꧘. ꦱꦲꦣꦩ꧀ꦩꦶꦏꦮꦒ꧀ꦒꦺꦴ

꧑. ꦱꦲꦣꦩ꧀ꦩꦶꦏꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧔꧓꧔. ꦱꦲꦣꦩ꧀ꦩꦶꦏꦱꦶꦏ꧀ꦑꦴꦥꦢꦁ ꦈꦠ꧀ꦠꦴꦤꦠ꧀ꦡꦩꦺꦮ.

꧒. ꦮꦶꦭꦺꦑꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧔꧓꧘. ꦄꦴꦥꦠ꧀ꦠꦶꦚ꧀ꦕ ꦱꦠꦶꦱꦩ꧀ꦩꦺꦴꦱꦴꦪꦴꦠꦶ ꦌꦠ꧀ꦡ ꦕ-ꦱꦢ꧀ꦢꦺꦴ ꦏꦠ꧀ꦠꦧ꧀ꦧꦚ꧀ꦕ ꦤ ꦏꦫꦺꦴꦠꦷꦠꦶ ꦢꦷꦥꦺꦠꦶ, ꦤ ꦕꦠ꧀ꦠꦴꦫꦶ ꦌꦮꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦫꦛ꧀ꦜꦺꦏꦢꦺꦱꦺꦴ ꦗꦤꦥꦢꦺꦴ. ꦧꦸꦢ꧀ꦣꦏꦴꦭꦺ ꦄꦫꦶꦛ꧀ꦜꦏꦟ꧀ꦛꦏꦴ ꦱꦴꦱꦤꦥꦕ꧀ꦕꦠ꧀ꦡꦶꦏꦴ. ‘‘ꦤꦴꦭꦁ ꦄꦤ꧀ꦠꦫꦴꦪꦴꦪꦴ’’ꦠꦶ ꦮꦕꦤꦺꦤ ꦲꦶ ꦠꦺ ꦨꦒꦮꦠꦺꦴ ꦄꦱꦧ꧀ꦧꦚ꧀ꦚꦸꦠꦁ ꦢꦷꦥꦺꦤ꧀ꦠꦶ. ꦥꦫꦶꦤꦶꦧ꧀ꦧꦸꦠꦺ ꦨꦒꦮꦠꦶ ꦢꦱꦮꦠ꧀ꦡꦸꦢꦷꦥꦏꦴ ꦮꦗ꧀ꦗꦶꦥꦸꦠ꧀ꦠꦏꦴ. ꦠꦺ ꦲꦶ ꦮꦶꦤꦪꦱꦴꦱꦤꦥꦕ꧀ꦕꦠ꧀ꦡꦶꦏꦴ. ꦥꦫꦹꦥꦲꦴꦫꦴꦢꦶꦮꦴꦢꦴ ꦥꦤ ꦱꦸꦠ꧀ꦠꦤ꧀ꦠꦴꦨꦶꦣꦩ꧀ꦩꦥ꧀ꦥꦕ꧀ꦕꦠ꧀ꦡꦶꦏꦴ. ꦏꦺ ꦥꦤ ꦠꦺ? ꦌꦏꦕ꧀ꦕꦺ ꦩꦲꦴꦱꦔ꧀ꦓꦶꦏꦴꦢꦪꦺꦴ, ꦤ ꦱꦧ꧀ꦧꦺꦠꦶ ꦢꦷꦥꦤꦠ꧀ꦡꦁ ‘‘ꦥꦫꦹꦥꦲꦴꦫꦴ…ꦥꦺ… ꦮꦴꦢꦴ’’ꦠꦶ ꦮꦶꦱꦺꦱꦤꦮꦕꦤꦩꦴꦲ. ꦠꦠ꧀ꦡ ꦪꦺ ꦏꦸꦲꦏꦴ ꦥꦴꦥꦶꦕ꧀ꦖꦏꦴ ꦄꦨꦹꦠꦁ ꦈꦭ꧀ꦭꦥꦶꦠ꧀ꦮꦴ ꦥꦛꦶꦭꦢ꧀ꦣꦮꦫꦨꦺꦴꦗꦤꦴꦤꦶ ꦨꦸꦚ꧀ꦗꦶꦠ꧀ꦮꦴ ꦩꦸꦛ꧀ꦜꦱ꧀ꦱꦠꦷ ꦤꦶꦢ꧀ꦢꦁ ꦎꦏ꧀ꦏꦩꦶꦠ꧀ꦮꦴ ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦁ ꦥꦠ꧀ꦠꦴ, ꦄꦚ꧀ꦚꦺꦲꦶ ꦠꦁ ꦢꦶꦱ꧀ꦮꦴ ‘‘ꦄꦠ꧀ꦡꦶ ꦄꦫꦲꦠꦺꦴ ꦱꦸꦏ꧀ꦏꦮꦶꦱ꧀ꦱꦛ꧀ꦜꦷ’’ꦠꦶ ꦮꦸꦠ꧀ꦠꦺ ‘‘ꦩꦴꦫꦏꦴꦪꦶꦏꦴ ꦈꦥꦱꦁꦲꦫꦤ꧀ꦠꦷ’’ꦠꦶ ꦮꦠ꧀ꦮꦴ ꦗꦤꦁ ꦮꦚ꧀ꦕꦺꦤ꧀ꦠꦶ. ꦪꦺ ꦕ ꦱꦩ꧀ꦩꦴꦥꦛꦶꦥꦤ꧀ꦤꦴ ꦄꦏꦸꦲꦏꦴ, ꦠꦺꦥꦶ ꦠꦁ ꦮꦕꦤꦁ ꦱꦸꦠ꧀ꦮꦴ ꦏꦺꦕꦶ ꦠꦁꦢꦶꦛ꧀ꦜꦶꦏꦴ ꦲꦺꦴꦤ꧀ꦠꦶ ꦄꦣꦶꦩꦴꦤꦶꦤꦺꦴ ꦕ. ꦄꦠ꧀ꦠꦤꦺꦴ ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦁ ꦥꦱ꧀ꦱꦶꦠ꧀ꦮꦴꦥꦶ ꦤꦴꦣꦶꦩꦸꦕ꧀ꦕꦤ꧀ꦠꦶ, ꦄꦤꦣꦶꦒꦠꦺ ꦄꦣꦶꦏꦠꦱꦚ꧀ꦚꦶꦤꦺꦴꦮ ꦲꦺꦴꦤ꧀ꦠꦶ. ꦠꦡꦴ ꦄꦠ꧀ꦡꦶ ꦄꦫꦲꦠꦺꦴ ꦄꦚ꧀ꦚꦴꦟꦏꦔ꧀ꦑꦴꦮꦶꦠꦫꦟꦴ ꦤꦴꦩꦒꦺꦴꦠ꧀ꦠꦴꦢꦷꦱꦸ ꦮꦶꦪ ꦱꦕ꧀ꦕꦺꦱꦸ ꦥꦫꦮꦶꦠꦫꦟꦴ ꦥꦫꦺꦲꦶ ꦥꦚ꧀ꦚꦠ꧀ꦠꦴ ꦤꦴꦩꦴꦤꦷꦠꦶ ꦄꦣꦶꦥ꧀ꦥꦴꦪꦺꦴ ꦪꦡꦴꦱꦩ꧀ꦨꦮꦁ ꦪꦺꦴꦗꦺꦠꦧ꧀ꦧꦺꦴ. ꦠꦠ꧀ꦡ ꦮꦶꦤꦪꦣꦫꦺꦴ ‘‘ꦄꦛ꧀ꦜꦴꦤꦩꦺꦠꦁ, ꦨꦶꦏ꧀ꦑꦮꦺ, ꦄꦤꦮꦏꦴꦱꦺꦴ, ꦪꦁ ꦄꦫꦲꦠꦺꦴ ꦄꦱꦸꦕꦶ ꦩꦸꦕ꧀ꦕꦺꦪ꧀ꦪ (ꦏꦡꦴ. ꧓꧑꧓; ꦩꦲꦴꦮ. ꧓꧕꧓). ꦢꦶꦛ꧀ꦜꦣꦩ꧀ꦩꦴ…ꦥꦺ… ꦄꦥꦫꦥ꧀ꦥꦕ꧀ꦕꦪꦴ ꦱꦠ꧀ꦡꦸꦱꦴꦱꦤꦺ’’ꦠꦶꦄꦴꦢꦷꦤꦶ (ꦩꦲꦴꦮ. ꧓꧐) ꦱꦸꦠ꧀ꦠꦥꦢꦴꦤꦶ ꦢꦱ꧀ꦱꦺꦠ꧀ꦮꦴ ꦠꦺ ꦱꦴꦱꦤꦥꦕ꧀ꦕꦠ꧀ꦡꦶꦏꦺꦱꦸ ꦤꦶꦒ꧀ꦒꦲꦶꦠꦁ ꦤꦶꦒ꧀ꦒꦟ꧀ꦲꦴꦠꦷꦠꦶ ꦄꦣꦶꦥ꧀ꦥꦴꦪꦺꦴ. ꦆꦠꦫꦺ ‘‘ꦥꦫꦶꦪꦠ꧀ꦠꦶ ꦩꦹꦭ’’ꦤ꧀ꦠꦶ ꦮꦴꦢꦶꦤꦺꦴ. ‘‘ꦥꦴꦠꦶꦩꦺꦴꦏ꧀ꦑꦺ ꦈꦢ꧀ꦢꦶꦱ꧀ꦱꦩꦴꦤꦺ’’ꦠꦶ ꦤꦶꦢꦴꦤꦮꦱꦺꦤ ꦮꦸꦠ꧀ꦠꦁ. ꦠꦡꦴꦒꦠꦱ꧀ꦱ ꦮꦶꦨꦔ꧀ꦒꦥꦢꦴꦤꦶ ꦱꦶꦢ꧀ꦣꦴꦤꦶ. ꦱꦶꦢ꧀ꦣꦺꦪꦺꦮ ꦏꦶꦁ ꦆꦩꦱ꧀ꦱ ꦄꦔ꧀ꦒꦴꦤꦶ? ꦒꦫꦲꦶꦠꦸꦏꦴꦩꦠꦴ ꦈꦥꦱꦩ꧀ꦥꦤ꧀ꦤꦱ꧀ꦱ ꦱꦤ꧀ꦠꦶꦏꦺ ꦱꦶꦏ꧀ꦑꦴꦥꦢꦮꦶꦮꦟ꧀ꦟꦤꦚ꧀ꦕꦴꦠꦶ.

ꦮꦶꦭꦺꦑꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧓. ꦩꦺꦴꦲꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧔꧔꧔. ꦩꦺꦴꦲꦤꦱꦶꦏ꧀ꦑꦴꦥꦢꦁ ꦈꦠ꧀ꦠꦴꦤꦠ꧀ꦡꦩꦺꦮ.

꧔. ꦥꦲꦴꦫꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧔꧕꧒. ꦫꦠ꧀ꦠꦕꦶꦠ꧀ꦠꦺꦴꦠꦶ ꦏꦴꦪꦱꦁꦱꦒ꧀ꦒꦫꦴꦒꦺꦤ. ꦮꦶꦲꦺꦜꦺꦠꦸꦏꦴꦩꦁ ꦥꦤ ꦢꦶꦱ꧀ꦮꦴ ‘‘ꦱꦕꦺ ꦄꦲꦁ ꦆꦩꦁ ꦩꦴꦫꦺꦩꦶ, ꦤꦠ꧀ꦡꦶ ꦩꦺ ꦩꦺꦴꦏ꧀ꦑꦺꦴ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦏꦸꦥꦶꦠꦺꦴ ꦱꦠ꧀ꦠꦱꦚ꧀ꦚꦁ ꦥꦸꦫꦺꦏ꧀ꦑꦠ꧀ꦮꦴ ꦥꦲꦴꦫꦁ ꦢꦺꦠꦶ, ꦠꦱ꧀ꦱ ꦪꦡꦴꦮꦠ꧀ꦡꦸꦏꦩꦺꦮ.

ꦥꦲꦴꦫꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧕. ꦠꦭꦱꦠ꧀ꦠꦶꦏꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧔꧕꧖. ‘‘ꦏꦴꦪꦁ ꦮꦴ ꦏꦴꦪꦥꦛꦶꦧꦢ꧀ꦣꦁ ꦮꦴ’’ꦠꦶ (ꦥꦴꦕꦶ. ꧔꧕꧖) ꦮꦕꦤꦠꦺꦴ ꦏꦴꦪꦴꦢꦷꦱꦸ ꦪꦁ ꦈꦕ꧀ꦕꦴꦫꦺꦠꦶ, ꦠꦁ ꦠꦭꦁ ꦤꦴꦩ. ꦠꦭꦩꦺꦮ ꦠꦭꦱꦠ꧀ꦠꦶꦏꦁ. ꦥꦺꦴꦡꦤꦱꦩꦠ꧀ꦡꦛ꧀ꦜꦺꦤ ꦱꦠ꧀ꦠꦶꦏꦤ꧀ꦠꦶ ꦌꦏꦺ. ꦠꦁ ‘‘ꦈꦥ꧀ꦥꦭꦥꦠ꧀ꦠꦩ꧀ꦥꦷ’’ꦠꦶ ꦆꦩꦶꦤꦴ ꦤꦶꦪꦩꦺꦠꦶ. ꦌꦮꦁ ꦏꦸꦥꦶꦠꦴ ꦲꦶ ꦏꦺꦴꦥꦮꦱꦺꦤ ꦥꦺꦴꦡꦤꦴꦱꦩꦠ꧀ꦡꦠꦁ ꦄꦮꦶꦕꦴꦫꦺꦠ꧀ꦮꦴ ꦪꦁ ꦏꦶꦚ꧀ꦕꦶ ꦲꦠ꧀ꦡꦒꦠꦁ ꦥꦛꦶꦏ꧀ꦑꦶꦥꦤ꧀ꦠꦶ, ꦱꦸꦑꦱꦩ꧀ꦦꦱ꧀ꦱꦩ꧀ꦥꦶ ꦲꦺꦴꦠꦸ, ꦥꦴꦕꦶꦠ꧀ꦠꦶꦪꦩꦺꦮ. ꦪꦱ꧀ꦩꦴ ꦥꦲꦫꦶꦠꦸꦏꦴꦩꦠꦴꦪ ꦥꦲꦛꦺ ꦥꦸꦫꦶꦩꦺꦤ ꦥꦴꦕꦶꦠ꧀ꦠꦶꦪꦁ. ꦏꦺꦮꦭꦁ ꦈꦕ꧀ꦕꦴꦫꦺꦠꦸꦏꦴꦩꦠꦴꦪ ꦈꦒ꧀ꦒꦶꦫꦟꦩꦠ꧀ꦠꦺ ꦏꦠꦺ ꦆꦩꦶꦤꦴ ꦥꦴꦕꦶꦠ꧀ꦠꦶꦪꦁ. ꦆꦩꦶꦤꦴ ꦥꦤ ꦮꦶꦫꦗ꧀ꦙꦶꦠ꧀ꦮꦴ ꦥꦲꦴꦫꦺꦴ ꦢꦶꦤ꧀ꦤꦺꦴ, ꦠꦱ꧀ꦩꦴ ꦤ ꦥꦲꦫꦶꦠꦸꦏꦴꦩꦠꦴꦪ ꦢꦶꦤ꧀ꦤꦠ꧀ꦠꦴ ꦢꦸꦏ꧀ꦏꦛꦁ. ꦏꦶꦩꦶꦢꦁ ꦢꦸꦏ꧀ꦏꦛꦁ ꦥꦲꦴꦫꦥꦕ꧀ꦕꦪꦴ, ꦈꦢꦴꦲꦸ ꦈꦒ꧀ꦒꦶꦫꦟꦥꦕ꧀ꦕꦪꦴꦠꦶ? ꦥꦲꦴꦫꦥꦕ꧀ꦕꦪꦴ ꦌꦮ ꦢꦸꦏ꧀ꦏꦛꦁ. ꦥꦸꦫꦶꦩꦁ ꦈꦒ꧀ꦒꦶꦫꦟꦥꦕ꧀ꦕꦪꦴ ꦥꦴꦕꦶꦠ꧀ꦠꦶꦪꦤ꧀ꦠꦶ ꦱꦢꦸꦏ꧀ꦏꦛꦁ ꦥꦴꦕꦶꦠ꧀ꦠꦶꦪꦁ ꦪꦸꦗ꧀ꦗꦠꦶ. ꦥꦸꦫꦶꦩꦚ꧀ꦲꦶ ꦈꦒ꧀ꦒꦶꦫꦟꦁ, ꦥꦕ꧀ꦖꦴ ꦥꦲꦴꦫꦺꦴ. ꦤ ꦕ ꦥꦕ꧀ꦖꦶꦩꦥꦲꦴꦫꦁ ꦤꦶꦱ꧀ꦱꦴꦪ ꦥꦸꦫꦶꦩꦁ ꦈꦒ꧀ꦒꦶꦫꦟꦁ ꦄꦤꦴꦥꦠ꧀ꦠꦶꦮꦠ꧀ꦡꦸꦏꦁ ꦨꦮꦶꦠꦸꦩꦫꦲꦠꦷꦠꦶ ꦤꦺꦴ ꦠꦏ꧀ꦏꦺꦴꦠꦶ ꦄꦴꦕꦫꦶꦪꦺꦴ. ‘‘ꦠꦺꦤ ꦥꦲꦴꦫꦺꦤ ꦲꦠ꧀ꦡꦴꦢꦷꦱꦸ ꦪꦁ ꦏꦶꦚ꧀ꦕꦶ ꦨꦶꦗ꧀ꦗꦠꦶ, ꦢꦸꦏ꧀ꦏꦛꦩꦺꦮꦴ’’ꦠꦶ ꦆꦩꦶꦤꦴꦥꦶ ꦥꦲꦴꦫꦥꦕ꧀ꦕꦪꦴ ꦢꦸꦏ꧀ꦏꦛꦁ. ꦈꦒ꧀ꦒꦶꦫꦟꦁ ꦪꦡꦴꦮꦠ꧀ꦡꦸꦏꦩꦺꦮꦴꦠꦶ ꦱꦶꦢ꧀ꦣꦁ, ꦱꦸꦛ꧀ꦜꦸ ꦮꦷꦩꦁꦱꦶꦠꦧ꧀ꦧꦁ. ‘‘ꦠꦶꦫꦕ꧀ꦖꦴꦤꦴꦢꦷꦤꦁ ꦄꦱꦸꦕꦶꦏꦫꦟꦴꦢꦷꦤꦶ ꦢꦶꦱ꧀ꦮꦴ ꦏꦸꦗ꧀ꦙꦶꦠ꧀ꦮꦴꦥꦶ ꦈꦒ꧀ꦒꦶꦫꦤ꧀ꦠꦱ꧀ꦱ ꦩꦺꦴꦏ꧀ꦑꦴꦣꦶꦥ꧀ꦥꦴꦪꦺꦴ ꦌꦮꦴ’’ꦠꦶ ꦮꦢꦤ꧀ꦠꦶ.

ꦠꦭꦱꦠ꧀ꦠꦶꦏꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧖. ꦄꦩꦹꦭꦏꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧔꧖꧒. ꦈꦥꦱꦩ꧀ꦥꦤ꧀ꦤꦺ ꦄꦤꦸꦥꦱꦩ꧀ꦥꦤ꧀ꦤꦱꦚ꧀ꦚꦷ ꦄꦩꦹꦭꦏꦺꦤ ꦱꦔ꧀ꦓꦴꦢꦶꦱꦺꦱꦺꦤꦴꦠꦶ ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦏꦴꦪꦱꦁꦱꦒ꧀ꦒꦴꦢꦶꦤꦴ ꦱꦔ꧀ꦓꦴꦢꦶꦱꦺꦱꦴꦥꦠ꧀ꦠꦶꦪꦴ ꦮꦠ꧀ꦡꦸꦤꦴꦠꦶ ꦮꦺꦢꦶꦠꦧ꧀ꦧꦁ. ꦤ ꦲꦶ ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦱꦔ꧀ꦓꦴꦢꦶꦱꦺꦱꦴꦥꦠ꧀ꦠꦶ ꦤꦴꦩ ꦄꦠ꧀ꦡꦶ.

ꦄꦩꦹꦭꦏꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧗. ꦱꦚ꧀ꦕꦶꦕ꧀ꦕꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧔꧖꧘. ꦈꦴꦤꦮꦷꦱꦠꦶꦮꦱ꧀ꦱꦺꦴ ꦩꦚ꧀ꦚꦺꦠꦶ ꦌꦠ꧀ꦡ ꦱꦪꦁ ꦱꦚ꧀ꦚꦴꦪ ꦠꦡꦴ ꦄꦩꦚ꧀ꦚꦤ꧀ꦠꦺꦴ ꦏꦸꦏ꧀ꦏꦸꦕ꧀ꦕꦸꦥ꧀ꦥꦴꦢꦤꦠ꧀ꦡꦁ ‘‘ꦩꦚ꧀ꦚꦺ’’ꦠꦶ ꦮꦢꦤ꧀ꦠꦺꦴ ꦏꦶꦁ ꦩꦸꦱꦴꦮꦴꦢꦺꦤ ꦏꦴꦫꦺꦠꦧ꧀ꦧꦺꦴꦠꦶ? ꦤ ꦱꦶꦪꦴ ꦄꦔ꧀ꦒꦱꦩ꧀ꦥꦠ꧀ꦠꦶꦪꦴ, ꦤ ꦕ ꦏꦺꦮꦭꦁ ‘‘ꦩꦚ꧀ꦚꦺ’’ꦠꦶ ꦆꦩꦶꦤꦴ ꦤꦶꦪꦩꦠꦺꦴ ꦄꦔ꧀ꦒꦱꦩ꧀ꦥꦠ꧀ꦠꦶ ꦲꦺꦴꦠꦶ. ꦥꦫꦩꦠ꧀ꦡꦮꦶꦲꦶꦠꦁ ꦏꦠ꧀ꦡꦕꦶ ꦲꦺꦴꦠꦶ. ‘‘ꦈꦢꦏꦁ ꦩꦚ꧀ꦚꦺ ꦄꦴꦢꦶꦠ꧀ꦠ’’ꦤ꧀ꦠꦶꦄꦴꦢꦶꦩ꧀ꦲꦶ ꦥꦫꦺꦴ ꦏꦸꦏ꧀ꦏꦸꦕ꧀ꦕꦁ ꦈꦥ꧀ꦥꦴꦢꦺꦠꦸ ꦮꦴ, ꦩꦴ ꦮꦴ, ꦠꦁ ꦄꦥ꧀ꦥꦩꦴꦟꦤ꧀ꦠꦶ ꦩꦴꦠꦶꦏꦴꦛ꧀ꦜꦏꦡꦴꦪꦁ (ꦏꦔ꧀ꦑꦴ. ꦄꦛ꧀ꦜ. ꦱꦚ꧀ꦕꦶꦕ꧀ꦕꦱꦶꦏ꧀ꦑꦴꦥꦢꦮꦟ꧀ꦟꦤꦴ) ‘‘ꦏꦸꦏ꧀ꦏꦸꦕ꧀ꦕꦸꦥ꧀ꦥꦴꦢꦤ’’ꦤ꧀ꦠꦶ ꦠꦱ꧀ꦱ ꦄꦣꦶꦥ꧀ꦥꦴꦪꦮꦱꦺꦤ ꦮꦸꦠ꧀ꦠꦤ꧀ꦠꦶ.

ꦱꦚ꧀ꦕꦶꦕ꧀ꦕꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧘. ꦈꦥꦱ꧀ꦱꦸꦠꦶꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧔꧗꧓. ꦆꦩꦺꦱꦁ ꦱꦸꦠ꧀ꦮꦴꦠꦶ ꦌꦠ꧀ꦡ ‘‘ꦮꦕꦤ’’ꦤ꧀ꦠꦶ ꦥꦴꦜꦱꦺꦱꦺꦴ. ꦌꦏꦥꦫꦶꦕ꧀ꦖꦺꦢꦴꦤꦷꦠꦶ ꦱꦶꦪꦴ ꦏꦶꦫꦶꦪꦴ ꦱꦶꦪꦴ ꦄꦏꦶꦫꦶꦪꦴꦠꦶ ꦆꦩꦶꦤꦴ ꦤꦪꦺꦤ ꦌꦏꦥꦫꦶꦕ꧀ꦖꦺꦢꦴꦤꦶ. ꦌꦠ꧀ꦡ ꦏꦶꦚ꧀ꦕꦴꦥꦶ ꦄꦚ꧀ꦚꦮꦴꦢꦏꦥꦕ꧀ꦕꦪꦴꦥꦠ꧀ꦠꦶ ꦏꦶꦫꦶꦪꦴ ꦕ ꦮꦶꦲꦺꦱꦏꦥꦕ꧀ꦕꦪꦴꦥꦠ꧀ꦠꦶ ꦄꦏꦶꦫꦶꦪꦴ ꦕ, ꦠꦢꦸꦨꦪꦁ ꦥꦤ ꦌꦏꦱꦶꦏ꧀ꦑꦴꦥꦢꦤ꧀ꦠꦶ ꦏꦠ꧀ꦮꦴ ꦠꦁ ꦄꦚ꧀ꦚꦮꦴꦢꦏꦱꦔ꧀ꦑꦴꦠꦁ ꦱꦶꦏ꧀ꦑꦴꦥꦢꦁ ꦱꦶꦪꦴ ꦏꦶꦫꦶꦪꦴ ꦥꦜꦩꦱ꧀ꦱ ꦮꦱꦺꦤ, ꦱꦶꦪꦴ ꦄꦏꦶꦫꦶꦪꦴ ꦢꦸꦠꦶꦪꦱ꧀ꦱ ꦮꦱꦺꦤꦴꦠꦶ ꦌꦮꦩꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ.

ꦈꦥꦱ꧀ꦱꦸꦠꦶꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧙. ꦏꦩ꧀ꦩꦥꦛꦶꦧꦴꦲꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧔꧗꧔. ‘‘ꦣꦩ꧀ꦩꦶꦏꦴꦤꦁ ꦏꦩ꧀ꦩꦴꦤ’’ꦤ꧀ꦠꦶ (ꦥꦴꦕꦶ. ꧔꧗꧕) ꦮꦕꦤꦠꦺꦴ ꦌꦏꦕ꧀ꦕꦺ ꦨꦶꦏ꧀ꦑꦹ ꦣꦩ꧀ꦩꦶꦏꦴꦤꦁ ꦏꦩ꧀ꦩꦴꦤꦁ ‘‘ꦖꦤ꧀ꦢꦁ ꦢꦩ꧀ꦩꦷ’’ꦠꦶ ꦖꦤ꧀ꦢꦁ ꦢꦺꦤ꧀ꦠꦶ, ꦠꦁ ꦠꦺꦱꦁ ꦩꦠꦶꦩꦠ꧀ꦠꦩꦺꦮ, ꦤ ꦥꦛꦶꦥꦠ꧀ꦠꦶ. ꦄꦣꦩ꧀ꦩꦁ ꦤꦶꦱ꧀ꦱꦴꦪ ꦑꦶꦪ꧀ꦪꦠꦶ, ꦠꦁ ꦮꦴ ꦈꦏ꧀ꦏꦺꦴꦛꦺꦠꦶ, ꦄꦤꦴꦥꦠ꧀ꦠꦶ ꦤꦺꦮ ꦲꦺꦴꦠꦷꦠꦶ? ꦤ, ꦠꦡꦴ ꦖꦤ꧀ꦢꦢꦴꦤꦏꦴꦭꦺ ꦄꦏꦠ꧀ꦮꦴ ꦥꦕ꧀ꦖꦴ ꦄꦣꦩ꧀ꦩꦏꦩ꧀ꦩꦑꦶꦪ꧀ꦪꦤꦴꦢꦶꦥꦕ꧀ꦕꦪꦴ ꦄꦤꦴꦥꦠ꧀ꦠꦶꦮꦴꦫꦺ ꦮꦸꦠ꧀ꦠꦠ꧀ꦠꦴ. ꦄꦣꦩ꧀ꦩꦺꦤ ꦮꦴ ꦮꦒ꧀ꦒꦺꦤ ꦮꦴ ꦤ ꦏꦩ꧀ꦩꦴꦫꦲꦱ꧀ꦱ ꦮꦴ ꦏꦩ꧀ꦩꦏꦫꦟꦥꦕ꧀ꦕꦪꦴ ꦄꦴꦥꦠ꧀ꦠꦶꦩꦺꦴꦏ꧀ꦑꦏꦫꦟꦠꦺꦴ ꦄꦮꦶꦱꦺꦱꦩꦺꦮ ꦠꦡꦴꦮꦕꦤꦤ꧀ꦠꦶ ꦕꦺ? ꦤ, ꦖꦤ꧀ꦢꦢꦴꦤꦏꦴꦭꦺ ꦄꦣꦩ꧀ꦩꦏꦩ꧀ꦩꦏꦫꦟꦴꦤꦸꦩꦠꦶꦪꦴ ꦄꦨꦴꦮꦠꦺꦴ, ꦏꦴꦫꦏꦱ꧀ꦱꦺꦮ ꦮꦗ꧀ꦗꦥ꧀ꦥꦱꦔ꧀ꦒꦠꦺꦴ ꦕ. ꦒꦟꦱ꧀ꦱ ꦢꦸꦏ꧀ꦏꦛꦤ꧀ꦠꦶ ꦕꦺ? ꦥꦴꦫꦶꦱꦸꦢ꧀ꦣꦶꦖꦤ꧀ꦢꦢꦴꦪꦏꦴꦮ ꦠꦺ, ꦤ ꦒꦟꦺꦴ ꦄꦏꦩ꧀ꦩꦥ꧀ꦥꦠ꧀ꦠꦠ꧀ꦠꦴ, ꦥꦫꦶꦮꦴꦫꦺꦥꦶ (ꦥꦫꦶ. ꧔꧘꧒ ꦄꦴꦢꦪꦺꦴ) ꦏꦩ꧀ꦩꦮꦒ꧀ꦒꦺ ꦏꦩ꧀ꦩꦥ꧀ꦥꦠ꧀ꦠꦖꦤ꧀ꦢꦢꦴꦪꦏꦴ ꦮꦶꦱꦸꦁ ꦮꦸꦠ꧀ꦠꦴ. ꦠꦡꦴꦥꦶ ꦄꦣꦩ꧀ꦩꦏꦩ꧀ꦩꦱ꧀ꦱ ꦖꦤ꧀ꦢꦺꦴ ꦤ ꦢꦴꦠꦧ꧀ꦧꦺꦴ ꦢꦺꦤ꧀ꦠꦺ ꦄꦏꦥ꧀ꦥꦶꦪꦴꦤꦸꦩꦠꦶꦢꦸꦏ꧀ꦏꦛꦠꦺꦴ. ꦠꦠ꧀ꦡ ꦲꦶ ꦪꦺꦴꦗꦤꦢꦸꦏ꧀ꦏꦛꦠꦺꦴ ꦤ ꦩꦸꦕ꧀ꦕꦤ꧀ꦠꦷꦠꦶ ꦤꦺꦴ ꦠꦏ꧀ꦏꦺꦴꦠꦶ ꦄꦴꦕꦫꦶꦪꦺꦴ.

ꦏꦩ꧀ꦩꦥꦛꦶꦧꦴꦲꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧑꧐. ꦖꦤ꧀ꦢꦁꦄꦢꦠ꧀ꦮꦴꦒꦩꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧔꧘꧑. ꦱꦤ꧀ꦤꦶꦥꦴꦠꦁ ꦄꦤꦴꦒꦤ꧀ꦠ꧀ꦮꦴ ꦕꦺ ꦖꦤ꧀ꦢꦁ ꦤ ꦢꦺꦠꦶ, ꦄꦤꦴꦥꦠ꧀ꦠꦷꦠꦶ ꦌꦏꦺ. ꦢꦸꦏ꧀ꦏꦛꦤ꧀ꦠꦶ ꦌꦏꦺ ꦣꦩ꧀ꦩꦏꦩ꧀ꦩꦤ꧀ꦠꦫꦴꦪꦏꦫꦟꦴꦣꦶꦥ꧀ꦥꦴꦪꦠ꧀ꦠꦴ. ꦱꦔ꧀ꦓꦩꦗ꧀ꦙꦺ ꦖꦤ꧀ꦢꦁ ꦢꦴꦠꦸꦁ ꦭꦨꦠꦷꦠꦶ ꦏꦺꦕꦶ. ꦢꦶꦤ꧀ꦤꦖꦤ꧀ꦢꦺ ꦱꦔ꧀ꦓꦩꦗ꧀ꦙꦁ ꦥꦮꦶꦱꦶꦠ꧀ꦮꦴ ꦥꦸꦤ ꦒꦠꦺꦥꦶ ꦖꦤ꧀ꦢꦺꦴ ꦤ ꦥꦛꦶꦥ꧀ꦥꦱ꧀ꦱꦩ꧀ꦨꦺꦪ꧀ꦪꦴꦠꦶ ꦕꦺ? ꦥꦛꦶꦥ꧀ꦥꦱ꧀ꦱꦩ꧀ꦨꦠꦶ. ꦏꦱ꧀ꦩꦴ? ‘‘ꦄꦲꦠ꧀ꦡꦥꦴꦱꦺꦴ ꦖꦤ꧀ꦢꦴꦫꦲꦺꦴ’’ꦠꦶꦄꦴꦢꦷꦲꦶ ꦮꦶꦫꦸꦗ꧀ꦙꦤꦠꦺꦴ. ꦥꦴꦭ꦳ꦶꦪꦁ ꦥꦤ ꦢꦴꦠꦸꦏꦴꦩꦠꦴꦪ ꦲꦠ꧀ꦡꦥꦴꦱꦁ ꦄꦠꦶꦏ꧀ꦏꦩꦤ꧀ꦠꦁ ꦱꦤ꧀ꦣꦴꦪ ꦮꦸꦠ꧀ꦠꦤ꧀ꦠꦶ ꦏꦺꦕꦶ.

ꦖꦤ꧀ꦢꦁꦄꦢꦠ꧀ꦮꦴꦒꦩꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧑꧑. ꦢꦸꦧ꧀ꦧꦭꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧔꧘꧔-꧕. ꦄꦢꦴꦱꦷꦠꦶ ꦄꦥꦭꦺꦴꦏꦺꦠ꧀ꦮꦴ ꦄꦢꦴꦱꦶ. ꦨꦶꦏ꧀ꦑꦹꦠꦶ ꦌꦠ꧀ꦡ ꦠꦺ ꦖꦧ꧀ꦧꦒ꧀ꦒꦶꦪꦴ ꦄꦠ꧀ꦠꦴꦤꦁ ꦥꦫꦶꦮꦗ꧀ꦗꦪꦶꦠ꧀ꦮꦴ ‘‘ꦱꦔ꧀ꦓꦺꦴ’’ꦠꦶ ꦄꦮꦠ꧀ꦮꦴ ‘‘ꦨꦶꦏ꧀ꦑꦹ’’ꦠꦶ ꦄꦴꦲꦁꦱꦸ. ꦥꦫꦶꦟꦴꦩꦺꦤ꧀ꦠꦷꦠꦶ ꦤꦺꦤ꧀ꦠꦶ. ꦠꦠ꧀ꦡ ꦭꦴꦨꦺꦴꦠꦶ ꦥꦢꦸꦢ꧀ꦣꦴꦫꦏꦫꦟꦁ ꦆꦣ ꦄꦤꦣꦶꦥ꧀ꦥꦺꦠꦱ꧀ꦱꦥꦶ ꦪꦱ꧀ꦱ ꦏꦱ꧀ꦱꦕꦶ ꦄꦠ꧀ꦡꦸꦢ꧀ꦣꦴꦫꦮꦱꦺꦤ ꦭꦴꦨꦢꦷꦥꦤꦠ꧀ꦡꦁ. ꦕꦷꦮꦫꦩꦺꦮ ꦲꦶ ꦆꦣꦴꦣꦶꦥ꧀ꦥꦺꦠꦁ, ꦠꦺꦤꦺꦮ ‘‘ꦄꦚ꧀ꦚꦁ ꦥꦫꦶꦏ꧀ꦑꦴꦫꦁ ꦢꦶꦤ꧀ꦤꦁ ꦑꦷꦪꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱꦴ’’ꦠꦶ ꦮꦸꦠ꧀ꦠꦁ. ꦢꦶꦤ꧀ꦤꦤ꧀ꦠꦶ ꦕ ꦥꦫꦶꦏ꧀ꦑꦴꦫꦤ꧀ꦠꦶ ꦕ ꦨꦸꦩ꧀ꦩꦠ꧀ꦡꦺ ꦈꦥꦪꦺꦴꦒꦮꦕꦤꦁ.

ꦢꦸꦧ꧀ꦧꦭꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧑꧒. ꦥꦫꦶꦟꦴꦩꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧔꧙꧑. ꦚꦴꦠꦏꦩ꧀ꦥꦶ ꦥꦫꦱ꧀ꦱ ꦢꦴꦠꦸꦏꦴꦩꦁ ꦄꦚ꧀ꦚꦱ꧀ꦱ ꦢꦴꦥꦺꦠꦶ, ꦄꦴꦥꦠ꧀ꦠꦶ ꦌꦮ. ꦱꦧ꧀ꦧꦠ꧀ꦡ ꦄꦴꦥꦸꦕ꧀ꦖꦶꦠ꧀ꦮꦴ ꦢꦴꦠꦸꦏꦴꦩꦁ ꦪꦡꦴꦱꦸꦑꦁ ꦮꦶꦕꦴꦫꦺꦠꦸꦁ ꦭꦨꦠꦶ.

ꦥꦫꦶꦟꦴꦩꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦱꦩꦠ꧀ꦠꦺꦴ ꦮꦟ꧀ꦟꦤꦴꦏ꧀ꦏꦩꦺꦤ ꦱꦲꦣꦩ꧀ꦩꦶꦏꦮꦒ꧀ꦒꦺꦴ ꦄꦛ꧀ꦜꦩꦺꦴ.