꧖. ꦱꦸꦠ꧀ꦠꦮꦶꦚ꧀ꦚꦠ꧀ꦠꦶꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧖꧓꧖. ꦖꦛ꧀ꦜꦺ ꦮꦷꦠꦮꦷꦠꦛ꧀ꦜꦴꦤꦁ ꦪꦱ꧀ꦩꦶꦁ ꦕꦠꦸꦫꦱ꧀ꦱꦢꦴꦫꦸꦩ꧀ꦲꦶ ꦥꦭꦶꦮꦺꦜꦺꦤ꧀ꦠꦶ, ꦠꦱ꧀ꦱ ꦠꦸꦫꦷꦠꦶ ꦤꦴꦩꦁ. ꦮꦴꦪꦤ꧀ꦠꦴ ꦠꦶꦫꦶꦪꦁ ꦱꦸꦠ꧀ꦠꦁ ꦥꦮꦺꦱꦺꦠ꧀ꦮꦴ ꦪꦺꦤ ꦄꦴꦏꦺꦴꦛꦺꦤ꧀ꦠꦴ ꦮꦠ꧀ꦡꦺ ꦓꦤꦨꦴꦮꦁ ꦄꦴꦥꦴꦢꦺꦤ꧀ꦠꦶ, ꦠꦁ ‘‘ꦮꦺꦩ’’ꦤ꧀ꦠꦶ ꦮꦸꦕ꧀ꦕꦠꦶ.

‘‘ꦆꦠꦫꦱ꧀ꦩꦶꦁ ꦠꦡꦺꦮ ꦢꦸꦏ꧀ꦏꦛ’’ꦤ꧀ꦠꦶ ꦆꦩꦶꦤꦴ ꦮꦴꦪꦶꦠꦸꦁ ꦄꦴꦫꦢ꧀ꦣꦏꦴꦭꦠꦺꦴ ꦥꦛ꧀ꦜꦴꦪ ꦪꦡꦴꦮꦸꦠ꧀ꦠꦥꦫꦶꦕ꧀ꦖꦺꦢꦤꦶꦛ꧀ꦜꦶꦠꦺꦪꦺꦮ ꦢꦸꦏ꧀ꦏꦛꦩ꧀ꦥꦶ ꦲꦺꦴꦠꦶ, ꦤ ꦠꦠꦺꦴ ꦥꦸꦧ꧀ꦧꦺ ꦮꦴꦪꦤꦥꦪꦺꦴꦒꦺꦱꦹꦠꦶ ꦢꦱ꧀ꦱꦺꦠꦶ.

ꦠꦤ꧀ꦠꦺ ꦜꦶꦠꦁꦪꦺꦮ ꦄꦣꦶꦛ꧀ꦜꦴꦠꦧ꧀ꦧꦤ꧀ꦠꦶ ꦌꦠ꧀ꦡ ꦌꦏꦮꦴꦫꦁ ꦄꦣꦶꦛ꧀ꦜꦶꦠꦺ ꦥꦕ꧀ꦖꦴ ꦮꦷꦠꦁ ꦄꦣꦶꦛ꧀ꦜꦶꦠꦒꦠꦶꦏꦩꦺꦮ ꦲꦺꦴꦠꦶ, ꦥꦸꦤ ꦄꦣꦶꦛ꧀ꦜꦴꦤꦏꦶꦕ꧀ꦕꦁ ꦤꦠ꧀ꦡꦶ. ꦱꦕꦺ ꦥꦤ ꦄꦤ꧀ꦠꦫꦤ꧀ꦠꦫꦴ ꦢꦱꦴ ꦜꦥꦺꦠ꧀ꦮꦴ ꦮꦶꦱꦸꦁ ꦮꦶꦱꦸꦁ ꦱꦥꦫꦶꦕ꧀ꦖꦺꦢꦁ ꦮꦷꦠꦁ ꦲꦺꦴꦠꦶ, ꦥꦕ꧀ꦕꦺꦏꦁ ꦄꦣꦶꦛ꧀ꦜꦴꦠꦧ꧀ꦧꦩꦺꦮꦴꦠꦶ ꦢꦛ꧀ꦜꦧ꧀ꦧꦁ. ꦌꦠ꧀ꦡ ꦕ ꦏꦥ꧀ꦥꦶꦪꦱꦸꦠ꧀ꦠꦁ ꦒꦲꦺꦠ꧀ꦮꦴ ꦄꦚ꧀ꦚꦴꦠꦏꦄꦥ꧀ꦥꦮꦴꦫꦶꦠꦺꦤꦴꦥꦶ ꦄꦏꦥ꧀ꦥꦶꦪꦠꦤ꧀ꦠꦮꦴꦪꦺꦤ ‘‘ꦱꦸꦠ꧀ꦠꦩꦠ꧀ꦡꦶ, ꦮꦴꦪꦤ꧀ꦠꦺꦴ ꦤꦠ꧀ꦡꦷ’’ꦠꦶꦄꦴꦢꦶꦥꦫꦶꦪꦴꦪꦩꦸꦑꦺꦤ ꦮꦴꦪꦴꦥꦺꦤ꧀ꦠꦱ꧀ꦱ ꦄꦤꦴꦥꦠ꧀ꦠꦶ. ꦠꦺꦤꦺꦮ ꦩꦴꦠꦶꦏꦴꦛ꧀ꦜꦏꦡꦴꦪꦁ (ꦏꦔ꧀ꦑꦴ. ꦄꦛ꧀ꦜ. ꦱꦸꦠ꧀ꦠꦮꦶꦚ꧀ꦚꦠ꧀ꦠꦶꦱꦶꦏ꧀ꦑꦴꦥꦢꦮꦟ꧀ꦟꦤꦴ) ‘‘ꦮꦴꦪꦴꦥꦺꦪ꧀ꦪꦴ’’ꦠꦶ ꦥꦢꦱ꧀ꦱ ‘‘ꦕꦷꦮꦫꦁ ꦩꦺ, ꦄꦴꦮꦸꦱꦺꦴ, ꦮꦴꦪꦡꦴꦠꦶ ꦄꦏꦥ꧀ꦥꦶꦪꦮꦶꦚ꧀ꦚꦠ꧀ꦠꦶꦪꦴ ꦮꦴꦪꦴꦥꦺꦪ꧀ꦪꦴ’’ꦠꦶ ꦄꦠ꧀ꦡꦺꦴ ꦮꦸꦠ꧀ꦠꦺꦴ, ꦌꦮꦁ ꦮꦢꦤ꧀ꦠꦺꦴ ꦄꦏꦥ꧀ꦥꦶꦪꦠꦤ꧀ꦠꦮꦴꦪꦺꦤ ꦮꦴꦪꦴꦥꦺꦠꦶ ꦤꦴꦩ, ꦤꦴꦚ꧀ꦚꦡꦴ.

꧖꧔꧐. ꦄꦤꦴꦥꦠ꧀ꦠꦶ ꦕꦷꦮꦫꦁ ꦱꦶꦧ꧀ꦧꦺꦠꦸꦤ꧀ꦠꦶꦄꦴꦢꦷꦱꦸ ꦆꦩꦶꦤꦴ ꦱꦶꦏ꧀ꦑꦴꦥꦢꦺꦤꦺꦮ ꦄꦤꦴꦥꦠ꧀ꦠꦶ, ꦄꦏꦠꦮꦶꦚ꧀ꦚꦠ꧀ꦠꦶꦥꦕ꧀ꦕꦪꦴ ꦥꦤ ꦢꦸꦏ꧀ꦏꦛꦩꦺꦮꦴꦠꦶ ꦮꦢꦤ꧀ꦠꦶ. ꦄꦏꦥ꧀ꦥꦶꦪꦱꦸꦠ꧀ꦠꦠꦴ, ꦄꦠ꧀ꦠꦸꦢ꧀ꦢꦺꦱꦶꦏꦠꦴ, ꦄꦏꦥ꧀ꦥꦶꦪꦠꦤ꧀ꦠꦮꦴꦪꦺꦤ ꦄꦏꦥ꧀ꦥꦶꦪꦮꦶꦚ꧀ꦚꦠ꧀ꦠꦶꦪꦴ ꦮꦴꦪꦴꦥꦤꦤ꧀ꦠꦶ ꦆꦩꦴꦤꦺꦠ꧀ꦡ ꦠꦷꦟꦶ ꦄꦔ꧀ꦒꦴꦤꦶ.

ꦱꦸꦠ꧀ꦠꦮꦶꦚ꧀ꦚꦠ꧀ꦠꦶꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.