꧑. ꦥꦜꦩꦏꦡꦶꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧔꧕꧙. ꦱꦩꦶꦠꦴꦮꦶꦤꦴꦠꦶ ꦱꦩꦶꦠꦥꦴꦥꦺꦤ. ꦒꦺꦴꦠꦩꦏꦺ ꦕꦺꦠꦶꦪꦺꦠꦶ ꦒꦺꦴꦠꦩꦪꦏ꧀ꦑꦱ꧀ꦱ ꦕꦺꦠꦶꦪꦛ꧀ꦜꦴꦤꦺ ꦏꦠꦮꦶꦲꦴꦫꦺꦴ ꦮꦸꦕ꧀ꦕꦠꦶ. ꦥꦫꦶꦨꦸꦚ꧀ꦗꦶꦠꦸꦁ ꦄꦤꦸꦚ꧀ꦚꦴꦠꦁ ꦲꦺꦴꦠꦷꦠꦶ ꦨꦒꦮꦠꦴ ꦒꦲꦥꦠꦶꦕꦷꦮꦫꦺ ꦄꦤꦸꦚ꧀ꦚꦴꦠꦺ ꦧꦲꦹꦤꦶ ꦕꦷꦮꦫꦴꦤꦶ ꦭꦨꦶꦠ꧀ꦮꦴ ꦨꦟ꧀ꦝꦶꦏꦁ ꦏꦠ꧀ꦮꦴ ꦱꦷꦱꦺꦥꦶ ꦑꦤ꧀ꦣꦺꦥꦶ ꦏꦛꦶꦪꦴꦥꦶ ꦜꦥꦺꦠ꧀ꦮꦴ ꦄꦴꦒꦕ꧀ꦖꦤ꧀ꦠꦺ ꦨꦶꦏ꧀ꦑꦹ ꦢꦶꦱ꧀ꦮꦴ ꦕꦷꦮꦫꦺ ꦱꦷꦩꦁ ꦧꦤ꧀ꦣꦤ꧀ꦠꦺꦤ ꦠꦶꦕꦷꦮꦫꦁ ꦥꦫꦶꦨꦺꦴꦒꦠ꧀ꦡꦴꦪ ꦄꦤꦸꦚ꧀ꦚꦴꦠꦁ, ꦤ ꦥꦤ ꦄꦣꦶꦛ꧀ꦜꦴꦤꦮꦱꦺꦤ. ꦤꦲꦴꦪꦤ꧀ꦠꦶ ꦌꦠ꧀ꦡꦴꦠꦶ ꦤꦲꦴꦤꦁ, ꦤꦲꦴꦤꦠꦶꦠ꧀ꦡꦁ.

꧔꧖꧐. ꦌꦏꦺꦴ ꦏꦶꦫ ꦧ꧀ꦫꦴꦲ꧀ꦩꦟꦺꦴ ꦕꦶꦤ꧀ꦠꦺꦱꦶ ‘‘ꦧꦸꦢ꧀ꦣꦫꦠꦤꦱ꧀ꦱ ꦕ ꦱꦔ꧀ꦓꦫꦠꦤꦱ꧀ꦱ ꦕ ꦥꦹꦗꦴ ꦥꦚ꧀ꦚꦴꦪꦠꦶ, ꦏꦡꦁ ꦤꦸ ꦑꦺꦴ ꦣꦩ꧀ꦩꦫꦠꦤꦁ ꦥꦹꦗꦶꦠꦁ ꦤꦴꦩ ꦲꦺꦴꦠꦷ’’ꦠꦶ. ꦱꦺꦴ ꦨꦒꦮꦤ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ꦌꦠꦩꦠ꧀ꦡꦁ ꦥꦸꦕ꧀ꦖꦶ. ꦨꦒꦮꦴ ꦄꦴꦲ ‘‘ꦱꦕꦺꦥꦶ ꦧ꧀ꦫꦴꦲ꧀ꦩꦟ ꦣꦩ꧀ꦩꦫꦠꦤꦁ ꦥꦹꦗꦺꦠꦸꦏꦴꦩꦺꦴ, ꦌꦏꦁ ꦧꦲꦸꦱ꧀ꦱꦸꦠꦁ ꦥꦹꦗꦺꦲꦷ’’ꦠꦶ. ꦧꦲꦸꦱ꧀ꦱꦸꦠꦁ ꦨꦤ꧀ꦠꦺ ꦄꦴꦕꦶꦏ꧀ꦑꦡꦴꦠꦶ. ꦨꦶꦏ꧀ꦑꦸꦱꦔ꧀ꦓꦁ ꦥꦸꦕ꧀ꦖꦴꦠꦶ. ꦱꦺꦴ ꦨꦶꦏ꧀ꦑꦹ ꦈꦥꦱꦔ꧀ꦏꦩꦶꦠ꧀ꦮꦴ ‘‘ꦧꦲꦸꦱ꧀ꦱꦸꦠꦁ ꦨꦤ꧀ꦠꦺ ꦄꦴꦕꦶꦏ꧀ꦑꦡꦴ’’ꦠꦶ ꦄꦴꦲ. ꦄꦴꦤꦤ꧀ꦢꦠ꧀ꦡꦺꦫꦺꦴ ꦧ꧀ꦫꦴꦲ꧀ꦩꦟꦴꦠꦶ. ꦧ꧀ꦫꦴꦲ꧀ꦩꦟꦺꦴ ꦡꦺꦫꦁ ꦱꦲꦱ꧀ꦱꦒ꧀ꦓꦤꦏꦺꦤ ꦕꦷꦮꦫꦺꦤ ꦥꦹꦗꦺꦱꦶ. ꦠꦺꦤ ꦮꦸꦠ꧀ꦠꦁ ‘‘ꦥꦛꦶꦭꦴꦨꦮꦱꦺꦤ ꦈꦥ꧀ꦥꦤ꧀ꦤ’’ꦤ꧀ꦠꦶ. ꦈꦥ꧀ꦥꦤ꧀ꦤ-ꦱꦢ꧀ꦢꦺꦴ ꦤꦶꦥ꧀ꦦꦤ꧀ꦤꦥꦫꦶꦪꦴꦪꦺꦴꦥꦶ ꦲꦺꦴꦠꦷꦠꦶ ꦠꦁ ꦥꦛꦶꦏ꧀ꦑꦶꦥꦤ꧀ꦠꦺꦴ ꦄꦴꦲ ‘‘ꦤꦺꦴ ꦤꦶꦥ꧀ꦦꦠ꧀ꦠꦶꦮꦱꦺꦤꦴ’’ꦠꦶ. ꦥꦜꦩꦩꦺꦮ ꦲꦶ ꦠꦁ ꦠꦤ꧀ꦠꦮꦴꦪꦏꦩ꧀ꦩꦺꦤ ꦤꦶꦥ꧀ꦦꦤ꧀ꦤꦁ.

ꦡꦺꦫꦱ꧀ꦱ ꦱꦤ꧀ꦠꦶꦏꦺ ꦈꦥꦗ꧀ꦙꦁ ꦒꦴꦲꦴꦥꦺꦠ꧀ꦮꦴ ꦱꦪꦁ ꦄꦤꦸꦱ꧀ꦱꦴꦮꦤꦏꦩ꧀ꦩꦁ ꦏꦫꦺꦴꦠꦷꦠꦶ ꦌꦠ꧀ꦡ ꦱꦴꦫꦶꦥꦸꦠ꧀ꦠꦠ꧀ꦡꦺꦫꦺꦴꦥꦶ ꦠꦡꦺꦮ ꦏꦫꦺꦴꦠꦷꦠꦶ ꦢꦛ꧀ꦜꦧ꧀ꦧꦁ. ꦌꦮꦁ ꦌꦏꦩꦺꦏꦺꦤ ꦄꦠ꧀ꦠꦤꦺꦴ ꦥꦠ꧀ꦠꦕꦷꦮꦫꦁ ꦢꦠ꧀ꦮꦴ ꦥꦧ꧀ꦧꦴꦗꦺꦠ꧀ꦮꦴ ꦈꦥꦗ꧀ꦙꦁ ꦒꦟ꧀ꦲꦴꦥꦶꦠꦴꦤꦶ ꦥꦚ꧀ꦕ ꦥꦚ꧀ꦕ ꦨꦶꦏ꧀ꦑꦸꦱꦠꦴꦤꦶ ꦄꦲꦺꦱꦸꦁ. ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦠꦶꦮꦶꦪ ꦩꦩꦴꦪꦠꦷꦠꦶ ꦄꦴꦤꦤ꧀ꦢꦠ꧀ꦡꦺꦫꦺꦴ ꦠꦴꦮ ꦩꦩꦴꦪꦠꦸ ꦄꦑꦷꦟꦴꦱꦮꦨꦴꦮꦠꦺꦴ, ꦱꦴꦫꦶꦥꦸꦠ꧀ꦠꦠ꧀ꦡꦺꦫꦺꦴ ꦏꦡꦤ꧀ꦠꦶ? ꦤ ꦆꦢꦁ ꦩꦩꦴꦪꦤꦁ ꦒꦺꦲꦱ꧀ꦱꦶꦠꦥꦺꦩꦮꦱꦺꦤ, ꦄꦡ ꦑꦺꦴ ꦒꦸꦟꦱꦩ꧀ꦨꦴꦮꦤꦴꦮꦱꦺꦤꦴꦠꦶ ꦤꦴꦪꦁ ꦢꦺꦴꦱꦺꦴ. ꦤꦮꦩꦁ ꦮꦴ ꦢꦶꦮꦱꦁ ꦢꦱꦩꦁ ꦮꦴꦠꦶ ꦨꦸꦩ꧀ꦩꦠ꧀ꦡꦺ ꦈꦥꦪꦺꦴꦒꦮꦕꦤꦁ, ꦤꦮꦩꦺ ꦮꦴ ꦢꦱꦩꦺ ꦮꦴ ꦢꦶꦮꦱꦺꦠꦶ ꦄꦠ꧀ꦡꦺꦴ. ꦱꦕꦺ ꦨꦮꦺꦪ꧀ꦪꦴꦠꦶ ꦱꦕꦺ ꦏꦱ꧀ꦱꦕꦶ ꦌꦮꦁ ꦱꦶꦪꦴ. ꦮꦸꦠ꧀ꦠꦱꦢꦶꦱꦩꦺꦮꦴꦠꦶ ꦌꦠ꧀ꦡ ‘‘ꦮꦸꦠ꧀ꦠꦢꦶꦮꦱꦩꦺꦮꦴ’’ꦠꦶꦥꦶ ꦥꦜꦤ꧀ꦠꦶ. ꦣꦴꦫꦺꦠꦸꦤ꧀ꦠꦶ ꦌꦠ꧀ꦡ ‘‘ꦄꦴꦲꦴ’’ꦠꦶ ꦥꦴꦜꦱꦺꦱꦺꦴ ꦢꦛ꧀ꦜꦧ꧀ꦧꦺꦴ.

꧔꧖꧒-꧔꧖꧓. ꦤꦶꦛ꧀ꦜꦶꦠꦕꦷꦮꦫꦱ꧀ꦩꦶꦤ꧀ꦠꦶ ꦨꦸꦩ꧀ꦩꦮꦕꦤꦱ꧀ꦱ ꦭꦺꦴꦥꦁ ꦏꦠ꧀ꦮꦴ ꦤꦶꦢ꧀ꦢꦺꦱꦺꦴꦠꦶ ꦄꦴꦲ ‘‘ꦤꦶꦛ꧀ꦜꦶꦠꦺ ꦕꦷꦮꦫꦱ꧀ꦩꦶ’’ꦤ꧀ꦠꦶ, ꦕꦷꦮꦫꦱ꧀ꦱ ꦏꦫꦟꦥꦭꦶꦧꦺꦴꦣꦺ ꦈꦥꦕ꧀ꦖꦶꦤ꧀ꦤꦺꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦥꦴꦱꦥꦛ꧀ꦛꦒꦟ꧀ꦜꦶꦏꦥꦛ꧀ꦛꦥꦫꦶꦪꦺꦴꦱꦴꦤꦁ ꦪꦁ ꦏꦶꦚ꧀ꦕꦶ ꦏꦴꦠꦧ꧀ꦧꦁ, ꦠꦁ ꦏꦠ꧀ꦮꦴꦠꦶ ꦪꦺꦴꦗꦺꦠꦧ꧀ꦧꦁ. ꦱꦹꦕꦶꦪꦴ ꦥꦛꦶꦱꦴꦩꦤꦤ꧀ꦠꦶ ꦆꦢꦁ ꦱꦹꦕꦶꦏꦩ꧀ꦩꦱ꧀ꦱ ꦱꦩ꧀ꦩꦴ ꦥꦫꦶꦤꦶꦛ꧀ꦜꦶꦠꦨꦴꦮꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦁ, ꦱꦹꦕꦶꦏꦩ꧀ꦩꦤꦶꦛ꧀ꦜꦴꦤꦩꦺꦮꦺꦠ꧀ꦡ ꦥꦩꦴꦟꦁ. ꦌꦠꦺꦱꦩ꧀ꦥꦷꦠꦶ ꦮꦶꦤꦛ꧀ꦜꦴꦢꦶꦁ ꦥꦫꦴꦩꦱꦠꦶ.

ꦏꦡꦶꦤꦺ ꦕ ꦈꦧ꧀ꦨꦠꦱ꧀ꦩꦶꦤ꧀ꦠꦶ ꦪꦁ ꦱꦔ꧀ꦓꦱ꧀ꦱ ꦏꦡꦶꦤꦁ ꦄꦠ꧀ꦡꦠꦁ, ꦠꦱ꧀ꦩꦶꦁ ꦏꦡꦶꦤꦺ ꦕ ꦈꦧ꧀ꦨꦠꦺꦠꦶ ꦄꦠ꧀ꦡꦺꦴ. ꦢꦸꦠꦶꦪꦱ꧀ꦱ ꦥꦭꦶꦧꦺꦴꦣꦱ꧀ꦱ ꦄꦨꦴꦮꦁ ꦢꦱ꧀ꦱꦺꦠꦷꦠꦶ ꦄꦴꦮꦴꦱꦥꦭꦶꦧꦺꦴꦣꦱ꧀ꦱ ꦄꦨꦴꦮꦁ ꦢꦱ꧀ꦱꦺꦠꦶ. ꦌꦠ꧀ꦡ ꦕ ‘‘ꦤꦶꦛ꧀ꦜꦶꦠꦕꦷꦮꦫꦱ꧀ꦩꦶꦁ ꦈꦧ꧀ꦨꦠꦱ꧀ꦩꦶꦁ ꦏꦡꦶꦤꦺ’’ꦠꦶ ꦆꦩꦺꦲꦶ ꦢ꧀ꦮꦷꦲꦶ ꦥꦢꦺꦲꦶ ꦢ꧀ꦮꦶꦤ꧀ꦤꦁ ꦥꦭꦶꦧꦺꦴꦣꦴꦤꦁ ꦄꦨꦴꦮꦢꦱ꧀ꦱꦤꦺꦤ ꦄꦠ꧀ꦡꦠꦏꦡꦶꦤꦱ꧀ꦱ ꦥꦚ꧀ꦕꦩꦴꦱꦧ꧀ꦨꦤ꧀ꦠꦫꦺ ꦪꦴꦮ ꦕꦷꦮꦫꦥꦭꦶꦧꦺꦴꦣꦺꦴ ꦄꦴꦮꦴꦱꦥꦭꦶꦧꦺꦴꦣꦺꦴ ꦕ ꦤ ꦈꦥꦕ꧀ꦖꦶꦗ꧀ꦗꦠꦶ, ꦠꦴꦮ ꦄꦤꦣꦶꦛ꧀ꦜꦶꦠꦁ ꦄꦮꦶꦏꦥ꧀ꦥꦶꦠꦁ ꦄꦠꦶꦫꦺꦏꦕꦷꦮꦫꦁ ꦢꦱꦴꦲꦠꦺꦴ ꦥꦫꦩ꧀ꦥꦶ ꦜꦥꦺꦠꦸꦁ ꦮꦛ꧀ꦛꦠꦷꦠꦶ ꦢꦷꦥꦺꦠꦶ. ꦄꦠ꧀ꦡꦠꦏꦡꦶꦤꦱ꧀ꦱ ꦲꦶ ꦪꦴꦮ ꦏꦡꦶꦤꦱ꧀ꦱ ꦈꦧ꧀ꦨꦴꦫꦴ ꦄꦤꦴꦩꦤ꧀ꦠꦕꦴꦫꦺꦴ ꦄꦱꦩꦴꦢꦴꦤꦕꦴꦫꦺꦴ ꦪꦴꦮꦢꦠ꧀ꦡꦕꦷꦮꦫꦁ ꦒꦟꦨꦺꦴꦗꦤꦁ ꦪꦺꦴ ꦕ ꦠꦠ꧀ꦡ ꦕꦷꦮꦫꦸꦥ꧀ꦥꦴꦢꦺꦴꦠꦶ ꦆꦩꦺ ꦥꦚ꧀ꦕꦴꦤꦶꦱꦁꦱꦴ ꦭꦧ꧀ꦨꦤ꧀ꦠꦶ. ꦥꦏ꧀ꦏꦩꦤꦁ ꦄꦤ꧀ꦠꦺꦴ ꦄꦱ꧀ꦱꦴꦠꦶ ꦥꦏ꧀ꦏꦩꦤꦤ꧀ꦠꦶꦏꦴ. ꦌꦮꦁ ꦱꦺꦱꦴꦥꦶ ꦮꦺꦢꦶꦠꦧ꧀ꦧꦴ. ꦮꦶꦠ꧀ꦡꦴꦫꦺꦴ ꦥꦤꦺꦠ꧀ꦡ ꦄꦴꦒꦠꦛ꧀ꦜꦴꦤꦺꦪꦺꦮ ꦄꦴꦮꦶ ꦨꦮꦶꦱ꧀ꦱꦠꦶ.

ꦑꦺꦴꦩꦤ꧀ꦠꦶ ꦑꦺꦴꦩꦱꦸꦠ꧀ꦠꦺꦲꦶ ꦮꦴꦪꦶꦠꦁ ꦑꦺꦴꦩꦥꦛꦕꦷꦮꦫꦁ, ꦠꦡꦴ ꦱꦺꦱꦴꦤꦶ. ꦱꦴꦟꦤ꧀ꦠꦶ ꦱꦴꦟꦮꦴꦏꦱꦸꦠ꧀ꦠꦺꦲꦶ ꦏꦠꦕꦷꦮꦫꦁ. ꦨꦔ꧀ꦒꦤ꧀ꦠꦶ ꦑꦺꦴꦩꦱꦸꦠ꧀ꦠꦴꦢꦷꦤꦶ ꦱꦧ꧀ꦧꦴꦤꦶ ꦌꦏꦕ꧀ꦕꦴꦤꦶ ꦮꦴ ꦩꦶꦱ꧀ꦱꦺꦠ꧀ꦮꦴ ꦏꦠꦕꦷꦮꦫꦁ. ꦨꦔ꧀ꦒꦩ꧀ꦥꦶ ꦮꦴꦏꦩꦪꦩꦺꦮꦴꦠꦶ ꦏꦺꦕꦶ. ꦢꦸꦏꦹꦭꦁ ꦥꦛ꧀ꦛꦸꦟ꧀ꦟꦁ ꦱꦺꦴꦩꦴꦫꦥꦛꦁ ꦕꦷꦤꦥꦛꦁ ꦆꦢ꧀ꦣꦶꦗꦁ ꦢꦺꦮꦢꦶꦤ꧀ꦤꦤ꧀ꦠꦶ ꦆꦩꦴꦤꦶ ꦥꦤ ꦖ ꦕꦷꦮꦫꦴꦤꦶ ꦌꦠꦺꦱꦁꦪꦺꦮ ꦄꦤꦸꦭꦺꦴꦩꦴꦤꦷꦠꦶ ꦮꦶꦱꦸꦁ ꦤ ꦮꦸꦠ꧀ꦠꦴꦤꦶ. ꦢꦸꦏꦹꦭꦚ꧀ꦲꦶ ꦱꦴꦟꦱ꧀ꦱ ꦄꦤꦸꦭꦺꦴꦩꦁ ꦮꦴꦏꦩꦪꦠ꧀ꦠꦴ. ꦥꦛ꧀ꦛꦸꦟ꧀ꦟꦢꦺꦱꦺ ꦱꦚ꧀ꦗꦴꦠꦮꦠ꧀ꦡꦁ ꦥꦛ꧀ꦛꦸꦟ꧀ꦟꦁ. ‘‘ꦥꦛ꧀ꦛꦸꦟ꧀ꦟꦏꦺꦴꦱꦺꦪ꧀ꦪꦮꦶꦱꦺꦱꦺꦴ’’ꦠꦶ ꦲꦶ ꦄꦨꦶꦣꦴꦤꦏꦺꦴꦱꦺ ꦮꦸꦠ꧀ꦠꦁ. ꦱꦺꦴꦩꦴꦫꦢꦺꦱꦺ ꦕꦷꦤꦢꦺꦱꦺ ꦕ ꦗꦴꦠꦮꦠ꧀ꦡꦴꦤꦶ ꦱꦺꦴꦩꦴꦫꦕꦷꦤꦥꦛꦴꦤꦶ. ꦥꦛ꧀ꦛꦸꦟ꧀ꦟꦴꦢꦷꦤꦶ ꦠꦷꦟꦶ ꦏꦺꦴꦱꦺꦪ꧀ꦪꦱ꧀ꦱ ꦄꦤꦸꦭꦺꦴꦩꦴꦤꦶ ꦥꦴꦟꦏꦺꦲꦶ ꦏꦠꦱꦸꦠ꧀ꦠꦩꦪꦠ꧀ꦠꦴ. ꦆꦢ꧀ꦣꦶꦗꦁ ꦌꦲꦶꦨꦶꦏ꧀ꦑꦹꦤꦁ ꦥꦸꦚ꧀ꦚꦶꦢ꧀ꦣꦶꦪꦴ ꦤꦶꦧ꧀ꦧꦠ꧀ꦠꦕꦷꦮꦫꦁ, ꦠꦁ ꦑꦺꦴꦩꦴꦢꦷꦤꦁ ꦄꦚ꧀ꦚꦠꦫꦁ ꦲꦺꦴꦠꦷꦠꦶ ꦠꦺꦱꦁ ꦌꦮ ꦄꦤꦸꦭꦺꦴꦩꦁ. ꦢꦺꦮꦠꦴꦲꦶ ꦢꦶꦤ꧀ꦤꦁ ꦕꦷꦮꦫꦁ ꦢꦺꦮꦢꦶꦤ꧀ꦤꦁ, ꦠꦁ ꦏꦥ꧀ꦥꦫꦸꦏ꧀ꦑꦺ ꦤꦶꦧ꧀ꦧꦠ꧀ꦠꦁ ꦗꦴꦭꦶꦤꦶꦪꦴ ꦢꦺꦮꦏꦚ꧀ꦚꦴꦪ ꦄꦤꦸꦫꦸꦢ꧀ꦣꦠ꧀ꦡꦺꦫꦱ꧀ꦱ ꦢꦶꦤ꧀ꦤꦮꦠ꧀ꦡꦱꦢꦶꦱꦁ, ꦠꦩ꧀ꦥꦶ ꦑꦺꦴꦩꦴꦢꦷꦤꦁꦪꦺꦮ ꦄꦤꦸꦭꦺꦴꦩꦁ ꦲꦺꦴꦠꦶ ꦠꦺꦱꦸ ꦄꦚ꧀ꦚꦠꦫꦨꦴꦮꦠꦺꦴ.

ꦩꦗ꧀ꦙꦶꦩꦱ꧀ꦱ ꦥꦸꦫꦶꦱꦱ꧀ꦱ ꦮꦶꦢꦠ꧀ꦡꦶꦁ ꦱꦤ꧀ꦣꦴꦪ ‘‘ꦢ꧀ꦮꦺ ꦮꦶꦢꦠ꧀ꦡꦶꦪꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦆꦩꦶꦤꦴ ꦢꦷꦓꦠꦺꦴ ꦮꦝ꧀ꦞꦏꦷꦲꦠ꧀ꦡꦥ꧀ꦥꦩꦴꦟꦁ ꦮꦶꦠ꧀ꦡꦴꦫꦠꦺꦴ ꦠꦠꦺꦴ ꦈꦥꦝ꧀ꦞꦥ꧀ꦥꦩꦴꦟꦁ ꦮꦶꦏꦥ꧀ꦥꦤꦸꦥꦒꦤ꧀ꦠꦶ ꦢꦱ꧀ꦱꦺꦠꦶ. ꦠꦡꦴ ꦲꦶ ‘‘ꦱꦸꦒꦠꦮꦶꦢꦠ꧀ꦡꦶ ꦤꦴꦩ ꦆꦢꦴꦤꦶ ꦩꦗ꧀ꦙꦶꦩꦱ꧀ꦱ ꦥꦸꦫꦶꦱꦱ꧀ꦱ ꦠꦶꦱ꧀ꦱꦺꦴ ꦮꦶꦢꦠ꧀ꦡꦶꦪꦺꦴ, ꦮꦝ꧀ꦞꦏꦷꦲꦠ꧀ꦡꦺꦤ ꦢꦶꦪꦝ꧀ꦞꦺꦴ ꦲꦠ꧀ꦡꦺꦴ ꦲꦺꦴꦠꦷ’’ꦠꦶ ꦏꦸꦛꦶꦏꦴꦫꦱꦶꦏ꧀ꦑꦴꦥꦢꦛ꧀ꦜꦏꦡꦴꦪꦁ (ꦥꦴꦫꦴ. ꦄꦛ꧀ꦜ. ꧒.꧓꧔꧘-꧓꧔꧙) ꦮꦸꦠ꧀ꦠꦁ, ꦠꦱ꧀ꦩꦴ ꦱꦸꦒꦠꦔ꧀ꦒꦸꦭꦺꦤ ꦢ꧀ꦮꦴꦢꦱꦔ꧀ꦒꦸꦭꦁ ꦮꦝ꧀ꦞꦏꦷꦲꦠ꧀ꦡꦺꦤ ꦢꦶꦪꦝ꧀ꦞꦺꦴ ꦲꦠ꧀ꦡꦺꦴꦠꦶ ꦱꦶꦢ꧀ꦣꦁ. ꦌꦮꦚ꧀ꦕ ꦏꦠ꧀ꦮꦴ ꦱꦸꦒꦠꦔ꧀ꦒꦸꦭꦺꦤ ꦄꦛ꧀ꦜꦔ꧀ꦒꦸꦭꦁ ꦮꦝ꧀ꦞꦏꦷꦲꦠ꧀ꦡꦥ꧀ꦥꦩꦴꦟꦤ꧀ꦠꦶ ꦆꦢꦁ ꦄꦴꦒꦠꦩꦺꦮꦴꦠꦶ.

ꦠꦁ ꦄꦠꦶꦏ꧀ꦏꦴꦩꦪꦠꦺꦴꦠꦶ ꦌꦠ꧀ꦡ ꦠꦤ꧀ꦠꦶ ꦕꦷꦮꦫꦁ ꦏꦴꦭꦁ ꦮꦴ ꦥꦫꦴꦩꦱꦠꦶ. ꦠꦱ꧀ꦱ ꦪꦺꦴ ꦄꦫꦸꦟꦺꦴꦠꦶ ꦠꦱ꧀ꦱ ꦕꦷꦮꦫꦸꦥ꧀ꦥꦴꦢꦢꦶꦮꦱꦱ꧀ꦱ ꦪꦺꦴ ꦄꦠꦶꦏ꧀ꦏꦤ꧀ꦠꦺꦴ ꦄꦫꦸꦟꦺꦴ. ꦕꦷꦮꦫꦸꦥ꧀ꦥꦴꦢꦢꦶꦮꦱꦺꦤ ꦱꦢ꧀ꦣꦶꦤ꧀ꦠꦶ ꦕꦷꦮꦫꦸꦥ꧀ꦥꦴꦢꦢꦶꦮꦱꦱ꧀ꦱ ꦄꦠꦶꦏ꧀ꦏꦤ꧀ꦠꦄꦫꦸꦟꦺꦤ ꦱꦢ꧀ꦣꦶꦤ꧀ꦠꦶ ꦄꦠ꧀ꦡꦺꦴ. ꦢꦶꦮꦱꦱꦢ꧀ꦢꦺꦤ ꦲꦶ ꦠꦁꦢꦶꦮꦱꦤꦶꦱ꧀ꦱꦶꦠꦺꦴ ꦄꦫꦸꦟꦺꦴ ꦮꦸꦠ꧀ꦠꦺꦴ. ꦧꦤ꧀ꦣꦶꦠ꧀ꦮꦴꦠꦶ ꦫꦗ꧀ꦗꦸꦄꦴꦢꦷꦲꦶ ꦧꦤ꧀ꦣꦶꦠ꧀ꦮꦴ. ꦮꦺꦜꦺꦠ꧀ꦮꦴꦠꦶ ꦮꦠ꧀ꦡꦴꦢꦷꦠꦶ ꦮꦺꦜꦺꦠ꧀ꦮꦴ.

ꦮꦕꦤꦷꦪꦺꦴꦠꦶ ꦱꦔ꧀ꦓꦁ ꦄꦥꦺꦏ꧀ꦑꦶꦠ꧀ꦮꦴ ꦮꦸꦠ꧀ꦠꦁ. ꦄꦚ꧀ꦚꦡꦴꦥꦶ ꦮꦠ꧀ꦠꦧ꧀ꦧꦤ꧀ꦠꦶ ꦌꦠ꧀ꦡ ‘‘ꦪꦴꦪ ꦏꦴꦪꦕꦶ ꦨꦴꦱꦴꦪ ꦥꦢꦥꦛꦶꦥꦴꦛꦶꦪꦴ ꦄꦮꦠ꧀ꦮꦴꦥꦶ ꦄꦠ꧀ꦡꦩꦠ꧀ꦠꦺ ꦮꦸꦠ꧀ꦠꦺ ꦮꦛ꧀ꦛꦠꦷ’’ꦠꦶ ꦮꦢꦤ꧀ꦠꦶ. ꦠꦺꦤꦴꦠꦶ ꦄꦴꦥꦠ꧀ꦠꦶꦁ ꦥꦛꦶꦒ꧀ꦒꦟ꧀ꦲꦤ꧀ꦠꦺꦤ. ꦥꦛꦶꦒ꧀ꦒꦴꦲꦏꦺꦤ ‘‘ꦥꦱ꧀ꦱꦱꦷ’’ꦠꦶ ꦮꦸꦠ꧀ꦠꦺ ꦢꦺꦱꦏꦺꦤ ꦮꦠ꧀ꦠꦧ꧀ꦧꦮꦕꦤꦁ ꦢꦱ꧀ꦱꦺꦠꦶ ‘‘ꦄꦴꦩ ꦥꦱ꧀ꦱꦴꦩꦷ’’ꦠꦶ. ꦥꦸꦤ ꦥꦛꦶꦒ꧀ꦒꦴꦲꦏꦺꦤ ꦮꦠ꧀ꦠꦧ꧀ꦧꦮꦕꦤꦩꦴꦲ ‘‘ꦄꦴꦪꦠꦶꦁ ꦱꦁꦮꦫꦺꦪ꧀ꦪꦴꦱꦷ’’ꦠꦶ. ꦌꦮꦁ ꦮꦸꦠ꧀ꦠꦺ ꦥꦸꦤ ꦢꦺꦱꦏꦺꦤ ꦮꦠ꧀ꦠꦧ꧀ꦧꦮꦕꦤꦁ ‘‘ꦱꦴꦣꦸ ꦱꦸꦛ꧀ꦜꦸ ꦱꦁꦮꦫꦶꦱ꧀ꦱꦴꦩꦷ’’ꦠꦶ. ꦆꦩꦶꦤꦴ ꦄꦠ꧀ꦠꦤꦺꦴ ꦄꦴꦪꦠꦶꦁ ꦱꦁꦮꦫꦺ ꦥꦠꦶꦛ꧀ꦜꦶꦠꦨꦴꦮꦁ ꦢꦱ꧀ꦱꦺꦠꦶ. ꦢ꧀ꦮꦷꦱꦸ ꦥꦤ ꦱꦩ꧀ꦧꦲꦸꦭꦴꦱꦸ ꦮꦴꦠꦶ ꦢ꧀ꦮꦷꦱꦸ ꦱꦩ꧀ꦧꦲꦸꦭꦴꦱꦸ ꦮꦴ ꦄꦴꦥꦠ꧀ꦠꦷꦱꦸ ꦥꦸꦫꦶꦩꦤꦪꦺꦤꦺꦮ ꦮꦕꦤꦨꦺꦢꦺꦴ ꦮꦺꦢꦶꦠꦧ꧀ꦧꦺꦴ. ꦚꦠ꧀ꦠꦶꦪꦁ ꦄꦴꦥꦠ꧀ꦠꦶꦁ ꦱꦫꦠꦶ ꦮꦶꦮꦫꦠꦷꦠꦶ ꦌꦠ꧀ꦡ ꦢ꧀ꦮꦺ ꦄꦴꦥꦠ꧀ꦠꦶꦪꦺꦴꦠꦶ ꦮꦴ ꦱꦩ꧀ꦧꦲꦸꦭꦴ ꦄꦴꦥꦠ꧀ꦠꦶꦪꦺꦴꦠꦶ ꦮꦴ ꦮꦠ꧀ꦠꦧ꧀ꦧꦤ꧀ꦠꦶ ꦄꦣꦶꦥ꧀ꦥꦴꦪꦺꦴ. ꦕꦷꦮꦫꦢꦴꦤꦺꦥꦷꦠꦶ ꦤꦶꦱ꧀ꦱꦛ꧀ꦜꦕꦷꦮꦫꦱ꧀ꦱ ꦢꦴꦤꦺꦥꦶ. ꦮꦠ꧀ꦡꦸꦮꦱꦺꦤꦴꦠꦶ ꦕꦷꦮꦫꦒꦟꦤꦴꦪ. ꦒꦟꦱ꧀ꦱ ꦮꦸꦠ꧀ꦠꦴ ꦥꦴꦭ꦳ꦶꦪꦺꦮꦺꦠ꧀ꦡ ꦥꦴꦭ꦳ꦷꦠꦶ ꦢ꧀ꦮꦷꦱꦸ ꦆꦩꦴꦲꦁ ꦄꦴꦪꦱ꧀ꦩꦤ꧀ꦠꦴꦤꦁ ꦤꦶꦱ꧀ꦱꦗ꧀ꦗꦴꦩꦷꦠꦶ ꦮꦕꦤꦺ ꦮꦶꦱꦺꦱꦴꦨꦴꦮꦠꦺꦴ ꦮꦸꦠ꧀ꦠꦁ. ꦌꦮꦁ…ꦥꦺ… ꦮꦠ꧀ꦠꦸꦁ ꦮꦛ꧀ꦛꦠꦷꦠꦶ ꦮꦠ꧀ꦮꦴ ꦠꦠ꧀ꦡ ꦏꦴꦫꦟꦩꦴꦲ ‘‘ꦆꦠꦺꦴ ꦒꦫꦸꦏꦠꦫꦴꦤꦷ’’ꦠꦶꦄꦴꦢꦶ. ꦠꦠ꧀ꦡ ꦆꦠꦺꦴꦠꦶ ꦆꦠꦺꦴ ꦤꦶꦱ꧀ꦱꦛ꧀ꦜꦕꦷꦮꦫꦢꦴꦤꦠꦺꦴ. ꦚꦠ꧀ꦠꦶꦏꦩ꧀ꦩꦠꦺꦴ ꦚꦠ꧀ꦠꦶꦢꦸꦠꦶꦪꦏꦩ꧀ꦩꦁ ꦒꦫꦸꦏꦠꦫꦤ꧀ꦠꦶ ꦄꦴꦲ ‘‘ꦆꦠꦺꦴ ꦒꦫꦸꦏꦠꦫꦴꦤꦷ’’ꦠꦶ. ꦆꦩꦴꦲꦁ ꦕꦷꦮꦫꦤ꧀ꦠꦶ ꦌꦠ꧀ꦡ ‘‘ꦆꦩꦁ ꦕꦷꦮꦫ’’ꦤ꧀ꦠꦶꦥꦶ ꦥꦜꦤ꧀ꦠꦶ.

꧔꧖꧘. ꦤ ꦆꦣ ꦱꦚ꧀ꦚꦴ ꦫꦏ꧀ꦑꦠꦷꦠꦶ ꦆꦢꦁ ꦮꦺꦩꦠꦶꦏꦁ ꦄꦤꦠꦶꦏ꧀ꦏꦤ꧀ꦠꦱꦚ꧀ꦚꦚ꧀ꦕ ꦱꦤ꧀ꦣꦴꦪ ꦮꦸꦠ꧀ꦠꦁ. ꦪꦺꦴꦥꦶ ꦌꦮꦁꦱꦚ꧀ꦚꦷ, ꦠꦱ꧀ꦱꦥꦷꦠꦶ ꦤ ꦏꦺꦮꦭꦁ ꦄꦠꦶꦏ꧀ꦏꦤ꧀ꦠꦺ ꦄꦠꦶꦏ꧀ꦏꦤ꧀ꦠꦱꦚ꧀ꦚꦶꦱ꧀ꦱ, ꦄꦡ ꦑꦺꦴ ꦮꦺꦩꦠꦶꦏꦱ꧀ꦱ ꦄꦤꦠꦶꦏ꧀ꦏꦤ꧀ꦠꦱꦚ꧀ꦚꦶꦱ꧀ꦱꦥꦷꦠꦶ ꦄꦠ꧀ꦡꦺꦴ. ‘‘ꦤ ꦆꦣ ꦱꦚ꧀ꦚꦴ ꦫꦏ꧀ꦑꦠꦷ’’ꦠꦶꦄꦴꦢꦶꦤꦴ ꦮꦸꦠ꧀ꦠꦩꦠ꧀ꦡꦁ ꦱꦺꦱꦠ꧀ꦠꦶꦏꦺꦥꦶ ꦄꦠꦶꦢꦶꦱꦠꦶ. ꦌꦱ ꦤꦪꦺꦴ ꦱꦧ꧀ꦧꦠ꧀ꦡꦴꦠꦶ ꦌꦱ ꦤꦪꦺꦴ ꦄꦮꦶꦤꦛ꧀ꦜꦴꦢꦷꦱꦸꦥꦷꦠꦶ ꦄꦚ꧀ꦚꦺꦱꦁ ꦕꦷꦮꦫꦺꦱꦸ ꦈꦥꦕꦶꦏꦴꦢꦷꦲꦶ ꦑꦴꦪꦶꦠꦺꦱꦸ ‘‘ꦩꦪ꧀ꦲꦩ꧀ꦥꦶ ꦕꦷꦮꦫꦁ ꦑꦴꦪꦶꦠ’’ꦤ꧀ꦠꦶ ꦌꦮꦁꦱꦚ꧀ꦚꦷ ꦲꦺꦴꦠꦷꦠꦶꦄꦴꦢꦶꦤꦴ ꦪꦺꦴꦗꦺꦠꦧ꧀ꦧꦤ꧀ꦠꦶ ꦢꦱ꧀ꦱꦺꦠꦶ. ꦄꦤꦛ꧀ꦜꦠꦺꦴ ꦄꦮꦶꦭꦸꦠ꧀ꦠꦱ꧀ꦱ ꦮꦶꦱꦺꦱꦩꦴꦲ ‘‘ꦥꦱꦪ꧀ꦲꦴꦮꦲꦴꦫꦮꦱꦺꦤꦴ’’ꦠꦶ. ꦡꦺꦪ꧀ꦪꦴꦮꦲꦴꦫꦮꦱꦺꦤ ꦒꦲꦶꦠꦚ꧀ꦲꦶ ꦤꦛ꧀ꦜꦤ꧀ꦠꦶ ꦄꦣꦶꦥ꧀ꦥꦺꦠꦁ, ꦥꦱꦪ꧀ꦲꦴꦮꦲꦴꦫꦮꦱꦺꦤ ꦒꦲꦶꦠꦁ ꦮꦶꦭꦸꦠ꧀ꦠꦤ꧀ꦠꦶ. ꦄꦤꦴꦥꦠ꧀ꦠꦶ ꦄꦚ꧀ꦚꦺꦤ ꦏꦠꦁ ꦥꦛꦶꦭꦨꦶꦠ꧀ꦮꦴ ꦥꦫꦶꦨꦸꦚ꧀ꦗꦠꦷꦠꦶ ꦆꦢꦁ ꦤꦶꦱꦷꦢꦤꦱꦤ꧀ꦡꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦪꦁ ꦪꦺꦤ ꦲꦶ ꦥꦸꦫꦴꦟꦱꦤ꧀ꦡꦠꦱ꧀ꦱ ꦱꦴꦩꦤ꧀ꦠꦴ ꦱꦸꦒꦠꦮꦶꦢꦠ꧀ꦡꦶꦁ ꦄꦤꦴꦢꦶꦪꦶꦠ꧀ꦮꦴ ꦄꦚ꧀ꦚꦁ ꦤꦮꦁ ꦤꦶꦱꦷꦢꦤꦱꦤ꧀ꦡꦠꦁ ꦏꦠꦁ, ꦠꦱ꧀ꦱ ꦠꦁ ꦤꦶꦱ꧀ꦱꦒ꧀ꦒꦶꦪꦁ ꦲꦺꦴꦠꦶ. ꦠꦱ꧀ꦩꦴ ‘‘ꦄꦤꦴꦥꦠ꧀ꦠꦶ ꦄꦚ꧀ꦚꦺꦤ ꦏꦠꦁ ꦥꦛꦶꦭꦨꦶꦠ꧀ꦮꦴ ꦥꦫꦶꦨꦸꦚ꧀ꦗꦠꦷ’’ꦠꦶ ꦆꦢꦁ ꦥꦫꦱ꧀ꦱ ꦤꦶꦱ꧀ꦱꦒ꧀ꦒꦶꦪꦁ ꦄꦥꦫꦱ꧀ꦱ ꦥꦫꦶꦨꦸꦚ꧀ꦗꦶꦠꦸꦁ ꦮꦛ꧀ꦛꦠꦷꦠꦶ ꦆꦩꦩꦠ꧀ꦡꦁ ꦱꦴꦣꦺꦠꦶ. ꦥꦫꦶꦨꦺꦴꦒꦁ ꦱꦤ꧀ꦣꦴꦪ ꦮꦸꦠ꧀ꦠꦤ꧀ꦠꦶ ꦄꦤꦠꦶꦏ꧀ꦏꦤ꧀ꦠꦺ ꦄꦠꦶꦏ꧀ꦏꦤ꧀ꦠꦱꦚ꧀ꦚꦶꦱ꧀ꦱ ꦮꦺꦩꦠꦶꦏꦱ꧀ꦱ ꦕ ꦥꦫꦶꦨꦸꦚ꧀ꦗꦤ꧀ꦠꦱ꧀ꦱꦺꦮ ꦢꦸꦏ꧀ꦏꦛꦁ, ꦤ ꦥꦤ ꦄꦥꦫꦶꦨꦸꦚ꧀ꦗꦶꦠ꧀ꦮꦴ ꦜꦥꦺꦤ꧀ꦠꦱ꧀ꦱꦴꦠꦶ ꦄꦣꦶꦥ꧀ꦥꦴꦪꦺꦴ.

꧔꧖꧙. ꦠꦶꦕꦷꦮꦫꦁ ꦄꦣꦶꦛ꧀ꦜꦴꦠꦸꦤ꧀ꦠꦶ ꦤꦴꦩꦁ ꦮꦠ꧀ꦮꦴ ꦄꦣꦶꦛ꧀ꦜꦴꦠꦸꦁ. ꦤ ꦮꦶꦏꦥ꧀ꦥꦺꦠꦸꦤ꧀ꦠꦶ ꦤꦴꦩꦁ ꦮꦠ꧀ꦮꦴ ꦤ ꦮꦶꦏꦥ꧀ꦥꦺꦠꦸꦁ. ꦌꦱ ꦤꦪꦺꦴ ꦱꦧ꧀ꦧꦠ꧀ꦡ. ꦠꦱ꧀ꦩꦴ ꦠꦶꦕꦷꦮꦫꦴꦢꦷꦤꦶ ꦄꦣꦶꦛ꧀ꦜꦲꦤ꧀ꦠꦺꦤ ‘‘ꦆꦩꦁ ꦱꦔ꧀ꦓꦴꦛꦶꦁ ꦄꦣꦶꦛ꧀ꦜꦴꦩꦷ’’ꦠꦶꦄꦴꦢꦶꦤꦴ ꦤꦴꦩꦁ ꦮꦠ꧀ꦮꦴ ꦄꦣꦶꦛ꧀ꦜꦴꦠꦧ꧀ꦧꦁ. ꦮꦶꦏꦥ꧀ꦥꦺꦤ꧀ꦠꦺꦤ ꦥꦤ ‘‘ꦆꦩꦁ ꦱꦔ꧀ꦓꦴꦛꦶ’’ꦤ꧀ꦠꦶꦄꦴꦢꦶꦤꦴ ꦠꦱ꧀ꦱ ꦠꦱ꧀ꦱ ꦕꦷꦮꦫꦱ꧀ꦱ ꦤꦴꦩꦁ ꦄꦒ꧀ꦒꦲꦺꦠ꧀ꦮꦴꦮ ‘‘ꦆꦩꦁ ꦕꦷꦮꦫꦁ ꦠꦸꦪ꧀ꦲꦁ ꦮꦶꦏꦥ꧀ꦥꦺꦩꦷ’’ꦠꦶ ꦮꦶꦏꦥ꧀ꦥꦺꦠꦧ꧀ꦧꦁ. ꦠꦶꦕꦷꦮꦫꦁ ꦮꦴ ꦲꦺꦴꦠꦸ ꦄꦚ꧀ꦚꦁ ꦮꦴ, ꦪꦢꦶ ꦠꦁ ꦠꦁ ꦤꦴꦩꦁ ꦒꦲꦺꦠ꧀ꦮꦴ ꦮꦶꦏꦥ꧀ꦥꦺꦠꦶ, ꦄꦮꦶꦏꦥ꧀ꦥꦶꦠꦁ ꦲꦺꦴꦠꦶ, ꦄꦠꦶꦫꦺꦏꦕꦷꦮꦫꦛ꧀ꦜꦴꦤꦺꦪꦺꦮ ꦠꦶꦛ꧀ꦜꦠꦶ. ꦠꦠꦺꦴ ꦥꦫꦁ ꦮꦶꦏꦥ꧀ꦥꦺꦠꦸꦤ꧀ꦠꦶ ‘‘ꦕꦠꦸꦩꦴꦱꦠꦺꦴ ꦥꦫꦁ ꦮꦶꦏꦥ꧀ꦥꦺꦠ꧀ꦮꦴ ꦥꦫꦶꦨꦸꦚ꧀ꦗꦶꦠꦸꦁ ꦄꦤꦸꦚ꧀ꦚꦴꦠ’’ꦤ꧀ꦠꦶ ꦠꦷꦱꦸꦥꦶ ꦒꦟ꧀ꦜꦶꦥꦢꦺꦱꦸ ꦮꦸꦠ꧀ꦠꦁ. ꦏꦺꦕꦶ ꦥꦤ ‘‘ꦠꦠꦺꦴ ꦥꦫꦁ ꦮꦶꦏꦥ꧀ꦥꦺꦠ꧀ꦮꦴ ꦪꦴꦮ ꦄꦴꦒꦴꦩꦶꦱꦁꦮꦕ꧀ꦖꦫꦺ ꦮꦱ꧀ꦱꦴꦤꦁ ꦕꦴꦠꦸꦩꦴꦱꦁ, ꦠꦴꦮ ꦜꦥꦺꦠꦸꦁ ꦄꦤꦸꦚ꧀ꦚꦴꦠ’’ꦤ꧀ꦠꦶꦥꦶ ꦮꦢꦤ꧀ꦠꦶ. ‘‘ꦠꦠꦺꦴ ꦥꦫꦁ ꦮꦶꦏꦥ꧀ꦥꦺꦠꦸꦁ ꦄꦤꦸꦗꦴꦤꦴꦩꦷꦠꦶ ꦌꦠ꧀ꦠꦴꦮꦠꦴ ꦮꦱ꧀ꦱꦶꦏꦱꦴꦛꦶꦏꦁ ꦏꦟ꧀ꦝꦸꦥ꧀ꦥꦛꦶꦕ꧀ꦖꦴꦢꦶꦚ꧀ꦕ ꦠꦁ ꦠꦁ ꦤꦴꦩꦁ ꦒꦲꦺꦠ꧀ꦮꦴ ꦮꦶꦏꦥ꧀ꦥꦺꦠꦸꦁ ꦄꦤꦸꦚ꧀ꦚꦴꦠꦤ꧀ꦠꦶ ꦌꦮꦩꦠ꧀ꦡꦺꦴ ꦤ ꦒꦲꦺꦠꦧ꧀ꦧꦺꦴ ꦠꦠꦺꦴ ꦥꦫꦁ ꦮꦱ꧀ꦱꦶꦏꦱꦴꦛꦶꦏꦴꦢꦶꦤꦴꦩꦱ꧀ꦱꦺꦮ ꦄꦨꦴꦮꦠꦺꦴ. ꦠꦱ꧀ꦩꦴ ꦠꦠꦺꦴ ꦥꦫꦁ ꦮꦶꦏꦥ꧀ꦥꦺꦤ꧀ꦠꦺꦤꦥꦶ ꦤꦴꦩꦁ ꦒꦲꦺꦠ꧀ꦮꦴ ꦤ ꦮꦶꦏꦥ꧀ꦥꦺꦠꦧ꧀ꦧꦁ. ꦈꦨꦶꦤ꧀ꦤꦩ꧀ꦥꦶ ꦠꦠꦺꦴ ꦥꦫꦁ ꦮꦶꦏꦥ꧀ꦥꦺꦠ꧀ꦮꦴ ꦥꦫꦶꦨꦺꦴꦒꦱ꧀ꦱ ꦄꦤꦸꦚ꧀ꦚꦴꦠꦠ꧀ꦠꦴ ꦠꦡꦴ ꦮꦶꦏꦥ꧀ꦥꦶꦠꦁ ꦄꦚ꧀ꦚꦤꦴꦩꦺꦤ ꦄꦣꦶꦛ꧀ꦜꦲꦶꦠ꧀ꦮꦴ ꦥꦫꦶꦨꦸꦚ꧀ꦗꦶꦠꦧ꧀ꦧ’’ꦤ꧀ꦠꦶ ꦠꦷꦱꦸꦥꦶ ꦒꦟ꧀ꦜꦶꦥꦢꦺꦱꦸ ꦮꦸꦠ꧀ꦠꦁ.

ꦥꦕ꧀ꦕꦸꦢ꧀ꦣꦫꦴꦩꦷꦠꦶ ꦜꦥꦺꦩꦶ, ꦥꦫꦶꦕ꧀ꦕꦗꦴꦩꦷꦠꦶ ꦮꦴ ꦄꦠ꧀ꦡꦺꦴ. ꦆꦩꦁ ꦱꦔ꧀ꦓꦴꦛꦶꦁ ꦄꦣꦶꦛ꧀ꦜꦴꦩꦷꦠꦶ ꦌꦠ꧀ꦡ ‘‘ꦆꦩꦁ ꦕꦷꦮꦫꦁ ꦱꦔ꧀ꦓꦴꦛꦶꦁ ꦄꦣꦶꦛ꧀ꦜꦴꦩꦷꦠꦶ ꦌꦮꦩ꧀ꦥꦶ ꦮꦠ꧀ꦠꦸꦁ ꦮꦛ꧀ꦛꦠꦷ’’ꦠꦶ ꦒꦟ꧀ꦜꦶꦥꦢꦺꦱꦸ ꦮꦸꦠ꧀ꦠꦁ, ꦠꦩ꧀ꦥꦶ ‘‘ꦆꦩꦁ ꦕꦷꦮꦫꦁ ꦥꦫꦶꦏ꧀ꦑꦴꦫꦕꦺꦴꦭ꦳ꦁ ꦄꦣꦶꦛ꧀ꦜꦴꦩꦷ’’ꦠꦶ ꦆꦩꦶꦤꦴ ꦱꦩꦺꦠꦶ. ꦏꦴꦪꦮꦶꦏꦴꦫꦁ ꦏꦫꦺꦴꦤ꧀ꦠꦺꦤꦴꦠꦶ ꦲꦠ꧀ꦡꦺꦤ ꦕꦷꦮꦫꦁ ꦥꦫꦴꦩꦱꦤ꧀ꦠꦺꦤ ꦮꦴ ꦕꦴꦭꦺꦤ꧀ꦠꦺꦤ ꦮꦴ. ꦢꦸꦮꦶꦣꦤ꧀ꦠꦶ ꦱꦩ꧀ꦩꦸꦑꦥꦫꦩ꧀ꦩꦸꦑꦨꦺꦢꦺꦱꦸ ꦢꦸꦮꦶꦣꦁ. ꦲꦠ꧀ꦡꦥꦴꦱꦺꦠꦶ ꦆꦢꦁ ꦢ꧀ꦮꦴꦢꦱꦲꦠ꧀ꦡꦁ ꦱꦤ꧀ꦣꦴꦪ ꦮꦸꦠ꧀ꦠꦁ, ꦠꦱ꧀ꦩꦴ ꦢ꧀ꦮꦴꦢꦱꦲꦠ꧀ꦡꦧ꧀ꦨꦤ꧀ꦠꦫꦺ ꦜꦶꦠꦁ ‘‘ꦆꦩ’’ꦤ꧀ꦠꦶ ꦮꦠ꧀ꦮꦴ ꦄꦣꦶꦛ꧀ꦜꦴꦠꦧ꧀ꦧꦁ. ꦠꦠꦺꦴ ꦥꦫꦁ ‘‘ꦌꦠ’’ꦤ꧀ꦠꦶ ꦮꦠ꧀ꦮꦴ ꦄꦣꦶꦛ꧀ꦜꦴꦠꦧ꧀ꦧꦤ꧀ꦠꦶ ꦏꦺꦕꦶ ꦮꦢꦤ꧀ꦠꦶ. ꦒꦟ꧀ꦜꦶꦥꦢꦺꦱꦸ ꦥꦤꦺꦠ꧀ꦡ ꦤ ꦏꦶꦚ꧀ꦕꦶ ꦮꦸꦠ꧀ꦠꦁ. ꦥꦴꦭ꦳ꦶꦪꦁ ꦄꦛ꧀ꦜꦏꦡꦴꦪꦚ꧀ꦕ ꦱꦧ꧀ꦧꦠ꧀ꦡ ‘‘ꦲꦠ꧀ꦡꦥꦴꦱꦺꦴ’’ꦠꦶ ꦄꦝ꧀ꦞꦠꦺꦪ꧀ꦪꦲꦠ꧀ꦡꦺꦴ ꦮꦸꦕ꧀ꦕꦠꦶ, ꦠꦱ꧀ꦩꦴ ꦆꦣ ꦮꦶꦱꦺꦱꦮꦶꦏꦥ꧀ꦥꦤꦴꦪ ꦏꦴꦫꦟꦁ ꦒꦮꦺꦱꦶꦠꦧ꧀ꦧꦁ. ꦱꦴꦩꦤ꧀ꦠꦮꦶꦲꦴꦫꦺꦴ ꦤꦴꦩ ꦪꦠ꧀ꦡ ꦠꦢꦲꦺꦮ ꦒꦤ꧀ꦠ꧀ꦮꦴ ꦤꦶꦮꦠ꧀ꦠꦶꦠꦸꦁ ꦱꦏ꧀ꦏꦴ. ‘‘ꦱꦴꦩꦤ꧀ꦠꦮꦶꦲꦴꦫꦺ’’ꦠꦶ ꦆꦢꦁ ꦢꦺꦱꦤꦴꦱꦷꦱꦩꦠ꧀ꦠꦁ, ꦠꦱ꧀ꦩꦴ ꦜꦥꦶꦠꦛ꧀ꦜꦴꦤꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦢꦹꦫꦺ ꦜꦶꦠꦩ꧀ꦥꦶ ꦄꦣꦶꦛ꧀ꦜꦴꦠꦧ꧀ꦧꦤ꧀ꦠꦶ ꦮꦢꦤ꧀ꦠꦶ. ꦜꦥꦶꦠꦛ꧀ꦜꦴꦤꦁ ꦱꦭ꧀ꦭꦏ꧀ꦑꦺꦠ꧀ꦮꦴꦠꦶ ꦕ ꦆꦢꦁ ꦜꦥꦶꦠꦛ꧀ꦜꦴꦤꦱꦭ꧀ꦭꦏ꧀ꦑꦟꦁ ꦄꦤꦸꦕ꧀ꦖꦮꦶꦏꦤ꧀ꦠꦶ ꦏꦠ꧀ꦮꦴ ꦮꦸꦠ꧀ꦠꦁ, ꦕꦷꦮꦫꦱꦭ꧀ꦭꦏ꧀ꦑꦟꦩꦺꦮꦺꦠ꧀ꦡ ꦥꦩꦴꦟꦁ.

ꦄꦣꦶꦛ꧀ꦜꦲꦶꦠ꧀ꦮꦴ ꦜꦥꦶꦠꦮꦠ꧀ꦡꦺꦲꦷꦠꦶ ꦥꦫꦶꦏ꧀ꦑꦴꦫꦕꦺꦴꦭ꦳ꦤꦴꦩꦺꦤ ꦄꦣꦶꦛ꧀ꦜꦲꦶꦠ꧀ꦮꦴ ꦜꦥꦶꦠꦮꦠ꧀ꦡꦺꦲꦶ. ꦄꦣꦶꦛ꧀ꦜꦴꦤꦠꦺꦴ ꦥꦸꦧ꧀ꦧꦺ ꦱꦔ꧀ꦓꦴꦛꦶꦄꦴꦢꦶꦮꦺꦴꦲꦴꦫꦱ꧀ꦱ ꦄꦨꦴꦮꦠꦺꦴ ‘‘ꦆꦩꦁ ꦥꦕ꧀ꦕꦸꦢ꧀ꦣꦫꦴꦩꦷ’’ꦠꦶ ꦥꦫꦶꦏ꧀ꦑꦴꦫꦕꦺꦴꦭ꦳ꦱ꧀ꦱ ꦮꦶꦱꦸꦁ ꦥꦕ꧀ꦕꦸꦢ꧀ꦣꦴꦫꦮꦶꦣꦶꦁ ꦢꦱ꧀ꦱꦺꦠꦶ. ꦥꦫꦶꦏ꧀ꦑꦴꦫꦕꦺꦴꦭ꦳ꦤꦴꦩꦺꦤ ꦥꦤ ꦄꦣꦶꦛ꧀ꦜꦶꦠꦠ꧀ꦠꦴ ‘‘ꦆꦩꦁ ꦥꦫꦶꦏ꧀ꦑꦴꦫꦕꦺꦴꦭ꦳ꦁ ꦥꦕ꧀ꦕꦸꦢ꧀ꦣꦫꦴꦩꦷ’’ꦠꦶ ꦮꦸꦠ꧀ꦠꦺꦥꦶ ꦤꦺꦮꦠ꧀ꦡꦶ ꦢꦺꦴꦱꦺꦴꦠꦶ ꦮꦶꦚ꧀ꦚꦴꦪꦠꦶ. ꦥꦕ꧀ꦕꦸꦢ꧀ꦣꦫꦶꦠ꧀ꦮꦴ ꦥꦸꦤ ꦄꦣꦶꦛ꧀ꦜꦴꦠꦧ꧀ꦧꦴꦤꦷꦠꦶ ꦆꦢꦚ꧀ꦕ ꦱꦔ꧀ꦓꦴꦛꦶꦄꦴꦢꦶꦕꦷꦮꦫꦤꦴꦩꦺꦤ ꦄꦣꦶꦛ꧀ꦜꦲꦶꦠ꧀ꦮꦴ ꦥꦫꦶꦨꦸꦚ꧀ꦗꦶꦠꦸꦏꦴꦩꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦥꦫꦶꦏ꧀ꦑꦴꦫꦕꦺꦴꦭ꦳ꦤꦴꦩꦺꦤꦺꦮ ꦄꦣꦶꦛ꧀ꦜꦲꦶꦠ꧀ꦮꦴ ꦥꦫꦶꦨꦸꦚ꧀ꦗꦤ꧀ꦠꦱ꧀ꦱ ꦥꦤ ꦥꦸꦧ꧀ꦧꦺꦏꦠꦄꦣꦶꦛ꧀ꦜꦴꦤꦩꦺꦮ ꦄꦣꦶꦛ꧀ꦜꦴꦤꦁ. ꦄꦣꦶꦛ꧀ꦜꦴꦤꦏꦶꦕ꧀ꦕꦁ ꦤꦠ꧀ꦡꦷꦠꦶ ꦆꦩꦶꦤꦴ ꦏꦥ꧀ꦥꦧꦶꦤ꧀ꦢꦸꦢꦴꦤꦏꦶꦕ꧀ꦕꦩ꧀ꦥꦶ ꦤꦠ꧀ꦡꦷꦠꦶ ꦢꦱ꧀ꦱꦺꦠꦶ. ꦩꦸꦛ꧀ꦜꦶꦥꦚ꧀ꦕꦏꦴꦢꦶꦠꦶꦕꦷꦮꦫꦥ꧀ꦥꦩꦴꦟꦪꦸꦠ꧀ꦠꦁ ꦱꦤ꧀ꦣꦴꦪ ‘‘ꦠꦶꦕꦷꦮꦫꦁ ꦥꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦥꦫꦶꦏ꧀ꦑꦴꦫꦕꦺꦴꦭ꦳ꦁ ꦄꦣꦶꦛ꧀ꦜꦴꦠꦸꦤ꧀ꦠꦶ ꦥꦫꦶꦏ꧀ꦑꦴꦫꦕꦺꦴꦭ꦳ꦁ ꦏꦠ꧀ꦮꦴ ꦄꦣꦶꦛ꧀ꦜꦴꦠꦸꦁ. ꦧꦢ꧀ꦣꦱꦷꦩꦴꦪꦁ ꦄꦮꦶꦥ꧀ꦥꦮꦴꦱꦱꦷꦩꦴꦱꦩ꧀ꦩꦸꦠꦶꦱꦧ꧀ꦨꦴꦮꦠꦺꦴ ꦕꦷꦮꦫꦮꦶꦥ꧀ꦥꦮꦴꦱꦺꦥꦶ ꦤꦺꦮꦠ꧀ꦡꦶ ꦢꦺꦴꦱꦺꦴꦠꦶ ꦤ ꦠꦠ꧀ꦡ ꦢꦸꦥ꧀ꦥꦫꦶꦲꦴꦫꦠꦴꦠꦶ ꦄꦴꦲ ‘‘ꦄꦧꦢ꧀ꦣꦱꦷꦩꦴꦪꦁ ꦢꦸꦥ꧀ꦥꦫꦶꦲꦴꦫ’’ꦤ꧀ꦠꦶ.

ꦄꦤꦠꦶꦫꦶꦠ꧀ꦠꦥ꧀ꦥꦩꦴꦟꦴꦠꦶ ꦱꦸꦒꦠꦮꦶꦢꦠ꧀ꦡꦶꦪꦴ ꦢꦷꦓꦱꦺꦴ ꦖ ꦮꦶꦢꦠ꧀ꦡꦶꦪꦺꦴ ꦠꦶꦫꦶꦪꦁ ꦄꦝ꧀ꦞꦠꦺꦪ꧀ꦪꦮꦶꦢꦠ꧀ꦡꦶꦚ꧀ꦕ ꦄꦤꦠꦶꦏ꧀ꦏꦤ꧀ꦠꦥ꧀ꦥꦩꦴꦟꦴꦠꦶ ꦄꦠ꧀ꦡꦺꦴ. ꦤꦤꦸ ꦕ ꦮꦱ꧀ꦱꦶꦏꦱꦴꦛꦶꦏꦴ ꦮꦱ꧀ꦱꦴꦤꦴꦠꦶꦏ꧀ꦏꦩꦺꦤ, ꦏꦟ꧀ꦝꦸꦥ꧀ꦥꦛꦶꦕ꧀ꦖꦴꦢꦶ ꦄꦴꦧꦴꦣꦮꦹꦥꦱꦩꦺꦤ ꦄꦣꦶꦛ꧀ꦜꦴꦤꦁ ꦮꦶꦗꦲꦠꦶ. ꦠꦺꦤꦺꦮ ꦩꦴꦠꦶꦏꦴꦛ꧀ꦜꦏꦡꦴꦪꦁ (ꦏꦔ꧀ꦑꦴ. ꦄꦛ꧀ꦜ. ꦏꦡꦶꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ) ‘‘ꦮꦱ꧀ꦱꦶꦏꦱꦴꦛꦶꦏꦴ ꦮꦱ꧀ꦱꦴꦤꦩꦴꦱꦴꦠꦶꦏ꧀ꦏꦩꦺꦤꦥꦶ, ꦏꦟ꧀ꦝꦸꦥ꧀ꦥꦛꦶꦕ꧀ꦖꦴꦢꦶ ꦄꦴꦧꦴꦣꦮꦹꦥꦱꦩꦺꦤꦥꦶ ꦄꦣꦶꦛ꧀ꦜꦴꦤꦁ ꦮꦶꦗꦲꦠꦷ’’ꦠꦶ ꦮꦸꦠ꧀ꦠꦁ. ꦠꦱ꧀ꦩꦴ ‘‘ꦠꦠꦺꦴ ꦥꦫꦁ ꦥꦕ꧀ꦕꦸꦢ꧀ꦣꦫꦶꦠ꧀ꦮꦴ ꦮꦶꦏꦥ꧀ꦥꦺꦠꦧ꧀ꦧꦴ’’ꦠꦶ ꦏꦱ꧀ꦩꦴ ꦮꦸꦠ꧀ꦠꦁ. ꦱꦠꦶ ꦲꦶ ꦄꦣꦶꦛ꧀ꦜꦴꦤꦺ ꦥꦕ꧀ꦕꦸꦢ꧀ꦣꦴꦫꦺꦴ ꦪꦸꦠ꧀ꦠꦺꦴꦠꦶ? ꦌꦠ꧀ꦡ ꦠꦴꦮ ꦠꦷꦱꦸꦥꦶ ꦒꦟ꧀ꦜꦶꦥꦢꦺꦱꦸ ꦆꦢꦁ ꦮꦸꦠ꧀ꦠꦁ ‘‘ꦥꦕ꧀ꦕꦸꦢ꧀ꦣꦫꦶꦠ꧀ꦮꦴꦠꦶ ꦆꦢꦁ ꦥꦕ꧀ꦕꦸꦢ꧀ꦣꦫꦟꦁ ꦱꦤ꧀ꦣꦴꦪ ꦤ ꦮꦸꦠ꧀ꦠꦁ, ꦥꦕ꧀ꦕꦸꦢ꧀ꦣꦫꦶꦠ꧀ꦮꦴꦠꦶ ꦥꦤ ꦮꦱ꧀ꦱꦶꦏꦱꦴꦛꦶꦏꦨꦴꦮꦠꦺꦴ ꦄꦥꦤꦺꦠ꧀ꦮꦴꦠꦶ ꦌꦮꦩꦠ꧀ꦡꦺꦴ ꦒꦲꦺꦠꦧ꧀ꦧꦺꦴ. ꦠꦱ꧀ꦩꦴ ꦲꦺꦩꦤ꧀ꦠꦱ꧀ꦱ ꦥꦜꦩꦢꦶꦮꦱꦠꦺꦴ ꦥꦛ꧀ꦜꦴꦪ ꦄꦤ꧀ꦠꦺꦴꦢꦱꦴꦲꦺ ꦮꦱ꧀ꦱꦶꦏꦱꦴꦛꦶꦏꦨꦴꦮꦠꦺꦴ ꦄꦥꦤꦺꦠ꧀ꦮꦴ ꦮꦶꦏꦥ꧀ꦥꦺꦠꦧ꧀ꦧꦴꦠꦶ ꦆꦩꦩꦠ꧀ꦡꦁ ꦢꦱ꧀ꦱꦺꦠꦸꦁ ‘ꦠꦠꦺꦴ ꦥꦫꦁ ꦥꦕ꧀ꦕꦸꦢ꧀ꦣꦫꦶꦠ꧀ꦮꦴ ꦮꦶꦏꦥ꧀ꦥꦺꦠꦧ꧀ꦧꦴ’ꦠꦶ ꦮꦸꦠ꧀ꦠ’’ꦤ꧀ꦠꦶ.

ꦏꦺꦕꦶ ꦥꦤ ‘‘ꦪꦡꦴ ꦏꦡꦶꦤꦩꦴꦱꦧ꧀ꦨꦤ꧀ꦠꦫꦺ ꦈꦥ꧀ꦥꦤ꧀ꦤꦕꦷꦮꦫꦁ ꦏꦡꦶꦤꦩꦴꦱꦴꦠꦶꦏ꧀ꦏꦩꦺ ꦤꦶꦱ꧀ꦱꦒ꧀ꦒꦶꦪꦁ ꦲꦺꦴꦠꦶ, ꦌꦮꦩꦪꦁ ꦮꦱ꧀ꦱꦶꦏꦱꦴꦛꦶꦏꦴꦥꦶ ꦮꦱ꧀ꦱꦴꦤꦩꦴꦱꦴꦠꦶꦏ꧀ꦏꦩꦺ ꦤꦶꦱ꧀ꦱꦒ꧀ꦒꦶꦪꦴ ꦲꦺꦴꦠꦶ, ꦠꦱ꧀ꦩꦴ ꦏꦠ꧀ꦠꦶꦏꦥꦸꦟ꧀ꦟꦩꦢꦶꦮꦱꦺ ꦥꦕ꧀ꦕꦸꦢ꧀ꦣꦫꦶꦠ꧀ꦮꦴ ꦠꦠꦺꦴ ꦥꦫꦁ ꦲꦺꦩꦤ꧀ꦠꦱ꧀ꦱ ꦥꦜꦩꦢꦶꦮꦱꦺ ꦮꦶꦏꦥ꧀ꦥꦺꦠꦧ꧀ꦧꦴꦠꦶ ꦌꦮꦩꦠ꧀ꦡꦺꦴ ꦒꦲꦺꦠꦧ꧀ꦧꦺꦴ. ꦥꦕ꧀ꦕꦸꦢ꧀ꦣꦫꦶꦠ꧀ꦮꦴ ꦠꦠꦺꦴ ꦥꦫꦁ ꦮꦶꦏꦥ꧀ꦥꦺꦠꦧ꧀ꦧꦴꦠꦶ ꦥꦢꦪꦺꦴꦗꦤꦴ ꦮꦺꦢꦶꦠꦧ꧀ꦧꦴ’’ꦠꦶ ꦕ ꦮꦢꦤ꧀ꦠꦶ, ꦠꦁ ꦤ ꦪꦸꦠ꧀ꦠꦁ. ꦏꦡꦶꦤꦩꦴꦱꦺ ꦈꦥ꧀ꦥꦤ꧀ꦤꦚ꧀ꦲꦶ ꦕꦷꦮꦫꦁ ꦄꦠꦶꦫꦺꦏꦕꦷꦮꦫꦛ꧀ꦜꦴꦤꦺ ꦜꦶꦠꦠ꧀ꦠꦴ ꦄꦮꦱꦴꦤꦢꦶꦮꦱꦺ ꦄꦤꦣꦶꦛ꧀ꦜꦶꦠꦁ ꦏꦡꦶꦤꦩꦴꦱꦴꦠꦶꦏ꧀ꦏꦩꦺ ꦤꦶꦱ꧀ꦱꦒ꧀ꦒꦶꦪꦁ ꦲꦺꦴꦠꦶ. ꦄꦪꦁ ꦥꦤ ꦮꦱ꧀ꦱꦶꦏꦱꦴꦛꦶꦏꦴ ꦄꦣꦶꦛ꧀ꦜꦲꦶꦠ꧀ꦮꦴ ꦜꦥꦶꦠꦠ꧀ꦠꦴ ꦤ ꦠꦺꦤ ꦱꦢꦶꦱꦴꦠꦶ ꦮꦱ꧀ꦱꦴꦤꦴꦠꦶꦏ꧀ꦏꦩꦺ ꦏꦡꦁ ꦤꦶꦱ꧀ꦱꦒ꧀ꦒꦶꦪꦴ ꦲꦺꦴꦠꦶ. ꦄꦤꦣꦶꦛ꧀ꦜꦶꦠꦄꦮꦶꦏꦥ꧀ꦥꦶꦠꦩꦺꦮ ꦲꦶ ꦠꦁꦠꦁꦏꦴꦭꦴꦠꦶꦏ꧀ꦏꦩꦺ ꦤꦶꦱ꧀ꦱꦒ꧀ꦒꦶꦪꦁ ꦲꦺꦴꦠꦶ, ꦠꦱ꧀ꦩꦴ ꦲꦺꦩꦤ꧀ꦠꦺꦥꦶ ꦮꦱ꧀ꦱꦶꦏꦱꦴꦛꦶꦏꦴ ꦢꦱꦴꦲꦁ ꦥꦫꦶꦲꦴꦫꦁ ꦭꦨꦠꦶꦪꦺꦮ. ꦌꦮꦁ ꦏꦟ꧀ꦝꦸꦥ꧀ꦥꦛꦶꦕ꧀ꦖꦴꦢꦶꦥꦶ ꦄꦴꦧꦴꦣꦮꦹꦥꦱꦩꦺꦤ ꦄꦣꦶꦛ꧀ꦜꦴꦤꦁ ꦮꦶꦗꦲꦠꦶ, ꦠꦱ꧀ꦩꦴ ꦠꦠꦺꦴ ꦥꦫꦁ ꦢꦱꦴꦲꦁ ꦥꦫꦶꦲꦴꦫꦁ ꦭꦨꦠꦶ, ꦢꦱꦴꦲꦁ ꦥꦤ ꦄꦤꦠꦶꦏ꧀ꦏꦩꦶꦠ꧀ꦮꦴ ꦮꦶꦏꦥ꧀ꦥꦺꦠꦧ꧀ꦧꦴꦠꦶ.

ꦏꦺꦕꦶ ꦥꦤ ‘‘ꦄꦣꦶꦛ꧀ꦜꦴꦤꦨꦺꦢꦭꦏ꧀ꦑꦟꦺ ꦄꦮꦸꦠ꧀ꦠꦠ꧀ꦠꦴ ꦮꦱ꧀ꦱꦶꦏꦱꦴꦛꦶꦏꦴ ꦮꦱ꧀ꦱꦴꦤꦩꦴꦱꦴꦠꦶꦏ꧀ꦏꦩꦺꦥꦶ, ꦏꦟ꧀ꦝꦸꦥ꧀ꦥꦛꦶꦕ꧀ꦖꦴꦢꦶ ꦄꦴꦧꦴꦣꦺ ꦮꦹꦥꦱꦤ꧀ꦠꦺꦥꦶ ꦄꦣꦶꦛ꧀ꦜꦴꦤꦁ ꦤ ꦮꦶꦗꦲꦠꦶ, ꦠꦱ꧀ꦩꦴ ‘ꦠꦠꦺꦴ ꦥꦫꦁ ꦥꦕ꧀ꦕꦸꦢ꧀ꦣꦫꦶꦠ꧀ꦮꦴ ꦮꦶꦏꦥ꧀ꦥꦺꦠꦧ꧀ꦧꦴ’ꦠꦶ ꦆꦢꦁ ꦮꦸꦠ꧀ꦠ’’ꦤ꧀ꦠꦶ ꦮꦢꦤ꧀ꦠꦶ, ꦠꦁ ꦩꦴꦠꦶꦏꦴꦛ꧀ꦜꦏꦡꦴꦪ ꦤ ꦱꦩꦺꦠꦶ, ꦱꦩꦤ꧀ꦠꦥꦴꦱꦴꦢꦶꦏꦴꦪ ꦥꦤ ꦱꦩꦺꦠꦶ. ꦠꦡꦴ ꦲꦶ ‘‘ꦮꦱ꧀ꦱꦶꦏꦱꦴꦛꦶꦏꦴ ꦮꦱ꧀ꦱꦴꦤꦩꦴꦱꦴꦠꦶꦏ꧀ꦏꦩꦺꦤꦥꦶ, ꦏꦟ꧀ꦝꦸꦥ꧀ꦥꦛꦶꦕ꧀ꦖꦴꦢꦶ ꦄꦴꦧꦴꦣꦮꦹꦥꦱꦩꦺꦤꦥꦶ ꦄꦣꦶꦛ꧀ꦜꦴꦤꦁ ꦮꦶꦗꦲꦠꦷ’’ꦠꦶ ꦆꦢꦁ ꦱꦩꦤ꧀ꦠꦥꦴꦱꦴꦢꦶꦏꦴꦪꦁ ꦤꦠ꧀ꦡꦶ, ꦥꦫꦶꦮꦴꦫꦛ꧀ꦜꦏꦡꦴꦪꦚ꧀ꦕ ‘‘ꦄꦠ꧀ꦡꦴꦥꦠ꧀ꦠꦶ ꦲꦺꦩꦤ꧀ꦠꦺ ꦄꦴꦥꦗ꧀ꦗꦠꦶ, ꦤꦺꦴ ꦒꦶꦩ꧀ꦲꦺ’’ꦠꦶ ꦌꦠ꧀ꦡ ꦆꦢꦁ ꦮꦸꦠ꧀ꦠꦁ ‘‘ꦏꦠ꧀ꦠꦶꦏꦥꦸꦟ꧀ꦟꦩꦴꦱꦶꦪꦴ ꦥꦕ꧀ꦖꦶꦩꦺ ꦥꦴꦛꦶꦥꦢꦢꦶꦮꦱꦺ ꦮꦶꦏꦥ꧀ꦥꦺꦠ꧀ꦮꦴ ꦜꦥꦶꦠꦁ ꦮꦱ꧀ꦱꦶꦏꦱꦴꦛꦶꦏꦁ ꦤꦶꦮꦴꦱꦺꦤ꧀ꦠꦺꦴ ꦲꦺꦩꦤ꧀ꦠꦺ ꦄꦴꦥꦗ꧀ꦗꦠꦶ. ꦏꦸꦫꦸꦤ꧀ꦢꦶꦪꦁ ꦥꦤ ‘ꦏꦠ꧀ꦠꦶꦏꦥꦸꦟ꧀ꦟꦩꦢꦶꦮꦱꦺ ꦄꦥꦕ꧀ꦕꦸꦢ꧀ꦣꦫꦶꦠ꧀ꦮꦴ ꦲꦺꦩꦤ꧀ꦠꦺ ꦄꦴꦥꦗ꧀ꦗꦠꦷ’ꦠꦶ ꦮꦸꦠ꧀ꦠꦁ, ꦠꦩ꧀ꦥꦶ ꦱꦸꦮꦸꦠ꧀ꦠꦁ. ꦕꦴꦠꦸꦩꦴꦱꦁ ꦄꦣꦶꦛ꧀ꦜꦴꦠꦸꦁ, ꦠꦠꦺꦴ ꦥꦫꦁ ꦮꦶꦏꦥ꧀ꦥꦺꦠꦸꦤ꧀ꦠꦶ ꦲꦶ ꦮꦸꦠ꧀ꦠ’’ꦤ꧀ꦠꦶ (ꦥꦫꦶ. ꦄꦛ꧀ꦜ. ꧓꧒꧓).

ꦠꦠ꧀ꦡ ꦩꦲꦴꦄꦛ꧀ꦜꦏꦡꦴꦪꦁ ꦤꦶꦮꦴꦱꦤꦥꦕ꧀ꦕꦪꦴ ꦢꦸꦏ꧀ꦏꦛꦁ ꦮꦸꦠ꧀ꦠꦁ, ꦏꦸꦫꦸꦤ꧀ꦢꦛ꧀ꦜꦏꦡꦴꦪꦁ ꦥꦤ ꦄꦥꦕ꧀ꦕꦸꦢ꧀ꦣꦴꦫꦥꦕ꧀ꦕꦪꦴ. ꦠꦱ꧀ꦩꦴ ꦏꦸꦫꦸꦤ꧀ꦢꦶꦪꦁ ꦮꦸꦠ꧀ꦠꦤꦪꦺꦤꦺꦮ ꦮꦱ꧀ꦱꦶꦏꦱꦴꦛꦶꦏꦴ ꦮꦱ꧀ꦱꦴꦤꦩꦴꦱꦴꦠꦶꦏ꧀ꦏꦩꦺꦥꦶ ꦄꦣꦶꦛ꧀ꦜꦴꦤꦁ ꦤ ꦮꦶꦗꦲꦠꦷꦠꦶ ꦥꦚ꧀ꦚꦴꦪꦠꦶ. ꦏꦸꦫꦸꦤ꧀ꦢꦶꦪꦚ꧀ꦲꦶ ‘‘ꦮꦱ꧀ꦱꦴꦤꦁ ꦕꦴꦠꦸꦩꦴꦱꦁ ꦄꦣꦶꦛ꧀ꦜꦴꦠꦸꦁ, ꦠꦠꦺꦴ ꦥꦫꦁ ꦮꦶꦏꦥ꧀ꦥꦺꦠꦸ’’ꦤ꧀ꦠꦶ ꦮꦕꦤꦠꦺꦴ ꦪꦢꦶ ꦏꦠ꧀ꦠꦶꦏꦥꦸꦟ꧀ꦟꦩꦴꦪꦁ ꦤ ꦥꦕ꧀ꦕꦸꦢ꧀ꦣꦫꦺꦪ꧀ꦪ, ꦄꦮꦶꦗꦲꦶꦠꦴꦣꦶꦛ꧀ꦜꦴꦤꦴ ꦮꦱ꧀ꦱꦶꦏꦱꦴꦛꦶꦏꦴ ꦲꦺꦩꦤ꧀ꦠꦁ ꦱꦩ꧀ꦥꦠ꧀ꦠꦴ ꦮꦶꦏꦥ꧀ꦥꦤꦏ꧀ꦑꦺꦠ꧀ꦠꦺ ꦄꦣꦶꦛ꧀ꦜꦴꦤꦱꦧ꧀ꦨꦴꦮꦠꦺꦴ ꦢꦸꦏ꧀ꦏꦛꦁ ꦗꦤꦺꦠꦶ, ꦠꦱ꧀ꦩꦴ ꦏꦠ꧀ꦠꦶꦏꦥꦸꦟ꧀ꦟꦩꦴꦪꦁ ꦌꦮ ꦥꦕ꧀ꦕꦸꦢ꧀ꦣꦫꦶꦠ꧀ꦮꦴ ꦲꦺꦩꦤ꧀ꦠꦺ ꦮꦶꦏꦥ꧀ꦥꦺꦠꦧ꧀ꦧꦴꦠꦶ ꦆꦩꦶꦤꦴ ꦄꦣꦶꦥ꧀ꦥꦴꦪꦺꦤ ‘‘ꦏꦠ꧀ꦠꦶꦏꦥꦸꦟ꧀ꦟꦩꦢꦶꦮꦱꦺ ꦄꦥꦕ꧀ꦕꦸꦢ꧀ꦣꦫꦶꦠ꧀ꦮꦴ ꦲꦺꦩꦤ꧀ꦠꦺ ꦄꦴꦥꦗ꧀ꦗꦠꦷ’’ꦠꦶ ꦮꦸꦠ꧀ꦠꦁ, ꦠꦱ꧀ꦩꦴ ꦮꦷꦩꦁꦱꦶꦠ꧀ꦮꦴ ꦪꦸꦠ꧀ꦠꦠꦫꦁ ꦒꦲꦺꦠꦧ꧀ꦧꦁ.

ꦤꦲꦴꦤꦠ꧀ꦡꦴꦪ ꦄꦤꦸꦚ꧀ꦚꦴꦠꦠ꧀ꦠꦴ ‘‘ꦮꦟ꧀ꦟꦨꦺꦢꦩꦠ꧀ꦠꦫꦠ꧀ꦠꦴꦥꦶ ꦕꦺꦱꦴ ꦮꦛ꧀ꦛꦠꦷ’’ꦠꦶ ꦮꦸꦠ꧀ꦠꦁ. ꦢ꧀ꦮꦺ ꦥꦤ ꦤ ꦮꦛ꧀ꦛꦤ꧀ꦠꦷꦠꦶ ꦢ꧀ꦮꦶꦤ꧀ꦤꦁ ꦄꦣꦶꦛ꧀ꦜꦴꦤꦴꦨꦴꦮꦠꦺꦴ ꦮꦸꦠ꧀ꦠꦁ. ‘‘ꦱꦕꦺ ꦮꦱ꧀ꦱꦴꦤꦺ ꦄꦥꦫꦴ ꦮꦱ꧀ꦱꦶꦏꦱꦴꦛꦶꦏꦴ ꦈꦥ꧀ꦥꦤ꧀ꦤꦴ ꦲꦺꦴꦠꦶ, ꦥꦸꦫꦶꦩꦮꦱ꧀ꦱꦶꦏꦱꦴꦛꦶꦏꦁ ꦥꦕ꧀ꦕꦸꦢ꧀ꦣꦫꦶꦠ꧀ꦮꦴ ꦮꦶꦏꦥ꧀ꦥꦺꦠ꧀ꦮꦴ ꦕ ꦄꦣꦶꦛ꧀ꦜꦴꦠꦧ꧀ꦧꦴ’’ꦠꦶ ꦮꦢꦤ꧀ꦠꦶ. ꦥꦩꦴꦟꦪꦸꦠ꧀ꦠꦤ꧀ꦠꦶ ꦢꦷꦓꦱꦺꦴ ꦱꦸꦒꦠꦮꦶꦢꦠ꧀ꦡꦶꦪꦴ ꦢ꧀ꦮꦺ ꦮꦶꦢꦠ꧀ꦡꦶꦪꦺꦴ, ꦮꦶꦠ꧀ꦡꦴꦫꦠꦺꦴ ꦢꦶꦪꦝ꧀ꦞꦴ, ꦢꦱꦴ ꦮꦶꦢꦠ꧀ꦡꦷꦠꦶ ꦆꦩꦶꦤꦴ ꦥꦩꦴꦟꦺꦤ ꦪꦸꦠ꧀ꦠꦁ. ꦥꦩꦴꦟꦶꦏꦴꦠꦶ ꦱꦸꦒꦠꦮꦶꦢꦠ꧀ꦡꦶꦪꦴ ꦢꦷꦓꦱꦺꦴ ꦕꦠꦱ꧀ꦱꦺꦴ ꦮꦶꦢꦠ꧀ꦡꦶꦪꦺꦴ, ꦠꦶꦫꦶꦪꦁ ꦢ꧀ꦮꦺ ꦮꦶꦢꦠ꧀ꦡꦶꦪꦺꦴꦠꦶ ꦌꦮꦁ ꦮꦸꦠ꧀ꦠꦥ꧀ꦥꦩꦴꦟꦪꦸꦠ꧀ꦠꦴ. ꦥꦕ꧀ꦕꦸꦢ꧀ꦣꦫꦶꦠ꧀ꦮꦴ ꦮꦶꦏꦥ꧀ꦥꦺꦠꦧ꧀ꦧꦴꦠꦶ ꦌꦠ꧀ꦡ ꦪꦁ ꦮꦠ꧀ꦠꦧ꧀ꦧꦁ, ꦠꦁ ꦲꦺꦛ꧀ꦜꦴ ꦮꦸꦠ꧀ꦠꦩꦺꦮ. ‘‘ꦱꦏꦶꦁ ꦄꦣꦶꦛ꧀ꦜꦶꦠꦁ ꦄꦣꦶꦛ꧀ꦜꦶꦠꦩꦺꦮ ꦲꦺꦴꦠꦶ, ꦥꦸꦤ ꦤ ꦥꦕ꧀ꦕꦸꦢ꧀ꦣꦫꦷꦪꦠꦶ ꦏꦴꦭꦥꦫꦶꦕ꧀ꦖꦺꦢꦴꦨꦴꦮꦠꦺꦴ’’ꦠꦶ ꦮꦢꦤ꧀ꦠꦶ. ꦄꦥꦫꦺ ꦥꦤ ‘‘ꦌꦏꦮꦕꦤꦺꦤꦥꦶ ꦮꦛ꧀ꦛꦠꦷꦠꦶ ꦢꦱ꧀ꦱꦤꦠ꧀ꦡꦁ ‘ꦱꦏꦶꦁ ꦄꦣꦶꦛ꧀ꦜꦶꦠꦁ ꦄꦣꦶꦛ꧀ꦜꦶꦠꦩꦺꦮꦴ’ꦠꦶ ꦮꦸꦠ꧀ꦠ’’ꦤ꧀ꦠꦶ ꦮꦢꦤ꧀ꦠꦶ. ꦈꦨꦪꦠ꧀ꦡꦴꦥꦶ ꦄꦱ꧀ꦱ ꦮꦕꦤꦱ꧀ꦱ ꦆꦣ ꦮꦕꦤꦺ ꦄꦥꦸꦧ꧀ꦧꦁ ꦥꦪꦺꦴꦗꦤꦁ ꦤ ꦢꦶꦱ꧀ꦱꦠꦶ, ꦠꦺꦤꦺꦮ ꦩꦴꦠꦶꦏꦴꦛ꧀ꦜꦏꦡꦴꦪꦁ ꦆꦩꦱ꧀ꦩꦶꦁ ꦜꦴꦤꦺ ‘‘ꦱꦏꦶꦁ ꦄꦣꦶꦛ꧀ꦜꦶꦠꦁ ꦄꦣꦶꦛ꧀ꦜꦶꦠꦩꦺꦮ ꦲꦺꦴꦠꦷ’’ꦠꦶ ꦆꦢꦁ ꦥꦢꦁ ꦤ ꦮꦸꦠ꧀ꦠꦁ.

‘‘ꦄꦠ꧀ꦠꦤꦺꦴ ꦱꦤ꧀ꦠꦏꦨꦴꦮꦠꦺꦴ ꦩꦺꦴꦕꦺꦠ꧀ꦮꦴ ꦜꦥꦶꦠꦁ ꦱꦤ꧀ꦣꦴꦪ ꦩꦲꦴꦥꦕ꧀ꦕꦫꦶꦪꦁ ꦄꦤꦴꦥꦠ꧀ꦠꦶ ꦮꦸꦠ꧀ꦠꦴ’’ꦠꦶ ꦮꦢꦤ꧀ꦠꦶ. ꦆꦩꦶꦤꦴ ꦨꦺꦱꦗ꧀ꦗꦁ ꦕꦺꦠꦴꦥꦺꦱ꧀ꦱꦴꦩꦶ, ꦆꦢꦁ ꦩꦴꦠꦸꦪꦴ ꦢꦱ꧀ꦱꦴꦩꦷꦠꦶ ꦜꦥꦺꦤ꧀ꦠꦺꦤ ꦄꦣꦶꦛ꧀ꦜꦴꦠꦧ꧀ꦧꦁ, ꦆꦢꦁ ꦨꦺꦱꦗ꧀ꦗꦱ꧀ꦱ, ꦆꦢꦁ ꦩꦴꦠꦸꦪꦴꦠꦶ ꦮꦶꦱ꧀ꦱꦗ꧀ꦗꦺꦠ꧀ꦮꦴ ꦱꦏꦱꦤ꧀ꦠꦏꦨꦴꦮꦠꦺꦴ ꦩꦺꦴꦕꦶꦠꦺ ꦄꦣꦶꦛ꧀ꦜꦴꦤꦏꦶꦕ꧀ꦕꦁ ꦤꦠ꧀ꦡꦷꦠꦶ ꦄꦣꦶꦥ꧀ꦥꦴꦪꦺꦴ. ꦱꦺꦤꦴꦱꦤꦥꦫꦶꦏ꧀ꦑꦴꦫꦠ꧀ꦡꦴꦪ ꦢꦶꦤ꧀ꦤꦥꦕ꧀ꦕꦠ꧀ꦡꦫꦟꦺꦠꦶ ꦌꦠ꧀ꦡ ‘‘ꦄꦤꦶꦮꦴꦱꦺꦠ꧀ꦮꦴ ꦄꦥꦴꦫꦸꦥꦶꦠ꧀ꦮꦴ ꦕ ꦏꦺꦮꦭꦁ ꦩꦚ꧀ꦕꦥꦷꦜꦺꦱꦸꦪꦺꦮ ꦄꦠ꧀ꦡꦫꦶꦠ꧀ꦮꦴ ꦥꦫꦶꦨꦸꦚ꧀ꦗꦶꦪꦩꦴꦤꦁ ꦥꦕ꧀ꦕꦠ꧀ꦡꦫꦟꦁ ꦄꦠ꧀ꦠꦤꦺꦴ ꦱꦤ꧀ꦠꦏꦩ꧀ꦥꦶ ꦄꦤꦣꦶꦛ꧀ꦜꦴꦠꦸꦁ ꦮꦛ꧀ꦛꦠꦷ’’ꦠꦶ ꦮꦢꦤ꧀ꦠꦶ. ꦲꦺꦛ꧀ꦜꦴ ꦥꦤ ‘‘ꦥꦕ꧀ꦕꦠ꧀ꦡꦫꦟꦩ꧀ꦥꦶ ꦄꦣꦶꦛ꧀ꦜꦴꦠꦧ꧀ꦧꦩꦺꦮꦴ’’ꦠꦶ ꦄꦮꦶꦱꦺꦱꦺꦤ ꦮꦸꦠ꧀ꦠꦠ꧀ꦠꦴ ꦄꦠ꧀ꦠꦤꦺꦴ ꦱꦤ꧀ꦠꦏꦁ ꦄꦣꦶꦛ꧀ꦜꦴꦠꦧ꧀ꦧꦩꦺꦮꦴꦠꦶ ꦄꦩ꧀ꦲꦴꦏꦁ ꦑꦤ꧀ꦠꦶ, ꦮꦷꦩꦁꦱꦶꦠ꧀ꦮꦴ ꦒꦲꦺꦠꦧ꧀ꦧꦁ.

‘‘ꦲꦷꦤꦴꦪꦴꦮꦠ꧀ꦠꦤꦺꦤꦴꦠꦶ ꦱꦶꦏ꧀ꦑꦁ ꦄꦥ꧀ꦥꦕ꧀ꦕꦏ꧀ꦑꦴꦪ ꦒꦶꦲꦶꦨꦴꦮꦹꦥꦒꦩꦤꦺꦤꦴ’’ꦠꦶ ꦠꦷꦱꦸꦥꦶ ꦒꦟ꧀ꦜꦶꦥꦢꦺꦱꦸ ꦮꦸꦠ꧀ꦠꦁ, ꦠꦁ ꦪꦸꦠ꧀ꦠꦁ ꦄꦚ꧀ꦚꦱ꧀ꦱ ꦢꦴꦤꦺ ꦮꦶꦪ ꦕꦷꦮꦫꦺ ꦤꦶꦫꦴꦭꦪꦨꦴꦮꦺꦤꦺꦮ ꦥꦫꦶꦕ꧀ꦕꦠ꧀ꦠꦠ꧀ꦠꦴ. ꦏꦺꦕꦶ ꦥꦤ ‘‘ꦲꦷꦤꦴꦪꦴꦮꦠ꧀ꦠꦤꦺꦤꦴꦠꦶ ꦨꦶꦏ꧀ꦑꦸꦤꦶꦪꦴ ꦒꦶꦲꦶꦨꦴꦮꦹꦥꦒꦩꦤꦺꦤꦴ’’ꦠꦶ ꦌꦮꦩꦠ꧀ꦡꦁ ꦒꦲꦺꦠ꧀ꦮꦴ ‘‘ꦨꦶꦏ꧀ꦑꦸ ꦥꦤ ꦮꦶꦧ꧀ꦨꦩꦤ꧀ꦠꦺꦴꦥꦶ ꦪꦴꦮ ꦱꦶꦏ꧀ꦑꦁ ꦤ ꦥꦕ꧀ꦕꦏ꧀ꦑꦴꦠꦶ, ꦠꦴꦮ ꦨꦶꦏ꧀ꦑꦸꦪꦺꦮꦴꦠꦶ ꦄꦣꦶꦛ꧀ꦜꦴꦤꦁ ꦤ ꦮꦶꦗꦲꦠꦷ’’ꦠꦶ ꦮꦢꦤ꧀ꦠꦶ, ꦠꦁ ꦤ ꦒꦲꦺꦠꦧ꧀ꦧꦁ ‘‘ꦨꦶꦏ꧀ꦑꦸꦤꦶꦪꦴ ꦲꦷꦤꦴꦪꦴꦮꦠ꧀ꦠꦤꦺꦤꦴ’’ꦠꦶ ꦮꦶꦱꦺꦱꦺꦠ꧀ꦮꦴ ꦄꦮꦸꦠ꧀ꦠꦠ꧀ꦠꦴ. ꦨꦶꦏ꧀ꦑꦸꦤꦶꦪꦴ ꦲꦶ ꦒꦶꦲꦶꦨꦴꦮꦹꦥꦒꦩꦤꦺ ꦄꦣꦶꦛ꧀ꦜꦴꦤꦮꦶꦗꦲꦤꦁ ꦮꦶꦱꦸꦁ ꦮꦠ꧀ꦠꦧ꧀ꦧꦁ ꦤꦠ꧀ꦡꦶ ꦠꦱ꧀ꦱꦴ ꦮꦶꦧ꧀ꦨꦩꦤꦺꦤꦺꦮ ꦄꦱ꧀ꦱꦩꦟꦷꦨꦴꦮꦠꦺꦴ. ꦱꦶꦏ꧀ꦑꦴꦥꦕ꧀ꦕꦏ꧀ꦑꦴꦤꦺꦤꦴꦠꦶ ꦥꦤ ꦆꦢꦁ ꦱꦕꦺ ꦨꦶꦏ꧀ꦑꦸꦭꦶꦔ꧀ꦒꦺ ꦜꦶꦠꦺꦴꦮ ꦱꦶꦏ꧀ꦑꦁ ꦥꦕ꧀ꦕꦏ꧀ꦑꦴꦠꦶ, ꦠꦱ꧀ꦱ ꦏꦴꦪꦭꦒ꧀ꦒꦩ꧀ꦥꦶ ꦕꦷꦮꦫꦁ ꦄꦣꦶꦛ꧀ꦜꦴꦤꦁ ꦮꦶꦗꦲꦠꦷꦠꦶ ꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦁ. ꦏꦤꦶꦛ꧀ꦜꦔ꧀ꦒꦸꦭꦶꦤꦑꦮꦱꦺꦤꦴꦠꦶ ꦲꦺꦛ꧀ꦜꦶꦩꦥꦫꦶꦕ꧀ꦖꦺꦢꦁ ꦢꦱ꧀ꦱꦺꦠꦶ. ꦥꦩꦴꦟꦕꦷꦮꦫꦱ꧀ꦱꦴꦠꦶ ꦥꦕ꧀ꦖꦶꦩꦥ꧀ꦥꦩꦴꦟꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦢ꧀ꦮꦺ ꦕꦷꦮꦫꦴꦤꦶ ꦥꦴꦫꦸꦥꦤ꧀ꦠꦱ꧀ꦱꦴꦠꦶ ꦄꦤ꧀ꦠꦫꦓꦫꦥ꧀ꦥꦮꦺꦱꦤꦠ꧀ꦡꦴꦪ ꦱꦸꦥ꧀ꦥꦛꦶꦕ꧀ꦖꦤ꧀ꦤꦱꦶꦏ꧀ꦑꦴꦥꦢꦺ ꦮꦸꦠ꧀ꦠꦤꦪꦺꦤ ꦱꦔ꧀ꦓꦴꦛꦶꦁ ꦈꦠ꧀ꦠꦫꦴꦱꦔ꧀ꦒꦚ꧀ꦕ ꦌꦏꦠꦺꦴ ꦏꦠ꧀ꦮꦴ ꦥꦴꦫꦸꦥꦤ꧀ꦠꦱ꧀ꦱ. ꦱꦔ꧀ꦓꦫꦶꦠꦛ꧀ꦜꦴꦤꦺꦠꦶ ꦢ꧀ꦮꦷꦱꦸꦥꦶ ꦄꦤ꧀ꦠꦺꦱꦸ ꦱꦔ꧀ꦓꦫꦶꦠꦛ꧀ꦜꦴꦤꦺ. ꦌꦱ ꦤꦪꦺꦴꦠꦶ ꦆꦩꦶꦤꦴ ꦥꦩꦴꦟꦪꦸꦠ꧀ꦠꦺꦱꦸ ꦪꦠ꧀ꦡ ꦏꦠ꧀ꦡꦕꦶ ꦖꦶꦢ꧀ꦢꦁ ꦄꦣꦶꦛ꧀ꦜꦴꦤꦁ ꦮꦶꦗꦲꦠꦶ, ꦩꦲꦤ꧀ꦠꦺꦱꦸ ꦥꦤ ꦠꦠꦺꦴ ꦥꦫꦺꦤ ꦖꦶꦢ꧀ꦢꦁ ꦄꦣꦶꦛ꧀ꦜꦴꦤꦁ ꦤ ꦮꦶꦗꦲꦠꦷꦠꦶ ꦄꦪꦩꦠ꧀ꦡꦺꦴ ꦢꦱ꧀ꦱꦶꦠꦺꦴ. ꦱꦧ꧀ꦧꦺꦱꦹꦠꦶ ꦠꦶꦕꦷꦮꦫꦴꦢꦶꦨꦺꦢꦺꦱꦸ ꦱꦧ꧀ꦧꦕꦷꦮꦫꦺꦱꦸ.

ꦄꦚ꧀ꦚꦁ ꦥꦕ꧀ꦖꦶꦩꦥ꧀ꦥꦩꦴꦟꦁ ꦤꦴꦩ ꦤꦠ꧀ꦡꦷꦠꦶ ꦱꦸꦠ꧀ꦠꦺ ꦄꦴꦒꦠꦁ ꦤꦠ꧀ꦡꦷꦠꦶ ꦄꦣꦶꦥ꧀ꦥꦴꦪꦺꦴ. ꦆꦢꦴꦤꦶ ꦠꦩꦺꦮ ꦮꦶꦨꦴꦮꦺꦠꦸꦁ ‘‘ꦪꦚ꧀ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ‘‘ꦠꦁ ꦄꦠꦶꦏ꧀ꦏꦩꦪꦠꦺꦴ ꦖꦺꦢꦤꦏꦁ ꦥꦴꦕꦶꦠ꧀ꦠꦶꦪ’’ꦤ꧀ꦠꦶ ꦮꦸꦠ꧀ꦠꦠ꧀ꦠꦴ ꦄꦴꦲ ‘‘ꦠꦠꦺꦴ ꦈꦠ꧀ꦠꦫꦶ ꦥꦛꦶꦱꦶꦢ꧀ꦣꦠ꧀ꦠꦴ’’ꦠꦶ. ꦠꦁ ꦤ ꦱꦩꦺꦠꦷꦠꦶ ꦥꦫꦶꦏ꧀ꦑꦴꦫꦕꦺꦴꦭ꦳ꦱ꧀ꦱ ꦮꦶꦏꦥ꧀ꦥꦤꦸꦥꦒꦥꦕ꧀ꦖꦶꦩꦁ ꦥꦕ꧀ꦖꦶꦩꦥ꧀ꦥꦩꦴꦟꦤ꧀ꦠꦶ ꦒꦲꦺꦠ꧀ꦮꦴ ꦆꦠꦫꦺꦱꦁ ꦠꦶꦕꦷꦮꦫꦴꦢꦷꦤꦁ ꦩꦸꦛ꧀ꦜꦶꦥꦚ꧀ꦕꦏꦴꦢꦶꦨꦺꦢꦁ ꦥꦕ꧀ꦖꦶꦩꦥ꧀ꦥꦩꦴꦟꦁ ꦱꦤ꧀ꦣꦴꦪ ‘‘ꦌꦱ ꦤꦪꦺꦴ’’ꦠꦶꦄꦴꦢꦶꦮꦕꦤꦁ ꦤ ꦱꦩꦺꦠꦶ ꦠꦴꦢꦶꦱꦱ꧀ꦱ ꦥꦕ꧀ꦖꦶꦩꦥ꧀ꦥꦩꦴꦟꦱ꧀ꦱ ꦱꦸꦠ꧀ꦠꦺ ꦄꦨꦴꦮꦠꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦄꦤ꧀ꦣꦏꦛ꧀ꦜꦏꦡꦴꦪꦁ ꦮꦸꦠ꧀ꦠꦮꦕꦤꦁ ꦤ ꦱꦩꦺꦠꦷꦠꦶ ꦆꦩꦶꦤꦴꦮ ꦥꦛꦶꦏ꧀ꦑꦺꦥꦺꦤ ꦮꦶꦏꦥ꧀ꦥꦤꦸꦥꦒꦥꦕ꧀ꦖꦶꦩꦱ꧀ꦱ ꦄꦤ꧀ꦠꦺꦴ ꦪꦠ꧀ꦡ ꦏꦠ꧀ꦡꦕꦶ ꦖꦶꦢ꧀ꦢꦁ ꦄꦣꦶꦛ꧀ꦜꦴꦤꦁ ꦮꦶꦗꦲꦠꦷꦠꦶ ꦄꦪꦩ꧀ꦥꦶ ꦤꦪꦺꦴ ꦥꦛꦶꦏ꧀ꦑꦶꦠ꧀ꦠꦺꦴꦪꦺꦮꦴꦠꦶ ꦢꦛ꧀ꦜꦧ꧀ꦧꦁ. ꦠꦶꦕꦷꦮꦫꦚ꧀ꦲꦶ ꦜꦥꦺꦠ꧀ꦮꦴ ꦱꦺꦱꦕꦷꦮꦫꦺꦱꦸ ꦖꦶꦢ꧀ꦢꦺꦤ ꦄꦣꦶꦛ꧀ꦜꦴꦤꦮꦶꦗꦲꦤꦁ ꦤꦴꦩ ꦤꦠ꧀ꦡꦶ, ꦠꦱ꧀ꦩꦴ ꦄꦣꦶꦛ꧀ꦜꦲꦶꦠ꧀ꦮꦴ ꦜꦥꦶꦠꦺꦱꦸ ꦱꦺꦱꦕꦷꦮꦫꦺꦱꦸ ꦮꦶꦏꦥ꧀ꦥꦤꦸꦥꦒꦥꦕ꧀ꦖꦶꦩꦁ ꦄꦥ꧀ꦥꦲꦺꦴꦤ꧀ꦠꦁ ꦏꦠ꧀ꦮꦴ ꦑꦟ꧀ꦝꦴꦑꦟ꧀ꦝꦶꦏꦁ ꦖꦶꦤ꧀ꦤꦺꦱꦸꦥꦶ ꦄꦣꦶꦛ꧀ꦜꦴꦤꦮꦶꦗꦲꦤꦁ ꦤꦠ꧀ꦡꦶ. ꦱꦕꦺ ꦥꦤ ꦄꦣꦶꦛ꧀ꦜꦴꦤꦠꦺꦴ ꦥꦸꦧ꧀ꦧꦺꦪꦺꦮ ꦠꦴꦢꦶꦱꦁ ꦲꦺꦴꦠꦶ, ꦄꦕꦷꦮꦫꦠ꧀ꦠꦴ ꦄꦣꦶꦛ꧀ꦜꦴꦤꦏꦶꦕ꧀ꦕꦁ ꦤꦠ꧀ꦡꦶ. ꦑꦸꦢ꧀ꦢꦏꦁ ꦕꦷꦮꦫꦤ꧀ꦠꦶ ꦩꦸꦛ꧀ꦜꦶꦥꦚ꧀ꦕꦏꦴꦢꦶꦨꦺꦢꦥ꧀ꦥꦩꦴꦟꦠꦺꦴ ꦄꦤꦹꦤꦩꦺꦮ ꦑꦸꦢ꧀ꦢꦏꦕꦷꦮꦫꦁ. ꦩꦲꦤ꧀ꦠꦁ ꦮꦴ ꦑꦸꦢ꧀ꦢꦏꦁ ꦏꦫꦺꦴꦠꦷꦠꦶ ꦌꦠ꧀ꦡ ꦠꦶꦟ꧀ꦟꦁ ꦕꦷꦮꦫꦴꦤꦁ ꦕꦠꦹꦱꦸ ꦥꦱ꧀ꦱꦺꦱꦸ ꦪꦱ꧀ꦩꦶꦁ ꦥꦢꦺꦱꦺ ꦖꦶꦢ꧀ꦢꦁ ꦄꦣꦶꦛ꧀ꦜꦴꦤꦁ ꦤ ꦮꦶꦗꦲꦠꦶ, ꦠꦱ꧀ꦩꦶꦁ ꦥꦢꦺꦱꦺ ꦱꦩꦤ꧀ꦠꦠꦺꦴ ꦖꦶꦤ꧀ꦢꦶꦠ꧀ꦮꦴ ꦑꦸꦢ꧀ꦢꦏꦁ ꦏꦫꦺꦴꦤ꧀ꦠꦱ꧀ꦱ ꦄꦣꦶꦛ꧀ꦜꦴꦤꦁ ꦤ ꦮꦶꦗꦲꦠꦷꦠꦶ ꦄꦣꦶꦥ꧀ꦥꦴꦪꦺꦴ.

ꦱꦩ꧀ꦩꦸꦑꦴꦮꦶꦏꦥ꧀ꦥꦤꦴ ꦥꦫꦩ꧀ꦩꦸꦑꦴꦮꦶꦏꦥ꧀ꦥꦤꦴꦠꦶ ꦌꦠ꧀ꦡ ꦱꦩ꧀ꦩꦸꦑꦺꦤ ꦮꦶꦏꦥ꧀ꦥꦤꦴ ꦥꦫꦩ꧀ꦩꦸꦑꦺꦤ ꦮꦶꦏꦥ꧀ꦥꦤꦴꦠꦶ ꦌꦮꦩꦠ꧀ꦡꦺꦴ ꦒꦲꦺꦠꦧ꧀ꦧꦺꦴ. ꦱꦤ꧀ꦤꦶꦲꦶꦠꦴꦱꦤ꧀ꦤꦶꦲꦶꦠꦨꦴꦮꦤ꧀ꦠꦶ ꦄꦴꦱꦤ꧀ꦤꦢꦹꦫꦨꦴꦮꦁ. ꦄꦴꦱꦤ꧀ꦤꦢꦹꦫꦨꦴꦮꦺꦴ ꦕ ꦄꦣꦶꦛ꧀ꦜꦴꦤꦺ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦺꦴ. ꦥꦫꦶꦨꦺꦴꦒꦴꦢꦪꦺꦴꦥꦶ ꦮꦛ꧀ꦛꦤ꧀ꦠꦷꦠꦶ ꦌꦠ꧀ꦡ ꦄꦣꦶꦛ꧀ꦜꦴꦤꦱ꧀ꦱꦥꦶ ꦄꦤ꧀ꦠꦺꦴꦒꦣꦠ꧀ꦠꦴ ꦱꦕꦺ ꦱꦔ꧀ꦓꦴꦛꦶꦄꦴꦢꦶꦤꦴꦩꦺꦤ ꦄꦣꦶꦛ꧀ꦜꦲꦶꦠ꧀ꦮꦴ ꦥꦫꦶꦨꦸꦚ꧀ꦗꦶꦠꦸꦏꦴꦩꦺꦴ ꦲꦺꦴꦠꦶ, ꦄꦣꦶꦛ꧀ꦜꦴꦤꦁ ꦏꦴꦠꦧ꧀ꦧꦁ. ꦤꦺꦴ ꦕꦺ, ꦤ ꦏꦴꦠꦧ꧀ꦧꦁ, ꦮꦶꦏꦥ꧀ꦥꦤꦩꦺꦮ ꦥꦩꦴꦟꦁ, ꦠꦱ꧀ꦩꦴ ꦄꦠꦶꦫꦺꦏꦕꦷꦮꦫꦁ ꦤꦴꦩ ꦤ ꦲꦺꦴꦠꦶ. ꦩꦶꦠ꧀ꦠꦺꦴꦠꦶ ꦢꦭ꦳꧀ꦲꦩꦶꦠ꧀ꦠꦺꦴ. ꦱꦤ꧀ꦢꦶꦛ꧀ꦜꦺꦴꦠꦶ ꦢꦶꦛ꧀ꦜꦩꦶꦠ꧀ꦠꦺꦴ ꦤꦴꦠꦶꦢꦭ꦳꧀ꦲꦩꦶꦠ꧀ꦠꦺꦴ. ꦮꦶꦏꦥ꧀ꦥꦶꦠꦮꦶꦏꦥ꧀ꦥꦤꦴ ꦤꦴꦩꦺꦱꦴ ꦮꦛ꧀ꦛꦠꦷꦠꦶ ꦄꦣꦶꦛ꧀ꦜꦶꦠꦄꦣꦶꦛ꧀ꦜꦴꦤꦁ ꦮꦶꦪꦴꦠꦶ ꦄꦣꦶꦥ꧀ꦥꦴꦪꦺꦴ ꦄꦮꦶꦱꦺꦱꦺꦤ ꦮꦸꦠ꧀ꦠꦮꦕꦤꦤ꧀ꦠꦶ ꦠꦶꦕꦷꦮꦫꦴꦢꦶꦁ ꦄꦣꦶꦛ꧀ꦜꦺꦠꦶ, ꦮꦱ꧀ꦱꦶꦏꦱꦴꦛꦶꦏꦁ ꦏꦟ꧀ꦝꦸꦥ꧀ꦥꦛꦶꦕ꧀ꦖꦴꦢꦶꦚ꧀ꦕ ꦮꦶꦏꦥ꧀ꦥꦺꦠꦷꦠꦶ ꦄꦮꦠ꧀ꦮꦴ ꦱꦧ꧀ꦧꦕꦷꦮꦫꦴꦤꦁ ꦄꦮꦶꦱꦺꦱꦺꦤ ꦮꦶꦏꦥ꧀ꦥꦺꦠꦷꦠꦶ ꦮꦸꦠ꧀ꦠꦮꦕꦤꦁ. ꦠꦶꦕꦷꦮꦫꦱꦔ꧀ꦑꦺꦥꦺꦤꦴꦠꦶ ꦠꦶꦕꦷꦮꦫꦤꦷꦲꦴꦫꦺꦤ, ꦱꦔ꧀ꦓꦴꦛꦶꦄꦴꦢꦶꦄꦣꦶꦛ꧀ꦜꦴꦤꦮꦱꦺꦤꦴꦠꦶ ꦮꦸꦠ꧀ꦠꦁ ꦲꦺꦴꦠꦶ.

ꦠꦸꦪ꧀ꦲꦁ ꦢꦺꦩꦷꦠꦶꦄꦴꦢꦷꦱꦸ ‘‘ꦠꦱ꧀ꦩꦶꦁ ꦏꦴꦭꦺ ꦤ ꦒꦟ꧀ꦲꦶꦠꦸꦏꦴꦩꦺꦴꦥꦶ ꦱꦕꦺ ꦤ ꦥꦛꦶꦏ꧀ꦑꦶꦥꦠꦶ, ꦥꦸꦤ ꦒꦟ꧀ꦲꦶꦠꦸꦏꦴꦩꦠꦴꦪ ꦱꦠꦶ ꦒꦲꦺꦠꦸꦁ ꦮꦛ꧀ꦛꦠꦷ’’ꦠꦶ ꦮꦢꦤ꧀ꦠꦶ. ꦆꦠ꧀ꦡꦤ꧀ꦤꦴꦩꦱ꧀ꦱꦴꦠꦶ ꦥꦫꦩ꧀ꦩꦸꦑꦺ ꦜꦶꦠꦁ ꦱꦤ꧀ꦣꦴꦪ ꦮꦢꦠꦶ. ‘‘ꦠꦸꦪ꧀ꦲꦁ ꦒꦟ꧀ꦲꦴꦲꦷ’’ꦠꦶ ꦮꦸꦠ꧀ꦠꦺ ‘‘ꦩꦪ꧀ꦲꦁ ꦒꦟ꧀ꦲꦴꦩꦷ’’ꦠꦶ ꦮꦢꦠꦶ, ꦱꦸꦢꦶꦤ꧀ꦤꦁ ꦱꦸꦒ꧀ꦒꦲꦶꦠꦚ꧀ꦕꦴꦠꦶ ꦌꦠ꧀ꦡ ‘‘ꦪꦡꦴ ꦥꦫꦠꦺꦴ ‘ꦠꦮ ꦱꦤ꧀ꦠꦏꦁ ꦏꦫꦺꦴꦲꦷ’ꦠꦶ ꦮꦸꦠ꧀ꦠꦺ ꦢꦸꦢ꧀ꦢꦶꦤ꧀ꦤꦩ꧀ꦥꦶ ‘ꦱꦴꦣꦸ, ꦨꦤ꧀ꦠꦺ, ꦩꦪ꧀ꦲꦁ ꦒꦟ꧀ꦲꦴꦩꦷ’ꦠꦶ ꦮꦕꦤꦺꦤ ‘ꦱꦸꦒ꧀ꦒꦲꦶꦠꦁ ꦲꦺꦴꦠꦷ’ꦠꦶ ꦮꦸꦠ꧀ꦠꦁ, ꦌꦮꦩꦶꦣꦴꦥꦶ ‘ꦠꦸꦪ꧀ꦲꦁ ꦒꦟ꧀ꦲꦴꦲꦷ’ꦠꦶ ꦮꦸꦠ꧀ꦠꦺ ꦱꦸꦢꦶꦤ꧀ꦤꦠ꧀ꦠꦴ ‘ꦩꦪ꧀ꦲꦁ ꦒꦟ꧀ꦲꦴꦩꦷ’ꦠꦶ ꦄꦮꦸꦠ꧀ꦠꦺꦥꦶ ‘ꦱꦸꦢꦶꦤ꧀ꦤꦩꦺꦮꦴ’’’ꦠꦶ ꦮꦢꦤ꧀ꦠꦶ. ‘‘ꦒꦟ꧀ꦲꦴꦲꦷꦠꦶ ꦕ ꦄꦴꦟꦠ꧀ꦠꦶꦪꦴ ꦒꦲꦟꦱ꧀ꦱ ꦠꦥ꧀ꦥꦛꦶꦧꦢ꧀ꦣꦠꦴꦏꦫꦟꦮꦱꦺꦤ ꦥꦮꦠ꧀ꦠꦠ꧀ꦠꦴ ꦠꦢꦴ ꦒꦟ꧀ꦲꦴꦩꦷꦠꦶ ꦕꦶꦠ꧀ꦠꦺ ꦄꦤꦸꦥ꧀ꦥꦴꦢꦶꦠꦺ ꦥꦕ꧀ꦖꦴ ꦒꦲꦺꦠꦸꦁ ꦤ ꦭꦨꦠꦷ’’ꦠꦶ ꦮꦢꦤ꧀ꦠꦶ.

ꦠꦁ ꦤ ꦪꦸꦗ꧀ꦗꦠꦷꦠꦶ ꦮꦶꦤꦪꦏꦩ꧀ꦩꦱ꧀ꦱ ꦏꦫꦟꦮꦱꦺꦤ ꦒꦲꦺꦠ꧀ꦮꦴ ꦢꦶꦤ꧀ꦤꦠ꧀ꦠꦴ ꦮꦸꦠ꧀ꦠꦁ. ꦱꦕꦺ ꦥꦤ ꦥꦫꦺꦴ ꦱꦕ꧀ꦕꦠꦺꦴꦪꦺꦮ ꦮꦶꦱ꧀ꦱꦴꦱꦁ ꦒꦟ꧀ꦲꦴꦠꦶ, ꦥꦸꦤ ꦏꦺꦤꦕꦶ ꦏꦴꦫꦟꦺꦤ ꦠꦺꦤ ꦢꦶꦤ꧀ꦤꦁ ꦠꦱ꧀ꦱ ꦤ ꦮꦛ꧀ꦛꦠꦷꦠꦶ ꦤꦠ꧀ꦡꦶ. ꦤꦶꦱ꧀ꦱꦒ꧀ꦒꦶꦪꦁ ꦥꦤ ꦕꦷꦮꦫꦁ ꦗꦴꦤꦶꦠ꧀ꦮꦴ ꦮꦴ ꦄꦗꦴꦤꦶꦠ꧀ꦮꦴ ꦮꦴ ꦒꦟ꧀ꦲꦤ꧀ꦠꦁ ‘‘ꦩꦴ ꦒꦟ꧀ꦲꦴꦲꦷ’’ꦠꦶ ꦤꦶꦮꦴꦫꦟꦠ꧀ꦡꦁ ꦮꦸꦠ꧀ꦠꦁ. ꦏꦴꦪꦮꦴꦕꦴꦲꦶ ꦏꦠ꧀ꦠꦧ꧀ꦧꦄꦣꦶꦛ꧀ꦜꦴꦤꦮꦶꦏꦥ꧀ꦥꦤꦴꦤꦁ ꦄꦏꦠꦠ꧀ꦠꦴ ꦲꦺꦴꦠꦷꦠꦶ ꦄꦴꦲ ‘‘ꦏꦴꦪꦮꦴꦕꦴꦠꦺꦴ ꦱꦩꦸꦛ꧀ꦜꦴꦠꦷ’’ꦠꦶ. ꦕꦷꦮꦫꦱ꧀ꦱ ꦄꦠ꧀ꦠꦤꦺꦴ ꦱꦤ꧀ꦠꦏꦠꦴ, ꦗꦴꦠꦶꦥ꧀ꦥꦩꦴꦟꦪꦸꦠ꧀ꦠꦠꦴ, ꦖꦶꦤ꧀ꦤꦥꦭꦶꦧꦺꦴꦣꦨꦴꦮꦺꦴ, ꦄꦠꦶꦫꦺꦏꦕꦷꦮꦫꦠꦴ, ꦢꦱꦴꦲꦴꦠꦶꦏ꧀ꦏꦩꦺꦴꦠꦶ ꦆꦩꦴꦤꦺꦠ꧀ꦡ ꦥꦚ꧀ꦕ ꦄꦔ꧀ꦒꦴꦤꦶ.

ꦥꦜꦩꦏꦡꦶꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.