꧓꧒. ꦒꦫꦸꦏꦴꦥꦠ꧀ꦠꦶꦮꦸꦛ꧀ꦜꦴꦤꦮꦶꦤꦶꦕ꧀ꦖꦪꦏꦡꦴ

ꦥꦛꦶꦕ꧀ꦖꦤ꧀ꦤꦥꦫꦶꦮꦴꦱꦏꦡꦴ

꧒꧓꧖. ꦌꦮꦁ ꦕꦺꦴꦢꦤꦴꦢꦶꦮꦶꦤꦶꦕ꧀ꦖꦪꦁ ꦏꦡꦺꦠ꧀ꦮꦴ ꦆꦢꦴꦤꦶ ꦒꦫꦸꦏꦴꦥꦠ꧀ꦠꦶꦮꦸꦛ꧀ꦜꦴꦤꦮꦶꦤꦶꦕ꧀ꦖꦪꦁ ꦏꦡꦺꦠꦸꦁ ‘‘ꦒꦫꦸꦏꦴꦥꦠ꧀ꦠꦶꦮꦸꦛ꧀ꦜꦴꦤ’’ꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦒꦫꦸ ꦄꦭꦲꦸꦏꦁ ꦥꦛꦶꦏꦫꦟꦁ ꦌꦠꦶꦱ꧀ꦱꦴ ꦄꦴꦥꦠ꧀ꦠꦶꦪꦴꦠꦶ ꦒꦫꦸꦏꦴ, ꦄꦴꦥꦗ꧀ꦗꦶꦠꦧ꧀ꦧꦴꦠꦶ ꦄꦴꦥꦠ꧀ꦠꦶ, ꦒꦫꦸꦏꦴ ꦕ ꦱꦴ ꦄꦴꦥꦠ꧀ꦠꦶ ꦕꦴꦠꦶ ꦒꦫꦸꦏꦴꦥꦠ꧀ꦠꦶ, ꦮꦸꦛ꧀ꦜꦲꦠꦺ ꦮꦸꦛ꧀ꦜꦴꦤꦁ, ꦒꦫꦸꦏꦴꦥꦠ꧀ꦠꦶꦪꦴ ꦮꦸꦛ꧀ꦜꦴꦤꦁ ꦒꦫꦸꦏꦴꦥꦠ꧀ꦠꦶ ꦮꦸꦛ꧀ꦜꦴꦤꦁ. ꦏꦶꦁ ꦠꦁ? ꦱꦔ꧀ꦓꦴꦢꦶꦱꦺꦱꦴꦥꦠ꧀ꦠꦶꦠꦺꦴ ꦥꦫꦶꦱꦸꦢ꧀ꦣꦨꦴꦮꦺꦴ. ꦠꦺꦤꦴꦲ ‘‘ꦥꦫꦶꦮꦴꦱꦩꦴꦤꦠ꧀ꦠꦴꦢꦷꦲꦶ ꦮꦶꦤꦪꦏꦩ꧀ꦩꦺꦲꦶ ꦒꦫꦸꦏꦴꦥꦠ꧀ꦠꦶꦠꦺꦴ ꦮꦸꦛ꧀ꦜꦴꦤ’’ꦤ꧀ꦠꦶ. ꦏꦶꦚ꧀ꦕꦴꦥꦶ ꦕꦠꦸꦧ꧀ꦧꦶꦣꦺꦴ ꦥꦫꦶꦮꦴꦱꦺꦴ, ꦄꦥ꧀ꦥꦛꦶꦕ꧀ꦖꦤ꧀ꦤꦥꦫꦶꦮꦴꦱꦺꦴ ꦥꦤ ꦆꦣ ꦤꦴꦣꦶꦥ꧀ꦥꦺꦠꦺꦴꦠꦶ ꦄꦴꦲ ‘‘ꦠꦶꦮꦶꦣꦺꦴ ꦥꦫꦶꦮꦴꦱꦺꦴ’’ꦠꦶ. ꦠꦡꦴ ꦲꦶ ꦮꦸꦠ꧀ꦠꦁ ꦱꦩꦤ꧀ꦠꦥꦴꦱꦴꦢꦶꦏꦴꦪꦁ (ꦕꦹꦭ꦳ꦮ. ꦄꦛ꧀ꦜ. ꧗꧕) ‘‘ꦠꦠ꧀ꦡ ꦕꦠꦸꦧ꧀ꦧꦶꦣꦺꦴ ꦥꦫꦶꦮꦴꦱꦺꦴ – ꦄꦥ꧀ꦥꦛꦶꦕ꧀ꦖꦤ꧀ꦤꦥꦫꦶꦮꦴꦱꦺꦴ ꦥꦛꦶꦕ꧀ꦖꦤ꧀ꦤꦥꦫꦶꦮꦴꦱꦺꦴ ꦱꦸꦢ꧀ꦣꦤ꧀ꦠꦥꦫꦶꦮꦴꦱꦺꦴ ꦱꦩꦺꦴꦣꦴꦤꦥꦫꦶꦮꦴꦱꦺꦴꦠꦶ. ꦠꦺꦱꦸ ‘ꦪꦺꦴ ꦱꦺꦴ, ꦨꦶꦏ꧀ꦑꦮꦺ, ꦄꦚ꧀ꦚꦺꦴꦥꦶ ꦄꦚ꧀ꦚꦠꦶꦠ꧀ꦡꦶꦪꦥꦸꦧ꧀ꦧꦺꦴ ꦆꦩꦱ꧀ꦩꦶꦁ ꦣꦩ꧀ꦩꦮꦶꦤꦪꦺ ꦄꦴꦏꦔ꧀ꦑꦠꦶ ꦥꦧ꧀ꦧꦗ꧀ꦗꦁ, ꦄꦴꦏꦔ꧀ꦑꦠꦶ ꦈꦥꦱꦩ꧀ꦥꦢꦁ, ꦠꦱ꧀ꦱ ꦕꦠ꧀ꦠꦴꦫꦺꦴ ꦩꦴꦱꦺ ꦥꦫꦶꦮꦴꦱꦺꦴ ꦢꦴꦠꦧ꧀ꦧꦺꦴ’ꦠꦶ ꦌꦮꦁ ꦩꦲꦴꦑꦤ꧀ꦣꦏꦺ (ꦩꦲꦴꦮ. ꧘꧖) ꦮꦸꦠ꧀ꦠꦺꦴ ꦠꦶꦠ꧀ꦡꦶꦪꦥꦫꦶꦮꦴꦱꦺꦴ ꦄꦥ꧀ꦥꦛꦶꦕ꧀ꦖꦤ꧀ꦤꦥꦫꦶꦮꦴꦱꦺꦴ ꦤꦴꦩ. ꦠꦠ꧀ꦡ ꦪꦁ ꦮꦠ꧀ꦠꦧ꧀ꦧꦁ, ꦠꦁ ꦮꦸꦠ꧀ꦠꦩꦺꦮ. ꦄꦪꦁ ꦥꦤ ꦆꦣ ꦄꦤꦣꦶꦥ꧀ꦥꦺꦠꦺꦴ’’ꦠꦶ. ꦆꦠꦺꦴ ꦥꦫꦁ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦤꦪꦺꦤꦺꦮ ꦱꦸꦮꦶꦚ꧀ꦚꦺꦪ꧀ꦪꦺꦴꦠꦶ ꦠꦱ꧀ꦩꦴ ꦢꦸꦧ꧀ꦧꦶꦚ꧀ꦚꦺꦪ꧀ꦪꦛ꧀ꦜꦴꦤꦺꦪꦺꦮ ꦮꦟ꧀ꦟꦪꦶꦱ꧀ꦱꦴꦩ.

꧒꧓꧗. ꦌꦮꦁ ꦪꦺꦴ ꦪꦺꦴ ꦄꦴꦥꦤ꧀ꦤꦺꦴ ꦲꦺꦴꦠꦶ, ꦠꦱ꧀ꦱ ꦠꦱ꧀ꦱ ꦤꦴꦩꦁ ꦒꦲꦺꦠ꧀ꦮꦴ ꦏꦩ꧀ꦩꦮꦴꦕꦴ ꦏꦴꦠꦧ꧀ꦧꦴꦠꦶ ꦌꦠꦺꦤ ꦥꦴꦭ꦳ꦶꦪꦁ ꦱꦧ꧀ꦧꦱꦴꦣꦴꦫꦟꦮꦱꦺꦤ ‘‘ꦱꦸꦟꦴꦠꦸ ꦩꦺ, ꦨꦤ꧀ꦠꦺ, ꦱꦔ꧀ꦓꦺꦴ, ꦄꦪꦁ ꦆꦠ꧀ꦡꦤ꧀ꦤꦴꦩꦺꦴ ꦨꦶꦏ꧀ꦑꦹ’’ꦠꦶ ꦕ ‘‘ꦪꦢꦶ ꦱꦔ꧀ꦓꦱ꧀ꦱ ꦥꦠ꧀ꦠꦏꦭ꧀ꦭꦁ, ꦱꦔ꧀ꦓꦺꦴ ꦆꦠ꧀ꦡꦤ꧀ꦤꦴꦩꦱ꧀ꦱ ꦨꦶꦏ꧀ꦑꦸꦤꦺꦴ’’ꦠꦶ ꦕ ꦄꦴꦒꦠꦺꦥꦶ ꦏꦩ꧀ꦩꦮꦴꦕꦴꦨꦟꦤꦏꦴꦭꦺ ꦠꦡꦴ ꦄꦨꦟꦶꦠ꧀ꦮꦴ ‘‘ꦄꦪꦁ ꦧꦸꦢ꧀ꦣꦫꦏ꧀ꦑꦶꦠꦺꦴ ꦨꦶꦏ꧀ꦑꦹ’’ꦠꦶ ꦕ ‘‘ꦆꦩꦱ꧀ꦱ ꦧꦸꦢ꧀ꦣꦫꦏ꧀ꦑꦶꦠꦱ꧀ꦱ ꦨꦶꦏ꧀ꦑꦸꦤꦺꦴ’’ꦠꦶ ꦕ ꦌꦮꦁ ꦱꦏꦱꦏꦤꦴꦩꦁ ꦈꦢ꧀ꦣꦫꦶꦠ꧀ꦮꦴꦮ ꦏꦩ꧀ꦩꦮꦴꦕꦴ ꦏꦴꦠꦧ꧀ꦧꦴꦠꦶ ꦢꦱ꧀ꦱꦺꦠꦶ.

ꦩꦴꦭ꦳ꦏꦱꦷꦩꦴꦪꦩꦺꦮ ꦮꦠ꧀ꦠꦁ ꦱꦩꦴꦢꦴꦠꦧ꧀ꦧꦁ, ꦤ ꦠꦠꦺꦴ ꦧꦲꦶ. ꦏꦱ꧀ꦩꦴ? ‘‘ꦄꦚ꧀ꦚꦠ꧀ꦡ ꦏꦩ꧀ꦩꦮꦴꦕꦴ ꦄꦚ꧀ꦚꦠ꧀ꦡ ꦱꦩꦴꦢꦴꦤ’’ꦤ꧀ꦠꦶ ꦮꦠ꧀ꦠꦧ꧀ꦧꦢꦺꦴꦱꦥ꧀ꦥꦱꦔ꧀ꦒꦠꦺꦴ. ꦄꦱꦩꦴꦢꦶꦤ꧀ꦤꦮꦠ꧀ꦠꦱ꧀ꦱ ꦄꦴꦫꦺꦴꦕꦤꦴꦱꦩ꧀ꦨꦮꦠꦺꦴ, ꦩꦴꦭ꦳ꦏꦱꦷꦩꦴꦪ ꦱꦤ꧀ꦤꦶꦥꦠꦶꦠꦴꦤꦁ ꦨꦶꦏ꧀ꦑꦹꦤꦁ ꦌꦏꦱ꧀ꦱꦥꦶ ꦄꦤꦴꦫꦺꦴꦕꦤꦺ ꦱꦠꦶ ꦫꦠ꧀ꦠꦶꦕ꧀ꦖꦺꦢꦱꦩ꧀ꦨꦮꦠꦺꦴ ꦕ. ꦥꦫꦶꦮꦴꦱꦁ ꦱꦩꦴꦢꦶꦪꦴꦩꦶ, ꦮꦠ꧀ꦠꦁ ꦱꦩꦴꦢꦶꦪꦴꦩꦷꦠꦶ ꦆꦩꦺꦱꦸ ꦢ꧀ꦮꦷꦱꦸ ꦥꦢꦺꦱꦸ ꦌꦏꦺꦏꦺꦤ ꦮꦴ ꦈꦨꦺꦴꦲꦶ ꦥꦢꦺꦲꦶ ꦮꦴ ꦱꦩꦴꦢꦴꦠꦧ꧀ꦧꦁ. ꦏꦡꦁ ꦮꦶꦚ꧀ꦚꦴꦪꦠꦷꦠꦶ ꦕꦺ? ‘‘ꦌꦏꦥꦢꦺꦤꦥꦶ ꦕꦺꦠ꧀ꦡ ꦤꦶꦏ꧀ꦑꦶꦠ꧀ꦠꦺꦴ ꦲꦺꦴꦠꦶ ꦥꦫꦶꦮꦴꦱꦺꦴ, ꦢ꧀ꦮꦷꦲꦶ ꦥꦤ ꦱꦸꦤꦶꦏ꧀ꦑꦶꦠ꧀ꦠꦺꦴꦪꦺꦮ, ꦱꦩꦴꦢꦴꦤꦺꦥꦶ ꦌꦱꦺꦮ ꦤꦪꦺꦴ’’ꦠꦶ ꦮꦏ꧀ꦑꦩꦴꦤꦠ꧀ꦠꦴ. ꦱꦩꦴꦢꦶꦪꦶꦠ꧀ꦮꦴ ꦠꦠ꧀ꦡꦺꦮ ꦱꦔ꧀ꦓꦱ꧀ꦱ ꦄꦴꦫꦺꦴꦕꦺꦠꦧ꧀ꦧꦁ, ꦤ ꦠꦠ꧀ꦡ ꦄꦤꦴꦫꦺꦴꦕꦺꦠ꧀ꦮꦴ ꦄꦚ꧀ꦚꦠ꧀ꦡ ꦒꦤ꧀ꦠꦧ꧀ꦧꦁ. ꦏꦱ꧀ꦩꦴ? ꦮꦸꦛ꧀ꦜꦶꦠꦴꦪ ꦥꦫꦶꦱꦴꦪ ꦥꦸꦤ ꦱꦤ꧀ꦤꦶꦥꦴꦠꦺꦠꦸꦁ ꦢꦸꦏ꧀ꦏꦫꦠ꧀ꦠꦴ, ꦌꦏꦱ꧀ꦱꦥꦶ ꦨꦶꦏ꧀ꦑꦸꦤꦺꦴ ꦄꦤꦴꦫꦺꦴꦕꦺꦠ꧀ꦮꦴ ꦄꦫꦸꦟꦸꦛ꧀ꦜꦴꦥꦤꦺ ꦱꦠꦶ ꦫꦠ꧀ꦠꦶꦕ꧀ꦖꦺꦢꦏꦫꦠ꧀ꦠꦴ.

ꦄꦴꦫꦺꦴꦕꦺꦤ꧀ꦠꦺꦤ ꦌꦮꦁ ꦄꦴꦫꦺꦴꦕꦺꦠꦧ꧀ꦧꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ‘‘ꦄꦲꦁ ꦨꦤ꧀ꦠꦺ…ꦥꦺ… ꦱꦔ꧀ꦓꦺꦴ ꦣꦴꦫꦺꦠꦹ’’ꦠꦶ ꦌꦠ꧀ꦠꦏꦩꦺꦮ ꦮꦠ꧀ꦮꦴ ꦪꦴꦕꦤꦺ ꦮꦶꦪ ‘‘ꦢꦸꦠꦶꦪꦩ꧀ꦥꦶ ꦠꦠꦶꦪꦩ꧀ꦥꦷ’’ꦠꦶ ꦄꦮꦸꦠ꧀ꦠꦠ꧀ꦠꦴ ꦄꦕ꧀ꦕꦴꦪꦶꦏꦏꦫꦟꦺ ꦱꦠꦶ ꦌꦏꦮꦴꦫꦁ ꦄꦴꦫꦺꦴꦕꦶꦠꦺꦥꦶ ꦈꦥꦥꦤ꧀ꦤꦩꦺꦮꦴꦠꦶ ꦢꦛ꧀ꦜꦧ꧀ꦧꦁ. ꦮꦺꦢꦶꦪꦴꦩꦲꦁ ꦨꦤ꧀ꦠꦺ, ꦮꦺꦢꦶꦪꦠꦷꦠꦶ ꦩꦁ ꦱꦔ꧀ꦓꦺꦴ ꦣꦴꦫꦺꦠꦹꦠꦶ ꦌꦠ꧀ꦡ ‘‘ꦮꦺꦢꦶꦪꦴꦩꦷꦠꦶ ꦕꦶꦠ꧀ꦠꦺꦤ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦱꦸꦑꦁ ꦄꦤꦸꦨꦮꦴꦩꦶ, ꦤ ꦠꦥ꧀ꦥꦕ꧀ꦕꦪꦴ ꦄꦲꦁ ꦢꦸꦏ꧀ꦑꦶꦠꦺꦴꦠꦶ ꦄꦣꦶꦥ꧀ꦥꦴꦪꦺꦴ’’ꦠꦶ ꦱꦴꦫꦠ꧀ꦡꦢꦷꦥꦤꦶꦪꦁ (ꦱꦴꦫꦠ꧀ꦡ. ꦛꦷ. ꦕꦹꦭ꦳ꦮꦒ꧀ꦒ ꧓.꧙꧗) ꦮꦸꦠ꧀ꦠꦁ. ꦌꦠ꧀ꦡ ꦕ ‘‘ꦱꦸꦑꦁ ꦮꦺꦢꦺꦩꦶ ꦮꦺꦢꦤ’’ꦤ꧀ꦠꦶꦄꦴꦢꦷꦱꦸ ꦮꦶꦪ ꦥꦶ-ꦱꦢ꧀ꦢꦺꦴ ꦄꦤꦸꦨꦮꦤꦠ꧀ꦡꦺꦴ ꦲꦺꦴꦠꦶ. ꦮꦗꦶꦫꦧꦸꦢ꧀ꦣꦶꦛꦷꦏꦴꦪꦁ (ꦮꦗꦶꦫ. ꦛꦷ. ꦕꦹꦭ꦳ꦮꦒ꧀ꦒ ꧙꧗) ꦥꦤ ‘‘ꦮꦺꦢꦶꦪꦴꦩꦷꦠꦶ ꦗꦴꦤꦺꦩꦶ, ꦕꦶꦠ꧀ꦠꦺꦤ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦱꦸꦑꦁ ꦄꦤꦸꦨꦮꦴꦩꦶ, ꦤ ꦠꦥ꧀ꦥꦕ꧀ꦕꦪꦴ ꦄꦲꦁ ꦢꦸꦏ꧀ꦑꦶꦠꦺꦴꦠꦶ ꦄꦣꦶꦥ꧀ꦥꦴꦪꦺꦴꦠꦶ ꦭꦶꦑꦶꦠ’’ꦤ꧀ꦠꦶ ꦮꦸꦠ꧀ꦠꦁ. ꦌꦠ꧀ꦡ ꦥꦤ ‘‘ꦢꦷꦥꦔ꧀ꦏꦫꦺꦴ ꦭꦺꦴꦏꦮꦶꦢꦹ’’ꦠꦶꦄꦴꦢꦷꦱꦸ ꦮꦶꦪ ꦚꦴꦟꦠ꧀ꦡꦺꦴ ꦄꦤꦸꦨꦮꦤꦠ꧀ꦡꦺꦴ ꦕ. ꦮꦶꦩꦠꦶꦮꦶꦤꦺꦴꦢꦤꦶꦪꦁ (ꦮꦶ. ꦮꦶ. ꦛꦷ. ꦕꦹꦭ꦳ꦮꦒ꧀ꦒ ꧒.꧙꧗) ꦥꦤ ‘‘ꦮꦺꦢꦶꦪꦴꦩꦲꦤ꧀ꦠꦶ ꦗꦴꦤꦴꦥꦺꦩꦲꦁ, ꦄꦴꦫꦺꦴꦕꦺꦩꦷꦠꦶ ꦄꦠ꧀ꦡꦺꦴ, ꦄꦤꦸꦨꦮꦴꦩꦷꦠꦶꦥꦶꦱ꧀ꦱ ꦄꦠ꧀ꦡꦁ ꦮꦢꦤ꧀ꦠꦶ. ꦥꦸꦫꦶꦩꦁ ꦥꦤ ꦥꦱꦁꦱꦤ꧀ꦠꦶ ꦄꦴꦫꦺꦴꦕꦤꦮꦕꦤꦠ꧀ꦠꦴ’’ꦠꦶ. ꦌꦠ꧀ꦡ ꦠꦸ –

‘‘ꦱꦩ꧀ꦥꦤ꧀ꦤꦁ ꦱꦴꦭꦶꦏꦺꦢꦴꦫꦁ, ꦱꦸꦮꦴ ꦑꦴꦢꦤ꧀ꦠꦶ ꦧ꧀ꦫꦴꦲ꧀ꦩꦟ;

ꦥꦛꦶꦮꦺꦢꦺꦩꦶ ꦠꦺ ꦧ꧀ꦫꦲ꧀ꦩꦺ, ꦤ ꦤꦁ ꦮꦴꦫꦺꦠꦸꦩꦸꦱ꧀ꦱꦲꦺ’’ꦠꦶ. –

ꦄꦴꦢꦷꦱꦸ ꦮꦶꦪ ꦄꦴꦫꦺꦴꦕꦤꦠ꧀ꦡꦺꦴꦠꦶ ꦢꦛ꧀ꦜꦧ꧀ꦧꦺꦴ.

ꦄꦴꦫꦺꦴꦕꦺꦠ꧀ꦮꦴ…ꦥꦺ… ꦤꦶꦏ꧀ꦑꦶꦥꦶꦠꦧ꧀ꦧꦤ꧀ꦠꦶ ꦢꦸꦏ꧀ꦏꦛꦥꦫꦶꦩꦺꦴꦕꦤꦠ꧀ꦡꦁ ꦮꦸꦠ꧀ꦠꦁ. ꦏꦺꦕꦶ ꦥꦤ ‘‘ꦠꦢꦲꦺꦮ ꦥꦸꦤ ꦮꦠ꧀ꦠꦁ ꦱꦩꦴꦢꦶꦪꦶꦠ꧀ꦮꦴ ꦄꦫꦸꦟꦁ ꦈꦛ꧀ꦜꦴꦥꦺꦠꦸꦏꦴꦩꦱ꧀ꦱ ꦫꦠ꧀ꦠꦶꦕ꧀ꦖꦺꦢꦥꦫꦶꦲꦴꦫꦠ꧀ꦡꦩ꧀ꦥꦷ’’ꦠꦶ ꦮꦢꦤ꧀ꦠꦶ. ꦪꦱ꧀ꦱ ꦩꦴꦭ꦳ꦏꦺ ꦤꦴꦫꦺꦴꦕꦶꦠꦁ, ꦠꦱ꧀ꦱ ꦄꦴꦫꦺꦴꦕꦺꦠ꧀ꦮꦴ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦪꦱ꧀ꦱ ꦄꦴꦫꦺꦴꦕꦶꦠꦁ, ꦠꦱ꧀ꦱ ꦥꦸꦤ ꦄꦴꦫꦺꦴꦕꦤꦏꦶꦕ꧀ꦕꦁ ꦤꦠ꧀ꦡꦶ, ꦏꦺꦮꦭꦁ ꦤꦶꦏ꧀ꦑꦶꦥꦶꦠꦧ꧀ꦧꦩꦺꦮ. ‘‘ꦱꦨꦴꦒꦴ ꦨꦶꦏ꧀ꦑꦹ ꦮꦱꦤ꧀ꦠꦷ’’ꦠꦶ ꦮꦸꦠ꧀ꦠꦠ꧀ꦠꦴ ꦮꦶꦱꦨꦴꦒꦴꦤꦁ ꦮꦱꦤꦛ꧀ꦜꦴꦤꦺ ꦮꦠ꧀ꦠꦁ ꦄꦱꦩꦴꦢꦶꦪꦶꦠ꧀ꦮꦴ ꦧꦲꦶ ꦌꦮ ꦏꦴꦠꦸꦩ꧀ꦥꦶ ꦮꦛ꧀ꦛꦠꦷꦠꦶ ꦢꦛ꧀ꦜꦧ꧀ꦧꦁ. ꦢ꧀ꦮꦺ ꦭꦺꦝ꧀ꦝꦸꦥꦴꦠꦺ ꦄꦠꦶꦏ꧀ꦏꦩꦶꦠ꧀ꦮꦴꦠꦶ ꦆꦢꦁ ꦮꦶꦲꦴꦫꦺ ꦨꦶꦏ꧀ꦑꦹꦤꦁ ꦱꦗ꧀ꦙꦴꦪꦴꦢꦶꦱꦢ꧀ꦢꦱꦮꦤꦹꦥꦕꦴꦫꦮꦶꦗꦲꦤꦠ꧀ꦡꦁ ꦮꦸꦠ꧀ꦠꦁ, ꦩꦲꦴꦩꦒ꧀ꦒꦠꦺꦴ ꦎꦏ꧀ꦏꦩ꧀ꦩꦴꦠꦶ ꦆꦢꦁ ꦩꦒ꧀ꦒꦥꦛꦶꦥꦤ꧀ꦤꦴꦤꦁ ꦨꦶꦏ꧀ꦑꦹꦤꦁ ꦱꦮꦤꦹꦥꦕꦴꦫꦴꦠꦶꦏ꧀ꦏꦩꦤꦠ꧀ꦡꦁ, ꦒꦸꦩ꧀ꦧꦺꦤ ꦮꦴꦠꦶꦄꦴꦢꦶ ꦢꦱ꧀ꦱꦤꦹꦥꦕꦴꦫꦮꦶꦗꦲꦤꦠ꧀ꦡꦁ. ꦱꦺꦴꦥꦶ ꦏꦺꦤꦕꦶ ꦏꦩ꧀ꦩꦺꦤ ꦥꦸꦫꦺꦄꦫꦸꦟꦺ ꦌꦮ ꦒꦕ꧀ꦖꦠꦷꦠꦶ ꦆꦩꦶꦤꦴ ꦄꦴꦫꦺꦴꦕꦤꦴꦪ ꦏꦠꦴꦪ ꦱꦧ꧀ꦧꦺꦱꦸ ꦨꦶꦏ꧀ꦑꦹꦱꦸ ꦧꦲꦶꦮꦶꦲꦴꦫꦁ ꦒꦠꦺꦱꦸꦥꦶ ꦈꦴꦤꦺꦒꦟꦺꦕꦫꦟꦢꦺꦴꦱꦺꦴ ꦮꦴ ꦮꦶꦥ꧀ꦥꦮꦴꦱꦢꦺꦴꦱꦺꦴ ꦮꦴ ꦤ ꦲꦺꦴꦠꦶ ꦄꦴꦫꦺꦴꦕꦤꦠ꧀ꦡꦠ꧀ꦠꦴ ꦱꦲꦮꦴꦱꦱ꧀ꦱꦴꦠꦶ ꦢꦱ꧀ꦱꦺꦠꦶ. ꦠꦺꦤꦴꦲ ‘‘ꦄꦪꦚ꧀ꦕꦴ’’ꦠꦶꦄꦴꦢꦶ. ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦺꦤ ꦄꦤ꧀ꦠꦺꦴꦈꦥꦕꦴꦫꦒꦠꦴꦤꦁ ꦱꦧ꧀ꦧꦺꦱꦩ꧀ꦥꦶ ꦄꦴꦫꦺꦴꦕꦺꦠꦧ꧀ꦧꦴ. ‘‘ꦄꦪꦁ ꦤꦶꦏ꧀ꦑꦶꦠ꧀ꦠꦮꦠ꧀ꦠꦱ꧀ꦱ ꦥꦫꦶꦲꦴꦫꦺꦴ’’ꦠꦶ ꦮꦸꦠ꧀ꦠꦁ, ꦠꦠ꧀ꦡ ꦤꦶꦏ꧀ꦑꦶꦠ꧀ꦠꦮꦠ꧀ꦠꦱ꧀ꦱꦴꦠꦶ ꦮꦠ꧀ꦠꦁ ꦤꦶꦏ꧀ꦑꦶꦥꦶꦠ꧀ꦮꦴ ꦥꦫꦶꦮꦱꦤ꧀ꦠꦱ꧀ꦱꦴꦠꦶ ꦄꦠ꧀ꦡꦺꦴ. ꦄꦪꦁ ꦥꦤꦺꦠ꧀ꦡ ꦡꦺꦫꦱ꧀ꦱ ꦄꦣꦶꦥ꧀ꦥꦴꦪꦺꦴ – ꦮꦠ꧀ꦠꦁ ꦤꦶꦏ꧀ꦑꦶꦥꦶꦠ꧀ꦮꦴ ꦥꦫꦶꦮꦱꦤ꧀ꦠꦱ꧀ꦱ ꦈꦥꦕꦴꦫꦒꦠꦴꦤꦁ ꦱꦧ꧀ꦧꦺꦱꦁ ꦄꦴꦫꦺꦴꦕꦤꦏꦶꦕ꧀ꦕꦁ ꦤꦠ꧀ꦡꦶ, ꦢꦶꦛ꧀ꦜꦫꦹꦥꦴꦤꦁ ꦱꦸꦠꦱꦢ꧀ꦢꦴꦤꦁ ꦄꦴꦫꦺꦴꦕꦺꦠꦧ꧀ꦧꦁ, ꦄꦢꦶꦛ꧀ꦜꦄꦱꦸꦠꦴꦤꦩ꧀ꦥꦶ ꦄꦤ꧀ꦠꦺꦴꦢ꧀ꦮꦴꦢꦱꦲꦠ꧀ꦡꦒꦠꦴꦤꦁ ꦄꦴꦫꦺꦴꦕꦺꦠꦧ꧀ꦧꦁ. ꦆꦢꦁ ꦮꦠ꧀ꦠꦁ ꦤꦶꦏ꧀ꦑꦶꦥꦶꦠ꧀ꦮꦴ ꦥꦫꦶꦮꦱꦤ꧀ꦠꦱ꧀ꦱ ꦭꦏ꧀ꦑꦟꦤ꧀ꦠꦶ. ꦡꦺꦫꦱ꧀ꦱꦴꦠꦶ ꦩꦲꦴꦥꦢꦸꦩꦠ꧀ꦡꦺꦫꦱ꧀ꦱ.

꧒꧓꧘. ꦏꦸꦏ꧀ꦏꦸꦕ꧀ꦕꦮꦶꦤꦺꦴꦢꦤꦠ꧀ꦡꦴꦪꦴꦠꦶ ꦆꦩꦺꦱꦸ ꦥꦛꦶꦕ꧀ꦖꦤ꧀ꦤꦢꦶꦮꦱꦥ꧀ꦥꦩꦴꦟꦺꦤ ꦥꦫꦶꦮꦱꦶꦠꦢꦶꦮꦱꦺꦱꦸ ‘‘ꦱꦶꦪꦸꦁ ꦤꦸ ꦑꦺꦴ ꦠꦶꦮꦶꦣꦫꦠ꧀ꦠꦶꦕ꧀ꦖꦺꦢꦏꦴꦫꦟꦪꦸꦠ꧀ꦠꦴꦤꦶ ꦏꦴꦤꦶꦕꦶ ꦢꦶꦮꦱꦴꦤꦶ, ꦌꦮꦁ ꦱꦠꦶ ꦄꦥꦫꦶꦥꦸꦟ꧀ꦟꦥꦫꦶꦮꦴꦱꦢꦶꦮꦱꦠ꧀ꦠꦴ ꦤ ꦩꦴꦤꦠ꧀ꦠꦴꦫꦲꦺꦴ ꦨꦮꦺꦪ꧀ꦪ, ꦄꦱꦠꦶ ꦕ ꦩꦴꦤꦠ꧀ꦠꦴꦫꦲꦨꦴꦮꦺ ꦩꦴꦤꦠ꧀ꦠꦁ ꦢꦶꦤ꧀ꦤꦩ꧀ꦥꦶ ꦄꦢꦶꦤ꧀ꦤꦁꦪꦺꦮ ꦨꦮꦺꦪ꧀ꦪ, ꦌꦮꦚ꧀ꦕ ꦱꦠꦶ ꦄꦴꦥꦤ꧀ꦤꦴꦥꦠ꧀ꦠꦶꦠꦺꦴ ꦮꦸꦛ꧀ꦜꦴꦤꦁ ꦤ ꦨꦮꦺꦪ꧀ꦪꦴ’’ꦠꦶ ꦆꦩꦱ꧀ꦱ ꦮꦶꦤꦪꦏꦸꦏ꧀ꦏꦸꦕ꧀ꦕꦱ꧀ꦱ ꦮꦶꦤꦺꦴꦢꦤꦠ꧀ꦡꦴꦪ. ꦌꦏꦺꦤ ꦮꦴ ꦢ꧀ꦮꦷꦲꦶ ꦮꦴ ꦠꦷꦲꦶ ꦮꦴ ꦢꦶꦮꦱꦺꦲꦶ ꦄꦣꦶꦏꦠꦫꦴꦤꦶ ꦢꦶꦮꦱꦴꦤꦶ ꦥꦫꦶꦮꦱꦶꦠ꧀ꦮꦴ ꦤꦤꦸ ꦕꦴꦪꦁ ꦥꦫꦶꦮꦸꦠ꧀ꦡꦥꦫꦶꦮꦴꦱꦺꦴ, ꦠꦱ꧀ꦩꦴꦤꦺꦤ ꦩꦴꦤꦠ꧀ꦠꦩꦺꦮ ꦪꦴꦕꦶꦠꦧ꧀ꦧꦁ, ꦄꦡ ꦏꦱ꧀ꦩꦴ ꦮꦠ꧀ꦠꦁ ꦱꦩꦴꦢꦶꦪꦶꦠ꧀ꦮꦴ ꦩꦴꦤꦠ꧀ꦠꦁ ꦪꦴꦕꦶꦠꦧ꧀ꦧꦤ꧀ꦠꦶ ꦄꦴꦲꦴꦠꦶ ꦕꦺꦴꦢꦤꦁ ꦩꦤꦱꦶ ꦏꦫꦺꦴꦤ꧀ꦠꦺꦤ ꦮꦸꦠ꧀ꦠꦁ ‘‘ꦄꦪꦚ꧀ꦲꦶ ꦮꦠ꧀ꦠꦺ ꦱꦩꦴꦢꦶꦤ꧀ꦤꦺ’’ꦠꦶꦄꦴꦢꦶ. ꦲꦶ ꦪꦱ꧀ꦩꦴ ꦄꦪꦁ ꦨꦶꦏ꧀ꦑꦸ ꦮꦠ꧀ꦠꦺ ꦱꦩꦴꦢꦶꦤ꧀ꦤꦺ ꦌꦮ ꦩꦴꦤꦠ꧀ꦠꦴꦫꦲꦺꦴ ꦲꦺꦴꦠꦶ, ꦤ ꦄꦱꦩꦴꦢꦶꦤ꧀ꦤꦺ, ꦆꦠꦶ ꦠꦱ꧀ꦩꦴ ꦮꦠ꧀ꦠꦁ ꦱꦩꦴꦢꦶꦪꦶꦠ꧀ꦮꦴ ꦩꦴꦤꦠ꧀ꦠꦁ ꦪꦴꦕꦶꦠꦧ꧀ꦧꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦤꦤꦸ ꦕ ꦏꦩ꧀ꦩꦮꦴꦕꦴꦪꦁ ‘‘ꦱꦺꦴ ꦥꦫꦶꦮꦸꦠ꧀ꦡꦥꦫꦶꦮꦴꦱꦺꦴ ꦱꦔ꧀ꦓꦁ ꦩꦴꦤꦠ꧀ꦠꦁ ꦪꦴꦕꦠꦶ’’ꦆꦕ꧀ꦕꦺꦮ ꦮꦸꦠ꧀ꦠꦁ, ꦤ ꦮꦸꦠ꧀ꦠꦁ ‘‘ꦱꦩꦴꦢꦶꦤ꧀ꦤꦮꦠ꧀ꦠꦺꦴ’’ꦠꦶ, ꦄꦡ ꦏꦱ꧀ꦩꦴ ‘‘ꦮꦠ꧀ꦠꦺ ꦱꦩꦴꦢꦶꦤ꧀ꦤꦺ ꦌꦮ ꦩꦴꦤꦠ꧀ꦠꦴꦫꦲꦺꦴ ꦲꦺꦴꦠꦷ’’ꦠꦶ ꦮꦸꦠ꧀ꦠꦤ꧀ꦠꦶ ꦕꦺꦴꦢꦤꦁ ꦱꦤ꧀ꦣꦴꦪꦴꦲ ‘‘ꦤꦶꦏ꧀ꦑꦶꦠ꧀ꦠꦮꦠ꧀ꦠꦺꦤ ꦥꦫꦶꦮꦸꦠ꧀ꦡꦠ꧀ꦠꦴ’’ꦠꦶ. ꦪꦱ꧀ꦩꦴ ꦄꦪꦁ ꦨꦶꦏ꧀ꦑꦸ ꦤꦶꦏ꧀ꦑꦶꦠ꧀ꦠꦮꦠ꧀ꦠꦺꦤ ꦲꦸꦠ꧀ꦮꦴ ꦥꦫꦶꦮꦸꦠ꧀ꦡꦺꦴ ꦲꦺꦴꦠꦶ, ꦤꦺꦴ ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦺꦤ, ꦠꦱ꧀ꦩꦴ ꦤꦶꦏ꧀ꦑꦶꦠ꧀ꦠꦮꦠ꧀ꦠꦺꦤ ꦲꦸꦠ꧀ꦮꦴ ꦥꦫꦶꦮꦸꦠ꧀ꦡꦠ꧀ꦠꦴ ꦄꦪꦁ ꦨꦶꦏ꧀ꦑꦸ ꦮꦠ꧀ꦠꦺ ꦱꦩꦴꦢꦶꦤ꧀ꦤꦺ ꦌꦮ ꦩꦴꦤꦠ꧀ꦠꦴꦫꦲꦺꦴ ꦲꦺꦴꦠꦶ, ꦤꦺꦴ ꦄꦱꦩꦴꦢꦶꦤ꧀ꦤꦺꦠꦶ ꦪꦺꦴꦗꦤꦴ. ꦠꦡꦴ ꦲꦶ ꦮꦸꦠ꧀ꦠꦁ ‘‘ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦱ꧀ꦱ ꦥꦤ ꦥꦸꦤ ꦱꦩꦴꦢꦴꦤꦏꦶꦕ꧀ꦕꦁ ꦤꦠ꧀ꦡꦶ. ꦱꦺꦴ ꦲꦶ ꦥꦛꦶꦕ꧀ꦖꦤ꧀ꦤꦢꦶꦮꦱꦴꦠꦶꦏ꧀ꦏꦩꦺꦤꦺꦮ ꦩꦴꦤꦠ꧀ꦠꦴꦫꦲꦺꦴ ꦲꦺꦴꦠꦶ, ꦠꦱ꧀ꦩꦴ ꦠꦱ꧀ꦱ ꦩꦴꦤꦠ꧀ꦠꦁ ꦢꦴꦠꦧ꧀ꦧꦩꦺꦮꦴ’’ꦠꦶ.

ꦕꦠꦹꦲꦶ ꦥꦚ꧀ꦕꦲꦶ ꦮꦴ ꦨꦶꦏ꧀ꦑꦹꦲꦶ ꦱꦢ꧀ꦣꦶꦤ꧀ꦠꦶ ꦈꦴꦤꦺꦒꦟꦺꦕꦫꦟꦢꦺꦴꦱꦴ ꦮꦶꦩꦸꦕ꧀ꦕꦤꦠ꧀ꦡꦁ. ꦥꦫꦶꦏ꧀ꦑꦶꦠ꧀ꦠꦱ꧀ꦱ ꦮꦶꦲꦴꦫꦱ꧀ꦱ ꦥꦫꦶꦏ꧀ꦑꦺꦥꦠꦺꦴꦠꦶꦄꦴꦢꦶ ꦏꦶꦚ꧀ꦕꦴꦥꦶ ꦥꦴꦭ꦳ꦶꦪꦁ ꦤꦠ꧀ꦡꦶ, ꦄꦡ ꦑꦺꦴ ꦄꦛ꧀ꦜꦏꦡꦴꦕꦫꦶꦪꦴꦤꦁ ꦮꦕꦤꦺꦤ ꦠꦡꦴ ꦌꦮ ꦥꦛꦶꦥꦗ꧀ꦗꦶꦠꦧ꧀ꦧꦤ꧀ꦠꦶ ꦕ ꦮꦸꦠ꧀ꦠꦁ. ‘‘ꦄꦠ꧀ꦡꦶꦨꦴꦮꦁ ꦱꦭ꧀ꦭꦏ꧀ꦑꦺꦠ꧀ꦮꦴꦠꦶ ꦢ꧀ꦮꦴꦢꦱꦲꦠ꧀ꦡꦺ ꦈꦥꦕꦴꦫꦺ ꦱꦭ꧀ꦭꦏ꧀ꦑꦺꦠ꧀ꦮꦴ, ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦴꦤꦁ ꦈꦥꦕꦴꦫꦱꦷꦩꦴꦪ ꦄꦴꦒꦠꦨꦴꦮꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦱꦲꦮꦴꦱꦴꦢꦶꦏꦁ ꦮꦺꦢꦶꦠꦧ꧀ꦧꦤ꧀ꦠꦶ ꦕ ꦮꦸꦠ꧀ꦠꦁ. ‘ꦤꦶꦏ꧀ꦑꦶꦥꦤ꧀ꦠꦺꦤ ꦄꦴꦫꦺꦴꦕꦺꦠ꧀ꦮꦴ ꦤꦶꦏ꧀ꦑꦶꦥꦶꦠꦧ꧀ꦧꦁ ꦥꦪꦺꦴꦗꦤꦁ ꦄꦠ꧀ꦡꦷ’ꦠꦶ ꦕ ꦮꦸꦠ꧀ꦠꦁ, ꦤ ꦥꦤ ꦠꦁ ꦥꦪꦺꦴꦗꦤꦁ ꦢꦱ꧀ꦱꦶꦠ’’ꦤ꧀ꦠꦶ ꦮꦗꦶꦫꦧꦸꦢ꧀ꦣꦶꦛꦷꦏꦴꦪꦁ (ꦮꦗꦶꦫ. ꦛꦷ. ꦕꦹꦭ꦳ꦮꦒ꧀ꦒ ꧙꧗) ꦮꦸꦠ꧀ꦠꦁ, ꦮꦠ꧀ꦠꦨꦺꦢꦢꦸꦏ꧀ꦏꦛꦴ ꦩꦸꦕ꧀ꦕꦤꦥꦪꦺꦴꦗꦤꦁ ꦲꦺꦴꦠꦷꦠꦶ ꦮꦺꦢꦶꦠꦧ꧀ꦧꦁ.

꧒꧓꧙. ꦄꦧ꧀ꦨꦴꦤꦁ ꦏꦴꦠꦸꦁ ꦤ ꦮꦛ꧀ꦛꦠꦷꦠꦶ ꦏꦠꦩ꧀ꦥꦶ ꦄꦏꦠꦩꦺꦮ ꦲꦺꦴꦠꦷꦠꦶ ꦄꦠ꧀ꦡꦺꦴ. ‘‘ꦠꦺꦤꦴꦥꦶ ꦮꦠ꧀ꦠꦁ ꦱꦩꦴꦢꦶꦪꦶꦠ꧀ꦮꦴ ꦄꦴꦫꦺꦴꦕꦺꦠ꧀ꦮꦴ ꦄꦧ꧀ꦨꦴꦤꦁ ꦪꦴꦕꦶꦠꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦠ꧀ꦠꦴ ꦄꦧ꧀ꦨꦴꦤꦪꦴꦕꦤꦠ꧀ꦡꦁ ꦩꦴꦤꦠ꧀ꦠꦱ꧀ꦱ ꦱꦩꦴꦢꦶꦪꦤꦏꦴꦭꦺꦥꦶ ꦄꦴꦫꦺꦴꦕꦺꦠꦧ꧀ꦧꦩꦺꦮ. ꦥꦸꦧ꧀ꦧꦺ ꦩꦴꦤꦠ꧀ꦠꦕꦴꦫꦶꦠꦏꦴꦭꦺ ꦄꦴꦫꦺꦴꦕꦶꦠꦩꦺꦮꦴꦠꦶ ꦄꦤꦴꦫꦺꦴꦕꦺꦠ꧀ꦮꦴ ꦄꦧ꧀ꦨꦴꦤꦁ ꦤ ꦪꦴꦕꦶꦠꦧ꧀ꦧꦤ꧀ꦠꦶ ꦮꦶꦚ꧀ꦚꦴꦪꦠꦶ. ꦌꦮꦁ ꦩꦴꦤꦠ꧀ꦠꦪꦴꦕꦤꦏꦴꦭꦺꦥꦶ ꦥꦫꦶꦮꦴꦱꦁ ꦱꦩꦴꦢꦶꦪꦶꦠ꧀ꦮꦴ ꦄꦴꦫꦺꦴꦕꦺꦠꦧ꧀ꦧꦩꦺꦮꦴꦠꦶ ꦢꦛ꧀ꦜꦧ꧀ꦧꦁ.

꧒꧔꧐. ꦕꦶꦟ꧀ꦟꦩꦴꦤꦠ꧀ꦠꦺꦴ ꦨꦶꦏ꧀ꦑꦸ ꦄꦧ꧀ꦨꦺꦠꦧ꧀ꦧꦺꦴꦠꦶ ꦕꦶꦟ꧀ꦟꦩꦴꦤꦠ꧀ꦠꦱ꧀ꦱ ꦕ ꦄꦧ꧀ꦨꦴꦤꦴꦫꦲꦱ꧀ꦱ ꦕ ꦤꦶꦤ꧀ꦤꦴꦤꦴꦏꦫꦟꦠ꧀ꦠꦴ ꦮꦸꦠ꧀ꦠꦁ. ꦄꦚ꧀ꦚꦡꦴ ‘‘ꦄꦧ꧀ꦨꦴꦤꦴꦫꦲꦺꦴ ꦄꦧ꧀ꦨꦺꦠꦧ꧀ꦧꦺꦴ’’ꦠꦶ ꦮꦠ꧀ꦠꦧ꧀ꦧꦁ ꦱꦶꦪꦴ. ꦈꦏ꧀ꦑꦺꦥꦤꦷꦪꦏꦩ꧀ꦩꦏꦠꦺꦴꦥꦶ ꦄꦠ꧀ꦠꦤꦺꦴ ꦭꦢ꧀ꦣꦶꦒ꧀ꦒꦲꦟꦮꦱꦺꦤ ꦱꦨꦴꦒꦨꦶꦏ꧀ꦑꦸꦩ꧀ꦲꦶ ꦱꦠꦶ ꦠꦱ꧀ꦱ ꦄꦤꦴꦫꦺꦴꦕꦴꦥꦺꦠꦸꦁ ꦤ ꦭꦨꦠꦶ.

‘‘ꦄꦤꦤ꧀ꦠꦫꦴꦪꦶꦏꦱ꧀ꦱ ꦥꦤ ꦄꦤ꧀ꦠꦫꦴꦪꦶꦏꦱꦚ꧀ꦚꦴꦪ ꦖꦴꦢꦪꦠꦺꦴ ꦄꦕ꧀ꦖꦤ꧀ꦤꦴꦮꦴ’’ꦠꦶ ꦥꦴꦜꦺꦴ. ꦄꦮꦺꦫꦶꦨꦴꦮꦺꦤ ꦱꦨꦴꦒꦺꦴ ꦄꦮꦺꦫꦶꦱꦨꦴꦒꦺꦴ. ‘‘ꦱꦨꦴꦒꦱꦔ꧀ꦓꦴꦢꦶꦱꦺꦱꦁ ꦄꦴꦥꦤ꧀ꦤꦱ꧀ꦱ ꦥꦤ ꦱꦤ꧀ꦠꦶꦏꦺ ꦄꦴꦮꦶ ꦏꦴꦠꦸꦁ ꦤ ꦮꦛ꧀ꦛꦠꦷ’’ꦠꦶ ꦥꦱꦔ꧀ꦒꦠꦺꦴ ꦆꦣꦺꦮ ꦥꦏꦴꦱꦶꦠꦁ. ꦭꦲꦸꦏꦺꦱꦸ ꦥꦛꦶꦏ꧀ꦑꦺꦥꦺꦴ ꦤꦠ꧀ꦡꦶ. ꦠꦠ꧀ꦡ ꦚꦠ꧀ꦠꦶꦪꦴ ꦄꦴꦮꦶ ꦏꦠ꧀ꦮꦴ ꦈꦥꦺꦴꦱꦡꦁ ꦏꦴꦠꦸꦁ ꦄꦤꦸꦚ꧀ꦚꦴꦠꦠ꧀ꦠꦴ ꦭꦲꦸꦏꦱꦨꦴꦒꦁ ꦄꦴꦮꦶ ꦏꦴꦠꦸꦁ ꦮꦛ꧀ꦛꦠꦷꦠꦶ. ꦱꦨꦴꦒꦱꦔ꧀ꦓꦴꦢꦶꦱꦺꦱꦁ ꦥꦤ ꦚꦠ꧀ꦠꦶꦪꦴ ꦄꦴꦫꦺꦴꦕꦤꦁ ꦤ ꦮꦛ꧀ꦛꦠꦷꦠꦶ ꦏꦶꦫ. ‘‘ꦠꦱ꧀ꦱ ꦱꦤ꧀ꦠꦶꦏꦺ ꦠꦁ ꦄꦴꦥꦠ꧀ꦠꦶꦁ ꦥꦛꦶꦏꦫꦶꦱ꧀ꦱꦠꦷꦠꦶ (ꦩꦲꦴꦮ. ꧑꧗꧑) ꦮꦸꦠ꧀ꦠꦠ꧀ꦠꦴ ꦭꦲꦸꦏꦱ꧀ꦱꦺꦮꦴꦪꦁ ꦱꦩꦤꦸꦚ꧀ꦚꦴꦠꦴ. ꦤ ꦲꦶ ꦱꦏ꧀ꦏꦴ ꦱꦸꦢ꧀ꦣꦱ꧀ꦱ ꦌꦏꦱ꧀ꦱ ꦱꦤ꧀ꦠꦶꦏꦺ ꦱꦔ꧀ꦓꦴꦢꦶꦱꦺꦱꦱ꧀ꦱ ꦥꦛꦶꦏꦫꦟꦁ ꦏꦴꦠꦸ’’ꦤ꧀ꦠꦶ ꦭꦶꦑꦶꦠꦁ. ꦭꦲꦸꦏꦺꦱꦸꦥꦶ ꦱꦨꦴꦒꦁ ꦄꦴꦮꦶ ꦏꦴꦠꦸꦁ ꦤ ꦮꦛ꧀ꦛꦠꦷꦠꦶ. ꦠꦱ꧀ꦩꦴ ꦌꦮ ꦲꦶ ꦚꦠ꧀ꦠꦶꦪꦴ ꦄꦴꦮꦶꦏꦫꦟꦁ ꦄꦤꦸꦚ꧀ꦚꦴꦠꦁ, ꦆꦠꦫꦡꦴ ꦠꦁ ꦤꦶꦫꦠ꧀ꦡꦏꦁ ꦱꦶꦪꦴ. ꦄꦚ꧀ꦚꦩꦚ꧀ꦚꦴꦫꦺꦴꦕꦤꦱ꧀ꦱ ꦮꦛ꧀ꦛꦠꦶ, ꦠꦠꦺꦴ ꦤ ꦮꦛ꧀ꦛꦠꦷꦠꦶ ꦢꦷꦥꦤꦠ꧀ꦡꦩꦺꦮ ꦚꦠ꧀ꦠꦶꦪꦴ ꦄꦴꦮꦶꦏꦫꦟꦩꦤꦸꦚ꧀ꦚꦴꦠꦁ, ꦠꦺꦤꦺꦮ ꦆꦣ ‘‘ꦱꦨꦴꦒꦱꦔ꧀ꦓꦴꦢꦶꦱꦺꦱꦁ ꦄꦴꦥꦤ꧀ꦤꦱ꧀ꦱꦴ’’ꦠꦶꦄꦴꦢꦶ ꦮꦸꦠ꧀ꦠꦁ, ꦄꦪꦩꦠ꧀ꦡꦺꦴ ‘‘ꦌꦠ꧀ꦠꦴꦮꦠꦴ ꦠꦺ ꦢ꧀ꦮꦺ ꦤꦶꦫꦴꦥꦠ꧀ꦠꦶꦏꦴ ꦲꦺꦴꦤ꧀ꦠꦶ, ꦠꦺꦱꦁ ꦱꦤ꧀ꦠꦶꦏꦺ ꦱꦺꦱꦺꦲꦶ ꦱꦨꦴꦒꦴꦥꦠ꧀ꦠꦶꦪꦺꦴ ꦢꦺꦱꦺꦠꦧ꧀ꦧꦴ’’ꦠꦶ ꦮꦕꦤꦺꦤ ꦏꦔ꧀ꦑꦴꦮꦶꦠꦫꦟꦶꦪꦩ꧀ꦥꦶ (ꦏꦔ꧀ꦑꦴ. ꦄꦛ꧀ꦜ. ꦤꦶꦢꦴꦤꦮꦟ꧀ꦟꦤꦴ) ꦥꦏꦴꦱꦶꦠꦺꦴꦮ. ꦱꦔ꧀ꦓꦴꦢꦶꦱꦺꦱꦁ ꦥꦤ ꦚꦠ꧀ꦠꦶꦪꦴ ꦄꦴꦫꦺꦴꦕꦺꦠ꧀ꦮꦴ ꦈꦥꦺꦴꦱꦡꦁ ꦏꦴꦠꦸꦁ ꦮꦛ꧀ꦛꦠꦶ. ꦠꦱ꧀ꦱꦴ ꦚꦠ꧀ꦠꦶꦪꦴ ꦄꦪꦩꦠ꧀ꦡꦺꦴ – ꦪꦢꦴ ꦱꦸꦢ꧀ꦣꦁ ꦨꦶꦏ꧀ꦑꦸꦁ ꦥꦱ꧀ꦱꦶꦱ꧀ꦱꦠꦶ, ꦠꦱ꧀ꦱ ꦱꦤ꧀ꦠꦶꦏꦺ ꦄꦚ꧀ꦚꦩꦚ꧀ꦚꦴꦫꦺꦴꦕꦤꦮꦱꦺꦤ ꦥꦛꦶꦏꦫꦶꦱ꧀ꦱꦠꦶ, ꦌꦮꦁ ꦥꦛꦶꦏꦠꦺ ‘‘ꦤ ꦕ, ꦨꦶꦏ꧀ꦑꦮꦺ, ꦱꦴꦥꦠ꧀ꦠꦶꦏꦺꦤ ꦥꦴꦠꦶꦩꦺꦴꦏ꧀ꦑꦁ ꦱꦺꦴꦠꦧ꧀ꦧꦁ, ꦪꦺꦴ ꦱꦸꦟꦺꦪ꧀ꦪ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱꦴ’’ꦠꦶ (ꦕꦹꦭ꦳ꦮ. ꧓꧘꧖) ꦮꦸꦠ꧀ꦠꦴꦥꦠ꧀ꦠꦶꦠꦺꦴ ꦩꦺꦴꦏ꧀ꦑꦺꦴ ꦲꦺꦴꦠꦶ, ꦠꦱ꧀ꦩꦴ ‘‘ꦒꦫꦸꦏꦁ ꦮꦴ ꦲꦺꦴꦠꦸ ꦭꦲꦸꦏꦁ ꦮꦴ, ꦚꦠ꧀ꦠꦶꦪꦴ ꦄꦴꦮꦶ ꦏꦴꦠꦸꦁ ꦮꦛ꧀ꦛꦠꦷ’’ꦠꦶ ꦮꦸꦠ꧀ꦠꦁ. ꦈꦨꦺꦴꦱꦸ ꦤꦪꦺꦱꦸ ꦪꦸꦠ꧀ꦠꦠꦫꦁ ꦒꦲꦺꦠꦧ꧀ꦧꦁ. ‘‘ꦤꦴꦩꦚ꧀ꦕꦺꦮ ꦄꦴꦥꦠ꧀ꦠꦶ ꦕꦴꦠꦶ ꦠꦺꦤ ꦠꦺꦤ ꦮꦷꦠꦶꦏ꧀ꦏꦩꦺꦤꦴꦥꦤ꧀ꦤꦴꦥꦠ꧀ꦠꦶ ꦄꦴꦥꦠ꧀ꦠꦶ. ꦤꦴꦩꦤ꧀ꦠꦶ ꦠꦱ꧀ꦱꦴ ꦄꦴꦥꦠ꧀ꦠꦶꦪꦴ ꦤꦴꦩ’’ꦤ꧀ꦠꦶ ꦭꦶꦑꦶꦠꦁ. ꦄꦴꦫꦺꦴꦕꦺꦠ꧀ꦮꦴ ꦤꦶꦏ꧀ꦑꦶꦥꦶꦠꦧ꧀ꦧꦤ꧀ꦠꦶ ꦌꦠ꧀ꦡ ꦄꦴꦫꦺꦴꦕꦤꦁ ꦮꦠ꧀ꦠꦨꦺꦢꦢꦸꦏ꧀ꦏꦛꦥꦫꦶꦲꦫꦟꦥ꧀ꦥꦪꦺꦴꦗꦤꦤ꧀ꦠꦶ ꦮꦺꦢꦶꦠꦧ꧀ꦧꦁ.

‘‘ꦱꦠꦶꦪꦺꦮ ꦄꦤ꧀ꦠꦫꦴꦪꦺ ꦄꦤ꧀ꦠꦫꦴꦪꦶꦏꦱꦚ꧀ꦚꦷ ꦖꦴꦢꦺꦠꦶ, ꦄꦕ꧀ꦖꦤ꧀ꦤꦴ ꦲꦺꦴꦠꦶ. ꦄꦤ꧀ꦠꦫꦴꦪꦶꦏꦱ꧀ꦱ ꦥꦤ ꦄꦤ꧀ꦠꦫꦴꦪꦶꦏꦱꦚ꧀ꦚꦴꦪ ꦮꦴ ꦄꦤꦤ꧀ꦠꦫꦴꦪꦶꦏꦱꦚ꧀ꦚꦴꦪ ꦮꦴ ꦖꦴꦢꦪꦠꦺꦴ ꦄꦕ꧀ꦖꦤ꧀ꦤꦴꦮꦴ’’ꦠꦶꦥꦶ ꦥꦴꦜꦺꦴ. ꦄꦮꦺꦫꦷꦠꦶ ꦲꦶꦠꦏꦴꦩꦺꦴ. ꦈꦢ꧀ꦣꦱ꧀ꦠꦺ ꦄꦫꦸꦟꦺꦠꦶ ꦈꦛ꧀ꦜꦶꦠꦺ ꦄꦫꦸꦟꦺ. ꦱꦸꦢ꧀ꦣꦱ꧀ꦱ ꦱꦤ꧀ꦠꦶꦏꦺꦠꦶ ꦱꦨꦴꦒꦱꦔ꧀ꦓꦴꦢꦶꦱꦺꦱꦁ ꦄꦤꦴꦥꦤ꧀ꦤꦱ꧀ꦱ ꦱꦤ꧀ꦠꦶꦏꦺ. ꦮꦠ꧀ꦡꦸꦤ꧀ꦠꦶ ꦄꦱꦸꦕꦶꦩꦺꦴꦕꦤꦴꦢꦶꦮꦷꦠꦶꦏ꧀ꦏꦩꦁ. ꦱꦸꦏ꧀ꦏꦮꦶꦱ꧀ꦱꦛ꧀ꦜꦷꦠꦶ ꦮꦠ꧀ꦡꦸ ꦕꦺꦮ ꦒꦺꦴꦠ꧀ꦠꦚ꧀ꦕꦴꦠꦶ ‘‘ꦱꦸꦏ꧀ꦏꦮꦶꦱ꧀ꦱꦛ꧀ꦜꦷ’’ꦠꦶ ꦆꦢꦁ ꦄꦱꦸꦕꦶꦩꦺꦴꦕꦤꦭꦏ꧀ꦑꦟꦱ꧀ꦱ ꦮꦷꦠꦶꦏ꧀ꦏꦩꦱ꧀ꦱ ꦥꦏꦴꦱꦤꦠꦺꦴ ꦮꦠ꧀ꦡꦸ ꦕꦺꦮ ꦲꦺꦴꦠꦶ, ꦱꦗꦴꦠꦶꦪꦱꦴꦣꦴꦫꦟꦮꦶꦗꦴꦠꦶꦪꦮꦶꦤꦶꦮꦠ꧀ꦠꦱꦨꦴꦮꦴꦪ ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦪꦴ ꦌꦮ ꦥꦏꦴꦱꦤꦠꦺꦴ ꦒꦺꦴꦠ꧀ꦠꦚ꧀ꦕ ꦲꦺꦴꦠꦷꦠꦶ ꦄꦠ꧀ꦡꦺꦴ. ꦒꦁ ꦠꦴꦪꦠꦷꦠꦶ ꦲꦶ ꦒꦺꦴꦠ꧀ꦠꦁ. ꦱꦔ꧀ꦓꦴꦢꦶꦱꦺꦱꦺꦴꦠꦶ ꦤꦴꦩꦚ꧀ꦕꦺꦮ ꦄꦴꦥꦠ꧀ꦠꦶ ꦕꦴꦠꦶ ꦱꦔ꧀ꦓꦴꦢꦶꦱꦺꦱꦺꦴꦠꦶ ꦠꦺꦤ ꦠꦺꦤ ꦮꦷꦠꦶꦏ꧀ꦏꦩꦺꦤ ꦄꦴꦥꦤ꧀ꦤꦱ꧀ꦱ ꦄꦴꦥꦠ꧀ꦠꦶꦤꦶꦏꦴꦪꦱ꧀ꦱ ꦤꦴꦩꦥꦏꦴꦱꦤꦠꦺꦴ ꦤꦴꦩꦚ꧀ꦕꦺꦮ ꦲꦺꦴꦠꦶ, ꦄꦴꦥꦠ꧀ꦠꦶꦱꦨꦴꦮꦠꦺꦴ ꦄꦴꦥꦠ꧀ꦠꦶ ꦕ.

ꦱꦸꦢ꧀ꦣꦱ꧀ꦱꦴꦠꦶ ꦱꦨꦴꦒꦱꦔ꧀ꦓꦴꦢꦶꦱꦺꦱꦁ ꦄꦤꦴꦥꦤ꧀ꦤꦱ꧀ꦱ, ꦠꦠꦺꦴ ꦮꦸꦛ꧀ꦜꦶꦠꦱ꧀ꦱ ꦮꦴ. ꦄꦚ꧀ꦚꦱ꧀ꦩꦶꦤ꧀ꦠꦶ ꦱꦸꦢ꧀ꦣꦤ꧀ꦠꦥꦫꦶꦮꦴꦱꦮꦱꦺꦤ ꦄꦴꦥꦠ꧀ꦠꦶꦮꦸꦛ꧀ꦜꦴꦤꦠꦺꦴ ꦄꦚ꧀ꦚꦱ꧀ꦩꦶꦁ ꦄꦴꦥꦠ꧀ꦠꦶꦮꦸꦛ꧀ꦜꦴꦤꦺ. ꦥꦛꦶꦕ꧀ꦖꦴꦢꦶꦪꦶꦠ꧀ꦡꦴꦠꦶ ꦥꦛꦶꦕ꧀ꦖꦤ꧀ꦤꦴ. ꦏꦴ ꦱꦴ? ꦄꦴꦥꦠ꧀ꦠꦶ. ꦢꦶꦮꦱꦴꦢꦷꦲꦶ ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦮꦱꦤꦁ ꦥꦫꦶꦮꦴꦱꦺꦴ. ꦏꦺꦴ ꦱꦺꦴ? ꦮꦶꦤꦪꦏꦩ꧀ꦩꦏꦫꦟꦁ. ꦥꦛꦶꦕ꧀ꦖꦤ꧀ꦤꦴꦪ ꦄꦴꦥꦠ꧀ꦠꦶꦪꦴ ꦥꦫꦶꦮꦴꦱꦺꦴ ꦥꦛꦶꦕ꧀ꦖꦤ꧀ꦤꦥꦫꦶꦮꦴꦱꦺꦴ.

ꦥꦛꦶꦕ꧀ꦖꦤ꧀ꦤꦥꦫꦶꦮꦴꦱꦏꦡꦴ ꦤꦶꦛ꧀ꦜꦶꦠꦴ.

ꦱꦸꦢ꧀ꦣꦤ꧀ꦠꦥꦫꦶꦮꦴꦱꦏꦡꦴ

꧒꧔꧒. ꦱꦸꦗ꧀ꦙꦤꦁ ꦱꦸꦢ꧀ꦣꦺꦴ, ꦏꦺꦴ ꦱꦺꦴ? ꦄꦴꦥꦠ꧀ꦠꦶꦮꦶꦒꦩꦺꦴ. ꦄꦩꦠꦶ ꦎꦱꦴꦤꦨꦴꦮꦁ ꦒꦕ꧀ꦖꦠꦷꦠꦶ ꦄꦤ꧀ꦠꦺꦴ, ꦱꦸꦢ꧀ꦣꦺꦴ ꦄꦤ꧀ꦠꦺꦴ ꦪꦱ꧀ꦱ ꦥꦫꦶꦮꦴꦱꦱ꧀ꦱꦴꦠꦶ ꦱꦸꦢ꧀ꦣꦤ꧀ꦠꦺꦴ, ꦱꦸꦢ꧀ꦣꦤ꧀ꦠꦺꦴ ꦕ ꦱꦺꦴ ꦥꦫꦶꦮꦴꦱꦺꦴ ꦕꦴꦠꦶ ꦱꦸꦢ꧀ꦣꦤ꧀ꦠꦥꦫꦶꦮꦴꦱꦺꦴ, ꦱꦸꦢ꧀ꦣꦏꦴꦭꦁ ꦥꦫꦶꦪꦤ꧀ꦠꦁ ꦏꦠ꧀ꦮꦴ ꦄꦱꦸꦢ꧀ꦣꦏꦴꦭꦥ꧀ꦥꦩꦴꦟꦺꦤ ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦏꦠꦥꦫꦶꦮꦴꦱꦺꦴ.

ꦱꦸꦢ꧀ꦣꦤ꧀ꦠꦥꦫꦶꦮꦴꦱꦏꦡꦴ ꦤꦶꦛ꧀ꦜꦶꦠꦴ.

ꦎꦣꦴꦤꦱꦩꦺꦴꦣꦴꦤꦥꦫꦶꦮꦴꦱꦏꦡꦴ

꧒꧔꧓. ꦱꦩꦺꦴꦣꦷꦪꦠꦺ ꦱꦩꦺꦴꦣꦴꦤꦁ, ꦤꦴꦤꦴꦏꦴꦭꦶꦏꦴ ꦤꦴꦤꦴꦮꦠ꧀ꦡꦸꦏꦴ ꦄꦴꦥꦠ꧀ꦠꦶꦪꦺꦴ ꦄꦒ꧀ꦓꦴꦢꦶꦮꦱꦺꦤ ꦱꦩꦺꦴꦣꦴꦤꦁ ꦌꦏꦷꦏꦫꦟꦁ, ꦱꦩꦺꦴꦣꦴꦤꦺꦠ꧀ꦮꦴ ꦏꦠꦺꦴ ꦥꦫꦶꦮꦴꦱꦺꦴ ꦱꦩꦺꦴꦣꦴꦤꦥꦫꦶꦮꦴꦱꦺꦴꦠꦶ ꦮꦶꦒ꧀ꦒꦲꦺꦴ. ꦏꦩ꧀ꦩꦮꦴꦕꦴꦪꦁ ‘‘ꦥꦛꦶꦏꦱ꧀ꦱꦶꦠꦺꦴ ꦱꦔ꧀ꦓꦺꦤ ꦆꦠ꧀ꦡꦤ꧀ꦤꦴꦩꦺꦴ ꦨꦶꦏ꧀ꦑꦸ ꦄꦤ꧀ꦠꦫꦴ ꦱꦩ꧀ꦧꦲꦸꦭꦴꦤꦁ ꦄꦴꦥꦠ꧀ꦠꦷꦤꦁ ꦄꦥ꧀ꦥꦛꦶꦕ꧀ꦖꦤ꧀ꦤꦴꦤꦁ ꦩꦹꦭꦴꦪꦥꦛꦶꦏꦱ꧀ꦱꦤꦴ, ꦑꦩꦠꦶ ꦱꦔ꧀ꦓꦱ꧀ꦱ, ꦠꦱ꧀ꦩꦴ ꦠꦸꦟ꧀ꦲꦷ, ꦌꦮꦩꦺꦠꦁ ꦣꦴꦫꦪꦴꦩꦷ’’ꦠꦶ ꦌꦠ꧀ꦡ ꦒꦠ꧀ꦪꦠ꧀ꦡꦣꦴꦠꦸꦪꦴ ꦏꦩ꧀ꦩꦤꦶ ꦕ ꦤꦪꦤꦠ꧀ꦡꦣꦴꦠꦸꦪꦴ ꦏꦩ꧀ꦩꦤꦶ ꦕ ꦠꦢꦠ꧀ꦡꦱꦩ꧀ꦥꦢꦴꦤꦺ ꦕ ꦮꦶꦨꦠ꧀ꦠꦶꦥꦫꦶꦟꦴꦩꦺ ꦕꦴꦠꦶ ꦆꦩꦺꦱꦸ ꦕꦠꦹꦱꦸ ꦜꦴꦤꦺꦱꦸ ꦄꦴꦪꦴꦢꦺꦱꦱ꧀ꦱ ꦮꦸꦠ꧀ꦠꦠ꧀ꦠꦴ, ꦥꦛꦶꦥꦸꦧ꧀ꦧꦏꦱꦣꦴꦠꦸꦪꦴ ꦕ ꦤꦪꦤꦠ꧀ꦡꦠ꧀ꦠꦴ ‘‘ꦩꦹꦭꦴꦪꦴ’’ꦠꦶ ꦆꦢꦁ ‘‘ꦥꦛꦶꦏꦱ꧀ꦱꦶꦠꦺꦴ’’ꦠꦶ ꦌꦠ꧀ꦡ ꦏꦩ꧀ꦩꦁ, ꦠꦱ꧀ꦩꦴ ‘‘ꦥꦛꦶꦏꦱ꧀ꦱꦶꦠꦺꦴ…ꦥꦺ… ꦩꦹꦭꦴꦪ’’ ꦆꦠꦶ ꦌꦠ꧀ꦠꦏꦩꦺꦮ ꦨꦮꦶꦠꦧ꧀ꦧꦁ, ꦤ ‘‘ꦩꦹꦭꦴꦪꦥꦛꦶꦏꦱ꧀ꦱꦤꦴ’’ꦠꦶ ꦌꦮꦁ ꦩꦚ꧀ꦚꦩꦴꦤꦴ ꦱꦢ꧀ꦢꦮꦶꦢꦸꦤꦺꦴ ‘‘ꦥꦛꦶꦏꦱ꧀ꦱꦤꦴ’’ꦠꦶ ꦆꦢꦁ ꦄꦣꦶꦏꦤ꧀ꦠꦶ ꦮꦴ ꦮꦢꦺꦪ꧀ꦪꦸꦁ ꦩꦏ꧀ꦑꦺꦪ꧀ꦪꦸꦁ ꦮꦴ, ꦤ ꦥꦤꦺꦠꦁ ꦮꦠ꧀ꦠꦧ꧀ꦧꦁ. ꦤꦮꦥꦴꦜꦺꦱꦸꦪꦺꦮ ꦄꦪꦁ ꦥꦴꦜꦺꦴ ꦱꦢ꧀ꦢꦭꦏ꧀ꦑꦟꦪꦸꦠ꧀ꦠꦺꦴ ꦮꦴ ꦄꦪꦸꦠ꧀ꦠꦺꦴ ꦮꦴꦠꦶ ꦕꦶꦤ꧀ꦠꦺꦠꦧ꧀ꦧꦺꦴ, ꦤ ꦥꦤ ꦥꦴꦭ꦳ꦶꦪꦛ꧀ꦜꦏꦡꦴꦢꦶꦠꦺꦴ ꦄꦴꦒꦠꦺꦱꦸ ꦥꦺꦴꦫꦴꦟꦥꦴꦜꦺꦱꦸ. ꦠꦺꦱꦸ ꦥꦤ ꦏꦡꦁ ꦪꦺꦴꦗꦶꦪꦩꦴꦤꦺꦴ ꦄꦪꦁ ꦥꦴꦜꦺꦴ ꦱꦢ꧀ꦢꦪꦸꦠ꧀ꦠꦶꦪꦴ ꦕ ꦄꦠ꧀ꦡꦪꦸꦠ꧀ꦠꦶꦪꦴ ꦕ ꦱꦩꦤ꧀ꦤꦴꦒꦠꦺꦴ ꦨꦮꦺꦪ꧀ꦪꦴꦠꦶ ꦪꦺꦴꦗꦤꦴꦏꦴꦫꦺꦴꦪꦺꦮ ꦕꦶꦤ꧀ꦠꦺꦠꦧ꧀ꦧꦺꦴ. ꦄꦪꦚ꧀ꦕ ꦥꦴꦜꦺꦴ ꦥꦺꦴꦫꦴꦟꦥꦴꦭ꦳ꦶꦥꦴꦜꦺꦴꦮ, ꦠꦱ꧀ꦩꦴ ‘‘ꦩꦹꦭꦴꦪꦥꦛꦶꦏꦱ꧀ꦱꦤꦴ’’ꦠꦶ ꦆꦢꦁ ꦏꦫꦟꦮꦱꦺꦤ ꦮꦶꦥꦫꦶꦟꦴꦩꦺꦠ꧀ꦮꦴ ‘‘ꦩꦹꦭꦴꦪꦥꦛꦶꦏꦱ꧀ꦱꦤꦴꦪ ꦥꦛꦶꦏꦱ꧀ꦱꦶꦠꦺꦴ’’ꦠꦶ ꦪꦺꦴꦗꦺꦠꦧ꧀ꦧꦁ.

ꦏꦡꦁ ꦥꦤꦺꦠꦱ꧀ꦱ ꦥꦺꦴꦫꦴꦟꦥꦴꦜꦨꦴꦮꦺꦴ ꦗꦴꦤꦶꦠꦧ꧀ꦧꦺꦴꦠꦶ? ꦥꦏꦫꦟꦺ ꦄꦴꦒꦠꦠ꧀ꦠꦴ. ꦮꦸꦠ꧀ꦠꦚ꧀ꦲꦶ ꦮꦶꦩꦠꦶꦮꦶꦤꦺꦴꦢꦤꦶꦪꦁ (ꦮꦶ. ꦮꦶ. ꦛꦷ. ꦕꦹꦭ꦳ꦮꦒ꧀ꦒ ꧒.꧑꧐꧒) ‘‘ꦥꦴꦭ꦳ꦶꦪꦁ ꦥꦛꦶꦏꦱ꧀ꦱꦶꦠꦺꦴ ꦱꦔ꧀ꦓꦺꦤ ꦈꦢꦴꦪꦶ ꦨꦶꦏ꧀ꦑꦸ ꦄꦤ꧀ꦠꦫꦴ ꦌꦏꦶꦱ꧀ꦱꦴ ꦄꦴꦥꦠ꧀ꦠꦶꦪꦴ…ꦥꦺ… ꦩꦹꦭꦴꦪꦥꦛꦶꦏꦱ꧀ꦱꦤꦴꦠꦶ ꦆꦢꦁ ꦏꦫꦟꦮꦱꦺꦤ ꦮꦶꦥꦫꦶꦟꦴꦩꦺꦠ꧀ꦮꦴ ꦩꦹꦭꦴꦪꦥꦛꦶꦏꦱ꧀ꦱꦤꦴꦪ ꦥꦛꦶꦏꦱ꧀ꦱꦶꦠꦺꦴꦠꦶ ꦪꦺꦴꦗꦺꦠꦧ꧀ꦧ’’ꦤ꧀ꦠꦶ. ꦄꦡ ꦮꦴ ‘‘ꦩꦹꦭꦴꦪ ꦥꦛꦶꦏꦱ꧀ꦱꦤꦴ ꦩꦹꦭꦴꦪꦥꦛꦶꦏꦱ꧀ꦱꦤꦴ’’ꦠꦶ ꦄꦭꦸꦠ꧀ꦠꦱꦩꦴꦱꦮꦱꦺꦤ ꦈꦠ꧀ꦠꦫꦥꦢꦺꦤ ꦱꦩꦴꦱꦁ ꦏꦠ꧀ꦮꦴ ꦱꦔ꧀ꦓꦺꦤ ꦆꦠ꧀ꦡꦤ꧀ꦤꦴꦩꦺꦴ ꦨꦶꦏ꧀ꦑꦸ ꦄꦤ꧀ꦠꦫꦴ ꦱꦩ꧀ꦧꦲꦸꦭꦴꦤꦁ ꦄꦴꦥꦠ꧀ꦠꦷꦤꦁ ꦄꦥ꧀ꦥꦛꦶꦕ꧀ꦖꦤ꧀ꦤꦴꦤꦁ ꦲꦺꦠꦸ ꦥꦛꦶꦏꦱ꧀ꦱꦶꦠꦺꦴ. ꦱꦴ ꦩꦹꦭꦴꦪꦥꦛꦶꦏꦱ꧀ꦱꦤꦴ ꦑꦩꦠꦶ ꦱꦔ꧀ꦓꦱ꧀ꦱꦴꦠꦶ ꦪꦺꦴꦗꦺꦠꦧ꧀ꦧꦁ. ꦠꦡꦴ ꦲꦶ ꦮꦸꦠ꧀ꦠꦁ ꦠꦠ꧀ꦡꦺꦮ (ꦮꦶ. ꦮꦶ. ꦛꦷ. ꦕꦹꦭ꦳ꦮꦒ꧀ꦒ ꧒.꧑꧐꧒) ‘‘ꦄꦡ ꦮꦴ ꦩꦹꦭꦴꦪꦥꦛꦶꦏꦱ꧀ꦱꦤꦴ ꦑꦩꦠꦶ ꦱꦔ꧀ꦓꦱ꧀ꦱꦴꦠꦶ ꦈꦠ꧀ꦠꦫꦥꦢꦺꦤ ꦱꦲ ꦥꦕ꧀ꦕꦠ꧀ꦠꦮꦱꦺꦤꦺꦮ ꦪꦺꦴꦗꦺꦠꦸꦩ꧀ꦥꦶ ꦮꦛ꧀ꦛꦠꦷ’’ꦠꦶ.

ꦠꦁ ꦢꦺꦤ꧀ꦠꦺꦤ ꦥꦜꦩꦁ ꦩꦹꦭꦴꦪ ꦥꦛꦶꦏꦱ꧀ꦱꦶꦠ꧀ꦮꦴ ꦥꦕ꧀ꦖꦴꦥꦫꦶꦮꦴꦱꦺꦴ ꦢꦴꦠꦧ꧀ꦧꦺꦴꦠꦶ ꦌꦠ꧀ꦡ ꦠꦁ ꦎꦣꦴꦤꦱꦩꦺꦴꦣꦴꦤꦥꦫꦶꦮꦴꦱꦁ ꦢꦺꦤ꧀ꦠꦺꦤ ꦥꦜꦩꦁ ꦠꦁ ꦨꦶꦏ꧀ꦑꦸꦁ ꦩꦹꦭꦴꦪ ꦥꦛꦶꦏꦱ꧀ꦱꦶꦠ꧀ꦮꦴ ꦩꦹꦭꦢꦶꦮꦱꦺ ꦄꦴꦏꦝ꧀ꦞꦶꦠ꧀ꦮꦴ ꦠꦱ꧀ꦱ ꦄꦤ꧀ꦠꦫꦴꦥꦠ꧀ꦠꦶꦪꦴ ꦱꦩꦺꦴꦣꦴꦤꦥꦫꦶꦮꦴꦱꦺꦴ ꦢꦴꦠꦧ꧀ꦧꦺꦴꦠꦶ ꦄꦠ꧀ꦡꦺꦴ. ꦪꦡꦴ ꦏꦶꦁ ꦮꦶꦩꦠꦶꦮꦶꦤꦺꦴꦢꦤꦶꦪꦁ (ꦮꦶ. ꦮꦶ. ꦛꦷ. ꦕꦹꦭ꦳ꦮꦒ꧀ꦒ ꧒.꧑꧐꧒) ‘‘ꦈꦢꦴꦪꦶꦁ ꦨꦶꦏ꧀ꦑꦸꦁ ꦄꦤ꧀ꦠꦫꦴ ꦌꦏꦶꦱ꧀ꦱꦴ ꦄꦴꦥꦠ꧀ꦠꦶꦪꦴ…ꦥꦺ… ꦩꦹꦭꦴꦪ ꦥꦛꦶꦏꦱ꧀ꦱꦶꦠ꧀ꦮꦴꦠꦶ ꦌꦠ꧀ꦡ ꦄꦤ꧀ꦠꦫꦴ ꦌꦏꦶꦱ꧀ꦱꦴ ꦄꦴꦥꦠ꧀ꦠꦶꦪꦴ ꦲꦺꦠꦸꦨꦹꦠꦴꦪ ꦈꦢꦴꦪꦶꦁ ꦨꦶꦏ꧀ꦑꦸꦁ ꦩꦹꦭꦴꦪ ꦥꦛꦶꦏꦱ꧀ꦱꦶꦠ꧀ꦮꦴ ꦩꦹꦭꦢꦶꦮꦱꦺ ꦄꦴꦏꦝ꧀ꦞꦶꦠ꧀ꦮꦴ ꦠꦱ꧀ꦱꦴ ꦄꦤ꧀ꦠꦫꦴꦥꦠ꧀ꦠꦶꦪꦴ ꦱꦩꦺꦴꦣꦴꦤꦥꦫꦶꦮꦴꦱꦁ ꦢꦺꦠꦹꦠꦶ ꦪꦺꦴꦗꦤꦴ’’ꦠꦶ ꦮꦸꦠ꧀ꦠꦁ. ꦩꦲꦴꦱꦸꦩꦠ꧀ꦡꦺꦫꦮꦴꦢꦺ ꦄꦴꦮꦶꦏꦴꦫꦴꦥꦺꦠ꧀ꦮꦴ ꦮꦶꦱ꧀ꦱꦗ꧀ꦗꦺꦠꦧ꧀ꦧꦺꦴꦠꦶ ꦠꦱ꧀ꦱ ꦄꦠꦺꦏꦶꦕ꧀ꦖꦨꦴꦮꦁ ꦠꦺꦤꦺꦮ ꦱꦔ꧀ꦓꦱ꧀ꦱ ꦥꦴꦏꦛꦁ ꦏꦴꦫꦺꦠ꧀ꦮꦴ ꦭꦗ꧀ꦗꦷꦒꦟꦠꦺꦴ ꦮꦶꦪꦺꦴꦗꦤꦮꦱꦺꦤ ꦮꦶꦱ꧀ꦱꦗ꧀ꦗꦺꦠꦧ꧀ꦧꦺꦴꦠꦶ ꦄꦠ꧀ꦡꦺꦴ.

ꦎꦣꦴꦤꦱꦩꦺꦴꦣꦴꦤꦥꦫꦶꦮꦴꦱꦏꦡꦴ ꦤꦶꦛ꧀ꦜꦶꦠꦴ.

ꦄꦒ꧀ꦓꦱꦩꦺꦴꦣꦴꦤꦥꦫꦶꦮꦴꦱꦏꦡꦴ

꧒꧔꧔. ꦄꦒ꧀ꦓꦺꦤ ꦄꦒ꧀ꦓꦮꦱꦺꦤ ꦄꦫꦲꦮꦱꦺꦤ ꦱꦩꦺꦴꦣꦴꦤꦁ ꦄꦒ꧀ꦓꦱꦩꦺꦴꦣꦴꦤꦁ, ꦄꦴꦥꦤ꧀ꦤꦴꦱꦸ ꦱꦩ꧀ꦧꦲꦸꦭꦴꦱꦸ ꦄꦴꦥꦠ꧀ꦠꦷꦱꦸ ꦪꦴ ꦄꦴꦥꦠ꧀ꦠꦶꦪꦺꦴ ꦕꦶꦫꦠꦫꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴ, ꦠꦴꦱꦁ ꦄꦒ꧀ꦓꦺꦤ ꦱꦩꦺꦴꦣꦴꦪ ꦠꦴꦱꦁ ꦫꦠ꧀ꦠꦶꦥꦫꦶꦕ꧀ꦖꦺꦢꦮꦱꦺꦤ ꦄꦮꦱꦺꦱꦴꦤꦁ ꦈꦴꦤꦠꦫꦥ꧀ꦥꦛꦶꦕ꧀ꦖꦤ꧀ꦤꦴꦤꦁ ꦄꦴꦥꦠ꧀ꦠꦷꦤꦁ ꦥꦫꦶꦮꦴꦱꦺꦴ ꦢꦷꦪꦠꦶ, ꦄꦪꦁ ꦮꦸꦕ꧀ꦕꦠꦶ ꦄꦒ꧀ꦓꦱꦩꦺꦴꦣꦴꦤꦺꦴ . ꦱꦠꦁ ꦄꦴꦥꦠ꧀ꦠꦶꦪꦺꦴꦠꦶ ꦏꦴꦪꦱꦁꦱꦒ꧀ꦒꦴꦢꦶꦮꦱꦺꦤ ꦌꦏꦢꦶꦮꦱꦺ ꦄꦴꦥꦤ꧀ꦤꦴ ꦱꦠꦁ ꦄꦴꦥꦠ꧀ꦠꦶꦪꦺꦴ. ꦢꦱꦱꦠꦤ꧀ꦠꦶ ꦱꦲꦱ꧀ꦱꦄꦴꦥꦠ꧀ꦠꦶꦪꦺꦴ. ꦫꦠ꧀ꦠꦶꦱꦠꦁ ꦖꦴꦢꦪꦶꦠ꧀ꦮꦴꦤꦴꦠꦶ ꦪꦺꦴꦗꦺꦠꦧ꧀ꦧꦁ. ‘‘ꦄꦒ꧀ꦓꦱꦩꦺꦴꦣꦴꦤꦺꦴ ꦤꦴꦩ ꦱꦨꦴꦒꦮꦠ꧀ꦡꦸꦏꦴꦪꦺꦴ ꦱꦩ꧀ꦧꦲꦸꦭꦴ ꦄꦴꦥꦠ꧀ꦠꦶꦪꦺꦴ ꦄꦴꦥꦤ꧀ꦤꦱ꧀ꦱ ꦧꦲꦸꦫꦠ꧀ꦠꦶꦁ ꦥꦛꦶꦕ꧀ꦖꦴꦢꦶꦠꦴꦥꦠ꧀ꦠꦶꦪꦁ ꦤꦶꦏ꧀ꦑꦶꦥꦶꦠ꧀ꦮꦴ ꦢꦴꦠꦧ꧀ꦧꦺꦴ, ꦆꦠꦫꦺꦴ ꦤꦴꦤꦴꦮꦠ꧀ꦡꦸꦏꦴꦤꦁ ꦮꦱꦺꦤꦴꦠꦶ ꦄꦪꦩꦺꦠꦺꦱꦁ ꦮꦶꦱꦺꦱꦺꦴ’’ꦠꦶ ꦮꦗꦶꦫꦧꦸꦢ꧀ꦣꦶꦛꦷꦏꦴꦪꦁ (ꦮꦗꦶꦫ. ꦛꦷ. ꦕꦹꦭ꦳ꦮꦒ꧀ꦒ ꧑꧐꧒) ꦮꦸꦠ꧀ꦠꦁ.

ꦄꦒ꧀ꦓꦱꦩꦺꦴꦣꦴꦤꦥꦫꦶꦮꦴꦱꦏꦡꦴ ꦤꦶꦛ꧀ꦜꦶꦠꦴ.

꧒꧔꧖. ꦭꦶꦔ꧀ꦒꦥꦫꦶꦮꦠ꧀ꦠꦤꦏꦏꦡꦴꦪꦁ ꦪꦢꦶ ꦏꦱ꧀ꦱꦕꦶ ꦨꦶꦏ꧀ꦑꦸꦤꦺꦴ ꦆꦠ꧀ꦡꦶꦭꦶꦔ꧀ꦒꦁ ꦥꦴꦠꦸ ꦨꦮꦺꦪ꧀ꦪ, ꦏꦶꦁ ꦠꦺꦤ ꦥꦸꦤ ꦈꦥꦗ꧀ꦙꦴ ꦒꦲꦺꦠꦧ꧀ꦧꦴ, ꦥꦸꦤ ꦈꦥꦱꦩ꧀ꦥꦢꦴ ꦏꦴꦠꦧ꧀ꦧꦴ, ꦏꦶꦁ ꦨꦶꦏ꧀ꦑꦹꦥꦱꦩ꧀ꦥꦢꦴꦠꦺꦴ ꦥꦛ꧀ꦜꦴꦪ ꦮꦱ꧀ꦱꦒꦟꦤꦴ ꦏꦴꦠꦧ꧀ꦧꦴ, ꦈꦢꦴꦲꦸ ꦆꦠꦺꦴ ꦥꦛ꧀ꦜꦴꦪꦴꦠꦶ ꦥꦸꦕ꧀ꦖꦴꦪ ꦱꦠꦶ ꦠꦁ ꦥꦫꦶꦲꦫꦶꦠꦸꦩꦴꦲ ‘‘ꦱꦕꦺ’’ꦠꦶꦄꦴꦢꦶ. ꦌꦮꦁ ꦱꦤ꧀ꦠꦺ ꦱꦴ ꦨꦶꦏ꧀ꦑꦸꦤꦷ ꦨꦶꦏ꧀ꦑꦹꦤꦁ ꦩꦗ꧀ꦙꦺꦪꦺꦮ ꦮꦱꦶꦠꦧ꧀ꦧꦁ ꦨꦮꦺꦪ꧀ꦪꦴꦠꦶ ꦕꦺꦴꦢꦤꦁ ꦱꦤ꧀ꦣꦴꦪꦴꦲ ‘‘ꦄꦥ꧀ꦥꦠꦶꦫꦹꦥ’’ꦤ꧀ꦠꦶꦄꦴꦢꦶ. ꦌꦮꦁ ꦱꦤ꧀ꦠꦺ ꦨꦶꦏ꧀ꦑꦸꦨꦹꦠꦏꦴꦭꦺ ꦄꦴꦥꦗ꧀ꦗꦶꦠꦴꦥꦠ꧀ꦠꦶꦪꦺꦴ ꦏꦡꦁ ꦏꦴꦠꦧ꧀ꦧꦴꦠꦶ ꦕꦺꦴꦢꦤꦁ ꦩꦤꦱꦶ ꦏꦠ꧀ꦮꦴ ꦄꦴꦲ ‘‘ꦪꦴ ꦢꦺꦱꦤꦴꦒꦴꦩꦶꦤꦶꦪꦺꦴ ꦮꦴ’’ꦠꦶꦄꦴꦢꦶ. ꦠꦠ꧀ꦡ ꦨꦶꦏ꧀ꦑꦹꦤꦁ ꦨꦶꦏ꧀ꦑꦸꦤꦷꦲꦶ ꦱꦴꦣꦴꦫꦟꦴꦠꦶ ꦱꦚ꧀ꦕꦫꦶꦠ꧀ꦠꦴꦢꦪꦺꦴ. ꦄꦱꦴꦣꦴꦫꦟꦴꦠꦶ ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦄꦴꦢꦪꦺꦴ. ꦲꦺꦴꦠꦸ ꦨꦒꦮꦠꦺꦴ ꦄꦤꦸꦚ꧀ꦚꦴꦠꦮꦱꦺꦤ ꦭꦶꦔ꧀ꦒꦺ ꦥꦫꦶꦮꦠ꧀ꦠꦺ ꦄꦱꦴꦣꦴꦫꦟꦴꦥꦠ꧀ꦠꦷꦲꦶ ꦮꦸꦛ꧀ꦜꦶꦠꦨꦴꦮꦺꦴ, ꦥꦸꦤ ꦥꦏꦠꦶꦭꦶꦔ꧀ꦒꦺ ꦈꦥ꧀ꦥꦤ꧀ꦤꦺ ꦥꦸꦤ ꦄꦴꦥꦠ꧀ꦠꦶ ꦱꦶꦪꦴꦠꦶ ꦄꦴꦱꦔ꧀ꦏꦁ ꦥꦫꦶꦲꦫꦶꦠꦸꦁ ‘‘ꦥꦸꦤ ꦥꦏꦠꦶꦭꦶꦔ꧀ꦒꦺ’’ꦠꦶꦄꦴꦢꦶ ꦮꦸꦠ꧀ꦠꦁ. ꦆꦢꦴꦤꦶ ꦠꦩꦠ꧀ꦡꦁ ꦥꦴꦭ꦳ꦶꦪꦴ ꦱꦴꦣꦺꦠꦸꦁ ‘‘ꦮꦸꦠ꧀ꦠꦚ꧀ꦕꦺꦠ’’ꦤ꧀ꦠꦶꦄꦴꦢꦶꦩꦴꦲ. ꦠꦱ꧀ꦱꦠ꧀ꦡꦺꦴ ꦥꦜꦩꦥꦴꦫꦴꦗꦶꦏꦮꦟ꧀ꦟꦤꦴꦪ ꦛꦷꦏꦴꦱꦸ (ꦱꦴꦫꦠ꧀ꦡ. ꦛꦷ. ꧒.꧖꧙; ꦮꦗꦶꦫ. ꦛꦷ. ꦥꦴꦫꦴꦗꦶꦏ ꧖꧙) ꦮꦸꦠ꧀ꦠꦤꦪꦺꦤꦺꦮ ꦢꦛ꧀ꦜꦧ꧀ꦧꦺꦴ, ꦆꦣ ꦥꦤ ꦒꦫꦸꦏꦴꦥꦠ꧀ꦠꦶꦮꦸꦛ꧀ꦜꦴꦤꦏꦡꦴꦨꦹꦠꦠ꧀ꦠꦴ ꦱꦴꦪꦺꦮ ꦏꦡꦴ ꦮꦸꦕ꧀ꦕꦠꦺ.

꧒꧔꧗. ꦠꦠ꧀ꦡ ꦨꦶꦏ꧀ꦑꦸꦤꦷꦲꦶ ꦱꦴꦣꦴꦫꦟꦴꦪ ꦥꦛꦶꦕ꧀ꦖꦤ꧀ꦤꦴꦪ ꦄꦴꦥꦠ꧀ꦠꦶꦪꦴꦠꦶ ꦱꦚ꧀ꦕꦫꦶꦠ꧀ꦠꦴꦢꦶꦄꦴꦥꦠ꧀ꦠꦶꦪꦴ, ꦲꦺꦠ꧀ꦮꦠ꧀ꦡꦺ ꦕꦺꦠꦁ ꦏꦫꦟꦮꦕꦤꦁ. ꦥꦫꦶꦮꦱꦤ꧀ꦠꦱ꧀ꦱꦴꦠꦶ ꦄꦤꦴꦢꦫꦺ ꦱꦴꦩꦶꦮꦕꦤꦁ. ꦥꦏ꧀ꦑꦩꦴꦤꦠ꧀ꦠꦩꦺꦮ ꦢꦴꦠꦧ꧀ꦧꦁ, ꦤ ꦥꦸꦤ ꦥꦫꦶꦮꦴꦱꦺꦴ ꦢꦴꦠꦧ꧀ꦧꦺꦴ ꦨꦶꦏ꧀ꦑꦸꦤꦶꦨꦴꦮꦺ ꦄꦥꦫꦶꦮꦴꦱꦴꦫꦲꦠ꧀ꦠꦴꦠꦶ ꦄꦣꦶꦥ꧀ꦥꦴꦪꦺꦴ. ꦩꦴꦤꦠ꧀ꦠꦁ ꦕꦫꦤ꧀ꦠꦱ꧀ꦱꦴꦠꦶ ꦄꦤꦴꦢꦫꦺꦪꦺꦮ ꦱꦴꦩꦶꦮꦕꦤꦁ, ꦖꦴꦫꦠ꧀ꦠꦩꦴꦤꦠ꧀ꦠꦺ ꦄꦴꦕꦶꦟ꧀ꦟꦺꦪꦺꦮ ꦥꦫꦶꦮꦠ꧀ꦠꦠꦶ, ꦥꦸꦤ ꦥꦏ꧀ꦑꦩꦴꦤꦠ꧀ꦠꦩꦺꦮ ꦢꦴꦠꦧ꧀ꦧꦤ꧀ꦠꦶ. ꦠꦺꦤ ꦮꦏ꧀ꦑꦠꦶ ‘‘ꦱꦕꦺ ꦕꦶꦟ꧀ꦟꦩꦴꦤꦠ꧀ꦠꦱ꧀ꦱꦴ’’ꦠꦶꦄꦴꦢꦶ. ꦄꦏꦸꦱꦭꦮꦶꦥꦴꦏꦺ ꦥꦫꦶꦏ꧀ꦑꦷꦟꦺꦠꦶ ꦥꦸꦫꦶꦱꦶꦤ꧀ꦢ꧀ꦫꦶꦪꦱ꧀ꦱ ꦄꦤ꧀ꦠꦫꦣꦴꦤꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦆꦠ꧀ꦡꦶꦤ꧀ꦢ꧀ꦫꦶꦪꦥꦠꦶꦛ꧀ꦜꦴꦤꦁ ꦥꦤ ꦏꦸꦱꦭꦮꦶꦥꦴꦏꦩꦺꦮ. ꦮꦸꦠ꧀ꦠꦚ꧀ꦲꦶ ꦄꦛ꧀ꦜꦏꦡꦴꦪꦁ ‘‘ꦈꦨꦪꦩ꧀ꦥꦶ ꦄꦏꦸꦱꦭꦺꦤ ꦄꦤ꧀ꦠꦫꦣꦴꦪꦠꦶ, ꦏꦸꦱꦭꦺꦤ ꦥꦛꦶꦭꦧ꧀ꦨꦠꦷ’’ꦠꦶ. ꦖꦴꦫꦠ꧀ꦠꦁ ꦩꦴꦤꦠ꧀ꦠꦩꦺꦮ ꦢꦴꦠꦧ꧀ꦧꦁ, ꦤ ꦥꦫꦶꦮꦴꦱꦺꦴ ꦢꦴꦠꦧ꧀ꦧꦺꦴ, ꦤ ꦮꦴ ꦥꦏ꧀ꦑꦩꦴꦤꦠ꧀ꦠꦁ ꦢꦴꦠꦧ꧀ꦧꦁ.

‘‘ꦄꦪꦁ ꦥꦤ ꦮꦶꦱꦺꦱꦺꦴ’’ꦠꦶ ꦮꦠ꧀ꦮꦴ ꦠꦁ ꦮꦶꦱꦺꦱꦁ ꦢꦱ꧀ꦱꦺꦠꦸꦩꦴꦲ ‘‘ꦱꦕꦺ’’ꦠꦶꦄꦴꦢꦶ. ꦥꦫꦶꦮꦴꦱꦢꦴꦤꦁ ꦤꦠ꧀ꦡꦶ, ꦖꦴꦫꦠ꧀ꦠꦁ ꦩꦴꦤꦠ꧀ꦠꦩꦺꦮ ꦢꦴꦠꦧ꧀ꦧꦁ. ꦏꦱ꧀ꦩꦴ? ꦨꦶꦏ꧀ꦑꦸꦤꦶꦏꦴꦭꦺ ꦥꦛꦶꦕ꧀ꦖꦤ꧀ꦤꦠ꧀ꦠꦴ. ꦨꦶꦏ꧀ꦑꦸꦏꦴꦭꦺ ꦖꦤ꧀ꦤꦴꦪꦺꦮ ꦲꦶ ꦄꦴꦥꦠ꧀ꦠꦶ ꦥꦫꦶꦮꦴꦱꦴꦫꦲꦴ ꦲꦺꦴꦠꦶ, ꦤꦺꦴ ꦨꦶꦏ꧀ꦑꦸꦤꦶꦏꦴꦭꦺꦠꦶ ꦄꦪꦩꦺꦠꦴꦱꦁ ꦮꦶꦱꦺꦱꦺꦴ. ꦥꦏ꧀ꦑꦩꦴꦤꦠ꧀ꦠꦁ ꦕꦫꦤ꧀ꦠꦶꦪꦴꦠꦶ ꦄꦤꦴꦢꦫꦺ ꦱꦴꦩꦶꦮꦕꦤꦁ, ꦥꦏ꧀ꦑꦩꦴꦤꦠ꧀ꦠꦺ ꦄꦴꦕꦶꦟ꧀ꦟꦺꦪꦺꦮꦴꦠꦶ ꦄꦠ꧀ꦡꦺꦴ. ꦠꦡꦴ ꦲꦶ ꦮꦏ꧀ꦑꦠꦶ ‘‘ꦕꦶꦟ꧀ꦟꦩꦴꦤꦠ꧀ꦠꦴꦪꦴ’’ꦠꦶꦄꦴꦢꦶ. ꦖꦴꦫꦠ꧀ꦠꦁ ꦩꦴꦤꦠ꧀ꦠꦁ ꦕꦫꦤ꧀ꦠꦱ꧀ꦱꦴꦠꦶꦄꦴꦢꦶ ꦮꦸꦠ꧀ꦠꦤꦪꦩꦺꦮ.

ꦥꦫꦶꦮꦴꦱꦮꦶꦤꦶꦕ꧀ꦖꦪꦏꦡꦴ

ꦆꦢꦴꦤꦶ ꦱꦔ꧀ꦓꦴꦢꦶꦱꦺꦱꦴꦥꦠ꧀ꦠꦶ ꦪꦱ꧀ꦩꦴ ꦱꦴꦮꦱꦺꦱꦒꦫꦸꦏꦴꦥꦠ꧀ꦠꦶ ꦲꦺꦴꦠꦶ ꦱꦠꦺꦏꦶꦕ꧀ꦖꦴ, ꦠꦱ꧀ꦩꦴ ꦪꦡꦴ ꦤꦴꦩ ꦫꦺꦴꦒꦴꦠꦸꦫꦺꦴ ꦥꦸꦒ꧀ꦒꦭꦺꦴ ꦏꦶꦚ꧀ꦕꦶ ꦄꦠ꧀ꦠꦤꦺꦴ ꦲꦶꦠꦱꦸꦑꦏꦴꦫꦟꦁ ꦏꦴꦠꦸꦁ ꦤ ꦱꦏ꧀ꦏꦺꦴꦠꦶ, ꦠꦩꦺꦤꦁ ꦏꦴꦫꦸꦟꦶꦏꦺꦴ ꦠꦶꦏꦶꦕ꧀ꦖꦏꦺꦴ ꦏꦫꦸꦟꦴꦱꦚ꧀ꦕꦺꦴꦢꦶꦠꦺꦴ ꦠꦶꦏꦶꦕ꧀ꦖꦁ ꦏꦠ꧀ꦮꦴ ꦒꦺꦭꦚ꧀ꦚꦠꦺꦴ ꦮꦸꦛ꧀ꦜꦴꦥꦺꦠ꧀ꦮꦴ ꦲꦶꦠꦱꦸꦑꦁ ꦗꦤꦺꦠꦶ, ꦌꦮꦁ ꦱꦔ꧀ꦓꦴꦢꦶꦱꦺꦱꦴꦥꦠ꧀ꦠꦶꦱꦩꦔ꧀ꦒꦷ ꦥꦸꦒ꧀ꦒꦭꦺꦴ ꦄꦴꦟꦴꦮꦷꦠꦶꦏ꧀ꦏꦩꦤ꧀ꦠꦫꦴꦪꦶꦏꦨꦴꦮꦠꦺꦴ ꦱꦒ꧀ꦒꦩꦺꦴꦏ꧀ꦑꦩꦒ꧀ꦒꦁ ꦱꦺꦴꦣꦺꦠꦸꦁ ꦤ ꦱꦏ꧀ꦏꦺꦴꦠꦶ, ꦠꦩꦺꦤꦁ ꦩꦲꦴꦏꦴꦫꦸꦟꦶꦏꦺꦴ ꦨꦒꦮꦴ ꦩꦲꦴꦏꦫꦸꦟꦴꦪ ꦱꦚ꧀ꦕꦺꦴꦢꦶꦠꦩꦴꦤꦱꦺꦴ ꦄꦤꦺꦏꦺꦲꦶ ꦤꦪꦺꦲꦶ ꦄꦴꦥꦠ꧀ꦠꦶꦠꦺꦴ ꦮꦸꦛ꧀ꦜꦴꦤꦁ ꦏꦠ꧀ꦮꦴ ꦱꦒ꧀ꦒꦩꦺꦴꦏ꧀ꦑꦱꦸꦑꦺ ꦥꦠꦶꦛ꧀ꦜꦥꦺꦠꦶ, ꦨꦒꦮꦠꦺꦴ ꦄꦣꦶꦥ꧀ꦥꦴꦪꦚ꧀ꦚꦸꦤꦺꦴ ꦄꦛ꧀ꦜꦏꦡꦴꦕꦫꦶꦪꦴꦥꦶ ꦄꦤꦺꦏꦺꦲꦶ ꦏꦴꦫꦟꦺꦲꦶ ꦨꦒꦮꦠꦺꦴ ꦮꦕꦤꦱ꧀ꦱ ꦄꦠ꧀ꦡꦁ ꦥꦏꦴꦱꦺꦠ꧀ꦮꦴ ꦮꦶꦱꦸꦢ꧀ꦣꦏꦴꦩꦴꦤꦁ ꦤꦪꦁ ꦢꦺꦤ꧀ꦠꦶ, ꦠꦡꦴ ꦛꦷꦏꦴꦕꦫꦶꦪꦴꦢꦪꦺꦴꦥꦶ. ꦌꦮꦁ ꦢꦶꦤ꧀ꦤꦺ ꦥꦤ ꦤꦪꦺ ꦪꦺꦴꦤꦶꦱꦺꦴ ꦩꦤꦱꦶ ꦏꦴꦠꦸꦁ ꦱꦏ꧀ꦏꦺꦴꦤ꧀ꦠꦴ ꦥꦟ꧀ꦝꦶꦠꦴ ꦪꦡꦴꦤꦸꦱꦶꦛ꧀ꦜꦁ ꦥꦛꦶꦥꦗ꧀ꦗꦤ꧀ꦠꦶ, ꦄꦱꦏ꧀ꦏꦺꦴꦤ꧀ꦠꦴ ꦄꦚ꧀ꦚꦡꦴ ꦄꦠ꧀ꦡꦁ ꦒꦲꦺꦠ꧀ꦮꦴ ꦤ ꦪꦡꦴꦤꦸꦱꦶꦛ꧀ꦜꦁ ꦥꦛꦶꦥꦗ꧀ꦗꦤ꧀ꦠꦶ, ꦠꦺꦱꦁ ꦢꦶꦛ꧀ꦜꦴꦤꦸꦒꦠꦶꦁ ꦄꦤꦸꦒꦕ꧀ꦖꦤ꧀ꦠꦴ ꦱꦶꦱ꧀ꦱꦴꦢꦪꦺꦴꦥꦶ ꦠꦡꦺꦮ ꦏꦫꦺꦴꦤ꧀ꦠꦶ, ꦠꦱ꧀ꦩꦴ ꦨꦒꦮꦠꦺꦴ ꦮꦕꦤꦚ꧀ꦕ ꦥꦸꦧ꧀ꦧꦺꦤꦴꦥꦫꦁ ꦱꦁꦱꦤ꧀ꦢꦶꦠ꧀ꦮꦴ ꦄꦛ꧀ꦜꦏꦡꦴꦛꦷꦏꦴꦢꦶꦮꦕꦤꦚ꧀ꦕ ꦱꦩ꧀ꦩꦴ ꦠꦸꦭꦪꦶꦠ꧀ꦮꦴ ꦠꦡꦠꦺꦴ ꦨꦒꦮꦠꦺꦴ ꦄꦣꦶꦥ꧀ꦥꦴꦪꦁ ꦚꦠ꧀ꦮꦴ ꦪꦡꦴꦤꦸꦱꦶꦛ꧀ꦜꦁ ꦥꦛꦶꦥꦗ꧀ꦗꦤ꧀ꦠꦺꦲꦶ ꦒꦫꦸꦏꦴꦥꦠ꧀ꦠꦶꦠꦺꦴ ꦮꦸꦛ꧀ꦜꦲꦤꦠ꧀ꦡꦁ ꦪꦺꦴꦒꦺꦴ ꦏꦫꦟꦷꦪꦺꦴ.

ꦠꦱ꧀ꦩꦴ ꦪꦢꦴ ꦨꦶꦏ꧀ꦑꦹ ꦄꦴꦒꦕ꧀ꦖꦤ꧀ꦠꦶ ꦮꦶꦤꦪꦣꦫꦱ꧀ꦱ ꦱꦤ꧀ꦠꦶꦏꦁ ‘‘ꦒꦫꦸꦏꦴꦥꦠ꧀ꦠꦶꦮꦸꦛ꧀ꦜꦴꦤꦁ ꦏꦫꦶꦱ꧀ꦱꦴꦩꦴ’’ꦠꦶ, ꦠꦢꦴ ꦮꦶꦤꦪꦣꦫꦺꦤ ‘‘ꦠ꧀ꦮꦁ ꦏꦠꦫꦴꦥꦠ꧀ꦠꦶꦁ ꦄꦴꦥꦤ꧀ꦤꦺꦴ’’ꦠꦶ ꦥꦸꦕ꧀ꦖꦶꦠꦧ꧀ꦧꦺꦴ. ‘‘ꦱꦔ꧀ꦓꦴꦢꦶꦱꦺꦱꦁ ꦄꦴꦥꦤ꧀ꦤꦺꦴ’’ꦠꦶ ꦮꦸꦠ꧀ꦠꦺ ‘‘ꦏꦠꦫꦱꦔ꧀ꦓꦴꦢꦶꦱꦺꦱ’’ꦤ꧀ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦆꦩꦁ ꦤꦴꦩꦴ’’ꦠꦶ ꦮꦸꦠ꧀ꦠꦺ ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦪꦁ ꦩꦺꦴꦕꦺꦠꦸꦏꦴꦩꦕꦺꦠꦤꦴ, ꦈꦥꦏ꧀ꦏꦩꦺꦴ, ꦩꦸꦕ꧀ꦕꦤꦤ꧀ꦠꦶ ꦠꦷꦟꦶ ꦄꦔ꧀ꦒꦴꦤꦶ. ꦏꦴꦪꦱꦁꦱꦒ꧀ꦒꦺ ꦩꦤꦸꦱ꧀ꦱꦶꦠ꧀ꦡꦷ, ꦆꦠ꧀ꦡꦶꦱꦚ꧀ꦚꦶꦠꦴ, ꦏꦴꦪꦱꦁꦱꦒ꧀ꦒꦫꦴꦒꦺꦴ, ꦠꦺꦤ ꦫꦴꦒꦺꦤ ꦮꦴꦪꦴꦩꦺꦴ, ꦲꦠ꧀ꦡꦒ꧀ꦒꦴꦲꦴꦢꦶꦱꦩꦴꦥꦗ꧀ꦗꦤꦤ꧀ꦠꦶ ꦥꦚ꧀ꦕ ꦄꦔ꧀ꦒꦴꦤꦶ. ꦢꦸꦛ꧀ꦜꦸꦭ꧀ꦭꦮꦴꦕꦴꦪꦁ ꦩꦤꦸꦱ꧀ꦱꦶꦠ꧀ꦡꦷ, ꦆꦠ꧀ꦡꦶꦱꦚ꧀ꦚꦶꦠꦴ, ꦢꦸꦛ꧀ꦜꦸꦭ꧀ꦭꦮꦴꦕꦱ꧀ꦱꦴꦢꦫꦴꦒꦺꦴ, ꦠꦺꦤ ꦫꦴꦒꦺꦤ ꦎꦨꦴꦱꦤꦁ, ꦠꦔ꧀ꦑꦟꦮꦶꦗꦴꦤꦤꦤ꧀ꦠꦶ ꦥꦚ꧀ꦕ ꦄꦔ꧀ꦒꦴꦤꦶ. ꦄꦠ꧀ꦠꦏꦴꦩꦺ ꦩꦤꦸꦱ꧀ꦱꦶꦠ꧀ꦡꦷ, ꦆꦠ꧀ꦡꦶꦱꦚ꧀ꦚꦶꦠꦴ, ꦄꦠ꧀ꦠꦏꦴꦩꦥꦴꦫꦶꦕꦫꦶꦪꦴꦪ ꦫꦴꦒꦺꦴ, ꦠꦺꦤ ꦫꦴꦒꦺꦤ ꦮꦟ꧀ꦟꦨꦟꦤꦁ, ꦠꦔ꧀ꦑꦟꦮꦶꦗꦴꦤꦤꦤ꧀ꦠꦶ ꦥꦚ꧀ꦕ ꦄꦔ꧀ꦒꦴꦤꦶ. ꦱꦚ꧀ꦕꦫꦶꦠ꧀ꦠꦺ ꦪꦺꦱꦸ ꦱꦚ꧀ꦕꦫꦶꦠ꧀ꦠꦁ ꦱꦩꦴꦥꦗ꧀ꦗꦠꦶ, ꦠꦺꦱꦁ ꦩꦤꦸꦱ꧀ꦱꦗꦴꦠꦶꦏꦠꦴ, ꦤꦴꦭꦁꦮꦕꦤꦷꦪꦠꦴ, ꦥꦛꦶꦒ꧀ꦒꦟ꧀ꦲꦤꦮꦷꦩꦁꦱꦤꦥꦕ꧀ꦕꦴꦲꦫꦟꦴꦤꦷꦠꦶ ꦥꦚ꧀ꦕ ꦄꦔ꧀ꦒꦴꦤꦶ. ꦏꦸꦛꦶꦏꦴꦫꦺ ꦈꦭ꧀ꦭꦶꦠ꧀ꦠꦴꦢꦷꦤꦁ ꦄꦚ꧀ꦚꦠꦫꦠꦴ, ꦲꦺꦛ꧀ꦜꦶꦩꦥꦩꦴꦟꦱꦩ꧀ꦨꦮꦺꦴ, ꦄꦢꦺꦱꦶꦠꦮꦠ꧀ꦡꦸꦏꦠꦴ, ꦥꦩꦴꦟꦴꦠꦶꦏ꧀ꦏꦤ꧀ꦠꦠꦴ, ꦄꦠ꧀ꦠꦸꦢ꧀ꦢꦺꦱꦶꦏꦠꦴ, ꦮꦴꦱꦴꦒꦴꦫꦠꦴ, ꦭꦺꦥꦓꦛꦤꦴꦠꦶ ꦱꦠ꧀ꦠ ꦥꦩꦴꦟꦪꦸꦠ꧀ꦠꦴꦢꦷꦱꦸ ꦖꦣꦴ ꦄꦔ꧀ꦒꦴꦤꦶ. ꦮꦶꦲꦴꦫꦏꦴꦫꦺ ꦠꦴꦤꦶꦪꦺꦮ ꦖ ꦄꦔ꧀ꦒꦴꦤꦶ. ꦢꦸꦛ꧀ꦜꦢꦺꦴꦱꦺ ꦪꦁ ꦕꦺꦴꦢꦺꦠꦶ, ꦠꦱ꧀ꦱ ꦈꦥꦱꦩ꧀ꦥꦤ꧀ꦤꦺꦴꦠꦶ ꦱꦔ꧀ꦑ꧀ꦪꦸꦥꦒꦩꦤꦁ, ꦠꦱ꧀ꦩꦶꦁ ꦱꦸꦢ꧀ꦣꦱꦚ꧀ꦚꦶꦠꦴ, ꦪꦺꦤ ꦥꦴꦫꦴꦗꦶꦏꦺꦤ ꦕꦺꦴꦢꦺꦠꦶ, ꦠꦱ꧀ꦱ ꦢꦶꦛ꧀ꦜꦴꦢꦶꦮꦱꦺꦤ ꦄꦩꦹꦭꦏꦠꦴ, ꦕꦴꦮꦤꦴꦣꦶꦥ꧀ꦥꦴꦪꦺꦤ ꦱꦩ꧀ꦩꦸꦑꦴꦕꦺꦴꦢꦤꦴ, ꦠꦱ꧀ꦱ ꦠꦔ꧀ꦑꦟꦮꦶꦗꦴꦤꦤꦤ꧀ꦠꦶ ꦥꦚ꧀ꦕ ꦄꦔ꧀ꦒꦴꦤꦶ. ꦄꦚ꧀ꦚꦨꦴꦒꦶꦪꦺ ꦄꦚ꧀ꦚꦨꦴꦒꦶꦪꦱ꧀ꦱ ꦄꦣꦶꦏꦫꦟꦱ꧀ꦱ ꦏꦚ꧀ꦕꦶꦢꦺꦱꦁ ꦭꦺꦱꦩꦠ꧀ꦠꦁ ꦈꦥꦴꦢꦶꦪꦤꦠꦴ, ꦥꦸꦫꦶꦩꦴꦤꦶ ꦥꦚ꧀ꦕꦴꦠꦶ ꦖ ꦄꦔ꧀ꦒꦴꦤꦶ. ꦱꦔ꧀ꦓꦨꦺꦢꦺ ꦨꦺꦢꦴꦪ ꦥꦫꦏ꧀ꦏꦩꦤꦁ, ꦣꦩ꧀ꦩꦏꦩ꧀ꦩꦺꦤ ꦱꦩꦤꦸꦨꦴꦱꦤꦁ, ꦏꦩ꧀ꦩꦮꦴꦕꦴꦥꦫꦶꦪꦺꦴꦱꦴꦤꦁ, ꦄꦥ꧀ꦥꦛꦶꦤꦶꦱ꧀ꦱꦗ꧀ꦗꦤꦤ꧀ꦠꦶ ꦕꦠ꧀ꦠꦴꦫꦶ ꦄꦔ꧀ꦒꦴꦤꦶ. ꦨꦺꦢꦴꦤꦸꦮꦠ꧀ꦠꦏꦺ ꦄꦔ꧀ꦒꦺꦱꦸ ꦪꦡꦴ ꦠꦠ꧀ꦡ ꦥꦫꦏ꧀ꦏꦩꦤꦁ, ꦌꦮꦁ ꦆꦣ ꦄꦤꦸꦮꦠ꧀ꦠꦤꦤ꧀ꦠꦶ ꦕꦠ꧀ꦠꦴꦫꦶ ꦄꦔ꧀ꦒꦴꦤꦶ. ꦢꦸꦧ꧀ꦧꦕꦺ ꦄꦔ꧀ꦒꦺꦱꦸ ꦪꦡꦴ ꦠꦠ꧀ꦡ ꦥꦫꦏ꧀ꦏꦩꦤꦁ, ꦌꦮꦁ ꦆꦣ ꦄꦮꦕꦤꦷꦪꦏꦫꦟꦠꦴꦠꦶ ꦕꦠ꧀ꦠꦴꦫꦶ ꦄꦔ꧀ꦒꦴꦤꦶ. ꦏꦸꦭꦢꦹꦱꦏꦺ ꦄꦔ꧀ꦒꦺꦱꦸ ꦪꦡꦴ ꦠꦠ꧀ꦡ ꦥꦫꦏ꧀ꦏꦩꦤꦁ, ꦌꦮꦁ ꦆꦣ ꦖꦤ꧀ꦢꦴꦢꦷꦲꦶ ꦥꦴꦥꦤꦤ꧀ꦠꦶ ꦕꦠ꧀ꦠꦴꦫꦶ ꦄꦔ꧀ꦒꦴꦤꦶ. ꦆꦠꦶ ꦆꦩꦴꦤꦶ ꦄꦔ꧀ꦒꦴꦤꦶ ꦱꦺꦴꦣꦺꦠ꧀ꦮꦴ ꦱꦕꦺ ꦄꦔ꧀ꦒꦥꦴꦫꦶꦥꦹꦫꦷ ꦲꦺꦴꦠꦶ, ‘‘ꦱꦔ꧀ꦓꦴꦢꦶꦱꦺꦱꦺꦴ’’ꦠꦶ ꦮꦠ꧀ꦠꦧ꧀ꦧꦺꦴ. ꦤꦺꦴ ꦕꦺ, ‘‘ꦤꦴꦪꦁ ꦱꦔ꧀ꦓꦴꦢꦶꦱꦺꦱꦺꦴ, ꦡꦸꦭ꧀ꦭꦕ꧀ꦕꦪꦴꦢꦷꦱꦸ ꦄꦚ꧀ꦚꦠꦫꦴꦥꦠ꧀ꦠꦷ’’ꦠꦶ ꦮꦠ꧀ꦮꦴ ‘‘ꦤꦴꦪꦁ ꦮꦸꦛ꧀ꦜꦴꦤꦒꦴꦩꦶꦤꦷ, ꦢꦺꦱꦤꦴꦒꦴꦩꦶꦤꦷ ꦄꦪꦁ ꦄꦴꦥꦠ꧀ꦠꦶ, ꦠꦱ꧀ꦩꦴ ꦥꦠꦶꦫꦹꦥꦱ꧀ꦱ ꦨꦶꦏ꧀ꦑꦸꦱ꧀ꦱ ꦱꦤ꧀ꦠꦶꦏꦺ ꦢꦺꦱꦺꦲꦷ’’ꦠꦶ ꦮꦠ꧀ꦮꦴ ꦢꦺꦱꦴꦥꦺꦠꦧ꧀ꦧꦺꦴ.

ꦄꦡ ꦥꦤ ꦄꦤꦴꦥꦠ꧀ꦠꦶꦕ꧀ꦖꦴꦪꦴ ꦥꦚ꧀ꦚꦴꦪꦠꦶ, ‘‘ꦄꦤꦴꦥꦠ꧀ꦠꦷ’’ꦠꦶ ꦮꦠ꧀ꦮꦴ ꦈꦪ꧀ꦪꦺꦴꦗꦺꦠꦧ꧀ꦧꦴ. ꦱꦕꦺ ꦥꦤ ꦱꦔ꧀ꦓꦴꦢꦶꦱꦺꦱꦕ꧀ꦖꦴꦪꦴ ꦥꦚ꧀ꦚꦴꦪꦠꦶ, ‘‘ꦠ꧀ꦮꦁ ꦆꦩꦁ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦶꦠ꧀ꦮꦴ ꦖꦴꦢꦺꦱꦶ, ꦤ ꦖꦴꦢꦺꦱꦷ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦤ ꦖꦴꦢꦺꦩꦷ’’ꦠꦶ ꦮꦸꦠ꧀ꦠꦺ ‘‘ꦠꦺꦤ ꦲꦶ ꦠ꧀ꦮꦁ ꦤ ꦥꦫꦶꦮꦴꦱꦴꦫꦲꦺꦴ, ꦩꦴꦤꦠ꧀ꦠꦴꦫꦲꦺꦴꦮ ꦲꦺꦴꦠꦷ’’ꦠꦶ ꦮꦠ꧀ꦠꦧ꧀ꦧꦺꦴ. ‘‘ꦖꦴꦢꦺꦩꦷ’’ꦠꦶ ꦥꦤ ꦮꦸꦠ꧀ꦠꦺ ‘‘ꦢꦱꦱꦸ ꦄꦴꦏꦴꦫꦺꦱꦸ ꦄꦚ꧀ꦚꦠꦫꦏꦴꦫꦟꦺꦤ ꦖꦴꦢꦺꦱꦶ, ꦈꦢꦴꦲꦸ ꦄꦚ꧀ꦚꦏꦴꦫꦟꦺꦤꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦢꦱꦱꦸ ꦄꦚ꧀ꦚꦠꦫꦏꦴꦫꦟꦺꦤꦴ’’ꦠꦶ ꦮꦸꦠ꧀ꦠꦺ ‘‘ꦌꦮꦩ꧀ꦥꦶ ꦩꦴꦤꦠ꧀ꦠꦴꦫꦲꦺꦴ ꦲꦺꦴꦠꦶ, ꦤ ꦥꦫꦶꦮꦴꦱꦴꦫꦲꦺꦴ’’ꦠꦶ ꦮꦠ꧀ꦠꦧ꧀ꦧꦺꦴ. ꦄꦡ ‘‘ꦄꦚ꧀ꦚꦏꦴꦫꦟꦺꦤꦴ’’ꦠꦶ ꦮꦢꦠꦶ, ꦌꦮꦁ ꦱꦤ꧀ꦠꦺꦥꦶ ‘‘ꦠ꧀ꦮꦁ ꦄꦴꦥꦠ꧀ꦠꦶꦄꦴꦥꦤ꧀ꦤꦨꦴꦮꦁ ꦗꦴꦤꦤ꧀ꦠꦺꦴ ꦥꦛꦶꦕ꧀ꦖꦴꦢꦺꦱꦶ, ꦈꦢꦴꦲꦸ ꦄꦗꦴꦤꦤ꧀ꦠꦺꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦄꦗꦴꦤꦤ꧀ꦠꦺꦴ ꦥꦛꦶꦕ꧀ꦖꦴꦢꦺꦩꦷ’’ꦠꦶ ꦮꦸꦠ꧀ꦠꦺ ꦕ ‘‘ꦄꦴꦥꦠ꧀ꦠꦶꦄꦴꦥꦤ꧀ꦤꦨꦴꦮꦁ ꦱꦫꦤ꧀ꦠꦺꦴ ꦥꦛꦶꦕ꧀ꦖꦴꦢꦺꦱꦶ, ꦈꦢꦴꦲꦸ ꦮꦶꦱꦫꦶꦠ꧀ꦮꦴ ꦥꦛꦶꦕ꧀ꦖꦴꦢꦺꦱꦷ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦮꦶꦱꦫꦶꦠ꧀ꦮꦴ ꦥꦛꦶꦕ꧀ꦖꦴꦢꦺꦩꦷ’’ꦠꦶ ꦮꦸꦠ꧀ꦠꦺ ꦕ ‘‘ꦄꦴꦥꦠ꧀ꦠꦶꦄꦴꦥꦤ꧀ꦤꦨꦴꦮꦺ ꦮꦺꦩꦠꦶꦏꦺꦴ ꦲꦸꦠ꧀ꦮꦴ ꦥꦛꦶꦕ꧀ꦖꦴꦢꦺꦱꦶ, ꦈꦢꦴꦲꦸ ꦤꦶꦧ꧀ꦧꦺꦩꦠꦶꦏꦺꦴ ꦲꦸꦠ꧀ꦮꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦮꦺꦩꦠꦶꦏꦺꦴ ꦲꦸꦠ꧀ꦮꦴ’’ꦠꦶ ꦮꦸꦠ꧀ꦠꦺ ꦕ ‘‘ꦤ ꦠ꧀ꦮꦁ ꦥꦫꦶꦮꦴꦱꦴꦫꦲꦺꦴ, ꦩꦴꦤꦠ꧀ꦠꦴꦫꦲꦺꦴꦮ ꦲꦺꦴꦠꦷ’’ꦠꦶ ꦮꦠ꧀ꦠꦧ꧀ꦧꦺꦴ.

ꦄꦡ ‘‘ꦗꦴꦤꦤ꧀ꦠꦺꦴ ꦥꦛꦶꦕ꧀ꦖꦴꦢꦺꦩꦷ’’ꦠꦶ ꦮꦸꦠ꧀ꦠꦺ ꦕ ‘‘ꦱꦫꦤ꧀ꦠꦺꦴ ꦥꦛꦶꦕ꧀ꦖꦴꦢꦺꦩꦷ’’ꦠꦶ ꦮꦸꦠ꧀ꦠꦺ ꦕ ‘‘ꦤꦶꦧ꧀ꦧꦺꦩꦠꦶꦏꦺꦴ ꦲꦸꦠ꧀ꦮꦴ ꦥꦛꦶꦕ꧀ꦖꦴꦢꦺꦩꦷ’’ꦠꦶ ꦮꦸꦠ꧀ꦠꦺ ꦕ ‘‘ꦠ꧀ꦮꦁ ꦥꦫꦶꦮꦴꦱꦴꦫꦲꦺꦴ’’ꦠꦶ ꦮꦠ꧀ꦠꦧ꧀ꦧꦺꦴ. ꦮꦸꦠ꧀ꦠꦚ꧀ꦲꦺꦠꦁ ꦱꦩꦸꦕ꧀ꦕꦪꦏ꧀ꦑꦤ꧀ꦣꦏꦺ (ꦕꦹꦭ꦳ꦮ. ꧑꧔꧔) ‘‘ꦱꦺꦴ ꦌꦮꦁ ꦮꦢꦠꦶ ‘ꦪꦴꦪꦁ, ꦄꦴꦮꦸꦱꦺꦴ, ꦄꦴꦥꦠ꧀ꦠꦶ ꦗꦴꦤꦥꦛꦶꦕ꧀ꦖꦤ꧀ꦤꦴ, ꦣꦩ꧀ꦩꦶꦏꦁ ꦠꦱ꧀ꦱꦴ ꦄꦴꦥꦠ꧀ꦠꦶꦪꦴ ꦥꦫꦶꦮꦴꦱꦢꦴꦤꦁ, ꦣꦩ꧀ꦩꦠ꧀ꦠꦴ ꦫꦸꦲꦠꦶ. ꦪꦴ ꦕ ꦑ꧀ꦮꦴꦪꦁ, ꦄꦴꦮꦸꦱꦺꦴ, ꦄꦴꦥꦠ꧀ꦠꦶ ꦄꦗꦴꦤꦥ꧀ꦥꦛꦶꦕ꧀ꦖꦤ꧀ꦤꦴ, ꦄꦣꦩ꧀ꦩꦶꦏꦁ ꦠꦱ꧀ꦱꦴ ꦄꦴꦥꦠ꧀ꦠꦶꦪꦴ ꦥꦫꦶꦮꦴꦱꦢꦴꦤꦁ, ꦄꦣꦩ꧀ꦩꦠ꧀ꦠꦴ ꦤ ꦫꦸꦲꦠꦶ. ꦌꦏꦶꦱ꧀ꦱꦴ, ꦄꦴꦮꦸꦱꦺꦴ, ꦄꦴꦥꦠ꧀ꦠꦶꦪꦴ ꦨꦶꦏ꧀ꦑꦸ ꦩꦴꦤꦠ꧀ꦠꦴꦫꦲꦺꦴ’’’ꦠꦶ ꦕ, ‘‘ꦱꦺꦴ ꦌꦮꦁ ꦮꦢꦠꦶ ‘ꦪꦴꦪꦁ ꦄꦴꦥꦠ꧀ꦠꦶ ꦱꦫꦩꦴꦤꦥꦛꦶꦕ꧀ꦖꦤ꧀ꦤꦴ, ꦣꦩ꧀ꦩꦶꦏꦁ ꦠꦱ꧀ꦱꦴ ꦄꦴꦥꦠ꧀ꦠꦶꦪꦴ ꦥꦫꦶꦮꦴꦱꦢꦴꦤꦁ, ꦣꦩ꧀ꦩꦠ꧀ꦠꦴ ꦫꦸꦲꦠꦶ. ꦪꦴ ꦕ ꦑ꧀ꦮꦴꦪꦁ ꦄꦴꦥꦠ꧀ꦠꦶ ꦄꦱꦫꦩꦴꦤꦥꦛꦶꦕ꧀ꦖꦤ꧀ꦤꦴ, ꦄꦣꦩ꧀ꦩꦶꦏꦁ ꦠꦱ꧀ꦱꦴ ꦄꦴꦥꦠ꧀ꦠꦶꦪꦴ ꦥꦫꦶꦮꦴꦱꦢꦴꦤꦁ, ꦄꦣꦩ꧀ꦩꦠ꧀ꦠꦴ ꦤ ꦫꦸꦲꦠꦶ. ꦌꦏꦶꦱ꧀ꦱꦴ, ꦄꦴꦮꦸꦱꦺꦴ, ꦄꦴꦥꦠ꧀ꦠꦶꦪꦴ ꦨꦶꦏ꧀ꦑꦸ ꦩꦴꦤꦠ꧀ꦠꦴꦫꦲꦺꦴ’’’ꦠꦶ ꦕ, ‘‘ꦱꦺꦴ ꦌꦮꦁ ꦮꦢꦠꦶ ‘ꦪꦴꦪꦁ, ꦄꦴꦮꦸꦱꦺꦴ, ꦄꦴꦥꦠ꧀ꦠꦶ ꦤꦶꦧ꧀ꦧꦺꦩꦠꦶꦏꦥꦛꦶꦕ꧀ꦖꦤ꧀ꦤꦴ, ꦣꦩ꧀ꦩꦶꦏꦁ ꦠꦱ꧀ꦱꦴ ꦄꦴꦥꦠ꧀ꦠꦶꦪꦴ ꦥꦫꦶꦮꦴꦱꦢꦴꦤꦁ, ꦣꦩ꧀ꦩꦠ꧀ꦠꦴ ꦫꦸꦲꦠꦶ. ꦪꦴ ꦕ ꦑ꧀ꦮꦴꦪꦁ, ꦄꦴꦮꦸꦱꦺꦴ, ꦄꦴꦥꦠ꧀ꦠꦶ ꦮꦺꦩꦠꦶꦏꦥꦛꦶꦕ꧀ꦖꦤ꧀ꦤꦴ, ꦄꦣꦩ꧀ꦩꦶꦏꦁ ꦠꦱ꧀ꦱꦴ ꦄꦴꦥꦠ꧀ꦠꦶꦪꦴ ꦥꦫꦶꦮꦴꦱꦢꦴꦤꦁ, ꦄꦣꦩ꧀ꦩꦠ꧀ꦠꦴ ꦤ ꦫꦸꦲꦠꦶ. ꦌꦏꦶꦱ꧀ꦱꦴ, ꦄꦴꦮꦸꦱꦺꦴ, ꦄꦴꦥꦠ꧀ꦠꦶꦪꦴ ꦨꦶꦏ꧀ꦑꦸꦩꦴꦤꦠ꧀ꦠꦴꦫꦲꦺꦴ’’’ꦠꦶ ꦕ.

ꦌꦮꦁ ꦥꦫꦶꦮꦴꦱꦴꦫꦲꦨꦴꦮꦁ ꦥꦏꦴꦱꦺꦠ꧀ꦮꦴ ‘‘ꦄꦪꦁ ꦨꦶꦏ꧀ꦑꦸ ꦥꦫꦶꦮꦴꦱꦴꦫꦲꦺꦴ, ꦠꦷꦱꦸ ꦥꦫꦶꦮꦴꦱꦺꦱꦸ ꦏꦠꦫꦥꦫꦶꦮꦴꦱꦴꦫꦲꦺꦴ’’ꦠꦶ ꦕꦶꦤ꧀ꦠꦺꦠ꧀ꦮꦴ ‘‘ꦨꦶꦏ꧀ꦑꦸ ꦠ꧀ꦮꦁ ꦏꦠꦶ ꦄꦴꦥꦠ꧀ꦠꦶꦪꦺꦴ ꦖꦴꦢꦺꦱꦷ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦌꦏꦁ ꦄꦴꦥꦠ꧀ꦠꦶ’’ꦤ꧀ꦠꦶ ꦮꦴ ‘‘ꦢ꧀ꦮꦺ ꦠꦷꦟꦶ ꦠꦠꦸꦠ꧀ꦠꦫꦶ ꦮꦴ ꦄꦴꦥꦠ꧀ꦠꦶꦪꦺꦴ ꦖꦴꦢꦺꦩꦷ’’ꦠꦶ ꦮꦴ ꦮꦸꦠ꧀ꦠꦺ ‘‘ꦏꦠꦷꦲꦁ ꦠ꧀ꦮꦁ ꦄꦴꦥꦠ꧀ꦠꦶꦁ ꦥꦛꦶꦕ꧀ꦖꦴꦢꦺꦱꦷ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦌꦏꦴꦲꦩꦺꦮꦴꦲꦁ ꦥꦛꦶꦕ꧀ꦖꦴꦢꦺꦩꦷ’’ꦠꦶ ꦮꦴ ‘‘ꦢ꧀ꦮꦷꦲꦁ ꦠꦷꦲꦁ ꦠꦠꦸꦠ꧀ꦠꦫꦶ ꦮꦴ ꦥꦛꦶꦕ꧀ꦖꦴꦢꦺꦩꦷ’’ꦠꦶ ꦮꦴ ꦮꦸꦠ꧀ꦠꦺ ‘‘ꦪꦴꦮꦠꦷꦲꦁ ꦥꦛꦶꦕ꧀ꦖꦴꦢꦺꦱꦶ, ꦠꦴꦮꦠꦷꦲꦁ ꦠ꧀ꦮꦁ ꦥꦛꦶꦮꦱꦶꦱ꧀ꦱꦱꦷ’’ꦠꦶ ꦮꦠ꧀ꦠꦧ꧀ꦧꦺꦴ. ꦮꦸꦠ꧀ꦠꦚ꧀ꦲꦺꦠꦁ ꦨꦒꦮꦠꦴ ‘‘ꦪꦴꦮꦠꦷꦲꦁ ꦗꦴꦤꦁ ꦥꦛꦶꦕ꧀ꦖꦴꦢꦺꦠꦶ, ꦠꦴꦮꦠꦷꦲꦁ ꦠꦺꦤ ꦨꦶꦏ꧀ꦑꦸꦤꦴ ꦄꦏꦴꦩꦴ ꦥꦫꦶꦮꦠ꧀ꦡꦧ꧀ꦧ’’ꦤ꧀ꦠꦶ. ꦠꦠꦺꦴ ‘‘ꦄꦪꦁ ꦨꦶꦏ꧀ꦑꦸ ꦄꦴꦥꦠ꧀ꦠꦶꦥꦫꦶꦪꦤ꧀ꦠꦁ ꦗꦴꦤꦴꦠꦶ, ꦠꦱ꧀ꦩꦴ ꦥꦛꦶꦕ꧀ꦖꦤ꧀ꦤꦥꦫꦶꦮꦴꦱꦴꦫꦲꦺꦴ’’ꦠꦶ (ꦥꦴꦫꦴ. ꧔꧔꧒) ꦚꦠ꧀ꦮꦴ ꦠꦢꦤꦸꦫꦹꦥꦴ ꦏꦩ꧀ꦩꦮꦴꦕꦴ ꦏꦴꦠꦧ꧀ꦧꦴ.

ꦌꦠ꧀ꦡ ꦕ ꦄꦴꦥꦠ꧀ꦠꦶꦥꦫꦶꦪꦤ꧀ꦠꦥꦸꦕ꧀ꦖꦤꦁ ꦏꦩ꧀ꦩꦮꦴꦕꦴꦏꦫꦟꦠ꧀ꦡꦩꦺꦮ ꦲꦺꦴꦠꦶ, ꦫꦠ꧀ꦠꦶꦥꦫꦶꦪꦤ꧀ꦠꦥꦸꦕ꧀ꦖꦤꦁ ꦥꦤ ꦠꦢꦠ꧀ꦡꦚ꧀ꦕꦺꦮ ꦱꦸꦢ꧀ꦣꦤ꧀ꦠꦥꦫꦶꦮꦴꦱꦱ꧀ꦱ ꦄꦤꦤꦸꦫꦹꦥꦨꦴꦮꦢꦱ꧀ꦱꦤꦠ꧀ꦡꦚ꧀ꦕ ꦲꦺꦴꦠꦶ. ꦮꦸꦠ꧀ꦠꦚ꧀ꦲꦶ ꦄꦛ꧀ꦜꦏꦡꦴꦪꦁ (ꦕꦸꦭ꦳ꦮ. ꦄꦛ꧀ꦜ. ꧑꧐꧒) ‘‘ꦱꦺꦴ ꦢꦸꦮꦶꦣꦺꦴ ꦕꦹꦭ꦳ꦱꦸꦢ꧀ꦣꦤ꧀ꦠꦺꦴ ꦩꦲꦴꦱꦸꦢ꧀ꦣꦤ꧀ꦠꦺꦴꦠꦶ, ꦢꦸꦮꦶꦣꦺꦴꦥꦶ ꦕꦺꦱ ꦫꦠ꧀ꦠꦶꦥꦫꦶꦕ꧀ꦖꦺꦢꦁ ꦱꦏꦭꦁ ꦮꦴ ꦌꦏꦕ꧀ꦕꦁ ꦮꦴ ꦄꦗꦴꦤꦤ꧀ꦠꦱ꧀ꦱ ꦕ ꦄꦱꦫꦤ꧀ꦠꦱ꧀ꦱ ꦕ ꦠꦠ꧀ꦡ ꦮꦺꦩꦠꦶꦏꦱ꧀ꦱ ꦕ ꦢꦴꦠꦧ꧀ꦧꦺꦴ. ꦄꦴꦥꦠ꧀ꦠꦶꦥꦫꦶꦪꦤ꧀ꦠꦁ ꦥꦤ ‘ꦄꦲꦁ ꦌꦠ꧀ꦠꦏꦴ ꦄꦴꦥꦠ꧀ꦠꦶꦪꦺꦴ ꦄꦴꦥꦤ꧀ꦤꦺꦴ’ꦠꦶ ꦗꦴꦤꦴꦠꦸ ꦮꦴ, ꦩꦴ ꦮꦴ, ꦄꦏꦴꦫꦟꦩꦺꦠ’’ꦤ꧀ꦠꦶ. ꦠꦠꦺꦴ ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦤꦶꦱꦷꦢꦤꦛ꧀ꦜꦴꦤꦁ ꦗꦴꦤꦶꦠꦧ꧀ꦧꦁ. ꦢꦸꦮꦶꦣꦚ꧀ꦲꦶ ꦤꦶꦱꦷꦢꦤꦛ꧀ꦜꦴꦤꦁ ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦺꦤ ꦤꦶꦱꦷꦢꦶꦠꦧ꧀ꦧꦛ꧀ꦜꦴꦤꦁ, ꦤꦶꦏ꧀ꦑꦶꦠ꧀ꦠꦮꦠ꧀ꦠꦺꦤ ꦤꦶꦱꦷꦢꦶꦠꦧ꧀ꦧꦛ꧀ꦜꦴꦤꦤ꧀ꦠꦶ.

ꦠꦠ꧀ꦡ ꦄꦥ꧀ꦥꦨꦶꦏ꧀ꦑꦸꦏꦺ ꦮꦶꦲꦴꦫꦺ ꦱꦨꦴꦒꦨꦶꦏ꧀ꦑꦹꦤꦁ ꦮꦱꦤꦛ꧀ꦜꦴꦤꦺ ꦈꦥꦕꦴꦫꦱꦷꦩꦴꦥꦫꦶꦕ꧀ꦖꦶꦤ꧀ꦤꦺꦴ ꦄꦤ꧀ꦠꦺꦴꦮꦶꦲꦴꦫꦺꦴ ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦺꦤ ꦤꦶꦱꦷꦢꦶꦠꦧ꧀ꦧꦛ꧀ꦜꦴꦤꦁ ꦲꦺꦴꦠꦶ. ꦈꦥꦕꦴꦫꦱꦷꦩꦁ ꦄꦠꦶꦏ꧀ꦏꦩ꧀ꦩ ꦩꦲꦴꦩꦒ꧀ꦒꦠꦺꦴ ꦎꦏ꧀ꦏꦩ꧀ꦩ ꦒꦸꦩ꧀ꦧꦮꦠꦶꦥꦛꦶꦕ꧀ꦖꦤ꧀ꦤꦛ꧀ꦜꦴꦤꦁ ꦤꦶꦏ꧀ꦑꦶꦠ꧀ꦠꦮꦠ꧀ꦠꦺꦤ ꦤꦶꦱꦷꦢꦶꦠꦧ꧀ꦧꦛ꧀ꦜꦴꦤꦁ ꦲꦺꦴꦠꦶ. ꦮꦸꦠ꧀ꦠꦚ꧀ꦲꦶ ꦄꦛ꧀ꦜꦏꦡꦴꦪꦁ (ꦕꦹꦭ꦳ꦮ. ꦄꦛ꧀ꦜ. ꧑꧐꧒) ‘‘ꦱꦕꦺ ꦄꦥ꧀ꦥꦨꦶꦏ꧀ꦑꦸꦏꦺꦴ ꦮꦶꦲꦴꦫꦺꦴ ꦲꦺꦴꦠꦶ, ꦱꦨꦴꦒꦴ ꦨꦶꦏ꧀ꦑꦹ ꦮꦱꦤ꧀ꦠꦶ, ꦮꦠ꧀ꦠꦁ ꦄꦤꦶꦏ꧀ꦑꦶꦥꦶꦠ꧀ꦮꦴ ꦮꦶꦲꦴꦫꦺꦪꦺꦮ ꦫꦠ꧀ꦠꦶꦥꦫꦶꦒ꧀ꦒꦲꦺꦴ ꦏꦴꦠꦧ꧀ꦧꦺꦴ. ꦄꦡ ꦤ ꦱꦏ꧀ꦏꦴ ꦱꦺꦴꦣꦺꦠꦸꦁ, ꦮꦸꦠ꧀ꦠꦤꦪꦺꦤꦺꦮ ꦮꦠ꧀ꦠꦁ ꦤꦶꦏ꧀ꦑꦶꦥꦶꦠ꧀ꦮꦴ ꦥꦕ꧀ꦕꦹꦱꦱꦩꦪꦺ ꦌꦏꦺꦤ ꦨꦶꦏ꧀ꦑꦸꦤꦴ ꦱꦢ꧀ꦣꦶꦁ ꦩꦴꦤꦠ꧀ꦠꦮꦟ꧀ꦟꦤꦴꦪꦁ ꦮꦸꦠ꧀ꦠꦤꦪꦺꦤꦺꦮ ꦈꦥꦕꦴꦫꦱꦷꦩꦁ ꦄꦠꦶꦏ꧀ꦏꦩꦶꦠ꧀ꦮꦴ ꦩꦲꦴꦩꦒ꧀ꦒꦴ ꦎꦏ꧀ꦏꦩ꧀ꦩ ꦥꦛꦶꦕ꧀ꦖꦤ꧀ꦤꦛ꧀ꦜꦴꦤꦺ ꦤꦶꦱꦷꦢꦶꦠ꧀ꦮꦴ ꦄꦤ꧀ꦠꦺꦴꦄꦫꦸꦟꦺꦪꦺꦮ ꦮꦸꦠ꧀ꦠꦤꦪꦺꦤꦺꦮ ꦮꦠ꧀ꦠꦁ ꦱꦩꦴꦢꦶꦪꦶꦠ꧀ꦮꦴ ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦥꦫꦶꦮꦴꦱꦺꦴ ꦄꦴꦫꦺꦴꦕꦺꦠꦧ꧀ꦧꦺꦴ’’ꦠꦶ. ‘‘ꦩꦴꦤꦠ꧀ꦠꦮꦟ꧀ꦟꦤꦴꦪꦁ ꦮꦸꦠ꧀ꦠꦤꦪꦺꦤꦺꦮꦴ’’ꦠꦶ ꦕ ‘‘ꦱꦕꦺ ꦄꦥ꧀ꦥꦨꦶꦏ꧀ꦑꦸꦏꦺꦴ ꦮꦶꦲꦴꦫꦺꦴ ꦲꦺꦴꦠꦶ, ꦱꦨꦴꦒꦴ ꦨꦶꦏ꧀ꦑꦹ ꦮꦱꦤ꧀ꦠꦶ, ꦮꦠ꧀ꦠꦁ ꦄꦤꦶꦏ꧀ꦑꦶꦥꦶꦠ꧀ꦮꦴ ꦄꦤ꧀ꦠꦺꦴꦮꦶꦲꦴꦫꦺꦪꦺꦮ ꦫꦠ꧀ꦠꦶꦪꦺꦴ ꦒꦟꦺꦠꦧ꧀ꦧꦴ. ꦄꦡ ꦤ ꦱꦏ꧀ꦏꦴ ꦱꦺꦴꦣꦺꦠꦸꦁ, ꦮꦸꦠ꧀ꦠꦤꦪꦺꦤꦺꦮ ꦮꦠ꧀ꦠꦁ ꦤꦶꦏ꧀ꦑꦶꦥꦶꦠ꧀ꦮꦴ ꦥꦕ꧀ꦕꦹꦱꦱꦩꦪꦺ ꦕꦠꦹꦲꦶ ꦥꦚ꧀ꦕꦲꦶ ꦮꦴ ꦨꦶꦏ꧀ꦑꦹꦲꦶ ꦱꦢ꧀ꦣꦶꦁ ꦥꦫꦶꦏ꧀ꦑꦶꦠ꧀ꦠꦱ꧀ꦱ ꦮꦶꦲꦴꦫꦱ꧀ꦱ ꦥꦫꦶꦏ꧀ꦑꦺꦥꦠꦺꦴ, ꦄꦥꦫꦶꦏ꧀ꦑꦶꦠ꧀ꦠꦱ꧀ꦱ ꦥꦫꦶꦏ꧀ꦑꦺꦥꦴꦫꦲꦛ꧀ꦜꦴꦤꦠꦺꦴ ꦢ꧀ꦮꦺ ꦭꦺꦝ꧀ꦝꦸꦥꦴꦠꦺ ꦄꦠꦶꦏ꧀ꦏꦩꦶꦠ꧀ꦮꦴ ꦩꦲꦴꦩꦒ꧀ꦒꦠꦺꦴ ꦎꦏ꧀ꦏꦩ꧀ꦩ ꦒꦸꦩ꧀ꦧꦺꦤ ꦮꦴ ꦮꦠꦶꦪꦴ ꦮꦴ ꦥꦛꦶꦕ꧀ꦖꦤ꧀ꦤꦛ꧀ꦜꦴꦤꦺ ꦤꦶꦱꦷꦢꦶꦠꦧ꧀ꦧ’’ꦤ꧀ꦠꦶ (ꦮꦶ. ꦱꦔ꧀ꦒ. ꦄꦛ꧀ꦜ. ꧒꧓꧘) ꦆꦢꦁ ꦮꦕꦤꦁ ꦱꦤ꧀ꦣꦴꦪ ꦮꦸꦠ꧀ꦠꦁ.

ꦠꦠ꧀ꦡ ꦄꦥ꧀ꦥꦨꦶꦏ꧀ꦑꦸꦏꦺꦴ ꦮꦶꦲꦴꦫꦺꦴ ꦲꦺꦴꦠꦷꦠꦶ ꦆꦢꦁ ꦧꦲꦸꦨꦶꦏ꧀ꦑꦸꦏꦺ ꦮꦶꦲꦴꦫꦺ ꦄꦚ꧀ꦚꦺ ꦨꦶꦏ꧀ꦑꦹ ꦒꦕ꧀ꦖꦤ꧀ꦠꦶ, ꦄꦚ꧀ꦚꦺ ꦨꦶꦏ꧀ꦑꦹ ꦄꦴꦒꦕ꧀ꦖꦤ꧀ꦠꦶ, ꦠꦱ꧀ꦩꦴ ꦫꦠ꧀ꦠꦶꦕ꧀ꦖꦺꦢꦮꦠ꧀ꦠꦨꦺꦢꦏꦴꦫꦟꦴꦤꦶ ꦱꦺꦴꦣꦺꦠꦸꦁ ꦢꦸꦏ꧀ꦏꦫꦠ꧀ꦠꦴ ꦮꦸꦠ꧀ꦠꦁ. ꦮꦏ꧀ꦑꦠꦶ ꦲꦶ ‘‘ꦄꦡ ꦤ ꦱꦏ꧀ꦏꦴ ꦱꦺꦴꦣꦺꦠꦸ’’ꦤ꧀ꦠꦶ. ꦱꦨꦴꦒꦴ ꦨꦶꦏ꧀ꦑꦹ ꦮꦱꦤ꧀ꦠꦷꦠꦶ ꦆꦢꦁ ꦮꦶꦱꦨꦴꦒꦴꦤꦁ ꦮꦺꦫꦷꦨꦶꦏ꧀ꦑꦹꦤꦁ ꦱꦤ꧀ꦠꦶꦏꦺ ꦮꦠ꧀ꦠꦁ ꦄꦴꦫꦺꦴꦕꦺꦤ꧀ꦠꦺꦴ ꦥꦏꦴꦱꦺꦠꦸꦏꦴꦩꦺꦴ ꦲꦺꦴꦠꦶ, ꦠꦱ꧀ꦩꦴ ꦮꦸꦠ꧀ꦠꦁ. ꦮꦸꦠ꧀ꦠꦚ꧀ꦲꦶ ꦄꦛ꧀ꦜꦏꦡꦴꦪꦁ (ꦕꦹꦭ꦳ꦮ. ꦄꦛ꧀ꦜ. ꧑꧐꧒; ꦮꦶ. ꦱꦔ꧀ꦒ. ꦄꦛ꧀ꦜ. ꧒꧓꧖) ‘‘ꦠꦱ꧀ꦩꦴ ꦄꦮꦺꦫꦶꦱꦨꦴꦒꦱ꧀ꦱ ꦱꦤ꧀ꦠꦶꦏꦺ ꦄꦴꦫꦺꦴꦕꦺꦠꦧ꧀ꦧꦴ. ꦪꦺꦴ ꦥꦤ ꦮꦶꦱꦨꦴꦒꦺꦴ ꦲꦺꦴꦠꦶ ꦱꦸꦠ꧀ꦮꦴ ꦥꦏꦴꦱꦺꦠꦸꦏꦴꦩꦺꦴ, ꦌꦮꦫꦹꦥꦱ꧀ꦱ ꦈꦥꦗ꧀ꦙꦴꦪꦱ꧀ꦱꦥꦶ ꦱꦤ꧀ꦠꦶꦏꦺ ꦤꦴꦫꦺꦴꦕꦺꦠꦧ꧀ꦧꦴ’’ꦠꦶ, ꦠꦱ꧀ꦩꦴ ꦮꦶꦱꦨꦴꦒꦴꦤꦁ ꦮꦱꦤꦛ꧀ꦜꦴꦤꦺ ꦮꦠ꧀ꦠꦁ ꦄꦱꦩꦴꦢꦶꦪꦶꦠ꧀ꦮꦴ ꦧꦲꦶꦪꦺꦮ ꦏꦴꦠꦸꦩ꧀ꦥꦶ ꦮꦛ꧀ꦛꦠꦷꦠꦶ ꦢꦛ꧀ꦜꦧ꧀ꦧꦁ. ꦮꦶꦲꦴꦫꦺꦪꦺꦮꦴꦠꦶ ꦄꦤ꧀ꦠꦺꦴꦈꦥꦕꦴꦫꦱꦷꦩꦴꦪꦩꦺꦮ. ꦮꦏ꧀ꦑꦠꦶ ꦲꦶ ‘‘ꦄꦡ ꦤ ꦱꦏ꧀ꦏꦴ…ꦥꦺ… ꦈꦥꦕꦴꦫꦱꦷꦩꦁ ꦄꦠꦶꦏ꧀ꦏꦩꦶꦠ꧀ꦮꦴ’’ꦠꦶ. ꦫꦠ꧀ꦠꦶꦥꦫꦶꦒ꧀ꦒꦲꦺꦴ ꦏꦴꦠꦧ꧀ꦧꦺꦴꦠꦶ ꦫꦠ꧀ꦠꦶꦒꦟꦤꦴ ꦏꦴꦠꦧ꧀ꦧꦴ. ꦮꦸꦠ꧀ꦠꦚ꧀ꦲꦶ ꦩꦴꦤꦠ꧀ꦠꦮꦟ꧀ꦟꦤꦴꦪꦁ ‘‘ꦫꦠ꧀ꦠꦶꦪꦺꦴ ꦒꦟꦺꦠꦧ꧀ꦧꦴ’’ꦠꦶ. ꦄꦡ ꦤ ꦱꦏ꧀ꦏꦴ ꦱꦺꦴꦣꦺꦠꦸꦤ꧀ꦠꦶ ꦧꦲꦸꦨꦶꦏ꧀ꦑꦸꦏꦠ꧀ꦠꦴ ꦮꦴ ꦮꦶꦲꦴꦫꦱ꧀ꦱ ꦮꦶꦱꦨꦴꦒꦴꦤꦁ ꦮꦱꦤꦛ꧀ꦜꦴꦤꦠ꧀ꦠꦴ ꦮꦴ ꦫꦠ꧀ꦠꦶꦕ꧀ꦖꦺꦢꦮꦠ꧀ꦠꦴꦨꦺꦢꦏꦴꦫꦟꦴꦤꦶꦥꦶ ꦱꦺꦴꦣꦺꦠꦸꦁ ꦤ ꦱꦏ꧀ꦏꦴ. ꦮꦠ꧀ꦠꦁ ꦤꦶꦏ꧀ꦑꦶꦥꦶꦠ꧀ꦮꦴꦠꦶ ꦥꦫꦶꦮꦴꦱꦮꦠ꧀ꦠꦁ ꦤꦶꦏ꧀ꦑꦶꦥꦶꦠ꧀ꦮꦴ. ꦥꦕ꧀ꦕꦹꦱꦱꦩꦪꦺꦠꦶ ꦥꦕ꧀ꦖꦶꦩꦪꦴꦩꦏꦴꦭꦺ ꦄꦫꦸꦟꦺꦴꦢꦪꦠꦺꦴ ꦥꦸꦫꦺꦠꦫꦩꦺꦮ. ꦠꦡꦴ ꦲꦶ ꦮꦏ꧀ꦑꦠꦶ ‘‘ꦄꦤ꧀ꦠꦺꦴꦄꦫꦸꦟꦺꦪꦺꦮ ꦮꦸꦠ꧀ꦠꦤꦪꦺꦤ ꦮꦠ꧀ꦠꦁ ꦱꦩꦴꦢꦶꦪꦶꦠ꧀ꦮꦴ ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦥꦫꦶꦮꦴꦱꦺꦴ ꦄꦴꦫꦺꦴꦕꦺꦠꦧ꧀ꦧꦺꦴ’’ꦠꦶ. ꦌꦏꦺꦤ ꦨꦶꦏ꧀ꦑꦸꦤꦴ ꦱꦢ꧀ꦣꦶꦤ꧀ꦠꦶ ꦮꦶꦥ꧀ꦥꦮꦴꦱꦫꦠ꧀ꦠꦶꦕ꧀ꦖꦺꦢꦮꦶꦩꦸꦕ꧀ꦕꦤꦠ꧀ꦡꦁ ꦮꦶꦤꦴ ꦥꦏꦠꦠ꧀ꦠꦺꦤ ꦱꦨꦶꦏ꧀ꦑꦸꦏꦄꦴꦮꦴꦱꦄꦨꦶꦏ꧀ꦑꦸꦏꦄꦤꦴꦮꦴꦱꦒꦩꦤꦱꦔ꧀ꦑꦴꦠꦮꦠ꧀ꦠꦨꦺꦢꦮꦶꦩꦸꦕ꧀ꦕꦤꦠ꧀ꦡꦚ꧀ꦕ ꦮꦸꦠ꧀ꦠꦁ. ꦠꦡꦴ ꦲꦶ ꦮꦸꦠ꧀ꦠꦁ ‘‘ꦤ, ꦨꦶꦏ꧀ꦑꦮꦺ, ꦥꦴꦫꦶꦮꦴꦱꦶꦏꦺꦤ ꦨꦶꦏ꧀ꦑꦸꦤꦴ ꦱꦨꦶꦏ꧀ꦑꦸꦏꦴ ꦄꦴꦮꦴꦱꦴ ꦄꦨꦶꦏ꧀ꦑꦸꦏꦺꦴ ꦄꦤꦴꦮꦴꦱꦺꦴ ꦒꦤ꧀ꦠꦧ꧀ꦧꦺꦴ ꦄꦚ꧀ꦚꦠ꧀ꦫ ꦥꦏꦠꦠ꧀ꦠꦺꦤ ꦄꦚ꧀ꦚꦠ꧀ꦫ ꦄꦤ꧀ꦠꦫꦴꦪꦴ’’ꦠꦶ (ꦕꦹꦭ꦳ꦮ. ꧗꧖).

ꦩꦴꦤꦠ꧀ꦠꦮꦟ꧀ꦟꦤꦴꦪꦁ ꦮꦸꦠ꧀ꦠꦤꦪꦺꦤꦴꦠꦶ ‘‘ꦥꦫꦶꦏ꧀ꦑꦶꦠ꧀ꦠꦱ꧀ꦱ ꦮꦶꦲꦴꦫꦱ꧀ꦱ ꦥꦫꦶꦏ꧀ꦑꦺꦥꦠꦺꦴ, ꦄꦥꦫꦶꦏ꧀ꦑꦶꦠ꧀ꦠꦱ꧀ꦱ ꦥꦫꦶꦏ꧀ꦑꦺꦥꦴꦫꦲꦛ꧀ꦜꦴꦤꦠꦺꦴ ꦢ꧀ꦮꦺ ꦭꦺꦝ꧀ꦝꦸꦥꦴꦠꦺ ꦄꦠꦶꦏ꧀ꦏꦩꦶꦠ꧀ꦮꦴ’’ꦠꦶ ꦮꦸꦠ꧀ꦠꦤꦪꦺꦤ. ꦪꦢꦶ ꦌꦮꦁ ꦮꦶꦱꦩꦩꦶꦢꦁ ꦤꦪꦢꦱ꧀ꦱꦤꦁ, ꦥꦫꦶꦏ꧀ꦑꦺꦥꦥꦫꦶꦏ꧀ꦑꦺꦥꦴꦫꦲꦛ꧀ꦜꦴꦤꦺ ꦌꦮ ꦲꦶ ꦈꦥꦕꦴꦫꦱꦷꦩꦴ ꦲꦺꦴꦠꦶ, ꦏꦱ꧀ꦩꦴ ꦠꦠ꧀ꦡ ꦈꦥꦕꦴꦫꦱꦷꦩꦠꦺꦴ ꦢ꧀ꦮꦺꦭꦺꦝ꧀ꦝꦸꦥꦴꦠꦴꦠꦶꦏ꧀ꦏꦩꦺꦴ ꦮꦸꦠ꧀ꦠꦺꦴ, ꦆꦣ ꦥꦤ ꦈꦥꦕꦴꦫꦱꦷꦩꦴꦠꦶꦏ꧀ꦏꦩꦺꦴ ꦌꦮꦴꦠꦶ? ꦱꦕ꧀ꦕꦁ, ꦠꦡꦴꦥꦶ ꦮꦶꦲꦴꦫꦺ ꦨꦶꦏ꧀ꦑꦹꦤꦁ ꦱꦗ꧀ꦙꦴꦪꦴꦢꦶꦱꦢ꧀ꦢꦱꦮꦤꦱꦧ꧀ꦨꦴꦮꦠꦺꦴ ꦱꦸꦮꦶꦢꦹꦫꦴꦠꦶꦏ꧀ꦏꦩꦺꦴ ꦮꦸꦠ꧀ꦠꦺꦴ, ꦆꦣ ꦥꦤ ꦈꦥꦕꦴꦫꦱꦷꦩꦠꦺꦴ ꦄꦠꦶꦏ꧀ꦏꦩꦩꦠ꧀ꦠꦺꦴꦥꦶ ꦄꦠꦶꦏ꧀ꦏꦩꦺꦴꦪꦺꦮꦴꦠꦶ ꦏꦠ꧀ꦮꦴ ꦮꦸꦠ꧀ꦠꦺꦴ. ꦧꦸꦢ꧀ꦣꦩꦠꦚ꧀ꦚꦸꦤꦺꦴ ꦲꦶ ꦄꦛ꧀ꦜꦏꦡꦴꦕꦫꦶꦪꦴ. ꦠꦡꦴ ꦲꦶ ꦮꦸꦠ꧀ꦠꦁ ꦮꦗꦶꦫꦧꦸꦢ꧀ꦣꦶꦛꦷꦏꦴꦪꦁ (ꦮꦗꦶꦫ. ꦛꦷ. ꦕꦹꦭ꦳ꦮꦒ꧀ꦒ ꧙꧗) ‘‘ꦥꦫꦶꦏ꧀ꦑꦶꦠ꧀ꦠꦱ꧀ꦱ ꦮꦶꦲꦴꦫꦱ꧀ꦱ ꦥꦫꦶꦏ꧀ꦑꦺꦥꦠꦺꦴꦠꦶꦄꦴꦢꦶ ꦏꦶꦚ꧀ꦕꦴꦥꦶ ꦥꦴꦭ꦳ꦶꦪꦁ ꦤꦠ꧀ꦡꦶ, ꦄꦡ ꦑꦺꦴ ꦄꦛ꧀ꦜꦏꦡꦴꦕꦫꦶꦪꦴꦤꦁ ꦮꦕꦤꦺꦤ ꦠꦡꦴ ꦌꦮ ꦥꦛꦶꦥꦗ꧀ꦗꦶꦠꦧ꧀ꦧꦤ꧀ꦠꦶ ꦕ ꦮꦸꦠ꧀ꦠ’’ꦤ꧀ꦠꦶ.

ꦩꦴꦤꦠ꧀ꦠꦮꦟ꧀ꦟꦤꦴꦪꦁ ꦕꦠꦹꦲꦶ ꦥꦚ꧀ꦕꦲꦶ ꦮꦴ ꦨꦶꦏ꧀ꦑꦹꦲꦶ ꦱꦢ꧀ꦣꦶꦤ꧀ꦠꦶ ꦆꦢꦁ ꦥꦤ ꦈꦴꦤꦺꦒꦟꦺꦕꦫꦟꦫꦠ꧀ꦠꦶꦕ꧀ꦖꦺꦢꦮꦶꦩꦸꦕ꧀ꦕꦤꦠ꧀ꦡꦁ ꦮꦸꦠ꧀ꦠꦁ. ꦢ꧀ꦮꦺ ꦭꦺꦝ꧀ꦝꦸꦥꦴꦠꦺ ꦄꦠꦶꦏ꧀ꦏꦩꦶꦠ꧀ꦮꦴꦠꦶꦄꦴꦢꦶ ꦄꦚ꧀ꦚꦺꦱꦁ ꦨꦶꦏ꧀ꦑꦹꦤꦁ ꦱꦮꦤꦹꦥꦕꦴꦫꦢꦱ꧀ꦱꦤꦹꦥꦕꦴꦫꦮꦶꦗꦲꦤꦠ꧀ꦡꦁ ꦮꦸꦠ꧀ꦠꦁ. ꦠꦺꦤꦺꦮꦴꦲ ꦛꦷꦏꦴꦕꦫꦶꦪꦺꦴ ‘‘ꦢ꧀ꦮꦺ ꦭꦺꦝ꧀ꦝꦸꦥꦴꦠꦺ ꦄꦠꦶꦏ꧀ꦏꦩꦶꦠ꧀ꦮꦴꦠꦶ ꦆꦢꦁ ꦮꦶꦲꦴꦫꦺ ꦨꦶꦏ꧀ꦑꦹꦤꦁ ꦱꦗ꧀ꦙꦴꦪꦴꦢꦶꦱꦢ꧀ꦢꦱꦮꦤꦹꦥꦕꦴꦫꦮꦶꦗꦲꦤꦠ꧀ꦡꦁ ꦮꦸꦠ꧀ꦠꦁ, ‘ꦩꦲꦴꦩꦒ꧀ꦒꦠꦺꦴ ꦎꦏ꧀ꦏꦩ꧀ꦩꦴꦠꦶ ꦆꦢꦁ ꦩꦒ꧀ꦒꦥꦛꦶꦥꦤ꧀ꦤꦴꦤꦁ ꦨꦶꦏ꧀ꦑꦹꦤꦁ ꦱꦮꦤꦹꦥꦕꦴꦫꦮꦶꦗꦲꦤꦠ꧀ꦡꦁ, ꦒꦸꦩ꧀ꦧꦺꦤ ꦮꦴꦠꦶꦄꦴꦢꦶ ꦢꦱ꧀ꦱꦤꦹꦥꦕꦴꦫꦮꦶꦗꦲꦤꦠ꧀ꦡ’’ꦤ꧀ꦠꦶ. ꦠꦱ꧀ꦩꦴ ꦪꦡꦴꦮꦸꦠ꧀ꦠꦁ ꦢꦸꦮꦶꦣꦁ ꦜꦴꦤꦁ ꦥꦫꦶꦮꦱꦤ꧀ꦠꦩꦴꦤꦠ꧀ꦠꦕꦴꦫꦶꦏꦨꦶꦏ꧀ꦑꦹꦲꦶ ꦤꦶꦱꦷꦢꦶꦠꦧ꧀ꦧꦛ꧀ꦜꦴꦤꦁ ꦲꦺꦴꦠꦶ. ꦠꦺꦱꦸ ꦕ ꦪꦢꦶ ꦄꦤ꧀ꦠꦺꦴꦮꦶꦲꦴꦫꦺꦪꦺꦮ ꦤꦶꦱꦷꦢꦶꦠ꧀ꦮꦴ ꦥꦫꦶꦮꦱꦠꦶ, ꦈꦥꦕꦴꦫꦱꦷꦩꦒꦠꦴꦤꦁ ꦱꦧ꧀ꦧꦺꦱꦁ ꦨꦶꦏ꧀ꦑꦹꦤꦁ ꦄꦴꦫꦺꦴꦕꦺꦠꦧ꧀ꦧꦁ ꦲꦺꦴꦠꦶ. ꦄꦡ ꦧꦲꦶꦈꦥꦕꦴꦫꦱꦷꦩꦴꦪꦁ, ꦢꦶꦛ꧀ꦜꦫꦹꦥꦴꦤꦁ ꦱꦸꦠꦱꦢ꧀ꦢꦴꦤꦁ ꦄꦴꦫꦺꦴꦕꦺꦠꦧ꧀ꦧꦁ. ꦄꦢꦶꦛ꧀ꦜꦄꦱꦸꦠꦴꦤꦩ꧀ꦥꦶ ꦄꦤ꧀ꦠꦺꦴꦢ꧀ꦮꦴꦢꦱꦲꦠ꧀ꦡꦒꦠꦴꦤꦁ ꦄꦴꦫꦺꦴꦕꦺꦠꦧ꧀ꦧꦩꦺꦮ. ꦮꦸꦠ꧀ꦠꦚ꧀ꦲꦶ ꦮꦗꦶꦫꦧꦸꦢ꧀ꦣꦶꦛꦷꦏꦴꦪꦁ ‘‘ꦮꦠ꧀ꦠꦁ ꦤꦶꦏ꧀ꦑꦶꦥꦶꦠ꧀ꦮꦴ ꦮꦱꦤ꧀ꦠꦱ꧀ꦱ ꦈꦥꦕꦴꦫꦱꦷꦩꦒꦠꦴꦤꦁ ꦱꦧ꧀ꦧꦺꦱꦁ ꦄꦴꦫꦺꦴꦕꦤꦏꦶꦕ꧀ꦕꦁ ꦤꦠ꧀ꦡꦶ, ꦢꦶꦛ꧀ꦜꦫꦹꦥꦴꦤꦁ ꦱꦸꦠꦱꦢ꧀ꦢꦴꦤꦁ ꦄꦴꦫꦺꦴꦕꦺꦠꦧ꧀ꦧꦁ. ꦄꦢꦶꦛ꧀ꦜꦄꦱ꧀ꦱꦸꦠꦴꦤꦩ꧀ꦥꦶ ꦄꦤ꧀ꦠꦺꦴꦢ꧀ꦮꦴꦢꦱꦲꦠ꧀ꦡꦒꦠꦴꦤꦁ ꦄꦴꦫꦺꦴꦕꦺꦠꦧ꧀ꦧꦁ. ꦆꦢꦁ ꦮꦠ꧀ꦠꦁ ꦤꦶꦏ꧀ꦑꦶꦥꦶꦠ꧀ꦮꦴ ꦮꦱꦤ꧀ꦠꦱ꧀ꦱ ꦭꦏ꧀ꦑꦟꦤ꧀ꦠꦶ ꦮꦸꦠ꧀ꦠ’’ꦤ꧀ꦠꦶ. ꦆꦢꦚ꧀ꦕ ꦮꦠ꧀ꦠꦁ ꦄꦤꦶꦏ꧀ꦑꦶꦥꦶꦠ꧀ꦮꦴ ꦮꦱꦤ꧀ꦠꦱ꧀ꦱ ꦄꦤ꧀ꦠꦺꦴꦮꦶꦲꦴꦫꦺꦪꦺꦮ ꦫꦠ꧀ꦠꦶꦥꦫꦶꦒ꧀ꦒꦲꦱ꧀ꦱ ꦕ ꦤꦶꦏ꧀ꦑꦶꦥꦶꦠ꧀ꦮꦴ ꦮꦱꦤ꧀ꦠꦱ꧀ꦱ ꦈꦥꦕꦴꦫꦱꦷꦩꦁ ꦄꦠꦶꦏ꧀ꦏꦩꦶꦠ꧀ꦮꦴ ꦮꦠ꧀ꦠꦱꦩꦴꦢꦴꦤꦱ꧀ꦱ ꦕ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦠ꧀ꦠꦴ ꦮꦸꦠ꧀ꦠꦁ. ꦈꦥꦕꦴꦫꦺꦴ ꦥꦤ ꦄꦤ꧀ꦠꦺꦴꦱꦷꦩꦴꦪ ꦜꦶꦠꦴꦤꦁ ꦱꦏꦭꦈꦥꦕꦴꦫꦱꦷꦩꦴ ꦲꦺꦴꦠꦶ, ꦧꦲꦶꦈꦥꦕꦴꦫꦱꦷꦩꦴꦪ ꦜꦶꦠꦴꦤꦁ ꦢ꧀ꦮꦴꦢꦱꦲꦠ꧀ꦡꦩꦠ꧀ꦠꦁ. ꦠꦺꦤꦺꦮ ꦲꦶ ꦈꦢ꧀ꦢꦺꦱꦨꦠ꧀ꦠꦴꦢꦶꦱꦔ꧀ꦓꦭꦴꦨꦺꦴ ꦪꦢꦶ ꦄꦤ꧀ꦠꦺꦴꦱꦷꦩꦴꦪ ꦈꦥ꧀ꦥꦗ꧀ꦗꦠꦶ, ꦱꦷꦩꦛ꧀ꦜꦏꦱꦔ꧀ꦓꦱ꧀ꦱ ꦲꦺꦴꦠꦶ. ꦪꦢꦶ ꦧꦲꦶꦱꦷꦩꦴꦪꦁ, ꦢ꧀ꦮꦴꦢꦱꦲꦠ꧀ꦡꦧ꧀ꦨꦤ꧀ꦠꦫꦺ ꦥꦠ꧀ꦠꦨꦶꦏ꧀ꦑꦹꦤꦁ, ꦠꦱ꧀ꦩꦴ ꦈꦥꦕꦴꦫꦮꦱꦺꦤꦥꦶ ꦌꦱ ꦄꦠ꧀ꦡꦺꦴ ꦮꦶꦚ꧀ꦚꦴꦪꦠꦶ. ꦠꦡꦴ ꦲꦶ ꦮꦸꦠ꧀ꦠꦁ ꦮꦗꦶꦫꦧꦸꦢ꧀ꦣꦶꦛꦷꦏꦴꦪꦁ (ꦮꦗꦶꦫ. ꦛꦷ. ꦕꦹꦭ꦳ꦮꦒ꧀ꦒ ꧙꧗) ‘‘ꦄꦠ꧀ꦡꦶꦨꦴꦮꦁ ꦱꦭ꧀ꦭꦏ꧀ꦑꦺꦠ꧀ꦮꦴꦠꦶ ꦢ꧀ꦮꦴꦢꦱꦲꦠ꧀ꦡꦺ ꦈꦥꦕꦴꦫꦺ ꦱꦭ꧀ꦭꦏ꧀ꦑꦺꦠ꧀ꦮꦴ ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦴꦤꦁ ꦈꦥꦕꦴꦫꦱꦷꦩꦴꦪ ꦄꦴꦒꦠꦨꦴꦮꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦱꦲꦮꦴꦱꦴꦢꦶꦏꦁ ꦮꦺꦢꦶꦠꦧ꧀ꦧꦤ꧀ꦠꦶ ꦕ ꦮꦸꦠ꧀ꦠ’’ꦤ꧀ꦠꦶ.

ꦌꦮꦁ ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦴꦤꦁ ꦲꦸꦠ꧀ꦮꦴ ꦥꦫꦶꦮꦱꦤ꧀ꦠꦴꦤꦁ ꦄꦤ꧀ꦠꦺꦴꦮꦶꦲꦴꦫꦺꦪꦺꦮ ꦮꦱꦤꦱ꧀ꦱ, ꦤꦶꦏ꧀ꦑꦶꦠ꧀ꦠꦮꦠ꧀ꦠꦴꦤꦁ ꦲꦸꦠ꧀ꦮꦴ ꦥꦫꦶꦮꦱꦤ꧀ꦠꦴꦤꦁ ꦮꦶꦲꦴꦫꦠꦺꦴ ꦧꦲꦶ ꦢ꧀ꦮꦺ ꦭꦺꦝ꧀ꦝꦸꦥꦴꦠꦺ ꦄꦠꦶꦏ꧀ꦏꦩꦶꦠ꧀ꦮꦴ ꦮꦱꦤꦱ꧀ꦱ ꦕ ꦄꦛ꧀ꦜꦏꦡꦴꦢꦷꦱꦸ ꦥꦏꦫꦟꦺꦱꦸ ꦄꦴꦒꦠꦠ꧀ꦠꦴ ꦠꦡꦴꦒꦠꦤꦪꦺꦴ ꦥꦏꦫꦟꦴꦒꦠꦤꦪꦺꦴ ꦲꦺꦴꦠꦶ. ꦆꦢꦴꦤꦶ ꦥꦤ ꦄꦴꦕꦫꦶꦪꦴ ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦱ꧀ꦱ ꦕ ꦫꦠ꧀ꦠꦶꦕ꧀ꦖꦺꦢꦮꦠ꧀ꦠꦨꦺꦢꦢꦺꦴꦱꦺ ꦥꦫꦶꦲꦫꦶꦠꦸꦁ ꦄꦠꦶꦢꦸꦏ꧀ꦏꦫꦠ꧀ꦠꦴ, ꦤꦶꦏ꧀ꦑꦶꦠ꧀ꦠꦮꦠ꧀ꦠꦱ꧀ꦱ ꦕ ꦢꦺꦮꦱꦶꦏꦁ ꦥꦕ꧀ꦕꦹꦱꦱꦩꦪꦺ ꦧꦲꦶꦱꦷꦩꦒꦩꦤꦱ꧀ꦱ ꦢꦸꦏ꧀ꦑꦠ꧀ꦠꦴ, ꦮꦴꦭ꦳ꦱꦫꦷꦱꦥꦴꦢꦶꦥꦫꦶꦱꦪꦱ꧀ꦱ ꦕ ꦄꦴꦱꦔ꧀ꦏꦶꦠꦧ꧀ꦧꦨꦴꦮꦠꦺꦴ ꦫꦠ꧀ꦠꦶꦕ꧀ꦖꦺꦢꦮꦠ꧀ꦠꦨꦺꦢꦥꦫꦶꦲꦫꦟꦮꦱꦺꦤ ꦭꦏ꧀ꦑꦟꦥꦴꦫꦶꦥꦹꦫꦶꦩꦺꦮ ꦩꦤꦱꦶ ꦏꦫꦺꦴꦤ꧀ꦠꦴ ꦤꦶꦏ꧀ꦑꦶꦠ꧀ꦠꦮꦠ꧀ꦠꦴꦥꦶ ꦱꦩꦴꦤꦴ ꦄꦤ꧀ꦠꦺꦴꦮꦶꦲꦴꦫꦺꦪꦺꦮ ꦥꦫꦶꦮꦴꦱꦮꦱꦤꦚ꧀ꦕ ꦩꦴꦤꦠ꧀ꦠꦕꦫꦟꦚ꧀ꦕ ꦏꦫꦺꦴꦤ꧀ꦠꦶ.

ꦌꦏꦕ꧀ꦕꦺ ꦄꦴꦕꦫꦶꦪꦴ ꦧꦲꦶꦈꦥꦕꦴꦫꦱꦷꦩꦴꦪꦁ ꦥꦠꦶꦫꦹꦥꦛ꧀ꦜꦴꦤꦺ ꦥꦏꦠꦠ꧀ꦠꦴꦤꦁ ꦨꦶꦏ꧀ꦑꦹꦤꦁ ꦮꦱꦤꦱꦴꦭꦁ ꦏꦴꦫꦴꦥꦺꦠ꧀ꦮꦴ ꦥꦴꦫꦶꦮꦴꦱꦶꦏꦨꦶꦏ꧀ꦑꦹꦤꦁ ꦤꦶꦥꦗ꧀ꦗꦤꦩꦚ꧀ꦕꦁ ꦱꦧ꧀ꦧꦠꦺꦴ ꦖꦤ꧀ꦤꦥꦫꦶꦕ꧀ꦖꦶꦤ꧀ꦤꦁ ꦱꦢ꧀ꦮꦴꦫꦧꦤ꧀ꦣꦤꦁ ꦱꦸꦒꦸꦠ꧀ꦠꦁ ꦏꦴꦫꦴꦥꦺꦠ꧀ꦮꦴ ꦠꦁ ꦥꦢꦺꦱꦁ ꦮꦠꦶꦪꦴ ꦥꦫꦶꦏ꧀ꦑꦶꦥꦴꦥꦺꦠ꧀ꦮꦴ ꦱꦴꦪꦤ꧀ꦲꦱꦩꦪꦺ ꦠꦠ꧀ꦡ ꦒꦤ꧀ꦠ꧀ꦮꦴ ꦈꦥꦛ꧀ꦜꦴꦏꦱꦴꦩꦟꦺꦫꦴꦢꦪꦺꦴ ꦤꦶꦮꦠ꧀ꦠꦴꦥꦺꦠ꧀ꦮꦴ ꦥꦸꦫꦶꦩꦪꦴꦩꦺ ꦮꦴ ꦩꦗ꧀ꦙꦶꦩꦪꦴꦩꦺ ꦮꦴ ꦱꦩꦤ꧀ꦠꦠꦺꦴ ꦱꦢ꧀ꦢꦖꦶꦗ꧀ꦗꦤꦏꦴꦭꦺ ꦥꦏꦠꦠ꧀ꦠꦨꦶꦏ꧀ꦑꦹ ꦱꦴꦭꦴꦪꦁ ꦤꦶꦥꦗ꧀ꦗꦴꦥꦺꦠ꧀ꦮꦴ ꦥꦴꦫꦶꦮꦴꦱꦶꦏꦨꦶꦏ꧀ꦑꦹ ꦮꦠ꧀ꦠꦁ ꦱꦩꦴꦢꦴꦥꦺꦠ꧀ꦮꦴ ꦄꦴꦫꦺꦴꦕꦴꦥꦺꦠ꧀ꦮꦴ ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦩꦚ꧀ꦕꦏꦺꦱꦸ ꦤꦶꦥꦗ꧀ꦗꦴꦥꦺꦠ꧀ꦮꦴ ꦥꦕ꧀ꦖꦶꦩꦪꦴꦩꦏꦴꦭꦺ ꦈꦛ꧀ꦜꦴꦥꦺꦠ꧀ꦮꦴ ꦄꦫꦸꦟꦺ ꦈꦛ꧀ꦜꦶꦠꦺ ꦄꦴꦫꦺꦴꦕꦴꦥꦺꦠ꧀ꦮꦴ ꦮꦠ꧀ꦠꦁ ꦤꦶꦏ꧀ꦑꦶꦥꦴꦥꦺꦤ꧀ꦠꦶ. ꦌꦱ ꦤꦪꦺꦴ ꦥꦏꦫꦟꦺꦱꦸ ꦄꦤꦴꦒꦠꦠ꧀ꦠꦴ ꦄꦴꦕꦫꦶꦪꦴꦤꦁ ꦩꦠꦺꦤ ꦏꦠꦠ꧀ꦠꦴ ꦄꦴꦕꦫꦶꦪꦤꦪꦺꦴ ꦤꦴꦩ. ꦌꦱ ꦤꦪꦺꦴꦥꦶ ꦪꦡꦴꦫꦸꦠꦠꦺꦴ ꦥꦏꦫꦟꦺꦱꦸ ꦄꦤꦴꦒꦠꦺꦴꦥꦶ ꦥꦏꦫꦟꦴꦤꦸꦭꦺꦴꦩꦮꦱꦺꦤ ꦫꦠ꧀ꦠꦶꦕ꧀ꦖꦺꦢꦮꦠ꧀ꦠꦨꦺꦢꦢꦺꦴꦱꦺ ꦥꦫꦶꦲꦫꦶꦠ꧀ꦮꦴ ꦭꦗ꧀ꦗꦶꦥꦺꦱꦭꦺꦲꦶ ꦧꦲꦸꦱ꧀ꦱꦸꦠꦺꦲꦶ ꦱꦶꦏ꧀ꦑꦴꦏꦴꦩꦺꦲꦶ ꦮꦶꦤꦪꦺ ꦥꦏꦠꦚ꧀ꦚꦹꦲꦶ ꦮꦶꦕꦴꦫꦶꦠꦺꦴ ꦱꦩꦴꦤꦺꦴ ꦱꦸꦤ꧀ꦢꦫꦺꦴ ꦥꦱꦠ꧀ꦡꦺꦴꦮ ꦲꦺꦴꦠꦶ, ꦠꦱ꧀ꦩꦴ ‘‘ꦄꦤꦸꦭꦺꦴꦩꦤꦪꦺꦴ’’ꦠꦶꦥꦶ ꦮꦠ꧀ꦠꦸꦁ ꦮꦛ꧀ꦛꦠꦶ.

ꦤꦤꦸ ꦕ ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦴꦤꦁꦪꦺꦮ ꦄꦤ꧀ꦠꦺꦴꦮꦶꦲꦴꦫꦺ ꦮꦱꦤꦁ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦁ, ꦄꦡ ꦏꦱ꧀ꦩꦴ ꦤꦶꦏ꧀ꦑꦶꦠ꧀ꦠꦮꦠ꧀ꦠꦴꦥꦶ ꦱꦩꦴꦤꦴ ꦮꦱꦤ꧀ꦠꦷꦠꦶ? ꦱꦕ꧀ꦕꦁ, ꦠꦠ꧀ꦡ ꦥꦤ ꦄꦥ꧀ꦥꦨꦶꦏ꧀ꦑꦸꦏꦠ꧀ꦠꦴ ꦱꦨꦴꦒꦨꦶꦏ꧀ꦑꦹꦤꦁ ꦮꦱꦤꦛ꧀ꦜꦴꦤꦠ꧀ꦠꦴ ꦕ ꦫꦠ꧀ꦠꦶꦕ꧀ꦖꦺꦢꦮꦠ꧀ꦠꦨꦺꦢꦢꦺꦴꦱꦺ ꦕ ꦥꦫꦶꦲꦫꦶꦠꦸꦁ ꦱꦏ꧀ꦏꦸꦟꦺꦪ꧀ꦪꦨꦴꦮꦠꦺꦴ ꦱꦏꦭꦫꦠ꧀ꦠꦶꦤ꧀ꦢꦶꦮꦩ꧀ꦥꦶ ꦮꦠ꧀ꦠꦁ ꦄꦤꦶꦏ꧀ꦑꦶꦥꦶꦠ꧀ꦮꦴ ꦮꦱꦤꦁ ꦮꦸꦠ꧀ꦠꦁ, ꦆꦣ ꦥꦤ ꦠꦡꦴ ꦄꦱꦏ꧀ꦏꦸꦟꦺꦪ꧀ꦪꦨꦴꦮꦠꦺꦴ ꦢꦶꦮꦴ ꦮꦠ꧀ꦠꦁ ꦤꦶꦏ꧀ꦑꦶꦥꦶꦠ꧀ꦮꦴ ꦫꦠ꧀ꦠꦶꦪꦁ ꦱꦩꦴꦢꦶꦪꦤ꧀ꦠꦺꦴ ꦄꦴꦒꦤ꧀ꦠꦸꦏꦴꦤꦁ ꦄꦤꦴꦒꦩꦤꦏꦴꦭꦨꦴꦮꦠꦺꦴ, ꦱꦢ꧀ꦢꦖꦶꦗ꧀ꦗꦤꦏꦴꦭꦨꦴꦮꦠꦺꦴ ꦕ ꦫꦠ꧀ꦠꦶꦕ꧀ꦖꦺꦢꦴꦢꦶꦢꦺꦴꦱꦺ ꦥꦫꦶꦲꦫꦶꦠꦸꦁ ꦱꦏ꧀ꦏꦸꦟꦺꦪ꧀ꦪꦠ꧀ꦠꦴ ꦠꦢꦤꦸꦭꦺꦴꦩꦺꦴꦪꦺꦮ ꦲꦺꦴꦠꦷꦠꦶ ꦩꦤ꧀ꦠ꧀ꦮꦴ ꦄꦴꦕꦫꦶꦪꦴ ꦌꦮꦁ ꦏꦫꦺꦴꦤ꧀ꦠꦷꦠꦶ ꦢꦛ꧀ꦜꦧ꧀ꦧꦁ.

ꦌꦮꦁ ꦲꦺꦴꦠꦸ, ꦧꦲꦶꦈꦥꦕꦴꦫꦱꦷꦩꦴꦪ ꦮꦱꦤ꧀ꦠꦴꦤꦁ ꦥꦛꦶꦕ꧀ꦖꦤ꧀ꦤꦛ꧀ꦜꦴꦤꦺ ꦤꦶꦱꦷꦢꦤꦩꦺꦮ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦁ, ꦤ ꦥꦏꦠꦠ꧀ꦠꦱꦴꦭꦴꦏꦫꦟꦩꦚ꧀ꦕꦏꦫꦟꦴꦢꦷꦤꦶ, ꦄꦡ ꦏꦱ꧀ꦩꦴ ꦌꦠꦴꦤꦶ ꦏꦫꦺꦴꦤ꧀ꦠꦷꦠꦶ? ꦱꦕ꧀ꦕꦁ, ꦠꦡꦴꦥꦶ ꦥꦏꦠꦠ꧀ꦠꦱꦴꦭꦴꦏꦫꦟꦁ ꦥꦴꦫꦶꦮꦴꦱꦶꦏꦴꦤꦁ ꦨꦶꦏ꧀ꦑꦹꦤꦁ ꦥꦏꦠꦠ꧀ꦠꦺꦲꦶ ꦨꦶꦏ꧀ꦑꦹꦲꦶ ꦮꦶꦥ꧀ꦥꦮꦴꦱꦫꦠ꧀ꦠꦶꦕ꧀ꦖꦺꦢꦮꦠ꧀ꦠꦨꦺꦢꦢꦺꦴꦱꦥꦫꦶꦲꦫꦟꦠ꧀ꦡꦁ, ꦠꦁ ‘‘ꦠꦪꦺꦴ ꦑꦺꦴ, ꦈꦥꦴꦭꦶ, ꦥꦴꦫꦶꦮꦴꦱꦶꦏꦱ꧀ꦱ ꦨꦶꦏ꧀ꦑꦸꦤꦺꦴ ꦫꦠ꧀ꦠꦶꦕ꧀ꦖꦺꦢꦴ ꦱꦲꦮꦴꦱꦺꦴ, ꦮꦶꦥ꧀ꦥꦮꦴꦱꦺꦴ, ꦄꦤꦴꦫꦺꦴꦕꦤꦴ’’ꦠꦶ ꦮꦸꦠ꧀ꦠꦥꦴꦜꦁ (ꦕꦹꦭ꦳ꦮ. ꧘꧓) ꦄꦤꦸꦭꦺꦴꦩꦺꦠꦶ. ꦩꦚ꧀ꦕꦏꦫꦟꦁ ꦱꦲꦮꦴꦱꦫꦠ꧀ꦠꦶꦕ꧀ꦖꦺꦢꦮꦠ꧀ꦠꦨꦺꦢꦢꦺꦴꦱꦥꦫꦶꦲꦫꦟꦠ꧀ꦡꦁ, ꦠꦁ ‘‘ꦤ, ꦨꦶꦏ꧀ꦑꦮꦺ, ꦥꦴꦫꦶꦮꦴꦱꦶꦏꦺꦤ ꦨꦶꦏ꧀ꦑꦸꦤꦴ ꦥꦏꦠꦠ꧀ꦠꦺꦤ ꦨꦶꦏ꧀ꦑꦸꦤꦴ ꦱꦢ꧀ꦣꦶꦁ ꦌꦏꦕ꧀ꦖꦤ꧀ꦤꦺ ꦄꦴꦮꦴꦱꦺ ꦮꦠ꧀ꦡꦧ꧀ꦧꦁ, ꦤ ꦌꦏꦕ꧀ꦖꦤ꧀ꦤꦺ ꦄꦤꦴꦮꦴꦱꦺ ꦮꦠ꧀ꦡꦧ꧀ꦧꦁ, ꦤ ꦌꦏꦕ꧀ꦖꦤ꧀ꦤꦺ ꦄꦴꦮꦴꦱꦺ ꦮꦴ ꦄꦤꦴꦮꦴꦱꦺ ꦮꦴ ꦮꦠ꧀ꦡꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦥꦴꦜꦚ꧀ꦕ (ꦕꦹꦭ꦳ꦮ. ꧘꧑) ꦪꦡꦴꦮꦸꦠ꧀ꦠꦥꦴꦜꦚ꧀ꦕ ꦄꦤꦸꦭꦺꦴꦩꦺꦠꦶ. ꦄꦴꦢꦶ-ꦱꦢ꧀ꦢꦺꦤ ꦱꦴꦪꦤ꧀ꦲꦱꦩꦪꦺ ꦒꦩꦤꦴꦢꦷꦤꦶ ꦱꦔ꧀ꦒꦟ꧀ꦲꦴꦠꦶ. ꦠꦺꦱꦸ ꦄꦛ꧀ꦜꦏꦡꦴꦪꦁ ꦥꦕ꧀ꦕꦹꦱꦱꦩꦪꦺ ꦒꦩꦤꦺ ꦌꦮ ꦮꦸꦠ꧀ꦠꦺꦥꦶ ꦱꦴꦪꦤ꧀ꦲꦱꦩꦪꦺ ꦒꦩꦤꦁ ꦫꦠ꧀ꦠꦶꦒꦩꦤꦱ꧀ꦱ ꦧꦲꦸꦥꦫꦶꦱ꧀ꦱꦪꦠ꧀ꦠꦴ ꦥꦫꦶꦱ꧀ꦱꦪꦮꦶꦤꦺꦴꦢꦤꦠ꧀ꦡꦁ, ꦠꦁ ‘‘ꦄꦤ꧀ꦠꦫꦴꦪꦠꦺꦴ ꦥꦫꦶꦩꦸꦕ꧀ꦕꦤꦠ꧀ꦡꦴꦪ ꦒꦤ꧀ꦠꦧ꧀ꦧꦩꦺꦮꦴ’’ꦠꦶ ꦮꦸꦠ꧀ꦠꦁ ꦄꦛ꧀ꦜꦏꦡꦴꦥꦴꦜꦁ (ꦕꦹꦭ꦳ꦮ. ꦄꦛ꧀ꦜ. ꧗꧖) ꦄꦤꦸꦭꦺꦴꦩꦺꦠꦶ. ꦈꦥꦛ꧀ꦜꦴꦏꦱꦴꦩꦟꦺꦫꦴꦢꦷꦤꦁ ꦤꦶꦮꦠ꧀ꦠꦴꦥꦤꦁ ꦄꦤꦸꦥꦱꦩ꧀ꦥꦤ꧀ꦤꦺꦤ ꦱꦲꦱꦺꦪ꧀ꦪꦱꦔ꧀ꦏꦴꦤꦶꦮꦠ꧀ꦠꦤꦠ꧀ꦡꦁ, ꦠꦁ ‘‘ꦪꦺꦴ ꦥꦤ ꦨꦶꦏ꧀ꦑꦸ ꦄꦤꦸꦥꦱꦩ꧀ꦥꦤ꧀ꦤꦺꦤ ꦱꦲꦱꦺꦪ꧀ꦪꦁ ꦏꦥ꧀ꦥꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ ꦮꦸꦠ꧀ꦠꦁ ꦩꦴꦠꦶꦏꦴꦥꦴꦜꦁ (ꦥꦴꦕꦶ. ꧔꧙) ꦄꦤꦸꦭꦺꦴꦩꦺꦠꦶ. ꦥꦸꦫꦶꦩꦪꦴꦩꦺ ꦮꦴ ꦩꦗ꧀ꦙꦶꦩꦪꦴꦩꦺ ꦮꦴ ꦱꦩꦤ꧀ꦠꦠꦺꦴ ꦱꦢ꧀ꦢꦖꦶꦗ꧀ꦗꦤꦏꦴꦭꦺ ꦥꦏꦠꦠ꧀ꦠꦨꦶꦏ꧀ꦑꦹ ꦱꦴꦭꦴꦪꦁ ꦤꦶꦥꦗ꧀ꦗꦴꦥꦺꦠ꧀ꦮꦴ ꦥꦴꦫꦶꦮꦴꦱꦶꦏꦨꦶꦏ꧀ꦑꦹꦤꦁ ꦮꦠ꧀ꦠꦱꦩꦴꦢꦴꦥꦤꦁ ꦄꦚ꧀ꦚꦨꦶꦏ꧀ꦑꦹꦤꦁ ꦱꦢ꧀ꦢꦱꦮꦤꦮꦶꦮꦗ꧀ꦗꦤꦠ꧀ꦡꦁ, ꦠꦁ ꦄꦤꦴꦫꦺꦴꦕꦤꦫꦠ꧀ꦠꦶꦕ꧀ꦖꦺꦢꦢꦺꦴꦱꦥꦫꦶꦲꦫꦟꦠ꧀ꦡꦁ, ꦠꦁ ꦪꦡꦴꦮꦸꦠ꧀ꦠꦫꦠ꧀ꦠꦶꦕ꧀ꦖꦺꦢꦥꦴꦜꦁ ꦄꦤꦸꦭꦺꦴꦩꦺꦠꦶ.

ꦤꦤꦸ ꦕ ꦄꦛ꧀ꦜꦏꦡꦴꦪꦁ ꦄꦤ꧀ꦠꦺꦴꦄꦫꦸꦟꦺꦪꦺꦮ ꦮꦠ꧀ꦠꦱꦩꦴꦢꦴꦥꦤꦁ ꦮꦸꦠ꧀ꦠꦁ, ꦄꦡ ꦏꦱ꧀ꦩꦴ ‘‘ꦥꦸꦫꦶꦩꦪꦴꦩꦩꦗ꧀ꦙꦶꦩꦪꦴꦩꦺꦱꦹ’’ꦠꦶ ꦮꦸꦠ꧀ꦠꦤ꧀ꦠꦶ? ꦤꦴꦪꦁ ꦢꦺꦴꦱꦺꦴ, ꦲꦶꦪ꧀ꦪꦺꦴꦄꦫꦸꦟꦸꦒ꧀ꦒꦩꦤꦠꦺꦴ ꦥꦛ꧀ꦜꦴꦪ ꦲꦶ ꦪꦴꦮ ꦄꦗ꧀ꦗꦄꦫꦸꦟꦸꦒ꧀ꦒꦩꦤꦴ ꦌꦏꦺꦴ ꦫꦠ꧀ꦠꦶꦤ꧀ꦢꦶꦮꦺꦴ ꦄꦗ꧀ꦗꦄꦫꦸꦟꦱ꧀ꦱ ꦄꦤ꧀ꦠꦺꦴ ꦤꦴꦩ, ꦄꦗ꧀ꦗꦄꦫꦸꦟꦠꦺꦴ ꦥꦛ꧀ꦜꦴꦪ ꦥꦕ꧀ꦖꦴꦏꦴꦭꦺꦴ ꦄꦫꦸꦟꦱ꧀ꦱ ꦧꦲꦶ ꦤꦴꦩ, ꦠꦱ꧀ꦩꦴ ꦥꦸꦫꦶꦩꦩꦗ꧀ꦙꦶꦩꦪꦴꦩꦺꦱꦸ ꦏꦠꦮꦠ꧀ꦠꦱꦩꦴꦢꦴꦤꦩ꧀ꦥꦶ ꦄꦫꦸꦟꦺꦴꦢꦪꦠꦺꦴ ꦥꦸꦫꦺ ꦏꦠꦠ꧀ꦠꦴ ꦄꦤ꧀ꦠꦺꦴꦄꦫꦸꦟꦺ ꦏꦠꦁꦪꦺꦮ ꦲꦺꦴꦠꦶ. ꦮꦠ꧀ꦠꦁ ꦄꦱꦩꦴꦢꦶꦪꦶꦠ꧀ꦮꦴ ꦤꦶꦥꦗ꧀ꦗꦤꦺ ꦕ ꦱꦠꦶ ꦤꦶꦢ꧀ꦢꦴꦮꦱꦺꦤ ꦄꦫꦸꦟꦸꦒ꧀ꦒꦩꦤꦏꦴꦭꦁ ꦄꦗꦴꦤꦶꦠ꧀ꦮꦴ ꦮꦠ꧀ꦠꦱꦩꦴꦢꦴꦤꦁ ꦄꦠꦶꦏ꧀ꦏꦤ꧀ꦠꦁ ꦨꦮꦺꦪ꧀ꦪ, ꦠꦱ꧀ꦩꦴ ꦥꦸꦫꦺꦠꦫꦩꦺꦮ ꦱꦩꦴꦢꦴꦤꦁ ꦏꦠ꧀ꦮꦴ ꦤꦶꦥꦗ꧀ꦗꦤꦁ ꦚꦴꦪꦴꦒꦠꦁ ꦲꦺꦴꦠꦶ, ‘‘ꦄꦤ꧀ꦠꦺꦴꦄꦫꦸꦟꦺꦪꦺꦮ ꦮꦸꦠ꧀ꦠꦤꦪꦺꦤꦺꦮ ꦮꦠ꧀ꦠꦁ ꦱꦩꦴꦢꦶꦪꦶꦠ꧀ꦮꦴ’’ꦠꦶ ꦮꦸꦠ꧀ꦠꦄꦛ꧀ꦜꦏꦡꦴꦥꦴꦜꦚ꧀ꦕ (ꦕꦹꦭ꦳ꦮ. ꦄꦛ꧀ꦜ. ꧑꧐꧒) ꦄꦤꦸꦭꦺꦴꦩꦺꦠꦶ.

ꦌꦮꦁ ꦲꦺꦴꦠꦸ, ꦌꦮꦁ ꦱꦤ꧀ꦠꦺꦥꦶ ꦏꦱ꧀ꦩꦴ ‘‘ꦄꦴꦫꦺꦴꦕꦴꦥꦺꦠ꧀ꦮꦴ’’ꦠꦶ ꦮꦸꦠ꧀ꦠꦁ, ꦤꦤꦸ ꦩꦴꦭ꦳ꦏꦱꦷꦩꦴꦪꦁ ꦱꦩꦴꦢꦶꦤ꧀ꦤꦏꦴꦭꦺꦪꦺꦮ ꦮꦠ꧀ꦠꦩꦴꦫꦺꦴꦕꦶꦠꦤ꧀ꦠꦶ? ꦱꦕ꧀ꦕꦁ ꦄꦴꦫꦺꦴꦕꦶꦠꦁ, ꦄꦪꦁ ꦥꦤ ꦨꦶꦏ꧀ꦑꦸ ꦢꦶꦮꦴ ꦮꦠ꧀ꦠꦁ ꦤꦶꦏ꧀ꦑꦶꦥꦶꦠ꧀ꦮꦴ ꦤꦶꦱꦶꦤ꧀ꦤꦺꦴ, ꦆꦢꦴꦤꦶ ꦱꦩꦴꦢꦶꦤ꧀ꦤꦺꦴ, ꦠꦱ꧀ꦩꦴ ꦩꦴꦭ꦳ꦏꦱꦷꦩꦴꦪ ꦄꦴꦫꦺꦴꦕꦶꦠꦩ꧀ꦥꦶ ꦥꦸꦤ ꦄꦴꦫꦺꦴꦕꦺꦠꦧ꧀ꦧꦁ ꦲꦺꦴꦠꦶ. ꦆꦢꦩ꧀ꦥꦶ ‘‘ꦄꦤ꧀ꦠꦺꦴꦄꦫꦸꦟꦺꦪꦺꦮ ꦮꦸꦠ꧀ꦠꦤꦪꦺꦤꦺꦮ ꦮꦠ꧀ꦠꦁ ꦱꦩꦴꦢꦶꦪꦶꦠ꧀ꦮꦴ ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦥꦫꦶꦮꦴꦱꦺꦴ ꦄꦴꦫꦺꦴꦕꦺꦠꦧ꧀ꦧꦺꦴ’’ꦠꦶ ꦥꦴꦜꦁ (ꦕꦹꦭ꦳ꦮ. ꦄꦛ꧀ꦜ. ꧑꧐꧒) ꦄꦤꦸꦭꦺꦴꦩꦺꦠꦶ. ꦄꦡ ‘‘ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦩꦚ꧀ꦕꦏꦺꦱꦸ ꦤꦶꦥꦗ꧀ꦗꦴꦥꦺꦠ꧀ꦮꦴ’’ꦠꦶ ꦏꦱ꧀ꦩꦴ ꦮꦸꦠ꧀ꦠꦁ, ꦤꦤꦸ ꦄꦚ꧀ꦚꦩꦚ꧀ꦚꦱ꧀ꦱ ꦩꦚ꧀ꦕꦺꦱꦸ ꦤꦶꦥꦗ꧀ꦗꦩꦴꦤꦴꦥꦶ ꦥꦏꦠꦠ꧀ꦠꦱꦴꦭꦠꦺꦴ ꦤꦶꦧ꧀ꦧꦺꦴꦢꦏꦥꦠꦤꦛ꧀ꦜꦴꦤꦠꦺꦴ ꦧꦲꦶ ꦤꦶꦥꦗ꧀ꦗꦩꦴꦤꦴ ꦱꦲꦮꦴꦱꦫꦠ꧀ꦠꦶꦕ꧀ꦖꦺꦢꦢꦺꦴꦱꦠꦺꦴ ꦩꦸꦠ꧀ꦠꦴꦪꦺꦮꦴꦠꦶ? ꦤ ꦥꦤꦺꦮꦁ ꦢꦛ꧀ꦜꦧ꧀ꦧꦁ. ꦤ ꦲꦶ ꦥꦴꦫꦶꦮꦴꦱꦶꦏꦺꦴ ꦥꦏꦠꦠ꧀ꦠꦨꦶꦏ꧀ꦑꦹꦲꦺꦮ ꦌꦏꦕ꧀ꦖꦤ꧀ꦤꦺ ꦤꦶꦥꦤ꧀ꦤꦺꦴ ꦱꦲꦮꦴꦱꦫꦠ꧀ꦠꦶꦕ꧀ꦖꦺꦢꦥ꧀ꦥꦠ꧀ꦠꦺꦴ ꦲꦺꦴꦠꦶ, ꦄꦡ ꦑꦺꦴ ꦄꦚ꧀ꦚꦩꦚ꧀ꦚꦩ꧀ꦥꦶ ꦲꦺꦴꦠꦶꦪꦺꦮ. ꦮꦸꦠ꧀ꦠꦚ꧀ꦕꦺꦠꦁ ꦱꦩꦤ꧀ꦠꦥꦴꦱꦴꦢꦶꦏꦴꦪꦁ (ꦕꦹꦭ꦳ꦮ. ꦄꦛ꧀ꦜ. ꧘꧑) ‘‘ꦱꦕꦺ ꦲꦶ ꦢ꧀ꦮꦺ ꦥꦴꦫꦶꦮꦴꦱꦶꦏꦴ ꦌꦏꦠꦺꦴ ꦮꦱꦺꦪ꧀ꦪꦸꦁ, ꦠꦺ ꦄꦚ꧀ꦚꦩꦚ꧀ꦚꦱ꧀ꦱ ꦄꦗ꧀ꦙꦴꦕꦴꦫꦁ ꦚꦠ꧀ꦮꦴ ꦄꦒꦴꦫꦮꦴ ꦮꦴ ꦮꦶꦥ꧀ꦥꦛꦶꦱꦴꦫꦶꦤꦺꦴ ꦮꦴ ꦲꦸꦠ꧀ꦮꦴ ꦥꦴꦥꦶꦛ꧀ꦜꦠꦫꦁ ꦮꦴ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦺꦪ꧀ꦪꦸꦁ ꦮꦶꦧ꧀ꦨꦩꦺꦪ꧀ꦪꦸꦁ ꦮꦴ, ꦠꦱ꧀ꦩꦴ ꦤꦺꦱꦁ ꦱꦲꦱꦺꦪ꧀ꦪꦴ ꦱꦧ꧀ꦧꦥ꧀ꦥꦏꦴꦫꦺꦤ ꦥꦛꦶꦏ꧀ꦑꦶꦠ꧀ꦠꦴ’’ꦠꦶ. ‘‘ꦥꦕ꧀ꦖꦶꦩꦪꦴꦩꦏꦴꦭꦺ ꦈꦛ꧀ꦜꦴꦥꦺꦠ꧀ꦮꦴ ꦄꦫꦸꦟꦺ ꦈꦛ꧀ꦜꦶꦠꦺ ꦄꦴꦫꦺꦴꦕꦴꦥꦺꦠ꧀ꦮꦴ ꦮꦠ꧀ꦠꦁ ꦤꦶꦏ꧀ꦑꦶꦥꦴꦥꦺꦤ꧀ꦠꦷ’’ꦠꦶ ꦌꦠ꧀ꦡ ꦄꦫꦸꦟꦺ ꦄꦤꦸꦛ꧀ꦜꦶꦠꦺꦪꦺꦮ ꦮꦠ꧀ꦠꦤꦶꦏ꧀ꦑꦶꦥꦤꦺ ꦏꦫꦶꦪꦩꦴꦤꦺ ꦫꦠ꧀ꦠꦶꦕ꧀ꦖꦺꦢꦺꦴ ꦲꦺꦴꦠꦶ, ꦱꦴ ꦫꦠ꧀ꦠꦶ ꦒꦟꦤꦹꦥꦒꦴ ꦤ ꦲꦺꦴꦠꦶ, ꦠꦱ꧀ꦩꦴ ꦥꦜꦩꦥꦫꦶꦕ꧀ꦖꦺꦢꦺ ꦮꦸꦠ꧀ꦠꦁ ꦄꦫꦸꦟꦏꦡꦴꦮꦶꦤꦶꦕ꧀ꦖꦪꦁ ꦎꦭꦺꦴꦏꦺꦠ꧀ꦮꦴ ꦄꦫꦸꦟꦸꦒ꧀ꦒꦩꦤꦨꦴꦮꦺꦴ ꦱꦸꦛ꧀ꦜꦸ ꦗꦴꦤꦶꦠꦧ꧀ꦧꦺꦴ.

‘‘ꦄꦴꦫꦺꦴꦕꦴꦥꦺꦠ꧀ꦮꦴ ꦮꦠ꧀ꦠꦁ ꦤꦶꦏ꧀ꦑꦶꦥꦴꦥꦺꦠꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦁ. ꦏꦱ꧀ꦩꦴ ꦄꦴꦫꦺꦴꦕꦴꦥꦺꦠꦶ, ꦤꦤꦸ ꦱꦩꦴꦢꦶꦤ꧀ꦤꦏꦴꦭꦺꦪꦺꦮ ꦄꦴꦫꦺꦴꦕꦶꦠꦤ꧀ꦠꦶ? ꦱꦕ꧀ꦕꦁ, ꦠꦡꦴꦥꦶ ꦥꦴꦫꦶꦮꦴꦱꦶꦏꦮꦠ꧀ꦠꦱꦩꦴꦢꦴꦤꦏꦴꦭꦺ ꦄꦴꦫꦺꦴꦕꦶꦠꦺꦱꦸ ꦨꦶꦏ꧀ꦑꦹꦱꦸ ꦌꦏꦕ꧀ꦕꦺ ꦤꦶꦏ꧀ꦑꦶꦥꦤꦏꦴꦭꦺ ꦒꦕ꧀ꦖꦤ꧀ꦠꦶ, ꦄꦚ꧀ꦚꦺ ꦄꦴꦒꦕ꧀ꦖꦤ꧀ꦠꦶ, ꦌꦮꦁ ꦥꦫꦶꦱꦱꦔ꧀ꦏꦩꦤꦩ꧀ꦥꦶ ꦱꦶꦪꦴ, ꦠꦡꦴ ꦕ ꦱꦠꦶ ꦄꦨꦶꦤꦮꦴꦒꦠꦴꦤꦁ ꦱꦧ꧀ꦨꦴꦮꦴ ꦄꦴꦫꦺꦴꦕꦺꦠꦧ꧀ꦧꦁ ꦲꦺꦴꦠꦶ, ꦄꦱꦠꦶ ꦥꦤ ꦄꦨꦶꦤꦮꦴꦒꦠꦨꦶꦏ꧀ꦑꦸꦩ꧀ꦲꦶ ꦄꦴꦫꦺꦴꦕꦤꦏꦶꦕ꧀ꦕꦁ ꦤꦠ꧀ꦡꦶ. ꦌꦮꦁ ꦱꦤ꧀ꦠꦺꦥꦶ ꦄꦴꦫꦺꦴꦕꦤꦺ ꦢꦺꦴꦱꦴꦨꦴꦮꦠꦺꦴ ꦥꦸꦤ ꦄꦴꦫꦺꦴꦕꦤꦁ ꦚꦴꦪꦴꦒꦠꦁ ꦲꦺꦴꦠꦶ, ꦩꦴꦤꦠ꧀ꦠꦕꦫꦟꦏꦴꦭꦺ ꦥꦤ ꦱꦩꦴꦢꦴꦤꦺ ꦄꦴꦫꦺꦴꦕꦶꦠꦺꦥꦶ ꦤꦶꦏ꧀ꦑꦶꦥꦤꦺ ꦄꦮꦱ꧀ꦱꦁ ꦄꦴꦫꦺꦴꦕꦺꦠꦧ꧀ꦧꦩꦺꦮ. ꦏꦱ꧀ꦩꦴ? ꦢꦶꦮꦱꦤ꧀ꦠꦫꦨꦴꦮꦠꦺꦴ. ‘‘ꦢꦺꦮꦱꦶꦏꦁ ꦄꦴꦫꦺꦴꦕꦺꦠꦧ꧀ꦧ’’ꦤ꧀ꦠꦶ (ꦕꦹꦭ꦳ꦮ. ꦄꦛ꧀ꦜ. ꧙꧐) ꦲꦶ ꦮꦸꦠ꧀ꦠꦁ. ꦌꦮꦁ ꦱꦤ꧀ꦠꦺꦥꦶ ꦱꦴꦪꦁ ꦱꦩꦴꦢꦴꦤꦏꦴꦭꦺ ꦄꦴꦫꦺꦴꦕꦺꦱ꧀ꦱꦠꦶ, ꦠꦱ꧀ꦩꦴ ꦤꦶꦏ꧀ꦑꦶꦥꦤꦺ ꦄꦴꦫꦺꦴꦕꦤꦏꦶꦕ꧀ꦕꦁ ꦤꦠ꧀ꦡꦷꦠꦶ ꦕꦺ? ꦤ, ꦱꦴꦪꦁ ꦱꦩꦴꦢꦴꦤꦏꦴꦭꦺ ꦌꦠꦺ ꦨꦶꦏ꧀ꦑꦹ ꦄꦴꦒꦕ꧀ꦖꦶꦱ꧀ꦱꦤ꧀ꦠꦶꦥꦶ, ꦤ ꦄꦴꦒꦕ꧀ꦖꦶꦱ꧀ꦱꦤ꧀ꦠꦶꦥꦶ, ꦄꦤꦴꦒꦠꦴꦤꦁ ꦏꦡꦁ ꦄꦴꦫꦺꦴꦕꦺꦠꦸꦁ ꦭꦨꦶꦱ꧀ꦱꦠꦶ, ꦄꦤꦴꦫꦺꦴꦕꦤꦺ ꦕ ꦱꦠꦶ ꦫꦠ꧀ꦠꦶꦕ꧀ꦖꦺꦢꦺꦴ ꦱꦶꦪꦴ, ꦠꦱ꧀ꦩꦴ ꦠꦱ꧀ꦩꦶꦁ ꦢꦶꦮꦱꦺ ꦄꦫꦸꦟꦺ ꦈꦛ꧀ꦜꦶꦠꦺ ꦮꦠ꧀ꦠꦤꦶꦏ꧀ꦑꦶꦥꦤꦠꦺꦴ ꦥꦸꦫꦺꦪꦺꦮ ꦄꦴꦫꦺꦴꦕꦺꦠꦧ꧀ꦧꦤ꧀ꦠꦶ ꦤꦺꦴ ꦩꦠꦶ, ꦱꦸꦛ꧀ꦜꦸꦠꦫꦁ ꦈꦥꦣꦴꦫꦺꦠ꧀ꦮꦴ ꦒꦲꦺꦠꦧ꧀ꦧꦁ. ꦌꦮꦁ ꦥꦏꦫꦟꦴꦒꦠꦤꦪꦺꦤ ꦮꦴ ꦥꦏꦫꦟꦴꦤꦸꦭꦺꦴꦩꦄꦴꦕꦫꦶꦪꦤꦪꦺꦤ ꦮꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦄꦴꦟꦁ ꦥꦠꦶꦛ꧀ꦜꦴꦥꦺꦤ꧀ꦠꦺꦤ ꦮꦶꦤꦪꦏꦺꦴꦮꦶꦢꦺꦤ ꦧꦲꦸꦱ꧀ꦱꦸꦠꦺꦤ ꦭꦗ꧀ꦗꦷꦥꦺꦱꦭꦨꦹꦠꦺꦤ ꦮꦶꦤꦪꦣꦫꦺꦤ ꦮꦶꦱꦸꦢ꧀ꦣꦶꦏꦴꦩꦴꦤꦁ ꦥꦺꦱꦭꦴꦤꦁ ꦨꦶꦏ꧀ꦑꦹꦤꦁ ꦱꦷꦭꦮꦶꦱꦸꦢ꧀ꦣꦠ꧀ꦡꦴꦪ ꦱꦸꦛ꧀ꦜꦸ ꦮꦶꦕꦴꦫꦺꦠ꧀ꦮꦴ ꦥꦫꦶꦮꦴꦱꦮꦠ꧀ꦠꦴꦩꦴꦤꦠ꧀ꦠꦕꦫꦟꦮꦠ꧀ꦠꦴꦤꦶ ꦄꦴꦕꦶꦏ꧀ꦑꦶꦠꦧ꧀ꦧꦴꦤꦷꦠꦶ.

ꦆꦩꦱ꧀ꦩꦶꦁ ꦜꦴꦤꦺ ꦭꦗ꧀ꦗꦷꦨꦶꦏ꧀ꦑꦹꦤꦁ ꦥꦫꦶꦮꦴꦱꦴꦢꦶꦏꦡꦴꦪ ꦏꦸꦱꦭꦠ꧀ꦡꦁ ꦤꦴꦤꦴꦮꦴꦢꦤꦪꦺꦴ ꦮꦸꦕ꧀ꦕꦠꦺ – ꦏꦺꦕꦶ ꦨꦶꦏ꧀ꦑꦹ ‘‘ꦥꦏꦠꦠ꧀ꦠꦱꦴꦭꦁ ꦏꦸꦫꦸꦩꦴꦤꦺꦤ ꦠꦱ꧀ꦱꦴ ꦱꦴꦭꦴꦪ ꦩꦗ꧀ꦙꦺ ꦡꦩ꧀ꦨꦁ ꦤꦶꦩꦶꦠ꧀ꦠꦁ ꦏꦠ꧀ꦮꦴ ꦠꦠꦺꦴ ꦢ꧀ꦮꦴꦢꦱꦲꦠ꧀ꦡꦩꦠ꧀ꦠꦁ ꦥꦢꦺꦱꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦪꦡꦴ ꦥꦚ꧀ꦚꦠ꧀ꦠꦺ ꦥꦴꦫꦶꦮꦴꦱꦶꦏꦴꦤꦁ ꦩꦚ꧀ꦕꦺ ꦤꦶꦥꦤ꧀ꦤꦱ꧀ꦱ ꦨꦶꦏ꧀ꦑꦸꦱ꧀ꦱ ꦒꦷꦮꦴ ꦠꦱ꧀ꦱ ꦥꦢꦺꦱꦱ꧀ꦱ ꦈꦥꦫꦶ ꦲꦺꦴꦠꦶ, ꦠꦡꦴ ꦥꦚ꧀ꦚꦴꦥꦺꦠꦧ꧀ꦧꦺꦴ. ꦌꦮꦁ ꦏꦠꦺ ꦱꦸꦏꦠꦁ ꦲꦺꦴꦠꦷ’’ꦠꦶ ꦮꦢꦤ꧀ꦠꦶ ꦏꦫꦺꦴꦤ꧀ꦠꦶ ꦕ. ꦌꦏꦕ꧀ꦕꦺ ‘‘ꦩꦚ꧀ꦕꦺ ꦤꦶꦥꦤ꧀ꦤꦱ꧀ꦱ ꦨꦶꦏ꧀ꦑꦸꦱ꧀ꦱ ꦏꦛꦶ ꦠꦱ꧀ꦱ ꦥꦢꦺꦱꦱ꧀ꦱ ꦈꦥꦫꦶ ꦲꦺꦴꦠꦶ, ꦪꦡꦴ ꦥꦚ꧀ꦚꦴꦥꦺꦠꦧ꧀ꦧꦺꦴ, ꦌꦮꦁ ꦏꦠꦺ ꦱꦸꦏꦠꦁ ꦲꦺꦴꦠꦷ’’ꦠꦶ ꦮꦢꦤ꧀ꦠꦶ ꦏꦫꦺꦴꦤ꧀ꦠꦶ ꦕ, ꦠꦁ ꦮꦕꦤꦁ ꦤꦺꦮ ꦥꦴꦭ꦳ꦶꦪꦁ, ꦤ ꦄꦛ꧀ꦜꦏꦡꦴꦛꦷꦏꦴꦢꦷꦱꦸ ꦮꦶꦗ꧀ꦗꦠꦶ, ꦏꦺꦮꦭꦁ ꦠꦺꦱꦁ ꦥꦫꦶꦏꦥ꧀ꦥꦩꦺꦮ. ꦄꦪꦁ ꦥꦤ ꦤꦺꦱꦁ ꦄꦣꦶꦥ꧀ꦥꦴꦪꦺꦴ ꦱꦶꦪꦴ – ‘‘ꦢ꧀ꦮꦴꦢꦱꦲꦠ꧀ꦡꦁ ꦥꦤ ꦈꦥꦕꦴꦫꦁ ꦩꦸꦚ꧀ꦕꦶꦠ꧀ꦮꦴ ꦤꦶꦱꦷꦢꦶꦠꦸꦁ ꦮꦛ꧀ꦛꦠꦷ’’ꦠꦶ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦮꦕꦤꦚ꧀ꦕ ‘‘ꦄꦡ ꦢ꧀ꦮꦴꦢꦱꦲꦠ꧀ꦡꦁ ꦈꦥꦕꦴꦫꦁ ꦎꦏ꧀ꦏꦩꦶꦠ꧀ꦮꦴ ꦄꦗꦴꦤꦤ꧀ꦠꦱ꧀ꦱꦺꦮ ꦒꦕ꧀ꦖꦠꦶ, ꦫꦠ꧀ꦠꦶꦕ꧀ꦖꦺꦢꦺꦴ ꦲꦺꦴꦠꦶ ꦌꦮ, ꦮꦠ꧀ꦠꦨꦺꦢꦺꦴ ꦥꦤ ꦤꦠ꧀ꦡꦷ’’ꦠꦶ ꦄꦛ꧀ꦜꦏꦡꦴꦮꦕꦤꦚ꧀ꦕ (ꦕꦹꦭ꦳ꦮ. ꦄꦛ꧀ꦜ. ꧙꧗) ‘‘ꦄꦢꦶꦛ꧀ꦜꦄꦱ꧀ꦱꦸꦠꦴꦤꦩ꧀ꦥꦶ ꦄꦤ꧀ꦠꦺꦴꦢ꧀ꦮꦴꦢꦱꦲꦠ꧀ꦡꦒꦠꦴꦤꦁ ꦄꦴꦫꦺꦴꦕꦺꦠꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦛꦷꦏꦴꦮꦕꦤꦚ꧀ꦕ (ꦱꦴꦫꦠ꧀ꦡ. ꦛꦷ. ꦕꦹꦭ꦳ꦮꦒ꧀ꦒ ꧓.꧙꧗) ‘‘ꦄꦢꦶꦛ꧀ꦜꦄꦱ꧀ꦱꦸꦠꦴꦤꦩ꧀ꦥꦶ ꦄꦤ꧀ꦠꦺꦴꦢ꧀ꦮꦴꦢꦱꦲꦠ꧀ꦡꦒꦠꦴꦤꦁ ꦄꦴꦫꦺꦴꦕꦺꦠꦧ꧀ꦧꦁ, ‘ꦆꦢꦁ ꦮꦠ꧀ꦠꦁ ꦤꦶꦏ꧀ꦑꦶꦥꦶꦠ꧀ꦮꦴ ꦮꦱꦤ꧀ꦠꦱ꧀ꦱ ꦭꦏ꧀ꦑꦟ’ꦤ꧀ꦠꦶ ꦮꦸꦠ꧀ꦠ’’ꦤ꧀ꦠꦶ ꦮꦸꦠ꧀ꦠꦮꦗꦶꦫꦧꦸꦢ꧀ꦣꦶꦛꦷꦏꦴꦮꦕꦤꦚ꧀ꦕ (ꦮꦗꦶꦫ. ꦛꦷ. ꦕꦹꦭ꦳ꦮꦒ꧀ꦒ ꧙꧗) ‘‘ꦄꦠ꧀ꦡꦶꦨꦴꦮꦁ ꦱꦭ꧀ꦭꦏ꧀ꦑꦺꦠ꧀ꦮꦴꦠꦶ ꦢ꧀ꦮꦴꦢꦱꦲꦠ꧀ꦡꦺ ꦈꦥꦕꦴꦫꦺ ꦱꦭ꧀ꦭꦏ꧀ꦑꦺꦠ꧀ꦮꦴ, ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦴꦤꦁ ꦈꦥꦕꦴꦫꦱꦷꦩꦴꦪ ꦄꦴꦒꦠꦨꦴꦮꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦱꦲꦮꦴꦱꦴꦢꦶꦏꦁ ꦮꦺꦢꦶꦠꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦁ ꦮꦗꦶꦫꦧꦸꦢ꧀ꦣꦶꦛꦷꦏꦴꦮꦕꦤꦚ꧀ꦕ ꦥꦱ꧀ꦱꦶꦠ꧀ꦮꦴ ꦄꦪꦺꦴꦤꦶꦱꦺꦴ ꦄꦠ꧀ꦡꦁ ꦒꦲꦺꦠ꧀ꦮꦴ ꦱꦧ꧀ꦧꦠ꧀ꦡ ꦢ꧀ꦮꦴꦢꦱꦲꦠ꧀ꦡꦩꦺꦮ ꦥꦩꦴꦟꦁ, ꦠꦠꦺꦴ ꦈꦴꦤꦩ꧀ꦥꦶ ꦄꦣꦶꦏꦩ꧀ꦥꦶ ꦤ ꦮꦛ꧀ꦛꦠꦶ, ꦠꦱ꧀ꦩꦴ ꦪꦡꦴꦮꦸꦠ꧀ꦠꦤꦪꦺꦤ ꦩꦗ꧀ꦙꦺ ꦡꦩ꧀ꦨꦠꦺꦴ ꦢ꧀ꦮꦴꦢꦱꦲꦠ꧀ꦡꦩꦠ꧀ꦠꦺ ꦥꦢꦺꦱꦺ ꦤꦶꦥꦤ꧀ꦤꦱ꧀ꦱ ꦨꦶꦏ꧀ꦑꦸꦱ꧀ꦱ ꦒꦷꦮꦴ ꦮꦴ ꦏꦛꦶ ꦮꦴ ꦲꦺꦴꦠꦸ, ꦌꦮꦁ ꦱꦤ꧀ꦠꦺ ꦢ꧀ꦮꦴꦢꦱꦲꦠ꧀ꦡꦥ꧀ꦥꦢꦺꦱꦺ ꦥꦴꦫꦶꦮꦴꦱꦶꦏꦨꦶꦏ꧀ꦑꦸ ꦲꦺꦴꦠꦶ, ꦠꦠꦺꦴ ꦱꦲꦮꦴꦱꦠꦺꦴ ꦮꦴ ꦮꦶꦥ꧀ꦥꦮꦴꦱꦠꦺꦴ ꦮꦴ ꦫꦠ꧀ꦠꦶꦕ꧀ꦖꦺꦢꦮꦠ꧀ꦠꦨꦺꦢꦢꦺꦴꦱꦴ ꦤ ꦲꦺꦴꦤ꧀ꦠꦷꦠꦶ.

ꦠꦠ꧀ꦫꦺꦮꦁ ꦪꦸꦠ꧀ꦠꦴꦪꦸꦠ꧀ꦠꦮꦶꦕꦴꦫꦟꦴ ꦏꦴꦠꦧ꧀ꦧꦴ. ꦪꦡꦴꦮꦸꦠ꧀ꦠꦥꦴꦜꦺꦱꦸ ꦥꦜꦩꦥꦴꦜꦱ꧀ꦱ ꦄꦪꦩꦣꦶꦥ꧀ꦥꦴꦪꦺꦴ – ꦥꦏꦠꦠ꧀ꦠꦨꦶꦏ꧀ꦑꦸꦩ꧀ꦲꦶ ꦖꦩꦴꦪ ꦤꦶꦱꦶꦤ꧀ꦤꦺ ꦪꦢꦶ ꦥꦴꦫꦶꦮꦴꦱꦶꦏꦨꦶꦏ꧀ꦑꦸ ꦄꦴꦱꦤꦺ ꦤꦶꦱꦷꦢꦶꦠꦸꦏꦴꦩꦺꦴ, ꦥꦏꦠꦠ꧀ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦤꦶꦱꦶꦤ꧀ꦤꦛ꧀ꦜꦴꦤꦠꦺꦴ ꦢ꧀ꦮꦴꦢꦱꦲꦠ꧀ꦡꦁ ꦈꦥꦕꦴꦫꦁ ꦩꦸꦚ꧀ꦕꦶꦠ꧀ꦮꦴꦮ ꦤꦶꦱꦷꦢꦶꦠꦸꦁ ꦮꦛ꧀ꦛꦠꦶ, ꦤ ꦢ꧀ꦮꦴꦢꦱꦲꦠ꧀ꦡꦧ꧀ꦨꦤ꧀ꦠꦫꦺꦠꦶ. ꦌꦠꦺꦤ ꦢ꧀ꦮꦷꦱꦸꦥꦶ ꦖꦩꦴꦪ ꦤꦶꦱꦶꦤ꧀ꦤꦺꦱꦸ ꦢ꧀ꦮꦴꦢꦱꦲꦠ꧀ꦡꦧ꧀ꦨꦤ꧀ꦠꦫꦺꦥꦶ ꦮꦛ꧀ꦛꦠꦶ, ꦢ꧀ꦮꦴꦢꦱꦲꦠ꧀ꦡꦥ꧀ꦥꦢꦺꦱꦠꦺꦴ ꦧꦲꦶ ꦤꦶꦱꦷꦢꦤ꧀ꦠꦺꦴ ꦄꦴꦱꦤꦺꦥꦶ ꦤꦶꦱꦷꦢꦶꦠꦸꦁ ꦮꦛ꧀ꦛꦠꦷꦠꦶ ꦢꦱ꧀ꦱꦺꦠꦶ. ꦠꦺꦤꦴꦲ ‘‘ꦤ ꦖꦩꦴꦪ ꦤꦶꦱꦶꦤ꧀ꦤꦺꦠꦶ ꦥꦏꦠꦠ꧀ꦠꦺ ꦨꦹꦩꦶꦪꦁ ꦤꦶꦱꦶꦤ꧀ꦤꦺ ꦆꦠꦫꦺꦤ ꦄꦤ꧀ꦠꦩꦱꦺꦴ ꦠꦶꦟꦱꦤ꧀ꦡꦫꦺꦥꦶ ꦈꦕ꧀ꦕꦠꦫꦺ ꦮꦴꦭꦶꦏꦠꦭꦺꦥꦶ ꦮꦴ ꦤ ꦤꦶꦱꦷꦢꦶꦠꦧ꧀ꦧꦁ, ꦢ꧀ꦮꦴꦢꦱꦲꦠ꧀ꦡꦁ ꦥꦤ ꦈꦥꦕꦴꦫꦁ ꦩꦸꦚ꧀ꦕꦶꦠ꧀ꦮꦴ ꦤꦶꦱꦷꦢꦶꦠꦸꦁ ꦮꦛ꧀ꦛꦠꦷ’’ꦠꦶ (ꦕꦹꦭ꦳ꦮ. ꦄꦛ꧀ꦜ. ꧘꧑). ꦆꦠꦶ ꦥꦏꦠꦠ꧀ꦠꦺ ꦖꦩꦴꦪ ꦤꦶꦱꦶꦤ꧀ꦤꦺ ꦥꦴꦫꦶꦮꦴꦱꦶꦏꦺꦤ ꦤꦶꦱꦷꦢꦶꦠꦧ꧀ꦧꦛ꧀ꦜꦴꦤꦢꦷꦥꦏꦺꦴ ꦄꦪꦁ ꦥꦴꦜꦺꦴ, ꦤ ꦩꦚ꧀ꦕꦥꦚ꧀ꦚꦴꦥꦤꦛ꧀ꦜꦴꦤꦱꦪꦤꦛ꧀ꦜꦴꦤꦢꦷꦥꦏꦺꦴ, ꦠꦁ ꦥꦸꦧ꧀ꦧꦴꦥꦫꦥꦫꦶꦥꦸꦟ꧀ꦟꦁ ꦱꦏꦭꦁ ꦥꦴꦜꦁ ꦄꦤꦺꦴꦭꦺꦴꦏꦺꦠ꧀ꦮꦴ ꦌꦏꦢꦺꦱꦩꦠ꧀ꦠꦩꦺꦮ ꦥꦱ꧀ꦱꦶꦠ꧀ꦮꦴ ꦥꦫꦶꦏꦥ꧀ꦥꦮꦱꦺꦤ ꦄꦪꦺꦴꦤꦶꦱꦺꦴ ꦄꦣꦶꦥ꧀ꦥꦴꦪꦁ ꦒꦟ꧀ꦲꦤ꧀ꦠꦶ.

ꦢꦸꦠꦶꦪꦥꦴꦜꦱ꧀ꦱ ꦥꦤ ꦄꦪꦩꦣꦶꦥ꧀ꦥꦴꦪꦺꦴ – ꦧꦲꦶ ꦈꦥꦕꦴꦫꦱꦷꦩꦴꦪ ꦥꦛꦶꦕ꧀ꦖꦤ꧀ꦤꦛ꧀ꦜꦴꦤꦺ ꦮꦠ꧀ꦠꦁ ꦱꦩꦴꦢꦶꦪꦶꦠ꧀ꦮꦴ ꦤꦶꦱꦶꦤ꧀ꦤꦺ ꦨꦶꦏ꧀ꦑꦸꦱ꧀ꦩꦶꦁ ꦠꦱ꧀ꦱ ꦤꦶꦱꦶꦤ꧀ꦤꦛ꧀ꦜꦴꦤꦠꦺꦴ ꦢ꧀ꦮꦴꦢꦱꦲꦠ꧀ꦡꦁ ꦈꦥꦕꦴꦫꦁ ꦎꦏ꧀ꦏꦩꦶꦠ꧀ꦮꦴ ꦠꦱ꧀ꦱ ꦄꦗꦴꦤꦤ꧀ꦠꦱ꧀ꦱꦺꦮ ꦄꦚ꧀ꦚꦺꦴ ꦨꦶꦏ꧀ꦑꦸ ꦒꦕ꧀ꦖꦠꦶ, ꦠꦱ꧀ꦱ ꦥꦴꦫꦶꦮꦴꦱꦶꦏꦱ꧀ꦱ ꦨꦶꦏ꧀ꦑꦸꦤꦺꦴ ꦫꦠ꧀ꦠꦶꦕ꧀ꦖꦺꦢꦺꦴ ꦲꦺꦴꦠꦶ, ꦮꦠ꧀ꦠꦨꦺꦢꦺꦴ ꦥꦤ ꦤꦠ꧀ꦡꦶ. ꦏꦱ꧀ꦩꦴ ꦫꦠ꧀ꦠꦶꦕ꧀ꦖꦺꦢꦺꦴ ꦲꦺꦴꦠꦶ? ꦈꦥꦕꦴꦫꦁ ꦎꦏ꧀ꦏꦩꦶꦠꦠ꧀ꦠꦴ. ꦏꦱ꧀ꦩꦴ ꦤ ꦮꦠ꧀ꦠꦨꦺꦢꦺꦴ? ꦄꦗꦴꦤꦤ꧀ꦠꦠ꧀ꦠꦴꦠꦶ. ꦌꦠꦺꦤ ꦧꦲꦶꦈꦥꦕꦴꦫꦱꦷꦩꦴꦪ ꦈꦥꦕꦴꦫꦺꦴ ꦢ꧀ꦮꦴꦢꦱꦲꦠ꧀ꦡꦥ꧀ꦥꦩꦴꦟꦺꦴ ꦲꦺꦴꦠꦶ ꦄꦴꦫꦺꦴꦕꦤꦏ꧀ꦑꦺꦠ꧀ꦠꦨꦹꦠꦺꦴꦠꦶ ꦢꦱ꧀ꦱꦺꦠꦶ. ꦠꦺꦤꦴꦲ ‘‘ꦒꦸꦩ꧀ꦧꦺꦤ ꦮꦴ ꦮꦠꦶꦪꦴ ꦮꦴ ꦥꦛꦶꦕ꧀ꦖꦤ꧀ꦤꦛ꧀ꦜꦴꦤꦺ ꦤꦶꦱꦷꦢꦶꦠꦧ꧀ꦧꦁ, ꦄꦤ꧀ꦠꦺꦴꦄꦫꦸꦟꦺꦪꦺꦮ ꦮꦸꦠ꧀ꦠꦤꦪꦺꦤ ꦮꦠ꧀ꦠꦁ ꦱꦩꦴꦢꦶꦪꦶꦠ꧀ꦮꦴ ꦄꦴꦫꦺꦴꦕꦺꦠꦧ꧀ꦧꦁ. ꦱꦕꦺ ꦄꦚ꧀ꦚꦺꦴ ꦏꦺꦴꦕꦶ ꦨꦶꦏ꧀ꦑꦸ ꦏꦺꦤꦕꦶꦢꦺꦮ ꦏꦫꦟꦷꦪꦺꦤ ꦠꦁ ꦜꦴꦤꦁ ꦄꦴꦒꦕ꧀ꦖꦠꦶ, ꦱꦕꦺ ꦌꦱ ꦠꦁ ꦥꦱ꧀ꦱꦠꦶ, ꦱꦢ꧀ꦢꦁ ꦮꦴꦱ꧀ꦱ ꦱꦸꦟꦴꦠꦶ, ꦄꦴꦫꦺꦴꦕꦺꦠꦧ꧀ꦧꦁ. ꦄꦤꦴꦫꦺꦴꦕꦺꦤ꧀ꦠꦱ꧀ꦱ ꦫꦠ꧀ꦠꦶꦕ꧀ꦖꦺꦢꦺꦴ ꦕꦺꦮ ꦮꦠ꧀ꦠꦨꦺꦢꦺꦴ ꦕ. ꦄꦡ ꦢ꧀ꦮꦴꦢꦱꦲꦠ꧀ꦡꦁ ꦈꦥꦕꦴꦫꦁ ꦎꦏ꧀ꦏꦩꦶꦠ꧀ꦮꦴ ꦄꦗꦴꦤꦤ꧀ꦠꦱ꧀ꦱꦺꦮ ꦒꦕ꧀ꦖꦠꦶ, ꦫꦠ꧀ꦠꦶꦕ꧀ꦖꦺꦢꦺꦴ ꦲꦺꦴꦠꦶ ꦌꦮ, ꦮꦠ꧀ꦠꦨꦺꦢꦺꦴ ꦥꦤ ꦤꦠ꧀ꦡꦷ’’ꦠꦶ (ꦕꦹꦭ꦳ꦮ. ꦄꦛ꧀ꦜ. ꧙꧗). ꦆꦠꦶ ꦄꦪꦩ꧀ꦥꦶ ꦥꦴꦜꦺꦴ ꦄꦴꦫꦺꦴꦕꦤꦏ꧀ꦑꦺꦠ꧀ꦠꦢꦷꦥꦏꦺꦴ ꦲꦺꦴꦠꦶ, ꦤ ꦩꦚ꧀ꦕꦥꦚ꧀ꦚꦴꦥꦤꦴꦢꦶꦢꦷꦥꦏꦺꦴꦠꦶ ꦢꦛ꧀ꦜꦧ꧀ꦧꦁ.

ꦠꦠꦶꦪꦥꦴꦜꦱ꧀ꦱ ꦥꦤ ꦄꦪꦩꦣꦶꦥ꧀ꦥꦴꦪꦺꦴ – ꦏꦶꦁ ꦧꦲꦶꦈꦥꦕꦴꦫꦱꦷꦩꦴꦪ ꦮꦠ꧀ꦠꦱꦩꦴꦢꦴꦤꦛ꧀ꦜꦴꦤꦁ ꦄꦴꦒꦠꦨꦶꦏ꧀ꦑꦹꦤꦁ ꦢꦶꦛ꧀ꦜꦫꦹꦥꦴꦤꦁ ꦱꦸꦠꦱꦢ꧀ꦢꦴꦤꦁꦪꦺꦮ ꦄꦴꦫꦺꦴꦕꦺꦠꦧ꧀ꦧꦤ꧀ꦠꦶ ꦥꦸꦕ꧀ꦖꦴꦪ ꦱꦠꦶ ꦄꦢꦶꦛ꧀ꦜꦄꦱ꧀ꦱꦸꦠꦴꦤꦩ꧀ꦥꦶ ꦄꦤ꧀ꦠꦺꦴꦢ꧀ꦮꦴꦢꦱꦲꦠ꧀ꦡꦒꦠꦴꦤꦁ ꦄꦴꦫꦺꦴꦕꦺꦠꦧ꧀ꦧꦤ꧀ꦠꦶ ꦮꦶꦱ꧀ꦱꦗ꧀ꦗꦺꦠꦧ꧀ꦧꦤ꧀ꦠꦶ. ꦌꦠꦺꦤ ꦄꦢꦶꦛ꧀ꦜꦄꦱ꧀ꦱꦸꦠꦴꦤꦁ ꦥꦤ ꦄꦤ꧀ꦠꦺꦴꦢ꧀ꦮꦴꦢꦱꦲꦠ꧀ꦡꦒꦠꦴꦤꦁꦪꦺꦮ ꦄꦴꦫꦺꦴꦕꦺꦠꦧ꧀ꦧꦁ, ꦤ ꦧꦲꦶꦢ꧀ꦮꦴꦢꦱꦲꦠ꧀ꦡꦒꦠꦴꦤꦁ, ꦢꦶꦛ꧀ꦜꦱꦸꦠꦴꦤꦁ ꦥꦤ ꦄꦤ꧀ꦠꦺꦴꦢ꧀ꦮꦴꦢꦱꦲꦠ꧀ꦡꦒꦠꦴꦤꦩ꧀ꦥꦶ ꦧꦲꦶꦢ꧀ꦮꦴꦢꦱꦲꦠ꧀ꦡꦒꦠꦴꦤꦩ꧀ꦥꦶ ꦄꦴꦏꦴꦱꦴꦢꦶꦒꦠꦴꦤꦩ꧀ꦥꦶ ꦄꦴꦫꦺꦴꦕꦺꦠꦧ꧀ꦧꦩꦺꦮꦴꦠꦶ ꦢꦱ꧀ꦱꦺꦠꦶ. ꦠꦺꦤꦴꦲ ‘‘ꦄꦪꦁ ꦥꦤꦺꦠ꧀ꦡ ꦡꦺꦫꦱ꧀ꦱ ꦄꦣꦶꦥ꧀ꦥꦴꦪꦺꦴ – ꦮꦠ꧀ꦠꦁ ꦤꦶꦏ꧀ꦑꦶꦥꦶꦠ꧀ꦮꦴ ꦥꦫꦶꦮꦱꦤ꧀ꦠꦱ꧀ꦱ ꦈꦥꦕꦴꦫꦒꦠꦴꦤꦁ ꦱꦧ꧀ꦧꦺꦱꦁ ꦄꦴꦫꦺꦴꦕꦤꦏꦶꦕ꧀ꦕꦁ ꦤꦠ꧀ꦡꦶ, ꦢꦶꦛ꧀ꦜꦫꦹꦥꦴꦤꦁ ꦱꦸꦠꦱꦢ꧀ꦢꦴꦤꦁ ꦄꦴꦫꦺꦴꦕꦺꦠꦧ꧀ꦧꦁ, ꦄꦢꦶꦛ꧀ꦜꦄꦱ꧀ꦱꦸꦠꦴꦤꦩ꧀ꦥꦶ ꦄꦤ꧀ꦠꦺꦴꦢ꧀ꦮꦴꦢꦱꦲꦠ꧀ꦡꦒꦠꦴꦤꦁ ꦄꦴꦫꦺꦴꦕꦺꦠꦧ꧀ꦧꦁ. ꦆꦢꦁ ꦮꦠ꧀ꦠꦁ ꦤꦶꦏ꧀ꦑꦶꦥꦶꦠ꧀ꦮꦴ ꦥꦫꦶꦮꦱꦤ꧀ꦠꦱ꧀ꦱ ꦭꦏ꧀ꦑꦟ’’ꦤ꧀ꦠꦶ (ꦱꦴꦫꦠ꧀ꦡ. ꦛꦷ. ꦕꦹꦭ꦳ꦮꦒ꧀ꦒ ꧓.꧙꧗). ꦆꦠꦶ ꦄꦪꦩ꧀ꦥꦶ ꦥꦴꦜꦺꦴ ꦄꦴꦫꦺꦴꦕꦺꦠꦧ꧀ꦧꦭꦏ꧀ꦑꦟꦢꦷꦥꦏꦺꦴ ꦲꦺꦴꦠꦶ, ꦤ ꦩꦚ꧀ꦕꦥꦚ꧀ꦚꦴꦥꦤꦴꦢꦶꦢꦷꦥꦏꦺꦴꦠꦶ. ꦕꦠꦸꦠ꧀ꦡꦥꦴꦜꦱ꧀ꦱ ꦄꦣꦶꦥ꧀ꦥꦴꦪꦺꦴꦥꦶ ꦠꦠꦶꦪꦥꦴꦜꦱ꧀ꦱ ꦄꦣꦶꦥ꧀ꦥꦴꦪꦱꦢꦶꦱꦺꦴꦮ.

ꦥꦚ꧀ꦕꦩꦥꦴꦜꦱ꧀ꦱ ꦥꦤ ꦄꦪꦩꦣꦶꦥ꧀ꦥꦴꦪꦺꦴ – ꦄꦠ꧀ꦡꦶꦨꦴꦮꦁ ꦱꦭ꧀ꦭꦏ꧀ꦑꦺꦠ꧀ꦮꦴꦠꦶ ꦌꦠ꧀ꦡ ꦌꦠꦱ꧀ꦩꦶꦁ ꦄꦛ꧀ꦜꦏꦡꦴꦮꦕꦤꦺ ꦤꦶꦏ꧀ꦑꦶꦠ꧀ꦠꦮꦠ꧀ꦠꦴꦤꦁ ꦨꦶꦏ꧀ꦑꦹꦤꦁ ꦄꦠ꧀ꦠꦤꦺꦴ ꦤꦶꦱꦶꦤ꧀ꦤꦛ꧀ꦜꦴꦤꦠꦺꦴ ꦢ꧀ꦮꦴꦢꦱꦲꦠ꧀ꦡꦺ ꦈꦥꦕꦴꦫꦺ ꦄꦚ꧀ꦚꦺꦱꦁ ꦨꦶꦏ꧀ꦑꦹꦤꦁ ꦄꦠ꧀ꦡꦶꦨꦴꦮꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦴꦤꦁ ꦈꦥꦕꦴꦫꦱꦷꦩꦴꦪ ꦄꦚ꧀ꦚꦺꦱꦁ ꦨꦶꦏ꧀ꦑꦹꦤꦁ ꦄꦴꦒꦠꦨꦴꦮꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦱꦲꦮꦴꦱꦴꦢꦶꦏꦁ ꦮꦺꦢꦶꦠꦧ꧀ꦧꦁ. ꦄꦴꦢꦶ-ꦱꦢ꧀ꦢꦺꦤ ꦮꦶꦥ꧀ꦥꦮꦴꦱꦄꦤꦴꦫꦺꦴꦕꦤꦈꦴꦤꦺꦒꦟꦺꦕꦫꦟꦴꦤꦶ ꦱꦔ꧀ꦒꦟ꧀ꦲꦴꦠꦶ. ꦄꦪꦚ꧀ꦕ ꦪꦱ꧀ꦩꦴ ꦒꦟꦱ꧀ꦱ ꦄꦴꦫꦺꦴꦕꦺꦠ꧀ꦮꦴ ꦨꦶꦏ꧀ꦑꦹꦤꦚ꧀ꦕ ꦄꦠ꧀ꦡꦶꦨꦴꦮꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦮꦱꦶ, ꦠꦱ꧀ꦩꦴ ꦤꦶꦏ꧀ꦑꦶꦠ꧀ꦠꦮꦠ꧀ꦠꦴꦤꦁ ꦧꦲꦶꦈꦥꦕꦴꦫꦱꦷꦩꦴꦪ ꦱꦩꦴꦢꦶꦤ꧀ꦤꦠ꧀ꦠꦴ ꦄꦠ꧀ꦠꦤꦺꦴ ꦤꦶꦱꦶꦤ꧀ꦤꦛ꧀ꦜꦴꦤꦠꦺꦴ ꦢ꧀ꦮꦴꦢꦱꦲꦠ꧀ꦡꦺ ꦈꦥꦕꦴꦫꦺ ꦄꦚ꧀ꦚꦺꦱꦁ ꦨꦶꦏ꧀ꦑꦹꦤꦁ ꦄꦠ꧀ꦡꦶꦨꦴꦮꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦴꦤꦁ ꦄꦤ꧀ꦠꦺꦴꦮꦶꦲꦴꦫꦺ ꦱꦩꦴꦢꦶꦤ꧀ꦤꦠ꧀ꦠꦴ ꦈꦥꦕꦴꦫꦱꦷꦩꦴꦪ ꦄꦚ꧀ꦚꦺꦱꦁ ꦨꦶꦏ꧀ꦑꦹꦤꦁ ꦄꦴꦒꦠꦨꦴꦮꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦱꦲꦮꦴꦱꦮꦶꦥ꧀ꦥꦮꦴꦱꦄꦤꦴꦫꦺꦴꦕꦤꦈꦴꦤꦺꦒꦟꦺꦕꦫꦟꦱꦔ꧀ꦑꦴꦠꦴꦤꦶ ꦮꦠ꧀ꦠꦕ꧀ꦖꦺꦢꦏꦴꦫꦟꦴꦤꦶ ꦮꦺꦢꦶꦠꦧ꧀ꦧꦴꦤꦷꦠꦶ. ꦮꦸꦠ꧀ꦠꦚ꧀ꦲꦶ ꦄꦛ꧀ꦜꦏꦡꦴꦪꦁ (ꦕꦹꦭ꦳ꦮ. ꦄꦛ꧀ꦜ. ꧙꧗) ‘‘ꦄꦪꦚ꧀ꦕ ꦪꦱ꧀ꦩꦴ ꦒꦟꦱ꧀ꦱ ꦄꦴꦫꦺꦴꦕꦺꦠ꧀ꦮꦴ ꦨꦶꦏ꧀ꦑꦹꦤꦚ꧀ꦕ ꦄꦠ꧀ꦡꦶꦨꦴꦮꦁ ꦱꦭ꧀ꦭꦏ꧀ꦑꦺꦠ꧀ꦮꦴꦮ ꦮꦱꦶ, ꦠꦺꦤꦱ꧀ꦱ ꦈꦴꦤꦺꦒꦟꦺꦕꦫꦟꦢꦺꦴꦱꦺꦴ ꦮꦴ ꦮꦶꦥ꧀ꦥꦮꦴꦱꦺꦴ ꦮꦴ ꦤ ꦲꦺꦴꦠꦷ’’ꦠꦶ. ꦆꦠꦶ ꦄꦪꦚ꧀ꦕ ꦥꦴꦜꦺꦴ ꦥꦏꦠꦠ꧀ꦠꦨꦶꦏ꧀ꦑꦹꦱꦸ ꦒꦠꦺꦱꦸꦥꦶ ꦮꦠ꧀ꦠꦁ ꦄꦴꦫꦺꦴꦕꦺꦠ꧀ꦮꦴ ꦨꦶꦏ꧀ꦑꦹꦤꦁ ꦄꦠ꧀ꦡꦶꦨꦴꦮꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦮꦱꦶꦠꦠ꧀ꦠꦴ ꦢꦺꦴꦱꦴꦨꦴꦮꦩꦺꦮ ꦢꦷꦥꦺꦠꦶ, ꦤ ꦩꦚ꧀ꦕꦥꦚ꧀ꦚꦴꦥꦤꦴꦢꦷꦤꦶ. ꦆꦠꦶ ꦆꦩꦺꦱꦁ ꦥꦴꦜꦴꦤꦁ ꦄꦪꦺꦴꦤꦶꦱꦺꦴ ꦄꦣꦶꦥ꧀ꦥꦴꦪꦁ ꦒꦲꦺꦠ꧀ꦮꦴ ‘‘ꦱꦧ꧀ꦧꦠ꧀ꦡ ꦢ꧀ꦮꦴꦢꦱꦲꦠ꧀ꦡꦩꦺꦮ ꦥꦩꦴꦟ’’ꦤ꧀ꦠꦶ ꦩꦚ꧀ꦚꦩꦴꦤꦴ ꦮꦶꦕꦴꦫꦶꦁꦱꦸ, ꦠꦺꦱꦁ ꦢꦶꦛ꧀ꦜꦴꦤꦸꦒꦠꦶꦁ ꦄꦴꦥꦗ꧀ꦗꦩꦴꦤꦴ ꦱꦶꦱ꧀ꦱꦴꦤꦸꦱꦶꦱ꧀ꦱꦴꦢꦪꦺꦴꦥꦶ ꦠꦡꦺꦮ ꦏꦫꦺꦴꦤ꧀ꦠꦶ, ꦠꦢꦺꦠꦁ ꦄꦥ꧀ꦥꦩꦴꦟꦁ.

ꦏꦡꦁ? ꦪꦁ ꦠꦠ꧀ꦡ ꦥꦏꦠꦠ꧀ꦠꦱꦴꦭꦴꦪ ꦩꦗ꧀ꦙꦺ ꦡꦩ꧀ꦨꦁ ꦤꦶꦩꦶꦠ꧀ꦠꦁ ꦏꦠ꧀ꦮꦴ ꦢ꧀ꦮꦴꦢꦱꦲꦠ꧀ꦡꦁ ꦩꦶꦤꦶꦁꦱꦸ, ꦠꦢꦥ꧀ꦥꦩꦴꦟꦁ. ꦤ ꦲꦶ ꦡꦩ꧀ꦨꦺꦤ ꦮꦴ ꦱꦴꦭꦴꦪ ꦮꦴ ꦱꦲꦮꦴꦱꦺꦴ ꦮꦴ ꦮꦶꦥ꧀ꦥꦮꦴꦱꦺꦴ ꦮꦴ ꦮꦸꦠ꧀ꦠꦺꦴ, ꦄꦡ ꦑꦺꦴ ꦥꦏꦠꦠ꧀ꦠꦨꦶꦏ꧀ꦑꦸꦤꦴꦮ. ꦮꦸꦠ꧀ꦠꦚ꧀ꦲꦶ ꦱꦩꦤ꧀ꦠꦥꦴꦱꦴꦢꦶꦏꦴꦪꦁ (ꦕꦹꦭ꦳ꦮ. ꦄꦛ꧀ꦜ. ꧘꧓) ‘‘ꦠꦠ꧀ꦡ ꦱꦲꦮꦴꦱꦺꦴꦠꦶ ꦪ꧀ꦮꦴꦪꦁ ꦥꦏꦠꦠ꧀ꦠꦺꦤ ꦨꦶꦏ꧀ꦑꦸꦤꦴ ꦱꦢ꧀ꦣꦶꦁ ꦌꦏꦕ꧀ꦖꦤ꧀ꦤꦺꦠꦶꦄꦴꦢꦶꦤꦴ ꦤꦪꦺꦤ ꦮꦸꦠ꧀ꦠꦺꦴ ꦌꦏꦠꦺꦴ ꦮꦴꦱꦺꦴ. ꦮꦶꦥ꧀ꦥꦮꦴꦱꦺꦴꦠꦶ ꦌꦏꦏꦱ꧀ꦱꦺꦮ ꦮꦴꦱꦺꦴ’’ꦠꦶ. ꦪꦚ꧀ꦲꦶ ꦠꦠꦺꦴ ꦢ꧀ꦮꦴꦢꦱꦲꦠ꧀ꦡꦩꦠ꧀ꦠꦛ꧀ꦜꦴꦤꦺ ꦨꦶꦏ꧀ꦑꦸꦱ꧀ꦱ ꦒꦷꦮꦴꦛ꧀ꦜꦥꦤꦁ ꦮꦴ ꦏꦛꦶꦛ꧀ꦜꦥꦤꦁ ꦮꦴ ꦮꦢꦤ꧀ꦠꦶ, ꦠꦢꦥꦶ ꦄꦥ꧀ꦥꦩꦴꦟꦁ. ꦧꦲꦶꦈꦥꦕꦴꦫꦱꦷꦩꦴꦪ ꦲꦶ ꦥꦫꦶꦮꦱꦤ꧀ꦠꦱ꧀ꦱ ꦨꦶꦏ꧀ꦑꦸꦱ꧀ꦱ ꦱꦏꦭꦱꦫꦷꦫꦁ ꦥꦏꦠꦠ꧀ꦠꦨꦶꦏ꧀ꦑꦹꦤꦁ ꦄꦤ꧀ꦠꦺꦴꦢ꧀ꦮꦴꦢꦱꦲꦠ꧀ꦡꦺ ꦈꦥꦕꦴꦫꦺ ꦜꦥꦺꦠꦧ꧀ꦧꦁ ꦲꦺꦴꦠꦶ, ꦤ ꦌꦏꦢꦺꦱꦩꦠ꧀ꦠꦁ.

ꦠꦺꦱꦁ ꦥꦤ ꦄꦪꦩꦣꦶꦥ꧀ꦥꦴꦪꦺꦴ ꦱꦶꦪꦴ – ꦢ꧀ꦮꦴꦢꦱꦲꦠ꧀ꦡꦥ꧀ꦥꦢꦺꦱꦠꦺꦴ ꦱꦏꦭꦱꦫꦷꦫꦱ꧀ꦱ ꦄꦤ꧀ꦠꦺꦴꦏꦫꦟꦺ ꦱꦠꦶ ꦱꦲꦮꦴꦱꦺꦴ ꦨꦮꦺꦪ꧀ꦪ, ꦧꦲꦶꦏꦫꦟꦺ ꦱꦠꦶ ꦮꦶꦥ꧀ꦥꦮꦴꦱꦺꦴ, ꦠꦺꦤ ꦈꦥꦝ꧀ꦞꦁ ꦄꦤ꧀ꦠꦺꦴ ꦈꦥꦝ꧀ꦞꦁ ꦧꦲꦶ ꦲꦺꦴꦠꦹꦠꦶ, ꦠꦁ ꦩꦶꦕ꧀ꦖꦴꦚꦴꦟꦮꦱꦺꦤ ꦲꦺꦴꦠꦶ. ꦤ ꦲꦶ ꦱꦲꦮꦴꦱꦢꦺꦴꦱꦺꦴ ꦢ꧀ꦮꦴꦢꦱꦲꦠ꧀ꦡꦺꦤ ꦏꦡꦶꦠꦺꦴ, ꦄꦡ ꦑꦺꦴ ꦌꦏꦕ꧀ꦖꦤ꧀ꦤꦺ ꦱꦪꦤꦺꦤ. ꦮꦸꦠ꧀ꦠꦚ꧀ꦲꦺꦠꦁ ꦨꦒꦮꦠꦴ ꦥꦴꦫꦶꦮꦴꦱꦶꦏꦏ꧀ꦑꦤ꧀ꦣꦏꦺ (ꦕꦹꦭ꦳ꦮ. ꧘꧑) ‘‘ꦤ, ꦨꦶꦏ꧀ꦑꦮꦺ, ꦥꦴꦫꦶꦮꦴꦱꦶꦏꦺꦤ ꦨꦶꦏ꧀ꦑꦸꦤꦴ ꦥꦏꦠꦠ꧀ꦠꦺꦤ ꦨꦶꦏ꧀ꦑꦸꦤꦴ ꦱꦢ꧀ꦣꦶꦁ ꦌꦏꦕ꧀ꦖꦤ꧀ꦤꦺ ꦄꦴꦮꦴꦱꦺ ꦮꦠ꧀ꦡꦧ꧀ꦧꦁ, ꦤ ꦌꦏꦕ꧀ꦖꦤ꧀ꦤꦺ ꦄꦤꦴꦮꦴꦱꦺ ꦮꦠ꧀ꦡꦧ꧀ꦧꦁ, ꦤ ꦌꦏꦕ꧀ꦖꦤ꧀ꦤꦺ ꦄꦴꦮꦴꦱꦺ ꦮꦴ ꦄꦤꦴꦮꦴꦱꦺ ꦮꦴ ꦮꦠ꧀ꦡꦧ꧀ꦧ’’ꦤ꧀ꦠꦶ. ꦄꦛ꧀ꦜꦏꦡꦴꦪꦩ꧀ꦥꦶ (ꦕꦹꦭ꦳ꦮ. ꦄꦛ꧀ꦜ. ꧘꧑) ꦮꦸꦠ꧀ꦠꦁ ‘‘ꦌꦏꦕ꧀ꦖꦤ꧀ꦤꦺ ꦄꦴꦮꦴꦱꦺ’’ꦠꦶꦄꦴꦢꦷꦱꦸ ꦄꦴꦮꦴꦱꦺꦴ ꦤꦴꦩ ꦮꦱꦤꦠ꧀ꦡꦴꦪ ꦏꦠꦱꦺꦤꦴꦱꦤꦁ. ꦄꦤꦴꦮꦴꦱꦺꦴ ꦤꦴꦩ ꦕꦺꦠꦶꦪꦓꦫꦁ ꦧꦺꦴꦣꦶꦓꦫꦁ ꦱꦩ꧀ꦩꦸꦚ꧀ꦗꦤꦶꦄꦛ꧀ꦛꦏꦺꦴ ꦢꦴꦫꦸꦄꦛ꧀ꦛꦏꦺꦴ ꦥꦴꦤꦷꦪꦩꦴꦭ꦳ꦺꦴ ꦮꦕ꧀ꦕꦏꦸꦛꦶ ꦢ꧀ꦮꦴꦫꦏꦺꦴꦛ꧀ꦜꦏꦺꦴꦠꦶ ꦌꦮꦩꦴꦢꦶ. ꦠꦠꦶꦪꦥꦢꦺꦤ ꦠꦢꦸꦨꦪꦩ꧀ꦥꦶ ꦒꦲꦶꦠꦁ, ‘ꦌꦠꦺꦱꦸ ꦪꦠ꧀ꦡ ꦏꦠ꧀ꦡꦕꦶ ꦌꦏꦕ꧀ꦖꦤ꧀ꦤꦺ ꦖꦢꦤꦠꦺꦴ ꦈꦢꦏꦥꦠꦤꦛ꧀ꦜꦴꦤꦥꦫꦶꦕ꧀ꦖꦶꦤ꧀ꦤꦺ ꦎꦏꦴꦱꦺ ꦈꦏ꧀ꦑꦶꦠ꧀ꦠꦏꦺꦴ ꦮꦱꦶꦠꦸꦁ ꦤ ꦭꦨꦠꦶ, ꦥꦴꦫꦶꦮꦴꦱꦶꦏꦺꦴ ꦥꦤ ꦄꦤ꧀ꦠꦺꦴꦄꦴꦮꦴꦱꦺꦪꦺꦮ ꦤ ꦭꦨꦠꦷ’ꦠꦶ ꦩꦲꦴꦥꦕ꧀ꦕꦫꦶꦪꦁ ꦮꦸꦠ꧀ꦠꦁ. ꦩꦲꦴꦄꦛ꧀ꦜꦏꦡꦴꦪꦁ ꦥꦤ ‘ꦄꦮꦶꦱꦺꦱꦺꦤ ꦈꦢꦏꦥꦴꦠꦺꦤ ꦮꦴꦫꦶꦠ’ꦤ꧀ꦠꦶ ꦮꦸꦠ꧀ꦠꦁ. ꦏꦸꦫꦸꦤ꧀ꦢꦶꦪꦁ ‘ꦌꦠꦺꦱꦸ ꦌꦠ꧀ꦠꦏꦺꦱꦸ ꦥꦚ꧀ꦕꦮꦟ꧀ꦟꦖꦢꦤꦧꦢ꧀ꦣꦛ꧀ꦜꦴꦤꦺꦱꦸ ꦥꦴꦫꦶꦮꦴꦱꦶꦏꦱ꧀ꦱ ꦕ ꦈꦏ꧀ꦑꦶꦠ꧀ꦠꦏꦱ꧀ꦱ ꦕ ꦥꦏꦠꦠ꧀ꦠꦺꦤ ꦱꦢ꧀ꦣꦶꦁ ꦈꦢꦏꦥꦴꦠꦺꦤ ꦮꦴꦫꦶꦠ’ꦤ꧀ꦠꦶ ꦮꦸꦠ꧀ꦠꦁ, ꦠꦱ꧀ꦩꦴ ꦤꦴꦤꦹꦥꦕꦴꦫꦺꦥꦶ ꦌꦏꦕ꧀ꦖꦤ꧀ꦤꦺ ꦤ ꦮꦛ꧀ꦛꦠꦶ. ꦱꦕꦺ ꦥꦤꦺꦠ꧀ꦡ ꦠꦢꦲꦸꦥꦱꦩ꧀ꦥꦤ꧀ꦤꦺꦥꦶ ꦥꦏꦠꦠ꧀ꦠꦺ ꦥꦜꦩꦁ ꦥꦮꦶꦱꦶꦠ꧀ꦮꦴ ꦤꦶꦥꦤ꧀ꦤꦺ ꦱꦛ꧀ꦜꦶꦮꦱ꧀ꦱꦺꦴꦥꦶ ꦥꦴꦫꦶꦮꦴꦱꦶꦏꦺꦴ ꦥꦕ꧀ꦖꦴ ꦥꦮꦶꦱꦶꦠ꧀ꦮꦴ ꦗꦴꦤꦤ꧀ꦠꦺꦴ ꦤꦶꦥꦗ꧀ꦗꦠꦶ, ꦫꦠ꧀ꦠꦶꦕ꧀ꦖꦺꦢꦺꦴ ꦕꦺꦮ ꦮꦠ꧀ꦠꦨꦺꦢꦢꦸꦏ꧀ꦏꦛꦚ꧀ꦕ, ꦄꦗꦴꦤꦤ꧀ꦠꦱ꧀ꦱ ꦫꦠ꧀ꦠꦶꦕ꧀ꦖꦺꦢꦺꦴꦮ, ꦤ ꦮꦠ꧀ꦠꦨꦺꦢꦢꦸꦏ꧀ꦏꦛꦁ. ꦱꦕꦺ ꦥꦤ ꦠꦱ꧀ꦩꦶꦁ ꦥꦜꦩꦁ ꦤꦶꦥꦤ꧀ꦤꦺ ꦥꦕ꧀ꦖꦴ ꦥꦏꦠꦠ꧀ꦠꦺꦴ ꦥꦮꦶꦱꦶꦠ꧀ꦮꦴ ꦤꦶꦥꦗ꧀ꦗꦠꦶ, ꦥꦴꦫꦶꦮꦴꦱꦶꦏꦺꦴ ꦕ ꦗꦴꦤꦴꦠꦶ, ꦫꦠ꧀ꦠꦶꦕ꧀ꦖꦺꦢꦺꦴ ꦕꦺꦮ ꦮꦠ꧀ꦠꦨꦺꦢꦢꦸꦏ꧀ꦏꦛꦚ꧀ꦕ. ꦤꦺꦴ ꦕꦺ ꦗꦴꦤꦴꦠꦶ, ꦫꦠ꧀ꦠꦶꦕ꧀ꦖꦺꦢꦺꦴꦮ, ꦤ ꦮꦠ꧀ꦠꦨꦺꦢꦢꦸꦏ꧀ꦏꦛꦤ꧀ꦠꦶ, ꦠꦱ꧀ꦩꦴ ꦱꦴꦭꦴꦪꦥꦶ ꦮꦶꦲꦴꦫꦺꦥꦶ ꦖꦢꦤꦠꦺꦴ ꦈꦢꦏꦥꦠꦤꦛ꧀ꦜꦴꦤꦠꦺꦴ ꦩꦸꦠ꧀ꦠꦩꦠ꧀ꦠꦺꦪꦺꦮ ꦱꦲꦮꦴꦱꦢꦺꦴꦱꦺꦴ ꦤ ꦮꦶꦗ꧀ꦗꦠꦷꦠꦶ ꦢꦛ꧀ꦜꦧ꧀ꦧꦁ.

ꦌꦏꦕ꧀ꦕꦺ ꦥꦤ ꦩꦗ꧀ꦙꦶꦩꦠ꧀ꦡꦩ꧀ꦨꦠꦺꦴ ꦢ꧀ꦮꦴꦢꦱꦲꦠ꧀ꦡꦴꦪꦴꦩꦺꦤ ꦢꦟ꧀ꦝꦏꦺꦤ ꦕꦏ꧀ꦏꦁ ꦨꦩꦶꦠ꧀ꦮꦴ ꦱꦩꦤ꧀ꦠꦠꦺꦴ ꦧꦴꦲꦶꦫꦺ ꦭꦺꦑꦁ ꦏꦫꦺꦴꦤ꧀ꦠꦶ, ꦌꦮꦁ ꦏꦠꦺ ꦱꦴ ꦧꦴꦲꦶꦫꦭꦺꦑꦴ ꦄꦴꦮꦛ꧀ꦛꦠꦺꦴ ꦢ꧀ꦮꦴꦱꦠ꧀ꦠꦠꦶꦲꦠ꧀ꦡꦩꦠ꧀ꦠꦴ ꦲꦺꦴꦠꦶ, ꦠꦠꦺꦴ ꦠꦁ ꦥꦢꦺꦱꦁ ꦢ꧀ꦮꦴꦢꦱꦲꦠ꧀ꦡꦺꦤ ꦢꦟ꧀ꦝꦏꦺꦤ ꦩꦶꦤꦶꦠ꧀ꦮꦴ ꦨꦴꦗꦶꦪꦩꦴꦤꦁ ꦖꦨꦴꦒꦩꦺꦮ ꦲꦺꦴꦠꦶ, ꦠꦠꦺꦴ ꦠꦺꦱꦁ ꦖꦨꦴꦒꦴꦤꦁ ꦱꦷꦩꦴꦪ ꦌꦏꦺꦏꦱ꧀ꦩꦶꦁ ꦩꦚ꧀ꦕꦺ ꦥꦚ꧀ꦚꦥꦶꦪꦩꦴꦤꦺ ꦖꦭ꦳ꦺꦮ ꦩꦚ꧀ꦕꦛ꧀ꦜꦴꦤꦴꦤꦶ ꦲꦺꦴꦤ꧀ꦠꦶ, ꦠꦱ꧀ꦩꦴ ꦌꦏꦱ꧀ꦩꦶꦁ ꦮꦛ꧀ꦛꦩꦟ꧀ꦝꦭꦺ ꦖ ꦨꦶꦏ꧀ꦑꦹꦪꦺꦮ ꦄꦥꦸꦧ꧀ꦧꦁ ꦄꦕꦫꦶꦩꦁ ꦮꦱꦶꦠꦸꦁ ꦭꦨꦤ꧀ꦠꦶ, ꦤ ꦠꦠꦺꦴ ꦈꦢ꧀ꦣꦤ꧀ꦠꦶ ꦮꦢꦤ꧀ꦠꦶ. ꦏꦱ꧀ꦩꦴ ꦥꦤ ꦌꦮꦁ ꦏꦫꦺꦴꦤ꧀ꦠꦷꦠꦶ? ꦥꦸꦧ꧀ꦧꦺ ꦮꦸꦠ꧀ꦠꦤꦪꦺꦤ ‘‘ꦱꦧ꧀ꦧꦠ꧀ꦡ ꦢ꧀ꦮꦴꦢꦱꦲꦠ꧀ꦡꦩꦠ꧀ꦠꦩꦺꦮ ꦥꦩꦴꦟ’’ꦤ꧀ꦠꦶ ꦒꦲꦶꦠꦠ꧀ꦠꦴ. ꦌꦮꦁ ꦏꦶꦫ ꦤꦺꦱꦩꦣꦶꦥ꧀ꦥꦴꦪꦺꦴ – ꦥꦴꦫꦶꦮꦴꦱꦶꦏꦺꦴ ꦥꦏꦠꦠ꧀ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦢ꧀ꦮꦴꦢꦱꦲꦠ꧀ꦡꦧ꧀ꦨꦤ꧀ꦠꦫꦺ ꦱꦪꦩꦴꦤꦺꦴ ꦱꦲꦮꦴꦱꦺꦴ ꦱꦶꦪꦴ, ꦧꦴꦲꦶꦫꦺ ꦱꦪꦩꦴꦤꦺꦴ ꦮꦶꦥ꧀ꦥꦮꦴꦱꦺꦴ, ꦠꦡꦴ ꦄꦚ꧀ꦚꦩꦚ꧀ꦚꦱ꧀ꦱꦥꦷꦠꦶ. ꦌꦮꦁ ꦏꦫꦺꦴꦤ꧀ꦠꦴꦤꦁ ꦥꦤ ꦤꦺꦱꦁ ꦱꦏꦄꦣꦶꦥ꧀ꦥꦴꦪꦺꦴꦥꦶ ꦤ ꦱꦶꦗ꧀ꦙꦠꦶ, ꦏꦸꦠꦺꦴ ꦨꦒꦮꦠꦺꦴ ꦄꦣꦶꦥ꧀ꦥꦴꦪꦺꦴ.

ꦏꦡꦁ? ꦥꦴꦫꦶꦮꦴꦱꦶꦏꦺꦴ ꦨꦶꦏ꧀ꦑꦸ ꦥꦏꦠꦠ꧀ꦠꦨꦶꦏ꧀ꦑꦹꦤꦚ꧀ꦕ ꦄꦚ꧀ꦚꦩꦚ꧀ꦚꦱ꧀ꦱ ꦕ ꦢ꧀ꦮꦴꦢꦱꦲꦠ꧀ꦡꦩꦠ꧀ꦠꦺ ꦥꦢꦺꦱꦺ ꦲꦺꦴꦠꦹꦠꦶ ꦤꦺꦱꦩꦣꦶꦥ꧀ꦥꦴꦪꦺꦴ. ꦄꦡ ꦥꦤ ꦩꦗ꧀ꦙꦶꦩꦠ꧀ꦡꦩ꧀ꦨꦁ ꦤꦶꦩꦶꦠ꧀ꦠꦁ ꦏꦠ꧀ꦮꦴ ꦩꦶꦤꦶꦪꦩꦴꦤꦴ ꦱꦩꦤ꧀ꦠꦠꦺꦴ ꦧꦴꦲꦶꦫꦭꦺꦑꦴ ꦡꦩ꧀ꦨꦠꦺꦴꦪꦺꦮ ꦢ꧀ꦮꦴꦢꦱꦲꦠ꧀ꦡꦩꦠ꧀ꦠꦴ ꦲꦺꦴꦠꦶ, ꦤ ꦥꦏꦠꦠ꧀ꦠꦨꦶꦏ꧀ꦑꦹꦲꦶ. ꦠꦺ ꦲꦶ ꦡꦩ꧀ꦨꦠꦺꦴ ꦧꦲꦶ ꦌꦏꦫꦠꦤꦢ꧀ꦮꦶꦠꦶꦫꦠꦤꦴꦢꦶꦛ꧀ꦜꦴꦤꦺ ꦜꦶꦠꦴ, ꦧꦴꦲꦶꦫꦠꦺꦴꦥꦶ ꦭꦺꦑꦴꦪꦺꦮ ꦡꦩ꧀ꦨꦠꦺꦴ ꦢ꧀ꦮꦴꦢꦱꦲꦠ꧀ꦡꦩꦠ꧀ꦠꦴ ꦲꦺꦴꦠꦶ, ꦤ ꦠꦱ꧀ꦱꦹꦥꦫꦶ ꦤꦶꦥꦤ꧀ꦤꦨꦶꦏ꧀ꦑꦸ. ꦱꦺꦴ ꦲꦶ ꦢ꧀ꦮꦶꦫꦠꦤꦩꦠ꧀ꦠꦺꦤꦥꦶ ꦠꦶꦫꦠꦤꦩꦠ꧀ꦠꦺꦤꦥꦶ ꦭꦺꦑꦴꦪ ꦄꦤ꧀ꦠꦺꦴꦥꦶ ꦲꦺꦴꦠꦶ ꦧꦲꦶꦥꦶ. ꦄꦚ꧀ꦚꦩꦚ꧀ꦚꦱ꧀ꦱꦥꦶ ꦖꦨꦴꦒꦱꦷꦩꦴꦪꦺꦮ ꦄꦚ꧀ꦚꦩꦚ꧀ꦚꦱ꧀ꦱ ꦢ꧀ꦮꦴꦢꦱꦲꦠ꧀ꦡꦩꦠ꧀ꦠꦴ ꦲꦺꦴꦠꦶ, ꦤ ꦠꦱ꧀ꦱꦹꦥꦫꦶ ꦥꦚ꧀ꦚꦠ꧀ꦠꦩꦚ꧀ꦕꦺꦴ ꦮꦴ ꦠꦠ꧀ꦡ ꦤꦶꦥꦤ꧀ꦤꦨꦶꦏ꧀ꦑꦸ ꦮꦴ. ꦩꦚ꧀ꦕꦺꦴ ꦲꦶ ꦌꦏꦫꦠꦤꦩꦠ꧀ꦠꦺꦤ ꦮꦴ ꦢ꧀ꦮꦶꦫꦠꦤꦩꦠ꧀ꦠꦺꦤ ꦮꦴ ꦱꦷꦩꦁ ꦄꦠꦶꦏ꧀ꦏꦩꦶꦠ꧀ꦮꦴ ꦜꦶꦠꦺꦴ, ꦨꦶꦏ꧀ꦑꦹꦥꦶ ꦱꦪꦩꦴꦤꦴ ꦤ ꦱꦷꦩꦴꦪ ꦈꦥꦫꦶꦪꦺꦮ ꦱꦪꦤ꧀ꦠꦶ, ꦮꦶꦢꦠ꧀ꦡꦶꦩꦠ꧀ꦠꦺꦤ ꦮꦴ ꦫꦠꦤꦩꦠ꧀ꦠꦺꦤ ꦮꦴ ꦱꦷꦩꦁ ꦄꦠꦶꦏ꧀ꦏꦩꦶꦠ꧀ꦮꦴ ꦮꦴ ꦄꦥ꧀ꦥꦠ꧀ꦮꦴ ꦮꦴ ꦱꦪꦤ꧀ꦠꦶ, ꦠꦱ꧀ꦩꦴ ꦠꦺ ꦥꦴꦫꦶꦮꦴꦱꦶꦏꦴ ꦨꦶꦏ꧀ꦑꦹ ꦥꦏꦠꦠ꧀ꦠꦨꦶꦏ꧀ꦑꦹꦤꦩ꧀ꦥꦶ ꦄꦚ꧀ꦚꦩꦚ꧀ꦚꦱ꧀ꦱꦥꦶ ꦢ꧀ꦮꦴꦢꦱꦲꦠ꧀ꦡꦩꦠ꧀ꦠꦛ꧀ꦜꦴꦪꦶꦤꦺꦴ ꦤ ꦲꦺꦴꦤ꧀ꦠꦶ, ꦠꦠꦺꦴ ꦈꦴꦤꦴꦮ ꦲꦺꦴꦤ꧀ꦠꦶ, ꦠꦱ꧀ꦩꦴ ꦱꦏꦄꦣꦶꦥ꧀ꦥꦴꦪꦺꦴꦥꦶ ꦤ ꦱꦶꦗ꧀ꦙꦠꦶ.

ꦨꦒꦮꦠꦺꦴ ꦥꦤ ꦄꦣꦶꦥ꧀ꦥꦴꦪꦺꦴ – ꦪꦢꦶ ꦄꦥ꧀ꦥꦨꦶꦏ꧀ꦑꦸꦏꦴꦢꦶꦄꦔ꧀ꦒꦱꦩ꧀ꦥꦤ꧀ꦤꦠ꧀ꦠꦴ ꦮꦶꦲꦴꦫꦱ꧀ꦱ ꦮꦠ꧀ꦠꦁ ꦄꦤꦶꦏ꧀ꦑꦶꦥꦶꦠ꧀ꦮꦴ ꦄꦤ꧀ꦠꦺꦴꦮꦶꦲꦴꦫꦺꦪꦺꦮ ꦥꦫꦶꦮꦱꦠꦶ, ꦌꦮꦁ ꦱꦠꦶ ꦥꦏꦠꦠ꧀ꦠꦺꦤ ꦨꦶꦏ꧀ꦑꦸꦤꦴ ꦤ ꦌꦏꦕ꧀ꦖꦤ꧀ꦤꦺ ꦄꦴꦮꦴꦱꦺ ꦮꦱꦶꦠꦧ꧀ꦧꦁ. ꦪꦢꦶ ꦠꦴꦢꦶꦱꦄꦴꦮꦴꦱꦺ ꦮꦴ ꦄꦤꦴꦮꦴꦱꦺ ꦮꦴ ꦖꦢꦤꦠꦺꦴ ꦈꦢꦏꦥꦠꦤꦛ꧀ꦜꦴꦤꦱ꧀ꦱ ꦄꦤ꧀ꦠꦺꦴ ꦱꦪꦺꦪ꧀ꦪ, ꦱꦲꦮꦴꦱꦺꦴ ꦤꦴꦩ, ꦫꦠ꧀ꦠꦶꦕ꧀ꦖꦺꦢꦺꦴ ꦲꦺꦴꦠꦷꦠꦶ ꦄꦪꦩꦠ꧀ꦡꦺꦴ ꦪꦡꦴꦮꦸꦠ꧀ꦠ-ꦥꦴꦭ꦳ꦶꦪꦴ ꦕ ꦄꦛ꧀ꦜꦏꦡꦴꦪ ꦕ ꦥꦏꦴꦱꦺꦠꦧ꧀ꦧꦺꦴ. ꦤ ꦌꦏꦕ꧀ꦖꦤ꧀ꦤꦺ ꦄꦴꦮꦴꦱꦺ ꦢ꧀ꦮꦷꦲꦶ ꦮꦠ꧀ꦡꦧ꧀ꦧꦁ. ꦪꦢꦶ ꦮꦱꦺꦪ꧀ꦪ, ꦮꦸꦝ꧀ꦞꦱ꧀ꦱ ꦫꦠ꧀ꦠꦶꦕ꧀ꦖꦺꦢꦺꦴꦪꦺꦮ, ꦤꦮꦏꦱ꧀ꦱ ꦫꦠ꧀ꦠꦶꦕ꧀ꦖꦺꦢꦺꦴ ꦕꦺꦮ ꦮꦠ꧀ꦠꦨꦺꦢꦢꦸꦏ꧀ꦏꦛꦚ꧀ꦕ ꦲꦺꦴꦠꦶ. ꦱꦩꦮꦱ꧀ꦱꦴ ꦕꦺ, ꦄꦗꦴꦤꦤ꧀ꦠꦱ꧀ꦱ ꦫꦠ꧀ꦠꦶꦕ꧀ꦖꦺꦢꦺꦴꦪꦺꦮ, ꦗꦴꦤꦤ꧀ꦠꦱ꧀ꦱ ꦈꦨꦪꦩ꧀ꦥꦷꦠꦶ ꦄꦪꦩꦠ꧀ꦡꦺꦴ ‘‘ꦠꦪꦺꦴ ꦑꦺꦴ, ꦈꦥꦴꦭꦶ, ꦥꦴꦫꦶꦮꦴꦱꦶꦏꦱ꧀ꦱ ꦨꦶꦏ꧀ꦑꦸꦤꦺꦴ ꦫꦠ꧀ꦠꦶꦕ꧀ꦖꦺꦢꦴ ꦱꦲꦮꦴꦱꦺꦴ ꦮꦶꦥ꧀ꦥꦮꦴꦱꦺꦴ ꦄꦤꦴꦫꦺꦴꦕꦤꦴ’’ꦠꦶ ꦕ ‘‘ꦤ, ꦨꦶꦏ꧀ꦑꦮꦺ, ꦥꦴꦫꦶꦮꦴꦱꦶꦏꦺꦤ ꦨꦶꦏ꧀ꦑꦸꦤꦴ ꦥꦴꦫꦶꦮꦴꦱꦶꦏꦺꦤ ꦮꦸꦝ꧀ꦞꦠꦫꦺꦤ ꦱꦢ꧀ꦣꦶꦁ ꦤ ꦌꦏꦕ꧀ꦖꦤ꧀ꦤꦺ ꦄꦴꦮꦴꦱꦺ ꦮꦠ꧀ꦡꦧ꧀ꦧ’’ꦤ꧀ꦠꦶ (ꦕꦹꦭ꦳ꦮ. ꧘꧒) ꦕ ‘‘ꦮꦸꦝ꧀ꦞꦠꦫꦺꦤꦴꦠꦶ ꦌꦠ꧀ꦡ…ꦥꦺ… ꦱꦕꦺ ꦲꦶ ꦢ꧀ꦮꦺ ꦥꦴꦫꦶꦮꦴꦱꦶꦏꦴ ꦌꦏꦠꦺꦴ ꦮꦱꦺꦪ꧀ꦪꦸꦁ, ꦠꦺ ꦄꦚ꧀ꦚꦩꦚ꧀ꦚꦱ꧀ꦱ ꦄꦗ꧀ꦙꦴꦕꦴꦫꦁ ꦚꦠ꧀ꦮꦴ ꦄꦒꦴꦫꦮꦴ ꦮꦴ ꦮꦶꦥ꧀ꦥꦛꦶꦱꦴꦫꦶꦤꦺꦴ ꦮꦴ ꦲꦸꦠ꧀ꦮꦴ ꦥꦴꦥꦶꦛ꧀ꦜꦠꦫꦁ ꦮꦴ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦺꦪ꧀ꦪꦸꦁ ꦮꦶꦧ꧀ꦨꦩꦺꦪ꧀ꦪꦸꦁ ꦮꦴ, ꦠꦱ꧀ꦩꦴ ꦤꦺꦱꦁ ꦱꦲꦱꦺꦪ꧀ꦪꦴ ꦱꦧ꧀ꦧꦥ꧀ꦥꦏꦴꦫꦺꦤ ꦥꦛꦶꦏ꧀ꦑꦶꦠ꧀ꦠꦴ’’ꦠꦶ (ꦕꦹꦭ꦳ꦮ. ꦄꦛ꧀ꦜ. ꧘꧑) ꦕ ꦆꦩꦺꦲꦶ ꦥꦴꦭ꦳ꦶꦄꦛ꧀ꦜꦏꦡꦴꦥꦴꦜꦺꦲꦶ ꦥꦏꦴꦱꦺꦠꦧ꧀ꦧꦺꦴ. ꦮꦶꦥ꧀ꦥꦮꦴꦱꦺꦥꦶ ꦥꦴꦫꦶꦮꦴꦱꦶꦏꦺꦤ ꦄꦨꦶꦏ꧀ꦑꦸꦏꦺ ꦄꦴꦮꦴꦱꦺ ꦤ ꦮꦠ꧀ꦡꦧ꧀ꦧꦁ, ꦥꦏꦠꦠ꧀ꦠꦺꦤ ꦮꦶꦤꦴ ꦄꦨꦶꦏ꧀ꦑꦸꦏꦺꦴ ꦄꦴꦮꦴꦱꦺꦴ ꦤ ꦒꦤ꧀ꦠꦧ꧀ꦧꦺꦴ, ꦧꦲꦶꦱꦷꦩꦴꦪꦁ ꦨꦶꦏ꧀ꦑꦹꦤꦁ ꦮꦱꦤꦛ꧀ꦜꦴꦤꦠꦺꦴ ꦢ꧀ꦮꦴꦢꦱꦲꦠ꧀ꦡꦥ꧀ꦥꦩꦴꦟꦱ꧀ꦱ ꦈꦥꦕꦴꦫꦱ꧀ꦱ ꦄꦤ꧀ꦠꦺꦴ ꦤꦶꦱꦷꦢꦶꦠꦧ꧀ꦧꦤ꧀ꦠꦶ ꦨꦒꦮꦠꦺꦴ ꦄꦣꦶꦥ꧀ꦥꦴꦪꦺꦴ.

ꦄꦪꦩꦠ꧀ꦡꦺꦴ ‘‘ꦤ, ꦨꦶꦏ꧀ꦑꦮꦺ, ꦥꦴꦫꦶꦮꦴꦱꦶꦏꦺꦤ ꦨꦶꦏ꧀ꦑꦸꦤꦴ ꦱꦨꦶꦏ꧀ꦑꦸꦏꦴ ꦄꦴꦮꦴꦱꦴ ꦄꦨꦶꦏ꧀ꦑꦸꦏꦺꦴ ꦄꦴꦮꦴꦱꦺꦴ ꦒꦤ꧀ꦠꦧ꧀ꦧꦺꦴ ꦄꦚ꧀ꦚꦠ꧀ꦫ ꦥꦏꦠꦠ꧀ꦠꦺꦤ ꦄꦚ꧀ꦚꦠ꧀ꦫ ꦄꦤ꧀ꦠꦫꦴꦪꦴ’’ꦠꦶꦄꦴꦢꦶ (ꦕꦹꦭ꦳ꦮ. ꧗꧖) ꦕ ‘‘ꦠꦪꦺꦴ ꦑꦺꦴ, ꦈꦥꦴꦭꦶ…ꦥꦺ… ꦄꦤꦴꦫꦺꦴꦕꦤꦴ’’ꦠꦶ ꦕ ‘‘ꦕꦠ꧀ꦠꦴꦫꦺꦴ ꦑꦺꦴ, ꦈꦥꦴꦭꦶ, ꦩꦴꦤꦠ꧀ꦠꦕꦴꦫꦶꦏꦱ꧀ꦱ ꦨꦶꦏ꧀ꦑꦸꦤꦺꦴ ꦫꦠ꧀ꦠꦶꦕ꧀ꦖꦺꦢꦴ ꦱꦲꦮꦴꦱꦺꦴ, ꦮꦶꦥ꧀ꦥꦮꦴꦱꦺꦴ, ꦄꦤꦴꦫꦺꦴꦕꦤꦴ, ꦈꦴꦤꦺꦒꦟꦺꦕꦫꦟ’’ꦤ꧀ꦠꦶ (ꦕꦹꦭ꦳ꦮ. ꧙꧒) ꦕ ‘‘ꦮꦶꦥ꧀ꦥꦮꦴꦱꦺꦴꦠꦶ ꦌꦏꦏꦱ꧀ꦱꦺꦮ ꦮꦴꦱꦺꦴ’’ꦠꦶ ꦕ ‘‘ꦄꦪꦚ꧀ꦕ ꦪꦱ꧀ꦩꦴ ꦒꦟꦱ꧀ꦱ ꦄꦴꦫꦺꦴꦕꦺꦠ꧀ꦮꦴ ꦨꦶꦏ꧀ꦑꦹꦤꦚ꧀ꦕ ꦄꦠ꧀ꦡꦶꦨꦴꦮꦁ ꦱꦭ꧀ꦭꦏ꧀ꦑꦺꦠ꧀ꦮꦴꦮ ꦮꦱꦶ, ꦠꦺꦤꦱ꧀ꦱ ꦈꦴꦤꦺꦒꦟꦺꦕꦫꦟꦢꦺꦴꦱꦺꦴ ꦮꦴ ꦮꦶꦥ꧀ꦥꦮꦴꦱꦺꦴ ꦮꦴ ꦤ ꦲꦺꦴꦠꦷ’’ꦠꦶ ꦕ ‘‘ꦄꦠ꧀ꦡꦶꦨꦴꦮꦁ ꦱꦭ꧀ꦭꦏ꧀ꦑꦺꦠ꧀ꦮꦴꦠꦶ ꦢ꧀ꦮꦴꦢꦱꦲꦠ꧀ꦡꦺ ꦈꦥꦕꦴꦫꦺ ꦱꦭ꧀ꦭꦏ꧀ꦑꦺꦠ꧀ꦮꦴ, ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦴꦤꦁ ꦈꦥꦕꦴꦫꦱꦷꦩꦴꦪ ꦄꦴꦒꦠꦨꦴꦮꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦱꦲꦮꦴꦱꦴꦢꦶꦏꦁ ꦮꦺꦢꦶꦠꦧ꧀ꦧ’’ꦤ꧀ꦠꦶ ꦕ ꦄꦴꦒꦠꦺꦲꦶ ꦥꦴꦭ꦳ꦶꦪꦛ꧀ꦜꦏꦡꦴ-ꦮꦗꦶꦫꦧꦸꦢ꧀ꦣꦶꦛꦷꦏꦴꦥꦴꦜꦺꦲꦶ ꦥꦏꦴꦱꦺꦠꦧ꧀ꦧꦺꦴ, ꦠꦱ꧀ꦩꦴ ꦮꦶꦲꦴꦫꦺ ꦥꦫꦶꦮꦱꦤ꧀ꦠꦱ꧀ꦱ ꦈꦥꦕꦴꦫꦱꦷꦩꦴꦪ ꦄꦧ꧀ꦨꦤ꧀ꦠꦫꦺ ꦪꦠ꧀ꦡ ꦏꦠ꧀ꦡꦕꦶ ꦮꦱꦤ꧀ꦠꦱ꧀ꦱ ꦤꦠ꧀ꦡꦶ ꦮꦶꦥ꧀ꦥꦮꦴꦱꦺꦴ, ꦧꦲꦶꦈꦥꦕꦴꦫꦱꦷꦩꦴꦪꦁ ꦥꦫꦶꦮꦱꦤ꧀ꦠꦱ꧀ꦱ ꦨꦶꦏ꧀ꦑꦹꦤꦁ ꦤꦶꦱꦶꦤ꧀ꦤꦥꦫꦶꦪꦤ꧀ꦠꦠꦺꦴ ꦢ꧀ꦮꦴꦢꦱꦲꦠ꧀ꦡꦧ꧀ꦨꦤ꧀ꦠꦫꦺ ꦮꦱꦤ꧀ꦠꦱ꧀ꦱ ꦕ ꦤꦠ꧀ꦡꦶ ꦮꦶꦥ꧀ꦥꦮꦴꦱꦺꦴꦠꦶ, ꦠꦚ꧀ꦕ ꦥꦫꦶꦮꦴꦱꦏꦴꦭꦺ ‘‘ꦌꦏꦺꦤ ꦨꦶꦏ꧀ꦑꦸꦤꦴ ꦱꦢ꧀ꦣꦶ’’ꦤ꧀ꦠꦶ ꦮꦕꦤꦠꦺꦴ ꦌꦏꦱ꧀ꦱꦥꦶ ꦨꦶꦏ꧀ꦑꦸꦤꦺꦴ, ꦩꦴꦤꦠ꧀ꦠꦕꦫꦟꦏꦴꦭꦺ ‘‘ꦕꦠꦹꦲꦶ ꦥꦚ꧀ꦕꦲꦶ ꦮꦴ ꦨꦶꦏ꧀ꦑꦹꦲꦶ ꦱꦢ꧀ꦣꦶ’’ꦤ꧀ꦠꦶ (ꦕꦹꦭ꦳ꦮ. ꦄꦛ꧀ꦜ. ꧑꧐꧒) ꦮꦕꦤꦠꦺꦴ ꦕ ꦕꦠꦸꦤ꧀ꦤꦁ ꦥꦚ꧀ꦕꦤ꧀ꦤꦩ꧀ꦥꦶ ꦨꦶꦏ꧀ꦑꦹꦤꦁ ꦲꦠ꧀ꦡꦥꦴꦱꦨꦹꦠꦺ ꦢ꧀ꦮꦴꦢꦱꦲꦠ꧀ꦡꦧ꧀ꦨꦤ꧀ꦠꦫꦺꦥꦶ ꦮꦱꦶꦠꦸꦁ ꦭꦨꦠꦶ, ꦤꦠ꧀ꦡꦶ ꦮꦶꦥ꧀ꦥꦮꦴꦱꦺꦴꦠꦶ ꦢꦛ꧀ꦜꦧ꧀ꦧꦁ.

ꦮꦠ꧀ꦠꦁ ꦱꦩꦴꦢꦶꦪꦶꦠ꧀ꦮꦴ ꦠꦺꦱꦁ ꦨꦶꦏ꧀ꦑꦹꦤꦁ ꦄꦴꦫꦺꦴꦕꦶꦠꦏꦴꦭꦠꦺꦴ ꦥꦤ ꦥꦛ꧀ꦜꦴꦪ ꦏꦺꦤꦕꦶ ꦏꦫꦟꦷꦪꦺꦤ ꦠꦺꦱꦸ ꦨꦶꦏ꧀ꦑꦹꦱꦸ ꦒꦠꦺꦱꦸꦥꦶ ꦪꦡꦴꦮꦸꦠ꧀ꦠꦄꦛ꧀ꦜꦏꦡꦴꦥꦴꦜꦤꦪꦺꦤ ꦮꦶꦥ꧀ꦥꦮꦴꦱꦺꦴ ꦤ ꦲꦺꦴꦠꦶ. ꦠꦡꦴ ꦲꦶ ꦮꦸꦠ꧀ꦠꦁ ꦮꦶꦩꦠꦶꦮꦶꦤꦺꦴꦢꦤꦶꦪꦁ (ꦮꦶ. ꦮꦶ. ꦛꦷ. ꦕꦹꦭ꦳ꦮꦒ꧀ꦒ ꧒.꧙꧗) ‘‘ꦱꦺꦴꦥꦶ ꦏꦺꦤꦕꦶ ꦏꦩ꧀ꦩꦺꦤ ꦥꦸꦫꦺꦄꦫꦸꦟꦺ ꦌꦮ ꦒꦕ꧀ꦖꦠꦷꦠꦶ ꦆꦩꦶꦤꦴ ꦄꦴꦫꦺꦴꦕꦤꦴꦪ ꦏꦠꦴꦪ ꦱꦧ꧀ꦧꦺꦱꦸꦥꦶ ꦨꦶꦏ꧀ꦑꦹꦱꦸ ꦧꦲꦶꦮꦶꦲꦴꦫꦁ ꦒꦠꦺꦱꦸ ꦈꦴꦤꦺꦒꦟꦺꦕꦫꦟꦢꦺꦴꦱꦺꦴ ꦮꦴ ꦮꦶꦥ꧀ꦥꦮꦴꦱꦢꦺꦴꦱꦺꦴ ꦮꦴ ꦤ ꦲꦺꦴꦠꦶ ꦄꦴꦫꦺꦴꦕꦶꦠꦠ꧀ꦠꦴ ꦱꦲꦮꦴꦱꦱ꧀ꦱꦴꦠꦶ ꦢꦱ꧀ꦱꦺꦠꦶ. ꦠꦺꦤꦴꦲ ‘ꦄꦪꦚ꧀ꦕꦴ’ꦠꦶꦄꦴꦢꦷ’’ꦠꦶ. ꦄꦥꦫꦺ ꦥꦤ ꦄꦴꦕꦫꦶꦪꦴ ‘‘ꦧꦲꦶꦱꦷꦩꦴꦪ ꦮꦠ꧀ꦠꦱꦩꦴꦢꦴꦤꦛ꧀ꦜꦴꦤꦺ ꦮꦠꦶꦥꦫꦶꦏ꧀ꦑꦺꦥꦺꦴꦥꦶ ꦥꦏꦠꦠ꧀ꦠꦨꦶꦏ꧀ꦑꦹꦲꦺꦮ ꦏꦴꦠꦧ꧀ꦧꦺꦴ, ꦤ ꦏꦩ꧀ꦩꦴꦫꦲꦨꦶꦏ꧀ꦑꦹꦲꦶ. ꦪꦡꦴ ꦭꦺꦴꦏꦺ ꦧꦤ꧀ꦣꦤꦴꦒꦴꦫꦴꦢꦶ ꦢꦟ꧀ꦝꦏꦴꦫꦏꦺꦲꦶ ꦌꦮ ꦏꦠ꧀ꦠꦧ꧀ꦧꦁ, ꦤ ꦢꦟ꧀ꦝꦴꦫꦲꦺꦲꦶ, ꦌꦮꦩꦶꦣꦴꦥꦷ’’ꦠꦶ ꦮꦢꦤ꧀ꦠꦶ, ꦠꦩ꧀ꦥꦶ ꦄꦛ꧀ꦜꦏꦡꦴꦢꦷꦱꦸ ꦤ ꦢꦶꦱ꧀ꦱꦠꦶ. ꦤ ꦲꦶ ꦮꦠꦶꦥꦫꦶꦏ꧀ꦑꦺꦥꦺꦴ ꦢꦟ꧀ꦝꦏꦩ꧀ꦩꦠ꧀ꦡꦴꦪ ꦏꦴꦫꦶꦠꦺꦴ, ꦄꦡ ꦑꦺꦴ ꦢꦱ꧀ꦱꦤꦹꦥꦕꦴꦫꦮꦶꦗꦲꦤꦠ꧀ꦡꦩꦺꦮ. ꦠꦡꦴ ꦲꦶ ꦮꦸꦠ꧀ꦠꦁ ꦱꦴꦫꦠ꧀ꦡꦢꦷꦥꦤꦶꦪꦁ (ꦱꦴꦫꦠ꧀ꦡ. ꦛꦷ. ꦕꦹꦭ꦳ꦮꦒ꧀ꦒ ꧓.꧙꧗) ‘‘ꦒꦸꦩ꧀ꦧꦺꦤ ꦮꦴ ꦮꦠꦶꦪꦴ ꦮꦴ ꦥꦛꦶꦕ꧀ꦖꦤ꧀ꦤꦛ꧀ꦜꦴꦤꦺꦠꦶ ꦢꦱ꧀ꦱꦤꦹꦥꦕꦴꦫꦮꦶꦗꦲꦤꦠ꧀ꦡ’’ꦤ꧀ꦠꦶ. ꦠꦡꦴ ꦮꦶꦩꦠꦶꦮꦶꦤꦺꦴꦢꦤꦶꦪꦩ꧀ꦥꦶ (ꦮꦶ. ꦮꦶ. ꦛꦷ. ꦕꦹꦭ꦳ꦮꦒ꧀ꦒ ꧒.꧙꧗) ‘‘ꦒꦸꦩ꧀ꦧꦺꦤ ꦮꦴꦠꦶꦄꦴꦢꦶ ꦢꦱ꧀ꦱꦤꦹꦥꦕꦴꦫꦮꦶꦗꦲꦤꦠ꧀ꦡ’’ꦤ꧀ꦠꦶ. ꦆꦠꦺꦴ ꦥꦫꦁ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦤꦪꦺꦤꦺꦮ ꦥꦫꦶꦮꦴꦱꦢꦴꦤꦚ꧀ꦕ ꦩꦴꦤꦠ꧀ꦠꦢꦴꦤꦚ꧀ꦕ ꦮꦺꦢꦶꦠꦧ꧀ꦧꦁ. ꦪꦠ꧀ꦡ ꦥꦤ ꦱꦁꦱꦪꦶꦠꦧ꧀ꦧꦁ ꦄꦠ꧀ꦡꦶ, ꦠꦠ꧀ꦡ ꦱꦁꦱꦪꦮꦶꦤꦺꦴꦢꦤꦠ꧀ꦡꦴꦪ ꦏꦡꦺꦠꦧ꧀ꦧꦁ ꦏꦡꦪꦴꦩ.

ꦌꦏꦕ꧀ꦕꦺ ꦨꦶꦏ꧀ꦑꦹ ꦌꦮꦁ ꦮꦢꦤ꧀ꦠꦶ – ꦥꦴꦫꦶꦮꦴꦱꦶꦏꦺꦴ ꦨꦶꦏ꧀ꦑꦸ ꦮꦸꦝ꧀ꦞꦠꦫꦺꦴꦥꦶ ꦱꦩꦴꦤꦺꦴ ꦮꦠ꧀ꦠꦺ ꦱꦩꦴꦢꦶꦤ꧀ꦤꦺ ꦤꦮꦏꦛ꧀ꦜꦴꦤꦺ ꦜꦶꦠꦺꦴ. ꦠꦡꦴ ꦲꦶ ꦮꦸꦠ꧀ꦠꦁ ‘‘ꦪꦠ꧀ꦡ ꦥꦤ ꦤꦶꦱꦷꦢꦴꦥꦺꦠ꧀ꦮꦴ ꦥꦫꦶꦮꦶꦱꦤ꧀ꦠꦶ, ꦠꦠ꧀ꦡ ꦱꦴꦩꦟꦺꦫꦴꦤꦁ ꦗꦺꦛ꧀ꦜꦏꦺꦤ, ꦨꦶꦏ꧀ꦑꦹꦤꦁ ꦱꦔ꧀ꦓꦤꦮꦏꦺꦤ ꦲꦸꦠ꧀ꦮꦴ ꦤꦶꦱꦷꦢꦶꦠꦧ꧀ꦧ’’ꦤ꧀ꦠꦶ (ꦕꦹꦭ꦳ꦮ. ꦄꦛ꧀ꦜ. ꧗꧕) ꦠꦱ꧀ꦩꦴ ꦄꦴꦫꦺꦴꦕꦶꦠꦏꦴꦭꦴꦢꦷꦱꦸ ‘‘ꦄꦲꦁ ꦨꦤ꧀ꦠꦺ’’ꦆꦕ꧀ꦕꦺꦮ ꦮꦠ꧀ꦠꦧ꧀ꦧꦁ, ꦤ ‘‘ꦄꦲꦁ ꦄꦴꦮꦸꦱꦺꦴ’’ꦠꦶ. ꦠꦠ꧀ꦫꦺꦮꦁ ꦮꦶꦕꦴꦫꦟꦴ ꦏꦴꦠꦧ꧀ꦧꦴ – ꦥꦴꦫꦶꦮꦴꦱꦶꦏꦴꦢꦪꦺꦴ ꦨꦶꦏ꧀ꦑꦹ ꦱꦺꦪ꧀ꦪꦴꦥꦫꦶꦪꦤ꧀ꦠꦄꦴꦱꦤꦥꦫꦶꦪꦤ꧀ꦠꦨꦴꦒꦶꦠꦴꦪ ꦤꦮꦏꦛ꧀ꦜꦴꦤꦺ ꦜꦶꦠꦴ, ꦤ ꦌꦏꦤ꧀ꦠꦺꦤ ꦤꦮꦏꦨꦹꦠꦠ꧀ꦠꦴ. ꦠꦡꦴ ꦲꦶ ꦮꦸꦠ꧀ꦠꦁ ꦨꦒꦮꦠꦴ ‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦥꦴꦫꦶꦮꦴꦱꦶꦏꦴꦤꦁ ꦨꦶꦏ꧀ꦑꦹꦤꦁ ꦥꦚ꧀ꦕ ꦪꦡꦴꦮꦸꦝ꧀ꦞꦁ ꦈꦥꦺꦴꦱꦡꦁ ꦥꦮꦴꦫꦟꦁ ꦮꦱ꧀ꦱꦶꦏꦱꦴꦛꦶꦏꦁ ꦎꦟꦺꦴꦗꦤꦁ ꦨꦠ꧀ꦠ’’ꦤ꧀ꦠꦶ (ꦕꦹꦭ꦳ꦮ. ꧗꧕). ꦄꦛ꧀ꦜꦏꦡꦴꦪꦚ꧀ꦕ (ꦕꦹꦭ꦳ꦮ. ꦄꦛ꧀ꦜ. ꧘꧑) ‘‘ꦥꦏꦠꦠ꧀ꦠꦁ ꦨꦶꦏ꧀ꦑꦸꦁ ꦢꦶꦱ꧀ꦮꦴ ꦄꦴꦱꦤꦴ ꦮꦸꦛ꧀ꦜꦴꦠꦧ꧀ꦧꦁ, ꦥꦏꦠꦠ꧀ꦠꦺꦴ ꦨꦶꦏ꧀ꦑꦸ ꦄꦴꦱꦤꦺꦤ ꦤꦶꦩꦤ꧀ꦠꦺꦠꦧ꧀ꦧꦺꦴ’’ꦠꦶ ꦌꦠꦶꦱ꧀ꦱꦴ ꦥꦴꦭ꦳ꦶꦪꦴ ꦱꦁꦮꦟ꧀ꦟꦤꦴꦪ ‘‘ꦮꦸꦛ꧀ꦜꦴꦠꦧ꧀ꦧꦁ, ꦤꦶꦩꦤ꧀ꦠꦺꦠꦧ꧀ꦧꦺꦴꦠꦶ ꦠꦢꦲꦸꦥꦱꦩ꧀ꦥꦤ꧀ꦤꦩ꧀ꦥꦶ ꦢꦶꦱ꧀ꦮꦴ ꦮꦸꦛ꧀ꦜꦴꦠꦧ꧀ꦧꦩꦺꦮ, ꦮꦸꦛ꧀ꦜꦴꦪ ꦕ ‘ꦄꦲꦁ ꦆꦩꦶꦤꦴ ꦱꦸꦑꦤꦶꦱꦶꦤ꧀ꦤꦺꦴ ꦮꦸꦛ꧀ꦜꦴꦥꦶꦠꦺꦴ’ꦠꦶ ꦥꦫꦩ꧀ꦩꦸꦑꦺꦤ ꦤ ꦒꦤ꧀ꦠꦧ꧀ꦧꦁ, ‘ꦆꦢꦁ ꦄꦴꦕꦫꦶꦪ ꦄꦴꦱꦤꦁ, ꦌꦠ꧀ꦡ ꦤꦶꦱꦷꦢꦡꦴ’ꦠꦶ ꦌꦮꦁ ꦤꦶꦩꦤ꧀ꦠꦺꦠꦧ꧀ꦧꦺꦴꦪꦺꦮꦴ’’ꦠꦶ ꦌꦠ꧀ꦡꦺꦮ ‘‘ꦄꦴꦕꦫꦶꦪꦴ’’ꦠꦶ ꦄꦴꦭꦥꦤꦮꦶꦱꦺꦱꦺꦴ ꦮꦸꦠ꧀ꦠꦺꦴ, ꦤ ꦄꦚ꧀ꦚꦠ꧀ꦡ. ꦪꦢꦶ ꦮꦸꦝ꧀ꦞꦠꦫꦺꦤꦥꦶ ‘‘ꦨꦤ꧀ꦠꦺ’’ꦆꦕ꧀ꦕꦺꦮ ꦮꦠ꧀ꦠꦧ꧀ꦧꦺꦴ ꦱꦶꦪꦴ, ꦆꦣꦴꦥꦶ ‘‘ꦆꦢꦁ, ꦨꦤ꧀ꦠꦺ, ꦄꦴꦱꦤ’’ꦤ꧀ꦠꦶ ꦮꦠ꧀ꦠꦧ꧀ꦧꦁ ꦨꦮꦺꦪ꧀ꦪ, ꦤ ꦥꦤ ꦮꦸꦠ꧀ꦠꦁ, ꦠꦱ꧀ꦩꦴ ꦤ ꦠꦺꦱꦁ ꦠꦁ ꦮꦕꦤꦁ ꦱꦴꦫꦠꦺꦴ ꦥꦕ꧀ꦕꦺꦠꦧ꧀ꦧꦁ. ꦆꦩꦱ꧀ꦩꦶꦁ ꦥꦤ ꦮꦶꦤꦪꦱꦔ꧀ꦒꦲꦥ꧀ꦥꦏꦫꦟꦺ (ꦮꦶ. ꦱꦔ꧀ꦒ. ꦄꦛ꧀ꦜ. ꧒꧓꧗) ‘‘ꦄꦴꦫꦺꦴꦕꦺꦤ꧀ꦠꦺꦤ ꦱꦕꦺ ꦤꦮꦏꦠꦫꦺꦴ ꦲꦺꦴꦠꦶ, ‘ꦄꦴꦮꦸꦱꦺꦴ’ꦠꦶ ꦮꦠ꧀ꦠꦧ꧀ꦧꦁ. ꦱꦕꦺ ꦮꦸꦝ꧀ꦞꦠꦫꦺꦴ, ‘ꦨꦤ꧀ꦠꦺ’ꦠꦶ ꦮꦠ꧀ꦠꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦁ, ꦆꦢꦚ꧀ꦕ ‘‘ꦌꦏꦺꦤ ꦨꦶꦏ꧀ꦑꦸꦤꦴ ꦱꦢ꧀ꦣꦶ’’ꦤ꧀ꦠꦶ ꦲꦺꦛ꧀ꦜꦴ ꦮꦸꦠ꧀ꦠꦠ꧀ꦠꦴ ꦠꦁ ꦥꦛꦶꦒ꧀ꦒꦴꦲꦏꦨꦹꦠꦁ ꦥꦏꦠꦠ꧀ꦠꦁ ꦨꦶꦏ꧀ꦑꦸꦁ ꦱꦤ꧀ꦣꦴꦪ ꦮꦸꦠ꧀ꦠꦤ꧀ꦠꦶ ꦢꦛ꧀ꦜꦧ꧀ꦧꦁ.

ꦧꦲꦮꦺꦴ ꦥꦤ ꦨꦶꦏ꧀ꦑꦹ ꦥꦴꦫꦶꦮꦴꦱꦶꦏꦁ ꦨꦶꦏ꧀ꦑꦸꦁ ꦱꦔ꧀ꦓꦩꦗ꧀ꦙꦺ ꦤꦶꦱꦷꦢꦴꦥꦺꦠ꧀ꦮꦴ ꦮꦠ꧀ꦠꦁ ꦪꦴꦕꦴꦥꦺꦠ꧀ꦮꦴ ꦏꦩ꧀ꦩꦮꦴꦕꦴꦥꦫꦶꦪꦺꦴꦱꦴꦤꦺ ꦱꦩꦴꦢꦴꦥꦺꦠ꧀ꦮꦴ ꦄꦴꦫꦺꦴꦕꦤꦩꦏꦴꦫꦺꦠ꧀ꦮꦴ ꦱꦔ꧀ꦓꦩꦗ꧀ꦙꦠꦺꦴ ꦤꦶꦏ꧀ꦑꦩꦴꦥꦺꦠ꧀ꦮꦴ ꦥꦫꦶꦱꦥꦫꦶꦪꦤ꧀ꦠꦺ ꦤꦶꦱꦷꦢꦴꦥꦺꦠ꧀ꦮꦴ ꦠꦠ꧀ꦡ ꦤꦶꦱꦶꦤ꧀ꦤꦺꦤ ꦄꦴꦫꦺꦴꦕꦴꦥꦺꦠ꧀ꦮꦴ ꦮꦠ꧀ꦠꦁ ꦤꦶꦏ꧀ꦑꦶꦥꦴꦥꦺꦤ꧀ꦠꦶ, ꦌꦮꦁ ꦏꦫꦺꦴꦤ꧀ꦠꦴꦤꦚ꧀ꦕ ꦤꦺꦱꦁ ꦄꦪꦩꦣꦶꦥ꧀ꦥꦴꦪꦺꦴ – ꦄꦪꦁ ꦨꦶꦏ꧀ꦑꦸ ꦮꦠ꧀ꦠꦺ ꦄꦱꦩꦴꦢꦶꦤ꧀ꦤꦺ ꦮꦸꦝ꧀ꦞꦛ꧀ꦜꦴꦤꦶꦪꦺꦴꦥꦶ ꦲꦺꦴꦠꦶ, ꦠꦱ꧀ꦩꦴ ꦪꦴꦕꦤꦏꦴꦭꦺ ꦕ ꦏꦩ꧀ꦩꦮꦴꦕꦴꦱꦮꦤꦏꦴꦭꦺ ꦕ ꦮꦠ꧀ꦠꦱꦩꦴꦢꦴꦤꦏꦴꦭꦺ ꦕ ꦱꦔ꧀ꦓꦩꦗ꧀ꦙꦺ ꦤꦶꦱꦷꦢꦤꦴꦫꦲꦺꦴ ꦲꦺꦴꦠꦶ, ꦮꦠ꧀ꦠꦺ ꦥꦤ ꦱꦩꦴꦢꦶꦤ꧀ꦤꦺ ꦤꦮꦏꦛ꧀ꦜꦴꦤꦶꦪꦺꦴ, ꦠꦱ꧀ꦩꦴ ꦤ ꦱꦔ꧀ꦓꦩꦗ꧀ꦙꦺ ꦤꦶꦱꦷꦢꦤꦴꦫꦲꦺꦴ, ꦄꦴꦱꦤꦥꦫꦶꦪꦤ꧀ꦠꦨꦴꦒꦶꦠꦴꦪ ꦥꦫꦶꦱꦥꦫꦶꦪꦤ꧀ꦠꦺꦪꦺꦮ ꦤꦶꦱꦷꦢꦤꦴꦫꦲꦺꦴꦠꦶ, ꦠꦢꦺꦠꦁ ꦌꦮꦁ ꦮꦶꦕꦴꦫꦺꦠꦧ꧀ꦧꦁ – ꦄꦪꦁ ꦨꦶꦏ꧀ꦑꦸ ꦱꦔ꧀ꦓꦩꦗ꧀ꦙꦺ ꦤꦶꦱꦷꦢꦩꦴꦤꦺꦴ ꦄꦴꦱꦤꦁ ꦒꦲꦺꦠ꧀ꦮꦴ ꦪꦡꦴꦮꦸꦝ꧀ꦞꦁ ꦤꦶꦱꦶꦤ꧀ꦤꦺꦴ ꦤ ꦲꦺꦴꦠꦶ, ꦄꦡ ꦑꦺꦴ ꦏꦩ꧀ꦩꦴꦫꦲꦨꦴꦮꦺꦤ ꦄꦴꦱꦤꦁ ꦄꦒ꧀ꦒꦲꦺꦠ꧀ꦮꦴ ꦄꦚ꧀ꦗꦭꦶꦁ ꦥꦒ꧀ꦒꦲꦺꦠ꧀ꦮꦴ ꦈꦏ꧀ꦏꦸꦛꦶꦏꦩꦺꦮ ꦤꦶꦱꦶꦤ꧀ꦤꦺꦴ ꦲꦺꦴꦠꦶ, ꦏꦩ꧀ꦩꦴꦫꦲꦺꦴ ꦕ ꦤꦴꦩ ꦱꦔ꧀ꦓꦩꦗ꧀ꦙꦺꦪꦺꦮ ꦜꦥꦺꦠꦧ꧀ꦧꦺꦴ ꦲꦺꦴꦠꦶ, ꦤꦺꦴ ꦧꦲꦶ, ꦠꦱ꧀ꦩꦴ ‘‘ꦱꦔ꧀ꦓꦩꦗ꧀ꦙꦺ ꦤꦶꦱꦷꦢꦤꦴꦫꦲꦺꦴ ꦤ ꦲꦺꦴꦠꦷ’’ꦠꦶ ꦤ ꦱꦏ꧀ꦏꦴ ꦮꦠ꧀ꦠꦸꦁ ꦠꦱ꧀ꦩꦶꦁ ꦏꦴꦭꦺ, ꦤꦶꦏ꧀ꦑꦩꦴꦥꦶꦠꦺ ꦕ ꦮꦠ꧀ꦠꦴꦫꦺꦴꦕꦤꦮꦠ꧀ꦠꦤꦶꦏ꧀ꦑꦶꦥꦤꦴꦤꦁ ꦄꦤꦶꦛ꧀ꦜꦶꦠꦠ꧀ꦠꦴ ꦄꦚ꧀ꦚꦩꦚ꧀ꦚꦁ ꦄꦴꦲꦕ꧀ꦕ ꦱꦸꦛ꧀ꦜꦸ ꦤꦶꦱꦶꦤ꧀ꦤꦁ ꦨꦶꦏ꧀ꦑꦸꦱꦔ꧀ꦓꦁ ꦥꦫꦶꦲꦫꦶꦠꦸꦩꦱꦏ꧀ꦏꦸꦟꦺꦪ꧀ꦪꦠ꧀ꦠꦴ, ꦕꦷꦮꦫꦏꦟ꧀ꦟꦥꦴꦢꦥꦶꦛ꧀ꦜꦶꦄꦴꦢꦷꦲꦶ ꦧꦴꦣꦶꦠꦠ꧀ꦠꦴ ꦄꦒꦴꦫꦮꦏꦶꦫꦶꦪꦴ ꦮꦶꦪ ꦢꦶꦱ꧀ꦱꦠꦶ, ꦄꦴꦫꦺꦴꦕꦤꦏꦶꦫꦶꦪꦚ꧀ꦕ ꦮꦠ꧀ꦠꦤꦶꦏ꧀ꦑꦶꦥꦤꦚ꧀ꦕ ꦱꦔ꧀ꦓꦩꦗ꧀ꦙꦺꦪꦺꦮ ꦏꦠ꧀ꦠꦧ꧀ꦧꦁ ꦥꦫꦶꦪꦤ꧀ꦠꦺ ꦤꦶꦱꦷꦢꦶꦠ꧀ꦮꦴ ꦏꦫꦺꦴꦤ꧀ꦠꦺꦴ ꦄꦛ꧀ꦜꦏꦡꦴꦮꦶꦫꦺꦴꦣꦺꦴ ꦲꦺꦴꦠꦶ. ꦮꦸꦠ꧀ꦠꦚ꧀ꦲꦶ ꦄꦛ꧀ꦜꦏꦡꦴꦪꦁ (ꦕꦹꦭ꦳ꦮ. ꦄꦛ꧀ꦜ. ꧙꧗) ‘‘ꦮꦠ꧀ꦠꦁ ꦱꦩꦴꦢꦶꦪꦶꦠ꧀ꦮꦴ ꦠꦠ꧀ꦡꦺꦮ ꦱꦔ꧀ꦓꦱ꧀ꦱ ꦄꦴꦫꦺꦴꦕꦺꦠꦧ꧀ꦧꦁ…ꦥꦺ… ꦄꦴꦫꦺꦴꦕꦺꦠ꧀ꦮꦴ ꦱꦕꦺ ꦤꦶꦏ꧀ꦑꦶꦥꦶꦠꦸꦏꦴꦩꦺꦴ, ꦮꦸꦠ꧀ꦠꦤꦪꦺꦤꦺꦮ ꦱꦔ꧀ꦓꦩꦗ꧀ꦙꦺ ꦤꦶꦏ꧀ꦑꦶꦥꦶꦠꦧ꧀ꦧ’’ꦤ꧀ꦠꦶ. ꦏꦱ꧀ꦩꦴ? ꦱꦩꦴꦢꦴꦤꦛ꧀ꦜꦴꦤꦺꦪꦺꦮ ꦄꦴꦫꦺꦴꦕꦴꦥꦺꦠ꧀ꦮꦴ ꦠꦠ꧀ꦡꦺꦮ ꦤꦶꦏ꧀ꦑꦶꦥꦴꦥꦺꦠ꧀ꦮꦴ ꦤꦶꦛ꧀ꦜꦶꦠꦱꦧ꧀ꦧꦏꦶꦕ꧀ꦕꦩꦺꦮ ꦤꦶꦏ꧀ꦑꦩꦴꦥꦺꦠ꧀ꦮꦴ ꦄꦠ꧀ꦠꦤꦺꦴ ꦄꦴꦱꦤꦺ ꦤꦶꦱꦷꦢꦴꦥꦺꦤ꧀ꦠꦺꦴ ꦚꦴꦪꦴꦒꦠꦺꦴꦠꦶ ꦄꦩ꧀ꦲꦴꦏꦁ ꦑꦤ꧀ꦠꦶ.

ꦠꦡꦴ ꦱꦴꦪꦁ ꦮꦠ꧀ꦠꦴꦫꦺꦴꦕꦤꦏꦴꦭꦺ ꦧꦲꦹꦱꦸ ꦥꦴꦫꦶꦮꦴꦱꦶꦏꦺꦱꦸ ꦮꦸꦝ꧀ꦞꦠꦫꦁ ꦥꦜꦩꦁ ꦱꦩꦴꦢꦴꦥꦺꦠ꧀ꦮꦴ ꦄꦴꦫꦺꦴꦕꦴꦥꦺꦠ꧀ꦮꦴ ꦄꦤꦸꦏ꧀ꦏꦩꦺꦤ ꦱꦧ꧀ꦧꦥꦕ꧀ꦖꦴ ꦤꦮꦏꦠꦫꦁ ꦱꦩꦴꦢꦴꦥꦺꦤ꧀ꦠꦶ ꦄꦴꦫꦺꦴꦕꦴꦥꦺꦤ꧀ꦠꦶ, ꦥꦴꦠꦺꦴ ꦤꦶꦏ꧀ꦑꦶꦥꦤꦏꦴꦭꦺ ꦥꦤ ꦤꦮꦏꦠꦫꦁ ꦥꦜꦩꦁ ꦄꦴꦫꦺꦴꦕꦴꦥꦺꦠ꧀ꦮꦴ ꦤꦶꦏ꧀ꦑꦶꦥꦴꦥꦺꦤ꧀ꦠꦶ, ꦠꦠꦺꦴ ꦄꦤꦸꦏ꧀ꦏꦩꦺꦤ ꦮꦸꦝ꧀ꦞꦠꦫꦁ ꦱꦧ꧀ꦧꦥꦕ꧀ꦖꦴ ꦄꦴꦫꦺꦴꦕꦴꦥꦺꦠ꧀ꦮꦴ ꦤꦶꦏ꧀ꦑꦶꦥꦴꦥꦺꦤ꧀ꦠꦶ. ꦠꦺꦱꦁ ꦄꦪꦩꦣꦶꦥ꧀ꦥꦴꦪꦺꦴ ꦱꦶꦪꦴ – ꦪꦢꦴ ꦢꦱ ꦨꦶꦏ꧀ꦑꦹ ꦥꦏꦠꦠ꧀ꦠꦴ ꦢꦱ ꦨꦶꦏ꧀ꦑꦹ ꦥꦴꦫꦶꦮꦴꦱꦶꦏꦴ ꦲꦺꦴꦤ꧀ꦠꦶ, ꦠꦢꦴ ꦮꦸꦝ꧀ꦞꦠꦫꦺꦤ ꦥꦜꦩꦁ ꦱꦩꦴꦢꦶꦪꦶꦠ꧀ꦮꦴ ꦄꦴꦫꦺꦴꦕꦶꦠꦺ ꦠꦱ꧀ꦱ ꦄꦴꦫꦺꦴꦕꦤꦁ ꦄꦮꦱꦺꦱꦴ ꦌꦏꦹꦤꦮꦷꦱꦠꦶ ꦨꦶꦏ꧀ꦑꦹ ꦱꦸꦟꦤ꧀ꦠꦶ, ꦢꦸꦠꦶꦪꦱ꧀ꦱ ꦄꦛ꧀ꦜꦴꦫꦱ, ꦠꦠꦶꦪꦱ꧀ꦱ ꦱꦠ꧀ꦠꦫꦱꦴꦠꦶ ꦄꦤꦸꦏ꧀ꦏꦩꦺꦤ ꦲꦴꦪꦶꦠ꧀ꦮꦴ ꦱꦧ꧀ꦧꦤꦮꦏꦱ꧀ꦱ ꦄꦴꦫꦺꦴꦕꦤꦁ ꦢꦱ ꦥꦏꦠꦠ꧀ꦠꦴ ꦱꦸꦟꦤ꧀ꦠꦶ ꦱꦺꦱꦴꦤꦁ ꦄꦥꦏꦠꦠ꧀ꦠꦨꦴꦮꦠꦺꦴ. ꦠꦠꦺꦴ ꦤꦶꦏ꧀ꦑꦶꦥꦤꦏꦴꦭꦺ ꦱꦧ꧀ꦧꦤꦮꦏꦺꦴ ꦥꦸꦧ꧀ꦧꦺ ꦄꦠ꧀ꦠꦤꦴ ꦄꦴꦫꦺꦴꦕꦶꦠꦴꦤꦁ ꦢꦱꦤ꧀ꦤꦁ ꦨꦶꦏ꧀ꦑꦹꦤꦁ ꦄꦴꦫꦺꦴꦕꦺꦠ꧀ꦮꦴ ꦤꦶꦏ꧀ꦑꦶꦥꦠꦶ, ꦠꦠꦺꦴ ꦥꦛꦶꦭꦺꦴꦩꦺꦤ ꦢꦸꦠꦶꦪꦺꦴ ꦌꦏꦴꦢꦱꦤ꧀ꦤꦁ, ꦠꦠꦶꦪꦺꦴ ꦢ꧀ꦮꦴꦢꦱꦤ꧀ꦤꦤ꧀ꦠꦶ ꦄꦤꦸꦏ꧀ꦏꦩꦺꦤ ꦮꦝ꧀ꦞꦶꦠ꧀ꦮꦴ ꦱꦧ꧀ꦧꦗꦺꦛ꧀ꦜꦏꦺꦴ ꦄꦠ꧀ꦠꦤꦴ ꦥꦸꦧ꧀ꦧꦺ ꦄꦴꦫꦺꦴꦕꦶꦠꦴꦤꦁ ꦌꦏꦹꦤꦮꦷꦱꦠꦶꦨꦶꦏ꧀ꦑꦹꦤꦁ ꦄꦴꦫꦺꦴꦕꦺꦠ꧀ꦮꦴ ꦤꦶꦏ꧀ꦑꦶꦥꦠꦶ, ꦌꦮꦁ ꦪꦡꦴꦤꦸꦏ꧀ꦏꦩꦺꦤ ꦤꦶꦏ꧀ꦑꦶꦥꦤꦁ ꦲꦺꦴꦠꦶ. ꦱꦧ꧀ꦧꦗꦺꦛ꧀ꦜꦏꦺ ꦥꦤ ꦥꦜꦩꦁ ꦤꦶꦏ꧀ꦑꦶꦠ꧀ꦠꦺ ꦱꦠꦶ ꦥꦸꦧ꧀ꦧꦺ ꦄꦠ꧀ꦠꦤꦴ ꦄꦴꦫꦺꦴꦕꦶꦠꦴꦤꦁ ꦤꦮꦤ꧀ꦤꦁ ꦨꦶꦏ꧀ꦑꦹꦤꦁ ꦠꦢꦴ ꦄꦥꦏꦠꦠ꧀ꦠꦨꦴꦮꦠꦺꦴ ꦄꦴꦫꦺꦴꦕꦶꦠꦴꦤꦁ ꦱꦤ꧀ꦠꦶꦏꦺ ꦤꦶꦏ꧀ꦑꦶꦥꦤꦁ ꦤ ꦲꦺꦴꦠꦶ, ꦠꦡꦴ ꦱꦺꦱꦴꦤꦁ. ꦠꦺꦱꦁ ꦥꦤ ꦌꦏꦕ꧀ꦕꦴꦤꦁ ꦈꦴꦤꦁ ꦲꦺꦴꦠꦶ, ꦌꦏꦕ꧀ꦕꦴꦤꦁ ꦄꦣꦶꦏꦁ, ꦠꦱ꧀ꦩꦴ ꦪꦡꦴꦮꦸꦠ꧀ꦠꦤꦪꦺꦤ ꦱꦧ꧀ꦧꦤꦮꦏꦠꦺꦴ ꦥꦛ꧀ꦜꦴꦪ ꦄꦤꦸꦏ꧀ꦏꦩꦺꦤ ꦤꦶꦏ꧀ꦑꦶꦥꦶꦠꦧ꧀ꦧꦤ꧀ꦠꦶ.

ꦌꦮꦁꦮꦴꦢꦷꦤꦁ ꦥꦤ ꦠꦺꦱꦩꦴꦪꦱ꧀ꦩꦤ꧀ꦠꦴꦤꦁ ꦮꦴꦢꦺ ꦥꦏꦠꦠ꧀ꦠꦴꦪꦺꦮ ꦨꦶꦏ꧀ꦑꦹ ꦄꦴꦫꦺꦴꦕꦺꦠꦧ꧀ꦧꦴ ꦲꦺꦴꦤ꧀ꦠꦶ, ꦤꦺꦴ ꦄꦥꦏꦠꦠ꧀ꦠꦴ. ꦥꦸꦧ꧀ꦧꦺ ꦄꦴꦫꦺꦴꦕꦶꦠꦴꦤꦁꦪꦺꦮ ꦱꦤ꧀ꦠꦶꦏꦺ ꦮꦠ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ ꦲꦺꦴꦠꦶ, ꦤꦺꦴ ꦄꦤꦴꦫꦺꦴꦕꦶꦠꦴꦤꦁ. ꦌꦮꦁ ꦥꦤ ꦥꦏꦠꦠ꧀ꦠꦴꦪꦺꦮ ꦨꦶꦏ꧀ꦑꦹ ꦄꦴꦫꦺꦴꦕꦺꦠꦧ꧀ꦧꦴ ꦤ ꦲꦺꦴꦤ꧀ꦠꦶ, ꦄꦡ ꦑꦺꦴ ꦄꦥꦏꦠꦠ꧀ꦠꦴꦥꦶ ‘‘ꦱꦕꦺ ꦢ꧀ꦮꦺ ꦥꦴꦫꦶꦮꦴꦱꦶꦏꦴ ꦒꦠꦛ꧀ꦜꦴꦤꦺ ꦄꦚ꧀ꦚꦩꦚ꧀ꦚꦁ ꦥꦱ꧀ꦱꦤ꧀ꦠꦶ, ꦈꦨꦺꦴꦲꦶ ꦄꦚ꧀ꦚꦩꦚ꧀ꦚꦱ꧀ꦱ ꦄꦴꦫꦺꦴꦕꦺꦠꦧ꧀ꦧ’’ꦤ꧀ꦠꦶ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦠ꧀ꦠꦴ. ꦥꦸꦧ꧀ꦧꦺ ꦄꦴꦫꦺꦴꦕꦶꦠꦴꦤꦩ꧀ꦥꦶ ꦄꦤꦴꦫꦺꦴꦕꦶꦠꦴꦤꦩ꧀ꦥꦶ ꦱꦤ꧀ꦠꦶꦏꦺ ꦄꦴꦫꦺꦴꦕꦺꦠ꧀ꦮꦴ ꦤꦶꦏ꧀ꦑꦶꦥꦶꦠꦧ꧀ꦧꦩꦺꦮ ‘‘ꦱꦕꦺ ꦱꦺꦴ ꦨꦶꦏ꧀ꦑꦸ ꦏꦺꦤꦕꦶꦢꦺꦮ ꦏꦫꦟꦷꦪꦺꦤ ꦥꦏ꧀ꦏꦤ꧀ꦠꦺꦴ ꦲꦺꦴꦠꦶ, ꦪꦁ ꦄꦚ꧀ꦚꦁ ꦱꦧ꧀ꦧꦥꦜꦩꦁ ꦥꦱ꧀ꦱꦠꦶ, ꦠꦱ꧀ꦱ ꦄꦴꦫꦺꦴꦕꦺꦠ꧀ꦮꦴ ꦤꦶꦏ꧀ꦑꦶꦥꦶꦠꦧ꧀ꦧ’’ꦤ꧀ꦠꦶ (ꦕꦹꦭ꦳ꦮ. ꦄꦛ꧀ꦜ. ꧑꧐꧒) ꦮꦸꦠ꧀ꦠꦠ꧀ꦠꦴ, ꦠꦱ꧀ꦩꦴ ꦠꦡꦴ ꦄꦏꦫꦺꦴꦤ꧀ꦠꦺꦥꦶ ꦱꦧ꧀ꦧꦺꦱꦁ ꦄꦴꦫꦺꦴꦕꦶꦠꦠ꧀ꦠꦴ ꦤꦠ꧀ꦡꦶ ꦢꦺꦴꦱꦺꦴ. ꦄꦥ꧀ꦥꦺꦏꦕ꧀ꦕꦺ ꦨꦶꦏ꧀ꦑꦹ ‘‘ꦥꦏꦠꦠ꧀ꦠꦱ꧀ꦱꦺꦮꦴꦪꦁ ꦄꦴꦫꦺꦴꦕꦤꦴ’’ꦠꦶ ꦩꦚ꧀ꦚꦩꦴꦤꦴ ꦱꦴꦪꦁ ꦮꦸꦝ꧀ꦞꦥꦛꦶꦥꦴꦛꦶꦪꦴ ꦮꦠ꧀ꦠꦁ ꦱꦩꦴꦢꦶꦪꦶꦠ꧀ꦮꦴ ꦄꦴꦫꦺꦴꦕꦺꦠ꧀ꦮꦴ ꦄꦠ꧀ꦠꦤꦺꦴ ꦱꦪꦤꦁ ꦥꦮꦶꦱꦶꦠ꧀ꦮꦴ ꦢ꧀ꦮꦴꦫꦗꦒ꧀ꦒꦤꦱꦪꦤꦱꦺꦴꦣꦤꦴꦢꦷꦤꦶ ꦏꦫꦺꦴꦤ꧀ꦠꦴ ꦄꦚ꧀ꦚꦺꦱꦁ ꦄꦴꦫꦺꦴꦕꦶꦠꦁ ꦤ ꦱꦸꦟꦤ꧀ꦠꦶ. ꦄꦥ꧀ꦥꦺꦏꦕ꧀ꦕꦺ ꦥꦴꦠꦺꦴ ꦱꦪꦁ ꦄꦴꦫꦺꦴꦕꦺꦠ꧀ꦮꦴ ꦤꦶꦏ꧀ꦑꦶꦥꦶꦠ꧀ꦮꦴ ꦄꦚ꧀ꦚꦺꦱꦁ ꦄꦴꦫꦺꦴꦕꦤꦁ ꦮꦴ ꦤꦶꦏ꧀ꦑꦶꦥꦤꦁ ꦮꦴ ꦄꦤꦴꦒꦩꦺꦠ꧀ꦮꦴ ꦨꦶꦏ꧀ꦑꦴꦕꦴꦫꦴꦢꦷꦤꦁ ꦄꦠ꧀ꦡꦴꦪ ꦒꦕ꧀ꦖꦤ꧀ꦠꦶ, ꦌꦮꦁ ꦏꦫꦺꦴꦤ꧀ꦠꦴꦤꦁ ꦠꦺꦱꦁ ꦄꦴꦫꦺꦴꦕꦤꦁ ꦌꦏꦕ꧀ꦕꦴꦤꦁ ꦄꦱꦸꦠꦨꦴꦮꦱꦩ꧀ꦨꦮꦠꦺꦴ ꦱꦴꦱꦔ꧀ꦏꦺꦴ ꦲꦺꦴꦠꦶ ꦥꦴꦫꦶꦮꦴꦱꦶꦏꦴꦤꦁ ꦄꦚ꧀ꦚꦩꦚ꧀ꦚꦴꦫꦺꦴꦕꦤꦱ꧀ꦱ ꦥꦏꦫꦟꦺꦱꦸ ꦄꦴꦒꦠꦠ꧀ꦠꦴ. ꦤ ꦏꦺꦮꦭꦁ ꦱꦴꦫꦠ꧀ꦡꦢꦷꦥꦤꦶꦪꦁꦪꦺꦮ, ꦄꦡ ꦑꦺꦴ ꦮꦗꦶꦫꦧꦸꦢ꧀ꦣꦶꦛꦷꦏꦴꦪꦩ꧀ꦥꦶ (ꦮꦗꦶꦫ. ꦛꦷ. ꦕꦹꦭ꦳ꦮꦒ꧀ꦒ ꧗꧖) ‘‘ꦱꦕꦺ ꦢ꧀ꦮꦺ ꦥꦴꦫꦶꦮꦴꦱꦶꦏꦴ ꦒꦠꦛ꧀ꦜꦴꦤꦺ ꦄꦚ꧀ꦚꦩꦚ꧀ꦚꦁ ꦥꦱ꧀ꦱꦤ꧀ꦠꦶ, ꦈꦨꦺꦴꦲꦶꦥꦶ ꦄꦚ꧀ꦚꦩꦚ꧀ꦚꦱ꧀ꦱ ꦄꦴꦫꦺꦴꦕꦺꦠꦧ꧀ꦧꦁ ꦄꦮꦶꦱꦺꦱꦺꦤ ‘ꦄꦴꦒꦤ꧀ꦠꦸꦏꦺꦤ ꦄꦴꦫꦺꦴꦕꦺꦠꦧ꧀ꦧꦁ, ꦄꦴꦒꦤ꧀ꦠꦸꦏꦱ꧀ꦱ ꦄꦴꦫꦺꦴꦕꦺꦠꦧ꧀ꦧ’ꦤ꧀ꦠꦶ ꦮꦸꦠ꧀ꦠꦠ꧀ꦠꦴ’’ꦠꦶ ꦮꦸꦠ꧀ꦠꦁ.

ꦠꦡꦴ ꦄꦥ꧀ꦥꦺꦏꦕ꧀ꦕꦺ ꦥꦏꦠꦠ꧀ꦠꦴ ꦨꦶꦏ꧀ꦑꦹ ꦥꦴꦫꦶꦮꦴꦱꦶꦏꦺꦱꦸ ꦨꦶꦏ꧀ꦑꦹꦱꦸ ꦱꦴꦪꦁ ꦮꦠ꧀ꦠꦱꦩꦴꦢꦴꦤꦠ꧀ꦡꦁ ꦥꦏꦠꦠ꧀ꦠꦱꦴꦭꦠꦺꦴ ꦤꦶꦏ꧀ꦑꦩꦶꦠ꧀ꦮꦴ ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦱꦪꦤꦱꦩꦷꦥꦁ ꦒꦠꦺꦱꦸ ꦄꦠ꧀ꦠꦤꦺꦴ ꦱꦪꦤꦥꦚ꧀ꦚꦴꦥꦤꦥꦄꦏ꧀ꦑꦴꦫꦜꦥꦤꦄꦚ꧀ꦚꦩꦚ꧀ꦚꦄꦴꦭꦴꦥꦱꦭ꧀ꦭꦴꦥꦏꦫꦟꦴꦢꦶꦮꦱꦺꦤ ꦄꦴꦭ꦳ꦺꦴꦭꦺꦤ꧀ꦠꦴ ꦥꦴꦫꦶꦮꦴꦱꦶꦏꦴꦤꦁ ꦮꦠ꧀ꦠꦴꦫꦺꦴꦕꦤꦁ ꦤ ꦱꦸꦟꦤ꧀ꦠꦶ, ꦤ ꦩꦤꦱꦶ ꦏꦫꦺꦴꦤ꧀ꦠꦶ. ꦄꦥ꧀ꦥꦺꦏꦕ꧀ꦕꦺ ꦥꦴꦠꦺꦴ ꦮꦠ꧀ꦠꦤꦶꦏ꧀ꦑꦶꦥꦤꦏꦴꦭꦺ ꦥꦴꦫꦶꦮꦴꦱꦶꦏꦨꦶꦏ꧀ꦑꦹꦱꦸ ꦮꦠ꧀ꦠꦴꦫꦺꦴꦕꦤꦮꦠ꧀ꦠꦤꦶꦏ꧀ꦑꦶꦥꦤꦴꦤꦶ ꦏꦫꦺꦴꦤ꧀ꦠꦺꦱꦸꦥꦶ ꦤꦶꦢ꧀ꦢꦴꦥꦱꦸꦠꦴ ꦲꦸꦠ꧀ꦮꦴ ꦤ ꦱꦸꦟꦤ꧀ꦠꦶ. ꦌꦮꦁ ꦏꦫꦺꦴꦤ꧀ꦠꦴꦤꦩ꧀ꦥꦶ ꦠꦺꦱꦁ ꦌꦏꦕ꧀ꦕꦴꦤꦁ ꦄꦱ꧀ꦱꦸꦠꦱꦩ꧀ꦨꦮꦠꦺꦴ ꦮꦠ꧀ꦠꦴꦫꦺꦴꦕꦤꦁ ꦱꦴꦱꦔ꧀ꦏꦁ ꦲꦺꦴꦠꦷꦠꦶ. ꦲꦺꦴꦠꦸ ꦱꦴꦱꦔ꧀ꦏꦁ, ꦱꦸꦟꦤ꧀ꦠꦴꦤꦁ ꦄꦱ꧀ꦱꦸꦠꦱꦩ꧀ꦨꦮꦺꦥꦶ ꦄꦴꦫꦺꦴꦕꦏꦴꦤꦁ ꦱꦩ꧀ꦩꦴꦄꦴꦫꦺꦴꦕꦤꦺꦤ ꦮꦠ꧀ꦠꦱ꧀ꦱ ꦥꦫꦶꦥꦸꦟ꧀ꦟꦠ꧀ꦠꦴ ꦏꦺꦴ ꦢꦺꦴꦱꦺꦴꦠꦶ ꦕꦺ? ꦄꦴꦫꦺꦴꦕꦏꦴꦤꦁ ꦱꦩ꧀ꦩꦴ ꦄꦴꦫꦺꦴꦕꦶꦠꦠ꧀ꦠꦴ ꦮꦠ꧀ꦠꦺ ꦥꦫꦶꦥꦸꦟ꧀ꦟꦺꦥꦶ ꦮꦠ꧀ꦠꦨꦺꦢꦢꦸꦏ꧀ꦏꦛꦠꦺꦴꦮ ꦮꦶꦩꦸꦠ꧀ꦠꦺꦴ ꦱꦶꦪꦴ, ꦤ ꦫꦠ꧀ꦠꦶꦕ꧀ꦖꦺꦢꦠꦺꦴ. ꦮꦸꦠ꧀ꦠꦚ꧀ꦲꦶ ꦱꦩꦤ꧀ꦠꦥꦴꦱꦴꦢꦶꦏꦴꦪꦁ (ꦕꦹꦭ꦳ꦮ. ꦄꦛ꧀ꦜ. ꧗꧖) ‘‘ꦱꦕꦺ ꦮꦴꦪꦩꦤ꧀ꦠꦺꦴꦥꦶ ꦱꦩ꧀ꦥꦴꦥꦸꦟꦶꦠꦸꦁ ꦮꦴ ꦱꦴꦮꦺꦠꦸꦁ ꦮꦴ ꦤ ꦱꦏ꧀ꦏꦺꦴꦠꦶ, ꦫꦠ꧀ꦠꦶꦕ꧀ꦖꦺꦢꦺꦴꦮ ꦲꦺꦴꦠꦶ, ꦤ ꦮꦠ꧀ꦠꦨꦺꦢꦢꦸꦏ꧀ꦏꦛ’’ꦤ꧀ꦠꦶ.

ꦄꦡꦚ꧀ꦚꦺ ꦨꦶꦏ꧀ꦑꦹ ꦮꦠ꧀ꦠꦁ ꦱꦩꦴꦢꦶꦪꦶꦠ꧀ꦮꦴ ꦫꦠ꧀ꦠꦶꦁ ꦤꦶꦥꦤ꧀ꦤꦴ ꦤꦶꦢ꧀ꦢꦴꦨꦴꦮꦺꦤ ꦩꦤꦸꦱ꧀ꦱꦱꦢ꧀ꦢꦩ꧀ꦥꦶ ꦱꦸꦟꦤ꧀ꦠꦶ, ꦨꦺꦫꦶꦄꦴꦢꦶꦱꦢ꧀ꦢꦩ꧀ꦥꦶ ꦱꦸꦟꦤ꧀ꦠꦶ, ꦱꦏꦛꦤꦴꦮꦴꦢꦶꦪꦴꦤꦱꦢ꧀ꦢꦩ꧀ꦥꦶ ꦱꦸꦟꦤ꧀ꦠꦶ, ꦠꦺ ꦠꦺꦤ ꦱꦢ꧀ꦢꦺꦤ ꦄꦴꦱꦔ꧀ꦏꦤ꧀ꦠꦶ ‘‘ꦨꦶꦏ꧀ꦑꦹꦤꦁ ꦤꦸ ꦑꦺꦴ ꦄꦪ’’ꦤ꧀ꦠꦶ, ꦠꦺ ꦠꦺꦤ ꦏꦴꦫꦟꦺꦤ ꦫꦠ꧀ꦠꦶꦕ꧀ꦖꦺꦢꦁ ꦩꦚ꧀ꦚꦤ꧀ꦠꦶ. ꦏꦱ꧀ꦩꦴ? ‘‘ꦄꦪꦚ꧀ꦕ ꦤꦺꦱꦁ ꦖꦠ꧀ꦠꦱꦢ꧀ꦢꦁ ꦮꦴ ꦈꦏ꧀ꦏꦴꦱꦶꦠꦱꦢ꧀ꦢꦁ ꦮꦴ ꦑꦶꦥꦶꦠꦱꦢ꧀ꦢꦁ ꦮꦴ ꦱꦸꦠ꧀ꦮꦴ ꦄꦴꦒꦤ꧀ꦠꦸꦏꦨꦴꦮꦁ ꦗꦴꦤꦴꦠꦶ, ꦒꦤ꧀ꦠ꧀ꦮꦴ ꦄꦴꦫꦺꦴꦕꦺꦠꦧ꧀ꦧꦁ. ꦒꦠꦏꦴꦭꦺ ꦗꦴꦤꦤ꧀ꦠꦺꦤꦥꦶ ꦄꦤꦸꦧꦤ꧀ꦣꦶꦠ꧀ꦮꦴ ꦄꦴꦫꦺꦴꦕꦺꦠꦧ꧀ꦧꦩꦺꦮ. ꦱꦩ꧀ꦥꦴꦥꦸꦟꦶꦠꦸꦁ ꦄꦱꦏ꧀ꦏꦺꦴꦤ꧀ꦠꦱ꧀ꦱ ꦫꦠ꧀ꦠꦶꦕ꧀ꦖꦺꦢꦺꦴꦮ ꦲꦺꦴꦠꦶ, ꦤ ꦮꦠ꧀ꦠꦨꦺꦢꦢꦸꦏ꧀ꦏꦛ’’ꦤ꧀ꦠꦶ (ꦕꦹꦭ꦳ꦮ. ꦄꦛ꧀ꦜ. ꧗꧖) ꦮꦸꦠ꧀ꦠꦠ꧀ꦠꦴꦠꦶ. ꦠꦺ ꦌꦮꦁ ꦱꦚ꧀ꦚꦴꦥꦺꦠꦧ꧀ꦧꦴ – ꦩꦴꦪꦱ꧀ꦩꦤ꧀ꦠꦺꦴ ꦌꦮꦁ ꦩꦚ꧀ꦚꦶꦠ꧀ꦡ, ꦤꦴꦪꦁ ꦥꦴꦜꦺꦴ ꦧꦲꦶꦱꦷꦩꦛ꧀ꦜꦮꦱꦺꦤ ꦮꦸꦠ꧀ꦠꦺꦴ, ꦄꦡ ꦑꦺꦴ ꦈꦥꦕꦴꦫꦱꦷꦩꦛ꧀ꦜꦮꦱꦺꦤ ꦮꦸꦠ꧀ꦠꦺꦴ. ꦮꦸꦠ꧀ꦠꦚ꧀ꦲꦶ ꦠꦠ꧀ꦡꦺꦮ ‘‘ꦪꦺꦥꦶ ꦄꦤ꧀ꦠꦺꦴꦮꦶꦲꦴꦫꦁ ꦄꦥ꧀ꦥꦮꦶꦱꦶꦠ꧀ꦮꦴ ꦈꦥꦕꦴꦫꦱꦷꦩꦁ ꦎꦏ꧀ꦏꦩꦶꦠ꧀ꦮꦴ ꦒꦕ꧀ꦖꦤ꧀ꦠꦷ’’ꦠꦶ. ꦠꦠ꧀ꦡꦥꦶ ꦄꦴꦒꦤ꧀ꦠꦸꦏꦨꦴꦮꦱ꧀ꦱ ꦗꦴꦤꦶꦠꦠ꧀ꦠꦴ ꦫꦠ꧀ꦠꦶꦕ꧀ꦖꦺꦢꦺꦴ ꦲꦺꦴꦠꦶ, ꦠꦱ꧀ꦩꦴ ꦢꦹꦫꦺꦱꦢ꧀ꦢꦱꦮꦤꦩꦠ꧀ꦠꦺꦤ ꦫꦠ꧀ꦠꦶꦕ꧀ꦖꦺꦢꦺꦴ ꦤꦠ꧀ꦡꦶ, ‘‘ꦄꦪꦁ ꦨꦶꦏ꧀ꦑꦹꦤꦁ ꦱꦢ꧀ꦢꦺꦴ, ꦄꦪꦁ ꦨꦶꦏ꧀ꦑꦹꦲꦶ ꦮꦴꦢꦶꦠꦨꦺꦫꦶꦓꦟ꧀ꦛꦴꦢꦶꦱꦢ꧀ꦢꦺꦴ, ꦄꦪꦁ ꦨꦶꦏ꧀ꦑꦹꦲꦶ ꦥꦴꦗꦶꦠꦱꦏꦛꦤꦴꦮꦴꦢꦶꦱꦢ꧀ꦢꦺꦴ’’ꦠꦶ ꦤꦶꦱꦶꦤ꧀ꦤꦛ꧀ꦜꦴꦤꦠꦺꦴ ꦗꦴꦤꦤ꧀ꦠꦺꦴꦪꦺꦮ ꦫꦠ꧀ꦠꦶꦕ꧀ꦖꦺꦢꦏꦫꦺꦴ ꦲꦺꦴꦠꦶ. ꦠꦺꦤꦴꦲ ‘‘ꦄꦴꦪꦱ꧀ꦩꦴ ꦏꦫꦮꦷꦏꦠꦶꦱ꧀ꦱꦠ꧀ꦡꦺꦫꦺꦴ ‘ꦱꦩꦟꦺꦴ ꦄꦪ’ꦤ꧀ꦠꦶ ꦮꦮꦠ꧀ꦡꦴꦤꦩꦺꦮ ꦥꦩꦴꦟ’’ꦤ꧀ꦠꦶ.

ꦢꦶꦮꦴ ꦢꦹꦫꦺ ꦒꦕ꧀ꦖꦤ꧀ꦠꦁ ꦗꦤꦏꦴꦪꦁ ꦢꦶꦱ꧀ꦮꦴꦥꦶ ‘‘ꦆꦩꦺ ꦨꦶꦏ꧀ꦑꦹ ꦤꦸ ꦑꦺꦴ’’ꦠꦶ ꦥꦫꦶꦏꦥ꧀ꦥꦺꦤ꧀ꦠꦴ ꦫꦠ꧀ꦠꦶꦕ꧀ꦖꦺꦢꦁ ꦩꦚ꧀ꦚꦤ꧀ꦠꦶ, ꦠꦩ꧀ꦥꦶ ꦄꦏꦴꦫꦟꦁ. ꦏꦱ꧀ꦩꦴ? ‘‘ꦨꦶꦏ꧀ꦑꦹ’’ꦠꦶ ꦮꦮꦠ꧀ꦡꦴꦤꦱ꧀ꦱ ꦄꦨꦴꦮꦴ. ꦮꦸꦠ꧀ꦠꦚ꧀ꦲꦶ ꦄꦛ꧀ꦜꦏꦡꦴꦪꦁ ‘‘ꦤꦢꦷꦄꦴꦢꦷꦱꦸ ꦤꦴꦮꦴꦪ ꦒꦕ꧀ꦖꦤ꧀ꦠꦩ꧀ꦥꦶ ꦥꦫꦠꦷꦫꦺ ꦜꦶꦠꦩ꧀ꦥꦶ ꦄꦴꦏꦴꦱꦺ ꦒꦕ꧀ꦖꦤ꧀ꦠꦩ꧀ꦥꦶ ꦥꦧ꧀ꦧꦠꦡꦭꦄꦫꦚ꧀ꦚꦴꦢꦷꦱꦸ ꦢꦹꦫꦺ ꦜꦶꦠꦩ꧀ꦥꦶ ꦨꦶꦏ꧀ꦑꦸꦁ ꦢꦶꦱ꧀ꦮꦴ ꦱꦕꦺ ‘ꦨꦶꦏ꧀ꦑꦹ’ꦠꦶ ꦮꦮꦠ꧀ꦡꦴꦤꦁ ꦄꦠ꧀ꦡꦶ, ꦤꦴꦮꦴꦢꦷꦲꦶ ꦮꦴ ꦒꦤ꧀ꦠ꧀ꦮꦴ ꦩꦲꦴꦱꦢ꧀ꦢꦁ ꦏꦠ꧀ꦮꦴ ꦮꦴ ꦮꦺꦒꦺꦤ ꦄꦤꦸꦧꦤ꧀ꦣꦶꦠ꧀ꦮꦴ ꦮꦴ ꦄꦴꦫꦺꦴꦕꦺꦠꦧ꧀ꦧ’’ꦤ꧀ꦠꦶ. ꦆꦠꦶ ꦨꦶꦏ꧀ꦑꦸꦁ ꦢꦶꦱ꧀ꦮꦴꦥꦶ ‘‘ꦨꦶꦏ꧀ꦑꦹ’’ꦠꦶ ꦮꦮꦠ꧀ꦡꦴꦤꦩꦺꦮ ꦥꦩꦴꦟꦁ. ꦄꦨꦶꦏ꧀ꦑꦸꦁ ꦥꦤ ‘‘ꦨꦶꦏ꧀ꦑꦹ’’ꦠꦶ ꦮꦮꦠ꧀ꦡꦴꦤꦺ ꦱꦤ꧀ꦠꦺꦥꦶ ꦮꦴ ꦄꦱꦤ꧀ꦠꦺꦥꦶ ꦮꦴ ꦏꦶꦁ ꦮꦠ꧀ꦠꦧ꧀ꦧꦁ ꦄꦠ꧀ꦡꦶ, ꦧꦲꦮꦺꦴ ꦥꦤ ꦨꦶꦏ꧀ꦑꦹ ꦆꦢꦁ ꦫꦹꦥꦢꦱ꧀ꦱꦤꦁ ꦱꦢ꧀ꦢꦱꦮꦤꦚ꧀ꦕ ꦄꦴꦱꦔ꧀ꦏꦤ꧀ꦠꦴ ‘‘ꦥꦨꦴꦠꦺ ꦱꦠꦶ ꦠꦁ ꦢ꧀ꦮꦪꦁ ꦨꦮꦺꦪ꧀ꦪ, ꦠꦱ꧀ꦩꦴ ꦩꦤꦸꦱ꧀ꦱꦴꦤꦁ ꦒꦩꦤꦏꦴꦭꦱꦢ꧀ꦢꦏꦫꦟꦏꦴꦭꦠꦺꦴ ꦥꦸꦧ꧀ꦧꦺꦪꦺꦮ ꦮꦠ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧ’’ꦤ꧀ꦠꦶ ꦩꦚ꧀ꦚꦩꦴꦤꦴ ꦄꦤꦸꦒ꧀ꦒꦠꦺꦪꦺꦮ ꦄꦫꦸꦟꦺ ꦮꦠ꧀ꦠꦁ ꦤꦶꦏ꧀ꦑꦶꦥꦤ꧀ꦠꦶ, ꦠꦢꦪꦸꦠ꧀ꦠꦁ ꦫꦠ꧀ꦠꦶꦕ꧀ꦖꦺꦢꦠ꧀ꦠꦴꦠꦶ.

ꦄꦡ ꦥꦤ ꦮꦶꦤꦪꦣꦫꦺꦤ ‘‘ꦏꦶꦠ꧀ꦠꦏꦴ ꦠꦺ ꦄꦴꦥꦠ꧀ꦠꦶꦪꦺꦴ, ꦖꦴꦢꦺꦱꦶ, ꦏꦷꦮꦠꦷꦲꦁ ꦥꦛꦶꦕ꧀ꦖꦴꦢꦺꦱꦷ’’ꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ ‘‘ꦄꦲꦁ, ꦨꦤ꧀ꦠꦺ, ꦄꦴꦥꦠ꧀ꦠꦶꦥꦫꦶꦪꦤ꧀ꦠꦁ ꦤ ꦗꦴꦤꦴꦩꦶ, ꦫꦠ꧀ꦠꦶꦥꦫꦶꦪꦤ꧀ꦠꦁ ꦤ ꦗꦴꦤꦴꦩꦶ, ꦄꦴꦥꦠ꧀ꦠꦶꦥꦫꦶꦪꦤ꧀ꦠꦁ ꦤꦱ꧀ꦱꦫꦴꦩꦶ, ꦫꦠ꧀ꦠꦶꦥꦫꦶꦪꦤ꧀ꦠꦁ ꦤꦱ꧀ꦱꦫꦴꦩꦶ, ꦄꦴꦥꦠ꧀ꦠꦶꦥꦫꦶꦪꦤ꧀ꦠꦺ ꦮꦺꦩꦠꦶꦏꦺꦴ, ꦫꦠ꧀ꦠꦶꦥꦫꦶꦪꦤ꧀ꦠꦺ ꦮꦺꦩꦠꦶꦏꦺꦴ’’ꦠꦶ ꦮꦸꦠ꧀ꦠꦺ ‘‘ꦄꦪꦁ ꦨꦶꦏ꧀ꦑꦸ ꦱꦸꦢ꧀ꦣꦤ꧀ꦠꦥꦫꦶꦮꦴꦱꦴꦫꦲꦺꦴ’’ꦠꦶ ꦚꦠ꧀ꦮꦴ ꦠꦱ꧀ꦱꦥꦶ ꦢꦸꦮꦶꦣꦠ꧀ꦠꦴ ꦕꦹꦭ꦳ꦱꦸꦢ꧀ꦣꦤ꧀ꦠꦩꦲꦴꦱꦸꦢ꧀ꦣꦤ꧀ꦠꦮꦱꦺꦤ ‘‘ꦠꦺꦱꦸ ꦄꦪꦁ ꦨꦶꦏ꧀ꦑꦸ ꦆꦩꦱ꧀ꦱ ꦄꦫꦲꦺꦴ’’ꦠꦶ ꦚꦴꦥꦤꦠ꧀ꦡꦁ ꦈꦥꦱꦩ꧀ꦥꦢꦠꦺꦴ ꦥꦛ꧀ꦜꦴꦪ ꦄꦤꦸꦭꦺꦴꦩꦏ꧀ꦏꦩꦺꦤ ꦮꦴ ꦄꦴꦫꦺꦴꦕꦶꦠꦢꦶꦮꦱꦠꦺꦴ ꦥꦛ꧀ꦜꦴꦪ ꦥꦛꦶꦭꦺꦴꦩꦏ꧀ꦏꦩꦺꦤ ꦮꦴ ‘‘ꦏꦶꦠ꧀ꦠꦏꦁ ꦏꦴꦭꦁ ꦠ꧀ꦮꦁ ꦄꦴꦫꦺꦴꦕꦤꦄꦴꦮꦶꦏꦫꦟꦴꦢꦶꦮꦱꦺꦤ ꦱꦸꦢ꧀ꦣꦺꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦄꦴꦩ ꦨꦤ꧀ꦠꦺ, ꦌꦠ꧀ꦠꦏꦁ ꦏꦴꦭꦁ ꦄꦲꦁ ꦱꦸꦢ꧀ꦣꦺꦴꦩ꧀ꦲꦷ’’ꦠꦶ ꦮꦸꦠ꧀ꦠꦺ ‘‘ꦄꦪꦁ ꦨꦶꦏ꧀ꦑꦸ ꦌꦏꦕ꧀ꦕꦁ ꦫꦠ꧀ꦠꦶꦥꦫꦶꦪꦤ꧀ꦠꦁ ꦗꦴꦤꦴꦠꦶ, ꦠꦱ꧀ꦩꦴ ꦕꦹꦭ꦳ꦱꦸꦢ꧀ꦣꦤ꧀ꦠꦴꦫꦲꦺꦴ’’ꦠꦶ ꦚꦠ꧀ꦮꦴ ꦠꦱ꧀ꦱ ꦱꦸꦢ꧀ꦣꦏꦴꦭꦁ ꦄꦥꦤꦺꦠ꧀ꦮꦴ ꦄꦱꦸꦢ꧀ꦣꦏꦴꦭꦮꦱꦺꦤ ꦥꦫꦶꦪꦤ꧀ꦠꦁ ꦏꦠ꧀ꦮꦴ ꦕꦹꦭ꦳ꦱꦸꦢ꧀ꦣꦤ꧀ꦠꦥꦫꦶꦮꦴꦱꦺꦴ ꦢꦴꦠꦧ꧀ꦧꦺꦴ. ꦄꦪꦁ ꦈꦢ꧀ꦣꦩ꧀ꦥꦶ ꦄꦴꦫꦺꦴꦲꦠꦶ, ꦄꦣꦺꦴꦥꦶ ꦎꦫꦺꦴꦲꦠꦶ. ꦪꦺꦴ ꦥꦤ ꦄꦤꦸꦭꦺꦴꦩꦮꦱꦺꦤ ꦮꦴ ꦥꦛꦶꦭꦺꦴꦩꦮꦱꦺꦤ ꦮꦴ ꦥꦸꦕ꧀ꦖꦶꦪꦩꦴꦤꦺꦴ ‘‘ꦱꦏꦭꦩ꧀ꦥꦶ ꦫꦠ꧀ꦠꦶꦥꦫꦶꦪꦤ꧀ꦠꦁ ꦄꦲꦁ ꦤ ꦗꦴꦤꦴꦩꦶ ꦤꦱ꧀ꦱꦫꦴꦩꦶ, ꦮꦺꦩꦠꦶꦏꦺꦴ ꦲꦺꦴꦩꦷ’’ꦠꦶ ꦮꦸꦠ꧀ꦠꦺ ‘‘ꦄꦪꦁ ꦨꦶꦏ꧀ꦑꦸ ꦱꦏꦭꦩ꧀ꦥꦶ ꦫꦠ꧀ꦠꦶꦥꦫꦶꦪꦤ꧀ꦠꦁ ꦤ ꦗꦴꦤꦴꦠꦶ, ꦠꦱ꧀ꦩꦴ ꦩꦲꦴꦱꦸꦢ꧀ꦣꦤ꧀ꦠꦴꦫꦲꦺꦴ’’ꦠꦶ ꦚꦠ꧀ꦮꦴ ꦠꦱ꧀ꦱ ꦈꦥꦱꦩ꧀ꦥꦢꦠꦺꦴ ꦥꦛ꧀ꦜꦴꦪ ꦪꦴꦮ ꦮꦠ꧀ꦠꦱꦩꦴꦢꦴꦤꦴ ꦌꦠ꧀ꦠꦏꦁ ꦏꦴꦭꦁ ꦥꦫꦶꦪꦤ꧀ꦠꦁ ꦏꦠ꧀ꦮꦴ ꦩꦲꦴꦱꦸꦢ꧀ꦣꦤ꧀ꦠꦥꦫꦶꦮꦴꦱꦺꦴ ꦢꦴꦠꦧ꧀ꦧꦺꦴ. ꦈꦢ꧀ꦣꦁꦄꦴꦫꦺꦴꦲꦤꦄꦣꦺꦴꦎꦫꦺꦴꦲꦤꦨꦴꦮꦺꦴ ꦥꦤꦺꦱꦁ ꦄꦛ꧀ꦜꦏꦡꦴꦪꦁ (ꦕꦹꦭ꦳ꦮ. ꦄꦛ꧀ꦜ. ꧑꧐꧒) ꦮꦸꦠ꧀ꦠꦺꦴꦪꦺꦮ. ꦆꦠꦺꦴ ꦥꦫꦩ꧀ꦥꦶ ꦮꦶꦣꦴꦤꦁ ꦄꦛ꧀ꦜꦏꦡꦴꦪꦁ ꦄꦴꦒꦠꦤꦪꦺꦤꦺꦮ ꦢꦛ꧀ꦜꦧ꧀ꦧꦁ.

ꦆꦢꦴꦤꦶ ꦥꦤ ꦧꦲꦮꦺꦴ ꦨꦶꦏ꧀ꦑꦹ ‘‘ꦄꦪꦁ ꦕꦹꦭ꦳ꦱꦸꦢ꧀ꦣꦤ꧀ꦠꦴꦫꦲꦺꦴ, ꦄꦪꦁ ꦩꦲꦴꦱꦸꦢ꧀ꦣꦤ꧀ꦠꦴꦫꦲꦺꦴ’’ꦠꦶ ꦄꦮꦶꦕꦶꦤꦤ꧀ꦠꦴ ꦄꦤ꧀ꦠꦺꦴꦏꦩ꧀ꦩꦮꦴꦕꦴꦪꦁ ‘‘ꦄꦴꦥꦠ꧀ꦠꦶꦥꦫꦶꦪꦤ꧀ꦠꦁ ꦤ ꦗꦴꦤꦴꦠꦶ, ꦫꦠ꧀ꦠꦶꦥꦫꦶꦪꦤ꧀ꦠꦁ ꦤ ꦗꦴꦤꦴꦠꦶ, ꦄꦴꦥꦠ꧀ꦠꦶꦥꦫꦶꦪꦤ꧀ꦠꦁ ꦤꦱ꧀ꦱꦫꦠꦶ, ꦫꦠ꧀ꦠꦶꦥꦫꦶꦪꦤ꧀ꦠꦁ ꦤꦱ꧀ꦱꦫꦠꦶ, ꦄꦴꦥꦠ꧀ꦠꦶꦥꦫꦶꦪꦤ꧀ꦠꦺ ꦮꦺꦩꦠꦶꦏꦺꦴ, ꦫꦠ꧀ꦠꦶꦥꦫꦶꦪꦤ꧀ꦠꦺ ꦮꦺꦩꦠꦶꦏꦺꦴ’’ꦠꦶ ꦄꦮꦶꦱꦺꦱꦮꦕꦤꦩꦺꦮ ꦩꦤꦱꦶ ꦏꦫꦺꦴꦤ꧀ꦠꦴ ‘‘ꦆꦩꦴꦪ ꦏꦩ꧀ꦩꦮꦴꦕꦴꦪ ꦢꦶꦤ꧀ꦤꦁ ꦱꦸꦢ꧀ꦣꦤ꧀ꦠꦥꦫꦶꦮꦴꦱꦁ ꦒꦲꦺꦠ꧀ꦮꦴ ꦥꦚ꧀ꦕꦴꦲꦩꦠ꧀ꦠꦁ ꦮꦴ ꦢꦱꦴꦲꦩꦠ꧀ꦠꦁ ꦮꦴ ꦥꦫꦶꦮꦱꦶꦠ꧀ꦮꦴ ꦄꦥꦫꦶꦪꦤ꧀ꦠꦫꦠ꧀ꦠꦶꦥꦛꦶꦕ꧀ꦖꦴꦢꦶꦠꦴꦲꦶ ꦄꦥꦫꦶꦪꦤ꧀ꦠꦴꦲꦶ ꦄꦴꦥꦠ꧀ꦠꦷꦲꦶ ꦩꦺꦴꦏ꧀ꦑꦺꦴ ꦲꦺꦴꦠꦷ’’ꦠꦶ ꦩꦚ꧀ꦚꦤ꧀ꦠꦴ ꦥꦚ꧀ꦕꦴꦲꦩꦠ꧀ꦠꦁ ꦮꦴ ꦢꦱꦴꦲꦩꦠ꧀ꦠꦁ ꦮꦴ ꦥꦫꦶꦮꦱꦶꦠ꧀ꦮꦴ ꦩꦴꦤꦠ꧀ꦠꦁ ꦪꦴꦕꦤ꧀ꦠꦶ, ꦌꦮꦁ ꦏꦫꦺꦴꦤ꧀ꦠꦴ ꦠꦺ ꦨꦶꦏ꧀ꦑꦹ ꦱꦲꦱ꧀ꦱꦏ꧀ꦑꦠ꧀ꦠꦸꦁ ꦥꦫꦶꦮꦱꦤ꧀ꦠꦴꦥꦶ ꦄꦴꦥꦠ꧀ꦠꦶꦠꦺꦴ ꦤ ꦩꦸꦕ꧀ꦕꦺꦪ꧀ꦪꦸꦁ. ꦏꦱ꧀ꦩꦴꦠꦶ ꦕꦺ? ꦥꦴꦭ꦳ꦶꦪꦴ ꦕ ꦄꦛ꧀ꦜꦏꦡꦴꦪ ꦕ ꦮꦶꦫꦸꦗ꧀ꦙꦤꦠꦺꦴ. ꦮꦸꦠ꧀ꦠꦚ꧀ꦲꦶ ꦥꦴꦭ꦳ꦶꦪꦁ (ꦥꦴꦫꦴ. ꧔꧔꧒) ‘‘ꦪꦴꦮꦠꦷꦲꦁ ꦗꦴꦤꦁ ꦥꦛꦶꦕ꧀ꦖꦴꦢꦺꦠꦶ, ꦠꦴꦮꦠꦷꦲꦁ ꦠꦺꦤ ꦨꦶꦏ꧀ꦑꦸꦤꦴ ꦄꦏꦴꦩꦴ ꦥꦫꦶꦮꦠ꧀ꦡꦧ꧀ꦧꦁ. ꦥꦫꦶꦮꦸꦠ꧀ꦡꦥꦫꦶꦮꦴꦱꦺꦤ ꦨꦶꦏ꧀ꦑꦸꦤꦴ ꦈꦠ꧀ꦠꦫꦶ ꦖꦴꦫꦠ꧀ꦠꦁ ꦨꦶꦏ꧀ꦑꦸꦩꦴꦤꦠ꧀ꦠꦴꦪ ꦥꦛꦶꦥꦗ꧀ꦗꦶꦠꦧ꧀ꦧꦁ. ꦕꦶꦟ꧀ꦟꦩꦴꦤꦠ꧀ꦠꦺꦴ ꦨꦶꦏ꧀ꦑꦸ ꦪꦠ꧀ꦡ ꦱꦶꦪꦴ ꦮꦷꦱꦠꦶꦒꦟꦺꦴ ꦨꦶꦏ꧀ꦑꦸꦱꦔ꧀ꦓꦺꦴ, ꦠꦠ꧀ꦡ ꦱꦺꦴ ꦨꦶꦏ꧀ꦑꦸ ꦄꦧ꧀ꦨꦺꦠꦧ꧀ꦧꦺꦴ’’ꦠꦶ, ꦠꦱ꧀ꦩꦴ ꦥꦛꦶꦕ꧀ꦖꦤ꧀ꦤꦢꦶꦮꦱꦩꦠ꧀ꦠꦁ ꦄꦥꦫꦶꦮꦱꦶꦠ꧀ꦮꦴ ꦩꦴꦤꦠ꧀ꦠꦴꦫꦲꦺꦴ ꦤꦴꦩ ꦤ ꦲꦺꦴꦠꦶ, ꦄꦩꦴꦤꦠ꧀ꦠꦴꦫꦲꦱ꧀ꦱ ꦩꦴꦤꦠ꧀ꦠꦢꦴꦤꦁ ꦤ ꦫꦸꦲꦠꦶ, ꦄꦕꦶꦟ꧀ꦟꦩꦴꦤꦠ꧀ꦠꦺꦴ ꦄꦧ꧀ꦨꦴꦤꦴꦫꦲꦺꦴ ꦤ ꦲꦺꦴꦠꦶ, ꦄꦤꦧ꧀ꦨꦴꦤꦴꦫꦲꦱ꧀ꦱ ꦄꦧ꧀ꦨꦴꦤꦁ ꦤ ꦫꦸꦲꦠꦶ, ꦄꦤꦧ꧀ꦨꦶꦠꦺꦴ ꦨꦶꦏ꧀ꦑꦸ ꦄꦴꦥꦠ꧀ꦠꦶꦩꦸꦠ꧀ꦠꦺꦴ ꦥꦏꦠꦠ꧀ꦠꦺꦴ ꦤ ꦲꦺꦴꦠꦷꦠꦶ ꦄꦪꦩꦺꦠ꧀ꦡ ꦨꦒꦮꦠꦺꦴ ꦄꦣꦶꦥ꧀ꦥꦴꦪꦺꦴ.

ꦄꦛ꧀ꦜꦏꦡꦴꦪꦁ (ꦕꦹꦭ꦳ꦮ. ꦄꦛ꧀ꦜ. ꧑꧐꧒) ꦥꦤ ꦕꦹꦭ꦳ꦱꦸꦢ꧀ꦣꦤ꧀ꦠꦺ ‘‘ꦠꦁ ꦒꦲꦺꦠ꧀ꦮꦴ ꦥꦫꦶꦮꦱꦤ꧀ꦠꦺꦤ ꦪꦠ꧀ꦠꦏꦁ ꦏꦴꦭꦁ ꦄꦠ꧀ꦠꦤꦺꦴ ꦱꦸꦢ꧀ꦣꦶꦁ ꦗꦴꦤꦴꦠꦶ, ꦠꦠ꧀ꦠꦏꦁ ꦄꦥꦤꦺꦠ꧀ꦮꦴ ꦄꦮꦱꦺꦱꦁ ꦩꦴꦱꦁ ꦮꦴ ꦢ꧀ꦮꦶꦩꦴꦱꦁ ꦮꦴ ꦥꦫꦶꦮꦱꦶꦠꦧ꧀ꦧ’’ꦤ꧀ꦠꦶ, ꦩꦲꦴꦱꦸꦢ꧀ꦣꦤ꧀ꦠꦺ ‘‘ꦠꦁ ꦒꦲꦺꦠ꧀ꦮꦴ ꦒꦲꦶꦠꦢꦶꦮꦱꦠꦺꦴ ꦪꦴꦮ ꦈꦥꦱꦩ꧀ꦥꦢꦢꦶꦮꦱꦺꦴ, ꦠꦴꦮ ꦫꦠ꧀ꦠꦶꦪꦺꦴ ꦒꦟꦺꦠ꧀ꦮꦴ ꦥꦫꦶꦮꦱꦶꦠꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦁ, ꦠꦱ꧀ꦩꦴ ꦥꦛꦶꦕ꧀ꦖꦤ꧀ꦤꦫꦠ꧀ꦠꦶꦥ꧀ꦥꦩꦴꦟꦁ ꦥꦫꦶꦮꦱꦤ꧀ꦠꦺꦴꦪꦺꦮ ꦩꦴꦤꦠ꧀ꦠꦴꦫꦲꦺꦴ ꦲꦺꦴꦠꦶ, ꦤ ꦥꦚ꧀ꦕꦴꦲꦢꦱꦴꦲꦫꦠ꧀ꦠꦶꦥ꧀ꦥꦩꦴꦟꦩꦠ꧀ꦠꦁ ꦥꦫꦶꦮꦱꦤ꧀ꦠꦺꦴꦠꦶ ꦄꦪꦁ ꦄꦛ꧀ꦜꦏꦡꦴꦕꦫꦶꦪꦴꦤꦁ ꦄꦣꦶꦥ꧀ꦥꦴꦪꦺꦴ. ꦠꦺꦤꦺꦮ ꦕ ꦏꦴꦫꦟꦺꦤ ꦢꦺꦱꦤꦴꦄꦴꦫꦺꦴꦕꦤꦴꦢꦷꦲꦶ ꦱꦧ꧀ꦧꦏꦴꦭꦁ ꦄꦴꦥꦠ꧀ꦠꦶꦁ ꦱꦺꦴꦣꦺꦠ꧀ꦮꦴ ꦮꦱꦤ꧀ꦠꦴꦤꦁ ꦭꦗ꧀ꦗꦷꦥꦺꦱꦭꦴꦤꦁ ꦱꦶꦏ꧀ꦑꦴꦏꦴꦩꦴꦤꦁ ꦨꦶꦏ꧀ꦑꦹꦤꦁ ꦱꦸꦢ꧀ꦣꦤ꧀ꦠꦥꦫꦶꦮꦴꦱꦁ ꦢꦴꦠꦸꦁ ꦄꦪꦸꦠ꧀ꦠꦫꦹꦥꦺꦴ, ꦢꦺꦱꦤꦴꦄꦴꦫꦺꦴꦕꦤꦴꦢꦷꦲꦶ ꦄꦴꦥꦠ꧀ꦠꦶꦁ ꦄꦱꦺꦴꦣꦺꦠ꧀ꦮꦴ ꦥꦩꦴꦢꦮꦱꦺꦤ ꦕꦶꦫꦏꦴꦭꦁ ꦮꦱꦤ꧀ꦠꦴꦤꦁ ꦗꦤꦥꦢꦮꦴꦱꦶꦏꦴꦢꦷꦤꦁ ꦢꦴꦠꦸꦁ ꦪꦸꦠ꧀ꦠꦫꦹꦥꦺꦴꦠꦶ ꦮꦺꦢꦶꦠꦧ꧀ꦧꦁ. ꦌꦠ꧀ꦡꦴꦥꦶ ꦄꦮꦱꦺꦱꦮꦶꦤꦶꦕ꧀ꦖꦪꦺꦴ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦺꦴ.

ꦄꦡ ꦥꦤ ꦮꦶꦤꦪꦣꦫꦺꦤ ‘‘ꦠ꧀ꦮꦁ, ꦄꦴꦮꦸꦱꦺꦴ, ꦏꦠꦫꦄꦴꦥꦠ꧀ꦠꦶꦁ ꦄꦴꦥꦤ꧀ꦤꦺꦴ, ꦏꦠꦶ ꦫꦠ꧀ꦠꦶꦪꦺꦴ ꦠꦺ ꦖꦴꦢꦶꦠꦴ’’ꦠꦶ ꦥꦸꦛ꧀ꦜꦺꦴ ‘‘ꦄꦲꦁ, ꦨꦤ꧀ꦠꦺ, ꦱꦔ꧀ꦓꦴꦢꦶꦱꦺꦱꦁ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦶꦠ꧀ꦮꦴ ꦥꦏ꧀ꦑꦩꦠ꧀ꦠꦁ ꦥꦛꦶꦕ꧀ꦖꦴꦢꦶꦠꦴ, ꦠꦺꦤꦴꦲꦁ ꦱꦔ꧀ꦓꦁ ꦥꦏ꧀ꦑꦥꦫꦶꦮꦴꦱꦁ ꦪꦴꦕꦶꦠ꧀ꦮꦴ ꦱꦔ꧀ꦓꦺꦤ ꦢꦶꦤ꧀ꦤꦺ ꦥꦏ꧀ꦑꦥꦫꦶꦮꦴꦱꦺ ꦥꦫꦶꦮꦱꦶꦠ꧀ꦮꦴ ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦺꦴꦮ ꦲꦸꦠ꧀ꦮꦴ ꦄꦤ꧀ꦠꦫꦴ ꦱꦔ꧀ꦓꦴꦢꦶꦱꦺꦱꦴꦥꦠ꧀ꦠꦶꦁ ꦄꦴꦥꦗ꧀ꦗꦶꦠ꧀ꦮꦴ ꦥꦚ꧀ꦕꦴꦲꦩꦠ꧀ꦠꦁ ꦖꦴꦢꦶꦠꦴ’’ꦠꦶ ꦮꦸꦠ꧀ꦠꦺ ‘‘ꦄꦪꦁ ꦨꦶꦏ꧀ꦑꦸ ꦱꦩꦺꦴꦣꦴꦤꦥꦫꦶꦮꦴꦱꦴꦫꦲꦺꦴ, ꦠꦷꦱꦸ ꦕ ꦱꦩꦺꦴꦣꦴꦤꦥꦫꦶꦮꦴꦱꦺꦱꦸ ꦎꦣꦴꦤꦱꦩꦺꦴꦣꦴꦤꦴꦫꦲꦺꦴ’’ꦠꦶ ꦚꦠ꧀ꦮꦴ ‘‘ꦠꦺꦤ ꦲꦶ ꦨꦶꦏ꧀ꦑꦸ ꦠ꧀ꦮꦁ ꦩꦹꦭꦴꦪꦥꦛꦶꦏꦱ꧀ꦱꦤꦴꦫꦲꦺꦴ’’ꦠꦶ ꦮꦠ꧀ꦮꦴ ꦠꦁ ꦩꦹꦭꦴꦪ ꦥꦛꦶꦏꦱ꧀ꦱꦶꦠ꧀ꦮꦴ ꦥꦫꦶꦮꦸꦠ꧀ꦡꦢꦶꦮꦱꦺ ꦄꦢꦶꦮꦱꦺ ꦏꦠ꧀ꦮꦴ ꦄꦤ꧀ꦠꦫꦴ ꦥꦛꦶꦕ꧀ꦖꦤ꧀ꦤꦺ ꦥꦚ꧀ꦕ ꦢꦶꦮꦱꦺ ꦩꦹꦭꦴꦥꦠ꧀ꦠꦶꦪꦴ ꦥꦛꦶꦕ꧀ꦖꦤ꧀ꦤꦺꦱꦸ ꦢꦶꦮꦱꦺꦱꦸ ꦱꦩꦺꦴꦣꦴꦤꦺꦠ꧀ꦮꦴ ꦎꦣꦴꦤꦱꦩꦺꦴꦣꦴꦤꦺꦴ ꦢꦴꦠꦧ꧀ꦧꦺꦴ. ꦆꦠꦺꦴ ꦥꦫꦴꦤꦶ ꦎꦣꦴꦤꦱꦩꦺꦴꦣꦴꦤꦺ ꦮꦠ꧀ꦠꦧ꧀ꦧꦮꦕꦤꦴꦤꦶ ꦥꦴꦭ꦳ꦶꦪꦁ ꦄꦛ꧀ꦜꦏꦡꦴꦪꦚ꧀ꦕ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦴꦤꦶ.

ꦄꦡ ꦥꦤ ꦮꦶꦤꦪꦣꦫꦺꦤ ꦥꦸꦛ꧀ꦜꦺꦴ ‘‘ꦄꦲꦁ, ꦨꦤ꧀ꦠꦺ, ꦱꦩ꧀ꦧꦲꦸꦭꦴ ꦱꦔ꧀ꦓꦴꦢꦶꦱꦺꦱꦴ ꦄꦴꦥꦠ꧀ꦠꦶꦪꦺꦴ ꦄꦴꦥꦗ꧀ꦗꦶꦁ, ꦱꦩ꧀ꦧꦲꦸꦭꦴ ꦄꦴꦥꦠ꧀ꦠꦶꦪꦺꦴ ꦌꦏꦴꦲꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴ…ꦥꦺ… ꦱꦩ꧀ꦧꦲꦸꦭꦴ ꦄꦴꦥꦠ꧀ꦠꦶꦪꦺꦴ ꦢꦱꦴꦲꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴ’’ꦠꦶ ꦮꦸꦠ꧀ꦠꦺ ‘‘ꦄꦪꦁ ꦨꦶꦏ꧀ꦑꦸ ꦄꦒ꧀ꦓꦱꦩꦺꦴꦣꦴꦤꦴꦫꦲꦺꦴ’’ꦠꦶ ꦚꦠ꧀ꦮꦴ ꦠꦴꦱꦁ ꦄꦴꦥꦠ꧀ꦠꦷꦤꦁ ꦪꦴ ꦄꦴꦥꦠ꧀ꦠꦶꦪꦺꦴ ꦕꦶꦫꦠꦫꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴ, ꦠꦴꦱꦁ ꦄꦒ꧀ꦓꦺꦤ ꦱꦩꦺꦴꦣꦴꦤꦥꦫꦶꦮꦴꦱꦺꦴ ꦢꦴꦠꦧ꧀ꦧꦺꦴ. ꦠꦠ꧀ꦫꦺꦮꦁ ꦮꦢꦤ꧀ꦠꦶ – ‘‘ꦪꦴ ꦄꦴꦥꦠ꧀ꦠꦶꦪꦺꦴ ꦕꦶꦫꦠꦫꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴ, ꦠꦴꦱꦁ ꦄꦒ꧀ꦓꦺꦤ ꦱꦩꦺꦴꦣꦴꦤꦥꦫꦶꦮꦴꦱꦺꦴ ꦢꦴꦠꦧ꧀ꦧꦺꦴ’’ꦠꦶ ꦮꦸꦠ꧀ꦠꦺꦴ, ꦌꦮꦁ ꦱꦤ꧀ꦠꦺ ꦥꦏ꧀ꦑꦥ꧀ꦥꦛꦶꦕ꧀ꦖꦤ꧀ꦤꦩꦴꦱꦥ꧀ꦥꦛꦶꦕ꧀ꦖꦤ꧀ꦤꦴꦢꦷꦱꦸ ꦏꦡꦤ꧀ꦠꦶ? ꦠꦺꦱꦸꦥꦶ ‘‘ꦪꦴ ꦄꦴꦥꦠ꧀ꦠꦶꦪꦺꦴ ꦥꦏ꧀ꦑꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴ, ꦪꦴ ꦄꦴꦥꦠ꧀ꦠꦶꦪꦺꦴ ꦩꦴꦱꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴ’’ꦠꦶ ꦮꦠ꧀ꦠꦧ꧀ꦧꦺꦴꦠꦶ. ꦪꦢꦶ ꦌꦮꦁ ꦥꦴꦭ꦳ꦶꦮꦶꦫꦺꦴꦣꦺꦴ ꦄꦴꦥꦗ꧀ꦗꦠꦶ. ꦥꦴꦭ꦳ꦶꦪꦚ꧀ꦲꦶ ꦢꦱꦴꦲꦥ꧀ꦥꦛꦶꦕ꧀ꦖꦤ꧀ꦤꦥꦫꦶꦪꦺꦴꦱꦴꦤꦴ ꦌꦮ ꦄꦴꦥꦠ꧀ꦠꦶ ꦢꦱ꧀ꦱꦶꦠꦴ, ꦤ ꦥꦏ꧀ꦑꦥ꧀ꦥꦛꦶꦕ꧀ꦖꦤ꧀ꦤꦩꦴꦱꦥ꧀ꦥꦛꦶꦕ꧀ꦖꦤ꧀ꦤꦴꦢꦪꦺꦴꦠꦶ? ꦱꦕ꧀ꦕꦁ, ꦥꦴꦭ꦳ꦶꦪꦁ ꦠꦡꦴꦢꦱ꧀ꦱꦤꦁ ꦥꦤ ꦤꦪꦢꦱ꧀ꦱꦤꦩꦠ꧀ꦠꦁ. ꦠꦡꦴ ꦲꦶ ꦮꦸꦠ꧀ꦠꦁ ꦄꦛ꧀ꦜꦏꦡꦴꦪꦁ (ꦕꦹꦭ꦳ꦮ. ꦄꦛ꧀ꦜ. ꧑꧐꧒) ‘‘ꦥꦚ꧀ꦕꦢꦱ ꦢꦶꦮꦱꦴꦤꦶ ꦥꦛꦶꦕ꧀ꦖꦤ꧀ꦤꦴꦪ ‘ꦥꦏ꧀ꦑꦥ꧀ꦥꦛꦶꦕ꧀ꦖꦤ꧀ꦤ’ꦤ꧀ꦠꦶ ꦮꦠ꧀ꦮꦴ ꦪꦺꦴꦗꦤꦴ ꦏꦴꦠꦧ꧀ꦧꦴ…ꦥꦺ… ꦌꦮꦁ ꦪꦴꦮ ꦱꦛ꧀ꦜꦶꦱꦁꦮꦕ꧀ꦖꦫꦁ, ꦄꦠꦶꦫꦺꦏꦱꦛ꧀ꦜꦶꦱꦁꦮꦕ꧀ꦖꦫꦥ꧀ꦥꦛꦶꦕ꧀ꦖꦤ꧀ꦤꦤ꧀ꦠꦶ ꦮꦴ ꦠꦠꦺꦴ ꦮꦴ ꦨꦶꦪ꧀ꦪꦺꦴꦥꦶ ꦮꦠ꧀ꦮꦴ ꦪꦺꦴꦗꦤꦴ ꦏꦴꦠꦧ꧀ꦧꦴ’’ꦠꦶ. ꦩꦲꦴꦥꦢꦸꦩꦠ꧀ꦡꦺꦫꦺꦤꦥꦶ ꦮꦸꦠ꧀ꦠꦁ ‘‘ꦄꦪꦁ ꦱꦩꦸꦕ꧀ꦕꦪꦏ꧀ꦑꦤ꧀ꦣꦏꦺꦴ ꦤꦴꦩ ꦧꦸꦢ꧀ꦣꦴꦤꦁ ꦜꦶꦠꦏꦴꦭꦱꦢꦶꦱꦺꦴ, ꦄꦴꦥꦠ꧀ꦠꦶ ꦤꦴꦩ ꦥꦛꦶꦕ꧀ꦖꦤ꧀ꦤꦴ ꦮꦴ ꦲꦺꦴꦠꦸ ꦄꦥ꧀ꦥꦛꦶꦕ꧀ꦖꦤ꧀ꦤꦴ ꦮꦴ ꦱꦩꦏꦈꦴꦤꦠꦫꦄꦠꦶꦫꦺꦏꦥ꧀ꦥꦛꦶꦕ꧀ꦖꦤ꧀ꦤꦴ ꦮꦴ, ꦮꦶꦤꦪꦣꦫꦱ꧀ꦱ ꦏꦩ꧀ꦩꦮꦴꦕꦁ ꦪꦺꦴꦗꦺꦠꦸꦁ ꦱꦩꦠ꧀ꦡꦨꦴꦮꦺꦴꦪꦺꦮꦺꦠ꧀ꦡ ꦥꦩꦴꦟ’’ꦤ꧀ꦠꦶ, ꦠꦱ꧀ꦩꦴ ꦥꦏ꧀ꦑꦥ꧀ꦥꦛꦶꦕ꧀ꦖꦤ꧀ꦤꦴꦢꦷꦤꦁ ꦏꦩ꧀ꦩꦮꦴꦕꦴꦏꦫꦟꦺ ꦏꦸꦏ꧀ꦏꦸꦕ꧀ꦕꦁ ꦤ ꦏꦴꦠꦧ꧀ꦧꦤ꧀ꦠꦶ.

ꦲꦺꦴꦠꦸ, ꦌꦮꦩ꧀ꦥꦶ ꦥꦏ꧀ꦑꦥ꧀ꦥꦛꦶꦕ꧀ꦖꦤ꧀ꦤꦁ ꦥꦫꦶꦪꦤ꧀ꦠꦁ ꦏꦠ꧀ꦮꦴ ꦏꦠꦴꦪ ꦏꦩ꧀ꦩꦮꦴꦕꦴꦪ ꦠꦠꦺꦴ ꦈꦢ꧀ꦣꦁ ꦄꦴꦥꦠ꧀ꦠꦶ ꦤꦠ꧀ꦡꦷꦠꦶ ꦏꦡꦁ ꦗꦴꦤꦺꦪ꧀ꦪꦴꦠꦶ? ꦆꦢꦴꦤꦶ ꦱꦶꦏ꧀ꦑꦴꦏꦴꦩꦴ ꦨꦶꦏ꧀ꦑꦹ ꦢꦺꦮꦱꦶꦏꦩ꧀ꦥꦶ ꦢꦺꦱꦤꦴꦫꦺꦴꦕꦤꦴꦮꦶꦏꦫꦟꦴꦤꦶ ꦏꦫꦺꦴꦤ꧀ꦠꦶ ꦌꦏꦴꦲꦶꦏꦢ꧀ꦮꦷꦲꦶꦏꦴꦢꦶꦮꦱꦺꦤꦥꦶ, ꦏꦶꦕ꧀ꦕꦥꦱꦸꦠꦴ ꦲꦸꦠ꧀ꦮꦴ ꦠꦡꦴ ꦄꦱꦏ꧀ꦏꦺꦴꦤ꧀ꦠꦴꦥꦶ ꦈꦥꦺꦴꦱꦡꦢꦶꦮꦱꦁ ꦤꦴꦠꦶꦏ꧀ꦏꦩꦤ꧀ꦠꦶ, ꦒꦶꦭꦴꦤꦴꦢꦶꦮꦱꦺꦤ ꦠꦢꦠꦶꦏ꧀ꦏꦤ꧀ꦠꦴꦥꦶ ꦄꦠꦶꦏ꧀ꦏꦤ꧀ꦠꦨꦴꦮꦁ ꦗꦴꦤꦤ꧀ꦠꦶ, ꦠꦱ꧀ꦩꦴ ꦠꦢꦠꦶꦏ꧀ꦏꦤ꧀ꦠꦨꦴꦮꦺ ꦱꦠꦶ ꦄꦠꦶꦫꦺꦏꦥꦏ꧀ꦑꦥ꧀ꦥꦛꦶꦕ꧀ꦖꦤ꧀ꦤꦩꦴꦱꦥ꧀ꦥꦛꦶꦕ꧀ꦖꦤ꧀ꦤꦴꦢꦶꦮꦱꦺꦤ ꦮꦝ꧀ꦞꦺꦠ꧀ꦮꦴ ꦏꦩ꧀ꦩꦮꦴꦕꦁ ꦏꦫꦺꦪ꧀ꦪ, ꦠꦢꦠꦶꦏ꧀ꦏꦤ꧀ꦠꦨꦴꦮꦺ ꦥꦤ ꦄꦱꦠꦶ ꦥꦏ꧀ꦑꦥ꧀ꦥꦛꦶꦕ꧀ꦖꦤ꧀ꦤꦥꦫꦶꦪꦤ꧀ꦠꦴ ꦲꦺꦴꦠꦶ, ꦠꦱ꧀ꦩꦴ ꦥꦏ꧀ꦑꦥꦫꦶꦪꦤ꧀ꦠꦏꦩ꧀ꦩꦮꦴꦕꦴꦏꦫꦟꦁ ꦚꦴꦪꦴꦒꦠꦁ ꦲꦺꦴꦠꦷꦠꦶ ꦢꦛ꧀ꦜꦧ꧀ꦧꦁ.

ꦌꦮꦁ ꦲꦺꦴꦠꦸ, ꦠꦡꦴꦥꦶ ꦪꦢꦺꦠꦁ ‘‘ꦱꦩ꧀ꦧꦲꦸꦭꦴ ꦄꦴꦥꦠ꧀ꦠꦶꦪꦺꦴ ꦌꦏꦴꦲꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴ…ꦥꦺ… ꦱꦩ꧀ꦧꦲꦸꦭꦴ ꦄꦴꦥꦠ꧀ꦠꦶꦪꦺꦴ ꦥꦏ꧀ꦑꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴ’’ꦠꦶ ꦮꦸꦠ꧀ꦠꦁ, ꦠꦠ꧀ꦡ ꦆꦩꦶꦤꦴꦪꦺꦮ ꦄꦤꦸꦏ꧀ꦏꦩꦺꦤ ꦩꦪꦴ ꦥꦛꦶꦕ꧀ꦖꦴꦢꦶꦠꦴ ꦄꦴꦥꦠ꧀ꦠꦶꦪꦺꦴ ꦲꦺꦴꦤ꧀ꦠꦷꦠꦶ ꦏꦡꦁ ꦗꦴꦤꦺꦪ꧀ꦪ, ꦄꦗꦴꦤꦤꦺ ꦕ ꦱꦠꦶ ‘‘ꦪꦴ ꦕ ꦑ꧀ꦮꦴꦪꦁ, ꦄꦴꦮꦸꦱꦺꦴ, ꦄꦴꦥꦠ꧀ꦠꦶ ꦄꦗꦴꦤꦥ꧀ꦥꦛꦶꦕ꧀ꦖꦤ꧀ꦤꦴ, ꦄꦣꦩ꧀ꦩꦶꦏꦁ ꦠꦱ꧀ꦱꦴ ꦄꦴꦥꦠ꧀ꦠꦶꦪꦴ ꦥꦫꦶꦮꦴꦱꦢꦴꦤꦁ, ꦄꦣꦩ꧀ꦩꦠ꧀ꦠꦴ ꦤ ꦫꦸꦲꦠꦷ’’ꦠꦶ ꦆꦢꦁ ꦄꦴꦥꦗ꧀ꦗꦠꦷꦠꦶ? ꦤꦴꦥꦗ꧀ꦗꦠꦶ. ꦠꦠ꧀ꦡ ꦲꦶ ꦄꦴꦥꦠ꧀ꦠꦶꦪꦴ ꦄꦴꦥꦤ꧀ꦤꦨꦴꦮꦁ ꦄꦗꦴꦤꦤ꧀ꦠꦺꦴ ꦲꦸꦠ꧀ꦮꦴ ꦥꦛꦶꦕ꧀ꦖꦴꦢꦺꦠꦶ, ꦠꦱ꧀ꦩꦴ ‘‘ꦄꦴꦥꦠ꧀ꦠꦶ ꦕ ꦲꦺꦴꦠꦶ ꦄꦴꦥꦠ꧀ꦠꦶꦱꦚ꧀ꦚꦷ ꦕꦴ’’ꦠꦶ ꦮꦸꦠ꧀ꦠꦄꦴꦥꦠ꧀ꦠꦶꦱꦚ꧀ꦚꦶꦠꦴꦨꦴꦮꦴ ꦄꦥ꧀ꦥꦛꦶꦕ꧀ꦖꦤ꧀ꦤꦩꦺꦮ ꦲꦺꦴꦠꦶ, ꦠꦱ꧀ꦩꦴ ꦄꦥ꧀ꦥꦛꦶꦕ꧀ꦖꦤ꧀ꦤꦴꦪ ꦄꦴꦥꦠ꧀ꦠꦶꦪꦴ ꦥꦫꦶꦮꦴꦱꦢꦴꦤꦁ ꦄꦣꦩ꧀ꦩꦶꦏꦁ ꦲꦺꦴꦠꦶ. ꦆꦣ ꦥꦤ ‘‘ꦌꦠ꧀ꦠꦏꦴ ꦫꦠ꧀ꦠꦶꦪꦺꦴ ꦩꦪꦴ ꦖꦴꦢꦶꦠꦴ’’ꦠꦶ ꦖꦤ꧀ꦤꦏꦴꦭꦩꦺꦮ ꦤ ꦗꦴꦤꦴꦠꦶ, ꦠꦢꦗꦴꦤꦨꦴꦮꦺ ꦱꦠꦶꦥꦶ ꦥꦫꦶꦮꦴꦱꦢꦴꦤꦁ ꦫꦸꦲꦠꦶ. ꦠꦺꦤꦺꦮ ꦕ ꦏꦴꦫꦟꦺꦤ ꦱꦸꦢ꧀ꦣꦤ꧀ꦠꦥꦫꦶꦮꦴꦱꦺ (ꦕꦹꦭ꦳ꦮ. ꧑꧕꧖-꧑꧕꧗) ‘‘ꦄꦴꦥꦠ꧀ꦠꦶꦥꦫꦶꦪꦤ꧀ꦠꦁ ꦤ ꦗꦴꦤꦴꦠꦶ, ꦫꦠ꧀ꦠꦶꦥꦫꦶꦪꦤ꧀ꦠꦁ ꦤ ꦗꦴꦤꦴꦠꦶ, ꦄꦴꦥꦠ꧀ꦠꦶꦥꦫꦶꦪꦤ꧀ꦠꦁ ꦤꦱ꧀ꦱꦫꦠꦶ, ꦫꦠ꧀ꦠꦶꦥꦫꦶꦪꦤ꧀ꦠꦁ ꦤꦱ꧀ꦱꦫꦠꦶ, ꦄꦴꦥꦠ꧀ꦠꦶꦥꦫꦶꦪꦤ꧀ꦠꦺ ꦮꦺꦩꦠꦶꦏꦺꦴ, ꦫꦠ꧀ꦠꦶꦥꦫꦶꦪꦤ꧀ꦠꦺ ꦮꦺꦩꦠꦶꦏꦺꦴ’’ꦠꦶ ꦫꦠ꧀ꦠꦶꦥꦫꦶꦪꦤ꧀ꦠꦱ꧀ꦱ ꦄꦗꦴꦤꦤꦄꦱꦫꦟꦮꦺꦩꦠꦶꦏꦨꦴꦮꦺ ꦱꦠꦶꦥꦶ ꦥꦫꦶꦮꦴꦱꦢꦴꦤꦁ ꦮꦸꦠ꧀ꦠꦁ, ꦠꦱ꧀ꦩꦴ ꦖꦴꦢꦶꦠꦏꦴꦭꦁ ꦠꦡꦠꦺꦴ ꦄꦗꦴꦤꦤ꧀ꦠꦺꦴꦥꦶ ‘‘ꦱꦩ꧀ꦧꦲꦸꦭꦴ ꦄꦴꦥꦠ꧀ꦠꦶꦪꦺꦴ ꦌꦏꦴꦲꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴ…ꦥꦺ… ꦱꦩ꧀ꦧꦲꦸꦭꦴ ꦄꦴꦥꦠ꧀ꦠꦶꦪꦺꦴ ꦥꦏ꧀ꦑꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴ’’ꦠꦶ ꦌꦠ꧀ꦡ ꦄꦥ꧀ꦥꦮꦶꦛ꧀ꦜꦱ꧀ꦱ ꦄꦨꦴꦮꦴ ꦱꦩ꧀ꦥꦗ꧀ꦗꦠꦶꦪꦺꦮꦴꦠꦶ ꦢꦛ꧀ꦜꦧ꧀ꦧꦁ.

ꦄꦡꦴꦥꦶ ꦌꦮꦁ ꦮꦢꦺꦪ꧀ꦪꦸꦁ – ‘‘ꦱꦩ꧀ꦧꦲꦸꦭꦴ ꦄꦴꦥꦠ꧀ꦠꦶꦪꦺꦴ ꦌꦏꦴꦲꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴ…ꦥꦺ… ꦱꦩ꧀ꦧꦲꦸꦭꦴ ꦄꦴꦥꦠ꧀ꦠꦶꦪꦺꦴ ꦥꦏ꧀ꦑꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴ’’ꦠꦶ ꦮꦸꦠ꧀ꦠꦺ ꦠꦺꦱꦸ ꦢꦶꦮꦱꦺꦱꦸ ꦄꦴꦥꦠ꧀ꦠꦶꦪꦺꦴ ꦄꦠ꧀ꦡꦶ ꦥꦛꦶꦕ꧀ꦖꦤ꧀ꦤꦴꦪꦺꦴꦥꦶ, ꦄꦠ꧀ꦡꦶ ꦄꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴꦥꦶ, ꦄꦠ꧀ꦡꦶ ꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴꦥꦶ, ꦄꦠ꧀ꦡꦶ ꦄꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴꦥꦶ, ꦄꦠ꧀ꦡꦶ ꦌꦏꦴꦥꦶ, ꦄꦠ꧀ꦡꦶ ꦱꦩ꧀ꦧꦲꦸꦭꦴꦥꦶ, ꦱꦧ꧀ꦧꦴ ꦠꦴ ꦄꦴꦥꦠ꧀ꦠꦶꦪꦺꦴ ꦌꦠꦺꦤꦺꦮ ꦥꦢꦺꦤ ꦱꦔ꧀ꦒꦲꦶꦠꦴ ꦱꦶꦪꦸꦤ꧀ꦠꦶ? ꦱꦔ꧀ꦒꦲꦶꦠꦴ ꦌꦮ. ꦤ ꦲꦺꦠ꧀ꦡ ꦱꦁꦱꦪꦺꦴ ꦏꦴꦠꦧ꧀ꦧꦺꦴ. ꦮꦸꦠ꧀ꦠꦚ꧀ꦲꦺꦠꦁ ꦄꦛ꧀ꦜꦏꦡꦴꦪꦁ (ꦕꦹꦭ꦳ꦮ. ꦄꦛ꧀ꦜ. ꧑꧐꧒) ‘‘ꦄꦚ꧀ꦚꦱ꧀ꦩꦶꦁ ꦥꦤ ꦄꦴꦥꦠ꧀ꦠꦶꦮꦸꦛ꧀ꦜꦴꦤꦺ ꦆꦢꦁ ꦭꦏ꧀ꦑꦟꦁ – ꦪꦺꦴ ꦄꦥ꧀ꦥꦛꦶꦕ꧀ꦖꦤ꧀ꦤꦁ ꦄꦴꦥꦠ꧀ꦠꦶꦁ ‘ꦥꦛꦶꦕ꧀ꦖꦤ꧀ꦤꦴ’ꦠꦶ ꦮꦶꦤꦪꦏꦩ꧀ꦩꦁ ꦏꦫꦺꦴꦠꦶ, ꦠꦱ꧀ꦱ ꦄꦴꦥꦠ꧀ꦠꦶ ꦮꦸꦛ꧀ꦜꦴꦠꦶ. ꦪꦺꦴ ꦥꦛꦶꦕ꧀ꦖꦤ꧀ꦤꦁ ‘ꦄꦥ꧀ꦥꦛꦶꦕ꧀ꦖꦤ꧀ꦤꦴ’ꦠꦶ ꦮꦶꦤꦪꦏꦩ꧀ꦩꦁ ꦏꦫꦺꦴꦠꦶ, ꦠꦱ꧀ꦱ ꦤ ꦮꦸꦛ꧀ꦜꦴꦠꦶ. ꦄꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦁ ‘ꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴ’ꦠꦶ ꦏꦫꦺꦴꦤ꧀ꦠꦱ꧀ꦱꦥꦶ ꦮꦸꦛ꧀ꦜꦴꦠꦶ, ꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦁ ‘ꦄꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴ’ꦠꦶ ꦏꦫꦺꦴꦤ꧀ꦠꦱ꧀ꦱ ꦤ ꦮꦸꦛ꧀ꦜꦴꦠꦶ. ꦌꦏꦁ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦶꦠ꧀ꦮꦴ ‘ꦱꦩ꧀ꦧꦲꦸꦭꦴ’ꦠꦶ ꦏꦫꦺꦴꦤ꧀ꦠꦱ꧀ꦱꦥꦶ ꦮꦸꦛ꧀ꦜꦴꦠꦶ ꦌꦏꦁ ꦮꦶꦤꦴ ꦱꦩ꧀ꦧꦲꦸꦭꦴꦤꦁ ꦄꦨꦴꦮꦠꦺꦴ. ꦱꦩ꧀ꦧꦲꦸꦭꦴ ꦥꦤ ꦄꦴꦥꦗ꧀ꦗꦶꦠ꧀ꦮꦴ ‘ꦌꦏꦁ ꦄꦴꦥꦗ꧀ꦗꦶ’ꦤ꧀ꦠꦶ ꦏꦫꦺꦴꦤ꧀ꦠꦱ꧀ꦱ ꦤ ꦮꦸꦛ꧀ꦜꦴꦠꦷ’’ꦠꦶ, ꦠꦱ꧀ꦩꦴ ꦌꦠꦺꦲꦶ ꦥꦢꦺꦲꦶ ꦱꦧ꧀ꦧꦴꦱꦁ ꦥꦛꦶꦕ꧀ꦖꦤ꧀ꦤꦴꦥꦠ꧀ꦠꦷꦤꦁ ꦱꦔ꧀ꦒꦲꦶꦠꦠ꧀ꦠꦴ ꦠꦴꦲꦶ ꦄꦴꦥꦠ꧀ꦠꦷꦲꦶ ꦮꦸꦛ꧀ꦜꦴꦤꦁ ꦱꦩ꧀ꦨꦮꦠꦷꦠꦶ ꦢꦛ꧀ꦜꦧ꧀ꦧꦁ.

ꦄꦡ ꦥꦤ ꦮꦶꦤꦪꦣꦫꦺꦤ ꦥꦸꦛ꧀ꦜꦺꦴ ‘‘ꦄꦲꦁ, ꦨꦤ꧀ꦠꦺ, ꦱꦩ꧀ꦧꦲꦸꦭꦴ ꦱꦔ꧀ꦓꦴꦢꦶꦱꦺꦱꦴ ꦄꦴꦥꦠ꧀ꦠꦶꦪꦺꦴ ꦄꦴꦥꦗ꧀ꦗꦶꦁ ꦌꦏꦁ ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦁ, ꦌꦏꦁ ꦏꦴꦪꦱꦁꦱꦒ꧀ꦒꦁ, ꦌꦏꦁ ꦢꦸꦛ꧀ꦜꦸꦭ꧀ꦭꦮꦴꦕꦁ, ꦌꦏꦁ ꦄꦠ꧀ꦠꦏꦴꦩꦁ, ꦌꦏꦁ ꦱꦚ꧀ꦕꦫꦶꦠ꧀ꦠꦁ, ꦌꦏꦁ ꦏꦸꦛꦶꦏꦴꦫꦁ, ꦌꦏꦁ ꦮꦶꦲꦴꦫꦏꦴꦫꦁ, ꦌꦏꦁ ꦢꦸꦛ꧀ꦜꦢꦺꦴꦱꦁ, ꦌꦏꦁ ꦄꦚ꧀ꦚꦨꦴꦒꦶꦪꦁ, ꦌꦏꦁ ꦱꦔ꧀ꦓꦨꦺꦢꦁ, ꦌꦏꦁ ꦨꦺꦢꦴꦤꦸꦮꦠ꧀ꦠꦏꦁ, ꦌꦏꦁ ꦢꦸꦧ꧀ꦧꦕꦁ, ꦌꦏꦁ ꦏꦸꦭꦢꦹꦱꦏ’’ꦤ꧀ꦠꦶ ꦮꦸꦠ꧀ꦠꦺ ‘‘ꦄꦪꦁ ꦨꦶꦏ꧀ꦑꦸ ꦩꦶꦱ꧀ꦱꦏꦱꦩꦺꦴꦣꦴꦤꦥꦫꦶꦮꦴꦱꦴꦫꦲꦺꦴ’’ꦠꦶ ꦚꦠ꧀ꦮꦴ ꦄꦛ꧀ꦜꦏꦡꦴꦪꦁ (ꦕꦹꦭ꦳ꦮ. ꦄꦛ꧀ꦜ. ꧑꧐꧒) ꦄꦴꦒꦠꦤꦪꦺꦤ ꦥꦫꦶꦮꦴꦱꦺꦴ ꦢꦴꦠꦧ꧀ꦧꦺꦴ. ꦌꦠ꧀ꦡꦴꦲ – ꦄꦒ꧀ꦓꦱꦩꦺꦴꦣꦴꦤꦩꦶꦱ꧀ꦱꦏꦱꦩꦺꦴꦣꦴꦤꦴꦤꦁ ꦏꦺꦴ ꦮꦶꦱꦺꦱꦺꦴ, ꦏꦶꦁ ꦤꦴꦤꦴꦏꦫꦟꦤ꧀ꦠꦶ? ꦮꦸꦕ꧀ꦕꦠꦺ – ꦄꦒ꧀ꦓꦱꦩꦺꦴꦣꦴꦤꦥꦫꦶꦮꦴꦱꦺꦴ ꦄꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴ ꦄꦴꦥꦠ꧀ꦠꦶꦪꦺꦴ ꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦪꦁ ꦄꦴꦥꦠ꧀ꦠꦶꦪꦁ ꦱꦩꦺꦴꦣꦴꦤꦺꦠ꧀ꦮꦴ ꦠꦱ꧀ꦱꦴ ꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦪ ꦄꦴꦥꦠ꧀ꦠꦶꦪꦴ ꦄꦒ꧀ꦓꦮꦱꦺꦤ ꦢꦷꦪꦠꦶ, ꦩꦶꦱ꧀ꦱꦏꦱꦩꦺꦴꦣꦴꦤꦥꦫꦶꦮꦴꦱꦺꦴ ꦤꦴꦤꦴꦮꦠ꧀ꦡꦸꦏꦴ ꦄꦴꦥꦠ꧀ꦠꦶꦪꦺꦴ ꦱꦩꦺꦴꦣꦴꦤꦺꦠ꧀ꦮꦴ ꦠꦴꦱꦁ ꦩꦶꦱ꧀ꦱꦏꦮꦱꦺꦤ ꦢꦷꦪꦠꦶ, ꦄꦪꦩꦺꦠꦺꦱꦁ ꦮꦶꦱꦺꦱꦺꦴ. ꦄꦡ ꦮꦴ ꦄꦒ꧀ꦓꦱꦩꦺꦴꦣꦴꦤꦺꦴ ꦱꦨꦴꦒꦮꦠ꧀ꦡꦹꦤꦁ ꦄꦴꦥꦠ꧀ꦠꦷꦤꦁ ꦱꦩꦺꦴꦣꦴꦤꦮꦱꦺꦤ ꦲꦺꦴꦠꦶ, ꦆꦠꦫꦺꦴ ꦮꦶꦱꦨꦴꦒꦮꦠ꧀ꦡꦹꦤꦤ꧀ꦠꦶ ꦄꦴꦕꦫꦶꦪꦴ. ꦠꦺꦤꦺꦮꦴꦲ ꦄꦴꦕꦫꦶꦪꦮꦗꦶꦫꦧꦸꦢ꧀ꦣꦶꦠ꧀ꦡꦺꦫꦺꦴ (ꦮꦗꦶꦫ. ꦛꦷ. ꦕꦹꦭ꦳ꦮꦒ꧀ꦒ ꧑꧐꧒) ‘‘ꦄꦒ꧀ꦓꦱꦩꦺꦴꦣꦴꦤꦺꦴ ꦤꦴꦩ ꦱꦨꦴꦒꦮꦠ꧀ꦡꦸꦏꦴꦪꦺꦴ ꦱꦩ꧀ꦧꦲꦸꦭꦴ ꦄꦴꦥꦠ꧀ꦠꦶꦪꦺꦴ ꦄꦴꦥꦤ꧀ꦤꦱ꧀ꦱ ꦧꦲꦸꦫꦠ꧀ꦠꦶꦁ ꦥꦛꦶꦕ꧀ꦖꦴꦢꦶꦠꦴꦥꦠ꧀ꦠꦶꦪꦁ ꦤꦶꦏ꧀ꦑꦶꦥꦶꦠ꧀ꦮꦴ ꦢꦴꦠꦧ꧀ꦧꦺꦴ, ꦆꦠꦫꦺꦴ ꦤꦴꦤꦴꦮꦠ꧀ꦡꦸꦏꦴꦤꦁ ꦮꦱꦺꦤꦴꦠꦶ ꦄꦪꦩꦺꦠꦺꦱꦁ ꦮꦶꦱꦺꦱꦺꦴ’’ꦠꦶ.

ꦄꦡ ꦱꦶꦪꦴ ‘‘ꦌꦮꦁ ꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴ ꦕ ꦄꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦪꦺꦴ ꦕ ꦤꦴꦤꦴꦮꦠ꧀ꦡꦸꦏꦴꦪꦺꦴ ꦄꦴꦥꦠ꧀ꦠꦶꦪꦺꦴ ꦄꦴꦥꦗ꧀ꦗꦤ꧀ꦠꦱ꧀ꦱ ꦏꦺꦴ ꦥꦫꦶꦮꦴꦱꦺꦴ ꦢꦴꦠꦧ꧀ꦧꦺꦴ ꦄꦒ꧀ꦓꦱꦩꦺꦴꦣꦴꦤꦺꦴ ꦮꦴ ꦩꦶꦱ꧀ꦱꦏꦱꦩꦺꦴꦣꦴꦤꦺꦴ ꦮꦴ, ꦄꦡ ꦠꦢꦸꦨꦪꦴ ꦮꦴ’’ꦠꦶ. ꦏꦶꦚ꧀ꦕꦺꦠ꧀ꦡ – ꦪꦢꦶ ꦄꦒ꧀ꦓꦱꦩꦺꦴꦣꦴꦤꦁ ꦢꦢꦺꦪ꧀ꦪ, ꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦲꦶ ꦕ ꦄꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦲꦶ ꦕ ꦱꦨꦴꦒꦮꦠ꧀ꦡꦸꦏꦴꦲꦶ ꦄꦴꦥꦠ꧀ꦠꦷꦲꦶ ꦮꦸꦛ꧀ꦜꦶꦠꦺꦴ ꦨꦮꦺꦪ꧀ꦪ, ꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦲꦶ ꦕ ꦄꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦲꦶ ꦕ ꦤꦺꦴ ꦮꦶꦱꦨꦴꦒꦮꦠ꧀ꦡꦸꦏꦴꦲꦶ. ꦪꦢꦶ ꦕ ꦩꦶꦱ꧀ꦱꦏꦱꦩꦺꦴꦣꦴꦤꦁ ꦢꦢꦺꦪ꧀ꦪ, ꦱꦩꦴꦤꦏꦴꦭꦥ꧀ꦥꦛꦶꦕ꧀ꦖꦤ꧀ꦤꦴꦲꦶ ꦮꦶꦱꦨꦴꦒꦮꦠ꧀ꦡꦹꦲꦶ ꦄꦴꦥꦠ꧀ꦠꦷꦲꦶ ꦮꦸꦛ꧀ꦜꦶꦠꦺꦴ ꦨꦮꦺꦪ꧀ꦪ, ꦤꦺꦴ ꦄꦱꦩꦴꦤꦏꦄꦴꦭꦥ꧀ꦥꦛꦶꦕ꧀ꦖꦤ꧀ꦤꦴꦲꦶ ꦱꦨꦴꦒꦮꦠ꧀ꦡꦸꦏꦴꦲꦶ ꦕ, ꦄꦡ ꦠꦢꦸꦨꦪꦩ꧀ꦥꦶ ꦢꦢꦺꦪ꧀ꦪ, ‘‘ꦌꦏꦱ꧀ꦩꦶꦁ ꦏꦩ꧀ꦩꦺ ꦢ꧀ꦮꦺ ꦥꦫꦶꦮꦴꦱꦴ ꦢꦴꦠꦧ꧀ꦧꦴ’’ꦠꦶ ꦤꦺꦮ ꦥꦴꦭ꦳ꦶꦪꦁ, ꦤ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦤ꧀ꦠꦶ? ꦮꦸꦕ꧀ꦕꦠꦺ – ꦆꦢꦚ꧀ꦲꦶ ꦱꦧ꧀ꦧꦩ꧀ꦥꦶ ꦥꦫꦶꦮꦴꦱꦴꦢꦶꦏꦁ ꦮꦶꦤꦪꦏꦩ꧀ꦩꦁ ꦮꦠ꧀ꦡꦸꦮꦱꦺꦤ ꦮꦴ ꦒꦺꦴꦠ꧀ꦠꦮꦱꦺꦤ ꦮꦴ ꦤꦴꦩꦮꦱꦺꦤ ꦮꦴ ꦄꦴꦥꦠ꧀ꦠꦶꦮꦱꦺꦤ ꦮꦴ ꦏꦴꦠꦸꦁ ꦮꦛ꧀ꦛꦠꦶꦪꦺꦮ.

ꦠꦠ꧀ꦡ ꦱꦸꦏ꧀ꦏꦮꦶꦱ꧀ꦱꦛ꧀ꦜꦷꦠꦶ ꦮꦠ꧀ꦡꦸ ꦕꦺꦮ ꦒꦺꦴꦠ꧀ꦠꦚ꧀ꦕ. ꦱꦔ꧀ꦓꦴꦢꦶꦱꦺꦱꦺꦴꦠꦶ ꦤꦴꦩꦚ꧀ꦕꦺꦮ ꦄꦴꦥꦠ꧀ꦠꦶ ꦕ. ꦠꦠ꧀ꦡ ‘‘ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦁ ꦏꦴꦪꦱꦁꦱꦒ꧀ꦒ’’ꦤ꧀ꦠꦶꦄꦴꦢꦶꦮꦕꦤꦺꦤꦴꦥꦶ ‘‘ꦤꦴꦤꦴꦮꦠ꧀ꦡꦸꦏꦴꦪꦺꦴ’’ꦠꦶ ꦮꦕꦤꦺꦤꦥꦶ ꦮꦠ꧀ꦡꦸ ꦕꦺꦮ ꦒꦺꦴꦠ꧀ꦠꦚ꧀ꦕ ꦒꦲꦶꦠꦁ ꦲꦺꦴꦠꦶ, ‘‘ꦱꦔ꧀ꦓꦴꦢꦶꦱꦺꦱꦺꦴ’’ꦠꦶ ꦮꦕꦤꦺꦤꦥꦶ ‘‘ꦄꦴꦥꦠ꧀ꦠꦶꦪꦺꦴ’’ꦠꦶ ꦮꦕꦤꦺꦤꦥꦶ ꦤꦴꦩꦚ꧀ꦕꦺꦮ ꦄꦴꦥꦠ꧀ꦠꦶ ꦕ ꦒꦲꦶꦠꦴ ꦲꦺꦴꦠꦶ, ꦠꦱ꧀ꦩꦴ ꦄꦒ꧀ꦓꦱꦩꦺꦴꦣꦴꦤꦮꦱꦺꦤ ꦥꦫꦶꦮꦴꦱꦺ ꦢꦶꦤ꧀ꦤꦺ ‘‘ꦄꦲꦁ, ꦨꦤ꧀ꦠꦺ, ꦱꦩ꧀ꦧꦲꦸꦭꦴ ꦱꦔ꧀ꦓꦴꦢꦶꦱꦺꦱꦴ ꦄꦴꦥꦠ꧀ꦠꦶꦪꦺꦴ ꦄꦴꦥꦗ꧀ꦗꦶ’’ꦤ꧀ꦠꦶꦄꦴꦢꦶꦮꦕꦤꦺꦤꦺꦮ ꦮꦠ꧀ꦡꦸꦱ꧀ꦱ ꦕ ꦒꦺꦴꦠ꧀ꦠꦱ꧀ꦱ ꦕ ꦤꦴꦩꦱ꧀ꦱ ꦕ ꦄꦴꦥꦠ꧀ꦠꦶꦪꦴ ꦕ ꦒꦲꦶꦠꦠ꧀ꦠꦴ ꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦲꦶ ꦄꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦲꦶ ꦕ ꦱꦨꦴꦒꦮꦠ꧀ꦡꦸꦏꦴꦲꦶ ꦕ ꦮꦶꦱꦨꦴꦒꦮꦠ꧀ꦡꦸꦏꦴꦲꦶ ꦕ ꦱꦧ꧀ꦧꦴꦲꦶ ꦄꦴꦥꦠ꧀ꦠꦷꦲꦶ ꦮꦸꦛ꧀ꦜꦴꦠꦷꦠꦶ ꦢꦛ꧀ꦜꦧ꧀ꦧꦁ. ꦮꦸꦠ꧀ꦠꦚ꧀ꦲꦺꦠꦁ ꦱꦩꦤ꧀ꦠꦥꦴꦱꦴꦢꦶꦏꦴꦪꦁ ‘‘ꦌꦠ꧀ꦡ ꦕ ‘ꦱꦔ꧀ꦓꦴꦢꦶꦱꦺꦱꦴ ꦄꦴꦥꦠ꧀ꦠꦶꦪꦺꦴ ꦄꦴꦥꦗ꧀ꦗꦶꦁ ꦤꦴꦤꦴꦮꦠ꧀ꦡꦸꦏꦴꦪꦺꦴ’ꦠꦶꦥꦶ ‘ꦱꦔ꧀ꦓꦴꦢꦶꦱꦺꦱꦴ ꦄꦴꦥꦠ꧀ꦠꦶꦪꦺꦴ ꦄꦴꦥꦗ꧀ꦗꦶ’ꦤ꧀ꦠꦶꦥꦶ ꦌꦮꦁ ꦥꦸꦧ꧀ꦧꦺ ꦮꦸꦠ꧀ꦠꦤꦪꦺꦤ ꦮꦠ꧀ꦡꦸꦮꦱꦺꦤꦥꦶ ꦒꦺꦴꦠ꧀ꦠꦮꦱꦺꦤꦥꦶ ꦤꦴꦩꦮꦱꦺꦤꦥꦶ ꦄꦴꦥꦠ꧀ꦠꦶꦮꦱꦺꦤꦥꦶ ꦪꦺꦴꦗꦺꦠ꧀ꦮꦴ ꦏꦩ꧀ꦩꦮꦴꦕꦁ ꦏꦴꦠꦸꦁ ꦮꦛ꧀ꦛꦠꦶꦪꦺꦮꦴꦠꦶ ꦄꦪꦁ ꦩꦶꦱ꧀ꦱꦏꦱꦩꦺꦴꦣꦴꦤꦺꦴ’’ꦠꦶ, ꦆꦩꦱ꧀ꦩꦶꦚ꧀ꦕ ꦮꦶꦤꦪꦱꦔ꧀ꦒꦲꦥ꧀ꦥꦏꦫꦟꦺ (ꦮꦶ. ꦱꦔ꧀ꦒ. ꦄꦛ꧀ꦜ. ꧒꧔꧕) ꦠꦡꦺꦮ ꦮꦠ꧀ꦮꦴ ‘‘ꦠꦱ꧀ꦩꦴ ꦤ ꦆꦣ ꦮꦶꦱꦸꦁ ꦏꦩ꧀ꦩꦮꦴꦕꦁ ꦪꦺꦴꦗꦺꦠ꧀ꦮꦴ ꦢꦱ꧀ꦱꦪꦶꦱ꧀ꦱꦴꦩ, ꦥꦸꦧ꧀ꦧꦺ ꦱꦧ꧀ꦧꦴꦥꦠ꧀ꦠꦶꦱꦴꦣꦴꦫꦟꦁ ꦏꦠ꧀ꦮꦴ ꦪꦺꦴꦗꦺꦠ꧀ꦮꦴ ꦢꦱ꧀ꦱꦶꦠꦴꦪ ꦌꦮ ꦏꦩ꧀ꦩꦮꦴꦕꦴꦪ ꦤꦴꦤꦴꦮꦠ꧀ꦡꦸꦏꦴꦲꦶꦥꦶ ꦄꦴꦥꦠ꧀ꦠꦷꦲꦶ ꦮꦸꦛ꧀ꦜꦴꦤꦱꦩ꧀ꦨꦮꦠꦺꦴ ꦱꦴꦪꦺꦮꦺꦠ꧀ꦡ ꦏꦩ꧀ꦩꦮꦴꦕꦴ ꦄꦭ’’ꦤ꧀ꦠꦶ.

ꦪꦢꦶ ꦌꦮꦁ ꦄꦴꦕꦫꦶꦪꦮꦗꦶꦫꦧꦸꦢ꧀ꦣꦶꦠ꧀ꦡꦺꦫꦺꦤ ꦢ꧀ꦮꦶꦤ꧀ꦤꦁ ꦮꦶꦱꦺꦱꦺꦴ ꦤ ꦮꦠ꧀ꦠꦧ꧀ꦧꦺꦴ, ꦄꦡ ꦏꦱ꧀ꦩꦴ ꦮꦸꦠ꧀ꦠꦺꦴꦠꦶ? ꦠꦷꦱꦸ ꦱꦩꦺꦴꦣꦴꦤꦥꦫꦶꦮꦴꦱꦺꦱꦸ ꦎꦣꦴꦤꦱꦩꦺꦴꦣꦴꦤꦺꦴ ꦩꦹꦭꦴꦪꦥꦛꦶꦏꦱ꧀ꦱꦤꦴꦪ ꦎꦣꦹꦤꦶꦠꦏꦴꦭꦺꦪꦺꦮ ꦢꦴꦠꦧ꧀ꦧꦺꦴ, ꦄꦒ꧀ꦓꦱꦩꦺꦴꦣꦴꦤꦩꦶꦱ꧀ꦱꦏꦱꦩꦺꦴꦣꦴꦤꦥꦫꦶꦮꦴꦱꦴ ꦥꦤ ꦮꦶꦱꦸꦁꦪꦺꦮ ꦢꦴꦠꦧ꧀ꦧꦴ. ‘‘ꦌꦮꦁ ꦢꦶꦤ꧀ꦤꦺ ꦌꦠꦺꦱꦁ ꦏꦺꦴ ꦮꦶꦱꦺꦱꦺꦴ’’ꦠꦶ ꦕꦶꦤ꧀ꦠꦴꦪꦁ ꦮꦶꦱꦺꦱꦱꦩ꧀ꦨꦮꦩꦠ꧀ꦠꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦺꦴ. ꦄꦛ꧀ꦜꦏꦡꦴꦪꦁ ꦥꦤ ꦥꦫꦶꦮꦴꦱꦴꦢꦶꦏꦩ꧀ꦩꦱ꧀ꦱ ꦭꦏ꧀ꦑꦟꦁ ꦢꦱ꧀ꦱꦺꦠꦸꦁ ‘‘ꦮꦠ꧀ꦡꦸꦮꦱꦺꦤ ꦮꦴ’’ꦠꦶꦄꦴꦢꦶꦩꦴꦲ, ꦠꦱ꧀ꦩꦴ ꦭꦏ꧀ꦑꦟꦮꦱꦺꦤꦺꦮ ꦱꦨꦴꦒꦮꦠ꧀ꦡꦸꦏꦴꦲꦶꦥꦶ ꦄꦴꦥꦠ꧀ꦠꦷꦲꦶ ꦮꦸꦛ꧀ꦜꦴꦤꦁ ꦱꦩ꧀ꦨꦮꦠꦶ. ꦠꦺꦤꦺꦮ ꦕ ꦏꦴꦫꦟꦺꦤ ꦱꦴꦫꦠ꧀ꦡꦢꦷꦥꦤꦶꦤꦴꦩꦶꦏꦴꦪꦁ ꦮꦶꦤꦪꦛꦷꦏꦴꦪꦚ꧀ꦕ ꦮꦶꦩꦠꦶꦮꦶꦤꦺꦴꦢꦤꦶꦤꦴꦩꦶꦏꦴꦪꦁ ꦮꦶꦤꦪꦛꦷꦏꦴꦪꦚ꧀ꦕ ꦤ ꦏꦺꦴꦕꦶ ꦮꦶꦱꦺꦱꦺꦴ ꦮꦸꦠ꧀ꦠꦺꦴꦠꦶ ꦢꦛ꧀ꦜꦧ꧀ꦧꦺꦴ.

ꦪꦢꦶ ꦌꦮꦁ ꦩꦶꦱ꧀ꦱꦏꦱꦩꦺꦴꦣꦴꦤꦏꦩ꧀ꦩꦮꦴꦕꦴꦪꦥꦶ ꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦲꦶ ꦄꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦲꦶꦥꦶ ꦄꦴꦥꦠ꧀ꦠꦷꦲꦶ ꦮꦸꦛ꧀ꦜꦴꦤꦁ ꦱꦩ꧀ꦨꦮꦺꦪ꧀ꦪ. ꦠꦠ꧀ꦡꦥꦶ ꦲꦶ ‘‘ꦄꦲꦁ, ꦨꦤ꧀ꦠꦺ, ꦱꦩ꧀ꦧꦲꦸꦭꦴ ꦱꦔ꧀ꦓꦴꦢꦶꦱꦺꦱꦴ ꦄꦴꦥꦠ꧀ꦠꦶꦪꦺꦴ ꦄꦴꦥꦗ꧀ꦗꦶꦁ ꦤꦴꦤꦴꦮꦠ꧀ꦡꦸꦏꦴꦪꦺꦴ’’ꦠꦶꦥꦶ ‘‘ꦌꦏꦴ ꦱꦸꦏ꧀ꦏꦮꦶꦱ꧀ꦱꦛ꧀ꦜꦶ…ꦥꦺ… ꦌꦏꦴ ꦏꦸꦭꦢꦹꦱꦏꦴ’’ꦠꦶꦥꦶ ꦮꦠ꧀ꦠꦧ꧀ꦧꦁ. ꦌꦮꦁ ꦱꦠꦶ ‘‘ꦱꦩ꧀ꦧꦲꦸꦭꦴ’’ꦠꦶꦥꦶ ‘‘ꦱꦔ꧀ꦓꦴꦢꦶꦱꦺꦱꦴ ꦄꦴꦥꦠ꧀ꦠꦶꦪꦺꦴ’’ꦠꦶꦥꦶ ꦮꦠ꧀ꦡꦸꦒꦺꦴꦠ꧀ꦠꦤꦴꦩꦴꦥꦠ꧀ꦠꦷꦲꦶ ꦏꦶꦠ꧀ꦠꦤꦱꦩ꧀ꦨꦮꦠꦺꦴ ꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦲꦶꦥꦶ ꦄꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦲꦶꦥꦶ ꦄꦴꦥꦠ꧀ꦠꦷꦲꦶ ꦮꦸꦛ꧀ꦜꦴꦤꦁ ꦱꦩ꧀ꦨꦮꦺꦪ꧀ꦪꦴꦠꦶ? ꦤ ꦥꦤꦺꦮꦁ ꦢꦛ꧀ꦜꦧ꧀ꦧꦁ. ꦮꦠ꧀ꦡꦴꦢꦶꦏꦶꦠ꧀ꦠꦤꦚ꧀ꦲꦶ ꦱꦧ꧀ꦧꦴꦥꦠ꧀ꦠꦷꦤꦁ ꦒꦟ꧀ꦲꦤꦠ꧀ꦡꦁ ꦲꦺꦴꦠꦶ. ꦌꦮꦁ ꦒꦟ꧀ꦲꦤ꧀ꦠꦺꦥꦶ ꦥꦛꦶꦕ꧀ꦖꦤ꧀ꦤꦏꦴꦭꦱ꧀ꦱ ꦄꦏꦡꦶꦠꦠ꧀ꦠꦴ ‘‘ꦌꦠ꧀ꦠꦏꦁ ꦤꦴꦩ ꦏꦴꦭꦁ ꦥꦫꦶꦮꦱꦶꦠꦧ꧀ꦧ’’ꦤ꧀ꦠꦶ ꦤ ꦥꦚ꧀ꦚꦴꦪꦠꦶ, ꦠꦱ꧀ꦩꦶꦁ ꦄꦥꦚ꧀ꦚꦴꦪꦩꦴꦤꦺ ꦠꦺꦤ ꦥꦩꦴꦟꦺꦤ ꦥꦫꦶꦮꦴꦱꦺꦴ ꦤ ꦲꦺꦴꦠꦶ, ꦠꦱ꧀ꦩꦶꦁ ꦄꦱꦠꦶ ꦄꦴꦥꦠ꧀ꦠꦶꦠꦺꦴ ꦮꦸꦛ꧀ꦜꦴꦤꦁ ꦤ ꦱꦩ꧀ꦨꦮꦠꦶ, ꦠꦱ꧀ꦩꦴ ꦩꦶꦱ꧀ꦱꦏꦱꦩꦺꦴꦣꦴꦤꦏꦩ꧀ꦩꦮꦴꦕꦴꦪ ꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦲꦶꦥꦶ ꦄꦕꦶꦫꦥ꧀ꦥꦛꦶꦕ꧀ꦖꦤ꧀ꦤꦴꦲꦶꦥꦶ ꦄꦴꦥꦠ꧀ꦠꦷꦲꦶ ꦮꦸꦛ꧀ꦜꦴꦤꦁ ꦤ ꦱꦩ꧀ꦨꦮꦠꦷꦠꦶ ꦢꦛ꧀ꦜꦧ꧀ꦧꦁ.

ꦥꦫꦶꦮꦴꦱꦮꦶꦤꦶꦕ꧀ꦖꦪꦏꦡꦴ ꦤꦶꦛ꧀ꦜꦶꦠꦴ.

ꦩꦴꦤꦠ꧀ꦠꦮꦶꦤꦶꦕ꧀ꦖꦪꦏꦡꦴ

ꦩꦴꦤꦠ꧀ꦠꦏꦡꦴꦪꦩ꧀ꦥꦶ ꦩꦴꦤꦠ꧀ꦠꦁ ꦤꦴꦩ ꦄꦥ꧀ꦥꦛꦶꦕ꧀ꦖꦤ꧀ꦤꦩꦴꦤꦠ꧀ꦠꦁ ꦥꦛꦶꦕ꧀ꦖꦤ꧀ꦤꦩꦴꦤꦠ꧀ꦠꦁ ꦥꦏ꧀ꦑꦩꦴꦤꦠ꧀ꦠꦁ ꦱꦩꦺꦴꦣꦴꦤꦩꦴꦤꦠ꧀ꦠꦤ꧀ꦠꦶ ꦕꦠꦸꦧ꧀ꦧꦶꦣꦁ ꦲꦺꦴꦠꦶ. ꦠꦠ꧀ꦡ ꦪꦺꦴ ꦨꦶꦏ꧀ꦑꦸ ꦱꦔ꧀ꦓꦴꦢꦶꦱꦺꦱꦁ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦶꦠ꧀ꦮꦴ ꦠꦁ ꦢꦶꦮꦱꦩꦺꦮ ꦄꦴꦫꦺꦴꦕꦺꦠꦶ, ꦌꦏꦫꦠ꧀ꦠꦶꦩꦠ꧀ꦠꦩ꧀ꦥꦶ ꦤ ꦥꦛꦶꦕ꧀ꦖꦴꦢꦺꦠꦶ, ꦠꦱ꧀ꦱ ꦥꦫꦶꦮꦴꦱꦁ ꦄꦢꦠ꧀ꦮꦴꦮ ꦢꦶꦤ꧀ꦤꦁ ꦩꦴꦤꦠ꧀ꦠꦁ ꦄꦥ꧀ꦥꦛꦶꦕ꧀ꦖꦤ꧀ꦤꦩꦴꦤꦠ꧀ꦠꦁ ꦤꦴꦩ. ꦪꦺꦴ ꦄꦴꦥꦗ꧀ꦗꦶꦠ꧀ꦮꦴ ꦢꦱꦲꦶ ꦄꦴꦏꦴꦫꦺꦲꦶ ꦮꦶꦤꦴ ꦠꦁ ꦢꦶꦮꦱꦁ ꦤꦴꦫꦺꦴꦕꦺꦠꦶ, ꦌꦏꦫꦠ꧀ꦠꦴꦢꦶꦮꦱꦺꦤ ꦥꦛꦶꦕ꧀ꦖꦴꦢꦺꦠꦶ, ꦠꦠ꧀ꦡ ꦪꦡꦴꦥꦛꦶꦕ꧀ꦖꦤ꧀ꦤꦢꦶꦮꦱꦁ ꦥꦫꦶꦮꦴꦱꦁ ꦢꦠ꧀ꦮꦴ ꦥꦫꦶꦮꦸꦠ꧀ꦡꦥꦫꦶꦮꦴꦱꦱ꧀ꦱ ꦢꦶꦤ꧀ꦤꦁ ꦩꦴꦤꦠ꧀ꦠꦁ ꦥꦛꦶꦕ꧀ꦖꦤ꧀ꦤꦩꦴꦤꦠ꧀ꦠꦁ ꦤꦴꦩ. ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦶꦠ꧀ꦮꦴ ꦥꦛꦶꦕ꧀ꦖꦤ꧀ꦤꦴꦪ ꦮꦴ ꦄꦥ꧀ꦥꦛꦶꦕ꧀ꦖꦤ꧀ꦤꦴꦪ ꦮꦴ ꦨꦶꦏ꧀ꦑꦸꦤꦶꦪꦴ ꦥꦏ꧀ꦑꦩꦠ꧀ꦠꦩꦺꦮ ꦢꦶꦤ꧀ꦤꦁ ꦩꦴꦤꦠ꧀ꦠꦁ ꦥꦏ꧀ꦑꦩꦴꦤꦠ꧀ꦠꦁ ꦤꦴꦩ. ꦨꦶꦏ꧀ꦑꦸ ꦥꦤ ꦥꦛꦶꦕ꧀ꦖꦤ꧀ꦤꦴꦪ ꦄꦴꦥꦠ꧀ꦠꦶꦪꦴ ꦥꦫꦶꦮꦱꦶꦠ꧀ꦮꦴ ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦏꦴꦭꦺꦪꦺꦮ ꦥꦸꦤ ꦄꦴꦥꦗ꧀ꦗꦶꦠ꧀ꦮꦴ ꦤ ꦥꦛꦶꦕ꧀ꦖꦴꦢꦺꦠꦶ, ꦠꦱ꧀ꦱ ꦩꦹꦭꦴꦪ ꦥꦛꦶꦏꦱ꧀ꦱꦶꦠ꧀ꦮꦴ ꦥꦫꦶꦮꦸꦠ꧀ꦡꦢꦶꦮꦱꦺ ꦄꦢꦶꦮꦱꦺ ꦏꦠ꧀ꦮꦴ ꦄꦥ꧀ꦥꦛꦶꦕ꧀ꦖꦴꦢꦶꦠꦠ꧀ꦠꦴ ꦱꦩꦺꦴꦣꦴꦤꦥꦫꦶꦮꦴꦱꦁ ꦄꦢꦠ꧀ꦮꦴ ꦢꦶꦤ꧀ꦤꦁ ꦩꦴꦤꦠ꧀ꦠꦁ ꦱꦩꦺꦴꦣꦴꦤꦩꦴꦤꦠ꧀ꦠꦁ ꦤꦴꦩ. ꦩꦴꦤꦠ꧀ꦠꦴꦫꦲꦏꦴꦭꦺꦥꦶ ꦩꦴꦤꦠ꧀ꦠꦕꦫꦟꦏꦴꦭꦺꦥꦶ ꦄꦧ꧀ꦨꦴꦤꦴꦫꦲꦏꦴꦭꦺꦥꦶ ꦌꦱꦺꦮ ꦤꦪꦺꦴ. ꦠꦺꦱꦸ ꦠꦷꦟꦶ ꦩꦴꦤꦠ꧀ꦠꦴꦤꦶ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦤꦪꦺꦤ ꦱꦸꦮꦶꦚ꧀ꦚꦺꦪ꧀ꦪꦠ꧀ꦠꦴ ꦤ ꦮꦸꦠ꧀ꦠꦴꦤꦶ. ꦥꦏ꧀ꦑꦩꦴꦤꦠ꧀ꦠꦁ ꦥꦕ꧀ꦖꦴ ꦄꦴꦒꦩꦶꦱ꧀ꦱꦠꦶ.

ꦪꦴꦤꦶ ꦥꦤ ꦥꦫꦶꦮꦴꦱꦩꦴꦤꦠ꧀ꦠꦴꦤꦶ ꦄꦤꦮꦛ꧀ꦜꦶꦠꦠ꧀ꦠꦴ ꦥꦸꦡꦸꦗ꧀ꦗꦤꦱ꧀ꦱ ꦒꦶꦲꦶꦄꦴꦢꦶꦮꦱꦺꦤ ꦥꦫꦶꦮꦠ꧀ꦠꦤꦺ ꦱꦠꦶ ꦥꦸꦤ ꦢꦴꦠꦧ꧀ꦧꦴꦢꦴꦠꦧ꧀ꦧꦨꦴꦮꦺ ꦱꦔ꧀ꦏꦶꦠꦧ꧀ꦧꦴꦤꦶ, ꦠꦴꦤꦶ ꦢꦱ꧀ꦱꦺꦠꦸꦁ ꦥꦴꦭ꦳ꦶꦪꦁ ꦄꦤꦺꦏꦺꦲꦶ ꦥꦏꦴꦫꦺꦲꦶ ꦮꦶꦠ꧀ꦡꦴꦫꦠꦺꦴ ꦮꦸꦠ꧀ꦠꦴꦤꦶ. ꦠꦺꦱꦸ ꦨꦶꦏ꧀ꦑꦹꦤꦁ ꦱꦁꦱꦪꦮꦶꦤꦺꦴꦢꦤꦠ꧀ꦡꦴꦪ ꦌꦏꦢꦺꦱꦁ ꦢꦱ꧀ꦱꦺꦠꦸꦁ ‘‘ꦱꦕꦺ ꦏꦺꦴꦕꦷ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦮꦶꦧ꧀ꦨꦩꦠꦷꦠꦶ ꦮꦶꦫꦹꦥꦺꦴ ꦲꦸꦠ꧀ꦮꦴ ꦨꦩꦠꦶ, ꦲꦷꦤꦴꦪꦴꦮꦠ꧀ꦠꦠꦶ ꦒꦶꦲꦷ ꦲꦺꦴꦠꦷꦠꦶ ꦄꦠ꧀ꦡꦺꦴ. ꦱꦴꦩꦟꦺꦫꦺꦴ ꦲꦺꦴꦠꦷꦠꦶ ꦈꦥꦱꦩ꧀ꦥꦤ꧀ꦤꦨꦴꦮꦁ ꦗꦲꦶꦠ꧀ꦮꦴ ꦱꦴꦩꦟꦺꦫꦨꦴꦮꦁ ꦈꦥꦒꦕ꧀ꦖꦠꦶ. ꦠꦠ꧀ꦡ ꦥꦴꦫꦴꦗꦶꦏꦥ꧀ꦥꦠ꧀ꦠꦨꦴꦮꦺꦤ ꦮꦴ ‘‘ꦒꦶꦲꦷꦠꦶ ꦩꦁ ꦣꦴꦫꦺꦡꦴ’’ꦠꦶꦄꦴꦢꦶꦤꦴ ꦱꦶꦏ꧀ꦑꦴꦥꦕ꧀ꦕꦏ꧀ꦑꦴꦤꦺꦤ ꦮꦴ ꦒꦶꦲꦷ ꦲꦺꦴꦠꦶ. ꦠꦺꦱꦸ ꦥꦜꦩꦺꦤ ꦥꦸꦤ ꦈꦥꦱꦩ꧀ꦥꦢꦴꦪ ꦄꦨꦧ꧀ꦧꦠ꧀ꦠꦴ ꦥꦸꦤ ꦥꦫꦶꦮꦴꦱꦺꦴ ꦤ ꦫꦸꦲꦠꦶꦪꦺꦮ, ꦢꦸꦠꦶꦪꦺꦤ ꦥꦤ ꦥꦸꦤ ꦈꦥꦱꦩ꧀ꦥꦢꦴꦪ ꦨꦧ꧀ꦧꦠ꧀ꦠꦴ ‘‘ꦱꦺꦴ ꦕꦺ ꦥꦸꦤ ꦈꦥꦱꦩ꧀ꦥꦗ꧀ꦗꦠꦷ’’ꦠꦶ ꦮꦸꦠ꧀ꦠꦁ. ꦆꦠꦫꦺꦴ ꦥꦤ ꦥꦴꦫꦴꦗꦶꦏꦥ꧀ꦥꦠ꧀ꦠꦨꦴꦮꦺꦤ ꦱꦴꦩꦟꦺꦫꦺꦴ ꦤ ꦲꦺꦴꦠꦶ. ꦏꦱ꧀ꦩꦴ? ꦱꦫꦟꦒꦩꦤꦴꦢꦷꦤꦁ ꦮꦶꦤꦱ꧀ꦱꦤꦠꦺꦴ. ꦮꦸꦠ꧀ꦠꦚ꧀ꦲꦶ ꦮꦶꦩꦠꦶꦮꦶꦤꦺꦴꦢꦤꦶꦪꦁ (ꦮꦶ. ꦮꦶ. ꦛꦷ. ꦩꦲꦴꦮꦒ꧀ꦒ ꧒.꧑꧐꧘) ‘‘ꦈꦥꦱꦩ꧀ꦥꦤ꧀ꦤꦴꦤꦩ꧀ꦥꦶ ꦥꦴꦫꦴꦗꦶꦏꦱꦩꦄꦴꦥꦠ꧀ꦠꦶꦪꦴ ꦱꦫꦟꦒꦩꦤꦴꦢꦶꦱꦴꦩꦟꦺꦫꦨꦴꦮꦱ꧀ꦱꦥꦶ ꦮꦶꦤꦱ꧀ꦱꦤꦠꦺꦴ ꦱꦺꦤꦴꦱꦤꦒ꧀ꦒꦴꦲꦺꦴ ꦕ ꦥꦛꦶꦥ꧀ꦥꦱ꧀ꦱꦩ꧀ꦨꦠꦶ, ꦱꦔ꧀ꦓꦭꦴꦨꦩ꧀ꦥꦶ ꦠꦺꦤ ꦭꦨꦤ꧀ꦠꦷꦠꦶ ꦮꦺꦢꦶꦠꦧ꧀ꦧ’’ꦤ꧀ꦠꦶ, ꦒꦶꦲꦷ ꦥꦤ ꦲꦸꦠ꧀ꦮꦴ ꦥꦸꦤ ꦱꦴꦩꦟꦺꦫꦨꦴꦮꦩꦠ꧀ꦠꦁ ꦭꦢ꧀ꦣꦧ꧀ꦧꦁ ꦲꦺꦴꦠꦶ. ‘‘ꦱꦴꦩꦟꦺꦫꦺꦴꦠꦶ ꦩꦁ ꦣꦴꦫꦺꦡꦴ’’ꦠꦶꦄꦴꦢꦶꦤꦴ ꦥꦤ ꦱꦶꦏ꧀ꦑꦴꦥꦕ꧀ꦕꦏ꧀ꦑꦴꦤꦺ ꦏꦠꦺ ꦱꦶꦪꦴ ꦱꦴꦩꦟꦺꦫꦨꦴꦮꦺꦴ, ꦠꦠꦺꦴꦥꦶ ꦥꦸꦤ ꦈꦥꦱꦩ꧀ꦥꦗ꧀ꦗꦶꦠꦸꦏꦴꦩꦠꦴꦪ ꦱꦠꦶ ꦱꦶꦪꦴ ꦈꦥꦱꦩ꧀ꦥꦤ꧀ꦤꦨꦴꦮꦺꦴ. ‘‘ꦒꦶꦲꦷꦠꦶ ꦩꦁ ꦣꦴꦫꦺꦡꦴ’’ꦠꦶꦄꦴꦢꦶꦤꦴ ꦱꦶꦏ꧀ꦑꦴꦥꦕ꧀ꦕꦏ꧀ꦑꦴꦤꦁ ꦏꦠ꧀ꦮꦴ ꦒꦶꦲꦶꦨꦴꦮꦁ ꦈꦥꦒꦠꦺꦥꦶ ꦥꦸꦤ ꦱꦴꦩꦟꦺꦫꦥꦧ꧀ꦧꦗ꧀ꦗꦁ ꦥꦧ꧀ꦧꦗꦶꦠ꧀ꦮꦴ ꦱꦴꦩꦟꦺꦫꦺꦴ ꦲꦺꦴꦠꦶ. ꦠꦠꦺꦴ ꦥꦸꦤ ꦈꦥꦱꦩ꧀ꦥꦗ꧀ꦗꦶꦠꦸꦁ ꦭꦢ꧀ꦣꦧ꧀ꦧꦠ꧀ꦠꦴ ‘‘ꦥꦸꦤ ꦈꦥꦱꦩ꧀ꦥꦗ꧀ꦗꦠꦷ’’ꦠꦶ ꦮꦸꦠ꧀ꦠꦺꦴ. ꦠꦺꦱꦁ ꦨꦶꦏ꧀ꦑꦸꦨꦴꦮꦺ ꦥꦫꦶꦮꦴꦱꦺ ꦄꦤꦶꦛ꧀ꦜꦶꦠꦺꦥꦶ ꦒꦶꦲꦶꦱꦴꦩꦟꦺꦫꦨꦴꦮꦁ ꦥꦠ꧀ꦠꦠ꧀ꦠꦴ ꦥꦫꦶꦮꦴꦱꦺꦴ ꦤ ꦫꦸꦲꦠꦶ ꦈꦥꦱꦩ꧀ꦥꦤ꧀ꦤꦴꦤꦩꦺꦮ ꦥꦫꦶꦮꦴꦱꦱ꧀ꦱ ꦨꦒꦮꦠꦴ ꦥꦚ꧀ꦚꦠ꧀ꦠꦠ꧀ꦠꦴꦠꦶ ꦄꦠ꧀ꦡꦺꦴ.

ꦌꦮꦁ ꦱꦤ꧀ꦠꦺ ꦥꦸꦤ ꦈꦥꦱꦩ꧀ꦥꦗ꧀ꦗꦤ꧀ꦠꦱ꧀ꦱ ꦏꦶꦁ ꦥꦫꦶꦮꦴꦱꦺꦴ ꦥꦸꦤ ꦢꦴꦠꦧ꧀ꦧꦺꦴꦠꦶ ꦄꦴꦲ ‘‘ꦱꦺꦴ ꦕꦺ ꦥꦸꦤ ꦈꦥꦱꦩ꧀ꦥꦗ꧀ꦗꦠꦷ’’ꦠꦶꦄꦴꦢꦶ. ꦠꦱ꧀ꦱꦠ꧀ꦡꦺꦴ – ꦱꦺꦴ ꦮꦶꦧ꧀ꦨꦤ꧀ꦠꦏꦺꦴ ꦱꦺꦴ ꦮꦴ ꦱꦴꦩꦟꦺꦫꦺꦴ ꦥꦸꦤ ꦈꦥꦱꦩ꧀ꦥꦤ꧀ꦤꦨꦴꦮꦁ ꦈꦥꦒꦕ꧀ꦖꦠꦶ, ꦥꦸꦫꦶꦩꦁ ꦥꦸꦧ꧀ꦧꦺ ꦨꦶꦏ꧀ꦑꦸꦨꦹꦠꦏꦴꦭꦺ ꦢꦶꦤ꧀ꦤꦁ ꦥꦫꦶꦮꦴꦱꦢꦴꦤꦁ ꦌꦮ ꦆꦢꦴꦤꦶ ꦥꦫꦶꦮꦴꦱꦢꦴꦤꦁ ꦲꦺꦴꦠꦶ. ꦪꦺꦴ ꦥꦫꦶꦮꦴꦱꦺꦴ ꦥꦸꦧ꧀ꦧꦺ ꦨꦶꦏ꧀ꦑꦸꦨꦹꦠꦏꦴꦭꦺ ꦢꦶꦤ꧀ꦤꦺꦴ, ꦱꦺꦴ ꦥꦫꦶꦮꦴꦱꦺꦴ ꦱꦸꦢꦶꦤ꧀ꦤꦺꦴ, ꦢꦸꦢꦶꦤ꧀ꦤꦺꦴ ꦤ ꦲꦺꦴꦠꦶ. ꦪꦺꦴ ꦪꦠ꧀ꦠꦏꦺꦴ ꦏꦴꦭꦺꦴ ꦥꦫꦶꦮꦸꦠ꧀ꦡꦺꦴ, ꦱꦺꦴ ꦠꦠ꧀ꦠꦏꦺꦴ ꦏꦴꦭꦺꦴ ꦱꦸꦥꦫꦶꦮꦸꦠ꧀ꦡꦺꦴꦪꦺꦮ ꦲꦺꦴꦠꦶ, ꦤ ꦢꦸꦥꦫꦶꦮꦸꦠ꧀ꦡꦺꦴ, ꦠꦱ꧀ꦩꦴ ꦄꦮꦱꦺꦱꦺꦴ ꦏꦴꦭꦺꦴ ꦥꦫꦶꦮꦱꦶꦠꦧ꧀ꦧꦺꦴꦠꦶ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦥꦸꦧ꧀ꦧꦺ ꦨꦶꦏ꧀ꦑꦸꦏꦴꦭꦺ ꦥꦏ꧀ꦑꦥ꧀ꦥꦛꦶꦕ꧀ꦖꦤ꧀ꦤꦴꦪ ꦄꦴꦥꦠ꧀ꦠꦶꦪꦴ ꦥꦫꦶꦮꦴꦱꦁ ꦒꦲꦺꦠ꧀ꦮꦴ ꦢꦱꦢꦶꦮꦱꦩꦠ꧀ꦠꦁ ꦥꦫꦶꦮꦱꦶꦠ꧀ꦮꦴ ꦄꦤꦶꦛ꧀ꦜꦶꦠꦺꦪꦺꦮ ꦥꦫꦶꦮꦴꦱꦺ ꦮꦶꦧ꧀ꦨꦩꦶꦠ꧀ꦮꦴ ꦱꦴꦩꦟꦺꦫꦺꦴ ꦮꦴ ꦲꦸꦠ꧀ꦮꦴ ꦥꦸꦤ ꦈꦥꦱꦩ꧀ꦥꦤ꧀ꦤꦺꦤ ꦄꦮꦱꦺꦱꦥꦚ꧀ꦕꦢꦶꦮꦱꦺ ꦥꦫꦶꦮꦱꦶꦠ꧀ꦮꦴ ꦥꦫꦶꦮꦴꦱꦺꦴ ꦤꦶꦛ꧀ꦜꦴꦥꦺꦠꦧ꧀ꦧꦺꦴꦠꦶ. ꦩꦴꦤꦠ꧀ꦠꦴꦫꦲꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ. ꦈꦩ꧀ꦩꦠ꧀ꦠꦏꦴꦢꦷꦱꦸꦥꦶ ꦠꦱ꧀ꦩꦶꦁ ꦏꦴꦭꦺ ꦄꦗꦴꦤꦤ꧀ꦠꦠ꧀ꦠꦴ ‘‘ꦥꦫꦶꦮꦴꦱꦺꦴ ꦤ ꦫꦸꦲꦠꦷ’’ꦠꦶ ꦮꦸꦠ꧀ꦠꦁ. ꦠꦶꦟ꧀ꦟꦩ꧀ꦥꦶ ꦈꦏ꧀ꦑꦶꦠ꧀ꦠꦏꦴꦤꦁ ꦏꦩ꧀ꦩꦤꦴꦤꦴꦱꦁꦮꦴꦱꦏꦠ꧀ꦠꦴ ꦠꦺꦲꦶ ꦱꦲꦱꦁꦮꦴꦱꦺꦴꦪꦺꦮ ꦤꦠ꧀ꦡꦷꦠꦶ ꦈꦏ꧀ꦑꦶꦠ꧀ꦠꦏꦴꦤꦁ ꦥꦫꦶꦮꦴꦱꦺꦴ ꦤ ꦫꦸꦲꦠꦷꦠꦶ ꦮꦸꦠ꧀ꦠꦁ.

ꦱꦕꦺ ꦥꦸꦤ ꦎꦱꦴꦫꦷꦪꦠꦷꦠꦶ ꦈꦏ꧀ꦑꦺꦥꦤꦷꦪꦏꦩ꧀ꦩꦁ ꦥꦛꦶꦥ꧀ꦥꦱ꧀ꦱꦩ꧀ꦨꦤꦮꦱꦺꦤ ꦱꦩꦴꦤꦱꦁꦮꦴꦱꦏꦨꦴꦮꦁ ꦥꦮꦺꦱꦷꦪꦠꦶ. ‘‘ꦱꦕꦺ ꦏꦱ꧀ꦱꦕꦶ ꦨꦶꦏ꧀ꦑꦸꦤꦺꦴ ꦆꦠ꧀ꦡꦶꦭꦶꦔ꧀ꦒꦁ ꦥꦴꦠꦸꦨꦮꦠꦷ’’ꦠꦶꦄꦴꦢꦷꦱꦸ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦤꦪꦺꦤꦺꦮ ꦄꦠ꧀ꦡꦺꦴ ꦱꦸꦮꦶꦚ꧀ꦚꦺꦪ꧀ꦪꦺꦴ ꦲꦺꦴꦠꦶ. ꦪꦁ ꦥꦤ ꦮꦸꦠ꧀ꦠꦁ ‘‘ꦥꦏ꧀ꦑꦩꦴꦤꦠ꧀ꦠꦁ ꦥꦕ꧀ꦖꦴ ꦄꦴꦒꦩꦶꦱ꧀ꦱꦠꦷ’’ꦠꦶ, ꦠꦠ꧀ꦫꦺꦮꦁ ꦗꦴꦤꦶꦠꦧ꧀ꦧꦁ – ꦥꦏ꧀ꦑꦩꦴꦤꦠ꧀ꦠꦤ꧀ꦠꦶ ꦨꦶꦏ꧀ꦑꦸꦤꦶꦪꦴ ꦢꦴꦠꦧ꧀ꦧꦩꦴꦤꦠ꧀ꦠꦁ. ꦠꦁ ꦥꦤ ꦥꦛꦶꦕ꧀ꦖꦤ꧀ꦤꦴꦪꦥꦶ ꦄꦥ꧀ꦥꦛꦶꦕ꧀ꦖꦤ꧀ꦤꦴꦪꦥꦶ ꦄꦴꦥꦠ꧀ꦠꦶꦪꦴ ꦄꦝ꧀ꦞꦩꦴꦱꦩꦠ꧀ꦠꦩꦺꦮ ꦢꦴꦠꦧ꧀ꦧꦁ. ꦮꦸꦠ꧀ꦠꦚ꧀ꦲꦺꦠꦁ ‘‘ꦒꦫꦸꦣꦩ꧀ꦩꦁ ꦄꦗ꧀ꦙꦴꦥꦤ꧀ꦤꦴꦪ ꦨꦶꦏ꧀ꦑꦸꦤꦶꦪꦴ ꦈꦨꦠꦺꦴꦱꦔ꧀ꦓꦺ ꦥꦏ꧀ꦑꦩꦴꦤꦠ꧀ꦠꦁ ꦕꦫꦶꦠꦧ꧀ꦧ’’ꦤ꧀ꦠꦶ (ꦥꦴꦕꦶ. ꧑꧔꧙; ꦕꦹꦭ꦳ꦮ. ꧔꧐꧓; ꦄ. ꦤꦶ. ꧘.꧕꧑). ꦠꦁ ꦥꦤ ꦨꦶꦏ꧀ꦑꦸꦤꦷꦲꦶ ꦄꦠ꧀ꦠꦤꦺꦴ ꦱꦷꦩꦁ ꦱꦺꦴꦣꦺꦠ꧀ꦮꦴ ꦮꦶꦲꦴꦫꦱꦷꦩꦴꦪ ꦮꦴ ꦮꦶꦲꦴꦫꦱꦷꦩꦁ ꦱꦺꦴꦣꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦷꦲꦶ ꦑꦟ꧀ꦝꦱꦷꦩꦴꦪ ꦮꦴ ꦱꦧ꧀ꦧꦤ꧀ꦠꦶꦩꦺꦤ ꦥꦫꦶꦕ꧀ꦖꦺꦢꦺꦤ ꦕꦠꦸꦮꦒ꧀ꦒꦒꦟꦁ ꦱꦤ꧀ꦤꦶꦥꦴꦠꦴꦥꦺꦠ꧀ꦮꦴ ꦢꦴꦠꦧ꧀ꦧꦁ. ꦱꦕꦺ ꦌꦏꦴ ꦄꦴꦥꦠ꧀ꦠꦶ ꦲꦺꦴꦠꦶ, ꦌꦏꦶꦱ꧀ꦱꦴ ꦮꦱꦺꦤ, ꦱꦕꦺ ꦢ꧀ꦮꦺ ꦮꦴ ꦠꦶꦱ꧀ꦱꦺꦴ ꦮꦴ ꦱꦩ꧀ꦧꦲꦸꦭꦴ ꦮꦴ ꦌꦏꦮꦠ꧀ꦡꦸꦏꦴ ꦮꦴ ꦤꦴꦤꦴꦮꦠ꧀ꦡꦸꦏꦴ ꦮꦴ, ꦠꦴꦱꦁ ꦠꦴꦱꦁ ꦮꦱꦺꦤ ꦮꦠ꧀ꦡꦸꦒꦺꦴꦠ꧀ꦠꦤꦴꦩꦄꦴꦥꦠ꧀ꦠꦷꦱꦸ ꦪꦁ ꦪꦁ ꦆꦕ꧀ꦖꦠꦶ, ꦠꦁ ꦠꦁ ꦄꦴꦢꦴꦪ ꦪꦺꦴꦗꦤꦴ ꦏꦴꦠꦧ꧀ꦧꦴ.

ꦠꦠ꧀ꦫꦶꦢꦁ ꦌꦏꦴꦥꦠ꧀ꦠꦶꦮꦱꦺꦤ ꦩꦸꦑꦩꦠ꧀ꦠꦤꦶꦢꦱ꧀ꦱꦤꦁ – ꦠꦴꦪ ꦄꦴꦥꦤ꧀ꦤꦴꦪ ꦨꦶꦏ꧀ꦑꦸꦤꦶꦪꦴ ꦨꦶꦏ꧀ꦑꦸꦤꦶꦱꦔ꧀ꦓꦁ ꦈꦥꦱꦔ꧀ꦏꦩꦶꦠ꧀ꦮꦴ ꦌꦏꦁꦱꦁ ꦈꦠ꧀ꦠꦫꦴꦱꦔ꧀ꦒꦁ ꦏꦫꦶꦠ꧀ꦮꦴ ꦮꦸꦝ꧀ꦞꦴꦤꦁ ꦨꦶꦏ꧀ꦑꦸꦤꦷꦤꦁ ꦥꦴꦢꦺ ꦮꦤ꧀ꦢꦶꦠ꧀ꦮꦴ ꦈꦏ꧀ꦏꦸꦛꦶꦏꦁ ꦤꦶꦱꦷꦢꦶꦠ꧀ꦮꦴ ꦄꦚ꧀ꦗꦭꦶꦁ ꦥꦒ꧀ꦒꦲꦺꦠ꧀ꦮꦴ ꦌꦮꦩꦱ꧀ꦱ ꦮꦕꦤꦷꦪꦺꦴ ‘‘ꦄꦲꦁ, ꦄꦪ꧀ꦪꦺ, ꦌꦏꦁ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦶꦁ ꦒꦴꦩꦤ꧀ꦠꦫꦁ, ꦱꦴꦲꦁ, ꦄꦪ꧀ꦪ,ꦌ ꦌꦏꦶꦱ꧀ꦱꦴ ꦄꦴꦥꦠ꧀ꦠꦶꦪꦴ ꦒꦴꦩꦤ꧀ꦠꦫꦴꦪ ꦥꦏ꧀ꦑꦩꦴꦤꦠ꧀ꦠꦁ ꦪꦴꦕꦴꦩꦷ’’ꦠꦶ. ꦌꦮꦁ ꦠꦶꦏ꧀ꦑꦠ꧀ꦠꦸꦁ ꦪꦴꦕꦴꦥꦺꦠ꧀ꦮꦴ ꦧ꧀ꦪꦠ꧀ꦠꦴꦪ ꦨꦶꦏ꧀ꦑꦸꦤꦶꦪꦴ ꦥꦛꦶꦧꦭꦴꦪ ꦱꦔ꧀ꦓꦺꦴ ꦚꦴꦥꦺꦠꦧ꧀ꦧꦺꦴ ‘‘ꦱꦸꦟꦴꦠꦸ ꦩꦺ, ꦄꦪ꧀ꦪꦺ, ꦱꦔ꧀ꦓꦺꦴ, ꦄꦪꦁ ꦆꦠ꧀ꦡꦤ꧀ꦤꦴꦩꦴ ꦨꦶꦏ꧀ꦑꦸꦤꦷ ꦌꦏꦁ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦶ ꦒꦴꦩꦤ꧀ꦠꦫꦁ, ꦱꦴ ꦱꦔ꧀ꦓꦁ ꦌꦏꦶꦱ꧀ꦱꦴ ꦄꦴꦥꦠ꧀ꦠꦶꦪꦴ ꦒꦴꦩꦤ꧀ꦠꦫꦴꦪ ꦥꦏ꧀ꦑꦩꦴꦤꦠ꧀ꦠꦁ ꦪꦴꦕꦠꦶ. ꦪꦢꦶ ꦱꦔ꧀ꦓꦱ꧀ꦱ ꦥꦠ꧀ꦠꦏꦭ꧀ꦭꦁ, ꦱꦔ꧀ꦓꦺꦴ ꦆꦠ꧀ꦡꦤ꧀ꦤꦴꦩꦴꦪ ꦨꦶꦏ꧀ꦑꦸꦤꦶꦪꦴ ꦌꦏꦶꦱ꧀ꦱꦴ ꦄꦴꦥꦠ꧀ꦠꦶꦪꦴ ꦒꦴꦩꦤ꧀ꦠꦫꦴꦪ ꦥꦏ꧀ꦑꦩꦴꦤꦠ꧀ꦠꦁ ꦢꦢꦺꦪ꧀ꦪ, ꦌꦱꦴ ꦚꦠ꧀ꦠꦶ. ꦱꦸꦟꦴꦠꦸ ꦩꦺ, ꦄꦪ꧀ꦪꦺ, ꦱꦔ꧀ꦓꦺꦴ…ꦥꦺ… ꦢꦸꦠꦶꦪꦩ꧀ꦥꦶ. ꦠꦠꦶꦪꦩ꧀ꦥꦶ ꦌꦠꦩꦠ꧀ꦡꦁ ꦮꦢꦴꦩꦶ. ꦱꦸꦟꦴꦠꦸ ꦩꦺ, ꦄꦪ꧀ꦪꦺ, ꦱꦔ꧀ꦓꦺꦴ…ꦥꦺ… ꦨꦴꦱꦺꦪ꧀ꦪ. ꦢꦶꦤ꧀ꦤꦁ ꦱꦔ꧀ꦓꦺꦤ ꦆꦠ꧀ꦡꦤ꧀ꦤꦴꦩꦴꦪ ꦨꦶꦏ꧀ꦑꦸꦤꦶꦪꦴ ꦌꦏꦶꦱ꧀ꦱꦴ ꦄꦴꦥꦠ꧀ꦠꦶꦪꦴ ꦒꦴꦩꦤ꧀ꦠꦫꦴꦪ ꦥꦏ꧀ꦑꦩꦴꦤꦠ꧀ꦠꦁ, ꦑꦩꦠꦶ ꦱꦔ꧀ꦓꦱ꧀ꦱ, ꦠꦱ꧀ꦩꦴ ꦠꦸꦟ꧀ꦲꦷ, ꦌꦮꦩꦺꦠꦁ ꦣꦴꦫꦪꦴꦩꦷ’’ꦠꦶ.

ꦏꦩ꧀ꦩꦮꦴꦕꦴꦥꦫꦶꦪꦺꦴꦱꦴꦤꦺ ꦮꦠ꧀ꦠꦁ ꦱꦩꦴꦢꦶꦪꦶꦠ꧀ꦮꦴ ꦨꦶꦏ꧀ꦑꦸꦩꦴꦤꦠ꧀ꦠꦏꦡꦴꦪꦁ ꦮꦸꦠ꧀ꦠꦤꦪꦺꦤꦺꦮ ꦱꦔ꧀ꦓꦱ꧀ꦱ ꦄꦴꦫꦺꦴꦕꦺꦠ꧀ꦮꦴ ꦤꦶꦏ꧀ꦑꦶꦠ꧀ꦠꦮꦠ꧀ꦠꦁ ꦮꦱꦶꦠꦸꦏꦴꦩꦴꦪ ꦠꦡꦺꦮ ꦱꦔ꧀ꦓꦱ꧀ꦱ ꦩꦗ꧀ꦙꦺ ꦮꦴ ꦥꦏ꧀ꦏꦤ꧀ꦠꦴꦱꦸ ꦨꦶꦏ꧀ꦑꦸꦤꦷꦱꦸ ꦌꦏꦨꦶꦏ꧀ꦑꦸꦤꦶꦪꦴ ꦮꦴ ꦢꦸꦠꦶꦪꦶꦏꦴꦪ ꦮꦴ ꦱꦤ꧀ꦠꦶꦏꦺ ꦮꦸꦠ꧀ꦠꦤꦪꦺꦤꦺꦮ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦄꦚ꧀ꦚꦶꦱ꧀ꦱꦴ ꦥꦤ ꦄꦴꦒꦤ꧀ꦠꦸꦏꦴꦪ ꦱꦤ꧀ꦠꦶꦏꦺ ꦄꦴꦫꦺꦴꦕꦺꦠ꧀ꦮꦴ ꦤꦶꦏ꧀ꦑꦶꦥꦶꦠꦧ꧀ꦧꦁ, ꦤꦶꦏ꧀ꦑꦶꦠ꧀ꦠꦏꦴꦭꦠꦺꦴ ꦥꦛ꧀ꦜꦴꦪ ꦥꦏꦠꦠ꧀ꦠꦛ꧀ꦜꦴꦤꦺ ꦠꦶꦛ꧀ꦜꦠꦶ.

ꦥꦸꦤ ꦱꦩꦴꦢꦶꦪꦶꦠ꧀ꦮꦴ ꦄꦫꦸꦟꦁ ꦈꦛ꧀ꦜꦥꦺꦤ꧀ꦠꦶꦪꦴ ꦥꦤ ꦨꦶꦏ꧀ꦑꦸꦤꦷꦤꦁꦪꦺꦮ ꦱꦤ꧀ꦠꦶꦏꦺ ꦮꦱꦶꦠꦸꦁ ꦤ ꦭꦧ꧀ꦨꦠꦶ. ‘‘ꦈꦨꦠꦺꦴꦱꦔ꧀ꦓꦺ ꦥꦏ꧀ꦑꦩꦴꦤꦠ꧀ꦠꦁ ꦕꦫꦶꦠꦧ꧀ꦧ’’ꦤ꧀ꦠꦶ ꦲꦶ ꦮꦸꦠ꧀ꦠꦁ, ꦠꦱ꧀ꦩꦴ ꦄꦱ꧀ꦱꦴ ꦄꦴꦕꦫꦶꦪꦸꦥꦗ꧀ꦙꦴꦪꦴꦲꦶ ꦮꦶꦲꦴꦫꦁ ꦒꦤ꧀ꦠ꧀ꦮꦴ ꦱꦔ꧀ꦒꦴꦲꦏꦥꦏ꧀ꦑꦺ ꦜꦶꦠꦺꦴ ꦌꦏꦺꦴ ꦩꦲꦴꦡꦺꦫꦺꦴ ꦮꦴ ꦣꦩ꧀ꦩꦏꦡꦶꦏꦺꦴ ꦮꦴ ꦨꦶꦏ꧀ꦑꦸ ꦮꦠ꧀ꦠꦧ꧀ꦧꦺꦴ ‘‘ꦌꦏꦶꦱ꧀ꦱꦴ ꦨꦶꦏ꧀ꦑꦸꦤꦶꦪꦴ ꦮꦶꦤꦪꦏꦩ꧀ꦩꦁ ꦏꦠ꧀ꦠꦧ꧀ꦧꦩꦠ꧀ꦡꦶ, ꦠꦠ꧀ꦫ ꦤꦺꦴ ꦄꦪ꧀ꦪꦴ ꦕꦠ꧀ꦠꦴꦫꦺꦴ ꦨꦶꦏ꧀ꦑꦹ ꦥꦺꦱꦺꦡꦴ’’ꦠꦶ. ꦱꦔ꧀ꦒꦲꦁ ꦄꦏꦴꦠꦸꦁ ꦤ ꦭꦧ꧀ꦨꦠꦶ, ‘‘ꦥꦺꦱꦺꦱ꧀ꦱꦴꦩꦴ’’ꦠꦶ ꦮꦠ꧀ꦠꦧ꧀ꦧꦁ. ꦕꦠꦹꦲꦶ ꦥꦏꦠꦠ꧀ꦠꦨꦶꦏ꧀ꦑꦸꦤꦷꦲꦶ ꦩꦴꦤꦠ꧀ꦠꦕꦴꦫꦶꦤꦶꦁ ꦨꦶꦏ꧀ꦑꦸꦤꦶꦁ ꦒꦲꦺꦠ꧀ꦮꦴ ꦄꦤ꧀ꦠꦺꦴꦄꦫꦸꦟꦺꦪꦺꦮ ꦤꦶꦏ꧀ꦑꦶꦥꦶꦠ꧀ꦮꦴ ꦒꦴꦩꦹꦥꦕꦴꦫꦠꦺꦴ ꦢ꧀ꦮꦺ ꦭꦺꦝ꧀ꦝꦸꦥꦴꦠꦺ ꦄꦠꦶꦏ꧀ꦏꦩꦶꦠ꧀ꦮꦴ ꦩꦒ꧀ꦒꦴ ꦎꦏ꧀ꦏꦩ꧀ꦩ ꦒꦸꦩ꧀ꦧꦮꦠꦶꦄꦴꦢꦷꦲꦶ ꦥꦛꦶꦕ꧀ꦖꦤ꧀ꦤꦺ ꦜꦴꦤꦺ ꦤꦶꦱꦷꦢꦶꦠꦧ꧀ꦧꦁ, ꦮꦶꦲꦴꦫꦹꦥꦕꦴꦫꦠꦺꦴꦥꦶ ꦢ꧀ꦮꦺ ꦭꦺꦝ꧀ꦝꦸꦥꦴꦠꦴ ꦄꦠꦶꦏ꧀ꦏꦩꦶꦠꦧ꧀ꦧꦴ. ꦕꦠꦹꦲꦶ ꦥꦏꦠꦠ꧀ꦠꦨꦶꦏ꧀ꦑꦹꦲꦶꦥꦶ ꦠꦠ꧀ꦡ ꦒꦤ꧀ꦠꦧ꧀ꦧꦁ, ꦒꦤ꧀ꦠ꧀ꦮꦴ ꦥꦤ ꦨꦶꦏ꧀ꦑꦸꦤꦷꦲꦶ ꦱꦢ꧀ꦣꦶꦁ ꦤ ꦌꦏꦛ꧀ꦜꦴꦤꦺ ꦤꦶꦱꦷꦢꦶꦠꦧ꧀ꦧꦁ, ꦥꦛꦶꦏ꧀ꦏꦩꦶꦠ꧀ꦮꦴ ꦄꦮꦶꦢꦹꦫꦺ ꦜꦴꦤꦺ ꦤꦶꦱꦷꦢꦶꦠꦧ꧀ꦧꦁ. ꦏꦸꦫꦸꦤ꧀ꦢꦶꦩꦲꦴꦥꦕ꧀ꦕꦫꦷꦱꦸ ꦥꦤ ‘‘ꦨꦶꦏ꧀ꦑꦸꦤꦷꦲꦶ ꦧ꧀ꦪꦠ꧀ꦠꦁ ꦌꦏꦁ ꦮꦴ ꦢ꧀ꦮꦺ ꦮꦴ ꦈꦥꦴꦱꦶꦏꦴꦪꦺꦴ ꦨꦶꦏ꧀ꦑꦹꦲꦶꦥꦶ ꦌꦏꦁ ꦮꦴ ꦢ꧀ꦮꦺ ꦮꦴ ꦈꦥꦴꦱꦏꦺ ꦄꦠ꧀ꦠꦫꦏ꧀ꦑꦟꦠ꧀ꦡꦴꦪ ꦒꦲꦺꦠ꧀ꦮꦴ ꦒꦤ꧀ꦠꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦁ. ꦏꦸꦫꦸꦤ꧀ꦢꦶꦪꦁꦪꦺꦮ ꦕ ‘‘ꦨꦶꦏ꧀ꦑꦸꦤꦸꦥꦱ꧀ꦱꦪꦱ꧀ꦱ ꦕ ꦮꦶꦲꦴꦫꦱ꧀ꦱ ꦕ ꦈꦥꦕꦴꦫꦁ ꦩꦸꦚ꧀ꦕꦶꦠꦸꦁ ꦮꦛ꧀ꦛꦠꦷ’’ꦠꦶ ꦮꦸꦠ꧀ꦠꦁ, ‘‘ꦒꦴꦩꦱ꧀ꦱꦴ’’ꦠꦶ ꦤ ꦮꦸꦠ꧀ꦠꦁ.

ꦌꦮꦁ ꦤꦶꦱꦶꦤ꧀ꦤꦺꦱꦸ ꦥꦤ ꦨꦶꦏ꧀ꦑꦸꦤꦷꦱꦸ ꦕ ꦨꦶꦏ꧀ꦑꦹꦱꦸ ꦕ ꦠꦴꦪ ꦨꦶꦏ꧀ꦑꦸꦤꦶꦪꦴ ‘‘ꦩꦴꦤꦠ꧀ꦠꦁ ꦱꦩꦴꦢꦶꦪꦴꦩꦶ, ꦮꦠ꧀ꦠꦁ ꦱꦩꦴꦢꦶꦪꦴꦩꦷ’’ꦠꦶ ꦮꦠ꧀ꦠꦁ ꦱꦩꦴꦢꦶꦪꦶꦠ꧀ꦮꦴ ꦨꦶꦏ꧀ꦑꦸꦤꦶꦱꦔ꧀ꦓꦱ꧀ꦱ ꦠꦴꦮ ꦌꦮꦁ ꦄꦴꦫꦺꦴꦕꦺꦠꦧ꧀ꦧꦁ ‘‘ꦄꦲꦁ, ꦄꦪ꧀ꦪꦺ, ꦌꦏꦁ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦶꦁ ꦒꦴꦩꦤ꧀ꦠꦫꦁ, ꦱꦴꦲꦁ ꦱꦔ꧀ꦓꦁ ꦌꦏꦶꦱ꧀ꦱꦴ ꦄꦴꦥꦠ꧀ꦠꦶꦪꦴ ꦒꦴꦩꦤ꧀ꦠꦫꦴꦪ ꦥꦏ꧀ꦑꦩꦴꦤꦠ꧀ꦠꦁ ꦪꦴꦕꦶꦁ, ꦠꦱ꧀ꦱꦴ ꦩꦺ ꦱꦔ꧀ꦓꦺꦴ ꦌꦏꦶꦱ꧀ꦱꦴ ꦄꦴꦥꦠ꧀ꦠꦶꦪꦴ ꦒꦴꦩꦤ꧀ꦠꦫꦴꦪ ꦥꦏ꧀ꦑꦩꦴꦤꦠ꧀ꦠꦁ ꦄꦢꦴꦱꦶ, ꦱꦴꦲꦁ ꦩꦴꦤꦠ꧀ꦠꦁ ꦕꦫꦴꦩꦶ, ꦮꦺꦢꦶꦪꦴꦩꦲꦁ ꦄꦪ꧀ꦪꦺ, ꦮꦺꦢꦶꦪꦠꦷꦠꦶ ꦩꦁ ꦱꦔ꧀ꦓꦺꦴ ꦣꦴꦫꦺꦠꦹ’’ꦠꦶ.

ꦠꦠꦺꦴ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦌꦮꦁ ꦄꦴꦫꦺꦴꦕꦺꦠꦧ꧀ꦧꦁ ‘‘ꦄꦲꦁ, ꦄꦪ꧀ꦪꦴ, ꦌꦏꦁ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦶꦁ…ꦥꦺ… ꦮꦺꦢꦶꦪꦴꦩꦲꦁ ꦄꦪ꧀ꦪꦴ, ꦮꦺꦢꦶꦪꦠꦷꦠꦶ ꦩꦁ ꦱꦔ꧀ꦓꦺꦴ ꦣꦴꦫꦺꦠꦹ’’ꦠꦶ. ꦆꦣꦴꦥꦶ ꦪꦴꦪ ꦏꦴꦪꦕꦶ ꦨꦴꦱꦴꦪ ꦄꦴꦫꦺꦴꦕꦺꦠꦸꦁ ꦮꦛ꧀ꦛꦠꦶ. ꦄꦴꦫꦺꦴꦕꦺꦠ꧀ꦮꦴ ꦕ ꦨꦶꦏ꧀ꦑꦸꦤꦶꦱꦔ꧀ꦓꦱ꧀ꦱꦺꦮ ꦱꦤ꧀ꦠꦶꦏꦺ ꦤꦶꦱꦷꦢꦶꦠꦧ꧀ꦧꦁ, ꦄꦴꦫꦺꦴꦕꦶꦠꦏꦴꦭꦠꦺꦴ ꦥꦛ꧀ꦜꦴꦪ ꦨꦶꦏ꧀ꦑꦹꦤꦁ ꦒꦤ꧀ꦠꦸꦁ ꦮꦛ꧀ꦛꦠꦶ. ꦱꦕꦺ ꦱꦴꦱꦔ꧀ꦏꦴ ꦲꦺꦴꦠꦶ, ꦨꦶꦏ꧀ꦑꦸꦤꦶꦪꦺꦴ ꦠꦠ꧀ꦡꦺꦮ ꦜꦴꦤꦁ ꦥꦕ꧀ꦕꦴꦱꦷꦱꦤ꧀ꦠꦶ, ꦜꦴꦠꦧ꧀ꦧꦁ. ꦱꦕꦺ ꦄꦚ꧀ꦚꦺꦴ ꦨꦶꦏ꧀ꦑꦸ ꦮꦴ ꦨꦶꦏ꧀ꦑꦸꦤꦷ ꦮꦴ ꦠꦁ ꦜꦴꦤꦁ ꦌꦠꦶ, ꦥꦱ꧀ꦱꦤ꧀ꦠꦶꦪꦴ ꦄꦴꦫꦺꦴꦕꦺꦠꦧ꧀ꦧꦁ. ꦤꦺꦴ ꦕꦺ ꦄꦴꦫꦺꦴꦕꦺꦠꦶ, ꦫꦠ꧀ꦠꦶꦕ꧀ꦖꦺꦢꦺꦴ ꦕꦺꦮ ꦮꦠ꧀ꦠꦨꦺꦢꦢꦸꦏ꧀ꦏꦛꦚ꧀ꦕ. ꦱꦕꦺ ꦄꦗꦴꦤꦤ꧀ꦠꦶꦪꦴ ꦌꦮ ꦈꦥꦕꦴꦫꦁ ꦎꦏ꧀ꦏꦩꦶꦠ꧀ꦮꦴ ꦒꦕ꧀ꦖꦠꦶ, ꦫꦠ꧀ꦠꦶꦕ꧀ꦖꦺꦢꦺꦴꦮ ꦲꦺꦴꦠꦶ, ꦤ ꦮꦠ꧀ꦠꦨꦺꦢꦢꦸꦏ꧀ꦏꦛꦁ. ꦱꦕꦺ ꦨꦶꦏ꧀ꦑꦸꦤꦶꦪꦺꦴ ꦈꦥꦗ꧀ꦙꦴꦪꦴꦢꦷꦤꦁ ꦮꦠ꧀ꦠꦏꦫꦟꦠ꧀ꦡꦁ ꦥꦒꦺꦮ ꦒꦤ꧀ꦠꦸꦏꦴꦩꦴ ꦲꦺꦴꦤ꧀ꦠꦶ, ꦫꦠ꧀ꦠꦶꦮꦶꦥ꧀ꦥꦮꦴꦱꦒꦟꦎꦲꦷꦪꦤꦒꦴꦩꦤ꧀ꦠꦫꦴꦥꦠ꧀ꦠꦶꦫꦏ꧀ꦑꦟꦠ꧀ꦡꦁ ꦌꦏꦁ ꦨꦶꦏ꧀ꦑꦸꦤꦶꦁ ꦜꦥꦺꦠ꧀ꦮꦴ ꦒꦤ꧀ꦠꦧ꧀ꦧꦁ, ꦠꦴꦪ ꦄꦫꦸꦟꦺ ꦈꦛ꧀ꦜꦶꦠꦺ ꦠꦱ꧀ꦱꦴ ꦱꦤ꧀ꦠꦶꦏꦺ ꦮꦠ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧꦁ. ꦌꦠꦺꦤꦸꦥꦴꦪꦺꦤ ꦄꦑꦟ꧀ꦝꦴ ꦥꦚ꧀ꦕꦢꦱ ꦫꦠ꧀ꦠꦶꦪꦺꦴ ꦩꦴꦤꦠ꧀ꦠꦁ ꦕꦫꦶꦠꦧ꧀ꦧꦁ.

ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦴꦪ ꦥꦤ ꦥꦴꦫꦶꦮꦴꦱꦶꦏꦏ꧀ꦑꦤ꧀ꦣꦏꦺ ꦮꦸꦠ꧀ꦠꦤꦪꦺꦤꦺꦮ ꦱꦩ꧀ꦩꦴ ꦮꦠ꧀ꦠꦶꦠꦧ꧀ꦧꦁ. ꦄꦪꦁ ꦥꦤ ꦮꦶꦱꦺꦱꦺꦴ – ‘‘ꦄꦴꦒꦤ꧀ꦠꦸꦏꦱ꧀ꦱ ꦄꦴꦫꦺꦴꦕꦺꦠꦧ꧀ꦧ’’ꦤ꧀ꦠꦶ ꦌꦠ꧀ꦡ ꦪꦠ꧀ꦠꦏꦴ ꦥꦸꦫꦺꦨꦠ꧀ꦠꦁ ꦮꦴ ꦥꦕ꧀ꦖꦴꦨꦠ꧀ꦠꦁ ꦮꦴ ꦠꦁ ꦒꦴꦩꦁ ꦨꦶꦏ꧀ꦑꦹ ꦮꦴ ꦨꦶꦏ꧀ꦑꦸꦤꦶꦪꦺꦴ ꦮꦴ ꦄꦴꦒꦕ꧀ꦖꦤ꧀ꦠꦶ, ꦱꦧ꧀ꦧꦺꦱꦁ ꦄꦴꦫꦺꦴꦕꦺꦠꦧ꧀ꦧꦁ. ꦄꦤꦴꦫꦺꦴꦕꦺꦤ꧀ꦠꦶꦪꦴ ꦫꦠ꧀ꦠꦶꦕ꧀ꦖꦺꦢꦺꦴ ꦕꦺꦮ ꦮꦠ꧀ꦠꦨꦺꦢꦢꦸꦏ꧀ꦏꦛꦚ꧀ꦕ. ꦱꦕꦺꦥꦶ ꦫꦠ꧀ꦠꦶꦁ ꦏꦺꦴꦕꦶ ꦨꦶꦏ꧀ꦑꦸ ꦠꦁ ꦒꦴꦩꦹꦥꦕꦴꦫꦁ ꦎꦏ꧀ꦏꦩꦶꦠ꧀ꦮꦴ ꦒꦕ꧀ꦖꦠꦶ, ꦫꦠ꧀ꦠꦶꦕ꧀ꦖꦺꦢꦺꦴ ꦲꦺꦴꦠꦶꦪꦺꦮ, ꦄꦗꦴꦤꦤꦥꦕ꧀ꦕꦪꦴ ꦥꦤ ꦮꦠ꧀ꦠꦨꦺꦢꦠꦺꦴ ꦩꦸꦕ꧀ꦕꦠꦶ. ꦏꦸꦫꦸꦤ꧀ꦢꦷꦄꦴꦢꦷꦱꦸ ꦥꦤ ‘‘ꦄꦤꦶꦏ꧀ꦑꦶꦠ꧀ꦠꦮꦠ꧀ꦠꦨꦶꦏ꧀ꦑꦹꦤꦁ ꦮꦸꦠ꧀ꦠꦤꦪꦺꦤꦺꦮ ꦏꦡꦺꦠꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦁ, ꦠꦁ ꦥꦴꦫꦶꦮꦴꦱꦶꦏꦮꦠ꧀ꦠꦴꦢꦷꦤꦁ ꦈꦥꦕꦴꦫꦱꦷꦩꦴꦪ ꦥꦫꦶꦕ꧀ꦖꦶꦤ꧀ꦤꦠ꧀ꦠꦴ ꦪꦸꦠ꧀ꦠꦠꦫꦁ ꦢꦶꦱ꧀ꦱꦠꦶ. ꦈꦥꦺꦴꦱꦡꦺ ꦄꦴꦫꦺꦴꦕꦺꦠꦧ꧀ꦧꦁ, ꦥꦮꦴꦫꦟꦴꦪ ꦄꦴꦫꦺꦴꦕꦺꦠꦧ꧀ꦧꦁ, ꦕꦠꦸꦤ꧀ꦤꦁ ꦨꦶꦏ꧀ꦑꦹꦤꦚ꧀ꦕ ꦨꦶꦏ꧀ꦑꦸꦤꦷꦤꦚ꧀ꦕ ꦢꦺꦮꦱꦶꦏꦁ ꦄꦴꦫꦺꦴꦕꦺꦠꦧ꧀ꦧꦁ. ꦱꦕꦺ ꦨꦶꦏ꧀ꦑꦹꦤꦁ ꦠꦱ꧀ꦩꦶꦁ ꦒꦴꦩꦺ ꦨꦶꦏ꧀ꦑꦴꦕꦴꦫꦺꦴ ꦱꦩ꧀ꦥꦗ꧀ꦗꦠꦶ, ꦠꦠ꧀ꦡꦺꦮ ꦒꦤ꧀ꦠꦧ꧀ꦧꦁ. ꦤꦺꦴ ꦕꦺ ꦱꦩ꧀ꦥꦗ꧀ꦗꦠꦶ, ꦄꦚ꧀ꦚꦠ꧀ꦫ ꦕꦫꦶꦠ꧀ꦮꦴꦥꦶ ꦠꦠ꧀ꦫ ꦄꦴꦒꦤ꧀ꦠ꧀ꦮꦴ ꦄꦠ꧀ꦠꦴꦤꦁ ꦢꦱ꧀ꦱꦺꦠ꧀ꦮꦴ ꦒꦤ꧀ꦠꦧ꧀ꦧꦁ, ꦧꦲꦶꦒꦴꦩꦺ ꦮꦴ ꦱꦔ꧀ꦏꦺꦠꦛ꧀ꦜꦴꦤꦁ ꦏꦴꦠꦧ꧀ꦧꦁ ‘‘ꦄꦱꦸꦏꦱ꧀ꦩꦶꦁ ꦤꦴꦩ ꦜꦴꦤꦺ ꦄꦩ꧀ꦲꦺ ꦥꦱ꧀ꦱꦶꦱ꧀ꦱꦠꦷ’’ꦠꦶ. ꦠꦴꦪ ꦱꦔ꧀ꦏꦺꦠꦛ꧀ꦜꦴꦤꦁ ꦒꦤ꧀ꦠ꧀ꦮꦴ ꦄꦴꦫꦺꦴꦕꦺꦠꦧ꧀ꦧꦁ, ꦱꦔ꧀ꦏꦺꦠꦛ꧀ꦜꦴꦤꦺ ꦄꦢꦶꦱ꧀ꦮꦴ ꦮꦶꦲꦴꦫꦁ ꦒꦤ꧀ꦠ꧀ꦮꦴ ꦄꦴꦫꦺꦴꦕꦺꦠꦧ꧀ꦧꦁ. ꦮꦶꦲꦴꦫꦺ ꦱꦧ꧀ꦧꦨꦶꦏ꧀ꦑꦹꦤꦁ ꦄꦴꦫꦺꦴꦕꦺꦠꦧ꧀ꦧꦁ. ꦱꦕꦺ ꦱꦧ꧀ꦧꦺꦱꦁ ꦱꦏ꧀ꦏꦴ ꦤ ꦲꦺꦴꦠꦶ ꦄꦴꦫꦺꦴꦕꦺꦠꦸꦁ, ꦧꦲꦶ ꦈꦥꦕꦴꦫꦱꦷꦩꦴꦪ ꦜꦠ꧀ꦮꦴ ꦨꦶꦏ꧀ꦑꦸꦤꦶꦪꦺꦴ ꦥꦺꦱꦺꦠꦧ꧀ꦧꦴ, ꦠꦴꦲꦶ ꦄꦴꦤꦷꦠꦴꦤꦁ ꦕꦠꦸꦤ꧀ꦤꦁ ꦨꦶꦏ꧀ꦑꦹꦤꦁ ꦄꦴꦫꦺꦴꦕꦺꦠꦧ꧀ꦧꦁ. ꦱꦕꦺ ꦮꦶꦲꦴꦫꦺꦴ ꦢꦹꦫꦺꦴ ꦲꦺꦴꦠꦶ ꦱꦴꦱꦔ꧀ꦏꦺꦴ, ꦈꦥꦴꦱꦏꦺ ꦕ ꦈꦥꦴꦱꦶꦏꦴꦪꦺꦴ ꦕ ꦒꦲꦺꦠ꧀ꦮꦴ ꦒꦤ꧀ꦠꦧ꧀ꦧꦁ. ꦱꦕꦺ ꦥꦤ ꦄꦪꦁ ꦌꦏꦴ ꦮꦱꦠꦶ, ꦫꦠ꧀ꦠꦶꦮꦶꦥ꧀ꦥꦮꦴꦱꦁ ꦄꦴꦥꦗ꧀ꦗꦠꦶ, ꦠꦱ꧀ꦩꦴꦱ꧀ꦱꦴ ꦌꦏꦴ ꦥꦏꦠꦠ꧀ꦠꦴ ꦨꦶꦏ꧀ꦑꦸꦤꦷ ꦱꦩ꧀ꦩꦤ꧀ꦤꦶꦠ꧀ꦮꦴ ꦢꦴꦠꦧ꧀ꦧꦴ ꦌꦏꦕ꧀ꦖꦤ꧀ꦤꦺ ꦮꦱꦤꦠ꧀ꦡꦴꦪ.

ꦌꦮꦁ ꦄꦑꦟ꧀ꦝꦁ ꦩꦴꦤꦠ꧀ꦠꦁ ꦕꦫꦶꦠ꧀ꦮꦴ ꦮꦷꦱꦠꦶꦒꦟꦺ ꦨꦶꦏ꧀ꦑꦸꦤꦶꦱꦔ꧀ꦓꦺ ꦮꦸꦠ꧀ꦠꦤꦪꦺꦤꦺꦮ ꦄꦧ꧀ꦨꦴꦤꦁ ꦏꦴꦠꦧ꧀ꦧꦁ. ‘‘ꦱꦕꦺ ꦩꦴꦤꦠ꧀ꦠꦁ ꦕꦫꦩꦴꦤꦴ ꦄꦤ꧀ꦠꦫꦴꦥꦠ꧀ꦠꦶꦁ ꦄꦴꦥꦗ꧀ꦗꦠꦶ, ꦩꦹꦭꦴꦪ ꦥꦛꦶꦏꦱ꧀ꦱꦶꦠ꧀ꦮꦴ ꦠꦱ꧀ꦱꦴ ꦄꦴꦥꦠ꧀ꦠꦶꦪꦴ ꦩꦴꦤꦠ꧀ꦠꦁ ꦢꦴꦠꦧ꧀ꦧ’’ꦤ꧀ꦠꦶ ꦏꦸꦫꦸꦤ꧀ꦢꦶꦪꦁ ꦮꦸꦠ꧀ꦠꦁ, ꦆꦢꦁ ꦥꦏ꧀ꦑꦩꦴꦤꦠ꧀ꦠꦁ ꦤꦴꦩ. ꦆꦢꦁ ꦥꦤ ꦥꦏ꧀ꦑꦩꦴꦤꦠ꧀ꦠꦁ ꦱꦩꦤ꧀ꦠꦥꦴꦱꦴꦢꦶꦏꦴꦪꦁ (ꦕꦹꦭ꦳ꦮ. ꦄꦛ꧀ꦜ. ꧑꧐꧒) ꦥꦴꦭ꦳ꦶꦩꦸꦠ꧀ꦠꦮꦶꦤꦪꦮꦶꦤꦶꦕ꧀ꦖꦪꦨꦴꦮꦺꦤ ꦄꦴꦒꦠꦩ꧀ꦥꦶ ꦆꦩꦱ꧀ꦩꦶꦁ ꦮꦶꦤꦪꦱꦔ꧀ꦒꦲꦥ꧀ꦥꦏꦫꦟꦺ ꦄꦴꦕꦫꦶꦪꦺꦤ ꦄꦤꦸꦢ꧀ꦣꦛꦁ. ꦄꦪꦁ ꦥꦤꦴꦕꦫꦶꦪꦱ꧀ꦱ ꦄꦣꦶꦥ꧀ꦥꦴꦪꦺꦴ ꦱꦶꦪꦴ – ꦆꦢꦁ ꦥꦏ꧀ꦑꦩꦴꦤꦠ꧀ꦠꦁ ꦨꦶꦏ꧀ꦑꦸꦤꦶꦪꦺꦴꦪꦺꦮ ꦱꦤ꧀ꦣꦴꦪ ꦨꦒꦮꦠꦴ ꦮꦶꦱꦸꦁ ꦥꦚ꧀ꦚꦠ꧀ꦠꦁ, ꦨꦶꦏ꧀ꦑꦹꦲꦶ ꦄꦱꦴꦣꦴꦫꦟꦁ, ꦆꦩꦱ꧀ꦩꦶꦚ꧀ꦕ ꦏꦴꦭꦺ ꦨꦶꦏ꧀ꦑꦸꦤꦶꦱꦔ꧀ꦓꦺꦴ ꦤꦠ꧀ꦡꦶ, ꦠꦱ꧀ꦩꦴ ꦒꦤ꧀ꦡꦱ꧀ꦱ ꦭꦲꦸꦨꦴꦮꦠ꧀ꦡꦁ ꦆꦢꦩ꧀ꦥꦶ ꦄꦚ꧀ꦚꦩ꧀ꦥꦶ ꦇꦢꦶꦱꦁ ꦄꦗ꧀ꦙꦸꦥꦺꦏ꧀ꦑꦶꦠꦧ꧀ꦧꦤ꧀ꦠꦶ. ꦄꦩ꧀ꦲꦺꦲꦶ ꦥꦤ ꦨꦶꦏ꧀ꦑꦸꦤꦶꦱꦔ꧀ꦓꦺ ꦄꦮꦶꦗ꧀ꦗꦩꦴꦤꦺꦥꦶ ‘‘ꦨꦶꦏ꧀ꦑꦸꦱꦔ꧀ꦓꦺꦴ ꦨꦶꦏ꧀ꦑꦸꦤꦷꦲꦶ ꦱꦩꦴꦢꦴꦠꦧ꧀ꦧꦮꦠ꧀ꦠꦁ ꦗꦴꦤꦶꦱ꧀ꦱꦠꦶ. ‘ꦢꦸꦧ꧀ꦧꦭꦗꦴꦠꦶꦏꦴ ꦲꦶ ꦨꦷꦫꦸꦏꦗꦴꦠꦶꦏꦴ ꦨꦶꦏ꧀ꦑꦸꦤꦶꦪꦺꦴ ꦨꦒꦮꦠꦺꦴ ꦄꦴꦟꦁ ꦥꦠꦶꦛ꧀ꦜꦴꦥꦺꦤ꧀ꦠꦶꦪꦺꦴ ꦌꦮꦫꦹꦥꦁ ꦢꦸꦏ꧀ꦏꦫꦁ ꦢꦸꦫꦨꦶꦱꦩ꧀ꦨꦮꦁ ꦮꦠ꧀ꦠꦁ ꦱꦩꦴꦢꦪꦶꦁꦱꦸ, ꦏꦶꦩꦔ꧀ꦒꦁ ꦥꦤ ꦩꦪ’ꦤ꧀ꦠꦶ ꦩꦤꦱꦶ ꦏꦫꦺꦴꦤ꧀ꦠꦴ ꦨꦒꦮꦠꦺꦴ ꦄꦴꦟꦁ ꦥꦠꦶꦛ꧀ꦜꦴꦥꦺꦤ꧀ꦠꦴ ꦥꦫꦶꦮꦴꦱꦴꦢꦶꦮꦠ꧀ꦠꦁ ꦱꦩꦴꦢꦶꦪꦶꦱ꧀ꦱꦤ꧀ꦠꦷ’’ꦠꦶ ꦩꦤ꧀ꦠ꧀ꦮꦴ ꦄꦴꦕꦫꦶꦪꦺꦤ ꦄꦤꦸꦢ꧀ꦣꦛꦩ꧀ꦥꦶ ꦆꦩꦱ꧀ꦩꦶꦁ ꦮꦶꦤꦪꦴꦭꦔ꧀ꦏꦴꦫꦥ꧀ꦥꦏꦫꦟꦺ ꦈꦢ꧀ꦣꦛꦁ, ꦠꦱ꧀ꦩꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺ ꦱꦚ꧀ꦗꦴꦠꦱꦢ꧀ꦣꦴꦥꦺꦩꦒꦴꦫꦮꦴꦢꦶꦪꦸꦠ꧀ꦠꦺꦲꦶ ꦱꦠ꧀ꦡꦸꦱꦴꦱꦤꦏꦫꦺꦲꦶ ꦨꦶꦏ꧀ꦑꦹꦲꦶ ꦱꦩ꧀ꦩꦴ ꦱꦶꦏ꧀ꦑꦶꦠꦧ꧀ꦧꦁ. ꦆꦠꦺꦴ ꦥꦫꦴꦤꦶ ꦄꦛ꧀ꦜꦏꦡꦴꦪꦁ ꦄꦴꦒꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦴꦤꦶ.

ꦩꦴꦤꦠ꧀ꦠꦮꦶꦤꦶꦕ꧀ꦖꦪꦏꦡꦴ ꦤꦶꦛ꧀ꦜꦶꦠꦴ.

꧒꧔꧘. ꦥꦴꦫꦶꦮꦴꦱꦶꦏꦮꦠ꧀ꦠꦏꦡꦴꦪꦁ ꦤꦮꦏꦠꦫꦁ ꦥꦴꦫꦶꦮꦴꦱꦶꦏꦤ꧀ꦠꦶ ꦄꦠ꧀ꦠꦤꦴ ꦤꦮꦏꦠꦫꦁ ꦥꦴꦫꦶꦮꦴꦱꦶꦏꦁ. ꦥꦴꦫꦶꦮꦴꦱꦶꦏꦱ꧀ꦱ ꦲꦶ ꦄꦠ꧀ꦠꦤꦴ ꦤꦮꦏꦠꦫꦁ ꦥꦴꦫꦶꦮꦴꦱꦶꦏꦁ ꦜꦥꦺꦠ꧀ꦮꦴ ꦄꦚ꧀ꦚꦺ ꦩꦹꦭꦴꦪꦥꦛꦶꦏꦱ꧀ꦱꦤꦴꦫꦲ ꦩꦴꦤꦠ꧀ꦠꦴꦫꦲ ꦩꦴꦤꦠ꧀ꦠꦕꦴꦫꦶꦏ ꦄꦧ꧀ꦨꦴꦤꦴꦫꦲꦴꦥꦶ ꦥꦏꦠꦠ꧀ꦠꦛ꧀ꦜꦴꦤꦺꦪꦺꦮ ꦠꦶꦛ꧀ꦜꦤ꧀ꦠꦶ. ꦠꦺꦤꦴꦲ ‘‘ꦄꦤ꧀ꦠꦩꦱꦺꦴ ꦩꦹꦭꦴꦪꦥꦛꦶꦏꦱ꧀ꦱꦤꦴꦫꦲꦴꦢꦷꦤꦩ꧀ꦥꦷ’’ꦠꦶ. ꦄꦤ꧀ꦠꦩꦱꦺꦴ ꦩꦹꦭꦴꦪꦥꦛꦶꦏꦱ꧀ꦱꦤꦴꦫꦲꦴꦢꦷꦤꦩ꧀ꦥꦷꦠꦶ ꦄꦴꦢꦶ-ꦱꦢ꧀ꦢꦺꦤ ꦩꦴꦤꦠ꧀ꦠꦴꦫꦲꦩꦴꦤꦠ꧀ꦠꦕꦴꦫꦶꦏꦄꦧ꧀ꦨꦴꦤꦴꦫꦲꦺ ꦱꦔ꧀ꦒꦟ꧀ꦲꦴꦠꦶ. ꦠꦺ ꦲꦶ ꦥꦴꦫꦶꦮꦴꦱꦶꦏꦴꦤꦁ, ꦥꦴꦫꦶꦮꦴꦱꦶꦏꦴ ꦕ ꦠꦺꦱꦁ ꦥꦏꦠꦠ꧀ꦠꦛ꧀ꦜꦴꦤꦺ ꦌꦮ ꦠꦶꦛ꧀ꦜꦤ꧀ꦠꦶ. ꦄꦣꦺꦴꦠꦥꦴꦢꦛ꧀ꦜꦥꦤꦏꦤ꧀ꦠꦶ ꦪꦠ꧀ꦡ ꦜꦠ꧀ꦮꦴ ꦥꦴꦢꦺ ꦣꦺꦴꦮꦤ꧀ꦠꦶ, ꦠꦴꦢꦶꦱꦁ ꦢꦴꦫꦸꦦꦭꦏꦑꦟ꧀ꦝꦴꦢꦶꦁ. ꦥꦴꦢꦓꦁꦱꦤꦤ꧀ꦠꦶ ꦱꦏ꧀ꦑꦫꦏꦡꦭꦴꦢꦶꦁ. ꦥꦴꦢꦺ ꦓꦁꦱꦤ꧀ꦠꦶ ꦌꦠꦺꦤꦴꦠꦶ ꦥꦴꦢꦓꦁꦱꦤꦁ, ꦱꦏ꧀ꦑꦫꦏꦡꦭꦴꦢꦶ. ꦮꦸꦠ꧀ꦠꦚ꧀ꦲꦶ ꦨꦒꦮꦠꦴ ‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦠꦶꦱ꧀ꦱꦺꦴ ꦥꦴꦢꦓꦁꦱꦤꦶꦪꦺꦴ ꦱꦏ꧀ꦑꦫꦁ ꦏꦡꦭꦁ ꦱꦩꦸꦢ꧀ꦢꦦꦺꦟ’’ꦤ꧀ꦠꦶ (ꦕꦹꦭ꦳ꦮ. ꧒꧖꧙). ꦱꦢ꧀ꦣꦶꦮꦶꦲꦴꦫꦶꦏꦴꦤꦩ꧀ꦥꦶ ꦱꦴꦢꦶꦪꦤ꧀ꦠꦱ꧀ꦱꦴꦠꦶ ꦱꦢ꧀ꦣꦶꦮꦶꦲꦴꦫꦶꦏꦴꦤꦩ꧀ꦥꦶ ꦄꦨꦶꦮꦴꦢꦤꦴꦢꦶꦁ ꦱꦴꦢꦶꦪꦤ꧀ꦠꦱ꧀ꦱ. ꦮꦠ꧀ꦠꦁ ꦏꦫꦺꦴꦤ꧀ꦠꦷꦠꦶ ꦌꦠ꧀ꦠꦏꦩꦠ꧀ꦠꦱ꧀ꦱꦺꦮ ꦮꦸꦠ꧀ꦠꦠ꧀ꦠꦴ ꦱꦢ꧀ꦣꦶꦮꦶꦲꦴꦫꦶꦏꦴꦢꦷꦲꦶꦥꦶ ꦄꦨꦶꦮꦴꦢꦤꦴꦢꦶꦁ ꦏꦴꦠꦸꦁ ꦤ ꦮꦛ꧀ꦛꦠꦶ. ‘‘ꦩꦴ ꦩꦁ ꦒꦴꦩꦥ꧀ꦥꦮꦺꦱꦤꦁ ꦄꦴꦥꦸꦕ꧀ꦖꦡꦴ’’ꦠꦶ ꦮꦸꦠ꧀ꦠꦺ ꦄꦤꦴꦥꦸꦕ꧀ꦖꦴꦥꦶ ꦒꦴꦩꦁ ꦥꦮꦶꦱꦶꦠꦸꦁ ꦮꦛ꧀ꦛꦠꦶ.

ꦪꦺꦴ ꦪꦺꦴ ꦮꦸꦝ꧀ꦞꦺꦴꦠꦶ ꦥꦴꦫꦶꦮꦴꦱꦶꦏꦺꦱꦸ ꦨꦶꦏ꧀ꦑꦹꦱꦸ ꦪꦺꦴ ꦪꦺꦴ ꦮꦸꦝ꧀ꦞꦺꦴ. ꦤꦮꦏꦠꦫꦱ꧀ꦱ ꦱꦴꦢꦶꦠꦸꦤ꧀ꦠꦶ ꦥꦴꦫꦶꦮꦴꦱꦶꦏꦤꦮꦏꦠꦫꦱ꧀ꦱ ꦄꦨꦶꦮꦴꦢꦤꦴꦢꦶꦁ ꦱꦴꦢꦶꦠꦸꦁ. ‘‘ꦥꦴꦫꦶꦱꦸꦢ꧀ꦣꦶꦈꦥꦺꦴꦱꦡꦺ ꦏꦫꦶꦪꦩꦴꦤꦺ’’ꦠꦶ ꦆꦢꦁ ꦥꦮꦴꦫꦟꦢꦶꦮꦱꦺꦱꦸ ꦱꦔ꧀ꦓꦺ ꦥꦮꦴꦫꦺꦤ꧀ꦠꦺ ꦄꦤꦸꦥꦒꦠꦖꦶꦤ꧀ꦤꦮꦱ꧀ꦱꦴꦢꦷꦲꦶ ꦏꦫꦶꦪꦩꦴꦤꦁ ꦥꦴꦫꦶꦱꦸꦢ꧀ꦣꦶꦈꦥꦺꦴꦱꦡꦩ꧀ꦥꦶ ꦱꦤ꧀ꦣꦴꦪ ꦮꦸꦠ꧀ꦠꦁ. ꦠꦠ꧀ꦡꦺꦮꦴꦠꦶ ꦱꦔ꧀ꦓꦤꦮꦏꦛ꧀ꦜꦴꦤꦺꦪꦺꦮ. ꦄꦠ꧀ꦠꦤꦺꦴ ꦥꦴꦭ꦳ꦶꦪꦴ ꦥꦮꦴꦫꦺꦠꦧ꧀ꦧꦤ꧀ꦠꦶ ꦄꦠ꧀ꦠꦤꦺꦴ ꦮꦱ꧀ꦱꦒ꧀ꦒꦺꦤ ꦥꦠ꧀ꦠꦥꦴꦭ꦳ꦶꦪꦴ ꦥꦮꦴꦫꦺꦠꦧ꧀ꦧꦁ, ꦤ ꦥꦤ ꦱꦧ꧀ꦧꦺꦱꦸ ꦥꦮꦴꦫꦶꦠꦺꦱꦹꦠꦶ ꦄꦠ꧀ꦡꦺꦴ.

ꦎꦟꦺꦴꦗꦤꦁ ꦤꦴꦩ ꦮꦶꦱ꧀ꦱꦗ꧀ꦗꦤꦁ, ꦠꦁ ꦥꦤ ꦥꦴꦫꦶꦮꦴꦱꦶꦏꦺꦤ ꦥꦴꦥꦶꦠꦱ꧀ꦱ ꦄꦠ꧀ꦠꦤꦴ ꦱꦩ꧀ꦥꦛꦶꦕ꧀ꦖꦶꦠꦱ꧀ꦱꦺꦮ ꦥꦸꦤꦢꦶꦮꦱꦴꦢꦶꦄꦠ꧀ꦡꦴꦪ ꦮꦶꦱ꧀ꦱꦗ꧀ꦗꦤꦁ ꦏꦴꦠꦧ꧀ꦧꦁ. ꦄꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦕꦺ ꦮꦶꦱ꧀ꦱꦗ꧀ꦗꦺꦠꦶ, ꦤ ꦭꦨꦠꦷꦠꦶ ꦮꦸꦠ꧀ꦠꦁ. ꦪꦢꦶ ꦥꦤ ꦤ ꦒꦟ꧀ꦲꦴꦠꦶ ꦤ ꦮꦶꦱ꧀ꦱꦗ꧀ꦗꦺꦠꦷꦠꦶ ꦪꦢꦶ ꦥꦸꦫꦶꦩꦢꦶꦮꦱꦺ ꦄꦠ꧀ꦠꦤꦺꦴ ꦤ ꦒꦟ꧀ꦲꦴꦠꦶ, ꦒꦲꦺꦠ꧀ꦮꦴ ꦕ ꦤ ꦮꦶꦱ꧀ꦱꦗ꧀ꦗꦺꦠꦶ.

ꦕꦠꦸꦱ꧀ꦱꦴꦭꦨꦠ꧀ꦠꦤ꧀ꦠꦶ ꦨꦺꦴꦗꦤꦱꦴꦭꦴꦪ ꦥꦛꦶꦥꦴꦛꦶꦪꦴ ꦢꦷꦪꦩꦴꦤꦁ ꦨꦠ꧀ꦠꦁ. ꦲꦠ꧀ꦡꦥꦴꦱꦺ ꦜꦶꦠꦺꦤꦴꦠꦶ ꦢꦴꦪꦏꦱ꧀ꦱ ꦲꦠ꧀ꦡꦥꦴꦱꦺ ꦜꦶꦠꦺꦤ, ꦥꦛꦶꦒ꧀ꦒꦲꦟꦫꦸꦲꦤꦛ꧀ꦜꦴꦤꦺꦠꦶ ꦄꦣꦶꦥ꧀ꦥꦴꦪꦺꦴ. ꦩꦲꦴꦥꦺꦭ꦳ꦨꦠ꧀ꦠꦺꦥꦷꦠꦶ ꦩꦲꦤ꧀ꦠꦺꦱꦸ ꦨꦠ꧀ꦠꦥꦕ꧀ꦖꦶꦄꦴꦢꦶꦨꦴꦗꦤꦺꦱꦸ ꦜꦥꦺꦠ꧀ꦮꦴ ꦢꦷꦪꦩꦴꦤꦨꦠ꧀ꦠꦺꦱꦸꦥꦶ. ꦆꦠꦺꦴ ꦥꦫꦩ꧀ꦥꦶ ꦥꦴꦫꦶꦮꦴꦱꦶꦏꦮꦠ꧀ꦠꦁ ꦥꦴꦭ꦳ꦶꦪꦁ (ꦕꦹꦭ꦳ꦮ. ꧗꧕) ꦄꦴꦒꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦠꦠ꧀ꦡ ꦥꦤ ꦄꦛ꧀ꦜꦏꦡꦴꦪꦁ ꦄꦴꦒꦠꦤꦪꦺꦤꦺꦮ ꦄꦠ꧀ꦡꦺꦴ ꦱꦸꦮꦶꦚ꧀ꦚꦺꦪ꧀ꦪꦺꦴ ꦲꦺꦴꦠꦶ, ꦠꦱ꧀ꦩꦴ ꦢꦸꦧ꧀ꦧꦶꦚ꧀ꦚꦺꦪ꧀ꦪꦛ꧀ꦜꦴꦤꦺꦪꦺꦮ ꦏꦡꦪꦶꦱ꧀ꦱꦴꦩ.

‘‘ꦤ ꦱꦴꦩꦟꦺꦫꦺꦴ ꦈꦥꦛ꧀ꦜꦴꦥꦺꦠꦧ꧀ꦧꦺꦴ’’ꦠꦶ ꦌꦠ꧀ꦡ ꦢꦸꦧ꧀ꦧꦶꦣꦁ ꦱꦴꦩꦟꦺꦫꦁ ꦢꦱ꧀ꦱꦺꦠꦸꦁ ‘‘ꦄꦚ꧀ꦚꦺꦴ’’ꦠꦶꦄꦴꦢꦶꦩꦴꦲ. ‘‘ꦤ ꦨꦶꦏ꧀ꦑꦸꦤꦶꦪꦺꦴ ꦎꦮꦢꦶꦠꦧ꧀ꦧꦴ’’ꦠꦶ ꦌꦠ꧀ꦡ ꦭꦢ꧀ꦣꦱꦩ꧀ꦩꦸꦠꦶꦏꦺꦤ ꦄꦴꦟꦠ꧀ꦠꦺꦴꦥꦶ ꦒꦫꦸꦣꦩ꧀ꦩꦺꦲꦶ ꦄꦚ꧀ꦚꦺꦲꦶ ꦮꦴ ꦎꦮꦢꦶꦠꦸꦁ ꦤ ꦭꦨꦠꦷꦠꦶ ꦄꦴꦲ ‘‘ꦥꦛꦶꦧꦭꦱ꧀ꦱ ꦮꦴ ꦨꦶꦏ꧀ꦑꦸꦱ꧀ꦱ ꦨꦴꦫꦺꦴ ꦏꦴꦠꦧ꧀ꦧꦺꦴ’’ꦠꦶ. ꦄꦴꦒꦠꦴ ꦨꦶꦏ꧀ꦑꦸꦤꦶꦪꦺꦴ ꦮꦠ꧀ꦠꦧ꧀ꦧꦴꦠꦶ ꦱꦩ꧀ꦧꦤ꧀ꦣꦺꦴ. ꦱꦮꦕꦤꦷꦪꦤ꧀ꦠꦶ ꦱꦢꦺꦴꦱꦁ. ꦗꦺꦛ꧀ꦜꦏꦛ꧀ꦜꦴꦤꦁ ꦤ ꦏꦴꦠꦧ꧀ꦧꦤ꧀ꦠꦶ ꦥꦣꦴꦤꦛ꧀ꦜꦴꦤꦁ ꦤ ꦏꦴꦠꦧ꧀ꦧꦁ. ꦏꦶꦁ ꦠꦤ꧀ꦠꦶ ꦄꦴꦲ ‘‘ꦥꦴꦠꦶꦩꦺꦴꦏ꧀ꦑꦸꦢ꧀ꦢꦺꦱꦏꦺꦤꦴ’’ꦠꦶꦄꦴꦢꦶ.

ꦫꦗꦺꦲꦶ ꦲꦠꦴ ꦈꦥꦲꦠꦴ ꦨꦹꦩꦶ ꦌꦠꦶꦱ꧀ꦱꦴꦠꦶ ꦫꦗꦺꦴꦲꦠꦨꦹꦩꦶ, ꦫꦗꦺꦴꦏꦶꦟ꧀ꦟꦨꦹꦩꦷꦠꦶ ꦄꦠ꧀ꦡꦺꦴ. ꦥꦕ꧀ꦕꦪꦤ꧀ꦠꦶ ꦮꦱ꧀ꦱꦴꦮꦴꦱꦶꦏꦭꦴꦨꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦌꦏꦥꦱ꧀ꦱꦺ ꦜꦠ꧀ꦮꦴꦠꦶ ꦥꦴꦭ꦳ꦶꦁ ꦮꦶꦲꦴꦪ ꦨꦶꦏ꧀ꦑꦹꦤꦁ ꦥꦕ꧀ꦖꦠꦺꦴ ꦜꦠ꧀ꦮꦴ. ꦱꦺꦤꦴꦱꦤꦁ ꦤ ꦭꦨꦠꦷꦠꦶ ꦱꦺꦪ꧀ꦪꦥꦫꦶꦪꦤ꧀ꦠꦨꦴꦒꦶꦠꦴꦪ ꦮꦱ꧀ꦱꦒ꧀ꦒꦺꦤ ꦒꦟ꧀ꦲꦶꦠꦸꦁ ꦤ ꦭꦨꦠꦶ. ꦄꦱ꧀ꦱꦴꦠꦶ ꦨꦮꦺꦪ꧀ꦪ. ‘‘ꦄꦴꦒꦤ꧀ꦠꦸꦏꦺꦤ ꦄꦴꦫꦺꦴꦕꦺꦠꦧ꧀ꦧꦁ, ꦄꦴꦒꦤ꧀ꦠꦸꦏꦱ꧀ꦱ ꦄꦴꦫꦺꦴꦕꦺꦠꦧ꧀ꦧ’’ꦤ꧀ꦠꦶ ꦄꦮꦶꦱꦺꦱꦺꦤ ꦮꦸꦠ꧀ꦠꦠ꧀ꦠꦴ ꦱꦕꦺ ꦢ꧀ꦮꦺ ꦥꦴꦫꦶꦮꦴꦱꦶꦏꦴ ꦒꦠꦛ꧀ꦜꦴꦤꦺ ꦄꦚ꧀ꦚꦩꦚ꧀ꦚꦁ ꦥꦱ꧀ꦱꦤ꧀ꦠꦶ, ꦈꦨꦺꦴꦲꦶꦥꦶ ꦄꦚ꧀ꦚꦩꦚ꧀ꦚꦱ꧀ꦱ ꦄꦴꦫꦺꦴꦕꦺꦠꦧ꧀ꦧꦁ. ꦪꦡꦴ ꦧꦲꦶ ꦢꦶꦱ꧀ꦮꦴ ꦄꦴꦫꦺꦴꦕꦶꦠꦱ꧀ꦱ ꦨꦶꦏ꧀ꦑꦸꦤꦺꦴ ꦮꦶꦲꦴꦫꦁ ꦄꦴꦒꦠꦺꦤ ꦥꦸꦤ ꦄꦴꦫꦺꦴꦕꦤꦏꦶꦕ꧀ꦕꦁ ꦤꦠ꧀ꦡꦶ, ꦌꦮꦁ ꦄꦚ꧀ꦚꦮꦶꦲꦴꦫꦁ ꦒꦠꦺꦤꦥꦶ ꦠꦠ꧀ꦡ ꦥꦸꦧ꧀ꦧꦺ ꦄꦴꦫꦺꦴꦕꦶꦠꦱ꧀ꦱ ꦥꦸꦤ ꦄꦴꦫꦺꦴꦕꦤꦏꦶꦕ꧀ꦕꦁ ꦤꦠ꧀ꦡꦷꦠꦶ ꦮꦢꦤ꧀ꦠꦶ. ꦄꦮꦶꦱꦺꦱꦺꦤꦴꦠꦶ ꦥꦴꦫꦶꦮꦴꦱꦶꦏꦱ꧀ꦱ ꦕ ꦈꦏ꧀ꦑꦶꦠ꧀ꦠꦏꦱ꧀ꦱ ꦕ ꦄꦮꦶꦱꦺꦱꦺꦤ.

ꦎꦧꦢ꧀ꦣꦤ꧀ꦠꦶ ꦥꦭꦶꦧꦸꦢ꧀ꦣꦁ. ꦱꦲꦮꦴꦱꦺꦴꦠꦶ ꦮꦸꦠ꧀ꦠꦥ꧀ꦥꦏꦴꦫꦺ ꦖꦤ꧀ꦤꦺ ꦨꦶꦏ꧀ꦑꦸꦤꦴ ꦱꦢ꧀ꦣꦶꦁ ꦱꦪꦤꦩꦺꦮ ꦄꦣꦶꦥ꧀ꦥꦺꦠꦁ, ꦤ ꦱꦺꦱꦆꦫꦶꦪꦴꦥꦡꦏꦥ꧀ꦥꦤꦁ. ꦱꦺꦱꦩꦺꦠ꧀ꦡ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.

ꦥꦴꦥꦶꦛ꧀ꦜꦠꦫꦴꦠꦶ ꦥꦴꦫꦴꦗꦶꦏꦴꦥꦠ꧀ꦠꦷꦠꦶ ꦈꦏ꧀ꦏꦁꦱꦮꦱꦺꦤ ꦮꦸꦠ꧀ꦠꦁ. ꦱꦚ꧀ꦕꦫꦶꦠ꧀ꦠꦴꦢꦶꦥꦟ꧀ꦟꦠ꧀ꦠꦶꦮꦗ꧀ꦗꦠꦺꦴ ꦥꦤ ꦱꦸꦏ꧀ꦏꦮꦶꦱ꧀ꦱꦛ꧀ꦜꦴꦢꦶꦏꦴ ꦭꦺꦴꦏꦮꦗ꧀ꦗꦴꦮ. ꦠꦠ꧀ꦡꦥꦶ ꦱꦔ꧀ꦓꦨꦺꦢꦴꦢꦶꦏꦴ ꦥꦴꦥꦶꦛ꧀ꦜꦠꦫꦴ ꦌꦮ. ꦏꦩ꧀ꦩꦤ꧀ꦠꦶ ꦥꦴꦫꦶꦮꦴꦱꦶꦏꦏꦩ꧀ꦩꦮꦴꦕꦴꦠꦶ ꦌꦠꦺꦤ ‘‘ꦏꦩ꧀ꦩꦨꦹꦠꦴ ꦮꦴꦕꦴ ꦏꦩ꧀ꦩꦮꦴꦕꦴ’’ꦠꦶ ꦏꦩ꧀ꦩꦮꦴꦕꦴꦱꦢ꧀ꦢꦱ꧀ꦱ ꦄꦠ꧀ꦡꦺꦴꦥꦶ ꦱꦶꦢ꧀ꦣꦺꦴꦠꦶ ꦮꦺꦢꦶꦠꦧ꧀ꦧꦺꦴ. ꦱꦮꦕꦤꦷꦪꦤ꧀ꦠꦶ ꦌꦠ꧀ꦡ ꦱ-ꦱꦢ꧀ꦢꦺꦴ ‘‘ꦱꦤ꧀ꦠꦶ’’ꦄꦠ꧀ꦡꦁ ꦮꦢꦠꦶ, ꦄꦠ꧀ꦠꦤꦺꦴ ꦮꦕꦤꦺꦤ ꦄꦠ꧀ꦠꦤꦺꦴ ꦥꦮꦠ꧀ꦠꦤꦏꦩ꧀ꦩꦤ꧀ꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ, ‘‘ꦩꦴ ꦥꦏ꧀ꦏꦩꦴꦲꦷ’’ꦠꦶ ꦮꦴ ‘‘ꦌꦲꦶ ꦮꦶꦤꦪꦣꦫꦴꦤꦁ ꦱꦩ꧀ꦩꦸꦑꦷꦨꦴꦮ’’ꦤ꧀ꦠꦶ ꦮꦴ ꦌꦮꦁ ꦄꦠ꧀ꦠꦤꦺꦴ ꦄꦴꦟꦴꦪ ꦥꦮꦠ꧀ꦠꦤꦏꦏꦩ꧀ꦩꦁ ꦤ ꦏꦴꦠꦧ꧀ꦧꦤ꧀ꦠꦶ ꦄꦣꦶꦥ꧀ꦥꦴꦪꦺꦴ. ꦌꦮꦚ꧀ꦲꦶ ꦏꦺꦤꦕꦶ ꦱꦮꦕꦤꦷꦪꦺ ꦏꦠꦺ ꦄꦤꦴꦢꦫꦺꦤ ꦄꦠꦶꦏ꧀ꦏꦩꦶꦠꦸꦁ ꦤ ꦮꦛ꧀ꦛꦠꦶ, ꦧꦸꦢ꧀ꦣꦱ꧀ꦱ ꦱꦔ꧀ꦓꦱ꧀ꦱ ꦄꦴꦟꦴ ꦄꦠꦶꦏ꧀ꦏꦤ꧀ꦠꦴ ꦤꦴꦩ ꦲꦺꦴꦠꦶ. ꦫꦗꦺꦴꦲꦠꦨꦹꦩꦷꦠꦶ ꦥꦟ꧀ꦟꦱꦴꦭꦴꦮꦶꦱꦺꦱꦤꦁ. ꦥꦕ꧀ꦕꦪꦤ꧀ꦠꦶ ꦮꦱ꧀ꦱꦴꦮꦴꦱꦶꦏꦕꦷꦮꦫꦁ. ꦱꦺꦤꦴꦱꦤꦁ ꦤ ꦭꦨꦠꦷꦠꦶ ꦮꦱ꧀ꦱꦒ꧀ꦒꦺꦤ ꦤ ꦭꦨꦠꦶ. ꦄꦥꦟ꧀ꦟꦏꦥꦛꦶꦥꦢꦴꦠꦶ ꦄꦮꦶꦫꦢ꧀ꦣꦥꦛꦶꦥꦢꦴ. ꦱꦕꦺ ꦮꦴꦪꦩꦤ꧀ꦠꦺꦴꦥꦷꦠꦶ ꦌꦠ꧀ꦡ ꦄꦮꦶꦱꦪꦨꦴꦮꦁ ꦚꦠ꧀ꦮꦴ ꦄꦮꦴꦪꦩꦤ꧀ꦠꦺꦴꦥꦶ ꦱꦔ꧀ꦒꦪ꧀ꦲꦠꦶ. ꦄꦮꦶꦱꦺꦱꦺꦤꦴꦠꦶ ꦥꦴꦫꦶꦮꦴꦱꦶꦏꦸꦏ꧀ꦑꦶꦠ꧀ꦠꦏꦴꦤꦁ ꦱꦴꦩꦚ꧀ꦚꦺꦤ. ꦥꦚ꧀ꦕꦮꦟ꧀ꦟꦖꦢꦤꦧꦤ꧀ꦣꦤꦛ꧀ꦜꦴꦤꦺꦱꦹꦠꦶ ꦥꦚ꧀ꦕꦥ꧀ꦥꦏꦴꦫꦖꦢꦤꦺꦲꦶ ꦖꦤ꧀ꦤꦛ꧀ꦜꦴꦤꦺꦱꦸ. ꦎꦧꦢ꧀ꦣꦤ꧀ꦠꦶ ꦈꦛ꧀ꦜꦴꦤꦴꦢꦶꦧ꧀ꦪꦴꦥꦴꦫꦥꦛꦶꦧꦢ꧀ꦣꦁ, ꦥꦷꦭ꦳ꦶꦠꦤ꧀ꦠꦶ ꦄꦠ꧀ꦡꦺꦴ. ꦩꦚ꧀ꦕꦺ ꦮꦴ ꦥꦷꦜꦺ ꦮꦴꦠꦶ ꦌꦠ꧀ꦡ ꦮꦴꦱꦢ꧀ꦢꦺꦴ ꦱꦩꦸꦕ꧀ꦕꦪꦠ꧀ꦡꦺꦴ. ꦠꦺꦤ ꦠꦛ꧀ꦛꦶꦏꦴꦕꦩ꧀ꦩꦑꦟ꧀ꦝꦴꦢꦷꦱꦸ ꦢꦷꦓꦴꦱꦤꦺꦱꦸꦥꦶ ꦤꦶꦱꦷꦢꦶꦠꦸꦁ ꦤ ꦮꦛ꧀ꦛꦠꦷꦠꦶ ꦢꦷꦥꦶꦠꦁ ꦲꦺꦴꦠꦶ. ꦤ ꦮꦠ꧀ꦠꦨꦺꦢꦢꦸꦏ꧀ꦏꦛꦤ꧀ꦠꦶ ꦮꦸꦝ꧀ꦞꦠꦫꦱ꧀ꦱ ꦗꦴꦤꦤ꧀ꦠꦱ꧀ꦱꦥꦶ ꦮꦠ꧀ꦠꦨꦺꦢꦺ ꦢꦸꦏ꧀ꦏꦛꦁ ꦤꦠ꧀ꦡꦷꦠꦶ ꦢꦱ꧀ꦱꦺꦠꦶ. ꦮꦠ꧀ꦠꦁ ꦤꦶꦏ꧀ꦑꦶꦥꦴꦥꦺꦠ꧀ꦮꦴꦠꦶ ꦆꦢꦩ꧀ꦥꦶ ꦥꦫꦶꦮꦴꦱꦴꦢꦶꦩꦺꦮ ꦱꦤ꧀ꦣꦴꦪ ꦮꦸꦠ꧀ꦠꦁ, ꦤ ꦱꦺꦱꦏꦩ꧀ꦩꦴꦤꦶ.

‘‘ꦱꦺꦤꦴꦱꦤꦁ ꦤ ꦭꦨꦠꦶ ꦱꦺꦪ꧀ꦪꦥꦫꦶꦪꦤ꧀ꦠꦨꦴꦒꦶꦠꦴꦪ. ꦈꦢ꧀ꦢꦺꦱꦴꦢꦷꦤꦶ ꦢꦴꦠꦸꦩ꧀ꦥꦶ ꦤ ꦭꦨꦠꦷꦠꦶ ꦮꦢꦤ꧀ꦠꦶ. ‘ꦠꦢꦲꦸꦥꦱꦩ꧀ꦥꦤ꧀ꦤꦺꦥꦶ ꦥꦏꦠꦠ꧀ꦠꦺ’ꦠꦶ ꦮꦕꦤꦠꦺꦴ ꦄꦤꦸꦥꦱꦩ꧀ꦥꦤ꧀ꦤꦺꦲꦶ ꦮꦱꦶꦠꦸꦁ ꦮꦛ꧀ꦛꦠꦶ. ꦱꦩꦮꦱ꧀ꦱꦴꦠꦶ ꦌꦠꦺꦤ ꦄꦥꦕ꧀ꦖꦴ ꦄꦥꦸꦫꦶꦩꦁ ꦤꦶꦥꦗ꧀ꦗꦤꦺ ꦢ꧀ꦮꦶꦤ꧀ꦤꦩ꧀ꦥꦶ ꦮꦠ꧀ꦠꦨꦺꦢꦴꦥꦠ꧀ꦠꦶꦨꦴꦮꦁ ꦢꦷꦥꦺꦠꦶ. ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦤꦮꦏꦠꦫꦤ꧀ꦠꦶ ꦥꦴꦫꦶꦮꦴꦱꦶꦏꦴꦢꦶꦤꦮꦏꦠꦫꦁ. ꦥꦜꦩꦁ ꦱꦔ꧀ꦓꦩꦗ꧀ꦙꦺ ꦥꦫꦶꦮꦴꦱꦁ ꦒꦲꦺꦠ꧀ꦮꦴ ꦤꦶꦏ꧀ꦑꦶꦠ꧀ꦠꦮꦠ꧀ꦠꦺꦤ ꦥꦸꦤ ꦌꦏꦱ꧀ꦱꦥꦶ ꦱꦤ꧀ꦠꦶꦏꦺ ꦱꦩꦴꦢꦶꦪꦶꦠꦸꦁ ꦤꦶꦏ꧀ꦑꦶꦥꦶꦠꦸꦚ꧀ꦕ ꦮꦛ꧀ꦛꦠꦶ, ꦩꦴꦤꦠ꧀ꦠꦺ ꦥꦤ ꦤꦶꦏ꧀ꦑꦶꦥꦶꦠꦸꦁ ꦮꦛ꧀ꦛꦠꦶ. ꦈꦴꦤꦺꦒꦟꦺꦕꦫꦟꦢꦺꦴꦱꦠ꧀ꦠꦴ ꦤ ꦒꦲꦺꦠꦸꦤ꧀ꦠꦶ ꦌꦏꦺ. ꦥꦜꦩꦁ ꦄꦴꦢꦶꦤ꧀ꦤꦮꦠ꧀ꦠꦁ ꦌꦏꦱ꧀ꦱ ꦱꦤ꧀ꦠꦶꦏꦺ ꦪꦡꦴ ꦤꦶꦏ꧀ꦑꦶꦥꦶꦠꦸꦁ ꦮꦛ꧀ꦛꦠꦶ, ꦠꦡꦴ ꦱꦩꦴꦢꦶꦪꦶꦠꦸꦩ꧀ꦥꦶ ꦮꦛ꧀ꦛꦠꦷꦠꦶ ꦥꦺꦴꦫꦴꦟꦒꦟ꧀ꦜꦶꦥꦢꦺ’’ꦠꦶ ꦮꦗꦶꦫꦧꦸꦢ꧀ꦣꦶꦛꦷꦏꦴꦪꦁ (ꦮꦗꦶꦫ. ꦛꦷ. ꦕꦹꦭ꦳ꦮꦒ꧀ꦒ ꧗꧖) ꦮꦸꦠ꧀ꦠꦤ꧀ꦠꦶ.

ꦆꦢꦁ ꦌꦠ꧀ꦡ ꦪꦁ ꦮꦠ꧀ꦠꦁ ‘‘ꦕꦠꦸꦤꦮꦸꦠꦶꦥꦴꦫꦶꦮꦴꦱꦶꦏꦮꦠ꧀ꦠ’’ꦤ꧀ꦠꦶ ꦥꦴꦫꦶꦮꦴꦱꦶꦏꦏ꧀ꦑꦤ꧀ꦣꦏꦥꦴꦭ꦳ꦶꦪꦁ (ꦕꦹꦭ꦳ꦮ. ꧗꧕) ꦄꦴꦒꦠꦁ, ꦱꦩꦤ꧀ꦠꦥꦴꦱꦴꦢꦶꦏꦴꦪꦩ꧀ꦥꦶ ꦌꦠ꧀ꦠꦏꦴꦪ ꦥꦴꦭ꦳ꦶꦪꦴ (ꦕꦹꦭ꦳ꦮ. ꦄꦛ꧀ꦜ. ꧗꧕-꧘꧔) ꦮꦟ꧀ꦟꦤꦁ ꦮꦠ꧀ꦮꦴ ‘‘ꦥꦴꦫꦶꦮꦴꦱꦶꦏꦮꦠ꧀ꦠꦏꦡꦴ ꦤꦶꦛ꧀ꦜꦶꦠꦴ’’ꦠꦶ ꦄꦴꦲ. ꦆꦩꦱ꧀ꦩꦶꦁ ꦮꦶꦤꦪꦱꦔ꧀ꦒꦲꦥꦏꦫꦟꦺ (ꦮꦶ. ꦱꦔ꧀ꦒ. ꦄꦛ꧀ꦜ. ꧒꧔꧘) ꦥꦤ ‘‘ꦤ ꦖꦩꦴꦪꦁ ꦕꦔ꧀ꦏꦩꦤ꧀ꦠꦺ ꦕꦔ꧀ꦏꦩꦺ ꦕꦔ꧀ꦏꦩꦶꦠꦧ꧀ꦧ’’ꦤ꧀ꦠꦶ ꦆꦩꦱ꧀ꦱꦴꦤꦤ꧀ꦠꦫꦁ ‘‘ꦥꦴꦫꦶꦮꦴꦱꦶꦏꦕꦠꦸꦠ꧀ꦡꦺꦴ ꦕꦺ, ꦨꦶꦏ꧀ꦑꦮꦺ’’ꦠꦶꦄꦴꦢꦷꦤꦶ ꦄꦒ꧀ꦒꦲꦺꦠ꧀ꦮꦴ ‘‘ꦤ, ꦨꦶꦏ꧀ꦑꦮꦺ, ꦥꦴꦫꦶꦮꦴꦱꦶꦏꦺꦤ ꦨꦶꦏ꧀ꦑꦸꦤꦴ ꦱꦴꦢꦶꦠꦧ꧀ꦧ’’ꦤ꧀ꦠꦶꦄꦴꦢꦷꦤꦶ ꦥꦜꦩꦁ ꦥꦚ꧀ꦚꦠ꧀ꦠꦥꦢꦴꦤꦶ ꦒꦲꦺꦠ꧀ꦮꦴ ꦠꦺꦱꦁ ꦥꦢꦴꦤꦁ ꦱꦁꦮꦟ꧀ꦟꦤꦁ ꦏꦠ꧀ꦮꦴ ‘‘ꦆꦢꦁ ꦥꦴꦫꦶꦮꦴꦱꦶꦏꦮꦠ꧀ꦠ’’ꦤ꧀ꦠꦶ ꦄꦚ꧀ꦚꦡꦴ ꦄꦤꦸꦏ꧀ꦏꦩꦺꦴ ꦮꦸꦠ꧀ꦠꦺꦴ, ꦱꦺꦴ ꦥꦴꦭ꦳ꦶꦪꦴ ꦕ ꦄꦛ꧀ꦜꦏꦡꦴꦪ ꦕ ꦤ ꦱꦩꦺꦠꦶ. ꦄꦴꦕꦫꦶꦪꦱ꧀ꦱ ꦥꦤ ꦄꦪꦩꦣꦶꦥ꧀ꦥꦴꦪꦺꦴ ꦱꦶꦪꦴ – ‘‘ꦥꦴꦫꦶꦮꦴꦱꦶꦏꦕꦠꦸꦠ꧀ꦡꦺꦴ ꦕꦺ, ꦨꦶꦏ꧀ꦑꦮꦺ’’ꦠꦶꦄꦴꦢꦷꦤꦶ ꦥꦴꦫꦶꦮꦴꦱꦶꦏꦨꦶꦏ꧀ꦑꦹꦤꦁ ꦱꦩꦴꦢꦶꦪꦶꦠꦧ꧀ꦧꦴꦤꦶ ꦤ ꦲꦺꦴꦤ꧀ꦠꦶ, ꦄꦡ ꦑꦺꦴ ꦏꦩ꧀ꦩꦏꦴꦫꦏꦴꦤꦁ ꦨꦶꦏ꧀ꦑꦹꦤꦁ ꦏꦠ꧀ꦠꦧ꧀ꦧꦴꦏꦠ꧀ꦠꦧ꧀ꦧꦏꦩ꧀ꦩꦢꦱ꧀ꦱꦤꦩꦺꦠꦁ, ꦠꦱ꧀ꦩꦴ ꦥꦴꦫꦶꦮꦴꦱꦶꦏꦮꦠ꧀ꦠꦺ ꦤ ꦥꦮꦺꦱꦺꦠꦧ꧀ꦧꦁ. ‘‘ꦤ, ꦨꦶꦏ꧀ꦑꦮꦺ, ꦥꦴꦫꦶꦮꦴꦱꦶꦏꦺꦤ ꦨꦶꦏ꧀ꦑꦸꦤꦴ ꦱꦴꦢꦶꦠꦧ꧀ꦧ’’ꦤ꧀ꦠꦶꦄꦴꦢꦷꦤꦶ ꦥꦤ ꦥꦴꦫꦶꦮꦴꦱꦶꦏꦨꦶꦏ꧀ꦑꦹꦤꦁ ꦱꦩ꧀ꦩꦴꦮꦠ꧀ꦠꦶꦠꦧ꧀ꦧꦮꦠ꧀ꦠꦴꦤꦶꦪꦺꦮ ꦲꦺꦴꦤ꧀ꦠꦶ, ꦠꦱ꧀ꦩꦴ ꦆꦩꦴꦤꦶꦪꦺꦮ ꦥꦴꦫꦶꦮꦴꦱꦶꦏꦮꦠ꧀ꦠꦺ ꦥꦮꦺꦱꦺꦠꦧ꧀ꦧꦴꦤꦷꦠꦶ. ꦄꦩ꧀ꦲꦺꦲꦶ ꦥꦤ ꦥꦴꦭ꦳ꦶꦄꦛ꧀ꦜꦏꦡꦴꦛꦷꦏꦴꦱꦸ ꦄꦴꦒꦠꦴꦤꦸꦏ꧀ꦏꦩꦺꦤ ꦥꦜꦩꦁ ꦥꦚ꧀ꦚꦠ꧀ꦠꦮꦠ꧀ꦠꦴꦤꦁ ꦄꦠ꧀ꦡꦁ ꦥꦜꦩꦁ ꦢꦱ꧀ꦱꦺꦠ꧀ꦮꦴ ꦥꦕ꧀ꦖꦴ ꦥꦚ꧀ꦚꦠ꧀ꦠꦥꦢꦴꦤꦁ ꦄꦠ꧀ꦡꦺꦴ ꦥꦕ꧀ꦖꦴ ꦮꦸꦠ꧀ꦠꦺꦴꦠꦶ ꦢꦛ꧀ꦜꦧ꧀ꦧꦺꦴ.

ꦆꦠꦶ ꦮꦶꦤꦪꦱꦔ꧀ꦒꦲꦱꦁꦮꦟ꧀ꦟꦤꦴꦨꦹꦠꦺ ꦮꦶꦤꦪꦴꦭꦔ꧀ꦏꦴꦫꦺ

ꦒꦫꦸꦏꦴꦥꦠ꧀ꦠꦶꦮꦸꦛ꧀ꦜꦴꦤꦮꦶꦤꦶꦕ꧀ꦖꦪꦏꦡꦴꦭꦔ꧀ꦏꦴꦫꦺꦴ ꦤꦴꦩ

ꦢ꧀ꦮꦠ꧀ꦠꦶꦁꦱꦠꦶꦩꦺꦴ ꦥꦫꦶꦕ꧀ꦖꦺꦢꦺꦴ.