꧘꧖. ꦢꦶꦱꦁꦒꦩꦶꦏꦴꦢꦶꦮꦠ꧀ꦡꦸ

꧑꧖꧓. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦩ꧀ꦧꦲꦸꦭꦴ ꦨꦶꦏ꧀ꦑꦹ ꦧꦴꦭꦴ ꦄꦧ꧀ꦪꦠ꧀ꦠꦴ ꦢꦶꦱꦁꦒꦩꦶꦏꦴ ꦄꦴꦕꦫꦶꦪꦸꦥꦗ꧀ꦙꦴꦪꦺ ꦤ ꦄꦴꦥꦸꦕ꧀ꦖꦶꦁꦱꦸ [ꦤ ꦄꦴꦥꦸꦕ꧀ꦖꦶꦁꦱꦸ (ꦏ.)]. ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ.

ꦆꦣ ꦥꦤ, ꦨꦶꦏ꧀ꦑꦮꦺ, ꦱꦩ꧀ꦧꦲꦸꦭꦴ ꦨꦶꦏ꧀ꦑꦹ ꦧꦴꦭꦴ ꦄꦧ꧀ꦪꦠ꧀ꦠꦴ ꦢꦶꦱꦁꦒꦩꦶꦏꦴ ꦄꦴꦕꦫꦶꦪꦸꦥꦗ꧀ꦙꦴꦪꦺ ꦤ ꦄꦴꦥꦸꦕ꧀ꦖꦤ꧀ꦠꦶ [ꦤ ꦄꦴꦥꦸꦕ꧀ꦖꦤ꧀ꦠꦶ (ꦏ.)]. ꦠꦺ [ꦠꦺꦲꦶ (ꦏ.)], ꦨꦶꦏ꧀ꦑꦮꦺ, ꦄꦴꦕꦫꦶꦪꦸꦥꦗ꧀ꦙꦴꦪꦺꦲꦶ ꦥꦸꦕ꧀ꦖꦶꦠꦧ꧀ꦧꦴ – ‘‘ꦏꦲꦁ ꦒꦩꦶꦱ꧀ꦱꦡ, ꦏꦺꦤ ꦱꦢ꧀ꦣꦶꦁ ꦒꦩꦶꦱ꧀ꦱꦡꦴ’’ꦠꦶ? ꦠꦺ ꦕꦺ, ꦨꦶꦏ꧀ꦑꦮꦺ, ꦧꦴꦭꦴ ꦄꦧ꧀ꦪꦠ꧀ꦠꦴ ꦄꦚ꧀ꦚꦺ ꦧꦴꦭꦺ ꦄꦧ꧀ꦪꦠ꧀ꦠꦺ ꦄꦥꦢꦶꦱꦺꦪ꧀ꦪꦸꦁ, ꦤ, ꦨꦶꦏ꧀ꦑꦮꦺ, ꦄꦴꦕꦫꦶꦪꦸꦥꦗ꧀ꦙꦴꦪꦺꦲꦶ ꦄꦤꦸꦗꦴꦤꦶꦠꦧ꧀ꦧꦴ. ꦄꦤꦸꦗꦴꦤꦺꦪ꧀ꦪꦸꦁ ꦕꦺ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦠꦺ ꦕ, ꦨꦶꦏ꧀ꦑꦮꦺ, ꦧꦴꦭꦴ ꦄꦧ꧀ꦪꦠ꧀ꦠꦴ ꦄꦤꦤꦸꦚ꧀ꦚꦴꦠꦴ ꦄꦴꦕꦫꦶꦪꦸꦥꦗ꧀ꦙꦴꦪꦺꦲꦶ ꦒꦕ꧀ꦖꦺꦪ꧀ꦪꦸꦁ ꦕꦺ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

ꦆꦣ ꦥꦤ, ꦨꦶꦏ꧀ꦑꦮꦺ, ꦄꦚ꧀ꦚꦠꦫꦱ꧀ꦩꦶꦁ ꦄꦴꦮꦴꦱꦺ ꦱꦩ꧀ꦧꦲꦸꦭꦴ ꦨꦶꦏ꧀ꦑꦹ ꦮꦶꦲꦫꦤ꧀ꦠꦶ ꦧꦴꦭꦴ ꦄꦧ꧀ꦪꦠ꧀ꦠꦴ. ꦠꦺ ꦤ ꦗꦴꦤꦤ꧀ꦠꦶ ꦈꦥꦺꦴꦱꦡꦁ ꦮꦴ ꦈꦥꦺꦴꦱꦡꦏꦩ꧀ꦩꦁ ꦮꦴ, ꦥꦴꦠꦶꦩꦺꦴꦏ꧀ꦑꦁ ꦮꦴ ꦥꦴꦠꦶꦩꦺꦴꦏ꧀ꦑꦸꦢ꧀ꦢꦺꦱꦁ ꦮꦴ. ꦠꦠ꧀ꦡ ꦄꦚ꧀ꦚꦺꦴ ꦨꦶꦏ꧀ꦑꦸ ꦄꦴꦒꦕ꧀ꦖꦠꦶ ꦧꦲꦸꦱ꧀ꦱꦸꦠꦺꦴ ꦄꦴꦒꦠꦴꦒꦩꦺꦴ ꦣꦩ꧀ꦩꦣꦫꦺꦴ ꦮꦶꦤꦪꦣꦫꦺꦴ ꦩꦴꦠꦶꦏꦴꦣꦫꦺꦴ ꦥꦟ꧀ꦝꦶꦠꦺꦴ ꦧ꧀ꦪꦠ꧀ꦠꦺꦴ ꦩꦺꦣꦴꦮꦷ ꦭꦗ꧀ꦗꦷ ꦏꦸꦏ꧀ꦏꦸꦕ꧀ꦕꦏꦺꦴ ꦱꦶꦏ꧀ꦑꦴꦏꦴꦩꦺꦴ. ꦠꦺꦲꦶ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦲꦶ ꦱꦺꦴ ꦨꦶꦏ꧀ꦑꦸ ꦱꦔ꧀ꦒꦲꦺꦠꦧ꧀ꦧꦺꦴ ꦄꦤꦸꦒ꧀ꦒꦲꦺꦠꦧ꧀ꦧꦺꦴ ꦈꦥꦭꦴꦥꦺꦠꦧ꧀ꦧꦺꦴ ꦈꦥꦛ꧀ꦜꦴꦥꦺꦠꦧ꧀ꦧꦺꦴ ꦕꦸꦟ꧀ꦟꦺꦤ ꦩꦠ꧀ꦠꦶꦏꦴꦪ ꦢꦤ꧀ꦠꦏꦛ꧀ꦜꦺꦤ ꦩꦸꦑꦺꦴꦢꦏꦺꦤ. ꦤꦺꦴ ꦕꦺ ꦱꦔ꧀ꦒꦟ꧀ꦲꦺꦪ꧀ꦪꦸꦁ ꦄꦤꦸꦒ꧀ꦒꦟ꧀ꦲꦺꦪ꧀ꦪꦸꦁ ꦈꦥꦭꦴꦥꦺꦪ꧀ꦪꦸꦁ ꦈꦥꦛ꧀ꦜꦴꦥꦺꦪ꧀ꦪꦸꦁ ꦕꦸꦟ꧀ꦟꦺꦤ ꦩꦠ꧀ꦠꦶꦏꦴꦪ ꦢꦤ꧀ꦠꦏꦛ꧀ꦜꦺꦤ ꦩꦸꦑꦺꦴꦢꦏꦺꦤ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

ꦆꦣ ꦥꦤ, ꦨꦶꦏ꧀ꦑꦮꦺ, ꦄꦚ꧀ꦚꦠꦫꦱ꧀ꦩꦶꦁ ꦄꦴꦮꦴꦱꦺ ꦠꦢꦲꦸꦥꦺꦴꦱꦡꦺ ꦱꦩ꧀ꦧꦲꦸꦭꦴ ꦨꦶꦏ꧀ꦑꦹ ꦮꦶꦲꦫꦤ꧀ꦠꦶ ꦧꦴꦭꦴ ꦄꦧ꧀ꦪꦠ꧀ꦠꦴ. ꦠꦺ ꦤ ꦗꦴꦤꦤ꧀ꦠꦶ ꦈꦥꦺꦴꦱꦡꦁ ꦮꦴ ꦈꦥꦺꦴꦱꦡꦏꦩ꧀ꦩꦁ ꦮꦴ, ꦥꦴꦠꦶꦩꦺꦴꦏ꧀ꦑꦁ ꦮꦴ ꦥꦴꦠꦶꦩꦺꦴꦏ꧀ꦑꦸꦢ꧀ꦢꦺꦱꦁ ꦮꦴ. ꦠꦺꦲꦶ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦲꦶ ꦌꦏꦺꦴ ꦨꦶꦏ꧀ꦑꦸ ꦱꦴꦩꦤ꧀ꦠꦴ ꦄꦴꦮꦴꦱꦴ ꦱꦗ꧀ꦗꦸꦏꦁ ꦥꦴꦲꦺꦠꦧ꧀ꦧꦺꦴ – ‘‘ꦒꦕ꧀ꦖꦴꦮꦸꦱꦺꦴ, ꦱꦁꦑꦶꦠ꧀ꦠꦺꦤ ꦮꦴ ꦮꦶꦠ꧀ꦡꦴꦫꦺꦤ ꦮꦴ ꦥꦴꦠꦶꦩꦺꦴꦏ꧀ꦑꦁ ꦥꦫꦶꦪꦴꦥꦸꦟꦶꦠ꧀ꦮꦴ ꦄꦴꦒꦕ꧀ꦖꦴ’’ꦠꦶ. ꦌꦮꦚ꧀ꦕꦺꦠꦁ ꦭꦨꦺꦡ, ꦆꦕ꧀ꦕꦺꦠꦁ ꦏꦸꦱꦭꦁ. ꦤꦺꦴ ꦕꦺ ꦭꦨꦺꦡ, ꦠꦺꦲꦶ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦲꦶ ꦱꦧ꧀ꦧꦺꦲꦺꦮ ꦪꦠ꧀ꦡ ꦗꦴꦤꦤ꧀ꦠꦶ ꦈꦥꦺꦴꦱꦡꦁ ꦮꦴ ꦈꦥꦺꦴꦱꦡꦏꦩ꧀ꦩꦁ ꦮꦴ ꦥꦴꦠꦶꦩꦺꦴꦏ꧀ꦑꦁ ꦮꦴ ꦥꦴꦠꦶꦩꦺꦴꦏ꧀ꦑꦸꦢ꧀ꦢꦺꦱꦁ ꦮꦴ, ꦱꦺꦴ ꦄꦴꦮꦴꦱꦺꦴ ꦒꦤ꧀ꦠꦧ꧀ꦧꦺꦴ. ꦤꦺꦴ ꦕꦺ ꦒꦕ꧀ꦖꦺꦪ꧀ꦪꦸꦁ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

ꦆꦣ ꦥꦤ, ꦨꦶꦏ꧀ꦑꦮꦺ, ꦄꦚ꧀ꦚꦠꦫꦱ꧀ꦩꦶꦁ ꦄꦴꦮꦴꦱꦺ ꦱꦩ꧀ꦧꦲꦸꦭꦴ ꦨꦶꦏ꧀ꦑꦹ ꦮꦱ꧀ꦱꦁ ꦮꦱꦤ꧀ꦠꦶ ꦧꦴꦭꦴ ꦄꦧ꧀ꦪꦠ꧀ꦠꦴ. ꦠꦺ ꦤ ꦗꦴꦤꦤ꧀ꦠꦶ ꦈꦥꦺꦴꦱꦡꦁ ꦮꦴ ꦈꦥꦺꦴꦱꦡꦏꦩ꧀ꦩꦁ ꦮꦴ ꦥꦴꦠꦶꦩꦺꦴꦏ꧀ꦑꦁ ꦮꦴ ꦥꦴꦠꦶꦩꦺꦴꦏ꧀ꦑꦸꦢ꧀ꦢꦺꦱꦁ ꦮꦴ. ꦠꦺꦲꦶ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦲꦶ ꦌꦏꦺꦴ ꦨꦶꦏ꧀ꦑꦸ ꦱꦴꦩꦤ꧀ꦠꦴ ꦄꦴꦮꦴꦱꦴ ꦱꦗ꧀ꦗꦸꦏꦁ ꦥꦴꦲꦺꦠꦧ꧀ꦧꦺꦴ – ‘‘ꦒꦕ꧀ꦖꦴꦮꦸꦱꦺꦴ, ꦱꦁꦑꦶꦠ꧀ꦠꦺꦤ ꦮꦴ ꦮꦶꦠ꧀ꦡꦴꦫꦺꦤ ꦮꦴ ꦥꦴꦠꦶꦩꦺꦴꦏ꧀ꦑꦁ ꦥꦫꦶꦪꦴꦥꦸꦟꦶꦠ꧀ꦮꦴ ꦄꦴꦒꦕ꧀ꦖꦴ’’ꦠꦶ. ꦌꦮꦚ꧀ꦕꦺꦠꦁ ꦭꦨꦺꦡ, ꦆꦕ꧀ꦕꦺꦠꦁ ꦏꦸꦱꦭꦁ. ꦤꦺꦴ ꦕꦺ ꦭꦨꦺꦡ, ꦌꦏꦺꦴ ꦨꦶꦏ꧀ꦑꦸ ꦱꦠ꧀ꦠꦴꦲꦏꦴꦭꦶꦏꦁ ꦥꦴꦲꦺꦠꦧ꧀ꦧꦺꦴ – ‘‘ꦒꦕ꧀ꦖꦴꦮꦸꦱꦺꦴ, ꦱꦁꦑꦶꦠ꧀ꦠꦺꦤ ꦮꦴ ꦮꦶꦠ꧀ꦡꦴꦫꦺꦤ ꦮꦴ ꦥꦴꦠꦶꦩꦺꦴꦏ꧀ꦑꦁ ꦥꦫꦶꦪꦴꦥꦸꦟꦶꦠ꧀ꦮꦴ ꦄꦴꦒꦕ꧀ꦖꦴ’’ꦠꦶ. ꦌꦮꦚ꧀ꦕꦺꦠꦁ ꦭꦨꦺꦡ, ꦆꦕ꧀ꦕꦺꦠꦁ ꦏꦸꦱꦭꦁ. ꦤꦺꦴ ꦕꦺ ꦭꦨꦺꦡ, ꦤ, ꦨꦶꦏ꧀ꦑꦮꦺ, ꦠꦺꦲꦶ ꦨꦶꦏ꧀ꦑꦹꦲꦶ ꦠꦱ꧀ꦩꦶꦁ ꦄꦴꦮꦴꦱꦺ ꦮꦱ꧀ꦱꦁ ꦮꦱꦶꦠꦧ꧀ꦧꦁ. ꦮꦱꦺꦪ꧀ꦪꦸꦁ ꦕꦺ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱꦴꦠꦶ.