꧓. ꦨꦺꦱꦗ꧀ꦗꦴꦢꦶꦏꦫꦟꦮꦶꦤꦶꦕ꧀ꦖꦪꦏꦡꦴ

꧑꧕. ꦨꦺꦱꦗ꧀ꦗꦏꦫꦟꦥꦫꦶꦠ꧀ꦠꦥꦛꦶꦱꦤ꧀ꦡꦴꦫꦺꦱꦸ ꦥꦤ ꦨꦺꦱꦗ꧀ꦗꦏꦫꦟꦺ ꦠꦴꦮ ꦄꦪꦁ ꦮꦶꦤꦶꦕ꧀ꦖꦪꦺꦴ (ꦥꦴꦫꦴ. ꦄꦛ꧀ꦜ. ꧒.꧑꧘꧕-꧗) – ꦄꦴꦒꦠꦴꦒꦠꦱ꧀ꦱ ꦥꦫꦗꦤꦱ꧀ꦱ ꦨꦺꦱꦗ꧀ꦗꦁ ꦤ ꦏꦴꦠꦧ꧀ꦧꦁ, ꦏꦫꦺꦴꦤ꧀ꦠꦺꦴ ꦢꦸꦏ꧀ꦏꦛꦁ ꦄꦴꦥꦗ꧀ꦗꦠꦶ. ꦥꦚ꧀ꦕꦤ꧀ꦤꦁ ꦥꦤ ꦱꦲꦣꦩ꧀ꦩꦶꦏꦴꦤꦁ ꦏꦴꦠꦧ꧀ꦧꦁ ꦨꦶꦏ꧀ꦑꦸꦱ꧀ꦱ ꦨꦶꦏ꧀ꦑꦸꦤꦶꦪꦴ ꦱꦶꦏ꧀ꦑꦩꦴꦤꦴꦪ ꦱꦴꦩꦟꦺꦫꦱ꧀ꦱ ꦱꦴꦩꦟꦺꦫꦶꦪꦴꦠꦶ. ꦱꦩꦱꦷꦭꦱꦢ꧀ꦣꦴꦥꦚ꧀ꦚꦴꦤꦚ꧀ꦲꦶ ꦌꦠꦺꦱꦁ ꦠꦷꦱꦸ ꦱꦶꦏ꧀ꦑꦴꦱꦸ ꦪꦸꦠ꧀ꦠꦴꦤꦁ ꦨꦺꦱꦗ꧀ꦗꦁ ꦄꦏꦴꦠꦸꦁ ꦤ ꦭꦧ꧀ꦨꦠꦶ. ꦏꦫꦺꦴꦤ꧀ꦠꦺꦤ ꦕ ꦱꦕꦺ ꦠꦺꦱꦁ ꦄꦠ꧀ꦡꦶ, ꦠꦺꦱꦁ ꦱꦤ꧀ꦠꦏꦁ ꦒꦲꦺꦠ꧀ꦮꦴ ꦪꦺꦴꦗꦺꦠ꧀ꦮꦴ ꦢꦴꦠꦧ꧀ꦧꦁ, ꦱꦕꦺ ꦤꦠ꧀ꦡꦶ, ꦄꦠ꧀ꦠꦤꦺꦴ ꦱꦤ꧀ꦠꦏꦁ ꦏꦴꦠꦧ꧀ꦧꦁ. ꦱꦕꦺ ꦄꦠ꧀ꦠꦤꦺꦴꦥꦶ ꦤꦠ꧀ꦡꦶ, ꦨꦶꦏ꧀ꦑꦴꦕꦴꦫꦮꦠ꧀ꦠꦺꦤ ꦮꦴ ꦚꦴꦠꦏꦥꦮꦴꦫꦶꦠꦛ꧀ꦜꦴꦤꦠꦺꦴ ꦮꦴ ꦥꦫꦶꦪꦺꦱꦶꦠꦧ꧀ꦧꦁ, ꦄꦭꦨꦤ꧀ꦠꦺꦤ ꦒꦶꦭꦴꦤꦱ꧀ꦱ ꦄꦠ꧀ꦡꦴꦪ ꦄꦏꦠꦮꦶꦚ꧀ꦚꦠ꧀ꦠꦶꦪꦴꦥꦶ ꦄꦴꦲꦫꦶꦠ꧀ꦮꦴ ꦏꦴꦠꦧ꧀ꦧꦁ.

꧑꧖. ꦄꦥꦫꦺꦱꦩ꧀ꦥꦶ ꦥꦚ꧀ꦕꦤ꧀ꦤꦁ ꦏꦴꦠꦸꦁ ꦮꦛ꧀ꦛꦠꦶ ꦩꦴꦠꦸ ꦥꦶꦠꦸ ꦠꦢꦸꦥꦛ꧀ꦜꦴꦏꦴꦤꦁ ꦄꦠ꧀ꦠꦤꦺꦴ ꦮꦺꦪ꧀ꦪꦴꦮꦕ꧀ꦕꦏꦫꦱ꧀ꦱ ꦥꦟ꧀ꦝꦸꦥꦭꦴꦱꦱ꧀ꦱ ꦕꦴꦠꦶ. ꦥꦟ꧀ꦝꦸꦥꦭꦴꦱꦺꦴ ꦤꦴꦩ ꦪꦺꦴ ꦥꦧ꧀ꦧꦗ꧀ꦗꦴꦥꦺꦏ꧀ꦑꦺꦴ ꦪꦴꦮ ꦥꦠ꧀ꦠꦕꦷꦮꦫꦁ ꦥꦛꦶꦪꦴꦢꦶꦪꦠꦶ, ꦠꦴꦮ ꦮꦶꦲꦴꦫꦺ ꦮꦱꦠꦶ. ꦠꦺꦱꦸ ꦱꦕꦺ ꦩꦴꦠꦴꦥꦶꦠꦫꦺꦴ ꦆꦱ꧀ꦱꦫꦴ ꦲꦺꦴꦤ꧀ꦠꦶ ꦤ ꦥꦕ꧀ꦕꦴꦱꦷꦱꦤ꧀ꦠꦶ, ꦄꦏꦴꦠꦸꦁ ꦮꦛ꧀ꦛꦠꦶ. ꦱꦕꦺ ꦥꦤ ꦫꦗ꧀ꦗꦺꦥꦶ ꦜꦶꦠꦴ ꦥꦕ꧀ꦕꦴꦱꦷꦱꦤ꧀ꦠꦶ, ꦄꦏꦴꦠꦸꦁ ꦤ ꦮꦛ꧀ꦛꦠꦶ. ꦨꦺꦱꦗ꧀ꦗꦁ ꦥꦕ꧀ꦕꦴꦱꦷꦱꦤ꧀ꦠꦴꦤꦁ ꦨꦺꦱꦗ꧀ꦗꦁ ꦢꦴꦠꦧ꧀ꦧꦁ, ꦪꦺꦴꦗꦺꦠꦸꦁ ꦄꦗꦴꦤꦤ꧀ꦠꦴꦤꦁ ꦪꦺꦴꦗꦺꦠ꧀ꦮꦴ ꦢꦴꦠꦧ꧀ꦧꦁ. ꦱꦧ꧀ꦧꦺꦱꦁ ꦄꦠ꧀ꦡꦴꦪ ꦱꦲꦣꦩ꧀ꦩꦶꦏꦺꦱꦸ ꦮꦸꦠ꧀ꦠꦤꦪꦺꦤꦺꦮ ꦥꦫꦶꦪꦺꦱꦶꦠꦧ꧀ꦧꦁ. ꦱꦕꦺ ꦥꦤ ꦩꦴꦠꦫꦁ ꦮꦶꦲꦴꦫꦁ ꦄꦴꦤꦺꦠ꧀ꦮꦴ ꦗꦒ꧀ꦒꦠꦶ, ꦱꦧ꧀ꦧꦁ ꦥꦫꦶꦏꦩ꧀ꦩꦁ ꦄꦤꦴꦩꦱꦤ꧀ꦠꦺꦤ ꦏꦴꦠꦧ꧀ꦧꦁ, ꦑꦴꦢꦤꦷꦪꦨꦺꦴꦗꦤꦷꦪꦁ ꦱꦲꦠ꧀ꦡꦴ ꦢꦴꦠꦧ꧀ꦧꦁ. ꦥꦶꦠꦴ ꦥꦤ ꦪꦡꦴ ꦱꦴꦩꦟꦺꦫꦺꦴ, ꦌꦮꦁ ꦱꦲꦠ꧀ꦡꦺꦤ ꦤ꧀ꦲꦴꦥꦤꦱꦩ꧀ꦧꦴꦲꦤꦴꦢꦷꦤꦶ ꦏꦠ꧀ꦮꦴ ꦈꦥꦛ꧀ꦜꦴꦠꦧ꧀ꦧꦺꦴ. ꦪꦺ ꦕ ꦩꦴꦠꦴꦥꦶꦠꦫꦺꦴ ꦈꦥꦛ꧀ꦜꦲꦤ꧀ꦠꦶ ꦥꦛꦶꦗꦒ꧀ꦒꦤ꧀ꦠꦶ, ꦠꦺꦱꦩ꧀ꦥꦶ ꦌꦮꦩꦺꦮ ꦏꦴꦠꦧ꧀ꦧꦁ. ꦮꦺꦪ꧀ꦪꦴꦮꦕ꧀ꦕꦏꦫꦺꦴ ꦤꦴꦩ ꦪꦺꦴ ꦮꦺꦠꦤꦁ ꦒꦲꦺꦠ꧀ꦮꦴ ꦄꦫꦚ꧀ꦚꦺ ꦢꦴꦫꦹꦤꦶ ꦮꦴ ꦖꦶꦤ꧀ꦢꦠꦶ, ꦄꦚ꧀ꦚꦁ ꦮꦴ ꦏꦶꦚ꧀ꦕꦶ ꦏꦩ꧀ꦩꦁ ꦏꦫꦺꦴꦠꦶ, ꦠꦱ꧀ꦱ ꦫꦺꦴꦒꦺ ꦈꦥ꧀ꦥꦤ꧀ꦤꦺ ꦪꦴꦮ ꦚꦴꦠꦏꦴ ꦤ ꦥꦱ꧀ꦱꦤ꧀ꦠꦶ, ꦠꦴꦮ ꦨꦺꦱꦗ꧀ꦗꦁ ꦏꦴꦠꦧ꧀ꦧꦁ. ꦪꦺꦴ ꦥꦤ ꦨꦶꦏ꧀ꦑꦸꦤꦶꦱ꧀ꦱꦶꦠꦏꦺꦴꦮ ꦲꦸꦠ꧀ꦮꦴ ꦱꦧ꧀ꦧꦏꦩ꧀ꦩꦴꦤꦶ ꦏꦫꦺꦴꦠꦶ, ꦠꦱ꧀ꦱ ꦨꦺꦱꦗ꧀ꦗꦁ ꦏꦴꦠꦧ꧀ꦧꦩꦺꦮ. ꦥꦟ꧀ꦝꦸꦥꦭꦴꦱꦺꦥꦶ ꦱꦴꦩꦟꦺꦫꦺ ꦮꦶꦪ ꦥꦛꦶꦥꦗ꧀ꦗꦶꦠꦧ꧀ꦧꦁ.

꧑꧗. ꦄꦥꦫꦺꦱꦩ꧀ꦥꦶ ꦢꦱꦤ꧀ꦤꦁ ꦏꦴꦠꦸꦁ ꦮꦛ꧀ꦛꦠꦶ ꦗꦺꦛ꧀ꦜꦨꦴꦠꦸ ꦏꦤꦶꦛ꧀ꦜꦨꦴꦠꦸ ꦗꦺꦛ꧀ꦜꦨꦒꦶꦤꦶꦪꦴ ꦏꦤꦶꦛ꧀ꦜꦨꦒꦶꦤꦶꦪꦴ ꦕꦹꦭ꦳ꦩꦴꦠꦸꦪꦴ ꦩꦲꦴꦩꦴꦠꦸꦪꦴ ꦕꦹꦭ꦳ꦥꦶꦠꦸꦤꦺꦴ ꦩꦲꦴꦥꦶꦠꦸꦤꦺꦴ ꦥꦶꦠꦸꦕ꧀ꦖꦴꦪ ꦩꦴꦠꦸꦭꦱ꧀ꦱꦴꦠꦶ. ꦠꦺꦱꦁ ꦥꦤ ꦱꦧ꧀ꦧꦺꦱꦩ꧀ꦥꦶ ꦏꦫꦺꦴꦤ꧀ꦠꦺꦤ ꦠꦺꦱꦁꦪꦺꦮ ꦱꦤ꧀ꦠꦏꦁ ꦨꦺꦱꦗ꧀ꦗꦁ ꦒꦲꦺꦠ꧀ꦮꦴ ꦏꦺꦮꦭꦁ ꦪꦺꦴꦗꦺꦠ꧀ꦮꦴ ꦢꦴꦠꦧ꧀ꦧꦁ. ꦱꦕꦺ ꦥꦤ ꦤꦥ꧀ꦥꦲꦺꦴꦤ꧀ꦠꦶ ꦪꦴꦕꦤ꧀ꦠꦶ ꦕ ‘‘ꦢꦺꦡ ꦤꦺꦴ, ꦨꦤ꧀ꦠꦺ, ꦠꦸꦩ꧀ꦲꦴꦏꦁ ꦥꦛꦶꦢꦱ꧀ꦱꦴꦩꦴ’’ꦠꦶ, ꦠꦴꦮꦏꦴꦭꦶꦏꦁ ꦢꦴꦠꦧ꧀ꦧꦁ. ꦱꦕꦺꦥꦶ ꦤ ꦪꦴꦕꦤ꧀ꦠꦶ, ‘‘ꦄꦩ꧀ꦲꦴꦏꦁ ꦨꦺꦱꦗ꧀ꦗꦁ ꦄꦠ꧀ꦡꦶ, ꦠꦴꦮꦏꦴꦭꦶꦏꦁ ꦒꦟ꧀ꦲꦡꦴ’’ꦠꦶ ꦮꦠ꧀ꦮꦴ ꦮꦴ ‘‘ꦪꦢꦴ ꦠꦺꦱꦁ ꦨꦮꦶꦱ꧀ꦱꦠꦶ, ꦠꦢꦴ ꦢꦱ꧀ꦱꦤ꧀ꦠꦷ’’ꦠꦶ ꦄꦴꦨꦺꦴꦒꦁ ꦮꦴ ꦏꦠ꧀ꦮꦴ ꦢꦴꦠꦧ꧀ꦧꦁ. ꦱꦕꦺ ꦥꦛꦶꦢꦺꦤ꧀ꦠꦶ, ꦒꦲꦺꦠꦧ꧀ꦧꦁ. ꦤꦺꦴ ꦕꦺ ꦢꦺꦤ꧀ꦠꦶ, ꦤ ꦕꦺꦴꦢꦺꦠꦧ꧀ꦧꦴ. ꦌꦠꦺ ꦢꦱ ꦚꦴꦠꦏꦺ ꦜꦥꦺꦠ꧀ꦮꦴ ꦄꦚ꧀ꦚꦺꦱꦁ ꦤ ꦏꦴꦠꦧ꧀ꦧꦁ.

ꦌꦠꦺꦱꦁ ꦥꦸꦠ꧀ꦠꦥꦫꦩ꧀ꦥꦫꦴꦪ ꦥꦤ ꦪꦴꦮ ꦱꦠ꧀ꦠꦩꦴ ꦏꦸꦭꦥꦫꦶꦮꦛ꧀ꦛꦴ, ꦠꦴꦮ ꦕꦠ꧀ꦠꦴꦫꦺꦴ ꦥꦕ꧀ꦕꦪꦺ ꦄꦴꦲꦫꦴꦥꦺꦤ꧀ꦠꦱ꧀ꦱ ꦄꦏꦠꦮꦶꦚ꧀ꦚꦠ꧀ꦠꦶ ꦮꦴ ꦨꦺꦱꦗ꧀ꦗꦁ ꦏꦫꦺꦴꦤ꧀ꦠꦱ꧀ꦱ ꦮꦺꦗ꧀ꦗꦏꦩ꧀ꦩꦁ ꦮꦴ ꦏꦸꦭꦢꦹꦱꦏꦴꦥꦠ꧀ꦠꦶ ꦮꦴ ꦤ ꦲꦺꦴꦠꦶ. ꦱꦕꦺ ꦨꦴꦠꦸ ꦗꦴꦪꦴ, ꦨꦒꦶꦤꦶꦪꦴ ꦱꦴꦩꦶꦏꦺꦴ ꦮꦴ ꦒꦶꦭꦴꦤꦺꦴ ꦲꦺꦴꦠꦶ, ꦚꦴꦠꦏꦴ ꦕꦺ, ꦠꦺꦱꦩ꧀ꦥꦶ ꦮꦛ꧀ꦛꦠꦶ. ꦄꦚ꧀ꦚꦴꦠꦏꦴ ꦕꦺ, ꦨꦴꦠꦸ ꦕ ꦨꦒꦶꦤꦶꦪꦴ ꦕ ꦏꦠ꧀ꦮꦴ ꦢꦴꦠꦧ꧀ꦧꦁ ‘‘ꦠꦸꦩ꧀ꦲꦴꦏꦁ ꦗꦒ꧀ꦒꦤꦛ꧀ꦜꦴꦤꦺ ꦢꦺꦡꦴ’’ꦠꦶ. ꦄꦡ ꦮꦴ ꦠꦺꦱꦁ ꦥꦸꦠ꧀ꦠꦴꦤꦁ ꦏꦠ꧀ꦮꦴ ꦢꦴꦠꦧ꧀ꦧꦁ ‘‘ꦠꦸꦩ꧀ꦲꦴꦏꦁ ꦩꦴꦠꦴꦥꦶꦠꦹꦤꦁ ꦢꦺꦡꦴ’’ꦠꦶ. ꦌꦠꦺꦤꦸꦥꦴꦪꦺꦤ ꦱꦧ꧀ꦧꦥꦢꦺꦱꦸ ꦮꦶꦤꦶꦕ꧀ꦖꦪꦺꦴ ꦮꦺꦢꦶꦠꦧ꧀ꦧꦺꦴ.

ꦠꦺꦱꦁ ꦄꦠ꧀ꦡꦴꦪ ꦕ ꦱꦴꦩꦟꦺꦫꦺꦲꦶ ꦄꦫꦚ꧀ꦚꦠꦺꦴ ꦨꦺꦱꦗ꧀ꦗꦁ ꦄꦴꦲꦫꦴꦥꦺꦤ꧀ꦠꦺꦤ ꦚꦴꦠꦶꦱꦴꦩꦟꦺꦫꦺꦲꦶ ꦮꦴ ꦄꦴꦲꦫꦴꦥꦺꦠꦧ꧀ꦧꦁ, ꦄꦚ꧀ꦚꦴꦠꦏꦺꦲꦶ ꦄꦠ꧀ꦠꦤꦺꦴ ꦄꦠ꧀ꦡꦴꦪ ꦮꦴ ꦄꦴꦲꦫꦴꦥꦺꦠ꧀ꦮꦴ ꦢꦴꦠꦧ꧀ꦧꦁ. ꦠꦺꦲꦶꦥꦶ ‘‘ꦈꦥꦗ꧀ꦙꦴꦪꦱ꧀ꦱ ꦄꦴꦲꦫꦴꦩꦴ’’ꦠꦶ ꦮꦠ꧀ꦠꦱꦷꦱꦺꦤ ꦄꦴꦲꦫꦶꦠꦧ꧀ꦧꦁ. ꦈꦥꦗ꧀ꦙꦴꦪꦱ꧀ꦱ ꦩꦴꦠꦴꦥꦶꦠꦫꦺꦴ ꦒꦶꦭꦴꦤꦴ ꦮꦶꦲꦴꦫꦁ ꦄꦴꦒꦕ꧀ꦖꦤ꧀ꦠꦶ, ꦈꦥꦗ꧀ꦙꦴꦪꦺꦴ ꦕ ꦢꦶꦱꦴꦥꦏ꧀ꦏꦤ꧀ꦠꦺꦴ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦈꦥꦗ꧀ꦙꦴꦪꦱ꧀ꦱ ꦱꦤ꧀ꦠꦏꦁ ꦨꦺꦱꦗ꧀ꦗꦁ ꦢꦴꦠꦧ꧀ꦧꦁ. ꦤꦺꦴ ꦕꦺ ꦄꦠ꧀ꦡꦶ, ꦄꦠ꧀ꦠꦤꦺꦴ ꦨꦺꦱꦗ꧀ꦗꦁ ꦈꦥꦗ꧀ꦙꦴꦪꦱ꧀ꦱ ꦥꦫꦶꦕ꧀ꦕꦗꦶꦠ꧀ꦮꦴ ꦢꦴꦠꦧ꧀ꦧꦁ. ꦄꦠ꧀ꦠꦤꦺꦴꦥꦶ ꦄꦱꦤ꧀ꦠꦺ ꦮꦸꦠ꧀ꦠꦤꦪꦺꦤꦺꦮ ꦥꦫꦶꦪꦺꦱꦶꦠ꧀ꦮꦴ ꦈꦥꦗ꧀ꦙꦴꦪꦱ꧀ꦱ ꦱꦤ꧀ꦠꦏꦁ ꦏꦠ꧀ꦮꦴ ꦢꦴꦠꦧ꧀ꦧꦁ. ꦈꦥꦗ꧀ꦙꦴꦪꦺꦤꦥꦶ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦩꦴꦠꦴꦥꦶꦠꦹꦱꦸ ꦌꦮꦩꦺꦮ ꦥꦛꦶꦥꦗ꧀ꦗꦶꦠꦧ꧀ꦧꦁ. ꦌꦱꦺꦮ ꦤꦪꦺꦴ ꦄꦴꦕꦫꦶꦪꦤ꧀ꦠꦺꦮꦴꦱꦶꦏꦺꦱꦸꦥꦶ. ꦄꦚ꧀ꦚꦺꦴꦥꦶ ꦪꦺꦴ ꦄꦴꦒꦤ꧀ꦠꦸꦏꦺꦴ ꦮꦴ ꦕꦺꦴꦫꦺꦴ ꦮꦴ ꦪꦸꦢ꧀ꦣꦥꦫꦴꦗꦶꦠꦺꦴ ꦆꦱ꧀ꦱꦫꦺꦴ ꦮꦴ ꦚꦴꦠꦏꦺꦲꦶ ꦥꦫꦶꦕ꧀ꦕꦠ꧀ꦠꦺꦴ ꦏꦥꦟꦺꦴ ꦮꦴ ꦒꦩꦶꦪꦩꦤꦸꦱ꧀ꦱꦺꦴ ꦮꦴ ꦒꦶꦭꦴꦤꦺꦴ ꦲꦸꦠ꧀ꦮꦴ ꦮꦶꦲꦴꦫꦁ ꦥꦮꦶꦱꦠꦶ, ꦱꦧ꧀ꦧꦺꦱꦁ ꦄꦥꦕ꧀ꦕꦴꦱꦷꦱꦤ꧀ꦠꦺꦤ ꦨꦺꦱꦗ꧀ꦗꦁ ꦏꦴꦠꦧ꧀ꦧꦁ.

꧑꧘. ꦱꦢ꧀ꦣꦁ ꦏꦸꦭꦁ ꦲꦺꦴꦠꦶ ꦕꦠꦹꦲꦶ ꦥꦕ꧀ꦕꦪꦺꦲꦶ ꦈꦥꦛ꧀ꦜꦴꦪꦏꦁ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦩꦴꦠꦴꦥꦶꦠꦸꦛ꧀ꦜꦴꦤꦶꦪꦁ, ꦠꦠ꧀ꦫ ꦕꦺ ꦏꦺꦴꦕꦶ ꦒꦶꦭꦴꦤꦺꦴ ꦲꦺꦴꦠꦶ, ꦠꦱ꧀ꦱꦠ꧀ꦡꦴꦪ ꦮꦶꦱ꧀ꦱꦴꦱꦺꦤ ‘‘ꦨꦺꦱꦗ꧀ꦗꦁ ꦏꦠ꧀ꦮꦴ ꦨꦤ꧀ꦠꦺ ꦢꦺꦡꦴ’’ꦠꦶ ꦮꦢꦤ꧀ꦠꦶ, ꦤꦺꦮ ꦢꦴꦠꦧ꧀ꦧꦁ ꦤ ꦏꦴꦠꦧ꧀ꦧꦁ. ꦄꦡ ꦥꦤ ꦏꦥ꧀ꦥꦶꦪꦁ ꦚꦠ꧀ꦮꦴ ꦌꦮꦁ ꦥꦸꦕ꧀ꦖꦤ꧀ꦠꦶ ‘‘ꦨꦤ꧀ꦠꦺ, ꦄꦱꦸꦏꦱ꧀ꦱ ꦤꦴꦩ ꦫꦺꦴꦒꦱ꧀ꦱ ꦏꦶꦁ ꦨꦺꦱꦗ꧀ꦗꦁ ꦏꦫꦺꦴꦤ꧀ꦠꦷ’’ꦠꦶ, ‘‘ꦆꦢꦚ꧀ꦕꦶꦢꦚ꧀ꦕ ꦒꦲꦺꦠ꧀ꦮꦴ ꦏꦫꦺꦴꦤ꧀ꦠꦷ’’ꦠꦶ ꦮꦠ꧀ꦠꦸꦁ ꦮꦛ꧀ꦛꦠꦶ. ‘‘ꦨꦤ꧀ꦠꦺ, ꦩꦪ꧀ꦲꦁ ꦩꦴꦠꦴ ꦒꦶꦭꦴꦤꦴ, ꦨꦺꦱꦗ꧀ꦗꦁ ꦠꦴꦮ ꦄꦴꦕꦶꦏ꧀ꦑꦡꦴ’’ꦠꦶ ꦌꦮꦁ ꦥꦸꦕ꧀ꦖꦶꦠꦺ ꦥꦤ ꦤ ꦄꦴꦕꦶꦏ꧀ꦑꦶꦠꦧ꧀ꦧꦁ, ꦄꦚ꧀ꦚꦩꦚ꧀ꦚꦁ ꦥꦤ ꦏꦡꦴ ꦏꦴꦠꦧ꧀ꦧꦴ ‘‘ꦄꦴꦮꦸꦱꦺꦴ, ꦄꦱꦸꦏꦱ꧀ꦱ ꦤꦴꦩ ꦨꦶꦏ꧀ꦑꦸꦤꦺꦴ ꦆꦩꦱ꧀ꦩꦶꦁ ꦫꦺꦴꦒꦺ ꦏꦶꦁ ꦨꦺꦱꦗ꧀ꦗꦁ ꦏꦫꦶꦁꦱꦹ’’ꦠꦶ. ꦆꦢꦚ꧀ꦕꦶꦢꦚ꧀ꦕ ꦨꦺꦱꦗ꧀ꦗꦁ ꦨꦤ꧀ꦠꦺꦠꦶ. ꦠꦁ ꦱꦸꦠ꧀ꦮꦴ ꦆꦠꦫꦺꦴ ꦩꦴꦠꦸ ꦨꦺꦱꦗ꧀ꦗꦁ ꦏꦫꦺꦴꦠꦶ, ꦮꦛ꧀ꦛꦠꦶ. ꦩꦲꦴꦥꦢꦸꦩꦠ꧀ꦡꦺꦫꦺꦴ ꦏꦶꦫ ꦮꦱꦨꦫꦚ꧀ꦚꦺꦴꦥꦶ ꦢꦺꦮꦶꦪꦴ ꦫꦺꦴꦒꦺ ꦈꦥ꧀ꦥꦤ꧀ꦤꦺ ꦌꦏꦴꦪ ꦆꦠ꧀ꦡꦶꦪꦴ ꦄꦴꦒꦤ꧀ꦠ꧀ꦮꦴ ꦥꦸꦕ꧀ꦖꦶꦠꦺꦴ ‘‘ꦤ ꦗꦴꦤꦴꦩꦷ’’ꦠꦶ ꦄꦮꦠ꧀ꦮꦴ ꦌꦮꦩꦺꦮ ꦨꦶꦏ꧀ꦑꦹꦲꦶ ꦱꦢ꧀ꦣꦶꦁ ꦱꦩꦸꦭ꧀ꦭꦥꦺꦱꦶ. ꦠꦁ ꦱꦸꦠ꧀ꦮꦴ ꦠꦱ꧀ꦱꦴ ꦨꦺꦱꦗ꧀ꦗꦩꦏꦁꦱꦸ. ꦮꦹꦥꦱꦤ꧀ꦠꦺ ꦕ ꦫꦺꦴꦒꦺ ꦠꦶꦕꦷꦮꦫꦺꦤ ꦠꦷꦲꦶ ꦕ ꦏꦲꦴꦥꦟꦱꦠꦺꦲꦶ ꦱꦢ꧀ꦣꦶꦁ ꦨꦺꦱꦗ꧀ꦗꦕꦔ꧀ꦏꦺꦴꦛꦏꦁ ꦥꦹꦫꦺꦠ꧀ꦮꦴ ꦄꦴꦲꦫꦶꦠ꧀ꦮꦴ ꦡꦺꦫꦱ꧀ꦱ ꦥꦴꦢꦩꦹꦭꦺ ꦜꦥꦺꦠ꧀ꦮꦴ ‘‘ꦨꦤ꧀ꦠꦺ, ꦥꦸꦥ꧀ꦦꦥꦹꦗꦁ ꦏꦫꦺꦴꦡꦴ’’ꦠꦶ ꦄꦴꦲꦁꦱꦸ. ꦡꦺꦫꦺꦴ ‘‘ꦄꦴꦕꦫꦶꦪꦨꦴꦒꦺꦴ ꦤꦴꦩ ꦄꦪ’’ꦤ꧀ꦠꦶ ꦏꦥ꧀ꦥꦶꦪꦮꦱꦺꦤ ꦒꦴꦲꦴꦥꦺꦠ꧀ꦮꦴ ꦥꦸꦥ꧀ꦦꦥꦹꦗꦩꦏꦴꦱꦶ. ꦌꦮꦁ ꦠꦴꦮ ꦨꦺꦱꦗ꧀ꦗꦺ ꦥꦛꦶꦥꦗ꧀ꦗꦶꦠꦧ꧀ꦧꦁ.

꧑꧙. ꦥꦫꦶꦠ꧀ꦠꦺ ꦥꦤ ‘‘ꦒꦶꦭꦴꦤꦱ꧀ꦱ ꦥꦫꦶꦠ꧀ꦠꦁ ꦏꦫꦺꦴꦡ, ꦨꦤ꧀ꦠꦺ’’ꦠꦶ ꦮꦸꦠ꧀ꦠꦺ ꦤ ꦏꦴꦠꦧ꧀ꦧꦁ, ‘‘ꦥꦫꦶꦠ꧀ꦠꦁ ꦨꦟꦡꦴ’’ꦠꦶ ꦮꦸꦠ꧀ꦠꦺ ꦥꦤ ꦨꦟꦶꦠꦧ꧀ꦧꦁ. ꦱꦕꦺꦥꦶꦱ꧀ꦱ ꦌꦮꦁ ꦲꦺꦴꦠꦶ ‘‘ꦩꦤꦸꦱ꧀ꦱꦴ ꦤꦴꦩ ꦤ ꦗꦴꦤꦤ꧀ꦠꦶ, ꦄꦏꦫꦶꦪꦩꦴꦤꦺ ꦮꦶꦥ꧀ꦥꦛꦶꦱꦴꦫꦶꦤꦺꦴ ꦨꦮꦶꦱ꧀ꦱꦤ꧀ꦠꦷ’’ꦠꦶ, ꦏꦴꦠꦧ꧀ꦧꦁ. ‘‘ꦥꦫꦶꦠ꧀ꦠꦺꦴꦢꦏꦁ ꦥꦫꦶꦠ꧀ꦠꦱꦸꦠ꧀ꦠꦁ ꦏꦠ꧀ꦮꦴ ꦢꦺꦡꦴ’’ꦠꦶ ꦮꦸꦠ꧀ꦠꦺ ꦥꦤ ꦠꦺꦱꦁꦪꦺꦮ ꦈꦢꦏꦁ ꦲꦠ꧀ꦡꦺꦤ ꦕꦴꦭꦺꦠ꧀ꦮꦴ ꦱꦸꦠ꧀ꦠꦁ ꦥꦫꦶꦩꦗ꧀ꦗꦶꦠ꧀ꦮꦴ ꦢꦴꦠꦧ꧀ꦧꦁ. ꦱꦕꦺ ꦮꦶꦲꦴꦫꦠꦺꦴ ꦈꦢꦏꦁ ꦄꦠ꧀ꦠꦤꦺꦴ ꦱꦤ꧀ꦠꦏꦁ ꦮꦴ ꦱꦸꦠ꧀ꦠꦁ ꦢꦺꦠꦶ, ꦢꦸꦏ꧀ꦏꦛꦁ. ꦩꦤꦸꦱ꧀ꦱꦴ ꦈꦢꦏꦚ꧀ꦕ ꦱꦸꦠ꧀ꦠꦚ꧀ꦕ ꦒꦲꦺꦠ꧀ꦮꦴ ꦤꦶꦱꦷꦢꦶꦠ꧀ꦮꦴ ‘‘ꦥꦫꦶꦠ꧀ꦠꦁ ꦨꦟꦡꦴ’’ꦠꦶ ꦮꦢꦤ꧀ꦠꦶ, ꦏꦴꦠꦧ꧀ꦧꦁ. ꦤꦺꦴ ꦕꦺ ꦗꦴꦤꦤ꧀ꦠꦶ, ꦄꦴꦕꦶꦏ꧀ꦑꦶꦠꦧ꧀ꦧꦁ. ꦨꦶꦏ꧀ꦑꦹꦤꦁ ꦤꦶꦱꦶꦤ꧀ꦤꦴꦤꦁ ꦥꦴꦢꦺꦱꦸ ꦈꦢꦏꦁ ꦄꦴꦏꦶꦫꦶꦠ꧀ꦮꦴ ꦱꦸꦠ꧀ꦠꦚ꧀ꦕ ꦜꦥꦺꦠ꧀ꦮꦴ ꦒꦕ꧀ꦖꦤ꧀ꦠꦶ ‘‘ꦥꦫꦶꦠ꧀ꦠꦁ ꦏꦫꦺꦴꦡ, ꦥꦫꦶꦠ꧀ꦠꦁ ꦨꦟꦡꦴ’’ꦠꦶ, ꦤ ꦥꦴꦢꦴ ꦄꦥꦤꦺꦠꦧ꧀ꦧꦴ. ꦩꦤꦸꦱ꧀ꦱꦴ ꦲꦶ ꦮꦶꦥ꧀ꦥꦛꦶꦱꦴꦫꦶꦤꦺꦴ ꦲꦺꦴꦤ꧀ꦠꦶ. ꦄꦤ꧀ꦠꦺꦴꦒꦴꦩꦺꦥꦶ ꦒꦶꦭꦴꦤꦱ꧀ꦱ ꦄꦠ꧀ꦡꦴꦪ ꦮꦶꦲꦴꦫꦁ ꦥꦺꦱꦺꦤ꧀ꦠꦶ ‘‘ꦥꦫꦶꦠ꧀ꦠꦁ ꦨꦟꦤ꧀ꦠꦹ’’ꦠꦶ, ꦨꦟꦶꦠꦧ꧀ꦧꦁ. ꦄꦤ꧀ꦠꦺꦴꦒꦴꦩꦺ ꦫꦴꦗꦒꦺꦲꦴꦢꦷꦱꦸ ꦫꦺꦴꦒꦺ ꦮꦴ ꦈꦥꦢ꧀ꦢꦮꦺ ꦮꦴ ꦈꦥ꧀ꦥꦤ꧀ꦤꦺ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ꦨꦟꦴꦥꦺꦤ꧀ꦠꦶ, ꦄꦴꦛꦴꦤꦴꦛꦶꦪꦱꦸꦠ꧀ꦠꦴꦢꦷꦤꦶ ꦨꦟꦶꦠꦧ꧀ꦧꦴꦤꦶ. ‘‘ꦄꦴꦒꦤ꧀ꦠ꧀ꦮꦴ ꦒꦶꦭꦴꦤꦱ꧀ꦱ ꦱꦶꦏ꧀ꦑꦴꦥꦢꦴꦤꦶ ꦢꦺꦤ꧀ꦠꦸ, ꦣꦩ꧀ꦩꦁ ꦏꦡꦺꦤ꧀ꦠꦸ, ꦫꦴꦗꦤ꧀ꦠꦺꦥꦸꦫꦺ ꦮꦴ ꦄꦩꦕ꧀ꦕꦒꦺꦲꦺ ꦮꦴ ꦄꦴꦒꦤ꧀ꦠ꧀ꦮꦴ ꦱꦶꦏ꧀ꦑꦴꦥꦢꦴꦤꦶ ꦢꦺꦤ꧀ꦠꦸ, ꦣꦩ꧀ꦩꦁ ꦏꦡꦺꦤ꧀ꦠꦹ’’ꦠꦶ ꦥꦺꦱꦶꦠꦺꦥꦶ ꦒꦤ꧀ꦠ꧀ꦮꦴ ꦱꦶꦏ꧀ꦑꦴꦥꦢꦴꦤꦶ ꦢꦴꦠꦧ꧀ꦧꦴꦤꦶ, ꦣꦩ꧀ꦩꦺꦴ ꦏꦡꦺꦠꦧ꧀ꦧꦺꦴ. ‘‘ꦩꦠꦴꦤꦁ ꦥꦫꦶꦮꦴꦫꦠ꧀ꦡꦁ ꦄꦴꦒꦕ꧀ꦖꦤ꧀ꦠꦹ’’ꦠꦶ ꦥꦏ꧀ꦏꦺꦴꦱꦤ꧀ꦠꦶ, ꦤ ꦒꦤ꧀ꦠꦧ꧀ꦧꦁ. ‘‘ꦱꦷꦮꦡꦶꦏꦢꦱ꧀ꦱꦤꦺ ꦄꦱꦸꦨꦢꦱ꧀ꦱꦤꦺ ꦕ ꦩꦫꦟꦱ꧀ꦱꦠꦶꦁ ꦥꦛꦶꦭꦨꦶꦱ꧀ꦱꦴꦩꦴ’’ꦠꦶ ꦏꦩ꧀ꦩꦛ꧀ꦜꦴꦤꦱꦷꦱꦺꦤ ꦒꦤ꧀ꦠꦸꦁ ꦮꦛ꧀ꦛꦠꦶ. ‘‘ꦥꦲꦴꦫꦺꦢꦶꦤ꧀ꦤꦺ ꦩꦠꦺꦥꦶ ꦄꦩꦫꦟꦴꦣꦶꦥ꧀ꦥꦴꦪꦱ꧀ꦱ ꦄꦤꦴꦥꦠ꧀ꦠꦶ ꦮꦸꦠ꧀ꦠꦴ’’ꦠꦶ ꦤ ꦌꦠ꧀ꦠꦏꦺꦤꦺꦮ ꦄꦩꦤꦸꦱ꧀ꦱꦒꦲꦶꦠꦱ꧀ꦱ ꦥꦲꦴꦫꦺꦴ ꦢꦴꦠꦧ꧀ꦧꦺꦴ, ꦠꦴꦭꦥꦟ꧀ꦟꦁ ꦥꦤ ꦥꦫꦶꦠ꧀ꦠꦱꦸꦠ꧀ꦠꦁ ꦮꦴ ꦲꦠ꧀ꦡꦺ ꦮꦴ ꦥꦴꦢꦺ ꦮꦴ ꦧꦤ꧀ꦣꦶꦠꦧ꧀ꦧꦁ, ꦫꦠꦤꦱꦸꦠ꧀ꦠꦴꦢꦷꦤꦶ ꦥꦫꦶꦠ꧀ꦠꦴꦤꦶ ꦨꦟꦶꦠꦧ꧀ꦧꦴꦤꦶ, ‘‘ꦩꦴ ꦱꦷꦭꦮꦤ꧀ꦠꦁ ꦨꦶꦏ꧀ꦑꦸꦁ ꦮꦶꦲꦺꦜꦺꦲꦷ’’ꦠꦶ ꦣꦩ꧀ꦩꦏꦡꦴ ꦏꦴꦠꦧ꧀ꦧꦴ, ꦄꦴꦛꦴꦤꦴꦛꦶꦪꦥꦫꦶꦠ꧀ꦠꦁ ꦮꦴ ꦨꦟꦶꦠꦧ꧀ꦧꦁ.

ꦆꦣ ꦥꦤ ꦄꦴꦛꦴꦤꦴꦛꦶꦪꦥꦫꦶꦠ꧀ꦠꦱ꧀ꦱ ꦥꦫꦶꦏꦩ꧀ꦩꦁ ꦮꦺꦢꦶꦠꦧ꧀ꦧꦁ (ꦢꦷ. ꦤꦶ. ꦄꦛ꧀ꦜ. ꧓.꧒꧘꧒). ꦥꦜꦩꦩꦺꦮ ꦲꦶ ꦄꦴꦛꦴꦤꦴꦛꦶꦪꦱꦸꦠ꧀ꦠꦁ ꦤ ꦨꦟꦶꦠꦧ꧀ꦧꦁ, ꦩꦺꦠ꧀ꦠꦱꦸꦠ꧀ꦠꦁ (ꦑꦸ. ꦥꦴ. ꧙.꧑ ꦄꦴꦢꦪꦺꦴ; ꦱꦸ. ꦤꦶ. ꧑꧔꧓ ꦄꦴꦢꦪꦺꦴ) ꦣꦗꦒ꧀ꦒꦱꦸꦠ꧀ꦠꦁ (ꦱꦁ. ꦤꦶ. ꧑.꧒꧔꧙) ꦫꦠꦤꦱꦸꦠ꧀ꦠꦤ꧀ꦠꦶ (ꦑꦸ. ꦥꦴ. ꧖.꧑ ꦄꦴꦢꦪꦺꦴ; ꦱꦸ. ꦤꦶ. ꧒꧒꧔ ꦄꦴꦢꦪꦺꦴ) ꦆꦩꦴꦤꦶ ꦱꦠ꧀ꦠꦴꦲꦁ ꦨꦟꦶꦠꦧ꧀ꦧꦴꦤꦶ. ꦱꦕꦺ ꦩꦸꦚ꧀ꦕꦠꦶ, ꦱꦸꦤ꧀ꦢꦫꦁ. ꦤꦺꦴ ꦕꦺ ꦩꦸꦚ꧀ꦕꦠꦶ, ꦄꦴꦛꦴꦤꦴꦛꦶꦪꦱꦸꦠ꧀ꦠꦁ ꦨꦟꦶꦠꦧ꧀ꦧꦁ. ꦠꦁ ꦨꦟꦤ꧀ꦠꦺꦤ ꦕ ꦨꦶꦏ꧀ꦑꦸꦤꦴ ꦥꦶꦛ꧀ꦜꦁ ꦮꦴ ꦩꦁꦱꦁ ꦮꦴ ꦤ ꦑꦴꦢꦶꦠꦧ꧀ꦧꦁ, ꦱꦸꦱꦴꦤꦺ ꦤ ꦮꦱꦶꦠꦧ꧀ꦧꦁ. ꦏꦱ꧀ꦩꦴ? ꦄꦩꦤꦸꦱ꧀ꦱꦴ ꦎꦠꦴꦫꦁ ꦭꦨꦤ꧀ꦠꦶ. ꦥꦫꦶꦠ꧀ꦠꦏꦫꦟꦛ꧀ꦜꦴꦤꦁ ꦲꦫꦶꦠꦹꦥꦭꦶꦠ꧀ꦠꦁ ꦏꦴꦫꦺꦠ꧀ꦮꦴ ꦠꦠ꧀ꦡ ꦥꦫꦶꦱꦸꦢ꧀ꦣꦁ ꦄꦴꦱꦤꦁ ꦥꦚ꧀ꦚꦥꦺꦠ꧀ꦮꦴ ꦤꦶꦱꦷꦢꦶꦠꦧ꧀ꦧꦁ. ꦥꦫꦶꦠ꧀ꦠꦏꦴꦫꦏꦺꦴ ꦨꦶꦏ꧀ꦑꦸ ꦮꦶꦲꦴꦫꦠꦺꦴ ꦓꦫꦁ ꦤꦺꦤ꧀ꦠꦺꦲꦶ ꦦꦭꦏꦴꦮꦸꦣꦺꦲꦶ ꦥꦫꦶꦮꦴꦫꦺꦠ꧀ꦮꦴ ꦤꦺꦠꦧ꧀ꦧꦺꦴ. ꦄꦧ꧀ꦨꦺꦴꦏꦴꦱꦺ ꦤꦶꦱꦷꦢꦶꦠ꧀ꦮꦴ ꦤ ꦮꦠ꧀ꦠꦧ꧀ꦧꦁ, ꦢ꧀ꦮꦴꦫꦮꦴꦠꦥꦴꦤꦴꦤꦶ ꦥꦶꦢꦲꦶꦠ꧀ꦮꦴ ꦤꦶꦱꦶꦤ꧀ꦤꦺꦤ ꦄꦴꦮꦸꦣꦲꦠ꧀ꦡꦺꦲꦶ ꦱꦩ꧀ꦥꦫꦶꦮꦴꦫꦶꦠꦺꦤ ꦩꦺꦠ꧀ꦠꦕꦶꦠ꧀ꦠꦁ ꦥꦸꦫꦺꦕꦴꦫꦶꦏꦁ ꦏꦠ꧀ꦮꦴ ꦮꦠ꧀ꦠꦧ꧀ꦧꦁ, ꦥꦜꦩꦁ ꦱꦶꦏ꧀ꦑꦴꦥꦢꦴꦤꦶ ꦒꦴꦲꦴꦥꦺꦠ꧀ꦮꦴ ꦱꦷꦭꦺ ꦥꦠꦶꦛ꧀ꦜꦶꦠꦱ꧀ꦱ ꦥꦫꦶꦠ꧀ꦠꦁ ꦏꦴꦠꦧ꧀ꦧꦁ. ꦌꦮꦩ꧀ꦥꦶ ꦩꦺꦴꦕꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦤ ꦮꦶꦲꦴꦫꦁ ꦤꦺꦠ꧀ꦮꦴ ꦕꦺꦠꦶꦪꦔ꧀ꦒꦟꦺ ꦤꦶꦥꦗ꧀ꦗꦴꦥꦺꦠ꧀ꦮꦴ ꦄꦴꦱꦤꦥꦹꦗꦁ ꦏꦴꦫꦺꦠ꧀ꦮꦴ ꦢꦷꦥꦺ ꦗꦴꦭꦴꦥꦺꦠ꧀ꦮꦴ ꦕꦺꦠꦶꦪꦔ꧀ꦒꦟꦁ ꦱꦩ꧀ꦩꦗ꧀ꦗꦶꦠ꧀ꦮꦴ ꦩꦔ꧀ꦒꦭꦏꦡꦴ ꦮꦠ꧀ꦠꦧ꧀ꦧꦴ, ꦱꦧ꧀ꦧꦱꦤ꧀ꦤꦶꦥꦴꦠꦺꦴ ꦓꦺꦴꦱꦺꦠꦧ꧀ꦧꦺꦴ, ꦮꦶꦲꦴꦫꦱ꧀ꦱ ꦈꦥꦮꦤꦺ ꦗꦺꦛ꧀ꦜꦏꦫꦸꦏ꧀ꦑꦺꦴ ꦤꦴꦩ ꦲꦺꦴꦠꦶ, ꦠꦠ꧀ꦡ ‘‘ꦨꦶꦏ꧀ꦑꦸꦱꦔ꧀ꦓꦺꦴ ꦠꦸꦩ꧀ꦲꦴꦏꦁ ꦄꦴꦒꦩꦤꦁ ꦥꦠꦶꦩꦴꦤꦺꦠꦷ’’ꦠꦶ ꦥꦲꦶꦟꦶꦠꦧ꧀ꦧꦁ. ꦱꦧ꧀ꦧꦱꦤ꧀ꦤꦶꦥꦴꦠꦛ꧀ꦜꦴꦤꦺ ꦄꦤꦴꦒꦤ꧀ꦠꦸꦁ ꦤꦴꦩ ꦤ ꦭꦨꦠꦶ, ꦠꦠꦺꦴ ꦄꦩꦤꦸꦱ꧀ꦱꦒꦲꦶꦠꦏꦺꦴ ‘‘ꦠ꧀ꦮꦁ ꦏꦺꦴꦤꦴꦩꦺꦴꦱꦷ’’ꦠꦶ ꦥꦸꦕ꧀ꦖꦶꦠꦧ꧀ꦧꦺꦴ, ꦤꦴꦩꦺ ꦏꦡꦶꦠꦺ ꦤꦴꦩꦺꦤꦺꦮ ꦄꦴꦭꦥꦶꦠꦧ꧀ꦧꦺꦴ, ‘‘ꦆꦠ꧀ꦡꦤ꧀ꦤꦴꦩ ꦠꦸꦪ꧀ꦲꦁ ꦩꦴꦭꦴꦒꦤ꧀ꦣꦴꦢꦷꦱꦸ ꦥꦠ꧀ꦠꦶ, ꦄꦴꦱꦤꦥꦹꦗꦴꦪꦁ ꦥꦠ꧀ꦠꦶ, ꦥꦶꦟ꧀ꦝꦥꦴꦠꦺ ꦥꦠ꧀ꦠꦶ, ꦨꦶꦏ꧀ꦑꦸꦱꦔ꧀ꦓꦺꦤ ꦠꦸꦪ꧀ꦲꦁ ꦥꦟ꧀ꦟꦴꦏꦴꦫꦠ꧀ꦡꦴꦪ ꦩꦲꦴꦩꦔ꧀ꦒꦭꦏꦡꦴ ꦮꦸꦠ꧀ꦠꦴ, ꦨꦶꦏ꧀ꦑꦸꦱꦔ꧀ꦓꦺ ꦒꦴꦫꦮꦺꦤ ꦌꦠꦁ ꦩꦸꦚ꧀ꦕꦴꦲꦷ’’ꦠꦶ ꦩꦺꦴꦕꦺꦠꦧ꧀ꦧꦺꦴ. ꦱꦕꦺ ꦤ ꦩꦸꦚ꧀ꦕꦠꦶ, ꦢꦺꦮꦠꦴꦤꦁ ꦄꦴꦫꦺꦴꦕꦺꦠꦧ꧀ꦧꦁ ‘‘ꦠꦸꦩ꧀ꦲꦺ ꦗꦴꦤꦴꦡ, ꦄꦪꦁ ꦄꦩꦤꦸꦱ꧀ꦱꦺꦴ ꦄꦩ꧀ꦲꦴꦏꦁ ꦮꦕꦤꦁ ꦤ ꦏꦫꦺꦴꦠꦶ, ꦩꦪꦁ ꦧꦸꦢ꧀ꦣꦄꦴꦟꦁ ꦏꦫꦶꦱ꧀ꦱꦴꦩꦴ’’ꦠꦶ ꦥꦫꦶꦠ꧀ꦠꦁ ꦏꦴꦠꦧ꧀ꦧꦁ. ꦌꦠꦁ ꦠꦴꦮ ꦒꦶꦲꦷꦤꦁ ꦥꦫꦶꦏꦩ꧀ꦩꦁ. ꦱꦕꦺ ꦥꦤ ꦨꦶꦏ꧀ꦑꦸ ꦄꦩꦤꦸꦱ꧀ꦱꦺꦤ ꦒꦲꦶꦠꦺꦴ ꦲꦺꦴꦠꦶ, ꦄꦴꦱꦤꦴꦤꦶ ꦣꦺꦴꦮꦶꦠ꧀ꦮꦴ ꦱꦧ꧀ꦧꦱꦤ꧀ꦤꦶꦥꦴꦠꦁ ꦓꦺꦴꦱꦴꦥꦺꦠ꧀ꦮꦴ ꦒꦤ꧀ꦣꦩꦴꦭꦴꦢꦷꦱꦸ ꦥꦠ꧀ꦠꦶꦁ ꦢꦠ꧀ꦮꦴ ꦥꦫꦶꦠ꧀ꦠꦁ ꦨꦟꦶꦠꦧ꧀ꦧꦁ, ꦆꦢꦁ ꦨꦶꦏ꧀ꦑꦹꦤꦁ ꦥꦫꦶꦏꦩ꧀ꦩꦁ. ꦌꦮꦁ ꦥꦫꦶꦠ꧀ꦠꦺ ꦥꦛꦶꦥꦗ꧀ꦗꦶꦠꦧ꧀ꦧꦁ.

꧒꧐. ꦥꦛꦶꦱꦤ꧀ꦡꦴꦫꦺ ꦥꦤ ꦄꦪꦁ ꦮꦶꦤꦶꦕ꧀ꦖꦪꦺꦴ (ꦥꦴꦫꦴ. ꦄꦛ꧀ꦜ. ꧒.꧑꧘꧕-꧗) – ꦄꦤꦴꦩꦛ꧀ꦜꦥꦶꦟ꧀ꦝꦥꦴꦠꦺꦴ ꦏꦱ꧀ꦱ ꦢꦴꦠꦧ꧀ꦧꦺꦴ, ꦏꦱ꧀ꦱ ꦤ ꦢꦴꦠꦧ꧀ꦧꦺꦴ? ꦩꦴꦠꦴꦥꦶꦠꦹꦤꦁ ꦠꦴꦮ ꦢꦴꦠꦧ꧀ꦧꦺꦴ. ꦱꦕꦺꦥꦶ ꦏꦲꦴꦥꦟꦒ꧀ꦓꦤꦏꦺꦴ ꦲꦺꦴꦠꦶ, ꦱꦢ꧀ꦣꦴꦢꦺꦪ꧀ꦪꦮꦶꦤꦶꦥꦴꦠꦤꦁ ꦤꦠ꧀ꦡꦶ. ꦩꦴꦠꦴꦥꦶꦠꦸꦈꦥꦛ꧀ꦜꦴꦏꦴꦤꦁ ꦮꦺꦪ꧀ꦪꦴꦮꦕ꧀ꦕꦏꦫꦱ꧀ꦱ ꦥꦟ꧀ꦝꦸꦥꦭꦴꦱꦱ꧀ꦱ ꦕꦴꦠꦶ ꦌꦠꦺꦱꦩ꧀ꦥꦶ ꦢꦴꦠꦧ꧀ꦧꦺꦴ. ꦠꦠ꧀ꦡ ꦥꦟ꧀ꦝꦸꦥꦭꦴꦱꦱ꧀ꦱ ꦡꦴꦭꦏꦺ ꦥꦏ꧀ꦑꦶꦥꦶꦠ꧀ꦮꦴꦥꦶ ꦢꦴꦠꦸꦁ ꦮꦛ꧀ꦛꦠꦶ, ꦠꦁ ꦜꦥꦺꦠ꧀ꦮꦴ ꦄꦚ꧀ꦚꦺꦱꦁ ꦄꦒꦴꦫꦶꦏꦴꦤꦁ ꦩꦴꦠꦴꦥꦶꦠꦹꦤꦩ꧀ꦥꦶ ꦤ ꦮꦛ꧀ꦛꦠꦶ. ꦥꦧ꧀ꦧꦗꦶꦠꦥꦫꦶꦨꦺꦴꦒꦺꦴ ꦲꦶ ꦄꦒꦴꦫꦶꦏꦴꦤꦁ ꦕꦺꦠꦶꦪꦛ꧀ꦜꦴꦤꦶꦪꦺꦴ. ꦄꦥꦶꦕ ꦄꦤꦴꦩꦛ꧀ꦜꦥꦶꦟ꧀ꦝꦥꦴꦡꦺꦴ ꦤꦴꦩꦺꦱ ꦱꦩ꧀ꦥꦠ꧀ꦠꦱ꧀ꦱ ꦢꦴꦩꦫꦶꦏꦕꦺꦴꦫꦱ꧀ꦱꦥꦶ ꦆꦱ꧀ꦱꦫꦶꦪꦱ꧀ꦱꦥꦶ ꦢꦴꦠꦧ꧀ꦧꦺꦴ. ꦏꦱ꧀ꦩꦴ? ꦠꦺ ꦲꦶ ꦄꦢꦷꦪꦩꦴꦤꦺꦥꦶ ‘‘ꦤ ꦢꦺꦤ꧀ꦠꦷ’’ꦠꦶ ꦄꦴꦩꦱꦶꦠ꧀ꦮꦴ ꦢꦷꦪꦩꦴꦤꦺꦥꦶ ‘‘ꦈꦕ꧀ꦖꦶꦛ꧀ꦜꦏꦁ ꦢꦺꦤ꧀ꦠꦷ’’ꦠꦶ ꦏꦸꦗ꧀ꦙꦤ꧀ꦠꦶ, ꦏꦸꦢ꧀ꦣꦴ ꦗꦷꦮꦶꦠꦴꦥꦶ ꦮꦺꦴꦫꦺꦴꦥꦺꦤ꧀ꦠꦶ, ꦱꦴꦱꦤꦱ꧀ꦱꦥꦶ ꦄꦤ꧀ꦠꦫꦴꦪꦁ ꦏꦫꦺꦴꦤ꧀ꦠꦶ. ꦫꦗ꧀ꦗꦁ ꦥꦠ꧀ꦡꦪꦩꦴꦤꦱ꧀ꦱ ꦮꦶꦕꦫꦠꦺꦴ ꦕꦺꦴꦫꦤꦴꦒꦱ꧀ꦱ ꦮꦠ꧀ꦡꦸ ꦕꦺꦠ꧀ꦡ ꦏꦡꦺꦠꦧ꧀ꦧꦁ. ꦌꦮꦁ ꦄꦤꦴꦩꦛ꧀ꦜꦥꦶꦟ꧀ꦝꦥꦴꦠꦺ ꦥꦛꦶꦥꦗ꧀ꦗꦶꦠꦧ꧀ꦧꦁ.

ꦥꦛꦶꦱꦤ꧀ꦡꦴꦫꦺꦴ ꦕ ꦤꦴꦩꦴꦪꦁ ꦏꦱ꧀ꦱ ꦏꦴꦠꦧ꧀ꦧꦺꦴ, ꦏꦱ꧀ꦱ ꦤ ꦏꦴꦠꦧ꧀ꦧꦺꦴ? ꦥꦛꦶꦱꦤ꧀ꦡꦴꦫꦺꦴ ꦤꦴꦩ ꦮꦶꦲꦴꦫꦁ ꦱꦩ꧀ꦥꦠ꧀ꦠꦱ꧀ꦱ ꦪꦱ꧀ꦱ ꦏꦱ꧀ꦱꦕꦶ ꦄꦴꦒꦤ꧀ꦠꦸꦏꦱ꧀ꦱ ꦮꦴ ꦢꦭꦶꦢ꧀ꦢꦱ꧀ꦱ ꦮꦴ ꦕꦺꦴꦫꦱ꧀ꦱ ꦮꦴ ꦆꦱ꧀ꦱꦫꦱ꧀ꦱ ꦮꦴ ꦏꦴꦠꦧ꧀ꦧꦺꦴꦪꦺꦮ. ꦏꦡꦁ? ꦄꦴꦒꦤ꧀ꦠꦸꦏꦁ ꦠꦴꦮ ꦑꦷꦟꦥꦫꦶꦧ꧀ꦧꦪꦁ ꦮꦶꦲꦴꦫꦁ ꦱꦩ꧀ꦥꦠ꧀ꦠꦁ ꦢꦶꦱ꧀ꦮꦴ ‘‘ꦥꦴꦤꦷꦪꦁ ꦥꦶꦮꦴ’’ꦠꦶ ꦢꦴꦠꦧ꧀ꦧꦁ, ꦥꦴꦢꦩꦏ꧀ꦑꦤꦠꦺꦭꦁ ꦢꦴꦠꦧ꧀ꦧꦁ, ꦏꦴꦭꦺ ꦄꦴꦒꦠꦱ꧀ꦱ ꦪꦴꦒꦸꦨꦠ꧀ꦠꦁ, ꦮꦶꦏꦴꦭꦺ ꦄꦴꦒꦠꦱ꧀ꦱ ꦱꦕꦺ ꦠꦟ꧀ꦝꦸꦭꦴ ꦄꦠ꧀ꦡꦶ, ꦠꦟ꧀ꦝꦸꦭꦴ ꦢꦴꦠꦧ꧀ꦧꦴ. ꦄꦮꦺꦭꦴꦪ ꦱꦩ꧀ꦥꦠ꧀ꦠꦺꦴꦥꦶ ‘‘ꦒꦕ꧀ꦖꦴꦲꦷ’’ꦠꦶ ꦤ ꦮꦠ꧀ꦠꦧ꧀ꦧꦺꦴ, ꦱꦪꦤꦛ꧀ꦜꦴꦤꦁ ꦢꦴꦠꦧ꧀ꦧꦁ. ꦱꦧ꧀ꦧꦁ ꦄꦥꦕ꧀ꦕꦴꦱꦷꦪꦤ꧀ꦠꦺꦤꦺꦮ ꦏꦴꦠꦧ꧀ꦧꦁ. ‘‘ꦩꦤꦸꦱ꧀ꦱꦴ ꦤꦴꦩ ꦕꦠꦸꦥꦕ꧀ꦕꦪꦢꦴꦪꦏꦴ, ꦌꦮꦁ ꦱꦔ꧀ꦒꦲꦺ ꦏꦫꦶꦪꦩꦴꦤꦺ ꦥꦸꦤꦥ꧀ꦥꦸꦤꦁ ꦥꦱꦷꦢꦶꦠ꧀ꦮꦴ ꦈꦥꦏꦴꦫꦁ ꦏꦫꦶꦱ꧀ꦱꦤ꧀ꦠꦷ’’ꦠꦶ ꦕꦶꦠ꧀ꦠꦁ ꦤ ꦈꦥ꧀ꦥꦴꦢꦺꦠꦧ꧀ꦧꦁ. ꦕꦺꦴꦫꦴꦤꦁ ꦥꦤ ꦱꦔ꧀ꦓꦶꦏꦩ꧀ꦥꦶ ꦢꦴꦠꦧ꧀ꦧꦁ. ꦥꦛꦶꦱꦤ꧀ꦡꦴꦫꦴꦤꦶꦱꦁꦱꦢꦷꦥꦤꦠ꧀ꦡꦚ꧀ꦕ ꦕꦺꦴꦫꦤꦴꦒꦮꦠ꧀ꦡꦸ, ꦨꦴꦠꦫꦴ ꦱꦢ꧀ꦣꦶꦁ ꦗꦩ꧀ꦧꦸꦢꦷꦥꦒꦠꦱ꧀ꦱ ꦩꦲꦴꦤꦴꦒꦫꦚ꧀ꦚꦺꦴ ꦮꦠ꧀ꦡꦸ, ꦥꦶꦠꦸꦫꦴꦗꦱ꧀ꦱ ꦫꦗ꧀ꦗꦺ ꦕꦠꦸꦤ꧀ꦤꦁ ꦄꦩꦕ꧀ꦕꦴꦤꦁ ꦮꦠ꧀ꦡꦸ, ꦄꦨꦪꦕꦺꦴꦫꦮꦠ꧀ꦡꦹꦠꦶ ꦌꦮꦩꦴꦢꦷꦤꦶ ꦧꦲꦹꦤꦶ ꦮꦠ꧀ꦡꦹꦤꦶ ꦩꦲꦴꦄꦛ꧀ꦜꦏꦡꦴꦪꦁ ꦮꦶꦠ꧀ꦡꦴꦫꦠꦺꦴ ꦮꦸꦠ꧀ꦠꦴꦤꦶ.

ꦠꦠ꧀ꦫꦴꦪꦁ ꦌꦏꦮꦠ꧀ꦡꦸꦢꦷꦥꦤꦴ – ꦱꦷꦲꦭ꦳ꦢꦷꦥꦺ ꦏꦶꦫ ꦄꦨꦪꦺꦴ ꦤꦴꦩ ꦕꦺꦴꦫꦺꦴ ꦥꦚ꧀ꦕꦱꦠꦥꦫꦶꦮꦴꦫꦺꦴ ꦌꦏꦱ꧀ꦩꦶꦁ ꦜꦴꦤꦺ ꦑꦤ꧀ꦣꦴꦮꦴꦫꦁ ꦧꦤ꧀ꦣꦶꦠ꧀ꦮꦴ ꦱꦩꦤ꧀ꦠꦴ ꦠꦶꦪꦺꦴꦗꦤꦁ ꦈꦧ꧀ꦧꦴꦱꦺꦠ꧀ꦮꦴ ꦮꦱꦠꦶ. ꦄꦤꦸꦫꦴꦣꦥꦸꦫꦮꦴꦱꦶꦤꦺꦴ ꦏꦢꦩ꧀ꦧꦤꦢꦶꦁ ꦤ ꦈꦠ꧀ꦠꦫꦤ꧀ꦠꦶ, ꦕꦺꦠꦶꦪꦒꦶꦫꦶꦩꦒ꧀ꦒꦺ ꦗꦤꦱꦚ꧀ꦕꦴꦫꦺꦴ ꦈꦥꦕ꧀ꦖꦶꦤ꧀ꦤꦺꦴ. ꦄꦡꦺꦏꦢꦶꦮꦱꦁ ꦕꦺꦴꦫꦺꦴ ‘‘ꦕꦺꦠꦶꦪꦒꦶꦫꦶꦁ ꦮꦶꦭꦸꦩ꧀ꦥꦶꦱ꧀ꦱꦴꦩꦷ’’ꦠꦶ ꦄꦒꦩꦴꦱꦶ. ꦄꦴꦫꦴꦩꦶꦏꦴ ꦢꦶꦱ꧀ꦮꦴ ꦢꦷꦓꦨꦴꦟꦏꦄꦨꦪꦠ꧀ꦡꦺꦫꦱ꧀ꦱ ꦄꦴꦫꦺꦴꦕꦺꦱꦸꦁ. ꦡꦺꦫꦺꦴ ‘‘ꦱꦥ꧀ꦥꦶꦦꦴꦟꦶꦠꦴꦢꦷꦤꦶ ꦄꦠ꧀ꦡꦷ’’ꦠꦶ ꦥꦸꦕ꧀ꦖꦶ. ‘‘ꦄꦠ꧀ꦡꦶ, ꦨꦤ꧀ꦠꦺ’’ꦠꦶ. ‘‘ꦕꦺꦴꦫꦴꦤꦁ ꦢꦺꦡ’’. ‘‘ꦠꦟ꧀ꦝꦸꦭꦴ ꦄꦠ꧀ꦡꦷ’’ꦠꦶ. ‘‘ꦄꦠ꧀ꦡꦶ, ꦨꦤ꧀ꦠꦺ, ꦱꦔ꧀ꦓꦱ꧀ꦱꦠ꧀ꦡꦴꦪ ꦄꦴꦲꦛꦴ ꦠꦟ꧀ꦝꦸꦭꦴ ꦕ ꦥꦏ꧀ꦏꦱꦴꦏꦚ꧀ꦕ ꦒꦺꦴꦫꦱꦺꦴ ꦕꦴ’’ꦠꦶ. ‘‘ꦨꦠ꧀ꦠꦁ ꦱꦩ꧀ꦥꦴꦢꦺꦠ꧀ꦮꦴ ꦕꦺꦴꦫꦴꦤꦁ ꦢꦺꦡꦴ’’ꦠꦶ. ꦄꦴꦫꦴꦩꦶꦏꦴ ꦠꦡꦴ ꦏꦫꦶꦁꦱꦸ. ꦕꦺꦴꦫꦴ ꦨꦠ꧀ꦠꦁ ꦨꦸꦚ꧀ꦗꦶꦠ꧀ꦮꦴ ‘‘ꦏꦺꦤꦴꦪꦁ ꦥꦛꦶꦱꦤ꧀ꦡꦴꦫꦺꦴ ꦏꦠꦺꦴ’’ꦠꦶ ꦥꦸꦕ꧀ꦖꦶꦁꦱꦸ. ‘‘ꦄꦩ꧀ꦲꦴꦏꦁ ꦄꦪ꧀ꦪꦺꦤ ꦄꦨꦪꦠ꧀ꦡꦺꦫꦺꦤꦴ’’ꦠꦶ. ꦕꦺꦴꦫꦴ ꦡꦺꦫꦱ꧀ꦱ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦮꦤ꧀ꦢꦶꦠ꧀ꦮꦴ ꦄꦴꦲꦁꦱꦸ ‘‘ꦩꦪꦁ ‘ꦱꦔ꧀ꦓꦱ꧀ꦱ ꦕ ꦕꦺꦠꦶꦪꦱ꧀ꦱ ꦕ ꦱꦤ꧀ꦠꦏꦁ ꦄꦕ꧀ꦖꦶꦤ꧀ꦢꦶꦠ꧀ꦮꦴ ꦒꦲꦺꦱ꧀ꦱꦴꦩꦴ’ꦠꦶ ꦄꦴꦒꦠꦴ, ꦠꦸꦩ꧀ꦲꦴꦏꦁ ꦥꦤ ꦆꦩꦶꦤꦴ ꦥꦛꦶꦱꦤ꧀ꦡꦴꦫꦺꦤ ꦩꦪꦁ ꦥꦱꦤ꧀ꦤꦴ, ꦄꦗ꧀ꦗ ꦥꦛ꧀ꦜꦴꦪ ꦮꦶꦲꦴꦫꦺ ꦣꦩ꧀ꦩꦶꦏꦴꦫꦏ꧀ꦑꦴ ꦄꦩ꧀ꦲꦴꦏꦁ ꦄꦴꦪꦠ꧀ꦠꦴ ꦲꦺꦴꦠꦸ, ꦤꦴꦒꦫꦴ ꦄꦴꦒꦤ꧀ꦠ꧀ꦮꦴ ꦢꦴꦤꦁ ꦢꦺꦤ꧀ꦠꦸ, ꦕꦺꦠꦶꦪꦁ ꦮꦤ꧀ꦢꦤ꧀ꦠꦹ’’ꦠꦶ. ꦠꦠꦺꦴ ꦥꦛ꧀ꦜꦴꦪ ꦕ ꦤꦴꦒꦫꦺ ꦢꦴꦤꦁ ꦢꦴꦠꦸꦁ ꦄꦴꦒꦕ꧀ꦖꦤ꧀ꦠꦺ ꦤꦢꦷꦠꦷꦫꦺꦪꦺꦮ ꦥꦕ꧀ꦕꦸꦒ꧀ꦒꦤ꧀ꦠ꧀ꦮꦴ ꦫꦏ꧀ꦑꦤ꧀ꦠꦴ ꦮꦶꦲꦴꦫꦁ ꦤꦺꦤ꧀ꦠꦶ, ꦮꦶꦲꦴꦫꦺꦥꦶ ꦢꦴꦤꦁ ꦢꦺꦤ꧀ꦠꦴꦤꦁ ꦫꦏ꧀ꦑꦁ ꦏꦠ꧀ꦮꦴ ꦠꦶꦛ꧀ꦜꦤ꧀ꦠꦶ. ꦠꦺꦥꦶ ꦨꦶꦏ꧀ꦑꦹꦤꦁ ꦨꦸꦠ꧀ꦠꦴꦮꦱꦺꦱꦁ ꦕꦺꦴꦫꦴꦤꦁ ꦢꦺꦤ꧀ꦠꦶ. ꦒꦩꦤꦏꦴꦭꦺꦥꦶ ꦠꦺ ꦕꦺꦴꦫꦴ ꦤꦢꦷꦠꦷꦫꦁ ꦥꦴꦥꦺꦠ꧀ꦮꦴ ꦤꦶꦮꦠ꧀ꦠꦤ꧀ꦠꦶ.

ꦄꦡꦺꦏꦢꦶꦮꦱꦁ ꦨꦶꦏ꧀ꦑꦸꦱꦔ꧀ꦓꦺ ꦑꦷꦪꦤꦏꦏꦡꦴ ꦈꦥ꧀ꦥꦤ꧀ꦤꦴ ‘‘ꦡꦺꦫꦺꦴ ꦆꦱ꧀ꦱꦫꦮꦠꦴꦪ ꦱꦔ꧀ꦓꦱꦤ꧀ꦠꦏꦁ ꦕꦺꦴꦫꦴꦤꦁ ꦄꦢꦴꦱꦷ’’ꦠꦶ. ꦡꦺꦫꦺꦴ ꦱꦤ꧀ꦤꦶꦥꦴꦠꦁ ꦏꦴꦫꦴꦥꦺꦠ꧀ꦮꦴ ꦄꦴꦲ ‘‘ꦕꦺꦴꦫꦴ ‘ꦱꦔ꧀ꦓꦱ꧀ꦱ ꦥꦏꦠꦶꦮꦛ꧀ꦛꦚ꧀ꦕ ꦕꦺꦠꦶꦪꦱꦤ꧀ꦠꦏꦚ꧀ꦕ ꦄꦕ꧀ꦖꦶꦤ꧀ꦢꦶꦠ꧀ꦮꦴ ꦒꦟ꧀ꦲꦶꦱ꧀ꦱꦴꦩꦴ’ꦠꦶ ꦄꦴꦒꦩꦶꦁꦱꦸ, ꦄꦡ ꦠꦺꦱꦁ ꦩꦪꦴ ‘ꦌꦠꦁ ꦤ ꦲꦫꦶꦱ꧀ꦱꦤ꧀ꦠꦷ’ꦠꦶ ꦌꦠ꧀ꦠꦏꦺꦴ ꦤꦴꦩ ꦥꦛꦶꦱꦤ꧀ꦡꦴꦫꦺꦴ ꦏꦠꦺꦴ, ꦠꦁ ꦱꦧ꧀ꦧꦩ꧀ꦥꦶ ꦌꦏꦠꦺꦴ ꦱꦩ꧀ꦥꦶꦟ꧀ꦝꦺꦠ꧀ꦮꦴ ꦄꦒ꧀ꦓꦴꦥꦺꦡ, ꦠꦺꦤ ꦏꦴꦫꦟꦺꦤ ꦄꦮꦶꦭꦸꦠ꧀ꦠꦁ ꦨꦟ꧀ꦝꦁ ꦌꦏꦠꦺꦴ ꦱꦩ꧀ꦥꦶꦟ꧀ꦝꦺꦠ꧀ꦮꦴ ꦄꦒ꧀ꦓꦴꦥꦺꦡꦴ’’ꦠꦶ. ꦠꦠꦺꦴ ꦱꦧ꧀ꦧꦩ꧀ꦥꦶ ꦡꦺꦫꦺꦤ ꦢꦶꦤ꧀ꦤꦏꦁ ꦕꦺꦠꦶꦪꦓꦫꦺ ꦌꦏꦁ ꦮꦫꦥꦺꦴꦠ꧀ꦡꦏꦕꦶꦠ꧀ꦠꦠ꧀ꦡꦫꦟꦁ ꦤ ꦄꦒ꧀ꦓꦠꦶ. ꦠꦠꦺꦴ ꦄꦴꦲꦁꦱꦸ ‘‘ꦡꦺꦫꦺꦤ ꦏꦠꦺꦴ ꦥꦛꦶꦱꦤ꧀ꦡꦴꦫꦺꦴ ꦱꦸꦏꦠꦺꦴ, ꦕꦺꦴꦢꦺꦠꦸꦁ ꦮꦴ ꦱꦴꦫꦺꦠꦸꦁ ꦮꦴ ꦤ ꦭꦧ꧀ꦨꦠꦶ, ꦒꦷꦮꦴ ꦮꦴ ꦄꦮꦲꦴꦫꦺꦴ ꦮꦴ ꦤꦠ꧀ꦡꦷ’’ꦠꦶ. ꦌꦮꦁ ꦩꦲꦴꦤꦶꦱꦁꦱꦺꦴ ꦥꦛꦶꦱꦤ꧀ꦡꦴꦫꦺꦴꦠꦶ ꦱꦭ꧀ꦭꦏ꧀ꦑꦺꦠ꧀ꦮꦴ ꦏꦠ꧀ꦠꦧ꧀ꦧꦺꦴ ꦥꦟ꧀ꦝꦶꦠꦺꦤ ꦨꦶꦏ꧀ꦑꦸꦤꦴꦠꦶ.

ꦆꦠꦶ ꦥꦴꦭ꦳ꦶꦩꦸꦠ꧀ꦠꦏꦮꦶꦤꦪꦮꦶꦤꦶꦕ꧀ꦖꦪꦱꦔ꧀ꦒꦲꦺ

ꦨꦺꦱꦗ꧀ꦗꦴꦢꦶꦏꦫꦟꦮꦶꦤꦶꦕ꧀ꦖꦪꦏꦡꦴ ꦱꦩꦠ꧀ꦠꦴ.