ꦥꦜꦩꦒꦴꦡꦴꦱꦔ꧀ꦒꦟꦶꦏꦮꦟ꧀ꦟꦤꦴ

ꦱꦠ꧀ꦠꦤꦒꦫꦺꦱꦸ ꦥꦚ꧀ꦚꦠ꧀ꦠꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧓꧓꧕. ꦮꦕꦤꦱꦩ꧀ꦥꦛꦶꦕ꧀ꦖꦤꦠ꧀ꦡꦺ ꦮꦴ ꦤꦶꦥꦴꦠꦺꦴꦠꦶ ꦄꦠ꧀ꦡꦺꦴ. ꦄꦝ꧀ꦞꦸꦝ꧀ꦞꦱꦠꦴꦤꦷꦠꦶ ꦠꦷꦟꦶ ꦱꦠꦴꦤꦶ, ꦥꦚ꧀ꦚꦴꦱꦴꦤꦶ ꦕ. ꦮꦶꦒ꧀ꦒꦲꦤ꧀ꦠꦶ ꦩꦤꦸꦱ꧀ꦱꦮꦶꦒ꧀ꦒꦲꦁ. ꦄꦠꦶꦫꦺꦏꦁ ꦮꦴꦠꦶ ꦢꦱꦴꦲꦥꦫꦩꦁ ꦄꦠꦶꦫꦺꦏꦕꦷꦮꦫꦁ. ꦏꦴꦭ꦳ꦏꦤ꧀ꦠꦶ ‘‘ꦱꦸꦢ꧀ꦣꦏꦴꦭ꦳ꦏꦴꦤ’’ꦤ꧀ꦠꦶ (ꦥꦴꦫꦴ. ꧕꧕꧒-꧕꧕꧔) ꦮꦸꦠ꧀ꦠꦏꦴꦭ꦳ꦏꦁ. ꦨꦹꦠꦤ꧀ꦠꦶ ꦨꦹꦠꦴꦫꦺꦴꦕꦤꦁ. ꦥꦫꦩ꧀ꦥꦫꦨꦠ꧀ꦠꦤ꧀ꦠꦶ ꦥꦫꦩ꧀ꦥꦫꦨꦺꦴꦗꦤꦁ. ꦨꦶꦏ꧀ꦑꦸꦤꦷꦱꦸ ꦕ ꦄꦏ꧀ꦏꦺꦴꦱꦺꦴꦠꦶ ꦪꦴ ꦥꦤ ꦨꦶꦏ꧀ꦑꦸꦤꦷ ꦨꦶꦏ꧀ꦑꦸꦁ ꦄꦏ꧀ꦏꦺꦴꦱꦺꦪ꧀ꦪ ꦮꦴ ꦥꦫꦶꦨꦴꦱꦺꦪ꧀ꦪ ꦮꦴ (ꦥꦴꦕꦶ. ꧑꧐꧒꧙). ꦄꦤ꧀ꦠꦫꦮꦴꦱꦏꦤ꧀ꦠꦶ ꦄꦚ꧀ꦚꦴꦠꦶꦏꦴꦪ ꦨꦶꦏ꧀ꦑꦸꦤꦶꦪꦴ ꦕꦷꦮꦫꦥꦛꦶꦒ꧀ꦒꦲꦟꦁ. ꦫꦹꦥꦶꦪꦤ꧀ꦠꦶ ꦫꦹꦥꦶꦪꦱꦧ꧀ꦧꦺꦴꦲꦴꦫꦁ. ꦱꦸꦠ꧀ꦠꦤ꧀ꦠꦶ ꦱꦴꦩꦁ ꦱꦸꦠ꧀ꦠꦁ ꦮꦶꦚ꧀ꦚꦴꦥꦺꦠ꧀ꦮꦴ ꦠꦤ꧀ꦠꦮꦴꦪꦺꦲꦶ. ꦈꦗ꧀ꦙꦴꦥꦤꦏꦺꦠꦶ ꦈꦗ꧀ꦙꦴꦥꦤꦏꦺ ꦑꦷꦪꦤꦏꦺ. ꦥꦴꦕꦶꦠꦥꦶꦟ꧀ꦝꦤ꧀ꦠꦶ ꦨꦶꦏ꧀ꦑꦸꦤꦷꦥꦄꦥꦴꦕꦶꦠꦥꦶꦟ꧀ꦝꦥꦴꦠꦁ. ꦕꦴꦫꦶꦠ꧀ꦠꦤ꧀ꦠꦶ ꦤꦶꦩꦤ꧀ꦠꦶꦠꦺꦴ ꦱꦨꦠ꧀ꦠꦺꦴ ꦱꦩꦴꦤꦺꦴ ꦱꦤ꧀ꦠꦁ. ꦕꦷꦮꦫꦁ ꦢꦠ꧀ꦮꦴꦠꦶ ꦱꦩꦒ꧀ꦒꦺꦤ ꦱꦔ꧀ꦓꦺꦤ ꦕꦷꦮꦫꦁ ꦢꦠ꧀ꦮꦴ. ꦮꦺꦴꦱꦴꦱꦤ꧀ꦠꦷꦠꦶ ꦨꦶꦏ꧀ꦑꦹ ꦥꦤꦺꦮ ꦏꦸꦭꦺꦱꦸ ꦤꦶꦩꦤ꧀ꦠꦶꦠꦴ ꦨꦸꦚ꧀ꦗꦤ꧀ꦠꦶ (ꦥꦴꦕꦶ. ꧕꧕꧘), ꦠꦠ꧀ꦡ ꦕꦺꦱꦴ. ꦒꦶꦫꦒ꧀ꦒꦕꦫꦶꦪꦴꦠꦶ ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦤꦕ꧀ꦕꦁ ꦮꦴ ꦒꦷꦠꦁ ꦮꦴ’’ꦠꦶ (ꦥꦴꦕꦶ. ꧘꧓꧔) ꦕ, ‘‘ꦄꦤ꧀ꦠꦺꦴꦮꦱ꧀ꦱꦁ ꦕꦴꦫꦶꦏꦁ ꦕꦫꦺꦪ꧀ꦪꦴ’’ꦠꦶ (ꦥꦴꦕꦶ. ꧙꧗꧐) ꦕ ꦮꦸꦠ꧀ꦠꦢ꧀ꦮꦪꦁ. ꦖꦤ꧀ꦢꦢꦴꦤꦺꦤꦴꦠꦶ ꦥꦴꦫꦶꦮꦴꦱꦶꦏꦖꦤ꧀ꦢꦢꦴꦤꦺꦤ ꦱꦶꦏ꧀ꦑꦩꦴꦤꦁ ꦮꦸꦛ꧀ꦜꦴꦥꦺꦪ꧀ꦪ (ꦥꦴꦕꦶ. ꧑꧑꧖꧗). ꦥꦴꦫꦴꦗꦶꦏꦴꦤꦶ ꦕꦠ꧀ꦠꦴꦫꦶ, ꦨꦶꦏ꧀ꦑꦸꦤꦷꦤꦁ ꦱꦚ꧀ꦚꦴꦕꦶꦏꦏꦸꦛꦶꦚ꧀ꦕ ꦏꦺꦴꦱꦶꦪꦩꦶꦱ꧀ꦱꦱꦤ꧀ꦡꦠꦚ꧀ꦕ ꦱꦺꦪ꧀ꦪꦴ ꦕ ꦄꦤꦸꦥꦱꦩ꧀ꦥꦤ꧀ꦤꦺꦤ ꦱꦲ ꦥꦡꦮꦷꦑꦟꦤꦁ. ꦒꦕ꧀ꦖ ꦢꦺꦮꦠꦺꦠꦶ ꦨꦹꦠꦒꦴꦩꦥꦴꦠꦧ꧀ꦪꦠꦴ ꦱꦥ꧀ꦥꦴꦟꦏꦈꦢꦏꦱꦶꦚ꧀ꦕꦤꦤ꧀ꦠꦶ ꦄꦠ꧀ꦡꦺꦴ. ꦩꦲꦴꦮꦶꦲꦴꦫꦺꦴꦠꦶ ꦩꦲꦭ꧀ꦭꦏꦮꦶꦲꦴꦫꦺꦴ. ꦄꦚ꧀ꦚꦤ꧀ꦠꦶ ꦄꦚ꧀ꦚꦮꦴꦢꦏꦁ. ꦢ꧀ꦮꦴꦫꦤ꧀ꦠꦶ ꦪꦴꦮꦢ꧀ꦮꦴꦫꦏꦺꦴꦱꦴ. ‘‘ꦄꦤꦴꦢꦫꦶꦪꦥꦴꦕꦶꦠ꧀ꦠꦷꦠꦶ ꦕ ꦱꦲꦣꦩ꧀ꦩꦶꦏꦁ ꦮꦸꦕ꧀ꦕꦩꦴꦤꦺꦴ’’ꦠꦶ ꦥꦴꦜꦺꦴ. ꦥꦪꦺꦴꦥꦴꦤꦤ꧀ꦠꦶ ꦱꦸꦫꦸꦱꦸꦫꦸꦏꦴꦫꦏꦁ. ꦌꦭ꦳ꦏꦭꦺꦴꦩꦴꦤꦶ ꦥꦠ꧀ꦠꦺꦴ ꦕꦴꦠꦶ ꦌꦭ꦳ꦏꦭꦺꦴꦩꦣꦺꦴꦮꦴꦥꦤꦚ꧀ꦕ ꦈꦴꦤꦥꦚ꧀ꦕꦧꦤ꧀ꦣꦤꦥꦠ꧀ꦠꦺꦴ ꦕ. ꦎꦮꦴꦢꦺꦴ ꦕꦺꦮ ꦨꦺꦱꦗ꧀ꦗꦤ꧀ꦠꦶ ꦨꦶꦏ꧀ꦑꦸꦤꦸꦥꦱ꧀ꦱꦪꦁ ꦈꦥꦱꦔ꧀ꦏꦩꦶꦠ꧀ꦮꦴ ꦎꦮꦴꦢꦺꦴ ꦠꦢꦸꦠ꧀ꦠꦫꦶꦨꦺꦱꦗ꧀ꦗꦮꦶꦚ꧀ꦚꦴꦥꦤꦚ꧀ꦕ. ꦱꦹꦕꦶ ꦄꦫꦚ꧀ꦚꦏꦺꦴꦠꦶ ‘‘ꦄꦛ꧀ꦜꦶꦩꦪꦁ ꦮꦴ ꦢꦤ꧀ꦠꦩꦪꦁ ꦮꦴ ꦮꦶꦱꦴꦟꦩꦪꦁ ꦮꦴ ꦱꦹꦕꦶꦓꦫ’’ꦤ꧀ꦠꦶ (ꦥꦴꦕꦶ. ꧕꧑꧗) ꦕ ‘‘ꦪꦴꦤꦶ ꦑꦺꦴ ꦥꦤ ꦠꦴꦤꦶ ꦄꦴꦫꦚ꧀ꦚꦏꦴꦤꦶ ꦱꦺꦤꦴꦱꦤꦴꦤꦶ ꦱꦴꦱꦔ꧀ꦏ…ꦥꦺ… ꦥꦛꦶꦢꦺꦱꦺꦠꦧ꧀ꦧ’’ꦤ꧀ꦠꦶ (ꦥꦴꦕꦶ. ꧕꧗꧐) ꦕ. ꦎꦮꦴꦢꦺꦴꦠꦶ ꦪꦴ ꦥꦤ ꦨꦶꦏ꧀ꦑꦸꦤꦷ ꦎꦮꦴꦢꦴꦪ ꦮꦴ ꦱꦁꦮꦴꦱꦴꦪ ꦮꦴ ꦤ ꦒꦕ꧀ꦖꦺꦪ꧀ꦪ (ꦥꦴꦕꦶ. ꧑꧐꧕꧕). ꦥꦴꦫꦴꦗꦶꦏꦴꦤꦶ ꦕꦠ꧀ꦠꦴꦫꦷꦠꦶꦄꦴꦢꦶ ꦢ꧀ꦮꦷꦱꦸ ꦤꦒꦫꦺꦱꦸ ꦥꦚ꧀ꦚꦠ꧀ꦠꦱꦩ꧀ꦥꦶꦟ꧀ꦝꦤꦁ.

ꦕꦠꦸꦮꦶꦥꦠ꧀ꦠꦶꦮꦟ꧀ꦟꦤꦴ

꧓꧓꧖. ꦌꦏꦠꦶꦁꦱꦴ ꦪꦺ ꦒꦫꦸꦏꦴꦠꦶ ꦈꦨꦠꦺꦴ ꦄꦛ꧀ꦜ ꦥꦴꦫꦴꦗꦶꦏꦴ, ꦨꦶꦏ꧀ꦑꦹꦤꦁ ꦠꦺꦫꦱ, ꦨꦶꦏ꧀ꦑꦸꦤꦷꦤꦁ ꦢꦱ ꦕ ꦱꦔ꧀ꦓꦴꦢꦶꦱꦺꦱꦴ. ꦱꦴꦣꦴꦫꦟꦴꦱꦴꦣꦴꦫꦟꦮꦱꦺꦤ ꦄꦛ꧀ꦜ ꦄꦤꦮꦱꦺꦱꦴ ꦤꦴꦩ ꦥꦴꦫꦴꦗꦶꦏꦴꦤꦶ. ꦠꦢꦺꦮꦴꦠꦶ ꦱꦷꦭꦮꦶꦥꦠ꧀ꦠꦶꦁꦪꦺꦮ. ꦮꦶꦠ꧀ꦡꦴꦫꦠꦺꦴ ꦢꦱ꧀ꦱꦺꦠꦸꦁ ‘‘ꦥꦴꦫꦴꦗꦶꦏ’’ꦤ꧀ꦠꦶꦄꦴꦢꦶꦤꦴ ꦄꦥꦸꦕ꧀ꦖꦶꦠꦩꦺꦮ ꦮꦶꦱ꧀ꦱꦗ꧀ꦗꦶꦠꦁ. ‘‘ꦠꦠ꧀ꦡ ꦪꦺꦴ ꦕꦴꦪꦁ, ꦄꦏ꧀ꦏꦺꦴꦱꦠꦶ ꦲꦱꦴꦣꦶꦥ꧀ꦥꦴꦪꦺꦴ’’ꦠꦶ ꦥꦴꦜꦺꦴ. ꦢꦸꦛ꧀ꦜꦸꦭ꧀ꦭꦮꦶꦨꦴꦮꦤꦮꦱꦺꦤꦴꦒꦠꦮꦶꦥꦠ꧀ꦠꦶꦁ ꦜꦥꦺꦠ꧀ꦮꦴ ꦥꦸꦕ꧀ꦖꦴꦥꦛꦶꦥꦴꦛꦶꦪꦴ ꦪꦴꦮꦠꦠꦶꦪꦏꦥꦚ꧀ꦲꦁ ꦮꦶꦱ꧀ꦱꦗ꧀ꦗꦶꦠꦸꦩꦴꦫꦨꦶ. ꦈꦏ꧀ꦑꦶꦠ꧀ꦠꦴꦤꦸꦮꦠ꧀ꦠꦶꦏꦴ ꦨꦶꦏ꧀ꦑꦸꦤꦷ ꦄꦛ꧀ꦜ ꦪꦴꦮꦠꦠꦶꦪꦏꦱꦔ꧀ꦓꦴꦢꦶꦱꦺꦱꦴ ꦆꦣ ꦥꦸꦕ꧀ꦖꦶꦠꦠ꧀ꦠꦴ ꦄꦤꦤ꧀ꦠꦫꦥꦚ꧀ꦲꦴ ꦤꦴꦩ ꦗꦴꦠꦴ.

ꦖꦺꦢꦤꦏꦴꦢꦶꦮꦟ꧀ꦟꦤꦴ

꧓꧓꧗. ꦥꦩꦴꦟꦴꦠꦶꦏ꧀ꦏꦤ꧀ꦠꦩꦚ꧀ꦕꦤꦶꦱꦷꦢꦤꦏꦟ꧀ꦝꦸꦥꦛꦶꦕ꧀ꦖꦴꦢꦶꦮꦱ꧀ꦱꦶꦏꦱꦴꦛꦶꦏꦴꦱꦸꦒꦠꦕꦷꦮꦫꦥ꧀ꦥꦩꦴꦟꦁ ꦨꦶꦏ꧀ꦑꦸꦤꦷꦤꦁ ꦈꦢꦏꦱꦴꦛꦶꦏꦴꦠꦶ ꦖ ꦖꦺꦢꦤꦏꦴꦤꦶ. ꦕꦷꦮꦫꦮꦶꦥ꧀ꦥꦮꦴꦱꦱꦩ꧀ꦩꦸꦠꦶꦄꦴꦢꦪꦺꦴ ꦕꦠꦱ꧀ꦱꦺꦴ ꦱꦩ꧀ꦩꦸꦠꦶꦪꦺꦴ. ‘‘ꦄꦪꦁ ꦠꦠ꧀ꦡ ꦱꦴꦩꦷꦕꦷ’’ꦠꦶ ꦌꦮꦁ ꦄꦴꦒꦠꦴ ꦱꦠ꧀ꦠ ꦱꦴꦩꦷꦕꦶꦪꦺꦴ.

ꦄꦱꦴꦣꦴꦫꦟꦴꦢꦶꦮꦟ꧀ꦟꦤꦴ

꧓꧓꧘. ꦥꦸꦧ꧀ꦧꦺ ꦮꦸꦠ꧀ꦠꦕꦸꦢ꧀ꦢꦱꦥꦫꦩꦴꦤꦺꦮ ꦄꦤ꧀ꦠꦫꦥꦚ꧀ꦲꦺ ꦤꦶꦛ꧀ꦜꦥꦺꦠ꧀ꦮꦴ ꦥꦸꦫꦶꦩꦥꦚ꧀ꦲꦁ ꦮꦶꦱ꧀ꦱꦗ꧀ꦗꦺꦤ꧀ꦠꦺꦴ. ꦣꦺꦴꦮꦤꦚ꧀ꦕ ꦥꦛꦶꦒ꧀ꦒꦲꦺꦴꦠꦶ ꦒꦴꦡꦴ ꦄꦛ꧀ꦜꦏꦡꦴꦕꦫꦶꦪꦴꦤꦁ. ꦢ꧀ꦮꦺ ꦭꦺꦴꦩꦴꦤꦶ ꦌꦭ꦳ꦏꦭꦺꦴꦩꦠꦶꦪꦺꦴꦗꦤꦥꦫꦩꦴꦤꦶ.

ꦢ꧀ꦮꦺꦮꦷꦱꦠꦶ ꦑꦸꦢ꧀ꦢꦏꦴꦠꦶ –

‘‘ꦱꦏꦭꦺꦴ ꦨꦶꦏ꧀ꦑꦸꦤꦶꦮꦒ꧀ꦒꦺꦴ, ꦥꦫꦩ꧀ꦥꦫꦚ꧀ꦕ ꦨꦺꦴꦗꦤꦁ;

ꦄꦤꦠꦶꦫꦶꦠ꧀ꦠꦁ ꦄꦨꦶꦲꦛꦁ, ꦥꦟꦷꦠꦚ꧀ꦕ ꦄꦕꦺꦭꦏꦁ;

ꦗꦴꦤꦁ ꦢꦸꦛ꧀ꦜꦸꦭ꧀ꦭꦖꦴꦢꦤꦁ.

‘‘ꦈꦴꦤꦁ ꦩꦴꦠꦸꦒꦴꦩꦺꦤ ꦱꦢ꧀ꦣꦶꦁ, ꦪꦴ ꦕ ꦄꦤꦶꦏ꧀ꦑꦤ꧀ꦠꦫꦴꦗꦏꦺ;

ꦱꦤ꧀ꦠꦁ ꦨꦶꦏ꧀ꦑꦸꦁ ꦄꦤꦴꦥꦸꦕ꧀ꦖꦴ, ꦮꦶꦏꦴꦭꦺ ꦒꦴꦩꦥ꧀ꦥꦮꦺꦱꦤꦁ.

‘‘ꦤꦶꦱꦷꦢꦤꦺ ꦕ ꦪꦴ ꦱꦶꦏ꧀ꦑꦴ, ꦮꦱ꧀ꦱꦶꦏꦴꦪ ꦕ ꦱꦴꦛꦶꦏꦴ;

ꦢ꧀ꦮꦴꦮꦷꦱꦠꦶ ꦆꦩꦴ ꦱꦶꦏ꧀ꦑꦴ, ꦑꦸꦢ꧀ꦢꦏꦺꦱꦸ ꦥꦏꦴꦱꦶꦠꦴ’’ꦠꦶ. –

ꦥꦴꦜꦺꦴ. ‘‘ꦏꦸꦭꦺꦱꦸ ꦕꦴꦫꦶꦠ꧀ꦠꦴꦥꦠ꧀ꦠꦷ’’ꦠꦶ ꦥꦴꦜꦺꦴ ꦤ ꦒꦲꦺꦠꦧ꧀ꦧꦺꦴ ꦱꦴꦣꦴꦫꦟꦠ꧀ꦠꦴ ꦠꦱ꧀ꦱ ꦱꦶꦏ꧀ꦑꦴꦥꦢꦱ꧀ꦱ. ꦖꦕꦠ꧀ꦠꦴꦫꦷꦱꦴ ꦕꦶꦩꦺꦠꦶ ꦖꦕꦠ꧀ꦠꦴꦫꦷꦱ ꦆꦩꦺ. ‘‘ꦥꦴꦫꦴꦗꦶꦏꦴꦤꦶ ꦱꦔ꧀ꦓꦴꦢꦶꦱꦺꦱꦺꦴ’’ꦠꦶ ꦌꦮꦁ ꦮꦸꦠ꧀ꦠꦱꦶꦏ꧀ꦑꦴꦥꦢꦺ ꦌꦮ ꦮꦶꦨꦗꦶꦠ꧀ꦮꦴ ꦮꦸꦠ꧀ꦠꦠ꧀ꦠꦴ ꦮꦶꦨꦠ꧀ꦠꦶꦪꦺꦴ ꦤꦴꦩ. ꦱꦴꦣꦴꦫꦟꦤ꧀ꦠꦶ ꦄꦛ꧀ꦜꦤ꧀ꦤꦩ꧀ꦥꦶ ꦱꦴꦣꦴꦫꦟꦁ. ꦥꦴꦫꦴꦗꦶꦏꦨꦹꦠꦴ ꦮꦶꦨꦠ꧀ꦠꦶꦪꦺꦴ ꦥꦴꦫꦴꦗꦶꦏꦮꦶꦨꦠ꧀ꦠꦶꦪꦺꦴ. ꦱꦴꦣꦴꦫꦟꦺ ꦱꦠ꧀ꦠꦮꦗ꧀ꦗꦺꦴ ꦱꦔ꧀ꦓꦴꦢꦶꦱꦺꦱꦺꦴ. ꦄꦚ꧀ꦚꦠꦫꦱ꧀ꦩꦶꦁ ꦒꦟ꧀ꦜꦶꦥꦢꦺ ‘‘ꦄꦡ ꦮꦴ ‘ꦢ꧀ꦮꦺ ꦈꦥꦺꦴꦱꦡꦴ ꦢ꧀ꦮꦺ ꦥꦮꦴꦫꦟꦴ ꦕꦠ꧀ꦠꦴꦫꦶ ꦏꦩ꧀ꦩꦴꦤꦶ ꦥꦚ꧀ꦕꦺꦮ ꦈꦢ꧀ꦢꦺꦱꦴ ꦕꦠꦸꦫꦺꦴ ꦨꦮꦤ꧀ꦠꦶ, ꦤꦚ꧀ꦚꦡꦴ’ꦠꦶ ꦥꦴꦭ꦳ꦶꦁ ꦈꦢ꧀ꦣꦫꦤ꧀ꦠꦶ. ꦠꦠ꧀ꦡ ‘ꦕꦠ꧀ꦠꦴꦫꦶ ꦏꦩ꧀ꦩꦴꦤꦷ’ꦠꦶ ꦮꦶꦱꦺꦱꦴꦨꦴꦮꦴ ꦈꦢ꧀ꦣꦫꦶꦠꦥꦺꦴꦠ꧀ꦡꦏꦩꦺꦮ ꦱꦸꦤ꧀ꦢꦫꦁ, ꦥꦸꦧ꧀ꦧꦺꦥꦶ ꦮꦶꦨꦠ꧀ꦠꦶꦩꦠ꧀ꦠꦢꦱ꧀ꦱꦤꦮꦱꦺꦤꦺꦮ ꦕꦺꦠꦁ ꦮꦸꦠ꧀ꦠꦁ. ‘ꦤ ꦱꦩꦡꦺꦲꦶ ꦮꦹꦥꦱꦩꦤꦮꦱꦺꦤꦴ’ꦠꦶ ꦮꦠ꧀ꦮꦴ ꦕꦠ꧀ꦠꦴꦫꦶ ꦏꦩ꧀ꦩꦮꦶꦨꦗꦤꦺ ‘ꦱꦩꦡꦺꦲꦶ ꦮꦹꦥꦱꦩ꧀ꦩꦠꦷ’ꦠꦶ ꦤ ꦮꦶꦱꦺꦱꦶꦠꦁ ꦈꦥꦺꦴꦱꦡꦥ꧀ꦥꦮꦴꦫꦟꦴꦤꦁꦪꦺꦮ ꦮꦶꦨꦴꦒꦠ꧀ꦠꦴ. ꦏꦱ꧀ꦩꦴ? ꦌꦠ꧀ꦡꦴꦥꦶ ‘ꦈꦥꦺꦴꦱꦡꦥ꧀ꦥꦮꦴꦫꦟꦴꦤꦁꦪꦺꦮ ꦮꦶꦱꦺꦱꦺꦠ꧀ꦮꦴ ꦤꦪꦁ ꦢꦺꦡꦴ’ꦠꦶ ꦮꦸꦠ꧀ꦠꦠ꧀ꦠꦴ, ꦄꦣꦩ꧀ꦩꦺꦤ ꦮꦒ꧀ꦒꦴꦢꦶꦏꦩ꧀ꦩꦺꦤ ꦄꦴꦥꦠ꧀ꦠꦶꦪꦺꦴꦥꦶ ꦮꦹꦥꦱꦩ꧀ꦩꦤ꧀ꦠꦷꦠꦶ ꦄꦴꦥꦗ꧀ꦗꦤꦠꦺꦴꦠꦶ ꦮꦺꦢꦶꦠꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦁ, ꦮꦶꦕꦴꦫꦺꦠꦧ꧀ꦧꦁ. ꦢ꧀ꦮꦷꦲꦶ ꦕꦠꦹꦲꦶ ꦠꦷꦲꦶ ꦏꦶꦕ꧀ꦕꦁ ꦌꦏꦺꦤꦴꦠꦶ ꦢ꧀ꦮꦷꦲꦶ ꦮꦶꦮꦴꦢꦴꦣꦶꦏꦫꦟꦁ, ꦕꦠꦹꦲꦶ ꦄꦤꦸꦮꦴꦢꦴꦣꦶꦏꦫꦟꦁ, ꦠꦷꦲꦶ ꦄꦴꦥꦠ꧀ꦠꦴꦣꦶꦏꦫꦟꦁ, ꦌꦏꦺꦤ ꦏꦶꦕ꧀ꦕꦴꦣꦶꦏꦫꦟꦁ ꦱꦩ꧀ꦩꦠꦷꦠꦶ ꦄꦠ꧀ꦡꦺꦴ.

ꦥꦴꦫꦴꦗꦶꦏꦴꦢꦶꦄꦴꦥꦠ꧀ꦠꦶꦮꦟ꧀ꦟꦤꦴ

꧓꧓꧙. ꦤꦶꦧ꧀ꦧꦕꦤꦩꦠ꧀ꦠꦤ꧀ꦠꦶ ꦮꦺꦮꦕꦤꦩꦠ꧀ꦠꦁ. ꦱꦺꦱꦺꦠꦶ ꦄꦴꦢꦶꦠꦺꦴ ꦱꦺꦱꦴ ꦩꦗ꧀ꦙꦤ꧀ꦠꦴ. ꦥꦢꦤ꧀ꦠꦶ ꦱꦶꦏ꧀ꦑꦴꦥꦢꦁ. ꦱꦢ꧀ꦣꦴꦕꦶꦠ꧀ꦠꦁ ꦥꦱꦤ꧀ꦤꦕꦶꦠ꧀ꦠꦤ꧀ꦠꦶ ꦄꦠ꧀ꦡꦺꦴ, ‘‘ꦱꦤ꧀ꦠꦴꦕꦶꦠ꧀ꦠ’’ꦤ꧀ꦠꦶ ꦮꦴ ꦥꦴꦜꦺꦴ. ꦄꦤꦴꦭ꦳ꦶꦪꦤ꧀ꦠꦶ ꦢꦭꦶꦢ꧀ꦢꦁ. ꦏꦶꦚ꧀ꦕꦴꦥꦶ ꦆꦢꦁ ꦤꦶꦧ꧀ꦧꦕꦤꦁ ‘‘ꦒꦫꦸꦏꦁ ꦭꦲꦸꦏꦚ꧀ꦕꦴ’’ꦠꦶꦄꦴꦢꦶꦥꦚ꧀ꦲꦺ ꦤꦠ꧀ꦡꦶ, ‘‘ꦲꦤ꧀ꦢ ꦮꦴꦏ꧀ꦪꦁ ꦱꦸꦟꦺꦴꦩ ꦠꦺ’’ꦠꦶ ꦆꦩꦶꦤꦴ ꦥꦤ ꦮꦕꦤꦺꦤ ꦱꦔ꧀ꦒꦲꦶꦠꦱ꧀ꦱꦠ꧀ꦡꦱ꧀ꦱ ꦢꦷꦥꦤꦠ꧀ꦡꦁ ꦮꦸꦠ꧀ꦠꦤ꧀ꦠꦶ ꦮꦺꦢꦶꦠꦧ꧀ꦧꦁ. ‘‘ꦄꦴꦏꦴꦱꦺꦴ ꦥꦏ꧀ꦑꦶꦤꦁ ꦒꦠꦷ’’ꦠꦶ ꦕ ꦥꦴꦜꦺꦴ ꦄꦠ꧀ꦡꦶ, ꦱꦺꦴ ꦗꦴꦠꦶꦮꦱꦺꦤ ꦪꦸꦗ꧀ꦗꦠꦶ. ꦥꦏ꧀ꦑꦷꦤꦤ꧀ꦠꦶ ꦈꦗꦸꦏꦩꦺꦮ.

ꦥꦜꦩꦒꦴꦡꦴꦱꦔ꧀ꦒꦟꦶꦏꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.