꧓. ꦠꦠꦶꦪꦏꦡꦶꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧔꧙꧗. ꦤꦥ꧀ꦥꦲꦺꦴꦠꦷꦠꦶ ꦭꦴꦩꦏꦥꦫꦶꦕ꧀ꦖꦺꦢꦁ ꦤ ꦥꦴꦥꦸꦟꦴꦠꦶ, ꦠꦺꦤꦺꦮ ꦠꦶꦕꦷꦮꦫꦱ꧀ꦱ ꦩꦸꦛ꧀ꦜꦶꦥꦚ꧀ꦕꦏꦴꦢꦶꦭꦴꦩꦏꦥꦫꦶꦕ꧀ꦖꦺꦢꦺꦴꦮ ꦠꦴꦮ ꦮꦸꦠ꧀ꦠꦺꦴ. ꦕꦷꦮꦫꦺ ꦥꦕ꧀ꦕꦴꦱꦴ ꦕꦷꦮꦫꦥꦕ꧀ꦕꦴꦱꦴ. ꦠꦺꦤꦺꦠꦁ ꦢꦷꦥꦺꦠꦶ – ꦠꦁ ꦕꦷꦮꦫꦁ ꦥꦕ꧀ꦖꦴ ꦭꦧ꧀ꦨꦠꦸ ꦮꦴ ꦩꦴ ꦮꦴ, ꦪꦴꦮ ꦱꦴ ꦥꦕ꧀ꦕꦴꦱꦴ ꦖꦶꦗ꧀ꦗꦠꦶ, ꦠꦴꦮ ꦆꦢꦁ ꦩꦹꦭꦕꦷꦮꦫꦁ ꦜꦥꦺꦠꦸꦁ ꦄꦤꦸꦗꦴꦤꦴꦩꦷꦠꦶ. ‘‘ꦕꦷꦮꦫꦥꦕ꧀ꦕꦴꦱꦴ’’ꦠꦶ ꦩꦫꦶꦪꦴꦢꦠ꧀ꦡꦺ ꦤꦶꦱ꧀ꦱꦏ꧀ꦏꦮꦕꦤꦁ, ꦨꦸꦩ꧀ꦩꦠ꧀ꦡꦺ ꦮꦴ ꦥꦕ꧀ꦕꦠ꧀ꦠꦮꦕꦤꦁ ꦏꦠꦁ.

꧔꧙꧙-꧕꧐꧐. ꦤꦶꦛ꧀ꦜꦶꦠꦕꦷꦮꦫꦱ꧀ꦩꦶꦁ …ꦥꦺ… ꦕꦷꦮꦫꦴꦱꦴ ꦮꦴ ꦈꦥꦕ꧀ꦖꦶꦤ꧀ꦤꦴꦠꦶꦄꦴꦢꦶꦩ꧀ꦲꦶ ꦠꦷꦱꦸ ꦕꦷꦮꦫꦺꦱꦸ ꦄꦚ꧀ꦚꦠꦫꦁ ꦏꦠꦁ ꦲꦺꦴꦠꦶ, ꦱꦺꦱꦴ ꦄꦠ꧀ꦡꦶ, ꦫꦏ꧀ꦑꦠꦶ. ꦕꦷꦮꦫꦥꦭꦶꦧꦺꦴꦣꦱ꧀ꦱ ꦈꦥꦕ꧀ꦖꦺꦢꦺ, ꦈꦧ꧀ꦨꦠꦱ꧀ꦩꦶꦚ꧀ꦕ ꦏꦡꦶꦤꦺ ꦱꦩꦪꦺ ꦮꦴ ꦲꦺꦩꦤ꧀ꦠꦱ꧀ꦱ ꦱꦩꦪꦺ ꦮꦴ ꦄꦏꦴꦭꦕꦷꦮꦫꦁ ꦈꦥ꧀ꦥꦗ꧀ꦗꦺꦪ꧀ꦪ, ꦑꦶꦥ꧀ꦥꦩꦺꦮ ꦏꦴꦫꦺꦠꦧ꧀ꦧꦁ. ꦱꦠꦶ ꦥꦴꦫꦶꦥꦹꦫꦶꦪꦴ ꦥꦕ꧀ꦕꦴꦱꦴ ꦤ ꦫꦏ꧀ꦑꦠꦶ, ꦄꦱꦠꦶ ꦤꦠ꧀ꦡꦶ ꦕꦺ ꦥꦕ꧀ꦕꦴꦱꦴ, ꦤ ꦫꦏ꧀ꦑꦠꦶ. ‘‘ꦄꦤꦠ꧀ꦡꦠꦺ ꦏꦡꦶꦤꦺ ꦌꦏꦴꦢꦱꦩꦴꦱꦺ ꦈꦥ꧀ꦥꦤ꧀ꦤ’’ꦤ꧀ꦠꦶ ꦮꦕꦤꦠꦺꦴ ꦄꦥꦫꦏꦠ꧀ꦠꦶꦏꦴ ꦄꦠ꧀ꦡꦠꦺ ꦮꦴ ꦄꦤꦠ꧀ꦡꦠꦺ ꦮꦴ ꦱꦩꦪꦺꦴꦮ. ꦲꦺꦩꦤ꧀ꦠꦺꦴ ꦱꦶꦪꦴ ꦱꦩꦪꦺꦴ ꦄꦠ꧀ꦡꦠꦺ, ꦱꦶꦪꦴ ꦄꦱꦩꦪꦺꦴ ꦄꦤꦠ꧀ꦡꦠꦺ. ꦠꦠꦺꦴ ꦥꦫꦁ ꦌꦏꦁꦱꦠꦺꦴ ꦄꦱꦩꦪꦺꦴ ꦮꦴꦠꦶ. ‘‘ꦄꦴꦢꦶꦱ꧀ꦱ ꦢꦶꦤ꧀ꦤ’’ꦤ꧀ꦠꦶ ꦆꦢꦁ ꦆꦣ ꦄꦭꦧ꧀ꦨꦩꦴꦤꦩ꧀ꦥꦶ ꦄꦠ꧀ꦡꦸꦢ꧀ꦣꦴꦫꦮꦱꦺꦤ ꦮꦸꦠ꧀ꦠꦁ ꦨꦶꦏ꧀ꦑꦸꦤꦷꦤꦁ ꦢꦸꦠꦶꦪꦤꦶꦱ꧀ꦱꦒ꧀ꦒꦶꦪꦺ (ꦥꦴꦕꦶ. ꧗꧓꧘ ꦄꦴꦢꦪꦺꦴ) ꦱꦺꦱꦁ ꦄꦏꦴꦭꦕꦷꦮꦫꦁ ꦮꦶꦪ. ꦠꦠ꧀ꦡ ꦲꦶ ꦨꦶꦏ꧀ꦑꦸꦤꦶꦱꦔ꧀ꦓꦱ꧀ꦱ ‘‘ꦱꦩ꧀ꦥꦠ꧀ꦠꦴ ꦨꦴꦗꦺꦤ꧀ꦠꦹ’’ꦠꦶ ꦌꦮꦁ ꦄꦴꦢꦶꦱ꧀ꦱ ꦢꦶꦤ꧀ꦤꦩꦺꦮ ‘‘ꦄꦏꦴꦭꦕꦷꦮꦫꦁ ꦏꦴꦭꦕꦷꦮꦫ’’ꦤ꧀ꦠꦶ ꦄꦣꦶꦛ꧀ꦜꦲꦶꦠ꧀ꦮꦴ ꦨꦴꦗꦺꦤ꧀ꦠꦶꦪꦴ ꦤꦶꦱ꧀ꦱꦒ꧀ꦒꦶꦪꦁ. ꦠꦡꦴ ꦲꦶ ꦠꦠ꧀ꦡ ꦪꦡꦴ ‘‘ꦄꦏꦴꦭꦕꦷꦮꦫꦁ ꦤꦴꦩ ꦄꦤꦠ꧀ꦡꦠꦺ ꦏꦡꦶꦤꦺ ꦌꦏꦴꦢꦱꦩꦴꦱꦺ ꦈꦥ꧀ꦥꦤ꧀ꦤꦁ, ꦄꦠ꧀ꦡꦠꦺ ꦏꦡꦶꦤꦺ ꦱꦠ꧀ꦠꦩꦴꦱꦺ ꦈꦥ꧀ꦥꦤ꧀ꦤ’’ꦤ꧀ꦠꦶ ꦆꦢꦁ ꦄꦠ꧀ꦡꦸꦢ꧀ꦣꦴꦫꦮꦱꦺꦤ ꦮꦸꦠ꧀ꦠꦁ, ꦌꦮꦁꦱꦩ꧀ꦥꦢꦩꦶꦢꦁ. ꦪꦢꦶ ꦌꦮꦁ ‘‘ꦌꦏꦥꦸꦒ꧀ꦒꦭꦱ꧀ꦱ ꦆꦢꦁ ꦠꦸꦪ꧀ꦲꦁ ꦢꦩ꧀ꦲꦷꦠꦶ ꦢꦶꦤ꧀ꦤ’’ꦤ꧀ꦠꦶ ꦆꦢꦁ ꦏꦶꦩꦠ꧀ꦡꦁ ꦮꦸꦠ꧀ꦠꦁ, ꦤ ꦲꦶ ꦠꦁ ꦨꦴꦗꦤꦷꦪꦤ꧀ꦠꦶ ꦕꦺ? ꦄꦨꦴꦗꦤꦷꦪꦱꦴꦩꦚ꧀ꦚꦠꦺꦴ ꦮꦸꦠ꧀ꦠꦁ ꦲꦺꦴꦠꦶ. ꦪꦡꦴ ꦱꦔ꧀ꦓꦱ꧀ꦱ ꦄꦴꦢꦶꦱ꧀ꦱ ꦢꦶꦤ꧀ꦤꦁ ꦄꦠ꧀ꦡꦠꦏꦡꦶꦤꦺꦲꦶ ꦌꦮ ꦨꦶꦏ꧀ꦑꦹꦲꦶ ꦄꦨꦴꦗꦤꦷꦪꦠ꧀ꦠꦴ ꦄꦏꦴꦭꦕꦷꦮꦫꦁ ꦤꦴꦩ ꦗꦴꦠꦁ, ꦌꦮꦁ ꦥꦸꦒ꧀ꦒꦭꦶꦏꦩ꧀ꦥꦶ ꦆꦠꦫꦺꦲꦷꦠꦶ ꦄꦠ꧀ꦡꦺꦴ. ꦌꦮꦁ ꦱꦤ꧀ꦠꦺꦥꦶ ꦏꦱ꧀ꦱꦕꦶ ꦱꦶꦪꦴ ‘‘ꦄꦴꦢꦶꦱ꧀ꦱ ꦢꦶꦤ꧀ꦤꦩ꧀ꦥꦶ ꦢꦱꦴꦲꦩꦺꦮ ꦥꦫꦶꦲꦴꦫꦁ ꦭꦨꦠꦷ’’ꦠꦶ. ꦠꦱ꧀ꦱꦺꦠꦁ ꦥꦴꦛꦶꦏꦔ꧀ꦑꦁ. ꦥꦜꦩꦏꦡꦶꦤꦺ ‘‘ꦤꦶꦛ꧀ꦜꦶꦠꦕꦷꦮꦫꦱ꧀ꦩꦶꦁ ꦨꦶꦏ꧀ꦑꦸꦤꦴ ꦈꦧ꧀ꦨꦠꦱ꧀ꦩꦶꦁ ꦏꦡꦶꦤꦺ’’ꦠꦶ ꦆꦢꦚ꧀ꦲꦶ ꦤꦶꦫꦠ꧀ꦡꦏꦤ꧀ꦠꦶ. ꦄꦤꦸꦧ꧀ꦨꦠꦱ꧀ꦩꦶꦩ꧀ꦥꦶ ꦲꦶ ꦏꦡꦶꦤꦺ ꦢꦱꦴꦲꦥꦫꦩꦩꦺꦮ ꦣꦴꦫꦺꦠꦧ꧀ꦧꦤ꧀ꦠꦶ ꦮꦶꦚ꧀ꦚꦴꦠꦠ꧀ꦠꦴ ꦄꦤꦴꦢꦶꦱ꧀ꦱ ꦢꦶꦤ꧀ꦤꦩꦺꦮ ꦱꦤ꧀ꦣꦴꦪꦺꦠꦁ ꦮꦸꦠ꧀ꦠꦁ ꦱꦶꦪꦴꦠꦶ ꦕꦺ? ꦌꦮꦁ ꦱꦤ꧀ꦠꦺꦥꦶ ꦄꦤꦴꦢꦶꦱ꧀ꦱ ꦢꦶꦤ꧀ꦤꦩ꧀ꦥꦶ ꦄꦤꦠ꧀ꦡꦠꦏꦡꦶꦤꦴꦤꦁ ꦄꦥꦫꦏꦠ꧀ꦠꦶꦏꦴꦪ ꦢꦱꦴꦲꦩꦺꦮ ꦥꦫꦶꦲꦴꦫꦁ ꦭꦨꦠꦶ ‘‘ꦤꦶꦛ꧀ꦜꦶꦠꦕꦷꦮꦫꦱ꧀ꦩꦶꦁ ꦨꦶꦏ꧀ꦑꦸꦤꦴ ꦈꦧ꧀ꦨꦠꦱ꧀ꦩꦶꦁ ꦏꦡꦶꦤꦺ’’ꦠꦶ ꦮꦸꦠ꧀ꦠꦠ꧀ꦠꦴ. ꦄꦴꦩꦤ꧀ꦠꦴꦠꦶ ꦕꦺ? ‘‘ꦄꦤꦠ꧀ꦡꦠꦺ ꦏꦡꦶꦤꦺ ꦌꦏꦴꦢꦱꦩꦴꦱꦺ ꦈꦥ꧀ꦥꦤ꧀ꦤ’’ꦤ꧀ꦠꦶ ꦮꦕꦤꦺꦤ ꦮꦶꦫꦸꦗ꧀ꦙꦠꦶ, ꦠꦱ꧀ꦩꦴ ꦪꦡꦴꦮꦸꦠ꧀ꦠꦤꦪꦺꦤꦺꦮꦺꦠ꧀ꦡ ꦱꦤ꧀ꦤꦶꦛ꧀ꦜꦴꦤꦁ ꦒꦤ꧀ꦠꦧ꧀ꦧꦁ.

ꦄꦤꦸꦒꦟ꧀ꦜꦶꦥꦢꦺ ꦮꦸꦠ꧀ꦠꦁ ‘‘ꦥꦜꦩꦱꦶꦏ꧀ꦑꦴꦥꦢꦺ ꦱꦧ꧀ꦧꦕꦷꦮꦫꦴꦤꦁ ꦪꦴꦮꦢꦠ꧀ꦡꦕꦷꦮꦫꦮꦱꦺꦤ ꦏꦡꦶꦤꦩꦴꦱꦧ꧀ꦨꦤ꧀ꦠꦫꦺ ꦢꦱꦴꦲꦴꦠꦶꦏ꧀ꦏꦩꦺꦥꦶ ꦄꦤꦴꦥꦠ꧀ꦠꦶ ꦥꦫꦶꦲꦴꦫꦱ꧀ꦱ ꦢꦶꦤ꧀ꦤꦠ꧀ꦠꦴ. ꦪꦡꦴ ꦏꦡꦶꦤꦩꦴꦱꦧ꧀ꦨꦤ꧀ꦠꦫꦺ ꦄꦴꦢꦶꦱ꧀ꦱ ꦢꦶꦤ꧀ꦤꦩꦏꦴꦭꦕꦷꦮꦫꦁ ꦏꦴꦭꦕꦷꦮꦫꦥꦫꦶꦲꦴꦫꦩꦺꦮ ꦭꦨꦠꦶ, ꦠꦡꦴ ꦆꦠꦫꦩꦴꦱꦺꦥꦶ ꦭꦨꦠꦷꦠꦶ ꦮꦺꦢꦶꦠꦧ꧀ꦧꦁ. ꦠꦱ꧀ꦩꦴ ꦌꦮꦁ ‘ꦤꦶꦛ꧀ꦜꦶꦠꦕꦷꦮꦫꦱ꧀ꦩꦶꦁ ꦨꦶꦏ꧀ꦑꦸꦤꦴ ꦈꦧ꧀ꦨꦠꦱ꧀ꦩꦶꦁ ꦏꦡꦶꦤꦺ ꦨꦶꦏ꧀ꦑꦸꦤꦺꦴ ꦥꦤꦺꦮ ꦕꦷꦮꦫꦁ ꦈꦥ꧀ꦥꦗ꧀ꦗꦺꦪ꧀ꦪꦴ’ꦠꦶꦄꦴꦢꦶꦤꦴ ꦱꦶꦏ꧀ꦑꦴꦥꦢꦺ ꦱꦶꦢ꧀ꦣꦺꦥꦶ ꦄꦤꦠ꧀ꦡꦠꦏꦡꦶꦤꦴꦤꦁ ꦥꦕ꧀ꦖꦶꦩꦏꦠ꧀ꦠꦶꦏꦩꦴꦱꦁ ꦄꦤꦸꦗꦴꦤꦤ꧀ꦠꦺꦤ ‘ꦄꦏꦴꦭꦕꦷꦮꦫꦁ ꦈꦥ꧀ꦥꦗ꧀ꦗꦺꦪ꧀ꦪꦴ’ꦠꦶ ꦮꦸꦠ꧀ꦠꦁ. ꦌꦮꦚ꧀ꦲꦶ ꦄꦮꦸꦠ꧀ꦠꦺ ꦄꦏꦴꦭꦕꦷꦮꦫꦁ ꦤꦴꦩ ‘ꦄꦤꦠ꧀ꦡꦠꦺ ꦏꦡꦶꦤꦺ ꦌꦏꦴꦢꦱꦩꦴꦱꦺ ꦈꦥ꧀ꦥꦤ꧀ꦤ’ꦤ꧀ꦠꦶ ꦤ ꦱꦏ꧀ꦏꦴ ꦮꦠ꧀ꦠꦸꦁ. ꦌꦮꦚ꧀ꦲꦶ ꦮꦕꦤꦠꦺꦴ ꦄꦤꦠ꧀ꦡꦠꦏꦡꦶꦤꦴꦤꦁ ꦄꦠ꧀ꦡꦠꦏꦡꦶꦤꦴꦤꦁ ꦮꦶꦪ ꦱꦧ꧀ꦧꦕꦷꦮꦫꦴꦤꦁ ꦥꦕ꧀ꦖꦶꦩꦏꦠ꧀ꦠꦶꦏꦩꦴꦱꦺ ꦢꦱꦴꦲꦴꦠꦶꦏ꧀ꦏꦩꦺ ꦤꦶꦱ꧀ꦱꦒ꧀ꦒꦶꦪꦁ ꦤ ꦲꦺꦴꦠꦷ’’ꦠꦶꦄꦴꦢꦶ.

ꦨꦶꦪ꧀ꦪꦺꦴꦥꦶ ꦌꦮꦁ ꦮꦸꦠ꧀ꦠꦁ – ꦪꦁ ꦥꦤ ꦩꦪꦴ ‘‘ꦥꦜꦩꦏꦡꦶꦤꦺ ꦢꦱꦴꦲꦥꦫꦩꦁ ꦄꦠꦶꦫꦺꦏꦕꦷꦮꦫꦁ ꦣꦴꦫꦺꦠꦧ꧀ꦧ’’ꦤ꧀ꦠꦶ ꦄꦤꦸꦚ꧀ꦚꦴꦠꦁ, ꦠꦩ꧀ꦥꦶ ꦏꦡꦶꦤꦩꦴꦱꦠꦺꦴ ꦧꦲꦶ ꦈꦥ꧀ꦥꦤ꧀ꦤꦩꦺꦮ, ꦤ ꦄꦤ꧀ꦠꦺꦴꦠꦶ ꦄꦪꦩꦠ꧀ꦡꦺꦴ ꦢꦷꦥꦶꦠꦺꦴ ꦲꦺꦴꦠꦶ. ꦏꦡꦁ? ꦄꦠꦶꦫꦺꦏꦕꦷꦮꦫꦱ꧀ꦱ ꦢꦱꦴꦲꦥꦫꦶꦲꦴꦫꦠꦺꦴ ꦈꦢ꧀ꦣꦁ ꦄꦴꦥꦗ꧀ꦗꦶꦠꦧ꧀ꦧꦴꦥꦠ꧀ꦠꦶꦁ ‘‘ꦤꦶꦛ꧀ꦜꦶꦠꦕꦷꦮꦫꦱ꧀ꦩꦶꦁ ꦨꦶꦏ꧀ꦑꦸꦤꦴ ꦈꦧ꧀ꦨꦠꦱ꧀ꦩꦶꦁ ꦏꦡꦶꦤꦺ’’ꦠꦶ ꦄꦤꦸꦥꦚ꧀ꦚꦠ꧀ꦠꦶꦪꦴ ꦏꦡꦶꦤꦧ꧀ꦨꦤ꧀ꦠꦫꦺ ꦮꦴꦫꦺꦠ꧀ꦮꦴ ꦠꦠꦺꦴ ꦈꦢ꧀ꦣꦁ ꦈꦥ꧀ꦥꦤ꧀ꦤꦺꦱꦸ ꦢꦱꦴꦲꦴꦠꦶꦏ꧀ꦏꦩꦺ ꦄꦴꦥꦗ꧀ꦗꦶꦠꦧ꧀ꦧꦴꦥꦠ꧀ꦠꦶꦁ ꦆꦩꦶꦤꦴ ꦱꦶꦏ꧀ꦑꦴꦥꦢꦺꦤ ꦮꦴꦫꦺꦠꦸꦁ ‘‘ꦄꦏꦴꦭꦕꦷꦮꦫꦁ ꦈꦥ꧀ꦥꦗ꧀ꦗꦺꦪ꧀ꦪꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦺꦤ ‘‘ꦏꦴꦭꦺꦥꦶ ꦄꦴꦢꦶꦱ꧀ꦱ ꦢꦶꦤ꧀ꦤꦁ, ꦌꦠꦁ ꦄꦏꦴꦭꦕꦷꦮꦫꦁ ꦤꦴꦩꦴ’’ꦠꦶ ꦮꦕꦤꦠꦺꦴ ꦏꦡꦶꦤꦸꦧ꧀ꦨꦴꦫꦠꦺꦴ ꦈꦢ꧀ꦣꦁ ꦢꦱꦴꦲꦥꦫꦶꦲꦴꦫꦁ ꦤ ꦭꦨꦠꦷꦠꦶ ꦢꦷꦥꦶꦠꦁ ꦲꦺꦴꦠꦶ, ꦠꦺꦲꦶ ꦱꦢ꧀ꦣꦶꦁ ꦥꦸꦤ ꦏꦡꦶꦤꦸꦧ꧀ꦨꦴꦫꦠꦺꦴ ꦈꦢ꧀ꦣꦁ ꦥꦚ꧀ꦕ ꦢꦶꦮꦱꦴꦤꦶ ꦭꦨꦠꦷꦠꦶ ꦥꦱꦔ꧀ꦒꦺꦴꦥꦶ ‘‘ꦤꦶꦛ꧀ꦜꦶꦠꦕꦷꦮꦫꦱ꧀ꦩꦶꦁ ꦨꦶꦏ꧀ꦑꦸꦤꦴ ꦈꦧ꧀ꦨꦠꦱ꧀ꦩꦶꦁ ꦏꦡꦶꦤꦺ ꦨꦶꦏ꧀ꦑꦸꦤꦺꦴ ꦥꦤꦺꦮ ꦄꦏꦴꦭꦕꦷꦮꦫꦁ ꦈꦥ꧀ꦥꦗ꧀ꦗꦺꦪ꧀ꦪ…ꦥꦺ… ꦑꦶꦥ꧀ꦥꦩꦺꦮ ꦏꦴꦫꦺꦠꦧ꧀ꦧ’’ꦤ꧀ꦠꦶ ꦄꦏꦴꦭꦕꦷꦮꦫꦱ꧀ꦱ ꦈꦥ꧀ꦥꦠ꧀ꦠꦶꦏꦴꦭꦁ ꦤꦶꦪꦩꦺꦠ꧀ꦮꦴ ꦮꦸꦠ꧀ꦠꦠ꧀ꦠꦴ ꦤꦶꦮꦴꦫꦶꦠꦺꦴ ꦲꦺꦴꦠꦶ, ꦠꦢꦸꦨꦪꦺꦤ ꦏꦡꦶꦤꦧ꧀ꦨꦤ꧀ꦠꦫꦺ ꦈꦥ꧀ꦥꦤ꧀ꦤꦕꦷꦮꦫꦁ ꦏꦡꦶꦤꦸꦧ꧀ꦨꦴꦫꦠꦺꦴ ꦈꦢ꧀ꦣꦁ ꦌꦏꦢꦶꦮꦱꦩ꧀ꦥꦶ ꦥꦫꦶꦲꦴꦫꦁ ꦤ ꦭꦨꦠꦷꦠꦶ ꦱꦶꦢ꧀ꦣꦁ ꦲꦺꦴꦠꦶ. ꦌꦮꦁ ꦄꦥꦫꦺ ꦮꦢꦤ꧀ꦠꦷꦠꦶ.

ꦥꦸꦤꦥꦶ ꦮꦸꦠ꧀ꦠꦁ – ꦄꦴꦕꦫꦶꦪꦴ ꦥꦤ ꦌꦮꦁ ꦮꦢꦺꦪ꧀ꦪꦸꦁ ‘‘ꦤꦶꦛ꧀ꦜꦶꦠꦕꦷꦮꦫꦱ꧀ꦩꦶꦁ ꦨꦶꦏ꧀ꦑꦸꦤꦴ ꦈꦧ꧀ꦨꦠꦱ꧀ꦩꦶꦁ ꦏꦡꦶꦤꦺ ꦨꦶꦏ꧀ꦑꦸꦤꦺꦴ ꦥꦤꦺꦮ ꦄꦏꦴꦭꦕꦷꦮꦫꦁ ꦈꦥ꧀ꦥꦗ꧀ꦗꦺꦪ꧀ꦪꦴ’’ꦠꦶ ꦌꦠ꧀ꦡ ‘‘ꦤꦶꦛ꧀ꦜꦶꦠꦕꦷꦮꦫꦱ꧀ꦩꦶꦁ ꦨꦶꦏ꧀ꦑꦸꦤꦴ ꦈꦧ꧀ꦨꦠꦱ꧀ꦩꦶꦁ ꦏꦡꦶꦤꦺ’’ꦠꦶ ꦮꦢꦤ꧀ꦠꦺꦴ ꦌꦮꦁ ꦮꦶꦚ꧀ꦚꦴꦥꦺꦠꦶ ‘‘ꦌꦠ꧀ꦡꦤ꧀ꦠꦫꦺ ꦠꦶꦟ꧀ꦟꦤ꧀ꦤꦩ꧀ꦥꦶ ꦄꦏꦴꦭꦕꦷꦮꦫꦴꦤꦁ ꦈꦥ꧀ꦥꦠ꧀ꦠꦶ ꦄꦨꦴꦮ’’ꦤ꧀ꦠꦶ. ꦏꦱ꧀ꦩꦴ ꦥꦤ ꦥꦢꦨꦴꦗꦤꦺ ꦮꦶꦠ꧀ꦡꦴꦫꦶꦠꦴꦤꦷꦠꦶ? ꦮꦸꦕ꧀ꦕꦠꦺ – ꦆꦢꦁ ꦱꦶꦏ꧀ꦑꦴꦥꦢꦁ ꦄꦣꦶꦛ꧀ꦜꦴꦤꦁ ꦱꦤ꧀ꦣꦴꦪ ꦮꦸꦠ꧀ꦠꦁ, ꦏꦶꦤ꧀ꦠꦸ ꦥꦜꦩꦺ ꦢꦱꦴꦲꦁ ꦄꦤꦸꦗꦴꦤꦶꦠ꧀ꦮꦴ ꦠꦱ꧀ꦩꦶꦁ ꦄꦥ꧀ꦥꦲꦺꦴꦤ꧀ꦠꦺ ꦱꦕꦺ ꦥꦕ꧀ꦕꦴꦱꦴ ꦄꦠ꧀ꦡꦶ, ꦠꦩꦺꦮ ꦮꦝ꧀ꦞꦺꦠ꧀ꦮꦴ ꦩꦴꦱꦁ ꦄꦤꦸꦗꦴꦤꦤ꧀ꦠꦺꦴ ꦆꦩꦩ꧀ꦥꦶ ꦄꦠ꧀ꦡꦮꦶꦱꦺꦱꦁ ꦢꦷꦥꦺꦠꦶ ꦄꦏꦴꦭꦕꦷꦮꦫꦁ ꦤꦴꦩ ꦱꦩ꧀ꦩꦸꦑꦷꦨꦹꦠꦺꦤ ꦨꦴꦗꦺꦠꦧ꧀ꦧꦤ꧀ꦠꦶꦥꦶ ꦢꦷꦥꦺꦠꦶ. ꦠꦁ ꦥꦤ ‘‘ꦄꦴꦏꦔ꧀ꦑꦩꦴꦤꦺꦤ ꦨꦶꦏ꧀ꦑꦸꦤꦴ ꦥꦛꦶꦒ꧀ꦒꦲꦺꦠꦧ꧀ꦧ’’ꦤ꧀ꦠꦶ ꦆꦩꦶꦤꦴ ꦱꦶꦏ꧀ꦑꦴꦥꦢꦺꦤ ꦮꦝ꧀ꦞꦺꦠ꧀ꦮꦴ ꦮꦸꦠ꧀ꦠꦤ꧀ꦠꦶ, ꦠꦱ꧀ꦩꦴ ꦠꦷꦟꦶꦥꦶ ꦥꦢꦨꦴꦗꦤꦺ ꦮꦶꦠ꧀ꦡꦴꦫꦶꦠꦴꦤꦷꦠꦶ.

‘‘ꦑꦶꦥ꧀ꦥꦩꦺꦮ ꦏꦴꦫꦺꦠꦧ꧀ꦧꦤ꧀ꦠꦶ ꦢꦱꦴꦲꦴ ꦏꦴꦫꦺꦠꦧ꧀ꦧ’’ꦤ꧀ꦠꦶ ꦆꦢꦁ ꦥꦤ ꦥꦲꦺꦴꦤꦏꦨꦴꦮꦺ ꦥꦸꦫꦶꦩꦱꦶꦏ꧀ꦑꦴꦥꦢꦭꦏ꧀ꦑꦟꦺꦤꦴꦠꦶ ꦢꦷꦥꦺꦠꦸꦁ ꦮꦸꦠ꧀ꦠꦁ, ꦠꦱ꧀ꦩꦴ ‘‘ꦌꦮꦁ ꦱꦷꦓꦤ꧀ꦠꦶ ꦮꦴ ꦭꦲꦸꦤ꧀ꦠꦶ ꦮꦴ’’ꦠꦶꦄꦴꦢꦶꦤꦴ ꦄꦮꦠ꧀ꦮꦴ ‘‘ꦢꦱꦴꦲꦴ’’ꦠꦶ ꦮꦸꦠ꧀ꦠꦁ. ꦄꦠ꧀ꦡꦠꦏꦡꦶꦤꦱ꧀ꦱ ꦌꦮꦁ ꦲꦺꦴꦠꦸ, ꦄꦤꦠ꧀ꦡꦠꦺ ꦥꦤ ꦏꦡꦶꦤꦺ ꦏꦡꦤ꧀ꦠꦶ ꦮꦸꦠ꧀ꦠꦺ ꦄꦤꦠ꧀ꦡꦠꦱ꧀ꦱ ꦥꦛꦶꦏ꧀ꦑꦺꦥꦠꦁ ꦢꦱ꧀ꦱꦺꦠꦷꦠꦶ ꦮꦸꦠ꧀ꦠꦺꦴ ꦄꦥꦱ꧀ꦱꦤ꧀ꦠꦺꦴ ꦮꦶꦓꦴꦠꦁ ꦄꦴꦥꦗ꧀ꦗꦠꦷꦠꦶ. ꦌꦏꦠꦶꦁꦱꦺ ꦄꦫꦸꦟꦸꦒ꧀ꦒꦩꦤꦺ ꦤꦶꦱ꧀ꦱꦒ꧀ꦒꦶꦪꦤ꧀ꦠꦶ ꦩꦲꦤ꧀ꦠꦺꦤꦥꦶ ꦥꦕ꧀ꦕꦴꦱꦴꦕꦷꦮꦫꦺꦤ ꦱꦲ ꦓꦛꦶꦠꦩ꧀ꦥꦶ ꦠꦧ꧀ꦨꦴꦮꦁ ꦄꦤꦸꦥꦠꦶꦠ꧀ꦮꦴ ꦤꦶꦱ꧀ꦱꦒ꧀ꦒꦶꦪꦁ ꦲꦺꦴꦠꦶ ꦱꦠꦶ ꦥꦕ꧀ꦖꦶꦩꦥ꧀ꦥꦩꦴꦟꦱꦩ꧀ꦨꦮꦺ, ꦄꦱꦠꦶ ꦤ ꦲꦺꦴꦠꦶ, ꦥꦸꦤ ꦓꦛꦶꦠꦺ ꦲꦺꦴꦠꦶ, ꦄꦚ꧀ꦚꦺꦤ ꦓꦛꦶꦠꦺ ꦤ ꦲꦺꦴꦠꦶ. ꦖꦶꦤ꧀ꦤꦁ ꦄꦚ꧀ꦚꦮꦠ꧀ꦡꦸ ꦲꦺꦴꦠꦶ. ꦥꦸꦧ꧀ꦧꦥꦫꦶꦕ꧀ꦖꦺꦢꦁ ꦄꦠꦶꦏ꧀ꦏꦤ꧀ꦠꦁ ꦓꦛꦶꦠꦁ ꦥꦸꦤ ꦄꦚ꧀ꦚꦥꦫꦶꦕ꧀ꦖꦺꦢꦁ ꦭꦨꦠꦷꦠꦶ ꦌꦏꦺ, ꦈꦥꦥꦫꦶꦏ꧀ꦑꦶꦠ꧀ꦮꦴ ꦒꦲꦺꦠꦧ꧀ꦧꦁ. ꦄꦚ꧀ꦚꦠꦫꦱ꧀ꦩꦶꦁ ꦒꦟ꧀ꦜꦶꦥꦢꦺ ꦥꦤ ‘‘ꦱꦔ꧀ꦓꦱ꧀ꦱ ꦮꦴ ꦆꦢꦁ ꦄꦏꦴꦭꦕꦷꦮꦫꦤ꧀ꦠꦶ ꦈꦢ꧀ꦢꦶꦱ꧀ꦱ ꦢꦶꦤ꧀ꦤ’ꦤ꧀ꦠꦶ ꦌꦠ꧀ꦡ ꦱꦔ꧀ꦓꦱ꧀ꦱ ꦢꦶꦤ꧀ꦤꦺ ꦄꦴꦥꦠ꧀ꦠꦶ ꦤꦴꦩ ꦤꦠ꧀ꦡꦶ, ‘ꦱꦺꦴꦠꦱ꧀ꦱ ꦫꦲꦺꦴ’ꦠꦶꦄꦴꦢꦷꦱꦸ ꦮꦶꦪ ꦥꦢꦸꦢ꧀ꦣꦴꦫꦺꦤ ꦮꦸꦠ꧀ꦠꦁ, ꦠꦱ꧀ꦱ ꦭꦴꦨꦁ ꦱꦤ꧀ꦣꦴꦪꦴꦠꦶ ꦕꦺ? ꦱꦔ꧀ꦓꦠꦺꦴ ꦮꦴ ꦈꦥ꧀ꦥꦗ꧀ꦗꦺꦪ꧀ꦪꦴꦠꦶ ꦄꦤꦺꦤ ꦱꦶꦢ꧀ꦣꦠ꧀ꦠꦴ ꦄꦣꦶꦏꦩꦺꦮꦴ’’ꦠꦶ ꦕ ‘‘ꦱꦔ꧀ꦓꦺꦴ ꦕꦷꦮꦫꦴꦤꦶ ꦭꦨꦶꦱ꧀ꦱꦠꦶ ꦒꦟꦺꦴ ꦮꦴ’ꦠꦶꦄꦴꦢꦶꦤꦴꦥꦶ ꦥꦴꦜꦺꦴ ꦄꦠ꧀ꦡꦷ’’ꦠꦶ ꦕ ꦮꦸꦠ꧀ꦠꦁ. ꦒꦟ꧀ꦜꦶꦥꦢꦺ ꦏꦺꦴꦱꦭ꧀ꦭꦠ꧀ꦡꦁ ꦥꦤ ꦩꦪꦴ ꦱꦧ꧀ꦧꦁ ꦭꦶꦑꦶꦠꦁ, ꦱꦸꦛ꧀ꦜꦸ ꦮꦶꦕꦴꦫꦺꦠ꧀ꦮꦴ ꦏꦡꦺꦠꦧ꧀ꦧꦁ.

ꦠꦠꦶꦪꦏꦡꦶꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.