꧙. ꦢꦸꦠꦶꦪꦢꦸꦛ꧀ꦜꦢꦺꦴꦱꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧓꧙꧑. ꦮꦺꦭ꦳ꦸꦮꦤꦺꦪꦺꦮꦴꦠꦶ ꦆꦢꦁ ꦠꦺꦲꦶ ꦮꦸꦠ꧀ꦠꦮꦺꦭꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ‘‘ꦥꦸꦧ꧀ꦧꦺ ꦩꦪꦁ ꦄꦴꦮꦸꦱꦺꦴ ꦱꦸꦠꦺꦤ ꦄꦮꦺꦴꦕꦸꦩ꧀ꦲꦴ’’ꦠꦶ ‘‘ꦄꦩ꧀ꦲꦺꦲꦶ ꦱꦴ ꦈꦱ꧀ꦱꦴꦲꦶꦠꦴ ꦏꦸꦥꦶꦠꦺꦲꦶ ꦄꦤꦠ꧀ꦠꦩꦤꦺꦲꦷ’’ꦠꦶꦄꦴꦢꦶꦮꦕꦤꦁ ꦱꦤ꧀ꦣꦴꦪ ꦮꦸꦠ꧀ꦠꦁ, ꦄꦚ꧀ꦚꦨꦴꦒꦱ꧀ꦱ ꦆꦢꦤ꧀ꦠꦶ ꦩꦤꦸꦱ꧀ꦱꦨꦶꦏ꧀ꦑꦸꦨꦴꦮꦠꦺꦴ ꦄꦚ꧀ꦚꦨꦴꦒꦱ꧀ꦱ ꦠꦶꦫꦕ꧀ꦖꦴꦤꦖꦒꦭꦏꦨꦴꦒꦱ꧀ꦱ ꦆꦢꦁ ꦖꦒꦭꦏꦗꦴꦠꦁ ꦄꦣꦶꦏꦫꦟꦁ. ꦄꦚ꧀ꦚꦨꦴꦒꦺꦴ ꦮꦴ ꦄꦱ꧀ꦱ ꦄꦠ꧀ꦡꦷꦠꦶ ꦱꦺꦴ ꦠꦶꦫꦕ꧀ꦖꦴꦤꦖꦒꦭꦏꦨꦴꦮꦱꦔ꧀ꦑꦴꦠꦺꦴ ꦄꦚ꧀ꦚꦨꦴꦒꦺꦴ ꦄꦱ꧀ꦱ ꦖꦒꦭꦏꦱ꧀ꦱ ꦄꦠ꧀ꦡꦷꦠꦶ ꦱ꧀ꦮꦴꦪꦁ ꦖꦒꦭꦏꦺꦴ ꦄꦚ꧀ꦚꦨꦴꦒꦶꦪꦁ ꦄꦣꦶꦏꦫꦟꦁ ꦤꦴꦩ.

ꦠꦠ꧀ꦡ ꦥꦛꦶꦩꦴꦪ ꦱꦫꦷꦫꦁ, ꦱꦶꦭꦴꦥꦸꦠ꧀ꦠꦏꦱ꧀ꦱ ꦱꦫꦷꦫꦤ꧀ꦠꦶ ꦤꦶꦢꦱ꧀ꦱꦤꦁ, ꦥꦜꦩꦁ ꦥꦤꦺꦠ꧀ꦡ ꦤꦶꦧ꧀ꦧꦕꦤꦁ ꦗꦴꦠꦶꦥꦢꦠ꧀ꦡꦺꦴꦠꦶꦮꦴꦢꦷꦤꦁ ꦩꦠꦺꦤ ꦮꦸꦠ꧀ꦠꦁ. ꦱꦴ ꦲꦶ ꦱꦴꦩꦶꦨꦴꦮꦺꦤ, ꦤꦶꦕ꧀ꦕꦨꦴꦮꦺꦤ ꦕ ꦥꦣꦴꦤꦠ꧀ꦠꦴ ꦱꦠ꧀ꦠꦶꦱꦨꦴꦮꦺ ꦜꦶꦠꦴ. ꦠꦧ꧀ꦧꦶꦥꦫꦷꦠꦏꦠ꧀ꦠꦴ ꦧ꧀ꦪꦠ꧀ꦠꦴꦏꦠꦶ ꦗꦴꦠꦶꦪꦺꦴ ꦠꦸ ꦥꦢꦠ꧀ꦡꦺꦴ ꦆꦠꦶ ꦆꦩꦱ꧀ꦱ ꦱꦸꦠ꧀ꦠꦱ꧀ꦱ ꦮꦱꦺꦤ ꦢꦸꦠꦶꦪꦁ ꦤꦶꦧ꧀ꦧꦕꦤꦁ ꦮꦸꦠ꧀ꦠꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦤꦴꦩꦏꦫꦟꦱꦚ꧀ꦚꦴꦪ ꦄꦴꦣꦴꦫꦺꦴꦠꦶ ꦌꦠ꧀ꦡ ꦤꦴꦩꦩꦺꦮ ꦤꦴꦩꦏꦫꦟꦁ. ꦤꦴꦩꦁ ꦏꦫꦺꦴꦤ꧀ꦠꦴꦤꦁ ꦱꦚ꧀ꦚꦴ ꦤꦴꦩꦏꦫꦟꦱꦚ꧀ꦚꦴ, ꦠꦱ꧀ꦱꦴ. ꦩꦤꦸꦱ꧀ꦱꦗꦴꦠꦶꦏꦺꦴ ꦖꦒꦭꦏꦗꦴꦠꦶꦄꦴꦣꦴꦫꦺꦴ ꦤꦴꦩ. ꦤ ꦲꦶ ꦠꦁ ꦤꦴꦩꦁ ꦏꦕ꧀ꦖꦥꦭꦺꦴꦩꦁ ꦮꦶꦪ ꦄꦤꦴꦣꦴꦫꦤ꧀ꦠꦶ ꦄꦣꦶꦥ꧀ꦥꦴꦪꦺꦴ. ꦠꦁ ꦥꦤ ꦖꦒꦭꦏꦱ꧀ꦱ ꦢꦧ꧀ꦧꦺꦴꦠꦶ ꦢꦶꦤ꧀ꦤꦤꦴꦩꦁ ‘‘ꦢꦺꦱꦺꦴ’’ꦠꦶ ꦮꦸꦕ꧀ꦕꦠꦶ. ꦠꦱ꧀ꦩꦴ ꦡꦺꦫꦁ ꦄꦩꦹꦭꦏꦺꦤꦴꦠꦶꦄꦴꦢꦶꦤꦴ ꦄꦚ꧀ꦚꦩ꧀ꦥꦶ ꦮꦠ꧀ꦡꦸꦁ ꦡꦺꦫꦱ꧀ꦱ ꦭꦶꦱ꧀ꦱꦠꦶ ꦱꦶꦭꦶꦱ꧀ꦱꦠꦶ ꦮꦺꦴꦲꦴꦫꦩꦠ꧀ꦠꦺꦤꦺꦮ, ꦤ ꦄꦠ꧀ꦡꦠꦺꦴ, ꦇꦱꦏꦁ ꦄꦭ꧀ꦭꦷꦪꦠꦷꦠꦶ ꦭꦺꦱꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦪꦱ꧀ꦩꦴ ꦢꦺꦱꦭꦺꦱꦴ ꦄꦠ꧀ꦡꦠꦺꦴ ꦤꦶꦤ꧀ꦤꦴꦤꦴꦏꦫꦟꦴ, ꦠꦱ꧀ꦩꦴ ‘‘ꦏꦚ꧀ꦕꦶꦢꦺꦱꦁ ꦭꦺꦱꦩꦠ꧀ꦠꦁ ꦈꦥꦴꦢꦴꦪꦴ’’ꦠꦶ ꦈꦢ꧀ꦣꦫꦶꦠ꧀ꦮꦴ ‘‘ꦢꦱ ꦭꦺꦱꦴ ꦗꦴꦠꦶꦭꦺꦱꦺꦴ’’ꦠꦶꦄꦴꦢꦶ ꦮꦸꦠ꧀ꦠꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦪꦡꦴ ꦤꦶꦢꦴꦤꦺ, ꦌꦮꦁ ꦱꦶꦏ꧀ꦑꦴꦥꦢꦥꦚ꧀ꦚꦠ꧀ꦠꦶꦪꦩ꧀ꦥꦶ ꦩꦴꦠꦶꦏꦴꦪꦩ꧀ꦥꦶ ꦄꦪꦩꦺꦮꦠ꧀ꦡꦺꦴ. ꦪꦱ꧀ꦩꦴ ꦄꦚ꧀ꦚꦨꦴꦒꦶꦪꦱ꧀ꦱ ꦄꦣꦶꦏꦫꦟꦱ꧀ꦱꦴꦠꦶ ꦖꦒꦭꦏꦱ꧀ꦱ. ꦏꦚ꧀ꦕꦶꦢꦺꦱꦁ ꦭꦺꦱꦩꦠ꧀ꦠꦁ ꦈꦥꦴꦢꦴꦪꦴꦠꦶ ꦢꦧ꧀ꦧꦺꦴꦠꦶ ꦤꦴꦩꦁ ꦈꦥꦴꦢꦴꦪꦴꦠꦶ ꦄꦪꦩꦠ꧀ꦡꦺꦴ ꦄꦛ꧀ꦜꦸꦥ꧀ꦥꦠ꧀ꦠꦶꦮꦱꦺꦤꦺꦮ ꦄꦴꦮꦶꦨꦹꦠꦺꦴ, ꦠꦱ꧀ꦩꦴ ꦤ ꦮꦶꦨꦠ꧀ꦠꦺꦴ. ꦏꦶꦚ꧀ꦕ ꦨꦶꦪ꧀ꦪꦺꦴ ꦄꦤꦶꦪꦩꦠ꧀ꦠꦴ. ꦤ ꦲꦶ ꦩꦺꦠ꧀ꦠꦶꦪꦨꦹꦩꦗꦏꦴꦤꦁ ꦮꦶꦪ ꦱꦧ꧀ꦧꦺꦱꦩ꧀ꦥꦶ ꦖꦒꦭꦏꦩꦺꦮ ꦄꦚ꧀ꦚꦨꦴꦒꦶꦪꦁ ꦄꦣꦶꦏꦫꦟꦁ ꦲꦺꦴꦠꦶ. ꦄꦚ꧀ꦚꦁ ꦒꦺꦴꦩꦲꦶꦁ ꦱꦴꦢꦶꦏꦩ꧀ꦥꦶ ꦲꦺꦴꦠꦶ, ꦤ ꦕ ꦩꦺꦠ꧀ꦠꦶꦪꦨꦹꦩꦗꦏꦴ ꦮꦶꦪ ꦱꦧ꧀ꦧꦺꦥꦶ ꦤꦴꦩꦭꦺꦱꦩꦠ꧀ꦠꦩꦺꦮ ꦈꦥꦴꦢꦶꦪꦤ꧀ꦠꦶ. ꦄꦚ꧀ꦚꦩ꧀ꦥꦶ ꦗꦴꦠꦶꦭꦺꦱꦴꦢꦶꦁ ꦈꦥꦴꦢꦶꦪꦤ꧀ꦠꦶ, ꦠꦱ꧀ꦩꦴ ꦄꦤꦶꦪꦩꦠ꧀ꦠꦴ ꦕ ꦪꦡꦴꦮꦸꦠ꧀ꦠꦤꦪꦺꦤ ꦤ ꦮꦶꦨꦠ꧀ꦠꦁ. ꦏꦶꦚ꧀ꦕ ꦨꦶꦪ꧀ꦪꦺꦴ ꦠꦡꦴ ꦮꦸꦠ꧀ꦠꦺ ꦖꦒꦭꦏꦱ꧀ꦱꦺꦮ ꦄꦚ꧀ꦚꦨꦴꦒꦶꦪꦠꦴ ꦱꦩ꧀ꦨꦮꦠꦶ, ꦤ ꦄꦚ꧀ꦚꦱ꧀ꦱ, ꦪꦺꦤ ꦱꦺꦴꦮ ꦢꦱ꧀ꦱꦶꦠꦺꦴ. ꦭꦺꦱꦺꦴ ꦕ ꦤꦴꦩ ꦭꦺꦱꦺꦴꦮ, ꦤ ꦗꦴꦠꦶꦄꦴꦢꦶ, ꦪꦺꦤ ꦱꦺꦴꦮ ꦢꦱ꧀ꦱꦶꦠꦺꦴꦠꦶ ꦌꦮꦁ ꦩꦶꦕ꧀ꦖꦴꦒꦴꦲꦥ꧀ꦥꦱꦔ꧀ꦒꦠꦺꦴ ꦕ ꦠꦡꦴ ꦤ ꦮꦶꦨꦠ꧀ꦠꦺꦴ.

꧓꧙꧓. ꦄꦚ꧀ꦚꦨꦴꦒꦶꦪꦱ꧀ꦱꦴꦠꦶ ꦕꦸꦢꦶꦠꦏꦠꦺꦴ ꦄꦚ꧀ꦚꦱ꧀ꦱ. ꦄꦣꦶꦏꦫꦟꦱ꧀ꦱꦴꦠꦶ ꦩꦤꦸꦱ꧀ꦱꦱ꧀ꦱ ꦮꦴ ꦄꦩꦤꦸꦱ꧀ꦱꦱ꧀ꦱ ꦮꦴ ꦠꦶꦫꦕ꧀ꦖꦴꦤꦒꦠꦱ꧀ꦱ ꦮꦴꦠꦶ ꦌꦮꦁ ꦮꦠ꧀ꦠꦧ꧀ꦧꦁ. ꦌꦮꦚ꧀ꦲꦶ ꦮꦸꦠ꧀ꦠꦺ ꦩꦤꦸꦱ꧀ꦱꦴꦢꦷꦤꦁꦪꦺꦮ ꦗꦴꦠꦶꦭꦺꦱꦴꦢꦪꦺꦴ ꦮꦸꦠ꧀ꦠꦴ ꦲꦺꦴꦤ꧀ꦠꦶ, ꦄꦚ꧀ꦚꦡꦴ ꦕꦠꦸꦤ꧀ꦤꦁ ꦄꦣꦶꦏꦫꦟꦴꦤꦁ ꦠꦺ ꦄꦴꦥꦗ꧀ꦗꦤ꧀ꦠꦶ ‘‘ꦄꦣꦶꦏꦫꦟꦱ꧀ꦱ ꦏꦚ꧀ꦕꦶ ꦢꦺꦱꦁ ꦭꦺꦱꦩꦠ꧀ꦠ’’ꦤ꧀ꦠꦶ ꦱꦴꦩꦶꦮꦕꦤꦁ ꦥꦸꦧ꧀ꦧꦔ꧀ꦒꦩꦁ ꦈꦢ꧀ꦢꦶꦛ꧀ꦜꦠ꧀ꦠꦴꦠꦶ ꦕꦺ? ꦤ, ꦤꦴꦩꦱ꧀ꦱ ꦮꦶꦪ ꦗꦴꦠꦶꦄꦴꦢꦷꦤꦁ ꦩꦤꦸꦱ꧀ꦱꦴꦢꦷꦤꦁ ꦄꦴꦣꦴꦫꦨꦴꦮꦤꦶꦪꦩꦱꦩ꧀ꦨꦮꦠꦺꦴ, ꦄꦣꦶꦏꦫꦟꦨꦴꦮꦴꦤꦶꦪꦩꦠꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦤꦶꦪꦩꦺ ꦕ ꦱꦠꦶ ꦗꦴꦠꦶꦪꦴ ꦄꦴꦣꦴꦫꦺꦴ ꦗꦴꦠꦶ, ꦭꦶꦔ꧀ꦒꦱ꧀ꦱ ꦕ ꦭꦶꦔ꧀ꦒꦁ, ꦄꦴꦥꦠ꧀ꦠꦶꦪꦴ ꦕ ꦄꦴꦥꦤ꧀ꦤꦺꦴ ꦄꦴꦣꦴꦫꦺꦴ, ꦮꦶꦫꦸꦢ꧀ꦣꦴꦤꦩ꧀ꦥꦶ ꦄꦱꦩꦴꦢꦶꦤ꧀ꦤꦴꦤꦩ꧀ꦥꦶ ꦥꦠ꧀ꦠꦕꦷꦮꦫꦴꦤꦁ ꦱꦴꦩꦶꦏꦺꦴ ꦄꦴꦣꦴꦫꦺꦴ, ꦪꦺꦤ ꦄꦣꦶꦏꦫꦟꦱꦔ꧀ꦑ꧀ꦪꦁ ꦒꦕ꧀ꦖꦺꦪ꧀ꦪꦴꦠꦶ ꦄꦴꦥꦗ꧀ꦗꦠꦷꦠꦶ ꦄꦣꦶꦏꦫꦟꦱ꧀ꦱꦴꦠꦶ ꦥꦢꦁ ꦄꦨꦴꦗꦺꦠꦧ꧀ꦧꦩꦺꦮ ꦨꦮꦺꦪ꧀ꦪꦴꦠꦶ ꦤ ꦈꦢ꧀ꦣꦫꦶꦠꦧ꧀ꦧꦁ ꦱꦶꦪꦴ, ꦈꦢ꧀ꦣꦫꦶꦠꦧ꧀ꦧꦁ. ꦠꦱ꧀ꦩꦴ ‘‘ꦄꦣꦶꦏꦫꦟꦤ꧀ꦠꦶ ꦮꦕꦤꦱꦴꦩꦚ꧀ꦚꦠꦺꦴ’’ꦠꦶꦄꦴꦢꦶ ꦱꦧ꧀ꦧꦁ ꦮꦠ꧀ꦠꦧ꧀ꦧꦁ. ꦄꦥꦴꦏꦛꦴ ꦆꦠꦺꦴ ꦄꦚ꧀ꦚꦠ꧀ꦫ ꦢꦱ꧀ꦱꦶꦠꦛ꧀ꦜꦴꦤꦴꦨꦴꦮꦠꦺꦴ. ꦗꦴꦤꦶꦠꦧ꧀ꦧꦴ ꦕ ꦮꦶꦤꦪꦣꦫꦺꦲꦶ ꦪꦱ꧀ꦩꦴ ꦄꦚ꧀ꦚꦡꦴ ꦥꦫꦶꦮꦴꦫꦺ ‘‘ꦮꦶꦮꦴꦢꦴꦣꦶꦏꦫꦟꦁ ꦕꦠꦸꦤ꧀ꦤꦁ ꦄꦣꦶꦏꦫꦟꦴꦤꦁ ꦮꦶꦮꦴꦢꦴꦣꦶꦏꦫꦟꦁ ꦨꦗꦠꦷ’’ꦠꦶꦄꦴꦢꦶꦤꦴ ꦤꦪꦺꦤ ꦄꦤꦴꦒꦠꦛ꧀ꦜꦴꦤꦺ ‘‘ꦏꦱ꧀ꦩꦴ’’ꦠꦶ ꦮꦸꦠ꧀ꦠꦺ ꦏꦴꦫꦟꦁ ꦤ ꦥꦚ꧀ꦚꦴꦪꦺꦪ꧀ꦪ, ꦠꦱ꧀ꦩꦴ ꦠꦺꦱꦁ ꦠꦧ꧀ꦨꦴꦒꦶꦪꦠꦴ ꦕ ꦄꦚ꧀ꦚꦨꦴꦒꦶꦪꦠꦴ ꦕ ꦗꦴꦤꦶꦠꦧ꧀ꦧꦴ ꦮꦶꦤꦪꦣꦫꦺꦲꦶ. ꦠꦴꦱꦸ ꦲꦶ ꦮꦶꦚ꧀ꦚꦴꦠꦴꦱꦸ ꦮꦶꦮꦴꦢꦴꦣꦶꦏꦫꦟꦁ ꦮꦶꦮꦴꦢꦴꦣꦶꦏꦫꦟꦁ ꦨꦗꦠꦶ. ꦏꦱ꧀ꦩꦴ? ꦠꦧ꧀ꦨꦴꦒꦶꦪꦠ꧀ꦠꦴ. ꦆꦠꦫꦁ ꦤ ꦨꦗꦠꦶ ꦄꦚ꧀ꦚꦨꦴꦒꦶꦪꦠ꧀ꦠꦴꦠꦶ ꦱꦸꦑꦏꦴꦫꦟꦠꦺꦴ ꦥꦚ꧀ꦚꦴꦪꦤ꧀ꦠꦶ, ꦠꦱ꧀ꦩꦴ ꦮꦕꦤꦱꦴꦩꦚ꧀ꦚꦠꦺꦴ ꦭꦢ꧀ꦣꦁ ꦄꦣꦶꦏꦫꦟꦁ ꦤꦶꦱ꧀ꦱꦴꦪꦴꦠꦶꦄꦴꦢꦶ. ꦠꦠ꧀ꦡ ꦪꦱ꧀ꦩꦴ ꦄꦴꦥꦠ꧀ꦠꦚ꧀ꦚꦨꦴꦒꦶꦪꦁ ꦩꦲꦴꦮꦶꦱꦪꦁ, ꦆꦠꦫꦺꦲꦶ ꦄꦱꦢꦶꦱꦤꦶꦢ꧀ꦢꦺꦱꦚ꧀ꦕ, ꦠꦱ꧀ꦩꦴ ꦠꦁ ꦄꦣꦶꦏꦫꦟꦥꦫꦶꦪꦴꦥꦤ꧀ꦤꦩ꧀ꦥꦶ ꦱꦩꦴꦤꦁ ꦮꦶꦱꦸꦁ ꦮꦸꦠ꧀ꦠꦁ ‘‘ꦄꦴꦥꦠ꧀ꦠꦚ꧀ꦚꦨꦴꦒꦶꦪꦁ ꦮꦴ ꦲꦺꦴꦠꦷ’’ꦠꦶ. ꦄꦣꦶꦏꦫꦟꦥꦫꦶꦪꦴꦥꦤ꧀ꦤꦠ꧀ꦠꦴ ꦕ ‘‘ꦄꦣꦶꦏꦫꦟꦚ꧀ꦚꦨꦴꦒꦶꦪꦁ ꦮꦴ’’ꦠꦶ ꦌꦠ꧀ꦡ ꦮꦸꦠ꧀ꦠꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦠꦠ꧀ꦡꦴꦥꦶ ꦩꦲꦴꦮꦶꦱꦪꦠ꧀ꦠꦴ, ꦩꦴꦠꦶꦏꦴꦪꦁ ꦄꦴꦒꦠꦠ꧀ꦠꦴ ꦕ ꦥꦜꦩꦁ ꦄꦚ꧀ꦚꦨꦴꦒꦶꦪꦠꦴ ꦮꦸꦠ꧀ꦠꦴ, ꦥꦕ꧀ꦖꦴ ꦠꦧ꧀ꦨꦴꦒꦶꦪꦠꦴꦠꦶ ꦮꦺꦢꦶꦠꦧ꧀ꦧꦴ. ꦠꦠ꧀ꦡ ꦪꦱ꧀ꦩꦴ ꦄꦣꦶꦏꦫꦟꦚ꧀ꦚꦨꦴꦒꦶꦪꦮꦕꦤꦺꦤ ꦄꦠ꧀ꦡꦴꦥꦠ꧀ꦠꦶꦤꦪꦺꦤ ꦱꦶꦢ꧀ꦣꦁ. ꦄꦣꦶꦏꦫꦟꦁ ꦠꦧ꧀ꦨꦴꦒꦶꦪꦁ, ꦠꦱ꧀ꦩꦴ ‘‘ꦄꦣꦶꦏꦫꦟꦁ ꦠꦧ꧀ꦨꦴꦒꦶꦪꦁ ꦲꦺꦴꦠꦷ’’ꦠꦶ ꦌꦮꦁ ꦈꦢ꧀ꦢꦺꦱꦁ ꦄꦏꦠ꧀ꦮꦴ ‘‘ꦏꦡꦁ ꦄꦣꦶꦏꦫꦟꦁ ꦄꦣꦶꦏꦫꦟꦱ꧀ꦱ ꦠꦧ꧀ꦨꦴꦒꦶꦪꦁ ꦲꦺꦴꦠꦷ’’ꦠꦶ ꦥꦸꦕ꧀ꦖꦴꦥꦸꦧ꧀ꦧꦔ꧀ꦒꦩꦤꦶꦢ꧀ꦢꦺꦱꦺꦴ ꦏꦠꦺꦴ. ꦠꦠ꧀ꦡꦴꦥꦶ ꦄꦴꦥꦠ꧀ꦠꦴꦣꦶꦏꦫꦟꦱ꧀ꦱ ꦄꦚ꧀ꦚꦨꦴꦒꦶꦪꦠꦴ ꦏꦶꦚ꧀ꦕꦴꦥꦶ ꦥꦴꦫꦴꦗꦶꦏꦺꦤ ꦄꦤꦸꦢ꧀ꦣꦁꦱꦶꦨꦴꦣꦶꦏꦴꦫꦠ꧀ꦠꦴ ꦥꦴꦫꦴꦗꦶꦏꦴꦤꦁꦪꦺꦮ ꦮꦱꦺꦤ ꦮꦸꦠ꧀ꦠꦴ, ꦄꦡ ꦑꦺꦴ ꦱꦺꦱꦴꦥꦠ꧀ꦠꦶꦏ꧀ꦑꦤ꧀ꦣꦮꦱꦺꦤꦴꦥꦶ ꦮꦺꦢꦶꦠꦧ꧀ꦧꦴ. ꦪꦴ ꦕ ꦱꦴ ꦕꦺꦴꦢꦤꦴ ‘‘ꦄꦱꦸꦏꦺꦴ ꦤꦴꦩ ꦨꦶꦏ꧀ꦑꦸ ꦱꦔ꧀ꦓꦴꦢꦶꦱꦺꦱꦁ ꦄꦗ꧀ꦙꦴꦥꦗ꧀ꦗꦤ꧀ꦠꦺꦴ ꦢꦶꦛ꧀ꦜꦺꦴ ꦲꦺꦴꦠꦷ’’ꦠꦶꦄꦴꦢꦶꦏꦴ, ꦠꦠ꧀ꦡ ‘‘ꦱꦔ꧀ꦓꦴꦢꦶꦱꦺꦱꦺ ꦡꦸꦭ꧀ꦭꦕ꧀ꦕꦪꦢꦶꦛ꧀ꦜꦶ ꦲꦺꦴꦠꦶ, ꦢꦸꦧ꧀ꦨꦴꦱꦶꦠꦺ ꦱꦔ꧀ꦓꦴꦢꦶꦱꦺꦱꦢꦶꦛ꧀ꦜꦶ ꦲꦺꦴꦠꦷ’’ꦠꦶ ꦌꦮꦩꦴꦢꦶꦏꦴ ꦮꦶꦤꦪꦺ ꦄꦥꦏꦠꦚ꧀ꦚꦸꦠꦴꦪ, ꦠꦁꦠꦁꦮꦠ꧀ꦡꦸꦱꦫꦶꦏ꧀ꦑꦠꦴꦪ ꦮꦴ ꦮꦸꦠ꧀ꦠꦴꦠꦶ ꦮꦺꦢꦶꦠꦧ꧀ꦧꦴ. ꦱꦧ꧀ꦧꦠ꧀ꦡꦴꦥꦶ ‘‘ꦥꦴꦫꦴꦗꦶꦏꦢꦶꦛ꧀ꦜꦶ ꦲꦺꦴꦠꦷ’’ꦠꦶ ꦤ ꦮꦸꦠ꧀ꦠꦁ. ꦠꦡꦴꦱꦚ꧀ꦚꦶꦤꦺꦴ ꦄꦤꦴꦥꦠ꧀ꦠꦶꦠꦺꦴ. ‘‘ꦠꦧ꧀ꦨꦴꦒꦶꦪꦮꦶꦕꦴꦫꦟꦴꦪ’’ꦤ꧀ꦠꦶ ꦠꦧ꧀ꦨꦴꦒꦶꦪꦥꦢꦤꦶꦢ꧀ꦢꦺꦱꦺ ꦄꦚ꧀ꦚꦨꦴꦒꦶꦪꦠꦴꦪꦥꦶ ꦤꦶꦢ꧀ꦢꦶꦛ꧀ꦜꦠ꧀ꦠꦴ ꦮꦸꦠ꧀ꦠꦁ.

ꦮꦠ꧀ꦡꦸꦱꦨꦴꦒꦠꦴꦪꦴꦠꦶ ꦄꦤꦸꦮꦴꦢꦮꦠ꧀ꦡꦸꦱꦨꦴꦒꦠꦴꦪꦴꦠꦶ ꦄꦠ꧀ꦡꦺꦴ. ꦄꦚ꧀ꦚꦡꦴ ‘‘ꦕꦠꦱ꧀ꦱꦺꦴ ꦮꦶꦥꦠ꧀ꦠꦶꦪꦺꦴ’’ꦠꦶ ꦮꦕꦤꦁ ꦮꦶꦫꦸꦗ꧀ꦙꦺꦪ꧀ꦪ. ꦱꦨꦴꦮꦱꦫꦶꦏ꧀ꦑꦴꦱꦫꦶꦏ꧀ꦑꦠꦺꦴ ꦕꦴꦠꦶ ꦱꦨꦴꦮꦺꦤ ꦱꦢꦶꦱꦴꦱꦢꦶꦱꦠꦺꦴ. ꦠꦠ꧀ꦡ ꦙꦴꦤꦴꦢꦶꦮꦠ꧀ꦡꦸꦮꦶꦱꦨꦴꦒꦠꦴꦪꦥꦶ ꦱꦨꦴꦮꦱꦫꦶꦏ꧀ꦑꦠꦴꦪ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦥꦴꦫꦴꦗꦶꦏꦴꦥꦠ꧀ꦠꦶ ꦠꦱ꧀ꦱꦺꦮ ꦠꦧ꧀ꦨꦴꦒꦶꦪꦴꦮ ꦲꦺꦴꦠꦶ. ꦠꦡꦴ ꦮꦠ꧀ꦡꦸꦮꦱꦺꦤ ꦄꦤꦸꦮꦴꦢꦴꦣꦶꦏꦫꦟꦁ, ꦏꦶꦕ꧀ꦕꦴꦣꦶꦏꦫꦟꦚ꧀ꦕ ꦥꦴꦛꦺꦏ꧀ꦏꦁ ꦕꦠꦸꦧ꧀ꦧꦶꦣꦩ꧀ꦥꦶ ꦮꦸꦠ꧀ꦠꦚ꧀ꦚꦨꦴꦒꦶꦪꦁ ꦤ ꦗꦴꦠꦁ, ꦠꦱ꧀ꦩꦴ ꦠꦢꦚ꧀ꦚꦨꦴꦒꦶꦪꦠꦴꦪ ꦮꦶꦢꦶꦠꦴꦪ ꦠꦧ꧀ꦨꦴꦒꦶꦪꦠꦴ ꦥꦴꦫꦶꦪꦺꦱꦪꦸꦠ꧀ꦠꦶꦪꦴ ꦄꦮꦸꦠ꧀ꦠꦴꦥꦶ ꦱꦶꦗ꧀ꦙꦠꦷꦠꦶ ꦏꦠ꧀ꦮꦴ ‘‘ꦄꦚ꧀ꦚꦨꦴꦒꦶꦪꦩꦺꦮ ꦥꦜꦩꦁ ꦤꦶꦢ꧀ꦢꦶꦛ꧀ꦜ’’ꦤ꧀ꦠꦶꦥꦶ ꦮꦠ꧀ꦠꦸꦁ ꦪꦸꦗ꧀ꦗꦠꦶ. ꦌꦏꦁꦱꦺꦤ ꦠꦧ꧀ꦨꦴꦒꦶꦪꦁ ꦤ ꦲꦺꦴꦠꦷꦠꦶ ꦱꦫꦶꦏ꧀ꦑꦮꦱꦺꦤ ꦄꦫꦲꦠ꧀ꦠꦁ ꦄꦴꦥꦠ꧀ꦠꦶ ꦄꦤꦴꦥꦠ꧀ꦠꦷꦠꦶ ꦮꦶꦮꦴꦢꦱꦧ꧀ꦨꦴꦮꦠꦺꦴ ꦄꦧ꧀ꦪꦴꦏꦠꦨꦴꦮꦺꦤ ꦮꦶꦮꦴꦢꦴꦣꦶꦏꦫꦟꦱ꧀ꦱꦥꦶ ꦄꦚ꧀ꦚꦨꦴꦒꦶꦪꦁ ꦱꦶꦪꦴ, ꦥꦴꦭ꦳ꦶꦪꦁ ꦄꦴꦥꦠ꧀ꦠꦴꦣꦶꦏꦫꦟꦱ꧀ꦱ ꦮꦸꦠ꧀ꦠꦠ꧀ꦠꦴ ꦌꦮꦁ ꦮꦸꦠ꧀ꦠꦁ, ꦄꦴꦢꦶꦠꦺꦴ ꦥꦛ꧀ꦜꦴꦪꦴꦠꦶ ‘‘ꦄꦚ꧀ꦚꦨꦴꦒꦶꦪꦱ꧀ꦱ ꦄꦣꦶꦏꦫꦟꦱ꧀ꦱꦴ’’ꦠꦶ ꦆꦠꦺꦴ ꦥꦛ꧀ꦜꦴꦪ. ‘‘ꦩꦺꦡꦸꦤꦫꦴꦒꦺꦤ ꦩꦤꦸꦱ꧀ꦱꦮꦶꦒ꧀ꦒꦲꦺꦴ ꦢꦺꦴꦱꦺꦤꦴꦠꦶꦄꦴꦢꦶꦤꦴ ꦱꦫꦶꦏ꧀ꦑꦠꦺꦴ ꦕꦴ’’ꦠꦶ ꦭꦶꦑꦶꦠꦁ. ꦠꦁ ꦮꦠ꧀ꦡꦸꦮꦶꦱꦨꦴꦒꦠꦴꦪ ꦌꦮ ꦱꦶꦢ꧀ꦣꦁ. ꦄꦪꦁ ꦥꦤ ꦮꦠ꧀ꦡꦸꦱꦨꦴꦒꦠꦴꦪꦥꦶ ꦱꦠꦶ ꦄꦴꦥꦠ꧀ꦠꦶꦱꦨꦴꦒꦠꦴ ꦱꦫꦶꦏ꧀ꦑꦠꦺꦴꦠꦶ ꦤꦺꦴ ꦠꦏ꧀ꦏꦺꦴꦠꦶ ꦕ, ꦌꦏꦱ꧀ꦩꦶꦩ꧀ꦥꦶ ꦲꦶ ꦮꦠ꧀ꦡꦸꦱ꧀ꦩꦶꦁ ꦄꦴꦥꦠ꧀ꦠꦶꦨꦺꦢꦺꦴ ꦲꦺꦴꦠꦷꦠꦶ ꦄꦴꦕꦫꦶꦪꦺꦴ. ꦥꦫꦠꦺꦴ ꦮꦸꦠ꧀ꦠꦤꦪꦺꦤ ꦮꦺꦢꦶꦠꦧ꧀ꦧꦤ꧀ꦠꦶ ꦱꦩ꧀ꦧꦤ꧀ꦣꦺꦴ.

‘‘ꦏꦶꦕ꧀ꦕꦩꦺꦮ ꦏꦶꦕ꧀ꦕꦴꦣꦶꦏꦫꦟ’’ꦤ꧀ꦠꦶ ꦮꦸꦠ꧀ꦠꦠ꧀ꦠꦴ ꦱꦔ꧀ꦓꦏꦩ꧀ꦩꦴꦤꦩꦺꦠꦁ ꦄꦣꦶꦮꦕꦤꦁ. ꦏꦩ꧀ꦩꦭꦏ꧀ꦑꦟꦤ꧀ꦠꦶ ꦏꦩ꧀ꦩꦴꦤꦁ ꦱꦨꦴꦮꦁ. ꦠꦁ ꦤꦶꦱ꧀ꦱꦴꦪꦴꦠꦶ ꦥꦸꦧ꧀ꦧꦺꦮ ꦲꦶ ꦱꦁꦮꦶꦣꦴꦪ ꦱꦔ꧀ꦓꦺꦴ ꦏꦩ꧀ꦩꦁ ꦏꦫꦺꦴꦠꦶ. ꦄꦡ ꦮꦴ ꦥꦸꦫꦶꦩꦁ ꦥꦸꦫꦶꦩꦤ꧀ꦠꦶ ꦥꦫꦶꦮꦴꦱꦈꦏ꧀ꦑꦺꦥꦤꦶꦪꦴꦢꦷꦤꦶ ꦱꦔ꧀ꦓꦏꦩ꧀ꦩꦴꦤꦶ ꦤꦶꦱ꧀ꦱꦴꦪ ꦄꦧ꧀ꦨꦴꦤꦎꦱꦴꦫꦟꦴꦢꦶ ꦈꦥ꧀ꦥꦤ꧀ꦤꦤ꧀ꦠꦶ ꦏꦠ꧀ꦮꦴ ꦮꦸꦠ꧀ꦠꦁ. ꦠꦱ꧀ꦩꦴ ꦏꦶꦚ꧀ꦕꦴꦥꦶ ꦱꦔ꧀ꦓꦏꦩ꧀ꦩꦩꦺꦮ ꦏꦶꦕ꧀ꦕꦴꦣꦶꦏꦫꦟꦁ, ꦠꦡꦴꦥꦶ ꦱꦺꦱꦮꦶꦱꦺꦱꦺꦴ ꦭꦧ꧀ꦨꦠꦷꦠꦶ ꦢꦱ꧀ꦱꦺꦠꦶ.

꧓꧙꧔. ꦄꦠ꧀ꦡꦠꦺꦴ ꦌꦏꦁ, ꦠꦱ꧀ꦩꦴ ꦢꦺꦱꦱ꧀ꦱ ꦄꦠ꧀ꦡꦩꦮꦠ꧀ꦮꦴ ‘‘ꦭꦺꦱꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ ꦏꦶꦫ.

꧓꧙꧕. ꦱꦮꦠ꧀ꦡꦸꦏꦁ ꦏꦠ꧀ꦮꦴꦠꦶ ꦥꦸꦒ꧀ꦒꦭꦱ꧀ꦱ ꦈꦥꦫꦶ ꦄꦴꦫꦺꦴꦥꦺꦠ꧀ꦮꦴ ꦑꦠ꧀ꦠꦶꦪꦴꦢꦶꦨꦴꦮꦺꦤ ꦌꦏꦗꦴꦠꦶꦏꦺꦴꦥꦶ ꦢꦷꦓꦫꦱ꧀ꦱꦏꦴꦭ꦳ꦏꦺꦴꦢꦴꦠꦴꦢꦷꦤꦁ ꦢꦶꦛ꧀ꦜꦱꦸꦠꦥꦫꦶꦱꦔ꧀ꦏꦶꦠꦴꦤꦁ ꦮꦱꦺꦤ ꦄꦚ꧀ꦚꦨꦴꦒꦶꦪꦠꦴ, ꦢꦷꦓꦁ ꦑꦠ꧀ꦠꦶꦪꦁ ꦄꦗ꧀ꦙꦴꦕꦫꦤ꧀ꦠꦁ ꦢꦶꦱ꧀ꦮꦴ ꦫꦱ꧀ꦱꦴꦢꦶꦑꦠ꧀ꦠꦶꦪꦥꦚ꧀ꦚꦠ꧀ꦠꦶꦪꦴ ꦄꦴꦣꦴꦫꦨꦴꦮꦠꦺꦴ ꦗꦴꦠꦶꦭꦺꦱꦺꦤ ꦕꦺꦴꦢꦺꦠꦶ, ꦌꦏꦁ ꦮꦴ ꦑꦠ꧀ꦠꦶꦪꦁ ꦄꦗ꧀ꦙꦴꦕꦫꦤ꧀ꦠꦁ ꦢꦶꦱ꧀ꦮꦴ ꦠꦠꦺꦴ ꦮꦶꦱꦶꦛ꧀ꦜꦚ꧀ꦚꦨꦴꦒꦨꦹꦠꦁ ꦑꦠ꧀ꦠꦶꦪꦁ ꦗꦴꦠꦶꦭꦺꦱꦁ ꦒꦲꦺꦠ꧀ꦮꦴ ‘‘ꦑꦠ꧀ꦠꦶꦪꦺꦴ ꦢꦶꦛ꧀ꦜꦺꦴ ꦠ꧀ꦮꦁ ꦑꦠ꧀ꦠꦶꦪꦺꦴꦱꦷ’’ꦠꦶ ꦕꦺꦴꦢꦺꦠꦶ ꦢꦶꦛ꧀ꦜꦴꦢꦶꦄꦚ꧀ꦚꦨꦴꦒꦺꦤ. ꦌꦠ꧀ꦡ ꦕ ‘‘ꦢꦷꦓꦴꦢꦪꦺꦴ, ꦢꦶꦛ꧀ꦜꦴꦢꦪꦺꦴ ꦕ ꦗꦴꦠꦶꦤꦴꦩꦴꦢꦷꦤꦁ ꦮꦠ꧀ꦡꦸꦨꦹꦠꦠ꧀ꦠꦴ ꦄꦣꦶꦏꦫꦟ’’ꦤ꧀ꦠꦶ ꦭꦶꦑꦶꦠꦁ. ꦠꦁ ‘‘ꦄꦣꦶꦏꦫꦟꦨꦴꦮꦴꦤꦶꦪꦩꦠꦺꦴ’’ꦠꦶ ꦮꦸꦠ꧀ꦠꦢꦺꦴꦱꦁ ꦤꦴꦠꦶꦏ꧀ꦏꦩꦠꦶ, ꦄꦛ꧀ꦜꦏꦡꦴꦪꦁ ‘‘ꦑꦠ꧀ꦠꦶꦪꦗꦴꦠꦶꦥꦚ꧀ꦚꦠ꧀ꦠꦶꦪꦴ ꦄꦴꦣꦴꦫꦮꦱꦺꦤ ꦄꦣꦶꦏꦫꦟꦠꦴ ꦕ ꦮꦺꦢꦶꦠꦧ꧀ꦧꦴ’’ꦠꦶ ꦮꦸꦠ꧀ꦠꦁ. ꦠꦩ꧀ꦥꦶ ꦤꦴꦩꦒꦺꦴꦠ꧀ꦠꦠꦺꦴ ꦄꦚ꧀ꦚꦶꦱ꧀ꦱꦴ ꦤꦴꦩꦒꦺꦴꦠ꧀ꦠꦥꦚ꧀ꦚꦠ꧀ꦠꦶꦪꦴ ꦤꦴꦩ ꦏꦱ꧀ꦱꦕꦶ ꦄꦨꦴꦮꦠꦺꦴ ꦤ ꦱꦧ꧀ꦧꦱꦴꦣꦴꦫꦟꦁ, ꦠꦱ꧀ꦩꦴ ‘‘ꦄꦣꦶꦏꦫꦟꦱ꧀ꦱꦴ’’ꦠꦶ ꦥꦢꦸꦢ꧀ꦣꦴꦫꦟꦁ ꦄꦣꦶꦏꦫꦟꦕꦠꦸꦏ꧀ꦏꦢꦱ꧀ꦱꦤꦠ꧀ꦡꦁ, ꦠꦁ ꦱꦩꦴꦤꦮꦕꦤꦢꦱ꧀ꦱꦤꦠ꧀ꦡꦤ꧀ꦠꦶ ꦤꦺꦴ ꦠꦏ꧀ꦏꦺꦴꦠꦶ. ꦠꦠ꧀ꦡ ꦢꦷꦓꦴꦢꦶꦤꦺꦴ ꦮꦴ ꦢꦶꦛ꧀ꦜꦴꦢꦶꦤꦺꦴ ꦮꦴꦠꦶ ꦌꦠ꧀ꦡ ꦢꦷꦓꦴꦢꦶꦠꦴ, ꦢꦶꦛ꧀ꦜꦴꦢꦶꦠꦴ ꦕ ꦄꦚ꧀ꦚꦨꦴꦒꦺꦴ, ꦪꦺꦴ ꦕꦸꦢꦶꦠꦏꦺꦴ ꦆꦠꦫꦱ꧀ꦱ ꦮꦶꦱꦺꦱꦺꦴ ꦪꦠꦺꦴ ꦄꦚ꧀ꦚꦺꦴꦠꦶ ꦮꦸꦕ꧀ꦕꦠꦶ.

꧓꧙꧙. ꦭꦲꦸꦏꦁ ꦄꦴꦥꦠ꧀ꦠꦶꦤ꧀ꦠꦶ ꦥꦴꦫꦴꦗꦶꦏꦠꦺꦴ ꦭꦲꦸꦏꦴꦥꦠ꧀ꦠꦶ ꦱꦔ꧀ꦓꦴꦢꦶꦱꦺꦱꦴꦢꦶ. ꦠꦺꦤꦺꦮ ꦄꦤ꧀ꦠꦺ ꦠꦁ ꦢꦱ꧀ꦱꦺꦤ꧀ꦠꦺꦤ ‘‘ꦨꦶꦏ꧀ꦑꦸ ꦱꦔ꧀ꦓꦴꦢꦶꦱꦺꦱꦁ ꦄꦗ꧀ꦙꦴꦥꦗ꧀ꦗꦤ꧀ꦠꦺꦴ ꦢꦶꦛ꧀ꦜꦺꦴ ꦲꦺꦴꦠꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦄꦴꦥꦠ꧀ꦠꦶꦭꦺꦱꦺꦴꦥꦶ ꦏꦶꦩꦠ꧀ꦡꦁ ꦗꦴꦠꦶꦭꦺꦱꦴꦢꦪꦺꦴ ꦮꦶꦪ ꦤ ꦮꦶꦠ꧀ꦡꦴꦫꦶꦠꦺꦴꦠꦶ ꦕꦺ? ꦠꦡꦴ ꦄꦱꦩ꧀ꦨꦮꦠꦺꦴꦠꦶ ꦮꦺꦢꦶꦠꦧ꧀ꦧꦁ.

꧔꧐꧐. ꦱꦴꦛꦏꦥꦠ꧀ꦠꦺꦴ ꦱꦫꦷꦫꦛ꧀ꦜꦥꦠ꧀ꦠꦺꦴ. ꦄꦴꦥꦠ꧀ꦠꦶꦪꦴꦠꦶ ꦥꦴꦫꦴꦗꦶꦏꦴꦥꦠ꧀ꦠꦶꦪꦴ ꦄꦚ꧀ꦚꦨꦴꦒꦶꦪꦁ ꦱꦔ꧀ꦓꦴꦢꦶꦱꦺꦱꦴꦢꦶ, ꦄꦣꦶꦏꦫꦟꦚ꧀ꦕ ꦄꦴꦥꦠ꧀ꦠꦶꦥꦚ꧀ꦚꦠ꧀ꦠꦶꦪꦴ. ‘‘ꦭꦺꦱꦺꦴ ꦤꦴꦩ ꦄꦴꦥꦠ꧀ꦠꦶꦨꦴꦒꦺꦴ’’ꦠꦶ ꦮꦸꦠ꧀ꦠꦠ꧀ꦠꦴ ꦄꦴꦥꦠ꧀ꦠꦶꦨꦴꦮꦭꦺꦱꦺꦴ ꦮꦸꦠ꧀ꦠꦺꦴꦠꦶ ꦮꦺꦢꦶꦠꦧ꧀ꦧꦺꦴ, ꦠꦱ꧀ꦩꦴ ꦥꦴꦫꦴꦗꦶꦏꦴꦥꦠ꧀ꦠꦶꦠꦺꦴ ꦄꦚ꧀ꦚꦨꦴꦒꦶꦪꦱ꧀ꦱ ꦄꦴꦥꦠ꧀ꦠꦶꦥꦚ꧀ꦚꦠ꧀ꦠꦶꦪꦴ ꦄꦴꦣꦴꦫꦟꦛ꧀ꦜꦺꦤ ‘‘ꦄꦣꦶꦏꦫꦟ’’ꦤ꧀ꦠꦶ ꦱꦔ꧀ꦑ꧀ꦪꦁ ꦒꦠꦱ꧀ꦱ ꦱꦔ꧀ꦓꦴꦢꦶꦱꦺꦱꦴꦢꦶꦤꦺꦴ ꦄꦴꦥꦠ꧀ꦠꦶꦤꦶꦏꦴꦪꦱ꧀ꦱ ꦄꦴꦥꦠ꧀ꦠꦶꦨꦴꦮꦭꦺꦱꦁ ꦒꦲꦺꦠ꧀ꦮꦴ ꦕꦺꦴꦢꦤꦴ ꦄꦴꦥꦠ꧀ꦠꦶꦭꦺꦱꦕꦺꦴꦢꦤꦴꦠꦶ ꦮꦺꦢꦶꦠꦧ꧀ꦧꦴ.

꧔꧐꧘. ꦄꦤꦴꦥꦠ꧀ꦠꦶ ꦠꦡꦴꦱꦚ꧀ꦚꦷ ꦕꦺꦴꦢꦺꦠꦶ ꦮꦴ ꦕꦺꦴꦢꦴꦥꦺꦠꦶ ꦮꦴꦠꦶ ꦄꦴꦥꦠ꧀ꦠꦚ꧀ꦚꦨꦴꦒꦶꦪꦕꦺꦴꦢꦤꦴꦪꦩꦺꦮ, ꦤ ꦄꦚ꧀ꦚꦠ꧀ꦡ. ꦌꦠ꧀ꦠꦴꦮꦠꦴ ꦥꦜꦩꦢꦸꦛ꧀ꦜꦢꦺꦴꦱꦺ ꦮꦸꦠ꧀ꦠꦮꦶꦕꦫꦟꦴꦪ ꦱꦁꦱꦤ꧀ꦢꦶꦠꦁ ꦲꦺꦴꦠꦶ, ꦠꦁ ꦆꦣ ꦏꦡꦁ ꦥꦚ꧀ꦚꦴꦪꦠꦷꦠꦶ ꦕꦺ? ꦏꦔ꧀ꦑꦴꦮꦶꦠꦫꦟꦶꦪꦴ ꦮꦕꦤꦠꦺꦴ. ꦮꦸꦠ꧀ꦠꦚ꧀ꦲꦶ ‘‘ꦠꦠ꧀ꦡ ꦆꦣ ꦕ ꦄꦴꦥꦠ꧀ꦠꦚ꧀ꦚꦨꦴꦒꦶꦪꦕꦺꦴꦢꦤꦴꦪ ꦠꦡꦴꦱꦚ꧀ꦚꦶꦤꦺꦴꦥꦶ ꦄꦤꦴꦥꦠ꧀ꦠꦷ’’ꦠꦶ.

ꦄꦚ꧀ꦚꦴꦨꦴꦒꦶꦪꦱꦶꦏ꧀ꦑꦁ ꦪꦺꦴ, ꦤꦺꦮ ꦱꦶꦏ꧀ꦑꦠꦶ ꦪꦸꦠ꧀ꦠꦶꦠꦺꦴ. ꦒꦕ꧀ꦖꦺ ꦮꦶꦤꦪꦮꦶꦚ꧀ꦚꦹꦲꦶ, ꦄꦚ꧀ꦚꦨꦴꦒꦶꦪꦠꦚ꧀ꦕ

ꦱꦺꦴꦠꦶ.

ꦢꦸꦠꦶꦪꦢꦸꦛ꧀ꦜꦢꦺꦴꦱꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.