꧑꧐. ꦫꦴꦗꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧕꧓꧗-꧕꧓꧙. ꦫꦴꦗꦱꦶꦏ꧀ꦑꦴꦥꦢꦺ ꦥꦤ ‘‘ꦄꦗ꧀ꦗꦟ꧀ꦲꦺꦴ’’ꦠꦶ ꦥꦴꦜꦺ ‘‘ꦄꦗ꧀ꦗꦸꦟ꧀ꦲꦺꦴ’’ꦠꦶꦥꦶ ꦥꦜꦤ꧀ꦠꦶ. ꦨꦺꦴꦒꦺꦴꦠꦶ ꦨꦸꦚ꧀ꦗꦶꦠꦧ꧀ꦧꦺꦴ. ꦪꦁ ꦮꦸꦠ꧀ꦠꦁ ꦩꦴꦠꦶꦏꦴꦛ꧀ꦜꦏꦡꦴꦪꦁ ‘‘ꦆꦩꦶꦤꦴ ꦕꦷꦮꦫꦕꦺꦠꦴꦥꦤ꧀ꦤꦺꦤ ꦕꦷꦮꦫꦁ ꦕꦺꦠꦴꦥꦺꦠ꧀ꦮꦴ ꦆꦠ꧀ꦡꦤ꧀ꦤꦴꦩꦁ ꦨꦶꦏ꧀ꦑꦸꦁ ꦕꦷꦮꦫꦺꦤ ꦄꦕ꧀ꦖꦴꦢꦺꦲꦷꦠꦶ ꦆꦢꦁ ꦄꦴꦒꦩꦤꦱꦸꦢ꧀ꦣꦶꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ. ꦱꦕꦺ ꦲꦶ ‘ꦆꦢꦁ ꦆꦠ꧀ꦡꦤ꧀ꦤꦴꦩꦱ꧀ꦱ ꦨꦶꦏ꧀ꦑꦸꦤꦺꦴ ꦢꦺꦲꦷ’ꦠꦶ ꦥꦺꦱꦺꦪ꧀ꦪ, ꦄꦴꦒꦩꦤꦱ꧀ꦱ ꦄꦱꦸꦢ꧀ꦣꦠ꧀ꦠꦴ ꦄꦏꦥ꧀ꦥꦶꦪꦮꦠ꧀ꦡꦸꦁ ꦄꦴꦫꦧ꧀ꦨ ꦨꦶꦏ꧀ꦑꦸꦤꦴ ꦏꦥ꧀ꦥꦶꦪꦏꦴꦫꦏꦺꦴꦥꦶ ꦤꦶꦢ꧀ꦢꦶꦱꦶꦠꦧ꧀ꦧꦺꦴ ꦤ ꦨꦮꦺꦪ꧀ꦪꦴ’’ꦠꦶ, ꦠꦠ꧀ꦡ ꦄꦴꦒꦩꦤꦱ꧀ꦱ ꦱꦸꦢ꧀ꦣꦶꦪꦴ ꦮꦴ ꦄꦱꦸꦢ꧀ꦣꦶꦪꦴ ꦮꦴ ꦮꦶꦱꦺꦱꦥ꧀ꦥꦪꦺꦴꦗꦤꦁ ꦤ ꦢꦶꦱ꧀ꦱꦠꦶ. ꦱꦠꦶꦥꦶ ꦲꦶ ꦄꦴꦒꦩꦤꦱ꧀ꦱ ꦄꦱꦸꦢ꧀ꦣꦨꦴꦮꦺ ꦢꦹꦠꦺꦴ ꦄꦠ꧀ꦠꦤꦺꦴ ꦏꦸꦱꦭꦠꦴꦪ ꦏꦥ꧀ꦥꦶꦪꦮꦺꦴꦲꦴꦫꦺꦤ ꦮꦢꦠꦶ, ‘‘ꦏꦥ꧀ꦥꦶꦪꦏꦴꦫꦏꦺꦴ ꦤ ꦤꦶꦢ꧀ꦢꦶꦱꦶꦠꦧ꧀ꦧꦺꦴ’’ꦠꦶ ꦆꦢꦁ ꦤꦠ꧀ꦡꦶ, ꦤ ꦕ ꦢꦹꦠꦺꦤ ꦏꦥ꧀ꦥꦶꦪꦮꦺꦴꦲꦴꦫꦮꦱꦺꦤ ꦮꦸꦠ꧀ꦠꦺ ꦢꦴꦪꦏꦺꦤ ꦆꦢꦁ ꦏꦡꦁ ꦥꦺꦱꦶꦠꦤ꧀ꦠꦶ ꦇꦢꦶꦱꦷ ꦮꦶꦕꦴꦫꦟꦴ ꦈꦥꦭꦧ꧀ꦨꦠꦶ, ꦄꦮꦶꦕꦴꦫꦺꦠ꧀ꦮꦴ ꦕ ꦠꦁ ꦤ ꦱꦏ꧀ꦏꦴ ꦗꦴꦤꦶꦠꦸꦁ, ꦪꦢꦶ ꦥꦤ ꦄꦴꦒꦩꦤꦱ꧀ꦱ ꦄꦱꦸꦢ꧀ꦣꦠ꧀ꦠꦴ ꦏꦥ꧀ꦥꦶꦪꦏꦴꦫꦏꦺꦴ ꦤꦶꦢ꧀ꦢꦶꦱꦶꦠꦧ꧀ꦧꦺꦴ ꦤ ꦨꦮꦺꦪ꧀ꦪ, ꦕꦷꦮꦫꦴꦤꦁ ꦄꦠ꧀ꦡꦴꦪ ꦢꦹꦠꦱ꧀ꦱ ꦲꦠ꧀ꦡꦺ ꦄꦏꦥ꧀ꦥꦶꦪꦮꦠ꧀ꦡꦸꦱ꧀ꦩꦶꦁ ꦥꦺꦱꦶꦠꦺ ꦱꦧ꧀ꦧꦠ꧀ꦡ ꦢꦴꦪꦏꦺꦤ ꦏꦡꦁ ꦥꦺꦱꦶꦠꦤ꧀ꦠꦶ ꦥꦸꦕ꧀ꦖꦶꦠ꧀ꦮꦴꦮ ꦏꦥ꧀ꦥꦶꦪꦏꦴꦫꦏꦺꦴ ꦤꦶꦢ꧀ꦢꦶꦱꦶꦠꦧ꧀ꦧꦺꦴ ꦨꦮꦺꦪ꧀ꦪ. ꦠꦱ꧀ꦩꦴ ꦄꦱꦠꦶꦥꦶ ꦄꦴꦒꦩꦤꦱꦸꦢ꧀ꦣꦶꦪꦁ ꦱꦕꦺ ꦱꦺꦴ ꦢꦹꦠꦺꦴ ꦄꦠ꧀ꦠꦤꦺꦴ ꦏꦸꦱꦭꦠꦴꦪ ꦏꦥ꧀ꦥꦶꦪꦮꦺꦴꦲꦴꦫꦮꦱꦺꦤ ꦮꦢꦠꦶ, ꦢꦹꦠꦱ꧀ꦱꦺꦮ ꦮꦕꦤꦁ ꦒꦲꦺꦠꦧ꧀ꦧꦁ. ꦪꦢꦶ ꦲꦶ ꦄꦴꦒꦩꦤꦱꦸꦢ꧀ꦣꦶꦪꦺꦮꦺꦠ꧀ꦡ ꦥꦩꦴꦟꦁ, ꦩꦹꦭꦱꦴꦩꦶꦏꦺꦤ ꦏꦥ꧀ꦥꦶꦪꦮꦺꦴꦲꦴꦫꦮꦱꦺꦤ ꦥꦺꦱꦶꦠꦱ꧀ꦱ ꦢꦹꦠꦱ꧀ꦱ ꦄꦏꦥ꧀ꦥꦶꦪꦮꦺꦴꦲꦴꦫꦮꦱꦺꦤ ꦮꦢꦠꦺꦴꦥꦶ ꦏꦥ꧀ꦥꦶꦪꦏꦴꦫꦏꦺꦴ ꦤꦶꦢ꧀ꦢꦶꦱꦶꦠꦧ꧀ꦧꦺꦴ ꦨꦮꦺꦪ꧀ꦪ, ꦠꦱ꧀ꦩꦴ ꦱꦧ꧀ꦧꦠ꧀ꦡ ꦢꦹꦠꦮꦕꦤꦩꦺꦮ ꦥꦩꦴꦟꦤ꧀ꦠꦶ ꦒꦲꦺꦠꦧ꧀ꦧꦁ.

ꦆꦩꦶꦤꦴ ꦕꦷꦮꦫꦕꦺꦠꦴꦥꦤ꧀ꦤꦺꦤꦴꦠꦶꦄꦴꦢꦶꦤꦴ ꦥꦤ ꦆꦩꦩꦠ꧀ꦡꦁ ꦢꦱ꧀ꦱꦺꦠꦶ – ꦏꦥ꧀ꦥꦶꦪ ꦮꦱꦺꦤ ꦄꦴꦒꦠꦩ꧀ꦥꦶ ꦕꦷꦮꦫꦩꦹꦭꦁ ꦇꦢꦶꦱꦺꦤ ꦢꦹꦠꦮꦕꦤꦺꦤ ꦄꦏꦥ꧀ꦥꦶꦪꦁ ꦲꦺꦴꦠꦶ, ꦠꦱ꧀ꦩꦴ ꦠꦁ ꦥꦛꦶꦏ꧀ꦑꦶꦥꦶꦠꦧ꧀ꦧꦤ꧀ꦠꦶ. ꦠꦺꦤꦺꦮꦴꦲ – ‘‘ꦠꦺꦤ ꦨꦶꦏ꧀ꦑꦸꦤꦴ ꦱꦺꦴ ꦢꦹꦠꦺꦴ ꦌꦮꦩꦱ꧀ꦱ ꦮꦕꦤꦷꦪꦺꦴ’’ꦠꦶꦄꦴꦢꦶ. ꦱꦸꦮꦟ꧀ꦟꦁ, ꦫꦗꦠꦁ, ꦏꦲꦴꦥꦟꦺꦴ, ꦩꦴꦱꦏꦺꦴꦠꦶ ꦆꦩꦴꦤꦶ ꦲꦶ ꦕꦠ꧀ꦠꦴꦫꦶ ꦤꦶꦱ꧀ꦱꦒ꧀ꦒꦶꦪꦮꦠ꧀ꦡꦹꦤꦶ, ꦩꦸꦠ꧀ꦠꦴ, ꦩꦟꦶ, ꦮꦺꦭ꦳ꦸꦫꦶꦪꦺꦴ, ꦱꦔ꧀ꦑꦺꦴ, ꦱꦶꦭꦴ, ꦥꦮꦴꦭ꦳ꦁ, ꦭꦺꦴꦲꦶꦠꦔ꧀ꦏꦺꦴ, ꦩꦱꦴꦫꦒꦭ꧀ꦭꦁ, ꦱꦠ꧀ꦠ ꦣꦚ꧀ꦚꦴꦤꦶ, ꦢꦴꦱꦶꦢꦴꦱꦁ, ꦑꦺꦠ꧀ꦠꦁ, ꦮꦠ꧀ꦡꦸ, ꦥꦸꦥ꧀ꦦꦴꦫꦴꦩꦦꦭꦴꦫꦴꦩꦴꦢꦪꦺꦴꦠꦶ ꦆꦩꦴꦤꦶ ꦢꦸꦏ꧀ꦏꦛꦮꦠ꧀ꦡꦹꦤꦶ ꦕ ꦄꦠ꧀ꦠꦤꦺꦴ ꦮꦴ ꦕꦺꦠꦶꦪꦱꦔ꧀ꦓꦒꦟꦥꦸꦒ꧀ꦒꦭꦴꦤꦁ ꦮꦴ ꦄꦠ꧀ꦡꦴꦪ ꦱꦩ꧀ꦥꦛꦶꦕ꧀ꦖꦶꦠꦸꦁ ꦤ ꦮꦛ꧀ꦛꦤ꧀ꦠꦶ, ꦠꦱ꧀ꦩꦴ ꦠꦁ ꦱꦴꦢꦶꦠꦸꦁ ꦤ ꦮꦛ꧀ꦛꦠꦷꦠꦶ ꦢꦱ꧀ꦱꦤꦠ꧀ꦡꦁ ‘‘ꦤ ꦑꦺꦴ ꦩꦪꦁ, ꦄꦴꦮꦸꦱꦺꦴ, ꦕꦷꦮꦫꦕꦺꦠꦴꦥꦤ꧀ꦤꦁ ꦥꦛꦶꦒ꧀ꦒꦟ꧀ꦲꦴꦩꦴ’’ꦠꦶ ꦮꦸꦠ꧀ꦠꦁ, ‘‘ꦕꦷꦮꦫꦚ꧀ꦕ ꦑꦺꦴ ꦩꦪꦁ ꦥꦛꦶꦒ꧀ꦒꦟ꧀ꦲꦴꦩꦴ’’ꦠꦶ ꦆꦢꦁ ꦥꦤ ꦄꦠ꧀ꦠꦴꦤꦁ ꦈꦢ꧀ꦢꦶꦱ꧀ꦱ ꦄꦴꦨꦠꦠ꧀ꦠꦴ ꦮꦠ꧀ꦠꦸꦁ ꦮꦛ꧀ꦛꦠꦶ, ꦠꦱ꧀ꦩꦴ ꦮꦸꦠ꧀ꦠꦁ. ‘‘ꦮꦺꦪ꧀ꦪꦴꦮꦕ꧀ꦕꦏꦫꦺꦴ ꦤꦶꦢ꧀ꦢꦶꦱꦶꦠꦧ꧀ꦧꦺꦴ’’ꦠꦶ ꦆꦢꦁ ‘‘ꦄꦠ꧀ꦡꦶ ꦥꦤꦴꦪꦱ꧀ꦩꦠꦺꦴ ꦏꦺꦴꦕꦶ ꦮꦺꦪ꧀ꦪꦴꦮꦕ꧀ꦕꦏꦫꦺꦴ’’ꦠꦶ ꦏꦥ꧀ꦥꦶꦪꦮꦕꦤꦺꦤ ꦮꦸꦠ꧀ꦠꦠ꧀ꦠꦴ ꦄꦤꦸꦚ꧀ꦚꦴꦠꦁ. ꦱꦕꦺ ꦥꦤ ꦢꦹꦠꦺꦴ ‘‘ꦏꦺꦴ ꦆꦩꦁ ꦒꦟ꧀ꦲꦴꦠꦷ’’ꦠꦶ ꦮꦴ ‘‘ꦏꦱ꧀ꦱ ꦢꦺꦩꦷ’’ꦠꦶ ꦮꦴ ꦮꦢꦠꦶ, ꦤ ꦤꦶꦢ꧀ꦢꦶꦱꦶꦠꦧ꧀ꦧꦺꦴ. ‘‘ꦄꦴꦫꦴꦩꦶꦏꦺꦴ ꦮꦴ ꦈꦥꦴꦱꦏꦺꦴ ꦮꦴ’’ꦠꦶ ꦆꦢꦁ ꦱꦴꦫꦸꦥ꧀ꦥꦠꦴꦪ ꦮꦸꦠ꧀ꦠꦁ, ꦜꦥꦺꦠ꧀ꦮꦴ ꦥꦤ ꦥꦚ꧀ꦕ ꦱꦲꦣꦩ꧀ꦩꦶꦏꦺ ꦪꦺꦴ ꦏꦺꦴꦕꦶ ꦏꦥ꧀ꦥꦶꦪꦏꦴꦫꦏꦺꦴ ꦮꦛ꧀ꦛꦠꦶ. ‘‘ꦌꦱꦺꦴ ꦑꦺꦴ, ꦄꦴꦮꦸꦱꦺꦴ, ꦨꦶꦏ꧀ꦑꦹꦤꦁ ꦮꦺꦪ꧀ꦪꦴꦮꦕ꧀ꦕꦏꦫꦺꦴ’’ꦠꦶ ꦆꦢꦁ ꦨꦶꦏ꧀ꦑꦸꦱ꧀ꦱ ꦏꦥ꧀ꦥꦶꦪꦮꦕꦤꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦁ. ꦌꦮꦩꦺꦮ ꦲꦶ ꦮꦠ꧀ꦠꦧ꧀ꦧꦁ, ‘‘ꦌꦠꦱ꧀ꦱ ꦢꦺꦲꦷ’’ꦠꦶꦄꦴꦢꦶ ꦤ ꦮꦠ꧀ꦠꦧ꧀ꦧꦁ. ꦱꦺꦴ ꦮꦴ ꦕꦺꦠꦴꦥꦺꦱ꧀ꦱꦠꦶ ꦮꦴꦠꦶ ꦌꦠ꧀ꦡ ꦌꦏꦺꦴ ꦮꦴ-ꦱꦢ꧀ꦢꦺꦴ ꦥꦢꦥꦹꦫꦟꦺꦴ, ‘‘ꦱꦚ꧀ꦚꦠ꧀ꦠꦺꦴ ꦱꦺꦴ ꦩꦪꦴ’’ꦠꦶꦄꦴꦢꦶ ꦥꦤ ꦢꦹꦠꦺꦤ ꦌꦮꦁ ꦄꦴꦫꦺꦴꦕꦶꦠꦺꦪꦺꦮ ꦠꦁ ꦕꦺꦴꦢꦺꦠꦸꦁ ꦮꦛ꧀ꦛꦠꦶ, ꦤꦺꦮꦴꦱ꧀ꦱ ꦲꦠ꧀ꦡꦺ ꦢꦠ꧀ꦮꦴ ꦒꦠꦩꦠ꧀ꦠꦏꦴꦫꦟꦺꦤꦴꦠꦶ ꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦁ.

ꦌꦠꦴꦤꦶ ꦲꦶ ꦮꦕꦤꦴꦤꦶ…ꦥꦺ… ꦤ ꦮꦠ꧀ꦠꦧ꧀ꦧꦺꦴꦠꦶ ꦌꦠ꧀ꦡ ‘‘ꦌꦮꦁ ꦮꦢꦤ꧀ꦠꦺꦴ ꦥꦛꦶꦏ꧀ꦑꦶꦠ꧀ꦠꦱ꧀ꦱ ꦏꦠꦠ꧀ꦠꦴ ꦮꦠ꧀ꦠꦨꦺꦢꦺ ꦢꦸꦏ꧀ꦏꦛꦁ ꦄꦴꦥꦗ꧀ꦗꦠꦶ, ꦕꦺꦴꦢꦤꦴ ꦥꦤ ꦲꦺꦴꦠꦶꦪꦺꦮꦴ’’ꦠꦶ ꦩꦲꦴꦒꦟ꧀ꦜꦶꦥꦢꦺ ꦩꦗ꧀ꦙꦶꦩꦒꦟ꧀ꦜꦶꦥꦢꦺ ꦕ ꦮꦸꦠ꧀ꦠꦁ. ꦈꦢ꧀ꦢꦶꦛ꧀ꦜꦕꦺꦴꦢꦤꦴꦥꦫꦶꦕ꧀ꦖꦺꦢꦁ ꦢꦱ꧀ꦱꦺꦠ꧀ꦮꦴꦠꦶ ‘‘ꦢꦸꦠꦶꦪꦩ꧀ꦥꦶ ꦮꦠ꧀ꦠꦧ꧀ꦧꦺꦴ’’ꦠꦶꦄꦴꦢꦶꦤꦴ ꦢꦱ꧀ꦱꦺꦠ꧀ꦮꦴ. ꦥꦸꦕ꧀ꦖꦶꦪꦩꦴꦤꦺꦴꦠꦶ ꦌꦠ꧀ꦡ ꦥꦸꦕ꧀ꦖꦶꦪꦩꦴꦤꦺꦤꦴꦠꦶ ꦄꦠ꧀ꦡꦺꦴ ꦒꦲꦺꦠꦧ꧀ꦧꦺꦴꦠꦶ ꦄꦴꦲ ‘‘ꦏꦫꦟꦠ꧀ꦡꦺ ꦥꦕ꧀ꦕꦠ꧀ꦠꦮꦕꦤ’’ꦤ꧀ꦠꦶ. ꦄꦴꦒꦠꦏꦴꦫꦟꦁ ꦨꦚ꧀ꦗꦠꦷꦠꦶ ꦄꦴꦒꦠꦏꦴꦫꦟꦁ ꦮꦶꦤꦴꦱꦺꦠꦶ.

ꦌꦠ꧀ꦡ ꦏꦺꦕꦶ ꦮꦢꦤ꧀ꦠꦶ ‘‘ꦄꦴꦒꦠꦏꦴꦫꦟꦁ ꦤꦴꦩ ꦕꦷꦮꦫꦒ꧀ꦒꦲꦟꦁ, ꦠꦁ ꦨꦚ꧀ꦗꦠꦷꦠꦶ ꦮꦸꦠ꧀ꦠꦠ꧀ꦠꦴ ꦥꦸꦤ ꦠꦁ ꦕꦷꦮꦫꦁ ꦪꦺꦤ ꦏꦺꦤꦕꦶ ꦄꦴꦏꦴꦫꦺꦤ ꦒꦲꦺꦠꦸꦁ ꦤ ꦮꦛ꧀ꦛꦠꦷ’’ꦠꦶ. ꦏꦺꦕꦶ ꦥꦤ ‘‘ꦄꦴꦒꦠꦏꦴꦫꦟꦁ ꦤꦴꦩ ꦏꦴꦪꦮꦴꦕꦴꦲꦶ ꦕꦺꦴꦢꦤꦴ, ꦠꦁ ꦨꦚ꧀ꦗꦠꦷꦠꦶ ꦮꦸꦠ꧀ꦠꦠ꧀ꦠꦴ ꦥꦸꦤ ꦠꦁ ꦪꦺꦤ ꦏꦺꦤꦕꦶ ꦄꦴꦏꦴꦫꦺꦤ ꦕꦺꦴꦢꦺꦠꦸꦁ ꦤ ꦭꦨꦠꦶ. ꦱꦕꦺ ꦱꦪꦩꦺꦮ ꦢꦺꦠꦶ, ꦩꦹꦭꦱꦴꦩꦶꦏꦺꦴ ꦮꦴ ꦢꦴꦥꦺꦠꦶ, ꦒꦲꦺꦠꦸꦁ ꦮꦛ꧀ꦛꦠꦷ’’ꦠꦶ ꦮꦢꦤ꧀ꦠꦶ. ꦄꦥꦫꦺ ꦥꦤ ‘‘ꦄꦴꦒꦠꦏꦴꦫꦟꦁ ꦤꦴꦩ ꦜꦴꦤꦁ, ꦠꦁ ꦨꦚ꧀ꦗꦠꦷꦠꦶ ꦮꦸꦠ꧀ꦠꦠ꧀ꦠꦴ ꦪꦡꦴ ‘ꦄꦠ꧀ꦡꦺꦴ ꦩꦺ, ꦄꦴꦮꦸꦱꦺꦴ, ꦕꦷꦮꦫꦺꦤꦴ’ꦠꦶ ꦌꦏꦴꦪ ꦕꦺꦴꦢꦤꦴꦪ ꦢ꧀ꦮꦺ ꦜꦴꦤꦴꦤꦶ ꦨꦚ꧀ꦗꦠꦶ, ꦌꦮꦩꦶꦣꦴꦥꦶ ꦱꦕꦺ ꦄꦴꦱꦤꦺ ꦤꦶꦱꦷꦢꦠꦶ, ꦌꦏꦴꦪ ꦤꦶꦱꦗ꧀ꦗꦴꦪ ꦢ꧀ꦮꦺ ꦜꦴꦤꦴꦤꦶ ꦨꦚ꧀ꦗꦠꦶ. ꦄꦴꦩꦶꦱꦁ ꦕꦺ ꦥꦛꦶꦒ꧀ꦒꦟ꧀ꦲꦴꦠꦶ, ꦌꦏꦺꦤ ꦥꦛꦶꦒ꧀ꦒꦲꦟꦺꦤ ꦢ꧀ꦮꦺ ꦜꦴꦤꦴꦤꦶ ꦨꦚ꧀ꦗꦠꦶ. ꦣꦩ꧀ꦩꦁ ꦕꦺ ꦨꦴꦱꦠꦶ, ꦣꦩ꧀ꦩꦢꦺꦱꦤꦴꦱꦶꦏ꧀ꦑꦴꦥꦢꦺ ꦮꦸꦠ꧀ꦠꦥꦫꦶꦕ꧀ꦖꦺꦢꦴꦪ ꦌꦏꦴꦪ ꦮꦴꦕꦴꦪ ꦢ꧀ꦮꦺ ꦜꦴꦤꦴꦤꦶ ꦨꦚ꧀ꦗꦠꦷ’’ꦠꦶ ꦮꦢꦤ꧀ꦠꦶ. ꦆꦩꦺꦱꦁ ꦥꦤ ꦱꦧ꧀ꦧꦺꦱꦩ꧀ꦥꦶ ꦮꦴꦢꦁ ‘‘ꦄꦪꦸꦠ꧀ꦠ’’ꦤ꧀ꦠꦶ ꦥꦛꦶꦏ꧀ꦑꦶꦥꦶꦠ꧀ꦮꦴ ꦠꦷꦱꦸꦥꦶ ꦒꦟ꧀ꦜꦶꦥꦢꦺꦱꦸ ꦆꦢꦁ ꦮꦸꦠ꧀ꦠꦁ ‘‘ꦄꦴꦒꦠꦏꦴꦫꦟꦁ ꦤꦴꦩ ꦜꦴꦤꦩꦺꦮ, ꦠꦱ꧀ꦩꦴ ‘ꦤ ꦏꦠ꧀ꦠꦧ꧀ꦧ’ꦤ꧀ꦠꦶ ꦮꦴꦫꦶꦠꦱ꧀ꦱ ꦏꦠꦠ꧀ꦠꦴ ꦤꦶꦱꦗ꧀ꦗꦴꦢꦷꦱꦸ ꦏꦠꦺꦱꦸ ꦖꦱꦸ ꦜꦴꦤꦺꦱꦸ ꦌꦏꦁ ꦜꦴꦤꦁ ꦨꦚ꧀ꦗꦠꦷ’’ꦠꦶ.

ꦠꦠ꧀ꦫ ꦠꦠ꧀ꦫ ꦜꦴꦤꦺ ꦠꦶꦛ꧀ꦜꦠꦷꦠꦶ ꦆꦢꦁ ꦕꦺꦴꦢꦏꦱ꧀ꦱ ꦜꦶꦠꦛ꧀ꦜꦴꦤꦠꦺꦴ ꦄꦥꦏ꧀ꦏꦩ꧀ꦩ ꦠꦠ꧀ꦫ ꦠꦠ꧀ꦫ ꦈꦢ꧀ꦢꦶꦱ꧀ꦱ ꦜꦴꦤꦁꦪꦺꦮ ꦱꦤ꧀ꦣꦴꦪ ꦮꦸꦠ꧀ꦠꦁ. ‘‘ꦱꦴꦩꦁ ꦮꦴ ꦒꦤ꧀ꦠꦧ꧀ꦧꦁ, ꦢꦹꦠꦺꦴ ꦮꦴ ꦥꦴꦲꦺꦠꦧ꧀ꦧꦺꦴ’’ꦠꦶ ꦆꦢꦁ ꦱꦨꦴꦮꦠꦺꦴ ꦕꦺꦴꦢꦺꦠꦸꦁ ꦄꦤꦶꦕ꧀ꦖꦤ꧀ꦠꦺꦤꦥꦶ ꦏꦴꦠꦧ꧀ꦧꦩꦺꦮꦴꦠꦶ ꦮꦢꦤ꧀ꦠꦶ. ꦩꦸꦑꦁ ꦮꦶꦮꦫꦶꦠ꧀ꦮꦴ ꦱꦪꦩꦺꦮ ꦏꦥ꧀ꦥꦶꦪꦏꦴꦫꦏꦠ꧀ꦠꦁ ꦈꦥꦒꦠꦺꦴꦠꦶ ꦩꦸꦑꦮꦺꦮꦛꦶꦏꦏꦥ꧀ꦥꦶꦪꦏꦴꦫꦏꦺꦴ. ꦄꦮꦶꦕꦴꦫꦺꦠꦸꦏꦴꦩꦠꦴꦪꦴꦠꦶ ꦆꦩꦱ꧀ꦩꦶꦁ ꦥꦏ꧀ꦑꦺ ‘‘ꦤꦠ꧀ꦡꦩ꧀ꦲꦴꦏꦁ ꦏꦥ꧀ꦥꦶꦪꦏꦴꦫꦏꦺꦴ’’ꦠꦶ ꦆꦢꦁ ‘‘ꦠꦴꦢꦶꦱꦁ ꦏꦫꦺꦴꦤ꧀ꦠꦺꦴ ꦏꦥ꧀ꦥꦶꦪꦏꦴꦫꦏꦺꦴ ꦤꦠ꧀ꦡꦷ’’ꦠꦶ ꦆꦩꦶꦤꦴ ꦄꦣꦶꦥ꧀ꦥꦴꦪꦺꦤ ꦮꦸꦠ꧀ꦠꦁ.

‘‘ꦩꦺꦟ꧀ꦝꦏꦱꦶꦏ꧀ꦑꦴꦥꦢꦺ ꦮꦸꦠ꧀ꦠꦤꦪꦺꦤ ꦥꦛꦶꦥꦗ꧀ꦗꦶꦠꦧ꧀ꦧ’’ꦤ꧀ꦠꦶ ꦮꦠ꧀ꦮꦴ ꦆꦢꦴꦤꦶ ꦠꦁ ꦩꦺꦟ꧀ꦝꦏꦱꦶꦏ꧀ꦑꦴꦥꦢꦁ ꦢꦱ꧀ꦱꦺꦤ꧀ꦠꦺꦴ ‘‘ꦮꦸꦠ꧀ꦠꦚ꧀ꦲꦺꦠ’’ꦤ꧀ꦠꦶꦄꦴꦢꦶꦩꦴꦲ. ꦆꦢꦩꦺꦮ ꦲꦶ ‘‘ꦱꦤ꧀ꦠꦶ, ꦨꦶꦏ꧀ꦑꦮꦺ, ꦱꦢ꧀ꦣꦴ ꦥꦱꦤ꧀ꦤꦴ’’ꦠꦶꦄꦴꦢꦶꦮꦕꦤꦁ ꦨꦺꦱꦗ꧀ꦗꦏ꧀ꦑꦤ꧀ꦣꦏꦺ ꦩꦺꦟ꧀ꦝꦏꦮꦠ꧀ꦡꦸꦱ꧀ꦩꦶꦁ (ꦩꦲꦴꦮ. ꧒꧙꧙) ꦮꦸꦠ꧀ꦠꦠ꧀ꦠꦴ ‘‘ꦩꦺꦟ꧀ꦝꦏꦱꦶꦏ꧀ꦑꦴꦥꦢ’’ꦤ꧀ꦠꦶ ꦮꦸꦠ꧀ꦠꦁ. ꦠꦠ꧀ꦡ ꦲꦶ ꦩꦺꦟ꧀ꦝꦏꦺꦤ ꦤꦴꦩ ꦱꦺꦛ꧀ꦜꦶꦤꦴ –

‘‘ꦱꦤ꧀ꦠꦶ, ꦨꦤ꧀ꦠꦺ, ꦩꦒ꧀ꦒꦴ ꦏꦤ꧀ꦠꦴꦫꦴ ꦄꦥ꧀ꦥꦺꦴꦢꦏꦴ ꦄꦥ꧀ꦥꦨꦏ꧀ꦑꦴ, ꦤ ꦱꦸꦏꦫꦴ ꦄꦥꦴꦡꦺꦪ꧀ꦪꦺꦤ ꦒꦤ꧀ꦠꦸꦁ, ꦱꦴꦣꦸ, ꦨꦤ꧀ꦠꦺ, ꦨꦒꦮꦴ ꦨꦶꦏ꧀ꦑꦹꦤꦁ ꦥꦴꦡꦺꦪ꧀ꦪꦁ ꦄꦤꦸꦗꦴꦤꦴꦠꦹ’’ꦠꦶ –

ꦪꦴꦕꦶꦠꦺꦤ ꦨꦒꦮꦠꦴ –

‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦥꦴꦡꦺꦪ꧀ꦪꦁ ꦥꦫꦶꦪꦺꦱꦶꦠꦸꦁ. ꦠꦟ꧀ꦝꦸꦭꦺꦴ ꦠꦟ꧀ꦝꦸꦭꦠ꧀ꦡꦶꦏꦺꦤ, ꦩꦸꦒ꧀ꦒꦺꦴ ꦩꦸꦒ꧀ꦒꦠ꧀ꦡꦶꦏꦺꦤ, ꦩꦴꦱꦺꦴ ꦩꦴꦱꦠ꧀ꦡꦶꦏꦺꦤ, ꦭꦺꦴꦟꦁ ꦭꦺꦴꦟꦠ꧀ꦡꦶꦏꦺꦤ, ꦒꦸꦭ꦳ꦺꦴ ꦒꦸꦭ꦳ꦠ꧀ꦡꦶꦏꦺꦤ, ꦠꦺꦭꦁ ꦠꦺꦭꦠ꧀ꦡꦶꦏꦺꦤ, ꦱꦥ꧀ꦥꦶ ꦱꦥ꧀ꦥꦶꦠ꧀ꦡꦶꦏꦺꦤꦴ’’ꦠꦶ –

ꦮꦠ꧀ꦮꦴ ꦆꦢꦁ ꦮꦸꦠ꧀ꦠꦁ –

‘‘ꦱꦤ꧀ꦠꦶ, ꦨꦶꦏ꧀ꦑꦮꦺ, ꦩꦤꦸꦱ꧀ꦱꦴ ꦱꦢ꧀ꦣꦴ ꦥꦱꦤ꧀ꦤꦴ, ꦠꦺ ꦏꦥ꧀ꦥꦶꦪꦏꦴꦫꦏꦴꦤꦁ ꦲꦠ꧀ꦡꦺ ꦲꦶꦫꦚ꧀ꦚꦁ ꦈꦥꦤꦶꦏ꧀ꦑꦶꦥꦤ꧀ꦠꦶ ‘ꦆꦩꦶꦤꦴ ꦄꦪ꧀ꦪꦱ꧀ꦱ ꦪꦁ ꦏꦥ꧀ꦥꦶꦪꦁ, ꦠꦁ ꦢꦺꦡꦴ’ꦠꦶ. ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦪꦁ ꦠꦠꦺꦴ ꦏꦥ꧀ꦥꦶꦪꦁ, ꦠꦁ ꦱꦴꦢꦶꦠꦸꦁ, ꦤ ꦠ꧀ꦮꦺꦮꦴꦲꦁ ꦨꦶꦏ꧀ꦑꦮꦺ ꦏꦺꦤꦕꦶ ꦥꦫꦶꦪꦴꦪꦺꦤ ꦗꦴꦠꦫꦹꦥꦫꦗꦠꦁ ꦱꦴꦢꦶꦠꦧ꧀ꦧꦁ ꦥꦫꦶꦪꦺꦱꦶꦠꦧ꧀ꦧꦤ꧀ꦠꦶ ꦮꦢꦴꦩꦷ’’ꦠꦶ.

ꦲꦶꦫꦚ꧀ꦚꦁ ꦈꦥꦤꦶꦏ꧀ꦑꦶꦥꦤ꧀ꦠꦷꦠꦶ ꦌꦠ꧀ꦡꦴꦥꦶ ꦨꦶꦏ꧀ꦑꦸꦱ꧀ꦱ ꦄꦴꦫꦺꦴꦕꦤꦁ ꦄꦠ꧀ꦡꦶꦪꦺꦮꦴꦠꦶ ꦒꦲꦺꦠꦧ꧀ꦧꦁ. ꦄꦚ꧀ꦚꦡꦴ ꦄꦤꦶꦢ꧀ꦢꦶꦛ꧀ꦜꦏꦥ꧀ꦥꦶꦪꦏꦴꦫꦏꦠ꧀ꦠꦁ ꦨꦗꦠꦷꦠꦶ ꦤ ꦕꦺꦴꦢꦺꦠꦧ꧀ꦧꦺꦴ ꦱꦶꦪꦴ. ꦪꦢꦶ ꦩꦹꦭꦁ ꦱꦤ꧀ꦣꦴꦪ ꦕꦺꦴꦢꦺꦠꦶ, ꦠꦁ ꦱꦴꦢꦶꦠꦩꦺꦮ ꦱꦶꦪꦴꦠꦶ ꦄꦴꦲ ‘‘ꦩꦹꦭꦁ ꦄꦱꦴꦢꦶꦪꦤ꧀ꦠꦺꦤꦴ’’ꦠꦶ.

‘‘ꦄꦚ꧀ꦚꦴꦠꦏꦄꦥ꧀ꦥꦮꦴꦫꦶꦠꦺꦱꦸ ꦮꦶꦪ ꦥꦛꦶꦥꦗ꧀ꦗꦶꦠꦧ꧀ꦧꦤ꧀ꦠꦶ ꦆꦢꦁ ꦄꦠ꧀ꦠꦤꦴ ꦕꦺꦴꦢꦤꦴꦜꦴꦤꦚ꧀ꦕ ꦤ ꦏꦴꦠꦧ꧀ꦧꦤ꧀ꦠꦶ ꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦁ. ꦄꦚ꧀ꦚꦁ ꦥꦤ ꦏꦥ꧀ꦥꦶꦪꦏꦴꦫꦏꦁ ꦥꦺꦱꦺꦠ꧀ꦮꦴ ꦭꦺꦴꦏꦕꦴꦫꦶꦠ꧀ꦠꦮꦱꦺꦤ ꦄꦤꦸꦪꦸꦚ꧀ꦗꦶꦠ꧀ꦮꦴꦥꦶ ꦏꦥ꧀ꦥꦶꦪꦮꦠ꧀ꦡꦸꦁ ꦄꦴꦲꦫꦴꦥꦺꦠꦸꦁ ꦮꦛ꧀ꦛꦠꦶ ꦄꦠ꧀ꦠꦴꦤꦁ ꦈꦢ꧀ꦢꦶꦱ꧀ꦱ ꦤꦶꦏ꧀ꦑꦶꦠ꧀ꦠꦱ꧀ꦱ ꦄꦠ꧀ꦠꦤꦺꦴ ꦱꦤ꧀ꦠꦏꦠ꧀ꦠꦴ’’ꦠꦶ ꦏꦺꦕꦶ ꦮꦢꦤ꧀ꦠꦶ, ꦠꦁ ꦄꦛ꧀ꦜꦏꦡꦴꦪꦁ ‘‘ꦄꦚ꧀ꦚꦴꦠꦏꦄꦥ꧀ꦥꦮꦴꦫꦶꦠꦺꦱꦸ ꦮꦶꦪ ꦥꦛꦶꦥꦗ꧀ꦗꦶꦠꦧ꧀ꦧꦁ. ꦱꦕꦺ ꦱꦪꦩꦺꦮ ꦕꦷꦮꦫꦁ ꦄꦴꦤꦺꦠ꧀ꦮꦴ ꦢꦺꦤ꧀ꦠꦶ, ꦒꦲꦺꦠꦧ꧀ꦧꦁ. ꦤꦺꦴ ꦕꦺ, ꦏꦶꦚ꧀ꦕꦶ ꦤ ꦮꦠ꧀ꦠꦧ꧀ꦧꦴ’’ꦠꦶ ꦢꦭ꦳꧀ꦲꦁ ꦏꦠ꧀ꦮꦴ ꦮꦸꦠ꧀ꦠꦠ꧀ꦠꦴ ꦤ ꦒꦲꦺꦠꦧ꧀ꦧꦤ꧀ꦠꦶ ꦄꦩ꧀ꦲꦴꦏꦁ ꦑꦤ꧀ꦠꦶ. ꦤ ꦲꦶ ꦄꦚ꧀ꦚꦴꦠꦏꦄꦥ꧀ꦥꦮꦴꦫꦶꦠꦁ ꦱꦪꦁ ꦄꦮꦶꦚ꧀ꦚꦴꦥꦺꦠ꧀ꦮꦴ ꦄꦚ꧀ꦚꦺꦤ ꦮꦶꦚ꧀ꦚꦴꦥꦺꦠꦸꦁ ꦮꦛ꧀ꦛꦠꦶ, ꦤ ꦕ ꦪꦠ꧀ꦡ ꦄꦚ꧀ꦚꦁ ꦥꦺꦱꦺꦠ꧀ꦮꦴ ꦄꦴꦲꦫꦴꦥꦺꦠꦸꦁ ꦮꦛ꧀ꦛꦠꦶ, ꦠꦠ꧀ꦡ ꦱꦪꦁ ꦒꦤ꧀ꦠ꧀ꦮꦴ ꦤ ꦄꦴꦲꦫꦴꦥꦺꦠꦧ꧀ꦧꦤ꧀ꦠꦶ ꦱꦏ꧀ꦏꦴ ꦮꦠ꧀ꦡꦸꦁ. ꦪꦢꦶ ꦕꦺꦠ꧀ꦡ ꦄꦚ꧀ꦚꦺꦤ ꦄꦴꦲꦫꦴꦥꦺꦠꦸꦁ ꦮꦛ꧀ꦛꦠꦶ, ‘‘ꦄꦚ꧀ꦚꦴꦠꦏꦄꦥ꧀ꦥꦮꦴꦫꦶꦠꦺꦱꦸ ꦮꦶꦪ ꦥꦛꦶꦥꦗ꧀ꦗꦶꦠꦧ꧀ꦧ’’ꦤ꧀ꦠꦶꦄꦴꦢꦶꦮꦕꦤꦩꦺꦮ ꦤꦶꦫꦠ꧀ꦡꦏꦁ ꦱꦶꦪꦴ. ‘‘ꦢꦹꦠꦺꦤꦴ’’ꦠꦶ ꦆꦩꦱ꧀ꦱ ꦧ꧀ꦪꦨꦶꦕꦴꦫꦁ ꦢꦱ꧀ꦱꦺꦠꦶ ‘‘ꦱꦪꦁ ꦄꦴꦲꦫꦶꦠ꧀ꦮꦴꦥꦷ’’ꦠꦶ. ꦢꦢꦤ꧀ꦠꦺꦱꦹꦠꦶ ꦆꦩꦶꦤꦴ ꦱꦩ꧀ꦧꦤ꧀ꦣꦺꦴ. ꦥꦶꦟ꧀ꦝꦥꦴꦠꦴꦢꦷꦤꦁ ꦄꦠ꧀ꦡꦴꦪꦴꦠꦶ ꦆꦩꦶꦤꦴ ꦥꦤ ‘‘ꦕꦷꦮꦫꦕꦺꦠꦴꦥꦤ꧀ꦤ’’ꦤ꧀ꦠꦶ ꦆꦩꦱ꧀ꦱ ꦧ꧀ꦪꦨꦶꦕꦴꦫꦁ ꦢꦱ꧀ꦱꦺꦠꦶ. ‘‘ꦌꦱꦺꦮ ꦤꦪꦺꦴ’’ꦠꦶ ꦮꦸꦠ꧀ꦠꦠ꧀ꦠꦴ ꦥꦶꦟ꧀ꦝꦥꦴꦠꦴꦢꦷꦤꦁ ꦄꦠ꧀ꦡꦴꦪ ꦢꦶꦤ꧀ꦤꦺꦥꦶ ꦜꦴꦤꦕꦺꦴꦢꦤꦴꦢꦶ ꦱꦧ꧀ꦧꦁ ꦲꦺꦛ꧀ꦜꦴ ꦮꦸꦠ꧀ꦠꦤꦪꦺꦤꦺꦮ ꦏꦴꦠꦧ꧀ꦧꦁ.

ꦥꦛꦶꦒ꧀ꦒꦲꦟꦺꦥꦶ ꦥꦫꦶꦨꦺꦴꦒꦺꦥꦶ ꦄꦴꦥꦠ꧀ꦠꦷꦠꦶ ꦥꦛꦶꦒ꧀ꦒꦲꦟꦺ ꦥꦴꦕꦶꦠ꧀ꦠꦶꦪꦁ, ꦥꦫꦶꦨꦺꦴꦒꦺ ꦢꦸꦏ꧀ꦏꦛꦁ. ꦱ꧀ꦮꦺꦮ ꦱꦴꦥꦠ꧀ꦠꦶꦏꦺꦴꦠꦶ ꦢꦸꦏ꧀ꦏꦛꦴꦥꦠ꧀ꦠꦶꦁ ꦱꦤ꧀ꦣꦴꦪ ꦮꦢꦠꦶ. ꦆꦢꦚ꧀ꦕ ꦄꦛ꧀ꦜꦏꦡꦴꦥꦩꦴꦟꦺꦤꦺꦮ ꦒꦲꦺꦠꦧ꧀ꦧꦁ. ‘‘ꦥꦫꦱ꧀ꦱ ꦤꦶꦢ꧀ꦢꦺꦴꦱꦨꦴꦮꦢꦱ꧀ꦱꦤꦠ꧀ꦡꦁ ꦱ꧀ꦮꦺꦮ ꦱꦴꦥꦠ꧀ꦠꦶꦏꦺꦴ ꦱꦢꦺꦴꦱꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦷ’’ꦠꦶꦥꦶ ꦮꦢꦤ꧀ꦠꦶ. ‘‘ꦕꦺꦴꦢꦺꦠꦷꦠꦶ ꦮꦸꦠ꧀ꦠꦠ꧀ꦠꦴ ꦥꦤ ꦄꦴꦥꦠ꧀ꦠꦶꦪꦴ ꦕꦺꦴꦢꦺꦠꦷꦠꦶ ꦏꦠ꧀ꦮꦴ ꦱ꧀ꦮꦺꦮ ꦱꦴꦥꦠ꧀ꦠꦶꦏꦺꦴꦠꦶ ꦆꦢꦁ ꦢꦸꦏ꧀ꦏꦛꦁꦪꦺꦮ ꦱꦤ꧀ꦣꦴꦪ ꦮꦠ꧀ꦠꦸꦁ ꦪꦸꦠ꧀ꦠ’’ꦤ꧀ꦠꦶ ꦠꦷꦱꦸꦥꦶ ꦒꦟ꧀ꦜꦶꦥꦢꦺꦱꦸ ꦮꦸꦠ꧀ꦠꦁ. ꦥꦛꦶꦒ꧀ꦒꦲꦟꦺꦥꦶ ꦥꦫꦶꦨꦺꦴꦒꦺꦥꦶ ꦄꦴꦥꦠ꧀ꦠꦶꦪꦺꦮꦴꦠꦶ ꦢꦸꦏ꧀ꦏꦛꦩꦺꦮ ꦱꦤ꧀ꦣꦴꦪ ꦮꦸꦠ꧀ꦠꦁ. ꦠꦭ꦳ꦴꦏꦱ꧀ꦱꦥꦶ ꦑꦺꦠ꧀ꦠꦱꦔ꧀ꦒꦲꦶꦠꦠ꧀ꦠꦴ ꦠꦱ꧀ꦱ ꦥꦛꦶꦒ꧀ꦒꦲꦟꦺꦥꦶ ꦄꦴꦥꦠ꧀ꦠꦶ ꦮꦸꦠ꧀ꦠꦴ. ꦕꦠ꧀ꦠꦴꦫꦺꦴ ꦥꦕ꧀ꦕꦪꦺ ꦱꦔ꧀ꦓꦺꦴ ꦥꦫꦶꦨꦸꦚ꧀ꦗꦠꦹꦠꦶ ꦢꦺꦠꦷꦠꦶ ꦌꦠ꧀ꦡ ‘‘ꦨꦶꦏ꧀ꦑꦸꦱꦔ꧀ꦓꦺꦴ ꦕꦠ꧀ꦠꦴꦫꦺꦴ ꦥꦕ꧀ꦕꦪꦺ ꦥꦫꦶꦨꦸꦚ꧀ꦕꦠꦸ, ꦠꦭ꦳ꦴꦏꦁ ꦢꦩ꧀ꦩꦷ’’ꦠꦶ ꦮꦴ ‘‘ꦕꦠꦸꦥꦕ꧀ꦕꦪꦥꦫꦶꦨꦺꦴꦒꦠ꧀ꦡꦁ ꦠꦭ꦳ꦴꦏꦁ ꦢꦩ꧀ꦩꦷ’’ꦠꦶ ꦮꦴ ꦮꦢꦠꦶ, ꦮꦛ꧀ꦛꦠꦶꦪꦺꦮ. ‘‘ꦆꦠꦺꦴ ꦠꦭ꦳ꦴꦏꦠꦺꦴ ꦈꦥ꧀ꦥꦤ꧀ꦤꦺ ꦕꦠ꧀ꦠꦴꦫꦺꦴ ꦥꦕ꧀ꦕꦪꦺ ꦢꦩ꧀ꦩꦷ’’ꦠꦶ ꦮꦸꦠ꧀ꦠꦺ ꦥꦤ ꦮꦠ꧀ꦠꦧ꧀ꦧꦩꦺꦮ ꦤꦠ꧀ꦡꦶ.

ꦄꦩ꧀ꦲꦴꦏꦁ ꦌꦏꦁ ꦏꦥ꧀ꦥꦶꦪꦏꦴꦫꦏꦁ ꦜꦥꦺꦡꦴꦠꦶ ꦮꦸꦠ꧀ꦠꦺꦠꦶ ꦆꦢꦁ ꦇꦢꦶꦱꦁꦪꦺꦮ ꦱꦤ꧀ꦣꦴꦪ ꦮꦸꦠ꧀ꦠꦁ. ꦏꦥ꧀ꦥꦶꦪꦏ꧀ꦏꦩꦺꦤ ꦱꦩ꧀ꦥꦛꦶꦕ꧀ꦖꦶꦠꦺꦱꦸ ꦑꦺꦠ꧀ꦠꦠꦭ꦳ꦴꦏꦴꦢꦷꦱꦸ ꦥꦤ ꦄꦮꦸꦠ꧀ꦠꦺꦥꦶ ꦏꦥ꧀ꦥꦶꦪꦏꦴꦫꦏꦁ ꦜꦥꦺꦠꦸꦁ ꦭꦧ꧀ꦨꦠꦶꦪꦺꦮ. ꦪꦱ꧀ꦩꦴ ꦥꦫꦱꦤ꧀ꦠꦏꦁ ꦤꦴꦱꦺꦠꦸꦁ ꦨꦶꦏ꧀ꦑꦹꦤꦁ ꦤ ꦮꦛ꧀ꦛꦠꦶ, ꦠꦱ꧀ꦩꦴ ‘‘ꦤ ꦱꦱ꧀ꦱꦏꦴꦭꦺ’’ꦠꦶ ꦮꦸꦠ꧀ꦠꦁ. ‘‘ꦗꦤꦥꦢꦱ꧀ꦱ ꦱꦴꦩꦶꦏꦺꦴꦠꦶ ꦆꦩꦶꦤꦴꦮ ꦪꦺꦴ ꦠꦁ ꦗꦤꦥꦢꦁ ꦮꦶꦕꦴꦫꦺꦠꦶ, ꦠꦺꦤꦥꦶ ꦄꦕ꧀ꦖꦶꦤ꧀ꦢꦶꦠ꧀ꦮꦴ ꦢꦶꦤ꧀ꦤꦁ ꦮꦛ꧀ꦛꦠꦶꦪꦺꦮꦴ’’ꦠꦶ ꦮꦢꦤ꧀ꦠꦶ. ꦈꦢꦏꦮꦴꦲꦏꦤ꧀ꦠꦶ ꦈꦢꦏꦩꦴꦠꦶꦏꦁ. ꦏꦥ꧀ꦥꦶꦪꦮꦺꦴꦲꦴꦫꦺꦥꦷꦠꦶ ꦌꦠ꧀ꦡ ‘‘ꦮꦶꦣꦴꦤꦁ ꦮꦏ꧀ꦑꦴꦩꦴ’’ꦠꦶ ꦥꦴꦜꦱꦺꦱꦺꦴ. ꦈꦢꦏꦮꦱꦺꦤꦴꦠꦶ ꦈꦢꦏꦥꦫꦶꦨꦺꦴꦒꦠ꧀ꦡꦁ. ꦱꦸꦢ꧀ꦣꦕꦶꦠ꧀ꦠꦴꦤꦤ꧀ꦠꦶ ꦏꦺꦮꦭꦁ ꦈꦢꦏꦥꦫꦶꦨꦺꦴꦒꦠ꧀ꦡꦩꦺꦮꦴꦠꦶ ꦄꦣꦶꦥ꧀ꦥꦴꦪꦺꦴ. ꦄꦭꦗ꧀ꦗꦶꦤꦴ ꦏꦴꦫꦴꦥꦶꦠꦺ ꦮꦠ꧀ꦠꦧ꧀ꦧꦩꦺꦮ ꦤꦠ꧀ꦡꦷꦠꦶ ꦄꦴꦲ ‘‘ꦭꦗ꧀ꦗꦷꦨꦶꦏ꧀ꦑꦸꦤꦴ’’ꦠꦶ. ꦥꦏꦠꦶꦨꦴꦒꦺꦴ ꦤꦴꦩ ꦆꦩꦱ꧀ꦩꦶꦁ ꦫꦛ꧀ꦜꦺ ꦕꦠꦸꦄꦩ꧀ꦧꦟꦩꦠ꧀ꦠꦁ. ꦄꦏꦛ꧀ꦜꦥꦸꦧ꧀ꦧꦁ ꦤꦮꦱꦱ꧀ꦱꦁ ꦤꦴꦩ. ꦄꦥꦫꦶꦕ꧀ꦖꦶꦤ꧀ꦤꦨꦴꦒꦺꦠꦶ ‘‘ꦌꦠ꧀ꦠꦏꦺ ꦨꦹꦩꦶꦨꦴꦒꦺ ꦌꦠ꧀ꦠꦏꦺꦴ ꦨꦴꦒꦺꦴ ꦢꦴꦠꦧ꧀ꦧꦺꦴ’’ꦠꦶ ꦌꦮꦁ ꦄꦥꦫꦶꦕ꧀ꦖꦶꦤ꧀ꦤꦨꦴꦒꦺ.

ꦫꦗ꧀ꦗꦸꦪꦴ ꦮꦴ ꦢꦟ꧀ꦝꦺꦤ ꦮꦴꦠꦶ ꦌꦠ꧀ꦡ ‘‘ꦥꦴꦢꦺꦲꦶꦥꦶ ꦩꦶꦤꦶꦠꦸꦁ ꦤ ꦮꦛ꧀ꦛꦠꦷ’’ꦠꦶ ꦮꦢꦤ꧀ꦠꦶ. ꦑꦭꦺ ꦮꦴ ꦜꦠ꧀ꦮꦴ ꦫꦏ꧀ꦑꦠꦷꦠꦶ ꦌꦠ꧀ꦡ ꦥꦤ ꦡꦺꦤꦺꦠ꧀ꦮꦴ ꦒꦟ꧀ꦲꦤ꧀ꦠꦺ ꦢꦶꦱ꧀ꦮꦴ ‘‘ꦩꦴ ꦒꦟ꧀ꦲꦡꦴ’’ꦠꦶ ꦤꦶꦮꦴꦫꦺꦤ꧀ꦠꦺꦴ ꦫꦏ꧀ꦑꦠꦶ ꦤꦴꦩ. ꦱꦕꦺ ꦥꦤ ꦄꦮꦶꦕꦴꦫꦺꦠ꧀ꦮꦴ ꦏꦺꦮꦭꦁ ꦠꦸꦟ꧀ꦲꦷꦨꦹꦠꦺꦴꦮ ꦫꦏ꧀ꦑꦟꦠ꧀ꦡꦴꦪ ꦎꦭꦺꦴꦏꦺꦤ꧀ꦠꦺꦴ ꦠꦶꦛ꧀ꦜꦠꦶ, ꦮꦛ꧀ꦛꦠꦶ. ꦱꦕꦺꦥꦶ ꦠꦱ꧀ꦩꦶꦁ ꦠꦸꦟ꧀ꦲꦷꦨꦹꦠꦺ ꦕꦺꦴꦫꦶꦏꦴꦪ ꦲꦫꦤ꧀ꦠꦶ, ‘‘ꦩꦪꦁ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦄꦴꦫꦺꦴꦕꦺꦱ꧀ꦱꦴꦩꦴ’’ꦠꦶ ꦌꦮꦁ ꦮꦠ꧀ꦠꦸꦁ ꦮꦛ꧀ꦛꦠꦷꦠꦶ ꦮꦢꦤ꧀ꦠꦶ. ꦤꦷꦲꦫꦴꦥꦺꦠꦶ ꦥꦛꦶꦱꦴꦩꦺꦠꦷꦠꦶ ꦌꦠ꧀ꦡꦴꦥꦶ ‘‘ꦱꦕꦺ ꦥꦫꦶꦪꦴꦪꦺꦤ ꦮꦢꦠꦶ, ꦮꦛ꧀ꦛꦠꦷ’’ꦠꦶ ꦮꦢꦤ꧀ꦠꦶ. ꦄꦥꦸꦧ꧀ꦧꦱ꧀ꦱ ꦄꦤꦸꦥ꧀ꦥꦴꦢꦶꦠꦠ꧀ꦠꦴ ꦄꦚ꧀ꦚꦺꦱꦁ ꦮꦛ꧀ꦛꦠꦷꦠꦶ ꦄꦴꦲ ‘‘ꦠꦱ꧀ꦱꦺꦮ ꦠꦁ ꦄꦏꦥ꧀ꦥꦶꦪ’’ꦤ꧀ꦠꦶ.

ꦤꦤꦸ ꦕ ꦢꦸꦧ꧀ꦧꦶꦕꦴꦫꦶꦠꦩꦠ꧀ꦠꦺꦤ ꦠꦱ꧀ꦱꦺꦮ ꦠꦁ ꦄꦏꦥ꧀ꦥꦶꦪꦁ, ꦤ ꦱꦧ꧀ꦧꦺꦱꦁ ꦫꦹꦥꦶꦪꦱꦁꦮꦺꦴꦲꦴꦫꦺ ꦕꦠꦸꦠ꧀ꦡꦥꦠ꧀ꦠꦺꦴ ꦮꦶꦪ. ꦮꦸꦠ꧀ꦠꦚ꧀ꦲꦶ ꦠꦠ꧀ꦡ (ꦥꦴꦫꦴ. ꦄꦛ꧀ꦜ. ꧒.꧕꧘꧙) ‘‘ꦪꦺꦴ ꦥꦤ ꦫꦹꦥꦶꦪꦁ ꦄꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ‘ꦡꦺꦫꦱ꧀ꦱ ꦥꦠ꧀ꦠꦁ ꦏꦶꦟꦶꦠ꧀ꦮꦴ ꦢꦺꦲꦷ’ꦠꦶ ꦥꦲꦶꦠꦏꦥ꧀ꦥꦶꦪꦏꦴꦫꦏꦺꦤ ꦱꦢ꧀ꦣꦶꦁ ꦏꦩ꧀ꦩꦴꦫꦏꦸꦭꦁ ꦒꦤ꧀ꦠ꧀ꦮꦴ ꦥꦠ꧀ꦠꦁ ꦢꦶꦱ꧀ꦮꦴ ‘ꦆꦩꦺ ꦏꦲꦴꦥꦟꦺ ꦒꦲꦺꦠ꧀ꦮꦴ ꦆꦩꦁ ꦢꦺꦲꦷ’ꦠꦶ ꦏꦲꦴꦥꦟꦺ ꦢꦴꦥꦺꦠ꧀ꦮꦴ ꦒꦲꦶꦠꦺꦴ, ꦄꦪꦁ ꦥꦠ꧀ꦠꦺꦴ ꦌꦠꦱ꧀ꦱꦺꦮ ꦨꦶꦏ꧀ꦑꦸꦤꦺꦴ ꦤ ꦮꦛ꧀ꦛꦠꦶ ꦢꦸꦧ꧀ꦧꦶꦕꦴꦫꦶꦠꦠ꧀ꦠꦴ, ꦄꦚ꧀ꦚꦺꦱꦁ ꦥꦤ ꦮꦛ꧀ꦛꦠꦶ ꦩꦹꦭꦱ꧀ꦱ ꦄꦱꦩ꧀ꦥꦛꦶꦕ꧀ꦖꦶꦠꦠ꧀ꦠꦴ’’ꦠꦶ. ꦠꦱ꧀ꦩꦴ ꦪꦁ ꦠꦺ ꦄꦴꦲꦫꦤ꧀ꦠꦶ, ꦱꦧ꧀ꦧꦺꦱꦁ ꦄꦏꦥ꧀ꦥꦶꦪꦁ. ꦏꦱ꧀ꦩꦴ? ꦏꦲꦴꦥꦟꦴꦤꦁ ꦮꦶꦕꦴꦫꦶꦠꦠ꧀ꦠꦴꦠꦶ ꦆꦢꦁ ꦏꦱ꧀ꦩꦴ ꦮꦸꦠ꧀ꦠꦤ꧀ꦠꦶ? ꦌꦠ꧀ꦡ ꦏꦺꦕꦶ ꦮꦢꦤ꧀ꦠꦶ ‘‘ꦏꦲꦴꦥꦟꦺ ꦱꦴꦢꦶꦪꦶꦠ꧀ꦮꦴ ꦮꦶꦕꦴꦫꦶꦠꦁ ꦱꦤ꧀ꦣꦴꦪ ꦌꦮꦁ ꦮꦸꦠ꧀ꦠ’’ꦤ꧀ꦠꦶ. ꦱꦔ꧀ꦓꦶꦏꦠ꧀ꦠꦴ ꦕ ꦤꦶꦱ꧀ꦱꦗ꧀ꦗꦶꦠꦸꦁ ꦤ ꦱꦏ꧀ꦏꦴ, ꦠꦱ꧀ꦩꦴ ꦱꦧ꧀ꦧꦺꦱꦁ ꦤ ꦏꦥ꧀ꦥꦠꦷꦠꦶ ꦠꦺꦱꦁ ꦄꦣꦶꦥ꧀ꦥꦴꦪꦺꦴ. ꦏꦺꦕꦶ ꦥꦤ ‘‘ꦄꦱꦴꦢꦶꦪꦶꦠ꧀ꦮꦴꦥꦶ ꦏꦲꦴꦥꦟꦴꦤꦁ ꦮꦶꦕꦴꦫꦶꦠꦠ꧀ꦠꦴ ꦫꦹꦥꦶꦪꦱꦁꦮꦺꦴꦲꦴꦫꦺꦴ ꦏꦠꦺꦴ ꦲꦺꦴꦠꦶ, ꦱꦔ꧀ꦓꦶꦏꦠ꧀ꦠꦴ ꦕ ꦤꦶꦱ꧀ꦱꦗ꧀ꦗꦶꦠꦸꦁ ꦤ ꦱꦏ꧀ꦏꦴ, ꦠꦱ꧀ꦩꦴ ꦱꦧ꧀ꦧꦺꦱꦁ ꦤ ꦏꦥ꧀ꦥꦠꦷ’’ꦠꦶ ꦮꦢꦤ꧀ꦠꦶ. ꦒꦟ꧀ꦜꦶꦥꦢꦺꦱꦸ ꦥꦤ ꦠꦷꦱꦸꦥꦶ ꦆꦢꦁ ꦮꦸꦠ꧀ꦠꦁ ‘‘ꦕꦠꦸꦠ꧀ꦡꦥꦠ꧀ꦠꦺꦴ ꦒꦶꦲꦶꦱꦤ꧀ꦠꦏꦴꦤꦁꦪꦺꦮ ꦏꦲꦴꦥꦟꦴꦤꦁ ꦮꦶꦕꦴꦫꦶꦠꦠ꧀ꦠꦴ ꦄꦚ꧀ꦚꦺꦱꦁ ꦏꦥ꧀ꦥꦠꦶ, ꦆꦣ ꦥꦤ ꦱꦔ꧀ꦓꦶꦏꦴꦤꦁ ꦮꦶꦕꦴꦫꦶꦠꦠ꧀ꦠꦴ ꦱꦧ꧀ꦧꦺꦱꦁ ꦤ ꦏꦥ꧀ꦥꦠꦷ’’ꦠꦶ. ꦱꦧ꧀ꦧꦺꦱꦩ꧀ꦥꦶ ꦮꦴꦢꦺꦴ ꦠꦺꦤ ꦠꦺꦤ ꦥꦫꦶꦪꦴꦪꦺꦤ ꦪꦸꦗ꧀ꦗꦠꦶꦪꦺꦮ.

ꦕꦠꦸꦱꦴꦭꦢ꧀ꦮꦴꦫꦺꦠꦶ ꦨꦺꦴꦗꦤꦱꦴꦭꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦥꦫꦶꦪꦴꦪꦺꦤ ꦏꦡꦶꦠꦠ꧀ꦠꦴꦠꦶ ‘‘ꦒꦟ꧀ꦲꦴ’’ꦠꦶ ꦄꦮꦠ꧀ꦮꦴ ‘‘ꦱꦷꦩꦴ ꦒꦠꦴ’’ꦠꦶ ꦥꦫꦶꦪꦴꦪꦺꦤ ꦏꦡꦶꦠꦠ꧀ꦠꦴ. ꦥꦏꦠꦶꦨꦹꦩꦶꦏꦫꦟꦠ꧀ꦡꦁ ‘‘ꦲꦺꦛ꧀ꦜꦴ ꦒꦲꦶꦠꦁ ꦥꦁꦱꦸ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦢꦴꦱꦁ ꦢꦩ꧀ꦩꦷꦠꦶ ꦌꦠ꧀ꦡ ‘‘ꦩꦤꦸꦱ꧀ꦱꦁ ꦢꦩ꧀ꦩꦷꦠꦶ ꦮꦸꦠ꧀ꦠꦺ ꦮꦛ꧀ꦛꦠꦷ’’ꦠꦶ ꦮꦢꦤ꧀ꦠꦶ. ꦏꦸꦏ꧀ꦏꦸꦛꦱꦹꦏꦫꦴ…ꦥꦺ… ꦮꦛ꧀ꦛꦠꦷꦠꦶ ꦌꦠ꧀ꦡ ꦏꦸꦏ꧀ꦏꦸꦛꦱꦹꦏꦫꦺꦱꦸ ꦢꦷꦪꦩꦴꦤꦺꦱꦸ ‘‘ꦆꦩꦺꦲꦶ ꦄꦩ꧀ꦲꦴꦏꦁ ꦄꦠ꧀ꦡꦺꦴ ꦤꦠ꧀ꦡꦶ, ꦱꦸꦑꦁ ꦗꦷꦮꦤ꧀ꦠꦸ, ꦄꦫꦚ꧀ꦚꦺ ꦮꦶꦱ꧀ꦱꦗ꧀ꦗꦺꦡꦴ’’ꦠꦶ ꦮꦠ꧀ꦠꦸꦁ ꦮꦛ꧀ꦛꦠꦶ. ‘‘ꦑꦺꦠ꧀ꦠꦮꦠ꧀ꦡꦸꦥꦛꦶꦒ꧀ꦒꦲꦟꦴ ꦥꦛꦶꦮꦶꦫꦠꦺꦴ ꦲꦺꦴꦠꦷ’’ꦠꦶꦄꦴꦢꦶꦮꦕꦤꦠꦺꦴ (ꦢꦷ. ꦤꦶ. ꧑.꧑꧐, ꧑꧙꧔) ꦑꦺꦠ꧀ꦠꦴꦢꦷꦤꦁ ꦥꦛꦶꦒ꧀ꦒꦲꦟꦺ ꦄꦪꦁ ꦱꦧ꧀ꦧꦺꦴ ꦮꦶꦤꦶꦕ꧀ꦖꦪꦺꦴ ꦮꦸꦠ꧀ꦠꦺꦴ. ꦏꦥ꧀ꦥꦶꦪꦏꦴꦫꦏꦱ꧀ꦱ ꦨꦶꦏ꧀ꦑꦸꦤꦴ ꦤꦶꦢ꧀ꦢꦶꦛ꧀ꦜꦨꦴꦮꦺꦴ, ꦢꦹꦠꦺꦤ ꦄꦥ꧀ꦥꦶꦠꦠꦴ, ꦠꦠꦸꦠ꧀ꦠꦫꦶ ꦮꦴꦪꦴꦩꦺꦴ, ꦠꦺꦤ ꦮꦴꦪꦴꦩꦺꦤ ꦥꦛꦶꦭꦴꦨꦺꦴꦠꦶ ꦆꦩꦴꦤꦺꦠ꧀ꦡ ꦕꦠ꧀ꦠꦴꦫꦶ ꦄꦔ꧀ꦒꦴꦤꦶ.

ꦫꦴꦗꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦤꦶꦛ꧀ꦜꦶꦠꦺꦴ ꦕꦷꦮꦫꦮꦒ꧀ꦒꦺꦴ ꦥꦜꦩꦺꦴ.