꧑. ꦥꦟ꧀ꦟꦠ꧀ꦠꦶꦮꦴꦫꦮꦟ꧀ꦟꦤꦴ

꧑꧐-꧒꧖. ꦱꦺꦴꦠꦶ ꦢꦸꦏ꧀ꦑꦱꦢ꧀ꦢꦺꦴ. ꦄꦚ꧀ꦚꦠ꧀ꦡꦴꦠꦶ ꦱꦔ꧀ꦑꦴꦫꦢꦸꦏ꧀ꦑꦮꦶꦥꦫꦶꦟꦴꦩꦢꦸꦏ꧀ꦑꦢꦸꦏ꧀ꦑꦴꦣꦶꦛ꧀ꦜꦴꦤꦺꦱꦸ. ꦄꦚ꧀ꦚꦤꦶꦫꦥꦺꦏ꧀ꦑꦺꦴꦠꦶ ꦱꦔ꧀ꦑꦴꦫꦴꦢꦶꦥꦢꦤ꧀ꦠꦫꦴꦤꦥꦺꦏ꧀ꦑꦺꦴ. ꦠꦺꦤꦴꦠꦶ ꦄꦚ꧀ꦚꦤꦶꦫꦥꦺꦏ꧀ꦑꦢꦸꦏ꧀ꦑꦥꦢꦒ꧀ꦒꦲꦟꦠꦺꦴ. ꦠꦱ꧀ꦩꦶꦁ ꦢꦸꦏ꧀ꦑꦢꦸꦏ꧀ꦑꦺ ꦮꦶꦱꦪꦨꦹꦠꦺ. ꦌꦱ ꦢꦸꦏ꧀ꦑꦱꦢ꧀ꦢꦺꦴ ‘‘ꦢꦸꦏ꧀ꦑꦁ ꦢꦸꦏ꧀ꦑꦱꦕ꧀ꦕ’’ꦤ꧀ꦠꦶ ꦌꦠ꧀ꦡ ꦥꦜꦩꦺꦴ ꦢꦸꦏ꧀ꦑꦱꦢ꧀ꦢꦺꦴ. ꦠꦚ꧀ꦕ ꦢꦸꦏ꧀ꦑꦢꦸꦏ꧀ꦑꦁ. ‘‘ꦢꦸꦏ꧀ꦑꦁ ꦢꦸꦏ꧀ꦑꦱꦕ꧀ꦕ’’ꦤ꧀ꦠꦶ ꦌꦠ꧀ꦡ ꦢꦸꦏ꧀ꦑꦩꦺꦮ ꦢꦸꦏ꧀ꦑꦱꦕ꧀ꦕꦤ꧀ꦠꦶ ꦤꦪꦶꦢꦁ ꦄꦮꦣꦴꦫꦟꦁ ꦆꦕ꧀ꦖꦶꦠꦧ꧀ꦧꦁ, ꦢꦸꦏ꧀ꦑꦁ ꦢꦸꦏ꧀ꦑꦱꦕ꧀ꦕꦩꦺꦮꦴꦠꦶ ꦥꦤ ꦆꦕ꧀ꦖꦶꦠꦧ꧀ꦧꦤ꧀ꦠꦶ ꦄꦴꦲ ‘‘ꦌꦏꦤ꧀ꦠꦺꦤ ꦢꦸꦏ꧀ꦑꦱꦕ꧀ꦕꦩꦺꦮꦴ’’ꦠꦶ. ꦱꦕ꧀ꦕꦮꦶꦨꦔ꧀ꦒꦺ ꦮꦸꦠ꧀ꦠꦺꦱꦸ ꦱꦩꦸꦢꦪꦺꦱꦸ ꦏꦺꦴꦕꦶ ꦦꦭꦣꦩ꧀ꦩꦺꦱꦸ ꦤꦠ꧀ꦡꦷꦠꦶ ꦱꦕ꧀ꦕꦮꦶꦨꦔ꧀ꦒꦺ ꦥꦚ꧀ꦕꦣꦴ ꦮꦸꦠ꧀ꦠꦺꦱꦸ ꦱꦩꦸꦢꦪꦺꦱꦸ ꦌꦏꦺꦴꦥꦶ ꦦꦭꦱꦨꦴꦮꦺꦱꦸ ꦤꦠ꧀ꦡꦶ, ꦦꦭꦱꦨꦴꦮꦺꦴ ꦤꦠ꧀ꦡꦷꦠꦶ ꦄꦠ꧀ꦡꦺꦴ. ‘‘ꦦꦭꦣꦩ꧀ꦩꦺꦴ ꦤꦠ꧀ꦡꦷ’’ꦠꦶ ꦕ ꦥꦴꦜꦺꦴ. ꦩꦒ꧀ꦒꦱꦢ꧀ꦢꦺꦴ ꦕ ꦦꦭꦔ꧀ꦒꦺꦱꦹꦠꦶ ꦱꦴꦩꦚ꧀ꦚꦦꦭꦔ꧀ꦒꦺꦱꦸ ꦱꦩ꧀ꦩꦴꦢꦶꦛ꧀ꦜꦶꦄꦴꦢꦷꦱꦸ ‘‘ꦩꦒ꧀ꦒꦔ꧀ꦒꦁ ꦩꦒ꧀ꦒꦥꦫꦶꦪꦴꦥꦤ꧀ꦤ’’ꦤ꧀ꦠꦶꦄꦴꦢꦶꦤꦴ (ꦮꦶꦨ. ꧔꧙꧒, ꧔꧙꧕) ꦄꦴꦒꦠꦺꦴ ꦩꦒ꧀ꦒꦱꦢ꧀ꦢꦺꦴ ꦩꦒ꧀ꦒꦦꦭꦠ꧀ꦠꦴ ꦥꦮꦠ꧀ꦠꦠꦶ ꦏꦴꦫꦟꦹꦥꦕꦴꦫꦺꦤꦴꦠꦶ ꦄꦣꦶꦥ꧀ꦥꦴꦪꦺꦴ. ꦠꦺꦤꦴꦲ ‘‘ꦤ ꦩꦒ꧀ꦒꦏꦶꦕ꧀ꦕꦱꦧ꧀ꦨꦴꦮꦴ’’ꦠꦶꦄꦴꦢꦶ. ꦠꦱ꧀ꦩꦴꦠꦶ ꦪꦱ꧀ꦩꦴ ꦱꦕ꧀ꦕꦢꦺꦱꦤꦴꦪ ꦥꦨꦮꦴꦢꦶꦱꦨꦴꦮꦴ ꦌꦮ ꦣꦩ꧀ꦩꦴ ꦱꦩꦸꦢꦪꦴꦢꦶꦥꦫꦶꦪꦴꦪꦺꦤ ꦮꦸꦠ꧀ꦠꦴ, ꦤ ꦄꦥ꧀ꦥꦨꦮꦴꦢꦶꦱꦨꦴꦮꦴ, ꦠꦱ꧀ꦩꦴ. ꦌꦠ꧀ꦡ ꦕ ꦠꦺꦨꦹꦩꦏꦣꦩ꧀ꦩꦴꦤꦁ ꦪꦡꦴꦫꦲꦁ ꦢꦸꦏ꧀ꦑꦱꦩꦸꦢꦪꦱꦕ꧀ꦕꦤ꧀ꦠꦺꦴꦒꦣꦠ꧀ꦠꦴ ꦄꦱꦕ꧀ꦕꦱꦨꦴꦮꦺ ꦱꦨꦴꦮꦣꦩ꧀ꦩꦺ ꦕ ꦈꦢ꧀ꦣꦫꦤ꧀ꦠꦺꦴ ꦦꦭꦣꦩ꧀ꦩꦺ ꦌꦮ ꦈꦢ꧀ꦣꦫꦶ. ꦤꦤꦸ ꦕ ꦩꦒ꧀ꦒꦱꦩ꧀ꦥꦪꦸꦠ꧀ꦠꦴꦥꦶ ꦣꦩ꧀ꦩꦴ ꦄꦱꦕ꧀ꦕꦱꦨꦴꦮꦴꦠꦶ ꦠꦺꦥꦶ ꦈꦢ꧀ꦣꦫꦶꦠꦧ꧀ꦧꦴꦠꦶ? ꦤ, ꦠꦺꦱꦁ ꦩꦒ꧀ꦒꦒꦠꦶꦏꦠ꧀ꦠꦴ. ‘‘ꦦꦭꦣꦩ꧀ꦩꦺꦱꦹ’’ꦠꦶ ꦌꦠ꧀ꦡ ꦣꦩ꧀ꦩꦒ꧀ꦒꦲꦟꦺꦤ ꦮꦴ ꦦꦭꦱꦩ꧀ꦥꦪꦸꦠ꧀ꦠꦣꦩ꧀ꦩꦴꦤꦁ ꦮꦶꦪ ꦠꦺꦱꦩ꧀ꦥꦶ ꦒꦲꦟꦁ ꦢꦛ꧀ꦜꦧ꧀ꦧꦁ.

ꦥꦢꦱꦺꦴꦣꦤꦺꦤ…ꦥꦺ… ꦆꦣ ꦒꦲꦶꦠꦴꦠꦶ ꦌꦠꦺꦤ ꦄꦱꦕ꧀ꦕꦱꦨꦴꦮꦴꦤꦁ ꦣꦩ꧀ꦩꦴꦤꦁ ꦥꦏꦫꦟꦺꦤ ꦤꦶꦮꦠ꧀ꦠꦶꦠꦠꦁ ꦄꦴꦲ. ꦠꦺꦱꦤ꧀ꦠꦶ ꦢꦸꦏ꧀ꦑꦴꦢꦷꦤꦁ. ꦠꦧ꧀ꦧꦶꦱꦺꦱꦤꦪꦺꦴꦒꦮꦶꦱꦺꦱꦤ꧀ꦠꦶ ꦠꦺꦤ ꦢꦸꦏ꧀ꦑꦴꦢꦶꦮꦶꦱꦺꦱꦤꦪꦺꦴꦒꦺꦤ ꦮꦶꦱꦶꦛ꧀ꦜꦠꦁ. ꦱꦕ꧀ꦕꦮꦶꦱꦺꦱꦤꦨꦴꦮꦺꦤꦺꦮ ꦢꦸꦏ꧀ꦑꦴꦢꦷꦤꦁ ꦥꦫꦶꦚ꧀ꦚꦺꦪ꧀ꦪꦠꦴꦢꦶꦨꦴꦮꦺꦴ ꦱꦶꦢ꧀ꦣꦺꦴꦠꦶ ꦄꦴꦲ ‘‘ꦌꦏꦤ꧀ꦠꦱꦕ꧀ꦕꦠ꧀ꦠꦴ’’ꦠꦶ. ꦪꦡꦴ ꦕꦺꦠ꧀ꦡꦴꦠꦶ ꦪꦡꦴ ꦌꦠꦱ꧀ꦩꦶꦁ ꦱꦕ꧀ꦕꦪꦩꦏꦺ ꦱꦸꦢ꧀ꦣꦱꦕ꧀ꦕꦮꦴꦫꦺ ꦱꦕ꧀ꦕꦮꦶꦱꦺꦱꦤꦨꦹꦠꦴ ꦌꦮ ꦢꦸꦏ꧀ꦑꦴꦢꦪꦺꦴ ꦒꦲꦶꦠꦴ. ꦌꦮꦁ ꦑꦤ꧀ꦣꦪꦩꦏꦴꦢꦷꦱꦸꦥꦷꦠꦶ ꦤ ꦱꦸꦢ꧀ꦣꦱꦕ꧀ꦕꦮꦴꦫꦺ ꦌꦮ ꦄꦪꦁ ꦤꦪꦺꦴ ꦢꦱ꧀ꦱꦶꦠꦺꦴꦠꦶ ꦄꦠ꧀ꦡꦺꦴ. ꦥꦢꦱꦺꦴꦣꦤꦮꦴꦫꦺ ꦠꦁꦩꦹꦭꦕꦏ꧀ꦏꦮꦴꦫꦺ ꦕ ‘‘ꦫꦹꦥꦁ ꦫꦹꦥꦏ꧀ꦑꦤ꧀ꦣꦺꦴ’’ꦠꦶꦄꦴꦢꦶꦤꦴ ꦱꦩꦸꦢꦴꦪꦥꦢꦴꦤꦁꦪꦺꦮ ꦮꦸꦠ꧀ꦠꦠ꧀ꦠꦴ ꦮꦠ꧀ꦠꦧ꧀ꦧꦩꦺꦮ ꦤꦠ꧀ꦡꦷꦠꦶ ‘‘ꦱꦸꦢ꧀ꦣꦏ꧀ꦑꦤ꧀ꦣꦴꦢꦶꦮꦴꦫꦺꦱꦹ’’ꦠꦶ ꦮꦸꦠ꧀ꦠꦁ. ꦠꦡꦴ ꦕꦺꦠ꧀ꦡꦴꦥꦶ ꦱꦸꦢ꧀ꦣꦮꦴꦫꦺ ꦌꦮ ꦄꦪꦁ ꦤꦪꦺꦴ ꦢꦱ꧀ꦱꦶꦠꦺꦴ. ꦪꦢꦶ ꦱꦸꦢ꧀ꦣꦏ꧀ꦑꦤ꧀ꦣꦴꦢꦶꦮꦴꦫꦺꦱꦸ ꦑꦤ꧀ꦣꦴꦢꦶꦮꦶꦱꦺꦱꦤꦨꦹꦠꦴꦤꦩꦺꦮ ꦫꦹꦥꦴꦢꦷꦤꦁ ꦒꦲꦟꦺꦤ ꦨꦮꦶꦠꦧ꧀ꦧꦁ, ꦄꦡ ꦏꦱ꧀ꦩꦴ ꦑꦤ꧀ꦣꦴꦢꦶꦮꦶꦱꦺꦱꦤꦠꦺꦴ ꦄꦚ꧀ꦚꦺꦱꦩ꧀ꦥꦶ ꦫꦹꦥꦴꦢꦷꦤꦁ ꦮꦱꦺꦤ ꦄꦠ꧀ꦡꦺꦴ ꦢꦱ꧀ꦱꦶꦠꦺꦴꦠꦶ ꦕꦺꦴꦢꦤꦁ ꦱꦤ꧀ꦣꦴꦪꦴꦲ ‘‘ꦄꦛ꧀ꦜꦏꦡꦴꦪꦁ ꦥꦤꦴ’’ꦠꦶꦄꦴꦢꦶ. ꦥꦸꦫꦶꦩꦺꦴ ꦌꦮ ꦄꦠ꧀ꦡꦺꦴ ꦪꦸꦠ꧀ꦠꦺꦴ, ꦪꦸꦠ꧀ꦠꦶꦠꦺꦴ ꦥꦴꦜꦺꦴꦮ ꦧꦭꦮꦴꦠꦶ.

ꦥꦟ꧀ꦟꦠ꧀ꦠꦶꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.