꧙. ꦥꦫꦶꦮꦠ꧀ꦠꦤꦲꦴꦫꦮꦶꦨꦔ꧀ꦒꦮꦶꦨꦴꦮꦤꦴ

꧓꧕. ꦪꦺꦤ ꦪꦺꦤ ꦱꦁꦮꦟ꧀ꦟꦴꦮꦶꦱꦺꦱꦨꦹꦠꦺꦤ ꦮꦶꦨꦠ꧀ꦠꦶꦲꦴꦫꦮꦶꦨꦔ꧀ꦒꦺꦤ ꦱꦸꦠ꧀ꦠꦺ ꦮꦸꦠ꧀ꦠꦴ ꦣꦩ꧀ꦩꦴꦢꦪꦺꦴ ꦮꦶꦨꦠ꧀ꦠꦴ, ꦱꦺꦴ ꦱꦁꦮꦟ꧀ꦟꦴꦮꦶꦱꦺꦱꦨꦹꦠꦺꦴ ꦮꦶꦨꦔ꧀ꦒꦺꦴ ꦥꦫꦶꦥꦸꦟ꧀ꦟꦺꦴ, ‘‘ꦏꦠꦩꦺꦴ ꦥꦫꦶꦮꦠ꧀ꦠꦤꦲꦴꦫꦮꦶꦨꦔ꧀ꦒꦺꦴ’’ꦠꦶ ꦥꦸꦕ꧀ꦖꦶꦠꦧ꧀ꦧꦠ꧀ꦠꦴ ‘‘ꦠꦠ꧀ꦡ ꦏꦠꦩꦺꦴ ꦥꦫꦶꦮꦠ꧀ꦠꦤꦺꦴ ꦲꦴꦫꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦠꦠ꧀ꦡꦴꦠꦶ ꦠꦺꦱꦸ ꦤꦶꦢ꧀ꦢꦶꦛ꧀ꦜꦺꦱꦸ ꦱꦺꦴꦭ꦳ꦱꦱꦸ ꦢꦺꦱꦤꦴꦲꦴꦫꦴꦢꦷꦱꦸ ꦏꦠꦩꦺꦴ ꦱꦁꦮꦟ꧀ꦟꦤꦴꦮꦶꦱꦺꦱꦺꦴ ꦥꦫꦶꦮꦠ꧀ꦠꦤꦺꦴ ꦲꦴꦫꦺꦴ ꦥꦫꦶꦮꦠ꧀ꦠꦤꦲꦴꦫꦮꦶꦨꦔ꧀ꦒꦺꦴ ꦤꦴꦩꦴꦠꦶ ꦥꦸꦕ꧀ꦖꦠꦶ. ‘‘ꦏꦸꦱꦭꦴꦏꦸꦱꦭꦺ ꦣꦩ꧀ꦩꦺ’’ꦠꦶꦄꦴꦢꦶꦤꦶꦢ꧀ꦢꦺꦱꦱ꧀ꦱ ꦆꦢꦴꦤꦶ ꦩꦪꦴ ꦮꦸꦕ꧀ꦕꦩꦴꦤꦺꦴ ‘‘ꦱꦩ꧀ꦩꦴꦢꦶꦛ꧀ꦜꦶꦱ꧀ꦱ ꦥꦸꦫꦶꦱꦥꦸꦒ꧀ꦒꦭꦱ꧀ꦱꦴ’’ꦠꦶꦄꦴꦢꦶꦏꦺꦴ ꦮꦶꦠ꧀ꦡꦴꦫꦱꦁꦮꦟ꧀ꦟꦤꦴꦮꦶꦱꦺꦱꦺꦴ ꦥꦫꦶꦮꦠ꧀ꦠꦤꦺꦴ ꦲꦴꦫꦺꦴ ꦥꦫꦶꦮꦠ꧀ꦠꦤꦲꦴꦫꦮꦶꦨꦔ꧀ꦒꦺꦴ ꦤꦴꦩꦴꦠꦶ ꦄꦠ꧀ꦡꦺꦴ ꦒꦲꦺꦠꦧ꧀ꦧꦺꦴ.

‘‘ꦱꦁꦮꦟ꧀ꦟꦶꦪꦩꦴꦤꦺ ꦱꦸꦠ꧀ꦠꦺ ꦤꦶꦢ꧀ꦢꦶꦛ꧀ꦜꦱ꧀ꦱ ꦏꦠꦩꦱ꧀ꦱ ꦨꦴꦮꦶꦠꦧ꧀ꦧꦱ꧀ꦱ ꦏꦸꦱꦭꦱ꧀ꦱ ꦏꦠꦩꦺꦴ ꦥꦛꦶꦥꦏ꧀ꦑꦺꦴ, ꦏꦡꦁ ꦥꦫꦶꦮꦠ꧀ꦠꦺꦠꦧ꧀ꦧꦺꦴ’’ꦠꦶ ꦥꦸꦕ꧀ꦖꦶꦠꦧ꧀ꦧꦠ꧀ꦠꦴ ꦆꦩꦱ꧀ꦱ ꦨꦴꦮꦶꦠꦧ꧀ꦧꦱ꧀ꦱ ꦏꦸꦱꦭꦱ꧀ꦱ ꦄꦪꦁ ꦥꦛꦶꦥꦏ꧀ꦑꦺꦴ, ꦌꦮꦁ ꦥꦲꦴꦠꦧ꧀ꦧꦨꦴꦮꦮꦱꦺꦤ ꦥꦫꦶꦮꦠ꧀ꦠꦺꦠꦧ꧀ꦧꦺꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦱꦩ꧀ꦩꦴꦢꦶꦛ꧀ꦜꦶꦱ꧀ꦱ ꦥꦸꦫꦶꦱꦥꦸꦒ꧀ꦒꦭꦱ꧀ꦱꦴ’’ꦠꦶꦄꦴꦢꦶꦩꦴꦲ. ꦄꦛ꧀ꦜꦏꦡꦴꦪꦁ ꦥꦤ –

‘‘ꦠꦠ꧀ꦡ ꦪꦱ꧀ꦩꦴ ꦱꦁꦮꦟ꧀ꦟꦶꦪꦩꦴꦤꦺ ꦱꦸꦠ꧀ꦠꦺ ꦪꦡꦴꦤꦶꦢ꧀ꦢꦶꦛ꧀ꦜꦴꦤꦁ ꦏꦸꦱꦭꦴꦏꦸꦱꦭꦣꦩ꧀ꦩꦴꦤꦁ ꦥꦛꦶꦥꦏ꧀ꦑꦨꦹꦠꦺ ꦄꦏꦸꦱꦭꦏꦸꦱꦭꦣꦩ꧀ꦩꦺ ꦥꦲꦴꦠꦧ꧀ꦧꦨꦴꦮꦴꦢꦶꦮꦱꦺꦤ ꦤꦶꦢ꧀ꦣꦴꦫꦟꦁ ꦥꦛꦶꦥꦏ꧀ꦑꦠꦺꦴ ꦥꦫꦶꦮꦠ꧀ꦠꦤꦁ, ꦠꦱ꧀ꦩꦴ ‘ꦱꦩ꧀ꦩꦴꦢꦶꦛ꧀ꦜꦶꦱ꧀ꦱ ꦥꦸꦫꦶꦱꦥꦸꦒ꧀ꦒꦭꦱ꧀ꦱ ꦩꦶꦕ꧀ꦖꦴꦢꦶꦛ꧀ꦜꦶ ꦤꦶꦗ꧀ꦗꦶꦟ꧀ꦟꦴ ꦨꦮꦠꦷ’ꦠꦶꦄꦴꦢꦶ ꦄꦴꦫꦢ꧀ꦣ’’ꦤ꧀ꦠꦶ (ꦤꦺꦠ꧀ꦠꦶ. ꦄꦛ꧀ꦜ. ꧓꧕) –

ꦮꦸꦠ꧀ꦠꦁ. ꦥꦲꦴꦪꦏꦱ꧀ꦱ ꦲꦶ ꦣꦩ꧀ꦩꦱ꧀ꦱ ꦥꦲꦴꦠꦧ꧀ꦧꦨꦴꦮꦮꦱꦺꦤ ꦤꦶꦢ꧀ꦣꦴꦫꦟꦁ, ꦥꦲꦴꦠꦧ꧀ꦧꦱ꧀ꦱ ꦕ ꦣꦩ꧀ꦩꦱ꧀ꦱ ꦥꦲꦴꦪꦏꦨꦴꦮꦮꦱꦺꦤ ꦤꦶꦢ꧀ꦣꦴꦫꦟꦁ ꦥꦛꦶꦥꦏ꧀ꦑꦠꦺꦴ ꦥꦫꦶꦮꦠ꧀ꦠꦤꦁ ꦤꦴꦩ ꦲꦺꦴꦠꦶ. ꦠꦠ꧀ꦡ ꦱꦩ꧀ꦩꦴꦢꦶꦛ꧀ꦜꦶꦱ꧀ꦱꦴꦠꦶ ꦱꦩ꧀ꦩꦴ ꦱꦸꦤ꧀ꦢꦫꦴ ꦥꦱꦠ꧀ꦡꦴ ꦢꦶꦛ꧀ꦜꦶ ꦪꦱ꧀ꦱ ꦥꦸꦒ꧀ꦒꦭꦱ꧀ꦱꦴꦠꦶ ꦱꦩ꧀ꦩꦴꦢꦶꦛ꧀ꦜꦶ. ꦥꦸꦒ꧀ꦒꦭꦥꦢꦛ꧀ꦜꦴꦤꦴ ꦲꦶ ꦄꦪꦁ ꦢꦺꦱꦤꦴ. ꦠꦺꦤ ꦮꦸꦠ꧀ꦠꦁ ‘‘ꦥꦸꦫꦶꦱꦥꦸꦒ꧀ꦒꦭꦱ꧀ꦱꦴ’’ꦠꦶ. ꦱꦴ ꦥꦤ ꦱꦩ꧀ꦩꦴꦢꦶꦛ꧀ꦜꦶ ꦏꦩ꧀ꦩꦏꦩ꧀ꦩꦦꦭꦴꦢꦶꦱꦢ꧀ꦢꦲꦤꦮꦱꦺꦤ ꦮꦴ ꦄꦤꦶꦕ꧀ꦕꦴꦢꦶꦮꦶꦥꦱ꧀ꦱꦤꦴꦮꦱꦺꦤ ꦮꦴ ꦩꦒ꧀ꦒꦱꦩ꧀ꦩꦴꦢꦱ꧀ꦱꦤꦮꦱꦺꦤ ꦮꦴ ꦥꦮꦠ꧀ꦠꦴ ꦤꦶꦫꦮꦱꦺꦱꦴꦮ ꦒꦲꦶꦠꦴ. ‘‘ꦪꦴꦪ ꦨꦴꦮꦶꦠꦴꦪ ꦱꦩ꧀ꦩꦴꦢꦶꦛ꧀ꦜꦶꦪꦴ ꦥꦲꦴꦠꦧ꧀ꦧꦴ ꦩꦶꦕ꧀ꦖꦴꦢꦶꦛ꧀ꦜꦶ ꦤꦶꦗ꧀ꦗꦶꦟ꧀ꦟꦴ ꦨꦮꦠꦶ, ꦪꦢꦶ ꦏꦺꦮꦭꦴ ꦩꦶꦕ꧀ꦖꦴꦢꦶꦛ꧀ꦜꦶꦪꦺꦮ ꦤꦶꦗ꧀ꦗꦶꦟ꧀ꦟꦴ ꦨꦮꦠꦶ, ꦌꦮꦁ ꦱꦠꦶ ꦠꦢꦮꦱꦺꦱꦴ ꦄꦏꦸꦱꦭꦴ ꦣꦩ꧀ꦩꦴ ꦄꦗꦶꦟ꧀ꦟꦴ

ꦨꦮꦺꦪ꧀ꦪꦸ’’ꦤ꧀ꦠꦶ ꦮꦠ꧀ꦠꦧ꧀ꦧꦠ꧀ꦠꦴ ‘‘ꦪꦺ ꦕꦱ꧀ꦱ ꦩꦶꦕ꧀ꦖꦴꦢꦶꦛ꧀ꦜꦶꦥꦕ꧀ꦕꦪꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦩꦶꦕ꧀ꦖꦴꦢꦶꦛ꧀ꦜꦶꦥꦕ꧀ꦕꦪꦴ ꦄꦤꦺꦏꦺ ꦥꦴꦥꦏꦴ ꦄꦏꦸꦱꦭꦴꦪꦺꦮ ꦣꦩ꧀ꦩꦴ ꦕ ꦈꦥ꧀ꦥꦗ꧀ꦗꦺꦪ꧀ꦪꦸꦁ ꦈꦥ꧀ꦥꦗ꧀ꦗꦤꦴꦫꦲꦴ ꦨꦮꦺꦪ꧀ꦪꦸꦁ, ꦠꦺ ꦕ ꦄꦏꦸꦱꦭꦴ ꦣꦩ꧀ꦩꦴ ꦄꦱ꧀ꦱ ꦱꦩ꧀ꦩꦴꦢꦶꦛ꧀ꦜꦶꦱꦩ꧀ꦥꦤ꧀ꦤꦱ꧀ꦱ ꦥꦸꦫꦶꦱꦥꦸꦒ꧀ꦒꦭꦱ꧀ꦱ ꦤꦶꦗ꧀ꦗꦶꦟ꧀ꦟꦴ ꦥꦲꦴꦠꦧ꧀ꦧꦴꦫꦲꦴ ꦄꦤꦸꦥ꧀ꦥꦗ꧀ꦗꦤꦱꦨꦴꦮꦴ ꦲꦺꦴꦤ꧀ꦠꦶ. ꦠꦺꦤꦴꦲ ꦨꦒꦮꦴ – ‘‘ꦈꦥꦴꦢꦴꦤꦤꦶꦫꦺꦴꦣꦴ ꦨꦮꦤꦶꦫꦺꦴꦣꦺꦴ’’ꦠꦶ (ꦈꦢꦴ. ꧒; ꦩꦲꦴꦮ. ꧑).

‘‘ꦪꦢꦶ ꦱꦩ꧀ꦩꦴꦢꦶꦛ꧀ꦜꦶꦱ꧀ꦱ ꦥꦸꦫꦶꦱꦥꦸꦒ꧀ꦒꦭꦱ꧀ꦱ ꦩꦶꦕ꧀ꦖꦴꦢꦶꦛ꧀ꦜꦶ, ꦠꦥ꧀ꦥꦕ꧀ꦕꦪꦴ ꦄꦏꦸꦱꦭꦣꦩ꧀ꦩꦴꦪꦺꦮ ꦤꦶꦗ꧀ꦗꦶꦟ꧀ꦟꦴ ꦨꦮꦤ꧀ꦠꦶ, ꦌꦮꦁ ꦱꦠꦶ ꦱꦩ꧀ꦩꦴꦢꦶꦛ꧀ꦜꦶꦥꦕ꧀ꦕꦪꦴ ꦏꦸꦱꦭꦴ ꦣꦩ꧀ꦩꦴ ꦤ ꦱꦩ꧀ꦨꦮꦺꦪ꧀ꦪꦸ’’ꦤ꧀ꦠꦶ ꦮꦠ꧀ꦠꦧ꧀ꦧꦠ꧀ꦠꦴ ‘‘ꦱꦩ꧀ꦩꦴꦢꦶꦛ꧀ꦜꦶꦥꦕ꧀ꦕꦪꦴ ꦕꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦄꦱ꧀ꦱ ꦱꦩ꧀ꦩꦴꦢꦶꦛ꧀ꦜꦶꦱꦩ꧀ꦥꦤ꧀ꦤꦱ꧀ꦱ ꦥꦸꦫꦶꦱꦥꦸꦒ꧀ꦒꦭꦱ꧀ꦱ ꦈꦥ꧀ꦥꦗ꧀ꦗꦤꦴꦫꦲꦴ ꦱꦩ꧀ꦩꦴꦢꦶꦛ꧀ꦜꦶꦥꦕ꧀ꦕꦪꦴ ꦄꦤꦺꦏꦺ ꦏꦸꦱꦭꦴ ꦱꦩꦡꦮꦶꦥꦱ꧀ꦱꦤꦴ ꦮꦴ ꦧꦺꦴꦣꦶꦥꦏ꧀ꦑꦶꦪꦴ ꦮꦴ ꦣꦩ꧀ꦩꦴ ꦱꦩ꧀ꦨꦮꦤ꧀ꦠꦶ, ꦈꦥ꧀ꦥꦤ꧀ꦤꦴ ꦕ ꦠꦺ ꦣꦩ꧀ꦩꦴ ꦄꦱ꧀ꦱ ꦱꦩ꧀ꦩꦴꦢꦶꦛ꧀ꦜꦶꦱꦩ꧀ꦥꦤ꧀ꦤꦱ꧀ꦱ ꦥꦸꦫꦶꦱꦥꦸꦒ꧀ꦒꦭꦱ꧀ꦱ ꦱꦤ꧀ꦠꦴꦤꦺ ꦥꦸꦤꦥ꧀ꦥꦸꦤꦁ ꦥꦮꦠ꧀ꦠꦤꦮꦱꦺꦤ ꦨꦴꦮꦤꦴꦥꦴꦫꦶꦥꦹꦫꦶꦁ ꦒꦕ꧀ꦖꦤ꧀ꦠꦶ.

ꦱꦩ꧀ꦩꦴꦢꦶꦛ꧀ꦜꦶꦪꦴ ꦥꦛꦶꦥꦏ꧀ꦑꦴꦤꦁ ꦩꦶꦕ꧀ꦖꦴꦢꦶꦛ꧀ꦜꦶꦪꦴ, ꦠꦥ꧀ꦥꦕ꧀ꦕꦪꦴꦤꦁ ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦥꦫꦶꦮꦠ꧀ꦠꦤꦨꦴꦮꦺꦴ ꦄꦴꦕꦫꦶꦪꦺꦤ ꦮꦶꦨꦠ꧀ꦠꦺꦴ, ꦄꦩ꧀ꦲꦺꦲꦶ ꦕ ꦚꦴꦠꦺꦴ, ‘‘ꦱꦩ꧀ꦩꦴꦱꦔ꧀ꦏꦥ꧀ꦥꦱ꧀ꦱ ꦣꦩ꧀ꦩꦱ꧀ꦱ ꦥꦛꦶꦥꦏ꧀ꦑꦺꦴ ꦣꦩ꧀ꦩꦺꦴ ꦏꦡꦁ ꦥꦫꦶꦮꦠ꧀ꦠꦺꦠꦧ꧀ꦧꦺꦴ’’ꦠꦶ ꦮꦠ꧀ꦠꦧ꧀ꦧꦠ꧀ꦠꦴ ‘‘ꦱꦩ꧀ꦩꦴꦱꦔ꧀ꦏꦥ꧀ꦥꦱ꧀ꦱ ꦥꦸꦫꦶꦱꦥꦸꦒ꧀ꦒꦭꦱ꧀ꦱꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦪꦺꦴꦗꦤꦠ꧀ꦡ ꦄꦴꦢꦪꦺꦴ ꦮꦸꦠ꧀ꦠꦤꦪꦴꦤꦸꦱꦴꦫꦺꦤ ꦮꦺꦢꦶꦠꦧ꧀ꦧꦴ. ꦱꦩ꧀ꦩꦴ ꦱꦸꦤ꧀ꦢꦫꦴ ꦥꦱꦠ꧀ꦡꦴ ꦮꦴꦕꦴ ꦪꦱ꧀ꦱ ꦥꦸꦒ꧀ꦒꦭꦱ꧀ꦱꦴꦠꦶ ꦱꦩ꧀ꦩꦴꦮꦴꦕꦺꦴ, ꦠꦱ꧀ꦱ ꦱꦩ꧀ꦩꦴꦮꦴꦕꦱ꧀ꦱ. ‘‘ꦥꦸꦫꦶꦱꦥꦸꦒ꧀ꦒꦭꦱ꧀ꦱꦴ’’ꦠꦶꦄꦴꦢꦷꦤꦁ ꦄꦠ꧀ꦡꦺꦴꦥꦶ ꦮꦸꦠ꧀ꦠꦤꦪꦺꦤ ꦮꦺꦢꦶꦠꦧ꧀ꦧꦺꦴ. ꦄꦪꦁ ꦥꦤ ꦮꦶꦱꦺꦱꦠ꧀ꦡꦺꦴꦱꦩ꧀ꦩꦴ ꦄꦮꦶꦥꦫꦷꦠꦠꦺꦴ ꦮꦶꦩꦸꦠ꧀ꦠꦶꦚꦴꦟꦢꦱ꧀ꦱꦤꦁ ꦪꦱ꧀ꦱ ꦥꦸꦒ꧀ꦒꦭꦱ꧀ꦱꦴꦠꦶ ꦱꦩ꧀ꦩꦴꦮꦶꦩꦸꦠ꧀ꦠꦶꦚꦴꦟꦢꦱ꧀ꦱꦤꦺꦴ, ꦠꦱ꧀ꦱ ꦱꦩ꧀ꦩꦴꦮꦶꦩꦸꦠ꧀ꦠꦶꦚꦴꦟꦢꦱ꧀ꦱꦤꦱ꧀ꦱ ꦥꦕ꧀ꦕꦮꦺꦏ꧀ꦑꦟꦚꦴꦟꦢꦱ꧀ꦱꦤꦱꦩ꧀ꦥꦤ꧀ꦤꦱ꧀ꦱ ꦥꦸꦫꦶꦱꦥꦸꦒ꧀ꦒꦭꦱ꧀ꦱ ‘‘ꦄꦮꦶꦩꦸꦠ꧀ꦠꦴꦮ ꦱꦩꦴꦤꦴ ꦮꦶꦩꦸꦠ꧀ꦠꦴ ꦩꦪ’’ꦤ꧀ꦠꦶ ꦩꦶꦕ꧀ꦖꦴꦨꦶꦤꦶꦮꦺꦱꦮꦱꦺꦤ ꦥꦮꦠ꧀ꦠꦁ ꦩꦶꦕ꧀ꦖꦴꦮꦶꦩꦸꦠ꧀ꦠꦶꦚꦴꦟꦢꦱ꧀ꦱꦤꦁ ꦤꦶꦗ꧀ꦗꦶꦟ꧀ꦟꦁ ꦮꦶꦒꦠꦁ ꦨꦮꦠꦶ. ‘‘ꦪꦺ ꦕꦱ꧀ꦱꦴ’’ꦠꦶꦄꦴꦢꦷꦤꦁ ꦄꦤꦸꦱꦤ꧀ꦣ꧀ꦪꦴꦢꦶꦏꦺꦴ ꦮꦸꦠ꧀ꦠꦤꦪꦴꦤꦸꦱꦴꦫꦺꦤ ꦮꦺꦢꦶꦠꦧ꧀ꦧꦺꦴ.

꧓꧖. ‘‘ꦱꦩ꧀ꦩꦴꦢꦶꦛ꧀ꦜꦶꦱ꧀ꦱꦴꦠꦶꦄꦴꦢꦶꦤꦴ ꦱꦩ꧀ꦩꦴꦢꦶꦛ꧀ꦜꦶꦄꦴꦢꦷꦤꦁ ꦏꦸꦱꦭꦴꦤꦁ ꦥꦛꦶꦥꦏ꧀ꦑꦴ ꦩꦶꦕ꧀ꦖꦴꦢꦶꦛ꧀ꦜꦴꦢꦶꦏꦴꦪꦺꦮ ꦄꦏꦸꦱꦭꦴ ꦥꦲꦴꦠꦧ꧀ꦧꦨꦴꦮꦺꦤ ꦥꦫꦶꦮꦠ꧀ꦠꦺꦠꦧ꧀ꦧꦴ’’ꦠꦶ ꦥꦸꦕ꧀ꦖꦶꦠꦧ꧀ꦧꦠ꧀ꦠꦴ ꦥꦴꦟꦴꦠꦶꦥꦴꦠꦴꦮꦺꦫꦩꦟꦶꦄꦴꦢꦷꦤꦁ ꦏꦸꦱꦭꦴꦤꦁ ꦥꦛꦶꦥꦏ꧀ꦑꦴ ꦥꦴꦟꦴꦠꦶꦥꦴꦠꦴꦢꦶꦏꦴꦥꦶ ꦄꦏꦸꦱꦭꦴ ꦥꦲꦴꦠꦧ꧀ꦧꦨꦴꦮꦺꦤ ꦥꦫꦶꦮꦠ꧀ꦠꦺꦠꦧ꧀ꦧꦴꦠꦶ ꦢꦱ꧀ꦱꦺꦠꦸꦁ ‘‘ꦪꦱ꧀ꦱ ꦮꦴ ꦥꦴꦟꦴꦠꦶꦥꦴꦠꦴ ꦥꦛꦶꦮꦶꦫꦠꦱ꧀ꦱꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦄꦛ꧀ꦜꦏꦡꦴꦪꦁ ꦥꦤ ‘‘ꦌꦮꦁ ꦱꦩ꧀ꦩꦴꦢꦶꦛ꧀ꦜꦶꦄꦴꦢꦶꦩꦸꦑꦺꦤ ꦩꦶꦕ꧀ꦖꦴꦢꦶꦛ꧀ꦜꦶꦄꦴꦢꦶꦁ ꦢꦱ꧀ꦱꦺꦠ꧀ꦮꦴ ꦥꦸꦤ ꦥꦴꦟꦴꦠꦶꦥꦴꦠꦄꦢꦶꦤ꧀ꦤꦴꦢꦴꦤꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴꦢꦶꦠꦺꦴ ꦮꦺꦫꦩꦟꦶꦪꦴꦢꦷꦲꦶ ꦥꦴꦟꦴꦠꦶꦥꦴꦠꦴꦢꦷꦤꦁ ꦥꦫꦶꦮꦠ꧀ꦠꦤꦁ ꦢꦱ꧀ꦱꦺꦠꦸꦁ ‘ꦪꦱ꧀ꦱꦴ’ꦠꦶꦄꦴꦢꦶ ꦄꦴꦫꦢ꧀ꦣ’’ꦤ꧀ꦠꦶ (ꦤꦺꦠ꧀ꦠꦶ. ꦄꦛ꧀ꦜ. ꧓꧖) ꦮꦸꦠ꧀ꦠꦁ. ꦠꦢꦔ꧀ꦒꦴꦢꦶꦮꦱꦺꦤꦥꦲꦷꦤꦺꦴ ꦲꦺꦴꦠꦶ. ꦏꦴꦭꦮꦴꦢꦶꦱ꧀ꦱꦴꦠꦶ ꦮꦢꦶꦠꦧ꧀ꦧꦏꦴꦭꦺ ꦮꦢꦶꦠꦧ꧀ꦧꦁ ꦮꦢꦠꦶ ꦱꦷꦭꦺꦤꦴꦠꦶ ꦏꦴꦭꦮꦴꦢꦷ, ꦠꦱ꧀ꦱ.

‘‘ꦪꦡꦴꦮꦸꦠ꧀ꦠꦥ꧀ꦥꦏꦴꦫꦺꦤꦺꦮ ꦥꦫꦶꦮꦠ꧀ꦠꦺꦠꦧ꧀ꦧꦴ’’ꦠꦶ ꦥꦸꦕ꧀ꦖꦶꦠꦧ꧀ꦧꦠ꧀ꦠꦴ ꦄꦚ꧀ꦚꦺꦤ ꦥꦏꦴꦫꦺꦤꦥꦶ ꦥꦫꦶꦮꦠ꧀ꦠꦺꦠꦧ꧀ꦧꦴꦠꦶ ꦢꦱ꧀ꦱꦺꦠꦸꦁ ‘‘ꦪꦺ ꦕ ꦑꦺꦴ ꦏꦺꦕꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦄꦛ꧀ꦜꦏꦡꦴꦪꦁ ꦥꦤ ‘‘ꦪꦺ ꦕ ꦑꦺꦴ ꦏꦺꦕꦷꦠꦶꦄꦴꦢꦶꦤꦴ ꦱꦩ꧀ꦩꦴꦢꦶꦛ꧀ꦜꦶꦄꦴꦢꦶꦩꦸꦑꦺꦤꦺꦮ ꦩꦶꦕ꧀ꦖꦴꦢꦶꦛ꧀ꦜꦶꦄꦴꦢꦷꦲꦶ ꦌꦮ ꦥꦫꦶꦮꦠ꧀ꦠꦤꦁ ꦥꦏꦴꦫꦤ꧀ꦠꦫꦺꦤ ꦢꦱ꧀ꦱꦺꦠꦷ’’ꦠꦶ (ꦤꦺꦠ꧀ꦠꦶ. ꦄꦛ꧀ꦜ. ꧓꧖) ꦮꦸꦠ꧀ꦠꦁ. ꦠꦠ꧀ꦡ ꦏꦺꦕꦶ ꦩꦶꦕ꧀ꦖꦴꦢꦶꦛ꧀ꦜꦶꦏꦩꦶꦕ꧀ꦖꦴꦱꦔ꧀ꦏꦥ꧀ꦥꦴꦢꦶꦏꦴꦪꦺꦮ ꦥꦸꦒ꧀ꦒꦭꦴ ꦥꦫꦺꦱꦁ ꦄꦫꦶꦪꦴꦤꦁ ꦄꦫꦶꦪꦁ ꦄꦛ꧀ꦜꦔ꧀ꦒꦶꦏꦁ ꦩꦒ꧀ꦒꦁ ꦒꦫꦲꦤ꧀ꦠꦶ. ꦱꦤ꧀ꦢꦶꦛ꧀ꦜꦶꦏꦴ ꦱꦤ꧀ꦢꦶꦛ꧀ꦜꦺ ꦤꦶꦪꦸꦠ꧀ꦠꦴ, ꦱꦲꦣꦩ꧀ꦩꦶꦏꦴ ꦱꦲ ꦣꦩ꧀ꦩꦺꦤ ꦏꦴꦫꦟꦺꦤ ꦪꦺ ꦮꦠ꧀ꦠꦤ꧀ꦠꦶ ꦱꦲꦣꦩ꧀ꦩꦶꦏꦴ. ꦒꦴꦫꦪ꧀ꦲꦴ ꦒꦫꦲꦶꦠꦧ꧀ꦧꦴꦏꦴꦫꦺ ꦪꦸꦠ꧀ꦠꦴ. ꦮꦴꦢꦴ ꦕ ꦄꦤꦸꦮꦴꦢꦴ ꦕ ꦮꦴꦢꦴꦤꦸꦮꦴꦢꦴ, ꦠꦺ ꦨꦮꦤ꧀ꦠꦺꦴ ꦱꦩ꧀ꦩꦴꦢꦶꦛ꧀ꦜꦶꦚ꧀ꦕ ꦣꦩ꧀ꦩꦁ ꦒꦫꦲꦤ꧀ꦠꦶ. ꦠꦺꦤ ꦒꦫꦲꦟꦺꦤ. ꦥꦸꦗ꧀ꦗꦴ ꦥꦹꦗꦶꦠꦧ꧀ꦧꦴ ꦕ ꦤ ꦨꦮꦤ꧀ꦠꦶ, ꦥꦴꦱꦁꦱꦴ ꦥꦱꦁꦱꦶꦠꦧ꧀ꦧꦴ ꦕ ꦤ ꦨꦮꦤ꧀ꦠꦶ. ꦌꦮꦤ꧀ꦠꦶꦄꦴꦢꦷꦱꦸ ꦱꦩ꧀ꦩꦴꦱꦔ꧀ꦏꦥ꧀ꦥꦁ ꦮꦴ ꦱꦩ꧀ꦩꦴꦮꦴꦕꦴꦢꦶꦏꦁ ꦮꦴ ꦮꦶꦱꦸꦁ ꦮꦶꦱꦸꦁ ꦱꦩ꧀ꦩꦴꦱꦔ꧀ꦏꦥ꧀ꦥꦚ꧀ꦕ ꦠꦺ ꦨꦮꦤ꧀ꦠꦺꦴ ꦣꦩ꧀ꦩꦁ ꦒꦫꦲꦤ꧀ꦠꦶ. ꦠꦺꦤ ꦲꦶ ꦪꦺ ꦩꦶꦕ꧀ꦖꦴꦱꦔ꧀ꦏꦥ꧀ꦥꦶꦏꦴ, ꦠꦺ ꦨꦮꦤ꧀ꦠꦺꦴ ꦤ ꦥꦸꦗ꧀ꦗꦴ ꦕ ꦥꦴꦱꦁꦱꦴ ꦕ…ꦥꦺ… ꦱꦩ꧀ꦩꦴꦮꦶꦩꦸꦠ꧀ꦠꦶꦚ꧀ꦕ ꦠꦺ ꦨꦮꦤ꧀ꦠꦺꦴ ꦣꦩ꧀ꦩꦁ ꦒꦫꦲꦤ꧀ꦠꦶ. ꦠꦺꦤ ꦲꦶ ꦪꦺ ꦩꦶꦕ꧀ꦖꦴꦢꦶꦛ꧀ꦜꦶꦮꦴꦕꦶꦏꦴ, ꦠꦺ ꦨꦮꦤ꧀ꦠꦺꦴ ꦤ ꦥꦸꦗ꧀ꦗꦴ ꦕ ꦥꦴꦱꦁꦱꦴ ꦕ. ꦱꦩ꧀ꦩꦴꦮꦶꦩꦸꦠ꧀ꦠꦶꦚꦴꦟꦢꦱ꧀ꦱꦤꦚ꧀ꦕ ꦠꦺ ꦨꦮꦤ꧀ꦠꦺꦴ ꦣꦩ꧀ꦩꦁ ꦒꦫꦲꦤ꧀ꦠꦶ. ꦠꦺꦤ ꦲꦶ ꦪꦺ ꦩꦶꦕ꧀ꦖꦴꦮꦶꦩꦸꦠ꧀ꦠꦶꦏꦴ, ꦠꦺ ꦨꦮꦤ꧀ꦠꦺꦴ ꦤ ꦥꦸꦗ꧀ꦗꦴ ꦕ ꦥꦴꦱꦁꦱꦴ ꦕ. ꦱꦩ꧀ꦩꦴꦮꦶꦩꦸꦠ꧀ꦠꦶꦚꦴꦟꦢꦱ꧀ꦱꦤꦚ꧀ꦕ ꦠꦺ ꦨꦮꦤ꧀ꦠꦺꦴ ꦣꦩ꧀ꦩꦁ ꦒꦫꦲꦤ꧀ꦠꦶ. ꦠꦺꦤ ꦲꦶ ꦪꦺ ꦩꦶꦕ꧀ꦖꦴꦮꦶꦩꦸꦠ꧀ꦠꦶꦚꦴꦟꦢꦱ꧀ꦱꦤꦶꦏꦴ, ꦠꦺ ꦨꦮꦤ꧀ꦠꦺꦴ ꦤ ꦥꦸꦗ꧀ꦗꦴ ꦕ ꦥꦴꦱꦁꦱꦴ ꦕꦴꦠꦶ ꦪꦺꦴꦗꦤꦴ ꦏꦴꦠꦧ꧀ꦧꦴ. ‘‘ꦩꦶꦕ꧀ꦖꦴꦮꦶꦩꦸꦠ꧀ꦠꦶꦚꦴꦟꦢꦱ꧀ꦱꦤꦴ’’ꦠꦶꦥꦶ ꦥꦴꦜꦺꦴ ꦄꦠ꧀ꦡꦶ.

‘‘ꦄꦫꦶꦪꦩꦒ꧀ꦒꦱꦩ꧀ꦩꦴꦢꦶꦛ꧀ꦜꦴꦢꦷꦤꦁ ꦒꦫꦲꦮꦱꦺꦤꦺꦮ ꦩꦶꦕ꧀ꦖꦴꦢꦶꦛ꧀ꦜꦴꦢꦪꦺꦴ ꦕ ꦥꦫꦶꦮꦠ꧀ꦠꦺꦠꦧ꧀ꦧꦴ, ꦤꦴꦮꦱꦺꦱꦴꦤꦁ ꦥꦱꦁꦱꦴꦮꦱꦺꦤꦴ’’ꦠꦶ ꦮꦠ꧀ꦠꦧ꧀ꦧꦠ꧀ꦠꦴ ꦏꦴꦩꦴꦢꦷꦤꦁ ꦥꦱꦁꦱꦴꦮꦱꦺꦤꦥꦶ ꦏꦴꦩꦴꦤꦁ ꦥꦛꦶꦥꦏ꧀ꦑꦴ ꦮꦺꦫꦩꦟꦶꦪꦴꦢꦪꦺꦴꦥꦶ ꦥꦫꦶꦮꦠ꧀ꦠꦺꦠꦧ꧀ꦧꦴꦠꦶ ꦢꦱ꧀ꦱꦺꦠꦸꦁ ‘‘ꦪꦺ ꦕ ꦑꦺꦴ ꦏꦺꦕꦶ ꦌꦮꦩꦴꦲꦁꦱꦹ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦨꦸꦚ꧀ꦗꦶꦠꦧ꧀ꦧꦴ ꦏꦴꦩꦴ, ꦥꦫꦶꦨꦸꦚ꧀ꦗꦶꦠꦧ꧀ꦧꦴ ꦏꦴꦩꦴ, ꦄꦴꦱꦺꦮꦶꦠꦧ꧀ꦧꦴ ꦏꦴꦩꦴ, ꦤꦶꦱꦺꦮꦶꦠꦧ꧀ꦧꦴ ꦏꦴꦩꦴꦠꦶ ꦌꦠ꧀ꦡ ꦏꦴꦩꦷꦪꦤ꧀ꦠꦺꦠꦶ ꦏꦴꦩꦴꦠꦶ ꦏꦩ꧀ꦩꦱꦴꦣꦤꦮꦱꦺꦤ ꦮꦠ꧀ꦡꦸꦏꦴꦩꦴ ꦒꦲꦶꦠꦴ, ꦤꦴꦠꦶꦥꦟꦷꦠꦴ ꦏꦴꦩꦴ ꦨꦸꦚ꧀ꦗꦶꦠꦧ꧀ꦧꦴ, ꦄꦠꦶꦥꦟꦷꦠꦴ ꦏꦴꦩꦴ ꦥꦫꦶ ꦱꦩꦤ꧀ꦠꦠꦺꦴ ꦨꦸꦚ꧀ꦗꦶꦠꦧ꧀ꦧꦴ. ꦄꦠꦶꦥꦟꦷꦠꦠꦫꦴ ꦏꦴꦩꦴ ꦄꦴ ꦨꦸꦱꦺꦴ ꦱꦺꦮꦶꦠꦧ꧀ꦧꦴ, ꦤꦶꦪꦠꦴ ꦱꦺꦮꦶꦠꦧ꧀ꦧꦴ. ꦨꦴꦮꦪꦶꦠꦧ꧀ꦧꦴ ꦏꦴꦩꦴ, ꦧꦲꦸꦭꦷꦏꦴꦠꦧ꧀ꦧꦴ ꦏꦴꦩꦴꦠꦶ ꦌꦠ꧀ꦡ ꦥꦤ ꦏꦴꦩꦺꦤ꧀ꦠꦷꦠꦶ ꦏꦴꦩꦴꦠꦶ ꦏꦠ꧀ꦠꦸꦱꦴꦣꦤꦮꦱꦺꦤ ꦏꦶꦭꦺꦱꦏꦴꦩꦴ ꦒꦲꦶꦠꦴ, ꦥꦸꦤꦥ꧀ꦥꦸꦤꦁ ꦈꦥ꧀ꦥꦴꦢꦤꦮꦱꦺꦤ ꦨꦴꦮꦪꦶꦠꦧ꧀ꦧꦴ ꦮꦝ꧀ꦞꦴꦥꦺꦠꦧ꧀ꦧꦴ ꦥꦮꦠ꧀ꦠꦺꦠꦧ꧀ꦧꦴ ꦏꦶꦭꦺꦱꦏꦴꦩꦴ, ꦧꦲꦹꦤꦁ ꦥꦸꦤꦥ꧀ꦥꦸꦤꦁ ꦈꦥ꧀ꦥꦴꦢꦤꦮꦱꦺꦤ ꦏꦴꦠꦧ꧀ꦧꦴ ꦮꦝ꧀ꦞꦴꦥꦺꦠꦧ꧀ꦧꦴ ꦏꦶꦭꦺꦱꦏꦴꦩꦴꦠꦶ ꦪꦺ ꦕ ꦏꦴꦩꦮꦱꦶꦏꦴ ꦥꦸꦡꦸꦗ꧀ꦗꦤꦴ ꦏꦺꦕꦶ ꦌꦮꦩꦴꦲꦁꦱꦸ ꦠꦺꦱꦁ ꦏꦴꦩꦮꦱꦶꦏꦴꦤꦁ ꦥꦸꦡꦸꦗ꧀ꦗꦤꦴꦤꦁ ꦏꦺꦱꦚ꧀ꦕꦶ ꦠꦴꦢꦶꦱꦺꦲꦶ ꦏꦴꦩꦺꦲꦶ ꦮꦺꦫꦩꦟꦷ ꦏꦸꦱꦭꦕꦺꦠꦤꦴ ꦥꦛꦶꦥꦏ꧀ꦑꦮꦱꦺꦤ ꦄꦣꦩ꧀ꦩꦺꦴ ꦄꦱꦺꦮꦶꦠꦧ꧀ꦧꦺꦴ ꦤꦴꦩ ꦄꦴꦥꦗ꧀ꦗꦺꦪ꧀ꦪꦴꦠꦶ ꦄꦣꦶꦥ꧀ꦥꦴꦪꦺꦴ ꦒꦲꦺꦠꦧ꧀ꦧꦺꦴ.

ꦄꦤ꧀ꦠꦢ꧀ꦮꦪꦮꦱꦺꦤ ꦥꦫꦶꦮꦠ꧀ꦠꦤꦁ ꦢꦱ꧀ꦱꦺꦠꦸꦁ ‘‘ꦪꦺ ꦮꦴ ꦥꦤ ꦏꦺꦕꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦄꦠ꧀ꦠꦏꦶꦭꦩꦡꦴꦤꦸꦪꦺꦴꦒꦺꦴ ꦣꦩ꧀ꦩꦺꦴꦠꦶ ꦤꦶꦪ꧀ꦪꦴꦤꦶꦏꦺꦴꦠꦶ ꦪꦺ ꦮꦴ ꦥꦤ ꦥꦚ꧀ꦕꦴꦠꦥꦴꦢꦶꦥꦛꦶꦥꦤ꧀ꦤꦏꦴ ꦠꦠ꧀ꦡꦶꦪꦴ ꦌꦮꦩꦴꦲꦁꦱꦸ, ꦠꦺꦱꦁ ꦥꦚ꧀ꦕꦴꦠꦥꦴꦢꦶꦥꦛꦶꦥꦤ꧀ꦤꦏꦴꦤꦁ ꦤꦶꦪ꧀ꦪꦴꦤꦶꦏꦺꦴ ꦣꦩ꧀ꦩꦺꦴ ꦩꦗ꧀ꦙꦶꦩꦴꦥꦛꦶꦥꦢꦴꦱꦔ꧀ꦑꦴꦠꦺꦴ ꦮꦶꦥꦱ꧀ꦱꦤꦴꦱꦲꦶꦠꦺꦴ ꦄꦫꦶꦪꦩꦒ꧀ꦒꦺꦴ ꦄꦣꦩ꧀ꦩꦺꦴ ꦄꦤꦶꦪ꧀ꦪꦴꦤꦶꦏꦺꦴ ꦄꦨꦴꦮꦺꦠꦧ꧀ꦧꦺꦴ ꦤꦴꦩ ꦄꦴꦥꦗ꧀ꦗꦺꦪ꧀ꦪꦴꦠꦶ. ꦱꦸꦑꦢꦸꦏ꧀ꦑꦮꦱꦺꦤꦥꦶ ꦥꦫꦶꦮꦠ꧀ꦠꦤꦁ ꦢꦱ꧀ꦱꦺꦠꦸꦁ ‘‘ꦪꦺ ꦕ ꦑꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ‘‘ꦥꦴꦥꦁ ꦤꦶꦗ꧀ꦗꦫꦴꦥꦺꦱ꧀ꦱꦴꦩꦴ’’ꦠꦶ ꦄꦠ꧀ꦠꦲꦶꦁꦱꦤꦴꦢꦶꦮꦱꦺꦤ ꦥꦛꦶꦥꦤ꧀ꦤꦏꦴꦤꦁ ꦥꦮꦠ꧀ꦠꦺꦴ ꦱꦫꦷꦫꦠꦴꦥꦤꦺꦴ ꦢꦸꦏ꧀ꦑꦺꦴ ꦣꦩ꧀ꦩꦺꦴ ꦤꦶꦪ꧀ꦪꦴꦤꦶꦏꦺꦴꦠꦶ.

ꦪꦺ ꦕ ꦠꦡꦴꦥꦛꦶꦥꦤ꧀ꦤꦏꦴ ꦏꦺꦕꦶ ꦌꦮꦩꦴꦲꦁꦱꦸ, ꦠꦺꦱꦁ ꦠꦡꦴꦥꦛꦶꦥꦤ꧀ꦤꦏꦴꦤꦁ ꦄꦤꦮꦗ꧀ꦗꦥꦕ꧀ꦕꦪꦥꦫꦶꦨꦺꦴꦒꦮꦱꦺꦤ ꦥꦮꦠ꧀ꦠꦺꦴ ꦱꦫꦷꦫꦢꦸꦏ꧀ꦑꦹꦥꦱꦩꦺꦴ ꦱꦸꦑꦺꦴ ꦣꦩ꧀ꦩꦺꦴ ꦄꦣꦩ꧀ꦩꦺꦴ ꦄꦥ꧀ꦥꦮꦠ꧀ꦠꦺꦠꦧ꧀ꦧꦺꦴ ꦄꦴꦥꦗ꧀ꦗꦺꦪ꧀ꦪꦴꦠꦶ.

ꦄꦤ꧀ꦠꦢ꧀ꦮꦪꦴꦢꦶꦮꦱꦺꦤ ꦥꦫꦶꦮꦠ꧀ꦠꦤꦁ ꦄꦴꦕꦫꦶꦪꦺꦤ ꦮꦶꦨꦠ꧀ꦠꦁ, ꦄꦩ꧀ꦲꦺꦲꦶ ꦕ ꦚꦴꦠꦁ, ‘‘ꦏꦡꦁ ꦄꦱꦸꦨꦱꦚ꧀ꦚꦴꦢꦶꦮꦱꦺꦤ ꦥꦫꦶꦮꦠ꧀ꦠꦺꦠꦧ꧀ꦧꦺꦴ’’ꦠꦶ ꦥꦸꦕ꧀ꦖꦶꦠꦧ꧀ꦧꦠ꧀ꦠꦴ ꦌꦮꦁ ꦄꦱꦸꦨꦱꦚ꧀ꦚꦴꦢꦶꦮꦱꦺꦤ ꦱꦸꦨꦱꦚ꧀ꦚꦴꦢꦶꦏꦴ ꦥꦫꦶꦮꦠ꧀ꦠꦺꦠꦧ꧀ꦧꦴꦠꦶ ꦢꦱ꧀ꦱꦺꦠꦸꦁ ‘‘ꦪꦡꦴ ꦮꦴ ꦥꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦄꦛ꧀ꦜꦏꦡꦴꦪꦁ ꦥꦤ ‘‘ꦆꦢꦴꦤꦶ ꦄꦱꦸꦨꦱꦚ꧀ꦚꦴꦢꦶꦩꦸꦑꦺꦤ ꦱꦸꦨꦱꦚ꧀ꦚꦴꦢꦶꦥꦫꦶꦮꦠ꧀ꦠꦤꦁ ꦢꦱ꧀ꦱꦺꦠꦸꦁ ‘ꦪꦡꦴ ꦮꦴ ꦥꦤꦴ’ꦠꦶꦄꦴꦢꦶ ꦮꦸꦠ꧀ꦠ’’ꦤ꧀ꦠꦶ (ꦤꦺꦠ꧀ꦠꦶ. ꦄꦛ꧀ꦜ. ꧓꧖) ꦮꦸꦠ꧀ꦠꦁ. ꦱꦧ꧀ꦧꦱꦔ꧀ꦑꦴꦫꦺꦱꦹꦠꦶ ꦠꦺꦨꦹꦩꦏꦱꦔ꧀ꦑꦴꦫꦺꦱꦸ. ꦄꦴꦫꦢ꧀ꦣꦮꦶꦥꦱ꧀ꦱꦏꦱ꧀ꦱ ꦲꦶ ꦠꦺꦨꦹꦩꦏꦴ ꦣꦩ꧀ꦩꦴ ꦏꦶꦭꦺꦱꦴꦱꦸꦕꦶꦥꦒ꧀ꦓꦫꦟꦏꦠ꧀ꦠꦴ ꦄꦱꦸꦨꦠꦺꦴ ꦈꦥꦛ꧀ꦜꦲꦤ꧀ꦠꦶ.

‘‘ꦪꦢꦶ ꦱꦫꦹꦥꦠꦺꦴꦪꦺꦮ ꦆꦩꦺꦱꦁ ꦆꦩꦺ ꦥꦛꦶꦥꦏ꧀ꦑꦴꦠꦶ ꦄꦥꦫꦶꦮꦠ꧀ꦠꦺꦠꦧ꧀ꦧꦴ ꦱꦶꦪꦸꦁ, ꦌꦮꦁ ꦱꦠꦶ ꦤꦶꦫꦮꦱꦺꦱꦴ ꦕ ꦥꦛꦶꦥꦏ꧀ꦑꦴ ꦤ ꦱꦏ꧀ꦏꦴ ꦥꦫꦶꦮꦠ꧀ꦠꦺꦠꦸꦁ, ꦏꦡꦁ ꦱꦏ꧀ꦏꦴ ꦥꦫꦶꦮꦠ꧀ꦠꦺꦠꦸ’’ꦤ꧀ꦠꦶ ꦮꦠ꧀ꦠꦧ꧀ꦧꦠ꧀ꦠꦴ ꦥꦫꦶꦮꦠ꧀ꦠꦤꦭꦏ꧀ꦑꦟꦁ ꦢꦱ꧀ꦱꦺꦤ꧀ꦠꦺꦴ ‘‘ꦪꦁ ꦪꦁ ꦮꦴ ꦥꦤꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦏꦸꦱꦭꦁ ꦮꦴ ꦄꦏꦸꦱꦭꦁ ꦮꦴ ꦪꦁ ꦪꦁ ꦣꦩ꧀ꦩꦁ ꦥꦫꦶꦮꦠ꧀ꦠꦺꦠꦸꦏꦴꦩꦺꦴ ꦄꦴꦕꦫꦶꦪꦺꦴ ꦕꦶꦠ꧀ꦠꦺꦤ ꦫꦺꦴꦕꦪꦠꦶ ꦢꦶꦛ꧀ꦜꦶꦪꦴ ꦈꦥꦒꦕ꧀ꦖꦠꦶ, ꦏꦸꦱꦭꦱ꧀ꦱ ꦮꦴ ꦄꦏꦸꦱꦭꦱ꧀ꦱ ꦮꦴ ꦠꦱ꧀ꦱ ꦠꦱ꧀ꦱ ꦫꦸꦕꦶꦏꦱ꧀ꦱ ꦈꦥꦒꦠꦱ꧀ꦱ ꦣꦩ꧀ꦩꦱ꧀ꦱ ꦪꦺꦴ ꦥꦛꦶꦥꦏ꧀ꦑꦺꦴ, ꦱꦺꦴ ꦥꦛꦶꦥꦏ꧀ꦑꦣꦩ꧀ꦩꦺꦴ ꦄꦱꦢ꧀ꦣꦩ꧀ꦩꦺꦴ ꦄꦱ꧀ꦱ ꦣꦩ꧀ꦩꦱ꧀ꦱ ꦄꦤꦶꦛ꧀ꦜꦠꦺꦴ ꦥꦕ꧀ꦕꦤꦷꦏꦠꦺꦴ ꦄꦗ꧀ꦙꦴꦥꦤ꧀ꦤꦺꦴ ꦥꦫꦶꦚ꧀ꦚꦴꦠꦺꦴ. ꦆꦛ꧀ꦜꦁ ꦮꦴ ꦄꦤꦶꦛ꧀ꦜꦁ ꦮꦴ ꦪꦁ ꦪꦁ ꦣꦩ꧀ꦩꦁ ꦥꦫꦶꦮꦠ꧀ꦠꦺꦠꦸꦏꦴꦩꦺꦴ ꦄꦴꦕꦫꦶꦪꦺꦴ ꦕꦶꦠ꧀ꦠꦺꦤ ꦫꦺꦴꦕꦪꦠꦶ ꦢꦶꦛ꧀ꦜꦶꦪꦴ ꦈꦥꦒꦕ꧀ꦖꦠꦶ, ꦆꦛ꧀ꦜꦱ꧀ꦱ ꦮꦴ ꦄꦤꦶꦛ꧀ꦜꦱ꧀ꦱ ꦮꦴ ꦠꦱ꧀ꦱ ꦠꦱ꧀ꦱ ꦫꦸꦕꦶꦏꦱ꧀ꦱ ꦣꦩ꧀ꦩꦱ꧀ꦱ ꦪꦺꦴ ꦥꦛꦶꦥꦏ꧀ꦑꦺꦴ, ꦱꦺꦴ ꦥꦛꦶꦥꦏ꧀ꦑꦣꦩ꧀ꦩꦺꦴ ꦄꦱ꧀ꦱ ꦣꦩ꧀ꦩꦱ꧀ꦱ ꦄꦤꦶꦛ꧀ꦜꦠꦺꦴ ꦥꦕ꧀ꦕꦤꦷꦏꦣꦩ꧀ꦩꦠꦺꦴ ꦄꦗ꧀ꦙꦴꦥꦤ꧀ꦤꦺꦴ ꦥꦫꦶꦚ꧀ꦚꦴꦠꦺꦴ ꦨꦮꦠꦷꦠꦶ ꦥꦫꦶꦮꦠ꧀ꦠꦺꦠꦸꦏꦴꦩꦺꦤ ꦆꦕ꧀ꦖꦶꦠꦧ꧀ꦧꦣꦩ꧀ꦩꦴꦤꦸꦫꦹꦥꦥꦛꦶꦥꦏ꧀ꦑꦮꦱꦺꦤ ꦥꦫꦶꦮꦠ꧀ꦠꦤꦁ ꦏꦴꦠꦧ꧀ꦧꦤ꧀ꦠꦶ ꦥꦫꦶꦮꦠ꧀ꦠꦤꦺ ꦥꦛꦶꦥꦏ꧀ꦑꦭꦏ꧀ꦑꦟꦁ ꦮꦸꦠ꧀ꦠꦁ. ꦠꦺꦤ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦁ – ‘‘ꦥꦛꦶꦥꦏ꧀ꦑꦱ꧀ꦱ ꦭꦏ꧀ꦑꦟꦁ ꦮꦶꦨꦴꦮꦺꦠꦷ’’ꦠꦶ.

‘‘ꦌꦮꦁ ꦮꦸꦠ꧀ꦠꦥ꧀ꦥꦏꦴꦫꦁ ꦥꦫꦶꦮꦠ꧀ꦠꦤꦁ ꦄꦩ꧀ꦲꦺꦲꦶ ꦏꦡꦁ ꦱꦢ꧀ꦢꦲꦶꦠꦧ꧀ꦧ’’ꦤ꧀ꦠꦶ ꦮꦠ꧀ꦠꦧ꧀ꦧꦠꦴ ‘‘ꦠꦺꦤꦴꦲꦴ’’ꦠꦶꦄꦴꦢꦶ ꦮꦸꦠ꧀ꦠꦁ.

‘‘ꦌꦠ꧀ꦠꦴꦮꦠꦴ ꦥꦫꦶꦮꦠ꧀ꦠꦺꦴ ꦲꦴꦫꦺꦴ ꦥꦫꦶꦥꦸꦟ꧀ꦟꦺꦴ, ꦄꦚ꧀ꦚꦺꦴ ꦤꦶꦪꦸꦠ꧀ꦠꦺꦴ ꦤꦠ꧀ꦡꦷ’’ꦠꦶ ꦮꦠ꧀ꦠꦧ꧀ꦧꦠ꧀ꦠꦴ ‘‘ꦤꦶꦪꦸꦠ꧀ꦠꦺꦴ ꦥꦫꦶꦮꦠ꧀ꦠꦤꦺꦴ ꦲꦴꦫꦺꦴ’’ꦠꦶ ꦮꦸꦠ꧀ꦠꦁ. ꦪꦱ꧀ꦩꦶꦁ ꦱꦸꦠ꧀ꦠꦺ ꦏꦸꦱꦭꦴꦏꦸꦱꦭꦺ ꦤꦶꦢ꧀ꦢꦶꦛ꧀ꦜꦺ ꦥꦛꦶꦥꦏ꧀ꦑꦮꦱꦺꦤ ꦤꦷꦲꦫꦶꦠ꧀ꦮꦴ ꦪꦡꦴꦱꦩ꧀ꦨꦮꦁ ꦪꦺꦴ ꦪꦺꦴ ꦥꦫꦶꦮꦠ꧀ꦠꦤꦺꦴ ꦲꦴꦫꦺꦴ ꦤꦶꦪꦸꦠ꧀ꦠꦺꦴ, ꦠꦱ꧀ꦩꦶꦁ ꦱꦸꦠ꧀ꦠꦺ ꦤꦶꦢ꧀ꦢꦶꦛ꧀ꦜꦺ ꦥꦛꦶꦥꦏ꧀ꦑꦮꦱꦺꦤ ꦤꦷꦲꦫꦶꦠ꧀ꦮꦴ ꦱꦺꦴ ꦱꦺꦴ ꦥꦫꦶꦮꦠ꧀ꦠꦤꦺꦴ ꦲꦴꦫꦺꦴ ꦤꦶꦪꦸꦠ꧀ꦠꦺꦴ ꦤꦶꦢ꧀ꦣꦴꦫꦺꦠ꧀ꦮꦴ ꦪꦸꦠ꧀ꦠꦺꦴ ꦪꦺꦴꦗꦶꦠꦺꦴꦠꦶ ꦄꦠ꧀ꦡꦺꦴ ꦒꦲꦺꦠꦧ꧀ꦧꦺꦴꦠꦶ.

ꦆꦠꦶ ꦥꦫꦶꦮꦠ꧀ꦠꦤꦲꦴꦫꦮꦶꦨꦔ꧀ꦒꦺ ꦱꦠ꧀ꦠꦶꦧꦭꦴꦤꦸꦫꦹꦥꦴ ꦫꦕꦶꦠꦴ

ꦮꦶꦨꦴꦮꦤꦴ ꦤꦶꦛ꧀ꦜꦶꦠꦴ.

ꦥꦟ꧀ꦝꦶꦠꦺꦲꦶ ꦥꦤ ꦄꦛ꧀ꦜꦏꦡꦴꦛꦷꦏꦴꦤꦸꦱꦴꦫꦺꦤ ꦒꦩ꧀ꦨꦷꦫꦠ꧀ꦡꦺꦴ ꦮꦶꦠ꧀ꦡꦴꦫꦠꦺꦴ ꦮꦶꦨꦗꦶꦠ꧀ꦮꦴ ꦒꦲꦺꦠꦧ꧀ꦧꦺꦴꦠꦶ.