꧒. ꦥꦮꦠ꧀ꦠꦶꦮꦴꦫꦮꦟ꧀ꦟꦤꦴ

꧑꧘꧖. ꦄꦚ꧀ꦚꦣꦩ꧀ꦩꦤꦶꦱ꧀ꦱꦪꦺꦤꦴꦠꦶ ‘‘ꦪꦺꦴ ꦠꦺꦱꦁ ꦫꦹꦥꦷꦤꦁ ꦣꦩ꧀ꦩꦴꦤꦁ ꦄꦴꦪꦸ ꦜꦶꦠꦷ’’ꦠꦶꦄꦴꦢꦶꦤꦴ (ꦣ. ꦱ. ꧖꧓꧔) ꦄꦚ꧀ꦚꦣꦩ꧀ꦩꦤꦶꦱ꧀ꦱꦪꦺꦤ ꦒꦲꦺꦠꦧ꧀ꦧꦁ. ꦥꦮꦠ꧀ꦠꦶꦚ꧀ꦕ ꦒꦲꦺꦠ꧀ꦮꦴ ꦒꦠꦺꦱꦸ ꦮꦶꦱ꧀ꦱꦗ꧀ꦗꦤꦺꦱꦸ, ꦕꦸꦠꦶꦥꦛꦶꦱꦤ꧀ꦣꦶꦪꦺꦴ ꦒꦲꦺꦠ꧀ꦮꦴ ꦒꦠꦺꦱꦸ ꦪꦺꦴꦗꦤꦴ ꦤ ꦭꦧ꧀ꦨꦠꦷꦠꦶ ꦄꦣꦶꦥ꧀ꦥꦴꦪꦺꦴ. ꦄꦭꦧ꧀ꦨꦩꦴꦤꦴ ꦕ ꦱꦸꦑꦢꦸꦏ꧀ꦑꦢꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦺꦲꦺꦮ ꦤ ꦭꦧ꧀ꦨꦠꦶ. ꦠꦁꦩꦹꦭꦏꦴ ꦕ ꦤꦪꦴꦠꦶ ꦱꦸꦑꦶꦤ꧀ꦢ꧀ꦫꦶꦪꦴꦢꦶꦩꦹꦭꦏꦴ ꦕ ꦤꦪꦴ. ꦠꦺꦲꦷꦠꦶ ꦱꦸꦑꦶꦤ꧀ꦢ꧀ꦫꦶꦪꦴꦢꦷꦲꦶ. ꦪꦺꦴꦗꦤꦴꦠꦶ ‘‘ꦥꦮꦠ꧀ꦠꦺ ꦱꦸꦑꦶꦤ꧀ꦢ꧀ꦫꦶꦪꦮꦶꦥ꧀ꦥꦪꦸꦠ꧀ꦠꦕꦶꦠ꧀ꦠꦱ꧀ꦱ ꦈꦥ꧀ꦥꦴꦢꦏ꧀ꦑꦟꦺ’’ꦠꦶꦄꦴꦢꦶꦤꦴ ꦈꦥ꧀ꦥꦗ꧀ꦗꦩꦴꦤꦺꦲꦶ ꦪꦺꦴꦗꦤꦴ. ꦠꦁꦩꦹꦭꦏꦴ ꦕ ꦠꦡꦴꦪꦺꦴꦗꦤꦴꦩꦹꦭꦨꦹꦠꦴ ꦕ ꦤꦪꦴ ꦗꦷꦮꦶꦠꦶꦤ꧀ꦢ꧀ꦫꦶꦪꦴꦢꦶꦩꦹꦭꦏꦴ ꦕ ꦤꦪꦴ. ꦥꦴꦏꦛꦴꦪꦺꦮꦴꦠꦶ ꦥꦴꦭ꦳ꦶꦒꦠꦶꦪꦴ ꦌꦮ ꦮꦶꦚ꧀ꦚꦴꦪꦩꦴꦤꦪꦺꦴꦗꦤꦠ꧀ꦠꦴ ꦱꦸꦮꦶꦚ꧀ꦚꦺꦪ꧀ꦪꦴ ꦌꦮ.

ꦠꦁ ꦮꦕꦤꦁ. ꦱꦺꦴꦩꦤꦱ꧀ꦱꦮꦶꦫꦲꦶꦠꦱꦕꦏ꧀ꦑꦸꦏꦥꦛꦶꦱꦤ꧀ꦣꦶꦤꦶꦢꦱ꧀ꦱꦤꦮꦱꦺꦤꦴꦠꦶ ꦱꦺꦴꦩꦤꦱ꧀ꦱꦮꦶꦫꦲꦶꦠꦱꦕꦏ꧀ꦑꦸꦏꦥꦛꦶꦱꦤ꧀ꦣꦶꦪꦺꦮ ꦤꦶꦢꦱ꧀ꦱꦤꦤ꧀ꦠꦶ ꦪꦺꦴꦗꦺꦠꦧ꧀ꦧꦁ. ꦏꦡꦁ ꦥꦤꦺꦠꦁ ꦗꦴꦤꦶꦠꦧ꧀ꦧꦁ ‘‘ꦤꦶꦢꦱ꧀ꦱꦤꦩꦠ꧀ꦠꦩꦺꦠꦁ, ꦤ ꦥꦤ ꦒꦟꦤꦥꦫꦶꦕ꧀ꦖꦶꦤ꧀ꦢꦤ’’ꦤ꧀ꦠꦶ ꦄꦴꦲ ‘‘ꦤ ꦲꦶ ꦕꦠꦸꦤ꧀ꦤꦁꦪꦺꦮꦴꦠꦶ ꦤꦶꦪꦩꦺꦴ ꦏꦠꦺꦴ’’ꦠꦶ. ꦠꦁꦱꦩꦴꦤꦭꦏ꧀ꦑꦟꦴꦠꦶ ꦠꦴꦪ ꦱꦕꦏ꧀ꦑꦸꦏꦥꦛꦶꦱꦤ꧀ꦣꦶꦠꦴꦪ ꦱꦩꦴꦤꦭꦏ꧀ꦑꦟꦴꦠꦶ ꦥꦫꦶꦠ꧀ꦠꦮꦶꦥꦴꦏꦒ꧀ꦒꦲꦟꦁ. ꦠꦠ꧀ꦡ ꦱꦱꦺꦴꦩꦤꦱ꧀ꦱꦥꦛꦶꦱꦤ꧀ꦣꦶꦪꦺꦴ ꦱꦤ꧀ꦣꦴꦪ ꦈꦥꦺꦏ꧀ꦑꦴꦥꦛꦶꦱꦤ꧀ꦣꦶꦪꦺꦴ ꦤꦶꦢꦱ꧀ꦱꦤꦨꦴꦮꦺꦤ ꦮꦸꦠ꧀ꦠꦴꦠꦶ ꦏꦺꦕꦶ. ꦥꦫꦶꦠ꧀ꦠꦮꦶꦥꦴꦏꦥꦛꦶꦱꦤ꧀ꦣꦶ ꦕ ꦏꦸꦱꦭꦮꦶꦥꦴꦏꦴꦲꦺꦠꦸꦏꦥꦛꦶꦱꦤ꧀ꦣꦶ ꦮꦺꦢꦶꦠꦧ꧀ꦧꦴ. ꦱꦴꦥꦶ ꦲꦶ ꦱꦕꦏ꧀ꦑꦸꦏꦴ ꦱꦶꦪꦴ. ꦠꦁꦱꦩꦴꦤꦭꦏ꧀ꦑꦟꦴꦠꦶ ꦮꦴ ꦠꦴꦪ ꦈꦥꦺꦏ꧀ꦑꦴꦱꦲꦒꦠꦴꦪ ꦱꦩꦴꦤꦭꦏ꧀ꦑꦟꦴ ꦪꦡꦴꦮꦸꦠ꧀ꦠꦄꦲꦺꦠꦸꦏꦥꦛꦶꦱꦤ꧀ꦣꦶ ꦕ ꦥꦚ꧀ꦕꦩꦗ꧀ꦙꦴꦤꦥꦛꦶꦱꦤ꧀ꦣꦶ ꦕ. ꦪꦢꦶ ꦌꦮꦁ ‘‘ꦕꦠꦸꦤ꧀ꦤ’’ꦤ꧀ꦠꦶ ꦏꦱ꧀ꦩꦴ ꦒꦟꦤꦥꦫꦶꦕ꧀ꦖꦺꦢꦺꦴꦠꦶ ꦄꦴꦲ ‘‘ꦏꦴꦩꦴꦮꦕꦫꦺ…ꦥꦺ… ꦤꦶꦢꦱ꧀ꦱꦤꦁ ꦏꦠ’’ꦤ꧀ꦠꦶ. ꦠꦺꦤꦴꦠꦶ ꦈꦥꦺꦏ꧀ꦑꦴꦱꦲꦒꦠꦩꦲꦴꦮꦶꦥꦴꦏꦤꦶꦢꦱ꧀ꦱꦤꦺꦤ, ꦪꦺꦲꦶ ꦱꦩꦴꦤꦠꦴꦪ ꦆꦩꦺ ꦤꦶꦢꦱ꧀ꦱꦤꦨꦴꦮꦺꦤ ꦮꦸꦠ꧀ꦠꦴ, ꦠꦺ ꦌꦏꦁꦱꦺꦤ ꦠꦁꦱꦨꦴꦮꦴ ꦌꦮꦴꦠꦶ ꦄꦪꦩꦺꦠ꧀ꦡ ꦄꦣꦶꦥ꧀ꦥꦴꦪꦺꦴ. ꦠꦺꦤꦴꦲ ‘‘ꦪꦡꦴ ꦱꦱꦺꦴꦩꦤꦱ꧀ꦱ…ꦥꦺ… ꦠꦺꦴ ꦲꦺꦴꦠꦷ’’ꦠꦶ.

ꦤꦤꦸ ꦕ ꦒꦧ꧀ꦨꦱꦺꦪ꧀ꦪꦏꦺꦱꦸ ꦄꦪꦩꦠ꧀ꦡꦺꦴ ꦌꦏꦁꦱꦠꦺꦴ ꦤ ꦭꦧ꧀ꦨꦠꦷꦠꦶ ꦄꦴꦱꦔ꧀ꦏꦁ ꦱꦤ꧀ꦣꦴꦪꦴꦲ ‘‘ꦒꦧ꧀ꦨꦱꦺꦪ꧀ꦪꦏꦴꦤꦚ꧀ꦕ…ꦥꦺ… ꦢꦱ꧀ꦱꦶꦠꦴ ꦲꦺꦴꦠꦷ’’ꦠꦶ. ꦠꦺꦤꦴꦲ ‘‘ꦱꦕꦏ꧀ꦑꦸꦏꦴꦤ’’ꦤ꧀ꦠꦶꦄꦴꦢꦶ. ꦠꦠ꧀ꦡ ꦪꦢꦶ ꦱꦲꦺꦠꦸꦏꦥꦛꦶꦱꦤ꧀ꦣꦶꦏꦴꦤꦁ ꦏꦴꦩꦴꦮꦕꦫꦴꦤꦁ ꦤꦶꦪꦩꦠꦺꦴ ꦱꦕꦏ꧀ꦑꦸꦏꦴꦢꦶꦨꦴꦮꦢꦱ꧀ꦱꦤꦁ ꦒꦧ꧀ꦨꦱꦺꦪ꧀ꦪꦏꦮꦱꦺꦤ ꦭꦧ꧀ꦨꦺꦪ꧀ꦪ, ꦪꦸꦠ꧀ꦠꦩꦺꦠꦁ ꦱꦶꦪꦴꦠꦶ ꦕꦺꦴꦢꦤꦁ ꦱꦤ꧀ꦣꦴꦪꦴꦲ ‘‘ꦒꦧ꧀ꦨꦱꦺꦪ꧀ꦪꦏꦺꦥꦶ ꦲꦷ’’ꦠꦶꦄꦴꦢꦶ. ꦠꦡꦴ ꦄꦴꦪꦠꦤꦪꦩꦏꦺ ꦢꦱ꧀ꦱꦶꦠꦤ꧀ꦠꦶ ꦆꦢꦁ ꦄꦴꦪꦠꦤꦪꦩꦏꦮꦟ꧀ꦟꦤꦴꦪꦁ ꦄꦠ꧀ꦠꦤꦴ ꦮꦸꦠ꧀ꦠꦁ ‘‘ꦌꦮꦚ꧀ꦕ ꦏꦠ꧀ꦮꦴ ꦆꦤ꧀ꦢ꧀ꦫꦶꦪꦪꦩꦏꦺ’’ꦠꦶꦄꦴꦢꦶꦮꦕꦤꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦠꦠ꧀ꦡ ꦲꦶ ꦱꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦸꦥ꧀ꦥꦴꦢꦏꦏꦩ꧀ꦩꦱ꧀ꦱ ꦌꦏꦤ꧀ꦠꦺꦤ ꦕꦏ꧀ꦑꦸꦤ꧀ꦢ꧀ꦫꦶꦪꦸꦥ꧀ꦥꦴꦢꦤꦠꦺꦴ ꦒꦧ꧀ꦨꦺꦥꦶ ꦪꦴꦮ ꦕꦏ꧀ꦑꦸꦤ꧀ꦢ꧀ꦫꦶꦪꦸꦥ꧀ꦥꦠ꧀ꦠꦶ, ꦠꦴꦮ ꦈꦥ꧀ꦥꦗ꧀ꦗꦩꦴꦤꦠꦴꦪ ‘‘ꦄꦨꦶꦤꦤ꧀ꦢꦶꦠꦧ꧀ꦧꦠ꧀ꦠꦴ’’ꦠꦶ ꦮꦸꦠ꧀ꦠꦁ. ꦱꦤ꧀ꦤꦶꦛ꧀ꦜꦴꦤꦺꦤ ꦱꦔ꧀ꦒꦲꦶꦠꦴꦤꦤ꧀ꦠꦶ ‘‘ꦪꦱ꧀ꦱ ꦮꦴ ꦥꦤ ꦱꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ ꦈꦥ꧀ꦥꦗ꧀ꦗꦠꦷ’’ꦠꦶ ꦌꦠꦺꦤ ꦱꦤ꧀ꦤꦶꦛ꧀ꦜꦴꦤꦺꦤ ꦱꦔ꧀ꦒꦲꦶꦠꦴꦤꦁ. ꦆꦠ꧀ꦡꦷꦤꦁ ꦄꦓꦴꦤꦏꦴꦤꦁ ꦈꦥꦥꦗ꧀ꦗꦤ꧀ꦠꦷꦤꦤ꧀ꦠꦶ ꦄꦴꦢꦷꦱꦹꦠꦶ ꦄꦴꦢꦶ-ꦱꦢ꧀ꦢꦺꦤ ‘‘ꦆꦠ꧀ꦡꦷꦤꦁ ꦄꦕꦏ꧀ꦑꦸꦏꦴꦤꦁ ꦈꦥꦥꦗ꧀ꦗꦤ꧀ꦠꦷꦤ’’ꦤ꧀ꦠꦶꦄꦴꦢꦶꦁ ꦱꦔ꧀ꦒꦟ꧀ꦲꦴꦠꦶ. ꦠꦺ ꦌꦮꦴꦠꦶ ꦒꦧ꧀ꦨꦱꦺꦪ꧀ꦪꦏꦴ ꦌꦮ.

ꦠꦁꦱꦩꦴꦤꦭꦏ꧀ꦑꦟꦤ꧀ꦠꦶ ꦱꦺꦴꦥꦺꦏ꧀ꦑꦄꦕꦏ꧀ꦑꦸꦏꦥꦛꦶꦱꦤ꧀ꦣꦶꦨꦴꦮꦺꦤ ꦱꦩꦴꦤꦭꦏ꧀ꦑꦟꦁ. ꦠꦠ꧀ꦡꦴꦠꦶ ꦄꦲꦺꦠꦸꦏꦥꦛꦶꦱꦤ꧀ꦣꦶꦕꦶꦠ꧀ꦠꦺ. ꦱꦩꦴꦣꦶꦭꦺꦱꦺꦴ ꦢꦸꦧ꧀ꦧꦭꦱꦩꦴꦣꦶ ꦪꦺꦴ ꦕꦶꦠ꧀ꦠꦛ꧀ꦜꦶꦠꦶꦩꦠ꧀ꦠꦺꦴ. ꦠꦱ꧀ꦩꦴꦠꦶ ꦪꦱ꧀ꦩꦴ ꦕꦶꦠ꧀ꦠꦛ꧀ꦜꦶꦠꦶ ꦮꦶꦪ ꦢꦸꦧ꧀ꦧꦭꦁ ꦮꦷꦫꦶꦪꦁ ꦤꦠ꧀ꦡꦶ, ꦪꦺꦴ ‘‘ꦮꦷꦫꦶꦪꦭꦺꦱꦺꦴ’’ꦠꦶ ꦮꦠ꧀ꦠꦧ꧀ꦧꦺꦴ, ꦠꦱ꧀ꦩꦴ, ꦭꦺꦱꦩꦠ꧀ꦠꦱ꧀ꦱꦥꦶ ꦮꦷꦫꦶꦪꦱ꧀ꦱ ꦄꦨꦴꦮꦴꦠꦶ ꦄꦠ꧀ꦡꦺꦴ. ꦄꦚ꧀ꦚꦺꦱꦹꦠꦶ ꦄꦲꦺꦠꦸꦏꦥꦛꦶꦱꦤ꧀ꦣꦶꦕꦶꦠ꧀ꦠꦠꦺꦴ ꦄꦚ꧀ꦚꦺꦱꦸ. ꦏꦺꦱꦸꦕꦷꦠꦶ ꦌꦏꦕ꧀ꦕꦺꦱꦸ. ꦈꦨꦪꦺꦤꦥꦶ ꦩꦤꦺꦴꦢ꧀ꦮꦴꦫꦴꦮꦗ꧀ꦗꦤꦲꦱꦶꦠꦸꦥ꧀ꦥꦴꦢꦕꦶꦠ꧀ꦠꦁ ꦮꦢꦠꦶ. ꦆꦣꦴꦠꦶ ꦄꦲꦺꦠꦸꦏꦥꦛꦶꦱꦤ꧀ꦣꦶꦕꦶꦠ꧀ꦠꦺ. ꦱꦩꦴꦣꦶꦮꦷꦫꦶꦪꦴꦤꦶ ꦆꦤ꧀ꦢ꧀ꦫꦶꦪꦥ꧀ꦥꦠ꧀ꦠꦴꦤꦶ ꦕ ꦤ ꦲꦺꦴꦤ꧀ꦠꦷꦠꦶ ꦱꦩꦴꦣꦶꦏꦶꦕ꧀ꦕꦁ ꦥꦛꦶꦏ꧀ꦑꦶꦥꦠꦶ, ꦤ ꦱꦩꦴꦣꦶꦩꦠ꧀ꦠꦁ, ꦤ ꦮꦷꦫꦶꦪꦭꦺꦱꦱ꧀ꦱ ꦱꦧ꧀ꦨꦴꦮꦠꦺꦴꦠꦶ ꦪꦺꦴꦗꦺꦠꦧ꧀ꦧꦁ. ꦠꦺꦤꦺꦮꦴꦲ ‘‘ꦮꦶꦱꦺꦱꦤꦚ꧀ꦲꦶ ꦮꦶꦱꦺꦱꦶꦠꦧ꧀ꦧꦺ ꦥꦮꦠ꧀ꦠꦠꦷ’’ꦠꦶ. ꦪꦱ꧀ꦩꦶꦁ ꦮꦷꦫꦶꦪꦺ ꦱꦠꦶ ꦆꦤ꧀ꦢ꧀ꦫꦶꦪꦸꦥ꧀ꦥꦠ꧀ꦠꦶ ꦱꦶꦪꦴ, ꦠꦢꦺꦮ ꦠꦠ꧀ꦡ ꦤꦠ꧀ꦡꦷꦠꦶ ꦄꦠ꧀ꦡꦺꦴ.

ꦄꦥꦴꦪꦺ ꦎꦥꦥꦴꦠꦶꦏꦮꦱꦺꦤꦴꦠꦶ ꦆꦢꦁ ꦱꦸꦒꦠꦶꦪꦁ ꦎꦥꦥꦴꦠꦶꦏꦺꦴ ꦮꦶꦏꦭꦶꦤ꧀ꦢ꧀ꦫꦶꦪꦺꦴ ꦤ ꦲꦺꦴꦠꦷꦠꦶ ꦏꦠ꧀ꦮꦴ ꦮꦸꦠ꧀ꦠꦁ, ‘‘ꦭꦧ꧀ꦨꦤ꧀ꦠꦺꦮ ꦚꦴꦟꦮꦶꦥ꧀ꦥꦪꦸꦠ꧀ꦠꦴꦤ’’ꦤ꧀ꦠꦶ ꦥꦤ ꦮꦸꦠ꧀ꦠꦠ꧀ꦠꦴ ‘‘ꦢꦸꦲꦺꦠꦸꦏꦥꦛꦶꦱꦤ꧀ꦣꦶꦏꦴꦤꦁ ꦮꦱꦺꦤꦴ’’ꦠꦶ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦁ. ꦠꦺꦱꦤ꧀ꦠꦶ ꦆꦠ꧀ꦡꦶꦥꦸꦫꦶꦱꦶꦤ꧀ꦢ꧀ꦫꦶꦪꦱꦤ꧀ꦠꦴꦤꦴꦤꦁ. ꦆꦠ꧀ꦡꦶꦥꦸꦫꦶꦱꦶꦤ꧀ꦢ꧀ꦫꦶꦪꦴꦤꦁ ꦥꦤ ꦈꦥ꧀ꦥꦴꦢꦤꦶꦫꦺꦴꦣꦴ ꦄꦨꦶꦟ꧀ꦲꦱꦺꦴꦮ ꦲꦺꦴꦤ꧀ꦠꦷꦠꦶ. ꦥꦜꦩꦏꦥ꧀ꦥꦶꦏꦴꦢꦷꦤꦤ꧀ꦠꦶ ꦌꦠ꧀ꦡ ꦄꦴꦢꦶ-ꦱꦢ꧀ꦢꦺꦤ ꦒꦲꦶꦠꦴꦤꦁ ꦥꦫꦶꦮꦠ꧀ꦠꦩꦴꦤꦭꦶꦔ꧀ꦒꦴꦤꦁ ꦮꦱꦺꦤ ꦈꦥ꧀ꦥꦴꦢꦤꦶꦫꦺꦴꦣꦒ꧀ꦒꦲꦟꦁ ꦮꦺꦢꦶꦠꦧ꧀ꦧꦁ. ꦥꦜꦩꦏꦥ꧀ꦥꦶꦏꦴꦤꦁ ꦥꦤ ꦮꦱꦺꦤ ꦈꦥ꧀ꦥꦴꦢꦺꦴ ꦌꦮ ꦭꦧ꧀ꦨꦠꦶ. ‘‘ꦕꦸꦠꦶꦈꦥꦥꦠ꧀ꦠꦶꦮꦱꦺꦤꦺꦮ ꦢꦸꦠꦶꦪꦥꦸꦕ꧀ꦖꦴꦱꦸꦥꦶ ꦱꦤ꧀ꦤꦶꦛ꧀ꦜꦴꦤꦺꦲꦶ ꦒꦲꦟꦁ ꦮꦺꦢꦶꦠꦧ꧀ꦧ’’ꦤ꧀ꦠꦶ ꦆꦢꦁ ꦈꦥꦴꦢꦶꦤ꧀ꦤꦆꦤ꧀ꦢ꧀ꦫꦶꦪꦺꦲꦶ ꦤꦶꦪꦩꦶꦠꦠ꧀ꦠꦴ ꦮꦸꦠ꧀ꦠꦁ.

꧑꧙꧐. ꦱꦤ꧀ꦠꦴꦤꦸꦥ꧀ꦥꦠ꧀ꦠꦶꦤꦶꦫꦺꦴꦣꦢꦱ꧀ꦱꦤꦠꦺꦴꦠꦶ ꦱꦤ꧀ꦠꦴꦤꦮꦱꦺꦤ ꦈꦥ꧀ꦥꦴꦢꦤꦶꦫꦺꦴꦣꦴꦤꦁ ꦢꦶꦱ꧀ꦱꦩꦴꦤꦠ꧀ꦠꦴ. ꦌꦠꦺꦤ ꦫꦹꦥꦗꦷꦮꦶꦠꦶꦤ꧀ꦢ꧀ꦫꦶꦪꦱ꧀ꦱ ꦕꦏ꧀ꦑꦸꦤ꧀ꦢ꧀ꦫꦶꦪꦴꦢꦶꦱꦩꦴꦤꦒꦠꦶꦏꦠꦁ ꦪꦸꦠ꧀ꦠꦶꦠꦺꦴ ꦱꦴꦣꦺꦠꦶ. ꦄꦴꦒꦩꦠꦺꦴ ꦥꦤ ‘‘ꦮꦶꦤꦴ ꦱꦺꦴꦩꦤꦱ꧀ꦱꦺꦤꦴ’’ꦠꦶꦄꦴꦢꦶꦤꦴ ꦥꦫꦠꦺꦴ ꦱꦴꦣꦺꦱ꧀ꦱꦠꦶ. ꦖꦺꦢꦺꦴꦠꦶ ꦤꦴꦩꦁ ꦢꦛ꧀ꦜꦧ꧀ꦧꦁ ꦱꦫꦹꦥꦢꦱ꧀ꦱꦤꦺꦤꦺꦮ ꦱꦁꦱꦪꦖꦺꦢꦤꦠꦺꦴ.

ꦠꦱ꧀ꦱꦴꦠꦶ ꦫꦹꦥꦗꦷꦮꦶꦠꦶꦤ꧀ꦢ꧀ꦫꦶꦪꦱ꧀ꦱ. ꦠꦺ ꦕ ꦄꦱꦚ꧀ꦚꦱꦠ꧀ꦠꦴ. ꦤꦤꦸ ꦕ ꦈꦥ꧀ꦥꦴꦢꦺꦴꦮ ꦗꦷꦮꦶꦠꦶꦤ꧀ꦢ꧀ꦫꦶꦪꦱ꧀ꦱ ꦕꦸꦠꦶꦈꦥꦥꦠ꧀ꦠꦶꦮꦱꦺꦤ ꦮꦠ꧀ꦠꦧ꧀ꦧꦺꦴ, ꦤ ꦄꦤꦸꦥ꧀ꦥꦴꦢꦺꦴꦠꦶ ꦄꦴꦲ ‘‘ꦄꦤꦸꦥ꧀ꦥꦴꦢꦺꦴ…ꦥꦺ… ꦤ ꦥꦮꦠ꧀ꦠꦺ’’ꦠꦶ. ꦄꦪꦚ꧀ꦕ ꦤꦪꦺꦴ ꦤ ꦏꦺꦮꦭꦁ ꦥꦸꦫꦶꦩꦏꦺꦴꦛ꧀ꦜꦴꦱꦺ ꦌꦮ, ꦄꦡ ꦑꦺꦴ ꦆꦠꦫꦏꦺꦴꦛ꧀ꦜꦴꦱꦺꦥꦶ ꦒꦲꦶꦠꦺꦴ ꦌꦮꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦥꦕ꧀ꦖꦶꦩꦏꦺꦴꦛ꧀ꦜꦴꦱꦺꦥꦷ’’ꦠꦶꦄꦴꦢꦶꦩꦴꦲ.

‘‘ꦈꦥꦥꦠ꧀ꦠꦶꦕꦶꦠ꧀ꦠꦱ꧀ꦱ ꦈꦥ꧀ꦥꦴꦢꦏ꧀ꦑꦟꦺ’’ꦠꦶ ꦏꦱ꧀ꦩꦴ ꦮꦸꦠ꧀ꦠꦤ꧀ꦠꦶ ꦪꦺꦤꦴꦣꦶꦥ꧀ꦥꦴꦪꦺꦤ ꦕꦺꦴꦢꦤꦴ ꦏꦠꦴ, ꦠꦩꦣꦶꦥ꧀ꦥꦴꦪꦁ ꦮꦶꦮꦫꦶꦠꦸꦁ ‘‘ꦤꦤꦸ ꦱꦸꦢ꧀ꦣꦴꦮꦴꦱ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦤ ꦮꦠ꧀ꦠꦧ꧀ꦧꦤ꧀ꦠꦶ ‘‘ꦈꦥꦥꦗ꧀ꦗꦤ꧀ꦠꦴꦤ’’ꦤ꧀ꦠꦶ ꦤ ꦮꦠ꧀ꦠꦧ꧀ꦧꦁ, ‘‘ꦈꦥꦥꦠ꧀ꦠꦶꦕꦶꦠ꧀ꦠꦱ꧀ꦱ ꦈꦥ꧀ꦥꦴꦢꦏ꧀ꦑꦟꦺ’’ꦆꦕ꧀ꦕꦺꦮ ꦮꦠ꧀ꦠꦧ꧀ꦧꦤ꧀ꦠꦶ ꦄꦠ꧀ꦡꦺꦴ. ꦆꦢꦴꦤꦶ ꦪꦡꦴ ‘‘ꦈꦥꦥꦗ꧀ꦗꦤ꧀ꦠꦴꦤ’’ꦤ꧀ꦠꦶ ꦤ ꦮꦠ꧀ꦠꦧ꧀ꦧꦁ, ꦠꦁ ꦢꦱ꧀ꦱꦺꦠꦸꦁ ‘‘ꦪꦡꦴ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦱꦺꦴꦩꦤꦱ꧀ꦱꦩꦤꦶꦤ꧀ꦢ꧀ꦫꦶꦪꦴꦤꦤ꧀ꦠꦶ ꦱꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦩꦤꦶꦤ꧀ꦢ꧀ꦫꦶꦪꦴꦤꦁ, ꦄꦪꦩꦺꦮ ꦮꦴ ꦥꦴꦜꦺꦴ. ꦠꦢꦴꦠꦶ ꦥꦜꦩꦱ꧀ꦱ ꦫꦹꦥꦗꦷꦮꦶꦠꦶꦤ꧀ꦢ꧀ꦫꦶꦪꦱ꧀ꦱ ꦣꦫꦩꦴꦤꦏꦴꦭꦺ. ꦠꦱ꧀ꦩꦴꦠꦶ ꦪꦱ꧀ꦩꦴ ꦫꦹꦥꦴꦫꦹꦥꦗꦷꦮꦶꦠꦶꦤ꧀ꦢ꧀ꦫꦶꦪꦴꦤꦁ ꦄꦠ꧀ꦡꦺꦮ ꦏꦴꦭꦨꦺꦢꦺꦴ, ꦈꦨꦪꦚ꧀ꦕꦺꦠ꧀ꦡ ꦗꦷꦮꦶꦠꦶꦤ꧀ꦢ꧀ꦫꦶꦪꦨꦴꦮꦱꦴꦩꦚ꧀ꦚꦺꦤ ꦌꦏꦗ꧀ꦙꦁ ꦏꦠ꧀ꦮꦴ ꦒꦪ꧀ꦲꦠꦶ, ꦠꦱ꧀ꦩꦴ. ꦈꦨꦪꦤ꧀ꦠꦶ ꦱꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦗꦷꦮꦶꦠꦶꦤ꧀ꦢ꧀ꦫꦶꦪꦤ꧀ꦠꦶ ꦆꦢꦁ ꦈꦨꦪꦁ. ꦈꦥ꧀ꦥꦴꦢꦏ꧀ꦑꦟꦺꦤ ꦤꦶꦢꦱ꧀ꦱꦶꦠꦤ꧀ꦠꦶ ꦌꦠꦺꦤ ‘‘ꦈꦥꦥꦠ꧀ꦠꦶꦕꦶꦠ꧀ꦠꦱ꧀ꦱ ꦈꦥ꧀ꦥꦴꦢꦏ꧀ꦑꦟꦺ’’ꦠꦶ ꦆꦢꦁ ꦤꦶꦢꦱ꧀ꦱꦤꦩꦠ꧀ꦠꦤ꧀ꦠꦶ ꦢꦱ꧀ꦱꦺꦠꦶ. ꦆꦢꦴꦤꦶ ꦠꦩꦺꦮꦠ꧀ꦡꦁ ꦈꦢꦴꦲꦫꦟꦺꦤ ꦥꦴꦏꦛꦠꦫꦁ ꦏꦴꦠꦸꦁ ‘‘ꦪꦡꦴ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦪꦡꦴ ꦠꦴꦢꦶꦱꦴꦤꦁ ꦄꦤꦺꦏꦺꦱꦁ ꦕꦶꦠ꧀ꦠꦴꦤꦁ ꦨꦔ꧀ꦒꦏ꧀ꦑꦟꦺ ꦭꦧ꧀ꦨꦩꦴꦤꦁ ꦠꦢꦺꦏꦢꦺꦱꦺꦤ ꦱꦧ꧀ꦧꦥꦜꦩꦱ꧀ꦱ ꦈꦥꦥꦠ꧀ꦠꦶꦕꦶꦠ꧀ꦠꦱ꧀ꦱ ꦨꦔ꧀ꦒꦏ꧀ꦑꦟꦺꦤ ꦤꦶꦢꦱ꧀ꦱꦶꦠꦁ, ꦌꦮꦩꦶꦣꦴꦥꦶ ꦑꦟꦢ꧀ꦮꦪꦺ ꦭꦧ꧀ꦨꦩꦴꦤꦁ ꦠꦢꦺꦏꦢꦺꦱꦺꦤ ꦈꦥ꧀ꦥꦴꦢꦏ꧀ꦑꦟꦺꦤ ꦤꦶꦢꦱ꧀ꦱꦶꦠꦤ꧀ꦠꦶ ꦌꦮꦁ ꦤꦶꦢꦱ꧀ꦱꦤꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦠꦺꦱꦤ꧀ꦠꦶ ꦗꦷꦮꦶꦠꦶꦤ꧀ꦢ꧀ꦫꦶꦪꦴꦢꦷꦤꦁ. ꦄꦚ꧀ꦚꦠ꧀ꦡꦴꦠꦶ ꦥꦮꦠ꧀ꦠꦺ. ꦆꦣꦴꦠꦶ ꦄꦤꦴꦒꦠꦏꦴꦭꦨꦺꦢꦺ. ꦤ ꦤ ꦱꦩ꧀ꦨꦮꦠꦶ ꦈꦥꦥꦠ꧀ꦠꦶꦏ꧀ꦑꦟꦱ꧀ꦱ ꦮꦶꦪ ꦠꦠꦺꦴ ꦥꦫꦁ ꦥꦮꦠ꧀ꦠꦶꦏ꧀ꦑꦟꦱ꧀ꦱꦥꦶ ꦄꦤꦴꦒꦠꦏꦴꦭꦨꦴꦮꦠꦺꦴ. ꦠꦱ꧀ꦩꦴꦠꦶ ꦈꦥꦥꦠ꧀ꦠꦶꦠꦺꦴ ꦄꦚ꧀ꦚꦠ꧀ꦡꦴꦥꦶ ꦪꦡꦴꦣꦶꦥ꧀ꦥꦺꦠꦈꦥ꧀ꦥꦴꦢꦱꦩ꧀ꦨꦮꦠꦺꦴ. ꦄꦪꦚ꧀ꦕ ꦄꦠ꧀ꦡꦺꦴ ꦮꦴꦫꦤ꧀ꦠꦫꦺꦥꦶ ꦢꦶꦱ꧀ꦱꦠꦷꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦌꦮꦚ꧀ꦕ ꦏꦠ꧀ꦮꦴ’’ꦠꦶꦄꦴꦢꦶ. ꦤ ꦲꦷꦠꦶꦄꦴꦢꦶꦤꦴ ꦠꦩꦺꦮꦠ꧀ꦡꦁ ꦱꦩꦠ꧀ꦡꦺꦠꦶ. ꦠꦠ꧀ꦡ ꦄꦥꦶ ꦥꦕ꧀ꦖꦶꦩ…ꦥꦺ… ꦱꦤ꧀ꦣꦶꦏꦱ꧀ꦱꦴꦠꦶ ꦄꦥꦶ-ꦱꦢ꧀ꦢꦺꦤ ‘‘ꦏꦺꦴ ꦥꦤ ꦮꦴꦢꦺꦴ ꦄꦥꦕ꧀ꦖꦶꦩꦨꦮꦶꦏꦱ꧀ꦱ ꦱꦺꦴꦩꦤꦱ꧀ꦱꦱꦲꦒꦠꦥꦛꦶꦱꦤ꧀ꦣꦶꦏꦱ꧀ꦱꦴ’’ꦠꦶ ꦢꦱ꧀ꦱꦺꦠꦶ. ꦄꦥꦕ꧀ꦖꦶꦩꦨꦮꦶꦏꦱ꧀ꦱ ꦕꦸꦠꦶꦠꦺꦴ ꦥꦕ꧀ꦖꦴ ‘‘ꦱꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ ꦤꦶꦫꦸꦗ꧀ꦙꦶꦱ꧀ꦱꦠꦷ’’ꦠꦶ ꦮꦠ꧀ꦠꦧ꧀ꦧꦩꦺꦮ ꦤꦠ꧀ꦡꦷꦠꦶ ꦄꦴꦲ ‘‘ꦕꦸꦠꦶꦠꦺꦴ ꦥꦸꦧ꧀ꦧꦺꦮꦴ’’ꦠꦶ. ꦌꦠ꧀ꦡ ꦲꦶ ꦥꦜꦩꦥꦸꦕ꧀ꦖꦴꦱꦸ ꦱꦤ꧀ꦤꦶꦛ꧀ꦜꦴꦤꦠ꧀ꦡꦺꦴꦠꦶꦄꦴꦢꦷꦱꦸ ꦄꦪꦁ ꦱꦔ꧀ꦑꦺꦥꦠ꧀ꦡꦺꦴ – ꦌꦠ꧀ꦡ ‘‘ꦪꦱ꧀ꦱ ꦕꦏ꧀ꦑꦸꦤ꧀ꦢ꧀ꦫꦶꦪꦁ ꦈꦥ꧀ꦥꦗ꧀ꦗꦶꦱ꧀ꦱꦠꦷ’’ꦠꦶ ꦌꦮꦩꦴꦢꦷꦱꦸ ꦪꦩꦏꦺꦱꦸ ꦪꦴ ꦥꦜꦩꦥꦸꦕ꧀ꦖꦴ, ꦠꦴꦱꦸ ꦱꦤ꧀ꦤꦶꦛ꧀ꦜꦴꦤꦥꦢꦱꦔ꧀ꦒꦲꦶꦠꦺꦴ ꦄꦠ꧀ꦡꦺꦴ. ꦥꦸꦕ꧀ꦖꦶꦠꦧ꧀ꦧꦠ꧀ꦡꦤꦶꦱ꧀ꦱꦪꦺꦴꦠꦶ ‘‘ꦠꦱ꧀ꦱ ꦱꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ ꦈꦥ꧀ꦥꦗ꧀ꦗꦶꦱ꧀ꦱꦠꦷ’’ꦠꦶꦄꦴꦢꦶꦏꦱ꧀ꦱ ꦥꦸꦕ꧀ꦖꦶꦠꦧ꧀ꦧꦱ꧀ꦱ ꦄꦠ꧀ꦡꦱ꧀ꦱ ꦤꦶꦱ꧀ꦱꦪꦨꦹꦠꦺꦴ ꦩꦴꦢꦶꦱꦺꦴꦮ ꦩꦪꦴ ꦱꦢꦶꦱꦺꦴ ꦌꦮ ꦄꦠ꧀ꦡꦺꦴ ꦈꦥꦥꦠ꧀ꦠꦶꦈꦥ꧀ꦥꦴꦢꦶꦤ꧀ꦢ꧀ꦫꦶꦪꦮꦴ ꦈꦥꦥꦠ꧀ꦠꦶꦏ꧀ꦑꦟꦺ ꦈꦥ꧀ꦥꦴꦢꦴꦮꦠ꧀ꦡꦆꦤ꧀ꦢ꧀ꦫꦶꦪꦱꦲꦶꦠꦺꦴ, ꦈꦨꦪꦸꦥ꧀ꦥꦴꦢꦶꦤ꧀ꦢ꧀ꦫꦶꦪꦮꦴ ꦥꦛꦶꦱꦤ꧀ꦣꦶꦥꦮꦠ꧀ꦠꦷꦱꦸ ꦈꦥ꧀ꦥꦴꦢꦴꦮꦠ꧀ꦡꦆꦤ꧀ꦢ꧀ꦫꦶꦪꦱꦲꦶꦠꦺꦴ ꦮꦴ. ꦥꦛꦶꦤꦶꦮꦠ꧀ꦠꦶꦠ꧀ꦮꦴꦥꦶ ꦥꦸꦕ꧀ꦖꦶꦠꦧ꧀ꦧꦠ꧀ꦡꦱ꧀ꦱ ꦤꦶꦱ꧀ꦱꦪꦺꦴꦠꦶ ‘‘ꦪꦱ꧀ꦱ ꦮꦴ ꦥꦤꦴ’’ꦠꦶꦄꦴꦢꦶꦤꦴ ꦥꦛꦶꦤꦶꦮꦠ꧀ꦠꦶꦠ꧀ꦮꦴ ꦥꦸꦕ꧀ꦖꦶꦠꦧ꧀ꦧꦱ꧀ꦱꦥꦶ ꦱꦁꦱꦪꦠ꧀ꦡꦱ꧀ꦱ ꦤꦶꦱ꧀ꦱꦪꦺꦴꦠꦶ ꦌꦮꦁ ꦆꦩꦶꦤꦴ ꦮꦶꦪ ꦄꦗ꧀ꦙꦴꦱꦪꦺꦤ ‘‘ꦪꦱ꧀ꦱ ꦮꦴ ꦥꦤ ꦱꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ ꦈꦥ꧀ꦥꦗ꧀ꦗꦶꦱ꧀ꦱꦠꦷ’’ꦠꦶꦄꦴꦢꦷꦱꦸ ꦢꦸꦠꦶꦪꦥꦸꦕ꧀ꦖꦴꦱꦸ ꦱꦤ꧀ꦤꦶꦛ꧀ꦜꦴꦤꦠ꧀ꦡꦩꦺꦮ ꦱꦤ꧀ꦤꦶꦛ꧀ꦜꦴꦤꦥꦢꦱꦔ꧀ꦒꦲꦶꦠꦩꦺꦮ ꦄꦠ꧀ꦡꦁ ꦤꦶꦪꦩꦺꦠꦶ. ꦠꦠ꧀ꦡꦺꦮ ꦠꦴꦱꦸ ꦌꦮ ꦥꦸꦧ꧀ꦧꦺ ꦮꦸꦠ꧀ꦠꦥꦜꦩꦥꦸꦕ꧀ꦖꦴꦱꦸ ꦌꦮ. ꦥꦸꦕ꧀ꦖꦶꦠꦧ꧀ꦧꦁ ‘‘ꦠꦱ꧀ꦱ ꦱꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ ꦈꦥ꧀ꦥꦗ꧀ꦗꦶꦱ꧀ꦱꦠꦷ’’ꦠꦶꦄꦴꦢꦷꦱꦸ ꦄꦤꦴꦒꦠꦨꦴꦮꦩꦠ꧀ꦠꦺꦤ ꦱꦫꦹꦥꦠꦺꦴ ꦒꦲꦶꦠꦁ ꦈꦥ꧀ꦥꦴꦢꦁ ꦈꦥ꧀ꦥꦴꦢꦱꦔ꧀ꦑꦴꦠꦁ, ‘‘ꦠꦱ꧀ꦱ ꦱꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ ꦤꦶꦫꦸꦗ꧀ꦙꦶꦱ꧀ꦱꦠꦷ’’ꦠꦶꦄꦴꦢꦷꦱꦸ ꦄꦤꦴꦒꦠꦨꦴꦮꦩꦠ꧀ꦠꦺꦤ ꦱꦫꦹꦥꦠꦺꦴ ꦒꦲꦶꦠꦁ ꦤꦶꦫꦺꦴꦣꦁ ꦮꦴ ꦤꦶꦫꦺꦴꦣꦱꦔ꧀ꦑꦴꦠꦁ ꦮꦴ ꦱꦁꦱꦪꦠ꧀ꦡꦁ ꦤ ꦤꦶꦪꦩꦺꦠꦷꦠꦶ. ꦌꦮꦤ꧀ꦠꦶ ꦮꦸꦠ꧀ꦠꦥ꧀ꦥꦏꦴꦫꦺꦤ ꦱꦤ꧀ꦤꦶꦛ꧀ꦜꦴꦤꦠ꧀ꦡꦱ꧀ꦱ ꦤꦶꦪꦩꦺꦴ ꦲꦺꦴꦠꦶ, ꦤ ꦱꦁꦱꦪꦠ꧀ꦡꦱ꧀ꦱ, ꦠꦱ꧀ꦩꦴ ‘‘ꦪꦱ꧀ꦱ ꦮꦴ ꦥꦤ…ꦥꦺ… ꦄꦴꦩꦤ꧀ꦠꦴ’’ꦠꦶ ꦮꦸꦠ꧀ꦠꦁ. ꦌꦱ ꦤꦪꦺꦴꦠꦶ ꦪ꧀ꦮꦴꦪꦁ ꦈꦥ꧀ꦥꦴꦢꦮꦴꦫꦺ ꦮꦶꦕꦴꦫꦺꦴ ꦮꦸꦠ꧀ꦠꦺꦴ, ꦤꦶꦫꦺꦴꦣꦮꦴꦫꦺꦥꦶ ꦌꦱꦺꦮ ꦤꦪꦺꦴ. ꦠꦡꦴ ꦲꦶ ‘‘ꦪꦱ꧀ꦱ ꦮꦴ ꦥꦤ ꦱꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ ꦤꦶꦫꦸꦗ꧀ꦙꦶꦱ꧀ꦱꦠꦶ, ꦠꦱ꧀ꦱ ꦕꦏ꧀ꦑꦸꦤ꧀ꦢ꧀ꦫꦶꦪꦁ ꦤꦶꦫꦸꦗ꧀ꦙꦶꦱ꧀ꦱꦠꦷꦠꦶ? ꦄꦴꦩꦤ꧀ꦠꦴ’’ꦠꦶ ꦮꦸꦠ꧀ꦠꦁ.

ꦌꦮꦁ ꦄꦮꦸꦠ꧀ꦠꦠ꧀ꦠꦴꦠꦶ ꦈꦥ꧀ꦥꦴꦢꦤꦶꦫꦺꦴꦣꦴꦤꦁ ꦄꦤꦴꦒꦠꦴꦤꦁ ꦱꦫꦹꦥꦺꦤ ꦄꦮꦸꦠ꧀ꦠꦠ꧀ꦠꦴ. ꦤ ꦲꦶ ꦠꦠ꧀ꦡ ꦠꦺ ꦱꦫꦹꦥꦺꦤ ꦮꦸꦠ꧀ꦠꦴ, ꦄꦡ ꦑꦺꦴ ‘‘ꦤꦸꦥ꧀ꦥꦗ꧀ꦗꦶꦱ꧀ꦱꦠꦷ’’ꦠꦶ ꦥꦛꦶꦏ꧀ꦑꦺꦥꦩꦸꦑꦺꦤ ꦮꦸꦠ꧀ꦠꦴ. ꦠꦠ꧀ꦡꦴꦠꦶ ꦄꦤꦸꦭꦺꦴꦩꦺ. ꦤ ꦌꦮꦁ ꦪꦺꦴꦗꦺꦠꦧ꧀ꦧꦴ ꦥꦛꦶꦭꦺꦴꦩꦺ. ꦠꦩꦺꦮ ꦄꦪꦺꦴꦗꦺꦠꦧ꧀ꦧꦠꦁ ‘‘ꦪꦡꦴ ꦲꦷ’’ꦠꦶꦄꦴꦢꦶꦤꦴ ꦮꦶꦮꦫꦠꦶ. ꦈꦥ꧀ꦥꦴꦢꦤꦶꦫꦺꦴꦣꦺ ꦄꦠꦶꦏ꧀ꦏꦩꦶꦠ꧀ꦮꦴ ꦈꦥ꧀ꦥꦴꦢꦤꦶꦫꦺꦴꦣꦴ ꦱꦩ꧀ꦨꦮꦤ꧀ꦠꦶ ꦪꦺꦴꦗꦺꦠꦸꦁ, ꦠꦡꦴ ꦈꦥ꧀ꦥꦴꦢꦤꦶꦫꦺꦴꦣꦺ ꦄꦥ꧀ꦥꦠ꧀ꦮꦴ ꦈꦥ꧀ꦥꦴꦢꦤꦶꦫꦺꦴꦣꦴ ꦱꦩ꧀ꦨꦮꦤ꧀ꦠꦶ ꦪꦺꦴꦗꦺꦠꦸꦤ꧀ꦠꦶ ꦪꦺꦴꦗꦤꦴ. ꦆꦢꦚ꧀ꦕ ꦢ꧀ꦮꦪꦁ ꦪꦡꦴꦤꦸꦭꦺꦴꦩꦺ ꦱꦩ꧀ꦨꦮꦠꦶ, ꦤ ꦌꦮꦁ ꦥꦛꦶꦭꦺꦴꦩꦺ. ꦠꦺꦤꦴꦲ ‘‘ꦤ ꦌꦮꦁ…ꦥꦺ… ꦱꦩ꧀ꦨꦮꦤ꧀ꦠꦷ’’ꦠꦶ. ꦠꦠ꧀ꦡ ꦏꦴꦫꦟꦩꦴꦲ ‘‘ꦄꦨꦹꦠꦴꦨꦴꦮꦱ꧀ꦱ…ꦥꦺ… ꦱꦩ꧀ꦨꦮꦴꦤꦸꦥꦥꦠ꧀ꦠꦶꦠꦺꦴ’’ꦠꦶ. ꦄꦨꦹꦠꦴꦨꦴꦮꦱ꧀ꦱꦴꦠꦶ ꦄꦨꦹꦠꦱ꧀ꦱ ꦄꦨꦴꦮꦱ꧀ꦱ, ꦄꦨꦹꦠꦱ꧀ꦱ ꦈꦥ꧀ꦥꦴꦢꦱ꧀ꦱ ꦤꦶꦫꦺꦴꦣꦱ꧀ꦱ ꦕ ꦄꦨꦴꦮꦱ꧀ꦱꦴꦠꦶ ꦄꦣꦶꦥ꧀ꦥꦴꦪꦺꦴ. ꦠꦺꦤꦴꦲ ‘‘ꦄꦨꦹꦠꦸꦥ꧀ꦥꦴꦢꦤꦶꦫꦺꦴꦣꦴꦨꦴꦮꦺꦴ ꦕ ꦥꦛꦶꦭꦺꦴꦩꦺ ꦥꦸꦕ꧀ꦖꦶꦠꦺꦴ’’ꦠꦶ, ꦠꦱ꧀ꦩꦴ ‘‘ꦄꦴꦩꦤ꧀ꦠꦴ’’ꦠꦶ ꦕ ꦮꦸꦠ꧀ꦠꦁ, ꦤ ꦮꦸꦠ꧀ꦠꦁ ꦮꦶꦱ꧀ꦱꦗ꧀ꦗꦤꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦄꦱ꧀ꦱ ꦮꦶꦱꦺꦱꦫꦲꦶꦠꦱ꧀ꦱ ꦄꦨꦹꦠꦴꦨꦴꦮꦱ꧀ꦱꦴꦠꦶ ꦆꦩꦱ꧀ꦱ ꦪꦡꦴꦮꦸꦠ꧀ꦠꦱ꧀ꦱ ꦪꦡꦴ ꦫꦹꦥꦴꦨꦴꦮꦺꦴ ꦮꦺꦢꦤꦴꦨꦴꦮꦺꦴꦠꦶ ꦏꦺꦴꦕꦶ ꦄꦨꦴꦮꦺꦴꦥꦶ ꦮꦶꦱꦺꦱꦱꦲꦶꦠꦺꦴ, ꦤ ꦌꦮꦩꦪꦤ꧀ꦠꦶ ꦮꦶꦱꦺꦱꦫꦲꦶꦠꦱ꧀ꦱ ꦄꦨꦹꦠꦴꦨꦴꦮꦱ꧀ꦱ.

ꦏꦴꦭꦤ꧀ꦠꦫꦪꦺꦴꦒꦴꦨꦴꦮꦠꦺꦴꦠꦶ ꦏꦴꦭꦮꦶꦱꦺꦱꦪꦺꦴꦒꦴꦨꦴꦮꦠꦺꦴ. ꦪꦴꦢꦶꦱꦴꦤꦤ꧀ꦠꦶ ꦪꦴꦤꦶ ꦨꦹꦠꦴꦤꦶ ꦤ ꦮꦠ꧀ꦠꦩꦴꦤꦴꦤꦶ ꦱꦠꦶ ꦥꦕ꧀ꦕꦪꦺ ꦈꦥ꧀ꦥꦗ꧀ꦗꦤꦴꦫꦲꦴꦤꦶ, ꦠꦺꦱꦁ ꦄꦤꦴꦒꦠꦴꦤꦤ꧀ꦠꦶ ꦄꦠ꧀ꦡꦺꦴ. ꦈꦥ꧀ꦥꦴꦢꦤꦶꦫꦺꦴꦣꦴꦨꦴꦮꦺꦤ ꦥꦸꦕ꧀ꦖꦶꦠꦧ꧀ꦧꦱ꧀ꦱꦴꦠꦶ ‘‘ꦤꦸꦥ꧀ꦥꦗ꧀ꦗꦶꦱ꧀ꦱꦠꦶ ꦤ ꦤꦶꦫꦸꦗ꧀ꦙꦶꦱ꧀ꦱꦠꦷ’’ꦠꦶ ꦌꦮꦁ ꦈꦥ꧀ꦥꦴꦢꦱ꧀ꦱ ꦤꦶꦫꦺꦴꦣꦱ꧀ꦱ ꦕ ꦄꦨꦴꦮꦺꦤ ꦥꦸꦕ꧀ꦖꦶꦠꦧ꧀ꦧꦱ꧀ꦱ ꦄꦠ꧀ꦡꦱ꧀ꦱ. ꦱꦤ꧀ꦤꦶꦱ꧀ꦱꦪꦺꦴ ꦤꦶꦱ꧀ꦱꦪꦨꦹꦠꦺꦴ ꦱꦤ꧀ꦤꦶꦛ꧀ꦜꦴꦤꦺꦤ ꦱꦤ꧀ꦤꦶꦕ꧀ꦖꦶꦠꦺꦴ ꦱꦤ꧀ꦤꦶꦛ꧀ꦜꦴꦤꦥꦢꦱꦔ꧀ꦒꦲꦶꦠꦺꦴ. ꦱꦺꦴ ꦪꦡꦴꦮꦸꦠ꧀ꦠꦺꦴ ꦄꦠ꧀ꦡꦺꦴ ꦤꦶꦱ꧀ꦱꦪꦺꦴ ꦌꦠꦺꦱꦤ꧀ꦠꦶ ꦠꦤ꧀ꦤꦶꦱ꧀ꦱꦪꦴ. ꦠꦴꦢꦶꦱꦴꦤꦁꦪꦺꦮ ꦄꦤꦴꦒꦠꦴꦤꦁꦪꦺꦮ ꦈꦥꦥꦠ꧀ꦠꦶꦕꦸꦠꦶꦈꦥ꧀ꦥꦴꦢꦤꦶꦫꦺꦴꦣꦴꦤꦁ ꦈꦥꦥꦠ꧀ꦠꦶꦕꦸꦠꦶꦱꦔ꧀ꦑꦴꦠꦈꦥ꧀ꦥꦴꦢꦤꦶꦫꦺꦴꦣꦴꦤꦁ ꦄꦤꦸꦥ꧀ꦥꦴꦢꦴꦤꦶꦫꦺꦴꦣꦴꦤꦁ ꦥꦛꦶꦏ꧀ꦑꦺꦥꦮꦱꦺꦤ. ꦗꦷꦮꦶꦠꦴꦢꦷꦤꦩ꧀ꦥꦶ ꦗꦷꦮꦶꦠꦩꦤꦶꦤ꧀ꦢ꧀ꦫꦶꦪꦴꦢꦷꦤꦩ꧀ꦥꦶ. ꦄꦤꦸꦥ꧀ꦥꦴꦢꦴꦤꦶꦫꦺꦴꦣꦴ ꦱꦁꦱꦪꦥꦢꦺꦤ ꦥꦸꦕ꧀ꦖꦶꦠꦴ ꦲꦺꦴꦤ꧀ꦠꦶ ‘‘ꦪꦱ꧀ꦱ ꦱꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ ꦤꦸꦥ꧀ꦥꦗ꧀ꦗꦶꦱ꧀ꦱꦠꦶ, ꦠꦱ꧀ꦱ ꦱꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ ꦤ ꦤꦶꦫꦸꦗ꧀ꦙꦶꦱ꧀ꦱꦠꦷ’’ꦠꦶ. ‘‘ꦄꦴꦩꦤ꧀ꦠꦴ’’ꦠꦶ ꦮꦸꦠ꧀ꦠꦁ ꦮꦶꦨꦗꦶꦠ꧀ꦮꦴ ꦮꦠ꧀ꦠꦧ꧀ꦧꦱ꧀ꦱ ꦄꦨꦴꦮꦠꦺꦴ. ꦠꦺꦤꦴꦲ ‘‘ꦤ ꦮꦸꦠ꧀ꦠꦁ…ꦥꦺ… ꦮꦶꦱ꧀ꦱꦗ꧀ꦗꦤ’’ꦤ꧀ꦠꦶ.

ꦪꦺ ꦱꦺꦴꦥꦺꦏ꧀ꦑꦥꦛꦶꦱꦤ꧀ꦣꦶꦏꦴ ꦨꦮꦶꦱ꧀ꦱꦤ꧀ꦠꦶ ꦫꦹꦥꦭꦺꦴꦏꦺ, ꦠꦺ ꦱꦔ꧀ꦒꦲꦶꦠꦴꦠꦶ ꦪꦺꦴꦗꦤꦴ. ꦠꦁꦱꦩꦴꦤꦭꦏ꧀ꦑꦟꦠꦴꦪꦴꦠꦶ ꦠꦺꦤ ꦱꦺꦴꦥꦺꦏ꧀ꦑꦥꦛꦶꦱꦤ꧀ꦣꦶꦏꦨꦴꦮꦺꦤ ꦱꦩꦴꦤꦭꦏ꧀ꦑꦟꦠꦴꦪ. ꦠꦁ ꦥꦩꦴꦢꦭꦶꦑꦶꦠꦁ ꦣꦩ꧀ꦩꦪꦩꦏꦺ ꦠꦴꦢꦶꦱꦱ꧀ꦱꦺꦮ ꦮꦕꦤꦱ꧀ꦱ ꦄꦨꦴꦮꦠꦺꦴ. ꦠꦠ꧀ꦡꦥꦶ ꦪꦁ ꦮꦠ꧀ꦠꦧ꧀ꦧꦁ, ꦠꦁ ꦕꦶꦠ꧀ꦠꦪꦩꦏꦺ ꦮꦸꦠ꧀ꦠꦁ ‘‘ꦤ ꦲꦶ ꦑꦟꦥꦕ꧀ꦕꦸꦥ꧀ꦥꦤ꧀ꦤꦺ ꦈꦥ꧀ꦥꦗ꧀ꦗꦶꦠ꧀ꦡꦴꦠꦶ ꦄꦠꦷꦠꦮꦺꦴꦲꦴꦫꦺꦴ ꦄꦠ꧀ꦡꦷ’’ꦠꦶꦄꦴꦢꦶꦤꦴ.

ꦥꦮꦠ꧀ꦠꦶꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.