꧖. ꦕꦠꦸꦧ꧀ꦪꦹꦲꦲꦴꦫꦱꦩ꧀ꦥꦴꦠꦮꦶꦨꦴꦮꦤꦴ

꧖꧘. ꦪꦺꦤ ꦪꦺꦤ ꦭꦏ꧀ꦑꦟꦲꦴꦫꦱꦩ꧀ꦥꦴꦠꦺꦤ ꦱꦸꦠ꧀ꦠꦥ꧀ꦥꦢꦺꦱꦠ꧀ꦡꦴ ꦱꦩꦴꦤꦭꦏ꧀ꦑꦟꦺꦤ ꦒꦲꦶꦠꦴ, ꦱꦺꦴ ꦭꦏ꧀ꦑꦟꦲꦴꦫꦱꦩ꧀ꦥꦴꦠꦺꦴ ꦥꦫꦶꦥꦸꦟ꧀ꦟꦺꦴ, ‘‘ꦏꦠꦩꦺꦴ ꦕꦠꦸꦧ꧀ꦪꦹꦲꦲꦴꦫꦱꦩ꧀ꦥꦴꦠꦺꦴ’’ꦠꦶ ꦥꦸꦕ꧀ꦖꦶꦠꦧ꧀ꦧꦠ꧀ꦠꦴ ‘‘ꦠꦠ꧀ꦡ ꦏꦠꦩꦺꦴ ꦕꦠꦸꦧ꧀ꦪꦹꦲꦺꦴ ꦲꦴꦫꦱꦩ꧀ꦥꦴꦠꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦠꦺꦱꦸ ꦢꦺꦱꦤꦴꦲꦴꦫꦱꦩ꧀ꦥꦴꦠꦴꦢꦷꦱꦸ ꦱꦺꦴꦭ꦳ꦱꦱꦸ ꦲꦴꦫꦱꦩ꧀ꦥꦴꦠꦺꦱꦸ ꦏꦠꦩꦺꦴ ꦱꦁꦮꦟ꧀ꦟꦤꦴꦮꦶꦱꦺꦱꦺꦴ ꦕꦠꦸꦧ꧀ꦪꦹꦲꦲꦴꦫꦱꦩ꧀ꦥꦴꦠꦺꦴ ꦤꦴꦩꦴꦠꦶ ꦥꦸꦕ꧀ꦖꦠꦶ.

‘‘ꦏꦠꦩꦱ꧀ꦩꦶꦁ ꦱꦸꦠ꧀ꦠꦺ ꦏꦠꦩꦺ ꦤꦶꦫꦸꦠ꧀ꦪꦴꦣꦶꦥ꧀ꦥꦴꦪꦤꦶꦢꦴꦤꦥꦸꦧ꧀ꦧꦴꦥꦫꦴꦤꦸꦱꦤ꧀ꦣꦪꦺꦴ ꦤꦶꦢ꧀ꦣꦴꦫꦶꦠꦴ’’ꦠꦶ ꦥꦸꦕ꧀ꦖꦶꦠꦧ꧀ꦧꦠ꧀ꦠꦴ ‘‘ꦠꦱ꧀ꦩꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ‘‘ꦠꦱ꧀ꦩꦴ ꦫꦏ꧀ꦑꦶꦠꦕꦶꦠ꧀ꦠꦱ꧀ꦱꦴ’’ꦠꦶ ꦱꦸꦠ꧀ꦠꦥ꧀ꦥꦢꦺꦱꦺ ‘‘ꦫꦏ꧀ꦑꦷꦪꦠꦺ ꦫꦏ꧀ꦑꦶꦠ’’ꦤ꧀ꦠꦶ ꦤꦶꦫꦸꦠ꧀ꦠꦶꦁ ‘‘ꦥꦫꦶꦥꦴꦭꦷꦪꦠꦷ’’ꦠꦶ ꦆꦩꦶꦤꦴ ꦥꦫꦶꦪꦴꦪꦺꦤ ꦢꦱ꧀ꦱꦺꦠꦶ, ꦆꦠꦶꦱꦢ꧀ꦢꦱ꧀ꦱ ꦄꦴꦢ꧀ꦪꦠ꧀ꦡꦠ꧀ꦠꦴ ‘‘ꦕꦶꦤ꧀ꦠꦺꦠꦷꦠꦶ ꦕꦶꦠ꧀ꦠꦁ, ꦄꦠ꧀ꦠꦤꦺꦴ ꦱꦤ꧀ꦠꦴꦤꦁ ꦕꦶꦤꦺꦴꦠꦷꦠꦶ ꦕꦶꦠ꧀ꦠꦁ, ꦥꦕ꧀ꦕꦪꦺꦲꦶ ꦕꦶꦠꦤ꧀ꦠꦶ ꦕꦶꦠ꧀ꦠꦁ, ꦕꦶꦠ꧀ꦠꦮꦶꦕꦶꦠ꧀ꦠꦛ꧀ꦜꦺꦤ ꦕꦶꦠ꧀ꦠꦁ, ꦕꦶꦠ꧀ꦠꦏꦫꦟꦛ꧀ꦜꦺꦤ ꦕꦶꦠ꧀ꦠꦁ, ꦫꦏ꧀ꦑꦶꦠꦁ ꦕꦶꦠ꧀ꦠꦁ ꦪꦱ꧀ꦱꦴꦠꦶ ꦫꦏ꧀ꦑꦶꦠꦕꦶꦠ꧀ꦠꦺꦴ. ꦱꦩ꧀ꦩꦴ ꦱꦔ꧀ꦏꦥ꧀ꦥꦺꦠꦷꦠꦶ ꦱꦩ꧀ꦩꦴꦱꦔ꧀ꦏꦥ꧀ꦥꦺꦴ, ꦒꦴꦮꦺꦴ ꦕꦫꦤ꧀ꦠꦶ ꦌꦠ꧀ꦡꦴꦠꦶ ꦒꦺꦴꦕꦫꦺꦴ, ꦒꦺꦴꦕꦫꦺꦴ ꦮꦶꦪꦴꦠꦶ ꦒꦺꦴꦕꦫꦺꦴ, ꦱꦩ꧀ꦩꦴꦱꦔ꧀ꦏꦥ꧀ꦥꦺꦴ ꦒꦺꦴꦕꦫꦺꦴ ꦄꦱ꧀ꦱꦴꦠꦶ ꦱꦩ꧀ꦩꦴꦱꦔ꧀ꦏꦥ꧀ꦥꦒꦺꦴꦕꦫꦺꦴ. ꦱꦩ꧀ꦩꦴ ꦥꦱ꧀ꦱꦠꦷꦠꦶ ꦱꦩ꧀ꦩꦴꦢꦶꦛ꧀ꦜꦶ, ꦱꦩ꧀ꦩꦴꦢꦶꦛ꧀ꦜꦶ ꦥꦸꦫꦺꦏ꧀ꦑꦴꦫꦺꦴ ꦄꦱ꧀ꦱꦴꦠꦶ ꦱꦩ꧀ꦩꦴꦢꦶꦛ꧀ꦜꦶꦥꦸꦫꦺꦏ꧀ꦑꦴꦫꦺꦴ. ꦗꦴꦤꦴꦠꦷꦠꦶ ꦚꦠ꧀ꦮꦴꦤ. ꦈꦢꦪꦺꦴ ꦕ ꦮꦪꦺꦴ ꦕ ꦈꦢꦪꦧ꧀ꦧꦪꦁ. ꦡꦶꦤꦚ꧀ꦕ ꦩꦶꦢ꧀ꦣꦚ꧀ꦕ ꦡꦶꦤꦩꦶꦢ꧀ꦣꦁ, ꦄꦨꦶꦨꦮꦠꦷꦠꦶ ꦄꦨꦶꦨꦹ, ꦡꦶꦤꦩꦶꦢ꧀ꦣꦁ ꦄꦨꦶꦨꦹꦠꦶ ꦡꦶꦤꦩꦶꦢ꧀ꦣꦴꦨꦶꦨꦹ. ꦨꦶꦏ꧀ꦑꦠꦷꦠꦶ ꦨꦶꦏ꧀ꦑꦹ’’ꦠꦶ ꦤꦶꦫꦸꦠ꧀ꦠꦶꦥꦶ ꦤꦷꦲꦫꦶꦠꦴ. ꦠꦺꦤꦴꦲ – ‘‘ꦆꦠꦶ-ꦱꦢ꧀ꦢꦺꦴ ꦄꦴꦢ꧀ꦪꦠ꧀ꦡꦺꦴ’’ꦠꦶ (ꦤꦺꦠ꧀ꦠꦶ. ꦄꦛ꧀ꦜ. ꧖꧘). ꦌꦱꦴ ꦮꦸꦠ꧀ꦠꦥ꧀ꦥꦏꦴꦫꦴ ꦥꦚ꧀ꦚꦠ꧀ꦠꦶ ꦤꦶꦫꦸꦠ꧀ꦠꦶ ꦤꦴꦩꦴꦠꦶ ꦤꦷꦲꦫꦶꦠꦴ.

ꦆꦣ ꦱꦸꦠ꧀ꦠꦥ꧀ꦥꦢꦺꦱꦺ ꦨꦒꦮꦠꦺꦴ ꦏꦺꦴ ꦄꦣꦶꦥ꧀ꦥꦴꦪꦺꦴꦠꦶ ꦕꦺ ꦥꦸꦕ꧀ꦖꦺꦪ꧀ꦪ, ꦪꦺ ꦱꦥ꧀ꦥꦸꦫꦶꦱꦴ ꦱꦧ꧀ꦧꦴꦲꦶ ꦢꦸꦒ꧀ꦒꦠꦷꦲꦶ ꦥꦫꦶꦩꦸꦕ꧀ꦕꦶꦠꦸꦏꦴꦩꦴ ꦨꦮꦶꦱ꧀ꦱꦤ꧀ꦠꦶ, ꦠꦺ ꦱꦥ꧀ꦥꦸꦫꦶꦱꦴ ꦣꦩ꧀ꦩꦕꦴꦫꦶꦤꦺꦴ ꦫꦏ꧀ꦑꦶꦠꦕꦶꦠ꧀ꦠꦴ ꦨꦮꦶꦱ꧀ꦱꦤ꧀ꦠꦷꦠꦶ ꦄꦪꦁ ꦄꦣꦶꦥ꧀ꦥꦴꦪꦺꦴ. ꦌꦠ꧀ꦡ ‘‘ꦠꦱ꧀ꦩꦴ ꦫꦏ꧀ꦑꦶꦠꦕꦶꦠ꧀ꦠꦱ꧀ꦱꦴ’’ꦠꦶꦄꦴꦢꦶꦱꦸꦠ꧀ꦠꦥ꧀ꦥꦢꦺꦱꦺ ꦨꦒꦮꦠꦺꦴ ꦄꦣꦶꦥ꧀ꦥꦴꦪꦺꦴꦠꦶ ꦤꦷꦲꦫꦶꦠꦧ꧀ꦧꦺꦴ.

‘‘ꦏꦠꦩꦁ ꦤꦶꦢꦴꦤ’’ꦤ꧀ꦠꦶ ꦕꦺ ꦥꦸꦕ꧀ꦖꦺꦪ꧀ꦪ, ꦏꦺꦴꦏꦴꦭꦶꦏꦺꦴ ꦱꦴꦫꦶꦥꦸꦠ꧀ꦠꦩꦺꦴꦒ꧀ꦒꦭ꧀ꦭꦴꦤꦺꦱꦸ ꦡꦺꦫꦺꦱꦸ ꦕꦶꦠ꧀ꦠꦁ ꦄꦫꦏ꧀ꦑꦶꦠ꧀ꦮꦴ ꦥꦢꦺꦴꦱꦪꦶꦠ꧀ꦮꦴ ꦩꦲꦴꦥꦢꦸꦩꦤꦶꦫꦪꦺ ꦪꦱ꧀ꦩꦴ ꦈꦥꦥꦤ꧀ꦤꦺꦴ, ꦪꦱ꧀ꦩꦴ ꦨꦒꦮꦴ ꦕ ꦱꦠꦶꦄꦴꦫꦏ꧀ꦑꦺꦤ ꦱꦩꦤ꧀ꦤꦴꦒꦠꦺꦴ ꦱꦧ꧀ꦧꦴ ꦢꦸꦒ꧀ꦒꦠꦶꦪꦺꦴ ꦗꦲꦠꦶ, ꦠꦱ꧀ꦩꦴ ꦕ ꦱꦧ꧀ꦧꦴ ꦢꦸꦒ꧀ꦒꦠꦶꦪꦺꦴ ꦗꦲꦶꦠꦸꦏꦴꦩꦺꦴ ꦨꦶꦏ꧀ꦑꦸ ꦱꦥ꧀ꦥꦸꦫꦶꦱꦺꦴ ꦫꦏ꧀ꦑꦶꦠꦕꦶꦠ꧀ꦠꦺꦴ ꦄꦱ꧀ꦱ ꦨꦮꦺꦪ꧀ꦪꦴꦠꦶ ꦤꦶꦢꦴꦤꦁ ꦤꦷꦲꦫꦶꦠꦧ꧀ꦧꦁ.

‘‘ꦏꦠꦩꦺꦴ ꦥꦸꦧ꧀ꦧꦴꦥꦫꦱꦤ꧀ꦣꦷ’’ꦠꦶ ꦕꦺ ꦥꦸꦕ꧀ꦖꦺꦪ꧀ꦪ, ꦱꦸꦠ꧀ꦠꦩ꧀ꦲꦶ ‘‘ꦱꦠꦶꦪꦴ ꦕꦶꦠ꧀ꦠꦁ ꦫꦏ꧀ꦑꦶꦠꦧ꧀ꦧ’’ꦤ꧀ꦠꦶ ꦪꦁ ꦮꦕꦤꦁ ꦮꦸꦠ꧀ꦠꦁ, ꦠꦺꦤ ꦥꦸꦧ꧀ꦧꦮꦕꦤꦺꦤ ꦄꦪꦁ ‘‘ꦠꦱ꧀ꦩꦴ ꦫꦏ꧀ꦑꦶꦠꦕꦶꦠ꧀ꦠꦱ꧀ꦱ…ꦥꦺ… ꦱꦧ꧀ꦧꦴ ꦢꦸꦒ꧀ꦒꦠꦶꦪꦺꦴ ꦗꦲꦺ’’ꦠꦶ ꦱꦸꦠ꧀ꦠꦥ꧀ꦥꦢꦺꦱꦺꦴ ꦄꦤꦸꦱꦤ꧀ꦣꦶ ꦱꦁꦱꦤ꧀ꦢꦠꦶ ꦱꦩꦺꦠꦷꦠꦶ ꦥꦸꦧ꧀ꦧꦥꦫꦴꦤꦸꦱꦤ꧀ꦣꦶ ꦤꦶꦢ꧀ꦣꦴꦫꦶꦠꦧ꧀ꦧꦺꦴꦠꦶ.

‘‘ꦌꦠ꧀ꦠꦏꦺꦴꦮ ꦕꦠꦸꦧ꧀ꦪꦹꦲꦲꦴꦫꦱꦩ꧀ꦥꦴꦠꦺꦴ ꦥꦫꦶꦥꦸꦟ꧀ꦟꦺꦴ’’ꦠꦶ ꦮꦠ꧀ꦠꦧ꧀ꦧꦠ꧀ꦠꦴ ‘‘ꦤꦶꦪꦸꦠ꧀ꦠꦺꦴ ꦕꦠꦸꦧ꧀ꦪꦹꦲꦺꦴ ꦲꦴꦫꦱꦩ꧀ꦥꦴꦠꦺꦴ’’ꦠꦶ ꦮꦸꦠ꧀ꦠꦁ. ꦪꦺꦤ ꦪꦺꦤ ꦱꦁꦮꦟ꧀ꦟꦤꦴꦮꦶꦱꦺꦱꦨꦹꦠꦺꦤ ꦕꦠꦸꦧ꧀ꦪꦹꦲꦲꦴꦫꦱꦩ꧀ꦥꦴꦠꦺꦤ ꦤꦶꦫꦸꦠ꧀ꦪꦴꦣꦶꦥ꧀ꦥꦴꦪꦤꦶꦢꦴꦤꦥꦸꦧ꧀ꦧꦴꦥꦫꦴꦤꦸꦱꦤ꧀ꦣꦶ ꦤꦶꦢ꧀ꦣꦴꦫꦶꦠꦧ꧀ꦧꦺꦴ, ꦱꦺꦴ ꦱꦺꦴ ꦱꦁꦮꦟ꧀ꦟꦤꦴꦮꦶꦱꦺꦱꦨꦹꦠꦺꦴ ꦕꦠꦸꦧ꧀ꦪꦹꦲꦲꦴꦫꦱꦩ꧀ꦥꦴꦠꦺꦴ ꦤꦶꦪꦸꦠ꧀ꦠꦺꦴ ꦪꦡꦴꦫꦲꦁ ꦤꦶꦢ꧀ꦣꦴꦫꦺꦠ꧀ꦮꦴ ꦪꦸꦗ꧀ꦗꦶꦠꦧ꧀ꦧꦺꦴꦠꦶ ꦄꦠ꧀ꦡꦺꦴ ꦒꦲꦺꦠꦧ꧀ꦧꦺꦴꦠꦶ.

ꦆꦠꦶ ꦕꦠꦸꦧ꧀ꦪꦹꦲꦲꦴꦫꦱꦩ꧀ꦥꦴꦠꦺ ꦱꦠ꧀ꦠꦶꦧꦭꦴꦤꦸꦫꦹꦥꦴ ꦫꦕꦶꦠꦴ

ꦮꦶꦨꦴꦮꦤꦴ ꦤꦶꦛ꧀ꦜꦶꦠꦴ.

ꦥꦟ꧀ꦝꦶꦠꦺꦲꦶ ꦥꦤ…ꦥꦺ… ꦒꦲꦺꦠꦧ꧀ꦧꦺꦴꦠꦶ.