꧒. ꦱꦴꦤꦸꦱꦪꦮꦴꦫꦮꦟ꧀ꦟꦤꦴ

꧖꧖-꧑꧓꧑. ‘‘ꦱꦴꦤꦸꦱꦪꦺꦴ, ꦥꦗꦲꦠꦶ, ꦥꦫꦶꦗꦴꦤꦴꦠꦷ’’ꦠꦶ ꦥꦸꦒ꧀ꦒꦭꦺꦴ ꦮꦸꦠ꧀ꦠꦺꦴꦠꦶ ‘‘ꦏꦴꦩꦫꦴꦒꦺꦤ ꦱꦴꦤꦸꦱꦪꦺꦴ, ꦏꦴꦩꦫꦴꦒꦁ ꦥꦗꦲꦠꦶ, ꦏꦴꦩꦫꦴꦒꦁ ꦥꦫꦶꦗꦴꦤꦴꦠꦷ’’ꦠꦶꦄꦴꦢꦷꦱꦸ ꦄꦤꦸꦱꦪꦱꦩꦔ꧀ꦒꦶꦨꦴꦮꦺꦤ ꦥꦲꦴꦤꦥꦫꦶꦚ꧀ꦚꦴꦏꦶꦫꦶꦪꦴꦪ ꦏꦠ꧀ꦠꦸꦨꦴꦮꦺꦤ ꦕ ꦥꦸꦒ꧀ꦒꦭꦺꦴ ꦮꦸꦠ꧀ꦠꦺꦴ, ꦤ ꦣꦩ꧀ꦩꦺꦴ. ꦨꦮꦮꦶꦱꦺꦱꦺꦤ ꦮꦴꦠꦶ ꦏꦺꦮꦭꦺꦤ ꦨꦮꦮꦶꦱꦺꦱꦺꦤ ꦮꦴ. ꦆꦠꦫꦺꦱꦹꦠꦶ ꦥꦛꦶꦓꦴꦤꦸꦱꦪꦴꦢꦷꦱꦸ. ꦨꦮꦴꦤꦸꦱꦪꦮꦶꦱꦺꦱꦺꦤ ꦮꦴꦠꦶ ꦏꦴꦩꦨꦮꦴꦢꦶꦨꦮꦮꦶꦱꦶꦛ꧀ꦜꦴꦤꦸꦱꦪꦮꦶꦱꦺꦱꦺꦤ ꦮꦴ. ꦱꦴꦤꦸꦱꦪꦠꦴꦤꦶꦫꦤꦸꦱꦪꦠꦴꦢꦶꦏꦴꦠꦶ ꦌꦠ꧀ꦡ ꦄꦴꦢꦶ-ꦱꦢ꧀ꦢꦺꦤ ꦥꦲꦴꦤꦴꦥꦲꦴꦤꦥꦫꦶꦚ꧀ꦚꦴꦥꦫꦶꦚ꧀ꦚꦴ ꦱꦔ꧀ꦒꦪ꧀ꦲꦤ꧀ꦠꦶ. ꦤꦤꦸ ꦕ ꦨꦮꦮꦶꦱꦺꦱꦺ ꦏꦺꦱꦚ꧀ꦕꦶ ꦄꦤꦸꦱꦪꦴꦤꦁ ꦄꦥ꧀ꦥꦲꦴꦤꦤ꧀ꦠꦶ? ꦤ ꦠꦁ ꦄꦤꦸꦱꦪꦏꦠꦁ, ꦄꦡ ꦑꦺꦴ ꦥꦕ꧀ꦕꦪꦮꦺꦏꦭ꧀ꦭꦠꦺꦴ ꦄꦤꦺꦴꦏꦴꦱꦠꦴꦪ ꦕꦴꦠꦶ ꦤꦴꦪꦁ ꦮꦶꦫꦺꦴꦣꦺꦴ. ꦢ꧀ꦮꦷꦱꦸ ꦮꦺꦢꦤꦴꦱꦹꦠꦶ ꦱꦸꦑꦈꦥꦺꦏ꧀ꦑꦴꦱꦸ ꦮꦺꦢꦤꦴꦱꦸ ꦢꦸꦏ꧀ꦑꦴꦪ ꦮꦺꦢꦤꦴꦪ ꦏꦴꦩꦫꦴꦒꦴꦤꦸꦱꦪꦺꦤ ꦤꦶꦫꦤꦸꦱꦪꦺꦴꦠꦶ ꦪꦺꦴꦗꦺꦠꦧ꧀ꦧꦁ. ꦆꦢꦩ꧀ꦥꦶ ꦤꦠ꧀ꦡꦶ ꦥꦸꦒ꧀ꦒꦭꦮꦱꦺꦤ ꦮꦸꦕ꧀ꦕꦩꦴꦤꦠ꧀ꦠꦴ. ꦠꦺꦤꦴꦲ ‘‘ꦤ ꦲꦶ ꦥꦸꦒ꧀ꦒꦭꦱ꧀ꦱ…ꦥꦺ… ꦄꦤꦸꦱꦪꦴꦤ’’ꦤ꧀ꦠꦶ. ꦪꦢꦶꦥꦶ ꦥꦸꦒ꧀ꦒꦭꦱ꧀ꦱ ꦄꦤꦸꦱꦪꦤꦺꦴꦏꦴꦱꦺꦴ ꦄꦤꦺꦴꦏꦴꦱꦺꦴ, ꦠꦱ꧀ꦱ ꦥꦤ ꦱꦴꦤꦸꦱꦪꦠꦴꦢꦶꦲꦺꦠꦸ ꦲꦺꦴꦠꦷꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦄꦤꦸꦱꦪꦱ꧀ꦱ ꦥꦤꦴ’’ꦠꦶꦄꦴꦢꦶꦩꦴꦲ. ꦤꦶꦫꦤꦸꦱꦪꦠꦴꦢꦷꦤꦤ꧀ꦠꦶ ꦄꦴꦢꦶ-ꦱꦢ꧀ꦢꦺꦤ ꦄꦥ꧀ꦥꦲꦴꦤꦴꦥꦫꦶꦚ꧀ꦚꦴ ꦱꦔ꧀ꦒꦟ꧀ꦲꦴꦠꦶ. ꦥꦫꦶꦗꦴꦤꦤꦁ ꦱꦩꦠꦶꦏ꧀ꦏꦩꦤꦤ꧀ꦠꦶ ꦥꦫꦶꦚ꧀ꦚꦴꦮꦴꦫꦺꦥꦶ ‘‘ꦄꦥꦴꦢꦴꦤꦺ ꦤꦶꦱ꧀ꦱꦏ꧀ꦏꦮꦕꦤ’’ꦤ꧀ꦠꦶ ꦮꦸꦠ꧀ꦠꦁ.

ꦄꦤꦸꦱꦪꦤꦛ꧀ꦜꦴꦤꦠꦺꦴꦠꦶ ꦄꦤꦸꦱꦪꦤꦛ꧀ꦜꦴꦤꦲꦺꦠꦸ. ‘‘ꦄꦤꦤꦸꦱꦪꦤꦛ꧀ꦜꦴꦤꦠꦺꦴ’’ꦠꦶ ꦌꦠ꧀ꦡꦴꦥꦶ ꦌꦱꦺꦮ ꦤꦪꦺꦴ. ꦤꦶꦩꦶꦠ꧀ꦠꦴꦥꦴꦢꦴꦤꦨꦴꦮꦢꦱ꧀ꦱꦤꦠ꧀ꦡꦤ꧀ꦠꦶ ꦱꦴꦤꦸꦱꦪꦮꦴꦫꦺ ꦤꦶꦩꦶꦠ꧀ꦠꦨꦴꦮꦢꦱ꧀ꦱꦤꦠ꧀ꦡꦁ, ꦥꦗꦲꦤꦥꦫꦶꦚ꧀ꦚꦴꦮꦴꦫꦺꦱꦸ ꦄꦥꦴꦢꦴꦤꦨꦴꦮꦢꦱ꧀ꦱꦤꦠ꧀ꦡꦚ꧀ꦕꦴꦠꦶ ꦪꦺꦴꦗꦺꦠꦧ꧀ꦧꦁ. ꦥꦗꦲꦠꦷꦠꦶ ꦌꦠ꧀ꦡ ‘‘ꦫꦹꦥꦣꦴꦠꦸꦪꦴ ꦄꦫꦹꦥꦣꦴꦠꦸꦪꦴ ꦠꦠꦺꦴ ꦩꦴꦤꦴꦤꦸꦱꦪꦁ ꦥꦗꦲꦠꦷ’’ꦠꦶ ꦥꦴꦭ꦳ꦶꦥꦢꦁ ꦄꦴꦲꦫꦶꦠ꧀ꦮꦴ ꦪꦺꦴꦗꦺꦠꦧ꧀ꦧꦁ, ꦤ ꦥꦗꦲꦠꦷꦠꦶ ꦌꦠ꧀ꦡ ꦥꦤ ‘‘ꦢꦸꦏ꧀ꦑꦴꦪ ꦮꦺꦢꦤꦴꦪ ꦠꦠꦺꦴ ꦏꦴꦩꦫꦴꦒꦴꦤꦸꦱꦪꦁ ꦤꦥ꧀ꦥꦗꦲꦠꦷ’’ꦠꦶ. ꦌꦮꦩꦴꦢꦷꦱꦹꦠꦶ ꦄꦴꦢꦶ-ꦱꦢ꧀ꦢꦺꦤ ꦥꦫꦶꦚ꧀ꦚꦴꦮꦴꦫꦩ꧀ꦥꦶ ꦱꦔ꧀ꦒꦟ꧀ꦲꦴꦠꦶ. ꦨꦸꦩ꧀ꦩꦤꦶꦢ꧀ꦢꦺꦱꦺꦤꦺꦮ ꦲꦺꦠꦸꦄꦠ꧀ꦡꦺꦤꦺꦮ ꦤꦶꦢ꧀ꦢꦶꦛ꧀ꦜꦴꦠꦶ ꦄꦠ꧀ꦡꦺꦴ.

ꦕꦠꦸꦠ꧀ꦡꦥꦚ꧀ꦲꦮꦶꦱ꧀ꦱꦗ꧀ꦗꦤꦺꦤꦴꦠꦶ ‘‘ꦪꦠꦺꦴ ꦮꦴ ꦥꦤ ꦩꦴꦤꦴꦤꦸꦱꦪꦺꦤ ꦱꦴꦤꦸꦱꦪꦺꦴ, ꦠꦠꦺꦴ ꦏꦴꦩꦫꦴꦒꦴꦤꦸꦱꦪꦺꦤ ꦱꦴꦤꦸꦱꦪꦺꦴ’’ꦠꦶ ꦌꦠꦱ꧀ꦱ ꦥꦚ꧀ꦲꦱ꧀ꦱ ꦮꦶꦱ꧀ꦱꦗ꧀ꦗꦤꦺꦤ. ꦠꦠ꧀ꦡ ꦲꦶ ‘‘ꦫꦹꦥꦣꦴꦠꦸꦪꦴ ꦄꦫꦹꦥꦣꦴꦠꦸꦪꦴ’’ꦠꦶꦄꦴꦢꦶꦤꦴ ꦱꦫꦹꦥꦠꦺꦴ ꦄꦤꦸꦱꦪꦤꦛ꧀ꦜꦴꦤꦴꦤꦶ ꦢꦱ꧀ꦱꦶꦠꦴꦤꦶ. ꦠꦢꦠ꧀ꦡꦺꦠꦶ ꦠꦁ ꦄꦤꦸꦱꦪꦤꦛ꧀ꦜꦴꦤꦢꦱ꧀ꦱꦤꦁ ꦄꦠ꧀ꦡꦺꦴ ꦌꦠꦱ꧀ꦱꦴꦠꦶ ꦠꦢꦠ꧀ꦡꦺꦴ, ꦠꦱ꧀ꦩꦶꦁ ꦠꦢꦠ꧀ꦡꦺ. ‘‘ꦄꦤꦸꦱꦪꦱ꧀ꦱ ꦈꦥ꧀ꦥꦠ꧀ꦠꦶꦛ꧀ꦜꦴꦤꦢꦱ꧀ꦱꦤꦠ꧀ꦡꦁ ꦄꦪꦁ ꦮꦴꦫꦺꦴ ꦄꦴꦫꦢ꧀ꦣꦺꦴ’’ꦠꦶꦄꦴꦢꦶꦤꦴ ‘‘ꦪꦠꦺꦴ’’ꦠꦶ ꦌꦠꦺꦤ ꦄꦤꦸꦱꦪꦤꦛ꧀ꦜꦴꦤꦁ ꦮꦸꦠ꧀ꦠꦤ꧀ꦠꦶ ꦆꦩꦩꦠ꧀ꦡꦁ ꦮꦶꦨꦴꦮꦺꦠ꧀ꦮꦴ. ꦥꦩꦴꦢꦭꦶꦑꦶꦠꦁ ꦮꦶꦪ ꦢꦶꦱ꧀ꦱꦠꦶ ꦈꦥ꧀ꦥꦤ꧀ꦤ-ꦱꦢ꧀ꦢꦺꦤ ꦮꦠ꧀ꦠꦩꦴꦤꦸꦥ꧀ꦥꦤ꧀ꦤꦺ ꦮꦸꦕ꧀ꦕꦩꦴꦤꦺ. ꦪꦡꦴ ꦥꦤ ꦈꦥ꧀ꦥꦗ꧀ꦗꦤꦮꦴꦫꦺ ꦈꦥ꧀ꦥꦗ꧀ꦗꦠꦶ-ꦱꦢ꧀ꦢꦺꦤ ꦈꦥ꧀ꦥꦠ꧀ꦠꦶꦪꦺꦴꦒꦢꦷꦥꦏꦠ꧀ꦠꦴ ꦈꦥ꧀ꦥꦠ꧀ꦠꦶꦫꦲꦴ ꦮꦸꦕ꧀ꦕꦤ꧀ꦠꦶ, ꦌꦮꦩꦶꦣꦴꦥꦶ ꦈꦥ꧀ꦥꦠ꧀ꦠꦶꦄꦫꦲꦺ ꦮꦸꦕ꧀ꦕꦩꦴꦤꦺ ꦤ ꦏꦺꦴꦕꦶ ꦮꦶꦫꦺꦴꦣꦺꦴ. ꦪꦁ ꦥꦤ ꦮꦏ꧀ꦑꦠꦶ ‘‘ꦤ ꦲꦶ ꦄꦥꦫꦶꦪꦴꦥꦤ꧀ꦤꦴꦤꦁ ꦄꦤꦸꦱꦪꦸꦥ꧀ꦥꦠ꧀ꦠꦶꦫꦲꦛ꧀ꦜꦴꦤꦠꦴ’’ꦠꦶ, ꦱꦺꦴꦥꦶ ꦤ ꦢꦺꦴꦱꦺꦴ. ꦪꦠ꧀ꦡ ꦪꦠ꧀ꦡ ꦲꦶ ꦄꦤꦸꦱꦪꦴ ꦈꦥ꧀ꦥꦠ꧀ꦠꦶꦫꦲꦴ, ꦠꦢꦺꦮ ꦌꦏꦗ꧀ꦙꦁ ꦒꦲꦺꦠ꧀ꦮꦴ ‘‘ꦱꦧ꧀ꦧꦠ꧀ꦡꦴ’’ꦠꦶ ꦮꦸꦠ꧀ꦠꦤ꧀ꦠꦶ. ꦠꦡꦺꦮ ꦢꦶꦱ꧀ꦱꦠꦷꦠꦶ ꦠꦁ ꦥꦩꦴꦢꦭꦶꦑꦶꦠꦁ ꦮꦶꦪ ꦢꦶꦱ꧀ꦱꦠꦷꦠꦶ ꦄꦠ꧀ꦡꦺꦴ.

ꦪꦠꦺꦴ ꦈꦥ꧀ꦥꦤ꧀ꦤꦺꦤ ꦨꦮꦶꦠꦧ꧀ꦧꦤ꧀ꦠꦶ ꦪꦠꦺꦴ ꦄꦤꦸꦱꦪꦤꦛ꧀ꦜꦴꦤꦠꦺꦴ ꦏꦴꦩꦒꦴꦫꦴꦤꦸꦱꦪꦺꦤ ꦈꦥ꧀ꦥꦤ꧀ꦤꦺꦤ ꦨꦮꦶꦠꦧ꧀ꦧꦁ, ꦠꦺꦤ ꦏꦴꦩꦫꦴꦒꦴꦤꦸꦱꦪꦺꦤ ꦈꦥ꧀ꦥꦠ꧀ꦠꦶꦫꦲꦛ꧀ꦜꦴꦤꦺ ꦤꦶꦱ꧀ꦱꦏ꧀ꦏꦮꦕꦤꦁ ꦏꦠꦁ ‘‘ꦪꦠꦺꦴ’’ꦠꦶ. ꦠꦡꦴꦠꦶ ꦌꦠ꧀ꦡ ꦠꦡꦴ-ꦱꦢ꧀ꦢꦺꦴ ꦪꦡꦴ ‘‘ꦪꦠꦺꦴ ꦈꦥ꧀ꦥꦤ꧀ꦤꦺꦤꦴ’’ꦠꦶ ꦌꦠ꧀ꦡ ꦈꦥ꧀ꦥꦠ꧀ꦠꦶꦫꦲꦛ꧀ꦜꦴꦤꦠꦺꦴ ꦄꦤꦸꦱꦪꦱ꧀ꦱ ꦈꦥ꧀ꦥꦠ꧀ꦠꦶꦫꦲꦠꦴ ꦮꦸꦠ꧀ꦠꦴ, ꦠꦡꦴ ‘‘ꦈꦥ꧀ꦥꦗ꧀ꦗꦤꦏꦺꦤꦴ’’ꦠꦶ ꦌꦠ꧀ꦡꦴꦥꦶ ꦱꦴ ꦌꦮ ꦮꦸꦕ꧀ꦕꦠꦷꦠꦶ ꦢꦷꦥꦺꦠꦷꦠꦶ ꦄꦴꦲ ‘‘ꦱꦧ꧀ꦧꦣꦩ꧀ꦩꦺꦱꦸ…ꦥꦺ… ꦄꦴꦥꦤ꧀ꦤꦺꦤꦴ’’ꦠꦶ. ꦠꦠ꧀ꦡ ‘‘ꦈꦥ꧀ꦥꦗ꧀ꦗꦤꦏꦺꦴ’’ꦠꦶ ꦮꦸꦠ꧀ꦠꦺ ꦄꦤꦸꦥ꧀ꦥꦗ꧀ꦗꦤꦏꦺꦴ ꦤ ꦲꦺꦴꦠꦷꦠꦶ ꦄꦪꦩꦠ꧀ꦡꦺꦴ ꦮꦶꦚ꧀ꦚꦴꦪꦠꦶ, ꦠꦡꦴ ꦕ ꦱꦠꦶ ꦠꦺꦤ ꦄꦤꦸꦥ꧀ꦥꦠ꧀ꦠꦶ ꦤꦶꦕ꧀ꦖꦶꦠꦴꦠꦶ ꦈꦥ꧀ꦥꦤ꧀ꦤꦱꦨꦴꦮꦠꦴ ꦕ ꦥꦏꦴꦱꦶꦠꦴ ꦲꦺꦴꦠꦷꦠꦶ. ꦠꦺꦤꦴꦲ ‘‘ꦱꦧ꧀ꦧꦣꦩ꧀ꦩꦺꦱꦸ…ꦥꦺ… ꦄꦥꦤꦺꦠꦷ’’ꦠꦶ. ‘‘ꦪꦺꦴ ꦪꦠꦺꦴ ꦏꦴꦩꦫꦴꦒꦴꦤꦸꦱꦪꦺꦤ ꦤꦶꦫꦤꦸꦱꦪꦺꦴ, ꦱꦺꦴ ꦠꦠꦺꦴ ꦩꦴꦤꦴꦤꦸꦱꦪꦺꦤ ꦤꦶꦫꦤꦸꦱꦪꦺꦴ’’ꦠꦶ ꦥꦸꦕ꧀ꦖꦴꦪ ‘‘ꦪꦠꦺꦴ ꦠꦠꦺꦴ’’ꦠꦶ ꦄꦴꦒꦠꦠ꧀ꦠꦴ ꦮꦶꦱ꧀ꦱꦗ꧀ꦗꦤꦺ ‘‘ꦱꦧ꧀ꦧꦠ꧀ꦡꦴ’’ꦠꦶ ꦥꦢꦱ꧀ꦱ ꦤꦶꦱ꧀ꦱꦏ꧀ꦏꦮꦱꦺꦤꦺꦮ ꦱꦏ꧀ꦏꦴ ꦪꦺꦴꦗꦺꦠꦸꦤ꧀ꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦱꦧ꧀ꦧꦠ꧀ꦡꦴꦠꦶ…ꦥꦺ… ꦤ ꦤ ꦱꦩ꧀ꦨꦮꦠꦷ’’ꦠꦶ ꦄꦴꦲ. ꦨꦸꦩ꧀ꦩꦠꦺꦴ ꦄꦚ꧀ꦚꦠ꧀ꦡꦴꦥꦶ ꦱꦢ꧀ꦢꦮꦶꦢꦹ ꦆꦕ꧀ꦖꦤ꧀ꦠꦶ, ꦪꦠꦺꦴ ꦱꦧ꧀ꦧꦺꦱꦁ ꦥꦴꦢꦏꦁ ‘‘ꦱꦧ꧀ꦧꦠ꧀ꦡꦥꦴꦢꦏ’’ꦤ꧀ꦠꦶ ꦮꦸꦕ꧀ꦕꦠꦶ, ꦆꦣ ꦥꦤ ꦤꦶꦱ꧀ꦱꦏ꧀ꦏꦮꦱꦺꦤ ꦮꦺꦢꦶꦠꦧ꧀ꦧꦁ.

ꦱꦴꦤꦸꦱꦪꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.