ꦄꦤ꧀ꦠꦫꦥꦺꦪ꧀ꦪꦴꦭꦁ

ꦏꦠꦶꦥꦸꦕ꧀ꦖꦴꦮꦴꦫꦮꦟ꧀ꦟꦤꦴ

꧒꧗꧑. ꦏꦠꦶ ꦄꦴꦥꦠ꧀ꦠꦶꦪꦺꦴꦠꦶ ꦥꦴꦫꦴꦗꦶꦏꦴꦢꦷꦱꦸ ꦥꦚ꧀ꦕꦱꦸ ꦄꦴꦥꦠ꧀ꦠꦷꦱꦸ ꦩꦺꦡꦸꦤꦴꦢꦶꦤ꧀ꦤꦴꦢꦴꦤꦴꦢꦶꦄꦤ꧀ꦠꦺꦴꦒꦣꦨꦺꦢꦁ ꦄꦥꦺꦏ꧀ꦑꦶꦠ꧀ꦮꦴ ꦗꦴꦠꦶꦮꦱꦺꦤ ꦌꦏꦠ꧀ꦠꦁ ꦄꦴꦫꦺꦴꦥꦺꦠ꧀ꦮꦴ ꦥꦸꦕ꧀ꦖꦴ ꦏꦠꦴ. ꦏꦠꦶ ꦄꦴꦥꦠ꧀ꦠꦶꦏ꧀ꦑꦤ꧀ꦣꦴꦠꦶ ꦄꦤ꧀ꦠꦺꦴꦒꦣꦨꦺꦢꦁ ꦄꦥꦺꦏ꧀ꦑꦶꦠ꧀ꦮꦴ ꦥꦕ꧀ꦕꦺꦏꦁ ꦫꦴꦱꦛ꧀ꦜꦺꦤꦴꦠꦶ ꦌꦠ꧀ꦠꦏꦩꦺꦮꦺꦠ꧀ꦡ ꦨꦺꦢꦺꦴ. ꦮꦶꦤꦷꦠꦴꦤꦶꦪꦺꦮ ꦮꦶꦤꦷꦠꦮꦠ꧀ꦡꦹꦤꦷꦠꦶ ꦄꦴꦥꦠ꧀ꦠꦶꦠꦺꦴ ꦮꦶꦫꦩꦟꦴꦤꦶ ꦌꦮ ꦄꦮꦶꦥ꧀ꦥꦛꦶꦱꦴꦫꦥꦴꦩꦺꦴꦗ꧀ꦗꦴꦢꦶꦣꦩ꧀ꦩꦴꦤꦁ ꦏꦴꦫꦟꦠ꧀ꦠꦴ ꦮꦠ꧀ꦡꦹꦤꦷꦠꦶ ꦮꦶꦤꦷꦠꦮꦠ꧀ꦡꦹꦤꦶ, ꦠꦴꦤꦶ ꦌꦠ꧀ꦡ ꦄꦠ꧀ꦡꦠꦺꦴ ꦮꦶꦫꦠꦶꦄꦴꦢꦶꦄꦤꦮꦗ꧀ꦗꦣꦩ꧀ꦩꦴ ꦌꦮ. ꦮꦺꦫꦁ ꦩꦟꦠꦷꦠꦶ ꦮꦺꦫꦲꦺꦠꦸꦠ꧀ꦠꦴ ‘‘ꦮꦺꦫ’’ꦤ꧀ꦠꦶ ꦭꦢ꧀ꦣꦤꦴꦩꦁ ꦫꦴꦒꦴꦢꦶꦄꦏꦸꦱꦭꦥꦏ꧀ꦑꦁ ꦮꦶꦤꦴꦱꦺꦠꦶ.

ꦣꦩ꧀ꦩꦱ꧀ꦱꦮꦤꦒ꧀ꦒꦁ ꦨꦶꦤ꧀ꦢꦶꦠ꧀ꦮꦴ ꦒꦕ꧀ꦖꦠꦷꦠꦶ ꦧꦲꦹꦱꦸ ꦌꦏꦠꦺꦴ ꦤꦶꦱꦷꦢꦶꦠ꧀ꦮꦴ ꦣꦩ꧀ꦩꦁ ꦱꦸꦟꦤ꧀ꦠꦺꦱꦸ ꦠꦁ ꦣꦩ꧀ꦩꦱ꧀ꦱꦮꦤꦱꦩꦴꦒꦩꦁ ꦏꦺꦴꦥꦺꦠ꧀ꦮꦴ ꦈꦛ꧀ꦜꦴꦪ ꦒꦕ꧀ꦖꦠꦶ. ꦄꦤꦴꦢꦫꦺꦴꦮꦴꦠꦶ ꦠꦸꦱ꧀ꦱꦶꦠꦧ꧀ꦧꦛ꧀ꦜꦴꦤꦺ ꦠꦸꦛ꧀ꦜꦶꦁ, ꦱꦁꦮꦶꦗꦶꦠꦧ꧀ꦧꦛ꧀ꦜꦴꦤꦺ ꦱꦁꦮꦺꦒꦚ꧀ꦕ ꦄꦥꦮꦺꦢꦺꦤ꧀ꦠꦺꦴ ꦌꦮ. ꦏꦴꦪꦥꦴꦒꦧ꧀ꦨꦶꦪꦤ꧀ꦠꦶ ꦈꦤ꧀ꦤꦠꦶꦮꦱꦺꦤ ꦥꦮꦠ꧀ꦠꦤꦏꦴꦪꦴꦤꦴꦕꦴꦫꦁ.

꧒꧗꧔. ꦩꦺꦠ꧀ꦠꦴꦪ ꦱꦩ꧀ꦨꦹꦠꦁ ꦩꦺꦠ꧀ꦠꦁ, ꦏꦴꦪꦏꦩ꧀ꦩꦁ. ꦈꦨꦪꦺꦲꦶꦥꦷꦠꦶ ꦤꦮꦏꦺꦲꦶ, ꦡꦺꦫꦺꦲꦶ ꦕ. ꦥꦶꦪꦁ ꦏꦫꦺꦴꦠꦷꦠꦶ ꦠꦁ ꦥꦸꦒ꧀ꦒꦭꦁ ꦥꦺꦩꦛ꧀ꦜꦴꦤꦁ ꦏꦫꦺꦴꦠꦶ, ꦏꦺꦱꦤ꧀ꦠꦶ ꦄꦴꦲ ‘‘ꦱꦧ꧀ꦫꦲ꧀ꦩꦕꦴꦫꦷꦤ’’ꦤ꧀ꦠꦶ.

ꦥꦸꦒ꧀ꦒꦭꦁ ꦥꦛꦶꦮꦶꦨꦗꦶꦠ꧀ꦮꦴ ꦨꦸꦚ꧀ꦗꦠꦷꦠꦶ ꦥꦏꦠꦺꦤ ꦱꦩ꧀ꦧꦤ꧀ꦣꦺꦴ. ꦠꦩꦺꦮ ꦥꦸꦒ꧀ꦒꦭꦥꦛꦶꦮꦶꦨꦴꦒꦁ ꦢꦱ꧀ꦱꦺꦠꦸꦁ ‘‘ꦄꦱꦸꦏꦱ꧀ꦱꦴ’’ꦠꦶꦄꦴꦢꦶ ꦮꦸꦠ꧀ꦠꦁ.

ꦨꦸꦗꦶꦱ꧀ꦱꦨꦴꦮꦏꦫꦟꦠꦺꦴꦠꦶ ꦠꦟ꧀ꦲꦴꦢꦴꦱꦧ꧀ꦪꦠꦺꦴ ꦩꦺꦴꦕꦺꦠ꧀ꦮꦴ ꦱꦩꦡꦮꦶꦥꦱ꧀ꦱꦤꦴꦱꦸ ꦱꦺꦫꦶꦮꦶꦲꦴꦫꦶꦠꦴꦏꦫꦟꦠꦺꦴꦠꦶ ꦄꦠ꧀ꦡꦺꦴ. ꦤꦶꦪ꧀ꦪꦴꦠꦷꦠꦶ ꦥꦮꦠ꧀ꦠꦠꦶ. ꦱꦩ꧀ꦩꦴꦢꦸꦏ꧀ꦑꦏ꧀ꦑꦪꦴꦪ ꦱꦁꦮꦠ꧀ꦠꦠꦷꦠꦶ ꦄꦠ꧀ꦡꦺꦴ.

ꦏꦠꦶꦥꦸꦕ꧀ꦖꦴꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦖꦄꦴꦥꦠ꧀ꦠꦶꦱꦩꦸꦛ꧀ꦜꦴꦤꦮꦴꦫꦮꦟ꧀ꦟꦤꦴ

꧒꧗꧖. ꦥꦜꦩꦺꦤ ꦄꦴꦥꦠ꧀ꦠꦶꦱꦩꦸꦛ꧀ꦜꦴꦤꦺꦤꦴꦠꦶ ꦏꦺꦮꦭꦁ ꦏꦴꦪꦺꦤ. ꦥꦴꦫꦴꦗꦶꦏꦴꦥꦠ꧀ꦠꦶꦪꦴ ꦌꦏꦤ꧀ꦠꦱꦕꦶꦠ꧀ꦠꦏꦱꦩꦸꦛ꧀ꦜꦴꦤꦠ꧀ꦠꦴ ‘‘ꦤ ꦲꦷꦠꦶ ꦮꦠ꧀ꦠꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦁ. ꦱꦔ꧀ꦓꦴꦢꦶꦱꦺꦱꦴꦢꦷꦤꦁ ꦢꦸꦏ꧀ꦏꦛꦥꦫꦶꦪꦺꦴꦱꦴꦤꦴꦤꦁ ꦥꦚ꧀ꦕꦤ꧀ꦤꦁ ꦄꦕꦶꦠ꧀ꦠꦏꦴꦤꦩ꧀ꦥꦶ ꦱꦩ꧀ꦨꦮꦠꦺꦴ ‘‘ꦱꦶꦪꦴ’’ꦠꦶ ꦮꦸꦠ꧀ꦠꦁ, ꦄꦴꦥꦗ꧀ꦗꦤꦁ ꦱꦶꦪꦴ ꦨꦮꦺꦪ꧀ꦪꦴꦠꦶ ꦄꦠ꧀ꦡꦺꦴ. ꦲꦷꦤꦸꦏ꧀ꦏꦛ꧀ꦜꦺꦲꦶ ꦗꦴꦠꦶꦄꦴꦢꦷꦲꦶ ꦎꦩꦱꦤꦺ ꦌꦮ ꦢꦸꦧ꧀ꦨꦴꦱꦶꦠꦱ꧀ꦱ ꦥꦚ꧀ꦚꦠ꧀ꦠꦠ꧀ꦠꦴ ꦱꦴ ꦌꦏꦤ꧀ꦠꦮꦴꦕꦴꦕꦶꦠ꧀ꦠꦱꦩꦸꦛ꧀ꦜꦴꦤꦴ ꦌꦮꦴꦠꦶ.

ꦢꦸꦠꦶꦪꦱꦩꦸꦛ꧀ꦜꦴꦤꦤꦪꦺ ꦮꦴꦕꦴꦪ ꦌꦮ ꦱꦩꦴꦥꦗ꧀ꦗꦶꦠꦧ꧀ꦧꦥꦴꦛꦶꦢꦺꦱꦤꦷꦪꦱ꧀ꦱ ꦄꦨꦴꦮꦴ ‘‘ꦤ ꦲꦷ’’ꦠꦶ ꦮꦸꦠ꧀ꦠꦁ.

ꦠꦠꦶꦪꦺ ꦥꦤ ꦮꦺꦴꦱꦴꦱꦩꦴꦤꦫꦹꦥꦁ ꦨꦶꦏ꧀ꦑꦸꦤꦶꦁ ꦏꦴꦪꦮꦴꦕꦴꦲꦶ ꦄꦤꦥꦱꦴꦢꦤꦥꦕ꧀ꦕꦪꦴ ꦥꦴꦛꦶꦢꦺꦱꦤꦷꦪꦱꦩ꧀ꦨꦮꦠꦺꦴ ‘‘ꦱꦶꦪꦴ’’ꦠꦶ ꦮꦸꦠ꧀ꦠꦁ.

ꦎꦩꦱꦤꦺ ꦥꦴꦕꦶꦠ꧀ꦠꦶꦪꦱ꧀ꦱ ꦄꦢꦶꦤ꧀ꦤꦴꦢꦴꦤꦱꦩꦸꦛ꧀ꦜꦴꦤꦠ꧀ꦠꦺꦥꦶ ꦠꦥ꧀ꦥꦕ꧀ꦕꦪꦴ ꦥꦚ꧀ꦚꦠ꧀ꦠꦱ꧀ꦱ ꦢꦸꦧ꧀ꦨꦴꦱꦶꦠꦱ꧀ꦱ ꦥꦚ꧀ꦕꦩꦺꦤꦺꦮ ꦱꦩꦸꦥ꧀ꦥꦠ꧀ꦠꦷꦠꦶ ꦢꦱ꧀ꦱꦺꦠꦸꦁ ꦕꦠꦸꦠ꧀ꦡꦮꦴꦫꦺ ‘‘ꦢꦸꦧ꧀ꦨꦴꦱꦶꦠꦁ ꦄꦴꦥꦗ꧀ꦗꦺꦪ꧀ꦪꦴꦠꦶ ꦤ ꦲꦷꦠꦶ ꦮꦠ꧀ꦠꦧ꧀ꦧ’’ꦤ꧀ꦠꦶ ꦮꦠ꧀ꦮꦴ ꦥꦚ꧀ꦕꦩꦮꦴꦫꦺ ‘‘ꦱꦶꦪꦴꦠꦶ ꦮꦠ꧀ꦠꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦁ. ꦏꦴꦪꦮꦶꦏꦴꦫꦺꦤꦺꦮ ꦎꦩꦱꦤ꧀ꦠꦱ꧀ꦱ ꦥꦤꦺꦠ꧀ꦡ ꦢꦸꦧ꧀ꦨꦴꦱꦶꦠꦨꦴꦮꦺꦥꦶ ꦏꦴꦪꦏꦷꦭ꦳ꦴꦨꦴꦮꦴꦨꦴꦮꦠꦺꦴ ꦢꦸꦏ꧀ꦏꦛꦩꦺꦮꦴꦠꦶ ꦢꦛ꧀ꦜꦧ꧀ꦧꦁ.

ꦖꦛ꧀ꦜꦮꦴꦫꦺ ꦥꦤ ꦮꦶꦗ꧀ꦗꦩꦴꦤꦺꦴꦥꦶ ꦏꦴꦪꦺꦴ ꦢꦸꦧ꧀ꦨꦴꦱꦶꦠꦱ꧀ꦱ ꦄꦔ꧀ꦒꦁ ꦤ ꦲꦺꦴꦠꦶ, ꦥꦚ꧀ꦕꦩꦱꦩꦸꦛ꧀ꦜꦴꦤꦺ ꦌꦮ ꦖꦛ꧀ꦜꦩ꧀ꦥꦶ ꦥꦮꦶꦱꦠꦷꦠꦶ ꦢꦱ꧀ꦱꦺꦠꦸꦁ ‘‘ꦤ ꦲꦷ’’ꦠꦶ ꦥꦛꦶꦏ꧀ꦑꦶꦠ꧀ꦠꦁ, ꦤ ꦥꦤ ꦠꦠ꧀ꦡ ꦱꦧ꧀ꦧꦡꦴ ꦢꦸꦧ꧀ꦨꦴꦱꦶꦠꦺꦤ ꦄꦤꦴꦥꦠ꧀ꦠꦷꦠꦶ ꦢꦱ꧀ꦱꦺꦠꦸꦁ. ꦤ ꦲꦶ ꦢꦮꦏꦩ꧀ꦪꦠꦴꦪ ꦏꦴꦪꦮꦴꦕꦴꦲꦶ ꦎꦩꦱꦤ꧀ꦠꦱ꧀ꦱ ꦢꦸꦧ꧀ꦨꦴꦱꦶꦠꦴꦥꦠ꧀ꦠꦶ ꦤ ꦱꦩ꧀ꦨꦮꦠꦶ. ꦪꦚ꧀ꦲꦶ ꦥꦚ꧀ꦕꦩꦺꦤꦺꦮ ꦱꦩꦴꦥꦗ꧀ꦗꦠꦶ, ꦠꦁ ꦖꦛ꧀ꦜꦺꦤꦥꦶ ꦱꦩꦴꦥꦗ꧀ꦗꦠꦶ ꦌꦮ ꦣꦩ꧀ꦩꦢꦺꦱꦤꦴꦥꦠ꧀ꦠꦶ ꦮꦶꦪꦴꦠꦶ ꦒꦲꦺꦠꦧ꧀ꦧꦁ. ꦱꦺꦱꦁ ꦱꦩꦸꦛ꧀ꦜꦴꦤꦮꦴꦫꦺ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.

ꦖꦄꦴꦥꦠ꧀ꦠꦶꦱꦩꦸꦛ꧀ꦜꦴꦤꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦏꦠꦴꦥꦠ꧀ꦠꦶꦮꦴꦫꦮꦟ꧀ꦟꦤꦴ

꧒꧗꧗. ꦢꦸꦠꦶꦪꦺ ꦥꦤ ꦏꦠꦶꦮꦴꦫꦺ ꦥꦜꦩꦱꦩꦸꦛ꧀ꦜꦴꦤꦺꦤ ꦄꦴꦥꦗ꧀ꦗꦶꦠꦧ꧀ꦧꦴꦤꦁ ꦄꦴꦥꦠ꧀ꦠꦷꦤꦁ ꦭꦲꦸꦢꦱ꧀ꦱꦤꦱꦸꦑꦠ꧀ꦡꦁ ꦏꦸꦛꦶꦏꦴꦫꦴꦢꦷꦤꦶ ꦌꦮ ꦱꦩꦸꦢ꧀ꦣꦛꦴꦤꦶ, ꦤ ꦄꦚ꧀ꦚꦺꦱꦁ ꦄꦨꦴꦮꦴ, ꦱꦚ꧀ꦕꦫꦶꦠ꧀ꦠꦴꦢꦷꦤꦩ꧀ꦥꦶ ꦮꦶꦗ꧀ꦗꦩꦴꦤꦠ꧀ꦠꦴ. ꦌꦮꦁ ꦢꦸꦠꦶꦪꦱꦩꦸꦛ꧀ꦜꦴꦤꦴꦢꦷꦱꦸꦥꦶ. ‘‘ꦏꦥ꧀ꦥꦶꦪꦱꦚ꧀ꦚꦷ’’ꦠꦶ ꦆꦩꦶꦤꦴ ꦄꦕꦶꦠ꧀ꦠꦏꦠ꧀ꦠꦁ ꦢꦱ꧀ꦱꦺꦠꦶ. ‘‘ꦏꦸꦛꦶꦁ ꦏꦫꦺꦴꦠꦷ’’ꦠꦶ ꦆꦩꦶꦤꦴ ꦮꦕꦷꦥꦪꦺꦴꦒꦴꦨꦴꦮꦁ. ꦈꦨꦪꦺꦤꦴꦥꦶ ꦏꦺꦮꦭꦁ ꦏꦴꦪꦺꦤꦺꦮ ꦢꦸꦏ꧀ꦏꦛꦴꦢꦷꦤꦁ ꦱꦩ꧀ꦨꦮꦁ ꦢꦱ꧀ꦱꦺꦠꦶ. ꦌꦮꦁ ꦈꦥꦫꦶꦥꦶ ꦪꦡꦴꦤꦸꦫꦹꦥꦁ ꦏꦴꦠꦧ꧀ꦧꦁ.

‘‘ꦌꦏꦺꦤ ꦱꦩꦸꦛ꧀ꦜꦴꦤꦺꦤ ꦱꦩꦸꦛ꧀ꦜꦲꦤ꧀ꦠꦷ’’ꦠꦶ ꦆꦢꦁ ꦆꦣ ꦮꦶꦱꦺꦱꦺꦠ꧀ꦮꦴ ꦢꦱ꧀ꦱꦶꦠꦴꦤꦁ ꦏꦴꦪꦠꦺꦴꦮ ꦱꦩꦸꦛ꧀ꦜꦶꦠꦴꦤꦁ ꦮꦱꦺꦤ ꦮꦸꦠ꧀ꦠꦁ, ꦄꦮꦶꦱꦺꦱꦠꦺꦴ ꦥꦤ ꦠꦴ ꦄꦴꦥꦠ꧀ꦠꦶꦪꦺꦴ ꦆꦠꦫꦱꦩꦸꦛ꧀ꦜꦴꦤꦺꦲꦶꦥꦶ ꦪꦡꦴꦫꦲꦁ ꦱꦩꦸꦛ꧀ꦜꦲꦤ꧀ꦠꦶ ꦌꦮ. ꦌꦮꦁ ꦈꦥꦫꦶꦥꦶ.

‘‘ꦠꦶꦟꦮꦠ꧀ꦡꦴꦫꦏꦺꦤ ꦕꦴ’’ꦠꦶ ꦆꦢꦁ ꦱꦔ꧀ꦓꦴꦢꦶꦱꦺꦱꦮꦗ꧀ꦗꦶꦠꦴꦤꦁ ꦕꦠꦸꦤ꧀ꦤꦁ ꦄꦴꦥꦠ꧀ꦠꦷꦤꦁ ꦮꦱꦺꦤ ꦮꦸꦠ꧀ꦠꦁ.

꧒꧗꧙. ꦱꦁꦮꦶꦢꦲꦶꦠ꧀ꦮꦴ ꦏꦸꦛꦶꦁ ꦏꦫꦺꦴꦠꦷꦠꦶ ꦮꦴꦕꦴꦪ ꦱꦁꦮꦶꦢꦲꦠꦶ, ꦱꦪꦚ꧀ꦕ ꦏꦴꦪꦺꦤ ꦏꦫꦺꦴꦠꦷꦠꦶ ꦄꦠ꧀ꦡꦺꦴ.

ꦏꦠꦴꦥꦠ꧀ꦠꦶꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦄꦴꦥꦠ꧀ꦠꦶꦱꦩꦸꦛ꧀ꦜꦴꦤꦒꦴꦡꦴꦮꦟ꧀ꦟꦤꦴ

꧒꧘꧓. ꦠꦠꦶꦪꦺꦴ ꦥꦤ ꦒꦴꦡꦴꦮꦴꦫꦺꦴ ꦢꦸꦠꦶꦪꦮꦴꦫꦺꦤ ꦮꦸꦠ꧀ꦠꦩꦺꦮꦠ꧀ꦡꦁ ꦱꦔ꧀ꦒꦲꦺꦠ꧀ꦮꦴ ꦢꦱ꧀ꦱꦺꦠꦸꦁ ꦮꦸꦠ꧀ꦠꦺꦴ. ꦠꦠ꧀ꦡ ꦏꦴꦪꦺꦴꦮ ꦏꦴꦪꦶꦏꦺꦴꦠꦶ ꦮꦠ꧀ꦠꦧ꧀ꦧꦺ ꦮꦕꦤꦮꦶꦥꦭ꧀ꦭꦴꦱꦺꦤ ‘‘ꦏꦴꦪꦶꦏꦴ’’ꦠꦶ ꦮꦸꦠ꧀ꦠꦁ. ꦠꦺꦤꦴꦲ ‘‘ꦠꦺꦤ ꦱꦩꦸꦛ꧀ꦜꦶꦠꦴ’’ꦠꦶ, ꦏꦴꦪꦺꦴ ꦱꦩꦸꦛ꧀ꦜꦴꦤꦁ ꦄꦏ꧀ꦑꦴꦠꦺꦴꦠꦶ ꦄꦠ꧀ꦡꦺꦴ.

ꦮꦶꦮꦺꦏꦢꦱ꧀ꦱꦶꦤꦴꦠꦶ ꦱꦧ꧀ꦧꦱꦔ꧀ꦑꦠꦮꦶꦮꦶꦠ꧀ꦠꦠ꧀ꦠꦴ, ꦠꦠꦺꦴ ꦮꦶꦮꦶꦠ꧀ꦠꦲꦺꦠꦸꦠ꧀ꦠꦴ ꦕ ꦤꦷꦮꦫꦟꦮꦶꦮꦺꦏꦚ꧀ꦕ ꦤꦶꦧ꧀ꦧꦴꦤꦚ꧀ꦕ ꦢꦱ꧀ꦱꦤꦱꦷꦭꦺꦤ. ꦮꦶꦨꦔ꧀ꦒꦏꦺꦴꦮꦶꦢꦴꦠꦶ ꦈꦨꦠꦺꦴꦮꦶꦨꦔ꧀ꦒꦏꦸꦱꦭꦴꦠꦶ ꦄꦴꦭꦥꦤꦁ. ꦆꦣ ꦥꦤꦺꦮꦁ ꦄꦚ꧀ꦚꦺꦴ ꦥꦸꦕ꧀ꦖꦤ꧀ꦠꦺꦴ ꦤꦴꦩ ꦤꦠ꧀ꦡꦶ, ꦈꦥꦴꦭꦶꦠ꧀ꦡꦺꦫꦺꦴ ꦱꦪꦩꦺꦮ ꦄꦠ꧀ꦡꦁ ꦥꦴꦏꦛꦁ ꦏꦴꦠꦸꦁ ꦥꦸꦕ꧀ꦖꦴꦮꦶꦱꦗ꧀ꦗꦤꦚ꧀ꦕ ꦄꦏꦴꦱꦷꦠꦶ ꦆꦩꦶꦤꦴ ꦤꦪꦺꦤ ꦱꦧ꧀ꦧꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦄꦴꦥꦠ꧀ꦠꦶꦱꦩꦸꦛ꧀ꦜꦴꦤꦒꦴꦡꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦮꦶꦥꦠ꧀ꦠꦶꦥꦕ꧀ꦕꦪꦮꦴꦫꦮꦟ꧀ꦟꦤꦴ

꧒꧘꧔. ꦕꦠꦸꦠ꧀ꦡꦺ ꦥꦤ ꦮꦶꦥꦠ꧀ꦠꦶꦥꦕ꧀ꦕꦪꦮꦴꦫꦺ ꦱꦷꦭꦮꦶꦥꦠ꧀ꦠꦶꦥꦕ꧀ꦕꦪꦴꦠꦶ ꦱꦷꦭꦮꦶꦥꦠ꧀ꦠꦶꦥꦄꦕ꧀ꦖꦴꦢꦤꦥꦕ꧀ꦕꦪꦴ.

꧒꧘꧖. ꦢꦶꦛ꧀ꦜꦶꦮꦶꦥꦠ꧀ꦠꦶꦥꦕ꧀ꦕꦪꦴꦠꦶ ꦢꦶꦛ꧀ꦜꦶꦮꦶꦥꦠ꧀ꦠꦶꦪꦴ ꦄꦥ꧀ꦥꦛꦶꦤꦶꦱ꧀ꦱꦗ꧀ꦗꦤꦥꦕ꧀ꦕꦪꦴ.

꧒꧘꧗. ꦄꦴꦗꦷꦮꦮꦶꦥꦠ꧀ꦠꦶꦥꦕ꧀ꦕꦪꦴꦠꦶ ꦌꦠ꧀ꦡ ꦄꦴꦒꦩ꧀ꦩ ꦗꦷꦮꦤ꧀ꦠꦶ ꦌꦠꦺꦤꦴꦠꦶ ꦄꦴꦗꦷꦮꦺꦴ, ꦕꦠꦸꦥꦕ꧀ꦕꦪꦺꦴ, ꦱꦺꦴꦮ ꦩꦶꦕ꧀ꦖꦴꦥꦠ꧀ꦠꦶꦪꦴ ꦮꦶꦥꦤ꧀ꦤꦠ꧀ꦠꦴ ꦮꦶꦥꦠ꧀ꦠꦷꦠꦶ ꦄꦴꦗꦷꦮꦮꦶꦥꦠ꧀ꦠꦶ, ꦠꦱ꧀ꦱꦴ ꦄꦴꦗꦷꦮꦮꦶꦥꦠ꧀ꦠꦶꦪꦴ ꦲꦺꦠꦸ, ꦠꦢꦸꦥ꧀ꦥꦴꦢꦤꦠꦥꦫꦶꦨꦺꦴꦒꦤꦶꦩꦶꦠ꧀ꦠꦤ꧀ꦠꦶ ꦄꦠ꧀ꦡꦺꦴ.

ꦮꦶꦥꦠ꧀ꦠꦶꦥꦕ꧀ꦕꦪꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦄꦣꦶꦏꦫꦟꦥꦕ꧀ꦕꦪꦮꦴꦫꦮꦟ꧀ꦟꦤꦴ

꧒꧙꧑. ꦥꦚ꧀ꦕꦩꦺ ꦄꦣꦶꦏꦫꦟꦥꦕ꧀ꦕꦪꦮꦴꦫꦺ ꦏꦶꦕ꧀ꦕꦴꦣꦶꦏꦫꦟꦥꦕ꧀ꦕꦪꦴꦠꦶ ꦄꦥꦭꦺꦴꦏꦤꦮꦕꦤꦚꦠ꧀ꦠꦶꦏꦩ꧀ꦩꦮꦴꦕꦴꦱꦔ꧀ꦑꦠꦏꦩ꧀ꦩꦮꦴꦕꦴꦥꦕ꧀ꦕꦪꦴ. ꦥꦚ꧀ꦕꦴꦠꦶ ꦌꦠ꧀ꦡ ꦄꦣꦩ꧀ꦩꦶꦏꦏꦠꦶꦏꦴꦢꦶꦁ ꦄꦥꦭꦺꦴꦏꦺꦠ꧀ꦮꦴ ꦏꦫꦺꦴꦤ꧀ꦠꦴꦤꦁ ꦄꦤꦶꦩꦶꦠ꧀ꦠꦤ꧀ꦠꦶ ꦄꦠ꧀ꦡꦺꦴ. ꦥꦚ꧀ꦕꦩꦺ ꦄꦣꦶꦏꦫꦟꦥꦕ꧀ꦕꦪꦮꦴꦫꦺ ꦏꦶꦕ꧀ꦕꦴꦣꦶꦏꦫꦟꦥꦕ꧀ꦕꦪꦴ ꦄꦥꦭꦺꦴꦏꦤꦴꦮꦱꦴꦤꦺ ꦢꦸꦏ꧀ꦏꦛꦁ, ꦄꦣꦶꦥ꧀ꦥꦴꦪꦴꦢꦶꦤꦴ ꦚꦠ꧀ꦠꦶꦏꦩ꧀ꦩꦴꦢꦶꦁ ꦏꦫꦺꦴꦤ꧀ꦠꦴꦤꦁ ꦡꦸꦭ꧀ꦭꦕ꧀ꦕꦪꦴꦢꦶ ꦕ ꦱꦔ꧀ꦒꦪ꧀ꦲꦠꦷꦠꦶ ꦢꦛ꧀ꦜꦧ꧀ꦧꦁ. ꦄꦮꦱꦺꦱꦴ ꦄꦴꦥꦠ꧀ꦠꦶꦪꦺꦴꦠꦶ ꦱꦺꦴꦠꦴꦥꦠ꧀ꦠꦶꦦꦭꦱꦩꦴꦥꦠ꧀ꦠꦶꦄꦴꦢꦪꦺꦴ. ‘‘ꦤꦠ꧀ꦡꦚ꧀ꦚꦴ ꦄꦴꦥꦠ꧀ꦠꦶꦪꦺꦴ’’ꦠꦶ ꦆꦢꦁ ꦮꦶꦥꦠ꧀ꦠꦶꦄꦴꦢꦶꦨꦴꦒꦶꦤꦶꦪꦺꦴ ꦱꦴꦮꦗ꧀ꦗꦴꦥꦠ꧀ꦠꦶꦪꦺꦴ ꦱꦤ꧀ꦣꦴꦪ ꦮꦸꦠ꧀ꦠꦁ.

ꦄꦣꦶꦏꦫꦟꦥꦕ꧀ꦕꦪꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.