꧑꧑. ꦥꦚ꧀ꦕꦱꦠꦶꦏꦏ꧀ꦑꦤ꧀ꦣꦏꦁ

꧑. ꦱꦔ꧀ꦒꦷꦠꦶꦤꦶꦢꦴꦤꦁ

꧔꧓꧗. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦱ꧀ꦱꦥꦺꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦌꦏꦩꦶꦢꦴꦲꦁ, ꦄꦴꦮꦸꦱꦺꦴ, ꦱꦩꦪꦁ ꦥꦴꦮꦴꦪ ꦏꦸꦱꦶꦤꦴꦫꦁ ꦄꦢ꧀ꦣꦴꦤꦩꦒ꧀ꦒꦥ꧀ꦥꦛꦶꦥꦤ꧀ꦤꦺꦴ ꦩꦲꦠꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦁ ꦥꦚ꧀ꦕꦩꦠ꧀ꦠꦺꦲꦶ ꦨꦶꦏ꧀ꦑꦸꦱꦠꦺꦲꦶ. ꦄꦡ ꦑ꧀ꦮꦴꦲꦁ, ꦄꦴꦮꦸꦱꦺꦴ, ꦩꦒ꧀ꦒꦴ ꦎꦏ꧀ꦏꦩ꧀ꦩ ꦄꦚ꧀ꦚꦠꦫꦱ꧀ꦩꦶꦁ ꦫꦸꦏ꧀ꦑꦩꦹꦭꦺ ꦤꦶꦱꦷꦢꦶꦁ.

[ꦢꦷ. ꦤꦶ. ꧒.꧒꧓꧑] ‘‘ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦚ꧀ꦚꦠꦫꦺꦴ ꦄꦴꦗꦷꦮꦏꦺꦴ ꦏꦸꦱꦶꦤꦴꦫꦴꦪ ꦩꦤ꧀ꦢꦴꦫꦮꦥꦸꦥ꧀ꦦꦁ ꦒꦲꦺꦠ꧀ꦮꦴ ꦥꦴꦮꦁ ꦄꦢ꧀ꦣꦴꦤꦩꦒ꧀ꦒꦥ꧀ꦥꦛꦶꦥꦤ꧀ꦤꦺꦴ ꦲꦺꦴꦠꦶ. ꦄꦢ꧀ꦢꦱꦁ ꦑꦺꦴ ꦄꦲꦁ, ꦄꦴꦮꦸꦱꦺꦴ, ꦠꦁ ꦄꦴꦗꦷꦮꦏꦁ ꦢꦹꦫꦠꦺꦴꦮ ꦄꦴꦒꦕ꧀ꦖꦤ꧀ꦠꦁ. ꦢꦶꦱ꧀ꦮꦴꦤ ꦠꦁ ꦄꦴꦗꦷꦮꦏꦁ ꦌꦠꦢꦮꦺꦴꦕꦁ – ‘ꦄꦥꦴꦮꦸꦱꦺꦴ, ꦄꦩ꧀ꦲꦴꦏꦁ ꦱꦠ꧀ꦡꦴꦫꦁ ꦗꦴꦤꦴꦱꦷ’ꦠꦶ? ‘ꦄꦴꦩꦴꦮꦸꦱꦺꦴ, ꦗꦴꦤꦴꦩꦶ. ꦄꦗ꧀ꦗ ꦱꦠ꧀ꦠꦴꦲꦥꦫꦶꦤꦶꦧ꧀ꦧꦸꦠꦺꦴ ꦱꦩꦟꦺꦴ ꦒꦺꦴꦠꦩꦺꦴ. ꦠꦠꦺꦴ ꦩꦺ ꦆꦢꦁ ꦩꦤ꧀ꦢꦴꦫꦮꦥꦸꦥ꧀ꦦꦁ ꦒꦲꦶꦠ’ꦤ꧀ꦠꦶ. ꦠꦠ꧀ꦫꦴꦮꦸꦱꦺꦴ, ꦪꦺ ꦠꦺ ꦨꦶꦏ꧀ꦑꦹ ꦄꦮꦷꦠꦫꦴꦒꦴ ꦄꦥ꧀ꦥꦺꦏꦕ꧀ꦕꦺ ꦧꦴꦲꦴ ꦥꦒ꧀ꦒꦪ꧀ꦲ ꦏꦤ꧀ꦢꦤ꧀ꦠꦶ, ꦖꦶꦤ꧀ꦤꦥꦴꦠꦁ ꦥꦥꦠꦤ꧀ꦠꦶ, ꦄꦴꦮꦛ꧀ꦛꦤ꧀ꦠꦶ, ꦮꦶꦮꦛ꧀ꦛꦤ꧀ꦠꦶ – ꦄꦠꦶꦑꦶꦥ꧀ꦥꦁ ꦨꦒꦮꦴ ꦥꦫꦶꦤꦶꦧ꧀ꦧꦸꦠꦺꦴ, ꦄꦠꦶꦑꦶꦥ꧀ꦥꦁ ꦱꦸꦒꦠꦺꦴ ꦥꦫꦶꦤꦶꦧ꧀ꦧꦸꦠꦺꦴ, ꦄꦠꦶꦑꦶꦥ꧀ꦥꦁ ꦕꦏ꧀ꦑꦸꦁ ꦭꦺꦴꦏꦺ ꦄꦤ꧀ꦠꦫꦲꦶꦠꦤ꧀ꦠꦶ. ꦪꦺ ꦥꦤ ꦠꦺ ꦨꦶꦏ꧀ꦑꦹ ꦮꦷꦠꦫꦴꦒꦴ ꦠꦺ ꦱꦠꦴ ꦱꦩ꧀ꦥꦗꦴꦤꦴ ꦄꦣꦶꦮꦴꦱꦺꦤ꧀ꦠꦶ – ꦄꦤꦶꦕ꧀ꦕꦴ ꦱꦔ꧀ꦑꦴꦫꦴ, ꦠꦁ ꦏꦸꦠꦺꦠ꧀ꦡ ꦭꦧ꧀ꦨꦴꦠꦶ.

‘‘ꦄꦡ ꦑ꧀ꦮꦴꦲꦁ, ꦄꦴꦮꦸꦱꦺꦴ, ꦠꦺ ꦨꦶꦏ꧀ꦑꦹ ꦌꦠꦢꦮꦺꦴꦕꦁ – ‘ꦄꦭꦁ, ꦄꦴꦮꦸꦱꦺꦴ, ꦩꦴ ꦱꦺꦴꦕꦶꦠ꧀ꦡ; ꦩꦴ ꦥꦫꦶꦢꦺꦮꦶꦠ꧀ꦡ. ꦤꦤ꧀ꦮꦺꦠꦁ, ꦄꦴꦮꦸꦱꦺꦴ, ꦨꦒꦮꦠꦴ ꦥꦛꦶꦏꦕ꧀ꦕꦺꦮ ꦄꦏ꧀ꦑꦴꦠꦁ – ꦱꦧ꧀ꦧꦺꦲꦺꦮ ꦥꦶꦪꦺꦲꦶ ꦩꦤꦴꦥꦺꦲꦶ ꦤꦴꦤꦴꦨꦴꦮꦺꦴ ꦮꦶꦤꦴꦨꦴꦮꦺꦴ ꦄꦚ꧀ꦚꦡꦴꦨꦴꦮꦺꦴ. ꦠꦁ ꦏꦸꦠꦺꦠ꧀ꦡ ꦄꦴꦮꦸꦱꦺꦴ ꦭꦧ꧀ꦨꦴ, ꦪꦁ ꦠꦁ ꦗꦴꦠꦁ ꦨꦹꦠꦁ ꦱꦔ꧀ꦑꦠꦁ ꦥꦭꦺꦴꦏꦣꦩ꧀ꦩꦁ, ꦠꦁ ꦮꦠ ꦩꦴ ꦥꦭꦸꦗ꧀ꦗꦷꦠꦶ – ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦷ’ꦠꦶ.

‘‘ꦠꦺꦤ ꦑꦺꦴ ꦥꦤꦴꦮꦸꦱꦺꦴ, ꦱꦩꦪꦺꦤ ꦱꦸꦨꦢ꧀ꦢꦺꦴ ꦤꦴꦩ ꦮꦸꦝ꧀ꦞꦥꦧ꧀ꦧꦗꦶꦠꦺꦴ ꦠꦱ꧀ꦱꦁ ꦥꦫꦶꦱꦴꦪꦁ ꦤꦶꦱꦶꦤ꧀ꦤꦺꦴ ꦲꦺꦴꦠꦶ. ꦄꦡ ꦑꦺꦴ, ꦄꦴꦮꦸꦱꦺꦴ, ꦱꦸꦨꦢ꧀ꦢꦺꦴ ꦮꦸꦝ꧀ꦞꦥꦧ꧀ꦧꦗꦶꦠꦺꦴ ꦠꦺ ꦨꦶꦏ꧀ꦑꦹ ꦌꦠꦢꦮꦺꦴꦕ – ‘ꦄꦭꦁ, ꦄꦴꦮꦸꦱꦺꦴ, ꦩꦴ ꦱꦺꦴꦕꦶꦠ꧀ꦡ; ꦩꦴ ꦥꦫꦶꦢꦺꦮꦶꦠ꧀ꦡ. ꦱꦸꦩꦸꦠ꧀ꦠꦴ ꦩꦪꦁ ꦠꦺꦤ ꦩꦲꦴꦱꦩꦟꦺꦤ; ꦈꦥꦢ꧀ꦢꦸꦠꦴ ꦕ ꦩꦪꦁ ꦲꦺꦴꦩ – ꦆꦢꦁ ꦮꦺꦴ ꦏꦥ꧀ꦥꦠꦶ, ꦆꦢꦁ ꦮꦺꦴ ꦤ ꦏꦥ꧀ꦥꦠꦷꦠꦶ. ꦆꦢꦴꦤꦶ ꦥꦤ ꦩꦪꦁ ꦪꦁ ꦆꦕ꧀ꦖꦶꦱ꧀ꦱꦴꦩ ꦠꦁ ꦏꦫꦶꦱ꧀ꦱꦴꦩ, ꦪꦁ ꦤ ꦆꦕ꧀ꦖꦶꦱ꧀ꦱꦴꦩ ꦤ ꦠꦁ ꦏꦫꦶꦱ꧀ꦱꦴꦩꦴ’ꦠꦶ. ꦲꦤ꧀ꦢ ꦩꦪꦁ, ꦄꦴꦮꦸꦱꦺꦴ, ꦣꦩ꧀ꦩꦚ꧀ꦕ ꦮꦶꦤꦪꦚ꧀ꦕ ꦱꦔ꧀ꦒꦴꦪꦴꦩ. ꦥꦸꦫꦺ ꦄꦣꦩ꧀ꦩꦺꦴ ꦢꦶꦥ꧀ꦥꦠꦶ [ꦢꦶꦧ꧀ꦧꦠꦶ (ꦏ.)], ꦣꦩ꧀ꦩꦺꦴ ꦥꦛꦶꦧꦴꦲꦶꦪ꧀ꦪꦠꦶ; ꦥꦸꦫꦺ ꦄꦮꦶꦤꦪꦺꦴ ꦢꦶꦥ꧀ꦥꦠꦶ ꦮꦶꦤꦪꦺꦴ ꦥꦛꦶꦧꦴꦲꦶꦪ꧀ꦪꦠꦶ; ꦥꦸꦫꦺ ꦄꦣꦩ꧀ꦩꦮꦴꦢꦶꦤꦺꦴ ꦧꦭꦮꦤ꧀ꦠꦺꦴ ꦲꦺꦴꦤ꧀ꦠꦶ, ꦣꦩ꧀ꦩꦮꦴꦢꦶꦤꦺꦴ ꦢꦸꦧ꧀ꦧꦭꦴ ꦲꦺꦴꦤ꧀ꦠꦶ; ꦥꦸꦫꦺ ꦄꦮꦶꦤꦪꦮꦴꦢꦶꦤꦺꦴ ꦧꦭꦮꦤ꧀ꦠꦺꦴ ꦲꦺꦴꦤ꧀ꦠꦶ, ꦮꦶꦤꦪꦮꦴꦢꦶꦤꦺꦴ ꦢꦸꦧ꧀ꦧꦭꦴ ꦲꦺꦴꦤ꧀ꦠꦷ’’ꦠꦶ.

‘‘ꦠꦺꦤ ꦲꦶ, ꦨꦤ꧀ꦠꦺ, ꦡꦺꦫꦺꦴ ꦨꦶꦏ꧀ꦑꦹ ꦈꦕ꧀ꦕꦶꦤꦠꦹ’’ꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦱ꧀ꦱꦥꦺꦴ ꦌꦏꦺꦤꦹꦤꦥꦚ꧀ꦕꦄꦫꦲꦤ꧀ꦠꦱꦠꦴꦤꦶ ꦈꦕ꧀ꦕꦶꦤꦶ. ꦨꦶꦏ꧀ꦑꦹ ꦄꦴꦪꦱ꧀ꦩꦤ꧀ꦠꦁ ꦩꦲꦴꦏꦱ꧀ꦱꦥꦁ ꦌꦠꦢꦮꦺꦴꦕꦸꦁ – ‘‘ꦄꦪꦁ, ꦨꦤ꧀ꦠꦺ, ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦏꦶꦚ꧀ꦕꦴꦥꦶ ꦱꦺꦏ꧀ꦑꦺꦴ, ꦄꦨꦧ꧀ꦧꦺꦴ ꦖꦤ꧀ꦢꦴ ꦢꦺꦴꦱꦴ ꦩꦺꦴꦲꦴ ꦨꦪꦴ ꦄꦒꦠꦶꦁ ꦒꦤ꧀ꦠꦸꦁ. ꦧꦲꦸ ꦕ ꦄꦤꦺꦤ ꦨꦒꦮꦠꦺꦴ ꦱꦤ꧀ꦠꦶꦏꦺ ꦣꦩ꧀ꦩꦺꦴ ꦕ ꦮꦶꦤꦪꦺꦴ ꦕ ꦥꦫꦶꦪꦠ꧀ꦠꦺꦴ. ꦠꦺꦤ ꦲꦶ, ꦨꦤ꧀ꦠꦺ, ꦡꦺꦫꦺꦴ ꦄꦴꦪꦱ꧀ꦩꦤ꧀ꦠꦩ꧀ꦥꦶ ꦄꦴꦤꦤ꧀ꦢꦁ ꦈꦕ꧀ꦕꦶꦤꦠꦹ’’ꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦱ꧀ꦱꦥꦺꦴ ꦄꦴꦪꦱ꧀ꦩꦤ꧀ꦠꦩ꧀ꦥꦶ ꦄꦴꦤꦤ꧀ꦢꦁ ꦈꦕ꧀ꦕꦶꦤꦶ.

ꦄꦡ ꦑꦺꦴ ꦡꦺꦫꦴꦤꦁ ꦨꦶꦏ꧀ꦑꦹꦤꦁ ꦌꦠꦢꦲꦺꦴꦱꦶ – ‘‘ꦏꦠ꧀ꦡ ꦤꦸ ꦑꦺꦴ ꦩꦪꦁ ꦣꦩ꧀ꦩꦚ꧀ꦕ ꦮꦶꦤꦪꦚ꧀ꦕ ꦱꦔ꧀ꦒꦴꦪꦺꦪ꧀ꦪꦴꦩꦴ’’ꦠꦶ? ꦄꦡ ꦑꦺꦴ ꦡꦺꦫꦴꦤꦁ ꦨꦶꦏ꧀ꦑꦹꦤꦁ ꦌꦠꦢꦲꦺꦴꦱꦶ – ‘‘ꦫꦴꦗꦒꦲꦁ ꦑꦺꦴ ꦩꦲꦴꦒꦺꦴꦕꦫꦁ ꦥꦲꦹꦠꦱꦺꦤꦴꦱꦤꦁ, ꦪꦁꦤꦹꦤ ꦩꦪꦁ ꦫꦴꦗꦒꦲꦺ ꦮꦱ꧀ꦱꦁ ꦮꦱꦤ꧀ꦠꦴ ꦣꦩ꧀ꦩꦚ꧀ꦕ ꦮꦶꦤꦪꦚ꧀ꦕ ꦱꦔ꧀ꦒꦴꦪꦺꦪ꧀ꦪꦴꦩ. ꦤ ꦄꦚ꧀ꦚꦺ ꦨꦶꦏ꧀ꦑꦹ ꦫꦴꦗꦒꦲꦺ ꦮꦱ꧀ꦱꦁ ꦈꦥꦒꦕ꧀ꦖꦺꦪ꧀ꦪꦸ’’ꦤ꧀ꦠꦶ.

ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦱ꧀ꦱꦥꦺꦴ ꦱꦔ꧀ꦓꦁ ꦚꦴꦥꦺꦱꦶ –

꧔꧓꧘. ‘‘ꦱꦸꦟꦴꦠꦸ ꦩꦺ, ꦄꦴꦮꦸꦱꦺꦴ, ꦱꦔ꧀ꦓꦺꦴ. ꦪꦢꦶ ꦱꦔ꧀ꦓꦱ꧀ꦱ ꦥꦠ꧀ꦠꦏꦭ꧀ꦭꦁ, ꦱꦔ꧀ꦓꦺꦴ ꦆꦩꦴꦤꦶ ꦥꦚ꧀ꦕ ꦨꦶꦏ꧀ꦑꦸꦱꦠꦴꦤꦶ ꦱꦩ꧀ꦩꦤ꧀ꦤꦺꦪ꧀ꦪ – ꦫꦴꦗꦒꦲꦺ ꦮꦱ꧀ꦱꦁ ꦮꦱꦤ꧀ꦠꦴꦤꦶ ꦣꦩ꧀ꦩꦚ꧀ꦕ ꦮꦶꦤꦪꦚ꧀ꦕ ꦱꦔ꧀ꦒꦴꦪꦶꦠꦸꦁ, ꦤ ꦄꦚ꧀ꦚꦺꦲꦶ ꦨꦶꦏ꧀ꦑꦹꦲꦶ ꦫꦴꦗꦒꦲꦺ ꦮꦱ꧀ꦱꦁ ꦮꦱꦶꦠꦧ꧀ꦧꦤ꧀ꦠꦶ. ꦌꦱꦴ ꦚꦠ꧀ꦠꦶ.

‘‘ꦱꦸꦟꦴꦠꦸ ꦩꦺ, ꦄꦴꦮꦸꦱꦺꦴ, ꦱꦔ꧀ꦓꦺꦴ. ꦆꦩꦴꦤꦶ ꦥꦚ꧀ꦕ ꦨꦶꦏ꧀ꦑꦸꦱꦠꦴꦤꦶ ꦱꦩ꧀ꦩꦤ꧀ꦤꦠꦶ – ꦫꦴꦗꦒꦲꦺ ꦮꦱ꧀ꦱꦁ ꦮꦱꦤ꧀ꦠꦴꦤꦶ ꦣꦩ꧀ꦩꦚ꧀ꦕ ꦮꦶꦤꦪꦚ꧀ꦕ ꦱꦔ꧀ꦒꦴꦪꦶꦠꦸꦁ, ꦤ ꦄꦚ꧀ꦚꦺꦲꦶ ꦨꦶꦏ꧀ꦑꦹꦲꦶ ꦫꦴꦗꦒꦲꦺ ꦮꦱ꧀ꦱꦁ ꦮꦱꦶꦠꦧ꧀ꦧꦤ꧀ꦠꦶ. ꦪꦱ꧀ꦱꦴꦪꦱ꧀ꦩꦠꦺꦴ ꦑꦩꦠꦶ ꦆꦩꦺꦱꦁ ꦥꦚ꧀ꦕꦤ꧀ꦤꦁ ꦨꦶꦏ꧀ꦑꦸꦱꦠꦴꦤꦁ ꦱꦩ꧀ꦩꦸꦠꦶ – ꦫꦴꦗꦒꦲꦺ ꦮꦱ꧀ꦱꦁ ꦮꦱꦤ꧀ꦠꦴꦤꦁ ꦣꦩ꧀ꦩꦚ꧀ꦕ ꦮꦶꦤꦪꦚ꧀ꦕ ꦱꦔ꧀ꦒꦴꦪꦶꦠꦸꦁ, ꦤ ꦄꦚ꧀ꦚꦺꦲꦶ ꦨꦶꦏ꧀ꦑꦹꦲꦶ ꦫꦴꦗꦒꦲꦺ ꦮꦱ꧀ꦱꦁ ꦮꦱꦶꦠꦧ꧀ꦧꦤ꧀ꦠꦶ – ꦱꦺꦴ ꦠꦸꦟ꧀ꦲꦱ꧀ꦱ; ꦪꦱ꧀ꦱ ꦤꦏ꧀ꦑꦩꦠꦶ, ꦱꦺꦴ ꦨꦴꦱꦺꦪ꧀ꦪ.

‘‘ꦱꦩ꧀ꦩꦠꦴꦤꦶ ꦱꦔ꧀ꦓꦺꦤ ꦆꦩꦴꦤꦶ ꦥꦚ꧀ꦕ ꦨꦶꦏ꧀ꦑꦸꦱꦠꦴꦤꦶ ꦫꦴꦗꦒꦲꦺ ꦮꦱ꧀ꦱꦁ ꦮꦱꦤ꧀ꦠꦴꦤꦶ ꦣꦩ꧀ꦩꦚ꧀ꦕ ꦮꦶꦤꦪꦚ꧀ꦕ ꦱꦔ꧀ꦒꦴꦪꦶꦠꦸꦁ, ꦤ ꦄꦚ꧀ꦚꦺꦲꦶ ꦨꦶꦏ꧀ꦑꦹꦲꦶ ꦫꦴꦗꦒꦲꦺ ꦮꦱ꧀ꦱꦁ ꦮꦱꦶꦠꦧ꧀ꦧꦤ꧀ꦠꦶ. ꦑꦩꦠꦶ ꦱꦔ꧀ꦓꦱ꧀ꦱ, ꦠꦱ꧀ꦩꦴ ꦠꦸꦟ꧀ꦲꦷ, ꦌꦮꦩꦺꦠꦁ ꦣꦴꦫꦪꦴꦩꦷ’’ꦠꦶ.

ꦄꦡ ꦑꦺꦴ ꦡꦺꦫꦴ ꦨꦶꦏ꧀ꦑꦹ ꦫꦴꦗꦒꦲꦁ ꦄꦒꦩꦁꦱꦸ ꦣꦩ꧀ꦩꦚ꧀ꦕ ꦮꦶꦤꦪꦚ꧀ꦕ ꦱꦔ꧀ꦒꦴꦪꦶꦠꦸꦁ. ꦄꦡ ꦑꦺꦴ ꦡꦺꦫꦴꦤꦁ ꦨꦶꦏ꧀ꦑꦹꦤꦁ ꦌꦠꦢꦲꦺꦴꦱꦶ – ‘‘ꦨꦒꦮꦠꦴ ꦑꦺꦴ, ꦄꦴꦮꦸꦱꦺꦴ, ꦑꦟ꧀ꦝꦦꦸꦭ꧀ꦭꦥ꧀ꦥꦛꦶꦱꦔ꧀ꦑꦫꦟꦁ ꦮꦟ꧀ꦟꦶꦠꦁ. ꦲꦤ꧀ꦢ ꦩꦪꦁ, ꦄꦴꦮꦸꦱꦺꦴ, ꦥꦜꦩꦁ ꦩꦴꦱꦁ ꦑꦟ꧀ꦝꦦꦸꦭ꧀ꦭꦁ ꦥꦛꦶꦱꦔ꧀ꦑꦫꦺꦴꦩ; ꦩꦗ꧀ꦙꦶꦩꦁ ꦩꦴꦱꦁ ꦱꦤ꧀ꦤꦶꦥꦠꦶꦠ꧀ꦮꦴ ꦣꦩ꧀ꦩꦚ꧀ꦕ ꦮꦶꦤꦪꦚ꧀ꦕ ꦱꦔ꧀ꦒꦴꦪꦶꦱ꧀ꦱꦴꦩꦴ’’ꦠꦶ.

ꦄꦡ ꦑꦺꦴ ꦡꦺꦫꦴ ꦨꦶꦏ꧀ꦑꦹ ꦥꦜꦩꦁ ꦩꦴꦱꦁ ꦑꦟ꧀ꦝꦦꦸꦭ꧀ꦭꦁ ꦥꦛꦶꦱꦔ꧀ꦑꦫꦶꦁꦱꦸ. ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ – ꦱ꧀ꦮꦺ ꦱꦤ꧀ꦤꦶꦥꦴꦠꦺꦴ [ꦱꦤ꧀ꦤꦶꦥꦴꦠꦺꦴꦠꦶ (ꦏ.)] ꦤ ꦑꦺꦴ ꦩꦺꦠꦁ ꦥꦠꦶꦫꦹꦥꦁ, ꦪꦺꦴꦲꦁ ꦱꦺꦏ꧀ꦑꦺꦴ ꦱꦩꦴꦤꦺꦴ ꦱꦤ꧀ꦤꦶꦥꦴꦠꦁ ꦒꦕ꧀ꦖꦺꦪ꧀ꦪꦤ꧀ꦠꦶ – ꦧꦲꦸꦢꦺꦮ ꦫꦠ꧀ꦠꦶꦁ ꦏꦴꦪꦒꦠꦴꦪ ꦱꦠꦶꦪꦴ ꦮꦷꦠꦶꦤꦴꦩꦺꦠ꧀ꦮꦴ ꦫꦠ꧀ꦠꦶꦪꦴ ꦥꦕ꧀ꦕꦹꦱꦱꦩꦪꦁ ‘ꦤꦶꦥꦗ꧀ꦗꦶꦱ꧀ꦱꦴꦩꦷ’ꦠꦶ ꦏꦴꦪꦁ ꦄꦴꦮꦗ꧀ꦗꦺꦱꦶ. ꦄꦥ꧀ꦥꦠ꧀ꦠꦚ꧀ꦕ ꦱꦷꦱꦁ ꦧꦶꦧ꧀ꦧꦺꦴꦲꦤꦁ, ꦨꦹꦩꦶꦠꦺꦴ ꦕ ꦥꦴꦢꦴ ꦩꦸꦠ꧀ꦠꦴ. ꦌꦠꦱ꧀ꦩꦶꦁ ꦄꦤ꧀ꦠꦫꦺ ꦄꦤꦸꦥꦴꦢꦴꦪ ꦄꦴꦱꦮꦺꦲꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦶ.

꧔꧓꧙. ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦄꦫꦲꦴ ꦱꦩꦴꦤꦺꦴ ꦱꦤ꧀ꦤꦶꦥꦴꦠꦁ ꦄꦒꦩꦴꦱꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦱ꧀ꦱꦥꦺꦴ ꦱꦔ꧀ꦓꦁ ꦚꦴꦥꦺꦱꦶ –

‘‘ꦱꦸꦟꦴꦠꦸ ꦩꦺ, ꦄꦴꦮꦸꦱꦺꦴ, ꦱꦔ꧀ꦓꦺꦴ. ꦪꦢꦶ ꦱꦔ꧀ꦓꦱ꧀ꦱ ꦥꦠ꧀ꦠꦏꦭ꧀ꦭꦁ, ꦄꦲꦁ ꦈꦥꦴꦭꦶꦁ ꦮꦶꦤꦪꦁ ꦥꦸꦕ꧀ꦖꦺꦪ꧀ꦪ’’ꦤ꧀ꦠꦶ.

ꦄꦴꦪꦱ꧀ꦩꦴ ꦈꦥꦴꦭꦶ ꦱꦔ꧀ꦓꦁ ꦚꦴꦥꦺꦱꦶ –

‘‘ꦱꦸꦟꦴꦠꦸ ꦩꦺ, ꦨꦤ꧀ꦠꦺ, ꦱꦔ꧀ꦓꦺꦴ. ꦪꦢꦶ ꦱꦔ꧀ꦓꦱ꧀ꦱ ꦥꦠ꧀ꦠꦏꦭ꧀ꦭꦁ, ꦄꦲꦁ ꦄꦴꦪꦱ꧀ꦩꦠꦴ ꦩꦲꦴꦏꦱ꧀ꦱꦥꦺꦤ ꦮꦶꦤꦪꦁ ꦥꦸꦛ꧀ꦜꦺꦴ ꦮꦶꦱ꧀ꦱꦗ꧀ꦗꦺꦪ꧀ꦪ’’ꦤ꧀ꦠꦶ.

ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦱ꧀ꦱꦥꦺꦴ ꦄꦴꦪꦱ꧀ꦩꦤ꧀ꦠꦁ ꦈꦥꦴꦭꦶꦁ ꦌꦠꦢꦮꦺꦴꦕ – ‘‘ꦥꦜꦩꦁ, ꦄꦴꦮꦸꦱꦺꦴ ꦈꦥꦴꦭꦶ, ꦥꦴꦫꦴꦗꦶꦏꦁ ꦏꦠ꧀ꦡ ꦥꦚ꧀ꦚꦠ꧀ꦠ’’ꦤ꧀ꦠꦶ? ‘‘ꦮꦺꦱꦴꦭꦶꦪꦁ ꦨꦤ꧀ꦠꦺ’’ꦠꦶ. ‘‘ꦏꦁ ꦄꦴꦫꦧ꧀ꦨꦴ’’ꦠꦶ? ‘‘ꦱꦸꦢꦶꦤ꧀ꦤꦁ ꦏꦭꦤ꧀ꦢꦥꦸꦠ꧀ꦠꦁ ꦄꦴꦫꦧ꧀ꦨꦴ’’ꦠꦶ. ‘‘ꦏꦶꦱ꧀ꦩꦶꦁ ꦮꦠ꧀ꦡꦸꦱ꧀ꦩꦶ’’ꦤ꧀ꦠꦶ? ‘‘ꦩꦺꦡꦸꦤꦣꦩ꧀ꦩꦺ’’ꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦱ꧀ꦱꦥꦺꦴ ꦄꦴꦪꦱ꧀ꦩꦤ꧀ꦠꦁ ꦈꦥꦴꦭꦶꦁ ꦥꦜꦩꦱ꧀ꦱ ꦥꦴꦫꦴꦗꦶꦏꦱ꧀ꦱ ꦮꦠ꧀ꦡꦸꦩ꧀ꦥꦶ ꦥꦸꦕ꧀ꦖꦶ, ꦤꦶꦢꦴꦤꦩ꧀ꦥꦶ ꦥꦸꦕ꧀ꦖꦶ, ꦥꦸꦒ꧀ꦒꦭꦩ꧀ꦥꦶ ꦥꦸꦕ꧀ꦖꦶ, ꦥꦚ꧀ꦚꦠ꧀ꦠꦶꦩ꧀ꦥꦶ ꦥꦸꦕ꧀ꦖꦶ, ꦄꦤꦸꦥꦚ꧀ꦚꦠ꧀ꦠꦶꦩ꧀ꦥꦶ ꦥꦸꦕ꧀ꦖꦶ, ꦄꦴꦥꦠ꧀ꦠꦶꦩ꧀ꦥꦶ ꦥꦸꦕ꧀ꦖꦶ, ꦄꦤꦴꦥꦠ꧀ꦠꦶꦩ꧀ꦥꦶ ꦥꦸꦕ꧀ꦖꦶ. ‘‘ꦢꦸꦠꦶꦪꦁ ꦥꦤꦴꦮꦸꦱꦺꦴ ꦈꦥꦴꦭꦶ, ꦥꦴꦫꦴꦗꦶꦏꦁ ꦏꦠ꧀ꦡ ꦥꦚ꧀ꦚꦠ꧀ꦠ’’ꦤ꧀ꦠꦶ? ‘‘ꦫꦴꦗꦒꦲꦺ ꦨꦤ꧀ꦠꦺ’’ꦠꦶ. ‘‘ꦏꦁ ꦄꦴꦫꦧ꧀ꦨꦴ’’ꦠꦶ? ‘‘ꦣꦤꦶꦪꦁ ꦏꦸꦩ꧀ꦨꦏꦴꦫꦥꦸꦠ꧀ꦠꦁ ꦄꦴꦫꦧ꧀ꦨꦴ’’ꦠꦶ. ‘‘ꦏꦶꦱ꧀ꦩꦶꦁ ꦮꦠ꧀ꦡꦸꦱ꧀ꦩꦶ’’ꦤ꧀ꦠꦶ? ‘‘ꦄꦢꦶꦤ꧀ꦤꦴꦢꦴꦤꦺ’’ꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦱ꧀ꦱꦥꦺꦴ ꦄꦴꦪꦱ꧀ꦩꦤ꧀ꦠꦁ ꦈꦥꦴꦭꦶꦁ ꦢꦸꦠꦶꦪꦱ꧀ꦱ ꦥꦴꦫꦴꦗꦶꦏꦱ꧀ꦱ ꦮꦠ꧀ꦡꦸꦩ꧀ꦥꦶ ꦥꦸꦕ꧀ꦖꦶ, ꦤꦶꦢꦴꦤꦩ꧀ꦥꦶ ꦥꦸꦕ꧀ꦖꦶ, ꦥꦸꦒ꧀ꦒꦭꦩ꧀ꦥꦶ ꦥꦸꦕ꧀ꦖꦶ, ꦥꦚ꧀ꦚꦠ꧀ꦠꦶꦩ꧀ꦥꦶ ꦥꦸꦕ꧀ꦖꦶ, ꦄꦤꦸꦥꦚ꧀ꦚꦠ꧀ꦠꦶꦩ꧀ꦥꦶ ꦥꦸꦕ꧀ꦖꦶ, ꦄꦴꦥꦠ꧀ꦠꦶꦩ꧀ꦥꦶ ꦥꦸꦕ꧀ꦖꦶ, ꦄꦤꦴꦥꦠ꧀ꦠꦶꦩ꧀ꦥꦶ ꦥꦸꦕ꧀ꦖꦶ. ‘‘ꦠꦠꦶꦪꦁ ꦥꦤꦴꦮꦸꦱꦺꦴ ꦈꦥꦴꦭꦶ, ꦥꦴꦫꦴꦗꦶꦏꦁ ꦏꦠ꧀ꦡ ꦥꦚ꧀ꦚꦠ꧀ꦠ’’ꦤ꧀ꦠꦶ? ‘‘ꦮꦺꦱꦴꦭꦶꦪꦁ ꦨꦤ꧀ꦠꦺ’’ꦠꦶ. ‘‘ꦏꦁ ꦄꦴꦫꦧ꧀ꦨꦴ’’ꦠꦶ? ‘‘ꦱꦩ꧀ꦧꦲꦸꦭꦺ ꦨꦶꦏ꧀ꦑꦹ ꦄꦴꦫꦧ꧀ꦨꦴ’’ꦠꦶ. ‘‘ꦏꦶꦱ꧀ꦩꦶꦁ ꦮꦠ꧀ꦡꦸꦱ꧀ꦩꦶ’’ꦤ꧀ꦠꦶ? ‘‘ꦩꦤꦸꦱ꧀ꦱꦮꦶꦒ꧀ꦒꦲꦺ’’ꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦱ꧀ꦱꦥꦺꦴ ꦄꦴꦪꦱ꧀ꦩꦤ꧀ꦠꦁ ꦈꦥꦴꦭꦶꦁ ꦠꦠꦶꦪꦱ꧀ꦱ ꦥꦴꦫꦴꦗꦶꦏꦱ꧀ꦱ ꦮꦠ꧀ꦡꦸꦩ꧀ꦥꦶ ꦥꦸꦕ꧀ꦖꦶ, ꦤꦶꦢꦴꦤꦩ꧀ꦥꦶ ꦥꦸꦕ꧀ꦖꦶ, ꦥꦸꦒ꧀ꦒꦭꦩ꧀ꦥꦶ ꦥꦸꦕ꧀ꦖꦶ, ꦥꦚ꧀ꦚꦠ꧀ꦠꦶꦩ꧀ꦥꦶ ꦥꦸꦕ꧀ꦖꦶ, ꦄꦤꦸꦥꦚ꧀ꦚꦠ꧀ꦠꦶꦩ꧀ꦥꦶ ꦥꦸꦕ꧀ꦖꦶ, ꦄꦴꦥꦠ꧀ꦠꦶꦩ꧀ꦥꦶ ꦥꦸꦕ꧀ꦖꦶ, ꦄꦤꦴꦥꦠ꧀ꦠꦶꦩ꧀ꦥꦶ ꦥꦸꦕ꧀ꦖꦶ. ‘‘ꦕꦠꦸꦠ꧀ꦡꦁ ꦥꦤꦴꦮꦸꦱꦺꦴ ꦈꦥꦴꦭꦶ, ꦥꦴꦫꦴꦗꦶꦏꦁ ꦏꦠ꧀ꦡ ꦥꦚ꧀ꦚꦠ꧀ꦠ’’ꦤ꧀ꦠꦶ? ‘‘ꦮꦺꦱꦴꦭꦶꦪꦁ ꦨꦤ꧀ꦠꦺ’’ꦠꦶ. ‘‘ꦏꦁ ꦄꦴꦫꦧ꧀ꦨꦴ’’ꦠꦶ? ‘‘ꦮꦒ꧀ꦒꦸꦩꦸꦢꦴꦠꦷꦫꦶꦪꦺ ꦨꦶꦏ꧀ꦑꦹ ꦄꦴꦫꦧ꧀ꦨꦴ’’ꦠꦶ. ‘‘ꦏꦶꦱ꧀ꦩꦶꦁ ꦮꦠ꧀ꦡꦸꦱ꧀ꦩꦶ’’ꦤ꧀ꦠꦶ? ‘‘ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦺ’’ꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦱ꧀ꦱꦥꦺꦴ ꦄꦴꦪꦱ꧀ꦩꦤ꧀ꦠꦁ ꦈꦥꦴꦭꦶꦁ ꦕꦠꦸꦠ꧀ꦡꦱ꧀ꦱ ꦥꦴꦫꦴꦗꦶꦏꦱ꧀ꦱ ꦮꦠ꧀ꦡꦸꦩ꧀ꦥꦶ ꦥꦸꦕ꧀ꦖꦶ, ꦤꦶꦢꦴꦤꦩ꧀ꦥꦶ ꦥꦸꦕ꧀ꦖꦶ, ꦥꦸꦒ꧀ꦒꦭꦩ꧀ꦥꦶ ꦥꦸꦕ꧀ꦖꦶ, ꦥꦚ꧀ꦚꦠ꧀ꦠꦶꦩ꧀ꦥꦶ ꦥꦸꦕ꧀ꦖꦶ, ꦄꦤꦸꦥꦚ꧀ꦚꦠ꧀ꦠꦶꦩ꧀ꦥꦶ ꦥꦸꦕ꧀ꦖꦶ, ꦄꦴꦥꦠ꧀ꦠꦶꦩ꧀ꦥꦶ ꦥꦸꦕ꧀ꦖꦶ, ꦄꦤꦴꦥꦠ꧀ꦠꦶꦩ꧀ꦥꦶ ꦥꦸꦕ꧀ꦖꦶ. ꦌꦠꦺꦤꦺꦮ ꦈꦥꦴꦪꦺꦤ ꦈꦨꦠꦺꦴꦮꦶꦨꦔ꧀ꦒꦺ ꦥꦸꦕ꧀ꦖꦶ. ꦥꦸꦛ꧀ꦜꦺꦴ ꦥꦸꦛ꧀ꦜꦺꦴ ꦄꦴꦪꦱ꧀ꦩꦴ ꦈꦥꦴꦭꦶ ꦮꦶꦱ꧀ꦱꦗ꧀ꦗꦺꦱꦶ.

꧔꧔꧐. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦱ꧀ꦱꦥꦺꦴ ꦱꦔ꧀ꦓꦁ ꦚꦴꦥꦺꦱꦶ –

‘‘ꦱꦸꦟꦴꦠꦸ ꦩꦺ, ꦄꦴꦮꦸꦱꦺꦴ, ꦱꦔ꧀ꦓꦺꦴ. ꦪꦢꦶ ꦱꦔ꧀ꦓꦱ꧀ꦱ ꦥꦠ꧀ꦠꦏꦭ꧀ꦭꦁ, ꦄꦲꦁ ꦄꦴꦤꦤ꧀ꦢꦁ ꦣꦩ꧀ꦩꦁ ꦥꦸꦕ꧀ꦖꦺꦪ꧀ꦪ’’ꦤ꧀ꦠꦶ.

ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦱꦔ꧀ꦓꦁ ꦚꦴꦥꦺꦱꦶ –

‘‘ꦱꦸꦟꦴꦠꦸ ꦩꦺ, ꦨꦤ꧀ꦠꦺ, ꦱꦔ꧀ꦓꦺꦴ. ꦪꦢꦶ ꦱꦔ꧀ꦓꦱ꧀ꦱ ꦥꦠ꧀ꦠꦏꦭ꧀ꦭꦁ, ꦄꦲꦁ ꦄꦴꦪꦱ꧀ꦩꦠꦴ ꦩꦲꦴꦏꦱ꧀ꦱꦥꦺꦤ ꦣꦩ꧀ꦩꦁ ꦥꦸꦛ꧀ꦜꦺꦴ ꦮꦶꦱ꧀ꦱꦗ꧀ꦗꦺꦪ꧀ꦪ’’ꦤ꧀ꦠꦶ.

ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦱ꧀ꦱꦥꦺꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦌꦠꦢꦮꦺꦴꦕ – ‘‘ꦧ꧀ꦫꦲ꧀ꦩꦗꦴꦭꦁ, ꦄꦴꦮꦸꦱꦺꦴ ꦄꦴꦤꦤ꧀ꦢ, ꦏꦠ꧀ꦡ ꦨꦴꦱꦶꦠ’’ꦤ꧀ꦠꦶ? ‘‘ꦄꦤ꧀ꦠꦫꦴ ꦕ, ꦨꦤ꧀ꦠꦺ, ꦫꦴꦗꦒꦲꦁ ꦄꦤ꧀ꦠꦫꦴ ꦕ ꦤꦴꦭ꦳ꦤ꧀ꦢꦁ ꦫꦴꦗꦴꦒꦴꦫꦏꦺ ꦄꦩ꧀ꦧꦭꦛ꧀ꦜꦶꦏꦴꦪꦴ’’ꦠꦶ. ‘‘ꦏꦁ ꦄꦴꦫꦧ꧀ꦨꦴ’’ꦠꦶ? ‘‘ꦱꦸꦥ꧀ꦥꦶꦪꦚ꧀ꦕ ꦥꦫꦶꦧ꧀ꦧꦴꦗꦏꦁ ꦧ꧀ꦫꦲ꧀ꦩꦢꦠ꧀ꦠꦚ꧀ꦕ ꦩꦴꦟꦮ’’ꦤ꧀ꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦱ꧀ꦱꦥꦺꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦧ꧀ꦫꦲ꧀ꦩꦗꦴꦭꦱ꧀ꦱ ꦤꦶꦢꦴꦤꦩ꧀ꦥꦶ ꦥꦸꦕ꧀ꦖꦶ, ꦥꦸꦒ꧀ꦒꦭꦩ꧀ꦥꦶ ꦥꦸꦕ꧀ꦖꦶ. ‘‘ꦱꦴꦩꦚ꧀ꦚꦦꦭꦁ ꦥꦤꦴꦮꦸꦱꦺꦴ ꦄꦴꦤꦤ꧀ꦢ, ꦏꦠ꧀ꦡ ꦨꦴꦱꦶꦠ’’ꦤ꧀ꦠꦶ? ‘‘ꦫꦴꦗꦒꦲꦺ, ꦨꦤ꧀ꦠꦺ, ꦗꦷꦮꦏꦩ꧀ꦧꦮꦤꦺ’’ꦠꦶ. ‘‘ꦏꦺꦤ ꦱꦢ꧀ꦣꦶ’’ꦤ꧀ꦠꦶ? ‘‘ꦄꦗꦴꦠꦱꦠ꧀ꦠꦸꦤꦴ ꦮꦺꦢꦺꦲꦶꦥꦸꦠ꧀ꦠꦺꦤ ꦱꦢ꧀ꦣꦶ’’ꦤ꧀ꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦱ꧀ꦱꦥꦺꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦱꦴꦩꦚ꧀ꦚꦦꦭꦱ꧀ꦱ ꦤꦶꦢꦴꦤꦩ꧀ꦥꦶ ꦥꦸꦕ꧀ꦖꦶ, ꦥꦸꦒ꧀ꦒꦭꦩ꧀ꦥꦶ ꦥꦸꦕ꧀ꦖꦶ. ꦌꦠꦺꦤꦺꦮ ꦈꦥꦴꦪꦺꦤ ꦥꦚ꧀ꦕꦥꦶ ꦤꦶꦏꦴꦪꦺ ꦥꦸꦕ꧀ꦖꦶ. ꦥꦸꦛ꧀ꦜꦺꦴ ꦥꦸꦛ꧀ꦜꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦮꦶꦱ꧀ꦱꦗ꧀ꦗꦺꦱꦶ.

꧒. ꦑꦸꦢ꧀ꦢꦴꦤꦸꦑꦸꦢ꧀ꦢꦏꦱꦶꦏ꧀ꦑꦴꦥꦢꦏꦡꦴ

꧔꧔꧑. ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦡꦺꦫꦺ ꦨꦶꦏ꧀ꦑꦹ ꦌꦠꦢꦮꦺꦴꦕ – ‘‘ꦨꦒꦮꦴ ꦩꦁ, ꦨꦤ꧀ꦠꦺ, ꦥꦫꦶꦤꦶꦧ꧀ꦧꦴꦤꦏꦴꦭꦺ ꦌꦮꦩꦴꦲ – ‘ꦄꦴꦏꦔ꧀ꦑꦩꦴꦤꦺꦴ, ꦄꦴꦤꦤ꧀ꦢ, ꦱꦔ꧀ꦓꦺꦴ ꦩꦩꦕ꧀ꦕꦪꦺꦤ ꦑꦸꦢ꧀ꦢꦴꦤꦸꦑꦸꦢ꧀ꦢꦏꦴꦤꦶ ꦱꦶꦏ꧀ꦑꦴꦥꦢꦴꦤꦶ ꦱꦩꦹꦲꦤꦺꦪ꧀ꦪꦴ’’’ꦠꦶ. ‘‘ꦥꦸꦕ꧀ꦖꦶ ꦥꦤ ꦠ꧀ꦮꦁ, ꦄꦴꦮꦸꦱꦺꦴ ꦄꦴꦤꦤ꧀ꦢ, ꦨꦒꦮꦤ꧀ꦠꦁ – ‘ꦏꦠꦩꦴꦤꦶ ꦥꦤ, ꦨꦤ꧀ꦠꦺ, ꦑꦸꦢ꧀ꦢꦴꦤꦸꦑꦸꦢ꧀ꦢꦏꦴꦤꦶ ꦱꦶꦏ꧀ꦑꦴꦥꦢꦴꦤꦷ’’’ꦠꦶ? ‘‘ꦤ ꦑꦺꦴꦲꦁ, ꦨꦤ꧀ꦠꦺ, ꦨꦒꦮꦤ꧀ꦠꦁ ꦥꦸꦕ꧀ꦖꦶꦁ – ‘ꦏꦠꦩꦴꦤꦶ ꦥꦤ, ꦨꦤ꧀ꦠꦺ, ꦑꦸꦢ꧀ꦢꦴꦤꦸꦑꦸꦢ꧀ꦢꦏꦴꦤꦶ ꦱꦶꦏ꧀ꦑꦴꦥꦢꦴꦤꦷ’’ꦠꦶ. ꦌꦏꦕ꧀ꦕꦺ ꦡꦺꦫꦴ ꦌꦮꦩꦴꦲꦁꦱꦸ – ‘‘ꦕꦠ꧀ꦠꦴꦫꦶ ꦥꦴꦫꦴꦗꦶꦏꦴꦤꦶ ꦜꦥꦺꦠ꧀ꦮꦴ, ꦄꦮꦱꦺꦱꦴꦤꦶ ꦑꦸꦢ꧀ꦢꦴꦤꦸꦑꦸꦢ꧀ꦢꦏꦴꦤꦶ ꦱꦶꦏ꧀ꦑꦴꦥꦢꦴꦤꦷ’’ꦠꦶ. ꦌꦏꦕ꧀ꦕꦺ ꦡꦺꦫꦴ ꦌꦮꦩꦴꦲꦁꦱꦸ – ‘‘ꦕꦠ꧀ꦠꦴꦫꦶ ꦥꦴꦫꦴꦗꦶꦏꦴꦤꦶ ꦜꦥꦺꦠ꧀ꦮꦴ, ꦠꦺꦫꦱ ꦱꦔ꧀ꦓꦴꦢꦶꦱꦺꦱꦺ ꦜꦥꦺꦠ꧀ꦮꦴ, ꦄꦮꦱꦺꦱꦴꦤꦶ ꦑꦸꦢ꧀ꦢꦴꦤꦸꦑꦸꦢ꧀ꦢꦏꦴꦤꦶ ꦱꦶꦏ꧀ꦑꦴꦥꦢꦴꦤꦷ’’ꦠꦶ. ꦌꦏꦕ꧀ꦕꦺ ꦡꦺꦫꦴ ꦌꦮꦩꦴꦲꦁꦱꦸ – ‘‘ꦕꦠ꧀ꦠꦴꦫꦶ ꦥꦴꦫꦴꦗꦶꦏꦴꦤꦶ ꦜꦥꦺꦠ꧀ꦮꦴ, ꦠꦺꦫꦱ ꦱꦔ꧀ꦓꦴꦢꦶꦱꦺꦱꦺ ꦜꦥꦺꦠ꧀ꦮꦴ, ꦢ꧀ꦮꦺ ꦄꦤꦶꦪꦠꦺ ꦜꦥꦺꦠ꧀ꦮꦴ, ꦄꦮꦱꦺꦱꦴꦤꦶ ꦑꦸꦢ꧀ꦢꦴꦤꦸꦑꦸꦢ꧀ꦢꦏꦴꦤꦶ ꦱꦶꦏ꧀ꦑꦴꦥꦢꦴꦤꦷ’’ꦠꦶ. ꦌꦏꦕ꧀ꦕꦺ ꦡꦺꦫꦴ ꦌꦮꦩꦴꦲꦁꦱꦸ – ‘‘ꦕꦠ꧀ꦠꦴꦫꦶ ꦥꦴꦫꦴꦗꦶꦏꦴꦤꦶ ꦜꦥꦺꦠ꧀ꦮꦴ, ꦠꦺꦫꦱ ꦱꦔ꧀ꦓꦴꦢꦶꦱꦺꦱꦺ ꦜꦥꦺꦠ꧀ꦮꦴ, ꦢ꧀ꦮꦺ ꦄꦤꦶꦪꦠꦺ ꦜꦥꦺꦠ꧀ꦮꦴ, ꦠꦶꦁꦱ ꦤꦶꦱ꧀ꦱꦒ꧀ꦒꦶꦪꦺ ꦥꦴꦕꦶꦠ꧀ꦠꦶꦪꦺ ꦜꦥꦺꦠ꧀ꦮꦴ, ꦄꦮꦱꦺꦱꦴꦤꦶ ꦑꦸꦢ꧀ꦢꦴꦤꦸꦑꦸꦢ꧀ꦢꦏꦴꦤꦶ ꦱꦶꦏ꧀ꦑꦴꦥꦢꦴꦤꦷ’’ꦠꦶ. ꦌꦏꦕ꧀ꦕꦺ ꦡꦺꦫꦴ ꦌꦮꦩꦴꦲꦁꦱꦸ – ‘‘ꦕꦠ꧀ꦠꦴꦫꦶ ꦥꦴꦫꦴꦗꦶꦏꦴꦤꦶ ꦜꦥꦺꦠ꧀ꦮꦴ, ꦠꦺꦫꦱ ꦱꦔ꧀ꦓꦴꦢꦶꦱꦺꦱꦺ ꦜꦥꦺꦠ꧀ꦮꦴ, ꦢ꧀ꦮꦺ ꦄꦤꦶꦪꦠꦺ ꦜꦥꦺꦠ꧀ꦮꦴ, ꦠꦶꦁꦱ ꦤꦶꦱ꧀ꦱꦒ꧀ꦒꦶꦪꦺ ꦥꦴꦕꦶꦠ꧀ꦠꦶꦪꦺ ꦜꦥꦺꦠ꧀ꦮꦴ, ꦢ꧀ꦮꦺꦤꦮꦸꦠꦶ ꦥꦴꦕꦶꦠ꧀ꦠꦶꦪꦺ ꦜꦥꦺꦠ꧀ꦮꦴ, ꦄꦮꦱꦺꦱꦴꦤꦶ ꦑꦸꦢ꧀ꦢꦴꦤꦸꦑꦸꦢ꧀ꦢꦏꦴꦤꦶ ꦱꦶꦏ꧀ꦑꦴꦥꦢꦴꦤꦷ’’ꦠꦶ. ꦌꦏꦕ꧀ꦕꦺ ꦡꦺꦫꦴ ꦌꦮꦩꦴꦲꦁꦱꦸ – ‘‘ꦕꦠ꧀ꦠꦴꦫꦶ ꦥꦴꦫꦴꦗꦶꦏꦴꦤꦶ ꦜꦥꦺꦠ꧀ꦮꦴ, ꦠꦺꦫꦱ ꦱꦔ꧀ꦓꦴꦢꦶꦱꦺꦱꦺ ꦜꦥꦺꦠ꧀ꦮꦴ, ꦢ꧀ꦮꦺ ꦄꦤꦶꦪꦠꦺ ꦜꦥꦺꦠ꧀ꦮꦴ, ꦠꦶꦁꦱ ꦤꦶꦱ꧀ꦱꦒ꧀ꦒꦶꦪꦺ ꦥꦴꦕꦶꦠ꧀ꦠꦶꦪꦺ ꦜꦥꦺꦠ꧀ꦮꦴ, ꦢ꧀ꦮꦺꦤꦮꦸꦠꦶ ꦥꦴꦕꦶꦠ꧀ꦠꦶꦪꦺ ꦜꦥꦺꦠ꧀ꦮꦴ, ꦕꦠ꧀ꦠꦴꦫꦺꦴ ꦥꦴꦛꦶꦢꦺꦱꦤꦷꦪꦺ ꦜꦥꦺꦠ꧀ꦮꦴ, ꦄꦮꦱꦺꦱꦴꦤꦶ ꦑꦸꦢ꧀ꦢꦴꦤꦸꦑꦸꦢ꧀ꦢꦏꦴꦤꦶ ꦱꦶꦏ꧀ꦑꦴꦥꦢꦴꦤꦷ’’ꦠꦶ.

꧔꧔꧒. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦱ꧀ꦱꦥꦺꦴ ꦱꦔ꧀ꦓꦁ ꦚꦴꦥꦺꦱꦶ –

‘‘ꦱꦸꦟꦴꦠꦸ ꦩꦺ, ꦄꦴꦮꦸꦱꦺꦴ, ꦱꦔ꧀ꦓꦺꦴ. ꦱꦤ꧀ꦠꦩ꧀ꦲꦴꦏꦁ ꦱꦶꦏ꧀ꦑꦴꦥꦢꦴꦤꦶ ꦒꦶꦲꦶꦒꦠꦴꦤꦶ. ꦒꦶꦲꦶꦤꦺꦴꦥꦶ ꦗꦴꦤꦤ꧀ꦠꦶ – ‘ꦆꦢꦁ ꦮꦺꦴ ꦱꦩꦟꦴꦤꦁ ꦱꦏ꧀ꦪꦥꦸꦠ꧀ꦠꦶꦪꦴꦤꦁ ꦏꦥ꧀ꦥꦠꦶ, ꦆꦢꦁ ꦮꦺꦴ ꦤ ꦏꦥ꧀ꦥꦠꦷ’ꦠꦶ. ꦱꦕꦺ ꦩꦪꦁ ꦑꦸꦢ꧀ꦢꦴꦤꦸꦑꦸꦢ꧀ꦢꦏꦴꦤꦶ ꦱꦶꦏ꧀ꦑꦴꦥꦢꦴꦤꦶ ꦱꦩꦹꦲꦤꦶꦱ꧀ꦱꦴꦩ, ꦨꦮꦶꦱ꧀ꦱꦤ꧀ꦠꦶ ꦮꦠ꧀ꦠꦴꦫꦺꦴ – ‘ꦣꦹꦩꦏꦴꦭꦶꦏꦁ ꦱꦩꦟꦺꦤ ꦒꦺꦴꦠꦩꦺꦤ ꦱꦴꦮꦏꦴꦤꦁ ꦱꦶꦏ꧀ꦑꦴꦥꦢꦁ ꦥꦚ꧀ꦚꦠ꧀ꦠꦁ. ꦪꦴꦮꦶꦩꦺꦱꦁ ꦱꦠ꧀ꦡꦴ ꦄꦛ꧀ꦜꦴꦱꦶ ꦠꦴꦮꦶꦩꦺ ꦱꦶꦏ꧀ꦑꦴꦥꦢꦺꦱꦸ ꦱꦶꦏ꧀ꦑꦶꦁꦱꦸ. ꦪꦠꦺꦴ ꦆꦩꦺꦱꦁ ꦱꦠ꧀ꦡꦴ ꦥꦫꦶꦤꦶꦧ꧀ꦧꦸꦠꦺꦴ, ꦤ ꦢꦴꦤꦶꦩꦺ ꦱꦶꦏ꧀ꦑꦴꦥꦢꦺꦱꦸ ꦱꦶꦏ꧀ꦑꦤ꧀ꦠꦷ’ꦠꦶ. ꦪꦢꦶ ꦱꦔ꧀ꦓꦱ꧀ꦱ ꦥꦠ꧀ꦠꦏꦭ꧀ꦭꦁ, ꦱꦔ꧀ꦓꦺꦴ ꦄꦥ꧀ꦥꦚ꧀ꦚꦠ꧀ꦠꦁ ꦤꦥ꧀ꦥꦚ꧀ꦚꦥꦺꦪ꧀ꦪ, ꦥꦚ꧀ꦚꦠ꧀ꦠꦁ ꦤ ꦱꦩꦸꦕ꧀ꦖꦶꦤ꧀ꦢꦺꦪ꧀ꦪ, ꦪꦡꦴꦥꦚ꧀ꦚꦠ꧀ꦠꦺꦱꦸ ꦱꦶꦏ꧀ꦑꦴꦥꦢꦺꦱꦸ ꦱꦩꦴꦢꦴꦪ ꦮꦠ꧀ꦠꦺꦪ꧀ꦪ. ꦌꦱꦴ ꦚꦠ꧀ꦠꦶ.

‘‘ꦱꦸꦟꦴꦠꦸ ꦩꦺ, ꦄꦴꦮꦸꦱꦺꦴ, ꦱꦔ꧀ꦓꦺꦴ. ꦱꦤ꧀ꦠꦩ꧀ꦲꦴꦏꦁ ꦱꦶꦏ꧀ꦑꦴꦥꦢꦴꦤꦶ ꦒꦶꦲꦶꦒꦠꦴꦤꦶ. ꦒꦶꦲꦶꦤꦺꦴꦥꦶ ꦗꦴꦤꦤ꧀ꦠꦶ – ‘ꦆꦢꦁ ꦮꦺꦴ ꦱꦩꦟꦴꦤꦁ ꦱꦏ꧀ꦪꦥꦸꦠ꧀ꦠꦶꦪꦴꦤꦁ ꦏꦥ꧀ꦥꦠꦶ, ꦆꦢꦁ ꦮꦺꦴ ꦤ ꦏꦥ꧀ꦥꦠꦷ’ꦠꦶ. ꦱꦕꦺ ꦩꦪꦁ ꦑꦸꦢ꧀ꦢꦴꦤꦸꦑꦸꦢ꧀ꦢꦏꦴꦤꦶ ꦱꦶꦏ꧀ꦑꦴꦥꦢꦴꦤꦶ ꦱꦩꦹꦲꦤꦶꦱ꧀ꦱꦴꦩ, ꦨꦮꦶꦱ꧀ꦱꦤ꧀ꦠꦶ ꦮꦠ꧀ꦠꦴꦫꦺꦴ – ‘ꦣꦹꦩꦏꦴꦭꦶꦏꦁ ꦱꦩꦟꦺꦤ ꦒꦺꦴꦠꦩꦺꦤ ꦱꦴꦮꦏꦴꦤꦁ ꦱꦶꦏ꧀ꦑꦴꦥꦢꦁ ꦥꦚ꧀ꦚꦠ꧀ꦠꦁ. ꦪꦴꦮꦶꦩꦺꦱꦁ ꦱꦠ꧀ꦡꦴ ꦄꦛ꧀ꦜꦴꦱꦶ ꦠꦴꦮꦶꦩꦺ ꦱꦶꦏ꧀ꦑꦴꦥꦢꦺꦱꦸ ꦱꦶꦏ꧀ꦑꦶꦁꦱꦸ. ꦪꦠꦺꦴ ꦆꦩꦺꦱꦁ ꦱꦠ꧀ꦡꦴ ꦥꦫꦶꦤꦶꦧ꧀ꦧꦸꦠꦺꦴ, ꦤ ꦢꦴꦤꦶꦩꦺ ꦱꦶꦏ꧀ꦑꦴꦥꦢꦺꦱꦸ ꦱꦶꦏ꧀ꦑꦤ꧀ꦠꦷ’ꦠꦶ. ꦱꦔ꧀ꦓꦺꦴ ꦄꦥ꧀ꦥꦚ꧀ꦚꦠ꧀ꦠꦁ ꦤꦥ꧀ꦥꦚ꧀ꦚꦥꦺꦠꦶ, ꦥꦚ꧀ꦚꦠ꧀ꦠꦁ ꦤ ꦱꦩꦸꦕ꧀ꦖꦶꦤ꧀ꦢꦠꦶ, ꦪꦡꦴꦥꦚ꧀ꦚꦠ꧀ꦠꦺꦱꦸ ꦱꦶꦏ꧀ꦑꦴꦥꦢꦺꦱꦸ ꦱꦩꦴꦢꦴꦪ ꦮꦠ꧀ꦠꦠꦶ. ꦪꦱ꧀ꦱꦴꦪꦱ꧀ꦩꦠꦺꦴ ꦑꦩꦠꦶ ꦄꦥ꧀ꦥꦚ꧀ꦚꦠ꧀ꦠꦱ꧀ꦱ ꦄꦥ꧀ꦥꦚ꧀ꦚꦴꦥꦤꦴ, ꦥꦚ꧀ꦚꦠ꧀ꦠꦱ꧀ꦱ ꦄꦱꦩꦸꦕ꧀ꦖꦺꦢꦺꦴ, ꦪꦡꦴꦥꦚ꧀ꦚꦠ꧀ꦠꦺꦱꦸ ꦱꦶꦏ꧀ꦑꦴꦥꦢꦺꦱꦸ ꦱꦩꦴꦢꦴꦪ ꦮꦠ꧀ꦠꦤꦴ, ꦱꦺꦴ ꦠꦸꦟ꧀ꦲꦱ꧀ꦱ; ꦪꦱ꧀ꦱ ꦤꦏ꧀ꦑꦩꦠꦶ, ꦱꦺꦴ ꦨꦴꦱꦺꦪ꧀ꦪ.

‘‘ꦱꦔ꧀ꦓꦺꦴ ꦄꦥ꧀ꦥꦚ꧀ꦚꦠ꧀ꦠꦁ ꦤꦥ꧀ꦥꦚ꧀ꦚꦥꦺꦠꦶ, ꦥꦚ꧀ꦚꦠ꧀ꦠꦁ ꦤ ꦱꦩꦸꦕ꧀ꦖꦶꦤ꧀ꦢꦠꦶ, ꦪꦡꦴꦥꦚ꧀ꦚꦠ꧀ꦠꦺꦱꦸ ꦱꦶꦏ꧀ꦑꦴꦥꦢꦺꦱꦸ ꦱꦩꦴꦢꦴꦪ ꦮꦠ꧀ꦠꦠꦶ. ꦑꦩꦠꦶ ꦱꦔ꧀ꦓꦱ꧀ꦱ, ꦠꦱ꧀ꦩꦴ ꦠꦸꦟ꧀ꦲꦷ, ꦌꦮꦩꦺꦠꦁ ꦣꦴꦫꦪꦴꦩꦷ’’ꦠꦶ.

꧔꧔꧓. ꦄꦡ ꦑꦺꦴ ꦡꦺꦫꦴ ꦨꦶꦏ꧀ꦑꦹ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦌꦠꦢꦮꦺꦴꦕꦸꦁ – ‘‘ꦆꦢꦁ ꦠꦺ, ꦄꦴꦮꦸꦱꦺꦴ ꦄꦴꦤꦤ꧀ꦢ, ꦢꦸꦏ꧀ꦏꦛꦁ, ꦪꦁ ꦠ꧀ꦮꦁ ꦨꦒꦮꦤ꧀ꦠꦁ ꦤ ꦥꦸꦕ꧀ꦖꦶ – ‘ꦏꦠꦩꦴꦤꦶ ꦥꦤ, ꦨꦤ꧀ꦠꦺ, ꦑꦸꦢ꧀ꦢꦴꦤꦸꦑꦸꦢ꧀ꦢꦏꦴꦤꦶ ꦱꦶꦏ꧀ꦑꦴꦥꦢꦴꦤꦷ’ꦠꦶ. ꦢꦺꦱꦺꦲꦶ ꦠꦁ ꦢꦸꦏ꧀ꦏꦛ’’ꦤ꧀ꦠꦶ. ‘‘ꦄꦲꦁ ꦑꦺꦴ, ꦨꦤ꧀ꦠꦺ, ꦄꦱ꧀ꦱꦠꦶꦪꦴ ꦨꦒꦮꦤ꧀ꦠꦁ ꦤ ꦥꦸꦕ꧀ꦖꦶꦁ – ‘ꦏꦠꦩꦴꦤꦶ ꦥꦤ, ꦨꦤ꧀ꦠꦺ, ꦑꦸꦢ꧀ꦢꦴꦤꦸꦑꦸꦢ꧀ꦢꦏꦴꦤꦶ ꦱꦶꦏ꧀ꦑꦴꦥꦢꦴꦤꦷ’ꦠꦶ. ꦤꦴꦲꦁ ꦠꦁ ꦢꦸꦏ꧀ꦏꦛꦁ ꦥꦱ꧀ꦱꦴꦩꦶ, ꦄꦥꦶ ꦕꦴꦪꦱ꧀ꦩꦤ꧀ꦠꦴꦤꦁ ꦱꦢ꧀ꦣꦴꦪ ꦢꦺꦱꦺꦩꦶ ꦠꦁ ꦢꦸꦏ꧀ꦏꦛ’’ꦤ꧀ꦠꦶ. ‘‘ꦆꦢꦩ꧀ꦥꦶ ꦠꦺ, ꦄꦴꦮꦸꦱꦺꦴ ꦄꦴꦤꦤ꧀ꦢ, ꦢꦸꦏ꧀ꦏꦛꦁ, ꦪꦁ ꦠ꧀ꦮꦁ ꦨꦒꦮꦠꦺꦴ ꦮꦱ꧀ꦱꦶꦏꦱꦴꦛꦶꦏꦁ ꦄꦏ꧀ꦏꦩꦶꦠ꧀ꦮꦴ ꦱꦶꦧ꧀ꦧꦺꦱꦶ. ꦢꦺꦱꦺꦲꦶ ꦠꦁ ꦢꦸꦏ꧀ꦏꦛ’’ꦤ꧀ꦠꦶ. ‘‘ꦄꦲꦁ ꦑꦺꦴ, ꦨꦤ꧀ꦠꦺ, ꦤ ꦄꦒꦴꦫꦮꦺꦤ ꦨꦒꦮꦠꦺꦴ ꦮꦱ꧀ꦱꦶꦏꦱꦴꦛꦶꦏꦁ ꦄꦏ꧀ꦏꦩꦶꦠ꧀ꦮꦴ ꦱꦶꦧ꧀ꦧꦺꦱꦶꦁ. ꦤꦴꦲꦁ ꦠꦁ ꦢꦸꦏ꧀ꦏꦛꦁ ꦥꦱ꧀ꦱꦴꦩꦶ, ꦄꦥꦶ ꦕꦴꦪꦱ꧀ꦩꦤ꧀ꦠꦴꦤꦁ ꦱꦢ꧀ꦣꦴꦪ ꦢꦺꦱꦺꦩꦶ ꦠꦁ ꦢꦸꦏ꧀ꦏꦛ’’ꦤ꧀ꦠꦶ. ‘‘ꦆꦢꦩ꧀ꦥꦶ ꦠꦺ, ꦄꦴꦮꦸꦱꦺꦴ ꦄꦴꦤꦤ꧀ꦢ, ꦢꦸꦏ꧀ꦏꦛꦁ, ꦪꦁ ꦠ꧀ꦮꦁ ꦩꦴꦠꦸꦒꦴꦩꦺꦲꦶ ꦨꦒꦮꦠꦺꦴ ꦱꦫꦷꦫꦁ ꦥꦜꦩꦁ ꦮꦤ꧀ꦢꦴꦥꦺꦱꦶ, ꦠꦴꦱꦁ ꦫꦺꦴꦢꦤ꧀ꦠꦷꦤꦁ ꦨꦒꦮꦠꦺꦴ ꦱꦫꦷꦫꦁ ꦄꦱ꧀ꦱꦸꦏꦺꦤ ꦩꦏ꧀ꦑꦶꦠꦁ. ꦢꦺꦱꦺꦲꦶ ꦠꦁ ꦢꦸꦏ꧀ꦏꦛ’’ꦤ꧀ꦠꦶ. ꦄꦲꦁ ꦑꦺꦴ, ꦨꦤ꧀ꦠꦺ – ꦩꦴꦪꦶꦩꦴꦱꦁ [ꦩꦴꦪꦶꦩꦴ (ꦱꦷ. ꦱ꧀ꦪꦴ.)] ꦮꦶꦏꦴꦭꦺ ꦄꦲꦺꦱꦸꦤ꧀ꦠꦶ – ꦩꦴꦠꦸꦒꦴꦩꦺꦲꦶ ꦨꦒꦮꦠꦺꦴ ꦱꦫꦷꦫꦁ ꦥꦜꦩꦁ ꦮꦤ꧀ꦢꦴꦥꦺꦱꦶꦁ. ꦤꦴꦲꦁ ꦠꦁ ꦢꦸꦏ꧀ꦏꦛꦁ ꦥꦱ꧀ꦱꦴꦩꦶ, ꦄꦥꦶ ꦕꦴꦪꦱ꧀ꦩꦤ꧀ꦠꦴꦤꦁ ꦱꦢ꧀ꦣꦴꦪ ꦢꦺꦱꦺꦩꦶ ꦠꦁ ꦢꦸꦏ꧀ꦏꦛ’’ꦤ꧀ꦠꦶ. ‘‘ꦆꦢꦩ꧀ꦥꦶ ꦠꦺ, ꦄꦴꦮꦸꦱꦺꦴ ꦄꦴꦤꦤ꧀ꦢ, ꦢꦸꦏ꧀ꦏꦛꦁ, ꦪꦁ ꦠ꧀ꦮꦁ ꦨꦒꦮꦠꦴ ꦎꦭ꦳ꦴꦫꦶꦏꦺ ꦤꦶꦩꦶꦠ꧀ꦠꦺ ꦏꦪꦶꦫꦩꦴꦤꦺ, ꦎꦭ꦳ꦴꦫꦶꦏꦺ ꦎꦨꦴꦱꦺ ꦏꦪꦶꦫꦩꦴꦤꦺ, ꦤ ꦨꦒꦮꦤ꧀ꦠꦁ ꦪꦴꦕꦶ – ‘ꦠꦶꦛ꧀ꦜꦠꦸ ꦨꦒꦮꦴ ꦏꦥ꧀ꦥꦁ, ꦠꦶꦛ꧀ꦜꦠꦸ ꦱꦸꦒꦠꦺꦴ ꦏꦥ꧀ꦥꦁ, ꦧꦲꦸꦗꦤꦲꦶꦠꦴꦪ ꦧꦲꦸꦗꦤꦱꦸꦑꦴꦪ ꦭꦺꦴꦏꦴꦤꦸꦏꦩ꧀ꦥꦴꦪ ꦄꦠ꧀ꦡꦴꦪ ꦲꦶꦠꦴꦪ ꦱꦸꦑꦴꦪ ꦢꦺꦮꦩꦤꦸꦱ꧀ꦱꦴꦤ’ꦤ꧀ꦠꦶ. ꦢꦺꦱꦺꦲꦶ ꦠꦁ ꦢꦸꦏ꧀ꦏꦛ’’ꦤ꧀ꦠꦶ. ‘‘ꦄꦲꦁ ꦑꦺꦴ, ꦨꦤ꧀ꦠꦺ, ꦩꦴꦫꦺꦤ ꦥꦫꦶꦪꦸꦛ꧀ꦜꦶꦠꦕꦶꦠ꧀ꦠꦺꦴ ꦤ ꦨꦒꦮꦤ꧀ꦠꦁ ꦪꦴꦕꦶꦁ – ‘ꦠꦶꦛ꧀ꦜꦠꦸ ꦨꦒꦮꦴ ꦏꦥ꧀ꦥꦁ, ꦠꦶꦛ꧀ꦜꦠꦸ ꦱꦸꦒꦠꦺꦴ ꦏꦥ꧀ꦥꦁ, ꦧꦲꦸꦗꦤꦲꦶꦠꦴꦪ ꦧꦲꦸꦗꦤꦱꦸꦑꦴꦪ ꦭꦺꦴꦏꦴꦤꦸꦏꦩ꧀ꦥꦴꦪ ꦄꦠ꧀ꦡꦴꦪ ꦲꦶꦠꦴꦪ ꦱꦸꦑꦴꦪ ꦢꦺꦮꦩꦤꦸꦱ꧀ꦱꦴꦤ’ꦤ꧀ꦠꦶ. ꦤꦴꦲꦁ ꦠꦁ ꦢꦸꦏ꧀ꦏꦛꦁ ꦥꦱ꧀ꦱꦴꦩꦶ, ꦄꦥꦶ ꦕꦴꦪꦱ꧀ꦩꦤ꧀ꦠꦴꦤꦁ ꦱꦢ꧀ꦣꦴꦪ ꦢꦺꦱꦺꦩꦶ ꦠꦁ ꦢꦸꦏ꧀ꦏꦛ’’ꦤ꧀ꦠꦶ. ‘‘ꦆꦢꦩ꧀ꦥꦶ ꦠꦺ, ꦄꦴꦮꦸꦱꦺꦴ ꦄꦴꦤꦤ꧀ꦢ, ꦢꦸꦏ꧀ꦏꦛꦁ ꦪꦁ ꦠ꧀ꦮꦁ ꦩꦴꦠꦸꦒꦴꦩꦱ꧀ꦱ ꦠꦡꦴꦒꦠꦥ꧀ꦥꦮꦺꦢꦶꦠꦺ ꦣꦩ꧀ꦩꦮꦶꦤꦪꦺ ꦥꦧ꧀ꦧꦗ꧀ꦗꦁ ꦈꦱ꧀ꦱꦸꦏ꧀ꦏꦁ ꦄꦏꦴꦱꦶ. ꦢꦺꦱꦺꦲꦶ ꦠꦁ ꦢꦸꦏ꧀ꦏꦛ’’ꦤ꧀ꦠꦶ. ‘‘ꦄꦲꦁ ꦑꦺꦴ, ꦨꦤ꧀ꦠꦺ, ꦄꦪꦁ ꦩꦲꦴꦥꦗꦴꦥꦠꦶ ꦒꦺꦴꦠꦩꦷ ꦨꦒꦮꦠꦺꦴ ꦩꦴꦠꦸꦕ꧀ꦖꦴ ꦄꦴꦥꦴꦢꦶꦏꦴ ꦥꦺꦴꦱꦶꦏꦴ ꦑꦷꦫꦱ꧀ꦱ ꦢꦴꦪꦶꦏꦴ ꦨꦒꦮꦤ꧀ꦠꦁ ꦗꦤꦺꦠ꧀ꦠꦶꦪꦴ ꦏꦴꦭꦔ꧀ꦏꦠꦴꦪ ꦡꦚ꧀ꦚꦁ ꦥꦴꦪꦺꦱꦷꦠꦶ ꦩꦴꦠꦸꦒꦴꦩꦱ꧀ꦱ ꦠꦡꦴꦒꦠꦥ꧀ꦥꦮꦺꦢꦶꦠꦺ ꦣꦩ꧀ꦩꦮꦶꦤꦪꦺ ꦥꦧ꧀ꦧꦗ꧀ꦗꦁ ꦈꦱ꧀ꦱꦸꦏ꧀ꦏꦁ ꦄꦏꦴꦱꦶꦁ. ꦤꦴꦲꦁ ꦠꦁ ꦢꦸꦏ꧀ꦏꦛꦁ ꦥꦱ꧀ꦱꦴꦩꦶ, ꦄꦥꦶ ꦕꦴꦪꦱ꧀ꦩꦤ꧀ꦠꦴꦤꦁ ꦱꦢ꧀ꦣꦴꦪ ꦢꦺꦱꦺꦩꦶ ꦠꦁ ꦢꦸꦏ꧀ꦏꦛ’’ꦤ꧀ꦠꦶ.

꧔꧔꧔. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦪꦱ꧀ꦩꦴ ꦥꦸꦫꦴꦟꦺꦴ ꦢꦏ꧀ꦑꦶꦟꦴꦒꦶꦫꦶꦱ꧀ꦩꦶꦁ ꦕꦴꦫꦶꦏꦁ ꦕꦫꦠꦶ ꦩꦲꦠꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦁ ꦥꦚ꧀ꦕꦩꦠ꧀ꦠꦺꦲꦶ ꦨꦶꦏ꧀ꦑꦸꦱꦠꦺꦲꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦥꦸꦫꦴꦟꦺꦴ ꦡꦺꦫꦺꦲꦶ ꦨꦶꦏ꧀ꦑꦹꦲꦶ ꦣꦩ꧀ꦩꦺ ꦕ ꦮꦶꦤꦪꦺ ꦕ ꦱꦔ꧀ꦒꦷꦠꦺ ꦢꦏ꧀ꦑꦶꦟꦴꦒꦶꦫꦶꦱ꧀ꦩꦶꦁ ꦪꦡꦴꦨꦶꦫꦤ꧀ꦠꦁ ꦮꦶꦲꦫꦶꦠ꧀ꦮꦴ ꦪꦺꦤ ꦫꦴꦗꦒꦲꦁ ꦪꦺꦤ ꦮꦺꦭ꦳ꦸꦮꦤꦁ ꦏꦭꦤ꧀ꦢꦏꦤꦶꦮꦴꦥꦺꦴ ꦪꦺꦤ ꦡꦺꦫꦴ ꦨꦶꦏ꧀ꦑꦹ ꦠꦺꦤꦸꦥꦱꦔ꧀ꦏꦩꦶ, ꦈꦥꦱꦔ꧀ꦏꦩꦶꦠ꧀ꦮꦴ ꦡꦺꦫꦺꦲꦶ ꦨꦶꦏ꧀ꦑꦹꦲꦶ ꦱꦢ꧀ꦣꦶꦁ ꦥꦛꦶꦱꦩ꧀ꦩꦺꦴꦢꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦁ ꦑꦺꦴ ꦄꦴꦪꦱ꧀ꦩꦤ꧀ꦠꦁ ꦥꦸꦫꦴꦟꦁ ꦡꦺꦫꦴ ꦨꦶꦏ꧀ꦑꦹ ꦌꦠꦢꦮꦺꦴꦕꦸꦁ – ‘‘ꦡꦺꦫꦺꦲꦶ, ꦄꦴꦮꦸꦱꦺꦴ ꦥꦸꦫꦴꦟ, ꦣꦩ꧀ꦩꦺꦴ ꦕ ꦮꦶꦤꦪꦺꦴ ꦕ ꦱꦔ꧀ꦒꦷꦠꦺꦴ. ꦈꦥꦺꦲꦶ ꦠꦁ ꦱꦔ꧀ꦒꦷꦠꦶ’’ꦤ꧀ꦠꦶ. ‘‘ꦱꦸꦱꦔ꧀ꦒꦷꦠꦴꦮꦸꦱꦺꦴ, ꦡꦺꦫꦺꦲꦶ ꦣꦩ꧀ꦩꦺꦴ ꦕ ꦮꦶꦤꦪꦺꦴ ꦕ. ꦄꦥꦶꦕ ꦪꦡꦺꦮ ꦩꦪꦴ ꦨꦒꦮꦠꦺꦴ ꦱꦩ꧀ꦩꦸꦑꦴ ꦱꦸꦠꦁ, ꦱꦩ꧀ꦩꦸꦑꦴ ꦥꦛꦶꦒ꧀ꦒꦲꦶꦠꦁ, ꦠꦡꦺꦮꦴꦲꦁ ꦣꦴꦫꦺꦱ꧀ꦱꦴꦩꦷ’’ꦠꦶ.

꧓. ꦧ꧀ꦫꦲ꧀ꦩꦢꦟ꧀ꦝꦏꦡꦴ

꧔꧔꧕. ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦡꦺꦫꦺ ꦨꦶꦏ꧀ꦑꦹ ꦌꦠꦢꦮꦺꦴꦕ – ‘‘ꦨꦒꦮꦴ ꦩꦁ, ꦨꦤ꧀ꦠꦺ, ꦥꦫꦶꦤꦶꦧ꧀ꦧꦴꦤꦏꦴꦭꦺ ꦌꦮꦩꦴꦲ – ‘ꦠꦺꦤ ꦲꦴꦤꦤ꧀ꦢ, ꦱꦔ꧀ꦓꦺꦴ ꦩꦩꦕ꧀ꦕꦪꦺꦤ ꦖꦤ꧀ꦤꦱ꧀ꦱ ꦨꦶꦏ꧀ꦑꦸꦤꦺꦴ ꦧ꧀ꦫꦲ꧀ꦩꦢꦟ꧀ꦝꦁ ꦄꦴꦟꦴꦥꦺꦠꦹ’’’ꦠꦶ. ‘‘ꦥꦸꦕ꧀ꦖꦶ ꦥꦤ ꦠ꧀ꦮꦁ, ꦄꦴꦮꦸꦱꦺꦴ ꦄꦴꦤꦤ꧀ꦢ, ꦨꦒꦮꦤ꧀ꦠꦁ – ‘ꦏꦠꦩꦺꦴ ꦥꦤ, ꦨꦤ꧀ꦠꦺ, ꦧ꧀ꦫꦲ꧀ꦩꦢꦟ꧀ꦝꦺꦴ’’’ꦠꦶ? ‘‘ꦥꦸꦕ꧀ꦖꦶꦁ ꦑꦺꦴꦲꦁ, ꦨꦤ꧀ꦠꦺ, ꦨꦒꦮꦤ꧀ꦠꦁ – ‘ꦏꦠꦩꦺꦴ ꦥꦤ, ꦨꦤ꧀ꦠꦺ, ꦧ꧀ꦫꦲ꧀ꦩꦢꦟ꧀ꦝꦺꦴ’’’ꦠꦶ? ‘‘ꦖꦤ꧀ꦤꦺꦴ, ꦄꦴꦤꦤ꧀ꦢ, ꦨꦶꦏ꧀ꦑꦸ ꦪꦁ ꦆꦕ꧀ꦖꦺꦪ꧀ꦪ ꦠꦁ ꦮꦢꦺꦪ꧀ꦪ. ꦨꦶꦏ꧀ꦑꦹꦲꦶ ꦖꦤ꧀ꦤꦺꦴ ꦨꦶꦏ꧀ꦑꦸ ꦤꦺꦮ ꦮꦠ꧀ꦠꦧ꧀ꦧꦺꦴ, ꦤ ꦎꦮꦢꦶꦠꦧ꧀ꦧꦺꦴ, ꦤꦴꦤꦸꦱꦴꦱꦶꦠꦧ꧀ꦧꦺꦴ’’ꦠꦶ. ‘‘ꦠꦺꦤ ꦲꦴꦮꦸꦱꦺꦴ ꦄꦴꦤꦤ꧀ꦢ, ꦠ꧀ꦮꦁꦪꦺꦮ ꦖꦤ꧀ꦤꦱ꧀ꦱ ꦨꦶꦏ꧀ꦑꦸꦤꦺꦴ ꦧ꧀ꦫꦲ꧀ꦩꦢꦟ꧀ꦝꦁ ꦄꦴꦟꦴꦥꦺꦲꦷ’’ꦠꦶ. ‘‘ꦏꦡꦴꦲꦁ, ꦨꦤ꧀ꦠꦺ, ꦖꦤ꧀ꦤꦱ꧀ꦱ ꦨꦶꦏ꧀ꦑꦸꦤꦺꦴ ꦧ꧀ꦫꦲ꧀ꦩꦢꦟ꧀ꦝꦁ ꦄꦴꦟꦴꦥꦺꦩꦶ, ꦕꦟ꧀ꦝꦺꦴ ꦱꦺꦴ ꦨꦶꦏ꧀ꦑꦸ ꦦꦫꦸꦱꦺꦴ’’ꦠꦶ? ‘ꦠꦺꦤ ꦲꦴꦮꦸꦱꦺꦴ ꦄꦴꦤꦤ꧀ꦢ, ꦧꦲꦸꦏꦺꦲꦶ ꦨꦶꦏ꧀ꦑꦹꦲꦶ ꦱꦢ꧀ꦣꦶꦁ ꦒꦕ꧀ꦖꦴꦲꦷ’’ꦠꦶ. ‘‘ꦌꦮꦁ ꦨꦤ꧀ꦠꦺ’’ꦠꦶ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦡꦺꦫꦴꦤꦁ ꦨꦶꦏ꧀ꦑꦹꦤꦁ ꦥꦛꦶꦱ꧀ꦱꦸꦠ꧀ꦮꦴ ꦩꦲꦠꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦁ ꦥꦚ꧀ꦕꦩꦠ꧀ꦠꦺꦲꦶ ꦨꦶꦏ꧀ꦑꦸꦱꦠꦺꦲꦶ ꦤꦴꦮꦴꦪ ꦈꦗ꧀ꦗꦮꦤꦶꦏꦴꦪ ꦏꦺꦴꦱꦩ꧀ꦧꦶꦁ ꦈꦗ꧀ꦗꦮꦶ, ꦤꦴꦮꦴꦪ ꦥꦕ꧀ꦕꦺꦴꦫꦺꦴꦲꦶꦠ꧀ꦮꦴ ꦫꦚ꧀ꦚꦺꦴ ꦈꦢꦺꦤꦱ꧀ꦱ [ꦈꦠꦺꦤꦱ꧀ꦱ (ꦏ.)] ꦈꦪ꧀ꦪꦴꦤꦱ꧀ꦱ ꦄꦮꦶꦢꦹꦫꦺ ꦄꦚ꧀ꦚꦠꦫꦱ꧀ꦩꦶꦁ ꦫꦸꦏ꧀ꦑꦩꦹꦭꦺ ꦤꦶꦱꦷꦢꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦫꦴꦗꦴ ꦈꦢꦺꦤꦺꦴ ꦈꦪ꧀ꦪꦴꦤꦺ ꦥꦫꦶꦕꦴꦫꦺꦱꦶ ꦱꦢ꧀ꦣꦶꦁ ꦎꦫꦺꦴꦣꦺꦤ. ꦄꦱ꧀ꦱꦺꦴꦱꦶ ꦑꦺꦴ ꦫꦚ꧀ꦚꦺꦴ ꦈꦢꦺꦤꦱ꧀ꦱ ꦎꦫꦺꦴꦣꦺꦴ – ‘‘ꦄꦩ꧀ꦲꦴꦏꦁ ꦏꦶꦫ ꦄꦴꦕꦫꦶꦪꦺꦴ ꦄꦪ꧀ꦪꦺꦴ ꦄꦴꦤꦤ꧀ꦢꦺꦴ ꦈꦪ꧀ꦪꦴꦤꦱ꧀ꦱ ꦄꦮꦶꦢꦹꦫꦺ ꦄꦚ꧀ꦚꦠꦫꦱ꧀ꦩꦶꦁ ꦫꦸꦏ꧀ꦑꦩꦹꦭꦺ ꦤꦶꦱꦶꦤ꧀ꦤꦺꦴ’’ꦠꦶ. ꦄꦡ ꦑꦺꦴ ꦫꦚ꧀ꦚꦺꦴ ꦈꦢꦺꦤꦱ꧀ꦱ ꦎꦫꦺꦴꦣꦺꦴ ꦫꦴꦗꦴꦤꦁ ꦈꦢꦺꦤꦁ ꦌꦠꦢꦮꦺꦴꦕ – ‘‘ꦄꦩ꧀ꦲꦴꦏꦁ ꦏꦶꦫ, ꦢꦺꦮ, ꦄꦴꦕꦫꦶꦪꦺꦴ ꦄꦪ꧀ꦪꦺꦴ ꦄꦴꦤꦤ꧀ꦢꦺꦴ ꦈꦪ꧀ꦪꦴꦤꦱ꧀ꦱ ꦄꦮꦶꦢꦹꦫꦺ ꦄꦚ꧀ꦚꦠꦫꦱ꧀ꦩꦶꦁ ꦫꦸꦏ꧀ꦑꦩꦹꦭꦺ ꦤꦶꦱꦶꦤ꧀ꦤꦺꦴ. ꦆꦕ꧀ꦖꦴꦩ ꦩꦪꦁ, ꦢꦺꦮ, ꦄꦪ꧀ꦪꦁ ꦄꦴꦤꦤ꧀ꦢꦁ ꦥꦱ꧀ꦱꦶꦠꦸ’’ꦤ꧀ꦠꦶ. ‘‘ꦠꦺꦤ ꦲꦶ ꦠꦸꦩ꧀ꦲꦺ ꦱꦩꦟꦁ ꦄꦴꦤꦤ꧀ꦢꦁ ꦥꦱ꧀ꦱꦡꦴ’’ꦠꦶ.

ꦄꦡ ꦑꦺꦴ ꦫꦚ꧀ꦚꦺꦴ ꦈꦢꦺꦤꦱ꧀ꦱ ꦎꦫꦺꦴꦣꦺꦴ ꦪꦺꦤꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦠꦺꦤꦸꦥꦱꦔ꧀ꦏꦩꦶ, ꦈꦥꦱꦔ꧀ꦏꦩꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦁ ꦑꦺꦴ ꦫꦚ꧀ꦚꦺꦴ ꦈꦢꦺꦤꦱ꧀ꦱ ꦎꦫꦺꦴꦣꦁ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦣꦩ꧀ꦩꦶꦪꦴ ꦏꦡꦴꦪ ꦱꦤ꧀ꦢꦱ꧀ꦱꦺꦱꦶ ꦱꦩꦴꦢꦥꦺꦱꦶ ꦱꦩꦸꦠ꧀ꦠꦺꦗꦺꦱꦶ ꦱꦩ꧀ꦥꦲꦁꦱꦺꦱꦶ. ꦄꦡ ꦑꦺꦴ ꦫꦚ꧀ꦚꦺꦴ ꦈꦢꦺꦤꦱ꧀ꦱ ꦎꦫꦺꦴꦣꦺꦴ ꦄꦴꦪꦱ꧀ꦩꦠꦴ ꦄꦴꦤꦤ꧀ꦢꦺꦤ ꦣꦩ꧀ꦩꦶꦪꦴ ꦏꦡꦴꦪ ꦱꦤ꧀ꦢꦱ꧀ꦱꦶꦠꦺꦴ ꦱꦩꦴꦢꦥꦶꦠꦺꦴ ꦱꦩꦸꦠ꧀ꦠꦺꦗꦶꦠꦺꦴ ꦱꦩ꧀ꦥꦲꦁꦱꦶꦠꦺꦴ ꦄꦴꦪꦱ꧀ꦩꦠꦺꦴ ꦄꦴꦤꦤ꧀ꦢꦱ꧀ꦱ ꦥꦚ꧀ꦕ ꦈꦠ꧀ꦠꦫꦴꦱꦔ꧀ꦒꦱꦠꦴꦤꦶ ꦥꦴꦢꦴꦱꦶ. ꦄꦡ ꦑꦺꦴ ꦫꦚ꧀ꦚꦺꦴ ꦈꦢꦺꦤꦱ꧀ꦱ ꦎꦫꦺꦴꦣꦺꦴ ꦄꦴꦪꦱ꧀ꦩꦠꦺꦴ ꦄꦴꦤꦤ꧀ꦢꦱ꧀ꦱ ꦨꦴꦱꦶꦠꦁ ꦄꦨꦶꦤꦤ꧀ꦢꦶꦠ꧀ꦮꦴ ꦄꦤꦸꦩꦺꦴꦢꦶꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦨꦶꦮꦴꦢꦺꦠ꧀ꦮꦴ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦪꦺꦤ ꦫꦴꦗꦴ ꦈꦢꦺꦤꦺꦴ ꦠꦺꦤꦸꦥꦱꦔ꧀ꦏꦩꦶ. ꦄꦢ꧀ꦢꦱꦴ ꦑꦺꦴ ꦫꦴꦗꦴ ꦈꦢꦺꦤꦺꦴ ꦎꦫꦺꦴꦣꦁ ꦢꦹꦫꦠꦺꦴꦮ ꦄꦴꦒꦕ꧀ꦖꦤ꧀ꦠꦁ. ꦢꦶꦱ꧀ꦮꦴꦤ ꦎꦫꦺꦴꦣꦁ ꦌꦠꦢꦮꦺꦴꦕ – ‘‘ꦄꦥꦶ ꦤꦸ ꦑꦺꦴ ꦠꦸꦩ꧀ꦲꦺ ꦱꦩꦟꦁ ꦄꦴꦤꦤ꧀ꦢꦁ ꦥꦱ꧀ꦱꦶꦠ꧀ꦡꦴ’’ꦠꦶ? ‘‘ꦄꦥꦱ꧀ꦱꦶꦩ꧀ꦲꦴ ꦑꦺꦴ ꦩꦪꦁ, ꦢꦺꦮ, ꦄꦪ꧀ꦪꦁ ꦄꦴꦤꦤ꧀ꦢ’’ꦤ꧀ꦠꦶ. ‘‘ꦄꦥꦶ ꦤꦸ ꦠꦸꦩ꧀ꦲꦺ ꦱꦩꦟꦱ꧀ꦱ ꦄꦴꦤꦤ꧀ꦢꦱ꧀ꦱ ꦏꦶꦚ꧀ꦕꦶ ꦄꦢꦠ꧀ꦡꦴ’’ꦠꦶ? ‘‘ꦄꦢꦩ꧀ꦲꦴ ꦑꦺꦴ ꦩꦪꦁ, ꦢꦺꦮ, ꦄꦪ꧀ꦪꦱ꧀ꦱ ꦄꦴꦤꦤ꧀ꦢꦱ꧀ꦱ ꦥꦚ꧀ꦕ ꦈꦠ꧀ꦠꦫꦴꦱꦔ꧀ꦒꦱꦠꦴꦤꦷ’’ꦠꦶ. ꦫꦴꦗꦴ ꦈꦢꦺꦤꦺꦴ ꦈꦗ꧀ꦙꦴꦪꦠꦶ ꦑꦶꦪ꧀ꦪꦠꦶ ꦮꦶꦥꦴꦕꦺꦠꦶ – ‘‘ꦏꦡꦚ꧀ꦲꦶ ꦤꦴꦩ ꦱꦩꦟꦺꦴ ꦄꦴꦤꦤ꧀ꦢꦺꦴ ꦠꦴꦮ ꦧꦲꦸꦁ ꦕꦷꦮꦫꦁ ꦥꦛꦶꦒ꧀ꦒꦲꦺꦱ꧀ꦱꦠꦶ! ꦢꦸꦱ꧀ꦱꦮꦴꦟꦶꦗ꧀ꦗꦁ ꦮꦴ ꦱꦩꦟꦺꦴ ꦄꦴꦤꦤ꧀ꦢꦺꦴ ꦏꦫꦶꦱ꧀ꦱꦠꦶ, ꦥꦒ꧀ꦒꦴꦲꦶꦏꦱꦴꦭꦁ ꦮꦴ ꦥꦱꦴꦫꦺꦱ꧀ꦱꦠꦷ’’ꦠꦶ!

ꦄꦡ ꦑꦺꦴ ꦫꦴꦗꦴ ꦈꦢꦺꦤꦺꦴ ꦪꦺꦤꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦠꦺꦤꦸꦥꦱꦔ꧀ꦏꦩꦶ, ꦈꦥꦱꦔ꧀ꦏꦩꦶꦠ꧀ꦮꦴ ꦄꦴꦪꦱ꧀ꦩꦠꦴ ꦄꦴꦤꦤ꧀ꦢꦺꦤ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶ. ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦫꦴꦗꦴ ꦈꦢꦺꦤꦺꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦌꦠꦢꦮꦺꦴꦕ – ‘‘ꦄꦴꦒꦩꦴ ꦤꦸ ꦑ꧀ꦮꦶꦣ, ꦨꦺꦴ ꦄꦴꦤꦤ꧀ꦢ, ꦄꦩ꧀ꦲꦴꦏꦁ ꦎꦫꦺꦴꦣꦺꦴ’’ꦠꦶ? ‘‘ꦄꦴꦒꦩꦴꦱꦶ ꦑꦺꦴ ꦠꦺ ꦆꦣ, ꦩꦲꦴꦫꦴꦗ, ꦎꦫꦺꦴꦣꦺꦴ’’ꦠꦶ. ‘‘ꦄꦥꦶ ꦥꦤ ꦨꦺꦴꦠꦺꦴ ꦄꦴꦤꦤ꧀ꦢꦱ꧀ꦱ ꦏꦶꦚ꧀ꦕꦶ ꦄꦢꦴꦱꦷ’’ꦠꦶ? ‘‘ꦄꦢꦴꦱꦶ ꦑꦺꦴ ꦩꦺ, ꦩꦲꦴꦫꦴꦗ, ꦥꦚ꧀ꦕ ꦈꦠ꧀ꦠꦫꦴꦱꦔ꧀ꦒꦱꦠꦴꦤꦷ’’ꦠꦶ. ‘‘ꦏꦶꦁ ꦥꦤ ꦨꦮꦁ ꦄꦴꦤꦤ꧀ꦢꦺꦴ ꦠꦴꦮ ꦧꦲꦸꦁ ꦕꦷꦮꦫꦁ ꦏꦫꦶꦱ꧀ꦱꦠꦷ’’ꦠꦶ? ‘‘ꦪꦺ [ꦪꦺ ꦥꦤ (ꦏ.)] ꦠꦺ, ꦩꦲꦴꦫꦴꦗ, ꦨꦶꦏ꧀ꦑꦹ ꦢꦸꦧ꧀ꦧꦭꦕꦷꦮꦫꦴ ꦠꦺꦲꦶ ꦱꦢ꧀ꦣꦶꦁ ꦱꦁꦮꦶꦨꦗꦶꦱ꧀ꦱꦴꦩꦷ’’ꦠꦶ. ‘‘ꦪꦴꦤꦶ ꦑꦺꦴ ꦥꦤ, ꦨꦺꦴ ꦄꦴꦤꦤ꧀ꦢ, ꦥꦺꦴꦫꦴꦟꦏꦴꦤꦶ ꦢꦸꦧ꧀ꦧꦭꦕꦷꦮꦫꦴꦤꦶ ꦠꦴꦤꦶ ꦏꦡꦁ ꦏꦫꦶꦱ꧀ꦱꦡꦴ’’ꦠꦶ? ‘‘ꦠꦴꦤꦶ, ꦩꦲꦴꦫꦴꦗ, ꦈꦠ꧀ꦠꦫꦠ꧀ꦡꦫꦟꦁ ꦏꦫꦶꦱ꧀ꦱꦴꦩꦴ’’ꦠꦶ. ‘‘ꦪꦴꦤꦶ ꦥꦤ, ꦨꦺꦴ ꦄꦴꦤꦤ꧀ꦢ, ꦥꦺꦴꦫꦴꦟꦏꦴꦤꦶ ꦈꦠ꧀ꦠꦫꦠ꧀ꦡꦫꦟꦴꦤꦶ ꦠꦴꦤꦶ ꦏꦡꦁ ꦏꦫꦶꦱ꧀ꦱꦡꦴ’’ꦠꦶ? ‘‘ꦠꦴꦤꦶ, ꦩꦲꦴꦫꦴꦗ, ꦨꦶꦱꦶꦕ꧀ꦖꦮꦶꦪꦺꦴ ꦏꦫꦶꦱ꧀ꦱꦴꦩꦴ’’ꦠꦶ. ‘‘ꦪꦴ ꦥꦤ, ꦨꦺꦴ ꦄꦴꦤꦤ꧀ꦢ, ꦥꦺꦴꦫꦴꦟꦏꦴ ꦨꦶꦱꦶꦕ꧀ꦖꦮꦶꦪꦺꦴ ꦠꦴ ꦏꦡꦁ ꦏꦫꦶꦱ꧀ꦱꦡꦴ’’ꦠꦶ? ‘‘ꦠꦴ, ꦩꦲꦴꦫꦴꦗ, ꦨꦹꦩꦠ꧀ꦡꦫꦟꦁ ꦏꦫꦶꦱ꧀ꦱꦴꦩꦴ’’ꦠꦶ. ‘‘ꦪꦴꦤꦶ ꦥꦤ, ꦨꦺꦴ ꦄꦴꦤꦤ꧀ꦢ, ꦥꦺꦴꦫꦴꦟꦏꦴꦤꦶ ꦨꦹꦩꦠ꧀ꦡꦫꦟꦴꦤꦶ ꦠꦴꦤꦶ ꦏꦡꦁ ꦏꦫꦶꦱ꧀ꦱꦡꦴ’’ꦠꦶ? ‘‘ꦠꦴꦤꦶ, ꦩꦲꦴꦫꦴꦗ, ꦥꦴꦢꦥꦸꦚ꧀ꦖꦤꦶꦪꦺꦴ ꦏꦫꦶꦱ꧀ꦱꦴꦩꦴ’’ꦠꦶ. ‘‘ꦪꦴ ꦥꦤ, ꦨꦺꦴ ꦄꦴꦤꦤ꧀ꦢ, ꦥꦺꦴꦫꦴꦟꦏꦴ ꦥꦴꦢꦥꦸꦚ꧀ꦖꦤꦶꦪꦺꦴ ꦠꦴ ꦏꦡꦁ ꦏꦫꦶꦱ꧀ꦱꦡꦴ’’ꦠꦶ?. ‘‘ꦠꦴ, ꦩꦲꦴꦫꦴꦗ, ꦫꦗꦺꦴꦲꦫꦟꦁ ꦏꦫꦶꦱ꧀ꦱꦴꦩꦴ’’ꦠꦶ. ‘‘ꦪꦴꦤꦶ ꦥꦤ, ꦨꦺꦴ ꦄꦴꦤꦤ꧀ꦢ, ꦥꦺꦴꦫꦴꦟꦏꦴꦤꦶ ꦫꦗꦺꦴꦲꦫꦟꦴꦤꦶ ꦠꦴꦤꦶ ꦏꦡꦁ ꦏꦫꦶꦱ꧀ꦱꦡꦴ’’ꦠꦶ? ‘‘ꦠꦴꦤꦶ, ꦩꦲꦴꦫꦴꦗ, ꦏꦺꦴꦛ꧀ꦛꦺꦠ꧀ꦮꦴ ꦕꦶꦏ꧀ꦑꦭ꧀ꦭꦺꦤ ꦩꦢ꧀ꦢꦶꦠ꧀ꦮꦴ ꦥꦫꦶꦨꦟ꧀ꦝꦁ ꦭꦶꦩ꧀ꦥꦶꦱ꧀ꦱꦴꦩꦴ’’ꦠꦶ.

ꦄꦡ ꦑꦺꦴ ꦫꦴꦗꦴ ꦈꦢꦺꦤꦺꦴ – ꦱꦧ꧀ꦧꦺꦮꦶꦩꦺ ꦱꦩꦟꦴ ꦱꦏ꧀ꦪꦥꦸꦠ꧀ꦠꦶꦪꦴ ꦪꦺꦴꦤꦶꦱꦺꦴ ꦈꦥꦤꦺꦤ꧀ꦠꦶ, ꦤ ꦏꦸꦭꦮꦁ ꦒꦩꦺꦤ꧀ꦠꦷꦠꦶ – ꦄꦴꦪꦱ꧀ꦩꦠꦺꦴ ꦄꦴꦤꦤ꧀ꦢꦱ꧀ꦱ ꦄꦚ꧀ꦚꦴꦤꦶꦥꦶ ꦥꦚ꧀ꦕ ꦢꦸꦱ꧀ꦱꦱꦠꦴꦤꦶ ꦥꦴꦢꦴꦱꦶ. ꦄꦪꦚ꧀ꦕꦫꦲꦶ ꦄꦴꦪꦱ꧀ꦩꦠꦺꦴ ꦄꦴꦤꦤ꧀ꦢꦱ꧀ꦱ ꦥꦜꦩꦁ ꦕꦷꦮꦫꦨꦶꦏ꧀ꦑꦴ ꦈꦥ꧀ꦥꦗ꧀ꦗꦶ ꦕꦷꦮꦫꦱꦲꦱ꧀ꦱꦁ. ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦪꦺꦤ ꦓꦺꦴꦱꦶꦠꦴꦫꦴꦩꦺꦴ ꦠꦺꦤꦸꦥꦱꦔ꧀ꦏꦩꦶ, ꦈꦥꦱꦔ꧀ꦏꦩꦶꦠ꧀ꦮꦴ ꦥꦚ꧀ꦚꦠ꧀ꦠꦺ ꦄꦴꦱꦤꦺ ꦤꦶꦱꦷꦢꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦖꦤ꧀ꦤꦺꦴ ꦪꦺꦤꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦠꦺꦤꦸꦥꦱꦔ꧀ꦏꦩꦶ, ꦈꦥꦱꦔ꧀ꦏꦩꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦁ ꦑꦺꦴ ꦄꦴꦪꦱ꧀ꦩꦤ꧀ꦠꦁ ꦖꦤ꧀ꦤꦁ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦌꦠꦢꦮꦺꦴꦕ – ‘‘ꦱꦔ꧀ꦓꦺꦤ ꦠꦺ, ꦄꦴꦮꦸꦱꦺꦴ ꦖꦤ꧀ꦤ, ꦧ꧀ꦫꦲ꧀ꦩꦢꦟ꧀ꦝꦺꦴ ꦄꦴꦟꦴꦥꦶꦠꦺꦴ’’ꦠꦶ.

‘‘ꦏꦠꦩꦺꦴ ꦥꦤ, ꦨꦤ꧀ꦠꦺ ꦄꦴꦤꦤ꧀ꦢ, ꦧ꧀ꦫꦲ꧀ꦩꦢꦟ꧀ꦝꦺꦴ ꦄꦴꦟꦴꦥꦶꦠꦺꦴ’’ꦠꦶ? ‘‘ꦠ꧀ꦮꦁ, ꦄꦴꦮꦸꦱꦺꦴ ꦖꦤ꧀ꦤ, ꦨꦶꦏ꧀ꦑꦹ ꦪꦁ ꦆꦕ꧀ꦖꦺꦪ꧀ꦪꦴꦱꦶ ꦠꦁ ꦮꦢꦺꦪ꧀ꦪꦴꦱꦶ. ꦨꦶꦏ꧀ꦑꦹꦲꦶ ꦠ꧀ꦮꦁ ꦤꦺꦮ ꦮꦠ꧀ꦠꦧ꧀ꦧꦺꦴ, ꦤ ꦎꦮꦢꦶꦠꦧ꧀ꦧꦺꦴ, ꦤꦴꦤꦸꦱꦴꦱꦶꦠꦧ꧀ꦧꦺꦴ’’ꦠꦶ. ‘‘ꦤꦤ꧀ꦮꦴꦲꦁ, ꦨꦤ꧀ꦠꦺ ꦄꦴꦤꦤ꧀ꦢ, ꦲꦠꦺꦴ ꦌꦠ꧀ꦠꦴꦮꦠꦴ, ꦪꦠꦺꦴꦲꦁ ꦨꦶꦏ꧀ꦑꦹꦲꦶ ꦤꦺꦮ ꦮꦠ꧀ꦠꦧ꧀ꦧꦺꦴ, ꦤ ꦎꦮꦢꦶꦠꦧ꧀ꦧꦺꦴ, ꦤꦴꦤꦸꦱꦴꦱꦶꦠꦧ꧀ꦧꦺꦴ’’ꦠꦶ ꦠꦠ꧀ꦡꦺꦮ ꦩꦸꦕ꧀ꦖꦶꦠꦺꦴ ꦥꦥꦠꦺꦴ. ꦄꦡ ꦑꦺꦴ ꦄꦴꦪꦱ꧀ꦩꦴ ꦖꦤ꧀ꦤꦺꦴ ꦧ꧀ꦫꦲ꧀ꦩꦢꦟ꧀ꦝꦺꦤ ꦄꦛ꧀ꦛꦷꦪꦩꦴꦤꦺꦴ ꦲꦫꦴꦪꦩꦴꦤꦺꦴ ꦗꦶꦒꦸꦕ꧀ꦖꦩꦴꦤꦺꦴ ꦌꦏꦺꦴ ꦮꦹꦥꦏꦛ꧀ꦜꦺꦴ ꦄꦥ꧀ꦥꦩꦠ꧀ꦠꦺꦴ ꦄꦴꦠꦴꦥꦷ ꦥꦲꦶꦠꦠ꧀ꦠꦺꦴ ꦮꦶꦲꦫꦤ꧀ꦠꦺꦴ ꦤꦕꦶꦫꦱ꧀ꦱꦺꦮ ꦪꦱ꧀ꦱꦠ꧀ꦡꦴꦪ ꦏꦸꦭꦥꦸꦠ꧀ꦠꦴ ꦱꦩ꧀ꦩꦢꦺꦮ ꦄꦒꦴꦫꦱ꧀ꦩꦴ ꦄꦤꦒꦴꦫꦶꦪꦁ ꦥꦧ꧀ꦧꦗꦤ꧀ꦠꦶ, ꦠꦢꦤꦸꦠ꧀ꦠꦫꦁ ꦧ꧀ꦫꦲ꧀ꦩꦕꦫꦶꦪꦥꦫꦶꦪꦺꦴꦱꦴꦤꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦴꦱꦶ. ‘ꦑꦷꦟꦴ ꦗꦴꦠꦶ, ꦮꦸꦱꦶꦠꦁ ꦧ꧀ꦫꦲ꧀ꦩꦕꦫꦶꦪꦁ, ꦏꦠꦁ ꦏꦫꦟꦷꦪꦁ, ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴ’ꦠꦶ ꦄꦧ꧀ꦨꦚ꧀ꦚꦴꦱꦶ. ꦄꦚ꧀ꦚꦠꦫꦺꦴ ꦕ ꦥꦤꦴꦪꦱ꧀ꦩꦴ ꦖꦤ꧀ꦤꦺꦴ ꦄꦫꦲꦠꦁ ꦄꦲꦺꦴꦱꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦖꦤ꧀ꦤꦺꦴ ꦄꦫꦲꦠ꧀ꦠꦁ ꦥꦠ꧀ꦠꦺꦴ ꦪꦺꦤꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦠꦺꦤꦸꦥꦱꦔ꧀ꦏꦩꦶ, ꦈꦥꦱꦔ꧀ꦏꦩꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦌꦠꦢꦮꦺꦴꦕ – ‘‘ꦥꦛꦶꦥ꧀ꦥꦱ꧀ꦱꦩ꧀ꦨꦺꦲꦶ ꦢꦴꦤꦶ ꦩꦺ, ꦨꦤ꧀ꦠꦺ ꦄꦴꦤꦤ꧀ꦢ, ꦧ꧀ꦫꦲ꧀ꦩꦢꦟ꧀ꦝ’’ꦤ꧀ꦠꦶ. ‘‘ꦪꦢꦒ꧀ꦒꦺꦤ ꦠꦪꦴ, ꦄꦴꦮꦸꦱꦺꦴ ꦖꦤ꧀ꦤ, ꦄꦫꦲꦠ꧀ꦠꦁ ꦱꦕ꧀ꦖꦶꦏꦠꦁ ꦠꦢꦒ꧀ꦒꦺꦤ ꦠꦺ ꦧ꧀ꦫꦲ꧀ꦩꦢꦟ꧀ꦝꦺꦴ ꦥꦛꦶꦥ꧀ꦥꦱ꧀ꦱꦢ꧀ꦣꦺꦴ’’ꦠꦶ. ꦆꦩꦴꦪ ꦑꦺꦴ ꦥꦤ ꦮꦶꦤꦪꦱꦔ꧀ꦒꦷꦠꦶꦪꦴ ꦥꦚ꧀ꦕ ꦨꦶꦏ꧀ꦑꦸꦱꦠꦴꦤꦶ ꦄꦤꦹꦤꦴꦤꦶ ꦄꦤꦣꦶꦏꦴꦤꦶ ꦄꦲꦺꦱꦸꦁ. ꦠꦱ꧀ꦩꦴ ꦄꦪꦁ ꦮꦶꦤꦪꦱꦔ꧀ꦒꦷꦠꦶ ‘‘ꦥꦚ꧀ꦕꦱꦠꦶꦏꦴ’’ꦠꦶ ꦮꦸꦕ꧀ꦕꦠꦷꦠꦶ.

ꦥꦚ꧀ꦕꦱꦠꦶꦏꦏ꧀ꦑꦤ꧀ꦣꦏꦺꦴ ꦌꦏꦴꦢꦱꦩꦺꦴ.

ꦆꦩꦩ꧀ꦲꦶ ꦑꦤ꧀ꦣꦏꦺ ꦮꦠ꧀ꦡꦹ ꦠꦺꦮꦷꦱꦠꦶ.

ꦠꦱ꧀ꦱꦸꦢ꧀ꦢꦴꦤꦁ –

ꦥꦫꦶꦤꦶꦧ꧀ꦧꦸꦠꦺ ꦱꦩ꧀ꦧꦸꦢ꧀ꦣꦺ, ꦡꦺꦫꦺꦴ ꦏꦱ꧀ꦱꦥꦱꦮ꧀ꦲꦪꦺꦴ;

ꦄꦴꦩꦤ꧀ꦠꦪꦶ ꦨꦶꦏ꧀ꦑꦸꦒꦟꦁ, ꦱꦢ꧀ꦣꦩ꧀ꦩꦩꦤꦸꦥꦴꦭꦏꦺꦴ;

ꦥꦴꦮꦴꦪꦢ꧀ꦣꦴꦤꦩꦒ꧀ꦒꦩ꧀ꦲꦶ, ꦱꦸꦨꦢ꧀ꦢꦺꦤ ꦥꦮꦺꦢꦶꦠꦁ;

ꦱꦔ꧀ꦒꦴꦪꦶꦱ꧀ꦱꦴꦩ ꦱꦢ꧀ꦣꦩ꧀ꦩꦁ, ꦄꦣꦩ꧀ꦩꦺꦴ ꦥꦸꦫꦺ ꦢꦶꦥ꧀ꦥꦠꦶ.

ꦌꦏꦺꦤꦹꦤ ꦥꦚ꧀ꦕꦱꦠꦁ, ꦄꦴꦤꦤ꧀ꦢꦩ꧀ꦥꦶ ꦕ ꦈꦕ꧀ꦕꦶꦤꦶ;

ꦣꦩ꧀ꦩꦮꦶꦤꦪꦱꦔ꧀ꦒꦷꦠꦶꦁ, ꦮꦱꦤ꧀ꦠꦺꦴ ꦒꦸꦲꦩꦸꦠ꧀ꦠꦩꦺ.

ꦈꦥꦴꦭꦶꦁ ꦮꦶꦤꦪꦁ ꦥꦸꦕ꧀ꦖꦶ, ꦱꦸꦠ꧀ꦠꦤ꧀ꦠꦴꦤꦤ꧀ꦢꦥꦟ꧀ꦝꦶꦠꦁ;

ꦥꦶꦛꦏꦁ ꦠꦷꦟꦶ ꦱꦔ꧀ꦒꦷꦠꦶꦁ, ꦄꦏꦁꦱꦸ ꦗꦶꦤꦱꦴꦮꦏꦴ.

ꦤ ꦥꦸꦕ꧀ꦖꦶ ꦄꦏ꧀ꦏꦩꦶꦠ꧀ꦮꦴꦤ, ꦮꦤ꧀ꦢꦴꦥꦺꦱꦶ ꦤ ꦪꦴꦕꦶ ꦕ.

ꦥꦧ꧀ꦧꦗ꧀ꦗꦁ ꦩꦴꦠꦸꦒꦴꦩꦱ꧀ꦱ, ꦱꦢ꧀ꦣꦴꦪ ꦢꦸꦏ꧀ꦏꦛꦴꦤꦶ ꦩꦺ;

ꦥꦸꦫꦴꦟꦺꦴ ꦧ꧀ꦫꦲ꧀ꦩꦢꦟ꧀ꦝꦚ꧀ꦕ, ꦎꦫꦺꦴꦣꦺꦴ ꦈꦢꦺꦤꦺꦤ ꦱꦲ.

ꦠꦴꦮ ꦧꦲꦸ ꦢꦸꦧ꧀ꦧꦭꦚ꧀ꦕ, ꦈꦠ꧀ꦠꦫꦠ꧀ꦡꦫꦟꦴ ꦨꦶꦱꦶ;

ꦨꦹꦩꦠ꧀ꦡꦫꦟꦴ ꦥꦸꦚ꧀ꦖꦤꦶꦪꦺꦴ, ꦫꦗꦺꦴ ꦕꦶꦏ꧀ꦑꦭ꧀ꦭꦩꦢ꧀ꦢꦤꦴ.

ꦱꦲꦱ꧀ꦱꦕꦷꦮꦫꦁ ꦈꦥ꧀ꦥꦗ꧀ꦗꦶ, ꦥꦜꦩꦴꦤꦤ꧀ꦢꦱꦮ꧀ꦲꦪꦺꦴ;

ꦠꦗ꧀ꦗꦶꦠꦺꦴ ꦧ꧀ꦫꦲ꧀ꦩꦢꦟ꧀ꦝꦺꦤ, ꦕꦠꦸꦱ꧀ꦱꦕ꧀ꦕꦁ ꦄꦥꦴꦥꦸꦟꦶ;

ꦮꦱꦷꦨꦹꦠꦴ ꦥꦚ꧀ꦕꦱꦠꦴ, ꦠꦱ꧀ꦩꦴ ꦥꦚ꧀ꦕꦱꦠꦷ ꦆꦠꦶ.

ꦥꦚ꧀ꦕꦱꦠꦶꦏꦏ꧀ꦑꦤ꧀ꦣꦏꦁ ꦤꦶꦛ꧀ꦜꦶꦠꦁ.