꧑. ꦥꦛꦶꦕ꧀ꦕꦮꦴꦫꦮꦟ꧀ꦟꦤꦴ

꧑. ꦥꦕ꧀ꦕꦪꦴꦤꦸꦭꦺꦴꦩꦁ

(꧑) ꦮꦶꦨꦔ꧀ꦒꦮꦴꦫꦮꦟ꧀ꦟꦤꦴ

꧕꧓. ꦠꦶꦏꦥꦢꦴꦤꦁ ꦠꦶꦏꦤ꧀ꦠꦫꦥꦢꦺꦲꦶ ꦮꦶꦱꦢꦶꦱꦠꦴ ꦥꦴꦏꦛꦴꦪꦺꦮꦴꦠꦶ ꦮꦸꦠ꧀ꦠꦁ ‘‘ꦠꦶꦏꦥꦢꦤꦴꦤꦠ꧀ꦠꦩꦠ꧀ꦠꦺꦤ ꦮꦶꦤꦴ’’ꦠꦶ. ꦩꦹꦭꦴꦮꦱꦴꦤꦮꦱꦺꦤꦴꦠꦶ ‘‘ꦌꦏꦩꦹꦭꦺꦏꦴꦮꦱꦴꦤꦁ ꦤꦮꦴ’’ꦠꦶꦄꦴꦢꦶꦤꦴ ꦮꦸꦠ꧀ꦠꦩꦹꦭꦴꦮꦱꦴꦤꦮꦱꦺꦤ. ‘‘ꦤ ꦠꦴꦪꦺꦮ ꦮꦺꦢꦤꦴꦠ꧀ꦠꦶꦏꦴꦢꦷꦱꦹ’’ꦠꦶ ꦌꦠ꧀ꦡ ꦪꦴ ꦱꦢꦶꦱꦠꦴ ꦥꦛꦶꦏ꧀ꦑꦶꦠ꧀ꦠꦴ, ꦠꦁ ꦢꦱ꧀ꦱꦺꦠꦸꦁ ‘‘ꦱꦢꦶꦱꦠꦁ ꦱꦤ꧀ꦣꦴꦪ ‘ꦤ ꦠꦴꦪꦺꦮꦴ’ꦠꦶ ꦮꦸꦠ꧀ꦠ’’ꦤ꧀ꦠꦶ ꦄꦴꦲ. ꦪꦴꦠꦶ ꦪꦴ ꦥꦸꦕ꧀ꦖꦴ. ꦱꦧ꧀ꦧꦥꦸꦕ꧀ꦖꦴꦱꦩꦴꦲꦫꦟꦤ꧀ꦠꦶ ꦱꦧ꧀ꦧꦴꦱꦁ ꦌꦏꦹꦤꦥꦚ꧀ꦚꦴꦱꦴꦪ ꦥꦸꦕ꧀ꦖꦴꦤꦁ ꦱꦩꦸꦕ꧀ꦕꦪꦤꦁ ꦄꦤꦮꦱꦺꦱꦺꦠ꧀ꦮꦴ ꦏꦡꦤꦁ. ꦆꦣ ꦆꦩꦱ꧀ꦩꦶꦁ ꦥꦛꦶꦕ꧀ꦕꦮꦴꦫꦸꦢ꧀ꦢꦺꦱꦺ ꦏꦠ꧀ꦠꦧ꧀ꦧꦁ. ꦄꦴꦢꦶꦠꦺꦴ ꦲꦶ ꦄꦤꦮꦱꦺꦱꦠꦺꦴ ꦮꦸꦠ꧀ꦠꦺ ꦥꦕ꧀ꦖꦴ ꦪꦡꦴꦫꦲꦁ ꦠꦢꦺꦏꦢꦺꦱꦮꦕꦤꦁ ꦪꦸꦠ꧀ꦠꦁ. ꦤ ꦲꦶ ꦠꦠ꧀ꦡ ꦌꦏꦹꦤꦥꦚ꧀ꦚꦴꦱ ꦥꦸꦕ꧀ꦖꦴ ꦮꦶꦱ꧀ꦱꦗ꧀ꦗꦤꦁ ꦭꦨꦤ꧀ꦠꦷꦠꦶ ꦠꦠ꧀ꦡ ꦠꦱ꧀ꦩꦶꦁ ꦣꦩ꧀ꦩꦴꦤꦸꦭꦺꦴꦩꦥꦕ꧀ꦕꦤꦷꦪꦺ ꦥꦷꦠꦶꦠ꧀ꦠꦶꦏꦺ ꦌꦏꦹꦤꦥꦚ꧀ꦚꦴꦱ ꦥꦸꦕ꧀ꦖꦴ ꦮꦶꦱ꧀ꦱꦗ꧀ꦗꦤꦁ ꦤ ꦲꦶ ꦭꦨꦤ꧀ꦠꦶ, ꦄꦛ꧀ꦜꦮꦷꦱꦺ ꦥꦤ ꦭꦨꦤ꧀ꦠꦷꦠꦶ ꦄꦠ꧀ꦡꦺꦴ.

ꦠꦺꦤ ꦱꦲꦗꦴꦠꦥꦕ꧀ꦕꦪꦨꦹꦠꦺꦤꦴꦠꦶ ꦠꦺꦤ ꦮꦺꦢꦤꦴꦢꦶꦨꦺꦢꦺꦤ ꦌꦏꦺꦤ ꦣꦩ꧀ꦩꦺꦤ ꦱꦲꦗꦴꦠꦥꦕ꧀ꦕꦪꦺꦴ ꦲꦺꦴꦤ꧀ꦠꦺꦤ, ꦱꦲꦗꦴꦠꦥꦕ꧀ꦕꦪꦠꦁ ꦮꦴ ꦥꦠ꧀ꦠꦺꦤ ꦥꦴꦥꦸꦟꦤ꧀ꦠꦺꦤꦴꦠꦶ ꦄꦠ꧀ꦡꦺꦴ. ꦄꦤꦸꦚ꧀ꦚꦴꦠꦁ ꦮꦶꦪ ꦲꦺꦴꦠꦷꦠꦶ ꦪꦢꦶꦥꦶ ꦄꦛ꧀ꦜꦏꦡꦴꦪꦁ ‘‘ꦪꦴꦮ ꦤꦶꦫꦺꦴꦣꦒꦩꦤꦴ’’ꦠꦶꦄꦴꦢꦶꦮꦕꦤꦺꦲꦶ ꦑꦟꦠ꧀ꦠꦪꦱꦩꦔ꧀ꦒꦷ ꦈꦥ꧀ꦥꦗ꧀ꦗꦠꦷꦠꦶ ꦄꦤꦸꦚ꧀ꦚꦴꦠꦁ ꦮꦶꦪ ꦲꦺꦴꦠꦶ, ꦈꦥ꧀ꦥꦴꦢꦏ꧀ꦑꦟꦱꦩꦔ꧀ꦒꦷꦪꦺꦮ ꦥꦤ ꦈꦥ꧀ꦥꦗ꧀ꦗꦠꦷꦠꦶ ꦮꦸꦠ꧀ꦠꦺꦴ ꦥꦛꦶꦕ꧀ꦕꦮꦴꦫꦴꦢꦷꦤꦁ ꦖꦤ꧀ꦤꦁ ꦮꦴꦫꦴꦤꦁ ꦈꦥ꧀ꦥꦴꦢꦩꦺꦮ ꦒꦲꦺꦠ꧀ꦮꦴ ꦥꦮꦠ꧀ꦠꦠ꧀ꦠꦴ. ꦠꦡꦴ ꦲꦶ ꦠꦺꦱꦸ ꦥꦕ꧀ꦖꦴꦗꦴꦠꦥꦕ꧀ꦕꦪꦺꦴ ꦄꦤꦸꦭꦺꦴꦩꦠꦺꦴ ꦤ ꦠꦶꦛ꧀ꦜꦠꦶ.

ꦆꦣ ꦏꦸꦱꦭꦮꦕꦤꦺꦤ ꦒꦲꦶꦠꦺ ꦑꦤ꧀ꦣꦺ ꦱꦤ꧀ꦣꦴꦪ ꦮꦸꦠ꧀ꦠꦤ꧀ꦠꦶ ꦆꦩꦱ꧀ꦩꦶꦁ ꦥꦛꦶꦕ꧀ꦕꦮꦴꦫꦺ ‘‘ꦏꦸꦱꦭꦁ ꦣꦩ꧀ꦩꦁ ꦥꦛꦶꦕ꧀ꦕ ꦏꦸꦱꦭꦺꦴ ꦣꦩ꧀ꦩꦺꦴ ꦈꦥ꧀ꦥꦗ꧀ꦗꦠꦷ’’ꦠꦶ ꦏꦸꦱꦭꦱꦢ꧀ꦢꦺꦤ ꦒꦲꦶꦠꦺ ꦑꦤ꧀ꦣꦺ ꦱꦤ꧀ꦣꦴꦪ ꦮꦸꦠ꧀ꦠꦁ ꦕꦠꦹꦱꦸꦥꦶ ꦏꦸꦱꦭꦑꦤ꧀ꦣꦺꦱꦸ ꦌꦏꦠꦺꦴ ꦈꦥ꧀ꦥꦗ꧀ꦗꦩꦴꦤꦺꦱꦸ ꦱꦴꦩꦚ꧀ꦚꦠꦺꦴ ꦮꦸꦠ꧀ꦠꦺꦱꦸ ꦱꦲꦗꦴꦠꦴꦢꦶꦱꦴꦣꦴꦫꦟꦥꦕ꧀ꦕꦪꦮꦱꦺꦤ ꦄꦮꦶꦱꦺꦱꦠꦺꦴ ꦱꦧ꧀ꦧꦺ ꦱꦧ꧀ꦧꦺꦱꦁ ꦥꦕ꧀ꦕꦪꦴꦠꦶ ꦄꦪꦩꦺꦮ ꦆꦩꦱ꧀ꦱ ꦥꦕ꧀ꦕꦪꦺꦴ, ꦆꦩꦱ꧀ꦱꦺꦮ ꦄꦪꦁ ꦥꦕ꧀ꦕꦪꦺꦴꦠꦶ ꦕ ꦤꦶꦪꦩꦺꦠ꧀ꦮꦴ ꦮꦠ꧀ꦠꦸꦁ ꦤ ꦱꦏ꧀ꦏꦴ. ꦠꦺꦤ ꦮꦸꦠ꧀ꦠꦁ ꦄꦛ꧀ꦜꦏꦡꦴꦪꦁ ‘‘ꦌꦏꦱ꧀ꦱꦺꦮ ꦢ꧀ꦮꦶꦤ꧀ꦤꦁꦪꦺꦮ ꦮꦴ’’ꦠꦶꦄꦴꦢꦶ. ‘‘ꦱꦸꦑꦴꦪ ꦮꦺꦢꦤꦴꦪ ꦱꦩ꧀ꦥꦪꦸꦠ꧀ꦠꦁ ꦣꦩ꧀ꦩꦁ ꦥꦛꦶꦕ꧀ꦕꦴ’’ꦠꦶꦄꦴꦢꦷꦱꦸ ꦥꦤ ꦮꦶꦱꦺꦱꦤꦨꦴꦮꦺꦤ ꦮꦺꦢꦤꦴꦢꦷꦤꦁ ꦮꦶꦱꦸꦁ ꦒꦲꦶꦠꦠ꧀ꦠꦴ ‘‘ꦌꦏꦁ ꦑꦤ꧀ꦣꦁ ꦥꦛꦶꦕ꧀ꦕ ꦢ꧀ꦮꦺ ꦑꦤ꧀ꦣꦴ’’ꦠꦶꦄꦴꦢꦶ ꦮꦠ꧀ꦠꦸꦁ ꦱꦏ꧀ꦏꦴ. ꦠꦺꦤ ꦮꦸꦠ꧀ꦠꦁ ‘‘ꦮꦺꦢꦤꦴꦠ꧀ꦠꦶꦏꦴꦢꦷꦱꦸ ꦥꦤꦴ’’ꦠꦶꦄꦴꦢꦶ. ꦠꦡꦴꦠꦶ ꦆꦩꦶꦤꦴ ‘‘ꦌꦏꦺꦏꦱ꧀ꦱꦥꦶ ꦢꦸꦏꦴꦢꦶꦨꦺꦢꦴꦤꦚ꧀ꦕꦴ’’ꦠꦶ ꦆꦩꦁ ꦄꦤꦸꦏꦝ꧀ꦞꦠꦶ.

ꦌꦠꦱ꧀ꦩꦶꦤ꧀ꦠꦶ ‘‘ꦮꦶꦥꦴꦏꦴꦧ꧀ꦪꦴꦏꦠꦁ ꦏꦶꦫꦶꦪꦴꦧ꧀ꦪꦴꦏꦠ’’ꦤ꧀ꦠꦶ ꦌꦮꦁ ꦮꦶꦥꦴꦏꦏꦶꦫꦶꦪꦴꦧ꧀ꦪꦴꦏꦠꦒ꧀ꦒꦲꦟꦺ. ‘‘ꦱꦧ꧀ꦧꦱ꧀ꦩꦶꦁ ꦤ ꦒꦲꦺꦠꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦁ, ꦏꦠ꧀ꦡ ꦥꦤ ꦒꦲꦺꦠꦧ꧀ꦧꦤ꧀ꦠꦶ ꦄꦴꦲ ‘‘ꦕꦶꦠ꧀ꦠꦱꦩꦸꦛ꧀ꦜꦴꦤꦚ꧀ꦕ ꦫꦹꦥꦤ꧀ꦠꦶ ꦌꦠ꧀ꦡꦺꦮꦴ’’ꦠꦶ. ꦌꦮꦁ ꦥꦜꦩꦺ ꦮꦴꦏ꧀ꦪꦺ ꦄꦠꦶꦧ꧀ꦪꦴꦥꦶꦠꦁ ꦥꦫꦶꦲꦫꦶꦠ꧀ꦮꦴ ꦢꦸꦠꦶꦪꦺ ꦄꦧ꧀ꦪꦴꦥꦶꦠꦁ ꦥꦫꦶꦲꦫꦶꦠꦸꦁ ‘‘ꦤ ꦏꦺꦮꦭ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦌꦠ꧀ꦡꦴꦠꦶ ‘‘ꦮꦶꦥꦴꦏꦴꦧ꧀ꦪꦴꦏꦠꦁ ꦏꦶꦫꦶꦪꦴꦧ꧀ꦪꦴꦏꦠ’’ꦤ꧀ꦠꦶ ꦌꦠ꧀ꦡ ꦤ ꦒꦲꦺꦠꦧ꧀ꦧꦁ ꦠꦱ꧀ꦱꦥꦶ ꦄꦴꦫꦸꦥ꧀ꦥꦺ ꦈꦥ꧀ꦥꦗ꧀ꦗꦩꦴꦤꦱ꧀ꦱ ꦫꦹꦥꦺꦤ ꦮꦶꦤꦴ ꦈꦥ꧀ꦥꦠ꧀ꦠꦶꦠꦺꦴ. ꦌꦠ꧀ꦡ ꦕ ꦪꦡꦴ ꦲꦺꦠꦸꦥꦕ꧀ꦕꦪꦒ꧀ꦒꦲꦟꦺꦤꦺꦮ ꦄꦲꦺꦠꦸꦏꦁ ꦤꦶꦮꦠ꧀ꦠꦶꦠꦁ, ꦌꦮꦁ ꦕꦶꦠ꧀ꦠꦱꦩꦸꦛ꧀ꦜꦴꦤꦚ꧀ꦕ ꦫꦹꦥꦤ꧀ꦠꦶ ꦫꦹꦥꦒ꧀ꦒꦲꦟꦺꦤꦺꦮ ꦄꦴꦫꦸꦥ꧀ꦥꦺ ꦮꦶꦥꦴꦏꦺꦴꦥꦶ ꦠꦠ꧀ꦡ ꦈꦥ꧀ꦥꦗ꧀ꦗꦩꦴꦤꦺꦤ ꦕꦶꦠ꧀ꦠꦸꦥ꧀ꦥꦴꦢꦺꦤ ꦱꦢ꧀ꦣꦶꦁ ꦤ ꦒꦲꦶꦠꦺꦴ. ꦠꦁ ꦥꦤꦺꦠꦁ ꦄꦠ꧀ꦡꦱꦶꦢ꧀ꦣꦩꦺꦮ ꦄꦏꦠ꧀ꦮꦴ ꦱꦫꦹꦥꦠꦺꦴ ꦥꦴꦏꦛꦠꦫꦁ ꦏꦠ꧀ꦮꦴ ꦢꦱ꧀ꦱꦺꦠꦸꦁ ꦄꦛ꧀ꦜꦏꦡꦴꦪꦁ ‘‘ꦮꦶꦥꦴꦏꦴꦧ꧀ꦪꦴꦏꦠ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦥꦛꦶꦱꦤ꧀ꦣꦶꦥꦕ꧀ꦖꦶꦩꦕꦶꦠ꧀ꦠꦴꦤꦶ ꦥꦤꦺꦠ꧀ꦡ ꦱꦠꦶꦥꦶ ꦫꦹꦥꦱ꧀ꦱ ꦄꦤꦸꦥ꧀ꦥꦴꦢꦤꦺ ꦮꦮꦠ꧀ꦡꦴꦤꦴꦨꦴꦮꦠꦺꦴ ꦤ ꦒꦲꦶꦠꦴꦤꦷꦠꦶ ꦢꦛ꧀ꦜꦧ꧀ꦧꦁ.

ꦥꦕ꧀ꦕꦪꦨꦹꦠꦱ꧀ꦱꦴꦠꦶ ꦑꦤ꧀ꦣꦴꦤꦁ ꦥꦕ꧀ꦕꦪꦨꦹꦠꦱ꧀ꦱ ꦮꦠ꧀ꦡꦸꦱ꧀ꦱ ꦄꦒ꧀ꦒꦲꦶꦠꦠꦴꦥꦠ꧀ꦠꦶꦁ ꦤꦶꦮꦴꦫꦺꦠꦸꦁ, ꦏꦡꦁ? ꦥꦕ꧀ꦕꦪꦸꦥ꧀ꦥꦤ꧀ꦤꦨꦴꦮꦺꦤ, ꦏꦠ꧀ꦡ? ‘‘ꦏꦛꦠ꧀ꦠꦴ ꦕ ꦫꦹꦥ’’ꦤ꧀ꦠꦶ ꦌꦠꦱ꧀ꦩꦶꦁ ꦱꦴꦩꦚ꧀ꦚꦮꦕꦤꦺ ‘‘ꦑꦤ꧀ꦣꦺ ꦥꦛꦶꦕ꧀ꦕ ꦮꦠ꧀ꦡꦹ’’ꦠꦶ ꦮꦸꦠ꧀ꦠꦁ, ꦌꦮꦚ꧀ꦲꦶꦱ꧀ꦱ ꦥꦕ꧀ꦕꦪꦸꦥ꧀ꦥꦤ꧀ꦤꦠꦴ ꦢꦱ꧀ꦱꦶꦠꦴ ꦲꦺꦴꦠꦷꦠꦶ. ꦄꦚ꧀ꦚꦩꦚ꧀ꦚꦴꦥꦺꦏ꧀ꦑꦁ ꦮꦕꦤꦢ꧀ꦮꦪꦤ꧀ꦠꦶ ‘‘ꦑꦤ꧀ꦣꦺ ꦥꦛꦶꦕ꧀ꦕ ꦮꦠ꧀ꦡꦸ, ꦮꦠ꧀ꦡꦸꦁ ꦥꦛꦶꦕ꧀ꦕ ꦑꦤ꧀ꦣꦴ’’ꦠꦶ ꦥꦢꦢ꧀ꦮꦪꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦱꦴꦩꦚ꧀ꦚꦺꦤ ꦒꦲꦶꦠꦤ꧀ꦠꦶ ‘‘ꦏꦛꦠ꧀ꦠꦴ ꦕ ꦫꦹꦥ’’ꦤ꧀ꦠꦶ ꦆꦩꦶꦤꦴ ꦱꦴꦩꦚ꧀ꦚꦮꦕꦤꦺꦤ, ꦏꦛꦠ꧀ꦠꦴꦫꦹꦥꦱꦴꦩꦚ꧀ꦚꦺꦤ ꦮꦴ ꦒꦲꦶꦠꦁ.

ꦈꦥꦴꦢꦴꦫꦹꦥꦒ꧀ꦒꦲꦟꦺꦤ ꦮꦶꦤꦴ ‘‘ꦈꦥꦴꦢꦴꦫꦹꦥ’’ꦤ꧀ꦠꦶ ꦄꦒ꧀ꦒꦲꦺꦠ꧀ꦮꦴ ꦏꦺꦮꦭꦁ ꦕꦶꦠ꧀ꦠꦱꦩꦸꦛ꧀ꦜꦴꦤꦫꦹꦥꦁ ‘‘ꦏꦛꦠ꧀ꦠꦴꦫꦹꦥꦁ’’ꦆꦕ꧀ꦕꦺꦮ ꦒꦲꦺꦠ꧀ꦮꦴꦠꦶ ꦄꦠ꧀ꦡꦺꦴ. ꦌꦠꦱ꧀ꦩꦶꦁ ꦥꦤ ꦢꦱ꧀ꦱꦤꦺꦠꦶ ‘‘ꦩꦲꦴꦨꦹꦠꦺꦥꦶ ꦥꦛꦶꦕ꧀ꦕ ꦈꦥ꧀ꦥꦠ꧀ꦠꦶꦢꦱ꧀ꦱꦤꦠ꧀ꦡ’’ꦤ꧀ꦠꦶ ꦮꦸꦠ꧀ꦠꦺ ꦌꦠꦱ꧀ꦩꦶꦁ ꦄꦠ꧀ꦡꦢꦱ꧀ꦱꦤꦺ. ꦑꦤ꧀ꦣꦥꦕ꧀ꦕꦪꦱꦲꦶꦠꦤ꧀ꦠꦶ ꦥꦛꦶꦱꦤ꧀ꦣꦶꦪꦁ ꦏꦛꦠ꧀ꦠꦴꦫꦹꦥꦁ, ꦥꦮꦠ꧀ꦠꦶꦪꦁ ꦕꦶꦠ꧀ꦠꦱꦩꦸꦛ꧀ꦜꦴꦤꦁ ꦫꦹꦥꦁ ꦮꦢꦠꦶ. ꦄꦱꦲꦶꦠꦤ꧀ꦠꦶ ꦥꦤ ꦥꦮꦠ꧀ꦠꦶꦪꦁ ꦏꦛꦠ꧀ꦠꦴꦫꦹꦥꦁ ꦄꦴꦲꦴꦫꦱꦩꦸꦛ꧀ꦜꦴꦤꦁ ꦈꦠꦸꦱꦩꦸꦛ꧀ꦜꦴꦤꦁ ꦄꦤꦶꦤ꧀ꦢ꧀ꦫꦶꦪꦧꦢ꧀ꦣꦁ ꦄꦱꦚ꧀ꦚꦨꦮꦱꦔ꧀ꦒꦲꦶꦠꦚ꧀ꦕ ꦫꦹꦥꦁ. ꦥꦛꦶꦱꦤ꧀ꦣꦶꦪꦩ꧀ꦥꦷꦠꦶ ꦥꦶ-ꦱꦢ꧀ꦢꦺꦤ ꦥꦮꦠ꧀ꦠꦶꦪꦩ꧀ꦥꦶ ꦏꦛꦠ꧀ꦠꦴꦫꦹꦥꦁ ꦄꦚ꧀ꦚꦚ꧀ꦕ ꦠꦠ꧀ꦡ ꦈꦥ꧀ꦥꦗ꧀ꦗꦤꦏꦁ ꦈꦥꦴꦢꦴꦫꦹꦥꦤ꧀ꦠꦶ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦏꦡꦁ ꦥꦤꦺꦠ꧀ꦡ ꦨꦹꦠꦺ ꦥꦛꦶꦕ꧀ꦕ ꦈꦥ꧀ꦥꦗ꧀ꦗꦩꦴꦤꦱ꧀ꦱ ꦫꦹꦥꦱ꧀ꦱ ꦲꦺꦠꦸꦥꦕ꧀ꦕꦪꦴ ꦈꦥ꧀ꦥꦗ꧀ꦗꦠꦷꦠꦶ? ‘‘ꦑꦤ꧀ꦣꦺ ꦥꦛꦶꦕ꧀ꦕ ꦲꦺꦠꦸꦥꦕ꧀ꦕꦪꦴ ꦈꦥ꧀ꦥꦗ꧀ꦗꦩꦴꦤꦁ ꦫꦹꦥꦁ ꦨꦹꦠꦺꦥꦶ ꦥꦛꦶꦕ꧀ꦕ ꦈꦥ꧀ꦥꦗ꧀ꦗꦠꦷ’’ꦠꦶ ꦌꦮꦁ ꦥꦢꦩꦺꦠꦁ, ꦨꦹꦠꦴꦤꦁ ꦮꦴ ꦲꦺꦠꦸꦥꦕ꧀ꦕꦪꦠꦺꦴ ꦤꦶꦧ꧀ꦧꦠ꧀ꦠꦠ꧀ꦠꦴ ꦌꦮꦁ ꦮꦸꦠ꧀ꦠꦁ. ꦏꦴꦫꦟꦏꦴꦫꦟꦩ꧀ꦥꦶ ꦲꦶ ꦏꦴꦫꦟꦤ꧀ꦠ꧀ꦮꦺꦮ ꦮꦸꦕ꧀ꦕꦠꦶ ꦪꦡꦴ ‘‘ꦕꦺꦴꦫꦺꦲꦶ ꦒꦴꦩꦺꦴ ꦢꦝ꧀ꦞꦺꦴ’’ꦠꦶ.

ꦨꦹꦠꦺ ꦥꦛꦶꦕ꧀ꦕ ꦈꦥꦴꦢꦴꦫꦹꦥꦤ꧀ꦠꦶ ꦥꦢꦸꦢ꧀ꦣꦴꦫꦺꦴ ꦏꦠꦺꦴ, ‘‘ꦩꦲꦴꦨꦹꦠꦺ ꦥꦛꦶꦕ꧀ꦕ ꦈꦥꦴꦢꦴꦫꦹꦥ’’ꦤ꧀ꦠꦶ ꦥꦤ ꦥꦴꦜꦺꦴꦠꦶ ꦄꦛ꧀ꦜꦏꦡꦴꦪꦚ꧀ꦕ ꦠꦩꦺꦮ ꦮꦸꦠ꧀ꦠꦁ. ꦄꦪꦁ ꦲꦺꦠ꧀ꦡꦠ꧀ꦡꦺꦴ – ‘‘ꦩꦲꦴꦨꦹꦠꦺ ꦥꦛꦶꦕ꧀ꦕ ꦈꦥꦴꦢꦴꦫꦹꦥ’’ꦤ꧀ꦠꦶ ꦆꦩꦱ꧀ꦩꦶꦁ ꦥꦴꦜꦺ ꦮꦸꦠ꧀ꦠꦤꦪꦺꦤ ꦈꦥꦴꦢꦴꦫꦹꦥꦩ꧀ꦥꦶ ꦏꦸꦱꦭꦺ ꦑꦤ꧀ꦣꦺ ꦩꦲꦴꦨꦹꦠꦺ ꦕ ꦥꦛꦶꦕ꧀ꦕ ꦈꦥ꧀ꦥꦗ꧀ꦗꦠꦷꦠꦶ. ꦏꦺꦴ ꦥꦤ ꦱꦺꦴ ꦤꦪꦺꦴꦠꦶ ꦠꦁ ꦢꦱ꧀ꦱꦺꦠꦸꦁ ‘‘ꦩꦲꦴꦨꦹꦠꦺ…ꦥꦺ… ꦱꦤ꧀ꦣꦴꦪꦴꦲꦴ’’ꦠꦶ ꦮꦸꦠ꧀ꦠꦁ. ꦠꦠ꧀ꦡ ꦄꦠ꧀ꦡꦠꦺꦴ ꦄꦪꦁ ꦤꦪꦺꦴ ꦮꦸꦠ꧀ꦠꦺꦴꦠꦶ ‘‘ꦩꦲꦴꦨꦹꦠꦺ ꦥꦛꦶꦕ꧀ꦕ ꦕꦶꦠ꧀ꦠꦱꦩꦸꦛ꧀ꦜꦴꦤꦁ ꦫꦹꦥꦁ ꦏꦛꦠ꧀ꦠꦴꦫꦹꦥꦁ ꦈꦥꦴꦢꦴꦫꦹꦥ’’ꦤ꧀ꦠꦶ ꦆꦩꦶꦤꦴ ꦄꦧ꧀ꦪꦴꦏꦠꦺ ꦑꦤ꧀ꦣꦺ ꦩꦲꦴꦨꦹꦠꦺ ꦕ ꦥꦛꦶꦕ꧀ꦕ ꦈꦥꦴꦢꦴꦫꦹꦥꦴꦤꦁ ꦈꦥ꧀ꦥꦠ꧀ꦠꦶꦮꦕꦤꦺꦤ ꦏꦸꦱꦭꦺ ꦑꦤ꧀ꦣꦺ ꦩꦲꦴꦨꦹꦠꦺ ꦕ ꦥꦛꦶꦕ꧀ꦕ ꦈꦥꦴꦢꦴꦫꦹꦥꦴꦤꦁ ꦈꦥ꧀ꦥꦠ꧀ꦠꦶ ꦄꦠ꧀ꦡꦠꦺꦴ ꦮꦸꦠ꧀ꦠꦺꦴ ꦲꦺꦴꦠꦷꦠꦶ ꦄꦠ꧀ꦡꦺꦴ.

꧕꧔. ꦫꦹꦥꦺꦤ ꦮꦶꦤꦴ ꦥꦕ꧀ꦕꦪꦸꦥ꧀ꦥꦤ꧀ꦤꦁ ꦤ ꦭꦧ꧀ꦨꦠꦷꦠꦶ ꦌꦠꦺꦤ ꦪꦴ ꦥꦸꦕ꧀ꦖꦴ ꦄꦫꦹꦥꦩꦶꦱ꧀ꦱꦏꦴꦮꦱꦴꦤꦴ, ꦠꦴꦥꦶ ꦆꦣ ꦤ ꦒꦪ꧀ꦲꦤ꧀ꦠꦶ, ꦥꦒꦺꦮ ꦫꦹꦥꦴꦮꦱꦴꦤꦴꦠꦶ ꦢꦱ꧀ꦱꦺꦠꦶ.

꧕꧗. ꦠꦴꦪ ꦱꦩꦴꦤꦭꦏ꧀ꦑꦟꦴꦠꦶ ꦥꦚ꧀ꦕꦏ꧀ꦑꦤ꧀ꦣꦥꦛꦶꦱꦤ꧀ꦣꦶꦠꦴꦪ ꦒꦧ꧀ꦨꦱꦺꦪ꧀ꦪꦏꦥꦛꦶꦱꦤ꧀ꦣꦶꦪꦴ ꦱꦩꦴꦤꦭꦏ꧀ꦑꦟꦴ. ꦥꦫꦶꦥꦸꦟ꧀ꦟꦣꦩ꧀ꦩꦴꦤꦤ꧀ꦠꦶ ꦥꦫꦶꦪꦠ꧀ꦠꦶꦮꦶꦨꦴꦒꦴꦤꦁ ꦥꦚ꧀ꦕꦏ꧀ꦑꦤ꧀ꦣꦣꦩ꧀ꦩꦴꦤꦁ. ꦌꦠ꧀ꦡꦴꦠꦶ ꦌꦠꦱ꧀ꦩꦶꦁ ꦱꦲꦗꦴꦠꦥꦕ꧀ꦕꦪꦤꦶꦢ꧀ꦢꦺꦱꦺ.

ꦕꦶꦠ꧀ꦠꦏꦩ꧀ꦩꦱꦩꦸꦛ꧀ꦜꦴꦤꦫꦹꦥꦤ꧀ꦠꦶ ꦕꦶꦠ꧀ꦠꦱꦩꦸꦛ꧀ꦜꦴꦤꦫꦹꦥꦁ ꦏꦩ꧀ꦩꦱꦩꦸꦛ꧀ꦜꦴꦤꦫꦹꦥꦚ꧀ꦕ. ꦥꦸꦤ ꦄꦴꦲꦴꦫꦱꦩꦸꦛ꧀ꦜꦴꦤꦤ꧀ꦠꦶ ꦌꦠ꧀ꦡ ꦥꦸꦤꦒꦲꦟꦁ ꦈꦠꦸꦱꦩꦸꦛ꧀ꦜꦴꦤꦴꦥꦺꦏ꧀ꦑꦁ. ꦤ ꦲꦶ ꦠꦁ ꦥꦸꦧ꧀ꦧꦺ ꦧꦴꦲꦶꦫꦒ꧀ꦒꦲꦟꦺꦤ ꦄꦒ꧀ꦒꦲꦶꦠꦁ, ꦄꦴꦲꦴꦫꦱꦩꦸꦛ꧀ꦜꦴꦤꦁ ꦥꦤ ꦄꦒ꧀ꦒꦲꦶꦠꦩꦺꦮ, ꦈꦠꦸꦱꦩꦸꦛ꧀ꦜꦴꦤꦱ꧀ꦱ ꦏꦱ꧀ꦩꦴ ꦥꦸꦤꦒꦲꦟꦤ꧀ꦠꦶ ꦄꦴꦲ ‘‘ꦌꦠꦺꦲꦷ’’ꦠꦶꦄꦴꦢꦶ. ꦠꦠ꧀ꦡꦴꦠꦶ ꦄꦱꦚ꧀ꦚꦱꦠ꧀ꦠꦺꦱꦸ. ꦠꦱ꧀ꦱꦴꦠꦶ ꦈꦠꦸꦱꦩꦸꦛ꧀ꦜꦴꦤꦱ꧀ꦱ. ꦄꦴꦢꦶꦩ꧀ꦲꦷꦠꦶ ꦧꦴꦲꦶꦫꦄꦴꦲꦴꦫꦱꦩꦸꦛ꧀ꦜꦴꦤꦈꦠꦸꦱꦩꦸꦛ꧀ꦜꦴꦤꦄꦱꦚ꧀ꦚꦱꦠ꧀ꦠꦮꦱꦺꦤ ꦄꦴꦒꦠꦮꦴꦫꦺꦲꦶ ꦥꦜꦩꦮꦴꦫꦺ. ꦄꦮꦶꦱꦺꦱꦮꦕꦤꦤ꧀ꦠꦶ ꦧꦴꦲꦶꦫꦴꦢꦶꦮꦶꦱꦺꦱꦁ ꦄꦏꦠ꧀ꦮꦴ ꦮꦸꦠ꧀ꦠꦮꦕꦤꦁ, ꦄꦫꦹꦥꦩ꧀ꦥꦶ ꦥꦕ꧀ꦕꦪꦁ ꦭꦨꦤ꧀ꦠꦁ ꦄꦠ꧀ꦡꦁ ꦲꦺꦠꦴꦢꦶꦏꦺ ꦥꦕ꧀ꦕꦪꦺ ꦭꦨꦤ꧀ꦠꦁ ꦱꦲ ꦱꦔ꧀ꦒꦟ꧀ꦲꦶꦠ꧀ꦮꦴꦠꦶ ꦪꦺꦴꦗꦤꦴ. ꦠꦱ꧀ꦱꦴꦠꦶ, ꦠꦠ꧀ꦡꦴꦠꦶ ꦕ ꦥꦢꦢ꧀ꦮꦪꦺꦤ ꦪꦡꦴꦮꦸꦠ꧀ꦠꦁ ꦥꦜꦩꦮꦴꦫꦩꦺꦮ ꦥꦕ꧀ꦕꦴꦩꦱꦠꦶ. ꦠꦁꦱꦩꦴꦤꦒꦠꦶꦏꦤ꧀ꦠꦶ ꦕꦶꦠ꧀ꦠꦱꦩꦸꦛ꧀ꦜꦴꦤꦒꦠꦶꦏꦁ. ꦆꦣꦴꦥꦷꦠꦶ ꦆꦩꦱ꧀ꦩꦶꦁ ꦱꦲꦗꦴꦠꦥꦕ꧀ꦕꦪꦤꦶꦢ꧀ꦢꦺꦱꦺꦥꦶ. ꦏꦩ꧀ꦩꦥꦕ꧀ꦕꦪꦮꦶꦨꦔ꧀ꦒꦺ ꦮꦶꦪꦴꦠꦶ ꦤꦴꦤꦴꦏ꧀ꦑꦟꦶꦏꦏꦩ꧀ꦩꦥꦕ꧀ꦕꦪꦤꦶꦢ꧀ꦢꦺꦱꦺ ꦮꦶꦪ. ꦠꦡꦴ ꦲꦶ ꦮꦸꦠ꧀ꦠꦁ ꦄꦛ꧀ꦜꦏꦡꦴꦪꦁ ‘‘ꦠꦁꦱꦩꦸꦛ꧀ꦜꦴꦤꦤ꧀ꦠꦶ ꦆꦩꦶꦤꦴ ꦥꦛꦶꦱꦤ꧀ꦣꦶꦏ꧀ꦑꦟꦺ ꦏꦛꦠ꧀ꦠꦴꦫꦹꦥꦩ꧀ꦥꦶ ꦱꦔ꧀ꦒꦟ꧀ꦲꦴꦠꦷ’’ꦠꦶ. ꦄꦪꦚ꧀ꦕ ꦄꦠ꧀ꦡꦮꦶꦱꦺꦱꦺꦴ ꦌꦠ꧀ꦡ ꦌꦏꦁꦱꦺꦤ ꦆꦕ꧀ꦖꦶꦠꦧ꧀ꦧꦺꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦤ ꦲꦶ…ꦥꦺ… ꦄꦠ꧀ꦡꦷ’’ꦠꦶ ꦄꦴꦲ.

ꦄꦮꦶꦱꦺꦱꦺꦠ꧀ꦮꦴꦠꦶ ‘‘ꦈꦠꦸꦱꦩꦸꦛ꧀ꦜꦴꦤ’’ꦤ꧀ꦠꦶꦄꦴꦢꦶꦤꦴ ꦮꦶꦱꦺꦱꦁ ꦄꦏꦠ꧀ꦮꦴ. ꦈꦥꦴꦢꦴꦫꦹꦥꦤ꧀ꦠꦶ ꦮꦶꦱꦺꦱꦺꦠ꧀ꦮꦴꦮ ꦏꦱ꧀ꦩꦴ ꦥꦤ ꦮꦸꦠ꧀ꦠꦴꦤꦷꦠꦶ ꦪꦺꦴꦗꦤꦴ. ꦲꦺꦠꦸꦥꦕ꧀ꦕꦪꦴꦢꦷꦱꦹꦠꦶ ꦄꦴꦢꦶ-ꦱꦢ꧀ꦢꦺꦤ ꦱꦲꦗꦴꦠꦥꦕ꧀ꦕꦪꦴꦢꦶꦁ ꦱꦔ꧀ꦒꦟ꧀ꦲꦴꦠꦶ. ꦱꦲꦴꦠꦶ ꦕꦶꦠ꧀ꦠꦱꦩꦸꦛ꧀ꦜꦴꦤꦫꦹꦥꦁ ꦏꦛꦠ꧀ꦠꦴꦫꦹꦥꦤ꧀ꦠꦶ ꦌꦮꦁ ꦌꦏꦠꦺꦴ. ꦮꦶꦱꦸꦤ꧀ꦠꦶ ꦕꦶꦠ꧀ꦠꦱꦩꦸꦛ꧀ꦜꦴꦤꦁ ꦫꦹꦥꦁ ꦏꦛꦠ꧀ꦠꦴꦫꦹꦥꦠꦺꦴ ꦮꦶꦱꦺꦱꦺꦠ꧀ꦮꦴ. ꦠꦠ꧀ꦡ ꦧꦴꦲꦶꦫꦒ꧀ꦒꦲꦟꦴꦢꦷꦲꦶ ꦮꦶꦪꦴꦠꦶ ꦪꦡꦴ ‘‘ꦧꦴꦲꦶꦫꦁ ꦌꦏꦁ ꦩꦲꦴꦨꦹꦠ’’ꦤ꧀ꦠꦶꦄꦴꦢꦷꦱꦸ ꦧꦴꦲꦶꦫꦄꦴꦲꦴꦫꦱꦩꦸꦛ꧀ꦜꦴꦤꦈꦠꦸꦱꦩꦸꦛ꧀ꦜꦴꦤꦒ꧀ꦒꦲꦟꦺꦲꦶ ꦩꦲꦴꦨꦹꦠꦴꦤꦶ ꦮꦶꦱꦺꦱꦶꦠꦴꦤꦶ, ꦌꦮꦁ ꦌꦠ꧀ꦡ ‘‘ꦩꦲꦴꦨꦹꦠꦺ ꦥꦛꦶꦕ꧀ꦕꦴ’’ꦠꦶ ꦌꦠꦱ꧀ꦩꦶꦁ ꦤꦶꦢ꧀ꦢꦺꦱꦺ ꦩꦲꦴꦨꦹꦠꦴꦤꦁ ꦏꦺꦤꦕꦶ ꦮꦶꦱꦺꦱꦤꦺꦤ ꦄꦮꦶꦱꦺꦱꦶꦠꦠ꧀ꦠꦴ ꦕꦶꦠ꧀ꦠꦱꦩꦸꦛ꧀ꦜꦴꦤꦫꦹꦥꦨꦴꦮꦏꦛꦠ꧀ꦠꦴꦫꦹꦥꦨꦴꦮꦺꦲꦶ ꦮꦶꦱꦺꦱꦺꦠ꧀ꦮꦴꦮ ꦮꦸꦠ꧀ꦠꦴꦤꦷꦠꦶ ꦪꦺꦴꦗꦤꦴ.

ꦆꦢꦴꦤꦶ ꦄꦚ꧀ꦚꦺꦤꦥꦶ ꦏꦴꦫꦟꦺꦤ ꦠꦺꦱꦁ ꦮꦶꦱꦺꦱꦶꦠꦧ꧀ꦧꦠꦁ ꦢꦱ꧀ꦱꦺꦠꦸꦁ ‘‘ꦄꦥꦶꦕꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦤ ꦏꦺꦴꦕꦶ ꦥꦕ꧀ꦕꦪꦺꦴꦠꦶ ꦆꦢꦁ ꦥꦛ꧀ꦜꦴꦤꦺ ꦄꦴꦒꦠꦤꦶꦪꦴꦩꦺꦤ ꦫꦹꦥꦁ ꦈꦥꦤꦶꦱ꧀ꦱꦪꦥꦕ꧀ꦕꦪꦁ ꦤ ꦭꦨꦠꦷꦠꦶ ꦏꦠ꧀ꦮꦴ ꦮꦸꦠ꧀ꦠꦁ. ꦠꦺꦤꦴꦲ ‘‘ꦲꦺꦠꦴꦢꦷꦱꦹ’’ꦠꦶ. ꦠꦢꦮꦶꦤꦴꦨꦴꦮꦠꦺꦴ ꦥꦤ ꦠꦱ꧀ꦱ ꦕꦶꦠ꧀ꦠꦏꦩ꧀ꦩꦴꦤꦁ ꦏꦴꦫꦟꦨꦴꦮꦺꦴ ꦮꦺꦢꦶꦠꦧ꧀ꦧꦺꦴ, ꦪꦠꦺꦴ ꦆꦢ꧀ꦣꦶꦕꦶꦠ꧀ꦠꦤꦶꦧ꧀ꦧꦠ꧀ꦠꦴꦤꦶ ꦏꦩ꧀ꦩꦥꦕ꧀ꦕꦪꦴꦤꦶ ꦕꦴꦠꦶ ꦮꦸꦠ꧀ꦠꦴꦤꦶ. ꦤꦤꦸ ꦕꦶꦠ꧀ꦠꦁ ꦄꦴꦲꦴꦫꦈꦠꦸꦱꦩꦸꦛ꧀ꦜꦴꦤꦴꦤꦁ ꦥꦕ꧀ꦕꦪꦺꦴ ꦲꦺꦴꦠꦷꦠꦶ? ꦱꦕ꧀ꦕꦁ ꦲꦺꦴꦠꦶ, ꦱꦺꦴ ꦥꦤ ꦈꦥꦠ꧀ꦡꦩ꧀ꦨꦏꦠ꧀ꦠꦺꦤ, ꦤ ꦗꦤꦏꦠ꧀ꦠꦺꦤꦴꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦄꦴꦲꦴꦫ…ꦥꦺ… ꦗꦤꦏ’’ꦤ꧀ꦠꦶ. ꦏꦶꦁ ꦥꦤ ꦠꦺꦱꦁ ꦗꦤꦏꦤ꧀ꦠꦶ ꦄꦴꦲ ‘‘ꦩꦲꦴꦨꦹꦠꦴꦤꦺꦮ…ꦥꦺ… ꦗꦤꦏꦴꦤꦷ’’ꦠꦶ. ꦕꦶꦠ꧀ꦠꦺꦤ ꦏꦩ꧀ꦩꦸꦤꦴ ꦕ ꦮꦶꦤꦴ ꦄꦨꦴꦮꦺ ꦪꦡꦴꦏ꧀ꦏꦩꦁ ꦕꦶꦠ꧀ꦠꦏꦩ꧀ꦩꦱꦩꦸꦛ꧀ꦜꦴꦤꦈꦥꦴꦢꦴꦫꦹꦥꦴꦤꦤ꧀ꦠꦶ ꦄꦠ꧀ꦡꦺꦴ. ꦕꦶꦠ꧀ꦠꦱꦩꦸꦛ꧀ꦜꦴꦤꦫꦹꦥꦏꦛꦠ꧀ꦠꦴꦫꦹꦥꦨꦹꦠꦴꦤꦺꦮꦴꦠꦶ ꦕꦶꦠ꧀ꦠꦏꦩ꧀ꦩꦱꦩꦸꦛ꧀ꦜꦴꦤꦩꦲꦴꦨꦹꦠꦤꦶꦧ꧀ꦧꦠ꧀ꦠꦴꦤꦺꦮ ꦩꦲꦴꦨꦹꦠꦴꦤꦁ ꦠꦺꦱꦁ ꦄꦴꦱꦤ꧀ꦤꦏꦴꦫꦟꦠ꧀ꦠꦴ. ꦄꦚ꧀ꦚꦴꦤꦷꦠꦶ ꦈꦠꦸꦄꦴꦲꦴꦫꦱꦩꦸꦛ꧀ꦜꦴꦤꦴꦤꦶ ꦈꦥꦴꦢꦴꦫꦹꦥꦴꦤꦶ ꦮꦢꦠꦶ. ꦮꦶꦱꦺꦱꦤꦁ ꦏꦠꦁ ‘‘ꦕꦶꦠ꧀ꦠꦱꦩꦸꦛ꧀ꦜꦴꦤꦁ ꦫꦹꦥꦁ ꦏꦛꦠ꧀ꦠꦴꦫꦹꦥꦁ ꦈꦥꦴꦢꦴꦫꦹꦥ’’ꦤ꧀ꦠꦶ. ꦱꦩꦴꦤꦗꦴꦠꦶꦏꦺꦤ ꦫꦹꦥꦺꦤ ꦈꦠꦸꦤꦴ ꦄꦴꦲꦴꦫꦺꦤ ꦕꦴꦠꦶ ꦄꦠ꧀ꦡꦺꦴ. ꦥꦴꦏꦛꦮꦶꦱꦺꦱꦤꦴꦤꦺꦮꦴꦠꦶ ꦆꦢꦁ ꦪꦺꦲꦶ ꦩꦲꦴꦨꦹꦠꦺꦲꦶ ꦠꦴꦤꦶ ꦤꦶꦧ꧀ꦧꦠ꧀ꦠꦴꦤꦶ, ꦠꦺꦱꦁ ‘‘ꦄꦴꦲꦴꦫꦱꦩꦸꦛ꧀ꦜꦴꦤꦁ ꦈꦠꦸꦱꦩꦸꦛ꧀ꦜꦴꦤ’’ꦤ꧀ꦠꦶ ꦮꦶꦱꦺꦱꦶꦠꦠ꧀ꦠꦴ ꦮꦸꦠ꧀ꦠꦁ. ꦤ ꦮꦶꦱꦺꦱꦤꦁ ꦄꦫꦲꦤ꧀ꦠꦶ ꦤ ꦮꦶꦱꦺꦱꦶꦠꦧ꧀ꦧꦴꦤꦶ ꦏꦴꦫꦟꦮꦶꦱꦺꦱꦤꦺꦤꦺꦮ ꦮꦶꦱꦺꦱꦱ꧀ꦱ ꦱꦶꦢ꧀ꦣꦠ꧀ꦠꦴ, ‘‘ꦩꦲꦴꦨꦹꦠꦺ ꦥꦛꦶꦕ꧀ꦕ ꦈꦥꦴꦢꦴꦫꦹꦥ’’ꦤ꧀ꦠ꧀ꦮꦺꦮ ꦮꦠ꧀ꦠꦧ꧀ꦧꦤ꧀ꦠꦶ ꦄꦠ꧀ꦡꦺꦴ. ꦌꦠꦴꦤꦶ ꦥꦤ ꦕꦶꦠ꧀ꦠꦗꦏꦩ꧀ꦩꦗꦫꦹꦥꦴꦤꦶ.

ꦱꦮꦶꦱꦺꦱꦺꦤꦴꦠꦶ ꦪꦺꦤ ꦮꦶꦱꦺꦱꦺꦤ ꦮꦶꦱꦺꦱꦶꦠꦴ, ꦠꦁ ꦢꦱ꧀ꦱꦺꦤ꧀ꦠꦺꦴ ꦕꦶꦠ꧀ꦠꦁ ꦱꦤ꧀ꦣꦴꦪꦴꦲ ‘‘ꦱꦲꦗꦴꦠꦴꦢꦶꦥꦕ꧀ꦕꦪꦨꦴꦮꦠꦺꦴ’’ꦠꦶ, ꦆꦠꦫꦁ ꦥꦤ ꦱꦤ꧀ꦣꦴꦪ ‘‘ꦩꦹꦭꦏꦴꦫꦟꦨꦴꦮꦠꦺꦴ’’ꦠꦶ, ꦏꦩ꧀ꦩꦹꦥꦤꦶꦱ꧀ꦱꦪꦥꦕ꧀ꦕꦪꦨꦴꦮꦠꦺꦴꦠꦶ ꦄꦠ꧀ꦡꦺꦴ. ꦆꦠꦫꦴꦤꦷꦠꦶ ꦄꦴꦲꦴꦫꦈꦠꦸꦱꦩꦸꦛ꧀ꦜꦴꦤꦴꦤꦶꦥꦶ ꦈꦥꦴꦢꦴꦫꦹꦥꦴꦤꦶ. ꦩꦲꦴꦨꦹꦠꦮꦶꦱꦺꦱꦤꦺꦤꦺꦮ ꦮꦶꦱꦺꦱꦶꦠꦴꦤꦷꦠꦶ ‘‘ꦄꦴꦲꦴꦫꦱꦩꦸꦛ꧀ꦜꦴꦤꦁ ꦌꦏꦁ ꦩꦲꦴꦨꦹꦠꦁ ꦥꦛꦶꦕ꧀ꦕ ꦈꦠꦸꦱꦩꦸꦛ꧀ꦜꦴꦤꦁ ꦌꦏꦁ ꦩꦲꦴꦨꦹꦠꦁ ꦥꦛꦶꦕ꧀ꦕꦴ’’ꦠꦶ ꦩꦲꦴꦨꦹꦠꦮꦶꦱꦺꦱꦤꦺꦤꦺꦮ ꦗꦤꦏꦥꦕ꧀ꦕꦪꦺꦤ ꦄꦴꦲꦴꦫꦺꦤ ꦈꦠꦸꦤꦴ ꦕ ꦮꦶꦱꦺꦱꦶꦠꦴꦤꦶ. ꦆꦣꦴꦠꦶ ‘‘ꦕꦶꦠ꧀ꦠꦱꦩꦸꦛ꧀ꦜꦴꦤꦁ ꦫꦹꦥꦁ ꦏꦛꦠ꧀ꦠꦴꦫꦹꦥꦁ ꦈꦥꦴꦢꦴꦫꦹꦥ’’ꦤ꧀ꦠꦶ ꦆꦩꦱ꧀ꦩꦶꦁ ꦮꦕꦤꦺ. ꦌꦠ꧀ꦡ ꦲꦶ ꦈꦥꦴꦢꦴꦫꦹꦥꦴꦤꦁ ꦕꦶꦠ꧀ꦠꦏꦩ꧀ꦩꦱꦩꦸꦛ꧀ꦜꦴꦤꦠꦴꦮꦕꦤꦺꦤ ꦠꦁꦤꦶꦱ꧀ꦱꦪꦴꦤꦩ꧀ꦥꦶ ꦠꦧ꧀ꦨꦴꦮꦺꦴ ꦥꦏꦴꦱꦶꦠꦺꦴꦠꦶ. ꦄꦚ꧀ꦚꦠꦫꦮꦶꦱꦺꦱꦤꦁ ꦈꦨꦪꦮꦶꦱꦺꦱꦤꦁ ꦲꦺꦴꦠꦶ ꦈꦨꦪꦺꦱꦁ ꦄꦮꦶꦤꦶꦧ꧀ꦨꦺꦴꦒꦺꦤ ꦥꦮꦠ꧀ꦠꦤꦠꦺꦴ.

꧕꧘. ꦥꦸꦧ꧀ꦧꦺꦠꦶ ꦲꦺꦠꦸꦥꦕ꧀ꦕꦪꦴꦢꦷꦱꦸ. ꦮꦶꦱꦸꦁ ꦥꦕ꧀ꦕꦪꦨꦴꦮꦺꦤꦴꦠꦶ ‘‘ꦥꦛꦶꦱꦤ꧀ꦣꦶꦏ꧀ꦑꦟꦺ ꦮꦶꦥꦴꦏꦴꦧ꧀ꦪꦴꦏꦠꦁ ꦌꦏꦁ ꦑꦤ꧀ꦣꦁ ꦥꦛꦶꦕ꧀ꦕ ꦠꦪꦺꦴ ꦑꦤ꧀ꦣꦴ ꦏꦛꦠ꧀ꦠꦴ ꦕ ꦫꦹꦥ’’ꦤ꧀ꦠꦶꦄꦴꦢꦶꦤꦴ ꦮꦠ꧀ꦡꦸꦱ꧀ꦱ ꦮꦶꦱꦸꦁ ꦥꦕ꧀ꦕꦪꦨꦴꦮꦺꦤ. ꦌꦠ꧀ꦡ ꦕ ꦮꦶꦱꦸꦁꦪꦺꦮ ꦥꦕ꧀ꦕꦪꦨꦴꦮꦺꦤ ꦢꦱ꧀ꦱꦶꦠꦴꦤꦷꦠꦶ ꦤ ꦱꦏ꧀ꦏꦴ ꦮꦠ꧀ꦠꦸꦁ, ‘‘ꦑꦤ꧀ꦣꦺ ꦥꦛꦶꦕ꧀ꦕ ꦮꦠ꧀ꦡꦸ, ꦮꦠ꧀ꦡꦸꦁ ꦥꦛꦶꦕ꧀ꦕ ꦑꦤ꧀ꦣꦴ’’ꦠꦶ ꦥꦕ꧀ꦕꦪꦸꦥ꧀ꦥꦤ꧀ꦤꦨꦴꦮꦺꦴ ꦮꦶꦪ ꦑꦤ꧀ꦣꦴꦤꦁ ꦌꦏꦠꦺꦴꦥꦶ ꦥꦕ꧀ꦕꦪꦨꦴꦮꦺꦴ ꦢꦱ꧀ꦱꦶꦠꦺꦴ. ꦠꦺꦤꦺꦮ ꦲꦶ ꦠꦱ꧀ꦩꦶꦁ ꦄꦠ꧀ꦡꦺ ꦄꦠ꧀ꦠꦤꦺꦴ ꦄꦫꦸꦕꦶꦁ ꦮꦶꦨꦴꦮꦺꦤ꧀ꦠꦺꦴ ꦄꦴꦲ ‘‘ꦆꦩꦶꦤꦴ ꦄꦣꦶꦥ꧀ꦥꦴꦪꦺꦤꦴꦲꦴ’’ꦠꦶ. ꦪꦺꦴ ꦥꦤꦠ꧀ꦡꦺꦴ ꦄꦠ꧀ꦠꦤꦺꦴ ꦫꦸꦕ꧀ꦕꦠꦶ, ꦠꦁ ꦢꦱ꧀ꦱꦺꦠꦸꦁ ‘‘ꦑꦤ꧀ꦣꦺ ꦥꦛꦶꦕ꧀ꦕ ꦮꦠ꧀ꦡꦹꦠꦶ ꦆꦢꦁ ꦥꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦑꦤ꧀ꦣꦴꦤꦁ ꦥꦕ꧀ꦕꦪꦨꦹꦠꦴꦤꦁ ꦥꦛꦶꦕ꧀ꦕꦛ꧀ꦜꦦꦫꦟꦠꦴꦢꦱ꧀ꦱꦤꦁ, ꦮꦠ꧀ꦡꦸꦱ꧀ꦱ ꦥꦕ꧀ꦕꦪꦨꦹꦠꦱ꧀ꦱ ꦥꦛꦶꦕ꧀ꦕꦛ꧀ꦜꦦꦫꦟꦠꦴꦢꦱ꧀ꦱꦤꦁ, ꦤ ꦑꦤ꧀ꦣꦴꦤꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦆꦣꦺꦮꦴꦠꦶ ꦆꦩꦱ꧀ꦩꦶꦁ ꦄꦚ꧀ꦚꦩꦚ꧀ꦚꦥꦕ꧀ꦕꦪꦺ ꦌꦮ. ꦲꦺꦠꦸꦥꦕ꧀ꦕꦪꦴꦢꦷꦱꦸꦥꦶ ꦄꦪꦩꦺꦮ ꦤꦪꦺꦴ, ꦠꦠ꧀ꦡ ꦲꦶ ꦥꦛꦶꦕ꧀ꦕꦛ꧀ꦜꦦꦫꦟꦱ꧀ꦱ ꦱꦩꦴꦤꦠꦴ. ꦢꦱ꧀ꦱꦶꦠꦴꦪ ꦥꦛꦶꦕ꧀ꦕꦛ꧀ꦜꦢ꧀ꦮꦪꦦꦫꦟꦠꦴꦪ. ꦑꦤ꧀ꦣꦮꦠ꧀ꦡꦹꦤꦚ꧀ꦕ ꦢꦱ꧀ꦱꦶꦠꦴꦪꦺꦮꦴꦠꦶ ꦑꦤ꧀ꦣꦮꦠ꧀ꦡꦹꦤꦚ꧀ꦕ ꦌꦏꦠꦺꦴ ꦥꦛꦶꦕ꧀ꦕꦛ꧀ꦜꦦꦫꦟꦠꦴ ꦢꦱ꧀ꦱꦶꦠꦴꦪꦺꦮ.

ꦌꦮꦩꦴꦢꦷꦠꦶ ꦄꦴꦢꦶ-ꦱꦢ꧀ꦢꦺꦤ ‘‘ꦄꦏꦸꦱꦭꦁ ꦣꦩ꧀ꦩꦁ ꦥꦛꦶꦕ꧀ꦕꦴ’’ꦠꦶ ꦌꦮꦩꦴꦢꦶ ꦱꦔ꧀ꦒꦪ꧀ꦲꦠꦶ. ꦤꦤꦸ ꦨꦮꦶꦠꦧ꧀ꦧꦤ꧀ꦠꦶ ꦪꦺꦴꦗꦤꦴ. ꦲꦺꦠꦸꦥꦕ꧀ꦕꦪꦴꦢꦷꦲꦶ ꦮꦶꦪꦴꦠꦶ ꦱꦢꦶꦱꦹꦢꦴꦲꦫꦟꦤ꧀ꦠꦶ ꦠꦁ ꦢꦱ꧀ꦱꦺꦤ꧀ꦠꦺꦴ ‘‘ꦤ ꦲꦷ’’ꦠꦶꦄꦴꦢꦶꦩꦴꦲ. ꦪꦁ ‘‘ꦌꦏꦁ, ꦠꦪꦺꦴ, ꦢ꧀ꦮꦺ ꦕ ꦑꦤ꧀ꦣꦺ ꦥꦛꦶꦕ꧀ꦕꦴ’’ꦠꦶ ꦮꦸꦠ꧀ꦠꦁ ꦥꦕ꧀ꦕꦪꦗꦴꦠꦤ꧀ꦠꦶ ꦄꦠ꧀ꦡꦺꦴ. ꦥꦕ꧀ꦕꦪꦛ꧀ꦜꦺꦴ ꦲꦶ ꦥꦛꦶꦕ꧀ꦕꦛ꧀ꦜꦺꦴ. ꦠꦺꦤꦴꦲ ‘‘ꦠꦺ ꦲꦺꦠꦸꦥꦕ꧀ꦕꦪꦨꦹꦠꦴ ꦌꦮ ꦤ ꦲꦺꦴꦤ꧀ꦠꦷ’’ꦠꦶ. ꦌꦠꦺꦤ ꦤ ꦥꦛꦶꦕ꧀ꦕꦛ꧀ꦜꦦꦫꦟꦏꦱ꧀ꦱ ꦌꦏꦤ꧀ꦠꦶꦏꦺꦴ ꦲꦺꦠꦸꦄꦴꦢꦶꦥꦕ꧀ꦕꦪꦨꦴꦮꦺꦴꦠꦶ ꦢꦱ꧀ꦱꦺꦠꦶ. ꦠꦺꦤꦴꦲ ‘‘ꦌꦱ ꦤꦪꦺꦴ ꦄꦴꦫꦩ꧀ꦩꦟꦥꦕ꧀ꦕꦪꦴꦢꦷꦱꦹ’’ꦠꦶ. ꦤ ꦲꦶ ꦄꦴꦫꦩ꧀ꦩꦟꦥꦕ꧀ꦕꦪꦨꦹꦠꦺꦴ ꦣꦩ꧀ꦩꦺꦴ ꦥꦛꦶꦕ꧀ꦕꦛ꧀ꦜꦁ ꦦꦫꦠꦶ. ꦮꦸꦠ꧀ꦠꦚ꧀ꦕ ‘‘ꦏꦸꦱꦭꦁ ꦣꦩ꧀ꦩꦁ ꦥꦛꦶꦕ꧀ꦕ ꦏꦸꦱꦭꦺꦴ ꦣꦩ꧀ꦩꦺꦴ ꦈꦥ꧀ꦥꦗ꧀ꦗꦠꦶ ꦄꦴꦫꦩ꧀ꦩꦟꦥꦕ꧀ꦕꦪꦴ’’ꦠꦶ.

ꦥꦕ꧀ꦕꦪꦤ꧀ꦠꦫꦺꦤꦥꦶ ꦈꦥꦏꦴꦫꦏꦠꦴꦩꦠ꧀ꦠꦩ꧀ꦥꦶ ꦒꦲꦺꦠ꧀ꦮꦴ ꦥꦛꦶꦕ꧀ꦕꦮꦴꦫꦺ ꦮꦴꦫꦤ꧀ꦠꦫꦺ ꦕ ꦲꦺꦠꦸꦄꦴꦢꦶꦥꦕ꧀ꦕꦪꦴ ꦢꦱ꧀ꦱꦶꦠꦴꦠꦶ ꦈꦥꦕꦪꦺꦤ ꦪꦡꦴꦮꦸꦠ꧀ꦠꦁ ꦮꦶꦨꦴꦮꦺꦤ꧀ꦠꦺꦴ ‘‘ꦥꦕ꧀ꦕꦪꦮꦴꦫꦺ ꦕꦴ’’ꦠꦶꦄꦴꦢꦶꦩꦴꦲ. ꦠꦁꦥꦕ꧀ꦕꦪꦴꦠꦶ ꦮꦠ꧀ꦡꦸꦥꦕ꧀ꦕꦪꦴ, ꦪꦡꦴꦫꦲꦁ ꦥꦕ꧀ꦕꦪꦨꦹꦠꦁ ꦮꦠ꧀ꦡꦸꦁ ꦭꦨꦶꦠ꧀ꦮꦴꦠꦶ ꦄꦠ꧀ꦡꦺꦴ. ꦠꦺꦠꦶ ꦏꦸꦱꦭꦺ ꦑꦤ꧀ꦣꦺ ꦥꦛꦶꦕ꧀ꦕ. ꦠꦺꦱꦤ꧀ꦠꦶ ꦩꦲꦴꦨꦹꦠꦴꦤꦁ ꦑꦤ꧀ꦣꦴꦤꦁ. ꦥꦕ꧀ꦕꦪꦨꦴꦮꦴꦨꦴꦮꦠꦺꦴꦠꦶ ꦆꦢꦁ ꦑꦤ꧀ꦣꦴꦤꦁ ꦲꦺꦠꦸꦱꦲꦗꦴꦠꦴꦢꦶꦥꦕ꧀ꦕꦪꦨꦴꦮꦱ꧀ꦱ ꦩꦲꦴꦨꦹꦠꦺꦱꦸ ꦢꦶꦛ꧀ꦜꦠ꧀ꦠꦴ ꦮꦸꦠ꧀ꦠꦁ. ꦪꦢꦶ ꦌꦮꦁ ꦄꦚ꧀ꦚꦩꦚ꧀ꦚꦥꦕ꧀ꦕꦪꦴꦥꦶ ꦠꦺ ꦠꦺꦱꦁ ꦨꦮꦺꦪ꧀ꦪꦸꦤ꧀ꦠꦶ ꦥꦫꦱ꧀ꦱ ꦄꦴꦱꦔ꧀ꦏꦤꦶꦫꦴꦱꦔ꧀ꦏꦁ ꦏꦫꦺꦴꦤ꧀ꦠꦺꦴ ‘‘ꦄꦚ꧀ꦚꦩꦚ꧀ꦚꦱꦢ꧀ꦢꦺꦴ ꦲꦷ’’ꦠꦶꦄꦴꦢꦶꦩꦴꦲ. ꦤꦶꦫꦥꦺꦏ꧀ꦑꦺꦴꦠꦶ ꦄꦚ꧀ꦚꦤꦶꦫꦥꦺꦏ꧀ꦑꦺꦴ. ꦤ ꦲꦶ ꦲꦺꦠꦸꦣꦩ꧀ꦩꦺꦴ ꦣꦩ꧀ꦩꦤ꧀ꦠꦫꦴꦥꦺꦏ꧀ꦑꦺꦴ ꦲꦸꦠ꧀ꦮꦴ ꦲꦺꦠꦸꦥꦕ꧀ꦕꦪꦺꦴ ꦲꦺꦴꦠꦶ, ꦱꦢ꧀ꦢꦱꦷꦱꦺꦤꦺꦠ꧀ꦡ ꦄꦠ꧀ꦡꦺꦴ ꦮꦸꦠ꧀ꦠꦺꦴ. ꦄꦚ꧀ꦚꦠꦫꦴꦥꦺꦏ꧀ꦑꦺꦴꦠꦶ ꦄꦠ꧀ꦠꦤꦴ ꦱꦲꦏꦴꦫꦶꦏꦴꦫꦟꦨꦹꦠꦁ, ꦆꦠꦫꦁ ꦮꦴ ꦪꦁ ꦏꦶꦚ꧀ꦕꦶ ꦄꦚ꧀ꦚꦠꦫꦁ ꦄꦥꦺꦏ꧀ꦑꦠꦷꦠꦶ ꦄꦚ꧀ꦚꦠꦫꦴꦥꦺꦏ꧀ꦑꦺꦴ. ꦪꦡꦴꦮꦸꦠ꧀ꦠꦺꦠꦫꦺꦠꦫꦴꦥꦺꦏ꧀ꦑꦺꦴꦠꦶ ꦄꦫꦹꦥꦏ꧀ꦑꦤ꧀ꦣꦴꦢꦶꦨꦺꦢꦁ ꦥꦴꦭ꦳ꦶꦪꦁ ꦮꦸꦠ꧀ꦠꦥ꧀ꦥꦏꦴꦫꦁ ꦆꦠꦫꦺꦠꦫꦁ ꦩꦶꦡꦸ ꦥꦕ꧀ꦕꦪꦨꦹꦠꦁ ꦄꦥꦺꦏ꧀ꦑꦠꦷꦠꦶ ꦆꦠꦫꦺꦠꦫꦴꦥꦺꦏ꧀ꦑꦺꦴ. ꦥꦕ꧀ꦕꦪꦥꦕ꧀ꦕꦪꦸꦥ꧀ꦥꦤ꧀ꦤꦴ ꦕ ꦑꦤ꧀ꦣꦴ ꦩꦲꦴꦨꦹꦠꦴ ꦆꦣ ꦪꦡꦴꦮꦸꦠ꧀ꦠꦴ ꦨꦮꦺꦪ꧀ꦪꦸꦤ꧀ꦠꦶ ꦏꦱ꧀ꦩꦴ ꦮꦸꦠ꧀ꦠꦁ. ꦤ ꦲꦶ ꦑꦤ꧀ꦣꦴ ꦩꦲꦴꦨꦹꦠꦴ ꦄꦚ꧀ꦚꦩꦚ꧀ꦚꦁ ꦄꦚ꧀ꦚꦩꦚ꧀ꦚꦥꦕ꧀ꦕꦪꦨꦴꦮꦺꦤ ꦮꦸꦠ꧀ꦠꦴ, ꦄꦡ ꦑꦤ꧀ꦣꦴ ꦕ ꦩꦲꦴꦨꦹꦠꦴ ꦕꦴꦠꦶ ꦮꦶꦱꦸꦁ ꦮꦶꦱꦸꦁ ꦒꦪ꧀ꦲꦺꦪ꧀ꦪꦸꦁ, ꦌꦮꦁ ꦱꦠꦶ ‘‘ꦩꦲꦴꦨꦹꦠꦴ ꦑꦤ꧀ꦣꦴꦤꦁ ꦤ ꦏꦺꦴꦕꦶ ꦥꦕ꧀ꦕꦪꦺꦴ’’ꦠꦶ ꦤ ꦮꦠ꧀ꦠꦧ꧀ꦧꦁ.

ꦪꦱ꧀ꦱ ꦱꦪꦁ ꦥꦕ꧀ꦕꦪꦺꦴ, ꦠꦠꦺꦴ ꦠꦺꦤ ꦠꦤ꧀ꦤꦶꦱ꧀ꦱꦶꦠꦺꦤ ꦮꦴꦠꦶ ꦪꦱ꧀ꦱ ꦣꦩ꧀ꦩꦱ꧀ꦱ ꦱꦪꦁ ꦄꦠ꧀ꦠꦤꦴ ꦥꦕ꧀ꦕꦪꦺꦴ ꦲꦺꦴꦠꦶ, ꦠꦠꦺꦴ ꦣꦩ꧀ꦩꦠꦺꦴ ꦱꦪꦁ ꦈꦥ꧀ꦥꦗ꧀ꦗꦩꦴꦤꦁ ꦏꦡꦁ ꦠꦺꦤ ꦣꦩ꧀ꦩꦺꦤ ꦠꦤ꧀ꦤꦶꦱ꧀ꦱꦶꦠꦺꦤ ꦮꦴ ꦄꦚ꧀ꦚꦩꦚ꧀ꦚꦥꦕ꧀ꦕꦪꦺꦤ ꦌꦮꦁꦨꦹꦠꦁ ꦠꦁ ꦣꦩ꧀ꦩꦗꦴꦠꦁ ꦄꦚ꧀ꦚꦩꦚ꧀ꦚꦥꦕ꧀ꦕꦪꦴ ꦈꦥ꧀ꦥꦗ꧀ꦗꦠꦷꦠꦶ ꦮꦠ꧀ꦠꦧ꧀ꦧꦠꦁ ꦄꦫꦲꦠꦷꦠꦶ ꦮꦸꦠ꧀ꦠꦩꦺꦮꦠ꧀ꦡꦁ ꦈꦢꦴꦲꦫꦟꦺꦤ ꦮꦶꦨꦴꦮꦺꦠꦶ ‘‘ꦪꦡꦴ’’ꦠꦶꦄꦴꦢꦶꦤꦴ. ꦠꦠ꧀ꦡ ‘‘ꦑꦤ꧀ꦣꦺ ꦥꦛꦶꦕ꧀ꦕ ꦑꦤ꧀ꦣꦴ’’ꦠꦶ ꦆꦢꦁ ‘‘ꦠꦺꦤ ꦄꦚ꧀ꦚꦩꦚ꧀ꦚꦥꦕ꧀ꦕꦪꦺꦤ ꦈꦥ꧀ꦥꦗ꧀ꦗꦩꦴꦤ’’ꦤ꧀ꦠꦶ ꦆꦩꦱ꧀ꦱ ꦈꦢꦴꦲꦫꦟꦁ, ‘‘ꦮꦠ꧀ꦡꦸꦁ ꦥꦕ꧀ꦕꦪꦴ ꦑꦤ꧀ꦣꦴ’’ꦠꦶ ꦆꦢꦁ ꦥꦤ ‘‘ꦠꦤ꧀ꦤꦶꦱ꧀ꦱꦶꦠꦺꦤ ꦄꦚ꧀ꦚꦩꦚ꧀ꦚꦥꦕ꧀ꦕꦪꦺꦤ ꦈꦥ꧀ꦥꦗ꧀ꦗꦩꦴꦤ’’ꦤ꧀ꦠꦶ ꦌꦠꦱ꧀ꦱ. ꦠꦱ꧀ꦩꦴꦠꦶ ꦮꦸꦠ꧀ꦠꦩꦺꦮ ꦄꦠ꧀ꦡꦁ ꦏꦴꦫꦟꦨꦴꦮꦺꦤ ꦥꦕ꧀ꦕꦴꦩꦱꦠꦶ. ꦄꦠ꧀ꦠꦤꦺꦴ ꦥꦕ꧀ꦕꦪꦱ꧀ꦱ ꦥꦕ꧀ꦕꦪꦠ꧀ꦠꦴꦨꦴꦮꦠꦺꦴꦠꦶ ꦄꦠ꧀ꦠꦤꦺꦴ ꦥꦕ꧀ꦕꦪꦨꦹꦠꦱ꧀ꦱ ꦄꦫꦹꦥꦏ꧀ꦑꦤ꧀ꦣꦱ꧀ꦱ ꦥꦕ꧀ꦕꦪꦨꦴꦮꦴꦨꦴꦮꦠꦺꦴ. ꦤ ꦲꦶ ꦩꦲꦴꦨꦹꦠꦴ ꦪꦠꦺꦴ ꦑꦤ꧀ꦣꦠꦺꦴ ꦈꦥ꧀ꦥꦤ꧀ꦤꦴ, ꦠꦺꦱꦁ ꦥꦕ꧀ꦕꦪꦴ ꦲꦺꦴꦤ꧀ꦠꦶ. ꦠꦢꦥꦺꦏ꧀ꦑꦠ꧀ꦠꦴꦠꦶ ꦆꦠꦫꦺꦠꦫꦥꦕ꧀ꦕꦪꦨꦴꦮꦴꦥꦺꦏ꧀ꦑꦠ꧀ꦠꦴ. ꦑꦤ꧀ꦣꦺ ꦥꦛꦶꦕ꧀ꦕ ꦥꦕ꧀ꦕꦪꦴ ꦕꦴꦠꦶ ꦥꦛꦶꦕ꧀ꦕꦮꦴꦫꦺ ꦮꦸꦠ꧀ꦠꦤꦶꦪꦴꦩꦺꦤꦺꦮ ꦑꦤ꧀ꦣꦺ ꦥꦛꦶꦕ꧀ꦕ, ꦥꦕ꧀ꦕꦪꦮꦴꦫꦺ ꦮꦸꦠ꧀ꦠꦤꦶꦪꦴꦩꦺꦤ ꦑꦤ꧀ꦣꦺ ꦥꦕ꧀ꦕꦪꦴ ꦕ. ꦤꦄꦚ꧀ꦚꦩꦚ꧀ꦚꦥꦕ꧀ꦕꦪꦴ ꦕ ꦮꦸꦠ꧀ꦠꦴꦠꦶ ꦄꦚ꧀ꦚꦩꦚ꧀ꦚꦥꦕ꧀ꦕꦪꦠꦺꦴ ꦄꦚ꧀ꦚꦱ꧀ꦩꦴ ꦤꦶꦱ꧀ꦱꦪꦥꦕ꧀ꦕꦪꦴꦢꦶꦠꦺꦴ ꦩꦲꦴꦨꦹꦠꦴꦤꦁ ꦈꦥ꧀ꦥꦠ꧀ꦠꦶ ꦮꦸꦠ꧀ꦠꦴ ꦕꦴꦠꦶ ꦄꦠ꧀ꦡꦺꦴ. ꦮꦠ꧀ꦡꦸꦁ ꦥꦕ꧀ꦕꦪꦴ ꦈꦥ꧀ꦥꦗ꧀ꦗꦩꦴꦤꦴꦠꦶ ꦮꦠ꧀ꦡꦸꦁ ꦥꦸꦫꦺꦗꦴꦠꦥꦕ꧀ꦕꦪꦁ ꦏꦠ꧀ꦮꦴ ꦈꦥ꧀ꦥꦗ꧀ꦗꦩꦴꦤꦴ. ꦠꦤ꧀ꦤꦶꦱ꧀ꦱꦶꦠꦺꦤ ꦕ ꦄꦚ꧀ꦚꦩꦚ꧀ꦚꦥꦕ꧀ꦕꦪꦺꦤꦴꦠꦶ ꦠꦁ ꦮꦠ꧀ꦡꦸꦁ ꦤꦶꦱ꧀ꦱꦶꦠꦺꦤ ꦑꦤ꧀ꦣꦺꦤ ꦄꦚ꧀ꦚꦩꦚ꧀ꦚꦥꦕ꧀ꦕꦪꦨꦹꦠꦺꦤ ꦈꦥ꧀ꦥꦗ꧀ꦗꦤ꧀ꦠꦶ, ꦠꦱ꧀ꦩꦴ ꦪꦡꦴꦮꦸꦠ꧀ꦠꦺꦤ ꦏꦴꦫꦟꦺꦤ ꦮꦠ꧀ꦡꦸꦁ ꦥꦕ꧀ꦕꦪꦴ…ꦥꦺ… ꦮꦸꦠ꧀ꦠꦴ, ꦆꦩꦶꦤꦴ ꦥꦫꦶꦪꦴꦪꦺꦤ ꦥꦤ ꦈꦗꦸꦏꦁ ꦥꦮꦠ꧀ꦠꦶꦪꦁ ꦮꦠ꧀ꦡꦸꦱ꧀ꦱ ꦄꦚ꧀ꦚꦩꦚ꧀ꦚꦥꦕ꧀ꦕꦪꦨꦴꦮꦺꦴꦠꦶ ꦄꦠ꧀ꦡꦺꦴ.

꧕꧙. ꦱꦴ ꦤ ꦒꦲꦶꦠꦴꦠꦶ ꦪꦴ ‘‘ꦕꦏ꧀ꦑꦴꦪꦠꦤꦁ ꦤꦶꦱ꧀ꦱꦴꦪꦴ’’ꦠꦶꦄꦴꦢꦶꦤꦴ ꦕꦏ꧀ꦑꦴꦪꦠꦤꦴꦢꦷꦤꦁ ꦤꦶꦱ꧀ꦱꦪꦥꦕ꧀ꦕꦪꦠꦴ ꦮꦸꦠ꧀ꦠꦴ, ꦱꦴ ꦆꦣ ꦥꦛꦶꦕ꧀ꦕꦮꦴꦫꦺ ꦤ ꦮꦸꦠ꧀ꦠꦴꦠꦶ ꦄꦠ꧀ꦡꦺꦴ ꦱꦲꦗꦴꦠꦠ꧀ꦡꦺꦴ ꦥꦛꦶꦕ꧀ꦕꦠ꧀ꦡꦺꦴꦠꦶ ꦏꦠ꧀ꦮꦴ. ꦠꦺꦤꦴꦲ ‘‘ꦕꦏ꧀ꦑꦴꦪꦠꦤꦴꦢꦷꦤꦶ…ꦥꦺ… ꦄꦣꦶꦥ꧀ꦥꦴꦪꦺꦴ’’ꦠꦶ. ꦪꦺꦱꦁ ꦥꦤ ꦄꦫꦹꦥꦏ꧀ꦑꦤ꧀ꦣꦩꦲꦴꦨꦹꦠꦤꦴꦩꦫꦹꦥꦕꦶꦠ꧀ꦠꦕꦺꦠꦱꦶꦏꦩꦲꦴꦨꦹꦠꦫꦹꦥꦶꦣꦩ꧀ꦩꦴꦤꦁ ꦮꦱꦺꦤ ꦖꦣꦴ ꦤꦶꦱ꧀ꦱꦪꦥꦕ꧀ꦕꦪꦺꦴ ꦆꦕ꧀ꦖꦶꦠꦺꦴ, ꦠꦺꦱꦁ ꦮꦱꦺꦤ ꦆꦣ ꦮꦶꦨꦠ꧀ꦠꦺꦴ ꦌꦮ. ꦏꦡꦁ ꦫꦹꦥꦶꦮꦱꦺꦤ ꦮꦶꦨꦠ꧀ꦠꦺꦴꦠꦶ ꦕꦺ? ‘‘ꦮꦠ꧀ꦡꦸꦁ ꦥꦛꦶꦕ꧀ꦕ ꦑꦤ꧀ꦣꦴ’’ꦠꦶ ꦲꦢꦪꦮꦠ꧀ꦡꦸꦮꦱꦺꦤ ꦱꦫꦹꦥꦠꦺꦴ ꦢꦱ꧀ꦱꦶꦠꦺꦴ ꦌꦮ. ꦆꦠꦫꦺꦱꦩ꧀ꦥꦶ ꦮꦱꦺꦤ ‘‘ꦄꦧ꧀ꦪꦴꦏꦠꦁ ꦣꦩ꧀ꦩꦁ ꦥꦛꦶꦕ꧀ꦕ ꦄꦧ꧀ꦪꦴꦏꦠꦺꦴ ꦣꦩ꧀ꦩꦺꦴ ꦈꦥ꧀ꦥꦗ꧀ꦗꦠꦶ ꦤꦶꦱ꧀ꦱꦪꦥꦕ꧀ꦕꦪꦴ’’ꦠꦶ ꦌꦠ꧀ꦡ ꦢꦱ꧀ꦱꦶꦠꦺꦴ. ꦪꦡꦴ ꦲꦶ ‘‘ꦏꦸꦱꦭꦁ ꦣꦩ꧀ꦩꦁ ꦥꦛꦶꦕ꧀ꦕ ꦏꦸꦱꦭꦺꦴ ꦣꦩ꧀ꦩꦺꦴ ꦈꦥ꧀ꦥꦗ꧀ꦗꦠꦶ ꦄꦴꦫꦩ꧀ꦩꦟꦥꦕ꧀ꦕꦪꦴ’’ꦠꦶꦄꦴꦢꦷꦱꦸ ꦫꦹꦥꦴꦪꦠꦤꦴꦢꦷꦤꦁ ꦄꦱꦠꦶꦥꦶ ꦥꦛꦶꦕ꧀ꦕꦛ꧀ꦜꦦꦫꦟꦺ ꦄꦴꦫꦩ꧀ꦩꦟꦥꦕ꧀ꦕꦪꦨꦴꦮꦺꦴ ꦢꦱ꧀ꦱꦶꦠꦺꦴ ꦲꦺꦴꦠꦶ, ꦌꦮꦩꦶꦣꦴꦥꦶ ꦕꦏ꧀ꦑꦴꦪꦠꦤꦴꦢꦷꦤꦁ ꦤꦶꦱ꧀ꦱꦪꦥꦕ꧀ꦕꦪꦨꦴꦮꦺꦴ ꦢꦱ꧀ꦱꦶꦠꦺꦴ ꦲꦺꦴꦠꦶ. ꦠꦺꦤ ꦮꦸꦠ꧀ꦠꦁ ‘‘ꦤꦶꦱ꧀ꦱꦪ…ꦥꦺ… ꦤ ꦒꦲꦶꦠꦴꦤꦷ’’ꦠꦶ.

꧖꧐. ꦢ꧀ꦮꦷꦱꦸ ꦈꦥꦤꦶꦱ꧀ꦱꦪꦺꦱꦹꦠꦶ ꦄꦤꦤ꧀ꦠꦫꦥꦏꦠꦹꦥꦤꦶꦱ꧀ꦱꦪꦺꦱꦸ. ꦏꦸꦱꦭꦴꦥꦶ ꦥꦤ ꦩꦲꦒ꧀ꦒꦠꦴꦠꦶ ꦥꦶ-ꦱꦢ꧀ꦢꦺꦤ ꦄꦧ꧀ꦪꦴꦏꦠꦺ ꦩꦲꦒ꧀ꦒꦠꦺ ꦄꦴꦏꦝ꧀ꦞꦠꦶ ‘‘ꦏꦸꦱꦭꦴꦥꦶ ꦩꦲꦒ꧀ꦒꦠꦴ ꦄꦴꦫꦩ꧀ꦩꦟꦹꦥꦤꦶꦱ꧀ꦱꦪꦁ ꦤ ꦭꦨꦤ꧀ꦠꦶ, ꦥꦒꦺꦮ ꦄꦧ꧀ꦪꦴꦏꦠꦴ’’ꦠꦶ. ꦏꦢꦴꦕꦶ ꦤ ꦭꦨꦤ꧀ꦠꦶ, ꦪꦢꦴ ꦒꦫꦸꦁ ꦏꦠ꧀ꦮꦴ ꦤ ꦥꦮꦠ꧀ꦠꦤ꧀ꦠꦷꦠꦶ ꦄꦠ꧀ꦡꦺꦴ.

꧖꧑. ꦄꦚ꧀ꦚꦠ꧀ꦡ ꦲꦺꦠꦸꦥꦕ꧀ꦕꦪꦴꦢꦷꦱꦸ. ꦥꦕ꧀ꦕꦪꦁ ꦄꦤꦶꦢ꧀ꦢꦶꦱꦶꦠ꧀ꦮꦴꦠꦶ ꦥꦕ꧀ꦕꦪꦁ ꦣꦩ꧀ꦩꦁ ꦱꦫꦹꦥꦠꦺꦴ ꦄꦤꦶꦢ꧀ꦢꦶꦱꦶꦠ꧀ꦮꦴ. ꦤ ꦲꦶ ꦲꦺꦠꦸꦥꦕ꧀ꦕꦪꦤꦶꦢ꧀ꦢꦺꦱꦴꦢꦷꦱꦸ ꦄꦭꦺꦴꦨꦴꦢꦶꦏꦸꦱꦭꦴꦢꦶꦱꦫꦹꦥꦮꦶꦱꦺꦱꦠꦺꦴ ꦲꦺꦠꦸꦄꦴꦢꦶꦣꦩ꧀ꦩꦴ ꦢꦱ꧀ꦱꦶꦠꦴ. ꦏꦸꦱꦭꦴꦢꦷꦱꦹꦠꦶ ꦆꦢꦁ ꦄꦭꦺꦴꦨꦴꦢꦶꦮꦶꦱꦺꦱꦤꦁ. ꦠꦺꦤ ꦪꦡꦴ ꦄꦭꦺꦴꦨꦴꦢꦷꦱꦸ ꦄꦪꦩꦺꦮ ꦥꦕ꧀ꦕꦪꦺꦴꦠꦶ ꦤꦶꦪꦩꦺꦴ ꦤꦠ꧀ꦡꦶ, ꦌꦮꦁ ꦠꦧ꧀ꦧꦶꦱꦺꦱꦺꦱꦸ ꦏꦸꦱꦭꦴꦢꦷꦱꦹꦠꦶ ꦢꦱ꧀ꦱꦺꦠꦶ. ꦆꦣ ꦥꦤ ꦥꦸꦫꦺꦗꦴꦠꦥꦕ꧀ꦕꦪꦺ. ꦮꦠ꧀ꦡꦸꦤꦮꦠ꧀ꦡꦸꦣꦩ꧀ꦩꦺꦱꦹꦠꦶ ꦤꦶꦢ꧀ꦣꦴꦫꦟꦺ ꦨꦸꦩ꧀ꦩꦁ. ꦥꦸꦫꦺꦗꦴꦠꦥꦕ꧀ꦕꦪꦴ ꦈꦥ꧀ꦥꦗ꧀ꦗꦩꦴꦤꦴꦤꦤ꧀ꦠꦶ ꦆꦩꦶꦤꦴ ꦥꦛꦶꦱꦤ꧀ꦣꦶꦏ꧀ꦑꦟꦺ, ꦄꦴꦫꦸꦥ꧀ꦥꦺ ꦈꦥ꧀ꦥꦗ꧀ꦗꦩꦴꦤꦺ ꦕ ꦑꦤ꧀ꦣꦺ ꦤꦶꦮꦠ꧀ꦠꦺꦠꦶ. ꦏꦱ꧀ꦩꦴ ꦥꦤꦺꦠ꧀ꦡ ꦮꦠ꧀ꦡꦸꦥꦸꦫꦺꦗꦴꦠꦩꦺꦮ ꦒꦲꦶꦠꦁ, ꦤ ꦄꦴꦫꦩ꧀ꦩꦟꦥꦸꦫꦺꦗꦴꦠꦤ꧀ꦠꦶ ꦕꦺꦴꦢꦤꦁ ꦩꦤꦱꦶ ꦏꦠ꧀ꦮꦴ ꦄꦴꦲ ‘‘ꦄꦴꦫꦩ꧀ꦩꦟꦥꦸꦫꦺꦗꦴꦠꦩ꧀ꦥꦶ ꦲꦶ ꦮꦠ꧀ꦡꦸꦥꦸꦫꦺꦗꦴꦠꦺ ꦄꦮꦶꦗ꧀ꦗꦩꦴꦤꦺ ꦤ ꦭꦧ꧀ꦨꦠꦷ’’ꦠꦶ. ꦠꦱ꧀ꦱꦴꦠꦶ ꦥꦛꦶꦱꦤ꧀ꦣꦶꦮꦶꦥꦴꦏꦱ꧀ꦱ. ꦤ ꦈꦢ꧀ꦣꦛꦺꦴꦠꦶ ꦮꦸꦠ꧀ꦠꦩꦺꦮꦠ꧀ꦡꦁ ꦥꦴꦏꦛꦁ ꦏꦴꦠꦸꦁ ‘‘ꦤꦺꦮꦮꦶꦥꦴꦏ…ꦥꦺ… ꦠꦷꦟꦷꦠꦶ ꦮꦸꦠ꧀ꦠ’’ꦤ꧀ꦠꦶ ꦮꦸꦠ꧀ꦠꦁ. ꦄꦭꦴꦨꦠꦺꦴꦠꦶ ꦪꦢꦶ ꦭꦧ꧀ꦨꦺꦪ꧀ꦪ, ‘‘ꦕꦠ꧀ꦠꦴꦫꦷ’’ꦠꦶ ꦮꦠ꧀ꦠꦧ꧀ꦧꦁ ꦱꦶꦪꦴꦠꦶ ꦢꦱ꧀ꦱꦺꦠꦶ. ꦠꦠ꧀ꦡꦴꦠꦶ ꦮꦶꦥꦴꦏꦠ꧀ꦠꦶꦏꦺ. ꦠꦷꦟꦷꦠꦶ ‘‘ꦮꦶꦥꦴꦏꦁ ꦣꦩ꧀ꦩꦁ ꦥꦛꦶꦕ꧀ꦕ ꦮꦶꦥꦴꦏꦺꦴ ꦣꦩ꧀ꦩꦺꦴ ꦈꦥ꧀ꦥꦗ꧀ꦗꦠꦶ ꦥꦸꦫꦺꦗꦴꦠꦥꦕ꧀ꦕꦪꦴ, ꦮꦶꦥꦴꦏꦣꦩ꧀ꦩꦣꦩ꧀ꦩꦁ, ꦤꦺꦮꦮꦶꦥꦴꦏꦤꦮꦶꦥꦴꦏꦣꦩ꧀ꦩꦣꦩ꧀ꦩꦁ ꦥꦛꦶꦕ꧀ꦕꦴ’’ꦠꦶ ꦆꦩꦴꦤꦶ ꦠꦷꦟꦶ.

꧖꧓. ꦠꦢꦸꦥꦴꦢꦴꦫꦹꦥꦴꦤꦤ꧀ꦠꦶ ꦠꦺ ꦩꦲꦴꦨꦹꦠꦺ ꦤꦶꦱ꧀ꦱꦴꦪ ꦥꦮꦠ꧀ꦠꦈꦥꦴꦢꦴꦫꦹꦥꦴꦤꦁ. ꦮꦢꦠꦷꦠꦶ ꦌꦏꦏ꧀ꦑꦟꦶꦏꦤꦴꦤꦴꦏ꧀ꦑꦟꦶꦏꦏꦩ꧀ꦩꦥꦕ꧀ꦕꦪꦁ ꦮꦢꦠꦶ ꦄꦮꦶꦤꦶꦧ꧀ꦨꦺꦴꦒꦮꦱꦺꦤ ꦥꦮꦠ꧀ꦠꦩꦴꦤꦴꦤꦁ ꦠꦺꦱꦁ ꦥꦕ꧀ꦕꦪꦺꦤ ꦮꦶꦱꦺꦱꦴꦨꦴꦮꦠꦺꦴ. ꦥꦮꦠ꧀ꦠꦶꦪꦁ ꦏꦛꦠ꧀ꦠꦴꦫꦹꦥꦴꦤꦤ꧀ꦠꦶ ꦮꦶꦱꦺꦱꦤꦁ ꦥꦛꦶꦱꦤ꧀ꦣꦶꦏ꧀ꦑꦟꦺ ꦏꦛꦠ꧀ꦠꦴꦫꦹꦥꦴꦤꦁ ꦌꦏꦏ꧀ꦑꦟꦶꦏꦱ꧀ꦱꦥꦶ ꦏꦩ꧀ꦩꦥꦕ꧀ꦕꦪꦱ꧀ꦱ ꦆꦕ꧀ꦖꦶꦠꦠ꧀ꦠꦴ. ꦠꦺꦤꦺꦮ ꦲꦶ ꦄꦛ꧀ꦜꦏꦡꦴꦪꦁ ‘‘ꦠꦡꦴ ꦥꦛꦶꦱꦤ꧀ꦣꦶꦏ꧀ꦑꦟꦺ ꦩꦲꦴꦨꦹꦠꦴꦤ’’ꦤ꧀ꦠꦶ ꦢꦸꦮꦶꦣꦺꦴꦥꦶ ꦏꦩ꧀ꦩꦥꦕ꧀ꦕꦪꦺꦴ ꦮꦸꦠ꧀ꦠꦺꦴ.

꧖꧔. ꦪꦁ ꦪꦁ ꦥꦛꦶꦱꦤ꧀ꦣꦶꦪꦁ ꦭꦧ꧀ꦨꦠꦷꦠꦶ ꦕꦏ꧀ꦑꦸꦤ꧀ꦢ꧀ꦫꦶꦪꦴꦢꦷꦱꦸ ꦪꦁ ꦪꦁ ꦆꦤ꧀ꦢ꧀ꦫꦶꦪꦫꦹꦥꦁ ꦥꦛꦶꦱꦤ꧀ꦣꦶꦪꦁ ꦭꦧ꧀ꦨꦠꦶ, ꦠꦱ꧀ꦱ ꦠꦱ꧀ꦱ ꦮꦱꦺꦤ ꦆꦤ꧀ꦢ꧀ꦫꦶꦪꦫꦹꦥꦚ꧀ꦕ ꦮꦠ꧀ꦡꦸꦫꦹꦥꦚ꧀ꦕ ‘‘ꦏꦛꦠ꧀ꦠꦴꦫꦹꦥ’’ꦤ꧀ꦠꦶ ꦮꦸꦠ꧀ꦠꦁ.

꧖꧙. ꦏꦺꦱꦚ꧀ꦕꦷꦠꦶ ꦥꦚ꧀ꦕꦮꦺꦴꦏꦴꦫꦺ ꦥꦛꦶꦱꦤ꧀ꦣꦶꦏ꧀ꦑꦤ꧀ꦣꦴꦢꦷꦤꦁ. ꦠꦺꦱꦚ꧀ꦲꦶ ꦮꦠ꧀ꦡꦸ ꦤꦶꦪꦩꦠꦺꦴ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦺꦴ ꦲꦺꦴꦠꦶ. ꦱꦩꦴꦤꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦴꦠꦶ ꦱꦢꦶꦱꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦴ. ꦏꦸꦱꦭꦴꦏꦸꦱꦭꦴ ꦲꦶ ꦑꦤ꧀ꦣꦴ ꦌꦏꦕ꧀ꦕꦺ ꦕ ꦄꦧ꧀ꦪꦴꦏꦠꦴ ꦪꦱ꧀ꦱ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦴ ꦲꦺꦴꦤ꧀ꦠꦶ, ꦤ ꦱꦪꦁ ꦠꦠꦺꦴ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦁ ꦭꦨꦤ꧀ꦠꦶ ꦕꦶꦠ꧀ꦠꦱꦩꦸꦛ꧀ꦜꦴꦤꦴꦤꦁ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦴꦨꦴꦮꦠꦺꦴ ꦮꦠ꧀ꦡꦸꦤꦴꦮ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦺꦤ ꦈꦥ꧀ꦥꦗ꧀ꦗꦤꦠꦺꦴ. ꦌꦏꦕ꧀ꦕꦺ ꦥꦤ ꦄꦧ꧀ꦪꦴꦏꦠꦴ ꦪꦱ꧀ꦱ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦴ ꦲꦺꦴꦤ꧀ꦠꦶ, ꦱꦪꦩ꧀ꦥꦶ ꦠꦠꦺꦴ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦁ ꦭꦨꦤ꧀ꦠꦶ ꦪꦡꦴ ꦥꦛꦶꦱꦤ꧀ꦣꦶꦏ꧀ꦑꦟꦺ ꦮꦠ꧀ꦡꦸꦏ꧀ꦑꦤ꧀ꦣꦴ. ꦠꦺꦤ ꦮꦸꦠ꧀ꦠꦁ ‘‘ꦏꦺꦱꦚ꧀ꦕꦶ ꦑꦤ꧀ꦣꦴ…ꦥꦺ… ꦤꦴꦤꦴꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦴꦥꦷ’’ꦠꦶ. ꦥꦕ꧀ꦕꦪꦁ ꦥꦕ꧀ꦕꦪꦁ ꦏꦫꦺꦴꦠꦷꦠꦶ ꦥꦕ꧀ꦕꦪꦣꦩ꧀ꦩꦁ ꦮꦠ꧀ꦡꦸꦁ ꦑꦤ꧀ꦣꦺ ꦕ ꦄꦠ꧀ꦠꦤꦺꦴ ꦥꦕ꧀ꦕꦪꦨꦹꦠꦁ ꦏꦫꦺꦴꦠꦶ, ꦪꦡꦴꦮꦸꦠ꧀ꦠꦁ ꦥꦕ꧀ꦕꦪꦣꦩ꧀ꦩꦁ ꦥꦕ꧀ꦕꦪꦁ ꦏꦠ꧀ꦮꦴ ꦥꦮꦠ꧀ꦠꦠꦷꦠꦶ ꦄꦠ꧀ꦡꦺꦴ. ꦠꦁꦏꦶꦫꦶꦪꦴꦏꦫꦟꦠꦺꦴꦠꦶ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦏꦶꦕ꧀ꦕꦏꦫꦟꦠꦺꦴ. ꦥꦛꦶꦕ꧀ꦕ ꦈꦥ꧀ꦥꦠ꧀ꦠꦶ ꦤꦠ꧀ꦡꦷꦠꦶ ꦥꦛꦶꦕ꧀ꦕꦛ꧀ꦜꦦꦫꦟꦁ ꦤꦠ꧀ꦡꦶ ꦱꦲꦗꦴꦠꦛ꧀ꦜꦺꦴ ꦥꦛꦶꦕ꧀ꦕꦛ꧀ꦜꦺꦴꦠꦶ ꦏꦠ꧀ꦮꦴ. ‘‘ꦥꦛꦶꦕ꧀ꦕ ꦈꦥ꧀ꦥꦗ꧀ꦗꦤ꧀ꦠꦷ’’ꦠꦶ ꦌꦠ꧀ꦠꦏꦩꦺꦮꦴꦲ, ꦏꦶꦁ ꦥꦛꦶꦕ꧀ꦕ? ꦑꦤ꧀ꦣꦺꦠꦶ ꦥꦴꦏꦛꦺꦴꦪꦩꦠ꧀ꦡꦺꦴꦠꦶ. ꦠꦺꦤꦴꦲ ‘‘ꦏꦶꦁ ꦥꦤ ꦥꦛꦶꦕ꧀ꦕꦴ’’ꦠꦶꦄꦴꦢꦶ. ꦥꦕ꧀ꦕꦴꦱꦠ꧀ꦠꦶꦚꦴꦪꦺꦤ ꦄꦤꦤ꧀ꦠꦫꦱ꧀ꦱ ꦮꦶꦣꦶ ꦥꦛꦶꦱꦺꦣꦺꦴ ꦮꦴ ꦲꦺꦴꦠꦷꦠꦶ ꦒꦟ꧀ꦲꦺꦪ꧀ꦪꦴꦠꦶ ꦠꦁ ꦤꦶꦮꦴꦫꦺꦠꦸꦁ ꦮꦸꦠ꧀ꦠꦤ꧀ꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦄꦤꦤ꧀ꦠꦫꦠ꧀ꦠꦴ…ꦥꦺ… ꦮꦸꦠ꧀ꦠꦁ ꦲꦺꦴꦠꦷ’’ꦠꦶ ꦄꦴꦲ.

꧗꧑-꧗꧒. ꦱꦔ꧀ꦑꦶꦥꦶꦠ꧀ꦮꦴ ꦢꦱ꧀ꦱꦶꦠꦴꦤꦁ ꦮꦱꦺꦤꦺꦠꦁ ꦮꦸꦠ꧀ꦠꦤ꧀ꦠꦶ ꦱꦔ꧀ꦑꦶꦥꦶꦠ꧀ꦮꦴ ꦢꦱ꧀ꦱꦶꦠꦴꦤꦁ ꦥꦕ꧀ꦕꦪꦴꦤꦁ ꦮꦱꦺꦤ ꦌꦠꦁ ‘‘ꦆꦩꦺ ꦠꦺꦮꦷꦱꦠꦶ ꦥꦕ꧀ꦕꦪꦴ’’ꦠꦶꦄꦴꦢꦶꦮꦕꦤꦁ ꦮꦴꦕꦤꦴꦩꦒ꧀ꦒꦁ ꦢꦱ꧀ꦱꦺꦤ꧀ꦠꦺꦲꦶꦥꦶ ꦥꦴꦭ꦳ꦶꦪꦁ ꦮꦸꦠ꧀ꦠꦤ꧀ꦠꦶ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦁ. ꦌꦏꦺꦤꦥꦷꦠꦶ ꦏꦸꦱꦭꦴꦢꦷꦱꦸ ꦕ ꦥꦢꦺꦱꦸ ꦌꦏꦺꦤꦥꦶ ꦥꦢꦺꦤ, ꦠꦱ꧀ꦩꦶꦁ ꦠꦱ꧀ꦩꦶꦁ ꦮꦴ ꦥꦕ꧀ꦕꦪꦤꦶꦢ꧀ꦢꦺꦱꦺ ꦮꦴꦏ꧀ꦪꦱꦔ꧀ꦑꦴꦠꦺꦤ ꦌꦏꦺꦤꦥꦶ ꦥꦢꦺꦤ. ꦠꦪꦺꦴ ꦥꦕ꧀ꦕꦪꦴꦠꦶ ꦲꦺꦠꦸꦄꦴꦫꦩ꧀ꦩꦟꦴꦣꦶꦥꦠꦶꦥꦕ꧀ꦕꦪꦴ. ꦠꦺ ꦕꦠ꧀ꦠꦴꦫꦺꦴ ꦥꦕ꧀ꦖꦴꦗꦴꦠꦚ꧀ꦕ ꦮꦗ꧀ꦗꦺꦠ꧀ꦮꦴꦠꦶ ꦌꦠ꧀ꦡ ꦪꦡꦴꦮꦸꦠ꧀ꦠꦺ ꦕꦠ꧀ꦠꦴꦫꦺꦴ ꦥꦕ꧀ꦕꦪꦺ ꦮꦶꦠ꧀ꦡꦴꦫꦶꦠꦠ꧀ꦠꦴ ‘‘ꦮꦗ꧀ꦗꦺꦠ꧀ꦮꦴ’’ꦠꦶ ꦮꦸꦠ꧀ꦠꦁ, ꦥꦕ꧀ꦖꦴꦗꦴꦠꦁ ꦥꦤ ꦱꦧ꧀ꦧꦺꦤ ꦱꦧ꧀ꦧꦁ ꦄꦒ꧀ꦒꦲꦶꦠꦠ꧀ꦠꦴ. ꦌꦠ꧀ꦠꦏꦴ ꦲꦶ ꦌꦏꦹꦤꦮꦷꦱꦠꦶ ꦥꦕ꧀ꦕꦪꦴ ꦪꦡꦴꦮꦸꦠ꧀ꦠꦺ ꦥꦕ꧀ꦕꦪꦺ ꦮꦗ꧀ꦗꦺꦠ꧀ꦮꦴ ꦄꦮꦱꦶꦛ꧀ꦜꦴ. ꦪꦺ ꦥꦤꦴꦠꦶ ꦥꦢꦏꦴꦫꦏꦺ ꦮꦢꦠꦶ. ꦱꦔ꧀ꦑꦶꦥꦶꦠ꧀ꦮꦴꦠꦶ ꦥꦢꦱ꧀ꦱ ‘‘ꦥꦴꦭ꦳ꦶꦪꦁ ꦮꦶꦠ꧀ꦡꦴꦫꦶꦠꦁ ꦄꦮꦶꦠ꧀ꦡꦴꦫꦶꦠꦚ꧀ꦕ ꦱꦧ꧀ꦧꦁ ꦱꦔ꧀ꦒꦲꦺꦠ꧀ꦮꦴ ꦮꦸꦠ꧀ꦠ’’ꦤ꧀ꦠꦶ ꦄꦠ꧀ꦡꦁ ꦮꦢꦤ꧀ꦠꦶ. ‘‘ꦠꦺꦮꦷꦱꦠꦶ ꦥꦕ꧀ꦕꦪꦴ’’ꦠꦶ ꦥꦴꦜꦺꦤ ꦨꦮꦶꦠꦧ꧀ꦧꦁ ‘‘ꦱꦧ꧀ꦧꦁ ꦱꦔ꧀ꦒꦲꦺꦠ꧀ꦮꦴ’’ꦠꦶ ꦮꦸꦠ꧀ꦠꦠ꧀ꦠꦴ. ꦥꦕ꧀ꦖꦴꦗꦴꦠꦥꦕ꧀ꦕꦪꦺꦴꦪꦺꦮ ꦲꦶ ꦮꦗ꧀ꦗꦺꦠꦧ꧀ꦧꦺꦴꦠꦶ. ꦌꦮꦁ ꦮꦴꦢꦤ꧀ꦠꦫꦺ ꦮꦠ꧀ꦠꦧ꧀ꦧꦁ ꦮꦠ꧀ꦮꦴ ꦆꦢꦴꦤꦶ ꦥꦴꦭ꦳ꦶꦪꦴ ꦄꦮꦶꦥꦫꦷꦠꦁ ꦄꦠ꧀ꦡꦁ ꦢꦱ꧀ꦱꦺꦠꦸꦁ ‘‘ꦄꦴꦢꦶꦩ꧀ꦲꦶ ꦥꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ.

ꦮꦶꦨꦔ꧀ꦒꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

(꧒) ꦱꦔ꧀ꦑ꧀ꦪꦴꦮꦴꦫꦮꦟ꧀ꦟꦤꦴ

꧗꧓. ꦪꦡꦴ ꦄꦚ꧀ꦚꦩꦚ꧀ꦚꦥꦕ꧀ꦕꦪꦺ ꦮꦶꦱꦺꦱꦺꦴ ꦮꦶꦨꦔ꧀ꦒꦺ ꦄꦠ꧀ꦡꦷꦠꦶ ꦆꦢꦁ ꦲꦺꦠꦸꦥꦕ꧀ꦕꦪꦴꦢꦶꦮꦶꦨꦔ꧀ꦒꦠꦺꦴ ꦮꦶꦱꦺꦱꦨꦴꦮꦱꦴꦩꦚ꧀ꦚꦺꦤ ꦮꦸꦠ꧀ꦠꦁ. ꦤ ꦲꦶ ꦪꦴꦢꦶꦱꦺꦴ ꦄꦚ꧀ꦚꦩꦚ꧀ꦚꦥꦕ꧀ꦕꦪꦮꦶꦨꦔ꧀ꦒꦺ ꦮꦶꦱꦺꦱꦺꦴ, ꦠꦴꦢꦶꦱꦺꦴ ꦥꦸꦫꦺꦗꦴꦠꦥꦕ꧀ꦕꦪꦮꦶꦨꦔ꧀ꦒꦺ. ꦠꦡꦴ ꦲꦶ ꦄꦚ꧀ꦚꦩꦚ꧀ꦚꦥꦕ꧀ꦕꦪꦺ ꦥꦛꦶꦱꦤ꧀ꦣꦶ ꦭꦧ꧀ꦨꦠꦶ, ꦤ ꦥꦸꦫꦺꦗꦴꦠꦥꦕ꧀ꦕꦪꦺ. ‘‘ꦮꦶꦥꦴꦏꦴꦧ꧀ꦪꦴꦏꦠꦁ ꦌꦏꦁ ꦑꦤ꧀ꦣꦁ ꦥꦛꦶꦕ꧀ꦕꦴ’’ꦠꦶꦄꦴꦢꦶꦏꦺ ꦮꦶꦨꦔ꧀ꦒꦺꦠꦶ ꦆꦩꦶꦤꦴ ꦪꦱ꧀ꦩꦶꦁ ꦥꦕ꧀ꦕꦪꦺ ꦮꦶꦥꦴꦏꦴꦧ꧀ꦪꦴꦏꦠꦁ ꦈꦢ꧀ꦣꦛꦁ, ꦠꦁ ꦤꦶꦢꦱ꧀ꦱꦤꦮꦱꦺꦤ ꦢꦱ꧀ꦱꦺꦠꦶ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦪꦡꦴ ꦲꦺꦠꦸꦥꦕ꧀ꦕꦪꦴꦢꦷꦱꦸ ‘‘ꦮꦶꦥꦴꦏꦴꦧ꧀ꦪꦴꦏꦠꦁ ꦌꦏꦁ ꦑꦤ꧀ꦣꦁ ꦥꦛꦶꦕ꧀ꦕꦴ’’ꦠꦶꦄꦴꦢꦶꦤꦴ ꦮꦶꦨꦔ꧀ꦒꦺ ꦮꦶꦥꦴꦏꦴꦧ꧀ꦪꦴꦏꦠꦁ ꦈꦢ꧀ꦣꦛꦁ ꦄꦠ꧀ꦡꦶ, ꦌꦮꦁ ꦮꦶꦥꦴꦏꦴꦧ꧀ꦪꦴꦏꦠꦴꦨꦴꦮꦁ ꦄꦴꦱꦺꦮꦤꦥꦕ꧀ꦕꦪꦺ ꦮꦶꦱꦺꦱꦁ ꦢꦱ꧀ꦱꦺꦠꦷꦠꦶ.

꧗꧔. ꦌꦠꦱ꧀ꦩꦶꦁ ꦄꦤꦸꦭꦺꦴꦩꦺꦠꦶ ꦆꦩꦱ꧀ꦩꦶꦁ ꦥꦛꦶꦕ꧀ꦕꦮꦴꦫꦺ ꦥꦕ꧀ꦕꦪꦴꦤꦸꦭꦺꦴꦩꦺ. ꦱꦸꦢ꧀ꦣꦶꦏꦤꦪꦺꦠꦶ ꦥꦜꦩꦺ ꦤꦪꦺ. ꦢꦱ꧀ꦱꦶꦠꦒꦟꦤꦠꦺꦴꦠꦶ ‘‘ꦤꦮ, ꦠꦷꦟꦶ, ꦌꦏ’’ꦤ꧀ꦠꦶ ꦌꦮꦁ ꦱꦔ꧀ꦑꦺꦥꦠꦺꦴ ꦢꦱ꧀ꦱꦶꦠꦒꦟꦤꦠꦺꦴ. ꦠꦠꦺꦴ ꦥꦫꦺꦱꦸ ꦤꦪꦺꦱꦹꦠꦶ ꦠꦠꦺꦴ ꦥꦜꦩꦤꦪꦠꦺꦴ ꦥꦫꦺꦱꦸ ꦢꦸꦠꦶꦪꦴꦢꦶꦤꦪꦺꦱꦸ. ꦄꦚ꧀ꦚꦶꦱ꧀ꦱꦴꦠꦶ ꦤꦮꦴꦢꦶꦨꦺꦢꦠꦺꦴ ꦄꦚ꧀ꦚꦶꦱ꧀ꦱꦴ ꦒꦟꦤꦴꦪ. ꦄꦧꦲꦸꦒꦟꦤꦺꦤ ꦪꦸꦠ꧀ꦠꦱ꧀ꦱ ꦧꦲꦸꦒꦟꦤꦱ꧀ꦱ ꦥꦕ꧀ꦕꦪꦱ꧀ꦱ, ꦠꦺꦤ ꦄꦧꦲꦸꦒꦟꦤꦺꦤ. ꦱꦩꦴꦤꦒꦟꦤꦠꦴ ꦕꦴꦠꦶ ꦕ-ꦱꦢ꧀ꦢꦺꦴ ꦧ꧀ꦪꦠꦶꦫꦺꦏꦺꦴ. ꦠꦺꦤ ꦥꦕ꧀ꦕꦤꦷꦪꦠꦺꦴ ꦄꦤꦸꦭꦺꦴꦩꦺ ꦪꦺꦴ ꦮꦶꦱꦺꦱꦺꦴ ꦮꦸꦕ꧀ꦕꦠꦶ, ꦠꦁ ꦗꦺꦴꦠꦺꦠꦶ. ꦠꦺꦤꦴꦲ ‘‘ꦄꦤꦸꦭꦺꦴꦩꦺꦪꦺꦮ ꦢꦛ꧀ꦜꦧ꧀ꦧꦴ’’ꦠꦶ. ꦄꦤꦸꦭꦺꦴꦩꦺꦪꦺꦮꦴꦠꦶ ꦄꦮꦣꦴꦫꦟꦺꦤ ꦤꦶꦮꦠ꧀ꦠꦶꦠꦁ ꦢꦱ꧀ꦱꦺꦠꦸꦁ ‘‘ꦥꦕ꧀ꦕꦤꦷꦪꦺ…ꦥꦺ… ꦮꦏ꧀ꦑꦠꦷ’’ꦠꦶ ꦮꦸꦠ꧀ꦠꦁ.

꧗꧖-꧗꧙. ꦠꦺ ꦥꦤ ꦠꦺꦫꦱꦩꦹꦭꦏꦴꦢꦶꦏꦺ ꦤꦪꦺ ꦱꦴꦱꦺꦮꦤꦱꦮꦶꦥꦴꦏꦺꦱꦸ ꦢ꧀ꦮꦷꦱꦸ ꦢ꧀ꦮꦴꦮꦷꦱꦠꦶꦩꦹꦭꦏꦺꦱꦸ ꦱꦴꦱꦺꦮꦤꦩꦺꦮ ꦒꦲꦺꦠ꧀ꦮꦴ ꦆꦠꦫꦁ ꦥꦗꦲꦤ꧀ꦠꦺꦴ ꦄꦴꦲ ‘‘ꦥꦕ꧀ꦖꦴꦗꦴꦠꦮꦶꦥꦴꦏꦴꦤꦁ ꦥꦫꦶꦲꦷꦤꦠ꧀ꦠꦴ’’ꦠꦶ. ꦮꦶꦫꦺꦴꦣꦴꦨꦴꦮꦺ ꦱꦠꦷꦠꦶ ꦆꦢꦁ ‘‘ꦱꦶꦪꦴ ꦏꦸꦱꦭꦁ ꦣꦩ꧀ꦩꦁ ꦥꦛꦶꦕ꧀ꦕ ꦄꦏꦸꦱꦭꦺꦴ ꦣꦩ꧀ꦩꦺꦴ ꦈꦥ꧀ꦥꦗ꧀ꦗꦺꦪ꧀ꦪꦴ’’ꦠꦶꦄꦴꦢꦷꦱꦸ ꦮꦶꦪ ꦥꦫꦶꦏꦥ꧀ꦥꦮꦕꦤꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦠꦺꦤꦴꦲ ‘‘ꦥꦸꦕ꧀ꦖꦴꦪ ꦢꦱ꧀ꦱꦶꦠꦤꦪꦺꦤꦴ’’ꦠꦶ. ꦠꦱ꧀ꦱ ꦕ ꦠꦺꦮꦷꦱꦠꦶꦩꦹꦭꦏꦱ꧀ꦱ. ꦤꦴꦩꦤ꧀ꦠꦶ ꦠꦺꦮꦷꦱꦠꦶꦩꦹꦭꦏꦤ꧀ꦠꦶ ꦤꦴꦩꦁ. ꦢ꧀ꦮꦴꦮꦷꦱꦠꦶ…ꦥꦺ… ꦮꦸꦠ꧀ꦠꦤ꧀ꦠꦶ ꦌꦠꦺꦤ ꦢ꧀ꦮꦴꦮꦷꦱꦠꦶꦩꦹꦭꦏꦺꦴꦮ ꦥꦫꦩꦠ꧀ꦡꦠꦺꦴ ꦭꦧ꧀ꦨꦠꦶ, ꦤ ꦠꦺꦮꦷꦱꦠꦶꦩꦹꦭꦏꦺꦴꦠꦶ ꦢꦱ꧀ꦱꦺꦠꦶ.

ꦄꦚ꧀ꦚꦥꦢꦴꦤꦷꦠꦶ ꦲꦺꦠꦸꦄꦣꦶꦥꦠꦶꦥꦢꦴꦢꦷꦤꦶ. ꦱꦸꦢ꧀ꦣꦶꦏꦤꦪꦺꦴꦠꦶ ꦥꦜꦩꦤꦪꦺꦴ, ꦪꦁ ꦄꦛ꧀ꦜꦏꦡꦴꦪꦁ ‘‘ꦌꦏꦩꦹꦭ’’ꦤ꧀ꦠꦶ ꦮꦸꦠ꧀ꦠꦁ. ꦄꦴꦫꦩ꧀ꦩꦟꦩꦹꦭꦏꦴꦢꦷꦱꦸ ꦤ ꦭꦧ꧀ꦨꦠꦷꦠꦶ ꦢꦸꦩꦹꦭꦏꦴꦢꦷꦱꦸ ꦠꦁ ꦤ ꦪꦺꦴꦗꦷꦪꦠꦶ. ꦲꦺꦛ꧀ꦜꦶꦩꦁ ꦲꦺꦛ꧀ꦜꦶꦩꦁ ꦱꦺꦴꦣꦺꦠ꧀ꦮꦴ ꦌꦮ ꦲꦶ ꦄꦨꦶꦣꦩ꧀ꦩꦥꦴꦭ꦳ꦶ ꦥꦮꦠ꧀ꦠꦴ, ꦠꦱ꧀ꦩꦴ ‘‘ꦄꦴꦫꦩ꧀ꦩꦟꦺ…ꦥꦺ… ꦥꦚ꧀ꦲꦴ’’ꦠꦶ ꦮꦸꦠ꧀ꦠꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦠꦠ꧀ꦡꦴꦠꦶ ‘‘ꦠꦷꦟꦶꦪꦺꦮ ꦥꦚ꧀ꦲꦴ’’ꦠꦶ ꦥꦴꦜꦺ. ‘‘ꦮꦠ꧀ꦠꦸ ꦄꦣꦶꦥ꧀ꦥꦴꦪꦴꦤꦸꦮꦶꦣꦴꦪꦷ ꦱꦢ꧀ꦢꦥ꧀ꦥꦪꦺꦴꦒꦺꦴ’’ꦠꦶ ꦏꦠ꧀ꦮꦴ ꦄꦣꦶꦥ꧀ꦥꦴꦪꦁ ꦮꦶꦨꦴꦮꦺꦤ꧀ꦠꦺꦴ ꦄꦴꦲ ‘‘ꦠꦠꦺꦴ ꦈꦢ꧀ꦣꦁ ꦒꦟꦤꦁ ꦤꦶꦮꦴꦫꦺꦠꦶ, ꦤ ꦄꦣꦺꦴ ꦥꦛꦶꦏ꧀ꦑꦶꦥꦠꦷ’’ꦠꦶ. ꦒꦟꦤꦴꦪ ꦈꦥꦤꦶꦏ꧀ꦑꦶꦠ꧀ꦠꦥꦚ꧀ꦚꦠ꧀ꦠꦶꦨꦴꦮꦠꦺꦴ ꦲꦺꦛ꧀ꦜꦴꦒꦟꦤꦁ ꦄꦩꦸꦚ꧀ꦕꦶꦠ꧀ꦮꦴꦮ ꦈꦥꦫꦶꦒꦟꦤꦴ ꦱꦩ꧀ꦨꦮꦠꦷꦠꦶ ꦄꦴꦲ ‘‘ꦠꦷꦱꦸ ꦌꦏꦱ꧀ꦱ ꦄꦤ꧀ꦠꦺꦴꦒꦣꦠꦴꦪ ꦕ ‘ꦠꦷꦟꦶꦪꦺꦮꦴ’ꦠꦶ ꦮꦸꦠ꧀ꦠ’’ꦤ꧀ꦠꦶ. ꦄꦠ꧀ꦠꦤꦺꦴ ꦮꦕꦤꦤ꧀ꦠꦶ ‘‘ꦠꦠ꧀ꦫꦶꦢꦁ ꦭꦏ꧀ꦑꦟ’’ꦤ꧀ꦠꦶꦄꦴꦢꦶꦤꦴ ꦮꦸꦠ꧀ꦠꦁ ꦄꦠ꧀ꦠꦤꦺꦴ ꦮꦕꦤꦁ.

꧘꧐-꧘꧕. ꦄꦮꦶꦒꦠꦴ…ꦥꦺ… ꦮꦸꦠ꧀ꦠꦺꦥꦶ ꦮꦶꦥꦭ꧀ꦭꦴꦱꦪꦺꦴꦗꦤꦁ ꦄꦏꦠ꧀ꦮꦴꦠꦶ ꦄꦣꦶꦥ꧀ꦥꦴꦪꦺꦴ. ꦱꦴ ꦢꦱ꧀ꦱꦶꦠꦴ ꦲꦺꦴꦠꦷꦠꦶ ꦱꦴ ꦮꦶꦥꦭ꧀ꦭꦴꦱꦪꦺꦴꦗꦤꦁ ꦄꦏꦠ꧀ꦮꦴ ꦢꦱ꧀ꦱꦶꦪꦩꦴꦤꦴ ꦪꦢꦶꦥꦶ ꦢꦱ꧀ꦱꦶꦠꦴ ꦲꦺꦴꦠꦶ, ꦤ ꦌꦮꦁ ꦄꦴꦮꦶꦏꦫꦟꦮꦱꦺꦤ ꦢꦱ꧀ꦱꦶꦠꦴ ꦲꦺꦴꦠꦶ ꦠꦴꦢꦶꦱꦱ꧀ꦱ ꦭꦶꦔ꧀ꦒꦤꦱ꧀ꦱ ꦄꦨꦴꦮꦠꦺꦴ ꦪꦡꦴ ꦮꦶꦥꦭ꧀ꦭꦴꦱꦪꦺꦴꦗꦤꦴꦪꦤ꧀ꦠꦶ ꦄꦣꦶꦥ꧀ꦥꦴꦪꦺꦴ. ꦠꦺꦤꦴꦲ ‘‘ꦮꦶꦥꦭ꧀ꦭꦴꦱ…ꦥꦺ… ꦲꦺꦴꦠꦷ’’ꦠꦶ. ꦌꦮꦩꦺꦮ ꦄꦣꦶꦥ꧀ꦥꦴꦪꦺꦴ ꦪꦺꦴꦗꦺꦠꦧ꧀ꦧꦺꦴꦠꦶ ‘‘ꦪꦺ…ꦥꦺ… ꦠꦁ ꦢꦱ꧀ꦱꦺꦠꦸ’’ꦤ꧀ꦠꦶ ꦌꦠ꧀ꦡ ‘‘ꦪꦢꦶꦥꦶ ꦄꦮꦶꦒꦠꦴꦤꦤ꧀ꦠꦫ’’ꦤ꧀ꦠꦶꦄꦴꦢꦶꦤꦴ ꦪꦡꦴ ꦄꦣꦶꦥ꧀ꦥꦴꦪꦺꦴ ꦪꦺꦴꦗꦶꦠꦺꦴ, ꦌꦮꦩꦺꦮ ‘‘ꦠꦺꦤꦺꦠꦁ ꦄꦴꦮꦶꦏꦫꦺꦴꦠꦷ’’ꦠꦶ ꦌꦠ꧀ꦡꦴꦥꦶ ꦄꦣꦶꦥ꧀ꦥꦴꦪꦺꦴ ꦪꦺꦴꦗꦺꦠꦧ꧀ꦧꦺꦴ. ꦏꦶꦁ ꦮꦸꦠ꧀ꦠꦁ ꦲꦺꦴꦠꦶ? ꦪꦡꦴ ꦠꦠ꧀ꦡ ‘‘ꦈꦴꦤꦠꦫꦒꦟꦤꦺꦲꦶ ꦱꦩꦴꦤꦒꦟꦤꦺꦲꦶ ꦕ ꦱꦢ꧀ꦣꦶꦁ ꦱꦁꦱꦤ꧀ꦢꦤꦺ ꦈꦴꦤꦠꦫꦴ ꦱꦩꦴꦤꦴ ꦕ ꦒꦟꦤꦴ ꦲꦺꦴꦠꦷ’’ꦠꦶ ꦄꦪꦩꦠ꧀ꦡꦺꦴ ꦚꦴꦥꦤꦮꦱꦺꦤ ꦢꦱ꧀ꦱꦶꦠꦺꦴ, ꦌꦮꦩꦶꦣꦴꦥꦷꦠꦶ. ꦠꦺꦤ ꦮꦸꦠ꧀ꦠꦁ ꦄꦛ꧀ꦜꦏꦡꦴꦪꦁ ‘‘ꦄꦴꦫꦩ꧀ꦩꦟꦥꦕ꧀ꦕꦪꦺꦴ ꦪꦺꦤ ꦪꦺꦤ ꦧꦲꦸꦠꦫꦒꦟꦤꦺꦤ ꦮꦴ ꦱꦩꦴꦤꦒꦟꦤꦺꦤ ꦮꦴ ꦥꦕ꧀ꦕꦪꦺꦤ ꦱꦢ꧀ꦣꦶꦁ ꦠꦶꦏꦢꦸꦏꦴꦢꦶꦨꦺꦢꦁ ꦒꦕ꧀ꦖꦠꦶ, ꦱꦧ꧀ꦧꦠ꧀ꦡ ꦠꦷꦟꦺꦮ ꦥꦚ꧀ꦲꦮꦶꦱ꧀ꦱꦗ꧀ꦗꦤꦴꦤꦶ ꦮꦺꦢꦶꦠꦧ꧀ꦧꦴꦤꦷ’’ꦠꦶ. ꦤ ꦏꦺꦮꦭꦩꦠ꧀ꦡꦮꦶꦱꦺꦱꦴꦮꦶꦏꦫꦟꦠ꧀ꦡꦩꦺꦮꦺꦠ꧀ꦡ ꦠꦡꦴ ꦪꦺꦴꦗꦤꦴ ꦏꦠꦴ, ꦄꦡ ꦑꦺꦴ ꦢꦺꦱꦤꦴꦏ꧀ꦏꦩꦺꦴꦪꦺꦮ ꦱꦺꦴꦠꦶ ꦢꦱ꧀ꦱꦺꦠꦸꦁ ‘‘ꦥꦕ꧀ꦕꦤꦷꦪꦴꦢꦷꦱꦸꦥꦶ ꦥꦤꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦩꦹꦭꦥꦢꦤ꧀ꦠꦶ ꦄꦴꦫꦩ꧀ꦩꦟꦥꦕ꧀ꦕꦪꦴꦢꦶꦏꦁ ꦠꦱ꧀ꦩꦶꦁ ꦠꦱ꧀ꦩꦶꦁ ꦤꦪꦺ ꦩꦹꦭꦨꦹꦠꦁ ꦥꦢꦁ. ꦠꦠ꧀ꦡꦴꦠꦶ ꦥꦕ꧀ꦕꦤꦷꦪꦴꦢꦷꦱꦸ. ꦌꦠꦁ ꦭꦏ꧀ꦑꦟꦤ꧀ꦠꦶ ‘‘ꦠꦠ꧀ꦫꦶꦢꦁ ꦭꦏ꧀ꦑꦟ’’ꦤ꧀ꦠꦶꦄꦴꦢꦶꦤꦴ ꦮꦸꦠ꧀ꦠꦭꦏ꧀ꦑꦟꦁ. ꦠꦱ꧀ꦩꦴꦠꦶ ꦪꦱ꧀ꦩꦴ ꦥꦸꦧ꧀ꦧꦺꦤꦴꦥꦫꦁ ꦥꦴꦭ꦳ꦶ ꦌꦮꦩꦺꦮ ꦥꦮꦠ꧀ꦠꦴ, ꦠꦱ꧀ꦩꦴ ꦌꦮ. ꦠꦺꦤ ꦩꦹꦭꦥꦢꦁ ꦄꦴꦢꦶꦩ꧀ꦲꦶꦪꦺꦮ ꦜꦥꦺꦠ꧀ꦮꦴ ꦢꦺꦱꦤꦴ ꦚꦴꦪꦴꦒꦠꦴꦠꦶ ꦢꦱ꧀ꦱꦺꦠꦶ. ꦪꦢꦶ ꦌꦮꦁ ꦭꦶꦔ꧀ꦒꦤꦺꦤ ꦄꦠ꧀ꦡꦮꦶꦱꦺꦱꦴꦮꦶꦏꦫꦟꦁ ꦏꦡꦤ꧀ꦠꦶ ꦄꦴꦲ ‘‘ꦤ ꦕ ꦮꦶꦚ꧀ꦚꦴꦠꦺ ꦄꦠ꧀ꦡꦺ ꦮꦕꦤꦺꦤ ꦭꦶꦔ꧀ꦒꦺꦤ ꦕ ꦥꦪꦺꦴꦗꦤꦁ ꦄꦠ꧀ꦡꦷ’’ꦠꦶ.

ꦥꦕ꧀ꦕꦪꦴꦤꦸꦭꦺꦴꦩꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦥꦛꦶꦕ꧀ꦕꦮꦴꦫꦺꦴ

ꦥꦕ꧀ꦕꦪꦥꦕ꧀ꦕꦤꦷꦪꦮꦟ꧀ꦟꦤꦴ

꧘꧖-꧘꧗. ꦫꦹꦥꦱꦩꦸꦛ꧀ꦜꦴꦥꦏꦮꦱꦺꦤꦺꦮ ꦮꦺꦢꦶꦠꦧ꧀ꦧꦤ꧀ꦠꦶ ꦆꦢꦁ ꦄꦛ꧀ꦜꦏꦡꦴꦮꦕꦤꦁ ꦄꦤꦤ꧀ꦠꦫꦁ ‘‘ꦕꦶꦠ꧀ꦠꦱꦩꦸꦛ꧀ꦜꦴꦤꦚ꧀ꦕ ꦫꦹꦥ’’ꦤ꧀ꦠꦶ ꦥꦴꦭ꦳ꦶꦪꦁ ꦄꦴꦒꦠꦠ꧀ꦠꦴ ꦮꦸꦠ꧀ꦠꦁ, ꦥꦚ꧀ꦕꦮꦶꦚ꧀ꦚꦴꦟꦴꦤꦁ ꦥꦤ ꦄꦲꦺꦠꦸꦏꦥꦛꦶꦱꦤ꧀ꦣꦶꦕꦶꦠ꧀ꦠꦴꦤꦚ꧀ꦕ ꦮꦱꦺꦤ ꦪꦺꦴꦗꦤꦴ ꦱꦩ꧀ꦨꦮꦠꦷꦠꦶ ꦏꦠ꧀ꦮꦴ ꦮꦸꦠ꧀ꦠꦁ ‘‘ꦱꦧ꧀ꦧꦱꦔ꧀ꦒꦴꦲꦶꦏꦮꦱꦺꦤ ꦥꦤꦺꦠꦁ ꦤ ꦤ ꦱꦏ꧀ꦏꦴ ꦪꦺꦴꦗꦺꦠꦸ’’ꦤ꧀ꦠꦶ.

꧙꧓. ꦱꦲꦗꦴꦠꦥꦸꦫꦺꦗꦴꦠꦥꦕ꧀ꦕꦪꦴꦠꦶ ꦆꦢꦁ ꦥꦕ꧀ꦕꦪꦺꦤ ꦥꦕ꧀ꦕꦪꦣꦩ꧀ꦩꦺꦴꦥꦭꦏ꧀ꦑꦟꦤ꧀ꦠꦶ ꦢꦱ꧀ꦱꦺꦠꦸꦁ ‘‘ꦱꦲꦗꦴꦠꦴ ꦕ ꦲꦺꦠꦸꦄꦴꦢꦪꦺꦴ…ꦥꦺ… ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ’’ꦠꦶ ꦮꦠ꧀ꦮꦴ ‘‘ꦤ ꦲꦷ’’ꦠꦶꦄꦴꦢꦶꦤꦴ ꦠꦩꦺꦮꦠ꧀ꦡꦁ ꦱꦩꦠ꧀ꦡꦺꦠꦶ.

꧙꧔-꧙꧗. ꦱꦺꦴ ꦥꦕ꧀ꦕꦪꦺꦴꦠꦶ ꦱꦺꦴ ꦥꦛꦶꦕ꧀ꦕꦛ꧀ꦜꦦꦫꦟꦏꦺꦴ ꦥꦕ꧀ꦕꦪꦺꦴ.

꧙꧙-꧑꧐꧒. ꦕꦶꦠ꧀ꦠꦱꦩꦸꦛ꧀ꦜꦴꦤꦴꦢꦪꦺꦴꦠꦶ ꦄꦴꦢꦶ-ꦱꦢ꧀ꦢꦺꦤ ꦧꦴꦲꦶꦫꦫꦹꦥꦄꦴꦲꦴꦫꦱꦩꦸꦛ꧀ꦜꦴꦤꦴꦢꦪꦺꦴ ꦫꦹꦥꦏꦺꦴꦛ꧀ꦜꦴꦱꦴ ꦱꦔ꧀ꦒꦪ꧀ꦲꦤ꧀ꦠꦶ. ꦠꦱ꧀ꦱꦴꦠꦶ ꦩꦒ꧀ꦒꦥꦕ꧀ꦕꦪꦁ ꦭꦨꦤ꧀ꦠꦱ꧀ꦱ ꦫꦹꦥꦱ꧀ꦱ. ꦌꦮꦩꦺꦮ ꦥꦤꦴꦠꦶ ꦆꦩꦶꦤꦴ ꦪꦡꦴ ꦤꦩꦒ꧀ꦒꦥꦕ꧀ꦕꦪꦺ ꦮꦸꦠ꧀ꦠꦁ, ꦌꦮꦩꦺꦮ ꦤꦲꦺꦠꦸꦥꦕ꧀ꦕꦪꦴꦢꦷꦱꦸ ꦪꦁ ꦲꦺꦠꦸꦥꦕ꧀ꦕꦪꦁ ꦭꦨꦠꦶ, ꦠꦱ꧀ꦱ ꦥꦫꦶꦲꦷꦤꦠ꧀ꦠꦴꦠꦶ ꦆꦩꦩꦠ꧀ꦡꦁ ꦈꦥꦱꦁꦲꦫꦠꦶ. ꦠꦺꦤꦴꦲ ‘‘ꦌꦏꦕ꧀ꦕꦫꦹꦥꦱ꧀ꦱ ꦥꦕ꧀ꦕꦪꦸꦥ꧀ꦥꦤ꧀ꦤꦠꦴ ꦢꦛ꧀ꦜꦧ꧀ꦧꦴ’’ꦠꦶ.

꧑꧐꧗-꧑꧓꧐. ꦱꦧ꧀ꦧꦠ꧀ꦡꦴꦠꦶ ꦥꦤ꧀ꦤꦫꦱꦩꦹꦭꦏꦴꦢꦷꦱꦸ ꦱꦧ꧀ꦧꦺꦱꦸ ꦤꦪꦺꦱꦸ. ꦏꦴꦩꦁ ꦱꦸꦢ꧀ꦣꦶꦏꦤꦪꦴꦢꦷꦱꦸ ꦮꦶꦱꦢꦶꦱꦮꦶꦱ꧀ꦱꦗ꧀ꦗꦤꦴ, ꦆꦣꦴꦣꦶꦥ꧀ꦥꦺꦠꦠ꧀ꦡꦁ ꦥꦤ ꦢꦱ꧀ꦱꦺꦠꦸꦁ ‘‘ꦌꦏꦺꦱꦹ’’ꦠꦶꦄꦴꦢꦶ ꦮꦸꦠ꧀ꦠꦁ. ꦆꦣꦴꦠꦶ ꦌꦠꦺꦱꦸ ꦤꦴꦲꦴꦫꦩꦹꦭꦏꦴꦢꦶꦤꦪꦺꦱꦸ. ꦒꦟꦤꦴꦪꦺꦮ ꦤ ꦱꦫꦹꦥꦢꦱ꧀ꦱꦤꦤ꧀ꦠꦶ ꦱꦸꦢ꧀ꦣꦶꦏꦤꦪꦺ ꦮꦶꦪ ꦒꦟꦤꦴꦪ ꦌꦮ ꦤ ꦱꦫꦹꦥꦢꦱ꧀ꦱꦤꦁ ꦄꦣꦶꦥ꧀ꦥꦺꦠꦤ꧀ꦠꦶ ꦄꦠ꧀ꦡꦺꦴ.

ꦥꦕ꧀ꦕꦪꦥꦕ꧀ꦕꦤꦷꦪꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦥꦕ꧀ꦕꦪꦴꦤꦸꦭꦺꦴꦩꦥꦕ꧀ꦕꦤꦷꦪꦮꦟ꧀ꦟꦤꦴ

꧑꧓꧑-꧑꧘꧙. ꦠꦶꦟ꧀ꦟꦤ꧀ꦠꦶ ꦲꦺꦠꦸ ꦄꦣꦶꦥꦠꦶ ꦩꦒ꧀ꦒꦺꦴꦠꦶ ꦆꦩꦺꦱꦁ ꦠꦶꦟ꧀ꦟꦁ ꦥꦕ꧀ꦕꦪꦴꦤꦁ. ꦱꦴꦣꦴꦫꦟꦴꦤꦤ꧀ꦠꦶ ꦪꦺ ꦠꦺꦱꦁ ꦠꦶꦟ꧀ꦟꦁ ꦱꦴꦣꦴꦫꦟꦴ ꦥꦕ꧀ꦕꦪꦴ ꦥꦕ꧀ꦕꦤꦷꦏꦠꦺꦴ ꦤ ꦭꦧ꧀ꦨꦤ꧀ꦠꦶ, ꦪꦱ꧀ꦩꦴ ꦠꦺꦱꦁ ꦱꦔ꧀ꦒꦟ꧀ꦲꦤꦮꦱꦺꦤ ꦮꦸꦠ꧀ꦠꦁ, ꦠꦱ꧀ꦩꦴ. ꦩꦒ꧀ꦒꦥꦕ꧀ꦕꦪꦺꦠꦶ ꦩꦒ꧀ꦒꦥꦕ꧀ꦕꦪꦺ ꦄꦤꦸꦭꦺꦴꦩꦠꦺꦴ ꦜꦶꦠꦺ. ꦆꦠꦫꦺꦲꦷꦠꦶ ꦲꦺꦠꦸꦄꦣꦶꦥꦠꦶꦥꦕ꧀ꦕꦪꦺꦲꦶ. ꦱꦴꦣꦴꦫꦟꦴ ꦱꦠ꧀ꦠꦺꦮꦴꦠꦶ ꦩꦒ꧀ꦒꦥꦕ꧀ꦕꦪꦮꦗ꧀ꦗꦺ ꦱꦠ꧀ꦠꦺꦮ. ꦲꦺꦠꦸꦥꦕ꧀ꦕꦪꦺꦴꦥꦶ ꦥꦕ꧀ꦕꦤꦷꦪꦠꦺꦴ ꦤ ꦭꦧ꧀ꦨꦠꦷꦠꦶ ꦲꦺꦠꦸꦫꦲꦶꦠꦺꦱꦸ ꦄꦣꦶꦥꦠꦶꦤꦺꦴ ꦄꦨꦴꦮꦴ. ꦱꦺꦴ ꦥꦤꦴꦠꦶ ꦲꦺꦠꦸꦥꦕ꧀ꦕꦪꦺꦴ ꦄꦱꦴꦣꦴꦫꦟꦺꦴꦠꦶ ꦏꦠ꧀ꦮꦴ ꦤ ꦮꦸꦠ꧀ꦠꦺꦴ ꦱꦴꦣꦴꦫꦟꦴꦤꦁ ꦄꦭꦧ꧀ꦨꦩꦴꦤꦴꦤꦁ ꦮꦸꦕ꧀ꦕꦩꦴꦤꦠ꧀ꦠꦴ. ꦤ ꦲꦶ ꦲꦺꦠꦸꦥꦕ꧀ꦕꦪꦺꦴ ꦩꦒ꧀ꦒꦥꦕ꧀ꦕꦪꦱ꧀ꦱ ꦱꦴꦣꦴꦫꦟꦺꦴ. ꦪꦺꦲꦷꦠꦶ ꦪꦺꦲꦶ ꦥꦕ꧀ꦕꦪꦺꦲꦶ. ꦠꦺꦠꦶ ꦄꦤꦤ꧀ꦠꦫꦥꦕ꧀ꦕꦪꦴꦢꦪꦺꦴ. ꦌꦏꦤ꧀ꦠꦶꦏꦠ꧀ꦠꦴꦠꦶ ꦄꦮꦶꦤꦴꦨꦴꦮꦠꦺꦴ. ꦄꦫꦹꦥꦛ꧀ꦜꦴꦤꦶꦏꦴꦠꦶ ꦄꦫꦹꦥꦥꦕ꧀ꦕꦪꦴ ꦄꦫꦹꦥꦣꦩ꧀ꦩꦴꦤꦁꦪꦺꦮ ꦥꦕ꧀ꦕꦪꦨꦹꦠꦴ ꦄꦤꦤ꧀ꦠꦫꦥꦕ꧀ꦕꦪꦴꦢꦪꦺꦴ. ꦠꦺꦤꦴꦠꦶ ‘‘ꦌꦏꦤ꧀ꦠꦶꦏꦴꦤꦁ ꦄꦫꦹꦥꦛ꧀ꦜꦴꦤꦶꦏꦴ’’ꦠꦶ ꦆꦣꦴꦣꦶꦥ꧀ꦥꦺꦠꦠ꧀ꦠꦴ. ꦠꦺꦲꦷꦠꦶ ꦥꦸꦫꦺꦗꦴꦠꦴꦱꦺꦮꦤꦥꦕ꧀ꦕꦪꦺꦲꦶ. ꦠꦺꦱꦁ ꦮꦱꦺꦤꦴꦠꦶ ꦠꦺꦱꦁ ꦈꦴꦤꦠꦫꦒꦟꦤꦴꦤꦁ ꦌꦏꦏꦴꦢꦷꦤꦁ ꦮꦱꦺꦤ. ꦠꦱ꧀ꦱ ꦠꦱ꧀ꦱꦴꦠꦶ ꦥꦕ꧀ꦕꦤꦷꦪꦠꦺꦴ ꦪꦺꦴꦗꦶꦠꦱ꧀ꦱ ꦠꦱ꧀ꦱ ꦠꦱ꧀ꦱ ꦢꦸꦏꦴꦢꦶꦏꦱ꧀ꦱ ꦧꦲꦸꦒꦟꦤꦱ꧀ꦱ. ꦒꦟꦤꦴꦠꦶ ꦈꦴꦤꦠꦫꦒꦟꦤꦴ. ꦄꦤꦸꦭꦺꦴꦩꦠꦺꦴ ꦜꦶꦠꦱ꧀ꦱꦥꦷꦠꦶ ꦥꦶ-ꦱꦢ꧀ꦢꦺꦤ ꦄꦤꦸꦭꦺꦴꦩꦠꦺꦴ ꦜꦶꦠꦺꦴ ꦮꦴ ꦲꦺꦴꦠꦸ ꦥꦕ꧀ꦕꦤꦷꦪꦠꦺꦴ ꦪꦺꦴꦗꦶꦠꦺꦴ ꦮꦴ, ꦈꦴꦤꦠꦫꦒꦟꦤꦴꦪ ꦱꦩꦴꦤꦤ꧀ꦠꦶ ꦢꦱ꧀ꦱꦺꦠꦶ. ꦤꦪꦶꦢꦁ ꦭꦏ꧀ꦑꦟꦁ ꦌꦏꦤ꧀ꦠꦶꦏꦤ꧀ꦠꦶ ꦆꦩꦶꦤꦴ ꦪꦡꦴꦮꦸꦠ꧀ꦠꦭꦏ꧀ꦑꦟꦁ ꦪꦺꦨꦸꦪ꧀ꦪꦮꦱꦺꦤ ꦮꦸꦠ꧀ꦠꦤ꧀ꦠꦶ ꦢꦱ꧀ꦱꦺꦠꦶ.

ꦥꦕ꧀ꦕꦪꦴꦤꦸꦭꦺꦴꦩꦥꦕ꧀ꦕꦤꦷꦪꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦥꦕ꧀ꦕꦪꦥꦕ꧀ꦕꦤꦷꦪꦴꦤꦸꦭꦺꦴꦩꦮꦟ꧀ꦟꦤꦴ

꧑꧙꧐. ꦱꦧ꧀ꦧꦺꦱꦸꦥꦷꦠꦶ ꦥꦕ꧀ꦖꦴꦗꦴꦠꦁ ꦜꦥꦺꦠ꧀ꦮꦴ ꦱꦧ꧀ꦧꦺꦱꦸꦥꦶ ꦥꦕ꧀ꦕꦪꦺꦱꦸ. ꦱꦺꦴ ꦲꦶ ꦄꦤꦸꦭꦺꦴꦩꦠꦺꦴ ꦄꦭꦧ꧀ꦨꦩꦴꦤꦨꦴꦮꦺꦤ ꦒꦲꦶꦠꦺꦴ ‘‘ꦱꦧ꧀ꦧꦺꦱꦹ’’ꦠꦶ ꦌꦠ꧀ꦡ ꦱꦔ꧀ꦒꦲꦁ ꦤ ꦭꦨꦠꦶ. ꦄꦫꦹꦥꦴꦮꦕꦫꦮꦶꦥꦴꦏꦱ꧀ꦱ ꦄꦴꦫꦸꦥ꧀ꦥꦺ ꦈꦥ꧀ꦥꦤ꧀ꦤꦭꦺꦴꦏꦸꦠ꧀ꦠꦫꦮꦶꦥꦴꦏꦱ꧀ꦱ ꦕ ꦥꦸꦫꦺꦗꦴꦠꦴꦱꦺꦮꦤꦴꦤꦁ ꦄꦭꦧ꧀ꦨꦤꦠꦺꦴꦠꦶ ‘‘ꦏꦶꦚ꧀ꦕꦶ ꦤꦶꦢꦱ꧀ꦱꦤꦮꦱꦺꦤ ꦢꦱ꧀ꦱꦺꦤ꧀ꦠꦺꦴ’’ꦠꦶ ꦄꦴꦲ.

ꦄꦮꦱꦺꦱꦴꦤꦁ ꦭꦴꦨꦩꦠ꧀ꦠꦤ꧀ꦠꦶ ꦄꦮꦱꦺꦱꦴꦤꦁ ꦌꦏꦕ꧀ꦕꦴꦤꦁ ꦭꦴꦨꦁ. ꦠꦺꦤꦴꦲ ‘‘ꦤ ꦱꦧ꧀ꦧꦺꦱꦁ ꦄꦮꦱꦺꦱꦴꦤꦁ ꦭꦴꦨ’’ꦤ꧀ꦠꦶ. ꦥꦕ꧀ꦖꦴꦗꦴꦠꦺ ꦥꦱꦔ꧀ꦒꦺꦴ ꦤꦠ꧀ꦡꦷꦠꦶ ꦥꦕ꧀ꦖꦴꦗꦴꦠꦺꦴ ꦄꦤꦸꦭꦺꦴꦩꦠꦺꦴ ꦠꦶꦛ꧀ꦜꦠꦷꦠꦶ ꦄꦪꦁ ꦥꦱꦔ꧀ꦒꦺꦴ ꦌꦮ ꦤꦠ꧀ꦡꦶ. ꦥꦸꦫꦺꦗꦴ…ꦥꦺ… ꦭꦧ꧀ꦨꦠꦷꦠꦶ ꦆꦩꦶꦤꦴ ꦮꦶꦥ꧀ꦥꦪꦸꦠ꧀ꦠꦺ ꦥꦕ꧀ꦕꦤꦷꦪꦠꦺꦴ ꦜꦶꦠꦺ ꦥꦸꦫꦺꦗꦴꦠꦺꦴ ꦭꦧ꧀ꦨꦠꦷꦠꦶ ꦄꦪꦩ꧀ꦥꦶ ꦄꦠ꧀ꦡꦠꦺꦴ ꦄꦴꦥꦤ꧀ꦤꦺꦴ ꦲꦺꦴꦠꦷꦠꦶ ꦠꦁ ꦤꦶꦢ꧀ꦣꦴꦫꦺꦠ꧀ꦮꦴ ꦠꦠ꧀ꦡ ꦪꦁ ꦮꦠ꧀ꦠꦧ꧀ꦧꦁ, ꦠꦁ ꦢꦱ꧀ꦱꦺꦠꦸꦁ ‘‘ꦥꦸꦫꦺꦗꦴꦠꦺꦴ ꦥꦤ ꦮꦶꦥ꧀ꦥꦪꦸꦠ꧀ꦠꦺ ꦥꦕ꧀ꦕꦤꦷꦪꦠꦺꦴ ꦜꦶꦠꦺ ꦄꦤꦸꦭꦺꦴꦩꦠꦺꦴ ꦭꦧ꧀ꦨꦠꦷꦠꦶ ꦆꦢꦩ꧀ꦥꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ‘‘ꦄꦮꦱꦺꦱꦴ ꦱꦧ꧀ꦧꦺꦥꦷꦠꦶ ꦄꦠ꧀ꦡꦺ ꦒꦪ꧀ꦲꦩꦴꦤꦺ ꦄꦴꦥꦗ꧀ꦗꦺꦪ꧀ꦪꦴ’’ꦠꦶ ꦆꦢꦁ ꦠꦱ꧀ꦱꦴ ꦄꦠ꧀ꦡꦴꦥꦠ꧀ꦠꦶꦪꦴ ꦱꦧ꧀ꦨꦴꦮꦢꦱ꧀ꦱꦤꦩꦠ꧀ꦠꦁ ꦢꦛ꧀ꦜꦧ꧀ꦧꦁ, ꦄꦠ꧀ꦡꦺꦴ ꦥꦤ ꦠꦴꦢꦶꦱꦺꦴ ꦤ ꦈꦥꦭꦧ꧀ꦨꦠꦷꦠꦶ ꦄꦪꦩꦺꦠ꧀ꦡ ꦄꦣꦶꦥ꧀ꦥꦴꦪꦺꦴ. ꦠꦺꦤꦴꦲ ‘‘ꦪꦩ꧀ꦥꦶ ꦏꦺꦕꦷ’’ꦠꦶꦄꦴꦢꦶ.

ꦠꦠ꧀ꦡ ꦏꦺꦕꦷꦠꦶ ꦥꦢꦏꦴꦫꦺ ꦱꦤ꧀ꦣꦴꦪꦴꦲ. ꦠꦺ ꦲꦶ ‘‘ꦄꦫꦹꦥꦣꦴꦠꦸꦪꦴ ꦕꦮꦶꦠ꧀ꦮꦴ ꦏꦴꦩꦣꦴꦠꦸꦁ ꦈꦥꦥꦗ꧀ꦗꦤ꧀ꦠꦱ꧀ꦱ ꦒꦠꦶꦤꦶꦩꦶꦠ꧀ꦠꦁ ꦄꦴꦫꦩ꧀ꦩꦟꦥꦸꦫꦺꦗꦴꦠꦁ ꦲꦺꦴꦠꦷꦠꦶ ꦚꦴꦥꦺꦠꦸꦁ ‘ꦤꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦴ ꦥꦸꦫꦺꦗꦴꦠꦺ’ꦠꦶ ꦄꦪꦩꦠ꧀ꦡꦺꦴ ꦤꦶꦢ꧀ꦣꦴꦫꦶꦠꦺꦴ’’ꦠꦶ ꦮꦢꦤ꧀ꦠꦶ, ꦠꦁ ꦤ ꦪꦸꦗ꧀ꦗꦠꦶ ꦄꦴꦫꦸꦥ꧀ꦥꦺ ꦫꦹꦥꦁ ꦄꦴꦫꦧ꧀ꦨ ꦕꦶꦠ꧀ꦠꦸꦥ꧀ꦥꦴꦢꦱ꧀ꦱ ꦄꦱꦩ꧀ꦨꦮꦠꦺꦴ. ꦠꦡꦴ ꦲꦺꦏꦺ ꦄꦱꦚ꧀ꦚꦨꦮꦴꦤꦤ꧀ꦠꦫꦱ꧀ꦱ ꦮꦶꦪ ꦄꦴꦫꦸꦥ꧀ꦥꦴꦤꦤ꧀ꦠꦫꦱ꧀ꦱ ꦏꦴꦩꦴꦮꦕꦫꦥꦛꦶꦱꦤ꧀ꦣꦶꦮꦶꦚ꧀ꦚꦴꦟꦱ꧀ꦱ ꦥꦸꦫꦶꦩꦴꦤꦸꦥꦛ꧀ꦜꦶꦠꦴꦫꦩ꧀ꦩꦟꦁ ꦆꦕ꧀ꦖꦤ꧀ꦠꦶ. ꦠꦺꦤꦺꦮꦴꦲ ‘‘ꦠꦩ꧀ꦥꦶ ꦠꦺꦱꦁ ꦫꦸꦕꦶꦩꦠ꧀ꦠꦩꦺꦮꦴ’’ꦠꦶꦄꦴꦢꦶ. ꦪꦸꦗ꧀ꦗꦩꦴꦤꦏꦥꦕ꧀ꦕꦪꦸꦥ꧀ꦥꦤ꧀ꦤꦮꦱꦺꦤ ꦮꦴꦠꦶ ꦪꦱ꧀ꦩꦶꦁ ꦪꦱ꧀ꦩꦶꦁ ꦥꦕ꧀ꦕꦪꦺ ꦄꦤꦸꦭꦺꦴꦩꦠꦺꦴ ꦜꦶꦠꦺ ꦪꦁ ꦪꦁ ꦥꦕ꧀ꦕꦪꦸꦥ꧀ꦥꦤ꧀ꦤꦁ ꦨꦮꦶꦠꦸꦁ ꦪꦸꦗ꧀ꦗꦠꦶ, ꦠꦱ꧀ꦱ ꦠꦱ꧀ꦱ ꦮꦱꦺꦤꦴꦠꦶ ꦄꦠ꧀ꦡꦺꦴ. ꦤ ꦮꦶꦕꦴꦫꦶꦠꦁ ꦱꦸꦮꦶꦚ꧀ꦚꦺꦪ꧀ꦪꦠ꧀ꦠꦴꦠꦶ ꦄꦣꦶꦥ꧀ꦥꦴꦪꦺꦴ. ꦤꦮꦴꦠꦶ ꦄꦴꦫꦩ꧀ꦩꦟꦄꦤꦤ꧀ꦠꦫꦱꦩꦤꦤ꧀ꦠꦫꦹꦥꦤꦶꦱ꧀ꦱꦪꦥꦸꦫꦺꦗꦴꦠꦴꦱꦺꦮꦤꦱꦩ꧀ꦥꦪꦸꦠ꧀ꦠꦤꦠ꧀ꦡꦶꦮꦶꦒꦠꦥꦕ꧀ꦕꦪꦴ. ꦠꦩ꧀ꦥꦶ ꦠꦺꦱꦁ ꦤꦮꦤ꧀ꦤꦁ ꦥꦕ꧀ꦕꦪꦴꦤꦁ ꦄꦤꦸꦭꦺꦴꦩꦠꦺꦴ ꦄꦭꦧ꧀ꦨꦩꦴꦤꦠꦁ.

꧑꧙꧑-꧑꧙꧕. ꦤ ꦄꦚ꧀ꦚꦩꦚ꧀ꦚꦺꦤ ꦓꦛꦶꦠꦱ꧀ꦱ ꦩꦹꦭꦱ꧀ꦱꦴꦠꦶ ꦄꦚ꧀ꦚꦩꦚ꧀ꦚꦥꦕ꧀ꦕꦪꦺꦤ ꦥꦕ꧀ꦕꦤꦷꦪꦠꦺꦴ ꦜꦶꦠꦺꦤ ꦪꦺꦴꦗꦶꦠꦱ꧀ꦱ ꦱꦠ꧀ꦠꦩꦱ꧀ꦱ ꦩꦹꦭꦱ꧀ꦱ ꦮꦶꦠ꧀ꦡꦴꦫꦶꦠꦠ꧀ꦠꦴ. ꦱꦧ꧀ꦧꦁ ꦱꦢꦶꦱꦤ꧀ꦠꦶ ꦱꦧ꧀ꦧꦥꦴꦭ꦳ꦶꦒꦩꦤꦁ ꦱꦢꦶꦱꦁ.

ꦆꦩꦱ꧀ꦩꦶꦁ…ꦥꦺ… ꦮꦺꦢꦶꦠꦧ꧀ꦧꦺꦴꦠꦶ ꦌꦠ꧀ꦡ ꦆꦩꦱ꧀ꦩꦶꦁ ꦌꦠ꧀ꦡꦴꦠꦶ ꦢ꧀ꦮꦺ ꦨꦸꦩ꧀ꦩꦤꦶꦢ꧀ꦢꦺꦱꦴ. ꦠꦺꦱꦸ ꦥꦜꦩꦱ꧀ꦱ ꦮꦶꦱꦪꦺꦴ ꦥꦕ꧀ꦕꦤꦷꦪꦴꦤꦸꦭꦺꦴꦩꦺꦠꦶ ꦄꦛ꧀ꦜꦏꦡꦴꦪꦩꦺꦮ ꦢꦱ꧀ꦱꦶꦠꦺꦴꦠꦶ ꦄꦢꦱ꧀ꦱꦶꦠꦱ꧀ꦱ ꦮꦶꦱꦪꦁ ꦢꦱ꧀ꦱꦺꦠꦸꦁ ‘‘ꦌꦠꦺꦱꦹ’’ꦠꦶꦄꦴꦢꦶ ꦮꦸꦠ꧀ꦠꦁ. ꦥꦶ-ꦱꦢ꧀ꦢꦺꦤꦴꦠꦶ ‘‘ꦆꦩꦺꦱꦩ꧀ꦥꦷ’’ꦠꦶ ꦌꦠ꧀ꦡ ꦥꦶ-ꦱꦢ꧀ꦢꦺꦤ. ꦏꦶꦱ꧀ꦩꦶꦚ꧀ꦕꦶ ꦥꦕ꧀ꦕꦪꦺ. ꦏꦩ꧀ꦩꦥꦕ꧀ꦕꦪꦁ ꦭꦨꦤ꧀ꦠꦴꦤꦶꦥꦶ ꦕꦏ꧀ꦑꦴꦢꦷꦤꦶ ꦮꦶꦥꦴꦏꦮꦶꦚ꧀ꦚꦴꦟꦴꦢꦷꦤꦶ ꦕ ꦆꦤ꧀ꦢ꧀ꦫꦶꦪꦁ ꦤ ꦭꦨꦤ꧀ꦠꦷꦠꦶ ꦏꦠ꧀ꦮꦴ ‘‘ꦪꦺꦨꦸꦪ꧀ꦪꦺꦤꦴ’’ꦠꦶ ꦮꦸꦠ꧀ꦠꦁ, ꦏꦠꦶꦥꦪꦁ ꦤ ꦭꦨꦠꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦩꦒ꧀ꦒꦥꦕ꧀ꦕꦪꦤ꧀ꦠꦶꦄꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ. ꦪꦡꦴꦮꦸꦠ꧀ꦠꦴꦤꦷꦠꦶ ꦥꦚ꧀ꦕꦮꦺꦴꦏꦴꦫꦥꦮꦠ꧀ꦠꦶꦄꦱꦚ꧀ꦚꦨꦮꦥꦫꦶꦪꦴꦥꦤ꧀ꦤꦴꦤꦶ ꦏꦛꦠ꧀ꦠꦴꦫꦹꦥꦴꦤꦺꦮ ꦮꦢꦠꦶ, ꦤ ꦕꦶꦠ꧀ꦠꦱꦩꦸꦛ꧀ꦜꦴꦤꦫꦹꦥꦴꦤꦷꦠꦶ ꦄꦣꦶꦥ꧀ꦥꦴꦪꦺꦴ. ꦪꦺ ꦫꦹꦥꦣꦩ꧀ꦩꦴꦤꦁ ꦥꦕ꧀ꦕꦪꦴ ꦲꦺꦴꦤ꧀ꦠꦷꦠꦶ ꦪꦺ ꦲꦺꦠꦸꦄꦣꦶꦥꦠꦶꦱꦲꦗꦴꦠꦴꦢꦶꦥꦕ꧀ꦕꦪꦴ ꦫꦹꦥꦣꦩ꧀ꦩꦴꦤꦁ ꦥꦕ꧀ꦕꦪꦴ ꦲꦺꦴꦤ꧀ꦠꦶ, ꦌꦠꦺꦪꦺꦮ ꦲꦺꦠꦸꦄꦣꦶꦥꦠꦶꦄꦴꦢꦶꦏꦺ ꦖ ꦥꦕ꧀ꦕꦪꦺ ꦤ ꦭꦨꦤ꧀ꦠꦶ. ꦌꦠꦺꦪꦺꦮꦴꦠꦶ ꦮꦕꦤꦺꦤ ꦄꦚ꧀ꦚꦺ ꦏꦠꦶꦥꦪꦺ ꦭꦨꦤ꧀ꦠꦷꦠꦶ ꦱꦶꦢ꧀ꦣꦁ ꦲꦺꦴꦠꦷꦠꦶ ꦠꦁ ꦢꦱ꧀ꦱꦺꦤ꧀ꦠꦺꦴ ‘‘ꦥꦕ꧀ꦖꦴꦗꦴꦠꦴ…ꦥꦺ… ꦭꦨꦠꦷ’’ꦠꦶ ꦄꦴꦲ. ꦄꦪꦚ꧀ꦕ ꦥꦕ꧀ꦕꦪꦭꦴꦨꦺꦴ ꦤ ꦗꦤꦏꦮꦱꦺꦤ ꦮꦺꦢꦶꦠꦧ꧀ꦧꦺꦴꦠꦶ ꦢꦱ꧀ꦱꦺꦠꦸꦁ ‘‘ꦭꦧ꧀ꦨꦩꦴꦤꦴ…ꦥꦺ… ꦢꦱ꧀ꦱꦤ’’ꦤ꧀ꦠꦶ ꦮꦸꦠ꧀ꦠꦁ. ꦣꦩ꧀ꦩꦮꦱꦺꦤꦴꦠꦶ ꦥꦕ꧀ꦕꦪꦸꦥ꧀ꦥꦤ꧀ꦤꦣꦩ꧀ꦩꦮꦱꦺꦤ. ꦆꦤ꧀ꦢ꧀ꦫꦶꦪꦤ꧀ꦠꦶ ꦆꦤ꧀ꦢ꧀ꦫꦶꦪꦥꦕ꧀ꦕꦪꦁ. ꦪꦢꦶ ꦌꦮꦤ꧀ꦠꦶ ꦏꦛꦠ꧀ꦠꦴꦫꦹꦥꦁ ꦪꦁ ꦪꦁ ꦤ ꦭꦨꦠꦶ, ꦠꦁ ꦠꦁ ꦪꦢꦶ ꦮꦠ꧀ꦠꦧ꧀ꦧꦁ, ꦌꦮꦁ ꦱꦤ꧀ꦠꦺ ꦫꦹꦥꦣꦩ꧀ꦩꦺꦱꦸ ꦨꦹꦠꦫꦹꦥꦴꦤꦶꦪꦺꦮ ꦄꦚ꧀ꦚꦩꦚ꧀ꦚꦥꦕ꧀ꦕꦪꦁ ꦭꦨꦤ꧀ꦠꦷꦠꦶ ꦄꦴꦲ ‘‘ꦈꦥꦴꦢꦴꦫꦹꦥꦴꦤꦶ…ꦥꦺ… ꦮꦠ꧀ꦠꦧ꧀ꦧ’’ꦤ꧀ꦠꦶ. ꦠꦁ ꦥꦤ ꦈꦥꦴꦢꦴꦫꦹꦥꦴꦤꦁ ꦄꦚ꧀ꦚꦩꦚ꧀ꦚꦥꦕ꧀ꦕꦪꦴꦭꦴꦨꦮꦕꦤꦁ. ꦄꦫꦹꦥꦶꦤ꧀ꦢ꧀ꦫꦶꦪꦴꦭꦴꦨꦤ꧀ꦠꦶ ꦄꦫꦹꦥꦷꦤꦁ ꦆꦤ꧀ꦢ꧀ꦫꦶꦪꦴꦤꦁ ꦮꦱꦺꦤ ꦆꦤ꧀ꦢ꧀ꦫꦶꦪꦥꦕ꧀ꦕꦪꦴꦭꦴꦨꦁ.

꧑꧙꧖-꧑꧙꧗. ꦧꦲꦸꦒꦟꦤꦩ꧀ꦥꦶ ꦈꦴꦤꦠꦫꦒꦟꦤꦺꦤ ꦪꦺꦴꦗꦶꦠꦁ ꦈꦴꦤꦠꦫꦒꦟꦩꦺꦮ ꦲꦺꦴꦠꦷꦠꦶ ꦏꦠ꧀ꦮꦴ ꦮꦸꦠ꧀ꦠꦁ ‘‘ꦪꦢꦶꦥꦶ ꦠꦶꦏꦴꦢꦷꦱꦸ ‘ꦲꦺꦠꦸꦪꦴ ꦥꦚ꧀ꦕꦴ’ꦠꦶ ꦆꦢꦁ ꦤꦠ꧀ꦡꦷ’’ꦠꦶ. ꦄꦤꦸꦠ꧀ꦠꦴꦤꦁ ꦢꦸꦮꦶꦚ꧀ꦚꦺꦪ꧀ꦪꦠꦴꦪ ꦒꦩ꧀ꦨꦷꦫꦁ. ꦪꦡꦴ ꦕ ꦨꦹꦠꦫꦹꦥꦴꦤꦶ ꦤꦴꦫꦩ꧀ꦩꦟꦥꦕ꧀ꦕꦪꦴ ꦄꦚ꧀ꦚꦩꦚ꧀ꦚꦥꦕ꧀ꦕꦪꦴ ꦈꦥ꧀ꦥꦗ꧀ꦗꦤ꧀ꦠꦶ, ꦌꦮꦁ ꦥꦛꦶꦱꦤ꧀ꦣꦶꦏ꧀ꦑꦟꦺ ꦮꦠ꧀ꦡꦸꦫꦹꦥꦤ꧀ꦠꦶ ꦄꦴꦲ ‘‘ꦮꦠ꧀ꦡꦸꦥꦶ ꦥꦤ ꦭꦨꦠꦷ’’ꦠꦶ. ꦪꦡꦴ ꦲꦺꦛ꧀ꦜꦴ ꦌꦏꦩꦹꦭꦏꦁ ‘‘ꦢꦸꦩꦹꦭꦏ’’ꦤ꧀ꦠꦶ ꦮꦸꦠ꧀ꦠꦁ, ꦌꦮꦁ ꦆꦣꦴꦥꦶ ꦢꦸꦩꦹꦭꦏꦁ ‘‘ꦠꦶꦩꦹꦭꦏ’’ꦤ꧀ꦠꦶ ꦮꦢꦤ꧀ꦠꦶ.

꧒꧐꧓-꧒꧓꧓. ꦕꦺꦠꦤꦴꦩꦠ꧀ꦠꦱꦔ꧀ꦒꦴꦲꦏꦺꦠꦶ ꦕꦺꦠꦤꦴꦩꦠ꧀ꦠꦁꦪꦺꦮ ꦥꦕ꧀ꦕꦪꦸꦥ꧀ꦥꦤ꧀ꦤꦁ ꦒꦲꦺꦠ꧀ꦮꦴ ꦜꦶꦠꦺ ꦥꦚ꧀ꦲꦺ. ꦠꦠ꧀ꦡ ꦲꦶ ‘‘ꦤꦏꦩ꧀ꦩꦥꦕ꧀ꦕꦪꦴ ꦲꦺꦠꦸꦥꦕ꧀ꦕꦪꦴ’’ꦠꦶ ꦮꦠ꧀ꦠꦸꦁ ꦱꦏ꧀ꦏꦴ. ꦌꦮꦁꦥꦏꦴꦫꦺꦠꦶ ꦆꦢꦁ ‘‘ꦠꦷꦟꦷꦠꦶꦄꦴꦢꦷꦱꦹ’’ꦠꦶ ꦌꦠ꧀ꦡ ꦄꦴꦢꦶ-ꦱꦢ꧀ꦢꦱ꧀ꦱ ꦄꦠ꧀ꦡꦮꦕꦤꦤ꧀ꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦄꦴꦢꦶ-ꦱꦢ꧀ꦢꦺꦴ ꦲꦶ ꦥꦏꦴꦫꦠ꧀ꦡꦺꦴꦮ ꦲꦺꦴꦠꦷ’’ꦠꦶ ꦄꦴꦲ. ꦫꦹꦥꦩ꧀ꦥꦶ ꦭꦧ꧀ꦨꦠꦶ ꦕꦺꦠꦤꦴꦩꦠ꧀ꦠꦩꦺꦮ ꦄꦱꦔ꧀ꦒꦟ꧀ꦲꦤꦠꦺꦴ.

ꦥꦕ꧀ꦕꦪꦥꦕ꧀ꦕꦤꦷꦪꦴꦤꦸꦭꦺꦴꦩꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦥꦛꦶꦕ꧀ꦕꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧒. ꦱꦲꦗꦴꦠꦮꦴꦫꦮꦟ꧀ꦟꦤꦴ

꧒꧓꧔-꧒꧔꧒. ꦱꦲꦗꦴꦠꦥꦕ꧀ꦕꦪꦏꦫꦟꦤ꧀ꦠꦶ ꦱꦲꦗꦴꦠꦁ ꦥꦕ꧀ꦕꦪꦣꦩ꧀ꦩꦁ ꦥꦕ꧀ꦕꦪꦁ ꦏꦠ꧀ꦮꦴ ꦥꦮꦠ꧀ꦠꦶ. ꦱꦲꦗꦴꦠꦴꦪꦠ꧀ꦠꦨꦴꦮꦒꦩꦤꦤ꧀ꦠꦶ ꦱꦲꦗꦴꦠꦺ ꦥꦕ꧀ꦕꦪꦣꦩ꧀ꦩꦺ ꦄꦴꦪꦠ꧀ꦠꦨꦴꦮꦱ꧀ꦱ ꦒꦩꦤꦁ ꦥꦕ꧀ꦕꦪꦸꦥ꧀ꦥꦤ꧀ꦤꦱ꧀ꦱ ꦄꦠ꧀ꦠꦤꦴ ꦱꦲꦗꦴꦠꦥꦕ꧀ꦕꦪꦴꦪꦠ꧀ꦠꦮꦸꦠ꧀ꦠꦶꦠꦴ. ꦌꦠ꧀ꦡ ꦕ ꦱꦲꦗꦴꦠꦥꦕ꧀ꦕꦪꦱꦔ꧀ꦑꦴꦠꦁ ꦱꦲꦗꦴꦠꦁ ꦏꦫꦺꦴꦠꦷꦠꦶ ꦱꦲꦗꦴꦠꦺꦴ, ꦠꦡꦴꦥꦮꦠ꧀ꦠꦺꦴ ꦥꦕ꧀ꦕꦪꦸꦥ꧀ꦥꦤ꧀ꦤꦣꦩ꧀ꦩꦺꦴ. ꦠꦠ꧀ꦡ ꦥꦮꦠ꧀ꦠꦩꦴꦤꦺꦴ ꦱꦲꦗꦴꦠꦱꦢ꧀ꦢꦺꦴ ꦪꦱ꧀ꦩꦴ ꦠꦱ꧀ꦱ ꦥꦕ꧀ꦕꦪꦸꦥ꧀ꦥꦤ꧀ꦤꦱ꧀ꦱ ꦄꦠ꧀ꦠꦤꦴ ꦱꦲꦗꦴꦠꦁ ꦥꦕ꧀ꦕꦪꦣꦩ꧀ꦩꦁ ꦥꦕ꧀ꦕꦪꦁ ꦏꦠ꧀ꦮꦴ ꦥꦮꦠ꧀ꦠꦶꦁ ꦠꦢꦴꦪꦠ꧀ꦠꦨꦴꦮꦹꦥꦒꦩꦤꦚ꧀ꦕ ꦮꦢꦠꦷꦠꦶ ꦮꦸꦕ꧀ꦕꦠꦶ, ꦠꦱ꧀ꦩꦴ ꦮꦸꦠ꧀ꦠꦁ ‘‘ꦱꦲꦗꦴꦠꦱꦢ꧀ꦢꦺꦤ…ꦥꦺ… ꦮꦸꦠ꧀ꦠ’’ꦤ꧀ꦠꦶ. ꦠꦱ꧀ꦱ ꦏꦫꦟꦱ꧀ꦱ ꦒꦩꦤꦱ꧀ꦱ ꦮꦴꦠꦶ ꦠꦱ꧀ꦱ ꦪꦡꦴꦮꦸꦠ꧀ꦠꦱ꧀ꦱ ꦱꦲꦗꦴꦠꦥꦕ꧀ꦕꦪꦏꦫꦟꦱ꧀ꦱ ꦱꦲꦗꦴꦠꦴꦪꦠ꧀ꦠꦨꦴꦮꦹꦥꦒꦩꦤꦱ꧀ꦱ ꦮꦴ. ‘‘ꦏꦸꦱꦭꦁ ꦣꦩ꧀ꦩꦁ ꦱꦲꦗꦴꦠꦺꦴ’’ꦠꦶ ꦆꦩꦱ꧀ꦱ ꦏꦸꦱꦭꦁ ꦣꦩ꧀ꦩꦁ ꦱꦲꦗꦴꦠꦁ ꦠꦁꦱꦲꦨꦴꦮꦶꦠꦚ꧀ꦕ ꦥꦕ꧀ꦕꦪꦁ ꦏꦠ꧀ꦮꦴꦠꦶ ꦄꦪꦩꦠ꧀ꦡꦺꦴꦠꦶ ꦄꦴꦲ ‘‘ꦏꦸꦱꦭꦴꦢꦷꦤꦁ ꦏꦩ꧀ꦩꦨꦴꦮꦠꦺꦴ’’ꦠꦶ. ꦱꦲꦗꦴꦠꦥꦕ꧀ꦕꦪꦱꦲꦨꦴꦮꦷꦤꦁ ꦥꦕ꧀ꦕꦪꦴꦤꦁ ꦱꦔ꧀ꦒꦟ꧀ꦲꦠ꧀ꦡꦚ꧀ꦲꦺꦠ꧀ꦡ ‘‘ꦱꦲꦗꦴꦠꦴꦪꦠ꧀ꦠꦨꦴꦮꦒꦩꦤꦁ ꦮꦴ’’ꦠꦶ ꦮꦸꦠ꧀ꦠꦁ.

ꦠꦁꦏꦩ꧀ꦩꦨꦴꦮꦠꦺꦴꦠꦶ ꦠꦺꦱꦁ ꦪꦡꦴꦮꦸꦠ꧀ꦠꦥꦕ꧀ꦕꦪꦏꦫꦟꦠꦢꦴꦪꦠ꧀ꦠꦨꦴꦮꦒꦩꦤꦴꦤꦁ ꦏꦩ꧀ꦩꦨꦴꦮꦠꦺꦴ. ꦄꦛ꧀ꦜꦏꦡꦴꦪꦁ ꦥꦤ ‘‘ꦏꦸꦱꦭꦁ ꦣꦩ꧀ꦩꦁ ꦱꦲꦗꦴꦠꦺꦴꦠꦶ ꦏꦸꦱꦭꦁ ꦣꦩ꧀ꦩꦁ ꦥꦛꦶꦕ꧀ꦕ ꦠꦺꦤ ꦱꦲꦗꦴꦠꦺꦴ ꦲꦸꦠ꧀ꦮꦴ’’ꦠꦶ ꦥꦛꦶꦕ꧀ꦕꦱꦢ꧀ꦢꦁ ꦄꦴꦲꦫꦶꦠ꧀ꦮꦴ ꦄꦠ꧀ꦡꦺꦴ ꦮꦸꦠ꧀ꦠꦺꦴ, ꦠꦁ ‘‘ꦥꦛꦶꦕ꧀ꦕꦠ꧀ꦡꦺꦴ ꦱꦲꦗꦴꦠꦠ꧀ꦡꦺꦴ’’ꦠꦶ ꦏꦠ꧀ꦮꦴ ꦮꦸꦠ꧀ꦠꦁ. ꦱꦲꦗꦴꦠꦱꦢ꧀ꦢꦪꦺꦴꦒꦺ ꦏꦸꦱꦭꦁ ꦣꦩ꧀ꦩꦤ꧀ꦠꦶ ꦈꦥꦪꦺꦴꦒꦮꦕꦤꦱ꧀ꦱ ꦪꦸꦠ꧀ꦠꦶ ꦤ ꦮꦸꦠ꧀ꦠꦴ, ‘‘ꦠꦺꦤ ꦱꦲꦗꦴꦠꦺꦴ ꦲꦸꦠ꧀ꦮꦴ’’ꦠꦶ ꦥꦤ ꦮꦸꦠ꧀ꦠꦠ꧀ꦠꦴ ꦏꦫꦟꦠ꧀ꦡꦺ ꦈꦥꦪꦺꦴꦒꦮꦕꦤꦤ꧀ꦠꦶ ꦢꦱ꧀ꦱꦶꦠꦤ꧀ꦠꦶ ꦏꦺꦕꦶ. ꦤꦶꦱ꧀ꦱꦪꦮꦴꦫꦺ ꦥꦤ ꦏꦸꦱꦭꦁ ꦣꦩ꧀ꦩꦁ ꦤꦶꦱ꧀ꦱꦪꦠ꧀ꦡꦺꦤ ꦥꦕ꧀ꦕꦪꦁ ꦏꦠ꧀ꦮꦴꦠꦶ ꦮꦢꦤ꧀ꦠꦺꦤ ꦆꦣꦴꦥꦶ ‘‘ꦏꦸꦱꦭꦁ ꦣꦩ꧀ꦩꦁ ꦱꦲꦗꦴꦠꦠ꧀ꦡꦺꦤ ꦥꦕ꧀ꦕꦪꦁ ꦏꦠ꧀ꦮꦴ’’ꦠꦶ ꦄꦪꦩꦠ꧀ꦡꦺꦴ ꦮꦸꦠ꧀ꦠꦺꦴꦪꦺꦮ ꦲꦺꦴꦠꦶ, ꦥꦛꦶꦕ꧀ꦕꦱꦢ꧀ꦢꦴꦲꦫꦟꦩ꧀ꦥꦶ ꦆꦩꦩꦺꦮꦠ꧀ꦡꦁ ꦚꦴꦥꦺꦠꦷꦠꦶ ꦢꦛ꧀ꦜꦧ꧀ꦧꦁ. ꦈꦥꦴꦢꦴꦫꦹꦥꦁ ꦏꦶꦚ꧀ꦕꦶ ꦨꦹꦠꦫꦹꦥꦱ꧀ꦱ ꦄꦤꦸꦥꦴꦭꦏꦁ ꦈꦥꦠ꧀ꦡꦩ꧀ꦨꦏꦚ꧀ꦕ ꦲꦺꦴꦤ꧀ꦠꦩ꧀ꦥꦶ ꦱꦲꦗꦴꦠꦭꦏ꧀ꦑꦟꦺꦤ ꦤ ꦲꦺꦴꦠꦶ, ꦠꦱ꧀ꦩꦴ ꦥꦛꦶꦕ꧀ꦕꦠ꧀ꦡꦁ ꦤ ꦦꦫꦠꦷꦠꦶ ꦄꦴꦲ ‘‘ꦥꦛꦶꦕ꧀ꦕꦴꦠꦶ ꦆꦩꦶꦤꦴ ꦮꦕꦤꦺꦤ ꦢꦷꦥꦶꦠꦺꦴ ꦥꦕ꧀ꦕꦪꦺꦴ ꦤ ꦲꦺꦴꦠꦷ’’ꦠꦶ. ꦤꦶꦢꦱ꧀ꦱꦤꦮꦱꦺꦤ ꦮꦸꦠ꧀ꦠꦤ꧀ꦠꦶ ꦈꦢꦴꦲꦫꦟꦮꦱꦺꦤ ꦮꦸꦠ꧀ꦠꦁ, ꦤ ꦄꦤꦮꦱꦺꦱꦠꦺꦴꦠꦶ ꦄꦠ꧀ꦡꦺꦴ. ꦪꦡꦴꦮꦸꦠ꧀ꦠꦺꦴꦠꦶ ꦥꦛꦶꦕ꧀ꦕꦠ꧀ꦡꦦꦫꦟꦮꦱꦺꦤ ꦮꦸꦠ꧀ꦠꦺꦴ. ꦪꦡꦴ ꦕ ꦈꦥꦴꦢꦴꦫꦹꦥꦁ ꦨꦹꦠꦫꦹꦥꦱ꧀ꦱ ꦈꦥꦴꦢꦴꦫꦹꦥꦱ꧀ꦱ ꦕ ꦥꦕ꧀ꦕꦪꦺꦴ ꦤ ꦲꦺꦴꦠꦶ, ꦌꦮꦁ ꦜꦥꦺꦠ꧀ꦮꦴ ꦖ ꦮꦠ꧀ꦡꦹꦤꦶ ꦱꦺꦱꦫꦹꦥꦴꦤꦶ ꦄꦫꦹꦥꦣꦩ꧀ꦩꦴꦤꦁ ꦥꦕ꧀ꦕꦪꦺꦴ ꦤ ꦲꦺꦴꦠꦷꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦮꦠ꧀ꦡꦸꦮꦗ꧀ꦗꦴꦤꦶ ꦫꦹꦥꦴꦤꦶ ꦕ ꦄꦫꦹꦥꦴꦤ’’ꦤ꧀ꦠꦶ ꦄꦴꦲ.

ꦱꦲꦗꦴꦠꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧓. ꦥꦕ꧀ꦕꦪꦮꦴꦫꦮꦟ꧀ꦟꦤꦴ

꧒꧔꧓. ꦥꦠꦶ-ꦱꦢ꧀ꦢꦺꦴ ꦥꦠꦶꦛ꧀ꦜꦠ꧀ꦡꦁ ꦢꦷꦥꦺꦠꦶ ‘‘ꦱꦴꦫꦺ ꦥꦠꦶꦛ꧀ꦜꦶꦠꦺꦴ’’ꦠꦶꦄꦴꦢꦷꦱꦸ, ꦄꦪ-ꦱꦢ꧀ꦢꦺꦴ ꦒꦠꦶꦁ ꦢꦷꦥꦺꦠꦶ ‘‘ꦌꦠꦶ ꦌꦠ꧀ꦡꦴꦠꦶ ꦄꦪꦺꦴ’’ꦠꦶ.

ꦨꦹꦠꦸꦥꦴꦢꦴꦫꦹꦥꦴꦤꦶ ꦱꦲ ꦱꦔ꧀ꦒꦟ꧀ꦲꦶꦠ꧀ꦮꦴ ꦮꦸꦠ꧀ꦠꦁ ꦈꦥꦴꦢꦴꦫꦹꦥꦴꦤꦁ ꦮꦶꦪ ꦨꦹꦠꦫꦹꦥꦴꦤꦶ ꦤꦶꦱ꧀ꦱꦪꦺꦴ ꦲꦺꦴꦠꦷꦠꦶ ꦏꦠ꧀ꦮꦴ. ꦪꦢꦶ ꦌꦮꦁ ꦏꦱ꧀ꦩꦴ ꦄꦛ꧀ꦜꦏꦡꦴꦪꦁ ‘‘ꦩꦲꦴꦨꦹꦠꦺ ꦤꦶꦱ꧀ꦱꦴꦪ ꦕꦶꦠ꧀ꦠꦱꦩꦸꦛ꧀ꦜꦴꦤꦁ ꦈꦥꦴꦢꦴꦫꦹꦥ’’ꦤ꧀ꦠꦶ ꦈꦥꦴꦢꦴꦫꦹꦥꦁꦪꦺꦮ ꦢꦱ꧀ꦱꦶꦠꦤ꧀ꦠꦶ ꦄꦴꦲ ‘‘ꦄꦛ꧀ꦜꦏꦡꦴꦪꦁ ꦥꦤꦴ’’ꦠꦶꦄꦴꦢꦶ.

꧒꧕꧕. ꦥꦛꦶꦕ꧀ꦕꦮꦴꦫꦺ ꦱꦲꦗꦴꦠꦺꦠꦶ ꦥꦛꦶꦕ꧀ꦕꦮꦴꦫꦺ ꦱꦲꦗꦴꦠꦥꦕ꧀ꦕꦪꦮꦟ꧀ꦟꦤꦴꦪꦁ, ꦏꦩ꧀ꦩꦈꦠꦸꦗꦴꦤꦤ꧀ꦠꦶ ꦏꦩ꧀ꦩꦗꦴꦤꦁ ꦈꦠꦸꦗꦴꦤꦚ꧀ꦕ ꦮꦱꦺꦤ ꦄꦠ꧀ꦡꦺꦴ ꦮꦸꦠ꧀ꦠꦺꦴꦠꦶ ꦪꦺꦴꦗꦤꦴ. ꦠꦡꦴ ꦲꦶ ꦠꦠ꧀ꦡ ꦮꦸꦠ꧀ꦠꦁ ‘‘ꦢ꧀ꦮꦶꦱꦤ꧀ꦠꦠꦶꦱꦩꦸꦛ꧀ꦜꦴꦤꦨꦹꦠꦮꦱꦺꦤ ꦮꦸꦠ꧀ꦠ’’ꦤ꧀ꦠꦶ (ꦥꦛ꧀ꦜꦴ. ꦄꦛ꧀ꦜ. ꧑.꧕꧗). ꦏꦩ꧀ꦩꦺ ꦕꦴꦠꦶ ꦏꦩ꧀ꦩꦺ ꦗꦤꦏꦏꦩ꧀ꦩꦥꦕ꧀ꦕꦪꦺ ꦒꦲꦶꦠꦺ. ꦌꦏꦤ꧀ꦠꦴꦤꦺꦏꦤ꧀ꦠꦏꦩ꧀ꦩꦗꦴꦤꦤ꧀ꦠꦶ ꦌꦏꦤ꧀ꦠꦺꦤ ꦏꦩ꧀ꦩꦗꦴꦤꦁ ꦤ ꦌꦏꦤ꧀ꦠꦏꦩ꧀ꦩꦗꦴꦤꦚ꧀ꦕ. ꦠꦠ꧀ꦡ ꦄꦱꦚ꧀ꦚꦨꦮꦺ ꦌꦏꦤ꧀ꦠꦏꦩ꧀ꦩꦗꦁ ꦤꦴꦩ ꦗꦷꦮꦶꦠꦶꦤ꧀ꦢ꧀ꦫꦶꦪꦁ, ꦆꦠꦫꦁ ꦈꦥꦴꦢꦴꦫꦹꦥꦁ ꦨꦹꦠꦫꦹꦥꦚ꧀ꦕ ꦤ ꦌꦏꦤ꧀ꦠꦏꦩ꧀ꦩꦗꦁ, ꦠꦢꦸꦨꦪꦩ꧀ꦥꦶ ꦠꦠ꧀ꦡ ꦌꦏꦗ꧀ꦙꦁ ꦏꦠ꧀ꦮꦴ ꦮꦸꦠ꧀ꦠꦁ, ‘‘ꦩꦲꦴꦨꦹꦠꦺ ꦥꦛꦶꦕ꧀ꦕ ꦏꦛꦠ꧀ꦠꦴꦫꦹꦥ’’ꦤ꧀ꦠꦶ ꦆꦢꦁ ꦥꦤ ꦏꦩ꧀ꦩꦱꦩꦸꦛ꧀ꦜꦴꦤꦮꦱꦺꦤꦺꦮ ꦮꦸꦠ꧀ꦠꦤ꧀ꦠꦶ. ꦱꦺꦴ ꦤꦴꦣꦶꦥ꧀ꦥꦺꦠꦺꦴꦠꦶ ꦪꦺꦴ ꦪꦡꦴꦢꦱ꧀ꦱꦶꦠꦺꦴ ꦥꦛꦶꦕ꧀ꦕꦮꦴꦫꦺ ꦱꦲꦗꦴꦠꦥꦕ꧀ꦕꦪꦺ ꦄꦠ꧀ꦡꦺꦴ ꦮꦸꦠ꧀ꦠꦺꦴ, ꦱꦺꦴ ꦆꦣ ꦤ ꦄꦣꦶꦥ꧀ꦥꦺꦠꦺꦴ. ꦏꦱ꧀ꦩꦴꦠꦶ ꦕꦺ, ꦄꦴꦲ ‘‘ꦏꦛꦠ꧀ꦠꦴ…ꦥꦺ… ꦒꦲꦶꦠꦠ꧀ꦠꦴ’’ꦠꦶ. ꦠꦁ ꦥꦲꦴꦪꦴꦠꦶ ꦠꦁ ꦥꦛꦶꦕ꧀ꦕꦮꦴꦫꦺ ꦮꦸꦠ꧀ꦠꦩꦠ꧀ꦡꦁ ꦥꦲꦴꦪ ꦄꦒ꧀ꦒꦲꦺꦠ꧀ꦮꦴ. ꦪꦡꦴꦒꦲꦶꦠꦱ꧀ꦱꦴꦠꦶ ‘‘ꦄꦱꦚ꧀ꦚ…ꦥꦺ… ꦏꦛꦠ꧀ꦠꦴꦫꦹꦥꦁ ꦈꦥꦴꦢꦴꦫꦹꦥ’’ꦤ꧀ꦠꦶ ꦥꦴꦭ꦳ꦶꦪꦁ ꦌꦮ ꦒꦲꦶꦠꦱ꧀ꦱ. ꦥꦛꦶꦕ꧀ꦕ ꦥꦕ꧀ꦕꦪꦴꦠꦶ ꦆꦢꦁ ꦢ꧀ꦮꦶꦤ꧀ꦤꦁ ꦮꦴꦫꦴꦤꦁ ꦈꦥꦭꦏ꧀ꦑꦟꦁ. ꦥꦛꦶꦕ꧀ꦕꦮꦴꦫꦺ ꦄꦴꦒꦠꦤꦪꦺꦤ ꦩꦲꦴꦨꦹꦠꦺ ꦥꦛꦶꦕ꧀ꦕ, ꦥꦕ꧀ꦕꦪꦮꦴꦫꦺ ꦄꦴꦒꦠꦤꦪꦺꦤ ꦩꦲꦴꦨꦹꦠꦺ ꦥꦕ꧀ꦕꦪꦴ ꦩꦲꦴꦨꦹꦠꦴꦤꦁ ꦈꦥ꧀ꦥꦠ꧀ꦠꦶ ꦤ ꦤꦶꦮꦴꦫꦺꦠꦧ꧀ꦧꦴ, ꦠꦱ꧀ꦩꦴ ‘‘ꦈꦥꦴꦢꦴꦫꦹꦥꦱꦔ꧀ꦑꦴꦠꦁ ꦏꦛꦠ꧀ꦠꦴꦫꦹꦥ’’ꦤ꧀ꦠꦶ ꦌꦮꦁ ꦈꦥꦴꦢꦴꦫꦹꦥꦒ꧀ꦒꦲꦟꦺꦤ ꦏꦛꦠ꧀ꦠꦴꦫꦹꦥꦁ ꦄꦮꦶꦱꦺꦱꦺꦠ꧀ꦮꦴ ꦈꦥꦴꦢꦴꦫꦹꦥꦴꦤꦁ ꦤꦶꦮꦠ꧀ꦠꦺꦠꦧ꧀ꦧꦴꦤꦁ ꦈꦠꦸꦕꦶꦠ꧀ꦠꦴꦲꦴꦫꦱꦩꦸꦛ꧀ꦜꦴꦤꦴꦤꦁ ꦄꦠ꧀ꦡꦶꦠꦴꦪ ꦏꦛꦠ꧀ꦠꦴ…ꦥꦺ… ꦮꦶꦱꦺꦱꦤꦁ ꦢꦛ꧀ꦜꦧ꧀ꦧꦤ꧀ꦠꦶ ꦌꦮꦩꦺꦠ꧀ꦡ ꦪꦺꦴꦗꦤꦴ ꦮꦺꦢꦶꦠꦧ꧀ꦧꦴ.

꧒꧘꧖-꧒꧘꧗. ꦌꦏꦕ꧀ꦕꦱ꧀ꦱ ꦫꦹꦥꦱ꧀ꦱꦴꦠꦶ ꦄꦲꦺꦠꦸꦏꦕꦶꦠ꧀ꦠꦱꦩꦸꦛ꧀ꦜꦴꦤꦱ꧀ꦱ. ꦆꦠꦺꦴ ꦥꦫꦺꦱꦸꦥꦶ ꦌꦏꦕ꧀ꦕꦫꦹꦥꦒ꧀ꦒꦲꦟꦺ ꦌꦱꦺꦮ ꦤꦪꦺꦴ. ꦕꦏ꧀ꦑꦴꦢꦶꦣꦩ꧀ꦩꦮꦱꦺꦤꦴꦠꦶ ꦕꦏ꧀ꦑꦴꦪꦠꦤꦴꦢꦶꦫꦹꦥꦣꦩ꧀ꦩꦮꦱꦺꦤ. ꦕꦶꦠ꧀ꦠꦱꦩꦸꦛ꧀ꦜꦴꦤꦴꦢꦶꦏꦺꦴꦛ꧀ꦜꦴꦱꦮꦱꦺꦤꦴꦠꦶ ꦕꦶꦠ꧀ꦠꦗꦴꦢꦶꦫꦹꦥꦣꦩ꧀ꦩꦨꦴꦒꦮꦱꦺꦤ. ꦱꦧ꧀ꦧꦁ ꦭꦧ꧀ꦨꦠꦷꦠꦶ ꦱꦠꦶꦥꦶ ꦆꦩꦱ꧀ꦱ ꦤꦪꦱ꧀ꦱ ꦤꦲꦺꦠꦸꦩꦹꦭꦏꦠ꧀ꦠꦺ ꦤꦺꦴꦤꦠ꧀ꦡꦶꦤꦺꦴꦮꦶꦒꦠꦺꦱꦸ ꦌꦏꦤ꧀ꦠꦶ ꦒꦟꦤꦁ ꦱꦧ꧀ꦧꦁ ꦫꦹꦥꦁ ꦱꦧ꧀ꦧꦱ꧀ꦱ ꦫꦹꦥꦱ꧀ꦱ ꦮꦱꦺꦤ ꦒꦟꦤꦴ ꦭꦧ꧀ꦨꦠꦶ ꦕꦠꦸꦱꦤ꧀ꦠꦠꦶꦮꦱꦺꦤ ꦮꦠ꧀ꦠꦩꦴꦤꦺꦱꦸ ꦥꦚ꧀ꦕꦮꦷꦱꦠꦶꦪꦴ ꦫꦹꦥꦣꦩ꧀ꦩꦺꦱꦸ ꦮꦗ꧀ꦗꦶꦠꦧ꧀ꦧꦱ꧀ꦱ ꦄꦨꦴꦮꦴ.

ꦥꦕ꧀ꦕꦪꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧔. ꦤꦶꦱ꧀ꦱꦪꦮꦴꦫꦮꦟ꧀ꦟꦤꦴ

꧓꧒꧙-꧓꧓꧗. ꦤꦶꦱ꧀ꦱꦪꦥꦕ꧀ꦕꦪꦨꦴꦮꦤ꧀ꦠꦶ ꦤꦶꦱ꧀ꦱꦪꦮꦴꦫꦺ ꦮꦸꦠ꧀ꦠꦱ꧀ꦱ ꦱꦲꦗꦴꦠꦥꦸꦫꦺꦗꦴꦠꦱ꧀ꦱ ꦕ ꦤꦶꦱ꧀ꦱꦪꦛ꧀ꦜꦱ꧀ꦱ ꦣꦩ꧀ꦩꦱ꧀ꦱ ꦥꦕ꧀ꦕꦪꦨꦴꦮꦁ ꦥꦕ꧀ꦕꦪꦮꦴꦫꦺꦤ ꦤꦶꦪꦩꦺꦠꦸꦤ꧀ꦠꦶ ꦪꦺꦴꦗꦤꦴ. ꦠꦡꦴ ꦥꦕ꧀ꦕꦪꦮꦴꦫꦺ ‘‘ꦥꦕ꧀ꦕꦪꦴ’’ꦠꦶ ꦮꦸꦠ꧀ꦠꦱ꧀ꦱ ꦥꦕ꧀ꦕꦪꦣꦩ꧀ꦩꦱ꧀ꦱ ꦱꦲꦗꦴꦠꦥꦸꦫꦺꦗꦴꦠꦨꦴꦮꦁ ꦤꦶꦱ꧀ꦱꦪꦮꦴꦫꦺꦤ ꦤꦶꦪꦩꦺꦠꦸꦤ꧀ꦠꦶ ꦪꦺꦴꦗꦤꦴ. ꦤꦶꦪꦩꦤꦚ꧀ꦕꦺꦠ꧀ꦡ ꦥꦕ꧀ꦕꦪꦛ꧀ꦜꦤꦶꦱ꧀ꦱꦪꦛ꧀ꦜꦴꦤꦁ ꦥꦫꦶꦪꦴꦪꦤ꧀ꦠꦫꦺꦤ ꦥꦏꦴꦱꦶꦠꦠ꧀ꦠꦴ ꦄꦠ꧀ꦡꦠꦺꦴ ꦨꦺꦢꦴꦨꦴꦮꦢꦱ꧀ꦱꦤꦤ꧀ꦠꦶ ꦮꦺꦢꦶꦠꦧ꧀ꦧꦺꦴ. ꦠꦺꦤ ꦮꦸꦠ꧀ꦠꦁ ‘‘ꦥꦕ꧀ꦕꦪꦠ꧀ꦠꦁ ꦤꦴꦩ ꦤꦶꦱ꧀ꦱꦪꦠ꧀ꦠꦁ, ꦤꦶꦱ꧀ꦱꦪꦠ꧀ꦠꦁ ꦤꦴꦩ ꦥꦕ꧀ꦕꦪꦠ꧀ꦠ’’ꦤ꧀ꦠꦶ.

ꦤꦶꦱ꧀ꦱꦪꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧕. ꦱꦁꦱꦛ꧀ꦜꦮꦴꦫꦮꦟ꧀ꦟꦤꦴ

꧓꧕꧑-꧓꧖꧘. ꦱꦴꦠꦶ ꦱꦮꦠ꧀ꦡꦸꦏꦴ ꦥꦛꦶꦱꦤ꧀ꦣꦶ. ꦆꦣꦴꦥꦷꦠꦶ ꦆꦩꦱ꧀ꦩꦶꦁ ꦱꦁꦱꦛ꧀ꦜꦮꦴꦫꦺꦥꦶ. ꦄꦣꦶꦥꦠꦶꦥꦸꦫꦺꦗꦴꦠꦴꦱꦺꦮꦤꦺꦱꦸ ꦄꦤꦸꦭꦺꦴꦩꦠꦺꦴ ꦤꦏꦩ꧀ꦩꦤꦮꦶꦥꦴꦏꦤꦙꦴꦤꦤꦮꦶꦥ꧀ꦥꦪꦸꦠ꧀ꦠꦺꦱꦸ ꦥꦕ꧀ꦕꦤꦷꦪꦠꦺꦴ ꦜꦶꦠꦺꦱꦸ ꦤ ꦭꦧ꧀ꦨꦠꦶ, ꦄꦚ꧀ꦚꦺꦱꦸ ꦱꦲꦗꦴꦠꦴꦢꦷꦱꦸ ꦄꦤꦸꦭꦺꦴꦩꦠꦺꦴ ꦲꦺꦠꦸꦄꦴꦢꦷꦱꦸ ꦥꦕ꧀ꦕꦤꦷꦪꦠꦺꦴ ꦕ ꦄꦤꦸꦭꦺꦴꦩꦠꦺꦴ ꦕ ꦜꦶꦠꦺꦱꦸ ꦭꦧ꧀ꦨꦠꦷꦠꦶ. ꦠꦺꦤꦴꦲ ‘‘ꦭꦧ꧀ꦨꦩꦴꦤꦥꦕ꧀ꦕꦪꦺꦱꦹ’’ꦠꦶ. ꦆꦩꦱ꧀ꦱ ꦮꦶꦱꦺꦱꦱ꧀ꦱꦴꦠꦶ ꦆꦩꦱ꧀ꦱ ꦪꦡꦴꦮꦸꦠ꧀ꦠꦱ꧀ꦱ ꦮꦶꦱꦺꦱꦱ꧀ꦱ ꦢꦱ꧀ꦱꦤꦠ꧀ꦡꦁ ꦈꦢ꧀ꦣꦛꦴ, ꦠꦱ꧀ꦩꦴ ꦠꦴꦢꦶꦱꦱ꧀ꦱ ꦮꦶꦱꦺꦱꦱ꧀ꦱ ꦢꦱ꧀ꦱꦺꦠꦧ꧀ꦧꦱ꧀ꦱ ꦄꦨꦴꦮꦠꦺꦴ ꦮꦠ꧀ꦡꦸꦮꦶꦫꦲꦶꦠꦴ ꦥꦛꦶꦱꦤ꧀ꦣꦶ ꦄꦤꦸꦢ꧀ꦣꦛꦴ, ꦤ ꦮꦶꦥ꧀ꦥꦪꦸꦠ꧀ꦠꦺ ꦥꦕ꧀ꦕꦤꦷꦪꦠꦺꦴ ꦜꦶꦠꦺ ꦄꦨꦴꦮꦠꦺꦴꦠꦶ ꦄꦠ꧀ꦡꦺꦴ. ꦲꦺꦠꦸꦥꦕ꧀ꦕꦪꦮꦶꦫꦲꦶꦠꦩꦠ꧀ꦠꦢꦱ꧀ꦱꦤꦠ꧀ꦡꦤ꧀ꦠꦶ ꦆꦩꦶꦤꦴ ꦨꦹꦠꦏꦡꦤꦁ ꦄꦲꦺꦠꦸꦏꦒ꧀ꦒꦲꦟꦁ ꦤ ꦧ꧀ꦪꦨꦶꦕꦴꦫꦤꦶꦮꦠ꧀ꦠꦤꦤ꧀ꦠꦶ ꦢꦱ꧀ꦱꦺꦠꦶ. ‘‘ꦄꦲꦺꦠꦸꦏꦮꦶꦥꦴꦏꦏꦶꦫꦶꦪꦮꦱꦺꦤꦴ’’ꦠꦶ ꦨꦮꦶꦠꦧ꧀ꦧꦁ ꦲꦺꦠꦸꦥꦫꦶꦪꦤ꧀ꦠꦠ꧀ꦠꦴ ꦩꦒ꧀ꦒꦱ꧀ꦱ.

꧓꧖꧙-꧓꧙꧑. ‘‘ꦲꦺꦠꦸꦩ꧀ꦲꦶ ꦄꦤꦸꦭꦺꦴꦩꦠꦺꦴ ꦜꦶꦠꦺ ꦙꦴꦤꦩꦒ꧀ꦒꦴ ꦥꦕ꧀ꦕꦤꦷꦪꦠꦺꦴ ꦤ ꦭꦧ꧀ꦨꦤ꧀ꦠꦷ’’ꦠꦶꦄꦴꦢꦶ ꦪꦁ ꦆꦣ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦁ, ꦠꦁ ꦲꦺꦠꦸꦥꦕ꧀ꦕꦪꦴꦢꦶꦮꦱꦺꦤ ꦈꦥ꧀ꦥꦗ꧀ꦗꦩꦴꦤꦺꦴ ꦣꦩ꧀ꦩꦺꦴ ꦕꦠ꧀ꦠꦴꦫꦺꦴ ꦱꦧ꧀ꦧꦛ꧀ꦜꦴꦤꦶꦏꦴ ꦄꦴꦲꦴꦫꦶꦤ꧀ꦢ꧀ꦫꦶꦪꦙꦴꦤꦩꦒ꧀ꦒꦴ ꦕꦴꦠꦶ ꦆꦩꦺ ꦄꦛ꧀ꦜ ꦥꦕ꧀ꦕꦪꦺ ꦄꦭꦨꦤ꧀ꦠꦺꦴ ꦤꦴꦩ ꦤꦠ꧀ꦡꦷꦠꦶ ꦆꦩꦶꦤꦴ ꦥꦛꦶꦕ꧀ꦕꦮꦴꦫꦺ ꦄꦤꦸꦭꦺꦴꦩꦥꦕ꧀ꦕꦤꦷꦪꦮꦟ꧀ꦟꦤꦴꦪꦁ ꦮꦸꦠ꧀ꦠꦺꦤ ꦤꦪꦺꦤ ꦮꦺꦢꦶꦠꦸꦁ ꦱꦏ꧀ꦏꦴꦠꦶ ꦄꦴꦲ ‘‘ꦥꦛꦶꦕ꧀ꦕꦮꦴꦫꦺ…ꦥꦺ… ꦤꦪꦺꦤꦴ’’ꦠꦶ. ꦱꦺꦱꦺꦱꦹꦠꦶ ꦄꦲꦺꦠꦸꦏꦩꦺꦴꦲꦮꦗ꧀ꦗꦴꦲꦺꦠꦸꦏꦺꦱꦸ ꦥꦚ꧀ꦕꦮꦶꦚ꧀ꦚꦴꦟꦴ…ꦥꦺ… ꦙꦴꦤꦥꦕ꧀ꦕꦪꦁ ꦭꦨꦤ꧀ꦠꦶ, ꦠꦱ꧀ꦩꦴ ‘‘ꦄꦲꦺꦠꦸꦏꦩꦺꦴꦲꦺꦴꦮ ꦙꦴꦤꦩꦒ꧀ꦒꦥꦕ꧀ꦕꦪꦁ ꦭꦨꦠꦷ’’ꦠꦶ ꦤ ꦱꦏ꧀ꦏꦴ ꦮꦠ꧀ꦠꦸꦁ, ꦏꦶꦚ꧀ꦕ ꦥꦕ꧀ꦕꦤꦷꦪꦴꦤꦸꦭꦺꦴꦩꦺ ꦢ꧀ꦮꦶꦤ꧀ꦤꦁ ꦥꦕ꧀ꦕꦪꦴꦤꦁ ꦄꦤꦸꦭꦺꦴꦩꦺꦤ ꦄꦤꦸꦭꦺꦴꦩꦮꦱꦺꦤ ꦱꦲ ꦪꦺꦴꦗꦤꦴ ꦤꦠ꧀ꦡꦶ ꦌꦏꦺꦏꦱ꧀ꦱꦺꦮ ꦪꦺꦴꦗꦤꦴꦪ ꦄꦴꦒꦠꦠ꧀ꦠꦴ, ꦠꦱ꧀ꦩꦴ ꦄꦲꦺꦠꦸꦏꦩꦺꦴꦲꦺꦴꦮ ꦩꦒ꧀ꦒꦥꦕ꧀ꦕꦪꦁ ꦭꦨꦠꦷꦠꦶ ꦌꦮꦩꦺꦠ꧀ꦡ ꦪꦺꦴꦗꦤꦴ ꦮꦺꦢꦶꦠꦧ꧀ꦧꦴ.

ꦱꦁꦱꦛ꧀ꦜꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧖. ꦱꦩ꧀ꦥꦪꦸꦠ꧀ꦠꦮꦴꦫꦮꦟ꧀ꦟꦤꦴ

꧓꧙꧒-꧔꧐꧐. ꦱꦢꦶꦱꦁ ꦱꦩ꧀ꦥꦪꦸꦠ꧀ꦠꦤ꧀ꦠꦶ ‘‘ꦪꦁ ꦱꦢꦶꦱꦁ, ꦠꦁ ꦱꦁꦱꦛ꧀ꦜ’’ꦤ꧀ꦠꦶ ꦮꦸꦕ꧀ꦕꦩꦴꦤꦁ ꦱꦩ꧀ꦥꦪꦸꦠ꧀ꦠꦁ ꦤ ꦲꦺꦴꦠꦶ ‘‘ꦱꦁꦱꦛ꧀ꦜꦴ ꦪꦺꦴꦗꦶꦠꦴ ꦲꦪꦴ’’ꦠꦶꦄꦴꦢꦷꦱꦸ. ꦄꦱꦁꦱꦛ꧀ꦜꦁ ꦮꦺꦴꦏꦶꦟ꧀ꦟꦤ꧀ꦠꦶ ꦪꦁ ꦤ ꦱꦁꦱꦛ꧀ꦜꦁ ꦄꦤ꧀ꦠꦫꦤ꧀ꦠꦫꦴ ꦈꦥ꧀ꦥꦗ꧀ꦗꦩꦴꦤꦺꦤ ꦮꦺꦴꦏꦶꦟ꧀ꦟꦩ꧀ꦥꦶ ꦮꦶꦩꦶꦱ꧀ꦱꦠꦴꦪ ꦱꦩ꧀ꦥꦪꦸꦠ꧀ꦠꦤ꧀ꦠꦶ ꦮꦸꦕ꧀ꦕꦩꦴꦤꦁ, ꦠꦁ ꦱꦁꦱꦛ꧀ꦜꦁ ꦤ ꦲꦺꦴꦠꦶ ‘‘ꦪꦴ ꦱꦴ ꦮꦷꦩꦁꦱꦴ…ꦥꦺ… ꦏꦺꦴꦱꦗ꧀ꦗꦱꦩ꧀ꦥꦪꦸꦠ꧀ꦠꦴ’’ꦠꦶꦄꦴꦢꦷꦱꦸ. ꦌꦮꦁ ꦄꦱꦩ꧀ꦥꦪꦸꦠ꧀ꦠꦱ꧀ꦱꦥꦶ ꦱꦁꦱꦛ꧀ꦜꦥꦫꦶꦪꦴꦪꦺꦴ ꦄꦱꦁꦱꦛ꧀ꦜꦱ꧀ꦱ ꦕ ꦱꦩ꧀ꦥꦪꦸꦠ꧀ꦠꦥꦫꦶꦪꦴꦪꦺꦴ ꦄꦠ꧀ꦡꦷꦠꦶ ꦠꦢꦸꦨꦪꦁ ꦆꦠꦫꦺꦠꦫꦁ ꦤꦶꦪꦩꦺꦠꦷꦠꦶ ꦢꦱ꧀ꦱꦤꦠ꧀ꦡꦁ ꦮꦴꦫꦢ꧀ꦮꦪꦢꦺꦱꦤꦴꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦈꦨꦪꦁ…ꦥꦺ… ꦤꦶꦪꦴꦩꦏꦁ ꦲꦺꦴꦠꦷ’’ꦠꦶ, ꦱꦁꦱꦛ꧀ꦜꦱꦢ꧀ꦢꦺꦴ ꦲꦶ ꦮꦺꦴꦏꦶꦟ꧀ꦟꦛ꧀ꦜꦺꦴ ꦤꦠ꧀ꦡꦶ, ꦱꦩ꧀ꦥꦪꦸꦠ꧀ꦠꦱꦢ꧀ꦢꦺꦴ ꦕ ꦱꦢꦶꦱꦠ꧀ꦡꦺꦴ, ꦠꦱ꧀ꦩꦴ ꦪꦡꦴ ꦱꦁꦱꦛ꧀ꦜꦱꦢ꧀ꦢꦺꦴ ꦱꦩ꧀ꦥꦪꦸꦠ꧀ꦠꦱꦢ꧀ꦢꦴꦥꦺꦏ꧀ꦑꦺꦴ ꦱꦢꦶꦱꦠ꧀ꦡꦠꦺꦴ ꦮꦶꦤꦶꦮꦠ꧀ꦠꦶꦠ꧀ꦮꦴ ꦌꦏꦸꦥ꧀ꦥꦴꦢꦴꦢꦶꦱꦨꦴꦮꦩꦺꦮ ꦄꦠ꧀ꦡꦁ ꦧꦺꦴꦣꦺꦠꦶ, ꦌꦮꦁ ꦱꦩ꧀ꦥꦪꦸꦠ꧀ꦠꦱꦢ꧀ꦢꦺꦴꦥꦶ ꦱꦁꦱꦛ꧀ꦜꦱꦢ꧀ꦢꦴꦥꦺꦏ꧀ꦑꦺꦴ ꦮꦺꦴꦏꦶꦟ꧀ꦟꦛ꧀ꦜꦠꦺꦴ ꦮꦶꦤꦶꦮꦠ꧀ꦠꦶꦠ꧀ꦮꦴꦠꦶ ꦄꦚ꧀ꦚꦩꦚ꧀ꦚꦴꦥꦺꦏ꧀ꦑꦱ꧀ꦱ ꦱꦢ꧀ꦢꦢ꧀ꦮꦪꦱ꧀ꦱ ꦄꦚ꧀ꦚꦩꦚ꧀ꦚꦤꦶꦪꦴꦩꦏꦠꦴ ꦮꦺꦢꦶꦠꦧ꧀ꦧꦴ.

ꦱꦩ꧀ꦥꦪꦸꦠ꧀ꦠꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧗. ꦥꦚ꧀ꦲꦴꦮꦴꦫꦮꦶꦨꦔ꧀ꦒꦮꦟ꧀ꦟꦤꦴ

꧔꧐꧑-꧔꧐꧓. ꦠꦺ ꦥꦕ꧀ꦕꦪꦺꦠꦶ ꦠꦺ ꦲꦺꦠꦸꦄꦴꦢꦶꦏꦺ ꦥꦕ꧀ꦕꦪꦺ. ꦥꦛꦶꦥꦴꦛꦶꦪꦴꦠꦶ ꦌꦠ꧀ꦡ ꦥꦕ꧀ꦕꦪꦥꦛꦶꦥꦴꦛꦶꦪꦴ ꦏꦸꦱꦭꦴꦢꦶꦥꦢꦥꦛꦶꦥꦴꦛꦶꦪꦴ ꦮꦴꦠꦶ ꦄꦴꦱꦔ꧀ꦏꦴꦪꦁ ꦈꦨꦪꦮꦱꦺꦤꦥꦶ ꦄꦠ꧀ꦡꦺꦴ ꦪꦸꦗ꧀ꦗꦠꦷꦠꦶ ꦢꦱ꧀ꦱꦺꦤ꧀ꦠꦺꦴ ꦥꦜꦩꦁ ꦠꦴꦮ ꦱꦤ꧀ꦣꦴꦪꦴꦲ ‘‘ꦪꦡꦴꦏ꧀ꦏꦩꦺꦤꦴ’’ꦠꦶꦄꦴꦢꦶ. ꦠꦱ꧀ꦱꦠ꧀ꦡꦺꦴ – ‘‘ꦲꦺꦠꦸꦥꦕ꧀ꦕꦪꦺꦴ ꦄꦴꦫꦩ꧀ꦩꦟꦥꦕ꧀ꦕꦪꦺꦴ’’ꦠꦶꦄꦴꦢꦶꦤꦴ ꦤꦪꦺꦤ ꦢꦺꦱꦤꦴꦏ꧀ꦏꦩꦺꦤ ꦪꦴꦪ ꦥꦛꦶꦥꦴꦛꦶꦪꦴ ꦥꦛꦶꦕ꧀ꦕꦮꦴꦫꦺ ꦥꦕ꧀ꦕꦪꦴ ꦄꦴꦒꦠꦴ, ꦠꦢꦤꦸꦫꦹꦥꦁ ꦠꦺ ꦢꦱ꧀ꦱꦺꦠꦸꦤ꧀ꦠꦶ. ꦢꦸꦠꦶꦪꦁ ꦥꦤ ꦢꦱ꧀ꦱꦺꦠꦸꦁ ‘‘ꦏꦸꦱꦭꦺꦴ ꦏꦸꦱꦭꦱ꧀ꦱꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦱꦴ ꦥꦤꦴꦪꦁ ꦥꦢꦥꦛꦶꦥꦴꦛꦶ ꦪꦱ꧀ꦩꦴ ꦤ ꦏꦸꦱꦭꦥꦢꦢꦱ꧀ꦱꦤꦩꦠ꧀ꦠꦺꦤ ꦢꦱ꧀ꦱꦶꦠꦴ ꦲꦺꦴꦠꦶ, ꦠꦱ꧀ꦩꦴ ꦠꦁ ꦌꦏꦢꦺꦱꦺꦤ ꦱꦏꦭꦁ ꦤꦪꦠꦺꦴ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦏꦸꦱꦭꦺꦴ ꦏꦸꦱꦭꦱ꧀ꦱꦴꦠꦶ…ꦥꦺ… ꦲꦺꦴꦠꦷ’’ꦠꦶ. ꦠꦺꦤꦴꦠꦶ ꦤꦶꦢꦱ꧀ꦱꦤꦩꦠ꧀ꦠꦺꦤ ‘‘ꦏꦸꦱꦭꦺꦴ ꦏꦸꦱꦭꦱ꧀ꦱꦴ’’ꦠꦶ ꦥꦢꦺꦤ. ꦱꦧ꧀ꦧꦺꦴ ꦥꦨꦺꦢꦺꦴꦠꦶ ꦪꦁ ꦠꦠ꧀ꦡ ꦠꦠ꧀ꦡ ꦥꦕ꧀ꦕꦪꦺ ‘‘ꦏꦸꦱꦭꦺꦴ ꦏꦸꦱꦭꦱ꧀ꦱꦴ’’ꦠꦶꦄꦴꦢꦶꦏꦺꦴ ꦪꦠ꧀ꦠꦏꦺꦴ ꦥꦨꦺꦢꦺꦴ ꦮꦶꦱ꧀ꦱꦗ꧀ꦗꦤꦁ ꦭꦨꦠꦶ, ꦱꦺꦴ ꦱꦧ꧀ꦧꦺꦴ ꦥꦨꦺꦢꦺꦴꦠꦶ ꦄꦠ꧀ꦡꦺꦴ. ꦠꦺ ꦥꦕ꧀ꦕꦪꦺ ꦥꦛꦶꦥꦴꦛꦶꦪꦴ ꦢꦱ꧀ꦱꦺꦠꦸꦤ꧀ꦠꦶ ꦠꦺ ꦲꦺꦠꦸꦄꦴꦢꦶꦥꦕ꧀ꦕꦪꦺ ꦏꦸꦱꦭꦴꦢꦶꦥꦢꦥꦛꦶꦥꦴꦛꦶꦪꦴ ꦢꦱ꧀ꦱꦺꦠꦸꦁ.

꧔꧐꧔. ꦦꦭꦮꦶꦱꦺꦱꦁ ꦄꦴꦏꦔ꧀ꦑꦤ꧀ꦠꦴ ꦥꦛꦶꦒ꧀ꦒꦴꦲꦏꦠꦺꦴ ꦮꦶꦪ ꦢꦴꦪꦏꦠꦺꦴꦥꦶ ꦪꦡꦴ ꦢꦏ꧀ꦑꦶꦟꦴ ꦮꦶꦱꦸꦗ꧀ꦙꦠꦶ, ꦌꦮꦁ ꦢꦴꦤꦁ ꦢꦺꦤ꧀ꦠꦷꦠꦶ ꦄꦴꦲ ‘‘ꦮꦶꦱꦸꦢ꧀ꦣꦁ ꦏꦠ꧀ꦮꦴ’’ꦠꦶ. ꦠꦺꦱꦤ꧀ꦠꦶ ꦮꦠ꧀ꦠꦧ꧀ꦧꦠꦴꦫꦲꦤ꧀ꦠꦶ ꦆꦩꦶꦤꦴ ꦮꦺꦴꦢꦴꦤꦱ꧀ꦱ ꦱꦏꦢꦴꦒꦴꦩꦶꦄꦴꦢꦷꦤꦁ ꦄꦴꦮꦺꦟꦶꦏꦠꦁ ꦢꦱ꧀ꦱꦺꦠꦶ. ꦏꦴꦩꦁ ꦄꦒ꧀ꦒꦩꦒ꧀ꦒꦥꦸꦫꦺꦕꦴꦫꦶꦏꦩ꧀ꦥꦶ ꦮꦺꦴꦢꦴꦤꦩꦺꦮ, ꦄꦱꦺꦏ꧀ꦑꦺꦴ ꦥꦤ ꦲꦸꦠ꧀ꦮꦴ ꦠꦁ ꦥꦕ꧀ꦕꦮꦺꦏ꧀ꦑꦠꦷꦠꦶ ꦤ ꦠꦁ ꦆꦣ ꦒꦲꦶꦠꦁ. ꦠꦤ꧀ꦠꦶ ꦮꦺꦴꦢꦴꦤꦁ. ꦒꦺꦴꦠ꧀ꦫꦨꦸꦕꦶꦠ꧀ꦠꦤ꧀ꦠꦶ ꦄꦛ꧀ꦜꦩꦏꦱ꧀ꦱ ꦈꦥ꧀ꦥꦗ꧀ꦗꦤꦏꦴꦭꦺ ‘‘ꦒꦺꦴꦠ꧀ꦫꦨꦹ’’ꦠꦶ ꦮꦠ꧀ꦠꦧ꧀ꦧꦠꦴꦫꦲꦁ ꦕꦶꦠ꧀ꦠꦁ. ꦒꦺꦴꦠ꧀ꦫꦨꦸꦱꦢꦶꦱꦤ꧀ꦠꦶ ꦮꦴ ꦱꦺꦴꦠꦴꦥꦤ꧀ꦤꦴꦢꦶꦒꦺꦴꦠ꧀ꦫꦴꦨꦶꦨꦴꦮꦷꦠꦶ ꦮꦴ ꦒꦺꦴꦠ꧀ꦫꦨꦸꦕꦶꦠ꧀ꦠꦤ꧀ꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦥꦕ꧀ꦕꦪꦸꦥ꧀ꦥꦤ꧀ꦤꦁ ꦨꦹꦩꦶꦠꦺꦴ ꦮꦮꦠ꧀ꦡꦥꦺꦠꦶ, ‘‘ꦠꦺꦨꦹꦩꦏꦏꦸꦱꦭꦩꦺꦮꦴ’’ꦠꦶ ꦌꦠ꧀ꦡ ꦮꦶꦪ ꦤ ꦥꦕ꧀ꦕꦪꦣꦩ꧀ꦩꦤ꧀ꦠꦶ ꦄꦠ꧀ꦡꦺꦴ. ꦢꦺꦱꦤꦤ꧀ꦠꦫꦠ꧀ꦠꦴꦠꦶ ‘‘ꦏꦸꦱꦭꦕꦶꦠ꧀ꦠꦱꦩꦔ꧀ꦒꦶꦱ꧀ꦱꦴ’’ꦠꦶꦄꦴꦢꦶꦤꦴ ꦥꦸꦒ꧀ꦒꦭꦴꦩꦱꦤꦢꦺꦱꦤꦠꦺꦴ ꦄꦚ꧀ꦚꦠ꧀ꦠꦴ, ꦄꦚ꧀ꦚꦡꦴ ꦒꦲꦶꦠꦁ ꦥꦸꦤ ꦤ ꦒꦟ꧀ꦲꦺꦪ꧀ꦪꦴꦠꦶ ꦄꦣꦶꦥ꧀ꦥꦴꦪꦺꦴ.

꧔꧐꧕. ꦫꦴꦒꦫꦲꦶꦠꦱ꧀ꦱ ꦮꦶꦪ ꦱꦺꦴꦩꦤꦱ꧀ꦱꦫꦲꦶꦠꦱ꧀ꦱ ꦕ ꦫꦴꦒꦱ꧀ꦱ ꦤ ꦄꦴꦫꦩ꧀ꦩꦟꦺ ꦄꦱ꧀ꦱꦴꦢꦤꦮꦱꦺꦤ ꦥꦮꦠ꧀ꦠꦶ ꦄꦗ꧀ꦙꦸꦥꦺꦏ꧀ꦑꦤꦠꦺꦴꦠꦶ ꦮꦸꦠ꧀ꦠꦁ ‘‘ꦄꦱ꧀ꦱꦴꦢꦤꦁ…ꦥꦺ… ꦏꦶꦕ꧀ꦕ’’ꦤ꧀ꦠꦶ. ꦱꦲꦱꦴꦏꦴꦫꦥ꧀ꦥꦮꦠ꧀ꦠꦴꦪ ꦈꦥ꧀ꦥꦶꦭꦴꦮꦶꦠꦱꦨꦴꦮꦴꦪ ꦥꦷꦠꦶꦪꦴ ꦄꦴꦲꦶꦠꦮꦶꦱꦺꦱꦴꦪ ꦠꦟ꧀ꦲꦴꦪ ꦠꦁ ꦠꦟ꧀ꦲꦴꦨꦶꦤꦤ꧀ꦢꦤꦤ꧀ꦠꦶ ꦮꦸꦕ꧀ꦕꦠꦷꦠꦶ ꦠꦁ ꦱꦤ꧀ꦣꦴꦪꦴꦲ ‘‘ꦥꦷꦠꦶꦏꦶꦕ꧀ꦕꦱꦲꦶꦠꦴꦪ ꦠꦟ꧀ꦲꦴꦪ ꦏꦶꦕ꧀ꦕ’’ꦤ꧀ꦠꦶ. ꦪꦡꦴ ꦕ ꦪꦡꦴꦮꦸꦠ꧀ꦠꦏꦶꦕ꧀ꦕꦮꦶꦱꦺꦱꦴꦪ ꦥꦷꦠꦶꦪꦴ ꦄꦴꦲꦶꦠꦮꦶꦱꦺꦱꦴ ꦠꦟ꧀ꦲꦴ ꦠꦟ꧀ꦲꦴꦨꦶꦤꦤ꧀ꦢꦤꦴ, ꦌꦮꦁ ꦢꦶꦛ꧀ꦜꦴꦨꦶꦤꦤ꧀ꦢꦤꦴ ꦮꦺꦢꦶꦠꦧ꧀ꦧꦴ. ꦪꦱ꧀ꦩꦴ ꦥꦤ ꦱꦴ ꦄꦠ꧀ꦡꦠꦺꦴ ꦥꦕ꧀ꦕꦪꦮꦶꦱꦺꦱꦮꦶꦱꦶꦛ꧀ꦜꦴ ꦢꦶꦛ꧀ꦜꦶꦪꦺꦮ, ꦠꦱ꧀ꦩꦴ ꦮꦸꦠ꧀ꦠꦁ ‘‘ꦢꦶꦛ꧀ꦜꦴꦨꦶꦤꦤ꧀ꦢꦤꦴ ꦢꦶꦛ꧀ꦜꦶꦪꦺꦮꦴ’’ꦠꦶ. ꦌꦠ꧀ꦡ ꦥꦤꦴꦠꦶ ‘‘ꦄꦨꦶꦤꦤ꧀ꦢꦠꦷ’’ꦠꦶ ꦥꦢꦱ꧀ꦱ ꦠꦟ꧀ꦲꦴꦢꦶꦛ꧀ꦜꦶꦮꦱꦺꦤ ꦮꦸꦠ꧀ꦠꦺꦱꦸ ꦌꦠꦺꦱꦸ ꦥꦤ ꦢ꧀ꦮꦷꦱꦸ ꦄꦠ꧀ꦡꦺꦱꦸ. ꦄꦨꦶꦤꦤ꧀ꦢꦤ꧀ꦠꦱ꧀ꦱꦴꦠꦶ ꦆꦢꦁ ꦢꦶꦛ꧀ꦜꦴꦨꦶꦤꦤ꧀ꦢꦤꦁꦪꦺꦮ ꦱꦤ꧀ꦣꦴꦪ ꦮꦸꦠ꧀ꦠꦤ꧀ꦠꦶ ꦄꦣꦶꦥ꧀ꦥꦴꦪꦺꦤ ‘‘ꦥꦕ꧀ꦖꦶꦩꦠ꧀ꦡꦩꦺꦮ ꦒꦲꦺꦠ꧀ꦮꦴ’’ꦠꦶ ꦮꦸꦠ꧀ꦠꦁ. ꦄꦨꦶꦤꦤ꧀ꦢꦤ꧀ꦠꦱ꧀ꦱꦴꦠꦶ ꦥꦤ ꦄꦮꦶꦱꦺꦱꦠꦺꦴ ꦮꦸꦠ꧀ꦠꦠ꧀ꦠꦴ ꦠꦟ꧀ꦲꦴꦮꦱꦺꦤ ꦢꦶꦛ꧀ꦜꦶꦮꦱꦺꦤ ꦄꦨꦶꦤꦤ꧀ꦢꦤ꧀ꦠꦱ꧀ꦱꦴꦠꦶ ꦄꦪꦩꦺꦠ꧀ꦡ ꦄꦠ꧀ꦡꦺꦴ ꦄꦣꦶꦥ꧀ꦥꦺꦠꦺꦴ, ꦠꦱ꧀ꦩꦴ ‘‘ꦄꦨꦶꦤꦤ꧀ꦢꦤꦴ…ꦥꦺ… ꦤ ꦱꦏ꧀ꦏꦴ ꦮꦠ꧀ꦠꦸ’’ꦤ꧀ꦠꦶ ꦆꦢꦩꦶꦣ ꦮꦕꦤꦩꦤꦺꦴꦏꦴꦱꦁ. ꦏꦱ꧀ꦩꦴ? ꦢꦶꦛ꧀ꦜꦶꦫꦲꦶꦠꦺꦥꦶ ꦱꦤ꧀ꦠꦴꦤꦺ ꦄꦨꦶꦤꦤ꧀ꦢꦤꦱ꧀ꦱ ꦮꦸꦠ꧀ꦠꦠ꧀ꦠꦴ. ꦠꦟ꧀ꦲꦴꦮꦱꦺꦤ ꦤꦤ꧀ꦢꦠꦷꦠꦶ ꦠꦟ꧀ꦲꦴꦨꦶꦤꦤ꧀ꦢꦤꦮꦱꦺꦤꦺꦮ ꦮꦸꦠ꧀ꦠꦺꦴ ꦄꦠ꧀ꦡꦺꦴ ꦥꦸꦫꦶꦩꦺꦴ ꦄꦠ꧀ꦡꦺꦴ. ꦢ꧀ꦮꦷꦱꦸ ꦥꦤ ꦱꦺꦴꦩꦤꦱ꧀ꦱꦱꦲꦒꦠꦕꦶꦠ꧀ꦠꦸꦥ꧀ꦥꦴꦢꦺꦱꦹꦠꦶ ꦢꦶꦛ꧀ꦜꦶꦫꦲꦶꦠꦴꦤꦶ ꦱꦺꦴꦩꦤꦱ꧀ꦱꦱꦲꦒꦠꦕꦶꦠ꧀ꦠꦴꦤꦶ ꦱꦤ꧀ꦣꦴꦪꦴꦲ. ꦪꦡꦴꦮꦸꦠ꧀ꦠꦺꦤꦴꦠꦶ ‘‘ꦱꦫꦴꦒꦱ꧀ꦱ ꦱꦺꦴꦩꦤꦱ꧀ꦱꦱ꧀ꦱꦴ’’ꦠꦶꦄꦴꦢꦶꦤꦴ ꦮꦸꦠ꧀ꦠꦺꦤ ꦱꦺꦴꦩꦤꦱ꧀ꦱꦺꦤ ꦄꦱ꧀ꦱꦴꦢꦺꦤ꧀ꦠꦱ꧀ꦱ, ꦫꦴꦒꦺꦤ ꦕ ꦠꦺꦱꦸꦪꦺꦮ ꦪꦡꦴꦮꦸꦠ꧀ꦠꦺꦱꦸ ꦢ꧀ꦮꦷꦱꦸ ꦕꦶꦠ꧀ꦠꦺꦱꦸ ꦄꦱ꧀ꦱꦴꦢꦺꦤ꧀ꦠꦱ꧀ꦱ, ꦕꦠꦹꦱꦸꦥꦶ ꦱꦺꦴꦩꦤꦱ꧀ꦱꦱꦲꦒꦠꦕꦶꦠ꧀ꦠꦺꦱꦸ ꦱꦥ꧀ꦥꦷꦠꦶꦏꦠꦟ꧀ꦲꦴꦪ ꦄꦨꦶꦤꦤ꧀ꦢꦤ꧀ꦠꦱ꧀ꦱ, ꦕꦠꦹꦱꦸꦥꦶ ꦢꦶꦛ꧀ꦜꦶꦱꦩ꧀ꦥꦪꦸꦠ꧀ꦠꦺꦱꦸ ꦢꦶꦛ꧀ꦜꦴꦨꦶꦤꦤ꧀ꦢꦤꦴꦪ ꦄꦨꦶꦤꦤ꧀ꦢꦤ꧀ꦠꦱ꧀ꦱ ꦢꦶꦛ꧀ꦜꦶ ꦈꦥ꧀ꦥꦗ꧀ꦗꦠꦷꦠꦶ ꦌꦮꦩꦺꦠ꧀ꦡ ꦪꦺꦴꦗꦤꦴ ꦮꦺꦢꦶꦠꦧ꧀ꦧꦴ. ꦠꦺꦤ ꦮꦸꦠ꧀ꦠꦁ ‘‘ꦆꦠꦶꦥꦶ ꦱꦏ꧀ꦏꦴ ꦪꦺꦴꦗꦺꦠꦸ’’ꦤ꧀ꦠꦶ. ꦪꦡꦴ ꦢꦶꦛ꧀ꦜꦹꦥꦤꦶꦱ꧀ꦱꦪꦠꦺꦴ ꦢꦶꦛ꧀ꦜꦴꦨꦶꦤꦤ꧀ꦢꦤꦴ ꦱꦩ꧀ꦨꦮꦠꦶ, ꦌꦮꦁ ꦠꦟ꧀ꦲꦹꦥꦤꦶꦱ꧀ꦱꦪꦠꦺꦴ ꦠꦟ꧀ꦲꦴꦨꦶꦤꦤ꧀ꦢꦤꦴꦥꦶ ꦱꦩ꧀ꦨꦮꦠꦷꦠꦶ ꦢꦛ꧀ꦜꦧ꧀ꦧꦁ. ‘‘ꦄꦨꦶꦤꦤ꧀ꦢꦠꦶ ꦫꦴꦒꦺꦴ ꦈꦥ꧀ꦥꦗ꧀ꦗꦠꦷ’’ꦠꦶ ꦮꦕꦤꦠꦺꦴ ꦱꦥ꧀ꦥꦷꦠꦶꦏꦠꦟ꧀ꦲꦴꦪ ꦄꦨꦶꦤꦤ꧀ꦢꦤ꧀ꦠꦱ꧀ꦱ ꦫꦴꦒꦸꦥ꧀ꦥꦠ꧀ꦠꦶꦥꦶ ꦮꦠ꧀ꦠꦧ꧀ꦧꦴ, ꦤ ꦮꦴ ꦮꦠ꧀ꦠꦧ꧀ꦧꦴ ꦠꦟ꧀ꦲꦴꦨꦶꦤꦤ꧀ꦢꦤꦴꦪ ꦌꦮ ꦫꦴꦒꦸꦥ꧀ꦥꦠ꧀ꦠꦶꦪꦴ ꦮꦸꦠ꧀ꦠꦠ꧀ꦠꦴ.

꧔꧐꧖. ‘‘ꦠꦢꦴꦫꦩ꧀ꦩꦟꦠꦴꦪꦴ’’ꦠꦶ ꦮꦠ꧀ꦠꦧ꧀ꦧꦺ ‘‘ꦠꦢꦴꦫꦩ꧀ꦩꦟꦠꦴ’’ꦠꦶ ꦮꦸꦠ꧀ꦠꦤ꧀ꦠꦶ ꦄꦴꦲ ‘‘ꦮꦶꦨꦠ꧀ꦠꦶꦭꦺꦴꦥꦺꦴ ꦲꦺꦠ꧀ꦡ ꦏꦠꦺꦴ’’ꦠꦶ. ꦠꦢꦴꦫꦩ꧀ꦩꦟꦠꦴꦠꦶ ꦌꦠ꧀ꦡ ꦠꦴ-ꦱꦢ꧀ꦢꦴꦨꦶꦣꦺꦪ꧀ꦪꦺꦴ ꦄꦠ꧀ꦡꦺꦴ ꦨꦴꦮꦺꦴ ꦤꦴꦩ, ꦱꦺꦴ ꦥꦤ ꦠꦢꦴꦫꦩ꧀ꦩꦟꦱꦢ꧀ꦢꦴꦨꦶꦣꦺꦪ꧀ꦪꦠꦺꦴ ꦄꦚ꧀ꦚꦺꦴ ꦤꦠ꧀ꦡꦷꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦨꦴꦮꦮꦤ꧀ꦠꦠꦺꦴ ꦮꦴ ꦄꦚ꧀ꦚꦺꦴ ꦨꦴꦮꦺꦴ ꦤꦴꦩ ꦤꦠ꧀ꦡꦷ’’ꦠꦶ. ꦌꦠꦺꦤ ꦱꦏꦠ꧀ꦡꦺ ꦄꦪꦁ ꦠꦴ-ꦱꦢ꧀ꦢꦺꦴꦠꦶ ꦢꦱ꧀ꦱꦺꦠꦶ. ꦠꦺꦤꦴꦲ ‘‘ꦮꦶꦥꦴꦏꦺꦴ ꦠꦢꦴꦫꦩ꧀ꦩꦟꦨꦴꦮꦨꦹꦠꦺꦴꦠꦶ ꦄꦠ꧀ꦡꦺꦴ’’ꦠꦶ. ꦌꦠꦱ꧀ꦩꦶꦚ꧀ꦕꦠ꧀ꦡꦺ ‘‘ꦠꦢꦴꦫꦩ꧀ꦩꦟꦠꦴ’’ꦠꦶ ꦥꦕ꧀ꦕꦠ꧀ꦠꦺꦏꦮꦕꦤꦁ ꦢꦛ꧀ꦜꦧ꧀ꦧꦁ. ꦮꦶꦚ꧀ꦚꦴꦟꦚ꧀ꦕꦴꦪꦠꦤ…ꦥꦺ… ꦤ ꦮꦸꦠ꧀ꦠꦤ꧀ꦠꦶ ꦪꦢꦶꦥꦶ ꦏꦴꦩꦴꦮꦕꦫꦮꦶꦥꦴꦏꦴꦤꦩ꧀ꦥꦶ ꦏꦩ꧀ꦩꦁ ꦄꦴꦫꦩ꧀ꦩꦟꦁ ꦭꦧ꧀ꦨꦠꦶ, ꦠꦁ ꦥꦤ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦮꦶꦥꦴꦏꦴꦤꦁ ꦮꦶꦪ ꦤ ꦌꦏꦤ꧀ꦠꦺꦤ ꦆꦩꦱ꧀ꦱ ꦮꦶꦥꦴꦏꦕꦶꦠ꧀ꦠꦱ꧀ꦱ ꦆꦢꦁ ꦏꦩ꧀ꦩꦁ ꦄꦴꦫꦩ꧀ꦩꦟꦤ꧀ꦠꦶ ꦮꦮꦠ꧀ꦡꦶꦠꦁ ꦏꦴꦩꦴꦮꦕꦫꦮꦶꦥꦴꦏꦕꦶꦠ꧀ꦠꦴꦤꦁ ꦧꦲꦸꦨꦺꦢꦠ꧀ꦠꦴ, ꦠꦱ꧀ꦩꦴ ꦠꦁ ꦭꦧ꧀ꦨꦩꦴꦤꦩ꧀ꦥꦶ ꦤ ꦮꦸꦠ꧀ꦠꦤ꧀ꦠꦶ ꦄꦠ꧀ꦡꦺꦴ. ꦪꦢꦶ ꦌꦮꦁ ꦏꦶꦁ ꦠꦁ ꦭꦧ꧀ꦨꦩꦴꦤꦩ꧀ꦥꦶ ꦤ ꦢꦱ꧀ꦱꦶꦠꦩꦺꦮꦴꦠꦶ ꦄꦴꦱꦔ꧀ꦏꦴꦪꦁ ꦄꦴꦲ ‘‘ꦠꦢꦴꦫꦩ꧀ꦩꦟꦺꦤ ꦥꦤꦴ’’ꦠꦶꦄꦴꦢꦶ. ꦄꦤꦸꦭꦺꦴꦩꦠꦺꦴ ꦱꦩꦴꦥꦗ꧀ꦗꦤꦺ ꦪꦺꦨꦸꦪ꧀ꦪꦺꦤ ꦄꦴꦱꦤ꧀ꦤꦱꦩꦴꦥꦠ꧀ꦠꦶꦪꦴ ꦄꦴꦫꦩ꧀ꦩꦟꦨꦴꦮꦺꦴ ꦢꦱ꧀ꦱꦶꦠꦺꦴ, ꦄꦚ꧀ꦚꦡꦴ ‘‘ꦥꦛꦶꦭꦺꦴꦩꦠꦺꦴ ꦮꦴ ꦌꦏꦤ꧀ꦠꦫꦶꦏꦮꦱꦺꦤ ꦮꦴ’’ꦠꦶ ꦮꦕꦤꦁ ꦤꦶꦫꦠ꧀ꦡꦏꦁ ꦱꦶꦪꦴꦠꦶ ꦄꦣꦶꦥ꧀ꦥꦴꦪꦺꦴ. ꦨꦮꦺꦪ꧀ꦪꦴꦠꦶ ꦄꦤꦴꦱꦤ꧀ꦤꦴꦥꦶ ꦱꦩꦴꦥꦠ꧀ꦠꦶ ꦄꦴꦫꦩ꧀ꦩꦟꦁ ꦨꦮꦺꦪ꧀ꦪ, ꦤ ꦱꦏ꧀ꦏꦴ ꦥꦛꦶꦏ꧀ꦑꦶꦥꦶꦠꦸꦤ꧀ꦠꦶ ꦄꦠ꧀ꦡꦺꦴ. ꦠꦺꦤꦺꦮ ꦲꦶ ‘‘ꦪꦺꦨꦸꦪ꧀ꦪꦺꦤꦴ’’ꦠꦶ ꦮꦸꦠ꧀ꦠꦁ. ꦌꦮꦁ ꦱꦠꦷꦠꦶ ꦪꦢꦶ ꦄꦴꦮꦗ꧀ꦗꦤꦴꦪ ꦌꦮ ꦄꦴꦫꦩ꧀ꦩꦟꦨꦴꦮꦺꦤ ꦏꦸꦱꦭꦴꦤꦁ ꦑꦤ꧀ꦣꦴꦤꦁ ꦄꦧ꧀ꦪꦴꦏꦠꦴꦫꦩ꧀ꦩꦟꦠꦴ ꦄꦣꦶꦥ꧀ꦥꦺꦠꦴ, ꦌꦮꦁ ꦱꦤ꧀ꦠꦺ. ꦮꦠ꧀ꦠꦧ꧀ꦧꦁ ꦱꦶꦪꦴꦠꦶ ‘‘ꦆꦢ꧀ꦣꦶꦮꦶꦣꦚꦴꦟꦱ꧀ꦱꦴ’’ꦠꦶ ꦕ ꦥꦴꦭ꦳ꦶꦪꦁ ꦮꦠ꧀ꦠꦧ꧀ꦧꦁ ꦱꦶꦪꦴ ꦠꦱ꧀ꦱꦴꦥꦶ ꦄꦴꦮꦗ꧀ꦗꦤꦴꦪ ꦄꦴꦫꦩ꧀ꦩꦟꦨꦴꦮꦠꦺꦴ. ꦠꦁ ꦤ ꦮꦸꦠ꧀ꦠꦤ꧀ꦠꦶ ꦠꦁ ꦄꦧ꧀ꦪꦴꦏꦠꦁ ꦆꦢ꧀ꦣꦶꦮꦶꦣꦚꦴꦟꦁ ‘‘ꦏꦸꦱꦭꦴ ꦑꦤ꧀ꦣꦴ ꦆꦢ꧀ꦣꦶꦮꦶꦣꦚꦴꦟꦱ꧀ꦱꦴ’’ꦠꦶ ꦤ ꦮꦸꦠ꧀ꦠꦁ. ꦲꦺꦴꦤ꧀ꦠꦷꦠꦶ ꦄꦴꦫꦩ꧀ꦩꦟꦁ ꦲꦺꦴꦤ꧀ꦠꦶ. ꦠꦴꦤꦷꦠꦶ ꦕꦺꦠꦺꦴꦥꦫꦶꦪꦚꦴꦟꦴꦢꦷꦤꦶ. ꦪꦴꦪ ꦏꦴꦪꦕꦷꦠꦶ ꦕꦺꦠꦺꦴꦥꦫꦶꦪꦚꦴꦟꦴꦢꦷꦤꦁ ꦄꦚ꧀ꦚꦺꦱꦚ꧀ꦕ ꦏꦸꦱꦭꦴꦤꦁ ꦄꦴꦫꦩ꧀ꦩꦟꦏꦫꦟꦮꦱꦺꦤ ꦄꦴꦮꦗ꧀ꦗꦤ꧀ꦠꦶꦪꦴ.

꧔꧐꧗-꧔꧐꧙. ꦄꦴꦢꦷꦤꦮꦢꦱ꧀ꦱꦤꦺꦤ ꦱꦨꦴꦮꦠꦺꦴ ꦕ ꦄꦤꦶꦛ꧀ꦜꦠꦴꦩꦠ꧀ꦠꦮꦱꦺꦤ ꦕ ꦢꦺꦴꦩꦤꦱ꧀ꦱꦱ꧀ꦱ ꦈꦥ꧀ꦥꦠ꧀ꦠꦶ ꦮꦺꦢꦶꦠꦧ꧀ꦧꦴꦠꦶ ꦪꦺꦴꦗꦺꦠꦧ꧀ꦧꦁ. ꦄꦴꦓꦴꦠꦮꦠ꧀ꦡꦸꦄꦴꦢꦶꦨꦺꦢꦺꦤ ꦄꦏ꧀ꦑꦤ꧀ꦠꦶꦨꦺꦢꦴ ꦮꦺꦢꦶꦠꦧ꧀ꦧꦴ.

꧔꧑꧐. ꦱꦧ꧀ꦧꦱ꧀ꦱꦴꦠꦶ ꦥꦏꦫꦟꦥꦫꦶꦕ꧀ꦖꦶꦤ꧀ꦤꦺ ꦒꦪ꧀ꦲꦩꦴꦤꦺ ꦱꦧ꧀ꦧꦱ꧀ꦱ ꦄꦧ꧀ꦪꦴꦏꦠꦱ꧀ꦱ, ꦄꦠ꧀ꦡꦤ꧀ꦠꦫꦮꦱꦺꦤ ꦥꦤ ꦒꦪ꧀ꦲꦩꦴꦤꦺ ꦱꦧ꧀ꦧꦱ꧀ꦱ ꦚꦺꦪ꧀ꦪꦱ꧀ꦱꦴꦠꦶ ꦄꦠ꧀ꦡꦺꦴ. ꦄꦱꦏ꧀ꦏꦸꦟꦺꦪ꧀ꦪꦠ꧀ꦠꦴꦠꦶ ꦆꦢꦁ ꦮꦠ꧀ꦠꦧ꧀ꦧꦱ꧀ꦱ ꦄꦤꦤ꧀ꦠꦴꦥꦫꦶꦩꦺꦪ꧀ꦪꦠꦴꦪ ꦮꦸꦠ꧀ꦠꦁ, ꦤ ꦄꦚ꧀ꦚꦴꦟꦥꦛꦶꦓꦴꦠꦠꦺꦴ.

꧔꧑꧗. ꦮꦺꦴꦢꦴꦤꦱꦔ꧀ꦑꦴꦠꦁ ꦮꦸꦛ꧀ꦜꦴꦤꦁ ꦄꦥꦸꦧ꧀ꦧꦠꦺꦴ ꦤ ꦲꦺꦴꦠꦷꦠꦶ ꦮꦸꦠ꧀ꦠꦁ ‘‘ꦄꦥꦸꦧ꧀ꦧꦠꦺꦴ ꦕꦶꦠ꧀ꦠꦱꦤ꧀ꦠꦴꦤꦠꦺꦴ ꦮꦸꦛ꧀ꦜꦴꦤꦁ ꦨꦮꦔ꧀ꦒꦩꦺꦮꦴ’’ꦠꦶ. ꦠꦚ꧀ꦲꦶ ꦪꦡꦴꦭꦢ꧀ꦣꦱ꧀ꦱ ꦮꦶꦱꦺꦱꦱ꧀ꦱ ꦮꦺꦴꦢꦴꦥꦤꦁ ꦥꦒꦸꦟꦨꦴꦮꦴꦥꦴꦢꦤꦁ ꦄꦥꦸꦧ꧀ꦧꦁ ꦤꦴꦩ ꦤ ꦲꦺꦴꦠꦶ. ꦠꦡꦴ ꦲꦶ ꦮꦸꦠ꧀ꦠꦁ ‘‘ꦲꦺꦛ꧀ꦜꦶꦩꦁ ꦲꦺꦛ꧀ꦜꦶꦩꦚ꧀ꦲꦶ ꦥꦒꦸꦟꦗ꧀ꦙꦴꦤꦁ ꦈꦥꦫꦶꦩꦱ꧀ꦱ ꦈꦥꦫꦶꦩꦱ꧀ꦱ ꦥꦢꦛ꧀ꦜꦴꦤꦁ ꦲꦺꦴꦠꦶ, ꦠꦱ꧀ꦩꦴ ꦮꦺꦴꦢꦴꦤꦩ꧀ꦥꦶ ꦮꦸꦛ꧀ꦜꦴꦤꦤ꧀ꦠꦶ ꦮꦸꦠ꧀ꦠ’’ꦤ꧀ꦠꦶ. ꦄꦮꦗ꧀ꦗꦺꦠꦧ꧀ꦧꦠ꧀ꦠꦴ ꦮꦠ꧀ꦠꦧ꧀ꦧꦁ ꦤꦠ꧀ꦡꦷꦠꦶ ꦏꦸꦱꦭꦨꦴꦮꦺꦤ ꦱꦩꦴꦤꦠ꧀ꦠꦴ ꦮꦗ꧀ꦗꦺꦠꦧ꧀ꦧꦠꦴꦪ ꦄꦨꦴꦮꦠꦺꦴ ꦮꦶꦨꦗꦶꦠ꧀ꦮꦴ ꦮꦠ꧀ꦠꦧ꧀ꦧꦁ ꦤꦠ꧀ꦡꦶ, ꦠꦱ꧀ꦩꦴ ꦪꦢꦺꦠ꧀ꦡ ꦮꦶꦱꦺꦱꦤꦁ ꦭꦧ꧀ꦨꦠꦶ, ꦠꦁ ꦢꦱ꧀ꦱꦺꦤ꧀ꦠꦺꦴ ‘‘ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦁ…ꦥꦺ… ꦱꦩꦴꦥꦠ꧀ꦠꦶꦪꦴ’’ꦠꦶ ꦄꦴꦲ. ꦕꦶꦠ꧀ꦠꦸꦥ꧀ꦥꦴꦢꦏꦟ꧀ꦝꦺ ꦮꦸꦠ꧀ꦠꦩꦺꦮꦴꦠꦶ ꦥꦛ꧀ꦜꦴꦤꦺ ꦥꦤ ‘‘ꦏꦸꦱꦭꦺ ꦤꦶꦫꦸꦢ꧀ꦣꦺ ꦮꦶꦥꦴꦏꦺꦴ ꦠꦢꦴꦫꦩ꧀ꦩꦟꦠꦴ ꦈꦥ꧀ꦥꦗ꧀ꦗꦠꦷ’’ꦠꦶꦄꦴꦢꦶꦤꦴ ‘‘ꦏꦶꦫꦶꦪꦴꦤꦤ꧀ꦠꦫꦁ ꦠꦢꦴꦫꦩ꧀ꦩꦟꦨꦴꦮꦺ’’ꦠꦶ ꦪꦁ ꦮꦠ꧀ꦠꦧ꧀ꦧꦁ, ꦠꦁ ꦕꦶꦠ꧀ꦠꦸꦥ꧀ꦥꦴꦢꦏꦟ꧀ꦝꦮꦟ꧀ꦟꦤꦴꦪꦁ ꦮꦸꦠ꧀ꦠꦩꦺꦮ.

ꦠꦴ ꦈꦨꦺꦴꦥꦷꦠꦶ ꦪꦴ ‘‘ꦏꦸꦱꦭꦮꦶꦥꦴꦏꦴꦲꦺꦠꦸꦏꦱꦺꦴꦩꦤꦱ꧀ꦱꦱꦲꦒꦠꦴ ꦈꦥꦺꦏ꧀ꦑꦴꦱꦲꦒꦠꦴ ꦕꦴ’’ꦠꦶ ꦢ꧀ꦮꦺ ꦩꦤꦺꦴꦮꦶꦚ꧀ꦚꦴꦟꦣꦴꦠꦸꦪꦺꦴ ꦮꦸꦠ꧀ꦠꦴ, ꦠꦴ ꦈꦨꦺꦴꦥꦶ ꦱꦺꦴꦩꦤꦱ꧀ꦱꦱꦲꦒꦠꦩꦤꦺꦴꦮꦶꦚ꧀ꦚꦴꦟꦣꦴꦠꦸꦮꦱꦺꦤ ꦮꦸꦠ꧀ꦠꦴ. ꦏꦱ꧀ꦩꦴ? ꦢꦱꦤ꧀ꦤꦁ ꦏꦴꦩꦴꦮꦕꦫꦨꦮꦔ꧀ꦒꦴꦤꦁ ꦄꦠ꧀ꦠꦤꦺꦴ ꦠꦢꦴꦫꦩ꧀ꦩꦟꦏꦴꦭꦺ ꦱꦤ꧀ꦠꦷꦫꦟꦏꦴꦭꦺ ꦕ ꦮꦺꦴꦛ꧀ꦜꦧ꧀ꦧꦤꦱ꧀ꦱ ꦄꦤꦤ꧀ꦠꦫꦥꦕ꧀ꦕꦪꦨꦴꦮꦠꦺꦴ. ꦈꦥꦺꦏ꧀ꦑꦴꦱꦲꦒꦠꦴ ꦥꦤ ꦪꦡꦴꦮꦸꦠ꧀ꦠꦴꦤꦁ ꦢꦱꦤ꧀ꦤꦁ ꦮꦶꦥꦴꦏꦴꦤꦁ ꦩꦤꦺꦴꦮꦶꦚ꧀ꦚꦴꦟꦣꦴꦠꦹꦤꦁ ꦄꦠ꧀ꦠꦤꦺꦴ ꦠꦢꦴꦫꦩ꧀ꦩꦟꦴꦢꦶꦏꦴꦭꦺ ꦮꦺꦴꦛ꧀ꦜꦧ꧀ꦧꦤꦏꦶꦫꦶꦪꦱ꧀ꦱ ꦱꦤ꧀ꦠꦷꦫꦟꦏꦴꦭꦺ ꦩꦤꦺꦴꦣꦴꦠꦸꦏꦶꦫꦶꦪꦱ꧀ꦱ ꦨꦮꦔ꧀ꦒꦏꦴꦭꦺꦠꦶ ꦪꦺꦴꦗꦺꦠꦧ꧀ꦧꦁ.

꧔꧒꧓. ꦥꦛꦶꦮꦶꦗ꧀ꦙꦶꦠ꧀ꦮꦴꦠꦶ ꦗꦴꦤꦶꦠ꧀ꦮꦴ. ꦢꦭ꦳꧀ꦲꦁ ꦤ ꦒꦲꦺꦠꦧ꧀ꦧꦤ꧀ꦠꦶ ꦢꦭ꦳꧀ꦲꦒ꧀ꦒꦴꦲꦁ ꦤ ꦒꦲꦺꦠꦧ꧀ꦧꦁ. ꦧꦭꦮꦠꦺꦴ…ꦥꦺ… ꦮꦶꦥꦕ꧀ꦕꦤꦠꦺꦴꦠꦶ ꦌꦠꦺꦤ ꦧꦭꦮꦠꦴ ꦢꦸꦧ꧀ꦧꦭꦠꦴ ꦕ ꦄꦥ꧀ꦥꦩꦴꦟꦁ, ꦏꦠꦺꦴꦏꦴꦱꦠꦴ ꦥꦩꦴꦟꦤ꧀ꦠꦶ ꦢꦱ꧀ꦱꦺꦠꦶ. ꦏꦠꦺꦴꦏꦴꦱꦠꦴ ꦕ ꦄꦮꦱꦺꦱꦥꦕ꧀ꦕꦪꦱꦩꦮꦴꦪꦺ ꦮꦶꦥꦴꦏꦴꦨꦶꦩꦸꦑꦠꦴꦠꦶ ꦢꦛ꧀ꦜꦧ꧀ꦧꦁ. ꦪꦁ ꦏꦶꦚ꧀ꦕꦷꦠꦶ ꦕ ꦧꦭꦮꦁ ꦢꦸꦧ꧀ꦧꦭꦁ ꦮꦴꦠꦶ ꦄꦠ꧀ꦡꦺꦴ. ꦮꦶꦥꦴꦏꦗꦤꦏꦩ꧀ꦥꦶ ꦏꦶꦚ꧀ꦕꦶ ꦏꦩ꧀ꦩꦁ ꦈꦥꦤꦶꦱ꧀ꦱꦪꦥꦕ꧀ꦕꦪꦺꦴ ꦤ ꦲꦺꦴꦠꦷꦠꦶ ꦱꦏ꧀ꦏꦴ ꦮꦠ꧀ꦠꦸꦁ. ꦱꦠꦶ ꦲꦶ ꦏꦩ꧀ꦩꦈꦥꦤꦶꦱ꧀ꦱꦪꦥꦕ꧀ꦕꦪꦴꦤꦁ ꦄꦮꦶꦤꦴꦨꦴꦮꦺ ꦮꦶꦥꦴꦏꦠ꧀ꦠꦶꦏꦺ ꦈꦥꦤꦶꦱ꧀ꦱꦪꦥꦕ꧀ꦕꦪꦺ ꦒꦲꦶꦠꦺ ꦏꦩ꧀ꦩꦥꦕ꧀ꦕꦪꦺꦴ ꦮꦶꦱꦸꦁ ꦤ ꦈꦢ꧀ꦣꦫꦶꦠꦧ꧀ꦧꦺꦴ ꦱꦶꦪꦴ, ꦮꦺꦢꦤꦴꦠ꧀ꦠꦶꦏꦺ ꦕ ꦈꦥꦤꦶꦱ꧀ꦱꦪꦺ ꦥꦕ꧀ꦕꦤꦷꦪꦠꦺꦴ ꦜꦶꦠꦺ ꦏꦩ꧀ꦩꦥꦕ꧀ꦕꦪꦺꦤ ꦱꦢ꧀ꦣꦶꦁ ꦄꦛ꧀ꦜꦴꦠꦶ ꦤ ꦮꦠ꧀ꦠꦧ꧀ꦧꦁ ꦱꦶꦪꦴꦠꦶ ꦄꦣꦶꦥ꧀ꦥꦴꦪꦺꦴ. ꦥꦕ꧀ꦕꦪꦢ꧀ꦮꦪꦱ꧀ꦱ ꦥꦤ ꦭꦧ꧀ꦨꦩꦴꦤꦠꦥ꧀ꦥꦫꦴꦪ ꦢꦺꦱꦤꦴꦪ ꦈꦥꦤꦶꦱ꧀ꦱꦪꦺ ꦒꦲꦶꦠꦺꦥꦶ ꦏꦩ꧀ꦩꦥꦕ꧀ꦕꦪꦺꦴ ꦈꦢ꧀ꦣꦫꦶꦠꦧ꧀ꦧꦺꦴꦪꦺꦮꦴꦠꦶ ꦱꦏ꧀ꦏꦴ ꦮꦠ꧀ꦠꦸꦁ. ꦭꦧ꧀ꦨꦩꦴꦤꦱ꧀ꦱ ꦲꦶ ꦈꦢ꧀ꦣꦫꦟꦁ ꦚꦴꦪꦴꦒꦠꦁ, ꦠꦡꦴ ꦈꦥꦤꦶꦱ꧀ꦱꦪꦺ ꦥꦕ꧀ꦕꦤꦷꦪꦠꦺꦴ ꦜꦶꦠꦺꦥꦶ ꦏꦩ꧀ꦩꦥꦕ꧀ꦕꦪꦺꦴ ꦮꦠ꧀ꦠꦧ꧀ꦧꦺꦴꦮ ꦈꦥꦤꦶꦱ꧀ꦱꦪꦱ꧀ꦱ ꦄꦤꦺꦏꦨꦺꦢꦠ꧀ꦠꦴ, ꦮꦶꦥꦴꦏꦁ ꦗꦤꦺꦤ꧀ꦠꦁ ꦏꦩ꧀ꦩꦁ ꦮꦶꦥꦴꦏꦱ꧀ꦱ ꦈꦥꦤꦶꦱ꧀ꦱꦪꦺꦴ ꦤ ꦲꦺꦴꦠꦷꦠꦶ ꦤ ꦮꦠ꧀ꦠꦧ꧀ꦧꦩꦺꦮꦴꦠꦶ ꦮꦺꦢꦶꦠꦧ꧀ꦧꦁ.

ꦥꦫꦱ꧀ꦱ ꦥꦮꦠ꧀ꦠꦁ ꦎꦩꦴꦤꦤ꧀ꦠꦶ ꦥꦫꦱꦤ꧀ꦠꦴꦤꦺ ꦄꦠ꧀ꦠꦴꦤꦁ ꦈꦢ꧀ꦢꦶꦱ꧀ꦱ ꦥꦮꦠ꧀ꦠꦁ ꦄꦮꦩꦴꦤꦁ. ꦠꦺꦱꦹꦠꦶ ꦪꦺꦴ ꦄꦤꦺꦤ ꦥꦸꦧ꧀ꦧꦺ ꦲꦠꦺꦴ, ꦠꦱ꧀ꦱ ꦚꦴꦠꦶꦩꦶꦠ꧀ꦠꦺꦱꦸ. ꦩꦴꦠꦸꦓꦴꦠꦤꦠ꧀ꦡꦁ ꦥꦮꦠ꧀ꦠꦶꦠꦠꦴꦪ ꦥꦸꦫꦶꦩꦕꦺꦠꦤꦴꦪ ꦩꦴꦠꦸꦓꦴꦠꦏꦩ꧀ꦩꦺꦤ ꦱꦢꦶꦱꦠꦴ, ꦪꦡꦴ ꦕ ꦄꦴꦟꦠ꧀ꦠꦶꦪꦁ ꦥꦲꦴꦫꦺꦥꦶ ꦌꦱꦺꦮ ꦤꦪꦺꦴ. ꦠꦺꦤ ꦮꦸꦠ꧀ꦠꦁ ‘‘ꦌꦱ ꦤꦪꦺꦴ ꦢ꧀ꦮꦷꦲꦶ ꦥꦏꦴꦫꦺꦲꦷꦠꦶ ꦌꦠ꧀ꦡꦴꦥꦷ’’ꦠꦶ.

ꦮꦛ꧀ꦛꦤꦶꦱ꧀ꦱꦶꦠꦺꦴ ꦢꦴꦤꦴꦢꦶꦮꦱꦺꦤ ꦱꦢ꧀ꦣꦁ ꦈꦥ꧀ꦥꦴꦢꦺꦤ꧀ꦠꦺꦴ ꦫꦴꦒꦁ ꦈꦥꦤꦶꦱ꧀ꦱꦴꦪ ꦢꦴꦤꦴꦢꦶꦮꦱꦺꦤ ꦱꦢ꧀ꦣꦁ ꦈꦥ꧀ꦥꦴꦢꦺꦠꦶ ꦤꦴꦩ, ꦤ ꦮꦶꦮꦛ꧀ꦛꦤꦶꦱ꧀ꦱꦶꦠꦺꦴ ꦄꦮꦶꦱꦺꦱꦺꦤ ꦮꦸꦠ꧀ꦠꦠ꧀ꦠꦴꦠꦶ ꦄꦴꦲ ‘‘ꦆꦩꦶꦤꦴ ꦄꦣꦶꦥ꧀ꦥꦴꦪꦺꦤ ꦮꦢꦠꦷ’’ꦠꦶ. ꦌꦠꦺꦱꦤ꧀ꦠꦶ ꦏꦴꦪꦶꦏꦱꦸꦑꦢꦸꦏ꧀ꦑꦴꦤꦁ. ꦌꦏꦠꦺꦴꦥꦷꦠꦶ ꦆꦢꦁ ꦪꦢꦶꦥꦶ ꦌꦏꦱ꧀ꦩꦶꦁ ꦱꦤ꧀ꦠꦴꦤꦺ ꦱꦸꦑꦢꦸꦏ꧀ꦑꦴꦤꦁ ꦌꦏꦱ꧀ꦩꦶꦁ ꦑꦟꦺ ꦈꦥ꧀ꦥꦠ꧀ꦠꦶ ꦤꦠ꧀ꦡꦶ, ꦥꦕ꧀ꦕꦪꦱꦩꦴꦪꦺꦴꦒꦺꦴ ꦥꦤ ꦠꦺꦱꦁ ꦌꦏꦗ꧀ꦙꦩ꧀ꦥꦶ ꦲꦺꦴꦠꦷꦠꦶ ꦏꦠ꧀ꦮꦴ ꦮꦸꦠ꧀ꦠꦁ.

꧔꧒꧕. ꦥꦸꦫꦶꦩꦮꦴꦫꦺꦱꦸ ꦮꦶꦪꦴꦠꦶ ꦥꦛꦶꦕ꧀ꦕꦮꦴꦫꦴꦢꦷꦱꦸ ꦥꦸꦫꦶꦩꦺꦱꦸ ꦮꦶꦪ. ꦆꦩꦱ꧀ꦩꦶꦤ꧀ꦠꦶ ꦥꦚ꧀ꦲꦴꦮꦴꦫꦺ. ꦥꦕ꧀ꦕꦪꦺꦤ ꦈꦥ꧀ꦥꦠ꧀ꦠꦶ ꦮꦸꦕ꧀ꦕꦠꦷꦠꦶ ꦲꦺꦠꦸꦄꦴꦢꦶꦤꦴ ꦠꦺꦤ ꦠꦺꦤ ꦥꦕ꧀ꦕꦪꦺꦤ ꦠꦁꦠꦁꦥꦕ꧀ꦕꦪꦸꦥ꧀ꦥꦤ꧀ꦤꦱ꧀ꦱ ꦈꦥ꧀ꦥꦠ꧀ꦠꦶ ꦤ ꦮꦸꦕ꧀ꦕꦠꦶ. ꦠꦺꦱꦁ ꦠꦺꦱꦁ ꦣꦩ꧀ꦩꦴꦤꦤ꧀ꦠꦶ ꦲꦺꦠꦸꦄꦴꦢꦷꦤꦁ ꦠꦺꦱꦁ ꦠꦺꦱꦁ ꦥꦕ꧀ꦕꦪꦣꦩ꧀ꦩꦴꦤꦁ. ꦠꦁꦠꦁꦥꦕ꧀ꦕꦪꦨꦴꦮꦺꦴꦠꦶ ꦲꦺꦠꦸꦄꦴꦢꦷꦤꦁ ꦠꦁꦠꦁꦥꦕ꧀ꦕꦪꦨꦴꦮꦺꦴ ꦮꦸꦕ꧀ꦕꦠꦶ. ꦠꦺꦤꦺꦮ ꦥꦸꦫꦶꦩꦺꦱꦸ ꦖꦱꦸ ꦮꦴꦫꦺꦱꦸ ‘‘ꦏꦸꦱꦭꦺꦴ ꦣꦩ꧀ꦩꦺꦴ ꦈꦥ꧀ꦥꦗ꧀ꦗꦠꦷ’’ꦠꦶꦄꦴꦢꦶꦤꦴ ꦠꦠ꧀ꦡ ꦠꦠ꧀ꦡ ꦈꦥ꧀ꦥꦴꦢꦒ꧀ꦒꦲꦟꦁ ꦏꦠꦁ, ꦆꦣ ꦥꦤ ‘‘ꦏꦸꦱꦭꦱ꧀ꦱ ꦣꦩ꧀ꦩꦱ꧀ꦱ ꦲꦺꦠꦸꦥꦕ꧀ꦕꦪꦺꦤ ꦥꦕ꧀ꦕꦪꦺꦴ’’ꦠꦶꦄꦴꦢꦶꦤꦴ ꦥꦕ꧀ꦕꦪꦨꦴꦮꦺꦴ ꦒꦲꦶꦠꦺꦴ. ꦠꦺꦤꦴꦠꦶ ꦈꦥꦠ꧀ꦡꦩ꧀ꦨꦏꦠ꧀ꦠꦺꦤ ꦥꦕ꧀ꦕꦪꦨꦴꦮꦺꦤ. ꦆꦣꦴꦠꦶ ꦥꦚ꧀ꦲꦴꦮꦴꦫꦺ.

꧔꧒꧗. ꦥꦠꦶꦛ꧀ꦜꦴꦨꦹꦠꦱ꧀ꦱꦴꦠꦶ ꦤꦶꦱ꧀ꦱꦪꦨꦹꦠꦱ꧀ꦱ. ꦏꦩ꧀ꦩꦥꦕ꧀ꦕꦪꦺꦴꦠꦶ ꦱꦲꦗꦴꦠꦏꦩ꧀ꦩꦥꦕ꧀ꦕꦪꦺꦴ. ꦢꦸꦏꦩꦹꦭꦏꦢꦸꦏꦴꦮꦱꦴꦤꦴꦠꦶ ‘‘ꦏꦸꦱꦭꦺꦴ ꦕ ꦄꦧ꧀ꦪꦴꦏꦠꦺꦴ ꦕ ꦣꦩ꧀ꦩꦴ ꦏꦸꦱꦭꦱ꧀ꦱ ꦕ ꦄꦧ꧀ꦪꦴꦏꦠꦱ꧀ꦱ ꦕ ꦣꦩ꧀ꦩꦱ꧀ꦱꦴ’’ꦠꦶ ꦌꦮꦁ ꦢꦸꦏꦩꦹꦭꦏꦢꦸꦏꦴꦮꦱꦴꦤꦴ ꦏꦠ꧀ꦮꦴ ꦮꦸꦠ꧀ꦠꦥꦚ꧀ꦲꦴ. ꦠꦠ꧀ꦡꦴꦠꦶ ꦥꦕ꧀ꦕꦪꦮꦴꦫꦺ. ꦏꦸꦱꦭꦺꦴ ꦕ ꦄꦧ꧀ꦪꦴꦏꦠꦺꦴ ꦕ ꦣꦩ꧀ꦩꦴꦠꦶ ꦏꦸꦱꦭꦴꦧ꧀ꦪꦴꦏꦠꦥ꧀ꦥꦨꦺꦢꦴ ꦥꦕ꧀ꦕꦪꦸꦥ꧀ꦥꦤ꧀ꦤꦴ ꦣꦩ꧀ꦩꦴ. ꦪꦠꦺꦴ ꦠꦠꦺꦴ ꦮꦴꦠꦶ ꦥꦕ꧀ꦕꦪꦣꦩ꧀ꦩꦤꦶꦪꦩꦁ ꦄꦏꦠ꧀ꦮꦴ ꦪꦠꦺꦴ ꦠꦠꦺꦴ ꦮꦴ ꦏꦸꦱꦭꦴꦧ꧀ꦪꦴꦏꦠꦮꦱꦺꦤ ꦈꦨꦪꦥꦕ꧀ꦕꦪꦠꦺꦴ ꦈꦥ꧀ꦥꦠ꧀ꦠꦶꦩꦠ꧀ꦠꦩꦺꦮ ꦠꦠ꧀ꦡ ꦥꦕ꧀ꦕꦪꦮꦴꦫꦺ ꦄꦣꦶꦥ꧀ꦥꦺꦠꦁ, ꦈꦨꦪꦱ꧀ꦱ ꦪꦡꦴꦮꦸꦠ꧀ꦠꦱ꧀ꦱ ꦥꦕ꧀ꦕꦪꦸꦥ꧀ꦥꦤ꧀ꦤꦱ꧀ꦱ ꦈꦨꦶꦤ꧀ꦤꦁ ꦪꦡꦴꦮꦸꦠ꧀ꦠꦴꦤꦁꦪꦺꦮ ꦥꦕ꧀ꦕꦪꦣꦩ꧀ꦩꦴꦤꦁ ꦥꦕ꧀ꦕꦪꦨꦴꦮꦺꦴ ꦤ ꦄꦣꦶꦥ꧀ꦥꦺꦠꦺꦴ ꦈꦥ꧀ꦥꦴꦢꦥꦣꦴꦤꦠ꧀ꦠꦴ ꦠꦱ꧀ꦱꦴ ꦢꦺꦱꦤꦴꦪꦴꦠꦶ ꦄꦣꦶꦥ꧀ꦥꦴꦪꦺꦴ. ꦤꦶꦱ꧀ꦱꦪꦴꦢꦶꦨꦹꦠꦴꦠꦶ ꦤꦶꦱ꧀ꦱꦪꦄꦠ꧀ꦡꦶꦄꦮꦶꦒꦠꦨꦹꦠꦴ ꦥꦕ꧀ꦕꦪꦣꦩ꧀ꦩꦴ ꦤ ꦭꦧ꧀ꦨꦤ꧀ꦠꦶ, ꦠꦱ꧀ꦩꦴ ꦏꦸꦱꦭꦺꦴ ꦕ…ꦥꦺ… ꦤ ꦮꦸꦠ꧀ꦠꦤ꧀ꦠꦶ ꦪꦺꦴꦗꦤꦴ.

ꦥꦚ꧀ꦲꦴꦮꦴꦫꦮꦶꦨꦔ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦥꦚ꧀ꦲꦴꦮꦴꦫꦱ꧀ꦱ ꦓꦛꦤꦺ ꦄꦤꦸꦭꦺꦴꦩꦒꦟꦤꦴ

꧔꧓꧙. ꦌꦠ꧀ꦡꦴꦠꦶ ꦄꦧ꧀ꦪꦴꦏꦠꦩꦹꦭꦏꦺ. ꦪꦢꦶ ꦌꦮꦤ꧀ꦠꦶ ꦪꦢꦶ ꦏꦸꦱꦭꦴꦏꦸꦱꦭꦩꦹꦭꦺꦲꦶ ꦄꦭꦧ꧀ꦨꦩꦴꦤꦩ꧀ꦥꦶ ꦭꦧ꧀ꦨꦠꦶ, ꦌꦮꦁ ꦱꦤ꧀ꦠꦺ. ꦒꦟꦤꦩꦠ꧀ꦠꦱꦴꦩꦚ꧀ꦚꦠꦺꦴ, ꦤ ꦥꦕ꧀ꦕꦪꦱꦴꦩꦚ꧀ꦚꦠꦺꦴꦠꦶ ꦄꦣꦶꦥ꧀ꦥꦴꦪꦺꦴ.

꧔꧔꧐. ꦤꦶꦢꦱ꧀ꦱꦤꦮꦱꦺꦤ ꦢꦛ꧀ꦜꦧ꧀ꦧꦺꦴ ꦪꦺꦨꦸꦪ꧀ꦪꦺꦤ ꦆꦤ꧀ꦢ꧀ꦫꦶꦪꦩꦒ꧀ꦒꦥꦕ꧀ꦕꦪꦴꦤꦚ꧀ꦕ ꦲꦺꦠꦸꦥꦕ꧀ꦕꦪꦱ꧀ꦱ ꦮꦶꦱꦨꦴꦒꦠ꧀ꦠꦴ. ꦆꦤ꧀ꦢ꧀ꦫꦶꦪꦩꦒ꧀ꦒꦥꦕ꧀ꦕꦪꦴ ꦕ ꦮꦶꦱꦨꦴꦒꦴꦠꦶ ꦮꦶꦱꦺꦱꦤꦺꦤ ꦪꦺꦴ ꦠꦠ꧀ꦡ ꦱꦨꦴꦒꦨꦴꦮꦺꦴ, ꦠꦁ ꦤꦶꦮꦠ꧀ꦠꦺꦠꦶ. ꦠꦡꦴ ꦨꦴꦮꦴꦨꦴꦮꦠꦺꦴꦠꦶ ꦠꦱ꧀ꦩꦶꦁ ꦲꦺꦠꦸꦥꦕ꧀ꦕꦪꦴꦏꦴꦫꦺ ꦱꦠꦶ ꦨꦴꦮꦠꦺꦴ, ꦲꦺꦠꦸꦣꦩ꧀ꦩꦴꦤꦁ ꦲꦺꦠꦸꦥꦕ꧀ꦕꦪꦨꦴꦮꦺ ꦱꦠꦶ ꦱꦲꦗꦴꦠꦴꦢꦶꦥꦕ꧀ꦕꦪꦨꦴꦮꦠꦺꦴꦠꦶ ꦄꦠ꧀ꦡꦺꦴ. ꦄꦣꦶꦥꦠꦶꦥꦕ꧀ꦕꦪꦴꦢꦷꦤꦤ꧀ꦠꦶ ꦄꦣꦶꦥꦠꦶꦤ꧀ꦢ꧀ꦫꦶꦪꦩꦒ꧀ꦒꦥꦕ꧀ꦕꦪꦴꦤꦁ. ꦮꦶꦱꦨꦴꦒꦠꦴ ꦲꦺꦠꦸꦥꦕ꧀ꦕꦪꦱ꧀ꦱ. ꦏꦸꦱꦭꦴꦢꦶꦲꦺꦠꦹꦤꦤ꧀ꦠꦶ ꦏꦸꦱꦭꦴꦏꦸꦱꦭꦏꦶꦫꦶꦪꦴꦧ꧀ꦪꦴꦏꦠꦲꦺꦠꦹꦤꦁ. ꦲꦺꦠꦸꦥꦕ꧀ꦕꦪꦨꦴꦮꦺꦠꦶ ꦲꦺꦠꦸꦥꦕ꧀ꦕꦪꦠ꧀ꦠꦺ ꦲꦺꦠꦸꦨꦴꦮꦺꦤ ꦈꦥꦏꦴꦫꦏꦠ꧀ꦠꦺ. ꦮꦶꦥꦴꦏꦥꦕ꧀ꦕꦪꦨꦴꦮꦴꦨꦴꦮꦠꦺꦴꦠꦶ ꦮꦶꦥꦴꦏꦥꦕ꧀ꦕꦪꦨꦴꦮꦱ꧀ꦱ ꦄꦨꦴꦮꦠꦺꦴ. ꦤ ꦲꦶ ꦮꦶꦥꦴꦏꦴꦤꦁ ꦮꦶꦥꦴꦏꦥꦕ꧀ꦕꦪꦠꦴ ꦄꦠ꧀ꦡꦶ. ꦮꦶꦥꦴꦏꦲꦺꦠꦹꦤꦁ ꦆꦠꦫꦲꦺꦠꦹꦲꦶ ꦲꦺꦠꦸꦥꦕ꧀ꦕꦪꦠꦴꦪ ꦄꦠ꧀ꦡꦶ ꦱꦨꦴꦒꦠꦴꦠꦶ ꦄꦴꦲ ‘‘ꦲꦺꦠꦸꦮꦗ꧀ꦗꦴꦤ’’ꦤ꧀ꦠꦶ. ꦮꦶꦥꦴꦏꦴꦤꦁ ꦮꦶꦱꦨꦴꦒꦠꦴꦪ ꦨꦮꦶꦠꦧ꧀ꦧꦁ, ꦤ ꦲꦶ ꦮꦶꦥꦴꦏꦣꦩ꧀ꦩꦣꦩ꧀ꦩꦤꦺꦮꦮꦶꦥꦴꦏꦤꦮꦶꦥꦴꦏꦣꦩ꧀ꦩꦣꦩ꧀ꦩꦴꦤꦁ ꦮꦶꦥꦴꦏꦺꦲꦶ ꦱꦨꦴꦒꦠꦴ ꦄꦠ꧀ꦡꦶ ꦫꦴꦱꦤ꧀ꦠꦫꦨꦴꦮꦠꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦈꦨꦪꦥꦕ꧀ꦕꦪꦱꦲꦶꦠꦺꦠꦶ ꦲꦺꦠꦸꦮꦶꦥꦴꦏꦥꦕ꧀ꦕꦪꦱꦲꦶꦠꦺ. ꦲꦺꦠꦸꦥꦕ꧀ꦕꦪꦨꦴꦮꦺ ꦮꦶꦥꦴꦏꦩ꧀ꦲꦷꦠꦶ ꦲꦺꦠꦸꦥꦕ꧀ꦕꦪꦨꦴꦮꦺꦤ ꦮꦠ꧀ꦠꦩꦴꦤꦺ ꦮꦶꦥꦴꦏꦣꦩ꧀ꦩꦺ. ꦮꦶꦥꦴꦏꦥꦕ꧀ꦕꦪꦠ꧀ꦠꦴꦨꦴꦮꦴꦨꦴꦮꦠꦺꦴꦠꦶ ꦮꦶꦥꦴꦏꦥꦕ꧀ꦕꦪꦨꦴꦮꦴꦨꦴꦮꦱ꧀ꦱ ꦄꦨꦴꦮꦠꦺꦴ. ꦤ ꦲꦶ ꦮꦶꦥꦴꦏꦺꦴ ꦮꦶꦥꦴꦏꦱ꧀ꦱ ꦮꦶꦥꦴꦏꦥꦕ꧀ꦕꦪꦺꦴ ꦤ ꦲꦺꦴꦠꦶ, ꦠꦱ꧀ꦩꦴ ꦤꦠ꧀ꦡꦶ ꦲꦺꦠꦸꦮꦶꦥꦴꦏꦥꦕ꧀ꦕꦪꦴꦤꦁ ꦮꦶꦱꦨꦴꦒꦠꦴꦠꦶ ꦄꦣꦶꦥ꧀ꦥꦴꦪꦺꦴ.

ꦆꦢꦴꦤꦶ ꦮꦸꦠ꧀ꦠꦩꦺꦮꦠ꧀ꦡꦁ ꦈꦢꦴꦲꦫꦟꦺꦤ ꦱꦩꦠ꧀ꦡꦺꦤ꧀ꦠꦺꦴ ‘‘ꦪꦡꦴ ꦲꦷ’’ꦠꦶꦄꦴꦢꦶꦩꦴꦲ. ꦲꦺꦠꦸꦱꦲꦗꦴꦠꦥꦕ꧀ꦕꦪꦱꦲꦶꦠꦺꦠꦶ ꦲꦺꦠꦸꦥꦕ꧀ꦕꦪꦱꦲꦗꦴꦠꦥꦕ꧀ꦕꦪꦱꦲꦶꦠꦺ, ꦈꦨꦪꦥꦕ꧀ꦕꦪꦪꦸꦠ꧀ꦠꦺꦠꦶ ꦄꦠ꧀ꦡꦺꦴ. ꦲꦺꦠꦹꦤꦤ꧀ꦠꦶ ꦆꦢꦁ ‘‘ꦱꦲꦗꦴꦠꦥꦕ꧀ꦕꦪꦠ꧀ꦠꦴꦨꦴꦮꦺꦴ’’ꦠꦶ ꦆꦩꦶꦤꦴꦥꦶ ꦱꦩ꧀ꦧꦤ꧀ꦣꦶꦠꦧ꧀ꦧꦁ. ꦲꦺꦠꦹꦤꦚ꧀ꦲꦶ ꦲꦺꦠꦸꦥꦕ꧀ꦕꦪꦱꦲꦶꦠꦺ ꦫꦴꦱꦶꦩ꧀ꦲꦶ ꦲꦺꦠꦸꦥꦕ꧀ꦕꦪꦨꦴꦮꦺꦴ ꦮꦶꦪ ꦱꦲꦗꦴꦠꦥꦕ꧀ꦕꦪꦨꦴꦮꦺꦴꦥꦶ ꦄꦠ꧀ꦡꦷꦠꦶ. ꦠꦠ꧀ꦡ ꦲꦺꦠꦸꦮꦗ꧀ꦗꦴꦤꦁ ꦱꦲꦗꦴꦠꦣꦩ꧀ꦩꦴꦤꦁ ꦲꦺꦠꦸꦣꦩ꧀ꦩꦱ꧀ꦱ ꦕ ꦤ ꦱꦨꦴꦒꦠꦴ ꦮꦸꦕ꧀ꦕꦠꦶ ꦱꦲꦗꦴꦠꦥꦕ꧀ꦕꦪꦺꦤ ꦱꦨꦴꦒꦨꦴꦮꦠꦺꦴ. ꦌꦮꦩꦶꦣꦴꦥꦷꦠꦶ ꦪꦡꦴ ꦲꦺꦠꦸꦱꦲꦗꦴꦠꦥꦕ꧀ꦕꦪꦺꦱꦸ ꦮꦸꦠ꧀ꦠꦥ꧀ꦥꦏꦴꦫꦺꦤ ꦤꦠ꧀ꦡꦶ ꦮꦶꦱꦨꦴꦒꦠꦴ, ꦌꦮꦩꦶꦣꦴꦥꦶ ꦲꦺꦠꦸꦮꦶꦥꦴꦏꦥꦕ꧀ꦕꦪꦺꦱꦸ ꦤꦠ꧀ꦡꦶ ꦮꦶꦱꦨꦴꦒꦠꦴꦠꦶ ꦄꦠ꧀ꦡꦺꦴ. ꦌꦱ ꦤꦪꦺꦴ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦺꦥꦷꦠꦶ ꦪ꧀ꦮꦴꦪꦁ ꦤꦪꦺꦴ ꦲꦺꦠꦸꦱꦲꦗꦴꦠꦥꦕ꧀ꦕꦪꦺꦱꦸ ꦮꦶꦱꦨꦴꦒꦠꦴꦨꦴꦮꦺꦴ ꦮꦸꦠ꧀ꦠꦺꦴ, ꦌꦱ ꦤꦪꦺꦴ ꦲꦺꦠꦸꦱꦲꦶꦠꦺ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦺꦥꦷꦠꦶ ꦄꦠ꧀ꦡꦺꦴ. ꦠꦠ꧀ꦡꦴꦥꦶ ꦲꦶ ‘‘ꦲꦺꦠꦸꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦱꦲꦶꦠꦺ ꦫꦴꦱꦶꦩ꧀ꦲꦷ’’ꦠꦶꦄꦴꦢꦶ ꦱꦏ꧀ꦏꦴ ꦪꦺꦴꦗꦺꦠꦸꦤ꧀ꦠꦶ. ꦥꦕ꧀ꦕꦸꦥ꧀ꦥꦤ꧀ꦤꦺꦴ ꦌꦮ ꦥꦕ꧀ꦕꦪꦸꦥ꧀ꦥꦤ꧀ꦤꦺꦴ, ꦥꦕ꧀ꦕꦪꦺꦴ ꦥꦤ ꦄꦠꦷꦠꦺꦴꦥꦶ ꦄꦤꦴꦒꦠꦺꦴꦥꦶ ꦏꦴꦭꦮꦶꦤꦶꦩꦸꦠ꧀ꦠꦺꦴꦥꦶ ꦲꦺꦴꦠꦷꦠꦶ ꦥꦕ꧀ꦕꦸꦥ꧀ꦥꦤ꧀ꦤꦏ꧀ꦑꦟꦺ ꦲꦺꦠꦸꦥꦕ꧀ꦕꦪꦨꦴꦮꦺ ꦱꦲꦗꦴꦠꦴꦢꦶꦥꦕ꧀ꦕꦪꦨꦴꦮꦁ ꦱꦤ꧀ꦣꦴꦪ ꦠꦡꦴꦨꦴꦮꦴꦨꦴꦮꦮꦱꦺꦤ ꦱꦨꦴꦒꦠꦴꦪ ꦮꦸꦕ꧀ꦕꦩꦴꦤꦴꦪ ꦤꦴꦤꦴꦏ꧀ꦑꦟꦶꦏꦴꦤꦁ ꦏꦸꦱꦭꦴꦢꦷꦤꦁ ꦲꦺꦠꦹꦤꦁ ꦮꦶꦥꦴꦏꦴꦤꦚ꧀ꦕ ꦮꦱꦺꦤ ꦮꦶꦱꦨꦴꦒꦠꦴ ꦠꦱ꧀ꦱꦺꦮ ꦲꦺꦠꦸꦱ꧀ꦱ ꦤ ꦮꦠ꧀ꦠꦧ꧀ꦧꦴꦠꦶ ꦆꦩꦩꦠ꧀ꦡꦁ ꦢꦱ꧀ꦱꦺꦠꦶ ‘‘ꦄꦥꦶꦕꦴ’’ꦠꦶꦄꦴꦢꦶꦤꦴ.

ꦄꦒ꧀ꦒꦲꦶꦠꦮꦶꦱꦺꦱꦠꦺꦴ ꦱꦴꦩꦚ꧀ꦚꦠꦺꦴ ꦮꦶꦱꦺꦱꦺꦴ ꦤ ꦱꦸꦮꦶꦚ꧀ꦚꦺꦪ꧀ꦪꦺꦴ ꦲꦺꦴꦠꦷꦠꦶ ꦄꦣꦶꦥ꧀ꦥꦴꦪꦺꦤꦴꦲ ‘‘ꦏꦸꦱꦭꦴ ꦮꦷꦩꦁꦱꦴꦣꦶꦥꦠꦷꦠꦶ ꦌꦮꦁ ꦮꦠ꧀ꦠꦧ꧀ꦧ’’ꦤ꧀ꦠꦶ.

꧔꧔꧑-꧔꧔꧓. ‘‘ꦆꦠꦫꦴꦤꦶ ꦢ꧀ꦮꦺ ꦭꦨꦠꦷ’’ꦠꦶ ꦌꦮꦁ ꦮꦠ꧀ꦠꦸꦁ ꦤ ꦱꦏ꧀ꦏꦴ, ꦲꦺꦠꦴꦣꦶꦥꦠꦶꦢꦸꦏꦺꦲꦶ ꦢꦱ꧀ꦱꦶꦠꦴꦤꦶ ꦪꦴꦤꦶ ‘‘ꦏꦸꦱꦭꦺꦴ ꦣꦩ꧀ꦩꦺꦴ ꦏꦸꦱꦭꦱ꧀ꦱ ꦣꦩ꧀ꦩꦱ꧀ꦱ, ꦏꦸꦱꦭꦺꦴ ꦣꦩ꧀ꦩꦺꦴ ꦄꦧ꧀ꦪꦴꦏꦠꦱ꧀ꦱ, ꦏꦸꦱꦭꦺꦴ ꦣꦩ꧀ꦩꦺꦴ ꦏꦸꦱꦭꦱ꧀ꦱ ꦕ ꦄꦧ꧀ꦪꦴꦏꦠꦱ꧀ꦱ ꦕ, ꦄꦧ꧀ꦪꦴꦏꦠꦺꦴ ꦣꦩ꧀ꦩꦺꦴ ꦄꦧ꧀ꦪꦴꦏꦠꦱ꧀ꦱꦴ’’ꦠꦶ ꦕꦠ꧀ꦠꦴꦫꦶ ꦮꦶꦱ꧀ꦱꦗ꧀ꦗꦤꦴꦤꦶ, ꦠꦺꦱꦸ ꦲꦺꦠꦸꦱꦲꦗꦴꦠꦤꦶꦱ꧀ꦱꦪꦄꦠ꧀ꦡꦶꦄꦮꦶꦒꦠꦆꦤ꧀ꦢ꧀ꦫꦶꦪꦩꦒ꧀ꦒꦥꦕ꧀ꦕꦪꦺꦱꦸ ꦱꦩ꧀ꦥꦪꦸꦠ꧀ꦠꦥꦕ꧀ꦕꦪꦺ ꦥꦮꦶꦛ꧀ꦜꦺ ‘‘ꦏꦸꦱꦭꦺꦴ ꦣꦩ꧀ꦩꦺꦴ ꦏꦸꦱꦭꦱ꧀ꦱ, ꦄꦧ꧀ꦪꦴꦏꦠꦺꦴ ꦣꦩ꧀ꦩꦺꦴ ꦄꦧ꧀ꦪꦴꦏꦠꦱ꧀ꦱꦴ’’ꦠꦶ ꦆꦩꦴꦤꦶ ꦢ꧀ꦮꦺ ꦭꦨꦠꦶ. ꦪꦁ ꦱꦤ꧀ꦣꦴꦪ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦁ ‘‘ꦱꦕꦺ ꦠꦺꦲꦶ ꦱꦢ꧀ꦣꦶꦁ…ꦥꦺ… ꦠꦴꦤꦺꦮ ꦢ꧀ꦮꦺ ꦭꦨꦠꦷ’’ꦠꦶ, ꦠꦺꦲꦶ ꦥꦤ ꦆꦠꦫꦴꦤꦶ ꦤꦴꦩ ‘‘ꦏꦸꦱꦭꦺꦴ ꦣꦩ꧀ꦩꦺꦴ ꦄꦧ꧀ꦪꦴꦏꦠꦱ꧀ꦱ, ꦏꦸꦱꦭꦺꦴ ꦣꦩ꧀ꦩꦺꦴ ꦏꦸꦱꦭꦱ꧀ꦱ ꦕ ꦄꦧ꧀ꦪꦴꦏꦠꦱ꧀ꦱ ꦕꦴ’’ꦠꦶ ꦆꦩꦴꦤꦶ ꦢ꧀ꦮꦺꦥꦶ ꦱꦶꦪꦸꦁ. ꦤ ꦲꦶ ꦏꦸꦱꦭꦺꦴ ꦣꦩ꧀ꦩꦺꦴ ꦏꦸꦱꦭꦱ꧀ꦱ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦺꦤ ꦥꦕ꧀ꦕꦪꦺꦴ ꦲꦺꦴꦠꦶ. ꦠꦺꦤ ꦮꦸꦠ꧀ꦠꦁ ‘‘ꦆꦠꦫꦴꦤꦶ ꦢ꧀ꦮꦺ ꦭꦨꦠꦷꦠꦶ ꦥꦸꦫꦶꦩꦥꦴꦜꦺꦴ’’ꦠꦶꦄꦴꦢꦶ. ꦆꦠꦫꦴꦤꦶ ꦢ꧀ꦮꦺꦠꦶ ꦮꦴ ꦄꦚ꧀ꦚꦴꦤꦶ ꦢ꧀ꦮꦺ, ꦪꦴꦤꦶ ꦱꦩ꧀ꦥꦪꦸꦠ꧀ꦠꦥꦕ꧀ꦕꦪꦮꦱꦺꦤ ꦢ꧀ꦮꦺ ꦮꦶꦱ꧀ꦱꦗ꧀ꦗꦤꦴꦤꦶ, ꦮꦶꦥ꧀ꦥꦪꦸꦠ꧀ꦠꦥꦮꦺꦱꦺ ꦥꦤ ꦠꦠꦺꦴ ꦄꦚ꧀ꦚꦴꦤꦶ ꦄꦚ꧀ꦚꦡꦴꦨꦹꦠꦴꦤꦶ ꦢ꧀ꦮꦺ ꦮꦶꦱ꧀ꦱꦗ꧀ꦗꦤꦴꦤꦶ. ꦪꦴꦤꦶ ꦱꦤ꧀ꦣꦴꦪ ꦮꦸꦠ꧀ꦠꦁ ‘‘ꦏꦸꦱꦭꦺꦴ ꦄꦧ꧀ꦪꦴꦏꦠꦱ꧀ꦱ, ꦄꦧ꧀ꦪꦴꦏꦠꦺꦴ ꦄꦧ꧀ꦪꦴꦏꦠꦱ꧀ꦱꦴꦠꦶ ꦢ꧀ꦮꦺ ꦭꦨꦠꦷꦠꦶ ꦥꦜꦤ꧀ꦠꦷ’’ꦠꦶ. ꦠꦺꦱꦹꦠꦶ ꦈꦴꦤꦠꦫꦒꦟꦤꦴꦲꦺꦠꦹꦱꦸ ꦮꦶꦥꦴꦏꦄꦚ꧀ꦚꦩꦚ꧀ꦚꦴꦢꦷꦱꦸ.

ꦄꦤꦴꦩꦛ꧀ꦜꦮꦶꦥꦴꦏꦴꦤꦷꦠꦶ ꦄꦒ꧀ꦒꦲꦶꦠꦮꦶꦥꦴꦏꦥꦕ꧀ꦕꦪꦴꦤꦶ, ꦓꦛꦤꦁ ꦄꦥꦺꦏ꧀ꦑꦶꦠ꧀ꦮꦴ ꦄꦪꦁ ꦤꦥꦸꦁꦱꦏꦤꦶꦢ꧀ꦢꦺꦱꦺꦴ. ꦤ ꦮꦶꦥꦴꦏꦲꦺꦠꦸꦫꦲꦶꦠꦴꦤꦶ ꦱꦴꦣꦴꦫꦟꦮꦱꦺꦤ ꦮꦸꦠ꧀ꦠꦠ꧀ꦠꦴ. ꦠꦺꦤ ꦮꦸꦠ꧀ꦠꦁ ꦄꦛ꧀ꦜꦏꦡꦴꦪꦁ ‘‘ꦱꦴꦩꦚ꧀ꦚꦠꦺꦴ ꦤꦮꦤ꧀ꦤꦩ꧀ꦥꦶ ꦲꦺꦠꦹꦤꦁ ꦮꦱꦺꦤ ꦮꦸꦠ꧀ꦠꦴꦤꦷ’’ꦠꦶ, ‘‘ꦮꦶꦥꦴꦏꦲꦺꦠꦸꦥꦶ ꦭꦧ꧀ꦨꦠꦷ’’ꦠꦶ ꦕ.

ꦠꦠ꧀ꦡꦴꦠꦶ ꦥꦚ꧀ꦕꦩꦓꦛꦤꦠꦺꦴ ꦥꦛ꧀ꦜꦴꦪ ꦥꦚ꧀ꦕꦱꦸ ꦓꦛꦤꦺꦱꦸ. ꦠꦺꦤ ꦮꦶꦥꦴꦏꦺꦤ ꦱꦲ, ꦱꦩꦁ ꦮꦴ ꦈꦛ꧀ꦜꦴꦤꦁ ꦌꦠꦱ꧀ꦱꦴꦠꦶ ꦱꦩꦸꦛ꧀ꦜꦴꦤꦤ꧀ꦠꦶ ꦄꦪꦩ꧀ꦥꦶ ꦄꦠ꧀ꦡꦺꦴ ꦱꦩ꧀ꦨꦮꦠꦷꦠꦶ ꦮꦸꦠ꧀ꦠꦁ ‘‘ꦥꦛꦶꦱꦤ꧀ꦣꦶꦪꦁ ꦏꦛꦠ꧀ꦠꦴꦫꦹꦥꦩ꧀ꦥꦶ ꦠꦁꦱꦩꦸꦛ꧀ꦜꦴꦤꦒ꧀ꦒꦲꦟꦺꦤꦺꦮ ꦱꦔ꧀ꦒꦟ꧀ꦲꦴꦠꦷ’’ꦠꦶ. ꦌꦱꦺꦮ ꦤꦪꦺꦴꦠꦶ ꦆꦩꦶꦤꦴ ꦏꦛꦠ꧀ꦠꦴꦫꦹꦥꦩ꧀ꦥꦶ ꦠꦁꦱꦩꦸꦛ꧀ꦜꦴꦤꦒ꧀ꦒꦲꦟꦺꦤꦺꦮ ꦱꦔ꧀ꦒꦟ꧀ꦲꦴꦠꦷꦠꦶ ꦆꦩꦩꦺꦮꦠ꧀ꦡꦁ ꦄꦠꦶꦢꦶꦱꦠꦶ.

ꦌꦮꦩ꧀ꦥꦷꦠꦶ ‘‘ꦌꦠꦺꦱꦸ ꦥꦤꦴ’’ꦠꦶꦄꦴꦢꦶꦤꦴ ꦱꦔ꧀ꦑꦺꦥꦠꦺꦴ ꦮꦸꦠ꧀ꦠꦥ꧀ꦥꦏꦴꦫꦺꦥꦷꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦌꦠꦺꦱꦸ ꦥꦤ…ꦥꦺ… ꦮꦸꦠ꧀ꦠꦤꦪꦺꦤꦥꦷ’’ꦠꦶ. ꦪꦺꦴ ꦪꦺꦴ ꦥꦕ꧀ꦕꦪꦺꦴꦠꦶ ꦪꦺꦴ ꦪꦺꦴ ꦲꦺꦠꦸꦄꦴꦢꦶꦥꦕ꧀ꦕꦪꦺꦴ ꦩꦹꦭꦨꦴꦮꦺꦤ ꦜꦶꦠꦺꦴ ꦥꦫꦺꦱꦁ ꦥꦕ꧀ꦕꦪꦴꦤꦁ. ꦠꦥ꧀ꦥꦕ꧀ꦕꦪꦣꦩ꧀ꦩꦴꦤꦤ꧀ꦠꦶ ꦠꦺꦲꦶ ꦲꦺꦠꦸꦄꦴꦢꦶꦥꦕ꧀ꦕꦪꦺꦲꦶ ꦥꦕ꧀ꦕꦪꦨꦹꦠꦴꦤꦁ ꦲꦺꦠꦸꦄꦴꦢꦶꦣꦩ꧀ꦩꦴꦤꦁ. ꦤꦶꦫꦮꦱꦺꦱꦈꦴꦤꦈꦴꦤꦠꦫꦈꦴꦤꦠꦩꦭꦴꦨꦏ꧀ꦏꦩꦺꦤꦴꦠꦶ ꦠꦺ ꦣꦩ꧀ꦩꦴ ꦪꦺꦱꦸ ꦮꦶꦱ꧀ꦱꦗ꧀ꦗꦤꦺꦱꦸ ꦪꦡꦴꦫꦲꦁ ꦤꦶꦫꦮꦱꦺꦱꦴ ꦭꦧ꧀ꦨꦤ꧀ꦠꦶ, ꦪꦺꦱꦸ ꦈꦴꦤꦴ ꦈꦴꦤꦠꦫꦴ ꦈꦴꦤꦠꦩꦴ ꦕ ꦭꦧ꧀ꦨꦤ꧀ꦠꦶ, ꦠꦺꦤ ꦏꦩꦺꦤ ꦓꦛꦤꦴꦮꦕꦤꦠꦺꦴ ꦥꦕ꧀ꦕꦪꦸꦥ꧀ꦥꦤ꧀ꦤꦴꦥꦶ ꦪꦡꦴꦏ꧀ꦏꦩꦁ ꦤꦶꦫꦮꦱꦺꦱꦴꦢꦶꦏ꧀ꦏꦩꦺꦤꦺꦮ ꦭꦧ꧀ꦨꦤ꧀ꦠꦶ. ꦠꦺꦤꦴꦲ ‘‘ꦤꦶꦫꦮꦱꦺꦱꦭꦴꦨꦺ ꦕ…ꦥꦺ… ꦮꦺꦢꦶꦠꦧ꧀ꦧꦺꦴ’’ꦠꦶ.

ꦲꦺꦠꦸꦩꦹꦭꦏꦁ ꦤꦶꦛ꧀ꦜꦶꦠꦁ.

꧔꧔꧕. ꦥꦚ꧀ꦕꦩꦺ ꦌꦏꦤ꧀ꦠꦶ ꦱꦤꦶꦱ꧀ꦱꦪꦠꦺꦴ ꦄꦧ꧀ꦪꦴꦏꦠꦩꦹꦭꦁ ꦄꦏꦸꦱꦭꦤ꧀ꦠꦶ ꦆꦢꦁ ꦱꦤ꧀ꦣꦴꦪꦴꦲ ‘‘ꦮꦠ꧀ꦡꦸꦮꦱꦺꦤ ꦱꦤꦶꦱ꧀ꦱꦪꦁ ꦮꦏ꧀ꦑꦠꦷ’’ꦠꦶ. ꦤ ꦆꦢꦤ꧀ꦠꦶ ꦆꦢꦁ ꦕꦠꦸꦠ꧀ꦡꦁ ꦓꦛꦤꦁ ꦭꦧ꧀ꦨꦩꦴꦤꦱ꧀ꦱꦥꦶ ꦮꦠ꧀ꦡꦸꦱ꧀ꦱ ꦮꦱꦺꦤ ꦓꦛꦤꦁ ꦤ ꦲꦺꦴꦠꦶ ꦠꦱ꧀ꦱ ꦮꦏ꧀ꦑꦩꦴꦤꦠ꧀ꦠꦴ, ꦠꦱ꧀ꦩꦴ ‘‘ꦄꦴꦫꦩ꧀ꦩꦟꦮꦱꦺꦤꦺꦮꦴ’’ꦠꦶ ꦌꦏꦁꦱꦺꦴ ꦒꦲꦶꦠꦺꦴꦠꦶ ꦄꦠ꧀ꦡꦪꦺꦴꦗꦤꦴ.

꧔꧔꧖. ꦱꦲꦗꦴꦠꦥꦸꦫꦺꦗꦴꦠꦴ ꦌꦏꦺꦴ ꦤꦶꦱ꧀ꦱꦪꦥꦕ꧀ꦕꦪꦺꦴꦠꦶ ꦆꦩꦶꦤꦴ ꦱꦠꦶꦥꦶ ꦥꦕ꧀ꦕꦪꦣꦩ꧀ꦩꦨꦺꦢꦺ ꦥꦕ꧀ꦕꦪꦨꦴꦮꦨꦺꦢꦺꦴ ꦤꦠ꧀ꦡꦷꦠꦶ ꦢꦱ꧀ꦱꦺꦠꦶ, ꦠꦡꦴ ‘‘ꦄꦠ꧀ꦡꦶꦥꦕ꧀ꦕꦪꦺꦴ’’ꦠꦶ ꦆꦩꦶꦤꦴꦥꦶ. ꦄꦮꦶꦒꦠꦥꦕ꧀ꦕꦪꦺꦴꦥꦺꦠ꧀ꦡ ꦄꦠ꧀ꦡꦶꦥꦕ꧀ꦕꦪꦺꦤꦺꦮ ꦱꦔ꧀ꦒꦲꦶꦠꦺꦴꦠꦶ ꦢꦛ꧀ꦜꦧ꧀ꦧꦺꦴ. ‘‘ꦄꦠ꧀ꦡꦶꦄꦮꦶꦒꦠꦥꦕ꧀ꦕꦪꦺꦴ’’ꦠꦶ ꦥꦴꦜꦺꦴ. ꦱꦲꦗꦴꦠꦴꦫꦩ꧀ꦩꦟꦴꦣꦶꦥꦠꦶ ꦥꦤ ꦤ ꦏꦺꦮꦭꦁ ꦥꦕ꧀ꦕꦪꦣꦩ꧀ꦩꦥ꧀ꦥꦨꦺꦢꦺꦴꦮ, ꦄꦡ ꦑꦺꦴ ꦥꦕ꧀ꦕꦪꦨꦴꦮꦨꦺꦢꦺꦴꦥꦶ ꦄꦠ꧀ꦡꦺꦮꦴꦠꦶ ꦄꦴꦲ ‘‘ꦌꦮꦁ…ꦥꦺ… ꦄꦨꦴꦮꦠꦺꦴ’’ꦠꦶ. ꦮꦸꦠ꧀ꦠꦩꦺꦮꦠ꧀ꦡꦁ ꦥꦴꦏꦛꦠꦫꦁ ꦏꦴꦠꦸꦁ ‘‘ꦤꦶꦱ꧀ꦱꦪꦨꦴꦮꦺꦴ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦱꦲꦗꦴꦠꦥꦸꦫꦺꦗꦴꦠꦤꦶꦱ꧀ꦱꦪꦴꦢꦷꦤꦤ꧀ꦠꦶ ꦱꦲꦗꦴꦠꦤꦶꦱ꧀ꦱꦪꦥꦸꦫꦺꦗꦴꦠꦤꦶꦱ꧀ꦱꦪꦴꦢꦷꦤꦁ. ꦄꦴꦢꦶ-ꦱꦢ꧀ꦢꦺꦤ ꦱꦲꦗꦴꦠꦥꦸꦫꦺꦗꦴꦠꦄꦠ꧀ꦡꦶꦄꦮꦶꦒꦠꦨꦴꦮꦺ ꦱꦔ꧀ꦒꦟ꧀ꦲꦴꦠꦶ. ꦤ ꦥꦤꦺꦮꦤ꧀ꦠꦶꦄꦴꦢꦶꦤꦴ ꦮꦸꦠ꧀ꦠꦩꦺꦮꦠ꧀ꦡꦁ ꦮꦶꦮꦫꦤ꧀ꦠꦺꦴ ‘‘ꦱꦲꦗꦴꦠꦺꦴ ꦲꦷ’’ꦠꦶꦄꦴꦢꦶꦩꦴꦲ. ꦨꦶꦤ꧀ꦤꦱꦨꦴꦮꦴꦠꦶ ꦱꦩꦴꦤꦺꦥꦶ ꦄꦣꦶꦥꦠꦶꦱꦢ꧀ꦢꦮꦕꦤꦷꦪꦨꦴꦮꦺ ꦥꦕ꧀ꦕꦪꦨꦴꦮꦮꦶꦱꦶꦛ꧀ꦜꦺꦤ ꦱꦨꦴꦮꦺꦤ ꦨꦶꦤ꧀ꦤꦱꦨꦴꦮꦴ, ꦤ ꦲꦺꦠꦸꦥꦕ꧀ꦕꦪꦴꦢꦪꦺꦴ ꦮꦶꦪ ꦱꦨꦴꦮꦩꦠ꧀ꦠꦺꦤ. ꦠꦺꦤꦺꦮꦴꦠꦶ ꦨꦶꦤ꧀ꦤꦱꦨꦴꦮꦠ꧀ꦠꦴ ꦌꦮ. ꦄꦚ꧀ꦚꦡꦴ ‘‘ꦏꦸꦱꦭꦺꦴ ꦏꦸꦱꦭꦱ꧀ꦱ ꦱꦲꦗꦴꦠꦮꦱꦺꦤ, ꦄꦧ꧀ꦪꦴꦏꦠꦺꦴ ꦄꦴꦫꦩ꧀ꦩꦟꦮꦱꦺꦤ ꦄꦣꦶꦥꦠꦶꦥꦕ꧀ꦕꦪꦺꦤ ꦥꦕ꧀ꦕꦪꦺꦴ ꦲꦺꦴꦠꦷ’’ꦠꦶ ꦠꦢꦸꦨꦪꦁ ꦌꦏꦗ꧀ꦙꦁ ꦏꦠ꧀ꦮꦴ ꦮꦠ꧀ꦠꦧ꧀ꦧꦁ ꦱꦶꦪꦴ, ꦤ ꦕ ꦮꦸꦠ꧀ꦠꦤ꧀ꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦥꦚ꧀ꦲꦴꦮꦴꦫꦮꦶꦨꦔ꧀ꦒꦺ…ꦥꦺ… ꦤ ꦮꦸꦠ꧀ꦠ’’ꦤ꧀ꦠꦶ.

꧔꧔꧗-꧔꧕꧒. ꦱꦴꦣꦴꦫꦟꦮꦱꦺꦤꦴꦠꦶ ꦄꦣꦶꦥꦠꦶꦤ꧀ꦢ꧀ꦫꦶꦪꦨꦴꦮꦱꦴꦩꦚ꧀ꦚꦺꦤ. ꦠꦡꦴ ꦕꦺꦮ ꦖ ꦓꦛꦤꦴꦤꦶ ꦪꦺꦴꦗꦺꦠ꧀ꦮꦴ ꦢꦱ꧀ꦱꦺꦠꦶ ‘‘ꦄꦣꦶꦥꦠꦷ’’ꦠꦶꦄꦴꦢꦶꦤꦴ. ꦢ꧀ꦮꦺ ꦥꦕ꧀ꦕꦪꦣꦩ꧀ꦩꦴꦠꦶ ꦮꦷꦫꦶꦪꦮꦷꦩꦁꦱꦴꦤꦁ ꦮꦱꦺꦤ ꦢ꧀ꦮꦺ ꦥꦕ꧀ꦕꦪꦣꦩ꧀ꦩꦴ, ꦌꦏꦺꦴꦪꦺꦮ ꦕꦶꦠ꧀ꦠꦴꦣꦶꦥꦠꦶꦮꦱꦺꦤ. ꦱꦩꦒ꧀ꦒꦏꦴꦤꦶ ꦥꦸꦧ꧀ꦧꦺ ꦮꦠ꧀ꦠꦧ꧀ꦧꦴꦤꦶ ꦱꦶꦪꦸꦁ ꦄꦣꦶꦥꦠꦶꦥꦛꦶꦥꦴꦛꦶꦪꦴꦠꦶ ꦄꦣꦶꦥ꧀ꦥꦴꦪꦺꦴ. ꦥꦜꦩꦚ꧀ꦲꦶ ꦮꦷꦫꦶꦪꦴꦣꦶꦥꦠꦶ ꦥꦕ꧀ꦖꦴ ꦕꦶꦠ꧀ꦠꦴꦣꦶꦥꦠꦷꦠꦶ. ꦠꦺꦱꦁ ꦄꦴꦲꦴꦫꦩꦒ꧀ꦒꦥꦕ꧀ꦕꦪꦴꦤꦁ ꦥꦕ꧀ꦖꦴ ꦮꦸꦠ꧀ꦠꦴꦤꦶ ꦱꦩꦒ꧀ꦒꦏꦴꦤꦶ. ꦱꦢꦶꦱꦠ꧀ꦠꦴꦠꦶ ꦆꦢꦁ ꦥꦫꦠꦺꦴ ‘‘ꦲꦺꦠꦸꦮꦱꦺꦤ ꦮꦸꦠ꧀ꦠꦓꦛꦤꦺꦲꦶ ꦱꦢꦶꦱꦠ꧀ꦠꦴ’’ꦠꦶꦄꦴꦢꦶꦮꦕꦤꦁ ꦱꦤ꧀ꦣꦴꦪ ꦮꦸꦠ꧀ꦠꦁ.

꧔꧕꧗-꧔꧖꧐. ꦢꦸꦩꦹꦭꦏꦤ꧀ꦠꦶ ꦏꦸꦱꦭꦴꦧ꧀ꦪꦴꦏꦠꦩꦹꦭꦏꦁ. ꦠꦁ ꦏꦸꦱꦭꦩꦹꦭꦏꦺꦱꦸ ꦏꦱ꧀ꦩꦴ ꦮꦸꦠ꧀ꦠꦤ꧀ꦠꦶ ꦕꦺꦴꦢꦤꦴꦪꦁ ꦄꦴꦲ ‘‘ꦄꦧ꧀ꦪꦴꦏꦠꦱꦲꦶꦠꦱ꧀ꦱ ꦏꦸꦱꦭꦱ꧀ꦱ ꦥꦕ꧀ꦕꦪꦨꦴꦮꦢꦱ꧀ꦱꦤꦮꦱꦺꦤꦴ’’ꦠꦶ. ꦌꦠ꧀ꦡꦴꦠꦶ ꦄꦤꦸꦭꦺꦴꦩꦒꦟꦤꦺ. ꦪꦡꦴꦮꦸꦠ꧀ꦠꦺꦱꦹꦠꦶ ‘‘ꦱꦲꦗꦴꦠꦄꦚ꧀ꦚꦩꦚ꧀ꦚꦤꦶꦱ꧀ꦱꦪꦮꦶꦥꦴꦏꦱꦩ꧀ꦥꦪꦸꦠ꧀ꦠꦮꦶꦥ꧀ꦥꦪꦸꦠ꧀ꦠꦄꦠ꧀ꦡꦶꦄꦮꦶꦒꦠꦩꦹꦭꦏꦺꦱꦹ’’ꦠꦶ ꦌꦮꦁ ꦮꦸꦠ꧀ꦠꦺꦱꦸ ꦱꦲꦗꦴꦠꦴꦢꦶꦩꦹꦭꦏꦺꦱꦸ. ꦄꦠ꧀ꦡꦶꦄꦮꦶꦒꦠꦩꦹꦭꦏꦮꦗ꧀ꦗꦺꦱꦹꦠꦶ ꦄꦠ꧀ꦡꦶꦄꦮꦶꦒꦠꦩꦹꦭꦏꦴꦤꦶ ꦜꦥꦺꦠ꧀ꦮꦴ ꦄꦮꦱꦺꦱꦺꦱꦸ ꦄꦴꦲꦴꦫꦺꦤ ꦄꦴꦲꦴꦫꦥꦕ꧀ꦕꦪꦺꦤ ꦓꦛꦤꦴꦤꦶ ꦤ ꦪꦺꦴꦗꦶꦠꦴꦤꦷꦠꦶ ꦱꦩ꧀ꦧꦤ꧀ꦣꦺꦴ. ꦄꦣꦶꦥꦠꦶꦤ꧀ꦢ꧀ꦫꦶꦪꦺꦲꦶ ꦕ ꦤꦶꦱ꧀ꦱꦪꦴꦢꦶꦮꦗ꧀ꦗꦺꦱꦸ ꦱꦲꦗꦴꦠꦴꦢꦷꦱꦸ ꦓꦛꦤꦴꦤꦶ ꦤ ꦪꦺꦴꦗꦶꦠꦴꦤꦷꦠꦶ ꦪꦺꦴꦗꦤꦴ. ꦠꦺꦱꦹꦠꦶ ꦲꦺꦠꦸꦏꦩ꧀ꦩꦙꦴꦤꦩꦒ꧀ꦒꦺꦱꦸ ꦄꦴꦲꦴꦫꦺ ꦄꦣꦶꦥꦠꦶꦤ꧀ꦢ꧀ꦫꦶꦪꦺꦱꦸ ꦕ ꦠꦁꦠꦁꦓꦛꦤꦮꦱꦺꦤ ꦪꦡꦴꦮꦸꦠ꧀ꦠꦺꦱꦸ ꦪꦺꦴꦗꦶꦪꦩꦴꦤꦺꦱꦸ. ꦠꦺꦤꦴꦠꦶ ꦲꦺꦠꦸꦄꦴꦢꦶꦄꦫꦹꦥꦣꦩ꧀ꦩꦴꦤꦁꦪꦺꦮ ꦭꦧ꧀ꦨꦤꦠꦺꦴ. ꦠꦺꦲꦶ ꦓꦛꦤꦴꦤꦷꦠꦶ ꦲꦺꦠꦸꦄꦴꦢꦷꦲꦶ ꦪꦺꦴꦗꦶꦪꦩꦴꦤꦴꦤꦶ ꦓꦛꦤꦴꦤꦶ. ꦫꦹꦥꦩꦶꦱ꧀ꦱꦏꦠ꧀ꦠꦴꦨꦴꦮꦺꦤꦴꦠꦶ ꦆꦢꦁ ꦮꦸꦠ꧀ꦠꦱꦢꦶꦱꦠꦴꦪ ꦏꦴꦫꦟꦮꦕꦤꦁ. ꦏꦱ꧀ꦩꦴ ꦥꦤꦺꦠ꧀ꦡ ꦄꦠ꧀ꦡꦶꦄꦮꦶꦒꦠꦩꦹꦭꦏꦴꦤꦶ ꦤꦶꦱ꧀ꦱꦪꦮꦶꦥ꧀ꦥꦪꦸꦠ꧀ꦠꦄꦠ꧀ꦡꦶꦄꦮꦶꦒꦠꦴꦤꦶ ꦠꦺꦲꦶ ꦮꦗ꧀ꦗꦶꦠꦴꦤꦷꦠꦶ ꦄꦴꦲ ‘‘ꦄꦠ꧀ꦡꦶꦄꦮꦶꦒꦠꦺꦲꦶ ꦥꦤꦴ’’ꦠꦶꦄꦴꦢꦶ. ꦤꦶꦱ꧀ꦱꦪꦴꦢꦷꦲꦶ ꦪꦺꦴꦗꦶꦪꦩꦴꦤꦴꦤꦶ ꦄꦣꦶꦥꦠꦶꦤ꧀ꦢ꧀ꦫꦶꦪꦴꦤꦶ ꦫꦹꦥꦩꦶꦱ꧀ꦱꦏꦴꦤꦶ ꦲꦺꦴꦤ꧀ꦠꦷꦠꦶ ꦤ ꦮꦸꦠ꧀ꦠꦴꦤꦷꦠꦶ ꦱꦩ꧀ꦧꦤ꧀ꦣꦺꦴ. ꦪꦢꦶ ꦌꦮꦁ ꦏꦱ꧀ꦩꦴ ꦄꦠ꧀ꦡꦶꦄꦮꦶꦒꦠꦩꦹꦭꦏꦺꦱꦸ ꦄꦴꦲꦴꦫꦺꦤ, ꦤꦶꦱ꧀ꦱꦪꦴꦢꦶꦩꦹꦭꦏꦺꦱꦸ ꦕ ꦄꦣꦶꦥꦠꦶꦤ꧀ꦢ꧀ꦫꦶꦪꦺꦲꦶ ꦪꦺꦴꦗꦤꦴ ꦏꦠꦴꦠꦶ ꦕꦺꦴꦢꦤꦁ ꦱꦤ꧀ꦣꦴꦪꦴꦲ ‘‘ꦄꦣꦶꦥꦠꦴꦲꦴꦫꦶꦤ꧀ꦢ꧀ꦫꦶꦪꦩꦹꦭꦏꦺꦱꦹ’’ꦠꦶꦄꦴꦢꦶ.

꧔꧗꧓-꧔꧗꧗. ꦌꦢꦶꦱꦺꦱꦸ ꦜꦴꦤꦺꦱꦸ ꦑꦤ꧀ꦣ-ꦱꦢ꧀ꦢꦺꦴ ꦄꦫꦹꦥꦺꦱ꧀ꦮꦺꦮ ꦤꦶꦫꦸꦭ꦳꧀ꦲꦺꦴꦠꦶ ꦏꦠ꧀ꦮꦴ ꦮꦸꦠ꧀ꦠꦁ ‘‘ꦤ ꦥꦮꦠ꧀ꦠꦺ ꦮꦶꦪ ꦑꦤ꧀ꦣꦴꦪꦺꦮ ꦥꦕ꧀ꦕꦪꦸꦥ꧀ꦥꦤ꧀ꦤꦨꦴꦮꦺꦤ ꦒꦲꦺꦠꦧ꧀ꦧꦴ’’ꦠꦶ. ꦏꦛꦠ꧀ꦠꦴꦫꦹꦥꦩ꧀ꦥꦶ ꦥꦤ ꦭꦧ꧀ꦨꦠꦷꦠꦶ ꦆꦩꦶꦤꦴ ‘‘ꦌꦏꦏ꧀ꦑꦟꦶꦏꦏꦩ꧀ꦩꦮꦱꦺꦤ ꦮꦸꦠ꧀ꦠꦴꦤꦷ’’ꦠꦶ ꦮꦕꦤꦁ ꦥꦛꦶꦏ꧀ꦑꦶꦥꦠꦶ. ꦪꦩꦠ꧀ꦡꦁ ꦱꦤ꧀ꦣꦴꦪ ‘‘ꦏꦱ꧀ꦩꦴ ꦤ ꦮꦸꦠ꧀ꦠ’’ꦤ꧀ꦠꦶ ꦮꦸꦠ꧀ꦠꦁ, ꦠꦁ ꦥꦴꦏꦛꦠꦫꦁ ꦏꦫꦺꦴꦤ꧀ꦠꦺꦴ ‘‘ꦤꦤꦹ’’ꦠꦶꦄꦴꦢꦶꦁ ꦮꦠ꧀ꦮꦴ ꦥꦸꦤ ꦠꦁ ꦈꦢꦴꦲꦫꦟꦺꦤ ꦮꦶꦨꦴꦮꦺꦠꦸꦁ ‘‘ꦪꦡꦴꦕꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦄꦴꦫꦩ꧀ꦩꦟꦤꦶꦱ꧀ꦱꦪꦥꦕ꧀ꦕꦪꦨꦴꦮꦺꦤꦴꦠꦶ ꦄꦴꦫꦩ꧀ꦩꦟꦥꦕ꧀ꦕꦪꦨꦴꦮꦺꦤ ꦤꦶꦱ꧀ꦱꦪꦥꦕ꧀ꦕꦪꦨꦴꦮꦺꦤ ꦕ. ꦏꦩ꧀ꦩꦱ꧀ꦱ ꦕ ꦥꦕ꧀ꦕꦪꦨꦴꦮꦺꦴ ꦥꦴꦏꦛꦺꦴꦪꦺꦮꦴꦠꦶ ꦄꦴꦲ ‘‘ꦏꦩ꧀ꦩꦩ꧀ꦥꦶ ꦄꦴꦫꦩ꧀ꦩꦟꦥꦕ꧀ꦕꦪꦨꦴꦮꦺꦤ ꦮꦠ꧀ꦠꦧ꧀ꦧ’’ꦤ꧀ꦠꦶ. ꦢ꧀ꦮꦶꦤ꧀ꦤꦁ ꦥꦕ꧀ꦕꦪꦨꦴꦮꦴꦤꦤ꧀ꦠꦶ ꦏꦩ꧀ꦩꦴꦫꦩ꧀ꦩꦟꦥꦕ꧀ꦕꦪꦨꦴꦮꦴꦤꦁ. ꦄꦚ꧀ꦚꦩꦚ꧀ꦚꦥꦛꦶꦏ꧀ꦑꦺꦥꦠꦺꦴꦠꦶ ꦆꦩꦶꦤꦴ ꦢ꧀ꦮꦶꦤ꧀ꦤꦁ ꦥꦕ꧀ꦕꦪꦨꦴꦮꦴꦤꦁ ꦨꦶꦤ꧀ꦤꦠ꧀ꦠꦴ ꦥꦮꦠ꧀ꦠꦶꦄꦴꦏꦴꦫꦱ꧀ꦱ ꦌꦏꦏ꧀ꦑꦟꦺ ꦌꦏꦱ꧀ꦩꦶꦁ ꦥꦕ꧀ꦕꦪꦣꦩ꧀ꦩꦺ ꦄꦪꦸꦗ꧀ꦗꦩꦴꦤꦠꦁ ꦢꦱ꧀ꦱꦺꦠꦶ. ꦪꦡꦴꦢꦱ꧀ꦱꦶꦠꦱ꧀ꦱ ꦤꦶꦢꦱ꧀ꦱꦶꦠꦧ꧀ꦧꦺꦤ ꦄꦱꦩꦴꦤꦠꦁ ꦢꦱ꧀ꦱꦺꦤ꧀ꦠꦺꦴ ‘‘ꦥꦕ꧀ꦕꦸꦥ꧀ꦥꦤ꧀ꦤꦚ꧀ꦲꦶ…ꦥꦺ… ꦪꦸꦠ꧀ꦠꦁ ꦮꦠ꧀ꦠꦸ’’ꦤ꧀ꦠꦶ ꦄꦴꦲ. ꦏꦩ꧀ꦩꦁ ꦥꦤꦴꦠꦶꦄꦴꦢꦶꦤꦴ ꦏꦩ꧀ꦩꦴꦫꦩ꧀ꦩꦟꦥꦕ꧀ꦕꦪꦴꦤꦁ ꦥꦮꦠ꧀ꦠꦶꦄꦴꦏꦴꦫꦱ꧀ꦱ ꦨꦶꦤ꧀ꦤꦠ꧀ꦠꦴ ꦌꦏꦗ꧀ꦙꦁ ꦲꦸꦠ꧀ꦮꦴ ꦄꦥ꧀ꦥꦮꦠ꧀ꦠꦶꦩꦺꦮ ꦮꦶꦨꦴꦮꦺꦠꦶ. ꦪꦠꦺꦴ ꦠꦺ ꦄꦚ꧀ꦚꦩꦚ꧀ꦚꦁ ꦥꦛꦶꦏ꧀ꦑꦺꦥꦏꦴ ꦮꦸꦠ꧀ꦠꦴ, ꦏꦱ꧀ꦩꦴ ꦥꦤ ꦠꦁꦪꦺꦮ ꦮꦠ꧀ꦡꦸ ꦄꦴꦫꦩ꧀ꦩꦟꦥꦕ꧀ꦕꦪꦺꦴ ꦲꦺꦴꦠꦶ ꦤꦶꦱ꧀ꦱꦪꦥꦕ꧀ꦕꦪꦺꦴ ꦕ, ꦤ ꦠꦁꦪꦺꦮ ꦏꦩ꧀ꦩꦁ ꦄꦴꦫꦩ꧀ꦩꦟꦥꦕ꧀ꦕꦪꦺꦴ ꦕ ꦏꦩ꧀ꦩꦥꦕ꧀ꦕꦪꦺꦴ ꦕꦴꦠꦶ? ꦤ ꦕꦺꦴꦢꦺꦠꦧ꧀ꦧꦩꦺꦠꦁ, ꦣꦩ꧀ꦩꦱꦨꦴꦮꦺꦴ ꦌꦱꦺꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦌꦱ ꦕ ꦱꦨꦴꦮꦺꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦮꦠ꧀ꦠꦩꦴꦤꦴꦤꦤ꧀ꦠꦶ ꦥꦕ꧀ꦕꦸꦥ꧀ꦥꦤ꧀ꦤꦴꦤꦁ. ꦪꦤ꧀ꦠꦶ ꦆꦢꦁ ‘‘ꦮꦠ꧀ꦠꦧ꧀ꦧꦠꦴ’’ꦠꦶ ꦆꦩꦶꦤꦴ ꦱꦩ꧀ꦧꦤ꧀ꦣꦶꦪꦩꦴꦤꦁ ‘‘ꦪꦴ’’ꦠꦶ ꦆꦠ꧀ꦡꦶꦭꦶꦔ꧀ꦒꦮꦱꦺꦤ ꦮꦶꦥꦫꦶꦟꦴꦩꦺꦠꦧ꧀ꦧꦁ. ꦪꦡꦴꦠꦶꦄꦴꦢꦶꦤꦴ ꦠꦩꦺꦮꦠ꧀ꦡꦁ ꦈꦢꦴꦲꦫꦟꦢꦱ꧀ꦱꦤꦺꦤ ꦮꦶꦨꦴꦮꦺꦠꦶ.

꧔꧗꧘-꧔꧘꧓. ꦪꦁ ꦮꦶꦚ꧀ꦚꦴꦟꦁ ꦄꦣꦶꦥꦠꦶꦥꦕ꧀ꦕꦪꦺꦴ ꦤ ꦲꦺꦴꦠꦶ, ꦠꦁ ꦄꦤꦴꦩꦛ꧀ꦜꦴꦣꦶꦥꦠꦶꦨꦴꦮꦁ ꦢꦛ꧀ꦜꦧ꧀ꦧꦁ. ꦮꦠ꧀ꦡꦸꦱ꧀ꦱ ꦮꦱꦺꦤꦴꦠꦶ ꦲꦴꦥꦺꦠꦧ꧀ꦧꦱ꧀ꦱ ꦮꦠ꧀ꦡꦸꦱ꧀ꦱ ꦮꦱꦺꦤ.

꧔꧘꧔-꧔꧙꧕. ꦄꦫꦹꦥꦶꦤ꧀ꦢ꧀ꦫꦶꦪꦴꦤꦶ ꦫꦹꦥꦴꦤꦁ ꦥꦕ꧀ꦕꦪꦠ꧀ꦠꦺꦤ ꦭꦧ꧀ꦨꦤ꧀ꦠꦷꦠꦶ ꦪꦺꦴꦗꦤꦴ. ꦪꦢꦶꦥꦶ ꦌꦮꦁ ꦮꦸꦠ꧀ꦠꦁ ꦫꦹꦥꦶꦤ꧀ꦢ꧀ꦫꦶꦪꦴꦤꦁ ꦄꦫꦹꦥꦴꦤꦁ ꦥꦕ꧀ꦕꦪꦠ꧀ꦠꦚ꧀ꦕ ꦭꦧ꧀ꦨꦠꦷꦠꦶ ꦄꦴꦲ ‘‘ꦕꦏ꧀ꦑꦴꦢꦷꦤꦶ ꦕ ꦥꦤ ꦕꦏ꧀ꦑꦸꦮꦶꦚ꧀ꦚꦴꦟꦴꦢꦷꦤꦁ ꦭꦧ꧀ꦨꦤ꧀ꦠꦷ’’ꦠꦶ. ꦠꦁꦱꦩꦴꦤꦒꦠꦶꦏꦴꦠꦶ ꦮꦷꦫꦶꦪꦺꦤ ꦱꦩꦴꦤꦒꦠꦶꦏꦴ ꦩꦒ꧀ꦒꦥꦕ꧀ꦕꦪꦠꦴꦪ.

꧕꧑꧑-꧕꧑꧔. ꦮꦶꦥ꧀ꦥꦪꦸꦠ꧀ꦠꦩꦹꦭꦏꦺ ‘‘ꦢꦱꦩꦺ ꦏꦸꦱꦭꦴꦢꦪꦺꦴ ꦕꦶꦠ꧀ꦠꦱꦩꦸꦛ꧀ꦜꦴꦤꦴꦤ’’ꦤ꧀ꦠꦶ ꦆꦢꦁ ꦥꦮꦠ꧀ꦠꦶꦮꦱꦺꦤ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦤ꧀ꦠꦶ ꦄꦴꦲ ‘‘ꦥꦛꦶꦱꦤ꧀ꦣꦶꦪꦁ ꦥꦤ ‘ꦑꦤ꧀ꦣꦴ ꦏꦛꦠ꧀ꦠꦴꦫꦹꦥꦴꦤꦁ ꦮꦠ꧀ꦡꦸ ꦕ ꦑꦤ꧀ꦣꦴꦤ’ꦤ꧀ꦠꦶ ꦆꦢꦩ꧀ꦥꦶ ꦭꦧ꧀ꦨꦠꦷ’’ꦠꦶ. ꦠꦱ꧀ꦱ ꦢꦱ꧀ꦱꦤꦮꦱꦺꦤꦴꦠꦶ ꦠꦱ꧀ꦱ ꦮꦠ꧀ꦡꦸꦱ꧀ꦱ ꦢꦱ꧀ꦱꦤꦮꦱꦺꦤ, ꦤ ꦄꦤꦮꦱꦺꦱꦠꦺꦴ ꦥꦕ꧀ꦕꦪꦣꦩ꧀ꦩꦱ꧀ꦱ ꦢꦱ꧀ꦱꦤꦮꦱꦺꦤ. ꦠꦺꦤꦴꦲ ‘‘ꦑꦤ꧀ꦣꦴ ꦕ ꦮꦠ꧀ꦡꦸꦱ꧀ꦱꦴꦠꦶ ꦆꦢꦩ꧀ꦥꦶ ꦥꦤ ꦭꦧ꧀ꦨꦠꦺꦮꦴ’’ꦠꦶ. ꦤ ꦮꦗ꧀ꦗꦺꦠꦧ꧀ꦧꦴꦤꦷꦠꦶ ꦠꦺꦱꦩ꧀ꦥꦶ ꦥꦕ꧀ꦕꦪꦸꦥ꧀ꦥꦤ꧀ꦤꦨꦴꦮꦺꦤ ꦪꦺꦴꦗꦺꦠꦧ꧀ꦧꦠ꧀ꦠꦴ.

꧕꧑꧕-꧕꧑꧘. ꦄꦫꦹꦥꦮꦠ꧀ꦡꦴꦫꦩ꧀ꦩꦟꦩꦲꦴꦨꦹꦠꦆꦤ꧀ꦢ꧀ꦫꦶꦪꦴꦲꦴꦫꦴꦤꦁ ꦥꦕ꧀ꦕꦪꦣꦩ꧀ꦩꦴꦤꦤ꧀ꦠꦶ ꦄꦠ꧀ꦡꦺꦴ. ‘‘ꦄꦴꦲꦴꦫꦶꦤ꧀ꦢ꧀ꦫꦶꦪꦥꦕ꧀ꦕꦪꦴ ꦕꦴ’’ꦠꦶꦥꦶ ꦥꦤ ꦮꦠ꧀ꦠꦧ꧀ꦧꦁ. ꦏꦱ꧀ꦩꦴ? ꦤ ꦲꦶ ꦆꦤ꧀ꦢ꧀ꦫꦶꦪꦴꦲꦴꦫꦴꦤꦁ ꦮꦱꦺꦤ ꦱꦲꦗꦴꦠꦴꦢꦪꦺꦴ ꦭꦧ꧀ꦨꦤ꧀ꦠꦶ, ꦆꦤ꧀ꦢ꧀ꦫꦶꦪꦴꦲꦴꦫꦴꦤꦁ ꦥꦤ ꦮꦱꦺꦤ ꦆꦤ꧀ꦢ꧀ꦫꦶꦪꦴꦲꦴꦫꦥꦕ꧀ꦕꦪꦴꦮ ꦭꦧ꧀ꦨꦤ꧀ꦠꦶ. ‘‘ꦱꦲꦗꦴꦠꦁ ꦥꦸꦫꦺꦗꦴꦠꦁ ꦥꦕ꧀ꦖꦴꦗꦴꦠꦁ ꦄꦴꦲꦴꦫꦁ ꦆꦤ꧀ꦢ꧀ꦫꦶꦪ’’ꦤ꧀ꦠꦶ ꦲꦶ ꦈꦢ꧀ꦢꦶꦱꦶꦠ꧀ꦮꦴ ꦄꦠ꧀ꦡꦶꦥꦕ꧀ꦕꦪꦺꦴ ꦮꦶꦨꦠ꧀ꦠꦺꦴꦠꦶ. ꦏꦺꦕꦶ ꦥꦤꦺꦠ꧀ꦡ ‘‘ꦄꦴꦲꦴꦫꦒ꧀ꦒꦲꦟꦺꦤ ꦏꦧꦭ꦳ꦷꦏꦴꦫꦺꦴ ꦄꦴꦲꦴꦫꦺꦴꦮ ꦒꦲꦶꦠꦺꦴ, ꦆꦤ꧀ꦢ꧀ꦫꦶꦪꦒ꧀ꦒꦲꦟꦺꦤ ꦕ ꦫꦹꦥꦗꦷꦮꦶꦠꦶꦤ꧀ꦢ꧀ꦫꦶꦪꦩꦺꦮ, ꦱꦺꦱꦴꦲꦴꦫꦶꦤ꧀ꦢ꧀ꦫꦶꦪꦴꦤꦶ ꦱꦲꦗꦴꦠꦴꦢꦷꦱ꧀ꦮꦺꦮ ꦄꦤ꧀ꦠꦺꦴꦒꦣꦴꦤꦶ ꦏꦠꦴꦤꦶ. ꦪꦴꦤꦶ ꦠꦢꦤ꧀ꦠꦺꦴꦒꦣꦴꦤꦶ, ꦠꦺ ꦱꦤ꧀ꦣꦴꦪ ꦄꦛ꧀ꦜꦏꦡꦴꦪꦁ ‘ꦄꦫꦹꦥꦮꦠ꧀ꦡꦴꦫꦩ꧀ꦩꦟꦩꦲꦴꦨꦹꦠꦆꦤ꧀ꦢ꧀ꦫꦶꦪꦴꦲꦴꦫꦴꦤꦁ ꦮꦱꦺꦤꦴ’ꦠꦶ ꦌꦠ꧀ꦡ ꦆꦤ꧀ꦢ꧀ꦫꦶꦪꦴꦲꦴꦫꦒ꧀ꦒꦲꦟꦁ ꦏꦠꦤ꧀ꦠꦶ ‘ꦱꦲꦗꦴꦠꦥꦸꦫꦺꦗꦴꦠꦥꦕ꧀ꦖꦴꦗꦴꦠꦥꦕ꧀ꦕꦪꦴ ꦭꦧ꧀ꦨꦤ꧀ꦠꦷ’ꦠꦶ ꦮꦸꦠ꧀ꦠ’’ꦤ꧀ꦠꦶ ꦮꦢꦤ꧀ꦠꦶ.

ꦠꦠ꧀ꦡ ꦄꦫꦹꦥꦴꦤꦁ ꦱꦲꦗꦴꦠꦥꦕ꧀ꦖꦴꦗꦴꦠꦴꦲꦴꦫꦶꦤ꧀ꦢ꧀ꦫꦶꦪꦥꦕ꧀ꦕꦪꦨꦴꦮꦺꦴ ꦪꦡꦴꦫꦲꦁ ꦮꦺꦢꦶꦠꦧ꧀ꦧꦺꦴ. ꦮꦠ꧀ꦡꦸ ꦱꦲꦗꦴꦠꦁ ꦥꦸꦫꦺꦗꦴꦠꦚ꧀ꦕ, ꦄꦴꦫꦩ꧀ꦩꦟꦁ ꦥꦸꦫꦺꦗꦴꦠꦩꦺꦮ, ꦄꦨꦶꦚ꧀ꦚꦴꦚꦴꦟꦱ꧀ꦱ ꦥꦤ ꦏꦢꦴꦕꦶ ꦱꦲꦗꦴꦠꦩ꧀ꦥꦶ ꦄꦴꦫꦩ꧀ꦩꦟꦥꦕ꧀ꦕꦪꦺꦴ ꦲꦺꦴꦠꦶꦪꦺꦮ. ꦱꦲꦗꦴꦠꦒ꧀ꦒꦲꦟꦺꦤ ꦥꦤꦺꦠ꧀ꦡ ꦱꦲꦗꦴꦠꦥꦕ꧀ꦕꦪꦨꦹꦠꦺꦴꦮ ꦒꦪ꧀ꦲꦠꦶ, ꦱꦺꦴ ꦕ ꦌꦏꦸꦥ꧀ꦥꦴꦢꦴꦢꦶꦭꦏ꧀ꦑꦟꦪꦸꦠ꧀ꦠꦺꦴꦮꦴꦠꦶ ꦪꦺꦴ ꦣꦩ꧀ꦩꦺꦴ ꦱꦲꦗꦴꦠꦺꦴ ꦲꦸꦠ꧀ꦮꦴ ꦄꦴꦫꦩ꧀ꦩꦟꦁ ꦲꦺꦴꦠꦶ, ꦤ ꦱꦺꦴ ꦆꦣ ꦄꦣꦶꦥ꧀ꦥꦺꦠꦺꦴ. ꦪꦢꦶ ꦱꦲꦗꦴꦠꦺꦴꦥꦶ ꦄꦴꦫꦩ꧀ꦩꦟꦁ ꦲꦺꦴꦠꦶ, ꦏꦱ꧀ꦩꦴ ꦥꦴꦭ꦳ꦶꦪꦁ ꦠꦡꦴ ꦤ ꦮꦶꦨꦠ꧀ꦠꦤ꧀ꦠꦶ? ꦌꦏꦏꦭꦴꦥꦥꦫꦶꦪꦴꦥꦤ꧀ꦤꦱ꧀ꦱ ꦌꦏꦸꦥ꧀ꦥꦴꦢꦴꦢꦶꦭꦏ꧀ꦑꦟꦪꦸꦠ꧀ꦠꦱ꧀ꦱ ꦨꦶꦤ꧀ꦤꦏꦭꦴꦥꦥꦫꦶꦪꦴꦥꦤ꧀ꦤꦠꦺꦴ ꦱꦔ꧀ꦏꦫꦩꦺꦴꦕꦤꦠ꧀ꦡꦁ. ꦄꦥꦶꦕ ꦄꦥ꧀ꦥꦕꦸꦫꦨꦴꦮꦠꦺꦴ ꦄꦥꦴꦏꦛꦨꦴꦮꦠꦺꦴ ꦕ ꦠꦁ ꦤ ꦒꦲꦶꦠꦁ. ꦠꦠꦺꦴꦠꦶ ꦤꦮꦩꦠꦺꦴꦠꦶ ꦄꦠ꧀ꦡꦺꦴ, ꦤ ꦢꦱꦩꦠꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦤ ꦲꦶ ꦌꦏꦴꦢꦱꦩꦺ ꦄꦣꦶꦥꦠꦶ ꦄꦠ꧀ꦡꦷꦠꦶ. ꦠꦡꦴ ꦕꦸꦢ꧀ꦢꦱꦩꦺꦠꦶ ꦌꦠ꧀ꦡ ꦠꦡꦴ-ꦱꦢ꧀ꦢꦺꦤ ꦮꦠ꧀ꦡꦸꦒ꧀ꦒꦲꦟꦺꦤ ꦕꦏ꧀ꦑꦴꦢꦶꦮꦠ꧀ꦡꦹꦤꦶꦥꦶ ꦒꦲꦶꦠꦴꦤꦷꦠꦶ ꦆꦩꦩꦠ꧀ꦡꦁ ꦈꦥꦱꦁꦲꦫꦠꦶ. ꦠꦢꦺꦮꦴꦠꦶ ꦄꦴꦫꦩ꧀ꦩꦟꦩꦺꦮ.

꧕꧑꧙. ꦱꦲꦗꦴꦠꦴꦤꦶ ꦮꦶꦪꦴꦠꦶ ꦱꦲꦗꦴꦠꦥꦕ꧀ꦕꦪꦱꦲꦶꦠꦴꦤꦶ ꦮꦶꦪ ꦓꦛꦤꦴꦤꦶ. ꦱꦲꦗꦴꦠꦺꦤꦴꦠꦶ ꦱꦲꦗꦴꦠꦥꦕ꧀ꦕꦪꦺꦤ. ꦠꦴꦤꦷꦠꦶ ‘‘ꦥꦏꦶꦟ꧀ꦟꦏꦓꦛꦤꦴꦤꦷ’’ꦠꦶ ꦮꦸꦠ꧀ꦠꦓꦛꦤꦴꦤꦶ. ꦪꦴꦤꦶ ꦲꦶ ꦱꦲꦗꦴꦠꦥꦕ꧀ꦕꦪꦺꦤ ꦤ ꦪꦺꦴꦗꦶꦠꦴꦤꦶ, ꦠꦴꦤꦺꦠ꧀ꦡ ꦥꦏꦶꦟ꧀ꦟꦏꦓꦛꦤꦴꦤꦷꦠꦶ ꦮꦸꦠ꧀ꦠꦴꦤꦶ. ꦥꦸꦫꦺꦗꦴꦠ…ꦥꦺ… ꦮꦱꦺꦤꦴꦠꦶ ꦌꦠ꧀ꦡ ꦄꦪꦁ ꦪꦺꦴꦗꦤꦴ – ꦥꦸꦫꦺꦗꦴꦠꦱ꧀ꦱ ꦥꦕ꧀ꦖꦴꦗꦴꦠꦱ꧀ꦱ ꦄꦴꦲꦴꦫꦱ꧀ꦱ ꦆꦤ꧀ꦢ꧀ꦫꦶꦪꦱ꧀ꦱ ꦕ ꦱꦲꦗꦴꦠꦺꦤ ꦄꦚ꧀ꦚꦩꦚ꧀ꦚꦚ꧀ꦕ ꦱꦴꦩꦚ꧀ꦚꦮꦱꦺꦤ, ꦠꦺꦱꦁꦪꦺꦮ ꦱꦲꦗꦴꦠꦺꦤ ꦄꦚ꧀ꦚꦩꦚ꧀ꦚꦚ꧀ꦕ ꦄꦱꦴꦩꦚ꧀ꦚꦮꦱꦺꦤ ꦕꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦪꦡꦴ ꦥꦸꦫꦺꦗꦴꦠꦱ꧀ꦱ ꦥꦕ꧀ꦖꦴꦗꦴꦠꦱ꧀ꦱ ꦕ ꦱꦲꦗꦴꦠꦺꦤ ꦄꦱꦴꦩꦚ꧀ꦚꦁ ꦨꦶꦤ꧀ꦤꦱꦨꦴꦮꦠ꧀ꦠꦴ, ꦠꦠꦺꦴ ꦌꦮ ꦄꦴꦲꦴꦫꦶꦤ꧀ꦢ꧀ꦫꦶꦪꦴꦤꦩ꧀ꦥꦶ ꦠꦺꦤ ꦄꦱꦴꦩꦚ꧀ꦚꦁ, ꦌꦮꦁ ꦥꦸꦫꦺꦗꦴꦠꦴꦢꦷꦤꦁ ꦕꦠꦸꦤ꧀ꦤꦩ꧀ꦥꦶ ꦄꦚ꧀ꦚꦩꦚ꧀ꦚꦁ ꦄꦱꦴꦩꦚ꧀ꦚꦁ ꦨꦶꦤ꧀ꦤꦱꦨꦴꦮꦠ꧀ꦠꦴ. ꦌꦮꦁ ꦄꦱꦴꦩꦚ꧀ꦚꦮꦱꦺꦤ ꦄꦱꦩꦴꦤꦠꦴꦮꦱꦺꦤ ꦪꦡꦴꦮꦸꦠ꧀ꦠꦴꦤꦶ ꦓꦛꦤꦴꦤꦶ ꦮꦶꦥ꧀ꦥꦏꦶꦟ꧀ꦟꦴꦤꦶ. ꦪꦡꦴ ꦥꦤ ꦱꦲꦗꦴꦠꦥꦕ꧀ꦕꦪꦣꦩ꧀ꦩꦴ ꦄꦫꦹꦥꦏ꧀ꦑꦤ꧀ꦣꦴꦢꦪꦺꦴ ꦠꦺꦤꦺꦮ ꦱꦲꦗꦴꦠꦥꦕ꧀ꦕꦪꦠꦴꦱꦔ꧀ꦑꦴꦠꦺꦤ ꦩꦶꦡꦹꦤꦁ ꦱꦩꦴꦤꦨꦴꦮꦺꦤ ꦄꦚ꧀ꦚꦺꦲꦶ ꦄꦱꦁꦏꦶꦟ꧀ꦟꦴ ꦄꦠ꧀ꦠꦤꦺꦴ ꦥꦕ꧀ꦕꦪꦸꦥ꧀ꦥꦤ꧀ꦤꦴꦤꦁ ꦥꦕ꧀ꦕꦪꦺꦴ ꦲꦺꦴꦤ꧀ꦠꦷꦠꦶ ꦄꦱꦴꦩꦚ꧀ꦚꦮꦱꦺꦤ ꦠꦺꦱꦁ ꦥꦮꦠ꧀ꦠꦶ, ꦌꦮꦁ ꦥꦸꦫꦺꦗꦴꦠꦴꦢꦶꦥꦕ꧀ꦕꦪꦣꦩ꧀ꦩꦴꦥꦷꦠꦶ ꦠꦺꦱꦁ ꦱꦲꦗꦴꦠꦺꦤ ꦄꦚ꧀ꦚꦩꦚ꧀ꦚꦚ꧀ꦕ ꦪꦡꦴꦮꦸꦠ꧀ꦠꦱ꧀ꦱ ꦱꦴꦩꦚ꧀ꦚꦱ꧀ꦱ ꦄꦱꦴꦩꦚ꧀ꦚꦱ꧀ꦱ ꦕ ꦮꦱꦺꦤ ꦠꦴꦤꦶ ꦓꦛꦤꦴꦤꦶ ꦮꦶꦥ꧀ꦥꦏꦶꦟ꧀ꦟꦴꦤꦷꦠꦶ ꦥꦏꦶꦟ꧀ꦟꦏꦴꦤꦶ ꦮꦸꦠ꧀ꦠꦴꦤꦶ. ꦌꦮꦁ ꦱꦤ꧀ꦠꦺ ꦱꦲꦗꦴꦠꦴꦤꦩ꧀ꦥꦶ ꦓꦛꦤꦴꦤꦁ ꦥꦏꦶꦟ꧀ꦟꦏꦨꦴꦮꦺꦴ ꦄꦴꦥꦗ꧀ꦗꦠꦷꦠꦶ? ꦤꦴꦥꦗ꧀ꦗꦠꦶ, ꦠꦺꦱꦁ ꦱꦲꦗꦴꦠꦠꦴꦪ ꦌꦮ ꦄꦮꦶꦥ꧀ꦥꦏꦶꦟ꧀ꦟꦨꦴꦮꦱꦶꦢ꧀ꦣꦶꦠꦺꦴ. ꦠꦺꦤ ꦮꦸꦠ꧀ꦠꦁ ‘‘ꦱꦲꦗꦴꦠꦁ ꦄꦒ꧀ꦒꦲꦺꦠ꧀ꦮꦴ ꦮꦸꦠ꧀ꦠꦴꦤꦶ ꦥꦏꦶꦟ꧀ꦟꦏꦴꦤꦶ ꦤꦴꦩꦴ’’ꦠꦶ.

ꦠꦴꦤꦷꦠꦶ ꦥꦏꦶꦟ꧀ꦟꦏꦓꦛꦤꦴꦤꦶ. ꦏꦸꦱꦭꦮꦶꦥꦴꦏꦴꦠꦶ ꦏꦸꦱꦭꦴ ꦕ ꦮꦶꦥꦴꦏꦴ ꦕ, ꦪꦺ ꦄꦨꦶꦤ꧀ꦤꦭꦏ꧀ꦑꦟꦴ ꦲꦸꦠ꧀ꦮꦴ ꦏꦸꦱꦭꦱꦨꦴꦮꦴ ꦮꦶꦥꦴꦏꦱꦨꦴꦮꦴ ꦕꦴꦠꦶ ꦄꦠ꧀ꦡꦺꦴ. ꦌꦮꦁꦱꦨꦴꦮꦚ꧀ꦕ ꦌꦏꦁ ꦄꦚ꧀ꦚꦶꦤ꧀ꦢ꧀ꦫꦶꦪꦩꦺꦮꦴꦠꦶ ꦄꦴꦲ ‘‘ꦆꦢꦁ…ꦥꦺ… ꦭꦧ꧀ꦨꦠꦷ’’ꦠꦶ. ꦤꦤꦸ ꦕ ꦱꦢ꧀ꦣꦶꦤ꧀ꦢ꧀ꦫꦶꦪꦴꦢꦶꦮꦱꦺꦤꦥꦶ ꦄꦪꦩꦠ꧀ꦡꦺꦴ ꦭꦧ꧀ꦨꦠꦷꦠꦶ? ꦠꦺꦱꦁ ꦏꦶꦫꦶꦪꦱꦨꦴꦮꦠꦴꦥꦶ ꦄꦠ꧀ꦡꦺꦮꦴꦠꦶ. ꦢꦸꦏ꧀ꦑꦤ꧀ꦠꦶ ꦕꦺꦠꦱꦶꦏꦢꦸꦏ꧀ꦑꦁ. ꦠꦺꦤꦴꦲ ‘‘ꦄꦏꦸꦱꦭꦩꦺꦮꦴ’’ꦠꦶ. ꦮꦶꦥꦴꦏꦱ꧀ꦱ ꦢꦸꦏ꧀ꦑꦱ꧀ꦱꦴꦠꦶ ꦪꦺꦴꦗꦤꦴ. ꦠꦺꦤ ꦮꦸꦠ꧀ꦠꦁ ‘‘ꦄꦙꦴꦤꦔ꧀ꦒꦠ꧀ꦠꦴ’’ꦠꦶ. ꦄꦏꦸꦱꦭꦮꦶꦥꦴꦏꦏꦶꦫꦶꦪꦴꦠꦶ ꦮꦶꦕꦶꦏꦶꦕ꧀ꦖꦴꦕꦶꦠ꧀ꦠꦥꦚ꧀ꦕꦮꦶꦚ꧀ꦚꦴꦟꦏꦶꦫꦶꦪꦴꦩꦤꦺꦴꦣꦴꦠꦹꦱꦸ ꦥꦮꦠ꧀ꦠꦤꦠꦺꦴ ꦄꦏꦸꦱꦭꦮꦶꦥꦴꦏꦏꦶꦫꦶꦪꦴꦮ ꦲꦺꦴꦠꦶ ꦕꦶꦠ꧀ꦠꦛ꧀ꦜꦶꦠꦷꦠꦶ ꦄꦠ꧀ꦡꦺꦴ. ꦪꦱ꧀ꦩꦴ ꦄꦏꦸꦱꦭꦮꦶꦥꦴꦏꦴꦠꦶ ꦌꦮꦩꦠ꧀ꦡꦺ ꦒꦪ꧀ꦲꦩꦴꦤꦺ ꦢꦸꦏ꧀ꦑꦱ꧀ꦱ ꦕꦶꦠ꧀ꦠꦛ꧀ꦜꦶꦠꦶꦪꦴ ꦕ ꦮꦱꦺꦤ ꦪꦡꦴ ꦙꦴꦤꦺꦱꦸ, ꦌꦮꦁ ꦄꦚ꧀ꦚꦺꦱꦁ ꦮꦱꦺꦤ ꦄꦚ꧀ꦚꦺꦱꦸ ꦕ ꦤ ꦭꦧ꧀ꦨꦠꦶ, ꦠꦱ꧀ꦩꦴ ꦄꦏꦸꦱꦭꦱ꧀ꦱ ꦮꦶꦥꦴꦏꦴꦠꦶ ꦌꦮꦩꦠ꧀ꦡꦺ ꦒꦪ꧀ꦲꦩꦴꦤꦺ ꦢꦸꦏ꧀ꦑꦶꦤ꧀ꦢ꧀ꦫꦶꦪꦱ꧀ꦱ ꦮꦱꦺꦤ ꦆꦤ꧀ꦢ꧀ꦫꦶꦪꦺꦱꦸ ꦭꦧ꧀ꦨꦠꦷꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦄꦏꦸꦱꦭꦱ꧀ꦱ…ꦥꦺ… ꦭꦧ꧀ꦨꦺꦪ꧀ꦪꦴ’’ꦠꦶ. ꦆꦩꦱ꧀ꦩꦶꦁ ꦏꦸꦱꦭꦠ꧀ꦠꦶꦏꦺ ꦮꦶꦥꦴꦏꦺꦴ ꦮꦶꦥꦴꦏꦴꦧ꧀ꦪꦴꦏꦠꦩꦶꦕ꧀ꦕꦺꦮ ꦒꦪ꧀ꦲꦠꦶ, ꦤ ꦄꦏꦸꦱꦭꦴꦢꦶꦥꦢꦺꦲꦶ ꦮꦶꦱꦺꦱꦺꦠ꧀ꦮꦴꦠꦶ ꦆꦩꦩꦠ꧀ꦡꦁ ꦢꦱ꧀ꦱꦺꦤ꧀ꦠꦺꦴ ‘‘ꦏꦸꦱꦭꦮꦶꦥꦴꦏꦴ…ꦥꦺ… ꦤꦠ꧀ꦡꦷ’’ꦠꦶ ꦄꦴꦲ.

ꦥꦚ꧀ꦲꦴꦮꦴꦫꦱ꧀ꦱ ꦓꦛꦤꦺ ꦄꦤꦸꦭꦺꦴꦩꦒꦟꦤꦴ ꦤꦶꦛ꧀ꦜꦶꦠꦴ.

ꦥꦕ꧀ꦕꦤꦷꦪꦸꦢ꧀ꦣꦴꦫꦮꦟ꧀ꦟꦤꦴ

꧕꧒꧗. ꦤꦲꦺꦠꦸꦥꦕ꧀ꦕꦪꦺꦤꦴꦠꦶ ꦌꦠ꧀ꦡ ꦤ-ꦏꦴꦫꦺꦴ ꦄꦚ꧀ꦚꦠ꧀ꦡꦺꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦲꦺꦠꦸꦥꦕ꧀ꦕꦪꦠꦺꦴ ꦄꦚ꧀ꦚꦺꦤ ꦥꦕ꧀ꦕꦪꦺꦤꦴ’’ꦠꦶ ꦄꦴꦲ. ꦄꦒ꧀ꦒꦲꦶꦠꦒ꧀ꦒꦲꦟꦺꦤꦴꦲꦶ ꦱꦲꦗꦴꦠꦴꦢꦶꦱꦔ꧀ꦒꦲꦮꦱꦺꦤ ꦄꦒ꧀ꦒꦲꦶꦠꦴꦤꦁ ꦒꦲꦟꦺꦤ. ꦄꦛ꧀ꦜ ꦲꦺꦴꦤ꧀ꦠꦷꦠꦶ ꦆꦩꦶꦱ꧀ꦱꦴ ꦥꦴꦭ꦳ꦶꦪꦴ ꦄꦴꦒꦠꦴ ꦄꦴꦫꦩ꧀ꦩꦟꦴꦢꦪꦺꦴ ꦄꦛ꧀ꦜ ꦥꦕ꧀ꦕꦪꦴ ꦲꦺꦴꦤ꧀ꦠꦶ. ꦠꦺꦱꦹꦠꦶ ꦄꦛ꧀ꦜꦱꦸ ꦥꦕ꧀ꦕꦪꦺꦱꦸ. ꦠꦷꦲꦷꦠꦶ ꦄꦴꦫꦩ꧀ꦩꦟꦱꦲꦗꦴꦠꦈꦥꦤꦶꦱ꧀ꦱꦪꦥꦕ꧀ꦕꦪꦺꦲꦶ. ꦢ꧀ꦮꦷꦲꦷꦠꦶ ꦄꦴꦫꦩ꧀ꦩꦟꦥꦕ꧀ꦕꦪꦈꦥꦤꦶꦱ꧀ꦱꦪꦥꦕ꧀ꦕꦪꦺꦲꦶ. ꦠꦱ꧀ꦩꦶꦁ ꦠꦱ꧀ꦩꦶꦁ ꦥꦕ꧀ꦕꦪꦺꦠꦶ ꦠꦱ꧀ꦩꦶꦁ ꦠꦱ꧀ꦩꦶꦁ ꦲꦺꦠꦸꦄꦴꦢꦶꦏꦺ ꦥꦕ꧀ꦕꦪꦺ. ꦠꦠꦺꦴ ꦲꦺꦠꦸꦄꦴꦢꦶꦥꦕ꧀ꦕꦪꦠꦺꦴ. ꦪꦡꦴꦪꦺꦴꦒꦁ ꦪꦺꦴꦗꦺꦠꦧ꧀ꦧꦴꦠꦶ ꦪꦱ꧀ꦩꦶꦁ ꦥꦕ꧀ꦕꦪꦺ ꦥꦕ꧀ꦕꦤꦷꦪꦠꦺꦴ ꦜꦶꦠꦺ ꦪꦺ ꦥꦕ꧀ꦕꦪꦴ ꦄꦤꦸꦭꦺꦴꦩꦠꦺꦴ ꦪꦺꦴꦗꦤꦁ ꦭꦨꦤ꧀ꦠꦶ, ꦠꦺ ꦪꦺꦴꦗꦺꦠꦧ꧀ꦧꦴꦠꦶ ꦄꦠ꧀ꦡꦺꦴ.

ꦢ꧀ꦮꦶꦤ꧀ꦤꦤ꧀ꦠꦶ ꦄꦤꦤ꧀ꦠꦫꦹꦥꦤꦶꦱ꧀ꦱꦪꦱ꧀ꦱ ꦥꦏꦠꦹꦥꦤꦶꦱ꧀ꦱꦪꦱ꧀ꦱꦴꦠꦶ ꦆꦩꦺꦱꦁ ꦢ꧀ꦮꦶꦤ꧀ꦤꦁ. ꦮꦠ꧀ꦡꦸꦥꦸꦫꦺꦗꦴꦠꦱ꧀ꦱ ꦮꦱꦺꦤ ꦥꦸꦫꦺꦗꦴꦠꦁ ꦄꦴꦫꦩ꧀ꦩꦟꦥꦸꦫꦺꦗꦴꦠꦱ꧀ꦱ ꦄꦴꦫꦩ꧀ꦩꦟꦺꦤ ꦱꦔ꧀ꦒꦲꦶꦠꦠ꧀ꦠꦴ. ꦄꦚ꧀ꦚꦶꦱ꧀ꦱꦴ ꦕꦺꦠꦤꦴꦪꦴꦠꦶ ꦤꦴꦤꦴꦏ꧀ꦑꦟꦶꦏꦏꦩ꧀ꦩꦥꦕ꧀ꦕꦪꦨꦴꦮꦺꦤꦺꦮ ꦥꦮꦠ꧀ꦠꦴꦪ ꦕꦺꦠꦤꦴꦪ. ꦄꦫꦹꦥꦴꦲꦴꦫꦴ ꦄꦥꦫꦶꦕ꧀ꦕꦠ꧀ꦠꦱꦲꦗꦴꦠꦨꦴꦮꦴ ꦌꦮ ꦄꦴꦲꦴꦫꦥꦕ꧀ꦕꦪꦺꦴ ꦲꦺꦴꦤ꧀ꦠꦶ, ꦫꦹꦥꦴꦲꦴꦫꦺꦴ ꦜꦶꦠꦶꦥ꧀ꦥꦠ꧀ꦠꦺꦴꦪꦺꦮꦴꦠꦶ ꦮꦸꦠ꧀ꦠꦁ ‘‘ꦱꦲꦗꦴꦠꦠꦺꦴ ꦄꦚ꧀ꦚꦱ꧀ꦱ ꦏꦧꦭ꦳ꦷꦏꦴꦫꦴꦲꦴꦫꦱ꧀ꦱ ꦮꦱꦺꦤ ꦄꦴꦲꦴꦫꦺꦴ’’ꦠꦶ. ꦱꦲꦗꦴꦠꦠꦺꦴ ꦄꦚ꧀ꦚꦱ꧀ꦱꦴꦠꦶ ꦕ ꦆꦢꦁ ꦄꦫꦹꦥꦴꦲꦴꦫꦤꦶꦮꦠ꧀ꦠꦤꦠ꧀ꦡꦁ ꦮꦸꦠ꧀ꦠꦁ, ꦤ ꦏꦧꦭ꦳ꦷꦏꦴꦫꦴꦲꦴꦫꦮꦶꦱꦺꦱꦤꦶꦮꦠ꧀ꦠꦤꦠ꧀ꦡꦁ ꦠꦴꦢꦶꦱꦱ꧀ꦱꦺꦮ ꦠꦱ꧀ꦱ ꦄꦨꦴꦮꦠꦺꦴ. ꦤ ꦲꦶ ꦫꦹꦥꦴꦲꦴꦫꦺꦴ ꦱꦲꦗꦴꦠꦥꦕ꧀ꦕꦪꦺꦴ ꦲꦺꦴꦠꦶ, ꦤꦴꦥꦶ ꦥꦸꦫꦺꦗꦴꦠꦥꦕ꧀ꦕꦪꦺꦴ ꦲꦺꦴꦠꦶ. ꦪꦡꦴ ꦱꦲꦗꦴꦠꦴꦤꦁ ꦱꦲꦗꦴꦠꦥꦕ꧀ꦕꦪꦺꦴ ꦤ ꦲꦺꦴꦠꦶ, ꦌꦮꦁ ꦥꦸꦫꦺꦗꦴꦠꦴꦤꦁ ꦥꦕ꧀ꦖꦴꦗꦴꦠꦥꦕ꧀ꦕꦪꦺꦴ ꦤ ꦲꦺꦴꦠꦶ, ꦥꦕ꧀ꦖꦴꦗꦴꦠꦴꦤꦚ꧀ꦕ ꦥꦸꦫꦺꦗꦴꦠꦥꦕ꧀ꦕꦪꦺꦴ ꦤ ꦲꦺꦴꦠꦶ. ꦏꦱ꧀ꦩꦴ? ꦠꦴꦢꦶꦱꦱ꧀ꦱ ꦥꦕ꧀ꦕꦪꦭꦏ꧀ꦑꦟꦱ꧀ꦱ ꦄꦨꦴꦮꦠꦺꦴ. ꦪꦺꦱꦚ꧀ꦲꦶ ꦪꦺꦴ ꦗꦤꦏꦺꦴ, ꦤ ꦠꦺꦲꦶ ꦠꦱ꧀ꦱ ꦱꦲꦗꦴꦠꦠꦴ ꦄꦠ꧀ꦡꦶ, ꦤꦴꦥꦶ ꦥꦸꦫꦺꦗꦴꦠꦠꦴ ꦥꦸꦫꦺꦗꦴꦠꦥꦕ꧀ꦕꦪꦭꦏ꧀ꦑꦟꦪꦸꦠ꧀ꦠꦴ, ꦥꦕ꧀ꦖꦴꦗꦴꦠꦥꦕ꧀ꦕꦪꦠꦴꦪ ꦥꦤ ꦮꦠ꧀ꦠꦧ꧀ꦧꦩꦺꦮ ꦤꦠ꧀ꦡꦶ ꦫꦹꦥꦣꦩ꧀ꦩꦠ꧀ꦠꦴ. ꦈꦥꦠ꧀ꦡꦩ꧀ꦨꦏꦠ꧀ꦠꦺꦥꦶ ꦌꦱꦺꦮ ꦤꦪꦺꦴ, ꦠꦱ꧀ꦩꦴ ꦱꦲꦗꦴꦠꦴꦢꦶꦮꦶꦣꦸꦫꦺꦴ ꦌꦮ ꦠꦱ꧀ꦱ ꦥꦕ꧀ꦕꦪꦨꦴꦮꦺꦴ ꦮꦺꦢꦶꦠꦧ꧀ꦧꦺꦴ. ꦠꦺꦤꦺꦮ ꦲꦶ ‘‘ꦱꦲꦗꦴꦠꦁ ꦥꦸꦫꦺꦗꦴꦠꦁ ꦥꦕ꧀ꦖꦴꦗꦴꦠꦁ ꦄꦴꦲꦴꦫꦁ ꦆꦤ꧀ꦢ꧀ꦫꦶꦪ’’ꦤ꧀ꦠꦶ ꦌꦠ꧀ꦡ ꦫꦹꦥꦗꦷꦮꦶꦠꦶꦤ꧀ꦢ꧀ꦫꦶꦪꦁ ꦮꦶꦪ ꦫꦹꦥꦴꦲꦴꦫꦺꦴ ꦮꦶꦱꦸꦁ ꦒꦲꦶꦠꦺꦴ. ꦠꦡꦴ ꦕꦴꦲ ‘‘ꦫꦹꦥꦴꦲꦴꦫꦺꦴ…ꦥꦺ… ꦄꦴꦲꦴꦫꦥꦕ꧀ꦕꦪꦺꦴꦮ ꦲꦺꦴꦠꦷ’’ꦠꦶ. ꦱꦲꦗꦴꦠꦠꦺꦴ ꦥꦸꦫꦺꦗꦴꦠꦠꦺꦴ ꦕ ꦄꦚ꧀ꦚꦱ꧀ꦱ ꦫꦹꦥꦗꦷꦮꦶꦠꦶꦤ꧀ꦢ꧀ꦫꦶꦪꦱ꧀ꦱꦴꦠꦶ ꦌꦠ꧀ꦡ ꦫꦹꦥꦴꦲꦴꦫꦺ ꦮꦸꦠ꧀ꦠꦤꦪꦺꦤꦺꦮ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦌꦮꦚ꧀ꦕ ꦏꦠ꧀ꦮꦴꦠꦶ ꦥꦸꦫꦶꦩꦥꦸꦫꦶꦩꦺꦲꦶ ꦄꦱꦔ꧀ꦒꦲꦶꦠꦱꦔ꧀ꦒꦟ꧀ꦲꦤꦮꦱꦺꦤ ꦥꦕ꧀ꦖꦶꦩꦥꦕ꧀ꦖꦶꦩꦴꦤꦁ ꦒꦲꦶꦠꦠ꧀ꦠꦴ ꦠꦡꦴ ꦫꦹꦥꦴꦲꦴꦫꦱ꧀ꦱ ꦗꦷꦮꦶꦠꦶꦤ꧀ꦢ꧀ꦫꦶꦪꦱ꧀ꦱ ꦕ ꦮꦱꦺꦤ ꦆꦣ ꦄꦴꦲꦴꦫꦶꦤ꧀ꦢ꧀ꦫꦶꦪꦥꦕ꧀ꦕꦪꦴꦤꦁ ꦒꦲꦶꦠꦠ꧀ꦠꦴꦠꦶ ꦄꦠ꧀ꦡꦺꦴ, ꦄꦚ꧀ꦚꦡꦴ ‘‘ꦄꦴꦲꦴꦫꦥꦕ꧀ꦕꦪꦺꦤ ꦥꦕ꧀ꦕꦪꦺꦴ, ꦆꦤ꧀ꦢ꧀ꦫꦶꦪꦥꦕ꧀ꦕꦪꦺꦤ ꦥꦕ꧀ꦕꦪꦺꦴ’’ꦠꦶ ꦮꦠ꧀ꦠꦧ꧀ꦧꦁ ꦱꦶꦪꦴꦠꦶ ꦄꦣꦶꦥ꧀ꦥꦴꦪꦺꦴ. ꦠꦺꦤꦺꦮꦴꦲ ‘‘ꦄꦴꦫꦩ꧀ꦩꦟ…ꦥꦺ… ꦆꦕ꧀ꦕꦺꦮ ꦮꦸꦠ꧀ꦠ’’ꦤ꧀ꦠꦶ. ꦠꦢꦚ꧀ꦚꦴꦨꦴꦮꦴꦠꦶ ꦠꦠꦺꦴ ꦄꦴꦫꦩ꧀ꦩꦟꦴꦢꦶꦥꦕ꧀ꦕꦪꦠꦺꦴ ꦄꦚ꧀ꦚꦱ꧀ꦱ ꦆꦣꦴꦣꦶꦥ꧀ꦥꦺꦠꦏꦩ꧀ꦩꦴꦢꦶꦥꦕ꧀ꦕꦪꦱ꧀ꦱ ꦏꦸꦱꦭꦺ ꦄꦨꦴꦮꦴ. ꦠꦱ꧀ꦩꦴꦠꦶ ꦪꦱ꧀ꦩꦴ ꦄꦴꦫꦩ꧀ꦩꦟꦠꦺꦴ ꦄꦚ꧀ꦚꦺꦱꦁ ꦢ꧀ꦮꦶꦤ꧀ꦤꦁ ꦮꦱꦺꦤ ꦈꦥꦤꦶꦱ꧀ꦱꦪꦺꦴ ꦮꦸꦠ꧀ꦠꦺꦴ, ꦠꦱ꧀ꦩꦴ ‘‘ꦄꦴꦫꦩ꧀ꦩꦟꦴꦣꦶꦥꦠꦶ ꦄꦴꦫꦩ꧀ꦩꦟꦥꦕ꧀ꦕꦪꦺ ꦱꦔ꧀ꦒꦲꦁ ꦒꦕ꧀ꦖꦠꦷ’’ꦠꦶ ꦮꦠ꧀ꦠꦧ꧀ꦧꦁ, ꦤ ꦄꦴꦫꦩ꧀ꦩꦟꦹꦥꦤꦶꦱ꧀ꦱꦪꦺꦠꦶ ꦄꦣꦶꦥ꧀ꦥꦴꦪꦺꦴ. ꦪꦢꦶ ꦌꦮꦁ ꦏꦱ꧀ꦩꦴ ꦥꦫꦶꦠ꧀ꦠꦠ꧀ꦠꦶꦏꦥꦚ꧀ꦲꦴꦮꦴꦫꦥꦕ꧀ꦕꦤꦷꦪꦺ ꦄꦴꦫꦩ꧀ꦩꦟꦁ ꦤ ꦮꦸꦠ꧀ꦠꦁ. ꦈꦥꦤꦶꦱ꧀ꦱꦪꦺꦤ ꦲꦶ ꦄꦱꦔ꧀ꦒꦲꦶꦠꦠ꧀ꦠꦺ ꦠꦁ ꦮꦠ꧀ꦠꦧ꧀ꦧꦩꦺꦮ ꦱꦶꦪꦴꦠꦶ ꦕꦺꦴꦢꦤꦁ ꦱꦤ꧀ꦣꦴꦪꦴꦲ ‘‘ꦪꦁ ꦥꦤꦴ’’ꦠꦶꦄꦴꦢꦶ. ꦠꦠ꧀ꦡ ꦥꦸꦫꦶꦩꦺꦲꦶ ꦄꦱꦔ꧀ꦒꦲꦶꦠꦮꦱꦺꦤ ꦮꦸꦠ꧀ꦠꦴꦤꦤ꧀ꦠꦶ ꦥꦸꦫꦶꦩꦺꦲꦶ ꦥꦕ꧀ꦕꦪꦺꦲꦶ ꦄꦱꦔ꧀ꦒꦲꦶꦠꦮꦱꦺꦤ ꦮꦸꦠ꧀ꦠꦴꦤꦁ ꦥꦕ꧀ꦖꦶꦩꦴꦤꦁ ꦥꦕ꧀ꦕꦪꦴꦤꦁ. ꦱꦔ꧀ꦒꦲꦶꦠꦮꦶꦮꦗ꧀ꦗꦤꦴꦨꦴꦮꦠꦺꦴꦠꦶ ꦄꦠ꧀ꦠꦤꦴ ꦱꦩꦴꦤꦭꦏ꧀ꦑꦟꦠꦴꦪ ꦱꦔ꧀ꦒꦲꦶꦠꦱ꧀ꦱ ꦥꦕ꧀ꦕꦪꦱ꧀ꦱ ꦮꦶꦮꦗ꧀ꦗꦤꦴꦨꦴꦮꦠꦺꦴ, ꦮꦶꦮꦗ꧀ꦗꦤꦺ ꦏꦴꦫꦟꦁ ꦤꦠ꧀ꦡꦷꦠꦶ ꦄꦠ꧀ꦡꦺꦴ. ꦈꦥꦤꦶꦱ꧀ꦱꦪꦠꦺꦴ ꦄꦚ꧀ꦚꦴꦫꦩ꧀ꦩꦟꦴꦨꦴꦮꦠꦺꦴꦠꦶ ꦄꦥ꧀ꦥꦩꦴꦟꦺꦴ ꦣꦩ꧀ꦩꦺꦴ ꦄꦥ꧀ꦥꦩꦴꦟꦱ꧀ꦱ ꦣꦩ꧀ꦩꦱ꧀ꦱ ꦄꦴꦫꦩ꧀ꦩꦟꦁ ꦲꦺꦴꦤ꧀ꦠꦺꦴ ꦄꦴꦫꦩ꧀ꦩꦟꦹꦥꦤꦶꦱ꧀ꦱꦪꦺꦴꦮ ꦲꦺꦴꦠꦶ ꦄꦴꦫꦩ꧀ꦩꦟꦴꦣꦶꦥꦠꦶꦨꦴꦮꦠꦺꦴꦠꦶ ꦄꦠ꧀ꦡꦺꦴ. ꦪꦡꦴ ꦄꦴꦫꦩ꧀ꦩꦟꦺ ꦒꦲꦶꦠꦺ ꦄꦴꦫꦩ꧀ꦩꦟꦹꦥꦤꦶꦱ꧀ꦱꦪꦺꦴ ꦒꦲꦶꦠꦺꦴꦮ ꦲꦺꦴꦠꦶ ꦧꦭꦮꦴꦫꦩ꧀ꦩꦟꦨꦴꦮꦠꦺꦴ, ꦌꦮꦁ ꦄꦴꦫꦩ꧀ꦩꦟꦹꦥꦤꦶꦱ꧀ꦱꦪꦺ ꦒꦲꦶꦠꦺ ꦄꦴꦫꦩ꧀ꦩꦟꦁ ꦒꦲꦶꦠꦩꦺꦮ ꦲꦺꦴꦠꦶ ꦠꦁꦱꦨꦴꦮꦠ꧀ꦠꦴꦠꦶ ꦠꦠ꧀ꦡ ꦠꦁ ꦮꦶꦱꦸꦁ ꦤ ꦈꦢ꧀ꦣꦛꦤ꧀ꦠꦶ ꦢꦛ꧀ꦜꦧ꧀ꦧꦁ. ꦠꦺꦤꦴꦲ ‘‘ꦤ ꦥꦤ ꦄꦴꦫꦩ꧀ꦩꦟꦹꦥꦤꦶꦱ꧀ꦱꦪꦱ꧀ꦱ ꦄꦴꦫꦩ꧀ꦩꦟꦺ ꦄꦱꦔ꧀ꦒꦲꦶꦠꦠ꧀ꦠꦴ’’ꦠꦶ.

ꦥꦕ꧀ꦖꦴꦗꦴꦠꦄꦴꦲꦴꦫꦴꦤꦤ꧀ꦠꦶ ꦄꦠ꧀ꦠꦤꦺꦴ ꦥꦕ꧀ꦕꦪꦸꦥ꧀ꦥꦤ꧀ꦤꦠꦺꦴ ꦥꦸꦫꦺꦗꦴꦠꦏꦴꦪꦠꦺꦴ ꦥꦕ꧀ꦖꦴꦗꦴꦠꦴꦤꦁ ꦄꦫꦹꦥꦴꦲꦴꦫꦴꦤꦁ. ꦠꦺ ꦲꦶ ꦄꦠ꧀ꦠꦤꦴ ꦱꦲꦗꦴꦠꦄꦫꦹꦥꦣꦩ꧀ꦩꦴꦤꦁ ꦠꦁꦱꦩꦸꦛ꧀ꦜꦴꦤꦫꦹꦥꦣꦩ꧀ꦩꦴꦤꦩ꧀ꦥꦶ ꦱꦲꦗꦴꦠꦄꦠ꧀ꦡꦶꦥꦕ꧀ꦕꦪꦴ ꦲꦺꦴꦤ꧀ꦠꦶ, ꦥꦸꦫꦺꦗꦴꦠꦴꦤꦁ ꦥꦤ ꦮꦠ꧀ꦡꦹꦤꦁ ꦥꦕ꧀ꦖꦴꦗꦴꦠꦄꦠ꧀ꦡꦶꦥꦕ꧀ꦕꦪꦺꦴ. ꦥꦕ꧀ꦖꦴꦗꦴꦠꦶꦤ꧀ꦢ꧀ꦫꦶꦪꦴꦤꦤ꧀ꦠꦶ ꦥꦕ꧀ꦖꦴꦗꦴꦠꦴꦤꦁ ꦄꦫꦹꦥꦶꦤ꧀ꦢ꧀ꦫꦶꦪꦴꦤꦁ. ꦱꦺꦱꦁ ꦄꦴꦲꦴꦫꦺ ꦮꦸꦠ꧀ꦠꦤꦪꦺꦤ ꦪꦺꦴꦗꦺꦠꦧ꧀ꦧꦁ. ꦪꦱ꧀ꦩꦴ ꦌꦠꦺ ꦄꦴꦲꦴꦫꦶꦤ꧀ꦢ꧀ꦫꦶꦪꦴ ꦪꦱ꧀ꦩꦶꦁ ꦑꦟꦺ ꦥꦸꦫꦺꦗꦴꦠꦄꦠ꧀ꦡꦶꦥꦕ꧀ꦕꦪꦁ ꦭꦨꦤ꧀ꦠꦶ, ꦠꦱ꧀ꦩꦶꦁꦪꦺꦮ ꦑꦟꦺ ꦠꦁꦠꦁꦥꦕ꧀ꦕꦪꦸꦥ꧀ꦥꦤ꧀ꦤꦴꦤꦁ ꦱꦲꦗꦴꦠꦄꦠ꧀ꦡꦶꦥꦕ꧀ꦕꦪꦺꦴ ꦥꦕ꧀ꦖꦴꦗꦴꦠꦄꦠ꧀ꦡꦶꦥꦕ꧀ꦕꦪꦺꦴ ꦕ ꦲꦺꦴꦤ꧀ꦠꦶ, ꦠꦱ꧀ꦩꦴ ꦮꦸꦠ꧀ꦠꦁ ‘‘ꦱꦲꦴꦥꦶ ꦄꦠ꧀ꦡꦶꦄꦮꦶꦒꦠꦥꦕ꧀ꦕꦪꦨꦴꦮꦺꦴ ꦲꦺꦴꦠꦷ’’ꦠꦶ. ꦠꦶꦟ꧀ꦟꦤ꧀ꦠꦶ ꦱꦲꦗꦴꦠꦴꦢꦷꦤꦁ ꦠꦶꦟ꧀ꦟꦁ. ꦖꦲꦶ ꦨꦺꦢꦺꦲꦷꦠꦶ ꦮꦶꦱꦸꦁ ꦒꦲꦶꦠꦺꦲꦶ ꦱꦲꦗꦴꦠꦴꦢꦷꦲꦶ ꦥꦚ꧀ꦕꦲꦶ ꦪꦡꦴꦫꦲꦁ ꦌꦏꦗ꧀ꦙꦁ ꦒꦲꦶꦠꦨꦺꦢꦺꦤ ꦕꦴꦠꦶ ꦖꦲꦶ ꦄꦠ꧀ꦡꦶꦥꦕ꧀ꦕꦪꦨꦺꦢꦺꦲꦶ. ꦌꦏꦺꦏꦁ ꦱꦔ꧀ꦒꦲꦺꦠ꧀ꦮꦴꦠꦶ ꦄꦠ꧀ꦡꦶꦥꦕ꧀ꦕꦪꦭꦏ꧀ꦑꦟꦁ ꦄꦮꦶꦒꦠꦥꦕ꧀ꦕꦪꦭꦏ꧀ꦑꦟꦚ꧀ꦕ ꦮꦶꦱꦸꦁ ꦮꦶꦱꦸꦁ ꦖꦲꦶ ꦨꦺꦢꦺꦲꦶ ꦱꦔ꧀ꦒꦲꦺꦠ꧀ꦮꦴ ꦮꦸꦠ꧀ꦠꦁ.

ꦄꦗ꧀ꦙꦠ꧀ꦠꦶꦏꦧꦴꦲꦶꦫꦨꦺꦢꦠꦺꦴꦠꦶ ꦮꦠ꧀ꦠꦧ꧀ꦧꦁ ꦕꦏ꧀ꦑꦴꦢꦷꦤꦁ ꦗꦷꦮꦶꦠꦶꦤ꧀ꦢ꧀ꦫꦶꦪꦱ꧀ꦱ ꦕ ꦄꦣꦶꦥ꧀ꦥꦺꦠꦠ꧀ꦠꦴ, ꦱꦥꦫꦱꦤ꧀ꦠꦴꦤꦶꦏꦴꦤꦚ꧀ꦕ ꦆꦤ꧀ꦢ꧀ꦫꦶꦪꦴꦤꦁ ꦄꦤꦣꦶꦥ꧀ꦥꦺꦠꦠ꧀ꦠꦴ. ꦤꦶꦱ꧀ꦱꦪꦥꦸꦫꦺꦗꦴꦠꦮꦶꦥ꧀ꦥꦪꦸꦠ꧀ꦠꦄꦠ꧀ꦡꦶꦄꦮꦶꦒꦠꦴꦤꦁ ꦥꦸꦫꦺꦗꦴꦠꦨꦹꦠꦴꦤꦤ꧀ꦠꦶ ꦄꦣꦶꦥ꧀ꦥꦴꦪꦺꦴ. ꦠꦺꦱꦚ꧀ꦲꦶ ꦥꦸꦫꦺꦗꦴꦠꦺ ꦱꦔ꧀ꦒꦲꦺꦴ. ꦠꦢꦺꦏꦢꦺꦱꦱ꧀ꦱꦴꦠꦶ ꦄꦴꦫꦩ꧀ꦩꦟꦺꦏꦢꦺꦱꦱ꧀ꦱ, ꦄꦴꦫꦩ꧀ꦩꦟꦴꦣꦶꦥꦠꦶꦄꦴꦫꦩ꧀ꦩꦟꦹꦥꦤꦶꦱ꧀ꦱꦪꦴꦤꦤ꧀ꦠꦶ ꦄꦠ꧀ꦡꦺꦴ. ꦠꦺꦱꦤ꧀ꦠꦶ ꦤꦶꦱ꧀ꦱꦪꦴꦢꦷꦤꦁ. ꦈꦥꦤꦶꦱ꧀ꦱꦪꦴꦢꦷꦱꦹꦠꦶ ꦈꦥꦤꦶꦱ꧀ꦱꦪꦥꦸꦫꦺꦗꦴꦠꦥꦕ꧀ꦕꦪꦴꦢꦷꦱꦸ. ꦠꦁ ꦥꦤ ꦥꦸꦫꦺꦗꦴꦠꦨꦹꦠꦁ ꦄꦴꦫꦩ꧀ꦩꦟꦁ. ꦠꦠ꧀ꦡꦴꦠꦶ ꦈꦥꦤꦶꦱ꧀ꦱꦪꦥꦕ꧀ꦕꦪꦱꦔ꧀ꦒꦲꦺ. ꦪꦡꦴꦮꦸꦠ꧀ꦠꦤꦪꦺꦴ ꦕꦺꦠ꧀ꦡ ꦌꦏꦤ꧀ꦠꦺꦤ ꦒꦲꦺꦠꦧ꧀ꦧꦺꦴꦠꦶ ꦢꦱ꧀ꦱꦺꦠꦸꦁ ‘‘ꦄꦡ ꦥꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ.

ꦌꦮ-ꦱꦢ꧀ꦢꦺꦴ ꦄꦴꦤꦺꦠ꧀ꦮꦴ ꦪꦺꦴꦗꦺꦠꦧ꧀ꦧꦺꦴ, ꦄꦚ꧀ꦚꦡꦴ ꦠꦺꦱꦸ ꦥꦚ꧀ꦲꦺꦱꦸ ꦌꦏꦱꦨꦴꦮꦠꦺꦴꦮ ꦥꦕ꧀ꦕꦪꦱ꧀ꦱ ꦄꦴꦒꦩꦤꦁ ꦮꦸꦠ꧀ꦠꦁ ꦱꦶꦪꦴ. ꦠꦺꦤꦴꦠꦶ ‘‘ꦌꦏꦺꦴꦮꦴ’’ꦠꦶ ꦄꦮꦣꦴꦫꦟꦺꦤ ꦄꦒ꧀ꦒꦲꦶꦠꦺꦤ. ꦠꦺꦱꦹꦠꦶ ꦱꦲꦗꦴꦠꦥꦸꦫꦺꦗꦴꦠꦥꦕ꧀ꦕꦪꦺꦱꦸ. ꦈꦏ꧀ꦏꦛ꧀ꦜꦮꦱꦺꦤꦴꦠꦶ ‘‘ꦌꦏꦺꦴ ꦢ꧀ꦮꦺ’’ꦠꦶꦄꦴꦢꦶꦤꦴ ꦮꦸꦠ꧀ꦠꦈꦏ꧀ꦏꦁꦱꦮꦱꦺꦤ. ꦠꦺ ꦠꦺ ꦥꦕ꧀ꦕꦪꦺ ꦱꦔ꧀ꦒꦲꦺꦠ꧀ꦮꦴꦠꦶ ꦠꦺ ꦲꦺꦠꦸꦄꦴꦢꦶꦥꦕ꧀ꦕꦪꦺ ꦱꦲꦗꦴꦠꦴꦢꦶꦥꦕ꧀ꦕꦪꦺꦲꦶ ꦱꦔ꧀ꦒꦲꦺꦠ꧀ꦮꦴ. ꦢꦱ꧀ꦱꦶꦠꦥꦕ꧀ꦕꦪꦥꦫꦶꦕ꧀ꦖꦺꦢꦺꦴꦠꦶ ꦱꦺꦴꦭ꦳ꦱꦴꦢꦶꦨꦺꦢꦺꦤ ꦱꦔ꧀ꦒꦲꦺꦠ꧀ꦮꦴ ꦢꦱ꧀ꦱꦶꦠꦥꦕ꧀ꦕꦪꦥꦫꦶꦕ꧀ꦖꦺꦢꦺꦴ.

ꦥꦨꦺꦢꦥꦫꦶꦲꦴꦤꦷꦱꦹꦠꦶ ꦱꦲꦗꦴꦠꦥꦕ꧀ꦕꦪꦴꦢꦷꦲꦶ ꦱꦔ꧀ꦒꦲꦶꦠꦥꦕ꧀ꦕꦪꦥ꧀ꦥꦨꦺꦢꦺ ꦠꦁꦠꦁꦥꦕ꧀ꦕꦪꦥꦛꦶꦏ꧀ꦑꦺꦥꦺ ꦥꦚ꧀ꦲꦴꦥꦫꦶꦲꦴꦤꦶꦪꦚ꧀ꦕꦴꦠꦶ ꦄꦠ꧀ꦡꦺꦴ. ꦤꦲꦺꦠꦸꦥꦕ꧀ꦕꦪꦴꦠꦶ ꦆꦩꦶꦤꦴ ꦲꦺꦠꦸꦥꦕ꧀ꦕꦪꦠꦺꦴ ꦄꦚ꧀ꦚꦺ ꦥꦕ꧀ꦕꦪꦴ ꦒꦲꦶꦠꦴꦠꦶ ꦏꦠ꧀ꦮꦴ ꦮꦸꦠ꧀ꦠꦁ ‘‘ꦤꦲꦺꦠꦸꦥꦕ꧀ꦕꦪꦴꦠꦶ ꦌꦠ꧀ꦡ ꦭꦧ꧀ꦨꦩꦴꦤꦥꦕ꧀ꦕꦪꦺ ꦱꦤ꧀ꦣꦴꦪ ꦮꦸꦠ꧀ꦠ’’ꦤ꧀ꦠꦶ. ꦌꦮꦚ꧀ꦕ ꦏꦠ꧀ꦮꦴꦠꦶ ꦱꦧ꧀ꦧꦥꦕ꧀ꦕꦤꦷꦪꦱꦴꦣꦴꦫꦟꦭꦏ꧀ꦑꦟꦮꦱꦺꦤ ꦮꦸꦠ꧀ꦠꦠ꧀ꦠꦴ ꦌꦮ ꦤ ꦮꦠ꧀ꦠꦧ꧀ꦧꦁ ꦱꦶꦪꦴ, ꦤ ꦲꦶ ꦲꦺꦠꦸꦥꦕ꧀ꦕꦪꦺ ꦥꦕ꧀ꦕꦤꦷꦪꦠꦺꦴ ꦜꦶꦠꦺ ꦲꦺꦠꦸꦣꦩ꧀ꦩꦺꦴ ꦲꦺꦠꦸꦱ꧀ꦱ ꦣꦩ꧀ꦩꦱ꧀ꦱ ꦱꦲꦗꦴꦠꦥꦕ꧀ꦕꦪꦺꦤ ꦥꦕ꧀ꦕꦪꦺꦴꦠꦶ ꦱꦏ꧀ꦏꦴ ꦮꦠ꧀ꦠꦸꦁ. ꦮꦷꦱꦠꦶ ꦥꦕ꧀ꦕꦪꦴꦠꦶ ꦲꦺꦠꦸꦥꦕ꧀ꦕꦪꦺꦤ ꦱꦢ꧀ꦣꦶꦁ ꦮꦷꦱꦠꦶ ꦥꦕ꧀ꦕꦪꦴ. ꦥꦫꦶꦲꦴꦤꦷꦪꦁ ꦮꦶꦠ꧀ꦡꦴꦫꦏꦡꦁ ꦢꦱ꧀ꦱꦺꦤ꧀ꦠꦺꦴꦠꦶ ꦪꦺꦴꦗꦤꦴ.

꧕꧒꧘. ꦠꦺꦲꦶ ꦠꦺꦲꦶ ꦥꦕ꧀ꦕꦪꦺꦲꦷꦠꦶ ꦱꦲꦗꦴꦠꦥꦕ꧀ꦕꦪꦴꦢꦷꦲꦶ ꦠꦺꦲꦶ ꦠꦺꦲꦶ ꦱꦔ꧀ꦒꦴꦲꦏꦨꦹꦠꦺꦲꦶ ꦥꦕ꧀ꦕꦪꦺꦲꦶ. ꦠꦺ ꦠꦺ ꦥꦕ꧀ꦕꦪꦴꦠꦶ ꦱꦔ꧀ꦒꦲꦺꦠꦧ꧀ꦧꦴ ꦄꦚ꧀ꦚꦩꦚ꧀ꦚꦥꦕ꧀ꦕꦪꦴꦢꦪꦺꦴ ꦲꦺꦠꦸꦥꦕ꧀ꦕꦪꦴꦢꦪꦺꦴ ꦮꦴ ꦠꦺ ꦠꦺ ꦥꦕ꧀ꦕꦪꦴ. ꦄꦚ꧀ꦚꦺꦱꦁ ꦄꦨꦴꦮꦁ ꦱꦤ꧀ꦣꦴꦪ ꦮꦸꦠ꧀ꦠꦁ, ꦤ ꦠꦺꦱꦁ ꦱꦧ꧀ꦧꦺꦱꦁ ꦱꦩ꧀ꦨꦮꦤ꧀ꦠꦶ ꦄꦣꦶꦥ꧀ꦥꦴꦪꦺꦴ. ꦠꦺꦤꦴꦲ ‘‘ꦤ ꦲꦷ’’ꦠꦶꦄꦴꦢꦶ. ꦠꦠ꧀ꦡ ꦢ꧀ꦮꦺꦪꦺꦮꦴꦠꦶ ꦄꦴꦫꦩ꧀ꦩꦟꦴꦣꦶꦥꦠꦶꦁ ꦄꦥꦤꦺꦠ꧀ꦮꦴ ꦄꦴꦲ. ꦄꦧ꧀ꦪꦴꦏꦠꦱ꧀ꦱꦥꦷꦠꦶ ꦥꦶ-ꦱꦢ꧀ꦢꦺꦤ ꦤ ꦏꦺꦮꦭꦁ ꦏꦸꦱꦭꦱ꧀ꦱꦺꦮ, ꦄꦡ ꦑꦺꦴ ꦄꦧ꧀ꦪꦴꦏꦠꦱ꧀ꦱꦥꦷꦠꦶ ꦏꦸꦱꦭꦁ ꦱꦩ꧀ꦥꦶꦟ꧀ꦝꦺꦠꦶ.

꧕꧓꧐. ꦠꦺꦤ ꦱꦢ꧀ꦣꦶꦤ꧀ꦠꦶ ꦮꦠ꧀ꦡꦸꦤꦴ ꦱꦢ꧀ꦣꦶꦁ. ꦱꦸꦢ꧀ꦣꦴꦤꦤ꧀ꦠꦶ ꦏꦺꦮꦭꦴꦤꦁ ꦮꦠ꧀ꦡꦸꦤꦴ ꦮꦶꦤꦴ ꦕ ꦒꦲꦶꦠꦴꦤꦁ ꦏꦸꦱꦭꦏ꧀ꦑꦤ꧀ꦣꦴꦤꦁ. ꦪꦢꦶꦥꦶ ꦮꦠ꧀ꦡꦸꦤꦴ ꦱꦢ꧀ꦣꦶꦁ ꦱꦲꦗꦴꦠꦛ꧀ꦜꦺꦴ ꦤꦠ꧀ꦡꦶ, ꦤꦶꦱ꧀ꦱꦪꦴꦢꦶꦨꦴꦮꦺꦴ ꦥꦤ ꦄꦠ꧀ꦡꦺꦮꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦮꦠ꧀ꦡꦸꦤꦴ ꦥꦤꦴ’’ꦠꦶꦄꦴꦢꦶꦩꦴꦲ.

ꦱꦲꦗꦴꦠꦥꦸꦫꦺꦗꦴꦠꦥꦕ꧀ꦖꦴꦗꦴꦠꦄꦴꦲꦴꦫꦶꦤ꧀ꦢ꧀ꦫꦶꦪꦴꦤꦁ ꦄꦠ꧀ꦡꦶꦥꦕ꧀ꦕꦪꦺꦤ ꦱꦔ꧀ꦒꦲꦺꦠꦧ꧀ꦧꦠ꧀ꦠꦴ ꦱꦲꦗꦴꦠꦴꦢꦷꦲꦶ ꦱꦔ꧀ꦒꦲꦺꦠꦧ꧀ꦧꦴꦤꦁ ꦠꦁꦱꦔ꧀ꦒꦲꦺꦴ ꦱꦸꦏꦫꦺꦴꦠꦶ ꦢꦱ꧀ꦱꦺꦠꦸꦁ ꦈꦥꦤꦶꦱ꧀ꦱꦪꦺꦤ ꦱꦔ꧀ꦒꦲꦺꦠꦧ꧀ꦧꦴꦤꦁ ꦱꦔ꧀ꦒꦲꦺꦴ ꦮꦸꦠ꧀ꦠꦤꦪꦺꦴ ꦌꦮꦴꦠꦶ ꦮꦸꦠ꧀ꦠꦁ ‘‘ꦕꦠꦹꦱꦸ ꦱꦧ꧀ꦧꦥꦕ꧀ꦕꦪꦺ ꦱꦔ꧀ꦒꦟ꧀ꦲꦶꦠ꧀ꦮꦴ’’ꦠꦶ. ꦏꦩ꧀ꦩꦁ ꦥꦤ ꦱꦲꦗꦴꦠꦹꦥꦤꦶꦱ꧀ꦱꦪꦺꦲꦶ ꦄꦱꦔ꧀ꦒꦲꦺꦠꦧ꧀ꦧꦠꦴꦥꦶ ꦄꦠ꧀ꦡꦷꦠꦶ ꦱꦫꦹꦥꦠꦺꦴ ꦒꦲꦶꦠꦁ, ꦄꦚ꧀ꦚꦡꦴ ‘‘ꦠꦷꦱꦸ ꦥꦕ꧀ꦕꦪꦺꦱꦹ’’ꦠꦶ ꦮꦠ꧀ꦠꦧ꧀ꦧꦁ ꦱꦶꦪꦴ. ꦩꦶꦱ꧀ꦱꦏꦴꦩꦶꦱ꧀ꦱꦏꦱ꧀ꦱꦴꦠꦶ ꦱꦲꦗꦴꦠꦥꦸꦫꦺꦗꦴꦠꦴꦢꦶꦨꦴꦮꦺꦲꦶ ꦩꦶꦱ꧀ꦱꦏꦱ꧀ꦱ ꦠꦡꦴ ꦄꦩꦶꦱ꧀ꦱꦏꦱ꧀ꦱ ꦕ. ꦮꦸꦠ꧀ꦠꦩꦺꦮꦠ꧀ꦡꦁ ꦮꦶꦠ꧀ꦡꦴꦫꦠꦺꦴ ꦢꦱ꧀ꦱꦺꦠꦸꦁ ‘‘ꦤ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦺꦤꦴꦠꦶ ꦄꦠ꧀ꦡꦶꦥꦕ꧀ꦕꦪꦮꦶꦨꦴꦒꦱꦔ꧀ꦒꦴꦲꦏꦴꦤꦁ ꦱꦲꦗꦴꦠꦴꦢꦷꦤꦁ ꦒꦲꦟꦺꦤ. ꦱꦧ꧀ꦧꦥꦕ꧀ꦕꦪꦴꦤꦁ…ꦥꦺ… ꦲꦺꦴꦠꦷꦠꦶ ꦆꦩꦶꦤꦴ ‘‘ꦆꦩꦱ꧀ꦩꦶꦁ ꦥꦤ ꦥꦕ꧀ꦕꦪꦸꦢ꧀ꦣꦴꦫꦺ’’ꦠꦶꦄꦴꦢꦶꦤꦴ ꦮꦸꦠ꧀ꦠꦺꦴꦥꦶ ꦥꦕ꧀ꦕꦪꦱꦔ꧀ꦒꦲꦺꦴ ꦆꦣ ꦄꦠ꧀ꦡꦠꦺꦴ ꦢꦱ꧀ꦱꦶꦠꦺꦴꦪꦺꦮꦴꦠꦶ ꦆꦩꦩꦠ꧀ꦡꦁ ꦢꦱ꧀ꦱꦺꦠꦶ.

ꦤꦶꦱ꧀ꦱꦪꦺꦴ ꦏꦱ꧀ꦩꦴ ꦤ ꦮꦸꦠ꧀ꦠꦺꦴ? ꦱꦲꦗꦴꦠꦤꦶꦱ꧀ꦱꦪꦺꦴ ꦥꦸꦫꦺꦗꦴꦠꦤꦶꦱ꧀ꦱꦪꦺꦴꦠꦶ ꦲꦶ ꦱꦏ꧀ꦏꦴ ꦮꦶꦨꦗꦶꦠꦸꦤ꧀ꦠꦶ ꦄꦣꦶꦥ꧀ꦥꦴꦪꦺꦴ. ꦮꦶꦥ꧀ꦥꦪꦸꦠ꧀ꦠꦺꦴ ꦮꦴ ꦏꦱ꧀ꦩꦴ ꦤ ꦮꦸꦠ꧀ꦠꦺꦴ? ꦥꦸꦫꦺꦗꦴꦠꦮꦶꦥ꧀ꦥꦪꦸꦠ꧀ꦠꦺꦴ ꦥꦕ꧀ꦖꦴꦗꦴꦠꦮꦶꦥ꧀ꦥꦪꦸꦠ꧀ꦠꦺꦴꦠꦶ ꦮꦶꦨꦗꦶꦠꦸꦁ ꦱꦏ꧀ꦏꦴꦠꦶ ꦄꦠ꧀ꦡꦺꦴ. ꦪꦁ ꦩꦶꦱ꧀ꦱꦏꦴꦩꦶꦱ꧀ꦱꦏꦨꦴꦮꦁ ꦩꦤꦱꦶ ꦏꦠ꧀ꦮꦴ ‘‘ꦄꦮꦠ꧀ꦠꦧ꧀ꦧꦠ꧀ꦠꦴ’’ꦠꦶ ꦮꦸꦠ꧀ꦠꦁ, ꦠꦁ ꦢꦱ꧀ꦱꦺꦤ꧀ꦠꦺꦴ ‘‘ꦤꦶꦱ꧀ꦱꦪꦺꦴ ꦠꦴꦮꦴ’’ꦠꦶꦄꦴꦢꦶꦩꦴꦲ. ꦮꦶꦱꦺꦱꦶꦠꦧ꧀ꦧꦺꦴ ‘‘ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦺꦤ ꦥꦕ꧀ꦕꦪꦺꦴ’’ꦠꦶ ꦄꦮꦶꦱꦺꦱꦺꦤ ꦥꦴꦭ꦳ꦶꦪꦁ ꦮꦸꦠ꧀ꦠꦠ꧀ꦠꦴ. ꦱꦺꦴ ꦮꦶꦪꦴꦠꦶ ꦄꦠ꧀ꦡꦶꦥꦕ꧀ꦕꦪꦺꦴ ꦮꦶꦪ, ꦤꦶꦱ꧀ꦱꦪꦥꦕ꧀ꦕꦪꦺꦴ ꦮꦶꦪ ꦮꦴ ꦄꦠ꧀ꦡꦶꦥꦕ꧀ꦕꦪꦮꦶꦱꦺꦱꦴꦨꦴꦮꦺꦤ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦺꦴ ꦤ ꦮꦠ꧀ꦠꦧ꧀ꦧꦺꦴꦮ. ꦢ꧀ꦮꦶꦤ꧀ꦤꦁ ꦥꦕ꧀ꦕꦪꦴꦤꦁ ꦮꦶꦪ ꦥꦨꦺꦢꦱꦧ꧀ꦨꦴꦮꦠꦺꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦱꦲꦗꦴꦠꦥꦸꦫꦺꦗꦴꦠꦴꦤꦚ꧀ꦕꦴ’’ꦠꦶꦄꦴꦢꦶꦩꦴꦲ. ꦠꦡꦴꦠꦶꦄꦴꦢꦶꦤꦴ ꦮꦸꦠ꧀ꦠꦩꦠ꧀ꦡꦁ ꦥꦴꦭ꦳ꦶꦪꦴ ꦱꦩꦠ꧀ꦡꦺꦠꦸꦁ ‘‘ꦮꦏ꧀ꦑꦠꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦩꦒ꧀ꦒꦦꦭꦣꦩ꧀ꦩꦴꦤꦁ ꦩꦒ꧀ꦒꦦꦭꦠꦁꦱꦩꦸꦛ꧀ꦜꦴꦤꦫꦹꦥꦮꦱꦺꦤ ꦱꦲꦗꦴꦠꦄꦠ꧀ꦡꦶꦥꦕ꧀ꦕꦪꦺꦴ ꦠꦺꦱꦁꦪꦺꦮ ꦥꦸꦫꦺꦗꦴꦠꦕꦠꦸꦱꦤ꧀ꦠꦠꦶꦫꦹꦥꦮꦱꦺꦤ ꦥꦕ꧀ꦖꦴꦗꦴꦠꦄꦠ꧀ꦡꦶꦥꦕ꧀ꦕꦪꦺꦴ ꦮꦸꦠ꧀ꦠꦺꦴ, ꦤ ꦥꦤ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦨꦴꦮꦺꦴ ꦮꦏ꧀ꦑꦠꦷꦠꦶ ꦪꦺꦴꦗꦤꦴ. ꦱꦺꦴꦠꦶ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦺꦴ.

ꦲꦺꦠꦸꦄꦴꦢꦷꦤꦁ ꦱꦲꦗꦴꦠꦤ꧀ꦠꦺꦴꦒꦣꦠ꧀ꦠꦴ ꦲꦺꦠꦸꦄꦴꦢꦪꦺꦴ ꦠꦧ꧀ꦧꦶꦱꦺꦱꦴ ꦲꦺꦴꦤ꧀ꦠꦷꦠꦶ ꦏꦠ꧀ꦮꦴ ꦮꦸꦠ꧀ꦠꦁ ‘‘ꦱꦲꦗꦴꦠꦥꦕ꧀ꦕꦪꦺꦴ ꦕ ꦲꦺꦠꦸꦄꦴꦢꦷꦲꦶ ꦮꦶꦱꦺꦱꦺꦠꦧ꧀ꦧꦺꦴ’’ꦠꦶ. ꦱꦺꦴꦠꦶ ꦱꦲꦗꦴꦠꦥꦕ꧀ꦕꦪꦺꦴ. ꦮꦶꦫꦸꦢ꧀ꦣꦥꦕ꧀ꦕꦪꦺꦲꦷꦠꦶ ꦱꦲꦗꦴꦠꦥꦸꦫꦺꦗꦴꦠꦱ꧀ꦱ ꦱꦲꦗꦴꦠꦴꦢꦶꦨꦴꦮꦺꦤ ꦮꦶꦫꦸꦢ꧀ꦣꦺꦲꦶ ꦥꦕ꧀ꦕꦪꦺꦲꦶ. ꦠꦺꦤꦴꦲ ‘‘ꦈꦥ꧀ꦥꦠ꧀ꦠꦶꦏꦴꦭꦮꦶꦫꦸꦢ꧀ꦣꦺꦲꦶ ꦥꦕ꧀ꦕꦪꦺꦲꦷ’’ꦠꦶ.

ꦥꦕ꧀ꦕꦤꦷꦪꦸꦢ꧀ꦣꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦥꦕ꧀ꦕꦤꦷꦪꦒꦟꦤꦮꦟ꧀ꦟꦤꦴ

ꦤꦲꦺꦠꦸꦩꦹꦭꦏꦮꦟ꧀ꦟꦤꦴ

꧕꧓꧒. ꦄꦣꦶꦥꦠꦶꦥꦕ꧀ꦕꦪꦴꦢꦶꦨꦹꦠꦺꦴ ꦄꦴꦫꦩ꧀ꦩꦟꦥꦕ꧀ꦕꦪꦺꦴꦠꦶ ꦄꦴꦫꦩ꧀ꦩꦟꦄꦴꦫꦩ꧀ꦩꦟꦴꦣꦶꦥꦠꦶꦄꦴꦫꦩ꧀ꦩꦟꦹꦥꦤꦶꦱ꧀ꦱꦪꦺ ꦮꦢꦠꦶ. ꦠꦺ ꦕ ꦪꦱ꧀ꦩꦴ ꦄꦴꦫꦩ꧀ꦩꦟꦱꦨꦴꦮꦴ ꦌꦮ, ꦠꦱ꧀ꦩꦴ ꦮꦸꦠ꧀ꦠꦁ ‘‘ꦥꦫꦶꦲꦴꦪꦠꦶꦪꦺꦮꦴ’’ꦠꦶ. ꦥꦤ꧀ꦤꦫꦱꦱꦹꦠꦶ ꦢꦸꦠꦶꦪꦺ ꦱꦲꦗꦴꦠꦥꦕ꧀ꦕꦪꦺ ‘‘ꦲꦺꦠꦸꦥꦕ꧀ꦕꦪꦺꦴ’’ꦠꦶꦄꦴꦢꦶꦤꦴ ꦮꦸꦠ꧀ꦠꦺꦱꦸ ꦥꦤ꧀ꦤꦫꦱꦱꦸ. ꦌꦏꦴꦢꦱꦤ꧀ꦤꦁ ꦮꦱꦺꦤꦴꦠꦶ ꦱꦲꦗꦴꦠꦥꦕ꧀ꦕꦪꦺꦴ, ꦱꦲꦗꦴꦠꦠꦴꦮꦶꦱꦶꦛ꧀ꦜꦴ ꦄꦣꦶꦥꦠꦶꦤꦶꦱ꧀ꦱꦪꦏꦩ꧀ꦩꦴꦲꦴꦫꦶꦤ꧀ꦢ꧀ꦫꦶꦪꦠ꧀ꦡꦶꦄꦮꦶꦒꦠꦲꦺꦠꦸꦙꦴꦤꦩꦒ꧀ꦒꦴ ꦕꦴꦠꦶ ꦆꦩꦺꦱꦁ ꦌꦏꦴꦢꦱꦤ꧀ꦤꦁ ꦮꦱꦺꦤ. ꦱꦲꦗꦴꦠꦺ ꦄꦤ꧀ꦠꦺꦴꦒꦣꦴ ꦲꦺꦠꦸꦄꦴꦢꦪꦺꦴ. ꦠꦱ꧀ꦩꦶꦁ ꦥꦛꦶꦏ꧀ꦑꦶꦠ꧀ꦠꦺꦠꦶ ꦠꦱ꧀ꦩꦶꦁ ꦱꦲꦗꦴꦠꦺ ꦥꦛꦶꦏ꧀ꦑꦶꦠ꧀ꦠꦺ ꦥꦕ꧀ꦕꦤꦷꦪꦠꦺꦴ ꦜꦶꦠꦺ. ꦄꦤꦤ꧀ꦠꦺꦴꦒꦣꦴ ꦱꦲꦗꦴꦠꦺ, ꦏꦺ ꦥꦤ ꦠꦺꦠꦶ ꦄꦴꦲ ‘‘ꦄꦴꦫꦩ꧀ꦩꦟꦴꦣꦶꦥꦠꦶꦥꦸꦫꦺꦗꦴꦠꦤꦶꦱ꧀ꦱꦪꦴꦢꦪꦺꦴ’’ꦠꦶ. ꦄꦴꦫꦩ꧀ꦩꦟꦴꦢꦶꦄꦴꦏꦴꦫꦺꦤꦴꦠꦶ ꦄꦴꦫꦩ꧀ꦩꦟꦥꦸꦫꦺꦗꦴꦠꦤꦶꦱ꧀ꦱꦪꦤꦴꦤꦴꦏ꧀ꦑꦟꦶꦏꦏꦩ꧀ꦩꦴꦢꦶꦄꦴꦏꦴꦫꦺꦤ.

ꦠꦱ꧀ꦩꦶꦁ ꦥꦛꦶꦏ꧀ꦑꦶꦠ꧀ꦠꦺꦠꦶ ꦠꦱ꧀ꦩꦶꦁ ꦱꦲꦗꦴꦠꦥꦕ꧀ꦕꦪꦺ ꦥꦛꦶꦏ꧀ꦑꦶꦠ꧀ꦠꦺ. ꦆꦩꦺ ꦮꦴꦫꦴꦠꦶ ꦱꦲꦗꦴꦠꦁ ꦥꦸꦫꦺꦗꦴꦠꦤ꧀ꦠꦶ ꦮꦶꦱ꧀ꦱꦗ꧀ꦗꦶꦠꦮꦴꦫꦴ. ꦌꦠꦺ ꦤꦶꦱ꧀ꦱꦪꦴꦢꦪꦺꦴꦠꦶ ꦱꦲꦗꦴꦠꦠꦴꦮꦶꦱꦶꦛ꧀ꦜꦺ ꦤꦶꦱ꧀ꦱꦪꦴꦢꦶꦏꦺ ꦮꦢꦠꦶ, ꦤ ꦆꦠꦫꦺ. ꦠꦺꦤꦴꦲ ‘‘ꦪꦱ꧀ꦩꦴ ꦕ…ꦥꦺ… ꦥꦛꦶꦏ꧀ꦑꦺꦥꦺꦤ ꦥꦛꦶꦏ꧀ꦑꦶꦠ꧀ꦠꦴ’’ꦠꦶ.

ꦤꦶꦱ꧀ꦱꦪꦴꦢꦶꦨꦹꦠꦚ꧀ꦕ ꦱꦲꦗꦴꦠꦥꦕ꧀ꦕꦪꦁ ꦜꦥꦺꦠ꧀ꦮꦴꦠꦶ ꦌꦠꦺꦤ ‘‘ꦜꦥꦺꦠ꧀ꦮꦴ ꦱꦲꦗꦴꦠꦥꦕ꧀ꦕꦪ’’ꦤ꧀ꦠꦶ ꦌꦠ꧀ꦡ ꦄꦤ꧀ꦠꦺꦴꦒꦣꦤꦶꦱ꧀ꦱꦪꦴꦢꦶꦨꦴꦮꦺꦴꦪꦺꦮ ꦱꦲꦗꦴꦠꦥꦕ꧀ꦕꦪꦺꦴ ꦒꦲꦶꦠꦺꦴꦠꦶ ꦢꦱ꧀ꦱꦺꦠꦶ. ꦤꦶꦱ꧀ꦱꦪꦴꦢꦷꦠꦶ ꦄꦴꦢꦶ-ꦱꦢ꧀ꦢꦺꦤ ꦲꦺꦠꦸꦄꦴꦢꦷꦤꦁ ꦱꦔ꧀ꦒꦲꦺꦴ ꦢꦛ꧀ꦜꦧ꧀ꦧꦺꦴ. ꦄꦚ꧀ꦚꦩꦚ꧀ꦚꦥꦕ꧀ꦕꦪꦣꦩ꧀ꦩꦮꦱꦺꦤ ꦥꦮꦠ꧀ꦠꦶꦱꦧ꧀ꦨꦴꦮꦠꦺꦴꦠꦶ ꦄꦚ꧀ꦚꦩꦚ꧀ꦚꦥꦕ꧀ꦕꦪꦣꦩ꧀ꦩꦮꦱꦺꦤ ꦱꦲꦗꦴꦠꦴꦢꦷꦲꦶ ꦥꦮꦠ꧀ꦠꦶꦱꦧ꧀ꦨꦴꦮꦠꦺꦴ ꦄꦚ꧀ꦚꦩꦚ꧀ꦚꦺ ꦥꦛꦶꦏ꧀ꦑꦶꦠ꧀ꦠꦺ ‘‘ꦏꦸꦱꦭꦺꦴ ꦏꦸꦱꦭꦴꦧ꧀ꦪꦴꦏꦠꦱ꧀ꦱꦴ’’ꦠꦶ ꦮꦴꦫꦺꦴ ꦥꦫꦶꦲꦴꦪꦠꦶ. ꦠꦺꦱꦁ ꦠꦺꦱꦁ ꦥꦕ꧀ꦕꦪꦸꦥ꧀ꦥꦤ꧀ꦤꦴꦤꦤ꧀ꦠꦶ ꦆꦢꦁ ꦱꦴꦩꦚ꧀ꦚꦮꦕꦤꦩ꧀ꦥꦶ ‘‘ꦄꦚ꧀ꦚꦩꦚ꧀ꦚꦥꦕ꧀ꦕꦪꦱꦔ꧀ꦒꦲꦁ ꦒꦠꦴ’’ꦠꦶ ꦮꦕꦤꦠꦺꦴ ꦄꦚ꧀ꦚꦩꦚ꧀ꦚꦥꦕ꧀ꦕꦪꦭꦴꦨꦷꦤꦁꦪꦺꦮ ꦒꦲꦟꦁ ꦱꦶꦪꦴꦠꦶ ꦄꦴꦱꦔ꧀ꦏꦁ ꦤꦶꦮꦠ꧀ꦠꦺꦠꦸꦁ ‘‘ꦏꦸꦱꦭꦺꦴ ꦕ ꦏꦸꦱꦭꦱ꧀ꦱꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦱꦩꦸꦢꦴꦪꦨꦹꦠꦺꦴꦠꦶ ꦕꦠꦸꦏ꧀ꦑꦤ꧀ꦣꦱꦩꦸꦢꦴꦪꦨꦹꦠꦺꦴ. ꦌꦏꦢꦺꦱꦨꦹꦠꦺꦲꦷꦠꦶ ꦠꦱ꧀ꦱꦺꦮ ꦌꦏꦢꦺꦱꦨꦹꦠꦺꦲꦶ. ‘‘ꦏꦸꦱꦭꦺꦴ ꦥꦤꦴ’’ꦠꦶꦄꦴꦢꦶ ‘‘ꦤꦄꦚ꧀ꦚꦩꦚ꧀ꦚꦥꦕ꧀ꦕꦪꦺꦤ…ꦥꦺ… ꦥꦫꦶꦲꦴꦪꦠꦷ’’ꦠꦶ ꦆꦩꦱ꧀ꦱ ꦄꦛ꧀ꦜꦏꦡꦴꦮꦕꦤꦱ꧀ꦱ ꦱꦩꦴꦣꦴꦤꦮꦕꦤꦁ.

ꦫꦹꦥꦏ꧀ꦑꦤ꧀ꦣꦺꦏꦢꦺꦱꦺꦴꦮ ꦲꦺꦴꦤ꧀ꦠꦶ ꦫꦹꦥꦴꦲꦴꦫꦫꦹꦥꦶꦤ꧀ꦢ꧀ꦫꦶꦪꦮꦱꦺꦤ, ‘‘ꦌꦏꦤ꧀ꦠꦺꦤ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦣꦩ꧀ꦩꦺꦲꦷ’’ꦠꦶ ꦮꦸꦠ꧀ꦠꦣꦩ꧀ꦩꦴ ‘‘ꦠꦺ’’ꦠꦶ ꦥꦕ꧀ꦕꦴꦩꦛ꧀ꦜꦴꦠꦶ ꦄꦴꦲ ‘‘ꦠꦺꦠꦶ ꦠꦺ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦣꦩ꧀ꦩꦴ’’ꦠꦶ.

꧕꧓꧓. ꦥꦕ꧀ꦕꦤꦷꦪꦒꦟꦤꦁ ꦢꦱ꧀ꦱꦺꦠꦸꦤ꧀ꦠꦶ ꦮꦸꦠ꧀ꦠꦺꦥꦶ ꦤꦤꦸ ꦥꦕ꧀ꦕꦪꦒꦟꦤꦩꦺꦮ ꦢꦱ꧀ꦱꦶꦠꦁ ꦲꦺꦴꦠꦷꦠꦶ ꦏꦱ꧀ꦱꦕꦶ ꦄꦴꦱꦔ꧀ꦏꦴ ꦱꦶꦪꦴꦠꦶ ꦠꦁ ꦤꦶꦮꦠ꧀ꦠꦺꦤ꧀ꦠꦺꦴ ꦄꦴꦲ ‘‘ꦥꦕ꧀ꦕꦤꦷꦪꦮꦴꦫꦒꦟꦤꦴ ꦲꦶ ꦢꦱ꧀ꦱꦶꦠꦴ’’ꦠꦶ. ꦧꦭꦮꦏꦩ꧀ꦩꦁ ꦮꦶꦥꦴꦏꦱ꧀ꦱ ꦈꦥꦤꦶꦱ꧀ꦱꦪꦺꦴ ꦲꦺꦴꦠꦶ, ꦆꦠꦫꦁ ꦏꦩ꧀ꦩꦥꦕ꧀ꦕꦪꦺꦴ ꦌꦮꦴꦠꦶ ꦄꦴꦲ ‘‘ꦮꦶꦥꦴꦏꦱ꧀ꦱꦥꦶ ꦥꦤ…ꦥꦺ… ꦏꦩ꧀ꦩꦥꦕ꧀ꦕꦪꦺꦴ ꦲꦺꦴꦠꦷ’’ꦠꦶ.

ꦤꦲꦺꦠꦸꦩꦹꦭꦏꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧕꧓꧔. ꦥꦫꦶꦕ꧀ꦖꦶꦤ꧀ꦤꦒꦟꦤꦴꦤꦷꦠꦶ ꦆꦢꦁ ꦤ ꦒꦟꦤꦴꦥꦺꦏ꧀ꦑꦁ, ꦄꦡ ꦑꦺꦴ ꦮꦶꦱ꧀ꦱꦗ꧀ꦗꦤꦴꦥꦺꦏ꧀ꦑꦤ꧀ꦠꦶ ꦄꦴꦲ ‘‘ꦥꦫꦶꦕ꧀ꦖꦶꦤ꧀ꦤꦒꦟꦤꦴꦤꦶ ꦮꦶꦱ꧀ꦱꦗ꧀ꦗꦤꦴꦤꦷ’’ꦠꦶ. ꦥꦕ꧀ꦕꦤꦷꦪꦠꦺꦴ ꦜꦶꦠꦺꦴꦥꦶ ꦲꦺꦠꦸ ꦤꦪꦴꦤꦁ ꦩꦹꦭꦨꦴꦮꦺꦤꦺꦮ ꦜꦶꦠꦺꦴꦠꦶ ꦄꦴꦲ ‘‘ꦲꦺꦠꦸꦩꦹꦭꦏꦺ’’ꦠꦶ, ꦄꦛ꧀ꦜꦏꦡꦴꦪꦁ ꦥꦤ ‘‘ꦤꦲꦺꦠꦸꦩꦹꦭꦏ’’ꦩꦶꦕ꧀ꦕꦺꦮ ꦮꦸꦠ꧀ꦠꦁ.

꧕꧓꧘. ꦩꦹꦭꦁ ꦱꦔ꧀ꦑꦶꦥꦶꦠ꧀ꦮꦴꦠꦶ ꦱꦠ꧀ꦠꦩꦹꦭꦏꦁ ꦄꦛ꧀ꦜꦩꦹꦭꦏꦁ ꦤꦮꦩꦹꦭꦏꦚ꧀ꦕ ꦱꦔ꧀ꦑꦶꦥꦶꦠ꧀ꦮꦴ. ꦢ꧀ꦮꦷꦱꦹꦠꦶ ‘‘ꦠꦷꦟꦷ’’ꦠꦶ ꦮꦸꦠ꧀ꦠꦺꦱꦸ ꦠꦷꦱꦸ ꦮꦶꦱ꧀ꦱꦗ꧀ꦗꦤꦺꦱꦸ ꦥꦸꦫꦶꦩꦺꦱꦸ ꦢ꧀ꦮꦷꦱꦸ ‘‘ꦏꦸꦱꦭꦺꦴ ꦣꦩ꧀ꦩꦺꦴ ꦄꦧ꧀ꦪꦴꦏꦠꦱ꧀ꦱ, ꦄꦏꦸꦱꦭꦺꦴ ꦣꦩ꧀ꦩꦺꦴ ꦄꦧ꧀ꦪꦴꦏꦠꦱ꧀ꦱꦴ’’ꦠꦶ ꦆꦩꦺꦱꦸ. ꦠꦺꦤꦴꦲ ‘‘ꦮꦶꦥꦴꦏꦺꦴ ꦥꦕ꧀ꦕꦪꦸꦥ꧀ꦥꦤ꧀ꦤꦺꦴ ꦲꦺꦴꦠꦷ’’ꦠꦶ. ꦠꦠꦶꦪꦺꦠꦶ ‘‘ꦄꦧ꧀ꦪꦴꦏꦠꦺꦴ ꦣꦩ꧀ꦩꦺꦴ ꦄꦧ꧀ꦪꦴꦏꦠꦱ꧀ꦱꦴ’’ꦠꦶ ꦆꦩꦱ꧀ꦩꦶꦁ. ꦠꦺꦱꦩꦸꦛ꧀ꦜꦴꦤꦶꦏꦏꦴꦪꦺꦴꦠꦶ ꦈꦠꦸꦕꦶꦠ꧀ꦠꦴꦲꦴꦫꦴꦤꦁ ꦮꦱꦺꦤ ꦠꦺꦱꦩꦸꦛ꧀ꦜꦴꦤꦶꦏꦏꦴꦪꦺꦴ.

꧕꧔꧕. ꦌꦠꦁ ꦢ꧀ꦮꦪꦁ ꦱꦤ꧀ꦣꦴꦪ ꦮꦸꦠ꧀ꦠꦁ, ꦪꦡꦴ ꦄꦫꦹꦥꦁ ꦄꦫꦹꦥꦱ꧀ꦱ, ꦌꦮꦁ ꦫꦹꦥꦩ꧀ꦥꦶ ꦫꦹꦥꦱ꧀ꦱ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦺꦴ ꦤ ꦲꦺꦴꦠꦷꦠꦶ. ꦫꦹꦥꦴꦧ꧀ꦪꦴꦏꦠꦺꦴ ꦄꦫꦹꦥꦴꦧ꧀ꦪꦴꦏꦠꦱ꧀ꦱꦴꦠꦶ ꦆꦢꦁ ꦮꦠ꧀ꦡꦸꦑꦤ꧀ꦣꦺ ꦱꦤ꧀ꦣꦴꦪ ꦮꦸꦠ꧀ꦠꦁ. ꦄꦫꦹꦥꦴꦧ꧀ꦪꦴꦏꦠꦺꦴ ꦫꦹꦥꦴꦧ꧀ꦪꦴꦏꦠꦱ꧀ꦱꦴꦠꦶ ꦆꦢꦁ ꦥꦤ ꦕꦶꦠ꧀ꦠꦱꦩꦸꦛ꧀ꦜꦴꦤꦫꦹꦥꦚ꧀ꦕꦴꦠꦶ ꦠꦺꦱꦁ ꦌꦏꦤ꧀ꦠꦶꦏꦺꦴ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦨꦴꦮꦺꦴꦠꦶ ꦄꦴꦲ ‘‘ꦱꦲꦗꦴꦠ…ꦥꦺ… ꦲꦺꦴꦠꦶꦪꦺꦮꦴ’’ꦠꦶ. ꦱꦲꦗꦴꦠꦴꦲꦴꦫꦶꦤ꧀ꦢ꧀ꦫꦶꦪꦮꦱꦺꦤꦴꦠꦶ ꦱꦲꦗꦴꦠꦄꦫꦹꦥꦴꦲꦴꦫꦶꦤ꧀ꦢ꧀ꦫꦶꦪꦮꦱꦺꦤ.

꧕꧔꧖. ꦌꦏꦩꦹꦭꦏꦺꦏꦴꦮꦱꦴꦤꦴ ꦄꦤꦤ꧀ꦠꦫꦥꦏꦠꦹꦥꦤꦶꦱ꧀ꦱꦪꦮꦱꦺꦤ ꦭꦧ꧀ꦨꦤ꧀ꦠꦷꦠꦶ ꦆꦢꦁ ꦪꦡꦴꦫꦲꦮꦱꦺꦤ ꦮꦸꦠ꧀ꦠꦤ꧀ꦠꦶ ꦠꦁ ꦪꦡꦴꦫꦲꦁ ꦥꦛꦶꦏ꧀ꦑꦺꦥꦴꦥꦛꦶꦏ꧀ꦑꦺꦥꦮꦱꦺꦤꦥꦶ ꦢꦱ꧀ꦱꦺꦠꦧ꧀ꦧꦤ꧀ꦠꦶ ‘‘ꦄꦠ꧀ꦡꦶꦥꦕ꧀ꦕꦪꦺ ꦥꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦥꦸꦫꦶꦩꦺꦱꦹꦠꦶ ꦤꦴꦫꦩ꧀ꦩꦟꦴꦢꦷꦱꦸ. ꦤꦮꦴꦠꦶ ꦌꦏꦩꦹꦭꦏꦴꦮꦱꦴꦤꦴ ꦤꦮ. ꦢ꧀ꦮꦺꦪꦺꦮꦴꦠꦶ ‘‘ꦏꦸꦱꦭꦺꦴ ꦣꦩ꧀ꦩꦺꦴ ꦄꦧ꧀ꦪꦴꦏꦠꦱ꧀ꦱ, ꦄꦏꦸꦱꦭꦺꦴ ꦣꦩ꧀ꦩꦺꦴ ꦄꦧ꧀ꦪꦴꦏꦠꦱ꧀ꦱꦴ’’ꦠꦶ ꦆꦩꦺ ꦢ꧀ꦮꦺꦪꦺꦮ.

ꦥꦕ꧀ꦕꦤꦷꦪꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦄꦤꦸꦭꦺꦴꦩꦥꦕ꧀ꦕꦤꦷꦪꦮꦟ꧀ꦟꦤꦴ

꧕꧕꧐. ꦆꦩꦺꦲꦺꦮꦴꦠꦶ ‘‘ꦏꦸꦱꦭꦺꦴ ꦏꦸꦱꦭꦱ꧀ꦱ, ꦄꦏꦸꦱꦭꦺꦴ ꦄꦏꦸꦱꦭꦱ꧀ꦱꦴ’’ꦠꦶ ꦆꦩꦺꦲꦶ ꦌꦮ ꦱꦩꦴꦤꦴ ꦲꦺꦴꦤ꧀ꦠꦶ ꦏꦸꦱꦭꦴꦢꦶꦠꦴꦱꦴꦩꦚ꧀ꦚꦺꦤ. ꦠꦺꦤ ꦮꦸꦠ꧀ꦠꦁ ‘‘ꦄꦠ꧀ꦡꦴꦨꦴꦮꦠꦺꦴ ꦥꦤ ꦤ ꦄꦤꦸꦫꦹꦥꦴ’’ꦠꦶ. ‘‘ꦏꦸꦱꦭꦺꦴ ꦏꦸꦱꦭꦱ꧀ꦱꦴ’’ꦠꦶꦄꦴꦢꦶꦤꦴ ꦱꦠꦶꦥꦶ ꦈꦢ꧀ꦢꦺꦱꦠꦺꦴ ꦱꦴꦩꦚ꧀ꦚꦺ ꦪꦺꦨꦸꦪ꧀ꦪꦺꦤ ꦱꦶꦪꦴ ꦮꦶꦨꦔ꧀ꦒꦺ ꦮꦶꦱꦺꦱꦺꦴꦠꦶ ꦄꦴꦲ ‘‘ꦪꦡꦴꦪꦺꦴꦒꦁ ꦤꦶꦢ꧀ꦢꦺꦱꦠꦺꦴ ꦕꦴ’’ꦠꦶ.

꧕꧕꧑. ꦲꦺꦠꦸꦤꦴꦩꦤ꧀ꦠꦶ ꦲꦺꦠꦸ ꦕ ꦠꦁ ꦤꦴꦩꦚ꧀ꦕꦴꦠꦶ ꦲꦺꦠꦸꦤꦴꦩꦁ. ꦥꦕ꧀ꦕꦪꦤ꧀ꦠꦶ ꦠꦩꦺꦮ ꦥꦕ꧀ꦕꦪꦨꦹꦠꦁ ꦱꦤ꧀ꦣꦴꦪꦴꦠꦶ ꦪꦺꦴꦗꦤꦴ.

꧕꧕꧒. ꦢ꧀ꦮꦶꦤ꧀ꦤꦩ꧀ꦥꦶ ꦄꦣꦶꦥꦠꦷꦤꦤ꧀ꦠꦶ ꦱꦲꦗꦴꦠꦴꦫꦩ꧀ꦩꦟꦴꦣꦶꦥꦠꦷꦤꦁ ꦮꦱꦺꦤ, ꦠꦁ ‘‘ꦏꦸꦱꦭꦁ ꦏꦸꦱꦭꦱ꧀ꦱ ꦱꦲꦗꦴꦠꦠꦺꦴ ꦕꦺꦮ ꦄꦴꦫꦩ꧀ꦩꦟꦠꦺꦴ ꦕꦴ’’ꦠꦶꦄꦴꦢꦶꦤꦴ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦤꦴꦫꦩ꧀ꦩꦟꦺ ꦱꦠ꧀ꦠꦴꦠꦶ ꦱꦲꦗꦴꦠꦴꦣꦶꦥꦠꦶꦱ꧀ꦱ ꦮꦱꦺꦤ ꦮꦸꦠ꧀ꦠꦁ, ꦤ ꦱꦲꦗꦴꦠꦺ ꦱꦠ꧀ꦠꦴꦠꦶ ꦄꦴꦫꦩ꧀ꦩꦟꦴꦣꦶꦥꦠꦶꦱ꧀ꦱ ꦮꦱꦺꦤ ꦮꦸꦠ꧀ꦠꦤ꧀ꦠꦶ ꦪꦺꦴꦗꦤꦴ. ꦌꦮꦤ꧀ꦠꦶ ꦪꦡꦴ ꦄꦣꦶꦥꦠꦶꦩ꧀ꦲꦶ ꦮꦸꦠ꧀ꦠꦁ, ꦌꦮꦁ ꦱꦧ꧀ꦧꦠ꧀ꦡ ꦱꦧ꧀ꦧꦥꦕ꧀ꦕꦪꦺꦱꦸ. ‘‘ꦠꦱ꧀ꦩꦶꦁ ꦠꦱ꧀ꦩꦶꦁ…ꦥꦺ… ꦈꦢ꧀ꦣꦫꦶꦠꦧ꧀ꦧꦴ’’ꦠꦶ ꦮꦠ꧀ꦮꦴ ꦠꦱ꧀ꦱ ꦒꦟꦤꦸꦢ꧀ꦣꦴꦫꦱ꧀ꦱ ꦱꦸꦏꦫꦠꦁ ꦈꦥꦴꦪꦚ꧀ꦕ ꦢꦱ꧀ꦱꦺꦤ꧀ꦠꦺꦴ ‘‘ꦄꦤꦸꦭꦺꦴꦩꦺ…ꦥꦺ… ꦮꦶꦚ꧀ꦚꦴꦠꦸ’’ꦤ꧀ꦠꦶ ꦄꦴꦲ.

ꦄꦤꦸꦭꦺꦴꦩꦥꦕ꧀ꦕꦤꦷꦪꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦥꦕ꧀ꦕꦤꦷꦪꦴꦤꦸꦭꦺꦴꦩꦮꦟ꧀ꦟꦤꦴ

꧖꧓꧑. ꦥꦫꦶꦲꦴꦥꦤꦒꦟꦤꦴꦪꦴꦠꦶ ꦥꦫꦶꦲꦴꦥꦺꦠꦧ꧀ꦧꦒꦟꦤꦴꦪ ꦱꦩꦴꦤꦠ꧀ꦠꦚ꧀ꦕ ꦤ ꦌꦏꦤ꧀ꦠꦶꦏꦁ ꦈꦴꦤꦠꦩꦨꦴꦮꦱ꧀ꦱꦥꦶ ꦱꦩ꧀ꦨꦮꦠꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦠꦺꦤꦴꦲ ‘‘ꦤꦲꦺꦠꦸꦤꦴꦫꦩ꧀ꦩꦟꦢꦸꦏꦱ꧀ꦱꦴ’’ꦠꦶꦄꦴꦢꦶ. ꦠꦠ꧀ꦡ ꦱꦢ꧀ꦣꦶꦁ ꦪꦺꦴꦗꦶꦪꦩꦴꦤꦺꦤ ꦈꦴꦤꦠꦫꦒꦟꦤꦺꦤ ꦄꦣꦶꦥꦠꦶꦥꦕ꧀ꦕꦪꦺꦤ ꦥꦫꦶꦲꦷꦤꦴꦥꦷꦠꦶ ꦪꦺꦴꦗꦤꦴ. ꦱꦢ꧀ꦣꦶꦁ ꦥꦫꦶꦲꦷꦤꦴꦥꦷꦠꦶ ꦮꦴ ꦆꦩꦱ꧀ꦩꦶꦁ ꦥꦏ꧀ꦑꦺ ‘‘ꦄꦣꦶꦥꦠꦶꦥꦕ꧀ꦕꦪꦺꦤꦴ’’ꦠꦶ ꦆꦠ꧀ꦡꦩ꧀ꦨꦹꦠꦭꦏ꧀ꦑꦟꦺ ꦏꦫꦟꦮꦕꦤꦁ. ꦌꦠꦤ꧀ꦠꦶ ꦭꦏ꧀ꦑꦟꦁ.

ꦄꦛ꧀ꦜꦴꦤꦤ꧀ꦠꦶ ꦄꦤꦸꦭꦺꦴꦩꦠꦺꦴ ꦄꦛ꧀ꦜꦴꦤꦁ ꦄꦠꦶꦛ꧀ꦜꦤꦁ. ꦠꦶꦛ꧀ꦜꦤ꧀ꦠꦷꦠꦶ ꦄꦤꦸꦭꦺꦴꦩꦠꦺꦴꦠꦶ ꦪꦺꦴꦗꦤꦴ. ꦠꦺꦱꦤ꧀ꦠꦶ ꦲꦺꦠꦸꦄꦴꦢꦷꦤꦁ. ꦆꦠꦫꦺꦱꦹꦠꦶ ꦪꦴꦢꦶꦱꦴ ꦄꦣꦶꦥ꧀ꦥꦺꦠꦴ, ꦠꦺ ꦢꦱ꧀ꦱꦺꦠꦸꦁ ‘‘ꦄꦣꦶꦥꦠꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦆꦩꦴꦤꦶ ꦢ꧀ꦮꦺꦠꦶ ‘‘ꦏꦸꦱꦭꦴꦧ꧀ꦪꦴꦏꦠꦴ ꦄꦧ꧀ꦪꦴꦏꦠꦱ꧀ꦱ, ꦄꦏꦸꦱꦭꦴꦄꦧ꧀ꦪꦴꦏꦠꦴ ꦄꦧ꧀ꦪꦴꦏꦠꦱ꧀ꦱꦴ’’ꦠꦶ ꦆꦩꦴꦤꦶ ꦕ ꦢ꧀ꦮꦺ.

ꦤꦲꦺꦠꦸꦩꦹꦭꦏꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.