꧒꧒-꧒꧓-꧒꧔. ꦤꦠ꧀ꦡꦶꦮꦶꦒꦠꦄꦮꦶꦒꦠꦥꦕ꧀ꦕꦪꦤꦶꦢ꧀ꦢꦺꦱꦮꦟ꧀ꦟꦤꦴ

꧒꧒-꧒꧓. ꦌꦠ꧀ꦡꦴꦠꦶ ꦤꦠ꧀ꦡꦶꦥꦕ꧀ꦕꦪꦺ. ꦤꦴꦤꦤ꧀ꦠꦶ ꦤꦴꦤꦠ꧀ꦠꦁ. ꦌꦠꦺꦤꦴꦠꦶ ꦄꦤꦤ꧀ꦠꦫꦥꦕ꧀ꦕꦪꦠꦺꦴ ꦤꦠ꧀ꦡꦶꦥꦕ꧀ꦕꦪꦱ꧀ꦱ ꦮꦶꦱꦺꦱꦩꦠ꧀ꦠꦢꦷꦥꦤꦺꦤ ‘‘ꦥꦕ꧀ꦕꦪꦭꦏ꧀ꦑꦟꦩꦺꦮ ꦲꦺꦠ꧀ꦡ ꦤꦴꦤ’’ꦤ꧀ꦠꦶ ꦆꦩꦶꦤꦴ ꦮꦕꦤꦺꦤ. ꦄꦠ꧀ꦡꦺꦴꦠꦶ ꦣꦩ꧀ꦩꦺꦴ. ꦧ꧀ꦪꦚ꧀ꦗꦤꦱꦔ꧀ꦒꦲꦶꦠꦺꦠꦶ ‘‘ꦤꦠ꧀ꦡꦶꦥꦕ꧀ꦕꦪꦺꦴ ꦮꦶꦒꦠꦥꦕ꧀ꦕꦪꦺꦴ’’ꦠꦶ ꦌꦮꦩꦴꦢꦶꦧ꧀ꦪꦚ꧀ꦗꦤꦺꦤ ꦱꦔ꧀ꦒꦲꦶꦠꦺ. ꦥꦕ꧀ꦕꦪꦭꦏ꧀ꦑꦟꦩꦠ꧀ꦠꦺꦠꦶ ꦌꦠ꧀ꦡ ꦥꦮꦠ꧀ꦠꦶꦎꦏꦴꦱꦢꦴꦤꦺꦤ ꦈꦥꦏꦴꦫꦏꦴ ꦄꦫꦹꦥꦣꦩ꧀ꦩꦴ, ꦮꦶꦒꦠꦨꦴꦮꦺꦤ ꦈꦥꦏꦴꦫꦏꦴꦠꦶ ꦌꦮꦩꦴꦢꦶꦏꦺ ꦥꦕ꧀ꦕꦪꦴꦤꦁ ꦭꦏ꧀ꦑꦟꦩꦠ꧀ꦠꦺ.

ꦤꦠ꧀ꦡꦶꦮꦶꦒꦠꦄꦮꦶꦒꦠꦥꦕ꧀ꦕꦪꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦥꦕ꧀ꦕꦪꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦥꦕ꧀ꦕꦪꦤꦶꦢ꧀ꦢꦺꦱꦥꦏꦶꦟ꧀ꦟꦏꦮꦶꦤꦶꦕ꧀ꦖꦪꦏꦡꦴꦮꦟ꧀ꦟꦤꦴ

ꦄꦴꦢꦶꦩꦥꦴꦜꦺꦴꦠꦶ ꦥꦸꦫꦶꦩꦥꦴꦜꦺꦴ. ꦠꦡꦴ ꦕ ꦱꦠꦷꦠꦶ ꦢꦺꦴꦱꦱ꧀ꦱꦥꦶ ꦱꦠ꧀ꦠꦫꦱꦲꦶ ꦥꦕ꧀ꦕꦪꦺꦲꦶ ꦥꦕ꧀ꦕꦪꦨꦴꦮꦺ ꦱꦠꦶ. ꦄꦣꦶꦥꦠꦶꦥꦕ꧀ꦕꦪꦨꦴꦮꦺꦴꦥꦶꦱ꧀ꦱ ꦄꦤꦸꦚ꧀ꦚꦴꦠꦺꦴ ꦲꦺꦴꦠꦷꦠꦶ ꦄꦴꦲ ‘‘ꦢꦺꦴꦱꦱ꧀ꦱꦥꦶ ꦒꦫꦸꦏꦫꦟꦁ ꦥꦴꦭ꦳ꦶꦪꦁ ꦮꦠ꧀ꦠꦧ꧀ꦧꦁ ꦱꦶꦪꦴ’’ꦠꦶ. ‘‘ꦱꦺꦱꦴꦤ’’ꦤ꧀ꦠꦶ ꦮꦕꦤꦺꦤꦺꦮ ꦤꦶꦮꦴꦫꦶꦠꦺꦴꦠꦶ ꦏꦢꦴꦕꦶ ꦄꦴꦱꦔ꧀ꦏꦺꦪ꧀ꦪꦴꦠꦶ ꦠꦁꦤꦶꦮꦠ꧀ꦠꦤꦠ꧀ꦡꦩꦴꦲ ‘‘ꦤ ꦕ ꦱꦺꦱꦴꦤ’’ꦤ꧀ꦠꦶꦄꦴꦢꦶ. ꦥꦸꦫꦺꦗꦴꦠꦴꦢꦷꦲꦷꦠꦶ ꦥꦸꦫꦺꦗꦴꦠꦏꦩ꧀ꦩꦴꦲꦴꦫꦙꦴꦤꦶꦤ꧀ꦢ꧀ꦫꦶꦪꦩꦒ꧀ꦒꦮꦶꦥꦴꦏꦥꦕ꧀ꦕꦪꦺꦲꦶ. ꦠꦤ꧀ꦤꦶꦮꦴꦫꦟꦠ꧀ꦡꦤ꧀ꦠꦶ ꦠꦱ꧀ꦱ ꦪꦡꦴꦮꦸꦠ꧀ꦠꦢꦺꦴꦱꦱ꧀ꦱ ꦤꦶꦮꦴꦫꦟꦠ꧀ꦡꦁ. ꦮꦶꦱꦸꦚ꧀ꦕ ꦄꦒ꧀ꦒꦲꦺꦠ꧀ꦮꦴꦠꦶ ꦭꦺꦴꦨꦩꦺꦴꦲꦴ ꦮꦶꦥꦴꦏꦥꦕ꧀ꦕꦪꦴꦥꦶ ꦤ ꦲꦺꦴꦤ꧀ꦠꦶ, ꦠꦡꦴ ꦢꦺꦴꦱꦺꦴꦠꦶ ꦌꦮꦁ ꦮꦶꦱꦸꦚ꧀ꦕ ꦄꦒ꧀ꦒꦲꦺꦠ꧀ꦮꦴ. ꦦꦺꦴꦛ꧀ꦜꦧ꧀ꦧꦴꦪꦠꦤꦁ ꦏꦴꦪꦮꦶꦚ꧀ꦚꦴꦟꦣꦴꦠꦸꦪꦴ ꦄꦴꦫꦩ꧀ꦩꦟꦴꦢꦶꦥꦕ꧀ꦕꦪꦺꦴ ꦲꦺꦴꦤ꧀ꦠꦁꦪꦺꦮ ꦥꦡꦮꦷꦄꦴꦢꦶꦱꦨꦴꦮꦠ꧀ꦠꦴ ꦄꦠ꧀ꦠꦤꦴ ꦱꦲꦗꦴꦠꦴꦤꦁ ꦱꦲꦗꦴꦠꦴꦢꦶꦥꦕ꧀ꦕꦪꦴ ꦲꦺꦴꦤ꧀ꦠꦶꦪꦺꦮꦴꦠꦶ ꦮꦸꦠ꧀ꦠꦁ ‘‘ꦦꦺꦴꦛ꧀ꦜꦧ꧀ꦧꦴꦪꦠꦤꦱ꧀ꦱ ꦱꦲꦗꦴꦠꦴꦢꦶꦥꦕ꧀ꦕꦪꦨꦴꦮꦁ ꦢꦱ꧀ꦱꦺꦠꦷ’’ꦠꦶ. ‘‘ꦱꦧ꧀ꦧꦣꦩ꧀ꦩꦴꦤ’’ꦤ꧀ꦠꦶ ‘‘ꦱꦧ꧀ꦧꦺ ꦣꦩ꧀ꦩꦴ ꦩꦤꦺꦴꦮꦶꦚ꧀ꦚꦴꦟꦣꦴꦠꦸꦪꦴ ꦠꦁꦱꦩ꧀ꦥꦪꦸꦠ꧀ꦠꦏꦴꦤꦚ꧀ꦕ ꦣꦩ꧀ꦩꦴꦤꦁ ꦄꦴꦫꦩ꧀ꦩꦟꦥꦕ꧀ꦕꦪꦺꦤ ꦥꦕ꧀ꦕꦪꦺꦴ’’ꦠꦶ ꦌꦠ꧀ꦡ ꦮꦸꦠ꧀ꦠꦺ ꦱꦧ꧀ꦧꦣꦩ꧀ꦩꦺ ꦱꦤ꧀ꦣꦴꦪꦴꦲ ‘‘ꦱꦧ꧀ꦧꦣꦩ꧀ꦩꦴꦤꦁ ꦪꦡꦴꦪꦺꦴꦒꦁ ꦲꦺꦠꦴꦢꦶꦥꦕ꧀ꦕꦪꦨꦴꦮꦁ ꦢꦱ꧀ꦱꦺꦠꦷ’’ꦠꦶ. ꦤ ꦲꦶ ꦌꦠꦁ…ꦥꦺ… ꦨꦴꦮꦢꦱ꧀ꦱꦤꦁ, ꦄꦡ ꦑꦺꦴ ꦌꦏꦣꦩ꧀ꦩꦱ꧀ꦱ ꦄꦤꦺꦏꦥꦕ꧀ꦕꦪꦨꦴꦮꦢꦱ꧀ꦱꦤꦁ, ꦠꦱ꧀ꦩꦴ ‘‘ꦌꦠꦺꦤ ꦦꦺꦴꦛ꧀ꦜꦧ꧀ꦧꦴꦪꦠꦤꦱ꧀ꦱꦴ’’ꦠꦶꦄꦴꦢꦶ ꦮꦸꦠ꧀ꦠꦤ꧀ꦠꦶ ꦄꦣꦶꦥ꧀ꦥꦴꦪꦺꦴ. ꦫꦹꦥꦴꦢꦷꦤꦤ꧀ꦠꦶ ꦫꦹꦥꦴꦪꦠꦤꦴꦢꦷꦤꦁ.

ꦨꦺꦢꦴꦠꦶ ꦮꦶꦱꦺꦱꦴ. ꦨꦺꦢꦁ ꦄꦤꦴꦩꦱꦶꦠ꧀ꦮꦴꦠꦶ ꦕꦏ꧀ꦑꦸꦮꦶꦚ꧀ꦚꦴꦟꦣꦴꦠꦸꦄꦴꦢꦶꦮꦶꦱꦺꦱꦁ ꦄꦒ꧀ꦒꦲꦺꦠ꧀ꦮꦴ. ꦠꦺ ꦌꦮꦴꦠꦶ ꦪꦡꦴꦮꦸꦠ꧀ꦠꦮꦶꦱꦺꦱꦴꦤꦁ ꦱꦴꦩꦚ꧀ꦚꦨꦹꦠꦺ ꦑꦤ꧀ꦣꦺ ꦌꦮ. ꦪꦁ ꦱꦤ꧀ꦣꦴꦪ ‘‘ꦌꦮꦁ ꦤ ꦱꦏ꧀ꦏꦴ ꦮꦠ꧀ꦠꦸ’’ꦤ꧀ꦠꦶ ꦮꦸꦠ꧀ꦠꦁ, ꦠꦁ ꦮꦶꦨꦴꦮꦺꦠꦸꦁ ‘‘ꦤ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦥꦛ꧀ꦜꦴꦤꦱꦁꦮꦟ꧀ꦟꦤꦴ ꦲꦺꦱꦴꦠꦶ ꦌꦠꦺꦤ ꦱꦸꦠ꧀ꦠꦺ ꦮꦸꦠ꧀ꦠꦥꦫꦶꦪꦴꦪꦩꦒ꧀ꦒꦨꦴꦮꦺꦤꦺꦠ꧀ꦡ ꦤ ꦱꦏ꧀ꦏꦴ ꦩꦶꦕ꧀ꦖꦴꦮꦴꦕꦴꦢꦷꦤꦁ ꦩꦒ꧀ꦒꦥꦕ꧀ꦕꦪꦁ ꦮꦠ꧀ꦠꦸꦤ꧀ꦠꦶ ꦢꦱ꧀ꦱꦺꦠꦶ. ꦱꦺꦱꦥꦕ꧀ꦕꦪꦨꦴꦮꦺꦴꦠꦶ ꦩꦒ꧀ꦒꦥꦕ꧀ꦕꦪꦁ ꦜꦥꦺꦠ꧀ꦮꦴ ꦪꦡꦴꦮꦸꦠ꧀ꦠꦺꦲꦶ ꦱꦺꦱꦺꦲꦶ ꦄꦛ꧀ꦜꦴꦫꦱꦲꦶ ꦥꦕ꧀ꦕꦪꦺꦲꦶ ꦥꦕ꧀ꦕꦪꦨꦴꦮꦺꦴ. ꦄꦣꦶꦥꦠꦶꦥꦕ꧀ꦕꦪꦺꦴ ꦤ ꦲꦺꦴꦠꦷꦠꦶ ꦄꦴꦫꦩ꧀ꦩꦟꦴꦣꦶꦥꦠꦶꦥꦕ꧀ꦕꦪꦺꦴ ꦤ ꦲꦺꦴꦠꦶ. ꦠꦤ꧀ꦠꦶ ꦮꦶꦕꦶꦏꦶꦕ꧀ꦖꦁ. ꦠꦠ꧀ꦡꦴꦠꦶ ꦪꦡꦴꦮꦸꦠ꧀ꦠꦺꦱꦸ ꦄꦲꦶꦫꦶꦏꦴꦢꦷꦱꦸ.

ꦢꦱꦣꦴ ꦥꦕ꧀ꦕꦪꦴ ꦲꦺꦴꦤ꧀ꦠꦶ, ꦥꦸꦤ ꦠꦡꦴ ꦲꦢꦪꦮꦠ꧀ꦡꦸꦤ꧀ꦠꦶ ꦆꦢꦁ ꦄꦠ꧀ꦡꦩꦠ꧀ꦠꦮꦕꦤꦁ. ꦥꦴꦜꦺꦴ ꦥꦤ ‘‘ꦲꦢꦪꦮꦠ꧀ꦡꦸ ꦠꦺꦱꦚ꧀ꦕꦺꦮ ꦮꦶꦥ꧀ꦥꦪꦸꦠ꧀ꦠꦱ꧀ꦱ ꦕ ꦮꦱꦺꦤ ꦢꦱꦣꦴ ꦥꦕ꧀ꦕꦪꦺꦴ ꦲꦺꦴꦠꦷ’’ꦠꦶ ꦮꦺꦢꦶꦠꦧ꧀ꦧꦺꦴ. ꦫꦹꦥꦱꦢ꧀ꦢꦒꦤ꧀ꦣꦫꦱꦴꦪꦠꦤꦩꦠ꧀ꦠꦩꦺꦮꦴꦠꦶ ꦆꦢꦁ ꦫꦹꦥꦴꦢꦷꦤꦁ ꦱꦲꦗꦴꦠꦥꦕ꧀ꦕꦪꦠꦴꦪ ꦮꦶꦪ ꦤꦶꦱ꧀ꦱꦪꦥꦕ꧀ꦕꦪꦠꦴꦪ ꦕ ꦄꦨꦴꦮꦠꦺꦴ, ꦥꦸꦫꦺꦗꦴꦠꦥꦕ꧀ꦕꦪꦠꦴꦪ ꦕ ꦨꦴꦮꦠꦺꦴ ꦮꦸꦠ꧀ꦠꦁ. ꦌꦠꦴꦤꦷꦠꦶ ꦪꦡꦴꦮꦸꦠ꧀ꦠꦴꦤꦶ ꦫꦹꦥꦱꦢ꧀ꦢꦒꦤ꧀ꦣꦫꦱꦴꦫꦩ꧀ꦩꦟꦴꦤꦶ. ꦱꦧ꧀ꦧꦴꦠꦶꦏ꧀ꦏꦤ꧀ꦠꦥꦕ꧀ꦕꦪꦴꦥꦺꦏ꧀ꦑꦴꦠꦶ ‘‘ꦌꦏꦣꦩ꧀ꦩꦱ꧀ꦱ ꦄꦤꦺꦏꦥꦕ꧀ꦕꦪꦨꦴꦮꦠꦺꦴ’’ꦠꦶ ꦌꦠꦱ꧀ꦩꦶꦁ ꦮꦶꦕꦴꦫꦺ ꦲꦺꦠꦸꦄꦴꦢꦶꦄꦠꦶꦏ꧀ꦏꦤ꧀ꦠꦥꦕ꧀ꦕꦪꦴꦥꦺꦏ꧀ꦑꦴ ꦌꦠꦺꦱꦁ ꦫꦹꦥꦴꦢꦷꦤꦁ ꦄꦥꦸꦧ꧀ꦧꦠꦴ ꦤꦠ꧀ꦡꦶ, ꦄꦡ ꦑꦺꦴ ꦄꦴꦫꦩ꧀ꦩꦟꦄꦴꦫꦩ꧀ꦩꦟꦴꦣꦶꦥꦠꦶꦄꦴꦫꦩ꧀ꦩꦟꦹꦥꦤꦶꦱ꧀ꦱꦪꦥꦕ꧀ꦕꦪꦴꦥꦺꦏ꧀ꦑꦴ. ꦤ ꦲꦶ ꦫꦹꦥꦴꦢꦷꦤꦶ ꦲꦺꦠꦸꦱꦲꦗꦴꦠꦴꦣꦶꦥꦠꦶꦄꦴꦢꦶꦮꦱꦺꦤ ꦥꦕ꧀ꦕꦪꦴ ꦲꦺꦴꦤ꧀ꦠꦷꦠꦶ. ꦠꦱ꧀ꦱꦴꦠꦶ ꦫꦹꦥꦗꦷꦮꦶꦠꦶꦤ꧀ꦢ꧀ꦫꦶꦪꦱ꧀ꦱ ꦥꦸꦫꦺꦗꦴꦠꦥꦕ꧀ꦕꦪꦨꦴꦮꦠꦺꦴ ꦄꦥꦸꦧ꧀ꦧꦠꦴ, ꦠꦱ꧀ꦩꦴ ꦠꦁ ꦌꦏꦹꦤꦮꦷꦱꦠꦶꦮꦶꦣꦺꦴ ꦥꦕ꧀ꦕꦪꦺꦴ ꦲꦺꦴꦠꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦱꦠ꧀ꦠꦣꦴ ꦥꦕ꧀ꦕꦪꦨꦴꦮꦺꦴ ꦪꦺꦴꦗꦺꦠꦧ꧀ꦧꦺꦴ, ꦤ ꦲꦶ ꦎꦗꦴ ꦥꦸꦫꦺꦗꦴꦠꦥꦕ꧀ꦕꦪꦺꦴ ꦤ ꦲꦺꦴꦠꦷꦠꦶ.

ꦄꦠ꧀ꦡꦺꦴꦠꦶ ꦮꦴ ꦲꦺꦠꦸꦄꦴꦢꦶꦣꦩ꧀ꦩꦴꦤꦁ ꦱꦨꦴꦮꦺꦴ ꦮꦺꦢꦶꦠꦧ꧀ꦧꦺꦴ. ꦱꦺꦴ ꦲꦶ ꦄꦠ꧀ꦠꦤꦺꦴ ꦥꦕ꧀ꦕꦪꦸꦥ꧀ꦥꦤ꧀ꦤꦺꦲꦶ ꦄꦫꦟꦷꦪꦠꦺꦴ ꦈꦥꦒꦤ꧀ꦠꦧ꧀ꦧꦠꦺꦴ, ꦚꦴꦟꦺꦤ ꦮꦴ ꦚꦴꦠꦧ꧀ꦧꦠꦺꦴ ‘‘ꦄꦠ꧀ꦡꦺꦴ’’ꦠꦶ ꦮꦸꦕ꧀ꦕꦠꦶ. ꦄꦴꦏꦴꦫꦺꦴꦠꦶ ꦠꦱ꧀ꦱꦺꦮ ꦥꦮꦠ꧀ꦠꦶꦄꦴꦏꦴꦫꦺꦴ, ꦪꦺꦤ ꦄꦠ꧀ꦠꦤꦺꦴ ꦥꦕ꧀ꦕꦪꦸꦥ꧀ꦥꦤ꧀ꦤꦴꦤꦁ ꦥꦕ꧀ꦕꦪꦨꦴꦮꦁ ꦈꦥꦒꦕ꧀ꦖꦠꦷꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦠꦁ ꦥꦤ ꦮꦶꦥ꧀ꦥꦪꦸꦠ꧀ꦠꦁ. ‘‘ꦱꦠ꧀ꦠꦲꦴꦏꦴꦫꦺꦲꦷ’’ꦠꦶ ꦥꦜꦴꦤꦱ꧀ꦱ ꦏꦴꦫꦟꦩꦴꦲ ‘‘ꦈꦏ꧀ꦏꦛ꧀ꦜꦥꦫꦶꦕ꧀ꦖꦺꦢꦺꦴ ꦲꦷ’’ꦠꦶꦄꦴꦢꦶꦤꦴ.

ꦪꦁ ꦏꦩ꧀ꦩꦥꦕ꧀ꦕꦪꦺꦴ…ꦥꦺ… ꦢꦛ꧀ꦜꦧ꧀ꦧꦁ ꦄꦴꦱꦺꦮꦤꦏꦩ꧀ꦩꦥꦕ꧀ꦕꦪꦴꦤꦁ ꦥꦕ꧀ꦕꦪꦸꦥ꧀ꦥꦤ꧀ꦤꦱ꧀ꦱ ꦄꦤꦤ꧀ꦠꦫꦛ꧀ꦜꦴꦤꦠꦴꦪ. ꦱꦲꦗꦴꦠꦩ꧀ꦥꦶ ꦲꦶ ꦄꦤꦤ꧀ꦠꦫꦩꦺꦮꦴꦠꦶ. ꦏꦺꦴꦕꦶ ꦥꦤꦺꦠ꧀ꦡꦴꦠꦶ ꦌꦠ꧀ꦡ ꦌꦠꦱ꧀ꦩꦶꦁ ꦥꦏꦠꦹꦥꦤꦶꦱ꧀ꦱꦪꦱꦩꦸꦢꦴꦪꦺ ꦏꦺꦴꦕꦶ ꦠꦢꦺꦏꦢꦺꦱꦨꦹꦠꦺꦴ ꦏꦩ꧀ꦩꦱꦨꦴꦮꦺꦴ ꦥꦏꦠꦹꦥꦤꦶꦱ꧀ꦱꦪꦺꦴꦠꦶ ꦄꦠ꧀ꦡꦺꦴ. ꦠꦠ꧀ꦡꦴꦠꦶ ‘‘ꦪꦢꦶꦢꦁ ꦄꦴꦫꦩ꧀ꦩꦟꦥꦸꦫꦺꦗꦴꦠꦺ ꦥꦤꦺꦠ꧀ꦡ ꦆꦤ꧀ꦢ꧀ꦫꦶꦪꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦠꦴ ꦤ ꦭꦧ꧀ꦨꦠꦷ’’ꦠꦶ ꦮꦸꦠ꧀ꦠꦁ, ꦠꦱ꧀ꦩꦶꦁ, ꦠꦱ꧀ꦩꦶꦁ ꦮꦴ ꦄꦴꦫꦩ꧀ꦩꦟꦥꦸꦫꦺꦗꦴꦠꦒ꧀ꦒꦲꦟꦺ. ꦮꦠ꧀ꦡꦸꦱ꧀ꦱ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦠꦴ ꦭꦧ꧀ꦨꦠꦷꦠꦶ ꦤ ꦮꦠ꧀ꦠꦧ꧀ꦧꦴ. ꦤ ꦲꦶ ꦄꦴꦫꦩ꧀ꦩꦟꦨꦹꦠꦁ ꦮꦠ꧀ꦡꦸ ꦮꦶꦥ꧀ꦥꦪꦸꦠ꧀ꦠꦥꦕ꧀ꦕꦪꦺꦴ ꦲꦺꦴꦠꦶ, ꦄꦡ ꦑꦺꦴ ꦤꦶꦱ꧀ꦱꦪꦨꦹꦠꦩꦺꦮꦴꦠꦶ. ꦆꦠꦺꦴ ꦈꦠ꧀ꦠꦫꦷꦠꦶ ꦌꦠ꧀ꦡ ‘‘ꦆꦠꦺꦴ’’ꦠꦶ ꦆꦢꦁ ꦥꦕ꧀ꦕꦴꦩꦱꦤꦁ ꦥꦸꦫꦺꦗꦴꦠꦁ ꦮꦴ ꦱꦤ꧀ꦣꦴꦪ ꦄꦴꦫꦩ꧀ꦩꦟꦥꦸꦫꦺꦗꦴꦠꦁ ꦮꦴ. ꦠꦠ꧀ꦡ ꦥꦜꦩꦤꦪꦁ ꦄꦥꦺꦏ꧀ꦑꦶꦠ꧀ꦮꦴ ꦮꦸꦠ꧀ꦠꦁ ‘‘ꦥꦸꦫꦺꦗꦴꦠꦠꦺꦴ ꦥꦫꦠꦺꦴꦥꦷ’’ꦠꦶ. ꦠꦺꦤ ꦏꦩ꧀ꦩꦴꦢꦶꦥꦕ꧀ꦕꦪꦺꦱꦸꦥꦶ ꦮꦏ꧀ꦑꦩꦴꦤꦺꦱꦸ ꦭꦧ꧀ꦨꦩꦴꦤꦴꦭꦧ꧀ꦨꦩꦴꦤꦁ ꦮꦺꦢꦶꦠꦧ꧀ꦧꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦢꦸꦠꦶꦪꦁ ꦥꦤ ꦤꦪꦁ ꦄꦤꦥꦺꦏ꧀ꦑꦶꦠ꧀ꦮꦴ ꦄꦛ꧀ꦜꦏꦡꦴꦪꦁ ꦄꦴꦒꦠꦮꦱꦺꦤ ꦮꦸꦠ꧀ꦠꦁ ‘‘ꦆꦠꦺꦴ ꦮꦴ ꦆꦤ꧀ꦢ꧀ꦫꦶꦪꦮꦶꦥ꧀ꦥꦪꦸꦠ꧀ꦠꦠꦺꦴ’’ꦠꦶ, ꦄꦠ꧀ꦠꦤꦴ ꦮꦸꦠ꧀ꦠꦤꦪꦺꦤ ꦥꦤ ‘‘ꦤꦶꦱ꧀ꦱꦪꦶꦤ꧀ꦢ꧀ꦫꦶꦪꦮꦶꦥ꧀ꦥꦪꦸꦠ꧀ꦠꦠꦺꦴ ꦮꦴ’’ꦠꦶ. ꦠꦠ꧀ꦡ ꦮꦠ꧀ꦠꦧ꧀ꦧꦁ ꦱꦪꦩꦺꦮꦴꦲ ‘‘ꦄꦴꦫꦩ꧀ꦩꦟꦴꦣꦶꦥꦠꦷ’’ꦠꦶꦄꦴꦢꦶ. ꦏꦩ꧀ꦩꦴꦢꦷꦱꦸ ꦭꦧ꧀ꦨꦩꦴꦤꦴꦭꦧ꧀ꦨꦩꦴꦤꦁ ꦤ ꦮꦏ꧀ꦑꦠꦶ ‘‘ꦆꦠꦺꦴ ꦈꦠ꧀ꦠꦫꦷ’’ꦠꦶꦄꦴꦢꦶꦤꦴ ꦥꦒꦺꦮ ꦄꦠꦶꦢꦺꦱꦱ꧀ꦱ ꦏꦠꦠ꧀ꦠꦴ, ꦠꦱ꧀ꦩꦴ ꦥꦸꦫꦶꦩꦺꦴꦪꦺꦮ ꦥꦸꦫꦺꦗꦴꦠꦠꦺꦴꦥꦷꦠꦶ ꦮꦸꦠ꧀ꦠꦄꦠ꧀ꦡꦺꦴꦪꦺꦮ ꦄꦣꦶꦥ꧀ꦥꦺꦠꦺꦴ.

‘‘ꦩꦒ꧀ꦒꦥꦕ꧀ꦕꦪꦠꦁ ꦄꦮꦶꦗꦲꦤ꧀ꦠꦺꦴꦮꦴ’’ꦠꦶ ꦆꦩꦶꦤꦴ ꦕ ꦩꦒ꧀ꦒꦥꦕ꧀ꦕꦪꦺꦴ ꦮꦸꦠ꧀ꦠꦺꦴꦠꦶ ‘‘ꦩꦒ꧀ꦒꦮꦗ꧀ꦗꦴꦤꦁ ꦤꦮꦤ꧀ꦤ’’ꦤ꧀ꦠꦶ ꦮꦸꦠ꧀ꦠꦁ ꦥꦕ꧀ꦖꦶꦩꦥꦴꦜꦺ, ꦥꦸꦫꦶꦩꦥꦴꦜꦺ ꦥꦤ ‘‘ꦩꦒ꧀ꦒꦥꦕ꧀ꦕꦪꦠꦁ ꦄꦮꦶꦗꦲꦤ꧀ꦠꦺꦴꦮꦴ’’ꦠꦶ ꦮꦸꦠ꧀ꦠꦠ꧀ꦠꦴ ꦌꦮ ꦩꦒ꧀ꦒꦥꦕ꧀ꦕꦪꦺꦤ ꦱꦢ꧀ꦣꦶꦁ ꦱꦲꦗꦴꦠꦴꦢꦶꦥꦕ꧀ꦕꦪꦴ ꦒꦲꦺꦠꦧ꧀ꦧꦴꦠꦶ ‘‘ꦢꦱꦤ꧀ꦤ’’ꦤ꧀ꦠꦶ ꦮꦸꦠ꧀ꦠꦁ. ꦠꦠ꧀ꦡ ꦥꦕ꧀ꦖꦶꦩꦥꦴꦜꦺ ‘‘ꦌꦏꦴꦢꦱꦲꦴꦏꦴꦫꦺꦲꦷ’’ꦠꦶ ꦮꦠ꧀ꦠꦧ꧀ꦧꦁ, ꦥꦸꦫꦶꦩꦥꦴꦜꦺ ‘‘ꦢ꧀ꦮꦴꦢꦱꦲꦷ’’ꦠꦶ.

ꦱꦩꦤꦤ꧀ꦠꦫꦤꦶꦫꦸꦢ꧀ꦣꦠꦴꦪ ꦄꦴꦫꦩ꧀ꦩꦟꦨꦴꦮꦺꦤ ꦕꦴꦠꦶ ꦮꦶꦗ꧀ꦗꦩꦴꦤꦩ꧀ꦥꦶ ꦮꦶꦱꦺꦱꦩꦤꦴꦩꦱꦶꦠ꧀ꦮꦴ ꦏꦺꦮꦭꦁ ꦱꦩꦤꦤ꧀ꦠꦫꦤꦶꦫꦸꦢ꧀ꦣꦠꦴꦪ ꦄꦴꦫꦩ꧀ꦩꦟꦨꦴꦮꦺꦤ, ꦤ ꦕ ꦱꦩꦤꦤ꧀ꦠꦫꦤꦶꦫꦸꦢ꧀ꦣꦠꦴꦄꦴꦫꦩ꧀ꦩꦟꦨꦴꦮꦱꦴꦩꦚ꧀ꦚꦺꦤꦴꦠꦶ ꦄꦠ꧀ꦡꦺꦴ. ‘‘ꦆꦩꦶꦤꦴ ꦈꦥꦴꦪꦺꦤꦴ’’ꦠꦶ ꦥꦕ꧀ꦕꦪꦱꦨꦴꦒꦠꦴꦢꦱ꧀ꦱꦤꦺꦤ ꦥꦕ꧀ꦕꦪꦮꦶꦱꦨꦴꦒꦠꦴꦢꦱ꧀ꦱꦤꦺꦤ ꦕ ꦮꦸꦠ꧀ꦠꦁ ꦥꦢꦢ꧀ꦮꦪꦁ ꦌꦏꦗ꧀ꦙꦁ ꦏꦠ꧀ꦮꦴ ꦥꦢꦸꦢ꧀ꦣꦴꦫꦺꦴ ꦏꦠꦺꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦲꦺꦠꦸꦄꦴꦢꦷꦤꦁ ꦱꦲꦗꦴꦠꦴꦤꦁ…ꦥꦺ… ꦪꦺꦴꦗꦺꦠꦧ꧀ꦧꦴ’’ꦠꦶ ꦄꦴꦲ. ꦲꦺꦠꦸꦄꦴꦫꦩ꧀ꦩꦟꦴꦢꦷꦤꦁ ꦱꦲꦗꦴꦠꦴꦱꦲꦗꦴꦠꦨꦴꦮꦺꦤ ꦄꦚ꧀ꦚꦩꦚ꧀ꦚꦮꦶꦱꦨꦴꦒꦠꦴꦠꦶ ꦪꦺꦴꦗꦤꦴ. ꦌꦮꦩꦴꦢꦶꦤꦴꦠꦶ ꦄꦴꦢꦶ-ꦱꦢ꧀ꦢꦺꦤ ꦥꦸꦫꦺꦗꦴꦠꦴꦤꦁ ꦕꦏ꧀ꦑꦴꦢꦷꦤꦁ ꦫꦹꦥꦴꦢꦷꦤꦚ꧀ꦕ ꦥꦸꦫꦺꦗꦴꦠꦨꦴꦮꦺꦤ ꦱꦨꦴꦒꦠꦴ, ꦥꦮꦠ꧀ꦠꦶꦪꦁ ꦮꦠ꧀ꦡꦸꦑꦤ꧀ꦣꦴꦢꦷꦤꦁ ꦥꦸꦫꦺꦗꦴꦠꦥꦕ꧀ꦖꦴꦗꦴꦠꦴꦤꦁ ꦥꦸꦫꦺꦗꦴꦠꦥꦕ꧀ꦖꦴꦗꦴꦠꦨꦴꦮꦺꦤ ꦮꦶꦱꦨꦴꦒꦠꦴꦠꦶ ꦌꦮꦩꦴꦢꦷꦤꦩ꧀ꦥꦶ ꦱꦔ꧀ꦒꦲꦺꦴ ꦢꦛ꧀ꦜꦧ꧀ꦧꦺꦴ. ꦲꦺꦠꦸꦤꦲꦺꦠꦸꦄꦴꦢꦶꦨꦴꦮꦠꦺꦴꦥꦶ ꦕꦺꦠ꧀ꦡ ꦪꦸꦒꦭ꦳ꦏꦠꦺꦴ ꦮꦶꦚ꧀ꦚꦴꦠꦧ꧀ꦧꦺꦴ ꦮꦶꦤꦶꦕ꧀ꦖꦪꦺꦴ. ꦲꦺꦠꦸꦥꦕ꧀ꦕꦪꦺꦴ ꦲꦶ ꦲꦺꦠꦸꦨꦴꦮꦺꦤ ꦥꦕ꧀ꦕꦪꦺꦴ, ꦆꦠꦫꦺ ꦠꦢꦚ꧀ꦚꦨꦴꦮꦺꦤ. ꦌꦮꦩꦶꦠꦫꦺꦱꦸꦥꦶ ꦪꦡꦴꦫꦲꦁ ꦪꦸꦒꦭ꦳ꦏꦠꦺꦴ ꦮꦺꦢꦶꦠꦧ꧀ꦧꦺꦴ.

ꦈꦨꦪꦥ꧀ꦥꦣꦴꦤꦠꦴꦠꦶ ꦗꦤꦤꦺꦴꦥꦠ꧀ꦡꦩ꧀ꦨꦤꦥ꧀ꦥꦣꦴꦤꦠꦴ. ꦜꦴꦤꦤ꧀ꦠꦶ ꦥꦢꦱ꧀ꦱ ꦄꦠ꧀ꦡꦮꦕꦤꦁ ꦏꦴꦫꦟꦨꦴꦮꦺꦴꦠꦶ ꦮꦶꦤꦴꦥꦶ ꦨꦴꦮꦥꦕ꧀ꦕꦪꦁ ꦨꦴꦮꦥꦕ꧀ꦕꦪꦱ꧀ꦱ ꦄꦠ꧀ꦡꦺꦴ ꦚꦴꦪꦠꦷꦠꦶ. ꦈꦥꦤꦶꦱ꧀ꦱꦪꦁ ꦨꦶꦤ꧀ꦢꦤ꧀ꦠꦺꦤꦴꦠꦶ ꦄꦤꦤ꧀ꦠꦫꦹꦥꦤꦶꦱ꧀ꦱꦪꦥꦏꦠꦹꦥꦤꦶꦱ꧀ꦱꦪꦮꦶꦨꦴꦒꦺꦤ ꦮꦶꦨꦗꦤ꧀ꦠꦺꦤ. ꦠꦪꦺꦴꦥꦶ ꦈꦥꦤꦶꦱ꧀ꦱꦪꦴ ꦮꦠ꧀ꦠꦧ꧀ꦧꦴ ꦈꦥꦤꦶꦱ꧀ꦱꦪꦮꦶꦨꦴꦒꦨꦴꦮꦠꦺꦴ. ꦈꦥꦤꦶꦱ꧀ꦱꦪꦒ꧀ꦒꦲꦟꦩꦺꦮ ꦏꦴꦠꦧ꧀ꦧꦁ ꦱꦴꦩꦚ꧀ꦚꦫꦹꦥꦺꦤ. ꦠꦠ꧀ꦡꦴꦠꦶ ꦌꦮꦩꦮꦛ꧀ꦜꦶꦠꦺ ꦄꦤꦤ꧀ꦠꦫꦹꦥꦤꦶꦱ꧀ꦱꦪꦥꦏꦠꦹꦥꦤꦶꦱ꧀ꦱꦪꦺꦴꦠꦶ ꦨꦶꦤ꧀ꦢꦤꦁ ꦮꦶꦨꦴꦒꦏꦫꦟꦁ ꦪꦢꦶ ꦥꦏꦠꦹꦥꦤꦶꦱ꧀ꦱꦪꦱ꧀ꦱ ꦫꦹꦥꦴꦤꦁ ꦥꦕ꧀ꦕꦪꦠ꧀ꦠꦴꦨꦴꦮꦢꦱ꧀ꦱꦤꦠ꧀ꦡꦁ, ꦤꦤꦸ ꦄꦴꦫꦩ꧀ꦩꦟꦹꦥꦤꦶꦱ꧀ꦱꦪꦄꦤꦤ꧀ꦠꦫꦹꦥꦤꦶꦱ꧀ꦱꦪꦴꦥꦶ ꦫꦹꦥꦴꦤꦁ ꦥꦕ꧀ꦕꦪꦴ ꦤ ꦲꦺꦴꦤ꧀ꦠꦶꦪꦺꦮꦴꦠꦶ? ꦱꦕ꧀ꦕꦁ ꦤ ꦲꦺꦴꦤ꧀ꦠꦶ, ꦠꦺ ꦥꦤ ꦢꦱ꧀ꦱꦶꦠꦤꦪꦴꦠꦶ ꦠꦢꦺꦏꦢꦺꦱꦺꦤ ꦆꦠꦫꦩ꧀ꦥꦶ ꦢꦱ꧀ꦱꦶꦠꦩꦺꦮ ꦲꦺꦴꦠꦷꦠꦶ ꦆꦩꦩꦠ꧀ꦡꦁ ꦢꦱ꧀ꦱꦺꦤ꧀ꦠꦺꦴ ‘‘ꦄꦴꦫꦩ꧀ꦩꦟꦁ…ꦥꦺ… ꦢꦛ꧀ꦜꦧ꧀ꦧ’’ꦤ꧀ꦠꦶ ꦄꦴꦲ. ꦠꦁꦱꦩꦴꦤꦒꦠꦶꦏꦠ꧀ꦠꦴꦠꦶ ꦠꦺꦲꦶ ꦄꦤꦤ꧀ꦠꦫꦴꦢꦷꦲꦶ ꦱꦩꦴꦤꦒꦠꦶꦏꦠ꧀ꦠꦴ ꦄꦫꦹꦥꦴꦤꦁꦪꦺꦮ ꦥꦕ꧀ꦕꦪꦨꦴꦮꦠꦺꦴ. ꦠꦤ꧀ꦠꦶ ꦥꦸꦫꦺꦗꦴꦠꦥꦕ꧀ꦕꦪꦁ. ꦠꦠ꧀ꦡꦴꦠꦶ ꦄꦤꦤ꧀ꦠꦫꦴꦢꦷꦱꦸ ꦥꦜꦶꦠ꧀ꦮꦴ.

ꦥꦕ꧀ꦕꦪꦤꦶꦢ꧀ꦢꦺꦱꦥꦏꦶꦟ꧀ꦟꦏꦮꦶꦤꦶꦕ꧀ꦖꦪꦏꦡꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.