꧑. ꦥꦴꦫꦴꦗꦶꦏꦏꦟ꧀ꦝꦁ

꧑. ꦥꦜꦩꦥꦴꦫꦴꦗꦶꦏꦁ

ꦱꦸꦢꦶꦤ꧀ꦤꦨꦴꦟꦮꦴꦫꦮꦟ꧀ꦟꦤꦴ

꧒꧔. ꦄꦤꦸꦥꦢꦮꦟ꧀ꦟꦤꦤ꧀ꦠꦶ ꦥꦢꦁ ꦥꦢꦁ ꦥꦛꦶꦮꦟ꧀ꦟꦤꦁ, ꦥꦢꦴꦤꦸꦏ꧀ꦏꦩꦺꦤ ꦮꦟ꧀ꦟꦤꦁ ꦮꦴ. ꦨꦟ꧀ꦝꦥ꧀ꦥꦪꦺꦴꦗꦤꦈꦢ꧀ꦣꦴꦫꦱꦴꦫꦟꦴꦢꦶꦤꦴ ꦏꦶꦕ꧀ꦕꦺꦤꦴꦠꦶ ꦌꦠ꧀ꦡ ꦮꦶꦏ꧀ꦏꦴꦪꦶꦏꦨꦟ꧀ꦝꦱ꧀ꦱ ꦮꦶꦏ꧀ꦏꦶꦟꦤꦁ ꦨꦟ꧀ꦝꦥ꧀ꦥꦪꦺꦴꦗꦤꦁ, ꦢꦴꦠꦸꦁ ꦱꦔ꧀ꦏꦺꦠꦶꦠꦺ ꦢꦶꦮꦱꦺ ꦒꦤ꧀ꦠ꧀ꦮꦴ ꦒꦲꦟꦁ ꦈꦢ꧀ꦣꦴꦫꦺꦴ, ‘‘ꦄꦱꦸꦏꦱ꧀ꦩꦶꦁ ꦢꦶꦮꦱꦺ ꦢꦴꦠꦧ꧀ꦧ’’ꦤ꧀ꦠꦶ ꦱꦠꦸꦥ꧀ꦥꦴꦢꦤꦁ ꦱꦴꦫꦟꦁ. ꦕꦠꦸꦧ꧀ꦧꦶꦣꦴꦪꦴꦠꦶ ꦑꦠ꧀ꦠꦶꦪꦧ꧀ꦫꦴꦲ꧀ꦩꦟꦒꦲꦥꦠꦶꦱꦩꦟꦴꦤꦁ ꦮꦱꦺꦤ ꦕꦠꦸꦧ꧀ꦧꦶꦣꦴꦪ, ꦨꦶꦏ꧀ꦑꦸꦨꦶꦏ꧀ꦑꦸꦤꦷꦈꦥꦴꦱꦏꦈꦥꦴꦱꦶꦏꦴꦤꦁ ꦮꦱꦺꦤ ꦮꦴ. ꦢꦶꦱ꧀ꦮꦴꦤꦱ꧀ꦱ ꦌꦠꦢꦲꦺꦴꦱꦷꦠꦶ ꦲꦺꦠꦸꦄꦠ꧀ꦡꦺꦴ ꦄꦪꦁ ꦢꦶꦱ꧀ꦮꦴꦤ-ꦱꦢ꧀ꦢꦺꦴ ꦄꦱꦩꦴꦤꦏꦠ꧀ꦠꦸꦏꦺꦴ ꦪꦡꦴ ‘‘ꦓꦠꦁ ꦥꦶꦮꦶꦠ꧀ꦮꦴ ꦧꦭꦁ ꦲꦺꦴꦠꦶ, ꦱꦷꦲꦁ ꦢꦶꦱ꧀ꦮꦴ ꦨꦪꦁ ꦲꦺꦴꦠꦷ’’ꦠꦶ. ꦢꦱ꧀ꦱꦤꦏꦴꦫꦟꦴ ꦲꦶ ꦌꦮꦁ ꦥꦫꦶꦮꦶꦠꦏ꧀ꦏꦤꦁ ꦄꦲꦺꦴꦱꦶ. ꦏꦶꦚ꧀ꦕꦴꦥꦶ ꦌꦠ꧀ꦡ ‘‘ꦨꦧ꧀ꦧꦏꦸꦭꦥꦸꦠ꧀ꦠꦱ꧀ꦱꦴ’’ꦠꦶ ꦮꦸꦠ꧀ꦠꦁ, ꦠꦡꦴꦥꦶ ꦈꦥꦤꦶꦱ꧀ꦱꦪꦱꦩ꧀ꦥꦤ꧀ꦤꦱ꧀ꦱꦥꦶ ꦄꦗꦴꦠꦱꦠ꧀ꦠꦸꦤꦺꦴ ꦮꦶꦪ ꦄꦤ꧀ꦠꦫꦴꦪꦺꦴ ꦨꦮꦶꦱ꧀ꦱꦠꦷꦠꦶ ꦆꦩꦱ꧀ꦱ ꦡꦺꦫꦱ꧀ꦱꦥꦶ ꦏꦠꦥꦴꦥꦏꦩ꧀ꦩꦩꦹꦭꦮꦶꦥ꧀ꦥꦛꦶꦱꦴꦫꦮꦱꦺꦤ ꦄꦣꦶꦒꦩꦤ꧀ꦠꦫꦴꦪꦺꦴ ꦄꦲꦺꦴꦱꦷꦠꦶ ꦮꦢꦤ꧀ꦠꦶ.

ꦏꦶꦁ ꦥꦤ ꦪꦺꦱꦁ ꦩꦒ꧀ꦒꦦꦭꦴꦤꦁ ꦈꦥꦤꦶꦱ꧀ꦱꦪꦺꦴ ꦄꦠ꧀ꦡꦶ, ꦧꦸꦢ꧀ꦣꦴꦤꦁ ꦱꦩ꧀ꦩꦸꦑꦷꦨꦴꦮꦺꦥꦶ ꦠꦺꦱꦁ ꦄꦤ꧀ꦠꦫꦴꦪꦺꦴ ꦲꦺꦴꦠꦷꦠꦶ? ꦄꦴꦩ ꦲꦺꦴꦠꦶ, ꦤ ꦥꦤ ꦧꦸꦢ꧀ꦣꦺ ꦥꦛꦶꦕ꧀ꦕ. ꦧꦸꦢ꧀ꦣꦴ ꦲꦶ ꦥꦫꦺꦱꦁ ꦩꦒ꧀ꦒꦦꦭꦴꦣꦶꦒꦩꦴꦪ ꦈꦱ꧀ꦱꦴꦲꦗꦴꦠꦴ ꦠꦠ꧀ꦡ ꦤꦶꦫꦤ꧀ꦠꦫꦁ ꦪꦸꦠ꧀ꦠꦥꦪꦸꦠ꧀ꦠꦴ ꦌꦮ ꦲꦺꦴꦤ꧀ꦠꦶ, ꦠꦱ꧀ꦩꦴ ꦠꦺ ꦥꦛꦶꦕ꧀ꦕ ꦠꦺꦱꦁ ꦄꦤ꧀ꦠꦫꦴꦪꦺꦴ ꦤ ꦲꦺꦴꦠꦶ, ꦄꦡ ꦑꦺꦴ ꦏꦶꦫꦶꦪꦴꦥꦫꦶꦲꦴꦤꦶꦪꦴ ꦮꦴ ꦥꦴꦥꦩꦶꦠ꧀ꦠꦠꦴꦪ ꦮꦴ ꦲꦺꦴꦠꦶ, ꦏꦶꦫꦶꦪꦴꦥꦫꦶꦲꦴꦤꦶ ꦕ ꦢꦺꦱꦏꦱ꧀ꦱ ꦠꦱ꧀ꦱꦺꦮ ꦮꦴ ꦥꦸꦒ꧀ꦒꦭꦱ꧀ꦱ ꦠꦗ꧀ꦗꦥꦪꦺꦴꦒꦴꦨꦴꦮꦠꦺꦴ ꦮꦺꦢꦶꦠꦧ꧀ꦧꦴ, ꦢꦺꦱꦏꦮꦱꦺꦤ ꦥꦤꦺꦠ꧀ꦡ ꦥꦫꦶꦲꦴꦤꦶ ꦱꦴꦮꦏꦴꦤꦁ ꦮꦱꦺꦤꦺꦮ ꦮꦺꦢꦶꦠꦧ꧀ꦧꦴ, ꦤ ꦧꦸꦢ꧀ꦣꦴꦤꦁ ꦮꦱꦺꦤ. ꦠꦡꦴ ꦲꦶ ꦱꦕꦺ ꦣꦩ꧀ꦩꦱꦺꦤꦴꦥꦠꦶ ꦣꦤꦚ꧀ꦗꦴꦤꦶꦪꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱ ꦄꦴꦱꦪꦁ ꦚꦠ꧀ꦮꦴ ꦣꦩ꧀ꦩꦁ ꦢꦺꦱꦪꦶꦱ꧀ꦱ, ꦧ꧀ꦫꦴꦲ꧀ꦩꦟꦺꦴ ꦱꦺꦴꦠꦴꦥꦤ꧀ꦤꦺꦴ ꦄꦨꦮꦶꦱ꧀ꦱ. ꦌꦮꦁ ꦠꦴꦮ ꦢꦺꦱꦏꦱ꧀ꦱ ꦮꦱꦺꦤ ꦏꦶꦫꦶꦪꦴꦥꦫꦶꦲꦴꦤꦶꦪꦴ ꦄꦤ꧀ꦠꦫꦴꦪꦺꦴ ꦲꦺꦴꦠꦶ. ꦱꦕꦺ ꦥꦺꦱ꧀ꦱꦺꦴ ꦲꦠ꧀ꦡꦴꦫꦺꦴꦲꦥꦸꦠ꧀ꦠꦺꦴ ꦨꦒꦮꦠꦺꦴ ꦱꦩ꧀ꦩꦸꦑꦴ ꦣꦩ꧀ꦩꦁ ꦱꦸꦟꦤ꧀ꦠꦺꦴ ꦩꦸꦲꦸꦠ꧀ꦠꦁ ꦤꦶꦱꦷꦢꦺꦪ꧀ꦪ, ꦪꦴꦮ ꦠꦱ꧀ꦱ ꦨꦒꦮꦴ ꦄꦠ꧀ꦠꦤ꧀ꦠꦥꦴꦢꦶꦏꦺ ꦕꦠ꧀ꦠꦴꦫꦺꦴ ꦥꦸꦒ꧀ꦒꦭꦺ ꦮꦶꦠ꧀ꦡꦴꦫꦺꦤ ꦮꦶꦨꦗꦶꦠ꧀ꦮꦴ ꦢꦺꦱꦺꦠꦶ, ꦱꦺꦴꦠꦴꦥꦠ꧀ꦠꦶꦦꦭꦺꦤ ꦱꦁꦪꦸꦠ꧀ꦠꦺꦴ ꦄꦨꦮꦶꦱ꧀ꦱ. ꦌꦮꦁ ꦥꦸꦒ꧀ꦒꦭꦱ꧀ꦱ ꦮꦱꦺꦤ ꦏꦶꦫꦶꦪꦴꦥꦫꦶꦲꦴꦤꦶꦪꦴ ꦄꦤ꧀ꦠꦫꦴꦪꦺꦴ ꦲꦺꦴꦠꦶ ꦤꦴꦩ. ꦆꦩꦱ꧀ꦱ ꦲꦶ ꦈꦥꦴꦱꦏꦱ꧀ꦱ ꦏꦶꦫꦶꦪꦴꦥꦫꦶꦲꦴꦤꦶ ꦗꦴꦠꦴ ꦄꦥꦫꦶꦤꦶꦛ꧀ꦜꦶꦠꦴꦪ ꦢꦺꦱꦤꦴꦪ ꦈꦛ꧀ꦜꦲꦶꦠ꧀ꦮꦴ ꦥꦏ꧀ꦏꦤ꧀ꦠꦠ꧀ꦠꦴ. ꦱꦕꦺ ꦄꦗꦴꦠꦱꦠ꧀ꦠꦸ ꦢꦺꦮꦢꦠ꧀ꦠꦱ꧀ꦱ ꦮꦕꦤꦁ ꦒꦲꦺꦠ꧀ꦮꦴ ꦥꦶꦠꦸꦓꦴꦠꦏꦩ꧀ꦩꦁ ꦤꦴꦏꦫꦶꦱ꧀ꦱ, ꦱꦴꦩꦚ꧀ꦚꦦꦭꦱꦸꦠ꧀ꦠꦏꦡꦶꦠꦢꦶꦮꦱꦺ ꦱꦺꦴꦠꦴꦥꦤ꧀ꦤꦺꦴ ꦄꦨꦮꦶꦱ꧀ꦱ, ꦠꦱ꧀ꦱ ꦮꦕꦤꦁ ꦒꦲꦺꦠ꧀ꦮꦴ ꦥꦶꦠꦸꦓꦴꦠꦏꦩ꧀ꦩꦱ꧀ꦱ ꦏꦠꦠ꧀ꦠꦴ ꦥꦤ ꦤꦴꦲꦺꦴꦱꦶ. ꦌꦮꦁ ꦥꦴꦥꦩꦶꦠ꧀ꦠꦠꦴꦪ ꦄꦤ꧀ꦠꦫꦴꦪꦺꦴ ꦲꦺꦴꦠꦶ. ꦱꦸꦢꦶꦤ꧀ꦤꦱ꧀ꦱꦥꦶ ꦥꦴꦥꦩꦶꦠ꧀ꦠꦮꦱꦺꦤ ꦄꦤ꧀ꦠꦫꦴꦪꦺꦴ ꦄꦲꦺꦴꦱꦷꦠꦶ ꦢꦛ꧀ꦜꦧ꧀ꦧꦁ. ꦪꦢꦶ ꦲꦶ ꦠꦺꦤ ꦩꦴꦠꦴꦥꦶꦠꦹꦤꦁ ꦮꦕꦤꦁ ꦒꦲꦺꦠ꧀ꦮꦴ ꦥꦸꦫꦴꦟꦢꦸꦠꦶꦪꦶꦏꦴꦪ ꦩꦺꦡꦸꦤꦣꦩ꧀ꦩꦺꦴ ꦥꦛꦶꦱꦺꦮꦶꦠꦺꦴ ꦤꦴꦨꦮꦶꦱ꧀ꦱ, ꦤ ꦠꦁꦩꦹꦭꦮꦶꦥ꧀ꦥꦛꦶꦱꦴꦫꦮꦱꦺꦤ ꦄꦣꦶꦒꦩꦤ꧀ꦠꦫꦴꦪꦺꦴ ꦄꦨꦮꦶꦱ꧀ꦱ.

ꦪꦤ꧀ꦤꦹꦤꦴꦠꦶ ꦥꦫꦶꦮꦶꦠꦏ꧀ꦏꦤꦠ꧀ꦡꦺ ꦤꦶꦥꦴꦠꦺꦴꦠꦶ ꦄꦴꦲ ‘‘ꦥꦫꦶꦮꦶꦠꦏ꧀ꦏꦢꦱ꧀ꦱꦤꦩꦺꦠ’’ꦤ꧀ꦠꦶ. ‘‘ꦣꦩ꧀ꦩꦁ ꦱꦸꦟꦺꦪ꧀ꦪ’’ꦤ꧀ꦠꦶ ꦏꦶꦫꦶꦪꦴꦥꦢꦺꦤ ꦮꦸꦕ꧀ꦕꦩꦴꦤꦺꦴ ꦌꦮ ꦲꦶ ꦄꦠ꧀ꦡꦺꦴ ‘‘ꦪꦤ꧀ꦤꦹꦤꦴ’’ꦠꦶ ꦤꦶꦥꦴꦠꦥꦢꦺꦤ ꦗꦺꦴꦠꦷꦪꦠꦶ. ꦄꦲꦁ ꦪꦤ꧀ꦤꦹꦤ ꦣꦩ꧀ꦩꦁ ꦱꦸꦟꦺꦪ꧀ꦪꦤ꧀ꦠꦶ ꦪꦺꦴꦗꦤꦴ. ꦪꦤ꧀ꦤꦹꦤꦴꦠꦶ ꦕ ꦪꦢꦶ ꦥꦤꦴꦠꦶ ꦄꦠ꧀ꦡꦺꦴ. ꦪꦢꦶ ꦥꦤꦴꦠꦶ ꦆꦢꦩ꧀ꦥꦶ ꦲꦶ ꦠꦺꦤ ꦱꦩꦴꦤꦠ꧀ꦡꦩꦺꦮ. ꦪꦁ ꦣꦩ꧀ꦩꦁ ꦱꦸꦟꦴꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦈꦭ꦳ꦴꦫꦸꦭ꦳ꦴꦫꦗꦤꦴꦠꦶ ꦑꦠ꧀ꦠꦶꦪꦩꦲꦴꦱꦴꦭꦴꦢꦶꦈꦭ꦳ꦴꦫꦸꦭ꦳ꦴꦫꦗꦤꦴꦏꦶꦟ꧀ꦟꦴ. ꦱꦕꦺ ꦄꦪꦩ꧀ꦥꦶ ꦥꦜꦩꦁ ꦄꦴꦒꦕ꧀ꦖꦺꦪ꧀ꦪ, ꦨꦒꦮꦤ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ꦤꦶꦱꦷꦢꦶꦠꦸꦁ ꦄꦫꦲꦫꦹꦥꦺꦴꦠꦶ ꦄꦴꦲ ‘‘ꦥꦕ꧀ꦖꦴ ꦄꦴꦒꦠꦺꦤꦴ’’ꦠꦶ. ꦱꦶꦏ꧀ꦑꦠ꧀ꦠꦪꦹꦥꦱꦁꦲꦶꦠꦤ꧀ꦠꦶ ꦄꦣꦶꦱꦷꦭꦄꦣꦶꦕꦶꦠ꧀ꦠꦄꦣꦶꦥꦚ꧀ꦚꦴꦱꦔ꧀ꦑꦴꦠꦱꦶꦏ꧀ꦑꦠ꧀ꦠꦪꦪꦸꦠ꧀ꦠꦁ. ꦡꦺꦴꦏꦁ ꦣꦩ꧀ꦩꦏꦡꦁ ꦱꦸꦠ꧀ꦮꦴ ꦄꦲꦺꦴꦱꦷꦠꦶ ꦱꦩ꧀ꦧꦤ꧀ꦣꦺꦴ. ꦆꦣꦴꦥꦶ ꦱꦸꦠ꧀ꦮꦴ-ꦱꦢ꧀ꦢꦺꦴ ꦲꦺꦠꦸꦄꦠ꧀ꦡꦺꦴꦠꦶ ꦢꦛ꧀ꦜꦧ꧀ꦧꦺꦴ, ꦱꦮꦤꦏꦴꦫꦟꦴ ꦌꦠꦢꦲꦺꦴꦱꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦪꦢꦶ ꦌꦮꦁ ꦄꦡ ꦏꦱ꧀ꦩꦴ ‘‘ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦱ꧀ꦱ…ꦥꦺ… ꦌꦠꦢꦲꦺꦴꦱꦷ’’ꦠꦶ ꦮꦸꦠ꧀ꦠꦤ꧀ꦠꦶ ꦄꦴꦲ ‘‘ꦠꦁ ꦥꦤꦱ꧀ꦱ ꦪꦱ꧀ꦩꦴ’’ꦠꦶꦄꦴꦢꦶ. ꦠꦠ꧀ꦡ ꦠꦤ꧀ꦠꦶ ꦥꦫꦶꦮꦶꦠꦏ꧀ꦏꦤꦁ.

ꦱꦔ꧀ꦑꦺꦥꦏꦡꦴꦠꦶ ꦮꦶꦱꦸꦁ ꦮꦶꦱꦸꦁ ꦥꦢꦸꦢ꧀ꦣꦴꦫꦁ ꦄꦏꦠ꧀ꦮꦴ ꦱꦩꦴꦱꦠꦺꦴ ꦄꦠ꧀ꦡꦮꦟ꧀ꦟꦤꦴ. ꦪꦺꦤ ꦪꦺꦤ ꦄꦴꦏꦴꦫꦺꦤꦴꦠꦶ ꦪꦺꦤ ꦪꦺꦤ ꦥꦏꦴꦫꦺꦤ. ꦠꦺꦤ ꦠꦺꦤ ꦩꦺ ꦈꦥꦥꦫꦶꦏ꧀ꦑꦠꦺꦴꦠꦶ ‘‘ꦏꦴꦩꦴ ꦤꦴꦩꦺꦠꦺ ꦄꦤꦶꦕ꧀ꦕꦴ ꦢꦸꦏ꧀ꦑꦴ ꦮꦶꦥꦫꦶꦟꦴꦩꦣꦩ꧀ꦩꦴ ꦄꦛ꧀ꦜꦶꦏꦔ꧀ꦏꦭꦹꦥꦩꦴ’’ꦠꦶ (ꦩ. ꦤꦶ. ꧑.꧒꧓꧔; ꧒.꧔꧒; ꦥꦴꦕꦶ. ꧔꧑꧗; ꦩꦲꦴꦤꦶ. ꧓; ꦕꦹꦭ꦳ꦤꦶ. ꦑꦒ꧀ꦒꦮꦶꦱꦴꦟꦱꦸꦠ꧀ꦠꦤꦶꦢ꧀ꦢꦺꦱ ꧑꧔꧗) ꦕ ꦄꦴꦢꦶꦤꦴ ꦪꦺꦤ ꦪꦺꦤ ꦄꦴꦏꦴꦫꦺꦤ ꦏꦴꦩꦺꦱꦸ ꦄꦴꦢꦷꦤꦮꦁ ꦎꦏꦴꦫꦁ ꦱꦁꦏꦶꦭꦺꦱꦁ, ꦠꦧ꧀ꦧꦶꦥꦫꦶꦪꦴꦪꦠꦺꦴ ꦤꦺꦏ꧀ꦑꦩ꧀ꦩꦺ ꦄꦴꦤꦶꦱꦁꦱꦁ ꦒꦸꦟꦁ ꦥꦏꦴꦱꦺꦤ꧀ꦠꦁ ꦨꦒꦮꦠꦴ ꦣꦩ꧀ꦩꦁ ꦢꦺꦱꦶꦠꦁ ꦄꦴꦗꦴꦤꦴꦩꦶ ꦄꦮꦧꦸꦗ꧀ꦙꦴꦩꦶ, ꦠꦺꦤ ꦠꦺꦤ ꦥꦏꦴꦫꦺꦤ ꦈꦥꦥꦫꦶꦏ꧀ꦑꦠꦺꦴ ꦮꦷꦩꦁꦱꦤ꧀ꦠꦱ꧀ꦱ ꦩꦪ꧀ꦲꦁ ꦌꦮꦁ ꦲꦺꦴꦠꦶ ꦌꦮꦁ ꦈꦥꦛ꧀ꦜꦴꦠꦶ. ꦱꦶꦏ꧀ꦑꦠ꧀ꦠꦪꦧ꧀ꦫꦲ꧀ꦩꦕꦫꦶꦪꦤ꧀ꦠꦶ ꦄꦣꦶꦱꦷꦭꦱꦶꦏ꧀ꦑꦴꦢꦶꦱꦶꦏ꧀ꦑꦠ꧀ꦠꦪꦱꦔ꧀ꦒꦲꦁ ꦱꦺꦛ꧀ꦜꦕꦫꦶꦪꦁ. ꦌꦏꦩ꧀ꦥꦶ ꦢꦶꦮꦱꦤ꧀ꦠꦶ ꦌꦏꦢꦶꦮꦱꦩꦠ꧀ꦠꦩ꧀ꦥꦶ. ꦄꦑꦟ꧀ꦝꦁ ꦏꦠ꧀ꦮꦴꦠꦶ ꦢꦸꦏ꧀ꦏꦛꦩꦠ꧀ꦠꦱ꧀ꦱꦥꦶ ꦄꦤꦴꦥꦗ꧀ꦗꦤꦺꦤ ꦄꦑꦟ꧀ꦝꦶꦠꦁ ꦏꦠ꧀ꦮꦴ, ꦄꦑꦟ꧀ꦝꦄꦕ꧀ꦖꦶꦢ꧀ꦢꦴꦢꦶꦨꦴꦮꦴꦥꦴꦢꦤꦺꦤ ꦮꦴ. ꦄꦑꦟ꧀ꦝꦭꦏ꧀ꦑꦟꦮꦕꦤꦚ꧀ꦲꦺꦠꦁ. ꦕꦫꦶꦩꦏꦕꦶꦠ꧀ꦠꦤ꧀ꦠꦶ ꦕꦸꦠꦶꦕꦶꦠ꧀ꦠꦁ. ꦏꦶꦚ꧀ꦕꦶꦥꦶ ꦌꦏꦢꦺꦱꦁ ꦄꦱꦺꦱꦺꦠ꧀ꦮꦴ ꦌꦏꦤ꧀ꦠꦺꦤꦺꦮ ꦥꦫꦶꦥꦹꦫꦺꦠꦧ꧀ꦧꦠꦴꦪ ꦌꦏꦤ꧀ꦠꦥꦫꦶꦥꦸꦟ꧀ꦟꦁ. ꦏꦶꦭꦺꦱꦩꦭꦺꦤ ꦄꦩꦭꦷꦤꦁ ꦏꦠ꧀ꦮꦴꦠꦶ ꦠꦟ꧀ꦲꦴꦱꦁꦏꦶꦭꦺꦱꦴꦢꦶꦤꦴ ꦄꦱꦁꦏꦶꦭꦶꦛ꧀ꦜꦁ ꦏꦠ꧀ꦮꦴ, ꦕꦶꦠ꧀ꦠꦸꦥ꧀ꦥꦴꦢꦩꦠ꧀ꦠꦩ꧀ꦥꦶ ꦱꦁꦏꦶꦭꦺꦱꦩꦭꦁ ꦄꦤꦸꦥ꧀ꦥꦴꦢꦺꦠ꧀ꦮꦴ. ꦄꦕ꧀ꦕꦤ꧀ꦠꦩꦺꦮ ꦮꦶꦱꦸꦢ꧀ꦣꦁ ꦏꦠ꧀ꦮꦴ ꦥꦫꦶꦲꦫꦶꦠꦧ꧀ꦧꦠꦴꦪ ꦌꦏꦤ꧀ꦠꦥꦫꦶꦱꦸꦢ꧀ꦣꦁ. ꦠꦠꦺꦴ ꦌꦮ ꦱꦔ꧀ꦑꦁ ꦮꦶꦪ ꦭꦶꦑꦶꦠꦤ꧀ꦠꦶ ꦱꦔ꧀ꦑꦭꦶꦑꦶꦠꦁ. ꦠꦺꦤꦴꦲ ‘‘ꦭꦶꦑꦶꦠꦱꦔ꧀ꦑꦱꦢꦶꦱ’’ꦤ꧀ꦠꦶ. ꦥꦫꦶꦪꦺꦴꦢꦴꦠꦛ꧀ꦜꦺꦤ ꦤꦶꦩ꧀ꦩꦭꦨꦴꦮꦺꦤ ꦱꦔ꧀ꦑꦁ ꦮꦶꦪ ꦭꦶꦑꦶꦠꦁ ꦣꦺꦴꦠꦤ꧀ꦠꦶ ꦱꦔ꧀ꦑꦭꦶꦑꦶꦠꦤ꧀ꦠꦶ ꦄꦴꦲ ‘‘ꦣꦺꦴꦠꦱꦔ꧀ꦑꦱꦥ꧀ꦥꦛꦶꦨꦴꦒ’’ꦤ꧀ꦠꦶ. ‘‘ꦄꦗ꧀ꦙꦴꦮꦱꦠꦴ’’ꦠꦶ ꦥꦢꦥ꧀ꦥꦪꦺꦴꦒꦺꦤ ꦄꦒꦴꦫꦤ꧀ꦠꦶ ꦨꦸꦩ꧀ꦩꦠ꧀ꦡꦺ ꦈꦥꦪꦺꦴꦒꦮꦕꦤꦤ꧀ꦠꦶ ꦄꦴꦲ ‘‘ꦄꦒꦴꦫꦩꦗ꧀ꦙꦺ’’ꦠꦶ. ꦢꦴꦜꦶꦏꦴꦥꦶ ꦩꦱ꧀ꦱꦸꦒ꧀ꦒꦲꦟꦺꦤꦺꦮ ꦒꦲꦺꦠ꧀ꦮꦴ ‘‘ꦩꦱ꧀ꦱꦸ’’ꦠ꧀ꦮꦺꦮ ꦮꦸꦠ꧀ꦠꦁ, ꦈꦠ꧀ꦠꦫꦴꦣꦫꦩꦱ꧀ꦱꦸꦤ꧀ꦠꦶ ꦄꦠ꧀ꦡꦺꦴ. ꦏꦱꦴꦪꦺꦤ ꦫꦠ꧀ꦠꦴꦤꦷꦠꦶ ꦏꦴꦱꦴꦪꦴꦤꦷꦠꦶ ꦄꦴꦲ ‘‘ꦏꦱꦴꦪꦫꦱꦥꦷꦠꦠꦴꦪꦴ’’ꦠꦶ. ꦥꦫꦶꦢꦲꦶꦠ꧀ꦮꦴꦠꦶ ꦤꦶꦮꦴꦱꦺꦠ꧀ꦮꦴ ꦕꦺꦮ ꦥꦴꦫꦸꦥꦶꦠ꧀ꦮꦴ ꦕ. ꦄꦒꦴꦫꦱ꧀ꦱ ꦲꦶꦠꦤ꧀ꦠꦶ ꦄꦒꦴꦫꦮꦴꦱꦺꦴ ꦄꦒꦴꦫꦁ ꦈꦠ꧀ꦠꦫꦥꦢꦭꦺꦴꦥꦺꦤ, ꦠꦱ꧀ꦱ ꦮꦝ꧀ꦞꦶꦄꦴꦮꦲꦁ ꦄꦒꦴꦫꦱ꧀ꦱ ꦲꦶꦠꦁ.

꧒꧕. ꦚꦴꦠꦶꦱꦴꦭꦺꦴꦲꦶꦠꦴꦠꦶꦄꦴꦢꦷꦱꦸ ‘‘ꦄꦪꦁ ꦄꦗ꧀ꦙꦠ꧀ꦠꦶꦏꦺꦴ’’ꦠꦶ ꦗꦴꦤꦤ꧀ꦠꦶ, ꦚꦴꦪꦤ꧀ꦠꦶ ꦮꦴꦠꦶ ꦚꦴꦠꦷ, ꦭꦺꦴꦲꦶꦠꦺꦤ ꦱꦩ꧀ꦧꦤ꧀ꦣꦴꦠꦶ ꦱꦴꦭꦺꦴꦲꦶꦠꦴ. ꦥꦶꦠꦸꦥꦏ꧀ꦑꦶꦏꦴ ꦚꦴꦠꦷ, ꦩꦴꦠꦸꦥꦏ꧀ꦑꦶꦏꦴ ꦱꦴꦭꦺꦴꦲꦶꦠꦴ. ꦩꦴꦠꦸꦥꦏ꧀ꦑꦶꦏꦴ ꦥꦶꦠꦸꦥꦏ꧀ꦑꦶꦏꦴ ꦮꦴ ꦚꦴꦠꦷ, ꦱꦱ꧀ꦱꦸꦱꦱꦸꦫꦥꦏ꧀ꦑꦶꦏꦴ ꦱꦴꦭꦺꦴꦲꦶꦠꦴ. ꦩꦶꦠ꧀ꦠꦴꦪꦤ꧀ꦠꦷꦠꦶ ꦩꦶꦠ꧀ꦠꦴ, ꦩꦶꦤꦤ꧀ꦠꦶ ꦮꦴ ꦱꦧ꧀ꦧꦒꦸꦪ꧀ꦲꦺꦱꦸ ꦄꦤ꧀ꦠꦺꦴ ꦥꦏ꧀ꦑꦶꦥꦤ꧀ꦠꦷꦠꦶ ꦩꦶꦠ꧀ꦠꦴ. ꦏꦶꦕ꧀ꦕꦏꦫꦟꦷꦪꦺꦱꦸ ꦱꦲꦨꦴꦮꦛ꧀ꦜꦺꦤ ꦄꦩꦴ ꦲꦺꦴꦤ꧀ꦠꦷꦠꦶ ꦄꦩꦕ꧀ꦕꦴ. ꦩꦩꦴꦪꦠꦷꦠꦶ ꦩꦴꦠꦴ, ꦥꦶꦪꦴꦪꦠꦷꦠꦶ ꦥꦶꦠꦴ. ꦱꦫꦷꦫꦏꦶꦕ꧀ꦕꦭꦺꦱꦺꦤꦴꦠꦶ ꦈꦕ꧀ꦕꦴꦫꦥꦱ꧀ꦱꦴꦮꦴꦢꦶꦱꦫꦷꦫꦏꦶꦕ꧀ꦕꦭꦺꦱꦺꦤ. ꦄꦤꦤꦸꦚ꧀ꦚꦴꦠꦁ ꦥꦸꦠ꧀ꦠꦁ ꦤ ꦥꦧ꧀ꦧꦴꦗꦺꦠꦷꦠꦶ ‘‘ꦩꦴꦠꦴꦥꦶꦠꦹꦤꦁ ꦭꦺꦴꦏꦶꦪꦩꦲꦴꦗꦤꦱ꧀ꦱ ꦕ ꦕꦶꦠ꧀ꦠꦚ꧀ꦚꦡꦠ꧀ꦠꦁ ꦩꦴ ꦲꦺꦴꦠꦹ’’ꦠꦶ ꦤ ꦥꦧ꧀ꦧꦴꦗꦺꦠꦶ. ꦠꦠꦺꦴꦪꦺꦮ ꦕ ꦱꦸꦢ꧀ꦣꦺꦴꦢꦤꦩꦲꦴꦫꦴꦗꦱ꧀ꦱ ꦠꦡꦴ ꦮꦫꦺꦴ ꦢꦶꦤ꧀ꦤꦺꦴ.

꧒꧖. ꦣꦸꦫꦤꦶꦏ꧀ꦑꦺꦥꦺꦤꦴꦠꦶ ꦨꦟ꧀ꦝꦥ꧀ꦥꦪꦺꦴꦗꦤꦴꦢꦷꦱꦸ ꦣꦸꦫꦤꦶꦏ꧀ꦑꦺꦥꦺꦤ. ꦠꦺꦤꦴꦲ ‘‘ꦤ ꦲꦷ’’ꦠꦶꦄꦴꦢꦶ. ꦥꦶꦪꦴꦪꦶꦠꦧ꧀ꦧꦺꦴꦠꦶ ꦥꦶꦪꦺꦴꦠꦶ ꦄꦴꦲ ‘‘ꦥꦷꦠꦶꦗꦤꦤꦏꦺꦴ’’ꦠꦶ. ꦩꦤꦱ꧀ꦱ ꦄꦥ꧀ꦥꦴꦪꦤꦠꦺꦴ ꦩꦤꦴꦥꦺꦴꦠꦶ ꦄꦴꦲ ‘‘ꦩꦤꦮꦝ꧀ꦞꦤꦏꦺꦴ’’ꦠꦶ. ꦱꦸꦑꦺꦣꦶꦠꦺꦴ ꦠꦫꦸꦟꦢꦴꦫꦏꦏꦴꦭꦺ, ꦠꦠꦺꦴ ꦥꦫꦚ꧀ꦕ ꦱꦥ꧀ꦥꦶꦑꦷꦫꦴꦢꦶꦱꦴꦢꦸꦫꦱꦩꦤꦸꦚ꧀ꦚꦨꦺꦴꦗꦤꦴꦢꦶꦄꦴꦲꦴꦫꦱꦩ꧀ꦥꦠ꧀ꦠꦶꦪꦴ ꦱꦸꦑꦥꦫꦶꦲꦠꦺꦴ. ꦄꦡ ꦮꦴ ꦢꦭ꦳꧀ꦲꦨꦠ꧀ꦠꦶꦏꦣꦴꦠꦶꦗꦤꦴꦢꦶꦥꦫꦶꦗꦤꦱꦩ꧀ꦥꦠ꧀ꦠꦶꦪꦴ ꦕꦺꦮ ꦥꦫꦶꦕ꧀ꦖꦺꦢꦱꦩ꧀ꦥꦠ꧀ꦠꦶꦪꦴ ꦕ ꦈꦭ꦳ꦴꦫꦥꦟꦷꦠꦱꦸꦑꦥꦕ꧀ꦕꦪꦹꦥꦲꦴꦫꦺꦲꦶ ꦕ ꦱꦸꦑꦺꦣꦶꦠꦺꦴ, ꦄꦏꦶꦕ꧀ꦖꦺꦤꦺꦮ ꦢꦸꦏ꧀ꦑꦥꦕ꧀ꦕꦪꦮꦶꦤꦺꦴꦢꦤꦺꦤ ꦱꦸꦑꦥꦫꦶꦲꦠꦺꦴ. ꦄꦗ꧀ꦙꦠ꧀ꦠꦶꦏꦔ꧀ꦒꦱꦩ꧀ꦥꦠ꧀ꦠꦶꦪꦴ ꦮꦴ ꦱꦸꦑꦺꦣꦶꦠꦺꦴ, ꦧꦴꦲꦶꦫꦔ꧀ꦒꦱꦩ꧀ꦥꦠ꧀ꦠꦶꦪꦴ ꦱꦸꦑꦥꦫꦶꦲꦠꦺꦴ.

ꦏꦶꦚ꧀ꦕꦷꦠꦶ ꦌꦠꦱ꧀ꦱ ꦮꦶꦮꦫꦟꦁ ‘‘ꦄꦥ꧀ꦥꦩꦠ꧀ꦠꦏꦩ꧀ꦥꦶ ꦏꦭꦨꦴꦒ’’ꦤ꧀ꦠꦶ. ꦪꦢꦴ ꦗꦴꦤꦴꦠꦶ-ꦱꦢ꧀ꦢꦺꦴ ꦧꦺꦴꦣꦤꦠ꧀ꦡꦺꦴ ꦤ ꦲꦺꦴꦠꦶ, ꦠꦢꦴ ꦠꦱ꧀ꦱ ꦥꦪꦺꦴꦒꦺ ‘‘ꦱꦥ꧀ꦥꦶꦤꦺꦴ ꦗꦴꦤꦴꦠꦶ, ꦩꦣꦸꦤꦺꦴ ꦗꦴꦤꦴꦠꦷ’’ꦠꦶꦄꦴꦢꦷꦱꦸ ꦮꦶꦪ ꦏꦫꦟꦠ꧀ꦡꦺ ꦱꦴꦩꦶꦮꦕꦤꦁ ꦱꦢ꧀ꦢꦠ꧀ꦡꦮꦶꦢꦹ ꦆꦕ꧀ꦖꦤ꧀ꦠꦷꦠꦶ ꦄꦴꦲ ‘‘ꦏꦶꦚ꧀ꦕꦶ ꦢꦸꦏ꧀ꦑꦺꦤ ꦤꦴꦤꦸꦨꦺꦴꦱꦷ’’ꦠꦶ. ꦠꦺꦤꦴꦲ ‘‘ꦏꦫꦟꦠ꧀ꦡꦺ ꦱꦴꦩꦶꦮꦕꦤꦁ, ꦄꦤꦸꦨꦮꦤꦠ꧀ꦡꦺ ꦕ ꦗꦴꦤꦤꦴ’’ꦠꦶ. ꦌꦠ꧀ꦡ ꦕ ꦏꦶꦚ꧀ꦕꦶ ꦢꦸꦏ꧀ꦑꦺꦤ ꦤꦴꦤꦸꦨꦺꦴꦱꦷꦠꦶ ꦏꦺꦤꦕꦶ ꦢꦸꦏ꧀ꦑꦺꦤ ꦏꦫꦟꦨꦹꦠꦺꦤ ꦮꦶꦱꦪꦁ ꦤꦴꦤꦸꦨꦺꦴꦱꦷꦠꦶ ꦌꦮꦩꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ‘‘ꦏꦶꦚ꧀ꦕꦷ’’ꦠꦶ ꦌꦠ꧀ꦡꦴꦥꦶ ꦲꦶ ꦏꦫꦟꦠ꧀ꦡꦺ ꦱꦴꦩꦶꦮꦕꦤꦱ꧀ꦱ ꦭꦺꦴꦥꦺꦴ ꦏꦠꦺꦴ. ꦠꦺꦤꦺꦮ ꦕ ꦮꦏ꧀ꦑꦠꦶ ‘‘ꦮꦶꦏꦥ꧀ꦥꦢ꧀ꦮꦪꦺꦥꦶ ꦥꦸꦫꦶꦩꦥꦢꦱ꧀ꦱ ꦈꦠ꧀ꦠꦫꦥꦢꦺꦤ ꦱꦩꦴꦤꦮꦶꦨꦠ꧀ꦠꦶꦭꦺꦴꦥꦺꦴ ꦢꦛ꧀ꦜꦧ꧀ꦧꦺꦴ’’ꦠꦶ. ꦪꦢꦴ ꦥꦤ ꦗꦴꦤꦴꦠꦶ-ꦱꦢ꧀ꦢꦺꦴ ꦱꦫꦟꦠ꧀ꦡꦺꦴ ꦲꦺꦴꦠꦶ, ꦠꦢꦴ ꦱꦫꦟꦠ꧀ꦡꦴꦤꦁ ꦣꦴꦠꦸꦱꦢ꧀ꦢꦴꦤꦁ ꦥꦪꦺꦴꦒꦺ ‘‘ꦩꦴꦠꦸ ꦱꦫꦠꦶ, ꦥꦶꦠꦸ ꦱꦫꦠꦶ, ꦨꦴꦠꦸ ꦗꦴꦤꦴꦠꦷ’’ꦠꦶꦄꦴꦢꦷꦱꦸ ꦮꦶꦪ ꦈꦥꦪꦺꦴꦒꦠ꧀ꦡꦺ ꦱꦴꦩꦶꦮꦕꦤꦁ ꦱꦢ꧀ꦢꦱꦠ꧀ꦡꦮꦶꦢꦹ ꦮꦢꦤ꧀ꦠꦷꦠꦶ ꦄꦴꦲ ‘‘ꦄꦡ ꦮꦴ ꦏꦶꦚ꧀ꦕꦶ ꦢꦸꦏ꧀ꦑꦁ ꦤꦱ꧀ꦱꦫꦱꦷꦠꦶ ꦄꦠ꧀ꦡꦺꦴ’’ꦠꦶ, ꦏꦱ꧀ꦱꦕꦶ ꦢꦸꦏ꧀ꦑꦱ꧀ꦱ ꦄꦤꦤꦸꦨꦹꦠꦠ꧀ꦠꦴ ꦄꦠ꧀ꦠꦤꦴ ꦄꦤꦸꦨꦹꦠꦁ ꦄꦥ꧀ꦥꦩꦠ꧀ꦠꦏꦩ꧀ꦥꦶ ꦢꦸꦏ꧀ꦑꦁ ꦥꦫꦶꦪꦺꦱꦩꦴꦤꦺꦴꦥꦶ ꦄꦨꦴꦮꦠꦺꦴꦪꦺꦮ ꦤꦱ꧀ꦱꦫꦱꦷꦠꦶ ꦄꦠ꧀ꦡꦺꦴ. ꦮꦶꦏꦥ꧀ꦥꦢ꧀ꦮꦪꦺꦥꦷꦠꦶ ꦄꦤꦸꦨꦮꦤꦱꦫꦟꦠ꧀ꦡꦮꦱꦺꦤ ꦮꦸꦠ꧀ꦠꦺ ꦢꦸꦠꦶꦪꦠꦠꦶꦪꦮꦶꦏꦥ꧀ꦥꦢ꧀ꦮꦪꦺ. ꦥꦸꦫꦶꦩꦥꦢꦱ꧀ꦱꦴꦠꦶ ‘‘ꦏꦶꦚ꧀ꦕꦷ’’ꦠꦶ ꦥꦢꦱ꧀ꦱ. ꦈꦠ꧀ꦠꦫꦥꦢꦺꦤꦴꦠꦶ ‘‘ꦢꦸꦏ꧀ꦑꦱ꧀ꦱꦴ’’ꦠꦶ ꦥꦢꦺꦤ. ꦱꦩꦴꦤꦮꦶꦨꦠ꧀ꦠꦶꦭꦺꦴꦥꦺꦴꦠꦶ ꦈꦠ꧀ꦠꦫꦥꦢꦺꦤ ꦱꦩꦴꦤꦱ꧀ꦱ ꦱꦴꦩꦶꦮꦕꦤꦱ꧀ꦱ ꦭꦺꦴꦥꦺꦴ. ‘‘ꦏꦱ꧀ꦱꦕꦶ ꦢꦸꦏ꧀ꦑꦱ꧀ꦱꦴ’’ꦠꦶ ꦮꦠ꧀ꦠꦧ꧀ꦧꦺ ꦮꦶꦏꦥ꧀ꦥꦢ꧀ꦮꦪꦺꦥꦶ ꦥꦸꦫꦶꦩꦥꦢꦺ ꦱꦴꦩꦶꦮꦕꦤꦱ꧀ꦱ ꦭꦺꦴꦥꦁ ꦏꦠ꧀ꦮꦴ ‘‘ꦏꦶꦚ꧀ꦕꦶ ꦢꦸꦏ꧀ꦑꦱ꧀ꦱꦴ’’ꦠꦶ ꦤꦶꦢ꧀ꦢꦺꦱꦺꦴ ꦏꦠꦺꦴ. ꦄꦤꦶꦕ꧀ꦖꦏꦴꦠꦶ ꦄꦤꦶꦕ꧀ꦖꦤ꧀ꦠꦴ. ꦌꦮꦁ ꦱꦤ꧀ꦠꦺꦠꦶ ꦤꦤꦸ ꦩꦪꦁ ꦱꦸꦢꦶꦤ꧀ꦤ ꦱꦴꦩꦴꦢꦷꦱꦸ ꦏꦺꦤꦕꦶꦥꦶ ꦈꦥꦴꦪꦺꦤ ꦄꦥ꧀ꦥꦛꦶꦱꦴꦣꦤꦺꦤ ꦄꦥ꧀ꦥꦛꦶꦏꦴꦫꦺꦤ ꦩꦫꦟꦺꦤꦥꦶ ꦠꦪꦴ ꦄꦏꦴꦩꦏꦴꦥꦶ ꦮꦶꦤꦴ ꦨꦮꦶꦱ꧀ꦱꦴꦩ, ꦌꦮꦁ ꦱꦠꦶ. ꦪꦺꦤꦴꦠꦶ ꦪꦺꦤ ꦏꦴꦫꦟꦺꦤ. ꦏꦶꦁ ꦥꦤꦴꦠꦶ ꦌꦠ꧀ꦡ ꦏꦶꦤ꧀ꦠꦶ ꦏꦫꦟꦠ꧀ꦡꦺ ꦥꦕ꧀ꦕꦠ꧀ꦠꦮꦕꦤꦤ꧀ꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦏꦺꦤ ꦥꦤ ꦏꦴꦫꦟꦺꦤꦴ’’ꦠꦶ.

꧒꧘. ꦒꦤ꧀ꦣꦧ꧀ꦧꦤꦛꦤꦴꦛꦏꦴꦢꦷꦤꦷꦠꦶ ꦌꦠ꧀ꦡ ꦒꦤ꧀ꦣꦧ꧀ꦧꦴ ꦤꦴꦩ ꦒꦴꦪꦤꦏꦴ, ꦤꦛꦴ ꦤꦴꦩ ꦫꦔ꧀ꦒꦤꦛꦴ, ꦤꦴꦛꦏꦴ ꦭꦔ꧀ꦓꦤꦏꦴꦢꦪꦺꦴ. ꦥꦫꦶꦕꦴꦫꦺꦲꦷꦠꦶ ꦌꦠ꧀ꦡ ꦥꦫꦶꦠꦺꦴ ꦠꦠ꧀ꦡ ꦠꦠ꧀ꦡ ꦪꦡꦴꦱꦏꦁ ꦮꦶꦱꦪꦺꦱꦸ ꦕꦴꦫꦺꦲꦷꦠꦶ ꦄꦠ꧀ꦡꦺꦴꦠꦶ ꦄꦴꦲ ‘‘ꦆꦤ꧀ꦢ꧀ꦫꦶꦪꦴꦤꦶ ꦕꦴꦫꦺꦲꦷ’’ꦠꦶꦄꦴꦢꦶ. ꦥꦫꦶꦕꦴꦫꦺꦲꦷꦠꦶ ꦮꦴ ꦱꦸꦑꦹꦥꦏꦫꦟꦺꦲꦶ ꦄꦠ꧀ꦠꦴꦤꦁ ꦥꦫꦶꦕꦴꦫꦺꦲꦶ ꦄꦠ꧀ꦠꦤꦺꦴ ꦥꦫꦶꦕꦫꦟꦁ ꦏꦴꦫꦺꦲꦶ. ꦠꦡꦴꦨꦹꦠꦺꦴ ꦕ ꦪꦱ꧀ꦩꦴ ꦭꦭ꦳ꦤ꧀ꦠꦺꦴ ꦏꦷꦭ꦳ꦤ꧀ꦠꦺꦴ ꦤꦴꦩ ꦲꦺꦴꦠꦶ, ꦠꦱ꧀ꦩꦴ ‘‘ꦭꦭ꦳ꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦨꦸꦚ꧀ꦗꦶꦠꦧ꧀ꦧꦠꦺꦴ ꦥꦫꦶꦨꦸꦚ꧀ꦗꦶꦠꦧ꧀ꦧꦠꦺꦴ ꦮꦶꦱꦺꦱꦠꦺꦴ ꦥꦚ꧀ꦕ ꦏꦴꦩꦒꦸꦟꦴ ꦨꦺꦴꦒꦴ ꦤꦴꦩꦴꦠꦶ ꦄꦴꦲ ‘‘ꦨꦺꦴꦒꦺ ꦨꦸꦚ꧀ꦗꦤ꧀ꦠꦺꦴ’’ꦠꦶ. ꦢꦴꦤꦥ꧀ꦥꦢꦴꦤꦴꦤꦷꦠꦶ ꦌꦠ꧀ꦡ ꦤꦶꦕ꧀ꦕꦢꦴꦤꦁ ꦢꦴꦤꦁ ꦤꦴꦩ, ꦈꦥꦺꦴꦱꦡꦢꦶꦮꦱꦴꦢꦷꦱꦸ ꦢꦴꦠꦧ꧀ꦧꦁ ꦄꦠꦶꦫꦺꦏꦢꦴꦤꦁ ꦥꦢꦴꦤꦁ ꦤꦴꦩ. ꦥꦮꦺꦟꦷꦫꦏ꧀ꦑꦟꦮꦱꦺꦤ ꦮꦴ ꦢꦷꦪꦩꦴꦤꦁ ꦢꦴꦤꦁ ꦤꦴꦩ, ꦄꦠ꧀ꦠꦤꦴꦮ ꦥꦛ꧀ꦜꦥꦺꦠ꧀ꦮꦴ ꦢꦷꦪꦩꦴꦤꦁ ꦥꦢꦴꦤꦁ ꦤꦴꦩ. ꦥꦕꦸꦫꦗꦤꦱꦴꦣꦴꦫꦟꦁ ꦮꦴ ꦤꦴꦠꦶꦈꦭ꦳ꦴꦫꦁ ꦢꦴꦤꦁ ꦤꦴꦩ, ꦄꦤꦚ꧀ꦚꦱꦴꦣꦴꦫꦟꦁ ꦄꦠꦶꦈꦭ꦳ꦴꦫꦁ ꦥꦢꦴꦤꦁ ꦤꦴꦩ. ꦄꦴꦢꦶ-ꦱꦢ꧀ꦢꦺꦤ ꦱꦷꦭꦴꦢꦷꦤꦶ ꦱꦔ꧀ꦒꦟ꧀ꦲꦴꦠꦶ. ꦤꦠ꧀ꦡꦶ ꦌꦠꦱ꧀ꦱ ꦮꦕꦤꦥ꧀ꦥꦛꦶꦮꦕꦤꦱꦔ꧀ꦑꦴꦠꦺꦴ ꦄꦴꦭꦴꦥꦱꦭ꧀ꦭꦴꦥꦺꦴꦠꦶ ꦤꦶꦫꦴꦭꦴꦥꦱꦭ꧀ꦭꦴꦥꦺꦴ.

꧓꧐. ꦧꦭꦁ ꦒꦴꦲꦺꦠ꧀ꦮꦴꦠꦶ ꦌꦠ꧀ꦡ ꦧꦭꦒ꧀ꦒꦲꦟꦁ ꦤꦴꦩ ꦏꦴꦪꦧꦭꦱ꧀ꦱ ꦈꦥ꧀ꦥꦴꦢꦤꦩꦺꦮꦴꦠꦶ ꦄꦴꦲ ‘‘ꦏꦴꦪꦧꦭꦁ ꦗꦤꦺꦠ꧀ꦮꦴ’’ꦠꦶ. ꦄꦱ꧀ꦱꦸꦩꦸꦑꦤ꧀ꦠꦶ ꦄꦱ꧀ꦱꦹꦤꦶ ꦩꦸꦑꦺ ꦌꦠꦱ꧀ꦱꦴꦠꦶ ꦄꦱ꧀ꦱꦸꦩꦸꦑꦺꦴ, ꦠꦁ ꦄꦱ꧀ꦱꦸꦩꦸꦑꦁ, ꦄꦱ꧀ꦱꦸꦏꦶꦭꦶꦤ꧀ꦤꦩꦸꦑꦤ꧀ꦠꦶ ꦄꦠ꧀ꦡꦺꦴ. ꦒꦴꦩꦺꦴꦪꦺꦮ ꦒꦴꦩꦤ꧀ꦠꦱꦺꦤꦴꦱꦤꦁ ꦒꦴꦩꦥꦫꦶꦪꦴꦥꦤ꧀ꦤꦠ꧀ꦠꦴ ꦒꦴꦩꦤ꧀ꦠꦱꦺꦤꦴꦱꦤꦱ꧀ꦱ. ꦄꦠꦶꦫꦺꦏꦭꦴꦨꦥꦛꦶꦏ꧀ꦑꦺꦥꦺꦤꦴꦠꦶ ‘‘ꦥꦶꦟ꧀ꦝꦶꦪꦴꦭꦺꦴꦥꦨꦺꦴꦗꦤꦁ ꦤꦶꦱ꧀ꦱꦴꦪꦴ’’ꦠꦶ (ꦩꦲꦴꦮ. ꧑꧒꧘) ꦌꦮꦁ ꦮꦸꦠ꧀ꦠꦨꦶꦏ꧀ꦑꦴꦲꦴꦫꦭꦴꦨꦠꦺꦴ ꦄꦣꦶꦏꦭꦴꦨꦺꦴ ꦱꦔ꧀ꦓꦨꦠ꧀ꦠꦴꦢꦶꦄꦠꦶꦫꦺꦏꦭꦴꦨꦺꦴ, ꦠꦱ꧀ꦱ ꦥꦛꦶꦏ꧀ꦑꦺꦥꦺꦤꦴꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦕꦸꦢ꧀ꦢꦱ ꦨꦠ꧀ꦠꦴꦤꦶ ꦥꦛꦶꦏ꧀ꦑꦶꦥꦶꦠ꧀ꦮꦴ’’ꦠꦶ. ꦱꦔ꧀ꦓꦨꦠ꧀ꦠꦁ ꦈꦢ꧀ꦢꦺꦱꦨꦠ꧀ꦠꦁ ꦤꦶꦩꦤ꧀ꦠꦤꦨꦠ꧀ꦠꦁ ꦱꦭꦴꦏꦨꦠ꧀ꦠꦁ ꦥꦏ꧀ꦑꦶꦏꦁ ꦈꦥꦺꦴꦱꦡꦶꦏꦁ ꦥꦴꦛꦶꦥꦢꦶꦏꦁ ꦄꦴꦒꦤ꧀ꦠꦸꦏꦨꦠ꧀ꦠꦁ ꦒꦩꦶꦏꦨꦠ꧀ꦠꦁ ꦒꦶꦭꦴꦤꦨꦠ꧀ꦠꦁ ꦒꦶꦭꦴꦤꦸꦥꦛ꧀ꦜꦴꦏꦨꦠ꧀ꦠꦁ ꦮꦶꦲꦴꦫꦨꦠ꧀ꦠꦁ ꦣꦸꦫꦨꦠ꧀ꦠꦁ ꦮꦴꦫꦨꦠ꧀ꦠꦤ꧀ꦠꦶ ꦆꦩꦴꦤꦶ ꦕꦸꦢ꧀ꦢꦱ ꦨꦠ꧀ꦠꦴꦤꦶ. ꦠꦠ꧀ꦡ ꦱꦏꦭꦱ꧀ꦱ ꦱꦔ꧀ꦓꦱ꧀ꦱ ꦢꦴꦠꦧ꧀ꦧꦁ ꦨꦠ꧀ꦠꦁ ꦱꦔ꧀ꦓꦨꦠ꧀ꦠꦁ. ꦏꦠꦶꦥꦪꦺ ꦨꦶꦏ꧀ꦑꦹ ꦈꦢ꧀ꦢꦶꦱꦶꦠ꧀ꦮꦴ ꦢꦴꦠꦧ꧀ꦧꦁ ꦨꦠ꧀ꦠꦁ ꦈꦢ꧀ꦢꦺꦱꦨꦠ꧀ꦠꦁ. ꦌꦏꦱ꧀ꦩꦶꦁ ꦥꦏ꧀ꦑꦺ ꦌꦏꦢꦶꦮꦱꦁ ꦢꦴꦠꦧ꧀ꦧꦁ ꦨꦠ꧀ꦠꦁ ꦥꦏ꧀ꦑꦶꦏꦁ. ꦈꦥꦺꦴꦱꦡꦺ ꦢꦴꦠꦧ꧀ꦧꦁ ꦨꦠ꧀ꦠꦁ ꦈꦥꦺꦴꦱꦡꦶꦏꦁ. ꦥꦴꦛꦶꦥꦢꦢꦶꦮꦱꦺ ꦢꦴꦠꦧ꧀ꦧꦁ ꦨꦠ꧀ꦠꦁ ꦥꦴꦛꦶꦥꦢꦶꦏꦁ. ꦮꦶꦲꦴꦫꦁ ꦈꦢ꧀ꦢꦶꦱ꧀ꦱ ꦢꦴꦠꦧ꧀ꦧꦁ ꦨꦠ꧀ꦠꦁ ꦮꦶꦲꦴꦫꦨꦠ꧀ꦠꦁ. ꦣꦸꦫꦒꦺꦲꦺꦪꦺꦮ ꦜꦥꦺꦠ꧀ꦮꦴ ꦢꦴꦠꦧ꧀ꦧꦁ ꦨꦠ꧀ꦠꦁ ꦣꦸꦫꦨꦠ꧀ꦠꦁ. ꦒꦴꦩꦮꦴꦱꦷꦄꦴꦢꦷꦲꦶ ꦮꦴꦫꦺꦤ ꦢꦴꦠꦧ꧀ꦧꦁ ꦨꦠ꧀ꦠꦁ ꦮꦴꦫꦨꦠ꧀ꦠꦁ.

ꦄꦡ ‘‘ꦒꦲꦥꦠꦶꦕꦷꦮꦫꦁ ꦥꦛꦶꦏ꧀ꦑꦶꦥꦶꦠ꧀ꦮꦴ’’ꦠꦶ ꦏꦱ꧀ꦩꦴ ꦮꦸꦠ꧀ꦠꦁ. ꦒꦲꦟꦺ ꦲꦶ ꦱꦠꦶ ꦥꦛꦶꦏ꧀ꦑꦺꦥꦺꦴ ꦪꦸꦗ꧀ꦗꦺꦪ꧀ꦪ, ꦤ ꦕ ꦥꦜꦩꦧꦺꦴꦣꦶꦪꦁ ꦒꦲꦥꦠꦶꦕꦷꦮꦫꦱ꧀ꦱ ꦥꦛꦶꦒ꧀ꦒꦲꦟꦁ ꦄꦤꦸꦚ꧀ꦚꦴꦠꦁ ꦥꦫꦠꦺꦴ ꦗꦷꦮꦏꦮꦠ꧀ꦡꦸꦱ꧀ꦩꦶꦁ ꦄꦤꦸꦚ꧀ꦚꦴꦠꦠ꧀ꦠꦴ. ꦠꦺꦤꦺꦮ ꦮꦏ꧀ꦑꦠꦶ ꦗꦷꦮꦏꦮꦠ꧀ꦡꦸꦱ꧀ꦩꦶꦁ (ꦩꦲꦴꦮ. ꦄꦛ꧀ꦜ. ꧓꧓꧗) ‘‘ꦨꦒꦮꦠꦺꦴ ꦲꦶ ꦧꦸꦢ꧀ꦣꦨꦴꦮꦥ꧀ꦥꦠ꧀ꦠꦶꦠꦺꦴ ꦥꦛ꧀ꦜꦴꦪ ꦪꦴꦮ ꦆꦢꦁ ꦮꦠ꧀ꦡꦁ, ꦌꦠ꧀ꦡꦤ꧀ꦠꦫꦺ ꦮꦷꦱꦠꦶ ꦮꦱ꧀ꦱꦴꦤꦶ ꦤ ꦏꦺꦴꦕꦶ ꦒꦲꦥꦠꦶꦕꦷꦮꦫꦁ ꦱꦴꦢꦶꦪꦶ, ꦱꦧ꧀ꦧꦺ ꦥꦁꦱꦸꦏꦹꦭꦶꦏꦴꦮ ꦄꦲꦺꦱꦸ’’ꦤ꧀ꦠꦶ. ꦱꦸꦢꦶꦤ꧀ꦤꦺꦴ ꦕ ꦥꦜꦩꦧꦺꦴꦣꦶꦪꦁꦪꦺꦮ ꦥꦧ꧀ꦧꦗꦶꦠꦺꦴ. ꦠꦺꦤꦺꦮ ꦮꦏ꧀ꦑꦠꦶ ‘‘ꦱꦸꦢꦶꦤ꧀ꦤꦺꦴ ꦲꦶ ꦨꦒꦮꦠꦺꦴ ꦢ꧀ꦮꦴꦢꦱꦩꦺ ꦮꦱ꧀ꦱꦺ ꦥꦧ꧀ꦧꦗꦶꦠꦺꦴ, ꦮꦷꦱꦠꦶꦩꦺ ꦮꦱ꧀ꦱꦺ ꦚꦴꦠꦶꦏꦸꦭꦁ ꦥꦶꦟ꧀ꦝꦴꦪ ꦥꦮꦶꦛ꧀ꦜꦺꦴ, ꦱꦪꦁ ꦥꦧ꧀ꦧꦗ꧀ꦗꦴꦪ ꦄꦛ꧀ꦜꦮꦱ꧀ꦱꦶꦏꦺꦴ ꦲꦸꦠ꧀ꦮꦴ’’ꦠꦶ. ꦠꦱ꧀ꦩꦴ ‘‘ꦒꦲꦥꦠꦶꦕꦷꦮꦫꦁ ꦥꦛꦶꦏ꧀ꦑꦶꦥꦶꦠ꧀ꦮꦴ’’ꦠꦶ ꦏꦱ꧀ꦩꦴ ꦮꦸꦠ꧀ꦠꦤ꧀ꦠꦶ? ꦮꦸꦕ꧀ꦕꦠꦺ – ꦄꦤꦤꦸꦚ꧀ꦚꦴꦠꦺꦥꦶ ꦒꦲꦥꦠꦶꦕꦷꦮꦫꦺ ꦥꦁꦱꦸꦏꦹꦭꦶꦏꦔ꧀ꦒꦱꦩꦴꦢꦴꦤꦮꦱꦺꦤ ꦒꦲꦥꦠꦶꦕꦷꦮꦫꦁ ꦥꦛꦶꦏ꧀ꦑꦶꦠ꧀ꦠꦁ ꦤꦴꦩ ꦲꦺꦴꦠꦷꦠꦶ ꦏꦠ꧀ꦮꦴ ꦮꦸꦠ꧀ꦠꦁ ‘‘ꦒꦲꦥꦠꦶꦕꦷꦮꦫꦁ ꦥꦛꦶꦏ꧀ꦑꦶꦥꦶꦠ꧀ꦮꦴ’’ꦠꦶ.

ꦭꦺꦴꦭꦸꦥ꧀ꦥꦕꦴꦫꦁ ꦥꦛꦶꦏ꧀ꦑꦶꦥꦶꦠ꧀ꦮꦴꦠꦶ ꦏꦸꦱꦭꦨꦟ꧀ꦝꦱ꧀ꦱ ꦨꦸꦱꦁ ꦮꦶꦭꦸꦩ꧀ꦥꦤꦛ꧀ꦜꦺꦤ ꦭꦺꦴꦭꦸꦥ꧀ꦥꦁ ꦮꦸꦕ꧀ꦕꦠꦶ ꦠꦟ꧀ꦲꦴ, ꦭꦺꦴꦭꦸꦥ꧀ꦥꦺꦤ ꦕꦫꦟꦁ ꦭꦺꦴꦭꦸꦥ꧀ꦥꦕꦴꦫꦺꦴ, ꦠꦟ꧀ꦲꦴꦮꦱꦺꦤ ꦓꦫꦥꦛꦶꦥꦴꦛꦶꦁ ꦄꦠꦶꦏ꧀ꦏꦩꦶꦠ꧀ꦮꦴ ꦨꦶꦏ꧀ꦑꦴꦪ ꦕꦫꦟꦁ, ꦠꦁ ꦥꦛꦶꦏ꧀ꦑꦶꦥꦶꦠ꧀ꦮꦴꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦓꦫꦥꦛꦶꦥꦴꦛꦶꦪꦴ ꦨꦶꦏ꧀ꦑꦴꦪ ꦥꦮꦶꦱꦠꦷ’’ꦠꦶ. ꦌꦠ꧀ꦡ ꦕ ꦄꦴꦫꦚ꧀ꦚꦶꦏꦔ꧀ꦒꦴꦢꦶꦥꦣꦴꦤꦔ꧀ꦒꦮꦱꦺꦤ ꦱꦺꦱꦣꦸꦠꦔ꧀ꦒꦴꦤꦶꦥꦶ ꦒꦲꦶꦠꦴꦤꦺꦮ ꦲꦺꦴꦤ꧀ꦠꦷꦠꦶ ꦮꦺꦢꦶꦠꦧ꧀ꦧꦁ. ꦮꦗ꧀ꦗꦷꦤꦤ꧀ꦠꦶ ꦫꦴꦗꦴꦤꦺꦴ ꦄꦥꦺꦏ꧀ꦑꦶꦠ꧀ꦮꦴ ꦱꦴꦩꦶꦮꦕꦤꦁ ꦏꦠꦁ, ꦮꦗ꧀ꦗꦷꦫꦴꦗꦹꦤꦤ꧀ꦠꦶ ꦄꦠ꧀ꦡꦺꦴ. ꦗꦤꦥꦢ-ꦱꦢ꧀ꦢꦱ꧀ꦱ ꦠꦁꦤꦶꦮꦴꦱꦷꦱꦸꦥꦶ ꦥꦮꦠ꧀ꦠꦤꦠꦺꦴ ‘‘ꦮꦗ꧀ꦗꦷꦱꦹ’’ꦠꦶ ꦗꦤꦥꦢꦴꦥꦺꦏ꧀ꦑꦁ ꦨꦸꦩ꧀ꦩꦮꦕꦤꦁ, ꦮꦗ꧀ꦗꦶꦤꦴꦩꦏꦺ ꦗꦤꦥꦢꦺꦠꦶ ꦄꦠ꧀ꦡꦺꦴ.

ꦈꦥꦨꦺꦴꦒꦥꦫꦶꦨꦺꦴꦒꦹꦥꦏꦫꦟꦩꦲꦤ꧀ꦠꦠꦴꦪꦴꦠꦶ ꦥꦚ꧀ꦕꦏꦴꦩꦒꦸꦟꦱꦔ꧀ꦑꦴꦠꦴꦤꦁ ꦈꦥꦨꦺꦴꦒꦴꦤꦚ꧀ꦕꦺꦮ ꦲꦠ꧀ꦡꦶꦄꦱ꧀ꦱꦫꦡꦆꦠ꧀ꦡꦶꦪꦴꦢꦶꦈꦥꦨꦺꦴꦒꦹꦥꦏꦫꦟꦴꦤꦚ꧀ꦕ ꦩꦲꦤ꧀ꦠꦠꦴꦪ. ꦈꦥꦨꦺꦴꦒꦹꦥꦏꦫꦟꦴꦤꦺꦮ ꦲꦶ ꦆꦣ ꦥꦫꦶꦨꦺꦴꦒꦹꦥꦏꦫꦟꦱꦢ꧀ꦢꦺꦤ ꦮꦸꦠ꧀ꦠꦴꦤꦶ. ꦠꦺꦤꦺꦮꦴꦲ ‘‘ꦪꦺ ꦲꦶ ꦠꦺꦱꦁ ꦈꦥꦨꦺꦴꦒꦴ, ꦪꦴꦤꦶ ꦕ ꦈꦥꦨꦺꦴꦒꦹꦥꦏꦫꦟꦴꦤꦶ, ꦠꦴꦤꦶ ꦩꦲꦤ꧀ꦠꦴꦤꦷ’’ꦠꦶ. ‘‘ꦈꦥꦨꦺꦴꦒꦴ ꦲꦠ꧀ꦡꦶꦄꦱ꧀ꦱꦫꦡꦆꦠ꧀ꦡꦷꦄꦴꦢꦪꦺꦴ, ꦈꦥꦨꦺꦴꦒꦹꦥꦏꦫꦟꦴꦤꦶ ꦠꦺꦱꦩꦺꦮ ꦱꦸꦮꦟ꧀ꦟꦴꦢꦶꦈꦥꦏꦫꦟꦴꦤꦷ’’ꦠꦶꦥꦶ ꦮꦢꦤ꧀ꦠꦶ. ꦱꦴꦫꦏꦴꦤꦷꦠꦶ ꦱꦴꦫꦨꦹꦠꦴꦤꦶ. ꦤꦶꦣꦺꦠ꧀ꦮꦴꦠꦶ ꦤꦶꦢꦲꦶꦠ꧀ꦮꦴ, ꦤꦶꦣꦴꦤꦁ ꦏꦠ꧀ꦮꦴꦠꦶ ꦄꦠ꧀ꦡꦺꦴ. ꦢꦶꦮꦱꦥꦫꦶꦧ꧀ꦧꦪꦱꦔ꧀ꦑꦴꦠꦨꦺꦴꦒꦩꦲꦤ꧀ꦠꦠꦴꦪꦴꦠꦶ ꦢꦶꦮꦱꦺ ꦢꦶꦮꦱꦺ ꦥꦫꦶꦨꦸꦚ꧀ꦗꦶꦠꦧ꧀ꦧꦱꦔ꧀ꦑꦴꦠꦨꦺꦴꦒꦴꦤꦁ ꦩꦲꦤ꧀ꦠꦠꦴꦪ. ꦗꦴꦠꦫꦹꦥꦫꦗꦠꦱ꧀ꦱꦺꦮ ꦥꦲꦹꦠꦠꦴꦪꦴꦠꦶ ꦥꦶꦟ꧀ꦝꦥꦶꦟ꧀ꦝꦮꦱꦺꦤ ꦕꦺꦮ ꦱꦸꦮꦟ꧀ꦟꦩꦴꦱꦏꦫꦗꦠꦩꦴꦱꦏꦴꦢꦶꦮꦱꦺꦤ ꦕ ꦗꦴꦠꦫꦹꦥꦫꦗꦠꦱ꧀ꦱꦺꦮ ꦥꦲꦹꦠꦠꦴꦪ. ꦮꦶꦠ꧀ꦠꦷꦠꦶ ꦠꦸꦛ꧀ꦜꦶ, ꦮꦶꦠ꧀ꦠꦶꦪꦴ ꦈꦥꦏꦫꦟꦁ ꦮꦶꦠ꧀ꦠꦹꦥꦏꦫꦟꦁ, ꦥꦲꦹꦠꦁ ꦤꦴꦤꦴꦮꦶꦣꦴꦭꦔ꧀ꦏꦴꦫꦨꦹꦠꦁ ꦮꦶꦠ꧀ꦠꦹꦥꦏꦫꦟꦩꦺꦠꦺꦱꦤ꧀ꦠꦶ ꦥꦲꦹꦠꦮꦶꦠ꧀ꦠꦹꦥꦏꦫꦟꦴ. ꦠꦺꦤꦴꦲ ‘‘ꦄꦭꦔ꧀ꦏꦴꦫꦨꦹꦠꦱ꧀ꦱꦴ’’ꦠꦶꦄꦴꦢꦶ. ꦮꦺꦴꦲꦴꦫꦮꦱꦺꦤꦴꦠꦶ ꦮꦟꦶꦗ꧀ꦗꦴꦮꦱꦺꦤ ꦮꦝ꧀ꦞꦶꦏꦠꦴꦢꦶꦮꦱꦺꦤ. ꦣꦤꦣꦚ꧀ꦚꦱ꧀ꦱ ꦥꦲꦹꦠꦠꦴꦪꦴꦠꦶ ꦱꦠ꧀ꦠꦫꦠꦤꦱꦔ꧀ꦑꦴꦠꦱ꧀ꦱ ꦣꦤꦱ꧀ꦱ ꦱꦧ꧀ꦧꦥꦸꦧ꧀ꦧꦟ꧀ꦟꦴꦥꦫꦟ꧀ꦟꦱꦔ꧀ꦒꦲꦶꦠꦱ꧀ꦱ ꦣꦚ꧀ꦚꦱ꧀ꦱ ꦕ ꦥꦲꦹꦠꦠꦴꦪꦴꦠꦶ ꦄꦠ꧀ꦡꦺꦴ. ꦠꦠ꧀ꦡ ‘‘ꦱꦸꦮꦟ꧀ꦟꦫꦗꦠꦩꦟꦶꦩꦸꦠ꧀ꦠꦴꦮꦺꦭ꦳ꦸꦫꦶꦪꦮꦗꦶꦫꦥꦮꦴꦭ꦳ꦴꦤꦶ ꦱꦠ꧀ꦠ ꦫꦠꦤꦴꦤꦷ’’ꦠꦶ ꦮꦢꦤ꧀ꦠꦶ. ꦱꦴꦭꦶꦮꦷꦲꦶꦄꦴꦢꦶ ꦥꦸꦧ꧀ꦧꦟ꧀ꦟꦁ ꦥꦸꦫꦏ꧀ꦑꦠꦁ ꦱꦱ꧀ꦱꦦꦭꦤ꧀ꦠꦶ ꦏꦠ꧀ꦮꦴ, ꦠꦧ꧀ꦧꦶꦥꦫꦶꦪꦴꦪꦠꦺꦴ ꦩꦸꦒ꧀ꦒꦩꦴꦱꦴꦢꦶ ꦄꦥꦫꦟ꧀ꦟꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦈꦏ꧀ꦏꦛ꧀ꦜꦥꦶꦟ꧀ꦝꦥꦴꦠꦶꦏꦠ꧀ꦠꦴꦠꦶ ꦱꦺꦱꦣꦸꦠꦔ꧀ꦒꦥꦫꦶꦮꦴꦫꦶꦠꦺꦤ ꦈꦏ꧀ꦏꦛ꧀ꦜꦥꦶꦟ꧀ꦝꦥꦴꦠꦣꦸꦠꦔ꧀ꦒꦺꦤ ꦱꦩꦤ꧀ꦤꦴꦒꦠꦠ꧀ꦠꦴ. ꦠꦺꦤꦴꦲ ‘‘ꦱꦥꦢꦴꦤꦕꦴꦫꦁ ꦕꦫꦶꦠꦸꦏꦴꦩꦺꦴ’’ꦠꦶ.

꧓꧑. ꦄꦤ꧀ꦠꦺꦴꦗꦴꦠꦠꦴꦪ ꦮꦴ ꦚꦴꦠꦶꦱꦢꦶꦱꦷ ꦢꦴꦱꦷꦠꦶ ꦚꦴꦠꦶꦢꦴꦱꦷ. ꦥꦹꦠꦶꦨꦴꦮꦺꦤꦺꦮ ꦭꦏ꧀ꦑꦶꦠꦧ꧀ꦧꦢꦺꦴꦱꦺꦴ ꦮꦴ ꦄꦴꦨꦶꦢꦺꦴꦱꦶꦏꦺꦴ, ꦄꦨꦶꦢꦺꦴꦱꦁ ꦮꦴ ꦥꦕ꧀ꦕꦹꦱꦏꦴꦭꦁ ꦒꦠꦺꦴ ꦥꦠ꧀ꦠꦺꦴ ꦄꦠꦶꦏ꧀ꦏꦤ꧀ꦠꦺꦴꦠꦶ ꦄꦴꦨꦶꦢꦺꦴꦱꦶꦏꦺꦴ. ꦠꦺꦤꦴꦲ ‘‘ꦌꦏꦫꦠ꧀ꦠꦴꦠꦶꦏ꧀ꦏꦤ꧀ꦠꦱ꧀ꦱ ꦮꦴ’’ꦠꦶꦄꦴꦢꦶ. ꦥꦹꦠꦶꦨꦹꦠꦨꦴꦮꦺꦤ ꦥꦫꦶꦨꦺꦴꦒꦁ ꦤꦴꦫꦲꦠꦷꦠꦶ ꦄꦥꦫꦶꦨꦺꦴꦒꦴꦫꦲꦺꦴ. ꦖꦝ꧀ꦝꦤꦷꦪꦱꦨꦴꦮꦺ ꦤꦶꦕ꧀ꦖꦶꦠꦺꦥꦶ ꦥꦸꦕ꧀ꦖꦴꦏꦴꦭꦺ ꦱꦤ꧀ꦢꦺꦲꦮꦺꦴꦲꦴꦫꦮꦱꦺꦤꦺꦮ ꦥꦸꦕ꧀ꦖꦶꦠꦸꦁ ꦪꦸꦠ꧀ꦠꦤ꧀ꦠꦶ ꦄꦴꦲ ‘‘ꦱꦕꦺ’’ꦠꦶ. ꦄꦫꦶꦪꦮꦺꦴꦲꦴꦫꦺꦤꦴꦠꦶ ꦄꦫꦶꦪꦱꦩꦸꦢꦴꦕꦴꦫꦺꦤ. ꦄꦫꦶꦪꦴ ꦲꦶ ꦩꦴꦠꦸꦒꦴꦩꦁ ꦨꦒꦶꦤꦶꦮꦴꦢꦺꦤ ꦱꦩꦸꦢꦴꦕꦫꦤ꧀ꦠꦶ. ꦤꦶꦱ꧀ꦱꦛ꧀ꦜꦥꦫꦶꦒ꧀ꦒꦲꦤ꧀ꦠꦶ ꦥꦫꦶꦕ꧀ꦕꦠ꧀ꦠꦴꦭꦪꦁ.

‘‘ꦄꦴꦏꦶꦫꦴ’’ꦠꦶ ꦮꦸꦠ꧀ꦠꦠ꧀ꦠꦴ ‘‘ꦮꦶꦚ꧀ꦚꦠ꧀ꦠꦶ ꦮꦴ’’ꦠꦶ ꦮꦸꦠ꧀ꦠꦁ, ‘‘ꦱꦕꦺ ꦠꦁ ꦖꦝ꧀ꦝꦤꦷꦪꦣꦩ꧀ꦩ’’ꦤ꧀ꦠꦶ ꦥꦫꦶꦪꦴꦪꦁ ꦄꦩꦸꦚ꧀ꦕꦶꦠ꧀ꦮꦴ ꦮꦸꦠ꧀ꦠꦠ꧀ꦠꦴ ‘‘ꦥꦪꦸꦠ꧀ꦠꦮꦴꦕꦴ ꦮꦴ’’ꦠꦶ ꦮꦸꦠ꧀ꦠꦁ, ꦥꦕ꧀ꦕꦪꦥꦛꦶꦱꦁꦪꦸꦠ꧀ꦠꦴ ꦮꦴꦕꦴ ꦥꦪꦸꦠ꧀ꦠꦮꦴꦕꦴ. ꦮꦠ꧀ꦠꦸꦁ ꦮꦛ꧀ꦛꦠꦷꦠꦶ ꦤꦶꦫꦥꦺꦏ꧀ꦑꦨꦴꦮꦠꦺꦴ ꦮꦸꦠ꧀ꦠꦁ, ꦆꦣ ꦥꦤ ꦮꦶꦱꦺꦱꦠꦺꦴ ꦄꦥꦫꦶꦨꦺꦴꦒꦴꦫꦲꦠ꧀ꦠꦴꦮ ꦮꦠ꧀ꦡꦸꦤꦺꦴ. ꦄꦒ꧀ꦒꦄꦫꦶꦪꦮꦁꦱꦶꦏꦺꦴꦠꦶ ꦄꦫꦶꦪꦮꦁꦱꦥꦛꦶꦥꦠ꧀ꦠꦶꦥꦹꦫꦏꦴꦤꦁ ꦄꦒ꧀ꦒꦺꦴ ꦈꦠ꧀ꦠꦩꦺꦴ. ꦤꦶꦩꦷꦪꦠꦶ ꦱꦚ꧀ꦚꦴꦪꦠꦷꦠꦶ ꦤꦶꦩꦶꦠ꧀ꦠꦁ, ꦪꦡꦴꦱꦭ꧀ꦭꦏ꧀ꦑꦶꦠꦺꦴ ꦄꦴꦏꦴꦫꦺꦴꦠꦶ ꦄꦴꦲ ‘‘ꦒꦶꦲꦶꦏꦴꦭꦺ ꦱꦭ꧀ꦭꦏ꧀ꦑꦶꦠꦥꦸꦧ꧀ꦧꦁ ꦄꦴꦏꦴꦫ’’ꦤ꧀ꦠꦶ. ꦲꦠ꧀ꦡꦥꦶꦛ꧀ꦜꦶꦄꦴꦢꦷꦤꦶ ꦎꦭꦺꦴꦏꦪꦩꦴꦤꦴ ‘‘ꦱꦴꦩꦶꦥꦸꦠ꧀ꦠꦱ꧀ꦱ ꦩꦺ ꦱꦸꦢꦶꦤ꧀ꦤꦱ꧀ꦱ ꦮꦶꦪ ꦱꦸꦮꦟ꧀ꦟꦏꦕ꧀ꦖꦥꦥꦶꦛ꧀ꦜꦶꦱꦢꦶꦱꦴ ꦆꦩꦴ ꦲꦠ꧀ꦡꦥꦴꦢꦥꦶꦛ꧀ꦜꦶꦪꦺꦴ, ꦲꦫꦶꦠꦴꦭꦮꦛ꧀ꦛꦶꦪꦺꦴ ꦮꦶꦪ ꦱꦸꦮꦛ꧀ꦛꦶꦠꦴ ꦄꦔ꧀ꦒꦸꦭꦶꦪꦺꦴ, ꦩꦣꦸꦫꦺꦴ ꦱꦫꦺꦴ’’ꦠꦶ ꦒꦶꦲꦶꦏꦴꦭꦺ ꦱꦭ꧀ꦭꦏ꧀ꦑꦶꦠꦥꦸꦧ꧀ꦧꦁ ꦄꦴꦏꦴꦫꦁ ꦄꦒ꧀ꦒꦲꦺꦱꦶ ꦱꦚ꧀ꦗꦴꦤꦶ ꦱꦭ꧀ꦭꦏ꧀ꦑꦺꦱꦶ. ꦏꦱ꧀ꦩꦴ ꦥꦤ ꦱꦴ ꦚꦴꦠꦶꦢꦴꦱꦷ ꦢꦶꦱ꧀ꦮꦴꦮ ꦤ ꦱꦚ꧀ꦗꦴꦤꦷꦠꦶ ꦄꦴꦲ ‘‘ꦱꦸꦢꦶꦤ꧀ꦤꦺꦴ ꦲꦷ’’ꦠꦶꦄꦴꦢꦶ. ꦥꦧ꧀ꦧꦗ꧀ꦗꦸꦥꦒꦠꦺꦤꦴꦠꦶ ꦥꦧ꧀ꦧꦗ꧀ꦗꦁ ꦈꦥꦒꦠꦺꦤ, ꦥꦧ꧀ꦧꦗꦶꦠꦺꦤꦴꦠꦶ ꦄꦠ꧀ꦡꦺꦴ. ꦓꦫꦁ ꦥꦮꦶꦱꦶꦠ꧀ꦮꦴꦠꦶ ꦒꦺꦲꦱꦴꦩꦶꦤꦶꦪꦴ ꦤꦶꦱꦷꦢꦶꦠꦧ꧀ꦧꦛ꧀ꦜꦴꦤꦨꦹꦠꦁ ꦄꦤ꧀ꦠꦺꦴꦒꦺꦲꦁ ꦥꦮꦶꦱꦶꦠ꧀ꦮꦴ. ꦪꦒ꧀ꦓꦺꦠꦶ ꦆꦩꦱ꧀ꦱ ꦄꦴꦫꦺꦴꦕꦪꦴꦩꦷꦠꦶ ꦄꦪꦩꦠ꧀ꦡꦺꦴꦠꦶ ꦄꦴꦲ ‘‘ꦄꦴꦫꦺꦴꦕꦤꦠ꧀ꦡꦺ ꦤꦶꦥꦴꦠꦺꦴ’’ꦠꦶ. ‘‘ꦪꦒ꧀ꦓꦺ ꦗꦴꦤꦺꦪ꧀ꦪꦴꦱꦷꦠꦶ ꦱꦸꦛ꧀ꦜꦸ ꦗꦴꦤꦺꦪ꧀ꦪꦴꦱꦷ’’ꦠꦶꦥꦶ ꦄꦠ꧀ꦡꦁ ꦮꦢꦤ꧀ꦠꦶ. ꦄꦴꦭꦥꦤꦺꦠꦶ ꦢꦴꦱꦶꦗꦤꦱ꧀ꦱ ꦄꦴꦭꦥꦤꦺ. ꦠꦺꦤꦴꦲ ‘‘ꦌꦮꦚ꧀ꦲꦷ’’ꦠꦶꦄꦴꦢꦶ.

꧓꧒. ꦓꦫꦺꦱꦸ ꦱꦴꦭꦴ ꦲꦺꦴꦤ꧀ꦠꦷꦠꦶ ꦓꦫꦺꦱꦸ ꦌꦏꦩꦤ꧀ꦠꦺ ꦨꦺꦴꦗꦤꦱꦴꦭꦴ ꦲꦺꦴꦤ꧀ꦠꦶ ꦥꦴꦏꦴꦫꦥꦫꦶꦏ꧀ꦑꦶꦠ꧀ꦠꦴ ꦱꦸꦱꦁꦮꦶꦲꦶꦠꦢ꧀ꦮꦴꦫꦧꦤ꧀ꦣꦴ ꦱꦸꦱꦩ꧀ꦩꦛ꧀ꦜꦮꦴꦭꦶꦏꦔ꧀ꦒꦟꦴ. ꦈꦢꦏꦏꦚ꧀ꦗꦶꦪꦤ꧀ꦠꦶ ꦈꦢꦏꦚ꧀ꦕ ꦏꦚ꧀ꦗꦶꦪꦚ꧀ꦕ. ꦏꦱ꧀ꦩꦴ ꦥꦤ ꦇꦢꦶꦱꦴꦪꦩꦺꦮ ꦱꦴꦭꦴꦪ ꦄꦚ꧀ꦚꦠꦫꦁ ꦏꦸꦛ꧀ꦛꦩꦹꦭꦤ꧀ꦠꦶ ꦄꦪꦩꦠ꧀ꦡꦺꦴ ꦮꦸꦠ꧀ꦠꦺꦴꦠꦶ ꦄꦴꦲ ‘‘ꦤ ꦲꦶ ꦥꦧ꧀ꦧꦗꦶꦠꦴ’’ꦠꦶꦄꦴꦢꦶ. ꦄꦱꦴꦫꦸꦥ꧀ꦥꦺ ꦜꦴꦤꦺꦠꦶ ꦨꦶꦏ꧀ꦑꦹꦤꦁ ꦄꦤꦤꦸꦕ꧀ꦖꦮꦶꦏꦺ ꦥꦢꦺꦱꦺ. ꦄꦠ꧀ꦡꦶ ꦤꦸ ꦑꦺꦴꦠꦶ ꦤꦸ-ꦱꦢ꧀ꦢꦺꦴ ꦥꦸꦕ꧀ꦖꦤꦠ꧀ꦡꦺ, ꦑꦺꦴ-ꦱꦢ꧀ꦢꦺꦴ ꦮꦕꦤꦱꦶꦭꦶꦛ꧀ꦜꦠꦴꦪ ꦮꦸꦠ꧀ꦠꦺꦴ. ꦤꦸꦑꦺꦴꦠꦶ ꦮꦴ ꦤꦶꦥꦴꦠꦱꦩꦸꦢꦴꦪꦺꦴ ꦥꦸꦕ꧀ꦖꦤꦠ꧀ꦡꦺꦴ. ꦠꦺꦤ ꦤꦴꦩ-ꦱꦢ꧀ꦢꦱ꧀ꦱ ꦥꦸꦕ꧀ꦖꦤꦠ꧀ꦡꦠꦁ ꦢꦱ꧀ꦱꦺꦠꦶ. ꦪꦺꦱꦁ ꦤꦺꦴ ꦠ꧀ꦮꦤ꧀ꦠꦶ ꦪꦺꦱꦁ ꦤꦺꦴ ꦥꦸꦠ꧀ꦠꦺꦴ ꦠ꧀ꦮꦁ. ꦇꦢꦶꦱꦺ ꦜꦴꦤꦺꦠꦶ ꦏꦶꦚ꧀ꦕꦴꦥꦶ ꦠꦁ ꦜꦴꦤꦁ ꦨꦶꦏ꧀ꦑꦹꦤꦁ ꦄꦤꦤꦸꦫꦹꦥꦁ ꦤ ꦲꦺꦴꦠꦶ, ꦠꦡꦴꦥꦶ ꦩꦴꦢꦶꦱꦴꦤꦁ ꦩꦲꦴꦨꦺꦴꦒꦏꦸꦭꦴꦤꦁ ꦥꦸꦠ꧀ꦠꦱ꧀ꦱ ꦥꦫꦏꦸꦭꦺ ꦄꦴꦱꦤꦱꦴꦭꦴꦪꦁ ꦤꦶꦱꦷꦢꦶꦠ꧀ꦮꦴ ꦨꦺꦴꦗꦤꦁ ꦤꦴꦩ ꦄꦪꦸꦠ꧀ꦠꦫꦹꦥꦤ꧀ꦠꦶ ꦩꦚ꧀ꦚꦩꦴꦤꦺꦴ ꦄꦴꦲ. ꦠꦺꦤꦺꦮꦴꦲ ‘‘ꦤꦤꦸ ꦤꦴꦩ, ꦠꦴꦠ ꦱꦸꦢꦶꦤ꧀ꦤ, ꦱꦏꦁ ꦒꦺꦲꦁ ꦒꦤ꧀ꦠꦧ꧀ꦧ’’ꦤ꧀ꦠꦶ. ꦄꦚ꧀ꦚꦺꦤꦥꦶ ꦥꦏꦴꦫꦺꦤ ꦤꦴꦩꦱꦢ꧀ꦢꦱ꧀ꦱ ꦥꦸꦕ꧀ꦖꦤꦠ꧀ꦡꦠꦩꦺꦮ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦠꦡꦴ ꦄꦠ꧀ꦡꦶ ꦤꦸ ꦑꦺꦴ ꦠꦴꦠꦴ’’ꦠꦶꦄꦴꦢꦶ. ꦠꦡꦴꦠꦶ ꦱꦩꦸꦕ꧀ꦕꦪꦠ꧀ꦡꦺꦴ. ꦆꦢꦴꦤꦶ ꦤꦴꦩꦱꦢ꧀ꦢꦱ꧀ꦱ ꦩꦚ꧀ꦚꦤꦠ꧀ꦡꦠꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦠꦡꦴ ꦄꦠ꧀ꦡꦶ ꦩꦚ꧀ꦚꦺ’’ꦠꦶꦄꦴꦢꦶ.

ꦢꦸꦏ꧀ꦑꦴꦨꦶꦠꦸꦤ꧀ꦤꦠꦴꦪꦴꦠꦶ ꦩꦴꦤꦱꦶꦏꦺꦤ ꦢꦸꦏ꧀ꦑꦺꦤ ꦄꦨꦶꦥꦷꦭ꦳ꦶꦠꦠ꧀ꦠꦴ. ꦌꦠꦩꦠ꧀ꦡꦤ꧀ꦠꦶ ‘‘ꦄꦠ꧀ꦡꦶ ꦤꦸ ꦑꦺꦴ, ꦠꦴꦠ ꦱꦸꦢꦶꦤ꧀ꦤ, ꦄꦩ꧀ꦲꦴꦏꦁ ꦣꦤ’’ꦤ꧀ꦠꦶꦄꦴꦢꦶꦤꦴ ꦪꦡꦴꦮꦸꦠ꧀ꦠꦩꦠ꧀ꦡꦁ. ꦄꦤꦺꦴꦏꦥ꧀ꦥꦤꦴꦩꦫꦶꦱꦤꦠ꧀ꦡꦮꦱꦺꦤꦴꦠꦶ ꦌꦠ꧀ꦡ ꦄꦤꦺꦴꦏꦥ꧀ꦥꦤꦁ ꦄꦱꦢ꧀ꦢꦲꦤꦁ. ꦄꦩꦫꦶꦱꦤꦁ ꦄꦱꦲꦤꦁ. ꦄꦤꦴꦒꦠꦮꦕꦤꦁ ꦄꦤꦴꦒꦠꦱꦢ꧀ꦢꦥ꧀ꦥꦪꦺꦴꦒꦺꦴ, ꦄꦠ꧀ꦡꦺꦴ ꦥꦤ ꦮꦠ꧀ꦠꦩꦴꦤꦏꦴꦭꦶꦏꦺꦴꦮ. ꦠꦺꦤꦴꦲ ‘‘ꦥꦕ꧀ꦕꦏ꧀ꦑꦩ꧀ꦥꦷ’’ꦠꦶ. ꦤ ꦩꦫꦶꦱꦪꦴꦩꦷꦠꦶ ꦤ ꦮꦶꦱꦲꦴꦩꦶ. ꦠꦁ ꦤ ꦱꦸꦤ꧀ꦢꦫꦤ꧀ꦠꦶ ‘‘ꦠꦢꦴꦪ’’ꦤ꧀ꦠꦶ ꦥꦴꦜꦁ ꦱꦤ꧀ꦣꦴꦪꦴꦲ. ꦄꦭꦁ, ꦒꦲꦥꦠꦶ, ꦏꦠꦁ ꦩꦺ ꦄꦗ꧀ꦗ ꦨꦠ꧀ꦠꦏꦶꦕ꧀ꦕꦤ꧀ꦠꦶ ꦡꦺꦫꦺꦴ ꦈꦏ꧀ꦏꦛ꧀ꦜꦌꦏꦴꦱꦤꦶꦏꦠꦴꦪ ꦥꦛꦶꦏ꧀ꦑꦶꦥꦤ꧀ꦠꦺꦴ ꦌꦮꦩꦴꦲ. ꦈꦏ꧀ꦏꦛ꧀ꦜꦌꦏꦴꦱꦤꦶꦏꦠꦴꦪꦴꦠꦶ ꦕ ꦆꦢꦁ ꦨꦹꦠꦏꦡꦤꦮꦱꦺꦤ ꦮꦸꦠ꧀ꦠꦁ ꦡꦺꦫꦱ꧀ꦱ ꦠꦡꦴꦨꦴꦮꦢꦷꦥꦤꦠ꧀ꦡꦁ. ꦩꦸꦢꦸꦏꦱ꧀ꦱꦥꦶ ꦲꦶ ꦌꦏꦴꦱꦤꦶꦏꦱ꧀ꦱ ꦪꦴꦪ ꦤꦶꦱꦗ꧀ꦗꦴꦪ ꦏꦶꦚ꧀ꦕꦶꦩꦠ꧀ꦠꦩ꧀ꦥꦶ ꦨꦺꦴꦗꦤꦁ ꦨꦸꦠ꧀ꦠꦁ, ꦮꦠ꧀ꦠꦱꦷꦱꦺꦤꦥꦶ ꦠꦠꦺꦴ ꦮꦸꦛ꧀ꦜꦶꦠꦱ꧀ꦱ ꦥꦸꦤ ꦨꦸꦚ꧀ꦗꦶꦠꦸꦁ ꦤ ꦮꦛ꧀ꦛꦠꦶ. ꦠꦺꦤꦴꦲ ꦠꦶꦥꦶꦛꦏꦕꦹꦭ꦳ꦴꦨꦪꦠ꧀ꦡꦺꦫꦺꦴ ‘‘ꦄꦴꦱꦤꦁ ꦮꦴ ꦫꦏ꧀ꦑꦺꦪ꧀ꦪ ꦨꦺꦴꦗꦤꦁ ꦮꦴ’’ꦠꦶ. ꦈꦏ꧀ꦏꦛ꧀ꦜꦥꦶꦟ꧀ꦝꦥꦴꦠꦶꦏꦺꦴꦥꦶ ꦱꦩꦴꦤꦺꦴꦠꦶ ꦤꦶꦢꦱ꧀ꦱꦤꦩꦠ꧀ꦠꦩꦶꦢꦁ, ꦡꦺꦫꦺꦴ ꦱꦥꦢꦴꦤꦕꦴꦫꦶꦏꦺꦱꦸꦥꦶ ꦈꦏ꧀ꦏꦛ꧀ꦜꦺꦴꦪꦺꦮ. ꦈꦏ꧀ꦏꦛ꧀ꦜꦱꦥꦢꦴꦤꦕꦴꦫꦶꦏꦺꦴꦥꦶ ꦲꦶ ꦥꦸꦫꦠꦺꦴ ꦕ ꦥꦕ꧀ꦖꦠꦺꦴ ꦕ ꦄꦴꦲꦛꦨꦶꦏ꧀ꦑꦩ꧀ꦥꦶ ꦄꦒ꧀ꦒꦲꦺꦠ꧀ꦮꦴꦮ ꦓꦫꦢ꧀ꦮꦴꦫꦺ ꦜꦠ꧀ꦮꦴ ꦥꦠ꧀ꦠꦮꦶꦱ꧀ꦱꦗ꧀ꦗꦤꦩꦺꦮ ꦏꦫꦺꦴꦠꦶ, ꦠꦱ꧀ꦩꦴ ꦡꦺꦫꦺꦴ ꦈꦏ꧀ꦏꦛ꧀ꦜꦱꦥꦢꦴꦤꦕꦴꦫꦶꦏꦠ꧀ꦠꦴꦥꦶ ꦱ꧀ꦮꦴꦠꦤꦴꦪ ꦨꦶꦏ꧀ꦑꦁ ꦤꦴꦣꦶꦮꦴꦱꦺꦠꦶ. ꦄꦡ ꦏꦱ꧀ꦩꦴ ‘‘ꦄꦣꦶꦮꦴꦱꦺꦱꦷ’’ꦠꦶ ꦄꦴꦲ ‘‘ꦱꦕꦺ ꦌꦏꦨꦠ꧀ꦠꦩ꧀ꦥꦶ ꦤ ꦒꦲꦺꦱ꧀ꦱꦴꦩꦷ’’ꦠꦶꦄꦴꦢꦶ. ꦥꦟ꧀ꦝꦶꦠꦴ ꦲꦶ ꦩꦴꦠꦴꦥꦶꦠꦹꦤꦁ ꦄꦴꦕꦫꦶꦪꦸꦥꦗ꧀ꦙꦴꦪꦴꦤꦁ ꦮꦴ ꦏꦴꦠꦧ꧀ꦧꦁ ꦄꦤꦸꦒ꧀ꦒꦲꦁ ꦄꦗ꧀ꦙꦸꦥꦺꦏ꧀ꦑꦶꦠ꧀ꦮꦴ ꦣꦸꦠꦔ꧀ꦒꦮꦶꦱꦸꦢ꧀ꦣꦶꦏꦴ ꦤ ꦨꦮꦤ꧀ꦠꦶ.

꧓꧓. ꦩꦗ꧀ꦙꦶꦩꦥ꧀ꦥꦩꦴꦟꦺꦴꦠꦶ ꦕꦠꦸꦲꦠ꧀ꦡꦺꦴ ꦥꦸꦫꦶꦱꦺꦴ ꦩꦗ꧀ꦙꦶꦩꦥ꧀ꦥꦩꦴꦟꦺꦴ. ‘‘ꦖꦲꦠ꧀ꦡꦺꦴ’’ꦠꦶꦥꦶ ꦏꦺꦕꦶ. ꦠꦶꦫꦺꦴ ꦏꦫꦺꦴꦤ꧀ꦠꦶ ꦌꦠꦴꦪꦴꦠꦶ ꦠꦶꦫꦺꦴꦏꦫꦟꦷꦠꦶ ꦱꦴꦟꦶꦥꦴꦏꦴꦫꦮꦕꦤꦺꦴ ꦄꦪꦁ ꦠꦶꦫꦺꦴꦏꦫꦟꦷ-ꦱꦢ꧀ꦢꦺꦴꦠꦶ ꦄꦴꦲ ‘‘ꦠꦶꦫꦺꦴꦏꦫꦟꦶꦪꦤ꧀ꦠꦶ ꦏꦫꦟꦠ꧀ꦡꦺ ꦨꦸꦩ꧀ꦩ’’ꦤ꧀ꦠꦶ. ‘‘ꦠꦶꦫꦺꦴꦏꦫꦟꦶꦪꦴ’’ꦠꦶ ꦮꦠ꧀ꦠꦧ꧀ꦧꦺ ‘‘ꦠꦶꦫꦺꦴꦏꦫꦟꦶꦪ’’ꦤ꧀ꦠꦶ ꦏꦫꦟꦠ꧀ꦡꦺ ꦨꦸꦩ꧀ꦩꦁ ꦮꦸꦠ꧀ꦠꦁ. ꦠꦶꦫꦺꦴꦏꦫꦟꦷꦪ-ꦱꦢ꧀ꦢꦺꦴ ꦮꦴ ꦄꦪꦁ ꦱꦴꦟꦶꦥꦴꦏꦴꦫꦥꦫꦶꦪꦴꦪꦺꦴꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦄꦡ ꦮꦴ’’ꦠꦶꦄꦴꦢꦶ. ꦠꦁ ꦥꦫꦶꦏ꧀ꦑꦶꦥꦶꦠ꧀ꦮꦴꦠꦶ ꦠꦁ ꦱꦩꦤ꧀ꦠꦠꦺꦴ ꦑꦶꦥꦶꦠ꧀ꦮꦴ, ꦥꦫꦶꦠꦺꦴ ꦧꦤ꧀ꦣꦶꦠ꧀ꦮꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦠꦺꦤꦴꦲ ‘‘ꦱꦩꦤ꧀ꦠꦠꦺꦴ ꦏꦠ꧀ꦮꦴ’’ꦠꦶ. ꦮꦶꦨꦠ꧀ꦠꦶꦥꦠꦶꦫꦹꦥꦏꦺꦴꦥꦶ ꦤꦶꦥꦴꦠꦺꦴ ꦲꦺꦴꦠꦷꦠꦶ ꦄꦴꦲ ‘‘ꦠꦺꦤꦴꦠꦶ ꦄꦪꦩ꧀ꦥꦶ ꦮꦴ’’ꦠꦶꦄꦴꦢꦶ.

꧓꧔. ‘‘ꦄꦡ ꦑꦺꦴ ꦄꦴꦪꦱ꧀ꦩꦠꦺꦴ ꦱꦸꦢꦶꦤ꧀ꦤꦱ꧀ꦱ ꦥꦶꦠꦴ ꦱꦏꦺ ꦤꦶꦮꦺꦱꦤꦺ ꦥꦟꦷꦠꦁ ꦑꦴꦢꦤꦷꦪꦁ ꦨꦺꦴꦗꦤꦷꦪꦁ ꦥꦛꦶꦪꦴꦢꦴꦥꦺꦠ꧀ꦮꦴ ꦄꦴꦪꦱ꧀ꦩꦠꦺꦴ ꦱꦸꦢꦶꦤ꧀ꦤꦱ꧀ꦱ ꦏꦴꦭꦁ ꦄꦴꦫꦺꦴꦕꦺꦱꦶ – ‘ꦏꦴꦭꦺꦴ, ꦠꦴꦠ ꦱꦸꦢꦶꦤ꧀ꦤ, ꦤꦶꦛ꧀ꦜꦶꦠꦁ ꦨꦠ꧀ꦠ’ꦤ꧀ꦠꦶ’’ ꦌꦮꦁ ꦏꦴꦭꦴꦫꦺꦴꦕꦤꦱ꧀ꦱ ꦥꦴꦭ꦳ꦶꦪꦁ ꦄꦤꦴꦫꦸꦭ꦳꧀ꦲꦠ꧀ꦠꦴ ꦄꦴꦲ – ‘‘ꦏꦶꦚ꧀ꦕꦴꦥꦶ ꦥꦴꦭ꦳ꦶꦪꦁ ꦏꦴꦭꦴꦫꦺꦴꦕꦤꦁ ꦤ ꦮꦸꦠ꧀ꦠ’’ꦤ꧀ꦠꦶ. ꦄꦴꦫꦺꦴꦕꦶꦠꦺꦪꦺꦮ ꦏꦴꦭꦺꦠꦶ ‘‘ꦏꦴꦭꦺꦴ, ꦠꦴꦠ ꦱꦸꦢꦶꦤ꧀ꦤ, ꦤꦶꦛ꧀ꦜꦶꦠꦁ ꦨꦠ꧀ꦠ’’ꦤ꧀ꦠꦶ ꦏꦴꦭꦺ ꦄꦴꦫꦺꦴꦕꦶꦠꦺꦪꦺꦮ. ꦢ꧀ꦮꦺ ꦥꦸꦚ꧀ꦗꦺꦠꦶ ꦏꦲꦴꦥꦟꦥꦸꦚ꧀ꦗꦚ꧀ꦕ ꦱꦸꦮꦟ꧀ꦟꦥꦸꦚ꧀ꦗꦚ꧀ꦕ.

ꦥꦺꦠ꧀ꦠꦶꦏꦤ꧀ꦠꦶ ꦥꦶꦠꦶꦠꦺꦴ ꦄꦴꦒꦠꦁ ꦥꦺꦠ꧀ꦠꦶꦏꦁ. ꦤꦶꦲꦶꦠꦤ꧀ꦠꦶ ꦨꦹꦩꦶꦒꦠꦁ. ꦥꦪꦸꦠ꧀ꦠꦤ꧀ꦠꦶ ꦮꦝ꧀ꦞꦶꦮꦱꦺꦤ ꦥꦪꦺꦴꦗꦶꦠꦁ. ꦠꦢ꧀ꦣꦶꦠꦭꦺꦴꦥꦁ ꦏꦠ꧀ꦮꦴ ꦮꦺꦢꦶꦠꦧ꧀ꦧꦤ꧀ꦠꦶ ꦪꦡꦴ ꦄꦚ꧀ꦚꦠ꧀ꦡꦴꦥꦶ ‘‘ꦥꦶꦠꦴꦩꦲꦁ ꦣꦤꦁ ꦭꦢ꧀ꦣꦴ, ꦱꦸꦑꦁ ꦗꦷꦮꦠꦶ ꦱꦚ꧀ꦗꦪꦺꦴ’’ꦠꦶ ꦮꦸꦠ꧀ꦠꦁ, ꦌꦮꦁ ꦠꦢ꧀ꦣꦶꦠꦭꦺꦴꦥꦁ ꦏꦠ꧀ꦮꦴ ꦮꦸꦠ꧀ꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦥꦶꦠꦴꦩꦲꦠꦺꦴ ꦄꦴꦒꦠꦁ, ꦥꦶꦠꦴꦩꦲꦱ꧀ꦱ ꦮꦴ ꦆꦢꦁ ꦥꦺꦠꦴꦩꦲꦁ. ꦥꦧ꧀ꦧꦗꦶꦠꦭꦶꦔ꧀ꦒꦤ꧀ꦠꦶ ꦱꦩꦟꦮꦺꦱꦁ. ꦤ ꦫꦴꦗꦨꦷꦠꦺꦴꦠꦶ ꦄꦥꦫꦴꦣꦏꦴꦫꦟꦴ ꦤ ꦫꦴꦗꦏꦸꦭꦴ ꦨꦷꦠꦺꦴ. ꦪꦺꦱꦁ ꦱꦤ꧀ꦠꦏꦁ ꦣꦤꦁ ꦒꦲꦶꦠꦁ, ꦠꦺ ꦆꦟꦴꦪꦶꦏꦴ. ꦥꦭꦶꦧꦸꦢ꧀ꦣꦺꦴ ꦥꦷꦭ꦳ꦶꦠꦺꦴ.

ꦮꦶꦨꦠ꧀ꦠꦶꦥꦠꦶꦫꦹꦥꦏꦺꦴꦠꦶ ‘‘ꦠꦺꦤꦴ’’ꦠꦶ ꦥꦢꦁ ꦱꦤ꧀ꦣꦴꦪꦴꦲ. ꦠꦁꦤꦶꦢꦴꦤꦤ꧀ꦠꦶ ꦠꦁ ꦣꦤꦁ ꦤꦶꦢꦴꦤꦁ ꦏꦴꦫꦟꦩꦱ꧀ꦱꦴꦠꦶ ꦠꦁꦤꦶꦢꦴꦤꦁ. ꦄꦱ꧀ꦱꦴꦠꦶ ꦥꦕ꧀ꦕꦠ꧀ꦠꦮꦕꦤꦱ꧀ꦱ, ꦥꦢꦱ꧀ꦱ ꦮꦴ. ꦨꦪꦤ꧀ꦠꦶ ꦕꦶꦠ꧀ꦠꦱ꧀ꦱ ꦈꦠ꧀ꦫꦱ꧀ꦠꦴꦏꦴꦫꦺꦤ ꦥꦮꦠ꧀ꦠꦨꦪꦁ ꦄꦣꦶꦥ꧀ꦥꦺꦠꦁ, ꦤ ꦚꦴꦟꦨꦪꦁ, ꦤꦴꦥꦶ ‘‘ꦨꦴꦪꦠꦶ ꦌꦠꦱ꧀ꦩꦴ’’ꦠꦶ ꦌꦮꦁ ꦮꦸꦠ꧀ꦠꦁ ꦄꦴꦫꦩ꧀ꦩꦟꦨꦪꦤ꧀ꦠꦶ ꦄꦴꦲ ‘‘ꦕꦶꦠ꧀ꦠꦸꦠ꧀ꦫꦴꦱꦺꦴꦠꦶ ꦄꦠ꧀ꦡꦺꦴ’’ꦠꦶ. ꦖꦩ꧀ꦨꦶꦠꦠ꧀ꦠꦤ꧀ꦠꦶ ꦠꦺꦤꦺꦮ ꦕꦶꦠ꧀ꦠꦸꦠ꧀ꦫꦴꦱꦨꦪꦺꦤ ꦱꦏꦭꦱꦫꦷꦫꦱ꧀ꦱ ꦖꦩ꧀ꦨꦶꦠꦨꦴꦮꦺꦴ. ꦮꦶꦱꦺꦱꦠꦺꦴ ꦥꦤ ꦲꦢꦪꦩꦁꦱꦕꦭꦤꦤ꧀ꦠꦶ ꦄꦴꦲ ‘‘ꦏꦴꦪꦏꦩ꧀ꦥꦺꦴ ꦲꦢꦪꦩꦁꦱꦕꦭꦤ’’ꦤ꧀ꦠꦶ. ꦭꦺꦴꦩꦲꦁꦱꦺꦴꦠꦶ ꦠꦺꦤ ꦨꦪꦺꦤ ꦠꦺꦤ ꦖꦩ꧀ꦨꦶꦠꦠ꧀ꦠꦺꦤ ꦱꦏꦭꦱꦫꦷꦫꦭꦺꦴꦩꦴꦤꦁ ꦲꦛ꧀ꦜꦨꦴꦮꦺꦴ, ꦱꦺꦴ ꦥꦤ ꦤꦺꦱꦁ ꦨꦶꦠ꧀ꦠꦶꦪꦁ ꦤꦴꦒꦢꦤ꧀ꦠꦴꦤꦁ ꦮꦶꦪ ꦈꦢ꧀ꦣꦁꦩꦸꦑꦠꦴꦠꦶ ꦄꦴꦲ ‘‘ꦭꦺꦴꦩꦴꦤꦁ ꦲꦁꦱꦤꦁ ꦈꦢ꧀ꦣꦒ꧀ꦒꦨꦴꦮꦺꦴ’’ꦠꦶ.

꧓꧕. ꦄꦠ꧀ꦠꦤꦴꦠꦶ ꦥꦕ꧀ꦕꦠ꧀ꦠꦺ ꦏꦫꦟꦮꦕꦤꦁ, ꦱꦪꦤ꧀ꦠꦶ ꦄꦠ꧀ꦡꦺꦴ. ꦢꦺꦮꦕ꧀ꦖꦫꦴꦤꦤ꧀ꦠꦶ ꦄꦤꦕ꧀ꦕꦤ꧀ꦠꦶꦪꦺꦴ ꦱꦤ꧀ꦣꦴꦪꦴꦲ. ꦢꦺꦮꦤꦴꦛꦏꦴꦤꦤ꧀ꦠꦶ ꦤꦕ꧀ꦕꦤ꧀ꦠꦶꦪꦺꦴ, ꦥꦫꦶꦪꦴꦪꦮꦕꦤꦁ ꦮꦴ ꦌꦠꦁ ꦢꦺꦮꦏꦚ꧀ꦚꦴꦤꦁ. ꦱꦩꦸꦥ꧀ꦥꦤ꧀ꦤꦧꦭꦮꦱꦺꦴꦏꦴ ꦲꦸꦠ꧀ꦮꦴꦠꦶ ꦄꦪꦁ ꦭꦺꦴꦏꦺꦴ ꦤꦴꦩ ꦄꦠ꧀ꦠꦴꦤꦁꦮ ꦕꦶꦤ꧀ꦠꦺꦠꦶ, ꦠꦱ꧀ꦩꦴ ꦱꦴꦥꦶ ‘‘ꦆꦢꦴꦤꦶ ꦄꦲꦁ ꦄꦤꦴꦡꦴ ꦗꦴꦠꦴ’’ꦠꦶ ꦄꦠ꧀ꦠꦴꦤꦁꦮ ꦕꦶꦤ꧀ꦠꦪꦩꦴꦤꦴ ‘‘ꦄꦪꦁ ꦄꦗ꧀ꦗ ꦄꦴꦒꦩꦶꦱ꧀ꦱꦠꦶ, ꦄꦗ꧀ꦗ ꦄꦴꦒꦩꦶꦱ꧀ꦱꦠꦷ’’ꦠꦶ ꦄꦛ꧀ꦜ ꦮꦱ꧀ꦱꦴꦤꦶ ꦧꦲꦶ ꦤ ꦤꦶꦏ꧀ꦑꦤ꧀ꦠꦴ ꦌꦠꦁ ꦤꦶꦱ꧀ꦱꦴꦪ ꦩꦪꦴ ꦢꦴꦫꦏꦺꦴꦥꦶ ꦤ ꦭꦢ꧀ꦣꦺꦴ, ꦪꦱ꧀ꦱ ꦄꦴꦤꦸꦨꦴꦮꦺꦤ ꦗꦷꦮꦺꦪ꧀ꦪꦴꦩꦶ, ꦆꦠꦺꦴ ꦕꦴꦩ꧀ꦲꦶ ꦥꦫꦶꦲꦷꦤꦴ ꦄꦚ꧀ꦚꦠꦺꦴ ꦕꦴꦠꦶ ꦱꦩꦸꦥ꧀ꦥꦤ꧀ꦤꦧꦭꦮꦱꦺꦴꦏꦴ ꦲꦸꦠ꧀ꦮꦴ. ꦏꦸꦭꦫꦸꦏ꧀ꦑꦥꦠꦶꦛ꧀ꦜꦴꦥꦤꦺ ꦧꦷꦗꦱꦢꦶꦱꦠ꧀ꦠꦴ ꦏꦸꦭꦮꦁꦱꦥ꧀ꦥꦠꦶꦛ꧀ꦜꦴꦥꦏꦺꦴ ꦥꦸꦠ꧀ꦠꦺꦴ ꦆꦣ ꦧꦷꦗꦏꦺꦴꦠꦶ ꦄꦣꦶꦥ꧀ꦥꦺꦠꦺꦴꦠꦶ ꦄꦴꦲ ‘‘ꦏꦸꦭꦮꦁꦱꦧꦷꦗꦏꦁ ꦌꦏꦁ ꦥꦸꦠ꧀ꦠ’’ꦤ꧀ꦠꦶ. ꦱꦁ ꦤꦴꦩ ꦣꦤꦁ, ꦠꦱ꧀ꦱ ꦥꦠꦷꦠꦶ ꦱꦁꦥꦠꦶ, ꦣꦤꦮꦴ ꦮꦶꦨꦮꦱꦩ꧀ꦥꦤ꧀ꦤꦺꦴ. ꦢꦶꦛ꧀ꦜꦣꦩ꧀ꦩꦶꦏꦱꦩ꧀ꦥꦫꦴꦪꦶꦏꦲꦶꦠꦴꦮꦲꦠ꧀ꦠꦴ ꦠꦱ꧀ꦱ ꦲꦶꦠꦤ꧀ꦠꦶ ꦱꦴꦥꦠꦺꦪ꧀ꦪꦁ, ꦠꦢꦺꦮ ꦣꦤꦁ ꦮꦶꦨꦮꦺꦴꦠꦶ ꦄꦴꦲ – ‘‘ꦆꦩꦁ ꦱꦴꦥꦠꦺꦪ꧀ꦪꦁ ꦌꦮꦁ ꦩꦲꦤ꧀ꦠꦁ ꦄꦩ꧀ꦲꦴꦏꦁ ꦮꦶꦨꦮ’’ꦤ꧀ꦠꦶ.

꧓꧖. ꦆꦠ꧀ꦡꦷꦤꦁ ꦏꦸꦩꦴꦫꦷꦨꦴꦮꦥ꧀ꦥꦠ꧀ꦠꦶꦠꦺꦴ ꦥꦛ꧀ꦜꦴꦪ ꦥꦕ꧀ꦖꦶꦩꦮꦪꦠꦺꦴ ꦎꦫꦁ ꦄꦱꦠꦶ ꦮꦶꦧꦤ꧀ꦣꦺ ꦄꦛ꧀ꦜꦩꦺ ꦄꦛ꧀ꦜꦩꦺ ꦱꦠ꧀ꦠꦴꦲꦺ ꦒꦧ꧀ꦨꦴꦱꦪꦱꦚ꧀ꦚꦶꦠꦺ ꦠꦠꦶꦪꦺ ꦄꦴꦮꦠ꧀ꦠꦺ ꦏꦠꦶꦥꦪꦴ ꦭꦺꦴꦲꦶꦠꦥꦷꦭ꦳ꦏꦴ ꦱꦟ꧀ꦜꦲꦶꦠ꧀ꦮꦴ ꦄꦒ꧀ꦒꦲꦶꦠꦥꦸꦧ꧀ꦧꦴ ꦌꦮ ꦨꦶꦗ꧀ꦗꦤ꧀ꦠꦶ, ꦠꦠꦺꦴ ꦭꦺꦴꦲꦶꦠꦁ ꦥꦒ꧀ꦓꦫꦠꦶ, ꦠꦠ꧀ꦡ ꦈꦠꦸꦱꦩꦚ꧀ꦚꦴ ꦥꦸꦥ꧀ꦦꦱꦩꦚ꧀ꦚꦴ ꦕꦴꦠꦶ ꦄꦴꦲ – ‘‘ꦥꦸꦥ꧀ꦦꦤ꧀ꦠꦶ ꦈꦠꦸꦏꦴꦭꦺ ꦈꦥ꧀ꦥꦤ꧀ꦤꦭꦺꦴꦲꦶꦠꦱ꧀ꦱ ꦤꦴꦩ’’ꦤ꧀ꦠꦶ. ꦒꦧ꧀ꦨꦥꦠꦶꦛ꧀ꦜꦴꦤꦛ꧀ꦜꦴꦤꦺꦠꦶ ꦪꦱ꧀ꦩꦶꦁ ꦎꦏꦴꦱꦺ ꦢꦴꦫꦏꦺꦴ ꦤꦶꦧ꧀ꦧꦠ꧀ꦠꦠꦶ, ꦠꦱ꧀ꦩꦶꦁ ꦥꦢꦺꦱꦺ. ꦱꦟ꧀ꦜꦲꦶꦠ꧀ꦮꦴꦠꦶ ꦤꦶꦧ꧀ꦧꦠ꧀ꦠꦶꦠ꧀ꦮꦴ. ꦨꦶꦗ꧀ꦗꦤ꧀ꦠꦷꦠꦶ ꦄꦒ꧀ꦒꦲꦶꦠꦥꦸꦧ꧀ꦧꦴ ꦌꦮ ꦨꦶꦗ꧀ꦗꦤ꧀ꦠꦶ. ꦄꦪꦚ꧀ꦲꦶ ꦠꦴꦱꦁ ꦱꦨꦴꦮꦺꦴ. ꦢꦺꦴꦱꦺꦤꦴꦠꦶ ꦭꦺꦴꦲꦶꦠꦩꦭꦺꦤ. ꦱꦸꦢ꧀ꦣꦺ ꦮꦠ꧀ꦡꦸꦩ꧀ꦲꦷꦠꦶ ꦥꦒ꧀ꦓꦫꦶꦠꦭꦺꦴꦲꦶꦠꦠ꧀ꦠꦴ ꦄꦤꦴꦩꦪꦠ꧀ꦠꦴ ꦕ ꦤꦲꦴꦤꦠꦺꦴ ꦥꦫꦁ ꦕꦠꦸꦠ꧀ꦡꦢꦶꦮꦱꦠꦺꦴ ꦥꦛ꧀ꦜꦴꦪ ꦱꦸꦢ꧀ꦣꦺ ꦒꦧ꧀ꦨꦴꦱꦪꦺ. ꦱꦸꦢ꧀ꦣꦺ ꦥꦤ ꦮꦠ꧀ꦡꦸꦩ꧀ꦲꦶ ꦩꦴꦠꦴꦥꦶꦠꦹꦱꦸ ꦌꦏꦮꦴꦫꦁ ꦱꦤ꧀ꦤꦶꦥꦠꦶꦠꦺꦱꦸ ꦪꦴꦮ ꦱꦠ꧀ꦠ ꦢꦶꦮꦱꦴꦤꦶ ꦑꦺꦠ꧀ꦠꦩꦺꦮ ꦲꦺꦴꦠꦶ ꦒꦧ꧀ꦨꦱꦟ꧀ꦜꦲꦤꦱ꧀ꦱ ꦥꦫꦶꦠ꧀ꦠꦱ꧀ꦱ ꦭꦺꦴꦲꦶꦠꦭꦺꦥꦱ꧀ꦱ ꦮꦶꦗ꧀ꦗꦩꦴꦤꦠ꧀ꦠꦴ. ꦏꦺꦕꦶ ꦥꦤ ‘‘ꦄꦝ꧀ꦞꦩꦴꦱꦩꦠ꧀ꦠꦩ꧀ꦥꦶ ꦑꦺꦠ꧀ꦠꦩꦺꦮꦴ’’ꦠꦶ ꦮꦢꦤ꧀ꦠꦶ. ꦧꦴꦲꦴꦪꦤ꧀ꦠꦶ ꦄꦣꦶꦏꦫꦟꦺ ꦨꦸꦩ꧀ꦩꦤ꧀ꦠꦶ ꦄꦴꦲ ‘‘ꦥꦸꦫꦴꦟꦢꦸꦠꦶꦪꦶꦏꦴꦪ ꦪꦴ ꦧꦴꦲꦴ, ꦠꦠ꧀ꦫ ꦤꦁ ꦒꦲꦺꦠ꧀ꦮꦴ’’ꦠꦶ. ꦈꦥꦪꦺꦴꦒꦠ꧀ꦡꦺ ꦨꦸꦩ꧀ꦩꦮꦕꦤꦩ꧀ꦥꦶ ꦪꦸꦗ꧀ꦗꦠꦶꦪꦺꦮ ꦪꦡꦴ ‘‘ꦱꦸꦢꦶꦤ꧀ꦤꦱ꧀ꦱ ꦥꦴꦢꦺꦱꦸ ꦒꦲꦺꦠ꧀ꦮꦴ’’ꦠꦶ.

ꦥꦸꦧ꧀ꦧꦺꦥꦶ ꦥꦚ꧀ꦚꦠ꧀ꦠꦱꦶꦏ꧀ꦑꦴꦥꦢꦴꦤꦁ ꦱꦧ꧀ꦨꦴꦮꦠꦺꦴ ꦄꦥꦚ꧀ꦚꦠ꧀ꦠꦺ ꦱꦶꦏ꧀ꦑꦴꦥꦢꦺꦠꦶ ꦥꦴꦫꦴꦗꦶꦏꦁ ꦱꦤ꧀ꦣꦴꦪ ꦮꦸꦠ꧀ꦠꦤ꧀ꦠꦶ ꦄꦴꦲ – ‘‘ꦥꦜꦩꦥꦴꦫꦴꦗꦶꦏꦱꦶꦏ꧀ꦑꦴꦥꦢꦺ ꦄꦛ꧀ꦜꦥꦶꦠꦺ’’ꦠꦶ. ꦮꦸꦠ꧀ꦠꦩꦺꦮꦠ꧀ꦡꦁ ꦮꦶꦨꦴꦮꦺꦤ꧀ꦠꦺꦴ ꦄꦴꦲ – ‘‘ꦨꦒꦮꦠꦺꦴ ꦏꦶꦫ ꦥꦜꦩꦧꦺꦴꦣꦶꦪ’’ꦤ꧀ꦠꦶꦄꦴꦢꦶ. ꦌꦮꦫꦹꦥꦤ꧀ꦠꦶ ꦥꦴꦫꦴꦗꦶꦏꦥꦚ꧀ꦚꦠ꧀ꦠꦶꦪꦴ ꦄꦤꦸꦫꦹꦥꦁ. ꦤꦶꦢꦱ꧀ꦱꦤꦩꦠ꧀ꦠꦚ꧀ꦕꦺꦠꦁ, ꦱꦔ꧀ꦓꦴꦢꦶꦱꦺꦱꦥꦚ꧀ꦚꦠ꧀ꦠꦶꦪꦴ ꦄꦤꦸꦫꦹꦥꦩ꧀ꦥꦶ ꦄꦗ꧀ꦙꦴꦕꦴꦫꦁ ꦤꦴꦏꦁꦱꦸꦪꦺꦮ. ꦠꦺꦤꦺꦮꦴꦲ – ‘‘ꦄꦮꦱꦺꦱꦺ ꦥꦚ꧀ꦕ ꦑꦸꦢ꧀ꦢꦏꦴꦥꦠ꧀ꦠꦶꦏ꧀ꦑꦤ꧀ꦣꦺ ꦌꦮ ꦥꦚ꧀ꦚꦥꦺꦱꦷ’’ꦠꦶ. ꦆꦢꦚ꧀ꦕ ꦡꦸꦭ꧀ꦭꦕ꧀ꦕꦪꦴꦢꦷꦤꦁ ꦥꦚ꧀ꦕꦤ꧀ꦤꦁ ꦭꦲꦸꦏꦴꦥꦠ꧀ꦠꦶꦏ꧀ꦑꦤ꧀ꦣꦴꦤꦁ ꦱꦧ꧀ꦨꦴꦮꦩꦠ꧀ꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ, ꦤ ꦥꦚ꧀ꦕꦴꦥꦠ꧀ꦠꦶꦏ꧀ꦑꦤ꧀ꦣꦴꦤꦁ ꦄꦤꦮꦱꦺꦱꦠꦺꦴ ꦥꦚ꧀ꦚꦠ꧀ꦠꦠ꧀ꦠꦴꦮ. ꦥꦜꦩꦧꦺꦴꦣꦶꦪꦁ ꦥꦚ꧀ꦕꦤ꧀ꦤꦁ ꦭꦲꦸꦏꦴꦥꦠ꧀ꦠꦷꦤꦁ ꦱꦧ꧀ꦨꦴꦮꦮꦕꦤꦺꦤꦺꦮ ꦣꦩ꧀ꦩꦱꦺꦤꦴꦥꦠꦶꦱ꧀ꦱ ꦱꦶꦏ꧀ꦑꦴꦥꦢꦥꦚ꧀ꦚꦠ꧀ꦠꦶꦪꦴꦕꦤꦴ ꦮꦶꦱꦺꦱꦠꦺꦴ ꦒꦫꦸꦏꦴꦥꦠ꧀ꦠꦶꦥꦚ꧀ꦚꦠ꧀ꦠꦶꦪꦴ ꦥꦴꦠꦶꦩꦺꦴꦏ꧀ꦑꦸꦢ꧀ꦢꦺꦱꦱ꧀ꦱ ꦕ ꦲꦺꦠꦸꦨꦹꦠꦴꦠꦶ ꦢꦛ꧀ꦜꦧ꧀ꦧꦴ. ꦏꦺꦕꦶ ꦥꦤ ‘‘ꦠꦱ꧀ꦩꦶꦁ ꦠꦱ꧀ꦩꦶꦁ ꦥꦤ ꦮꦠ꧀ꦡꦸꦱ꧀ꦩꦶꦁ ꦄꦮꦱꦺꦱꦥꦚ꧀ꦕꦑꦸꦢ꧀ꦢꦏꦴꦥꦠ꧀ꦠꦶꦏ꧀ꦑꦤ꧀ꦣꦺ ꦌꦮ ꦥꦚ꧀ꦚꦥꦺꦱꦷꦠꦶ ꦆꦢꦁ ꦢ꧀ꦮꦴꦢꦱꦩꦺ ꦮꦱ꧀ꦱꦺ ꦮꦺꦫꦚ꧀ꦗꦴꦪꦁ ꦮꦸꦠ꧀ꦡꦮꦱ꧀ꦱꦺꦤ ꦨꦒꦮꦠꦴ ꦠꦠꦺꦴ ꦥꦛ꧀ꦜꦴꦪ ꦄꦛ꧀ꦜꦮꦱ꧀ꦱꦧ꧀ꦨꦤ꧀ꦠꦫꦺ ꦥꦚ꧀ꦚꦠ꧀ꦠꦱꦶꦏ꧀ꦑꦴꦥꦢꦁ ꦱꦤ꧀ꦣꦴꦪ ꦮꦸꦠ꧀ꦠ’’ꦤ꧀ꦠꦶ ꦮꦢꦤ꧀ꦠꦶ, ꦠꦁ ꦤ ꦱꦸꦤ꧀ꦢꦫꦁ ꦠꦠꦺꦴ ꦥꦸꦧ꧀ꦧꦺꦥꦶ ꦱꦶꦏ꧀ꦑꦴꦥꦢꦥꦚ꧀ꦚꦠ꧀ꦠꦶꦪꦴ ꦱꦧ꧀ꦨꦴꦮꦠꦺꦴ. ꦠꦺꦤꦺꦮ ꦮꦺꦫꦚ꧀ꦗꦏꦟ꧀ꦝꦺ ‘‘ꦌꦏꦨꦶꦏ꧀ꦑꦸꦤꦴꦥꦶ ꦫꦠ꧀ꦠꦶꦕ꧀ꦖꦺꦢꦺꦴ ꦮꦴ ꦥꦕ꧀ꦖꦶꦩꦶꦏꦴꦪ ꦠꦠ꧀ꦡ ꦮꦱ꧀ꦱꦁ ꦈꦥꦒꦕ꧀ꦖꦴꦩꦴꦠꦶ ꦮꦱ꧀ꦱꦕ꧀ꦖꦺꦢꦺꦴ ꦮꦴ ꦤ ꦏꦠꦺꦴ’’ꦠꦶ ꦕ ‘‘ꦱꦴꦩꦩ꧀ꦥꦶ ꦥꦕꦤꦁ ꦱꦩꦟꦱꦴꦫꦸꦥ꧀ꦥꦁ ꦤ ꦲꦺꦴꦠꦶ, ꦤ ꦕ ꦮꦛ꧀ꦛꦠꦷ’’ꦠꦶ ꦕ ꦮꦸꦠ꧀ꦠꦁ. ꦄꦴꦫꦴꦣꦪꦶꦁꦱꦹꦠꦶ ꦕꦶꦠ꧀ꦠꦁ ꦒꦟ꧀ꦲꦶꦁꦱꦸ, ꦄꦗ꧀ꦙꦴꦱꦪꦁ ꦥꦹꦫꦪꦶꦁꦱꦸ, ꦲꦢꦪꦒꦴꦲꦶꦤꦶꦁ ꦥꦛꦶꦥꦠ꧀ꦠꦶꦁ ꦥꦛꦶꦥꦗ꧀ꦗꦶꦁꦱꦹꦠꦶ ꦄꦠ꧀ꦡꦺꦴ. ꦌꦏꦁ ꦱꦩꦪꦤ꧀ꦠꦶ ꦌꦏꦱ꧀ꦩꦶꦁ ꦱꦩꦪꦺ, ꦥꦜꦩꦧꦺꦴꦣꦶꦪꦤ꧀ꦠꦶ ꦄꦠ꧀ꦡꦺꦴ.

ꦪꦁ ꦄꦴꦢꦷꦤꦮꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦱꦶꦏ꧀ꦑꦴꦥꦢꦁ ꦥꦚ꧀ꦚꦥꦺꦤ꧀ꦠꦺꦴꦠꦶ ꦥꦜꦩꦥꦴꦫꦴꦗꦶꦏꦱꦶꦏ꧀ꦑꦴꦥꦢꦁ ꦥꦚ꧀ꦚꦥꦺꦤ꧀ꦠꦺꦴ. ꦄꦴꦢꦷꦤꦮꦁ ꦢꦱ꧀ꦱꦺꦱ꧀ꦱꦠꦷꦠꦶ ‘‘ꦮꦫꦁ ꦠꦺ, ꦩꦺꦴꦓꦥꦸꦫꦶꦱ, ꦄꦴꦱꦷꦮꦶꦱꦱ꧀ꦱ ꦓꦺꦴꦫꦮꦶꦱꦱ꧀ꦱ ꦩꦸꦑꦺ ꦄꦔ꧀ꦒꦗꦴꦠꦁ ꦥꦏ꧀ꦑꦶꦠ꧀ꦠꦁ, ꦤ ꦠ꧀ꦮꦺꦮ ꦩꦴꦠꦸꦒꦴꦩꦱ꧀ꦱ ꦄꦔ꧀ꦒꦗꦴꦠꦺ ꦄꦔ꧀ꦒꦗꦴꦠꦁ ꦥꦏ꧀ꦑꦶꦠ꧀ꦠ’’ꦤ꧀ꦠꦶꦄꦴꦢꦶꦤꦴ ꦪꦁ ꦄꦴꦢꦷꦤꦮꦁ ꦢꦱ꧀ꦱꦺꦱ꧀ꦱꦠꦶ. ꦄꦨꦶꦮꦶꦚ꧀ꦚꦴꦥꦺꦱꦷꦠꦶ ꦆꦩꦱ꧀ꦱ ‘‘ꦥꦮꦠ꧀ꦠꦺꦱꦷ’’ꦠꦶ ꦄꦪꦩꦠ꧀ꦡꦺꦴ ꦏꦡꦁ ꦭꦢ꧀ꦣꦺꦴꦠꦶ ꦄꦴꦲ ‘‘ꦥꦮꦠ꧀ꦠꦤꦴꦥꦶ ꦲꦷ’’ꦠꦶꦄꦴꦢꦶ. ꦏꦴꦪꦮꦶꦚ꧀ꦚꦠ꧀ꦠꦶꦕꦺꦴꦥꦤꦠꦺꦴꦠꦶ ꦏꦴꦪꦮꦶꦚ꧀ꦚꦠ꧀ꦠꦶꦮꦱꦺꦤ ꦥꦮꦠ꧀ꦠꦕꦭꦤꦠꦺꦴ. ꦏꦱ꧀ꦩꦴ ꦥꦤꦺꦱ ꦩꦺꦡꦸꦤꦣꦩ꧀ꦩꦺꦤ ꦄꦤꦠ꧀ꦡꦶꦏꦺꦴꦥꦶ ꦱꦩꦴꦤꦺꦴ ꦠꦶꦏ꧀ꦑꦠ꧀ꦠꦸꦁ ꦄꦨꦶꦮꦶꦚ꧀ꦚꦴꦥꦺꦱꦷꦠꦶ ꦄꦴꦲ – ‘‘ꦠꦶꦏ꧀ꦑꦠ꧀ꦠꦸꦁ ꦄꦨꦶꦮꦶꦚ꧀ꦚꦴꦥꦤꦚ꧀ꦕꦺꦱꦴ’’ꦠꦶꦄꦴꦢꦶ. ꦠꦠ꧀ꦡ ꦠꦶꦏ꧀ꦑꦠ꧀ꦠꦸꦁ ꦄꦨꦶꦮꦶꦚ꧀ꦚꦴꦥꦤꦤ꧀ꦠꦶ ꦩꦸꦠ꧀ꦠꦶꦥꦴꦥꦤꦮꦱꦺꦤ ꦠꦷꦱꦸ ꦮꦴꦫꦺꦱꦸ ꦩꦺꦡꦸꦤꦣꦩ꧀ꦩꦱ꧀ꦱ ꦥꦮꦠ꧀ꦠꦤꦁ.

ꦱꦧ꧀ꦧꦺꦱꦩ꧀ꦥꦶ ꦥꦢꦴꦤꦁ ꦄꦮꦣꦴꦫꦟꦦꦭꦠ꧀ꦠꦴ ꦮꦶꦤꦴꦥꦶ ꦌꦮꦏꦴꦫꦁ ꦄꦮꦣꦴꦫꦟꦠ꧀ꦡꦺꦴ ꦮꦶꦚ꧀ꦚꦴꦪꦠꦷꦠꦶ ꦄꦴꦲ ‘‘ꦠꦺꦤꦺꦮ ꦄꦗ꧀ꦙꦴꦕꦴꦫꦺꦤꦴ’’ꦠꦶ. ꦄꦛ꧀ꦜ ꦲꦶ ꦒꦧ꧀ꦨꦏꦴꦫꦟꦴꦤꦶ. ꦮꦸꦠ꧀ꦠꦚ꧀ꦲꦺꦠꦁ –

‘‘ꦩꦺꦡꦸꦤꦕꦺꦴꦭ꦳ꦒ꧀ꦒꦲꦟꦁ, ꦠꦤꦸꦱꦁꦱꦒ꧀ꦒꦺꦴ ꦕ ꦤꦴꦨꦶꦄꦴꦩꦱꦤꦁ;

ꦥꦴꦤꦁ ꦢꦱ꧀ꦱꦤꦱꦮꦤꦁ, ꦓꦴꦪꦤꦩꦶꦠꦶ ꦒꦧ꧀ꦨꦲꦺꦠꦮꦺꦴ ꦄꦛ꧀ꦜꦴ’’ꦠꦶ.

ꦆꦢꦴꦤꦶ ꦄꦮꦣꦴꦫꦟꦺꦤ ꦤꦶꦮꦠ꧀ꦠꦶꦠꦩꦠ꧀ꦡꦁ ꦢꦱ꧀ꦱꦺꦠꦸꦏꦴꦩꦺꦴ ꦄꦴꦲ – ‘‘ꦏꦶꦁ ꦥꦤ ꦄꦚ꧀ꦚꦡꦴꦥꦶ ꦒꦧ꧀ꦨꦒ꧀ꦒꦲꦟꦁ ꦲꦺꦴꦠꦷ’’ꦠꦶꦄꦴꦢꦶ. ꦤꦤꦸ ꦕ ꦤꦴꦨꦶꦥꦫꦴꦩꦱꦤꦩ꧀ꦥꦶ ꦏꦴꦪꦱꦁꦱꦒ꧀ꦒꦺꦴꦪꦺꦮ, ꦏꦱ꧀ꦩꦴ ꦤꦁ ꦮꦶꦱꦸꦁ ꦮꦸꦠ꧀ꦠꦤ꧀ꦠꦶ? ꦈꦨꦪꦺꦱꦁ ꦖꦤ꧀ꦢꦫꦴꦒꦮꦱꦺꦤ ꦏꦴꦪꦱꦁꦱꦒ꧀ꦒꦺꦴ ꦮꦸꦠ꧀ꦠꦺꦴ, ꦆꦠ꧀ꦡꦶꦪꦴ ꦖꦤ꧀ꦢꦫꦴꦒꦮꦱꦺꦤ ꦤꦴꦨꦶꦥꦫꦴꦩꦱꦤꦁ, ꦮꦠ꧀ꦡꦸꦮꦱꦺꦤ ꦮꦴ ꦠꦁ ꦮꦶꦱꦸꦁ ꦮꦸꦠ꧀ꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦏꦡꦁ ꦥꦤ ꦏꦴꦪꦱꦁꦱꦒ꧀ꦒꦺꦤ ꦒꦧ꧀ꦨꦒ꧀ꦒꦲꦟꦁ ꦲꦺꦴꦠꦶ, ꦏꦡꦚ꧀ꦕ ꦠꦠ꧀ꦡ ꦱꦸꦏ꧀ꦏꦱꦺꦴꦟꦶꦠꦱ꧀ꦱ ꦱꦩ꧀ꦨꦮꦺꦴꦠꦶ ꦄꦴꦲ ‘‘ꦆꦠ꧀ꦡꦶꦪꦺꦴ ꦲꦷ’’ꦠꦶꦄꦴꦢꦶ. ꦖꦤ꧀ꦢꦫꦴꦒꦸꦥ꧀ꦥꦠ꧀ꦠꦶꦮꦱꦺꦤ ꦆꦠ꧀ꦡꦶꦪꦴ ꦱꦸꦏ꧀ꦏꦏꦺꦴꦛ꧀ꦜꦴꦱꦺꦴ ꦕꦭꦶꦠꦺꦴ ꦲꦺꦴꦠꦶ, ꦱꦺꦴꦥꦶ ꦒꦧ꧀ꦨꦱꦟ꧀ꦜꦴꦤꦱ꧀ꦱ ꦥꦕ꧀ꦕꦪꦺꦴ ꦲꦺꦴꦠꦷꦠꦶ ꦄꦣꦶꦥ꧀ꦥꦴꦪꦺꦴ. ꦆꦠ꧀ꦡꦶꦱꦤ꧀ꦠꦴꦤꦺꦥꦶ ꦲꦶ ꦫꦱꦴꦢꦶꦱꦠ꧀ꦠꦣꦴꦠꦸꦪꦺꦴ ꦭꦧ꧀ꦨꦤ꧀ꦠꦶꦪꦺꦮ. ꦠꦺꦤꦴꦲ – ‘‘ꦄꦔ꧀ꦒꦥꦕ꧀ꦕꦔ꧀ꦒꦥꦫꦴꦩꦱꦤꦁ ꦱꦴꦢꦶꦪꦤ꧀ꦠꦶꦪꦺꦴꦥꦶ ꦒꦧ꧀ꦨꦁ ꦒꦟ꧀ꦲꦤ꧀ꦠꦷ’’ꦠꦶ. ꦒꦟ꧀ꦜꦶꦥꦢꦺꦱꦸ ꦥꦤ ‘‘ꦏꦴꦪꦱꦁꦱꦒ꧀ꦒꦴꦢꦶꦤꦴ ꦱꦠ꧀ꦠꦥ꧀ꦥꦏꦴꦫꦺꦤ ꦒꦧ꧀ꦨꦒ꧀ꦒꦲꦟꦺ ꦥꦶꦠꦸ ꦱꦸꦏ꧀ꦏꦏꦺꦴꦛ꧀ꦜꦴꦱꦁ ꦮꦶꦤꦴ ꦖꦤ꧀ꦢꦫꦴꦒꦮꦱꦺꦤ ꦩꦴꦠꦸ ꦮꦶꦏꦴꦫꦥ꧀ꦥꦠ꧀ꦠꦁ ꦭꦺꦴꦲꦶꦠꦩꦺꦮ ꦒꦧ꧀ꦨꦱꦟ꧀ꦜꦴꦤꦱ꧀ꦱ ꦥꦕ꧀ꦕꦪꦺꦴ ꦲꦺꦴꦠꦷ’’ꦠꦶ ꦮꦸꦠ꧀ꦠꦁ. ‘‘ꦪꦱ꧀ꦱ ꦄꦔ꧀ꦒꦥꦕ꧀ꦕꦔ꧀ꦒꦥꦫꦴꦩꦱꦤꦁ ꦱꦴꦢꦶꦪꦶꦠ꧀ꦮꦴ ꦩꦴꦠꦴ ꦥꦸꦠ꧀ꦠꦁ ꦥꦛꦶꦭꦨꦠꦶ, ꦱꦕꦺ ꦱꦺꦴ ꦄꦥꦫꦺꦤ ꦱꦩꦪꦺꦤ ꦥꦫꦶꦥꦸꦟ꧀ꦟꦶꦤ꧀ꦢ꧀ꦫꦶꦪꦺꦴ ꦲꦸꦠ꧀ꦮꦴ ꦠꦴꦢꦶꦱꦁ ꦥꦶꦠꦫꦁ ꦩꦤꦸꦱ꧀ꦱꦗꦴꦠꦶꦏꦁ ꦗꦷꦮꦶꦠꦴ ꦮꦺꦴꦫꦺꦴꦥꦺꦠꦶ, ꦥꦶꦠꦸꦓꦴꦠꦏꦺꦴꦮ ꦲꦺꦴꦠꦷ’’ꦠꦶ ꦮꦢꦤ꧀ꦠꦶ.

ꦠꦁ ꦄꦱꦸꦕꦶꦁ ꦌꦏꦢꦺꦱꦁ ꦩꦸꦑꦺꦤ ꦄꦒ꧀ꦒꦲꦺꦱꦷꦠꦶ ꦥꦸꦫꦴꦟꦕꦷꦮꦫꦁ ꦣꦺꦴꦮꦤ꧀ꦠꦷ ꦠꦠ꧀ꦡ ꦪꦁ ꦄꦱꦸꦕꦶꦁ ꦄꦢ꧀ꦢꦱ, ꦠꦁ ꦄꦱꦸꦕꦶꦁ ꦌꦏꦢꦺꦱꦁ ꦥꦶꦮꦶ. ‘‘ꦮꦛ꧀ꦛꦠꦶ ꦠꦸꦩ꧀ꦲꦴꦏꦁ ꦩꦺꦡꦸꦤꦣꦩ꧀ꦩꦺꦴ’’ꦠꦶ ꦥꦸꦛ꧀ꦜꦺꦴ ‘‘ꦏꦥ꧀ꦥꦠꦸ ꦮꦴ ꦩꦴ ꦮꦴ ꦏꦥ꧀ꦥꦠꦸ, ꦩꦪꦁ ꦠꦺꦤ ꦄꦤꦠ꧀ꦡꦶꦏꦴ’’ꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦄꦤꦠ꧀ꦡꦶꦏꦴ ꦩꦪꦁ ꦌꦠꦺꦤꦴ’’ꦠꦶ. ꦏꦶꦚ꧀ꦕꦴꦥꦶ ꦤꦴꦨꦶꦥꦫꦴꦩꦱꦤꦺ ꦩꦺꦡꦸꦤꦫꦴꦒꦺꦴ ꦤꦠ꧀ꦡꦶ, ꦠꦡꦴꦥꦶ ꦤꦴꦨꦶꦥꦫꦴꦩꦱꦤꦏꦴꦭꦺ ꦦꦱ꧀ꦱꦱꦴꦢꦶꦪꦤꦮꦱꦺꦤ ꦄꦱ꧀ꦱꦴꦢꦩꦠ꧀ꦠꦁ ꦠꦱ꧀ꦱꦴ ꦄꦲꦺꦴꦱꦷꦠꦶ ꦒꦲꦺꦠꦧ꧀ꦧꦁ, ꦄꦚ꧀ꦚꦡꦴ ꦒꦧ꧀ꦨꦱꦟ꧀ꦜꦲꦤꦁ ꦤ ꦱꦶꦪꦴ. ꦢꦶꦛ꧀ꦜꦩꦔ꧀ꦒꦭꦶꦏꦴꦪ ꦤꦴꦨꦶꦥꦫꦴꦩꦱꦤꦺꦤ ꦩꦟ꧀ꦝꦧ꧀ꦪꦱ꧀ꦱ ꦤꦶꦧ꧀ꦧꦠ꧀ꦠꦶ ꦄꦲꦺꦴꦱꦶ, ꦕꦟ꧀ꦝꦥꦗ꧀ꦗꦺꦴꦠꦩꦴꦠꦸ ꦤꦴꦨꦶꦪꦁ ꦮꦶꦕ꧀ꦖꦶꦏꦴ ꦦꦫꦶꦠ꧀ꦮꦴ ꦒꦠꦴ, ꦠꦺꦤ ꦕꦟ꧀ꦝꦥꦗ꧀ꦗꦺꦴꦠꦱ꧀ꦱ ꦤꦶꦧ꧀ꦧꦠ꧀ꦠꦶ ꦄꦲꦺꦴꦱꦷꦠꦶ ꦄꦴꦲ ‘‘ꦌꦠꦺꦤꦺꦮ ꦤꦪꦺꦤꦴ’’ꦠꦶꦄꦴꦢꦶ. ꦥꦸꦫꦶꦱꦁ ꦈꦥꦤꦶꦗ꧀ꦙꦴꦪꦠꦷꦠꦶ ꦮꦴꦠꦥꦴꦤꦴꦢꦶꦤꦴ ꦢꦶꦱ꧀ꦮꦴ ꦮꦴ ꦢꦶꦛ꧀ꦜꦥꦸꦧ꧀ꦧꦁ ꦮꦴ ꦥꦸꦫꦶꦱꦁ ꦈꦥꦤꦶꦗ꧀ꦙꦴꦪꦠꦶ. ꦫꦴꦗꦺꦴꦫꦺꦴꦣꦴ ꦮꦶꦪꦴꦠꦶ ꦱꦷꦲꦭ꦳ꦢꦷꦥꦺ ꦏꦶꦫ ꦌꦏꦶꦱ꧀ꦱꦴ ꦆꦠ꧀ꦡꦶꦪꦴ ꦠꦡꦴ ꦄꦲꦺꦴꦱꦶ, ꦠꦱ꧀ꦩꦴ ꦌꦮꦁ ꦮꦸꦠ꧀ꦠꦁ.

ꦆꦣꦴꦠꦶ ꦆꦩꦱ꧀ꦩꦶꦁ ꦮꦠ꧀ꦡꦸꦱ꧀ꦩꦶꦁ. ꦄꦪꦤ꧀ꦠꦶ ꦱꦸꦢꦶꦤ꧀ꦤꦱ꧀ꦱ ꦥꦸꦫꦴꦟꦢꦸꦠꦶꦪꦶꦏꦴ. ꦪꦁ ꦱꦤ꧀ꦣꦴꦪꦴꦠꦶ ꦪꦁ ꦄꦗ꧀ꦙꦴꦕꦴꦫꦁ ꦱꦤ꧀ꦣꦴꦪ. ꦱꦸꦏ꧀ꦏꦁ ꦱꦤ꧀ꦣꦴꦪ ‘‘ꦩꦴꦠꦴꦥꦶꦠꦫꦺꦴ ꦕ ꦱꦤ꧀ꦤꦶꦥꦠꦶꦠꦴ ꦲꦺꦴꦤ꧀ꦠꦷ’’ꦠꦶ ꦮꦸꦠ꧀ꦠꦁ, ꦩꦴꦠꦴ ꦕ ꦈꦠꦸꦤꦷ ꦲꦺꦴꦠꦷꦠꦶ ꦭꦺꦴꦲꦶꦠꦁ ꦱꦤ꧀ꦣꦴꦪ. ꦠꦠ꧀ꦡ ꦱꦤ꧀ꦤꦶꦥꦠꦶꦠꦴ ꦲꦺꦴꦤ꧀ꦠꦷꦠꦶ ꦄꦱꦢ꧀ꦣꦩ꧀ꦩꦮꦱꦺꦤ ꦌꦏꦱ꧀ꦩꦶꦁ ꦜꦴꦤꦺ ꦱꦩꦴꦒꦠꦴ ꦱꦔ꧀ꦒꦠꦴ ꦲꦺꦴꦤ꧀ꦠꦶ. ꦩꦴꦠꦴ ꦕ ꦈꦠꦸꦤꦷ ꦲꦺꦴꦠꦷꦠꦶ ꦆꦢꦁ ꦈꦠꦸꦱꦩꦪꦁ ꦱꦤ꧀ꦣꦴꦪ ꦮꦸꦠ꧀ꦠꦁ, ꦤ ꦭꦺꦴꦏꦱꦩꦚ꧀ꦚꦴꦏꦫꦗꦱ꧀ꦱ ꦭꦒ꧀ꦒꦤꦢꦶꦮꦱꦩꦠ꧀ꦠꦁ. ꦒꦤ꧀ꦣꦧ꧀ꦧꦺꦴꦠꦶ ꦠꦠ꧀ꦫꦹꦥꦒꦱꦠ꧀ꦠꦺꦴ, ꦒꦤ꧀ꦠꦧ꧀ꦧꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦠ-ꦏꦴꦫꦱ꧀ꦱ ꦣ-ꦏꦴꦫꦺꦴ ꦏꦠꦺꦴꦠꦶ ꦢꦛ꧀ꦜꦧ꧀ꦧꦁ. ꦄꦡ ꦮꦴ ꦒꦤ꧀ꦣꦤꦠꦺꦴ ꦈꦥ꧀ꦥꦗ꧀ꦗꦤꦒꦠꦶꦪꦴ ꦤꦶꦩꦶꦠ꧀ꦠꦸꦥꦛ꧀ꦜꦴꦤꦺꦤ ꦱꦹꦕꦤꦠꦺꦴ ꦢꦷꦥꦤꦠꦺꦴ ꦒꦤ꧀ꦣꦺꦴꦠꦶ ꦭꦢ꧀ꦣꦤꦴꦩꦺꦤ ꦨꦮꦒꦴꦩꦶꦏꦩ꧀ꦩꦸꦤꦴ ꦄꦧ꧀ꦧꦠꦶ ꦥꦮꦠ꧀ꦠꦠꦷꦠꦶ ꦒꦤ꧀ꦣꦧ꧀ꦧꦺꦴ, ꦠꦠ꧀ꦡ ꦈꦥ꧀ꦥꦗ꧀ꦗꦤꦏꦱꦠ꧀ꦠꦺꦴ. ꦥꦕ꧀ꦕꦸꦥꦛ꧀ꦜꦶꦠꦺꦴ ꦲꦺꦴꦠꦷꦠꦶ ꦈꦥꦒꦠꦺꦴ ꦲꦺꦴꦠꦶ. ꦌꦠ꧀ꦡ ꦕ ꦤ ꦩꦴꦠꦴꦥꦶꦠꦹꦤꦁ ꦱꦤ꧀ꦤꦶꦥꦴꦠꦁ ꦎꦭꦺꦴꦏꦪꦩꦴꦤꦺꦴ ꦱꦩꦷꦥꦺ ꦜꦶꦠꦺꦴ ꦤꦴꦩ ꦲꦺꦴꦠꦶ, ꦏꦩ꧀ꦩꦪꦤ꧀ꦠꦪꦤ꧀ꦠꦶꦠꦺꦴ ꦥꦤ ꦌꦏꦺꦴ ꦱꦠ꧀ꦠꦺꦴ ꦠꦱ꧀ꦩꦶꦁ ꦎꦏꦴꦱꦺ ꦤꦶꦧ꧀ꦧꦠ꧀ꦠꦤꦏꦺꦴ ꦥꦸꦫꦶꦩꦗꦴꦠꦶꦪꦁ ꦜꦶꦠꦺꦴꦪꦺꦮ ꦒꦠꦶꦤꦶꦩꦶꦠ꧀ꦠꦴꦢꦶꦄꦴꦫꦩ꧀ꦩꦟꦏꦫꦟꦮꦱꦺꦤ ꦈꦥꦥꦠ꧀ꦠꦴꦨꦶꦩꦸꦑꦺꦴ ꦲꦺꦴꦠꦷꦠꦶ ꦄꦣꦶꦥ꧀ꦥꦴꦪꦺꦴ.

ꦱꦤ꧀ꦤꦶꦥꦴꦠꦴꦠꦶ ꦱꦩꦺꦴꦣꦴꦤꦺꦤ ꦱꦩꦴꦒꦩꦺꦤ. ꦒꦧ꧀ꦨꦱ꧀ꦱꦴꦠꦶ ꦒꦧ꧀ꦨꦺ ꦤꦶꦧ꧀ꦧꦠ꧀ꦠꦤꦏꦱꦠ꧀ꦠꦱ꧀ꦱ. ꦒꦧ꧀ꦨꦺ ꦤꦶꦧ꧀ꦧꦠ꧀ꦠꦤꦏꦱꦠ꧀ꦠꦺꦴꦥꦶ ꦲꦶ ꦒꦧ꧀ꦨꦺꦴꦠꦶ ꦮꦸꦕ꧀ꦕꦠꦶ. ꦪꦡꦴꦲ – ‘‘ꦪꦡꦴ ꦑꦺꦴ ꦥꦤꦴꦤꦤ꧀ꦢ, ꦄꦚ꧀ꦚꦴ ꦆꦠ꧀ꦡꦶꦏꦴ ꦤꦮ ꦮꦴ ꦢꦱ ꦮꦴ ꦩꦴꦱꦺ ꦒꦧ꧀ꦨꦁ ꦏꦸꦕ꧀ꦖꦶꦤꦴ ꦥꦫꦶꦲꦫꦶꦠ꧀ꦮꦴ ꦮꦶꦗꦴꦪꦤ꧀ꦠꦷ’’ꦠꦶ (ꦩ. ꦤꦶ. ꧓.꧒꧐꧕). ꦏꦠ꧀ꦡꦕꦶ ꦥꦤ ꦒꦧ꧀ꦨꦺꦴꦠꦶ ꦩꦴꦠꦸꦏꦸꦕ꧀ꦖꦶ ꦮꦸꦠ꧀ꦠꦺꦴ. ꦪꦡꦴꦲ –

‘‘ꦪꦩꦺꦏꦫꦠ꧀ꦠꦶꦁ ꦥꦜꦩꦁ, ꦒꦧ꧀ꦨꦺ ꦮꦱꦠꦶ ꦩꦴꦟꦮꦺꦴ;

ꦄꦧ꧀ꦨꦸꦛ꧀ꦜꦶꦠꦺꦴꦮ ꦱꦺꦴ ꦪꦴꦠꦶ, ꦱ ꦒꦕ꧀ꦖꦁ ꦤ ꦤꦶꦮꦠ꧀ꦠꦠꦷ’’ꦠꦶ. (ꦗꦴ. ꧑.꧑꧕.꧓꧖꧓); –

ꦌꦠ꧀ꦡ ꦕ ꦒꦧ꧀ꦨꦠꦶ ꦄꦠ꧀ꦠꦨꦴꦮꦨꦴꦮꦺꦤ ꦥꦮꦠ꧀ꦠꦠꦷꦠꦶ ꦒꦧ꧀ꦨꦺꦴ, ꦏꦭꦭꦴꦢꦶꦄꦮꦠ꧀ꦡꦺꦴ ꦣꦩ꧀ꦩꦥ꧀ꦥꦧꦤ꧀ꦣꦺꦴ, ꦠꦁꦤꦶꦱ꧀ꦱꦶꦠꦠ꧀ꦠꦴ ꦥꦤ ꦱꦠ꧀ꦠꦱꦤ꧀ꦠꦴꦤꦺꦴ ‘‘ꦒꦧ꧀ꦨꦺꦴ’’ꦠꦶ ꦮꦸꦠ꧀ꦠꦺꦴ ꦪꦡꦴ ‘‘ꦩꦚ꧀ꦕꦴ ꦈꦏ꧀ꦏꦸꦛ꧀ꦜꦶꦁ ꦏꦫꦺꦴꦤ꧀ꦠꦷ’’ꦠꦶ. ꦠꦁꦤꦶꦱ꧀ꦱꦪꦨꦴꦮꦠꦺꦴ ꦩꦴꦠꦸꦏꦸꦕ꧀ꦖꦶ ‘‘ꦒꦧ꧀ꦨꦺꦴ’’ꦠꦶ ꦮꦺꦢꦶꦠꦧ꧀ꦧꦺꦴ. ꦒꦧ꧀ꦨꦺꦴ ꦮꦶꦪꦴꦠꦶ ꦮꦴ. ꦪꦡꦴ ꦲꦶ ꦤꦶꦮꦴꦱꦛ꧀ꦜꦴꦤꦠꦴꦪ ꦱꦠ꧀ꦠꦴꦤꦁ ꦎꦮꦫꦏꦺꦴ ‘‘ꦒꦧ꧀ꦨꦺꦴ’’ꦠꦶ ꦮꦸꦕ꧀ꦕꦠꦶ, ꦌꦮꦁ ꦒꦧ꧀ꦨꦱꦺꦪ꧀ꦪꦏꦴꦤꦁ ꦱꦠ꧀ꦠꦴꦤꦁ ꦪꦴꦮ ꦄꦨꦶꦗꦴꦠꦶ ꦤꦶꦮꦴꦱꦛ꧀ꦜꦴꦤꦠꦴꦪ ꦩꦴꦠꦸꦏꦸꦕ꧀ꦖꦶ ‘‘ꦒꦧ꧀ꦨꦺꦴ’’ꦠꦶ ꦮꦸꦠ꧀ꦠꦺꦴꦠꦶ ꦮꦺꦢꦶꦠꦧ꧀ꦧꦺꦴ. ꦄꦮꦏ꧀ꦏꦤ꧀ꦠꦶ ꦲꦺꦴꦠꦷꦠꦶ ꦤꦶꦧ꧀ꦧꦠ꧀ꦠꦶ ꦲꦺꦴꦠꦶ.

ꦄꦴꦫꦏ꧀ꦑꦢꦺꦮꦠꦴꦠꦶ ꦠꦱ꧀ꦱ ꦄꦴꦫꦏ꧀ꦑꦠ꧀ꦡꦴꦪ ꦜꦶꦠꦴ ꦢꦺꦮꦠꦴ. ꦄꦱ꧀ꦱ ꦠꦁ ꦄꦗ꧀ꦙꦴꦕꦴꦫꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦠꦡꦴ ꦤꦶꦕ꧀ꦖꦴꦫꦺꦱꦸꦤ꧀ꦠꦶ ꦠꦡꦴ ꦩꦲꦤ꧀ꦠꦁ ꦱꦢ꧀ꦢꦁ ꦏꦠ꧀ꦮꦴ ꦤꦶꦕ꧀ꦖꦴꦫꦺꦱꦸꦁ. ꦏꦶꦚ꧀ꦕꦴꦥꦶ ꦆꦣ ꦥꦴꦭ꦳ꦶꦪꦁ ꦄꦴꦏꦴꦱꦛ꧀ꦜꦢꦺꦮꦠꦴ ꦮꦶꦱꦸꦁ ꦤ ꦄꦴꦒꦠꦴ, ꦠꦡꦴꦥꦶ ꦱꦢ꧀ꦢꦱ꧀ꦱ ꦄꦤꦸꦱ꧀ꦱꦴꦮꦤꦺ ꦄꦪꦩꦤꦸꦏ꧀ꦏꦩꦺꦴꦠꦶ ꦢꦱ꧀ꦱꦺꦠꦸꦁ ꦕꦴꦠꦸꦩꦲꦴꦫꦴꦗꦶꦏꦢꦺꦮꦠꦴꦪꦺꦴ ꦢ꧀ꦮꦶꦣꦴ ꦏꦠ꧀ꦮꦴ ꦄꦴꦏꦴꦱꦛ꧀ꦜꦢꦺꦮꦠꦴ ꦮꦶꦱꦸꦁ ꦮꦸꦠ꧀ꦠꦴ. ꦠꦺꦤꦺꦠ꧀ꦡ ꦄꦴꦏꦴꦱꦛ꧀ꦜꦏꦴꦤꦁ ꦮꦶꦱꦸꦁ ꦒꦲꦶꦠꦠ꧀ꦠꦴ ꦕꦴꦠꦸꦩꦲꦴꦫꦴꦗꦶꦏꦴꦠꦶ ꦥꦫꦶꦨꦟ꧀ꦝꦥꦧ꧀ꦧꦠꦛ꧀ꦜꦏꦴ ꦮꦺꦢꦶꦠꦧ꧀ꦧꦴ. ꦆꦠꦶꦲꦴꦠꦶ ꦤꦶꦥꦴꦠꦱꦩꦸꦢꦴꦪꦺꦴ ꦌꦮꦁꦱꦢ꧀ꦢꦱ꧀ꦱ ꦄꦠ꧀ꦡꦺ ꦢꦛ꧀ꦜꦧ꧀ꦧꦺꦴꦠꦶ ꦄꦴꦲ ‘‘ꦌꦮ’’ꦤ꧀ꦠꦶ. ꦑꦟꦺꦤ ꦩꦸꦲꦸꦠ꧀ꦠꦺꦤꦴꦠꦶ ꦥꦢꦢ꧀ꦮꦪꦁ ꦮꦺꦮꦕꦤꦨꦴꦮꦠꦺꦴ ꦱꦩꦴꦤꦠ꧀ꦡꦩꦺꦮꦴꦠꦶ ꦢꦛ꧀ꦜꦧ꧀ꦧꦁ. ꦌꦏꦏꦺꦴꦭꦴꦲꦭꦩꦲꦺꦴꦱꦷꦠꦶ ꦢꦺꦮꦧ꧀ꦫꦲ꧀ꦩꦭꦺꦴꦏꦺꦱꦸ ꦌꦏꦏꦺꦴꦭꦴꦲꦭꦩꦲꦺꦴꦱꦶ. ꦏꦶꦚ꧀ꦕꦴꦥꦶ ꦲꦶ ꦱꦺꦴ ꦱꦢ꧀ꦢꦺꦴ ꦪꦴꦮ ꦧ꧀ꦫꦲ꧀ꦩꦭꦺꦴꦏꦴ ꦄꦧ꧀ꦨꦸꦒ꧀ꦒꦕ꧀ꦖꦶ, ꦠꦡꦴꦥꦶ ꦤ ꦱꦺꦴ ꦩꦤꦸꦱ꧀ꦱꦴꦤꦁ ꦮꦶꦱꦪꦺꦴ ꦠꦺꦱꦁ ꦫꦹꦥꦁ ꦮꦶꦪ, ꦠꦺꦤꦺꦮ ꦨꦶꦏ꧀ꦑꦹ ꦥꦸꦕ꧀ꦖꦶꦁꦱꦸ – ‘‘ꦏꦕ꧀ꦕꦶ ꦤꦺꦴ ꦠ꧀ꦮꦁ, ꦄꦴꦮꦸꦱꦺꦴ ꦱꦸꦢꦶꦤ꧀ꦤ, ꦄꦤꦨꦶꦫꦠꦺꦴ’’ꦠꦶ.

꧓꧗. ‘‘ꦌꦮꦁ ꦩꦴꦠꦴꦥꦸꦠ꧀ꦠꦴꦤꦁ ꦥꦧ꧀ꦧꦗ꧀ꦗꦴ ꦱꦦꦭꦴ ꦄꦲꦺꦴꦱꦶ, ꦥꦶꦠꦴ ꦥꦤ ꦮꦶꦥ꧀ꦥꦛꦶꦱꦴꦫꦴꦨꦶꦨꦹꦠꦺꦴ ꦮꦶꦲꦴꦱꦷ’’ꦠꦶ ꦮꦕꦤꦠꦺꦴ ꦱꦸꦢꦶꦤ꧀ꦤꦱ꧀ꦱ ꦠꦱ꧀ꦩꦶꦁ ꦄꦠ꧀ꦠꦨꦴꦮꦺ ꦄꦫꦲꦠ꧀ꦠꦴꦣꦶꦒꦩꦺꦴ ꦤꦴꦲꦺꦴꦱꦷꦠꦶ ꦮꦶꦚ꧀ꦚꦴꦪꦠꦶ. ꦏꦺꦕꦶ ꦥꦤ ‘‘ꦥꦸꦧ꧀ꦧꦺꦏꦠꦥꦸꦚ꧀ꦚꦠꦴꦪ ꦕꦺꦴꦢꦶꦪꦩꦴꦤꦱ꧀ꦱ ꦨꦧ꧀ꦧꦏꦸꦭꦥꦸꦠ꧀ꦠꦱ꧀ꦱꦴꦠꦶ ꦮꦸꦠ꧀ꦠꦠ꧀ꦠꦴ ꦱꦸꦢꦶꦤ꧀ꦤꦺꦴ ꦠꦁ ꦏꦸꦏ꧀ꦏꦸꦕ꧀ꦕꦁ ꦮꦶꦤꦺꦴꦢꦺꦠ꧀ꦮꦴ ꦄꦫꦲꦠ꧀ꦠꦁ ꦱꦕ꧀ꦖꦴꦏꦴꦱꦶ, ꦠꦺꦤꦺꦮ ꦥꦧ꧀ꦧꦗ꧀ꦗꦴ ꦄꦤꦸꦚ꧀ꦚꦴꦠꦴ’’ꦠꦶ ꦮꦢꦤ꧀ꦠꦶ. ꦠꦁ ꦥꦴꦭ꦳ꦶꦪꦴ ꦄꦛ꧀ꦜꦏꦡꦴꦪ ꦕ ꦤ ꦱꦩꦺꦠꦶ. ꦥꦸꦧ꧀ꦧꦺꦏꦠꦥꦸꦚ꧀ꦚꦠꦴ ꦕ ꦄꦥ꧀ꦥꦩꦴꦟꦁ ꦠꦴꦢꦶꦱꦱ꧀ꦱꦥꦶ ꦄꦤ꧀ꦠꦫꦴꦏꦠꦥꦴꦥꦏꦩ꧀ꦩꦱ꧀ꦱ ꦮꦱꦺꦤ ꦄꦗꦴꦠꦱꦠ꧀ꦠꦸꦤꦺꦴ ꦮꦶꦪ ꦄꦣꦶꦒꦩꦤ꧀ꦠꦫꦴꦪꦢꦱ꧀ꦱꦤꦠꦺꦴ. ꦏꦠꦴꦏꦠꦴꦤꦸꦱꦺꦴꦕꦤꦭꦏ꧀ꦑꦟꦁ ꦏꦸꦏ꧀ꦏꦸꦕ꧀ꦕꦁ ꦆꦣꦴꦣꦶꦥ꧀ꦥꦺꦠꦤ꧀ꦠꦶ ꦄꦴꦲ ‘‘ꦄꦗ꧀ꦙꦴꦕꦴꦫꦲꦺꦠꦸꦏꦺꦴ ꦥꦕ꧀ꦖꦴꦤꦸꦠꦴꦥꦺꦴ’’ꦠꦶ. ꦏꦠꦁ ꦄꦗ꧀ꦙꦴꦕꦴꦫꦁ ꦥꦛꦶꦕ꧀ꦕ ꦄꦤꦸꦱꦺꦴꦕꦤꦮꦱꦺꦤ ꦮꦶꦫꦹꦥꦁ ꦱꦫꦟꦁ ꦕꦶꦤ꧀ꦠꦤꦁ ꦮꦶꦥ꧀ꦥꦛꦶꦱꦴꦫꦺꦴꦠꦶ ꦄꦴꦲ ‘‘ꦮꦶꦥ꧀ꦥꦛꦶꦱꦴꦫꦺꦴꦠꦶꦥꦶ ꦠꦱ꧀ꦱꦺꦮ ꦤꦴꦩ’’ꦤ꧀ꦠꦶ. ꦏꦸꦕ꧀ꦖꦶꦠꦁ ꦏꦠꦁ ꦏꦶꦫꦶꦪꦴꦠꦶ ꦏꦸꦏꦠꦁ, ꦏꦸꦏꦠꦩꦺꦮ ꦏꦸꦏ꧀ꦏꦸꦕ꧀ꦕꦤ꧀ꦠꦶ ꦄꦴꦲ ‘‘ꦏꦸꦕ꧀ꦖꦶꦠꦏꦶꦫꦶꦪꦴꦨꦴꦮꦠꦺꦴ ꦏꦸꦏ꧀ꦏꦸꦕ꧀ꦕ’’ꦤ꧀ꦠꦶ. ꦥꦫꦶꦪꦴꦢꦶꦤ꧀ꦤꦩꦁꦱꦭꦺꦴꦲꦶꦠꦠ꧀ꦠꦴꦠꦶ ꦥꦫꦶꦏ꧀ꦑꦷꦟꦩꦁꦱꦭꦺꦴꦲꦶꦠꦠ꧀ꦠꦴ. ꦄꦮꦶꦥ꧀ꦦꦴꦫꦶꦏꦺꦴꦠꦶ ꦈꦢ꧀ꦢꦺꦱꦴꦢꦷꦱꦸ ꦧ꧀ꦪꦴꦥꦴꦫꦫꦲꦶꦠꦺꦴ, ꦄꦧ꧀ꦪꦴꦮꦛꦺꦴꦠꦶ ꦄꦠ꧀ꦡꦺꦴ. ꦮꦲꦕ꧀ꦖꦶꦤ꧀ꦤꦺꦴꦠꦶ ꦖꦶꦤ꧀ꦤꦮꦲꦺꦴ, ꦨꦴꦫꦮꦲꦤꦺꦤ ꦖꦶꦤ꧀ꦤꦏ꧀ꦑꦤ꧀ꦣꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦠꦁ ꦠꦁ ꦕꦶꦤ꧀ꦠꦪꦷꦠꦶ ‘‘ꦪꦢꦶ ꦄꦲꦁ ꦠꦁ ꦥꦴꦥꦁ ꦤ ꦏꦫꦶꦱ꧀ꦱꦁ, ꦆꦩꦺ ꦨꦶꦏ꧀ꦑꦹ ꦮꦶꦪ ꦥꦫꦶꦥꦸꦟ꧀ꦟꦱꦷꦭꦺꦴ ꦄꦱ꧀ꦱ’’ꦤ꧀ꦠꦶꦄꦴꦢꦶꦤꦴ ꦠꦁ ꦠꦁ ꦕꦶꦤ꧀ꦠꦪꦶ.

꧓꧘. ꦌꦮꦁꦨꦹꦠꦤ꧀ꦠꦶ ꦏꦶꦱꦭꦹꦑꦴꦢꦶꦨꦴꦮꦥ꧀ꦥꦠ꧀ꦠꦁ. ꦒꦟꦱꦔ꧀ꦒꦟꦶꦏꦴꦥꦥꦚ꧀ꦕꦺꦤꦴꦠꦶ ꦒꦟꦺ ꦗꦤꦱꦩꦴꦒꦩꦺ ꦱꦤ꧀ꦤꦶꦥꦠꦤꦁ ꦒꦟꦱꦔ꧀ꦒꦟꦶꦏꦴ, ꦒꦟꦱꦔ꧀ꦒꦟꦶꦏꦴꦪꦺꦮ ꦥꦥꦚ꧀ꦕꦺꦴ ꦒꦟꦱꦔ꧀ꦒꦟꦶꦏꦴꦥꦥꦚ꧀ꦕꦺꦴ, ꦠꦺꦤ. ꦪꦱ꧀ꦱꦴꦠꦶ ꦪꦺ ꦄꦱ꧀ꦱ. ꦏꦡꦴꦦꦴꦱꦸꦏꦴꦠꦶ ꦮꦶꦱ꧀ꦱꦴꦱꦶꦏꦨꦴꦮꦺꦤꦺꦮ ꦏꦡꦴꦏꦫꦟꦺ ꦦꦴꦱꦸꦏꦴ, ꦱꦸꦑꦺꦤ ꦮꦠ꧀ꦠꦸꦁ ꦱꦏ꧀ꦏꦸꦟꦺꦪ꧀ꦪꦴ, ꦱꦸꦑꦱꦩ꧀ꦨꦴꦱꦴꦠꦶ ꦄꦠ꧀ꦡꦺꦴ. ꦥꦱꦴꦢꦱ꧀ꦱ ꦥꦩꦴꦟꦠꦺꦴ ꦈꦴꦤꦴꦣꦶꦏꦠ꧀ꦠꦁ ꦱꦧ꧀ꦧꦢꦴ ꦱꦧ꧀ꦧꦺꦱꦁ ꦤꦠ꧀ꦡꦷꦠꦶ ꦄꦴꦲ ‘‘ꦥꦱꦴꦢꦥꦠꦶꦛ꧀ꦜꦴꦤꦺꦴꦏꦴꦱꦱ꧀ꦱ ꦱꦩ꧀ꦥꦸꦟ꧀ꦟꦠ꧀ꦠꦴ’’ꦠꦶ. ꦢꦴꦤꦷꦠꦶ ꦆꦩꦱ꧀ꦩꦶꦁ ꦄꦠ꧀ꦡꦺ ꦌꦠꦫꦲꦶ-ꦱꦢ꧀ꦢꦺꦴ ꦄꦠ꧀ꦡꦷꦠꦶ ꦄꦴꦲ ‘‘ꦢꦴꦤꦷꦠꦶ ꦤꦶꦥꦴꦠꦺꦴ’’ꦠꦶ. ꦤꦺꦴ-ꦱꦢ꧀ꦢꦺꦴꦥꦶ ꦤꦸ-ꦱꦢ꧀ꦢꦺꦴ ꦮꦶꦪ ꦥꦸꦕ꧀ꦖꦤꦠ꧀ꦡꦺꦴꦠꦶ ꦄꦴꦲ ‘‘ꦏꦕ꧀ꦕꦶ ꦤꦸ ꦠ꧀ꦮ’’ꦤ꧀ꦠꦶ. ꦠꦩꦺꦮ ꦄꦤꦨꦶꦫꦠꦶꦤ꧀ꦠꦶ ꦠꦺꦲꦶ ꦨꦶꦏ꧀ꦑꦹꦲꦶ ꦥꦸꦕ꧀ꦖꦶꦠꦁ ꦠꦩꦺꦮ ꦒꦶꦲꦶꦨꦴꦮꦥꦠ꧀ꦡꦤꦴꦏꦴꦫꦁ ꦄꦤꦨꦶꦫꦠꦶꦁ. ‘‘ꦠꦩꦺꦮꦴ’’ꦠꦶ ꦄꦮꦣꦴꦫꦟꦺꦤ ꦤꦶꦮꦠ꧀ꦠꦶꦠꦩꦠ꧀ꦡꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦄꦣꦶꦏꦸꦱꦭꦴꦤ’’ꦤ꧀ꦠꦶꦄꦴꦢꦶ. ꦄꦣꦶꦏꦸꦱꦭꦴ ꦣꦩ꧀ꦩꦴ ꦱꦩꦡꦮꦶꦥꦱ꧀ꦱꦤꦴꦢꦪꦺꦴ. ꦄꦠ꧀ꦡꦷꦠꦶ ꦮꦶꦱꦪꦨꦴꦮꦺꦤ ꦕꦶꦠ꧀ꦠꦺ ꦥꦫꦶꦮꦠ꧀ꦠꦤꦁ ꦱꦤ꧀ꦣꦴꦪ ꦮꦸꦠ꧀ꦠꦁ, ꦤ ꦥꦴꦥꦱ꧀ꦱ ꦮꦠ꧀ꦠꦩꦴꦤꦠꦁ ꦱꦤ꧀ꦣꦴꦪ, ꦄꦠ꧀ꦡꦶ ꦮꦶꦱꦪꦨꦴꦮꦺꦤ ꦕꦶꦠ꧀ꦠꦺ ꦥꦫꦶꦮꦠ꧀ꦠꦠꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦠꦺꦤꦴꦲ – ‘‘ꦤꦶꦕ꧀ꦕꦏꦴꦭꦁ ꦄꦨꦶꦩꦸꦑꦁ ꦮꦶꦪ ꦩꦺ ꦠꦶꦛ꧀ꦜꦠꦷ’’ꦠꦶ.

ꦪꦁ ꦠ꧀ꦮꦤ꧀ꦠꦶ ꦌꦠ꧀ꦡ ꦪꦤ꧀ꦠꦶ ꦲꦺꦠꦸꦄꦠ꧀ꦡꦺ ꦤꦶꦥꦴꦠꦺꦴ, ꦏꦫꦟꦠ꧀ꦡꦺ ꦮꦴ ꦥꦕ꧀ꦕꦠ꧀ꦠꦮꦕꦤꦤ꧀ꦠꦶ ꦄꦴꦲ ‘‘ꦪꦺꦤ ꦥꦴꦥꦺꦤꦴ’’ꦠꦶ. ꦄꦤꦺꦏꦥꦫꦶꦪꦴꦪꦺꦤꦴꦠꦶ ꦌꦠ꧀ꦡ ꦥꦫꦶꦪꦴꦪ-ꦱꦢ꧀ꦢꦺꦴ ꦏꦴꦫꦟꦮꦕꦤꦺꦴꦠꦶ ꦄꦴꦲ ‘‘ꦄꦤꦺꦏꦏꦴꦫꦟꦺꦤꦴ’’ꦠꦶ. ꦮꦶꦫꦴꦒꦠ꧀ꦡꦴꦪꦴꦠꦶ ꦨꦮꦨꦺꦴꦒꦺꦱꦸ ꦮꦶꦫꦗ꧀ꦗꦤꦠ꧀ꦡꦴꦪ. ꦤꦺꦴ ꦫꦴꦒꦺꦤ ꦫꦗ꧀ꦗꦤꦠ꧀ꦡꦴꦪꦴꦠꦶ ꦨꦮꦨꦺꦴꦒꦺꦱꦸꦪꦺꦮ ꦫꦴꦒꦺꦤ ꦄꦫꦚ꧀ꦗꦤꦠ꧀ꦡꦴꦪ. ꦠꦺꦤꦴꦲ ‘‘ꦨꦒꦮꦠꦴ ꦲꦷ’’ꦠꦶꦄꦴꦢꦶ. ꦌꦱ ꦤꦪꦺꦴ ꦱꦧ꧀ꦧꦥꦢꦺꦱꦹꦠꦶ ꦄꦣꦶꦥ꧀ꦥꦴꦪꦶꦏꦩꦠ꧀ꦠꦁ ꦱꦧ꧀ꦧꦥꦢꦺꦱꦸ ꦄꦠꦶꦢꦶꦱ꧀ꦱꦠꦶ. ꦆꦢꦁ ꦥꦤꦺꦠ꧀ꦡ ꦥꦫꦶꦪꦴꦪꦮꦕꦤꦩꦠ꧀ꦠꦤ꧀ꦠꦶ ‘‘ꦮꦶꦱꦁꦪꦺꦴꦒꦴꦪꦴ’’ꦠꦶꦄꦴꦢꦷꦱꦸ ꦱꦧ꧀ꦧꦥꦢꦺꦱꦸ ‘‘ꦏꦶꦭꦺꦱꦺꦲꦶ ꦮꦶꦱꦁꦪꦸꦗ꧀ꦗꦤꦠ꧀ꦡꦴꦪꦴ’’ꦠꦶꦄꦴꦢꦶꦤꦴ ꦥꦢꦠ꧀ꦡꦮꦶꦨꦴꦮꦤꦮꦱꦺꦤ ꦮꦸꦠ꧀ꦠꦥꦫꦶꦪꦴꦪꦮꦕꦤꦁ ꦱꦤ꧀ꦣꦴꦪ ꦮꦢꦠꦶ. ꦤ ꦱꦁꦪꦸꦗ꧀ꦗꦤꦠ꧀ꦡꦴꦪꦴꦠꦶ ꦏꦶꦭꦺꦱꦺꦲꦶ ꦤ ꦱꦁꦪꦸꦗ꧀ꦗꦤꦠ꧀ꦡꦴꦪ. ꦄꦒ꧀ꦒꦲꦟꦠ꧀ꦡꦴꦪꦴꦠꦶ ꦏꦶꦭꦺꦱꦺ ꦄꦒ꧀ꦒꦲꦟꦠ꧀ꦡꦴꦪ, ꦨꦮꦨꦺꦴꦒꦺ ꦮꦴ ꦠꦟ꧀ꦲꦴꦢꦶꦛ꧀ꦜꦶꦮꦱꦺꦤ ꦄꦒ꧀ꦒꦲꦟꦠ꧀ꦡꦴꦪ. ꦤ ꦱꦔ꧀ꦒꦲꦟꦠ꧀ꦡꦴꦪꦴꦠꦶ ꦌꦠ꧀ꦡꦴꦥꦶ ꦆꦩꦶꦤꦴꦮ ꦤꦪꦺꦤ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦤꦶꦧ꧀ꦧꦠ꧀ꦠꦶꦠꦭꦺꦴꦏꦸꦠ꧀ꦠꦫꦤꦶꦧ꧀ꦧꦴꦤꦩꦺꦮꦴꦠꦶ ꦱꦔ꧀ꦑꦴꦫꦺꦲꦶ ꦤꦶꦏ꧀ꦑꦤ꧀ꦠꦁ ꦮꦶꦮꦶꦠ꧀ꦠꦁ, ꦠꦠꦺꦴꦪꦺꦮ ꦭꦺꦴꦏꦠꦺꦴ ꦈꦠ꧀ꦠꦶꦟ꧀ꦟꦠ꧀ꦠꦴ ꦭꦺꦴꦏꦸꦠ꧀ꦠꦫꦁ ꦤꦶꦧ꧀ꦧꦴꦤꦁ. ꦩꦢꦤꦶꦩ꧀ꦩꦢꦤꦴꦪꦴꦠꦶ ꦮꦴꦠꦶ ꦌꦠ꧀ꦡ ꦄꦮꦸꦠ꧀ꦠꦱꦩꦸꦕ꧀ꦕꦪꦠ꧀ꦡꦺꦤ ꦮꦴ-ꦱꦢ꧀ꦢꦺꦤ ꦄꦴꦢꦶꦄꦠ꧀ꦡꦺꦤ ꦆꦠꦶ-ꦱꦢ꧀ꦢꦺꦤ ꦮꦴ ‘‘ꦥꦶꦥꦴꦱꦮꦶꦤꦪꦴꦪꦴ’’ꦠꦶꦄꦴꦢꦶ ꦱꦧ꧀ꦧꦁ ꦱꦔ꧀ꦒꦲꦶꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦤꦶꦧ꧀ꦧꦴꦤꦁ ꦄꦴꦫꦩ꧀ꦩꦟꦁ ꦏꦠ꧀ꦮꦴ ꦥꦮꦠ꧀ꦠꦩꦴꦤꦺꦤ ꦄꦫꦶꦪꦩꦒ꧀ꦒꦺꦤ ꦥꦲꦷꦪꦩꦴꦤꦴ ꦫꦴꦒꦩꦴꦤꦩꦢꦴꦢꦪꦺꦴ ꦠꦁ ꦥꦠ꧀ꦮꦴ ꦥꦲꦷꦪꦤ꧀ꦠꦶ ꦤꦴꦩꦴꦠꦶ ꦄꦴꦲ ‘‘ꦪꦱ꧀ꦩꦴ ꦥꦤ ꦠꦁ ꦄꦴꦒꦩ꧀ꦩꦴ’’ꦠꦶꦄꦴꦢꦶ. ꦠꦠ꧀ꦡ ꦠꦁ ꦄꦴꦒꦩ꧀ꦩꦴꦠꦶ ꦤꦶꦧ꧀ꦧꦴꦤꦁ ꦄꦴꦒꦩ꧀ꦩ ꦥꦛꦶꦕ꧀ꦕ ꦄꦫꦶꦪꦩꦒ꧀ꦒꦱ꧀ꦱ ꦄꦴꦫꦩ꧀ꦩꦟꦥꦕ꧀ꦕꦪꦨꦴꦮꦲꦺꦠꦸ. ꦩꦴꦤꦩꦢꦥꦸꦫꦶꦱꦩꦢꦴꦢꦪꦺꦴꦠꦶ ꦌꦠ꧀ꦡ ꦗꦴꦠꦶꦄꦴꦢꦶꦁ ꦤꦶꦱ꧀ꦱꦴꦪ ꦱꦺꦪ꧀ꦪꦱ꧀ꦱ ‘‘ꦱꦺꦪ꧀ꦪꦺꦴꦲꦩꦱ꧀ꦩꦷ’’ꦠꦶꦄꦴꦢꦶꦤꦴ ꦈꦥ꧀ꦥꦗ꧀ꦗꦤꦏꦩꦴꦤꦺꦴꦪꦺꦮ ꦩꦢꦗꦤꦤꦛ꧀ꦜꦺꦤ ꦩꦢꦺꦴꦠꦶ ꦩꦴꦤꦩꦢꦺꦴ. ꦥꦸꦫꦶꦱꦩꦢꦺꦴ ꦮꦸꦕ꧀ꦕꦠꦶ ꦥꦸꦫꦶꦱꦩꦴꦤꦺꦴ, ‘‘ꦄꦲꦁ ꦥꦸꦫꦶꦱꦺꦴ’’ꦠꦶ ꦈꦥ꧀ꦥꦗ꧀ꦗꦤꦏꦩꦴꦤꦺꦴ. ‘‘ꦄꦱꦢ꧀ꦣꦩ꧀ꦩꦱꦺꦮꦤꦱꦩꦠ꧀ꦡꦠꦁ ꦤꦶꦱ꧀ꦱꦴꦪ ꦥꦮꦠ꧀ꦠꦺꦴ ꦩꦴꦤꦺꦴ, ꦫꦴꦒꦺꦴ ꦌꦮ ꦮꦴ ꦥꦸꦫꦶꦱꦩꦢꦺꦴ’’ꦠꦶ ꦏꦺꦕꦶ. ꦄꦴꦢꦶ-ꦱꦢ꧀ꦢꦺꦤ ꦧꦭꦩꦢꦪꦺꦴꦧ꧀ꦧꦤꦩꦢꦴꦢꦶꦁ ꦱꦔ꧀ꦒꦟ꧀ꦲꦴꦠꦶ. ꦩꦲꦴꦒꦟ꧀ꦜꦶꦥꦢꦺ ꦥꦤ ꦩꦗ꧀ꦙꦶꦩꦒꦟ꧀ꦜꦶꦥꦢꦺ ꦕ ‘‘ꦥꦸꦫꦶꦱꦩꦢꦺꦴ ꦤꦴꦩ ꦱꦩ꧀ꦨꦮꦺꦴ’’ꦠꦶ ꦮꦸꦠ꧀ꦠꦁ, ꦠꦁ ꦆꦣ ꦪꦸꦠ꧀ꦠꦁ ꦮꦶꦪ ꦤ ꦢꦶꦱ꧀ꦱꦠꦶ. ꦤ ꦲꦶ ‘‘ꦨꦒꦮꦠꦴ ꦱꦩ꧀ꦨꦮꦱ꧀ꦱ ꦮꦶꦤꦴꦱꦴꦪ ꦣꦩ꧀ꦩꦺꦴ ꦢꦺꦱꦶꦠꦺꦴ’’ꦠꦶ ꦮꦠ꧀ꦠꦸꦁ ꦮꦛ꧀ꦛꦠꦶ. ꦤꦶꦩ꧀ꦩꦢꦴꦠꦶ ꦮꦶꦒꦠꦩꦢꦨꦴꦮꦴ. ꦆꦩꦩꦺꦮ ꦲꦶ ꦄꦠ꧀ꦡꦁ ꦢꦱ꧀ꦱꦺꦠꦸꦁ ‘‘ꦄꦩꦢꦴ’’ꦠꦶ ꦮꦸꦠ꧀ꦠꦁ. ꦩꦢꦴ ꦤꦶꦩ꧀ꦩꦢꦷꦪꦤ꧀ꦠꦶ ꦌꦠ꧀ꦡ ꦄꦩꦢꦨꦴꦮꦁ ꦮꦶꦤꦴꦱꦁ ꦒꦕ꧀ꦖꦤ꧀ꦠꦷꦠꦶ ꦩꦢꦤꦶꦩ꧀ꦩꦢꦤꦺꦴ. ꦌꦱ ꦤꦪꦺꦴ ꦱꦺꦱꦥꦢꦺꦱꦸꦥꦶ.

ꦏꦴꦩꦥꦶꦥꦴꦱꦴꦠꦶ ꦏꦴꦩꦴꦤꦁ ꦥꦴꦠꦸꦏꦩ꧀ꦪꦠꦴ, ꦏꦴꦩꦠꦟ꧀ꦲꦴꦠꦶ ꦄꦠ꧀ꦡꦺꦴ. ꦄꦴꦭꦷꦪꦤ꧀ꦠꦶ ꦄꦨꦶꦫꦩꦶꦠꦧ꧀ꦧꦛ꧀ꦜꦺꦤ ꦱꦺꦮꦷꦪꦤ꧀ꦠꦷꦠꦶ ꦄꦴꦭꦪꦴ, ꦥꦚ꧀ꦕ ꦏꦴꦩꦒꦸꦟꦴꦠꦶ ꦄꦴꦲ ‘‘ꦥꦚ꧀ꦕ ꦏꦴꦩꦒꦸꦟꦴꦭꦪꦴ’’ꦠꦶ. ꦥꦚ꧀ꦕꦱꦸ ꦲꦶ ꦏꦴꦩꦒꦸꦟꦺꦱꦸ ꦖꦤ꧀ꦢꦫꦴꦒꦥ꧀ꦥꦲꦴꦤꦺꦤꦺꦮ ꦥꦚ꧀ꦕ ꦏꦴꦩꦒꦸꦟꦴꦥꦶ ꦥꦲꦷꦤꦴ ꦤꦴꦩ ꦲꦺꦴꦤ꧀ꦠꦶ, ꦠꦺꦤꦺꦮ ‘‘ꦪꦺꦴ, ꦨꦶꦏ꧀ꦑꦮꦺ, ꦫꦹꦥꦺꦱꦸ ꦖꦤ꧀ꦢꦫꦴꦒꦺꦴ’’ꦠꦶꦄꦴꦢꦶ (ꦱꦁ. ꦤꦶ. ꧓.꧓꧒꧓) ꦮꦸꦠ꧀ꦠꦁ. ꦥꦚ꧀ꦕꦏꦴꦩꦒꦸꦟꦺꦱꦸ ꦮꦴ ꦄꦴꦭꦪꦴ ꦥꦚ꧀ꦕꦏꦴꦩꦒꦸꦟꦴꦭꦪꦴ. ꦄꦴꦭꦷꦪꦤ꧀ꦠꦶ ꦄꦭ꧀ꦭꦷꦪꦤ꧀ꦠꦶ ꦄꦨꦶꦫꦩꦤꦮꦱꦺꦤ ꦱꦺꦮꦤ꧀ꦠꦷꦠꦶ ꦄꦴꦭꦪꦴꦠꦶ ꦲꦶ ꦠꦟ꧀ꦲꦴꦮꦶꦕꦫꦶꦠꦴꦤꦁ ꦄꦣꦶꦮꦕꦤꦁ. ꦠꦺꦨꦹꦩꦏꦮꦛ꧀ꦛꦤ꧀ꦠꦶ ꦠꦷꦱꦸ ꦨꦹꦩꦷꦱꦸ ꦏꦩ꧀ꦩꦏꦶꦭꦺꦱꦮꦶꦥꦴꦏꦴ ꦮꦛ꧀ꦛꦤꦛ꧀ꦜꦺꦤ ꦮꦛ꧀ꦛꦁ. ꦮꦶꦫꦗ꧀ꦗꦠꦷꦠꦶ ꦥꦭꦸꦗ꧀ꦗꦠꦶ. ‘‘ꦮꦶꦫꦗ꧀ꦗꦠꦷꦠꦶ ꦏꦴꦩꦮꦶꦤꦴꦱꦺꦴ ꦮꦸꦠ꧀ꦠꦺꦴ, ꦤꦶꦫꦸꦗ꧀ꦙꦠꦷꦠꦶ ꦌꦏꦥ꧀ꦥꦲꦴꦫꦺꦤ ꦮꦶꦤꦴꦱꦺꦴ’’ꦠꦶ ꦒꦟ꧀ꦜꦶꦥꦢꦺꦱꦸ ꦮꦸꦠ꧀ꦠꦁ. ꦮꦶꦫꦴꦒꦺꦴ ꦤꦶꦫꦺꦴꦣꦺꦴꦠꦶ ꦱꦴꦩꦚ꧀ꦚꦕꦺꦴꦢꦤꦴꦪꦥꦶ ‘‘ꦠꦟ꧀ꦲꦴꦏ꧀ꦑꦪꦺꦴ’’ꦠꦶ ꦄꦣꦶꦏꦠꦠ꧀ꦠꦴ ꦠꦟ꧀ꦲꦴꦪ ꦌꦮ ꦮꦶꦫꦗ꧀ꦗꦤꦁ ꦤꦶꦫꦸꦗ꧀ꦙꦤꦚ꧀ꦕ ꦮꦸꦠ꧀ꦠꦁ.

ꦕꦠꦱ꧀ꦱꦺꦴ ꦪꦺꦴꦤꦶꦪꦺꦴꦠꦶ ꦌꦠ꧀ꦡ ꦪꦺꦴꦤꦷꦠꦶ ꦑꦤ꧀ꦣꦏꦺꦴꦛ꧀ꦜꦴꦱꦱ꧀ꦱꦥꦶ ꦏꦴꦫꦟꦱ꧀ꦱꦥꦶ ꦥꦱ꧀ꦱꦴꦮꦩꦒ꧀ꦒꦱ꧀ꦱꦥꦶ ꦤꦴꦩꦁ. ‘‘ꦕꦠꦱ꧀ꦱꦺꦴ ꦤꦴꦒꦪꦺꦴꦤꦶꦪꦺꦴ (ꦱꦁ. ꦤꦶ. ꧓.꧓꧔꧒-꧓꧔꧓) ꦕꦠꦱ꧀ꦱꦺꦴ ꦱꦸꦥꦟ꧀ꦟꦪꦺꦴꦤꦶꦪꦺꦴ’’ꦠꦶ ꦌꦠ꧀ꦡ ꦲꦶ ꦑꦤ꧀ꦣꦏꦺꦴꦛ꧀ꦜꦴꦱꦺꦴ ꦪꦺꦴꦤꦶ ꦤꦴꦩ. ‘‘ꦪꦺꦴꦤꦶ ꦲꦺꦱꦴ ꦨꦹꦩꦶꦗ ꦦꦭꦱ꧀ꦱ ꦄꦣꦶꦒꦩꦴꦪꦴ’’ꦠꦶ (ꦩ. ꦤꦶ. ꧓.꧒꧒꧖) ꦌꦠ꧀ꦡ ꦏꦴꦫꦟꦁ. ‘‘ꦤ ꦕꦴꦲꦁ ꦧ꧀ꦫꦴꦲ꧀ꦩꦟꦁ ꦧ꧀ꦫꦹꦩꦶ, ꦪꦺꦴꦤꦶꦗꦁ ꦩꦠ꧀ꦠꦶꦱꦩ꧀ꦨꦮ’’ꦤ꧀ꦠꦶ (ꦩ. ꦤꦶ. ꧒.꧔꧕꧗; ꦣ. ꦥ. ꧓꧙꧖) ꦌꦠ꧀ꦡ ꦥꦱ꧀ꦱꦴꦮꦩꦒ꧀ꦒꦺꦴ. ꦆꦣ ꦥꦤ ꦑꦤ꧀ꦣꦏꦺꦴꦛ꧀ꦜꦴꦱꦺꦴ ‘‘ꦪꦺꦴꦤꦷ’’ꦠꦶ ꦄꦣꦶꦥ꧀ꦥꦺꦠꦺꦴ. ꦪꦮꦤ꧀ꦠꦶ ꦠꦴꦪ ꦱꦠ꧀ꦠꦴ ꦄꦩꦶꦱ꧀ꦱꦶꦠꦴꦥꦶ ꦱꦩꦴꦤꦗꦴꦠꦶꦠꦴꦪ ꦩꦶꦱ꧀ꦱꦶꦠꦴ ꦲꦺꦴꦤ꧀ꦠꦷꦠꦶ ꦪꦺꦴꦤꦶ. ꦱꦴ ꦥꦤ ꦄꦠ꧀ꦡꦠꦺꦴ ꦄꦟ꧀ꦝꦴꦢꦶꦈꦥ꧀ꦥꦠ꧀ꦠꦶꦛ꧀ꦜꦴꦤꦮꦶꦱꦶꦛ꧀ꦜꦺꦴ ꦑꦤ꧀ꦣꦴꦤꦁ ꦨꦴꦒꦱꦺꦴ ꦥꦮꦠ꧀ꦠꦶꦮꦶꦱꦺꦱꦺꦴ, ꦱꦴ ꦕ ꦄꦟ꧀ꦝꦗꦗꦭꦴꦧꦸꦗꦱꦁꦱꦺꦢꦗꦎꦥꦥꦴꦠꦶꦏꦮꦱꦺꦤ ꦕꦠꦸꦧ꧀ꦧꦶꦣꦴ. ꦮꦸꦠ꧀ꦠꦚ꧀ꦲꦺꦠꦁ ‘‘ꦕꦠꦱ꧀ꦱꦺꦴ ꦑꦺꦴ ꦆꦩꦴ, ꦱꦴꦫꦶꦥꦸꦠ꧀ꦠ, ꦪꦺꦴꦤꦶꦪꦺꦴ. ꦏꦠꦩꦴ ꦕꦠꦱ꧀ꦱꦺꦴ? ꦄꦟ꧀ꦝꦗꦴ ꦪꦺꦴꦤꦶ ꦗꦭꦴꦧꦸꦗꦴ ꦪꦺꦴꦤꦶ ꦱꦁꦱꦺꦢꦗꦴ ꦪꦺꦴꦤꦶ ꦎꦥꦥꦴꦠꦶꦏꦴ ꦪꦺꦴꦤꦷ’’ꦠꦶ (ꦩ. ꦤꦶ. ꧑.꧑꧕꧒).

ꦠꦠ꧀ꦡ ꦄꦟ꧀ꦝꦺ ꦗꦴꦠꦴ ꦄꦟ꧀ꦝꦗꦴ. ꦗꦭꦴꦧꦸꦩ꧀ꦲꦶ ꦗꦴꦠꦴ ꦗꦭꦴꦧꦸꦗꦴ. ꦱꦁꦱꦺꦢꦺ ꦗꦴꦠꦴ ꦱꦁꦱꦺꦢꦗꦴ. ꦮꦶꦤꦴ ꦌꦠꦺꦲꦶ ꦏꦴꦫꦟꦺꦲꦶ ꦈꦥ꧀ꦥꦠꦶꦠ꧀ꦮꦴ ꦮꦶꦪ ꦤꦶꦧ꧀ꦧꦠ꧀ꦠꦴꦠꦶ ꦎꦥꦥꦴꦠꦶꦏꦴ. ꦌꦠ꧀ꦡ ꦕ ꦥꦺꦠꦭꦺꦴꦏꦺ ꦠꦶꦫꦕ꧀ꦖꦴꦤꦺ ꦩꦤꦸꦱ꧀ꦱꦺꦱꦸ ꦕ ꦄꦟ꧀ꦝꦗꦴꦢꦪꦺꦴ ꦕꦠꦱ꧀ꦱꦺꦴꦥꦶ ꦪꦺꦴꦤꦶꦪꦺꦴ ꦱꦩ꧀ꦨꦮꦤ꧀ꦠꦶ, ꦩꦤꦸꦱ꧀ꦱꦺꦱꦸ ꦥꦤꦺꦠ꧀ꦡ ꦏꦺꦕꦶꦢꦺꦮ ꦎꦥꦥꦴꦠꦶꦏꦴ ꦲꦺꦴꦤ꧀ꦠꦶ ꦩꦲꦴꦥꦢꦸꦩꦏꦸꦩꦴꦫꦴꦢꦪꦺꦴ ꦮꦶꦪ. ꦄꦟ꧀ꦝꦗꦴꦥꦶ ꦏꦺꦴꦤ꧀ꦠꦥꦸꦠ꧀ꦠꦴ ꦢ꧀ꦮꦺꦨꦴꦠꦶꦪꦡꦺꦫꦴ ꦮꦶꦪ, ꦱꦁꦱꦺꦢꦗꦴꦥꦶ ꦥꦢꦸꦩꦒꦧ꧀ꦨꦺ ꦤꦶꦧ꧀ꦧꦠ꧀ꦠꦥꦺꦴꦏ꧀ꦑꦫꦱꦴꦠꦶꦧ꧀ꦫꦴꦲ꧀ꦩꦟꦥꦢꦸꦩꦮꦠꦷꦢꦺꦮꦷꦄꦴꦢꦪꦺꦴ ꦮꦶꦪ ꦏꦺꦕꦶꦢꦺꦮ ꦲꦺꦴꦤ꧀ꦠꦶ, ꦪꦺꦨꦸꦪ꧀ꦪꦺꦤ ꦥꦤ ꦩꦤꦸꦱ꧀ꦱꦴ ꦗꦭꦴꦧꦸꦗꦴꦮ. ꦥꦺꦠꦺꦱꦸꦥꦶ ꦤꦶꦗ꧀ꦙꦴꦩꦠꦟ꧀ꦲꦶꦏꦥꦺꦠꦴꦤꦁ ꦤꦶꦕ꧀ꦕꦢꦸꦏ꧀ꦑꦴꦠꦸꦫꦠꦴꦪ ꦏꦴꦩꦱꦺꦮꦤꦴ ꦤꦠ꧀ꦡꦶ, ꦠꦱ꧀ꦩꦴ ꦠꦺ ꦒꦧ꧀ꦨꦱꦺꦪ꧀ꦪꦏꦴ ꦤ ꦲꦺꦴꦤ꧀ꦠꦶ. ꦗꦴꦭꦴꦮꦤ꧀ꦠꦠꦴꦪ ꦤ ꦠꦴꦱꦁ ꦏꦸꦕ꧀ꦖꦶꦪꦁ ꦒꦧ꧀ꦨꦺꦴ ꦱꦟ꧀ꦜꦴꦠꦶ, ꦠꦱ꧀ꦩꦴ ꦠꦺ ꦎꦥꦥꦴꦠꦶꦏꦴꦪꦺꦮ ꦱꦁꦱꦺꦢꦗꦠꦴꦪꦥꦶ ꦄꦱꦩ꧀ꦨꦮꦠꦺꦴ, ꦄꦮꦱꦺꦱꦥꦺꦠꦴ ꦥꦤ ꦕꦠꦸꦪꦺꦴꦤꦶꦏꦴꦥꦶ ꦲꦺꦴꦤ꧀ꦠꦶ. ꦪꦡꦴ ꦕ ꦠꦺ, ꦌꦮꦁ ꦪꦏ꧀ꦑꦴꦥꦶ ꦱꦧ꧀ꦧꦕꦠꦸꦥ꧀ꦥꦢꦥꦏ꧀ꦑꦶꦗꦴꦠꦶꦢꦷꦓꦗꦴꦠꦶꦄꦴꦢꦪꦺꦴꦥꦶ ꦱꦧ꧀ꦧꦺ ꦕꦠꦸꦪꦺꦴꦤꦶꦏꦴꦪꦺꦮ. ꦱꦧ꧀ꦧꦺ ꦤꦺꦫꦪꦶꦏꦴ ꦕ ꦕꦠꦸꦩꦲꦴꦫꦴꦗꦶꦏꦠꦺꦴ ꦥꦛ꧀ꦜꦴꦪ ꦈꦥꦫꦶꦢꦺꦮꦴ ꦕ ꦎꦥꦥꦴꦠꦶꦏꦴꦪꦺꦮ, ꦨꦸꦩ꧀ꦩꦢꦺꦮꦴ ꦥꦤ ꦕꦠꦸꦪꦺꦴꦤꦶꦏꦴꦮ ꦲꦺꦴꦤ꧀ꦠꦶ. ꦠꦠ꧀ꦡ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦺꦢꦗꦎꦥꦥꦴꦠꦶꦏꦴꦤꦁ ꦄꦪꦁ ꦮꦶꦱꦺꦱꦺꦴ – ꦱꦁꦱꦺꦢꦗꦴ ꦩꦤ꧀ꦢꦴ ꦢꦲꦫꦴ ꦲꦸꦠ꧀ꦮꦴ ꦤꦶꦧ꧀ꦧꦠ꧀ꦠꦤ꧀ꦠꦶ, ꦎꦥꦥꦴꦠꦶꦏꦴ ꦱꦺꦴꦭ꦳ꦱꦮꦱ꧀ꦱꦸꦢ꧀ꦢꦺꦱꦶꦏꦴ ꦲꦸꦠ꧀ꦮꦴ.

ꦥꦚ꧀ꦕ ꦒꦠꦶꦪꦺꦴꦠꦶ ꦌꦠ꧀ꦡ ꦱꦸꦏꦠꦢꦸꦏ꧀ꦏꦛꦏꦩ꧀ꦩꦮꦱꦺꦤ ꦒꦤ꧀ꦠꦧ꧀ꦧꦴ ꦈꦥꦥꦗ꧀ꦗꦶꦠꦧ꧀ꦧꦴꦠꦶ ꦒꦠꦶꦪꦺꦴ. ꦪꦡꦴ ꦲꦶ ꦏꦩ꧀ꦩꦨꦮꦺꦴ ꦥꦫꦩꦠ꧀ꦡꦠꦺꦴ ꦄꦱꦠꦶꦥꦶ ꦏꦴꦫꦏꦺ ꦥꦕ꧀ꦕꦪꦱꦴꦩꦒ꧀ꦒꦶꦪꦴ ꦱꦶꦢ꧀ꦣꦺꦴ, ꦠꦁꦱꦩꦔ꧀ꦒꦶꦤꦴ ꦱꦤ꧀ꦠꦴꦤꦭꦏ꧀ꦑꦟꦺꦤ ꦱꦠ꧀ꦠꦺꦤ ꦏꦠꦺꦴꦠꦶ ꦮꦺꦴꦲꦫꦷꦪꦠꦶ, ꦌꦮꦁ ꦈꦥꦥꦠ꧀ꦠꦶꦨꦮꦭꦏ꧀ꦑꦟꦒꦠꦶꦪꦺꦴ ꦥꦫꦩꦠ꧀ꦡꦠꦺꦴ ꦄꦱꦠꦶꦥꦶ ꦒꦩꦏꦺ ꦠꦁꦠꦁꦏꦩ꧀ꦩꦮꦱꦺꦤ ꦪꦺꦱꦁ ꦠꦴꦤꦶ ꦏꦩ꧀ꦩꦴꦤꦶ ꦠꦺꦲꦶ ꦒꦤ꧀ꦠꦧ꧀ꦧꦴꦠꦶ ꦮꦺꦴꦲꦫꦷꦪꦤ꧀ꦠꦶ. ꦄꦥꦶꦕ ꦒꦠꦶꦒꦠꦶ ꦤꦶꦧ꧀ꦧꦠ꧀ꦠꦶꦒꦠꦶ ꦄꦗ꧀ꦙꦴꦱꦪꦒꦠꦶ ꦮꦶꦨꦮꦒꦠꦶ ꦤꦶꦥ꧀ꦦꦠ꧀ꦠꦶꦒꦠꦷꦠꦶ ꦧꦲꦸꦮꦶꦣꦴ ꦒꦠꦶ ꦤꦴꦩ. ꦠꦠ꧀ꦡ ‘‘ꦠꦁ ꦒꦠꦶꦁ ꦥꦺꦕ꧀ꦕ ꦒꦕ꧀ꦖꦴꦩꦷ’’ꦠꦶ (ꦄ. ꦤꦶ. ꧔.꧑꧘꧔) ꦕ ‘‘ꦪꦱ꧀ꦱ ꦒꦠꦶꦁ ꦤ ꦗꦴꦤꦤ꧀ꦠꦶ, ꦢꦺꦮꦴ ꦒꦤ꧀ꦣꦧ꧀ꦧꦩꦴꦤꦸꦱꦴ’’ꦠꦶ (ꦣ. ꦥ. ꧔꧒꧐; ꦱꦸ. ꦤꦶ. ꧖꧔꧙) ꦕ ꦄꦪꦁ ꦒꦠꦶꦒꦠꦶ ꦤꦴꦩ. ‘‘ꦆꦩꦺꦱꦁ ꦑꦺꦴ ꦥꦤꦴꦲꦁ ꦨꦶꦏ꧀ꦑꦹꦤꦁ ꦱꦷꦭꦮꦤ꧀ꦠꦴꦤꦁ ꦤꦺꦮ ꦗꦴꦤꦴꦩꦶ ꦄꦴꦒꦠꦶꦁ ꦮꦴ ꦒꦠꦶꦁ ꦮꦴ’’ꦠꦶ (ꦩ. ꦤꦶ. ꧑.꧕꧐꧘) ꦄꦪꦁ ꦤꦶꦧ꧀ꦧꦠ꧀ꦠꦶꦒꦠꦶ ꦤꦴꦩ. ‘‘ꦌꦮꦩ꧀ꦥꦶ ꦑꦺꦴ ꦠꦺ ꦄꦲꦁ ꦧ꧀ꦫꦲ꧀ꦩꦺ ꦒꦠꦶꦚ꧀ꦕ ꦥꦗꦴꦤꦴꦩꦶ ꦕꦸꦠꦶꦚ꧀ꦕ ꦥꦗꦴꦤꦴꦩꦷ’’ꦠꦶ (ꦩ. ꦤꦶ. ꧑.꧕꧐꧓) ꦄꦪꦁ ꦄꦗ꧀ꦙꦴꦱꦪꦒꦠꦶ ꦤꦴꦩ. ‘‘ꦮꦶꦨꦮꦺꦴ ꦒꦠꦶ ꦣꦩ꧀ꦩꦴꦤꦁ, ꦤꦶꦧ꧀ꦧꦴꦤꦁ ꦄꦫꦲꦠꦺꦴ ꦒꦠꦷ’’ꦠꦶ (ꦥꦫꦶ. ꧓꧓꧙) ꦄꦪꦁ ꦮꦶꦨꦮꦒꦠꦶ ꦤꦴꦩ. ‘‘ꦢ꧀ꦮꦺꦪꦺꦮ ꦒꦠꦶꦪꦺꦴ ꦱꦩ꧀ꦨꦮꦤ꧀ꦠꦶ ꦄꦤꦚ꧀ꦚꦴ’’ꦠꦶ (ꦢꦷ. ꦤꦶ. ꧑.꧒꧕꧘; ꧒.꧓꧔; ꧓.꧒꧐꧐) ꦄꦪꦁ ꦤꦶꦥ꧀ꦦꦠ꧀ꦠꦶꦒꦠꦶ ꦤꦴꦩ. ꦠꦴꦱꦸ ꦆꦣ ꦒꦠꦶꦒꦠꦶ ꦄꦣꦶꦥ꧀ꦥꦺꦠꦴ, ꦱꦴ ꦥꦤ ꦤꦶꦫꦪꦠꦶꦫꦕ꧀ꦖꦴꦤꦪꦺꦴꦤꦶꦥꦺꦠ꧀ꦠꦶꦮꦶꦱꦪꦩꦤꦈꦱ꧀ꦱꦢꦺꦮꦴꦤꦁ ꦮꦱꦺꦤ ꦥꦚ꧀ꦕꦮꦶꦣꦴ ꦲꦺꦴꦠꦶ. ꦮꦸꦠ꧀ꦠꦚ꧀ꦲꦺꦠꦁ – ‘‘ꦥꦚ꧀ꦕ ꦑꦺꦴ ꦆꦩꦴ, ꦱꦴꦫꦶꦥꦸꦠ꧀ꦠ, ꦒꦠꦶꦪꦺꦴ. ꦏꦠꦩꦴ ꦥꦚ꧀ꦕ? ꦤꦶꦫꦪꦺꦴ ꦠꦶꦫꦕ꧀ꦖꦴꦤꦪꦺꦴꦤꦶ ꦥꦺꦠ꧀ꦠꦶꦮꦶꦱꦪꦺꦴ ꦩꦤꦸꦱ꧀ꦱꦴ ꦢꦺꦮꦴ’’ꦠꦶ (ꦩ. ꦤꦶ. ꧑.꧑꧕꧓).

ꦠꦠ꧀ꦡ ꦪꦱ꧀ꦱ ꦈꦥ꧀ꦥꦗ꧀ꦗꦠꦶ, ꦠꦁ ꦧ꧀ꦫꦹꦲꦺꦤ꧀ꦠꦺꦴꦪꦺꦮ ꦈꦥ꧀ꦥꦗ꧀ꦗꦠꦷꦠꦶ ꦄꦪꦺꦴ, ꦱꦸꦑꦁ. ꦤꦠ꧀ꦡꦶ ꦌꦠ꧀ꦡ ꦄꦪꦺꦴꦠꦶ ꦤꦶꦫꦪꦺꦴ, ꦠꦠꦺꦴ ꦌꦮ ꦫꦩꦶꦠꦧ꧀ꦧꦁ ꦄꦱ꧀ꦱꦴꦢꦺꦠꦧ꧀ꦧꦁ ꦠꦠ꧀ꦡ ꦤꦠ꧀ꦡꦷꦠꦶ ꦤꦶꦫꦠꦶꦄꦠ꧀ꦡꦺꦤ ꦤꦶꦫꦱ꧀ꦱꦴꦢꦛ꧀ꦜꦺꦤ ꦕ ꦤꦶꦫꦪꦺꦴꦠꦶ ꦮꦸꦕ꧀ꦕꦠꦶ. ꦠꦶꦫꦶꦪꦁ ꦄꦚ꧀ꦕꦶꦠꦴꦠꦶ ꦠꦶꦫꦕ꧀ꦖꦴꦤꦴ, ꦢꦺꦮꦩꦤꦸꦱ꧀ꦱꦴꦢꦪꦺꦴ ꦮꦶꦪ ꦈꦢ꧀ꦣꦁ ꦢꦷꦓꦴ ꦄꦲꦸꦠ꧀ꦮꦴ ꦠꦶꦫꦶꦪꦁ ꦢꦷꦓꦴꦠꦶ ꦄꦠ꧀ꦡꦺꦴ. ꦥꦏꦛ꧀ꦜꦠꦺꦴ ꦱꦸꦑꦠꦺꦴ ꦄꦪꦤꦁ ꦄꦥꦒꦩꦺꦴ ꦥꦺꦕ꧀ꦕꦨꦴꦮꦺꦴ, ꦠꦁ ꦥꦺꦕ꧀ꦕꦨꦴꦮꦁ ꦥꦠ꧀ꦠꦴꦤꦁ ꦮꦶꦱꦪꦺꦴꦠꦶ ꦥꦺꦠ꧀ꦠꦶꦮꦶꦱꦪꦺꦴ, ꦥꦺꦠꦪꦺꦴꦤꦶ. ꦩꦤꦱ꧀ꦱ ꦈꦱ꧀ꦱꦤ꧀ꦤꦠꦴꦪ ꦩꦤꦸꦱ꧀ꦱꦴ, ꦱꦠꦶꦱꦹꦫꦨꦴꦮꦧ꧀ꦫꦲ꧀ꦩꦕꦫꦶꦪꦪꦺꦴꦒ꧀ꦪꦠꦴꦢꦶꦒꦸꦟꦮꦱꦺꦤ ꦈꦥꦕꦶꦠꦩꦴꦤꦱꦠꦴꦪ ꦈꦏ꧀ꦏꦛ꧀ꦜꦒꦸꦟꦕꦶꦠ꧀ꦠꦠꦴꦪ ꦩꦤꦸꦱ꧀ꦱꦴꦠꦶ ꦮꦸꦠ꧀ꦠꦁ ꦲꦺꦴꦠꦶ, ꦄꦪꦁ ꦥꦤꦠ꧀ꦡꦺꦴ ꦤꦶꦥ꧀ꦥꦫꦶꦪꦴꦪꦠꦺꦴ ꦗꦩ꧀ꦧꦸꦢꦷꦥꦮꦴꦱꦷꦮꦱꦺꦤ ꦮꦺꦢꦶꦠꦧ꧀ꦧꦺꦴ. ꦪꦡꦴꦲ – ‘‘ꦠꦷꦲꦶ, ꦨꦶꦏ꧀ꦑꦮꦺ, ꦜꦴꦤꦺꦲꦶ ꦗꦩ꧀ꦧꦸꦢꦷꦥꦏꦴ ꦩꦤꦸꦱ꧀ꦱꦴ ꦈꦠ꧀ꦠꦫꦏꦸꦫꦸꦏꦺ ꦕ ꦩꦤꦸꦱ꧀ꦱꦺ ꦄꦣꦶꦒ꧀ꦒꦟ꧀ꦲꦤ꧀ꦠꦶ ꦢꦺꦮꦺ ꦕ ꦠꦴꦮꦠꦶꦁꦱꦺ. ꦏꦠꦩꦺꦲꦶ ꦠꦷꦲꦶ? ꦱꦹꦫꦴ ꦱꦠꦶꦩꦤ꧀ꦠꦺꦴ ꦆꦣ ꦧ꧀ꦫꦲ꧀ꦩꦕꦫꦶꦪꦮꦴꦱꦺꦴ’’ꦠꦶ (ꦄ. ꦤꦶ. ꧙.꧒꧑). ꦠꦡꦴ ꦲꦶ ꦧꦸꦢ꧀ꦣꦴ ꦕ ꦨꦒꦮꦤ꧀ꦠꦺꦴ ꦥꦕ꧀ꦕꦺꦏꦧꦸꦢ꧀ꦣꦴ ꦄꦒ꧀ꦒꦱꦴꦮꦏꦴ ꦩꦲꦴꦱꦴꦮꦏꦴ ꦕꦏ꧀ꦏꦮꦠ꧀ꦠꦶꦤꦺꦴ ꦄꦚ꧀ꦚꦺ ꦕ ꦩꦲꦴꦤꦸꦨꦴꦮꦴ ꦱꦠ꧀ꦠꦴ ꦠꦠ꧀ꦡꦺꦮ ꦈꦥ꧀ꦥꦗ꧀ꦗꦤ꧀ꦠꦶ, ꦠꦺꦲꦶ ꦱꦩꦴꦤꦫꦹꦥꦴꦢꦶꦠꦴꦪ ꦥꦤ ꦱꦢ꧀ꦣꦶꦁ ꦥꦫꦶꦠ꧀ꦠꦢꦷꦥꦮꦴꦱꦷꦲꦶ ꦆꦠꦫꦩꦲꦴꦢꦷꦥꦮꦴꦱꦶꦤꦺꦴꦥꦶ ꦩꦤꦸꦱ꧀ꦱꦴꦠ꧀ꦮꦺꦮ ꦥꦚ꧀ꦚꦴꦪꦶꦁꦱꦸ.

ꦄꦥꦫꦺ ꦥꦤ ꦨꦟꦤ꧀ꦠꦶ ‘‘ꦭꦺꦴꦨꦴꦢꦷꦲꦶ ꦄꦭꦺꦴꦨꦴꦢꦷꦲꦶ ꦕ ꦱꦲꦶꦠꦱ꧀ꦱ ꦩꦤꦱ꧀ꦱ ꦈꦱ꧀ꦱꦤ꧀ꦤꦠꦴꦪ ꦩꦤꦸꦱ꧀ꦱꦴ. ꦪꦺ ꦲꦶ ꦱꦠ꧀ꦠꦴ ꦩꦤꦸꦱ꧀ꦱꦗꦴꦠꦶꦏꦴ, ꦠꦺꦱꦸ ꦮꦶꦱꦺꦱꦠꦺꦴ ꦭꦺꦴꦨꦴꦢꦪꦺꦴ ꦄꦭꦺꦴꦨꦴꦢꦪꦺꦴ ꦕ ꦈꦱ꧀ꦱꦤ꧀ꦤꦴ. ꦠꦺ ꦭꦺꦴꦨꦴꦢꦶꦈꦱ꧀ꦱꦤ꧀ꦤꦠꦴꦪ ꦄꦥꦴꦪꦩꦒ꧀ꦒꦁ, ꦄꦭꦺꦴꦨꦴꦢꦶꦈꦱ꧀ꦱꦤ꧀ꦤꦠꦴꦪ ꦱꦸꦒꦠꦶꦩꦒ꧀ꦒꦁ ꦤꦶꦧ꧀ꦧꦴꦤꦒꦴꦩꦶꦩꦒ꧀ꦒꦚ꧀ꦕ ꦥꦫꦶꦥꦹꦫꦺꦤ꧀ꦠꦶ, ꦠꦱ꧀ꦩꦴ ꦭꦺꦴꦨꦴꦢꦷꦲꦶ ꦄꦭꦺꦴꦨꦴꦢꦷꦲꦶ ꦕ ꦱꦲꦶꦠꦱ꧀ꦱ ꦩꦤꦱ꧀ꦱ ꦈꦱ꧀ꦱꦤ꧀ꦤꦠꦴꦪ ꦥꦫꦶꦠ꧀ꦠꦢꦷꦥꦮꦴꦱꦷꦲꦶ ꦱꦢ꧀ꦣꦶꦁ ꦕꦠꦸꦩꦲꦴꦢꦷꦥꦮꦴꦱꦶꦤꦺꦴ ꦱꦠ꧀ꦠꦮꦶꦱꦺꦱꦴ ꦩꦤꦸꦱ꧀ꦱꦴꦠꦶ ꦮꦸꦕ꧀ꦕꦤ꧀ꦠꦷ’’ꦠꦶ. ꦭꦺꦴꦏꦶꦪꦴ ꦥꦤ ‘‘ꦩꦤꦸꦤꦺꦴ ꦄꦥꦕ꧀ꦕꦨꦴꦮꦺꦤ ꦩꦤꦸꦱ꧀ꦱꦴ’’ꦠꦶ ꦮꦢꦤ꧀ꦠꦶ. ꦩꦤꦸ ꦤꦴꦩ ꦥꦜꦩꦏꦥ꧀ꦥꦶꦏꦺꦴ ꦭꦺꦴꦏꦩꦫꦶꦪꦴꦢꦴꦪ ꦄꦴꦢꦶꦨꦹꦠꦺꦴ ꦱꦠ꧀ꦠꦴꦤꦁ ꦲꦶꦠꦴꦲꦶꦠꦮꦶꦣꦴꦪꦏꦺꦴ ꦏꦠ꧀ꦠꦧ꧀ꦧꦴꦏꦠ꧀ꦠꦧ꧀ꦧꦠꦴꦮꦱꦺꦤ ꦥꦶꦠꦸꦛ꧀ꦜꦴꦤꦶꦪꦺꦴ, ꦪꦺꦴ ꦱꦴꦱꦤꦺ ꦩꦲꦴꦱꦩ꧀ꦩꦠꦺꦴꦠꦶ ꦮꦸꦕ꧀ꦕꦠꦶ ꦄꦩ꧀ꦲꦴꦏꦁ ꦧꦺꦴꦣꦶꦱꦠ꧀ꦠꦺꦴ, ꦥꦕ꧀ꦕꦏ꧀ꦑꦠꦺꦴ ꦥꦫꦩ꧀ꦥꦫꦴꦪ ꦕ ꦠꦱ꧀ꦱ ꦎꦮꦴꦢꦴꦤꦸꦱꦴꦱꦤꦶꦪꦁ ꦜꦶꦠꦴ ꦱꦠ꧀ꦠꦴ ꦥꦸꦠ꧀ꦠꦱꦢꦶꦱꦠꦴꦪ ‘‘ꦩꦤꦸꦱ꧀ꦱꦴ, ꦩꦴꦤꦸꦱꦴ’’ꦠꦶ ꦕ ꦮꦸꦕ꧀ꦕꦤ꧀ꦠꦶ. ꦠꦠꦺꦴ ꦌꦮ ꦲꦶ ꦠꦺ ‘‘ꦩꦴꦤꦮꦴ ꦩꦤꦸꦗꦴ’’ꦠꦶ ꦕ ꦮꦺꦴꦲꦫꦷꦪꦤ꧀ꦠꦶ.

ꦥꦚ꧀ꦕꦲꦶ ꦏꦴꦩꦒꦸꦟꦺꦲꦶ ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦢꦺꦮꦴꦤꦸꦨꦴꦮꦱꦔ꧀ꦑꦴꦠꦺꦲꦶ ꦆꦢ꧀ꦣꦶꦮꦶꦱꦺꦱꦺꦲꦶ ꦕ ꦢꦶꦧ꧀ꦧꦤ꧀ꦠꦶ ꦏꦷꦭ꦳ꦤ꧀ꦠꦶ ꦭꦭ꦳ꦤ꧀ꦠꦶ ꦗꦺꦴꦠꦤ꧀ꦠꦷꦠꦶ ꦢꦺꦮꦴ. ꦠꦠ꧀ꦡ ꦏꦴꦩꦢꦺꦮꦴ ꦏꦴꦩꦒꦸꦟꦺꦲꦶ ꦕꦺꦮ ꦆꦢ꧀ꦣꦶꦮꦶꦱꦺꦱꦺꦲꦶ ꦕ, ꦆꦠꦫꦺ ꦆꦢ꧀ꦣꦶꦮꦶꦱꦺꦱꦺꦲꦺꦮ ꦢꦶꦧ꧀ꦧꦤ꧀ꦠꦷꦠꦶ ꦮꦺꦢꦶꦠꦧ꧀ꦧꦴ. ꦱꦫꦟꦤ꧀ꦠꦶ ꦮꦴ ꦒꦩꦶꦪꦤ꧀ꦠꦶ ꦄꦨꦶꦠ꧀ꦡꦮꦷꦪꦤ꧀ꦠꦷꦠꦶ ꦮꦴ ꦢꦺꦮꦴ. ꦌꦠ꧀ꦡ ꦕ ꦤꦶꦫꦪꦒꦠꦶꦢꦺꦮꦒꦠꦶꦩꦤꦸꦱ꧀ꦱꦒꦠꦷꦲꦶ ꦱꦢ꧀ꦣꦶꦁ ꦎꦏꦴꦱꦺꦤ ꦑꦤ꧀ꦣꦴ ꦮꦸꦠ꧀ꦠꦴ. ꦠꦶꦫꦕ꧀ꦖꦴꦤꦪꦺꦴꦤꦶꦥꦺꦠ꧀ꦠꦶꦮꦶꦱꦪꦒ꧀ꦒꦲꦟꦺꦤ ꦑꦤ꧀ꦣꦴꦤꦁ ꦌꦮ ꦒꦲꦟꦁ ꦮꦺꦢꦶꦠꦧ꧀ꦧꦁ ꦠꦺꦱꦁ ꦠꦴꦢꦶꦱꦱ꧀ꦱ ꦥꦫꦶꦕ꧀ꦖꦶꦤ꧀ꦤꦱ꧀ꦱ ꦎꦏꦴꦱꦱ꧀ꦱ ꦄꦨꦴꦮꦠꦺꦴ. ꦪꦠ꧀ꦡ ꦪꦠ꧀ꦡ ꦮꦴ ꦠꦺ ꦄꦫꦚ꧀ꦚꦱꦩꦸꦢ꧀ꦢꦥꦧ꧀ꦧꦠꦥꦴꦢꦴꦢꦶꦏꦺ ꦤꦶꦧꦢ꧀ꦣꦮꦴꦱꦁ ꦮꦱꦤ꧀ꦠꦶ, ꦠꦴꦢꦶꦱꦱ꧀ꦱ ꦜꦴꦤꦱ꧀ꦱ ꦮꦱꦺꦤ ꦎꦏꦴꦱꦺꦴꦥꦶ ꦒꦲꦺꦠꦧ꧀ꦧꦺꦴ. ꦱꦠ꧀ꦠ ꦮꦶꦚ꧀ꦚꦴꦟꦛ꧀ꦜꦶꦠꦶꦪꦺꦴ ꦤꦮ ꦱꦠ꧀ꦠꦴꦮꦴꦱꦴ ꦕ ꦲꦺꦛ꧀ꦜꦴ ꦱꦁꦮꦟ꧀ꦟꦶꦠꦤꦪꦴ ꦌꦮ. ꦄꦥꦫꦴꦥꦫꦨꦴꦮꦴꦪꦴꦠꦶ ꦄꦥꦫꦴꦥꦫꦁ ꦪꦺꦴꦤꦶꦄꦴꦢꦶꦠꦺꦴ ꦪꦺꦴꦤꦶꦄꦴꦢꦶꦨꦴꦮꦴꦪ. ꦄꦴꦧꦤ꧀ꦣꦤꦁ ꦒꦟ꧀ꦜꦶꦏꦫꦟꦁ, ꦱꦁꦱꦶꦧ꧀ꦧꦤꦁ ꦠꦸꦤ꧀ꦤꦏꦫꦟꦁ. ꦠꦟ꧀ꦲꦴꦪ ꦤꦶꦏ꧀ꦑꦤ꧀ꦠꦁ ꦠꦠ꧀ꦡ ꦠꦱ꧀ꦱꦴ ꦱꦧ꧀ꦧꦱꦺꦴ ꦄꦨꦴꦮꦠꦺꦴ, ꦤꦶꦏ꧀ꦑꦩꦤꦚ꧀ꦕꦱ꧀ꦱ ꦠꦟ꧀ꦲꦴꦪ ꦮꦶꦱꦁꦪꦺꦴꦒꦺꦴ ꦌꦮꦴꦠꦶ ꦄꦴꦲ ‘‘ꦮꦶꦱꦁꦪꦸꦠ꧀ꦠ’’ꦤ꧀ꦠꦶ.

ꦏꦴꦩꦴꦤꦁ ꦥꦲꦴꦤꦤ꧀ꦠꦶ ꦌꦠ꧀ꦡ ꦏꦴꦩꦒ꧀ꦒꦲꦟꦺꦤ ꦏꦴꦩꦷꦪꦠꦷꦠꦶ ꦏꦴꦩꦺꦴ, ꦏꦴꦩꦺꦠꦷꦠꦶ ꦏꦴꦩꦺꦴꦠꦶ ꦢꦸꦮꦶꦣꦱ꧀ꦱꦥꦶ ꦏꦴꦩꦱ꧀ꦱ ꦱꦔ꧀ꦒꦲꦺꦴ ꦏꦠꦺꦴꦠꦶ ꦄꦴꦲ ‘‘ꦮꦠ꧀ꦡꦸꦏꦴꦩꦴꦤꦁ ꦏꦶꦭꦺꦱꦏꦴꦩꦴꦤꦚ꧀ꦕ ꦥꦲꦴꦤ’’ꦤ꧀ꦠꦶ. ꦮꦠ꧀ꦡꦸꦏꦴꦩꦥ꧀ꦥꦲꦴꦤꦚ꧀ꦕꦺꦠ꧀ꦡ ꦠꦺꦱꦸ ꦖꦤ꧀ꦢꦫꦴꦒꦥ꧀ꦥꦲꦴꦤꦺꦤꦴꦠꦶ ꦮꦺꦢꦶꦠꦧ꧀ꦧꦁ. ꦏꦴꦩꦱꦚ꧀ꦚꦴꦤꦤ꧀ꦠꦶ ꦏꦴꦩꦺꦱꦸ, ꦏꦴꦩꦱꦲꦒꦠꦴꦤꦁ ꦮꦴ ꦱꦚ꧀ꦚꦴꦤꦁ. ꦥꦫꦶꦚ꧀ꦚꦴꦠꦶ ꦠꦶꦮꦶꦣꦴꦥꦶ ꦥꦫꦶꦚ꧀ꦚꦴ ꦆꦣꦴꦣꦶꦥ꧀ꦥꦺꦠꦴꦠꦶ ꦄꦴꦲ ‘‘ꦚꦴꦠꦠꦷꦫꦟꦥꦲꦴꦤꦮꦱꦺꦤ ꦠꦶꦮꦶꦣꦴ ꦥꦫꦶꦚ꧀ꦚꦴ’’ꦠꦶ. ꦠꦠ꧀ꦡ ꦏꦠꦩꦴ ꦚꦴꦠꦥꦫꦶꦚ꧀ꦚꦴ? ꦱꦧ꧀ꦧꦁ ꦠꦺꦨꦹꦩꦏꦁ ꦤꦴꦩꦫꦹꦥꦁ ‘‘ꦆꦢꦁ ꦫꦹꦥꦁ, ꦌꦠ꧀ꦠꦏꦁ ꦫꦹꦥꦁ, ꦤ ꦆꦠꦺꦴ ꦨꦶꦪ꧀ꦪꦺꦴ, ꦆꦢꦁ ꦤꦴꦩꦁ, ꦌꦠ꧀ꦠꦏꦁ ꦤꦴꦩꦁ, ꦤ ꦆꦠꦺꦴ ꦨꦶꦪ꧀ꦪꦺꦴ’’ꦠꦶ ꦨꦹꦠꦸꦥꦴꦢꦴꦪꦨꦺꦢꦁ ꦫꦹꦥꦁ ꦦꦱ꧀ꦱꦴꦢꦶꦨꦺꦢꦁ ꦤꦴꦩꦚ꧀ꦕ ꦭꦏ꧀ꦑꦟꦫꦱꦥꦕ꧀ꦕꦸꦥꦛ꧀ꦜꦴꦤꦥꦢꦛ꧀ꦜꦴꦤꦠꦺꦴ ꦮꦮꦠ꧀ꦡꦥꦺꦠꦶ, ꦏꦩ꧀ꦩꦴꦮꦶꦗ꧀ꦗꦴꦢꦶꦏꦚ꧀ꦕꦱ꧀ꦱ ꦥꦕ꧀ꦕꦪꦁ ꦥꦫꦶꦒ꧀ꦒꦟ꧀ꦲꦴꦠꦶ, ꦄꦪꦁ ꦚꦴꦠꦥꦫꦶꦚ꧀ꦚꦴ.

ꦏꦠꦩꦴ ꦠꦷꦫꦟꦥꦫꦶꦚ꧀ꦚꦴ? ꦌꦮꦁ ꦚꦴꦠꦁ ꦏꦠ꧀ꦮꦴ ꦠꦁ ꦱꦧ꧀ꦧꦁ ꦠꦷꦫꦺꦠꦶ ꦄꦤꦶꦕ꧀ꦕꦠꦺꦴ ꦢꦸꦏ꧀ꦑꦠꦺꦴ ꦫꦺꦴꦒꦠꦺꦴꦠꦶ ꦢ꧀ꦮꦴꦕꦠ꧀ꦠꦴꦭꦷꦱꦴꦪ ꦄꦴꦏꦴꦫꦺꦲꦶ, ꦄꦪꦁ ꦠꦷꦫꦟꦥꦫꦶꦚ꧀ꦚꦴ ꦤꦴꦩ. ꦏꦠꦩꦴ ꦥꦲꦴꦤꦥꦫꦶꦚ꧀ꦚꦴ? ꦌꦮꦁ ꦠꦷꦫꦪꦶꦠ꧀ꦮꦴ ꦄꦒ꧀ꦒꦩꦒ꧀ꦒꦺꦤ ꦱꦧ꧀ꦧꦱ꧀ꦩꦶꦁ ꦖꦤ꧀ꦢꦫꦴꦒꦁ ꦥꦗꦲꦠꦶ, ꦄꦪꦁ ꦥꦲꦴꦤꦥꦫꦶꦚ꧀ꦚꦴ. ꦢꦶꦛ꧀ꦜꦶꦮꦶꦱꦸꦢ꧀ꦣꦶꦏꦔ꧀ꦑꦴꦮꦶꦠꦫꦟꦮꦶꦱꦸꦢ꧀ꦣꦶꦪꦺꦴ ꦮꦴ ꦚꦴꦠꦥꦫꦶꦚ꧀ꦚꦴ, ꦩꦒ꧀ꦒꦴꦩꦒ꧀ꦒꦥꦛꦶꦥꦢꦴꦚꦴꦟꦢꦱ꧀ꦱꦤꦮꦶꦱꦸꦢ꧀ꦣꦶꦄꦴꦢꦪꦺꦴ, ꦏꦭꦴꦥꦱꦩ꧀ꦩꦱꦤꦴꦢꦶꦄꦤꦸꦭꦺꦴꦩꦥꦫꦶꦪꦺꦴꦱꦴꦤꦴ ꦮꦴ ꦥꦚ꧀ꦚꦴ ꦠꦷꦫꦟꦥꦫꦶꦚ꧀ꦚꦴ, ꦄꦫꦶꦪꦩꦒ꧀ꦒꦺ ꦚꦴꦟꦁ ꦤꦶꦥ꧀ꦥꦫꦶꦪꦴꦪꦺꦤ ꦥꦲꦴꦤꦥꦫꦶꦚ꧀ꦚꦴ. ꦆꦣ ꦥꦤ ꦏꦴꦩꦱꦚ꧀ꦚꦴꦤꦁ ꦱꦨꦴꦮꦭꦏ꧀ꦑꦟꦥꦛꦶꦮꦺꦣꦮꦱꦺꦤ ꦄꦤꦶꦕ꧀ꦕꦴꦢꦶꦱꦴꦩꦚ꧀ꦚꦭꦏ꧀ꦑꦟꦮꦱꦺꦤ ꦕ ꦥꦮꦠ꧀ꦠꦩꦴꦤꦴꦤꦁ ꦚꦴꦠꦠꦷꦫꦟꦥꦫꦶꦚ꧀ꦚꦴꦤꦩ꧀ꦥꦶ ꦏꦶꦕ꧀ꦕꦤꦶꦥ꧀ꦦꦠ꧀ꦠꦶꦪꦴ ꦩꦒ꧀ꦒꦺꦤꦺꦮ ꦆꦗ꧀ꦙꦤꦠꦺꦴ ꦩꦒ꧀ꦒꦏ꧀ꦑꦟꦁꦪꦺꦮ ꦱꦤ꧀ꦣꦴꦪ ꦠꦶꦮꦶꦣꦴꦥꦶ ꦥꦫꦶꦚ꧀ꦚꦴ ꦮꦸꦠ꧀ꦠꦴ. ꦠꦺꦤꦺꦮ ‘‘ꦆꦩꦺꦱꦸ ꦥꦚ꧀ꦕꦱꦸ ꦜꦴꦤꦺꦱꦸ ꦏꦶꦭꦺꦱꦏ꧀ꦑꦪꦏꦫꦺꦴ ꦭꦺꦴꦏꦸꦠ꧀ꦠꦫꦩꦒ꧀ꦒꦺꦴꦮ ꦏꦡꦶꦠꦺꦴ’’ꦠꦶ ꦮꦸꦠ꧀ꦠꦁ.

ꦏꦴꦩꦺꦱꦸ, ꦏꦴꦩꦺ ꦮꦴ ꦥꦴꦠꦸꦩꦶꦕ꧀ꦖꦴ ꦏꦴꦩꦥꦶꦥꦴꦱꦴꦠꦶ ꦄꦴꦲ – ‘‘ꦏꦴꦩꦺꦱꦸ ꦥꦴꦠꦧ꧀ꦪꦠꦴꦤꦁ, ꦏꦴꦩꦺ ꦮꦴ ꦥꦴꦠꦸꦩꦶꦕ꧀ꦖꦴꦤ’’ꦤ꧀ꦠꦶ. ꦆꦩꦺꦱꦸ ꦥꦚ꧀ꦕꦱꦸ ꦜꦴꦤꦺꦱꦹꦠꦶ ‘‘ꦏꦴꦩꦴꦤꦁ ꦥꦲꦴꦤꦁ ꦄꦏ꧀ꦑꦴꦠ’’ꦤ꧀ꦠꦶꦄꦴꦢꦶꦤꦴ ꦮꦸꦠ꧀ꦠꦺꦱꦸ ꦥꦚ꧀ꦕꦱꦸ ꦜꦴꦤꦺꦱꦸ. ꦠꦷꦱꦸ ꦜꦴꦤꦺꦱꦹꦠꦶ ‘‘ꦮꦶꦫꦴꦒꦴꦪ ꦣꦩ꧀ꦩꦺꦴ ꦢꦺꦱꦶꦠꦺꦴ, ꦤꦺꦴ ꦱꦫꦴꦒꦴꦪ, ꦮꦶꦱꦁꦪꦺꦴꦒꦴꦪ ꦣꦩ꧀ꦩꦺꦴ ꦢꦺꦱꦶꦠꦺꦴ, ꦤꦺꦴ ꦱꦁꦪꦺꦴꦒꦴꦪ, ꦄꦤꦸꦥꦴꦢꦴꦤꦴꦪ ꦣꦩ꧀ꦩꦺꦴ ꦢꦺꦱꦶꦠꦺꦴ, ꦤꦺꦴ ꦱꦈꦥꦴꦢꦴꦤꦴꦪꦴ’’ꦠꦶ ꦌꦮꦁ ꦮꦸꦠ꧀ꦠꦺꦱꦸ ꦜꦴꦤꦺꦱꦸ. ꦮꦶꦥ꧀ꦥꦛꦶꦱꦴꦫꦁ ꦏꦫꦺꦴꦠꦷꦠꦶ ꦌꦮꦁ ꦠꦁ ꦥꦴꦥꦁ ꦮꦶꦥ꧀ꦥꦛꦶꦱꦴꦫꦁ ꦈꦥ꧀ꦥꦴꦢꦺꦠꦶ. ꦏꦷꦢꦶꦱꦁ ꦮꦶꦥ꧀ꦥꦛꦶꦱꦴꦫꦁ ꦏꦫꦺꦴꦠꦷꦠꦶ ꦄꦴꦲ ‘‘ꦇꦢꦶꦱꦺꦥꦶ ꦤꦴꦩꦴ’’ꦠꦶꦄꦴꦢꦶ.

꧓꧙. ꦤꦺꦮ ꦥꦶꦪꦏꦩ꧀ꦪꦠꦴꦪꦴꦠꦶ ꦄꦠ꧀ꦠꦤꦶ ꦱꦠ꧀ꦡꦸ ꦤꦺꦮ ꦥꦶꦪꦨꦴꦮꦏꦴꦩꦠꦴꦪ. ꦤ ꦨꦺꦢꦥꦸꦫꦺꦏ꧀ꦑꦴꦫꦠꦴꦪꦴꦠꦶ ꦤ ꦱꦠ꧀ꦡꦸ ꦠꦺꦤ ꦨꦶꦏ꧀ꦑꦸꦤꦴ ꦨꦺꦢꦤꦴꦣꦶꦥ꧀ꦥꦴꦪꦥꦸꦫꦺꦏ꧀ꦑꦴꦫꦠꦴꦪ. ꦤ ꦏꦭꦶꦱꦴꦱꦤꦴꦫꦺꦴꦥꦤꦠ꧀ꦡꦴꦪꦴꦠꦶ ꦤ ꦢꦺꦴꦱꦴꦫꦺꦴꦥꦤꦠ꧀ꦡꦴꦪ. ꦏꦭꦷꦠꦶ ꦏꦺꦴꦣꦱ꧀ꦱꦺꦠꦁ ꦄꦣꦶꦮꦕꦤꦁ, ꦠꦱ꧀ꦱ ꦱꦴꦱꦤꦁ ꦏꦭꦶꦱꦴꦱꦤꦁ, ꦏꦺꦴꦣꦮꦱꦺꦤ ꦮꦸꦕ꧀ꦕꦩꦴꦤꦺꦴ ꦒꦫꦲꦢꦺꦴꦱꦺꦴ. ꦮꦺꦭꦤ꧀ꦠꦶ ꦱꦶꦏ꧀ꦑꦴꦥꦢꦮꦺꦭꦁ. ꦩꦫꦶꦪꦴꦢꦤ꧀ꦠꦶ ꦠꦱ꧀ꦱꦺꦮ ꦮꦺꦮꦕꦤꦁ. ꦱꦶꦏ꧀ꦑꦴꦥꦢꦚ꧀ꦲꦶ ꦄꦤꦠꦶꦏ꧀ꦏꦩꦤꦷꦪꦛ꧀ꦜꦺꦤ ‘‘ꦮꦺꦭꦴ, ꦩꦫꦶꦪꦴꦢꦴ’’ꦠꦶ ꦕ ꦮꦸꦕ꧀ꦕꦠꦶ.

ꦄꦗ꧀ꦙꦴꦕꦴꦫꦮꦷꦠꦶꦏ꧀ꦏꦩꦺꦴꦠꦶ ꦩꦺꦡꦸꦤꦮꦱꦺꦤ ꦥꦮꦠ꧀ꦠꦄꦗ꧀ꦙꦴꦕꦴꦫꦱꦔ꧀ꦑꦴꦠꦺꦴ ꦮꦷꦠꦶꦏ꧀ꦏꦩꦺꦴ. ꦥꦏꦫꦟꦺꦠꦶ ꦌꦠ꧀ꦡ ꦥ-ꦱꦢ꧀ꦢꦺꦴ ꦄꦴꦫꦩ꧀ꦨꦮꦕꦤꦺꦴꦠꦶ ꦄꦴꦲ ‘‘ꦏꦠ꧀ꦠꦸꦁ ꦄꦴꦫꦨꦠꦷ’’ꦠꦶ. ꦏꦠ꧀ꦡꦕꦶ ꦈꦥꦱꦒ꧀ꦒꦺꦴ ꦣꦴꦠꦸꦄꦠ꧀ꦡꦩꦺꦮ ꦮꦢꦠꦶ, ꦤ ꦮꦶꦱꦺꦱꦠ꧀ꦡꦗꦺꦴꦠꦏꦺꦴꦠꦶ ꦄꦴꦲ ‘‘ꦏꦫꦺꦴꦠꦶꦪꦺꦮ ꦮꦴ’’ꦠꦶ. ꦗꦴꦠꦶꦪꦴꦠꦶ ꦑꦠ꧀ꦠꦶꦪꦴꦢꦶꦗꦴꦠꦶꦪꦴ. ꦒꦺꦴꦠ꧀ꦠꦺꦤꦴꦠꦶ ꦒꦺꦴꦠꦩꦏꦱ꧀ꦱꦥꦴꦢꦶꦒꦺꦴꦠ꧀ꦠꦺꦤ. ꦏꦺꦴꦭꦥꦸꦠ꧀ꦠꦶꦪꦺꦤꦴꦠꦶ ꦑꦠ꧀ꦠꦶꦪꦴꦢꦶꦗꦴꦠꦷꦱꦸꦪꦺꦮ ꦱꦏ꧀ꦏꦏꦸꦭꦱꦺꦴꦠ꧀ꦡꦶꦪꦏꦸꦭꦴꦢꦶꦮꦶꦱꦶꦛ꧀ꦜꦏꦸꦭꦴꦤꦁ ꦥꦸꦠ꧀ꦠꦨꦴꦮꦺꦤ. ꦪꦱꦱ꧀ꦱꦷꦠꦶ ꦩꦲꦴꦥꦫꦶꦮꦴꦫꦺꦴ. ꦥꦺꦱꦭꦤ꧀ꦠꦶ ꦥꦶꦪꦱꦷꦭꦁ. ꦄꦮꦶꦏꦩ꧀ꦥꦩꦴꦤꦺꦤꦴꦠꦶ ꦥꦛꦶꦓꦴꦤꦸꦤꦪꦺꦲꦶ ꦄꦏꦩ꧀ꦥꦩꦴꦤꦺꦤ. ꦪꦱ꧀ꦱ ꦠꦱ꧀ꦩꦶꦁ ꦄꦠ꧀ꦠꦨꦴꦮꦺ ꦈꦥ꧀ꦥꦗ꧀ꦗꦤꦴꦫꦲꦴꦤꦁ ꦩꦒ꧀ꦒꦦꦭꦴꦤꦁ ꦈꦥꦤꦶꦱ꧀ꦱꦪꦺꦴ ꦤꦠ꧀ꦡꦶ, ꦠꦁ ꦧꦸꦢ꧀ꦣꦴ ‘‘ꦩꦺꦴꦓꦥꦸꦫꦶꦱꦴ’’ꦠꦶ ꦮꦢꦤ꧀ꦠꦶ ꦄꦫꦶꦛ꧀ꦜꦭꦴꦭ꦳ꦸꦢꦴꦪꦷꦄꦴꦢꦶꦏꦺ ꦮꦶꦪ. ꦈꦥꦤꦶꦱ꧀ꦱꦪꦺ ꦱꦠꦶꦥꦶ ꦠꦱ꧀ꦩꦶꦁ ꦑꦟꦺ ꦩꦒ꧀ꦒꦺ ꦮꦴ ꦦꦭꦺ ꦮꦴ ꦄꦱꦠꦶ ‘‘ꦩꦺꦴꦓꦥꦸꦫꦶꦱꦴ’’ꦠꦶ ꦮꦢꦤ꧀ꦠꦶꦪꦺꦮ ꦣꦤꦶꦪꦈꦥꦱꦺꦤꦠ꧀ꦡꦺꦫꦴꦢꦶꦏꦺ ꦮꦶꦪ. ꦱꦸꦢꦶꦤ꧀ꦤꦱ꧀ꦱ ꦥꦤ ꦠꦱ꧀ꦩꦶꦁ ꦄꦠ꧀ꦠꦨꦴꦮꦺ ꦩꦒ꧀ꦒꦦꦭꦴꦤꦁ ꦈꦥꦤꦶꦱ꧀ꦱꦪꦺꦴ ꦱꦩꦸꦕ꧀ꦖꦶꦤ꧀ꦤꦺꦴꦪꦺꦮ, ꦠꦺꦤ ꦤꦁ ‘‘ꦩꦺꦴꦓꦥꦸꦫꦶꦱꦴ’’ꦠꦶ ꦄꦴꦲ.

ꦱꦩꦟꦏꦫꦟꦴꦤꦁ ꦣꦩ꧀ꦩꦴꦤꦤ꧀ꦠꦶ ꦲꦶꦫꦺꦴꦠ꧀ꦠꦥ꧀ꦥꦴꦢꦷꦤꦁ. ꦩꦒ꧀ꦒꦦꦭꦤꦶꦧ꧀ꦧꦴꦤꦒ꧀ꦒꦲꦟꦺꦤ ꦥꦛꦶꦮꦺꦣꦱꦴꦱꦤꦱ꧀ꦱ ꦒꦲꦶꦠꦠ꧀ꦠꦴ ꦱꦴꦱꦤꦴꦤꦤ꧀ꦠꦶ ꦥꦛꦶꦥꦠ꧀ꦠꦶꦥꦫꦶꦪꦠ꧀ꦠꦶꦱꦴꦱꦤꦴꦤꦁ ꦒꦲꦟꦁ ꦮꦺꦢꦶꦠꦧ꧀ꦧꦁ. ꦖꦮꦶꦤ꧀ꦠꦶ ꦠꦺꦱꦁ ꦥꦨꦱ꧀ꦱꦫꦏꦫꦟꦁ ꦖꦮꦶꦁ. ꦏꦶꦁ ꦠꦤ꧀ꦠꦶ ꦄꦴꦲ ‘‘ꦖꦴꦪ’’ꦤ꧀ꦠꦶ, ꦠꦺꦱꦁ ꦥꦏꦴꦱꦏꦁ ꦎꦨꦴꦱꦤ꧀ꦠꦶ ꦄꦠ꧀ꦡꦺꦴ. ꦏꦶꦁ ꦠꦤ꧀ꦠꦶ ꦄꦴꦲ ‘‘ꦱꦸꦤ꧀ꦢꦫꦨꦴꦮ’’ꦤ꧀ꦠꦶ. ꦖꦮꦶꦩꦤꦸꦒꦠꦁ ꦄꦤꦸꦕ꧀ꦖꦮꦶꦏꦁ. ꦥꦠꦶꦫꦹꦥꦤ꧀ꦠꦶꦄꦴꦢꦷꦱꦸꦥꦶ ‘‘ꦠꦺꦱ’’ꦤ꧀ꦠꦶ ꦄꦴꦤꦺꦠ꧀ꦮꦴ ꦱꦩ꧀ꦧꦤ꧀ꦣꦶꦠꦧ꧀ꦧꦁ. ꦱꦩꦟꦴꦤꦁ ꦏꦩ꧀ꦩꦁ ꦱꦴꦩꦟꦏꦁ, ꦤ ꦱꦴꦩꦟꦏꦁ ꦄꦱ꧀ꦱꦴꦩꦟꦏꦁ. ꦏꦡꦁ-ꦱꦢ꧀ꦢꦪꦺꦴꦒꦺꦤ ‘‘ꦤ ꦱꦏ꧀ꦑꦶꦱ꧀ꦱꦱꦷ’’ꦠꦶ ꦄꦤꦴꦒꦠꦮꦕꦤꦁ ꦏꦠꦁ. ‘‘ꦤꦴꦩ-ꦱꦢ꧀ꦢꦪꦺꦴꦒꦺꦤꦴ’’ꦠꦶ ꦕ ꦮꦢꦤ꧀ꦠꦶ.

ꦢꦪꦴꦭꦸꦏꦺꦤꦴꦠꦶ ꦄꦤꦸꦏꦩ꧀ꦥꦴꦪ ꦱꦲꦶꦠꦺꦤ. ꦥꦫꦶꦨꦴꦱꦤ꧀ꦠꦺꦴꦠꦶ ꦒꦫꦲꦤ꧀ꦠꦺꦴ. ꦤꦶꦫꦸꦠ꧀ꦠꦶꦤꦪꦺꦤ ꦄꦴꦱꦷꦮꦶꦱ-ꦱꦢ꧀ꦢꦱ꧀ꦱ ꦄꦠ꧀ꦡꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦄꦴꦱꦸ ꦱꦷꦓ’’ꦤ꧀ꦠꦶꦄꦴꦢꦶ. ꦌꦠꦱ꧀ꦱꦴꦠꦶ ꦄꦴꦱꦷꦮꦶꦱꦱ꧀ꦱ. ꦄꦴꦒꦕ꧀ꦖꦠꦷꦠꦶ ꦪꦺꦴ ꦠꦺꦤ ꦢꦛ꧀ꦜꦺꦴ, ꦠꦁ ꦥꦠꦶꦄꦴꦒꦕ꧀ꦖꦠꦶ. ꦄꦴꦱꦶꦠ꧀ꦠꦮꦶꦱꦺꦴꦠꦶꦥꦶ ꦄꦴꦱꦷꦮꦶꦱꦺꦴ, ꦱꦏꦭꦏꦴꦪꦺ ꦄꦴꦱꦶꦚ꧀ꦕꦶꦠ꧀ꦮꦴ ꦮꦶꦪ ꦜꦥꦶꦠꦮꦶꦱꦺꦴ ꦥꦫꦱ꧀ꦱ ꦕ ꦱꦫꦷꦫꦺ ꦄꦴꦱꦶꦚ꧀ꦕꦤꦮꦶꦱꦺꦴꦠꦶ ꦄꦠ꧀ꦡꦺꦴ. ꦄꦱꦶꦠꦮꦶꦱꦺꦴꦠꦶꦥꦶ ꦄꦴꦱꦷꦮꦶꦱꦺꦴ. ꦪꦁ ꦪꦚ꧀ꦲꦶ ꦌꦠꦺꦤ ꦄꦱꦶꦠꦁ ꦲꦺꦴꦠꦶ ꦥꦫꦶꦨꦸꦠ꧀ꦠꦁ, ꦠꦁ ꦮꦶꦱꦩꦺꦮ ꦱꦩ꧀ꦥꦗ꧀ꦗꦠꦶ, ꦠꦱ꧀ꦩꦴ ꦄꦱꦶꦠꦁ ꦮꦶꦱꦁ ꦌꦠꦱ꧀ꦱꦴꦠꦶ ꦄꦱꦶꦠꦮꦶꦱꦺꦴꦠꦶ ꦮꦠ꧀ꦠꦧ꧀ꦧꦺ ‘‘ꦄꦴꦱꦷꦮꦶꦱꦺꦴ’’ꦠꦶ ꦤꦶꦫꦸꦠ꧀ꦠꦶꦤꦪꦺꦤ ꦮꦸꦠ꧀ꦠꦁ. ꦄꦱꦶꦱꦢꦶꦱꦮꦶꦱꦺꦴꦠꦶꦥꦶ ꦄꦴꦱꦷꦮꦶꦱꦺꦴ, ꦄꦱꦶ ꦮꦶꦪ ꦠꦶꦑꦶꦟꦁ ꦥꦫꦱ꧀ꦱ ꦩꦩ꧀ꦩꦕ꧀ꦖꦺꦢꦤꦱꦩꦠ꧀ꦡꦁ ꦮꦶꦱꦁ ꦌꦠꦱ꧀ꦱꦴꦠꦶ ꦄꦴꦱꦷꦮꦶꦱꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦄꦴꦱꦷꦠꦶ ꦮꦴ ꦢꦴꦜꦴ ꦮꦸꦕ꧀ꦕꦠꦶ, ꦠꦠ꧀ꦡ ꦱꦤ꧀ꦤꦶꦲꦶꦠꦮꦶꦱꦺꦴꦠꦶ ꦄꦴꦱꦷꦮꦶꦱꦺꦴ. ꦱꦺꦱꦱꦥ꧀ꦥꦺꦲꦶ ꦏꦟ꧀ꦲꦱꦥ꧀ꦥꦱ꧀ꦱ ꦩꦲꦴꦮꦶꦱꦠ꧀ꦠꦴ ꦄꦴꦱꦷꦮꦶꦱꦱ꧀ꦱꦴꦤꦤ꧀ꦠꦫꦁ ꦏꦟ꧀ꦲꦱꦥ꧀ꦥꦺꦴ ꦮꦸꦠ꧀ꦠꦺꦴ. ꦱꦥ꧀ꦥꦩꦸꦑꦩ꧀ꦥꦶ ꦄꦔ꧀ꦒꦴꦫꦏꦴꦱꦸ ꦮꦶꦪ ꦨꦪꦴꦮꦲꦠ꧀ꦠꦴ ꦄꦏꦸꦱꦭꦸꦥ꧀ꦥꦠ꧀ꦠꦶꦪꦴ ꦜꦴꦤꦁ ꦤ ꦲꦺꦴꦠꦷꦠꦶ ꦄꦏꦸꦱꦭꦏꦩ꧀ꦩꦠꦺꦴ ꦤꦶꦮꦴꦫꦟꦴꦣꦶꦥ꧀ꦥꦴꦪꦺꦤ ꦱꦷꦭꦨꦺꦢꦠꦺꦴꦥꦶ ꦱꦸꦢ꧀ꦣꦱꦷꦭꦺ ꦜꦶꦠꦱ꧀ꦱ ꦩꦫꦟꦩꦺꦮ ꦮꦫꦠꦫꦤ꧀ꦠꦶ ꦢꦱ꧀ꦱꦺꦠꦸꦁ ‘‘ꦄꦴꦱꦷꦮꦶꦱꦱ꧀ꦱ ꦏꦟ꧀ꦲꦱꦥ꧀ꦥꦱ꧀ꦱ ꦩꦸꦑꦺ ꦄꦔ꧀ꦒꦗꦴꦠꦁ ꦥꦏ꧀ꦑꦶꦠ꧀ꦠꦁ ꦮꦫ’’ꦤ꧀ꦠꦶ ꦮꦸꦠ꧀ꦠꦁ. ꦥꦧ꧀ꦧꦗꦶꦠꦺꦤ ꦲꦶ ꦏꦠꦥꦴꦥꦏꦩ꧀ꦩꦁ ꦨꦒꦮꦠꦺꦴ ꦄꦴꦟꦴꦠꦶꦏ꧀ꦏꦩꦤꦠꦺꦴ ꦮꦠ꧀ꦡꦸꦩꦲꦤ꧀ꦠꦠꦴꦪ ꦩꦲꦴꦱꦴꦮꦗ꧀ꦗꦁ. ꦏꦴꦱꦸꦤ꧀ꦠꦶ ꦄꦴꦮꦴꦛꦺꦴꦥꦶ ꦮꦸꦕ꧀ꦕꦠꦶ ꦫꦴꦱꦶꦥꦶ.

‘‘ꦏꦶꦤ꧀ꦤꦸ ꦱꦤ꧀ꦠꦫꦩꦴꦤꦺꦴꦮ, ꦏꦴꦱꦸꦁ ꦑꦟꦱꦶ ꦱꦴꦫꦡꦶ;

ꦥꦸꦛ꧀ꦜꦺꦴ ꦩꦺ ꦱꦩ꧀ꦩ ꦄꦏ꧀ꦑꦴꦲꦶ, ꦏꦶꦁ ꦏꦴꦱꦸꦪꦴ ꦏꦫꦶꦱ꧀ꦱꦱꦷ’’ꦠꦶ. (ꦗꦴ. ꧒.꧒꧒.꧓) –

ꦌꦠ꧀ꦡ ꦲꦶ ꦄꦴꦮꦴꦛꦺꦴ ꦏꦴꦱꦸ ꦤꦴꦩ.

‘‘ꦄꦔ꧀ꦒꦴꦫꦏꦴꦱꦸꦁ ꦄꦥꦫꦺ ꦦꦸꦟꦤ꧀ꦠꦶ, ꦤꦫꦴ ꦫꦸꦢꦤ꧀ꦠꦴ ꦥꦫꦶꦢꦝ꧀ꦞꦒꦠ꧀ꦠꦴ’’ꦠꦶ (ꦗꦴ. ꧒.꧒꧒.꧔꧖꧒) –

ꦌꦠ꧀ꦡ ꦫꦴꦱꦶ. ꦆꦣ ꦥꦤ ꦈꦨꦪꦩ꧀ꦥꦶ ꦄꦣꦶꦥ꧀ꦥꦺꦠꦤ꧀ꦠꦶ ꦄꦴꦲ ‘‘ꦄꦔ꧀ꦒꦴꦫꦥꦸꦟ꧀ꦟꦏꦹꦥꦺ ꦄꦔ꧀ꦒꦴꦫꦫꦴꦱꦶꦩ꧀ꦲꦶ ꦮꦴ’’ꦠꦶ. ꦏꦱ꧀ꦱꦠꦶ ꦑꦟꦷꦪꦠꦷꦠꦶ ꦏꦴꦱꦸ, ꦄꦴꦮꦴꦛꦺꦴ. ꦏꦱꦷꦪꦠꦶ ꦕꦷꦪꦠꦷꦠꦶ ꦏꦴꦱꦸ, ꦫꦴꦱꦶ. ꦥꦢꦶꦠ꧀ꦠꦴꦪꦴꦠꦶ ꦢꦶꦥ꧀ꦥꦩꦴꦤꦴꦪ. ꦱꦁ-ꦱꦢ꧀ꦢꦺꦴ ꦌꦠ꧀ꦡ ꦱꦩꦤ꧀ꦠꦥꦫꦶꦪꦴꦪꦺꦴꦠꦶ ꦄꦴꦲ ‘‘ꦱꦩꦤ꧀ꦠꦠꦺꦴ ꦥꦗ꧀ꦗꦭꦶꦠꦴꦪꦴ’’ꦠꦶ.

ꦆꦢꦁ ꦩꦴꦠꦸꦒꦴꦩꦱ꧀ꦱ ꦄꦔ꧀ꦒꦗꦴꦠꦺ ꦄꦔ꧀ꦒꦗꦴꦠꦥꦏ꧀ꦑꦶꦥꦤꦁ ꦤꦶꦢꦴꦤꦁ ꦏꦴꦫꦟꦩꦱ꧀ꦱ ꦤꦶꦫꦪꦸꦥꦥꦗ꧀ꦗꦤꦱ꧀ꦱꦴꦠꦶ ꦆꦠꦺꦴꦤꦶꦢꦴꦤꦁ, ꦨꦴꦮꦤꦥꦸꦁꦱꦏꦚ꧀ꦕꦺꦠꦁ. ꦥꦕ꧀ꦕꦠ꧀ꦠꦮꦕꦤꦱ꧀ꦱ ꦠꦺꦴ-ꦄꦴꦢꦺꦱꦺꦴ ꦏꦠꦺꦴ, ꦠꦱ꧀ꦱ ꦕ ꦱꦩꦴꦱꦺꦥꦶ ꦄꦭꦺꦴꦥꦺꦴ. ꦠꦠ꧀ꦡ ꦤꦴꦩ ꦠ꧀ꦮꦤ꧀ꦠꦶ ꦌꦠ꧀ꦡ ꦠ꧀ꦮꦁ-ꦱꦢ꧀ꦢꦺꦴ ‘‘ꦱꦩꦴꦥꦗ꧀ꦗꦶꦱ꧀ꦱꦱꦷ’’ꦠꦶ ꦆꦩꦶꦤꦴ ꦱꦩ꧀ꦧꦤ꧀ꦣꦩꦸꦥꦒꦕ꧀ꦖꦩꦴꦤꦺꦴ ꦄꦠ꧀ꦡꦷꦠꦶ ꦄꦴꦲ ‘‘ꦠ꧀ꦮꦤ꧀ꦠꦶ ꦠꦁꦱꦢ꧀ꦢꦱ꧀ꦱ ꦮꦺꦮꦕꦤ’’ꦤ꧀ꦠꦶ. ‘‘ꦪꦁ ꦠꦤ꧀ꦠꦶ ꦥꦤ ꦥꦴꦜꦺꦴ ꦪꦸꦠ꧀ꦠꦫꦹꦥꦺꦴ’’ꦠꦶ ꦒꦟ꧀ꦜꦶꦥꦢꦺꦱꦸ ꦮꦸꦠ꧀ꦠꦁ. ꦪꦁ ꦠꦤ꧀ꦠꦶ ꦤꦴꦪꦁ ꦈꦢ꧀ꦢꦺꦱꦤꦶꦢ꧀ꦢꦺꦱꦺꦴ, ꦪꦡꦴ ꦭꦺꦴꦏꦺ ꦪꦁ ꦮꦴ ꦠꦁ ꦮꦴꦠꦶ ꦄꦮꦚ꧀ꦚꦴꦠꦮꦕꦤꦁ, ꦌꦮꦁ ꦢꦛ꧀ꦜꦧ꧀ꦧꦤ꧀ꦠꦶ ꦄꦴꦲ – ‘‘ꦪꦁ ꦮꦴ ꦠꦁ ꦮꦴ ꦲꦷꦭ꦳ꦶꦠꦁ ꦄꦮꦚ꧀ꦚꦴꦠꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦷ’’ꦠꦶ. ꦤꦷꦕꦗꦤꦴꦤꦤ꧀ꦠꦶ ꦤꦶꦲꦷꦤꦒꦸꦟꦴꦤꦁ ꦱꦠ꧀ꦠꦴꦤꦁ. ꦒꦴꦩꦣꦩ꧀ꦩꦤ꧀ꦠꦶ ꦌꦠ꧀ꦡ ꦒꦴꦩ-ꦱꦢ꧀ꦢꦺꦤ ꦒꦴꦩꦮꦴꦱꦶꦤꦺꦴ ꦮꦸꦠ꧀ꦠꦴ ꦄꦨꦺꦢꦹꦥꦕꦴꦫꦺꦤꦴꦠꦶ ꦄꦴꦲ ‘‘ꦒꦴꦩꦮꦴꦱꦶꦏꦩꦤꦸꦱ꧀ꦱꦴꦤ’’ꦤ꧀ꦠꦶ. ꦏꦶꦭꦺꦱꦥꦒ꧀ꦓꦫꦟꦏꦁ ꦣꦩ꧀ꦩꦤ꧀ꦠꦶ ꦫꦴꦒꦴꦢꦶꦏꦶꦭꦺꦱꦮꦶꦱ꧀ꦱꦤ꧀ꦢꦤꦏꦣꦩ꧀ꦩꦁ. ꦩꦺꦡꦸꦤꦣꦩ꧀ꦩꦺꦴ ꦲꦶ ꦫꦴꦒꦁ ꦥꦒ꧀ꦓꦫꦠꦶ. ꦩꦺꦡꦸꦤꦣꦩ꧀ꦩꦱ꧀ꦱ ꦩꦲꦴꦱꦴꦮꦗ꧀ꦗꦠꦴꦪ ꦎꦭ꦳ꦴꦫꦶꦏꦠ꧀ꦠꦴ ꦮꦸꦠ꧀ꦠꦁ ‘‘ꦄꦱꦸꦑꦸꦩ’’ꦤ꧀ꦠꦶ. ꦄꦤꦶꦥꦸꦟꦤ꧀ꦠꦶ ꦠꦱ꧀ꦱꦺꦮ ꦮꦺꦮꦕꦤꦁ. ꦈꦢꦏꦺ ꦨꦮꦁ ꦎꦢꦏꦁ. ꦏꦶꦁ ꦠꦁ? ꦈꦢꦏꦏꦶꦕ꧀ꦕꦤ꧀ꦠꦶ ꦄꦴꦲ – ‘‘ꦈꦢꦏꦏꦶꦕ꧀ꦕꦁ ꦄꦤ꧀ꦠꦶꦏꦁ ꦄꦮꦱꦴꦤꦁ ꦄꦱ꧀ꦱꦴ’’ꦠꦶ. ꦱꦩꦴꦥꦗ꧀ꦗꦶꦱ꧀ꦱꦠꦷꦠꦶ ꦄꦤꦴꦒꦠꦮꦕꦤꦁ ꦤꦴꦩ-ꦱꦢ꧀ꦢꦪꦺꦴꦒꦺꦤ ꦏꦠꦤ꧀ꦠꦶ ꦄꦴꦲ – ‘‘ꦱꦩꦴꦥꦗ꧀ꦗꦶꦱ꧀ꦱꦠꦷꦠꦶ…ꦥꦺ… ꦤꦴꦩ-ꦱꦢ꧀ꦢꦺꦤ ꦪꦺꦴꦗꦺꦠꦧ꧀ꦧ’’ꦤ꧀ꦠꦶ. ꦭꦺꦴꦏꦺ ꦩꦺꦡꦸꦤꦣꦩ꧀ꦩꦱ꧀ꦱ ꦄꦴꦢꦶꦏꦠ꧀ꦠꦴ ꦏꦺꦴꦕꦶ ꦥꦜꦩꦏꦥ꧀ꦥꦶꦏꦺꦴ, ꦤ ꦥꦤꦴꦪꦤ꧀ꦠꦶ ꦄꦴꦲ – ‘‘ꦱꦴꦱꦤꦁ ꦱꦤ꧀ꦣꦴꦪ ꦮꦢꦠꦷ’’ꦠꦶ. ꦧꦲꦹꦤꦤ꧀ꦠꦶ ꦥꦸꦒ꧀ꦒꦭꦴꦥꦺꦏ꧀ꦑꦁ, ꦤ ꦥꦤ ꦄꦏꦸꦱꦭꦴꦥꦺꦏ꧀ꦑꦤ꧀ꦠꦶ ꦄꦴꦲ ‘‘ꦧꦲꦹꦤꦁ ꦥꦸꦒ꧀ꦒꦭꦴꦤ’’ꦤ꧀ꦠꦶ.

ꦪꦁ ꦄꦱꦁꦮꦫꦁ ꦥꦛꦶꦕ꧀ꦕ ꦢꦸꦧ꧀ꦨꦫꦠꦴꦢꦸꦥ꧀ꦥꦺꦴꦱꦠꦴꦢꦶ ꦲꦺꦴꦠꦶ, ꦱꦺꦴ ꦄꦱꦁꦮꦫꦺꦴ ꦢꦸꦧ꧀ꦨꦫꦠꦴꦢꦶ-ꦱꦢ꧀ꦢꦺꦤ ꦮꦸꦠ꧀ꦠꦺꦴ ꦏꦴꦫꦟꦺ ꦦꦭꦹꦥꦕꦴꦫꦺꦤꦴꦠꦶ ꦄꦴꦲ – ‘‘ꦢꦸꦧ꧀ꦨꦫꦠꦴꦢꦷꦤꦁ ꦮꦠ꧀ꦡꦸꦨꦹꦠꦱ꧀ꦱ ꦄꦱꦁꦮꦫꦱ꧀ꦱꦴ’’ꦠꦶ. ꦮꦠ꧀ꦡꦸꦨꦹꦠꦱ꧀ꦱꦴꦠꦶ ꦏꦴꦫꦟꦨꦹꦠꦱ꧀ꦱ. ꦮꦱꦠꦶ ꦌꦠ꧀ꦡ ꦦꦭꦁ ꦠꦢꦴꦪꦠ꧀ꦠꦮꦸꦠ꧀ꦠꦶꦠꦴꦪꦴꦠꦶ ꦲꦶ ꦏꦴꦫꦟꦁ ꦮꦠ꧀ꦡꦸ. ꦄꦠ꧀ꦠꦴꦠꦶ ꦕꦶꦠ꧀ꦠꦁ ꦱꦫꦷꦫꦚ꧀ꦕ, ꦕꦶꦠ꧀ꦠꦩꦺꦮ ꦮꦴ. ꦢꦸꦧ꧀ꦨꦫꦠꦚ꧀ꦕꦺꦮ ꦢꦸꦥ꧀ꦥꦺꦴꦱꦠꦚ꧀ꦕ ꦄꦴꦥꦗ꧀ꦗꦠꦷꦠꦶ ꦄꦠ꧀ꦠꦤꦴ ꦥꦕ꧀ꦕꦪꦢꦴꦪꦏꦺꦲꦶ ꦕ ꦢꦸꦏ꧀ꦑꦺꦤ ꦨꦫꦶꦠꦧ꧀ꦧꦠꦁ ꦥꦺꦴꦱꦺꦠꦧ꧀ꦧꦠꦚ꧀ꦕ ꦄꦴꦥꦗ꧀ꦗꦠꦶ. ꦄꦱꦁꦮꦫꦺ ꦜꦶꦠꦺꦴ ꦲꦶ ꦌꦏꦕ꧀ꦕꦺꦴ ꦄꦠ꧀ꦠꦤꦺꦴꦥꦶ ꦢꦸꦧ꧀ꦨꦫꦺꦴ ꦲꦺꦴꦠꦶ ꦢꦸꦥ꧀ꦥꦺꦴꦱꦺꦴ, ꦌꦏꦕ꧀ꦕꦺꦴ ꦈꦥꦛ꧀ꦜꦴꦏꦴꦤꦩ꧀ꦥꦶ. ꦏꦡꦁ? ꦪꦺꦴ ꦲꦶ ꦄꦩ꧀ꦧꦶꦭꦴꦢꦷꦤꦶ ꦭꦢ꧀ꦣꦴ ꦄꦤꦩ꧀ꦧꦶꦭꦴꦢꦷꦤꦶ ꦥꦫꦶꦪꦺꦱꦠꦶ, ꦄꦚ꧀ꦚꦱ꧀ꦱ ꦓꦫꦺ ꦭꦢ꧀ꦣꦁ ꦄꦚ꧀ꦚꦱ꧀ꦱ ꦓꦫꦺ ꦖꦝ꧀ꦝꦺꦤ꧀ꦠꦺꦴ ꦱꦧ꧀ꦧꦁ ꦒꦴꦩꦁ ꦕꦫꦶꦠ꧀ꦮꦴ ꦫꦶꦠ꧀ꦠꦥꦠ꧀ꦠꦺꦴꦮ ꦮꦶꦲꦴꦫꦁ ꦥꦮꦶꦱꦶꦠ꧀ꦮꦴ ꦤꦶꦥꦗ꧀ꦗꦠꦶ, ꦄꦪꦁ ꦄꦠ꧀ꦠꦤꦺꦴ ꦢꦸꦧ꧀ꦨꦫꦺꦴ. ꦪꦺꦴ ꦥꦤ ꦱꦴꦭꦶꦩꦁꦱꦺꦴꦢꦤꦴꦢꦷꦤꦁ ꦥꦠ꧀ꦠꦺ ꦥꦹꦫꦺꦠ꧀ꦮꦴ ꦢꦶꦤ꧀ꦤꦺꦥꦶ ꦢꦸꦩ꧀ꦩꦸꦑꦨꦴꦮꦁ ꦄꦤꦠ꧀ꦠꦩꦤꦨꦴꦮꦩꦺꦮ ꦢꦱ꧀ꦱꦺꦠꦶ, ꦠꦺꦱꦁ ꦮꦴ ꦱꦩ꧀ꦩꦸꦑꦴꦮ ꦠꦁ ꦥꦶꦟ꧀ꦝꦥꦴꦠꦁ ‘‘ꦏꦶꦁ ꦠꦸꦩ꧀ꦲꦺꦲꦶ ꦢꦶꦤ꧀ꦤ’’ꦤ꧀ꦠꦶ ꦄꦥꦱꦴꦢꦺꦤ꧀ꦠꦺꦴ ꦱꦴꦩꦟꦺꦫꦒꦲꦛ꧀ꦜꦴꦢꦷꦤꦁ ꦢꦺꦠꦶ, ꦄꦪꦁ ꦈꦥꦛ꧀ꦜꦴꦏꦴꦤꦁ ꦢꦸꦧ꧀ꦨꦫꦺꦴ. ꦌꦠꦁ ꦢꦶꦱ꧀ꦮꦴ ꦩꦤꦸꦱ꧀ꦱꦴ ꦢꦹꦫꦠꦺꦴꦮ ꦥꦫꦶꦮꦗ꧀ꦗꦺꦤ꧀ꦠꦶ ‘‘ꦢꦸꦧ꧀ꦨꦫꦺꦴ ꦨꦶꦏ꧀ꦑꦸ ꦤ ꦱꦏ꧀ꦏꦴ ꦥꦺꦴꦱꦺꦠꦸ’’ꦤ꧀ꦠꦶ.

ꦩꦲꦶꦕ꧀ꦖꦠꦤ꧀ꦠꦶ ꦌꦠ꧀ꦡ ꦩꦲꦤ꧀ꦠꦴꦤꦶ ꦮꦠ꧀ꦡꦹꦤꦶ ꦆꦕ꧀ꦖꦠꦶ, ꦩꦲꦠꦷ ꦮꦴ ꦥꦤꦱ꧀ꦱ ꦆꦕ꧀ꦖꦴꦠꦶ ꦩꦲꦶꦕ꧀ꦖꦺꦴ, ꦠꦱ꧀ꦱ ꦨꦴꦮꦺꦴ ꦩꦲꦶꦕ꧀ꦖꦠꦴ, ꦱꦤ꧀ꦠꦒꦸꦟꦮꦶꦨꦴꦮꦤꦠꦴ ꦥꦛꦶꦒ꧀ꦒꦲꦟꦺ ꦄꦩꦠ꧀ꦠꦚ꧀ꦚꦸꦠꦴ ꦕ. ꦩꦲꦶꦕ꧀ꦖꦺꦴ ꦲꦶ ꦆꦕ꧀ꦖꦴꦕꦴꦫꦺ ꦜꦠ꧀ꦮꦴ ꦄꦠ꧀ꦠꦤꦶ ꦮꦶꦗ꧀ꦗꦩꦴꦤꦱꦷꦭꦣꦸꦠꦣꦩ꧀ꦩꦴꦢꦶꦒꦸꦟꦺ ꦮꦶꦨꦴꦮꦺꦠꦶ, ꦠꦴꦢꦶꦱꦱ꧀ꦱ ꦥꦛꦶꦒ꧀ꦒꦲꦟꦺ ꦄꦩꦠ꧀ꦠꦚ꧀ꦚꦸꦠꦴꦥꦶ ꦲꦺꦴꦠꦶ. ꦪꦁ ꦱꦤ꧀ꦣꦴꦪ ꦮꦢꦤ꧀ꦠꦶ ‘‘ꦱꦤ꧀ꦠꦒꦸꦟꦱꦩ꧀ꦨꦴꦮꦤꦠꦴ ꦥꦛꦶꦒ꧀ꦒꦲꦟꦺ ꦕ ꦄꦩꦠ꧀ꦠꦚ꧀ꦚꦸꦠꦴ, ꦌꦠꦁ ꦩꦲꦶꦕ꧀ꦖꦠꦴꦭꦏ꧀ꦑꦟ’’ꦤ꧀ꦠꦶ. ꦱꦴ ꦥꦤꦺꦱꦴ ꦩꦲꦶꦕ꧀ꦖꦠꦴ ‘‘ꦆꦣꦺꦏꦕ꧀ꦕꦺꦴ ꦱꦢ꧀ꦣꦺꦴ ꦱꦩꦴꦤꦺꦴ ‘ꦱꦢ꧀ꦣꦺꦴꦠꦶ ꦩꦁ ꦗꦤꦺꦴ ꦗꦴꦤꦴꦠꦹ’ꦠꦶ ꦆꦕ꧀ꦖꦠꦶ, ꦱꦷꦭꦮꦴ ꦱꦩꦴꦤꦺꦴ ‘ꦱꦷꦭꦮꦴꦠꦶ ꦩꦁ ꦗꦤꦺꦴ ꦗꦴꦤꦴꦠꦹ’ꦠꦶ’’ ꦆꦩꦶꦤꦴ ꦤꦪꦺꦤ ꦄꦴꦒꦠꦴꦪꦺꦮ, ꦠꦴꦪ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ꦢꦸꦱ꧀ꦱꦤ꧀ꦠꦥ꧀ꦥꦶꦪꦺꦴ ꦲꦺꦴꦠꦶ, ꦮꦶꦗꦴꦠꦩꦴꦠꦴꦥꦶꦱ꧀ꦱ ꦕꦶꦠ꧀ꦠꦁ ꦒꦲꦺꦠꦸꦁ ꦤ ꦱꦏ꧀ꦏꦺꦴꦠꦶ. ꦠꦺꦤꦺꦠꦁ ꦮꦸꦕ꧀ꦕꦠꦶ –

‘‘ꦄꦒ꧀ꦒꦶꦏ꧀ꦑꦤ꧀ꦣꦺꦴ ꦱꦩꦸꦢ꧀ꦢꦺꦴ ꦕ, ꦩꦲꦶꦕ꧀ꦖꦺꦴ ꦕꦴꦥꦶ ꦥꦸꦒ꧀ꦒꦭꦺꦴ;

ꦱꦏꦛꦺꦤ ꦥꦕ꧀ꦕꦪꦁ ꦢꦺꦤ꧀ꦠꦸ, ꦠꦪꦺꦴꦥꦺꦠꦺ ꦄꦠꦥ꧀ꦥꦶꦪꦴ’’ꦠꦶ. (ꦩ. ꦤꦶ. ꦄꦛ꧀ꦜ. ꧑.꧒꧕꧒; ꦄ. ꦤꦶ. ꦄꦛ꧀ꦜ. ꧑.꧑.꧖꧓; ꦮꦶꦨ. ꦄꦛ꧀ꦜ. ꧘꧕꧐; ꦈꦢꦴ. ꦄꦛ꧀ꦜ. ꧓꧑; ꦩꦲꦴꦤꦶ. ꦄꦛ꧀ꦜ. ꧘꧕);

ꦱꦠ꧀ꦠꦺꦲꦶ ꦏꦶꦭꦺꦱꦺꦲꦶ ꦕ ꦱꦔ꧀ꦒꦟꦤꦁ ꦱꦩꦺꦴꦣꦴꦤꦁ ꦱꦔ꧀ꦒꦟꦶꦏꦴꦠꦶ ꦄꦴꦲ – ‘‘ꦒꦟꦱꦔ꧀ꦒꦟꦶꦏꦴꦪ ꦕꦺꦮ ꦏꦶꦭꦺꦱꦱꦔ꧀ꦒꦟꦶꦏꦴꦪ ꦕꦴ’’ꦠꦶ. ꦏꦺꦴꦱꦗ꧀ꦗꦴꦤꦸꦒꦠꦺꦴ ꦕ ꦲꦺꦴꦠꦷꦠꦶ ꦏꦸꦱꦷꦠꦨꦴꦮꦺꦤ ꦄꦤꦸꦒꦠꦺꦴ ꦲꦺꦴꦠꦶ, ꦏꦸꦱꦷꦠꦱ꧀ꦱ ꦨꦴꦮꦺꦴ ꦏꦺꦴꦱꦗ꧀ꦗꦁ. ꦄꦛ꧀ꦜꦏꦸꦱꦷꦠꦮꦠ꧀ꦡꦸꦥꦴꦫꦶꦥꦹꦫꦶꦪꦴꦠꦶ ꦌꦠ꧀ꦡ ꦏꦸꦕ꧀ꦖꦶꦠꦁ ꦱꦷꦢꦠꦷꦠꦶ ꦏꦸꦱꦷꦠꦺꦴ ꦢ-ꦏꦴꦫꦱ꧀ꦱ ꦠ-ꦏꦴꦫꦁ ꦏꦠ꧀ꦮꦴ. ꦪꦱ꧀ꦱ ꦣꦩ꧀ꦩꦱ꧀ꦱ ꦮꦱꦺꦤ ꦥꦸꦒ꧀ꦒꦭꦺꦴ ‘‘ꦏꦸꦱꦷꦠꦺꦴ’’ꦠꦶ ꦮꦸꦕ꧀ꦕꦠꦶ, ꦱꦺꦴ ꦏꦸꦱꦷꦠꦨꦴꦮꦺꦴ ꦆꦣ ꦏꦸꦱꦷꦠ-ꦱꦢ꧀ꦢꦺꦤ ꦮꦸꦠ꧀ꦠꦺꦴ. ꦮꦶꦤꦴꦥꦶ ꦲꦶ ꦨꦴꦮꦗꦺꦴꦠꦤꦱꦢ꧀ꦢꦁ ꦨꦴꦮꦠ꧀ꦡꦺꦴ ꦮꦶꦚ꧀ꦚꦴꦪꦠꦶ ꦪꦡꦴ ‘‘ꦥꦛꦱ꧀ꦱ ꦱꦸꦏ꧀ꦏ’’ꦤ꧀ꦠꦶ, ꦠꦱ꧀ꦩꦴ ꦏꦸꦱꦷꦠꦨꦴꦮꦮꦠ꧀ꦡꦹꦤꦷꦠꦶ ꦄꦠ꧀ꦡꦺꦴ, ꦏꦺꦴꦱꦗ꧀ꦗꦏꦴꦫꦟꦴꦤꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦠꦡꦴ ꦲꦶ –

‘‘ꦏꦩ꧀ꦩꦁ ꦑꦺꦴ ꦩꦺ ꦏꦠ꧀ꦠꦧ꧀ꦧꦁ ꦨꦮꦶꦱ꧀ꦱꦠꦶ, ꦏꦩ꧀ꦩꦁ ꦑꦺꦴ ꦥꦤ ꦩꦺ ꦏꦫꦺꦴꦤ꧀ꦠꦱ꧀ꦱ ꦏꦴꦪꦺꦴ ꦏꦶꦭꦩꦶꦱ꧀ꦱꦠꦶ, ꦲꦤ꧀ꦢꦴꦲꦁ ꦤꦶꦥꦗ꧀ꦗꦴꦩꦷꦠꦶ ꦱꦺꦴ ꦤꦶꦥꦗ꧀ꦗꦠꦶ, ꦤ ꦮꦷꦫꦶꦪꦁ ꦄꦴꦫꦨꦠꦶ ꦄꦥ꧀ꦥꦠ꧀ꦠꦱ꧀ꦱ ꦥꦠ꧀ꦠꦶꦪꦴ ꦄꦤꦣꦶꦒꦠꦱ꧀ꦱ ꦄꦣꦶꦒꦩꦴꦪ ꦄꦱꦕ꧀ꦖꦶꦏꦠꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪ, ꦆꦢꦁ ꦥꦜꦩꦁ ꦏꦸꦱꦷꦠꦮꦠ꧀ꦡꦸ. ꦄꦲꦁ ꦑꦺꦴ ꦏꦩ꧀ꦩꦁ ꦄꦏꦴꦱꦶꦁ, ꦏꦩ꧀ꦩꦁ ꦑꦺꦴ ꦥꦤ ꦩꦺ ꦏꦫꦺꦴꦤ꧀ꦠꦱ꧀ꦱ ꦏꦴꦪꦺꦴ ꦏꦶꦭꦤ꧀ꦠꦺꦴ, ꦲꦤ꧀ꦢꦴꦲꦁ ꦤꦶꦥꦗ꧀ꦗꦴꦩꦶ…ꦥꦺ… ꦩꦒ꧀ꦒꦺꦴ ꦑꦺꦴ ꦩꦺ ꦒꦤ꧀ꦠꦧ꧀ꦧꦺꦴ ꦨꦮꦶꦱ꧀ꦱꦠꦶ, ꦩꦒ꧀ꦒꦁ ꦑꦺꦴ ꦥꦤ ꦩꦺ ꦒꦕ꧀ꦖꦤ꧀ꦠꦱ꧀ꦱ ꦏꦴꦪꦺꦴ ꦏꦶꦭꦩꦶꦱ꧀ꦱꦠꦶ, ꦲꦤ꧀ꦢꦴꦲꦁ ꦤꦶꦥꦗ꧀ꦗꦴꦩꦶ…ꦥꦺ… ꦄꦲꦁ ꦑꦺꦴ ꦩꦒ꧀ꦒꦁ ꦄꦒꦩꦴꦱꦶꦁ, ꦩꦒ꧀ꦒꦁ ꦑꦺꦴ ꦥꦤ ꦩꦺ ꦒꦕ꧀ꦖꦤ꧀ꦠꦱ꧀ꦱ ꦏꦴꦪꦺꦴ ꦏꦶꦭꦤ꧀ꦠꦺꦴ, ꦲꦤ꧀ꦢꦴꦲꦁ ꦤꦶꦥꦗ꧀ꦗꦴꦩꦶ…ꦥꦺ… ꦄꦲꦁ ꦑꦺꦴ ꦒꦴꦩꦁ ꦮꦴ ꦤꦶꦒꦩꦁ ꦮꦴ ꦥꦶꦟ꧀ꦝꦴꦪ ꦕꦫꦤ꧀ꦠꦺꦴ ꦤꦴꦭꦠ꧀ꦡꦁ ꦭꦹꦑꦱ꧀ꦱ ꦮꦴ ꦥꦟꦷꦠꦱ꧀ꦱ ꦮꦴ ꦨꦺꦴꦗꦤꦱ꧀ꦱ ꦪꦴꦮꦢꦠ꧀ꦡꦁ ꦥꦴꦫꦶꦥꦹꦫꦶꦁ, ꦠꦱ꧀ꦱ ꦩꦺ ꦏꦴꦪꦺꦴ ꦏꦶꦭꦤ꧀ꦠꦺꦴ ꦄꦏꦩ꧀ꦩꦚ꧀ꦚꦺꦴ, ꦲꦤ꧀ꦢꦴꦲꦁ ꦤꦶꦥꦗ꧀ꦗꦴꦩꦶ…ꦥꦺ… ꦄꦲꦁ ꦑꦺꦴ ꦒꦴꦩꦁ ꦮꦴ ꦤꦶꦒꦩꦁ ꦮꦴ ꦥꦶꦟ꧀ꦝꦴꦪ ꦕꦫꦤ꧀ꦠꦺꦴ ꦄꦭꦠ꧀ꦡꦁ ꦭꦹꦑꦱ꧀ꦱ ꦮꦴ ꦥꦟꦷꦠꦱ꧀ꦱ ꦮꦴ ꦨꦺꦴꦗꦤꦱ꧀ꦱ ꦪꦴꦮꦢꦠ꧀ꦡꦁ ꦥꦴꦫꦶꦥꦹꦫꦶꦁ, ꦠꦱ꧀ꦱ ꦩꦺ ꦏꦴꦪꦺꦴ ꦒꦫꦸꦏꦺꦴ ꦄꦏꦩ꧀ꦩꦚ꧀ꦚꦺꦴ ꦩꦴꦱꦴꦕꦶꦠꦁ ꦩꦚ꧀ꦚꦺ, ꦲꦤ꧀ꦢꦴꦲꦁ ꦤꦶꦥꦗ꧀ꦗꦴꦩꦶ…ꦥꦺ… ꦈꦥ꧀ꦥꦤ꧀ꦤꦺꦴ ꦑꦺꦴ ꦩꦺ ꦄꦪꦁ ꦄꦥ꧀ꦥꦩꦠ꧀ꦠꦏꦺꦴ ꦄꦴꦧꦴꦣꦺꦴ, ꦄꦠ꧀ꦡꦶ ꦏꦥ꧀ꦥꦺꦴ ꦤꦶꦥꦗ꧀ꦗꦶꦠꦸꦁ, ꦲꦤ꧀ꦢꦴꦲꦁ ꦤꦶꦥꦗ꧀ꦗꦴꦩꦶ…ꦥꦺ… ꦄꦲꦁ ꦑꦺꦴ ꦒꦶꦭꦴꦤꦴ ꦮꦸꦛ꧀ꦜꦶꦠꦺꦴ ꦄꦕꦶꦫꦮꦸꦛ꧀ꦜꦶꦠꦺꦴ ꦒꦺꦭꦚ꧀ꦚꦴ, ꦠꦱ꧀ꦱ ꦩꦺ ꦏꦴꦪꦺꦴ ꦢꦸꦧ꧀ꦧꦭꦺꦴ ꦄꦏꦩ꧀ꦩꦚ꧀ꦚꦺꦴ, ꦲꦤ꧀ꦢꦴꦲꦁ ꦤꦶꦥꦗ꧀ꦗꦴꦩꦷꦠꦶ ꦱꦺꦴ ꦤꦶꦥꦗ꧀ꦗꦠꦶ, ꦤ ꦮꦷꦫꦶꦪꦁ ꦄꦴꦫꦨꦠꦶ ꦄꦥ꧀ꦥꦠ꧀ꦠꦱ꧀ꦱ ꦥꦠ꧀ꦠꦶꦪꦴ ꦄꦤꦣꦶꦒꦠꦱ꧀ꦱ ꦄꦣꦶꦒꦩꦴꦪ ꦄꦱꦕ꧀ꦖꦶꦏꦠꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪ. ꦆꦢꦁ ꦄꦛ꧀ꦜꦩꦁ ꦏꦸꦱꦷꦠꦮꦠ꧀ꦡꦸ’’ꦤ꧀ꦠꦶ (ꦢꦷ. ꦤꦶ. ꧓.꧓꧓꧔; ꦄ. ꦤꦶ. ꧘.꧘꧐) –

ꦌꦮꦩꦴꦒꦠꦴꦤꦶ ‘‘ꦲꦤ꧀ꦢꦴꦲꦁ ꦤꦶꦥꦗ꧀ꦗꦴꦩꦷ’’ꦠꦶ ꦌꦮꦁ ꦥꦮꦠ꧀ꦠꦎꦱꦷꦢꦤꦴꦤꦶ ꦈꦥꦫꦹꦥꦫꦶ ꦏꦺꦴꦱꦗ꧀ꦗꦏꦴꦫꦟꦠ꧀ꦠꦴ ꦄꦛ꧀ꦜ ꦏꦸꦱꦷꦠꦮꦠ꧀ꦡꦹꦤꦶ ꦤꦴꦩ, ꦠꦺꦱꦁ ꦥꦴꦫꦶꦥꦹꦫꦶꦪꦴ ꦱꦁꦮꦠ꧀ꦠꦠꦷꦠꦶ ꦄꦠ꧀ꦡꦺꦴ.

ꦱꦸꦨꦫꦺꦴ ꦲꦺꦴꦠꦶ ꦱꦸꦥꦺꦴꦱꦺꦴꦠꦶ ꦄꦠ꧀ꦠꦤꦺꦴ ꦈꦥꦛ꧀ꦜꦴꦏꦺꦲꦶ ꦕ ꦱꦸꦑꦺꦤ ꦨꦫꦶꦠꦧ꧀ꦧꦺꦴ ꦥꦺꦴꦱꦺꦠꦧ꧀ꦧꦺꦴꦠꦶ ꦄꦠ꧀ꦡꦺꦴ. ꦱꦁꦮꦫꦺ ꦜꦶꦠꦺꦴ ꦲꦶ ꦌꦏꦕ꧀ꦕꦺꦴ ꦄꦠ꧀ꦠꦤꦺꦴꦥꦶ ꦱꦸꦨꦫꦺꦴ ꦲꦺꦴꦠꦶ ꦱꦸꦥꦺꦴꦱꦺꦴ, ꦌꦏꦕ꧀ꦕꦺꦴ ꦈꦥꦛ꧀ꦜꦴꦏꦴꦤꦩ꧀ꦥꦶ. ꦏꦡꦁ? ꦪꦺꦴ ꦲꦶ ꦪꦁ ꦏꦶꦚ꧀ꦕꦶ ꦭꦹꦑꦁ ꦮꦴ ꦥꦟꦷꦠꦁ ꦮꦴ ꦭꦢ꧀ꦣꦴ ꦠꦸꦛ꧀ꦜꦕꦶꦠ꧀ꦠꦺꦴꦮ ꦨꦸꦚ꧀ꦗꦶꦠ꧀ꦮꦴ ꦮꦶꦲꦴꦫꦁ ꦒꦤ꧀ꦠ꧀ꦮꦴ ꦄꦠ꧀ꦠꦤꦺꦴ ꦏꦩ꧀ꦩꦁ ꦏꦫꦺꦴꦠꦶ, ꦄꦪꦁ ꦄꦠ꧀ꦠꦤꦺꦴ ꦱꦸꦨꦫꦺꦴ. ꦪꦺꦴ ꦥꦤ ꦥꦫꦺꦱꦩ꧀ꦥꦶ ꦄꦥ꧀ꦥꦁ ꦮꦴ ꦧꦲꦸꦁ ꦮꦴ ꦭꦹꦑꦁ ꦮꦴ ꦥꦟꦷꦠꦁ ꦮꦴ ꦢꦴꦤꦁ ꦄꦲꦷꦭ꦳ꦺꦠ꧀ꦮꦴ ꦄꦠ꧀ꦠꦩꦤꦺꦴ ꦮꦶꦥ꧀ꦥꦱꦤ꧀ꦤꦩꦸꦑꦺꦴ ꦲꦸꦠ꧀ꦮꦴ ꦌꦠꦺꦱꦁ ꦱꦩ꧀ꦩꦸꦑꦴꦮ ꦥꦫꦶꦨꦸꦚ꧀ꦗꦶꦠ꧀ꦮꦴ ꦪꦴꦠꦶ, ꦄꦪꦁ ꦈꦥꦛ꧀ꦜꦴꦏꦴꦤꦁ ꦱꦸꦨꦫꦺꦴ. ꦌꦠꦁ ꦢꦶꦱ꧀ꦮꦴ ꦩꦤꦸꦱ꧀ꦱꦴ ꦄꦠꦶꦮꦶꦪ ꦮꦶꦱ꧀ꦱꦠ꧀ꦡꦴ ꦲꦺꦴꦤ꧀ꦠꦶ, ‘‘ꦄꦩ꧀ꦲꦴꦏꦁ ꦨꦢꦤ꧀ꦠꦺꦴ ꦱꦸꦨꦫꦺꦴ, ꦡꦺꦴꦏꦡꦺꦴꦏꦺꦤꦥꦶ ꦠꦸꦱ꧀ꦱꦠꦶ, ꦩꦪꦩꦺꦮ ꦤꦁ ꦥꦺꦴꦱꦺꦱ꧀ꦱꦴꦩꦴ’’ꦠꦶ ꦥꦛꦶꦚ꧀ꦚꦁ ꦏꦠ꧀ꦮꦴ ꦥꦺꦴꦱꦺꦤ꧀ꦠꦶ. ꦄꦥ꧀ꦥꦶꦕ꧀ꦖꦠꦤ꧀ꦠꦶ ꦆꦕ꧀ꦖꦴꦮꦶꦫꦲꦶꦠꦠ꧀ꦠꦁ. ꦌꦠ꧀ꦡ ꦲꦶ ꦧ꧀ꦪꦚ꧀ꦗꦤꦁ ꦱꦴꦮꦱꦺꦱꦁ ꦮꦶꦪ, ꦄꦠ꧀ꦡꦺꦴ ꦥꦤ ꦤꦶꦫꦮꦱꦺꦱꦺꦴ. ꦄꦥ꧀ꦥ-ꦱꦢ꧀ꦢꦺꦴ ꦲꦺꦠ꧀ꦡ ꦄꦨꦴꦮꦠ꧀ꦡꦺꦴꦠꦶ ꦱꦏ꧀ꦏꦴ ꦮꦶꦚ꧀ꦚꦴꦠꦸꦁ ‘‘ꦄꦥ꧀ꦥꦴꦧꦴꦣꦠꦚ꧀ꦕ ꦱꦚ꧀ꦗꦴꦤꦴꦩꦷ’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧒꧒꧕) ꦮꦶꦪ. ꦠꦺꦤꦺꦮꦴꦲ ‘‘ꦤꦶꦠ꧀ꦠꦟ꧀ꦲꦨꦴꦮ’’ꦤ꧀ꦠꦶ.

ꦠꦶꦥ꧀ꦥꦨꦺꦢꦴꦪ ꦱꦤ꧀ꦠꦸꦛ꧀ꦜꦶꦪꦴꦠꦶ ꦪꦡꦴꦭꦴꦨꦴꦢꦶꦱꦤ꧀ꦠꦺꦴꦱꦱꦴꦩꦚ꧀ꦚꦺꦤ ꦮꦸꦠ꧀ꦠꦁ, ꦕꦠꦹꦱꦸ ꦥꦤ ꦥꦕ꧀ꦕꦪꦺꦱꦸ ꦠꦪꦺꦴ ꦠꦪꦺꦴ ꦱꦤ꧀ꦠꦺꦴꦱꦴꦠꦶ ꦢ꧀ꦮꦴꦢꦱꦮꦶꦣꦺꦴ ꦲꦺꦴꦠꦶ ꦱꦤ꧀ꦠꦺꦴꦱꦺꦴ. ꦏꦡꦁ? ꦕꦷꦮꦫꦺ ꦪꦡꦴꦭꦴꦨꦱꦤ꧀ꦠꦺꦴꦱꦺꦴ ꦪꦡꦴꦧꦭꦱꦤ꧀ꦠꦺꦴꦱꦺꦴ ꦪꦡꦴꦱꦴꦫꦸꦥ꧀ꦥꦱꦤ꧀ꦠꦺꦴꦱꦺꦴꦠꦶ ꦠꦶꦮꦶꦣꦺꦴ ꦲꦺꦴꦠꦶ ꦱꦤ꧀ꦠꦺꦴꦱꦺꦴ. ꦌꦮꦁ ꦥꦶꦟ꧀ꦝꦥꦴꦠꦴꦢꦷꦱꦸ. ꦠꦱ꧀ꦱꦴꦪꦁ ꦥꦨꦺꦢꦱꦁꦮꦟ꧀ꦟꦤꦴ (ꦩ. ꦤꦶ. ꦄꦛ꧀ꦜ. ꧑.꧒꧕꧒; ꦱꦁ. ꦤꦶ. ꦄꦛ꧀ꦜ. ꧒.꧒.꧑꧔꧔; ꦄ. ꦤꦶ. ꦄꦛ꧀ꦜ. ꧑.꧑.꧖꧕) – ꦆꦣ ꦨꦶꦏ꧀ꦑꦸ ꦕꦷꦮꦫꦁ ꦭꦨꦠꦶ ꦱꦸꦤ꧀ꦢꦫꦁ ꦮꦴ ꦄꦱꦸꦤ꧀ꦢꦫꦁ ꦮꦴ, ꦱꦺꦴ ꦠꦺꦤꦺꦮ ꦪꦴꦥꦺꦠꦶ ꦄꦚ꧀ꦚꦁ ꦤ ꦥꦠ꧀ꦡꦺꦠꦶ, ꦭꦨꦤ꧀ꦠꦺꦴꦥꦶ ꦤ ꦒꦟ꧀ꦲꦴꦠꦶ. ꦄꦪꦩꦱ꧀ꦱ ꦕꦷꦮꦫꦺ ꦪꦡꦴꦭꦴꦨꦱꦤ꧀ꦠꦺꦴꦱꦺꦴ. ꦄꦡ ꦥꦤ ꦥꦏꦠꦶꦢꦸꦧ꧀ꦧꦭꦺꦴ ꦮꦴ ꦲꦺꦴꦠꦶ ꦄꦴꦧꦴꦣꦗꦫꦴꦨꦶꦨꦹꦠꦺꦴ ꦮꦴ, ꦒꦫꦸꦕꦷꦮꦫꦁ ꦥꦴꦫꦸꦥꦤ꧀ꦠꦺꦴ ꦏꦶꦭꦩꦠꦶ, ꦱꦺꦴ ꦱꦨꦴꦒꦺꦤ ꦨꦶꦏ꧀ꦑꦸꦤꦴ ꦱꦢ꧀ꦣꦶꦁ ꦠꦁ ꦥꦫꦶꦮꦠ꧀ꦠꦺꦠ꧀ꦮꦴ ꦭꦲꦸꦏꦺꦤ ꦪꦴꦥꦺꦤ꧀ꦠꦺꦴꦥꦶ ꦱꦤ꧀ꦠꦸꦛ꧀ꦜꦺꦴꦪꦺꦮ ꦲꦺꦴꦠꦶ. ꦄꦪꦩꦱ꧀ꦱ ꦕꦷꦮꦫꦺ ꦪꦡꦴꦧꦭꦱꦤ꧀ꦠꦺꦴꦱꦺꦴ. ꦥꦏꦠꦶꦢꦸꦧ꧀ꦧꦭꦴꦢꦷꦤꦚ꧀ꦲꦶ ꦒꦫꦸꦕꦷꦮꦫꦴꦤꦶ ꦤ ꦦꦴꦱꦸꦨꦴꦮꦴꦮꦲꦴꦤꦶ ꦱꦫꦷꦫꦑꦺꦢꦴꦮꦲꦴꦤꦶ ꦕ ꦲꦺꦴꦤ꧀ꦠꦷꦠꦶ ꦥꦪꦺꦴꦗꦤꦮꦱꦺꦤ ꦄꦤꦠ꧀ꦫꦶꦕ꧀ꦖꦠꦴꦢꦶꦮꦱꦺꦤ ꦠꦴꦤꦶ ꦥꦫꦶꦮꦠ꧀ꦠꦺꦠ꧀ꦮꦴ ꦭꦲꦸꦏꦕꦷꦮꦫꦥꦫꦶꦨꦺꦴꦒꦺꦴ ꦤ ꦱꦤ꧀ꦠꦺꦴꦱꦮꦶꦫꦺꦴꦣꦷꦠꦶ. ꦄꦥꦫꦺꦴ ꦥꦟꦷꦠꦥꦕ꧀ꦕꦪꦭꦴꦨꦷ ꦲꦺꦴꦠꦶ, ꦱꦺꦴ ꦥꦛ꧀ꦛꦕꦷꦮꦫꦴꦢꦷꦤꦁ ꦄꦚ꧀ꦚꦠꦫꦁ ꦩꦲꦒ꧀ꦓꦕꦷꦮꦫꦁ ꦧꦲꦹꦤꦶ ꦮꦴ ꦥꦤ ꦕꦷꦮꦫꦴꦤꦶ ꦭꦨꦶꦠ꧀ꦮꦴ ‘‘ꦆꦢꦁ ꦡꦺꦫꦴꦤꦁ ꦕꦶꦫꦥꦧ꧀ꦧꦗꦶꦠꦴꦤꦁ, ꦆꦢꦁ ꦧꦲꦸꦱ꧀ꦱꦸꦠꦴꦤꦁ ꦄꦤꦸꦫꦹꦥꦁ, ꦆꦢꦁ ꦒꦶꦭꦴꦤꦴꦤꦁ, ꦆꦢꦁ ꦄꦥ꧀ꦥꦭꦴꦨꦴꦤꦁ ꦲꦺꦴꦠꦹ’’ꦠꦶ ꦢꦠ꧀ꦮꦴ ꦠꦺꦱꦁ ꦥꦸꦫꦴꦟꦕꦷꦮꦫꦁ ꦮꦴ ꦱꦔ꧀ꦏꦴꦫꦏꦹꦛꦴꦢꦶꦠꦺꦴ ꦮꦴ ꦤꦤ꧀ꦠꦏꦴꦤꦶ ꦈꦕ꧀ꦕꦶꦤꦶꦠ꧀ꦮꦴ ꦠꦺꦲꦶ ꦱꦔ꧀ꦓꦴꦛꦶꦁ ꦏꦠ꧀ꦮꦴ ꦣꦴꦫꦺꦤ꧀ꦠꦺꦴꦥꦶ ꦱꦤ꧀ꦠꦸꦛ꧀ꦜꦺꦴꦮ ꦲꦺꦴꦠꦶ. ꦄꦪꦩꦱ꧀ꦱ ꦕꦷꦮꦫꦺ ꦪꦡꦴꦱꦴꦫꦸꦥ꧀ꦥꦱꦤ꧀ꦠꦺꦴꦱꦺꦴ. ꦩꦲꦒ꧀ꦓꦚ꧀ꦲꦶ ꦕꦷꦮꦫꦁ ꦧꦲꦹꦤꦶ ꦮꦴ ꦕꦷꦮꦫꦴꦤꦶ ꦭꦨꦶꦠ꧀ꦮꦴꦥꦶ ꦠꦴꦤꦶ ꦮꦶꦱ꧀ꦱꦗ꧀ꦗꦺꦠ꧀ꦮꦴ ꦠꦢꦚ꧀ꦚꦱ꧀ꦱ ꦒꦲꦟꦁ ꦪꦡꦴꦱꦴꦫꦸꦥ꧀ꦥꦤꦪꦺ ꦜꦶꦠꦠ꧀ꦠꦴ ꦤ ꦱꦤ꧀ꦠꦺꦴꦱꦮꦶꦫꦺꦴꦣꦷꦠꦶ.

ꦆꦣ ꦥꦤ ꦨꦶꦏ꧀ꦑꦸ ꦥꦶꦟ꧀ꦝꦥꦴꦠꦁ ꦭꦨꦠꦶ ꦭꦹꦑꦁ ꦮꦴ ꦥꦟꦷꦠꦁ ꦮꦴ, ꦱꦺꦴ ꦠꦺꦤꦺꦮ ꦪꦴꦥꦺꦠꦶ ꦄꦚ꧀ꦚꦁ ꦤ ꦥꦠ꧀ꦡꦺꦠꦶ, ꦭꦨꦤ꧀ꦠꦺꦴꦥꦶ ꦤ ꦒꦟ꧀ꦲꦴꦠꦶ. ꦄꦪꦩꦱ꧀ꦱ ꦥꦶꦟ꧀ꦝꦥꦴꦠꦺ ꦪꦡꦴꦭꦴꦨꦱꦤ꧀ꦠꦺꦴꦱꦺꦴ. ꦪꦺꦴ ꦥꦤ ꦄꦠ꧀ꦠꦤꦺꦴ ꦥꦏꦠꦶꦮꦶꦫꦸꦢ꧀ꦣꦁ ꦮꦴ ꦧ꧀ꦪꦴꦣꦶꦮꦶꦫꦸꦢ꧀ꦣꦁ ꦮꦴ ꦥꦶꦟ꧀ꦝꦥꦴꦠꦁ ꦭꦨꦠꦶ, ꦪꦺꦤꦱ꧀ꦱ ꦥꦫꦶꦨꦸꦠ꧀ꦠꦺꦤ ꦄꦦꦴꦱꦸ ꦲꦺꦴꦠꦶ, ꦱꦺꦴ ꦱꦨꦴꦒꦱ꧀ꦱ ꦨꦶꦏ꧀ꦑꦸꦤꦺꦴ ꦠꦁ ꦢꦠ꧀ꦮꦴ ꦠꦱ꧀ꦱ ꦲꦠ꧀ꦡꦠꦺꦴ ꦱꦥ꧀ꦥꦴꦪꦨꦺꦴꦗꦤꦁ ꦨꦸꦚ꧀ꦗꦶꦠ꧀ꦮꦴ ꦱꦩꦟꦣꦩ꧀ꦩꦁ ꦏꦫꦺꦴꦤ꧀ꦠꦺꦴꦥꦶ ꦱꦤ꧀ꦠꦸꦛ꧀ꦜꦺꦴꦮ ꦲꦺꦴꦠꦶ. ꦄꦪꦩꦱ꧀ꦱ ꦥꦶꦟ꧀ꦝꦥꦴꦠꦺ ꦪꦡꦴꦧꦭꦱꦤ꧀ꦠꦺꦴꦱꦺꦴ. ꦄꦥꦫꦺꦴ ꦧꦲꦸꦁ ꦥꦟꦷꦠꦁ ꦥꦶꦟ꧀ꦝꦥꦴꦠꦁ ꦭꦨꦠꦶ, ꦱꦺꦴ ꦠꦁ ꦕꦷꦮꦫꦁ ꦮꦶꦪ ꦕꦶꦫꦥꦧ꧀ꦧꦗꦶꦠꦧꦲꦸꦱ꧀ꦱꦸꦠꦄꦥ꧀ꦥꦭꦴꦨꦒꦶꦭꦴꦤꦴꦤꦁ ꦢꦠ꧀ꦮꦴ ꦠꦺꦱꦁ ꦮꦴ ꦱꦺꦱꦏꦁ ꦥꦶꦟ꧀ꦝꦴꦪ ꦮꦴ ꦕꦫꦶꦠ꧀ꦮꦴ ꦩꦶꦱ꧀ꦱꦏꦴꦲꦴꦫꦁ ꦨꦸꦚ꧀ꦗꦤ꧀ꦠꦺꦴꦥꦶ ꦱꦤ꧀ꦠꦸꦛ꧀ꦜꦺꦴꦮ ꦲꦺꦴꦠꦶ. ꦄꦪꦩꦱ꧀ꦱ ꦥꦶꦟ꧀ꦝꦥꦴꦠꦺ ꦪꦡꦴꦱꦴꦫꦸꦥ꧀ꦥꦱꦤ꧀ꦠꦺꦴꦱꦺꦴ.

ꦆꦣ ꦥꦤ ꦨꦶꦏ꧀ꦑꦸ ꦱꦺꦤꦴꦱꦤꦁ ꦭꦨꦠꦶ ꦩꦤꦴꦥꦁ ꦮꦴ ꦄꦩꦤꦴꦥꦁ ꦮꦴ, ꦱꦺꦴ ꦠꦺꦤ ꦤꦺꦮ ꦱꦺꦴꦩꦤꦱ꧀ꦱꦁ, ꦤ ꦥꦛꦶꦓꦁ ꦈꦥ꧀ꦥꦴꦢꦺꦠꦶ, ꦄꦤ꧀ꦠꦩꦱꦺꦴ ꦠꦶꦟꦱꦤ꧀ꦡꦫꦏꦺꦤꦥꦶ ꦪꦡꦴꦭꦢ꧀ꦣꦺꦤꦺꦮ ꦠꦸꦱ꧀ꦱꦠꦶ. ꦄꦪꦩꦱ꧀ꦱ ꦱꦺꦤꦴꦱꦤꦺ ꦪꦡꦴꦭꦴꦨꦱꦤ꧀ꦠꦺꦴꦱꦺꦴ. ꦪꦺꦴ ꦥꦤ ꦄꦠ꧀ꦠꦤꦺꦴ ꦥꦏꦠꦶꦮꦶꦫꦸꦢ꧀ꦣꦁ ꦮꦴ ꦧ꧀ꦪꦴꦣꦶꦮꦶꦫꦸꦢ꧀ꦣꦁ ꦮꦴ ꦱꦺꦤꦴꦱꦤꦁ ꦭꦨꦠꦶ, ꦪꦠ꧀ꦡꦱ꧀ꦱ ꦮꦱꦠꦺꦴ ꦄꦦꦴꦱꦸ ꦲꦺꦴꦠꦶ, ꦱꦺꦴ ꦠꦁ ꦱꦨꦴꦒꦱ꧀ꦱ ꦨꦶꦏ꧀ꦑꦸꦤꦺꦴ ꦢꦠ꧀ꦮꦴ ꦠꦱ꧀ꦱ ꦱꦤ꧀ꦠꦏꦺ ꦱꦥ꧀ꦥꦴꦪꦱꦺꦤꦴꦱꦤꦺ ꦮꦱꦤ꧀ꦠꦺꦴꦥꦶ ꦱꦤ꧀ꦠꦸꦛ꧀ꦜꦺꦴꦮ ꦲꦺꦴꦠꦶ. ꦄꦪꦩꦱ꧀ꦱ ꦱꦺꦤꦴꦱꦤꦺ ꦪꦡꦴꦧꦭꦱꦤ꧀ꦠꦺꦴꦱꦺꦴ. ꦄꦥꦫꦺꦴ ꦩꦲꦴꦥꦸꦚ꧀ꦚꦺꦴ ꦭꦺꦟꦩꦟ꧀ꦝꦥꦏꦹꦛꦴꦒꦴꦫꦴꦢꦷꦤꦶ ꦧꦲꦹꦤꦶ ꦥꦟꦷꦠꦱꦺꦤꦴꦱꦤꦴꦤꦶ ꦭꦨꦠꦶ, ꦱꦺꦴ ꦠꦴꦤꦶ ꦕꦷꦮꦫꦴꦢꦷꦤꦶ ꦮꦶꦪ ꦕꦶꦫꦥꦧ꧀ꦧꦗꦶꦠꦧꦲꦸꦱ꧀ꦱꦸꦠꦄꦥ꧀ꦥꦭꦴꦨꦒꦶꦭꦴꦤꦴꦤꦁ ꦢꦠ꧀ꦮꦴ ꦪꦠ꧀ꦡ ꦏꦠ꧀ꦡꦕꦶ ꦮꦱꦤ꧀ꦠꦺꦴꦥꦶ ꦱꦤ꧀ꦠꦸꦛ꧀ꦜꦺꦴꦮ ꦲꦺꦴꦠꦶ. ꦄꦪꦩꦱ꧀ꦱ ꦱꦺꦤꦴꦱꦤꦺ ꦪꦡꦴꦱꦴꦫꦸꦥ꧀ꦥꦱꦤ꧀ꦠꦺꦴꦱꦺꦴ. ꦪꦺꦴꦥꦶ ‘‘ꦈꦠ꧀ꦠꦩꦱꦺꦤꦴꦱꦤꦁ ꦤꦴꦩ ꦥꦩꦴꦢꦛ꧀ꦜꦴꦤꦁ, ꦠꦠ꧀ꦡ ꦤꦶꦱꦶꦤ꧀ꦤꦱ꧀ꦱ ꦡꦶꦤꦩꦶꦢ꧀ꦣꦁ ꦎꦏ꧀ꦏꦩꦠꦶ, ꦤꦶꦢ꧀ꦢꦴꦨꦶꦨꦹꦠꦱ꧀ꦱ ꦥꦸꦤ ꦥꦛꦶꦧꦸꦗ꧀ꦙꦠꦺꦴ ꦥꦴꦥꦮꦶꦠꦏ꧀ꦏꦴ ꦥꦴꦠꦸꦨꦮꦤ꧀ꦠꦷ’’ꦠꦶ ꦥꦛꦶꦱꦚ꧀ꦕꦶꦏ꧀ꦑꦶꦠ꧀ꦮꦴ ꦠꦴꦢꦶꦱꦁ ꦱꦺꦤꦴꦱꦤꦁ ꦥꦠ꧀ꦠꦩ꧀ꦥꦶ ꦤ ꦱꦩ꧀ꦥꦛꦶꦕ꧀ꦖꦠꦶ, ꦱꦺꦴ ꦠꦁ ꦥꦛꦶꦏ꧀ꦑꦶꦥꦶꦠ꧀ꦮꦴ ꦄꦧ꧀ꦨꦺꦴꦏꦴꦱꦫꦸꦏ꧀ꦑꦩꦹꦭꦴꦢꦷꦱꦸ ꦮꦱꦤ꧀ꦠꦺꦴꦥꦶ ꦱꦤ꧀ꦠꦸꦛ꧀ꦜꦺꦴꦮ ꦲꦺꦴꦠꦶ. ꦄꦪꦩ꧀ꦥꦶꦱ꧀ꦱ ꦱꦺꦤꦴꦱꦤꦺ ꦪꦡꦴꦱꦴꦫꦸꦥ꧀ꦥꦱꦤ꧀ꦠꦺꦴꦱꦺꦴ.

ꦆꦣ ꦥꦤ ꦨꦶꦏ꧀ꦑꦸ ꦨꦺꦱꦗ꧀ꦗꦁ ꦭꦨꦠꦶ ꦭꦹꦑꦁ ꦮꦴ ꦥꦟꦷꦠꦁ ꦮꦴ, ꦱꦺꦴ ꦪꦁ ꦭꦨꦠꦶ, ꦠꦺꦤꦺꦮ ꦠꦸꦱ꧀ꦱꦠꦶ ꦄꦚ꧀ꦚꦁ ꦤ ꦥꦠ꧀ꦡꦺꦠꦶ, ꦭꦨꦤ꧀ꦠꦺꦴꦥꦶ ꦤ ꦒꦟ꧀ꦲꦴꦠꦶ. ꦄꦪꦩꦱ꧀ꦱ ꦒꦶꦭꦴꦤꦥꦕ꧀ꦕꦪꦺ ꦪꦡꦴꦭꦴꦨꦱꦤ꧀ꦠꦺꦴꦱꦺꦴ. ꦪꦺꦴ ꦥꦤ ꦠꦺꦭꦺꦤ ꦄꦠ꧀ꦡꦶꦏꦺꦴ ꦦꦴꦟꦶꦠꦁ ꦭꦨꦠꦶ, ꦱꦺꦴ ꦠꦁ ꦱꦨꦴꦒꦱ꧀ꦱ ꦨꦶꦏ꧀ꦑꦸꦤꦺꦴ ꦢꦠ꧀ꦮꦴ ꦠꦱ꧀ꦱ ꦲꦠ꧀ꦡꦠꦺꦴ ꦠꦺꦭꦁ ꦒꦲꦺꦠ꧀ꦮꦴ ꦄꦚ꧀ꦚꦢꦺꦮ ꦮꦴ ꦥꦫꦶꦪꦺꦱꦶꦠ꧀ꦮꦴ ꦨꦺꦱꦗ꧀ꦗꦁ ꦏꦫꦺꦴꦤ꧀ꦠꦺꦴꦥꦶ ꦱꦤ꧀ꦠꦸꦛ꧀ꦜꦺꦴꦮ ꦲꦺꦴꦠꦶ. ꦄꦪꦩꦱ꧀ꦱ ꦒꦶꦭꦴꦤꦥꦕ꧀ꦕꦪꦺ ꦪꦡꦴꦧꦭꦱꦤ꧀ꦠꦺꦴꦱꦺꦴ. ꦄꦥꦫꦺꦴ ꦩꦲꦴꦥꦸꦚ꧀ꦚꦺꦴ ꦧꦲꦸꦁ ꦠꦺꦭꦩꦣꦸꦦꦴꦟꦶꦠꦴꦢꦶꦥꦟꦷꦠꦨꦺꦱꦗ꧀ꦗꦁ ꦭꦨꦠꦶ, ꦱꦺꦴ ꦠꦁ ꦕꦷꦮꦫꦁ ꦮꦶꦪ ꦕꦶꦫꦥꦧ꧀ꦧꦗꦶꦠꦧꦲꦸꦱ꧀ꦱꦸꦠꦄꦥ꧀ꦥꦭꦴꦨꦒꦶꦭꦴꦤꦴꦤꦁ ꦢꦠ꧀ꦮꦴ ꦠꦺꦱꦁ ꦄꦴꦨꦠꦺꦤ ꦪꦺꦤ ꦏꦺꦤꦕꦶ ꦪꦴꦥꦺꦤ꧀ꦠꦺꦴꦥꦶ ꦱꦤ꧀ꦠꦸꦛ꧀ꦜꦺꦴꦮ ꦲꦺꦴꦠꦶ. ꦪꦺꦴ ꦥꦤ ꦌꦏꦱ꧀ꦩꦶꦁ ꦨꦴꦗꦤꦺ ꦩꦸꦠ꧀ꦠꦲꦫꦷꦠꦏꦁ ꦜꦥꦺꦠ꧀ꦮꦴ ꦌꦏꦱ꧀ꦩꦶꦁ ꦕꦠꦸꦩꦣꦸꦫꦁ ‘‘ꦒꦟ꧀ꦲ, ꦨꦤ꧀ꦠꦺ, ꦪꦢꦶꦕ꧀ꦖꦱꦷ’’ꦠꦶ ꦮꦸꦕ꧀ꦕꦩꦴꦤꦺꦴ ꦱꦕꦱ꧀ꦱ ꦠꦺꦱꦸ ꦄꦚ꧀ꦚꦠꦫꦺꦤꦥꦶ ꦫꦺꦴꦒꦺꦴ ꦮꦹꦥꦱꦩ꧀ꦩꦠꦶ, ꦄꦡ ‘‘ꦩꦸꦠ꧀ꦠꦲꦫꦷꦠꦏꦁ ꦤꦴꦩ ꦧꦸꦢ꧀ꦣꦴꦢꦷꦲꦶ ꦮꦟ꧀ꦟꦶꦠ’’ꦤ꧀ꦠꦶ ꦕꦠꦸꦩꦣꦸꦫꦁ ꦥꦛꦶꦏ꧀ꦑꦶꦥꦶꦠ꧀ꦮꦴ ꦩꦸꦠ꧀ꦠꦲꦫꦷꦠꦏꦺꦤꦺꦮ ꦨꦺꦱꦗ꧀ꦗꦁ ꦏꦫꦺꦴꦤ꧀ꦠꦺꦴ ꦥꦫꦩꦱꦤ꧀ꦠꦸꦛ꧀ꦜꦺꦴꦮ ꦲꦺꦴꦠꦶ. ꦄꦪꦩꦱ꧀ꦱ ꦒꦶꦭꦴꦤꦥꦕ꧀ꦕꦪꦺ ꦪꦡꦴꦱꦴꦫꦸꦥ꧀ꦥꦱꦤ꧀ꦠꦺꦴꦱꦺꦴ. ꦌꦮꦁ ꦪꦡꦴꦭꦴꦨꦴꦢꦶꦮꦱꦺꦤ ꦠꦶꦥ꧀ꦥꦨꦺꦢꦺꦴ ꦱꦤ꧀ꦠꦺꦴꦱꦺꦴ ꦕꦠꦸꦤ꧀ꦤꦁ ꦥꦕ꧀ꦕꦪꦴꦤꦁ ꦮꦱꦺꦤ ꦢ꧀ꦮꦴꦢꦱꦮꦶꦣꦺꦴ ꦲꦺꦴꦠꦷꦠꦶ ꦮꦺꦢꦶꦠꦧ꧀ꦧꦺꦴ.

ꦏꦴꦩꦮꦶꦠꦏ꧀ꦏꦧ꧀ꦪꦴꦥꦴꦢꦮꦶꦠꦏ꧀ꦏꦮꦶꦲꦶꦁꦱꦴꦮꦶꦠꦏ꧀ꦏꦴꦤꦁ ꦮꦱꦺꦤ ꦄꦏꦸꦱꦭꦮꦶꦠꦏ꧀ꦏꦠ꧀ꦠꦪꦁ. ꦤꦺꦏ꧀ꦑꦩ꧀ꦩꦮꦶꦠꦏ꧀ꦏꦄꦧ꧀ꦪꦴꦥꦴꦢꦮꦶꦠꦏ꧀ꦏꦄꦮꦶꦲꦶꦁ ꦱꦴꦮꦶꦠꦏ꧀ꦏꦴꦤꦁ ꦮꦱꦺꦤ ꦏꦸꦱꦭꦮꦶꦠꦏ꧀ꦏꦠ꧀ꦠꦪꦁ. ꦱꦧ꧀ꦧꦏꦶꦭꦺꦱꦴꦥꦕꦪꦨꦹꦠꦴꦪ ꦮꦶꦮꦛ꧀ꦛꦴꦪꦴꦠꦶ ꦫꦴꦒꦴꦢꦶꦱꦧ꧀ꦧꦏꦶꦭꦺꦱꦴꦤꦁ ꦄꦥꦕꦪꦲꦺꦠꦸꦨꦹꦠꦴꦪ ꦤꦶꦧ꧀ꦧꦴꦤꦣꦴꦠꦸꦪꦴ. ꦄꦛ꧀ꦜꦮꦷꦫꦶꦪꦴꦫꦩ꧀ꦨꦮꦠ꧀ꦡꦸꦥꦴꦫꦶꦥꦹꦫꦶꦪꦴꦠꦶ ꦄꦛ꧀ꦜꦤ꧀ꦤꦁ ꦮꦷꦫꦶꦪꦴꦫꦩ꧀ꦨꦏꦴꦫꦟꦴꦤꦁ ꦥꦴꦫꦶꦥꦹꦫꦶꦪꦴ. ꦪꦡꦴ ꦠꦡꦴ ꦥꦜꦩꦁ ꦥꦮꦠ꧀ꦠꦄꦧ꧀ꦨꦸꦱ꧀ꦱꦲꦤꦚ꧀ꦲꦶ ꦈꦥꦫꦶ ꦮꦷꦫꦶꦪꦴꦫꦩ꧀ꦨꦱ꧀ꦱ ꦏꦴꦫꦟꦁ ꦲꦺꦴꦠꦶ. ꦄꦤꦸꦫꦹꦥꦥꦕ꧀ꦕꦮꦺꦏ꧀ꦑꦟꦴꦱꦲꦶꦠꦴꦤꦶ ꦲꦶ ꦄꦧ꧀ꦨꦸꦱ꧀ꦱꦲꦤꦴꦤꦶ ꦠꦩ꧀ꦩꦹꦭꦏꦴꦤꦶ ꦮꦴ ꦥꦕ꧀ꦕꦮꦺꦏ꧀ꦑꦟꦴꦤꦶ ꦄꦛ꧀ꦜ ꦮꦷꦫꦶꦪꦴꦫꦩ꧀ꦨꦮꦠ꧀ꦡꦹꦤꦷꦠꦶ ꦮꦺꦢꦶꦠꦧ꧀ꦧꦴꦤꦶ. ꦠꦡꦴ ꦲꦶ –

‘‘ꦏꦩ꧀ꦩꦁ ꦑꦺꦴ ꦩꦺ ꦏꦠ꧀ꦠꦧ꧀ꦧꦁ ꦨꦮꦶꦱ꧀ꦱꦠꦶ, ꦏꦩ꧀ꦩꦁ ꦑꦺꦴ ꦥꦤ ꦩꦺ ꦏꦫꦺꦴꦤ꧀ꦠꦺꦤ ꦤ ꦱꦸꦏꦫꦁ ꦧꦸꦢ꧀ꦣꦴꦤꦁ ꦱꦴꦱꦤꦁ ꦩꦤꦱꦶ ꦏꦴꦠꦸꦁ, ꦲꦤ꧀ꦢꦴꦲꦁ ꦮꦷꦫꦶꦪꦁ ꦄꦴꦫꦨꦴꦩꦶ ꦄꦥ꧀ꦥꦠ꧀ꦠꦱ꧀ꦱ ꦥꦠ꧀ꦠꦶꦪꦴ ꦄꦤꦣꦶꦒꦠꦱ꧀ꦱ ꦄꦣꦶꦒꦩꦴꦪ ꦄꦱꦕ꧀ꦖꦶꦏꦠꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪ. ꦄꦲꦁ ꦑꦺꦴ ꦏꦩ꧀ꦩꦁ ꦄꦏꦴꦱꦶꦁ, ꦏꦩ꧀ꦩꦁ ꦑꦺꦴ ꦥꦤꦴꦲꦁ ꦏꦫꦺꦴꦤ꧀ꦠꦺꦴ ꦤꦴꦱꦏ꧀ꦑꦶꦁ ꦧꦸꦢ꧀ꦣꦴꦤꦁ ꦱꦴꦱꦤꦁ ꦩꦤꦱꦶ ꦏꦴꦠꦸꦁ, ꦲꦤ꧀ꦢꦴꦲꦁ ꦮꦷꦫꦶꦪꦁ ꦄꦴꦫꦨꦴꦩꦶ…ꦥꦺ… ꦩꦒ꧀ꦒꦺꦴ ꦑꦺꦴ ꦩꦺ ꦒꦤ꧀ꦠꦧ꧀ꦧꦺꦴ ꦨꦮꦶꦱ꧀ꦱꦠꦶ, ꦩꦒ꧀ꦒꦁ ꦑꦺꦴ ꦥꦤ ꦩꦺ ꦒꦕ꧀ꦖꦤ꧀ꦠꦺꦤ ꦤ ꦱꦸꦏꦫꦁ ꦧꦸꦢ꧀ꦣꦴꦤꦁ ꦱꦴꦱꦤꦁ ꦩꦤꦱꦶ ꦏꦴꦠꦸꦁ, ꦲꦤ꧀ꦢꦴꦲꦁ ꦮꦷꦫꦶꦪꦁ ꦄꦴꦫꦨꦴꦩꦶ…ꦥꦺ… ꦄꦲꦁ ꦑꦺꦴ ꦩꦒ꧀ꦒꦁ ꦄꦒꦩꦴꦱꦶꦁ, ꦩꦒ꧀ꦒꦁ ꦑꦺꦴ ꦥꦤꦴꦲꦁ ꦒꦕ꧀ꦖꦤ꧀ꦠꦺꦴ ꦤꦴꦱꦏ꧀ꦑꦶꦁ ꦧꦸꦢ꧀ꦣꦴꦤꦁ ꦱꦴꦱꦤꦁ ꦩꦤꦱꦶ ꦏꦴꦠꦸꦁ, ꦲꦤ꧀ꦢꦴꦲꦁ ꦮꦷꦫꦶꦪꦁ ꦄꦴꦫꦨꦴꦩꦶ…ꦥꦺ… ꦄꦲꦁ ꦑꦺꦴ ꦒꦴꦩꦁ ꦮꦴ ꦤꦶꦒꦩꦁ ꦮꦴ ꦥꦶꦟ꧀ꦝꦴꦪ ꦕꦫꦤ꧀ꦠꦺꦴ ꦤꦴꦭꦠ꧀ꦡꦁ ꦭꦹꦑꦱ꧀ꦱ ꦮꦴ ꦥꦟꦷꦠꦱ꧀ꦱ ꦮꦴ ꦨꦺꦴꦗꦤꦱ꧀ꦱ ꦪꦴꦮꦢꦠ꧀ꦡꦁ ꦥꦴꦫꦶꦥꦹꦫꦶꦁ, ꦠꦱ꧀ꦱ ꦩꦺ ꦏꦴꦪꦺꦴ ꦭꦲꦸꦏꦺꦴ ꦏꦩ꧀ꦩꦚ꧀ꦚꦺꦴ, ꦲꦤ꧀ꦢꦴꦲꦁ ꦮꦷꦫꦶꦪꦁ ꦄꦴꦫꦨꦴꦩꦶ…ꦥꦺ… ꦄꦲꦁ ꦑꦺꦴ ꦒꦴꦩꦁ ꦮꦴ ꦤꦶꦒꦩꦁ ꦮꦴ ꦥꦶꦟ꧀ꦝꦴꦪ ꦕꦫꦤ꧀ꦠꦺꦴ ꦄꦭꦠ꧀ꦡꦁ ꦭꦹꦑꦱ꧀ꦱ ꦮꦴ ꦥꦟꦷꦠꦱ꧀ꦱ ꦮꦴ ꦨꦺꦴꦗꦤꦱ꧀ꦱ ꦪꦴꦮꦢꦠ꧀ꦡꦁ ꦥꦴꦫꦶꦥꦹꦫꦶꦁ, ꦠꦱ꧀ꦱ ꦩꦺ ꦏꦴꦪꦺꦴ ꦧꦭꦮꦴ ꦏꦩ꧀ꦩꦚ꧀ꦚꦺꦴ, ꦲꦤ꧀ꦢꦴꦲꦁ ꦮꦷꦫꦶꦪꦁ ꦄꦴꦫꦨꦴꦩꦶ…ꦥꦺ… ꦈꦥ꧀ꦥꦤ꧀ꦤꦺꦴ ꦑꦺꦴ ꦩꦺ ꦄꦪꦁ ꦄꦥ꧀ꦥꦩꦠ꧀ꦠꦏꦺꦴ ꦄꦴꦧꦴꦣꦺꦴ, ꦜꦴꦤꦁ ꦑꦺꦴ ꦥꦤꦺꦠꦁ ꦮꦶꦗ꧀ꦗꦠꦶ, ꦪꦁ ꦩꦺ ꦄꦴꦧꦴꦣꦺꦴ ꦥꦮꦝ꧀ꦞꦺꦪ꧀ꦪ, ꦲꦤ꧀ꦢꦴꦲꦁ ꦮꦷꦫꦶꦪꦁ ꦄꦴꦫꦨꦴꦩꦶ…ꦥꦺ… ꦄꦲꦁ ꦑꦺꦴ ꦒꦶꦭꦴꦤꦴ ꦮꦸꦛ꧀ꦜꦶꦠꦺꦴ ꦄꦕꦶꦫꦮꦸꦛ꧀ꦜꦶꦠꦺꦴ ꦒꦺꦭꦚ꧀ꦚꦴ, ꦜꦴꦤꦁ ꦑꦺꦴ ꦥꦤꦺꦠꦁ ꦮꦶꦗ꧀ꦗꦠꦶ, ꦪꦁ ꦩꦺ ꦄꦴꦧꦴꦣꦺꦴ ꦥꦕ꧀ꦕꦸꦢꦴꦮꦠ꧀ꦠꦺꦪ꧀ꦪ, ꦲꦤ꧀ꦢꦴꦲꦁ ꦮꦷꦫꦶꦪꦁ ꦄꦴꦫꦨꦴꦩꦶ ꦄꦥ꧀ꦥꦠ꧀ꦠꦱ꧀ꦱ ꦥꦠ꧀ꦠꦶꦪꦴ ꦄꦤꦣꦶꦒꦠꦱ꧀ꦱ ꦄꦣꦶꦒꦩꦴꦪ ꦄꦱꦕ꧀ꦖꦶꦏꦠꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪꦴ’’ꦠꦶ (ꦢꦷ. ꦤꦶ. ꧓.꧓꧓꧕; ꦄ. ꦤꦶ. ꧘.꧘꧐) –

ꦌꦮꦁ ꦥꦮꦠ꧀ꦠꦄꦤꦸꦫꦹꦥꦥꦕ꧀ꦕꦮꦺꦏ꧀ꦑꦟꦴꦱꦲꦶꦠꦴꦤꦶ ꦄꦧ꧀ꦨꦸꦱ꧀ꦱꦲꦤꦴꦤꦶ ꦠꦩ꧀ꦩꦹꦭꦏꦴꦤꦶ ꦮꦴ ꦥꦕ꧀ꦕꦮꦺꦏ꧀ꦑꦟꦴꦤꦶ ꦄꦛ꧀ꦜ ꦮꦷꦫꦶꦪꦴꦫꦩ꧀ꦨꦮꦠ꧀ꦡꦹꦤꦶ ꦤꦴꦩ.

ꦠꦢꦤꦸꦕ꧀ꦖꦮꦶꦏꦁ ꦠꦢꦤꦸꦭꦺꦴꦩꦶꦏꦤ꧀ꦠꦶ ꦌꦠ꧀ꦡ ꦠ-ꦱꦢ꧀ꦢꦺꦴ ꦮꦏ꧀ꦑꦩꦴꦤꦴꦥꦺꦏ꧀ꦑꦺꦴ ꦕ ꦄꦠꦷꦠꦴꦥꦺꦏ꧀ꦑꦺꦴ ꦕ ꦲꦺꦴꦠꦷꦠꦶ ꦄꦴꦲ ‘‘ꦪꦁ ꦆꦢꦴꦤꦶ ꦱꦶꦏ꧀ꦑꦴꦥꦢꦁ ꦥꦚ꧀ꦚꦥꦺꦱ꧀ꦱꦠꦷ’’ꦠꦶꦄꦴꦢꦶ. ꦱꦧ꧀ꦧꦤꦴꦩꦴꦤꦶ ꦲꦶ ꦮꦏ꧀ꦑꦩꦴꦤꦮꦕꦤꦴꦤꦶꦥꦶ ꦲꦺꦴꦤ꧀ꦠꦶ ꦥꦏ꧀ꦏꦤ꧀ꦠꦮꦕꦤꦴꦤꦶꦥꦶ. ꦱꦁꦮꦫꦥ꧀ꦥꦲꦴꦤꦥꦛꦶꦱꦁꦪꦸꦠ꧀ꦠꦤ꧀ꦠꦶ ꦥꦚ꧀ꦕꦱꦁꦮꦫꦺꦲꦶ ꦕꦺꦮ ꦥꦚ꧀ꦕꦥꦲꦴꦤꦺꦲꦶ ꦕ ꦥꦛꦶꦱꦁꦪꦸꦠ꧀ꦠꦁ. ꦥꦚ꧀ꦕꦮꦶꦣꦺꦴ ꦲꦶ ꦱꦁꦮꦫꦺꦴ ꦱꦷꦭꦱꦁꦮꦫꦺꦴ ꦱꦠꦶꦱꦁꦮꦫꦺꦴ ꦚꦴꦟꦱꦁꦮꦫꦺꦴ ꦑꦤ꧀ꦠꦶꦱꦁꦮꦫꦺꦴ ꦮꦷꦫꦶꦪꦱꦁꦮꦫꦺꦴꦠꦶ. ꦥꦲꦴꦤꦩ꧀ꦥꦶ ꦥꦚ꧀ꦕꦮꦶꦣꦁ ꦠꦢꦔ꧀ꦒꦥ꧀ꦥꦲꦴꦤꦁ ꦮꦶꦏ꧀ꦑꦩ꧀ꦨꦤꦥ꧀ꦥꦲꦴꦤꦁ ꦱꦩꦸꦕ꧀ꦖꦺꦢꦥ꧀ꦥꦲꦴꦤꦁ ꦥꦛꦶꦥ꧀ꦥꦱ꧀ꦱꦢ꧀ꦣꦶꦥ꧀ꦥꦲꦴꦤꦁ ꦤꦶꦱ꧀ꦱꦫꦟꦥ꧀ꦥꦲꦴꦤꦤ꧀ꦠꦶ.

ꦠꦠ꧀ꦡ ‘‘ꦆꦩꦶꦤꦴ ꦥꦴꦠꦶꦩꦺꦴꦏ꧀ꦑꦱꦁꦮꦫꦺꦤ ꦈꦥꦺꦠꦺꦴ ꦲꦺꦴꦠꦶ ꦱꦩꦸꦥꦺꦠꦺꦴ’’ꦠꦶ (ꦮꦶꦨ. ꧕꧑꧑) ꦌꦮꦩꦴꦒꦠꦺꦴ ꦥꦴꦠꦶꦩꦺꦴꦏ꧀ꦑꦱꦁꦮꦫꦺꦴ ꦱꦷꦭꦱꦁꦮꦫꦺꦴ ꦤꦴꦩ, ꦱꦺꦴ ꦕ ꦄꦠ꧀ꦡꦠꦺꦴ ꦏꦴꦪꦶꦏꦮꦴꦕꦱꦶꦏꦺꦴ ꦄꦮꦷꦠꦶꦏ꧀ꦏꦩꦺꦴ. ‘‘ꦫꦏ꧀ꦑꦠꦶ ꦕꦏ꧀ꦑꦸꦤ꧀ꦢ꧀ꦫꦶꦪꦁ, ꦕꦏ꧀ꦑꦸꦤ꧀ꦢ꧀ꦫꦶꦪꦺ ꦱꦁꦮꦫꦁ ꦄꦴꦥꦗ꧀ꦗꦠꦷ’’ꦠꦶ (ꦢꦷ. ꦤꦶ. ꧑.꧒꧑꧓; ꦩ. ꦤꦶ. ꧑.꧒꧙꧕; ꦱꦁ. ꦤꦶ. ꧔.꧒꧓꧙; ꦄ. ꦤꦶ. ꧓.꧑꧖) ꦌꦮꦩꦴꦒꦠꦴ ꦆꦤ꧀ꦢ꧀ꦫꦶꦪꦴꦫꦏ꧀ꦑꦴ ꦱꦠꦶꦱꦁꦮꦫꦺꦴ, ꦱꦴ ꦕ ꦄꦠ꧀ꦡꦠꦺꦴ ꦠꦡꦴꦥꦮꦠ꧀ꦠꦴ ꦱꦠꦶ ꦌꦮ. ‘‘ꦱꦺꦴꦠꦴꦤꦁ ꦱꦁꦮꦫꦁ ꦧ꧀ꦫꦹꦩꦶ, ꦥꦚ꧀ꦚꦴꦪꦺꦠꦺ ꦥꦶꦣꦷꦪꦫꦺ’’ꦠꦶ (ꦱꦸ. ꦤꦶ. ꧑꧐꧔꧑; ꦤꦺꦠ꧀ꦠꦶ. ꧑꧑) ꦌꦮꦩꦴꦒꦠꦺꦴ ꦚꦴꦟꦱꦁꦮꦫꦺꦴ. ꦌꦠ꧀ꦡ ꦲꦶ ‘‘ꦱꦺꦴꦠꦴꦤꦁ ꦱꦁꦮꦫꦁ ꦧ꧀ꦫꦹꦩꦷ’’ꦠꦶ ꦮꦠ꧀ꦮꦴ ‘‘ꦥꦚ꧀ꦚꦴꦪꦺꦠꦺ ꦥꦶꦣꦷꦪꦫꦺ’’ꦠꦶ ꦮꦕꦤꦠꦺꦴ ꦱꦺꦴꦠꦱꦔ꧀ꦑꦴꦠꦴꦤꦁ ꦠꦟ꧀ꦲꦴꦢꦶꦛ꧀ꦜꦶꦢꦸꦕ꧀ꦕꦫꦶꦠꦄꦮꦶꦗ꧀ꦗꦴꦢꦶꦏꦶꦭꦺꦱꦴꦤꦁ ꦱꦩꦸꦕ꧀ꦖꦺꦢꦏꦚꦴꦟꦁ ꦥꦶꦢꦲꦤꦛ꧀ꦜꦺꦤ ꦱꦁꦮꦫꦺꦴꦠꦶ ꦮꦸꦠ꧀ꦠꦁ. ‘‘ꦑꦩꦺꦴ ꦲꦺꦴꦠꦶ ꦱꦷꦠꦱ꧀ꦱ ꦈꦟ꧀ꦲꦱ꧀ꦱꦴ’’ꦠꦶꦌꦮꦩꦴꦒꦠꦴ (ꦩ. ꦤꦶ. ꧑.꧒꧔; ꦩ. ꦤꦶ. ꧓.꧑꧕꧙; ꦄ. ꦤꦶ. ꧔.꧑꧑꧔) ꦄꦣꦶꦮꦴꦱꦤꦴ ꦑꦤ꧀ꦠꦶꦱꦁꦮꦫꦺꦴ, ꦱꦴ ꦕ ꦄꦠ꧀ꦡꦠꦺꦴ ꦠꦡꦴꦥꦮꦠ꧀ꦠꦴ ꦑꦤ꧀ꦣꦴ ꦄꦢꦺꦴꦱꦺꦴ ꦮꦴ. ꦥꦚ꧀ꦚꦴꦠꦶ ꦌꦏꦺ, ꦠꦁ ꦤ ꦒꦲꦺꦠꦧ꧀ꦧꦁ. ‘‘ꦈꦥ꧀ꦥꦤ꧀ꦤꦁ ꦏꦴꦩꦮꦶꦠꦏ꧀ꦏꦁ ꦤꦴꦣꦶꦮꦴꦱꦺꦠꦷ’’ꦠꦶ (ꦩ. ꦤꦶ. ꧑.꧒꧖) ꦌꦮꦩꦴꦒꦠꦁ ꦏꦴꦩꦮꦶꦠꦏ꧀ꦏꦴꦢꦷꦤꦁ ꦮꦶꦤꦺꦴꦢꦤꦮꦱꦺꦤ ꦥꦮꦠ꧀ꦠꦁ ꦮꦷꦫꦶꦪꦩꦺꦮ ꦮꦷꦫꦶꦪꦱꦁꦮꦫꦺꦴ. ꦱꦧ꧀ꦧꦺꦴ ꦕꦴꦪꦁ ꦱꦁꦮꦫꦺꦴ ꦪꦡꦴꦱꦏꦁ ꦱꦁꦮꦫꦶꦠꦧ꧀ꦧꦴꦤꦁ ꦢꦸꦱ꧀ꦱꦷꦭ꧀ꦪꦱꦔ꧀ꦑꦴꦠꦴꦤꦁ ꦏꦴꦪꦮꦕꦷꦢꦸꦕ꧀ꦕꦫꦶꦠꦴꦤꦁ ꦩꦸꦛ꧀ꦜꦱ꧀ꦱꦕ꧀ꦕꦱꦔ꧀ꦑꦴꦠꦱ꧀ꦱ ꦥꦩꦴꦢꦱ꧀ꦱ ꦄꦨꦶꦗ꧀ꦙꦴꦢꦷꦤꦁ ꦮꦴ ꦄꦏ꧀ꦑꦤ꧀ꦠꦶ ꦄꦚ꧀ꦚꦴꦟꦏꦺꦴꦱꦗ꧀ꦗꦴꦤꦚ꧀ꦕ ꦱꦁꦮꦫꦟꦠꦺꦴ ꦥꦶꦢꦲꦤꦠꦺꦴ ꦖꦴꦢꦤꦠꦺꦴ ‘‘ꦱꦁꦮꦫꦺꦴ’’ꦠꦶ ꦮꦸꦕ꧀ꦕꦠꦶ. ꦱꦁꦮꦫꦠꦷꦠꦶ ꦱꦁꦮꦫꦺꦴ, ꦥꦶꦢꦲꦠꦶ ꦤꦶꦮꦴꦫꦺꦠꦶ ꦥꦮꦠ꧀ꦠꦶꦠꦸꦁ ꦤ ꦢꦺꦠꦷꦠꦶ ꦄꦠ꧀ꦡꦺꦴ. ꦥꦕ꧀ꦕꦪꦱꦩꦮꦴꦪꦺ ꦈꦥ꧀ꦥꦗ꧀ꦗꦤꦴꦫꦲꦴꦤꦁ ꦏꦴꦪꦢꦸꦕ꧀ꦕꦫꦶꦠꦴꦢꦷꦤꦁ ꦠꦡꦴ ꦠꦡꦴ ꦄꦤꦸꦥ꧀ꦥꦴꦢꦤꦩꦺꦮ ꦲꦶ ꦆꦣ ꦱꦁꦮꦫꦟꦁ ꦤꦴꦩ. ꦌꦮꦁ ꦠꦴꦮ ꦥꦚ꧀ꦕꦮꦶꦣꦺꦴ ꦱꦁꦮꦫꦺꦴ ꦮꦺꦢꦶꦠꦧ꧀ꦧꦺꦴ.

ꦠꦺꦤ ꦠꦺꦤ ꦒꦸꦟꦔ꧀ꦒꦺꦤ ꦠꦱ꧀ꦱ ꦠꦱ꧀ꦱ ꦄꦒꦸꦟꦔ꧀ꦒꦱ꧀ꦱ ꦥꦲꦴꦤꦁ ꦠꦢꦔ꧀ꦒꦥ꧀ꦥꦲꦴꦤꦁ. ꦤꦴꦩꦫꦹꦥꦥꦫꦶꦕ꧀ꦖꦺꦢꦴꦢꦷꦱꦸ ꦲꦶ ꦮꦶꦥꦱ꧀ꦱꦤꦴꦚꦴꦟꦺꦱꦸ ꦥꦛꦶꦥꦏ꧀ꦑꦨꦴꦮꦠꦺꦴ ꦢꦷꦥꦴꦭꦺꦴꦏꦺꦤꦺꦮ ꦠꦩꦱ꧀ꦱ ꦤꦴꦩꦫꦹꦥꦮꦮꦠ꧀ꦡꦴꦤꦺꦤ ꦱꦏ꧀ꦏꦴꦪꦢꦶꦛ꧀ꦜꦶꦪꦴ, ꦥꦕ꧀ꦕꦪꦥꦫꦶꦒ꧀ꦒꦲꦺꦤ ꦄꦲꦺꦠꦸꦮꦶꦱꦩꦲꦺꦠꦸꦢꦶꦛ꧀ꦜꦷꦤꦁ, ꦠꦱ꧀ꦱꦺꦮ ꦄꦥꦫꦨꦴꦒꦺ ꦈꦥ꧀ꦥꦤ꧀ꦤꦺꦤ ꦏꦔ꧀ꦑꦴꦮꦶꦠꦫꦟꦺꦤ ꦏꦡꦁꦏꦡꦷꦨꦴꦮꦱ꧀ꦱ, ꦏꦭꦴꦥꦱꦩ꧀ꦩꦱꦤꦺꦤ ‘‘ꦄꦲꦁ ꦩꦩꦴ’’ꦠꦶ ꦒꦴꦲꦱ꧀ꦱ, ꦩꦒ꧀ꦒꦴꦩꦒ꧀ꦒꦮꦮꦠ꧀ꦡꦴꦤꦺꦤ ꦄꦩꦒ꧀ꦒꦺ ꦩꦒ꧀ꦒꦱꦚ꧀ꦚꦴꦪ, ꦈꦢꦪꦢꦱ꧀ꦱꦤꦺꦤ ꦈꦕ꧀ꦖꦺꦢꦢꦶꦛ꧀ꦜꦶꦪꦴ, ꦮꦪꦢꦱ꧀ꦱꦤꦺꦤ ꦱꦱ꧀ꦱꦠꦢꦶꦛ꧀ꦜꦶꦪꦴ, ꦨꦪꦢꦱ꧀ꦱꦤꦺꦤ ꦱꦨꦪꦺ ꦄꦨꦪꦱꦚ꧀ꦚꦴꦪꦴꦠꦶꦄꦴꦢꦶꦤꦴ ꦤꦪꦺꦤ ꦠꦺꦤ ꦠꦺꦤ ꦮꦶꦥꦱ꧀ꦱꦤꦴꦚꦴꦟꦺꦤ ꦠꦱ꧀ꦱ ꦠꦱ꧀ꦱ ꦄꦒꦸꦟꦔ꧀ꦒꦱ꧀ꦱ ꦥꦲꦴꦤꦁ ꦠꦢꦔ꧀ꦒꦥ꧀ꦥꦲꦴꦤꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦪꦁ ꦥꦤ ꦈꦥꦕꦴꦫꦥ꧀ꦥꦤꦴꦨꦺꦢꦺꦤ ꦱꦩꦴꦣꦶꦤꦴ ꦥꦮꦠ꧀ꦠꦶꦤꦶꦮꦴꦫꦟꦠꦺꦴ ꦓꦛꦥ꧀ꦥꦲꦴꦫꦺꦤꦺꦮ ꦈꦢꦏꦥꦶꦛ꧀ꦜꦺ ꦱꦺꦮꦴꦭꦱ꧀ꦱ ꦠꦺꦱꦁ ꦠꦺꦱꦁ ꦤꦷꦮꦫꦟꦴꦢꦶꦣꦩ꧀ꦩꦴꦤꦁ ꦥꦲꦴꦤꦁ, ꦌꦠꦁ ꦮꦶꦏ꧀ꦑꦩ꧀ꦨꦤꦥ꧀ꦥꦲꦴꦤꦁ ꦤꦴꦩ. ꦮꦶꦏ꧀ꦑꦩ꧀ꦨꦤꦩꦺꦮ ꦥꦲꦴꦤꦁ ꦮꦶꦏ꧀ꦑꦩ꧀ꦨꦤꦥ꧀ꦥꦲꦴꦤꦁ. ꦪꦁ ꦕꦠꦸꦤ꧀ꦤꦁ ꦄꦫꦶꦪꦩꦒ꧀ꦒꦴꦤꦁ ꦨꦴꦮꦶꦠꦠ꧀ꦠꦴ ꦠꦁꦠꦁꦩꦒ꧀ꦒꦮꦠꦺꦴ ꦄꦠ꧀ꦠꦤꦺꦴ ꦱꦤ꧀ꦠꦴꦤꦺ ‘‘ꦢꦶꦛ꧀ꦜꦶꦒꦠꦴꦤꦁ ꦥꦲꦴꦤꦴꦪꦴ’’ꦠꦶꦄꦴꦢꦶꦤꦴ (ꦣ. ꦱ. ꧒꧗꧗) ꦤꦪꦺꦤ ꦮꦸꦠ꧀ꦠꦱ꧀ꦱ ꦱꦩꦸꦢꦪꦥꦏ꧀ꦑꦶꦪꦱ꧀ꦱ ꦏꦶꦭꦺꦱꦒꦟꦱ꧀ꦱ ꦄꦕ꧀ꦕꦤ꧀ꦠꦁ ꦄꦥ꧀ꦥꦮꦠ꧀ꦠꦶꦨꦴꦮꦺꦤ ꦥꦲꦴꦤꦁ, ꦆꦢꦁ ꦱꦩꦸꦕ꧀ꦖꦺꦢꦥ꧀ꦥꦲꦴꦤꦁ ꦤꦴꦩ. ꦪꦁ ꦥꦤ ꦦꦭꦏ꧀ꦑꦟꦺ ꦥꦛꦶꦥ꧀ꦥꦱ꧀ꦱꦢ꧀ꦣꦠ꧀ꦠꦁ ꦮꦹꦥꦱꦤ꧀ꦠꦠꦴ ꦏꦶꦭꦺꦱꦴꦤꦁ, ꦌꦠꦁ ꦥꦛꦶꦥ꧀ꦥꦱ꧀ꦱꦢ꧀ꦣꦶꦥ꧀ꦥꦲꦴꦤꦁ ꦤꦴꦩ. ꦪꦁ ꦱꦧ꧀ꦧꦱꦔ꧀ꦑꦠꦤꦶꦱ꧀ꦱꦛꦠ꧀ꦠꦴ ꦥꦲꦷꦤꦱꦧ꧀ꦧꦱꦔ꧀ꦑꦠꦁ ꦤꦶꦧ꧀ꦧꦴꦤꦁ, ꦌꦠꦁ ꦤꦶꦱ꧀ꦱꦫꦟꦥ꧀ꦥꦲꦴꦤꦁ ꦤꦴꦩ. ꦱꦧ꧀ꦧꦩ꧀ꦥꦶ ꦕꦺꦠꦁ ꦕꦴꦒꦛ꧀ꦜꦺꦤ ꦥꦲꦴꦤꦤ꧀ꦠꦶ ꦮꦸꦕ꧀ꦕꦠꦶ. ꦌꦮꦩꦶꦩꦺꦲꦶ ꦪꦡꦴꦮꦸꦠ꧀ꦠꦱꦁꦮꦫꦺꦲꦶ ꦕꦺꦮ ꦥꦲꦴꦤꦺꦲꦶ ꦕ ꦥꦛꦶꦱꦁꦪꦸꦠ꧀ꦠꦴ ꦣꦩ꧀ꦩꦢꦺꦱꦤꦴ ‘‘ꦱꦁꦮꦫꦥ꧀ꦥꦲꦴꦤꦥꦛꦶꦱꦁꦪꦸꦠ꧀ꦠꦴ’’ꦠꦶ ꦮꦺꦢꦶꦠꦧ꧀ꦧꦴ.

ꦄꦱꦸꦠ꧀ꦠꦤ꧀ꦠꦮꦶꦤꦶꦧꦢ꧀ꦣꦤ꧀ꦠꦶ ꦱꦸꦠ꧀ꦠꦤ꧀ꦠꦺꦱꦸ ꦄꦤꦶꦧꦢ꧀ꦣꦁ, ꦥꦴꦭ꦳ꦶꦄꦤꦴꦫꦸꦭ꦳꧀ꦲꦤ꧀ꦠꦶ ꦄꦠ꧀ꦡꦺꦴ. ꦥꦏꦶꦟ꧀ꦟꦏꦣꦩ꧀ꦩꦢꦺꦱꦤꦴ ꦲꦶ ꦱꦔ꧀ꦒꦲꦁ ꦤ ꦄꦴꦫꦺꦴꦲꦠꦶ. ꦮꦸꦠ꧀ꦠꦩꦺꦮꦠ꧀ꦡꦁ ꦥꦏꦴꦱꦺꦤ꧀ꦠꦺꦴ ꦄꦴꦲ ‘‘ꦥꦴꦭ꦳ꦶꦮꦶꦤꦶꦩꦸꦠ꧀ꦠ’’ꦤ꧀ꦠꦶ. ꦄꦡ ꦮꦴ ꦄꦱꦸꦠ꧀ꦠꦤ꧀ꦠꦮꦶꦤꦶꦧꦢ꧀ꦣꦤ꧀ꦠꦶ ꦱꦸꦠ꧀ꦠꦴꦨꦶꦣꦩ꧀ꦩꦥꦴꦭ꦳ꦶꦁ ꦄꦤꦴꦫꦸꦭ꦳꧀ꦲꦨꦴꦮꦁ ꦱꦤ꧀ꦣꦴꦪ ꦮꦸꦠ꧀ꦠꦁ, ꦥꦴꦭ꦳ꦶꦮꦶꦤꦶꦩꦸꦠ꧀ꦠꦤ꧀ꦠꦶ ꦮꦶꦤꦪꦥꦴꦭ꦳ꦶꦁ ꦄꦤꦴꦫꦸꦭ꦳꧀ꦲꦨꦴꦮꦁ ꦱꦤ꧀ꦣꦴꦪ. ꦎꦏ꧀ꦏꦤ꧀ꦠꦶꦏꦣꦩ꧀ꦩꦢꦺꦱꦤꦴ ꦤꦴꦩ ꦚꦴꦟꦺꦤ ꦄꦤꦸꦥꦮꦶꦱꦶꦠ꧀ꦮꦴ ꦄꦤ꧀ꦠꦫꦴ ꦏꦡꦶꦪꦩꦴꦤꦴ ꦣꦩ꧀ꦩꦢꦺꦱꦤꦴ, ꦥꦛꦶꦏ꧀ꦑꦶꦥꦤꦴꦣꦶꦥ꧀ꦥꦴꦪꦴ ꦨꦢ꧀ꦢꦴꦭꦶꦠ꧀ꦡꦺꦫꦱꦢꦶꦱꦴ. ꦱꦩ꧀ꦥꦫꦺꦠꦧ꧀ꦧꦠꦺꦴ ꦥꦺꦕ꧀ꦕ ꦒꦤ꧀ꦠꦧ꧀ꦧꦠꦺꦴ ꦱꦩ꧀ꦥꦫꦴꦪꦺꦴ, ꦥꦫꦭꦺꦴꦏꦺꦴ. ꦠꦠ꧀ꦡ ꦨꦮꦁ ꦱꦩ꧀ꦥꦫꦴꦪꦶꦏꦁ. ꦮꦛ꧀ꦛꦨꦪꦺꦤ ꦠꦗ꧀ꦗꦺꦤ꧀ꦠꦺꦴꦠꦶ ‘‘ꦌꦮꦁ ꦢꦸꦱ꧀ꦱꦷꦭꦴ ꦤꦶꦫꦪꦴꦢꦷꦱꦸ ꦢꦸꦏ꧀ꦑꦁ ꦥꦴꦥꦸꦟꦤ꧀ꦠꦷ’’ꦠꦶ ꦠꦗ꧀ꦗꦺꦤ꧀ꦠꦺꦴ. ꦢꦷꦓꦤꦶꦏꦴꦪꦥ꧀ꦥꦩꦴꦟꦩ꧀ꦥꦶ ꦩꦗ꧀ꦙꦶꦩꦤꦶꦏꦴꦪꦥ꧀ꦥꦩꦴꦟꦩ꧀ꦥꦶ ꦣꦩ꧀ꦩꦢꦺꦱꦤꦁ ꦏꦫꦺꦴꦠꦷꦠꦶ ‘‘ꦠꦺꦤ ꦑꦟꦺꦤ ꦠꦺꦤ ꦩꦸꦲꦸꦠ꧀ꦠꦺꦤ ꦏꦡꦁ ꦨꦒꦮꦴ ꦠꦴꦮꦩꦲꦤ꧀ꦠꦁ ꦣꦩ꧀ꦩꦢꦺꦱꦤꦁ ꦏꦫꦺꦴꦠꦷ’’ꦠꦶ ꦤ ꦮꦠ꧀ꦠꦧ꧀ꦧꦁ. ꦪꦴꦮꦠꦴ ꦲꦶ ꦭꦺꦴꦏꦶꦪꦩꦲꦴꦗꦤꦴ ꦌꦏꦁ ꦥꦢꦁ ꦏꦡꦺꦤ꧀ꦠꦶ, ꦠꦴꦮ ꦄꦴꦤꦤ꧀ꦢꦠ꧀ꦡꦺꦫꦺꦴ ꦄꦛ꧀ꦜ ꦥꦢꦴꦤꦶ ꦏꦡꦺꦠꦶ. ꦄꦴꦤꦤ꧀ꦢꦠ꧀ꦡꦺꦫꦺ ꦥꦤ ꦌꦏꦁ ꦥꦢꦁ ꦏꦡꦺꦤ꧀ꦠꦺꦪꦺꦮ ꦨꦒꦮꦴ ꦱꦺꦴꦭ꦳ꦱ ꦥꦢꦴꦤꦶ ꦏꦡꦺꦠꦶ. ꦆꦩꦶꦤꦴ ꦤꦪꦺꦤ ꦭꦺꦴꦏꦶꦪꦗꦤꦱ꧀ꦱ ꦌꦏꦥꦢꦸꦕ꧀ꦕꦴꦫꦟꦏ꧀ꦑꦟꦺ ꦨꦒꦮꦴ ꦄꦛ꧀ꦜꦮꦷꦱꦱꦠꦁ ꦥꦢꦴꦤꦶ ꦏꦡꦺꦠꦶ. ꦏꦱ꧀ꦩꦴ? ꦨꦒꦮꦠꦺꦴ ꦲꦶ ꦗꦶꦮ꧀ꦲꦴ ꦩꦸꦢꦸ, ꦢꦤ꧀ꦠꦴꦮꦫꦟꦁ ꦱꦸꦦꦸꦱꦶꦠꦁ, ꦮꦕꦤꦁ ꦄꦒꦭ꦳ꦶꦠꦁ, ꦨꦮꦔ꧀ꦒꦥꦫꦶꦮꦴꦱꦺꦴ ꦭꦲꦸꦏꦺꦴ, ꦠꦱ꧀ꦩꦴ ꦱꦕꦺ ꦌꦏꦺꦴ ꦨꦶꦏ꧀ꦑꦸ ꦏꦴꦪꦴꦤꦸꦥꦱ꧀ꦱꦤꦁ ꦥꦸꦕ꧀ꦖꦠꦶ, ꦄꦚ꧀ꦚꦺꦴ ꦮꦺꦢꦤꦴꦤꦸꦥꦱ꧀ꦱꦤꦁ, ꦄꦚ꧀ꦚꦺꦴ ꦕꦶꦠ꧀ꦠꦴꦤꦸꦥꦱ꧀ꦱꦤꦁ, ꦄꦚ꧀ꦚꦺꦴ ꦣꦩ꧀ꦩꦴꦤꦸꦥꦱ꧀ꦱꦤꦁ, ‘‘ꦆꦩꦶꦤꦴ ꦥꦸꦛ꧀ꦜꦺ ꦄꦲꦁ ꦥꦸꦕ꧀ꦖꦶꦱ꧀ꦱꦴꦩꦷ’’ꦠꦶ ꦌꦏꦺꦴ ꦌꦏꦁ ꦤ ꦎꦭꦺꦴꦏꦺꦠꦶ, ꦌꦮꦁ ꦱꦤ꧀ꦠꦺꦥꦶ ꦠꦺꦱꦁ ꦨꦶꦏ꧀ꦑꦹꦤꦁ ‘‘ꦄꦪꦁ ꦥꦜꦩꦁ ꦥꦸꦕ꧀ꦖꦶ, ꦄꦪꦁ ꦢꦸꦠꦶꦪ’’ꦤ꧀ꦠꦶꦄꦴꦢꦶꦤꦴ ꦥꦸꦕ꧀ꦖꦤꦮꦴꦫꦺꦴ ꦠꦴꦢꦶꦱꦱ꧀ꦱ ꦥꦚ꧀ꦚꦮꦠꦺꦴ ꦥꦚ꧀ꦚꦴꦪꦠꦶ ꦱꦸꦑꦸꦩꦱ꧀ꦱ ꦄꦤ꧀ꦠꦫꦱ꧀ꦱ ꦭꦧ꧀ꦨꦤꦠꦺꦴ. ꦧꦸꦢ꧀ꦣꦴꦤꦁ ꦥꦤ ꦢꦺꦱꦤꦴꦮꦴꦫꦺꦴ ꦄꦚ꧀ꦚꦺꦱꦁ ꦤ ꦥꦚ꧀ꦚꦴꦪꦠꦺꦮ ꦄꦕ꧀ꦖꦫꦴꦱꦔ꧀ꦓꦴꦠꦩꦠ꧀ꦠꦺ ꦑꦟꦺ ꦄꦤꦺꦏꦏꦺꦴꦛꦶꦱꦲꦱ꧀ꦱꦕꦶꦠ꧀ꦠꦥ꧀ꦥꦮꦠ꧀ꦠꦶꦱꦩ꧀ꦨꦮꦠꦺꦴ. ꦢꦭ꦳꧀ꦲꦣꦩ꧀ꦩꦺꦤ ꦣꦤꦸꦒ꧀ꦒꦲꦺꦤ ꦑꦶꦠ꧀ꦠꦱꦫꦱ꧀ꦱ ꦮꦶꦢꦠ꧀ꦡꦶꦕꦠꦸꦫꦔ꧀ꦒꦸꦭꦁ ꦠꦴꦭꦕ꧀ꦖꦴꦪꦁ ꦄꦠꦶꦏ꧀ꦏꦩꦤꦠꦺꦴ ꦥꦸꦫꦺꦠꦫꦁꦪꦺꦮ ꦨꦒꦮꦴ ꦕꦸꦢ꧀ꦢꦱꦮꦶꦣꦺꦤ ꦏꦴꦪꦴꦤꦸꦥꦱ꧀ꦱꦤꦁ, ꦤꦮꦮꦶꦣꦺꦤ ꦮꦺꦢꦤꦴꦤꦸꦥꦱ꧀ꦱꦤꦁ, ꦱꦺꦴꦭ꦳ꦱꦮꦶꦣꦺꦤ ꦕꦶꦠ꧀ꦠꦴꦤꦸꦥꦱ꧀ꦱꦤꦁ, ꦥꦚ꧀ꦕꦮꦶꦣꦺꦤ ꦣꦩ꧀ꦩꦴꦤꦸꦥꦱ꧀ꦱꦤꦁ ꦏꦡꦺꦠꦶ. ꦠꦶꦛ꧀ꦜꦤ꧀ꦠꦸ ꦮꦴ ꦌꦠꦺ ꦕꦠ꧀ꦠꦴꦫꦺꦴ, ꦱꦕꦺ ꦲꦶ ꦄꦚ꧀ꦚꦺ ꦕꦠ꧀ꦠꦴꦫꦺꦴ ꦱꦩ꧀ꦩꦥ꧀ꦥꦣꦴꦤꦺꦱꦸ, ꦄꦚ꧀ꦚꦺ ꦆꦢ꧀ꦣꦶꦥꦴꦢꦺꦱꦸ, ꦄꦚ꧀ꦚꦺ ꦥꦚ꧀ꦕꦶꦤ꧀ꦢ꧀ꦫꦶꦪꦺꦱꦸ, ꦄꦚ꧀ꦚꦺ ꦥꦚ꧀ꦕꦧꦭꦺꦱꦸ, ꦄꦚ꧀ꦚꦺ ꦱꦠ꧀ꦠꦧꦺꦴꦗ꧀ꦙꦔ꧀ꦒꦺꦱꦸ, ꦄꦚ꧀ꦚꦺ ꦄꦛ꧀ꦜꦩꦒ꧀ꦒꦔ꧀ꦒꦺꦱꦸ ꦥꦚ꧀ꦲꦺ ꦥꦸꦕ꧀ꦖꦺꦪ꧀ꦪꦸꦁ, ꦠꦩ꧀ꦥꦶ ꦨꦒꦮꦴ ꦏꦡꦺꦪ꧀ꦪ. ꦠꦶꦛ꧀ꦜꦤ꧀ꦠꦸ ꦮꦴ ꦌꦠꦺ ꦄꦛ꧀ꦜ, ꦱꦕꦺ ꦄꦚ꧀ꦚꦺ ꦱꦠ꧀ꦠꦠꦶꦁꦱ ꦗꦤꦴ ꦧꦺꦴꦣꦶꦥꦏ꧀ꦑꦶꦪꦺꦱꦸ ꦥꦚ꧀ꦲꦺ ꦥꦸꦕ꧀ꦖꦺꦪ꧀ꦪꦸꦁ, ꦠꦩ꧀ꦥꦶ ꦨꦒꦮꦴ ꦠꦴꦮꦢꦺꦮ ꦏꦡꦺꦪ꧀ꦪ.

ꦩꦹꦭꦁ ꦤꦶꦱ꧀ꦱꦪꦺꦴ ꦥꦠꦶꦛ꧀ꦜꦴꦠꦶ ꦥꦕ꧀ꦖꦶꦩꦁ ꦥꦕ꧀ꦖꦶꦩꦁ ꦥꦜꦩꦱ꧀ꦱ ꦥꦜꦩꦱ꧀ꦱ ꦮꦺꦮꦕꦤꦤ꧀ꦠꦶ ꦢꦛ꧀ꦜꦧ꧀ꦧꦁ. ꦠꦠ꧀ꦡ ꦥꦠꦶꦛ꧀ꦜꦴꦠꦶ ꦱꦩ꧀ꦥꦪꦺꦴꦒꦮꦱꦺꦤ ꦈꦥꦤꦶꦱ꧀ꦱꦪꦮꦱꦺꦤ ꦕ ꦎꦏꦴꦱꦨꦴꦮꦺꦴ. ꦱꦶꦏ꧀ꦑꦴꦱꦔ꧀ꦑꦴꦠꦴꦤꦚ꧀ꦲꦶ ꦄꦮꦱꦺꦱꦏꦸꦱꦭꦣꦩ꧀ꦩꦴꦤꦁ ꦩꦺꦡꦸꦤꦮꦶꦫꦠꦶꦱꦩ꧀ꦥꦪꦺꦴꦒꦮꦱꦺꦤ ꦮꦴ ꦥꦠꦶꦛ꧀ꦜꦴ ꦱꦶꦪꦴ ꦈꦥꦤꦶꦱ꧀ꦱꦪꦨꦴꦮꦺꦤ ꦮꦴ. ꦠꦺꦤꦺꦮꦴꦲ ‘‘ꦩꦺꦡꦸꦤꦱꦁꦮꦫꦺꦴ ꦲꦷ’’ꦠꦶꦄꦴꦢꦶ. ꦮꦸꦠ꧀ꦠꦠ꧀ꦡꦮꦱꦺꦤꦴꦠꦶ ꦥꦠꦶꦛ꧀ꦜꦴꦄꦣꦶꦒꦩꦹꦥꦴꦪꦮꦱꦺꦤ. ꦱꦶꦏ꧀ꦑꦴꦥꦢꦮꦶꦨꦔ꧀ꦒꦺ ꦤꦶꦢ꧀ꦢꦶꦛ꧀ꦜꦮꦶꦫꦠꦶꦕꦺꦠꦤꦴ ꦠꦁꦱꦩ꧀ꦥꦪꦸꦠ꧀ꦠꦣꦩ꧀ꦩꦴ ꦕ ꦱꦶꦏ꧀ꦑꦴꦥꦢꦤ꧀ꦠꦶ ꦢꦱ꧀ꦱꦺꦠꦸꦏꦴꦩꦺꦴ ꦄꦴꦲ – ‘‘ꦄꦪꦚ꧀ꦕ ꦄꦠ꧀ꦡꦺꦴ ꦱꦶꦏ꧀ꦑꦴꦥꦢꦮꦶꦨꦔ꧀ꦒꦺ ꦮꦸꦠ꧀ꦠꦤꦪꦺꦤ ꦮꦺꦢꦶꦠꦧ꧀ꦧꦺꦴ’’ꦠꦶ. ꦱꦶꦏ꧀ꦑꦴꦥꦢꦮꦶꦨꦔ꧀ꦒꦺ ꦲꦶ ꦮꦶꦫꦠꦶꦄꦴꦢꦪꦺꦴ ꦣꦩ꧀ꦩꦴ ꦤꦶꦥ꧀ꦥꦫꦶꦪꦴꦪꦠꦺꦴ ꦥꦫꦶꦪꦴꦪꦠꦺꦴ ꦕ ‘‘ꦱꦶꦏ꧀ꦑꦴꦥꦢ’’ꦤ꧀ꦠꦶ ꦮꦸꦠ꧀ꦠꦴ. ꦮꦸꦠ꧀ꦠꦚ꧀ꦲꦺꦠꦁ –

‘‘ꦠꦠ꧀ꦡ ꦏꦠꦩꦁ ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦮꦺꦫꦩꦟꦷ ꦱꦶꦏ꧀ꦑꦴꦥꦢꦁ? ꦪꦱ꧀ꦩꦶꦁ ꦱꦩꦪꦺ ꦏꦴꦩꦴꦮꦕꦫꦁ ꦏꦸꦱꦭꦁ ꦕꦶꦠ꧀ꦠꦁ ꦈꦥ꧀ꦥꦤ꧀ꦤꦁ ꦲꦺꦴꦠꦶ ꦱꦺꦴꦩꦤꦱ꧀ꦱꦱꦲꦒꦠꦁ ꦚꦴꦟꦱꦩ꧀ꦥꦪꦸꦠ꧀ꦠꦁ ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦮꦶꦫꦩꦤ꧀ꦠꦱ꧀ꦱ, ꦪꦴ ꦠꦱ꧀ꦩꦶꦁ ꦱꦩꦪꦺ ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦄꦴꦫꦠꦶ ꦮꦶꦫꦠꦶ ꦥꦛꦶꦮꦶꦫꦠꦶ ꦮꦺꦫꦩꦟꦷ ꦄꦏꦶꦫꦶꦪꦴ ꦄꦏꦫꦟꦁ ꦄꦤꦗ꧀ꦙꦴꦥꦠ꧀ꦠꦶ ꦮꦺꦭꦴꦤꦠꦶꦏ꧀ꦏꦩꦺꦴ ꦱꦺꦠꦸꦓꦴꦠꦺꦴ, ꦆꦢꦁ ꦮꦸꦕ꧀ꦕꦠꦶ ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦮꦺꦫꦩꦟꦷ ꦱꦶꦏ꧀ꦑꦴꦥꦢꦁ. ꦄꦮꦱꦺꦱꦴ ꦣꦩ꧀ꦩꦴ ꦮꦺꦫꦩꦟꦶꦪꦴ ꦱꦩ꧀ꦥꦪꦸꦠ꧀ꦠꦴ.

‘‘ꦠꦠ꧀ꦡ ꦏꦠꦩꦁ ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦮꦺꦫꦩꦟꦷ ꦱꦶꦏ꧀ꦑꦴꦥꦢꦁ? ꦪꦱ꧀ꦩꦶꦁ ꦱꦩꦪꦺ ꦏꦴꦩꦴꦮꦕꦫꦁ ꦏꦸꦱꦭꦁ ꦕꦶꦠ꧀ꦠꦁ ꦈꦥ꧀ꦥꦤ꧀ꦤꦁ ꦲꦺꦴꦠꦶ ꦱꦺꦴꦩꦤꦱ꧀ꦱꦱꦲꦒꦠꦁ ꦚꦴꦟꦱꦩ꧀ꦥꦪꦸꦠ꧀ꦠꦁ ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦮꦶꦫꦩꦤ꧀ꦠꦱ꧀ꦱ, ꦪꦴ ꦠꦱ꧀ꦩꦶꦁ ꦱꦩꦪꦺ ꦕꦺꦠꦤꦴ ꦱꦚ꧀ꦕꦺꦠꦤꦴ ꦕꦺꦠꦪꦶꦠꦠ꧀ꦠꦁ, ꦆꦢꦁ ꦮꦸꦕ꧀ꦕꦠꦶ ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦮꦺꦫꦩꦟꦷ ꦱꦶꦏ꧀ꦑꦴꦥꦢꦁ. ꦄꦮꦱꦺꦱꦴ ꦣꦩ꧀ꦩꦴ ꦕꦺꦠꦤꦴꦪ ꦱꦩ꧀ꦥꦪꦸꦠ꧀ꦠꦴ.

‘‘ꦠꦠ꧀ꦡ ꦏꦠꦩꦁ ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦮꦺꦫꦩꦟꦷ ꦱꦶꦏ꧀ꦑꦴꦥꦢꦁ? ꦪꦱ꧀ꦩꦶꦁ ꦱꦩꦪꦺ ꦏꦴꦩꦴꦮꦕꦫꦁ ꦏꦸꦱꦭꦁ ꦕꦶꦠ꧀ꦠꦁ ꦈꦥ꧀ꦥꦤ꧀ꦤꦁ ꦲꦺꦴꦠꦶ ꦱꦺꦴꦩꦤꦱ꧀ꦱꦱꦲꦒꦠꦁ ꦚꦴꦟꦱꦩ꧀ꦥꦪꦸꦠ꧀ꦠꦁ ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦮꦶꦫꦩꦤ꧀ꦠꦱ꧀ꦱ, ꦪꦺꦴ ꦠꦱ꧀ꦩꦶꦁ ꦱꦩꦪꦺ ꦦꦱ꧀ꦱꦺꦴ…ꦥꦺ… ꦥꦒ꧀ꦒꦴꦲꦺꦴ ꦄꦮꦶꦏ꧀ꦑꦺꦥꦺꦴ, ꦆꦢꦁ ꦮꦸꦕ꧀ꦕꦠꦶ ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦮꦺꦫꦩꦟꦷ ꦱꦶꦏ꧀ꦑꦴꦥꦢ’’ꦤ꧀ꦠꦶ (ꦮꦶꦨ. ꧗꧐꧖).

ꦌꦠ꧀ꦡ ꦲꦶ ꦪꦱ꧀ꦩꦴ ꦤ ꦏꦺꦮꦭꦁ ꦮꦶꦫꦠꦶꦪꦺꦮ ꦱꦶꦏ꧀ꦑꦴꦥꦢꦁ, ꦕꦺꦠꦤꦴꦥꦶ ꦱꦶꦏ꧀ꦑꦴꦥꦢꦩꦺꦮ, ꦠꦱ꧀ꦩꦴ ꦠꦁ ꦢꦱ꧀ꦱꦺꦠꦸꦁ ꦢꦸꦠꦶꦪꦤꦪꦺꦴ ꦮꦸꦠ꧀ꦠꦺꦴ. ꦪꦱ꧀ꦩꦴ ꦕ ꦤ ꦏꦺꦮꦭꦁ ꦌꦠꦺꦪꦺꦮ ꦢ꧀ꦮꦺ ꦣꦩ꧀ꦩꦴ ꦱꦶꦏ꧀ꦑꦴꦥꦢꦁ, ꦕꦺꦠꦤꦴꦱꦩ꧀ꦥꦪꦸꦠ꧀ꦠꦴ ꦥꦤ ꦥꦫꦺꦴꦥꦟ꧀ꦟꦴꦱ ꦣꦩ꧀ꦩꦴꦥꦶ ꦱꦶꦏ꧀ꦑꦶꦠꦧ꧀ꦧꦏꦺꦴꦛ꧀ꦜꦴꦱꦠꦺꦴ ꦱꦶꦏ꧀ꦑꦴꦥꦢꦩꦺꦮ, ꦠꦱ꧀ꦩꦴ ꦠꦠꦶꦪꦤꦪꦺꦴ ꦢꦱ꧀ꦱꦶꦠꦺꦴ. ꦢꦸꦮꦶꦣꦚ꧀ꦲꦶ ꦱꦶꦏ꧀ꦑꦴꦥꦢꦁ ꦤꦶꦥ꧀ꦥꦫꦶꦪꦴꦪꦱꦶꦏ꧀ꦑꦴꦥꦢꦁ ꦥꦫꦶꦪꦴꦪꦱꦶꦏ꧀ꦑꦴꦥꦢꦤ꧀ꦠꦶ. ꦠꦠ꧀ꦡ ꦮꦶꦫꦠꦶ ꦤꦶꦥ꧀ꦥꦫꦶꦪꦴꦪꦱꦶꦏ꧀ꦑꦴꦥꦢꦁ. ꦱꦴ ꦲꦶ ‘‘ꦥꦴꦟꦴꦠꦶꦥꦴꦠꦴ ꦮꦺꦫꦩꦟꦷ’’ꦠꦶ ꦥꦴꦭ꦳ꦶꦪꦁ ꦄꦴꦒꦠꦴ, ꦤꦺꦴ ꦕꦺꦠꦤꦴ. ꦮꦶꦫꦩꦤ꧀ꦠꦺꦴ ꦕ ꦠꦴꦪ ꦌꦮ ꦠꦠꦺꦴ ꦠꦠꦺꦴ ꦮꦶꦫꦩꦠꦶ, ꦤ ꦕꦺꦠꦤꦴꦪ, ꦕꦺꦠꦤꦩ꧀ꦥꦶ ꦥꦤ ꦄꦴꦲꦫꦶꦠ꧀ꦮꦴ ꦢꦱ꧀ꦱꦺꦠꦶ, ꦠꦡꦴ ꦱꦺꦱꦕꦺꦠꦤꦴꦱꦩ꧀ꦥꦪꦸꦠ꧀ꦠꦣꦩ꧀ꦩꦺ. ꦠꦱ꧀ꦩꦴ ꦕꦺꦠꦤꦴ ꦕꦺꦮ ꦄꦮꦱꦺꦱꦱꦩ꧀ꦥꦪꦸꦠ꧀ꦠꦣꦩ꧀ꦩꦴ ꦕ ꦥꦫꦶꦪꦴꦪꦱꦶꦏ꧀ꦑꦴꦥꦢꦤ꧀ꦠꦶ ꦮꦺꦢꦶꦠꦧ꧀ꦧꦁ.

ꦆꦢꦴꦤꦶ ꦤ ꦏꦺꦮꦭꦁ ꦆꦣ ꦮꦶꦫꦠꦶꦄꦴꦢꦪꦺꦴ ꦣꦩ꧀ꦩꦴꦮ ꦱꦶꦏ꧀ꦑꦴꦥꦢꦁ, ꦄꦡ ꦑꦺꦴ ꦠꦢꦠ꧀ꦡꦗꦺꦴꦠꦶꦏꦴ ꦥꦚ꧀ꦚꦠ꧀ꦠꦶꦥꦷꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦄꦥꦶꦕꦴ’’ꦠꦶꦄꦴꦢꦶ. ‘‘ꦪꦺꦴ ꦠꦠ꧀ꦡ ꦤꦴꦩꦏꦴꦪꦺꦴ ꦥꦢꦏꦴꦪꦺꦴꦠꦶ ꦆꦢꦁ ꦩꦲꦴꦄꦛ꧀ꦜꦏꦡꦴꦪꦁ ꦮꦸꦠ꧀ꦠ’’ꦤ꧀ꦠꦶ ꦮꦢꦤ꧀ꦠꦶ. ꦤꦴꦩꦏꦴꦪꦺꦴꦠꦶ ꦤꦴꦩꦱꦩꦹꦲꦺꦴ ꦤꦴꦩꦥꦟ꧀ꦟꦠ꧀ꦠꦶꦪꦺꦮ. ꦥꦢꦤꦶꦫꦸꦠ꧀ꦠꦶꦧ꧀ꦪꦚ꧀ꦗꦤꦴꦤꦶ ꦤꦴꦩꦮꦺꦮꦕꦤꦴꦤꦺꦮ ‘‘ꦤꦴꦩꦁ ꦤꦴꦩꦏꦩ꧀ꦩꦁ ꦤꦴꦩꦤꦶꦫꦸꦠ꧀ꦠꦷ’’ꦠꦶꦄꦴꦢꦷꦱꦸ (ꦣ. ꦱ. ꧑꧓꧑꧓-꧑꧓꧑꧕) ꦮꦶꦪ. ꦱꦶꦏ꧀ꦑꦴꦏꦺꦴꦛ꧀ꦜꦴꦱꦺꦴꦠꦶ ꦮꦶꦫꦠꦶꦄꦴꦢꦪꦺꦴꦮ ꦮꦸꦠ꧀ꦠꦴ, ꦠꦢꦠ꧀ꦡꦗꦺꦴꦠꦏꦁ ꦮꦕꦤꦩ꧀ꦥꦶ ꦱꦶꦏ꧀ꦑꦴꦥꦢꦤ꧀ꦠꦶ ꦆꦢꦩ꧀ꦥꦶ ꦌꦠ꧀ꦡ ꦭꦧ꧀ꦨꦠꦺꦮ.

ꦄꦠ꧀ꦡꦮꦱꦺꦠꦶ ꦮꦸꦢ꧀ꦣꦶꦮꦶꦱꦺꦱꦺ ꦄꦴꦤꦶꦱꦁꦱꦮꦶꦱꦺꦱꦺ. ꦠꦺꦱꦁ ꦥꦤ ꦱꦶꦏ꧀ꦑꦴꦥꦢꦥꦚ꧀ꦚꦠ꧀ꦠꦶꦏꦴꦫꦟꦠ꧀ꦠꦴ ꦄꦴꦲ ‘‘ꦢꦱ ꦏꦴꦫꦟꦮꦱꦺ’’ꦠꦶ, ꦢꦱ ꦏꦴꦫꦟꦮꦶꦱꦺꦱꦺꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦲꦶꦠꦮꦶꦱꦺꦱꦺ’’ꦠꦶ. ꦄꦠ꧀ꦡꦺꦴꦪꦺꦮ ꦮꦴ ꦄꦠ꧀ꦡꦮꦱꦺꦴ, ꦢꦱ ꦄꦠ꧀ꦡꦺ ꦢꦱ ꦏꦴꦫꦟꦴꦤꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦄꦡ ꦮꦴ ꦄꦠ꧀ꦡꦺꦴ ꦦꦭꦁ ꦠꦢꦣꦷꦤꦮꦸꦠ꧀ꦠꦶꦠꦴꦪ ꦮꦱꦺꦴ ꦌꦠꦱ꧀ꦱꦴꦠꦶ ꦄꦠ꧀ꦡꦮꦱꦺꦴ, ꦲꦺꦠꦹꦠꦶ ꦌꦮꦩ꧀ꦥꦺꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦱꦸꦛ꧀ꦜꦸ ꦢꦺꦮꦴꦠꦶ ꦆꦢꦁ ꦫꦴꦗꦤ꧀ꦠꦺꦥꦸꦫꦥ꧀ꦥꦮꦺꦱꦤꦱꦶꦏ꧀ꦑꦴꦥꦢꦺ (ꦥꦴꦕꦶ. ꧔꧙꧔ ꦄꦴꦢꦪꦺꦴ) ꦮꦸꦠ꧀ꦠꦁ. ‘‘ꦪꦺ ꦩꦩ ꦱꦺꦴꦠꦧ꧀ꦧꦁ ꦱꦢ꧀ꦢꦲꦴꦠꦧ꧀ꦧꦁ ꦩꦚ꧀ꦚꦶꦱ꧀ꦱꦤ꧀ꦠꦶ, ꦠꦺꦱꦁ ꦠꦁ ꦄꦱ꧀ꦱ ꦢꦷꦓꦫꦠ꧀ꦠꦁ ꦲꦶꦠꦴꦪ ꦱꦸꦑꦴꦪꦴ’’ꦠꦶ ꦮꦸꦠ꧀ꦠꦠ꧀ꦠꦴ ‘‘ꦪꦺꦴ ꦕ ꦠꦡꦴꦒꦠꦱ꧀ꦱ ꦮꦕꦤꦁ ꦱꦩ꧀ꦥꦛꦶꦕ꧀ꦖꦠꦶ, ꦠꦱ꧀ꦱ ꦠꦁ ꦢꦷꦓꦫꦠ꧀ꦠꦁ ꦲꦶꦠꦴꦪ ꦱꦸꦑꦴꦪ ꦲꦺꦴꦠꦷ’’ꦠꦶ ꦮꦸꦠ꧀ꦠꦁ. ꦄꦱꦩ꧀ꦥꦛꦶꦕ꧀ꦖꦤꦺ ꦄꦴꦢꦷꦤꦮꦤ꧀ꦠꦶ ꦨꦢ꧀ꦢꦴꦭꦶꦱꦸꦠ꧀ꦠꦺ (ꦩ. ꦤꦶ. ꧒.꧑꧓꧔ ꦄꦴꦢꦪꦺꦴ) ꦮꦶꦪ ꦄꦱꦩ꧀ꦥꦛꦶꦕ꧀ꦖꦤꦺ ꦄꦴꦢꦷꦤꦮꦁ ꦢꦱ꧀ꦱꦺꦠ꧀ꦮꦴ. ꦱꦸꦑꦮꦶꦲꦴꦫꦴꦨꦴꦮꦺ ꦱꦲꦗꦷꦮꦩꦴꦤꦱ꧀ꦱ ꦄꦨꦴꦮꦠꦺꦴ ꦱꦲꦗꦷꦮꦶꦠꦴꦥꦶ ꦱꦸꦑꦮꦶꦲꦴꦫꦺꦴꦮ ꦮꦸꦠ꧀ꦠꦺꦴ. ꦱꦸꦑꦮꦶꦲꦴꦫꦺꦴ ꦤꦴꦩ ꦕꦠꦸꦤ꧀ꦤꦁ ꦆꦫꦶꦪꦴꦥꦡꦮꦶꦲꦴꦫꦴꦤꦁ ꦦꦴꦱꦸꦠꦴ.

ꦩꦔ꧀ꦏꦸꦠꦤ꧀ꦠꦶ ꦤꦶꦠ꧀ꦠꦺꦗꦨꦴꦮꦁ. ꦣꦩ꧀ꦩꦺꦤꦴꦠꦶꦄꦴꦢꦷꦱꦸ ꦣꦩ꧀ꦩꦺꦴꦠꦶ ꦨꦹꦠꦁ ꦮꦠ꧀ꦡꦸ. ꦮꦶꦤꦪꦺꦴꦠꦶ ꦕꦺꦴꦢꦤꦴ ꦕꦺꦮ ꦱꦴꦫꦟꦴ ꦕ. ꦱꦠ꧀ꦡꦸꦱꦴꦱꦤꦤ꧀ꦠꦶ ꦚꦠ꧀ꦠꦶꦱꦩ꧀ꦥꦢꦴ ꦕꦺꦮ ꦄꦤꦸꦱ꧀ꦱꦴꦮꦤꦱꦩ꧀ꦥꦢꦴ ꦕ. ꦥꦶꦪꦱꦷꦭꦴꦤꦤ꧀ꦠꦶ ꦱꦶꦏ꧀ꦑꦴꦏꦴꦩꦴꦤꦁ. ꦠꦺꦱꦚ꧀ꦲꦶ ꦱꦷꦭꦁ ꦥꦶꦪꦁ ꦲꦺꦴꦠꦶ. ꦠꦺꦤꦺꦮꦴꦲ ‘‘ꦱꦶꦏ꧀ꦑꦠ꧀ꦠꦪꦥꦴꦫꦶꦥꦹꦫꦶꦪꦴ ꦓꦛꦩꦴꦤꦴ’’ꦠꦶ. ꦱꦤ꧀ꦢꦶꦛ꧀ꦜꦩꦴꦤꦴꦠꦶ ꦱꦁꦱꦪꦁ ꦄꦴꦥꦗ꧀ꦗꦩꦴꦤꦴ. ꦈꦧ꧀ꦧꦴꦭ꦳꧀ꦲꦴ ꦲꦺꦴꦤ꧀ꦠꦷꦠꦶ ꦥꦷꦭ꦳ꦶꦠꦴ ꦲꦺꦴꦤ꧀ꦠꦶ. ꦱꦔ꧀ꦓꦏꦩ꧀ꦩꦴꦤꦷꦠꦶ ꦱꦠꦶꦥꦶ ꦈꦥꦺꦴꦱꦡꦥꦮꦴꦫꦟꦴꦤꦁ ꦱꦔ꧀ꦓꦏꦩ꧀ꦩꦨꦴꦮꦺ ꦒꦺꦴꦧꦭꦶꦧꦢ꧀ꦢꦚꦴꦪꦺꦤ ꦈꦥꦺꦴꦱꦡꦁ ꦥꦮꦴꦫꦟꦚ꧀ꦕ ꦜꦥꦺꦠ꧀ꦮꦴ ꦈꦥꦱꦩ꧀ꦥꦢꦴꦢꦶꦱꦺꦱꦱꦔ꧀ꦓꦏꦩ꧀ꦩꦴꦤꦁ ꦒꦲꦟꦁ ꦮꦺꦢꦶꦠꦧ꧀ꦧꦁ. ꦱꦩꦒ꧀ꦒꦴꦤꦁ ꦨꦴꦮꦺꦴ ꦱꦴꦩꦒ꧀ꦒꦷ.

‘‘ꦤ ꦮꦺꦴ ꦄꦲꦁ, ꦕꦸꦤ꧀ꦢ, ꦢꦶꦛ꧀ꦜꦣꦩ꧀ꦩꦶꦏꦴꦤꦁꦪꦺꦮ ꦄꦴꦱꦮꦴꦤꦁ ꦱꦁꦮꦫꦴꦪ ꦣꦩ꧀ꦩꦁ ꦢꦺꦱꦺꦩꦷ’’ꦠꦶ (ꦢꦷ. ꦤꦶ. ꧓.꧑꧘꧒) ꦌꦠ꧀ꦡ ꦮꦶꦮꦴꦢꦩꦹꦭꦨꦹꦠꦴ ꦏꦶꦭꦺꦱꦴ ꦄꦴꦱꦮꦴꦠꦶ ꦄꦴꦒꦠꦴ.

‘‘ꦪꦺꦤ ꦢꦺꦮꦹꦥꦥꦠ꧀ꦪꦱ꧀ꦱ, ꦒꦤ꧀ꦣꦧ꧀ꦧꦺꦴ ꦮꦴ ꦮꦶꦲꦔ꧀ꦒꦩꦺꦴ;

ꦪꦏ꧀ꦑꦠ꧀ꦠꦁ ꦪꦺꦤ ꦒꦕ꧀ꦖꦺꦪ꧀ꦪꦁ, ꦩꦤꦸꦱ꧀ꦱꦠ꧀ꦠꦚ꧀ꦕ ꦄꦧ꧀ꦧꦗꦺ;

ꦠꦺ ꦩꦪ꧀ꦲꦁ ꦄꦴꦱꦮꦴ ꦑꦷꦟꦴ, ꦮꦶꦢ꧀ꦣꦱ꧀ꦠꦴ ꦮꦶꦤꦭ꦳ꦷꦏꦠꦴ’’ꦠꦶ. (ꦄ. ꦤꦶ. ꧔.꧓꧖) –

ꦌꦠ꧀ꦡ ꦠꦺꦨꦹꦩꦏꦁ ꦏꦩ꧀ꦩꦁ ꦄꦮꦱꦺꦱꦴ ꦕ ꦄꦏꦸꦱꦭꦴ ꦣꦩ꧀ꦩꦴ. ꦆꦣ ꦥꦤ ꦥꦫꦹꦥꦮꦴꦢꦮꦶꦥ꧀ꦥꦛꦶꦱꦴꦫꦮꦣꦧꦤ꧀ꦣꦴꦢꦪꦺꦴ ꦕꦺꦮ ꦄꦥꦴꦪꦢꦸꦏ꧀ꦑꦨꦹꦠꦴ ꦕ ꦤꦴꦤꦥ꧀ꦥꦏꦴꦫꦴ ꦈꦥꦢ꧀ꦢꦮꦴ ꦄꦴꦱꦮꦴꦠꦶ ꦄꦴꦲ – ‘‘ꦄꦱꦁꦮꦫꦺ ꦜꦶꦠꦺꦤ ꦠꦱ꧀ꦩꦶꦁꦪꦺꦮ ꦄꦠ꧀ꦠꦨꦴꦮꦺ ꦥꦠ꧀ꦠꦧ꧀ꦧꦴ’’ꦠꦶꦄꦴꦢꦶ. ꦪꦢꦶ ꦲꦶ ꦨꦒꦮꦴ ꦱꦶꦏ꧀ꦑꦴꦥꦢꦁ ꦤ ꦥꦚ꧀ꦚꦥꦺꦪ꧀ꦪ, ꦠꦠꦺꦴ ꦄꦱꦢ꧀ꦣꦩ꧀ꦩꦥꦛꦶꦱꦺꦮꦤꦄꦢꦶꦤ꧀ꦤꦴꦢꦴꦤꦥꦴꦟꦴꦠꦶꦥꦴꦠꦴꦢꦶꦲꦺꦠꦸ ꦪꦺ ꦈꦥ꧀ꦥꦗ꧀ꦗꦺꦪ꧀ꦪꦸꦁ ꦥꦫꦹꦥꦮꦴꦢꦴꦢꦪꦺꦴ ꦢꦶꦛ꧀ꦜꦣꦩ꧀ꦩꦶꦏꦴ ꦤꦴꦤꦥ꧀ꦥꦏꦴꦫꦴ ꦄꦤꦠ꧀ꦡꦴ, ꦪꦺ ꦕ ꦠꦁꦤꦶꦩꦶꦠ꧀ꦠꦩꦺꦮ ꦤꦶꦫꦪꦴꦢꦷꦱꦸ ꦤꦶꦧ꧀ꦧꦠ꧀ꦠꦱ꧀ꦱ ꦥꦚ꧀ꦕꦮꦶꦣꦧꦤ꧀ꦣꦤꦏꦩ꧀ꦩꦏꦴꦫꦟꦴꦢꦶꦮꦱꦺꦤ ꦩꦲꦴꦢꦸꦏ꧀ꦑꦴꦤꦸꦨꦮꦤꦤꦴꦤꦥ꧀ꦥꦏꦴꦫꦴ ꦄꦤꦠ꧀ꦡꦴ, ꦠꦺ ꦱꦤ꧀ꦣꦴꦪ ꦆꦢꦁ ꦮꦸꦠ꧀ꦠꦁ ‘‘ꦢꦶꦛ꧀ꦜꦣꦩ꧀ꦩꦶꦏꦴꦤꦁ ꦄꦴꦱꦮꦴꦤꦁ ꦱꦁꦮꦫꦴꦪ ꦱꦩ꧀ꦥꦫꦴꦪꦶꦏꦴꦤꦁ ꦄꦴꦱꦮꦴꦤꦁ ꦥꦛꦶꦓꦴꦠꦴꦪꦴ’’ꦠꦶ. ꦢꦶꦛ꧀ꦜꦣꦩ꧀ꦩꦺꦴ ꦮꦸꦕ꧀ꦕꦠꦶ ꦥꦕ꧀ꦕꦏ꧀ꦑꦺꦴ ꦄꦠ꧀ꦠꦨꦴꦮꦺꦴ, ꦠꦠ꧀ꦡ ꦨꦮꦴ ꦢꦶꦛ꧀ꦜꦣꦩ꧀ꦩꦶꦏꦴ. ꦠꦺꦤ ꦮꦸꦠ꧀ꦠꦁ ‘‘ꦠꦱ꧀ꦩꦶꦁꦪꦺꦮ ꦄꦠ꧀ꦠꦨꦴꦮꦺ ꦥꦠ꧀ꦠꦧ꧀ꦧꦴ’’ꦠꦶ. ꦱꦩ꧀ꦩꦸꦑꦴ ꦒꦫꦲꦟꦁ ꦄꦏꦶꦠ꧀ꦠꦶ, ꦥꦫꦩ꧀ꦩꦸꦑꦴ ꦒꦫꦲꦟꦁ ꦄꦪꦱꦺꦴ. ꦄꦡ ꦮꦴ ꦱꦩ꧀ꦩꦸꦑꦴ ꦥꦫꦩ꧀ꦩꦸꦑꦴ ꦕ ꦒꦫꦲꦟꦁ ꦄꦏꦶꦠ꧀ꦠꦶ, ꦥꦫꦶꦮꦴꦫꦲꦴꦤꦶ ꦄꦪꦱꦺꦴꦠꦶ ꦮꦺꦢꦶꦠꦧ꧀ꦧꦁ. ꦄꦴꦒꦩꦤꦩꦒ꧀ꦒꦡꦏꦤꦴꦪꦴꦠꦶ ꦄꦴꦒꦩꦤꦢ꧀ꦮꦴꦫꦥꦶꦢꦲꦤꦠ꧀ꦡꦴꦪ. ꦱꦩ꧀ꦥꦫꦺꦠꦧ꧀ꦧꦠꦺꦴ ꦥꦺꦕ꧀ꦕ ꦒꦤ꧀ꦠꦧ꧀ꦧꦠꦺꦴ ꦱꦩ꧀ꦥꦫꦴꦪꦺꦴ, ꦥꦫꦭꦺꦴꦏꦺꦴꦠꦶ ꦄꦴꦲ ‘‘ꦱꦩ꧀ꦥꦫꦴꦪꦺ ꦤꦫꦏꦴꦢꦷꦱꦹ’’ꦠꦶ. ꦩꦺꦡꦸꦤꦴꦢꦷꦤꦶ ꦫꦗ꧀ꦗꦤꦛ꧀ꦜꦴꦤꦴꦤꦶ, ꦥꦴꦟꦴꦠꦶꦥꦴꦠꦴꦢꦷꦤꦶ ꦢꦸꦱ꧀ꦱꦤꦛ꧀ꦜꦴꦤꦴꦤꦶ.

ꦕꦸꦢ꧀ꦢꦱ ꦑꦤ꧀ꦣꦏꦮꦠ꧀ꦠꦴꦤꦶ ꦤꦴꦩ ꦮꦠ꧀ꦠꦏ꧀ꦑꦤ꧀ꦣꦏꦺ ꦮꦸꦠ꧀ꦠꦴꦤꦶ ꦄꦴꦒꦤ꧀ꦠꦸꦏꦮꦠ꧀ꦠꦁ ꦄꦴꦮꦴꦱꦶꦏꦒꦩꦶꦏꦄꦤꦸꦩꦺꦴꦢꦤꦨꦠ꧀ꦠꦒ꧀ꦒꦥꦶꦟ꧀ꦝꦕꦴꦫꦶꦏꦄꦴꦫꦚ꧀ꦚꦶꦏꦱꦺꦤꦴꦱꦤꦗꦤ꧀ꦠꦴꦓꦫꦮꦕ꧀ꦕꦏꦸꦛꦶꦈꦥꦗ꧀ꦙꦴꦪꦱꦢ꧀ꦣꦶꦮꦶꦲꦴꦫꦶꦏꦄꦴꦕꦫꦶꦪꦄꦤ꧀ꦠꦺꦮꦴꦱꦶꦏꦮꦠ꧀ꦠꦤ꧀ꦠꦶ ꦆꦩꦴꦤꦶ ꦕꦸꦢ꧀ꦢꦱ ꦮꦠ꧀ꦠꦴꦤꦶ. ꦠꦠꦺꦴ ꦄꦚ꧀ꦚꦴꦤꦶ ꦥꦤ ꦏꦢꦴꦕꦶ ꦠꦗ꧀ꦗꦤꦷꦪꦏꦩ꧀ꦩꦏꦠꦴꦢꦶꦏꦴꦭꦺꦪꦺꦮ ꦕꦫꦶꦠꦧ꧀ꦧꦴꦤꦶ ꦢ꧀ꦮꦺꦄꦱꦷꦠꦶ ꦩꦲꦴꦮꦠ꧀ꦠꦴꦤꦶ, ꦤ ꦱꦧ꧀ꦧꦴꦱꦸ ꦄꦮꦠ꧀ꦡꦴꦱꦸ ꦕꦫꦶꦠꦧ꧀ꦧꦴꦤꦶ, ꦠꦱ꧀ꦩꦴ ꦕꦸꦢ꧀ꦢꦱꦑꦤ꧀ꦣꦏꦮꦠ꧀ꦠꦺꦱꦸ ꦄꦒꦟꦶꦠꦴꦤꦶ, ꦠꦴꦤꦶ ꦥꦤ ‘‘ꦥꦴꦫꦶꦮꦴꦱꦶꦏꦴꦤꦁ ꦨꦶꦏ꧀ꦑꦹꦤꦁ ꦮꦠ꧀ꦠꦁ ꦥꦚ꧀ꦚꦥꦺꦱ꧀ꦱꦴꦩꦷ’’ꦠꦶ (ꦕꦹꦭ꦳ꦮ. ꧗꧕ ꦄꦴꦢꦪꦺꦴ) ꦄꦴꦫꦨꦶꦠ꧀ꦮꦴ ‘‘ꦤ ꦈꦥꦱꦩ꧀ꦥꦴꦢꦺꦠꦧ꧀ꦧꦁ…ꦥꦺ… ꦤ ꦖꦩꦴꦪꦁ ꦕꦔ꧀ꦏꦩꦤ꧀ꦠꦺ ꦕꦔ꧀ꦏꦩꦺ ꦕꦔ꧀ꦏꦩꦶꦠꦧ꧀ꦧ’’ꦤ꧀ꦠꦶ (ꦕꦹꦭ꦳ꦮ. ꧗꧖) ꦮꦸꦠ꧀ꦠꦴꦮꦱꦴꦤꦴꦤꦶ ꦖꦱꦛ꧀ꦜꦶ, ꦠꦠꦺꦴ ꦥꦫꦁ ‘‘ꦤ, ꦨꦶꦏ꧀ꦑꦮꦺ, ꦥꦴꦫꦶꦮꦴꦱꦶꦏꦺꦤ ꦨꦶꦏ꧀ꦑꦸꦤꦴ ꦥꦴꦫꦶꦮꦴꦱꦶꦏꦮꦸꦝ꧀ꦞꦠꦫꦺꦤ ꦨꦶꦏ꧀ꦑꦸꦤꦴ ꦱꦢ꧀ꦣꦶꦁ, ꦩꦹꦭꦴꦪꦥꦛꦶꦏꦱ꧀ꦱꦤꦴꦫꦲꦺꦤ, ꦩꦴꦤꦠ꧀ꦠꦴꦫꦲꦺꦤ, ꦩꦴꦤꦠ꧀ꦠꦕꦴꦫꦶꦏꦺꦤ, ꦄꦧ꧀ꦨꦴꦤꦴꦫꦲꦺꦤ ꦨꦶꦏ꧀ꦑꦸꦤꦴ ꦱꦢ꧀ꦣꦶꦁ ꦌꦏꦕ꧀ꦖꦤ꧀ꦤꦺ ꦄꦴꦮꦴꦱꦺ ꦮꦠ꧀ꦡꦧ꧀ꦧ’’ꦤ꧀ꦠꦶꦄꦴꦢꦶꦤꦴ (ꦕꦹꦭ꦳ꦮ. ꧘꧒) ꦮꦸꦠ꧀ꦠꦮꦠ꧀ꦠꦴꦤꦶ ꦥꦏꦠꦠ꧀ꦠꦕꦫꦶꦠꦧ꧀ꦧꦺꦲꦶ ꦄꦤꦚ꧀ꦚꦠ꧀ꦠꦴ ꦮꦶꦱꦸꦁ ꦄꦒꦟꦺꦠ꧀ꦮꦴ ꦥꦴꦫꦶꦮꦴꦱꦶꦏꦮꦸꦝ꧀ꦞꦠꦫꦴꦢꦷꦱꦸ ꦥꦸꦒ꧀ꦒꦭꦤ꧀ꦠꦫꦺꦱꦸ ꦕꦫꦶꦠꦧ꧀ꦧꦠ꧀ꦠꦴ ꦠꦺꦱꦁ ꦮꦱꦺꦤ ꦱꦩ꧀ꦥꦶꦟ꧀ꦝꦺꦠ꧀ꦮꦴ ꦌꦏꦺꦏꦁ ꦏꦠ꧀ꦮꦴ ꦒꦟꦶꦠꦴꦤꦶ ꦥꦚ꧀ꦕꦴꦠꦶ ꦌꦏꦱꦠ꧀ꦠꦠꦶ ꦮꦠ꧀ꦠꦴꦤꦶ, ꦈꦏ꧀ꦑꦺꦥꦤꦷꦪꦏꦩ꧀ꦩꦏꦠꦮꦠ꧀ꦠꦺꦱꦸ ꦮꦸꦠ꧀ꦠꦁ ‘‘ꦤ ꦥꦏꦠꦠ꧀ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦄꦨꦶꦮꦴꦢꦤꦁ ꦥꦕ꧀ꦕꦸꦛ꧀ꦜꦴꦤꦁ…ꦥꦺ… ꦤꦲꦴꦤꦺ ꦥꦶꦛ꧀ꦜꦶꦥꦫꦶꦏꦩ꧀ꦩꦁ ꦱꦴꦢꦶꦠꦧ꧀ꦧ’’ꦤ꧀ꦠꦶ (ꦕꦹꦭ꦳ꦮ. ꧗꧕) ꦆꦢꦁ ꦄꦨꦶꦮꦴꦢꦤꦴꦢꦷꦤꦁ ꦄꦱꦴꦢꦶꦪꦤꦁ ꦌꦏꦁ, ‘‘ꦤ ꦥꦏꦠꦠ꧀ꦠꦺꦴ ꦨꦶꦏ꧀ꦑꦸ ꦱꦷꦭꦮꦶꦥꦠ꧀ꦠꦶꦪꦴ ꦄꦤꦸꦢ꧀ꦣꦁꦱꦺꦠꦧ꧀ꦧꦺꦴ’’ꦠꦶꦄꦴꦢꦷꦤꦶ (ꦕꦹꦭ꦳ꦮ. ꧕꧑) ꦢꦱꦴꦠꦶ ꦌꦮꦩꦺꦠꦴꦤꦶ ꦢ꧀ꦮꦴꦱꦷꦠꦶ ꦮꦠ꧀ꦠꦴꦤꦶ. ꦌꦠꦺꦱ꧀ꦮꦺꦮ ꦥꦤ ꦏꦴꦤꦶꦕꦶ ꦠꦗ꧀ꦗꦤꦷꦪꦏꦩ꧀ꦩꦴꦢꦶꦮꦠ꧀ꦠꦴꦄꦴꦤꦶ, ꦏꦴꦤꦶꦕꦶ ꦥꦴꦫꦶꦮꦴꦱꦶꦏꦴꦢꦶꦮꦠ꧀ꦠꦴꦤꦷꦠꦶ ꦄꦒ꧀ꦒꦲꦶꦠꦒ꧀ꦒꦲꦟꦺꦤ ꦢ꧀ꦮꦴꦱꦷꦠꦶ ꦌꦮ, ꦄꦚ꧀ꦚꦠ꧀ꦡ ꦥꦤ ꦄꦛ꧀ꦜꦏꦡꦴꦥꦢꦺꦱꦺ ꦄꦥ꧀ꦥꦏꦁ ꦈꦴꦤꦩꦣꦶꦏꦁ ꦮꦴ ꦒꦟꦤꦹꦥꦒꦁ ꦤ ꦲꦺꦴꦠꦷꦠꦶ ‘‘ꦄꦱꦷꦠꦶ ꦑꦤ꧀ꦣꦏꦮꦠ꧀ꦠꦴꦤꦷ’’ꦠꦶ ꦮꦸꦠ꧀ꦠꦁ.

ꦱꦁꦮꦫꦮꦶꦤꦪꦺꦴꦠꦶ ꦱꦷꦭꦱꦁꦮꦫꦺꦴ ꦱꦠꦶꦱꦁꦮꦫꦺꦴ ꦚꦴꦟꦱꦁꦮꦫꦺꦴ ꦑꦤ꧀ꦠꦶꦱꦁꦮꦫꦺꦴ ꦮꦷꦫꦶꦪꦱꦁꦮꦫꦺꦴꦠꦶ ꦥꦚ꧀ꦕꦮꦶꦣꦺꦴꦥꦶ ꦱꦁꦮꦫꦺꦴ ꦪꦡꦴꦱꦏꦁ ꦱꦁꦮꦫꦶꦠꦧ꧀ꦧꦴꦤꦁ ꦮꦶꦤꦺꦠꦧ꧀ꦧꦴꦤꦚ꧀ꦕ ꦏꦴꦪꦢꦸꦕ꧀ꦕꦫꦶꦠꦴꦢꦷꦤꦁ ꦱꦁꦮꦫꦟꦠꦺꦴ ꦱꦁꦮꦫꦺꦴ, ꦮꦶꦤꦪꦤꦠꦺꦴ ꦮꦶꦤꦪꦺꦴꦠꦶ ꦮꦸꦕ꧀ꦕꦠꦶ. ꦥꦲꦴꦤꦮꦶꦤꦪꦺꦴꦠꦶ ꦠꦢꦔ꧀ꦒꦥ꧀ꦥꦲꦴꦤꦁ ꦮꦶꦏ꧀ꦑꦩ꧀ꦨꦤꦥ꧀ꦥꦲꦴꦤꦁ ꦱꦩꦸꦕ꧀ꦖꦺꦢꦥ꧀ꦥꦲꦴꦤꦁ ꦥꦛꦶꦥ꧀ꦥꦱ꧀ꦱꦢ꧀ꦣꦶꦥ꧀ꦥꦲꦴꦤꦁ ꦤꦶꦱ꧀ꦱꦫꦟꦥ꧀ꦥꦲꦴꦤꦤ꧀ꦠꦶ ꦥꦚ꧀ꦕꦮꦶꦣꦩ꧀ꦥꦶ ꦥꦲꦴꦤꦁ ꦪꦱ꧀ꦩꦴ ꦕꦴꦒꦛ꧀ꦜꦺꦤ ꦥꦲꦴꦤꦁ, ꦮꦶꦤꦪꦤꦛ꧀ꦜꦺꦤ ꦮꦶꦤꦪꦺꦴ, ꦠꦱ꧀ꦩꦴ ꦥꦲꦴꦤꦮꦶꦤꦪꦺꦴꦠꦶ ꦮꦸꦕ꧀ꦕꦠꦶ. ꦱꦩꦡꦮꦶꦤꦪꦺꦴꦠꦶ ꦱꦠ꧀ꦠ ꦄꦣꦶꦏꦫꦟꦱꦩꦡꦴ. ꦥꦚ꧀ꦚꦠ꧀ꦠꦶꦮꦶꦤꦪꦺꦴꦠꦶ ꦱꦶꦏ꧀ꦑꦴꦥꦢꦩꦺꦮ. ꦱꦶꦏ꧀ꦑꦴꦥꦢꦥꦚ꧀ꦚꦠ꧀ꦠꦶꦪꦴ ꦲꦶ ꦮꦶꦗ꧀ꦗꦩꦴꦤꦴꦪ ꦌꦮ ꦱꦶꦏ꧀ꦑꦴꦥꦢꦱꦩ꧀ꦨꦮꦠꦺꦴ ꦥꦚ꧀ꦚꦠ꧀ꦠꦶꦮꦶꦤꦪꦺꦴꦥꦶ ꦱꦶꦏ꧀ꦑꦴꦥꦢꦥꦚ꧀ꦚꦠ꧀ꦠꦶꦪꦴ ꦄꦤꦸꦒ꧀ꦒꦲꦶꦠꦺꦴ ꦲꦺꦴꦠꦶ.

ꦆꦢꦴꦤꦶ –

‘‘ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦱꦔ꧀ꦓꦦꦴꦱꦸ, ꦪꦁ ꦱꦔ꧀ꦓꦦꦴꦱꦸ, ꦠꦁ ꦢꦸꦩ꧀ꦩꦔ꧀ꦏꦹꦤꦁ ꦥꦸꦒ꧀ꦒꦭꦴꦤꦁ ꦤꦶꦒ꧀ꦒꦲꦴꦪ, ꦪꦁ ꦢꦸꦩ꧀ꦩꦔ꧀ꦏꦹꦤꦁ ꦥꦸꦒ꧀ꦒꦭꦴꦤꦁ ꦤꦶꦒ꧀ꦒꦲꦴꦪ, ꦠꦁ ꦥꦺꦱꦭꦴꦤꦁ ꦨꦶꦏ꧀ꦑꦹꦤꦁ ꦦꦴꦱꦸꦮꦶꦲꦴꦫꦴꦪ, ꦪꦁ ꦥꦺꦱꦭꦴꦤꦁ ꦨꦶꦏ꧀ꦑꦹꦤꦁ ꦦꦴꦱꦸꦮꦶꦲꦴꦫꦴꦪ, ꦠꦁ ꦢꦶꦛ꧀ꦜꦣꦩ꧀ꦩꦶꦏꦴꦤꦁ ꦄꦴꦱꦮꦴꦤꦁ ꦱꦁꦮꦫꦴꦪ, ꦪꦁ ꦢꦶꦛ꧀ꦜꦣꦩ꧀ꦩꦶꦏꦴꦤꦁ ꦄꦴꦱꦮꦴꦤꦁ ꦱꦁꦮꦫꦴꦪ, ꦠꦁ ꦱꦩ꧀ꦥꦫꦴꦪꦶꦏꦴꦤꦁ ꦄꦴꦱꦮꦴꦤꦁ ꦥꦛꦶꦓꦴꦠꦴꦪ, ꦪꦁ ꦱꦩ꧀ꦥꦫꦴꦪꦶꦏꦴꦤꦁ ꦄꦴꦱꦮꦴꦤꦁ ꦥꦛꦶꦓꦴꦠꦴꦪ, ꦠꦁ ꦄꦥ꧀ꦥꦱꦤ꧀ꦤꦴꦤꦁ ꦥꦱꦴꦢꦴꦪ, ꦪꦁ ꦄꦥ꧀ꦥꦱꦤ꧀ꦤꦴꦤꦁ ꦥꦱꦴꦢꦴꦪ, ꦠꦁ ꦥꦱꦤ꧀ꦤꦴꦤꦁ ꦨꦶꦪ꧀ꦪꦺꦴꦨꦴꦮꦴꦪ, ꦪꦁ ꦥꦱꦤ꧀ꦤꦴꦤꦁ ꦨꦶꦪ꧀ꦪꦺꦴꦨꦴꦮꦴꦪ, ꦠꦁ ꦱꦢ꧀ꦣꦩ꧀ꦩꦛ꧀ꦜꦶꦠꦶꦪꦴ, ꦪꦁ ꦱꦢ꧀ꦣꦩ꧀ꦩꦛ꧀ꦜꦶꦠꦶꦪꦴ, ꦠꦁ ꦮꦶꦤꦪꦴꦤꦸꦒ꧀ꦒꦲꦴꦪ.

‘‘ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦱꦔ꧀ꦓꦦꦴꦱꦸ, ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦢꦸꦩ꧀ꦩꦔ꧀ꦏꦹꦤꦁ ꦥꦸꦒ꧀ꦒꦭꦴꦤꦁ ꦤꦶꦒ꧀ꦒꦲꦴꦪ, ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦥꦺꦱꦭꦴꦤꦁ ꦨꦶꦏ꧀ꦑꦹꦤꦁ ꦦꦴꦱꦸꦮꦶꦲꦴꦫꦴꦪ, ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦢꦶꦛ꧀ꦜꦣꦩ꧀ꦩꦶꦏꦴꦤꦁ ꦄꦴꦱꦮꦴꦤꦁ ꦱꦁꦮꦫꦴꦪ, ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦱꦩ꧀ꦥꦫꦴꦪꦶꦏꦴꦤꦁ ꦄꦴꦱꦮꦴꦤꦁ ꦥꦛꦶꦓꦴꦠꦴꦪ, ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦄꦥ꧀ꦥꦱꦤ꧀ꦤꦴꦤꦁ ꦥꦱꦴꦢꦴꦪ, ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦥꦱꦤ꧀ꦤꦴꦤꦁ ꦨꦶꦪ꧀ꦪꦺꦴꦨꦴꦮꦴꦪ, ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦱꦢ꧀ꦣꦩ꧀ꦩꦛ꧀ꦜꦶꦠꦶꦪꦴ, ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦮꦶꦤꦪꦴꦤꦸꦒ꧀ꦒꦲꦴꦪ.

‘‘ꦪꦁ ꦱꦔ꧀ꦓꦦꦴꦱꦸ, ꦠꦁ ꦢꦸꦩ꧀ꦩꦔ꧀ꦏꦹꦤꦁ ꦥꦸꦒ꧀ꦒꦭꦴꦤꦁ ꦤꦶꦒ꧀ꦒꦲꦴꦪ, ꦪꦁ ꦱꦔ꧀ꦓꦦꦴꦱꦸ, ꦠꦁ ꦥꦺꦱꦭꦴꦤꦁ ꦨꦶꦏ꧀ꦑꦹꦤꦁ ꦦꦴꦱꦸꦮꦶꦲꦴꦫꦴꦪ, ꦪꦁ ꦱꦔ꧀ꦓꦦꦴꦱꦸ, ꦠꦁ ꦢꦶꦛ꧀ꦜꦣꦩ꧀ꦩꦶꦏꦴꦤꦁ ꦄꦴꦱꦮꦴꦤꦁ ꦱꦁꦮꦫꦴꦪ, ꦪꦁ ꦱꦔ꧀ꦓꦦꦴꦱꦸ, ꦠꦁ ꦱꦩ꧀ꦥꦫꦴꦪꦶꦏꦴꦤꦁ ꦄꦴꦱꦮꦴꦤꦁ ꦥꦛꦶꦓꦴꦠꦴꦪ, ꦪꦁ ꦱꦔ꧀ꦓꦦꦴꦱꦸ, ꦠꦁ ꦄꦥ꧀ꦥꦱꦤ꧀ꦤꦴꦤꦁ ꦥꦱꦴꦢꦴꦪ, ꦪꦁ ꦱꦔ꧀ꦓꦦꦴꦱꦸ, ꦠꦁ ꦥꦱꦤ꧀ꦤꦴꦤꦁ ꦨꦶꦪ꧀ꦪꦺꦴꦨꦴꦮꦴꦪ, ꦪꦁ ꦱꦔ꧀ꦓꦦꦴꦱꦸ, ꦠꦁ ꦱꦢ꧀ꦣꦩ꧀ꦩꦛ꧀ꦜꦶꦠꦶꦪꦴ, ꦪꦁ ꦱꦔ꧀ꦓꦦꦴꦱꦸ, ꦠꦁ ꦮꦶꦤꦪꦴꦤꦸꦒ꧀ꦒꦲꦴꦪ, ꦪꦁ ꦱꦔ꧀ꦓꦦꦴꦱꦸ, ꦠꦁ ꦱꦔ꧀ꦓꦱꦸꦛ꧀ꦜꦸꦠꦴꦪ.

‘‘ꦪꦁ ꦢꦸꦩ꧀ꦩꦔ꧀ꦏꦹꦤꦁ ꦥꦸꦒ꧀ꦒꦭꦴꦤꦁ ꦤꦶꦒ꧀ꦒꦲꦴꦪ…ꦥꦺ… ꦪꦁ ꦥꦺꦱꦭꦴꦤꦁ ꦨꦶꦏ꧀ꦑꦹꦤꦁ ꦦꦴꦱꦸꦮꦶꦲꦴꦫꦴꦪ…ꦥꦺ… ꦪꦁ ꦢꦶꦛ꧀ꦜꦣꦩ꧀ꦩꦶꦏꦴꦤꦁ ꦄꦴꦱꦮꦴꦤꦁ ꦱꦁꦮꦫꦴꦪ…ꦥꦺ… ꦪꦁ ꦱꦩ꧀ꦥꦫꦴꦪꦶꦏꦴꦤꦁ ꦄꦴꦱꦮꦴꦤꦁ ꦥꦛꦶꦓꦴꦠꦴꦪ…ꦥꦺ… ꦪꦁ ꦄꦥ꧀ꦥꦱꦤ꧀ꦤꦴꦤꦁ ꦥꦱꦴꦢꦴꦪ…ꦥꦺ… ꦪꦁ ꦥꦱꦤ꧀ꦤꦴꦤꦁ ꦨꦶꦪ꧀ꦪꦺꦴꦨꦴꦮꦴꦪ…ꦥꦺ… ꦪꦁ ꦱꦢ꧀ꦣꦩ꧀ꦩꦛ꧀ꦜꦶꦠꦶꦪꦴ…ꦥꦺ… ꦪꦁ ꦮꦶꦤꦪꦴꦤꦸꦒ꧀ꦒꦲꦴꦪ, ꦠꦁ ꦱꦔ꧀ꦓꦱꦸꦛ꧀ꦜꦸꦠꦴꦪ, ꦪꦁ ꦮꦶꦤꦪꦴꦤꦸꦒ꧀ꦒꦲꦴꦪ, ꦠꦁ ꦱꦔ꧀ꦓꦦꦴꦱꦸꦠꦴꦪ, ꦪꦁ ꦮꦶꦤꦪꦴꦤꦸꦒ꧀ꦒꦲꦴꦪ, ꦠꦁ ꦢꦸꦩ꧀ꦩꦔ꧀ꦏꦹꦤꦁ ꦥꦸꦒ꧀ꦒꦭꦴꦤꦁ ꦤꦶꦒ꧀ꦒꦲꦴꦪ, ꦪꦁ ꦮꦶꦤꦪꦴꦤꦸꦒ꧀ꦒꦲꦴꦪ, ꦠꦁ ꦥꦺꦱꦭꦴꦤꦁ ꦨꦶꦏ꧀ꦑꦹꦤꦁ ꦦꦴꦱꦸꦮꦶꦲꦴꦫꦴꦪ, ꦪꦁ ꦮꦶꦤꦪꦴꦤꦸꦒ꧀ꦒꦲꦴꦪ, ꦠꦁ ꦢꦶꦛ꧀ꦜꦣꦩ꧀ꦩꦶꦏꦴꦤꦁ ꦄꦴꦱꦮꦴꦤꦁ ꦱꦁꦮꦫꦴꦪ, ꦪꦁ ꦮꦶꦤꦪꦴꦤꦸꦒ꧀ꦒꦲꦴꦪ, ꦠꦁ ꦱꦩ꧀ꦥꦫꦴꦪꦶꦏꦴꦤꦁ ꦄꦴꦱꦮꦴꦤꦁ ꦥꦛꦶꦓꦴꦠꦴꦪ, ꦪꦁ ꦮꦶꦤꦪꦴꦤꦸꦒ꧀ꦒꦲꦴꦪ, ꦠꦁ ꦄꦥ꧀ꦥꦱꦤ꧀ꦤꦴꦤꦁ ꦥꦱꦴꦢꦴꦪ, ꦪꦁ ꦮꦶꦤꦪꦴꦤꦸꦒ꧀ꦒꦲꦴꦪ, ꦠꦁ ꦥꦱꦤ꧀ꦤꦴꦤꦁ ꦨꦶꦪ꧀ꦪꦺꦴꦨꦴꦮꦴꦪ, ꦪꦁ ꦮꦶꦤꦪꦴꦤꦸꦒ꧀ꦒꦲꦴꦪ, ꦠꦁ ꦱꦢ꧀ꦣꦩ꧀ꦩꦛ꧀ꦜꦶꦠꦶꦪꦴ (ꦥꦫꦶ. ꧓꧓꧔).

‘‘ꦄꦠ꧀ꦡꦱꦠꦁ ꦣꦩ꧀ꦩꦱꦠꦁ, ꦢ꧀ꦮꦺ ꦕ ꦤꦶꦫꦸꦠ꧀ꦠꦶꦱꦠꦴꦤꦶ;

ꦕꦠ꧀ꦠꦴꦫꦶ ꦚꦴꦟꦱꦠꦴꦤꦶ, ꦄꦠ꧀ꦡꦮꦱꦺ ꦥꦏꦫꦟꦺ’’ꦠꦶ (ꦥꦫꦶ. ꧓꧓꧔) –

ꦪꦁ ꦮꦸꦠ꧀ꦠꦁ ꦥꦫꦶꦮꦴꦫꦺ, ꦠꦁ ꦢꦱ꧀ꦱꦺꦤ꧀ꦠꦺꦴ ‘‘ꦄꦥꦶꦕꦺꦠ꧀ꦡꦴ’’ꦠꦶꦄꦴꦢꦶꦩꦴꦲ.

ꦠꦠ꧀ꦡ ‘‘ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦱꦔ꧀ꦓꦦꦴꦱꦸ, ꦪꦁ ꦱꦔ꧀ꦓꦦꦴꦱꦸ, ꦠꦁ ꦢꦸꦩ꧀ꦩꦔ꧀ꦏꦹꦤꦁ ꦥꦸꦒ꧀ꦒꦭꦴꦤꦁ ꦤꦶꦒ꧀ꦒꦲꦴꦪꦴ’’ꦠꦶ ꦆꦩꦶꦤꦴ ꦄꦤꦸꦏ꧀ꦏꦩꦺꦤ ꦪꦁ ꦮꦸꦠ꧀ꦠꦁ, ꦠꦁ ꦱꦤ꧀ꦣꦴꦪ ꦄꦴꦱꦤ꧀ꦤꦴꦱꦤ꧀ꦤꦥꦢꦴꦤꦁ ꦈꦥꦫꦹꦥꦫꦶꦥꦢꦺꦲꦶ ꦱꦢ꧀ꦣꦶꦁ ꦪꦺꦴꦗꦶꦠꦠ꧀ꦠꦴ ꦱꦔ꧀ꦑꦭꦶꦏꦧꦤ꧀ꦣꦤꦱꦢꦶꦱꦠ꧀ꦠꦴ ‘‘ꦱꦔ꧀ꦑꦭꦶꦏꦤꦪ’’ꦤ꧀ꦠꦶ ꦮꦸꦠ꧀ꦠꦁ. ꦱꦔ꧀ꦑꦭꦶꦏꦤꦪꦁ ꦏꦠ꧀ꦮꦴꦠꦶ ꦱꦩ꧀ꦧꦤ꧀ꦣꦺꦴ. ‘‘ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦱꦔ꧀ꦓꦦꦴꦱꦸ, ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦢꦸꦩ꧀ꦩꦔ꧀ꦏꦹꦤꦁ ꦥꦸꦒ꧀ꦒꦭꦴꦤꦁ ꦤꦶꦒ꧀ꦒꦲꦴꦪꦴ’’ꦠꦶ ꦌꦮꦩꦴꦢꦶꦤꦴ ꦢꦱꦱꦸ ꦥꦢꦺꦱꦸ ꦌꦏꦩꦺꦏꦁ ꦥꦢꦁ ꦠꦢꦮꦱꦺꦱꦺꦲꦶ ꦤꦮꦤꦮꦥꦢꦺꦲꦶ ꦪꦺꦴꦗꦺꦠ꧀ꦮꦴ ꦪꦁ ꦮꦸꦠ꧀ꦠꦁ, ꦠꦁ ꦱꦤ꧀ꦣꦴꦪ ‘‘ꦌꦏꦺꦏꦥꦢꦩꦹꦭꦶꦏꦁ ꦢꦱꦏ꧀ꦑꦠ꧀ꦠꦸꦁ ꦪꦺꦴꦗꦤꦁ ꦏꦠ꧀ꦮꦴ’’ꦠꦶ ꦮꦸꦠ꧀ꦠꦁ.

ꦄꦠ꧀ꦡꦱꦠꦤ꧀ꦠꦶꦄꦴꦢꦷꦱꦸ ꦱꦔ꧀ꦑꦭꦶꦏꦤꦪꦺ ꦠꦴꦮ ꦥꦸꦫꦶꦩꦥꦸꦫꦶꦩꦥꦢꦴꦤꦁ ꦮꦱꦺꦤ ꦣꦩ꧀ꦩꦱꦠꦁ ꦮꦺꦢꦶꦠꦧ꧀ꦧꦁ, ꦥꦕ꧀ꦖꦶꦩꦥꦕ꧀ꦖꦶꦩꦴꦤꦁ ꦮꦱꦺꦤ ꦄꦠ꧀ꦡꦱꦠꦁ ꦢꦛ꧀ꦜꦧ꧀ꦧꦁ. ꦏꦡꦁ? ꦏꦶꦚ꧀ꦕꦴꦥꦶ ꦥꦫꦶꦮꦴꦫꦺ ‘‘ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦱꦔ꧀ꦓꦦꦴꦱꦹ’’ꦠꦶꦄꦴꦢꦶꦤꦴ ꦱꦔ꧀ꦑꦭꦶꦏꦤꦪꦺ ꦑꦟ꧀ꦝꦕꦏ꧀ꦏꦩꦺꦮ ꦮꦸꦠ꧀ꦠꦁ, ꦠꦡꦴꦥꦶ ꦠꦺꦤꦺꦮ ꦤꦪꦺꦤ ꦧꦢ꧀ꦣꦕꦏ꧀ꦏꦱ꧀ꦱꦥꦶ ꦤꦪꦺꦴ ꦢꦶꦤ꧀ꦤꦺꦴ, ꦠꦱ꧀ꦩꦴ ‘‘ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦱꦔ꧀ꦓꦦꦴꦱꦹ’’ꦠꦶꦄꦴꦢꦶꦁ ꦮꦠ꧀ꦮꦴ ‘‘ꦪꦁ ꦮꦶꦤꦪꦴꦤꦸꦒ꧀ꦒꦲꦴꦪ, ꦠꦁ ꦱꦔ꧀ꦓꦱꦸꦛ꧀ꦜꦹ’’ꦠꦶ ꦪꦺꦴꦗꦺꦠ꧀ꦮꦴ ꦧꦢ꧀ꦣꦕꦏ꧀ꦏꦁ ꦏꦴꦠꦧ꧀ꦧꦁ. ꦌꦮꦁ ‘‘ꦪꦁ ꦱꦔ꧀ꦓꦦꦴꦱꦸ, ꦠꦁ ꦢꦸꦩ꧀ꦩꦔ꧀ꦏꦹꦤꦁ ꦥꦸꦒ꧀ꦒꦭꦴꦤꦁ ꦤꦶꦒ꧀ꦒꦲꦴꦪꦴ’’ꦠꦶꦄꦴꦢꦶꦁ ꦮꦠ꧀ꦮꦴꦥꦶ ‘‘ꦪꦁ ꦮꦶꦤꦪꦴꦤꦸꦒ꧀ꦒꦲꦴꦪ, ꦠꦁ ꦱꦔ꧀ꦓꦱꦸꦛ꧀ꦜꦸ, ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦱꦔ꧀ꦓꦦꦴꦱꦹ’’ꦠꦶ ꦪꦺꦴꦗꦺꦠ꧀ꦮꦴ ꦧꦢ꧀ꦣꦕꦏ꧀ꦏꦁ ꦏꦴꦠꦧ꧀ꦧꦁ. ꦆꦩꦶꦤꦴ ꦄꦤꦸꦏ꧀ꦏꦩꦺꦤ ꦱꦺꦱꦥꦢꦺꦱꦸꦥꦶ ꦪꦺꦴꦗꦶꦠꦺꦱꦸ ꦱꦔ꧀ꦑꦭꦶꦏꦤꦪꦺꦤ ꦢꦱ ꦧꦢ꧀ꦣꦕꦏ꧀ꦏꦴꦤꦶ ꦲꦺꦴꦤ꧀ꦠꦶ. ꦠꦺꦱꦸ ꦌꦏꦺꦏꦱ꧀ꦩꦶꦁ ꦕꦏ꧀ꦏꦺ ꦥꦸꦫꦶꦩꦥꦸꦫꦶꦩꦥꦢꦴꦤꦁ ꦮꦱꦺꦤ ꦢꦱ ꦢꦱ ꦣꦩ꧀ꦩꦴ, ꦥꦕ꧀ꦖꦶꦩꦥꦕ꧀ꦖꦶꦩꦥꦢꦴꦤꦁ ꦮꦱꦺꦤ ꦢꦱ ꦢꦱ ꦄꦠ꧀ꦡꦴꦠꦶ ꦱꦔ꧀ꦑꦭꦶꦏꦤꦪꦺ ꦄꦠ꧀ꦡꦱꦠꦁ ꦣꦩ꧀ꦩꦱꦠꦚ꧀ꦕ ꦱꦩ꧀ꦥꦗ꧀ꦗꦠꦶ. ꦌꦏꦩꦹꦭꦏꦤꦪꦺ ꦥꦤ ‘‘ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦱꦔ꧀ꦓꦦꦴꦱꦸ, ꦪꦁ ꦱꦔ꧀ꦓꦱꦸꦛ꧀ꦜꦸ, ꦠꦁ ꦢꦸꦩ꧀ꦩꦔ꧀ꦏꦹꦤꦁ ꦥꦸꦒ꧀ꦒꦭꦴꦤꦁ ꦤꦶꦒ꧀ꦒꦲꦴꦪꦴ’’ꦠꦶ ꦌꦮꦩꦴꦢꦶꦤꦴ ꦌꦏꦩꦺꦮ ꦥꦢꦁ ꦱꦺꦱꦺꦲꦶ ꦤꦮꦲꦶ ꦥꦢꦺꦲꦶ ꦪꦺꦴꦗꦶꦠꦤ꧀ꦠꦶ ꦥꦸꦫꦶꦩꦥꦢꦱ꧀ꦱ ꦌꦏꦠ꧀ꦠꦴ ꦌꦏꦩꦺꦮ ꦣꦩ꧀ꦩꦥꦢꦁ ꦤꦮꦺꦮ ꦄꦠ꧀ꦡꦥꦢꦴꦤꦶ ꦲꦺꦴꦤ꧀ꦠꦶ, ꦠꦱ꧀ꦩꦴ ꦌꦏꦩꦹꦭꦏꦤꦪꦺ ꦢꦱꦱꦸ ꦥꦢꦺꦱꦸ ꦌꦏꦩꦺꦏꦁ ꦩꦹꦭꦁ ꦏꦠ꧀ꦮꦴ ꦢꦱꦏ꧀ꦑꦠ꧀ꦠꦸꦁ ꦪꦺꦴꦗꦤꦴꦪ ꦏꦠꦴꦪ ꦣꦩ꧀ꦩꦥꦢꦴꦤꦁ ꦮꦱꦺꦤ ꦣꦩ꧀ꦩꦥꦢꦴꦤꦶ ꦢꦱ, ꦄꦠ꧀ꦡꦥꦢꦴꦤꦶ ꦤꦮꦸꦠꦷꦠꦶ ꦄꦠ꧀ꦡꦱꦠꦁ ꦣꦩ꧀ꦩꦱꦠꦚ꧀ꦕ ꦤ ꦱꦩ꧀ꦥꦗ꧀ꦗꦠꦶ, ꦠꦱ꧀ꦩꦴ ꦌꦏꦩꦹꦭꦏꦤꦪꦺ ꦱꦔ꧀ꦑꦭꦶꦏꦤꦪꦺ ꦮꦸꦠ꧀ꦠꦤꦪꦺꦤ ꦄꦠ꧀ꦡꦱꦠꦁ ꦣꦩ꧀ꦩꦱꦠꦚ꧀ꦕ ꦄꦒ꧀ꦒꦲꦺꦠ꧀ꦮꦴ ꦪꦁ ꦠꦠ꧀ꦡ ꦢꦱꦣꦩ꧀ꦩꦥꦢꦴꦤꦁ ꦤꦮꦸꦠꦶꦄꦠ꧀ꦡꦥꦢꦴꦤꦚ꧀ꦕ ꦮꦱꦺꦤ ꦥꦢꦱꦠꦁ ꦮꦸꦠ꧀ꦠꦁ, ꦠꦁ ꦱꦧ꧀ꦧꦁ ꦣꦩ꧀ꦩꦱꦠꦤ꧀ꦠꦶ ꦒꦲꦺꦠ꧀ꦮꦴ ꦠꦢꦠ꧀ꦡꦗꦺꦴꦠꦤꦮꦱꦺꦤ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦴꦤꦶ ꦱꦔ꧀ꦓꦱꦸꦛ꧀ꦜꦸꦨꦴꦮꦴꦢꦷꦤꦶ ꦄꦠ꧀ꦡꦥꦢꦴꦤꦶ ꦄꦠ꧀ꦡꦱꦠꦤ꧀ꦠꦶ ꦌꦮꦁ ꦒꦲꦶꦠꦺ ꦄꦠ꧀ꦡꦱꦠꦁ ꦣꦩ꧀ꦩꦱꦠꦚ꧀ꦕ ꦱꦩ꧀ꦥꦗ꧀ꦗꦠꦶ. ꦌꦮꦁ ꦠꦴꦮ ꦄꦠ꧀ꦡꦱꦠꦁ ꦣꦩ꧀ꦩꦱꦠꦚ꧀ꦕ ꦮꦺꦢꦶꦠꦧ꧀ꦧꦁ. ꦢ꧀ꦮꦺ ꦕ ꦤꦶꦫꦸꦠ꧀ꦠꦶꦱꦠꦴꦤꦷꦠꦶ ꦌꦠ꧀ꦡ ꦥꦤ ꦄꦠ꧀ꦡꦗꦺꦴꦠꦶꦏꦴꦤꦁ ꦤꦶꦫꦸꦠ꧀ꦠꦷꦤꦁ ꦮꦱꦺꦤ ꦤꦶꦫꦸꦠ꧀ꦠꦶꦱꦠꦁ, ꦣꦩ꧀ꦩꦨꦹꦠꦴꦤꦁ ꦤꦶꦫꦸꦠ꧀ꦠꦷꦤꦁ ꦮꦱꦺꦤ ꦤꦶꦫꦸꦠ꧀ꦠꦶꦱꦠꦤ꧀ꦠꦶ ꦢ꧀ꦮꦺ ꦤꦶꦫꦸꦠ꧀ꦠꦶꦱꦠꦴꦤꦶ ꦕ ꦮꦺꦢꦶꦠꦧ꧀ꦧꦴꦤꦶ. ꦕꦠ꧀ꦠꦴꦫꦶ ꦚꦴꦟꦱꦠꦴꦤꦷꦠꦶ ꦄꦠ꧀ꦡꦱꦠꦺ ꦚꦴꦟꦱꦠꦁ, ꦣꦩ꧀ꦩꦱꦠꦺ ꦚꦴꦟꦱꦠꦁ, ꦢ꧀ꦮꦷꦱꦸ ꦤꦶꦫꦸꦠ꧀ꦠꦶꦱꦠꦺꦱꦸ ꦢ꧀ꦮꦺ ꦚꦴꦟꦱꦠꦴꦤꦷꦠꦶ ꦕꦠ꧀ꦠꦴꦫꦶ ꦚꦴꦟꦱꦠꦴꦤꦶ.

ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺꦠꦶ ꦌꦠ꧀ꦡ ꦕ-ꦱꦢ꧀ꦢꦺꦴ ꦨꦶꦤ꧀ꦤꦏ꧀ꦏꦩꦺꦤ ꦪꦺꦴꦗꦺꦠꦧ꧀ꦧꦺꦴꦠꦶ ꦄꦴꦲ ‘‘ꦈꦢ꧀ꦢꦶꦱꦺꦪ꧀ꦪꦴꦡ ꦕꦴ’’ꦠꦶ. ꦏꦡꦁ ꦥꦤꦺꦠ꧀ꦡ ‘‘ꦈꦢ꧀ꦢꦶꦱꦺꦪ꧀ꦪꦴꦡꦴ’’ꦠꦶ ꦮꦸꦠ꧀ꦠꦺ ꦥꦫꦶꦪꦴꦥꦸꦟꦺꦪ꧀ꦪꦴꦡꦴꦠꦶꦄꦴꦢꦶ ꦄꦠ꧀ꦡꦱꦩ꧀ꦨꦮꦺꦴꦠꦶ ꦄꦴꦲ ‘‘ꦄꦠꦶꦫꦺꦏꦴꦤꦪꦤꦠ꧀ꦡꦺꦴ ꦲꦶ ꦌꦠ꧀ꦡ ꦕ-ꦱꦢ꧀ꦢꦺꦴ’’ꦠꦶ. ꦮꦸꦠ꧀ꦠꦠ꧀ꦡꦠꦺꦴ ꦄꦠꦶꦫꦺꦏꦱ꧀ꦱ ꦄꦠ꧀ꦡꦱ꧀ꦱ ꦄꦴꦤꦪꦤꦁ ꦄꦠꦶꦫꦺꦏꦴꦤꦪꦤꦁ, ꦱꦺꦴ ꦄꦠ꧀ꦡꦺꦴ ꦌꦠꦱ꧀ꦱꦴꦠꦶ ꦄꦠꦶꦫꦺꦏꦴꦤꦪꦤꦠ꧀ꦡꦺꦴ, ꦄꦮꦸꦠ꧀ꦠꦱꦩꦸꦕ꧀ꦕꦪꦠ꧀ꦡꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ‘‘ꦄꦱꦁꦮꦴꦱꦺꦴ’’ꦠꦶ ꦮꦸꦠ꧀ꦠꦠ꧀ꦠꦴ ‘‘ꦢꦭ꦳꧀ꦲꦁ ꦏꦠ꧀ꦮꦴ’’ꦠꦶ ꦮꦸꦠ꧀ꦠꦁ.

ꦆꦠꦶ ꦱꦩꦤ꧀ꦠꦥꦴꦱꦴꦢꦶꦏꦴꦪ ꦮꦶꦤꦪꦛ꧀ꦜꦏꦡꦴꦪ ꦱꦴꦫꦠ꧀ꦡꦢꦷꦥꦤꦶꦪꦁ

ꦥꦜꦩꦥꦚ꧀ꦚꦠ꧀ꦠꦶꦏꦡꦴ ꦤꦶꦛ꧀ꦜꦶꦠꦴ.

ꦱꦸꦢꦶꦤ꧀ꦤꦨꦴꦟꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦩꦏ꧀ꦏꦛꦶꦮꦠ꧀ꦡꦸꦏꦡꦴꦮꦟ꧀ꦟꦤꦴ

꧔꧐. ꦄꦤꦸꦠ꧀ꦠꦴꦤꦥꦢꦮꦟ꧀ꦟꦤꦴꦠꦶ ꦈꦠ꧀ꦠꦴꦤꦁ ꦮꦸꦕ꧀ꦕꦠꦶ ꦥꦴꦏꦛꦁ, ꦠꦥ꧀ꦥꦛꦶꦥꦏ꧀ꦑꦺꦤ ꦄꦤꦸꦠ꧀ꦠꦴꦤꦁ ꦄꦥꦴꦏꦛꦁ ꦄꦥ꧀ꦥꦕꦸꦫꦁ ꦢꦸꦮꦶꦚ꧀ꦚꦺꦪ꧀ꦪꦚ꧀ꦕ, ꦄꦤꦸꦠ꧀ꦠꦴꦤꦴꦤꦁ ꦥꦢꦴꦤꦁ ꦮꦟ꧀ꦟꦤꦴ ꦄꦤꦸꦠ꧀ꦠꦴꦤꦥꦢꦮꦟ꧀ꦟꦤꦴ. ꦈꦠ꧀ꦠꦴꦤꦥꦢꦮꦟ꧀ꦟꦤꦴꦪ ꦥꦪꦺꦴꦗꦤꦴꦨꦴꦮꦠꦺꦴ ꦄꦤꦸꦠ꧀ꦠꦴꦤꦒ꧀ꦒꦲꦟꦁ. ꦥꦕꦸꦫꦥꦛꦶꦱꦺꦮꦤꦺꦴ ꦲꦺꦴꦠꦷꦠꦶ ꦧꦲꦸꦭꦥꦛꦶꦱꦺꦮꦤꦺꦴ ꦲꦺꦴꦠꦶ, ꦢꦶꦮꦱꦺ ꦢꦶꦮꦱꦺ ꦤꦶꦫꦤ꧀ꦠꦫꦁ ꦥꦛꦶꦱꦺꦮꦠꦷꦠꦶ ꦄꦠ꧀ꦡꦺꦴ. ꦥꦕꦸꦫꦠ꧀ꦡꦺ ꦲꦶ ꦮꦠ꧀ꦠꦩꦴꦤꦮꦕꦤꦤ꧀ꦠꦶ ꦱꦧ꧀ꦧꦢꦴ ꦥꦛꦶꦱꦺꦮꦤꦴꦨꦴꦮꦺꦥꦶ ‘‘ꦆꦲ ꦩꦭ꧀ꦭꦴ ꦪꦸꦗ꧀ꦙꦤ꧀ꦠꦷ’’ꦠꦶꦄꦴꦢꦷꦱꦸ ꦮꦶꦪ ꦧꦴꦲꦸꦭ꧀ꦭꦮꦸꦠ꧀ꦠꦶꦁ ꦈꦥꦴꦢꦴꦪ ꦮꦠ꧀ꦠꦩꦴꦤꦮꦕꦤꦁ. ꦄꦴꦲꦶꦟ꧀ꦝꦤ꧀ꦠꦴꦠꦶ ꦮꦶꦕꦫꦤ꧀ꦠꦴ. ꦄꦚ꧀ꦚꦺꦱꦸꦥꦷꦠꦶ ꦄꦚ꧀ꦚꦺꦱꦸꦥꦶ ꦨꦶꦏ꧀ꦑꦹꦱꦸ.

꧔꧑. ꦱꦲꦺꦴꦝ꧀ꦞꦒ꧀ꦒꦲꦶꦠꦺꦴꦠꦶ ꦱꦲ ꦨꦟ꧀ꦝꦺꦤ ꦒꦲꦶꦠꦺꦴ. ꦄꦠ꧀ꦠꦤꦺꦴ ꦩꦶꦕ꧀ꦖꦴꦒꦴꦲꦺꦤ ꦭꦺꦱꦎꦝ꧀ꦝꦤꦺꦤ ꦮꦴ ꦥꦫꦶꦥꦸꦟ꧀ꦟꦠ꧀ꦡꦩ꧀ꦥꦶ ꦥꦜꦩꦥꦚ꧀ꦚꦠ꧀ꦠꦶꦁ ꦄꦚ꧀ꦚꦡꦴ ꦏꦫꦺꦴꦤ꧀ꦠꦺꦴ ‘‘ꦠꦚ꧀ꦕ ꦑꦺꦴ ꦩꦤꦸꦱ꧀ꦱꦶꦠ꧀ꦡꦶꦪꦴ, ꦤꦺꦴ ꦠꦶꦫꦕ꧀ꦖꦴꦤꦒꦠꦴꦪꦴ’’ꦠꦶ ꦄꦴꦲ. ꦢꦱ꧀ꦱꦤꦤ꧀ꦠꦶ ꦱꦴꦤꦸꦫꦴꦒꦢꦱ꧀ꦱꦤꦁ. ꦒꦲꦟꦤ꧀ꦠꦶ ꦄꦤꦸꦫꦴꦒꦮꦱꦺꦤꦺꦮ ꦲꦠ꧀ꦡꦺꦤ ꦒꦲꦟꦁ. ꦄꦴꦩꦱꦤꦁ ꦄꦠ꧀ꦠꦤꦺꦴ ꦱꦫꦷꦫꦺꦤ ꦠꦱ꧀ꦱꦴ ꦱꦫꦷꦫꦱ꧀ꦱ ꦈꦥꦫꦶ ꦄꦴꦩꦱꦤꦩꦠ꧀ꦠꦁ, ꦦꦸꦱꦤꦁ ꦠꦠꦺꦴ ꦢꦭ꦳꧀ꦲꦠꦫꦁ ꦏꦠ꧀ꦮꦴ ꦱꦁꦦꦸꦱꦤꦁ, ꦓꦛ꧀ꦛꦤꦁ ꦠꦠꦺꦴꦥꦶ ꦢꦭ꦳꧀ꦲꦠꦫꦁ ꦏꦠ꧀ꦮꦴ ꦱꦫꦷꦫꦺꦤ ꦱꦫꦷꦫꦱ꧀ꦱ ꦓꦛ꧀ꦛꦤꦁ. ꦠꦁ ꦱꦧ꧀ꦧꦩ꧀ꦥꦷꦠꦶ ꦢꦱ꧀ꦱꦤꦴꦢꦶ ꦱꦧ꧀ꦧꦩ꧀ꦥꦶ.

꧔꧒. ꦢꦭ꦳꧀ꦲꦠꦫꦁ ꦱꦶꦏ꧀ꦑꦴꦥꦢꦩꦏꦴꦱꦷꦠꦶ ꦆꦩꦱ꧀ꦩꦶꦁ ꦄꦣꦶꦏꦴꦫꦺ ꦄꦤꦸꦥꦚ꧀ꦚꦠ꧀ꦠꦶꦪꦴ ꦱꦶꦏ꧀ꦑꦴꦥꦢꦱ꧀ꦱ ꦢꦭ꦳꧀ꦲꦷꦏꦫꦟꦁ ꦱꦶꦡꦶꦭꦏꦫꦟꦚ꧀ꦕ ꦥꦱꦔ꧀ꦒꦠꦺꦴ ꦄꦴꦥꦤ꧀ꦤꦁ ꦮꦶꦨꦗꦶꦠ꧀ꦮꦴ ꦢꦱ꧀ꦱꦺꦠꦸꦏꦴꦩꦺꦴ ‘‘ꦢꦸꦮꦶꦣꦚ꧀ꦲꦶ ꦱꦶꦏ꧀ꦑꦴꦥꦢ’’ꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦪꦱ꧀ꦱ ꦱꦕꦶꦠ꧀ꦠꦏꦱ꧀ꦱ ꦱꦶꦏ꧀ꦑꦴꦥꦢꦱ꧀ꦱ ꦕꦶꦠ꧀ꦠꦁ ꦄꦏꦸꦱꦭꦩꦺꦮ ꦲꦺꦴꦠꦶ, ꦠꦁ ꦭꦺꦴꦏꦮꦗ꧀ꦗꦁ. ꦪꦱ꧀ꦱ ꦱꦕꦶꦠ꧀ꦠꦏꦴꦕꦶꦠ꧀ꦠꦏꦥꦏ꧀ꦑꦱꦲꦶꦠꦱ꧀ꦱ ꦄꦕꦶꦠ꧀ꦠꦏꦱ꧀ꦱ ꦕ ꦱꦕꦶꦠ꧀ꦠꦏꦥꦏ꧀ꦑꦺ ꦕꦶꦠ꧀ꦠꦁ ꦄꦏꦸꦱꦭꦩꦺꦮ ꦲꦺꦴꦠꦶ, ꦠꦩ꧀ꦥꦶ ꦱꦸꦫꦴꦥꦴꦤꦴꦢꦶ ꦭꦺꦴꦏꦮꦗ꧀ꦗꦤ꧀ꦠꦶ ꦆꦩꦩꦠ꧀ꦡꦁ ꦱꦩ꧀ꦥꦶꦟ꧀ꦝꦺꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦪꦱ꧀ꦱ ꦱꦕꦶꦠ꧀ꦠꦏꦥꦏ꧀ꦑꦺ ꦕꦶꦠ꧀ꦠꦁ ꦄꦏꦸꦱꦭꦩꦺꦮ ꦲꦺꦴꦠꦶ, ꦠꦁ ꦭꦺꦴꦏꦮꦗ꧀ꦗꦁ ꦤꦴꦩꦴ’’ꦠꦶ ꦮꦸꦠ꧀ꦠꦁ. ‘‘ꦱꦕꦶꦠ꧀ꦠꦏꦥꦏ꧀ꦑꦺ’’ꦠꦶ ꦲꦶ ꦆꦢꦁ ꦮꦕꦤꦁ ꦄꦕꦶꦠ꧀ꦠꦏꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦤ ꦲꦶ ꦌꦏꦁꦱꦠꦺꦴ ꦱꦕꦶꦠ꧀ꦠꦏꦱ꧀ꦱ ‘‘ꦱꦕꦶꦠ꧀ꦠꦏꦥꦏ꧀ꦑꦺ’’ꦠꦶ ꦮꦶꦱꦺꦱꦤꦺ ꦥꦪꦺꦴꦗꦤꦁ ꦄꦠ꧀ꦡꦶ. ꦱꦕꦶꦠ꧀ꦠꦏꦥꦏ꧀ꦑꦺꦠꦶ ꦕ ꦮꦠ꧀ꦡꦸꦮꦷꦠꦶꦏ꧀ꦏꦩꦮꦶꦗꦴꦤꦤꦕꦶꦠ꧀ꦠꦺꦤ ‘‘ꦱꦕꦶꦠ꧀ꦠꦏꦥꦏ꧀ꦑꦺ’’ꦠꦶ ꦒꦲꦺꦠꦧ꧀ꦧꦁ, ꦤ ꦥꦟ꧀ꦟꦠ꧀ꦠꦶꦮꦶꦗꦴꦤꦤꦕꦶꦠ꧀ꦠꦺꦤ. ꦪꦢꦶ ꦲꦶ ‘‘ꦤ ꦮꦛ꧀ꦛꦠꦷ’’ꦠꦶ ꦥꦟ꧀ꦟꦠ꧀ꦠꦶꦮꦶꦗꦴꦤꦤꦕꦶꦠ꧀ꦠꦺꦤꦥꦶ ꦪꦱ꧀ꦱ ꦱꦶꦏ꧀ꦑꦴꦥꦢꦱ꧀ꦱ ꦱꦕꦶꦠ꧀ꦠꦏꦥꦏ꧀ꦑꦺ ꦕꦶꦠ꧀ꦠꦁ ꦄꦏꦸꦱꦭꦩꦺꦮ, ꦠꦩ꧀ꦥꦶ ꦭꦺꦴꦏꦮꦗ꧀ꦗꦤ꧀ꦠꦶ ꦮꦢꦺꦪ꧀ꦪ, ꦱꦧ꧀ꦧꦺꦱꦁ ꦥꦟ꧀ꦟꦠ꧀ꦠꦶꦮꦗ꧀ꦗꦱꦶꦏ꧀ꦑꦴꦥꦢꦴꦤꦩ꧀ꦥꦶ ꦭꦺꦴꦏꦮꦗ꧀ꦗꦠꦴ ꦄꦴꦥꦗ꧀ꦗꦺꦪ꧀ꦪ ꦥꦟ꧀ꦟꦠ꧀ꦠꦶꦮꦗ꧀ꦗꦴꦤꦩ꧀ꦥꦶ ‘‘ꦤ ꦮꦛ꧀ꦛꦠꦷ’’ꦠꦶ ꦗꦴꦤꦶꦠ꧀ꦮꦴ ꦮꦷꦠꦶꦏ꧀ꦏꦩꦺ ꦄꦏꦸꦱꦭꦕꦶꦠ꧀ꦠꦱ꧀ꦱꦺꦮ ꦱꦩ꧀ꦨꦮꦠꦺꦴ. ꦤ ꦲꦶ ꦨꦒꦮꦠꦺꦴ ꦄꦴꦟꦁ ꦗꦴꦤꦶꦠ꧀ꦮꦴ ꦩꦢ꧀ꦢꦤ꧀ꦠꦱ꧀ꦱ ꦏꦸꦱꦭꦕꦶꦠ꧀ꦠꦁ ꦈꦥ꧀ꦥꦗ꧀ꦗꦠꦶ ꦄꦤꦴꦢꦫꦶꦪꦮꦱꦺꦤ ꦥꦛꦶꦓꦕꦶꦠ꧀ꦠꦱ꧀ꦱꦺꦮ ꦈꦥ꧀ꦥꦗ꧀ꦗꦤꦠꦺꦴ.

ꦄꦥꦶꦕꦺꦠ꧀ꦡ ‘‘ꦱꦕꦶꦠ꧀ꦠꦏꦥꦏ꧀ꦑꦺ ꦕꦶꦠ꧀ꦠꦁ ꦄꦏꦸꦱꦭꦩꦺꦮꦴ’’ꦠꦶ ꦮꦕꦤꦠꦺꦴ ꦄꦕꦶꦠ꧀ꦠꦏꦱ꧀ꦱ ꦮꦠ꧀ꦡꦸꦄꦗꦴꦤꦤꦮꦱꦺꦤ ꦄꦕꦶꦠ꧀ꦠꦏꦥꦏ꧀ꦑꦺ ꦕꦶꦠ꧀ꦠꦁ ꦄꦏꦸꦱꦭꦩꦺꦮꦴꦠꦶ ꦄꦪꦁ ꦤꦶꦪꦩꦺꦴ ꦤꦠ꧀ꦡꦷꦠꦶ ꦮꦶꦚ꧀ꦚꦴꦪꦠꦶ. ꦪꦢꦶ ꦲꦶ ꦄꦕꦶꦠ꧀ꦠꦏꦱ꧀ꦱ ꦄꦕꦶꦠ꧀ꦠꦏꦥꦏ꧀ꦑꦺꦥꦶ ꦕꦶꦠ꧀ꦠꦁ ꦄꦏꦸꦱꦭꦩꦺꦮ ꦱꦶꦪꦴ, ‘‘ꦱꦕꦶꦠ꧀ꦠꦏꦥꦏ꧀ꦑꦺ’’ꦠꦶ ꦆꦢꦁ ꦮꦶꦱꦺꦱꦤꦁ ꦤꦶꦫꦠ꧀ꦡꦏꦁ ꦱꦶꦪꦴ. ‘‘ꦪꦱ꧀ꦱ ꦕꦶꦠ꧀ꦠꦁ ꦄꦏꦸꦱꦭꦩꦺꦮ ꦲꦺꦴꦠꦶ, ꦠꦁ ꦭꦺꦴꦏꦮꦗ꧀ꦗ’’ꦤ꧀ꦠꦶ ꦌꦠ꧀ꦠꦏꦺ ꦮꦸꦠ꧀ꦠꦺ ꦱꦸꦫꦴꦠꦶ ꦄꦗꦴꦤꦶꦠ꧀ꦮꦴ ꦥꦶꦮꦤ꧀ꦠꦱ꧀ꦱ ꦒꦤ꧀ꦣꦮꦟ꧀ꦟꦏꦴꦢꦶꦨꦴꦮꦁ ꦄꦗꦴꦤꦶꦠ꧀ꦮꦴ ꦠꦴꦤꦶ ꦭꦶꦩ꧀ꦥꦤ꧀ꦠꦷꦤꦁ ꦨꦶꦏ꧀ꦑꦸꦤꦷꦤꦚ꧀ꦕ ꦮꦶꦤꦴꦥꦶ ꦄꦏꦸꦱꦭꦕꦶꦠ꧀ꦠꦺꦤ ꦄꦴꦥꦠ꧀ꦠꦶꦱꦩ꧀ꦨꦮꦠꦺꦴ ꦌꦏꦤ꧀ꦠꦴꦏꦸꦱꦭꦁ ꦱꦕꦶꦠ꧀ꦠꦏꦱꦶꦏ꧀ꦑꦴꦥꦢꦁ ꦜꦥꦺꦠ꧀ꦮꦴ ꦱꦸꦫꦴꦥꦴꦤꦴꦢꦶꦄꦕꦶꦠ꧀ꦠꦏꦱꦶꦏ꧀ꦑꦴꦥꦢꦴꦤꦁ ꦭꦺꦴꦏꦮꦗ꧀ꦗꦠꦴ ꦤ ꦱꦶꦪꦴꦠꦶ ꦠꦺꦱꦩ꧀ꦥꦶ ꦱꦔ꧀ꦒꦟ꧀ꦲꦠ꧀ꦡꦁ ‘‘ꦪꦱ꧀ꦱ ꦱꦕꦶꦠ꧀ꦠꦏꦥꦏ꧀ꦑꦺ ꦕꦶꦠ꧀ꦠꦁ ꦄꦏꦸꦱꦭꦩꦺꦮ ꦲꦺꦴꦠꦶ, ꦠꦁ ꦭꦺꦴꦏꦮꦗ꧀ꦗ’’ꦤ꧀ꦠꦶ ꦮꦸꦠ꧀ꦠꦁ. ꦠꦺꦤꦺꦮ ꦕꦹꦭ꦳ꦒꦟ꧀ꦜꦶꦥꦢꦺ ꦩꦗ꧀ꦙꦶꦩꦒꦟ꧀ꦜꦶꦥꦢꦺ ꦕ ꦮꦸꦠ꧀ꦠꦁ ‘‘ꦌꦠꦁ ꦱꦠ꧀ꦠꦁ ꦩꦴꦫꦺꦱ꧀ꦱꦴꦩꦷꦠꦶ ꦠꦱ꧀ꦩꦶꦁꦪꦺꦮ ꦥꦢꦺꦱꦺ ꦤꦶꦥꦤ꧀ꦤꦁ ꦄꦚ꧀ꦚꦁ ꦩꦴꦫꦺꦤ꧀ꦠꦱ꧀ꦱ ꦥꦴꦟꦱꦴꦩꦚ꧀ꦚꦱ꧀ꦱ ꦄꦠ꧀ꦡꦶꦠꦴꦪ ꦪꦡꦴ ꦥꦴꦟꦴꦠꦶꦥꦴꦠꦺꦴ ꦲꦺꦴꦠꦶ, ꦌꦮꦁ ꦌꦠꦁ ꦩꦗ꧀ꦗꦁ ꦥꦶꦮꦶꦱ꧀ꦱꦴꦩꦷꦠꦶ ꦄꦚ꧀ꦚꦁ ꦩꦗ꧀ꦗꦁ ꦥꦶꦮꦤ꧀ꦠꦱ꧀ꦱ ꦩꦗ꧀ꦗꦱꦴꦩꦚ꧀ꦚꦱ꧀ꦱ ꦄꦠ꧀ꦡꦶꦠꦴꦪ ꦄꦏꦸꦱꦭꦩꦺꦮ ꦲꦺꦴꦠꦶ. ꦪꦡꦴ ꦥꦤ ꦏꦛ꧀ꦜꦱꦚ꧀ꦚꦴꦪ ꦱꦥ꧀ꦥꦁ ꦓꦴꦠꦺꦤ꧀ꦠꦱ꧀ꦱ ꦥꦴꦟꦴꦠꦶꦥꦴꦠꦺꦴ ꦤ ꦲꦺꦴꦠꦶ, ꦌꦮꦁ ꦤꦴꦭ꦳ꦶꦏꦺꦫꦥꦴꦤꦱꦚ꧀ꦚꦴꦪ ꦩꦗ꧀ꦗꦁ ꦥꦶꦮꦤ꧀ꦠꦱ꧀ꦱ ꦄꦏꦸꦱꦭꦁ ꦤ ꦲꦺꦴꦠꦷ’’ꦠꦶ.

ꦏꦺꦕꦶ ꦥꦤ ꦮꦢꦤ꧀ꦠꦶ ‘‘ꦱꦴꦩꦟꦺꦫꦱ꧀ꦱ ꦱꦸꦫꦴꦠꦶ ꦄꦗꦴꦤꦶꦠ꧀ꦮꦴ ꦥꦶꦮꦤ꧀ꦠꦱ꧀ꦱ ꦥꦴꦫꦴꦗꦶꦏꦺꦴ ꦤꦠ꧀ꦡꦶ, ꦄꦏꦸꦱꦭꦁ ꦥꦤ ꦲꦺꦴꦠꦷ’’ꦠꦶ, ꦠꦁ ꦠꦺꦱꦁ ꦩꦠꦶꦩꦠ꧀ꦠꦁ. ‘‘ꦨꦶꦏ꧀ꦑꦸꦤꦺꦴ ꦄꦗꦴꦤꦶꦠ꧀ꦮꦴꦥꦶ ꦧꦷꦗꦠꦺꦴ ꦥꦛ꧀ꦜꦴꦪ ꦩꦗ꧀ꦗꦁ ꦥꦶꦮꦤ꧀ꦠꦱ꧀ꦱ ꦥꦴꦕꦶꦠ꧀ꦠꦶꦪꦁ, ꦱꦴꦩꦟꦺꦫꦺꦴ ꦗꦴꦤꦶꦠ꧀ꦮꦴ ꦥꦶꦮꦤ꧀ꦠꦺꦴ ꦱꦷꦭꦨꦺꦢꦁ ꦄꦴꦥꦗ꧀ꦗꦠꦶ, ꦤ ꦄꦗꦴꦤꦶꦠ꧀ꦮꦴ’’ꦠꦶ ꦌꦠ꧀ꦠꦏꦩꦺꦮ ꦲꦶ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦁ, ‘‘ꦄꦏꦸꦱꦭꦁ ꦥꦤ ꦲꦺꦴꦠꦷ’’ꦠꦶ ꦤ ꦮꦸꦠ꧀ꦠꦤ꧀ꦠꦶ. ꦄꦥꦫꦩ꧀ꦥꦶ ꦮꦢꦤ꧀ꦠꦶ ‘‘ꦄꦗꦴꦤꦶꦠ꧀ꦮꦴ ꦥꦶꦮꦤ꧀ꦠꦱ꧀ꦱꦥꦶ ꦱꦺꦴꦠꦴꦥꦤ꧀ꦤꦱ꧀ꦱ ꦩꦸꦑꦁ ꦱꦸꦫꦴ ꦤ ꦥꦮꦶꦱꦠꦶ ꦏꦩ꧀ꦩꦥꦡꦥ꧀ꦥꦠ꧀ꦠꦄꦏꦸꦱꦭꦕꦶꦠ꧀ꦠꦺꦤꦺꦮ ꦥꦴꦠꦧ꧀ꦧꦠꦺꦴ’’ꦠꦶ, ꦠꦩ꧀ꦥꦶ ꦤ ꦱꦸꦤ꧀ꦢꦫꦁ. ꦧꦺꦴꦣꦶꦱꦠ꧀ꦠꦺ ꦏꦸꦕ꧀ꦖꦶꦒꦠꦺ ꦧꦺꦴꦣꦶꦱꦠ꧀ꦠꦩꦴꦠꦸ ꦱꦷꦭꦁ ꦮꦶꦪ ꦲꦶ ꦆꦢꦩ꧀ꦥꦶ ꦄꦫꦶꦪꦱꦴꦮꦏꦴꦤꦁ ꦣꦩ꧀ꦩꦠꦴꦱꦶꦢ꧀ꦣꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦠꦺꦤꦺꦮ ꦢꦷꦓꦤꦶꦏꦴꦪꦺ ꦏꦹꦛꦢꦤ꧀ꦠꦱꦸꦠ꧀ꦠꦛ꧀ꦜꦏꦡꦴꦪꦁ (ꦢꦷ. ꦤꦶ. ꦄꦛ꧀ꦜ. ꧑.꧓꧕꧒) ꦮꦸꦠ꧀ꦠꦁ –

‘‘ꦨꦮꦤ꧀ꦠꦫꦺꦥꦶ ꦲꦶ ꦄꦫꦶꦪꦱꦴꦮꦏꦺꦴ ꦗꦷꦮꦶꦠꦲꦺꦠꦸꦥꦶ ꦤꦺꦮ ꦥꦴꦟꦁ ꦲꦤꦠꦶ, ꦤ ꦱꦸꦫꦁ ꦥꦶꦮꦠꦶ. ꦱꦕꦺꦥꦶꦱ꧀ꦱ ꦱꦸꦫꦚ꧀ꦕ ꦑꦷꦫꦚ꧀ꦕ ꦩꦶꦱ꧀ꦱꦺꦠ꧀ꦮꦴ ꦩꦸꦑꦺ ꦥꦏ꧀ꦑꦶꦥꦤ꧀ꦠꦶ, ꦑꦷꦫꦩꦺꦮ ꦥꦮꦶꦱꦠꦶ, ꦤ ꦱꦸꦫꦴ. ꦪꦡꦴ ꦏꦶꦁ? ꦪꦡꦴ ꦏꦺꦴꦚ꧀ꦕꦱꦏꦸꦟꦴꦤꦁ ꦑꦷꦫꦩꦶꦱ꧀ꦱꦏꦺ ꦈꦢꦏꦺ ꦑꦷꦫꦩꦺꦮ ꦥꦮꦶꦱꦠꦶ, ꦤ ꦈꦢꦏꦁ. ꦆꦢꦁ ꦪꦺꦴꦤꦶꦱꦶꦢ꧀ꦣꦤ꧀ꦠꦶ ꦕꦺ? ꦆꦢꦩ꧀ꦥꦶ ꦣꦩ꧀ꦩꦠꦴꦱꦶꦢ꧀ꦣꦤ꧀ꦠꦶ ꦮꦺꦢꦶꦠꦧ꧀ꦧ’’ꦤ꧀ꦠꦶ.

ꦪꦢꦶ ꦌꦮꦁ ꦱꦸꦫꦴꦥꦴꦤꦱꦶꦏ꧀ꦑꦴꦥꦢꦛ꧀ꦜꦏꦡꦴꦪꦁ (ꦥꦴꦕꦶ. ꦄꦛ꧀ꦜ. ꧓꧒꧙) ‘‘ꦮꦠ꧀ꦡꦸꦄꦗꦴꦤꦤꦠꦴꦪ ꦕꦺꦠ꧀ꦡ ꦄꦕꦶꦠ꧀ꦠꦏꦠꦴ ꦮꦺꦢꦶꦠꦧ꧀ꦧꦴ, ꦄꦏꦸꦱꦭꦺꦤꦺꦮ ꦥꦴꦠꦧ꧀ꦧꦠꦴꦪ ꦭꦺꦴꦏꦮꦗ꧀ꦗꦠꦴ’’ꦠꦶ ꦏꦱ꧀ꦩꦴ ꦮꦸꦠ꧀ꦠꦁ? ꦤꦴꦪꦁ ꦢꦺꦴꦱꦺꦴ. ꦄꦪꦚ꧀ꦲꦺꦠ꧀ꦡ ꦄꦣꦶꦥ꧀ꦥꦴꦪꦺꦴ – ꦱꦕꦶꦠ꧀ꦠꦏꦥꦏ꧀ꦑꦺ ꦄꦏꦸꦱꦭꦕꦶꦠ꧀ꦠꦺꦤꦺꦮ ꦥꦴꦠꦧ꧀ꦧꦠꦴꦪ ꦭꦺꦴꦏꦮꦗ꧀ꦗꦠꦴꦠꦶ. ꦆꦩꦶꦤꦴꦪꦺꦮ ꦲꦶ ꦄꦣꦶꦥ꧀ꦥꦴꦪꦺꦤ ꦄꦚ꧀ꦚꦺꦱꦸꦥꦶ ꦭꦺꦴꦏꦮꦗ꧀ꦗꦺꦱꦸ ꦄꦕꦶꦠ꧀ꦠꦏꦱꦶꦏ꧀ꦑꦴꦥꦢꦺꦱꦸ ꦄꦏꦸꦱꦭꦕꦶꦠ꧀ꦠꦠꦴꦪꦺꦮ ꦮꦸꦠ꧀ꦠꦴ, ꦤ ꦥꦤ ꦱꦕꦶꦠ꧀ꦠꦏꦠꦴ. ꦠꦺꦤꦺꦮ ꦨꦶꦏ꧀ꦑꦸꦤꦷꦮꦶꦨꦔ꧀ꦒꦛ꧀ꦜꦏꦡꦴꦪꦁ (ꦥꦴꦕꦶ. ꦄꦛ꧀ꦜ. ꧑꧒꧒꧗) ꦮꦸꦠ꧀ꦠꦁ –

‘‘ꦒꦶꦫꦒ꧀ꦒꦱꦩꦗ꧀ꦗꦁ ꦕꦶꦠ꧀ꦠꦴꦒꦴꦫꦱꦶꦏ꧀ꦑꦴꦥꦢꦁ ꦱꦔ꧀ꦓꦴꦟꦶ ꦆꦠ꧀ꦡꦴꦭꦔ꧀ꦏꦴꦫꦺꦴ ꦒꦤ꧀ꦣꦏꦮꦟ꧀ꦟꦏꦺꦴ ꦮꦴꦱꦶꦠꦏꦥꦶꦚ꧀ꦚꦴꦏꦺꦴ ꦨꦶꦏ꧀ꦑꦸꦤꦷꦄꦴꦢꦷꦲꦶ ꦈꦩ꧀ꦩꦢ꧀ꦢꦤꦥꦫꦶꦩꦢ꧀ꦢꦤꦴꦠꦶ ꦆꦩꦴꦤꦶ ꦢꦱ ꦱꦶꦏ꧀ꦑꦴꦥꦢꦴꦤꦶ ꦄꦕꦶꦠ꧀ꦠꦏꦴꦤꦶ ꦭꦺꦴꦏꦮꦗ꧀ꦗꦴꦤꦶ ꦄꦏꦸꦱꦭꦕꦶꦠ꧀ꦠꦴꦤꦷ’’ꦠꦶ,

ꦄꦪꦁ ꦥꦤꦺꦠ꧀ꦡ ꦄꦣꦶꦥ꧀ꦥꦴꦪꦺꦴ – ꦮꦶꦤꦴꦥꦶ ꦕꦶꦠ꧀ꦠꦺꦤ ꦄꦴꦥꦗ꧀ꦗꦶꦠꦧ꧀ꦧꦠ꧀ꦠꦴ ꦄꦕꦶꦠ꧀ꦠꦏꦴꦤꦶ, ꦕꦶꦠ꧀ꦠꦺ ꦥꦤ ꦱꦠꦶ ꦄꦏꦸꦱꦭꦺꦤꦺꦮ ꦄꦴꦥꦗ꧀ꦗꦶꦠꦧ꧀ꦧꦠ꧀ꦠꦴ ꦭꦺꦴꦏꦮꦗ꧀ꦗꦴꦤꦶ ꦕꦺꦮ ꦄꦏꦸꦱꦭꦕꦶꦠ꧀ꦠꦴꦤꦶ ꦕꦴꦠꦶ. ꦠꦱ꧀ꦩꦴ ꦨꦶꦏ꧀ꦑꦸꦮꦶꦨꦔ꧀ꦒꦺ ꦄꦴꦒꦠꦴꦤꦶ ꦱꦸꦫꦴꦥꦴꦤꦈꦪ꧀ꦪꦸꦠ꧀ꦠꦈꦪ꧀ꦪꦺꦴꦣꦶꦏꦱꦶꦏ꧀ꦑꦴꦥꦢꦴꦤꦶ ꦠꦷꦟꦶ, ꦨꦶꦏ꧀ꦑꦸꦤꦷꦮꦶꦨꦔ꧀ꦒꦺ ꦄꦴꦒꦠꦴꦤꦶ ꦒꦶꦫꦒ꧀ꦒꦱꦩꦗ꧀ꦗꦴꦢꦷꦤꦶ ꦢꦱꦴꦠꦶ ꦆꦩꦺꦱꦁ ꦠꦺꦫꦱꦤ꧀ꦤꦁ ꦄꦕꦶꦠ꧀ꦠꦏꦱꦶꦏ꧀ꦑꦴꦥꦢꦴꦤꦁ ꦭꦺꦴꦏꦮꦗ꧀ꦗꦠꦴꦢꦱ꧀ꦱꦤꦠ꧀ꦡꦁ ‘‘ꦱꦕꦶꦠ꧀ꦠꦏꦥꦏ꧀ꦑꦺ’’ꦠꦶ ꦆꦢꦁ ꦮꦶꦱꦺꦱꦤꦁ ꦏꦠꦤ꧀ꦠꦶ ꦤꦶꦛ꧀ꦜꦩꦺꦠ꧀ꦡ ꦒꦤ꧀ꦠꦧ꧀ꦧꦁ. ꦪꦱ꧀ꦩꦴ ꦥꦤ ꦥꦟ꧀ꦟꦠ꧀ꦠꦶꦮꦗ꧀ꦗꦱ꧀ꦱ ꦮꦠ꧀ꦡꦸꦮꦷꦠꦶꦏ꧀ꦏꦩꦮꦶꦗꦴꦤꦤꦕꦶꦠ꧀ꦠꦺꦤ ꦱꦕꦶꦠ꧀ꦠꦏꦥꦏ꧀ꦑꦺ ꦕꦶꦠ꧀ꦠꦁ ꦱꦶꦪꦴ ꦏꦸꦱꦭꦁ, ꦱꦶꦪꦴ ꦄꦏꦸꦱꦭꦁ, ꦱꦶꦪꦴ ꦄꦧ꧀ꦪꦴꦏꦠꦁ, ꦠꦱ꧀ꦩꦴ ꦠꦱ꧀ꦱ ꦱꦕꦶꦠ꧀ꦠꦏꦥꦏ꧀ꦑꦺ ꦕꦶꦠ꧀ꦠꦁ ꦄꦏꦸꦱꦭꦩꦺꦮꦴꦠꦶ ꦄꦪꦁ ꦤꦶꦪꦩꦺꦴ ꦤꦠ꧀ꦡꦷꦠꦶ ꦱꦺꦱꦁ ꦥꦟ꧀ꦟꦠ꧀ꦠꦶꦮꦗ꧀ꦗꦤ꧀ꦠꦶ ꦮꦸꦠ꧀ꦠꦁ.

ꦫꦸꦤ꧀ꦣꦤ꧀ꦠꦷꦠꦶ ꦮꦷꦠꦶꦏ꧀ꦏꦩꦁ ꦫꦸꦤ꧀ꦣꦤ꧀ꦠꦷ. ꦢ꧀ꦮꦴꦫꦁ ꦥꦶꦢꦲꦤ꧀ꦠꦷꦠꦶ ꦮꦷꦠꦶꦏ꧀ꦏꦩꦭꦺꦱꦱ꧀ꦱ ꦢ꧀ꦮꦴꦫꦁ ꦥꦶꦢꦲꦤ꧀ꦠꦷ. ꦱꦺꦴꦠꦁ ꦥꦕ꧀ꦖꦶꦤ꧀ꦢꦩꦴꦤꦴꦠꦶ ꦈꦥꦫꦹꦥꦫꦶ ꦮꦷꦠꦶꦏ꧀ꦏꦩꦱꦺꦴꦠꦁ ꦥꦕ꧀ꦖꦶꦤ꧀ꦢꦩꦴꦤꦴ. ꦄꦡ ꦮꦴ ꦫꦸꦤ꧀ꦣꦤ꧀ꦠꦷꦠꦶ ꦄꦤꦴꦥꦠ꧀ꦠꦶꦭꦺꦱꦁ ꦫꦸꦤ꧀ꦣꦤ꧀ꦠꦷ. ꦢ꧀ꦮꦴꦫꦁ ꦥꦶꦢꦲꦤ꧀ꦠꦷꦠꦶ ꦄꦤꦴꦥꦠ꧀ꦠꦶꦭꦺꦱꦱ꧀ꦱ ꦢ꧀ꦮꦴꦫꦁ ꦥꦶꦢꦲꦤ꧀ꦠꦷ. ꦱꦺꦴꦠꦁ ꦥꦕ꧀ꦖꦶꦤ꧀ꦢꦩꦴꦤꦴꦠꦶ ꦄꦤꦴꦥꦠ꧀ꦠꦶꦱꦺꦴꦠꦁ ꦥꦕ꧀ꦖꦶꦤ꧀ꦢꦩꦴꦤꦴ, ꦄꦴꦥꦠ꧀ꦠꦶꦩꦺꦮ ꦏꦸꦫꦸꦩꦴꦤꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦤꦤꦸ ꦕ ꦭꦺꦴꦏꦮꦗ꧀ꦗꦺ ꦏꦴꦕꦶ ꦄꦤꦸꦥꦚ꧀ꦚꦠ꧀ꦠꦶ ꦈꦥ꧀ꦥꦗ꧀ꦗꦩꦴꦤꦴ ꦱꦶꦡꦶꦭꦁ ꦏꦫꦺꦴꦤ꧀ꦠꦷ ꦈꦥ꧀ꦥꦗ꧀ꦗꦠꦶ, ꦠꦱ꧀ꦩꦴ ‘‘ꦭꦺꦴꦏꦮꦗ꧀ꦗꦺ ꦄꦤꦸꦥꦚ꧀ꦚꦠ꧀ꦠꦶ ꦈꦥ꧀ꦥꦗ꧀ꦗꦩꦴꦤꦴ…ꦥꦺ… ꦒꦴꦭ꦳꧀ꦲꦠꦫꦁ ꦏꦫꦺꦴꦤ꧀ꦠꦷ ꦈꦥ꧀ꦥꦗ꧀ꦗꦠꦷ’’ꦠꦶ ꦆꦢꦁ ꦏꦱ꧀ꦩꦴ ꦮꦸꦠ꧀ꦠꦤ꧀ꦠꦶ ꦄꦴꦲ ‘‘ꦄꦚ꧀ꦚꦠ꧀ꦫ ꦄꦣꦶꦩꦴꦤꦴ ꦄꦚ꧀ꦚꦠ꧀ꦫ ꦱꦸꦥꦶꦤꦤ꧀ꦠꦴ’’ꦠꦶꦄꦴꦢꦶ. ‘‘ꦄꦚ꧀ꦚꦠ꧀ꦫ ꦄꦣꦶꦩꦴꦤꦴ’’ꦠꦶ ꦆꦩꦶꦱ꧀ꦱꦴ ꦄꦤꦸꦥꦚ꧀ꦚꦠ꧀ꦠꦶꦪꦴ ‘‘ꦮꦷꦠꦶꦏ꧀ꦏꦩꦴꦨꦴꦮꦴ’’ꦠꦶ ꦏꦴꦫꦟꦁ ꦮꦸꦠ꧀ꦠꦁ, ‘‘ꦄꦚ꧀ꦚꦠ꧀ꦫ ꦱꦸꦥꦶꦤꦤ꧀ꦠꦴ’’ꦠꦶ ꦆꦩꦶꦱ꧀ꦱꦴ ‘‘ꦄꦧ꧀ꦧꦺꦴꦲꦴꦫꦶꦏꦠ꧀ꦠꦴ’’ꦠꦶ ꦏꦴꦫꦟꦁ ꦮꦸꦠ꧀ꦠꦁ. ꦠꦠ꧀ꦡ ꦮꦷꦠꦶꦏ꧀ꦏꦩꦴꦨꦴꦮꦴꦠꦶ ꦥꦴꦥꦶꦕ꧀ꦖꦺꦴ ꦆꦕ꧀ꦖꦴꦥꦏꦠꦺꦴꦠꦶꦄꦴꦢꦶꦮꦷꦠꦶꦏ꧀ꦏꦩꦴꦨꦴꦮꦴ. ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦺ ꦲꦶ ‘‘ꦥꦴꦥꦶꦕ꧀ꦖꦺꦴ ꦆꦕ꧀ꦖꦴꦥꦏꦠꦺꦴ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦁ ꦈꦭ꧀ꦭꦥꦠꦷ’’ꦠꦶ (ꦩꦲꦴꦮ. ꧑꧒꧙) ꦮꦕꦤꦠꦺꦴ ꦮꦶꦱꦁꦮꦴꦢꦤꦴꦣꦶꦥ꧀ꦥꦴꦪꦺꦤ ꦩꦸꦱꦴ ꦨꦟꦤ꧀ꦠꦺꦴ ꦥꦴꦫꦴꦗꦶꦏꦺꦴ ꦲꦺꦴꦠꦶ. ꦄꦪꦁ ꦥꦤ ꦄꦣꦶꦩꦴꦤꦺꦤ ꦄꦣꦶꦒꦠꦱꦚ꧀ꦚꦷ ꦲꦸꦠ꧀ꦮꦴ ꦈꦭ꧀ꦭꦥꦠꦶ, ꦤ ꦱꦶꦏ꧀ꦑꦴꦥꦢꦁ ꦮꦷꦠꦶꦏ꧀ꦏꦩꦶꦠꦸꦏꦴꦩꦺꦴ, ꦠꦱ꧀ꦩꦴ ‘‘ꦄꦚ꧀ꦚꦠ꧀ꦫ ꦄꦣꦶꦩꦴꦤꦴ’’ꦠꦶ ꦄꦪꦁ ꦄꦤꦸꦥꦚ꧀ꦚꦠ꧀ꦠꦶ ꦈꦥ꧀ꦥꦗ꧀ꦗꦩꦴꦤꦴ ꦮꦷꦠꦶꦏ꧀ꦏꦩꦴꦨꦴꦮꦴ ꦄꦤꦴꦥꦠ꧀ꦠꦶꦏꦫꦴ ꦗꦴꦠꦴ. ꦄꦧ꧀ꦧꦺꦴꦲꦴꦫꦶꦏꦠ꧀ꦠꦴꦠꦶ ꦱꦸꦥꦶꦤꦤ꧀ꦠꦺ ꦮꦶꦗ꧀ꦗꦩꦴꦤꦴꦪꦥꦶ ꦕꦺꦠꦤꦴꦪ ꦮꦷꦠꦶꦏ꧀ꦏꦩꦶꦕ꧀ꦖꦴꦪ ꦕ ꦄꦧ꧀ꦧꦺꦴꦲꦴꦫꦶꦏꦠ꧀ꦠꦴ. ꦏꦶꦚ꧀ꦕꦴꦥꦶ ꦲꦶ ꦱꦸꦥꦶꦤꦤ꧀ꦠꦺ ꦩꦺꦴꦕꦤꦱ꧀ꦱꦴꦢꦕꦺꦠꦤꦴ ꦱꦁꦮꦶꦗ꧀ꦗꦠꦶ, ꦏꦢꦴꦕꦶ ꦈꦥꦏ꧀ꦏꦩꦤꦩ꧀ꦥꦶ ꦲꦺꦴꦠꦶ, ꦠꦡꦴꦥꦶ ꦡꦶꦤꦩꦶꦢ꧀ꦣꦺꦤ ꦄꦨꦶꦨꦹꦠꦠ꧀ꦠꦴ ꦠꦁ ꦕꦶꦠ꧀ꦠꦁ ꦄꦧ꧀ꦧꦺꦴꦲꦴꦫꦶꦏꦁ, ꦕꦶꦠ꧀ꦠꦱ꧀ꦱ ꦄꦧ꧀ꦧꦺꦴꦲꦴꦫꦶꦏꦠ꧀ꦠꦴ ꦈꦥꦏ꧀ꦏꦩꦏꦶꦫꦶꦪꦴꦱꦁꦮꦠ꧀ꦠꦤꦶꦏꦴꦥꦶ ꦕꦺꦠꦤꦴ ꦄꦧ꧀ꦧꦺꦴꦲꦴꦫꦶꦏꦴ. ꦠꦺꦤꦺꦮ ‘‘ꦄꦠ꧀ꦡꦺꦱꦴ ꦨꦶꦏ꧀ꦑꦮꦺ ꦕꦺꦠꦤꦴ, ꦱꦴ ꦕ ꦑꦺꦴ ꦄꦧ꧀ꦧꦺꦴꦲꦴꦫꦶꦏꦴ’’ꦠꦶ (ꦥꦴꦫꦴ. ꧒꧓꧕) ꦨꦒꦮꦠꦴ ꦮꦸꦠ꧀ꦠꦴ, ꦠꦱ꧀ꦩꦴ ‘‘ꦄꦚ꧀ꦚꦠ꧀ꦫ ꦱꦸꦥꦶꦤꦤ꧀ꦠꦴ’’ꦠꦶ ꦄꦪꦁ ꦄꦤꦸꦥꦚ꧀ꦚꦠ꧀ꦠꦶ ꦄꦧ꧀ꦧꦺꦴꦲꦴꦫꦶꦏꦠ꧀ꦠꦴ ꦄꦤꦴꦥꦠ꧀ꦠꦶꦏꦫꦴ ꦗꦴꦠꦴ.

ꦄꦏꦠꦺ ꦮꦷꦠꦶꦏ꧀ꦏꦩꦺꦠꦶ ‘‘ꦏꦸꦏ꧀ꦏꦸꦕ꧀ꦕꦴꦪꦤ꧀ꦠꦴ ꦤ ꦨꦸꦚ꧀ꦗꦶꦁꦱꦹ’’ꦠꦶꦄꦴꦢꦷꦱꦸ ꦮꦶꦪ ꦮꦷꦠꦶꦏ꧀ꦏꦩꦺ ꦄꦏꦠꦺ. ꦱꦶꦡꦶꦭꦁ ꦏꦫꦺꦴꦤ꧀ꦠꦷꦠꦶ ꦥꦜꦩꦁ ꦱꦴꦩꦚ꧀ꦚꦠꦺꦴ ꦧꦢ꧀ꦣꦱꦶꦏ꧀ꦑꦴꦥꦢꦁ ꦩꦺꦴꦕꦺꦠ꧀ꦮꦴ ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦮꦶꦱꦪꦺ ꦄꦤꦴꦥꦠ꧀ꦠꦶꦏꦫꦟꦮꦱꦺꦤ ꦱꦶꦡꦶꦭꦁ ꦏꦫꦺꦴꦤ꧀ꦠꦷ. ꦢ꧀ꦮꦴꦫꦁ ꦢꦢꦩꦴꦤꦴꦠꦶ ꦄꦤꦴꦥꦠ꧀ꦠꦶꦪꦴ ꦢ꧀ꦮꦴꦫꦁ ꦢꦢꦩꦴꦤꦴ. ꦠꦺꦤꦺꦮꦴꦲ ‘‘ꦄꦥꦫꦴꦥꦫꦩ꧀ꦥꦶ ꦄꦤꦴꦥꦠ꧀ꦠꦶꦁ ꦏꦸꦫꦸꦩꦴꦤꦴ’’ꦠꦶ. ꦤꦤꦸ ꦕ ꦱꦚ꧀ꦕꦫꦶꦠ꧀ꦠꦱꦶꦏ꧀ꦑꦴꦥꦢꦺ ‘‘ꦄꦤ꧀ꦠꦩꦱꦺꦴ ꦠꦔ꧀ꦑꦟꦶꦏꦴꦪꦥꦷ’’ꦠꦶ ꦄꦤꦸꦥꦚ꧀ꦚꦠ꧀ꦠꦶ ꦈꦥ꧀ꦥꦗ꧀ꦗꦩꦴꦤꦴ ꦄꦴꦥꦠ꧀ꦠꦶꦩꦺꦮ ꦏꦫꦺꦴꦤ꧀ꦠꦷ ꦈꦥ꧀ꦥꦤ꧀ꦤꦴ, ꦄꦡ ꦏꦱ꧀ꦩꦴ ‘‘ꦄꦤꦴꦥꦠ꧀ꦠꦶꦁ ꦏꦸꦫꦸꦩꦴꦤꦴ ꦈꦥ꧀ꦥꦗ꧀ꦗꦠꦷ’’ꦠꦶ ꦮꦸꦠ꧀ꦠꦤ꧀ꦠꦶ ꦄꦴꦲ ‘‘ꦄꦤ꧀ꦠꦩꦱꦺꦴ ꦠꦔ꧀ꦑꦟꦶꦏꦴꦪꦥꦷ’’ꦠꦶꦄꦴꦢꦶ. ꦈꦢꦴꦪꦶꦤꦴ ꦨꦶꦏ꧀ꦑꦸꦤꦴ ꦠꦔ꧀ꦑꦟꦶꦏꦴꦪ ꦱꦚ꧀ꦕꦫꦶꦠ꧀ꦠꦁ ꦄꦴꦥꦤ꧀ꦤꦮꦠ꧀ꦡꦸꦱ꧀ꦩꦶꦁ ꦥꦚ꧀ꦚꦠ꧀ꦠꦠ꧀ꦠꦴ ‘‘ꦏꦠꦺ ꦮꦷꦠꦶꦏ꧀ꦏꦩꦺ’’ꦠꦶ ꦮꦸꦠ꧀ꦠꦁ. ꦥꦚ꧀ꦚꦠ꧀ꦠꦶꦒꦠꦶꦏꦴꦮ ꦲꦺꦴꦠꦷꦠꦶ ꦩꦹꦭꦥꦚ꧀ꦚꦠ꧀ꦠꦶꦪꦁꦪꦺꦮ ꦄꦤ꧀ꦠꦺꦴꦒꦣꦴ ꦲꦺꦴꦠꦶ.

ꦩꦏ꧀ꦏꦛꦶꦮꦠ꧀ꦡꦸꦏꦡꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦱꦤ꧀ꦡꦠꦨꦴꦟꦮꦴꦫꦺꦴ

ꦮꦗ꧀ꦗꦶꦥꦸꦠ꧀ꦠꦏꦮꦠ꧀ꦡꦸꦮꦟ꧀ꦟꦤꦴ

꧔꧓. ꦮꦺꦱꦴꦭꦷ ꦤꦶꦮꦴꦱꦺꦴ ꦌꦠꦺꦱꦤ꧀ꦠꦶ ꦮꦺꦱꦴꦭꦶꦏꦴꦠꦶ ꦄꦴꦲ ‘‘ꦮꦺꦱꦴꦭꦶꦮꦴꦱꦶꦤꦺꦴ’’ꦠꦶ. ꦮꦗ꧀ꦗꦷꦱꦸ ꦗꦤꦥꦢꦺ ꦮꦱꦤ꧀ꦠꦴ ꦮꦗ꧀ꦗꦶꦤꦺꦴ, ꦮꦗ꧀ꦗꦷꦤꦁ ꦥꦸꦠ꧀ꦠꦏꦴ ꦮꦗ꧀ꦗꦶꦥꦸꦠ꧀ꦠꦏꦴꦠꦶ ꦄꦴꦲ ‘‘ꦮꦗ꧀ꦗꦶꦫꦛ꧀ꦜꦺ ꦮꦺꦱꦴꦭꦶꦪꦁ ꦏꦸꦭꦴꦤꦁ ꦥꦸꦠ꧀ꦠꦴ’’ꦠꦶ. ꦚꦴꦠꦷꦤꦁ ꦧ꧀ꦪꦱꦤꦤ꧀ꦠꦶ ꦚꦴꦠꦷꦤꦁ ꦮꦶꦤꦴꦱꦺꦴ. ꦱꦺꦴ ꦥꦤ ꦚꦴꦠꦷꦤꦁ ꦮꦶꦤꦴꦱꦺꦴ ꦫꦴꦗꦢꦟ꧀ꦝꦴꦢꦶꦏꦴꦫꦟꦺꦤ ꦲꦺꦴꦠꦷꦠꦶ ꦄꦴꦲ ‘‘ꦫꦴꦗꦢꦟ꧀ꦝꦧ꧀ꦪꦴꦣꦶꦩꦫꦟꦮꦶꦥ꧀ꦥꦮꦴꦱꦤꦶꦩꦶꦠ꧀ꦠꦺꦤꦴ’’ꦠꦶ. ꦨꦺꦴꦒꦴꦤꦁ ꦧ꧀ꦪꦱꦤꦁ ꦮꦶꦤꦴꦱꦺꦴ ꦨꦺꦴꦒꦧ꧀ꦪꦱꦤꦁ. ꦠꦚ꧀ꦕ ꦲꦶꦫꦚ꧀ꦚꦱꦸꦮꦟ꧀ꦟꦢꦴꦱꦶꦢꦴꦱꦴꦢꦷꦤꦁ ꦈꦥꦨꦺꦴꦒꦥꦫꦶꦨꦺꦴꦒꦮꦠ꧀ꦡꦹꦤꦁ ꦫꦴꦗꦢꦟ꧀ꦝꦴꦢꦶꦤꦴ ꦮꦶꦤꦴꦱꦺꦴꦠꦶ ꦄꦴꦲ ‘‘ꦌꦱ ꦤꦪꦺꦴ ꦢꦸꦠꦶꦪꦥꦢꦺꦥꦷ’’ꦠꦶ. ꦤ ꦧꦸꦢ꧀ꦣꦁ ꦒꦫꦲꦴꦩꦴꦠꦶ ‘‘ꦄꦱꦧ꧀ꦧꦚ꧀ꦚꦸ ꦧꦸꦢ꧀ꦣꦺꦴ’’ꦠꦶꦄꦴꦢꦶꦤꦴ ꦧꦸꦢ꧀ꦣꦁ ꦤ ꦒꦫꦲꦴꦩ. ꦤ ꦣꦩ꧀ꦩꦒꦫꦲꦶꦤꦺꦴꦠꦶ ‘‘ꦄꦤꦶꦪ꧀ꦪꦴꦤꦶꦏꦺꦴ ꦣꦩ꧀ꦩꦺꦴ’’ꦠꦶꦄꦴꦢꦶꦤꦴ ꦣꦩ꧀ꦩꦁ ꦤ ꦒꦫꦲꦴꦩ. ꦤ ꦱꦔ꧀ꦓꦒꦫꦲꦶꦤꦺꦴꦠꦶ ‘‘ꦢꦸꦥ꧀ꦥꦛꦶꦥꦤ꧀ꦤꦺꦴ ꦱꦔ꧀ꦓꦺꦴ’’ꦠꦶꦄꦴꦢꦶꦤꦴ ꦱꦔ꧀ꦓꦁ ꦤ ꦒꦫꦲꦴꦩ. ꦄꦛ꧀ꦜꦠꦶꦁꦱꦴꦫꦩ꧀ꦩꦟꦺꦱꦹꦠꦶ ꦢꦱ ꦏꦱꦶꦟꦴ ꦢꦱ ꦄꦱꦸꦨꦴ ꦢꦱꦴꦤꦸꦱ꧀ꦱꦠꦶꦪꦺꦴ ꦕꦠ꧀ꦠꦴꦫꦺꦴ ꦧ꧀ꦫꦲ꧀ꦩꦮꦶꦲꦴꦫꦴ ꦕꦠ꧀ꦠꦴꦫꦺꦴ ꦄꦴꦫꦸꦥ꧀ꦥꦴ ꦕꦠꦸꦣꦴꦠꦸꦮꦮꦠ꧀ꦡꦴꦤꦁ ꦄꦴꦲꦴꦫꦺ ꦥꦛꦶꦏꦹꦭꦱꦚ꧀ꦚꦴꦠꦶ ꦆꦩꦺꦱꦸ ꦕꦠ꧀ꦠꦴꦭꦷꦱꦏꦩ꧀ꦩꦛ꧀ꦜꦴꦤꦺꦱꦸ ꦥꦴꦭ꦳ꦶꦪꦁ ꦄꦤꦴꦒꦠꦠ꧀ꦠꦴ ꦄꦴꦭꦺꦴꦏꦴꦏꦴꦱꦏꦱꦶꦟꦢ꧀ꦮꦪꦁ ꦜꦥꦺꦠ꧀ꦮꦴ ꦄꦮꦱꦺꦱꦴꦤꦶ ꦒꦲꦺꦠ꧀ꦮꦴ ꦮꦸꦠ꧀ꦠꦁ. ꦮꦶꦨꦠ꧀ꦠꦴ ꦏꦸꦱꦭꦴ ꦣꦩ꧀ꦩꦴꦠꦶ ‘‘ꦆꦩꦱ꧀ꦩꦶꦁ ꦄꦴꦫꦩ꧀ꦩꦟꦺ ꦆꦢꦁ ꦲꦺꦴꦠꦷ’’ꦠꦶ ꦌꦮꦁ ꦮꦶꦨꦠ꧀ꦠꦴ ꦈꦥꦕꦴꦫꦗ꧀ꦙꦴꦤꦺꦤ ꦱꦢ꧀ꦣꦶꦁ ꦥꦜꦩꦗ꧀ꦙꦴꦤꦴꦢꦪꦺꦴ ꦩꦲꦒ꧀ꦒꦠꦏꦸꦱꦭꦴ ꦣꦩ꧀ꦩꦴ. ꦠꦺꦮ ꦣꦩ꧀ꦩꦺꦠꦶ ꦠꦺ ꦌꦮ ꦏꦸꦱꦭꦺ ꦣꦩ꧀ꦩꦺ. ꦩꦗ꧀ꦙꦶꦩꦪꦴꦩꦺꦴ ꦨꦶꦏ꧀ꦑꦹꦤꦁ ꦤꦶꦢ꧀ꦢꦴꦏꦶꦭꦩꦡꦮꦶꦤꦺꦴꦢꦤꦺꦴꦏꦴꦱꦠ꧀ꦠꦴ ꦤ ꦒꦲꦶꦠꦺꦴꦠꦶ ꦄꦴꦲ ‘‘ꦥꦜꦩꦪꦴꦩꦚ꧀ꦕ ꦥꦕ꧀ꦖꦶꦩꦪꦴꦩꦚ꧀ꦕꦴ’’ꦠꦶ. ꦱꦕ꧀ꦕꦴꦤꦶ ꦧꦸꦗ꧀ꦙꦠꦶ ꦥꦛꦶꦮꦶꦗ꧀ꦙꦠꦷꦠꦶ ꦧꦺꦴꦣꦶ, ꦄꦫꦲꦠ꧀ꦠꦩꦒ꧀ꦒꦚꦴꦟꦁ. ꦈꦥꦏꦴꦫꦏꦠ꧀ꦠꦺꦤ ꦠꦱ꧀ꦱ ꦥꦏ꧀ꦑꦺ ꦨꦮꦴ ꦧꦺꦴꦣꦶꦥꦏ꧀ꦑꦶꦪꦴꦠꦶ ꦄꦴꦲ ‘‘ꦧꦺꦴꦣꦶꦱ꧀ꦱ ꦥꦏ꧀ꦑꦺ ꦨꦮꦴꦤꦁ, ꦄꦫꦲꦠ꧀ꦠꦩꦒ꧀ꦒꦚꦴꦟꦱ꧀ꦱ ꦈꦥꦏꦴꦫꦏꦴꦤ’’ꦤ꧀ꦠꦶ. ꦕꦠ꧀ꦠꦴꦫꦺꦴ ꦱꦠꦶꦥꦛ꧀ꦜꦴꦤꦴ, ꦕꦠ꧀ꦠꦴꦫꦺꦴ ꦱꦩ꧀ꦩꦥ꧀ꦥꦣꦴꦤꦴ, ꦕꦠ꧀ꦠꦴꦫꦺꦴ ꦆꦢ꧀ꦣꦶꦥꦴꦢꦴ, ꦥꦚ꧀ꦕꦶꦤ꧀ꦢ꧀ꦫꦶꦪꦴꦤꦶ, ꦥꦚ꧀ꦕ ꦧꦭꦴꦤꦶ, ꦱꦠ꧀ꦠ ꦧꦺꦴꦗ꧀ꦙꦔ꧀ꦒꦴ, ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴꦠꦶ ꦆꦩꦺ ꦱꦠ꧀ꦠꦠꦶꦁꦱ ꦧꦺꦴꦣꦶꦥꦏ꧀ꦑꦶꦪꦣꦩ꧀ꦩꦴ. ‘‘ꦒꦶꦲꦶꦥꦭꦶꦧꦺꦴꦣꦁ ꦄꦴꦮꦴꦱꦥꦭꦶꦧꦺꦴꦣꦚ꧀ꦕ ꦥꦲꦴꦪꦴ’’ꦠꦶ ꦆꦩꦺꦱꦁꦪꦺꦮ ꦢ꧀ꦮꦶꦤ꧀ꦤꦁ ꦥꦭꦶꦧꦺꦴꦣꦴꦤꦁ ꦈꦥꦕ꧀ꦖꦺꦢꦱ꧀ꦱ ꦱꦸꦢꦸꦏ꧀ꦏꦫꦨꦴꦮꦠꦺꦴ ꦮꦸꦠ꧀ꦠꦁ. ꦪꦸꦠ꧀ꦠꦥꦪꦸꦠ꧀ꦠꦴꦠꦶ ꦱꦩ꧀ꦩꦢꦺꦮ ꦪꦸꦠ꧀ꦠꦴ.

ꦄꦴꦱꦪꦤ꧀ꦠꦶ ꦄꦗ꧀ꦙꦴꦱꦪꦁ. ꦱꦶꦏ꧀ꦑꦁ ꦄꦥ꧀ꦥꦕ꧀ꦕꦏ꧀ꦑꦴꦪ ꦨꦶꦏ꧀ꦑꦸꦨꦴꦮꦺ ꦜꦠ꧀ꦮꦴ ꦥꦛꦶꦱꦺꦮꦶꦠꦩꦺꦡꦸꦤꦴꦤꦁ ꦠꦺꦱꦁ ꦮꦗ꧀ꦗꦶꦥꦸꦠ꧀ꦠꦏꦴꦤꦁ ꦈꦥꦱꦩ꧀ꦥꦢꦁ ꦄꦤꦸꦗꦴꦤꦤ꧀ꦠꦺꦴ ꦨꦒꦮꦴ ‘‘ꦥꦴꦫꦴꦗꦶꦏꦺꦴ ꦲꦺꦴꦠꦶ ꦄꦱꦁꦮꦴꦱꦺꦴ’’ꦠꦶ ꦌꦮꦁ ꦥꦚ꧀ꦚꦠ꧀ꦠꦱꦶꦏ꧀ꦑꦴꦥꦢꦁ ꦱꦩꦹꦲꦤꦠꦶ ꦤꦴꦩꦴꦠꦶ ꦄꦴꦲ – ‘‘ꦪꦢꦶ ꦲꦶ ꦨꦒꦮꦴ…ꦥꦺ… ꦥꦚ꧀ꦚꦠ꧀ꦠꦁ ꦱꦩꦹꦲꦤꦺꦪ꧀ꦪꦴ’’ꦠꦶ. ‘‘ꦪꦺꦴ ꦥꦤ ꦨꦶꦏ꧀ꦑꦹ’’ꦠꦶ ꦮꦸꦠ꧀ꦠꦠ꧀ꦠꦴ ꦥꦤ ꦱꦶꦏ꧀ꦑꦁ ꦥꦕ꧀ꦕꦏ꧀ꦑꦴꦪ ꦥꦛꦶꦱꦺꦮꦶꦠꦩꦺꦡꦸꦤꦱ꧀ꦱ ꦈꦥꦱꦩ꧀ꦥꦢꦁ ꦄꦤꦸꦗꦴꦤꦤ꧀ꦠꦺꦴ ꦤ ꦱꦩꦹꦲꦤꦠꦶ ꦤꦴꦩ. ꦤ ꦲꦶ ꦱꦺꦴ ꦨꦶꦏ꧀ꦑꦸ ꦲꦸꦠ꧀ꦮꦴ ꦥꦛꦶꦱꦺꦮꦠꦶ. ‘‘ꦱꦺꦴ ꦄꦴꦒꦠꦺꦴ ꦤ ꦈꦥꦱꦩ꧀ꦥꦴꦢꦺꦠꦧ꧀ꦧꦺꦴ’’ꦠꦶ ꦮꦕꦤꦠꦺꦴ ꦱꦴꦩꦟꦺꦫꦨꦹꦩꦶ ꦄꦤꦸꦚ꧀ꦚꦴꦠꦴꦠꦶ ꦄꦴꦲ ‘‘ꦱꦴꦩꦟꦺꦫꦨꦹꦩꦶꦪꦁ ꦥꦤ ꦜꦶꦠꦺꦴ’’ꦠꦶꦄꦴꦢꦶ. ꦈꦠ꧀ꦠꦩꦠ꧀ꦡꦤ꧀ꦠꦶ ꦄꦫꦲꦠ꧀ꦠꦁ ꦤꦶꦧ꧀ꦧꦴꦤꦩꦺꦮ ꦮꦴ.

ꦮꦗ꧀ꦗꦶꦥꦸꦠ꧀ꦠꦏꦮꦠ꧀ꦡꦸꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦕꦠꦸꦧ꧀ꦧꦶꦣꦮꦶꦤꦪꦏꦡꦴꦮꦟ꧀ꦟꦤꦴ

꧔꧕. ꦤꦷꦲꦫꦶꦠ꧀ꦮꦴꦠꦶ ꦱꦴꦱꦤꦠꦺꦴ ꦤꦷꦲꦫꦶꦠ꧀ꦮꦴ. ꦠꦡꦴ ꦲꦶ ‘‘ꦥꦚ꧀ꦕꦲꦸꦥꦴꦭꦶ ꦄꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦺꦤ ꦨꦶꦏ꧀ꦑꦸꦤꦴ ꦤꦴꦤꦸꦪꦸꦚ꧀ꦗꦶꦠꦧ꧀ꦧꦁ. ꦏꦠꦩꦺꦲꦶ ꦥꦚ꧀ꦕꦲꦶ? ꦱꦸꦠ꧀ꦠꦁ ꦤ ꦗꦴꦤꦴꦠꦶ, ꦱꦸꦠ꧀ꦠꦴꦤꦸꦭꦺꦴꦩꦁ ꦤ ꦗꦴꦤꦴꦠꦷ’’ꦠꦶ (ꦥꦫꦶ. ꧔꧔꧒) ꦌꦮꦩꦴꦢꦶꦥꦫꦶꦪꦠ꧀ꦠꦶꦱꦴꦱꦤꦠꦺꦴ ꦱꦸꦠ꧀ꦠꦁ ꦱꦸꦠ꧀ꦠꦴꦤꦸꦭꦺꦴꦩꦚ꧀ꦕ ꦤꦷꦲꦫꦶꦠ꧀ꦮꦴ ꦥꦏꦴꦱꦺꦱꦸꦁ, ‘‘ꦄꦤꦴꦥꦠ꧀ꦠꦶ ꦌꦮꦁ ꦄꦩ꧀ꦲꦴꦏꦁ ꦄꦴꦕꦫꦶꦪꦴꦤꦁ ꦈꦒ꧀ꦒꦲꦺꦴ ꦥꦫꦶꦥꦸꦕ꧀ꦖꦴꦠꦶ ꦒꦟ꧀ꦲꦴꦠꦷ’’ꦠꦶ ꦌꦮꦩꦴꦢꦶꦥꦫꦶꦪꦠ꧀ꦠꦶꦱꦴꦱꦤꦠꦺꦴ ꦄꦴꦕꦫꦶꦪꦮꦴꦢꦁ ꦤꦷꦲꦫꦶꦠ꧀ꦮꦴ ꦥꦏꦴꦱꦺꦱꦸꦁ, ꦨꦴꦫꦸꦏꦕ꧀ꦖꦏꦮꦠ꧀ꦡꦸꦱ꧀ꦩꦶꦁ (ꦥꦴꦫꦴ. ꧗꧘) ‘‘ꦄꦴꦪꦱ꧀ꦩꦴ ꦈꦥꦴꦭꦶ ꦌꦮꦩꦴꦲ ꦄꦤꦴꦥꦠ꧀ꦠꦶ ꦄꦴꦮꦸꦱꦺꦴ ꦱꦸꦥꦶꦤꦤ꧀ꦠꦺꦤꦴ’’ꦠꦶ ꦌꦮꦩꦴꦢꦶꦥꦫꦶꦪꦠ꧀ꦠꦶꦱꦴꦱꦤꦠꦺꦴ ꦌꦮ ꦄꦠ꧀ꦠꦤꦺꦴꦩꦠꦶꦁ ꦤꦷꦲꦫꦶꦠ꧀ꦮꦴ ꦥꦏꦴꦱꦺꦱꦸꦁ. ꦠꦴꦪ ꦲꦶ ꦄꦠ꧀ꦠꦤꦺꦴꦩꦠꦶꦪꦴ ꦡꦺꦫꦺꦴ ꦌꦠꦢꦒ꧀ꦒꦛ꧀ꦜꦴꦤꦁ ꦭꦨꦶ.

ꦮꦸꦠ꧀ꦠꦤ꧀ꦠꦶ ꦤꦴꦒꦱꦺꦤꦠ꧀ꦡꦺꦫꦺꦤ ꦮꦸꦠ꧀ꦠꦁ. ꦥꦗ꧀ꦗꦠꦺ ꦄꦤꦺꦤ ꦄꦠ꧀ꦡꦺꦴꦠꦶ ꦥꦢꦁ, ꦨꦒꦮꦠꦴ ꦏꦟ꧀ꦜꦴꦢꦶꦮꦟ꧀ꦟꦥ꧀ꦥꦮꦠ꧀ꦠꦶꦛ꧀ꦜꦴꦤꦁ ꦄꦴꦲꦕ꧀ꦕ ꦮꦶꦱꦺꦱꦺꦠ꧀ꦮꦴ ꦨꦴꦱꦶꦠꦁ ꦥꦢꦁ ꦄꦴꦲꦕ꧀ꦕꦥꦢꦁ, ꦨꦒꦮꦠꦺꦴꦪꦺꦮ ꦮꦕꦤꦁ. ꦠꦺꦤꦴꦲ ‘‘ꦄꦴꦲꦕ꧀ꦕꦥꦢꦤ꧀ꦠꦶ ꦱꦸꦠ꧀ꦠꦁ ꦄꦣꦶꦥ꧀ꦥꦺꦠ’’ꦤ꧀ꦠꦶ. ‘‘ꦆꦢꦁ ꦏꦥ꧀ꦥꦠꦶ, ꦆꦢꦁ ꦤ ꦏꦥ꧀ꦥꦠꦷ’’ꦠꦶ ꦌꦮꦁ ꦄꦮꦶꦱꦺꦱꦺꦠ꧀ꦮꦴ ‘‘ꦪꦁ, ꦨꦶꦏ꧀ꦑꦮꦺ, ꦩꦪꦴ ‘ꦆꦢꦁ ꦤ ꦏꦥ꧀ꦥꦠꦷ’ꦠꦶ ꦄꦥ꧀ꦥꦛꦶꦏ꧀ꦑꦶꦠ꧀ꦠꦁ, ꦠꦚ꧀ꦕꦺ ꦄꦏꦥ꧀ꦥꦶꦪꦁ ꦄꦤꦸꦭꦺꦴꦩꦺꦠꦶ, ꦏꦥ꧀ꦥꦶꦪꦁ ꦥꦛꦶꦧꦴꦲꦠꦶ, ꦠꦁ ꦮꦺꦴ ꦤ ꦏꦥ꧀ꦥꦠꦷ’’ꦠꦶꦄꦴꦢꦶꦤꦴ (ꦩꦲꦴꦮ. ꧓꧐꧕) ꦮꦸꦠ꧀ꦠꦁ ꦱꦴꦩꦚ꧀ꦚꦭꦏ꧀ꦑꦟꦁ ꦆꦣ ‘‘ꦫꦱꦺꦴ’’ꦠꦶ ꦄꦣꦶꦥ꧀ꦥꦺꦠꦤ꧀ꦠꦶ ꦄꦴꦲ ‘‘ꦫꦱꦺꦴꦠꦶ ꦱꦸꦠ꧀ꦠꦴꦤꦸꦭꦺꦴꦩ’’ꦤ꧀ꦠꦶ. ꦣꦩ꧀ꦩꦱꦔ꧀ꦒꦴꦲꦏꦥ꧀ꦥꦨꦸꦠꦶꦄꦴꦕꦫꦶꦪꦥꦫꦩ꧀ꦥꦫꦠꦺꦴ ꦄꦴꦤꦷꦠꦴ ꦄꦛ꧀ꦜꦏꦡꦴꦠꦤ꧀ꦠꦶ ꦆꦣ ‘‘ꦄꦴꦕꦫꦶꦪꦮꦁꦱꦺꦴ’’ꦠꦶ ꦄꦣꦶꦥ꧀ꦥꦺꦠꦴꦠꦶ ꦄꦴꦲ ‘‘ꦄꦴꦕꦫꦶꦪꦮꦁꦱꦺꦴꦠꦶ ꦄꦴꦕꦫꦶꦪꦮꦴꦢꦺꦴ’’ꦠꦶ.

ꦆꦣ ꦮꦶꦤꦪꦮꦶꦤꦶꦕ꧀ꦖꦪꦱ꧀ꦱ ꦄꦣꦶꦏꦠꦠ꧀ꦠꦴ ꦠꦢꦤꦸꦕ꧀ꦖꦮꦶꦏꦩꦺꦮ ꦱꦸꦠ꧀ꦠꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ – ‘‘ꦱꦸꦠ꧀ꦠꦁ ꦤꦴꦩ ꦱꦏꦭꦺ ꦮꦶꦤꦪꦥꦶꦛꦏꦺ ꦥꦴꦭ꦳ꦷ’’ꦠꦶ. ꦩꦲꦴꦥꦢꦺꦱꦴꦠꦶ ꦩꦲꦴꦎꦏꦴꦱꦴ, ꦩꦲꦤ꧀ꦠꦴꦤꦶ ꦮꦶꦤꦪꦱ꧀ꦱ ꦥꦠꦶꦛ꧀ꦜꦴꦥꦤꦛ꧀ꦜꦴꦤꦴꦤꦶ ꦪꦺꦱꦸ ꦥꦠꦶꦛ꧀ꦜꦴꦥꦶꦠꦺꦴ ꦮꦶꦤꦪꦺꦴ ꦮꦶꦤꦶꦕ꧀ꦖꦪꦠꦶ ꦄꦱꦤ꧀ꦢꦺꦲꦠꦺꦴ. ꦩꦲꦤ꧀ꦠꦴꦤꦶ ꦮꦴ ꦏꦴꦫꦟꦴꦤꦶ ꦩꦲꦴꦥꦢꦺꦱꦴ, ꦩꦲꦤ꧀ꦠꦴꦤꦶ ꦮꦶꦤꦪꦮꦶꦤꦶꦕ꧀ꦖꦪꦏꦴꦫꦟꦴꦤꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ‘‘ꦄꦠ꧀ꦡꦠꦺꦴ ꦥꦤ ‘ꦪꦁ, ꦨꦶꦏ꧀ꦑꦮꦺ’ꦠꦶꦄꦴꦢꦶꦤꦴ ꦮꦸꦠ꧀ꦠꦴ ꦱꦴꦣꦶꦥ꧀ꦥꦴꦪꦴ ꦥꦴꦭ꦳ꦶꦪꦺꦮ ꦩꦲꦴꦥꦢꦺꦱꦴ’’ꦠꦶ ꦮꦢꦤ꧀ꦠꦶ. ꦠꦺꦤꦺꦮꦴꦲ ‘‘ꦪꦺ ꦨꦒꦮꦠꦴ ꦌꦮꦁ ꦮꦸꦠ꧀ꦠꦴ’’ꦠꦶꦄꦴꦢꦶ. ꦆꦩꦺ ꦕ ꦩꦲꦴꦥꦢꦺꦱꦴ ꦑꦤ꧀ꦣꦏꦺ ꦄꦴꦒꦠꦴ, ꦠꦱ꧀ꦩꦴ ꦠꦺꦱꦁ ꦮꦶꦤꦶꦕ꧀ꦖꦪꦏꦡꦴ ꦠꦠ꧀ꦡꦺꦮ ꦄꦴꦮꦶ ꦨꦮꦶꦱ꧀ꦱꦠꦷꦠꦶ ꦆꦣ ꦤ ꦮꦸꦕ꧀ꦕꦠꦶ. ꦪꦢꦶꦥꦶ ꦠꦠ꧀ꦡ ꦠꦠ꧀ꦡ ꦨꦒꦮꦠꦴ ꦥꦮꦠ꧀ꦠꦶꦠꦴ ꦥꦏꦶꦟ꧀ꦟꦏꦢꦺꦱꦤꦴꦮ ꦄꦛ꧀ꦜꦏꦡꦴ, ꦱꦴ ꦥꦤ ꦣꦩ꧀ꦩꦱꦔ꧀ꦒꦴꦲꦏꦺꦲꦶ ꦥꦜꦩꦁ ꦠꦷꦟꦶ ꦥꦶꦛꦏꦴꦤꦶ ꦱꦔ꧀ꦒꦴꦪꦶꦠ꧀ꦮꦴ ꦠꦱ꧀ꦱ ꦄꦠ꧀ꦡꦮꦟ꧀ꦟꦤꦴꦤꦸꦫꦹꦥꦺꦤꦺꦮ ꦮꦴꦕꦤꦴꦩꦒ꧀ꦒꦁ ꦄꦴꦫꦺꦴꦥꦶꦠꦠ꧀ꦠꦴ ‘‘ꦄꦴꦕꦫꦶꦪꦮꦴꦢꦺꦴ’’ꦠꦶ ꦮꦸꦕ꧀ꦕꦠꦶ ꦄꦴꦕꦫꦶꦪꦴ ꦮꦢꦤ꧀ꦠꦶ ꦱꦁꦮꦟ꧀ꦟꦺꦤ꧀ꦠꦶ ꦥꦴꦭ꦳ꦶꦁ ꦌꦠꦺꦤꦴꦠꦶ ꦏꦠ꧀ꦮꦴ. ꦠꦺꦤꦴꦲ – ‘‘ꦄꦴꦕꦫꦶꦪꦮꦴꦢꦺꦴ ꦤꦴꦩ…ꦥꦺ… ꦄꦛ꧀ꦜꦏꦡꦴꦠꦤ꧀ꦠꦷ’’ꦠꦶ. ꦠꦶꦱ꧀ꦱꦺꦴ ꦱꦔ꧀ꦒꦷꦠꦶꦪꦺꦴ ꦄꦴꦫꦸꦭ꦳꧀ꦲꦺꦴꦪꦺꦮ ꦕ ꦧꦸꦢ꧀ꦣꦮꦕꦤꦱ꧀ꦱ ꦄꦠ꧀ꦡꦱꦁꦮꦟ꧀ꦟꦤꦴꦨꦹꦠꦺꦴ ꦏꦡꦴꦩꦒ꧀ꦒꦺꦴ ꦩꦲꦴꦩꦲꦶꦤ꧀ꦢꦠ꧀ꦡꦺꦫꦺꦤ ꦠꦩ꧀ꦧꦥꦟ꧀ꦟꦶꦢꦷꦥꦁ ꦄꦴꦨꦠꦺꦴ, ꦥꦕ꧀ꦖꦴ ꦠꦩ꧀ꦧꦥꦟ꧀ꦟꦶꦪꦺꦲꦶ ꦩꦲꦴꦡꦺꦫꦺꦲꦶ ꦱꦷꦲꦭ꦳ꦨꦴꦱꦴꦪ ꦜꦥꦶꦠꦺꦴ ꦤꦶꦏꦴꦪꦤ꧀ꦠꦫꦭꦢ꧀ꦣꦶꦱꦔ꧀ꦏꦫꦥꦫꦶꦲꦫꦟꦠ꧀ꦡꦁ. ꦏꦶꦚ꧀ꦕꦴꦥꦶ ꦄꦠ꧀ꦠꦤꦺꦴꦩꦠꦶ ꦱꦸꦠ꧀ꦠꦴꦢꦷꦲꦶ ꦱꦁꦱꦤ꧀ꦢꦶꦠ꧀ꦮꦴꦮ ꦥꦫꦶꦏꦥ꧀ꦥꦷꦪꦠꦶ, ꦠꦡꦴꦥꦶ ꦱꦴ ꦤ ꦱꦸꦠ꧀ꦠꦴꦢꦷꦱꦸ ꦮꦶꦱꦺꦱꦠꦺꦴ ꦤꦶꦢ꧀ꦢꦶꦛ꧀ꦜꦴꦠꦶ ꦄꦴꦲ ‘‘ꦱꦸꦠ꧀ꦠꦱꦸꦠ꧀ꦠꦴꦤꦸꦭꦺꦴꦩꦄꦴꦕꦫꦶꦪꦮꦴꦢꦺ ꦩꦸꦚ꧀ꦕꦶꦠ꧀ꦮꦴ’’ꦠꦶ. ꦄꦤꦸꦧꦸꦢ꧀ꦣꦶꦪꦴꦠꦶ ꦱꦸꦠ꧀ꦠꦴꦢꦷꦤꦶꦪꦺꦮ ꦄꦤꦸꦒꦠꦧꦸꦢ꧀ꦣꦶꦪꦴ. ꦤꦪꦒ꧀ꦒꦴꦲꦺꦤꦴꦠꦶ ꦱꦸꦠ꧀ꦠꦴꦢꦶꦠꦺꦴ ꦭꦧ꧀ꦨꦩꦴꦤꦤꦪꦒ꧀ꦒꦲꦟꦺꦤ.

ꦄꦠ꧀ꦠꦤꦺꦴꦩꦠꦶꦁ ꦱꦴꦩꦚ꧀ꦚꦠꦺꦴ ꦥꦜꦩꦁ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦠꦩꦺꦮ ꦮꦶꦱꦺꦱꦺꦠ꧀ꦮꦴ ꦢꦱ꧀ꦱꦺꦤ꧀ꦠꦺꦴ ‘‘ꦄꦥꦶꦕꦴ’’ꦠꦶꦄꦴꦢꦶꦩꦴꦲ. ꦆꦢꦴꦤꦶ ꦠꦠ꧀ꦡ ꦥꦛꦶꦥꦗ꧀ꦗꦶꦠꦧ꧀ꦧꦴꦏꦴꦫꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ – ‘‘ꦠꦁ ꦥꦤ ꦄꦠ꧀ꦠꦤꦺꦴꦩꦠꦶꦁ ꦒꦲꦺꦠ꧀ꦮꦴ ꦏꦡꦺꦤ꧀ꦠꦺꦤꦴ’’ꦠꦶꦄꦴꦢꦶ. ꦄꦠ꧀ꦡꦺꦤꦴꦠꦶ ꦄꦠ꧀ꦠꦤꦴ ꦱꦭ꧀ꦭꦏ꧀ꦑꦶꦠꦺꦤ ꦄꦠ꧀ꦡꦺꦤ. ꦄꦴꦕꦫꦶꦪꦮꦴꦢꦺ ꦎꦠꦴꦫꦺꦠꦧ꧀ꦧꦴꦠꦶ ꦄꦴꦕꦫꦶꦪꦮꦴꦢꦺ ꦚꦴꦟꦺꦤ ꦄꦤꦸꦥ꧀ꦥꦮꦺꦱꦺꦠꦧ꧀ꦧꦴ. ꦱꦧ꧀ꦧꦢꦸꦧ꧀ꦧꦭꦴꦠꦶ ꦥꦸꦒ꧀ꦒꦭꦱ꧀ꦱ ꦱꦪꦁ ꦥꦛꦶꦨꦴꦤꦨꦴꦮꦠꦺꦴ. ꦥꦩꦴꦢꦥꦴꦜꦮꦱꦺꦤ ꦄꦴꦕꦫꦶꦪꦮꦴꦢꦱ꧀ꦱ ꦏꦢꦴꦕꦶ ꦱꦸꦠ꧀ꦠꦴꦤꦸꦭꦺꦴꦩꦺꦤ ꦄꦱꦁꦱꦤ꧀ꦢꦤꦴꦥꦶ ꦱꦶꦪꦴ, ꦱꦺꦴ ꦤ ꦒꦲꦺꦠꦧ꧀ꦧꦺꦴꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ – ‘‘ꦄꦴꦕꦫꦶꦪꦮꦴꦢꦺꦴꦥꦶ…ꦥꦺ… ꦱꦩꦺꦤ꧀ꦠꦺꦴ ꦌꦮ ꦒꦲꦺꦠꦧ꧀ꦧꦺꦴ’’ꦠꦶ. ꦱꦩꦺꦤ꧀ꦠꦩꦺꦮ ꦒꦲꦺꦠꦧ꧀ꦧꦤ꧀ꦠꦶ ꦪꦡꦴ ꦱꦸꦠ꧀ꦠꦺꦤ ꦱꦁꦱꦤ꧀ꦢꦠꦶ, ꦌꦮꦁ ꦩꦲꦴꦥꦢꦺꦱꦠꦺꦴ ꦄꦠ꧀ꦡꦴ ꦈꦢ꧀ꦣꦫꦶꦠꦧ꧀ꦧꦴꦠꦶ ꦢꦱ꧀ꦱꦺꦠꦶ. ꦱꦸꦠ꧀ꦠꦴꦤꦸꦭꦺꦴꦩꦱ꧀ꦱ ꦱꦸꦠ꧀ꦠꦺꦏꦢꦺꦱꦠ꧀ꦠꦺꦥꦶ ꦱꦸꦠ꧀ꦠꦺ ꦮꦶꦪ ‘‘ꦆꦢꦁ ꦏꦥ꧀ꦥꦠꦶ, ꦆꦢꦁ ꦤ ꦏꦥ꧀ꦥꦠꦷ’’ꦠꦶ ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦄꦴꦲꦕ꧀ꦕꦨꦴꦱꦶꦠꦁ ꦏꦶꦚ꧀ꦕꦶ ꦤꦠ꧀ꦡꦷꦠꦶ ꦄꦴꦲ – ‘‘ꦱꦸꦠ꧀ꦠꦴꦤꦸꦭꦺꦴꦩꦠꦺꦴ ꦲꦶ ꦱꦸꦠ꧀ꦠꦩꦺꦮ ꦧꦭꦮꦠꦫ’’ꦤ꧀ꦠꦶ. ꦄꦥ꧀ꦥꦛꦶꦮꦠ꧀ꦠꦶꦪꦤ꧀ꦠꦶ ꦄꦥ꧀ꦥꦛꦶꦧꦴꦲꦶꦪꦁ. ꦏꦴꦫꦏꦱꦔ꧀ꦓꦱꦢꦶꦱꦤ꧀ꦠꦶ ꦥꦩꦴꦟꦠ꧀ꦠꦴ ꦱꦔ꧀ꦒꦷꦠꦶꦏꦴꦫꦏꦱꦔ꧀ꦓꦱꦢꦶꦱꦁ. ꦧꦸꦢ꧀ꦣꦴꦤꦁ ꦜꦶꦠꦏꦴꦭꦱꦢꦶꦱꦤ꧀ꦠꦶ ꦆꦩꦶꦤꦴ ꦧꦸꦢ꧀ꦣꦺꦲꦺꦮ ꦏꦡꦶꦠꦠ꧀ꦠꦴ ꦣꦫꦩꦴꦤꦧꦸꦢ꧀ꦣꦱꦢꦶꦱꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦱꦸꦠ꧀ꦠꦺ ꦲꦶ ꦥꦛꦶꦧꦴꦲꦶꦠꦺ ꦧꦸꦢ꧀ꦣꦺꦴꦮ ꦥꦛꦶꦧꦴꦲꦶꦠꦺꦴ ꦲꦺꦴꦠꦶ. ꦱꦏꦮꦴꦢꦷ ꦱꦸꦠ꧀ꦠꦁ ꦒꦲꦺꦠ꧀ꦮꦴ ꦏꦡꦺꦠꦷꦠꦶ ꦱꦏꦮꦴꦢꦷ ꦄꦠ꧀ꦠꦤꦺꦴ ꦱꦸꦠ꧀ꦠꦁ ꦒꦲꦺꦠ꧀ꦮꦴ ꦮꦺꦴꦲꦫꦠꦶ. ꦥꦫꦮꦴꦢꦷ ꦱꦸꦠ꧀ꦠꦴꦤꦸꦭꦺꦴꦩꦤ꧀ꦠꦶ ꦄꦚ꧀ꦚꦤꦶꦏꦴꦪꦮꦴꦢꦷ ꦄꦠ꧀ꦠꦤꦺꦴ ꦤꦶꦏꦴꦪꦺ ꦱꦸꦠ꧀ꦠꦴꦤꦸꦭꦺꦴꦩꦁ ꦒꦲꦺꦠ꧀ꦮꦴ ꦏꦡꦺꦠꦶ. ꦑꦺꦥꦁ ꦮꦴ ꦒꦫꦲꦁ ꦮꦴ ꦄꦏꦠ꧀ꦮꦴꦠꦶ ‘‘ꦏꦶꦁ ꦆꦩꦶꦤꦴ’’ꦠꦶ ꦑꦺꦥꦁ ꦮꦴ ‘‘ꦏꦶꦩꦺꦱ ꦧꦴꦭꦺꦴ ꦮꦢꦠꦷ’’ꦠꦶ ꦒꦫꦲꦁ ꦮꦴ ꦄꦏꦠ꧀ꦮꦴ. ꦱꦸꦠ꧀ꦠꦴꦤꦸꦭꦺꦴꦩꦤ꧀ꦠꦶ ꦥꦫꦮꦴꦢꦶꦤꦴ ꦮꦸꦠ꧀ꦠꦁ ꦄꦚ꧀ꦚꦤꦶꦏꦴꦪꦺ ꦱꦸꦠ꧀ꦠꦴꦤꦸꦭꦺꦴꦩꦁ. ꦱꦸꦠ꧀ꦠꦺ ꦎꦠꦴꦫꦺꦠꦧ꧀ꦧꦤ꧀ꦠꦶ ꦱꦏꦮꦴꦢꦶꦤꦴ ꦄꦠ꧀ꦠꦤꦺꦴ ꦱꦸꦠ꧀ꦠꦺ ꦎꦠꦴꦫꦺꦠꦧ꧀ꦧꦁ. ꦱꦸꦠ꧀ꦠꦱ꧀ꦩꦶꦁꦪꦺꦮ ꦜꦴꦠꦧ꧀ꦧꦤ꧀ꦠꦶ ꦄꦠ꧀ꦠꦤꦺꦴ ꦱꦸꦠ꧀ꦠꦺꦪꦺꦮ ꦜꦴꦠꦧ꧀ꦧꦁ. ꦌꦮꦁ ꦱꦺꦱꦮꦴꦫꦺꦱꦸꦥꦶ ꦄꦠ꧀ꦡꦪꦺꦴꦗꦤꦴ ꦏꦴꦠꦧ꧀ꦧꦴ. ꦄꦪꦤ꧀ꦠꦶ ꦱꦏꦮꦴꦢꦷ. ꦥꦫꦺꦴꦠꦶ ꦄꦚ꧀ꦚꦤꦶꦏꦴꦪꦮꦴꦢꦷ. ꦌꦮꦁ ꦱꦺꦱꦺꦱꦸꦥꦶ.

ꦤꦤꦸ ꦕ ‘‘ꦱꦸꦠ꧀ꦠꦴꦤꦸꦭꦺꦴꦩꦠꦺꦴ ꦱꦸꦠ꧀ꦠꦩꦺꦮ ꦧꦭꦮꦠꦫ’’ꦤ꧀ꦠꦶ ꦲꦺꦛ꧀ꦜꦴ ꦮꦸꦠ꧀ꦠꦁ, ꦆꦣ ꦥꦤ ‘‘ꦱꦸꦠ꧀ꦠꦴꦤꦸꦭꦺꦴꦩꦺ ꦱꦸꦠ꧀ꦠꦁ ꦎꦠꦴꦫꦺꦠꦧ꧀ꦧ’’ꦤ꧀ꦠꦶꦄꦴꦢꦶ ꦏꦱ꧀ꦩꦴ ꦮꦸꦠ꧀ꦠꦤ꧀ꦠꦶ? ꦤꦴꦪꦁ ꦮꦶꦫꦺꦴꦣꦺꦴ. ‘‘ꦱꦸꦠ꧀ꦠꦴꦤꦸꦭꦺꦴꦩꦠꦺꦴ ꦱꦸꦠ꧀ꦠꦩꦺꦮ ꦧꦭꦮꦠꦫ’’ꦤ꧀ꦠꦶ ꦲꦶ ꦆꦢꦁ ꦱꦏꦩꦠꦺꦪꦺꦮ ꦱꦸꦠ꧀ꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦠꦠ꧀ꦡ ꦲꦶ ꦱꦏꦩꦠꦶꦥꦫꦶꦪꦴꦥꦤ꧀ꦤꦩꦺꦮ ꦱꦸꦠ꧀ꦠꦴꦢꦶꦁ ꦱꦤ꧀ꦣꦴꦪ ‘‘ꦄꦠ꧀ꦠꦤꦺꦴꦩꦠꦶ ꦱꦧ꧀ꦧꦢꦸꦧ꧀ꦧꦭꦴ, ꦄꦠ꧀ꦠꦤꦺꦴꦩꦠꦶꦠꦺꦴ ꦄꦴꦕꦫꦶꦪꦮꦴꦢꦺꦴ ꦧꦭꦮꦠꦫꦺꦴ, ꦄꦴꦕꦫꦶꦪꦮꦴꦢꦠꦺꦴ ꦱꦸꦠ꧀ꦠꦴꦤꦸꦭꦺꦴꦩꦁ ꦧꦭꦮꦠꦫꦁ, ꦱꦸꦠ꧀ꦠꦴꦤꦸꦭꦺꦴꦩꦠꦺꦴ ꦱꦸꦠ꧀ꦠꦩꦺꦮ ꦧꦭꦮꦠꦫ’’ꦤ꧀ꦠꦶ ꦕ ꦮꦸꦠ꧀ꦠꦁ. ꦆꦣ ꦥꦤ ꦥꦫꦮꦴꦢꦶꦤꦴ ꦄꦴꦤꦷꦠꦁ ꦄꦚ꧀ꦚꦤꦶꦏꦴꦪꦺ ꦱꦸꦠ꧀ꦠꦁ ꦱꦤ꧀ꦣꦴꦪ ‘‘ꦱꦸꦠ꧀ꦠꦴꦤꦸꦭꦺꦴꦩꦺ ꦱꦸꦠ꧀ꦠꦁ ꦎꦠꦴꦫꦺꦠꦧ꧀ꦧ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦠꦱ꧀ꦩꦴ ꦥꦫꦮꦴꦢꦶꦤꦴ ꦄꦴꦤꦷꦠꦁ ꦱꦸꦠ꧀ꦠꦴꦢꦶꦁ ꦄꦠ꧀ꦠꦤꦺꦴ ꦱꦸꦠ꧀ꦠꦴꦤꦸꦭꦺꦴꦩꦄꦴꦕꦫꦶꦪꦮꦴꦢꦄꦠ꧀ꦠꦤꦺꦴꦩꦠꦷꦱꦸ ꦎꦠꦴꦫꦺꦠ꧀ꦮꦴ ꦱꦩꦺꦤ꧀ꦠꦁꦪꦺꦮ ꦒꦲꦺꦠꦧ꧀ꦧꦁ, ꦆꦠꦫꦁ ꦤ ꦒꦲꦺꦠꦧ꧀ꦧꦤ꧀ꦠꦶ ꦄꦪꦁ ꦤꦪꦺꦴ ꦆꦣ ꦮꦸꦕ꧀ꦕꦠꦷꦠꦶ ꦤ ꦏꦺꦴꦕꦶ ꦥꦸꦧ꧀ꦧꦴꦥꦫꦮꦶꦫꦺꦴꦣꦺꦴ.

ꦧꦴꦲꦶꦫꦏꦱꦸꦠ꧀ꦠꦤ꧀ꦠꦶ ꦠꦶꦱ꧀ꦱꦺꦴ ꦱꦔ꧀ꦒꦷꦠꦶꦪꦺꦴ ꦄꦤꦴꦫꦸꦭ꦳꧀ꦲꦒꦸꦭ꦳꧀ꦲꦮꦺꦱ꧀ꦱꦤ꧀ꦠꦫꦴꦢꦷꦤꦶ ꦩꦲꦴꦱꦔ꧀ꦓꦶꦏꦤꦶꦏꦴꦪꦮꦴꦱꦷꦤꦁ ꦱꦸꦠ꧀ꦠꦴꦤꦶ. ꦮꦺꦢꦭ꧀ꦭꦴꦢꦷꦤꦤ꧀ꦠꦶ ꦄꦴꦢꦶ-ꦱꦢ꧀ꦢꦺꦤ ꦒꦸꦭ꦳꧀ꦲꦈꦩ꧀ꦩꦒ꧀ꦒꦴꦢꦶꦒ꧀ꦒꦲꦟꦁ ꦮꦺꦢꦶꦠꦧ꧀ꦧꦁ, ꦆꦠꦫꦁ ꦒꦴꦫꦪ꧀ꦲꦱꦸꦠ꧀ꦠꦁ ꦤ ꦒꦲꦺꦠꦧ꧀ꦧꦁ. ꦄꦠ꧀ꦠꦤꦺꦴꦩꦠꦶꦪꦩꦺꦮ ꦜꦴꦠꦧ꧀ꦧꦤ꧀ꦠꦶ ꦆꦩꦶꦤꦴ ꦄꦚ꧀ꦚꦤꦶꦏꦴꦪꦠꦺꦴ ꦄꦴꦤꦷꦠꦱꦸꦠ꧀ꦠꦠꦺꦴꦥꦶ ꦱꦏꦤꦶꦏꦴꦪꦺ ꦄꦠ꧀ꦠꦤꦺꦴꦩꦠꦶꦪꦺꦮ ꦧꦭꦮꦠꦫꦴꦠꦶ ꦢꦱ꧀ꦱꦺꦠꦶ. ꦱꦏꦮꦴꦢꦷ ꦱꦸꦠ꧀ꦠꦁ ꦒꦲꦺꦠ꧀ꦮꦴ ꦏꦡꦺꦠꦶ, ꦥꦫꦮꦴꦢꦷꦥꦶ ꦱꦸꦠ꧀ꦠꦩꦺꦮꦴꦠꦶꦌꦮꦩꦴꦢꦶꦤꦴ ꦱꦩꦴꦤꦗꦴꦠꦶꦏꦴꦤꦁ ꦮꦱꦺꦤ ꦮꦴꦫꦺꦴ ꦤ ꦮꦸꦠ꧀ꦠꦺꦴ, ꦱꦸꦠ꧀ꦠꦱ꧀ꦱ ꦱꦸꦠ꧀ꦠꦺꦪꦺꦮ ꦎꦠꦴꦫꦟꦁ ꦨꦶꦤ꧀ꦤꦁ ꦮꦶꦪ ꦲꦸꦠ꧀ꦮꦴ ꦤ ꦥꦚ꧀ꦚꦴꦪꦠꦶ, ꦮꦸꦠ꧀ꦠꦤꦪꦺꦤꦺꦮ ꦕ ꦱꦏ꧀ꦏꦴ ꦪꦺꦴꦗꦺꦠꦸꦤ꧀ꦠꦶ.

ꦆꦢꦴꦤꦶ ꦱꦏꦮꦴꦢꦷꦥꦫꦮꦴꦢꦷꦤꦁ ꦏꦥ꧀ꦥꦶꦪꦴꦏꦥ꧀ꦥꦶꦪꦴꦢꦶꦨꦴꦮꦁ ꦱꦤ꧀ꦣꦴꦪ ꦮꦶꦮꦴꦢꦺ ꦈꦥ꧀ꦥꦤ꧀ꦤꦺ ꦠꦠ꧀ꦡ ꦥꦛꦶꦥꦗ꧀ꦗꦶꦠꦧ꧀ꦧꦮꦶꦣꦶꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ – ‘‘ꦄꦡ ꦥꦤꦴꦪꦁ ꦏꦥ꧀ꦥꦶꦪꦤ꧀ꦠꦶ ꦒꦲꦺꦠ꧀ꦮꦴ ꦏꦡꦺꦠꦷ’’ꦠꦶꦄꦴꦢꦶ. ꦠꦠ꧀ꦡ ꦱꦸꦠ꧀ꦠꦺ ꦕ ꦱꦸꦠ꧀ꦠꦴꦤꦸꦭꦺꦴꦩꦺ ꦕ ꦎꦠꦴꦫꦺꦠꦧ꧀ꦧꦤ꧀ꦠꦶ ꦱꦏꦮꦴꦢꦶꦤꦴ ꦄꦠ꧀ꦠꦤꦺꦴꦪꦺꦮ ꦱꦸꦠ꧀ꦠꦺ ꦕ ꦱꦸꦠ꧀ꦠꦴꦤꦸꦭꦺꦴꦩꦺ ꦕ ꦎꦠꦴꦫꦺꦠꦧ꧀ꦧꦁ. ꦥꦫꦺꦴ ꦏꦴꦫꦟꦁ ꦤ ꦮꦶꦤ꧀ꦢꦠꦷꦠꦶ ꦥꦫꦮꦴꦢꦷ ꦏꦴꦫꦟꦁ ꦤ ꦭꦨꦠꦶ. ꦱꦸꦠ꧀ꦠꦠꦺꦴ ꦧꦲꦸꦁ ꦏꦴꦫꦟꦚ꧀ꦕ ꦮꦶꦤꦶꦕ꧀ꦖꦪꦚ꧀ꦕ ꦢꦱ꧀ꦱꦺꦠꦷꦠꦶ ꦥꦫꦮꦴꦢꦷ ꦄꦠ꧀ꦠꦤꦺꦴ ꦱꦸꦠ꧀ꦠꦠꦺꦴ ꦧꦲꦸꦁ ꦏꦴꦫꦟꦁ ꦮꦶꦤꦶꦕ꧀ꦖꦪꦚ꧀ꦕ ꦄꦴꦲꦫꦶꦠ꧀ꦮꦴ ꦢꦱ꧀ꦱꦺꦠꦶ. ꦱꦴꦣꦹꦠꦶ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦄꦏꦥ꧀ꦥꦶꦪꦺꦮ ꦜꦴꦠꦧ꧀ꦧꦤ꧀ꦠꦶ ꦆꦩꦶꦤꦴ ꦄꦠ꧀ꦠꦤꦺꦴ ꦤꦶꦏꦴꦪꦺ ꦱꦸꦠ꧀ꦠꦴꦢꦷꦤꦶ ꦄꦭꦨꦤ꧀ꦠꦺꦤ ꦱꦏꦮꦴꦢꦶꦤꦴ ꦥꦫꦮꦴꦢꦷꦮꦕꦤꦺꦪꦺꦮ ꦜꦴꦠꦧ꧀ꦧꦤ꧀ꦠꦶ ꦮꦢꦠꦶ. ꦢ꧀ꦮꦶꦤ꧀ꦤꦩ꧀ꦥꦶ ꦏꦴꦫꦟꦕ꧀ꦖꦴꦪꦴ ꦢꦶꦱ꧀ꦱꦠꦷꦠꦶ ꦱꦏꦮꦴꦢꦷꦥꦫꦮꦴꦢꦷꦤꦁ ꦈꦨꦶꦤ꧀ꦤꦩ꧀ꦥꦶ ꦏꦥ꧀ꦥꦶꦪꦴꦏꦥ꧀ꦥꦶꦪꦨꦴꦮꦱꦴꦣꦏꦁ ꦏꦴꦫꦟꦥꦠꦶꦫꦹꦥꦏꦁ ꦢꦶꦱ꧀ꦱꦠꦶ. ꦪꦢꦶ ꦢ꧀ꦮꦶꦤ꧀ꦤꦩ꧀ꦥꦶ ꦏꦴꦫꦟꦕ꧀ꦖꦴꦪꦴ ꦢꦶꦱ꧀ꦱꦠꦶ, ꦏꦱ꧀ꦩꦴ ‘‘ꦄꦏꦥ꧀ꦥꦶꦪꦺꦮ ꦜꦴꦠꦧ꧀ꦧ’’ꦤ꧀ꦠꦶ ꦄꦴꦲ ‘‘ꦮꦶꦤꦪꦚ꧀ꦲꦶ ꦥꦠ꧀ꦮꦴ’’ꦠꦶꦄꦴꦢꦶ. ‘‘ꦮꦶꦤꦪꦁ ꦥꦠ꧀ꦮꦴ’’ꦠꦶ ꦮꦸꦠ꧀ꦠꦩꦺꦮꦠ꧀ꦡꦁ ꦥꦴꦏꦛꦠꦫꦁ ꦏꦠ꧀ꦮꦴ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦏꦥ꧀ꦥꦶꦪꦴꦏꦥ꧀ꦥꦶꦪꦮꦶꦕꦴꦫꦟꦩꦴꦒꦩ꧀ꦩꦴ’’ꦠꦶ. ꦫꦸꦤ꧀ꦣꦶꦠꦧ꧀ꦧꦤ꧀ꦠꦶꦄꦴꦢꦷꦱꦸ ꦢꦸꦧ꧀ꦧꦶꦚ꧀ꦚꦺꦪ꧀ꦪꦮꦶꦤꦶꦕ꧀ꦖꦪꦺ ꦏꦥ꧀ꦥꦶꦪꦴꦏꦥ꧀ꦥꦶꦪꦨꦴꦮꦺ ꦱꦠꦶ ꦏꦥ꧀ꦥꦶꦪꦤ꧀ꦠꦶ ꦒꦲꦟꦁ ꦫꦸꦤ꧀ꦣꦶꦠꦧ꧀ꦧꦁ, ꦄꦏꦥ꧀ꦥꦶꦪꦤ꧀ꦠꦶ ꦒꦲꦟꦁ ꦒꦴꦭ꦳꧀ꦲꦁ ꦏꦴꦠꦧ꧀ꦧꦁ. ꦄꦥꦫꦴꦥꦫꦁ ꦥꦮꦠ꧀ꦠꦏꦥ꧀ꦥꦶꦪꦒꦲꦟꦱꦺꦴꦠꦁ ꦥꦕ꧀ꦖꦶꦤ꧀ꦢꦶꦠꦧ꧀ꦧꦁ, ꦒꦫꦸꦏꦨꦴꦮꦱꦔ꧀ꦑꦴꦠꦺ ꦄꦏꦥ꧀ꦥꦶꦪꦨꦴꦮꦺꦪꦺꦮ ꦜꦴꦠꦧ꧀ꦧꦤ꧀ꦠꦶ ꦄꦠ꧀ꦡꦺꦴ.

ꦧꦲꦹꦲꦶ ꦱꦸꦠ꧀ꦠꦮꦶꦤꦶꦕ꧀ꦖꦪꦏꦴꦫꦟꦺꦲꦷꦠꦶ ꦧꦲꦹꦲꦶ ꦱꦸꦠ꧀ꦠꦺꦲꦶ ꦕꦺꦮ ꦠꦠꦺꦴ ꦄꦴꦤꦷꦠꦮꦶꦤꦶꦕ꧀ꦖꦪꦏꦴꦫꦟꦺꦲꦶ ꦕ. ꦄꦠ꧀ꦠꦤꦺꦴ ꦒꦲꦟꦁ ꦤ ꦮꦶꦱ꧀ꦱꦗ꧀ꦗꦺꦠꦧ꧀ꦧꦤ꧀ꦠꦶ ꦱꦏꦮꦴꦢꦶꦤꦴ ꦄꦠ꧀ꦠꦤꦺꦴ ꦄꦏꦥ꧀ꦥꦶꦪꦤ꧀ꦠꦶ ꦒꦲꦟꦁ ꦤ ꦮꦶꦱ꧀ꦱꦗ꧀ꦗꦺꦠꦧ꧀ꦧꦁ. ꦆꦢꦴꦤꦶ ꦮꦸꦠ꧀ꦠꦩꦺꦮꦠ꧀ꦡꦁ ꦤꦶꦒꦩꦺꦤ꧀ꦠꦺꦴ ‘‘ꦌꦮ’’ꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦪꦺꦴꦠꦶ ꦱꦏꦮꦴꦢꦷꦥꦫꦮꦴꦢꦷꦱꦸ ꦪꦺꦴ ꦏꦺꦴꦕꦶ. ꦏꦺꦕꦶ ꦥꦤ ‘‘ꦱꦏꦮꦴꦢꦷꦱꦸꦪꦺꦮ ꦪꦺꦴ ꦏꦺꦴꦕꦶ ꦆꦣꦴꦣꦶꦥ꧀ꦥꦺꦠꦺꦴ’’ꦠꦶ ꦮꦢꦤ꧀ꦠꦶ, ꦌꦮꦁ ꦱꦤ꧀ꦠꦺ ‘‘ꦄꦡ ꦥꦤꦴꦪꦁ ꦏꦥ꧀ꦥꦶꦪꦤ꧀ꦠꦶ ꦒꦲꦺꦠ꧀ꦮꦴ ꦏꦡꦺꦠꦷ’’ꦠꦶꦄꦴꦢꦷꦱꦸ ꦱꦧ꧀ꦧꦠ꧀ꦡ ꦈꦨꦺꦴꦥꦶ ꦱꦏꦮꦴꦢꦶꦤꦺꦴꦪꦺꦮ ꦱꦶꦪꦸꦁ ꦲꦺꦛ꧀ꦜꦴ ꦮꦸꦠ꧀ꦠꦱ꧀ꦱꦺꦮ ꦤꦶꦒꦩꦤꦮꦱꦺꦤ ‘‘ꦌꦮ’’ꦤ꧀ꦠꦶꦄꦴꦢꦷꦤꦁ ꦮꦸꦠ꧀ꦠꦠ꧀ꦠꦴ, ꦠꦱ꧀ꦩꦴ ꦠꦁ ꦤ ꦒꦲꦺꦠꦧ꧀ꦧꦁ. ꦄꦠꦶꦫꦺꦏꦏꦴꦫꦟꦁ ꦭꦨꦠꦷꦠꦶ ꦌꦠ꧀ꦡ ꦱꦸꦠ꧀ꦠꦴꦢꦷꦱꦸ ꦥꦸꦫꦶꦩꦁ ꦥꦸꦫꦶꦩꦁ ꦄꦠꦶꦫꦺꦏꦏꦴꦫꦟꦁ ꦤꦴꦩ, ꦪꦺꦴ ꦮꦴ ꦱꦸꦠ꧀ꦠꦴꦢꦷꦱꦸ ꦕꦠꦹꦱꦸ ꦧꦲꦸꦠꦫꦁ ꦏꦴꦫꦟꦁ ꦭꦨꦠꦶ, ꦱꦺꦴ ꦄꦠꦶꦫꦺꦏꦏꦴꦫꦟꦁ ꦭꦨꦠꦶ ꦤꦴꦩ.

ꦱꦸꦛ꧀ꦜꦸ ꦥꦮꦠ꧀ꦠꦶ ꦌꦠꦱ꧀ꦱꦴꦠꦶ ꦱꦸꦥ꧀ꦥꦮꦠ꧀ꦠꦶ, ꦱꦸꦛ꧀ꦜꦸ ꦥꦮꦠ꧀ꦠꦠꦶ ꦱꦷꦭꦺꦤꦴꦠꦶ ꦮꦴ ꦱꦸꦥ꧀ꦥꦮꦠ꧀ꦠꦶ. ꦠꦺꦤꦴꦲ ‘‘ꦱꦸꦥ꧀ꦥꦮꦠ꧀ꦠꦷꦠꦶ ꦱꦸꦛ꧀ꦜꦸ ꦥꦮꦠ꧀ꦠ’’ꦤ꧀ꦠꦶ. ꦮꦴꦕꦴꦪ ꦈꦒ꧀ꦒꦠꦁ ꦮꦴꦕꦸꦒ꧀ꦒꦠꦁ, ꦮꦕꦱꦴ ꦱꦸꦒ꧀ꦒꦲꦶꦠꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦱꦸꦠ꧀ꦠꦠꦺꦴꦠꦶ ꦆꦩꦱ꧀ꦱ ꦮꦶꦮꦫꦟꦁ ‘‘ꦥꦴꦭ꦳ꦶꦠꦺꦴ’’ꦠꦶ. ꦌꦠ꧀ꦡ ꦕ ‘‘ꦱꦸꦠ꧀ꦠꦁ ꦤꦴꦩ ꦱꦏꦭꦁ ꦮꦶꦤꦪꦥꦶꦛꦏ’’ꦤ꧀ꦠꦶ ꦮꦸꦠ꧀ꦠꦠ꧀ꦠꦴ ꦥꦴꦭ꦳ꦶꦠꦺꦴꦠꦶ ꦠꦢꦠ꧀ꦡꦢꦷꦥꦶꦏꦴ ꦄꦚ꧀ꦚꦴꦪꦺꦮ ꦥꦴꦭ꦳ꦶ ꦮꦺꦢꦶꦠꦧ꧀ꦧꦴ. ꦄꦤꦸꦧ꧀ꦪꦚ꧀ꦗꦤꦱꦺꦴꦠꦶ ꦆꦩꦱ꧀ꦱ ꦮꦶꦮꦫꦟꦁ ‘‘ꦥꦫꦶꦥꦸꦕ꧀ꦖꦠꦺꦴ ꦕ ꦄꦛ꧀ꦜꦏꦡꦴꦠꦺꦴ ꦕꦴ’’ꦠꦶ. ꦥꦴꦭ꦳ꦶꦁ ꦄꦤꦸꦒꦤ꧀ꦠ꧀ꦮꦴ ꦄꦠ꧀ꦡꦱ꧀ꦱ ꦧ꧀ꦪꦚ꧀ꦗꦤꦠꦺꦴ ꦥꦏꦴꦱꦤꦠꦺꦴ ꦄꦤꦸꦧ꧀ꦪꦚ꧀ꦗꦤꦤ꧀ꦠꦶ ꦲꦶ ꦥꦫꦶꦥꦸꦕ꧀ꦖꦴ ꦄꦛ꧀ꦜꦏꦡꦴ ꦕ ꦮꦸꦕ꧀ꦕꦠꦶ. ꦌꦠ꧀ꦡ ꦕ ꦄꦛ꧀ꦜꦏꦡꦴꦪ ꦮꦶꦱꦸꦁ ꦒꦲꦶꦠꦠ꧀ꦠꦴ ꦥꦫꦶꦥꦸꦕ꧀ꦖꦴꦠꦶ ꦡꦺꦫꦮꦴꦢꦺꦴ ꦮꦸꦠ꧀ꦠꦺꦴ. ꦱꦔ꧀ꦓꦨꦺꦢꦱ꧀ꦱ ꦥꦸꦧ꧀ꦧꦨꦴꦒꦺ ꦥꦮꦠ꧀ꦠꦏꦭꦲꦱ꧀ꦱꦺꦠꦁ ꦄꦣꦶꦮꦕꦤꦁ ꦱꦔ꧀ꦓꦫꦴꦗꦷꦠꦶ. ꦏꦸꦏ꧀ꦏꦸꦕ꧀ꦕꦏꦺꦴꦠꦶ ꦄꦟꦸꦩꦠ꧀ꦠꦺꦱꦸꦥꦶ ꦮꦗ꧀ꦗꦺꦱꦸ ꦨꦪꦢꦱ꧀ꦱꦤꦮꦱꦺꦤ ꦏꦸꦏ꧀ꦏꦸꦕ꧀ꦕꦁ ꦈꦥ꧀ꦥꦴꦢꦺꦤ꧀ꦠꦺꦴ. ꦠꦤ꧀ꦠꦶꦁ ꦄꦮꦶꦱꦁꦮꦴꦢꦺꦠ꧀ꦮꦴꦠꦶ ꦥꦴꦭ꦳ꦶꦁ ꦄꦚ꧀ꦚꦡꦴ ꦄꦏꦠ꧀ꦮꦴ. ꦄꦮꦺꦴꦏ꧀ꦏꦩꦤ꧀ꦠꦺꦴꦠꦶ ꦄꦤꦠꦶꦏ꧀ꦏꦩꦤ꧀ꦠꦺꦴ.

ꦮꦶꦠ꧀ꦡꦸꦤꦠꦷꦠꦶ ꦄꦠ꧀ꦡꦁ ꦄꦢꦶꦱ꧀ꦮꦴ ꦤꦶꦠ꧀ꦡꦸꦤꦠꦶ. ꦮꦶꦥ꧀ꦦꦤ꧀ꦢꦠꦷꦠꦶ ꦏꦩ꧀ꦥꦠꦶ. ꦱꦤ꧀ꦠꦶꦛ꧀ꦜꦶꦠꦸꦁ ꦤ ꦱꦏ꧀ꦏꦺꦴꦠꦷꦠꦶ ꦌꦏꦱ꧀ꦩꦶꦁꦪꦺꦮ ꦄꦠ꧀ꦡꦺ ꦥꦠꦶꦛ꧀ꦜꦴꦠꦸꦁ ꦤ ꦱꦏ꧀ꦏꦺꦴꦠꦶ. ꦠꦺꦤꦴꦲ ‘‘ꦪꦁ ꦪꦁ ꦥꦫꦺꦤ ꦮꦸꦕ꧀ꦕꦠꦶ, ꦠꦁ ꦠꦁ ꦄꦤꦸꦗꦴꦤꦴꦠꦷ’’ꦠꦶ. ꦥꦫꦮꦴꦢꦁ ꦒꦟ꧀ꦲꦴꦠꦷꦠꦶ ‘‘ꦈꦕ꧀ꦖꦸꦩ꧀ꦲꦶ ꦏꦱꦛꦁ ꦪꦴꦮꦗꦷꦮꦶꦏꦁ, ꦫꦱꦺꦴ ꦱꦠ꧀ꦠꦴꦲꦏꦴꦭꦶꦏꦺꦴ, ꦠꦢꦸꦨꦪꦮꦶꦤꦶꦩꦸꦠ꧀ꦠꦺꦴ ꦕ ꦈꦕ꧀ꦖꦸ ꦤꦴꦩ ꦮꦶꦱꦸꦁ ꦤꦠ꧀ꦡꦶ, ꦠꦱ꧀ꦩꦴ ꦈꦕ꧀ꦖꦸꦥꦶ ꦮꦶꦏꦴꦭꦺ ꦮꦛ꧀ꦛꦠꦷ’’ꦠꦶ ꦥꦫꦮꦴꦢꦶꦤꦴ ꦮꦸꦠ꧀ꦠꦺ ꦠꦩ꧀ꦥꦶ ꦒꦟ꧀ꦲꦴꦠꦶ. ꦌꦏꦺꦏꦭꦺꦴꦩꦤ꧀ꦠꦶ ꦥꦭꦶꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦪꦩ꧀ꦲꦷꦠꦶ ꦪꦱ꧀ꦩꦶꦁ ꦥꦸꦒ꧀ꦒꦭꦺ. ꦥꦫꦶꦏ꧀ꦑꦪꦁ ꦥꦫꦶꦪꦴꦢꦴꦤꦤ꧀ꦠꦶ ꦄꦠ꧀ꦡꦠꦺꦴ ꦌꦏꦁ.

ꦄꦴꦕꦫꦶꦪꦥꦫꦩ꧀ꦥꦫꦴ ꦑꦺꦴ ꦥꦤꦱ꧀ꦱ ꦱꦸꦒ꧀ꦒꦲꦶꦠꦴ ꦲꦺꦴꦠꦷꦠꦶ ꦌꦠ꧀ꦡ ꦄꦴꦕꦫꦶꦪꦥꦫꦩ꧀ꦥꦫꦴꦠꦶ ꦄꦴꦕꦫꦶꦪꦴꦤꦁ ꦮꦶꦤꦶꦕ꧀ꦖꦪꦥꦫꦩ꧀ꦥꦫꦴ. ꦠꦺꦤꦺꦮ ꦮꦏ꧀ꦑꦠꦶ ‘‘ꦪꦡꦴ ꦄꦴꦕꦫꦶꦪꦺꦴ ꦕ ꦄꦴꦕꦫꦶꦪꦴꦕꦫꦶꦪꦺꦴ ꦕ ꦥꦴꦭ꦳ꦶꦚ꧀ꦕ ꦥꦫꦶꦥꦸꦕ꧀ꦖꦚ꧀ꦕ ꦮꦢꦤ꧀ꦠꦶ, ꦠꦡꦴ ꦚꦴꦠꦸꦁ ꦮꦛ꧀ꦛꦠꦷ’’ꦠꦶ. ꦥꦸꦧ꧀ꦧꦴꦥꦫꦴꦤꦸꦱꦤ꧀ꦣꦶꦠꦺꦴꦠꦶ ‘‘ꦆꦢꦁ ꦥꦸꦧ꧀ꦧꦮꦕꦤꦁ, ꦆꦢꦁ ꦥꦫꦮꦕꦤꦁ, ꦄꦪꦩꦤꦸꦱꦤ꧀ꦣꦷ’’ꦠꦶ ꦌꦮꦁ ꦥꦸꦧ꧀ꦧꦴꦥꦫꦴꦤꦸꦱꦤ꧀ꦣꦶꦠꦺꦴ. ꦄꦴꦕꦫꦶꦪꦥꦫꦩ꧀ꦥꦫꦤ꧀ꦠꦶ ꦆꦩꦱ꧀ꦱꦺꦮ ꦮꦺꦮꦕꦤꦁ ꦡꦺꦫꦮꦴꦢꦔ꧀ꦒꦤ꧀ꦠꦶ, ꦡꦺꦫꦥꦛꦶꦥꦴꦛꦶꦤ꧀ꦠꦶ ꦄꦠ꧀ꦡꦺꦴ. ꦢ꧀ꦮꦺ ꦠꦪꦺꦴ ꦥꦫꦶꦮꦛ꧀ꦛꦴꦠꦶ ꦢ꧀ꦮꦺ ꦠꦶꦱ꧀ꦱꦺꦴ ꦥꦫꦩ꧀ꦥꦫꦴ.

ꦆꦩꦺꦲꦶ ꦕ ꦥꦤ ꦠꦷꦲꦶ ꦭꦏ꧀ꦑꦟꦺꦲꦷꦠꦶ ‘‘ꦱꦸꦠ꧀ꦠꦩꦱ꧀ꦱ ꦱ꧀ꦮꦴꦒꦠꦁ ꦲꦺꦴꦠꦷ’’ꦠꦶꦄꦴꦢꦶꦤꦴ ꦲꦺꦛ꧀ꦜꦴ ꦮꦸꦠ꧀ꦠꦺꦲꦶ ꦠꦷꦲꦶ ꦭꦏ꧀ꦑꦟꦺꦲꦶ. ꦌꦠ꧀ꦡ ꦕ ꦥꦜꦩꦺꦤ ꦭꦏ꧀ꦑꦟꦺꦤ ꦮꦶꦤꦪꦱ꧀ꦱ ꦱꦸꦛ꧀ꦜꦸ ꦈꦒ꧀ꦒꦲꦶꦠꦨꦴꦮꦺꦴ ꦮꦸꦠ꧀ꦠꦺꦴ, ꦢꦸꦠꦶꦪꦺꦤ ꦈꦒ꧀ꦒꦲꦶꦠꦺꦤ ꦄꦕꦭꦠꦴ ꦱꦸꦥ꧀ꦥꦠꦶꦛ꧀ꦜꦶꦠꦠꦴ ꦮꦸꦠ꧀ꦠꦴ, ꦠꦠꦶꦪꦺꦤ ꦪꦁ ꦥꦴꦭ꦳ꦶꦪꦴ ꦄꦛ꧀ꦜꦏꦡꦴꦪ ꦕ ꦤꦠ꧀ꦡꦶ, ꦠꦩ꧀ꦥꦶ ꦄꦴꦕꦫꦶꦪꦮꦕꦤꦺꦤ ꦮꦶꦤꦶꦕ꧀ꦖꦶꦤꦶꦠꦸꦁ ꦱꦩꦠ꧀ꦡꦠꦴ ꦮꦸꦠ꧀ꦠꦴ. ꦎꦠꦶꦟ꧀ꦟꦺ ꦮꦠ꧀ꦡꦸꦱ꧀ꦩꦶꦤ꧀ꦠꦶ ꦕꦺꦴꦢꦤꦴꦱꦔ꧀ꦑꦴꦠꦺ ꦮꦷꦠꦶꦏ꧀ꦏꦩꦱꦔ꧀ꦑꦴꦠꦺ ꦮꦴ ꦮꦠ꧀ꦡꦸꦱ꧀ꦩꦶꦁ ꦱꦔ꧀ꦓꦩꦗ꧀ꦙꦺ ꦎꦠꦶꦟ꧀ꦟꦺ, ꦎꦱꦛꦺꦠꦶ ꦄꦠ꧀ꦡꦺꦴ. ꦮꦸꦠ꧀ꦠꦩꦺꦮ ꦮꦶꦨꦴꦮꦺꦤ꧀ꦠꦺꦴ ‘‘ꦕꦺꦴꦢꦏꦺꦤ ꦕ ꦕꦸꦢꦶꦠꦏꦺꦤ ꦕ ꦮꦸꦠ꧀ꦠꦺ ꦮꦠ꧀ꦠꦧ꧀ꦧꦺ’’ꦠꦶ ꦄꦴꦲ. ꦏꦺꦕꦶ ꦥꦤ ‘‘ꦕꦺꦴꦢꦏꦺꦤ ꦎꦠꦶꦟ꧀ꦟꦺ ꦮꦠ꧀ꦡꦸꦱ꧀ꦩꦶꦁ ꦕꦸꦢꦶꦠꦏꦺꦤ ꦕ ꦮꦸꦠ꧀ꦠꦺ ꦮꦠ꧀ꦠꦧ꧀ꦧꦺ’’ꦠꦶ ꦌꦮꦁ ꦪꦺꦴꦗꦺꦤ꧀ꦠꦶ. ꦄꦥꦫꦺ ꦥꦤ ‘‘ꦕꦺꦴꦢꦏꦺꦤ ꦕ ꦕꦸꦢꦶꦠꦏꦺꦤ ꦕ ꦮꦸꦠ꧀ꦠꦺ ꦮꦶꦤꦪꦣꦫꦺꦤ ꦕ ꦮꦠ꧀ꦠꦧ꧀ꦧꦺ’’ꦠꦶ ꦌꦮꦩ꧀ꦥꦶ ꦪꦺꦴꦗꦺꦤ꧀ꦠꦶ. ‘‘ꦕꦺꦴꦢꦏꦺꦤ ꦕ ꦕꦸꦢꦶꦠꦏꦺꦤ ꦕ ꦮꦸꦠ꧀ꦠꦺ ꦮꦠ꧀ꦠꦧ꧀ꦧꦺ’’ꦠꦶ ꦄꦪꦩꦺꦮ ꦥꦤ ꦪꦺꦴꦗꦤꦴ ꦱꦸꦤ꧀ꦢꦫꦠꦫꦴꦠꦶ ꦮꦺꦢꦶꦠꦧ꧀ꦧꦴ. ꦮꦠ꧀ꦡꦸ ꦎꦭꦺꦴꦏꦺꦠꦧ꧀ꦧꦤ꧀ꦠꦶ ꦠꦱ꧀ꦱ ꦠꦱ꧀ꦱ ꦱꦶꦏ꧀ꦑꦴꦥꦢꦱ꧀ꦱ ꦮꦠ꧀ꦡꦸ ꦎꦭꦺꦴꦏꦺꦠꦧ꧀ꦧꦁ. ‘‘ꦠꦶꦟꦺꦤ ꦮꦴ ꦥꦟ꧀ꦟꦺꦤ ꦮꦴ…ꦥꦺ… ꦪꦺꦴ ꦄꦴꦒꦕ꧀ꦖꦺꦪ꧀ꦪ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱꦴ’’ꦠꦶ (ꦥꦴꦫꦴ. ꧕꧑꧗) ꦲꦶ ꦆꦢꦁ ꦤꦶꦱ꧀ꦱꦒ꧀ꦒꦶꦪꦺ ꦄꦚ꧀ꦚꦴꦠꦏꦮꦶꦚ꧀ꦚꦠ꧀ꦠꦶꦱꦶꦏ꧀ꦑꦴꦥꦢꦱ꧀ꦱ ꦮꦠ꧀ꦡꦸꦱ꧀ꦩꦶꦁ ꦥꦚ꧀ꦚꦠ꧀ꦠꦁ, ꦡꦸꦭ꧀ꦭꦕ꧀ꦕꦪꦢꦸꦧ꧀ꦨꦴꦱꦶꦠꦴꦥꦠ꧀ꦠꦷꦤꦁ ꦩꦴꦠꦶꦏꦴꦪ ꦄꦤꦴꦒꦠꦠ꧀ꦠꦴ ‘‘ꦥꦚ꧀ꦕꦤ꧀ꦤꦁ ꦄꦴꦥꦠ꧀ꦠꦷꦤꦁ ꦄꦚ꧀ꦚꦠꦫ’’ꦤ꧀ꦠꦶ ꦮꦸꦠ꧀ꦠꦁ. ꦄꦚ꧀ꦚꦠꦫꦁ ꦮꦴ ꦄꦴꦥꦠ꧀ꦠꦶꦤ꧀ꦠꦶ ‘‘ꦏꦴꦭꦺ ꦮꦶꦏꦴꦭꦱꦚ꧀ꦚꦷ ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ, ꦏꦴꦭꦺ ꦮꦺꦩꦠꦶꦏꦺꦴ ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱꦴ’’ꦠꦶ ꦌꦮꦩꦴꦢꦶꦤꦴ (ꦥꦴꦕꦶ. ꧒꧕꧐) ꦄꦴꦒꦠꦁ ꦢꦸꦏ꧀ꦏꦛꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦱꦶꦏ꧀ꦑꦴꦥꦢꦤ꧀ꦠꦫꦺꦱꦹꦠꦶ ꦮꦶꦤꦷꦠꦮꦠ꧀ꦡꦸꦁ ꦄꦤ꧀ꦠꦺꦴꦏꦠ꧀ꦮꦴ ꦌꦏꦺꦏꦱ꧀ꦩꦶꦁ ꦱꦶꦏ꧀ꦑꦴꦥꦢꦤ꧀ꦠꦫꦺ.

ꦱꦸꦑꦸꦩꦴꦠꦶ ꦄꦠ꧀ꦠꦤꦺꦴꦥꦶ ꦢꦸꦮꦶꦚ꧀ꦚꦺꦪ꧀ꦪꦱꦨꦴꦮꦱ꧀ꦱ ꦭꦲꦸꦥꦫꦶꦮꦠ꧀ꦠꦶꦤꦺꦴ ꦕꦶꦠ꧀ꦠꦱ꧀ꦱ ꦱꦷꦓꦥꦫꦶꦮꦠ꧀ꦠꦶꦠꦴꦪ ꦮꦸꦠ꧀ꦠꦁ. ꦠꦺꦤꦴꦲ ‘‘ꦕꦶꦠ꧀ꦠꦭꦲꦸꦏꦴ’’ꦠꦶ. ꦕꦶꦠ꧀ꦠꦁ ꦭꦲꦸ ꦱꦷꦓꦥꦫꦶꦮꦠ꧀ꦠꦶ ꦌꦠꦺꦱꦤ꧀ꦠꦶ ꦕꦶꦠ꧀ꦠꦭꦲꦸꦏꦴ. ꦠꦺꦠꦶ ꦠꦺ ꦮꦷꦠꦶꦏ꧀ꦏꦩꦺ. ꦠꦁꦮꦠ꧀ꦡꦸꦏꦤ꧀ꦠꦶ ꦠꦺ ꦄꦢꦶꦤ꧀ꦤꦴꦢꦴꦤꦩꦤꦸꦱ꧀ꦱꦮꦶꦒ꧀ꦒꦲꦮꦷꦠꦶꦏ꧀ꦏꦩꦴ ꦮꦠ꧀ꦡꦸ ꦄꦣꦶꦛ꧀ꦜꦴꦤꦁ ꦏꦴꦫꦟꦩꦺꦠꦱ꧀ꦱꦴꦠꦶ ꦠꦁꦮꦠ꧀ꦡꦸꦏꦁ. ꦱꦷꦭꦴꦤꦶ ꦱꦺꦴꦣꦺꦠ꧀ꦮꦴꦠꦶ ꦪꦁꦮꦠ꧀ꦡꦸꦏꦁ ꦏꦸꦏ꧀ꦏꦸꦕ꧀ꦕꦁ ꦈꦥ꧀ꦥꦤ꧀ꦤꦁ, ꦠꦁ ꦄꦩꦤꦱꦶꦏꦫꦶꦠ꧀ꦮꦴ ꦄꦮꦱꦺꦱꦱꦷꦭꦴꦤꦶ ꦱꦺꦴꦣꦺꦠ꧀ꦮꦴ. ꦥꦴꦏꦛꦨꦴꦮꦠꦺꦴ ꦱꦸꦑꦮꦭ꦳ꦚ꧀ꦗꦤꦠꦴꦪ ꦕ ‘‘ꦢ꧀ꦮꦠ꧀ꦠꦶꦁꦱꦴꦏꦴꦫꦁ ꦠꦴꦮ ꦩꦤꦱꦶ ꦏꦫꦺꦴꦲꦷ’’ꦠꦶ ꦮꦸꦠ꧀ꦠꦁ. ꦄꦚ꧀ꦚꦱ꧀ꦩꦶꦁ ꦥꦤ ꦏꦩ꧀ꦩꦛ꧀ꦜꦴꦤꦺ ꦏꦠꦥꦫꦶꦕꦪꦺꦤ ꦠꦢꦺꦮ ꦩꦤꦱꦶ ꦏꦴꦠꦧ꧀ꦧꦁ. ꦏꦩ꧀ꦩꦛ꧀ꦜꦴꦤꦁ ꦓꦛꦪꦠꦷꦠꦶ ꦄꦤ꧀ꦠꦫꦤ꧀ꦠꦫꦴ ꦑꦟ꧀ꦝꦁ ꦄꦢꦱ꧀ꦱꦺꦠ꧀ꦮꦴ ꦕꦶꦠ꧀ꦠꦺꦤ ꦱꦢ꧀ꦣꦶꦁ ꦄꦴꦭꦩ꧀ꦧꦤꦨꦴꦮꦺꦤ ꦕꦶꦫꦏꦴꦭꦁ ꦓꦛꦪꦠꦶ. ꦱꦔ꧀ꦑꦴꦫꦴ ꦥꦴꦏꦛꦴ ꦲꦸꦠ꧀ꦮꦴ ꦈꦥꦛ꧀ꦜꦲꦤ꧀ꦠꦷꦠꦶ ꦮꦶꦥꦱ꧀ꦱꦤꦴꦏꦩ꧀ꦩꦛ꧀ꦜꦴꦤꦶꦏꦺꦴ ꦕꦺ, ꦠꦱ꧀ꦱ ꦱꦔ꧀ꦑꦴꦫꦴ ꦥꦴꦏꦛꦴ ꦲꦸꦠ꧀ꦮꦴ ꦈꦥꦛ꧀ꦜꦲꦤ꧀ꦠꦶ. ꦱꦕꦺ ꦏꦠꦥꦴꦫꦴꦗꦶꦏꦮꦷꦠꦶꦏ꧀ꦏꦩꦺꦴ ꦨꦮꦺꦪ꧀ꦪ, ꦠꦱ꧀ꦱ ꦱꦠꦶꦥꦶ ꦄꦱꦫꦶꦠꦸꦏꦴꦩꦠꦴꦪ ꦮꦶꦥ꧀ꦥꦛꦶꦱꦴꦫꦮꦠ꧀ꦡꦸꦮꦱꦺꦤ ꦥꦸꦤꦥ꧀ꦥꦸꦤꦁ ꦠꦁ ꦈꦥꦛ꧀ꦜꦲꦠꦷꦠꦶ ꦕꦶꦠ꧀ꦠꦺꦏꦒ꧀ꦒꦠꦁ ꦤ ꦮꦶꦤ꧀ꦢꦠꦶ. ꦠꦺꦤ ꦮꦸꦠ꧀ꦠꦁ ‘‘ꦏꦩ꧀ꦩꦛ꧀ꦜꦴꦤꦁ ꦤ ꦓꦛꦪꦠꦷ’’ꦠꦶꦄꦴꦢꦶ. ꦄꦠ꧀ꦠꦤꦴ ꦗꦴꦤꦴꦠꦷꦠꦶ ꦱꦪꦩꦺꦮ ꦗꦴꦤꦴꦠꦶ. ꦥꦕ꧀ꦕꦠ꧀ꦠꦺ ꦕꦺꦠꦁ ꦏꦫꦟꦮꦕꦤꦁ, ꦄꦠ꧀ꦠꦴ ꦗꦴꦤꦴꦠꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦄꦚ꧀ꦚꦴ ꦕ ꦢꦺꦮꦠꦴ ꦗꦴꦤꦤ꧀ꦠꦷꦠꦶ ꦄꦴꦫꦏ꧀ꦑꦢꦺꦮꦠꦴꦲꦶ ꦄꦚ꧀ꦚꦴ ꦥꦫꦕꦶꦠ꧀ꦠꦮꦶꦢꦸꦤꦶꦪꦺꦴ ꦢꦺꦮꦠꦴ ꦕ ꦗꦴꦤꦤ꧀ꦠꦶ.

ꦤꦶꦛ꧀ꦜꦶꦠꦴ ꦕꦠꦸꦧ꧀ꦧꦶꦣꦮꦶꦤꦪꦏꦡꦴꦮꦟ꧀ꦟꦤꦴ

ꦮꦶꦤꦪꦣꦫꦱ꧀ꦱ ꦕ ꦭꦏ꧀ꦑꦟꦴꦢꦶꦏꦡꦴꦮꦟ꧀ꦟꦤꦴ.

ꦨꦶꦏ꧀ꦑꦸꦥꦢꦨꦴꦗꦤꦷꦪꦮꦟ꧀ꦟꦤꦴ

ꦠꦱ꧀ꦩꦴꦠꦶ ꦪꦱ꧀ꦩꦴ ꦥꦤ-ꦱꦢ꧀ꦢꦁ ꦄꦥꦤꦺꦠ꧀ꦮꦴ ꦄꦤꦶꦪꦩꦺꦤ ꦥꦸꦒ꧀ꦒꦭꦢꦷꦥꦏꦁ ꦪꦺꦴ-ꦱꦢ꧀ꦢꦩꦺꦮ ꦄꦴꦲ, ꦠꦱ꧀ꦩꦴ. ꦌꦠ꧀ꦡꦴꦠꦶ ꦆꦩꦱ꧀ꦩꦶꦁ ꦪꦺꦴ-ꦱꦢ꧀ꦢꦺ. ꦥꦤ-ꦱꦢ꧀ꦢꦱ꧀ꦱ ꦤꦶꦥꦴꦠꦩꦠ꧀ꦠꦠ꧀ꦠꦴ ꦪꦺꦴ-ꦱꦢ꧀ꦢꦱ꧀ꦱꦺꦮ ꦄꦠ꧀ꦡꦁ ꦥꦏꦴꦱꦺꦤ꧀ꦠꦺꦴ ‘‘ꦪꦺꦴ ꦏꦺꦴꦕꦷꦠꦶ ꦮꦸꦠ꧀ꦠꦁ ꦲꦺꦴꦠꦷ’’ꦠꦶ ꦄꦴꦲ. ꦪꦺꦴ ꦏꦺꦴꦕꦶ ꦤꦴꦩꦴꦠꦶ ꦪꦺꦴ ꦮꦴ ꦱꦺꦴ ꦮꦴ ꦪꦺꦴ ꦏꦺꦴꦕꦷꦠꦶ ꦮꦸꦠ꧀ꦠꦺꦴ. ꦮꦴꦱꦣꦸꦫꦪꦸꦠ꧀ꦠꦺꦴ ꦮꦴꦠꦶ ꦮꦶꦥꦱ꧀ꦱꦤꦴꦣꦸꦫꦪꦸꦠ꧀ꦠꦺꦴ ꦮꦴ. ꦱꦷꦭꦺꦱꦹꦠꦶ ꦥꦏꦠꦷꦱꦸ.

ꦨꦶꦏ꧀ꦑꦠꦷꦠꦶ ꦪꦴꦕꦠꦶ. ꦭꦨꦤ꧀ꦠꦺꦴ ꦮꦴ ꦄꦭꦨꦤ꧀ꦠꦺꦴ ꦮꦴꦠꦶ ꦪꦺꦴ ꦏꦺꦴꦕꦶ ꦨꦶꦏ꧀ꦑꦠꦶ ꦨꦶꦏ꧀ꦑꦁ ꦌꦱꦠꦶ ꦒꦮꦺꦱꦠꦶ, ꦱꦺꦴ ꦠꦁ ꦭꦨꦠꦸ ꦮꦴ ꦩꦴ ꦮꦴ, ꦠꦡꦴꦥꦶ ꦨꦶꦏ꧀ꦑꦠꦷꦠꦶ ꦨꦶꦏ꧀ꦑꦹꦠꦶ ꦄꦪꦩꦺꦠ꧀ꦡ ꦄꦣꦶꦥ꧀ꦥꦴꦪꦺꦴ. ꦄꦫꦶꦪꦴꦪ ꦪꦴꦕꦤꦴꦪꦴꦠꦶ ‘‘ꦈꦢ꧀ꦢꦶꦱ꧀ꦱ ꦄꦫꦶꦪꦴ ꦠꦶꦛ꧀ꦜꦤ꧀ꦠꦶ, ꦌꦱꦴ ꦄꦫꦶꦪꦴꦤ ꦪꦴꦕꦤꦴ’’ꦠꦶ ꦌꦮꦁ ꦮꦸꦠ꧀ꦠꦴꦪ ꦄꦫꦶꦪꦪꦴꦕꦤꦴꦪ, ꦤ ꦏꦥꦟꦢ꧀ꦣꦶꦏꦮꦟꦶꦧ꧀ꦧꦏꦪꦴꦕꦏꦴꦤꦁ ꦮꦶꦪ ‘‘ꦢꦺꦲꦶ ꦢꦺꦲꦷ’’ꦠꦶ ꦌꦮꦁ ꦥꦮꦠ꧀ꦠꦪꦴꦕꦤꦴꦪ. ꦨꦶꦏ꧀ꦑꦴꦕꦫꦶꦪꦤ꧀ꦠꦶ ꦈꦚ꧀ꦖꦴꦕꦫꦶꦪꦁ. ꦄꦗ꧀ꦙꦸꦥꦒꦠꦠ꧀ꦠꦴꦠꦶ ꦄꦤꦸꦛ꧀ꦜꦶꦠꦠ꧀ꦠꦴ. ꦏꦴꦗꦨꦠ꧀ꦠꦤ꧀ꦠꦶ ꦏꦴꦗꦺꦲꦶ ꦄꦴꦤꦷꦠꦁ ꦨꦠ꧀ꦠꦁ. ꦄꦒ꧀ꦓꦦꦱ꧀ꦱꦮꦟ꧀ꦟꦨꦺꦢꦺꦤꦴꦠꦶ ꦄꦒ꧀ꦓꦴꦢꦷꦤꦁ ꦥꦸꦫꦶꦩꦥꦏꦠꦶꦮꦶꦗꦲꦺꦤ. ꦥꦸꦫꦶꦩꦥꦏꦠꦶꦮꦶꦗꦲꦤꦚ꧀ꦲꦺꦠ꧀ꦡ ꦨꦺꦢꦺꦴꦠꦶ ꦄꦣꦶꦥ꧀ꦥꦺꦠꦁ. ꦣꦺꦴꦮꦶꦠ꧀ꦮꦴ ꦄꦥꦤꦺꦠꦸꦁ ꦄꦱꦏ꧀ꦏꦸꦟꦺꦪ꧀ꦪꦱꦨꦴꦮꦁ ꦩꦭꦁ, ꦠꦡꦴ ꦄꦥꦤꦺꦠꦸꦁ ꦱꦏ꧀ꦏꦸꦟꦺꦪ꧀ꦪꦱꦨꦴꦮꦴ ꦗꦭ꧀ꦭꦶꦏꦴ. ꦨꦶꦤ꧀ꦤꦥꦛꦣꦫꦺꦴꦠꦶ ꦤꦶꦧ꧀ꦧꦕꦤꦁ ꦨꦶꦤ꧀ꦤꦥꦛꦣꦫꦺ ꦨꦶꦏ꧀ꦑꦸ-ꦱꦢ꧀ꦢꦱ꧀ꦱ ꦤꦶꦫꦸꦭ꦳꧀ꦲꦠ꧀ꦠꦴ ꦏꦠꦁ.

ꦈꦥꦤꦶꦱ꧀ꦱꦪꦱꦩ꧀ꦥꦤ꧀ꦤꦤ꧀ꦠꦶ ꦥꦸꦧ꧀ꦧꦺ ꦄꦛ꧀ꦜꦥꦫꦶꦏ꧀ꦑꦴꦫꦢꦴꦤꦹꦥꦤꦶꦱ꧀ꦱꦪꦱꦩ꧀ꦥꦤ꧀ꦤꦁ. ꦪꦺꦴ ꦲꦶ ꦕꦷꦮꦫꦴꦢꦶꦏꦺ ꦄꦛ꧀ꦜ ꦥꦫꦶꦏ꧀ꦑꦴꦫꦺ ꦥꦠ꧀ꦠꦕꦷꦮꦫꦩꦺꦮ ꦮꦴ ꦱꦺꦴꦠꦴꦥꦤ꧀ꦤꦴꦢꦶꦄꦫꦶꦪꦱ꧀ꦱ ꦥꦸꦡꦸꦗ꧀ꦗꦤꦱ꧀ꦱꦺꦮ ꦮꦴ ꦱꦷꦭꦱꦩ꧀ꦥꦤ꧀ꦤꦱ꧀ꦱ ꦢꦠ꧀ꦮꦴ ‘‘ꦆꦢꦁ ꦥꦫꦶꦏ꧀ꦑꦴꦫꦢꦴꦤꦁ ꦄꦤꦴꦒꦠꦺ ꦌꦲꦶꦨꦶꦏ꧀ꦑꦸꦨꦴꦮꦴꦪ ꦥꦕ꧀ꦕꦪꦺꦴ ꦲꦺꦴꦠꦹ’’ꦠꦶ ꦥꦠ꧀ꦡꦤꦁ ꦥꦛ꧀ꦜꦥꦺꦱꦶ, ꦠꦱ꧀ꦱ ꦠꦁ ꦱꦠꦶ ꦄꦣꦶꦏꦴꦫꦱꦩ꧀ꦥꦠ꧀ꦠꦶꦪꦁ ꦧꦸꦢ꧀ꦣꦴꦤꦁ ꦱꦩ꧀ꦩꦸꦑꦷꦨꦴꦮꦺ ꦆꦢ꧀ꦣꦶꦩꦪꦥꦫꦶꦏ꧀ꦑꦴꦫꦭꦴꦨꦴꦪ ꦱꦁꦮꦠ꧀ꦠꦠꦷꦠꦶ ꦮꦺꦢꦶꦠꦧ꧀ꦧꦁ. ꦧ꧀ꦫꦲ꧀ꦩꦓꦺꦴꦱꦤ꧀ꦠꦶ ꦈꦠ꧀ꦠꦩꦓꦺꦴꦱꦁ, ꦧ꧀ꦫꦲ꧀ꦩꦸꦤꦺꦴ ꦓꦺꦴꦱꦱꦢꦶꦱꦁ ꦮꦴ ꦓꦺꦴꦱꦁ. ꦧ꧀ꦫꦲ꧀ꦩꦕꦫꦶꦪꦤ꧀ꦠꦶ ꦱꦴꦱꦤꦧ꧀ꦫꦲ꧀ꦩꦕꦫꦶꦪꦁ ꦩꦒ꧀ꦒꦧ꧀ꦫꦲ꧀ꦩꦕꦫꦶꦪꦚ꧀ꦕ. ꦢꦸꦏ꧀ꦑꦱ꧀ꦱ ꦱꦩ꧀ꦩꦴ ꦄꦤ꧀ꦠꦏꦶꦫꦶꦪꦴꦪꦴꦠꦶ ꦪꦺꦴꦗꦺꦠꦧ꧀ꦧꦁ. ꦨꦟ꧀ꦝꦹꦠꦶ ꦩꦸꦟ꧀ꦝꦺꦴ. ꦮꦴꦱꦷꦠꦶ ꦢꦤ꧀ꦠꦏꦛ꧀ꦜꦕ꧀ꦖꦺꦢꦤꦮꦴꦱꦶ. ꦧꦤ꧀ꦣꦤꦤ꧀ꦠꦶ ꦏꦴꦪꦧꦤ꧀ꦣꦤꦁ. ꦪꦸꦠ꧀ꦠꦺꦴ ꦨꦴꦮꦤꦴꦤꦸꦪꦺꦴꦒꦺꦴ ꦄꦱ꧀ꦱꦴꦠꦶ ꦪꦸꦠ꧀ꦠꦪꦺꦴꦒꦺꦴ, ꦠꦱ꧀ꦱ ꦪꦸꦠ꧀ꦠꦪꦺꦴꦒꦱ꧀ꦱ, ꦨꦴꦮꦤꦴꦤꦸꦪꦺꦴꦒꦩꦤꦸꦪꦸꦠ꧀ꦠꦱ꧀ꦱꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦆꦫꦶꦪꦴꦥꦡꦱꦩ꧀ꦥꦤ꧀ꦤꦠꦴꦮꦶꦨꦴꦮꦤꦠ꧀ꦡꦁ ‘‘ꦱꦛ꧀ꦜꦶꦮꦱ꧀ꦱꦶꦏꦠ꧀ꦡꦺꦫꦺꦴ ꦮꦶꦪꦴ’’ꦠꦶ ꦮꦸꦠ꧀ꦠꦁ. ꦧꦸꦢ꧀ꦣꦺꦴꦮ ꦥꦧ꧀ꦧꦗ꧀ꦗꦴꦕꦫꦶꦪꦺꦴ ꦈꦥꦱꦩ꧀ꦥꦢꦴꦕꦫꦶꦪꦺꦴ ꦕ ꦄꦱ꧀ꦱꦴꦠꦶ ꦧꦸꦢ꧀ꦣꦴꦕꦫꦶꦪꦏꦺꦴ. ꦥꦜꦩꦧꦺꦴꦣꦶꦪꦩ꧀ꦥꦶ ꦥꦜꦩꦏꦴꦭꦺꦪꦺꦮ ꦱꦺꦱꦈꦥꦱꦩ꧀ꦥꦢꦴꦤꦁ ꦄꦨꦴꦮꦺꦴꦠꦶ ꦄꦴꦲ ‘‘ꦥꦜꦩꦧꦺꦴꦣꦶꦪꦁ ꦌꦏꦱ꧀ꦩꦶꦁ ꦏꦴꦭꦺ’’ꦠꦶ. ꦥꦚ꧀ꦕ ꦥꦚ꧀ꦕꦮꦒ꧀ꦒꦶꦪꦠ꧀ꦡꦺꦫꦴꦠꦶ ꦥꦚ꧀ꦕꦮꦒ꧀ꦒꦶꦪꦠ꧀ꦡꦺꦫꦴ ꦥꦚ꧀ꦕ. ꦠꦷꦟꦶ ꦱꦠꦤ꧀ꦠꦶ ꦠꦷꦟꦶ ꦱꦠꦴꦤꦶ, ꦒꦴꦡꦴꦧꦤ꧀ꦣꦱꦸꦑꦠ꧀ꦡꦁ ꦮꦕꦤꦮꦶꦥꦭ꧀ꦭꦴꦱꦺꦴ ꦏꦠꦺꦴ. ꦌꦏꦺꦴ ꦕ ꦡꦺꦫꦺꦴꦠꦶ ꦄꦔ꧀ꦒꦸꦭꦶꦩꦴꦭꦠ꧀ꦡꦺꦫꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦤ ꦮꦸꦠ꧀ꦠꦴꦠꦶ ꦄꦛ꧀ꦜꦏꦡꦴꦪꦁ ꦤ ꦮꦸꦠ꧀ꦠꦴ. ꦠꦠ꧀ꦡꦴꦠꦶ ꦮꦶꦤꦪꦥꦴꦭ꦳ꦶꦪꦁ.

ꦮꦺꦭ꦳ꦸꦮꦤꦩꦲꦴꦮꦶꦲꦴꦫꦺ ꦒꦤ꧀ꦣꦏꦸꦛꦶꦪꦁ ꦤꦶꦱꦶꦤ꧀ꦤꦺꦴꦪꦺꦮ ꦨꦒꦮꦴ ꦩꦲꦴꦏꦱ꧀ꦱꦥꦠ꧀ꦡꦺꦫꦱ꧀ꦱ ꦄꦠ꧀ꦠꦴꦤꦁ ꦈꦢ꧀ꦢꦶꦱ꧀ꦱ ꦥꦧ꧀ꦧꦗꦶꦠꦨꦴꦮꦁ ꦮꦶꦢꦶꦠ꧀ꦮꦴ ꦠꦱ꧀ꦱ ꦥꦕ꧀ꦕꦸꦒ꧀ꦒꦩꦤꦁ ꦏꦫꦺꦴꦤ꧀ꦠꦺꦴ ꦠꦶꦒꦴꦮꦸꦠꦁ ꦩꦒ꧀ꦒꦁ ꦌꦏꦏꦺꦴꦮ ꦒꦤ꧀ꦠ꧀ꦮꦴ ꦧꦲꦸꦥꦸꦠ꧀ꦠꦤꦶꦒ꧀ꦫꦺꦴꦣꦩꦹꦭꦺ ꦥꦭ꧀ꦭꦔ꧀ꦏꦁ ꦄꦴꦨꦸꦗꦶꦠ꧀ꦮꦴ ꦤꦶꦱꦶꦤ꧀ꦤꦺꦴ ꦄꦠ꧀ꦠꦤꦺꦴ ꦱꦤ꧀ꦠꦶꦏꦁ ꦄꦴꦒꦤ꧀ꦠ꧀ꦮꦴ ꦥꦫꦩꦤꦶꦥꦕ꧀ꦕꦏꦴꦫꦁ ꦢꦱ꧀ꦱꦺꦠ꧀ꦮꦴ ‘‘ꦱꦠ꧀ꦡꦴ ꦩꦺ ꦨꦤ꧀ꦠꦺ ꦨꦒꦮꦴ, ꦱꦴꦮꦏꦺꦴꦲꦩꦱ꧀ꦩꦶ, ꦱꦠ꧀ꦡꦴ ꦩꦺ ꦨꦤ꧀ꦠꦺ ꦨꦒꦮꦴ, ꦱꦴꦮꦏꦺꦴꦲꦩꦱ꧀ꦩꦷ’’ꦠꦶ ꦠꦶꦏ꧀ꦑꦠ꧀ꦠꦸꦁ ꦄꦠ꧀ꦠꦤꦺꦴ ꦱꦴꦮꦏꦠ꧀ꦠꦁ ꦱꦴꦮꦺꦠ꧀ꦮꦴ ꦜꦶꦠꦱ꧀ꦱ ꦩꦲꦴꦏꦱ꧀ꦱꦥꦠ꧀ꦡꦺꦫꦱ꧀ꦱ ꦤꦶꦥꦕ꧀ꦕꦏꦴꦫꦩꦲꦠ꧀ꦠꦠꦁ ꦄꦠ꧀ꦠꦤꦺꦴ ꦕ ꦩꦲꦴꦤꦸꦨꦴꦮꦠꦁ ꦢꦷꦥꦺꦠꦸꦁ ꦪꦱ꧀ꦱ ꦄꦚ꧀ꦚꦱ꧀ꦱ ꦄꦗꦴꦤꦁꦪꦺꦮ ‘‘ꦗꦴꦤꦴꦩꦷ’’ꦠꦶ ꦥꦛꦶꦚ꧀ꦚꦱ꧀ꦱ ꦧꦴꦲꦶꦫꦏꦱ꧀ꦱ ꦱꦠ꧀ꦡꦸꦤꦺꦴ ꦌꦮꦁ ꦱꦧ꧀ꦧꦕꦺꦠꦱꦴ ꦱꦩꦤ꧀ꦤꦴꦒꦠꦺꦴ ꦥꦱꦤ꧀ꦤꦕꦶꦠ꧀ꦠꦺꦴ ꦱꦴꦮꦏꦺꦴ ꦌꦮꦫꦹꦥꦁ ꦥꦫꦩꦤꦶꦥꦕ꧀ꦕꦏꦴꦫꦁ ꦏꦫꦺꦪ꧀ꦪ, ꦠꦱ꧀ꦱ ꦮꦟ꧀ꦛꦕ꧀ꦖꦶꦤ꧀ꦤꦠꦴꦭꦥꦏ꧀ꦏꦁ ꦮꦶꦪ ꦒꦷꦮꦠꦺꦴ ꦩꦸꦢ꧀ꦣꦴꦥꦶ ꦮꦶꦥꦠꦺꦪ꧀ꦪ, ꦱꦠ꧀ꦠꦣꦴ ꦮꦴ ꦦꦭꦺꦪ꧀ꦪꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦪꦺꦴ ꦑꦺꦴ, ꦏꦱ꧀ꦱꦥ, ꦌꦮꦁ ꦱꦧ꧀ꦧꦕꦺꦠꦱꦴ ꦱꦩꦤ꧀ꦤꦴꦒꦠꦁ ꦱꦴꦮꦏꦁ ꦄꦗꦴꦤꦁꦪꦺꦮ ꦮꦢꦺꦪ꧀ꦪ ‘ꦗꦴꦤꦴꦩꦷ’ꦠꦶ, ꦄꦥꦱ꧀ꦱꦁꦪꦺꦮ ꦮꦢꦺꦪ꧀ꦪ ‘ꦥꦱ꧀ꦱꦴꦩꦷ’ꦠꦶ, ꦩꦸꦢ꧀ꦣꦴꦥꦶ ꦠꦱ꧀ꦱ ꦮꦶꦥꦠꦺꦪ꧀ꦪ, ꦱꦠ꧀ꦠꦣꦴ ꦮꦴ ꦦꦭꦺꦪ꧀ꦪ, ꦄꦲꦁ ꦑꦺꦴ, ꦏꦱ꧀ꦱꦥ, ꦗꦴꦤꦁꦪꦺꦮ ꦮꦢꦴꦩꦶ ‘ꦗꦴꦤꦴꦩꦷ’ꦠꦶ, ꦥꦱ꧀ꦱꦁꦪꦺꦮ ꦮꦢꦴꦩꦶ ‘ꦥꦱ꧀ꦱꦴꦩꦷ’’’ (ꦱꦁ. ꦤꦶ. ꧒.꧑꧕꧔) ꦠꦶ ꦮꦠ꧀ꦮꦴ ꦗꦴꦠꦶꦩꦢꦩꦴꦤꦩꦢꦫꦹꦥꦩꦢꦥ꧀ꦥꦲꦴꦤꦠ꧀ꦡꦁ ꦠꦷꦲꦶ ꦎꦮꦴꦢꦺꦲꦶ ꦩꦲꦴꦏꦱ꧀ꦱꦥꦠ꧀ꦡꦺꦫꦁ ꦎꦮꦢꦤ꧀ꦠꦺꦴ ‘‘ꦠꦱ꧀ꦩꦴꦠꦶꦲ ꦠꦺ ꦏꦱ꧀ꦱꦥꦴ’’ꦠꦶꦄꦴꦢꦶꦩꦴꦲ.

ꦠꦠ꧀ꦡ (ꦱꦁ. ꦤꦶ. ꦄꦛ꧀ꦜ. ꧒.꧒.꧑꧕꧔) ꦠꦱ꧀ꦩꦴꦠꦶꦲꦴꦠꦶ ꦠꦱ꧀ꦩꦴ ꦆꦕ꧀ꦕꦺꦮ ꦮꦸꦠ꧀ꦠꦁ ꦲꦺꦴꦠꦶ, ꦪꦱ꧀ꦩꦴ ꦄꦲꦁ ꦗꦴꦤꦤ꧀ꦠꦺꦴꦮ ‘‘ꦗꦴꦤꦴꦩꦷ’’ꦠꦶ ꦥꦱ꧀ꦱꦤ꧀ꦠꦺꦴ ꦌꦮ ꦕ ‘‘ꦥꦱ꧀ꦱꦴꦩꦷ’’ꦠꦶ ꦮꦢꦴꦩꦶ, ꦠꦱ꧀ꦩꦴꦠꦶ ꦄꦠ꧀ꦡꦺꦴ. ꦠꦶ-ꦏꦴꦫ ꦲ-ꦏꦴꦫꦴ ꦤꦶꦥꦴꦠꦴ. ꦆꦲꦴꦠꦶ ꦮꦴ ꦆꦩꦱ꧀ꦩꦶꦁ ꦱꦴꦱꦤꦺ, ꦠ-ꦏꦴꦫꦺꦴ ꦥꦢꦱꦤ꧀ꦣꦶꦮꦱꦺꦤ ꦄꦴꦒꦠꦺꦴ. ꦌꦮꦁ ꦱꦶꦏ꧀ꦑꦶꦠꦧ꧀ꦧꦤ꧀ꦠꦶ ꦆꦢꦴꦤꦶ ꦮꦸꦕ꧀ꦕꦩꦴꦤꦴꦏꦴꦫꦺꦤ ꦱꦶꦏ꧀ꦑꦶꦠꦧ꧀ꦧꦁ. ꦠꦶꦧ꧀ꦧꦤ꧀ꦠꦶ ꦧꦲꦭꦁ ꦩꦲꦤ꧀ꦠꦁ. ꦲꦶꦫꦺꦴꦠ꧀ꦠꦥ꧀ꦥꦚ꧀ꦕꦴꦠꦶ ꦲꦶꦫꦷ ꦕ ꦎꦠ꧀ꦠꦥ꧀ꦥꦚ꧀ꦕ. ꦥꦕ꧀ꦕꦸꦥꦛ꧀ꦜꦶꦠꦁ ꦨꦮꦶꦱ꧀ꦱꦠꦷꦠꦶ ꦈꦥꦱꦔ꧀ꦏꦩꦤꦠꦺꦴ ꦥꦜꦩꦠꦫꦩꦺꦮ ꦈꦥꦛ꧀ꦜꦶꦠꦁ ꦨꦮꦶꦱ꧀ꦱꦠꦶ. ꦠꦡꦴ ꦲꦶ ꦱꦠꦶ ꦠꦺꦱꦁ ꦥꦸꦫꦠꦺꦴ ꦄꦱ꧀ꦱ ꦱꦒꦴꦫꦮꦱꦥ꧀ꦥꦠꦶꦱ꧀ꦱꦮꦠꦴ ꦱꦟ꧀ꦜꦴꦠꦶ. ꦪꦺꦴ ꦕ ꦡꦺꦫꦴꦢꦷꦱꦸ ꦲꦶꦫꦺꦴꦠ꧀ꦠꦥ꧀ꦥꦁ ꦈꦥꦛ꧀ꦜꦥꦺꦠ꧀ꦮꦴ ꦈꦥꦱꦔ꧀ꦏꦩꦠꦶ, ꦡꦺꦫꦴꦢꦪꦺꦴꦥꦶ ꦠꦁ ꦱꦲꦶꦫꦶꦏꦴ ꦱꦎꦠ꧀ꦠꦥ꧀ꦥꦴ ꦕ ꦲꦸꦠ꧀ꦮꦴ ꦈꦥꦱꦔ꧀ꦏꦩꦤ꧀ꦠꦷꦠꦶ ꦄꦪꦩꦺꦠ꧀ꦡ ꦄꦴꦤꦶꦱꦁꦱꦺꦴ. ꦏꦸꦱꦭꦹꦥꦱꦁꦲꦶꦠꦤ꧀ꦠꦶ ꦏꦸꦱꦭꦤꦶꦱ꧀ꦱꦶꦠꦁ, ꦄꦤꦮꦗ꧀ꦗꦣꦩ꧀ꦩꦤꦶꦱ꧀ꦱꦶꦠꦤ꧀ꦠꦶ ꦄꦠ꧀ꦡꦺꦴ. ꦄꦛ꧀ꦜꦶꦁ ꦏꦠ꧀ꦮꦴꦠꦶ ꦄꦠ꧀ꦠꦴꦤꦁ ꦠꦺꦤ ꦣꦩ꧀ꦩꦺꦤ ꦄꦛ꧀ꦜꦶꦏꦁ ꦏꦠ꧀ꦮꦴ, ꦠꦁ ꦮꦴ ꦣꦩ꧀ꦩꦁ ‘‘ꦌꦱ ꦩꦪ꧀ꦲꦁ ꦣꦩ꧀ꦩꦺꦴ’’ꦠꦶ ꦄꦛ꧀ꦜꦶꦁ ꦏꦠ꧀ꦮꦴ. ꦩꦤꦱꦶ ꦏꦠ꧀ꦮꦴꦠꦶ ꦕꦶꦠ꧀ꦠꦺ ꦜꦥꦺꦠ꧀ꦮꦴ. ꦱꦧ꧀ꦧꦕꦺꦠꦱꦴ ꦱꦩꦤ꧀ꦤꦴꦲꦫꦶꦠ꧀ꦮꦴꦠꦶ ꦕꦶꦠ꧀ꦠꦱ꧀ꦱ ꦡꦺꦴꦏꦩ꧀ꦥꦶ ꦧꦲꦶ ꦒꦤ꧀ꦠꦸꦁ ꦄꦢꦺꦤ꧀ꦠꦺꦴ ꦱꦧ꧀ꦧꦺꦤ ꦱꦩꦤ꧀ꦤꦴꦲꦴꦫꦕꦶꦠ꧀ꦠꦺꦤ ꦱꦩꦤ꧀ꦤꦴꦲꦫꦶꦠ꧀ꦮꦴ. ꦎꦲꦶꦠꦱꦺꦴꦠꦺꦴꦠꦶ ꦜꦥꦶꦠꦱꦺꦴꦠꦺꦴ, ꦣꦩ꧀ꦩꦺ ꦤꦶꦲꦶꦠꦱꦺꦴꦠꦺꦴꦠꦶ ꦄꦠ꧀ꦡꦺꦴ. ꦌꦮꦚ꧀ꦲꦶ ꦠꦺ ꦱꦶꦏ꧀ꦑꦶꦠꦧ꧀ꦧꦤ꧀ꦠꦶ ꦚꦴꦟꦱꦺꦴꦠꦚ꧀ꦕ ꦥꦱꦴꦢꦱꦺꦴꦠꦚ꧀ꦕ ꦎꦢꦲꦶꦠ꧀ꦮꦴ ‘‘ꦩꦪꦴ ꦢꦺꦱꦶꦠꦁ ꦣꦩ꧀ꦩꦁ ꦱꦏ꧀ꦏꦕ꧀ꦕꦩꦺꦮ ꦱꦸꦟꦶꦱ꧀ꦱꦴꦩꦷ’’ꦠꦶ ꦌꦮꦚ꧀ꦲꦶ ꦠꦺ ꦱꦶꦏ꧀ꦑꦶꦠꦧ꧀ꦧꦁ. ꦱꦴꦠꦱꦲꦒꦠꦴ ꦕ ꦩꦺ ꦏꦴꦪꦒꦠꦴꦱꦠꦷꦠꦶ ꦄꦱꦸꦨꦺꦱꦸ ꦕꦺꦮ ꦄꦴꦤꦴꦥꦴꦤꦺ ꦕ ꦥꦜꦩꦗ꧀ꦙꦴꦤꦮꦱꦺꦤ ꦱꦸꦑꦱꦩ꧀ꦥꦪꦸꦠ꧀ꦠꦴ ꦏꦴꦪꦒꦠꦴꦱꦠꦶ. ꦪꦺꦴ ꦕ ꦥꦤꦴꦪꦁ ꦠꦶꦮꦶꦣꦺꦴ ꦎꦮꦴꦢꦺꦴ, ꦡꦺꦫꦱ꧀ꦱ ꦄꦪꦩꦺꦮ ꦥꦧ꧀ꦧꦗ꧀ꦗꦴ ꦕ ꦈꦥꦱꦩ꧀ꦥꦢꦴ ꦕ ꦄꦲꦺꦴꦱꦶ.