ꦥꦴꦕꦶꦠ꧀ꦠꦶꦪꦏꦡꦴꦮꦟ꧀ꦟꦤꦴ

꧘꧘꧙. ꦌꦮꦁ ꦤꦴꦠꦶꦮꦶꦠ꧀ꦡꦴꦫꦱꦔ꧀ꦑꦺꦥꦠꦺꦴ ꦤꦶꦱ꧀ꦱꦒ꧀ꦒꦶꦪꦮꦶꦤꦶꦕ꧀ꦖꦪꦁ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦠꦢꦤꦤ꧀ꦠꦫꦁ ꦤꦶꦢ꧀ꦢꦶꦛ꧀ꦜꦱ꧀ꦱ ꦥꦴꦕꦶꦠ꧀ꦠꦶꦪꦏꦟ꧀ꦝꦱ꧀ꦱ ꦮꦶꦤꦶꦕ꧀ꦖꦪꦁ ꦢꦱ꧀ꦱꦺꦠꦸꦁ ‘‘ꦱꦩ꧀ꦥꦗꦴꦤꦩꦸꦱꦴꦮꦴꦢꦺ’’ꦠꦶꦄꦴꦢꦶ ꦄꦴꦫꦢ꧀ꦣꦁ. ꦱꦩ꧀ꦥꦗꦴꦤꦩꦸꦱꦴꦮꦴꦢꦺꦠꦶ ꦄꦠ꧀ꦠꦤꦺꦴ ꦮꦕꦤꦱ꧀ꦱ ꦩꦸꦱꦴꦨꦴꦮꦁ ꦚꦠ꧀ꦮꦴ, ꦄꦢꦶꦛ꧀ꦜꦁ ‘‘ꦢꦶꦛ꧀ꦜ’’ꦤ꧀ꦠꦶꦄꦴꦢꦶꦤꦴ ꦤꦪꦺꦤ ꦩꦸꦱꦴꦮꦴꦢꦺ ꦱꦩ꧀ꦥꦗꦴꦤꦤ꧀ꦠꦱ꧀ꦱ ꦩꦸꦱꦴꦨꦟꦤꦺꦠꦶꦥꦶ ꦄꦠ꧀ꦡꦺꦴ ꦒꦲꦺꦠꦧ꧀ꦧꦺꦴ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦗꦴꦤꦶꦠ꧀ꦮꦴ ꦗꦴꦤꦤ꧀ꦠꦱ꧀ꦱ ꦕ ꦩꦸꦱꦴꦨꦟꦤꦺ’’ꦠꦶ (ꦥꦴꦕꦶ. ꦄꦛ꧀ꦜ. ꧒). ‘‘ꦩꦸꦱꦴꦮꦴꦢꦺ’’ꦠꦶ ꦲꦶ ꦤꦶꦩꦶꦠ꧀ꦠꦠ꧀ꦡꦺ ꦨꦸꦩ꧀ꦩꦁ, ꦩꦸꦱꦴꦮꦴꦢꦤꦶꦩꦶꦠ꧀ꦠꦤ꧀ꦠꦶ ꦄꦠ꧀ꦡꦺꦴ.

ꦢꦮꦴ ꦨꦟꦤ꧀ꦠꦱ꧀ꦱꦴꦠꦶ ꦪꦺꦴꦗꦤꦴ. ꦄꦤꦸꦥꦥꦫꦶꦏ꧀ꦑꦶꦠ꧀ꦮꦴ ꦮꦺꦒꦺꦤ ꦢꦶꦛ꧀ꦜꦩ꧀ꦥꦶ ‘‘ꦄꦢꦶꦛ꧀ꦜꦁ ꦩꦺ’’ꦠꦶ ꦮꦢꦤ꧀ꦠꦱ꧀ꦱꦴꦠꦶ ꦄꦠ꧀ꦡꦺꦴ. ꦪꦡꦴꦲ ‘‘ꦢꦮꦴ ꦨꦟꦠꦶ ꦤꦴꦩ ꦱꦲꦱꦴ ꦨꦟꦠꦷ’’ꦠꦶ ꦥꦢꦨꦴꦗꦤꦷꦄꦛ꧀ꦜꦏꦡꦴꦪꦁ ‘‘ꦱꦲꦱꦴ ꦨꦟꦠꦷꦠꦶ ꦄꦮꦷꦩꦁꦱꦶꦠ꧀ꦮꦴ ꦄꦤꦸꦥꦣꦴꦫꦺꦠ꧀ꦮꦴ ꦮꦺꦒꦺꦤ ꦢꦶꦛ꧀ꦜꦩ꧀ꦥꦶ ‘ꦄꦢꦶꦛ꧀ꦜꦁ ꦩꦺ’ꦠꦶ ꦨꦟꦠꦷ’’ꦠꦶ (ꦥꦴꦕꦶ. ꦄꦛ꧀ꦜ. ꧑꧑). ꦫꦮꦴ ꦨꦟꦤ꧀ꦠꦱ꧀ꦱꦴꦠꦶ ‘‘ꦕꦷꦮꦫ’’ꦤ꧀ꦠꦶ ꦮꦠ꧀ꦠꦸꦏꦴꦩꦱ꧀ꦱ ‘‘ꦕꦷꦫ’’ꦤ꧀ꦠꦶ ꦮꦕꦤꦁ ꦮꦶꦪ ꦩꦤ꧀ꦢꦠ꧀ꦠꦴ ꦩꦺꦴꦩꦹꦲꦠ꧀ꦠꦴ ‘‘ꦄꦚ꧀ꦚꦁ ꦨꦟꦶꦱ꧀ꦱꦴꦩꦷ’’ꦠꦶ ꦄꦚ꧀ꦚꦁ ꦨꦟꦤ꧀ꦠꦱ꧀ꦱ. ꦪꦡꦴꦲ ‘‘ꦫꦮꦴ ꦨꦟꦠꦶ ꦤꦴꦩ ‘ꦄꦚ꧀ꦚꦁ ꦨꦟꦶꦱ꧀ꦱꦴꦩꦷ’ꦠꦶ ꦄꦚ꧀ꦚꦁ ꦨꦟꦠꦷ’’ꦠꦶ.

꧘꧙꧐. ꦄꦚ꧀ꦚꦠ꧀ꦡꦴꦠꦶ ꦕꦠꦸꦠ꧀ꦡꦥꦴꦫꦴꦗꦶꦏꦴꦢꦷꦱꦸ. ꦄꦠ꧀ꦠꦤꦴ ꦄꦭꦢ꧀ꦣꦁ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦁ ‘‘ꦭꦢ꧀ꦣꦁ ꦩꦪꦴ’’ꦠꦶ ꦩꦸꦱꦴ ꦪꦱ꧀ꦱ ꦨꦟꦠꦶ, ꦠꦺꦤ ꦠꦔ꧀ꦑꦟꦩꦺꦮ ꦱꦸꦠ꧀ꦮꦴ ꦠꦢꦠ꧀ꦡꦺ ꦚꦴꦠꦺ ꦥꦴꦫꦴꦗꦶꦏꦱ꧀ꦱ, ꦄꦚ꧀ꦚꦴꦠꦺ ꦏꦴꦭꦤ꧀ꦠꦫꦺꦤ ꦚꦴꦠꦺ ꦕ ꦥꦫꦶꦪꦴꦪꦮꦕꦤꦺ ꦕ ꦚꦴꦠꦺ ꦡꦸꦭ꧀ꦭꦕ꧀ꦕꦪꦱ꧀ꦱ, ꦥꦫꦶꦪꦴꦪꦮꦕꦤꦺ ꦄꦮꦶꦚ꧀ꦚꦴꦠꦺ ꦢꦸꦏ꧀ꦏꦛꦱ꧀ꦱ, ꦢꦸꦛ꧀ꦜꦢꦺꦴꦱꦱꦶꦏ꧀ꦑꦴꦥꦢꦺ ꦥꦴꦫꦴꦗꦶꦏꦁ ꦄꦤꦴꦥꦤ꧀ꦤꦱ꧀ꦱ ‘‘ꦄꦴꦥꦤ꧀ꦤꦺꦴ’’ꦠꦶ ꦩꦸꦱꦴꦨꦟꦤꦺ ꦱꦔ꧀ꦓꦴꦢꦶꦱꦺꦱꦱ꧀ꦱ, ꦎꦩꦱꦮꦴꦢꦱꦶꦏ꧀ꦑꦴꦥꦢꦺ ꦢꦸꦧ꧀ꦨꦴꦱꦶꦠꦱ꧀ꦱ ꦕ ꦮꦸꦠ꧀ꦠꦠ꧀ꦠꦴ ꦄꦴꦲ ‘‘ꦩꦸꦱꦴꦮꦴꦢꦱ꧀ꦱ ꦏꦴꦫꦟꦴ ꦥꦚ꧀ꦕ ꦄꦴꦥꦠ꧀ꦠꦶꦪꦺꦴ’’ꦠꦶ. ꦆꦩꦴꦪ ꦥꦴꦕꦶꦠ꧀ꦠꦶꦪꦴ ꦱꦢ꧀ꦣꦶꦁ ꦖ ꦄꦴꦥꦠ꧀ꦠꦶꦏ꧀ꦑꦤ꧀ꦣꦴ ꦲꦺꦴꦤ꧀ꦠꦶ.

ꦱꦩ꧀ꦥꦗꦴꦤꦩꦸꦱꦴꦮꦴꦢꦏꦡꦴꦮꦟ꧀ꦟꦤꦴ.

꧘꧙꧑-꧓. ꦮꦸꦠ꧀ꦠꦺꦱꦸ ꦗꦴꦠꦶꦄꦴꦢꦷꦱꦸ ꦢꦱꦱꦸ ꦄꦏ꧀ꦏꦺꦴꦱꦮꦠ꧀ꦡꦹꦱꦹꦠꦶ ꦪꦺꦴꦗꦤꦴ, ꦥꦢꦨꦴꦗꦤꦺ ꦮꦸꦠ꧀ꦠꦺꦱꦸ ꦗꦴꦠꦶꦤꦴꦩꦒꦺꦴꦠ꧀ꦠꦏꦩ꧀ꦩꦱꦶꦥ꧀ꦥꦄꦴꦧꦴꦣꦭꦶꦔ꧀ꦒꦏꦶꦭꦺꦱꦄꦴꦥꦠ꧀ꦠꦶꦄꦏ꧀ꦏꦺꦴꦱꦴꦤꦁ ꦮꦱꦺꦤ ꦢꦱꦱꦸ ꦄꦏ꧀ꦏꦺꦴꦱꦮꦠ꧀ꦡꦹꦱꦹꦠꦶ ꦄꦠ꧀ꦡꦺꦴ. ꦠꦺꦱꦸ ꦏꦶꦭꦺꦱꦁ ꦮꦶꦤꦴ ꦱꦧ꧀ꦧꦺꦠꦺ ꦲꦷꦤꦸꦏ꧀ꦏꦛ꧀ꦜꦮꦱꦺꦤ ꦢ꧀ꦮꦶꦥ꧀ꦥꦏꦴꦫꦴ ꦲꦺꦴꦤ꧀ꦠꦶ. ꦪꦡꦴꦲ ꦥꦢꦨꦴꦗꦤꦺ ‘‘ꦗꦴꦠꦶ ꦤꦴꦩ ꦢ꧀ꦮꦺ ꦗꦴꦠꦶꦪꦺꦴ ꦲꦷꦤꦴ ꦕ ꦗꦴꦠꦶ ꦈꦏ꧀ꦏꦛ꧀ꦜꦴ ꦕ ꦗꦴꦠꦷ’’ꦠꦶꦄꦴꦢꦶ.

ꦠꦠ꧀ꦡ ꦕꦟ꧀ꦝꦴꦭꦴꦢꦶꦗꦴꦠꦶ ꦲꦷꦤꦴ, ꦑꦠ꧀ꦠꦶꦪꦧ꧀ꦫꦴꦲ꧀ꦩꦟꦗꦴꦠꦶꦪꦺꦴ ꦈꦏ꧀ꦏꦛ꧀ꦜꦴ. ꦤꦴꦩꦺꦱꦸ ꦄꦮꦏꦟ꧀ꦟꦏꦗꦮꦏꦟ꧀ꦟꦏꦴꦢꦶꦤꦴꦩꦴꦤꦶ ꦢꦴꦱꦤꦴꦩꦠ꧀ꦠꦴ ꦲꦷꦤꦴꦤꦶ, ꦧꦸꦢ꧀ꦣꦫꦏ꧀ꦑꦶꦠꦴꦢꦶꦤꦴꦩꦴꦤꦶ ꦈꦏ꧀ꦏꦛ꧀ꦜꦴꦤꦶ. ꦏꦺꦴꦱꦶꦪꦴꦢꦶꦒꦺꦴꦠ꧀ꦠꦁ ꦲꦷꦤꦁ, ꦒꦺꦴꦠꦩꦴꦢꦶꦒꦺꦴꦠ꧀ꦠꦁ ꦈꦏ꧀ꦏꦛ꧀ꦜꦁ. ꦏꦩ꧀ꦩꦺꦱꦸ ꦮꦝ꧀ꦞꦏꦶꦩꦟꦶꦏꦴꦫꦴꦢꦶꦏꦩ꧀ꦩꦴꦤꦶ ꦲꦷꦤꦴꦤꦶ, ꦏꦱꦶꦮꦴꦟꦶꦗ꧀ꦗꦴꦒꦺꦴꦫꦏ꧀ꦑꦏꦩ꧀ꦩꦴꦤꦶ ꦈꦏ꧀ꦏꦛ꧀ꦜꦴꦤꦶ. ꦱꦶꦥ꧀ꦥꦺꦱꦸ ꦤꦭ꦳ꦏꦴꦫꦏꦸꦩ꧀ꦨꦏꦴꦫꦴꦢꦶꦱꦶꦥ꧀ꦥꦁ ꦲꦷꦤꦁ, ꦩꦸꦢ꧀ꦢꦴꦒꦟꦤꦴꦢꦶꦱꦶꦥ꧀ꦥꦁ ꦈꦏ꧀ꦏꦛ꧀ꦜꦁ. ꦄꦴꦧꦴꦣꦺꦱꦸ ꦱꦧ꧀ꦧꦺꦥꦶ ꦄꦴꦧꦴꦣꦴ ꦲꦷꦤꦴ, ꦄꦥꦶꦕ ꦩꦣꦸꦩꦺꦲꦺꦴ ꦥꦷꦭ꦳ꦴꦗꦤꦏꦠ꧀ꦠꦴꦨꦴꦮꦴ ꦈꦏ꧀ꦏꦛ꧀ꦜꦺꦴ. ꦭꦶꦔ꧀ꦒꦺꦱꦸ ꦄꦠꦶꦢꦷꦓꦠꦴꦢꦪꦺꦴ ꦲꦷꦤꦴ, ꦤꦴꦠꦶꦢꦷꦓꦠꦴꦢꦪꦺꦴ ꦈꦏ꧀ꦏꦛ꧀ꦜꦴ. ꦱꦧ꧀ꦧꦺꦥꦶ ꦏꦶꦭꦺꦱꦴ ꦲꦷꦤꦴ. ꦱꦧ꧀ꦧꦴꦥꦠ꧀ꦠꦶꦪꦺꦴꦥꦶ ꦲꦷꦤꦴ, ꦄꦥꦶꦕ ꦱꦺꦴꦠꦴꦥꦠ꧀ꦠꦶꦱꦩꦴꦥꦠ꧀ꦠꦶ ꦈꦏ꧀ꦏꦛ꧀ꦜꦴ. ꦄꦏ꧀ꦏꦺꦴꦱꦺꦱꦸ ‘‘ꦎꦛ꧀ꦜꦺꦴꦱꦶ ꦩꦺꦟ꧀ꦝꦺꦴꦱꦶ ꦒꦺꦴꦟꦺꦴꦱꦷ’’ꦠꦶꦄꦴꦢꦶꦏꦺꦴ ꦲꦷꦤꦺꦴ, ‘‘ꦥꦟ꧀ꦝꦶꦠꦺꦴꦱꦶ ꦧ꧀ꦪꦠ꧀ꦠꦺꦴꦱꦷ’’ꦠꦶꦄꦴꦢꦶꦏꦺꦴ ꦈꦏ꧀ꦏꦛ꧀ꦜꦺꦴ.

ꦄꦚ꧀ꦚꦠ꧀ꦫꦚ꧀ꦚꦴꦥꦢꦺꦱꦺꦤꦴꦠꦶ ꦥꦫꦶꦪꦴꦪꦏꦡꦤꦺꦤ ꦮꦶꦤꦴ. ꦎꦩꦱꦤ꧀ꦠꦱ꧀ꦱꦴꦠꦶ ꦮꦕꦤꦥꦠꦺꦴꦢꦺꦤ ꦎꦮꦶꦗ꧀ꦙꦤ꧀ꦠꦱ꧀ꦱ. ꦱꦩ꧀ꦧꦸꦢ꧀ꦣꦺꦤ ꦥꦏꦴꦱꦶꦠꦴꦠꦶ ‘‘ꦕꦟ꧀ꦝꦴꦭꦺꦴꦱꦶ ꦮꦺꦤꦺꦴꦱꦶ ꦤꦺꦱꦴꦢꦺꦴꦱꦶ ꦫꦡꦏꦴꦫꦺꦴꦱꦶ ꦥꦸꦏ꧀ꦏꦸꦱꦺꦴꦱꦷ’ꦠꦶ ꦨꦟꦠꦶ, ꦄꦴꦥꦠ꧀ꦠꦶ ꦮꦴꦕꦴꦪ ꦮꦴꦕꦴꦪ ꦥꦴꦕꦶꦠ꧀ꦠꦶꦪꦱ꧀ꦱꦴ’’ꦠꦶ ꦱꦴꦩꦁ ꦱꦧ꧀ꦧꦣꦩ꧀ꦩꦴꦮꦧꦺꦴꦣꦠꦺꦴ ‘‘ꦱꦩ꧀ꦧꦸꦢ꧀ꦣꦺꦴ’’ꦠꦶ ꦥꦚ꧀ꦚꦴꦠꦺꦤ ꦨꦒꦮꦠꦴ ꦢꦺꦱꦶꦠꦴ.

꧘꧙꧔. ꦠꦺꦲꦺꦮꦴꦠꦶ ꦗꦴꦠꦶꦄꦴꦢꦷꦲꦶ ꦄꦏ꧀ꦏꦺꦴꦱꦮꦠ꧀ꦡꦹꦲꦺꦮ. ꦄꦚ꧀ꦚꦴꦥꦢꦺꦱꦺꦤ ꦨꦹꦠꦺꦤ ꦮꦴ…ꦥꦺ… ꦄꦴꦥꦤ꧀ꦤꦩꦺꦮ ꦮꦴ ꦄꦤꦸꦥꦱꦩ꧀ꦥꦤ꧀ꦤꦁ ꦄꦏ꧀ꦏꦺꦴꦱꦤ꧀ꦠꦱ꧀ꦱ ꦢꦸꦏ꧀ꦏꦛꦁ ꦱꦩ꧀ꦧꦸꦢ꧀ꦣꦺꦤ ꦥꦏꦴꦱꦶꦠꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦆꦣ ꦨꦹꦠꦴꦨꦹꦠꦥꦢꦴꦤꦶ ꦠꦺꦲꦷꦠꦶ ꦄꦥꦺꦏ꧀ꦑꦶꦠ꧀ꦮꦴ ꦧꦲꦸꦮꦕꦤꦤ꧀ꦠꦴꦤꦶ ꦪꦺꦴꦗꦺꦠꦧ꧀ꦧꦴꦤꦶ. ꦌꦠꦺꦤ ‘‘ꦱꦤ꧀ꦠꦶ ꦆꦣꦺꦏꦕ꧀ꦕꦺ’’ꦠꦶꦄꦴꦢꦶꦢꦸꦠꦶꦪꦮꦴꦫꦠ꧀ꦡꦁ (ꦥꦴꦕꦶ. ꧒꧖) ꦢꦱ꧀ꦱꦺꦤ꧀ꦠꦺꦤ ꦢꦸꦏ꧀ꦏꦛꦱꦴꦣꦤꦠ꧀ꦡꦺꦤ ꦠꦢꦺꦏꦏꦴꦫꦶꦪꦁ ꦠꦠꦶꦪꦁ ꦪꦺꦤꦹꦤꦮꦴꦫꦚ꧀ꦕ ꦕꦠꦸꦠ꧀ꦡꦁ ꦤ ꦩꦪꦤ꧀ꦠꦶꦄꦴꦢꦶꦮꦴꦫꦚ꧀ꦕ ꦱꦔ꧀ꦒꦲꦶꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦱꦤ꧀ꦠꦶ ꦆꦣꦺꦏꦕ꧀ꦕꦺ’ꦠꦶ ꦮꦴꦫꦺ ꦥꦤ ꦥꦫꦶꦲꦫꦶꦠ꧀ꦮꦴ ꦮꦸꦠ꧀ꦠꦨꦴꦮꦺꦤ ꦢꦸꦏ꧀ꦏꦛꦁ. ꦌꦱꦺꦮ ꦤꦪꦺꦴ ‘ꦪꦺꦤꦹꦤ…ꦥꦺ… ꦤ ꦩꦪ’ꦤ꧀ꦠꦶ ꦮꦴꦫꦺꦱꦸꦥꦷ’’ꦠꦶ (ꦥꦴꦕꦶ. ꦄꦛ꧀ꦜ. ꧒꧖).

ꦥꦴꦭ꦳ꦶꦩꦸꦠ꧀ꦠꦥꦢꦺꦲꦶꦥꦷꦠꦶ ꦌꦠ꧀ꦡꦴꦥꦶ ꦠꦡꦺꦮ ‘‘ꦨꦹꦠꦺꦤ ꦮꦴ’’ꦠꦶꦄꦴꦢꦷꦤꦶ ꦥꦢꦴꦤꦶ ꦱꦩ꧀ꦧꦤ꧀ꦣꦶꦠꦧ꧀ꦧꦴꦤꦶ. ‘‘ꦕꦺꦴꦫꦺꦴꦱꦶ, ꦒꦟ꧀ꦜꦶꦨꦺꦢꦏꦺꦴꦱꦷ’’ꦠꦶꦄꦴꦢꦶ ꦥꦴꦭ꦳ꦶꦩꦸꦠ꧀ꦠꦥꦢꦁ ꦤꦴꦩ. ꦱꦧ꧀ꦧꦠ꧀ꦡꦴꦠꦶ ꦱꦧ꧀ꦧꦺꦱꦸ ꦕꦠꦹꦱꦸ ꦮꦴꦫꦺꦱꦸ, ꦥꦴꦭ꦳ꦶꦩꦸꦠ꧀ꦠꦥꦢꦺꦱꦸ ꦕ. ꦮꦸꦠ꧀ꦠꦚ꧀ꦲꦶ ‘‘ꦄꦤꦸꦥꦱꦩ꧀ꦥꦤ꧀ꦤꦺ ꦥꦤ ꦕꦠꦹꦱꦸꦥꦶ ꦮꦴꦫꦺꦱꦸ ꦢꦸꦏ꧀ꦏꦛꦩꦺꦮ. ‘ꦕꦺꦴꦫꦺꦴꦱꦶ, ꦒꦟ꧀ꦜꦶꦨꦺꦢꦏꦺꦴꦱꦷ’ꦠꦶꦄꦴꦢꦶꦮꦕꦤꦺꦲꦶ ꦥꦤ ꦈꦥꦱꦩ꧀ꦥꦤ꧀ꦤꦺꦥꦶ ꦄꦤꦸꦥꦱꦩ꧀ꦥꦤ꧀ꦤꦺꦥꦶ ꦱꦧ꧀ꦧꦮꦴꦫꦺꦱꦸ ꦢꦸꦏ꧀ꦏꦛꦩꦺꦮꦴ’’ꦠꦶ (ꦥꦴꦕꦶ. ꦄꦛ꧀ꦜ. ꧒꧖). ‘‘ꦄꦤꦸꦥꦱꦩ꧀ꦥꦤ꧀ꦤ’’ꦤ꧀ꦠꦶ ꦆꦩꦶꦤꦴ ‘‘ꦆꦩꦱ꧀ꦩꦶꦚ꧀ꦕ ꦱꦶꦏ꧀ꦑꦴꦥꦢꦺ ꦜꦥꦺꦠ꧀ꦮꦴ ꦨꦶꦏ꧀ꦑꦸꦁ ꦨꦶꦏ꧀ꦑꦸꦤꦶꦄꦴꦢꦪꦺꦴ ꦱꦧ꧀ꦧꦺ ꦱꦠ꧀ꦠꦴ ꦄꦤꦸꦥꦱꦩ꧀ꦥꦤ꧀ꦤꦛ꧀ꦜꦴꦤꦺ ꦜꦶꦠꦴ’’ꦠꦶ (ꦥꦴꦕꦶ. ꦄꦛ꧀ꦜ. ꧒꧖) ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦴ ꦄꦤꦸꦥꦱꦩ꧀ꦥꦤ꧀ꦤꦴ ꦱꦔ꧀ꦒꦲꦶꦠꦴ. ꦠꦺꦤꦺꦮꦺꦠ꧀ꦡꦴꦥꦶ ꦮꦏ꧀ꦑꦠꦶ ‘‘ꦥꦮꦶꦛ꧀ꦜꦴꦤꦸꦥꦱꦩ꧀ꦥꦤ꧀ꦤꦛ꧀ꦜꦴꦤꦺ ꦆꦣ ꦕ ꦨꦶꦏ꧀ꦑꦸꦤꦷ’’ꦠꦶ.

꧘꧙꧕. ꦢꦮꦏꦩ꧀ꦪꦠꦴꦠꦶ ꦌꦠ꧀ꦡ ‘‘ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧒꧒, ꧒꧓, ꧔꧒꧒; ꦄ. ꦤꦶ. ꧖.꧕꧘; ꧙.꧙; ꦩꦲꦴꦤꦶ. ꧒꧐꧖; ꦮꦶꦨ. ꧕꧑꧘) ꦮꦶꦪ ꦪ-ꦏꦴꦫꦭꦺꦴꦥꦺꦴ. ꦱꦧ꧀ꦧꦠ꧀ꦡꦴꦠꦶ ꦱꦧ꧀ꦧꦺꦱꦸ ꦮꦸꦠ꧀ꦠꦥꦴꦕꦶꦠ꧀ꦠꦶꦪꦮꦠ꧀ꦡꦹꦱꦸ ꦕ ꦢꦸꦏ꧀ꦏꦛꦮꦠ꧀ꦡꦹꦱꦸ ꦕꦴꦠꦶ ꦱꦧ꧀ꦧꦠ꧀ꦡꦺꦮ. ꦢꦸꦧ꧀ꦨꦴꦱꦶꦠꦩꦸꦢꦷꦫꦶꦠꦤ꧀ꦠꦶ ‘‘ꦕꦟ꧀ꦝꦴꦭꦺꦴꦱꦶ…ꦥꦺ… ꦥꦸꦏ꧀ꦏꦸꦱꦺꦴꦱꦷ’ꦠꦶ ꦨꦟꦠꦶ, ꦄꦴꦥꦠ꧀ꦠꦶ ꦮꦴꦕꦴꦪ ꦮꦴꦕꦴꦪ ꦢꦸꦧ꧀ꦨꦴꦱꦶꦠꦱ꧀ꦱꦴ’’ꦠꦶ (ꦥꦴꦕꦶ. ꧓꧒) ꦮꦸꦠ꧀ꦠꦤ꧀ꦠꦶ ꦄꦠ꧀ꦡꦺꦴ. ꦥꦫꦩ꧀ꦩꦸꦑꦴ ꦥꦤ ꦥꦴꦕꦶꦠ꧀ꦠꦶꦪꦮꦠ꧀ꦡꦹꦲꦶ ꦕ ꦢꦸꦏ꧀ꦏꦛꦮꦠ꧀ꦡꦹꦲꦶ ꦕ ꦄꦏ꧀ꦏꦺꦴꦱꦤꦺ ꦢꦸꦏ꧀ꦏꦛꦩꦺꦮ. ꦠꦡꦴ ꦢꦮꦏꦩ꧀ꦪꦠꦴꦪ ꦥꦫꦩ꧀ꦩꦸꦑꦴ ꦮꦢꦤ꧀ꦠꦱ꧀ꦱꦴꦥꦶ ꦢꦸꦧ꧀ꦨꦴꦱꦶꦠꦩꦺꦮꦴꦠꦶ ꦄꦴꦕꦫꦶꦪꦴ ꦮꦢꦤ꧀ꦠꦶ.

꧘꧙꧖-꧗. ꦄꦠ꧀ꦡꦁ ꦥꦸꦫꦏ꧀ꦑꦠ꧀ꦮꦴ ꦮꦢꦠꦺꦴ ꦨꦶꦏ꧀ꦑꦸꦱ꧀ꦱ ꦄꦤꦴꦥꦠ꧀ꦠꦷꦠꦶ ꦪꦺꦴꦗꦤꦴ. ꦣꦩ꧀ꦩꦺꦴ ꦤꦴꦩ ‘‘ꦕꦟ꧀ꦝꦴꦭꦺꦴꦱꦷ’’ꦠꦶꦄꦴꦢꦶꦥꦴꦭ꦳ꦶꦪꦺꦮ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦥꦴꦭ꦳ꦶꦁ ꦮꦴꦕꦺꦤ꧀ꦠꦺꦴ ꦣꦩ꧀ꦩꦥꦸꦫꦺꦏ꧀ꦑꦴꦫꦺꦴ’’ꦠꦶ (ꦥꦴꦕꦶ. ꦄꦛ꧀ꦜ. ꧓꧕). ꦄꦤꦸꦱꦴꦱꦤꦷ ꦤꦴꦩ ‘‘ꦆꦢꦴꦤꦶꦥꦶ ꦕꦟ꧀ꦝꦴꦭꦺꦴꦱꦶ, ꦩꦴ ꦥꦴꦥꦣꦩ꧀ꦩꦁ ꦄꦏꦴꦱꦶ, ꦩꦴ ꦠꦩꦺꦴ ꦠꦩꦥꦫꦴꦪꦤꦺꦴ ꦄꦲꦺꦴꦱꦷ’’ꦠꦶꦄꦴꦢꦶꦤꦴ (ꦥꦴꦕꦶ. ꦄꦛ꧀ꦜ. ꧓꧕) ꦤꦪꦺꦤ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦱꦫꦹꦥꦴꦪꦺꦮ ꦄꦤꦸꦱꦴꦱꦤꦷꦥꦸꦫꦺꦏ꧀ꦑꦠꦴꦪ ꦜꦠ꧀ꦮꦴ ꦮꦢꦤ꧀ꦠꦱ꧀ꦱ ꦕꦶꦠ꧀ꦠꦱ꧀ꦱ ꦭꦲꦸꦥꦫꦶꦮꦠ꧀ꦠꦶꦠꦨꦴꦮꦠꦺꦴ ꦄꦤ꧀ꦠꦫꦴ ꦏꦺꦴꦣꦺ ꦈꦥ꧀ꦥꦤ꧀ꦤꦺꦥꦶ ꦄꦤꦴꦥꦠ꧀ꦠꦶ.

ꦌꦠ꧀ꦡꦴꦠꦶ ꦆꦩꦱ꧀ꦩꦶꦁ ꦎꦩꦱꦮꦴꦢꦱꦶꦏ꧀ꦑꦴꦥꦢꦺ. ꦥꦛꦶꦓꦱꦩ꧀ꦥꦪꦸꦠ꧀ꦠꦕꦶꦠ꧀ꦠꦺꦤꦺꦮ ꦄꦴꦥꦗ꧀ꦗꦶꦠꦧ꧀ꦧꦠ꧀ꦠꦴ ꦩꦴꦤꦱꦶꦏꦢꦸꦏ꧀ꦑꦮꦺꦢꦤꦴꦮ ꦲꦺꦴꦠꦶ.

ꦎꦩꦱꦮꦴꦢꦏꦡꦴꦮꦟ꧀ꦟꦤꦴ.

꧘꧙꧘. ꦢꦸꦮꦶꦣꦴꦏꦴꦫꦠꦺꦴ ꦨꦶꦏ꧀ꦑꦸꦥꦺꦱꦸꦚ꧀ꦚꦺ ꦄꦴꦥꦠ꧀ꦠꦶ ꦱꦶꦪꦴꦠꦶ ꦪꦺꦴꦗꦤꦴ. ꦥꦶꦱꦠꦷꦠꦶ ꦥꦶꦱꦸꦟꦴ, ꦮꦴꦕꦴ, ꦱꦩꦒ꧀ꦒꦺ ꦱꦠ꧀ꦠꦺ ꦄꦮꦪꦮꦨꦹꦠꦺ ꦮꦒ꧀ꦒꦺ ꦨꦶꦤ꧀ꦤꦺ ꦏꦫꦺꦴꦠꦷꦠꦶ ꦄꦠ꧀ꦡꦺꦴ. ꦥꦶꦱꦸꦟꦴ ꦌꦮ ꦥꦺꦱꦸꦚ꧀ꦚꦁ, ꦠꦴꦪ ꦮꦴꦕꦴꦪ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ꦱꦲꦕꦫꦶꦪꦤꦪꦺꦤ ꦥꦶꦱꦸꦟꦺꦴ, ꦠꦱ꧀ꦱ ꦏꦩ꧀ꦩꦁ ꦥꦺꦱꦸꦚ꧀ꦚꦁ, ꦨꦶꦏ꧀ꦑꦹꦤꦁ ꦥꦺꦱꦸꦚ꧀ꦚꦁ ꦨꦶꦏ꧀ꦑꦸꦥꦺꦱꦸꦚ꧀ꦚꦁ, ꦠꦱ꧀ꦩꦶꦁ ꦨꦶꦏ꧀ꦑꦸꦥꦺꦱꦸꦚ꧀ꦚꦺ. ꦥꦢꦨꦴꦗꦤꦺ ‘‘ꦈꦥꦱꦩ꧀ꦥꦤ꧀ꦤꦺꦴ ꦈꦥꦱꦩ꧀ꦥꦤ꧀ꦤꦱ꧀ꦱ ꦱꦸꦠ꧀ꦮꦴ ꦈꦥꦱꦩ꧀ꦥꦤ꧀ꦤꦱ꧀ꦱ ꦥꦺꦱꦸꦚ꧀ꦚꦁ ꦈꦥꦱꦁꦲꦫꦠꦶ ‘ꦆꦠ꧀ꦡꦤ꧀ꦤꦴꦩꦺꦴ ꦠꦁ ‘ꦕꦟ꧀ꦝꦴꦭꦺꦴ…ꦥꦺ… ꦥꦸꦏ꧀ꦏꦸꦱꦺꦴ’ꦠꦶ ꦨꦟꦠꦷ’ꦠꦶ ꦄꦴꦥꦠ꧀ꦠꦶ…ꦥꦺ… ꦥꦴꦕꦶꦠ꧀ꦠꦶꦪꦱ꧀ꦱꦴ’’ꦠꦶ (ꦥꦴꦕꦶ. ꧓꧙) ꦮꦸꦠ꧀ꦠꦠ꧀ꦠꦴ ꦱꦪꦁ ꦈꦥꦱꦩ꧀ꦥꦤ꧀ꦤꦺꦴ ꦲꦸꦠ꧀ꦮꦴ ꦈꦥꦱꦩ꧀ꦥꦤ꧀ꦤꦱ꧀ꦱ ꦗꦴꦠꦶꦄꦴꦢꦷꦱꦸ ꦢꦱꦱꦸ ꦄꦏ꧀ꦏꦺꦴꦱꦮꦠ꧀ꦡꦹꦱꦸ ꦄꦚ꧀ꦚꦠꦫꦺꦤ ꦄꦚ꧀ꦚꦁ ꦈꦥꦱꦩ꧀ꦥꦤ꧀ꦤꦁ ꦥꦫꦩ꧀ꦩꦸꦑꦴ ꦄꦏ꧀ꦏꦺꦴꦱꦤ꧀ꦠꦱ꧀ꦱ ꦱꦸꦠ꧀ꦮꦴ ꦠꦱ꧀ꦱ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦮꦏ꧀ꦑꦩꦴꦤꦱꦫꦹꦥꦺꦱꦸ ꦄꦠ꧀ꦠꦤꦺꦴ ꦥꦶꦪꦏꦴꦩꦠꦴꦨꦺꦢꦴꦣꦶꦥ꧀ꦥꦴꦪꦱꦔ꧀ꦑꦴꦠꦺꦱꦸ ꦢ꧀ꦮꦷꦱꦸ ꦏꦴꦫꦟꦺꦱꦸ ꦄꦚ꧀ꦚꦠꦫꦏꦴꦫꦟꦁ ꦥꦛꦶꦕ꧀ꦕ ‘‘ꦄꦱꦸꦏꦺꦴ ꦠꦸꦪ꧀ꦲꦁ ꦌꦮꦁ ꦮꦢꦠꦷ’’ꦠꦶ ꦥꦺꦱꦸꦚ꧀ꦚꦁ ꦲꦫꦠꦶ, ꦠꦱ꧀ꦱ ꦥꦺꦱꦸꦚ꧀ꦚꦏꦡꦤꦤꦶꦩꦶꦠ꧀ꦠꦁ ꦥꦴꦕꦶꦠ꧀ꦠꦶꦪꦁ ꦲꦺꦴꦠꦷꦠꦶ ꦄꦠ꧀ꦡꦺꦴ.

ꦢꦸꦮꦶꦣꦴꦏꦴꦫꦠꦺꦴꦠꦶ ꦌꦠ꧀ꦡ ꦄꦴꦏꦴꦫ-ꦱꦢ꧀ꦢꦺꦴ ꦏꦴꦫꦟꦥꦫꦶꦪꦴꦪꦺꦴ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦢ꧀ꦮꦷꦲꦴꦏꦴꦫꦺꦲꦷꦠꦶ ꦢ꧀ꦮꦷꦲꦶ ꦏꦴꦫꦟꦺꦲꦷ’’ꦠꦶ (ꦥꦴꦕꦶ. ꦄꦛ꧀ꦜ. ꧓꧘). ꦌꦠ꧀ꦡ ꦏꦴꦫꦟꦁ ꦤꦴꦩ ꦄꦣꦶꦥ꧀ꦥꦴꦪꦮꦶꦱꦺꦱꦺꦴ. ꦠꦁ ꦏꦴꦫꦟꦁ ꦄꦣꦶꦥ꧀ꦥꦴꦪꦩꦸꦑꦺꦤ ꦢꦱ꧀ꦱꦺꦠꦸꦩꦴꦲ ‘‘ꦄꦠ꧀ꦠꦤꦺꦴ’’ꦠꦶꦄꦴꦢꦶ. ꦄꦠ꧀ꦠꦤꦺꦴ ꦥꦶꦪꦏꦴꦩꦱ꧀ꦱꦴꦠꦶ ꦄꦠ꧀ꦠꦤꦺꦴ ꦥꦶꦪꦨꦴꦮꦏꦴꦩꦱ꧀ꦱ ꦥꦺꦱꦸꦚ꧀ꦚꦁ ꦨꦟꦤ꧀ꦠꦱ꧀ꦱ, ꦄꦠ꧀ꦠꦤꦺꦴ ꦥꦶꦪꦨꦴꦮꦁ ꦏꦴꦩꦪꦤ꧀ꦠꦱ꧀ꦱꦴꦠꦶ ꦄꦠ꧀ꦡꦺꦴ, ꦠꦴꦢꦶꦱꦺꦤ ꦄꦣꦶꦥ꧀ꦥꦴꦪꦺꦤꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦌꦮꦁ ꦄꦲꦁ ꦌꦠꦱ꧀ꦱ ꦥꦶꦪꦺꦴ ꦨꦮꦶꦱ꧀ꦱꦴꦩꦷ’’ꦠꦶ ꦄꦠ꧀ꦠꦤꦺꦴ ꦥꦶꦪꦨꦴꦮꦁ ꦥꦠ꧀ꦡꦪꦩꦴꦤꦱ꧀ꦱꦴ’’ꦠꦶ (ꦥꦴꦕꦶ. ꦄꦛ꧀ꦜ. ꧓꧘). ꦥꦫꦨꦺꦢꦠ꧀ꦡꦶꦤꦺꦴꦥꦶ ꦮꦴꦠꦶ ꦄꦏ꧀ꦏꦺꦴꦱꦏꦱ꧀ꦱ ꦕ ꦄꦠ꧀ꦠꦤꦺꦴ ꦥꦺꦱꦸꦚ꧀ꦚꦮꦕꦤꦁ ꦱꦸꦟꦤ꧀ꦠꦱ꧀ꦱ ꦕꦴꦠꦶ ꦈꦨꦶꦤ꧀ꦤꦁ ꦨꦺꦢꦁ ꦆꦕ꧀ꦖꦤ꧀ꦠꦱ꧀ꦱꦴꦠꦶ ꦄꦠ꧀ꦡꦺꦴ, ꦨꦺꦢꦴꦣꦶꦥ꧀ꦥꦴꦪꦺꦤꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦥꦫꦱ꧀ꦱ ꦥꦫꦺꦤ ꦨꦺꦢꦁ ꦆꦕ꧀ꦖꦤ꧀ꦠꦱ꧀ꦱꦴ’’ꦠꦶ (ꦥꦴꦕꦶ. ꦄꦛ꧀ꦜ. ꧓꧘).

꧘꧙꧙. ꦥꦫꦶꦪꦴꦪꦤꦪꦺꦤ ꦄꦏ꧀ꦏꦺꦴꦱꦤ꧀ꦠꦱ꧀ꦱ ꦮꦕꦤꦱ꧀ꦱ…ꦥꦺ… ꦢꦸꦏ꧀ꦏꦛꦤ꧀ꦠꦶ ꦪꦺꦴꦗꦤꦴ, ꦥꦫꦶꦪꦴꦪꦄꦏ꧀ꦏꦺꦴꦱꦮꦕꦤꦁ ꦱꦸꦠ꧀ꦮꦴ ꦥꦫꦱ꧀ꦱ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦮꦢꦤ꧀ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦢꦸꦏ꧀ꦏꦛꦁ ꦲꦺꦴꦠꦷꦠꦶ ꦄꦠ꧀ꦡꦺꦴ. ꦪꦡꦴꦲ ‘‘ꦆꦠ꧀ꦡꦤ꧀ꦤꦴꦩꦺꦴ ꦱꦤ꧀ꦠꦶ ꦆꦣꦺꦏꦕ꧀ꦕꦺ ꦕꦟ꧀ꦝꦴꦭꦴ…ꦥꦺ… ꦨꦟꦠꦶ, ꦤ ꦱꦺꦴ ꦄꦚ꧀ꦚꦁ ꦨꦟꦠꦶ, ꦠꦁꦪꦺꦮ ꦨꦟꦠꦷꦠꦶ ꦄꦴꦥꦠ꧀ꦠꦶ ꦮꦴꦕꦴꦪ ꦮꦴꦕꦴꦪ ꦢꦸꦏ꧀ꦏꦛꦱ꧀ꦱꦴ’’ꦠꦶꦄꦴꦢꦶ (ꦥꦴꦕꦶ. ꧔꧑). ꦥꦴꦭ꦳ꦶꦩꦸꦠ꧀ꦠꦤꦪꦺꦤ ꦄꦏ꧀ꦏꦺꦴꦱꦤ꧀ꦠꦱ꧀ꦱ ꦮꦕꦤꦱ꧀ꦱ…ꦥꦺ… ꦢꦸꦏ꧀ꦏꦛꦤ꧀ꦠꦶ ꦪꦺꦴꦗꦤꦴ. ꦌꦠ꧀ꦡ ‘‘ꦕꦺꦴꦫꦺꦴꦱꦶ, ꦒꦟ꧀ꦜꦶꦨꦺꦢꦏꦺꦴꦱꦷ’’ꦠꦶꦄꦴꦢꦶꦤꦴ ꦢꦱ꧀ꦱꦶꦠꦺꦴ ꦥꦴꦭ꦳ꦶꦩꦸꦠ꧀ꦠꦤꦪꦺꦴ ꦤꦴꦩ.

꧙꧐꧐. ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦄꦏ꧀ꦏꦺꦴꦱꦁ ꦈꦥꦱꦩ꧀ꦥꦤ꧀ꦤꦁ ꦲꦫꦠꦺꦴꦥꦶ ꦕ ꦠꦡꦴ ꦢꦸꦏ꧀ꦏꦛꦤ꧀ꦠꦶ ꦪꦺꦴꦗꦤꦴ. ꦕ-ꦱꦢ꧀ꦢꦺꦤ ꦈꦥꦱꦩ꧀ꦥꦤ꧀ꦤꦱ꧀ꦱ ꦄꦏ꧀ꦏꦺꦴꦱꦁ ꦄꦤꦸꦥꦱꦩ꧀ꦥꦤ꧀ꦤꦁ ꦲꦫꦠꦺꦴꦥꦶ ꦕ, ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦄꦏ꧀ꦏꦺꦴꦱꦁ ꦄꦤꦸꦥꦱꦩ꧀ꦥꦤ꧀ꦤꦁ ꦲꦫꦠꦺꦴꦥꦶ ꦕ ꦠꦡꦴ ꦢꦸꦏ꧀ꦏꦛꦤ꧀ꦠꦶ ꦮꦶꦏꦥ꧀ꦥꦢ꧀ꦮꦪꦚ꧀ꦕ ꦱꦩꦸꦕ꧀ꦕꦶꦤꦺꦴꦠꦶ. ‘‘ꦆꦣꦴꦥꦶ ꦨꦶꦏ꧀ꦑꦸꦤꦶꦁ ꦄꦴꦢꦶꦁ ꦏꦠ꧀ꦮꦴ ꦱꦧ꧀ꦧꦺ ꦄꦤꦸꦥꦱꦩ꧀ꦥꦤ꧀ꦤꦴ ꦤꦴꦩꦴ’’ꦠꦶ (ꦥꦴꦕꦶ. ꦄꦛ꧀ꦜ. ꧓꧘) ꦄꦛ꧀ꦜꦏꦡꦴꦮꦕꦤꦠꦺꦴ ‘‘ꦨꦶꦏ꧀ꦑꦸꦤꦷ’’ꦠꦶ ꦈꦥꦭꦏ꧀ꦑꦟꦁ.

꧙꧐꧑. ꦤ ꦕꦺꦮ ꦥꦶꦪꦏꦴꦩꦱ꧀ꦱꦴꦠꦶ ꦥꦶꦪꦨꦴꦮꦁ ꦄꦏꦴꦩꦪꦤ꧀ꦠꦱ꧀ꦱ ꦕ. ꦤ ꦨꦺꦢꦠ꧀ꦡꦶꦤꦺꦴꦥꦶ ꦕꦴꦠꦶ ꦨꦺꦢꦁ ꦄꦤꦶꦕ꧀ꦖꦤ꧀ꦠꦱ꧀ꦱ ꦕ. ꦥꦴꦥꦴꦤꦁ ꦒꦫꦲꦠ꧀ꦡꦴꦪꦴꦠꦶ ꦌꦠ꧀ꦡ ‘‘ꦏꦺꦮꦭ’’ꦤ꧀ꦠꦶ ꦱꦺꦱꦺꦴ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦌꦏꦁ ꦄꦏ꧀ꦏꦺꦴꦱꦤ꧀ꦠꦁ, ꦌꦏꦚ꧀ꦕ ꦑꦩꦤ꧀ꦠꦁ ꦢꦶꦱ꧀ꦮꦴ ‘ꦄꦲꦺꦴ ꦤꦶꦭ꧀ꦭꦗ꧀ꦗꦺꦴ, ꦇꦢꦶꦱꦩ꧀ꦥꦶ ꦤꦴꦩ ꦄꦴꦪꦱ꧀ꦩꦤ꧀ꦠꦁ ꦥꦸꦤ ꦮꦠ꧀ꦠꦧ꧀ꦧꦁ ꦩꦚ꧀ꦚꦶꦱ꧀ꦱꦠꦷ’ꦠꦶ ꦌꦮꦁ ꦏꦺꦮꦭꦁ ꦥꦴꦥꦒꦫꦲꦶꦠꦴꦪ ꦨꦟꦤ꧀ꦠꦱ꧀ꦱ ꦄꦤꦴꦥꦠ꧀ꦠꦷ’’ꦠꦶ (ꦥꦴꦕꦶ. ꦄꦛ꧀ꦜ. ꧓꧘).

ꦥꦺꦱꦸꦚ꧀ꦚꦏꦡꦴꦮꦟ꧀ꦟꦤꦴ.

꧙꧐꧓. ꦄꦚ꧀ꦚꦺꦤꦴꦠꦶ ꦱꦴꦩꦟꦺꦫꦴꦢꦶꦤꦴ. ‘‘ꦪꦚ꧀ꦕ ꦥꦢꦁ ꦪꦚ꧀ꦕ ꦄꦤꦸꦥꦢꦁ ꦪꦚ꧀ꦕ ꦄꦤ꧀ꦮꦏ꧀ꦑꦫꦁ ꦪꦚ꧀ꦕ ꦄꦤꦸꦧ꧀ꦪꦚ꧀ꦗꦤꦁ, ꦱꦧ꧀ꦧꦩꦺꦠꦁ ꦥꦢꦱꦺꦴ ꦤꦴꦩꦴ’’ꦠꦶ (ꦥꦴꦕꦶ. ꧔꧖) ꦥꦢꦨꦴꦗꦤꦺ ꦮꦸꦠ꧀ꦠꦠ꧀ꦠꦴ ꦄꦮꦪꦮꦺ ꦱꦩꦸꦢꦴꦪꦺꦴꦥꦕꦴꦫꦮꦱꦺꦤ ‘‘ꦥꦶꦛꦏꦠ꧀ꦠꦪ’’ꦤ꧀ꦠꦶ ꦠꦢꦺꦏꦢꦺꦱꦥꦢꦴꦢꦶ ꦌꦮ ꦮꦸꦠ꧀ꦠꦺꦴꦠꦶ ꦒꦲꦺꦠꦧ꧀ꦧꦺꦴ. ꦌꦠ꧀ꦡ ꦥꦢꦴꦢꦶꦱꦫꦹꦥꦁ ꦄꦛ꧀ꦜꦏꦡꦴꦪ ꦮꦺꦢꦶꦠꦧ꧀ꦧꦁ. ꦮꦸꦠ꧀ꦠꦚ꧀ꦲꦶ ꦠꦠ꧀ꦡ ‘‘ꦥꦢꦤ꧀ꦠꦶ ꦌꦏꦺꦴ ꦒꦴꦡꦴꦥꦴꦢꦺꦴ ꦄꦣꦶꦥ꧀ꦥꦺꦠꦺꦴ. ꦄꦤꦸꦥꦢꦤ꧀ꦠꦶ ꦢꦸꦠꦶꦪꦺꦴ ꦥꦴꦢꦺꦴ. ꦄꦤ꧀ꦮꦏ꧀ꦑꦫꦤ꧀ꦠꦶ ꦌꦏꦺꦏꦩꦏ꧀ꦑꦫꦁ. ꦄꦤꦸꦧ꧀ꦪꦚ꧀ꦗꦤꦤ꧀ꦠꦶ ꦥꦸꦫꦶꦩꦧ꧀ꦪꦚ꧀ꦗꦤꦺꦤ ꦱꦢꦶꦱꦁ ꦥꦕ꧀ꦖꦴꦧ꧀ꦪꦚ꧀ꦗꦤ’’ꦤ꧀ꦠꦶ (ꦥꦴꦕꦶ. ꦄꦛ꧀ꦜ. ꧔꧕). ꦆꦢꦁ ꦒꦴꦡꦴꦩꦪꦢꦺꦱꦤꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ‘‘ꦪꦁ ꦏꦶꦚ꧀ꦕꦶ ꦮꦴ ꦌꦏꦩꦏ꧀ꦑꦫꦁ ꦄꦤ꧀ꦮꦏ꧀ꦑꦫꦁ, ꦄꦏ꧀ꦑꦫꦱꦩꦹꦲꦺꦴ ꦄꦤꦸꦧ꧀ꦪꦚ꧀ꦗꦤꦁ, ꦄꦏ꧀ꦑꦫꦴꦤꦸꦧ꧀ꦪꦚ꧀ꦗꦤꦱꦩꦹꦲꦺꦴ ꦥꦢꦁ, ꦥꦜꦩꦥꦢꦁ ꦥꦢꦩꦺꦮ, ꦢꦸꦠꦶꦪꦁ ꦄꦤꦸꦥꦢꦤ꧀ꦠꦶ ꦌꦮꦩꦺꦠ꧀ꦡ ꦤꦴꦤꦴꦏꦫꦟꦁ ꦮꦺꦢꦶꦠꦧ꧀ꦧ’’ꦤ꧀ꦠꦶꦥꦶ (ꦥꦴꦕꦶ. ꦄꦛ꧀ꦜ. ꧔꧕) ꦮꦸꦠ꧀ꦠꦁ. ꦆꦢꦁ ꦕꦸꦟ꧀ꦟꦶꦪꦢꦺꦱꦤꦁ ꦱꦤ꧀ꦣꦴꦪ ꦮꦸꦠ꧀ꦠꦁ.

ꦣꦩ꧀ꦩꦤ꧀ꦠꦶ ꦧꦸꦢ꧀ꦣꦨꦴꦱꦶꦠꦴꦢꦶꦥꦴꦭ꦳ꦶꦣꦩ꧀ꦩꦁ. ꦥꦛꦶꦱꦩ꧀ꦨꦶꦢꦴꦪꦚ꧀ꦲꦶ ꦣꦩ꧀ꦩꦥꦚ꧀ꦕꦏꦺ ꦥꦴꦭ꦳ꦶꦥꦶ ꦣꦩ꧀ꦩꦺꦴꦠꦶ ꦮꦸꦠ꧀ꦠꦴ. ꦣꦩ꧀ꦩꦥꦚ꧀ꦕꦏꦁ ꦤꦴꦩ ꦦꦭꦤꦶꦧ꧀ꦧꦠ꧀ꦠꦏꦺꦴ ꦲꦺꦠꦸ, ꦄꦫꦶꦪꦩꦒ꧀ꦒꦺꦴ, ꦨꦴꦱꦶꦠꦁ, ꦏꦸꦱꦭꦴꦏꦸꦱꦭꦁ ꦕꦺꦠꦶ ꦌꦠꦺ ꦣꦩ꧀ꦩꦱꦚ꧀ꦚꦶꦠꦴꦠꦶ ꦤꦶꦢ꧀ꦢꦶꦛ꧀ꦜꦁ. ꦌꦠ꧀ꦡ ꦲꦶ ꦨꦴꦱꦶꦠꦤ꧀ꦠꦶ ꦥꦴꦭ꦳ꦶ ꦮꦸꦠ꧀ꦠꦴ. ꦄꦛ꧀ꦜꦏꦡꦴꦤꦶꦱ꧀ꦱꦶꦠꦺꦴꦥꦶ ꦌꦠ꧀ꦡꦺꦮ ꦱꦔ꧀ꦒꦲꦁ ꦒꦕ꧀ꦖꦠꦶ. ꦱꦺꦴ ꦕ ꦥꦸꦧ꧀ꦧꦺ ꦩꦒꦣꦨꦴꦱꦴꦪ ꦜꦶꦠꦺꦴ ꦱꦔ꧀ꦒꦷꦠꦶꦠ꧀ꦠꦪꦴꦫꦸꦭ꦳꧀ꦲꦺꦴ ꦒꦲꦺꦠꦧ꧀ꦧꦺꦴ.

‘‘ꦱꦲ ꦨꦟꦤ꧀ꦠꦱ꧀ꦱ ꦥꦴꦕꦶꦠ꧀ꦠꦶꦪꦁ ꦱꦶꦪꦴ’’ꦠꦶ ꦆꦩꦶꦤꦴ ‘‘ꦌꦏꦠꦺꦴ ꦥꦛ꧀ꦜꦥꦺꦠ꧀ꦮꦴ ꦌꦏꦠꦺꦴ ꦎꦱꦴꦥꦺꦤ꧀ꦠꦷ’’ꦠꦶꦄꦴꦢꦶꦤꦴ (ꦥꦴꦕꦶ. ꧔꧖) ꦥꦢꦨꦴꦗꦤꦴꦒꦠꦤꦪꦺꦤ ꦄꦤꦸꦥꦱꦩ꧀ꦥꦤ꧀ꦤꦺꦤ ꦱꦢ꧀ꦣꦶꦁ ꦄꦴꦫꦨꦶꦠ꧀ꦮꦴ ꦌꦏꦠꦺꦴ ꦈꦕ꧀ꦕꦴꦫꦟꦮꦱꦺꦤ ꦥꦢꦁ ꦮꦴ ꦄꦤꦸꦥꦢꦁ ꦮꦴ ꦄꦤ꧀ꦮꦏ꧀ꦑꦫꦁ ꦮꦴ ꦄꦤꦸꦧ꧀ꦪꦚ꧀ꦗꦤꦁ ꦮꦴ ꦮꦢꦠꦺꦴ ꦥꦢꦴꦢꦶꦒꦟꦤꦴꦮꦱꦺꦤ ꦥꦴꦕꦶꦠ꧀ꦠꦶꦪꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ.

꧙꧐꧔. ꦱꦔ꧀ꦒꦷꦠꦶꦁ ꦄꦤꦴꦫꦸꦭ꦳꧀ꦲꦺꦱꦸ ꦣꦩ꧀ꦩꦺꦱꦸ ꦫꦴꦗꦺꦴꦮꦴꦢꦴꦢꦪꦺꦴ ꦱꦸꦠ꧀ꦠꦤ꧀ꦠꦴ ꦄꦴꦥꦠ꧀ꦠꦶꦗꦤꦏꦴꦪꦺꦮꦴꦠꦶ ꦩꦲꦴꦥꦕ꧀ꦕꦫꦶꦪꦴꦢꦶꦱꦸ ꦮꦸꦠ꧀ꦠꦴꦠꦶ ꦪꦺꦴꦗꦤꦴ. ꦫꦴꦗꦺꦴꦮꦴꦢꦺꦴ ꦤꦴꦩ ꦌꦏꦺꦴ ꦱꦸꦠ꧀ꦠꦤ꧀ꦠꦺꦴ. ꦄꦴꦢꦶ-ꦱꦢ꧀ꦢꦺꦤ ꦠꦶꦏ꧀ꦑꦶꦤ꧀ꦢ꧀ꦫꦶꦪꦴꦢꦶꦱꦸꦠ꧀ꦠꦤ꧀ꦠꦴ ꦒꦲꦶꦠꦴ.

꧙꧐꧕. ꦨꦶꦏ꧀ꦑꦸꦱ꧀ꦩꦶꦩ꧀ꦥꦶ ꦨꦶꦏ꧀ꦑꦸꦤꦶꦪꦴꦥꦶ ꦕ ꦄꦤꦸꦥꦱꦩ꧀ꦥꦤ꧀ꦤꦱꦚ꧀ꦚꦶꦤꦺꦴ, ꦮꦶꦩꦠꦶꦱ꧀ꦱ ꦮꦴ ꦨꦶꦏ꧀ꦑꦸꦱ꧀ꦱ ꦠꦡꦴ ꦥꦢꦱꦺꦴꦣꦩ꧀ꦩꦺ ꦢꦸꦏ꧀ꦏꦛꦁ ꦲꦺꦴꦠꦷꦠꦶ ꦪꦺꦴꦗꦤꦴ.

꧙꧐꧖-꧗. ꦌꦏꦠꦺꦴ ꦈꦢ꧀ꦢꦶꦱꦴꦥꦺꦠꦷꦠꦶ ꦌꦏꦠꦺꦴ ꦈꦢ꧀ꦢꦺꦱꦁ ꦒꦟ꧀ꦲꦤ꧀ꦠꦺꦲꦶ ꦄꦤꦸꦥꦱꦩ꧀ꦥꦤ꧀ꦤꦺꦲꦶ ꦱꦢ꧀ꦣꦶꦁ ꦈꦕ꧀ꦕꦴꦫꦟꦮꦱꦺꦤ ꦈꦢ꧀ꦢꦶꦱꦴꦥꦺꦠꦶ. ꦱꦗ꧀ꦙꦴꦪꦁ ꦮꦴ ꦏꦫꦺꦴꦠꦷꦠꦶ ꦠꦡꦴ ꦌꦏꦠꦺꦴ ꦱꦗ꧀ꦙꦴꦪꦠꦶ.

‘‘ꦱꦕꦺ ꦌꦏꦒꦴꦡꦴꦪ ꦌꦏꦺꦴ ꦥꦴꦢꦺꦴ ꦤ ꦄꦴꦒꦕ꧀ꦖꦠꦶ, ꦱꦺꦱꦁ ꦄꦴꦒꦕ꧀ꦖꦠꦶ, ꦄꦪꦁ ꦪꦺꦨꦸꦪ꧀ꦪꦺꦤ ꦥꦒꦸꦟꦒꦤ꧀ꦡꦺꦴ ꦤꦴꦩ. ꦌꦱ ꦤꦪꦺꦴ ꦱꦸꦠ꧀ꦠꦺꦥꦶ ꦮꦺꦢꦶꦠꦧ꧀ꦧꦺꦴꦠꦷ’’ꦠꦶ (ꦥꦴꦕꦶ. ꦄꦛ꧀ꦜ. ꧔꧘) ꦄꦛ꧀ꦜꦏꦡꦴꦮꦕꦤꦠꦺꦴ ꦥꦒꦸꦟꦒꦤ꧀ꦡꦤ꧀ꦠꦶ ꦌꦠ꧀ꦡ ‘‘ꦪꦺꦨꦸꦪ꧀ꦪꦺꦤꦴ’’ꦠꦶ ꦱꦺꦱꦺꦴ. ꦎꦥꦴꦠꦺꦠꦷꦠꦶ ‘‘ꦌꦮꦁ ꦨꦟꦴꦲꦷ’’ꦠꦶ ꦌꦏꦠꦺꦴ ꦨꦟꦠꦶ. ꦈꦢ꧀ꦢꦺꦱꦤ꧀ꦠꦶ ꦈꦢ꧀ꦢꦶꦱꦶꦠꦧ꧀ꦧꦁ. ꦠꦺꦤꦴꦠꦶ ꦄꦤꦸꦥꦱꦩ꧀ꦥꦤ꧀ꦤꦺꦤ.

꧙꧐꧘. ꦪꦱ꧀ꦩꦴ ꦆꦢꦁ ꦥꦢꦱꦺꦴꦣꦩ꧀ꦩꦱꦶꦏ꧀ꦑꦴꦥꦢꦁ ꦮꦴꦕꦠꦺꦴ ꦕ ꦱꦩꦸꦛ꧀ꦜꦴꦠꦶ, ꦮꦴꦕꦴꦕꦶꦠ꧀ꦠꦢ꧀ꦮꦪꦴꦥꦶ ꦕ ꦱꦩꦸꦛ꧀ꦜꦴꦠꦶ, ꦠꦱ꧀ꦩꦴ ꦆꦢꦁ ꦱꦩꦸꦛ꧀ꦜꦴꦤꦁ ꦥꦢꦱꦺꦴꦣꦩ꧀ꦩꦱꦚ꧀ꦚꦶꦠꦤ꧀ꦠꦶ ꦮꦸꦠ꧀ꦠꦤ꧀ꦠꦶ ꦪꦺꦴꦗꦤꦴ.

ꦥꦢꦱꦺꦴꦣꦩ꧀ꦩꦏꦡꦴꦮꦟ꧀ꦟꦤꦴ.

꧙꧐꧙-꧑꧐. ꦱꦧ꧀ꦧꦕ꧀ꦖꦤ꧀ꦤꦱꦧ꧀ꦧꦥꦫꦶꦕ꧀ꦖꦤ꧀ꦤꦺ ꦱꦺꦤꦴꦱꦤꦺ ꦠꦶꦱ꧀ꦱꦤ꧀ꦤꦁ ꦥꦤ ꦫꦠ꧀ꦠꦷꦤꦁ ꦪꦺꦴ ꦥꦤ ꦨꦶꦏ꧀ꦑꦸ ꦫꦠ꧀ꦠꦶꦪꦁ ꦜꦥꦺꦠ꧀ꦮꦴ ꦨꦶꦏ꧀ꦑꦸꦁ ꦄꦚ꧀ꦚꦺꦤ ꦱꦕꦺ ꦤꦶꦥꦗ꧀ꦗꦺꦪ꧀ꦪ, ꦠꦱ꧀ꦱ ꦥꦴꦕꦶꦠ꧀ꦠꦶꦪꦁ ꦱꦶꦪꦴꦠꦶ ꦪꦺꦴꦗꦤꦴ. ‘‘ꦪꦁ ꦏꦶꦚ꧀ꦕꦶ ꦥꦛꦶꦕ꧀ꦖꦴꦢꦤꦱꦩꦠ꧀ꦡꦁ ꦆꦣ ꦖꦢꦤꦚ꧀ꦕ ꦥꦫꦶꦕ꧀ꦖꦤ꧀ꦤꦚ꧀ꦕ ꦮꦺꦢꦶꦠꦧ꧀ꦧ’’ꦤ꧀ꦠꦶ (ꦥꦴꦕꦶ. ꦄꦛ꧀ꦜ. ꧕꧑) ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦠ꧀ꦠꦴ ꦖꦢꦤꦴꦫꦲꦁ ꦆꦛ꧀ꦜꦏꦴꦱꦶꦭꦴꦱꦸꦣꦴꦠꦶꦟꦥꦟ꧀ꦟꦴꦢꦷꦤꦁ ꦪꦺꦤ ꦏꦺꦤꦕꦶ ꦱꦧ꧀ꦧꦱꦺꦴ ꦖꦴꦢꦶꦠꦁ ꦱꦺꦤꦴꦱꦤꦁ ꦱꦧ꧀ꦧꦕ꧀ꦖꦤ꧀ꦤꦁ. ‘‘ꦨꦹꦩꦶꦠꦺꦴ ꦥꦛ꧀ꦜꦴꦪ ꦪꦴꦮ ꦖꦢꦤꦁ ꦄꦴꦲꦕ꧀ꦕ ꦥꦴꦏꦴꦫꦺꦤ ꦮꦴ ꦄꦚ꧀ꦚꦺꦤ ꦮꦴ ꦏꦺꦤꦕꦶ ꦄꦤ꧀ꦠꦩꦱꦺꦴ ꦮꦠ꧀ꦡꦺꦤꦥꦶ ꦥꦫꦶꦏ꧀ꦑꦶꦠ꧀ꦠ’’ꦤ꧀ꦠꦶ (ꦥꦴꦕꦶ. ꦄꦛ꧀ꦜ. ꧕꧑) ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦠ꧀ꦠꦴ ꦪꦺꦤ ꦏꦺꦤꦕꦶ ꦥꦫꦶꦏ꧀ꦑꦶꦥꦶꦠ꧀ꦮꦴ ꦥꦛꦶꦕ꧀ꦖꦴꦢꦶꦠꦱꦺꦤꦴꦱꦤꦁ ꦱꦧ꧀ꦧꦥꦫꦶꦕ꧀ꦖꦤ꧀ꦤꦁ. ‘‘ꦖꦢꦤꦁ ꦄꦤꦴꦲꦕ꧀ꦕ ꦱꦧ꧀ꦧꦤ꧀ꦠꦶꦩꦺꦤ ꦥꦫꦶꦪꦴꦪꦺꦤ ꦢꦶꦪꦝ꧀ꦞꦲꦠ꧀ꦡꦸꦧ꧀ꦧꦺꦣꦺꦤ ꦥꦴꦏꦴꦫꦴꦢꦶꦤꦴ ꦥꦫꦶꦏ꧀ꦑꦶꦠ꧀ꦠꦴꦥꦶ ꦱꦧ꧀ꦧꦥꦫꦶꦕ꧀ꦖꦤ꧀ꦤꦴꦪꦺꦮꦴ’’ꦠꦶ (ꦥꦴꦕꦶ. ꦄꦛ꧀ꦜ. ꧕꧑) ꦏꦸꦫꦸꦤ꧀ꦢꦛ꧀ꦜꦏꦡꦴꦪꦁ ꦮꦸꦠ꧀ꦠꦁ, ꦠꦁ ‘‘ꦢꦶꦪꦝ꧀ꦞꦴ’’ꦠꦶꦄꦴꦢꦶꦤꦴ ꦮꦏ꧀ꦑꦠꦶ.

ꦌꦮꦁ ꦱꦧ꧀ꦧꦕ꧀ꦖꦤ꧀ꦤꦱꦧ꧀ꦧꦥꦫꦶꦕ꧀ꦖꦤ꧀ꦤꦺ ꦌꦏꦱ꧀ꦩꦶꦁ ꦱꦺꦤꦴꦱꦤꦺ ꦪꦺꦴ ꦨꦶꦏ꧀ꦑꦸ ꦈꦥꦱꦩ꧀ꦥꦤ꧀ꦤꦠꦺꦴ ꦄꦚ꧀ꦚꦺꦤ ꦌꦏꦺꦤ ꦮꦴ ꦄꦤꦺꦏꦺꦲꦶ ꦮꦴ ꦠꦶꦫꦠ꧀ꦠꦁ ꦱꦲꦱꦺꦪ꧀ꦪꦁ ꦏꦥ꧀ꦥꦺꦠ꧀ꦮꦴ ꦕꦠꦸꦠ꧀ꦡꦫꦠ꧀ꦠꦶꦁ ꦄꦴꦢꦶꦁ ꦏꦠ꧀ꦮꦴ ꦱꦧ꧀ꦧꦫꦠ꧀ꦠꦷꦱꦸ ꦱꦹꦫꦶꦪꦠ꧀ꦡꦔ꧀ꦒꦩꦠꦺꦴ ꦥꦛ꧀ꦜꦴꦪ ꦱꦏꦭꦫꦠ꧀ꦠꦶꦪꦁ ꦥꦜꦩꦁ ꦮꦴ ꦥꦕ꧀ꦖꦴ ꦮꦴ ꦄꦥꦸꦧ꧀ꦧꦴꦕꦫꦶꦩꦁ ꦮꦴ ꦥꦶꦛ꧀ꦜꦶꦁ ꦥꦱꦴꦫꦺꦠ꧀ꦮꦴ ꦱꦕꦺ ꦌꦏꦱꦺꦤꦴꦱꦤꦺ ꦱꦺꦪ꧀ꦪꦁ ꦏꦥ꧀ꦥꦺꦠꦶ, ꦠꦱ꧀ꦱ ꦢꦺꦮꦱꦶꦏꦁ ꦥꦴꦕꦶꦠ꧀ꦠꦶꦪꦁ ꦲꦺꦴꦠꦷꦠꦶ ꦆꦢꦁ ꦮꦶꦣꦴꦤꦁ ‘‘ꦄꦥꦶꦕꦺꦠ꧀ꦡ ꦌꦏꦴꦮꦴꦱꦴꦢꦶꦏꦩ꧀ꦥꦶ ꦕꦠꦸꦏ꧀ꦏꦁ ꦮꦺꦢꦶꦠꦧ꧀ꦧ’’ꦤ꧀ꦠꦶꦄꦴꦢꦶꦤꦴ (ꦥꦴꦕꦶ. ꦄꦛ꧀ꦜ. ꧕꧑) ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦁ.

‘‘ꦪꦺꦨꦸꦪ꧀ꦪꦺꦤ ꦥꦫꦶꦕ꧀ꦖꦤ꧀ꦤꦺ ꦖꦤ꧀ꦤꦺ’’ꦠꦶ ꦆꦩꦶꦤꦴꦥꦶ ꦌꦮꦩꦺꦮ ꦪꦺꦴꦗꦺꦠ꧀ꦮꦴ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ‘‘ꦪꦱ꧀ꦱꦴ ꦥꦤ ꦈꦥꦫꦶ ꦧꦲꦸꦠꦫꦁ ꦜꦴꦤꦁ ꦖꦤ꧀ꦤꦁ, ꦄꦥ꧀ꦥꦁ ꦄꦕ꧀ꦖꦤ꧀ꦤꦁ, ꦱꦩꦤ꧀ꦠꦠꦺꦴ ꦕ ꦧꦲꦸꦠꦫꦁ ꦥꦫꦶꦏ꧀ꦑꦶꦠ꧀ꦠꦁ, ꦄꦥ꧀ꦥꦁ ꦄꦥꦫꦶꦏ꧀ꦑꦶꦠ꧀ꦠꦁ, ꦄꦪꦁ ꦪꦺꦨꦸꦪ꧀ꦪꦺꦤꦖꦤ꧀ꦤꦴ ꦪꦺꦨꦸꦪ꧀ꦪꦺꦤꦥꦫꦶꦕ꧀ꦖꦤ꧀ꦤꦴ ꦤꦴꦩꦴ’’ꦠꦶ (ꦥꦴꦕꦶ. ꦄꦛ꧀ꦜ. ꧕꧑) ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦤꦪꦺꦤ ꦪꦺꦨꦸꦪ꧀ꦪꦺꦤ ꦖꦤ꧀ꦤꦥꦫꦶꦕ꧀ꦖꦤ꧀ꦤꦁ ꦮꦺꦢꦶꦠꦧ꧀ꦧꦁ. ꦄꦠ꧀ꦡꦺꦴ ꦮꦸꦠ꧀ꦠꦤꦪꦺꦴꦪꦺꦮ. ‘‘ꦪꦺꦨꦸꦪ꧀ꦪꦺꦤ ꦥꦁꦱꦸꦏꦴ’’ꦠꦶ ꦌꦠꦱ꧀ꦱ ꦄꦛ꧀ꦜꦏꦡꦴꦪꦁ (ꦥꦴꦕꦶ. ꦄꦛ꧀ꦜ. ꧘꧖) ꦠꦷꦱꦸ ꦢ꧀ꦮꦺ ꦪꦺꦨꦸꦪ꧀ꦪꦁ ꦤꦴꦩ, ꦆꦣ ꦥꦤ ꦥꦢꦱꦺꦴꦣꦩ꧀ꦩꦺ ‘‘ꦪꦺꦨꦸꦪ꧀ꦪꦺꦤ ꦥꦒꦸꦟꦁ ꦒꦤ꧀ꦡ’’ꦤ꧀ꦠꦶ ꦌꦠꦱ꧀ꦱ ꦄꦛ꧀ꦜꦏꦡꦴꦪꦁ (ꦥꦴꦕꦶ. ꦄꦛ꧀ꦜ. ꧔꧘) ‘‘ꦌꦏꦒꦴꦡꦴꦪꦴ’’ꦠꦶꦄꦴꦢꦶꦮꦶꦮꦫꦟꦺ ꦮꦶꦪ ꦕꦠꦹꦱꦸ ꦠꦪꦺꦴꦥꦶ ꦨꦴꦒꦴ ꦪꦺꦨꦸꦪ꧀ꦪꦁ ꦤꦴꦩꦴꦠꦶ ꦮꦺꦢꦶꦠꦧ꧀ꦧꦁ.

꧙꧑꧑. ꦩꦺꦡꦸꦤꦱ꧀ꦱ ꦥꦲꦺꦴꦤꦏꦁ ꦪꦁ ꦥꦤ ꦮꦠ꧀ꦡꦸ ꦥꦜꦩꦥꦴꦫꦴꦗꦶꦏꦴꦪ ꦤꦶꦢ꧀ꦢꦶꦛ꧀ꦜꦁ ꦄꦤ꧀ꦠꦩꦱꦺꦴ ꦠꦶꦫꦕ꧀ꦖꦴꦤꦒꦠꦺꦤꦥꦶ, ꦠꦺꦤ ꦥꦜꦩꦥꦴꦫꦴꦗꦶꦏꦮꦠ꧀ꦡꦸꦤꦴ ꦥꦸꦒ꧀ꦒꦭꦺꦤ ꦱꦲ ꦤꦶꦥꦗ꧀ꦗꦶꦠ꧀ꦮꦴ ꦄꦴꦥꦠ꧀ꦠꦶ ꦱꦲꦱꦺꦪ꧀ꦪꦴꦥꦠ꧀ꦠꦶ ꦲꦺꦴꦠꦷꦠꦶ ꦪꦺꦴꦗꦤꦴ.

꧙꧑꧒-꧓. ‘‘ꦈꦨꦺꦴ ꦮꦴ ꦤꦶꦥꦗ꧀ꦗꦤ꧀ꦠꦷ’’ꦠꦶ ꦮꦶꦏꦥ꧀ꦥꦱ꧀ꦱ ꦥꦜꦩꦒꦴꦡꦴꦢ꧀ꦮꦪꦺꦤꦺꦮ ꦄꦠ꧀ꦡꦠꦺꦴ ꦢꦱ꧀ꦱꦶꦠꦠ꧀ꦠꦴ ꦥꦸꦧ꧀ꦧꦴꦥꦫꦶꦪꦮꦱꦺꦤꦥꦶ ꦱꦩ꧀ꦨꦮꦤ꧀ꦠꦁ ꦢꦱ꧀ꦱꦺꦠꦸꦁ ‘‘ꦄꦤꦸꦥꦱꦩ꧀ꦥꦤ꧀ꦤꦺ’’ꦠꦶꦄꦴꦢꦶꦤꦴ (ꦥꦴꦕꦶ. ꧕꧒-꧕꧔) ꦤꦪꦺꦤ ꦢꦱ꧀ꦱꦶꦠꦥꦏ꧀ꦑꦢ꧀ꦮꦪꦁ ꦤꦶꦢꦱ꧀ꦱꦺꦠꦸꦩꦴꦲ ‘‘ꦤꦶꦥꦤ꧀ꦤꦺ’’ꦠꦶꦄꦴꦢꦶ. ‘‘ꦈꦛ꧀ꦜꦲꦶꦠ꧀ꦮꦴ’’ꦠꦶ ꦆꦢꦁ ꦮꦶꦕ꧀ꦖꦴꦮꦱꦺꦤ ꦒꦲꦺꦠꦧ꧀ꦧꦁ. ꦄꦤꦸꦥꦱꦩ꧀ꦥꦤ꧀ꦤꦒꦟꦤꦴꦪꦥꦶ ꦮꦴꦠꦶ ꦧꦲꦹꦱꦸ ꦄꦤꦸꦥꦱꦩ꧀ꦥꦤ꧀ꦤꦺꦱꦸ ꦠꦺꦱꦁ ꦒꦟꦤꦴꦪ ꦕ. ꦄꦤꦸꦥꦱꦩ꧀ꦥꦤ꧀ꦤꦺꦱꦸ ꦧꦲꦹꦱꦸ ꦠꦺꦱꦁ ꦒꦟꦤꦴꦪ ꦌꦏꦱ꧀ꦱ ꦨꦶꦏ꧀ꦑꦸꦤꦺꦴ ꦧꦲꦹ ꦄꦴꦥꦠ꧀ꦠꦶꦪꦺꦴ ꦲꦺꦴꦤ꧀ꦠꦷꦠꦶ ꦌꦮꦁ ꦢꦱ꧀ꦱꦤꦺꦤ ꦈꦥꦱꦩ꧀ꦥꦤ꧀ꦤꦺꦱꦸ ꦧꦲꦹꦱꦸ ꦌꦏꦱ꧀ꦩꦶꦁ ꦄꦤꦸꦥꦱꦩ꧀ꦥꦤ꧀ꦤꦺ ꦱꦠꦶ ꦠꦺꦱꦚ꧀ꦕ ꦠꦱ꧀ꦱ ꦥꦪꦺꦴꦒꦒꦟꦤꦴꦪ ꦄꦴꦥꦗ꧀ꦗꦶꦠꦧ꧀ꦧꦴ ꦧꦲꦹ ꦄꦴꦥꦠ꧀ꦠꦶꦪꦺꦴ ꦕ ꦈꦨꦺꦴꦱꦸꦥꦶ ꦧꦲꦹꦱꦸ ꦌꦏꦺꦏꦱ꧀ꦱꦺꦮ ꦈꦥꦱꦩ꧀ꦥꦤ꧀ꦤꦱ꧀ꦱ ꦄꦤꦸꦥꦱꦩ꧀ꦥꦤ꧀ꦤꦒꦟꦤꦴꦪ ꦧꦲꦹ ꦄꦴꦥꦠ꧀ꦠꦶꦪꦺꦴ ꦕ ꦲꦺꦴꦤ꧀ꦠꦷꦠꦶꦥꦶ ꦢꦱ꧀ꦱꦶꦠꦁ ꦲꦺꦴꦠꦶ.

꧙꧑꧔. ꦌꦏꦺꦤꦺꦮ ꦢ꧀ꦮꦴꦫꦺꦤ ꦮꦭ꦳ꦚ꧀ꦗꦶꦠꦧ꧀ꦧꦠꦺꦴ ꦌꦏꦹꦥꦕꦴꦫꦺ ꦱꦠꦒꦧ꧀ꦨꦺꦥꦶ ꦱꦺꦤꦴꦱꦤꦺ ꦈꦥꦱꦩ꧀ꦥꦤ꧀ꦤꦺꦴ ꦌꦏꦱ꧀ꦩꦶꦁ ꦒꦧ꧀ꦨꦺ ꦮꦱꦤ꧀ꦠꦺꦴ ꦄꦠ꧀ꦠꦤꦴ ꦱꦪꦤꦒꦧ꧀ꦨꦺ ꦢ꧀ꦮꦴꦫꦁ ꦥꦶꦢꦲꦶꦠ꧀ꦮꦴ ꦮꦴ ꦄꦥꦶꦢꦲꦶꦠ꧀ꦮꦴ ꦮꦴ ꦕꦠꦸꦠ꧀ꦡꦫꦠ꧀ꦠꦶꦪꦁ ꦱꦪꦠꦶ ꦕꦺ, ꦈꦥꦫꦶꦩꦠꦭꦺ, ꦄꦮꦱꦺꦱꦒꦧ꧀ꦨꦺꦱꦸ ꦕ ꦱꦪꦤ꧀ꦠꦺꦲꦶ ꦄꦤꦸꦥꦱꦩ꧀ꦥꦤ꧀ꦤꦺꦲꦶ ꦥꦸꦧ꧀ꦧꦺ ꦮꦸꦠ꧀ꦠꦄꦴꦥꦠ꧀ꦠꦶꦤꦶꦪꦩꦺꦴꦪꦺꦮꦴꦠꦶ ꦢꦱ꧀ꦱꦤꦠ꧀ꦡꦩꦴꦲ ‘‘ꦱꦕꦺ ꦥꦶꦣꦴꦪꦴ’’ꦠꦶꦄꦴꦢꦶ. ꦒꦧ꧀ꦨꦢ꧀ꦮꦴꦫꦁ ꦈꦠ꧀ꦠꦫꦥꦢꦭꦺꦴꦥꦺꦤ ‘‘ꦒꦧ꧀ꦨ’’ꦤ꧀ꦠꦶ ꦮꦸꦠ꧀ꦠꦁ. ꦕꦠꦸꦠ꧀ꦡꦢꦶꦮꦱꦺ ꦄꦠ꧀ꦡꦔ꧀ꦒꦠꦺ ꦱꦹꦫꦶꦪꦺ ꦤꦶꦥꦗ꧀ꦗꦠꦶ, ꦄꦴꦥꦠ꧀ꦠꦶ ꦱꦶꦪꦴꦠꦶ ꦪꦺꦴꦗꦤꦴ. ‘‘ꦄꦤꦸꦥꦱꦩ꧀ꦥꦤ꧀ꦤꦺꦤ ꦱꦲꦴ’’ꦠꦶ ꦥꦏꦫꦟꦠꦺꦴ ꦭꦧ꧀ꦨꦠꦶ. ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦁ.

꧙꧑꧕. ꦢꦶꦪꦝ꧀ꦞꦲꦠ꧀ꦡꦸꦧ꧀ꦧꦺꦣꦺꦤꦴꦠꦶ ꦮꦝ꧀ꦞꦏꦶꦫꦠꦤꦺꦤ ꦢꦶꦪꦝ꧀ꦞꦫꦠꦤꦸꦧ꧀ꦧꦺꦣꦺꦤ. ꦥꦴꦏꦴꦫꦺꦴ ꦤꦴꦩ ꦤꦶꦛ꧀ꦜꦶꦠꦺꦴ. ꦕꦪꦤꦁ ꦤꦴꦩ ꦮꦶꦥ꧀ꦥꦏꦠꦥꦴꦏꦴꦫꦺꦴꦠꦶꦥꦶ ꦮꦢꦤ꧀ꦠꦶ. ꦆꦩꦶꦤꦴ ꦕ ꦄꦴꦭ꦳ꦶꦤ꧀ꦢꦱ꧀ꦱ ꦄꦒ꧀ꦒꦲꦟꦠ꧀ꦡꦁ ‘‘ꦢꦱꦲꦠ꧀ꦡꦸꦧ꧀ꦧꦺꦣꦴꦥꦶ ꦗꦒꦠꦶ ꦥꦫꦶꦏ꧀ꦑꦺꦥꦱꦔ꧀ꦑ꧀ꦪꦁ ꦤ ꦒꦕ꧀ꦖꦠꦷ’’ꦠꦶ (ꦥꦴꦕꦶ. ꦄꦛ꧀ꦜ. ꧕꧑) ꦄꦛ꧀ꦜꦏꦡꦴ ꦥꦩꦴꦟꦤ꧀ꦠꦶ ꦮꦢꦤ꧀ꦠꦶ. ꦗꦒꦠꦷꦠꦶ ꦄꦴꦭ꦳ꦶꦤ꧀ꦢꦁ. ꦄꦴꦢꦶ-ꦱꦢ꧀ꦢꦺꦤ ꦨꦶꦠ꧀ꦠꦶꦥꦟ꧀ꦟꦴꦮꦫꦟꦴꦢꦶꦒꦲꦟꦁ.

꧙꧑꧖. ꦢꦸꦱ꧀ꦱꦏꦸꦛꦶꦪꦤ꧀ꦠꦶ ꦮꦠ꧀ꦡꦏꦸꦛꦶꦪꦁ.

꧙꧑꧗. ‘‘ꦱꦧ꧀ꦧꦕ꧀ꦖꦤ꧀ꦤꦥꦫꦶꦕ꧀ꦖꦤ꧀ꦤꦴꦢꦶꦥ꧀ꦥꦨꦺꦢꦠꦺꦴ ꦪꦺꦨꦸꦪ꧀ꦪꦴꦢꦶꦥ꧀ꦥꦨꦺꦢꦠꦺꦴ’’ꦠꦶ ꦄꦴꦢꦶ-ꦱꦢ꧀ꦢꦺꦴ ꦥꦕ꧀ꦕꦺꦏꦁ ꦪꦺꦴꦗꦺꦠꦧ꧀ꦧꦺꦴ. ꦥꦜꦩꦺꦤ ꦄꦴꦢꦶ-ꦱꦢ꧀ꦢꦺꦤ ꦱꦧ꧀ꦧꦕ꧀ꦖꦤ꧀ꦤꦪꦺꦨꦸꦪ꧀ꦪꦥꦫꦶꦕ꧀ꦖꦤ꧀ꦤꦱꦧ꧀ꦧꦕ꧀ꦖꦤ꧀ꦤꦈꦥꦝ꧀ꦞꦥꦫꦶꦕ꧀ꦖꦤ꧀ꦤꦱꦧ꧀ꦧꦥꦫꦶꦕ꧀ꦖꦤ꧀ꦤꦪꦺꦨꦸꦪ꧀ꦪꦕ꧀ꦖꦤ꧀ꦤ- ꦱꦧ꧀ꦧꦥꦫꦶꦕ꧀ꦖꦤ꧀ꦤꦈꦥꦝ꧀ꦞꦕ꧀ꦖꦤ꧀ꦤꦱꦔ꧀ꦑꦴꦠꦴꦤꦶ ꦕꦠ꧀ꦠꦴꦫꦶ ꦱꦺꦤꦴꦱꦤꦴꦤꦶ ꦒꦲꦶꦠꦴꦤꦶ. ꦒꦴꦡꦴꦪ ꦱꦫꦹꦥꦺꦤ ꦮꦸꦠ꧀ꦠꦱꦧ꧀ꦧꦕ꧀ꦖꦤ꧀ꦤꦱꦧ꧀ꦧꦥꦫꦶꦕ꧀ꦖꦤ꧀ꦤꦺꦤ ꦱꦢ꧀ꦣꦶꦁ ꦥꦚ꧀ꦕ ꦱꦺꦤꦴꦱꦤꦴꦤꦶ ꦢꦱ꧀ꦱꦶꦠꦴꦤꦶ ꦲꦺꦴꦤ꧀ꦠꦶ. ꦢꦸꦠꦶꦪꦺꦤ ꦄꦴꦢꦶ-ꦱꦢ꧀ꦢꦺꦤ ꦪꦺꦨꦸꦪ꧀ꦪꦕ꧀ꦖꦤ꧀ꦤꦪꦺꦨꦸꦪ꧀ꦪꦥꦫꦶꦕ꧀ꦖꦤ꧀ꦤ ꦪꦺꦨꦸꦪ꧀ꦪꦕ꧀ꦖꦤ꧀ꦤꦈꦥꦝ꧀ꦞꦥꦫꦶꦕ꧀ꦖꦤ꧀ꦤ ꦪꦺꦨꦸꦪ꧀ꦪꦥꦫꦶꦕ꧀ꦖꦤ꧀ꦤꦈꦥꦝ꧀ꦞꦕ꧀ꦖꦤ꧀ꦤꦱꦔ꧀ꦑꦴꦠꦴꦤꦶ ꦠꦷꦟꦶ ꦱꦺꦤꦴꦱꦤꦴꦤꦶ ꦒꦲꦶꦠꦴꦤꦶ. ꦆꦩꦺ ꦄꦛ꧀ꦜ ꦮꦶꦏꦥ꧀ꦥꦴ ꦭꦧ꧀ꦨꦤ꧀ꦠꦶ. ꦏꦱ꧀ꦩꦴ ꦮꦸꦠ꧀ꦠꦁ ‘‘ꦱꦠ꧀ꦠ ꦥꦴꦕꦶꦠ꧀ꦠꦶꦪꦴꦤꦷ’’ꦠꦶ? ꦩꦲꦴꦄꦛ꧀ꦜꦏꦡꦴꦪ ꦮꦸꦠ꧀ꦠꦠ꧀ꦠꦴ. ꦪꦡꦴꦲ ‘‘ꦩꦲꦴꦄꦛ꧀ꦜꦏꦡꦴꦪꦁ ꦥꦤ ‘ꦱꦧ꧀ꦧꦕ꧀ꦖꦤ꧀ꦤꦺ ꦪꦺꦨꦸꦪ꧀ꦪꦺꦤꦥꦫꦶꦕ꧀ꦖꦤ꧀ꦤꦺ ꦥꦴꦕꦶꦠ꧀ꦠꦶꦪꦁ, ꦱꦧ꧀ꦧꦕ꧀ꦖꦤ꧀ꦤꦺ ꦈꦥꦝ꧀ꦞꦥꦫꦶꦕ꧀ꦖꦤ꧀ꦤꦺ ꦥꦴꦕꦶꦠ꧀ꦠꦶꦪꦁ, ꦪꦺꦨꦸꦪ꧀ꦪꦺꦤꦕ꧀ꦖꦤ꧀ꦤꦺ ꦈꦥꦝ꧀ꦞꦥꦫꦶꦕ꧀ꦖꦤ꧀ꦤꦺ ꦥꦴꦕꦶꦠ꧀ꦠꦶꦪꦁ, ꦱꦧ꧀ꦧꦥꦫꦶꦕ꧀ꦖꦤ꧀ꦤꦺ ꦪꦺꦨꦸꦪ꧀ꦪꦺꦤꦕ꧀ꦖꦤ꧀ꦤꦺ ꦥꦴꦕꦶꦠ꧀ꦠꦶꦪꦁ, ꦱꦧ꧀ꦧꦥꦫꦶꦕ꧀ꦖꦤ꧀ꦤꦺ ꦈꦥꦝ꧀ꦞꦕ꧀ꦖꦤ꧀ꦤꦺ ꦥꦴꦕꦶꦠ꧀ꦠꦶꦪꦁ, ꦪꦺꦨꦸꦪ꧀ꦪꦺꦤꦥꦫꦶꦕ꧀ꦖꦤ꧀ꦤꦺ ꦈꦥꦝ꧀ꦞꦕ꧀ꦖꦤ꧀ꦤꦺ ꦥꦴꦕꦶꦠ꧀ꦠꦶꦪꦁ, ꦥꦴꦭ꦳ꦶꦪꦁ ꦮꦸꦠ꧀ꦠꦥꦴꦕꦶꦠ꧀ꦠꦶꦪꦺꦤ ꦱꦢ꧀ꦣꦶꦁ ꦱꦠ꧀ꦠ ꦥꦴꦕꦶꦠ꧀ꦠꦶꦪꦴꦤꦷ’ꦠꦶ ꦮꦸꦠ꧀ꦠ’’ꦤ꧀ꦠꦶ (ꦥꦴꦕꦶ. ꦄꦛ꧀ꦜ. ꧕꧓).

ꦏꦱ꧀ꦩꦴ ꦥꦤ ꦄꦛ꧀ꦜꦏꦡꦴꦪꦁ ‘‘ꦄꦛ꧀ꦜ ꦥꦴꦕꦶꦠ꧀ꦠꦶꦪꦴꦤꦷ’’ꦠꦶ ꦮꦠ꧀ꦮꦴ ‘‘ꦱꦠ꧀ꦠꦴ’’ꦠꦶ ꦒꦟꦤꦥꦫꦶꦕ꧀ꦖꦺꦢꦺꦴ ꦏꦠꦺꦴꦠꦶ? ꦤꦶꦱ꧀ꦱꦤ꧀ꦢꦺꦲꦺ ꦠꦴꦮ ‘‘ꦱꦺꦪ꧀ꦪꦴ ꦤꦴꦩ ꦱꦧ꧀ꦧꦕ꧀ꦖꦤ꧀ꦤꦴ ꦱꦧ꧀ꦧꦥꦫꦶꦕ꧀ꦖꦤ꧀ꦤꦴ, ꦪꦺꦨꦸꦪ꧀ꦪꦺꦤꦕ꧀ꦖꦤ꧀ꦤꦴ ꦪꦺꦨꦸꦪ꧀ꦪꦺꦤꦥꦫꦶꦕ꧀ꦖꦤ꧀ꦤꦴ’ꦠꦶ (ꦥꦴꦕꦶ. ꧕꧒) ꦥꦴꦭ꦳ꦶꦪꦁ ꦄꦴꦒꦠꦺꦱꦸ ꦢ꧀ꦮꦷꦱꦸ ꦮꦶꦏꦥ꧀ꦥꦺꦱꦸ ꦌꦏꦱ꧀ꦩꦶꦁ ꦮꦸꦠ꧀ꦠꦥꦴꦕꦶꦠ꧀ꦠꦶꦪꦁ ꦒꦲꦺꦠ꧀ꦮꦴ ꦥꦴꦭ꦳ꦶꦪꦁ ꦮꦸꦠ꧀ꦠꦺꦤ ꦥꦴꦕꦶꦠ꧀ꦠꦶꦪꦺꦤ ‘ꦱꦠ꧀ꦠꦴ’ꦠꦶ ꦮꦸꦠ꧀ꦠ’’ꦤ꧀ꦠꦶ ꦥꦫꦶꦲꦴꦫꦺꦴ ꦢꦱ꧀ꦱꦶꦠꦺꦴ. ꦱꦴꦫꦠ꧀ꦡꦢꦷꦥꦤꦶꦪꦚ꧀ꦕ ‘‘ꦱꦠ꧀ꦠ ꦥꦴꦕꦶꦠ꧀ꦠꦶꦪꦴꦤꦷ’ꦠꦶ ꦥꦴꦭ꦳ꦶꦪꦁ ꦮꦸꦠ꧀ꦠꦥꦴꦕꦶꦠ꧀ꦠꦶꦪꦢ꧀ꦮꦪꦁ ꦱꦴꦩꦚ꧀ꦚꦠꦺꦴ ꦌꦏꦠ꧀ꦠꦺꦤ ꦒꦲꦺꦠ꧀ꦮꦴ ꦮꦸꦠ꧀ꦠꦁ. ꦮꦶꦱꦸꦁ ꦥꦤ ꦒꦪ꧀ꦲꦩꦴꦤꦺ ꦱꦧ꧀ꦧꦕ꧀ꦖꦤ꧀ꦤꦺ ꦱꦧ꧀ꦧꦥꦫꦶꦕ꧀ꦖꦤ꧀ꦤꦺ ꦥꦴꦕꦶꦠ꧀ꦠꦶꦪꦁ, ꦪꦺꦨꦸꦪ꧀ꦪꦺꦤꦕ꧀ꦖꦤ꧀ꦤꦺ ꦪꦺꦨꦸꦪ꧀ꦪꦺꦤꦥꦫꦶꦕ꧀ꦖꦤ꧀ꦤꦺ ꦥꦴꦕꦶꦠ꧀ꦠꦶꦪꦤ꧀ꦠꦶ ꦄꦛ꧀ꦜꦺꦮ ꦥꦴꦕꦶꦠ꧀ꦠꦶꦪꦴꦤꦶ ꦲꦺꦴꦤ꧀ꦠꦷ’’ꦠꦶ (ꦱꦴꦫꦠ꧀ꦡ. ꦛꦷ. ꦥꦴꦕꦶꦠ꧀ꦠꦶꦪ ꧓.꧕꧓) ꦥꦫꦶꦲꦴꦫꦺꦴ ꦮꦸꦠ꧀ꦠꦺꦴ.

ꦱꦧ꧀ꦧꦪꦺꦨꦸꦪ꧀ꦪꦈꦥꦝ꧀ꦞꦥꦢꦺꦱꦸ ꦖꦤ꧀ꦤꦥꦫꦶꦕ꧀ꦖꦤ꧀ꦤꦥꦢꦺꦲꦶ ꦪꦺꦴꦗꦶꦠꦺꦱꦸ ꦤꦮ ꦮꦶꦏꦥ꧀ꦥꦴ ꦱꦩ꧀ꦨꦮꦤ꧀ꦠꦶ, ꦠꦺꦱꦸ ꦤꦮꦩꦺ ꦈꦥꦝ꧀ꦞꦕ꧀ꦖꦤ꧀ꦤꦈꦥꦝ꧀ꦞꦥꦫꦶꦕ꧀ꦖꦤ꧀ꦤꦮꦶꦏꦥ꧀ꦥꦺ ꦢꦸꦏ꧀ꦏꦛꦱ꧀ꦱ ꦢꦱ꧀ꦱꦶꦠꦠ꧀ꦠꦴ ꦥꦴꦫꦶꦱꦺꦱꦠꦺꦴ ꦆꦠꦫꦺꦱꦸ ꦄꦛ꧀ꦜꦱꦸ ꦄꦛ꧀ꦜ ꦥꦴꦕꦶꦠ꧀ꦠꦶꦪꦴꦤꦺꦮ ꦱꦩ꧀ꦨꦮꦤ꧀ꦠꦶ. ꦄꦛ꧀ꦜꦏꦡꦴꦪꦁ ꦥꦤ ꦄꦥ꧀ꦥꦏꦁ ꦈꦴꦤꦩꦣꦶꦏꦁ ꦮꦴ ꦒꦸꦟꦤꦹꦥꦒꦁ ꦤ ꦲꦺꦴꦠꦷꦠꦶ ꦏꦠ꧀ꦮꦴ ‘‘ꦱꦠ꧀ꦠꦴ‘‘ꦠꦶ ꦮꦸꦠ꧀ꦠꦤ꧀ꦠꦶ ꦒꦲꦺꦠꦧ꧀ꦧꦁ. ꦌꦠ꧀ꦡꦴꦠꦶ ꦆꦩꦱ꧀ꦩꦶꦁ ꦱꦶꦏ꧀ꦑꦴꦥꦢꦺ.

꧙꧑꧘. ‘‘ꦄꦝ꧀ꦞꦕ꧀ꦖꦤ꧀ꦤꦺ ꦄꦝ꧀ꦞꦥꦫꦶꦕ꧀ꦖꦤ꧀ꦤꦺ’’ꦠꦶ ꦪꦺꦴꦗꦤꦴ. ‘‘ꦱꦧ꧀ꦧꦥꦫꦶꦕ꧀ꦖꦤ꧀ꦤꦺ ꦕꦹꦭ꦳ꦕ꧀ꦖꦤ꧀ꦤꦺ’’ꦠꦶ ꦪꦡꦴꦏ꧀ꦏꦩꦺꦤ ꦪꦺꦴꦗꦤꦴ. ꦆꦩꦶꦤꦴ ꦄꦛ꧀ꦜꦏꦡꦴꦒꦠꦺꦱꦸ ꦥꦚ꧀ꦕꦱꦸ ꦮꦶꦏꦥ꧀ꦥꦺꦱꦸ ꦠꦠꦶꦪꦮꦶꦏꦥ꧀ꦥꦁ ꦢꦱ꧀ꦱꦺꦠ꧀ꦮꦴ ꦄꦴꦢꦶ-ꦱꦢ꧀ꦢꦺꦤ ꦱꦧ꧀ꦧꦕ꧀ꦖꦤ꧀ꦤꦴꦢꦪꦺꦴ ꦱꦺꦱꦮꦶꦏꦥ꧀ꦥꦴ ꦒꦲꦶꦠꦴ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦱꦧ꧀ꦧꦕ꧀ꦖꦤ꧀ꦤꦺ ꦕꦹꦭ꦳ꦏꦥꦫꦶꦕ꧀ꦖꦤ꧀ꦤꦺ ꦢꦸꦏ꧀ꦏꦛꦁ, ꦪꦺꦨꦸꦪ꧀ꦪꦺꦤꦕ꧀ꦖꦤ꧀ꦤꦺ ꦕꦹꦭ꦳ꦏꦥꦫꦶꦕ꧀ꦖꦤ꧀ꦤꦺ ꦢꦸꦏ꧀ꦏꦛꦁ, ꦱꦧ꧀ꦧꦥꦫꦶꦕ꧀ꦖꦤ꧀ꦤꦺ ꦕꦹꦭ꦳ꦏꦕ꧀ꦖꦤ꧀ꦤꦺ ꦢꦸꦏ꧀ꦏꦛꦁ, ꦪꦺꦨꦸꦪ꧀ꦪꦺꦤꦥꦫꦶꦕ꧀ꦖꦤ꧀ꦤꦺ ꦕꦹꦭ꦳ꦏꦕ꧀ꦖꦤ꧀ꦤꦺ ꦢꦸꦏ꧀ꦏꦛꦁ, ꦥꦴꦭ꦳ꦶꦪꦁ ꦄꦴꦒꦠꦢꦸꦏ꧀ꦏꦛꦺꦤ ꦱꦲ ꦥꦚ꧀ꦕ ꦢꦸꦏ꧀ꦏꦛꦴꦤꦷꦲꦶ ꦮꦸꦠ꧀ꦠ’’ꦤ꧀ꦠꦶ (ꦥꦴꦕꦶ. ꦄꦛ꧀ꦜ. ꧕꧓). ꦥꦴꦭ꦳ꦶꦪꦁ ꦄꦴꦒꦠꦢꦸꦏ꧀ꦏꦛꦁ ꦤꦴꦩ ꦆꦩꦶꦱ꧀ꦱꦴꦪꦺꦮ ꦒꦴꦡꦴꦪ ꦄꦴꦢꦶꦩ꧀ꦲꦶꦪꦺꦮ ꦮꦸꦠ꧀ꦠꦢꦸꦏ꧀ꦏꦛꦁ. ꦪꦡꦴꦲ ‘‘ꦈꦥꦝ꧀ꦞꦕ꧀ꦖꦤ꧀ꦤꦺ ꦈꦥꦝ꧀ꦞꦥꦫꦶꦕ꧀ꦖꦤ꧀ꦤꦺ ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱꦴ’’ꦠꦶ (ꦥꦴꦕꦶ. ꧕꧓).

ꦕꦹꦭ꦳ꦕ꧀ꦖꦤ꧀ꦤꦴꦢꦷꦤꦶ ꦕꦺꦠ꧀ꦡ ꦌꦮꦁ ꦮꦺꦢꦶꦠꦧ꧀ꦧꦴꦤꦶ – ꦪꦱ꧀ꦱ ꦕꦠꦹꦱꦸ ꦨꦴꦒꦺꦱꦸ ꦌꦏꦺꦴ ꦖꦤ꧀ꦤꦺꦴ, ꦱꦺꦱꦴ ꦄꦕ꧀ꦖꦤ꧀ꦤꦴ, ꦆꦢꦁ ꦕꦹꦭ꦳ꦏꦕ꧀ꦖꦤ꧀ꦤꦁ. ꦪꦱ꧀ꦱ ꦠꦷꦱꦸ ꦨꦴꦒꦺꦱꦸ ꦢ꧀ꦮꦺ ꦖꦤ꧀ꦤꦴ, ꦌꦏꦺꦴ ꦄꦕ꧀ꦖꦤ꧀ꦤꦺꦴ, ꦆꦢꦁ ꦪꦺꦨꦸꦪ꧀ꦪꦺꦤꦕ꧀ꦖꦤ꧀ꦤꦁ. ꦪꦱ꧀ꦱ ꦢ꧀ꦮꦷꦱꦸ ꦨꦴꦒꦺꦱꦸ ꦌꦏꦺꦴ ꦖꦤ꧀ꦤꦺꦴ, ꦌꦏꦺꦴ ꦄꦕ꧀ꦖꦤ꧀ꦤꦺꦴ, ꦆꦢꦁ ꦈꦥꦝ꧀ꦞꦕ꧀ꦖꦤ꧀ꦤꦁ ꦤꦴꦩ ꦱꦺꦤꦴꦱꦤꦁ. ꦕꦹꦭ꦳ꦥꦫꦶꦕ꧀ꦖꦤ꧀ꦤꦴꦢꦷꦤꦶ ꦆꦩꦶꦤꦴ ꦤꦪꦺꦤ ꦮꦺꦢꦶꦠꦧ꧀ꦧꦴꦤꦶ. ꦖꦤ꧀ꦤꦴꦢꦷꦲꦶꦥꦷꦠꦶ ꦱꦲꦠ꧀ꦡꦺ ꦏꦫꦟꦮꦕꦤꦁ. ꦥꦶ-ꦱꦢ꧀ꦢꦺꦴ ꦱꦩꦸꦕ꧀ꦕꦪꦠ꧀ꦡꦺꦴ. ꦱꦧ꧀ꦧꦕꦹꦭ꦳ꦥꦫꦶꦕ꧀ꦖꦤ꧀ꦤꦖꦤ꧀ꦤꦴꦢꦷꦲꦶ ꦕꦠꦹꦲꦶꦥꦶ ꦱꦲ ꦄꦝ꧀ꦞꦕ꧀ꦖꦤ꧀ꦤꦥꦫꦶꦕ꧀ꦖꦤ꧀ꦤꦺ ꦥꦚ꧀ꦕꦣꦴ ꦢꦸꦏ꧀ꦏꦛꦁ ꦥꦫꦶꦢꦷꦥꦶꦠꦤ꧀ꦠꦶ ꦪꦺꦴꦗꦤꦴ.

꧙꧒꧐. ꦱꦧ꧀ꦧꦕ꧀ꦖꦤ꧀ꦤꦴꦢꦶꦏꦺꦠꦶ ꦌꦠ꧀ꦡ ꦄꦴꦢꦶ-ꦱꦢ꧀ꦢꦺꦤ ‘‘ꦱꦧ꧀ꦧꦥꦫꦶꦕ꧀ꦖꦤ꧀ꦤꦺ ꦱꦧ꧀ꦧꦄꦕ꧀ꦖꦤ꧀ꦤꦺ ꦪꦺꦨꦸꦪ꧀ꦪꦺꦤꦄꦕ꧀ꦖꦤ꧀ꦤꦺ ꦪꦺꦨꦸꦪ꧀ꦪꦺꦤꦄꦥꦫꦶꦕ꧀ꦖꦤ꧀ꦤꦺ’’ꦠꦶ (ꦥꦴꦕꦶ. ꧕꧔) ꦥꦴꦭ꦳ꦶꦪꦁ ꦮꦸꦠ꧀ꦠꦴ ꦄꦤꦴꦥꦠ꧀ꦠꦶꦮꦴꦫꦱꦺꦱꦴ ꦕ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦴ ‘‘ꦈꦥꦝ꧀ꦞꦕ꧀ꦖꦤ꧀ꦤꦺ ꦕꦹꦭ꦳ꦏꦥꦫꦶꦕ꧀ꦖꦤ꧀ꦤꦺ, ꦈꦥꦝ꧀ꦞꦥꦫꦶꦕ꧀ꦖꦤ꧀ꦤꦺ ꦕꦹꦭ꦳ꦏꦕ꧀ꦖꦤ꧀ꦤꦺ, ꦕꦹꦭ꦳ꦏꦕ꧀ꦖꦤ꧀ꦤꦺ ꦕꦹꦭ꦳ꦏꦥꦫꦶꦕ꧀ꦖꦤ꧀ꦤꦺ’’ꦠꦶ (ꦥꦴꦕꦶ. ꦄꦛ꧀ꦜ. ꧕꧓) ꦠꦪꦺꦴ ꦄꦤꦴꦥꦠ꧀ꦠꦶꦮꦴꦫꦴ ꦕ ꦒꦲꦶꦠꦴ.

꧙꧒꧑. ꦤꦶꦥꦤ꧀ꦤꦺꦥꦷꦠꦶ ꦌꦠ꧀ꦡ ꦥꦶ-ꦱꦢ꧀ꦢꦺꦤ ‘‘ꦨꦶꦏ꧀ꦑꦸ ꦤꦶꦥꦤ꧀ꦤꦺ ꦄꦤꦸꦥꦱꦩ꧀ꦥꦤ꧀ꦤꦺꦴ ꦤꦶꦱꦷꦢꦠꦶ, ꦈꦨꦺꦴ ꦮꦴ ꦤꦶꦱꦷꦢꦤ꧀ꦠꦷ’’ꦠꦶ (ꦥꦴꦕꦶ. ꧕꧔) ꦥꦴꦭ꦳ꦶꦪꦁ ꦮꦸꦠ꧀ꦠꦥꦏꦴꦫꦤ꧀ꦠꦫꦺ ꦱꦩꦸꦕ꧀ꦕꦶꦤꦺꦴꦠꦶ.

ꦱꦲꦱꦺꦪ꧀ꦪꦏꦡꦴꦮꦟ꧀ꦟꦤꦴ.

꧙꧒꧒. ꦄꦥꦶ-ꦱꦢ꧀ꦢꦺꦤ ꦥꦒꦺꦮ ꦩꦲꦠ꧀ꦠꦫꦶꦪꦴꦠꦶ ꦢꦱ꧀ꦱꦺꦠꦶ. ꦱꦲꦱꦺꦪ꧀ꦪꦁ ꦥꦏꦥ꧀ꦥꦺꦪ꧀ꦪꦴꦠꦶ ꦪꦡꦴꦮꦸꦠ꧀ꦠꦭꦏ꧀ꦑꦟꦁ ꦱꦧ꧀ꦧꦕ꧀ꦖꦤ꧀ꦤꦱꦧ꧀ꦧꦥꦫꦶꦕ꧀ꦖꦤ꧀ꦤꦴꦢꦶꦱꦺꦤꦴꦱꦤꦁ ꦥꦮꦶꦱꦶꦠ꧀ꦮꦴ ꦱꦹꦫꦶꦪꦠ꧀ꦡꦔ꧀ꦒꦩꦠꦺꦴ ꦥꦛ꧀ꦜꦴꦪ ꦥꦸꦧ꧀ꦧꦺ ꦮꦸꦠ꧀ꦠꦥ꧀ꦥꦏꦴꦫꦺꦤꦺꦮ ꦥꦶꦛ꧀ꦜꦶꦥ꧀ꦥꦱꦴꦫꦟꦭꦏ꧀ꦑꦟꦁ ꦱꦺꦪ꧀ꦪꦁ ꦏꦥ꧀ꦥꦺꦪ꧀ꦪ.

꧙꧒꧓-꧔. ꦢꦺꦮꦶꦪꦴꦠꦶ ꦢꦺꦮꦶꦠ꧀ꦡꦶꦪꦴ. ꦠꦶꦫꦕ꧀ꦖꦴꦤꦒꦠꦶꦠ꧀ꦡꦶꦪꦴꦠꦶ ꦒꦺꦴꦣꦴꦢꦶꦏꦴꦪ. ‘‘ꦩꦺꦡꦸꦤꦮꦠ꧀ꦡꦸꦨꦹꦠꦴꦪꦴ’’ꦠꦶ ꦆꦩꦶꦤꦴ ꦩꦺꦡꦸꦤꦣꦩ꧀ꦩꦱ꧀ꦱ ꦄꦮꦠ꧀ꦡꦸꦨꦹꦠꦴꦪ ꦱꦲꦱꦺꦪ꧀ꦪꦴꦪ ꦢꦺꦴꦱꦴꦨꦴꦮꦁ ꦢꦱ꧀ꦱꦺꦠꦶ. ꦮꦠ꧀ꦡꦹꦤꦁ ꦒꦟꦤꦴꦪꦴꦠꦶ ꦩꦴꦠꦸꦒꦴꦩꦱ꧀ꦱ ꦒꦟꦤꦴꦪ ꦕ ꦠꦴꦱꦚ꧀ꦕ ꦄꦠ꧀ꦠꦤꦺꦴ ꦕ ꦥꦪꦺꦴꦒꦒꦟꦤꦴꦪ ꦕ. ꦄꦱ꧀ꦱꦴꦠꦶ ꦨꦶꦏ꧀ꦑꦸꦱ꧀ꦱ. ꦩꦴꦠꦸꦒꦴꦩꦺꦤ ꦠꦪꦺꦴ ꦢꦶꦮꦱꦺ ꦱꦲꦱꦺꦪ꧀ꦪꦴꦪ ꦆꦩꦶꦤꦴ ꦱꦶꦏ꧀ꦑꦴꦥꦢꦺꦤ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦶꦠ꧀ꦮꦴ ꦕꦠꦸꦠ꧀ꦡꦢꦶꦮꦱꦺ ꦱꦲꦱꦺꦪ꧀ꦪꦴꦪ ꦢ꧀ꦮꦷꦲꦶꦥꦶ ꦱꦶꦏ꧀ꦑꦴꦥꦢꦺꦲꦶ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦠꦷꦠꦶ ꦌꦠ꧀ꦡ ꦢꦸꦏ꧀ꦏꦛꦮꦠ꧀ꦡꦸꦨꦹꦠꦴꦪ ꦆꦠ꧀ꦡꦶꦪꦴ ꦠꦠ꧀ꦡꦺꦮ ꦱꦲꦱꦺꦪ꧀ꦪꦴꦪ ꦆꦩꦶꦤꦴ ꦱꦶꦏ꧀ꦑꦴꦥꦢꦺꦤ ꦢꦸꦏ꧀ꦏꦛꦁ ꦄꦴꦥꦗ꧀ꦗꦶꦠ꧀ꦮꦴ ꦕꦠꦸꦠ꧀ꦡꦢꦶꦮꦱꦺ ꦫꦠ꧀ꦠꦶꦪꦁ ꦱꦲꦱꦺꦪ꧀ꦪꦴꦪ ꦆꦩꦶꦤꦴ ꦱꦶꦏ꧀ꦑꦴꦥꦢꦺꦤ ꦄꦴꦥꦗ꧀ꦗꦶꦠꦧ꧀ꦧꦢꦸꦏ꧀ꦏꦛꦺꦤ ꦱꦲ ꦥꦸꦫꦶꦩꦱꦶꦏ꧀ꦑꦴꦥꦢꦺꦤ ꦥꦴꦕꦶꦠ꧀ꦠꦶꦪꦁ ꦄꦴꦥꦗ꧀ꦗꦠꦷꦠꦶ ꦮꦺꦢꦶꦠꦧ꧀ꦧꦁ.

ꦢꦸꦠꦶꦪꦱꦲꦱꦺꦪ꧀ꦪꦏꦡꦴꦮꦟ꧀ꦟꦤꦴ.

꧙꧒꧖. ꦖꦥ꧀ꦥꦚ꧀ꦕꦮꦴꦕꦴꦲꦶ ꦈꦢ꧀ꦣꦁ ꦆꦠ꧀ꦡꦶꦪꦴ ꦣꦩ꧀ꦩꦁ ꦨꦟꦤ꧀ꦠꦱ꧀ꦱꦴꦠꦶ ꦱꦩ꧀ꦧꦤ꧀ꦣꦺꦴ. ꦆꦠ꧀ꦡꦶꦪꦴꦠꦶ ‘‘ꦩꦴꦠꦸꦒꦴꦩꦺꦴ ꦤꦴꦩ ꦩꦤꦸꦱ꧀ꦱꦶꦠ꧀ꦡꦷ, ꦤ ꦪꦏ꧀ꦑꦷ, ꦤ ꦥꦺꦠꦷ, ꦤ ꦠꦶꦫꦕ꧀ꦖꦴꦤꦒꦠꦴ, ꦮꦶꦚ꧀ꦚꦹ ꦥꦛꦶꦧꦭꦴ ꦲꦺꦴꦠꦶ ꦱꦸꦨꦴꦱꦶꦠꦢꦸꦧ꧀ꦨꦴꦱꦶꦠꦁ ꦢꦸꦛ꧀ꦜꦸꦭ꧀ꦭꦴꦢꦸꦛ꧀ꦜꦸꦭ꧀ꦭꦁ ꦄꦴꦗꦴꦤꦶꦠꦸ’’ꦤ꧀ꦠꦶ ꦥꦴꦭ꦳ꦶꦪꦁ ꦮꦸꦠ꧀ꦠꦩꦤꦸꦱ꧀ꦱꦶꦠ꧀ꦡꦶꦪꦴ. ꦨꦟꦤ꧀ꦠꦱ꧀ꦱꦴꦠꦶ ꦮꦏ꧀ꦑꦩꦴꦤꦭꦏ꧀ꦑꦟꦁ ꦣꦩ꧀ꦩꦁ ꦖꦲꦶ ꦥꦢꦺꦲꦶ ꦈꦠ꧀ꦠꦫꦶ ꦨꦟꦤ꧀ꦠꦱ꧀ꦱ. ꦮꦶꦚ꧀ꦚꦸꦁ ꦥꦸꦫꦶꦱꦮꦶꦒ꧀ꦒꦲꦁ ꦮꦶꦤꦴꦠꦶ ‘‘ꦮꦶꦚ꧀ꦚꦹ ꦤꦴꦩ ꦥꦸꦫꦶꦱꦮꦶꦒ꧀ꦒꦲꦺꦴ ꦥꦛꦶꦧꦭꦺꦴ ꦲꦺꦴꦠꦶ ꦱꦸꦨꦴꦱꦶꦠꦢꦸꦧ꧀ꦨꦴꦱꦶꦠꦁ ꦢꦸꦛ꧀ꦜꦸꦭ꧀ꦭꦴꦢꦸꦛ꧀ꦜꦸꦭ꧀ꦭꦁ ꦄꦴꦗꦴꦤꦶꦠꦸ’’ꦤ꧀ꦠꦶ (ꦥꦴꦕꦶ. ꧖꧔) ꦥꦴꦭ꦳ꦶꦪꦁ ꦮꦸꦠ꧀ꦠꦱꦮꦤꦹꦥꦕꦴꦫꦒꦠꦩꦤꦸꦱ꧀ꦱꦥꦸꦫꦶꦱꦁ ꦮꦶꦤꦴ. ꦣꦩ꧀ꦩꦤ꧀ꦠꦶ ꦮꦏ꧀ꦑꦩꦴꦤꦥ꧀ꦥꦏꦴꦫꦱꦫꦹꦥꦁ ꦢꦺꦱꦤꦴꦣꦩ꧀ꦩꦁ.

꧙꧒꧗. ꦒꦴꦡꦴꦩꦪꦴ, ꦕꦸꦟ꧀ꦟꦶꦪꦒꦤ꧀ꦡꦩꦪꦴꦠꦶ ꦢꦸꦮꦶꦣꦴ ꦢꦺꦱꦤꦴ, ꦠꦠ꧀ꦡ ꦒꦴꦡꦴꦩꦪꦢꦺꦱꦤꦴꦪ ꦮꦴꦕꦴ ꦤꦴꦩ ꦒꦴꦡꦴꦥꦴꦢꦭꦏ꧀ꦑꦟꦴꦠꦶ ꦢꦱ꧀ꦱꦺꦠꦸꦩꦴꦲ ‘‘ꦒꦴꦡꦴꦥꦴꦢꦺꦴ’’ꦠꦶꦄꦴꦢꦶ. ꦕꦸꦟ꧀ꦟꦶꦪꦢꦺꦱꦤꦴꦪꦁ ꦥꦤ ꦮꦴꦕꦴꦥꦫꦶꦕ꧀ꦖꦺꦢꦺꦴ ꦮꦶꦨꦠ꧀ꦪꦤ꧀ꦠꦮꦱꦺꦤ ꦮꦺꦢꦶꦠꦧ꧀ꦧꦺꦴ. ꦠꦺꦤꦴꦲ ꦒꦟ꧀ꦜꦶꦥꦢꦺ ‘‘ꦌꦏꦺꦴ ꦒꦴꦡꦴꦥꦴꦢꦺꦴ’ꦠꦶ ꦆꦢꦁ ꦒꦴꦡꦴꦧꦤ꧀ꦣꦩꦺꦮ ꦱꦤ꧀ꦣꦴꦪ ꦮꦸꦠ꧀ꦠꦁ, ꦄꦚ꧀ꦚꦠ꧀ꦡ ꦥꦤ ꦮꦶꦨꦠ꧀ꦠꦶꦄꦤ꧀ꦠꦥꦢꦩꦺꦮ ꦒꦲꦺꦠꦧ꧀ꦧ’’ꦤ꧀ꦠꦶ. ꦥꦢꦱꦺꦴꦣꦩ꧀ꦩꦁ ꦤꦶꦢ꧀ꦢꦶꦛ꧀ꦜꦁ ꦣꦩ꧀ꦩꦤ꧀ꦠꦶ ꦥꦶꦛꦏꦠ꧀ꦠꦪꦁ. ‘‘ꦄꦛ꧀ꦜꦏꦡ’’ꦤ꧀ꦠꦶ ꦆꦩꦶꦤꦴ ꦱꦔ꧀ꦒꦷꦠꦶꦠ꧀ꦠꦪꦴꦫꦸꦭ꦳꧀ꦲꦁ ꦥꦺꦴꦫꦴꦟꦛ꧀ꦜꦏꦡꦁ ꦒꦲꦺꦠꦧ꧀ꦧꦁ. ꦠꦺꦤꦺꦮ ꦒꦟ꧀ꦜꦶꦥꦢꦺ ꦮꦸꦠ꧀ꦠꦁ ‘‘ꦄꦛ꧀ꦜꦏꦡꦁ ꦣꦩ꧀ꦩꦥꦢꦗꦴꦠꦏꦴꦢꦶꦮꦠ꧀ꦡꦸꦚ꧀ꦕꦴ’’ꦠꦶ. ꦆꦩꦶꦤꦴꦥꦶ ꦥꦺꦴꦫꦴꦟꦏꦁ ꦱꦔ꧀ꦒꦷꦠꦶꦄꦴꦫꦸꦭ꦳꧀ꦲꦩꦺꦮ ꦄꦛ꧀ꦜꦏꦡꦁ ꦮꦸꦠ꧀ꦠꦤ꧀ꦠꦶ ꦮꦢꦤ꧀ꦠꦶ. ꦄꦛ꧀ꦜꦏꦡꦴꦢꦶꦥꦴꦜꦁ ꦜꦥꦺꦠ꧀ꦮꦴ ꦢꦩꦶꦭ꦳ꦴꦢꦶꦨꦴꦱꦤ꧀ꦠꦫꦺꦤ ꦪꦡꦴꦫꦸꦕꦶ ꦏꦡꦺꦠꦸꦁ ꦮꦛ꧀ꦛꦠꦷꦠꦶ.

꧙꧒꧘. ꦥꦢꦴꦢꦷꦤꦁ ꦮꦱꦴ ꦖꦤ꧀ꦤꦁ ꦮꦴꦕꦴꦤꦁ ꦈꦥꦫꦶ ꦣꦩ꧀ꦩꦁ ꦢꦺꦱꦺꦤ꧀ꦠꦱ꧀ꦱꦴꦠꦶ ꦪꦺꦴꦗꦤꦴ. ꦢꦺꦱꦺꦤ꧀ꦠꦱ꧀ꦱꦴꦠꦶ ꦥꦢꦱꦺꦴꦣꦩ꧀ꦩꦺ ꦮꦸꦠ꧀ꦠꦭꦏ꧀ꦑꦟꦥꦢꦴꦢꦶꦱꦫꦹꦥꦴꦲꦶ ꦖꦲꦶ ꦮꦴꦕꦴꦲꦶ ꦈꦠ꧀ꦠꦫꦶ ꦣꦩ꧀ꦩꦁ ꦢꦺꦱꦺꦤ꧀ꦠꦱ꧀ꦱ. ꦥꦢꦴꦢꦶꦒꦟꦤꦴꦪꦴꦠꦶ ꦪꦡꦴꦮꦸꦠ꧀ꦠꦭꦏ꧀ꦑꦟꦥꦢꦄꦤꦸꦥꦢꦄꦤ꧀ꦮꦏ꧀ꦑꦫꦄꦤꦸꦧ꧀ꦪꦚ꧀ꦗꦤꦒꦟꦤꦴꦪ.

꧙꧒꧙. ꦥꦸꦫꦶꦱꦮꦶꦒ꧀ꦒꦲꦤ꧀ꦠꦶ ꦩꦤꦸꦱ꧀ꦱꦥꦸꦫꦶꦱꦮꦺꦱꦁ. ꦌꦠ꧀ꦡ ꦠꦶꦫꦕ꧀ꦖꦴꦤꦒꦠꦴ ꦤꦴꦩ ꦮꦺꦱꦤꦶꦩ꧀ꦩꦴꦤꦴꦫꦲꦴ ꦆꦢ꧀ꦣꦶꦩꦤ꧀ꦠꦴ ꦤꦴꦒꦱꦸꦥꦟ꧀ꦟꦴ.

꧙꧓꧑. ꦮꦢꦠꦺꦴꦠꦶ ꦄꦣꦶꦏꦁ ꦣꦩ꧀ꦩꦁ ꦨꦴꦱꦠꦺꦴ.

꧙꧓꧒. ꦆꦠ꧀ꦡꦶꦫꦹꦥꦤ꧀ꦠꦶ ꦩꦤꦸꦱ꧀ꦱꦶꦠ꧀ꦡꦶꦮꦺꦱꦁ. ꦠꦶꦫꦕ꧀ꦖꦴꦤꦒꦠꦶꦠ꧀ꦡꦶꦪꦴꦠꦶ ꦮꦸꦠ꧀ꦠꦱꦫꦹꦥꦴꦪ ꦠꦶꦫꦕ꧀ꦖꦴꦤꦒꦠꦶꦠ꧀ꦡꦶꦪꦴ.

꧙꧓꧓. ꦱꦪꦁ ꦈꦛ꧀ꦜꦴꦪ ꦤꦶꦱꦷꦢꦶꦠ꧀ꦮꦴ ꦥꦸꦤ ꦣꦩ꧀ꦩꦁ ꦢꦺꦱꦺꦤ꧀ꦠꦱ꧀ꦱ ꦄꦤꦴꦥꦠ꧀ꦠꦶ ꦥꦏꦴꦱꦶꦠꦴꦠꦶ ꦱꦩ꧀ꦧꦤ꧀ꦣꦺꦴ. ꦩꦴꦠꦸꦒꦴꦩꦱ꧀ꦱ ꦮꦴ ꦠꦡꦴꦠꦶ ꦌꦠ꧀ꦡ ‘‘ꦠꦡꦴ’’ꦠꦶ ꦆꦩꦶꦤꦴ ꦮꦸꦠ꧀ꦠꦥ꧀ꦥꦏꦴꦫꦱ꧀ꦱ ꦒꦲꦶꦠꦠ꧀ꦠꦴ ꦈꦛ꧀ꦜꦴꦪ ꦤꦶꦱꦶꦤ꧀ꦤꦱ꧀ꦱ ꦩꦴꦠꦸꦒꦴꦩꦱ꧀ꦱ ꦥꦸꦤ ꦣꦩ꧀ꦩꦁ ꦢꦺꦱꦺꦤ꧀ꦠꦱ꧀ꦱ ꦄꦤꦴꦥꦠ꧀ꦠꦶ ꦥꦏꦴꦱꦶꦠꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ‘‘ꦈꦛ꧀ꦜꦴꦪꦴ’’ꦠꦶꦄꦴꦢꦶꦤꦴ ꦆꦫꦶꦪꦴꦥꦡꦥꦫꦶꦮꦠ꧀ꦠꦤꦢꦱ꧀ꦱꦤꦺꦤ ꦤꦴꦤꦴꦆꦫꦶꦪꦴꦥꦡꦺꦥꦶ ꦄꦤꦴꦥꦠ꧀ꦠꦶꦁ ꦢꦷꦥꦺꦠꦶ.

꧙꧓꧔. ꦄꦚ꧀ꦚꦶꦱ꧀ꦱꦴ ꦥꦸꦤ ꦄꦚ꧀ꦚꦶꦱ꧀ꦱꦴꦠꦶ ꦌꦠ꧀ꦡ ‘‘ꦄꦴꦒꦠꦴꦒꦠꦴꦪꦴ’’ꦠꦶ ꦱꦺꦱꦺꦴ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦄꦚ꧀ꦚꦱ꧀ꦱ ꦩꦴꦠꦸꦒꦴꦩꦱ꧀ꦱꦴꦠꦶ ꦌꦏꦶꦱ꧀ꦱꦴ ꦢꦺꦱꦺꦠ꧀ꦮꦴ ꦥꦸꦤ ꦄꦴꦒꦠꦴꦒꦠꦴꦪ ꦄꦚ꧀ꦚꦶꦱ꧀ꦱꦴꦥꦶ ꦢꦺꦱꦺꦠꦷꦠꦶ ꦌꦮꦁ ꦌꦏꦴꦱꦤꦺ ꦤꦶꦱꦶꦤ꧀ꦤꦺꦴ ꦩꦴꦠꦸꦒꦴꦩꦱꦠꦱꦲꦱ꧀ꦱꦤ꧀ꦤꦩ꧀ꦥꦶ ꦢꦺꦱꦺꦠꦷꦠꦶ ꦄꦠ꧀ꦡꦺꦴ’’ꦠꦶ (ꦥꦴꦕꦶ. ꦄꦛ꧀ꦜ. ꧖꧖). ꦄꦮꦸꦠ꧀ꦠꦱꦩꦸꦕ꧀ꦕꦪꦠ꧀ꦡꦺꦤ ꦕ-ꦱꦢ꧀ꦢꦺꦤ ‘‘ꦥꦚ꧀ꦲꦁ ꦥꦸꦛ꧀ꦜꦺꦴ ꦏꦡꦺꦠꦷ’’ꦠꦶ (ꦥꦴꦕꦶ. ꧖꧖) ꦆꦢꦁ ꦱꦩꦸꦕ꧀ꦕꦶꦤꦺꦴꦠꦶ. ‘‘ꦢꦷꦓꦤꦶꦏꦴꦪꦺꦴ ꦏꦶꦩꦠ꧀ꦡꦶꦪꦺꦴ ꦨꦤ꧀ꦠꦺ’’ꦠꦶ ꦥꦚ꧀ꦲꦁ ꦥꦸꦕ꧀ꦖꦠꦺꦴ ꦩꦴꦠꦸꦒꦴꦩꦱ꧀ꦱ ꦱꦧ꧀ꦧꦁ ꦢꦷꦓꦤꦶꦏꦴꦪꦁ ꦮꦢꦠꦺꦴꦥꦶ ꦄꦤꦴꦥꦠ꧀ꦠꦶ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦥꦚ꧀ꦲꦁ ꦥꦸꦕ꧀ꦖꦠꦶ, ꦥꦚ꧀ꦲꦁ ꦥꦸꦛ꧀ꦜꦺꦴ ꦏꦡꦺꦠꦷꦠꦶ ꦩꦴꦠꦸꦒꦴꦩꦺꦴ ‘ꦢꦷꦓꦤꦶꦏꦴꦪꦺꦴ ꦤꦴꦩ ꦨꦤ꧀ꦠꦺ ꦏꦶꦩꦠ꧀ꦡꦁ ꦢꦷꦥꦺꦠꦷ’ꦠꦶ ꦥꦸꦕ꧀ꦖꦠꦶ, ꦌꦮꦁ ꦥꦚ꧀ꦲꦁ ꦥꦸꦛ꧀ꦜꦺꦴ ꦨꦶꦏ꧀ꦑꦸ ꦱꦧ꧀ꦧꦁ ꦕꦺꦥꦶ ꦢꦷꦓꦤꦶꦏꦴꦪꦁ ꦏꦡꦺꦠꦶ, ꦄꦤꦴꦥꦠ꧀ꦠꦷ’’ꦠꦶ (ꦥꦴꦕꦶ. ꦄꦛ꧀ꦜ. ꧖꧖). ꦌꦠ꧀ꦡ ꦕ ꦱꦧ꧀ꦧꦁ ꦕꦺꦥꦶ ꦢꦷꦓꦤꦶꦏꦴꦪꦁ ꦏꦡꦺꦠꦷꦠꦶ ꦪꦴꦮ ꦤ ꦤꦶꦛ꧀ꦜꦴꦠꦶ, ꦠꦴꦮ ꦥꦸꦤꦢꦶꦮꦱꦺꦥꦶ ꦏꦡꦺꦠꦶ.

꧙꧓꧕. ꦣꦩ꧀ꦩꦱ꧀ꦱ ꦢꦺꦱꦤꦴꦪ, ꦮꦶꦚ꧀ꦚꦸꦩꦤꦸꦱ꧀ꦱꦥꦸꦫꦶꦱꦱ꧀ꦱ ꦄꦱꦤ꧀ꦤꦶꦲꦶꦠꦏꦫꦟꦺꦤ ꦕ ꦄꦴꦥꦗ꧀ꦗꦶꦠꦧ꧀ꦧꦠꦺꦴ ꦏ꧀ꦫꦶꦪꦴꦏ꧀ꦫꦶꦪꦁ.

ꦣꦩ꧀ꦩꦢꦺꦱꦤꦴꦏꦡꦴꦮꦟ꧀ꦟꦤꦴ.

꧙꧓꧖. ꦩꦲꦒ꧀ꦒꦠꦁ ꦫꦹꦥꦴꦫꦹꦥꦗ꧀ꦙꦴꦤꦁ. ꦥꦟꦷꦠꦁ ꦭꦺꦴꦏꦸꦠ꧀ꦠꦫꦣꦩ꧀ꦩꦁ. ꦥꦣꦴꦤꦨꦴꦮꦁ ꦤꦷꦠꦤ꧀ꦠꦶ ꦥꦟꦷꦠꦁ. ꦄꦴꦫꦺꦴꦕꦺꦤ꧀ꦠꦱ꧀ꦱꦴꦠꦶ ‘‘ꦥꦜꦩꦁ ꦙꦴꦤꦁ ꦱꦩꦴꦥꦗ꧀ꦗꦴꦩꦷ’’ꦠꦶꦄꦴꦢꦶꦤꦴ (ꦥꦴꦫꦴ. ꧒꧐꧑) ꦤꦪꦺꦤ ꦕꦠꦸꦠ꧀ꦡꦥꦴꦫꦴꦗꦶꦏꦺ ꦮꦸꦠ꧀ꦠꦤꦪꦺꦤ ꦮꦢꦤ꧀ꦠꦱ꧀ꦱ. ꦥꦫꦶꦤꦶꦧ꧀ꦧꦴꦤꦏꦴꦭꦺ ꦕ ꦥꦸꦛ꧀ꦜꦏꦴꦭꦺ ꦕ ꦨꦶꦏ꧀ꦑꦸꦨꦶꦏ꧀ꦑꦸꦤꦷꦤꦁ ꦄꦠ꧀ꦠꦤꦴ ꦭꦢ꧀ꦣꦱ꧀ꦱ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦱ꧀ꦱ ꦄꦴꦫꦺꦴꦕꦺꦠꦧ꧀ꦧꦠ꧀ꦠꦴ ‘‘ꦜꦥꦺꦠ꧀ꦮꦴ ꦨꦶꦏ꧀ꦑꦸꦤꦶꦁ ꦨꦶꦏ꧀ꦑꦸ’’ꦤ꧀ꦠꦶ ꦮꦸꦠ꧀ꦠꦁ. ‘‘ꦄꦚ꧀ꦚꦱ꧀ꦱꦴ’’ꦠꦶ ꦱꦺꦱꦺꦴ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦈꦥꦱꦩ꧀ꦥꦤ꧀ꦤꦱ꧀ꦱ ꦨꦹꦠꦁ ꦄꦴꦫꦺꦴꦕꦺꦠꦷꦠꦶ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦩꦺꦮ ꦱꦤ꧀ꦣꦴꦪ ꦮꦸꦠ꧀ꦠꦁ. ꦥꦫꦶꦤꦶꦧ꧀ꦧꦴꦤꦏꦴꦭꦺ, ꦲꦶ ꦄꦤ꧀ꦠꦫꦴ ꦮꦴ ꦄꦠꦶꦏꦝ꧀ꦞꦶꦪꦩꦴꦤꦺꦤ ꦈꦥꦱꦩ꧀ꦥꦤ꧀ꦤꦱ꧀ꦱ ꦨꦹꦠꦁ ꦄꦴꦫꦺꦴꦕꦺꦠꦸꦁ ꦮꦛ꧀ꦛꦠꦷ’’ꦠꦶ (ꦥꦴꦕꦶ. ꦄꦛ꧀ꦜ. ꧗꧗). ꦨꦹꦠꦺꦠꦶ ꦌꦠ꧀ꦡ ‘‘ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦺ ꦄꦴꦫꦺꦴꦕꦶꦠꦺ’’ꦠꦶ ꦮꦠ꧀ꦠꦧ꧀ꦧꦁ, ꦤꦶꦩꦶꦠ꧀ꦠꦠ꧀ꦡꦺ ꦨꦸꦩ꧀ꦩꦁ, ꦄꦠ꧀ꦠꦤꦺꦴ ꦱꦤ꧀ꦠꦴꦤꦺ ꦆꦩꦱ꧀ꦩꦶꦁ ꦄꦠ꧀ꦠꦨꦴꦮꦺ ꦱꦶꦢ꧀ꦣꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦱ꧀ꦱ ꦄꦴꦫꦺꦴꦕꦤꦤꦶꦩꦶꦠ꧀ꦠꦤ꧀ꦠꦶ ꦄꦠ꧀ꦡꦺꦴ.

꧙꧓꧗. ꦤꦺꦴ ꦕꦺ ꦗꦴꦤꦴꦠꦶ ꦱꦺꦴ ꦮꦸꦠ꧀ꦠꦤ꧀ꦠꦶ ꦪꦱ꧀ꦱ ꦄꦴꦫꦺꦴꦕꦺꦠꦶ, ꦱꦺꦴ ꦱꦕꦺ ꦱꦸꦠꦏ꧀ꦑꦟꦺꦪꦺꦮ ꦮꦸꦠ꧀ꦠꦤꦪꦺꦤꦺꦮ ‘‘ꦌꦱ ꦥꦜꦩꦗ꧀ꦙꦴꦤꦱ꧀ꦱ ꦭꦴꦨꦷ’’ꦠꦶꦄꦴꦢꦶꦤꦴ ꦤꦪꦺꦤ ꦮꦸꦠ꧀ꦠꦁ ꦤꦺꦴ ꦗꦴꦤꦴꦠꦶ. ꦥꦫꦶꦪꦴꦪꦮꦕꦤꦺꦠꦶ ‘‘ꦪꦺꦴ ꦠꦺ ꦮꦶꦲꦴꦫꦺ ꦮꦱꦠꦶ, ꦱꦺꦴ ꦥꦜꦩꦱ꧀ꦱ ꦙꦴꦤꦱ꧀ꦱ ꦭꦴꦨꦷ’’ꦠꦶ ꦌꦮꦩꦴꦢꦶꦥꦫꦶꦪꦴꦪꦮꦕꦤꦺ. ꦪꦱ꧀ꦱ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦁ ꦄꦴꦫꦺꦴꦕꦺꦠꦶ, ꦱꦺꦴ ꦱꦕꦺ ꦱꦸꦠꦱꦩꦤꦤ꧀ꦠꦫꦁ ‘‘ꦌꦱ ꦌꦮꦁ ꦮꦢꦠꦷ’’ꦠꦶ ꦮꦸꦠ꧀ꦠꦁ ꦤꦺꦴ ꦗꦴꦤꦴꦠꦶ, ꦠꦴꦢꦶꦱꦱ꧀ꦱ ꦄꦴꦫꦺꦴꦕꦺꦤ꧀ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦲꦺꦴꦠꦶ ꦄꦴꦥꦠ꧀ꦠꦶ ꦢꦸꦏ꧀ꦏꦛꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦄꦱ꧀ꦱ ꦨꦹꦠꦱ꧀ꦱ ꦥꦫꦶꦪꦴꦪꦮꦕꦤꦺ ꦕ ꦨꦶꦏ꧀ꦑꦸꦤꦺꦴ ꦄꦴꦥꦠ꧀ꦠꦶ ꦢꦸꦏ꧀ꦏꦛꦁ ꦲꦺꦴꦠꦷꦠꦶ ꦪꦺꦴꦗꦤꦴ.

꧙꧓꧘. ꦠꦡꦴꦫꦹꦥꦺ ꦏꦴꦫꦟꦺ ꦱꦠꦷꦠꦶ ꦥꦫꦱ꧀ꦱ ꦏꦴꦫꦟꦨꦴꦮꦁ ꦚꦠ꧀ꦮꦴꦥꦶ ꦥꦛꦶꦥꦠ꧀ꦠꦶꦪꦴ ꦄꦩꦺꦴꦓꦨꦴꦮꦢꦱ꧀ꦱꦤꦱꦩꦸꦠ꧀ꦠꦺꦗꦤꦱꦩ꧀ꦥꦲꦁꦱꦤꦴꦢꦶꦏꦫꦱꦔ꧀ꦑꦴꦠꦺ ꦏꦴꦫꦟꦺ ꦱꦠꦶ. ꦱꦧ꧀ꦧꦱ꧀ꦱꦴꦥꦷꦠꦶ ꦈꦥꦱꦩ꧀ꦥꦤ꧀ꦤꦴꦤꦸꦥꦱꦩ꧀ꦥꦤ꧀ꦤꦱ꧀ꦱ ꦱꦧ꧀ꦧꦱ꧀ꦱ. ꦱꦷꦭꦴꦢꦶꦤ꧀ꦠꦶ ꦱꦷꦭꦱꦸꦠꦥꦫꦶꦪꦠ꧀ꦠꦶꦒꦸꦟꦁ. ꦮꦢꦠꦺꦴꦠꦶ ꦌꦠ꧀ꦡ ‘‘ꦨꦶꦏ꧀ꦑꦸꦤꦺꦴ’’ꦠꦶ ꦥꦏꦫꦟꦠꦺꦴ ꦭꦧ꧀ꦨꦠꦶ.

꧙꧓꧙. ꦠꦢꦱꦩ꧀ꦨꦮꦴꦠꦶ ꦢꦶꦛ꧀ꦜꦶꦱꦩ꧀ꦥꦤ꧀ꦤꦱ꧀ꦱ ꦈꦩ꧀ꦩꦴꦢꦴꦢꦷꦤꦁ ꦄꦱꦩ꧀ꦨꦮꦴ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦢꦶꦛ꧀ꦜꦶꦱꦩ꧀ꦥꦤ꧀ꦤꦴꦤꦁ ꦈꦩ꧀ꦩꦴꦢꦱ꧀ꦱ ꦮꦴ ꦕꦶꦠ꧀ꦠꦏ꧀ꦑꦺꦥꦱ꧀ꦱ ꦮꦴ ꦄꦨꦴꦮꦴꦠꦶ. ꦩꦲꦴꦥꦕ꧀ꦕꦫꦶꦪꦩ꧀ꦥꦶ ꦲꦶ ꦮꦶꦕꦴꦫꦶꦠ’’ꦤ꧀ꦠꦶ (ꦥꦴꦕꦶ. ꦄꦛ꧀ꦜ. ꧗꧗). ꦈꦩ꧀ꦩꦠ꧀ꦠꦏꦥꦢꦱ꧀ꦱ ꦄꦮꦕꦤꦺ ꦏꦴꦫꦟꦁ ꦮꦢꦤ꧀ꦠꦺꦤꦺꦮ ꦑꦶꦠ꧀ꦠꦕꦶꦠ꧀ꦠꦴꦢꦶꦥꦢꦴꦤꦁ ꦄꦮꦕꦤꦺ ꦏꦴꦫꦟꦚ꧀ꦕ ꦈꦥꦭꦏ꧀ꦑꦟꦠꦺꦴ ꦢꦱ꧀ꦱꦶꦠꦩꦺꦮꦴꦠꦶ ꦢꦛ꧀ꦜꦧ꧀ꦧꦁ. ꦌꦠ꧀ꦡ ꦕ ꦩꦒ꧀ꦒꦦꦭꦢꦶꦛ꧀ꦜꦶꦪꦴ ꦱꦩꦤ꧀ꦤꦴꦒꦠꦴꦤꦁ ꦄꦫꦶꦪꦴꦤꦩꦺꦮ ꦲꦶ ꦈꦩ꧀ꦩꦠ꧀ꦠꦏꦴꦢꦶꦨꦴꦮꦺꦴ ꦤꦠ꧀ꦡꦶ. ꦙꦴꦤꦭꦴꦨꦶꦤꦺꦴ ꦥꦤ ꦠꦱ꧀ꦩꦶꦁ ꦱꦠꦶ ꦙꦴꦤꦴ ꦥꦫꦶꦲꦴꦪꦤ꧀ꦠꦶ, ꦠꦱ꧀ꦩꦴ ꦠꦺꦱꦁ ꦄꦨꦹꦠꦴꦫꦺꦴꦕꦤꦥꦕ꧀ꦕꦪꦴ ꦄꦤꦴꦥꦠ꧀ꦠꦶ ꦮꦠ꧀ꦠꦧ꧀ꦧꦴ, ꦤ ꦨꦹꦠꦴꦫꦺꦴꦕꦤꦥꦕ꧀ꦕꦪꦴ.

꧙꧔꧐. ꦆꦩꦶꦱ꧀ꦱꦴꦥꦠ꧀ꦠꦶꦪꦴ ꦄꦚ꧀ꦚꦠ꧀ꦫ ꦙꦴꦤꦩꦒ꧀ꦒꦴꦢꦶꦭꦴꦨꦷꦤꦁ ꦄꦚ꧀ꦚꦱ꧀ꦱ ꦄꦱꦩ꧀ꦨꦮꦴ ‘‘ꦏꦸꦱꦭꦴꦧ꧀ꦪꦴꦏꦠꦺꦲꦺꦮ ꦢ꧀ꦮꦶꦕꦶꦠ꧀ꦠ’’ꦤ꧀ꦠꦶ ꦮꦸꦠ꧀ꦠꦁ. ꦆꦢꦚ꧀ꦕ ꦈꦏ꧀ꦏꦛ꧀ꦜꦥꦫꦶꦕ꧀ꦖꦺꦢꦺꦤ ꦄꦫꦶꦪꦥꦸꦒ꧀ꦒꦭꦺꦪꦺꦮ ꦱꦤ꧀ꦣꦴꦪ ꦮꦸꦠ꧀ꦠꦁ. ꦥꦟ꧀ꦟꦠ꧀ꦠꦶꦁ ꦄꦗꦴꦤꦤ꧀ꦠꦴ ꦥꦤ ꦙꦴꦤꦭꦴꦨꦷ ꦥꦸꦡꦸꦗ꧀ꦗꦤꦴ ꦤꦴꦤꦴꦮꦠ꧀ꦡꦸꦩ꧀ꦲꦶ ꦭꦺꦴꦨꦮꦱꦺꦤ ꦄꦏꦸꦱꦭꦕꦶꦠ꧀ꦠꦺꦤꦴꦥꦶ ꦤ ꦄꦴꦫꦺꦴꦕꦺꦤ꧀ꦠꦷꦠꦶ ꦤꦠ꧀ꦡꦶ, ꦠꦱ꧀ꦩꦴ ‘‘ꦠꦶꦕꦶꦠ꧀ꦠ’’ꦤ꧀ꦠꦶ ꦮꦠ꧀ꦠꦧ꧀ꦧꦁ ꦱꦶꦪꦴ, ꦠꦡꦴꦥꦶ ꦧꦲꦸꦭꦺꦤ ꦏꦸꦱꦭꦴꦧ꧀ꦪꦴꦏꦠꦴꦤꦩꦺꦮ ꦱꦩ꧀ꦨꦮꦺꦴꦠꦶ ꦌꦮꦁ ꦮꦸꦠ꧀ꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦢ꧀ꦮꦶꦮꦺꦢꦤꦁ ꦱꦸꦑꦺꦴꦥꦺꦏ꧀ꦑꦴꦮꦱꦺꦤ. ꦆꦢꦚ꧀ꦕ ꦱꦶꦏ꧀ꦑꦴꦥꦢꦁ ꦥꦟ꧀ꦟꦠ꧀ꦠꦶꦄꦗꦴꦤꦤꦮꦱꦺꦤ ꦄꦕꦶꦠ꧀ꦠꦏꦱꦩꦸꦛ꧀ꦜꦴꦤꦁ ꦲꦺꦴꦠꦶ. ꦄꦫꦶꦪꦴ ꦕꦺꦠ꧀ꦡ ꦥꦟ꧀ꦟꦠ꧀ꦠꦶꦁ ꦗꦴꦤꦤ꧀ꦠꦴ ꦮꦷꦠꦶꦏ꧀ꦏꦩꦁ ꦤ ꦏꦫꦺꦴꦤ꧀ꦠꦶ, ꦥꦸꦡꦸꦗ꧀ꦗꦤꦴ ꦥꦤ ꦥꦟ꧀ꦟꦠ꧀ꦠꦶꦁ ꦗꦴꦤꦶꦠ꧀ꦮꦴꦥꦶ ꦮꦷꦠꦶꦏ꧀ꦏꦩꦁ ꦏꦫꦺꦴꦤ꧀ꦠꦶ. ꦠꦺ ꦕ ꦱꦠ꧀ꦡꦸꦤꦺꦴ ꦄꦴꦟꦴꦮꦷꦠꦶꦏ꧀ꦏꦩꦕꦺꦠꦤꦴꦪ ꦧꦭꦮꦄꦏꦸꦱꦭꦨꦴꦮꦠꦺꦴ ꦙꦴꦤꦴ ꦥꦫꦶꦲꦴꦪꦤ꧀ꦠꦷꦠꦶ ꦢꦛ꧀ꦜꦧ꧀ꦧꦁ.

ꦨꦹꦠꦴꦫꦺꦴꦕꦤꦏꦡꦴꦮꦟ꧀ꦟꦤꦴ.

꧙꧔꧑. ꦨꦶꦏ꧀ꦑꦸꦤꦺꦴ ꦢꦸꦛ꧀ꦜꦸꦭ꧀ꦭꦁ ꦄꦴꦥꦠ꧀ꦠꦶꦁ ꦨꦶꦏ꧀ꦑꦸꦱꦩ꧀ꦩꦸꦠꦶꦁ ꦜꦥꦺꦠ꧀ꦮꦴ ꦄꦤꦸꦥꦱꦩ꧀ꦥꦤ꧀ꦤꦺ ꦄꦴꦫꦺꦴꦕꦺꦤ꧀ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦄꦴꦥꦠ꧀ꦠꦷꦠꦶ ꦪꦺꦴꦗꦤꦴ. ꦢꦸꦛ꧀ꦜꦸꦭ꧀ꦭꦁ ꦄꦴꦥꦠ꧀ꦠꦶꦤ꧀ꦠꦶ ꦱꦔ꧀ꦓꦴꦢꦶꦱꦺꦱꦺꦴ. ꦤꦤꦸ ꦕ ‘‘ꦢꦸꦛ꧀ꦜꦸꦭ꧀ꦭꦴ ꦤꦴꦩ ꦄꦴꦥꦠ꧀ꦠꦶ ꦕꦠ꧀ꦠꦴꦫꦶ ꦕ ꦥꦴꦫꦴꦗꦶꦏꦴꦤꦶ ꦠꦺꦫꦱ ꦕ ꦱꦔ꧀ꦓꦴꦢꦶꦱꦺꦱꦴ’’ꦠꦶ (ꦥꦴꦕꦶ. ꧗꧙) ꦥꦢꦨꦴꦗꦤꦺ ꦥꦴꦫꦴꦗꦶꦏꦱꦔ꧀ꦓꦴꦢꦶꦱꦺꦱꦴ ꦢꦱ꧀ꦱꦶꦠꦴ, ꦏꦱ꧀ꦩꦴ ꦆꦣ ꦱꦔ꧀ꦓꦴꦢꦶꦱꦺꦱꦺꦴꦮ ꦒꦲꦶꦠꦺꦴꦠꦶ? ꦮꦸꦕ꧀ꦕꦠꦺ – ꦥꦴꦫꦴꦗꦶꦏꦁ ꦢꦸꦛ꧀ꦜꦸꦭ꧀ꦭꦱꦢ꧀ꦢꦠ꧀ꦡꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦁ, ꦆꦣ ꦥꦤ ꦱꦔ꧀ꦓꦴꦢꦶꦱꦺꦱꦺꦴꦪꦺꦮ ꦨꦒꦮꦠꦴ ꦄꦣꦶꦥ꧀ꦥꦺꦠꦺꦴꦠꦶ ꦄꦛ꧀ꦜꦏꦡꦴꦪꦁ ꦮꦶꦕꦴꦫꦶꦠꦩꦺꦠꦁ. ꦮꦸꦠ꧀ꦠꦚ꧀ꦲꦶ ꦠꦠ꧀ꦡ ‘‘ꦥꦴꦫꦴꦗꦶꦏꦴꦤꦶ ꦢꦸꦛ꧀ꦜꦸꦭ꧀ꦭꦱꦢ꧀ꦢꦠ꧀ꦡꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦴꦤꦶ, ꦱꦔ꧀ꦓꦴꦢꦶꦱꦺꦱꦁ ꦥꦤ ꦆꦣ ꦄꦣꦶꦥ꧀ꦥꦺꦠ’’ꦤ꧀ꦠꦶ (ꦥꦴꦕꦶ. ꦄꦛ꧀ꦜ. ꧗꧘). ꦮꦏ꧀ꦑꦠꦶ ꦕ ‘‘ꦆꦣ ꦱꦔ꧀ꦓꦴꦢꦶꦱꦺꦱꦴꦮ, ꦢꦸꦛ꧀ꦜꦸꦭ꧀ꦭꦴꦥꦠ꧀ꦠꦶꦪꦺꦴ ꦩꦠꦴ’’ꦠꦶ. ꦄꦤꦸꦥꦱꦩ꧀ꦥꦤ꧀ꦤꦺꦠꦶ ‘‘ꦨꦶꦏ꧀ꦑꦸꦚ꧀ꦕ ꦨꦶꦏ꧀ꦑꦸꦤꦶꦚ꧀ꦕ ꦜꦥꦺꦠ꧀ꦮꦴ ꦄꦮꦱꦺꦱꦺꦴ ꦄꦤꦸꦥꦱꦩ꧀ꦥꦤ꧀ꦤꦺꦴ’’ꦠꦶ (ꦥꦴꦕꦶ. ꧘꧐) ꦥꦢꦨꦴꦗꦤꦺ ꦤꦶꦢ꧀ꦢꦶꦛ꧀ꦜꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦄꦴꦫꦺꦴꦕꦺꦤ꧀ꦠꦱ꧀ꦱꦴꦠꦶ ꦮꦸꦠ꧀ꦠꦁ ꦲꦺꦴꦠꦶ.

ꦜꦥꦺꦠ꧀ꦮꦴ ꦨꦶꦏ꧀ꦑꦸꦱꦩ꧀ꦩꦸꦠꦶꦤ꧀ꦠꦶ ‘‘ꦄꦠ꧀ꦡꦶ ꦨꦶꦏ꧀ꦑꦸꦱꦩ꧀ꦩꦸꦠꦶ ꦄꦴꦥꦠ꧀ꦠꦶꦥꦫꦶꦪꦤ꧀ꦠꦴ ꦤ ꦏꦸꦭꦥꦫꦶꦪꦤ꧀ꦠꦴ’’ꦠꦶꦄꦴꦢꦶꦤꦴ (ꦥꦴꦕꦶ. ꧘꧐) ꦥꦢꦨꦴꦗꦤꦺ ꦢꦱ꧀ꦱꦶꦠꦁ ꦄꦨꦶꦟ꧀ꦲꦴꦥꦠ꧀ꦠꦶꦏꦱ꧀ꦱ ꦨꦶꦏ꧀ꦑꦸꦤꦺꦴ ꦄꦴꦪꦠꦶꦁ ꦱꦁꦮꦫꦠ꧀ꦡꦁ ꦲꦶꦫꦺꦴꦠ꧀ꦠꦥ꧀ꦥꦗꦤꦤꦠ꧀ꦡꦁ ꦄꦴꦥꦠ꧀ꦠꦶꦪꦺꦴ ꦮꦴ ꦈꦥꦴꦱꦏꦏꦸꦭꦴꦤꦶ ꦮꦴ ꦈꦨꦪꦩꦺꦮ ꦮꦴ ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦮꦴ ꦄꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦮꦴ ꦄꦴꦥꦠ꧀ꦠꦶꦪꦺꦴ ꦄꦴꦫꦺꦴꦕꦺꦠꦸꦁ ꦱꦔ꧀ꦓꦺꦤ ꦱꦔ꧀ꦓꦩꦗ꧀ꦙꦺ ꦠꦶꦏ꧀ꦑꦠ꧀ꦠꦸꦁ ꦱꦴꦮꦺꦠ꧀ꦮꦴ ꦏꦠꦱꦩ꧀ꦩꦸꦠꦶꦁ ꦜꦥꦺꦠ꧀ꦮꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦄꦨꦶꦟ꧀ꦲꦴꦥꦠ꧀ꦠꦶꦏꦁ ꦨꦶꦏ꧀ꦑꦸꦁ ꦢꦶꦱ꧀ꦮꦴ ‘ꦌꦮꦩꦺꦱ ꦥꦫꦺꦱꦸ ꦲꦶꦫꦺꦴꦠ꧀ꦠꦥ꧀ꦥꦺꦤꦴꦥꦶ ꦄꦴꦪꦠꦶꦁ ꦱꦁꦮꦫꦁ ꦄꦴꦥꦗ꧀ꦗꦶꦱ꧀ꦱꦠꦷ’ꦠꦶ ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦲꦶꦠꦺꦱꦶꦠꦴꦪ ꦠꦶꦏ꧀ꦑꦠ꧀ꦠꦸꦁ ꦄꦥꦭꦺꦴꦏꦺꦠ꧀ꦮꦴ ꦱꦔ꧀ꦓꦺꦤ ꦏꦴꦠꦧ꧀ꦧꦴ’’ꦠꦶ (ꦥꦴꦕꦶ. ꦄꦛ꧀ꦜ. ꧘꧐).

꧙꧔꧒. ꦓꦛꦺꦠ꧀ꦮꦴ ꦮꦢꦤ꧀ꦠꦱ꧀ꦱꦺꦮꦴꦠꦶ ꦌꦮꦏꦴꦫꦺꦴ ꦪꦡꦴꦜꦴꦤꦺ ꦪꦺꦴꦗꦺꦠꦧ꧀ꦧꦺꦴ. ꦌꦮꦏꦴꦫꦺꦤ ꦧ꧀ꦪꦮꦕ꧀ꦖꦶꦤ꧀ꦤꦩꦠ꧀ꦡꦁ ꦮꦏ꧀ꦑꦠꦶ ‘‘ꦮꦠ꧀ꦡꦸ’’ꦤ꧀ꦠꦶꦄꦴꦢꦶꦤꦴ. ‘‘ꦄꦱꦸꦕꦶꦁ ꦩꦺꦴꦕꦺꦠ꧀ꦮꦴ’’ꦠꦶ ꦆꦩꦶꦤꦴ ꦮꦠ꧀ꦡꦸꦩꦴꦲ, ‘‘ꦱꦔ꧀ꦓꦴꦢꦶꦱꦺꦱ’’ꦤ꧀ꦠꦶ ꦆꦩꦶꦤꦴ ꦄꦴꦥꦠ꧀ꦠꦶꦁ. ꦮꦗ꧀ꦗꦩꦺꦮ ꦮꦗ꧀ꦗꦠꦴ. ‘‘ꦥꦴꦕꦶꦠ꧀ꦠꦶꦪꦴꦥꦠ꧀ꦠꦷ’’ꦠꦶ ꦆꦩꦱ꧀ꦱꦴꦪꦁ ꦥꦫꦶꦪꦴꦪꦺꦴ. ‘‘ꦄꦪꦁ ꦄꦱꦸꦕꦶꦁ ꦩꦺꦴꦕꦺꦠ꧀ꦮꦴ ꦱꦔ꧀ꦓꦴꦢꦶꦱꦺꦱꦁ ꦄꦴꦥꦤ꧀ꦤꦺꦴ’’ꦠꦶ ꦮꦠ꧀ꦡꦸꦤꦴ ꦱꦢ꧀ꦣꦶꦁ ꦓꦛꦺꦠ꧀ꦮꦴ ꦄꦴꦥꦠ꧀ꦠꦶꦁ ꦮꦢꦤ꧀ꦠꦱ꧀ꦱ ꦮꦗ꧀ꦗꦠꦴ ꦥꦴꦕꦶꦠ꧀ꦠꦶꦪꦴꦥꦠ꧀ꦠꦶ ꦲꦺꦴꦠꦷꦠꦶ ꦪꦺꦴꦗꦤꦴ.

꧙꧔꧓. ꦱꦸꦢ꧀ꦣꦱ꧀ꦱꦴꦠꦶ ꦥꦴꦫꦴꦗꦶꦏꦩꦤꦴꦥꦤ꧀ꦤꦱ꧀ꦱ. ꦮꦢꦤ꧀ꦠꦶ ꦮꦢꦤꦲꦺꦠꦸ, ꦮꦠ꧀ꦡꦸꦤꦴ ꦱꦢ꧀ꦣꦶꦁ ꦱꦔ꧀ꦓꦴꦢꦶꦱꦺꦱꦱ꧀ꦱ ꦏꦡꦤꦠꦺꦴꦠꦶ ꦄꦠ꧀ꦡꦺꦴ.

꧙꧔꧔. ꦄꦢꦸꦛ꧀ꦜꦸꦭ꧀ꦭꦴꦪꦴꦠꦶ ꦱꦔ꧀ꦓꦴꦢꦶꦱꦺꦱꦠꦺꦴ ꦄꦚ꧀ꦚꦴꦪ ꦄꦴꦥꦠ꧀ꦠꦶꦪꦴ. ꦢꦸꦛ꧀ꦜꦸꦭ꧀ꦭꦱꦚ꧀ꦚꦶꦤꦺꦴꦠꦶ ꦱꦔ꧀ꦓꦴꦢꦶꦱꦺꦱꦱꦚ꧀ꦚꦶꦤꦺꦴ. ꦱꦺꦱꦴ ꦄꦴꦥꦠ꧀ꦠꦶꦪꦺꦴꦥꦶ ꦮꦴꦠꦶ ꦱꦔ꧀ꦓꦴꦢꦶꦱꦺꦱꦁ ꦮꦶꦤꦴ ꦱꦺꦱꦺ ꦖꦭ꦳ꦴꦥꦠ꧀ꦠꦶꦏ꧀ꦑꦤ꧀ꦣꦺ.

꧙꧔꧕. ꦠꦡꦴꦠꦶ ꦢꦸꦏ꧀ꦏꦛꦁ ꦄꦠꦶꦢꦶꦱꦠꦶ. ꦥꦚ꧀ꦕꦣꦴ ꦩꦠꦁ ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦢꦸꦛ꧀ꦜꦸꦭ꧀ꦭꦁ ꦄꦗ꧀ꦙꦴꦕꦴꦫꦁ ꦄꦴꦫꦺꦴꦕꦺꦤ꧀ꦠꦱ꧀ꦱ ꦠꦡꦴ ꦢꦸꦏ꧀ꦏꦛꦤ꧀ꦠꦶ ꦪꦺꦴꦗꦤꦴ. ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦥꦚ꧀ꦕꦣꦴ ꦩꦠꦁ ꦢꦸꦛ꧀ꦜꦸꦭ꧀ꦭꦁ ꦄꦗ꧀ꦙꦴꦕꦴꦫꦤ꧀ꦠꦶ ꦕ ꦥꦴꦟꦴꦠꦶꦥꦴꦠꦴꦢꦶꦥꦚ꧀ꦕꦱꦶꦏ꧀ꦑꦴꦥꦢꦮꦷꦠꦶꦏ꧀ꦏꦩꦴ ꦒꦲꦶꦠꦴ. ꦏꦺꦕꦶ ꦥꦤ ‘‘ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦄꦴꦢꦪꦺꦴ ꦥꦚ꧀ꦕꦴ’’ꦠꦶ ꦮꦢꦤ꧀ꦠꦶ, ꦠꦁ ꦤ ꦒꦲꦺꦠꦧ꧀ꦧꦁ. ꦥꦴꦟꦴꦠꦶꦥꦴꦠꦴꦢꦷꦤꦶ ꦲꦶ ꦢꦱꦺꦮ ꦱꦶꦏ꧀ꦑꦴꦥꦢꦴꦤꦶ ꦱꦴꦩꦟꦺꦫꦴꦤꦁ ꦥꦚ꧀ꦚꦠ꧀ꦠꦴꦤꦶ. ꦠꦺꦱꦁ ꦥꦚ꧀ꦚꦠ꧀ꦠꦺꦱꦸꦪꦺꦮ ꦕ ꦱꦶꦏ꧀ꦑꦴꦥꦢꦺꦱꦸ ꦢꦸꦛ꧀ꦜꦸꦭ꧀ꦭꦴꦢꦸꦛ꧀ꦜꦸꦭ꧀ꦭꦮꦶꦕꦴꦫꦟꦴ ꦏꦴꦠꦧ꧀ꦧꦴ, ꦤ ꦕ ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦄꦴꦢꦷꦤꦶ ꦮꦶꦱꦸꦁ ꦠꦺꦱꦁ ꦥꦚ꧀ꦚꦠ꧀ꦠꦴꦤꦶ ꦄꦠ꧀ꦡꦷꦠꦶ.

ꦄꦡ ꦨꦶꦏ꧀ꦑꦸꦤꦺꦴ ꦢꦸꦛ꧀ꦜꦸꦭ꧀ꦭꦱꦔ꧀ꦑꦴꦠꦴꦤꦶ ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦄꦴꦢꦷꦤꦶ ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦏꦶꦁ ꦤꦴꦩ ꦲꦺꦴꦤ꧀ꦠꦷꦠꦶ? ꦄꦗ꧀ꦙꦴꦕꦴꦫꦺꦴ ꦤꦴꦩ ꦲꦺꦴꦤ꧀ꦠꦷꦠꦶ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦱꦸꦏ꧀ꦏꦮꦶꦱ꧀ꦱꦛ꧀ꦜꦶ…ꦥꦺ… ꦄꦗ꧀ꦙꦴꦕꦴꦫꦺꦴ ꦤꦴꦩꦴꦠꦶ ꦮꦸꦠ꧀ꦠ’’ꦤ꧀ꦠꦶ (ꦥꦴꦕꦶ. ꦄꦛ꧀ꦜ. ꧘꧒). ꦆꦩꦶꦤꦴꦥꦶ ꦕꦺꦠꦁ ꦱꦶꦢ꧀ꦣꦁ ‘‘ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦄꦴꦢꦶ ꦢꦸꦛ꧀ꦜꦸꦭ꧀ꦭꦁ ꦤꦴꦩ ꦤ ꦲꦺꦴꦠꦷ’’ꦠꦶ. ‘‘ꦄꦗ꧀ꦙꦴꦕꦴꦫꦺꦴ ꦤꦴꦩꦴ’’ꦠꦶ ꦲꦶ ꦮꦢꦤ꧀ꦠꦺꦴ ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦄꦴꦢꦶ ꦏꦺꦮꦭꦁ ꦄꦗ꧀ꦙꦴꦕꦴꦫꦺꦴ ꦤꦴꦩ ꦲꦺꦴꦠꦶ, ꦤ ꦥꦤ ꦢꦸꦛ꧀ꦜꦸꦭ꧀ꦭꦺꦴ ꦤꦴꦩ ꦄꦗ꧀ꦙꦴꦕꦴꦫꦺꦴꦠꦶ ꦢꦷꦥꦺꦠꦶ. ‘‘ꦄꦗ꧀ꦙꦴꦕꦴꦫꦺꦴ ꦤꦴꦩꦴ’’ꦠꦶ ꦕ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦠ꧀ꦠꦴ, ꦄꦏꦠ꧀ꦠꦧ꧀ꦧꦫꦹꦥꦠ꧀ꦠꦴ ꦕ ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦄꦴꦢꦷꦤꦶ ꦢꦟ꧀ꦝꦏꦩ꧀ꦩꦮꦠ꧀ꦡꦸꦥꦏ꧀ꦑꦁ ꦨꦗꦤ꧀ꦠꦶ. ꦠꦴꦤꦶ ꦕ ꦄꦚ꧀ꦚꦱ꧀ꦱ ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦄꦮꦟ꧀ꦟꦏꦴꦩꦠꦴꦪ ꦄꦴꦫꦺꦴꦕꦺꦤ꧀ꦠꦺꦴ ꦨꦶꦏ꧀ꦑꦸ ꦢꦸꦏ꧀ꦏꦛꦁ ꦄꦴꦥꦗ꧀ꦗꦠꦷꦠꦶ ꦮꦢꦤ꧀ꦠꦶ. ꦆꦣ ꦥꦤ ꦄꦤꦸꦥꦱꦩ꧀ꦥꦤ꧀ꦤꦒ꧀ꦒꦲꦟꦺꦤ ꦱꦴꦩꦟꦺꦫꦱꦴꦩꦟꦺꦫꦶꦱꦶꦏ꧀ꦑꦩꦴꦤꦴꦤꦁ ꦒꦲꦟꦁ ꦮꦺꦢꦶꦠꦧ꧀ꦧꦁ.

ꦄꦢꦸꦛ꧀ꦜꦸꦭ꧀ꦭꦁ ꦄꦗ꧀ꦙꦴꦕꦴꦫꦤ꧀ꦠꦶ ꦪꦺꦴꦗꦤꦴ. ‘‘ꦄꦤꦸꦥꦱꦩ꧀ꦥꦤ꧀ꦤꦱ꧀ꦱꦴ’’ꦠꦶ ꦕ ꦄꦗ꧀ꦙꦴꦲꦫꦶꦠꦧ꧀ꦧꦴꦤꦶ. ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦪꦡꦴꦮꦸꦠ꧀ꦠꦺꦲꦶ ꦥꦚ꧀ꦕꦱꦶꦏ꧀ꦑꦴꦥꦢꦺꦲꦶ ꦄꦚ꧀ꦚꦁ ꦮꦶꦏꦴꦭꦨꦺꦴꦗꦤꦴꦢꦶꦁ ꦄꦢꦸꦛ꧀ꦜꦸꦭ꧀ꦭꦁ ꦄꦗ꧀ꦙꦴꦕꦴꦫꦁ ꦮꦴ. ꦪꦡꦴꦲ ‘‘ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦢꦸꦛ꧀ꦜꦸꦭ꧀ꦭꦁ ꦮꦴ ꦄꦢꦸꦛ꧀ꦜꦸꦭ꧀ꦭꦁ ꦮꦴ ꦄꦗ꧀ꦙꦴꦕꦴꦫ’’ꦤ꧀ꦠꦶꦄꦴꦢꦶ (ꦥꦴꦕꦶ. ꧘꧒).

꧙꧔꧖. ꦏꦺꦮꦭꦁ ꦮꦠ꧀ꦡꦸꦁ ꦮꦴ ꦄꦴꦫꦺꦴꦕꦺꦤ꧀ꦠꦱ꧀ꦱꦴꦠꦶ ‘‘ꦄꦪꦁ ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦁ ꦄꦴꦥꦤ꧀ꦤꦺꦴ’’ꦠꦶꦄꦴꦢꦶꦤꦴ ꦤꦪꦺꦤ ꦮꦠ꧀ꦡꦸꦩꦠ꧀ꦠꦁ ꦄꦴꦫꦺꦴꦕꦺꦤ꧀ꦠꦱ꧀ꦱ. ꦏꦺꦮꦭꦁ ꦄꦴꦥꦠ꧀ꦠꦶꦁ ꦮꦴ ꦄꦴꦫꦺꦴꦕꦺꦤ꧀ꦠꦱ꧀ꦱꦴꦠꦶ ‘‘ꦄꦪꦁ ꦥꦴꦫꦴꦗꦶꦏꦁ ꦄꦴꦥꦤ꧀ꦤꦺꦴ, ꦄꦪꦁ ꦱꦔ꧀ꦓꦴꦢꦶꦱꦺꦱꦁ ꦄꦴꦥꦤ꧀ꦤꦺꦴ’’ꦠꦶꦄꦴꦢꦶꦤꦴ ꦤꦪꦺꦤ ꦄꦴꦥꦠ꧀ꦠꦶꦩꦠ꧀ꦠꦁ ꦄꦴꦫꦺꦴꦕꦺꦤ꧀ꦠꦱ꧀ꦱ ꦕ. ꦨꦶꦏ꧀ꦑꦸꦱꦩ꧀ꦩꦸꦠꦶꦪꦴꦠꦶ ꦌꦠ꧀ꦡ ꦮꦠ꧀ꦡꦸꦤꦴ ꦓꦛꦺꦠ꧀ꦮꦴ ꦄꦴꦥꦠ꧀ꦠꦶꦁ ꦄꦴꦫꦺꦴꦕꦺꦤ꧀ꦠꦱ꧀ꦱꦴꦠꦶ ꦒꦲꦺꦠꦧ꧀ꦧꦁ. ‘‘ꦠꦡꦴ’’ꦠꦶ ꦆꦩꦶꦤꦴ ‘‘ꦄꦤꦴꦥꦠ꧀ꦠꦷ’’ꦠꦶ ꦌꦠꦁ ꦥꦫꦴꦩꦱꦠꦶ.

ꦢꦸꦛ꧀ꦜꦸꦭ꧀ꦭꦴꦫꦺꦴꦕꦤꦏꦡꦴꦮꦟ꧀ꦟꦤꦴ.

꧙꧔꧘. ꦄꦏꦥ꧀ꦥꦶꦪꦁ ꦥꦡꦮꦶꦤ꧀ꦠꦶ ꦥꦢꦨꦴꦗꦤꦺ ‘‘ꦢ꧀ꦮꦺ ꦥꦡꦮꦶꦪꦺꦴ ꦗꦴꦠꦴ ꦕ ꦥꦡꦮꦷ ꦄꦗꦴꦠꦴ ꦕ ꦥꦡꦮꦷ’’ꦠꦶ (ꦥꦴꦕꦶ. ꧘꧖) ꦈꦢ꧀ꦢꦶꦱꦶꦠ꧀ꦮꦴ –

‘‘ꦗꦴꦠꦴ ꦤꦴꦩ ꦥꦡꦮꦷ ꦱꦸꦢ꧀ꦣꦥꦁꦱꦸ ꦱꦸꦢ꧀ꦣꦩꦠ꧀ꦠꦶꦏꦴ ꦄꦥ꧀ꦥꦥꦴꦱꦴꦟꦴ ꦄꦥ꧀ꦥꦱꦏ꧀ꦑꦫꦴ ꦄꦥ꧀ꦥꦏꦡꦭꦴ ꦄꦥ꧀ꦥꦩꦫꦸꦩ꧀ꦧꦴ ꦄꦥ꧀ꦥꦮꦴꦭꦶꦏꦴ ꦪꦺꦨꦸꦪ꧀ꦪꦺꦤꦥꦁꦱꦸꦏꦴ ꦪꦺꦨꦸꦪ꧀ꦪꦺꦤꦩꦠ꧀ꦠꦶꦏꦴ, ꦄꦢꦝ꧀ꦞꦴꦥꦶ ꦮꦸꦕ꧀ꦕꦠꦶ ꦗꦴꦠꦴ ꦥꦡꦮꦷ. ꦪꦺꦴꦥꦶ ꦥꦁꦱꦸꦥꦸꦚ꧀ꦗꦺꦴ ꦮꦴ ꦩꦠ꧀ꦠꦶꦏꦴꦥꦸꦚ꧀ꦗꦺꦴ ꦮꦴ ꦄꦠꦶꦫꦺꦏꦕꦴꦠꦸꦩꦴꦱꦁ ꦎꦮꦛ꧀ꦜꦺꦴ, ꦄꦪꦩ꧀ꦥꦶ ꦮꦸꦕ꧀ꦕꦠꦶ ꦗꦴꦠꦴ ꦥꦡꦮꦷ’’ꦠꦶ (ꦥꦴꦕꦶ. ꧘꧖) ꦕ,

‘‘ꦄꦗꦴꦠꦴ ꦤꦴꦩ ꦥꦡꦮꦷ ꦱꦸꦢ꧀ꦣꦥꦴꦱꦴꦟꦴ ꦱꦸꦢ꧀ꦣꦱꦏ꧀ꦑꦫꦴ ꦱꦸꦢ꧀ꦣꦏꦡꦭꦴ ꦱꦸꦢ꧀ꦣꦩꦫꦸꦩ꧀ꦧꦴ ꦱꦸꦢ꧀ꦣꦮꦴꦭꦶꦏꦴ ꦄꦥ꧀ꦥꦥꦁꦱꦸ ꦄꦥ꧀ꦥꦩꦠ꧀ꦠꦶꦏꦴ ꦪꦺꦨꦸꦪ꧀ꦪꦺꦤꦥꦴꦱꦴꦟꦴ ꦪꦺꦨꦸꦪ꧀ꦪꦺꦤꦱꦏ꧀ꦑꦫꦴ ꦪꦺꦨꦸꦪ꧀ꦪꦺꦤꦏꦡꦭꦴ ꦪꦺꦨꦸꦪ꧀ꦪꦺꦤꦩꦫꦸꦩ꧀ꦧꦴ ꦪꦺꦨꦸꦪ꧀ꦪꦺꦤꦮꦴꦭꦶꦏꦴ, ꦢꦝ꧀ꦞꦴꦥꦶ ꦮꦸꦕ꧀ꦕꦠꦶ ꦄꦗꦴꦠꦴ ꦥꦡꦮꦷ. ꦪꦺꦴꦥꦶ ꦥꦁꦱꦸꦥꦸꦚ꧀ꦗꦺꦴ ꦮꦴ ꦩꦠ꧀ꦠꦶꦏꦴꦥꦸꦚ꧀ꦗꦺꦴ ꦮꦴ ꦈꦴꦤꦕꦴꦠꦸꦩꦴꦱꦁ ꦎꦮꦛ꧀ꦜꦺꦴ, ꦄꦪꦩ꧀ꦥꦶ ꦮꦸꦕ꧀ꦕꦠꦶ ꦄꦗꦴꦠꦴ ꦥꦡꦮꦷ’’ꦠꦶ (ꦥꦴꦕꦶ. ꧘꧖) ꦕ –

ꦤꦶꦢ꧀ꦢꦶꦛ꧀ꦜꦴꦱꦸ ꦢ꧀ꦮꦷꦱꦸ ꦥꦡꦮꦷꦱꦸ ꦗꦴꦠꦥꦡꦮꦶꦱꦔ꧀ꦑꦴꦠꦁ ꦄꦏꦥ꧀ꦥꦶꦪꦥꦡꦮꦶꦁ.

ꦌꦠ꧀ꦡ ꦥꦴꦱꦴꦟꦴꦢꦷꦤꦁ ꦭꦏ꧀ꦑꦟꦁ ꦄꦛ꧀ꦜꦏꦡꦴꦪꦁ ‘‘ꦩꦸꦛ꧀ꦜꦶꦥ꧀ꦥꦩꦴꦟꦠꦺꦴ ꦈꦥꦫꦶ ꦥꦴꦱꦴꦟꦴꦠꦶ ꦮꦺꦢꦶꦠꦧ꧀ꦧꦴ, ꦩꦸꦛ꧀ꦜꦶꦥ꧀ꦥꦩꦴꦟꦴ ꦱꦏ꧀ꦑꦫꦴ. ꦏꦡꦭꦴꦠꦶ ꦏꦥꦴꦭꦑꦟ꧀ꦝꦴꦤꦶ. ꦩꦫꦸꦩ꧀ꦧꦴꦠꦶ ꦏꦛꦱꦏ꧀ꦑꦫꦴ. ꦮꦴꦭꦶꦏꦴꦠꦶ ꦮꦴꦭꦸꦏꦴꦪꦺꦮꦴ’’ꦠꦶ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦪꦺꦨꦸꦪ꧀ꦪꦺꦤꦥꦁꦱꦸꦏꦴꦢꦷꦤꦁ ꦭꦏ꧀ꦑꦟꦁ ‘‘ꦪꦺꦨꦸꦪ꧀ꦪꦺꦤꦥꦁꦱꦸꦏꦴꦠꦶ ꦠꦷꦱꦸ ꦏꦺꦴꦛ꧀ꦜꦴꦱꦺꦱꦸ ꦢ꧀ꦮꦺ ꦏꦺꦴꦛ꧀ꦜꦴꦱꦴ ꦥꦁꦱꦸ, ꦌꦏꦺꦴ ꦥꦴꦱꦴꦟꦴꦢꦷꦱꦸ ꦄꦚ꧀ꦚꦠꦫꦺꦴ ꦏꦺꦴꦛ꧀ꦜꦴꦱꦺꦴ’’ꦠꦶ (ꦥꦴꦕꦶ. ꦄꦛ꧀ꦜ. ꧘꧖) ꦕ ‘‘ꦄꦢꦝ꧀ꦞꦴꦥꦷꦠꦶ ꦈꦢ꧀ꦣꦤꦥꦠ꧀ꦠꦥꦕꦤꦏꦸꦩ꧀ꦨꦏꦴꦫꦴꦮꦴꦥꦴꦢꦶꦮꦱꦺꦤ ꦠꦡꦴ ꦠꦡꦴ ꦄꦢꦝ꧀ꦞꦴ’’ꦠꦶꦄꦴꦢꦶ ꦄꦛ꧀ꦜꦏꦡꦴꦠꦺꦴ ꦕ ꦮꦺꦢꦶꦠꦧ꧀ꦧꦁ. ‘‘ꦄꦥ꧀ꦥꦥꦁꦱꦸꦄꦥ꧀ꦥꦩꦠ꧀ꦠꦶꦏꦴ’’ꦠꦶ ꦢ꧀ꦮꦷꦱꦸꦥꦶ ꦥꦢꦺꦱꦸ ꦤꦶꦢ꧀ꦢꦺꦱꦫꦹꦥꦺꦤ ꦪꦺꦨꦸꦪ꧀ꦪꦺꦤꦥꦴꦱꦴꦟꦴꦢꦶꦥꦢꦥꦚ꧀ꦕꦏꦁ ꦮꦸꦠ꧀ꦠꦁ, ꦠꦠ꧀ꦡꦴꦥꦶ ꦄꦠ꧀ꦡꦺꦴ ꦪꦺꦨꦸꦪ꧀ꦪꦺꦤꦥꦁꦱꦸꦥꦢꦴꦢꦷꦱꦸ ꦮꦸꦠ꧀ꦠꦮꦶꦥꦭ꧀ꦭꦴꦱꦺꦤ ꦮꦺꦢꦶꦠꦧ꧀ꦧꦺꦴ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦠꦺꦱꦁꦪꦺꦮ ꦲꦶ ꦢ꧀ꦮꦶꦤ꧀ꦤꦁ ꦥꦨꦺꦢꦢꦱ꧀ꦱꦤꦩꦺꦠ’’ꦤ꧀ꦠꦶ (ꦥꦴꦕꦶ. ꧘꧖).

ꦑꦟꦺꦪ꧀ꦪ ꦮꦴꦠꦶ ꦌꦮꦫꦹꦥꦁ ꦄꦏꦥ꧀ꦥꦶꦪꦥꦡꦮꦶꦥꦢꦺꦱꦁ ꦄꦤ꧀ꦠꦩꦱꦺꦴ ꦥꦴꦢꦔ꧀ꦒꦸꦛ꧀ꦜꦺꦤꦴꦥꦶ ꦱꦩ꧀ꦩꦸꦚ꧀ꦗꦤꦶꦱꦭꦴꦏꦴꦪꦥꦶ ꦱꦪꦁ ꦮꦴ ꦑꦟꦠꦶ. ꦑꦟꦴꦥꦺꦪ꧀ꦪ ꦮꦴꦠꦶ ꦄꦚ꧀ꦚꦺꦤ ꦮꦴ ‘‘ꦆꦢꦁ ꦑꦟꦴꦲꦷ’’ꦠꦶꦄꦴꦢꦶꦤꦴ ꦄꦏꦥ꧀ꦥꦶꦪꦮꦺꦴꦲꦴꦫꦺꦤ ꦑꦟꦴꦥꦺꦪ꧀ꦪ. ꦨꦺꦢꦴꦥꦺꦪ꧀ꦪꦴꦠꦶ ꦠꦡꦺꦮ ꦨꦺꦢꦴꦥꦺꦪ꧀ꦪ. ꦨꦶꦤ꧀ꦢꦺꦪ꧀ꦪ ꦮꦴꦠꦶ ꦥꦱ꧀ꦱꦴꦮꦣꦴꦫꦴꦢꦷꦲꦶꦥꦶ ꦨꦶꦤ꧀ꦢꦺꦪ꧀ꦪ. ꦄꦣꦶꦏꦴꦫꦮꦱꦺꦤ ꦮꦴ-ꦱꦢ꧀ꦢꦱ꧀ꦱ ꦱꦧ꧀ꦧꦏꦶꦫꦶꦪꦴꦥꦢꦺꦲꦶ ꦱꦩ꧀ꦧꦤ꧀ꦣꦺꦴ ꦭꦧ꧀ꦨꦠꦷꦠꦶ ꦨꦺꦢꦴꦥꦺꦪ꧀ꦪ ꦕꦴꦠꦶ ꦌꦠ꧀ꦡ ꦕ-ꦱꦢ꧀ꦢꦺꦴ ꦆꦣ ꦄꦮꦸꦠ꧀ꦠꦱ꧀ꦱ ‘‘ꦢꦲꦠꦶ ꦮꦴ, ꦢꦲꦴꦥꦺꦠꦶ ꦮꦴ’’ꦠꦶ ꦥꦢꦢ꧀ꦮꦪꦱ꧀ꦱ ꦱꦩꦸꦕ꧀ꦕꦪꦏꦺꦴꦠꦶ ꦮꦺꦢꦶꦠꦧ꧀ꦧꦺꦴ. ꦄꦤ꧀ꦠꦩꦱꦺꦴ ꦥꦠ꧀ꦠꦩ꧀ꦥꦶ ꦥꦕꦤ꧀ꦠꦺꦴ ꦱꦪꦁ ꦮꦴ ꦢꦲꦠꦶ, ꦄꦚ꧀ꦚꦺꦤ ꦮꦴ ꦢꦲꦴꦥꦺꦠꦷꦠꦶꦄꦴꦢꦶ ꦆꦩꦺꦱꦁ ꦥꦢꦴꦤꦁ ꦄꦛ꧀ꦜꦏꦡꦴꦮꦱꦺꦤ (ꦥꦴꦕꦶ. ꦄꦛ꧀ꦜ. ꧘꧗) ꦮꦺꦢꦶꦠꦧ꧀ꦧꦁ. ꦥꦴꦕꦶꦠ꧀ꦠꦶꦪꦁ ꦱꦶꦪꦴꦠꦶ ꦑꦟꦤ꧀ꦠꦱ꧀ꦱ, ꦨꦶꦤ꧀ꦢꦤ꧀ꦠꦱ꧀ꦱ ꦕ ꦥꦲꦴꦫꦺ ꦥꦲꦴꦫꦺ ꦥꦴꦕꦶꦠ꧀ꦠꦶꦪꦁ.

꧙꧔꧙. ꦄꦴꦟꦴꦥꦺꦤ꧀ꦠꦱ꧀ꦱ ꦄꦴꦟꦠ꧀ꦠꦶꦒꦟꦤꦴꦪ, ꦢꦲꦤ꧀ꦠꦱ꧀ꦱ ꦄꦒ꧀ꦒꦶꦥꦴꦠꦒꦟꦤꦴꦪ ꦲꦺꦴꦠꦷꦠꦶ ꦆꦢꦁ ‘‘ꦥꦲꦴꦫꦺ ꦥꦲꦴꦫꦺ ꦥꦴꦕꦶꦠ꧀ꦠꦶꦪ’’ꦤ꧀ꦠꦶꦄꦴꦢꦶꦄꦛ꧀ꦜꦏꦡꦴꦮꦕꦤꦮꦱꦺꦤ ꦮꦺꦢꦶꦠꦧ꧀ꦧꦁ, ꦆꦩꦩꦺꦮ ꦢꦱ꧀ꦱꦺꦠꦸꦩꦴꦲ ‘‘ꦱꦪꦩꦺꦮꦴ’’ꦠꦶꦄꦴꦢꦶ.

꧙꧕꧐. ꦄꦴꦟꦴꦥꦺꦤ꧀ꦠꦱ꧀ꦱꦴꦠꦶ ꦱꦏꦶꦁ ꦄꦴꦟꦴꦥꦺꦤ꧀ꦠꦱ꧀ꦱ.

꧙꧕꧑. ‘‘ꦑꦟꦴꦥꦺꦪ꧀ꦪꦴ’’ꦠꦶ ꦱꦴꦩꦚ꧀ꦚꦮꦕꦤꦱ꧀ꦱ ꦄꦥꦮꦴꦢꦢꦱ꧀ꦱꦤꦠ꧀ꦡꦁ ‘‘ꦑꦟ ꦥꦺꦴꦏ꧀ꦑꦫꦟꦶ’’ꦤ꧀ꦠꦶꦄꦴꦢꦶꦩꦴꦲ. ꦏꦺꦴꦕꦶ ꦢꦺꦴꦱꦺꦴ ꦤ ꦮꦶꦗ꧀ꦗꦠꦷꦠꦶ ꦌꦠ꧀ꦡ ꦥꦺꦴꦏ꧀ꦑꦫꦟꦶꦄꦴꦮꦴꦛꦴꦢꦶꦱꦢ꧀ꦢꦴꦤꦁ ꦥꦡꦮꦶꦥꦫꦶꦪꦴꦪꦠ꧀ꦠꦴꦨꦴꦮꦠꦺꦴ ꦌꦮꦁꦮꦕꦤꦺꦤ ꦄꦤꦴꦥꦠ꧀ꦠꦷꦠꦶ ꦄꦣꦶꦥ꧀ꦥꦴꦪꦺꦴ.

꧙꧕꧒. ‘‘ꦆꦩꦁ ꦆꦣꦴ’’ꦠꦶꦄꦴꦢꦷꦤꦁ ꦥꦢꦴꦤꦁ ꦥꦕ꧀ꦕꦏ꧀ꦑꦨꦹꦠꦴꦣꦶꦥ꧀ꦥꦺꦠꦨꦹꦩꦶꦮꦴꦕꦏꦠ꧀ꦠꦴ ꦠꦺꦲꦶ ꦪꦺꦴꦗꦺꦠ꧀ꦮꦴ ꦮꦸꦠ꧀ꦠꦱ꧀ꦱ ꦠꦱ꧀ꦱꦺꦮ ꦥꦪꦺꦴꦒꦱ꧀ꦱ ꦄꦴꦥꦠ꧀ꦠꦶꦏꦫꦨꦴꦮꦁ ꦢꦱ꧀ꦱꦺꦠꦸꦩꦴꦲ ‘‘ꦆꦩ’’ꦤ꧀ꦠꦶꦄꦴꦢꦶ.

꧙꧕꧓. ꦏꦤ꧀ꦢꦤ꧀ꦠꦶ ꦠꦴꦭꦴꦢꦶꦏꦤ꧀ꦢꦁ. ꦏꦸꦫꦸꦤ꧀ꦢꦤ꧀ꦠꦶ ꦏꦸꦭꦕꦺꦴꦕꦫꦸꦏ꧀ꦑꦁ. ꦡꦹꦟꦤ꧀ꦠꦶ ꦡꦩ꧀ꦨꦁ. ꦑꦴꦟꦸꦏꦤ꧀ꦠꦶ ꦱꦴꦑꦴꦮꦶꦛꦥꦫꦲꦶꦠꦁ ꦫꦸꦏ꧀ꦑꦴꦮꦪꦮꦁ. ꦩꦹꦭꦤ꧀ꦠꦶ ꦥꦡꦮꦶꦪꦴ ꦱꦸꦥ꧀ꦥꦠꦶꦛ꧀ꦜꦶꦠꦨꦴꦮꦏꦫꦁ ꦫꦸꦏ꧀ꦑꦴꦮꦪꦮꦁ. ꦮꦛ꧀ꦛꦠꦷꦠꦶ ꦄꦤꦶꦪꦩꦺꦠ꧀ꦮꦴ ꦮꦕꦤꦺꦤ ꦄꦤꦴꦥꦠ꧀ꦠꦶꦨꦴꦮꦠꦺꦴ ꦮꦛ꧀ꦛꦠꦶ.

꧙꧕꧔. ꦆꦩꦤ꧀ꦠꦶ ꦥꦕ꧀ꦕꦏ꧀ꦑꦥꦫꦴꦩꦴꦱꦥꦢꦺꦤ ꦤꦶꦪꦩꦺꦠ꧀ꦮꦴ ꦮꦕꦤꦠꦺꦴ ꦄꦴꦥꦠ꧀ꦠꦶ ꦲꦺꦴꦠꦷꦠꦶ ꦄꦴꦲ ‘‘ꦤꦶꦪꦩꦺꦠ꧀ꦮꦴꦤ ꦮꦠ꧀ꦠꦸꦁ ꦥꦤ ꦤ ꦮꦛ꧀ꦛꦠꦷ’’ꦠꦶ.

꧙꧕꧕. ꦓꦛꦺꦲꦶ ꦈꦱ꧀ꦱꦶꦚ꧀ꦕꦶꦠꦸꦤ꧀ꦠꦶ ꦓꦛꦺꦲꦶ ꦒꦲꦺꦠ꧀ꦮꦴ ꦄꦮꦱꦶꦚ꧀ꦕꦶꦠꦸꦁ. ꦠꦤꦸꦏꦢ꧀ꦢꦩꦺꦴꦠꦶ ꦗꦩ꧀ꦧꦴꦭꦺꦴ. ꦧꦲꦭꦁ ꦏꦢ꧀ꦢꦩꦁ ꦨꦶꦏ꧀ꦑꦸꦤꦴ ꦄꦥꦤꦺꦠꦸꦁ ꦤ ꦕ ꦮꦛ꧀ꦛꦠꦷꦠꦶ ꦪꦺꦴꦗꦺꦠꦧ꧀ꦧꦁ.

꧙꧕꧖. ꦤꦢꦶꦪꦴꦢꦷꦤꦤ꧀ꦠꦶ ꦌꦠ꧀ꦡ ꦄꦴꦢꦶ-ꦱꦢ꧀ꦢꦺꦤ ꦒꦔ꧀ꦒꦴꦏꦤ꧀ꦢꦫꦴꦢꦷꦤꦁ ꦒꦲꦟꦁ. ‘‘ꦠꦛ’’ꦤ꧀ꦠꦶ ꦆꦩꦶꦤꦴ ꦱꦩ꧀ꦧꦤ꧀ꦣꦺꦴ. ꦮꦛ꧀ꦜꦤ꧀ꦠꦶ ꦮꦸꦛ꧀ꦜꦷꦲꦶ ꦎꦮꦛ꧀ꦜꦚ꧀ꦕ. ꦕꦴꦠꦸꦩꦴꦱꦤ꧀ꦠꦶ ꦮꦶꦏꦺꦴꦥꦤꦏꦶꦫꦶꦪꦴꦪ ꦄꦕ꧀ꦕꦤ꧀ꦠꦱꦁꦪꦺꦴꦒꦺ ꦈꦥꦪꦺꦴꦒꦮꦕꦤꦁ, ꦕꦴꦠꦸꦩꦴꦱꦧ꧀ꦨꦤ꧀ꦠꦫꦺ ꦮꦶꦏꦺꦴꦥꦺꦠꦸꦁ ꦮꦛ꧀ꦛꦠꦷꦠꦶ ꦄꦠ꧀ꦡꦺꦴ.

꧙꧕꧗. ꦱꦕꦺ ꦠꦺꦴꦪꦱ꧀ꦩꦶꦁ ꦥꦠꦠꦶ ꦠꦛꦤ꧀ꦠꦶ ꦪꦺꦴꦗꦤꦴ, ꦱꦕꦺ ꦏꦹꦭꦁ ꦨꦶꦗ꧀ꦗꦶꦠ꧀ꦮꦴ ꦄꦤ꧀ꦠꦺꦴꦈꦢꦏꦺ ꦥꦠꦠꦷꦠꦶ. ꦢꦺꦮꦺ ꦮꦸꦛ꧀ꦜꦺꦥꦷꦠꦶ ꦥꦗ꧀ꦗꦸꦤ꧀ꦤꦢꦺꦮꦺ ꦮꦸꦛ꧀ꦜꦺꦥꦶ. ꦮꦸꦛ꧀ꦜ-ꦱꦢ꧀ꦢꦺꦴ ꦏꦠ꧀ꦠꦸꦱꦴꦣꦤꦺꦴ. ꦕꦴꦠꦸꦩꦴꦱꦩꦠꦶꦏ꧀ꦏꦤ꧀ꦠꦺꦥꦷꦠꦶ ꦪꦺꦴꦗꦤꦴ. ꦠꦠ꧀ꦡ ꦲꦺꦠꦸꦢꦱ꧀ꦱꦤꦠ꧀ꦡꦩꦴꦲ ‘‘ꦠꦺꦴꦪꦺ ꦢꦺꦮꦺꦴ ꦲꦶ ꦮꦱ꧀ꦱꦠꦷ’’ꦠꦶ.

꧙꧕꧘. ꦱꦺꦴꦟ꧀ꦝꦶꦤ꧀ꦠꦶ ꦥꦴꦱꦴꦟꦥꦺꦴꦏ꧀ꦑꦫꦟꦶꦁ. ꦠꦠ꧀ꦡ ꦠꦹꦠꦶ ꦈꦢꦏꦫꦲꦶꦠꦺ ꦠꦱ꧀ꦩꦶꦁ ꦱꦺꦴꦟ꧀ꦝꦶꦄꦴꦮꦴꦛꦺ.

꧙꧕꧙. ꦄꦤ꧀ꦠꦺꦴꦕꦴꦠꦸꦩꦴꦱꦁ ꦱꦺꦴꦣꦺꦠꦸꦁ ꦨꦶꦤ꧀ꦢꦶꦠꦸꦤ꧀ꦠꦶ ꦪꦺꦴꦗꦤꦴ. ‘‘ꦱꦺꦴꦣꦺꦠꦸꦁ ꦨꦶꦤ꧀ꦢꦶꦠꦸꦁ ꦮꦶꦏꦺꦴꦥꦺꦠꦸ’’ꦤ꧀ꦠꦶ ꦏꦶꦫꦶꦪꦴꦥꦢꦺꦲꦶ ‘‘ꦫꦗ’’ꦤ꧀ꦠꦶ ꦏꦩ꧀ꦩꦥꦢꦁ ꦄꦴꦤꦺꦠ꧀ꦮꦴ ꦱꦩ꧀ꦧꦤ꧀ꦣꦶꦠꦧ꧀ꦧꦁ. ꦠꦁ ꦫꦗꦺꦴꦫꦴꦱꦶꦁ ꦢꦺꦮꦺ ꦮꦸꦛ꧀ꦜꦺ ꦥꦕ꧀ꦖꦴ ꦈꦢꦏꦱ꧀ꦱ ꦖꦶꦤ꧀ꦤꦠ꧀ꦠꦴ ꦧꦲꦭꦨꦹꦩꦶꦱꦸꦏ꧀ꦑꦩ꧀ꦥꦶ ꦮꦸꦛ꧀ꦜꦶꦥꦴꦠꦢꦶꦮꦱꦠꦺꦴ ꦥꦛ꧀ꦜꦴꦪ ꦄꦤ꧀ꦠꦺꦴꦕꦴꦠꦸꦩꦴꦱꦺ ꦏꦺꦴꦥꦺꦠꦸꦁ ꦨꦶꦤ꧀ꦢꦶꦠꦸꦁ ꦮꦛ꧀ꦛꦠꦷꦠꦶ ꦄꦠ꧀ꦡꦺꦴ.

꧙꧖꧐. ꦥꦸꦟ꧀ꦟꦺ ꦱꦺꦴꦟ꧀ꦝꦶꦩ꧀ꦲꦶ ꦠꦁ ꦫꦗꦁ ꦮꦶꦏꦺꦴꦥꦺꦠꦸꦁ ꦮꦛ꧀ꦛꦠꦶ ꦕꦴꦠꦸꦩꦴꦱꦠꦺꦴ ꦈꦢ꧀ꦣꦤ꧀ꦠꦶ ꦪꦺꦴꦗꦤꦴ.

꧙꧖꧑. ‘‘ꦦꦸꦱꦴꦪꦤ꧀ꦠꦺ’’ꦠꦶ ꦌꦠꦺꦤ ‘‘ꦢꦺꦮꦺꦴ’’ꦠꦶ ꦆꦢꦁ ꦨꦸꦩ꧀ꦩꦮꦱꦺꦤ ꦮꦶꦥꦫꦶꦟꦴꦩꦺꦠ꧀ꦮꦴ ‘‘ꦢꦺꦮꦺ ꦦꦸꦱꦴꦪꦤ꧀ꦠꦺ’’ꦠꦶ ꦪꦺꦴꦗꦺꦠꦧ꧀ꦧꦁ, ꦥꦗ꧀ꦗꦸꦤ꧀ꦤꦢꦺꦮꦺ ꦮꦸꦛ꧀ꦜꦶꦥꦴꦠꦁ ꦏꦫꦺꦴꦤ꧀ꦠꦺꦠꦶ ꦄꦠ꧀ꦡꦺꦴ. ꦥꦶꦛ꧀ꦜꦶꦥꦴꦱꦴꦟꦏꦺꦠꦶ ꦥꦴꦱꦴꦟꦥꦶꦛ꧀ꦜꦺ. ꦠꦩ꧀ꦥꦷꦠꦶ ꦠꦡꦴ ꦥꦴꦱꦴꦟꦥꦶꦛ꧀ꦜꦺ ꦭꦒ꧀ꦒꦁ ꦠꦩ꧀ꦥꦶ ꦫꦗꦁ.

꧙꧖꧒. ꦄꦏꦠꦥꦧ꧀ꦨꦴꦫꦺꦴ ꦤꦴꦩ ꦪꦡꦴ ꦲꦺꦛ꧀ꦜꦴꦨꦴꦒꦺꦴ ꦮꦸꦛ꧀ꦜꦶꦦꦸꦱꦶꦠꦺꦲꦶ ꦤ ꦠꦺꦩꦷꦪꦠꦶ, ꦠꦡꦴ ꦤꦩꦶꦠ꧀ꦮꦴ ꦜꦶꦠꦥꦧ꧀ꦧꦠꦥ꧀ꦥꦢꦺꦱꦺꦴ. ꦆꦢꦁ ꦄꦤꦺꦴꦮꦱ꧀ꦱꦏꦛ꧀ꦜꦴꦤꦺ ꦈꦛ꧀ꦜꦶꦠꦮꦩ꧀ꦩꦶꦏꦴꦤꦁ ꦈꦥꦭꦏ꧀ꦑꦟꦁ.

꧙꧖꧓. ꦄꦧ꧀ꦨꦺꦴꦏꦴꦱꦺ ꦮꦸꦛ꧀ꦜꦶꦠꦺꦴ ꦮꦩ꧀ꦩꦶꦏꦺꦴ ꦱꦕꦺ ꦎꦮꦛ꧀ꦜꦺꦴ, ꦏꦁ ꦕꦴꦠꦸꦩꦴꦱꦁ ꦮꦶꦏꦺꦴꦥꦺꦠꦸꦁ ꦮꦛ꧀ꦛꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦕꦴꦠꦸꦩꦴꦱꦤ꧀ꦠꦶ ꦮꦶꦏꦺꦴꦥꦤꦏꦶꦫꦶꦪꦴꦪ ꦄꦕ꧀ꦕꦤ꧀ꦠꦱꦁꦪꦺꦴꦒꦺ ꦈꦥꦪꦺꦴꦒꦮꦕꦤꦁ. ꦫꦸꦏ꧀ꦑꦺꦠꦶ ꦕ ꦡꦩ꧀ꦨꦥꦴꦱꦴꦟꦴꦢꦷꦤꦁ ꦈꦥꦭꦏ꧀ꦑꦟꦁ. ꦈꦥꦕꦶꦏꦴꦢꦷꦤꦤ꧀ꦠꦶ ꦄꦴꦢꦶ-ꦱꦢ꧀ꦢꦺꦤ ꦏꦴꦭ꦳ꦏꦶꦥꦶꦭ꧀ꦭꦶꦏꦴꦢꦷꦤꦁ ꦒꦲꦟꦁ. ꦱꦺꦴ ꦤꦪꦺꦴꦠꦶ ‘‘ꦎꦮꦛ꧀ꦜꦢꦶꦮꦱꦠꦺꦴ ꦈꦠ꧀ꦠꦫꦶ ꦕꦴꦠꦸꦩꦴꦱꦧ꧀ꦨꦤ꧀ꦠꦫꦺ ꦏꦺꦴꦥꦺꦠꦸꦁ ꦮꦛ꧀ꦛꦠꦷ’’ꦠꦶ ꦪꦡꦴꦮꦸꦠ꧀ꦠꦺꦴ ꦤꦪꦺꦴ.

꧙꧖꧔. ꦩꦹꦱꦶꦏꦸꦏ꧀ꦏꦶꦫꦁ ꦤꦴꦩ ꦩꦹꦱꦶꦏꦴꦲꦶ ꦈꦢ꧀ꦣꦛꦥꦁꦱꦸ. ꦩꦹꦱꦶꦏꦴꦤꦁ ꦈꦏ꧀ꦏꦶꦫꦺꦴ ꦩꦹꦱꦶꦏꦸꦏ꧀ꦏꦶꦫꦺꦴꦠꦶ ꦮꦶꦒ꧀ꦒꦲꦺꦴ. ꦒꦺꦴꦏꦟ꧀ꦛꦏꦁ ꦤꦴꦩ ꦒꦸꦤ꧀ꦤꦁ ꦑꦸꦫꦴꦤꦁ ꦈꦛ꧀ꦜꦶꦠꦩꦠ꧀ꦠꦶꦏꦴ. ꦒꦟ꧀ꦝꦸꦥ꧀ꦥꦴꦢꦩꦭꦁ ꦤꦴꦩ ꦨꦹꦭꦠꦴꦪ ꦩꦭꦩꦠ꧀ꦠꦶꦏꦴ. ꦱꦩ꧀ꦧꦤ꧀ꦣꦁ ꦥꦤ ꦥꦏꦠꦶꦨꦹꦩꦶꦁ ꦄꦏꦺꦴꦥꦺꦤ꧀ꦠꦺꦤ ꦩꦠ꧀ꦡꦏꦠꦺꦴ ꦒꦟ꧀ꦲꦶꦠꦸꦁ ꦮꦛ꧀ꦛꦠꦶ.

꧙꧖꧕. ꦏꦱꦷꦠꦶ ꦏꦱꦶꦠꦛ꧀ꦜꦴꦤꦁ, ꦠꦠ꧀ꦡ ꦤꦔ꧀ꦒꦭꦺꦤ ꦈꦢ꧀ꦣꦛꦩꦠ꧀ꦠꦶꦏꦴ ꦏꦱꦶꦤꦔ꧀ꦒꦭꦩꦠ꧀ꦠꦶꦏꦴ. ‘‘ꦄꦕ꧀ꦖꦶꦤ꧀ꦤꦴ’’ꦠꦶꦆꦩꦶꦤꦴ ꦑꦟ꧀ꦝꦴꦑꦟ꧀ꦝꦶꦏꦁ ꦏꦠ꧀ꦮꦴ ꦄꦴꦪꦠꦁ ꦲꦸꦠ꧀ꦮꦴ ꦜꦶꦠꦩꦠ꧀ꦠꦶꦏꦴꦥꦛꦭꦩ꧀ꦥꦶ ꦄꦗꦴꦠꦥꦡꦮꦷ ꦱꦶꦪꦴꦠꦶ ꦄꦴꦱꦔ꧀ꦏꦴꦤꦶꦮꦠ꧀ꦠꦤꦠ꧀ꦡꦩꦴꦲ ‘‘ꦨꦹꦩꦶꦱꦩ꧀ꦧꦤ꧀ꦣꦴ’’ꦠꦶ. ꦱꦴꦠꦶ ꦏꦱꦶꦤꦔ꧀ꦒꦭꦩꦠ꧀ꦠꦶꦏꦴ.

꧙꧖꧖. ꦱꦺꦤꦴꦱꦤꦤ꧀ꦠꦶ ꦌꦠ꧀ꦡ ‘‘ꦥꦸꦫꦴꦟ’’ꦤ꧀ꦠꦶ ꦥꦴꦜꦱꦺꦱꦺꦴ ꦒꦲꦺꦠꦧ꧀ꦧꦺꦴ. ꦎꦮꦛ꧀ꦜꦁ ꦕꦴꦠꦸꦩꦴꦱꦠꦺꦴ ꦈꦢ꧀ꦣꦁ ꦤ ꦮꦶꦏꦺꦴꦥꦪꦺꦠꦶ ꦪꦺꦴꦗꦤꦴ.

꧙꧖꧗. ꦠꦠꦺꦴꦠꦶ ꦎꦮꦛ꧀ꦜꦢꦶꦮꦱꦠꦺꦴ ꦥꦛ꧀ꦜꦴꦪ ꦕꦴꦠꦸꦩꦴꦱꦴꦠꦶꦏ꧀ꦏꦤ꧀ꦠꦒꦺꦲꦠꦺꦴ. ‘‘ꦒꦺꦴꦥꦴꦤꦱꦶ’’ꦤ꧀ꦠꦶ ꦆꦩꦶꦤꦴ ꦒꦺꦴꦥꦴꦤꦱꦶꦩꦠ꧀ꦡꦏꦺ ꦜꦶꦠꦈꦥꦕꦶꦏꦴꦥꦁꦱꦸꦩ꧀ꦲꦶ ꦨꦶꦗ꧀ꦗꦤ꧀ꦠꦺꦥꦶ ꦄꦤꦴꦥꦠ꧀ꦠꦶꦨꦴꦮꦁ ꦢꦷꦥꦺꦠꦶ. ‘‘ꦨꦶꦠ꧀ꦠꦶ’’ꦤ꧀ꦠꦶ ꦆꦩꦶꦤꦴ ꦠꦢꦺꦏꦢꦺꦱꦁ ꦨꦶꦠ꧀ꦠꦶꦥꦴꦢꦴꦢꦶꦢꦴꦫꦸꦩꦴꦲ. ꦆꦢꦩ꧀ꦥꦶ ꦨꦶꦠ꧀ꦠꦶꦩꦠ꧀ꦠꦶꦏꦁ ꦈꦥꦕꦶꦏꦴꦩꦠ꧀ꦠꦶꦏꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ‘‘ꦡꦩ꧀ꦨ’’ꦤ꧀ꦠꦶ ꦆꦢꦩ꧀ꦥꦶ ꦠꦁꦱꦩ꧀ꦧꦤ꧀ꦣꦥꦴꦏꦴꦫꦨꦹꦩꦶꦩꦠ꧀ꦠꦶꦏꦴꦈꦥꦕꦶꦏꦴꦢꦶꦥꦁꦱꦸꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦥꦢꦫꦠ꧀ꦡꦫꦤ꧀ꦠꦶ ꦄꦠ꧀ꦡꦠꦥꦢꦫꦁ. ꦆꦢꦩ꧀ꦥꦶ ꦥꦢꦫꦴꦤꦁ ꦈꦥꦫꦶ ꦩꦠ꧀ꦠꦶꦏꦴꦈꦥꦕꦶꦏꦴꦥꦁꦱꦸꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ‘‘ꦒꦺꦴꦥꦴꦤꦱꦶ’’ꦤ꧀ꦠꦶꦄꦴꦢꦷꦲꦶ ꦥꦢꦺꦲꦶ ‘‘ꦒꦟ꧀ꦲꦶꦱ꧀ꦱꦴꦩꦷ’’ꦠꦶ ꦥꦕ꧀ꦕꦺꦏꦁ ꦪꦺꦴꦗꦤꦷꦪꦁ. ‘‘ꦒꦟ꧀ꦲꦶꦱ꧀ꦱꦴꦩꦷ’’ꦠꦶ ꦆꦩꦶꦤꦴ ꦮꦶꦏꦺꦴꦥꦤꦴꦣꦶꦥ꧀ꦥꦴꦪꦴꦨꦴꦮꦁ ꦢꦷꦥꦺꦠꦶ.

꧙꧖꧘. ꦒꦟ꧀ꦲꦤ꧀ꦠꦱ꧀ꦱꦴꦠꦶ ꦌꦠ꧀ꦡ ꦄꦤꦴꦢꦫꦺ ꦱꦴꦩꦶꦮꦕꦤꦁ, ‘‘ꦱꦸꦢ꧀ꦣꦕꦶꦠ꧀ꦠꦺꦤꦴ’’ꦠꦶ ꦥꦴꦜꦱꦺꦱꦺꦴ. ꦆꦛ꧀ꦜꦏꦴꦠꦶ ꦖꦢꦤꦶꦛ꧀ꦜꦏꦴ. ꦄꦴꦢꦶ-ꦱꦢ꧀ꦢꦺꦤ ꦥꦴꦱꦴꦟꦱꦩꦸꦢ꧀ꦢꦦꦺꦟꦴꦢꦷꦤꦁ ꦒꦲꦟꦁ. ꦥꦠꦠꦷꦠꦶ ꦱꦸꦢ꧀ꦣꦕꦶꦠ꧀ꦠꦺꦤ ꦒꦟ꧀ꦲꦤ꧀ꦠꦺ ꦱꦕꦺ ꦩꦠ꧀ꦠꦶꦏꦴ ꦖꦶꦗ꧀ꦗꦶꦠ꧀ꦮꦴ ꦥꦠꦠꦶ, ꦄꦤꦴꦥꦠ꧀ꦠꦷꦠꦶ ꦄꦠ꧀ꦡꦺꦴ. ꦩꦠ꧀ꦠꦶꦏꦤ꧀ꦠꦶ ꦨꦶꦠ꧀ꦠꦶꦪꦁ, ꦖꦢꦤꦺ ꦕ ꦕꦴꦠꦸꦩꦴꦱꦴꦣꦶꦏꦺꦴꦮꦛ꧀ꦜꦩꦠ꧀ꦠꦶꦏꦁ, ꦄꦤꦺꦴꦮꦛ꧀ꦜꦁ ꦕꦺ, ꦒꦟ꧀ꦲꦶꦠꦸꦁ ꦮꦛ꧀ꦛꦠꦷꦠꦶ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦱꦕꦺ ꦪꦴ ꦪꦴ ꦄꦠꦶꦤ꧀ꦠꦴ, ꦠꦁ ꦠꦁ ꦒꦟ꧀ꦲꦴꦠꦶ, ꦄꦤꦴꦥꦠ꧀ꦠꦷ’’ꦠꦶ (ꦥꦴꦕꦶ. ꦄꦛ꧀ꦜ. ꧘꧖). ꦪꦢꦶ ꦒꦟ꧀ꦲꦠꦶ, ꦄꦴꦥꦠ꧀ꦠꦶ ꦱꦶꦪꦴꦠꦶ ꦪꦺꦴꦗꦤꦴ.

꧙꧖꧙. ꦄꦠꦶꦤ꧀ꦠꦺꦴꦠꦶ ꦮꦱ꧀ꦱꦺꦴꦢꦏꦺꦤ ꦄꦠꦶꦤ꧀ꦠꦺꦴ, ꦆꦩꦶꦤꦴ ꦮꦶꦤꦶꦕ꧀ꦖꦶꦠꦧ꧀ꦧꦮꦠ꧀ꦡꦸꦁ ꦢꦱ꧀ꦱꦺꦠꦶ. ꦠꦱ꧀ꦱ ꦄꦤ꧀ꦠꦺꦴꦒꦺꦲꦺ ꦕ ꦧꦲꦶ ꦕ ꦱꦩ꧀ꦨꦮꦠꦺꦴ ꦄꦤ꧀ꦠꦺꦴꦒꦺꦲꦺ ꦜꦶꦠꦱ꧀ꦱ ꦠꦴꦮ ꦮꦶꦤꦶꦕ꧀ꦖꦪꦁ ꦢꦱ꧀ꦱꦺꦠꦸꦩꦴꦲ ‘‘ꦄꦤ꧀ꦠꦺꦴꦒꦺꦲꦺ ꦱꦕꦺ ꦱꦶꦪꦴ’’ꦠꦶ. ꦮꦱ꧀ꦱꦺꦴꦢꦏꦺꦤ ꦠꦶꦤ꧀ꦠꦴꦠꦶꦤ꧀ꦠꦺꦱꦸ ꦢ꧀ꦮꦷꦱꦸ ꦩꦠ꧀ꦠꦶꦏꦴꦥꦸꦚ꧀ꦗꦺꦱꦸ ꦄꦠꦶꦤ꧀ꦠꦁ ꦠꦴꦮ ꦢꦱ꧀ꦱꦺꦠꦸꦩꦴꦲ ‘‘ꦄꦤꦺꦴꦮꦛ꧀ꦜꦺꦴ ꦕꦴ’’ꦠꦶ.

꧙꧗꧐. ꦮꦱ꧀ꦱꦺꦴꦢꦏꦺꦤ ꦠꦶꦤ꧀ꦠꦺ ꦮꦶꦤꦶꦕ꧀ꦖꦪꦁ ꦢꦱ꧀ꦱꦺꦠꦸꦩꦴꦲ ‘‘ꦮꦸꦛ꧀ꦜꦺ ꦥꦸꦤ ꦕꦴ’’ꦠꦶꦄꦴꦢꦶ. ‘‘ꦮꦸꦛ꧀ꦜꦺ’’ꦠꦶ ꦆꦩꦶꦤꦴ ‘‘ꦩꦠ꧀ꦠꦶꦏꦴꦥꦸꦚ꧀ꦗꦺꦴ’’ꦠꦶ ꦥꦢꦁ ꦨꦸꦩ꧀ꦩꦮꦱꦺꦤ ꦮꦶꦥꦫꦶꦟꦴꦩꦺꦠ꧀ꦮꦴ ꦮꦸꦛ꧀ꦜꦺ ꦩꦠ꧀ꦠꦶꦏꦴꦥꦸꦚ꧀ꦗꦺꦠꦶ ꦪꦺꦴꦗꦺꦠꦧ꧀ꦧꦁ, ‘‘ꦌꦏꦢꦶꦮꦱꦩ꧀ꦥꦷ’’ꦠꦶ ꦱꦺꦱꦺꦴ, ꦒꦺꦲꦱ꧀ꦩꦶꦤ꧀ꦠꦶ ꦌꦠ꧀ꦡ ‘‘ꦜꦶꦠꦺ’’ꦠꦶ ꦮꦠ꧀ꦠꦧ꧀ꦧꦁ, ꦒꦺꦲꦱ꧀ꦩꦶꦁ ꦜꦶꦠꦺ ꦩꦠ꧀ꦠꦶꦏꦴꦥꦸꦚ꧀ꦗꦺ ꦮꦱ꧀ꦱꦺꦴꦢꦏꦺꦤ ꦌꦏꦢꦶꦮꦱꦩ꧀ꦥꦶ ꦠꦶꦤ꧀ꦠꦺꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦮꦏ꧀ꦑꦩꦴꦤꦤꦪꦺꦤ ꦄꦚ꧀ꦚꦠ꧀ꦡ ꦥꦲꦫꦶꦠ꧀ꦮꦴ ꦈꦛ꧀ꦜꦶꦠꦺꦤ ꦠꦺꦤ ꦄꦠꦺꦩꦶꦠ꧀ꦮꦴ ꦈꦗꦸꦏꦁ ꦥꦠꦶꦠꦺꦲꦶ ꦮꦱ꧀ꦱꦦꦸꦱꦶꦠꦺꦲꦶ ꦠꦶꦤ꧀ꦠꦺꦠꦶ ꦒꦲꦺꦠꦧ꧀ꦧꦁ. ꦱꦕꦺ ꦱꦧ꧀ꦧꦺꦴ ꦠꦶꦤ꧀ꦠꦺꦴ ꦲꦺꦴꦠꦷꦠꦶ ꦪꦺꦴꦗꦤꦴ. ‘‘ꦩꦠ꧀ꦠꦶꦏꦴꦥꦸꦚ꧀ꦗꦺꦴ’’ꦠꦶ ꦆꦩꦶꦤꦴ ꦱꦩ꧀ꦧꦤ꧀ꦣꦺꦴ.

꧙꧗꧑. ‘‘ꦱꦧ꧀ꦧꦺꦴ’’ꦠꦶ ꦆꦩꦶꦤꦴ ꦮꦶꦱꦺꦱꦤꦺꦤ ꦧ꧀ꦪꦮꦕ꧀ꦖꦶꦤ꧀ꦤꦁ ꦌꦏꦢꦺꦱꦠꦶꦤ꧀ꦠꦺ ꦮꦶꦤꦶꦕ꧀ꦖꦪꦁ ꦢꦱ꧀ꦱꦺꦠꦸꦩꦴꦲ ‘‘ꦪꦠ꧀ꦠꦏ’’ꦤ꧀ꦠꦶꦄꦴꦢꦶ. ꦠꦸ-ꦱꦢ꧀ꦢꦺꦴ ꦆꦩꦩꦺꦮ ꦮꦶꦱꦺꦱꦁ ꦗꦺꦴꦠꦺꦠꦶ. ꦪꦠ꧀ꦠꦏꦤ꧀ꦠꦶ ꦲꦺꦛ꧀ꦜꦴ ꦄꦤꦺꦴꦠꦫꦶꦠ꧀ꦮꦴ ꦩꦠ꧀ꦡꦏꦠꦺꦴ, ꦥꦫꦶꦪꦤ꧀ꦠꦏꦠꦺꦴ ꦕ ꦪꦠ꧀ꦠꦏꦥ꧀ꦥꦩꦴꦟꦁ. ꦠꦠ꧀ꦡꦴꦠꦶ ꦩꦠ꧀ꦠꦶꦏꦴꦥꦸꦚ꧀ꦗꦺ. ‘‘ꦄꦏꦥ꧀ꦥꦶꦪ’’ꦤ꧀ꦠꦶ ꦌꦠꦱ꧀ꦱ ‘‘ꦕꦴꦠꦸꦩꦴꦱꦕ꧀ꦕꦪꦺꦤꦴ’’ꦠꦶ ꦄꦤꦸꦮꦠ꧀ꦠꦠꦶ. ‘‘ꦄꦠꦶꦤ꧀ꦠꦁ…ꦥꦺ… ꦏꦥ꧀ꦥꦶꦪ’’ꦤ꧀ꦠꦶ ꦆꦩꦶꦤꦴ ꦄꦏꦥ꧀ꦥꦶꦪꦛ꧀ꦜꦴꦤꦁ ꦥꦫꦶꦲꦫꦶꦠ꧀ꦮꦴ ꦮꦴ ꦏꦥ꧀ꦥꦶꦪꦏꦴꦫꦏꦺꦲꦶ ꦏꦥ꧀ꦥꦶꦪꦮꦕꦤꦺꦤ ꦲꦫꦴꦥꦺꦠ꧀ꦮꦴ ꦮꦴ ꦄꦠꦶꦤ꧀ꦠꦁ ꦜꦴꦤꦁ ꦪꦡꦴꦏꦴꦩꦁ ꦮꦭ꦳ꦚ꧀ꦗꦺꦠꦧ꧀ꦧꦤ꧀ꦠꦶ ꦄꦪꦩꦠ꧀ꦡꦺꦴ ꦢꦱ꧀ꦱꦶꦠꦺꦴ ꦲꦺꦴꦠꦶ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦏꦥ꧀ꦥꦶꦪꦏꦴꦫꦏꦺꦲꦷ’’ꦠꦶꦄꦴꦢꦶ (ꦥꦴꦕꦶ. ꦄꦛ꧀ꦜ. ꧘꧖).

꧙꧗꧒. ꦮꦴꦫꦶꦤꦴꦠꦶ ꦈꦗꦸꦏꦁ ꦄꦴꦏꦴꦱꦠꦺꦴ ꦥꦠꦶꦠꦮꦱ꧀ꦱꦺꦴꦢꦏꦺꦤ. ꦄꦚ꧀ꦚꦠ꧀ꦡ ꦥꦲꦫꦶꦠ꧀ꦮꦴ ꦠꦠ꧀ꦡ ꦥꦠꦶꦠ꧀ꦮꦴ ꦠꦺꦩꦶꦠꦺ ꦮꦛ꧀ꦛꦠꦶ. ꦱꦺꦴ ꦩꦠ꧀ꦠꦶꦏꦴꦥꦸꦚ꧀ꦗꦺꦴ. ꦠꦠꦺꦴ ꦥꦫꦤ꧀ꦠꦶ ꦌꦏꦴꦧꦢ꧀ꦣꦏꦴꦭꦠꦺꦴ ꦈꦠ꧀ꦠꦫꦶꦁ ꦱꦺꦴ ꦩꦠ꧀ꦠꦶꦏꦴꦥꦸꦚ꧀ꦗꦺꦴ ꦮꦴꦫꦶꦤꦴ ꦠꦺꦩꦶꦠꦺꦴ ꦨꦹꦩꦶꦪꦴ ꦌꦏꦴꦧꦢ꧀ꦣꦺꦴ ꦕꦺ ꦲꦺꦴꦠꦶ, ꦠꦠꦺꦴ ꦥꦫꦁ ꦱꦴ ꦗꦴꦠꦴ ꦥꦡꦮꦷ ꦌꦮ, ꦏꦺꦴꦥꦺꦠꦸꦁ ꦤ ꦮꦛ꧀ꦛꦠꦷꦠꦶ ꦪꦺꦴꦗꦤꦴ.

꧙꧗꧓. ‘‘ꦎꦮꦛ꧀ꦜꦺꦴ’’ꦠꦶ ꦆꦩꦶꦤꦴ ꦄꦤꦺꦴꦮꦛ꧀ꦜꦥꦴꦏꦴꦫꦺꦴ ꦏꦥ꧀ꦥꦶꦪꦺꦴꦠꦶ ꦧ꧀ꦪꦠꦶꦫꦺꦏꦮꦱꦺꦤ ꦢꦱ꧀ꦱꦺꦠꦶ. ‘‘ꦩꦠ꧀ꦠꦶꦏꦴꦩꦪꦺꦴ’’ꦠꦶ ꦮꦶꦱꦺꦱꦤꦺꦤ ꦆꦛ꧀ꦜꦏꦥꦴꦏꦴꦫꦴꦢꦶꦁ ꦧ꧀ꦪꦮꦕ꧀ꦖꦶꦤ꧀ꦢꦠꦶ. ꦠꦱ꧀ꦱ ꦥꦤ ꦏꦥ꧀ꦥꦶꦪꦨꦴꦮꦁ ꦮꦏ꧀ꦑꦠꦶ ‘‘ꦱꦕꦺ ꦆꦛ꧀ꦜꦏꦥꦴꦏꦴꦫꦺꦴ’’ꦠꦶꦄꦴꦢꦶꦤꦴ. ‘‘ꦕꦴꦠꦸꦩꦴꦱꦕ꧀ꦕꦪꦺ’’ꦠꦶ ꦆꦩꦶꦤꦴ ꦠꦠꦺꦴ ꦄꦤ꧀ꦠꦺꦴ ꦮꦶꦏꦺꦴꦥꦤꦷꦪꦨꦴꦮꦁ ꦢꦱ꧀ꦱꦺꦠꦶ.

꧙꧗꧔. ꦠꦠ꧀ꦡꦴꦠꦶ ꦎꦮꦛ꧀ꦜꦺ ꦩꦠ꧀ꦠꦶꦏꦥꦴꦏꦴꦫꦺ. ꦄꦓꦁꦱꦤ꧀ꦠꦺꦴꦮꦴꦠꦶ ꦥꦴꦏꦴꦫꦩꦠ꧀ꦠꦶꦏꦁ ꦄꦏꦺꦴꦥꦺꦤ꧀ꦠꦺꦴ. ꦩꦠ꧀ꦠꦱꦺꦴ ꦖꦸꦥꦶꦠ꧀ꦮꦴꦠꦶ ꦥꦩꦴꦟꦠꦺꦴ ꦩꦸꦢꦸꦏꦁ ꦏꦠ꧀ꦮꦴ ꦲꦠ꧀ꦡꦠꦭꦁ ꦜꦥꦺꦠ꧀ꦮꦴ. ꦄꦭ꧀ꦭꦲꦠ꧀ꦡꦺꦤꦴꦠꦶ ꦈꦢꦏꦠꦶꦤ꧀ꦠꦺꦤ ꦲꦠ꧀ꦡꦠꦭꦺꦤ. ꦲꦠ꧀ꦡꦺꦏꦢꦺꦱꦺꦴ ꦲꦠ꧀ꦡꦺꦴ ꦤꦴꦩ.

꧙꧗꧕. ꦪꦺꦨꦸꦪ꧀ꦪꦏꦡꦭꦺ ꦜꦴꦤꦺꦠꦶ ꦥꦸꦧ꧀ꦧꦺ ꦮꦸꦠ꧀ꦠꦤꦪꦺꦤ ꦪꦱ꧀ꦱꦴ ꦠꦷꦱꦸ ꦨꦴꦒꦺꦱꦸ ꦢ꧀ꦮꦺ ꦨꦴꦒꦴ ꦏꦡꦭꦴ ꦲꦺꦴꦤ꧀ꦠꦶ, ꦠꦴꦢꦶꦱꦺ ꦏꦥ꧀ꦥꦶꦪꦥꦡꦮꦶꦛ꧀ꦜꦴꦤꦺ.

꧙꧗꧖. ꦄꦧ꧀ꦨꦺꦴꦏꦴꦱꦺꦠꦶ ꦈꦥꦭꦏ꧀ꦑꦟꦠ꧀ꦠꦴ ꦄꦤ꧀ꦠꦺꦴꦒꦺꦲꦺꦥꦶ ꦡꦩ꧀ꦨꦁ ꦕꦴꦭꦺꦠ꧀ꦮꦴ ꦗꦴꦠꦥꦡꦮꦶꦁ ꦮꦶꦏꦺꦴꦥꦺꦠꦸꦁ ꦤ ꦮꦛ꧀ꦛꦠꦷꦠꦶ ꦢꦛ꧀ꦜꦧ꧀ꦧꦁ. ꦢ꧀ꦮꦷꦱꦸꦥꦶ ꦜꦴꦤꦺꦱꦸ ꦱꦸꦢ꧀ꦣꦕꦶꦠ꧀ꦠꦺꦤ ꦤꦶꦢ꧀ꦢꦺꦴꦱꦨꦴꦮꦁ ꦪꦡꦴꦮꦸꦠ꧀ꦠꦺꦤ ‘‘ꦡꦩ꧀ꦨꦁ ꦮꦴ ꦥꦢꦫꦠ꧀ꦡꦫꦁ. ꦒꦟ꧀ꦲꦶꦱ꧀ꦱꦴꦩꦷ’ꦠꦶ ꦱꦚ꧀ꦚꦴꦪ, ꦒꦲꦺꦠꦸꦁ ꦥꦤ ꦮꦛ꧀ꦛꦠꦷ’’ꦠꦶ ꦆꦩꦶꦤꦴ ꦤꦪꦺꦤꦴꦲ. ꦥꦡꦮꦶꦤ꧀ꦠꦶ ꦄꦏꦥ꧀ꦥꦶꦪꦥꦡꦮꦶꦁ.

꧙꧗꧗. ꦈꦗꦸꦩꦸꦢ꧀ꦣꦫꦠꦺꦴ ꦤ ꦢꦺꦴꦱꦺꦴꦠꦶ ꦪꦺꦴꦗꦤꦴ.

꧙꧗꧘. ꦈꦕ꧀ꦕꦴꦭꦺꦠ꧀ꦮꦴꦠꦶ ꦈꦏ꧀ꦑꦶꦥꦶꦠ꧀ꦮꦴ ꦕꦴꦭꦺꦠ꧀ꦮꦴ ꦥꦫꦶꦮꦠ꧀ꦠꦺꦠ꧀ꦮꦴ. ꦥꦮꦛ꧀ꦛꦠꦷꦠꦶ ꦥꦮꦛ꧀ꦛꦺꦠ꧀ꦮꦴ ꦥꦮꦛ꧀ꦛꦺꦠ꧀ꦮꦴ ꦤꦺꦠꦷꦠꦶ ꦄꦠ꧀ꦡꦺꦴ. ꦱꦸꦢ꧀ꦣꦕꦶꦠ꧀ꦠꦱ꧀ꦱꦴꦠꦶ ‘‘ꦨꦹꦩꦶ ꦨꦶꦗ꧀ꦗꦠꦷ’’ꦠꦶ ꦄꦱꦭ꧀ꦭꦏ꧀ꦑꦺꦠ꧀ꦮꦴ ‘‘ꦥꦴꦱꦴꦟꦁ ꦥꦮꦛ꧀ꦛꦺꦠ꧀ꦮꦴ ꦥꦮꦛ꧀ꦛꦺꦠ꧀ꦮꦴ ꦲꦫꦶꦱ꧀ꦱꦴꦩꦷ’’ꦠꦶ ꦱꦸꦢ꧀ꦣꦕꦶꦠ꧀ꦠꦮꦠꦺꦴ.

꧙꧗꧙. ꦨꦹꦩꦶꦪꦁ ꦢꦴꦫꦹꦤꦶ ꦦꦴꦭꦺꦤ꧀ꦠꦴꦤꦩ꧀ꦥꦶ ꦨꦹꦩꦶꦪꦁ ꦱꦴꦑꦴꦢꦷꦤꦶ ꦏꦝ꧀ꦞꦠꦺꦴ ꦕꦴꦠꦶ ꦪꦺꦴꦗꦤꦴ.

꧙꧘꧐. ꦏꦟ꧀ꦛꦏꦤ꧀ꦠꦶ ꦫꦸꦏ꧀ꦑꦏꦟ꧀ꦛꦏꦁ, ꦩꦕ꧀ꦖꦏꦟ꧀ꦛꦏꦚ꧀ꦕ. ꦱꦹꦕꦶ ꦤꦴꦩ ꦄꦪꦺꦴꦩꦪꦢꦤ꧀ꦠꦩꦪꦠꦩ꧀ꦧꦩꦪꦏꦛ꧀ꦜꦩꦪꦴꦢꦶꦱꦹꦕꦷꦤꦁ ꦄꦚ꧀ꦚꦠꦫꦴ. ꦄꦛ꧀ꦜꦶꦁ ꦮꦴꦠꦶ ꦒꦺꦴꦩꦲꦶꦁꦱꦴꦢꦷꦤꦁ ꦄꦛ꧀ꦜꦶꦁ ꦮꦴ. ꦲꦷꦫꦁ ꦮꦴꦠꦶ ꦤꦴꦭ꦳ꦶꦏꦺꦫꦴꦢꦶꦲꦷꦫꦁ ꦮꦴ. ꦄꦴꦏꦺꦴꦛꦺꦠꦸꦤ꧀ꦠꦶ ꦪꦡꦴ ꦌꦏꦏꦺꦴꦛꦶ ꦨꦹꦩꦶꦁ ꦥꦮꦶꦱꦠꦶ, ꦠꦡꦴ ꦠꦴꦭ꦳ꦺꦠꦸꦁ. ꦥꦮꦺꦱꦺꦠꦸꦤ꧀ꦠꦶ ꦨꦹꦩꦶꦁ ꦒꦩꦪꦶꦠꦸꦁ.

꧙꧘꧑. ꦥꦱ꧀ꦱꦴꦮꦁ ꦩꦸꦠ꧀ꦠꦁ. ꦩꦺꦢꦤꦶꦤ꧀ꦠꦶ ꦌꦠ꧀ꦡ ꦄꦏꦥ꧀ꦥꦶꦪꦥꦡꦮꦶꦩꦴꦲ. ꦨꦶꦤ꧀ꦢꦶꦱ꧀ꦱꦴꦩꦷꦠꦶ ꦌꦠ꧀ꦡ ‘‘ꦌꦮꦁ ꦕꦶꦤ꧀ꦠꦺꦠ꧀ꦮꦴ’’ꦠꦶ ꦱꦺꦱꦺꦴ.

꧙꧘꧒. ꦏꦫꦺꦴꦤ꧀ꦠꦱ꧀ꦱꦴꦠꦶ ꦱꦸꦢ꧀ꦣꦕꦶꦠ꧀ꦠꦺꦤ ꦥꦱ꧀ꦱꦴꦮꦁ ꦏꦫꦺꦴꦤ꧀ꦠꦱ꧀ꦱꦴꦠꦶꦪꦺꦴꦗꦺꦠꦧ꧀ꦧꦁ. ‘‘ꦱꦩ꧀ꦩꦗ꧀ꦗꦠꦺꦴ’’ꦠꦶ ꦆꦢꦁ ‘‘ꦱꦩ꧀ꦩꦗ꧀ꦗꦤ꧀ꦠꦺꦤꦴ’’ꦠꦶ ꦒꦲꦺꦠꦧ꧀ꦧꦁ, ‘‘ꦱꦩ꧀ꦩꦗ꧀ꦗꦤꦶꦪꦴ’’ꦠꦶ ꦱꦺꦱꦺꦴ, ꦄꦤꦤ꧀ꦠꦫꦁ ꦩꦺꦢꦤꦷꦥꦢꦁ ꦈꦥꦪꦺꦴꦒꦮꦱꦺꦤ ‘‘ꦩꦺꦢꦤꦶ’’ꦤ꧀ꦠꦶ ꦒꦲꦺꦠꦧ꧀ꦧꦁ, ‘‘ꦮꦶꦱꦩ’’ꦤ꧀ꦠꦶ ꦱꦺꦱꦺꦴ, ‘‘ꦱꦩꦁ ꦏꦴꦠꦸ’’ꦤ꧀ꦠꦶ ꦆꦩꦶꦤꦴ ꦪꦺꦴꦗꦺꦠꦧ꧀ꦧꦁ, ꦱꦩ꧀ꦩꦗ꧀ꦗꦤ꧀ꦠꦺꦤ ꦈꦕ꧀ꦕꦛ꧀ꦜꦴꦤꦁ ꦩꦢ꧀ꦢꦶꦠ꧀ꦮꦴ, ꦄꦴꦮꦴꦛꦛ꧀ꦜꦴꦤꦁ ꦥꦮꦺꦱꦺꦠ꧀ꦮꦴ ꦱꦩꦁ ꦏꦴꦠꦸꦁ ꦱꦩ꧀ꦩꦗ꧀ꦗꦤꦶꦪꦴ ꦓꦁꦱꦺꦠꦸꦁ ꦤ ꦮꦛ꧀ꦛꦠꦷꦠꦶ ꦄꦠ꧀ꦡꦺꦴ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦮꦶꦱꦩꦁ ꦨꦹꦩꦶꦁ ꦱꦩꦁ ꦏꦫꦶꦱ꧀ꦱꦴꦩꦷꦠꦶ ꦱꦩ꧀ꦩꦗ꧀ꦗꦤꦶꦪꦴ ꦓꦁꦱꦶꦠꦸꦩ꧀ꦥꦶ ꦤ ꦮꦛ꧀ꦛꦠꦷ’’ꦠꦶ (ꦥꦴꦕꦶ. ꦄꦛ꧀ꦜ. ꧘꧖).

꧙꧘꧓. ꦥꦴꦢꦔ꧀ꦒꦸꦛ꧀ꦜꦺꦤ ꦮꦴꦠꦶ ꦌꦠ꧀ꦡ ꦱꦩꦸꦕ꧀ꦕꦪꦠ꧀ꦡꦺꦤ ꦮꦴ-ꦱꦢ꧀ꦢꦺꦤ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦁ ‘‘ꦏꦠ꧀ꦠꦫꦪꦛ꧀ꦜꦶꦪꦴ ꦨꦹꦩꦶꦁ ꦏꦺꦴꦛ꧀ꦛꦺꦤ꧀ꦠꦷ’’ꦠꦶ ꦆꦢꦁ ꦱꦔ꧀ꦒꦟ꧀ꦲꦴꦠꦶ. ꦭꦶꦑꦶꦠꦸꦩ꧀ꦥꦷꦠꦶ ꦫꦴꦗꦶꦁ ꦏꦴꦠꦸꦩ꧀ꦥꦶ ꦨꦹꦩꦶꦁ ꦨꦶꦤ꧀ꦢꦤ꧀ꦠꦺꦤꦴꦠꦶ ꦪꦺꦴꦗꦤꦴ. ꦥꦴꦢꦺꦲꦷꦠꦶ ꦥꦴꦢꦠꦭꦺꦲꦶ.

꧙꧘꧕. ꦨꦹꦩꦶꦤ꧀ꦠꦶ ꦄꦏꦥ꧀ꦥꦶꦪꦨꦹꦩꦶꦁ. ꦢꦲꦠꦶ ꦢꦲꦴꦥꦺꦠꦷꦠꦶ ꦌꦠ꧀ꦡ ‘‘ꦪꦺꦴ’’ꦠꦶ ꦕ ‘‘ꦠꦱ꧀ꦱꦴ’’ꦠꦶ ꦕ ꦱꦩ꧀ꦧꦤ꧀ꦣꦮꦱꦺꦤ ꦭꦧ꧀ꦨꦠꦶ. ꦥꦠ꧀ꦠꦁ ꦢꦲꦤ꧀ꦠꦱ꧀ꦱꦴꦠꦶ ꦖꦮꦶꦪꦴ ꦡꦶꦫꦨꦴꦮꦠ꧀ꦡꦁ ꦣꦹꦩꦁ ꦒꦴꦲꦴꦥꦺꦠ꧀ꦮꦴ ꦠꦶꦟꦸꦏ꧀ꦏꦴꦢꦷꦲꦶ ꦥꦠ꧀ꦠꦁ ꦒꦟ꧀ꦲꦤ꧀ꦠꦱ꧀ꦱ.

꧙꧘꧖. ꦠꦠ꧀ꦠꦏꦴꦤꦺꦮꦴꦠꦶ ꦜꦴꦤꦥ꧀ꦥꦩꦴꦟꦴꦤꦺꦮ. ꦆꦣꦴꦥꦶ ‘‘ꦪꦺꦴ’’ꦠꦶ ꦕ ‘‘ꦠꦱ꧀ꦱꦴ’’ꦠꦶ ꦕ ꦱꦴꦩꦠ꧀ꦡꦶꦪꦴ ꦭꦧ꧀ꦨꦠꦶ.

꧙꧘꧗. ꦨꦹꦩꦶꦪꦤ꧀ꦠꦶ ꦄꦏꦥ꧀ꦥꦶꦪꦨꦹꦩꦶꦪꦁ. ꦥꦠ꧀ꦠꦁ ꦥꦕꦷꦪꦠꦶ ꦌꦠ꧀ꦡꦴꦠꦶ ꦥꦠ꧀ꦠꦥꦕꦤꦁ, ꦏꦥꦴꦭꦁ, ꦠꦱ꧀ꦩꦶꦁ ꦏꦥꦴꦭꦺ.

꧙꧘꧘. ꦱꦺꦴ ꦄꦒ꧀ꦒꦶ ꦠꦴꦤꦶ ꦢꦴꦫꦹꦤꦶ ꦢꦲꦤ꧀ꦠꦺꦴ ꦒꦤ꧀ꦠ꧀ꦮꦴ ꦕꦺ ꦌꦏꦁꦱꦺꦤ ꦨꦹꦩꦶꦁ ꦢꦲꦠꦶ, ꦠꦱ꧀ꦩꦴ ꦢꦴꦫꦹꦤꦁ ꦈꦥꦫꦶ ꦄꦒ꧀ꦒꦶꦁ ꦜꦥꦺꦠꦸꦁ ꦤ ꦮꦛ꧀ꦛꦠꦷꦠꦶ ꦪꦺꦴꦗꦤꦴ.

꧙꧘꧙. ꦆꦛ꧀ꦜꦏꦴ ꦄꦴꦮꦥꦷꦪꦤ꧀ꦠꦶ ꦥꦕ꧀ꦕꦤ꧀ꦠꦶ ꦌꦠ꧀ꦡꦴꦠꦶ ꦆꦛ꧀ꦜꦏꦴꦮꦴꦥꦺꦴ, ꦱꦺꦴ ꦌꦮ ꦆꦛ꧀ꦜꦏꦴꦮꦴꦥꦏꦺꦴ, ꦆꦛ꧀ꦜꦏꦴꦥꦕꦤꦛ꧀ꦜꦴꦤꦁ. ꦄꦴꦢꦶ-ꦱꦢ꧀ꦢꦺꦤ ꦏꦸꦩ꧀ꦨꦏꦴꦫꦴꦮꦴꦥꦴꦢꦶꦁ ꦱꦔ꧀ꦒꦟ꧀ꦲꦴꦠꦶ.

꧙꧙꧐. ꦈꦥꦴꦢꦷꦪꦠꦷꦠꦶ ꦈꦥꦴꦢꦴꦤꦁ, ꦆꦤ꧀ꦣꦤꦁ, ꦤ ꦈꦥꦴꦢꦴꦤꦁ ꦄꦤꦸꦥꦴꦢꦴꦤꦁ, ꦆꦤ꧀ꦣꦤꦠꦺꦴ ꦄꦚ꧀ꦚꦁ, ꦠꦠꦺꦴ ꦄꦤꦸꦥꦴꦢꦴꦤꦠꦺꦴꦠꦶ ꦄꦠ꧀ꦡꦺꦴ. ꦑꦴꦟꦸꦏꦺꦠꦶ ꦩꦠꦑꦴꦟꦸꦏꦺ ꦕ ꦱꦸꦏ꧀ꦑꦫꦸꦏ꧀ꦑꦺ ꦕ ꦨꦹꦩꦶꦒꦠꦁ ꦄꦢꦠ꧀ꦮꦴ ‘‘ꦤꦶꦧ꧀ꦧꦴꦥꦺꦱ꧀ꦱꦴꦩꦷ’’ꦠꦶ ꦄꦒ꧀ꦒꦶꦢꦴꦤꦁ ꦮꦛ꧀ꦛꦠꦶ. ꦥꦕ꧀ꦖꦴ ꦈꦱ꧀ꦱꦴꦲꦺ ꦏꦠꦺꦥꦶ ꦤ ꦤꦶꦧ꧀ꦧꦴꦪꦠꦶ, ꦤ ꦢꦺꦴꦱꦺꦴꦠꦶ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦱꦕꦺ ꦥꦤ ꦨꦹꦩꦶꦁ ꦄꦥ꧀ꦥꦠ꧀ꦠꦩꦺꦮꦴ’’ꦠꦶꦄꦴꦢꦶ (ꦥꦴꦕꦶ. ꦄꦛ꧀ꦜ. ꧘꧗).

꧙꧙꧑. ꦠꦶꦟꦸꦏ꧀ꦏꦤ꧀ꦠꦶ ꦠꦶꦟꦺꦤ ꦧꦢ꧀ꦣꦈꦏ꧀ꦏꦁ. ꦠꦶꦟꦸꦏ꧀ꦏꦤ꧀ꦠꦶ ꦈꦥꦭꦏ꧀ꦑꦟꦁ. ꦤꦴꦭ꦳ꦶꦏꦺꦫꦥꦟ꧀ꦟꦴꦢꦷꦲꦶ ꦧꦢ꧀ꦣꦴꦥꦶ ꦱꦔ꧀ꦒꦪ꧀ꦲꦤ꧀ꦠꦶ.

꧙꧙꧒. ꦠꦱ꧀ꦱ ꦄꦒ꧀ꦒꦶꦱ꧀ꦱ ꦥꦠꦶꦠꦛ꧀ꦜꦴꦤꦺ ꦆꦤ꧀ꦣꦤꦁ ꦢꦠ꧀ꦮꦴ ꦥꦸꦤ ꦠꦁ ꦄꦒ꧀ꦒꦶꦁ ꦏꦴꦠꦸꦁ ꦮꦛ꧀ꦛꦠꦷꦠꦶ ꦩꦲꦴꦥꦕ꧀ꦕꦫꦶꦪꦁ ꦫꦸꦠꦁ ꦏꦡꦶꦠꦤ꧀ꦠꦶ ꦪꦺꦴꦗꦤꦴ.

꧙꧙꧓. ‘‘ꦠꦱ꧀ꦱ ꦄꦥꦡꦮꦶꦪ’’ꦤ꧀ꦠꦶ ꦥꦢꦕ꧀ꦖꦺꦢꦺꦴ. ꦮꦶꦩꦠꦶꦱ꧀ꦱꦸꦨꦪꦠ꧀ꦡꦴꦥꦷꦠꦶ ꦥꦡꦮꦶꦄꦥꦡꦮꦶꦢ꧀ꦮꦪꦺꦥꦶ ꦮꦺꦩꦠꦶꦏꦱ꧀ꦱ. ꦠꦠ꧀ꦡ ꦗꦴꦠꦴ ꦥꦡꦮꦷ, ꦆꦠꦫꦴ ꦄꦥꦡꦮꦷ.

꧙꧙꧔. ꦆꦩꦤ꧀ꦠꦶ ꦄꦴꦮꦴꦛꦁ, ꦩꦠ꧀ꦠꦶꦏꦁ, ꦥꦁꦱꦸꦁ ꦮꦴ.

ꦥꦡꦮꦷꦑꦟꦤꦏꦡꦴꦮꦟ꧀ꦟꦤꦴ.

ꦩꦸꦱꦴꦮꦴꦢꦮꦒ꧀ꦒꦺꦴ ꦥꦜꦩꦺꦴ.

꧙꧙꧕. ꦨꦮꦤ꧀ꦠꦱ꧀ꦱꦴꦠꦶ ꦗꦴꦪꦤ꧀ꦠꦱ꧀ꦱ, ꦮꦝ꧀ꦞꦩꦴꦤꦱ꧀ꦱ ꦕ. ꦨꦹꦠꦱ꧀ꦱꦴꦠꦶ ꦗꦴꦠꦱ꧀ꦱ, ꦮꦝ꧀ꦞꦶꦠꦱ꧀ꦱ ꦕꦴꦠꦶ ꦄꦠ꧀ꦡꦺꦴ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦨꦮꦤ꧀ꦠꦶ ꦄꦲꦸꦮꦸꦚ꧀ꦕꦴꦠꦶ ꦨꦹꦠꦴ, ꦗꦴꦪꦤ꧀ꦠꦶ ꦮꦝ꧀ꦞꦤ꧀ꦠꦶ, ꦗꦴꦠꦴ ꦮꦝ꧀ꦞꦶꦠꦴ ꦕꦴ’’ꦠꦶ (ꦥꦴꦕꦶ. ꦄꦛ꧀ꦜ. ꧙꧐). ꦌꦠ꧀ꦡ ꦕ ‘‘ꦨꦮꦤ꧀ꦠꦷ’’ꦠꦶ ꦆꦩꦶꦤꦴ ꦮꦶꦫꦸꦭ꦳꧀ꦲꦩꦹꦭꦺ ꦤꦷꦭꦨꦴꦮꦁ ꦄꦴꦥꦗ꧀ꦗꦶꦠ꧀ꦮꦴ ꦮꦝ꧀ꦞꦩꦴꦤꦏꦺ ꦠꦫꦸꦟꦒꦕ꧀ꦖꦺ ꦢꦱ꧀ꦱꦺꦠꦶ. ‘‘ꦄꦲꦸꦮꦸ’’ꦤ꧀ꦠꦶ ꦆꦩꦶꦤꦴ ꦥꦤ ꦮꦝ꧀ꦞꦶꦠ꧀ꦮꦴ ꦜꦶꦠꦺ ꦩꦲꦤ꧀ꦠꦺ ꦫꦸꦏ꧀ꦑꦒꦕ꧀ꦖꦴꦢꦶꦏꦺ ꦢꦱ꧀ꦱꦺꦠꦶ. ‘‘ꦨꦮꦤ꧀ꦠꦷ’’ꦠꦶ ꦆꦩꦱ꧀ꦱ ꦮꦶꦮꦫꦟꦁ ‘‘ꦗꦪꦤ꧀ꦠꦶ ꦮꦝ꧀ꦞꦤ꧀ꦠꦷ’’ꦠꦶ, ‘‘ꦄꦲꦸꦮꦸ’’ꦤ꧀ꦠꦶ ꦆꦩꦱ꧀ꦱ ‘‘ꦗꦴꦠꦴ ꦮꦝ꧀ꦞꦶꦠꦴ’’ꦠꦶ. ꦌꦮꦁ ꦨꦹꦠ-ꦱꦢ꧀ꦢꦺꦴ ꦥꦕ꧀ꦕꦸꦥ꧀ꦥꦤ꧀ꦤꦴꦠꦷꦠꦮꦶꦱꦪꦺꦴꦠꦶ ꦢꦱ꧀ꦱꦺꦠꦶ. ‘‘ꦨꦮꦤ꧀ꦠꦱ꧀ꦱ ꦨꦹꦠꦱ꧀ꦱꦴ’’ꦠꦶ ꦆꦩꦶꦤꦴ ꦥꦢꦢ꧀ꦮꦪꦺꦤ ‘‘ꦨꦹꦠꦒꦴꦩꦱ꧀ꦱꦴ’’ꦠꦶ ꦥꦢꦱ꧀ꦱ ꦠꦸꦭ꧀ꦪꦴꦣꦶꦏꦫꦟꦠꦴꦢꦱ꧀ꦱꦤꦺꦤ ꦒꦴꦩ-ꦱꦢ꧀ꦢꦱ꧀ꦱ ꦢꦶꦛ꧀ꦜꦶꦒꦠꦮꦤꦤ꧀ꦠꦴꦢꦶꦱꦢ꧀ꦢꦴꦤꦁ ꦢꦶꦛ꧀ꦜꦶꦮꦤꦴꦢꦶꦱꦢ꧀ꦢꦠ꧀ꦡꦺ ꦮꦶꦪ ꦨꦹꦠꦱꦢ꧀ꦢꦠ꧀ꦡꦺ ꦮꦸꦠ꧀ꦠꦶꦥꦏ꧀ꦑꦩꦴꦲ. ꦪꦡꦴꦲ ꦄꦛ꧀ꦜꦏꦡꦴꦪꦁ (ꦥꦴꦕꦶ. ꦄꦛ꧀ꦜ. ꧙꧐) ‘‘ꦨꦹꦠꦴ ꦌꦮ ꦮꦴ ꦒꦴꦩꦺꦴ ꦨꦹꦠꦒꦴꦩꦺꦴ, ꦥꦠꦶꦛ꧀ꦜꦶꦠꦲꦫꦶꦠꦠꦶꦟꦫꦸꦏ꧀ꦑꦴꦢꦷꦤꦩꦺꦠꦁ ꦄꦣꦶꦮꦕꦤ’’ꦤ꧀ꦠꦶ. ꦨꦹꦠꦴꦤꦁ ꦢꦺꦮꦠꦴꦤꦁ ꦒꦴꦩꦺꦴ ꦤꦶꦮꦴꦱꦺꦴꦠꦶ ꦮꦴ ꦨꦹꦠꦒꦴꦩꦺꦴ. ꦨꦹꦩꦶꦪꦁ ꦥꦠꦶꦛ꧀ꦜꦲꦶꦠ꧀ꦮꦴ ꦲꦶ ꦲꦫꦶꦠꦨꦴꦮꦩꦴꦥꦤ꧀ꦤꦴ ꦠꦶꦟꦫꦸꦏ꧀ꦑꦒꦕ꧀ꦖꦴꦢꦪꦺꦴ ꦢꦺꦮꦠꦴꦲꦶ ꦥꦫꦶꦒꦪ꧀ꦲꦤ꧀ꦠꦷꦠꦶ. ꦗꦴꦪꦤ꧀ꦠꦱ꧀ꦱ ꦮꦝ꧀ꦞꦤ꧀ꦠꦱ꧀ꦱ ꦮꦴ ꦱꦩ꧀ꦥꦠ꧀ꦠꦮꦸꦢ꧀ꦣꦶꦩꦫꦶꦪꦴꦢꦱ꧀ꦱ ꦮꦴ ꦫꦸꦏ꧀ꦑꦴꦢꦶꦤꦺꦴꦠꦶ ꦄꦠ꧀ꦡꦺꦴ.

ꦥꦴꦠꦧ꧀ꦪꦠꦴꦤꦶꦩꦶꦠ꧀ꦠꦤ꧀ꦠꦶ ꦌꦠ꧀ꦡ ꦥꦴꦠꦧ꧀ꦪꦨꦴꦮꦺꦴ ꦥꦴꦠꦧ꧀ꦪꦠꦴ, ‘‘ꦖꦺꦢꦤꦨꦺꦢꦤꦴꦢꦷꦲꦶ ꦪꦡꦴꦫꦸꦕꦶ ꦥꦫꦶꦨꦸꦚ꧀ꦗꦶꦠꦧ꧀ꦧꦠꦴꦠꦶ ꦄꦠ꧀ꦡꦺꦴ’’ꦠꦶ ꦄꦛ꧀ꦜꦏꦡꦴꦮꦕꦤꦠꦺꦴ ꦥꦴꦠꦧ꧀ꦪꦠꦴ-ꦱꦢ꧀ꦢꦱ꧀ꦱ ꦥꦫꦶꦨꦸꦚ꧀ꦗꦶꦠꦧ꧀ꦧꦠꦴꦠꦶ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ, ꦱꦴ ꦤꦶꦩꦶꦠ꧀ꦠꦁ ꦲꦺꦠꦸ ꦪꦱ꧀ꦱ ꦥꦴꦕꦶꦠ꧀ꦠꦶꦪꦱ꧀ꦱ ꦠꦁ ꦥꦴꦠꦧ꧀ꦪꦠꦴꦤꦶꦩꦶꦠ꧀ꦠꦁ. ꦫꦸꦏ꧀ꦑꦴꦢꦷꦤꦁ ꦖꦺꦢꦤꦦꦴꦭꦤꦴꦢꦶꦮꦱꦺꦤ ꦮꦶꦏꦺꦴꦥꦤꦷꦪꦠꦴꦱꦔ꧀ꦑꦴꦠꦥꦴꦠꦧ꧀ꦪꦠꦴꦤꦶꦩꦶꦠ꧀ꦠꦁ ꦥꦫꦶꦨꦸꦚ꧀ꦗꦶꦠꦧ꧀ꦧꦠꦴꦲꦺꦠꦸ ꦥꦴꦕꦶꦠ꧀ꦠꦶꦪꦁ ꦈꦢꦷꦫꦶꦠꦁ ꦮꦸꦠ꧀ꦠꦤ꧀ꦠꦶ ꦄꦠ꧀ꦡꦺꦴ.

꧙꧙꧖-꧗. ꦱꦺꦴꦠꦶ ꦨꦹꦠꦒꦴꦩꦺꦴ. ꦠꦶꦭꦧꦷꦗꦴꦢꦶꦏꦺꦴꦠꦶ ꦠꦶꦭꦧꦷꦗꦩꦺꦠ꧀ꦡ ꦱꦸꦑꦸꦩꦥꦟ꧀ꦟꦱꦺꦮꦴꦭꦴꦢꦶꦏꦺꦴ. ꦄꦴꦢꦶ-ꦱꦢ꧀ꦢꦺꦤ ꦕ ꦠꦴꦢꦶꦱꦴ ꦆꦠꦫꦴ ꦱꦺꦮꦴꦭꦗꦴꦠꦶ ꦒꦲꦶꦠꦴ. ‘‘ꦈꦥꦫꦶ ꦑꦸꦢ꧀ꦢꦴꦤꦸꦑꦸꦢ꧀ꦢꦏꦥꦟ꧀ꦟꦔ꧀ꦏꦸꦫꦺꦴ, ꦲꦺꦛ꧀ꦜꦴ ꦑꦸꦢ꧀ꦢꦴꦤꦸꦑꦸꦢ꧀ꦢꦏꦩꦹꦭꦔ꧀ꦏꦸꦫꦺꦴ ꦱꦺꦮꦴꦭꦺꦴ ꦠꦶꦭꦧꦷꦗꦁ ꦤꦴꦩꦴ’’ꦠꦶ ꦒꦟ꧀ꦜꦶꦥꦢꦺ ꦮꦸꦠ꧀ꦠꦤ꧀ꦠꦶ. ꦮꦶꦏꦺꦴꦥꦺꦤ꧀ꦠꦱ꧀ꦱ ꦠꦁ ꦱꦧ꧀ꦧꦤ꧀ꦠꦶ ꦨꦹꦩꦶꦪꦁ ꦥꦠꦶꦛ꧀ꦜꦴꦪ ꦈꦢꦏꦺ ꦗꦴꦪꦩꦴꦤꦏꦱꦺꦮꦴꦭꦴꦢꦶꦁ ꦨꦹꦩꦶꦪꦴ ꦈꦥ꧀ꦥꦴꦛꦤꦕ꧀ꦖꦺꦢꦤꦮꦱꦺꦤ ꦗꦭꦺ ꦌꦮ ꦥꦠꦶꦛ꧀ꦜꦶꦠꦁ ꦱꦸꦑꦸꦩꦥꦟ꧀ꦟꦤꦷꦭꦶꦏꦴꦢꦶꦁ ꦈꦢꦏꦠꦺꦴ ꦈꦢ꧀ꦣꦫꦟꦕ꧀ꦖꦺꦢꦤꦮꦱꦺꦤ ꦠꦁ ꦱꦧ꧀ꦧꦁ ꦱꦺꦮꦴꦭꦁ ꦮꦶꦏꦺꦴꦥꦺꦤ꧀ꦠꦱ꧀ꦱꦴꦠꦶ ꦄꦠ꧀ꦡꦺꦴ.

꧙꧙꧘. ꦲꦠ꧀ꦡꦺꦤ ꦮꦶꦪꦹꦲꦶꦠ꧀ꦮꦴꦠꦶ ꦗꦭꦠꦺꦴ ꦄꦩꦺꦴꦕꦺꦠ꧀ꦮꦴ ꦲꦠ꧀ꦡꦺꦤ ꦢꦹꦫꦠꦺꦴ ꦄꦥꦤꦺꦠ꧀ꦮꦴ. ‘‘ꦲꦺꦴꦠꦷ’’ꦠꦶꦄꦴꦢꦶ ꦠꦱ꧀ꦱ ꦲꦺꦠꦸꦱꦤ꧀ꦢꦱ꧀ꦱꦤꦠ꧀ꦡꦁ. ꦱꦏꦭꦁ ꦄꦤꦮꦱꦺꦱꦁ ꦱꦧ꧀ꦧꦁ ꦗꦭꦁ ꦠꦱ꧀ꦱ ꦪꦱ꧀ꦩꦴ ꦜꦴꦤꦁ ꦲꦺꦴꦠꦶ, ꦠꦱ꧀ꦩꦴꦠꦶ ꦄꦠ꧀ꦡꦺꦴ.

꧙꧙꧙. ꦕꦺꦕ꧀ꦕꦴꦠꦶ ꦗꦴꦤꦤ꧀ꦠꦺꦴ. ꦠꦁ ꦱꦺꦮꦴꦭꦗꦴꦠꦶꦏꦁ ꦗꦭꦴ ꦈꦢ꧀ꦣꦫꦶꦠꦸꦁ ꦈꦢꦏꦺꦤ ꦮꦶꦤꦴ ꦨꦶꦏ꧀ꦑꦸꦱ꧀ꦱ ꦤ ꦮꦛ꧀ꦛꦠꦷꦠꦶ ꦪꦺꦴꦗꦤꦴ. ꦜꦴꦤꦱꦔ꧀ꦏꦩꦤꦚ꧀ꦲꦶ ꦠꦤ꧀ꦠꦶ ꦲꦺꦠꦸꦢꦱ꧀ꦱꦤꦁ. ꦠꦁ ꦠꦡꦴꦏꦫꦟꦁ ꦪꦱ꧀ꦩꦴ ꦜꦴꦤꦱꦔ꧀ꦏꦩꦤꦁ ꦜꦴꦤꦠꦺꦴ ꦕꦴꦮꦤꦁ, ꦠꦱ꧀ꦩꦴ ꦠꦁ ꦤ ꦮꦛ꧀ꦛꦠꦷꦠꦶ ꦪꦺꦴꦗꦤꦴ.

꧑꧐꧐꧐. ꦪꦡꦴꦮꦸꦠ꧀ꦠꦱ꧀ꦱ ꦧ꧀ꦪꦠꦶꦫꦺꦏꦁ ꦢꦱ꧀ꦱꦺꦠꦸꦩꦴꦲ ‘‘ꦈꦢꦏꦺꦤꦴ’’ꦠꦶꦄꦴꦢꦶ. ꦠꦠ꧀ꦡ ꦈꦢꦏꦺꦤꦴꦠꦶ ꦱꦲꦠ꧀ꦡꦺ ꦏꦫꦟꦮꦕꦤꦁ. ꦠꦁ ꦱꦺꦮꦴꦭꦗꦴꦠꦶꦏꦁ. ꦮꦴꦫꦶꦱꦹꦠꦶ ꦌꦠ꧀ꦡ ꦮꦴꦱꦁ ꦮꦴꦫꦪꦤ꧀ꦠꦷꦠꦶ ꦮꦴꦫꦷ, ꦠꦺꦱꦸ.

꧑꧐꧐꧑. ꦗꦭꦺ ꦮꦭ꧀ꦭꦶꦠꦶꦟꦴꦢꦷꦤꦷꦠꦶ ꦗꦭꦩꦠ꧀ꦡꦏꦺ ꦮꦭ꧀ꦭꦶꦚ꧀ꦕ ꦗꦴꦪꦩꦴꦤꦏꦫꦮꦭ꧀ꦭꦶꦠꦶꦟꦴꦢꦷꦤꦶ ꦕ. ꦈꦢ꧀ꦣꦫꦤ꧀ꦠꦱ꧀ꦱꦴꦠꦶ ꦨꦹꦩꦶꦪꦁ ꦥꦠꦶꦛ꧀ꦜꦶꦠꦁ ꦨꦹꦩꦶꦠꦺꦴ, ꦈꦢꦏꦺ ꦥꦠꦶꦛ꧀ꦜꦶꦠꦁ ꦈꦢꦏꦠꦺꦴ ꦕ ꦈꦢ꧀ꦣꦫꦤ꧀ꦠꦱ꧀ꦱ. ꦠꦠ꧀ꦡ ꦄꦤ꧀ꦠꦥꦏ꧀ꦑꦁ ꦢꦱ꧀ꦱꦺꦠꦸꦩꦴꦲ ‘‘ꦠꦺꦴꦪꦠꦺꦴ’’ꦠꦶ. ꦮꦶꦏꦺꦴꦥꦺꦤ꧀ꦠꦱ꧀ꦱꦴꦠꦶ ꦑꦟ꧀ꦝꦤꦴꦢꦶꦮꦱꦺꦤ ꦏꦺꦴꦥꦺꦤ꧀ꦠꦱ꧀ꦱ. ꦠꦠ꧀ꦡꦴꦠꦶ ꦠꦱ꧀ꦩꦶꦁ ꦈꦢꦏꦺ, ꦌꦮ-ꦏꦴꦫꦺꦴ ꦭꦸꦠ꧀ꦠꦤꦶꦢ꧀ꦢꦶꦛ꧀ꦜꦺꦴ ‘‘ꦠꦠ꧀ꦡꦺꦮꦴ’’ꦠꦶ (ꦥꦴꦕꦶ. ꦄꦛ꧀ꦜ. ꧙꧒) ꦄꦛ꧀ꦜꦏꦡꦴꦮꦕꦤꦠꦺꦴ.

꧑꧐꧐꧒. ꦌꦠ꧀ꦡꦴꦠꦶ ꦈꦢꦏꦺ ꦌꦮ. ꦮꦶꦏꦺꦴꦥꦺꦤ꧀ꦠꦱ꧀ꦱꦴꦠꦶ ꦏꦥ꧀ꦥꦶꦪꦁ ꦄꦏꦴꦫꦴꦥꦺꦠ꧀ꦮꦴ ꦖꦺꦢꦤꦴꦢꦶꦁ ꦏꦫꦺꦴꦤ꧀ꦠꦱ꧀ꦱ. ꦠꦴꦤꦷꦠꦶ ꦠꦡꦴ ꦥꦫꦺꦲꦶ ꦈꦥ꧀ꦥꦴꦛꦶꦠꦠ꧀ꦠꦴ ꦨꦹꦠꦒꦴꦩꦨꦴꦮꦠꦺꦴ ꦩꦸꦠ꧀ꦠꦴꦤꦶ ꦮꦭ꧀ꦭꦶꦠꦶꦟꦴꦢꦷꦤꦶ. ꦧꦷꦗꦒꦴꦩꦺꦤꦴꦠꦶ ꦩꦹꦭꦧꦷꦗꦒꦴꦩꦴꦢꦶꦮꦱꦺꦤ.

꧑꧐꧐꧓. ꦌꦮꦁ ꦈꦢꦏꦛ꧀ꦜꦺ ꦱꦔ꧀ꦑꦺꦥꦠꦺꦴ ꦮꦶꦤꦶꦕ꧀ꦖꦪꦁ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦆꦠꦫꦠ꧀ꦫꦴꦥꦶ ꦮꦶꦤꦶꦕ꧀ꦖꦪꦁ ꦢꦱ꧀ꦱꦺꦠꦸꦩꦴꦲ ‘‘ꦡꦭꦛ꧀ꦜꦺ’’ꦠꦶꦄꦴꦢꦶ. ꦲꦫꦶꦠꦑꦴꦟꦸꦏꦺꦴꦠꦶ ꦌꦠ꧀ꦡ ‘‘ꦪꦺꦴ’’ꦠꦶ ꦱꦺꦱꦺꦴ. ‘‘ꦠꦱ꧀ꦱꦴ’’ꦠꦶ ꦆꦩꦶꦤꦴ ꦱꦩ꧀ꦧꦤ꧀ꦣꦺꦴ, ꦏꦏꦸꦣꦏꦫꦚ꧀ꦗꦴꦢꦷꦤꦁ ꦖꦶꦤ꧀ꦤꦴꦮꦱꦶꦛ꧀ꦜꦑꦴꦟꦸꦏꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ‘‘ꦨꦹꦠꦒꦴꦩꦺꦤ ꦱꦔ꧀ꦒꦲꦺꦴ’’ꦠꦶ ꦆꦩꦶꦤꦴ ꦠꦁꦮꦶꦏꦺꦴꦥꦤꦺ ꦥꦴꦕꦶꦠ꧀ꦠꦶꦪꦨꦴꦮꦁ ꦢꦷꦥꦺꦠꦶ. ꦌꦮꦩꦸꦥꦫꦶꦥꦶ.

꧑꧐꧐꧔. ꦤꦴꦭ꦳ꦶꦏꦺꦫꦴꦢꦶꦏꦴꦤꦁ ꦑꦴꦟꦹꦠꦶ ꦌꦠ꧀ꦡꦴꦥꦶ ‘‘ꦈꦥꦫꦶꦲꦫꦶꦠꦺꦴ’’ꦠꦶ ꦱꦴꦩꦠ꧀ꦡꦶꦪꦴ ꦭꦧ꧀ꦨꦠꦶ. ‘‘ꦧꦷꦗꦒꦴꦩꦺꦤ ꦱꦔ꧀ꦒꦲꦺꦴ’’ꦠꦶ ꦆꦩꦶꦤꦴ ꦢꦸꦏ꧀ꦏꦛꦮꦠ꧀ꦡꦸꦠꦩꦴꦲ. ꦌꦮꦩꦸꦥꦫꦶꦥꦶ. ꦏꦶꦚ꧀ꦕꦴꦥꦶ ꦲꦶ ꦠꦴꦭꦤꦴꦭ꦳ꦶꦏꦺꦫꦴꦢꦷꦤꦁ ꦑꦴꦟꦸ ꦈꦢ꧀ꦣꦁ ꦄꦮꦝ꧀ꦞꦤꦏꦺꦴ ꦨꦹꦠꦒꦴꦩꦱ꧀ꦱ ꦏꦴꦫꦟꦁ ꦤ ꦲꦺꦴꦠꦶ, ꦠꦡꦴꦥꦶ ꦨꦹꦠꦒꦴꦩꦱꦔ꧀ꦑꦴꦠꦤꦶꦧ꧀ꦧꦠ꧀ꦠꦥꦟ꧀ꦟꦩꦹꦭꦧꦷꦗꦠꦺꦴ ꦱꦩ꧀ꦨꦹꦠꦠ꧀ꦠꦴ ꦨꦹꦠꦒꦴꦩꦠꦺꦴ ꦈꦥ꧀ꦥꦤ꧀ꦤꦺꦴ ꦤꦴꦩ ꦲꦺꦴꦠꦷꦠꦶ ꦧꦷꦗꦒꦴꦩꦺꦤ ꦱꦔ꧀ꦒꦲꦁ ꦒꦕ꧀ꦖꦠꦶ.

꧑꧐꧐꧕. ꦠꦡꦴꦥꦏꦴꦱꦶꦠꦺꦴꦠꦶ ‘‘ꦧꦷꦗꦒꦴꦩꦺꦴ’’ꦠꦶ ꦮꦸꦠ꧀ꦠꦺꦴ.

꧑꧐꧐꧖. ꦦꦭꦶꦠꦴ ꦏꦢꦭꦷ ꦪꦴꦮ ꦤꦷꦭꦥꦟ꧀ꦟꦴ, ꦠꦴꦮ ꦱꦴ ꦕ ꦨꦹꦠꦒꦴꦩꦺꦴꦠꦶ ꦥꦏꦴꦱꦶꦠꦴꦠꦶ ꦪꦺꦴꦗꦤꦴ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦏꦢꦭꦷ ꦥꦤ ꦦꦭꦶꦠꦴ ꦪꦴꦮ ꦤꦷꦭꦥꦟ꧀ꦟꦴ, ꦠꦴꦮ ꦨꦹꦠꦒꦴꦩꦺꦤꦺꦮ ꦱꦔ꧀ꦒꦲꦶꦠꦴ’’ꦠꦶ (ꦥꦴꦕꦶ. ꦄꦛ꧀ꦜ. ꧙꧒). ꦤꦭ꦳ꦤ꧀ꦠꦶ ꦑꦸꦢ꧀ꦢꦏꦮꦺꦭ꦳ꦸ. ꦮꦺꦭ꦳ꦹꦠꦶ ꦩꦲꦴꦮꦺꦭ꦳ꦸ. ꦠꦶꦟꦴꦢꦷꦤꦤ꧀ꦠꦶ ꦄꦴꦢꦶ-ꦱꦢ꧀ꦢꦺꦤ ꦱꦱ꧀ꦱꦴꦢꦪꦺꦴ ꦒꦲꦶꦠꦴ.

꧑꧐꧐꧗. ꦪꦺꦴ ꦄꦪꦁ ꦥꦤ ꦮꦺꦭ꦳ꦸ ꦄꦒ꧀ꦒꦠꦺꦴ ꦥꦛ꧀ꦜꦴꦪ ꦪꦢꦴ ꦱꦸꦱ꧀ꦱꦠꦶ, ꦠꦢꦴ ꦱꦺꦴ ꦧꦷꦗꦒꦴꦩꦺꦤ ꦱꦔ꧀ꦒꦲꦶꦠꦺꦴ ꦤꦴꦩ ꦲꦺꦴꦠꦷꦠꦶ ꦪꦺꦴꦗꦤꦴ. ꦧꦷꦗꦒꦴꦩꦺꦤꦴꦠꦶ ꦦꦭ꦳ꦸꦧꦷꦗꦒꦴꦩꦺꦤ. ꦪꦡꦴꦲ ꦄꦛ꧀ꦜꦏꦡꦴꦪꦁ ‘‘ꦏꦠꦫꦧꦷꦗꦒꦴꦩꦺꦤ? ꦦꦭ꦳ꦸꦧꦷꦗꦒꦴꦩꦺꦤꦴ’’ꦠꦶ.

꧑꧐꧐꧘. ꦆꦤ꧀ꦢꦱꦴꦭꦺꦴ ꦱꦭ꧀ꦭꦏꦷ. ꦄꦴꦢꦶ-ꦱꦢ꧀ꦢꦺꦤ ꦱꦺꦴꦨꦚ꧀ꦗꦤꦴꦢꦷꦤꦁ ꦱꦔ꧀ꦒꦲꦺꦴ. ꦠꦸ-ꦱꦢ꧀ꦢꦺꦤ ꦄꦛ꧀ꦜꦏꦡꦴꦪꦁ ‘‘ꦏꦶꦚ꧀ꦕꦴꦥꦶ ꦫꦴꦱꦶꦏꦠꦢꦟ꧀ꦝꦏꦺꦲꦶ ꦫꦠꦤꦥ꧀ꦥꦩꦴꦟꦴꦥꦶ ꦱꦴꦑꦴ ꦤꦶꦏ꧀ꦑꦩꦤ꧀ꦠꦷ’’ꦠꦶ (ꦥꦴꦕꦶ. ꦄꦛ꧀ꦜ. ꧙꧒) ꦮꦸꦠ꧀ꦠꦮꦶꦱꦺꦱꦁ ꦗꦺꦴꦠꦺꦠꦶ. ꦖꦶꦤ꧀ꦢꦶꦠ꧀ꦮꦴ ꦜꦥꦶꦠꦢꦟ꧀ꦝꦏꦺꦱꦸ ꦫꦠꦤꦩꦠ꧀ꦠꦴꦱꦸꦥꦶ ꦱꦴꦑꦴꦱꦸ ꦈꦛ꧀ꦜꦶꦠꦴꦱꦸ ꦨꦹꦠꦒꦴꦩꦁ ꦄꦲꦸꦠ꧀ꦮꦴ ꦧꦷꦗꦒꦴꦩꦩꦺꦮ ꦲꦺꦴꦠꦶ ꦄꦮꦶꦫꦸꦭ꦳꧀ꦲꦩꦹꦭꦏꦠ꧀ꦠꦴꦠꦶ ꦄꦪꦁ ꦮꦶꦤꦶꦕ꧀ꦖꦪꦺꦴ ꦮꦶꦤꦪꦚ꧀ꦚꦸꦤꦴ ꦚꦴꦠꦺꦴ ꦏꦸꦏ꧀ꦏꦸꦕ꧀ꦕꦏꦴꦤꦩꦸꦥꦏꦴꦫꦴꦪ ꦲꦺꦴꦠꦷꦠꦶ ꦄꦴꦲ ‘‘ꦮꦶꦚ꧀ꦚꦺꦪ꧀ꦪꦺꦴ ꦮꦶꦤꦪꦚ꧀ꦚꦸꦤꦴ’’ꦠꦶ. ꦆꦩꦩꦺꦮꦠ꧀ꦡꦁ ‘‘ꦩꦹꦭꦩꦠ꧀ꦠꦺꦥꦶ ꦮꦴ’’ꦠꦶꦄꦴꦢꦶꦤꦴ ꦮꦏ꧀ꦑꦠꦶ.

꧑꧐꧐꧙. ꦩꦟ꧀ꦝꦥꦴꦢꦷꦤꦩꦠ꧀ꦡꦴꦪꦴꦠꦶ ꦩꦟ꧀ꦝꦥꦮꦠꦶꦥꦴꦏꦴꦫꦴꦢꦷꦤꦩꦠ꧀ꦡꦴꦪ. ꦱꦕꦺ ꦠꦺ ꦤꦶꦏ꧀ꦑꦟꦤ꧀ꦠꦷꦠꦶ ꦪꦢꦶ ꦠꦺ ꦆꦤ꧀ꦢꦱꦴꦭꦴꦢꦶꦢꦟ꧀ꦝꦏꦺ ꦨꦹꦩꦶꦪꦁ ꦤꦶꦑꦟꦤ꧀ꦠꦶ. ꦤꦶꦒ꧀ꦒꦠꦺ ꦩꦹꦭꦥꦟ꧀ꦟꦱ꧀ꦩꦶꦤ꧀ꦠꦶ ꦠꦡꦴ ꦤꦶꦑꦴꦠꦢꦟ꧀ꦝꦠꦺꦴ ꦩꦹꦭꦺ ꦕ ꦥꦟ꧀ꦟꦺ ꦕ ꦗꦴꦠꦺ. ꦨꦹꦠꦒꦴꦩꦺꦤ ꦱꦔ꧀ꦒꦲꦺꦴꦠꦶ ꦌꦠ꧀ꦡ ‘‘ꦠꦺꦱ’’ꦤ꧀ꦠꦶ ꦱꦴꦩꦠ꧀ꦡꦶꦪꦴ ꦭꦧ꧀ꦨꦠꦶ, ‘‘ꦮꦶꦚ꧀ꦚꦺꦪ꧀ꦪꦺꦴ’’ꦠꦶ ꦄꦣꦶꦏꦴꦫꦺꦴ.

꧑꧐꧑꧐. ꦤꦶꦒ꧀ꦒꦠꦺꦥꦷꦠꦶ ꦠꦠꦶꦪꦺꦤ ꦥꦶ-ꦱꦢ꧀ꦢꦺꦤ ꦄꦠꦶꦑꦸꦢ꧀ꦢꦏꦠꦁ ꦱꦹꦕꦺꦠꦶ.

꧑꧐꧑꧑. ꦱꦏꦤ꧀ꦢꦴ ꦠꦴꦭꦛ꧀ꦜꦷꦠꦶ ꦱꦏꦤ꧀ꦢꦠꦴꦭꦧꦷꦗꦁ. ꦥꦠ꧀ꦠꦮꦛ꧀ꦛꦷꦠꦶ ꦱꦹꦕꦶꦱꦟ꧀ꦜꦴꦤꦴ ꦄꦔ꧀ꦏꦸꦫꦥꦠ꧀ꦠꦮꦛ꧀ꦛꦶ. ꦤ ꦕ ꦧꦷꦗꦒꦴꦩꦺꦴꦠꦶ ꦮꦸꦕ꧀ꦕꦠꦷꦠꦶ ꦪꦺꦴꦗꦤꦴ. ‘‘ꦨꦹꦠꦒꦴꦩꦺꦴ’’ꦠꦶ ꦆꦢꦁ ꦪꦡꦴꦮꦸꦠ꧀ꦠꦱ꧀ꦱ ꦧ꧀ꦪꦠꦶꦫꦺꦏꦮꦱꦺꦤ ꦢꦱ꧀ꦱꦺꦠꦶ.

꧑꧐꧑꧒. ꦤꦴꦭ꦳ꦶꦏꦺꦫꦠꦕꦤ꧀ꦠꦶ ꦤꦴꦭ꦳ꦶꦏꦺꦫꦦꦭꦖꦭ꧀ꦭꦶꦁ. ꦢꦤ꧀ꦠꦱꦹꦕꦷꦮꦴꦠꦶ ꦢꦤ꧀ꦠꦩꦪꦱꦹꦕꦶ ꦆꦮ. ꦱꦺꦴꦥꦷꦠꦶ ꦤꦴꦭ꦳ꦶꦏꦺꦫꦺꦴꦥꦶ. ꦫꦸꦏ꧀ꦑꦠꦕꦱꦢ꧀ꦢꦴꦤꦁ ꦦꦭꦺꦱꦸ ꦮꦠ꧀ꦠꦩꦴꦤꦏꦴꦭꦺꦱꦸꦥꦶ ꦠꦁꦭꦶꦔ꧀ꦒꦠꦴ ꦤ ꦮꦶꦫꦸꦗ꧀ꦙꦠꦷꦠꦶ ‘‘ꦱꦺꦴ’’ꦠꦶ ꦄꦴꦲꦴꦠꦶ ꦮꦶꦚ꧀ꦚꦴꦪꦠꦶ.

꧑꧐꧑꧓. ꦩꦶꦒꦱꦶꦔ꧀ꦒꦱꦩꦴꦤꦴꦪꦴꦠꦶ ꦲꦫꦶꦠꦮꦶꦱꦴꦟꦱꦢꦶꦱꦴꦪ. ꦥꦠ꧀ꦠꦮꦛ꧀ꦛꦶꦪꦴꦠꦶ ꦄꦔ꧀ꦏꦸꦫꦥꦠ꧀ꦠꦮꦛ꧀ꦛꦶꦪꦴ. ꦱꦠꦶꦪꦴꦠꦶ ꦮꦶꦗ꧀ꦗꦩꦴꦤꦴꦪ. ꦨꦹꦠꦒꦴꦩꦺꦴꦠꦶ ꦮꦸꦕ꧀ꦕꦠꦷꦠꦶ ꦄꦩꦹꦭꦏꦨꦹꦠꦒꦴꦩꦺꦴꦠꦶ ꦮꦸꦕ꧀ꦕꦠꦶ. ꦆꦢꦁ ꦤꦴꦭ꦳ꦶꦏꦺꦫꦱ꧀ꦱ ꦄꦴꦮꦺꦟꦶꦏꦁ ꦏꦠ꧀ꦮꦴ ꦮꦸꦠ꧀ꦠꦁ.

ꦕꦠꦸꦨꦴꦟꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧑꧐꧑꧕-꧖. ꦄꦩ꧀ꦧꦛ꧀ꦜꦷꦠꦶ ꦄꦩ꧀ꦧꦧꦷꦗꦁ. ꦗꦩ꧀ꦧꦸꦛ꧀ꦜꦷꦠꦶ ꦗꦩ꧀ꦧꦸꦧꦷꦗꦁ. ꦄꦴꦢꦶ-ꦱꦢ꧀ꦢꦺꦤ ꦩꦣꦸꦏꦥꦤꦱꦴꦢꦶꦧꦷꦗꦴꦤꦁ ꦒꦲꦟꦁ. ꦮꦤ꧀ꦢꦴꦏꦴꦠꦶ ꦫꦸꦏ꧀ꦑꦴꦢꦤꦷ. ꦄꦚ꧀ꦚꦁ ꦮꦴꦠꦶ ꦨꦟ꧀ꦝꦏꦢꦭꦶꦩꦤꦺꦴꦫꦲꦁ ꦮꦴ. ꦄꦱ꧀ꦱꦴꦠꦶ ꦮꦤ꧀ꦢꦴꦏꦴꦢꦶꦤꦺꦴ. ꦄꦩꦹꦭꦮꦭ꧀ꦭꦷꦠꦶ ꦌꦮꦁꦤꦴꦩꦶꦏꦴ ꦮꦭ꧀ꦭꦶ.

꧑꧐꧑꧗. ꦱꦺꦴ ꦱꦺꦮꦴꦭꦺꦴꦠꦶ ꦪꦺꦴꦗꦤꦴ.

꧑꧐꧑꧘. ꦓꦁꦱꦶꦠ꧀ꦮꦴꦠꦶ ꦪꦺꦤ ꦏꦺꦤꦕꦶ ꦓꦁꦱꦶꦠ꧀ꦮꦴ. ꦠꦁ ꦱꦺꦮꦴꦭꦁ. ꦠꦱ꧀ꦩꦴꦠꦶ ꦠꦱ꧀ꦩꦴ ꦥꦴꦏꦴꦫꦴ.