꧑. ꦏꦩ꧀ꦩꦏ꧀ꦑꦤ꧀ꦣꦏꦁ

ꦠꦗ꧀ꦗꦤꦷꦪꦏꦩ꧀ꦩꦏꦡꦴꦮꦟ꧀ꦟꦤꦴ

꧑. ꦕꦹꦭ꦳ꦮꦒ꧀ꦒꦱ꧀ꦱ ꦥꦜꦩꦺ ꦏꦩ꧀ꦩꦏ꧀ꦑꦤ꧀ꦣꦏꦺ ꦠꦴꦮ ‘‘ꦪꦛ꧀ꦜꦶꦁ ꦥꦮꦺꦱꦪ, ꦏꦸꦤ꧀ꦠꦺ ꦥꦮꦺꦱꦪꦴ’’ꦠꦶꦄꦴꦢꦷꦱꦸ ꦮꦶꦪ ꦱꦲꦕꦫꦟꦚꦴꦪꦺꦤ ‘‘ꦩꦚ꧀ꦕꦴ ꦈꦏ꧀ꦏꦸꦛ꧀ꦜꦶꦁ ꦏꦫꦺꦴꦤ꧀ꦠꦷ’’ꦠꦶꦄꦴꦢꦷꦱꦸ ꦮꦶꦪ ꦤꦶꦱ꧀ꦱꦶꦠꦺꦱꦸ ꦤꦶꦱ꧀ꦱꦪꦮꦺꦴꦲꦴꦫꦮꦱꦺꦤ ꦮꦴ ꦥꦟ꧀ꦝꦸꦏꦭꦺꦴꦲꦶꦠꦏꦤꦶꦱ꧀ꦱꦶꦠꦴ ꦥꦟ꧀ꦝꦸꦏꦭꦺꦴꦲꦶꦠꦏꦱꦢ꧀ꦢꦺꦤ ꦮꦸꦠ꧀ꦠꦴꦠꦶ ꦄꦴꦲ ‘‘ꦠꦺꦱꦁ ꦤꦶꦱ꧀ꦱꦶꦠꦏꦴꦥꦶ ꦥꦟ꧀ꦝꦸꦏꦭꦺꦴꦲꦶꦠꦏꦴꦠ꧀ꦮꦺꦮ ꦥꦚ꧀ꦚꦴꦪꦤ꧀ꦠꦷ’’ꦠꦶ. ꦥꦛꦶꦮꦢꦡꦴꦠꦶ ꦥꦛꦶꦮꦕꦤꦁ ꦢꦺꦡ.

ꦄꦣꦩ꧀ꦩꦏꦩ꧀ꦩꦢ꧀ꦮꦴꦢꦱꦏꦏꦡꦴꦮꦟ꧀ꦟꦤꦴ

꧔. ꦠꦷꦲꦶ ꦄꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦤ꧀ꦠꦶ ꦥꦕ꧀ꦕꦺꦏꦁ ꦱꦩꦸꦢꦶꦠꦺꦲꦶ ꦮꦴ ꦠꦷꦲꦶ ꦄꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦁ. ꦤ ꦲꦶ ꦠꦶꦟ꧀ꦟꦁ ꦌꦮ ꦄꦔ꧀ꦒꦴꦤꦁ ꦱꦩꦺꦴꦣꦴꦤꦺꦤ ꦄꦣꦩ꧀ꦩꦏꦩ꧀ꦩꦁ ꦲꦺꦴꦠꦶ, ꦌꦏꦺꦤꦥꦶ ꦲꦺꦴꦠꦶꦪꦺꦮ. ‘‘ꦄꦥ꧀ꦥꦛꦶꦚ꧀ꦚꦴꦪ ꦏꦠꦁ ꦲꦺꦴꦠꦷꦠꦶ ꦭꦗ꧀ꦗꦶꦁ ꦱꦤ꧀ꦣꦴꦪ ꦮꦸꦠ꧀ꦠ’’ꦤ꧀ꦠꦶ ꦒꦟ꧀ꦜꦶꦥꦢꦺꦱꦸ ꦏꦡꦶꦠꦁ.

ꦤꦤꦸ ꦕ ‘‘ꦄꦢꦺꦱꦤꦴꦒꦴꦩꦶꦤꦶꦪꦴ ꦄꦴꦥꦠ꧀ꦠꦶꦪꦴ ꦏꦠꦁ ꦲꦺꦴꦠꦷ’’ꦠꦶ ꦆꦢꦁ ꦥꦫꦠꦺꦴ ‘‘ꦠꦷꦲꦶ, ꦨꦶꦏ꧀ꦑꦮꦺ, ꦄꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦱ꧀ꦱ ꦨꦶꦏ꧀ꦑꦸꦤꦺꦴ ꦄꦴꦏꦔ꧀ꦑꦩꦴꦤꦺꦴ ꦱꦔ꧀ꦓꦺꦴ ꦠꦗ꧀ꦗꦤꦷꦪꦏꦩ꧀ꦩꦁ ꦏꦫꦺꦪ꧀ꦪ, ꦄꦣꦶꦱꦷꦭꦺ ꦱꦷꦭꦮꦶꦥꦤ꧀ꦤꦺꦴ ꦲꦺꦴꦠꦷ’’ꦠꦶ ꦆꦩꦶꦤꦴ ꦮꦶꦫꦸꦗ꧀ꦙꦠꦶ. ꦄꦢꦺꦱꦤꦴꦒꦴꦩꦶꦤꦶꦁ ꦄꦴꦥꦤ꧀ꦤꦺꦴ ꦲꦶ ‘‘ꦄꦣꦶꦱꦷꦭꦺ ꦱꦷꦭꦮꦶꦥꦤ꧀ꦤꦺꦴ’’ꦠꦶ ꦮꦸꦕ꧀ꦕꦠꦷꦠꦶ? ꦠꦠ꧀ꦡ ꦏꦺꦕꦶ ꦮꦢꦤ꧀ꦠꦶ ‘‘ꦠꦗ꧀ꦗꦤꦷꦪꦏꦩ꧀ꦩꦱ꧀ꦱ ꦲꦶ ꦮꦶꦱꦺꦱꦺꦤ ꦨꦟ꧀ꦝꦤꦏꦴꦫꦏꦠ꧀ꦠꦁ ꦄꦔ꧀ꦒ’ꦤ꧀ꦠꦶ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦁ, ꦠꦁ ꦥꦴꦭ꦳ꦶꦪꦴ ꦄꦴꦒꦠꦤꦶꦢꦴꦤꦺꦤ ꦱꦩꦺꦠꦶ, ꦠꦱ꧀ꦩꦴ ꦱꦧ꧀ꦧꦠꦶꦏꦺꦱꦸꦥꦶ ꦨꦟ꧀ꦝꦤꦁ ꦄꦴꦫꦺꦴꦥꦺꦠ꧀ꦮꦴ ꦨꦟ꧀ꦝꦤꦥꦕ꧀ꦕꦪꦴ ꦄꦴꦥꦤ꧀ꦤꦴꦥꦠ꧀ꦠꦶꦮꦱꦺꦤ ꦆꦢꦁ ꦏꦩ꧀ꦩꦁ ꦏꦴꦠꦧ꧀ꦧꦁ. ꦠꦱ꧀ꦩꦴ ‘ꦄꦣꦶꦱꦷꦭꦺ ꦱꦷꦭꦮꦶꦥꦤ꧀ꦤꦺꦴ’ꦠꦶ ꦌꦠ꧀ꦡꦴꦥꦶ ꦥꦸꦧ꧀ꦧꦨꦴꦒꦺ ꦮꦴ ꦥꦫꦨꦴꦒꦺ ꦮꦴ ꦕꦺꦴꦢꦤꦴꦱꦴꦫꦟꦴꦢꦶꦏꦴꦭꦺ ꦨꦟ꧀ꦝꦤꦥꦕ꧀ꦕꦪꦴ ꦄꦴꦥꦤ꧀ꦤꦴꦥꦠ꧀ꦠꦶꦮꦱꦺꦤꦺꦮ ꦏꦴꦠꦧ꧀ꦧꦁ, ꦤ ꦏꦺꦮꦭꦁ ꦱꦔ꧀ꦓꦴꦢꦶꦱꦺꦱꦥꦕ꧀ꦕꦪꦴ ꦏꦴꦠꦧ꧀ꦧ’’ꦤ꧀ꦠꦶ. ꦄꦥꦫꦺ ꦥꦤ ꦮꦢꦤ꧀ꦠꦶ ‘‘ꦄꦢꦺꦱꦤꦴꦒꦴꦩꦶꦤꦶꦪꦴꦠꦶ ꦆꦢꦁ ꦥꦴꦫꦴꦗꦶꦏꦴꦥꦠ꧀ꦠꦶꦁꦪꦺꦮ ꦱꦤ꧀ꦣꦴꦪ ꦮꦸꦠ꧀ꦠꦁ, ꦤ ꦱꦔ꧀ꦓꦴꦢꦶꦱꦺꦱꦁ. ꦄꦛ꧀ꦜꦏꦡꦴꦪꦁ ꦥꦤ ‘ꦄꦢꦺꦱꦤꦴꦒꦴꦩꦶꦤꦶꦪꦴꦠꦶ ꦥꦴꦫꦴꦗꦶꦏꦴꦥꦠ꧀ꦠꦶꦪꦴ ꦮꦴ ꦱꦔ꧀ꦓꦴꦢꦶꦱꦺꦱꦴꦥꦠ꧀ꦠꦶꦪꦴ ꦮꦴ’ꦠꦶ ꦮꦸꦠ꧀ꦠꦁ. ꦠꦠ꧀ꦡ ꦱꦔ꧀ꦓꦴꦢꦶꦱꦺꦱꦴꦥꦠ꧀ꦠꦶꦪꦴ ꦮꦴꦠꦶ ꦄꦠ꧀ꦡꦸꦢ꧀ꦣꦴꦫꦮꦱꦺꦤ ꦮꦸꦠ꧀ꦠꦁ, ‘ꦄꦣꦶꦱꦷꦭꦺ ꦱꦷꦭꦮꦶꦥꦤ꧀ꦤꦺꦴ’ꦠꦶ ꦕ ꦆꦢꦁ ꦱꦔ꧀ꦓꦴꦢꦶꦱꦺꦱꦁꦪꦺꦮ ꦱꦤ꧀ꦣꦴꦪ ꦮꦸꦠ꧀ꦠꦁ, ꦤ ꦥꦴꦫꦴꦗꦶꦏꦁ. ꦠꦱ꧀ꦩꦴ ꦥꦴꦫꦴꦗꦶꦏꦴꦥꦠ꧀ꦠꦶꦥꦕ꧀ꦕꦪꦴ ꦤ ꦠꦗ꧀ꦗꦤꦷꦪꦏꦩ꧀ꦩꦁ ꦏꦴꦠꦧ꧀ꦧꦁ ꦥꦪꦺꦴꦗꦤꦴꦨꦴꦮꦴ, ꦱꦔ꧀ꦓꦴꦢꦶꦱꦺꦱꦥꦕ꧀ꦕꦪꦴ ꦏꦴꦠꦧ꧀ꦧꦤ꧀ꦠꦶ ꦄꦪꦩꦠ꧀ꦡꦺꦴ ꦱꦶꦢ꧀ꦣꦺꦴ ꦲꦺꦴꦠꦶ. ꦱꦸꦏ꧀ꦏꦥꦏ꧀ꦑꦺ ‘ꦢꦺꦱꦤꦴꦒꦴꦩꦶꦤꦶꦪꦴ ꦄꦴꦥꦠ꧀ꦠꦶꦪꦴ ꦏꦠꦁ ꦲꦺꦴꦠꦷ’ꦠꦶ ꦆꦩꦶꦤꦴ ꦮꦶꦫꦸꦗ꧀ꦙꦠꦷꦠꦶ ꦕꦺ? ꦤ ꦌꦏꦺꦤ ꦥꦫꦶꦪꦴꦪꦺꦤ ꦱꦔ꧀ꦓꦴꦢꦶꦱꦺꦱꦱ꧀ꦱꦥꦶ ꦢꦺꦱꦤꦴꦒꦴꦩꦶꦤꦷꦮꦺꦴꦲꦴꦫꦱꦩ꧀ꦨꦮꦠꦺꦴ’’ꦠꦶ, ꦠꦁ ꦪꦸꦠ꧀ꦠꦁ ꦮꦶꦪ ꦢꦶꦱ꧀ꦱꦠꦶ.

ꦤꦥ꧀ꦥꦛꦶꦥ꧀ꦥꦱ꧀ꦱꦩ꧀ꦨꦺꦠꦧ꧀ꦧꦄꦛ꧀ꦜꦴꦫꦱꦏꦏꦡꦴꦮꦟ꧀ꦟꦤꦴ

꧘. ꦭꦺꦴꦩꦁ ꦥꦴꦠꦺꦤ꧀ꦠꦷꦠꦶꦄꦴꦢꦶ ꦱꦩ꧀ꦩꦴꦮꦠ꧀ꦠꦤꦴꦪ ꦥꦫꦶꦪꦴꦪꦮꦕꦤꦁ.

ꦤꦶꦪꦱ꧀ꦱꦏꦩ꧀ꦩꦏꦡꦴꦮꦟ꧀ꦟꦤꦴ

꧑꧑. ꦤꦶꦪꦱ꧀ꦱꦏꦩ꧀ꦩꦺ ‘‘ꦤꦶꦱ꧀ꦱꦴꦪ ꦠꦺ ꦮꦠ꧀ꦡꦧ꧀ꦧꦤ꧀ꦠꦶ ꦒꦫꦸꦤꦶꦱ꧀ꦱꦪꦁ ꦱꦤ꧀ꦣꦴꦪ ꦮꦸꦠ꧀ꦠꦁ, ꦤ ꦆꦠꦫ’’ꦤ꧀ꦠꦶ ꦏꦺꦤꦕꦶ ꦭꦶꦑꦶꦠꦁ. ꦒꦟ꧀ꦜꦶꦥꦢꦺ ꦥꦤ ‘‘ꦤꦶꦪꦱ꧀ꦱꦏꦩ꧀ꦩꦁ ꦪꦱ꧀ꦩꦴ ꦧꦴꦭꦮꦱꦺꦤ ꦏꦫꦷꦪꦠꦶ, ꦠꦱ꧀ꦩꦴ ꦤꦶꦱ꧀ꦱꦴꦪ ꦮꦠ꧀ꦡꦧ꧀ꦧꦤ꧀ꦠꦶ ꦤꦶꦱ꧀ꦱꦪꦁ ꦒꦴꦲꦴꦥꦺꦠꦧ꧀ꦧꦺꦴ’’ꦠꦶ ꦮꦸꦠ꧀ꦠꦁ, ꦮꦷꦩꦁꦱꦶꦠ꧀ꦮꦴ ꦪꦸꦠ꧀ꦠꦠꦫꦁ ꦒꦲꦺꦠꦧ꧀ꦧꦁ. ꦄꦥꦶꦱ꧀ꦱꦹꦠꦶ ꦌꦠ꧀ꦡ ꦱꦸꦆꦠꦶ ꦤꦶꦥꦴꦠꦩꦠ꧀ꦠꦁ, ꦨꦶꦏ꧀ꦑꦹ ꦄꦥꦶ ꦤꦶꦕ꧀ꦕꦧ꧀ꦪꦴꦮꦛꦴ ꦲꦺꦴꦤ꧀ꦠꦷꦠꦶ ꦮꦸꦠ꧀ꦠꦁ ꦲꦺꦴꦠꦶ.

ꦥꦧ꧀ꦧꦴꦗꦤꦷꦪꦏꦩ꧀ꦩꦏꦡꦴꦮꦟ꧀ꦟꦤꦴ

꧒꧙. ꦥꦧ꧀ꦧꦴꦗꦤꦷꦪꦏꦩ꧀ꦩꦺ ꦠꦺꦤ ꦲꦶ, ꦨꦶꦏ꧀ꦑꦮꦺ, ꦱꦔ꧀ꦓꦺꦴ ꦥꦧ꧀ꦧꦴꦗꦤꦷꦪꦏꦩ꧀ꦩꦁ ꦥꦛꦶꦥ꧀ꦥꦱ꧀ꦱꦩ꧀ꦨꦺꦠꦹꦠꦶ ꦆꦢꦁ ꦠꦺꦱꦸ ꦮꦶꦧ꧀ꦨꦩꦤ꧀ꦠꦺꦱꦸꦥꦶ ꦥꦏ꧀ꦏꦩꦤ꧀ꦠꦺꦱꦸꦥꦶ ꦱꦩ꧀ꦩꦴꦮꦠ꧀ꦠꦤ꧀ꦠꦺꦪꦺꦮ ꦱꦤ꧀ꦣꦴꦪ ꦮꦸꦠ꧀ꦠꦁ.

ꦥꦛꦶꦱꦴꦫꦟꦷꦪꦏꦩ꧀ꦩꦏꦡꦴꦮꦟ꧀ꦟꦤꦴ

꧓꧓. ꦱꦸꦣꦩ꧀ꦩꦮꦠ꧀ꦡꦸꦱ꧀ꦩꦶꦁ ꦩꦕ꧀ꦖꦶꦏꦴꦱꦟ꧀ꦝꦺꦠꦶ ꦌꦮꦁꦤꦴꦩꦏꦺ ꦤꦒꦫꦺ. ꦠꦠ꧀ꦡ ꦏꦶꦫ (ꦣ. ꦥ. ꦄꦛ꧀ꦜ. ꧑.꧗꧒ ꦕꦶꦠ꧀ꦠꦒꦲꦥꦠꦶꦮꦠ꧀ꦡꦸ) ꦕꦶꦠ꧀ꦠꦺꦴ ꦒꦲꦥꦠꦶ ꦥꦚ꧀ꦕꦮꦒ꧀ꦒꦶꦪꦴꦤꦁ ꦄꦧ꧀ꦨꦤ꧀ꦠꦫꦁ ꦩꦲꦴꦤꦴꦩꦠ꧀ꦡꦺꦫꦁ ꦥꦶꦟ꧀ꦝꦴꦪ ꦕꦫꦩꦴꦤꦁ ꦢꦶꦱ꧀ꦮꦴ ꦠꦱ꧀ꦱ ꦆꦫꦶꦪꦴꦥꦡꦺ ꦥꦱꦷꦢꦶꦠ꧀ꦮꦴ ꦥꦠ꧀ꦠꦁ ꦄꦴꦢꦴꦪ ꦒꦺꦲꦁ ꦥꦮꦺꦱꦺꦠ꧀ꦮꦴ ꦨꦺꦴꦗꦺꦠ꧀ꦮꦴ ꦨꦠ꧀ꦠꦏꦶꦕ꧀ꦕꦴꦮꦱꦴꦤꦺ ꦣꦩ꧀ꦩꦏꦡꦁ ꦱꦸꦟꦤ꧀ꦠꦺꦴ ꦱꦺꦴꦠꦴꦥꦠ꧀ꦠꦶꦦꦭꦁ ꦥꦠ꧀ꦮꦴ ꦄꦕꦭꦱꦢ꧀ꦣꦺꦴ ꦲꦸꦠ꧀ꦮꦴ ꦄꦩ꧀ꦧꦴꦛꦏꦮꦤꦁ ꦤꦴꦩ ꦄꦠ꧀ꦠꦤꦺꦴ ꦈꦪ꧀ꦪꦴꦤꦁ ꦱꦔ꧀ꦓꦴꦫꦴꦩꦁ ꦏꦴꦠꦸꦏꦴꦩꦺꦴ ꦡꦺꦫꦱ꧀ꦱ ꦲꦠ꧀ꦡꦺ ꦈꦢꦏꦁ ꦥꦴꦠꦺꦠ꧀ꦮꦴ ꦤꦶꦪ꧀ꦪꦴꦠꦺꦱꦶ. ꦠꦱ꧀ꦩꦶꦁ ꦑꦟꦺ ‘‘ꦥꦠꦶꦛ꧀ꦜꦶꦠꦁ ꦧꦸꦢ꧀ꦣꦱꦴꦱꦤ’’ꦤ꧀ꦠꦶ ꦈꦢꦏꦥꦫꦶꦪꦤ꧀ꦠꦁ ꦏꦠ꧀ꦮꦴ ꦩꦲꦴꦥꦡꦮꦷ ꦏꦩ꧀ꦥꦶ, ꦩꦲꦴꦱꦺꦛ꧀ꦜꦶ ꦈꦪ꧀ꦪꦴꦤꦺ ꦩꦲꦴꦮꦶꦲꦴꦫꦁ ꦏꦴꦫꦺꦱꦶ. ꦠꦠ꧀ꦡꦴꦪꦁ ꦱꦸꦣꦩ꧀ꦩꦺꦴ ꦨꦶꦏ꧀ꦑꦸ ꦄꦴꦮꦴꦱꦶꦏꦺꦴ ꦄꦲꦺꦴꦱꦶ. ꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ ‘‘ꦄꦴꦪꦱ꧀ꦩꦴ ꦱꦸꦣꦩ꧀ꦩꦺꦴ ꦩꦕ꧀ꦖꦶꦏꦴꦱꦟ꧀ꦝꦺ ꦕꦶꦠ꧀ꦠꦱ꧀ꦱ ꦒꦲꦥꦠꦶꦤꦺꦴ ꦄꦴꦮꦴꦱꦶꦏꦺꦴ ꦲꦺꦴꦠꦷ’’ꦠꦶꦄꦴꦢꦶ. ꦠꦠ꧀ꦡ ꦣꦸꦮꦨꦠ꧀ꦠꦶꦏꦺꦴꦠꦶ ꦤꦶꦕ꧀ꦕꦨꦠ꧀ꦠꦶꦏꦺꦴ.

ꦄꦥꦫꦺꦤ ꦱꦩꦪꦺꦤ ꦕꦶꦠ꧀ꦠꦱ꧀ꦱ ꦒꦸꦟꦏꦡꦁ ꦱꦸꦠ꧀ꦮꦴ ꦨꦶꦏ꧀ꦑꦸꦱꦲꦱ꧀ꦱꦺꦤ ꦱꦢ꧀ꦣꦶꦁ ꦢ꧀ꦮꦺ ꦄꦒ꧀ꦒꦱꦴꦮꦏꦴ ꦠꦱ꧀ꦱ ꦱꦔ꧀ꦒꦲꦁ ꦏꦠ꧀ꦠꦸꦏꦴꦩꦴ ꦩꦕ꧀ꦖꦶꦏꦴꦱꦟ꧀ꦝꦁ ꦄꦒꦩꦁꦱꦸ. ꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ ‘‘ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦩ꧀ꦧꦲꦸꦭꦴ ꦡꦺꦫꦴ’’ꦠꦶꦄꦴꦢꦶ. ꦕꦶꦠ꧀ꦠꦺꦴ ꦒꦲꦥꦠꦶ ꦠꦺꦱꦁ ꦄꦴꦒꦩꦤꦁ ꦱꦸꦠ꧀ꦮꦴ ꦄꦢ꧀ꦣꦪꦺꦴꦗꦤꦩꦠ꧀ꦠꦁ ꦥꦕ꧀ꦕꦸꦒ꧀ꦒꦤ꧀ꦠ꧀ꦮꦴ ꦠꦺ ꦄꦴꦢꦴꦪ ꦄꦠ꧀ꦠꦤꦺꦴ ꦮꦶꦲꦴꦫꦁ ꦥꦮꦺꦱꦺꦠ꧀ꦮꦴ ꦄꦴꦒꦤ꧀ꦠꦸꦏꦮꦠ꧀ꦠꦁ ꦏꦠ꧀ꦮꦴ ‘‘ꦨꦤ꧀ꦠꦺ, ꦡꦺꦴꦏꦁ ꦣꦩ꧀ꦩꦏꦡꦁ ꦱꦺꦴꦠꦸꦏꦴꦩꦺꦴꦩ꧀ꦲꦷ’’ꦠꦶ ꦣꦩ꧀ꦩꦱꦺꦤꦴꦥꦠꦶꦁ ꦪꦴꦕꦶ. ꦄꦡ ꦤꦁ ꦡꦺꦫꦺꦴ ‘‘ꦈꦥꦴꦱꦏ, ꦄꦢ꧀ꦣꦴꦤꦺꦤꦴꦩ꧀ꦲꦴ ꦏꦶꦭꦤ꧀ꦠꦫꦹꦥꦴ, ꦄꦥꦶꦕ ꦡꦺꦴꦏꦁ ꦱꦸꦟꦴꦲꦷ’’ꦠꦶ ꦠꦱ꧀ꦱ ꦣꦩ꧀ꦩꦏꦡꦁ ꦏꦡꦺꦱꦶ. ꦠꦺꦤ ꦮꦸꦠ꧀ꦠꦁ ‘‘ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦁ ꦑꦺꦴ ꦕꦶꦠ꧀ꦠꦁ ꦒꦲꦥꦠꦶꦁ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦣꦩ꧀ꦩꦶꦪꦴ ꦏꦡꦴꦪ ꦱꦤ꧀ꦢꦱ꧀ꦱꦺꦱꦷ’’ꦠꦶꦄꦴꦢꦶ. ꦱꦺꦴ ꦡꦺꦫꦱ꧀ꦱ ꦣꦩ꧀ꦩꦏꦡꦁ ꦱꦸꦟꦤ꧀ꦠꦺꦴꦮ ꦄꦤꦴꦒꦴꦩꦶꦦꦭꦁ ꦥꦴꦥꦸꦟꦶ.

꧔꧑. ꦤꦴꦱꦏ꧀ꦑꦶ ꦕꦶꦠ꧀ꦠꦁ ꦒꦲꦥꦠꦶꦁ ꦑꦩꦴꦥꦺꦠꦸꦤ꧀ꦠꦶ ꦱꦺꦴ ꦠꦠ꧀ꦡ ꦒꦤ꧀ꦠ꧀ꦮꦴ ‘‘ꦒꦲꦥꦠꦶ, ꦩꦪ꧀ꦲꦩꦺꦮ ꦱꦺꦴ ꦢꦺꦴꦱꦺꦴ, ꦑꦩꦴꦲꦶ ꦩꦺ’’ꦠꦶ ꦮꦠ꧀ꦮꦴꦥꦶ ‘‘ꦤꦴꦲꦁ ꦑꦩꦴꦩꦷ’’ꦠꦶ ꦠꦺꦤ ꦥꦛꦶꦏ꧀ꦑꦶꦠ꧀ꦠꦺꦴ ꦩꦔ꧀ꦏꦸꦨꦹꦠꦺꦴ ꦠꦁ ꦑꦩꦴꦥꦺꦠꦸꦁ ꦤꦴꦱꦏ꧀ꦑꦶ. ꦥꦸꦤꦢꦺꦮ ꦱꦠ꧀ꦡꦸ ꦱꦤ꧀ꦠꦶꦏꦁ ꦥꦕ꧀ꦕꦴꦒꦩꦴꦱꦶ. ꦱꦠ꧀ꦡꦴ ‘‘ꦤꦴꦱ꧀ꦱ ꦈꦥꦴꦱꦏꦺꦴ ꦑꦩꦶꦱ꧀ꦱꦠꦷ’’ꦠꦶ ꦗꦴꦤꦤ꧀ꦠꦺꦴꦥꦶ ‘‘ꦩꦴꦤꦡꦢ꧀ꦣꦺꦴ ꦌꦱ ꦠꦶꦁꦱꦪꦺꦴꦗꦤꦁ ꦒꦤ꧀ꦠ꧀ꦮꦴꦮ ꦥꦕ꧀ꦕꦴꦒꦕ꧀ꦖꦠꦹ’’ꦠꦶ ꦑꦩꦤꦸꦥꦴꦪꦁ ꦄꦤꦴꦕꦶꦏ꧀ꦑꦶꦠ꧀ꦮꦴꦮ ꦈꦪ꧀ꦪꦺꦴꦗꦺꦱꦶ. ꦄꦡꦱ꧀ꦱ ꦥꦸꦤ ꦄꦴꦒꦠꦏꦴꦭꦺ ꦤꦶꦲꦠꦩꦴꦤꦱ꧀ꦱ ꦄꦤꦸꦢꦹꦠꦁ ꦢꦠ꧀ꦮꦴ ‘‘ꦒꦕ꧀ꦖ, ꦆꦩꦶꦤꦴ ꦱꦢ꧀ꦣꦶꦁ ꦒꦤ꧀ꦠ꧀ꦮꦴ ꦈꦥꦴꦱꦏꦁ ꦑꦩꦴꦥꦺꦲꦷ’’ꦠꦶ ꦮꦠ꧀ꦮꦴ ‘‘ꦱꦩꦟꦺꦤ ꦤꦴꦩ ‘ꦩꦪ꧀ꦲꦁ ꦮꦶꦲꦴꦫꦺꦴ, ꦩꦪ꧀ꦲꦁ ꦤꦶꦮꦴꦱꦛ꧀ꦜꦴꦤꦁ, ꦩꦪ꧀ꦲꦁ ꦈꦥꦴꦱꦏꦺꦴ, ꦩꦪ꧀ꦲꦁ ꦈꦥꦴꦱꦶꦏꦴ’ꦠꦶ ꦩꦴꦤꦁ ꦮꦴ ꦆꦱ꧀ꦱꦁ ꦮꦴ ꦏꦴꦠꦸꦁ ꦤ ꦮꦛ꧀ꦛꦠꦶ. ꦌꦮꦁ ꦏꦫꦺꦴꦤ꧀ꦠꦱ꧀ꦱ ꦲꦶ ꦆꦕ꧀ꦖꦴꦩꦴꦤꦴꦢꦪꦺꦴ ꦏꦶꦭꦺꦱꦴ ꦮꦝ꧀ꦞꦤ꧀ꦠꦷ’’ꦠꦶ ꦎꦮꦢꦤ꧀ꦠꦺꦴ –

‘‘ꦄꦱꦤ꧀ꦠꦁ ꦨꦴꦮꦤꦩꦶꦕ꧀ꦖꦺꦪ꧀ꦪ, ꦥꦸꦫꦺꦏ꧀ꦑꦴꦫꦚ꧀ꦕ ꦨꦶꦏ꧀ꦑꦸꦱꦸ;

ꦄꦴꦮꦴꦱꦺꦱꦸ ꦕ ꦆꦱ꧀ꦱꦫꦶꦪꦁ, ꦥꦹꦗꦴ ꦥꦫꦏꦸꦭꦺꦱꦸ ꦕ.

‘‘ꦩꦩꦺꦮ ꦏꦠ ꦩꦚ꧀ꦚꦤ꧀ꦠꦸ, ꦒꦶꦲꦷ ꦥꦧ꧀ꦧꦗꦶꦠꦴ ꦈꦨꦺꦴ;

ꦩꦩꦺꦮꦴꦠꦶꦮꦱꦴ ꦄꦱ꧀ꦱꦸ, ꦏꦶꦕ꧀ꦕꦴꦏꦶꦕ꧀ꦕꦺꦱꦸ ꦏꦶꦱ꧀ꦩꦶꦕꦶ;

ꦆꦠꦶ ꦧꦴꦭꦱ꧀ꦱ ꦱꦔ꧀ꦏꦥ꧀ꦥꦺꦴ, ꦆꦕ꧀ꦖꦴ ꦩꦴꦤꦺꦴ ꦕ ꦮꦝ꧀ꦞꦠꦷ’’ꦠꦶ. (ꦣ. ꦥ. ꧗꧓-꧗꧔) –

ꦣꦩ꧀ꦩꦥꦢꦺ ꦆꦩꦴ ꦒꦴꦡꦴ ꦄꦨꦴꦱꦶ.

ꦱꦸꦣꦩ꧀ꦩꦠ꧀ꦡꦺꦫꦺꦴꦥꦶ ꦆꦩꦁ ꦎꦮꦴꦢꦁ ꦱꦸꦠ꧀ꦮꦴ ꦱꦠ꧀ꦡꦴꦫꦁ ꦮꦤ꧀ꦢꦶꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦠꦺꦤ ꦄꦤꦸꦢꦹꦠꦺꦤ ꦨꦶꦏ꧀ꦑꦸꦤꦴ ꦱꦢ꧀ꦣꦶꦁ ꦒꦤ꧀ꦠ꧀ꦮꦴ ꦈꦥꦴꦱꦏꦱ꧀ꦱ ꦕꦏ꧀ꦑꦸꦥꦡꦺ ꦄꦴꦥꦠ꧀ꦠꦶꦁ ꦥꦛꦶꦏꦫꦶꦠ꧀ꦮꦴ ꦈꦥꦴꦱꦏꦁ ꦑꦩꦴꦥꦺꦱꦶ. ꦱꦺꦴ ꦈꦥꦴꦱꦏꦺꦤ ‘‘ꦑꦩꦴꦩꦲꦁ ꦨꦤ꧀ꦠꦺ, ꦱꦕꦺ ꦩꦪ꧀ꦲꦁ ꦢꦺꦴꦱꦺꦴ ꦄꦠ꧀ꦡꦶ, ꦑꦩꦡ ꦩꦺ’’ꦠꦶ ꦥꦛꦶꦑꦩꦴꦥꦶꦠꦺꦴ ꦱꦠ꧀ꦡꦴꦫꦴ ꦢꦶꦤ꧀ꦤꦎꦮꦴꦢꦺ ꦜꦠ꧀ꦮꦴ ꦏꦠꦶꦥꦴꦲꦺꦤꦺꦮ ꦱꦲ ꦥꦛꦶꦱꦩ꧀ꦨꦶꦢꦴꦲꦶ ꦄꦫꦲꦠ꧀ꦠꦁ ꦥꦴꦥꦸꦟꦶ.

ꦄꦴꦥꦠ꧀ꦠꦶꦪꦴ ꦄꦢꦱ꧀ꦱꦤꦺ ꦈꦏ꧀ꦑꦺꦥꦤꦷꦪꦏꦩ꧀ꦩꦏꦡꦴꦮꦟ꧀ꦟꦤꦴ

꧕꧐. ꦠꦱ꧀ꦱꦴ ꦄꦢꦱ꧀ꦱꦤꦺꦪꦺꦮ ꦏꦩ꧀ꦩꦁ ꦏꦴꦠꦧ꧀ꦧꦤ꧀ꦠꦶ ꦠꦱ꧀ꦱꦴ ꦄꦢꦱ꧀ꦱꦤꦺꦪꦺꦮ ꦈꦏ꧀ꦑꦺꦥꦤꦷꦪꦏꦩ꧀ꦩꦁ ꦏꦴꦠꦧ꧀ꦧꦁ. ꦠꦗ꧀ꦗꦤꦷꦪꦴꦢꦶꦏꦩ꧀ꦩꦁ ꦥꦤ ꦄꦴꦥꦠ꧀ꦠꦶꦁ ꦄꦴꦫꦺꦴꦥꦺꦠ꧀ꦮꦴ ꦠꦱ꧀ꦱꦴ ꦄꦢꦱ꧀ꦱꦤꦺ ꦄꦥ꧀ꦥꦛꦶꦏꦩ꧀ꦩꦺ ꦮꦴ ꦨꦟ꧀ꦝꦤꦏꦴꦫꦏꦴꦢꦶꦄꦔ꧀ꦒꦺꦲꦶ ꦏꦴꦠꦧ꧀ꦧꦁ. ꦱꦺꦱꦩꦺꦠ꧀ꦡ ꦈꦠ꧀ꦠꦴꦤꦩꦺꦮ.

ꦏꦩ꧀ꦩꦏ꧀ꦑꦤ꧀ꦣꦏꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.