꧑꧔꧙. ꦱꦧ꧀ꦧꦤꦷꦭꦶꦏꦴꦢꦶꦥꦛꦶꦏ꧀ꦑꦺꦥꦺꦴ

꧒꧔꧖. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦱꦧ꧀ꦧꦤꦷꦭꦶꦏꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ…ꦥꦺ… ꦱꦧ꧀ꦧꦥꦷꦠꦶꦏꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ… ꦱꦧ꧀ꦧꦭꦺꦴꦲꦶꦠꦶꦏꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ… ꦱꦧ꧀ꦧꦩꦚ꧀ꦗꦶꦛ꧀ꦜꦶꦏꦴ [ꦱꦧ꧀ꦧꦩꦚ꧀ꦗꦺꦛ꧀ꦜꦶꦏꦴ (ꦏ.)] ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ … ꦱꦧ꧀ꦧꦏꦟ꧀ꦲꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ… ꦱꦧ꧀ꦧꦩꦲꦴꦫꦔ꧀ꦒꦫꦠ꧀ꦠꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ… ꦱꦧ꧀ꦧꦩꦲꦴꦤꦴꦩꦫꦠ꧀ꦠꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ. ꦩꦤꦸꦱ꧀ꦱꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ, ‘‘ꦱꦺꦪ꧀ꦪꦡꦴꦥꦶ ꦒꦶꦲꦷ ꦏꦴꦩꦨꦺꦴꦒꦶꦤꦺꦴ’’ꦠꦶ. ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ. ꦤ, ꦨꦶꦏ꧀ꦑꦮꦺ, ꦱꦧ꧀ꦧꦤꦷꦭꦶꦏꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ…ꦥꦺ… ꦤ ꦱꦧ꧀ꦧꦥꦷꦠꦶꦏꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦱꦧ꧀ꦧꦭꦺꦴꦲꦶꦠꦶꦏꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦱꦧ꧀ꦧꦩꦚ꧀ꦗꦶꦛ꧀ꦜꦶꦏꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦱꦧ꧀ꦧꦏꦟ꧀ꦲꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦱꦧ꧀ꦧꦩꦲꦴꦫꦔ꧀ꦒꦫꦠ꧀ꦠꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦱꦧ꧀ꦧꦩꦲꦴꦤꦴꦩꦫꦠ꧀ꦠꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ. ꦪꦺꦴ ꦣꦴꦫꦺꦪ꧀ꦪ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱꦴꦠꦶ.

ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦤꦷꦭꦏꦮꦢ꧀ꦣꦶꦏꦴ [ꦮꦛ꧀ꦛꦶꦏꦴ (ꦱꦷ.)] ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦥꦷꦠꦏꦮꦢ꧀ꦣꦶꦏꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦭꦺꦴꦲꦶꦠꦏꦮꦢ꧀ꦣꦶꦏꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦩꦚ꧀ꦗꦶꦛ꧀ꦜꦶꦏꦮꦢ꧀ꦣꦶꦏꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦏꦟ꧀ꦲꦮꦢ꧀ꦣꦶꦏꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦩꦲꦴꦫꦔ꧀ꦒꦫꦠ꧀ꦠꦮꦢ꧀ꦣꦶꦏꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦩꦲꦴꦤꦴꦩꦫꦠ꧀ꦠꦮꦢ꧀ꦣꦶꦏꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ. ꦩꦤꦸꦱ꧀ꦱꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ, ‘‘ꦱꦺꦪ꧀ꦪꦡꦴꦥꦶ ꦒꦶꦲꦷ ꦏꦴꦩꦨꦺꦴꦒꦶꦤꦺꦴ’’ꦠꦶ. ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ. ꦤ, ꦨꦶꦏ꧀ꦑꦮꦺ, ꦤꦷꦭꦏꦮꦢ꧀ꦣꦶꦏꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ…ꦥꦺ… ꦤ ꦥꦷꦠꦏꦮꦢ꧀ꦣꦶꦏꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦭꦺꦴꦲꦶꦠꦏꦮꦢ꧀ꦣꦶꦏꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦩꦚ꧀ꦗꦶꦛ꧀ꦜꦶꦏꦮꦢ꧀ꦣꦶꦏꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦏꦟ꧀ꦲꦮꦢ꧀ꦣꦶꦏꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦩꦲꦴꦫꦔ꧀ꦒꦫꦠ꧀ꦠꦮꦢ꧀ꦣꦶꦏꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦩꦲꦴꦤꦴꦩꦫꦠ꧀ꦠꦮꦢ꧀ꦣꦶꦏꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ. ꦪꦺꦴ ꦣꦴꦫꦺꦪ꧀ꦪ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱꦴꦠꦶ.

ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦑꦭ꧀ꦭꦏꦧꦢ꧀ꦣꦴ […ꦧꦤ꧀ꦣꦴ (ꦏ.)] ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ…ꦥꦺ… ꦥꦸꦛꦧꦢ꧀ꦣꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦥꦴꦭꦶꦒꦸꦟ꧀ꦜꦶꦩꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦠꦹꦭꦥꦸꦟ꧀ꦟꦶꦏꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦠꦶꦠ꧀ꦠꦶꦫꦥꦠ꧀ꦠꦶꦏꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦩꦺꦟ꧀ꦝꦮꦶꦱꦴꦟꦮꦢ꧀ꦣꦶꦏꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦄꦗꦮꦶꦱꦴꦟꦮꦢ꧀ꦣꦶꦏꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦮꦶꦕ꧀ꦖꦶꦏꦴꦭ꦳ꦶꦏꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦩꦺꦴꦫꦥꦶꦚ꧀ꦖ [ꦩꦺꦴꦫꦥꦶꦚ꧀ꦗ (ꦱꦷ. ꦱ꧀ꦪꦴ.)] ꦥꦫꦶꦱꦶꦧ꧀ꦧꦶꦠꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦕꦶꦠ꧀ꦫꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ. ꦩꦤꦸꦱ꧀ꦱꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ, ‘‘ꦱꦺꦪ꧀ꦪꦡꦴꦥꦶ ꦒꦶꦲꦷ ꦏꦴꦩꦨꦺꦴꦒꦶꦤꦺꦴ’’ꦠꦶ. ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ. ꦤ, ꦨꦶꦏ꧀ꦑꦮꦺ, ꦑꦭ꧀ꦭꦏꦧꦢ꧀ꦣꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ…ꦥꦺ… ꦤ ꦥꦸꦛꦧꦢ꧀ꦣꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦥꦴꦭꦶꦒꦸꦟ꧀ꦜꦶꦩꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦠꦹꦭꦥꦸꦟ꧀ꦟꦶꦏꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦠꦶꦠ꧀ꦠꦶꦫꦥꦠ꧀ꦠꦶꦏꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦩꦺꦟ꧀ꦝꦮꦶꦱꦴꦟꦮꦢ꧀ꦣꦶꦏꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦄꦗꦮꦶꦱꦴꦟꦮꦢ꧀ꦣꦶꦏꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦮꦶꦕ꧀ꦖꦶꦏꦴꦭ꦳ꦶꦏꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦩꦺꦴꦫꦥꦶꦚ꧀ꦖꦥꦫꦶꦱꦶꦧ꧀ꦧꦶꦠꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦕꦶꦠ꧀ꦫꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ. ꦪꦺꦴ ꦣꦴꦫꦺꦪ꧀ꦪ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱꦴꦠꦶ.

ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦱꦷꦲꦕꦩ꧀ꦩꦥꦫꦶꦏ꧀ꦑꦛꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ…ꦥꦺ… ꦧ꧀ꦪꦒ꧀ꦓꦕꦩ꧀ꦩꦥꦫꦶꦏ꧀ꦑꦛꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦢꦷꦥꦶꦕꦩ꧀ꦩꦥꦫꦶꦏ꧀ꦑꦛꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦄꦗꦶꦤꦕꦩ꧀ꦩꦥꦫꦶꦏ꧀ꦑꦛꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦈꦢ꧀ꦢꦕꦩ꧀ꦩꦥꦫꦶꦏ꧀ꦑꦛꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦩꦗ꧀ꦗꦴꦫꦕꦩ꧀ꦩꦥꦫꦶꦏ꧀ꦑꦛꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦏꦴꦭ꦳ꦏꦕꦩ꧀ꦩꦥꦫꦶꦏ꧀ꦑꦛꦴ ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ, ꦭꦸꦮꦏꦕꦩ꧀ꦩꦥꦫꦶꦏ꧀ꦑꦛꦴ [ꦈꦭꦹꦏꦕꦩ꧀ꦩꦥꦫꦶꦏ꧀ꦑꦛꦴ (ꦪꦺꦴꦗꦤꦴ)] ꦈꦥꦴꦲꦤꦴꦪꦺꦴ ꦣꦴꦫꦺꦤ꧀ꦠꦶ. ꦩꦤꦸꦱ꧀ꦱꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ, ‘‘ꦱꦺꦪ꧀ꦪꦡꦴꦥꦶ ꦒꦶꦲꦷ ꦏꦴꦩꦨꦺꦴꦒꦶꦤꦺꦴ’’ꦠꦶ. ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ. ꦤ, ꦨꦶꦏ꧀ꦑꦮꦺ, ꦱꦷꦲꦕꦩ꧀ꦩꦥꦫꦶꦏ꧀ꦑꦛꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ…ꦥꦺ… ꦤ ꦧ꧀ꦪꦒ꧀ꦓꦕꦩ꧀ꦩꦥꦫꦶꦏ꧀ꦑꦛꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦢꦷꦥꦶꦕꦩ꧀ꦩꦥꦫꦶꦏ꧀ꦑꦛꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦄꦗꦶꦤꦕꦩ꧀ꦩꦥꦫꦶꦏ꧀ꦑꦛꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦈꦢ꧀ꦢꦕꦩ꧀ꦩꦥꦫꦶꦏ꧀ꦑꦛꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦩꦗ꧀ꦗꦴꦫꦕꦩ꧀ꦩꦥꦫꦶꦏ꧀ꦑꦛꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦏꦴꦭ꦳ꦏꦕꦩ꧀ꦩꦥꦫꦶꦏ꧀ꦑꦛꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦭꦸꦮꦏꦕꦩ꧀ꦩꦥꦫꦶꦏ꧀ꦑꦛꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ. ꦪꦺꦴ ꦣꦴꦫꦺꦪ꧀ꦪ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱꦴꦠꦶ.

ꦱꦧ꧀ꦧꦤꦷꦭꦶꦏꦴꦢꦶꦥꦛꦶꦏ꧀ꦑꦺꦥꦺꦴ ꦤꦶꦛ꧀ꦜꦶꦠꦺꦴ.