꧘. ꦮꦠ꧀ꦠꦏ꧀ꦑꦤ꧀ꦣꦏꦁ

꧑. ꦄꦴꦒꦤ꧀ꦠꦸꦏꦮꦠ꧀ꦠꦏꦡꦴ

꧓꧕꧖. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦒꦤ꧀ꦠꦸꦏꦴ ꦨꦶꦏ꧀ꦑꦹ ꦱꦈꦥꦴꦲꦤꦴꦥꦶ ꦄꦴꦫꦴꦩꦁ ꦥꦮꦶꦱꦤ꧀ꦠꦶ, ꦖꦠ꧀ꦠꦥꦒ꧀ꦒꦲꦶꦠꦴꦥꦶ ꦄꦴꦫꦴꦩꦁ ꦥꦮꦶꦱꦤ꧀ꦠꦶ, ꦎꦒꦸꦟ꧀ꦜꦶꦠꦴꦥꦶ ꦄꦴꦫꦴꦩꦁ ꦥꦮꦶꦱꦤ꧀ꦠꦶ, ꦱꦷꦱꦺꦥꦶ ꦕꦷꦮꦫꦁ ꦏꦫꦶꦠ꧀ꦮꦴ ꦄꦴꦫꦴꦩꦁ ꦥꦮꦶꦱꦤ꧀ꦠꦶ, ꦥꦴꦤꦷꦪꦺꦤꦥꦶ ꦥꦴꦢꦺ ꦣꦺꦴꦮꦤ꧀ꦠꦶ, ꦮꦸꦝ꧀ꦞꦠꦫꦺꦥꦶ ꦄꦴꦮꦴꦱꦶꦏꦺ ꦨꦶꦏ꧀ꦑꦹ ꦤ ꦄꦨꦶꦮꦴꦢꦺꦤ꧀ꦠꦶ, ꦤꦥꦶ ꦱꦺꦤꦴꦱꦤꦁ ꦥꦸꦕ꧀ꦖꦤ꧀ꦠꦶ. ꦄꦚ꧀ꦚꦠꦫꦺꦴꦥꦶ ꦄꦴꦒꦤ꧀ꦠꦸꦏꦺꦴ ꦨꦶꦏ꧀ꦑꦸ ꦄꦤꦗ꧀ꦙꦴꦮꦸꦛ꧀ꦜꦁ ꦮꦶꦲꦴꦫꦁ ꦓꦛꦶꦏꦁ ꦈꦒ꧀ꦓꦴꦛꦺꦠ꧀ꦮꦴ ꦏꦮꦴꦛꦁ ꦥꦟꦴꦩꦺꦠ꧀ꦮꦴ ꦱꦲꦱꦴ ꦥꦴꦮꦶꦱꦶ. ꦠꦱ꧀ꦱ ꦈꦥꦫꦶꦥꦶꦛ꧀ꦜꦶꦠꦺꦴ [ꦈꦥꦫꦶꦥꦶꦛ꧀ꦜꦠꦺꦴ (?)] ꦄꦲꦶ ꦑꦤ꧀ꦣꦺ ꦥꦥꦠꦶ. ꦱꦺꦴ ꦨꦷꦠꦺꦴ ꦮꦶꦱ꧀ꦱꦫꦩꦏꦴꦱꦶ. ꦨꦶꦏ꧀ꦑꦹ ꦈꦥꦣꦴꦮꦶꦠ꧀ꦮꦴ ꦠꦁ ꦨꦶꦏ꧀ꦑꦸꦁ ꦌꦠꦢꦮꦺꦴꦕꦸꦁ – ‘‘ꦏꦶꦱ꧀ꦱ ꦠ꧀ꦮꦁ, ꦄꦴꦮꦸꦱꦺꦴ, ꦮꦶꦱ꧀ꦱꦫꦩꦏꦴꦱꦷ’’ꦠꦶ? ꦄꦡ ꦑꦺꦴ ꦱꦺꦴ ꦨꦶꦏ꧀ꦑꦸ ꦨꦶꦏ꧀ꦑꦹꦤꦁ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦶ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦴꦒꦤ꧀ꦠꦸꦏꦴ ꦨꦶꦏ꧀ꦑꦹ ꦱꦈꦥꦴꦲꦤꦴꦥꦶ ꦄꦴꦫꦴꦩꦁ ꦥꦮꦶꦱꦶꦱ꧀ꦱꦤ꧀ꦠꦶ, ꦖꦠ꧀ꦠꦥꦒ꧀ꦒꦲꦶꦠꦴꦥꦶ ꦄꦴꦫꦴꦩꦁ ꦥꦮꦶꦱꦶꦱ꧀ꦱꦤ꧀ꦠꦶ, ꦎꦒꦸꦟ꧀ꦜꦶꦠꦴꦥꦶ ꦄꦴꦫꦴꦩꦁ ꦥꦮꦶꦱꦶꦱ꧀ꦱꦤ꧀ꦠꦶ, ꦱꦷꦱꦺꦥꦶ ꦕꦷꦮꦫꦁ ꦏꦫꦶꦠ꧀ꦮꦴ ꦄꦴꦫꦴꦩꦁ ꦥꦮꦶꦱꦶꦱ꧀ꦱꦤ꧀ꦠꦶ, ꦥꦴꦤꦷꦪꦺꦤꦥꦶ ꦥꦴꦢꦺ ꦣꦺꦴꦮꦶꦱ꧀ꦱꦤ꧀ꦠꦶ, ꦮꦸꦝ꧀ꦞꦠꦫꦺꦥꦶ ꦄꦴꦮꦴꦱꦶꦏꦺ ꦨꦶꦏ꧀ꦑꦹ ꦤ ꦄꦨꦶꦮꦴꦢꦺꦱ꧀ꦱꦤ꧀ꦠꦶ, ꦤꦥꦶ ꦱꦺꦤꦴꦱꦤꦁ ꦥꦸꦕ꧀ꦖꦶꦱ꧀ꦱꦤ꧀ꦠꦷ’’ꦠꦶ! ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ‘‘ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ‘‘ꦄꦴꦒꦤ꧀ꦠꦸꦏꦴ ꦨꦶꦏ꧀ꦑꦹ ꦱꦈꦥꦴꦲꦤꦴꦥꦶ ꦄꦴꦫꦴꦩꦁ ꦥꦮꦶꦱꦤ꧀ꦠꦶ, ꦖꦠ꧀ꦠꦥꦒ꧀ꦒꦲꦶꦠꦴꦥꦶ ꦄꦴꦫꦴꦩꦁ ꦥꦮꦶꦱꦤ꧀ꦠꦶ, ꦎꦒꦸꦟ꧀ꦜꦶꦠꦴꦥꦶ ꦄꦴꦫꦴꦩꦁ ꦥꦮꦶꦱꦤ꧀ꦠꦶ, ꦱꦷꦱꦺꦥꦶ ꦕꦷꦮꦫꦁ ꦏꦫꦶꦠ꧀ꦮꦴ ꦄꦴꦫꦴꦩꦁ ꦥꦮꦶꦱꦤ꧀ꦠꦶ, ꦥꦴꦤꦷꦪꦺꦤꦶꦥꦶ ꦥꦴꦢꦺ ꦣꦺꦴꦮꦤ꧀ꦠꦶ, ꦮꦸꦝ꧀ꦞꦠꦫꦺꦥꦶ ꦄꦴꦮꦴꦱꦶꦏꦺ ꦨꦶꦏ꧀ꦑꦹ ꦤ ꦄꦨꦶꦮꦴꦢꦺꦤ꧀ꦠꦶ, ꦤꦥꦶ ꦱꦺꦤꦴꦱꦤꦁ ꦥꦸꦕ꧀ꦖꦤ꧀ꦠꦷꦠꦶ. ꦱꦕ꧀ꦕꦁ ꦨꦒꦮꦴꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦮꦺ ꦄꦴꦒꦤ꧀ꦠꦸꦏꦴ ꦨꦶꦏ꧀ꦑꦹ ꦱꦈꦥꦴꦲꦤꦴꦥꦶ ꦄꦴꦫꦴꦩꦁ ꦥꦮꦶꦱꦶꦱ꧀ꦱꦤ꧀ꦠꦶ, ꦖꦠ꧀ꦠꦥꦒ꧀ꦒꦲꦶꦠꦴꦥꦶ ꦄꦴꦫꦴꦩꦁ ꦥꦮꦶꦱꦶꦱ꧀ꦱꦤ꧀ꦠꦶ, ꦎꦒꦸꦟ꧀ꦜꦶꦠꦴꦥꦶ ꦄꦴꦫꦴꦩꦁ ꦥꦮꦶꦱꦶꦱ꧀ꦱꦤ꧀ꦠꦶ, ꦱꦷꦱꦺꦥꦶ ꦕꦷꦮꦫꦁ ꦏꦫꦶꦠ꧀ꦮꦴ ꦄꦴꦫꦴꦩꦁ ꦥꦮꦶꦱꦶꦱ꧀ꦱꦤ꧀ꦠꦶ, ꦥꦴꦤꦷꦪꦺꦤꦥꦶ ꦥꦴꦢꦺ ꦣꦺꦴꦮꦶꦱ꧀ꦱꦤ꧀ꦠꦶ, ꦮꦸꦝ꧀ꦞꦠꦫꦺꦥꦶ ꦄꦴꦮꦴꦱꦶꦏꦺ ꦨꦶꦏ꧀ꦑꦹ ꦤ ꦄꦨꦶꦮꦴꦢꦺꦱ꧀ꦱꦤ꧀ꦠꦶ, ꦤꦥꦶ ꦱꦺꦤꦴꦱꦤꦁ ꦥꦸꦕ꧀ꦖꦶꦱ꧀ꦱꦤ꧀ꦠꦶ, ꦤꦺꦠꦁ ꦨꦶꦏ꧀ꦑꦮꦺ ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦮꦶꦒꦫꦲꦶꦠ꧀ꦮꦴ…ꦥꦺ… ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ –

꧓꧕꧗. ‘‘ꦠꦺꦤ ꦲꦶ, ꦨꦶꦏ꧀ꦑꦮꦺ, ꦄꦴꦒꦤ꧀ꦠꦸꦏꦴꦤꦁ ꦨꦶꦏ꧀ꦑꦹꦤꦁ ꦮꦠ꧀ꦠꦁ ꦥꦚ꧀ꦚꦥꦺꦱ꧀ꦱꦴꦩꦶ ꦪꦡꦴ ꦄꦴꦒꦤ꧀ꦠꦸꦏꦺꦲꦶ ꦨꦶꦏ꧀ꦑꦹꦲꦶ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. ꦄꦴꦒꦤ꧀ꦠꦸꦏꦺꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦴ ‘ꦆꦢꦴꦤꦶ ꦄꦴꦫꦴꦩꦁ ꦥꦮꦶꦱꦶꦱ꧀ꦱꦴꦩꦷ’ꦠꦶ ꦈꦥꦴꦲꦤꦴ ꦎꦩꦸꦚ꧀ꦕꦶꦠ꧀ꦮꦴ ꦤꦷꦕꦁ ꦏꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦒꦲꦺꦠ꧀ꦮꦴ ꦖꦠ꧀ꦠꦁ ꦄꦥꦤꦴꦩꦺꦠ꧀ꦮꦴ ꦱꦷꦱꦁ ꦮꦶꦮꦫꦶꦠ꧀ꦮꦴ ꦱꦷꦱꦺ ꦕꦷꦮꦫꦁ [ꦮꦶꦮꦫꦶꦠ꧀ꦮꦴ ꦕꦷꦮꦫꦁ (ꦏ.)] ꦑꦤ꧀ꦣꦺ ꦏꦠ꧀ꦮꦴ ꦱꦴꦣꦸꦏꦁ ꦄꦠꦫꦩꦴꦤꦺꦤ ꦄꦴꦫꦴꦩꦺꦴ ꦥꦮꦶꦱꦶꦠꦧ꧀ꦧꦺꦴ. ꦄꦴꦫꦴꦩꦁ ꦥꦮꦶꦱꦤ꧀ꦠꦺꦤ ꦱꦭ꧀ꦭꦏ꧀ꦑꦺꦠꦧ꧀ꦧꦁ – ‘ꦏꦠ꧀ꦡ ꦄꦴꦮꦴꦱꦶꦏꦴ ꦨꦶꦏ꧀ꦑꦹ ꦥꦛꦶꦏ꧀ꦏꦩꦤ꧀ꦠꦷ’ꦠꦶ? ꦪꦠ꧀ꦡ ꦄꦴꦮꦴꦱꦶꦏꦴ ꦨꦶꦏ꧀ꦑꦹ ꦥꦛꦶꦏ꧀ꦏꦩꦤ꧀ꦠꦶ – ꦈꦥꦛ꧀ꦜꦴꦤꦱꦴꦭꦴꦪ ꦮꦴ ꦩꦟ꧀ꦝꦥꦺ ꦮꦴ ꦫꦸꦏ꧀ꦑꦩꦹꦭꦺ ꦮꦴ – ꦠꦠ꧀ꦡ ꦒꦤ꧀ꦠ꧀ꦮꦴ ꦌꦏꦩꦤ꧀ꦠꦁ ꦥꦠ꧀ꦠꦺꦴ ꦤꦶꦏ꧀ꦑꦶꦥꦶꦠꦧ꧀ꦧꦺꦴ; ꦌꦏꦩꦤ꧀ꦠꦁ ꦕꦷꦮꦫꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦥꦠꦶꦫꦹꦥꦁ ꦄꦴꦱꦤꦁ ꦒꦲꦺꦠ꧀ꦮꦴ ꦤꦶꦱꦷꦢꦶꦠꦧ꧀ꦧꦁ; ꦥꦴꦤꦷꦪꦁ ꦥꦸꦕ꧀ꦖꦶꦠꦧ꧀ꦧꦁ, ꦥꦫꦶꦨꦺꦴꦗꦤꦷꦪꦁ ꦥꦸꦕ꧀ꦖꦶꦠꦧ꧀ꦧꦁ – ‘ꦏꦠꦩꦁ ꦥꦴꦤꦷꦪꦁ, ꦏꦠꦩꦁ ꦥꦫꦶꦨꦺꦴꦗꦤꦷꦪ’ꦤ꧀ꦠꦶ? ꦱꦕꦺ ꦥꦴꦤꦷꦪꦺꦤ ꦄꦠ꧀ꦡꦺꦴ ꦲꦺꦴꦠꦶ, ꦥꦴꦤꦷꦪꦁ ꦒꦲꦺꦠ꧀ꦮꦴ ꦥꦴꦠꦧ꧀ꦧꦁ. ꦱꦕꦺ ꦥꦫꦶꦨꦺꦴꦗꦤꦷꦪꦺꦤ ꦄꦠ꧀ꦡꦺꦴ ꦲꦺꦴꦠꦶ, ꦥꦫꦶꦨꦺꦴꦗꦤꦷꦪꦁ ꦒꦲꦺꦠ꧀ꦮꦴ ꦥꦴꦢꦴ ꦣꦺꦴꦮꦶꦠꦧ꧀ꦧꦴ. ꦥꦴꦢꦺ ꦣꦺꦴꦮꦤ꧀ꦠꦺꦤ ꦌꦏꦺꦤ ꦲꦠ꧀ꦡꦺꦤ ꦈꦢꦏꦁ ꦄꦴꦱꦶꦚ꧀ꦕꦶꦠꦧ꧀ꦧꦁ, ꦌꦏꦺꦤ ꦲꦠ꧀ꦡꦺꦤ ꦥꦴꦢꦴ ꦣꦺꦴꦮꦶꦠꦧ꧀ꦧꦴ. ꦠꦺꦤꦺꦮ ꦈꦢꦏꦁ ꦄꦴꦱꦶꦚ꧀ꦕꦶꦠꦧ꧀ꦧꦁ [ꦪꦺꦤ ꦲꦠ꧀ꦡꦺꦤ ꦈꦢꦏꦁ ꦄꦴꦱꦶꦚ꧀ꦕꦶꦠꦧ꧀ꦧꦁ (ꦱ꧀ꦪꦴ.)] ꦤ ꦠꦺꦤꦺꦮ ꦲꦠ꧀ꦡꦺꦤ ꦥꦴꦢꦴ ꦣꦺꦴꦮꦶꦠꦧ꧀ꦧꦴ. ꦈꦥꦴꦲꦤꦥꦸꦚ꧀ꦖꦤꦕꦺꦴꦭ꦳ꦏꦁ ꦥꦸꦕ꧀ꦖꦶꦠ꧀ꦮꦴ ꦈꦥꦴꦲꦤꦴ ꦥꦸꦚ꧀ꦖꦶꦠꦧ꧀ꦧꦴ. ꦈꦥꦴꦲꦤꦴ ꦥꦸꦚ꧀ꦖꦤ꧀ꦠꦺꦤ ꦥꦜꦩꦁ ꦱꦸꦏ꧀ꦑꦺꦤ ꦕꦺꦴꦭ꦳ꦏꦺꦤ ꦥꦸꦚ꧀ꦖꦶꦠꦧ꧀ꦧꦴ, ꦥꦕ꧀ꦖꦴ ꦄꦭ꧀ꦭꦺꦤ. ꦈꦥꦴꦲꦤꦴꦥꦸꦚ꧀ꦖꦤꦕꦺꦴꦭ꦳ꦏꦁ ꦣꦺꦴꦮꦶꦠ꧀ꦮꦴ [ꦥꦷꦭ꦳ꦺꦠ꧀ꦮꦴ (ꦱ꧀ꦪꦴ.)] ꦌꦏꦩꦤ꧀ꦠꦁ ꦮꦶꦱ꧀ꦱꦗ꧀ꦗꦺꦠꦧ꧀ꦧꦁ.

‘‘ꦱꦕꦺ ꦄꦴꦮꦴꦱꦶꦏꦺꦴ ꦨꦶꦏ꧀ꦑꦸ ꦮꦸꦝ꧀ꦞꦺꦴ ꦲꦺꦴꦠꦶ, ꦄꦨꦶꦮꦴꦢꦺꦠꦧ꧀ꦧꦺꦴ. ꦱꦕꦺ ꦤꦮꦏꦺꦴ ꦲꦺꦴꦠꦶ, ꦄꦨꦶꦮꦴꦢꦴꦥꦺꦠꦧ꧀ꦧꦺꦴ. ꦱꦺꦤꦴꦱꦤꦁ ꦥꦸꦕ꧀ꦖꦶꦠꦧ꧀ꦧꦁ – ‘ꦏꦠꦩꦁ ꦩꦺ ꦱꦺꦤꦴꦱꦤꦁ ꦥꦴꦥꦸꦟꦴꦠꦷ’ꦠꦶ? ꦄꦗ꧀ꦙꦴꦮꦸꦛ꧀ꦜꦁ ꦮꦴ ꦄꦤꦗ꧀ꦙꦴꦮꦸꦛ꧀ꦜꦁ ꦮꦴ ꦥꦸꦕ꧀ꦖꦶꦠꦧ꧀ꦧꦁ, ꦒꦺꦴꦕꦫꦺꦴ ꦥꦸꦕ꧀ꦖꦶꦠꦧ꧀ꦧꦺꦴ, ꦄꦒꦺꦴꦕꦫꦺꦴ ꦥꦸꦕ꧀ꦖꦶꦠꦧ꧀ꦧꦺꦴ, ꦱꦺꦏ꧀ꦑꦱꦩ꧀ꦩꦠꦴꦤꦶ [ꦱꦺꦑꦱꦩ꧀ꦩꦠꦴꦤꦶ (ꦏ.)] ꦏꦸꦭꦴꦤꦶ ꦥꦸꦕ꧀ꦖꦶꦠꦧ꧀ꦧꦴꦤꦶ, ꦮꦕ꧀ꦕꦛ꧀ꦜꦴꦤꦁ ꦥꦸꦕ꧀ꦖꦶꦠꦧ꧀ꦧꦁ, ꦥꦱ꧀ꦱꦴꦮꦛ꧀ꦜꦴꦤꦁ ꦥꦸꦕ꧀ꦖꦶꦠꦧ꧀ꦧꦁ, ꦥꦴꦤꦷꦪꦁ ꦥꦸꦕ꧀ꦖꦶꦠꦧ꧀ꦧꦁ, ꦥꦫꦶꦨꦺꦴꦗꦤꦷꦪꦁ ꦥꦸꦕ꧀ꦖꦶꦠꦧ꧀ꦧꦁ, ꦏꦠ꧀ꦠꦫꦢꦟ꧀ꦝꦺꦴ ꦥꦸꦕ꧀ꦖꦶꦠꦧ꧀ꦧꦺꦴ, ꦱꦔ꧀ꦓꦱ꧀ꦱ ꦏꦠꦶꦏꦱꦟ꧀ꦜꦴꦤꦁ ꦥꦸꦕ꧀ꦖꦶꦠꦧ꧀ꦧꦁ – ‘ꦏꦁ ꦏꦴꦭꦁ ꦥꦮꦶꦱꦶꦠꦧ꧀ꦧꦁ, ꦏꦁ ꦏꦴꦭꦁ ꦤꦶꦏ꧀ꦑꦩꦶꦠꦧ꧀ꦧ’ꦤ꧀ꦠꦶ? ꦱꦕꦺ ꦮꦶꦲꦴꦫꦺꦴ ꦄꦤꦗ꧀ꦙꦴꦮꦸꦛ꧀ꦜꦺꦴ ꦲꦺꦴꦠꦶ, ꦏꦮꦴꦛꦁ ꦄꦴꦏꦺꦴꦛꦺꦠ꧀ꦮꦴ ꦩꦸꦲꦸꦠ꧀ꦠꦁ ꦄꦴꦒꦩꦺꦠ꧀ꦮꦴ ꦓꦛꦶꦏꦁ ꦈꦒ꧀ꦓꦴꦛꦺꦠ꧀ꦮꦴ ꦏꦮꦴꦛꦁ ꦥꦟꦴꦩꦺꦠ꧀ꦮꦴ ꦧꦲꦶ ꦜꦶꦠꦺꦤ ꦤꦶꦭ꧀ꦭꦺꦴꦏꦺꦠꦧ꧀ꦧꦺꦴ.

‘‘ꦱꦕꦺ ꦮꦶꦲꦴꦫꦺꦴ ꦈꦏ꧀ꦭꦴꦥꦺꦴ ꦲꦺꦴꦠꦶ, ꦩꦚ꧀ꦕꦺ ꦮꦴ ꦩꦚ꧀ꦕꦺꦴ ꦄꦴꦫꦺꦴꦥꦶꦠꦺꦴ ꦲꦺꦴꦠꦶ, ꦥꦷꦜꦺ ꦮꦴ ꦥꦷꦜꦁ ꦄꦴꦫꦺꦴꦥꦶꦠꦁ ꦲꦺꦴꦠꦶ, ꦱꦺꦤꦴꦱꦤꦁ ꦈꦥꦫꦶ ꦥꦸꦚ꧀ꦗꦷꦏꦠꦁ [ꦥꦸꦚ꧀ꦗꦏꦶꦠꦁ (ꦏ.)] ꦲꦺꦴꦠꦶ, ꦱꦕꦺ ꦈꦱ꧀ꦱꦲꦠꦶ, ꦱꦺꦴꦣꦺꦠꦧ꧀ꦧꦺꦴ. [ꦩꦲꦴꦮ. ꧖꧖-꧖꧗ (ꦡꦺꦴꦏꦁ ꦮꦶꦱꦢꦶꦱꦁ)] ꦮꦶꦲꦴꦫꦁ ꦱꦺꦴꦣꦺꦤ꧀ꦠꦺꦤ ꦥꦜꦩꦁ ꦨꦹꦩꦠ꧀ꦡꦫꦟꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦩꦚ꧀ꦕꦥꦛꦶꦥꦴꦢꦏꦴ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦴ; ꦨꦶꦱꦶꦧꦶꦧ꧀ꦧꦺꦴꦲꦤꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦤꦶꦱꦷꦢꦤꦥꦕ꧀ꦕꦠ꧀ꦡꦫꦟꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦩꦚ꧀ꦕꦺꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ, ꦄꦱꦔ꧀ꦓꦛ꧀ꦛꦺꦤ꧀ꦠꦺꦤ ꦏꦮꦴꦛꦥꦶꦛ꧀ꦜꦁ, ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦺꦴ; ꦥꦷꦜꦁ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ, ꦄꦱꦔ꧀ꦓꦛ꧀ꦛꦺꦤ꧀ꦠꦺꦤ ꦏꦮꦴꦛꦥꦶꦛ꧀ꦜꦁ, ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦑꦺꦭ꦳ꦩꦭ꧀ꦭꦏꦺꦴ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦺꦴ; ꦄꦥꦱ꧀ꦱꦺꦤꦦꦭꦏꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦱꦕꦺ ꦮꦶꦲꦴꦫꦺ ꦱꦤ꧀ꦠꦴꦤꦏꦁ ꦲꦺꦴꦠꦶ, ꦈꦭ꧀ꦭꦺꦴꦏꦴ ꦥꦜꦩꦁ ꦎꦲꦴꦫꦺꦠꦧ꧀ꦧꦁ, ꦄꦴꦭꦺꦴꦏꦱꦤ꧀ꦣꦶꦏꦟ꧀ꦟꦨꦴꦒꦴ ꦥꦩꦗ꧀ꦗꦶꦠꦧ꧀ꦧꦴ. ꦱꦕꦺ ꦒꦺꦫꦸꦏꦥꦫꦶꦏꦩ꧀ꦩꦏꦠꦴ ꦨꦶꦠ꧀ꦠꦶ ꦏꦟ꧀ꦟꦏꦶꦠꦴ ꦲꦺꦴꦠꦶ, ꦕꦺꦴꦭ꦳ꦏꦁ ꦠꦺꦩꦺꦠ꧀ꦮꦴ ꦥꦷꦭ꦳ꦺꦠ꧀ꦮꦴ ꦥꦩꦗ꧀ꦗꦶꦠꦧ꧀ꦧꦴ. ꦱꦕꦺ ꦏꦴꦭ꦳ꦮꦟ꧀ꦟꦏꦠꦴ ꦨꦹꦩꦶ ꦏꦟ꧀ꦟꦏꦶꦠꦴ ꦲꦺꦴꦠꦶ, ꦕꦺꦴꦭ꦳ꦏꦁ ꦠꦺꦩꦺꦠ꧀ꦮꦴ ꦥꦷꦭ꦳ꦺꦠ꧀ꦮꦴ ꦥꦩꦗ꧀ꦗꦶꦠꦧ꧀ꦧꦴ. ꦱꦕꦺ ꦄꦏꦠꦴ ꦲꦺꦴꦠꦶ ꦨꦹꦩꦶ, ꦈꦢꦏꦺꦤ ꦥꦫꦶꦥ꧀ꦦꦺꦴꦱꦶꦠ꧀ꦮꦴ ꦱꦩ꧀ꦩꦗ꧀ꦗꦶꦠꦧ꧀ꦧꦴ – ꦩꦴ ꦮꦶꦲꦴꦫꦺꦴ ꦫꦗꦺꦤ ꦈꦲꦚ꧀ꦚꦷꦠꦶ [ꦈꦴꦲꦚ꧀ꦚꦷꦠꦶ (ꦱꦷ. ꦱ꧀ꦪꦴ.)]. ꦱꦔ꧀ꦏꦴꦫꦁ ꦮꦶꦕꦶꦤꦶꦠ꧀ꦮꦴ ꦌꦏꦩꦤ꧀ꦠꦁ ꦖꦝ꧀ꦝꦺꦠꦧ꧀ꦧꦁ.

‘‘ꦨꦹꦩꦠ꧀ꦡꦫꦟꦁ ꦎꦠꦴꦥꦺꦠ꧀ꦮꦴ ꦱꦺꦴꦣꦺꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦜꦴꦤꦺ [ꦪꦡꦴꦥꦚ꧀ꦚꦠ꧀ꦠꦁ (ꦱꦷ. ꦱ꧀ꦪꦴ.), ꦪꦡꦴꦨꦴꦒꦁ (ꦏ.)] ꦥꦚ꧀ꦚꦥꦺꦠꦧ꧀ꦧꦁ. ꦩꦚ꧀ꦕꦥꦛꦶꦥꦴꦢꦏꦴ ꦎꦠꦴꦥꦺꦠ꧀ꦮꦴ ꦥꦩꦗ꧀ꦗꦶꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦜꦴꦤꦺ [ꦪꦡꦴꦨꦴꦒꦁ (ꦱ꧀ꦪꦴ. ꦏ.)] ꦜꦥꦺꦠꦧ꧀ꦧꦴ. ꦩꦚ꧀ꦕꦺꦴ ꦎꦠꦴꦥꦺꦠ꧀ꦮꦴ ꦱꦺꦴꦣꦺꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ, ꦄꦱꦔ꧀ꦓꦛ꧀ꦛꦺꦤ꧀ꦠꦺꦤ ꦏꦮꦴꦛꦥꦶꦛ꧀ꦜꦁ, ꦄꦠꦶꦲꦫꦶꦠ꧀ꦮꦴ ꦪꦡꦴꦜꦴꦤꦺ [ꦪꦡꦴꦨꦴꦒꦁ (ꦱ꧀ꦪꦴ. ꦏ.)] ꦥꦚ꧀ꦚꦥꦺꦠꦧ꧀ꦧꦺꦴ. ꦥꦷꦜꦁ ꦎꦠꦴꦥꦺꦠ꧀ꦮꦴ ꦱꦺꦴꦣꦺꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ, ꦄꦱꦔ꧀ꦓꦛ꧀ꦛꦺꦤ꧀ꦠꦺꦤ ꦏꦮꦴꦛꦥꦶꦛ꧀ꦜꦁ, ꦄꦠꦶꦲꦫꦶꦠ꧀ꦮꦴ ꦪꦡꦴꦜꦴꦤꦺ [ꦪꦡꦴꦨꦴꦒꦁ (ꦱ꧀ꦪꦴ. ꦏ.)] ꦥꦚ꧀ꦚꦥꦺꦠꦧ꧀ꦧꦁ. ꦨꦶꦱꦶꦧꦶꦧ꧀ꦧꦺꦴꦲꦤꦁ ꦎꦠꦴꦥꦺꦠ꧀ꦮꦴ ꦱꦺꦴꦣꦺꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦨꦴꦒꦁ ꦥꦚ꧀ꦚꦥꦺꦠꦧ꧀ꦧꦁ. ꦤꦶꦱꦷꦢꦤꦥꦕ꧀ꦕꦠ꧀ꦡꦫꦟꦁ ꦎꦠꦴꦥꦺꦠ꧀ꦮꦴ ꦱꦺꦴꦣꦺꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦨꦴꦒꦁ ꦥꦚ꧀ꦚꦥꦺꦠꦧ꧀ꦧꦁ. ꦑꦺꦭ꦳ꦩꦭ꧀ꦭꦏꦺꦴ ꦎꦠꦴꦥꦺꦠ꧀ꦮꦴ ꦥꦩꦗ꧀ꦗꦶꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦨꦴꦒꦁ ꦜꦥꦺꦠꦧ꧀ꦧꦺꦴ. ꦄꦥꦱ꧀ꦱꦺꦤꦦꦭꦏꦁ ꦎꦠꦴꦥꦺꦠ꧀ꦮꦴ ꦥꦩꦗ꧀ꦗꦶꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦨꦴꦒꦁ ꦜꦥꦺꦠꦧ꧀ꦧꦁ. ꦥꦠ꧀ꦠꦕꦷꦮꦫꦁ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦥꦠ꧀ꦠꦁ ꦤꦶꦏ꧀ꦑꦶꦥꦤ꧀ꦠꦺꦤ ꦌꦏꦺꦤ ꦲꦠ꧀ꦡꦺꦤ ꦥꦠ꧀ꦠꦁ ꦒꦲꦺꦠ꧀ꦮꦴ ꦌꦏꦺꦤ ꦲꦠ꧀ꦡꦺꦤ ꦲꦺꦛ꧀ꦜꦴꦩꦚ꧀ꦕꦁ ꦮꦴ ꦲꦺꦛ꧀ꦜꦴꦥꦷꦜꦁ ꦮꦴ ꦥꦫꦴꦩꦱꦶꦠ꧀ꦮꦴ ꦥꦠ꧀ꦠꦺꦴ ꦤꦶꦏ꧀ꦑꦶꦥꦶꦠꦧ꧀ꦧꦺꦴ. ꦤ ꦕ ꦄꦤꦤ꧀ꦠꦫꦲꦶꦠꦴꦪ ꦨꦹꦩꦶꦪꦴ ꦥꦠ꧀ꦠꦺꦴ ꦤꦶꦏ꧀ꦑꦶꦥꦶꦠꦧ꧀ꦧꦺꦴ. ꦕꦷꦮꦫꦁ ꦤꦶꦏ꧀ꦑꦶꦥꦤ꧀ꦠꦺꦤ ꦌꦏꦺꦤ ꦲꦠ꧀ꦡꦺꦤ ꦕꦷꦮꦫꦁ ꦒꦲꦺꦠ꧀ꦮꦴ ꦌꦏꦺꦤ ꦲꦠ꧀ꦡꦺꦤ ꦕꦷꦮꦫꦮꦁꦱꦁ ꦮꦴ ꦕꦷꦮꦫꦫꦗ꧀ꦗꦸꦁ ꦮꦴ ꦥꦩꦗ꧀ꦗꦶꦠ꧀ꦮꦴ ꦥꦴꦫꦠꦺꦴ ꦄꦤ꧀ꦠꦁ ꦎꦫꦠꦺꦴ ꦨꦺꦴꦒꦁ ꦏꦠ꧀ꦮꦴ ꦕꦷꦮꦫꦁ ꦤꦶꦏ꧀ꦑꦶꦥꦶꦠꦧ꧀ꦧꦁ.

‘‘ꦱꦕꦺ ꦥꦸꦫꦠ꧀ꦡꦶꦩꦴ ꦱꦫꦗꦴ ꦮꦴꦠꦴ ꦮꦴꦪꦤ꧀ꦠꦶ, ꦥꦸꦫꦠ꧀ꦡꦶꦩꦴ ꦮꦴꦠꦥꦴꦤꦴ ꦡꦏꦺꦠꦧ꧀ꦧꦴ. ꦱꦕꦺ ꦥꦕ꧀ꦖꦶꦩꦴ ꦱꦫꦗꦴ ꦮꦴꦠꦴ ꦮꦴꦪꦤ꧀ꦠꦶ, ꦥꦕ꧀ꦖꦶꦩꦴ ꦮꦴꦠꦥꦴꦤꦴ ꦡꦏꦺꦠꦧ꧀ꦧꦴ. ꦱꦕꦺ ꦈꦠ꧀ꦠꦫꦴ ꦱꦫꦗꦴ ꦮꦴꦠꦴ ꦮꦴꦪꦤ꧀ꦠꦶ, ꦈꦠ꧀ꦠꦫꦴ ꦮꦴꦠꦥꦴꦤꦴ ꦡꦏꦺꦠꦧ꧀ꦧꦴ. ꦱꦕꦺ ꦢꦏ꧀ꦑꦶꦟꦴ ꦱꦫꦗꦴ ꦮꦴꦠꦴ ꦮꦴꦪꦤ꧀ꦠꦶ, ꦢꦏ꧀ꦑꦶꦟꦴ ꦮꦴꦠꦥꦴꦤꦴ ꦡꦏꦺꦠꦧ꧀ꦧꦴ. ꦱꦕꦺ ꦱꦷꦠꦏꦴꦭꦺꦴ ꦲꦺꦴꦠꦶ, ꦢꦶꦮꦴ ꦮꦴꦠꦥꦴꦤꦴ ꦮꦶꦮꦫꦶꦠꦧ꧀ꦧꦴ, ꦫꦠ꧀ꦠꦶꦁ ꦡꦏꦺꦠꦧ꧀ꦧꦴ. ꦱꦕꦺ ꦈꦟ꧀ꦲꦏꦴꦭꦺꦴ ꦲꦺꦴꦠꦶ, ꦢꦶꦮꦴ ꦮꦴꦠꦥꦴꦤꦴ ꦡꦏꦺꦠꦧ꧀ꦧꦴ, ꦫꦠ꧀ꦠꦶꦁ ꦮꦶꦮꦫꦶꦠꦧ꧀ꦧꦴ.

‘‘ꦱꦕꦺ ꦥꦫꦶꦮꦺꦟꦁ ꦈꦏ꧀ꦭꦴꦥꦁ ꦲꦺꦴꦠꦶ, ꦥꦫꦶꦮꦺꦟꦁ ꦱꦩ꧀ꦩꦗ꧀ꦗꦶꦠꦧ꧀ꦧꦁ. ꦱꦕꦺ ꦏꦺꦴꦛ꧀ꦜꦏꦺꦴ ꦈꦏ꧀ꦭꦴꦥꦺꦴ ꦲꦺꦴꦠꦶ, ꦏꦺꦴꦛ꧀ꦜꦏꦺꦴ ꦱꦩ꧀ꦩꦗ꧀ꦗꦶꦠꦧ꧀ꦧꦺꦴ. ꦱꦕꦺ ꦈꦥꦛ꧀ꦜꦴꦤꦱꦴꦭꦴ ꦈꦏ꧀ꦭꦴꦥꦴ ꦲꦺꦴꦠꦶ, ꦈꦥꦛ꧀ꦜꦴꦤꦱꦴꦭꦴ ꦱꦩ꧀ꦩꦗ꧀ꦗꦶꦠꦧ꧀ꦧꦴ. ꦱꦕꦺ ꦄꦒ꧀ꦒꦶꦱꦴꦭꦴ ꦈꦏ꧀ꦭꦴꦥꦴ ꦲꦺꦴꦠꦶ, ꦄꦒ꧀ꦒꦶꦱꦴꦭꦴ ꦱꦩ꧀ꦩꦗ꧀ꦗꦶꦠꦧ꧀ꦧꦴ. ꦱꦕꦺ ꦮꦕ꧀ꦕꦏꦸꦛꦶ ꦈꦏ꧀ꦭꦴꦥꦴ ꦲꦺꦴꦠꦶ, ꦮꦕ꧀ꦕꦏꦸꦛꦶ ꦱꦩ꧀ꦩꦗ꧀ꦗꦶꦠꦧ꧀ꦧꦴ. ꦱꦕꦺ ꦥꦴꦤꦷꦪꦁ ꦤ ꦲꦺꦴꦠꦶ, ꦥꦴꦤꦷꦪꦁ ꦈꦥꦛ꧀ꦜꦴꦥꦺꦠꦧ꧀ꦧꦁ. ꦱꦕꦺ ꦥꦫꦶꦨꦺꦴꦗꦤꦷꦪꦁ ꦤ ꦲꦺꦴꦠꦶ, ꦥꦫꦶꦨꦺꦴꦗꦤꦷꦪꦁ ꦈꦥꦛ꧀ꦜꦴꦥꦺꦠꦧ꧀ꦧꦁ. ꦱꦕꦺ ꦄꦴꦕꦩꦤꦏꦸꦩ꧀ꦨꦶꦪꦴ ꦈꦢꦏꦁ ꦤ ꦲꦺꦴꦠꦶ, ꦄꦴꦕꦩꦤꦏꦸꦩ꧀ꦨꦶꦪꦴ ꦈꦢꦏꦁ ꦄꦴꦱꦶꦚ꧀ꦕꦶꦠꦧ꧀ꦧꦁ. ꦆꦢꦁ ꦑꦺꦴ, ꦨꦶꦏ꧀ꦑꦮꦺ, ꦄꦴꦒꦤ꧀ꦠꦸꦏꦴꦤꦁ ꦨꦶꦏ꧀ꦑꦹꦤꦁ ꦮꦠ꧀ꦠꦁ ꦪꦡꦴ ꦄꦴꦒꦤ꧀ꦠꦸꦏꦺꦲꦶ ꦨꦶꦏ꧀ꦑꦹꦲꦶ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧ’’ꦤ꧀ꦠꦶ.

꧒. ꦄꦴꦮꦴꦱꦶꦏꦮꦠ꧀ꦠꦏꦡꦴ

꧓꧕꧘. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦮꦴꦱꦶꦏꦴ ꦨꦶꦏ꧀ꦑꦹ ꦄꦴꦒꦤ꧀ꦠꦸꦏꦺ ꦨꦶꦏ꧀ꦑꦹ ꦢꦶꦱ꧀ꦮꦴ ꦤꦺꦮ ꦄꦴꦱꦤꦁ ꦥꦚ꧀ꦚꦥꦺꦤ꧀ꦠꦶ, ꦤ ꦥꦴꦢꦺꦴꦢꦏꦁ ꦥꦴꦢꦥꦷꦜꦁ ꦥꦴꦢꦏꦡꦭꦶꦏꦁ ꦈꦥꦤꦶꦏ꧀ꦑꦶꦥꦤ꧀ꦠꦶ, ꦤ ꦥꦕ꧀ꦕꦸꦒ꧀ꦒꦤ꧀ꦠ꧀ꦮꦴ ꦥꦠ꧀ꦠꦕꦷꦮꦫꦁ ꦥꦛꦶꦒ꧀ꦒꦟ꧀ꦲꦤ꧀ꦠꦶ, ꦤ ꦥꦴꦤꦷꦪꦺꦤ ꦥꦸꦕ꧀ꦖꦤ꧀ꦠꦶ [ꦤ ꦥꦴꦤꦷꦪꦺꦤ ꦥꦸꦕ꧀ꦖꦤ꧀ꦠꦶ, ꦤ ꦥꦫꦶꦨꦺꦴꦗꦤꦷꦪꦺꦤ ꦥꦸꦕ꧀ꦖꦤ꧀ꦠꦶ (ꦱ꧀ꦪꦴ. ꦏꦁ.)], ꦤ ꦮꦸꦝ꧀ꦞꦠꦫꦺꦥꦶ ꦄꦴꦒꦤ꧀ꦠꦸꦏꦺ ꦨꦶꦏ꧀ꦑꦹ ꦄꦨꦶꦮꦴꦢꦺꦤ꧀ꦠꦶ, ꦤ ꦱꦺꦤꦴꦱꦤꦁ ꦥꦚ꧀ꦚꦥꦺꦤ꧀ꦠꦶ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦴꦮꦴꦱꦶꦏꦴ ꦨꦶꦏ꧀ꦑꦹ ꦄꦴꦒꦤ꧀ꦠꦸꦏꦺ ꦨꦶꦏ꧀ꦑꦹ ꦢꦶꦱ꧀ꦮꦴ ꦤꦺꦮ ꦄꦴꦱꦤꦁ ꦥꦚ꧀ꦚꦥꦺꦱ꧀ꦱꦤ꧀ꦠꦶ, ꦤ ꦥꦴꦢꦺꦴꦢꦏꦁ ꦥꦴꦢꦥꦷꦜꦁ ꦥꦴꦢꦏꦡꦭꦶꦏꦁ ꦈꦥꦤꦶꦏ꧀ꦑꦶꦥꦶꦱ꧀ꦱꦤ꧀ꦠꦶ, ꦤ ꦥꦕ꧀ꦕꦸꦒ꧀ꦒꦤ꧀ꦠ꧀ꦮꦴ ꦥꦠ꧀ꦠꦕꦷꦮꦫꦁ ꦥꦛꦶꦒ꧀ꦒꦲꦶꦱ꧀ꦱꦤ꧀ꦠꦶ, ꦤ ꦥꦴꦤꦷꦪꦺꦤ ꦥꦸꦕ꧀ꦖꦶꦱ꧀ꦱꦤ꧀ꦠꦶ, ꦮꦸꦝ꧀ꦞꦠꦫꦺꦥꦶ ꦄꦴꦒꦤ꧀ꦠꦸꦏꦺ ꦨꦶꦏ꧀ꦑꦹ ꦤ ꦄꦨꦶꦮꦴꦢꦺꦱ꧀ꦱꦤ꧀ꦠꦶ, ꦤ ꦱꦺꦤꦴꦱꦤꦁ ꦥꦚ꧀ꦚꦥꦺꦱ꧀ꦱꦤ꧀ꦠꦷ’’ꦠꦶ! ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ꦱꦕ꧀ꦕꦁ ꦏꦶꦫꦁ, ꦨꦶꦏ꧀ꦑꦮꦺ…ꦥꦺ… ꦱꦕ꧀ꦕꦁ ꦨꦒꦮꦴꦠꦶ…ꦥꦺ… ꦮꦶꦒꦫꦲꦶꦠ꧀ꦮꦴ…ꦥꦺ… ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ –

꧓꧕꧙. ‘‘ꦠꦺꦤ ꦲꦶ, ꦨꦶꦏ꧀ꦑꦮꦺ, ꦄꦴꦮꦴꦱꦶꦏꦴꦤꦁ ꦨꦶꦏ꧀ꦑꦹꦤꦁ ꦮꦠ꧀ꦠꦁ ꦥꦚ꧀ꦚꦥꦺꦱ꧀ꦱꦴꦩꦶ ꦪꦡꦴ ꦄꦴꦮꦴꦱꦶꦏꦺꦲꦶ ꦨꦶꦏ꧀ꦑꦹꦲꦶ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. ꦄꦴꦮꦴꦱꦶꦏꦺꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦴ ꦄꦴꦒꦤ꧀ꦠꦸꦏꦁ ꦨꦶꦏ꧀ꦑꦸꦁ ꦮꦸꦝ꧀ꦞꦠꦫꦁ ꦢꦶꦱ꧀ꦮꦴ ꦄꦴꦱꦤꦁ ꦥꦚ꧀ꦚꦥꦺꦠꦧ꧀ꦧꦁ, ꦥꦴꦢꦺꦴꦢꦏꦁ ꦥꦴꦢꦥꦷꦜꦁ ꦥꦴꦢꦏꦡꦭꦶꦏꦁ ꦈꦥꦤꦶꦏ꧀ꦑꦶꦥꦶꦠꦧ꧀ꦧꦁ, ꦥꦕ꧀ꦕꦸꦒ꧀ꦒꦤ꧀ꦠ꧀ꦮꦴ ꦥꦠ꧀ꦠꦕꦷꦮꦫꦁ ꦥꦛꦶꦒ꧀ꦒꦲꦺꦠꦧ꧀ꦧꦁ, ꦥꦴꦤꦷꦪꦺꦤ ꦥꦸꦕ꧀ꦖꦶꦠꦧ꧀ꦧꦺꦴ [ꦥꦴꦤꦷꦪꦺꦤ ꦥꦸꦕ꧀ꦖꦶꦠꦧ꧀ꦧꦺꦴ, ꦥꦫꦶꦨꦺꦴꦗꦤꦷꦪꦺꦤ ꦥꦸꦕ꧀ꦖꦶꦠꦧ꧀ꦧꦺꦴ (ꦱ꧀ꦪꦴ.)]. ꦱꦕꦺ ꦈꦱ꧀ꦱꦲꦠꦶ, ꦈꦥꦴꦲꦤꦴ ꦥꦸꦚ꧀ꦖꦶꦠꦧ꧀ꦧꦴ. ꦈꦥꦴꦲꦤꦴ ꦥꦸꦚ꧀ꦖꦤ꧀ꦠꦺꦤ ꦥꦜꦩꦁ ꦱꦸꦏ꧀ꦑꦺꦤ ꦕꦺꦴꦭ꦳ꦏꦺꦤ ꦥꦸꦚ꧀ꦖꦶꦠꦧ꧀ꦧꦴ, ꦥꦕ꧀ꦖꦴ ꦄꦭ꧀ꦭꦺꦤ. ꦈꦥꦴꦲꦤꦴꦥꦸꦚ꧀ꦖꦤꦕꦺꦴꦭ꦳ꦏꦁ ꦣꦺꦴꦮꦶꦠ꧀ꦮꦴ [ꦣꦺꦴꦮꦶꦠ꧀ꦮꦴ ꦥꦷꦭ꦳ꦺꦠ꧀ꦮꦴ (ꦱ꧀ꦪꦴ.)] ꦌꦏꦩꦤ꧀ꦠꦁ ꦮꦶꦱ꧀ꦱꦗ꧀ꦗꦺꦠꦧ꧀ꦧꦁ.

‘‘ꦄꦴꦒꦤ꧀ꦠꦸꦏꦺꦴ ꦨꦶꦏ꧀ꦑꦸ ꦮꦸꦝ꧀ꦞꦠꦫꦺꦴ ꦄꦨꦶꦮꦴꦢꦺꦠꦧ꧀ꦧꦺꦴ. ꦱꦺꦤꦴꦱꦤꦁ ꦥꦚ꧀ꦚꦥꦺꦠꦧ꧀ꦧꦁ – ‘ꦌꦠꦁ ꦠꦺ ꦱꦺꦤꦴꦱꦤꦁ ꦥꦴꦥꦸꦟꦴꦠꦷ’ꦠꦶ. ꦄꦗ꧀ꦙꦴꦮꦸꦛ꧀ꦜꦁ ꦮꦴ ꦄꦤꦗ꧀ꦙꦴꦮꦸꦛ꧀ꦜꦁ ꦮꦴ ꦄꦴꦕꦶꦏ꧀ꦑꦶꦠꦧ꧀ꦧꦁ. ꦒꦺꦴꦕꦫꦺꦴ ꦄꦴꦕꦶꦏ꧀ꦑꦶꦠꦧ꧀ꦧꦺꦴ. ꦄꦒꦺꦴꦕꦫꦺꦴ ꦄꦴꦕꦶꦏ꧀ꦑꦶꦠꦧ꧀ꦧꦺꦴ. ꦱꦺꦏ꧀ꦑꦱꦩ꧀ꦩꦠꦴꦤꦶ ꦏꦸꦭꦴꦤꦶ ꦄꦴꦕꦶꦏ꧀ꦑꦶꦠꦧ꧀ꦧꦴꦤꦶ. ꦮꦕ꧀ꦕꦛ꧀ꦜꦴꦤꦁ ꦄꦴꦕꦶꦏ꧀ꦑꦶꦠꦧ꧀ꦧꦁ. ꦥꦱ꧀ꦱꦴꦮꦛ꧀ꦜꦴꦤꦁ ꦄꦴꦕꦶꦏ꧀ꦑꦶꦠꦧ꧀ꦧꦁ. ꦥꦴꦤꦷꦪꦁ ꦄꦴꦕꦶꦏ꧀ꦑꦶꦠꦧ꧀ꦧꦁ. ꦥꦫꦶꦨꦺꦴꦗꦤꦷꦪꦁ ꦄꦴꦕꦶꦏ꧀ꦑꦶꦠꦧ꧀ꦧꦁ. ꦏꦠ꧀ꦠꦫꦢꦟ꧀ꦝꦺꦴ ꦄꦴꦕꦶꦏ꧀ꦑꦶꦠꦧ꧀ꦧꦺꦴ. ꦱꦔ꧀ꦓꦱ꧀ꦱ ꦏꦠꦶꦏꦱꦟ꧀ꦜꦴꦤꦁ ꦄꦴꦕꦶꦏ꧀ꦑꦶꦠꦧ꧀ꦧꦁ – ‘ꦆꦩꦁ ꦏꦴꦭꦁ ꦥꦮꦶꦱꦶꦠꦧ꧀ꦧꦁ, ꦆꦩꦁ ꦏꦴꦭꦁ ꦤꦶꦏ꧀ꦑꦩꦶꦠꦧ꧀ꦧ’ꦤ꧀ꦠꦶ.

‘‘ꦱꦕꦺ ꦤꦮꦏꦺꦴ ꦲꦺꦴꦠꦶ, ꦤꦶꦱꦶꦤ꧀ꦤꦏꦺꦤꦺꦮ ꦄꦴꦕꦶꦏ꧀ꦑꦶꦠꦧ꧀ꦧꦁ – ‘ꦄꦠ꧀ꦫ ꦥꦠ꧀ꦠꦁ ꦤꦶꦏ꧀ꦑꦶꦥꦴꦲꦶ, ꦄꦠ꧀ꦫ ꦕꦷꦮꦫꦁ ꦤꦶꦏ꧀ꦑꦶꦥꦴꦲꦶ, ꦆꦢꦁ ꦄꦴꦱꦤꦁ ꦤꦶꦱꦷꦢꦴꦲꦷ’ꦠꦶ. ꦥꦴꦤꦷꦪꦁ ꦄꦴꦕꦶꦏ꧀ꦑꦶꦠꦧ꧀ꦧꦁ. ꦥꦫꦶꦨꦺꦴꦗꦤꦷꦪꦁ ꦄꦴꦕꦶꦏ꧀ꦑꦶꦠꦧ꧀ꦧꦁ. ꦈꦥꦴꦲꦤꦴꦥꦸꦚ꧀ꦖꦤꦕꦺꦴꦭ꦳ꦏꦁ ꦄꦴꦕꦶꦏ꧀ꦑꦶꦠꦧ꧀ꦧꦁ. ꦄꦴꦒꦤ꧀ꦠꦸꦏꦺꦴ ꦨꦶꦏ꧀ꦑꦸ ꦤꦮꦏꦺꦴ ꦄꦨꦶꦮꦴꦢꦴꦥꦺꦠꦧ꧀ꦧꦺꦴ. ꦱꦺꦤꦴꦱꦤꦁ ꦄꦴꦕꦶꦏ꧀ꦑꦶꦠꦧ꧀ꦧꦁ – ‘ꦌꦠꦁ ꦠꦺ ꦱꦺꦤꦴꦱꦤꦁ ꦥꦴꦥꦸꦟꦴꦠꦷ’ꦠꦶ. ꦄꦗ꧀ꦙꦴꦮꦸꦛ꧀ꦜꦁ ꦮꦴ ꦄꦤꦗ꧀ꦙꦴꦮꦸꦛ꧀ꦜꦁ ꦮꦴ ꦄꦴꦕꦶꦏ꧀ꦑꦶꦠꦧ꧀ꦧꦁ. ꦒꦺꦴꦕꦫꦺꦴ ꦄꦴꦕꦶꦏ꧀ꦑꦶꦠꦧ꧀ꦧꦺꦴ. ꦄꦒꦺꦴꦕꦫꦺꦴ ꦄꦴꦕꦶꦏ꧀ꦑꦶꦠꦧ꧀ꦧꦺꦴ. ꦱꦺꦏ꧀ꦑꦱꦩ꧀ꦩꦠꦴꦤꦶ ꦏꦸꦭꦴꦤꦶ ꦄꦴꦕꦶꦏ꧀ꦑꦶꦠꦧ꧀ꦧꦴꦤꦶ. ꦮꦕ꧀ꦕꦛ꧀ꦜꦴꦤꦁ ꦄꦴꦕꦶꦏ꧀ꦑꦶꦠꦧ꧀ꦧꦁ. ꦥꦱ꧀ꦱꦴꦮꦛ꧀ꦜꦴꦤꦁ ꦄꦴꦕꦶꦏ꧀ꦑꦶꦠꦧ꧀ꦧꦁ. ꦥꦴꦤꦷꦪꦁ ꦄꦴꦕꦶꦏ꧀ꦑꦶꦠꦧ꧀ꦧꦁ. ꦥꦫꦶꦨꦺꦴꦗꦤꦷꦪꦁ ꦄꦴꦕꦶꦏ꧀ꦑꦶꦠꦧ꧀ꦧꦁ. ꦏꦠ꧀ꦠꦫꦢꦟ꧀ꦝꦺꦴ ꦄꦴꦕꦶꦏ꧀ꦑꦶꦠꦧ꧀ꦧꦺꦴ. ꦱꦔ꧀ꦓꦱ꧀ꦱ ꦏꦠꦶꦏꦱꦟ꧀ꦜꦴꦤꦁ ꦄꦴꦕꦶꦏ꧀ꦑꦶꦠꦧ꧀ꦧꦁ – ‘ꦆꦩꦁ ꦏꦴꦭꦁ ꦥꦮꦶꦱꦶꦠꦧ꧀ꦧꦁ, ꦆꦩꦁ ꦏꦴꦭꦁ ꦤꦶꦏ꧀ꦑꦩꦶꦠꦧ꧀ꦧ’ꦤ꧀ꦠꦶ. ꦆꦢꦁ ꦑꦺꦴ, ꦨꦶꦏ꧀ꦑꦮꦺ, ꦄꦴꦮꦴꦱꦶꦏꦴꦤꦁ ꦨꦶꦏ꧀ꦑꦹꦤꦁ ꦮꦠ꧀ꦠꦁ ꦪꦡꦴ ꦄꦴꦮꦴꦱꦶꦏꦺꦲꦶ ꦨꦶꦏ꧀ꦑꦹꦲꦶ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧ’’ꦤ꧀ꦠꦶ.

꧓. ꦒꦩꦶꦏꦮꦠ꧀ꦠꦏꦡꦴ

꧓꧖꧐. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦒꦩꦶꦏꦴ ꦨꦶꦏ꧀ꦑꦹ ꦢꦴꦫꦸꦨꦟ꧀ꦝꦁ ꦩꦠ꧀ꦠꦶꦏꦴꦨꦟ꧀ꦝꦁ ꦄꦥ꧀ꦥꦛꦶꦱꦴꦩꦺꦠ꧀ꦮꦴ ꦢ꧀ꦮꦴꦫꦮꦴꦠꦥꦴꦤꦁ ꦮꦶꦮꦫꦶꦠ꧀ꦮꦴ ꦱꦺꦤꦴꦱꦤꦁ ꦄꦤꦴꦥꦸꦕ꧀ꦖꦴ ꦥꦏ꧀ꦏꦩꦤ꧀ꦠꦶ. ꦢꦴꦫꦸꦨꦟ꧀ꦝꦁ ꦩꦠ꧀ꦠꦶꦏꦴꦨꦟ꧀ꦝꦁ ꦤꦱ꧀ꦱꦠꦶ. ꦱꦺꦤꦴꦱꦤꦁ ꦄꦒꦸꦠ꧀ꦠꦁ ꦲꦺꦴꦠꦶ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦒꦩꦶꦏꦴ ꦨꦶꦏ꧀ꦑꦹ ꦢꦴꦫꦸꦨꦟ꧀ꦝꦁ ꦩꦠ꧀ꦠꦶꦏꦴꦨꦟ꧀ꦝꦁ ꦄꦥ꧀ꦥꦛꦶꦱꦴꦩꦺꦠ꧀ꦮꦴ ꦢ꧀ꦮꦴꦫꦮꦴꦠꦥꦴꦤꦁ ꦮꦶꦮꦫꦶꦠ꧀ꦮꦴ ꦱꦺꦤꦴꦱꦤꦁ ꦄꦤꦴꦥꦸꦕ꧀ꦖꦴ ꦥꦏ꧀ꦏꦩꦶꦱ꧀ꦱꦤ꧀ꦠꦶ! ꦢꦴꦫꦸꦨꦟ꧀ꦝꦁ ꦩꦠ꧀ꦠꦶꦏꦴꦨꦟ꧀ꦝꦁ ꦤꦱ꧀ꦱꦠꦶ. ꦱꦺꦤꦴꦱꦤꦁ ꦄꦒꦸꦠ꧀ꦠꦁ ꦲꦺꦴꦠꦷ’’ꦠꦶ. ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ…ꦥꦺ… ꦱꦕ꧀ꦕꦁ ꦨꦒꦮꦴꦠꦶ…ꦥꦺ… ꦮꦶꦒꦫꦲꦶꦠ꧀ꦮꦴ…ꦥꦺ… ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ –

꧓꧖꧑. ‘‘ꦠꦺꦤ ꦲꦶ, ꦨꦶꦏ꧀ꦑꦮꦺ, ꦒꦩꦶꦏꦴꦤꦁ ꦨꦶꦏ꧀ꦑꦹꦤꦁ ꦮꦠ꧀ꦠꦁ ꦥꦚ꧀ꦚꦥꦺꦱ꧀ꦱꦴꦩꦶ ꦪꦡꦴ ꦒꦩꦶꦏꦺꦲꦶ ꦨꦶꦏ꧀ꦑꦹꦲꦶ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. ꦒꦩꦶꦏꦺꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦴ ꦢꦴꦫꦸꦨꦟ꧀ꦝꦁ ꦩꦠ꧀ꦠꦶꦏꦴꦨꦟ꧀ꦝꦁ ꦥꦛꦶꦱꦴꦩꦺꦠ꧀ꦮꦴ ꦢ꧀ꦮꦴꦫꦮꦴꦠꦥꦴꦤꦁ ꦡꦏꦺꦠ꧀ꦮꦴ ꦱꦺꦤꦴꦱꦤꦁ ꦄꦴꦥꦸꦕ꧀ꦖꦴ ꦥꦏ꧀ꦏꦩꦶꦠꦧ꧀ꦧꦁ [ꦄꦴꦥꦸꦕ꧀ꦖꦶꦠꦧ꧀ꦧꦁ (ꦱ꧀ꦪꦴ.)]. ꦱꦕꦺ ꦨꦶꦏ꧀ꦑꦸ ꦤ ꦲꦺꦴꦠꦶ, ꦱꦴꦩꦟꦺꦫꦺꦴ ꦄꦴꦥꦸꦕ꧀ꦖꦶꦠꦧ꧀ꦧꦺꦴ. ꦱꦕꦺ ꦱꦴꦩꦟꦺꦫꦺꦴ ꦤ ꦲꦺꦴꦠꦶ, ꦄꦴꦫꦴꦩꦶꦏꦺꦴ ꦄꦴꦥꦸꦕ꧀ꦖꦶꦠꦧ꧀ꦧꦺꦴ. ꦱꦕꦺ ꦄꦴꦫꦴꦩꦶꦏꦺꦴ ꦤ ꦲꦺꦴꦠꦶ, ꦈꦥꦴꦱꦏꦺꦴ ꦄꦴꦥꦸꦕ꧀ꦖꦶꦠꦧ꧀ꦧꦺꦴ. ꦱꦕꦺ ꦤ ꦲꦺꦴꦠꦶ ꦨꦶꦏ꧀ꦑꦸ ꦮꦴ ꦱꦴꦩꦟꦺꦫꦺꦴ ꦮꦴ ꦄꦴꦫꦴꦩꦶꦏꦺꦴ ꦮꦴ ꦈꦥꦴꦱꦏꦺꦴ ꦮꦴ, ꦕꦠꦹꦱꦸ ꦥꦴꦱꦴꦟꦺꦱꦸ ꦩꦚ꧀ꦕꦁ ꦥꦚ꧀ꦚꦥꦺꦠ꧀ꦮꦴ ꦩꦚ꧀ꦕꦺ ꦩꦚ꧀ꦕꦁ ꦄꦴꦫꦺꦴꦥꦺꦠ꧀ꦮꦴ ꦥꦷꦜꦺ ꦥꦷꦜꦁ ꦄꦴꦫꦺꦴꦥꦺꦠ꧀ꦮꦴ ꦱꦺꦤꦴꦱꦤꦁ ꦈꦥꦫꦶ ꦥꦸꦚ꧀ꦗꦁ ꦏꦫꦶꦠ꧀ꦮꦴ ꦢꦴꦫꦸꦨꦟ꧀ꦝꦁ ꦩꦠ꧀ꦠꦶꦏꦴꦨꦟ꧀ꦝꦁ ꦥꦛꦶꦱꦴꦩꦺꦠ꧀ꦮꦴ ꦢ꧀ꦮꦴꦫꦮꦴꦠꦥꦴꦤꦁ ꦡꦏꦺꦠ꧀ꦮꦴ ꦥꦏ꧀ꦏꦩꦶꦠꦧ꧀ꦧꦁ. ꦱꦕꦺ ꦮꦶꦲꦴꦫꦺꦴ ꦎꦮꦱ꧀ꦱꦠꦶ, ꦱꦕꦺ ꦈꦱ꧀ꦱꦲꦠꦶ, ꦖꦴꦢꦺꦠꦧ꧀ꦧꦺꦴ, ꦈꦱ꧀ꦱꦸꦏꦁ ꦮꦴ ꦏꦴꦠꦧ꧀ꦧꦁ – ‘ꦏꦶꦤ꧀ꦠꦶ ꦤꦸ ꦑꦺꦴ ꦮꦶꦲꦴꦫꦺꦴ ꦖꦴꦢꦶꦪꦺꦡꦴ’ꦠꦶ. ꦌꦮꦚ꧀ꦕꦺꦠꦁ ꦭꦨꦺꦡ, ꦆꦕ꧀ꦕꦺꦠꦁ ꦏꦸꦱꦭꦁ. ꦤꦺꦴ ꦕꦺ ꦭꦨꦺꦡ, ꦪꦺꦴ ꦢꦺꦱꦺꦴ ꦄꦤꦺꦴꦮꦱ꧀ꦱꦏꦺꦴ ꦲꦺꦴꦠꦶ, ꦠꦠ꧀ꦡ ꦕꦠꦹꦱꦸ ꦥꦴꦱꦴꦟꦺꦱꦸ ꦩꦚ꧀ꦕꦁ ꦥꦚ꧀ꦚꦥꦺꦠ꧀ꦮꦴ ꦩꦚ꧀ꦕꦺ ꦩꦚ꧀ꦕꦁ ꦄꦴꦫꦺꦴꦥꦺꦠ꧀ꦮꦴ ꦥꦷꦜꦺ ꦥꦷꦜꦁ ꦄꦴꦫꦺꦴꦥꦺꦠ꧀ꦮꦴ ꦱꦺꦤꦴꦱꦤꦁ ꦈꦥꦫꦶ ꦥꦸꦚ꧀ꦗꦁ ꦏꦫꦶꦠ꧀ꦮꦴ ꦢꦴꦫꦸꦨꦟ꧀ꦝꦁ ꦩꦠ꧀ꦠꦶꦏꦴꦨꦟ꧀ꦝꦁ ꦥꦛꦶꦱꦴꦩꦺꦠ꧀ꦮꦴ ꦢ꧀ꦮꦴꦫꦮꦴꦠꦥꦴꦤꦁ ꦡꦏꦺꦠ꧀ꦮꦴ ꦥꦏ꧀ꦏꦩꦶꦠꦧ꧀ꦧꦁ. ꦱꦕꦺ ꦱꦧ꧀ꦧꦺꦴ ꦮꦶꦲꦴꦫꦺꦴ ꦎꦮꦱ꧀ꦱꦠꦶ, ꦱꦕꦺ ꦈꦱ꧀ꦱꦲꦠꦶ, ꦱꦺꦤꦴꦱꦤꦁ ꦒꦴꦩꦁ ꦄꦠꦶꦲꦫꦶꦠꦧ꧀ꦧꦁ, ꦈꦱ꧀ꦱꦸꦏꦁ ꦮꦴ ꦏꦴꦠꦧ꧀ꦧꦁ – ‘ꦏꦶꦤ꧀ꦠꦶ ꦤꦸ ꦑꦺꦴ ꦱꦺꦤꦴꦱꦤꦁ ꦒꦴꦩꦁ ꦄꦠꦶꦲꦫꦶꦪꦺꦡꦴ’ꦠꦶ. ꦌꦮꦚ꧀ꦕꦺꦠꦁ ꦭꦨꦺꦡ, ꦆꦕ꧀ꦕꦺꦠꦁ ꦏꦸꦱꦭꦁ. ꦤꦺꦴ ꦕꦺ ꦭꦨꦺꦡ, ꦄꦗ꧀ꦙꦺꦴꦏꦴꦱꦺ ꦕꦠꦹꦱꦸ ꦥꦴꦱꦴꦟꦺꦱꦸ ꦩꦚ꧀ꦕꦁ ꦥꦚ꧀ꦚꦥꦺꦠ꧀ꦮꦴ ꦩꦚ꧀ꦕꦺ ꦩꦚ꧀ꦕꦁ ꦄꦴꦫꦺꦴꦥꦺꦠ꧀ꦮꦴ ꦥꦷꦜꦺ ꦥꦷꦜꦁ ꦄꦴꦫꦺꦴꦥꦺꦠ꧀ꦮꦴ ꦱꦺꦤꦴꦱꦤꦁ ꦈꦥꦫꦶ ꦥꦸꦚ꧀ꦗꦁ ꦏꦫꦶꦠ꧀ꦮꦴ ꦢꦴꦫꦸꦨꦟ꧀ꦝꦁ ꦩꦠ꧀ꦠꦶꦏꦴꦨꦟ꧀ꦝꦁ ꦥꦛꦶꦱꦴꦩꦺꦠ꧀ꦮꦴ ꦠꦶꦟꦺꦤ ꦮꦴ ꦥꦟ꧀ꦟꦺꦤ ꦮꦴ ꦥꦛꦶꦕ꧀ꦖꦴꦢꦺꦠ꧀ꦮꦴ ꦥꦏ꧀ꦏꦩꦶꦠꦧ꧀ꦧꦁ – ꦄꦥ꧀ꦥꦺꦮ ꦤꦴꦩ ꦄꦔ꧀ꦒꦴꦤꦶꦥꦶ ꦱꦺꦱꦺꦪ꧀ꦪꦸꦤ꧀ꦠꦶ. ꦆꦢꦁ ꦑꦺꦴ, ꦨꦶꦏ꧀ꦑꦮꦺ, ꦒꦩꦶꦏꦴꦤꦁ ꦨꦶꦏ꧀ꦑꦹꦤꦁ ꦮꦠ꧀ꦠꦁ ꦪꦡꦴ ꦒꦩꦶꦏꦺꦲꦶ ꦨꦶꦏ꧀ꦑꦹꦲꦶ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧ’’ꦤ꧀ꦠꦶ.

꧔. ꦄꦤꦸꦩꦺꦴꦢꦤꦮꦠ꧀ꦠꦏꦡꦴ

꧓꧖꧒. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦶꦏ꧀ꦑꦹ ꦨꦠ꧀ꦠꦒ꧀ꦒꦺ ꦤ ꦄꦤꦸꦩꦺꦴꦢꦤ꧀ꦠꦶ. ꦩꦤꦸꦱ꧀ꦱꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦱꦩꦟꦴ ꦱꦏ꧀ꦪꦥꦸꦠ꧀ꦠꦶꦪꦴ ꦨꦠ꧀ꦠꦒ꧀ꦒꦺ ꦤ ꦄꦤꦸꦩꦺꦴꦢꦶꦱ꧀ꦱꦤ꧀ꦠꦷ’’ꦠꦶ! ꦄꦱ꧀ꦱꦺꦴꦱꦸꦁ ꦑꦺꦴ ꦨꦶꦏ꧀ꦑꦹ ꦠꦺꦱꦁ ꦩꦤꦸꦱ꧀ꦱꦴꦤꦁ ꦈꦗ꧀ꦙꦴꦪꦤ꧀ꦠꦴꦤꦁ ꦑꦶꦪ꧀ꦪꦤ꧀ꦠꦴꦤꦁ ꦮꦶꦥꦴꦕꦺꦤ꧀ꦠꦴꦤꦁ. ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ. ꦄꦡ ꦑꦺꦴ ꦨꦒꦮꦴ ꦌꦠꦱ꧀ꦩꦶꦁ ꦤꦶꦢꦴꦤꦺ ꦌꦠꦱ꧀ꦩꦶꦁ ꦥꦏꦫꦟꦺ ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦨꦠ꧀ꦠꦒ꧀ꦒꦺ ꦄꦤꦸꦩꦺꦴꦢꦶꦠꦸ’’ꦤ꧀ꦠꦶ. ꦄꦡ ꦑꦺꦴ ꦠꦺꦱꦁ ꦨꦶꦏ꧀ꦑꦹꦤꦁ ꦌꦠꦢꦲꦺꦴꦱꦶ – ‘‘ꦏꦺꦤ ꦤꦸ ꦑꦺꦴ ꦨꦠ꧀ꦠꦒ꧀ꦒꦺ ꦄꦤꦸꦩꦺꦴꦢꦶꦠꦧ꧀ꦧ’’ꦤ꧀ꦠꦶ? ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ. ꦄꦡ ꦑꦺꦴ ꦨꦒꦮꦴ ꦌꦠꦱ꧀ꦩꦶꦁ ꦤꦶꦢꦴꦤꦺ ꦌꦠꦱ꧀ꦩꦶꦁ ꦥꦏꦫꦟꦺ ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦡꦺꦫꦺꦤ ꦨꦶꦏ꧀ꦑꦸꦤꦴ ꦨꦠ꧀ꦠꦒ꧀ꦒꦺ ꦄꦤꦸꦩꦺꦴꦢꦶꦠꦸ’’ꦤ꧀ꦠꦶ.

ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦚ꧀ꦚꦠꦫꦱ꧀ꦱ ꦥꦹꦒꦱ꧀ꦱ ꦱꦔ꧀ꦓꦨꦠ꧀ꦠꦁ ꦲꦺꦴꦠꦶ. ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦱꦔ꧀ꦓꦠ꧀ꦡꦺꦫꦺꦴ ꦲꦺꦴꦠꦶ. ꦨꦶꦏ꧀ꦑꦹ – ‘ꦨꦒꦮꦠꦴ ꦄꦤꦸꦚ꧀ꦚꦴꦠꦁ ꦡꦺꦫꦺꦤ ꦨꦶꦏ꧀ꦑꦸꦤꦴ ꦨꦠ꧀ꦠꦒ꧀ꦒꦺ ꦄꦤꦸꦩꦺꦴꦢꦶꦠꦸ’ꦤ꧀ꦠꦶ – ꦄꦴꦪꦱ꧀ꦩꦤ꧀ꦠꦁ ꦱꦴꦫꦶꦥꦸꦠ꧀ꦠꦁ ꦌꦏꦏꦁ ꦎꦲꦴꦪ ꦥꦏ꧀ꦏꦩꦶꦁꦱꦸ. ꦄꦡ ꦑꦺꦴ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦠꦺ ꦩꦤꦸꦱ꧀ꦱꦺ ꦥꦛꦶꦱꦩ꧀ꦩꦺꦴꦢꦶꦠ꧀ꦮꦴ ꦥꦕ꧀ꦖꦴ ꦌꦏꦏꦺꦴ ꦄꦒꦩꦴꦱꦶ. ꦄꦢ꧀ꦢꦱꦴ ꦑꦺꦴ ꦨꦒꦮꦴ ꦄꦴꦪꦱ꧀ꦩꦤ꧀ꦠꦁ ꦱꦴꦫꦶꦥꦸꦠ꧀ꦠꦁ ꦢꦹꦫꦠꦺꦴꦮ ꦌꦏꦏꦁ ꦄꦴꦒꦕ꧀ꦖꦤ꧀ꦠꦁ. ꦢꦶꦱ꧀ꦮꦴꦤ ꦄꦴꦪꦱ꧀ꦩꦤ꧀ꦠꦁ ꦱꦴꦫꦶꦥꦸꦠ꧀ꦠꦁ ꦌꦠꦢꦮꦺꦴꦕ – ‘‘ꦏꦕ꧀ꦕꦶ, ꦱꦴꦫꦶꦥꦸꦠ꧀ꦠ, ꦨꦠ꧀ꦠꦁ ꦆꦢ꧀ꦣꦁ ꦄꦲꦺꦴꦱꦷ’’ꦠꦶ? ‘‘ꦆꦢ꧀ꦣꦁ ꦑꦺꦴ, ꦨꦤ꧀ꦠꦺ, ꦨꦠ꧀ꦠꦁ ꦄꦲꦺꦴꦱꦶ; ꦄꦥꦶꦕ ꦩꦁ ꦨꦶꦏ꧀ꦑꦹ ꦌꦏꦏꦁ ꦎꦲꦴꦪ ꦥꦏ꧀ꦏꦤ꧀ꦠꦴ’’ꦠꦶ. ꦄꦡ ꦑꦺꦴ ꦨꦒꦮꦴ ꦌꦠꦱ꧀ꦩꦶꦁ ꦤꦶꦢꦴꦤꦺ ꦌꦠꦱ꧀ꦩꦶꦁ ꦥꦏꦫꦟꦺ ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦨꦠ꧀ꦠꦒ꧀ꦒꦺ ꦕꦠꦹꦲꦶ ꦥꦚ꧀ꦕꦲꦶ ꦡꦺꦫꦴꦤꦸꦡꦺꦫꦺꦲꦶ ꦨꦶꦏ꧀ꦑꦹꦲꦶ ꦄꦴꦒꦩꦺꦠꦸ’’ꦤ꧀ꦠꦶ.

ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦚ꧀ꦚꦠꦫꦺꦴ ꦡꦺꦫꦺꦴ ꦨꦠ꧀ꦠꦒ꧀ꦒꦺ ꦮꦕ꧀ꦕꦶꦠꦺꦴ ꦄꦴꦒꦩꦺꦱꦶ. ꦱꦺꦴ ꦮꦕ꧀ꦕꦁ ꦱꦤ꧀ꦣꦴꦫꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦩꦸꦕ꧀ꦖꦶꦠꦺꦴ ꦥꦥꦠꦶ. ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ. ‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦱꦠꦶ ꦏꦫꦟꦷꦪꦺ ꦄꦴꦤꦤ꧀ꦠꦫꦶꦏꦁ ꦨꦶꦏ꧀ꦑꦸꦁ ꦄꦴꦥꦸꦕ꧀ꦖꦶꦠ꧀ꦮꦴ ꦒꦤ꧀ꦠꦸ’’ꦤ꧀ꦠꦶ.

꧕. ꦨꦠ꧀ꦠꦒ꧀ꦒꦮꦠ꧀ꦠꦏꦡꦴ

꧓꧖꧓. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦢꦸꦤ꧀ꦤꦶꦮꦠ꧀ꦡꦴ ꦢꦸꦥ꧀ꦥꦴꦫꦸꦠꦴ ꦄꦤꦴꦏꦥ꧀ꦥꦱꦩ꧀ꦥꦤ꧀ꦤꦴ ꦨꦠ꧀ꦠꦒ꧀ꦒꦁ ꦒꦕ꧀ꦖꦤ꧀ꦠꦶ, ꦮꦺꦴꦏ꧀ꦏꦩ꧀ꦩꦥꦶ ꦡꦺꦫꦴꦤꦁ ꦨꦶꦏ꧀ꦑꦹꦤꦁ ꦥꦸꦫꦠꦺꦴ ꦥꦸꦫꦠꦺꦴ ꦒꦕ꧀ꦖꦤ꧀ꦠꦶ, ꦡꦺꦫꦺꦥꦶ ꦨꦶꦏ꧀ꦑꦹ ꦄꦤꦸꦥꦑꦗ꧀ꦗ ꦤꦶꦱꦷꦢꦤ꧀ꦠꦶ, ꦤꦮꦺꦥꦶ ꦨꦶꦏ꧀ꦑꦹ ꦄꦴꦱꦤꦺꦤ ꦥꦛꦶꦧꦴꦲꦤ꧀ꦠꦶ, ꦱꦔ꧀ꦓꦴꦛꦶꦩ꧀ꦥꦶ ꦎꦠ꧀ꦡꦫꦶꦠ꧀ꦮꦴ ꦄꦤ꧀ꦠꦫꦓꦫꦺ ꦤꦶꦱꦷꦢꦤ꧀ꦠꦶ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦢꦸꦤ꧀ꦤꦶꦮꦠ꧀ꦡꦴ ꦢꦸꦥ꧀ꦥꦴꦫꦸꦠꦴ ꦄꦤꦴꦏꦥ꧀ꦥꦱꦩ꧀ꦥꦤ꧀ꦤꦴ ꦨꦠ꧀ꦠꦒ꧀ꦒꦁ ꦒꦕ꧀ꦖꦶꦱ꧀ꦱꦤ꧀ꦠꦶ, ꦮꦺꦴꦏ꧀ꦏꦩ꧀ꦩꦥꦶ ꦡꦺꦫꦴꦤꦁ ꦨꦶꦏ꧀ꦑꦹꦤꦁ ꦥꦸꦫꦠꦺꦴ ꦥꦸꦫꦠꦺꦴ ꦒꦕ꧀ꦖꦶꦱ꧀ꦱꦤ꧀ꦠꦶ, ꦡꦺꦫꦺꦥꦶ ꦨꦶꦏ꧀ꦑꦹ ꦄꦤꦸꦥꦑꦗ꧀ꦗ ꦤꦶꦱꦷꦢꦶꦱ꧀ꦱꦤ꧀ꦠꦶ, ꦤꦮꦺꦥꦶ ꦨꦶꦏ꧀ꦑꦹ ꦄꦴꦱꦤꦺꦤꦥꦶ ꦥꦛꦶꦧꦴꦲꦶꦱ꧀ꦱꦤ꧀ꦠꦶ, ꦱꦔ꧀ꦓꦴꦛꦶꦩ꧀ꦥꦶ ꦎꦠ꧀ꦡꦫꦶꦠ꧀ꦮꦴ ꦄꦤ꧀ꦠꦫꦓꦫꦺ ꦤꦶꦱꦷꦢꦶꦱ꧀ꦱꦤ꧀ꦠꦷ’’ꦠꦶ! ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ‘‘ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦢꦸꦤ꧀ꦤꦶꦮꦠ꧀ꦡꦴ ꦢꦸꦥ꧀ꦥꦴꦫꦸꦠꦴ ꦄꦤꦴꦏꦥ꧀ꦥꦱꦩ꧀ꦥꦤ꧀ꦤꦴ ꦨꦠ꧀ꦠꦒ꧀ꦒꦁ ꦒꦕ꧀ꦖꦤ꧀ꦠꦶ, ꦮꦺꦴꦏ꧀ꦏꦩ꧀ꦩꦥꦶ ꦡꦺꦫꦴꦤꦁ ꦨꦶꦏ꧀ꦑꦹꦤꦁ ꦥꦸꦫꦠꦺꦴ ꦥꦸꦫꦠꦺꦴ ꦒꦕ꧀ꦖꦤ꧀ꦠꦶ, ꦡꦺꦫꦺꦥꦶ ꦨꦶꦏ꧀ꦑꦹ ꦄꦤꦸꦥꦑꦗ꧀ꦗ ꦤꦶꦱꦷꦢꦤ꧀ꦠꦶ, ꦤꦮꦺꦥꦶ ꦨꦶꦏ꧀ꦑꦹ ꦄꦴꦱꦤꦺꦤ ꦥꦛꦶꦧꦴꦲꦤ꧀ꦠꦶ, ꦱꦔ꧀ꦓꦴꦛꦶꦩ꧀ꦥꦶ ꦎꦠ꧀ꦡꦫꦶꦠ꧀ꦮꦴ ꦄꦤ꧀ꦠꦫꦓꦫꦺ ꦤꦶꦱꦷꦢꦤ꧀ꦠꦷ’’ꦠꦶ? ‘‘ꦱꦕ꧀ꦕꦁ ꦨꦒꦮꦴ’’ꦠꦶ…ꦥꦺ… ꦮꦶꦒꦫꦲꦶꦠ꧀ꦮꦴ…ꦥꦺ… ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ –

꧓꧖꧔. ‘‘ꦠꦺꦤ ꦲꦶ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦨꦠ꧀ꦠꦒ꧀ꦒꦮꦠ꧀ꦠꦁ ꦥꦚ꧀ꦚꦥꦺꦱ꧀ꦱꦴꦩꦶ ꦪꦡꦴ ꦨꦶꦏ꧀ꦑꦹꦲꦶ ꦨꦠ꧀ꦠꦒ꧀ꦒꦺ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. ꦱꦕꦺ ꦄꦴꦫꦴꦩꦺ ꦏꦴꦭꦺꦴ ꦄꦴꦫꦺꦴꦕꦶꦠꦺꦴ ꦲꦺꦴꦠꦶ, ꦠꦶꦩꦟ꧀ꦝꦭꦁ ꦥꦛꦶꦕ꧀ꦖꦴꦢꦺꦤ꧀ꦠꦺꦤ ꦥꦫꦶꦩꦟ꧀ꦝꦭꦁ ꦤꦶꦮꦴꦱꦺꦠ꧀ꦮꦴ ꦏꦴꦪꦧꦤ꧀ꦣꦤꦁ ꦧꦤ꧀ꦣꦶꦠ꧀ꦮꦴ ꦱꦒꦸꦟꦁ ꦏꦠ꧀ꦮꦴ ꦱꦔ꧀ꦓꦴꦛꦶꦪꦺꦴ ꦥꦴꦫꦸꦥꦶꦠ꧀ꦮꦴ ꦒꦟ꧀ꦜꦶꦏꦁ ꦥꦛꦶꦩꦸꦚ꧀ꦕꦶꦠ꧀ꦮꦴ ꦣꦺꦴꦮꦶꦠ꧀ꦮꦴ ꦥꦠ꧀ꦠꦁ ꦒꦲꦺꦠ꧀ꦮꦴ ꦱꦴꦣꦸꦏꦁ ꦄꦠꦫꦩꦴꦤꦺꦤ ꦒꦴꦩꦺꦴ ꦥꦮꦶꦱꦶꦠꦧ꧀ꦧꦺꦴ.

‘‘ꦤ ꦮꦺꦴꦏ꧀ꦏꦩ꧀ꦩ ꦡꦺꦫꦴꦤꦁ ꦨꦶꦏ꧀ꦑꦹꦤꦁ ꦥꦸꦫꦠꦺꦴ ꦥꦸꦫꦠꦺꦴ ꦒꦤ꧀ꦠꦧ꧀ꦧꦁ. ꦱꦸꦥ꧀ꦥꦛꦶꦕ꧀ꦖꦤ꧀ꦤꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦱꦸꦱꦁꦮꦸꦠꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦎꦏ꧀ꦑꦶꦠ꧀ꦠꦕꦏ꧀ꦑꦸꦤꦴ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦈꦏ꧀ꦑꦶꦠ꧀ꦠꦏꦴꦪ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦈꦗ꧀ꦗꦒ꧀ꦓꦶꦏꦴꦪ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦄꦥ꧀ꦥꦱꦢ꧀ꦢꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦏꦴꦪꦥ꧀ꦥꦕꦴꦭꦏꦁ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦧꦴꦲꦸꦥ꧀ꦥꦕꦴꦭꦏꦁ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦱꦷꦱꦥ꧀ꦥꦕꦴꦭꦏꦁ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦑꦩ꧀ꦨꦏꦠꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦎꦒꦸꦟ꧀ꦜꦶꦠꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦈꦏ꧀ꦏꦸꦛꦶꦏꦴꦪ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ.

‘‘ꦱꦸꦥ꧀ꦥꦛꦶꦕ꧀ꦖꦤ꧀ꦤꦺꦤ ꦄꦤ꧀ꦠꦫꦓꦫꦺ ꦤꦶꦱꦷꦢꦶꦠꦧ꧀ꦧꦁ. ꦱꦸꦱꦁꦮꦸꦠꦺꦤ ꦄꦤ꧀ꦠꦫꦓꦫꦺ ꦤꦶꦱꦷꦢꦶꦠꦧ꧀ꦧꦁ. ꦎꦏ꧀ꦑꦶꦠ꧀ꦠꦕꦏ꧀ꦑꦸꦤꦴ ꦄꦤ꧀ꦠꦫꦓꦫꦺ ꦤꦶꦱꦷꦢꦶꦠꦧ꧀ꦧꦁ. ꦤ ꦈꦏ꧀ꦑꦶꦠ꧀ꦠꦏꦴꦪ ꦄꦤ꧀ꦠꦫꦓꦫꦺ ꦤꦶꦱꦷꦢꦶꦠꦧ꧀ꦧꦁ ꦤ ꦈꦗ꧀ꦗꦒ꧀ꦓꦶꦏꦴꦪ ꦄꦤ꧀ꦠꦫꦓꦫꦺ ꦤꦶꦱꦷꦢꦶꦠꦧ꧀ꦧꦁ, ꦄꦥ꧀ꦥꦱꦢ꧀ꦢꦺꦤ ꦄꦤ꧀ꦠꦫꦓꦫꦺ ꦤꦶꦱꦷꦢꦶꦠꦧ꧀ꦧ. ꦤ ꦏꦴꦪꦥ꧀ꦥꦕꦴꦭꦏꦁ ꦄꦤ꧀ꦠꦫꦓꦫꦺ ꦤꦶꦱꦷꦢꦶꦠꦧ꧀ꦧꦁ. ꦤ ꦧꦴꦲꦸꦥ꧀ꦥꦕꦴꦭꦏꦁ ꦄꦤ꧀ꦠꦫꦓꦫꦺ ꦤꦶꦱꦷꦢꦶꦠꦧ꧀ꦧꦁ. ꦤ ꦱꦷꦱꦥ꧀ꦥꦕꦴꦭꦏꦁ ꦄꦤ꧀ꦠꦫꦓꦫꦺ ꦤꦶꦱꦷꦢꦶꦠꦧ꧀ꦧꦁ. ꦤ ꦑꦩ꧀ꦨꦏꦠꦺꦤ ꦄꦤ꧀ꦠꦫꦓꦫꦺ ꦤꦶꦱꦷꦢꦶꦠꦧ꧀ꦧꦁ. ꦤ ꦎꦒꦸꦟ꧀ꦜꦶꦠꦺꦤ ꦄꦤ꧀ꦠꦫꦓꦫꦺ ꦤꦶꦱꦷꦢꦶꦠꦧ꧀ꦧꦁ. ꦤ ꦥꦭ꧀ꦭꦠ꧀ꦡꦶꦏꦴꦪ ꦄꦤ꧀ꦠꦫꦓꦫꦺ ꦤꦶꦱꦷꦢꦶꦠꦧ꧀ꦧꦁ. ꦤ ꦡꦺꦫꦺ ꦨꦶꦏ꧀ꦑꦹ ꦄꦤꦸꦥꦑꦗ꧀ꦗ ꦤꦶꦱꦷꦢꦶꦠꦧ꧀ꦧꦁ. ꦤ ꦤꦮꦴ ꦨꦶꦏ꧀ꦑꦹ ꦄꦴꦱꦤꦺꦤ ꦥꦛꦶꦧꦴꦲꦶꦠꦧ꧀ꦧꦴ. ꦤ ꦱꦔ꧀ꦓꦴꦛꦶꦁ ꦎꦠ꧀ꦡꦫꦶꦠ꧀ꦮꦴ ꦄꦤ꧀ꦠꦫꦓꦫꦺ ꦤꦶꦱꦷꦢꦶꦠꦧ꧀ꦧꦁ.

‘‘ꦈꦢꦏꦺ ꦢꦶꦪ꧀ꦪꦩꦴꦤꦺ ꦈꦨꦺꦴꦲꦶ ꦲꦠ꧀ꦡꦺꦲꦶ ꦥꦠ꧀ꦠꦁ ꦥꦛꦶꦒ꧀ꦒꦲꦺꦠ꧀ꦮꦴ ꦈꦢꦏꦁ ꦥꦛꦶꦒ꧀ꦒꦲꦺꦠꦧ꧀ꦧꦁ. ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ ꦥꦠ꧀ꦠꦺꦴ ꦣꦺꦴꦮꦶꦠꦧ꧀ꦧꦺꦴ. ꦱꦕꦺ ꦈꦢꦏꦥ꧀ꦥꦛꦶꦒ꧀ꦒꦴꦲꦏꦺꦴ ꦲꦺꦴꦠꦶ, ꦤꦷꦕꦁ ꦏꦠ꧀ꦮꦴ ꦈꦢꦏꦥ꧀ꦥꦛꦶꦒ꧀ꦒꦲꦺ ꦈꦢꦏꦁ ꦄꦴꦱꦶꦚ꧀ꦕꦶꦠꦧ꧀ꦧꦁ – ꦩꦴ ꦈꦢꦏꦥ꧀ꦥꦛꦶꦒ꧀ꦒꦴꦲꦏꦺꦴ ꦈꦢꦏꦺꦤ ꦎꦱꦶꦚ꧀ꦕꦶ [ꦎꦱꦶꦚ꧀ꦕꦶꦪ꧀ꦪꦷ (ꦏ.)], ꦩꦴ ꦱꦴꦩꦤ꧀ꦠꦴ ꦨꦶꦏ꧀ꦑꦹ ꦈꦢꦏꦺꦤ ꦎꦱꦶꦚ꧀ꦕꦶꦁꦱꦸ [ꦎꦱꦶꦚ꧀ꦕꦶꦪ꧀ꦪꦶꦁꦱꦸ (ꦏ.)], ꦩꦴ ꦱꦔ꧀ꦓꦴꦛꦶ ꦈꦢꦏꦺꦤ ꦎꦱꦶꦚ꧀ꦕꦷꦠꦶ. ꦱꦕꦺ ꦈꦢꦏꦥ꧀ꦥꦛꦶꦒ꧀ꦒꦴꦲꦏꦺꦴ ꦤ ꦲꦺꦴꦠꦶ, ꦤꦷꦕꦁ ꦏꦠ꧀ꦮꦴ ꦖꦩꦴꦪ ꦈꦢꦏꦁ ꦄꦴꦱꦶꦚ꧀ꦕꦶꦠꦧ꧀ꦧꦁ – ꦩꦴ ꦱꦴꦩꦤ꧀ꦠꦴ ꦨꦶꦏ꧀ꦑꦹ ꦈꦢꦏꦺꦤ ꦎꦱꦶꦚ꧀ꦕꦶꦁꦱꦸ, ꦩꦴ ꦱꦔ꧀ꦓꦴꦛꦶ ꦈꦢꦏꦺꦤ ꦎꦱꦶꦚ꧀ꦕꦷꦠꦶ.

‘‘ꦎꦢꦤꦺ ꦢꦶꦪ꧀ꦪꦩꦴꦤꦺ ꦈꦨꦺꦴꦲꦶ ꦲꦠ꧀ꦡꦺꦲꦶ ꦥꦠ꧀ꦠꦁ ꦥꦛꦶꦒ꧀ꦒꦲꦺꦠ꧀ꦮꦴ ꦎꦢꦤꦺꦴ ꦥꦛꦶꦒ꧀ꦒꦲꦺꦠꦧ꧀ꦧꦺꦴ, ꦱꦹꦥꦱ꧀ꦱ ꦎꦏꦴꦱꦺꦴ ꦏꦴꦠꦧ꧀ꦧꦺꦴ. ꦱꦕꦺ ꦲꦺꦴꦠꦶ ꦱꦥ꧀ꦥꦶ ꦮꦴ ꦠꦺꦭꦁ ꦮꦴ ꦈꦠ꧀ꦠꦫꦶꦨꦔ꧀ꦒꦁ ꦮꦴ, ꦡꦺꦫꦺꦤ ꦮꦠ꧀ꦠꦧ꧀ꦧꦺꦴ – ‘ꦱꦧ꧀ꦧꦺꦱꦁ ꦱꦩꦏꦁ ꦱꦩ꧀ꦥꦴꦢꦺꦲꦷ’ꦠꦶ. ꦱꦏ꧀ꦏꦕ꧀ꦕꦁ ꦥꦶꦟ꧀ꦝꦥꦴꦠꦺꦴ ꦥꦛꦶꦒ꧀ꦒꦲꦺꦠꦧ꧀ꦧꦺꦴ. ꦥꦠ꧀ꦠꦱꦚ꧀ꦚꦶꦤꦴ ꦥꦶꦟ꧀ꦝꦥꦴꦠꦺꦴ ꦥꦛꦶꦒ꧀ꦒꦲꦺꦠꦧ꧀ꦧꦺꦴ. ꦱꦩꦱꦹꦥꦏꦺꦴ ꦥꦶꦟ꧀ꦝꦥꦴꦠꦺꦴ ꦥꦛꦶꦒ꧀ꦒꦲꦺꦠꦧ꧀ꦧꦺꦴ. ꦱꦩꦠꦶꦠ꧀ꦠꦶꦏꦺꦴ ꦥꦶꦟ꧀ꦝꦥꦴꦠꦺꦴ ꦥꦛꦶꦒ꧀ꦒꦲꦺꦠꦧ꧀ꦧꦺꦴ.

‘‘ꦤ ꦠꦴꦮ ꦡꦺꦫꦺꦤ ꦨꦸꦚ꧀ꦗꦶꦠꦧ꧀ꦧꦁ ꦪꦴꦮ ꦤ ꦱꦧ꧀ꦧꦺꦱꦁ ꦎꦢꦤꦺꦴ ꦱꦩ꧀ꦥꦠ꧀ꦠꦺꦴ ꦲꦺꦴꦠꦶ. ꦱꦏ꧀ꦏꦕ꧀ꦕꦁ ꦥꦶꦟ꧀ꦝꦥꦴꦠꦺꦴ ꦨꦸꦚ꧀ꦗꦶꦠꦧ꧀ꦧꦺꦴ. ꦥꦠ꧀ꦠꦱꦚ꧀ꦚꦶꦤꦴ ꦥꦶꦟ꧀ꦝꦥꦴꦠꦺꦴ ꦨꦸꦚ꧀ꦗꦶꦠꦧ꧀ꦧꦺꦴ. ꦱꦥꦢꦴꦤꦁ ꦥꦶꦟ꧀ꦝꦥꦴꦠꦺꦴ ꦨꦸꦚ꧀ꦗꦶꦠꦧ꧀ꦧꦺꦴ. ꦱꦩꦱꦹꦥꦏꦺꦴ ꦥꦶꦟ꧀ꦝꦥꦴꦠꦺꦴ ꦨꦸꦚ꧀ꦗꦶꦠꦧ꧀ꦧꦺꦴ. ꦤ ꦡꦹꦥꦏꦠꦺꦴ ꦎꦩꦢ꧀ꦢꦶꦠ꧀ꦮꦴ ꦥꦶꦟ꧀ꦝꦶꦥꦴꦠꦺꦴ ꦨꦸꦚ꧀ꦗꦶꦠꦧ꧀ꦧꦺꦴ. ꦤ ꦱꦹꦥꦁ ꦮꦴ ꦧ꧀ꦪꦚ꧀ꦗꦤꦁ ꦮꦴ ꦎꦢꦤꦺꦤ ꦥꦛꦶꦕ꧀ꦖꦴꦢꦺꦠꦧ꧀ꦧꦁ ꦨꦶꦪ꧀ꦪꦺꦴꦏꦩ꧀ꦪꦠꦁ ꦈꦥꦴꦢꦴꦪ. ꦤ ꦱꦹꦥꦁ ꦮꦴ ꦎꦢꦤꦁ ꦮꦴ ꦄꦒꦶꦭꦴꦤꦺꦤ ꦄꦠ꧀ꦠꦤꦺꦴ ꦄꦠ꧀ꦡꦴꦪ ꦮꦶꦚ꧀ꦚꦴꦥꦺꦠ꧀ꦮꦴ ꦨꦸꦚ꧀ꦗꦶꦠꦧ꧀ꦧꦁ. ꦤ ꦈꦗ꧀ꦙꦴꦤꦱꦚ꧀ꦚꦶꦤꦴ ꦥꦫꦺꦱꦁ ꦥꦠ꧀ꦠꦺꦴ ꦎꦭꦺꦴꦏꦺꦠꦧ꧀ꦧꦺꦴ. ꦤꦴꦠꦶꦩꦲꦤ꧀ꦠꦺꦴ ꦏꦧꦭ꦳ꦺꦴ ꦏꦴꦠꦧ꧀ꦧꦺꦴ. ꦥꦫꦶꦩꦟ꧀ꦝꦭꦺꦴ ꦄꦴꦭꦺꦴꦥꦺꦴ ꦏꦴꦠꦧ꧀ꦧꦺꦴ. ꦤ ꦄꦤꦴꦲꦛꦺ ꦏꦧꦭ꦳ꦺ ꦩꦸꦑꦢ꧀ꦮꦴꦫꦁ ꦮꦶꦮꦫꦶꦠꦧ꧀ꦧꦁ. ꦤ ꦨꦸꦚ꧀ꦗꦩꦴꦤꦺꦤ ꦱꦧ꧀ꦧꦺꦴ ꦲꦠ꧀ꦡꦺꦴ ꦩꦸꦑꦺ ꦥꦏ꧀ꦑꦶꦥꦶꦠꦧ꧀ꦧꦺꦴ. ꦤ ꦱꦏꦧꦭ꦳ꦺꦤ ꦩꦸꦑꦺꦤ ꦧ꧀ꦪꦴꦲꦫꦶꦠꦧ꧀ꦧꦁ. ꦤ ꦥꦶꦟ꧀ꦝꦸꦏ꧀ꦑꦺꦥꦏꦁ ꦨꦸꦚ꧀ꦗꦶꦠꦧ꧀ꦧꦁ. ꦤ ꦏꦧꦭ꦳ꦴꦮꦕ꧀ꦖꦺꦢꦏꦁ ꦨꦸꦚ꧀ꦗꦶꦠꦧ꧀ꦧꦁ. ꦤ ꦄꦮꦒꦟ꧀ꦝꦏꦴꦫꦏꦁ ꦨꦸꦚ꧀ꦗꦶꦠꦧ꧀ꦧꦁ. ꦤ ꦲꦠ꧀ꦡꦤꦶꦢ꧀ꦣꦸꦤꦏꦁ ꦨꦸꦚ꧀ꦗꦶꦠꦧ꧀ꦧꦁ. ꦤ ꦱꦶꦠ꧀ꦡꦴꦮꦏꦴꦫꦏꦁ ꦨꦸꦚ꧀ꦗꦶꦠꦧ꧀ꦧꦁ. ꦤ ꦗꦶꦮ꧀ꦲꦴꦤꦶꦕ꧀ꦖꦴꦫꦏꦁ ꦨꦸꦚ꧀ꦗꦶꦠꦧ꧀ꦧꦁ. ꦤ ꦕꦥꦸꦕꦥꦸꦏꦴꦫꦏꦁ ꦨꦸꦚ꧀ꦗꦶꦠꦧ꧀ꦧꦁ. ꦤ ꦱꦸꦫꦸꦱꦸꦫꦸꦏꦴꦫꦏꦁ ꦨꦸꦚ꧀ꦗꦶꦠꦧ꧀ꦧꦁ. ꦤ ꦲꦠ꧀ꦡꦤꦶꦭ꧀ꦭꦺꦲꦏꦁ ꦨꦸꦚ꧀ꦗꦶꦠꦧ꧀ꦧꦁ. ꦤ ꦥꦠ꧀ꦠꦤꦶꦭ꧀ꦭꦺꦲꦏꦁ ꦨꦸꦚ꧀ꦗꦶꦠꦧ꧀ꦧꦁ. ꦤ ꦎꦛ꧀ꦜꦤꦶꦭ꧀ꦭꦺꦲꦏꦁ ꦨꦸꦚ꧀ꦗꦶꦠꦧ꧀ꦧꦁ.

‘‘ꦤ ꦱꦴꦩꦶꦱꦺꦤ ꦲꦠ꧀ꦡꦺꦤ ꦥꦴꦤꦷꦪꦡꦴꦭꦏꦺꦴ ꦥꦛꦶꦒ꧀ꦒꦲꦺꦠꦧ꧀ꦧꦺꦴ. ꦤ ꦠꦴꦮ ꦡꦺꦫꦺꦤ ꦈꦢꦏꦁ ꦥꦛꦶꦒ꧀ꦒꦲꦺꦠꦧ꧀ꦧꦁ ꦪꦴꦮ ꦤ ꦱꦧ꧀ꦧꦺꦮ ꦨꦸꦠ꧀ꦠꦴꦮꦶꦤꦺꦴ ꦲꦺꦴꦤ꧀ꦠꦶ. ꦈꦢꦏꦺ ꦢꦶꦪ꧀ꦪꦩꦴꦤꦺ ꦈꦨꦺꦴꦲꦶ ꦲꦠ꧀ꦡꦺꦲꦶ ꦥꦠ꧀ꦠꦁ ꦥꦛꦶꦒ꧀ꦒꦲꦺꦠ꧀ꦮꦴ ꦈꦢꦏꦁ ꦥꦛꦶꦒ꧀ꦒꦲꦺꦠꦧ꧀ꦧꦁ. ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ ꦥꦠ꧀ꦠꦺꦴ ꦣꦺꦴꦮꦶꦠꦧ꧀ꦧꦺꦴ. ꦱꦕꦺ ꦈꦢꦏꦥ꧀ꦥꦛꦶꦒ꧀ꦒꦴꦲꦏꦺꦴ ꦲꦺꦴꦠꦶ, ꦤꦷꦕꦁ ꦏꦠ꧀ꦮꦴ ꦈꦢꦏꦥ꧀ꦥꦛꦶꦒ꧀ꦒꦲꦺ ꦈꦢꦏꦁ ꦄꦴꦱꦶꦚ꧀ꦕꦶꦠꦧ꧀ꦧꦁ – ꦩꦴ ꦈꦢꦏꦥ꧀ꦥꦛꦶꦒ꧀ꦒꦴꦲꦏꦺꦴ ꦈꦢꦏꦺꦤ ꦎꦱꦶꦚ꧀ꦕꦶ, ꦩꦴ ꦱꦴꦩꦤ꧀ꦠꦴ ꦨꦶꦏ꧀ꦑꦹ ꦈꦢꦏꦺꦤ ꦎꦱꦶꦚ꧀ꦕꦶꦁꦱꦸ, ꦩꦴ ꦱꦔ꧀ꦓꦴꦛꦶ ꦈꦢꦏꦺꦤ ꦎꦱꦶꦚ꧀ꦕꦷꦠꦶ. ꦱꦕꦺ ꦈꦢꦏꦥ꧀ꦥꦛꦶꦒ꧀ꦒꦴꦲꦏꦺꦴ ꦤ ꦲꦺꦴꦠꦶ, ꦤꦷꦕꦁ ꦏꦠ꧀ꦮꦴ ꦖꦩꦴꦪ ꦈꦢꦏꦁ ꦄꦴꦱꦶꦚ꧀ꦕꦶꦠꦧ꧀ꦧꦁ – ꦩꦴ ꦱꦴꦩꦤ꧀ꦠꦴ ꦨꦶꦏ꧀ꦑꦹ ꦈꦢꦏꦺꦤ ꦎꦱꦶꦚ꧀ꦕꦶꦁꦱꦸ, ꦩꦴ ꦱꦔ꧀ꦓꦴꦛꦶ ꦈꦢꦏꦺꦤ ꦎꦱꦶꦚ꧀ꦕꦷꦠꦶ. ꦤ ꦱꦱꦶꦠ꧀ꦡꦏꦁ ꦥꦠ꧀ꦠꦣꦺꦴꦮꦤꦁ ꦄꦤ꧀ꦠꦫꦓꦫꦺ ꦖꦝ꧀ꦝꦺꦠꦧ꧀ꦧꦁ.

‘‘ꦤꦶꦮꦠ꧀ꦠꦤ꧀ꦠꦺꦤ ꦤꦮꦏꦺꦲꦶ ꦨꦶꦏ꧀ꦑꦹꦲꦶ ꦥꦜꦩꦠꦫꦁ ꦤꦶꦮꦠ꧀ꦠꦶꦠꦧ꧀ꦧꦁ. ꦥꦕ꧀ꦖꦴ ꦡꦺꦫꦺꦲꦶ ꦱꦸꦥ꧀ꦥꦛꦶꦕ꧀ꦖꦤ꧀ꦤꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦱꦸꦱꦁꦮꦸꦠꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦎꦏ꧀ꦑꦶꦠ꧀ꦠꦕꦏ꧀ꦑꦸꦤꦴ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦈꦏ꧀ꦑꦶꦠ꧀ꦠꦏꦴꦪ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦈꦗ꧀ꦗꦒ꧀ꦓꦶꦏꦴꦪ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦄꦥ꧀ꦥꦱꦢ꧀ꦢꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦏꦴꦪꦥ꧀ꦥꦕꦴꦭꦏꦁ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦧꦴꦲꦸꦥ꧀ꦥꦕꦴꦭꦏꦁ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦱꦷꦱꦥ꧀ꦥꦕꦴꦭꦏꦁ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦑꦩ꧀ꦨꦏꦠꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦎꦒꦸꦟ꧀ꦜꦶꦠꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦈꦏ꧀ꦏꦸꦛꦶꦏꦴꦪ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦆꦢꦁ ꦑꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦨꦠ꧀ꦠꦒ꧀ꦒꦮꦠ꧀ꦠꦁ ꦪꦡꦴ ꦨꦶꦏ꧀ꦑꦹꦲꦶ ꦨꦠ꧀ꦠꦒ꧀ꦒꦺ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧ’’ꦤ꧀ꦠꦶ.

ꦥꦜꦩꦨꦴꦟꦮꦴꦫꦺꦴ ꦤꦶꦛ꧀ꦜꦶꦠꦺꦴ.

꧖. ꦥꦶꦟ꧀ꦝꦕꦴꦫꦶꦏꦮꦠ꧀ꦠꦏꦡꦴ

꧓꧖꧕. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦥꦶꦟ꧀ꦝꦕꦴꦫꦶꦏꦴ ꦨꦶꦏ꧀ꦑꦹ ꦢꦸꦤ꧀ꦤꦶꦮꦠ꧀ꦡꦴ ꦢꦸꦥ꧀ꦥꦴꦫꦸꦠꦴ ꦄꦤꦴꦏꦥ꧀ꦥꦱꦩ꧀ꦥꦤ꧀ꦤꦴ ꦥꦶꦟ꧀ꦝꦴꦪ ꦕꦫꦤ꧀ꦠꦶ, ꦄꦱꦭ꧀ꦭꦏ꧀ꦑꦺꦠ꧀ꦮꦴꦥꦶ ꦤꦶꦮꦺꦱꦤꦁ ꦥꦮꦶꦱꦤ꧀ꦠꦶ, ꦄꦱꦭ꧀ꦭꦏ꧀ꦑꦺꦠ꧀ꦮꦴꦥꦶ ꦤꦶꦏ꧀ꦑꦩꦤ꧀ꦠꦶ, ꦄꦠꦶꦱꦲꦱꦴꦥꦶ ꦥꦮꦶꦱꦤ꧀ꦠꦶ, ꦄꦠꦶꦱꦲꦱꦴꦥꦶ ꦤꦶꦏ꧀ꦑꦩꦤ꧀ꦠꦶ, ꦄꦠꦶꦢꦹꦫꦺꦥꦶ ꦠꦶꦛ꧀ꦜꦤ꧀ꦠꦶ, ꦄꦕ꧀ꦕꦴꦱꦤ꧀ꦤꦺꦥꦶ ꦠꦶꦛ꧀ꦜꦤ꧀ꦠꦶ, ꦄꦠꦶꦕꦶꦫꦩ꧀ꦥꦶ ꦠꦶꦛ꧀ꦜꦤ꧀ꦠꦶ, ꦄꦠꦶꦭꦲꦸꦩ꧀ꦥꦶ ꦤꦶꦮꦠ꧀ꦠꦤ꧀ꦠꦶ. ꦄꦚ꧀ꦚꦠꦫꦺꦴꦥꦶ ꦥꦶꦟ꧀ꦝꦕꦴꦫꦶꦏꦺꦴ ꦨꦶꦏ꧀ꦑꦸ ꦄꦱꦭ꧀ꦭꦏ꧀ꦑꦺꦠ꧀ꦮꦴ ꦤꦶꦮꦺꦱꦤꦁ ꦥꦴꦮꦶꦱꦶ. ꦱꦺꦴ ꦕ ꦢ꧀ꦮꦴꦫꦁ ꦩꦚ꧀ꦚꦩꦴꦤꦺꦴ ꦄꦚ꧀ꦚꦠꦫꦁ ꦎꦮꦫꦏꦁ ꦥꦴꦮꦶꦱꦶ. ꦠꦱ꧀ꦩꦶꦩ꧀ꦥꦶ ꦎꦮꦫꦏꦺ ꦆꦠ꧀ꦡꦷ ꦤꦒ꧀ꦒꦴ ꦈꦠ꧀ꦠꦴꦤꦴ ꦤꦶꦥꦤ꧀ꦤꦴ ꦲꦺꦴꦠꦶ. ꦄꦢ꧀ꦢꦱꦴ ꦑꦺꦴ ꦱꦺꦴ ꦨꦶꦏ꧀ꦑꦸ ꦠꦁ ꦆꦠ꧀ꦡꦶꦁ ꦤꦒ꧀ꦒꦁ ꦈꦠ꧀ꦠꦴꦤꦁ ꦤꦶꦥꦤ꧀ꦤꦁ. ꦢꦶꦱ꧀ꦮꦴꦤ – ‘‘ꦤꦪꦶꦢꦁ ꦢ꧀ꦮꦴꦫꦁ, ꦎꦮꦫꦏꦁ ꦆꦢ’’ꦤ꧀ꦠꦶ ꦠꦩ꧀ꦲꦴ ꦎꦮꦫꦏꦴ ꦤꦶꦏ꧀ꦑꦩꦶ. ꦄꦢ꧀ꦢꦱꦴ ꦑꦺꦴ ꦠꦱ꧀ꦱꦴ ꦆꦠ꧀ꦡꦶꦪꦴ ꦱꦴꦩꦶꦏꦺꦴ ꦠꦁ ꦆꦠ꧀ꦡꦶꦁ ꦤꦒ꧀ꦒꦁ ꦈꦠ꧀ꦠꦴꦤꦁ ꦤꦶꦥꦤ꧀ꦤꦁ. ꦢꦶꦱ꧀ꦮꦴꦤ – ‘‘ꦆꦩꦶꦤꦴ ꦩꦺ ꦨꦶꦏ꧀ꦑꦸꦤꦴ ꦥꦗꦴꦥꦠꦷ ꦢꦹꦱꦶꦠꦴ’’ꦠꦶ ꦠꦁ ꦨꦶꦏ꧀ꦑꦸꦁ ꦒꦲꦺꦠ꧀ꦮꦴ ꦄꦴꦏꦺꦴꦛꦺꦱꦶ. ꦄꦡ ꦑꦺꦴ ꦱꦴ ꦆꦠ꧀ꦡꦷ ꦠꦺꦤ ꦱꦢ꧀ꦢꦺꦤ ꦥꦛꦶꦧꦸꦗ꧀ꦙꦶꦠ꧀ꦮꦴ ꦠꦁ ꦥꦸꦫꦶꦱꦁ ꦌꦠꦢꦮꦺꦴꦕ – ‘‘ꦏꦶꦱ꧀ꦱ ꦠ꧀ꦮꦁ, ꦄꦪ꧀ꦪ, ꦆꦩꦁ ꦨꦶꦏ꧀ꦑꦸꦁ ꦄꦴꦏꦺꦴꦛꦺꦱꦷ’’ꦠꦶ? ‘‘ꦆꦩꦶꦤꦴꦱꦶ ꦠ꧀ꦮꦁ ꦨꦶꦏ꧀ꦑꦸꦤꦴ ꦢꦹꦱꦶꦠꦴ’’ꦠꦶ? ‘‘ꦤꦴꦲꦁ, ꦄꦪ꧀ꦪ, ꦆꦩꦶꦤꦴ ꦨꦶꦏ꧀ꦑꦸꦤꦴ ꦢꦹꦱꦶꦠꦴ; ꦄꦏꦴꦫꦏꦺꦴ ꦱꦺꦴ ꦨꦶꦏ꧀ꦑꦹ’’ꦠꦶ ꦠꦁ ꦨꦶꦏ꧀ꦑꦸꦁ ꦩꦸꦚ꧀ꦕꦴꦥꦺꦱꦶ. ꦄꦡ ꦑꦺꦴ ꦱꦺꦴ ꦨꦶꦏ꧀ꦑꦸ ꦄꦴꦫꦴꦩꦁ ꦒꦤ꧀ꦠ꧀ꦮꦴ ꦨꦶꦏ꧀ꦑꦹꦤꦁ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦶ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦥꦶꦟ꧀ꦝꦕꦴꦫꦶꦏꦴ ꦨꦶꦏ꧀ꦑꦹ ꦢꦸꦤ꧀ꦤꦶꦮꦠ꧀ꦡꦴ ꦢꦸꦥ꧀ꦥꦴꦫꦸꦠꦴ ꦄꦤꦴꦏꦥ꧀ꦥꦱꦩ꧀ꦥꦤ꧀ꦤꦴ ꦥꦶꦟ꧀ꦝꦴꦪ ꦕꦫꦶꦱ꧀ꦱꦤ꧀ꦠꦶ, ꦄꦱꦭ꧀ꦭꦏ꧀ꦑꦺꦠ꧀ꦮꦴꦥꦶ ꦤꦶꦮꦺꦱꦤꦁ ꦥꦮꦶꦱꦶꦱ꧀ꦱꦤ꧀ꦠꦶ, ꦄꦱꦭ꧀ꦭꦏ꧀ꦑꦺꦠ꧀ꦮꦴꦥꦶ ꦤꦶꦏ꧀ꦑꦩꦶꦱ꧀ꦱꦤ꧀ꦠꦶ, ꦄꦠꦶꦱꦲꦱꦴꦥꦶ ꦥꦮꦶꦱꦶꦱ꧀ꦱꦤ꧀ꦠꦶ, ꦄꦠꦶꦱꦲꦱꦴꦥꦶ ꦤꦶꦏ꧀ꦑꦩꦶꦱ꧀ꦱꦤ꧀ꦠꦶ, ꦄꦠꦶꦢꦹꦫꦺꦥꦶ ꦠꦶꦛ꧀ꦜꦶꦱ꧀ꦱꦤ꧀ꦠꦶ, ꦄꦕ꧀ꦕꦴꦱꦤ꧀ꦤꦺꦥꦶ ꦠꦶꦛ꧀ꦜꦶꦱ꧀ꦱꦤ꧀ꦠꦶ, ꦄꦠꦶꦕꦶꦫꦩ꧀ꦥꦶ ꦠꦶꦛ꧀ꦜꦶꦱ꧀ꦱꦤ꧀ꦠꦶ, ꦄꦠꦶꦭꦲꦸꦩ꧀ꦥꦶ ꦤꦶꦮꦠ꧀ꦠꦶꦱ꧀ꦱꦤ꧀ꦠꦷ’’ꦠꦶ! ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ…ꦥꦺ… ꦱꦕ꧀ꦕꦁ ꦨꦒꦮꦴꦠꦶ…ꦥꦺ… ꦮꦶꦒꦫꦲꦶꦠ꧀ꦮꦴ…ꦥꦺ… ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ –

꧓꧖꧖. ‘‘ꦠꦺꦤ ꦲꦶ, ꦨꦶꦏ꧀ꦑꦮꦺ, ꦥꦶꦟ꧀ꦝꦕꦴꦫꦶꦏꦴꦤꦁ ꦨꦶꦏ꧀ꦑꦹꦤꦁ ꦮꦠ꧀ꦠꦁ ꦥꦚ꧀ꦚꦴꦥꦺꦱ꧀ꦱꦴꦩꦶ ꦪꦡꦴ ꦥꦶꦟ꧀ꦝꦕꦴꦫꦶꦏꦺꦲꦶ ꦨꦶꦏ꧀ꦑꦹꦲꦶ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. ꦥꦶꦟ꧀ꦝꦕꦴꦫꦶꦏꦺꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦴ – ‘ꦆꦢꦴꦤꦶ ꦒꦴꦩꦁ ꦥꦮꦶꦱꦶꦱ꧀ꦱꦴꦩꦷ’ꦠꦶ ꦠꦶꦩꦟ꧀ꦝꦭꦁ ꦥꦛꦶꦕ꧀ꦖꦴꦢꦺꦤ꧀ꦠꦺꦤ ꦥꦫꦶꦩꦟ꧀ꦝꦭꦁ ꦤꦶꦮꦴꦱꦺꦠ꧀ꦮꦴ ꦏꦴꦪꦧꦤ꧀ꦣꦤꦁ ꦧꦤ꧀ꦣꦶꦠ꧀ꦮꦴ ꦱꦒꦸꦟꦁ ꦏꦠ꧀ꦮꦴ ꦱꦔ꧀ꦓꦴꦛꦶꦪꦺꦴ ꦥꦴꦫꦸꦥꦶꦠ꧀ꦮꦴ ꦒꦟ꧀ꦜꦶꦏꦁ ꦥꦛꦶꦩꦸꦚ꧀ꦕꦶꦠ꧀ꦮꦴ ꦣꦺꦴꦮꦶꦠ꧀ꦮꦴ ꦥꦠ꧀ꦠꦁ ꦒꦲꦺꦠ꧀ꦮꦴ ꦱꦴꦣꦸꦏꦁ ꦄꦠꦫꦩꦴꦤꦺꦤ ꦒꦴꦩꦺꦴ ꦥꦮꦶꦱꦶꦠꦧ꧀ꦧꦺꦴ.

‘‘ꦤꦶꦮꦺꦱꦤꦁ ꦥꦮꦶꦱꦤ꧀ꦠꦺꦤ ꦱꦭ꧀ꦭꦏ꧀ꦑꦺꦠꦧ꧀ꦧꦁ – ‘ꦆꦩꦶꦤꦴ ꦥꦮꦶꦱꦶꦱ꧀ꦱꦴꦩꦶ, ꦆꦩꦶꦤꦴ ꦤꦶꦏ꧀ꦑꦩꦶꦱ꧀ꦱꦴꦩꦷ’ꦠꦶ. ꦤꦴꦠꦶꦱꦲꦱꦴ ꦥꦮꦶꦱꦶꦠꦧ꧀ꦧꦁ. ꦤꦴꦠꦶꦱꦲꦱꦴ ꦤꦶꦏ꧀ꦑꦩꦶꦠꦧ꧀ꦧꦁ. ꦤꦴꦠꦶꦢꦹꦫꦺ ꦜꦴꦠꦧ꧀ꦧꦁ. ꦤꦴꦕ꧀ꦕꦴꦱꦤ꧀ꦤꦺ ꦜꦴꦠꦧ꧀ꦧꦁ. ꦤꦴꦠꦶꦕꦶꦫꦁ ꦜꦴꦠꦧ꧀ꦧꦁ. ꦤꦴꦠꦶꦭꦲꦸꦁ ꦤꦶꦮꦠ꧀ꦠꦶꦠꦧ꧀ꦧꦁ. ꦜꦶꦠꦏꦺꦤ ꦱꦭ꧀ꦭꦏ꧀ꦑꦺꦠꦧ꧀ꦧꦁ – ‘ꦨꦶꦏ꧀ꦑꦁ ꦢꦴꦠꦸꦏꦴꦩꦴ ꦮꦴ ꦄꦢꦴꦠꦸꦏꦴꦩꦴ ꦮꦴ’ꦠꦶ. ꦱꦕꦺ ꦏꦩ꧀ꦩꦁ ꦮꦴ ꦤꦶꦏ꧀ꦑꦶꦥꦠꦶ, ꦄꦴꦱꦤꦴ ꦮꦴ ꦮꦸꦛ꧀ꦜꦴꦠꦶ, ꦏꦛꦕ꧀ꦖꦸꦁ ꦮꦴ ꦥꦫꦴꦩꦱꦠꦶ, ꦨꦴꦗꦤꦁ ꦮꦴ ꦥꦫꦴꦩꦱꦠꦶ, ꦜꦥꦺꦠꦶ [ꦜꦴꦥꦺꦠꦶ (ꦏ.)] ꦮꦴ – ꦢꦴꦠꦸꦏꦴꦩꦱ꧀ꦱꦴꦠꦶ [ꦢꦴꦠꦸꦏꦴꦩꦶꦪꦴꦠꦶ (ꦱ꧀ꦪꦴ.), ꦢꦴꦠꦸꦏꦴꦩꦴ ꦮꦶꦪꦴꦠꦶ (ꦱꦷ.)] ꦜꦴꦠꦧ꧀ꦧꦁ. ꦨꦶꦏ꧀ꦑꦴꦪ ꦢꦶꦪ꧀ꦪꦩꦴꦤꦴꦪ ꦮꦴꦩꦺꦤ ꦲꦠ꧀ꦡꦺꦤ ꦱꦔ꧀ꦓꦴꦛꦶꦁ ꦈꦕ꧀ꦕꦴꦫꦺꦠ꧀ꦮꦴ ꦢꦏ꧀ꦑꦶꦟꦺꦤ ꦲꦠ꧀ꦡꦺꦤ ꦥꦠ꧀ꦠꦁ ꦥꦟꦴꦩꦺꦠ꧀ꦮꦴ ꦈꦨꦺꦴꦲꦶ ꦲꦠ꧀ꦡꦺꦲꦶ ꦥꦠ꧀ꦠꦁ ꦥꦛꦶꦒ꧀ꦒꦲꦺꦠ꧀ꦮꦴ ꦨꦶꦏ꧀ꦑꦴ ꦥꦛꦶꦒ꧀ꦒꦲꦺꦠꦧ꧀ꦧꦴ. ꦤ ꦕ ꦨꦶꦏ꧀ꦑꦴꦢꦴꦪꦶꦏꦴꦪ ꦩꦸꦑꦁ ꦈꦭ꧀ꦭꦺꦴꦏꦺꦠꦧ꧀ꦧꦁ [ꦎꦭꦺꦴꦏꦺꦠꦧ꧀ꦧꦁ (ꦱ꧀ꦪꦴ.)]. ꦱꦭ꧀ꦭꦏ꧀ꦑꦺꦠꦧ꧀ꦧꦁ – ‘ꦱꦹꦥꦁ ꦢꦴꦠꦸꦏꦴꦩꦴ ꦮꦴ ꦄꦢꦴꦠꦸꦏꦴꦩꦴ ꦮꦴ’ꦠꦶ. ꦱꦕꦺ ꦏꦛꦕ꧀ꦖꦸꦁ ꦮꦴ ꦥꦫꦴꦩꦱꦠꦶ, ꦨꦴꦗꦤꦁ ꦮꦴ ꦥꦫꦴꦩꦱꦠꦶ, ꦜꦥꦺꦠꦶ ꦮꦴ – ꦢꦴꦠꦸꦏꦴꦩꦱ꧀ꦱꦴꦠꦶ ꦜꦴꦠꦧ꧀ꦧꦁ. ꦨꦶꦏ꧀ꦑꦴꦪ ꦢꦶꦤ꧀ꦤꦴꦪ ꦱꦔ꧀ꦓꦴꦛꦶꦪꦴ ꦥꦠ꧀ꦠꦁ ꦥꦛꦶꦕ꧀ꦖꦴꦢꦺꦠ꧀ꦮꦴ ꦱꦴꦣꦸꦏꦁ ꦄꦠꦫꦩꦴꦤꦺꦤ ꦤꦶꦮꦠ꧀ꦠꦶꦠꦧ꧀ꦧꦁ.

‘‘ꦱꦸꦥ꧀ꦥꦛꦶꦕ꧀ꦖꦤ꧀ꦤꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦱꦸꦱꦁꦮꦸꦠꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦎꦏ꧀ꦑꦶꦠ꧀ꦠꦕꦏ꧀ꦑꦸꦤꦴ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦈꦏ꧀ꦑꦶꦠ꧀ꦠꦏꦴꦪ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦈꦗ꧀ꦗꦒ꧀ꦓꦶꦏꦴꦪ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦄꦥ꧀ꦥꦱꦢ꧀ꦢꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦏꦴꦪꦥ꧀ꦥꦕꦴꦭꦏꦁ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦧꦴꦲꦸꦥ꧀ꦥꦕꦴꦭꦏꦁ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦱꦷꦱꦥ꧀ꦥꦕꦴꦭꦏꦁ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦑꦩ꧀ꦨꦏꦠꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦎꦒꦸꦟ꧀ꦜꦶꦠꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦈꦏ꧀ꦏꦸꦛꦶꦏꦴꦪ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦪꦺꦴ ꦥꦜꦩꦁ ꦒꦴꦩꦠꦺꦴ ꦥꦶꦟ꧀ꦝꦴꦪ ꦥꦛꦶꦏ꧀ꦏꦩꦠꦶ, ꦠꦺꦤ ꦄꦴꦱꦤꦁ ꦥꦚ꧀ꦚꦥꦺꦠꦧ꧀ꦧꦁ, ꦥꦴꦢꦺꦴꦢꦏꦁ ꦥꦴꦢꦥꦷꦜꦁ ꦥꦴꦢꦏꦡꦭꦶꦏꦁ ꦈꦥꦤꦶꦏ꧀ꦑꦶꦥꦶꦠꦧ꧀ꦧꦁ, ꦄꦮꦏ꧀ꦏꦴꦫꦥꦴꦠꦶ ꦣꦺꦴꦮꦶꦠ꧀ꦮꦴ ꦈꦥꦛ꧀ꦜꦴꦥꦺꦠꦧ꧀ꦧꦴ, ꦥꦴꦤꦷꦪꦁ ꦥꦫꦶꦨꦺꦴꦗꦤꦷꦪꦁ ꦈꦥꦛ꧀ꦜꦴꦥꦺꦠꦧ꧀ꦧꦁ. ꦪꦺꦴ ꦥꦕ꧀ꦖꦴ ꦒꦴꦩꦠꦺꦴ ꦥꦶꦟ꧀ꦝꦴꦪ ꦥꦛꦶꦏ꧀ꦏꦩꦠꦶ, ꦱꦕꦺ ꦲꦺꦴꦠꦶ ꦨꦸꦠ꧀ꦠꦴꦮꦱꦺꦱꦺꦴ, ꦱꦕꦺ ꦄꦴꦏꦔ꧀ꦑꦠꦶ, ꦨꦸꦚ꧀ꦗꦶꦠꦧ꧀ꦧꦁ. ꦤꦺꦴ ꦕꦺ ꦄꦴꦏꦔ꧀ꦑꦠꦶ, ꦄꦥ꧀ꦥꦲꦫꦶꦠꦺ ꦮꦴ ꦖꦝ꧀ꦝꦺꦠꦧ꧀ꦧꦁ, ꦄꦥ꧀ꦥꦴꦟꦏꦺ ꦮꦴ ꦈꦢꦏꦺ ꦎꦥꦶꦭꦴꦥꦺꦠꦧ꧀ꦧꦁ. ꦠꦺꦤ ꦄꦴꦱꦤꦁ ꦈꦢ꧀ꦣꦫꦶꦠꦧ꧀ꦧꦁ, ꦥꦴꦢꦺꦴꦢꦏꦁ ꦥꦴꦢꦥꦷꦜꦁ ꦥꦴꦢꦏꦡꦭꦶꦏꦁ ꦥꦛꦶꦱꦴꦩꦺꦠꦧ꧀ꦧꦁ, ꦄꦮꦏ꧀ꦏꦴꦫꦥꦴꦠꦶ ꦣꦺꦴꦮꦶꦠ꧀ꦮꦴ ꦥꦛꦶꦱꦴꦩꦺꦠꦧ꧀ꦧꦴ, ꦥꦴꦤꦷꦪꦁ ꦥꦫꦶꦨꦺꦴꦗꦤꦷꦪꦁ ꦥꦛꦶꦱꦴꦩꦺꦠꦧ꧀ꦧꦁ, ꦨꦠ꧀ꦠꦒ꧀ꦒꦁ ꦱꦩ꧀ꦩꦗ꧀ꦗꦶꦠꦧ꧀ꦧꦁ. ꦪꦺꦴ ꦥꦱ꧀ꦱꦠꦶ ꦥꦴꦤꦷꦪꦓꦛꦁ ꦮꦴ ꦥꦫꦶꦨꦺꦴꦗꦤꦷꦪꦓꦛꦁ ꦮꦴ ꦮꦕ꧀ꦕꦓꦛꦁ ꦮꦴ ꦫꦶꦠ꧀ꦠꦁ ꦠꦸꦕ꧀ꦖꦁ ꦠꦺꦤ ꦈꦥꦛ꧀ꦜꦴꦥꦺꦠꦧ꧀ꦧꦁ. ꦱꦕꦱ꧀ꦱ ꦲꦺꦴꦠꦶ ꦄꦮꦶꦱꦪ꧀ꦲꦁ, ꦲꦠ꧀ꦡꦮꦶꦏꦴꦫꦺꦤ ꦢꦸꦠꦶꦪꦁ ꦄꦴꦩꦤ꧀ꦠꦺꦠ꧀ꦮꦴ ꦲꦠ꧀ꦡꦮꦶꦭꦔ꧀ꦓꦏꦺꦤ ꦈꦥꦛ꧀ꦜꦴꦥꦺꦠꦧ꧀ꦧꦁ, ꦤ ꦕ ꦠꦥ꧀ꦥꦕ꧀ꦕꦪꦴ ꦮꦴꦕꦴ ꦨꦶꦤ꧀ꦢꦶꦠꦧ꧀ꦧꦴ. ꦆꦢꦁ ꦑꦺꦴ, ꦨꦶꦏ꧀ꦑꦮꦺ, ꦥꦶꦟ꧀ꦝꦕꦴꦫꦶꦏꦴꦤꦁ ꦨꦶꦏ꧀ꦑꦹꦤꦁ ꦮꦠ꧀ꦠꦁ ꦪꦡꦴ ꦥꦶꦟ꧀ꦝꦕꦴꦫꦶꦏꦺꦲꦶ ꦨꦶꦏ꧀ꦑꦹꦲꦶ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧ’’ꦤ꧀ꦠꦶ.

꧗. ꦄꦴꦫꦚ꧀ꦚꦶꦏꦮꦠ꧀ꦠꦏꦡꦴ

꧓꧖꧗. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦩ꧀ꦧꦲꦸꦭꦴ ꦨꦶꦏ꧀ꦑꦹ ꦄꦫꦚ꧀ꦚꦺ ꦮꦶꦲꦫꦤ꧀ꦠꦶ. ꦠꦺ ꦤꦺꦮ ꦥꦴꦤꦷꦪꦁ ꦈꦥꦛ꧀ꦜꦴꦥꦺꦤ꧀ꦠꦶ, ꦤ ꦥꦫꦶꦨꦺꦴꦗꦤꦷꦪꦁ ꦈꦥꦛ꧀ꦜꦴꦥꦺꦤ꧀ꦠꦶ, ꦤ ꦄꦒ꧀ꦒꦶꦁ ꦈꦥꦛ꧀ꦜꦴꦥꦺꦤ꧀ꦠꦶ, ꦤ ꦄꦫꦟꦶꦱꦲꦶꦠꦁ ꦈꦥꦛ꧀ꦜꦴꦥꦺꦤ꧀ꦠꦶ, ꦤ ꦤꦏ꧀ꦑꦠ꧀ꦠꦥꦢꦴꦤꦶ ꦗꦴꦤꦤ꧀ꦠꦶ, ꦤ ꦢꦶꦱꦴꦨꦴꦒꦁ ꦗꦴꦤꦤ꧀ꦠꦶ. ꦕꦺꦴꦫꦴ ꦠꦠ꧀ꦡ ꦒꦤ꧀ꦠ꧀ꦮꦴ ꦠꦺ ꦨꦶꦏ꧀ꦑꦹ ꦌꦠꦢꦮꦺꦴꦕꦸꦁ – ‘‘ꦄꦠ꧀ꦡꦶ, ꦨꦤ꧀ꦠꦺ, ꦥꦴꦤꦷꦪ’’ꦤ꧀ꦠꦶ? ‘‘ꦤꦠ꧀ꦡꦴꦮꦸꦱꦺꦴ’’ꦠꦶ. ‘‘ꦄꦠ꧀ꦡꦶ, ꦨꦤ꧀ꦠꦺ, ꦥꦫꦶꦨꦺꦴꦗꦤꦷꦪ’’ꦤ꧀ꦠꦶ? ‘‘ꦤꦠ꧀ꦡꦴꦮꦸꦱꦺꦴ’’ꦠꦶ. ‘‘ꦄꦠ꧀ꦡꦶ, ꦨꦤ꧀ꦠꦺ, ꦄꦒ꧀ꦒꦷ’’ꦠꦶ? ‘‘ꦤꦠ꧀ꦡꦴꦮꦸꦱꦺꦴ’’ꦠꦶ. ‘‘ꦄꦠ꧀ꦡꦶ, ꦨꦤ꧀ꦠꦺ, ꦄꦫꦟꦶꦱꦲꦶꦠ’’ꦤ꧀ꦠꦶ? ‘‘ꦤꦠ꧀ꦡꦴꦮꦸꦱꦺꦴ’’ꦠꦶ. ( ) [(ꦄꦠ꧀ꦡꦶ ꦨꦤ꧀ꦠꦺ ꦤꦏ꧀ꦑꦠ꧀ꦠꦥꦢꦴꦤꦷꦠꦶ, ꦤ ꦗꦴꦤꦴꦩ ꦄꦴꦮꦸꦱꦺꦴꦠꦶ, ꦄꦠ꧀ꦡꦶ ꦨꦤ꧀ꦠꦺ ꦢꦶꦱꦴꦨꦴꦒꦤ꧀ꦠꦶ, ꦤ ꦗꦴꦤꦴꦩ ꦄꦴꦮꦸꦱꦺꦴꦠꦶ.) ꦱꦷ. ꦮꦶꦩꦠꦶꦛꦷꦏꦴꦪ ꦥꦤ ꦱꦩꦺꦠꦶ] ‘‘ꦏꦺꦤꦗ꧀ꦗ, ꦨꦤ꧀ꦠꦺ, ꦪꦸꦠ꧀ꦠ’’ꦤ꧀ꦠꦶ? ‘‘ꦤ ꦑꦺꦴ ꦩꦪꦁ, ꦄꦴꦮꦸꦱꦺꦴ, ꦗꦴꦤꦴꦩꦴ’’ꦠꦶ. ‘‘ꦏꦠꦩꦴꦪꦁ, ꦨꦤ꧀ꦠꦺ, ꦢꦶꦱꦴ’’ꦠꦶ? ‘‘ꦤ ꦑꦺꦴ ꦩꦪꦁ, ꦄꦴꦮꦸꦱꦺꦴ, ꦗꦴꦤꦴꦩꦴ’’ꦠꦶ. ꦄꦡ ꦑꦺꦴ ꦠꦺ ꦕꦺꦴꦫꦴ – ‘ꦤꦺꦮꦶꦩꦺꦱꦁ ꦥꦴꦤꦷꦪꦁ ꦄꦠ꧀ꦡꦶ, ꦤ ꦥꦫꦶꦨꦺꦴꦗꦤꦷꦪꦁ ꦄꦠ꧀ꦡꦶ, ꦤ ꦄꦒ꧀ꦒꦶ ꦄꦠ꧀ꦡꦶ, ꦤ ꦄꦫꦟꦶꦱꦲꦶꦠꦁ ꦄꦠ꧀ꦡꦶ, ꦤ ꦤꦏ꧀ꦑꦠ꧀ꦠꦥꦢꦴꦤꦶ ꦗꦴꦤꦤ꧀ꦠꦶ, ꦤ ꦢꦶꦱꦴꦨꦴꦒꦁ ꦗꦴꦤꦤ꧀ꦠꦶ; ꦕꦺꦴꦫꦴ ꦆꦩꦺ, ꦤꦪꦶꦩꦺ ꦨꦶꦏ꧀ꦑꦹ’ꦠꦶ – ꦄꦴꦏꦺꦴꦛꦺꦠ꧀ꦮꦴ ꦥꦏ꧀ꦏꦩꦶꦁꦱꦸ. ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦨꦶꦏ꧀ꦑꦹꦤꦁ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ. ꦨꦶꦏ꧀ꦑꦹ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ. ꦄꦡ ꦑꦺꦴ ꦨꦒꦮꦴ ꦌꦠꦱ꧀ꦩꦶꦁ ꦤꦶꦢꦴꦤꦺ ꦌꦠꦱ꧀ꦩꦶꦁ ꦥꦏꦫꦟꦺ ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ –

꧓꧖꧘. ‘‘ꦠꦺꦤ ꦲꦶ, ꦨꦶꦏ꧀ꦑꦮꦺ, ꦄꦴꦫꦚ꧀ꦚꦶꦏꦴꦤꦁ ꦨꦶꦏ꧀ꦑꦹꦤꦁ ꦮꦠ꧀ꦠꦁ ꦥꦚ꧀ꦚꦥꦺꦱ꧀ꦱꦴꦩꦶ ꦪꦡꦴ ꦄꦴꦫꦚ꧀ꦚꦶꦏꦺꦲꦶ ꦨꦶꦏ꧀ꦑꦹꦲꦶ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. ꦄꦴꦫꦚ꧀ꦚꦶꦏꦺꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦴ ꦏꦴꦭꦱ꧀ꦱꦺꦮ ꦈꦛ꧀ꦜꦴꦪ ꦥꦠ꧀ꦠꦁ ꦡꦮꦶꦏꦴꦪ ꦥꦏ꧀ꦑꦶꦥꦶꦠ꧀ꦮꦴ ꦄꦁꦱꦺ ꦄꦴꦭꦒ꧀ꦒꦺꦠ꧀ꦮꦴ ꦕꦷꦮꦫꦁ ꦑꦤ꧀ꦣꦺ ꦏꦫꦶꦠ꧀ꦮꦴ ꦈꦥꦴꦲꦤꦴ ꦄꦴꦫꦺꦴꦲꦶꦠ꧀ꦮꦴ ꦢꦴꦫꦸꦨꦟ꧀ꦝꦁ ꦩꦠ꧀ꦠꦶꦏꦴꦨꦟ꧀ꦝꦁ ꦥꦛꦶꦱꦴꦩꦺꦠ꧀ꦮꦴ ꦢ꧀ꦮꦴꦫꦮꦴꦠꦥꦴꦤꦁ ꦡꦏꦺꦠ꧀ꦮꦴ ꦱꦺꦤꦴꦱꦤꦴ ꦎꦠꦫꦶꦠꦧ꧀ꦧꦁ – ꦆꦢꦴꦤꦶ ꦒꦴꦩꦁ ꦥꦮꦶꦱꦶꦱ꧀ꦱꦴꦩꦷꦠꦶ. ꦈꦥꦴꦲꦤꦴ ꦎꦩꦸꦚ꧀ꦕꦶꦠ꧀ꦮꦴ ꦤꦷꦕꦁ ꦏꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦡꦮꦶꦏꦴꦪ ꦥꦏ꧀ꦑꦶꦥꦶꦠ꧀ꦮꦴ ꦄꦁꦱꦺ ꦄꦴꦭꦒ꧀ꦒꦺꦠ꧀ꦮꦴ ꦠꦶꦩꦟ꧀ꦝꦭꦁ ꦥꦛꦶꦕ꧀ꦖꦴꦢꦺꦤ꧀ꦠꦺꦤ ꦥꦫꦶꦩꦟ꧀ꦝꦭꦁ ꦤꦶꦮꦴꦱꦺꦠ꧀ꦮꦴ ꦏꦴꦪꦧꦤ꧀ꦣꦤꦁ ꦧꦤ꧀ꦣꦶꦠ꧀ꦮꦴ ꦱꦒꦸꦟꦁ ꦏꦠ꧀ꦮꦴ ꦱꦔ꧀ꦓꦴꦛꦶꦪꦺꦴ ꦥꦴꦫꦸꦥꦶꦠ꧀ꦮꦴ ꦒꦟ꧀ꦜꦶꦏꦁ ꦥꦛꦶꦩꦸꦚ꧀ꦕꦶꦠ꧀ꦮꦴ ꦣꦺꦴꦮꦶꦠ꧀ꦮꦴ ꦥꦠ꧀ꦠꦁ ꦒꦲꦺꦠ꧀ꦮꦴ ꦱꦴꦣꦸꦏꦁ ꦄꦠꦫꦩꦴꦤꦺꦤ ꦒꦴꦩꦺꦴ ꦥꦮꦶꦱꦶꦠꦧ꧀ꦧꦺꦴ. ꦱꦸꦥ꧀ꦥꦛꦶꦕ꧀ꦖꦤ꧀ꦤꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ…ꦥꦺ… ꦤ ꦑꦩ꧀ꦨꦏꦠꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦎꦒꦸꦟ꧀ꦜꦶꦠꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦤ ꦈꦏ꧀ꦏꦸꦛꦶꦏꦴꦪ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ.

‘‘ꦤꦶꦮꦺꦱꦤꦁ ꦥꦮꦶꦱꦤ꧀ꦠꦺꦤ ꦱꦭ꧀ꦭꦏ꧀ꦑꦺꦠꦧ꧀ꦧꦁ – ‘ꦆꦩꦶꦤꦴ ꦥꦮꦶꦱꦶꦱ꧀ꦱꦴꦩꦶ, ꦆꦩꦶꦤꦴ ꦤꦶꦏ꧀ꦑꦩꦶꦱ꧀ꦱꦴꦩꦷ’ꦠꦶ. ꦤꦴꦠꦶꦱꦲꦱꦴ ꦥꦮꦶꦱꦶꦠꦧ꧀ꦧꦁ. ꦤꦴꦠꦶꦱꦲꦱꦴ ꦤꦶꦏ꧀ꦑꦩꦶꦠꦧ꧀ꦧꦁ. ꦤꦴꦠꦶꦢꦹꦫꦺ ꦜꦴꦠꦧ꧀ꦧꦁ. ꦤꦴꦕ꧀ꦕꦴꦱꦤ꧀ꦤꦺ ꦜꦴꦠꦧ꧀ꦧꦁ. ꦤꦴꦠꦶꦕꦶꦫꦁ ꦜꦴꦠꦧ꧀ꦧꦁ. ꦤꦴꦠꦶꦭꦲꦸꦁ ꦤꦶꦮꦠ꧀ꦠꦶꦠꦧ꧀ꦧꦁ. ꦜꦶꦠꦏꦺꦤ ꦱꦭ꧀ꦭꦏ꧀ꦑꦺꦠꦧ꧀ꦧꦁ – ‘ꦨꦶꦏ꧀ꦑꦁ ꦢꦴꦠꦸꦏꦴꦩꦴ ꦮꦴ ꦄꦢꦴꦠꦸꦏꦴꦩꦴ ꦮꦴ’ꦠꦶ. ꦱꦕꦺ ꦏꦩ꧀ꦩꦁ ꦮꦴ ꦤꦶꦏ꧀ꦑꦶꦥꦠꦶ, ꦄꦴꦱꦤꦴ ꦮꦴ ꦮꦸꦛ꧀ꦜꦴꦠꦶ, ꦏꦛꦕ꧀ꦖꦸꦁ ꦮꦴ ꦥꦫꦴꦩꦱꦠꦶ, ꦨꦴꦗꦤꦁ ꦮꦴ ꦥꦫꦴꦩꦱꦠꦶ, ꦜꦥꦺꦠꦶ ꦮꦴ – ꦢꦴꦠꦸꦏꦴꦩꦱ꧀ꦱꦴꦠꦶ ꦜꦴꦠꦧ꧀ꦧꦁ. ꦨꦶꦏ꧀ꦑꦴꦪ ꦢꦶꦪ꧀ꦪꦩꦴꦤꦴꦪ ꦮꦴꦩꦺꦤ ꦲꦠ꧀ꦡꦺꦤ ꦱꦔ꧀ꦓꦴꦛꦶꦁ ꦈꦕ꧀ꦕꦴꦫꦺꦠ꧀ꦮꦴ ꦢꦏ꧀ꦑꦶꦟꦺꦤ ꦲꦠ꧀ꦡꦺꦤ ꦥꦠ꧀ꦠꦁ ꦥꦟꦴꦩꦺꦠ꧀ꦮꦴ ꦈꦨꦺꦴꦲꦶ ꦲꦠ꧀ꦡꦺꦲꦶ ꦥꦠ꧀ꦠꦁ ꦥꦛꦶꦒ꧀ꦒꦲꦺꦠ꧀ꦮꦴ ꦨꦶꦏ꧀ꦑꦴ ꦥꦛꦶꦒ꧀ꦒꦲꦺꦠꦧ꧀ꦧꦴ. ꦤ ꦕ ꦨꦶꦏ꧀ꦑꦴꦢꦴꦪꦶꦏꦴꦪ ꦩꦸꦑꦁ ꦈꦭ꧀ꦭꦺꦴꦏꦺꦠꦧ꧀ꦧꦁ. ꦱꦭ꧀ꦭꦏ꧀ꦑꦺꦠꦧ꧀ꦧꦁ – ‘ꦱꦹꦥꦁ ꦢꦴꦠꦸꦏꦴꦩꦴ ꦮꦴ ꦄꦢꦴꦠꦸꦏꦴꦩꦴ ꦮꦴ’ꦠꦶ. ꦱꦕꦺ ꦏꦛꦕ꧀ꦖꦸ ꦮꦴ ꦥꦫꦴꦩꦱꦠꦶ, ꦨꦴꦗꦤꦁ ꦮꦴ ꦥꦫꦴꦩꦱꦠꦶ, ꦜꦥꦺꦠꦶ ꦮꦴ – ꦢꦴꦠꦸꦏꦴꦩꦱ꧀ꦱꦴꦠꦶ ꦜꦴꦠꦧ꧀ꦧꦁ. ꦨꦶꦏ꧀ꦑꦴꦪ ꦢꦶꦤ꧀ꦤꦴꦪ ꦱꦔ꧀ꦓꦴꦛꦶꦪꦴ ꦥꦠ꧀ꦠꦁ ꦥꦛꦶꦕ꧀ꦖꦴꦢꦺꦠ꧀ꦮꦴ ꦱꦴꦣꦸꦏꦁ ꦄꦠꦫꦩꦴꦤꦺꦤ ꦤꦶꦮꦠ꧀ꦠꦶꦠꦧ꧀ꦧꦁ.

‘‘ꦱꦸꦥ꧀ꦥꦛꦶꦕ꧀ꦖꦤ꧀ꦤꦺꦤ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ…ꦥꦺ… ꦤ ꦈꦏ꧀ꦏꦸꦛꦶꦏꦴꦪ ꦄꦤ꧀ꦠꦫꦓꦫꦺ ꦒꦤ꧀ꦠꦧ꧀ꦧꦁ. ꦒꦴꦩꦠꦺꦴ ꦤꦶꦏ꧀ꦑꦩꦶꦠ꧀ꦮꦴ ꦥꦠ꧀ꦠꦁ ꦡꦮꦶꦏꦴꦪ ꦥꦏ꧀ꦑꦶꦥꦶꦠ꧀ꦮꦴ ꦄꦁꦱꦺ ꦄꦴꦭꦒ꧀ꦒꦺꦠ꧀ꦮꦴ ꦕꦷꦮꦫꦁ ꦱꦔ꧀ꦓꦫꦶꦠ꧀ꦮꦴ ꦱꦷꦱꦺ ꦏꦫꦶꦠ꧀ꦮꦴ ꦈꦥꦴꦲꦤꦴ ꦄꦴꦫꦺꦴꦲꦶꦠ꧀ꦮꦴ ꦒꦤ꧀ꦠꦧ꧀ꦧꦁ.

‘‘ꦄꦴꦫꦚ꧀ꦚꦶꦏꦺꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦴ ꦥꦴꦤꦷꦪꦁ ꦈꦥꦛ꧀ꦜꦴꦥꦺꦠꦧ꧀ꦧꦁ, ꦥꦫꦶꦨꦺꦴꦗꦤꦷꦪꦁ ꦈꦥꦛ꧀ꦜꦴꦥꦺꦠꦧ꧀ꦧꦁ, ꦄꦒ꧀ꦒꦶ ꦈꦥꦛ꧀ꦜꦴꦥꦺꦠꦧ꧀ꦧꦺꦴ, ꦄꦫꦟꦶꦱꦲꦶꦠꦁ ꦈꦥꦛ꧀ꦜꦴꦥꦺꦠꦧ꧀ꦧꦁ, ꦏꦠ꧀ꦠꦫꦢꦟ꧀ꦝꦺꦴ ꦈꦥꦛ꧀ꦜꦴꦥꦺꦠꦧ꧀ꦧꦺꦴ, ꦤꦏ꧀ꦑꦠ꧀ꦠꦥꦢꦴꦤꦶ ꦈꦒ꧀ꦒꦲꦺꦠꦧ꧀ꦧꦴꦤꦶ – ꦱꦏꦭꦴꦤꦶ ꦮꦴ ꦌꦏꦢꦺꦱꦴꦤꦶ ꦮꦴ, ꦢꦶꦱꦴꦏꦸꦱꦭꦺꦤ ꦨꦮꦶꦠꦧ꧀ꦧꦁ. ꦆꦢꦁ ꦑꦺꦴ, ꦨꦶꦏ꧀ꦑꦮꦺ, ꦄꦴꦫꦚ꧀ꦚꦶꦏꦴꦤꦁ ꦨꦶꦏ꧀ꦑꦹꦤꦁ ꦮꦠ꧀ꦠꦁ ꦪꦡꦴ ꦄꦴꦫꦚ꧀ꦚꦶꦏꦺꦲꦶ ꦨꦶꦏ꧀ꦑꦹꦲꦶ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧ’’ꦤ꧀ꦠꦶ.

꧘. ꦱꦺꦤꦴꦱꦤꦮꦠ꧀ꦠꦏꦡꦴ

꧓꧖꧙. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦩ꧀ꦧꦲꦸꦭꦴ ꦨꦶꦏ꧀ꦑꦹ ꦄꦗ꧀ꦙꦺꦴꦏꦴꦱꦺ ꦕꦷꦮꦫꦏꦩ꧀ꦩꦁ ꦏꦫꦺꦴꦤ꧀ꦠꦶ. ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦥꦛꦶꦮꦴꦠꦺ ꦄꦔ꧀ꦒꦟꦺ [ꦥꦔ꧀ꦒꦟꦺ (ꦱꦷ. ꦱ꧀ꦪꦴ.)] ꦱꦺꦤꦴꦱꦤꦁ ꦥꦥ꧀ꦦꦺꦴꦛꦺꦱꦸꦁ. ꦨꦶꦏ꧀ꦑꦹ ꦫꦗꦺꦤ ꦎꦏꦶꦫꦶꦁꦱꦸ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦥꦛꦶꦮꦴꦠꦺ ꦄꦔ꧀ꦒꦟꦺ ꦱꦺꦤꦴꦱꦤꦁ ꦥꦥ꧀ꦦꦺꦴꦛꦺꦱ꧀ꦱꦤ꧀ꦠꦶ! ꦨꦶꦏ꧀ꦑꦹ ꦫꦗꦺꦤ ꦎꦏꦶꦫꦶꦁꦱꦹ’’ꦠꦶ. ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ‘‘ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦥꦛꦶꦮꦴꦠꦺ ꦄꦔ꧀ꦒꦟꦺ ꦱꦺꦤꦴꦱꦤꦁ ꦥꦥ꧀ꦦꦺꦴꦛꦺꦤ꧀ꦠꦶ, ꦨꦶꦏ꧀ꦑꦹ ꦫꦗꦺꦤ ꦎꦏꦶꦫꦶꦁꦱꦹ’’ꦠꦶ? ‘‘ꦱꦕ꧀ꦕꦁ ꦨꦒꦮꦴ’’ꦠꦶ…ꦥꦺ… ꦮꦶꦒꦫꦲꦶꦠ꧀ꦮꦴ…ꦥꦺ… ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ –

꧓꧗꧐. ‘‘ꦠꦺꦤ ꦲꦶ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦱꦺꦤꦴꦱꦤꦮꦠ꧀ꦠꦁ ꦥꦚ꧀ꦚꦥꦺꦱ꧀ꦱꦴꦩꦶ ꦪꦡꦴ ꦨꦶꦏ꧀ꦑꦹꦲꦶ ꦱꦺꦤꦴꦱꦤꦺ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. ꦪꦱ꧀ꦩꦶꦁ ꦮꦶꦲꦴꦫꦺ ꦮꦶꦲꦫꦠꦶ, ꦱꦕꦺ ꦱꦺꦴ ꦮꦶꦲꦴꦫꦺꦴ ꦈꦏ꧀ꦭꦴꦥꦺꦴ ꦲꦺꦴꦠꦶ, ꦱꦕꦺ ꦈꦱ꧀ꦱꦲꦠꦶ, ꦱꦺꦴꦣꦺꦠꦧ꧀ꦧꦺꦴ. [ꦩꦲꦴꦮ. ꧖꧖, ꧖꧗; ꦕꦹꦭ꦳ꦮ. ꧓꧕꧗] ꦮꦶꦲꦴꦫꦁ ꦱꦺꦴꦣꦺꦤ꧀ꦠꦺꦤ ꦥꦜꦩꦁ ꦥꦠ꧀ꦠꦕꦷꦮꦫꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦤꦶꦱꦷꦢꦤꦥꦕ꧀ꦕꦠ꧀ꦡꦫꦟꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦨꦶꦱꦶꦧꦶꦧ꧀ꦧꦺꦴꦲꦤꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦩꦚ꧀ꦕꦺꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ, ꦄꦱꦔ꧀ꦓꦛ꧀ꦛꦺꦤ꧀ꦠꦺꦤ ꦏꦮꦴꦛꦥꦶꦛ꧀ꦜꦁ, ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦺꦴ; ꦥꦷꦜꦁ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ, ꦄꦱꦔ꧀ꦓꦛ꧀ꦛꦺꦤ꧀ꦠꦺꦤ ꦏꦮꦴꦛꦥꦶꦛ꧀ꦜꦁ, ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦩꦚ꧀ꦕꦥꦛꦶꦥꦴꦢꦏꦴ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦴ; ꦑꦺꦭ꦳ꦩꦭ꧀ꦭꦏꦺꦴ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦺꦴ; ꦄꦥꦱ꧀ꦱꦺꦤꦦꦭꦏꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦨꦸꦩ꧀ꦩꦠ꧀ꦡꦫꦟꦁ ꦪꦡꦴꦥꦚ꧀ꦚꦠ꧀ꦠꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦱꦕꦺ ꦮꦶꦲꦴꦫꦺ ꦱꦤ꧀ꦠꦴꦤꦏꦁ ꦲꦺꦴꦠꦶ, ꦈꦭ꧀ꦭꦺꦴꦏꦴ ꦥꦜꦩꦁ ꦎꦲꦴꦫꦺꦠꦧ꧀ꦧꦁ, ꦄꦴꦭꦺꦴꦏꦱꦤ꧀ꦣꦶꦏꦟ꧀ꦟꦨꦴꦒꦴ ꦥꦩꦗ꧀ꦗꦶꦠꦧ꧀ꦧꦴ. ꦱꦕꦺ ꦒꦺꦫꦸꦏꦥꦫꦶꦏꦩ꧀ꦩꦏꦠꦴ ꦨꦶꦠ꧀ꦠꦶ ꦏꦟ꧀ꦟꦏꦶꦠꦴ ꦲꦺꦴꦠꦶ, ꦕꦺꦴꦭ꦳ꦏꦁ ꦠꦺꦩꦺꦠ꧀ꦮꦴ ꦥꦷꦭ꦳ꦺꦠ꧀ꦮꦴ ꦥꦩꦗ꧀ꦗꦶꦠꦧ꧀ꦧꦴ. ꦱꦕꦺ ꦏꦴꦭ꦳ꦮꦟ꧀ꦟꦏꦠꦴ ꦨꦹꦩꦶ ꦏꦟ꧀ꦟꦏꦶꦠꦴ ꦲꦺꦴꦠꦶ, ꦕꦺꦴꦭ꦳ꦏꦁ ꦠꦺꦩꦺꦠ꧀ꦮꦴ ꦥꦷꦭ꦳ꦺꦠ꧀ꦮꦴ ꦥꦩꦗ꧀ꦗꦶꦠꦧ꧀ꦧꦴ. ꦱꦕꦺ ꦄꦏꦠꦴ ꦲꦺꦴꦠꦶ ꦨꦹꦩꦶ, ꦈꦢꦏꦺꦤ ꦥꦫꦶꦥ꧀ꦦꦺꦴꦱꦶꦠ꧀ꦮꦴ ꦥꦫꦶꦦꦺꦴꦱꦶꦠ꧀ꦮꦴ ꦱꦩ꧀ꦩꦗ꧀ꦗꦶꦠꦧ꧀ꦧꦴ – ꦩꦴ ꦮꦶꦲꦴꦫꦺꦴ ꦫꦗꦺꦤ ꦈꦲꦚ꧀ꦚꦷꦠꦶ. ꦱꦔ꧀ꦏꦴꦫꦁ ꦮꦶꦕꦶꦤꦶꦠ꧀ꦮꦴ ꦌꦏꦩꦤ꧀ꦠꦁ ꦖꦝ꧀ꦝꦺꦠꦧ꧀ꦧꦁ.

‘‘ꦤ ꦨꦶꦏ꧀ꦑꦸꦱꦴꦩꦤ꧀ꦠꦴ ꦱꦺꦤꦴꦱꦤꦁ ꦥꦥ꧀ꦦꦺꦴꦛꦺꦠꦧ꧀ꦧꦁ. ꦤ ꦮꦶꦲꦴꦫꦱꦴꦩꦤ꧀ꦠꦴ ꦱꦺꦤꦴꦱꦤꦁ ꦥꦥ꧀ꦦꦺꦴꦛꦺꦠꦧ꧀ꦧꦁ. ꦤ ꦥꦴꦤꦷꦪꦱꦴꦩꦤ꧀ꦠꦴ ꦱꦺꦤꦴꦱꦤꦁ ꦥꦥ꧀ꦦꦺꦴꦛꦺꦠꦧ꧀ꦧꦁ. ꦤ ꦥꦫꦶꦨꦺꦴꦗꦤꦷꦪꦱꦴꦩꦤ꧀ꦠꦴ ꦱꦺꦤꦴꦱꦤꦁ ꦥꦥ꧀ꦦꦺꦴꦛꦺꦠꦧ꧀ꦧꦁ. ꦤ ꦥꦛꦶꦮꦴꦠꦺ ꦄꦔ꧀ꦒꦟꦺ ꦱꦺꦤꦴꦱꦤꦁ ꦥꦥ꧀ꦦꦺꦴꦛꦺꦠꦧ꧀ꦧꦁ. ꦄꦣꦺꦴꦮꦴꦠꦺ ꦱꦺꦤꦴꦱꦤꦁ ꦥꦥ꧀ꦦꦺꦴꦛꦺꦠꦧ꧀ꦧꦁ.

‘‘ꦨꦸꦩ꧀ꦩꦠ꧀ꦡꦫꦟꦁ ꦌꦏꦩꦤ꧀ꦠꦁ ꦎꦠꦴꦥꦺꦠ꧀ꦮꦴ ꦱꦺꦴꦣꦺꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦥꦚ꧀ꦚꦠ꧀ꦠꦁ ꦥꦚ꧀ꦚꦥꦺꦠꦧ꧀ꦧꦁ. ꦩꦚ꧀ꦕꦥꦛꦶꦥꦴꦢꦏꦴ ꦌꦏꦩꦤ꧀ꦠꦁ ꦎꦠꦴꦥꦺꦠ꧀ꦮꦴ ꦥꦩꦗ꧀ꦗꦶꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦜꦴꦤꦺ ꦜꦥꦺꦠꦧ꧀ꦧꦴ. ꦩꦚ꧀ꦕꦺꦴ ꦌꦏꦩꦤ꧀ꦠꦁ ꦎꦠꦴꦥꦺꦠ꧀ꦮꦴ ꦱꦺꦴꦣꦺꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ, ꦄꦱꦔ꧀ꦓꦛ꧀ꦛꦺꦤ꧀ꦠꦺꦤ ꦏꦮꦴꦛꦥꦶꦛ꧀ꦜꦁ, ꦄꦠꦶꦲꦫꦶꦠ꧀ꦮꦴ ꦪꦡꦴꦥꦚ꧀ꦚꦠ꧀ꦠꦁ ꦥꦚ꧀ꦚꦥꦺꦠꦧ꧀ꦧꦺꦴ. ꦥꦷꦜꦁ ꦌꦏꦩꦤ꧀ꦠꦁ ꦎꦠꦴꦥꦺꦠ꧀ꦮꦴ ꦱꦺꦴꦣꦺꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ, ꦄꦱꦔ꧀ꦓꦛ꧀ꦛꦺꦤ꧀ꦠꦺꦤ ꦏꦮꦴꦛꦥꦶꦛ꧀ꦜꦁ, ꦄꦠꦶꦲꦫꦶꦠ꧀ꦮꦴ ꦪꦡꦴꦥꦚ꧀ꦚꦠ꧀ꦠꦁ ꦥꦚ꧀ꦚꦥꦺꦠꦧ꧀ꦧꦁ. ꦨꦶꦱꦶꦧꦶꦧ꧀ꦧꦺꦴꦲꦤꦁ ꦌꦏꦩꦤ꧀ꦠꦁ ꦎꦠꦴꦥꦺꦠ꧀ꦮꦴ ꦱꦺꦴꦣꦺꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦥꦚ꧀ꦚꦠ꧀ꦠꦁ ꦥꦚ꧀ꦚꦥꦺꦠꦧ꧀ꦧꦁ. ꦤꦶꦱꦷꦢꦤꦥꦕ꧀ꦕꦠ꧀ꦡꦫꦟꦁ ꦌꦏꦩꦤ꧀ꦠꦁ ꦎꦠꦴꦥꦺꦠ꧀ꦮꦴ ꦱꦺꦴꦣꦺꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦥꦚ꧀ꦚꦠ꧀ꦠꦁ ꦥꦚ꧀ꦚꦥꦺꦠꦧ꧀ꦧꦁ. ꦑꦺꦭ꦳ꦩꦭ꧀ꦭꦏꦺꦴ ꦌꦏꦩꦤ꧀ꦠꦁ ꦎꦠꦴꦥꦺꦠ꧀ꦮꦴ ꦥꦩꦗ꧀ꦗꦶꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦜꦴꦤꦺ ꦜꦥꦺꦠꦧ꧀ꦧꦺꦴ. ꦄꦥꦱ꧀ꦱꦺꦤꦦꦭꦏꦁ ꦌꦏꦩꦤ꧀ꦠꦁ ꦎꦠꦴꦥꦺꦠ꧀ꦮꦴ ꦥꦩꦗ꧀ꦗꦶꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦜꦴꦤꦺ ꦜꦥꦺꦠꦧ꧀ꦧꦁ. ꦥꦠ꧀ꦠꦕꦷꦮꦫꦁ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦥꦠ꧀ꦠꦁ ꦤꦶꦏ꧀ꦑꦶꦥꦤ꧀ꦠꦺꦤ ꦌꦏꦺꦤ ꦲꦠ꧀ꦡꦺꦤ ꦥꦠ꧀ꦠꦁ ꦒꦲꦺꦠ꧀ꦮꦴ ꦌꦏꦺꦤ ꦲꦠ꧀ꦡꦺꦤ ꦲꦺꦛ꧀ꦜꦴꦩꦚ꧀ꦕꦁ ꦮꦴ ꦲꦺꦛ꧀ꦜꦴꦥꦷꦜꦁ ꦮꦴ ꦥꦫꦴꦩꦱꦶꦠ꧀ꦮꦴ ꦥꦠ꧀ꦠꦺꦴ ꦤꦶꦏ꧀ꦑꦶꦥꦶꦠꦧ꧀ꦧꦺꦴ. ꦤ ꦕ ꦄꦤꦤ꧀ꦠꦫꦲꦶꦠꦴꦪ ꦨꦹꦩꦶꦪꦴ ꦥꦠ꧀ꦠꦺꦴ ꦤꦶꦏ꧀ꦑꦶꦥꦶꦠꦧ꧀ꦧꦺꦴ. ꦕꦷꦮꦫꦁ ꦤꦶꦏ꧀ꦑꦶꦥꦤ꧀ꦠꦺꦤ ꦌꦏꦺꦤ ꦲꦠ꧀ꦡꦺꦤ ꦕꦷꦮꦫꦁ ꦒꦲꦺꦠ꧀ꦮꦴ ꦌꦏꦺꦤ ꦲꦠ꧀ꦡꦺꦤ ꦕꦷꦮꦫꦮꦁꦱꦁ ꦮꦴ ꦕꦷꦮꦫꦫꦗ꧀ꦗꦸ ꦮꦴ ꦥꦩꦗ꧀ꦗꦶꦠ꧀ꦮꦴ ꦥꦴꦫꦠꦺꦴ ꦄꦤ꧀ꦠꦁ ꦎꦫꦠꦺꦴ ꦨꦺꦴꦒꦁ ꦏꦠ꧀ꦮꦴ ꦕꦷꦮꦫꦁ ꦤꦶꦏ꧀ꦑꦶꦥꦶꦠꦧ꧀ꦧꦁ.

‘‘ꦱꦕꦺ ꦥꦸꦫꦠ꧀ꦡꦶꦩꦴ ꦱꦫꦗꦴ ꦮꦴꦠꦴ ꦮꦴꦪꦤ꧀ꦠꦶ, ꦥꦸꦫꦠ꧀ꦡꦶꦩꦴ ꦮꦴꦠꦥꦴꦤꦴ ꦡꦏꦺꦠꦧ꧀ꦧꦴ. ꦱꦕꦺ ꦥꦕ꧀ꦖꦶꦩꦴ ꦱꦫꦗꦴ ꦮꦴꦠꦴ ꦮꦴꦪꦤ꧀ꦠꦶ, ꦥꦕ꧀ꦖꦶꦩꦴ ꦮꦴꦠꦥꦴꦤꦴ ꦡꦏꦺꦠꦧ꧀ꦧꦴ. ꦱꦕꦺ ꦈꦠ꧀ꦠꦫꦴ ꦱꦫꦗꦴ ꦮꦴꦠꦴ ꦮꦴꦪꦤ꧀ꦠꦶ ꦈꦠ꧀ꦠꦫꦴ ꦮꦴꦠꦥꦴꦤꦴ ꦡꦏꦺꦠꦧ꧀ꦧꦴ. ꦱꦕꦺ ꦢꦏ꧀ꦑꦶꦟꦴ ꦱꦫꦗꦴ ꦮꦴꦠꦴ ꦮꦴꦪꦤ꧀ꦠꦶ, ꦢꦏ꧀ꦑꦶꦟꦴ ꦮꦴꦠꦥꦴꦤꦴ ꦡꦏꦺꦠꦧ꧀ꦧꦴ. ꦱꦕꦺ ꦱꦷꦠꦏꦴꦭꦺꦴ ꦲꦺꦴꦠꦶ, ꦢꦶꦮꦴ ꦮꦴꦠꦥꦴꦤꦴ ꦮꦶꦮꦫꦶꦠꦧ꧀ꦧꦴ, ꦫꦠ꧀ꦠꦶꦁ ꦡꦏꦺꦠꦧ꧀ꦧꦴ. ꦱꦕꦺ ꦈꦟ꧀ꦲꦏꦴꦭꦺꦴ ꦲꦺꦴꦠꦶ, ꦢꦶꦮꦴ ꦮꦴꦠꦥꦴꦤꦴ ꦡꦏꦺꦠꦧ꧀ꦧꦴ, ꦫꦠ꧀ꦠꦶꦁ ꦮꦶꦮꦫꦶꦠꦧ꧀ꦧꦴ.

‘‘ꦱꦕꦺ ꦮꦸꦝ꧀ꦞꦺꦤ ꦱꦢ꧀ꦣꦶꦁ ꦌꦏꦮꦶꦲꦴꦫꦺ ꦮꦶꦲꦫꦠꦶ, ꦤ ꦮꦸꦝ꧀ꦞꦁ ꦄꦤꦴꦥꦸꦕ꧀ꦖꦴ ꦈꦢ꧀ꦢꦺꦱꦺꦴ ꦢꦴꦠꦧ꧀ꦧꦺꦴ, ꦤ ꦥꦫꦶꦥꦸꦕ꧀ꦖꦴ ꦢꦴꦠꦧ꧀ꦧꦴ, ꦤ ꦱꦗ꧀ꦙꦴꦪꦺꦴ ꦏꦴꦠꦧ꧀ꦧꦺꦴ, ꦤ ꦣꦩ꧀ꦩꦺꦴ ꦨꦴꦱꦶꦠꦧ꧀ꦧꦺꦴ, ꦤ ꦥꦢꦷꦥꦺꦴ ꦏꦴꦠꦧ꧀ꦧꦺꦴ, ꦤ ꦥꦢꦷꦥꦺꦴ ꦮꦶꦗ꧀ꦙꦴꦥꦺꦠꦧ꧀ꦧꦺꦴ, ꦤ ꦮꦴꦠꦥꦴꦤꦴ ꦮꦶꦮꦫꦶꦠꦧ꧀ꦧꦴ, ꦤ ꦮꦴꦠꦥꦴꦤꦴ ꦡꦏꦺꦠꦧ꧀ꦧꦴ. ꦱꦕꦺ ꦮꦸꦝ꧀ꦞꦺꦤ ꦱꦢ꧀ꦣꦶꦁ ꦌꦏꦕꦔ꧀ꦏꦩꦺ ꦕꦔ꧀ꦏꦩꦠꦶ, ꦪꦺꦤ ꦮꦸꦝ꧀ꦞꦺꦴ ꦠꦺꦤ ꦥꦫꦶꦮꦠ꧀ꦠꦶꦠꦧ꧀ꦧꦁ, ꦤ ꦕ ꦮꦸꦝ꧀ꦞꦺꦴ ꦱꦔ꧀ꦓꦴꦛꦶꦏꦟ꧀ꦟꦺꦤ ꦓꦛ꧀ꦛꦺꦠꦧ꧀ꦧꦺꦴ. ꦆꦢꦁ ꦑꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦱꦺꦤꦴꦱꦤꦮꦠ꧀ꦠꦁ ꦪꦡꦴ ꦨꦶꦏ꧀ꦑꦹꦲꦶ ꦱꦺꦤꦴꦱꦤꦺ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧ’’ꦤ꧀ꦠꦶ.

꧙. ꦗꦤ꧀ꦠꦴꦓꦫꦮꦠ꧀ꦠꦏꦡꦴ

꧓꧗꧑. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦗꦤ꧀ꦠꦴꦓꦫꦺ ꦡꦺꦫꦺꦲꦶ ꦨꦶꦏ꧀ꦑꦹꦲꦶ ꦤꦶꦮꦴꦫꦶꦪꦩꦴꦤꦴ ꦄꦤꦴꦢꦫꦶꦪꦁ ꦥꦛꦶꦕ꧀ꦕ ꦥꦲꦹꦠꦁ ꦏꦛ꧀ꦜꦁ ꦄꦴꦫꦺꦴꦥꦺꦠ꧀ꦮꦴ ꦄꦒ꧀ꦒꦶꦁ ꦢꦠ꧀ꦮꦴ ꦢ꧀ꦮꦴꦫꦁ ꦡꦏꦺꦠ꧀ꦮꦴ ꦢ꧀ꦮꦴꦫꦺ ꦤꦶꦱꦷꦢꦤ꧀ꦠꦶ. ꦨꦶꦏ꧀ꦑꦹ [ꦡꦺꦫꦴ ꦕ ꦨꦶꦏ꧀ꦑꦹ (ꦱ꧀ꦪꦴ. ꦏꦁ.)] ꦈꦟ꧀ꦲꦴꦨꦶꦠꦠ꧀ꦠꦴ ꦢ꧀ꦮꦴꦫꦁ ꦄꦭꦨꦩꦴꦤꦴ ꦩꦸꦕ꧀ꦖꦶꦠꦴ ꦥꦥꦠꦤ꧀ꦠꦶ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦗꦤ꧀ꦠꦴꦓꦫꦺ ꦡꦺꦫꦺꦲꦶ ꦨꦶꦏ꧀ꦑꦹꦲꦶ ꦤꦶꦮꦴꦫꦶꦪꦩꦴꦤꦴ ꦄꦤꦴꦢꦫꦶꦪꦁ ꦥꦛꦶꦕ꧀ꦕ ꦥꦲꦹꦠꦁ ꦏꦛ꧀ꦜꦁ ꦄꦴꦫꦺꦴꦥꦺꦠ꧀ꦮꦴ ꦄꦒ꧀ꦒꦶꦁ ꦢꦠ꧀ꦮꦴ ꦢ꧀ꦮꦴꦫꦁ ꦡꦏꦺꦠ꧀ꦮꦴ ꦢ꧀ꦮꦴꦫꦺ ꦤꦶꦱꦷꦢꦶꦱ꧀ꦱꦤ꧀ꦠꦶ! ꦨꦶꦏ꧀ꦑꦹ ꦈꦟ꧀ꦲꦴꦨꦶꦠꦠ꧀ꦠꦴ ꦢ꧀ꦮꦴꦫꦁ ꦄꦭꦨꦩꦴꦤꦴ ꦩꦸꦕ꧀ꦖꦶꦠꦴ ꦥꦥꦠꦤ꧀ꦠꦷ’’ꦠꦶ. ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ‘‘ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦗꦤ꧀ꦠꦴꦓꦫꦺ ꦡꦺꦫꦺꦲꦶ ꦨꦶꦏ꧀ꦑꦹꦲꦶ ꦤꦶꦮꦴꦫꦶꦪꦩꦴꦤꦴ ꦄꦤꦴꦢꦫꦶꦪꦁ ꦥꦛꦶꦕ꧀ꦕ ꦥꦲꦹꦠꦁ ꦏꦛ꧀ꦜꦁ ꦄꦴꦫꦺꦴꦥꦺꦠ꧀ꦮꦴ ꦄꦒ꧀ꦒꦶꦁ ꦢꦠ꧀ꦮꦴ ꦢ꧀ꦮꦴꦫꦁ ꦡꦏꦺꦠ꧀ꦮꦴ ꦢ꧀ꦮꦴꦫꦺ ꦤꦶꦱꦷꦢꦤ꧀ꦠꦶ; ꦨꦶꦏ꧀ꦑꦹ ꦈꦟ꧀ꦲꦴꦨꦶꦠꦠ꧀ꦠꦴ ꦢ꧀ꦮꦴꦫꦁ ꦄꦭꦨꦩꦴꦤꦴ ꦩꦸꦕ꧀ꦖꦶꦠꦴ ꦥꦥꦠꦤ꧀ꦠꦷ’’ꦠꦶ? ‘‘ꦱꦕ꧀ꦕꦁ ꦨꦒꦮꦴ’’ꦠꦶ…ꦥꦺ… ꦮꦶꦒꦫꦲꦶꦠ꧀ꦮꦴ…ꦥꦺ… ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦤ, ꦨꦶꦏ꧀ꦑꦮꦺ, ꦗꦤ꧀ꦠꦴꦓꦫꦺ ꦡꦺꦫꦺꦤ ꦨꦶꦏ꧀ꦑꦸꦤꦴ ꦤꦶꦮꦴꦫꦶꦪꦩꦴꦤꦺꦤ ꦄꦤꦴꦢꦫꦶꦪꦁ ꦥꦛꦶꦕ꧀ꦕ ꦥꦲꦹꦠꦁ ꦏꦛ꧀ꦜꦁ ꦄꦴꦫꦺꦴꦥꦺꦠ꧀ꦮꦴ ꦄꦒ꧀ꦒꦶ ꦢꦴꦠꦧ꧀ꦧꦺꦴ. ꦪꦺꦴ ꦢꦢꦺꦪ꧀ꦪ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦤ, ꦨꦶꦏ꧀ꦑꦮꦺ, ꦢ꧀ꦮꦴꦫꦁ ꦡꦏꦺꦠ꧀ꦮꦴ ꦢ꧀ꦮꦴꦫꦺ ꦤꦶꦱꦷꦢꦶꦠꦧ꧀ꦧꦁ. ꦪꦺꦴ ꦤꦶꦱꦷꦢꦺꦪ꧀ꦪ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

꧓꧗꧒. ‘‘ꦠꦺꦤ ꦲꦶ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦗꦤ꧀ꦠꦴꦓꦫꦮꦠ꧀ꦠꦁ ꦥꦚ꧀ꦚꦥꦺꦱ꧀ꦱꦴꦩꦶ ꦪꦡꦴ ꦨꦶꦏ꧀ꦑꦹꦲꦶ ꦗꦤ꧀ꦠꦴꦓꦫꦺ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. ꦪꦺꦴ ꦥꦜꦩꦁ ꦗꦤ꧀ꦠꦴꦓꦫꦁ ꦒꦕ꧀ꦖꦠꦶ, ꦱꦕꦺ ꦖꦴꦫꦶꦏꦴ ꦈꦱ꧀ꦱꦤ꧀ꦤꦴ ꦲꦺꦴꦠꦶ, ꦖꦴꦫꦶꦏꦴ ꦖꦝ꧀ꦝꦺꦠꦧ꧀ꦧꦴ. ꦱꦕꦺ ꦗꦤ꧀ꦠꦴꦓꦫꦁ ꦈꦏ꧀ꦭꦴꦥꦁ ꦲꦺꦴꦠꦶ, ꦗꦤ꧀ꦠꦴꦓꦫꦁ ꦱꦩ꧀ꦩꦗ꧀ꦗꦶꦠꦧ꧀ꦧꦁ. ꦱꦕꦺ ꦥꦫꦶꦨꦟ꧀ꦝꦁ ꦈꦏ꧀ꦭꦴꦥꦁ ꦲꦺꦴꦠꦶ, ꦥꦫꦶꦨꦟ꧀ꦝꦁ ꦱꦩ꧀ꦩꦗ꧀ꦗꦶꦠꦧ꧀ꦧꦁ. ꦱꦕꦺ ꦥꦫꦶꦮꦺꦟꦁ ꦈꦏ꧀ꦭꦴꦥꦁ ꦲꦺꦴꦠꦶ, ꦥꦫꦶꦮꦺꦟꦁ ꦱꦩ꧀ꦩꦗ꧀ꦗꦶꦠꦧ꧀ꦧꦁ. ꦱꦕꦺ ꦏꦺꦴꦛ꧀ꦜꦏꦺꦴ ꦈꦏ꧀ꦭꦴꦥꦺꦴ ꦲꦺꦴꦠꦶ, ꦏꦺꦴꦛ꧀ꦜꦏꦺꦴ ꦱꦩ꧀ꦩꦗ꧀ꦗꦶꦠꦧ꧀ꦧꦺꦴ. ꦱꦕꦺ ꦗꦤ꧀ꦠꦴꦓꦫꦱꦴꦭꦴ ꦈꦏ꧀ꦭꦴꦥꦴ ꦲꦺꦴꦠꦶ, ꦗꦤ꧀ꦠꦴꦓꦫꦱꦴꦭꦴ ꦱꦩ꧀ꦩꦗ꧀ꦗꦶꦠꦧ꧀ꦧꦴ.

‘‘ꦕꦸꦟ꧀ꦟꦁ ꦱꦤ꧀ꦤꦺꦠꦧ꧀ꦧꦁ, ꦩꦠ꧀ꦠꦶꦏꦴ ꦠꦺꦩꦺꦠꦧ꧀ꦧꦴ, ꦈꦢꦏꦢꦺꦴꦟꦶꦏꦴꦪ ꦈꦢꦏꦁ ꦄꦴꦱꦶꦚ꧀ꦕꦶꦠꦧ꧀ꦧꦁ. ꦗꦤ꧀ꦠꦴꦓꦫꦁ ꦥꦮꦶꦱꦤ꧀ꦠꦺꦤ ꦩꦠ꧀ꦠꦶꦏꦴꦪ ꦩꦸꦑꦁ ꦩꦏ꧀ꦑꦺꦠ꧀ꦮꦴ ꦥꦸꦫꦠꦺꦴ ꦕ ꦥꦕ꧀ꦖꦠꦺꦴ ꦕ ꦥꦛꦶꦕ꧀ꦖꦴꦢꦺꦠ꧀ꦮꦴ ꦗꦤ꧀ꦠꦴꦓꦫꦁ ꦥꦮꦶꦱꦶꦠꦧ꧀ꦧꦁ. ꦤ ꦡꦺꦫꦺ ꦨꦶꦏ꧀ꦑꦹ ꦄꦤꦸꦥꦑꦗ꧀ꦗ ꦤꦶꦱꦷꦢꦶꦠꦧ꧀ꦧꦁ. ꦤ ꦤꦮꦴ ꦨꦶꦏ꧀ꦑꦹ ꦄꦴꦱꦤꦺꦤ ꦥꦛꦶꦧꦴꦲꦶꦠꦧ꧀ꦧꦴ. ꦱꦕꦺ ꦈꦱ꧀ꦱꦲꦠꦶ, ꦗꦤ꧀ꦠꦴꦓꦫꦺ ꦡꦺꦫꦴꦤꦁ ꦨꦶꦏ꧀ꦑꦹꦤꦁ ꦥꦫꦶꦏꦩ꧀ꦩꦁ ꦏꦴꦠꦧ꧀ꦧꦁ. ꦗꦤ꧀ꦠꦴꦓꦫꦴ ꦤꦶꦏ꧀ꦑꦩꦤ꧀ꦠꦺꦤ ꦗꦤ꧀ꦠꦴꦓꦫꦥꦷꦜꦁ ꦄꦴꦢꦴꦪ ꦥꦸꦫꦠꦺꦴ ꦕ ꦥꦕ꧀ꦖꦠꦺꦴ ꦕ ꦥꦛꦶꦕ꧀ꦖꦴꦢꦺꦠ꧀ꦮꦴ ꦗꦤ꧀ꦠꦴꦓꦫꦴ ꦤꦶꦏ꧀ꦑꦩꦶꦠꦧ꧀ꦧꦁ. ꦱꦕꦺ ꦈꦱ꧀ꦱꦲꦠꦶ, ꦈꦢꦏꦺꦥꦶ ꦡꦺꦫꦴꦤꦁ ꦨꦶꦏ꧀ꦑꦹꦤꦁ ꦥꦫꦶꦏꦩ꧀ꦩꦁ ꦏꦴꦠꦧ꧀ꦧꦁ. ꦤ ꦡꦺꦫꦴꦤꦁ ꦨꦶꦏ꧀ꦑꦹꦤꦁ ꦥꦸꦫꦠꦺꦴꦥꦶ ꦤꦲꦴꦪꦶꦠꦧ꧀ꦧꦁ, ꦤ ꦈꦥꦫꦶꦠꦺꦴꦥꦶ ꦤꦲꦴꦪꦶꦠꦧ꧀ꦧꦁ. ꦤꦲꦴꦠꦺꦤ ꦈꦠ꧀ꦠꦫꦤ꧀ꦠꦺꦤ ꦎꦠꦫꦤ꧀ꦠꦴꦤꦁ ꦩꦒ꧀ꦒꦺꦴ ꦢꦴꦠꦧ꧀ꦧꦺꦴ. ꦪꦺꦴ ꦥꦕ꧀ꦖꦴ ꦗꦤ꧀ꦠꦴꦓꦫꦴ ꦤꦶꦏ꧀ꦑꦩꦠꦶ, ꦱꦕꦺ ꦗꦤ꧀ꦠꦴꦓꦫꦁ ꦕꦶꦏ꧀ꦑꦭ꧀ꦭꦁ ꦲꦺꦴꦠꦶ, ꦣꦺꦴꦮꦶꦠꦧ꧀ꦧꦁ. ꦩꦠ꧀ꦠꦶꦏꦴꦢꦺꦴꦟꦶꦏꦁ ꦣꦺꦴꦮꦶꦠ꧀ꦮꦴ ꦗꦤ꧀ꦠꦴꦓꦫꦥꦷꦜꦁ ꦥꦛꦶꦱꦴꦩꦺꦠ꧀ꦮꦴ ꦄꦒ꧀ꦒꦶꦁ ꦮꦶꦗ꧀ꦙꦴꦥꦺꦠ꧀ꦮꦴ ꦢ꧀ꦮꦴꦫꦁ ꦡꦏꦺꦠ꧀ꦮꦴ ꦥꦏ꧀ꦏꦩꦶꦠꦧ꧀ꦧꦁ. ꦆꦢꦁ ꦑꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦗꦤ꧀ꦠꦴꦓꦫꦮꦠ꧀ꦠꦁ ꦪꦡꦴ ꦨꦶꦏ꧀ꦑꦹꦲꦶ ꦗꦤ꧀ꦠꦴꦓꦫꦺ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧ’’ꦤ꧀ꦠꦶ.

꧑꧐. ꦮꦕ꧀ꦕꦏꦸꦛꦶꦮꦠ꧀ꦠꦏꦡꦴ

꧓꧗꧓. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦚ꧀ꦚꦠꦫꦺꦴ ꦨꦶꦏ꧀ꦑꦸ ꦧ꧀ꦫꦴꦲ꧀ꦩꦟꦗꦴꦠꦶꦏꦺꦴ ꦮꦕ꧀ꦕꦁ ꦏꦠ꧀ꦮꦴ ꦤ ꦆꦕ꧀ꦖꦠꦶ ꦄꦴꦕꦩꦺꦠꦸꦁ – ꦏꦺꦴ ꦆꦩꦁ ꦮꦱꦭꦁ ꦢꦸꦒ꧀ꦒꦤ꧀ꦣꦁ ꦄꦴꦩꦱꦶꦱ꧀ꦱꦠꦷꦠꦶ [ꦄꦴꦕꦩꦶꦱ꧀ꦱꦠꦷꦠꦶ (ꦏ.)]. ꦠꦱ꧀ꦱ ꦮꦕ꧀ꦕꦩꦒ꧀ꦒꦺ ꦏꦶꦩꦶ ꦱꦟ꧀ꦜꦴꦠꦶ. ꦄꦡ ꦑꦺꦴ ꦱꦺꦴ ꦨꦶꦏ꧀ꦑꦸ ꦨꦶꦏ꧀ꦑꦹꦤꦁ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦶ. ‘‘ꦏꦶꦁ ꦥꦤ ꦠ꧀ꦮꦁ, ꦄꦴꦮꦸꦱꦺꦴ, ꦮꦕ꧀ꦕꦁ ꦏꦠ꧀ꦮꦴ ꦤ ꦄꦴꦕꦩꦺꦱꦷ’’ꦠꦶ? ‘‘ꦌꦮꦩꦴꦮꦸꦱꦺꦴ’’ꦠꦶ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦸ ꦮꦕ꧀ꦕꦁ ꦏꦠ꧀ꦮꦴ ꦤ ꦄꦴꦕꦩꦺꦱ꧀ꦱꦠꦷ’’ꦠꦶ! ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ‘‘ꦱꦕ꧀ꦕꦁ ꦏꦶꦫ ꦠ꧀ꦮꦁ, ꦨꦶꦏ꧀ꦑꦸ, ꦮꦕ꧀ꦕꦁ ꦏꦠ꧀ꦮꦴ ꦤ ꦄꦴꦕꦩꦺꦱꦷ’’ꦠꦶ? ‘‘ꦱꦕ꧀ꦕꦁ ꦨꦒꦮꦴ’’ꦠꦶ…ꦥꦺ… ꦮꦶꦒꦫꦲꦶꦠ꧀ꦮꦴ…ꦥꦺ… ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦤ, ꦨꦶꦏ꧀ꦑꦮꦺ, ꦮꦕ꧀ꦕꦁ ꦏꦠ꧀ꦮꦴ ꦱꦠꦶ ꦈꦢꦏꦺ ꦤꦴꦕꦩꦺꦠꦧ꧀ꦧꦁ. ꦪꦺꦴ ꦤꦴꦕꦩꦺꦪ꧀ꦪ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱꦴ’’ꦠꦶ.

ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦶꦏ꧀ꦑꦹ ꦮꦕ꧀ꦕꦏꦸꦛꦶꦪꦴ ꦪꦡꦴꦮꦸꦝ꧀ꦞꦁ ꦮꦕ꧀ꦕꦁ ꦏꦫꦺꦴꦤ꧀ꦠꦶ. ꦤꦮꦏꦴ ꦨꦶꦏ꧀ꦑꦹ ꦥꦜꦩꦠꦫꦁ ꦄꦴꦒꦤ꧀ꦠ꧀ꦮꦴ ꦮꦕ꧀ꦕꦶꦠꦴ ꦄꦴꦒꦩꦺꦤ꧀ꦠꦶ. ꦠꦺ ꦮꦕ꧀ꦕꦁ ꦱꦤ꧀ꦣꦴꦫꦺꦤ꧀ꦠꦴ ꦩꦸꦕ꧀ꦖꦶꦠꦴ ꦥꦥꦠꦤ꧀ꦠꦶ. ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ꦱꦕ꧀ꦕꦁ ꦏꦶꦫ ꦨꦶꦏ꧀ꦑꦮꦺ…ꦥꦺ… ꦱꦕ꧀ꦕꦁ ꦨꦒꦮꦴꦠꦶ…ꦥꦺ… ‘‘ꦤ, ꦨꦶꦏ꧀ꦑꦮꦺ, ꦮꦕ꧀ꦕꦏꦸꦛꦶꦪꦴ ꦪꦡꦴꦮꦸꦝ꧀ꦞꦁ ꦮꦕ꧀ꦕꦺꦴ ꦏꦴꦠꦧ꧀ꦧꦺꦴ. ꦪꦺꦴ ꦏꦫꦺꦪ꧀ꦪ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦄꦴꦒꦠꦥꦛꦶꦥꦴꦛꦶꦪꦴ ꦮꦕ꧀ꦕꦁ ꦏꦴꦠꦸ’’ꦤ꧀ꦠꦶ.

ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦄꦠꦶꦱꦲꦱꦴꦥꦶ ꦮꦕ꧀ꦕꦏꦸꦛꦶꦁ ꦥꦮꦶꦱꦤ꧀ꦠꦶ, ꦈꦧ꧀ꦨꦗꦶꦠ꧀ꦮꦴꦥꦶ [ꦈꦧ꧀ꦨꦸꦗ꧀ꦗꦶꦠ꧀ꦮꦴꦥꦶ (ꦱꦷ.), ꦈꦧ꧀ꦨꦸꦗꦶꦠ꧀ꦮꦴ (ꦱ꧀ꦪꦴ.)] ꦥꦮꦶꦱꦤ꧀ꦠꦶ, ꦤꦶꦠ꧀ꦡꦸꦤꦤ꧀ꦠꦴꦥꦶ ꦮꦕ꧀ꦕꦁ ꦏꦫꦺꦴꦤ꧀ꦠꦶ, ꦢꦤ꧀ꦠꦏꦛ꧀ꦜꦁ ꦑꦴꦢꦤ꧀ꦠꦴꦥꦶ ꦮꦕ꧀ꦕꦁ ꦏꦫꦺꦴꦤ꧀ꦠꦶ, ꦧꦲꦶꦢ꧀ꦣꦴꦥꦶ ꦮꦕ꧀ꦕꦢꦺꦴꦟꦶꦏꦴꦪ ꦮꦕ꧀ꦕꦁ ꦏꦫꦺꦴꦤ꧀ꦠꦶ, ꦧꦲꦶꦢ꧀ꦣꦴꦥꦶ ꦥꦱ꧀ꦱꦴꦮꦢꦺꦴꦟꦶꦏꦴꦪ ꦥꦱ꧀ꦱꦴꦮꦁ ꦏꦫꦺꦴꦤ꧀ꦠꦶ, ꦥꦱ꧀ꦱꦴꦮꦢꦺꦴꦟꦶꦏꦴꦪꦥꦶ ꦑꦺꦭ꦳ꦁ ꦏꦫꦺꦴꦤ꧀ꦠꦶ, ꦦꦫꦸꦱꦺꦤꦥꦶ ꦏꦛ꧀ꦜꦺꦤ ꦄꦮꦭꦺꦑꦤ꧀ꦠꦶ, ꦄꦮꦭꦺꦑꦤꦏꦛ꧀ꦜꦩ꧀ꦥꦶ ꦮꦕ꧀ꦕꦏꦹꦥꦩ꧀ꦲꦶ ꦥꦴꦠꦺꦤ꧀ꦠꦶ, ꦄꦠꦶꦱꦲꦱꦴꦥꦶ ꦤꦶꦏ꧀ꦑꦩꦤ꧀ꦠꦶ, ꦈꦧ꧀ꦨꦗꦶꦠ꧀ꦮꦴꦥꦶ ꦤꦶꦏ꧀ꦑꦩꦤ꧀ꦠꦶ, ꦕꦥꦸꦕꦥꦸꦏꦴꦫꦏꦩ꧀ꦥꦶ ꦄꦴꦕꦩꦺꦤ꧀ꦠꦶ, ꦄꦴꦕꦩꦤꦱꦫꦴꦮꦏꦺꦥꦶ ꦈꦢꦏꦁ ꦱꦺꦱꦺꦤ꧀ꦠꦶ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦄꦠꦶꦱꦲꦱꦴꦥꦶ ꦮꦕ꧀ꦕꦏꦸꦛꦶꦁ ꦥꦮꦶꦱꦶꦱ꧀ꦱꦤ꧀ꦠꦶ, ꦈꦧ꧀ꦨꦗꦶꦠ꧀ꦮꦴꦥꦶ ꦥꦮꦶꦱꦶꦱ꧀ꦱꦤ꧀ꦠꦶ, ꦤꦶꦠ꧀ꦡꦸꦤꦤ꧀ꦠꦴꦥꦶ ꦮꦕ꧀ꦕꦁ ꦏꦫꦶꦱ꧀ꦱꦤ꧀ꦠꦶ, ꦢꦤ꧀ꦠꦏꦛ꧀ꦜꦁ ꦑꦴꦢꦤ꧀ꦠꦴꦥꦶ ꦮꦕ꧀ꦕꦁ ꦏꦫꦶꦱ꧀ꦱꦤ꧀ꦠꦶ, ꦧꦲꦶꦢ꧀ꦣꦴꦥꦶ ꦮꦕ꧀ꦕꦢꦺꦴꦟꦶꦏꦴꦪ ꦮꦕ꧀ꦕꦁ ꦏꦫꦶꦱ꧀ꦱꦤ꧀ꦠꦶ, ꦧꦲꦶꦢ꧀ꦣꦴꦥꦶ ꦥꦱ꧀ꦱꦴꦮꦢꦺꦴꦟꦶꦏꦴꦪ ꦥꦱ꧀ꦱꦴꦮꦁ ꦏꦫꦶꦱ꧀ꦱꦤ꧀ꦠꦶ, ꦥꦱ꧀ꦱꦴꦮꦢꦺꦴꦟꦶꦏꦴꦪꦥꦶ ꦑꦺꦭ꦳ꦁ ꦏꦫꦶꦱ꧀ꦱꦤ꧀ꦠꦶ, ꦦꦫꦸꦱꦺꦤꦥꦶ ꦏꦛ꧀ꦜꦺꦤ ꦄꦮꦭꦺꦑꦶꦱ꧀ꦱꦤ꧀ꦠꦶ, ꦄꦮꦭꦺꦑꦤꦏꦛ꧀ꦜꦩ꧀ꦥꦶ ꦮꦕ꧀ꦕꦏꦹꦥꦩ꧀ꦲꦶ ꦥꦴꦠꦺꦱ꧀ꦱꦤ꧀ꦠꦶ, ꦄꦠꦶꦱꦲꦱꦴꦥꦶ ꦤꦶꦏ꧀ꦑꦩꦶꦱ꧀ꦱꦤ꧀ꦠꦶ, ꦈꦧ꧀ꦨꦗꦶꦠ꧀ꦮꦴꦥꦶ ꦤꦶꦏ꧀ꦑꦩꦶꦱ꧀ꦱꦤ꧀ꦠꦶ, ꦕꦥꦸꦕꦥꦸꦏꦴꦫꦏꦩ꧀ꦥꦶ ꦄꦴꦕꦩꦺꦱ꧀ꦱꦤ꧀ꦠꦶ, ꦄꦴꦕꦩꦤꦱꦫꦴꦮꦏꦺꦥꦶ ꦈꦢꦏꦁ ꦱꦺꦱꦺꦱ꧀ꦱꦤ꧀ꦠꦷ’’ꦠꦶ! ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ…ꦥꦺ… ꦱꦕ꧀ꦕꦁ ꦨꦒꦮꦴꦠꦶ…ꦥꦺ… ꦮꦶꦒꦫꦲꦶꦠ꧀ꦮꦴ…ꦥꦺ… ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ –

꧓꧗꧔. ‘‘ꦠꦺꦤ ꦲꦶ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦮꦕ꧀ꦕꦏꦸꦛꦶꦮꦠ꧀ꦠꦁ ꦥꦚ꧀ꦚꦥꦺꦱ꧀ꦱꦴꦩꦶ ꦪꦡꦴ ꦨꦶꦏ꧀ꦑꦹꦲꦶ ꦮꦕ꧀ꦕꦏꦸꦛꦶꦪꦴ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. ꦪꦺꦴ ꦮꦕ꧀ꦕꦏꦸꦛꦶꦁ ꦒꦕ꧀ꦖꦠꦶ ꦠꦺꦤ ꦧꦲꦶ ꦜꦶꦠꦺꦤ [ꦧꦲꦶ ꦜꦶꦠꦺꦤ (ꦱꦷ. ꦏ.)] ꦈꦏ꧀ꦏꦴꦱꦶꦠꦧ꧀ꦧꦁ. ꦄꦤ꧀ꦠꦺꦴ ꦤꦶꦱꦶꦤ꧀ꦤꦺꦤꦥꦶ ꦈꦏ꧀ꦏꦴꦱꦶꦠꦧ꧀ꦧꦁ. ꦕꦷꦮꦫꦮꦁꦱꦺ ꦮꦴ ꦕꦷꦮꦫꦫꦗ꧀ꦗꦸꦪꦴ ꦮꦴ ꦕꦷꦮꦫꦁ ꦤꦶꦏ꧀ꦑꦶꦥꦶꦠ꧀ꦮꦴ ꦱꦴꦣꦸꦏꦁ ꦄꦠꦫꦩꦴꦤꦺꦤ ꦮꦕ꧀ꦕꦏꦸꦛꦷ ꦥꦮꦶꦱꦶꦠꦧ꧀ꦧꦴ. ꦤꦴꦠꦶꦱꦲꦱꦴ ꦥꦮꦶꦱꦶꦠꦧ꧀ꦧꦴ. ꦤ ꦈꦧ꧀ꦨꦗꦶꦠ꧀ꦮꦴ ꦥꦮꦶꦱꦶꦠꦧ꧀ꦧꦴ. ꦮꦕ꧀ꦕꦥꦴꦢꦸꦏꦴꦪ ꦜꦶꦠꦺꦤ ꦈꦧ꧀ꦨꦗꦶꦠꦧ꧀ꦧꦁ. ꦤ ꦤꦶꦠ꧀ꦡꦸꦤꦤ꧀ꦠꦺꦤ ꦮꦕ꧀ꦕꦺꦴ ꦏꦴꦠꦧ꧀ꦧꦺꦴ. ꦤ ꦢꦤ꧀ꦠꦏꦛ꧀ꦜꦁ ꦑꦴꦢꦤ꧀ꦠꦺꦤ ꦮꦕ꧀ꦕꦺꦴ ꦏꦴꦠꦧ꧀ꦧꦺꦴ. ꦤ ꦧꦲꦶꦢ꧀ꦣꦴ ꦮꦕ꧀ꦕꦢꦺꦴꦟꦶꦏꦴꦪ ꦮꦕ꧀ꦕꦺꦴ ꦏꦴꦠꦧ꧀ꦧꦺꦴ. ꦤ ꦧꦲꦶꦢ꧀ꦣꦴ ꦥꦱ꧀ꦱꦴꦮꦢꦺꦴꦟꦶꦏꦴꦪ ꦥꦱ꧀ꦱꦴꦮꦺꦴ ꦏꦴꦠꦧ꧀ꦧꦺꦴ. ꦤ ꦥꦱ꧀ꦱꦴꦮꦢꦺꦴꦟꦶꦏꦴꦪ ꦑꦺꦭ꦳ꦺꦴ ꦏꦴꦠꦧ꧀ꦧꦺꦴ. ꦤ ꦦꦫꦸꦱꦺꦤ ꦏꦛ꧀ꦜꦺꦤ ꦄꦮꦭꦺꦑꦶꦠꦧ꧀ꦧꦁ. ꦤ ꦄꦮꦭꦺꦑꦤꦏꦛ꧀ꦜꦁ ꦮꦕ꧀ꦕꦏꦹꦥꦩ꧀ꦲꦶ ꦥꦴꦠꦺꦠꦧ꧀ꦧꦁ. ꦮꦕ꧀ꦕꦥꦴꦢꦸꦏꦴꦪ ꦜꦶꦠꦺꦤ ꦥꦛꦶꦕ꧀ꦖꦴꦢꦺꦠꦧ꧀ꦧꦁ. ꦤꦴꦠꦶꦱꦲꦱꦴ ꦤꦶꦏ꧀ꦑꦩꦶꦠꦧ꧀ꦧꦁ. ꦤ ꦈꦧ꧀ꦨꦗꦶꦠ꧀ꦮꦴ ꦤꦶꦏ꧀ꦑꦩꦶꦠꦧ꧀ꦧꦁ. ꦄꦴꦕꦩꦤꦥꦴꦢꦸꦏꦴꦪ ꦜꦶꦠꦺꦤ ꦈꦧ꧀ꦨꦗꦶꦠꦧ꧀ꦧꦁ. ꦤ ꦕꦥꦸꦕꦥꦸꦏꦴꦫꦏꦁ ꦄꦴꦕꦩꦺꦠꦧ꧀ꦧꦁ. ꦤ ꦄꦴꦕꦩꦤꦱꦫꦴꦮꦏꦺ ꦈꦢꦏꦁ ꦱꦺꦱꦺꦠꦧ꧀ꦧꦁ. ꦄꦴꦕꦩꦤꦥꦴꦢꦸꦏꦴꦪ ꦜꦶꦠꦺꦤ ꦥꦛꦶꦕ꧀ꦖꦴꦢꦺꦠꦧ꧀ꦧꦁ.

‘‘ꦱꦕꦺ ꦮꦕ꧀ꦕꦏꦸꦛꦶ ꦈꦲꦠꦴ [ꦈꦴꦲꦠꦴ (ꦱꦷ. ꦱ꧀ꦪꦴ.)] ꦲꦺꦴꦠꦶ, ꦣꦺꦴꦮꦶꦠꦧ꧀ꦧꦴ. ꦱꦕꦺ ꦄꦮꦭꦺꦑꦤꦥꦶꦣꦫꦺꦴ ꦥꦹꦫꦺꦴ ꦲꦺꦴꦠꦶ, ꦄꦮꦭꦺꦑꦤꦏꦛ꧀ꦜꦁ ꦖꦝ꧀ꦝꦺꦠꦧ꧀ꦧꦁ. ꦱꦕꦺ ꦮꦕ꧀ꦕꦏꦸꦛꦶ ꦈꦏ꧀ꦭꦴꦥꦴ ꦲꦺꦴꦠꦶ, ꦮꦕ꧀ꦕꦏꦸꦛꦶ ꦱꦩ꧀ꦩꦗ꧀ꦗꦶꦠꦧ꧀ꦧꦴ. ꦱꦕꦺ ꦥꦫꦶꦨꦟ꧀ꦝꦁ ꦈꦏ꧀ꦭꦴꦥꦁ ꦲꦺꦴꦠꦶ, ꦥꦫꦶꦨꦟ꧀ꦝꦁ ꦱꦩ꧀ꦩꦗ꧀ꦗꦶꦠꦧ꧀ꦧꦁ. ꦱꦕꦺ ꦥꦫꦶꦮꦺꦟꦁ ꦈꦏ꧀ꦭꦴꦥꦁ ꦲꦺꦴꦠꦶ, ꦥꦫꦶꦮꦺꦟꦁ ꦱꦩ꧀ꦩꦗ꧀ꦗꦶꦠꦧ꧀ꦧꦁ. ꦱꦕꦺ ꦏꦺꦴꦛ꧀ꦜꦏꦺꦴ ꦈꦏ꧀ꦭꦴꦥꦺꦴ ꦲꦺꦴꦠꦶ, ꦏꦺꦴꦛ꧀ꦜꦏꦺꦴ ꦱꦩ꧀ꦩꦗ꧀ꦗꦶꦠꦧ꧀ꦧꦺꦴ. ꦱꦕꦺ ꦄꦴꦕꦩꦤꦏꦸꦩ꧀ꦨꦶꦪꦴ ꦈꦢꦏꦁ ꦤ ꦲꦺꦴꦠꦶ, ꦄꦴꦕꦩꦤꦏꦸꦩ꧀ꦨꦶꦪꦴ ꦈꦢꦏꦁ ꦄꦴꦱꦶꦚ꧀ꦕꦶꦠꦧ꧀ꦧꦁ. ꦆꦢꦁ ꦑꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦮꦕ꧀ꦕꦏꦸꦛꦶꦮꦠ꧀ꦠꦁ ꦪꦡꦴ ꦨꦶꦏ꧀ꦑꦹꦲꦶ ꦮꦕ꧀ꦕꦏꦸꦛꦶꦪꦴ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧ’’ꦤ꧀ꦠꦶ.

꧑꧑. ꦈꦥꦗ꧀ꦙꦴꦪꦮꦠ꧀ꦠꦏꦡꦴ

꧓꧗꧕. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦢ꧀ꦣꦶꦮꦶꦲꦴꦫꦶꦏꦴ ꦈꦥꦗ꧀ꦙꦴꦪꦺꦱꦸ ꦤ ꦱꦩ꧀ꦩꦴ ꦮꦠ꧀ꦠꦤ꧀ꦠꦶ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦱꦢ꧀ꦣꦶꦮꦶꦲꦴꦫꦶꦏꦴ ꦈꦥꦗ꧀ꦙꦴꦪꦺꦱꦸ ꦤ ꦱꦩ꧀ꦩꦴ ꦮꦠ꧀ꦠꦶꦱ꧀ꦱꦤ꧀ꦠꦷ’’ꦠꦶ! ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ‘‘ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦱꦢ꧀ꦣꦶꦮꦶꦲꦴꦫꦶꦏꦴ ꦈꦥꦗ꧀ꦙꦴꦪꦺꦱꦸ ꦤ ꦱꦩ꧀ꦩꦴ ꦮꦠ꧀ꦠꦤ꧀ꦠꦷ’’ꦠꦶ? ‘‘ꦱꦕ꧀ꦕꦁ ꦨꦒꦮꦴ’’ꦠꦶ ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ‘‘ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦱꦢ꧀ꦣꦶꦮꦶꦲꦴꦫꦶꦏꦴ ꦈꦥꦗ꧀ꦙꦴꦪꦺꦱꦸ ꦤ ꦱꦩ꧀ꦩꦴ ꦮꦠ꧀ꦠꦶꦱ꧀ꦱꦤ꧀ꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦮꦶꦒꦫꦲꦶꦠ꧀ꦮꦴ…ꦥꦺ… ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ –

꧓꧗꧖. ‘‘ꦠꦺꦤ ꦲꦶ, ꦨꦶꦏ꧀ꦑꦮꦺ, ꦱꦢ꧀ꦣꦶꦮꦶꦲꦴꦫꦶꦏꦴꦤꦁ ꦈꦥꦗ꧀ꦙꦴꦪꦺꦱꦸ ꦮꦠ꧀ꦠꦁ ꦥꦚ꧀ꦚꦥꦺꦱ꧀ꦱꦴꦩꦶ ꦪꦡꦴ ꦱꦢ꧀ꦣꦶꦮꦶꦲꦴꦫꦶꦏꦺꦲꦶ ꦈꦥꦗ꧀ꦙꦴꦪꦺꦱꦸ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. [ꦩꦲꦴꦮ. ꧖꧖] ꦱꦢ꧀ꦣꦶꦮꦶꦲꦴꦫꦶꦏꦺꦤ, ꦨꦶꦏ꧀ꦑꦮꦺ, ꦈꦥꦗ꧀ꦙꦴꦪꦩ꧀ꦲꦶ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. ꦠꦠ꧀ꦫꦴꦪꦁ ꦱꦩ꧀ꦩꦴꦮꦠ꧀ꦠꦤꦴ –

‘‘ꦏꦴꦭꦱ꧀ꦱꦺꦮ ꦈꦛ꧀ꦜꦴꦪ ꦈꦥꦴꦲꦤꦴ ꦎꦩꦸꦚ꧀ꦕꦶꦠ꧀ꦮꦴ ꦌꦏꦁꦱꦁ ꦈꦠ꧀ꦠꦫꦴꦱꦔ꧀ꦒꦁ ꦏꦫꦶꦠ꧀ꦮꦴ ꦢꦤ꧀ꦠꦏꦛ꧀ꦜꦁ ꦢꦴꦠꦧ꧀ꦧꦁ, ꦩꦸꦑꦺꦴꦢꦏꦁ ꦢꦴꦠꦧ꧀ꦧꦁ, ꦄꦴꦱꦤꦁ ꦥꦚ꧀ꦚꦥꦺꦠꦧ꧀ꦧꦁ. ꦱꦕꦺ ꦪꦴꦒꦸ ꦲꦺꦴꦠꦶ, ꦨꦴꦗꦤꦁ ꦣꦺꦴꦮꦶꦠ꧀ꦮꦴ ꦪꦴꦒꦸ ꦈꦥꦤꦴꦩꦺꦠꦧ꧀ꦧꦴ. ꦪꦴꦒꦸꦁ ꦥꦷꦠꦱ꧀ꦱ ꦈꦢꦏꦁ ꦢꦠ꧀ꦮꦴ ꦨꦴꦗꦤꦁ ꦥꦛꦶꦒ꧀ꦒꦲꦺꦠ꧀ꦮꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ ꦣꦺꦴꦮꦶꦠ꧀ꦮꦴ ꦥꦛꦶꦱꦴꦩꦺꦠꦧ꧀ꦧꦁ. ꦈꦥꦗ꧀ꦙꦴꦪꦩ꧀ꦲꦶ ꦮꦸꦛ꧀ꦜꦶꦠꦺ ꦄꦴꦱꦤꦁ ꦈꦢ꧀ꦣꦫꦶꦠꦧ꧀ꦧꦁ. ꦱꦕꦺ ꦱꦺꦴ ꦢꦺꦱꦺꦴ ꦈꦏ꧀ꦭꦴꦥꦺꦴ ꦲꦺꦴꦠꦶ, ꦱꦺꦴ ꦢꦺꦱꦺꦴ ꦱꦩ꧀ꦩꦗ꧀ꦗꦶꦠꦧ꧀ꦧꦺꦴ.

‘‘ꦱꦕꦺ ꦈꦥꦗ꧀ꦙꦴꦪꦺꦴ ꦒꦴꦩꦁ ꦥꦮꦶꦱꦶꦠꦸꦏꦴꦩꦺꦴ ꦲꦺꦴꦠꦶ, ꦤꦶꦮꦴꦱꦤꦁ ꦢꦴꦠꦧ꧀ꦧꦁ, ꦥꦛꦶꦤꦶꦮꦴꦱꦤꦁ ꦥꦛꦶꦒ꧀ꦒꦲꦺꦠꦧ꧀ꦧꦁ, ꦏꦴꦪꦧꦤ꧀ꦣꦤꦁ ꦢꦴꦠꦧ꧀ꦧꦁ, ꦱꦒꦸꦟꦁ ꦏꦠ꧀ꦮꦴ ꦱꦔ꧀ꦓꦴꦛꦶꦪꦺꦴ ꦢꦴꦠꦧ꧀ꦧꦴ, ꦣꦺꦴꦮꦶꦠ꧀ꦮꦴ ꦥꦠ꧀ꦠꦺꦴ ꦱꦺꦴꦢꦏꦺꦴ [ꦱꦈꦢꦏꦺꦴ (ꦏ.)] ꦢꦴꦠꦧ꧀ꦧꦺꦴ. ꦱꦕꦺ ꦈꦥꦗ꧀ꦙꦴꦪꦺꦴ ꦥꦕ꧀ꦖꦴꦱꦩꦟꦁ ꦄꦴꦏꦔ꧀ꦑꦠꦶ, ꦠꦶꦩꦟ꧀ꦝꦭꦁ ꦥꦛꦶꦕ꧀ꦖꦴꦢꦺꦤ꧀ꦠꦺꦤ ꦥꦫꦶꦩꦟ꧀ꦝꦭꦁ ꦤꦶꦮꦴꦱꦺꦠ꧀ꦮꦴ ꦏꦴꦪꦧꦤ꧀ꦣꦤꦁ ꦧꦤ꧀ꦣꦶꦠ꧀ꦮꦴ ꦱꦒꦸꦟꦁ ꦏꦠ꧀ꦮꦴ ꦱꦔ꧀ꦓꦴꦛꦶꦪꦺꦴ ꦥꦴꦫꦸꦥꦶꦠ꧀ꦮꦴ ꦒꦟ꧀ꦜꦶꦏꦁ ꦥꦛꦶꦩꦸꦚ꧀ꦕꦶꦠ꧀ꦮꦴ ꦣꦺꦴꦮꦶꦠ꧀ꦮꦴ ꦥꦠ꧀ꦠꦁ ꦒꦲꦺꦠ꧀ꦮꦴ ꦈꦥꦗ꧀ꦙꦴꦪꦱ꧀ꦱ ꦥꦕ꧀ꦖꦴꦱꦩꦟꦺꦤ ꦲꦺꦴꦠꦧ꧀ꦧꦁ. ꦤꦴꦠꦶꦢꦹꦫꦺ ꦒꦤ꧀ꦠꦧ꧀ꦧꦁ, ꦤꦴꦕ꧀ꦕꦴꦱꦤ꧀ꦤꦺ ꦒꦤ꧀ꦠꦧ꧀ꦧꦁ, ꦥꦠ꧀ꦠꦥꦫꦶꦪꦴꦥꦤ꧀ꦤꦁ ꦥꦛꦶꦒ꧀ꦒꦲꦺꦠꦧ꧀ꦧꦁ. ꦤ ꦈꦥꦗ꧀ꦙꦴꦪꦱ꧀ꦱ ꦨꦟꦩꦴꦤꦱ꧀ꦱ ꦄꦤ꧀ꦠꦫꦤ꧀ꦠꦫꦴ ꦏꦡꦴ ꦎꦥꦴꦠꦺꦠꦧ꧀ꦧꦴ. ꦈꦥꦗ꧀ꦙꦴꦪꦺꦴ ꦄꦴꦥꦠ꧀ꦠꦶꦱꦴꦩꦤ꧀ꦠꦴ ꦨꦟꦩꦴꦤꦺꦴ ꦤꦶꦮꦴꦫꦺꦠꦧ꧀ꦧꦺꦴ.

‘‘ꦤꦶꦮꦠ꧀ꦠꦤ꧀ꦠꦺꦤ ꦥꦜꦩꦠꦫꦁ ꦄꦴꦒꦤ꧀ꦠ꧀ꦮꦴ ꦄꦴꦱꦤꦁ ꦥꦚ꧀ꦚꦥꦺꦠꦧ꧀ꦧꦁ, ꦥꦴꦢꦺꦴꦢꦏꦁ ꦥꦴꦢꦥꦷꦜꦁ ꦥꦴꦢꦏꦡꦭꦶꦏꦁ ꦈꦥꦤꦶꦏ꧀ꦑꦶꦥꦶꦠꦧ꧀ꦧꦁ, ꦥꦕ꧀ꦕꦸꦒ꧀ꦒꦤ꧀ꦠ꧀ꦮꦴ ꦥꦠ꧀ꦠꦕꦷꦮꦫꦁ ꦥꦛꦶꦒ꧀ꦒꦲꦺꦠꦧ꧀ꦧꦁ, ꦥꦛꦶꦤꦶꦮꦴꦱꦤꦁ ꦢꦴꦠꦧ꧀ꦧꦁ, ꦤꦶꦮꦴꦱꦤꦁ ꦥꦛꦶꦒ꧀ꦒꦲꦺꦠꦧ꧀ꦧꦁ. ꦱꦕꦺ ꦕꦷꦮꦫꦁ ꦱꦶꦤ꧀ꦤꦁ ꦲꦺꦴꦠꦶ, ꦩꦸꦲꦸꦠ꧀ꦠꦁ ꦈꦟ꧀ꦲꦺ ꦎꦠꦴꦥꦺꦠꦧ꧀ꦧꦁ, ꦤ ꦕ ꦈꦟ꧀ꦲꦺ ꦕꦷꦮꦫꦁ ꦤꦶꦢꦲꦶꦠꦧ꧀ꦧꦁ. ꦕꦷꦮꦫꦁ ꦱꦔ꧀ꦓꦫꦶꦠꦧ꧀ꦧꦁ. ꦕꦷꦮꦫꦁ ꦱꦔ꧀ꦓꦫꦤ꧀ꦠꦺꦤ ꦕꦠꦸꦫꦔ꧀ꦒꦸꦭꦁ ꦏꦟ꧀ꦟꦁ ꦈꦱ꧀ꦱꦴꦫꦺꦠ꧀ꦮꦴ ꦕꦷꦮꦫꦁ ꦱꦔ꧀ꦓꦫꦶꦠꦧ꧀ꦧꦁ – ꦩꦴ ꦩꦗ꧀ꦙꦺ ꦨꦔ꧀ꦒꦺꦴ ꦄꦲꦺꦴꦱꦷꦠꦶ. ꦎꦨꦺꦴꦒꦺ ꦏꦴꦪꦧꦤ꧀ꦣꦤꦁ ꦏꦴꦠꦧ꧀ꦧꦁ.

‘‘ꦱꦕꦺ ꦥꦶꦟ꧀ꦝꦥꦴꦠꦺꦴ ꦲꦺꦴꦠꦶ, ꦈꦥꦗ꧀ꦙꦴꦪꦺꦴ ꦕ ꦨꦸꦚ꧀ꦗꦶꦠꦸꦏꦴꦩꦺꦴ ꦲꦺꦴꦠꦶ, ꦈꦢꦏꦁ ꦢꦠ꧀ꦮꦴ ꦥꦶꦟ꧀ꦝꦥꦴꦠꦺꦴ ꦈꦥꦤꦴꦩꦺꦠꦧ꧀ꦧꦺꦴ. ꦈꦥꦗ꧀ꦙꦴꦪꦺꦴ ꦥꦴꦤꦷꦪꦺꦤ ꦥꦸꦕ꧀ꦖꦶꦠꦧ꧀ꦧꦺꦴ. ꦨꦸꦠ꧀ꦠꦴꦮꦶꦱ꧀ꦱ ꦈꦢꦏꦁ ꦢꦠ꧀ꦮꦴ ꦥꦠ꧀ꦠꦁ ꦥꦛꦶꦒ꧀ꦒꦲꦺꦠ꧀ꦮꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ ꦣꦺꦴꦮꦶꦠ꧀ꦮꦴ ꦮꦺꦴꦢꦏꦁ ꦏꦠ꧀ꦮꦴ ꦩꦸꦲꦸꦠ꧀ꦠꦁ ꦈꦟ꧀ꦲꦺ ꦎꦠꦴꦥꦺꦠꦧ꧀ꦧꦺꦴ. ꦤ ꦕ ꦈꦟ꧀ꦲꦺ ꦥꦠ꧀ꦠꦺꦴ ꦤꦶꦢꦲꦶꦠꦧ꧀ꦧꦺꦴ. ꦥꦠ꧀ꦠꦕꦷꦮꦫꦁ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦥꦠ꧀ꦠꦁ ꦤꦶꦏ꧀ꦑꦶꦥꦤ꧀ꦠꦺꦤ ꦌꦏꦺꦤ ꦲꦠ꧀ꦡꦺꦤ ꦥꦠ꧀ꦠꦁ ꦒꦲꦺꦠ꧀ꦮꦴ ꦌꦏꦺꦤ ꦲꦠ꧀ꦡꦺꦤ ꦲꦺꦛ꧀ꦜꦴꦩꦚ꧀ꦕꦁ ꦮꦴ ꦲꦺꦛ꧀ꦜꦴꦥꦷꦜꦁ ꦮꦴ ꦥꦫꦴꦩꦱꦶꦠ꧀ꦮꦴ ꦥꦠ꧀ꦠꦺꦴ ꦤꦶꦏ꧀ꦑꦶꦥꦶꦠꦧ꧀ꦧꦺꦴ. ꦤ ꦕ ꦄꦤꦤ꧀ꦠꦫꦲꦶꦠꦴꦪ ꦨꦹꦩꦶꦪꦴ ꦥꦠ꧀ꦠꦺꦴ ꦤꦶꦏ꧀ꦑꦶꦥꦶꦠꦧ꧀ꦧꦺꦴ. ꦕꦷꦮꦫꦁ ꦤꦶꦏ꧀ꦑꦶꦥꦤ꧀ꦠꦺꦤ ꦌꦏꦺꦤ ꦲꦠ꧀ꦡꦺꦤ ꦕꦷꦮꦫꦁ ꦒꦲꦺꦠ꧀ꦮꦴ ꦌꦏꦺꦤ ꦲꦠ꧀ꦡꦺꦤ ꦕꦷꦮꦫꦮꦁꦱꦁ ꦮꦴ ꦕꦷꦮꦫꦫꦗ꧀ꦗꦸꦁ ꦮꦴ ꦥꦩꦗ꧀ꦗꦶꦠ꧀ꦮꦴ ꦥꦴꦫꦠꦺꦴ ꦄꦤ꧀ꦠꦁ ꦎꦫꦠꦺꦴ ꦨꦺꦴꦒꦁ ꦏꦠ꧀ꦮꦴ ꦕꦷꦮꦫꦁ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦈꦥꦗ꧀ꦙꦴꦪꦩ꧀ꦲꦶ ꦮꦸꦛ꧀ꦜꦶꦠꦺ ꦄꦴꦱꦤꦁ ꦈꦢ꧀ꦣꦫꦶꦠꦧ꧀ꦧꦁ, ꦥꦴꦢꦺꦴꦢꦏꦁ ꦥꦴꦢꦥꦷꦜꦁ ꦥꦴꦢꦏꦡꦭꦶꦏꦁ ꦥꦛꦶꦱꦴꦩꦺꦠꦧ꧀ꦧꦁ. ꦱꦕꦺ ꦱꦺꦴ ꦢꦺꦱꦺꦴ ꦈꦏ꧀ꦭꦴꦥꦺꦴ ꦲꦺꦴꦠꦶ, ꦱꦺꦴ ꦢꦺꦱꦺꦴ ꦱꦩ꧀ꦩꦗ꧀ꦗꦶꦠꦧ꧀ꦧꦺꦴ.

‘‘ꦱꦕꦺ ꦈꦥꦗ꧀ꦙꦴꦪꦺꦴ ꦤꦲꦴꦪꦶꦠꦸꦏꦴꦩꦺꦴ ꦲꦺꦴꦠꦶ, ꦤꦲꦴꦤꦁ ꦥꦛꦶꦪꦴꦢꦺꦠꦧ꧀ꦧꦁ. ꦱꦕꦺ ꦱꦷꦠꦺꦤ ꦄꦠ꧀ꦡꦺꦴ ꦲꦺꦴꦠꦶ, ꦱꦷꦠꦁ ꦥꦛꦶꦪꦴꦢꦺꦠꦧ꧀ꦧꦁ. ꦱꦕꦺ ꦈꦟ꧀ꦲꦺꦤ ꦄꦠ꧀ꦡꦺꦴ ꦲꦺꦴꦠꦶ, ꦈꦟ꧀ꦲꦁ ꦥꦛꦶꦪꦴꦢꦺꦠꦧ꧀ꦧꦁ.

‘‘ꦱꦕꦺ ꦈꦥꦗ꧀ꦙꦴꦪꦺꦴ ꦗꦤ꧀ꦠꦴꦓꦫꦁ ꦥꦮꦶꦱꦶꦠꦸꦏꦴꦩꦺꦴ ꦲꦺꦴꦠꦶ, ꦕꦸꦟ꧀ꦟꦁ ꦱꦤ꧀ꦤꦺꦠꦧ꧀ꦧꦁ, ꦩꦠ꧀ꦠꦶꦏꦴ ꦠꦺꦩꦺꦠꦧ꧀ꦧꦴ, ꦗꦤ꧀ꦠꦴꦓꦫꦥꦷꦜꦁ ꦄꦴꦢꦴꦪ ꦈꦥꦗ꧀ꦙꦴꦪꦱ꧀ꦱ ꦥꦶꦛ꧀ꦜꦶꦠꦺꦴ ꦥꦶꦛ꧀ꦜꦶꦠꦺꦴ ꦒꦤ꧀ꦠ꧀ꦮꦴ ꦗꦤ꧀ꦠꦴꦓꦫꦥꦷꦜꦁ ꦢꦠ꧀ꦮꦴ ꦕꦷꦮꦫꦁ ꦥꦛꦶꦒ꧀ꦒꦲꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ, ꦕꦸꦟ꧀ꦟꦁ ꦢꦴꦠꦧ꧀ꦧꦁ, ꦩꦠ꧀ꦠꦶꦏꦴ ꦢꦴꦠꦧ꧀ꦧꦴ. ꦱꦕꦺ ꦈꦱ꧀ꦱꦲꦠꦶ, ꦗꦤ꧀ꦠꦴꦓꦫꦁ ꦥꦮꦶꦱꦶꦠꦧ꧀ꦧꦁ. ꦗꦤ꧀ꦠꦴꦓꦫꦁ ꦥꦮꦶꦱꦤ꧀ꦠꦺꦤ ꦩꦠ꧀ꦠꦶꦏꦴꦪ ꦩꦸꦑꦁ ꦩꦏ꧀ꦑꦺꦠ꧀ꦮꦴ ꦥꦸꦫꦠꦺꦴ ꦕ ꦥꦕ꧀ꦖꦠꦺꦴ ꦕ ꦥꦛꦶꦕ꧀ꦖꦴꦢꦺꦠ꧀ꦮꦴ ꦗꦤ꧀ꦠꦴꦓꦫꦁ ꦥꦮꦶꦱꦶꦠꦧ꧀ꦧꦁ. ꦤ ꦡꦺꦫꦺ ꦨꦶꦏ꧀ꦑꦹ ꦄꦤꦸꦥꦑꦗ꧀ꦗ ꦤꦶꦱꦷꦢꦶꦠꦧ꧀ꦧꦁ. ꦤ ꦤꦮꦴ ꦨꦶꦏ꧀ꦑꦹ ꦄꦴꦱꦤꦺꦤ ꦥꦛꦶꦧꦴꦲꦶꦠꦧ꧀ꦧꦴ. ꦗꦤ꧀ꦠꦴꦓꦫꦺ ꦈꦥꦗ꧀ꦙꦴꦪꦱ꧀ꦱ ꦥꦫꦶꦏꦩ꧀ꦩꦁ ꦏꦴꦠꦧ꧀ꦧꦁ. ꦗꦤ꧀ꦠꦴꦓꦫꦴ ꦤꦶꦏ꧀ꦑꦩꦤ꧀ꦠꦺꦤ ꦗꦤ꧀ꦠꦴꦓꦫꦥꦷꦜꦁ ꦄꦴꦢꦴꦪ ꦥꦸꦫꦠꦺꦴ ꦕ ꦥꦕ꧀ꦖꦠꦺꦴ ꦕ ꦥꦛꦶꦕ꧀ꦖꦴꦢꦺꦠ꧀ꦮꦴ ꦗꦤ꧀ꦠꦴꦓꦫꦴ ꦤꦶꦏ꧀ꦑꦩꦶꦠꦧ꧀ꦧꦁ.

‘‘ꦈꦢꦏꦺꦥꦶ ꦈꦥꦗ꧀ꦙꦴꦪꦱ꧀ꦱ ꦥꦫꦶꦏꦩ꧀ꦩꦁ ꦏꦴꦠꦧ꧀ꦧꦁ. ꦤꦲꦴꦠꦺꦤ ꦥꦜꦩꦠꦫꦁ ꦈꦠ꧀ꦠꦫꦶꦠ꧀ꦮꦴ ꦄꦠ꧀ꦠꦤꦺꦴ ꦒꦠ꧀ꦠꦁ ꦮꦺꦴꦢꦏꦁ ꦏꦠ꧀ꦮꦴ ꦤꦶꦮꦴꦱꦺꦠ꧀ꦮꦴ ꦈꦥꦗ꧀ꦙꦴꦪꦱ꧀ꦱ ꦒꦠ꧀ꦠꦠꦺꦴ ꦈꦢꦏꦁ ꦥꦩꦗ꧀ꦗꦶꦠꦧ꧀ꦧꦁ, ꦤꦶꦮꦴꦱꦤꦁ ꦢꦴꦠꦧ꧀ꦧꦁ, ꦱꦔ꧀ꦓꦴꦛꦶ ꦢꦴꦠꦧ꧀ꦧꦴ, ꦗꦤ꧀ꦠꦴꦓꦫꦥꦷꦜꦁ ꦄꦴꦢꦴꦪ ꦥꦜꦩꦠꦫꦁ ꦄꦴꦒꦤ꧀ꦠ꧀ꦮꦴ ꦄꦴꦱꦤꦁ ꦥꦚ꧀ꦚꦥꦺꦠꦧ꧀ꦧꦁ, ꦥꦴꦢꦺꦴꦢꦏꦁ ꦥꦴꦢꦥꦷꦜꦁ ꦥꦴꦢꦏꦡꦭꦶꦏꦁ ꦈꦥꦤꦶꦏ꧀ꦑꦶꦥꦶꦠꦧ꧀ꦧꦁ. ꦈꦥꦗ꧀ꦙꦴꦪꦺꦴ ꦥꦴꦤꦷꦪꦺꦤ ꦥꦸꦕ꧀ꦖꦶꦠꦧ꧀ꦧꦺꦴ. ꦱꦕꦺ ꦈꦢ꧀ꦢꦶꦱꦴꦥꦺꦠꦸꦏꦴꦩꦺꦴ ꦲꦺꦴꦠꦶ, ꦈꦢ꧀ꦢꦶꦱꦶꦠꦧ꧀ꦧꦺꦴ. ꦱꦕꦺ ꦥꦫꦶꦥꦸꦕ꧀ꦖꦶꦠꦸꦏꦴꦩꦺꦴ ꦲꦺꦴꦠꦶ, ꦥꦫꦶꦥꦸꦕ꧀ꦖꦶꦠꦧ꧀ꦧꦺꦴ.

‘‘ꦪꦱ꧀ꦩꦶꦁ ꦮꦶꦲꦴꦫꦺ ꦈꦥꦗ꧀ꦙꦴꦪꦺꦴ ꦮꦶꦲꦫꦠꦶ, ꦱꦕꦺ ꦱꦺꦴ ꦮꦶꦲꦴꦫꦺꦴ ꦈꦏ꧀ꦭꦴꦥꦺꦴ ꦲꦺꦴꦠꦶ, ꦱꦕꦺ ꦈꦱ꧀ꦱꦲꦠꦶ, ꦱꦺꦴꦣꦺꦠꦧ꧀ꦧꦺꦴ. ꦮꦶꦲꦴꦫꦁ ꦱꦺꦴꦣꦺꦤ꧀ꦠꦺꦤ ꦥꦜꦩꦁ ꦥꦠ꧀ꦠꦕꦷꦮꦫꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦤꦶꦱꦷꦢꦤꦥꦕ꧀ꦕꦠ꧀ꦡꦫꦟꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦨꦶꦱꦶꦧꦶꦧ꧀ꦧꦺꦴꦲꦤꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦩꦚ꧀ꦕꦺꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ, ꦄꦱꦔ꧀ꦓꦛ꧀ꦛꦺꦤ꧀ꦠꦺꦤ ꦏꦮꦴꦛꦥꦶꦛ꧀ꦜꦁ, ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦺꦴ; ꦥꦷꦜꦁ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ, ꦄꦱꦔ꧀ꦓꦛ꧀ꦛꦺꦤ꧀ꦠꦺꦤ ꦏꦮꦴꦛꦥꦶꦛ꧀ꦜꦁ, ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦩꦚ꧀ꦕꦥꦛꦶꦥꦴꦢꦏꦴ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦴ; ꦑꦺꦭ꦳ꦩꦭ꧀ꦭꦏꦺꦴ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦺꦴ; ꦄꦥꦱ꧀ꦱꦺꦤꦦꦭꦏꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦨꦹꦩꦠ꧀ꦡꦫꦟꦁ ꦪꦡꦴꦥꦚ꧀ꦚꦠ꧀ꦠꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦱꦕꦺ ꦮꦶꦲꦴꦫꦺ ꦱꦤ꧀ꦠꦴꦤꦏꦁ ꦲꦺꦴꦠꦶ, ꦈꦭ꧀ꦭꦺꦴꦏꦴ ꦥꦜꦩꦁ ꦎꦲꦴꦫꦺꦠꦧ꧀ꦧꦁ, ꦄꦴꦭꦺꦴꦏꦱꦤ꧀ꦣꦶꦏꦟ꧀ꦟꦨꦴꦒꦴ ꦥꦩꦗ꧀ꦗꦶꦠꦧ꧀ꦧꦴ. ꦱꦕꦺ ꦒꦺꦫꦸꦏꦥꦫꦶꦏꦩ꧀ꦩꦏꦠꦴ ꦨꦶꦠ꧀ꦠꦶ ꦏꦟ꧀ꦟꦏꦶꦠꦴ ꦲꦺꦴꦠꦶ, ꦕꦺꦴꦭ꦳ꦏꦁ ꦠꦺꦩꦺꦠ꧀ꦮꦴ ꦥꦷꦭ꦳ꦺꦠ꧀ꦮꦴ ꦥꦩꦗ꧀ꦗꦶꦠꦧ꧀ꦧꦴ. ꦱꦕꦺ ꦏꦴꦭ꦳ꦮꦟ꧀ꦟꦏꦠꦴ ꦨꦹꦩꦶ ꦏꦟ꧀ꦟꦏꦶꦠꦴ ꦲꦺꦴꦠꦶ, ꦕꦺꦴꦭ꦳ꦏꦁ ꦠꦺꦩꦺꦠ꧀ꦮꦴ ꦥꦷꦭ꦳ꦺꦠ꧀ꦮꦴ ꦥꦩꦗ꧀ꦗꦶꦠꦧ꧀ꦧꦴ. ꦱꦕꦺ ꦄꦏꦠꦴ ꦲꦺꦴꦠꦶ ꦨꦹꦩꦶ, ꦈꦢꦏꦺꦤ ꦥꦫꦶꦥ꧀ꦦꦺꦴꦱꦶꦠ꧀ꦮꦴ ꦥꦫꦶꦦꦺꦴꦱꦶꦠ꧀ꦮꦴ ꦱꦩ꧀ꦩꦗ꧀ꦗꦶꦠꦧ꧀ꦧꦴ – ꦩꦴ ꦮꦶꦲꦴꦫꦺꦴ ꦫꦗꦺꦤ ꦈꦲꦚ꧀ꦚꦷꦠꦶ. ꦱꦔ꧀ꦏꦴꦫꦁ ꦮꦶꦕꦶꦤꦶꦠ꧀ꦮꦴ ꦌꦏꦩꦤ꧀ꦠꦁ ꦖꦝ꧀ꦝꦺꦠꦧ꧀ꦧꦁ.

‘‘ꦨꦹꦩꦠ꧀ꦡꦫꦟꦁ ꦎꦠꦴꦥꦺꦠ꧀ꦮꦴ ꦱꦺꦴꦣꦺꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦥꦚ꧀ꦚꦠ꧀ꦠꦁ ꦥꦚ꧀ꦚꦥꦺꦠꦧ꧀ꦧꦁ. ꦩꦚ꧀ꦕꦥꦛꦶꦥꦴꦢꦏꦴ ꦎꦠꦴꦥꦺꦠ꧀ꦮꦴ ꦥꦩꦗ꧀ꦗꦶꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦜꦴꦤꦺ ꦜꦥꦺꦠꦧ꧀ꦧꦴ. ꦩꦚ꧀ꦕꦺꦴ ꦎꦠꦴꦥꦺꦠ꧀ꦮꦴ ꦱꦺꦴꦣꦺꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ, ꦄꦱꦔ꧀ꦓꦛ꧀ꦛꦺꦤ꧀ꦠꦺꦤ ꦏꦮꦴꦛꦥꦶꦛ꧀ꦜꦁ, ꦄꦠꦶꦲꦫꦶꦠ꧀ꦮꦴ ꦪꦡꦴꦥꦚ꧀ꦚꦠ꧀ꦠꦁ ꦥꦚ꧀ꦚꦥꦺꦠꦧ꧀ꦧꦺꦴ. ꦥꦷꦜꦁ ꦎꦠꦴꦥꦺꦠ꧀ꦮꦴ ꦱꦺꦴꦣꦺꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ, ꦄꦱꦔ꧀ꦓꦛ꧀ꦛꦺꦤ꧀ꦠꦺꦤ ꦏꦮꦴꦛꦥꦶꦛ꧀ꦜꦁ, ꦄꦠꦶꦲꦫꦶꦠ꧀ꦮꦴ ꦪꦡꦴꦥꦚ꧀ꦚꦠ꧀ꦠꦁ ꦥꦚ꧀ꦚꦥꦺꦠꦧ꧀ꦧꦁ. ꦨꦶꦱꦶꦧꦶꦧ꧀ꦧꦺꦴꦲꦤꦁ ꦎꦠꦴꦥꦺꦠ꧀ꦮꦴ ꦱꦺꦴꦣꦺꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦥꦚ꧀ꦚꦠ꧀ꦠꦁ ꦥꦚ꧀ꦚꦥꦺꦠꦧ꧀ꦧꦁ. ꦤꦶꦱꦷꦢꦤꦥꦕ꧀ꦕꦠ꧀ꦡꦫꦟꦁ ꦎꦠꦴꦥꦺꦠ꧀ꦮꦴ ꦱꦺꦴꦣꦺꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦥꦚ꧀ꦚꦠ꧀ꦠꦁ ꦥꦚ꧀ꦚꦥꦺꦠꦧ꧀ꦧꦁ. ꦑꦺꦭ꦳ꦩꦭ꧀ꦭꦏꦺꦴ ꦎꦠꦴꦥꦺꦠ꧀ꦮꦴ ꦥꦩꦗ꧀ꦗꦶꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦜꦴꦤꦺ ꦜꦥꦺꦠꦧ꧀ꦧꦺꦴ. ꦄꦥꦱ꧀ꦱꦺꦤꦦꦭꦏꦁ ꦎꦠꦴꦥꦺꦠ꧀ꦮꦴ ꦥꦩꦗ꧀ꦗꦶꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦜꦴꦤꦺ ꦜꦥꦺꦠꦧ꧀ꦧꦁ. ꦥꦠ꧀ꦠꦕꦷꦮꦫꦁ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦥꦠ꧀ꦠꦁ ꦤꦶꦏ꧀ꦑꦶꦥꦤ꧀ꦠꦺꦤ ꦌꦏꦺꦤ ꦲꦠ꧀ꦡꦺꦤ ꦥꦠ꧀ꦠꦁ ꦒꦲꦺꦠ꧀ꦮꦴ ꦌꦏꦺꦤ ꦲꦠ꧀ꦡꦺꦤ ꦲꦺꦛ꧀ꦜꦴꦩꦚ꧀ꦕꦁ ꦮꦴ ꦲꦺꦛ꧀ꦜꦴꦥꦷꦜꦁ ꦮꦴ ꦥꦫꦴꦩꦱꦶꦠ꧀ꦮꦴ ꦥꦠ꧀ꦠꦺꦴ ꦤꦶꦏ꧀ꦑꦶꦥꦶꦠꦧ꧀ꦧꦺꦴ. ꦤ ꦕ ꦄꦤꦤ꧀ꦠꦫꦲꦶꦠꦴꦪ ꦨꦹꦩꦶꦪꦴ ꦥꦠ꧀ꦠꦺꦴ ꦤꦶꦏ꧀ꦑꦶꦥꦶꦠꦧ꧀ꦧꦺꦴ. ꦕꦷꦮꦫꦁ ꦤꦶꦏ꧀ꦑꦶꦥꦤ꧀ꦠꦺꦤ ꦌꦏꦺꦤ ꦲꦠ꧀ꦡꦺꦤ ꦕꦷꦮꦫꦁ ꦒꦲꦺꦠ꧀ꦮꦴ ꦌꦏꦺꦤ ꦲꦠ꧀ꦡꦺꦤ ꦕꦷꦮꦫꦮꦁꦱꦁ ꦮꦴ ꦕꦷꦮꦫꦫꦗ꧀ꦗꦸꦁ ꦮꦴ ꦥꦩꦗ꧀ꦗꦶꦠ꧀ꦮꦴ ꦥꦴꦫꦠꦺꦴ ꦄꦤ꧀ꦠꦁ ꦎꦫꦠꦺꦴ ꦨꦺꦴꦒꦁ ꦏꦠ꧀ꦮꦴ ꦕꦷꦮꦫꦁ ꦤꦶꦏ꧀ꦑꦶꦥꦶꦠꦧ꧀ꦧꦁ.

‘‘ꦱꦕꦺ ꦈꦥꦗ꧀ꦙꦴꦪꦱ꧀ꦱ ꦄꦤꦨꦶꦫꦠꦶ ꦈꦥ꧀ꦥꦤ꧀ꦤꦴ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦮꦹꦥꦏꦴꦱꦺꦠꦧ꧀ꦧꦺꦴ, ꦮꦹꦥꦏꦴꦱꦴꦥꦺꦠꦧ꧀ꦧꦺꦴ, ꦣꦩ꧀ꦩꦏꦡꦴ ꦮꦴꦱ꧀ꦱ ꦏꦴꦠꦧ꧀ꦧꦴ. ꦱꦕꦺ ꦈꦥꦗ꧀ꦙꦴꦪꦱ꧀ꦱ ꦏꦸꦏ꧀ꦏꦸꦕ꧀ꦕꦁ ꦈꦥ꧀ꦥꦤ꧀ꦤꦁ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦮꦶꦤꦺꦴꦢꦺꦠꦧ꧀ꦧꦁ, ꦮꦶꦤꦺꦴꦢꦴꦥꦺꦠꦧ꧀ꦧꦁ, ꦣꦩ꧀ꦩꦏꦡꦴ ꦮꦴꦱ꧀ꦱ ꦏꦴꦠꦧ꧀ꦧꦴ. ꦱꦕꦺ ꦈꦥꦗ꧀ꦙꦴꦪꦱ꧀ꦱ ꦢꦶꦛ꧀ꦜꦶꦒꦠꦁ ꦈꦥ꧀ꦥꦤ꧀ꦤꦁ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦮꦶꦮꦺꦕꦺꦠꦧ꧀ꦧꦁ, ꦮꦶꦮꦺꦕꦴꦥꦺꦠꦧ꧀ꦧꦁ, ꦣꦩ꧀ꦩꦏꦡꦴ ꦮꦴꦱ꧀ꦱ ꦏꦴꦠꦧ꧀ꦧꦴ. ꦱꦕꦺ ꦈꦥꦗ꧀ꦙꦴꦪꦺꦴ ꦒꦫꦸꦣꦩ꧀ꦩꦁ ꦄꦗ꧀ꦙꦴꦥꦤ꧀ꦤꦺꦴ ꦲꦺꦴꦠꦶ ꦥꦫꦶꦮꦴꦱꦴꦫꦲꦺꦴ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦈꦥꦗ꧀ꦙꦴꦪꦱ꧀ꦱ ꦥꦫꦶꦮꦴꦱꦁ ꦢꦢꦺꦪ꧀ꦪꦴꦠꦶ. ꦱꦕꦺ ꦈꦥꦗ꧀ꦙꦴꦪꦺꦴ ꦩꦹꦭꦴꦪꦥꦛꦶꦏꦱ꧀ꦱꦤꦴꦫꦲꦺꦴ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦈꦥꦗ꧀ꦙꦴꦪꦁ ꦩꦹꦭꦴꦪ ꦥꦛꦶꦏꦱ꧀ꦱꦺꦪ꧀ꦪꦴꦠꦶ. ꦱꦕꦺ ꦈꦥꦗ꧀ꦙꦴꦪꦺꦴ ꦩꦴꦤꦠ꧀ꦠꦴꦫꦲꦺꦴ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦈꦥꦗ꧀ꦙꦴꦪꦱ꧀ꦱ ꦩꦴꦤꦠ꧀ꦠꦁ ꦢꦢꦺꦪ꧀ꦪꦴꦠꦶ. ꦱꦕꦺ ꦈꦥꦗ꧀ꦙꦴꦪꦺꦴ ꦄꦧ꧀ꦨꦴꦤꦴꦫꦲꦺꦴ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦈꦥꦗ꧀ꦙꦴꦪꦁ ꦄꦧ꧀ꦨꦺꦪ꧀ꦪꦴꦠꦶ. ꦱꦕꦺ ꦱꦔ꧀ꦓꦺꦴ ꦈꦥꦗ꧀ꦙꦴꦪꦱ꧀ꦱ ꦏꦩ꧀ꦩꦁ ꦏꦠ꧀ꦠꦸꦏꦴꦩꦺꦴ ꦲꦺꦴꦠꦶ, ꦠꦗ꧀ꦗꦤꦷꦪꦁ ꦮꦴ ꦤꦶꦪꦱ꧀ꦱꦁ ꦮꦴ ꦥꦧ꧀ꦧꦴꦗꦤꦷꦪꦁ ꦮꦴ ꦥꦛꦶꦱꦴꦫꦟꦷꦪꦁ ꦮꦴ ꦈꦏ꧀ꦑꦺꦥꦤꦷꦪꦁ ꦮꦴ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦈꦥꦗ꧀ꦙꦴꦪꦱ꧀ꦱ ꦏꦩ꧀ꦩꦁ ꦤ ꦏꦫꦺꦪ꧀ꦪ, ꦭꦲꦸꦏꦴꦪ ꦮꦴ ꦥꦫꦶꦟꦴꦩꦺꦪ꧀ꦪꦴꦠꦶ. ꦏꦠꦁ ꦮꦴ ꦥꦤꦱ꧀ꦱ ꦲꦺꦴꦠꦶ ꦱꦔ꧀ꦓꦺꦤ ꦏꦩ꧀ꦩꦁ, ꦠꦗ꧀ꦗꦤꦷꦪꦁ ꦮꦴ ꦤꦶꦪꦱ꧀ꦱꦁ ꦮꦴ ꦥꦧ꧀ꦧꦴꦗꦤꦷꦪꦁ ꦮꦴ ꦥꦛꦶꦱꦴꦫꦟꦷꦪꦁ ꦮꦴ ꦈꦏ꧀ꦑꦺꦥꦤꦷꦪꦁ ꦮꦴ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦈꦥꦗ꧀ꦙꦴꦪꦺꦴ ꦱꦩ꧀ꦩꦴ ꦮꦠ꧀ꦠꦺꦪ꧀ꦪ, ꦭꦺꦴꦩꦁ ꦥꦴꦠꦺꦪ꧀ꦪ, ꦤꦺꦠ꧀ꦡꦴꦫꦁ ꦮꦠ꧀ꦠꦺꦪ꧀ꦪ, ꦱꦔ꧀ꦓꦺꦴ ꦠꦁ ꦏꦩ꧀ꦩꦁ ꦥꦛꦶꦥ꧀ꦥꦱ꧀ꦱꦩ꧀ꦨꦺꦪ꧀ꦪꦴꦠꦶ.

‘‘ꦱꦕꦺ ꦈꦥꦗ꧀ꦙꦴꦪꦱ꧀ꦱ ꦕꦷꦮꦫꦁ ꦣꦺꦴꦮꦶꦠꦧ꧀ꦧꦁ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦣꦺꦴꦮꦶꦠꦧ꧀ꦧꦁ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦈꦥꦗ꧀ꦙꦴꦪꦱ꧀ꦱ ꦕꦷꦮꦫꦁ ꦣꦺꦴꦮꦶꦪꦺꦡꦴꦠꦶ. ꦱꦕꦺ ꦈꦥꦗ꧀ꦙꦴꦪꦱ꧀ꦱ ꦕꦷꦮꦫꦁ ꦏꦴꦠꦧ꧀ꦧꦁ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦏꦴꦠꦧ꧀ꦧꦁ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦈꦥꦗ꧀ꦙꦴꦪꦱ꧀ꦱ ꦕꦷꦮꦫꦁ ꦏꦫꦶꦪꦺꦡꦴꦠꦶ. ꦱꦕꦺ ꦈꦥꦗ꧀ꦙꦴꦪꦱ꧀ꦱ ꦫꦗꦤꦴ ꦥꦕꦶꦠꦧ꧀ꦧꦴ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦥꦕꦶꦠꦧ꧀ꦧꦴ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦈꦥꦗ꧀ꦙꦴꦪꦱ꧀ꦱ ꦫꦗꦤꦁ ꦥꦕꦶꦪꦺꦡꦴꦠꦶ. ꦱꦕꦺ ꦈꦥꦗ꧀ꦙꦴꦪꦱ꧀ꦱ ꦕꦷꦮꦫꦁ ꦫꦗꦶꦠꦧ꧀ꦧꦁ [ꦫꦗꦺꦠꦧ꧀ꦧꦁ (ꦱ꧀ꦪꦴ.)] ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦫꦗꦶꦠꦧ꧀ꦧꦁ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦈꦥꦗ꧀ꦙꦴꦪꦱ꧀ꦱ ꦕꦷꦮꦫꦁ ꦫꦗꦶꦪꦺꦡꦴꦠꦶ. ꦕꦷꦮꦫꦁ ꦫꦗꦤ꧀ꦠꦺꦤ [ꦫꦗꦺꦤ꧀ꦠꦺꦤ (ꦱ꧀ꦪꦴ.)] ꦱꦴꦣꦸꦏꦁ ꦱꦩ꧀ꦥꦫꦶꦮꦠ꧀ꦠꦏꦁ ꦱꦩ꧀ꦥꦫꦶꦮꦠ꧀ꦠꦏꦁ ꦫꦗꦶꦠꦧ꧀ꦧꦁ, ꦤ ꦕ ꦄꦕ꧀ꦖꦶꦤ꧀ꦤꦺ ꦡꦺꦮꦺ ꦥꦏ꧀ꦏꦩꦶꦠꦧ꧀ꦧꦁ.

‘‘ꦤ ꦈꦥꦗ꧀ꦙꦴꦪꦁ ꦄꦤꦴꦥꦸꦕ꧀ꦖꦴ ꦌꦏꦕ꧀ꦕꦱ꧀ꦱ ꦥꦠ꧀ꦠꦺꦴ ꦢꦴꦠꦧ꧀ꦧꦺꦴ, ꦤ ꦌꦏꦕ꧀ꦕꦱ꧀ꦱ ꦥꦠ꧀ꦠꦺꦴ ꦥꦛꦶꦒ꧀ꦒꦲꦺꦠꦧ꧀ꦧꦺꦴ; ꦤ ꦌꦏꦕ꧀ꦕꦱ꧀ꦱ ꦕꦷꦮꦫꦁ ꦢꦴꦠꦧ꧀ꦧꦁ, ꦤ ꦌꦏꦕ꧀ꦕꦱ꧀ꦱ ꦕꦷꦮꦫꦁ ꦥꦛꦶꦒ꧀ꦒꦲꦺꦠꦧ꧀ꦧꦁ; ꦤ ꦌꦏꦕ꧀ꦕꦱ꧀ꦱ ꦥꦫꦶꦏ꧀ꦑꦴꦫꦺꦴ ꦢꦴꦠꦧ꧀ꦧꦺꦴ, ꦤ ꦌꦏꦕ꧀ꦕꦱ꧀ꦱ ꦥꦫꦶꦏ꧀ꦑꦴꦫꦺꦴ ꦥꦛꦶꦒ꧀ꦒꦲꦺꦠꦧ꧀ꦧꦺꦴ; ꦤ ꦌꦏꦕ꧀ꦕꦱ꧀ꦱ ꦏꦺꦱꦴ ꦖꦺꦢꦺꦠꦧ꧀ꦧꦴ [ꦖꦺꦠ꧀ꦠꦧ꧀ꦧꦴ (ꦱꦷ.), ꦖꦺꦢꦶꦠꦧ꧀ꦧꦴ (ꦏ.)], ꦤ ꦌꦏꦕ꧀ꦕꦺꦤ ꦏꦺꦱꦴ ꦖꦺꦢꦴꦥꦺꦠꦧ꧀ꦧꦴ; ꦤ ꦌꦏꦕ꧀ꦕꦱ꧀ꦱ ꦥꦫꦶꦏꦩ꧀ꦩꦁ ꦏꦴꦠꦧ꧀ꦧꦁ, ꦤ ꦌꦏꦕ꧀ꦕꦺꦤ ꦥꦫꦶꦏꦩ꧀ꦩꦁ ꦏꦴꦫꦴꦥꦺꦠꦧ꧀ꦧꦁ; ꦤ ꦌꦏꦕ꧀ꦕꦱ꧀ꦱ ꦮꦺꦪ꧀ꦪꦴꦮꦕ꧀ꦕꦺꦴ [ꦮꦺꦪ꧀ꦪꦴꦮꦕ꧀ꦕꦁ (ꦏ.)] ꦏꦴꦠꦧ꧀ꦧꦺꦴ, ꦤ ꦌꦏꦕ꧀ꦕꦺꦤ ꦮꦺꦪ꧀ꦪꦴꦮꦕ꧀ꦕꦺꦴ ꦏꦴꦫꦴꦥꦺꦠꦧ꧀ꦧꦺꦴ; ꦤ ꦌꦏꦕ꧀ꦕꦱ꧀ꦱ ꦥꦕ꧀ꦖꦴꦱꦩꦟꦺꦤ ꦲꦺꦴꦠꦧ꧀ꦧꦁ, ꦤ ꦌꦏꦕ꧀ꦕꦺꦴ ꦥꦕ꧀ꦖꦴꦱꦩꦟꦺꦴ ꦄꦴꦢꦴꦠꦧ꧀ꦧꦺꦴ; ꦤ ꦌꦏꦕ꧀ꦕꦱ꧀ꦱ ꦥꦶꦟ꧀ꦝꦥꦴꦠꦺꦴ ꦤꦷꦲꦫꦶꦠꦧ꧀ꦧꦺꦴ, ꦤ ꦌꦏꦕ꧀ꦕꦺꦤ ꦥꦶꦟ꧀ꦝꦥꦴꦠꦺꦴ ꦤꦷꦲꦫꦴꦥꦺꦠꦧ꧀ꦧꦺꦴ; ꦤ ꦈꦥꦗ꧀ꦙꦴꦪꦁ ꦄꦤꦴꦥꦸꦕ꧀ꦖꦴ ꦒꦴꦩꦺꦴ ꦥꦮꦶꦱꦶꦠꦧ꧀ꦧꦺꦴ; ꦤ ꦱꦸꦱꦴꦤꦁ ꦒꦤ꧀ꦠꦧ꧀ꦧꦁ; ꦤ ꦢꦶꦱꦴ ꦥꦏ꧀ꦏꦩꦶꦠꦧ꧀ꦧꦴ. ꦱꦕꦺ ꦈꦥꦗ꧀ꦙꦴꦪꦺꦴ ꦒꦶꦭꦴꦤꦺꦴ ꦲꦺꦴꦠꦶ, ꦪꦴꦮꦗꦷꦮꦁ ꦈꦥꦛ꧀ꦜꦴꦠꦧ꧀ꦧꦺꦴ, ꦮꦸꦛ꧀ꦜꦴꦤꦩꦱ꧀ꦱ ꦄꦴꦒꦩꦺꦠꦧ꧀ꦧꦁ. ꦆꦢꦁ ꦑꦺꦴ, ꦨꦶꦏ꧀ꦑꦮꦺ, ꦱꦢ꧀ꦣꦶꦮꦶꦲꦴꦫꦶꦏꦴꦤꦁ ꦈꦥꦗ꧀ꦙꦴꦪꦺꦱꦸ ꦮꦠ꧀ꦠꦁ ꦪꦡꦴ ꦱꦢ꧀ꦣꦶꦮꦶꦲꦴꦫꦶꦏꦺꦲꦶ ꦈꦥꦗ꧀ꦙꦴꦪꦺꦱꦸ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧ’’ꦤ꧀ꦠꦶ.

꧑꧒. ꦱꦢ꧀ꦣꦶꦮꦶꦲꦴꦫꦶꦏꦮꦠ꧀ꦠꦏꦡꦴ

꧓꧗꧗. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦈꦥꦗ꧀ꦙꦴꦪꦴ ꦱꦢ꧀ꦣꦶꦮꦶꦲꦴꦫꦶꦏꦺꦱꦸ ꦤ ꦱꦩ꧀ꦩꦴ ꦮꦠ꧀ꦠꦤ꧀ꦠꦶ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦈꦥꦗ꧀ꦙꦴꦪꦴ ꦱꦢ꧀ꦣꦶꦮꦶꦲꦴꦫꦶꦏꦺꦱꦸ ꦤ ꦱꦩ꧀ꦩꦴ ꦮꦠ꧀ꦠꦶꦱ꧀ꦱꦤ꧀ꦠꦷ’’ꦠꦶ! ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ‘‘ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦈꦥꦗ꧀ꦙꦴꦪꦴ ꦱꦢ꧀ꦣꦶꦮꦶꦲꦴꦫꦶꦏꦺꦱꦸ ꦤ ꦱꦩ꧀ꦩꦴ ꦮꦠ꧀ꦠꦤ꧀ꦠꦷ’’ꦠꦶ? ‘‘ꦱꦕ꧀ꦕꦁ ꦨꦒꦮꦴ’’ꦠꦶ…ꦥꦺ… ꦮꦶꦒꦫꦲꦶꦠ꧀ꦮꦴ…ꦥꦺ… ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ –

꧓꧗꧘. ‘‘ꦠꦺꦤ ꦲꦶ, ꦨꦶꦏ꧀ꦑꦮꦺ, ꦈꦥꦗ꧀ꦙꦴꦪꦴꦤꦁ ꦱꦢ꧀ꦣꦶꦮꦶꦲꦴꦫꦶꦏꦺꦱꦸ ꦮꦠ꧀ꦠꦁ ꦥꦚ꧀ꦚꦥꦺꦱ꧀ꦱꦴꦩꦶ ꦪꦡꦴ ꦈꦥꦗ꧀ꦙꦴꦪꦺꦲꦶ ꦱꦢ꧀ꦣꦶꦮꦶꦲꦴꦫꦶꦏꦺꦱꦸ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. [ꦩꦲꦴꦮ. ꧖꧗] ꦈꦥꦗ꧀ꦙꦴꦪꦺꦤ, ꦨꦶꦏ꧀ꦑꦮꦺ, ꦱꦢ꧀ꦣꦶꦮꦶꦲꦴꦫꦶꦏꦩ꧀ꦲꦶ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. ꦠꦠ꧀ꦫꦴꦪꦁ ꦱꦩ꧀ꦩꦴꦮꦠ꧀ꦠꦤꦴ –

‘‘ꦈꦥꦗ꧀ꦙꦴꦪꦺꦤ, ꦨꦶꦏ꧀ꦑꦮꦺ, ꦱꦢ꧀ꦣꦶꦮꦶꦲꦴꦫꦶꦏꦺꦴ ꦱꦔ꧀ꦒꦲꦺꦠꦧ꧀ꦧꦺꦴ ꦄꦤꦸꦒ꧀ꦒꦲꦺꦠꦧ꧀ꦧꦺꦴ ꦈꦢ꧀ꦢꦺꦱꦺꦤ ꦥꦫꦶꦥꦸꦕ꧀ꦖꦴꦪ ꦎꦮꦴꦢꦺꦤ ꦄꦤꦸꦱꦴꦱꦤꦶꦪꦴ. ꦱꦕꦺ ꦈꦥꦗ꧀ꦙꦴꦪꦱ꧀ꦱ ꦥꦠ꧀ꦠꦺꦴ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦥꦠ꧀ꦠꦺꦴ ꦤ ꦲꦺꦴꦠꦶ, ꦈꦥꦗ꧀ꦙꦴꦪꦺꦤ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦥꦠ꧀ꦠꦺꦴ ꦢꦴꦠꦧ꧀ꦧꦺꦴ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦥꦠ꧀ꦠꦺꦴ ꦈꦥ꧀ꦥꦗ꧀ꦗꦶꦪꦺꦡꦴꦠꦶ. ꦱꦕꦺ ꦈꦥꦗ꧀ꦙꦴꦪꦱ꧀ꦱ ꦕꦷꦮꦫꦁ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦕꦷꦮꦫꦁ ꦤ ꦲꦺꦴꦠꦶ, ꦈꦥꦗ꧀ꦙꦴꦪꦺꦤ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦕꦷꦮꦫꦁ ꦢꦴꦠꦧ꧀ꦧꦁ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦕꦷꦮꦫꦁ ꦈꦥ꧀ꦥꦗ꧀ꦗꦶꦪꦺꦡꦴꦠꦶ. ꦱꦕꦺ ꦈꦥꦗ꧀ꦙꦴꦪꦱ꧀ꦱ ꦥꦫꦶꦏ꧀ꦑꦴꦫꦺꦴ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦥꦫꦶꦏ꧀ꦑꦴꦫꦺꦴ ꦤ ꦲꦺꦴꦠꦶ, ꦈꦥꦗ꧀ꦙꦴꦪꦺꦤ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦥꦫꦶꦏ꧀ꦑꦴꦫꦺꦴ ꦢꦴꦠꦧ꧀ꦧꦺꦴ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦥꦫꦶꦏ꧀ꦑꦴꦫꦺꦴ ꦈꦥ꧀ꦥꦗ꧀ꦗꦶꦪꦺꦡꦴꦠꦶ.

‘‘ꦱꦕꦺ ꦱꦢ꧀ꦣꦶꦮꦶꦲꦴꦫꦶꦏꦺꦴ ꦒꦶꦭꦴꦤꦺꦴ ꦲꦺꦴꦠꦶ, ꦏꦴꦭꦱ꧀ꦱꦺꦮ ꦈꦛ꧀ꦜꦴꦪ ꦢꦤ꧀ꦠꦏꦛ꧀ꦜꦁ ꦢꦴꦠꦧ꧀ꦧꦁ, ꦩꦸꦑꦺꦴꦢꦏꦁ ꦢꦴꦠꦧ꧀ꦧꦁ, ꦄꦴꦱꦤꦁ ꦥꦚ꧀ꦚꦥꦺꦠꦧ꧀ꦧꦁ. ꦱꦕꦺ ꦪꦴꦒꦸ ꦲꦺꦴꦠꦶ, ꦨꦴꦗꦤꦁ ꦣꦺꦴꦮꦶꦠ꧀ꦮꦴ ꦪꦴꦒꦸ ꦈꦥꦤꦴꦩꦺꦠꦧ꧀ꦧꦴ. ꦪꦴꦒꦸꦁ ꦥꦷꦠꦱ꧀ꦱ ꦈꦢꦏꦁ ꦢꦠ꧀ꦮꦴ ꦨꦴꦗꦤꦁ ꦥꦛꦶꦒ꧀ꦒꦲꦺꦠ꧀ꦮꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ ꦣꦺꦴꦮꦶꦠ꧀ꦮꦴ ꦥꦛꦶꦱꦴꦩꦺꦠꦧ꧀ꦧꦁ. ꦱꦢ꧀ꦣꦶꦮꦶꦲꦴꦫꦶꦏꦩ꧀ꦲꦶ ꦮꦸꦛ꧀ꦜꦶꦠꦺ ꦄꦴꦱꦤꦁ ꦈꦢ꧀ꦣꦫꦶꦠꦧ꧀ꦧꦁ. ꦱꦕꦺ ꦱꦺꦴ ꦢꦺꦱꦺꦴ ꦈꦏ꧀ꦭꦴꦥꦺꦴ ꦲꦺꦴꦠꦶ, ꦱꦺꦴ ꦢꦺꦱꦺꦴ ꦱꦩ꧀ꦩꦗ꧀ꦗꦶꦠꦧ꧀ꦧꦺꦴ.

‘‘ꦱꦕꦺ ꦱꦢ꧀ꦣꦶꦮꦶꦲꦴꦫꦶꦏꦺꦴ ꦒꦴꦩꦁ ꦥꦮꦶꦱꦶꦠꦸꦏꦴꦩꦺꦴ ꦲꦺꦴꦠꦶ, ꦤꦶꦮꦴꦱꦤꦁ ꦢꦴꦠꦧ꧀ꦧꦁ, ꦥꦛꦶꦤꦶꦮꦴꦱꦤꦁ ꦥꦛꦶꦒ꧀ꦒꦲꦺꦠꦧ꧀ꦧꦁ, ꦏꦴꦪꦧꦤ꧀ꦣꦤꦁ ꦢꦴꦠꦧ꧀ꦧꦁ, ꦱꦒꦸꦟꦁ ꦏꦠ꧀ꦮꦴ ꦱꦔ꧀ꦓꦴꦛꦶꦪꦺꦴ ꦢꦴꦠꦧ꧀ꦧꦴ, ꦣꦺꦴꦮꦶꦠ꧀ꦮꦴ ꦥꦠ꧀ꦠꦺꦴ ꦱꦺꦴꦢꦏꦺꦴ ꦢꦴꦠꦧ꧀ꦧꦺꦴ.

‘‘ꦌꦠ꧀ꦠꦴꦮꦠꦴ ꦤꦶꦮꦠ꧀ꦠꦶꦱ꧀ꦱꦠꦷꦠꦶ ꦄꦴꦱꦤꦁ ꦥꦚ꧀ꦚꦥꦺꦠꦧ꧀ꦧꦁ, ꦥꦴꦢꦺꦴꦢꦏꦁ ꦥꦴꦢꦥꦷꦜꦁ ꦥꦴꦢꦏꦡꦭꦶꦏꦁ ꦈꦥꦤꦶꦏ꧀ꦑꦶꦥꦶꦠꦧ꧀ꦧꦁ, ꦥꦕ꧀ꦕꦸꦒ꧀ꦒꦤ꧀ꦠ꧀ꦮꦴ ꦥꦠ꧀ꦠꦕꦷꦮꦫꦁ ꦥꦛꦶꦒ꧀ꦒꦲꦺꦠꦧ꧀ꦧꦁ, ꦥꦛꦶꦤꦶꦮꦴꦱꦤꦁ ꦢꦴꦠꦧ꧀ꦧꦁ, ꦤꦶꦮꦴꦱꦤꦁ ꦥꦛꦶꦒ꧀ꦒꦲꦺꦠꦧ꧀ꦧꦁ. ꦱꦕꦺ ꦕꦷꦮꦫꦁ ꦱꦶꦤ꧀ꦤꦁ ꦲꦺꦴꦠꦶ, ꦩꦸꦲꦸꦠ꧀ꦠꦁ ꦈꦟ꧀ꦲꦺ ꦎꦠꦴꦥꦺꦠꦧ꧀ꦧꦁ, ꦤ ꦕ ꦈꦟ꧀ꦲꦺ ꦕꦷꦮꦫꦁ ꦤꦶꦢꦲꦶꦠꦧ꧀ꦧꦁ. ꦕꦷꦮꦫꦁ ꦱꦔ꧀ꦓꦫꦶꦠꦧ꧀ꦧꦁ. ꦕꦷꦮꦫꦁ ꦱꦔ꧀ꦓꦫꦤ꧀ꦠꦺꦤ ꦕꦠꦸꦫꦔ꧀ꦒꦸꦭꦁ ꦏꦟ꧀ꦟꦁ ꦈꦱ꧀ꦱꦴꦫꦺꦠ꧀ꦮꦴ ꦕꦷꦮꦫꦁ ꦱꦔ꧀ꦓꦫꦶꦠꦧ꧀ꦧꦁ – ꦩꦴ ꦩꦗ꧀ꦙꦺ ꦨꦔ꧀ꦒꦺꦴ ꦄꦲꦺꦴꦱꦷꦠꦶ. ꦎꦨꦺꦴꦒꦺ ꦏꦴꦪꦧꦤ꧀ꦣꦤꦁ ꦏꦴꦠꦧ꧀ꦧꦁ.

‘‘ꦱꦕꦺ ꦥꦶꦟ꧀ꦝꦥꦴꦠꦺꦴ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦺꦴ ꦕ ꦨꦸꦚ꧀ꦗꦶꦠꦸꦏꦴꦩꦺꦴ ꦲꦺꦴꦠꦶ, ꦈꦢꦏꦁ ꦢꦠ꧀ꦮꦴ ꦥꦶꦟ꧀ꦝꦥꦴꦠꦺꦴ ꦈꦥꦤꦴꦩꦺꦠꦧ꧀ꦧꦺꦴ. ꦱꦢ꧀ꦣꦶꦮꦶꦲꦴꦫꦶꦏꦺꦴ ꦥꦴꦤꦷꦪꦺꦤ ꦥꦸꦕ꧀ꦖꦶꦠꦧ꧀ꦧꦺꦴ. ꦨꦸꦠ꧀ꦠꦴꦮꦶꦱ꧀ꦱ ꦈꦢꦏꦁ ꦢꦠ꧀ꦮꦴ ꦥꦠ꧀ꦠꦁ ꦥꦛꦶꦒ꧀ꦒꦲꦺꦠ꧀ꦮꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ ꦣꦺꦴꦮꦶꦠ꧀ꦮꦴ ꦮꦺꦴꦢꦏꦁ ꦏꦠ꧀ꦮꦴ ꦩꦸꦲꦸꦠ꧀ꦠꦁ ꦈꦟ꧀ꦲꦺ ꦎꦠꦴꦥꦺꦠꦧ꧀ꦧꦺꦴ, ꦤ ꦕ ꦈꦟ꧀ꦲꦺ ꦥꦠ꧀ꦠꦺꦴ ꦤꦶꦢꦲꦶꦠꦧ꧀ꦧꦺꦴ. ꦥꦠ꧀ꦠꦕꦷꦮꦫꦁ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦥꦠ꧀ꦠꦁ ꦤꦶꦏ꧀ꦑꦶꦥꦤ꧀ꦠꦺꦤ ꦌꦏꦺꦤ ꦲꦠ꧀ꦡꦺꦤ ꦥꦠ꧀ꦠꦁ ꦒꦲꦺꦠ꧀ꦮꦴ ꦌꦏꦺꦤ ꦲꦠ꧀ꦡꦺꦤ ꦲꦺꦛ꧀ꦜꦴꦩꦚ꧀ꦕꦁ ꦮꦴ ꦲꦺꦛ꧀ꦜꦴꦥꦷꦜꦁ ꦮꦴ ꦥꦫꦴꦩꦱꦶꦠ꧀ꦮꦴ ꦥꦠ꧀ꦠꦺꦴ ꦤꦶꦏ꧀ꦑꦶꦥꦶꦠꦧ꧀ꦧꦺꦴ. ꦤ ꦕ ꦄꦤꦤ꧀ꦠꦫꦲꦶꦠꦴꦪ ꦨꦹꦩꦶꦪꦴ ꦥꦠ꧀ꦠꦺꦴ ꦤꦶꦏ꧀ꦑꦶꦥꦶꦠꦧ꧀ꦧꦺꦴ. ꦕꦷꦮꦫꦁ ꦤꦶꦏ꧀ꦑꦶꦥꦤ꧀ꦠꦺꦤ ꦌꦏꦺꦤ ꦲꦠ꧀ꦡꦺꦤ ꦕꦷꦮꦫꦁ ꦒꦲꦺꦠ꧀ꦮꦴ ꦌꦏꦺꦤ ꦲꦠ꧀ꦡꦺꦤ ꦕꦷꦮꦫꦮꦁꦱꦁ ꦮꦴ ꦕꦷꦮꦫꦫꦗ꧀ꦗꦸꦁ ꦮꦴ ꦥꦩꦗ꧀ꦗꦶꦠ꧀ꦮꦴ ꦥꦴꦫꦠꦺꦴ ꦄꦤ꧀ꦠꦁ ꦎꦫꦠꦺꦴ ꦨꦺꦴꦒꦁ ꦏꦠ꧀ꦮꦴ ꦕꦷꦮꦫꦁ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦱꦢ꧀ꦣꦶꦮꦶꦲꦴꦫꦶꦏꦩ꧀ꦲꦶ ꦮꦸꦛ꧀ꦜꦶꦠꦺ ꦄꦴꦱꦤꦁ ꦈꦢ꧀ꦣꦫꦶꦠꦧ꧀ꦧꦁ, ꦥꦴꦢꦺꦴꦢꦏꦁ ꦥꦴꦢꦥꦷꦜꦁ ꦥꦴꦢꦏꦡꦭꦶꦏꦁ ꦥꦛꦶꦱꦴꦩꦺꦠꦧ꧀ꦧꦁ. ꦱꦕꦺ ꦱꦺꦴ ꦢꦺꦱꦺꦴ ꦈꦏ꧀ꦭꦴꦥꦺꦴ ꦲꦺꦴꦠꦶ, ꦱꦺꦴ ꦢꦺꦱꦺꦴ ꦱꦩ꧀ꦩꦗ꧀ꦗꦶꦠꦧ꧀ꦧꦺꦴ.

‘‘ꦱꦕꦺ ꦱꦢ꧀ꦣꦶꦮꦶꦲꦴꦫꦶꦏꦺꦴ ꦤꦲꦴꦪꦶꦠꦸꦏꦴꦩꦺꦴ ꦲꦺꦴꦠꦶ, ꦤꦲꦴꦤꦁ ꦥꦛꦶꦪꦴꦢꦺꦠꦧ꧀ꦧꦁ. ꦱꦕꦺ ꦱꦷꦠꦺꦤ ꦄꦠ꧀ꦡꦺꦴ ꦲꦺꦴꦠꦶ, ꦱꦷꦠꦁ ꦥꦛꦶꦪꦴꦢꦺꦠꦧ꧀ꦧꦁ. ꦱꦕꦺ ꦈꦟ꧀ꦲꦺꦤ ꦄꦠ꧀ꦡꦺꦴ ꦲꦺꦴꦠꦶ, ꦈꦟ꧀ꦲꦁ ꦥꦛꦶꦪꦴꦢꦺꦠꦧ꧀ꦧꦁ.

‘‘ꦱꦕꦺ ꦱꦢ꧀ꦣꦶꦮꦶꦲꦴꦫꦶꦏꦺꦴ ꦗꦤ꧀ꦠꦴꦓꦫꦁ ꦥꦮꦶꦱꦶꦠꦸꦏꦴꦩꦺꦴ ꦲꦺꦴꦠꦶ, ꦕꦸꦟ꧀ꦟꦁ ꦱꦤ꧀ꦤꦺꦠꦧ꧀ꦧꦁ, ꦩꦠ꧀ꦠꦶꦏꦴ ꦠꦺꦩꦺꦠꦧ꧀ꦧꦴ, ꦗꦤ꧀ꦠꦴꦓꦫꦥꦷꦜꦁ ꦄꦴꦢꦴꦪ [ꦄꦴꦢꦴꦪ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦥꦶꦛ꧀ꦜꦶꦠꦺꦴ ꦥꦶꦛ꧀ꦜꦶꦠꦺꦴ (ꦏ.)] ꦒꦤ꧀ꦠ꧀ꦮꦴ ꦗꦤ꧀ꦠꦴꦓꦫꦥꦷꦜꦁ ꦢꦠ꧀ꦮꦴ ꦕꦷꦮꦫꦁ ꦥꦛꦶꦒ꧀ꦒꦲꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ, ꦕꦸꦟ꧀ꦟꦁ ꦢꦴꦠꦧ꧀ꦧꦁ, ꦩꦠ꧀ꦠꦶꦏꦴ ꦢꦴꦠꦧ꧀ꦧꦴ. ꦱꦕꦺ ꦈꦱ꧀ꦱꦲꦠꦶ ꦗꦤ꧀ꦠꦴꦓꦫꦁ ꦥꦮꦶꦱꦶꦠꦧ꧀ꦧꦁ. ꦗꦤ꧀ꦠꦴꦓꦫꦁ ꦥꦮꦶꦱꦤ꧀ꦠꦺꦤ ꦩꦠ꧀ꦠꦶꦏꦴꦪ ꦩꦸꦑꦁ ꦩꦏ꧀ꦑꦺꦠ꧀ꦮꦴ ꦥꦸꦫꦠꦺꦴ ꦕ ꦥꦕ꧀ꦖꦠꦺꦴ ꦕ ꦥꦛꦶꦕ꧀ꦖꦴꦢꦺꦠ꧀ꦮꦴ ꦗꦤ꧀ꦠꦴꦓꦫꦁ ꦥꦮꦶꦱꦶꦠꦧ꧀ꦧꦁ. ꦤ ꦡꦺꦫꦺ ꦨꦶꦏ꧀ꦑꦹ ꦄꦤꦸꦥꦑꦗ꧀ꦗ ꦤꦶꦱꦷꦢꦶꦠꦧ꧀ꦧꦁ, ꦤ ꦤꦮꦴ ꦨꦶꦏ꧀ꦑꦹ ꦄꦴꦱꦤꦺꦤ ꦥꦛꦶꦧꦴꦲꦶꦠꦧ꧀ꦧꦴ. ꦗꦤ꧀ꦠꦴꦓꦫꦺ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦥꦫꦶꦏꦩ꧀ꦩꦁ ꦏꦴꦠꦧ꧀ꦧꦁ. ꦗꦤ꧀ꦠꦴꦓꦫꦴ ꦤꦶꦏ꧀ꦑꦩꦤ꧀ꦠꦺꦤ ꦗꦤ꧀ꦠꦴꦓꦫꦥꦷꦜꦁ ꦄꦴꦢꦴꦪ ꦥꦸꦫꦠꦺꦴ ꦕ ꦥꦕ꧀ꦖꦠꦺꦴ ꦕ ꦥꦛꦶꦕ꧀ꦖꦴꦢꦺꦠ꧀ꦮꦴ ꦗꦤ꧀ꦠꦴꦓꦫꦴ ꦤꦶꦏ꧀ꦑꦩꦶꦠꦧ꧀ꦧꦁ.

‘‘ꦈꦢꦏꦺꦥꦶ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦥꦫꦶꦏꦩ꧀ꦩꦁ ꦏꦴꦠꦧ꧀ꦧꦁ. ꦤꦲꦴꦠꦺꦤ ꦥꦜꦩꦠꦫꦁ ꦈꦠ꧀ꦠꦫꦶꦠ꧀ꦮꦴ ꦄꦠ꧀ꦠꦤꦺꦴ ꦒꦠ꧀ꦠꦁ ꦮꦺꦴꦢꦏꦁ ꦏꦠ꧀ꦮꦴ ꦤꦶꦮꦴꦱꦺꦠ꧀ꦮꦴ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦒꦠ꧀ꦠꦠꦺꦴ ꦈꦢꦏꦁ ꦥꦩꦗ꧀ꦗꦶꦠꦧ꧀ꦧꦁ, ꦤꦶꦮꦴꦱꦤꦁ ꦢꦴꦠꦧ꧀ꦧꦁ, ꦱꦔ꧀ꦓꦴꦛꦶ ꦢꦴꦠꦧ꧀ꦧꦴ, ꦗꦤ꧀ꦠꦴꦓꦫꦥꦷꦜꦁ ꦄꦴꦢꦴꦪ ꦥꦜꦩꦠꦫꦁ ꦄꦴꦒꦤ꧀ꦠ꧀ꦮꦴ ꦄꦴꦱꦤꦁ ꦥꦚ꧀ꦚꦥꦺꦠꦧ꧀ꦧꦁ, ꦥꦴꦢꦺꦴꦢꦏꦁ ꦥꦴꦢꦥꦷꦜꦁ ꦥꦴꦢꦏꦡꦭꦶꦏꦁ ꦈꦥꦤꦶꦏ꧀ꦑꦶꦥꦶꦠꦧ꧀ꦧꦁ. ꦱꦢ꧀ꦣꦶꦮꦶꦲꦴꦫꦶꦏꦺꦴ ꦥꦴꦤꦷꦪꦺꦤ ꦥꦸꦕ꧀ꦖꦶꦠꦧ꧀ꦧꦺꦴ.

‘‘ꦪꦱ꧀ꦩꦶꦁ ꦮꦶꦲꦴꦫꦺ ꦱꦢ꧀ꦣꦶꦮꦶꦲꦴꦫꦶꦏꦺꦴ ꦮꦶꦲꦫꦠꦶ, ꦱꦕꦺ ꦱꦺꦴ ꦮꦶꦲꦴꦫꦺꦴ ꦈꦏ꧀ꦭꦴꦥꦺꦴ ꦲꦺꦴꦠꦶ, ꦱꦕꦺ ꦈꦱ꧀ꦱꦲꦠꦶ, ꦱꦺꦴꦣꦺꦠꦧ꧀ꦧꦺꦴ. ꦮꦶꦲꦴꦫꦁ ꦱꦺꦴꦣꦺꦤ꧀ꦠꦺꦤ ꦥꦜꦩꦁ ꦥꦠ꧀ꦠꦕꦷꦮꦫꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ…ꦥꦺ… ꦱꦕꦺ ꦄꦴꦕꦩꦤꦏꦸꦩ꧀ꦨꦶꦪꦴ ꦈꦢꦏꦁ ꦤ ꦲꦺꦴꦠꦶ, ꦄꦴꦕꦩꦤꦏꦸꦩ꧀ꦨꦶꦪꦴ ꦈꦢꦏꦁ ꦄꦴꦱꦶꦚ꧀ꦕꦶꦠꦧ꧀ꦧꦁ.

‘‘ꦱꦕꦺ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦄꦤꦨꦶꦫꦠꦶ ꦈꦥ꧀ꦥꦤ꧀ꦤꦴ ꦲꦺꦴꦠꦶ, ꦈꦥꦗ꧀ꦙꦴꦪꦺꦤ ꦮꦹꦥꦏꦴꦱꦺꦠꦧ꧀ꦧꦺꦴ, ꦮꦹꦥꦏꦴꦱꦴꦥꦺꦠꦧ꧀ꦧꦺꦴ, ꦣꦩ꧀ꦩꦏꦡꦴ ꦮꦴꦱ꧀ꦱ ꦏꦴꦠꦧ꧀ꦧꦴ. ꦱꦕꦺ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦏꦸꦏ꧀ꦏꦸꦕ꧀ꦕꦁ ꦈꦥ꧀ꦥꦤ꧀ꦤꦁ ꦲꦺꦴꦠꦶ, ꦈꦥꦗ꧀ꦙꦴꦪꦺꦤ ꦮꦶꦤꦺꦴꦢꦺꦠꦧ꧀ꦧꦁ, ꦮꦶꦤꦺꦴꦢꦴꦥꦺꦠꦧ꧀ꦧꦁ, ꦣꦩ꧀ꦩꦏꦡꦴ ꦮꦴꦱ꧀ꦱ ꦏꦴꦠꦧ꧀ꦧꦴ. ꦱꦕꦺ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦢꦶꦛ꧀ꦜꦶꦒꦠꦁ ꦈꦥ꧀ꦥꦤ꧀ꦤꦁ ꦲꦺꦴꦠꦶ, ꦈꦥꦗ꧀ꦙꦴꦪꦺꦤ ꦮꦶꦮꦺꦕꦺꦠꦧ꧀ꦧꦁ, ꦮꦶꦮꦺꦕꦴꦥꦺꦠꦧ꧀ꦧꦁ, ꦣꦩ꧀ꦩꦏꦡꦴ ꦮꦴꦱ꧀ꦱ ꦏꦴꦠꦧ꧀ꦧꦴ. ꦱꦕꦺ ꦱꦢ꧀ꦣꦶꦮꦶꦲꦴꦫꦶꦏꦺꦴ ꦒꦫꦸꦣꦩ꧀ꦩꦁ ꦄꦗ꧀ꦙꦴꦥꦤ꧀ꦤꦺꦴ ꦲꦺꦴꦠꦶ ꦥꦫꦶꦮꦴꦱꦴꦫꦲꦺꦴ, ꦈꦥꦗ꧀ꦙꦴꦪꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦥꦫꦶꦮꦴꦱꦁ ꦢꦢꦺꦪ꧀ꦪꦴꦠꦶ. ꦱꦕꦺ ꦱꦢ꧀ꦣꦶꦮꦶꦲꦴꦫꦶꦏꦺꦴ ꦩꦹꦭꦴꦪꦥꦛꦶꦏꦱ꧀ꦱꦤꦴꦫꦲꦺꦴ ꦲꦺꦴꦠꦶ, ꦈꦥꦗ꧀ꦙꦴꦪꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦱꦢ꧀ꦣꦶꦮꦶꦲꦴꦫꦶꦏꦁ ꦩꦹꦭꦴꦪ ꦥꦛꦶꦏꦱ꧀ꦱꦺꦪ꧀ꦪꦴꦠꦶ. ꦱꦕꦺ ꦱꦢ꧀ꦣꦶꦮꦶꦲꦴꦫꦶꦏꦺꦴ ꦩꦴꦤꦠ꧀ꦠꦴꦫꦲꦺꦴ ꦲꦺꦴꦠꦶ, ꦈꦥꦗ꧀ꦙꦴꦪꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦩꦴꦤꦠ꧀ꦠꦁ ꦢꦢꦺꦪ꧀ꦪꦴꦠꦶ. ꦱꦕꦺ ꦱꦢ꧀ꦣꦶꦮꦶꦲꦴꦫꦶꦏꦺꦴ ꦄꦧ꧀ꦨꦴꦤꦴꦫꦲꦺꦴ ꦲꦺꦴꦠꦶ, ꦈꦥꦗ꧀ꦙꦴꦪꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦱꦢ꧀ꦣꦶꦮꦶꦲꦴꦫꦶꦏꦁ ꦄꦧ꧀ꦨꦺꦪ꧀ꦪꦴꦠꦶ. ꦱꦕꦺ ꦱꦔ꧀ꦓꦺꦴ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦏꦩ꧀ꦩꦁ ꦏꦠ꧀ꦠꦸꦏꦴꦩꦺꦴ ꦲꦺꦴꦠꦶ, ꦠꦗ꧀ꦗꦤꦷꦪꦁ ꦮꦴ ꦤꦶꦪꦱ꧀ꦱꦁ ꦮꦴ ꦥꦧ꧀ꦧꦴꦗꦤꦷꦪꦁ ꦮꦴ ꦥꦛꦶꦱꦴꦫꦟꦷꦪꦁ ꦮꦴ ꦈꦏ꧀ꦑꦺꦥꦤꦷꦪꦁ ꦮꦴ, ꦈꦥꦗ꧀ꦙꦴꦪꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦏꦩ꧀ꦩꦁ ꦤ ꦏꦫꦺꦪ꧀ꦪ, ꦭꦲꦸꦏꦴꦪ ꦮꦴ ꦥꦫꦶꦟꦴꦩꦺꦪ꧀ꦪꦴꦠꦶ. ꦏꦠꦁ ꦮꦴ ꦥꦤꦱ꧀ꦱ ꦲꦺꦴꦠꦶ ꦱꦔ꧀ꦓꦺꦤ ꦏꦩ꧀ꦩꦁ, ꦠꦗ꧀ꦗꦤꦷꦪꦁ ꦮꦴ ꦤꦶꦪꦱ꧀ꦱꦁ ꦮꦴ ꦥꦧ꧀ꦧꦴꦗꦤꦷꦪꦁ ꦮꦴ ꦥꦛꦶꦱꦴꦫꦟꦷꦪꦁ ꦮꦴ, ꦈꦏ꧀ꦑꦺꦥꦤꦷꦪꦁ ꦮꦴ, ꦈꦥꦗ꧀ꦙꦴꦪꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦢ꧀ꦣꦶꦮꦶꦲꦴꦫꦶꦏꦺꦴ ꦱꦩ꧀ꦩꦴ ꦮꦠ꧀ꦠꦺꦪ꧀ꦪ ꦭꦺꦴꦩꦁ ꦥꦴꦠꦺꦪ꧀ꦪ, ꦤꦺꦠ꧀ꦡꦴꦫꦁ ꦮꦠ꧀ꦠꦺꦪ꧀ꦪ, ꦱꦔ꧀ꦓꦺꦴ ꦠꦁ ꦏꦩ꧀ꦩꦁ ꦥꦛꦶꦥ꧀ꦥꦱ꧀ꦱꦩ꧀ꦨꦺꦪ꧀ꦪꦴꦠꦶ.

‘‘ꦱꦕꦺ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦕꦷꦮꦫꦁ ꦣꦺꦴꦮꦶꦠꦧ꧀ꦧꦁ ꦲꦺꦴꦠꦶ, ꦈꦥꦗ꧀ꦙꦴꦪꦺꦤ ꦄꦴꦕꦶꦏ꧀ꦑꦶꦠꦧ꧀ꦧꦁ – ꦌꦮꦁ ꦣꦺꦴꦮꦺꦪ꧀ꦪꦴꦱꦷꦠꦶ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦕꦷꦮꦫꦁ ꦣꦺꦴꦮꦶꦪꦺꦡꦴꦠꦶ. ꦱꦕꦺ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦕꦷꦮꦫꦁ ꦏꦴꦠꦧ꧀ꦧꦁ ꦲꦺꦴꦠꦶ, ꦈꦥꦗ꧀ꦙꦴꦪꦺꦤ ꦄꦴꦕꦶꦏ꧀ꦑꦶꦠꦧ꧀ꦧꦁ – ꦌꦮꦁ ꦏꦫꦺꦪ꧀ꦪꦴꦱꦷꦠꦶ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦕꦷꦮꦫꦁ ꦏꦫꦶꦪꦺꦡꦴꦠꦶ. ꦱꦕꦺ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦫꦗꦤꦁ ꦥꦕꦶꦠꦧ꧀ꦧꦁ ꦲꦺꦴꦠꦶ, ꦈꦥꦗ꧀ꦙꦴꦪꦺꦤ ꦄꦴꦕꦶꦏ꧀ꦑꦶꦠꦧ꧀ꦧꦁ – ꦌꦮꦁ ꦥꦕꦺꦪ꧀ꦪꦴꦱꦷꦠꦶ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦫꦗꦤꦁ ꦥꦕꦶꦪꦺꦡꦴꦠꦶ. ꦱꦕꦺ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦕꦷꦮꦫꦁ ꦫꦗꦶꦠꦧ꧀ꦧꦁ ꦲꦺꦴꦠꦶ, ꦈꦥꦗ꧀ꦙꦴꦪꦺꦤ ꦄꦴꦕꦶꦏ꧀ꦑꦶꦠꦧ꧀ꦧꦁ – ꦌꦮꦁ ꦫꦗꦺꦪ꧀ꦪꦴꦱꦷꦠꦶ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦕꦷꦮꦫꦁ ꦫꦗꦶꦪꦺꦡꦴꦠꦶ. ꦕꦷꦮꦫꦁ ꦫꦗꦤ꧀ꦠꦺꦤ ꦱꦴꦣꦸꦏꦁ ꦱꦩ꧀ꦥꦫꦶꦮꦠ꧀ꦠꦏꦁ ꦱꦩ꧀ꦥꦫꦶꦮꦠ꧀ꦠꦏꦁ ꦫꦗꦶꦠꦧ꧀ꦧꦁ, ꦤ ꦕ ꦄꦕ꧀ꦖꦶꦤ꧀ꦤꦺ ꦡꦺꦮꦺ ꦥꦏ꧀ꦏꦩꦶꦠꦧ꧀ꦧꦁ. ꦱꦕꦺ ꦱꦢ꧀ꦣꦶꦮꦶꦲꦴꦫꦶꦏꦺꦴ ꦒꦶꦭꦴꦤꦺꦴ ꦲꦺꦴꦠꦶ, ꦪꦴꦮꦗꦷꦮꦁ ꦈꦥꦛ꧀ꦜꦴꦠꦧ꧀ꦧꦺꦴ, ꦮꦸꦛ꧀ꦜꦴꦤꦩꦱ꧀ꦱ ꦄꦴꦒꦩꦺꦠꦧ꧀ꦧꦁ. ꦆꦢꦁ ꦑꦺꦴ, ꦨꦶꦏ꧀ꦑꦮꦺ, ꦈꦥꦗ꧀ꦙꦴꦪꦴꦤꦁ ꦱꦢ꧀ꦣꦶꦮꦶꦲꦴꦫꦶꦏꦺꦱꦸ ꦮꦠ꧀ꦠꦁ ꦪꦡꦴ ꦈꦥꦗ꧀ꦙꦴꦪꦺꦲꦶ ꦱꦢ꧀ꦣꦶꦮꦶꦲꦴꦫꦶꦏꦺꦱꦸ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧ’’ꦤ꧀ꦠꦶ.

ꦢꦸꦠꦶꦪꦨꦴꦟꦮꦴꦫꦺꦴ ꦤꦶꦛ꧀ꦜꦶꦠꦺꦴ.

꧑꧓. ꦄꦴꦕꦫꦶꦪꦮꦠ꧀ꦠꦏꦡꦴ

꧓꧗꧙. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦤ꧀ꦠꦺꦮꦴꦱꦶꦏꦴ ꦄꦴꦕꦫꦶꦪꦺꦱꦸ ꦤ ꦱꦩ꧀ꦩꦴ ꦮꦠ꧀ꦠꦤ꧀ꦠꦶ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦤ꧀ꦠꦺꦮꦴꦱꦶꦏꦴ ꦄꦴꦕꦫꦶꦪꦺꦱꦸ ꦤ ꦱꦩ꧀ꦩꦴ ꦮꦠ꧀ꦠꦶꦱ꧀ꦱꦤ꧀ꦠꦷ’’ꦠꦶ! ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ‘‘ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦄꦤ꧀ꦠꦺꦮꦴꦱꦶꦏꦴ ꦄꦴꦕꦫꦶꦪꦺꦱꦸ ꦤ ꦱꦩ꧀ꦩꦴ ꦮꦠ꧀ꦠꦤ꧀ꦠꦷ’’ꦠꦶ? ‘‘ꦱꦕ꧀ꦕꦁ ꦨꦒꦮꦴ’’ꦠꦶ…ꦥꦺ… ꦮꦶꦒꦫꦲꦶꦠ꧀ꦮꦴ…ꦥꦺ… ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ –

꧓꧘꧐. ‘‘ꦠꦺꦤ ꦲꦶ, ꦨꦶꦏ꧀ꦑꦮꦺ, ꦄꦤ꧀ꦠꦺꦮꦴꦱꦶꦏꦴꦤꦁ ꦄꦴꦕꦫꦶꦪꦺꦱꦸ ꦮꦠ꧀ꦠꦁ ꦥꦚ꧀ꦚꦥꦺꦱ꧀ꦱꦴꦩꦶ ꦪꦡꦴ ꦄꦤ꧀ꦠꦺꦮꦴꦱꦶꦏꦺꦲꦶ ꦄꦴꦕꦫꦶꦪꦺꦱꦸ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. [ꦩꦲꦴꦮ. ꧗꧘] ꦄꦤ꧀ꦠꦺꦮꦴꦱꦶꦏꦺꦤ, ꦨꦶꦏ꧀ꦑꦮꦺ, ꦄꦴꦕꦫꦶꦪꦩ꧀ꦲꦶ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. ꦠꦠ꧀ꦫꦴꦪꦁ ꦱꦩ꧀ꦩꦴꦮꦠ꧀ꦠꦤꦴ –

‘‘ꦏꦴꦭꦱ꧀ꦱꦺꦮ ꦈꦛ꧀ꦜꦴꦪ ꦈꦥꦴꦲꦤꦴ ꦎꦩꦸꦚ꧀ꦕꦶꦠ꧀ꦮꦴ ꦌꦏꦁꦱꦁ ꦈꦠ꧀ꦠꦫꦴꦱꦔ꧀ꦒꦁ ꦏꦫꦶꦠ꧀ꦮꦴ ꦢꦤ꧀ꦠꦏꦛ꧀ꦜꦁ ꦢꦴꦠꦧ꧀ꦧꦁ, ꦩꦸꦑꦺꦴꦢꦏꦁ ꦢꦴꦠꦧ꧀ꦧꦁ, ꦄꦴꦱꦤꦁ ꦥꦚ꧀ꦚꦥꦺꦠꦧ꧀ꦧꦁ. ꦱꦕꦺ ꦪꦴꦒꦸ ꦲꦺꦴꦠꦶ, ꦨꦴꦗꦤꦁ ꦣꦺꦴꦮꦶꦠ꧀ꦮꦴ ꦪꦴꦒꦸ ꦈꦥꦤꦴꦩꦺꦠꦧ꧀ꦧꦴ. ꦪꦴꦒꦸꦁ ꦥꦷꦠꦱ꧀ꦱ ꦈꦢꦏꦁ ꦢꦠ꧀ꦮꦴ ꦨꦴꦗꦤꦁ ꦥꦛꦶꦒ꧀ꦒꦲꦺꦠ꧀ꦮꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ ꦣꦺꦴꦮꦶꦠ꧀ꦮꦴ ꦥꦛꦶꦱꦴꦩꦺꦠꦧ꧀ꦧꦁ. ꦄꦴꦕꦫꦶꦪꦩ꧀ꦲꦶ ꦮꦸꦛ꧀ꦜꦶꦠꦺ ꦄꦴꦱꦤꦁ ꦈꦢ꧀ꦣꦫꦶꦠꦧ꧀ꦧꦁ. ꦱꦕꦺ ꦱꦺꦴ ꦢꦺꦱꦺꦴ ꦈꦏ꧀ꦭꦴꦥꦺꦴ ꦲꦺꦴꦠꦶ, ꦱꦺꦴ ꦢꦺꦱꦺꦴ ꦱꦩ꧀ꦩꦗ꧀ꦗꦶꦠꦧ꧀ꦧꦺꦴ.

‘‘ꦱꦕꦺ ꦄꦴꦕꦫꦶꦪꦺꦴ ꦒꦴꦩꦁ ꦥꦮꦶꦱꦶꦠꦸꦏꦴꦩꦺꦴ ꦲꦺꦴꦠꦶ, ꦤꦶꦮꦴꦱꦤꦁ ꦢꦴꦠꦧ꧀ꦧꦁ, ꦥꦛꦶꦤꦶꦮꦴꦱꦤꦁ ꦥꦛꦶꦒ꧀ꦒꦲꦺꦠꦧ꧀ꦧꦁ, ꦏꦴꦪꦧꦤ꧀ꦣꦤꦁ ꦢꦴꦠꦧ꧀ꦧꦁ, ꦱꦒꦸꦟꦁ ꦏꦠ꧀ꦮꦴ ꦱꦔ꧀ꦓꦴꦛꦶꦪꦺꦴ ꦢꦴꦠꦧ꧀ꦧꦴ, ꦣꦺꦴꦮꦶꦠ꧀ꦮꦴ ꦥꦠ꧀ꦠꦺꦴ ꦱꦺꦴꦢꦏꦺꦴ ꦢꦴꦠꦧ꧀ꦧꦺꦴ. ꦱꦕꦺ ꦄꦴꦕꦫꦶꦪꦺꦴ ꦥꦕ꧀ꦖꦴꦱꦩꦟꦁ ꦄꦴꦏꦔ꧀ꦑꦠꦶ, ꦠꦶꦩꦟ꧀ꦝꦭꦁ ꦥꦛꦶꦕ꧀ꦖꦴꦢꦺꦤ꧀ꦠꦺꦤ ꦥꦫꦶꦩꦟ꧀ꦝꦭꦁ ꦤꦶꦮꦴꦱꦺꦠ꧀ꦮꦴ ꦏꦴꦪꦧꦤ꧀ꦣꦤꦁ ꦧꦤ꧀ꦣꦶꦠ꧀ꦮꦴ ꦱꦒꦸꦟꦁ ꦏꦠ꧀ꦮꦴ ꦱꦔ꧀ꦓꦴꦛꦶꦪꦺꦴ ꦥꦴꦫꦸꦥꦶꦠ꧀ꦮꦴ ꦒꦟ꧀ꦜꦶꦏꦁ ꦥꦛꦶꦩꦸꦚ꧀ꦕꦶꦠ꧀ꦮꦴ ꦣꦺꦴꦮꦶꦠ꧀ꦮꦴ ꦥꦠ꧀ꦠꦁ ꦒꦲꦺꦠ꧀ꦮꦴ ꦄꦴꦕꦫꦶꦪꦱ꧀ꦱ ꦥꦕ꧀ꦖꦴꦱꦩꦟꦺꦤ ꦲꦺꦴꦠꦧ꧀ꦧꦁ. ꦤꦴꦠꦶꦢꦹꦫꦺ ꦒꦤ꧀ꦠꦧ꧀ꦧꦁ, ꦤꦴꦕ꧀ꦕꦴꦱꦤ꧀ꦤꦺ ꦒꦤ꧀ꦠꦧ꧀ꦧꦁ, ꦥꦠ꧀ꦠꦥꦫꦶꦪꦴꦥꦤ꧀ꦤꦁ ꦥꦛꦶꦒ꧀ꦒꦲꦺꦠꦧ꧀ꦧꦁ. ꦤ ꦄꦴꦕꦫꦶꦪꦱ꧀ꦱ ꦨꦟꦩꦴꦤꦱ꧀ꦱ ꦄꦤ꧀ꦠꦫꦤ꧀ꦠꦫꦴ ꦏꦡꦴ ꦎꦥꦴꦠꦺꦠꦧ꧀ꦧꦴ. ꦄꦴꦕꦫꦶꦪꦺꦴ ꦄꦴꦥꦠ꧀ꦠꦶꦱꦴꦩꦤ꧀ꦠꦴ ꦨꦟꦩꦴꦤꦺꦴ ꦤꦶꦮꦴꦫꦺꦠꦧ꧀ꦧꦺꦴ.

‘‘ꦱꦕꦺ ꦥꦶꦟ꧀ꦝꦥꦴꦠꦺꦴ ꦲꦺꦴꦠꦶ, ꦄꦴꦕꦫꦶꦪꦺꦴ ꦕ ꦨꦸꦚ꧀ꦗꦶꦠꦸꦏꦴꦩꦺꦴ ꦲꦺꦴꦠꦶ, ꦈꦢꦏꦁ ꦢꦠ꧀ꦮꦴ ꦥꦶꦟ꧀ꦝꦥꦴꦠꦺꦴ ꦈꦥꦤꦴꦩꦺꦠꦧ꧀ꦧꦺꦴ. ꦄꦴꦕꦫꦶꦪꦺꦴ ꦥꦴꦤꦷꦪꦺꦤ ꦥꦸꦕ꧀ꦖꦶꦠꦧ꧀ꦧꦺꦴ. ꦨꦸꦠ꧀ꦠꦴꦮꦶꦱ꧀ꦱ ꦈꦢꦏꦁ ꦢꦠ꧀ꦮꦴ ꦥꦠ꧀ꦠꦁ ꦥꦛꦶꦒ꧀ꦒꦲꦺꦠ꧀ꦮꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ ꦣꦺꦴꦮꦶꦠ꧀ꦮꦴ ꦮꦺꦴꦢꦏꦁ ꦏꦠ꧀ꦮꦴ ꦩꦸꦲꦸꦠ꧀ꦠꦁ ꦈꦟ꧀ꦲꦺ ꦎꦠꦴꦥꦺꦠꦧ꧀ꦧꦺꦴ, ꦤ ꦕ ꦈꦟ꧀ꦲꦺ ꦥꦠ꧀ꦠꦺꦴ ꦤꦶꦢꦲꦶꦠꦧ꧀ꦧꦺꦴ. ꦥꦠ꧀ꦠꦕꦷꦮꦫꦁ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦥꦠ꧀ꦠꦁ ꦤꦶꦏ꧀ꦑꦶꦥꦤ꧀ꦠꦺꦤ ꦌꦏꦺꦤ ꦲꦠ꧀ꦡꦺꦤ ꦥꦠ꧀ꦠꦁ ꦒꦲꦺꦠ꧀ꦮꦴ ꦌꦏꦺꦤ ꦲꦠ꧀ꦡꦺꦤ ꦲꦺꦛ꧀ꦜꦴꦩꦚ꧀ꦕꦁ ꦮꦴ ꦲꦺꦛ꧀ꦜꦴꦥꦷꦜꦁ ꦮꦴ ꦥꦫꦴꦩꦱꦶꦠ꧀ꦮꦴ ꦥꦠ꧀ꦠꦺꦴ ꦤꦶꦏ꧀ꦑꦶꦥꦶꦠꦧ꧀ꦧꦺꦴ. ꦤ ꦕ ꦄꦤꦤ꧀ꦠꦫꦲꦶꦠꦴꦪ ꦨꦹꦩꦶꦪꦴ ꦥꦠ꧀ꦠꦺꦴ ꦤꦶꦏ꧀ꦑꦶꦥꦶꦠꦧ꧀ꦧꦺꦴ. ꦕꦷꦮꦫꦁ ꦤꦶꦏ꧀ꦑꦶꦥꦤ꧀ꦠꦺꦤ ꦌꦏꦺꦤ ꦲꦠ꧀ꦡꦺꦤ ꦕꦷꦮꦫꦁ ꦒꦲꦺꦠ꧀ꦮꦴ ꦌꦏꦺꦤ ꦲꦠ꧀ꦡꦺꦤ ꦕꦷꦮꦫꦮꦁꦱꦁ ꦮꦴ ꦕꦷꦮꦫꦫꦗ꧀ꦗꦸꦁ ꦮꦴ ꦥꦩꦗꦶꦠ꧀ꦮꦴ ꦥꦴꦫꦠꦺꦴ ꦄꦤ꧀ꦠꦁ ꦎꦫꦠꦺꦴ ꦨꦺꦴꦒꦁ ꦏꦠ꧀ꦮꦴ ꦕꦷꦮꦫꦁ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦄꦴꦕꦫꦶꦪꦩ꧀ꦲꦶ ꦮꦸꦛ꧀ꦜꦶꦠꦺ ꦄꦴꦱꦤꦁ ꦈꦢ꧀ꦣꦫꦶꦠꦧ꧀ꦧꦁ, ꦥꦴꦢꦺꦴꦢꦏꦁ ꦥꦴꦢꦥꦷꦜꦁ ꦥꦴꦢꦏꦡꦭꦶꦏꦁ ꦥꦛꦶꦱꦴꦩꦺꦠꦧ꧀ꦧꦁ. ꦱꦕꦺ ꦱꦺꦴ ꦢꦺꦱꦺꦴ ꦈꦏ꧀ꦭꦴꦥꦺꦴ ꦲꦺꦴꦠꦶ, ꦱꦺꦴ ꦢꦺꦱꦺꦴ ꦱꦩ꧀ꦩꦗ꧀ꦗꦶꦠꦧ꧀ꦧꦺꦴ.

‘‘ꦱꦕꦺ ꦄꦴꦕꦫꦶꦪꦺꦴ ꦤꦲꦴꦪꦶꦠꦸꦏꦴꦩꦺꦴ ꦲꦺꦴꦠꦶ, ꦤꦲꦴꦤꦁ ꦥꦛꦶꦪꦴꦢꦺꦠꦧ꧀ꦧꦁ. ꦱꦕꦺ ꦱꦷꦠꦺꦤ ꦄꦠ꧀ꦡꦺꦴ ꦲꦺꦴꦠꦶ, ꦱꦷꦠꦁ ꦥꦛꦶꦪꦴꦢꦺꦠꦧ꧀ꦧꦁ. ꦱꦕꦺ ꦈꦟ꧀ꦲꦺꦤ ꦄꦠ꧀ꦡꦺꦴ ꦲꦺꦴꦠꦶ, ꦈꦟ꧀ꦲꦁ ꦥꦛꦶꦪꦴꦢꦺꦠꦧ꧀ꦧꦁ.

‘‘ꦱꦕꦺ ꦄꦴꦕꦫꦶꦪꦺꦴ ꦗꦤ꧀ꦠꦴꦓꦫꦁ ꦥꦮꦶꦱꦶꦠꦸꦏꦴꦩꦺꦴ ꦲꦺꦴꦠꦶ, ꦕꦸꦟ꧀ꦟꦁ ꦱꦤ꧀ꦤꦺꦠꦧ꧀ꦧꦁ, ꦩꦠ꧀ꦠꦶꦏꦴ ꦠꦺꦩꦺꦠꦧ꧀ꦧꦴ, ꦗꦤ꧀ꦠꦴꦓꦫꦥꦷꦜꦁ ꦄꦴꦢꦴꦪ ꦄꦴꦕꦫꦶꦪꦱ꧀ꦱ ꦥꦶꦛ꧀ꦜꦶꦠꦺꦴ ꦥꦶꦛ꧀ꦜꦶꦠꦺꦴ ꦒꦤ꧀ꦠ꧀ꦮꦴ ꦗꦤ꧀ꦠꦴꦓꦫꦥꦷꦜꦁ ꦢꦠ꧀ꦮꦴ ꦕꦷꦮꦫꦁ ꦥꦛꦶꦒ꧀ꦒꦲꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ, ꦕꦸꦟ꧀ꦟꦁ ꦢꦴꦠꦧ꧀ꦧꦁ, ꦩꦠ꧀ꦠꦶꦏꦴ ꦢꦴꦠꦧ꧀ꦧꦴ. ꦱꦕꦺ ꦈꦱ꧀ꦱꦲꦠꦶ, ꦗꦤ꧀ꦠꦴꦓꦫꦁ ꦥꦮꦶꦱꦶꦠꦧ꧀ꦧꦁ. ꦗꦤ꧀ꦠꦴꦓꦫꦁ ꦥꦮꦶꦱꦤ꧀ꦠꦺꦤ ꦩꦠ꧀ꦠꦶꦏꦴꦪ ꦩꦸꦑꦁ ꦩꦏ꧀ꦑꦺꦠ꧀ꦮꦴ ꦥꦸꦫꦠꦺꦴ ꦕ ꦥꦕ꧀ꦖꦠꦺꦴ ꦕ ꦥꦛꦶꦕ꧀ꦖꦴꦢꦺꦠ꧀ꦮꦴ ꦗꦤ꧀ꦠꦴꦓꦫꦁ ꦥꦮꦶꦱꦶꦠꦧ꧀ꦧꦁ. ꦤ ꦡꦺꦫꦺ ꦨꦶꦏ꧀ꦑꦹ ꦄꦤꦸꦥꦑꦗ꧀ꦗ ꦤꦶꦱꦷꦢꦶꦠꦧ꧀ꦧꦁ. ꦤ ꦤꦮꦴ ꦨꦶꦏ꧀ꦑꦹ ꦄꦴꦱꦤꦺꦤ ꦥꦛꦶꦧꦴꦲꦶꦠꦧ꧀ꦧꦴ. ꦗꦤ꧀ꦠꦴꦓꦫꦺ ꦄꦴꦕꦫꦶꦪꦱ꧀ꦱ ꦥꦫꦶꦏꦩ꧀ꦩꦁ ꦏꦴꦠꦧ꧀ꦧꦁ. ꦗꦤ꧀ꦠꦴꦓꦫꦴ ꦤꦶꦏ꧀ꦑꦩꦤ꧀ꦠꦺꦤ ꦗꦤ꧀ꦠꦴꦓꦫꦥꦷꦜꦁ ꦄꦴꦢꦴꦪ ꦥꦸꦫꦠꦺꦴ ꦕ ꦥꦕ꧀ꦖꦠꦺꦴ ꦕ ꦥꦛꦶꦕ꧀ꦖꦴꦢꦺꦠ꧀ꦮꦴ ꦗꦤ꧀ꦠꦴꦓꦫꦴ ꦤꦶꦏ꧀ꦑꦩꦶꦠꦧ꧀ꦧꦁ.

‘‘ꦈꦢꦏꦺꦥꦶ ꦄꦴꦕꦫꦶꦪꦱ꧀ꦱ ꦥꦫꦶꦏꦩ꧀ꦩꦁ ꦏꦴꦠꦧ꧀ꦧꦁ. ꦤꦲꦴꦠꦺꦤ ꦥꦜꦩꦠꦫꦁ ꦈꦠ꧀ꦠꦫꦶꦠ꧀ꦮꦴ ꦄꦠ꧀ꦠꦤꦺꦴ ꦒꦠ꧀ꦠꦁ ꦮꦺꦴꦢꦏꦁ ꦏꦠ꧀ꦮꦴ ꦤꦶꦮꦴꦱꦺꦠ꧀ꦮꦴ ꦄꦴꦕꦫꦶꦪꦱ꧀ꦱ ꦒꦠ꧀ꦠꦠꦺꦴ ꦈꦢꦏꦁ ꦥꦩꦗ꧀ꦗꦶꦠꦧ꧀ꦧꦁ, ꦤꦶꦮꦴꦱꦤꦁ ꦢꦴꦠꦧ꧀ꦧꦁ, ꦱꦔ꧀ꦓꦴꦛꦶ ꦢꦴꦠꦧ꧀ꦧꦴ, ꦗꦤ꧀ꦠꦴꦓꦫꦥꦷꦜꦁ ꦄꦴꦢꦴꦪ ꦥꦜꦩꦠꦫꦁ ꦄꦴꦒꦤ꧀ꦠ꧀ꦮꦴ ꦄꦴꦱꦤꦁ ꦥꦚ꧀ꦚꦥꦺꦠꦧ꧀ꦧꦁ, ꦥꦴꦢꦺꦴꦢꦏꦁ ꦥꦴꦢꦥꦷꦜꦁ ꦥꦴꦢꦏꦡꦭꦶꦏꦁ ꦈꦥꦤꦶꦏ꧀ꦑꦶꦥꦶꦠꦧ꧀ꦧꦁ. ꦄꦴꦕꦫꦶꦪꦺꦴ ꦥꦴꦤꦷꦪꦺꦤ ꦥꦸꦕ꧀ꦖꦶꦠꦧ꧀ꦧꦺꦴ. ꦱꦕꦺ ꦈꦢ꧀ꦢꦶꦱꦴꦥꦺꦠꦸꦏꦴꦩꦺꦴ ꦲꦺꦴꦠꦶ, ꦈꦢ꧀ꦢꦶꦱꦶꦠꦧ꧀ꦧꦺꦴ. ꦱꦕꦺ ꦥꦫꦶꦥꦸꦕ꧀ꦖꦶꦠꦸꦏꦴꦩꦺꦴ ꦲꦺꦴꦠꦶ, ꦥꦫꦶꦥꦸꦕ꧀ꦖꦶꦠꦧ꧀ꦧꦺꦴ.

‘‘ꦪꦱ꧀ꦩꦶꦁ ꦮꦶꦲꦴꦫꦺ ꦄꦴꦕꦫꦶꦪꦺꦴ ꦮꦶꦲꦫꦠꦶ, ꦱꦕꦺ ꦱꦺꦴ ꦮꦶꦲꦴꦫꦺꦴ ꦈꦏ꧀ꦭꦴꦥꦺꦴ ꦲꦺꦴꦠꦶ, ꦱꦕꦺ ꦈꦱ꧀ꦱꦲꦠꦶ, ꦱꦺꦴꦣꦺꦠꦧ꧀ꦧꦺꦴ. ꦮꦶꦲꦴꦫꦁ ꦱꦺꦴꦣꦺꦤ꧀ꦠꦺꦤ ꦥꦜꦩꦁ ꦥꦠ꧀ꦠꦕꦷꦮꦫꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦤꦶꦱꦷꦢꦤꦥꦕ꧀ꦕꦠ꧀ꦡꦫꦟꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦨꦶꦱꦶꦧꦶꦧ꧀ꦧꦺꦴꦲꦤꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦩꦚ꧀ꦕꦺꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ ꦄꦱꦔ꧀ꦓꦛ꧀ꦛꦺꦤ꧀ꦠꦺꦤ ꦏꦮꦴꦛꦥꦶꦛ꧀ꦜꦁ, ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦺꦴ; ꦥꦷꦜꦁ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ, ꦄꦱꦔ꧀ꦓꦛ꧀ꦛꦺꦤ꧀ꦠꦺꦤ ꦏꦮꦴꦛꦥꦶꦛ꧀ꦜꦁ, ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦩꦚ꧀ꦕꦥꦛꦶꦥꦴꦢꦏꦴ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦴ; ꦑꦺꦭ꦳ꦩꦭ꧀ꦭꦏꦺꦴ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦺꦴ; ꦄꦥꦱ꧀ꦱꦺꦤꦦꦭꦏꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ; ꦨꦹꦩꦠ꧀ꦡꦫꦟꦁ ꦪꦡꦴꦥꦚ꧀ꦚꦠ꧀ꦠꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦱꦕꦺ ꦮꦶꦲꦴꦫꦺ ꦱꦤ꧀ꦠꦴꦤꦏꦁ ꦲꦺꦴꦠꦶ, ꦈꦭ꧀ꦭꦺꦴꦏꦴ ꦥꦜꦩꦁ ꦎꦲꦴꦫꦺꦠꦧ꧀ꦧꦁ, ꦄꦴꦭꦺꦴꦏꦱꦤ꧀ꦣꦶꦏꦟ꧀ꦟꦨꦴꦒꦴ ꦥꦩꦗ꧀ꦗꦶꦠꦧ꧀ꦧꦴ. ꦱꦕꦺ ꦒꦺꦫꦸꦏꦥꦫꦶꦏꦩ꧀ꦩꦏꦠꦴ ꦨꦶꦠ꧀ꦠꦶ ꦏꦟ꧀ꦟꦏꦶꦠꦴ ꦲꦺꦴꦠꦶ, ꦕꦺꦴꦭ꦳ꦏꦁ ꦠꦺꦩꦺꦠ꧀ꦮꦴ ꦥꦷꦭ꦳ꦺꦠ꧀ꦮꦴ ꦥꦩꦗ꧀ꦗꦶꦠꦧ꧀ꦧꦴ. ꦱꦕꦺ ꦏꦴꦭ꦳ꦮꦟ꧀ꦟꦏꦠꦴ ꦨꦹꦩꦶ ꦏꦟ꧀ꦟꦏꦶꦠꦴ ꦲꦺꦴꦠꦶ, ꦕꦺꦴꦭ꦳ꦏꦁ ꦠꦺꦩꦺꦠ꧀ꦮꦴ ꦥꦷꦭ꦳ꦺꦠ꧀ꦮꦴ ꦥꦩꦗ꧀ꦗꦶꦠꦧ꧀ꦧꦴ. ꦱꦕꦺ ꦄꦏꦠꦴ ꦲꦺꦴꦠꦶ ꦨꦹꦩꦶ, ꦈꦢꦏꦺꦤ ꦥꦫꦶꦥ꧀ꦦꦺꦴꦱꦶꦠ꧀ꦮꦴ ꦥꦫꦶꦦꦺꦴꦱꦶꦠ꧀ꦮꦴ ꦱꦩ꧀ꦩꦗ꧀ꦗꦶꦠꦧ꧀ꦧꦴ – ꦩꦴ ꦮꦶꦲꦴꦫꦺꦴ ꦫꦗꦺꦤ ꦈꦲꦚ꧀ꦚꦷꦠꦶ. ꦱꦔ꧀ꦏꦴꦫꦁ ꦮꦶꦕꦶꦤꦶꦠ꧀ꦮꦴ ꦌꦏꦩꦤ꧀ꦠꦁ ꦖꦝ꧀ꦝꦺꦠꦧ꧀ꦧꦁ.

‘‘ꦱꦕꦺ ꦄꦴꦕꦫꦶꦪꦱ꧀ꦱ ꦄꦤꦨꦶꦫꦠꦶ ꦈꦥ꧀ꦥꦤ꧀ꦤꦴ ꦲꦺꦴꦠꦶ, ꦄꦤ꧀ꦠꦺꦮꦴꦱꦶꦏꦺꦤ ꦮꦹꦥꦏꦴꦱꦺꦠꦧ꧀ꦧꦴ, ꦮꦹꦥꦏꦴꦱꦴꦥꦺꦠꦧ꧀ꦧꦴ, ꦣꦩ꧀ꦩꦏꦡꦴ ꦮꦴꦱ꧀ꦱ ꦏꦴꦠꦧ꧀ꦧꦴ. ꦱꦕꦺ ꦄꦴꦕꦫꦶꦪꦱ꧀ꦱ ꦏꦸꦏ꧀ꦏꦸꦕ꧀ꦕꦁ ꦈꦥ꧀ꦥꦤ꧀ꦤꦁ ꦲꦺꦴꦠꦶ, ꦄꦤ꧀ꦠꦺꦮꦴꦱꦶꦏꦺꦤ ꦮꦶꦤꦺꦴꦢꦺꦠꦧ꧀ꦧꦁ, ꦮꦶꦤꦺꦴꦢꦴꦥꦺꦠꦧ꧀ꦧꦁ, ꦣꦩ꧀ꦩꦏꦡꦴ ꦮꦴꦱ꧀ꦱ ꦏꦴꦠꦧ꧀ꦧꦴ. ꦱꦕꦺ ꦄꦴꦕꦫꦶꦪꦱ꧀ꦱ ꦢꦶꦛ꧀ꦜꦶꦒꦠꦁ ꦈꦥ꧀ꦥꦤ꧀ꦤꦁ ꦲꦺꦴꦠꦶ, ꦄꦤ꧀ꦠꦺꦮꦴꦱꦶꦏꦺꦤ ꦮꦶꦮꦺꦕꦺꦠꦧ꧀ꦧꦁ, ꦮꦶꦮꦺꦕꦴꦥꦺꦠꦧ꧀ꦧꦁ, ꦣꦩ꧀ꦩꦏꦡꦴ ꦮꦴꦱ꧀ꦱ ꦏꦴꦠꦧ꧀ꦧꦴ. ꦱꦕꦺ ꦄꦴꦕꦫꦶꦪꦺꦴ ꦒꦫꦸꦣꦩ꧀ꦩꦁ ꦄꦗ꧀ꦙꦴꦥꦤ꧀ꦤꦺꦴ ꦲꦺꦴꦠꦶ, ꦥꦫꦶꦮꦴꦱꦴꦫꦲꦺꦴ, ꦄꦤ꧀ꦠꦺꦮꦴꦱꦶꦏꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦄꦴꦕꦫꦶꦪꦱ꧀ꦱ ꦥꦫꦶꦮꦴꦱꦁ ꦢꦢꦺꦪ꧀ꦪꦴꦠꦶ. ꦱꦕꦺ ꦄꦴꦕꦫꦶꦪꦺꦴ ꦩꦹꦭꦴꦪꦥꦛꦶꦏꦱ꧀ꦱꦤꦴꦫꦲꦺꦴ ꦲꦺꦴꦠꦶ, ꦄꦤ꧀ꦠꦺꦮꦴꦱꦶꦏꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦄꦴꦕꦫꦶꦪꦁ ꦩꦹꦭꦴꦪ ꦥꦛꦶꦏꦱ꧀ꦱꦺꦪ꧀ꦪꦴꦠꦶ. ꦱꦕꦺ ꦄꦴꦕꦫꦶꦪꦺꦴ ꦩꦴꦤꦠ꧀ꦠꦴꦫꦲꦺꦴ ꦲꦺꦴꦠꦶ, ꦄꦤ꧀ꦠꦺꦮꦴꦱꦶꦏꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦄꦴꦕꦫꦶꦪꦱ꧀ꦱ ꦩꦴꦤꦠ꧀ꦠꦁ ꦢꦢꦺꦪ꧀ꦪꦴꦠꦶ. ꦱꦕꦺ ꦄꦴꦕꦫꦶꦪꦺꦴ ꦄꦧ꧀ꦨꦴꦤꦴꦫꦲꦺꦴ ꦲꦺꦴꦠꦶ, ꦄꦤ꧀ꦠꦺꦮꦴꦱꦶꦏꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦄꦴꦕꦫꦶꦪꦁ ꦄꦧ꧀ꦨꦺꦪ꧀ꦪꦴꦠꦶ. ꦱꦕꦺ ꦱꦔ꧀ꦓꦺꦴ ꦄꦴꦕꦫꦶꦪꦱ꧀ꦱ ꦏꦩ꧀ꦩꦁ ꦏꦠ꧀ꦠꦸꦏꦴꦩꦺꦴ ꦲꦺꦴꦠꦶ, ꦠꦗ꧀ꦗꦤꦷꦪꦁ ꦮꦴ ꦤꦶꦪꦱ꧀ꦱꦁ ꦮꦴ ꦥꦧ꧀ꦧꦴꦗꦤꦷꦪꦁ ꦮꦴ ꦥꦛꦶꦱꦴꦫꦟꦷꦪꦁ ꦮꦴ ꦈꦏ꧀ꦑꦺꦥꦤꦷꦪꦁ ꦮꦴ, ꦄꦤ꧀ꦠꦺꦮꦴꦱꦶꦏꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦄꦴꦕꦫꦶꦪꦱ꧀ꦱ ꦏꦩ꧀ꦩꦁ ꦤ ꦏꦫꦺꦪ꧀ꦪ, ꦭꦲꦸꦏꦴꦪ ꦮꦴ ꦥꦫꦶꦟꦴꦩꦺꦪ꧀ꦪꦴꦠꦶ. ꦏꦠꦁ ꦮꦴ ꦥꦤꦱ꧀ꦱ ꦲꦺꦴꦠꦶ ꦱꦔ꧀ꦓꦺꦤ ꦏꦩ꧀ꦩꦁ, ꦠꦗ꧀ꦗꦤꦷꦪꦁ ꦮꦴ ꦤꦶꦪꦱ꧀ꦱꦁ ꦮꦴ ꦥꦧ꧀ꦧꦴꦗꦤꦷꦪꦁ ꦮꦴ ꦥꦛꦶꦱꦴꦫꦟꦷꦪꦁ ꦮꦴ ꦈꦏ꧀ꦑꦺꦥꦤꦷꦪꦁ ꦮꦴ, ꦄꦤ꧀ꦠꦺꦮꦴꦱꦶꦏꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦄꦴꦕꦫꦶꦪꦺꦴ ꦱꦩ꧀ꦩꦴ ꦮꦠ꧀ꦠꦺꦪ꧀ꦪ, ꦭꦺꦴꦩꦁ ꦥꦴꦠꦺꦪ꧀ꦪ, ꦤꦺꦠ꧀ꦡꦴꦫꦁ ꦮꦠ꧀ꦠꦺꦪ꧀ꦪ, ꦱꦔ꧀ꦓꦺꦴ ꦠꦁ ꦏꦩ꧀ꦩꦁ ꦥꦛꦶꦥ꧀ꦥꦱ꧀ꦱꦩ꧀ꦨꦺꦪ꧀ꦪꦴꦠꦶ.

‘‘ꦱꦕꦺ ꦄꦴꦕꦫꦶꦪꦱ꧀ꦱ ꦕꦷꦮꦫꦁ ꦣꦺꦴꦮꦶꦠꦧ꧀ꦧꦁ ꦲꦺꦴꦠꦶ, ꦄꦤ꧀ꦠꦺꦮꦴꦱꦶꦏꦺꦤ ꦣꦺꦴꦮꦶꦠꦧ꧀ꦧꦁ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦄꦴꦕꦫꦶꦪꦱ꧀ꦱ ꦕꦷꦮꦫꦁ ꦣꦺꦴꦮꦶꦪꦺꦡꦴꦠꦶ. ꦱꦕꦺ ꦄꦴꦕꦫꦶꦪꦱ꧀ꦱ ꦕꦷꦮꦫꦁ ꦏꦴꦠꦧ꧀ꦧꦁ ꦲꦺꦴꦠꦶ, ꦄꦤ꧀ꦠꦺꦮꦴꦱꦶꦏꦺꦤ ꦏꦴꦠꦧ꧀ꦧꦁ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦄꦴꦕꦫꦶꦪꦱ꧀ꦱ ꦕꦷꦮꦫꦁ ꦏꦫꦶꦪꦺꦡꦴꦠꦶ. ꦱꦕꦺ ꦄꦴꦕꦫꦶꦪꦱ꧀ꦱ ꦫꦗꦤꦁ ꦥꦕꦶꦠꦧ꧀ꦧꦁ ꦲꦺꦴꦠꦶ, ꦄꦤ꧀ꦠꦺꦮꦴꦱꦶꦏꦺꦤ ꦥꦕꦶꦠꦧ꧀ꦧꦁ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦄꦴꦕꦫꦶꦪꦱ꧀ꦱ ꦫꦗꦤꦁ ꦥꦕꦶꦪꦺꦡꦴꦠꦶ. ꦱꦕꦺ ꦄꦴꦕꦫꦶꦪꦱ꧀ꦱ ꦕꦷꦮꦫꦁ ꦫꦗꦶꦠꦧ꧀ꦧꦁ ꦲꦺꦴꦠꦶ, ꦄꦤ꧀ꦠꦺꦮꦴꦱꦶꦏꦺꦤ ꦫꦗꦶꦠꦧ꧀ꦧꦁ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦄꦴꦕꦫꦶꦪꦱ꧀ꦱ ꦕꦷꦮꦫꦁ ꦫꦗꦶꦪꦺꦡꦴꦠꦶ. ꦕꦷꦮꦫꦁ ꦫꦗꦤ꧀ꦠꦺꦤ ꦱꦴꦣꦸꦏꦁ ꦱꦩ꧀ꦥꦫꦶꦮꦠ꧀ꦠꦏꦁ ꦱꦩ꧀ꦥꦫꦶꦮꦠ꧀ꦠꦏꦁ ꦫꦗꦶꦠꦧ꧀ꦧꦁ, ꦤ ꦕ ꦄꦕ꧀ꦖꦶꦤ꧀ꦤꦺ ꦡꦺꦮꦺ ꦥꦏ꧀ꦏꦩꦶꦠꦧ꧀ꦧꦁ.

‘‘ꦤ ꦄꦴꦕꦫꦶꦪꦁ ꦄꦤꦴꦥꦸꦕ꧀ꦖꦴ ꦌꦏꦕ꧀ꦕꦱ꧀ꦱ ꦥꦠ꧀ꦠꦺꦴ ꦢꦴꦠꦧ꧀ꦧꦺꦴ, ꦤ ꦌꦏꦕ꧀ꦕꦱ꧀ꦱ ꦥꦠ꧀ꦠꦺꦴ ꦥꦛꦶꦒ꧀ꦒꦲꦺꦠꦧ꧀ꦧꦺꦴ; ꦤ ꦌꦏꦕ꧀ꦕꦱ꧀ꦱ ꦕꦷꦮꦫꦁ ꦢꦴꦠꦧ꧀ꦧꦁ, ꦤ ꦌꦏꦕ꧀ꦕꦱ꧀ꦱ ꦕꦷꦮꦫꦁ ꦥꦛꦶꦒ꧀ꦒꦲꦺꦠꦧ꧀ꦧꦁ; ꦤ ꦌꦏꦕ꧀ꦕꦱ꧀ꦱ ꦥꦫꦶꦏ꧀ꦑꦴꦫꦺꦴ ꦢꦴꦠꦧ꧀ꦧꦺꦴ, ꦤ ꦌꦏꦕ꧀ꦕꦱ꧀ꦱ ꦥꦫꦶꦏ꧀ꦑꦴꦫꦺꦴ ꦥꦛꦶꦒ꧀ꦒꦲꦺꦠꦧ꧀ꦧꦺꦴ; ꦤ ꦌꦏꦕ꧀ꦕꦱ꧀ꦱ ꦏꦺꦱꦴ ꦖꦺꦢꦶꦠꦧ꧀ꦧꦴ, ꦤ ꦌꦏꦕ꧀ꦕꦺꦤ ꦏꦺꦱꦴ ꦖꦺꦢꦴꦥꦺꦠꦧ꧀ꦧꦴ; ꦤ ꦌꦏꦕ꧀ꦕꦱ꧀ꦱ ꦥꦫꦶꦏꦩ꧀ꦩꦁ ꦏꦴꦠꦧ꧀ꦧꦁ, ꦤ ꦌꦏꦕ꧀ꦕꦺꦤ ꦥꦫꦶꦏꦩ꧀ꦩꦁ ꦏꦴꦫꦴꦥꦺꦠꦧ꧀ꦧꦁ; ꦤ ꦌꦏꦕ꧀ꦕꦱ꧀ꦱ ꦮꦺꦪ꧀ꦪꦴꦮꦕ꧀ꦕꦺꦴ ꦏꦴꦠꦧ꧀ꦧꦺꦴ, ꦤ ꦌꦏꦕ꧀ꦕꦺꦤ ꦮꦺꦪ꧀ꦪꦴꦮꦕ꧀ꦕꦺꦴ ꦏꦴꦫꦴꦥꦺꦠꦧ꧀ꦧꦺꦴ; ꦤ ꦌꦏꦕ꧀ꦕꦱ꧀ꦱ ꦥꦕ꧀ꦖꦴꦱꦩꦟꦺꦤ ꦲꦺꦴꦠꦧ꧀ꦧꦁ, ꦤ ꦌꦏꦕ꧀ꦕꦺꦴ ꦥꦕ꧀ꦖꦴꦱꦩꦟꦺꦴ ꦄꦴꦢꦴꦠꦧ꧀ꦧꦺꦴ; ꦤ ꦌꦏꦕ꧀ꦕꦱ꧀ꦱ ꦥꦶꦟ꧀ꦝꦥꦴꦠꦺꦴ ꦤꦷꦲꦫꦶꦠꦧ꧀ꦧꦺꦴ, ꦤ ꦌꦏꦕ꧀ꦕꦺꦤ ꦥꦶꦟ꧀ꦝꦥꦴꦠꦺꦴ ꦤꦷꦲꦫꦴꦥꦺꦠꦧ꧀ꦧꦺꦴ; ꦤ ꦄꦴꦕꦫꦶꦪꦁ ꦄꦤꦴꦥꦸꦕ꧀ꦖꦴ ꦒꦴꦩꦺꦴ ꦥꦮꦶꦱꦶꦠꦧ꧀ꦧꦺꦴ; ꦤ ꦱꦸꦱꦴꦤꦁ ꦒꦤ꧀ꦠꦧ꧀ꦧꦁ; ꦤ ꦢꦶꦱꦴ ꦥꦏ꧀ꦏꦩꦶꦠꦧ꧀ꦧꦴ. ꦱꦕꦺ ꦄꦴꦕꦫꦶꦪꦺꦴ ꦒꦶꦭꦴꦤꦺꦴ ꦲꦺꦴꦠꦶ, ꦪꦴꦮꦗꦷꦮꦁ ꦈꦥꦛ꧀ꦜꦴꦠꦧ꧀ꦧꦺꦴ, ꦮꦸꦛ꧀ꦜꦴꦤꦩꦱ꧀ꦱ ꦄꦴꦒꦩꦺꦠꦧ꧀ꦧꦁ. ꦆꦢꦁ ꦑꦺꦴ, ꦨꦶꦏ꧀ꦑꦮꦺ, ꦄꦤ꧀ꦠꦺꦮꦴꦱꦶꦏꦴꦤꦁ ꦄꦴꦕꦫꦶꦪꦺꦱꦸ ꦮꦠ꧀ꦠꦁ ꦪꦡꦴ ꦄꦤ꧀ꦠꦺꦮꦴꦱꦶꦏꦺꦲꦶ ꦄꦴꦕꦫꦶꦪꦺꦱꦸ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧ’’ꦤ꧀ꦠꦶ.

꧑꧔. ꦄꦤ꧀ꦠꦺꦮꦴꦱꦶꦏꦮꦠ꧀ꦠꦏꦡꦴ

꧓꧘꧑. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦕꦫꦶꦪꦴ ꦄꦤ꧀ꦠꦺꦮꦴꦱꦶꦏꦺꦱꦸ ꦤ ꦱꦩ꧀ꦩꦴ ꦮꦠ꧀ꦠꦤ꧀ꦠꦶ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦴꦕꦫꦶꦪꦴ ꦄꦤ꧀ꦠꦺꦮꦴꦱꦶꦏꦺꦱꦸ ꦤ ꦱꦩ꧀ꦩꦴ ꦮꦠ꧀ꦠꦶꦱ꧀ꦱꦤ꧀ꦠꦷ’’ꦠꦶ! ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ. ꦄꦡ ꦑꦺꦴ ꦨꦒꦮꦴ ꦌꦠꦱ꧀ꦩꦶꦁ ꦤꦶꦢꦴꦤꦺ ꦌꦠꦱ꧀ꦩꦶꦁ ꦥꦏꦫꦟꦺ ꦨꦶꦏ꧀ꦑꦸꦱꦔ꧀ꦓꦁ ꦱꦤ꧀ꦤꦶꦥꦴꦠꦴꦥꦺꦠ꧀ꦮꦴ ꦨꦶꦏ꧀ꦑꦹ ꦥꦛꦶꦥꦸꦕ꧀ꦖꦶ – ‘‘ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦄꦴꦕꦫꦶꦪꦴ ꦄꦤ꧀ꦠꦺꦮꦴꦱꦶꦏꦺꦱꦸ ꦤ ꦱꦩ꧀ꦩꦴ ꦮꦠ꧀ꦠꦤ꧀ꦠꦷ’’ꦠꦶ? ‘‘ꦱꦕ꧀ꦕꦁ ꦨꦒꦮꦴ’’ꦠꦶ…ꦥꦺ… ꦮꦶꦒꦫꦲꦶꦠ꧀ꦮꦴ…ꦥꦺ… ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ –

꧓꧘꧒. ‘‘ꦠꦺꦤ ꦲꦶ, ꦨꦶꦏ꧀ꦑꦮꦺ, ꦄꦴꦕꦫꦶꦪꦴꦤꦁ ꦄꦤ꧀ꦠꦺꦮꦴꦱꦶꦏꦺꦱꦸ ꦮꦠ꧀ꦠꦁ ꦥꦚ꧀ꦚꦥꦺꦱ꧀ꦱꦴꦩꦶ ꦪꦡꦴ ꦄꦴꦕꦫꦶꦪꦺꦲꦶ ꦄꦤ꧀ꦠꦺꦮꦴꦱꦶꦏꦺꦱꦸ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. [ꦩꦲꦴꦮ. ꧗꧙] ꦄꦴꦕꦫꦶꦪꦺꦤ, ꦨꦶꦏ꧀ꦑꦮꦺ, ꦄꦤ꧀ꦠꦺꦮꦴꦱꦶꦏꦩ꧀ꦲꦶ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. ꦠꦠ꧀ꦫꦴꦪꦁ ꦱꦩ꧀ꦩꦴꦮꦠ꧀ꦠꦤꦴ –

‘‘ꦄꦴꦕꦫꦶꦪꦺꦤ, ꦨꦶꦏ꧀ꦑꦮꦺ, ꦄꦤ꧀ꦠꦺꦮꦴꦱꦶꦏꦺꦴ ꦱꦔ꧀ꦒꦲꦺꦠꦧ꧀ꦧꦺꦴ ꦄꦤꦸꦒ꧀ꦒꦲꦺꦠꦧ꧀ꦧꦺꦴ ꦈꦢ꧀ꦢꦺꦱꦺꦤ ꦥꦫꦶꦥꦸꦕ꧀ꦖꦴꦪ ꦎꦮꦴꦢꦺꦤ ꦄꦤꦸꦱꦴꦱꦤꦶꦪꦴ. ꦱꦕꦺ ꦄꦴꦕꦫꦶꦪꦱ꧀ꦱ ꦥꦠ꧀ꦠꦺꦴ ꦲꦺꦴꦠꦶ, ꦄꦤ꧀ꦠꦺꦮꦴꦱꦶꦏꦱ꧀ꦱ ꦥꦠ꧀ꦠꦺꦴ ꦤ ꦲꦺꦴꦠꦶ, ꦄꦴꦕꦫꦶꦪꦺꦤ ꦄꦤ꧀ꦠꦺꦮꦴꦱꦶꦏꦱ꧀ꦱ ꦥꦠ꧀ꦠꦺꦴ ꦢꦴꦠꦧ꧀ꦧꦺꦴ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦄꦤ꧀ꦠꦺꦮꦴꦱꦶꦏꦱ꧀ꦱ ꦥꦠ꧀ꦠꦺꦴ ꦈꦥ꧀ꦥꦗ꧀ꦗꦶꦪꦺꦡꦴꦠꦶ. ꦱꦕꦺ ꦄꦴꦕꦫꦶꦪꦱ꧀ꦱ ꦕꦷꦮꦫꦁ ꦲꦺꦴꦠꦶ, ꦄꦤ꧀ꦠꦺꦮꦴꦱꦶꦏꦱ꧀ꦱ ꦕꦷꦮꦫꦁ ꦤ ꦲꦺꦴꦠꦶ, ꦄꦴꦕꦫꦶꦪꦺꦤ ꦄꦤ꧀ꦠꦺꦮꦴꦱꦶꦏꦱ꧀ꦱ ꦕꦷꦮꦫꦁ ꦢꦴꦠꦧ꧀ꦧꦁ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦄꦤ꧀ꦠꦺꦮꦴꦱꦶꦏꦱ꧀ꦱ ꦕꦷꦮꦫꦁ ꦈꦥ꧀ꦥꦗ꧀ꦗꦶꦪꦺꦡꦴꦠꦶ. ꦱꦕꦺ ꦄꦴꦕꦫꦶꦪꦱ꧀ꦱ ꦥꦫꦶꦏ꧀ꦑꦴꦫꦺꦴ ꦲꦺꦴꦠꦶ, ꦄꦤ꧀ꦠꦺꦮꦴꦱꦶꦏꦱ꧀ꦱ ꦥꦫꦶꦏ꧀ꦑꦴꦫꦺꦴ ꦤ ꦲꦺꦴꦠꦶ, ꦄꦴꦕꦫꦶꦪꦺꦤ ꦄꦤ꧀ꦠꦺꦮꦴꦱꦶꦏꦱ꧀ꦱ ꦥꦫꦶꦏ꧀ꦑꦴꦫꦺꦴ ꦢꦴꦠꦧ꧀ꦧꦺꦴ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦄꦤ꧀ꦠꦺꦮꦴꦱꦶꦏꦱ꧀ꦱ ꦥꦫꦶꦏ꧀ꦑꦴꦫꦺꦴ ꦈꦥ꧀ꦥꦗ꧀ꦗꦶꦪꦺꦡꦴꦠꦶ.

‘‘ꦱꦕꦺ ꦄꦤ꧀ꦠꦺꦮꦴꦱꦶꦏꦺꦴ ꦒꦶꦭꦴꦤꦺꦴ ꦲꦺꦴꦠꦶ, ꦏꦴꦭꦱ꧀ꦱꦺꦮ ꦈꦛ꧀ꦜꦴꦪ ꦢꦤ꧀ꦠꦏꦛ꧀ꦜꦁ ꦢꦴꦠꦧ꧀ꦧꦁ, ꦩꦸꦑꦺꦴꦢꦏꦁ ꦢꦴꦠꦧ꧀ꦧꦁ, ꦄꦴꦱꦤꦁ ꦥꦚ꧀ꦚꦥꦺꦠꦧ꧀ꦧꦁ. ꦱꦕꦺ ꦪꦴꦒꦸ ꦲꦺꦴꦠꦶ, ꦨꦴꦗꦤꦁ ꦣꦺꦴꦮꦶꦠ꧀ꦮꦴ ꦪꦴꦒꦸ ꦈꦥꦤꦴꦩꦺꦠꦧ꧀ꦧꦴ. ꦪꦴꦒꦸꦁ ꦥꦷꦠꦱ꧀ꦱ ꦈꦢꦏꦁ ꦢꦠ꧀ꦮꦴ ꦨꦴꦗꦤꦁ ꦥꦛꦶꦒ꧀ꦒꦲꦺꦠ꧀ꦮꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ ꦣꦺꦴꦮꦶꦠ꧀ꦮꦴ ꦥꦛꦶꦱꦴꦩꦺꦠꦧ꧀ꦧꦁ. ꦄꦤ꧀ꦠꦺꦮꦴꦱꦶꦏꦩ꧀ꦲꦶ ꦮꦸꦛ꧀ꦜꦶꦠꦺ ꦄꦴꦱꦤꦁ ꦈꦢ꧀ꦣꦫꦶꦠꦧ꧀ꦧꦁ. ꦱꦕꦺ ꦱꦺꦴ ꦢꦺꦱꦺꦴ ꦈꦏ꧀ꦭꦴꦥꦺꦴ ꦲꦺꦴꦠꦶ, ꦱꦺꦴ ꦢꦺꦱꦺꦴ ꦱꦩ꧀ꦩꦗ꧀ꦗꦶꦠꦧ꧀ꦧꦺꦴ.

‘‘ꦱꦕꦺ ꦄꦤ꧀ꦠꦺꦮꦴꦱꦶꦏꦺꦴ ꦒꦴꦩꦁ ꦥꦮꦶꦱꦶꦠꦸꦏꦴꦩꦺꦴ ꦲꦺꦴꦠꦶ, ꦤꦶꦮꦴꦱꦤꦁ ꦢꦴꦠꦧ꧀ꦧꦁ, ꦥꦛꦶꦤꦶꦮꦴꦱꦤꦁ ꦥꦛꦶꦒ꧀ꦒꦲꦺꦠꦧ꧀ꦧꦁ, ꦏꦴꦪꦧꦤ꧀ꦣꦤꦁ ꦢꦴꦠꦧ꧀ꦧꦁ, ꦱꦒꦸꦟꦁ ꦏꦠ꧀ꦮꦴ ꦱꦔ꧀ꦓꦴꦛꦶꦪꦺꦴ ꦢꦴꦠꦧ꧀ꦧꦴ, ꦣꦺꦴꦮꦶꦠ꧀ꦮꦴ ꦥꦠ꧀ꦠꦺꦴ ꦱꦺꦴꦢꦏꦺꦴ ꦢꦴꦠꦧ꧀ꦧꦺꦴ.

‘‘ꦱꦕꦺ ꦥꦶꦟ꧀ꦝꦥꦴꦠꦺꦴ ꦲꦺꦴꦠꦶ, ꦄꦤ꧀ꦠꦺꦮꦴꦱꦶꦏꦺꦴ ꦕ ꦨꦸꦚ꧀ꦗꦶꦠꦸꦏꦴꦩꦺꦴ ꦲꦺꦴꦠꦶ, ꦈꦢꦏꦁ ꦢꦠ꧀ꦮꦴ ꦥꦶꦟ꧀ꦝꦥꦴꦠꦺꦴ ꦈꦥꦤꦴꦩꦺꦠꦧ꧀ꦧꦺꦴ. ꦄꦤ꧀ꦠꦺꦮꦴꦱꦶꦏꦺꦴ ꦥꦴꦤꦷꦪꦺꦤ ꦥꦸꦕ꧀ꦖꦶꦠꦧ꧀ꦧꦺꦴ. ꦨꦸꦠ꧀ꦠꦴꦮꦶꦱ꧀ꦱ ꦈꦢꦏꦁ ꦢꦠ꧀ꦮꦴ ꦥꦠ꧀ꦠꦁ ꦥꦛꦶꦒ꧀ꦒꦲꦺꦠ꧀ꦮꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥ꧀ꦥꦛꦶꦓꦁꦱꦤ꧀ꦠꦺꦤ ꦣꦺꦴꦮꦶꦠ꧀ꦮꦴ ꦮꦺꦴꦢꦏꦁ ꦏꦠ꧀ꦮꦴ ꦩꦸꦲꦸꦠ꧀ꦠꦁ ꦈꦟ꧀ꦲꦺ ꦎꦠꦴꦥꦺꦠꦧ꧀ꦧꦺꦴ, ꦤ ꦕ ꦈꦟ꧀ꦲꦺ ꦥꦠ꧀ꦠꦺꦴ ꦤꦶꦢꦲꦶꦠꦧ꧀ꦧꦺꦴ. ꦥꦠ꧀ꦠꦕꦷꦮꦫꦁ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦥꦠ꧀ꦠꦁ ꦤꦶꦏ꧀ꦑꦶꦥꦤ꧀ꦠꦺꦤ…ꦥꦺ… ꦕꦷꦮꦫꦁ ꦤꦶꦏ꧀ꦑꦶꦥꦤ꧀ꦠꦺꦤ…ꦥꦺ… ꦥꦴꦫꦠꦺꦴ ꦄꦤ꧀ꦠꦁ ꦎꦫꦠꦺꦴ ꦨꦺꦴꦒꦁ ꦏꦠ꧀ꦮꦴ ꦕꦷꦮꦫꦁ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦄꦤ꧀ꦠꦺꦮꦴꦱꦶꦏꦩ꧀ꦲꦶ ꦈꦛ꧀ꦜꦶꦠꦺ ꦄꦴꦱꦤꦁ ꦈꦢ꧀ꦣꦫꦶꦠꦧ꧀ꦧꦁ, ꦥꦴꦢꦺꦴꦢꦏꦁ ꦥꦴꦢꦥꦷꦜꦁ ꦥꦴꦢꦏꦡꦭꦶꦏꦁ ꦥꦛꦶꦱꦴꦩꦺꦠꦧ꧀ꦧꦁ. ꦱꦕꦺ ꦱꦺꦴ ꦢꦺꦱꦺꦴ ꦈꦏ꧀ꦭꦴꦥꦺꦴ ꦲꦺꦴꦠꦶ, ꦱꦺꦴ ꦢꦺꦱꦺꦴ ꦱꦩ꧀ꦩꦗ꧀ꦗꦶꦠꦧ꧀ꦧꦺꦴ.

‘‘ꦱꦕꦺ ꦄꦤ꧀ꦠꦺꦮꦴꦱꦶꦏꦺꦴ ꦤꦲꦴꦪꦶꦠꦸꦏꦴꦩꦺꦴ ꦲꦺꦴꦠꦶ, ꦤꦲꦴꦤꦁ ꦥꦛꦶꦪꦴꦢꦺꦠꦧ꧀ꦧꦁ. ꦱꦕꦺ ꦱꦷꦠꦺꦤ ꦄꦠ꧀ꦡꦺꦴ ꦲꦺꦴꦠꦶ, ꦱꦷꦠꦁ ꦥꦛꦶꦪꦴꦢꦺꦠꦧ꧀ꦧꦁ. ꦱꦕꦺ ꦈꦟ꧀ꦲꦺꦤ ꦄꦠ꧀ꦡꦺꦴ ꦲꦺꦴꦠꦶ, ꦈꦟ꧀ꦲꦁ ꦥꦛꦶꦪꦴꦢꦺꦠꦧ꧀ꦧꦁ.

‘‘ꦱꦕꦺ ꦄꦤ꧀ꦠꦺꦮꦴꦱꦶꦏꦺꦴ ꦗꦤ꧀ꦠꦴꦓꦫꦁ ꦥꦮꦶꦱꦶꦠꦸꦏꦴꦩꦺꦴ ꦲꦺꦴꦠꦶ, ꦕꦸꦟ꧀ꦟꦁ ꦱꦤ꧀ꦤꦺꦠꦧ꧀ꦧꦁ, ꦩꦠ꧀ꦠꦶꦏꦴ ꦠꦺꦩꦺꦠꦧ꧀ꦧꦴ, ꦗꦤ꧀ꦠꦴꦓꦫꦥꦷꦜꦁ ꦄꦴꦢꦴꦪ [ꦄꦴꦢꦴꦪ ꦄꦤ꧀ꦠꦺꦮꦴꦱꦶꦏꦱ꧀ꦱ ꦥꦶꦛ꧀ꦜꦶꦠꦺꦴ ꦥꦶꦛ꧀ꦜꦶꦠꦺꦴ (ꦏ.)] ꦒꦤ꧀ꦠ꧀ꦮꦴ ꦗꦤ꧀ꦠꦴꦓꦫꦥꦷꦜꦁ ꦢꦠ꧀ꦮꦴ ꦕꦷꦮꦫꦁ ꦥꦛꦶꦒ꧀ꦒꦲꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ, ꦕꦸꦟ꧀ꦟꦁ ꦢꦴꦠꦧ꧀ꦧꦁ, ꦩꦠ꧀ꦠꦶꦏꦴ ꦢꦴꦠꦧ꧀ꦧꦴ. ꦱꦕꦺ ꦈꦱ꧀ꦱꦲꦠꦶ ꦗꦤ꧀ꦠꦴꦓꦫꦁ ꦥꦮꦶꦱꦶꦠꦧ꧀ꦧꦁ. ꦗꦤ꧀ꦠꦴꦓꦫꦁ ꦥꦮꦶꦱꦤ꧀ꦠꦺꦤ ꦩꦠ꧀ꦠꦶꦏꦴꦪ ꦩꦸꦑꦁ ꦩꦏ꧀ꦑꦺꦠ꧀ꦮꦴ ꦥꦸꦫꦠꦺꦴ ꦕ ꦥꦕ꧀ꦖꦠꦺꦴ ꦕ ꦥꦛꦶꦕ꧀ꦖꦴꦢꦺꦠ꧀ꦮꦴ ꦗꦤ꧀ꦠꦴꦓꦫꦁ ꦥꦮꦶꦱꦶꦠꦧ꧀ꦧꦁ. ꦤ ꦡꦺꦫꦺ ꦨꦶꦏ꧀ꦑꦹ ꦄꦤꦸꦥꦑꦗ꧀ꦗ ꦤꦶꦱꦷꦢꦶꦠꦧ꧀ꦧꦁ. ꦤ ꦤꦮꦴ ꦨꦶꦏ꧀ꦑꦹ ꦄꦴꦱꦤꦺꦤ ꦥꦛꦶꦧꦴꦲꦶꦠꦧ꧀ꦧꦴ. ꦗꦤ꧀ꦠꦴꦓꦫꦺ ꦄꦤ꧀ꦠꦺꦮꦴꦱꦶꦏꦱ꧀ꦱ ꦥꦫꦶꦏꦩ꧀ꦩꦁ ꦏꦴꦠꦧ꧀ꦧꦁ. ꦗꦤ꧀ꦠꦴꦓꦫꦴ ꦤꦶꦏ꧀ꦑꦩꦤ꧀ꦠꦺꦤ ꦗꦤ꧀ꦠꦴꦓꦫꦥꦷꦜꦁ ꦄꦴꦢꦴꦪ ꦥꦸꦫꦠꦺꦴ ꦕ ꦥꦕ꧀ꦖꦠꦺꦴ ꦕ ꦥꦛꦶꦕ꧀ꦖꦴꦢꦺꦠ꧀ꦮꦴ ꦗꦤ꧀ꦠꦴꦓꦫꦴ ꦤꦶꦏ꧀ꦑꦩꦶꦠꦧ꧀ꦧꦁ.

‘‘ꦈꦢꦏꦺꦥꦶ ꦄꦤ꧀ꦠꦺꦮꦴꦱꦶꦏꦱ꧀ꦱ ꦥꦫꦶꦏꦩ꧀ꦩꦁ ꦏꦴꦠꦧ꧀ꦧꦁ. ꦤꦲꦴꦠꦺꦤ ꦥꦜꦩꦠꦫꦁ ꦈꦠ꧀ꦠꦫꦶꦠ꧀ꦮꦴ ꦄꦠ꧀ꦠꦤꦺꦴ ꦒꦠ꧀ꦠꦁ ꦮꦺꦴꦢꦏꦁ ꦏꦠ꧀ꦮꦴ ꦤꦶꦮꦴꦱꦺꦠ꧀ꦮꦴ ꦄꦤ꧀ꦠꦺꦮꦴꦱꦶꦏꦱ꧀ꦱ ꦒꦠ꧀ꦠꦠꦺꦴ ꦈꦢꦏꦁ ꦥꦩꦗ꧀ꦗꦶꦠꦧ꧀ꦧꦁ, ꦤꦶꦮꦴꦱꦤꦁ ꦢꦴꦠꦧ꧀ꦧꦁ, ꦱꦔ꧀ꦓꦴꦛꦶ ꦢꦴꦠꦧ꧀ꦧꦴ, ꦗꦤ꧀ꦠꦴꦓꦫꦥꦷꦜꦁ ꦄꦴꦢꦴꦪ ꦥꦜꦩꦠꦫꦁ ꦄꦴꦒꦤ꧀ꦠ꧀ꦮꦴ ꦄꦴꦱꦤꦁ ꦥꦚ꧀ꦚꦥꦺꦠꦧ꧀ꦧꦁ, ꦥꦴꦢꦺꦴꦢꦏꦁ ꦥꦴꦢꦥꦷꦜꦁ ꦥꦴꦢꦏꦡꦭꦶꦏꦁ ꦈꦥꦤꦶꦏ꧀ꦑꦶꦥꦶꦠꦧ꧀ꦧꦁ, ꦄꦤ꧀ꦠꦺꦮꦴꦱꦶꦏꦺꦴ ꦥꦴꦤꦷꦪꦺꦤ ꦥꦸꦕ꧀ꦖꦶꦠꦧ꧀ꦧꦺꦴ.

‘‘ꦪꦱ꧀ꦩꦶꦁ ꦮꦶꦲꦴꦫꦺ ꦄꦤ꧀ꦠꦺꦮꦴꦱꦶꦏꦺꦴ ꦮꦶꦲꦫꦠꦶ, ꦱꦕꦺ ꦱꦺꦴ ꦮꦶꦲꦴꦫꦺꦴ ꦈꦏ꧀ꦭꦴꦥꦺꦴ ꦲꦺꦴꦠꦶ, ꦱꦕꦺ ꦈꦱ꧀ꦱꦲꦠꦶ, ꦱꦺꦴꦣꦺꦠꦧ꧀ꦧꦺꦴ. ꦮꦶꦲꦴꦫꦁ ꦱꦺꦴꦣꦺꦤ꧀ꦠꦺꦤ ꦥꦜꦩꦁ ꦥꦠ꧀ꦠꦕꦷꦮꦫꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ…ꦥꦺ… ꦄꦴꦕꦩꦤꦏꦸꦩ꧀ꦨꦶꦪꦴ ꦈꦢꦏꦁ ꦤ ꦲꦺꦴꦠꦶ, ꦄꦴꦕꦩꦤꦏꦸꦩ꧀ꦨꦶꦪꦴ ꦈꦢꦏꦁ ꦄꦴꦱꦶꦚ꧀ꦕꦶꦠꦧ꧀ꦧꦁ.

‘‘ꦱꦕꦺ ꦄꦤ꧀ꦠꦺꦮꦴꦱꦶꦏꦱ꧀ꦱ ꦄꦤꦨꦶꦫꦠꦶ ꦈꦥ꧀ꦥꦤ꧀ꦤꦴ ꦲꦺꦴꦠꦶ, ꦄꦴꦕꦫꦶꦪꦺꦤ ꦮꦹꦥꦏꦴꦱꦺꦠꦧ꧀ꦧꦺꦴ, ꦮꦹꦥꦏꦴꦱꦴꦥꦺꦠꦧ꧀ꦧꦺꦴ, ꦣꦩ꧀ꦩꦏꦡꦴ ꦮꦴꦱ꧀ꦱ ꦏꦴꦠꦧ꧀ꦧꦴ. ꦱꦕꦺ ꦄꦤ꧀ꦠꦺꦮꦴꦱꦶꦏꦱ꧀ꦱ ꦏꦸꦏ꧀ꦏꦸꦕ꧀ꦕꦁ ꦈꦥ꧀ꦥꦤ꧀ꦤꦁ ꦲꦺꦴꦠꦶ, ꦄꦴꦕꦫꦶꦪꦺꦤ ꦮꦶꦤꦺꦴꦢꦺꦠꦧ꧀ꦧꦁ, ꦮꦶꦤꦺꦴꦢꦴꦥꦺꦠꦧ꧀ꦧꦁ, ꦣꦩ꧀ꦩꦏꦡꦴ ꦮꦴꦱ꧀ꦱ ꦏꦴꦠꦧ꧀ꦧꦴ. ꦱꦕꦺ ꦄꦤ꧀ꦠꦺꦮꦴꦱꦶꦏꦱ꧀ꦱ ꦢꦶꦛ꧀ꦜꦶꦒꦠꦁ ꦈꦥ꧀ꦥꦤ꧀ꦤꦁ ꦲꦺꦴꦠꦶ, ꦄꦴꦕꦫꦶꦪꦺꦤ ꦮꦶꦮꦺꦕꦺꦠꦧ꧀ꦧꦁ, ꦮꦶꦮꦺꦕꦴꦥꦺꦠꦧ꧀ꦧꦁ, ꦣꦩ꧀ꦩꦏꦡꦴ ꦮꦴꦱ꧀ꦱ ꦏꦴꦠꦧ꧀ꦧꦴ. ꦱꦕꦺ ꦄꦤ꧀ꦠꦺꦮꦴꦱꦶꦏꦺꦴ ꦒꦫꦸꦣꦩ꧀ꦩꦁ ꦄꦗ꧀ꦙꦴꦥꦤ꧀ꦤꦺꦴ ꦲꦺꦴꦠꦶ, ꦥꦫꦶꦮꦴꦱꦴꦫꦲꦺꦴ, ꦄꦴꦕꦫꦶꦪꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦄꦤ꧀ꦠꦺꦮꦴꦱꦶꦏꦱ꧀ꦱ ꦥꦫꦶꦮꦴꦱꦁ ꦢꦢꦺꦪ꧀ꦪꦴꦠꦶ. ꦱꦕꦺ ꦄꦤ꧀ꦠꦺꦮꦴꦱꦶꦏꦺꦴ ꦩꦹꦭꦴꦪꦥꦛꦶꦏꦱ꧀ꦱꦤꦴꦫꦲꦺꦴ ꦲꦺꦴꦠꦶ, ꦄꦴꦕꦫꦶꦪꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦄꦤ꧀ꦠꦺꦮꦴꦱꦶꦏꦁ ꦩꦹꦭꦴꦪ ꦥꦛꦶꦏꦱ꧀ꦱꦺꦪ꧀ꦪꦴꦠꦶ. ꦱꦕꦺ ꦄꦤ꧀ꦠꦺꦮꦴꦱꦶꦏꦺꦴ ꦩꦴꦤꦠ꧀ꦠꦴꦫꦲꦺꦴ ꦲꦺꦴꦠꦶ, ꦄꦴꦕꦫꦶꦪꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦄꦤ꧀ꦠꦺꦮꦴꦱꦶꦏꦱ꧀ꦱ ꦩꦴꦤꦠ꧀ꦠꦁ ꦢꦢꦺꦪ꧀ꦪꦴꦠꦶ. ꦱꦕꦺ ꦄꦤ꧀ꦠꦺꦮꦴꦱꦶꦏꦺꦴ ꦄꦧ꧀ꦨꦴꦤꦴꦫꦲꦺꦴ ꦲꦺꦴꦠꦶ, ꦄꦴꦕꦫꦶꦪꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦄꦤ꧀ꦠꦺꦮꦴꦱꦶꦏꦁ ꦄꦧ꧀ꦨꦺꦪ꧀ꦪꦴꦠꦶ. ꦱꦕꦺ ꦱꦔ꧀ꦓꦺꦴ ꦄꦤ꧀ꦠꦺꦮꦴꦱꦶꦏꦱ꧀ꦱ ꦏꦩ꧀ꦩꦁ ꦏꦠ꧀ꦠꦸꦏꦴꦩꦺꦴ ꦲꦺꦴꦠꦶ, ꦠꦗ꧀ꦗꦤꦷꦪꦁ ꦮꦴ ꦤꦶꦪꦱ꧀ꦱꦁ ꦮꦴ ꦥꦧ꧀ꦧꦴꦗꦤꦷꦪꦁ ꦮꦴ ꦥꦛꦶꦱꦴꦫꦟꦷꦪꦁ ꦮꦴ ꦈꦏ꧀ꦑꦺꦥꦤꦷꦪꦁ ꦮꦴ, ꦄꦴꦕꦫꦶꦪꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦱꦔ꧀ꦓꦺꦴ ꦄꦤ꧀ꦠꦺꦮꦴꦱꦶꦏꦱ꧀ꦱ ꦏꦩ꧀ꦩꦁ ꦤ ꦏꦫꦺꦪ꧀ꦪ, ꦭꦲꦸꦏꦴꦪ ꦮꦴ ꦥꦫꦶꦟꦴꦩꦺꦪ꧀ꦪꦴꦠꦶ. ꦏꦠꦁ ꦮꦴ ꦥꦤꦱ꧀ꦱ ꦲꦺꦴꦠꦶ, ꦱꦔ꧀ꦓꦺꦤ ꦏꦩ꧀ꦩꦁ, ꦠꦗ꧀ꦗꦤꦷꦪꦁ ꦮꦴ ꦤꦶꦪꦱ꧀ꦱꦁ ꦮꦴ ꦥꦧ꧀ꦧꦴꦗꦤꦷꦪꦁ ꦮꦴ ꦥꦛꦶꦱꦴꦫꦟꦷꦪꦁ ꦮꦴ ꦈꦏ꧀ꦑꦺꦥꦤꦷꦪꦁ ꦮꦴ, ꦄꦴꦕꦫꦶꦪꦺꦤ ꦈꦱ꧀ꦱꦸꦏ꧀ꦏꦁ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦄꦤ꧀ꦠꦺꦮꦴꦱꦶꦏꦺꦴ ꦱꦩ꧀ꦩꦴ ꦮꦠ꧀ꦠꦺꦪ꧀ꦪ, ꦭꦺꦴꦩꦁ ꦥꦴꦠꦺꦪ꧀ꦪ, ꦤꦺꦠ꧀ꦡꦴꦫꦁ ꦮꦠ꧀ꦠꦺꦪ꧀ꦪ, ꦱꦔ꧀ꦓꦺꦴ ꦠꦁ ꦏꦩ꧀ꦩꦁ ꦥꦛꦶꦥ꧀ꦥꦱ꧀ꦱꦩ꧀ꦨꦺꦪ꧀ꦪꦴꦠꦶ.

‘‘ꦱꦕꦺ ꦄꦤ꧀ꦠꦺꦮꦴꦱꦶꦏꦱ꧀ꦱ ꦕꦷꦮꦫꦁ ꦣꦺꦴꦮꦶꦠꦧ꧀ꦧꦁ ꦲꦺꦴꦠꦶ, ꦄꦴꦕꦫꦶꦪꦺꦤ ꦄꦴꦕꦶꦏ꧀ꦑꦶꦠꦧ꧀ꦧꦁ – ꦌꦮꦁ ꦣꦺꦴꦮꦺꦪ꧀ꦪꦴꦱꦷꦠꦶ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦄꦤ꧀ꦠꦺꦮꦴꦱꦶꦏꦱ꧀ꦱ ꦕꦷꦮꦫꦁ ꦣꦺꦴꦮꦶꦪꦺꦡꦴꦠꦶ. ꦱꦕꦺ ꦄꦤ꧀ꦠꦺꦮꦴꦱꦶꦏꦱ꧀ꦱ ꦕꦷꦮꦫꦁ ꦏꦴꦠꦧ꧀ꦧꦁ ꦲꦺꦴꦠꦶ, ꦄꦴꦕꦫꦶꦪꦺꦤ ꦄꦴꦕꦶꦏ꧀ꦑꦶꦠꦧ꧀ꦧꦁ – ꦌꦮꦁ ꦏꦫꦺꦪ꧀ꦪꦴꦱꦷꦠꦶ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦄꦤ꧀ꦠꦺꦮꦴꦱꦶꦏꦱ꧀ꦱ ꦕꦷꦮꦫꦁ ꦏꦫꦶꦪꦺꦡꦴꦠꦶ. ꦱꦕꦺ ꦄꦤ꧀ꦠꦺꦮꦴꦱꦶꦏꦱ꧀ꦱ ꦫꦗꦤꦁ ꦥꦕꦶꦠꦧ꧀ꦧꦁ ꦲꦺꦴꦠꦶ, ꦄꦴꦕꦫꦶꦪꦺꦤ ꦄꦴꦕꦶꦏ꧀ꦑꦶꦠꦧ꧀ꦧꦁ – ꦌꦮꦁ ꦥꦕꦺꦪ꧀ꦪꦴꦱꦷꦠꦶ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦄꦤ꧀ꦠꦺꦮꦴꦱꦶꦏꦱ꧀ꦱ ꦫꦗꦤꦁ ꦥꦕꦶꦪꦺꦡꦴꦠꦶ. ꦱꦕꦺ ꦄꦤ꧀ꦠꦺꦮꦴꦱꦶꦏꦱ꧀ꦱ ꦕꦷꦮꦫꦁ ꦫꦗꦶꦠꦧ꧀ꦧꦁ ꦲꦺꦴꦠꦶ, ꦄꦴꦕꦫꦶꦪꦺꦤ ꦄꦴꦕꦶꦏ꧀ꦑꦶꦠꦧ꧀ꦧꦁ – ꦌꦮꦁ ꦫꦗꦺꦪ꧀ꦪꦴꦱꦷꦠꦶ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧꦁ – ꦏꦶꦤ꧀ꦠꦶ ꦤꦸ ꦑꦺꦴ ꦄꦤ꧀ꦠꦺꦮꦴꦱꦶꦏꦱ꧀ꦱ ꦕꦷꦮꦫꦁ ꦫꦗꦶꦪꦺꦡꦴꦠꦶ. ꦕꦷꦮꦫꦁ ꦫꦗꦤ꧀ꦠꦺꦤ ꦱꦴꦣꦸꦏꦁ ꦱꦩ꧀ꦥꦫꦶꦮꦠ꧀ꦠꦏꦁ ꦱꦩ꧀ꦥꦫꦶꦮꦠ꧀ꦠꦏꦁ ꦫꦗꦶꦠꦧ꧀ꦧꦁ. ꦤ ꦕ ꦄꦕ꧀ꦖꦶꦤ꧀ꦤꦺ ꦡꦺꦮꦺ ꦥꦏ꧀ꦏꦩꦶꦠꦧ꧀ꦧꦁ. ꦱꦕꦺ ꦄꦤ꧀ꦠꦺꦮꦴꦱꦶꦏꦺꦴ ꦒꦶꦭꦴꦤꦺꦴ ꦲꦺꦴꦠꦶ, ꦪꦴꦮꦗꦷꦮꦁ ꦈꦥꦛ꧀ꦜꦴꦠꦧ꧀ꦧꦺꦴ, ꦮꦸꦛ꧀ꦜꦴꦤꦩꦱ꧀ꦱ ꦄꦴꦒꦩꦺꦠꦧ꧀ꦧꦁ. ꦆꦢꦁ ꦑꦺꦴ, ꦨꦶꦏ꧀ꦑꦮꦺ, ꦄꦴꦕꦫꦶꦪꦴꦤꦁ ꦄꦤ꧀ꦠꦺꦮꦴꦱꦶꦏꦺꦱꦸ ꦮꦠ꧀ꦠꦁ ꦪꦡꦴ ꦄꦴꦕꦫꦶꦪꦺꦲꦶ ꦄꦤ꧀ꦠꦺꦮꦴꦱꦶꦏꦺꦱꦸ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧ’’ꦤ꧀ꦠꦶ.

ꦮꦠ꧀ꦠꦏ꧀ꦑꦤ꧀ꦣꦏꦺꦴ ꦄꦛ꧀ꦜꦩꦺꦴ.

ꦆꦩꦩ꧀ꦲꦶ ꦑꦤ꧀ꦣꦏꦺ ꦮꦠ꧀ꦡꦹ ꦌꦏꦹꦤꦮꦷꦱꦠꦶ, ꦮꦠ꧀ꦠꦴ ꦕꦸꦢ꧀ꦢꦱ.

ꦠꦱ꧀ꦱꦸꦢ꧀ꦢꦴꦤꦁ –

ꦱꦈꦥꦴꦲꦤꦴ ꦖꦠ꧀ꦠꦴ ꦕ, ꦎꦒꦸꦟ꧀ꦜꦶ ꦱꦷꦱꦁ ꦥꦴꦤꦷꦪꦁ;

ꦤꦴꦨꦶꦮꦴꦢꦺ ꦤ ꦥꦸꦕ꧀ꦖꦤ꧀ꦠꦶ, ꦄꦲꦶ ꦈꦗ꧀ꦙꦤ꧀ꦠꦶ ꦥꦺꦱꦭꦴ.

ꦎꦩꦸꦚ꧀ꦕꦶ ꦖꦠ꧀ꦠꦁ ꦑꦤ꧀ꦣꦺ ꦕ, ꦄꦠꦫꦚ꧀ꦕ ꦥꦛꦶꦏ꧀ꦏꦩꦁ;

ꦥꦠ꧀ꦠꦕꦷꦮꦫꦁ ꦤꦶꦏ꧀ꦑꦶꦥꦴ, ꦥꦠꦶꦫꦹꦥꦚ꧀ꦕ ꦥꦸꦕ꧀ꦖꦶꦠꦴ.

ꦄꦴꦱꦶꦚ꧀ꦕꦺꦪ꧀ꦪ ꦣꦺꦴꦮꦶꦠꦺꦤ, ꦱꦸꦏ꧀ꦑꦺꦤꦭ꧀ꦭꦺꦤꦸꦥꦴꦲꦤꦴ;

ꦮꦸꦝ꧀ꦞꦺꦴ ꦤꦮꦏꦺꦴ ꦥꦸꦕ꧀ꦖꦺꦪ꧀ꦪ, ꦄꦗ꧀ꦙꦴꦮꦸꦛ꧀ꦜꦚ꧀ꦕ ꦒꦺꦴꦕꦫꦴ.

ꦱꦺꦏ꧀ꦑꦴ ꦮꦕ꧀ꦕꦴ ꦥꦴꦤꦷ ꦥꦫꦶ, ꦏꦠ꧀ꦠꦫꦁ ꦏꦠꦶꦏꦁ ꦠꦠꦺꦴ;

ꦏꦴꦭꦁ ꦩꦸꦲꦸꦠ꧀ꦠꦁ ꦈꦏ꧀ꦭꦴꦥꦺꦴ, ꦨꦹꦩꦠ꧀ꦡꦫꦟꦁ ꦤꦷꦲꦫꦺ.

ꦥꦛꦶꦥꦴꦢꦺꦴ ꦨꦶꦱꦶꦧꦶꦧ꧀ꦧꦺꦴ, ꦩꦚ꧀ꦕꦥꦷꦜꦚ꧀ꦕ ꦩꦭ꧀ꦭꦏꦁ;

ꦄꦥꦱ꧀ꦱꦺꦤꦸꦭ꧀ꦭꦺꦴꦏꦏꦟ꧀ꦟꦴ, ꦒꦺꦫꦸꦏꦴ ꦏꦴꦭ꦳ ꦄꦏꦠꦴ.

ꦱꦔ꧀ꦏꦴꦫꦚ꧀ꦕ ꦨꦹꦩꦠ꧀ꦡꦫꦟꦁ, ꦥꦛꦶꦥꦴꦢꦏꦁ ꦩꦚ꧀ꦕꦥꦷꦜꦁ;

ꦨꦶꦱꦶ ꦤꦶꦱꦷꦢꦤꦩ꧀ꦥꦶ, ꦩꦭ꧀ꦭꦏꦁ ꦄꦥꦱ꧀ꦱꦺꦤ ꦕ.

ꦥꦠ꧀ꦠꦕꦷꦮꦫꦁ ꦨꦹꦩꦶ ꦕ, ꦥꦴꦫꦤ꧀ꦠꦁ ꦎꦫꦠꦺꦴ ꦨꦺꦴꦒꦁ;

ꦥꦸꦫꦠ꧀ꦡꦶꦩꦴ ꦥꦕ꧀ꦖꦶꦩꦴ ꦕ, ꦈꦠ꧀ꦠꦫꦴ ꦄꦡ ꦢꦏ꧀ꦑꦶꦟꦴ.

ꦱꦷꦠꦸꦟ꧀ꦲꦺ ꦕ ꦢꦶꦮꦴꦫꦠ꧀ꦠꦶꦁ, ꦥꦫꦶꦮꦺꦟꦚ꧀ꦕ ꦏꦺꦴꦛ꧀ꦜꦏꦺꦴ;

ꦈꦥꦛ꧀ꦜꦴꦤꦒ꧀ꦒꦶ ꦱꦴꦭꦴ ꦕ, ꦮꦠ꧀ꦠꦁ ꦮꦕ꧀ꦕꦏꦸꦛꦷꦱꦸ ꦕ.

ꦥꦴꦤꦷ ꦥꦫꦶꦨꦺꦴꦗꦤꦶꦪꦴ, ꦏꦸꦩ꧀ꦨꦶ ꦄꦴꦕꦩꦤꦺꦱꦸ ꦕ;

ꦄꦤꦺꦴꦥꦩꦺꦤ ꦥꦚ꧀ꦚꦠ꧀ꦠꦁ, ꦮꦠ꧀ꦠꦁ ꦄꦴꦒꦤ꧀ꦠꦸꦏꦺꦲꦶꦩꦺ [ꦮꦺ (ꦏ. ꦌꦮꦩꦸꦥꦫꦶꦥꦶ)].

ꦤꦺꦮꦴꦱꦤꦁ ꦤ ꦈꦢꦏꦁ, ꦤ ꦥꦕ꧀ꦕꦸ ꦤ ꦕ ꦥꦴꦤꦶꦪꦁ;

ꦤꦴꦨꦶꦮꦴꦢꦺ ꦤꦥꦚ꧀ꦚꦥꦺ, ꦈꦗ꧀ꦙꦴꦪꦤ꧀ꦠꦶ ꦕ ꦥꦺꦱꦭꦴ.

ꦮꦸꦝ꧀ꦞꦴꦱꦤꦚ꧀ꦕ ꦈꦢꦏꦁ, ꦥꦕ꧀ꦕꦸꦒ꧀ꦒꦤ꧀ꦠ꧀ꦮꦴ ꦕ ꦥꦴꦤꦶꦪꦁ;

ꦈꦥꦴꦲꦤꦺ ꦌꦏꦩꦤ꧀ꦠꦁ, ꦄꦨꦶꦮꦴꦢꦺ ꦕ ꦥꦚ꧀ꦚꦥꦺ.