꧗. ꦮꦶꦲꦴꦫꦏꦴꦫꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧓꧖꧕. ꦱꦠ꧀ꦠꦩꦺ ꦌꦮꦁꦤꦴꦩꦏꦺ ꦤꦒꦫꦺꦠꦶ ꦏꦺꦴꦱꦩ꧀ꦧꦷꦤꦴꦩꦏꦺ. ꦠꦱ꧀ꦱ ꦏꦶꦫ ꦤꦒꦫꦱ꧀ꦱ ꦄꦴꦫꦴꦩꦥꦺꦴꦏ꧀ꦑꦫꦟꦷꦄꦴꦢꦷꦱꦸ ꦠꦺꦱꦸ ꦠꦺꦱꦸ ꦜꦴꦤꦺꦱꦸ ꦏꦺꦴꦱꦩ꧀ꦧꦫꦸꦏ꧀ꦑꦴꦮ ꦈꦱ꧀ꦱꦤ꧀ꦤꦴ ꦄꦲꦺꦱꦸꦁ, ꦠꦱ꧀ꦩꦴ ꦏꦺꦴꦱꦩ꧀ꦧꦷꦠꦶ ꦱꦔ꧀ꦑ꧀ꦪꦁ ꦄꦒꦩꦴꦱꦶ. ꦏꦸꦱꦸꦩ꧀ꦧꦱ꧀ꦱ ꦤꦴꦩ ꦆꦱꦶꦤꦺꦴ ꦄꦱ꧀ꦱꦩꦠꦺꦴ ꦄꦮꦶꦢꦹꦫꦺ ꦩꦴꦥꦶꦠꦠ꧀ꦠꦴꦠꦶ ꦌꦏꦺ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦏꦸꦱꦸꦩ꧀ꦧꦱ꧀ꦱ ꦆꦱꦶꦤꦺꦴ ꦤꦶꦮꦴꦱꦨꦹꦩꦶ ꦏꦺꦴꦱꦩ꧀ꦧꦷ, ꦠꦱ꧀ꦱ ꦕ ꦄꦮꦶꦢꦹꦫꦺ ꦨꦮꦠ꧀ꦠꦴ ꦤꦒꦫꦁ ꦏꦺꦴꦱꦩ꧀ꦧꦷꦠꦶ ꦱꦔ꧀ꦑ꧀ꦪꦁ ꦒꦠꦤ꧀ꦠꦶ. ꦓꦺꦴꦱꦶꦠꦤꦴꦩꦏꦺꦤ ꦏꦶꦫ ꦱꦺꦛ꧀ꦜꦶꦤꦴ ꦱꦺꦴ ꦏꦴꦫꦶꦠꦺꦴꦠꦶ ꦌꦠ꧀ꦡ ꦏꦺꦴ ꦓꦺꦴꦱꦶꦠꦱꦺꦛ꧀ꦜꦶ, ꦏꦡꦚ꧀ꦕꦴꦤꦺꦤ ꦱꦺꦴ ꦄꦴꦫꦴꦩꦺꦴ ꦏꦴꦫꦶꦠꦺꦴꦠꦶ? ꦥꦸꦧ꧀ꦧꦺ ꦏꦶꦫ ꦄꦢ꧀ꦢꦶꦭꦫꦛ꧀ꦜꦁ ꦤꦴꦩ ꦄꦲꦺꦴꦱꦶ. ꦠꦠꦺꦴ ꦏꦺꦴꦠꦹꦲꦭꦏꦺꦴ ꦤꦴꦩ ꦢꦭꦶꦢ꧀ꦢꦺꦴ ꦖꦴꦠꦏꦨꦪꦺꦤ ꦱꦥꦸꦠ꧀ꦠꦢꦴꦫꦺꦴ ꦱꦸꦨꦶꦏ꧀ꦑꦁ ꦫꦛ꧀ꦜꦁ ꦒꦕ꧀ꦖꦤ꧀ꦠꦺꦴ ꦥꦸꦠ꧀ꦠꦁ ꦮꦲꦶꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦖꦝ꧀ꦝꦺꦠ꧀ꦮꦴ ꦄꦒꦩꦴꦱꦶ. ꦩꦴꦠꦴ ꦤꦶꦮꦠ꧀ꦠꦶꦠ꧀ꦮꦴ ꦠꦁ ꦒꦲꦺꦠ꧀ꦮꦴ ꦒꦠꦴ. ꦠꦺ ꦌꦏꦁ ꦒꦺꦴꦥꦴꦭꦏꦒꦴꦩꦁ ꦥꦮꦶꦱꦶꦁꦱꦸ. ꦒꦺꦴꦥꦴꦭꦏꦴꦤꦚ꧀ꦕ ꦠꦢꦴ ꦧꦲꦸꦥꦴꦪꦴꦱꦺꦴ ꦥꦛꦶꦪꦠ꧀ꦠꦺꦴ ꦲꦺꦴꦠꦶ, ꦠꦠꦺꦴ ꦥꦴꦪꦴꦱꦁ ꦭꦨꦶꦠ꧀ꦮꦴ ꦨꦸꦚ꧀ꦗꦶꦁꦱꦸ. ꦄꦡ ꦱꦺꦴ ꦥꦸꦫꦶꦱꦺꦴ ꦧꦲꦸꦠꦫꦁ ꦥꦴꦪꦴꦱꦁ ꦨꦸꦠ꧀ꦠꦺꦴ ꦗꦷꦫꦴꦥꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦫꦠ꧀ꦠꦶꦨꦴꦒꦺ ꦏꦴꦭꦁ ꦏꦠ꧀ꦮꦴ ꦠꦠ꧀ꦡꦺꦮ ꦱꦸꦤꦑꦶꦪꦴ ꦏꦸꦕ꧀ꦖꦶꦱ꧀ꦩꦶꦁ ꦥꦛꦶꦱꦤ꧀ꦣꦶꦁ ꦒꦲꦺꦠ꧀ꦮꦴ ꦏꦸꦏ꧀ꦏꦸꦫꦺꦴ ꦗꦴꦠꦺꦴ, ꦱꦺꦴ ꦒꦺꦴꦥꦴꦭꦏꦱ꧀ꦱ ꦥꦶꦪꦺꦴ ꦄꦲꦺꦴꦱꦶ. ꦒꦺꦴꦥꦴꦭꦏꦺꦴ ꦕ ꦥꦕ꧀ꦕꦺꦏꦧꦸꦢ꧀ꦣꦁ ꦈꦥꦛ꧀ꦜꦴꦠꦶ. ꦥꦕ꧀ꦕꦺꦏꦧꦸꦢ꧀ꦣꦺꦴꦥꦶ ꦨꦠ꧀ꦠꦏꦶꦕ꧀ꦕꦏꦴꦭꦺ ꦏꦸꦏ꧀ꦏꦸꦫꦱ꧀ꦱ ꦌꦏꦁ ꦥꦶꦟ꧀ꦝꦁ ꦢꦺꦠꦶ. ꦱꦺꦴ ꦥꦕ꧀ꦕꦺꦏꦧꦸꦢ꧀ꦣꦺ ꦱꦶꦤꦺꦲꦁ ꦈꦥ꧀ꦥꦴꦢꦺꦠ꧀ꦮꦴ ꦒꦺꦴꦥꦴꦭꦏꦺꦤ ꦱꦢ꧀ꦣꦶꦁ ꦥꦟ꧀ꦟꦱꦴꦭꦩ꧀ꦥꦶ ꦒꦕ꧀ꦖꦠꦶ, ꦒꦺꦴꦥꦴꦭꦏꦺ ꦄꦱꦤ꧀ꦤꦶꦲꦶꦠꦺ ꦨꦠ꧀ꦠꦮꦺꦭꦴꦪꦁ ꦱꦪꦩꦺꦮ ꦒꦤ꧀ꦠ꧀ꦮꦴ ꦏꦴꦭꦴꦫꦺꦴꦕꦤꦠ꧀ꦡꦁ ꦥꦟ꧀ꦟꦱꦴꦭꦢ꧀ꦮꦴꦫꦺ ꦨꦸꦱ꧀ꦱꦠꦶ, ꦄꦤ꧀ꦠꦫꦴꦩꦒ꧀ꦒꦺꦥꦶ ꦕꦟ꧀ꦝꦩꦶꦒꦺ ꦢꦶꦱ꧀ꦮꦴ ꦨꦸꦱ꧀ꦱꦶꦠ꧀ꦮꦴ ꦥꦭꦴꦥꦺꦠꦶ. ꦱꦺꦴ ꦥꦕ꧀ꦕꦺꦏꦧꦸꦢ꧀ꦣꦺ ꦩꦸꦢꦸꦏꦺꦤ ꦕꦶꦠ꧀ꦠꦺꦤ ꦏꦴꦭꦁ ꦏꦠ꧀ꦮꦴ ꦢꦺꦮꦭꦺꦴꦏꦺ ꦤꦶꦧ꧀ꦧꦠ꧀ꦠꦶ. ꦠꦠ꧀ꦫꦴꦱ꧀ꦱ ‘‘ꦓꦺꦴꦱꦏꦢꦺꦮꦥꦸꦠ꧀ꦠꦺꦴ’’ꦠ꧀ꦮꦺꦮ ꦤꦴꦩꦁ ꦄꦲꦺꦴꦱꦶ.

ꦱꦺꦴ ꦢꦺꦮꦭꦺꦴꦏꦠꦺꦴ ꦕꦮꦶꦠ꧀ꦮꦴ ꦏꦺꦴꦱꦩ꧀ꦧꦶꦪꦁ ꦌꦏꦱ꧀ꦩꦶꦁ ꦏꦸꦭꦓꦫꦺ ꦤꦶꦧ꧀ꦧꦠ꧀ꦠꦶ. ꦠꦁ ꦄꦥꦸꦠ꧀ꦠꦏꦺꦴ ꦏꦶꦫ ꦱꦺꦛ꧀ꦜꦶ ꦠꦱ꧀ꦱ ꦩꦴꦠꦴꦥꦶꦠꦹꦤꦁ ꦣꦤꦁ ꦢꦠ꧀ꦮꦴ ꦥꦸꦠ꧀ꦠꦁ ꦏꦠ꧀ꦮꦴ ꦄꦒ꧀ꦒꦲꦺꦱꦶ. ꦄꦡ ꦄꦠ꧀ꦠꦤꦺꦴ ꦥꦸꦠ꧀ꦠꦺ ꦗꦴꦠꦺ ꦱꦠ꧀ꦠꦏ꧀ꦑꦠ꧀ꦠꦸꦁ ꦓꦴꦠꦴꦥꦺꦠꦸꦁ ꦈꦥꦏ꧀ꦏꦩꦶ. ꦱꦺꦴ ꦥꦸꦚ꧀ꦚꦮꦤ꧀ꦠꦠꦴꦪ ꦱꦠ꧀ꦠꦱꦸꦥꦶ ꦜꦴꦤꦺꦱꦸ ꦩꦫꦟꦁ ꦄꦥ꧀ꦥꦠ꧀ꦮꦴ ꦄꦮꦱꦴꦤꦺ ꦌꦏꦴꦪ ꦱꦺꦛ꧀ꦜꦶꦣꦷꦠꦴꦪ ꦮꦺꦪ꧀ꦪꦠ꧀ꦠꦶꦪꦺꦤ ꦭꦢ꧀ꦣꦗꦷꦮꦶꦏꦺꦴ ꦄꦥꦫꦨꦴꦒꦺ ꦥꦶꦠꦸ ꦄꦕ꧀ꦕꦪꦺꦤ ꦱꦺꦛ꧀ꦜꦶꦛ꧀ꦜꦴꦤꦁ ꦥꦠ꧀ꦮꦴ ꦓꦺꦴꦱꦶꦠꦱꦺꦛ꧀ꦜꦶ ꦤꦴꦩ ꦗꦴꦠꦺꦴ. ꦄꦚ꧀ꦚꦺꦥꦶ ꦏꦺꦴꦱꦩ꧀ꦧꦶꦪꦁ ꦏꦸꦏ꧀ꦏꦸꦛꦱꦺꦛ꧀ꦜꦶ, ꦥꦴꦮꦴꦫꦶꦪꦱꦺꦛ꧀ꦜꦷꦠꦶ ꦢ꧀ꦮꦺ ꦱꦺꦛ꧀ꦜꦶꦤꦺꦴ ꦄꦠ꧀ꦡꦶ, ꦆꦩꦶꦤꦴ ꦱꦢ꧀ꦣꦶꦁ ꦠꦪꦺꦴ ꦄꦲꦺꦱꦸꦁ.

ꦠꦺꦤ ꦕ ꦱꦩꦪꦺꦤ ꦠꦺꦱꦁ ꦱꦲꦴꦪꦏꦴꦤꦁ ꦱꦺꦛ꧀ꦜꦷꦤꦁ ꦏꦸꦭꦹꦥꦏꦴ ꦥꦚ꧀ꦕꦱꦠꦴ ꦆꦱꦪꦺꦴ ꦥꦧ꧀ꦧꦠꦥꦴꦢꦺ ꦮꦱꦶꦁꦱꦸ. ꦠꦺ ꦏꦴꦭꦺꦤ ꦏꦴꦭꦁ ꦭꦺꦴꦟꦩ꧀ꦧꦶꦭꦱꦺꦮꦤꦠ꧀ꦡꦁ ꦩꦤꦸꦱ꧀ꦱꦥꦡꦁ ꦄꦴꦒꦕ꧀ꦖꦤ꧀ꦠꦶ. ꦄꦡꦺꦏꦱ꧀ꦩꦶꦁ ꦮꦴꦫꦺ ꦒꦶꦩ꧀ꦲꦱꦩꦪꦺ ꦩꦤꦸꦱ꧀ꦱꦥꦡꦁ ꦄꦴꦒꦕ꧀ꦖꦤ꧀ꦠꦴ ꦤꦶꦫꦸꦢꦏꦁ ꦩꦲꦴꦏꦤ꧀ꦠꦴꦫꦁ ꦄꦠꦶꦏ꧀ꦏꦩꦶꦠ꧀ꦮꦴ ꦏꦤ꧀ꦠꦴꦫꦥꦫꦶꦪꦺꦴꦱꦴꦤꦺ ꦩꦲꦤ꧀ꦠꦁ ꦤꦶꦒ꧀ꦫꦺꦴꦣꦫꦸꦏ꧀ꦑꦁ ꦢꦶꦱ꧀ꦮꦴ ꦕꦶꦤ꧀ꦠꦺꦱꦸꦁ ‘‘ꦪꦴꦢꦶꦱꦺꦴ ꦄꦪꦁ ꦫꦸꦏ꧀ꦑꦺꦴ, ꦄꦢ꧀ꦣꦴ ꦌꦠ꧀ꦡ ꦩꦲꦺꦱꦏ꧀ꦑꦴꦪ ꦢꦺꦮꦠꦴꦪ ꦨꦮꦶꦠꦧ꧀ꦧꦁ, ꦱꦴꦣꦸ ꦮꦠꦱ꧀ꦱ, ꦱꦕꦺ ꦤꦺꦴ ꦥꦴꦤꦷꦪꦁ ꦮꦴ ꦥꦫꦶꦨꦺꦴꦗꦤꦷꦪꦁ ꦮꦴ ꦢꦢꦺꦪ꧀ꦪꦴ’’ꦠꦶ. ꦢꦺꦮꦠꦴ ꦆꦱꦷꦤꦁ ꦄꦗ꧀ꦙꦴꦱꦪꦁ ꦮꦶꦢꦶꦠ꧀ꦮꦴ ‘‘ꦆꦩꦺꦱꦁ ꦱꦔ꧀ꦒꦲꦁ ꦏꦫꦶꦱ꧀ꦱꦴꦩꦷ’’ꦠꦶ ꦄꦠ꧀ꦠꦤꦺꦴ ꦄꦴꦤꦸꦨꦴꦮꦺꦤ ꦮꦶꦛꦥꦤ꧀ꦠꦫꦠꦺꦴ ꦤꦔ꧀ꦒꦭꦱꦷꦱꦩꦠ꧀ꦠꦁ ꦈꦢꦏꦣꦴꦫꦁ ꦥꦮꦠ꧀ꦠꦺꦱꦶ. ꦆꦱꦶꦒꦟꦺꦴ ꦫꦗꦠꦏ꧀ꦑꦤ꧀ꦣꦱꦢꦶꦱꦁ ꦈꦢꦏꦮꦛ꧀ꦛꦶꦁ ꦢꦶꦱ꧀ꦮꦴ ꦄꦠ꧀ꦠꦤꦺꦴ ꦨꦴꦗꦤꦺꦲꦶ ꦈꦢꦏꦁ ꦒꦲꦺꦠ꧀ꦮꦴ ꦥꦫꦶꦨꦺꦴꦒꦁ ꦏꦠ꧀ꦮꦴ ꦕꦶꦤ꧀ꦠꦺꦱꦶ ‘‘ꦢꦺꦮꦠꦴꦪ ꦄꦩ꧀ꦲꦴꦏꦁ ꦥꦫꦶꦨꦺꦴꦒꦸꦢꦏꦁ ꦢꦶꦤ꧀ꦤꦁ, ꦆꦢꦁ ꦥꦤ ꦄꦒꦴꦩꦏꦁ ꦩꦲꦴꦫꦚ꧀ꦚꦁ, ꦱꦴꦣꦸ ꦮꦠꦱ꧀ꦱ, ꦱꦕꦺ ꦤꦺꦴ ꦄꦴꦲꦴꦫꦩ꧀ꦥꦶ ꦢꦢꦺꦪ꧀ꦪꦴ’’ꦠꦶ. ꦢꦺꦮꦠꦴ ꦆꦱꦷꦤꦁ ꦈꦥꦏꦥ꧀ꦥꦤꦮꦱꦺꦤ ꦢꦶꦧ꧀ꦧꦴꦤꦶ ꦪꦴꦒꦸꦑꦗ꧀ꦗꦏꦴꦢꦷꦤꦶ ꦢꦠ꧀ꦮꦴ ꦱꦤ꧀ꦠꦥ꧀ꦥꦺꦱꦶ.

ꦆꦱꦪꦺꦴ ꦕꦶꦤ꧀ꦠꦪꦶꦁꦱꦸ ‘‘ꦢꦺꦮꦠꦴꦪ ꦄꦩ꧀ꦲꦴꦏꦁ ꦥꦫꦶꦨꦺꦴꦒꦸꦢꦏꦩ꧀ꦥꦶ ꦨꦺꦴꦗꦤꦩ꧀ꦥꦶ ꦱꦧ꧀ꦧꦁ ꦢꦶꦤ꧀ꦤꦁ, ꦱꦴꦣꦸ ꦮꦠꦱ꧀ꦱ, ꦱꦕꦺ ꦤꦺꦴ ꦄꦠ꧀ꦠꦴꦤꦁ ꦢꦱ꧀ꦱꦺꦪ꧀ꦪꦴ’’ꦠꦶ. ꦢꦺꦮꦠꦴ ꦠꦺꦱꦁ ꦄꦗ꧀ꦙꦴꦱꦪꦁ ꦮꦶꦢꦶꦠ꧀ꦮꦴ ꦈꦥꦝ꧀ꦞꦏꦴꦪꦁ ꦢꦱ꧀ꦱꦺꦱꦶ. ꦢꦺꦮꦠꦺ ꦩꦲꦠꦷ ꦠꦺ ꦱꦩ꧀ꦥꦠ꧀ꦠꦶ, ꦏꦶꦁ ꦏꦩ꧀ꦩꦁ ꦏꦠ꧀ꦮꦴ ꦆꦩꦁ ꦱꦩ꧀ꦥꦠ꧀ꦠꦶꦁ ꦄꦣꦶꦒꦠꦴꦱꦷꦠꦶ. ꦤꦴꦠꦶꦩꦲꦤ꧀ꦠꦁ ꦥꦫꦶꦠ꧀ꦠꦏꦁ ꦏꦩ꧀ꦩꦁ ꦏꦠ꧀ꦮꦴꦠꦶ. ꦈꦥꦝ꧀ꦞꦸꦥꦺꦴꦱꦡꦏꦩ꧀ꦩꦁ ꦤꦶꦱ꧀ꦱꦴꦪ ꦲꦶ ꦢꦺꦮꦠꦴꦪ ꦱꦩ꧀ꦥꦠ꧀ꦠꦶ ꦭꦢ꧀ꦣꦴ. ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦏꦶꦫ ꦒꦺꦲꦺ ꦄꦪꦁ ꦢꦺꦮꦥꦸꦠ꧀ꦠꦺꦴ ꦏꦩ꧀ꦩꦏꦴꦫꦺꦴ ꦄꦲꦺꦴꦱꦶ. ꦱꦺꦛ꧀ꦜꦶꦱ꧀ꦱ ꦲꦶ ꦒꦺꦲꦺ ꦈꦥꦺꦴꦱꦡꦢꦶꦮꦱꦺꦱꦸ ꦄꦤ꧀ꦠꦩꦱꦺꦴ ꦢꦴꦱꦏꦩ꧀ꦩꦏꦴꦫꦺ ꦈꦥꦴꦢꦴꦪ ꦱꦧ꧀ꦧꦺꦴ ꦗꦤꦺꦴ ꦈꦥꦺꦴꦱꦡꦶꦏꦺꦴ ꦲꦺꦴꦠꦶ. ꦌꦏꦢꦶꦮꦱꦁ ꦄꦪꦁ ꦏꦩ꧀ꦩꦏꦴꦫꦺꦴ ꦌꦏꦏꦺꦴꦮ ꦥꦴꦠꦺꦴ ꦈꦛ꧀ꦜꦴꦪ ꦏꦩ꧀ꦩꦤ꧀ꦠꦁ ꦒꦠꦺꦴ. ꦩꦲꦴꦱꦺꦛ꧀ꦜꦶ ꦤꦶꦮꦴꦥꦁ ꦭꦨꦩꦴꦤꦩꦤꦸꦱ꧀ꦱꦺ ꦱꦭ꧀ꦭꦏ꧀ꦑꦺꦤ꧀ꦠꦺꦴ ꦌꦠꦱ꧀ꦱꦺꦮꦺꦏꦱ꧀ꦱ ꦄꦫꦚ꧀ꦚꦁ ꦒꦠꦨꦴꦮꦁ ꦚꦠ꧀ꦮꦴ ꦄꦱ꧀ꦱ ꦱꦴꦪꦩꦴꦱꦠ꧀ꦡꦴꦪ ꦤꦶꦮꦴꦥꦁ ꦄꦢꦴꦱꦶ. ꦨꦠ꧀ꦠꦏꦴꦫꦢꦴꦱꦷ ꦌꦏꦱ꧀ꦱꦺꦮ ꦨꦠ꧀ꦠꦁ ꦥꦕꦶꦠ꧀ꦮꦴ ꦄꦫꦚ꧀ꦚꦠꦺꦴ ꦄꦴꦒꦠꦱ꧀ꦱ ꦨꦠ꧀ꦠꦁ ꦮꦝ꧀ꦞꦺꦠ꧀ꦮꦴ ꦄꦢꦴꦱꦶ. ꦏꦩ꧀ꦩꦏꦴꦫꦺꦴ ꦕꦶꦤ꧀ꦠꦪꦶ ‘‘ꦄꦚ꧀ꦚꦺꦱꦸ ꦢꦶꦮꦱꦺꦱꦸ ꦆꦩꦱ꧀ꦩꦶꦁ ꦏꦴꦭꦺ ꦒꦺꦲꦁ ꦌꦏꦱꦢ꧀ꦢꦁ ꦄꦲꦺꦴꦱꦶ, ꦄꦗ꧀ꦗ ꦄꦠꦶꦮꦶꦪ ꦱꦤ꧀ꦤꦶꦱꦶꦤ꧀ꦤꦁ, ꦏꦶꦁ ꦤꦸ ꦑꦺꦴ ꦌꦠ’’ꦤ꧀ꦠꦶ. ꦠꦱ꧀ꦱ ꦱꦴ ꦄꦴꦕꦶꦏ꧀ꦑꦶ ‘‘ꦄꦗ꧀ꦗ ꦆꦩꦱ꧀ꦩꦶꦁ ꦒꦺꦲꦺ ꦱꦧ꧀ꦧꦺ ꦩꦤꦸꦱ꧀ꦱꦴ ꦈꦥꦺꦴꦱꦡꦶꦏꦴ, ꦩꦲꦴꦱꦺꦛ꧀ꦜꦶ ꦠꦸꦪ꧀ꦲꦺꦮꦺꦏꦱ꧀ꦱ ꦤꦶꦮꦴꦥꦁ ꦄꦢꦴꦱꦷ’’ꦠꦶ. ꦌꦮꦁ ꦄꦩ꧀ꦩꦴꦠꦶ. ꦄꦴꦩ ꦱꦴꦩꦷꦠꦶ. ‘‘ꦆꦩꦱ꧀ꦩꦶꦁ ꦏꦴꦭꦺ ꦈꦥꦺꦴꦱꦡꦁ ꦱꦩꦴꦢꦶꦤ꧀ꦤꦱ꧀ꦱ ꦈꦥꦺꦴꦱꦡꦏꦩ꧀ꦩꦁ ꦲꦺꦴꦠꦶ, ꦤ ꦲꦺꦴꦠꦷ’’ꦠꦶ ꦩꦲꦴꦱꦺꦛ꧀ꦜꦶꦁ ꦥꦸꦕ꧀ꦖ ꦄꦩ꧀ꦩꦴꦠꦶ. ꦠꦴꦪ ꦒꦤ꧀ꦠ꧀ꦮꦴ ꦥꦸꦕ꧀ꦖꦶꦠꦺꦴ ꦩꦲꦴꦱꦺꦛ꧀ꦜꦶ ꦄꦴꦲ – ‘‘ꦱꦏꦭꦈꦥꦺꦴꦱꦡꦏꦩ꧀ꦩꦁ ꦤ ꦲꦺꦴꦠꦶ, ꦈꦥꦝ꧀ꦞꦏꦩ꧀ꦩꦁ ꦥꦤ ꦲꦺꦴꦠꦶ, ꦈꦥꦺꦴꦱꦡꦶꦏꦺꦴ ꦲꦺꦴꦠꦷ’’ꦠꦶ. ꦏꦩ꧀ꦩꦏꦴꦫꦺꦴ ꦨꦠ꧀ꦠꦁ ꦄꦨꦸꦚ꧀ꦗꦶꦠ꧀ꦮꦴ ꦩꦸꦑꦁ ꦮꦶꦏ꧀ꦑꦴꦭꦺꦠ꧀ꦮꦴ ꦈꦥꦺꦴꦱꦡꦶꦏꦺꦴ ꦲꦸꦠ꧀ꦮꦴ ꦮꦱꦤꦛ꧀ꦜꦴꦤꦁ ꦒꦲꦺꦠ꧀ꦮꦴ ꦤꦶꦥꦗ꧀ꦗꦶ. ꦠꦱ꧀ꦱ ꦄꦴꦲꦴꦫꦥꦫꦶꦏ꧀ꦑꦷꦟꦏꦴꦪꦱ꧀ꦱ ꦫꦠ꧀ꦠꦶꦁ ꦮꦴꦠꦺꦴ ꦏꦸꦥ꧀ꦥꦶ. ꦱꦺꦴ ꦥꦕ꧀ꦕꦹꦱꦱꦩꦪꦺ ꦏꦴꦭꦁ ꦏꦠ꧀ꦮꦴ ꦈꦥꦝ꧀ꦞꦸꦥꦺꦴꦱꦡꦏꦩ꧀ꦩꦤꦶꦱ꧀ꦱꦤ꧀ꦢꦺꦤ ꦩꦲꦴꦮꦠ꧀ꦠꦤꦶꦄꦛꦮꦶꦢ꧀ꦮꦴꦫꦺ ꦤꦶꦒ꧀ꦫꦺꦴꦣꦫꦸꦏ꧀ꦑꦢꦺꦮꦥꦸꦠ꧀ꦠꦺꦴ ꦲꦸꦠ꧀ꦮꦴ ꦤꦶꦧ꧀ꦧꦠ꧀ꦠꦶ.

ꦱꦺꦴ ꦠꦁ ꦥꦮꦠ꧀ꦠꦶꦁ ꦆꦱꦷꦤꦁ ꦄꦴꦫꦺꦴꦕꦺꦱꦶ. ꦆꦱꦪꦺꦴ ꦥꦸꦕ꧀ꦖꦶꦁꦱꦸ ‘‘ꦠꦸꦩ꧀ꦲꦺꦲꦶ ꦩꦪꦁ ‘ꦧꦸꦢ꧀ꦣꦺꦴ ꦣꦩ꧀ꦩꦺꦴ ꦱꦔ꧀ꦓꦺꦴ’ꦠꦶ ꦄꦱ꧀ꦱꦸꦠꦥꦸꦧ꧀ꦧꦁ ꦱꦴꦮꦶꦠꦴ, ꦈꦥ꧀ꦥꦤ꧀ꦤꦺꦴ ꦤꦸ ꦑꦺꦴ ꦭꦺꦴꦏꦺ ꦧꦸꦢ꧀ꦣꦺꦴ’’ꦠꦶ. ꦄꦴꦩ, ꦨꦤ꧀ꦠꦺ, ꦈꦥ꧀ꦥꦤ꧀ꦤꦺꦴꦠꦶ. ꦆꦢꦴꦤꦶ ꦏꦸꦲꦶꦁ ꦮꦱꦠꦷꦠꦶ. ꦱꦴꦮꦠ꧀ꦡꦶꦪꦁ ꦤꦶꦱ꧀ꦱꦴꦪ ꦗꦺꦠꦮꦤꦺ, ꦨꦤ꧀ꦠꦺꦠꦶ. ꦆꦱꦪꦺꦴ ‘‘ꦠꦶꦛ꧀ꦜꦡ ꦠꦸꦩ꧀ꦲꦺ, ꦩꦪꦁ ꦱꦠ꧀ꦡꦴꦫꦁ ꦥꦱ꧀ꦱꦶꦱ꧀ꦱꦴꦩꦴ’’ꦠꦶ ꦲꦛ꧀ꦜꦠꦸꦛ꧀ꦜꦴ ꦤꦶꦏ꧀ꦑꦩꦶꦠ꧀ꦮꦴ ꦄꦤꦸꦥꦸꦧ꧀ꦧꦺꦤ ꦏꦺꦴꦱꦩ꧀ꦧꦷꦤꦒꦫꦁ ꦱꦩ꧀ꦥꦴꦥꦸꦟꦶꦁꦱꦸ. ꦩꦲꦴꦱꦺꦛ꧀ꦜꦶꦤꦺꦴ ‘‘ꦆꦱꦪꦺꦴ ꦄꦴꦒꦠꦴ’’ꦠꦶ ꦥꦕ꧀ꦕꦸꦒ꧀ꦒꦩꦤꦁ ꦏꦠ꧀ꦮꦴ ‘‘ꦱ꧀ꦮꦺ ꦄꦩ꧀ꦲꦴꦏꦁ ꦨꦶꦏ꧀ꦑꦁ ꦒꦟ꧀ꦲꦡ, ꦨꦤ꧀ꦠꦺ’’ꦠꦶ ꦤꦶꦩꦤ꧀ꦠꦺꦠ꧀ꦮꦴ ꦥꦸꦤꦢꦶꦮꦱꦺ ꦆꦱꦶꦒꦟꦱ꧀ꦱ ꦩꦲꦴꦢꦴꦤꦁ ꦄꦢꦁꦱꦸ. ꦆꦱꦪꦺꦴ ‘‘ꦨꦸꦠ꧀ꦮꦴꦮ ꦒꦕ꧀ꦖꦴꦩꦴ’’ꦠꦶ ꦄꦴꦥꦸꦕ꧀ꦖꦶꦁꦱꦸ. ꦨꦤ꧀ꦠꦺ, ꦠꦸꦩ꧀ꦲꦺ ꦄꦚ꧀ꦚꦱ꧀ꦩꦶꦁ ꦏꦴꦭꦺ ꦌꦏꦩ꧀ꦥꦶ ꦩꦴꦱꦁ ꦢ꧀ꦮꦺꦥꦶ ꦠꦪꦺꦴꦥꦶ ꦕꦠ꧀ꦠꦴꦫꦺꦴꦥꦶ ꦩꦴꦱꦺ ꦮꦱꦶꦠ꧀ꦮꦴ ꦒꦕ꧀ꦖꦡ, ꦆꦩꦱ꧀ꦩꦶꦁ ꦥꦤ ꦮꦴꦫꦺ ꦲꦶꦪ꧀ꦪꦺꦴ ꦄꦴꦒꦤ꧀ꦠ꧀ꦮꦴ ‘‘ꦄꦗ꧀ꦗꦺꦮ ꦒꦕ꧀ꦖꦴꦩꦴ’’ꦠꦶ ꦮꦢꦡ, ꦏꦶꦁ ꦆꦢꦤ꧀ꦠꦶ. ꦄꦴꦩ ꦒꦲꦥꦠꦪꦺꦴ ꦧꦸꦢ꧀ꦣꦺꦴ ꦭꦺꦴꦏꦺ ꦈꦥ꧀ꦥꦤ꧀ꦤꦺꦴ, ꦤ ꦑꦺꦴ ꦥꦤ ꦱꦏ꧀ꦏꦴ ꦗꦷꦮꦶꦠꦤ꧀ꦠꦫꦴꦪꦺꦴ ꦗꦴꦤꦶꦠꦸꦁ, ꦠꦺꦤ ꦩꦪꦁ ꦠꦸꦫꦶꦠꦴ ꦒꦕ꧀ꦖꦴꦩꦴꦠꦶ. ꦠꦺꦤ ꦲꦶ, ꦨꦤ꧀ꦠꦺ, ꦩꦪꦩ꧀ꦥꦶ ꦄꦴꦒꦕ꧀ꦖꦴꦩ, ꦄꦩ꧀ꦲꦺꦲꦶ ꦱꦢ꧀ꦣꦶꦁꦪꦺꦮ ꦒꦕ꧀ꦖꦡꦴꦠꦶ. ‘‘ꦠꦸꦩ꧀ꦲꦺ ꦄꦒꦴꦫꦶꦪꦴ ꦤꦴꦩ ꦩꦲꦴꦗꦛꦴ, ꦠꦶꦛ꧀ꦜꦡ ꦠꦸꦩ꧀ꦲꦺ, ꦩꦪꦁ ꦥꦸꦫꦺꦠꦫꦁ ꦒꦩꦶꦱ꧀ꦱꦴꦩꦴ’’ꦠꦶ ꦤꦶꦏ꧀ꦑꦩꦶꦠ꧀ꦮꦴ ꦌꦏꦛ꧀ꦜꦴꦤꦺ ꦢ꧀ꦮꦺ ꦢꦶꦮꦱꦴꦤꦶ ꦄꦮꦱꦶꦠ꧀ꦮꦴ ꦠꦸꦫꦶꦠꦒꦩꦤꦺꦤ ꦱꦴꦮꦠ꧀ꦡꦶꦁ ꦥꦠ꧀ꦮꦴ ꦗꦺꦠꦮꦤꦮꦶꦲꦴꦫꦺ ꦱꦠ꧀ꦡꦸ ꦱꦤ꧀ꦠꦶꦏꦩꦺꦮ ꦄꦒꦩꦁꦱꦸ. ꦠꦠ꧀ꦡ ꦩꦣꦸꦫꦣꦩ꧀ꦩꦏꦡꦁ ꦱꦸꦠ꧀ꦮꦴ ꦱꦧ꧀ꦧꦺꦮ ꦥꦧ꧀ꦧꦗꦶꦠ꧀ꦮꦴ ꦄꦫꦲꦠ꧀ꦠꦁ ꦥꦴꦥꦸꦟꦶꦁꦱꦸ.

ꦠꦺꦥꦶ ꦠꦪꦺꦴ ꦱꦺꦛ꧀ꦜꦶꦤꦺꦴ ꦥꦚ꧀ꦕꦲꦶ ꦥꦚ꧀ꦕꦲꦶ ꦱꦏꦛꦱꦠꦺꦲꦶ ꦱꦥ꧀ꦥꦶꦩꦣꦸꦦꦴꦟꦶꦠꦴꦢꦷꦤꦶ ꦕꦺꦮ ꦥꦛ꧀ꦛꦸꦟ꧀ꦟꦢꦸꦏꦹꦭꦴꦢꦷꦤꦶ ꦕ ꦄꦴꦢꦴꦪ ꦏꦺꦴꦱꦩ꧀ꦧꦶꦠꦺꦴ ꦤꦶꦏ꧀ꦑꦩꦶꦠ꧀ꦮꦴ ꦄꦤꦸꦥꦸꦧ꧀ꦧꦺꦤ ꦱꦴꦮꦠ꧀ꦡꦶꦁ ꦥꦠ꧀ꦮꦴ ꦗꦺꦠꦮꦤꦱꦴꦩꦤ꧀ꦠꦺ ꦑꦤ꧀ꦣꦴꦮꦴꦫꦁ ꦧꦤ꧀ꦣꦶꦠ꧀ꦮꦴ ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦮꦤ꧀ꦢꦶꦠ꧀ꦮꦴ ꦥꦛꦶꦱꦤ꧀ꦡꦴꦫꦁ ꦏꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦱꦠ꧀ꦡꦴ ꦠꦶꦟ꧀ꦟꦩ꧀ꦥꦶ ꦱꦲꦴꦪꦴꦤꦁ ꦩꦣꦸꦫꦣꦩ꧀ꦩꦏꦡꦁ ꦏꦡꦺꦱꦶ. ꦠꦺ ꦧꦭꦮꦱꦺꦴꦩꦤꦱ꧀ꦱꦗꦴꦠꦴ ꦱꦠ꧀ꦡꦴꦫꦁ ꦤꦶꦩꦤ꧀ꦠꦺꦠ꧀ꦮꦴ ꦥꦸꦤꦢꦶꦮꦱꦺ ꦩꦲꦴꦢꦴꦤꦁ ꦄꦢꦁꦱꦸ, ꦥꦸꦤ ꦤꦶꦩꦤ꧀ꦠꦺꦠ꧀ꦮꦴ ꦥꦸꦤꦢꦶꦮꦱꦺꦠꦶ ꦌꦮꦁ ꦄꦝ꧀ꦞꦩꦴꦱꦁ ꦢꦴꦤꦁ ꦢꦠ꧀ꦮꦴ ‘‘ꦨꦤ꧀ꦠꦺ, ꦄꦩ꧀ꦲꦴꦏꦁ ꦗꦤꦥꦢꦁ ꦄꦴꦒꦩꦤꦴꦪ ꦥꦛꦶꦚ꧀ꦚꦁ ꦢꦺꦡꦴ’’ꦠꦶ ꦥꦴꦢꦩꦹꦭꦺ ꦤꦶꦥꦗ꧀ꦗꦶꦁꦱꦸ. ꦨꦒꦮꦴ ‘‘ꦱꦸꦚ꧀ꦚꦴꦒꦴꦫꦺ ꦑꦺꦴ ꦒꦲꦥꦠꦪꦺꦴ ꦠꦡꦴꦒꦠꦴ ꦄꦨꦶꦫꦩꦤ꧀ꦠꦷ’’ꦠꦶ ꦄꦴꦲ. ‘‘ꦌꦠ꧀ꦠꦴꦮꦠꦴ ꦥꦛꦶꦚ꧀ꦚꦴ ꦢꦶꦤ꧀ꦤꦴ ꦤꦴꦩ ꦲꦺꦴꦠꦷ’’ꦠꦶ ꦒꦲꦥꦠꦪꦺꦴ ꦱꦭ꧀ꦭꦏ꧀ꦑꦺꦠ꧀ꦮꦴ ‘‘ꦢꦶꦤ꧀ꦤꦴ ꦤꦺꦴ ꦨꦒꦮꦠꦴ ꦥꦛꦶꦚ꧀ꦚꦴ’’ꦠꦶ ꦥꦴꦢꦩꦹꦭꦺ ꦤꦶꦥꦗ꧀ꦗꦶꦠ꧀ꦮꦴ ꦢꦱꦧꦭꦁ ꦮꦤ꧀ꦢꦶꦠ꧀ꦮꦴ ꦤꦶꦏ꧀ꦑꦩꦶꦠ꧀ꦮꦴ ꦄꦤ꧀ꦠꦫꦴꦩꦒ꧀ꦒꦺ ꦪꦺꦴꦗꦤꦺ ꦪꦺꦴꦗꦤꦺ ꦮꦶꦲꦴꦫꦁ ꦏꦴꦫꦺꦠ꧀ꦮꦴ ꦄꦤꦸꦥꦸꦧ꧀ꦧꦺꦤ ꦏꦺꦴꦱꦩ꧀ꦧꦶꦁ ꦥꦠ꧀ꦮꦴ ‘‘ꦭꦺꦴꦏꦺ ꦧꦸꦢ꧀ꦣꦺꦴ ꦈꦥ꧀ꦥꦤ꧀ꦤꦺꦴ’’ꦠꦶ ꦏꦡꦪꦶꦁꦱꦸ. ꦠꦪꦺꦴ ꦗꦤꦴ ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦄꦴꦫꦴꦩꦺ ꦩꦲꦤ꧀ꦠꦁ ꦣꦤꦥꦫꦶꦕ꧀ꦕꦴꦒꦁ ꦏꦠ꧀ꦮꦴ ꦨꦒꦮꦠꦺꦴ ꦮꦶꦲꦴꦫꦺ ꦏꦴꦫꦴꦥꦺꦱꦸꦁ. ꦠꦠ꧀ꦡ ꦏꦸꦏ꧀ꦏꦸꦛꦱꦺꦛ꧀ꦜꦶꦤꦴ ꦏꦴꦫꦶꦠꦺꦴ ꦏꦸꦏ꧀ꦏꦸꦛꦴꦫꦴꦩꦺꦴ ꦤꦴꦩ ꦄꦲꦺꦴꦱꦶ. ꦥꦴꦮꦴꦫꦶꦏꦱꦺꦛ꧀ꦜꦶꦤꦴ ꦄꦩ꧀ꦧꦮꦤꦺ ꦏꦴꦫꦶꦠꦺꦴ ꦥꦴꦮꦴꦫꦶꦏꦩ꧀ꦧꦮꦤꦁ ꦤꦴꦩ. ꦓꦺꦴꦱꦶꦠꦺꦤ ꦏꦴꦫꦶꦠꦺꦴ ꦓꦺꦴꦱꦶꦠꦴꦫꦴꦩꦺꦴ ꦤꦴꦩ ꦄꦲꦺꦴꦱꦶ. ꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ ‘‘ꦓꦺꦴꦱꦶꦠꦤꦴꦩꦏꦺꦤ ꦏꦶꦫ ꦱꦺꦛ꧀ꦜꦶꦤꦴ ꦱꦺꦴ ꦏꦴꦫꦶꦠꦺꦴ’’ꦠꦶ.

ꦪꦺꦴ ꦄꦨꦶꦤꦶꦏ꧀ꦑꦩꦤꦏꦴꦭꦺ ꦱꦢ꧀ꦣꦶꦁ ꦤꦶꦏ꧀ꦑꦤ꧀ꦠꦺꦴ, ꦪꦱ꧀ꦱ ꦕ ꦱꦠ꧀ꦡꦴꦫꦴ ꦥꦫꦶꦤꦶꦧ꧀ꦧꦴꦤꦏꦴꦭꦺ ꦧ꧀ꦫꦲ꧀ꦩꦢꦟ꧀ꦝꦺꦴ ꦄꦴꦟꦠ꧀ꦠꦺꦴ, ꦠꦁ ꦱꦤ꧀ꦣꦴꦪꦴꦲ ‘‘ꦧꦺꦴꦣꦶꦱꦠ꧀ꦠꦏꦴꦭꦺ ꦈꦥꦛ꧀ꦜꦴꦏꦖꦤ꧀ꦤꦱ꧀ꦱꦴ’’ꦠꦶ. ꦆꦩꦶꦤꦴ ꦕ ꦪꦺꦴ ꦩꦗ꧀ꦙꦶꦩꦤꦶꦏꦴꦪꦺ ꦖꦤ꧀ꦤꦺꦴꦮꦴꦢꦱꦸꦠ꧀ꦠꦺ (ꦩ. ꦤꦶ. ꧓.꧓꧘꧙ ꦄꦴꦢꦪꦺꦴ) ꦒꦶꦭꦴꦤꦺꦴ ꦲꦸꦠ꧀ꦮꦴ ꦣꦩ꧀ꦩꦱꦺꦤꦴꦥꦠꦶꦤꦴ ꦎꦮꦢꦶꦪꦩꦴꦤꦺꦴꦥꦶ ꦩꦴꦫꦟꦤ꧀ꦠꦶꦏꦮꦺꦢꦤꦁ ꦄꦣꦶꦮꦴꦱꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦠꦶꦟ꧀ꦲꦺꦤ ꦱꦠ꧀ꦡꦺꦤ ꦏꦟ꧀ꦜꦤꦴꦭ꦳ꦶꦁ ꦖꦶꦤ꧀ꦢꦶꦠ꧀ꦮꦴ ꦩꦫꦟꦨꦪꦺ ꦈꦥ꧀ꦥꦤ꧀ꦤꦺ ꦒꦠꦶꦤꦶꦩꦶꦠ꧀ꦠꦺ ꦕ ꦈꦥꦛ꧀ꦜꦶꦠꦺ ꦄꦠ꧀ꦠꦤꦺꦴ ꦥꦸꦡꦸꦗ꧀ꦗꦤꦨꦴꦮꦁ ꦚꦠ꧀ꦮꦴ ꦱꦁꦮꦶꦒ꧀ꦒꦺꦴ ꦮꦶꦥꦱ꧀ꦱꦤꦁ ꦥꦛ꧀ꦜꦥꦺꦠ꧀ꦮꦴ ꦱꦔ꧀ꦑꦴꦫꦺ ꦥꦫꦶꦒ꧀ꦒꦟ꧀ꦲꦤ꧀ꦠꦺꦴ ꦄꦫꦲꦠ꧀ꦠꦁ ꦥꦠ꧀ꦮꦴ ꦱꦩꦱꦷꦱꦷ ꦲꦸꦠ꧀ꦮꦴ ꦥꦫꦶꦤꦶꦧ꧀ꦧꦴꦪꦶ, ꦄꦪꦁ ꦱꦺꦴ ꦤ ꦲꦺꦴꦠꦷꦠꦶ ꦢꦱ꧀ꦱꦺꦠꦶ. ꦥꦹꦗꦴꦮꦕꦤꦥ꧀ꦥꦪꦺꦴꦒꦺ ꦏꦠ꧀ꦠꦫꦶ ꦱꦴꦩꦶꦮꦕꦤꦱ꧀ꦱꦥꦶ ꦆꦕ꧀ꦖꦶꦠꦠ꧀ꦠꦴ ꦄꦴꦲ ‘‘ꦒꦴꦩꦱ꧀ꦱ ꦮꦴ ꦥꦹꦗꦶꦠ’’ꦤ꧀ꦠꦶ. ꦭꦏ꧀ꦑꦟꦁ ꦥꦤꦺꦠ꧀ꦡ ꦱꦢ꧀ꦢꦱꦠ꧀ꦡꦴꦤꦸꦱꦴꦫꦠꦺꦴ ꦮꦺꦢꦶꦠꦧ꧀ꦧꦁ. ꦌꦏꦺꦏꦺꦴ ꦏꦺꦴꦛ꧀ꦜꦴꦱꦺꦴꦠꦶ ꦌꦏꦺꦏꦺꦴ ꦨꦴꦒꦺꦴ.

꧓꧖꧖. ꦏꦶꦫꦶꦪꦠꦺꦴ ꦱꦩꦸꦛ꧀ꦜꦴꦤꦨꦴꦮꦺꦴꦠꦶ ꦏꦺꦮꦭꦁ ꦏꦶꦫꦶꦪꦴꦩꦠ꧀ꦠꦠꦺꦴ ꦱꦩꦸꦛ꧀ꦜꦴꦤꦨꦴꦮꦁ ꦥꦛꦶꦏ꧀ꦑꦶꦥꦠꦶ, ꦮꦠ꧀ꦡꦸꦤꦺꦴ ꦥꦤ ꦄꦢꦺꦱꦤꦴꦪ ꦏꦸꦛꦶꦏꦫꦟꦏꦶꦫꦶꦪꦴꦪ ꦕ ꦱꦩꦸꦛ꧀ꦜꦴꦤꦠꦺꦴ ꦏꦶꦫꦶꦪꦴꦏꦶꦫꦶꦪꦠꦺꦴ ꦱꦩꦸꦛ꧀ꦜꦴꦠꦷꦠꦶ ꦮꦺꦢꦶꦠꦧ꧀ꦧꦁ. ꦆꦩꦱ꧀ꦩꦶꦁ ꦱꦶꦏ꧀ꦑꦴꦥꦢꦺ ꦨꦶꦏ꧀ꦑꦹ ꦮꦴ ꦄꦤꦨꦶꦤꦺꦪ꧀ꦪꦴꦠꦶ ꦌꦠ꧀ꦡ ꦮꦴ-ꦱꦢ꧀ꦢꦺꦴ ‘‘ꦄꦪꦁ ꦮꦴ ꦱꦺꦴ ꦩꦲꦴꦤꦴꦒꦺꦴ’’ꦠꦶꦄꦴꦢꦷꦱꦸ ꦮꦶꦪ ꦄꦮꦣꦴꦫꦟꦠ꧀ꦡꦺꦴꦠꦶ ꦢꦛ꧀ꦜꦧ꧀ꦧꦺꦴ.

ꦮꦶꦲꦴꦫꦏꦴꦫꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.