꧓. ꦥꦺꦱꦸꦚ꧀ꦚꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧓꧖-꧗. ‘‘ꦆꦩꦱ꧀ꦱ ꦱꦸꦠ꧀ꦮꦴ ꦄꦩꦸꦱ꧀ꦱꦴ’’ꦠꦶ ꦥꦴꦜꦺꦴ. ‘‘ꦆꦩꦺꦱꦁ ꦱꦸꦠ꧀ꦮꦴ’’ꦠꦶ ꦤ ꦱꦸꦤ꧀ꦢꦫꦁ. ꦨꦺꦢꦴꦪꦥꦷꦠꦶ ꦨꦺꦢꦴꦪ. ꦠꦶꦟ꧀ꦟꦩ꧀ꦥꦶ ꦨꦶꦏ꧀ꦑꦸꦨꦴꦮꦠꦺꦴꦪꦺꦮ ꦤꦶꦥꦗ꧀ꦗꦤꦠꦺꦴ ‘‘ꦨꦶꦏ꧀ꦑꦹꦤꦁ ꦥꦺꦱꦸꦚ꧀ꦚꦺ’’ꦠꦶ ꦧꦲꦸꦮꦕꦤꦁ ꦏꦠꦁ.

꧓꧘-꧙. ‘‘ꦆꦠ꧀ꦡꦤ꧀ꦤꦴꦩꦺꦴ ꦄꦴꦪꦱ꧀ꦩꦴ ꦕꦟ꧀ꦝꦴꦭꦺꦴ…ꦥꦺ… ꦥꦸꦏ꧀ꦏꦸꦱꦺꦴꦠꦶ ꦨꦟꦠꦷ’’ꦠꦶ ꦮꦠ꧀ꦮꦴ ꦥꦺꦱꦸꦚ꧀ꦚꦁ ꦈꦥꦱꦁꦲꦫꦠꦷꦠꦶ ꦪꦺꦴꦗꦤꦴ. ꦄꦚ꧀ꦚꦡꦴ ‘‘ꦥꦸꦏ꧀ꦏꦸꦱꦺꦴꦠꦶ ꦨꦟꦠꦷ’’ꦠꦶ ꦮꦠ꧀ꦠꦧ꧀ꦧꦠꦴ ꦄꦴꦥꦗ꧀ꦗꦠꦶ. ꦌꦠ꧀ꦡ ꦄꦤꦸꦥꦱꦩ꧀ꦥꦤ꧀ꦤꦮꦴꦫꦺꦴ ꦭꦧ꧀ꦨꦩꦴꦤꦺꦴꦥꦶ ꦤ ꦈꦢ꧀ꦣꦛꦺꦴ ꦎꦩꦱꦮꦴꦢꦺ ꦢꦱ꧀ꦱꦶꦠꦤꦪꦠ꧀ꦠꦴ, ꦱꦔ꧀ꦑꦺꦥꦠꦺꦴ ꦄꦤ꧀ꦠꦺ ꦢꦱ꧀ꦱꦺꦠꦸꦏꦴꦩꦠꦴꦪ ꦮꦴ. ꦠꦡꦴ ꦲꦶ ꦄꦤ꧀ꦠꦺ ꦠꦷꦟꦶ ꦢꦸꦏ꧀ꦏꦛꦴꦤꦶ ꦢꦱ꧀ꦱꦶꦠꦴꦤꦶ. ꦠꦴꦤꦶ ꦥꦤ ꦢꦱ꧀ꦱꦺꦤ꧀ꦠꦺꦴ ꦨꦒꦮꦴ ꦪꦱ꧀ꦩꦴ ‘‘ꦈꦥꦱꦩ꧀ꦥꦤ꧀ꦤꦱ꧀ꦱ ꦱꦸꦠ꧀ꦮꦴ ꦈꦥꦱꦩ꧀ꦥꦤ꧀ꦤꦱ꧀ꦱ ꦥꦺꦱꦸꦚ꧀ꦚꦁ ꦈꦥꦱꦁꦲꦫꦠꦷ’’ꦠꦶ ꦮꦸꦠ꧀ꦠꦴꦤꦁ ꦢ꧀ꦮꦶꦤ꧀ꦤꦁ ꦥꦢꦴꦤꦁ ꦄꦚ꧀ꦚꦠꦫꦮꦶꦥꦭ꧀ꦭꦴꦱꦮꦱꦺꦤ ꦮꦴ ꦈꦨꦪꦮꦶꦥꦭ꧀ꦭꦴꦱꦮꦱꦺꦤ ꦮꦴ ꦥꦴꦕꦶꦠ꧀ꦠꦶꦪꦤ꧀ꦠꦶ ꦏꦠ꧀ꦮꦴ ꦢ꧀ꦮꦺꦥꦶ ꦠꦴꦤꦶ ꦌꦏꦠꦺꦴ ꦮꦸꦠ꧀ꦠꦴꦤꦷꦠꦶ ꦢꦱ꧀ꦱꦺꦠꦸꦏꦴꦩꦺꦴ, ꦠꦱ꧀ꦩꦴ ꦱꦧ꧀ꦧꦥꦜꦩꦁꦪꦺꦮ ‘‘ꦈꦥꦱꦩ꧀ꦥꦤ꧀ꦤꦺꦴ ꦈꦥꦱꦩ꧀ꦥꦤ꧀ꦤꦱ꧀ꦱ ꦱꦸꦠ꧀ꦮꦴ ꦈꦥꦱꦩ꧀ꦥꦤ꧀ꦤꦱ꧀ꦱ ꦥꦺꦱꦸꦚ꧀ꦚꦁ ꦈꦥꦱꦁꦲꦫꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱꦴ’’ꦠꦶ ꦄꦴꦲ. ‘‘ꦢ꧀ꦮꦷꦱꦸ ꦥꦤꦺꦠꦺꦱꦸ ꦪꦱ꧀ꦩꦴ ꦥꦴꦫꦴꦗꦶꦏꦁ ꦄꦗ꧀ꦙꦴꦥꦤ꧀ꦤꦺꦴꦥꦶ ꦈꦥꦱꦩ꧀ꦥꦤ꧀ꦤꦺꦴ ꦠꦴꦢꦶꦱꦁꦪꦺꦮ ꦈꦥꦱꦩ꧀ꦥꦤ꧀ꦤꦁ ꦑꦸꦁꦱꦺꦠꦸꦏꦴꦩꦺꦴ ꦎꦩꦱꦠꦶ, ꦠꦴꦢꦶꦱꦱ꧀ꦱ ꦱꦸꦠ꧀ꦮꦴ ꦠꦴꦢꦶꦱꦱ꧀ꦱ ꦥꦺꦱꦸꦚ꧀ꦚꦁ ꦈꦥꦱꦁꦲꦫꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ, ꦠꦱ꧀ꦩꦴ ‘ꦈꦥꦱꦩ꧀ꦥꦤ꧀ꦤꦺꦴ’ꦠꦶ ꦆꦢꦁ ꦄꦴꦢꦶꦥꦢꦁ ꦱꦧ꧀ꦧꦠ꧀ꦡ ꦮꦸꦠ꧀ꦠ’’ꦤ꧀ꦠꦶ ꦏꦺꦕꦶ ꦮꦢꦤ꧀ꦠꦶ, ꦠꦁ ꦤ ꦪꦸꦠ꧀ꦠꦁ, ꦄꦤꦮꦱꦺꦱꦄꦴꦥꦠ꧀ꦠꦶꦁ ꦄꦴꦥꦤ꧀ꦤꦱ꧀ꦱ ꦥꦸꦤ ꦄꦴꦥꦠ꧀ꦠꦶꦪꦴ ꦄꦱꦩ꧀ꦨꦮꦠꦺꦴ, ꦠꦱ꧀ꦩꦴ ꦏꦺꦮꦭꦁ ꦩꦴꦠꦶꦏꦴꦪꦁ ꦨꦶꦏ꧀ꦑꦸꦥꦢꦴꦨꦴꦮꦠꦺꦴꦪꦺꦮ ‘‘ꦨꦟꦠꦶ ꦈꦥꦱꦁꦲꦫꦠꦷ’’ꦠꦶ ꦥꦢꦴꦤꦁ ꦏꦴꦫꦏꦤꦶꦢ꧀ꦢꦺꦱꦴꦨꦴꦮꦺ ꦄꦱꦩ꧀ꦨꦮꦠꦺꦴ ꦌꦮ ꦠꦁ ꦄꦴꦢꦶꦥꦢꦁ ꦮꦸꦠ꧀ꦠꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦆꦢꦁ ꦥꦴꦭ꦳ꦶꦭꦺꦱꦴꦨꦴꦮꦠꦺꦴ ꦄꦤꦴꦟꦠ꧀ꦠꦶꦏꦩꦺꦮ. ‘‘ꦤ ꦥꦶꦪꦏꦩ꧀ꦪꦱ꧀ꦱ, ꦤ ꦨꦺꦢꦴꦣꦶꦥ꧀ꦥꦴꦪꦱ꧀ꦱꦴ’’ꦠꦶ ꦈꦥꦱꦁꦲꦫꦟꦴꦥꦺꦏ꧀ꦑꦁ ꦱꦴꦩꦶꦮꦕꦤꦁ ꦠꦸꦟ꧀ꦲꦷꦨꦹꦠꦱ꧀ꦱ ꦮꦕꦤꦥ꧀ꦥꦪꦺꦴꦗꦤꦴꦨꦴꦮꦠꦺꦴ, ꦠꦺꦤ ꦮꦸꦠ꧀ꦠꦁ ‘‘ꦥꦴꦥꦒꦫꦲꦶꦠꦴꦪ ꦨꦟꦤ꧀ꦠꦱ꧀ꦱ ꦄꦤꦴꦥꦠ꧀ꦠꦷ’’ꦠꦶ.

ꦥꦺꦱꦸꦚ꧀ꦚꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.