꧑. ꦥꦠ꧀ꦠꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧕꧙꧘-꧖꧐꧒. ꦥꦠ꧀ꦠꦮꦒ꧀ꦒꦱ꧀ꦱ ꦥꦜꦩꦺ ꦨꦟ꧀ꦝꦤ꧀ꦠꦶ ꦮꦶꦏ꧀ꦏꦺꦠꦧ꧀ꦧꦨꦟ꧀ꦝꦁ. ꦪꦱ꧀ꦩꦴ ꦮꦟ꧀ꦟꦱꦢ꧀ꦢꦺꦴ ꦱꦟ꧀ꦜꦴꦤꦗꦴꦠꦶꦫꦹꦥꦴꦪꦠꦤꦏꦴꦫꦟꦥꦩꦴꦟꦒꦸꦟꦥꦱꦁꦱꦴꦢꦷꦱꦸ ꦢꦶꦱ꧀ꦱꦠꦶ. ‘‘ꦩꦲꦤ꧀ꦠꦁ ꦱꦥ꧀ꦥꦫꦴꦗꦮꦟ꧀ꦟꦁ ꦄꦨꦶꦤꦶꦩ꧀ꦩꦶꦤꦶꦠ꧀ꦮꦴ’’ꦠꦶꦄꦴꦢꦷꦱꦸ (ꦱꦁ. ꦤꦶ. ꧑.꧑꧔꧒) ꦲꦶ ꦱꦟ꧀ꦜꦴꦤꦁ ꦮꦸꦕ꧀ꦕꦠꦶ. ‘‘ꦧ꧀ꦫꦴꦲ꧀ꦩꦟꦺꦴꦮ ꦱꦺꦛ꧀ꦜꦺꦴ ꦮꦟ꧀ꦟꦺꦴ, ꦲꦷꦤꦺꦴ ꦄꦚ꧀ꦚꦺꦴ ꦮꦟ꧀ꦟꦺꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧒.꧔꧐꧒) ꦗꦴꦠꦶ. ‘‘ꦥꦫꦩꦴꦪ ꦮꦟ꧀ꦟꦥꦺꦴꦏ꧀ꦑꦫꦠꦴꦪ ꦱꦩꦤ꧀ꦤꦴꦒꦠꦺꦴ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧑.꧓꧐꧓) ꦫꦹꦥꦴꦪꦠꦤꦁ.

‘‘ꦤ ꦲꦫꦴꦩꦶ ꦤ ꦨꦚ꧀ꦗꦴꦩꦶ, ꦄꦴꦫꦴ ꦱꦶꦔ꧀ꦓꦴꦩꦶ ꦮꦴꦫꦶꦗꦁ;

ꦄꦡ ꦏꦺꦤ ꦤꦸ ꦮꦟ꧀ꦟꦺꦤ, ꦒꦤ꧀ꦣꦠ꧀ꦡꦺꦤꦺꦴꦠꦶ ꦮꦸꦕ꧀ꦕꦠꦷ’’ꦠꦶ. (ꦱꦁ. ꦤꦶ. ꧑.꧒꧓꧔; ꦗꦴ. ꧑.꧖.꧑꧑꧖) –

ꦄꦴꦢꦷꦱꦸ ꦏꦴꦫꦟꦁ. ‘‘ꦠꦪꦺꦴ ꦥꦠ꧀ꦠꦱ꧀ꦱ ꦮꦟ꧀ꦟꦴ’’ꦠꦶꦄꦴꦢꦷꦱꦸ (ꦥꦴꦫꦴ. ꧖꧐꧒) ꦥꦩꦴꦟꦁ. ‘‘ꦏꦢꦴ ꦱꦚ꧀ꦚꦸꦭ꦳꧀ꦲꦴ ꦥꦤ ꦠꦺ ꦒꦲꦥꦠꦶ ꦆꦩꦺ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦮꦟ꧀ꦟꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧒.꧗꧗) ꦒꦸꦟꦺꦴ. ‘‘ꦮꦟ꧀ꦟꦴꦫꦲꦱ꧀ꦱ ꦮꦟ꧀ꦟꦁ ꦨꦴꦱꦠꦷ’’ꦠꦶꦄꦴꦢꦷꦱꦸ (ꦄ. ꦤꦶ. ꧔.꧓) ꦥꦱꦁꦱꦴ. ꦠꦱ꧀ꦩꦴ ꦮꦸꦠ꧀ꦠꦁ ‘‘ꦠꦪꦺꦴ ꦥꦠ꧀ꦠꦱ꧀ꦱ ꦮꦟ꧀ꦟꦴꦠꦶ ꦠꦷꦟꦶ ꦥꦠ꧀ꦠꦱ꧀ꦱ ꦥꦩꦴꦟꦴꦤꦷ’’ꦠꦶ.

ꦄꦝ꧀ꦞꦠꦺꦫꦱꦥꦭꦴ ꦲꦺꦴꦠꦷꦠꦶ ꦌꦠ꧀ꦡ ‘‘ꦩꦴꦱꦴꦤꦁ ꦄꦝ꧀ꦞꦠꦺꦫꦱꦥꦭꦴꦤꦶ ꦒꦟ꧀ꦲꦴꦠꦷ’’ꦠꦶ ꦮꦢꦤ꧀ꦠꦶ. ‘‘ꦩꦒꦣꦤꦴꦭ꦳ꦶ ꦤꦴꦩ ꦖꦥꦱꦠꦴ ꦤꦴꦭ꦳ꦷ’’ꦠꦶ ꦏꦺꦕꦶ. ‘‘ꦄꦛ꧀ꦜꦥꦱꦠꦴ’’ꦠꦶ ꦄꦥꦫꦺ. ꦠꦠ꧀ꦡ ꦥꦸꦫꦶꦩꦴꦤꦁ ꦩꦠꦺꦤ ꦠꦶꦥꦱꦠꦴꦪ ꦤꦴꦭ꦳ꦶꦪꦴ ꦢ꧀ꦮꦺ ꦤꦴꦭ꦳ꦶꦪꦺꦴ ꦌꦏꦴ ꦩꦒꦣꦤꦴꦭ꦳ꦶ ꦲꦺꦴꦠꦶ, ꦥꦕ꧀ꦖꦶꦩꦴꦤꦁ ꦕꦠꦸꦥꦱꦠꦴꦪ ꦤꦴꦭ꦳ꦶꦪꦴ ꦢ꧀ꦮꦺ ꦤꦴꦭ꦳ꦶꦪꦺꦴ ꦌꦏꦴ ꦩꦒꦣꦤꦴꦭ꦳ꦶ. ꦄꦴꦕꦫꦶꦪꦣꦩ꧀ꦩꦥꦴꦭꦠ꧀ꦡꦺꦫꦺꦤ ꦥꦤ ‘‘ꦥꦏꦠꦶꦪꦴ ꦕꦠꦸꦩꦸꦛ꧀ꦜꦶꦏꦁ ꦏꦸꦝꦸꦮꦁ, ꦕꦠꦸꦏꦸꦝꦸꦮꦁ ꦤꦴꦭ꦳ꦶꦏꦁ, ꦠꦴꦪ ꦤꦴꦭ꦳ꦶꦪꦴ ꦱꦺꦴꦭ꦳ꦱ ꦤꦴꦭ꦳ꦶꦪꦺꦴ ꦢꦺꦴꦟꦁ, ꦠꦁ ꦥꦤ ꦩꦒꦣꦤꦴꦭ꦳ꦶꦪꦴ ꦢ꧀ꦮꦴꦢꦱ ꦤꦴꦭ꦳ꦶꦪꦺꦴ ꦲꦺꦴꦤ꧀ꦠꦷ’’ꦠꦶ ꦮꦸꦠ꧀ꦠꦁ, ꦠꦱ꧀ꦩꦴ ꦠꦺꦤ ꦤꦪꦺꦤ ‘‘ꦩꦒꦣꦤꦴꦭ꦳ꦶ ꦤꦴꦩ ꦥꦚ꧀ꦕ ꦏꦸꦝꦸꦮꦴꦤꦶ ꦌꦏꦚ꧀ꦕ ꦩꦸꦛ꧀ꦜꦶꦁ ꦌꦏꦴꦪ ꦩꦸꦛ꧀ꦜꦶꦪꦴ ꦠꦠꦶꦪꦚ꧀ꦕ ꦨꦴꦒꦁ ꦒꦟ꧀ꦲꦴꦠꦷ’’ꦠꦶ ꦮꦺꦢꦶꦠꦧ꧀ꦧꦁ.

ꦱꦧ꧀ꦧꦱꦩ꧀ꦨꦴꦫꦱꦔ꧀ꦑꦠꦺꦴꦠꦶ ꦗꦷꦫꦏꦴꦢꦶꦱꦧ꧀ꦧꦱꦩ꧀ꦨꦴꦫꦺꦲꦶ ꦱꦔ꧀ꦑꦠꦺꦴ. ꦄꦴꦭꦺꦴꦥꦱ꧀ꦱ ꦄꦴꦭꦺꦴꦥꦱ꧀ꦱ ꦄꦤꦸꦫꦹꦥꦤ꧀ꦠꦶ ꦌꦠ꧀ꦡ ‘‘ꦧ꧀ꦪꦚ꧀ꦗꦤꦱ꧀ꦱ ꦩꦠ꧀ꦠꦴ ꦤꦴꦩ ꦎꦢꦤꦕꦠꦸꦠ꧀ꦡꦺꦴ ꦨꦴꦒꦺꦴ’’ꦠꦶ ꦧ꧀ꦫꦲ꧀ꦩꦴꦪꦸꦱꦸꦠ꧀ꦠꦱ꧀ꦱ ꦄꦛ꧀ꦜꦏꦡꦴꦪꦁ (ꦩ. ꦤꦶ. ꦄꦛ꧀ꦜ. ꧒.꧓꧘꧗) ꦮꦸꦠ꧀ꦠꦠ꧀ꦠꦴ ꦄꦴꦭꦺꦴꦥꦱ꧀ꦱ ꦕꦠꦸꦠ꧀ꦡꦨꦴꦒꦥ꧀ꦥꦩꦴꦟꦁ ꦧ꧀ꦪꦚ꧀ꦗꦤꦁ ꦄꦴꦭꦺꦴꦥꦱ꧀ꦱ ꦄꦤꦸꦫꦹꦥꦤ꧀ꦠꦶ ꦒꦲꦺꦠꦧ꧀ꦧꦁ. ꦆꦣ ꦥꦤ ꦱꦹꦥꦱ꧀ꦱꦺꦮ ꦎꦢꦤꦕꦠꦸꦠ꧀ꦡꦨꦴꦒꦥ꧀ꦥꦩꦴꦟꦠꦁ ꦢꦱ꧀ꦱꦺꦠ꧀ꦮꦴ ꦌꦠꦱ꧀ꦱ ꦭꦏ꧀ꦑꦟꦺ ꦢꦱ꧀ꦱꦶꦠꦺ ꦆꦠꦫꦱ꧀ꦱꦥꦶ ꦢꦱ꧀ꦱꦶꦠꦩꦺꦮ ꦲꦺꦴꦠꦷꦠꦶ ꦧ꧀ꦪꦚ꧀ꦗꦤꦱ꧀ꦱ ꦠꦡꦴ ꦮꦶꦱꦺꦱꦺꦠ꧀ꦮꦴ ꦥꦩꦴꦟꦁ ꦤ ꦢꦱ꧀ꦱꦶꦠꦁ.

ꦩꦒꦣꦤꦴꦭ꦳ꦶꦪꦴ ꦈꦥꦝ꧀ꦞꦥ꧀ꦥꦩꦴꦟꦺꦴ ꦆꦣ ꦥꦠ꧀ꦡꦺꦴꦠꦶ ꦄꦴꦲ ‘‘ꦥꦠ꧀ꦡꦺꦴꦢꦤꦤ꧀ꦠꦶ ꦩꦒꦣꦤꦴꦭ꦳ꦶꦪꦴ ꦈꦥꦝ꧀ꦞꦤꦴꦭ꦳ꦶꦏꦺꦴꦢꦤ’’ꦤ꧀ꦠꦶ. ꦆꦩꦶꦤꦴ ꦕ ‘‘ꦥꦠ꧀ꦡꦢ꧀ꦮꦪꦁ ꦩꦒꦣꦤꦴꦭ꦳ꦷ’’ꦠꦶ ꦢꦱ꧀ꦱꦶꦠꦁ ꦲꦺꦴꦠꦶ. ꦥꦠ꧀ꦡꦺꦴ ꦕ ‘‘ꦕꦠꦸꦥꦭꦺꦴ ꦏꦸꦝꦸꦮꦺꦴ, ꦕꦠꦸꦏꦸꦝꦸꦮꦺꦴ ꦥꦠ꧀ꦡꦺꦴ’’ꦠꦶ ꦆꦩꦶꦤꦴ ꦭꦺꦴꦏꦶꦪꦮꦺꦴꦲꦴꦫꦺꦤ ꦮꦺꦢꦶꦠꦧ꧀ꦧꦺꦴ. ꦨꦴꦗꦤꦥꦫꦶꦨꦺꦴꦒꦺꦤꦴꦠꦶ ꦈꦢꦏꦴꦲꦫꦟꦴꦢꦶꦤꦴ ꦨꦴꦗꦤꦥꦫꦶꦨꦺꦴꦒꦺꦤ.

꧖꧐꧗. ꦣꦺꦴꦠꦺꦠꦶ ꦥꦫꦶꦨꦺꦴꦒꦴꦮꦱꦴꦤꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦁ, ꦤ ꦥꦤ ꦣꦺꦴꦠꦺꦪꦺꦮ ꦢꦸꦏ꧀ꦏꦛꦁ ꦄꦴꦥꦗ꧀ꦗꦠꦶ ꦠꦠꦺꦴ ꦥꦸꦫꦺꦠꦫꦁ ꦥꦫꦶꦨꦺꦴꦒꦏꦴꦭꦺꦪꦺꦮ ꦄꦴꦥꦗ꧀ꦗꦤꦠꦺꦴ.

꧖꧐꧘. ꦥꦚ꧀ꦕꦲꦶ ꦢ꧀ꦮꦷꦲꦷꦠꦶ ꦆꦢꦁ ‘‘ꦌꦠ꧀ꦠꦴꦮꦠꦴ ꦏꦴꦭ꦳ꦮꦟ꧀ꦟꦠꦴ ꦱꦩ꧀ꦥꦗ꧀ꦗꦠꦷ’’ꦠꦶ ꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦁ. ‘‘ꦪꦢꦶ ꦥꦤ ꦌꦏꦺꦤꦥꦶ ꦥꦴꦏꦺꦤ ꦏꦴꦭ꦳ꦮꦟ꧀ꦟꦺꦴ ꦲꦺꦴꦠꦶ, ꦄꦣꦶꦛ꧀ꦜꦴꦤꦸꦥꦒꦺꦴꦪꦺꦮꦴ’’ꦠꦶ ꦮꦢꦤ꧀ꦠꦶ. ꦲꦠ꧀ꦡꦴꦤꦴꦒꦠꦱ꧀ꦱꦥꦶ ꦄꦣꦶꦛ꧀ꦜꦴꦠꦧ꧀ꦧꦨꦴꦮꦢꦱ꧀ꦱꦤꦠ꧀ꦡꦁ ‘‘ꦪꦢꦶꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦆꦩꦶꦤꦴ ꦕ ꦢꦹꦫꦺ ꦜꦶꦠꦩ꧀ꦥꦶ ꦄꦣꦶꦛ꧀ꦜꦴꦠꦸꦁ ꦮꦶꦏꦥ꧀ꦥꦺꦠꦸꦚ꧀ꦕ ꦭꦨꦠꦶ, ꦜꦥꦶꦠꦛ꧀ꦜꦴꦤꦱꦭ꧀ꦭꦏ꧀ꦑꦟꦚ꧀ꦕ ꦤ ꦥꦩꦴꦟꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦱꦸꦠ꧀ꦮꦴ ꦮꦴꦠꦶ ꦥꦠ꧀ꦠꦏꦴꦫꦏꦺꦤ ꦥꦺꦱꦶꦠꦨꦶꦏ꧀ꦑꦸꦤꦴ ꦄꦤꦴꦟꦠ꧀ꦠꦺꦴ ꦏꦺꦮꦭꦁ ꦠꦱ꧀ꦱ ꦏꦡꦺꦤ꧀ꦠꦱ꧀ꦱ ꦮꦕꦤꦩꦠ꧀ꦠꦁ ꦱꦸꦠ꧀ꦮꦴ. ꦤ ꦥꦩꦴꦟꦤ꧀ꦠꦶ ꦠꦺꦤ ꦄꦥꦺꦱꦶꦠꦠ꧀ꦠꦴ. ꦱꦴꦩꦤ꧀ꦠꦮꦶꦲꦴꦫꦺꦠꦶ ꦆꦢꦁ ꦈꦥꦕꦴꦫꦩꦠ꧀ꦠꦁ, ꦠꦠꦺꦴ ꦢꦹꦫꦺ ꦜꦶꦠꦩ꧀ꦥꦶ ꦄꦣꦶꦛ꧀ꦜꦴꦠꦸꦁ ꦮꦛ꧀ꦛꦠꦶꦪꦺꦮ. ꦜꦥꦶꦠꦛ꧀ꦜꦴꦤꦁ ꦱꦭ꧀ꦭꦏ꧀ꦑꦺꦠ꧀ꦮꦴꦠꦶ ꦆꦢꦩ꧀ꦥꦶ ꦈꦥꦕꦴꦫꦩꦠ꧀ꦠꦁ, ꦥꦠ꧀ꦠꦱꦭ꧀ꦭꦏ꧀ꦑꦟꦩꦺꦮꦺꦠ꧀ꦡ ꦥꦩꦴꦟꦁ. ꦥꦠ꧀ꦠꦺ ꦮꦴ ꦖꦶꦢ꧀ꦢꦁ ꦲꦺꦴꦠꦷꦠꦶ ꦩꦸꦑꦮꦛ꧀ꦛꦶꦠꦺꦴ ꦲꦺꦛ꧀ꦜꦴ ꦢ꧀ꦮꦔ꧀ꦒꦸꦭꦩꦠ꧀ꦠꦺꦴꦏꦴꦱꦠꦺꦴ ꦥꦛ꧀ꦜꦴꦪ ꦪꦠ꧀ꦡ ꦏꦠ꧀ꦡꦕꦶ ꦖꦶꦢ꧀ꦢꦁ ꦲꦺꦴꦠꦶ. ꦱꦺꦱꦩꦺꦠ꧀ꦡ ꦥꦜꦩꦏꦡꦶꦤꦺ ꦮꦸꦠ꧀ꦠꦤꦪꦩꦺꦮ.

ꦥꦠ꧀ꦠꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.