꧒. ꦧꦺꦴꦗ꧀ꦙꦔ꧀ꦒꦱꦁꦪꦸꦠ꧀ꦠꦁ

꧑. ꦥꦧ꧀ꦧꦠꦮꦒ꧀ꦒꦺꦴ

꧑.ꦲꦶꦩꦮꦤ꧀ꦠꦱꦸꦠ꧀ꦠꦮꦟ꧀ꦟꦤꦴ

꧑꧘꧒. ꦧꦸꦗ꧀ꦙꦠꦶ ꦕꦠꦸꦱꦕ꧀ꦕꦁ ꦄꦫꦶꦪꦱꦴꦮꦏꦺꦴ ꦌꦠꦴꦪꦴꦠꦶ ꦧꦺꦴꦣꦁ, ꦣꦩ꧀ꦩꦱꦴꦩꦒ꧀ꦒꦷ, ꦄꦫꦶꦪꦱꦴꦮꦏꦺꦴ ꦥꦤ ꦕꦠꦸꦱꦕ꧀ꦕꦁ ꦧꦸꦗ꧀ꦙꦠꦷꦠꦶ ꦧꦺꦴꦣꦶ. ꦄꦔ꧀ꦒꦴꦠꦶ ꦏꦴꦫꦟꦴ. ꦪꦴꦪ ꦣꦩ꧀ꦩꦱꦴꦩꦒ꧀ꦒꦶꦪꦴꦠꦶ ꦱꦩ꧀ꦧꦤ꧀ꦣꦺꦴ. ꦠꦟ꧀ꦲꦴꦮꦱꦺꦤ ꦥꦠꦶꦛ꧀ꦜꦴꦤꦁ, ꦢꦶꦛ꧀ꦜꦶꦮꦱꦺꦤ ꦄꦴꦪꦹꦲꦤꦴ. ꦱꦱ꧀ꦱꦠꦢꦶꦛ꧀ꦜꦶꦪꦴ ꦥꦠꦶꦛ꧀ꦜꦴꦤꦁ, ꦈꦕ꧀ꦖꦺꦢꦢꦶꦛ꧀ꦜꦶꦪꦴ ꦄꦴꦪꦹꦲꦤꦴ. ꦭꦷꦤꦮꦱꦺꦤ ꦥꦠꦶꦛ꧀ꦜꦴꦤꦁ, ꦈꦢ꧀ꦣꦕ꧀ꦕꦮꦱꦺꦤ ꦄꦴꦪꦹꦲꦤꦴ. ꦏꦴꦩꦱꦸꦑꦴꦤꦸꦪꦺꦴꦒꦮꦱꦺꦤ ꦥꦠꦶꦛ꧀ꦜꦴꦤꦁ, ꦄꦠ꧀ꦠꦏꦶꦭꦩꦡꦴꦤꦸꦪꦺꦴꦒꦮꦱꦺꦤ ꦄꦴꦪꦹꦲꦤꦴ. ꦎꦓꦠꦫꦟꦱꦸꦠ꧀ꦠꦮꦟ꧀ꦟꦤꦴꦪꦁ (ꦱꦁ. ꦤꦶ. ꧑.꧑) –

‘‘ꦏꦶꦭꦺꦱꦮꦱꦺꦤ ꦥꦠꦶꦛ꧀ꦜꦴꦤꦁ, ꦄꦨꦶꦱꦔ꧀ꦑꦴꦫꦮꦱꦺꦤ ꦄꦴꦪꦹꦲꦤꦴ. ꦠꦟ꧀ꦲꦴꦢꦶꦛ꧀ꦜꦷꦲꦶ ꦥꦠꦶꦛ꧀ꦜꦴꦤꦁ, ꦄꦮꦱꦺꦱꦏꦶꦭꦺꦱꦴꦨꦶꦱꦔ꧀ꦑꦴꦫꦺꦲꦶ ꦄꦴꦪꦹꦲꦤꦴ, ꦱꦧ꧀ꦧꦴꦏꦸꦱꦭꦴꦨꦶꦱꦔ꧀ꦑꦴꦫꦮꦱꦺꦤ ꦥꦠꦶꦛ꧀ꦜꦴꦤꦁ, ꦱꦧ꧀ꦧꦭꦺꦴꦏꦶꦪꦏꦸꦱꦭꦴꦨꦶꦱꦔ꧀ꦑꦴꦫꦮꦱꦺꦤ ꦄꦴꦪꦹꦲꦤꦴ’’ꦠꦶ –

ꦮꦸꦠ꧀ꦠꦺꦱꦸ ꦥꦏꦴꦫꦺꦱꦸ ꦆꦣ ꦄꦮꦸꦠ꧀ꦠꦴꦤꦁ ꦮꦱꦺꦤ ꦮꦺꦢꦶꦠꦧ꧀ꦧꦺꦴ. ꦏꦶꦭꦺꦱꦱꦤ꧀ꦠꦴꦤꦤꦶꦢ꧀ꦢꦴꦪ ꦈꦛ꧀ꦜꦲꦠꦷꦠꦶ ꦌꦠꦺꦤ ꦱꦶꦑꦴꦥꦠ꧀ꦠꦮꦶꦥꦱ꧀ꦱꦤꦴꦱꦲꦒꦠꦴꦤꦩ꧀ꦥꦶ ꦱꦠꦶꦄꦴꦢꦷꦤꦁ ꦧꦺꦴꦗ꧀ꦙꦔ꧀ꦒꦨꦴꦮꦁ ꦢꦱ꧀ꦱꦺꦠꦶ. ꦕꦠ꧀ꦠꦴꦫꦷꦠꦶꦄꦴꦢꦶꦤꦴ ꦩꦒ꧀ꦒꦦꦭꦺꦤ ꦱꦲꦒꦠꦴꦤꦁ. ꦱꦠ꧀ꦠꦲꦶ ꦧꦺꦴꦗ꧀ꦙꦔ꧀ꦒꦺꦲꦶ ꦨꦴꦮꦶꦠꦺꦲꦶ ꦱꦕ꧀ꦕꦥꦛꦶꦮꦺꦣꦺꦴ ꦲꦺꦴꦠꦷꦠꦶ ꦏꦡꦩꦶꦢꦁ ꦗꦴꦤꦶꦠꦧ꧀ꦧꦤ꧀ꦠꦶ ꦕꦺꦴꦢꦤꦁ ꦱꦤ꧀ꦣꦴꦪꦴꦲ ‘‘ꦪꦡꦴꦲꦴ’’ꦠꦶꦄꦴꦢꦶ. ꦙꦴꦤꦔ꧀ꦒꦩꦒ꧀ꦒꦔ꧀ꦒꦴꦢꦪꦺꦴ ꦮꦶꦪꦴꦠꦶ ꦌꦠꦺꦤ ꦧꦺꦴꦣꦶꦧꦺꦴꦗ꧀ꦙꦔ꧀ꦒꦱꦢ꧀ꦢꦴꦤꦁ ꦱꦩꦸꦢꦴꦪꦴꦮꦪꦮꦮꦶꦱꦪꦠꦁ ꦢꦱ꧀ꦱꦺꦠꦶ. ꦱꦺꦤꦔ꧀ꦒꦫꦡꦔ꧀ꦒꦴꦢꦪꦺꦴ ꦮꦶꦪꦴꦠꦶ ꦌꦠꦺꦤ ꦥꦸꦒ꧀ꦒꦭꦥꦚ꧀ꦚꦠ꧀ꦠꦶꦪꦴ ꦄꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦶꦨꦴꦮꦁ ꦢꦱ꧀ꦱꦺꦠꦶ.

ꦧꦺꦴꦣꦴꦪ ꦱꦁꦮꦠ꧀ꦠꦤ꧀ꦠꦷꦠꦶ ꦧꦺꦴꦗ꧀ꦙꦔ꧀ꦒꦴꦠꦶ ꦮꦸꦠ꧀ꦠꦁ ‘‘ꦏꦴꦫꦟꦠ꧀ꦡꦺꦴ ꦄꦔ꧀ꦒꦱꦢ꧀ꦢꦺꦴ’’ꦠꦶ. ꦧꦸꦗ꧀ꦙꦠꦷꦠꦶ ꦧꦺꦴꦣꦶ, ꦧꦺꦴꦣꦶꦪꦴ ꦌꦮ ꦄꦔ꧀ꦒꦴꦠꦶ ꦧꦺꦴꦗ꧀ꦙꦔ꧀ꦒꦴꦠꦶ ꦮꦸꦠ꧀ꦠꦁ ‘‘ꦧꦸꦗ꧀ꦙꦤ꧀ꦠꦷꦠꦶ ꦧꦺꦴꦗ꧀ꦙꦔ꧀ꦒꦴ’’ꦠꦶ. ꦮꦶꦥꦱ꧀ꦱꦤꦴꦢꦷꦤꦁ ꦏꦴꦫꦟꦴꦤꦁ ꦧꦸꦗ꧀ꦙꦶꦠꦧ꧀ꦧꦴꦤꦁ ꦱꦕ꧀ꦕꦴꦤꦁ ꦄꦤꦸꦫꦹꦥꦁ ꦥꦕ꧀ꦕꦏ꧀ꦑꦨꦴꦮꦺꦤ ꦥꦛꦶꦩꦸꦑꦁ ꦄꦮꦶꦥꦫꦷꦠꦁ ꦱꦩ꧀ꦩꦴ ꦧꦸꦗ꧀ꦙꦤ꧀ꦠꦷꦠꦶ ꦌꦮꦁ ꦮꦠ꧀ꦡꦸꦮꦶꦱꦺꦱꦢꦷꦥꦏꦺꦲꦶ ꦈꦥꦫꦶꦩꦒ꧀ꦒꦺꦲꦶ ꦄꦤꦸꦧꦸꦗ꧀ꦙꦤ꧀ꦠꦷꦠꦶꦄꦴꦢꦶꦤꦴ ꦮꦸꦠ꧀ꦠꦧꦺꦴꦣꦶꦱꦢ꧀ꦢꦺꦲꦶ ꦤꦶꦥ꧀ꦥꦢꦺꦱꦺꦤ ꦮꦸꦠ꧀ꦠꦁ ‘‘ꦧꦸꦗ꧀ꦙꦤꦠꦴꦱꦴꦩꦚ꧀ꦚꦺꦤ ꦱꦔ꧀ꦒꦟ꧀ꦲꦴꦠꦷ’’ꦠꦶ. ꦌꦠ꧀ꦡ ꦕ ꦭꦷꦤꦥꦠꦶꦛ꧀ꦜꦴꦤ-ꦏꦴꦩꦱꦸꦑꦭ꧀ꦭꦶꦏꦴꦤꦸꦪꦺꦴꦒ-ꦈꦕ꧀ꦖꦺꦢꦴꦨꦶꦤꦶꦮꦺꦱꦴꦤꦁ ꦣꦩ꧀ꦩꦮꦶꦕꦪ-ꦮꦷꦫꦶꦪꦥꦷꦠꦶꦥꦣꦴꦤ-ꦣꦩ꧀ꦩꦱꦴꦩꦒ꧀ꦒꦷ ꦥꦛꦶꦥꦏ꧀ꦑꦺꦴ. ꦈꦢ꧀ꦣꦕ꧀ꦕꦴꦪꦹꦲꦤꦄꦠ꧀ꦠꦏꦶꦭꦩꦡꦴꦤꦸꦪꦺꦴꦒ-ꦱꦱ꧀ꦱꦠꦴꦨꦶꦤꦶꦮꦺꦱꦴꦤꦁ ꦥꦱ꧀ꦱꦢ꧀ꦣꦶꦱꦩꦴꦣꦶ-ꦈꦥꦺꦏ꧀ꦑꦴꦥꦣꦴꦤ-ꦣꦩ꧀ꦩꦱꦴꦩꦒ꧀ꦒꦷ ꦥꦛꦶꦥꦏ꧀ꦑꦺꦴ. ꦱꦠꦶ ꦥꦤ ꦈꦨꦪꦠ꧀ꦡꦴꦥꦶ ꦆꦕ꧀ꦖꦶꦠꦧ꧀ꦧꦴ. ꦠꦡꦴ ꦲꦶ ꦱꦴ ꦱꦧ꧀ꦧꦠ꧀ꦡꦶꦏꦴ ꦮꦸꦠ꧀ꦠꦴ.

ꦱꦁ-ꦱꦢ꧀ꦢꦺꦴ ꦥꦱꦁꦱꦴꦪꦁ. ꦥꦸꦤꦢꦺꦮ ꦱꦸꦤ꧀ꦢꦫꦺꦴ ꦕ ꦄꦠ꧀ꦡꦺꦴꦥꦷꦠꦶ ꦄꦴꦲ ‘‘ꦥꦱꦠ꧀ꦡꦺꦴ ꦱꦸꦤ꧀ꦢꦫꦺꦴ ꦕ ꦧꦺꦴꦗ꧀ꦙꦔ꧀ꦒꦺꦴ’’ꦠꦶ. ꦄꦨꦶꦤꦶꦧ꧀ꦧꦠ꧀ꦠꦺꦠꦷꦠꦶ ꦄꦨꦶꦮꦶꦱꦶꦛ꧀ꦜꦨꦴꦮꦺꦤ ꦤꦶꦧ꧀ꦧꦠ꧀ꦠꦺꦠꦶ ꦱꦮꦶꦱꦺꦱꦨꦴꦮꦁ ꦮꦢꦠꦶ. ‘‘ꦌꦏꦺ ꦮꦟ꧀ꦟꦪꦤ꧀ꦠꦷ’’ꦠꦶ ꦮꦠ꧀ꦮꦴ ꦠꦠ꧀ꦡ ꦪꦡꦴꦮꦸꦠ꧀ꦠꦮꦶꦮꦺꦏꦠ꧀ꦠꦪꦠꦺꦴ ꦄꦚ꧀ꦚꦁ ꦮꦶꦮꦺꦏꦢ꧀ꦮꦪꦁ ꦈꦢ꧀ꦣꦫꦶꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦠꦺ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦙꦴꦤꦏ꧀ꦑꦟꦺ ꦠꦴꦮ ꦏꦶꦕ꧀ꦕꦠꦺꦴ ꦮꦶꦏ꧀ꦑꦩ꧀ꦨꦤꦮꦶꦮꦺꦏꦤꦶꦱ꧀ꦱꦶꦠꦁ, ꦮꦶꦥꦱ꧀ꦱꦤꦴꦏ꧀ꦑꦟꦺ ꦄꦗ꧀ꦙꦴꦱꦪꦠꦺꦴ ꦥꦛꦶꦥ꧀ꦥꦱ꧀ꦱꦢ꧀ꦣꦶꦮꦶꦮꦺꦏꦤꦶꦱ꧀ꦱꦶꦠꦁ ꦨꦴꦮꦺꦠꦷꦠꦶ. ꦠꦺꦤꦴꦲ – ‘‘ꦄꦤꦸꦠ꧀ꦠꦫꦁ ꦮꦶꦩꦺꦴꦏ꧀ꦑꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦶꦱ꧀ꦱꦴꦩꦷ’’ꦠꦶ. ꦠꦠ꧀ꦡ ꦠꦠ꧀ꦡ ꦤꦶꦕ꧀ꦖꦪꦠꦴꦪ ꦏꦱꦶꦟꦗ꧀ꦙꦴꦤꦒ꧀ꦒꦲꦟꦺꦤ ꦄꦤꦸꦥ꧀ꦥꦴꦢꦴꦤꦩ꧀ꦥꦶ ꦒꦲꦟꦁ ꦢꦛ꧀ꦜꦧ꧀ꦧꦁ.

ꦲꦶꦩꦮꦤ꧀ꦠꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧒. ꦏꦴꦪꦱꦸꦠ꧀ꦠꦮꦟ꧀ꦟꦤꦴ

꧑꧘꧓. ꦠꦶꦛ꧀ꦜꦤ꧀ꦠꦶ ꦌꦠꦺꦤꦴꦠꦶ ꦜꦶꦠꦶ, ꦏꦴꦫꦟꦁ. ꦏꦩ꧀ꦩꦈꦠꦸꦕꦶꦠ꧀ꦠꦴꦲꦴꦫꦱꦚ꧀ꦚꦶꦠꦺꦴ ꦕꦠꦸꦧ꧀ꦧꦶꦣꦺꦴ ꦥꦕ꧀ꦕꦪꦺꦴ ꦜꦶꦠꦶ ꦌꦠꦱ꧀ꦱꦴꦠꦶ ꦥꦕ꧀ꦕꦪꦛ꧀ꦜꦶꦠꦶꦏꦺꦴ. ꦄꦴꦲꦴꦫꦥꦕ꧀ꦕꦪꦱꦢ꧀ꦢꦴ ꦲꦶ ꦌꦏꦠ꧀ꦡꦴ. ꦱꦸꦨꦩ꧀ꦥꦷꦠꦶ ꦏꦴꦩꦕ꧀ꦖꦤ꧀ꦢꦺꦴ ꦥꦕ꧀ꦕꦪꦺꦴ, ꦄꦱꦸꦨꦺ ꦱꦸꦨꦴꦏꦴꦫꦺꦤ ꦥꦮꦠ꧀ꦠꦤꦠꦺꦴ ꦱꦸꦨꦤ꧀ꦠꦶ ꦮꦸꦕ꧀ꦕꦠꦶ. ꦠꦺꦤ ꦏꦴꦫꦟꦺꦤ ꦥꦮꦠ꧀ꦠꦤꦏꦱ꧀ꦱ ꦄꦚ꧀ꦚꦱ꧀ꦱ ꦏꦴꦩꦕ꧀ꦖꦤ꧀ꦢꦱ꧀ꦱ ꦤꦶꦩꦶꦠ꧀ꦠꦠ꧀ꦠꦴ ꦱꦸꦨꦤꦶꦩꦶꦠ꧀ꦠꦤ꧀ꦠꦶ. ꦱꦸꦨꦱ꧀ꦱꦴꦠꦶ ꦪꦡꦴꦮꦸꦠ꧀ꦠꦱ꧀ꦱ ꦱꦸꦨꦱ꧀ꦱ. ꦄꦴꦫꦩ꧀ꦩꦟꦩ꧀ꦥꦷꦠꦶ ꦱꦸꦨꦴꦏꦴꦫꦺꦤ, ꦆꦛ꧀ꦜꦴꦏꦴꦫꦺꦤ ꦮꦴ ꦒꦪ꧀ꦲꦩꦴꦤꦁ ꦫꦹꦥꦴꦢꦶꦄꦴꦫꦩ꧀ꦩꦟꦩ꧀ꦥꦶ ꦱꦸꦨꦤꦶꦩꦶꦠ꧀ꦠꦁ ꦮꦸꦠ꧀ꦠꦴꦏꦴꦫꦺꦤ. ꦄꦤꦸꦥꦴꦪꦩꦤꦱꦶꦏꦴꦫꦺꦴꦠꦶ ꦄꦴꦏꦔ꧀ꦑꦶꦠꦱ꧀ꦱ ꦲꦶꦠꦱꦸꦑꦱ꧀ꦱ ꦄꦤꦸꦥꦴꦪꦨꦹꦠꦺꦴ ꦩꦤꦱꦶꦏꦴꦫꦺꦴ, ꦠꦠꦺꦴ ꦌꦮ ꦈꦥ꧀ꦥꦡꦩꦤꦱꦶꦏꦴꦫꦺꦴꦠꦶ ꦄꦪꦺꦴꦤꦶꦱꦺꦴꦩꦤꦱꦶꦏꦴꦫꦺꦴ. ꦠꦱ꧀ꦩꦶꦤ꧀ꦠꦶ ꦪꦡꦴꦤꦶꦢ꧀ꦣꦴꦫꦶꦠꦺ ꦏꦴꦩꦕ꧀ꦖꦤ꧀ꦢꦨꦹꦠꦺ ꦠꦢꦴꦫꦩ꧀ꦩꦟꦨꦹꦠꦺ ꦕ ꦢꦸꦮꦶꦣꦺꦥꦶ ꦱꦸꦨꦤꦶꦩꦶꦠ꧀ꦠꦺ. ꦄꦛ꧀ꦜꦏꦡꦴꦪꦁ ꦥꦤ ‘‘ꦱꦸꦨꦴꦫꦩ꧀ꦩꦟꦺ’’ꦆꦕ꧀ꦕꦺꦮ ꦮꦸꦠ꧀ꦠꦁ. ꦄꦠ꧀ꦡꦶ, ꦨꦶꦏ꧀ꦑꦮꦺ, ꦱꦸꦨꦤꦶꦩꦶꦠ꧀ꦠꦤ꧀ꦠꦶꦄꦴꦢꦷꦠꦶ ꦄꦴꦢꦶ-ꦱꦢ꧀ꦢꦺꦤ ꦏꦴꦩꦕ꧀ꦖꦤ꧀ꦢꦤꦷꦮꦫꦟꦱ꧀ꦱ ꦄꦴꦲꦴꦫꦢꦱ꧀ꦱꦤꦥꦴꦭ꦳ꦶ ꦈꦠ꧀ꦠꦴꦤꦴꦠꦶ ꦏꦠ꧀ꦮꦴ ꦮꦸꦠ꧀ꦠꦁ – ‘‘ꦌꦮꦁ ꦱꦧ꧀ꦧꦤꦷꦮꦫꦟꦺꦱꦸ ꦪꦺꦴꦗꦤꦴ ꦮꦺꦢꦶꦠꦧ꧀ꦧꦴ’’ꦠꦶ.

ꦥꦛꦶꦓꦺꦴꦥꦶ ꦥꦛꦶꦓꦤꦶꦩꦶꦠ꧀ꦠꦁ ꦥꦸꦫꦶꦩꦸꦥ꧀ꦥꦤ꧀ꦤꦱ꧀ꦱ ꦥꦕ꧀ꦖꦴ ꦈꦥ꧀ꦥꦗ꧀ꦗꦤꦏꦱ꧀ꦱ ꦤꦶꦩꦶꦠ꧀ꦠꦨꦴꦮꦠꦺꦴ. ꦥꦛꦶꦓꦴꦫꦩ꧀ꦩꦟꦁ ꦤꦴꦩ ꦌꦏꦹꦤꦮꦷꦱꦠꦶ ꦄꦴꦓꦴꦠꦮꦠ꧀ꦡꦸꦨꦹꦠꦴ ꦱꦠ꧀ꦠꦱꦔ꧀ꦑꦴꦫꦴ. ꦄꦫꦠꦷꦠꦶ ꦥꦤ꧀ꦠꦱꦺꦤꦴꦱꦤꦴꦢꦷꦱꦸ ꦄꦫꦩꦟꦁ. ꦈꦏ꧀ꦏꦟ꧀ꦜꦶꦠꦴꦠꦶ ꦈꦏ꧀ꦏꦟ꧀ꦜꦨꦴꦮꦺꦴ. ꦥꦤ꧀ꦠꦺꦱꦹꦠꦶ ꦢꦹꦫꦺꦱꦸ, ꦮꦶꦮꦶꦠ꧀ꦠꦺꦱꦸ ꦮꦴ. ꦄꦣꦶꦏꦸꦱꦭꦺꦱꦹꦠꦶ ꦱꦩꦡꦮꦶꦥꦱ꧀ꦱꦤꦴꦣꦩ꧀ꦩꦺꦱꦸ. ꦄꦫꦠꦶ ꦫꦠꦶꦥꦛꦶꦥꦏ꧀ꦑꦺꦴ. ꦄꦫꦠꦶꦠꦴꦠꦶ ꦄꦫꦩꦟꦴꦏꦴꦫꦺꦴ. ꦄꦤꦨꦶꦫꦠꦷꦠꦶ ꦄꦤꦨꦶꦫꦠꦨꦴꦮꦺꦴ. ꦄꦤꦨꦶꦫꦩꦟꦴꦠꦶ ꦄꦤꦨꦶꦫꦩꦟꦴꦏꦴꦫꦺꦴ. ꦈꦏ꧀ꦏꦟ꧀ꦜꦶꦠꦴꦠꦶ ꦈꦏ꧀ꦏꦟ꧀ꦜꦤꦴꦏꦴꦫꦺꦴ. ꦥꦫꦶꦠꦱ꧀ꦱꦶꦠꦴꦠꦶ ꦈꦏ꧀ꦏꦟ꧀ꦜꦤꦮꦱꦺꦤꦺꦮ ꦥꦫꦶꦠꦱ꧀ꦱꦤꦴ.

ꦄꦴꦒꦤ꧀ꦠꦸꦏꦁ, ꦤ ꦱꦨꦴꦮꦱꦶꦢ꧀ꦣꦁ. ꦏꦴꦪꦴꦭꦱꦶꦪꦤ꧀ꦠꦶ ꦤꦴꦩꦏꦴꦪꦺ ꦄꦭꦱꦨꦴꦮꦺꦴ. ꦱꦩ꧀ꦩꦺꦴꦲꦮꦶꦤꦺꦴꦢꦤꦶꦪꦁ ꦥꦤ ‘‘ꦠꦤ꧀ꦢꦷꦠꦶ ꦗꦴꦠꦶꦄꦴꦭꦱꦶꦪ’’ꦤ꧀ꦠꦶ ꦮꦸꦠ꧀ꦠꦁ. ꦮꦢꦠꦷꦠꦶ ꦌꦠꦺꦤ ꦄꦠꦶꦱꦷꦠꦴꦢꦶꦥꦕ꧀ꦕꦪꦴ ꦱꦔ꧀ꦏꦺꦴꦕꦴꦥꦠ꧀ꦠꦶꦁ ꦢꦱ꧀ꦱꦺꦠꦶ. ꦪꦁ ꦱꦤ꧀ꦣꦴꦪ ꦮꦸꦠ꧀ꦠꦁ ꦏꦶꦭꦺꦱꦮꦠ꧀ꦡꦸꦮꦶꦨꦔ꧀ꦒꦺ (ꦮꦶꦨ. ꦄꦛ꧀ꦜ. ꧘꧕꧗). ꦠꦤ꧀ꦢꦷꦠꦶ ꦗꦴꦠꦶꦄꦴꦭꦱꦶꦪꦁ. ꦠꦤ꧀ꦢꦶꦪꦤꦴꦠꦶ ꦠꦤ꧀ꦢꦶꦪꦤꦴꦏꦴꦫꦺꦴ. ꦠꦤ꧀ꦢꦶꦩꦤꦏꦠꦴꦠꦶ ꦠꦤ꧀ꦢꦶꦪꦴ ꦄꦨꦶꦨꦹꦠꦕꦶꦠ꧀ꦠꦠꦴ. ꦄꦭꦱꦱ꧀ꦱ ꦨꦴꦮꦺꦴ ꦄꦴꦭꦱ꧀ꦪꦁ. ꦄꦴꦭꦱ꧀ꦪꦴꦪꦤꦴꦏꦴꦫꦺꦴ ꦄꦴꦭꦱ꧀ꦪꦴꦪꦤꦴ. ꦄꦴꦭꦱ꧀ꦪꦴꦪꦶꦠꦱ꧀ꦱ ꦨꦴꦮꦺꦴ ꦄꦴꦭꦱ꧀ꦪꦴꦪꦶꦠꦠ꧀ꦠꦁ. ꦆꦠꦶ ꦱꦧ꧀ꦧꦺꦲꦶꦥꦶ ꦆꦩꦺꦲꦶ ꦥꦢꦺꦲꦶ ꦏꦶꦭꦺꦱꦮꦱꦺꦤ ꦏꦴꦪꦴꦭꦱꦶꦪꦁ ꦏꦡꦶꦠꦁ.

ꦏꦶꦭꦺꦱꦮꦱꦺꦤꦴꦠꦶ ꦱꦩ꧀ꦩꦺꦴꦲꦮꦱꦺꦤ. ꦏꦴꦪꦮꦶꦤꦩꦤꦴꦠꦶ ꦏꦴꦪꦱ꧀ꦱ ꦮꦶꦫꦹꦥꦠꦺꦴ ꦤꦩꦤꦴ. ꦗꦩ꧀ꦨꦤꦴꦠꦶ ꦦꦤ꧀ꦢꦤꦴ. ꦥꦸꦤꦥ꧀ꦥꦸꦤꦁ ꦗꦩ꧀ꦨꦤꦴ ꦮꦶꦗꦩ꧀ꦨꦤꦴ. ꦄꦴꦤꦩꦤꦴꦠꦶ ꦥꦸꦫꦠꦺꦴ ꦤꦩꦤꦴ. ꦮꦶꦤꦩꦤꦴꦠꦶ ꦥꦕ꧀ꦖꦠꦺꦴ ꦤꦩꦤꦴ. ꦱꦤ꧀ꦤꦩꦤꦴꦠꦶ ꦱꦩꦤ꧀ꦠꦠꦺꦴ ꦤꦩꦤꦴ. ꦥꦟꦩꦤꦴꦠꦶ ꦪꦡꦴ ꦲꦶ ꦠꦤ꧀ꦠꦠꦺꦴ ꦈꦛ꧀ꦜꦶꦠꦥꦺꦱꦏꦴꦫꦺꦴ ꦏꦶꦚ꧀ꦕꦶꦢꦺꦮ ꦈꦥꦫꦶꦛ꧀ꦜꦶꦠꦁ ꦒꦲꦺꦠ꧀ꦮꦴ ꦈꦗꦸꦁ ꦏꦴꦪꦁ ꦈꦱ꧀ꦱꦴꦥꦺꦠꦶ, ꦌꦮꦁ ꦏꦴꦪꦱ꧀ꦱ ꦈꦢ꧀ꦣꦁ ꦜꦥꦤꦴ. ꦧ꧀ꦪꦴꦣꦶꦪꦏꦤ꧀ꦠꦶ ꦈꦥ꧀ꦥꦤ꧀ꦤꦧ꧀ꦪꦴꦣꦶꦠꦴ. ꦆꦠꦶ ꦱꦧ꧀ꦧꦺꦲꦶꦥꦶ ꦆꦩꦺꦲꦶ ꦥꦢꦺꦲꦶ ꦏꦶꦭꦺꦱꦮꦱꦺꦤ ꦏꦴꦪꦦꦤ꧀ꦢꦤꦩꦺꦮ ꦏꦡꦶꦠꦁ (ꦮꦶꦨ. ꦄꦛ꧀ꦜ. ꧘꧕꧘).

ꦨꦠ꧀ꦠꦥꦫꦶꦭ꦳ꦴꦲꦺꦴꦠꦶ ꦨꦠ꧀ꦠꦮꦱꦺꦤ ꦥꦫꦶꦭ꦳ꦴꦲꦸꦥ꧀ꦥꦠ꧀ꦠꦶ. ꦨꦸꦠ꧀ꦠꦴꦮꦶꦱ꧀ꦱꦴꦠꦶ ꦨꦸꦠ꧀ꦠꦮꦠꦺꦴ. ꦨꦠ꧀ꦠꦩꦸꦕ꧀ꦖꦴꦠꦶ ꦨꦠ꧀ꦠꦒꦺꦭꦚ꧀ꦚꦁ. ꦄꦠꦶꦨꦸꦠ꧀ꦠꦥꦕ꧀ꦕꦪꦴ ꦲꦶ ꦩꦸꦕ꧀ꦖꦴꦥꦠ꧀ꦠꦺꦴ ꦮꦶꦪ ꦲꦺꦴꦠꦶ. ꦨꦠ꧀ꦠꦏꦶꦭꦩꦡꦺꦴꦠꦶ ꦨꦸꦠ꧀ꦠꦥꦕ꧀ꦕꦪꦴ ꦏꦶꦭꦤ꧀ꦠꦨꦴꦮꦺꦴ. ꦨꦠ꧀ꦠꦥꦫꦶꦭ꦳ꦴꦲꦺꦴꦠꦶ ꦨꦠ꧀ꦠꦢꦫꦡꦺꦴ. ꦏꦸꦕ꧀ꦖꦶꦥꦹꦫꦁ ꦨꦸꦠ꧀ꦠꦮꦠꦺꦴ ꦲꦶ ꦥꦫꦶꦭ꦳ꦴꦲꦸꦥ꧀ꦥꦠ꧀ꦠꦶꦪꦴ ꦈꦥꦲꦠꦶꦤ꧀ꦢ꧀ꦫꦶꦪꦺꦴ ꦮꦶꦪ ꦲꦺꦴꦠꦶ, ꦏꦴꦪꦺꦴ ꦑꦶꦗ꧀ꦗꦠꦶ. ꦏꦴꦪꦢꦸꦛ꧀ꦜꦸꦭ꧀ꦭꦤ꧀ꦠꦶ ꦨꦸꦠ꧀ꦠꦨꦠ꧀ꦠꦁ ꦤꦶꦱ꧀ꦱꦴꦪ ꦏꦴꦪꦱ꧀ꦱ ꦄꦏꦩ꧀ꦩꦚ꧀ꦚꦠꦴ.

ꦕꦶꦠ꧀ꦠꦱ꧀ꦱ ꦭꦷꦪꦤꦴꦏꦴꦫꦺꦴꦠꦶ ꦄꦴꦫꦩ꧀ꦩꦟꦺ ꦕꦶꦠ꧀ꦠꦱ꧀ꦱ ꦱꦔ꧀ꦏꦺꦴꦕꦥ꧀ꦥꦠ꧀ꦠꦶ. ꦕꦶꦠ꧀ꦠꦱ꧀ꦱ ꦄꦏꦭ꧀ꦪꦠꦴꦠꦶ ꦕꦶꦠ꧀ꦠꦱ꧀ꦱ ꦒꦶꦭꦴꦤꦨꦴꦮꦺꦴ. ꦒꦶꦭꦴꦤꦺꦴꦠꦶ ꦄꦏꦭ꧀ꦭꦏꦺꦴ ꦮꦸꦕ꧀ꦕꦠꦶ. ꦠꦡꦴ ꦕꦴꦲ ‘‘ꦤꦴꦲꦁ, ꦨꦤ꧀ꦠꦺ, ꦄꦏꦭ꧀ꦭꦏꦺꦴ’’ꦠꦶ. ꦄꦏꦩ꧀ꦩꦚ꧀ꦚꦠꦴꦠꦶ ꦕꦶꦠ꧀ꦠꦒꦺꦭꦚ꧀ꦚꦱꦔ꧀ꦑꦴꦠꦺꦴ ꦄꦏꦩ꧀ꦩꦚ꧀ꦚꦤꦴꦏꦴꦫꦺꦴ. ꦎꦭꦷꦪꦤꦴꦠꦶ ꦎꦭꦷꦪꦤꦴꦏꦴꦫꦺꦴ. ꦆꦫꦶꦪꦴꦥꦡꦶꦏꦩ꧀ꦥꦶ ꦕꦶꦠ꧀ꦠꦁ ꦪꦱ꧀ꦱ ꦮꦱꦺꦤ ꦆꦫꦶꦪꦴꦥꦡꦁ ꦱꦤ꧀ꦣꦴꦫꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦎꦭꦷꦪꦠꦶ, ꦠꦱ꧀ꦱ ꦠꦁ ꦄꦴꦏꦴꦫꦁ ꦱꦤ꧀ꦣꦴꦪ ꦮꦸꦠ꧀ꦠꦁ ‘‘ꦎꦭꦷꦪꦤꦴ’’ꦠꦶ. ꦢꦸꦠꦶꦪꦥꦢꦁ ꦈꦥꦱꦒ꧀ꦒꦺꦤ ꦮꦝ꧀ꦞꦶꦠꦁ. ꦭꦷꦤꦤ꧀ꦠꦶ ꦄꦮꦶꦥ꧀ꦦꦴꦫꦶꦏꦠꦴꦪ ꦱꦔ꧀ꦏꦺꦴꦕꦥ꧀ꦥꦠ꧀ꦠꦁ. ꦆꦠꦫꦺ ꦢ꧀ꦮꦺ ꦄꦴꦏꦴꦫꦤꦶꦢ꧀ꦢꦺꦱꦴ. ꦡꦶꦤꦤ꧀ꦠꦶ ꦄꦮꦶꦥ꧀ꦦꦴꦫꦶꦏꦠꦴꦪ ꦄꦤꦸꦱ꧀ꦱꦴꦲꦤꦴ ꦄꦱꦔ꧀ꦒꦲꦤꦱꦔ꧀ꦒꦲꦤꦁ. ꦡꦶꦪꦤꦴꦏꦴꦫꦺꦴ ꦡꦶꦪꦤꦴ. ꦡꦶꦪꦶꦠꦠ꧀ꦠꦤ꧀ꦠꦶ ꦡꦶꦪꦶꦠꦱ꧀ꦱ ꦄꦴꦏꦴꦫꦺꦴ, ꦄꦮꦶꦥ꧀ꦦꦴꦫꦶꦏꦠꦴꦠꦶ ꦄꦠ꧀ꦡꦺꦴ.

ꦕꦺꦠꦱꦺꦴ ꦄꦮꦹꦥꦱꦩꦺꦴꦠꦶ ꦕꦶꦠ꧀ꦠꦱ꧀ꦱ ꦄꦮꦹꦥꦱꦤ꧀ꦠꦠꦴ ꦄꦱꦤ꧀ꦤꦶꦱꦶꦤ꧀ꦤꦨꦴꦮꦺꦴ. ꦠꦺꦤꦴꦲ – ‘‘ꦄꦮꦹꦥꦱꦤ꧀ꦠꦴꦏꦴꦫꦺꦴ’’ꦠꦶ. ꦄꦠ꧀ꦡꦠꦺꦴ ꦥꦤꦺꦠꦤ꧀ꦠꦶ ꦱ꧀ꦮꦴꦪꦁ ꦄꦮꦹꦥꦱꦤ꧀ꦠꦴꦏꦴꦫꦺꦴ ꦮꦶꦏ꧀ꦑꦺꦥꦱꦨꦴꦮꦠ꧀ꦠꦴ ꦮꦶꦏ꧀ꦑꦺꦥꦲꦺꦠꦸꦠꦴꦪ ꦕ ꦄꦠ꧀ꦡꦠꦺꦴ ꦌꦠꦁ ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦩꦺꦮ.

ꦮꦶꦕꦶꦏꦶꦕ꧀ꦖꦴꦪ ꦄꦴꦫꦩ꧀ꦩꦟꦣꦩ꧀ꦩꦴ ꦤꦴꦩ ‘‘ꦧꦸꦢ꧀ꦣꦺ ꦏꦔ꧀ꦑꦠꦷ’’ꦠꦶꦄꦴꦢꦶꦤꦴ ꦄꦴꦒꦠꦄꦛ꧀ꦜꦏꦔ꧀ꦑꦴꦮꦠ꧀ꦡꦸꦨꦹꦠꦴ ꦣꦩ꧀ꦩꦴ. ꦪꦱ꧀ꦩꦴ ꦮꦶꦕꦶꦏꦶꦕ꧀ꦖꦴ ꦧ꧀ꦪꦴꦥꦴꦢꦴꦢꦪꦺꦴ ꦮꦶꦪ ꦄꦤꦸ ꦄꦤꦸ ꦈꦒ꧀ꦒꦲꦟꦥꦕ꧀ꦕꦪꦴ ꦈꦥ꧀ꦥꦗ꧀ꦗꦠꦶ, ꦠꦱ꧀ꦩꦴ ꦏꦔ꧀ꦑꦴꦛ꧀ꦜꦴꦤꦷꦪꦁ ꦄꦴꦫꦩ꧀ꦩꦟꦩꦺꦮ ꦢꦱ꧀ꦱꦶꦠꦁ ‘‘ꦮꦶꦕꦶꦏꦶꦕ꧀ꦖꦴꦪ ꦄꦴꦫꦩ꧀ꦩꦟꦣꦩ꧀ꦩꦴ’’ꦠꦶ. ꦪꦱ꧀ꦩꦴ ꦥꦸꦫꦶꦩꦸꦥ꧀ꦥꦤ꧀ꦤꦴ ꦮꦶꦕꦶꦏꦶꦕ꧀ꦖꦴ ꦥꦕ꧀ꦖꦴ ꦮꦶꦕꦶꦏꦶꦕ꧀ꦖꦴꦪ ꦥꦕ꧀ꦕꦪꦺꦴ ꦲꦺꦴꦠꦶ, ꦠꦱ꧀ꦩꦴ ꦮꦶꦕꦶꦏꦶꦕ꧀ꦖꦴꦥꦶ ꦮꦶꦕꦶꦏꦶꦕ꧀ꦖꦴꦛ꧀ꦜꦴꦤꦷꦪꦣꦩ꧀ꦩꦴ ꦮꦺꦢꦶꦠꦧ꧀ꦧꦴ. ꦠꦠ꧀ꦫꦴꦪꦁ ꦮꦕꦤꦠ꧀ꦡꦺꦴ – ꦠꦶꦛ꧀ꦜꦤ꧀ꦠꦶ ꦥꦮꦠ꧀ꦠꦤ꧀ꦠꦶ ꦌꦠ꧀ꦡꦴꦠꦶ ꦜꦴꦤꦷꦪꦴ, ꦮꦶꦕꦶꦏꦶꦕ꧀ꦖꦴ ꦌꦮ ꦜꦴꦤꦷꦪꦴ ꦮꦶꦕꦶꦏꦶꦕ꧀ꦖꦴꦛ꧀ꦜꦴꦤꦷꦪꦴ. ꦄꦛ꧀ꦜꦏꦡꦴꦪꦁ ꦥꦤ ꦄꦴꦫꦩ꧀ꦩꦟꦱ꧀ꦱꦥꦶ ꦠꦠ꧀ꦡ ꦮꦶꦱꦺꦱꦥꦕ꧀ꦕꦪꦠꦁ ꦈꦥꦴꦢꦴꦪ ‘‘ꦏꦴꦩꦕ꧀ꦖꦤ꧀ꦢꦺꦴ ꦮꦶꦕꦶꦏꦶꦕ꧀ꦖꦴꦠꦶ ꦆꦩꦺ ꦢ꧀ꦮꦺ ꦣꦩ꧀ꦩꦴ ꦄꦴꦫꦩ꧀ꦩꦟꦺꦤ ꦏꦡꦶꦠꦴ’’ꦠꦶ ꦮꦸꦠ꧀ꦠꦁ. ꦱꦸꦨꦤꦶꦩꦶꦠ꧀ꦠꦱ꧀ꦱ ꦲꦶ ꦥꦕ꧀ꦕꦪꦨꦴꦮꦩꦠ꧀ꦠꦁ ꦱꦤ꧀ꦣꦴꦪꦺꦠꦁ ꦮꦸꦠ꧀ꦠꦁ, ꦠꦡꦴꦥꦶ ꦪꦡꦴ ‘‘ꦥꦛꦶꦓꦩ꧀ꦥꦶ ꦥꦛꦶꦓꦤꦶꦩꦶꦠ꧀ꦠ’’ꦤ꧀ꦠꦶ ꦏꦠ꧀ꦮꦴ ‘‘ꦧ꧀ꦪꦴꦥꦴꦢꦺꦴ ꦈꦥꦤꦶꦱ꧀ꦱꦪꦺꦤ ꦏꦡꦶꦠꦺꦴ’’ꦠꦶ ꦮꦸꦠ꧀ꦠꦁ, ꦌꦮꦁ ꦱꦸꦨꦩ꧀ꦥꦶ ꦱꦸꦨꦤꦶꦩꦶꦠ꧀ꦠꦤ꧀ꦠꦶ ꦏꦠ꧀ꦮꦴ ꦏꦴꦩꦕ꧀ꦖꦤ꧀ꦢꦺꦴ ꦈꦥꦤꦶꦱ꧀ꦱꦪꦺꦤ ꦏꦡꦶꦠꦺꦴꦠꦶ ꦱꦏ꧀ꦏꦴ ꦮꦶꦚ꧀ꦚꦴꦠꦸꦁ. ꦱꦺꦱꦴ ꦡꦶꦤꦩꦶꦢ꧀ꦣꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦴꦤꦶ. ꦠꦠ꧀ꦡ ꦡꦶꦤꦩꦶꦢ꧀ꦣꦁ ꦄꦚ꧀ꦚꦩꦚ꧀ꦚꦁ ꦱꦲꦗꦴꦠꦴꦢꦶꦮꦱꦺꦤ ꦥꦕ꧀ꦕꦪꦺꦴ, ꦠꦡꦴ ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦤ꧀ꦠꦶ. ꦈꦨꦪꦺꦱꦩ꧀ꦥꦶ ꦈꦥꦤꦶꦱ꧀ꦱꦪꦏꦺꦴꦛꦶꦪꦴ ꦥꦕ꧀ꦕꦪꦨꦴꦮꦺ ꦮꦠ꧀ꦠꦧ꧀ꦧꦩꦺꦮ ꦤꦠ꧀ꦡꦷꦠꦶ ꦄꦴꦲ ‘‘ꦱꦲꦗꦴꦠꦺꦤ ꦕ ꦈꦥꦤꦶꦱ꧀ꦱꦪꦺꦤ ꦕꦴ’’ꦠꦶ.

ꦪꦱ꧀ꦩꦴ ꦱꦠꦶ ꦤꦴꦩ ‘‘ꦕꦠ꧀ꦠꦴꦫꦺꦴ ꦱꦠꦶꦥꦛ꧀ꦜꦴꦤꦴ’’ꦠꦶꦄꦴꦢꦶꦤꦴ ꦠꦺꦱꦁ ꦠꦺꦱꦁ ꦣꦩ꧀ꦩꦴꦤꦁ ꦄꦤꦸꦱ꧀ꦱꦫꦟꦮꦱꦺꦤ ꦮꦠ꧀ꦠꦠꦶ, ꦠꦱ꧀ꦩꦴ ꦠꦺ ꦣꦩ꧀ꦩꦴ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦛ꧀ꦜꦴꦤꦷꦪꦴ ꦤꦴꦩ. ꦭꦺꦴꦏꦸꦠ꧀ꦠꦫꦣꦩ꧀ꦩꦺ ꦕ ꦄꦤꦸꦱ꧀ꦱꦮꦴꦢꦶꦮꦱꦺꦤ ꦒꦲꦺꦠ꧀ꦮꦴ ꦠꦡꦴ ꦥꦮꦠ꧀ꦠꦠꦺꦮ. ꦠꦺꦤ ꦮꦸꦠ꧀ꦠꦁ ‘‘ꦱꦠꦶꦪꦴ’’ꦠꦶꦄꦴꦢꦶ.

ꦏꦺꦴꦱꦭ꧀ꦭꦁ ꦮꦸꦕ꧀ꦕꦠꦶ ꦥꦚ꧀ꦚꦴ, ꦠꦠꦺꦴ ꦈꦥ꧀ꦥꦤ꧀ꦤꦴ ꦏꦺꦴꦱꦭ꧀ꦭꦱꦩ꧀ꦨꦹꦠꦴ. ꦄꦤꦮꦗ꧀ꦗꦱꦸꦑꦮꦶꦥꦴꦏꦴꦠꦶ ꦄꦤꦮꦗ꧀ꦗꦴ ꦲꦸꦠ꧀ꦮꦴ ꦱꦸꦑꦮꦶꦥꦴꦏꦴ ꦮꦶꦥꦕ꧀ꦕꦤꦏꦴ. ꦥꦢꦢ꧀ꦮꦪꦺꦤ ꦥꦕ꧀ꦕꦪꦠꦺꦴ ꦱꦨꦴꦮꦠꦺꦴ ꦏꦶꦕ꧀ꦕꦠꦺꦴ ꦦꦭꦠꦺꦴ ꦏꦸꦱꦭꦣꦩ꧀ꦩꦁ ꦢꦱ꧀ꦱꦺꦠꦶ. ꦄꦏꦸꦱꦭꦤꦶꦢ꧀ꦢꦺꦱꦺꦥꦶ ꦌꦱꦺꦮ ꦤꦪꦺꦴ. ꦱꦴꦮꦗ꧀ꦗꦴꦠꦶ ꦒꦴꦫꦪ꧀ꦲꦴ. ꦄꦤꦮꦗ꧀ꦗꦴꦠꦶ ꦄꦒꦴꦫꦪ꧀ꦲꦴ. ꦲꦷꦤꦴ ꦭꦴꦩꦏꦴ. ꦥꦟꦷꦠꦴ ꦱꦺꦛ꧀ꦜꦴ. ꦏꦟ꧀ꦲꦴ ꦏꦴꦭ꦳ꦏꦴ ꦄꦱꦸꦢ꧀ꦣꦴ. ꦱꦸꦏ꧀ꦏꦴ ꦎꦢꦴꦠꦴ ꦱꦸꦢ꧀ꦣꦴ. ꦥꦛꦶꦨꦴꦒ-ꦱꦢ꧀ꦢꦺꦴ ꦥꦜꦩꦺ ꦮꦶꦏꦥ꧀ꦥꦺ ꦱꦢꦶꦱꦏꦺꦴꦛ꧀ꦜꦴꦱꦠ꧀ꦡꦺꦴ, ꦢꦸꦠꦶꦪꦺ ꦥꦛꦶꦥꦏ꧀ꦑꦏꦺꦴꦛ꧀ꦜꦴꦱꦠ꧀ꦡꦺꦴ, ꦠꦠꦶꦪꦺ ꦤꦶꦒ꧀ꦒꦲꦺꦠꦧ꧀ꦧꦥꦛꦶꦥꦏ꧀ꦑꦏꦺꦴꦛ꧀ꦜꦴꦱꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ.

ꦏꦸꦱꦭꦏꦶꦫꦶꦪꦴꦪ ꦄꦴꦢꦶꦏꦩ꧀ꦩꦨꦴꦮꦺꦤ ꦥꦮꦠ꧀ꦠꦮꦷꦫꦶꦪꦁ ꦣꦶꦠꦶꦱꦨꦴꦮꦠꦴꦪ ꦣꦴꦠꦹꦠꦶ ꦮꦸꦠ꧀ꦠꦤ꧀ꦠꦶ ꦄꦴꦲ ‘‘ꦄꦴꦫꦩ꧀ꦨꦣꦴꦠꦹꦠꦶ ꦥꦜꦩꦴꦫꦩ꧀ꦨꦮꦷꦫꦶꦪ’’ꦤ꧀ꦠꦶ. ꦭꦢ꧀ꦣꦴꦱꦺꦮꦤꦁ ꦮꦷꦫꦶꦪꦁ ꦧꦭꦥ꧀ꦥꦠ꧀ꦠꦁ ꦲꦸꦠ꧀ꦮꦴ ꦥꦛꦶꦥꦏ꧀ꦑꦁ ꦮꦶꦣꦩꦠꦷꦠꦶ ꦄꦴꦲ – ‘‘ꦤꦶꦏ꧀ꦏꦩꦣꦴꦠꦹꦠꦶ ꦏꦺꦴꦱꦗ꧀ꦗꦠꦺꦴ ꦤꦶꦏ꧀ꦑꦤ꧀ꦠꦠ꧀ꦠꦴ ꦠꦠꦺꦴ ꦧꦭꦮꦠꦫ’’ꦤ꧀ꦠꦶ. ꦄꦣꦶꦩꦠ꧀ꦠꦴꦣꦶꦩꦠ꧀ꦠꦠꦫꦴꦤꦁ ꦥꦛꦶꦥꦏ꧀ꦑꦣꦩ꧀ꦩꦴꦤꦁ ꦮꦶꦣꦩꦤꦱꦩꦠ꧀ꦡꦁ ꦥꦛꦸꦥꦛꦸꦠꦫꦴꦢꦶꦨꦴꦮꦥ꧀ꦥꦠ꧀ꦠꦁ ꦲꦺꦴꦠꦷꦠꦶ ꦄꦴꦲ – ‘‘ꦥꦫꦏ꧀ꦏꦩꦣꦴꦠꦹꦠꦶ ꦥꦫꦁ ꦥꦫꦁ ꦜꦴꦤꦁ ꦄꦏ꧀ꦏꦩꦤꦠꦴꦪ ꦠꦠꦺꦴꦥꦶ ꦧꦭꦮꦠꦫ’’ꦤ꧀ꦠꦶ.

ꦠꦶꦛ꧀ꦜꦠꦶ ꦥꦮꦠ꧀ꦠꦠꦶ ꦌꦠ꧀ꦡꦴꦠꦶ ꦜꦴꦤꦷꦪꦴ. ꦄꦴꦫꦩ꧀ꦩꦟꦣꦩ꧀ꦩꦴ, ꦥꦷꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦜꦴꦤꦷꦪꦴꦠꦶ ꦥꦷꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦛ꧀ꦜꦴꦤꦷꦪꦴꦠꦶ ‘‘ꦥꦷꦠꦶꦪꦴ ꦄꦴꦫꦩ꧀ꦩꦟꦣꦩ꧀ꦩꦴ’’ꦠꦶ ꦮꦸꦠ꧀ꦠꦁ. ꦪꦱ꧀ꦩꦴ ꦄꦥꦫꦴꦥꦫꦸꦥ꧀ꦥꦠ꧀ꦠꦶꦪꦴ ꦥꦷꦠꦶꦥꦶ ꦠꦡꦴ ꦮꦠ꧀ꦠꦧ꧀ꦧꦠꦁ ꦭꦨꦠꦷꦠꦶ ꦮꦸꦠ꧀ꦠꦁ ꦮꦶꦱꦸꦢ꧀ꦣꦶꦩꦒ꧀ꦒꦺ ‘‘ꦥꦷꦠꦶꦪꦴ ꦌꦮ ꦠꦁ ꦤꦴꦩ’’ꦤ꧀ꦠꦶ. ꦢꦫꦡꦥꦱ꧀ꦱꦢ꧀ꦣꦷꦠꦶ ꦢꦫꦡꦺꦴ ꦏꦶꦭꦺꦱꦥꦫꦶꦭ꦳ꦴꦲꦺꦴ, ꦱꦺꦴ ꦥꦱ꧀ꦱꦩ꧀ꦨꦠꦶ ꦌꦠꦴꦪꦴꦠꦶ ꦢꦫꦡꦥꦱ꧀ꦱꦢ꧀ꦣꦶ, ꦏꦴꦪꦥꦱ꧀ꦱꦢ꧀ꦣꦶꦪꦴ ꦮꦺꦢꦤꦴꦢꦶꦑꦤ꧀ꦣꦠ꧀ꦠꦪꦱ꧀ꦱ ꦮꦶꦪ ꦫꦹꦥꦏꦴꦪꦱ꧀ꦱꦥꦶ ꦥꦱ꧀ꦱꦩ꧀ꦨꦤꦁ ꦲꦺꦴꦠꦶ, ꦕꦶꦠ꧀ꦠꦥꦱ꧀ꦱꦢ꧀ꦣꦶꦪꦴ ꦕꦶꦠ꧀ꦠꦱ꧀ꦱꦺꦮ ꦥꦱ꧀ꦱꦩ꧀ꦨꦤꦁ, ꦠꦠꦺꦴ ꦌꦮꦺꦠ꧀ꦡ ꦨꦒꦮꦠꦴ ꦭꦲꦸꦠꦴꦢꦷꦤꦁ ꦮꦶꦪ ꦢꦸꦮꦶꦣꦠꦴ ꦮꦸꦠ꧀ꦠꦴ. ꦠꦡꦴ ꦱꦩꦴꦲꦶꦠꦴꦏꦴꦫꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦒꦪ꧀ꦲꦩꦴꦤꦺꦴ ꦱꦩꦡꦺꦴꦮ ꦱꦩꦡꦤꦶꦩꦶꦠ꧀ꦠꦁ, ꦠꦱ꧀ꦱ ꦄꦴꦫꦩ꧀ꦩꦟꦨꦹꦠꦁ ꦥꦛꦶꦨꦴꦒꦤꦶꦩꦶꦠ꧀ꦠꦩ꧀ꦥꦶ. ꦮꦶꦮꦶꦣꦁ ꦄꦒ꧀ꦒꦁ ꦌꦠꦱ꧀ꦱꦴꦠꦶ ꦧ꧀ꦪꦒ꧀ꦒꦺꦴ, ꦮꦶꦏ꧀ꦑꦺꦥꦺꦴ. ꦠꦡꦴ ꦲꦶ ꦱꦺꦴ ꦄꦤꦮꦛ꧀ꦜꦴꦤꦫꦱꦺꦴ ꦨꦤ꧀ꦠꦠꦴꦥꦕ꧀ꦕꦸꦥꦛ꧀ꦜꦴꦤꦺꦴ ꦮꦸꦠ꧀ꦠꦺꦴ. ꦌꦏꦒ꧀ꦒꦨꦴꦮꦠꦺꦴ ꦧ꧀ꦪꦒ꧀ꦒꦥꦛꦶꦥꦏ꧀ꦑꦺꦴꦠꦶ ꦄꦧ꧀ꦪꦒ꧀ꦒꦺꦴ, ꦱꦩꦴꦣꦶ, ꦱꦺꦴ ꦌꦮ ꦤꦶꦩꦶꦠ꧀ꦠꦤ꧀ꦠꦶ ꦥꦸꦧ꧀ꦧꦺ ꦮꦶꦪ ꦮꦠ꧀ꦠꦧ꧀ꦧꦁ. ꦠꦺꦤꦴꦲ ‘‘ꦠꦱ꧀ꦱꦺꦮ ꦮꦺꦮꦕꦤ’’ꦤ꧀ꦠꦶ.

ꦪꦺꦴ ꦄꦴꦫꦩ꧀ꦩꦟꦺ ꦆꦛ꧀ꦜꦴꦤꦶꦛ꧀ꦜꦴꦏꦴꦫꦁ ꦄꦤꦴꦢꦶꦪꦶꦠ꧀ꦮꦴ ꦒꦲꦺꦠꦧ꧀ꦧꦺꦴ ꦩꦗ꧀ꦙꦠ꧀ꦠꦴꦏꦴꦫꦺꦴ, ꦪꦺꦴ ꦕ ꦥꦸꦧ꧀ꦧꦺ ꦈꦥꦺꦏ꧀ꦑꦴꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦮꦱꦺꦤ ꦈꦥ꧀ꦥꦤ꧀ꦤꦺꦴ ꦩꦗ꧀ꦙꦠ꧀ꦠꦴꦏꦴꦫꦺꦴ, ꦢꦸꦮꦶꦣꦺꦴꦥꦶ ꦱꦺꦴ ꦈꦥꦺꦏ꧀ꦑꦴꦪ ꦄꦴꦫꦩ꧀ꦩꦟꦣꦩ꧀ꦩꦺꦴꦠꦶ ꦄꦣꦶꦥ꧀ꦥꦺꦠꦺꦴꦠꦶ ꦄꦴꦲ – ‘‘ꦄꦠ꧀ꦡꦠꦺꦴ ꦥꦤ ꦩꦗ꧀ꦙꦠ꧀ꦠꦴꦏꦴꦫꦺꦴ ꦈꦥꦺꦏ꧀ꦑꦴꦛ꧀ꦜꦴꦤꦷꦪꦴ ꦣꦩ꧀ꦩꦴꦠꦶ ꦮꦺꦢꦶꦠꦧ꧀ꦧꦺꦴ’’ꦠꦶ. ꦄꦴꦫꦩ꧀ꦩꦟꦺꦤ ꦏꦡꦶꦠꦴ ꦄꦴꦫꦩ꧀ꦩꦟꦱ꧀ꦱꦺꦮ ꦠꦺꦱꦁ ꦮꦶꦱꦺꦱꦥꦕ꧀ꦕꦪꦨꦴꦮꦠꦺꦴ. ꦱꦺꦱꦴꦠꦶ ꦮꦷꦫꦶꦪꦴꦢꦪꦺꦴ ꦕꦠ꧀ꦠꦴꦫꦺꦴ ꦣꦩ꧀ꦩꦴ. ꦠꦺꦱꦚ꧀ꦲꦶ ꦈꦥꦤꦶꦱ꧀ꦱꦪꦺꦴꦮ ꦱꦴꦠꦶꦱꦪꦺꦴ ꦆꦕ꧀ꦖꦶꦠꦧ꧀ꦧꦺꦴꦠꦶ.

ꦏꦴꦪꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧓. ꦱꦷꦭꦱꦸꦠ꧀ꦠꦮꦟ꧀ꦟꦤꦴ

꧑꧘꧔. ꦑꦷꦟꦴꦱꦮꦱ꧀ꦱ ꦭꦺꦴꦏꦸꦠ꧀ꦠꦫꦁ ꦱꦷꦭꦁ ꦤꦴꦩ ꦩꦒ꧀ꦒꦦꦭꦥꦫꦶꦪꦴꦥꦤ꧀ꦤꦴ ꦱꦩ꧀ꦩꦴꦮꦴꦕꦴꦏꦩ꧀ꦩꦤ꧀ꦠꦴꦗꦷꦮꦴ ꦱꦷꦭꦭꦏ꧀ꦑꦟꦥ꧀ꦥꦠ꧀ꦠꦴ ꦠꦢꦚ꧀ꦚꦺ ꦕꦺꦠꦤꦴꦢꦪꦺꦴ. ꦭꦺꦴꦏꦶꦪꦁ ꦥꦤ ꦏꦶꦫꦶꦪꦴꦧ꧀ꦪꦴꦏꦠꦕꦶꦠ꧀ꦠꦥꦫꦶꦪꦴꦥꦤ꧀ꦤꦁ ꦕꦴꦫꦶꦠ꧀ꦠꦱꦷꦭꦁ, ꦮꦴꦫꦶꦠ꧀ꦠꦱꦷꦭꦱ꧀ꦱ ꦥꦤ ꦱꦩ꧀ꦨꦮꦺꦴ ꦌꦮ ꦤꦠ꧀ꦡꦶ ꦮꦶꦫꦩꦟꦮꦱꦺꦤ ꦥꦮꦠ꧀ꦠꦶꦪꦴ ꦄꦨꦴꦮꦠꦺꦴ. ‘‘ꦥꦸꦧ꧀ꦧꦨꦴꦒꦱꦷꦭꦁ ꦭꦺꦴꦏꦶꦪꦱꦷꦭ’’ꦤ꧀ꦠꦶ ꦏꦺꦕꦶ.

ꦕꦏ꧀ꦑꦸꦢꦱ꧀ꦱꦤꦤ꧀ꦠꦶ ꦕꦏ꧀ꦑꦹꦲꦶ ꦢꦱ꧀ꦱꦤꦁ. ꦭꦏ꧀ꦑꦟꦱ꧀ꦱ ꦢꦱ꧀ꦱꦤꦤ꧀ꦠꦶ ꦱꦨꦴꦮꦣꦩ꧀ꦩꦴꦤꦁ ꦱꦔ꧀ꦑꦠꦴꦤꦁ ꦥꦕ꧀ꦕꦠ꧀ꦠꦭꦏ꧀ꦑꦟꦱ꧀ꦱ ꦚꦴꦠꦥꦫꦶꦚ꧀ꦚꦴꦪ, ꦄꦤꦶꦕ꧀ꦕꦴꦢꦶꦱꦴꦩꦚ꧀ꦚꦭꦏ꧀ꦑꦟꦱ꧀ꦱ ꦠꦷꦫꦟꦥꦫꦶꦚ꧀ꦚꦴꦪ ꦢꦱ꧀ꦱꦤꦁ. ꦥꦗꦲꦤ꧀ꦠꦺꦴꦥꦶ ꦲꦶ ꦠꦺ ꦥꦲꦴꦠꦧ꧀ꦧꦴꦏꦴꦫꦠꦺꦴ ꦥꦱ꧀ꦱꦠꦶ ꦤꦴꦩ. ꦤꦶꦧ꧀ꦧꦴꦤꦱ꧀ꦱ ꦠꦡꦭꦏ꧀ꦑꦟꦁ ꦩꦒ꧀ꦒꦦꦭꦺꦲꦶ ꦢꦱ꧀ꦱꦤꦁ, ꦠꦁ ꦥꦤ ꦥꦛꦶꦮꦶꦗ꧀ꦙꦤꦁ. ꦙꦴꦤꦺꦤ ꦥꦡꦮꦷꦏꦱꦶꦟꦴꦢꦷꦤꦁ, ꦄꦨꦶꦚ꧀ꦚꦴꦲꦶ ꦫꦹꦥꦴꦤꦁ ꦢꦱ꧀ꦱꦤꦩ꧀ꦥꦶ ꦚꦴꦟꦢꦱ꧀ꦱꦤꦩꦺꦮ. ꦕꦏ꧀ꦑꦸꦢꦱ꧀ꦱꦤꦁ ꦄꦣꦶꦥ꧀ꦥꦺꦠꦁ ꦱꦮꦤꦥꦪꦶꦫꦸꦥꦴꦱꦤꦴꦤꦁ ꦥꦫꦠꦺꦴ ꦒꦲꦶꦠꦠ꧀ꦠꦴ. ꦥꦚ꧀ꦲꦥꦪꦶꦫꦸꦥꦴꦱꦤꦤ꧀ꦠꦶ ꦥꦚ꧀ꦲꦥꦸꦕ꧀ꦖꦤꦮꦱꦺꦤ ꦥꦪꦶꦫꦸꦥꦴꦱꦤꦁ ꦄꦚ꧀ꦚꦏꦩ꧀ꦩꦠ꧀ꦡꦴꦪ ꦈꦥꦱꦔ꧀ꦏꦩꦤꦱ꧀ꦱ ꦏꦺꦮꦭꦁ ꦈꦥꦱꦔ꧀ꦏꦩꦤꦺꦤꦺꦮ ꦗꦺꦴꦠꦶꦠꦠ꧀ꦠꦴ.

ꦄꦫꦶꦪꦴꦤꦁ ꦄꦤꦸꦱ꧀ꦱꦠꦶ ꦤꦴꦩ ꦒꦸꦟꦮꦱꦺꦤ, ꦠꦠ꧀ꦡꦴꦥꦶ ꦭꦢ꧀ꦣꦎꦮꦴꦢꦴꦮꦗ꧀ꦗꦤꦩꦸꦑꦺꦤ ꦪꦡꦴꦨꦹꦠꦱꦷꦭꦴꦢꦶꦒꦸꦟꦴꦤꦸꦱ꧀ꦱꦫꦟꦤ꧀ꦠꦶ ꦢꦱ꧀ꦱꦺꦠꦸꦁ ‘‘ꦙꦴꦤꦮꦶꦥꦱ꧀ꦱꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦄꦚ꧀ꦚꦺꦱꦁꦪꦺꦮ ꦱꦤ꧀ꦠꦶꦏꦺꦠꦶ ꦄꦫꦶꦪꦺꦲꦶ ꦄꦚ꧀ꦚꦺꦱꦁ ꦱꦴꦱꦤꦶꦏꦴꦤꦁꦪꦺꦮ ꦱꦤ꧀ꦠꦶꦏꦺ. ꦠꦺꦤꦴꦲ – ‘‘ꦄꦤꦸꦥꦧ꧀ꦧꦗ꧀ꦗꦴ ꦤꦴꦩꦴ’’ꦠꦶ. ꦄꦚ꧀ꦚꦺꦱꦹꦠꦶ ꦱꦴꦱꦤꦶꦏꦺꦲꦶ ꦄꦚ꧀ꦚꦺꦱꦸ ꦠꦴꦥꦱꦥꦫꦶꦧ꧀ꦧꦴꦗꦏꦴꦢꦷꦱꦸ. ꦠꦠ꧀ꦡ ꦲꦶ ꦥꦧ꧀ꦧꦗ꧀ꦗꦴ ꦄꦫꦶꦪꦴꦤꦁ ꦄꦤꦸꦥꦧ꧀ꦧꦗ꧀ꦗꦴ ꦤꦴꦩ ꦤ ꦲꦺꦴꦠꦷꦠꦶ ꦮꦸꦠ꧀ꦠꦁ.

ꦱꦠꦱꦲꦱ꧀ꦱꦩꦠ꧀ꦠꦴ ꦄꦲꦺꦱꦸꦁ ꦱꦩꦤ꧀ꦠꦥꦴꦱꦴꦢꦶꦏꦠ꧀ꦠꦴ ꦩꦲꦴꦡꦺꦫꦱ꧀ꦱ. ꦭꦔ꧀ꦏꦴꦢꦷꦥꦺꦠꦶ ꦤꦶꦱ꧀ꦱꦪꦱꦷꦱꦺꦤ ꦤꦶꦱ꧀ꦱꦶꦠꦱꦭ꧀ꦭꦏ꧀ꦑꦟꦁ. ꦤ ꦲꦶ ꦥꦧ꧀ꦧꦗ꧀ꦗꦴ ꦢꦷꦥꦥꦛꦶꦭꦢ꧀ꦣꦴ, ꦄꦡ ꦑꦺꦴ ꦢꦷꦥꦤꦶꦮꦴꦱꦶꦄꦴꦕꦫꦶꦪꦥꦛꦶꦭꦢ꧀ꦣꦴ. ꦩꦲꦶꦤ꧀ꦢ…ꦥꦺ… ꦥꦧ꧀ꦧꦗꦤ꧀ꦠꦶ ꦤꦴꦩ ꦠꦱ꧀ꦱ ꦥꦫꦶꦮꦴꦫꦠꦴꦪ ꦥꦧ꧀ꦧꦗ꧀ꦗꦴꦪꦴꦠꦶ.

ꦱꦫꦠꦷꦠꦶ ꦠꦁ ꦎꦮꦴꦢꦴꦤꦸꦱꦴꦱꦤꦶꦣꦩ꧀ꦩꦁ ꦕꦶꦤ꧀ꦠꦺꦠꦶ ꦕꦶꦠ꧀ꦠꦺ ꦏꦫꦺꦴꦠꦶ. ꦮꦶꦠꦏ꧀ꦏꦴꦲꦠꦁ ꦏꦫꦺꦴꦠꦷꦠꦶ ꦥꦸꦤꦥ꧀ꦥꦸꦤꦁ ꦥꦫꦶꦮꦶꦠꦏ꧀ꦏꦤꦺꦤ ꦠꦢꦠ꧀ꦡꦁ ꦮꦶꦠꦏ꧀ꦏꦤꦶꦥ꧀ꦦꦴꦢꦶꦠꦁ ꦏꦫꦺꦴꦠꦶ. ꦄꦴꦫꦢ꧀ꦣꦺꦴ ꦲꦺꦴꦠꦷꦠꦶ ꦱꦩ꧀ꦥꦴꦢꦶꦠꦺꦴ ꦲꦺꦴꦠꦶ. ꦠꦁ ꦥꦤ ꦱꦩ꧀ꦥꦴꦢꦤꦁ ꦥꦴꦫꦶꦥꦹꦫꦶ ꦌꦮꦴꦠꦶ ꦄꦴꦲ ‘‘ꦥꦫꦶꦥꦸꦟ꧀ꦟꦺꦴ ꦲꦺꦴꦠꦷ’’ꦠꦶ. ꦠꦠ꧀ꦡꦴꦠꦶ ꦪꦡꦴꦮꦸꦠ꧀ꦠꦺ ꦣꦩ꧀ꦩꦺ. ꦚꦴꦟꦕꦴꦫꦮꦱꦺꦤꦴꦠꦶ ꦚꦴꦟꦱ꧀ꦱ ꦥꦮꦠ꧀ꦠꦤꦮꦱꦺꦤ. ꦠꦺꦱꦁ ꦠꦺꦱꦁ ꦣꦩ꧀ꦩꦴꦤꦤ꧀ꦠꦶ ꦠꦱ꧀ꦩꦶꦁ ꦠꦱ꧀ꦩꦶꦁ ꦎꦮꦴꦢꦣꦩ꧀ꦩꦺ ꦄꦴꦒꦠꦴꦤꦁ ꦫꦹꦥꦴꦫꦹꦥꦣꦩ꧀ꦩꦴꦤꦁ. ꦭꦏ꧀ꦑꦟꦤ꧀ꦠꦶ ꦮꦶꦱꦺꦱꦭꦏ꧀ꦑꦟꦁ ꦱꦴꦩꦚ꧀ꦚꦭꦏ꧀ꦑꦟꦚ꧀ꦕ. ꦥꦮꦶꦕꦶꦤꦠꦷꦠꦶ ‘‘ꦆꦢꦁ ꦫꦹꦥꦁ ꦌꦠ꧀ꦠꦏꦁ ꦫꦹꦥ’’ꦤ꧀ꦠꦶꦄꦴꦢꦶꦤꦴ ꦮꦶꦕꦪꦁ ꦄꦴꦥꦗ꧀ꦗꦠꦶ. ꦚꦴꦟꦚ꧀ꦕ ꦫꦺꦴꦥꦺꦠꦷꦠꦶ ‘‘ꦄꦤꦶꦕ꧀ꦕꦁ ꦕꦭꦁ ꦥꦭꦺꦴꦏꦁ ꦥꦨꦔ꧀ꦒꦹ’’ꦠꦶꦄꦴꦢꦶꦤꦴ ꦚꦴꦟꦁ ꦥꦮꦠ꧀ꦠꦺꦠꦶ. ꦮꦷꦩꦁꦱꦤꦁ…ꦥꦺ… ꦄꦴꦥꦗ꧀ꦗꦠꦷꦠꦶ ꦫꦹꦥꦱꦠ꧀ꦠꦏꦴꦫꦹꦥꦱꦠ꧀ꦠꦏꦏ꧀ꦏꦩꦺꦤ ꦮꦶꦥꦱ꧀ꦱꦤꦁ ꦥꦕ꧀ꦕꦏ꧀ꦑꦠꦺꦴ ꦮꦶꦪ ꦄꦤꦶꦕ꧀ꦕꦠꦴꦢꦷꦤꦁ ꦢꦱ꧀ꦱꦤꦁ ꦱꦩ꧀ꦩꦱꦤꦁ ꦄꦴꦥꦗ꧀ꦗꦠꦶ.

ꦈꦨꦪꦩ꧀ꦥꦺꦠꦤ꧀ꦠꦶ ꦦꦭꦴꦤꦶꦱꦁꦱꦴꦠꦶ ꦮꦸꦠ꧀ꦠꦢ꧀ꦮꦪꦁ. ꦄꦠ꧀ꦡꦠꦺꦴ ꦌꦏꦁ ꦥꦫꦶꦪꦴꦪꦱꦢ꧀ꦢꦠ꧀ꦠꦴ. ꦥꦛꦶꦏꦕ꧀ꦕꦴꦠꦶ ꦥꦒꦺꦮ. ꦩꦫꦟꦏꦴꦭꦺꦠꦶ ꦩꦫꦟꦏꦴꦭꦱꦩꦷꦥꦺ. ꦱꦩꦷꦥꦠ꧀ꦡꦺ ꦲꦶ ꦆꦢꦁ ꦨꦸꦩ꧀ꦩꦤ꧀ꦠꦶ ꦄꦴꦲ ‘‘ꦩꦫꦟꦱ꧀ꦱ ꦄꦴꦱꦤ꧀ꦤꦏꦴꦭꦺ’’ꦠꦶ.

ꦱꦺꦴ ꦠꦶꦮꦶꦣꦺꦴ ꦲꦺꦴꦠꦶ ꦚꦴꦟꦱ꧀ꦱ ꦠꦶꦏ꧀ꦑꦩꦗ꧀ꦙꦩꦸꦢꦸꦨꦴꦮꦺꦤ. ꦠꦺꦤꦴꦲ ‘‘ꦏꦥ꧀ꦥꦱꦲꦱ꧀ꦱꦴꦪꦸꦏꦺꦱꦹ’’ꦠꦶꦄꦴꦢꦶ. ꦈꦥꦲꦕ꧀ꦕꦥꦫꦶꦤꦶꦧ꧀ꦧꦴꦪꦷ ꦤꦴꦩ ꦄꦴꦪꦸꦮꦺꦩꦗ꧀ꦙꦁ ꦄꦠꦶꦏ꧀ꦏꦩꦶꦠ꧀ꦮꦴ ꦥꦫꦶꦤꦶꦧ꧀ꦧꦴꦪꦤꦠꦺꦴ. ꦪꦠ꧀ꦡ ꦏꦠ꧀ꦡꦕꦷꦠꦶ ꦄꦮꦶꦲꦴꦢꦷꦱꦸ ꦪꦠ꧀ꦡ ꦏꦠ꧀ꦡꦕꦶ. ꦱꦥ꧀ꦥꦪꦺꦴꦒꦺꦤꦴꦠꦶ ꦮꦶꦥꦱ꧀ꦱꦤꦴꦚꦴꦟꦱꦔ꧀ꦑꦴꦫꦱꦔ꧀ꦑꦴꦠꦺꦤ ꦥꦪꦺꦴꦒꦺꦤ, ꦱꦲ ꦮꦶꦥꦱ꧀ꦱꦤꦴꦥꦪꦺꦴꦒꦺꦤꦴꦠꦶ ꦄꦠ꧀ꦡꦺꦴ. ꦱꦸꦢ꧀ꦣꦴꦮꦴꦱꦨꦹꦩꦶꦪꦁ ꦈꦢ꧀ꦣꦁꦪꦺꦮ ꦩꦒ꧀ꦒꦱꦺꦴꦠꦺꦴ ꦌꦠꦱ꧀ꦱꦴꦠꦶ ꦈꦢ꧀ꦣꦁꦱꦺꦴꦠꦺꦴ. ꦥꦛꦶꦱꦤ꧀ꦣꦶꦮꦱꦺꦤ ꦄꦏꦤꦶꦛ꧀ꦜꦨꦮꦁ ꦒꦕ꧀ꦖꦠꦷꦠꦶ ꦄꦏꦤꦶꦛ꧀ꦜꦒꦴꦩꦷ.

ꦄꦮꦶꦲꦴꦢꦷꦱꦸ ꦮꦠ꧀ꦠꦩꦴꦤꦺꦴꦥꦶ ꦌꦏꦁꦱꦠꦺꦴ ꦈꦢ꧀ꦣꦁꦒꦩꦤꦴꦫꦲꦺꦴ ꦥꦸꦒ꧀ꦒꦭꦺꦴ ꦄꦏꦤꦶꦛ꧀ꦜꦒꦴꦩꦷ ꦌꦮ ꦤꦴꦩꦴꦠꦶ ꦮꦸꦠ꧀ꦠꦁ ‘‘ꦌꦏꦺꦴ ꦈꦢ꧀ꦣꦁꦱꦺꦴꦠꦺꦴ ꦄꦏꦤꦶꦛ꧀ꦜꦒꦴꦩꦷꦠꦶ ꦥꦚ꧀ꦕ ꦲꦺꦴꦤ꧀ꦠꦷ’’ꦠꦶ. ꦠꦺꦱꦤ꧀ꦠꦶ ꦤꦶꦢ꧀ꦣꦴꦫꦟꦺ ꦱꦴꦩꦶꦮꦕꦤꦁ. ꦈꦢ꧀ꦣꦁꦱꦺꦴꦠꦨꦴꦮꦠꦺꦴ ꦪꦢꦶꦥꦶ ꦲꦺꦛ꧀ꦜꦶꦩꦴꦢꦷꦱꦸꦥꦶ ꦄꦫꦶꦪꦨꦹꦩꦶ ꦤꦶꦧ꧀ꦧꦠ꧀ꦠꦠꦺꦮ, ꦠꦡꦴꦥꦶ ꦠꦠ꧀ꦡ ꦨꦹꦩꦷꦱꦸ ꦄꦴꦪꦸꦁ ꦄꦒ꧀ꦒꦲꦺꦠ꧀ꦮꦴ ꦄꦏꦤꦶꦛ꧀ꦜꦨꦮꦺ ꦄꦴꦪꦸꦮꦱꦺꦤꦺꦮ ꦱꦺꦴꦭ꦳ꦱꦏꦥ꧀ꦥꦱꦲꦱ꧀ꦱꦴꦪꦸꦏꦠꦴ ꦢꦛ꧀ꦜꦧ꧀ꦧꦴ. ‘‘ꦱꦠ꧀ꦠ ꦦꦭꦴ ꦱꦠ꧀ꦠꦴꦤꦶꦱꦁꦱꦴ ꦥꦴꦛꦶꦏꦔ꧀ꦑꦴ’’ꦠꦶ ꦮꦸꦠ꧀ꦠꦠ꧀ꦠꦴ ‘‘ꦄꦫꦲꦠ꧀ꦠꦩꦒ꧀ꦒꦱ꧀ꦱ ꦥꦸꦧ꧀ꦧꦨꦴꦒꦮꦶꦥꦱ꧀ꦱꦤꦴ ꦧꦺꦴꦗ꧀ꦙꦔ꧀ꦒꦴ ꦏꦡꦶꦠꦴ’’ꦠꦶ ꦮꦸꦠ꧀ꦠꦁ. ꦱꦠ꧀ꦠꦤ꧀ꦤꦩ꧀ꦥꦶ ꦱꦲꦨꦴꦮꦺꦴ ꦭꦧ꧀ꦨꦠꦷꦠꦶ ‘‘ꦄꦥꦸꦧ꧀ꦧꦁ ꦄꦕꦫꦶꦩꦁ ꦌꦏꦕꦶꦠ꧀ꦠꦏ꧀ꦑꦟꦶꦏꦴ’’ꦠꦶ ꦮꦸꦠ꧀ꦠꦁ. ꦠꦪꦶꦢꦁ ꦥꦴꦭ꦳ꦶꦪꦁ ꦠꦠ꧀ꦡ ꦠꦠ꧀ꦡ ‘‘ꦠꦱ꧀ꦩꦶꦁ ꦱꦩꦪꦺ’’ꦠꦶ ꦄꦴꦒꦠꦮꦕꦤꦺꦤ ꦮꦶꦚ꧀ꦚꦴꦪꦠꦶ, ꦧꦺꦴꦗ꧀ꦙꦔ꧀ꦒꦴꦤꦁ ꦥꦤ ꦤꦴꦤꦴꦱꦨꦴꦮꦠ꧀ꦠꦴ ‘‘ꦤꦴꦤꦴꦭꦏ꧀ꦑꦟꦴ’’ꦠꦶ ꦮꦸꦠ꧀ꦠꦁ.

ꦱꦷꦭꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧔. ꦮꦠ꧀ꦡꦱꦸꦠ꧀ꦠꦮꦟ꧀ꦟꦤꦴ

꧑꧘꧕. ‘‘ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦺꦴ’’ꦠꦶ ꦌꦮꦁ ꦕꦺ ꦩꦪ꧀ꦲꦁ ꦲꦺꦴꦠꦷꦠꦶ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦺꦴ ꦤꦴꦩ ꦱꦺꦛ꧀ꦜꦺꦴ ꦈꦠ꧀ꦠꦩꦺꦴ ꦥꦮꦫꦺꦴ, ꦠꦱ꧀ꦩꦴꦲꦁ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦱꦷꦱꦺꦤ ꦦꦭꦱꦩꦴꦥꦠ꧀ꦠꦶꦁ ꦄꦥ꧀ꦥꦺꦠ꧀ꦮꦴ ꦮꦶꦲꦫꦶꦱ꧀ꦱꦴꦩꦷꦠꦶ ꦌꦮꦁ ꦕꦺ ꦩꦪ꧀ꦲꦁ ꦥꦸꦧ꧀ꦧꦨꦴꦒꦺ ꦲꦺꦴꦠꦷꦠꦶ ꦄꦠ꧀ꦡꦺꦴ. ‘‘ꦄꦥ꧀ꦥꦩꦴꦟꦺꦴ’’ꦠꦶ ꦌꦮꦁ ꦩꦪ꧀ꦲꦁ ꦲꦺꦴꦠꦷꦠꦶ ꦱ꧀ꦮꦴꦪꦁ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦺꦴ, ꦱꦧ꧀ꦧꦱꦺꦴ ꦥꦩꦴꦟꦏꦫꦏꦶꦭꦺꦱꦴꦨꦴꦮꦠꦺꦴ ꦄꦥ꧀ꦥꦩꦴꦟꦣꦩ꧀ꦩꦴꦫꦩ꧀ꦩꦟꦠꦺꦴ ꦕ ꦄꦥ꧀ꦥꦩꦴꦟꦺꦴꦠꦶ ꦌꦮꦁ ꦩꦪ꧀ꦲꦁ ꦄꦤ꧀ꦠꦺꦴꦱꦩꦴꦥꦠ꧀ꦠꦶꦪꦁ ꦄꦱꦩ꧀ꦩꦺꦴꦲꦮꦱꦺꦤ ꦲꦺꦴꦠꦶ. ꦱꦸꦥꦫꦶꦥꦸꦟ꧀ꦟꦺꦴꦠꦶ ꦨꦴꦮꦤꦴꦥꦴꦫꦶꦥꦹꦫꦶꦪꦴ ꦱꦸꦛ꧀ꦜꦸ ꦥꦫꦶꦥꦸꦟ꧀ꦟꦺꦴꦠꦶ ꦌꦮꦁ ꦩꦪ꧀ꦲꦁ ꦄꦤ꧀ꦠꦺꦴꦱꦩꦴꦥꦠ꧀ꦠꦶꦪꦁ ꦄꦱꦩ꧀ꦩꦺꦴꦲꦮꦱꦺꦤ ꦲꦺꦴꦠꦷꦠꦶ. ꦠꦶꦛ꧀ꦜꦠꦷꦠꦶ ꦪꦡꦴꦏꦴꦭꦥꦫꦶꦕ꧀ꦖꦺꦢꦱꦩꦴꦥꦠ꧀ꦠꦶꦪꦴ ꦄꦮꦛ꧀ꦜꦴꦤꦺꦤ ꦠꦥ꧀ꦥꦫꦶꦪꦴꦥꦤ꧀ꦤꦠꦴꦪ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦺꦴ ꦠꦶꦛ꧀ꦜꦠꦶ ꦥꦛꦶꦧꦤ꧀ꦣꦮꦱꦺꦤ. ꦈꦥ꧀ꦥꦴꦢꦁ ꦄꦤꦴꦮꦗ꧀ꦗꦶꦠꦠ꧀ꦠꦴꦠꦶ ꦈꦥ꧀ꦥꦴꦢꦱ꧀ꦱ ꦄꦤꦴꦮꦗ꧀ꦗꦤꦺꦤ ꦄꦱꦩꦤ꧀ꦤꦴꦲꦴꦫꦺꦤ. ꦈꦥ꧀ꦥꦴꦢꦱꦷꦱꦺꦤ ꦕꦺꦠ꧀ꦡ ꦈꦥ꧀ꦥꦴꦢꦮꦤ꧀ꦠꦺꦴꦮ ꦱꦔ꧀ꦑꦴꦫꦴ ꦒꦲꦶꦠꦴ. ꦄꦤꦸꦥ꧀ꦥꦴꦢꦤ꧀ꦠꦶ ꦤꦶꦧ꧀ꦧꦴꦤꦁ ꦈꦥ꧀ꦥꦴꦢꦴꦨꦴꦮꦠꦺꦴ ꦈꦥ꧀ꦥꦴꦢꦮꦤ꧀ꦠꦺꦲꦶ ꦕ ꦮꦶꦤꦶꦱ꧀ꦱꦛꦠ꧀ꦠꦴ. ꦥꦮꦠ꧀ꦠꦤ꧀ꦠꦶ ꦮꦶꦥꦴꦏꦥ꧀ꦥꦮꦠ꧀ꦠꦁ. ꦄꦥ꧀ꦥꦮꦠ꧀ꦠꦤ꧀ꦠꦶ ꦤꦶꦧ꧀ꦧꦴꦤꦁ ꦠꦥ꧀ꦥꦛꦶꦏ꧀ꦑꦺꦥꦠꦺꦴ. ꦤꦶꦩꦶꦠ꧀ꦠꦤ꧀ꦠꦶ ꦱꦧ꧀ꦧꦱꦔ꧀ꦑꦴꦫꦤꦶꦩꦶꦠ꧀ꦠꦁ. ꦄꦤꦶꦩꦶꦠ꧀ꦠꦤ꧀ꦠꦶ ꦤꦶꦧ꧀ꦧꦴꦤꦁ. ꦱꦔ꧀ꦑꦴꦫꦺꦠꦶ ꦈꦥ꧀ꦥꦴꦢꦴꦢꦶꦄꦤꦴꦩꦱꦤꦺꦤ ꦏꦺꦮꦭꦩꦺꦮ ꦱꦔ꧀ꦑꦴꦫꦒꦲꦟꦁ. ꦮꦶꦱꦔ꧀ꦑꦴꦫꦤ꧀ꦠꦶ ꦤꦶꦧ꧀ꦧꦴꦤꦁ. ꦄꦴꦮꦗ꧀ꦗꦶꦠꦠ꧀ꦠꦴ ꦄꦴꦮꦗ꧀ꦗꦶꦠꦏꦴꦭꦠꦺꦴ ꦥꦛ꧀ꦜꦴꦪ ꦄꦴꦫꦧ꧀ꦨ ꦥꦮꦠ꧀ꦠꦶꦪꦴ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦺꦴ ꦠꦶꦛ꧀ꦜꦠꦶ. ꦄꦛ꧀ꦜꦲꦴꦏꦴꦫꦺꦲꦷꦠꦶ ꦄꦛ꧀ꦜꦲꦶ ꦏꦴꦫꦟꦺꦲꦶ. ꦗꦴꦤꦴꦠꦷꦠꦶ ꦱꦩꦴꦥꦠ꧀ꦠꦶꦠꦺꦴ ꦮꦸꦛ꧀ꦜꦶꦠꦏꦴꦭꦺ ꦥꦗꦴꦤꦴꦠꦶ. ꦄꦛ꧀ꦜꦲꦴꦏꦴꦫꦺꦲꦷꦠꦶ ꦈꦥ꧀ꦥꦴꦢꦴꦮꦗ꧀ꦗꦤꦴꦢꦷꦲꦶ ꦕꦺꦮ ꦄꦤꦸꦥ꧀ꦥꦴꦢꦴꦮꦗ꧀ꦗꦤꦴꦢꦷꦲꦶ ꦕ ꦮꦸꦠ꧀ꦠꦴꦏꦴꦫꦮꦶꦥꦫꦷꦠꦺꦲꦶ ꦄꦛ꧀ꦜꦲꦶ ꦄꦴꦏꦴꦫꦺꦲꦶ ꦕꦮꦤ꧀ꦠꦁ ꦱꦩꦴꦥꦠ꧀ꦠꦶꦮꦱꦺꦤ ꦄꦤꦮꦛ꧀ꦜꦴꦤꦠꦺꦴꦥꦶ ꦒꦕ꧀ꦖꦤ꧀ꦠꦁ ꦕꦮꦠꦷꦠꦶ ꦡꦺꦫꦺꦴ ꦥꦗꦴꦤꦴꦠꦷꦠꦶ.

ꦦꦭꦧꦺꦴꦗ꧀ꦙꦔ꧀ꦒꦴꦠꦶ ꦦꦭꦱꦩꦴꦥꦠ꧀ꦠꦶꦥꦫꦶꦪꦴꦥꦤ꧀ꦤꦴ ꦧꦺꦴꦗ꧀ꦙꦔ꧀ꦒꦴ. ꦏꦶꦁ ꦥꦤ ꦠꦺ ꦮꦶꦱꦸꦁ ꦮꦶꦱꦸꦁ ꦥꦮꦠ꧀ꦠꦤ꧀ꦠꦷꦠꦶ ꦄꦴꦲ ‘‘ꦪꦢꦴ ꦲꦷ’’ꦠꦶꦄꦴꦢꦶ. ꦱꦷꦱꦁ ꦏꦠ꧀ꦮꦴꦠꦶ ꦥꦣꦴꦤꦁ ꦱꦺꦛ꧀ꦜꦁ ꦏꦠ꧀ꦮꦴ. ꦠꦢꦤ꧀ꦮꦪꦴꦠꦶ ꦠꦢꦤꦸꦒꦠꦴ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦁ ꦄꦤꦸꦒꦕ꧀ꦖꦤꦏꦴ. ꦠꦚ꧀ꦕ ꦑꦺꦴ ꦠꦡꦴ ꦏꦠ꧀ꦮꦴ ꦣꦩ꧀ꦩꦁ ꦥꦕ꧀ꦕꦮꦺꦏ꧀ꦑꦟꦮꦱꦺꦤ. ꦏꦺꦕꦶ ꦥꦤ ‘‘ꦠꦁ ꦥꦕ꧀ꦕꦮꦺꦏ꧀ꦑꦟꦴꦢꦶꦏꦁ ꦏꦠ꧀ꦮꦴ’’ꦠꦶ ꦮꦢꦤ꧀ꦠꦶ.

ꦮꦠ꧀ꦡꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧕. ꦨꦶꦏ꧀ꦑꦸꦱꦸꦠ꧀ꦠꦮꦟ꧀ꦟꦤꦴ

꧑꧘꧖. ꦧꦺꦴꦣꦴꦪꦴꦠꦶ ꦌꦠ꧀ꦡ ꦧꦺꦴꦣꦺꦴ ꦤꦴꦩ ꦧꦸꦗ꧀ꦙꦤꦁ, ꦠꦁ ꦥꦤ ꦏꦶꦱ꧀ꦱ ꦏꦺꦤꦴꦠꦶ ꦥꦸꦕ꧀ꦖꦤ꧀ꦠꦺꦴ ‘‘ꦏꦶꦁ ꦧꦸꦗ꧀ꦙꦤꦠ꧀ꦡꦴꦪꦴ’’ꦠꦶ ꦮꦠ꧀ꦮꦴ ꦠꦁ ꦢꦱ꧀ꦱꦺꦤ꧀ꦠꦺꦴ ‘‘ꦩꦒ꧀ꦒꦺꦤꦴ’’ꦠꦶꦄꦴꦢꦶꦩꦴꦲ. ꦩꦒ꧀ꦒꦺꦤ ꦤꦶꦧ꧀ꦧꦴꦤꦁ ꦧꦸꦗ꧀ꦙꦤꦠ꧀ꦡꦴꦪ ꦱꦁꦮꦠ꧀ꦠꦤ꧀ꦠꦶ, ꦥꦕ꧀ꦕꦮꦺꦏ꧀ꦑꦟꦴꦪ ꦏꦠꦏꦶꦕ꧀ꦕꦠꦁ ꦧꦸꦗ꧀ꦙꦤꦠ꧀ꦡꦴꦪ ꦱꦁꦮꦠ꧀ꦠꦤ꧀ꦠꦶ, ꦥꦜꦩꦮꦶꦏꦥ꧀ꦥꦺ ꦱꦕ꧀ꦖꦶꦏꦶꦫꦶꦪꦴꦨꦶꦱꦩꦪꦺꦴ ꦌꦮ ꦢꦱ꧀ꦱꦶꦠꦺꦴꦠꦶ ꦠꦺꦤ ꦄꦠꦸꦛ꧀ꦜꦺ ‘‘ꦩꦒ꧀ꦒꦺꦤ ꦮꦴ’’ꦠꦶ ꦢꦸꦠꦶꦪꦮꦶꦏꦥ꧀ꦥꦩꦴꦲ. ꦮꦶꦮꦺꦏꦤꦶꦱ꧀ꦱꦶꦠꦁ ꦮꦶꦫꦴꦒꦤꦶꦱ꧀ꦱꦶꦠꦤ꧀ꦠꦶ ꦥꦢꦺꦲꦶ ꦱꦧ꧀ꦧꦁ ꦩꦒ꧀ꦒꦏꦶꦕ꧀ꦕꦁ ꦠꦱ꧀ꦱ ꦦꦭꦚ꧀ꦕ ꦢꦱ꧀ꦱꦶꦠꦁ. ꦤꦶꦫꦺꦴꦣꦤꦶꦱ꧀ꦱꦶꦠꦤ꧀ꦠꦶ ꦆꦩꦶꦤꦴ ꦤꦶꦧ꧀ꦧꦴꦤꦱꦕ꧀ꦖꦶꦏꦶꦫꦶꦪꦴ. ꦏꦴꦩꦴꦱꦮꦴꦥꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦠꦷꦠꦶꦄꦴꦢꦶꦤꦴ ꦏꦶꦭꦺꦱꦥ꧀ꦥꦲꦴꦤꦁ. ꦮꦶꦩꦸꦠ꧀ꦠꦱ꧀ꦩꦶꦁ ꦮꦶꦩꦸꦠ꧀ꦠꦩꦶꦠꦶ ꦚꦴꦟꦁ ꦲꦺꦴꦠꦷꦠꦶꦄꦴꦢꦶꦤꦴ ꦥꦕ꧀ꦕꦮꦺꦏ꧀ꦑꦟꦴ ꦢꦱ꧀ꦱꦶꦠꦴ.

ꦨꦶꦏ꧀ꦑꦸꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧖-꧗. ꦏꦸꦟ꧀ꦝꦭꦶꦪꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧑꧘꧗-꧑꧘꧘. ꦤꦶꦧꦢ꧀ꦣꦮꦴꦱꦮꦱꦺꦤ ꦄꦴꦫꦴꦩꦺ ꦤꦶꦱꦷꦢꦤꦱꦷꦭꦺꦴꦠꦶ ꦄꦴꦫꦴꦩꦤꦶꦱꦴꦢꦷ. ꦥꦫꦶꦱꦁ ꦎꦒꦴꦭ꦳꧀ꦲꦺꦴ ꦲꦸꦠ꧀ꦮꦴ ꦕꦫꦠꦷꦠꦶ ꦥꦫꦶꦱꦴꦮꦕꦫꦺꦴꦠꦶ ꦄꦴꦲ – ‘‘ꦪꦺꦴ ꦥꦤꦴ’’ꦠꦶꦄꦴꦢꦶ. ꦌꦮꦤ꧀ꦠꦶ ꦆꦩꦶꦤꦴꦏꦴꦫꦺꦤ. ꦒꦲꦟꦤ꧀ꦠꦶ ꦤꦶꦒ꧀ꦒꦲꦟꦁ. ꦠꦺꦤ ꦥꦸꦕ꧀ꦖꦴꦥꦢꦱ꧀ꦱ ꦄꦠ꧀ꦡꦁ ꦮꦶꦮꦫꦠꦶ. ꦤꦶꦧ꧀ꦧꦺꦜꦤꦤ꧀ꦠꦶ ꦤꦶꦒ꧀ꦒꦲꦤꦶꦧ꧀ꦧꦺꦜꦤꦁ. ꦠꦺꦤ ꦮꦶꦱ꧀ꦱꦗ꧀ꦗꦤꦥꦢꦱ꧀ꦱ ꦄꦠ꧀ꦡꦁ ꦮꦶꦮꦫꦠꦶ. ꦆꦩꦶꦤꦴ ꦤꦪꦺꦤꦴꦠꦶ ꦌꦠꦺꦤ ‘‘ꦆꦠꦶꦮꦴꦢꦺꦴ’’ꦠꦶ ꦌꦠ꧀ꦡ ꦆꦠꦶ-ꦱꦢ꧀ꦢꦱ꧀ꦱ ꦄꦠ꧀ꦡꦁ ꦢꦱ꧀ꦱꦺꦠꦶ. ꦈꦥꦴꦫꦩ꧀ꦨꦴꦣꦶꦥ꧀ꦥꦴꦪꦺꦴ ꦮꦢꦠꦶ ꦌꦠꦺꦤꦴꦠꦶ ꦮꦴꦢꦺꦴ, ꦢꦺꦴꦱꦺꦴ. ꦆꦠꦶꦮꦴꦢꦺꦴ ꦲꦺꦴꦠꦷꦠꦶ ꦌꦮꦁ ꦆꦩꦱ꧀ꦱ ꦈꦥꦫꦶ ꦮꦴꦢꦴꦫꦺꦴꦥꦤꦁ ꦲꦺꦴꦠꦶ. ꦆꦠꦶꦮꦴꦢꦥ꧀ꦥꦩꦺꦴꦏ꧀ꦑꦺꦴꦠꦶ ꦌꦮꦁ ꦠꦠꦺꦴ ꦥꦩꦺꦴꦏ꧀ꦑꦺꦴ ꦲꦺꦴꦠꦶ. ꦌꦮꦁ ꦮꦴꦢꦥ꧀ꦥꦩꦺꦴꦏ꧀ꦑꦴꦤꦶꦱꦁꦱꦁ ꦥꦫꦺꦲꦶ ꦄꦴꦫꦺꦴꦥꦶꦠꦢꦺꦴꦱꦱ꧀ꦱ ꦤꦶꦧ꧀ꦧꦺꦜꦤꦮꦱꦺꦤ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦢꦺꦴꦱꦥꦮꦺꦢꦤꦮꦱꦺꦤ ꦢꦱ꧀ꦱꦺꦠꦸꦁ ‘‘ꦄꦪꦁ ꦥꦸꦕ꧀ꦖꦴꦪ ꦢꦺꦴꦱꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ.

ꦌꦠ꧀ꦠꦏꦁ ꦜꦴꦤꦤ꧀ꦠꦶꦄꦴꦢꦶꦠꦺꦴ ꦥꦛ꧀ꦜꦴꦪ ꦪꦴꦮ ‘‘ꦠꦷꦟꦶ ꦱꦸꦕꦫꦶꦠꦴꦤꦷ’’ꦠꦶ ꦌꦠ꧀ꦠꦏꦁ ꦜꦴꦤꦁ. ꦆꦩꦁ ꦢꦺꦱꦤꦤ꧀ꦠꦶ ‘‘ꦆꦤ꧀ꦢ꧀ꦫꦶꦪꦱꦁꦮꦫꦺꦴ ꦑꦺꦴ’’ꦠꦶꦄꦴꦢꦶꦤꦪꦥ꧀ꦥꦮꦠ꧀ꦠꦁ ꦆꦩꦁ ꦢꦺꦱꦤꦁ. ꦤꦴꦨꦶꦗ꧀ꦙꦴꦪꦠꦷꦠꦶ ꦤ ꦄꦨꦶꦗ꧀ꦙꦴꦪꦠꦶ. ꦤꦴꦨꦶꦲꦁꦱꦠꦷꦠꦶ ꦤ ꦄꦨꦶꦠꦸꦱ꧀ꦱꦠꦶ. ꦒꦺꦴꦕꦫꦗ꧀ꦙꦠ꧀ꦠꦺ ꦜꦶꦠꦁ ꦲꦺꦴꦠꦷꦠꦶ ꦏꦩ꧀ꦩꦛ꧀ꦜꦴꦤꦴꦫꦩ꧀ꦩꦟꦺ ꦱꦩꦴꦣꦴꦤꦮꦱꦺꦤ ꦜꦶꦠꦁ ꦲꦺꦴꦠꦶ ꦄꦮꦛ꧀ꦜꦶꦠꦁ. ꦠꦺꦤꦴꦲ ‘‘ꦱꦸꦱꦟ꧀ꦜꦶꦠ’’ꦤ꧀ꦠꦶ. ꦱꦸꦱꦟ꧀ꦜꦶꦠꦤ꧀ꦠꦶ ꦱꦩ꧀ꦩꦴ ꦄꦮꦶꦏ꧀ꦑꦺꦥꦮꦱꦺꦤ ꦜꦶꦠꦁ. ꦏꦩ꧀ꦩꦛ꧀ꦜꦴꦤꦮꦶꦩꦸꦠ꧀ꦠꦶꦪꦴꦠꦶ ꦏꦩ꧀ꦩꦛ꧀ꦜꦴꦤꦴꦤꦸꦪꦸꦚ꧀ꦗꦤꦮꦱꦺꦤ ꦥꦛꦶꦥꦏ꧀ꦑꦠꦺꦴ ꦤꦷꦮꦫꦟꦠꦺꦴ ꦮꦶꦩꦸꦠ꧀ꦠꦶꦪꦴ. ꦱꦸꦛ꧀ꦜꦸ ꦮꦶꦩꦸꦠ꧀ꦠꦤ꧀ꦠꦶ ꦱꦸꦮꦶꦩꦸꦠ꧀ꦠꦁ. ꦠꦱ꧀ꦩꦶꦁ ꦄꦩꦤꦴꦥꦫꦹꦥꦢꦱ꧀ꦱꦤꦺ ꦤ ꦩꦔ꧀ꦏꦸ ꦮꦶꦭꦏ꧀ꦑꦺꦴ ꦤ ꦲꦺꦴꦠꦶ. ꦏꦶꦭꦺꦱꦮꦱꦺꦤ ꦢꦺꦴꦱꦮꦱꦺꦤ. ꦄꦛ꧀ꦜꦶꦠꦕꦶꦠ꧀ꦠꦺꦴ ꦄꦡꦢ꧀ꦣꦕꦶꦠ꧀ꦠꦺꦴ. ꦏꦺꦴꦮꦺꦱꦺꦤ ꦲꦶ ꦕꦶꦠ꧀ꦠꦁ ꦡꦢ꧀ꦣꦁ ꦲꦺꦴꦠꦶ, ꦤ ꦩꦸꦢꦸꦏꦁ. ꦄꦢꦷꦤꦩꦴꦤꦱꦺꦴꦠꦶ ꦢꦺꦴꦩꦤꦱ꧀ꦱꦮꦱꦺꦤ ꦪꦺꦴ ꦢꦷꦤꦨꦴꦮꦺꦴ, ꦠꦢꦨꦴꦮꦺꦤ ꦤꦶꦢ꧀ꦢꦺꦴꦱꦩꦴꦤꦱꦺꦴ. ꦄꦥꦹꦠꦶꦕꦶꦠ꧀ꦠꦺꦴꦠꦶ ꦧ꧀ꦪꦴꦥꦗ꧀ꦗꦴꦨꦴꦮꦺꦤ ꦱꦷꦠꦶꦨꦹꦠꦕꦶꦠ꧀ꦠꦺꦴ.

ꦆꦩꦺꦱꦸ ꦖꦱꦸ ꦢ꧀ꦮꦴꦫꦺꦱꦸ ꦄꦛ꧀ꦜꦴꦫꦱ ꦢꦸꦕ꧀ꦕꦫꦶꦠꦴꦤꦶ ꦲꦺꦴꦤ꧀ꦠꦶ ꦥꦕ꧀ꦕꦺꦏꦁ ꦏꦴꦪꦮꦕꦷꦩꦤꦺꦴꦢꦸꦕ꧀ꦕꦫꦶꦠꦨꦺꦢꦺꦤ. ꦠꦴꦤꦶ ꦮꦶꦨꦴꦒꦺꦤ ꦢꦱ꧀ꦱꦺꦠꦸꦁ ‘‘ꦏꦡ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦆꦛ꧀ꦜꦴꦫꦩ꧀ꦩꦟꦺ ꦄꦴꦥꦴꦡꦒꦠꦺꦠꦶ ꦤꦪꦢꦴꦤꦩꦠ꧀ꦠꦩꦺꦠꦁ. ꦠꦺꦤ ‘‘ꦄꦤꦶꦛ꧀ꦜꦴꦫꦩ꧀ꦩꦟꦺ ꦄꦴꦥꦴꦡꦒꦠꦺ ꦢꦺꦴꦱꦁ ꦈꦥ꧀ꦥꦴꦢꦺꦤ꧀ꦠꦱ꧀ꦱꦴ’’ꦠꦶꦄꦴꦢꦶꦤꦴ ꦠꦶꦮꦶꦣꦢꦸꦕ꧀ꦕꦫꦶꦠꦁ ꦤꦷꦲꦫꦶꦠ꧀ꦮꦴ ꦮꦠ꧀ꦠꦧ꧀ꦧꦁ, ꦠꦡꦴ ‘‘ꦩꦗ꧀ꦙꦠ꧀ꦠꦴꦫꦩ꧀ꦩꦟꦺ ꦩꦺꦴꦲꦁ ꦈꦥ꧀ꦥꦴꦢꦺꦤ꧀ꦠꦱ꧀ꦱꦴ’’ꦠꦶꦄꦴꦢꦶꦤꦴ ꦕ. ꦩꦤꦺꦴꦢꦸꦕ꧀ꦕꦫꦶꦠꦴꦢꦶꦱꦴꦩꦚ꧀ꦚꦺꦤ ꦥꦤ ꦠꦷꦟꦶꦪꦺꦮ ꦢꦸꦕ꧀ꦕꦫꦶꦠꦴꦤꦶ ꦲꦺꦴꦤ꧀ꦠꦷꦠꦶ ꦮꦺꦢꦶꦠꦧ꧀ꦧꦁ.

ꦥꦚ꧀ꦚꦠ꧀ꦠꦶꦮꦱꦺꦤꦴꦠꦶ ꦮꦠ꧀ꦡꦸꦁ ꦄꦤꦴꦩꦱꦶꦠ꧀ꦮꦴ ꦥꦶꦟ꧀ꦝꦒꦲꦟꦩꦸꦑꦺꦤ ꦏꦺꦮꦭꦁ ꦥꦚ꧀ꦚꦠ꧀ꦠꦶꦮꦱꦺꦤꦺꦮ. ꦨꦴꦮꦤꦴꦥꦛꦶꦱꦔ꧀ꦑꦴꦤꦺꦠꦶ ꦨꦴꦮꦤꦴꦱꦶꦢ꧀ꦣꦺ ꦥꦛꦶꦱꦔ꧀ꦑꦴꦤꦺ, ꦨꦴꦮꦤꦴꦪ ꦥꦛꦶꦱꦔ꧀ꦑꦴꦤꦺ ꦮꦴꦠꦶ ꦄꦠ꧀ꦡꦺꦴ. ꦆꦩꦴꦤꦷꦠꦶ ꦪꦡꦴꦮꦸꦠ꧀ꦠꦴꦤꦶ ꦖꦢ꧀ꦮꦴꦫꦴꦫꦩ꧀ꦩꦟꦴꦤꦶ. ꦢꦸꦕ꧀ꦕꦫꦶꦠꦴꦤꦷꦠꦶ ꦢꦸꦕ꧀ꦕꦫꦶꦠꦏꦴꦫꦟꦴꦤꦶ. ꦄꦥ꧀ꦥꦛꦶꦱꦔ꧀ꦑꦴꦤꦺ ꦜꦶꦠꦱ꧀ꦱ ꦢꦸꦕ꧀ꦕꦫꦶꦠꦴꦤꦶ ꦱꦸꦕꦫꦶꦠꦴꦤꦶ ꦏꦠ꧀ꦮꦴ. ꦥꦫꦶꦟꦴꦩꦺꦠꦷꦠꦶ ꦥꦫꦶꦮꦠ꧀ꦠꦺꦠꦶ ꦢꦸꦕ꧀ꦕꦫꦶꦠꦴꦤꦶ ꦠꦠ꧀ꦡ ꦄꦤꦸꦥ꧀ꦥꦴꦢꦺꦠ꧀ꦮꦴ ꦱꦸꦕꦫꦶꦠꦴꦤꦶ ꦈꦥ꧀ꦥꦴꦢꦺꦤ꧀ꦠꦺꦴ. ꦌꦮꦤ꧀ꦠꦶ ꦮꦸꦠ꧀ꦠꦥ꧀ꦥꦏꦴꦫꦺꦤ. ꦆꦤ꧀ꦢ꧀ꦫꦶꦪꦱꦁꦮꦫꦺꦴ…ꦥꦺ… ꦮꦺꦢꦶꦠꦧ꧀ꦧꦺꦴ ꦆꦤ꧀ꦢ꧀ꦫꦶꦪꦱꦁꦮꦫꦱꦩ꧀ꦥꦴꦢꦤꦮꦱꦺꦤ ꦠꦶꦟ꧀ꦟꦁ ꦱꦸꦕꦫꦶꦠꦴꦤꦁ ꦱꦶꦗ꧀ꦙꦤꦠꦺꦴ. ꦠꦺꦤꦴꦲ ‘‘ꦌꦠ꧀ꦠꦴꦮꦠꦴ’’ꦠꦶꦄꦴꦢꦶ. ꦌꦠ꧀ꦠꦴꦮꦠꦴꦠꦶ ꦄꦴꦢꦶꦠꦺꦴ ꦥꦛ꧀ꦜꦴꦪ ꦪꦴꦮ ‘‘ꦠꦷꦟꦶ ꦱꦸꦕꦫꦶꦠꦴꦤꦶ ꦥꦫꦶꦥꦹꦫꦺꦤ꧀ꦠꦷ’’ꦠꦶ ꦥꦢꦁ, ꦌꦠ꧀ꦠꦴꦮꦠꦴ. ꦱꦷꦭꦴꦤꦸꦫꦏ꧀ꦑꦏꦁ ꦆꦤ꧀ꦢ꧀ꦫꦶꦪꦱꦁꦮꦫꦱꦷꦭꦤ꧀ꦠꦶ ꦕꦠꦸꦥꦴꦫꦶꦱꦸꦢ꧀ꦣꦶꦱꦷꦭꦱ꧀ꦱ ꦄꦤꦸꦫꦏ꧀ꦑꦏꦁ ꦆꦤ꧀ꦢ꧀ꦫꦶꦪꦱꦁꦮꦫꦱꦷꦭꦁ ꦏꦡꦶꦏꦁ. ꦏꦡꦁ ꦥꦤ ꦠꦢꦺꦮ ꦠꦱ꧀ꦱ ꦄꦤꦸꦫꦏ꧀ꦑꦏꦁ ꦲꦺꦴꦠꦷꦠꦶ? ꦄꦥꦫꦴꦥꦫꦸꦥ꧀ꦥꦠ꧀ꦠꦶꦪꦴ ꦈꦥꦤꦶꦱ꧀ꦱꦪꦨꦴꦮꦠꦺꦴ.

ꦠꦷꦟꦶ ꦱꦷꦭꦴꦤꦷꦠꦶ ꦆꦤ꧀ꦢ꧀ꦫꦶꦪꦱꦁꦮꦫ-ꦄꦴꦗꦷꦮꦥꦴꦫꦶꦱꦸꦢ꧀ꦣꦶ-ꦥꦕ꧀ꦕꦪꦱꦤ꧀ꦤꦶꦱ꧀ꦱꦶꦠ-ꦱꦷꦭꦴꦤꦶ. ꦭꦺꦴꦏꦸꦠ꧀ꦠꦫꦩꦶꦱ꧀ꦱꦏꦴꦠꦶ ꦭꦺꦴꦏꦶꦪꦴꦥꦶ ꦭꦺꦴꦏꦸꦠ꧀ꦠꦫꦴꦥꦶ ꦲꦺꦴꦤ꧀ꦠꦷꦠꦶ ꦄꦠ꧀ꦡꦺꦴ. ꦱꦠ꧀ꦠꦤ꧀ꦤꦁ ꦧꦺꦴꦗ꧀ꦙꦔ꧀ꦒꦴꦤꦤ꧀ꦠꦶ ꦭꦺꦴꦏꦸꦠ꧀ꦠꦫꦴꦤꦁ ꦱꦠ꧀ꦠꦤ꧀ꦤꦁ ꦧꦺꦴꦗ꧀ꦙꦔ꧀ꦒꦴꦤꦁ. ꦩꦹꦭꦨꦹꦠꦴ ꦱꦠꦶꦥꦛ꧀ꦜꦴꦤꦴ ꦥꦸꦧ꧀ꦧꦨꦴꦒꦴ, ꦠꦺ ꦱꦤ꧀ꦣꦴꦪ ꦮꦸꦠ꧀ꦠꦁ ‘‘ꦕꦠ꧀ꦠꦴꦫꦺꦴ ꦑꦺꦴ, ꦏꦸꦟ꧀ꦝꦭꦶꦪ, ꦱꦠꦶꦥꦛ꧀ꦜꦴꦤꦴ ꦨꦴꦮꦶꦠꦴ ꦧꦲꦸꦭꦷꦏꦠꦴ ꦱꦠ꧀ꦠ ꦧꦺꦴꦗ꧀ꦙꦔ꧀ꦒꦺ ꦥꦫꦶꦥꦹꦫꦺꦤ꧀ꦠꦷ’’ꦠꦶ. ꦠꦺꦥꦷꦠꦶ ꦪꦡꦴꦮꦸꦠ꧀ꦠꦱꦠꦶꦥꦛ꧀ꦜꦴꦤꦴ. ꦱꦠꦶꦥꦛ꧀ꦜꦴꦤꦩꦹꦭꦏꦴ ꦧꦺꦴꦗ꧀ꦙꦔ꧀ꦒꦴꦠꦶ ꦭꦺꦴꦏꦶꦪꦱꦠꦶꦥꦛ꧀ꦜꦴꦤꦩꦹꦭꦏꦴ ꦧꦺꦴꦗ꧀ꦙꦔ꧀ꦒꦴꦮ. ꦥꦸꦧ꧀ꦧꦨꦴꦒꦴꦮꦴꦠꦶ ꦌꦠ꧀ꦡ ꦏꦺꦕꦶ ‘‘ꦥꦸꦧ꧀ꦧꦨꦴꦒꦴ ꦕꦴ’’ꦠꦶ ꦥꦴꦜꦁ ꦏꦠ꧀ꦮꦴ ‘‘ꦥꦸꦧ꧀ꦧꦺꦮ ꦭꦺꦴꦏꦸꦠ꧀ꦠꦫꦴ ꦥꦸꦧ꧀ꦧꦨꦴꦒꦴ ꦕꦴ’’ꦠꦶ ꦄꦠ꧀ꦡꦁ ꦮꦢꦤ꧀ꦠꦶ. ꦮꦶꦗ꧀ꦗꦴꦮꦶꦩꦸꦠ꧀ꦠꦶꦩꦹꦭꦏꦴꦠꦶ ‘‘ꦱꦠ꧀ꦠ ꦑꦺꦴ, ꦏꦸꦟ꧀ꦝꦭꦶꦪ, ꦧꦺꦴꦗ꧀ꦙꦔ꧀ꦒꦴ ꦨꦴꦮꦶꦠꦴ ꦧꦲꦸꦭꦷꦏꦠꦴ ꦮꦶꦗ꧀ꦗꦴꦮꦶꦩꦸꦠ꧀ꦠꦶꦁ ꦥꦫꦶꦥꦹꦫꦺꦤ꧀ꦠꦷ’’ꦠꦶ ꦌꦮꦁ ꦮꦸꦠ꧀ꦠꦴ ꦧꦺꦴꦗ꧀ꦙꦔ꧀ꦒꦴ ꦭꦺꦴꦏꦸꦠ꧀ꦠꦫꦴꦮ ꦮꦶꦗ꧀ꦗꦴꦮꦶꦩꦸꦠ꧀ꦠꦶꦱꦲꦒꦠꦨꦴꦮꦠꦺꦴ.

ꦏꦸꦟ꧀ꦝꦭꦶꦪꦱꦸꦠ꧀ꦠꦴꦢꦶꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧘. ꦈꦥꦮꦴꦤꦱꦸꦠ꧀ꦠꦮꦟ꧀ꦟꦤꦴ

꧑꧘꧙. ꦥꦕ꧀ꦕꦠ꧀ꦠꦤ꧀ꦠꦶ ꦏꦫꦟꦤꦶꦢ꧀ꦢꦺꦱꦺꦴ ꦄꦪꦤ꧀ꦠꦶ ꦄꦴꦲ – ‘‘ꦄꦠ꧀ꦠꦤꦴꦮꦴ’’ꦠꦶ. ꦏꦸꦫꦸꦩꦴꦤꦺꦴꦪꦺꦮꦴꦠꦶ ꦈꦥ꧀ꦥꦴꦢꦺꦤ꧀ꦠꦺꦴ ꦌꦮ. ꦏꦩ꧀ꦩꦛ꧀ꦜꦴꦤꦮꦶꦩꦸꦠ꧀ꦠꦶꦪꦴ ꦱꦸꦛ꧀ꦜꦸ ꦮꦶꦩꦸꦠ꧀ꦠꦤ꧀ꦠꦶ ꦏꦩ꧀ꦩꦛ꧀ꦜꦴꦤꦩꦤꦱꦶꦏꦴꦫꦺꦤ ꦤꦷꦮꦫꦟꦴꦤꦁ ꦢꦹꦫꦷꦨꦴꦮꦠꦺꦴ ꦠꦺꦲꦶ ꦱꦸꦛ꧀ꦜꦸ ꦮꦶꦩꦸꦠ꧀ꦠꦁ. ꦄꦠ꧀ꦡꦁ ꦏꦫꦶꦠ꧀ꦮꦴꦠꦶ ꦨꦴꦮꦤꦴꦩꦤꦱꦶꦏꦴꦫꦁ ꦈꦠ꧀ꦠꦩꦁ ꦏꦠ꧀ꦮꦴ. ‘‘ꦩꦲꦴ ꦮꦠ ꦩꦺ ꦄꦪꦁ ꦄꦠ꧀ꦡꦺꦴ ꦈꦥ꧀ꦥꦤ꧀ꦤꦺꦴ’’ꦠꦶ ꦄꦠ꧀ꦡꦶꦏꦺꦴ ꦲꦸꦠ꧀ꦮꦴ.

꧙. ꦥꦜꦩꦈꦥ꧀ꦥꦤ꧀ꦤꦱꦸꦠ꧀ꦠꦮꦟ꧀ꦟꦤꦴ

꧑꧙꧐. ꦠꦡꦴꦒꦠꦱ꧀ꦱ ꦥꦴꦠꦸꦨꦴꦮꦴꦠꦶꦄꦴꦢꦶꦤꦴ ꦧꦸꦢ꧀ꦣꦸꦥ꧀ꦥꦴꦢꦏꦴꦭꦺ ꦌꦮ ꦧꦺꦴꦗ꧀ꦙꦔ꧀ꦒꦫꦠꦤꦥꦛꦶꦭꦴꦨꦺꦴꦠꦶ ꦢꦱ꧀ꦱꦺꦠꦶ.

ꦥꦧ꧀ꦧꦠꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧒. ꦒꦶꦭꦴꦤꦮꦒ꧀ꦒꦺꦴ

꧑-꧓. ꦥꦴꦟꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧑꧙꧒-꧑꧙꧔. ꦪꦺꦱꦤ꧀ꦠꦶ ꦪꦺꦱꦁ ꦱꦠ꧀ꦠꦴꦤꦁ. ꦕꦠ꧀ꦠꦴꦫꦺꦴ ꦆꦫꦶꦪꦴꦥꦡꦴ ꦄꦠ꧀ꦡꦶ ꦭꦧ꧀ꦨꦤ꧀ꦠꦶ ꦠꦢꦸꦥꦒꦱꦫꦷꦫꦴꦮꦪꦮꦭꦴꦨꦺꦤ. ꦌꦠꦤ꧀ꦠꦶ ‘‘ꦕꦠ꧀ꦠꦴꦫꦺꦴ ꦆꦫꦶꦪꦴꦥꦡꦺ ꦏꦥ꧀ꦥꦺꦤ꧀ꦠꦷ’’ꦠꦶ ꦌꦠꦁ ꦮꦕꦤꦁ. ‘‘ꦮꦶꦮꦺꦏꦤꦶꦱ꧀ꦱꦶꦠ’’ꦤ꧀ꦠꦶꦄꦴꦢꦶꦮꦕꦤꦠꦺꦴ ‘‘ꦱꦲꦮꦶꦥꦱ꧀ꦱꦤꦏꦺ ꦩꦒ꧀ꦒꦧꦺꦴꦗ꧀ꦙꦔ꧀ꦒꦺ’’ꦆꦕ꧀ꦕꦺꦮ ꦮꦸꦠ꧀ꦠꦁ. ꦢꦸꦠꦶꦪꦠꦠꦶꦪꦴꦤꦶ ꦈꦠ꧀ꦠꦴꦤꦠ꧀ꦡꦴꦤꦺꦮ ꦲꦺꦛ꧀ꦜꦴ ꦮꦸꦠ꧀ꦠꦤꦪꦠ꧀ꦠꦴ.

꧔-꧑꧐. ꦥꦜꦩꦒꦶꦭꦴꦤꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧑꧙꧕-꧒꧐꧑. ꦮꦶꦱꦸꦢ꧀ꦣꦁ ꦄꦲꦺꦴꦱꦶ ꦮꦶꦱꦨꦴꦒꦣꦴꦠꦸꦏ꧀ꦑꦺꦴꦨꦁ ꦮꦹꦥꦱꦩꦺꦤ꧀ꦠꦁ. ꦠꦺꦤꦴꦲ – ‘‘ꦥꦺꦴꦏ꧀ꦑꦫꦥꦠ꧀ꦠꦺ …ꦥꦺ… ꦮꦶꦤꦶꦮꦠ꧀ꦠꦶꦠ꧀ꦮꦴ ꦒꦠꦺꦴ’’ꦠꦶ. ꦌꦱꦺꦮ ꦤꦪꦺꦴ ꦥꦴꦭ꦳ꦶꦠꦺꦴ ꦄꦠ꧀ꦡꦠꦺꦴ ꦕ ꦕꦠꦸꦠ꧀ꦡꦺꦤ ꦥꦚ꧀ꦕꦩꦖꦛ꧀ꦜꦴꦤꦁ ꦱꦩꦴꦤꦠ꧀ꦠꦴ. ꦮꦶꦱꦫꦸꦏ꧀ꦑꦮꦴꦠꦱꦩ꧀ꦦꦱ꧀ꦱꦺꦤꦴꦠꦶ ꦮꦶꦱꦫꦸꦏ꧀ꦑꦱꦤ꧀ꦤꦶꦱ꧀ꦱꦶꦠꦮꦴꦠꦱꦩ꧀ꦦꦱ꧀ꦱꦺꦤ. ꦩꦤ꧀ꦢꦱꦷꦠꦗꦫꦺꦴꦠꦶ ꦩꦸꦢꦸꦏꦺꦴ ꦱꦷꦠꦗꦫꦺꦴ. ꦱꦺꦱꦤ꧀ꦠꦶ ꦮꦸꦠ꧀ꦠꦴꦮꦱꦺꦱꦁ. ꦱꦧ꧀ꦧꦠ꧀ꦡꦴꦠꦶ ꦱꦠ꧀ꦠꦩꦴꦢꦷꦱꦸ ꦕꦠꦹꦱꦸ.

ꦒꦶꦭꦴꦤꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧓. ꦈꦢꦴꦪꦶꦮꦒ꧀ꦒꦺꦴ

꧑-꧒. ꦧꦺꦴꦣꦴꦪꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧒꧐꧒-꧒꧐꧓. ꦏꦶꦠ꧀ꦠꦏꦺꦤ ꦤꦸ ꦑꦺꦴ ꦏꦴꦫꦟꦺꦤ ꦧꦸꦗ꧀ꦙꦤꦏꦄꦔ꧀ꦒꦴ ꦤꦴꦩ ꦮꦸꦕ꧀ꦕꦤ꧀ꦠꦶ ꦧꦸꦗ꧀ꦙꦤꦏꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦔ꧀ꦒꦴꦠꦶ ꦮꦠ꧀ꦠꦧ꧀ꦧꦠꦁ ꦭꦨꦤ꧀ꦠꦶ. ꦩꦶꦱ꧀ꦱꦏꦧꦺꦴꦗ꧀ꦙꦔ꧀ꦒꦴ ꦏꦡꦶꦠꦴ ꦱꦲꦮꦶꦥꦱ꧀ꦱꦤꦴ ꦩꦒ꧀ꦒꦧꦺꦴꦗ꧀ꦙꦔ꧀ꦒꦴ ꦏꦡꦶꦠꦴꦠꦶ ꦏꦠ꧀ꦮꦴ. ꦣꦩ꧀ꦩꦥꦫꦶꦕ꧀ꦖꦺꦢꦺꦴ ꦏꦡꦶꦠꦺꦴ ꦒꦟꦤꦴꦩꦠ꧀ꦠꦺꦤ ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦮꦸꦠ꧀ꦠꦠ꧀ꦠꦴ ꦤ ꦨꦹꦩꦤ꧀ꦠꦫꦥꦫꦶꦕ꧀ꦖꦺꦢꦺꦴ, ꦮꦶꦥꦱ꧀ꦱꦤꦴꦢꦶꦥꦫꦶꦕ꧀ꦖꦺꦢꦺꦴ ꦮꦴ.

꧓-꧕. ꦜꦴꦤꦶꦪꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧒꧐꧔-꧒꧐꧖. ꦏꦴꦩꦫꦴꦒꦺꦤ ꦒꦣꦶꦠꦧ꧀ꦧꦛ꧀ꦜꦴꦤꦨꦹꦠꦴ ꦏꦴꦩꦫꦴꦒꦛ꧀ꦜꦴꦤꦶꦪꦴꦠꦶ ꦄꦴꦲ ‘‘ꦄꦴꦫꦩ꧀ꦩꦟꦣꦩ꧀ꦩꦴꦤ’’ꦤ꧀ꦠꦶ. ‘‘ꦩꦤꦱꦶꦏꦴꦫꦧꦲꦸꦭꦷꦏꦴꦫꦴ’’ꦠꦶ ꦮꦸꦠ꧀ꦠꦠ꧀ꦠꦴ ‘‘ꦄꦴꦫꦩ꧀ꦩꦟꦺꦤꦺꦮ ꦏꦡꦶꦠ’’ꦤ꧀ꦠꦶ ꦮꦸꦠ꧀ꦠꦁ. ꦮꦸꦠ꧀ꦠꦥꦫꦶꦕ꧀ꦖꦺꦢꦺꦴꦠꦶ ꦌꦠꦺꦤ ꦤ ꦏꦺꦮꦭꦁ ꦄꦴꦫꦩ꧀ꦩꦟꦮꦱꦺꦤꦺꦮ, ꦄꦡ ꦑꦺꦴ ꦈꦥꦤꦶꦱ꧀ꦱꦪꦮꦱꦺꦤꦥꦺꦠ꧀ꦡ ꦄꦠ꧀ꦡꦺꦴ ꦭꦧ꧀ꦨꦠꦷꦠꦶ ꦢꦱ꧀ꦱꦺꦠꦶ. ꦥꦜꦩꦮꦒ꧀ꦒꦱ꧀ꦱ ꦲꦶ ꦢꦸꦠꦶꦪꦺ ꦱꦸꦠ꧀ꦠꦺ ꦈꦥꦤꦶꦱ꧀ꦱꦪꦮꦱꦺꦤꦺꦮ ꦄꦠ꧀ꦡꦺꦴ ꦢꦱ꧀ꦱꦶꦠꦺꦴ. ꦩꦶꦱ꧀ꦱꦏꦧꦺꦴꦗ꧀ꦙꦔ꧀ꦒꦴ ꦏꦡꦶꦠꦴ ꦄꦮꦶꦨꦴꦒꦺꦤꦺꦮ ꦏꦡꦶꦠꦠ꧀ꦠꦴ. ꦄꦥꦫꦶꦲꦴꦤꦶꦪꦺꦠꦶ ꦠꦷꦲꦶ ꦱꦶꦏ꧀ꦑꦴꦲꦶ ꦄꦥꦫꦶꦲꦴꦤꦴꦮꦲꦺ.

꧖-꧗. ꦠꦟ꧀ꦲꦏ꧀ꦑꦪꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧒꧐꧗-꧒꧐꧘. ‘‘ꦱꦺꦴ ꦩꦁ ꦥꦸꦕ꧀ꦖꦶꦱ꧀ꦱꦠꦷ’’ꦠꦶ ꦄꦣꦶꦥ꧀ꦥꦴꦪꦺꦤ ꦨꦒꦮꦠꦴ ꦎꦱꦴꦥꦶꦠꦢꦺꦱꦤꦁ. ꦥꦠ꧀ꦡꦛꦠ꧀ꦠꦴ ꦨꦴꦮꦤꦴꦥꦴꦫꦶꦥꦹꦫꦶꦪꦴ ꦮꦶꦠ꧀ꦡꦴꦫꦶꦠꦁ ꦒꦠꦠ꧀ꦠꦴ. ꦩꦲꦤ꧀ꦠꦨꦴꦮꦤ꧀ꦠꦶ ꦨꦴꦮꦤꦴꦮꦱꦺꦤꦺꦮ ꦩꦲꦠ꧀ꦠꦁ ꦒꦠꦠ꧀ꦠꦴ. ꦠꦠꦺꦴ ꦌꦮ ꦮꦝ꧀ꦞꦶꦥ꧀ꦥꦩꦴꦟꦴ. ꦤꦷꦮꦫꦟꦮꦶꦒꦩꦺ ꦱꦩ꧀ꦨꦮꦠꦺꦴ ꦥꦕ꧀ꦕꦪꦠꦺꦴ ꦧ꧀ꦪꦴꦥꦴꦢꦺꦴ ꦮꦶꦒꦠꦺꦴ ꦲꦺꦴꦠꦷꦠꦶ ꦄꦴꦲ – ‘‘ꦤꦷꦮꦫꦟꦴꦤꦁ ꦢꦹꦫꦷꦨꦴꦮꦺꦤ ꦧ꧀ꦪꦴꦥꦴꦢꦮꦶꦫꦲꦶꦠꦠ꧀ꦠꦴ’’ꦠꦶ. ꦠꦟ꧀ꦲꦴꦩꦹꦭꦏꦤ꧀ꦠꦶ ꦠꦟ꧀ꦲꦴꦥꦕ꧀ꦕꦪꦁ. ꦪꦚ꧀ꦲꦶ ꦠꦟ꧀ꦲꦴꦱꦲꦒꦠꦁ ꦄꦱꦲꦒꦠꦩ꧀ꦥꦶ ꦠꦟ꧀ꦲꦁ ꦈꦥꦤꦶꦱ꧀ꦱꦴꦪ ꦤꦶꦥ꧀ꦦꦤ꧀ꦤꦁ, ꦱꦧ꧀ꦧꦁ ꦠꦁ ꦠꦟ꧀ꦲꦴꦩꦹꦭꦏꦁ. ꦥꦲꦷꦪꦠꦶ ꦄꦤꦸꦥ꧀ꦥꦴꦢꦥ꧀ꦥꦲꦴꦤꦺꦤ. ꦠꦟ꧀ꦲꦴꦢꦷꦤꦁꦪꦺꦮ ꦑꦪꦴ, ꦤ ꦠꦺꦱꦁ ꦱꦔ꧀ꦑꦴꦫꦴꦤꦁ ꦑꦪꦴ. ꦌꦠꦺꦲꦶ ꦠꦟ꧀ꦲꦏ꧀ꦑꦪꦴꦢꦶꦥꦢꦺꦲꦶ.

꧘. ꦤꦶꦧ꧀ꦧꦺꦣꦨꦴꦒꦶꦪꦱꦸꦠ꧀ꦠꦮꦟ꧀ꦟꦤꦴ

꧒꧐꧙. ꦤꦶꦧ꧀ꦧꦶꦗ꧀ꦙꦤ꧀ꦠꦷꦠꦶ ꦤꦶꦧ꧀ꦧꦺꦣꦴ, ꦤꦶꦧ꧀ꦧꦶꦗ꧀ꦙꦤꦣꦩ꧀ꦩꦴ ꦣꦩ꧀ꦩꦮꦶꦤꦪꦴꦢꦪꦺꦴ, ꦠꦥ꧀ꦥꦫꦶꦪꦴꦥꦤ꧀ꦤꦠꦴꦪ ꦤꦶꦧ꧀ꦧꦺꦣꦨꦴꦒꦺ ꦒꦠꦺꦴ ꦤꦶꦧ꧀ꦧꦺꦣꦨꦴꦒꦶꦪꦺꦴ, ꦠꦁ ꦤꦶꦧ꧀ꦧꦺꦣꦨꦴꦒꦶꦪꦁ. ꦠꦺꦤꦴꦲ ‘‘ꦤꦶꦧ꧀ꦧꦶꦗ꧀ꦙꦤꦏꦺꦴꦛ꧀ꦜꦴꦱꦶꦪ’’ꦤ꧀ꦠꦶ. ꦨꦴꦮꦺꦠ꧀ꦮꦴ ꦜꦶꦠꦺꦤ ꦕꦶꦠ꧀ꦠꦺꦤ. ꦮꦶꦥꦱ꧀ꦱꦤꦴꦩꦒ꧀ꦒꦩ꧀ꦥꦶ ꦒꦲꦺꦠ꧀ꦮꦴ ‘‘ꦩꦒ꧀ꦒꦧꦺꦴꦗ꧀ꦙꦔ꧀ꦒꦴ ꦩꦶꦱ꧀ꦱꦏꦴ’’ꦠꦶ ꦮꦸꦠ꧀ꦠꦴ. ꦠꦺꦲꦷꦠꦶ ꦧꦺꦴꦗ꧀ꦙꦔ꧀ꦒꦺꦲꦶ ꦨꦴꦮꦶꦠꦁ ꦕꦶꦠ꧀ꦠꦁ. ꦠꦺ ꦮꦴ ꦧꦺꦴꦗ꧀ꦙꦔ꧀ꦒꦺ ꦨꦴꦮꦺꦠ꧀ꦮꦴ ꦜꦶꦠꦁ ꦕꦶꦠ꧀ꦠꦁ ꦤꦴꦩ ꦦꦭꦕꦶꦠ꧀ꦠꦁ, ꦠꦱ꧀ꦩꦴ ꦤꦶꦧ꧀ꦧꦠ꧀ꦠꦶꦠꦭꦺꦴꦏꦸꦠ꧀ꦠꦫꦩꦺꦮ. ꦠꦩ꧀ꦥꦷꦠꦶ ꦦꦭꦕꦶꦠ꧀ꦠꦩ꧀ꦥꦶ ꦩꦒ꧀ꦒꦴꦤꦤ꧀ꦠꦫꦠꦴꦪ ꦩꦒ꧀ꦒꦤꦶꦱ꧀ꦱꦶꦠꦁ ꦏꦠ꧀ꦮꦴ ꦩꦶꦱ꧀ꦱꦏꦩꦺꦮ ꦏꦡꦺꦠꦸꦁ ꦮꦛ꧀ꦛꦠꦶ ‘‘ꦧꦺꦴꦣꦴꦪ ꦱꦁꦮꦠ꧀ꦠꦤ꧀ꦠꦷ’’ꦠꦶ ꦮꦸꦠ꧀ꦠꦠ꧀ꦠꦴ.

꧙. ꦌꦏꦣꦩ꧀ꦩꦱꦸꦠ꧀ꦠꦮꦟ꧀ꦟꦤꦴ

꧒꧑꧐. ꦱꦁꦪꦺꦴꦗꦤꦱꦔ꧀ꦑꦴꦠꦴ ꦮꦶꦤꦶꦧꦤ꧀ꦣꦴꦠꦶ ꦏꦴꦩꦫꦴꦒꦴꦢꦶꦱꦁꦪꦺꦴꦗꦤꦱꦚ꧀ꦚꦶꦠꦴ ꦧꦤ꧀ꦣꦤꦴ. ꦥꦫꦶꦤꦶꦛ꧀ꦜꦥꦺꦠ꧀ꦮꦴ ꦒꦲꦟꦴꦠꦶ ꦒꦶꦭꦶꦠ꧀ꦮꦴ ꦮꦶꦪ ꦥꦫꦶꦤꦶꦛ꧀ꦜꦥꦺꦠ꧀ꦮꦴ ꦒꦲꦟꦴꦏꦴꦫꦴ.

꧑꧐. ꦈꦢꦴꦪꦶꦱꦸꦠ꧀ꦠꦮꦟ꧀ꦟꦤꦴ

꧒꧑꧑. ꦧꦲꦸꦏꦠꦁ ꦮꦸꦕ꧀ꦕꦠꦶ ꦧꦲꦸꦏꦴꦫꦺꦴ ꦧꦲꦸꦩꦴꦤꦺꦴ, ꦤꦠ꧀ꦡꦶ ꦌꦠꦱ꧀ꦱ ꦧꦲꦸꦏꦠꦤ꧀ꦠꦶ ꦄꦧꦲꦸꦏꦠꦺꦴ, ꦄꦏꦠꦧꦲꦸꦩꦴꦤꦺꦴ. ꦣꦩ꧀ꦩꦺꦴ ꦈꦥ꧀ꦥꦗ꧀ꦗꦩꦴꦤꦺꦴ ꦈꦏ꧀ꦏꦸꦗ꧀ꦗꦤ꧀ꦠꦺꦴ ꦮꦶꦪ ꦤꦶꦫꦸꦗ꧀ꦙꦩꦴꦤꦺꦴ ꦄꦮꦏꦸꦗ꧀ꦗꦤ꧀ꦠꦺꦴ ꦮꦶꦪ ꦲꦺꦴꦠꦷꦠꦶ ꦮꦸꦠ꧀ꦠꦁ ‘‘ꦈꦏ꧀ꦏꦸꦗ꧀ꦗꦁ ꦮꦸꦕ꧀ꦕꦠꦶ ꦈꦢꦪꦺꦴ, ꦄꦮꦏꦸꦗ꧀ꦗꦁ ꦮꦪꦺꦴ’’ꦠꦶ. ꦥꦫꦶꦮꦠ꧀ꦠꦺꦤ꧀ꦠꦺꦴꦠꦶ ꦄꦤꦶꦕ꧀ꦕꦴꦠꦶꦥꦶ ꦢꦸꦏ꧀ꦑꦴꦠꦶꦥꦶ ꦄꦤꦠ꧀ꦠꦴꦠꦶꦥꦶ. ‘‘ꦌꦱꦺꦴ ꦲꦶ ꦠꦺ ꦈꦢꦴꦪꦶ ꦩꦒ꧀ꦒꦺꦴ ꦥꦛꦶꦭꦢ꧀ꦣꦺꦴ, ꦪꦺꦴ ꦠꦺ…ꦥꦺ… ꦠꦡꦠ꧀ꦠꦴꦪ ꦈꦥꦤꦺꦱ꧀ꦱꦠꦷ’’ꦠꦶ ꦥꦫꦶꦪꦺꦴꦱꦴꦤꦺ ꦨꦒꦮꦠꦺꦴ ꦮꦕꦤꦚ꧀ꦕꦺꦠ꧀ꦡ ꦱꦴꦣꦏꦁ ꦢꦛ꧀ꦜꦧ꧀ꦧꦁ. ꦠꦺꦤ ꦠꦺꦤꦴꦏꦴꦫꦺꦤ ꦮꦶꦲꦫꦤ꧀ꦠꦤ꧀ꦠꦶ ꦪꦺꦤ ꦱꦩ꧀ꦩꦱꦤꦴꦏꦴꦫꦺꦤ ꦮꦶꦥꦱ꧀ꦱꦤꦴꦮꦶꦲꦴꦫꦺꦤ ꦮꦶꦲꦫꦤ꧀ꦠꦁ. ꦠꦡꦴꦨꦴꦮꦴꦪꦴꦠꦶ ꦑꦷꦟꦴꦱꦮꦨꦴꦮꦥꦕ꧀ꦕꦮꦺꦏ꧀ꦑꦟꦴꦪ. ꦠꦺꦤꦴꦲ – ‘‘ꦑꦷꦟꦴ ꦗꦴꦠꦷꦠꦶ…ꦥꦺ… ꦠꦁ ꦢꦱ꧀ꦱꦺꦤ꧀ꦠꦺꦴ ꦌꦮꦩꦴꦲꦴ’’ꦠꦶ.

ꦈꦢꦴꦪꦶꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧔. ꦤꦷꦮꦫꦟꦮꦒ꧀ꦒꦺꦴ

꧓-꧔. ꦈꦥꦏ꧀ꦏꦶꦭꦺꦱꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧒꧑꧔-꧒꧑꧕. ꦤ ꦕ ꦥꦨꦴꦮꦤ꧀ꦠꦤ꧀ꦠꦶ ꦤ ꦕ ꦥꦨꦴꦱꦩ꧀ꦥꦤ꧀ꦤꦁ. ꦥꦨꦶꦗ꧀ꦗꦤꦱꦨꦴꦮꦤ꧀ꦠꦶ ꦠꦴꦥꦺꦠ꧀ꦮꦴ ꦠꦴꦭꦤꦺ ꦥꦨꦔ꧀ꦒꦸꦠꦁ. ꦄꦮꦱꦺꦱꦁ ꦭꦺꦴꦲꦤ꧀ꦠꦶ ꦮꦸꦠ꧀ꦠꦴꦮꦱꦺꦱꦁ ꦗꦴꦠꦶꦭꦺꦴꦲꦁ, ꦮꦶꦗꦴꦠꦶꦭꦺꦴꦲꦁ, ꦏꦶꦠ꧀ꦠꦶꦩꦭꦺꦴꦲꦤ꧀ꦠꦶ ꦥꦨꦺꦢꦁ ꦱꦧ꧀ꦧꦩ꧀ꦥꦶ ꦭꦺꦴꦲꦁ. ꦈꦥ꧀ꦥꦗ꧀ꦗꦶꦠꦸꦁ ꦄꦥ꧀ꦥꦢꦴꦤꦺꦤꦴꦠꦶ ꦌꦠ꧀ꦡ ꦤꦤꦸ ꦭꦺꦴꦏꦶꦪꦏꦸꦱꦭꦕꦶꦠ꧀ꦠꦱ꧀ꦱꦥꦶ ꦱꦸꦮꦶꦱꦸꦢ꧀ꦣꦱ꧀ꦱ ꦈꦥ꧀ꦥꦗ꧀ꦗꦶꦠꦸꦁ ꦄꦥ꧀ꦥꦢꦴꦤꦺꦤ ꦈꦥꦏ꧀ꦏꦶꦭꦺꦱꦠꦴꦠꦶ? ꦱꦕ꧀ꦕꦩꦺꦠꦁ, ꦪꦱ꧀ꦩꦶꦁ ꦥꦤ ꦱꦤ꧀ꦠꦴꦤꦺ ꦤꦷꦮꦫꦟꦴꦤꦶ ꦭꦢ꧀ꦣꦥꦠꦶꦛ꧀ꦜꦴꦤꦶ, ꦠꦠ꧀ꦡ ꦩꦲꦒ꧀ꦒꦠꦏꦸꦱꦭꦱ꧀ꦱꦥꦶ ꦄꦱꦩ꧀ꦨꦮꦺꦴ, ꦥꦒꦺꦮ ꦭꦺꦴꦏꦸꦠ꧀ꦠꦫꦏꦸꦱꦭꦱ꧀ꦱ, ꦥꦫꦶꦠ꧀ꦠꦏꦸꦱꦭꦁ ꦥꦤ ꦪꦡꦴꦥꦕ꧀ꦕꦪꦁ ꦈꦥ꧀ꦥꦗ꧀ꦗꦠꦶ. ꦤꦷꦮꦫꦟꦺ ꦲꦶ ꦮꦹꦥꦱꦤ꧀ꦠꦺ ꦱꦤ꧀ꦠꦴꦤꦺ ꦈꦥ꧀ꦥꦠ꧀ꦠꦶꦪꦴ ꦄꦥꦫꦶꦱꦸꦢ꧀ꦣꦁ ꦲꦺꦴꦠꦶ, ꦈꦥꦏ꧀ꦏꦶꦭꦶꦛ꧀ꦜꦁ ꦤꦴꦩ ꦲꦺꦴꦠꦶ, ꦄꦥꦫꦶꦱꦸꦢ꧀ꦣꦢꦷꦥꦏꦥꦭ꧀ꦭꦶꦏꦮꦛ꧀ꦜꦶꦠꦺꦭꦴꦢꦶꦱꦤ꧀ꦤꦶꦱ꧀ꦱꦪꦺꦴ ꦢꦷꦥꦺꦴ ꦮꦶꦪ, ꦄꦥꦶꦕ ꦤꦶꦥ꧀ꦥꦫꦶꦪꦴꦪꦠꦺꦴ ꦈꦥ꧀ꦥꦗ꧀ꦗꦶꦠꦸꦁ ꦄꦥ꧀ꦥꦢꦴꦤꦺꦤꦺꦮ ꦠꦺꦱꦁ ꦈꦥꦏ꧀ꦏꦶꦭꦺꦱꦠꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦪꦢꦒ꧀ꦒꦺꦤ ꦲꦷ’’ꦠꦶꦄꦴꦢꦶꦩꦴꦲ. ꦄꦴꦫꦩ꧀ꦩꦟꦺ ꦮꦶꦏ꧀ꦑꦶꦠ꧀ꦠꦥ꧀ꦥꦠ꧀ꦠꦶꦮꦱꦺꦤ ꦕꦸꦟ꧀ꦟꦮꦶꦕꦸꦟ꧀ꦟꦠꦴ ꦮꦺꦢꦶꦠꦧ꧀ꦧꦴ. ꦤ ꦄꦴꦮꦫꦤ꧀ꦠꦷꦠꦶ ꦏꦸꦱꦭꦣꦩ꧀ꦩꦺ ꦈꦥ꧀ꦥꦗ꧀ꦗꦶꦠꦸꦁ ꦄꦥ꧀ꦥꦢꦴꦤꦮꦱꦺꦤ ꦤ ꦄꦴꦮꦫꦤ꧀ꦠꦶ, ꦄꦡ ꦑꦺꦴ ꦠꦺꦱꦁ ꦈꦥ꧀ꦥꦠ꧀ꦠꦶꦪꦴ ꦲꦺꦴꦤ꧀ꦠꦶ. ꦤ ꦥꦛꦶꦕ꧀ꦖꦴꦢꦺꦤ꧀ꦠꦷꦠꦶ ꦤ ꦮꦶꦤꦤ꧀ꦣꦤ꧀ꦠꦶ. ꦕꦠꦸꦨꦹꦩꦏꦕꦶꦠ꧀ꦠꦱ꧀ꦱꦴꦠꦶ ꦕꦠꦸꦠ꧀ꦡꦨꦹꦩꦏꦏꦸꦱꦭꦕꦶꦠ꧀ꦠꦱ꧀ꦱ ꦄꦤꦸꦥꦏ꧀ꦏꦶꦭꦺꦱꦴ, ꦠꦺꦲꦶ ꦄꦏꦶꦭꦶꦱ꧀ꦱꦤꦠꦺꦴ.

꧘. ꦄꦴꦮꦫꦟꦤꦷꦮꦫꦟꦱꦸꦠ꧀ꦠꦮꦟ꧀ꦟꦤꦴ

꧒꧑꧙. ꦥꦚ꧀ꦚꦴ ꦢꦸꦧ꧀ꦧꦭꦴ ꦲꦺꦴꦠꦶ, ꦤ ꦧꦭꦮꦠꦷ ꦥꦛꦶꦥꦏ꧀ꦑꦺꦤ ꦈꦥꦏ꧀ꦏꦶꦭꦶꦛ꧀ꦜꦨꦴꦮꦠꦺꦴ. ꦠꦺꦤꦴꦲ ‘‘ꦩꦤ꧀ꦢꦴ ꦄꦮꦶꦱꦢꦴ’’ꦠꦶ.

ꦥꦚ꧀ꦕ ꦤꦷꦮꦫꦟꦴ ꦢꦹꦫꦺ ꦲꦺꦴꦤ꧀ꦠꦶ ꦄꦴꦮꦫꦟꦴꦨꦴꦮꦠꦺꦴ. ꦠꦩꦺꦮ ꦥꦷꦠꦶꦤ꧀ꦠꦶ ꦱꦥ꧀ꦥꦴꦪꦣꦩ꧀ꦩꦱꦮꦤꦺ ꦈꦥ꧀ꦥꦤ꧀ꦤꦁ ꦥꦷꦠꦶꦁ. ꦠꦱ꧀ꦱꦴ ꦠꦢꦴ ꦈꦥ꧀ꦥꦤ꧀ꦤꦴꦏꦴꦫꦱꦭ꧀ꦭꦏ꧀ꦑꦟꦺꦤ ꦄꦮꦶꦗꦲꦤ꧀ꦠꦺꦴ ꦥꦸꦤꦥ꧀ꦥꦸꦤꦁ ꦠꦱ꧀ꦱꦴ ꦤꦶꦧ꧀ꦧꦠ꧀ꦠꦤꦺꦤ. ꦠꦺꦤꦴꦲ ‘‘ꦥꦚ꧀ꦕ ꦤꦷꦮꦫꦟꦺ ꦮꦶꦏ꧀ꦑꦩ꧀ꦨꦺꦠ꧀ꦮꦴ’’ꦠꦶ. ꦆꦢꦁ ꦱꦤ꧀ꦣꦴꦪꦴꦠꦶ ꦌꦠ꧀ꦠꦏꦺ ꦢꦶꦮꦱꦺꦥꦶ ꦤ ꦮꦶꦤꦱ꧀ꦱꦤ꧀ꦠꦶ, ꦱꦴ ꦣꦩ꧀ꦩꦥꦷꦠꦶ ꦭꦢ꧀ꦣꦥꦕ꧀ꦕꦪꦴ ꦲꦸꦠ꧀ꦮꦴ ꦮꦶꦱꦺꦱꦴꦮꦲꦴꦠꦶ ꦆꦩꦩꦠ꧀ꦡꦁ ꦱꦤ꧀ꦣꦴꦪ ꦌꦠꦁ ‘‘ꦆꦩꦱ꧀ꦱ ꦥꦚ꧀ꦕ ꦤꦷꦮꦫꦟꦴ ꦠꦱ꧀ꦩꦶꦁ ꦱꦩꦪꦺ ꦤ ꦲꦺꦴꦤ꧀ꦠꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦥꦷꦠꦶꦥꦴꦩꦺꦴꦗ꧀ꦗꦥꦏ꧀ꦑꦶꦪꦴꦠꦶ ꦥꦷꦠꦶꦥꦴꦩꦺꦴꦗ꧀ꦗꦥꦕ꧀ꦕꦪꦴ. ꦤꦱ꧀ꦱꦤ꧀ꦠꦷꦠꦶ ꦤꦶꦫꦺꦴꦣꦥꦕ꧀ꦕꦪꦮꦱꦺꦤ ꦥꦮꦠ꧀ꦠꦤꦠꦺꦴ ꦤꦱ꧀ꦱꦤ꧀ꦠꦶ. ꦱꦨꦴꦒꦥꦕ꧀ꦕꦪꦮꦱꦺꦤ ꦥꦸꦤ ꦈꦥ꧀ꦥꦗ꧀ꦗꦤ꧀ꦠꦴꦥꦶ…ꦥꦺ… ꦮꦸꦕ꧀ꦕꦠꦶ ꦏꦶꦕ꧀ꦕꦱꦴꦣꦤꦮꦱꦺꦤ ꦥꦮꦠ꧀ꦠꦤꦠꦺꦴ.

꧙. ꦫꦸꦏ꧀ꦑꦱꦸꦠ꧀ꦠꦮꦟ꧀ꦟꦤꦴ

꧒꧒꧐. ꦄꦨꦶꦫꦸꦲꦤꦏꦴꦠꦶ ꦱꦩꦷꦥꦫꦸꦏ꧀ꦑꦺ ꦄꦨꦶꦨꦮꦶꦠ꧀ꦮꦴ ꦫꦸꦲꦤꦏꦴ. ꦄꦛ꧀ꦜꦶꦏꦕ꧀ꦖꦏꦺꦴꦠꦶ ꦄꦛ꧀ꦜꦶꦧꦲꦸꦭꦏꦕ꧀ꦖꦏꦺꦴ. ꦏꦥꦶꦡꦤꦱꦢꦶꦱꦦꦭꦠ꧀ꦠꦴ ꦏꦥꦶꦠ꧀ꦡꦤꦺꦴꦠꦶ ꦭꦢ꧀ꦣꦤꦴꦩꦺꦴ.

꧑꧐. ꦤꦷꦮꦫꦟꦱꦸꦠ꧀ꦠꦮꦟ꧀ꦟꦤꦴ

꧒꧒꧑. ꦄꦤ꧀ꦣꦨꦴꦮꦏꦫꦟꦴ ꦥꦚ꧀ꦚꦴꦕꦏ꧀ꦑꦸꦱ꧀ꦱ ꦮꦶꦧꦤ꧀ꦣꦤꦠꦺꦴ. ꦠꦡꦴ ꦲꦶ ꦠꦺ ‘‘ꦄꦕꦏ꧀ꦑꦸꦏꦫꦟꦴ ꦥꦚ꧀ꦚꦴꦤꦶꦫꦺꦴꦣꦶꦏꦴ’’ꦠꦶ ꦮꦸꦠ꧀ꦠꦴ. ꦮꦶꦲꦤꦠꦶ ꦮꦶꦧꦴꦣꦠꦷꦠꦶ ꦮꦶꦓꦴꦠꦺꦴ, ꦢꦸꦏ꧀ꦑꦤ꧀ꦠꦶ ꦄꦴꦲ ‘‘ꦮꦶꦓꦴꦠꦥꦏ꧀ꦑꦶꦪꦴꦠꦶ ꦢꦸꦏ꧀ꦑꦥꦏ꧀ꦑꦶꦏꦴ’’ꦠꦶ. ꦤꦶꦧ꧀ꦧꦴꦤꦠ꧀ꦡꦴꦪ ꦤ ꦱꦁꦮꦠ꧀ꦠꦤ꧀ꦠꦷꦠꦶ ꦄꦤꦶꦧ꧀ꦧꦴꦤꦱꦁꦮꦠ꧀ꦠꦤꦶꦏꦴ. ꦩꦶꦱ꧀ꦱꦏꦧꦺꦴꦗ꧀ꦙꦔ꧀ꦒꦴꦮ ꦏꦡꦶꦠꦴ ꦥꦸꦧ꧀ꦧꦨꦴꦒꦶꦏꦴꦤꦁ ꦏꦡꦶꦠꦠ꧀ꦠꦴ.

ꦤꦷꦮꦫꦟꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧕. ꦕꦏ꧀ꦏꦮꦠ꧀ꦠꦶꦮꦒ꧀ꦒꦺꦴ

꧑. ꦮꦶꦣꦴꦱꦸꦠ꧀ꦠꦮꦟ꧀ꦟꦤꦴ

꧒꧒꧒. ꦮꦶꦣꦷꦪꦤ꧀ꦠꦷꦠꦶ ꦮꦶꦣꦴ, ꦩꦴꦤꦴꦢꦶꦨꦴꦒꦴ ꦏꦺꦴꦛ꧀ꦜꦴꦱꦴꦠꦶ ꦄꦴꦲ ‘‘ꦠꦪꦺꦴ ꦩꦴꦤꦏꦺꦴꦛ꧀ꦜꦴꦱꦴ’’ꦠꦶ. ꦠꦡꦴ ꦠꦡꦴ ꦮꦶꦢꦲꦤꦠꦺꦴꦠꦶ ‘‘ꦱꦺꦪ꧀ꦪꦺꦴꦲꦩꦱ꧀ꦩꦷ’’ꦠꦶꦄꦴꦢꦶꦤꦴ ꦠꦺꦤ ꦠꦺꦤꦴꦏꦴꦫꦺꦤ ꦮꦶꦢꦲꦤꦠꦺꦴ ꦜꦥꦤꦠꦺꦴ, ꦜꦥꦺꦠꦧ꧀ꦧꦠꦺꦴ ꦮꦴ.

꧒. ꦕꦏ꧀ꦏꦮꦠ꧀ꦠꦶꦱꦸꦠ꧀ꦠꦮꦟ꧀ꦟꦤꦴ

꧒꧒꧓. ꦱꦶꦫꦶꦱꦩ꧀ꦥꦠ꧀ꦠꦶꦪꦴ ꦫꦴꦗꦠꦶ ꦢꦶꦥ꧀ꦥꦠꦶ ꦱꦺꦴꦨꦠꦷꦠꦶ ꦫꦴꦗꦴ, ꦢꦴꦤꦥꦶꦪꦮꦕꦤꦄꦠ꧀ꦡꦕꦫꦶꦪꦴꦱꦩꦴꦤꦠ꧀ꦠꦠꦴꦱꦔ꧀ꦑꦴꦠꦺꦲꦶ ꦕꦠꦹꦲꦶ ꦱꦔ꧀ꦒꦲꦮꦠ꧀ꦡꦹꦲꦶ. ꦫꦚ꧀ꦗꦺꦠꦷꦠꦶ ꦫꦩꦺꦠꦶ. ꦄꦧ꧀ꦨꦸꦒ꧀ꦒꦠꦴꦪꦴꦠꦶ ꦈꦢꦷꦫꦶꦠꦴ ꦤꦶꦧ꧀ꦧꦠ꧀ꦠꦶꦠꦺꦴ ꦠꦠ꧀ꦡ ꦠꦠ꧀ꦡ ꦒꦕ꧀ꦖꦤꦠꦺꦴ. ꦕꦏ꧀ꦏꦁ ꦮꦠ꧀ꦠꦺꦠꦷꦠꦶ ꦕꦏ꧀ꦏꦫꦠꦤꦁ ꦥꦮꦠ꧀ꦠꦺꦠꦶ. ꦢꦺꦮꦛ꧀ꦜꦴꦤꦤ꧀ꦠꦶ ꦥꦹꦗꦤꦷꦪꦢꦺꦮꦛ꧀ꦜꦴꦤꦁ. ꦕꦶꦠ꧀ꦠꦷꦏꦠꦛ꧀ꦜꦺꦤꦴꦠꦶ ꦥꦹꦗꦤꦷꦪꦨꦴꦮꦺꦤ. ꦄꦒ꧀ꦓꦺꦴ ꦤꦠ꧀ꦡꦶ ꦕꦶꦫꦏꦴꦭꦱꦩ꧀ꦨꦮꦥꦸꦚ꧀ꦚꦴꦤꦸꦨꦴꦮꦱꦶꦢ꧀ꦣꦫꦠꦤꦱꦧ꧀ꦨꦴꦮꦠꦺꦴ. ꦄꦚ꧀ꦚꦺꦲꦶ ꦕꦏ꧀ꦏꦮꦠ꧀ꦠꦶꦤꦺꦴ ꦥꦫꦶꦒ꧀ꦒꦲꦨꦹꦠꦫꦠꦤꦺꦲꦶ. ꦭꦺꦴꦏꦺꦠꦶ ꦩꦤꦸꦱ꧀ꦱꦭꦺꦴꦏꦺ. ꦠꦺꦤ ꦠꦢꦚ꧀ꦚꦭꦺꦴꦏꦁ ꦤꦶꦮꦠ꧀ꦠꦺꦠꦶ. ꦮꦶꦗ꧀ꦗꦩꦴꦤꦒ꧀ꦒꦲꦟꦺꦤ ꦄꦠꦷꦠꦴꦤꦴꦒꦠꦁ ꦤꦶꦮꦠ꧀ꦠꦺꦠꦶ. ꦧꦸꦢ꧀ꦣꦴ ꦕ ꦏꦢꦴꦕꦶ ꦏꦫꦲꦕꦶ ꦈꦥ꧀ꦥꦗ꧀ꦗꦤ꧀ꦠꦶ ꦕꦏ꧀ꦏꦮꦠ꧀ꦠꦶꦤꦺꦴꦥꦶ ꦪꦺꦨꦸꦪ꧀ꦪꦺꦤ ꦠꦱ꧀ꦩꦶꦁꦪꦺꦮ ꦈꦥ꧀ꦥꦗ꧀ꦗꦤꦠꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦄꦤꦺꦴꦩꦱ꧀ꦱꦴꦠꦶ ꦄꦭꦴꦩꦏꦱ꧀ꦱ ꦈꦏ꧀ꦏꦛ꧀ꦜꦱ꧀ꦱ. ꦱꦺꦱꦴꦤꦶ ꦫꦠꦤꦴꦤꦶ.

ꦠꦠ꧀ꦫꦴꦠꦶ ꦮꦴꦏ꧀ꦪꦺꦴꦥꦚ꧀ꦚꦴꦱꦤꦺ ꦤꦶꦥꦴꦠꦺꦴ, ꦠꦱ꧀ꦩꦶꦁ ꦥꦴꦠꦸꦨꦴꦮꦮꦕꦤꦺ. ‘‘ꦄꦪꦸꦠ꧀ꦠ’’ꦤ꧀ꦠꦶ ꦮꦠ꧀ꦮꦴ ꦠꦠ꧀ꦡ ꦄꦣꦶꦥ꧀ꦥꦴꦪꦁ ꦮꦶꦮꦫꦤ꧀ꦠꦺꦴ ‘‘ꦈꦥ꧀ꦥꦤ꧀ꦤꦁ ꦲꦷ’’ꦠꦶꦄꦴꦢꦶꦩꦴꦲ. ꦠꦺꦲꦶ ꦫꦠꦤꦺꦲꦶ ꦕꦏ꧀ꦏꦮꦠ꧀ꦠꦤꦤꦶꦪꦩꦴꦥꦺꦏ꧀ꦑꦠꦴꦪ ꦕꦏ꧀ꦏꦮꦠ꧀ꦠꦶꦮꦕꦤꦱ꧀ꦱ. ꦤꦶꦪꦩꦺꦤꦴꦠꦶ ꦌꦏꦤ꧀ꦠꦺꦤ. ꦮꦠ꧀ꦠꦧ꧀ꦧꦠꦁ ꦄꦴꦥꦗ꧀ꦗꦠꦶ ꦨꦴꦮꦶꦤꦶ ꦨꦹꦠꦺ ꦮꦶꦪ ꦈꦥꦕꦴꦫꦺꦴꦠꦶ ꦪꦡꦴ – ‘‘ꦄꦒꦩꦴ ꦫꦴꦗꦒꦲꦁ ꦧꦸꦢ꧀ꦣꦺꦴ’’ꦠꦶ (ꦱꦸ. ꦤꦶ. ꧔꧑꧐). ꦭꦢ꧀ꦣꦤꦴꦩꦱ꧀ꦱꦴꦠꦶ ꦕꦏ꧀ꦏꦮꦠ꧀ꦠꦷꦠꦶ ꦭꦺꦴꦏꦺ ꦭꦢ꧀ꦣꦱꦩꦚ꧀ꦚꦱ꧀ꦱ ꦥꦠ꧀ꦡꦤꦷꦪꦱ꧀ꦱ ꦥꦸꦫꦶꦱꦮꦶꦱꦺꦱꦱ꧀ꦱ. ꦩꦹꦭꦸꦥ꧀ꦥꦠ꧀ꦠꦶꦮꦕꦤꦠꦺꦴꦥꦷꦠꦶ ‘‘ꦕꦏ꧀ꦏꦮꦠ꧀ꦠꦶꦱ꧀ꦱ ꦥꦴꦠꦸꦨꦴꦮꦴ’’ꦠꦶ ꦌꦠꦱ꧀ꦱ ꦥꦜꦩꦸꦥ꧀ꦥꦠ꧀ꦠꦶꦪꦴ ꦮꦕꦤꦠꦺꦴꦥꦶ. ꦆꦢꦴꦤꦶ ꦠꦩꦠ꧀ꦡꦁ ꦮꦶꦮꦫꦤ꧀ꦠꦺꦴ ‘‘ꦪꦺꦴ ꦲꦷ’’ꦠꦶꦄꦴꦢꦶꦩꦴꦲ. ꦪꦺꦴ ꦲꦶ ꦕꦏ꧀ꦏꦮꦠ꧀ꦠꦶꦫꦴꦗꦴ, ꦠꦱ꧀ꦱ ꦈꦥ꧀ꦥꦠ꧀ꦠꦶꦪꦴ ꦕꦏ꧀ꦏꦫꦠꦤꦱ꧀ꦱ ꦈꦥ꧀ꦥꦗ꧀ꦗꦤꦠꦺꦴ ꦕꦏ꧀ꦏꦮꦠ꧀ꦠꦷꦠꦶ ꦌꦮꦁ ꦤꦴꦩꦁ ꦈꦥ꧀ꦥꦗ꧀ꦗꦠꦶ. ‘‘ꦕꦏ꧀ꦏꦁ ꦮꦠ꧀ꦠꦺꦱ꧀ꦱꦠꦷ’’ꦠꦶ ꦆꦢꦁ ꦥꦤ ꦤꦶꦪꦴꦩꦁ ꦄꦤꦥꦺꦏ꧀ꦑꦶꦠ꧀ꦮꦴ ꦠꦱ꧀ꦱ ꦈꦥ꧀ꦥꦗ꧀ꦗꦠꦷꦠꦶ ꦫꦠꦤꦴꦤꦸꦥ꧀ꦥꦠ꧀ꦠꦶꦁ ꦒꦲꦺꦠ꧀ꦮꦴ ꦮꦸꦠ꧀ꦠꦤꦪꦠꦺꦴ ꦱꦚ꧀ꦚꦴ ꦈꦥ꧀ꦥꦗ꧀ꦗꦠꦶ ‘‘ꦕꦏ꧀ꦏꦮꦠ꧀ꦠꦷ’’ꦠꦶ. ꦌꦏꦩꦺꦮꦴꦠꦶ ꦕꦏ꧀ꦏꦫꦠꦤꦩꦺꦮ ꦥꦜꦩꦁ ꦥꦴꦠꦸꦨꦮꦠꦶ. ꦪꦱ꧀ꦩꦶꦁ ꦨꦹꦠꦺ ꦫꦚ꧀ꦚꦺꦴ ꦕꦏ꧀ꦏꦮꦠ꧀ꦠꦶꦱꦩꦚ꧀ꦚꦴ, ꦄꦡ ꦥꦕ꧀ꦖꦴ ꦫꦠꦤꦴꦤꦶ ꦥꦴꦠꦸꦨꦮꦤ꧀ꦠꦷꦠꦶ ꦧꦲꦹꦤꦁ ꦥꦴꦠꦸꦨꦴꦮꦁ ꦈꦥꦴꦢꦴꦪ ꦧꦲꦸꦭꦮꦕꦤꦠꦺꦴꦥꦶ ꦌꦠꦁ ‘‘ꦕꦏ꧀ꦏꦮꦠ꧀ꦠꦶꦱ꧀ꦱ ꦥꦴꦠꦸꦨꦴꦮꦴ ꦫꦠꦤꦴꦤꦁ ꦥꦴꦠꦸꦨꦴꦮꦺꦴ’’ꦠꦶ ꦮꦸꦠ꧀ꦠꦁ. ꦄꦪꦁ ꦲꦺꦠꦸꦏꦠ꧀ꦠꦸꦱꦚ꧀ꦚꦶꦠꦺꦴ ꦄꦠ꧀ꦡꦨꦺꦢꦺꦴ. ꦥꦴꦠꦸꦨꦴꦮꦴꦠꦶ ꦥꦴꦠꦸꦨꦴꦮꦠꦺꦴ. ꦥꦸꦚ꧀ꦚꦱꦩ꧀ꦨꦴꦫꦺꦴ ꦨꦶꦤ꧀ꦤꦱꦤ꧀ꦠꦴꦤꦠꦴꦪ ꦫꦠꦤꦴꦤꦩ꧀ꦥꦶ ꦥꦫꦶꦪꦴꦪꦺꦤ ꦈꦥꦤꦶꦱ꧀ꦱꦪꦲꦺꦠꦹꦠꦶ ꦮꦸꦠ꧀ꦠꦁ. ꦪꦸꦠ꧀ꦠꦩꦺꦮꦺꦠꦁ ꦪꦡꦴꦮꦸꦠ꧀ꦠꦪꦸꦠ꧀ꦠꦶꦪꦸꦠ꧀ꦠꦠ꧀ꦠꦴ.

ꦮꦠ꧀ꦠꦧ꧀ꦧꦨꦹꦠꦺꦴ ꦄꦣꦶꦥ꧀ꦥꦴꦪꦺꦴ ꦌꦠꦱ꧀ꦱ ꦄꦠ꧀ꦡꦷꦠꦶ ꦄꦣꦶꦥ꧀ꦥꦴꦪꦺꦴ, ꦄꦠ꧀ꦡꦤꦶꦢ꧀ꦢꦺꦱꦺꦴ, ꦱꦔ꧀ꦑꦺꦥꦠꦺꦴ ꦄꦣꦶꦥ꧀ꦥꦴꦪꦺꦴ ꦱꦔ꧀ꦑꦺꦥꦴꦣꦶꦥ꧀ꦥꦴꦪꦺꦴ. ꦕꦏ꧀ꦏꦫꦠꦤꦴꦤꦸꦨꦴꦮꦺꦤ ꦕꦏ꧀ꦏꦮꦠ꧀ꦠꦶꦱ꧀ꦱꦫꦶꦪꦱ꧀ꦱ ꦱꦶꦗ꧀ꦙꦤꦠꦺꦴ ‘‘ꦢꦴꦠꦸꦁ ꦱꦩꦠ꧀ꦡꦱ꧀ꦱꦴ’’ꦠꦶ ꦮꦸꦠ꧀ꦠꦁ. ꦪꦺꦴꦗꦤꦥ꧀ꦥꦩꦴꦟꦺ ꦥꦢꦺꦱꦺ ꦥꦮꦠ꧀ꦠꦠ꧀ꦠꦴ ꦪꦺꦴꦗꦤꦥ꧀ꦥꦩꦴꦟꦁ ꦄꦤ꧀ꦣꦏꦴꦫꦁ. ꦄꦠꦶꦢꦷꦓꦴꦠꦶꦫꦱ꧀ꦱꦠꦴꦢꦶꦁ ꦖꦧ꧀ꦧꦶꦣꦁ ꦢꦺꦴꦱꦁ ꦮꦶꦮꦗ꧀ꦗꦺꦠ꧀ꦮꦴ ꦜꦶꦠꦱ꧀ꦱꦴꦠꦶ ꦮꦕꦤꦱꦺꦱꦺꦴ.

ꦱꦧ꧀ꦧꦺꦱꦁ ꦕꦠꦸꦨꦹꦩꦏꦣꦩ꧀ꦩꦴꦤꦁ ꦥꦸꦫꦺꦕꦫꦁ ꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦒꦠꦶꦪꦺꦴ ꦱꦩꦤ꧀ꦮꦺꦱꦤꦮꦱꦺꦤ ꦥꦮꦠ꧀ꦠꦤꦠꦺꦴ. ꦧꦸꦢ꧀ꦣꦴꦢꦷꦲꦶꦥꦶ ꦄꦥ꧀ꦥꦲꦴꦤꦷꦪꦠꦴꦪ ꦩꦲꦤ꧀ꦠꦣꦩ꧀ꦩꦱꦨꦴꦮꦠ꧀ꦠꦴ ꦣꦩ꧀ꦩꦏꦴꦪꦺ ꦕ ꦗꦺꦛ꧀ꦜꦏꦛ꧀ꦜꦺꦤ ꦣꦩ꧀ꦩꦏꦴꦪꦹꦥꦥꦤ꧀ꦤꦁ. ꦥꦚ꧀ꦚꦴꦥꦴꦱꦴꦢꦠꦴꦪ ꦕꦱ꧀ꦱ ꦈꦥꦫꦶꦒꦠꦛ꧀ꦜꦺꦤ ꦄꦕ꧀ꦕꦸꦒ꧀ꦒꦠꦁ. ꦮꦶꦠ꧀ꦡꦠꦛ꧀ꦜꦺꦤ ꦮꦶꦥꦸꦭꦁ. ꦩꦲꦤ꧀ꦠꦠꦴꦪ ꦩꦲꦤ꧀ꦠꦁ. ꦄꦤꦴꦢꦶꦏꦴꦭꦨꦴꦮꦶꦠꦱ꧀ꦱ ꦏꦶꦭꦺꦱꦱꦤ꧀ꦠꦴꦤꦱ꧀ꦱ ꦑꦟꦺꦤꦺꦮ ꦮꦶꦢ꧀ꦣꦁꦱꦤꦠꦺꦴ ꦱꦷꦓꦁ ꦭꦲꦸ ꦗꦮꦤ꧀ꦠꦶ ꦥꦫꦶꦪꦴꦪꦴ. ꦧꦺꦴꦗ꧀ꦙꦔ꧀ꦒꦣꦩ꧀ꦩꦥꦫꦶꦪꦴꦥꦤ꧀ꦤꦠ꧀ꦠꦴ ꦲꦶ ꦮꦸꦠ꧀ꦠꦁ ‘‘ꦌꦏꦤ꧀ꦠ-ꦏꦸꦱꦭꦠ꧀ꦠꦴ’’ꦠꦶ. ꦱꦩ꧀ꦥꦪꦸꦠ꧀ꦠꦮꦱꦺꦤ ꦥꦷꦠꦶꦪꦴ ꦄꦴꦭꦺꦴꦏꦮꦶꦢ꧀ꦣꦁꦱꦤꦨꦴꦮꦮꦱꦺꦤꦴꦠꦶ ꦮꦸꦠ꧀ꦠꦁ ‘‘ꦱꦲꦗꦴꦠꦥꦕ꧀ꦕꦪꦴꦢꦷ’’ꦠꦶꦄꦴꦢꦶ. ꦱꦧ꧀ꦧꦱꦔ꧀ꦒꦴꦲꦶꦏꦣꦩ꧀ꦩꦥꦫꦶꦕ꧀ꦖꦺꦢꦺꦴꦠꦶ ꦕꦠꦸꦨꦹꦩꦏꦠ꧀ꦠꦴ ꦱꦧ꧀ꦧꦱꦔ꧀ꦒꦴꦲꦏꦺꦴ ꦧꦺꦴꦗ꧀ꦙꦔ꧀ꦒꦣꦩ꧀ꦩꦥꦫꦶꦕ꧀ꦖꦺꦢꦺꦴ ꦏꦡꦶꦠꦺꦴ.

꧔-꧑꧐. ꦢꦸꦥ꧀ꦥꦚ꧀ꦚꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧒꧒꧕-꧒꧓꧑. ꦌꦭ꦳ꦁ ꦮꦸꦕ꧀ꦕꦠꦶ ꦢꦺꦴꦱꦺꦴ, ꦌꦭ꦳ꦺꦤ ꦩꦹꦒꦺꦴ ꦮꦶꦪꦴꦠꦶ ꦌꦭ꦳ꦩꦹꦒꦺꦴꦠꦶ ꦆꦩꦩꦠ꧀ꦡꦁ ꦢꦱ꧀ꦱꦺꦤ꧀ꦠꦺꦴ ‘‘ꦩꦸꦑꦺꦤ ꦮꦴꦕ’’ꦤ꧀ꦠꦶꦄꦴꦢꦶꦩꦴꦲ.

ꦕꦏ꧀ꦏꦮꦠ꧀ꦠꦶꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧖. ꦱꦴꦏꦕ꧀ꦖꦮꦒ꧀ꦒꦺꦴ

꧑. ꦄꦴꦲꦴꦫꦱꦸꦠ꧀ꦠꦮꦟ꧀ꦟꦤꦴ

꧒꧓꧒. ꦥꦸꦫꦶꦩꦤꦪꦠꦺꦴꦠꦶ ‘‘ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦛ꧀ꦜꦴꦤꦷꦪꦴꦤꦁ ꦣꦩ꧀ꦩꦴꦤ’’ꦤ꧀ꦠꦶꦄꦴꦢꦶꦤꦴ ꦄꦴꦒꦠꦤꦪꦠꦺꦴ. ꦌꦮꦤ꧀ꦠꦶ ꦆꦢꦴꦤꦶ ꦮꦸꦕ꧀ꦕꦩꦴꦤꦴꦏꦴꦫꦺꦤ. ꦱꦠꦶ ꦕ ꦱꦩ꧀ꦥꦗꦚ꧀ꦚꦚ꧀ꦕ ꦱꦠꦶꦱꦩ꧀ꦥꦗꦚ꧀ꦚꦁ. ꦱꦠꦶꦥꦣꦴꦤꦁ ꦮꦴ ꦄꦨꦶꦏ꧀ꦏꦤ꧀ꦠꦴꦢꦷꦱꦸ ꦱꦠ꧀ꦡꦏꦨꦴꦮꦥꦫꦶꦒ꧀ꦒꦟ꧀ꦲꦏꦚꦴꦟꦁ ꦱꦠꦶꦱꦩ꧀ꦥꦗꦚ꧀ꦚꦁ. ꦠꦁ ꦱꦧ꧀ꦧꦠ꧀ꦡ ꦱꦠꦺꦴꦏꦴꦫꦷꦨꦴꦮꦴꦮꦲꦠ꧀ꦠꦴ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦴꦪ ꦱꦁꦮꦠ꧀ꦠꦠꦶ. ꦪꦡꦴ ꦕ ꦥꦕ꧀ꦕꦤꦷꦏꦣꦩ꧀ꦩꦥ꧀ꦥꦲꦴꦤꦁ ꦄꦤꦸꦫꦹꦥꦣꦩ꧀ꦩꦢꦺꦱꦤꦴ ꦕ ꦄꦤꦸꦥ꧀ꦥꦤ꧀ꦤꦴꦤꦁ ꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦈꦥ꧀ꦥꦴꦢꦴꦪ ꦲꦺꦴꦠꦶ, ꦌꦮꦁ ꦱꦠꦶꦫꦲꦶꦠꦥꦸꦒ꧀ꦒꦭꦮꦗ꧀ꦗꦤꦴ ꦱꦠꦺꦴꦏꦴꦫꦷꦥꦸꦒ꧀ꦒꦭꦱꦺꦮꦤꦴ ꦕ ꦠꦠ꧀ꦡ ꦕ ꦪꦸꦠ꧀ꦠꦥꦪꦸꦠ꧀ꦠꦠꦴ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦴꦪ ꦲꦺꦴꦠꦷꦠꦶ ꦆꦩꦩꦠ꧀ꦡꦁ ꦢꦱ꧀ꦱꦺꦠꦶ ‘‘ꦱꦠꦶꦱꦩ꧀ꦥꦗꦚ꧀ꦚ’’ꦤ꧀ꦠꦶꦄꦴꦢꦶꦤꦴ. ꦄꦫꦲꦠ꧀ꦠꦩꦒ꧀ꦒꦺꦤ ꦨꦴꦮꦤꦴꦥꦴꦫꦶꦥꦹꦫꦷ ꦲꦺꦴꦠꦶ. ꦠꦡꦴ ꦲꦶ ꦄꦫꦲꦴꦮ ‘‘ꦱꦠꦶꦮꦺꦥꦸꦭ꧀ꦭꦥ꧀ꦥꦠ꧀ꦠꦺꦴ’’ꦠꦶ ꦮꦸꦕ꧀ꦕꦠꦶ.

ꦣꦩ꧀ꦩꦴꦤꦁ, ꦣꦩ꧀ꦩꦺꦱꦸ ꦮꦴ ꦮꦶꦕꦪꦺꦴ, ꦱꦺꦴ ꦌꦮ ꦲꦺꦛ꧀ꦜꦴ ꦮꦸꦠ꧀ꦠꦤꦪꦺꦤ ꦱꦩ꧀ꦧꦺꦴꦗ꧀ꦙꦔ꧀ꦒꦺꦴ, ꦠꦱ꧀ꦱ ꦣꦩ꧀ꦩꦮꦶꦕꦪꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ. ꦥꦫꦶꦥꦸꦕ꧀ꦖꦏꦠꦴꦠꦶ ꦄꦴꦕꦫꦶꦪꦁ ꦥꦪꦶꦫꦸꦥꦴꦱꦶꦠ꧀ꦮꦴ ꦥꦚ꧀ꦕꦥꦶ ꦤꦶꦏꦴꦪꦺ ꦱꦲꦛ꧀ꦜꦏꦡꦴꦪ ꦥꦫꦶꦪꦺꦴꦒꦴꦲꦺꦠ꧀ꦮꦴ ꦪꦁ ꦪꦁ ꦠꦠ꧀ꦡ ꦒꦟ꧀ꦜꦶꦛ꧀ꦜꦴꦤꦁ, ꦠꦱ꧀ꦱ ꦠꦱ꧀ꦱ ‘‘ꦆꦢꦁ, ꦨꦤ꧀ꦠꦺ, ꦏꦡꦁ ꦆꦩꦱ꧀ꦱ ꦏꦺꦴ ꦄꦠ꧀ꦡꦺꦴ’’ꦠꦶ ꦌꦮꦁ ꦑꦤ꧀ꦣꦴꦢꦷꦱꦸ ꦄꦠ꧀ꦡꦥꦸꦕ꧀ꦖꦏꦨꦴꦮꦺꦴ. ꦠꦺꦤꦴꦲ ‘‘ꦑꦤ꧀ꦣ…ꦥꦺ… ꦧꦲꦸꦭꦠꦴ’’ꦠꦶ.

ꦮꦠ꧀ꦡꦸꦮꦶꦱꦢꦏꦶꦫꦶꦪꦴꦠꦶ ꦕꦶꦠ꧀ꦠꦕꦺꦠꦱꦶꦏꦴꦤꦁ ꦥꦮꦠ꧀ꦠꦶꦛ꧀ꦜꦴꦤꦨꦴꦮꦠꦺꦴ ꦱꦫꦷꦫꦁ ꦠꦥ꧀ꦥꦛꦶꦧꦢ꧀ꦣꦴꦤꦶ ꦕ ꦕꦷꦮꦫꦴꦢꦷꦤꦶ ꦆꦣ ‘‘ꦮꦠ꧀ꦡꦹꦤꦷ’’ꦠꦶ ꦄꦣꦶꦥ꧀ꦥꦺꦠꦴꦤꦶ, ꦠꦴꦤꦶ ꦪꦡꦴ ꦕꦶꦠ꧀ꦠꦱ꧀ꦱ ꦱꦸꦑꦴꦮꦲꦴꦤꦶ ꦲꦺꦴꦤ꧀ꦠꦶ, ꦠꦡꦴ ꦏꦫꦟꦁ ꦠꦺꦱꦁ ꦮꦶꦱꦢꦨꦴꦮꦏꦫꦟꦁ. ꦠꦺꦤ ꦮꦸꦠ꧀ꦠꦁ ‘‘ꦄꦗ꧀ꦙꦠ꧀ꦠꦶꦏꦧꦴꦲꦶꦫꦴꦤ’’ꦤ꧀ꦠꦶꦄꦴꦢꦶ. ꦈꦱ꧀ꦱꦤ꧀ꦤꦢꦺꦴꦱꦤ꧀ꦠꦶ ꦮꦴꦠꦴꦢꦶꦈꦱ꧀ꦱꦤ꧀ꦤꦢꦺꦴꦱꦁ. ꦱꦺꦢꦩꦭꦩꦏ꧀ꦑꦶꦠꦤ꧀ꦠꦶ ꦱꦺꦢꦺꦤ ꦕꦺꦮ ꦗꦭ꧀ꦭꦶꦏꦴꦱꦔ꧀ꦑꦴꦠꦺꦤ ꦱꦫꦷꦫꦩꦭꦺꦤ ꦕ ꦩꦏ꧀ꦑꦶꦠꦁ. ꦕ-ꦱꦢ꧀ꦢꦺꦤ ꦄꦚ꧀ꦚꦩ꧀ꦥꦶ ꦱꦫꦷꦫꦱ꧀ꦱ ꦕ ꦕꦶꦠ꧀ꦠꦱ꧀ꦱ ꦕ ꦥꦷꦭ꦳ꦴꦮꦲꦁ ꦱꦔ꧀ꦒꦟ꧀ꦲꦴꦠꦶ. ꦱꦺꦤꦴꦱꦤꦁ ꦮꦴꦠꦶ ꦮꦴ-ꦱꦢ꧀ꦢꦺꦤ ꦥꦠ꧀ꦠꦴꦢꦷꦤꦁ ꦱꦔ꧀ꦒꦲꦺꦴ ꦢꦛ꧀ꦜꦧ꧀ꦧꦺꦴ. ꦄꦮꦶꦱꦢꦺ ꦱꦠꦶ, ꦮꦶꦱꦪꦨꦹꦠꦺ ꦮꦴ. ꦏꦡꦁ ꦨꦴꦮꦤꦩꦤꦸꦪꦸꦠ꧀ꦠꦱ꧀ꦱ ꦠꦴꦤꦶ ꦮꦶꦱꦪꦺꦴꦠꦶ? ꦄꦤ꧀ꦠꦫꦤ꧀ꦠꦫꦴ ꦥꦮꦠ꧀ꦠꦤꦏꦕꦶꦠ꧀ꦠꦸꦥ꧀ꦥꦴꦢꦮꦱꦺꦤ ꦌꦮꦁ ꦮꦸꦠ꧀ꦠꦁ. ꦠꦺ ꦲꦶ ꦕꦶꦠ꧀ꦠꦸꦥ꧀ꦥꦴꦢꦴ ꦕꦶꦠ꧀ꦠꦺꦏꦒ꧀ꦒꦠꦴꦪ ꦆꦗ꧀ꦙꦤ꧀ꦠꦶꦪꦴꦥꦶ ꦄꦥꦫꦶꦱꦸꦢ꧀ꦣꦨꦴꦮꦴꦪ ꦱꦁꦮꦠ꧀ꦠꦤ꧀ꦠꦶ. ꦕꦶꦠ꧀ꦠꦕꦺꦠꦱꦶꦏꦺꦱꦸ ꦤꦶꦱ꧀ꦱꦪꦴꦢꦶꦥꦕ꧀ꦕꦪꦨꦹꦠꦺꦱꦸ. ꦚꦴꦟꦩ꧀ꦥꦷꦠꦶ ꦥꦶ-ꦱꦢ꧀ꦢꦺꦴ ꦱꦩ꧀ꦥꦶꦟ꧀ꦝꦤꦺ. ꦠꦺꦤ ꦤ ꦏꦺꦮꦭꦁ ꦠꦁ ꦮꦠ꧀ꦡꦸꦪꦺꦮ, ꦄꦡ ꦑꦺꦴ ꦠꦱ꧀ꦩꦶꦁ ꦄꦥꦫꦶꦱꦸꦢ꧀ꦣꦺ ꦚꦴꦟꦩ꧀ꦥꦶ ꦄꦥꦫꦶꦱꦸꦢ꧀ꦣꦁ ꦲꦺꦴꦠꦷꦠꦶ ꦤꦶꦱ꧀ꦱꦪꦴꦥꦫꦶꦱꦸꦢ꧀ꦣꦶꦪꦴ ꦤꦶꦱ꧀ꦱꦶꦠꦴꦥꦫꦶꦱꦸꦢ꧀ꦣꦶ ꦮꦶꦪ ꦮꦶꦱꦪꦱ꧀ꦱ ꦄꦥꦫꦶꦱꦸꦢ꧀ꦣꦠꦴꦪ ꦮꦶꦱꦪꦷꦤꦁ ꦄꦥꦫꦶꦱꦸꦢ꧀ꦣꦶꦁ ꦢꦱ꧀ꦱꦺꦠꦶ ꦄꦤ꧀ꦮꦪꦠꦺꦴ ꦧ꧀ꦪꦠꦶꦫꦺꦏꦠꦺꦴ ꦕ.

ꦱꦩꦨꦴꦮꦏꦫꦟꦁ ꦏꦶꦕ꧀ꦕꦠꦺꦴ ꦄꦤꦹꦤꦴꦣꦶꦏꦨꦴꦮꦏꦫꦟꦁ. ꦪꦡꦴꦥꦕ꧀ꦕꦪꦁ ꦱꦢ꧀ꦣꦺꦪ꧀ꦪꦮꦠ꧀ꦡꦸꦱ꧀ꦩꦶꦁ ꦄꦣꦶꦩꦺꦴꦏ꧀ꦑꦏꦶꦕ꧀ꦕꦱ꧀ꦱ ꦥꦛꦸꦠꦫꦨꦴꦮꦺꦤ ꦥꦚ꧀ꦚꦴꦪ ꦄꦮꦶꦱꦢꦠꦴꦪ ꦮꦷꦫꦶꦪꦴꦢꦷꦤꦚ꧀ꦕ ꦄꦤꦸꦧꦭꦥ꧀ꦥꦢꦴꦤꦱꦶꦡꦶꦭꦠꦴꦢꦶꦤꦴ ꦱꦢ꧀ꦣꦶꦤ꧀ꦢ꧀ꦫꦶꦪꦁ ꦧꦭꦮꦁ ꦲꦺꦴꦠꦶ. ꦠꦺꦤꦴꦲ ‘‘ꦆꦠꦫꦴꦤꦶ ꦩꦤ꧀ꦢꦴꦤꦷ’’ꦠꦶ. ꦠꦠꦺꦴꦠꦶ ꦠꦱ꧀ꦩꦴ ꦱꦢ꧀ꦣꦶꦤ꧀ꦢ꧀ꦫꦶꦪꦱ꧀ꦱ ꦧꦭꦮꦨꦴꦮꦠꦺꦴ ꦆꦠꦫꦺꦱꦚ꧀ꦕ ꦩꦤ꧀ꦢꦠ꧀ꦠꦴ. ꦏꦺꦴꦱꦗ꧀ꦗꦥꦏ꧀ꦑꦺ ꦥꦠꦶꦠꦸꦁ ꦄꦢꦠ꧀ꦮꦴ ꦱꦩ꧀ꦥꦪꦸꦠ꧀ꦠꦣꦩ꧀ꦩꦴꦤꦁ ꦥꦒ꧀ꦒꦟ꧀ꦲꦤꦁ ꦄꦤꦸꦧꦭꦥ꧀ꦥꦢꦴꦤꦁ ꦥꦒ꧀ꦒꦲꦺꦴ, ꦥꦒ꧀ꦒꦲꦏꦶꦕ꧀ꦕꦁ ꦏꦴꦠꦸꦁ ꦤ ꦱꦏ꧀ꦏꦺꦴꦠꦷꦠꦶ ꦱꦩ꧀ꦧꦤ꧀ꦣꦶꦠꦧ꧀ꦧꦁ. ꦄꦴꦫꦩ꧀ꦩꦟꦁ ꦈꦥꦒꦤ꧀ꦠ꧀ꦮꦴ ꦜꦴꦤꦁ, ꦄꦤꦶꦱ꧀ꦱꦗ꧀ꦗꦤꦁ ꦮꦴ ꦈꦥꦛ꧀ꦜꦴꦤꦁ, ꦮꦶꦏ꧀ꦑꦺꦥꦥꦛꦶꦥꦏ꧀ꦑꦺꦴ. ꦪꦺꦤ ꦮꦴ ꦱꦩ꧀ꦥꦪꦸꦠ꧀ꦠꦴ ꦄꦮꦶꦏ꧀ꦑꦶꦠ꧀ꦠꦴ ꦲꦺꦴꦤ꧀ꦠꦶ, ꦱꦺꦴ ꦄꦮꦶꦏ꧀ꦑꦺꦥꦺꦴ. ꦫꦹꦥꦒꦠꦁ ꦮꦶꦪ ꦕꦏ꧀ꦑꦸꦤꦴ ꦪꦺꦤ ꦪꦴꦡꦴꦮꦠꦺꦴ ꦮꦶꦱꦪꦱꦨꦴꦮꦁ ꦥꦱ꧀ꦱꦠꦶ, ꦠꦁ ꦢꦱ꧀ꦱꦤꦏꦶꦕ꧀ꦕꦁ ꦏꦴꦠꦸꦁ ꦤ ꦱꦏ꧀ꦏꦺꦴꦠꦶ ꦧꦭꦮꦠꦴ ꦱꦢ꧀ꦣꦶꦤ꧀ꦢ꧀ꦫꦶꦪꦺꦤ ꦄꦨꦶꦨꦹꦠꦠ꧀ꦠꦴ. ꦱꦲꦗꦴꦠꦣꦩ꧀ꦩꦺꦱꦸ ꦲꦶ ꦆꦤ꧀ꦢꦛ꧀ꦜꦁ ꦏꦫꦺꦴꦤ꧀ꦠꦴꦤꦁ ꦱꦲ ꦥꦮꦠ꧀ꦠꦩꦴꦤꦴꦤꦁ ꦣꦩ꧀ꦩꦴꦤꦁ ꦌꦏꦫꦱꦠꦴꦮꦱꦺꦤꦺꦮ ꦄꦠ꧀ꦡꦱꦶꦢ꧀ꦣꦶ, ꦤ ꦄꦚ꧀ꦚꦡꦴ. ꦠꦱ꧀ꦩꦴꦠꦶ ꦮꦸꦠ꧀ꦠꦩꦺꦮꦠ꧀ꦡꦁ ꦏꦴꦫꦟꦨꦴꦮꦺꦤ ꦥꦕ꧀ꦕꦴꦩꦱꦠꦶ. ꦠꦤ꧀ꦠꦶ ꦱꦢ꧀ꦣꦶꦤ꧀ꦢ꧀ꦫꦶꦪꦁ.

ꦣꦩ꧀ꦩꦱꦨꦴꦮꦥꦕ꧀ꦕꦮꦺꦏ꧀ꦑꦟꦺꦤꦴꦠꦶ ꦪꦱ꧀ꦱ ꦱꦢ꧀ꦣꦺꦪ꧀ꦪꦮꦠ꧀ꦡꦸꦤꦺꦴ ꦈꦭ꦳ꦴꦫꦠꦴꦢꦶꦒꦸꦟꦺ ꦄꦣꦶꦩꦸꦕ꧀ꦕꦤꦱ꧀ꦱ ꦱꦴꦠꦶꦱꦪꦥ꧀ꦥꦮꦠ꧀ꦠꦶꦪꦴ ꦱꦢ꧀ꦣꦶꦤ꧀ꦢ꧀ꦫꦶꦪꦁ ꦧꦭꦮꦁ ꦗꦴꦠꦁ, ꦠꦱ꧀ꦱ ꦥꦕ꧀ꦕꦪꦥꦕ꧀ꦕꦪꦸꦥ꧀ꦥꦤ꧀ꦤꦠꦴꦢꦶꦮꦶꦨꦴꦒꦠꦺꦴ ꦪꦴꦡꦴꦮꦠꦺꦴ ꦮꦷꦩꦁꦱꦤꦺꦤ. ꦌꦮꦚ꧀ꦲꦶ ꦌꦮꦁꦣꦩ꧀ꦩꦠꦴꦤꦪꦺꦤ ꦱꦨꦴꦮꦱꦫꦱꦠꦺꦴ ꦥꦫꦶꦒ꧀ꦒꦪ꧀ꦲꦩꦴꦤꦺ ꦱꦮꦶꦥ꧀ꦦꦴꦫꦺꦴ ꦄꦣꦶꦩꦺꦴꦏ꧀ꦑꦺꦴ ꦤ ꦲꦺꦴꦠꦶ – ‘‘ꦄꦪꦁ ꦆꦩꦺꦱꦁ ꦣꦩ꧀ꦩꦴꦤꦁ ꦱꦨꦴꦮꦺꦴ’’ꦠꦶ ꦥꦚ꧀ꦚꦴꦧ꧀ꦪꦴꦥꦴꦫꦱ꧀ꦱ ꦱꦴꦠꦶꦱꦪꦠ꧀ꦠꦴ. ꦣꦸꦫꦶꦪꦣꦩ꧀ꦩꦺꦱꦸ ꦲꦶ ꦪꦡꦴ ꦱꦢ꧀ꦣꦴꦪ ꦧꦭꦮꦨꦴꦮꦺ ꦥꦚ꧀ꦚꦴꦪ ꦩꦤ꧀ꦢꦨꦴꦮꦺꦴ ꦲꦺꦴꦠꦶ, ꦌꦮꦁ ꦥꦚ꧀ꦚꦴꦪ ꦧꦭꦮꦨꦴꦮꦺ ꦱꦢ꧀ꦣꦴꦪ ꦩꦤ꧀ꦢꦨꦴꦮꦺꦴ ꦲꦺꦴꦠꦶ. ꦠꦺꦤ ꦮꦸꦠ꧀ꦠꦁ – ‘‘ꦠꦁ ꦣꦩ꧀ꦩꦱꦨꦴꦮꦥꦕ꧀ꦕꦮꦺꦏ꧀ꦑꦟꦺꦤ…ꦥꦺ… ꦲꦴꦥꦺꦠꦧ꧀ꦧ’’ꦤ꧀ꦠꦶ. ꦠꦡꦴ ꦄꦩꦤꦱꦶꦏꦫꦟꦺꦤꦴꦠꦶ ꦪꦺꦤꦴꦏꦴꦫꦺꦤ ꦨꦴꦮꦤꦩꦤꦸꦪꦸꦚ꧀ꦗꦤ꧀ꦠꦱ꧀ꦱ ꦱꦢ꧀ꦣꦶꦤ꧀ꦢ꧀ꦫꦶꦪꦁ ꦧꦭꦮꦁ ꦗꦴꦠꦁ, ꦠꦺꦤꦴꦏꦴꦫꦺꦤ ꦨꦴꦮꦤꦁ ꦤꦴꦤꦸꦪꦸꦚ꧀ꦗꦤꦺꦤꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦆꦣ ꦢꦸꦮꦶꦣꦺꦤ ꦱꦢ꧀ꦣꦶꦤ꧀ꦢ꧀ꦫꦶꦪꦱ꧀ꦱ ꦧꦭꦮꦨꦴꦮꦺꦴ ꦄꦠ꧀ꦠꦤꦺꦴ ꦮꦴ ꦥꦕ꧀ꦕꦪꦮꦶꦱꦺꦱꦺꦤ ꦏꦶꦕ꧀ꦕꦸꦠ꧀ꦠꦫꦶꦪꦠꦺꦴ ꦮꦷꦫꦶꦪꦴꦢꦷꦤꦁ ꦮꦴ ꦩꦤ꧀ꦢꦏꦶꦕ꧀ꦕꦠꦴꦪ. ꦠꦠ꧀ꦡ ꦥꦜꦩꦮꦶꦏꦥ꧀ꦥꦺ ꦲꦴꦥꦤꦮꦶꦣꦶ ꦢꦱ꧀ꦱꦶꦠꦺꦴ, ꦢꦸꦠꦶꦪꦮꦶꦏꦥ꧀ꦥꦺ ꦥꦤ ꦪꦡꦴ ꦩꦤꦱꦶꦏꦫꦺꦴꦠꦺꦴ ꦮꦷꦫꦶꦪꦴꦢꦷꦤꦁ ꦩꦤ꧀ꦢꦏꦶꦕ꧀ꦕꦠꦴꦪ ꦱꦢ꧀ꦣꦶꦤ꧀ꦢ꧀ꦫꦶꦪꦁ ꦧꦭꦮꦁ ꦗꦴꦠꦁ, ꦠꦡꦴ ꦄꦩꦤꦱꦶꦏꦴꦫꦺꦤ ꦮꦷꦫꦶꦪꦴꦢꦷꦤꦁ ꦥꦛꦸꦠꦫꦨꦴꦮꦴꦮꦲꦺꦤ ꦩꦤꦱꦶꦏꦴꦫꦺꦤ ꦱꦢ꧀ꦣꦶꦤ꧀ꦢ꧀ꦫꦶꦪꦁ ꦠꦺꦲꦶ ꦱꦩꦠꦁ ꦏꦫꦺꦴꦤ꧀ꦠꦺꦤ ꦲꦴꦥꦺꦠꦧ꧀ꦧꦁ. ꦆꦩꦶꦤꦴ ꦤꦪꦺꦤ ꦱꦺꦱꦶꦤ꧀ꦢ꧀ꦫꦶꦪꦺꦱꦸꦥꦶ ꦲꦴꦥꦤꦮꦶꦣꦶ ꦮꦺꦢꦶꦠꦧ꧀ꦧꦺꦴ.

ꦮꦏ꧀ꦏꦭꦶꦠ꧀ꦡꦺꦫꦮꦠ꧀ꦡꦹꦠꦶ ꦱꦺꦴ ꦲꦶ ꦄꦴꦪꦱ꧀ꦩꦴ ꦱꦢ꧀ꦣꦴꦣꦶꦩꦸꦠ꧀ꦠꦺꦴ ꦠꦠ꧀ꦡ ꦕ ꦏꦠꦴꦣꦶꦏꦴꦫꦺꦴ ꦱꦠ꧀ꦡꦸ ꦫꦹꦥꦏꦴꦪꦢꦱ꧀ꦱꦤꦺ ꦥꦱꦸꦠꦺꦴ ꦌꦮ ꦲꦸꦠ꧀ꦮꦴ ꦮꦶꦲꦫꦤ꧀ꦠꦺꦴ ꦱꦠ꧀ꦡꦴꦫꦴ – ‘‘ꦏꦶꦁ ꦠꦺ, ꦮꦏ꧀ꦏꦭꦶ, ꦆꦩꦶꦤꦴ ꦥꦹꦠꦶꦏꦴꦪꦺꦤ ꦢꦶꦛ꧀ꦜꦺꦤ, ꦪꦺꦴ ꦑꦺꦴ, ꦮꦏ꧀ꦏꦭꦶ, ꦣꦩ꧀ꦩꦁ ꦥꦱ꧀ꦱꦠꦶ, ꦱꦺꦴ ꦩꦁ ꦥꦱ꧀ꦱꦠꦷ’’ꦠꦶꦄꦴꦢꦶꦤꦴ (ꦱꦁ. ꦤꦶ. ꧓.꧘꧗) ꦎꦮꦢꦶꦪꦩꦴꦤꦺꦴ ꦏꦩ꧀ꦩꦛ꧀ꦜꦴꦤꦺ ꦤꦶꦪꦺꦴꦗꦶꦠꦺꦴꦥꦶ ꦠꦁ ꦄꦤꦤꦸꦪꦸꦚ꧀ꦗꦤ꧀ꦠꦺꦴ ꦥꦟꦴꦩꦶꦠꦺꦴ ꦄꦠ꧀ꦠꦴꦤꦁ ꦮꦶꦤꦶꦥꦴꦠꦺꦠꦸꦁ ꦥꦥꦴꦠꦛ꧀ꦜꦴꦤꦁ ꦄꦨꦶꦫꦸꦲꦶ. ꦄꦡ ꦤꦁ ꦱꦠ꧀ꦡꦴ ꦪꦡꦴꦤꦶꦱꦶꦤ꧀ꦤꦺꦴꦮ ꦎꦨꦴꦱꦮꦶꦱ꧀ꦱꦗ꧀ꦗꦤꦺꦤ ꦄꦠ꧀ꦠꦴꦤꦁ ꦢꦱ꧀ꦱꦺꦠ꧀ꦮꦴ –

‘‘ꦥꦴꦩꦺꦴꦗ꧀ꦗꦧꦲꦸꦭꦺꦴ ꦨꦶꦏ꧀ꦑꦸ, ꦥꦱꦤ꧀ꦤꦺꦴ ꦧꦸꦢ꧀ꦣꦱꦴꦱꦤꦺ;

ꦄꦣꦶꦒꦕ꧀ꦖꦺ ꦥꦢꦁ ꦱꦤ꧀ꦠꦁ, ꦱꦔ꧀ꦑꦴꦫꦹꦥꦱꦩꦁ ꦱꦸꦑ’’ꦤ꧀ꦠꦶ. (ꦣ. ꦥ. ꧓꧘꧑) –

ꦒꦴꦡꦁ ꦮꦠ꧀ꦮꦴ ‘‘ꦌꦲꦶ, ꦮꦏ꧀ꦏꦭꦷ’’ꦠꦶ ꦄꦴꦲ. ꦱꦺꦴ ꦠꦺꦤ ꦮꦕꦤꦺꦤ ꦄꦩꦠꦺꦤꦺꦮ ꦄꦨꦶꦱꦶꦠ꧀ꦠꦺꦴ ꦲꦛ꧀ꦜꦠꦸꦛ꧀ꦜꦺꦴ ꦲꦸꦠ꧀ꦮꦴ ꦮꦶꦥꦱ꧀ꦱꦤꦁ ꦥꦛ꧀ꦜꦥꦺꦱꦶ, ꦱꦢ꧀ꦣꦴꦪ ꦧꦲꦸꦭꦨꦴꦮꦠꦺꦴ ꦮꦶꦥꦱ꧀ꦱꦤꦴꦮꦷꦡꦶꦁ ꦤꦴꦫꦺꦴꦲꦠꦶ. ꦠꦁ ꦚꦠ꧀ꦮꦴ ꦨꦒꦮꦴ ꦆꦤ꧀ꦢ꧀ꦫꦶꦪꦱꦩꦠ꧀ꦠꦥꦛꦶꦥꦴꦢꦤꦴꦪ ꦏꦩ꧀ꦩꦛ꧀ꦜꦴꦤꦁ ꦱꦺꦴꦣꦺꦠ꧀ꦮꦴ ꦄꦢꦴꦱꦶ. ꦱꦺꦴ ꦱꦠ꧀ꦡꦴꦫꦴ ꦢꦶꦤ꧀ꦤꦤꦪꦺꦤ ꦮꦶꦥꦱ꧀ꦱꦤꦁ ꦈꦱ꧀ꦱꦸꦏ꧀ꦏꦴꦥꦺꦠ꧀ꦮꦴ ꦩꦒ꧀ꦒꦥꦛꦶꦥꦴꦛꦶꦪꦴ ꦄꦫꦲꦠ꧀ꦠꦁ ꦥꦴꦥꦸꦟꦶ. ꦠꦺꦤ ꦮꦸꦠ꧀ꦠꦁ – ‘‘ꦮꦏ꧀ꦏꦭꦶꦠ꧀ꦡꦺꦫꦮꦠ꧀ꦡꦸ ꦕꦺꦠ꧀ꦡ ꦤꦶꦢꦱ꧀ꦱꦤ’’ꦤ꧀ꦠꦶ. ꦌꦠ꧀ꦡꦴꦠꦶ ꦱꦢ꧀ꦣꦶꦤ꧀ꦢ꧀ꦫꦶꦪꦱ꧀ꦱ ꦄꦣꦶꦩꦠ꧀ꦠꦨꦴꦮꦺ ꦱꦺꦱꦶꦤ꧀ꦢ꧀ꦫꦶꦪꦴꦤꦁ ꦱꦏꦶꦕ꧀ꦕꦴꦏꦫꦟꦺ.

ꦆꦠꦫꦏꦶꦕ꧀ꦕꦨꦺꦢꦤ꧀ꦠꦶ ꦈꦥꦛ꧀ꦜꦴꦤꦴꦢꦶꦏꦶꦕ꧀ꦕꦮꦶꦱꦺꦱꦁ. ꦥꦱ꧀ꦱꦢ꧀ꦣꦴꦢꦷꦠꦶ ꦄꦴꦢꦶ-ꦱꦢ꧀ꦢꦺꦤ ꦱꦩꦴꦣꦶꦈꦥꦺꦏ꧀ꦑꦴꦱꦩ꧀ꦧꦺꦴꦗ꧀ꦙꦔ꧀ꦒꦴꦤꦁ ꦱꦔ꧀ꦒꦲꦺꦴ ꦢꦛ꧀ꦜꦧ꧀ꦧꦺꦴ. ꦲꦴꦥꦺꦠꦧ꧀ꦧꦤ꧀ꦠꦶ ꦪꦡꦴ ꦱꦢ꧀ꦣꦶꦤ꧀ꦢ꧀ꦫꦶꦪꦱ꧀ꦱ ꦧꦭꦮꦨꦴꦮꦺꦴ ꦣꦩ꧀ꦩꦱꦨꦴꦮꦥꦕ꧀ꦕꦮꦺꦏ꧀ꦑꦟꦺꦤ ꦲꦴꦪꦠꦶ, ꦌꦮꦁ ꦮꦷꦫꦶꦪꦶꦤ꧀ꦢ꧀ꦫꦶꦪꦱ꧀ꦱ ꦄꦣꦶꦩꦠ꧀ꦠꦠꦴ ꦥꦱ꧀ꦱꦢ꧀ꦣꦶꦪꦴꦢꦶꦨꦴꦮꦤꦴꦪ ꦲꦴꦪꦠꦶ ꦱꦩꦴꦣꦶꦥꦏ꧀ꦑꦶꦏꦠ꧀ꦠꦴ ꦠꦱ꧀ꦱꦴ. ꦠꦡꦴ ꦲꦶ ꦱꦩꦴꦣꦶꦤ꧀ꦢ꧀ꦫꦶꦪꦱ꧀ꦱ ꦄꦣꦶꦩꦠ꧀ꦠꦠꦁ ꦏꦺꦴꦱꦗ꧀ꦗꦥꦴꦠꦠꦺꦴ ꦫꦏ꧀ꦑꦤ꧀ꦠꦷ ꦮꦷꦫꦶꦪꦴꦢꦶꦨꦴꦮꦤꦴ ꦮꦶꦪ ꦮꦷꦫꦶꦪꦶꦤ꧀ꦢ꧀ꦫꦶꦪꦱ꧀ꦱ ꦄꦣꦶꦩꦠ꧀ꦠꦠꦁ ꦈꦢ꧀ꦣꦕ꧀ꦕꦥꦴꦠꦠꦺꦴ ꦫꦏ꧀ꦑꦤ꧀ꦠꦷ ꦌꦏꦁꦱꦠꦺꦴ ꦲꦴꦥꦺꦠꦶ. ꦠꦺꦤ ꦮꦸꦠ꧀ꦠꦁ ‘‘ꦥꦱ꧀ꦱꦢ꧀ꦣꦴꦢꦶꦨꦴꦮꦤꦴꦪ ꦲꦴꦥꦺꦠꦧ꧀ꦧ’’ꦤ꧀ꦠꦶ. ꦱꦺꦴꦟꦠ꧀ꦡꦺꦫꦱ꧀ꦱ ꦮꦠ꧀ꦡꦹꦠꦶ ꦱꦸꦏꦸꦩꦴꦫꦱꦺꦴꦟꦠ꧀ꦡꦺꦫꦱ꧀ꦱ ꦮꦠ꧀ꦡꦸ. ꦱꦺꦴ ꦲꦶ ꦄꦴꦪꦱ꧀ꦩꦴꦥꦶ ꦱꦠ꧀ꦡꦸ ꦱꦤ꧀ꦠꦶꦏꦴ ꦏꦩ꧀ꦩꦛ꧀ꦜꦴꦤꦁ ꦒꦲꦺꦠ꧀ꦮꦴ ꦱꦷꦠꦮꦤꦺ ꦮꦶꦲꦫꦤ꧀ꦠꦺꦴ – ‘‘ꦩꦩ ꦱꦫꦷꦫꦁ ꦱꦸꦑꦸꦩꦴꦭꦁ, ꦤ ꦕ ꦱꦏ꧀ꦏꦴ ꦱꦸꦑꦺꦤꦺꦮ ꦱꦸꦑꦁ ꦄꦣꦶꦒꦤ꧀ꦠꦸꦁ, ꦏꦴꦪꦁ ꦏꦶꦭꦩꦺꦠ꧀ꦮꦴꦥꦶ ꦱꦩꦟꦣꦩ꧀ꦩꦺꦴ ꦏꦴꦠꦧ꧀ꦧꦺꦴ’’ꦠꦶ ꦜꦴꦤꦕꦔ꧀ꦏꦩꦤꦩꦺꦮ ꦄꦣꦶꦛ꧀ꦜꦴꦪ ꦥꦣꦴꦤꦩꦤꦸꦪꦸꦚ꧀ꦗꦤ꧀ꦠꦺꦴ ꦥꦴꦢꦠꦭꦺꦱꦸ ꦦꦺꦴꦛꦺꦱꦸ ꦈꦛ꧀ꦜꦶꦠꦺꦱꦸꦥꦶ ꦮꦺꦢꦤꦁ ꦄꦗ꧀ꦙꦸꦥꦺꦏ꧀ꦑꦶꦠ꧀ꦮꦴ ꦢꦭ꦳꧀ꦲꦮꦷꦫꦶꦪꦁ ꦏꦫꦺꦴꦤ꧀ꦠꦺꦴ ꦄꦕ꧀ꦕꦴꦫꦢ꧀ꦣꦮꦷꦫꦶꦪꦠꦴꦪ ꦮꦶꦱꦺꦱꦁ ꦥꦮꦠ꧀ꦠꦺꦠꦸꦁ ꦤꦴꦱꦏ꧀ꦑꦶ. ꦱꦠ꧀ꦡꦴ ꦠꦠ꧀ꦡ ꦒꦤ꧀ꦠ꧀ꦮꦴ ꦮꦷꦟꦺꦴꦥꦩꦺꦴꦮꦴꦢꦺꦤ ꦎꦮꦢꦶꦠ꧀ꦮꦴ ꦮꦷꦫꦶꦪꦱꦩꦠꦴꦪꦺꦴꦗꦤꦮꦶꦣꦶꦁ ꦢꦱ꧀ꦱꦺꦤ꧀ꦠꦺꦴ ꦏꦩ꧀ꦩꦛ꧀ꦜꦴꦤꦁ ꦱꦺꦴꦣꦺꦠ꧀ꦮꦴ ꦒꦶꦗ꧀ꦙꦏꦹꦛꦁ ꦒꦠꦺꦴ. ꦡꦺꦫꦺꦴꦥꦶ ꦱꦠ꧀ꦡꦴꦫꦴ ꦢꦶꦤ꧀ꦤꦤꦪꦺꦤ ꦮꦷꦫꦶꦪꦱꦩꦠꦁ ꦪꦴꦗꦺꦠ꧀ꦮꦴ ꦨꦴꦮꦺꦤ꧀ꦠꦺꦴ ꦮꦶꦥꦱ꧀ꦱꦤꦁ ꦈꦱ꧀ꦱꦸꦏ꧀ꦏꦴꦥꦺꦠ꧀ꦮꦴ ꦄꦫꦲꦠ꧀ꦠꦺꦮ ꦥꦠꦶꦛ꧀ꦜꦴꦱꦶ. ꦠꦺꦤ ꦮꦸꦠ꧀ꦠꦁ ‘‘ꦱꦺꦴꦟꦠ꧀ꦡꦺꦫꦱ꧀ꦱ ꦮꦠ꧀ꦡꦸ ꦢꦱ꧀ꦱꦺꦠꦧ꧀ꦧ’’ꦤ꧀ꦠꦶ. ꦱꦺꦱꦺꦱꦸꦥꦷꦠꦶ ꦱꦠꦶꦱꦩꦴꦣꦶꦥꦚ꧀ꦚꦶꦤ꧀ꦢ꧀ꦫꦶꦪꦺꦱꦸꦥꦶ.

ꦱꦩꦠꦤ꧀ꦠꦶ ꦱꦢ꧀ꦣꦴꦥꦚ꧀ꦚꦴꦤꦁ ꦄꦚ꧀ꦚꦩꦚ꧀ꦚꦁ ꦄꦤꦹꦤꦴꦣꦶꦏꦨꦴꦮꦁ, ꦠꦡꦴ ꦱꦩꦴꦣꦶꦮꦷꦫꦶꦪꦴꦤꦚ꧀ꦕ. ꦪꦡꦴ ꦲꦶ ꦱꦢ꧀ꦣꦴꦥꦚ꧀ꦚꦴꦤꦁ ꦮꦶꦱꦸꦁ ꦮꦶꦱꦸꦁ ꦣꦸꦫꦶꦪꦣꦩ꧀ꦩꦨꦹꦠꦴꦤꦁ ꦏꦶꦕ꧀ꦕꦠꦺꦴ ꦄꦚ꧀ꦚꦩꦚ꧀ꦚꦤꦴꦠꦶꦮꦠ꧀ꦠꦤꦁ ꦮꦶꦱꦺꦱꦠꦺꦴ ꦆꦕ꧀ꦖꦶꦠꦧ꧀ꦧꦁ. ꦪꦠꦺꦴ ꦠꦺꦱꦁ ꦱꦩꦣꦸꦫꦠꦴꦪ ꦄꦥ꧀ꦥꦤꦴ ꦱꦩ꧀ꦥꦗ꧀ꦗꦠꦶ, ꦌꦮꦁ ꦱꦩꦴꦣꦶꦮꦷꦫꦶꦪꦴꦤꦁ ꦏꦺꦴꦱꦗ꧀ꦗꦸꦢ꧀ꦣꦕ꧀ꦕꦥꦏ꧀ꦑꦶꦏꦴꦤꦁ ꦱꦩꦠꦴꦪ ꦱꦠꦶ ꦄꦚ꧀ꦚꦩꦚ꧀ꦚꦸꦥꦠ꧀ꦡꦩ꧀ꦨꦤꦠꦺꦴ ꦱꦩ꧀ꦥꦪꦸꦠ꧀ꦠꦣꦩ꧀ꦩꦴꦤꦁ ꦄꦤ꧀ꦠꦢ꧀ꦮꦪꦥꦴꦠꦴꦨꦴꦮꦺꦤ ꦱꦩ꧀ꦩꦢꦺꦮ ꦄꦥ꧀ꦥꦤꦴ ꦆꦗ꧀ꦙꦠꦷꦠꦶ. ꦧꦭꦮꦱꦢ꧀ꦣꦺꦴꦠꦶꦄꦴꦢꦶ ꦮꦸꦠ꧀ꦠꦱ꧀ꦱꦺꦮ ꦄꦠ꧀ꦡꦱ꧀ꦱ ꦧ꧀ꦪꦠꦶꦫꦺꦏꦩꦸꦑꦺꦤ ꦱꦩꦠ꧀ꦡꦤꦁ. ꦠꦱ꧀ꦱꦠ꧀ꦡꦺꦴ – ꦪꦺꦴ ꦧꦭꦮꦠꦶꦪꦴ ꦱꦢ꧀ꦣꦴꦪ ꦱꦩꦤ꧀ꦤꦴꦒꦠꦺꦴ ꦄꦮꦶꦱꦢꦚꦴꦟꦺꦴ, ꦱꦺꦴ ꦩꦸꦣꦥ꧀ꦥꦱꦤ꧀ꦤꦺꦴ ꦲꦺꦴꦠꦶ, ꦤ ꦄꦮꦺꦕ꧀ꦕꦥ꧀ꦥꦱꦤ꧀ꦤꦺꦴ. ꦠꦡꦴ ꦲꦶ ꦱꦺꦴ ꦄꦮꦠ꧀ꦡꦸꦱ꧀ꦩꦶꦁ ꦥꦱꦷꦢꦠꦶ, ꦱꦺꦪ꧀ꦪꦡꦴꦥꦶ ꦠꦶꦠ꧀ꦡꦶꦪꦱꦴꦮꦏꦴ. ꦏꦺꦫꦴꦛꦶꦏꦥꦏ꧀ꦑꦤ꧀ꦠꦶ ꦱꦴꦜꦺꦪ꧀ꦪꦥꦏ꧀ꦑꦁ ꦨꦗꦠꦶ. ꦱꦢ꧀ꦣꦴꦲꦷꦤꦴꦪ ꦥꦚ꧀ꦚꦴꦪ ꦄꦠꦶꦣꦴꦮꦤ꧀ꦠꦺꦴ ‘‘ꦢꦺꦪ꧀ꦪꦮꦠ꧀ꦡꦸꦥꦫꦶꦕ꧀ꦕꦴꦒꦺꦤ ꦮꦶꦤꦴ ꦕꦶꦠ꧀ꦠꦸꦥ꧀ꦥꦴꦢꦩꦠ꧀ꦠꦺꦤꦥꦶ ꦢꦴꦤꦩꦪꦁ ꦥꦸꦚ꧀ꦚꦁ ꦲꦺꦴꦠꦷ’’ꦠꦶꦄꦴꦢꦷꦤꦶ ꦥꦫꦶꦏꦥ꧀ꦥꦺꦠꦶ ꦲꦺꦠꦸꦥꦠꦶꦫꦹꦥꦏꦺꦲꦶ ꦮꦚ꧀ꦕꦶꦠꦺꦴ, ꦌꦮꦁꦨꦹꦠꦺꦴ ꦕ ꦭꦹꦑꦠꦏ꧀ꦏꦮꦶꦭꦸꦠ꧀ꦠꦕꦶꦠ꧀ꦠꦺꦴ ꦥꦟ꧀ꦝꦶꦠꦴꦤꦁ ꦮꦕꦤꦁ ꦤꦴꦢꦶꦪꦠꦶ, ꦱꦚ꧀ꦚꦠ꧀ꦠꦶꦁ ꦤ ꦒꦕ꧀ꦖꦠꦶ. ꦠꦺꦤꦴꦲ ‘‘ꦨꦺꦱꦗ꧀ꦗꦱꦩꦸꦛ꧀ꦜꦶꦠꦺꦴ ꦮꦶꦪ ꦫꦺꦴꦒꦺꦴ ꦄꦠꦺꦏꦶꦕ꧀ꦖꦺꦴ ꦲꦺꦴꦠꦷ’’ꦠꦶ. ꦪꦡꦴ ꦕꦺꦠ꧀ꦡ ꦱꦢ꧀ꦣꦴꦥꦚ꧀ꦚꦴꦤꦁ ꦄꦚ꧀ꦚꦩꦚ꧀ꦚꦁ ꦱꦩꦨꦴꦮꦺꦴ ꦄꦠ꧀ꦡꦴꦮꦲꦺꦴ, ꦮꦶꦱꦩꦨꦴꦮꦺꦴ ꦄꦤꦠ꧀ꦡꦴꦮꦲꦺꦴ, ꦌꦮꦁ ꦱꦩꦴꦣꦶꦮꦷꦫꦶꦪꦴꦤꦁ ꦄꦚ꧀ꦚꦩꦚ꧀ꦚꦁ ꦱꦩꦨꦴꦮꦺꦴ ꦄꦠ꧀ꦡꦴꦮꦲꦺꦴ, ꦆꦠꦫꦺꦴ ꦄꦤꦠ꧀ꦡꦴꦮꦲꦺꦴ, ꦠꦡꦴ ꦱꦩꦨꦴꦮꦺꦴ ꦄꦮꦶꦏ꧀ꦑꦺꦥꦴꦮꦲꦺꦴ, ꦆꦠꦫꦺꦴ ꦮꦶꦏ꧀ꦑꦺꦥꦴꦮꦲꦺꦴ. ꦏꦺꦴꦱꦗ꧀ꦗꦁ ꦄꦨꦶꦨꦮꦠꦶ, ꦠꦺꦤ ꦄꦥ꧀ꦥꦤꦁ ꦤ ꦥꦴꦥꦸꦟꦴꦠꦷꦠꦶ ꦄꦣꦶꦥ꧀ꦥꦴꦪꦺꦴ. ꦌꦱ ꦤꦪꦺꦴ ꦈꦢ꧀ꦣꦕ꧀ꦕꦁ ꦄꦨꦶꦨꦮꦠꦷꦠꦶ ꦌꦠ꧀ꦡꦴꦥꦶ. ꦠꦢꦸꦨꦪꦤ꧀ꦠꦶ ꦱꦢ꧀ꦣꦴꦥꦚ꧀ꦚꦴꦢ꧀ꦮꦪꦁ ꦱꦩꦴꦣꦶꦮꦷꦫꦶꦪꦢ꧀ꦮꦪꦚ꧀ꦕ. ꦱꦩꦁ ꦏꦴꦠꦧ꧀ꦧꦤ꧀ꦠꦶ ꦱꦩꦠꦁ ꦏꦴꦠꦧ꧀ꦧꦁ.

ꦱꦩꦴꦣꦶꦏꦩ꧀ꦩꦶꦏꦱ꧀ꦱꦴꦠꦶ ꦱꦩꦡꦏꦩ꧀ꦩꦛ꧀ꦜꦴꦤꦶꦏꦱ꧀ꦱ. ꦌꦮꦤ꧀ꦠꦶ ꦌꦮꦁ ꦱꦤ꧀ꦠꦺ, ꦱꦢ꧀ꦣꦴꦪ ꦡꦺꦴꦏꦁ ꦧꦭꦮꦨꦴꦮꦺ ꦱꦠꦷꦠꦶ ꦄꦠ꧀ꦡꦺꦴ. ꦱꦢ꧀ꦢꦲꦤ꧀ꦠꦺꦴꦠꦶ ‘‘ꦥꦡꦮꦷ ꦥꦡꦮꦷꦠꦶ ꦩꦤꦱꦶꦏꦴꦫꦩꦠ꧀ꦠꦺꦤ ꦏꦡꦁ ꦙꦴꦤꦸꦥ꧀ꦥꦠ꧀ꦠꦷ’’ꦠꦶ ꦄꦕꦶꦤ꧀ꦠꦺꦠ꧀ꦮꦴ ‘‘ꦄꦢ꧀ꦣꦴ ꦱꦩ꧀ꦧꦸꦢ꧀ꦣꦺꦤ ꦮꦸꦠ꧀ꦠꦮꦶꦣꦶ ꦆꦗ꧀ꦙꦠꦷ’’ꦠꦶ ꦱꦢ꧀ꦢꦲꦤ꧀ꦠꦺꦴ ꦱꦢ꧀ꦣꦁ ꦗꦤꦺꦤ꧀ꦠꦺꦴ. ꦎꦏꦥ꧀ꦥꦺꦤ꧀ꦠꦺꦴꦠꦶ ꦄꦴꦫꦩ꧀ꦩꦟꦁ ꦄꦤꦸꦥꦮꦶꦱꦶꦠ꧀ꦮꦴ ꦮꦶꦪ ꦄꦣꦶꦩꦸꦕ꧀ꦕꦤꦮꦱꦺꦤ ꦄꦮꦏꦥ꧀ꦥꦺꦤ꧀ꦠꦺꦴ ꦥꦏ꧀ꦑꦤ꧀ꦢꦤ꧀ꦠꦺꦴ. ꦌꦏꦒ꧀ꦒꦠꦴ ꦧꦭꦮꦠꦷ ꦮꦛ꧀ꦛꦠꦶ ꦱꦩꦴꦣꦶꦥꦣꦴꦤꦠ꧀ꦠꦴ ꦙꦴꦤꦱ꧀ꦱ. ꦈꦨꦶꦤ꧀ꦤꦤ꧀ꦠꦶ ꦱꦩꦴꦣꦶꦥꦚ꧀ꦚꦴꦤꦁ. ꦱꦩꦴꦣꦶꦏꦩ꧀ꦩꦶꦏꦱ꧀ꦱ ꦱꦩꦴꦣꦶꦤꦺꦴ ꦄꦣꦶꦩꦠ꧀ꦠꦠꦴꦪ ꦥꦚ꧀ꦚꦴꦪ ꦄꦣꦶꦩꦠ꧀ꦠꦠꦴꦥꦶ ꦆꦕ꧀ꦖꦶꦠꦧ꧀ꦧꦴꦠꦶ ꦄꦴꦲ ‘‘ꦱꦩꦠꦴꦪꦥꦷ’’ꦠꦶ, ꦱꦩꦨꦴꦮꦺꦤꦴꦥꦷꦠꦶ ꦄꦠ꧀ꦡꦺꦴ. ꦄꦥ꧀ꦥꦤꦴꦠꦶ ꦭꦺꦴꦏꦶꦪꦄꦥ꧀ꦥꦤꦴ. ꦠꦡꦴ ꦲꦶ ‘‘ꦲꦺꦴꦠꦶꦪꦺꦮꦴ’’ꦠꦶ ꦱꦴꦱꦔ꧀ꦏꦁ ꦮꦢꦠꦶ, ꦭꦺꦴꦏꦸꦠ꧀ꦠꦫꦥ꧀ꦥꦤꦴ ꦥꦤ ꦠꦺꦱꦁ ꦱꦩꦨꦴꦮꦺꦤꦺꦮ ꦆꦕ꧀ꦖꦶꦠꦴ. ꦪꦡꦴꦲ ‘‘ꦱꦩꦡꦮꦶꦥꦱ꧀ꦱꦤꦁ ꦪꦸꦒꦤꦢ꧀ꦣꦁ ꦨꦴꦮꦺꦠꦷ’’ꦠꦶ (ꦄ. ꦤꦶ. ꧔.꧑꧗꧐). ꦪꦢꦶ ꦮꦶꦱꦺꦱꦠꦺꦴ ꦱꦢ꧀ꦣꦴꦥꦚ꧀ꦚꦴꦤꦁ ꦱꦩꦴꦣꦶꦮꦷꦫꦶꦪꦴꦤꦚ꧀ꦕ ꦱꦩꦴꦤꦠꦁ ꦆꦕ꧀ꦖꦠꦶ, ꦏꦡꦁ ꦱꦠꦷꦠꦶ ꦄꦴꦲ – ‘‘ꦱꦠꦶ ꦥꦤ ꦱꦧ꧀ꦧꦠ꧀ꦡ ꦧꦭꦮꦠꦷ ꦮꦛ꧀ꦛꦠꦷ’’ꦠꦶ. ꦱꦧ꧀ꦧꦠ꧀ꦡꦴꦠꦶ ꦭꦷꦤꦸꦢ꧀ꦣꦕ꧀ꦕꦥꦏ꧀ꦑꦶꦏꦺꦱꦸ ꦥꦚ꧀ꦕꦶꦤ꧀ꦢ꧀ꦫꦶꦪꦺꦱꦸ. ꦈꦢ꧀ꦣꦕ꧀ꦕꦥꦏ꧀ꦑꦶꦏꦺꦏꦢꦺꦱꦺ ꦒꦟ꧀ꦲꦤ꧀ꦠꦺꦴ ‘‘ꦱꦢ꧀ꦣꦴꦮꦷꦫꦶꦪꦥꦚ꧀ꦚꦴꦤ’’ꦤ꧀ꦠꦶ ꦄꦴꦲ. ꦄꦚ꧀ꦚꦡꦴ ꦥꦷꦠꦶ ꦕ ꦒꦲꦺꦠꦧ꧀ꦧꦴ ꦱꦶꦪꦴ. ꦠꦡꦴ ꦲꦶ ‘‘ꦏꦺꦴꦱꦗ꧀ꦗꦥꦏ꧀ꦑꦶꦏꦺꦤ ꦱꦩꦴꦣꦶꦤꦴ’’ꦆꦕ꧀ꦕꦺꦮ ꦮꦸꦠ꧀ꦠꦁ, ꦤ ꦕ ‘‘ꦥꦱ꧀ꦱꦢ꧀ꦣꦶꦱꦩꦴꦣꦶꦈꦥꦺꦏ꧀ꦑꦴꦲꦷ’’ꦠꦶ. ꦱꦴꦠꦶ ꦱꦠꦶ. ꦱꦧ꧀ꦧꦺꦱꦸ ꦫꦴꦗꦏꦩ꧀ꦩꦺꦱꦸ ꦤꦶꦪꦸꦠ꧀ꦠꦺꦴꦠꦶ ꦱꦧ꧀ꦧꦏꦩ꧀ꦩꦶꦏꦺꦴ. ꦠꦺꦤꦴꦠꦶ ꦪꦺꦤ ꦏꦴꦫꦟꦺꦤ ꦱꦧ꧀ꦧꦠ꧀ꦡ ꦆꦕ꧀ꦖꦶꦠꦧ꧀ꦧꦴ, ꦠꦺꦤ ꦄꦴꦲ ꦄꦛ꧀ꦜꦏꦡꦴꦪꦁ. ꦱꦧ꧀ꦧꦠ꧀ꦡ ꦤꦶꦪꦸꦠ꧀ꦠꦴ ꦱꦧ꧀ꦧꦠ꧀ꦡꦶꦏꦴ, ꦱꦧ꧀ꦧꦺꦤ ꦮꦴ ꦭꦷꦤꦸꦢ꧀ꦣꦕ꧀ꦕꦥꦏ꧀ꦑꦶꦏꦺꦤ ꦧꦺꦴꦗ꧀ꦙꦔ꧀ꦒꦺꦤ ꦄꦠ꧀ꦡꦺꦠꦧ꧀ꦧꦴ ꦱꦧ꧀ꦧꦠ꧀ꦡꦶꦪꦴ, ꦱꦧ꧀ꦧꦠ꧀ꦡꦶꦪꦴꦮ ꦱꦧ꧀ꦧꦠ꧀ꦡꦶꦏꦴ. ꦕꦶꦠ꧀ꦠꦤ꧀ꦠꦶ ꦏꦸꦱꦭꦕꦶꦠ꧀ꦠꦁ. ꦠꦱ꧀ꦱ ꦲꦶ ꦱꦠꦶꦥꦛꦶꦱꦫꦟꦁ ꦥꦫꦴꦪꦟꦁ ꦄꦥ꧀ꦥꦠ꧀ꦠꦱ꧀ꦱ ꦥꦠ꧀ꦠꦶꦪꦴ ꦄꦤꦣꦶꦒꦠꦱ꧀ꦱ ꦄꦣꦶꦒꦩꦴꦪ. ꦠꦺꦤꦴꦲ – ‘‘ꦄꦴꦫꦏ꧀ꦑꦥꦕ꧀ꦕꦸꦥꦛ꧀ꦜꦴꦤꦴ’’ꦠꦶꦄꦴꦢꦶ.

ꦑꦤ꧀ꦣꦴꦢꦶꦨꦺꦢꦺ ꦄꦤꦺꦴꦒꦴꦭ꦳꧀ꦲꦥꦚ꧀ꦚꦴꦤꦤ꧀ꦠꦶ ꦥꦫꦶꦪꦠ꧀ꦠꦶꦧꦴꦲꦸꦱꦕ꧀ꦕꦮꦱꦺꦤꦥꦶ ꦑꦤ꧀ꦣꦴꦪꦠꦤꦴꦢꦷꦱꦸ ꦄꦥ꧀ꦥꦠꦶꦛ꧀ꦜꦶꦠꦧꦸꦢ꧀ꦣꦷꦤꦁ. ꦧꦲꦸꦱ꧀ꦱꦸꦠꦱꦺꦮꦤꦴ ꦲꦶ ꦱꦸꦠꦩꦪꦚꦴꦟꦴꦮꦲꦴ. ꦠꦫꦸꦟꦮꦶꦥꦱ꧀ꦱꦤꦴꦱꦩꦔ꧀ꦒꦷꦥꦶ ꦨꦴꦮꦤꦴꦩꦪꦚꦴꦟꦺ ꦜꦶꦠꦠ꧀ꦠꦴ ꦌꦏꦁꦱꦠꦺꦴ ꦥꦚ꧀ꦚꦮꦴ ꦌꦮ ꦤꦴꦩ ꦲꦺꦴꦠꦷꦠꦶ ꦄꦴꦲ – ‘‘ꦱꦩꦥꦚ꧀ꦚꦴꦱ…ꦥꦺ… ꦥꦸꦒ꧀ꦒꦭꦱꦺꦮꦤꦴ’’ꦠꦶ. ꦚꦺꦪ꧀ꦪꦣꦩ꧀ꦩꦱ꧀ꦱ ꦒꦩ꧀ꦨꦷꦫꦨꦴꦮꦮꦱꦺꦤ ꦠꦥ꧀ꦥꦫꦶꦕ꧀ꦖꦺꦢꦏꦚꦴꦟꦱ꧀ꦱ ꦒꦩ꧀ꦨꦷꦫꦨꦴꦮꦒꦲꦟꦤ꧀ꦠꦶ ꦄꦴꦲ – ‘‘ꦒꦩ꧀ꦨꦷꦫꦺꦱꦸ ꦑꦤ꧀ꦣꦴꦢꦷꦱꦸ ꦥꦮꦠ꧀ꦠꦴꦪ ꦒꦩ꧀ꦨꦷꦫꦥꦚ꧀ꦚꦴꦪꦴ’’ꦠꦶ. ꦠꦚ꧀ꦲꦶ ꦚꦺꦪ꧀ꦪꦁ ꦠꦴꦢꦶꦱꦴꦪ ꦥꦚ꧀ꦚꦴꦪ ꦕꦫꦶꦠꦧ꧀ꦧꦠꦺꦴ ꦒꦩ꧀ꦨꦷꦫꦚꦴꦟꦕꦫꦶꦪꦁ, ꦠꦱ꧀ꦱꦴ ꦮꦴ ꦥꦚ꧀ꦚꦴꦪ ꦠꦠ꧀ꦡ ꦥꦨꦺꦢꦠꦺꦴ ꦥꦮꦠ꧀ꦠꦶ ꦒꦩ꧀ꦨꦷꦫꦚꦴꦟꦕꦫꦶꦪꦴ, ꦠꦱ꧀ꦱꦴ ꦥꦕ꧀ꦕꦮꦺꦏ꧀ꦑꦟꦴꦠꦶ ꦄꦴꦲ ‘‘ꦒꦩ꧀ꦨꦷꦫꦥꦚ꧀ꦚꦴꦪ ꦥꦨꦺꦢꦥꦕ꧀ꦕꦮꦺꦏ꧀ꦑꦟꦴ’’ꦠꦶ. ꦪꦡꦴ ꦱꦠꦶꦮꦺꦥꦸꦭ꧀ꦭꦥ꧀ꦥꦠ꧀ꦠꦺꦴ ꦤꦴꦩ ꦄꦫꦲꦴ ꦌꦮ, ꦌꦮꦁ ꦱꦺꦴ ꦌꦮ ꦥꦚ꧀ꦚꦴꦮꦺꦥꦸꦭ꧀ꦭꦥ꧀ꦥꦠ꧀ꦠꦺꦴꦥꦷꦠꦶ ꦄꦴꦲ ‘‘ꦄꦫꦲꦠ꧀ꦠꦩꦒ꧀ꦒꦺꦤ ꦨꦴꦮꦤꦴꦥꦴꦫꦶꦥꦹꦫꦷ ꦲꦺꦴꦠꦷ’’ꦠꦶ. ꦮꦷꦫꦶꦪꦴꦢꦷꦱꦸꦥꦶ ꦌꦱꦺꦮ ꦤꦪꦺꦴꦠꦶ.

‘‘ꦠꦠ꧀ꦠꦁ ꦄꦪꦺꦴꦑꦶꦭꦁ ꦲꦠ꧀ꦡꦺ ꦒꦩꦺꦤ꧀ꦠꦷ’’ꦠꦶꦄꦴꦢꦶꦤꦴ ꦮꦸꦠ꧀ꦠꦥꦚ꧀ꦕꦮꦶꦣꦧꦤ꧀ꦣꦤꦏꦩ꧀ꦩꦏꦴꦫꦟꦴ ꦤꦶꦫꦪꦺ ꦤꦶꦧ꧀ꦧꦠ꧀ꦠꦱꦠ꧀ꦠꦱ꧀ꦱ ꦱꦧ꧀ꦧꦥꦜꦩꦁ ꦏꦫꦺꦴꦤ꧀ꦠꦷꦠꦶ ꦢꦺꦮꦢꦹꦠꦱꦸꦠ꧀ꦠꦴꦢꦷꦱꦸ (ꦩ. ꦤꦶ. ꧓.꧒꧕꧐), ꦠꦱ꧀ꦱꦴ ꦄꦴꦢꦶꦠꦺꦴ ꦮꦸꦠ꧀ꦠꦠ꧀ꦠꦴ ꦕ ꦄꦴꦲ – ‘‘ꦥꦚ꧀ꦕꦮꦶꦣꦧꦤ꧀ꦣꦤꦏꦩ꧀ꦩꦏꦴꦫꦟꦠꦺꦴ ꦥꦛ꧀ꦜꦴꦪꦴ’’ꦠꦶ. ꦱꦏꦛꦮꦲꦤꦴꦢꦶꦏꦴꦭꦺꦠꦶ ꦄꦴꦢꦶ-ꦱꦢ꧀ꦢꦺꦤ ꦠꦢꦚ꧀ꦚꦩꦤꦸꦱ꧀ꦱꦺꦲꦶ ꦠꦶꦫꦕ꧀ꦖꦴꦤꦺꦲꦶ ꦕ ꦮꦶꦧꦴꦣꦤꦷꦪꦏꦴꦭꦁ ꦱꦔ꧀ꦒꦟ꧀ꦲꦴꦠꦶ. ꦌꦏꦁ ꦧꦸꦢ꧀ꦣꦤ꧀ꦠꦫꦤ꧀ꦠꦶ ꦆꦢꦁ ꦄꦥꦫꦴꦥꦫꦁ ꦥꦺꦠꦺꦱꦸ ꦌꦮ ꦈꦥ꧀ꦥꦗ꧀ꦗꦤꦏꦱꦠ꧀ꦠꦮꦱꦺꦤ ꦮꦸꦠ꧀ꦠꦁ, ꦌꦏꦕ꧀ꦕꦴꦤꦁ ꦮꦴ ꦥꦺꦠꦴꦤꦁ, ꦌꦏꦕ꧀ꦕꦠꦶꦫꦕ꧀ꦖꦴꦤꦴꦤꦁ ꦮꦶꦪ ꦠꦡꦴ ꦢꦷꦓꦴꦪꦸꦏꦠꦴꦥꦶ ꦱꦶꦪꦴꦠꦶ ꦠꦡꦴ ꦮꦸꦠ꧀ꦠꦁ. ꦠꦡꦴ ꦲꦶ ꦏꦴꦭꦺꦴ ꦤꦴꦒꦫꦴꦗꦴ ꦕꦠꦸꦤ꧀ꦤꦁ ꦧꦸꦢ꧀ꦣꦴꦤꦁ ꦫꦹꦥꦢꦱ꧀ꦱꦴꦮꦷ.

ꦌꦮꦁ ꦄꦴꦤꦶꦱꦁꦱꦢꦱ꧀ꦱꦴꦮꦶꦤꦺꦴꦠꦶ ‘‘ꦮꦷꦫꦶꦪꦴꦪꦠ꧀ꦠꦺꦴ ꦌꦮ ꦱꦏꦭꦭꦺꦴꦏꦶꦪꦭꦺꦴꦏꦸꦠ꧀ꦠꦫꦮꦶꦱꦺꦱꦴꦣꦶꦒꦩꦺꦴ’’ꦠꦶ ꦌꦮꦁ ꦄꦴꦤꦶꦱꦁꦱꦢꦱ꧀ꦱꦤꦱꦷꦭꦱ꧀ꦱ. ꦒꦩꦤꦮꦷꦡꦶꦤ꧀ꦠꦶ ꦱꦥꦸꦧ꧀ꦧꦨꦴꦒꦁ ꦤꦶꦧ꧀ꦧꦴꦤꦒꦴꦩꦶꦤꦶꦁ ꦥꦛꦶꦥꦢꦁ. ꦱꦲ ꦮꦶꦥꦱ꧀ꦱꦤꦴꦪ ꦄꦫꦶꦪꦩꦒ꧀ꦒꦥꦛꦶꦥꦴꦛꦶ, ꦱꦠ꧀ꦠꦮꦶꦱꦸꦢ꧀ꦣꦶꦥꦫꦩ꧀ꦥꦫꦴ ꦮꦴ. ꦱꦴ ꦲꦶ ꦮꦛ꧀ꦛꦠꦺꦴ ꦤꦶꦪ꧀ꦪꦴꦤꦴꦪ ꦒꦤ꧀ꦠꦧ꧀ꦧꦴ ꦥꦛꦶꦥꦢꦴꦠꦶ ꦏꦠ꧀ꦮꦴ ꦒꦩꦤꦮꦷꦡꦶ ꦤꦴꦩ.

ꦏꦴꦪꦢꦭ꦳꧀ꦲꦷꦧꦲꦸꦭꦺꦴꦠꦶ ꦏꦴꦪꦱ꧀ꦱ ꦥꦺꦴꦱꦤꦥꦱꦸꦠꦺꦴ. ꦥꦶꦟ꧀ꦝꦤ꧀ꦠꦶ ꦫꦛ꧀ꦜꦥꦶꦟ꧀ꦝꦁ. ꦥꦕ꧀ꦕꦪꦢꦴꦪꦏꦴꦤꦁ ꦄꦠ꧀ꦠꦤꦶ ꦏꦴꦫꦱ꧀ꦱ ꦄꦠ꧀ꦠꦤꦺꦴ ꦱꦩ꧀ꦩꦴꦥꦛꦶꦥꦠ꧀ꦠꦶꦪꦴ ꦩꦲꦥ꧀ꦦꦭꦨꦴꦮꦱ꧀ꦱ ꦏꦫꦟꦺꦤ ꦥꦶꦟ꧀ꦝꦴꦪ ꦨꦶꦏ꧀ꦑꦴꦪ ꦥꦛꦶꦥꦹꦗꦤꦴ ꦥꦶꦟ꧀ꦝꦴꦥꦕꦴꦪꦤꦴ. ꦤꦷꦲꦫꦤ꧀ꦠꦺꦴꦠꦶ ꦥꦠ꧀ꦠꦠ꧀ꦡꦮꦶꦏꦠꦺꦴ ꦤꦷꦲꦫꦤ꧀ꦠꦺꦴ. ꦠꦁ ꦱꦢ꧀ꦢꦁ ꦱꦸꦠ꧀ꦮꦴꦠꦶ ꦠꦁ ꦈꦥꦴꦱꦶꦏꦴꦪ ꦮꦕꦤꦁ ꦥꦟ꧀ꦟꦱꦴꦭꦢ꧀ꦮꦴꦫꦺ ꦜꦶꦠꦺꦴꦮ ꦥꦚ꧀ꦕꦴꦨꦶꦚ꧀ꦚꦠꦴꦪ ꦢꦶꦧ꧀ꦧꦱꦺꦴꦠꦺꦤ ꦱꦸꦠ꧀ꦮꦴꦠꦶ ꦮꦢꦤ꧀ꦠꦶ. ꦩꦤꦸꦱ꧀ꦱꦱꦩ꧀ꦥꦠ꧀ꦠꦶ, ꦢꦶꦧ꧀ꦧꦱꦩ꧀ꦥꦠ꧀ꦠꦶ, ꦄꦤ꧀ꦠꦺ ꦤꦶꦧ꧀ꦧꦴꦤꦱꦩ꧀ꦥꦠ꧀ꦠꦷꦠꦶ ꦠꦶꦱ꧀ꦱꦺꦴ ꦱꦩ꧀ꦥꦠ꧀ꦠꦶꦪꦺꦴ. ꦱꦶꦠꦁ ꦏꦫꦺꦴꦤ꧀ꦠꦺꦴꦮꦴꦠꦶ ‘‘ꦄꦏꦶꦕ꧀ꦖꦺꦤꦺꦮ ꦩꦪꦴ ꦮꦛ꧀ꦛꦢꦸꦏ꧀ꦑꦁ ꦱꦩꦠꦶꦏ꧀ꦏꦤ꧀ꦠ’’ꦤ꧀ꦠꦶ ꦥꦕ꧀ꦕꦮꦺꦏ꧀ꦑꦟꦴꦮꦱꦴꦤꦺ ꦱꦚ꧀ꦗꦴꦠꦥꦴꦩꦺꦴꦗ꧀ꦗꦮꦱꦺꦤ ꦱꦶꦠꦁ ꦏꦫꦺꦴꦤ꧀ꦠꦺꦴ ꦌꦮ.

ꦄꦭꦱꦴꦤꦁ ꦨꦴꦮꦤꦴꦪ ꦤꦴꦩꦩꦠ꧀ꦠꦩ꧀ꦥꦶ ꦄꦗꦴꦤꦤ꧀ꦠꦴꦤꦁ ꦏꦴꦪꦱ꧀ꦱ ꦥꦺꦴꦱꦤꦧꦲꦸꦭꦴꦤꦁ ꦪꦴꦮꦢꦠ꧀ꦡꦁ ꦥꦫꦶꦨꦸꦚ꧀ꦗꦶꦠ꧀ꦮꦴ ꦱꦺꦪ꧀ꦪꦱꦸꦑꦴꦢꦶꦁ ꦄꦤꦸꦪꦸꦚ꧀ꦗꦤ꧀ꦠꦴꦤꦁ ꦠꦶꦫꦕ꧀ꦖꦴꦤꦏꦡꦶꦏꦴꦤꦁ ꦢꦹꦫꦠꦺꦴꦮ ꦮꦗ꧀ꦗꦤꦁ ꦏꦸꦱꦷꦠꦥꦸꦒ꧀ꦒꦭꦥꦫꦶꦮꦗ꧀ꦗꦤꦴ. ‘‘ꦢꦶꦮꦱꦁ ꦕꦔ꧀ꦏꦩꦺꦤ ꦤꦶꦱꦗ꧀ꦗꦴꦪꦴ’’ꦠꦶꦄꦴꦢꦶꦤꦴ ꦨꦴꦮꦤꦴꦫꦩ꧀ꦨꦮꦱꦺꦤ ꦄꦴꦫꦢ꧀ꦣꦮꦷꦫꦶꦪꦴꦤꦁ ꦢꦭ꦳꧀ꦲꦥꦫꦏ꧀ꦏꦩꦴꦤꦁ ꦏꦴꦭꦺꦤꦏꦴꦭꦁ ꦈꦥꦱꦔ꧀ꦏꦩꦤꦴ ꦄꦴꦫꦢ꧀ꦣꦮꦷꦫꦶꦪꦥꦸꦒ꧀ꦒꦭꦱꦺꦮꦤꦴ. ꦠꦺꦤꦴꦲ ‘‘ꦏꦸꦕ꧀ꦖꦶꦁ ꦥꦹꦫꦺꦠ꧀ꦮꦴ’’ꦠꦶꦄꦴꦢꦶ.

ꦮꦶꦱꦸꦢ꧀ꦣꦶꦩꦒ꧀ꦒꦺ ꦥꦤ ‘‘ꦗꦴꦠꦶꦩꦲꦠ꧀ꦠꦥꦕ꧀ꦕꦮꦺꦏ꧀ꦑꦟꦴ, ꦱꦧ꧀ꦫꦲ꧀ꦩꦕꦴꦫꦶꦩꦲꦠ꧀ꦠꦥꦕ꧀ꦕꦮꦺꦏ꧀ꦑꦟꦴ’’ꦠꦶ ꦆꦢꦁ ꦢ꧀ꦮꦪꦁ ꦤ ꦒꦲꦶꦠꦁ, ‘‘ꦡꦶꦤꦩꦶꦢ꧀ꦣꦮꦶꦤꦺꦴꦢꦤꦠꦴ, ꦱꦩ꧀ꦩꦥ꧀ꦥꦣꦴꦤꦥꦕ꧀ꦕꦮꦺꦏ꧀ꦑꦟꦴ’’ꦠꦶ ꦆꦢꦁ ꦢ꧀ꦮꦪꦁ ꦒꦲꦶꦠꦁ. ꦠꦠ꧀ꦡ ꦄꦴꦤꦶꦱꦁꦱꦢꦱ꧀ꦱꦴꦮꦶꦠꦴꦪ ꦌꦮ ꦱꦩ꧀ꦩꦥ꧀ꦥꦣꦴꦤꦥꦕ꧀ꦕꦮꦺꦏ꧀ꦑꦟꦴ ꦒꦲꦶꦠꦴ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦮꦶꦱꦺꦱꦴꦣꦶꦒꦩꦱ꧀ꦱ ꦮꦷꦫꦶꦪꦴꦪꦠ꧀ꦠꦠꦴꦢꦱ꧀ꦱꦤꦨꦴꦮꦠꦺꦴ. ꦡꦶꦤꦩꦶꦢ꧀ꦣꦮꦶꦤꦺꦴꦢꦤꦁ ꦠꦢꦣꦶꦩꦸꦠ꧀ꦠꦠꦴꦪ ꦒꦲꦶꦠꦁ, ꦮꦷꦫꦶꦪꦸꦥ꧀ꦥꦴꦢꦤꦺ ꦪꦸꦠ꧀ꦠꦥꦪꦸꦠ꧀ꦠꦱ꧀ꦱ ꦡꦶꦤꦩꦶꦢ꧀ꦣꦮꦶꦤꦺꦴꦢꦤꦁ ꦄꦠ꧀ꦡꦠꦺꦴ ꦱꦶꦢ꧀ꦣꦩꦺꦮ. ꦠꦠ꧀ꦡ ꦡꦶꦤꦩꦶꦢ꧀ꦣꦮꦶꦤꦺꦴꦢꦤꦁ ꦏꦸꦱꦷꦠꦥꦸꦒ꧀ꦒꦭꦥꦫꦶꦮꦗ꧀ꦗꦤ-ꦄꦴꦫꦢ꧀ꦣꦮꦷꦫꦶꦪꦥꦸꦒ꧀ꦒꦭ-ꦱꦺꦮꦤ- ꦠꦢꦣꦶꦩꦸꦠ꧀ꦠꦠꦴꦥꦛꦶꦥꦏ꧀ꦑꦮꦶꦣꦩꦤ-ꦥꦕ꧀ꦕꦪꦹꦥꦱꦁꦲꦴꦫꦮꦱꦺꦤ, ꦄꦥꦴꦪꦨꦪꦥꦕ꧀ꦕꦮꦺꦏ꧀ꦑꦟꦴꦢꦪꦺꦴ ꦱꦩꦸꦠ꧀ꦠꦺꦗꦤꦮꦱꦺꦤ ꦮꦷꦫꦶꦪꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦏꦴꦠꦶ ꦢꦛ꧀ꦜꦧ꧀ꦧꦴ.

ꦧꦸꦢ꧀ꦣꦴꦤꦸꦱ꧀ꦱꦠꦶꦪꦴ ꦈꦥꦕꦴꦫꦱꦩꦴꦣꦶꦤꦶꦛ꧀ꦜꦠ꧀ꦠꦴ ꦮꦸꦠ꧀ꦠꦁ ‘‘ꦪꦴꦮ ꦈꦥꦕꦴꦫꦴ’’ꦠꦶ. ꦱꦏꦭꦱꦫꦷꦫꦁ ꦦꦫꦩꦴꦤꦺꦴꦠꦶ ꦥꦷꦠꦶꦱꦩꦸꦛ꧀ꦜꦴꦤꦺꦲꦶ ꦥꦟꦷꦠꦫꦹꦥꦺꦲꦶ ꦱꦏꦭꦱꦫꦷꦫꦁ ꦦꦫꦩꦴꦤꦺꦴ. ꦣꦩ꧀ꦩꦱꦔ꧀ꦓꦒꦸꦟꦺ ꦄꦤꦸꦱ꧀ꦱꦫꦤ꧀ꦠꦱ꧀ꦱꦥꦶ ꦪꦴꦮ ꦈꦥꦕꦴꦫꦴ ꦱꦏꦭꦱꦫꦷꦫꦁ ꦦꦫꦩꦴꦤꦺꦴ ꦥꦷꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦺꦴ ꦈꦥ꧀ꦥꦗ꧀ꦗꦠꦷꦠꦶ ꦪꦺꦴꦗꦤꦴ. ꦌꦮꦁ ꦱꦺꦱꦄꦤꦸꦱ꧀ꦱꦠꦷꦱꦸ ꦥꦱꦴꦢꦤꦷꦪꦱꦸꦠ꧀ꦠꦤ꧀ꦠꦥꦕ꧀ꦕꦮꦺꦏ꧀ꦑꦟꦴꦪ ꦕ ꦪꦺꦴꦗꦺꦠꦧ꧀ꦧꦁ ꦠꦱ꧀ꦱꦴꦥꦶ ꦮꦶꦩꦸꦠ꧀ꦠꦴꦪꦠꦤꦨꦴꦮꦺꦤ ꦠꦒ꧀ꦒꦠꦶꦏꦠ꧀ꦠꦴ. ꦌꦮꦫꦹꦥꦺ ꦏꦴꦭꦺꦠꦶ ꦢꦸꦧ꧀ꦨꦶꦏ꧀ꦑꦨꦪꦴꦢꦷꦱꦹꦠꦶ ꦮꦸꦠ꧀ꦠꦏꦴꦭꦺ. ꦱꦩꦴꦥꦠ꧀ꦠꦶꦪꦴ…ꦥꦺ… ꦤ ꦱꦩꦸꦢꦴꦕꦫꦤ꧀ꦠꦷꦠꦶ ꦆꦢꦁ ꦈꦥꦱꦩꦴꦤꦸꦱ꧀ꦱꦠꦶꦪꦴ ꦮꦱꦺꦤ ꦮꦸꦠ꧀ꦠꦁ. ꦱꦔ꧀ꦑꦴꦫꦴꦤꦚ꧀ꦲꦶ ꦱꦥ꧀ꦥꦢꦺꦱꦮꦹꦥꦱꦩꦺꦥꦶ ꦤꦶꦥ꧀ꦥꦢꦺꦱꦮꦹꦥꦱꦩꦺ ꦮꦶꦪ ꦠꦠ꧀ꦡ ꦱꦥꦚ꧀ꦚꦴꦪ ꦥꦮꦠ꧀ꦠꦤꦠꦺꦴ ꦨꦴꦮꦤꦴꦩꦤꦱꦶꦏꦴꦫꦺꦴ ꦏꦶꦭꦺꦱꦮꦶꦏ꧀ꦑꦩ꧀ꦨꦤꦱꦩꦠ꧀ꦡꦺꦴ ꦲꦸꦠ꧀ꦮꦴ ꦈꦥꦕꦴꦫꦱꦩꦴꦣꦶꦁ ꦄꦴꦮꦲꦤ꧀ꦠꦺꦴ ꦠꦡꦴꦫꦹꦥꦥꦷꦠꦶꦱꦺꦴꦩꦤꦱ꧀ꦱꦱꦩꦤ꧀ꦤꦴꦒꦠꦺꦴ ꦥꦷꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦴꦪ ꦲꦺꦴꦠꦷꦠꦶ. ꦥꦱꦴꦢꦤꦷꦪꦺꦱꦸ ꦜꦴꦤꦺꦱꦸ ꦥꦱꦴꦢꦱꦶꦤꦺꦲꦴꦨꦴꦮꦺꦤ ꦱꦁꦱꦹꦕꦶꦠꦲꦢꦪꦠꦴ ꦭꦹꦑꦠꦴ. ꦱꦴ ꦕ ꦠꦠ꧀ꦡ ꦄꦴꦢꦫꦒꦴꦫꦮꦴꦏꦫꦟꦺꦤ ꦮꦶꦚ꧀ꦚꦴꦪꦠꦷꦠꦶ ꦄꦴꦲ ‘‘ꦄꦱꦏ꧀ꦏꦕ꧀ꦕꦏꦶꦫꦶꦪꦴꦪ ꦱꦁꦱꦹꦕꦶꦠꦭꦹꦑꦨꦴꦮꦺ’’ꦠꦶ.

ꦏꦴꦪꦕꦶꦠ꧀ꦠꦢꦫꦡꦮꦹꦥꦱꦩꦭꦏ꧀ꦑꦟꦴ ꦥꦱ꧀ꦱꦢ꧀ꦣꦶ ꦌꦮ ꦪꦡꦴꦮꦸꦠ꧀ꦠꦧꦺꦴꦣꦶꦄꦔ꧀ꦒꦨꦹꦠꦺꦴ ꦥꦱ꧀ꦱꦢ꧀ꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦺꦴ, ꦠꦱ꧀ꦱ ꦥꦱ꧀ꦱꦢ꧀ꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ. ꦥꦟꦷꦠꦨꦺꦴꦗꦤꦱꦺꦮꦤꦠꦴꦠꦶ ꦥꦟꦷꦠꦱꦥ꧀ꦥꦴꦪꦨꦺꦴꦗꦤꦱꦺꦮꦤꦠꦴ. ꦈꦠꦸꦆꦫꦶꦪꦴꦥꦡꦱꦸꦑꦒ꧀ꦒꦲꦟꦺꦲꦶ ꦱꦥ꧀ꦥꦴꦪꦈꦠꦸꦆꦫꦶꦪꦴꦥꦡꦁ ꦒꦲꦶꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦠꦚ꧀ꦲꦶ ꦠꦶꦮꦶꦣꦩ꧀ꦥꦶ ꦱꦥ꧀ꦥꦴꦪꦁ ꦱꦺꦮꦶꦪꦩꦴꦤꦁ ꦏꦴꦪꦱ꧀ꦱ ꦏꦭ꧀ꦭꦠꦴꦥꦴꦢꦤꦮꦱꦺꦤ ꦕꦶꦠ꧀ꦠꦱ꧀ꦱ ꦏꦭ꧀ꦭꦠꦁ ꦄꦴꦮꦲꦤ꧀ꦠꦁ ꦢꦸꦮꦶꦣꦴꦪꦥꦶ ꦥꦱ꧀ꦱꦢ꧀ꦣꦶꦪꦴ ꦏꦴꦫꦟꦁ ꦲꦺꦴꦠꦶ. ꦱꦠ꧀ꦠꦺꦱꦸ ꦭꦧ꧀ꦨꦩꦴꦤꦁ ꦱꦸꦑꦢꦸꦏ꧀ꦑꦁ ꦄꦲꦺꦠꦸꦏꦤ꧀ꦠꦶ ꦄꦪꦩꦺꦏꦺꦴ ꦄꦤ꧀ꦠꦺꦴ, ꦆꦱ꧀ꦱꦫꦴꦢꦶꦮꦶꦱꦩꦲꦺꦠꦸꦏꦤ꧀ꦠꦶ ꦄꦪꦁ ꦢꦸꦠꦶꦪꦺꦴ, ꦌꦠꦺ ꦈꦨꦺꦴ ꦄꦤ꧀ꦠꦺ ꦄꦤꦸꦥꦒꦩ꧀ꦩ ꦪꦡꦴꦱꦏꦁ ꦏꦩ꧀ꦩꦸꦤꦴ ꦲꦺꦴꦠꦷꦠꦶ ꦄꦪꦁ ꦩꦗ꧀ꦙꦶꦩꦴ ꦥꦛꦶꦥꦠ꧀ꦠꦶ. ꦩꦗ꧀ꦙꦠ꧀ꦠꦺꦴ ꦥꦪꦺꦴꦒꦺꦴ ꦪꦱ꧀ꦱ ꦱꦺꦴ ꦩꦗ꧀ꦙꦠ꧀ꦠꦥꦪꦺꦴꦒꦺꦴ, ꦠꦱ꧀ꦱ ꦨꦴꦮꦺꦴ ꦩꦗ꧀ꦙꦠ꧀ꦠꦥꦪꦺꦴꦒꦠꦴ. ꦄꦪꦚ꧀ꦲꦶ ꦥꦲꦴꦤꦱꦴꦫꦢ꧀ꦣꦏꦴꦪꦠꦴ-ꦱꦔ꧀ꦑꦴꦠꦥꦱ꧀ꦱꦢ꧀ꦣꦏꦴꦪꦠꦴꦪ ꦏꦴꦫꦟꦁ ꦲꦺꦴꦤ꧀ꦠꦷ ꦥꦱ꧀ꦱꦢ꧀ꦣꦶꦢ꧀ꦮꦪꦁ ꦄꦴꦮꦲꦠꦶ. ꦌꦠꦺꦤꦺꦮ ꦱꦴꦫꦢ꧀ꦣꦏꦴꦪꦥꦸꦒ꧀ꦒꦭꦥꦫꦶꦮꦗ꧀ꦗꦤ-ꦥꦱ꧀ꦱꦢ꧀ꦣꦏꦴꦪꦥꦸꦒ꧀ꦒꦭꦱꦺꦮꦤꦴꦤꦁ ꦠꦢꦴꦮꦲꦤꦠꦴ ꦱꦁꦮꦟ꧀ꦟꦶꦠꦴꦠꦶ ꦢꦛ꧀ꦜꦧ꧀ꦧꦁ.

ꦮꦠ꧀ꦡꦸꦮꦶꦱꦢꦏꦶꦫꦶꦪꦴ ꦆꦤ꧀ꦢ꧀ꦫꦶꦪꦱꦩꦠ꧀ꦠꦥꦛꦶꦥꦴꦢꦤꦴ ꦕ ‘‘ꦥꦚ꧀ꦚꦴꦮꦲꦴ’’ꦠꦶ ꦮꦸꦠ꧀ꦠꦴ. ꦱꦩꦡꦴꦮꦲꦴꦥꦶ ꦠꦴ ꦲꦺꦴꦤ꧀ꦠꦶ ꦱꦩꦡꦴꦮꦲꦨꦴꦮꦺꦤꦺꦮ ꦥꦚ꧀ꦚꦴꦮꦲꦠ꧀ꦠꦴꦠꦶ ꦮꦸꦠ꧀ꦠꦁ ‘‘ꦮꦠ꧀ꦡꦸꦮꦶꦱꦢ…ꦥꦺ… ꦮꦺꦢꦶꦠꦧ꧀ꦧꦴ’’ꦠꦶ.

ꦏꦫꦟꦏꦺꦴꦱꦭ꧀ꦭꦨꦴꦮꦤꦴꦏꦺꦴꦱꦭ꧀ꦭꦴꦤꦁ ꦤꦴꦤꦤ꧀ꦠꦫꦶꦪꦨꦴꦮꦠꦺꦴ ꦫꦏ꧀ꦑꦟꦏꦺꦴꦱꦭ꧀ꦭꦱ꧀ꦱ ꦕ ꦠꦁꦩꦹꦭꦏꦠ꧀ꦠꦴ ‘‘ꦤꦶꦩꦶꦠ꧀ꦠꦏꦸꦱꦭꦠꦴ ꦤꦴꦩ ꦏꦱꦶꦟꦤꦶꦩꦶꦠ꧀ꦠꦱ꧀ꦱ ꦈꦒ꧀ꦒꦲꦟꦏꦸꦱꦭꦠꦴ’’ꦆꦕ꧀ꦕꦺꦮ ꦮꦸꦠ꧀ꦠꦁ. ꦄꦠꦶꦱꦶꦡꦶꦭꦮꦷꦫꦶꦪꦠꦴꦢꦷꦲꦷꦠꦶ ꦄꦴꦢꦶ-ꦱꦢ꧀ꦢꦺꦤ ꦥꦚ꧀ꦚꦴꦥꦪꦺꦴꦒꦩꦤ꧀ꦢꦠꦁ ꦄꦥ꧀ꦥꦩꦴꦢꦮꦺꦏꦭ꧀ꦭꦚ꧀ꦕ ꦱꦔ꧀ꦒꦟ꧀ꦲꦴꦠꦶ. ꦠꦱ꧀ꦱ ꦥꦒ꧀ꦒꦟ꧀ꦲꦤꦤ꧀ꦠꦶ ꦠꦱ꧀ꦱ ꦭꦷꦤꦱ꧀ꦱ ꦕꦶꦠ꧀ꦠꦱ꧀ꦱ ꦣꦩ꧀ꦩꦮꦶꦕꦪꦱꦩ꧀ꦧꦺꦴꦗ꧀ꦙꦔ꧀ꦒꦴꦢꦶꦱꦩꦸꦛ꧀ꦜꦴꦥꦤꦺꦤ ꦭꦪꦴꦥꦠ꧀ꦠꦶꦠꦺꦴ ꦱꦩꦸꦛ꧀ꦜꦴꦥꦤꦁ. ꦮꦸꦠ꧀ꦠꦚ꧀ꦲꦺꦠꦁ ꦨꦒꦮꦠꦴ –

‘‘ꦪꦱ꧀ꦩꦶꦚ꧀ꦕ ꦑꦺꦴ, ꦨꦶꦏ꧀ꦑꦮꦺ, ꦱꦩꦪꦺ ꦭꦷꦤꦁ ꦕꦶꦠ꧀ꦠꦁ ꦲꦺꦴꦠꦶ, ꦏꦴꦭꦺꦴ ꦠꦱ꧀ꦩꦶꦁ ꦱꦩꦪꦺ ꦣꦩ꧀ꦩꦮꦶꦕꦪꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ, ꦏꦴꦭꦺꦴ ꦮꦷꦫꦶꦪꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ, ꦏꦴꦭꦺꦴ ꦥꦷꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ. ꦠꦁ ꦏꦶꦱ꧀ꦱ ꦲꦺꦠꦸ? ꦭꦷꦤꦁ, ꦨꦶꦏ꧀ꦑꦮꦺ, ꦕꦶꦠ꧀ꦠꦁ, ꦠꦁ ꦌꦠꦺꦲꦶ ꦣꦩ꧀ꦩꦺꦲꦶ ꦱꦸꦱꦩꦸꦛ꧀ꦜꦴꦥꦪꦁ ꦲꦺꦴꦠꦶ. ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦥꦸꦫꦶꦱꦺꦴ ꦥꦫꦶꦠ꧀ꦠꦁ ꦄꦒ꧀ꦒꦶꦁ ꦈꦗ꧀ꦗꦴꦭꦺꦠꦸꦏꦴꦩꦺꦴ ꦄꦱ꧀ꦱ, ꦱꦺꦴ ꦠꦠ꧀ꦡ ꦱꦸꦏ꧀ꦑꦴꦤꦶ ꦕꦺꦮ ꦠꦶꦟꦴꦤꦶ ꦥꦏ꧀ꦑꦶꦥꦺꦪ꧀ꦪ, ꦱꦸꦏ꧀ꦑꦴꦤꦶ ꦒꦺꦴꦩꦪꦴꦤꦶ ꦥꦏ꧀ꦑꦶꦥꦺꦪ꧀ꦪ, ꦱꦸꦏ꧀ꦑꦴꦤꦶ ꦏꦛ꧀ꦜꦴꦤꦶ ꦥꦏ꧀ꦑꦶꦥꦺꦪ꧀ꦪ, ꦩꦸꦑꦮꦴꦠꦚ꧀ꦕ ꦢꦢꦺꦪ꧀ꦪ, ꦤ ꦕ ꦥꦁꦱꦸꦏꦺꦤ ꦎꦏꦶꦫꦺꦪ꧀ꦪ, ꦨꦧ꧀ꦧꦺꦴ ꦤꦸ ꦑꦺꦴ ꦱꦺꦴ ꦥꦸꦫꦶꦱꦺꦴ ꦥꦫꦶꦠ꧀ꦠꦁ ꦄꦒ꧀ꦒꦶꦁ ꦈꦗ꧀ꦗꦴꦭꦺꦠꦸꦤ꧀ꦠꦶ. ꦌꦮꦁ, ꦨꦤ꧀ꦠꦺ’’ꦠꦶ (ꦱꦁ. ꦤꦶ. ꧕.꧒꧓꧔).

ꦌꦠ꧀ꦡ ꦕ ꦪꦡꦴꦱꦏꦁ ꦄꦴꦲꦴꦫꦮꦱꦺꦤ ꦣꦩ꧀ꦩꦮꦶꦕꦪꦱꦩ꧀ꦧꦺꦴꦗ꧀ꦙꦔ꧀ꦒꦴꦢꦷꦤꦁ ꦨꦴꦮꦤꦴ ꦱꦩꦸꦛ꧀ꦜꦴꦥꦤꦴꦠꦶ ꦮꦺꦢꦶꦠꦧ꧀ꦧꦴ, ꦱꦴ ꦄꦤꦤ꧀ꦠꦫꦁ ꦮꦶꦨꦴꦮꦶꦠꦴ ꦌꦮ.

ꦄꦕ꧀ꦕꦴꦫꦢ꧀ꦣꦮꦷꦫꦶꦪꦠꦴꦢꦷꦲꦷꦠꦶ ꦄꦴꦢꦶ-ꦱꦢ꧀ꦢꦺꦤ ꦥꦚ꧀ꦚꦴꦥꦪꦺꦴꦒꦧꦭꦮꦠꦁ ꦥꦩꦺꦴꦢꦸꦥ꧀ꦥꦶꦭꦴꦮꦤꦚ꧀ꦕ ꦱꦔ꧀ꦒꦟ꧀ꦲꦴꦠꦶ. ꦠꦱ꧀ꦱ ꦤꦶꦒ꧀ꦒꦟ꧀ꦲꦤꦤ꧀ꦠꦶ ꦠꦱ꧀ꦱ ꦈꦢ꧀ꦣꦠꦱ꧀ꦱ ꦕꦶꦠ꧀ꦠꦱ꧀ꦱ ꦱꦩꦴꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦴꦢꦶꦱꦩꦸꦛ꧀ꦜꦴꦥꦤꦺꦤ ꦈꦢ꧀ꦣꦠꦴꦥꦠ꧀ꦠꦶꦠꦺꦴ ꦤꦶꦱꦺꦣꦤꦁ. ꦮꦸꦠ꧀ꦠꦩ꧀ꦥꦶ ꦕꦺꦠꦁ ꦨꦒꦮꦠꦴ –

‘‘ꦪꦱ꧀ꦩꦶꦚ꧀ꦕ ꦑꦺꦴ, ꦨꦶꦏ꧀ꦑꦮꦺ, ꦱꦩꦪꦺ ꦈꦢ꧀ꦣꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦏꦴꦭꦺꦴ ꦠꦱ꧀ꦩꦶꦁ ꦱꦩꦪꦺ ꦥꦱ꧀ꦱꦢ꧀ꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ, ꦏꦴꦭꦺꦴ ꦱꦩꦴꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ, ꦏꦴꦭꦺꦴ ꦈꦥꦺꦏ꧀ꦑꦴꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ. ꦠꦁ ꦏꦶꦱ꧀ꦱ ꦲꦺꦠꦸ? ꦈꦢ꧀ꦣꦠꦁ, ꦨꦶꦏ꧀ꦑꦮꦺ, ꦕꦶꦠ꧀ꦠꦁ, ꦠꦁ ꦌꦠꦺꦲꦶ ꦣꦩ꧀ꦩꦺꦲꦶ ꦱꦸꦮꦹꦥꦱꦩꦪꦁ ꦲꦺꦴꦠꦶ. ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦥꦸꦫꦶꦱꦺꦴ ꦩꦲꦤ꧀ꦠꦁ ꦄꦒ꧀ꦒꦶꦏ꧀ꦑꦤ꧀ꦣꦁ ꦤꦶꦧ꧀ꦧꦴꦥꦺꦠꦸꦏꦴꦩꦺꦴ ꦄꦱ꧀ꦱ, ꦱꦺꦴ ꦠꦠ꧀ꦡ ꦄꦭ꧀ꦭꦴꦤꦶ ꦕꦺꦮ ꦠꦶꦟꦴꦤꦶ….ꦥꦺ… ꦥꦁꦱꦸꦏꦺꦤ ꦕ ꦎꦏꦶꦫꦺꦪ꧀ꦪ, ꦨꦧ꧀ꦧꦺꦴ ꦤꦸ ꦑꦺꦴ ꦱꦺꦴ ꦥꦸꦫꦶꦱꦺꦴ ꦩꦲꦤ꧀ꦠꦁ ꦄꦒ꧀ꦒꦶꦏ꧀ꦑꦤ꧀ꦣꦁ ꦤꦶꦧ꧀ꦧꦴꦥꦺꦠꦸꦤ꧀ꦠꦶ. ꦌꦮꦁ, ꦨꦤ꧀ꦠꦺ’’ꦠꦶ (ꦱꦁ. ꦤꦶ. ꧕.꧒꧓꧔).

ꦌꦠ꧀ꦡꦴꦥꦶ ꦪꦡꦴꦱꦏꦁ ꦄꦴꦲꦴꦫꦮꦱꦺꦤ ꦥꦱ꧀ꦱꦢ꧀ꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦴꦢꦷꦤꦁ ꦨꦴꦮꦤꦴ ꦱꦩꦸꦛ꧀ꦜꦴꦥꦤꦴꦠꦶ ꦮꦺꦢꦶꦠꦧ꧀ꦧꦴ. ꦠꦠ꧀ꦡ ꦥꦱ꧀ꦱꦢ꧀ꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴ ꦮꦸꦠ꧀ꦠꦴ ꦌꦮ, ꦱꦩꦴꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦮꦸꦕ꧀ꦕꦩꦴꦤꦴ, ꦆꦠꦫꦱ꧀ꦱ ꦄꦤꦤ꧀ꦠꦫꦁ ꦮꦏ꧀ꦑꦠꦶ. ꦥꦚ꧀ꦚꦴꦥꦪꦺꦴꦒꦩꦤ꧀ꦢꦠꦴꦪꦴꦠꦶ ꦥꦚ꧀ꦚꦴꦧ꧀ꦪꦴꦥꦴꦫꦱ꧀ꦱ ꦄꦥ꧀ꦥꦨꦴꦮꦺꦤ. ꦪꦡꦴ ꦲꦶ ꦢꦴꦤꦁ ꦄꦭꦺꦴꦨꦥ꧀ꦥꦣꦴꦤꦁ, ꦱꦷꦭꦁ ꦄꦢꦺꦴꦱꦥ꧀ꦥꦣꦴꦤꦁ, ꦌꦮꦁ ꦨꦴꦮꦤꦴ ꦄꦩꦺꦴꦲꦥ꧀ꦥꦣꦴꦤꦴ. ꦠꦠ꧀ꦡ ꦪꦢꦴ ꦥꦚ꧀ꦚꦴ ꦤ ꦧꦭꦮꦠꦷ ꦲꦺꦴꦠꦶ, ꦠꦢꦴ ꦨꦴꦮꦤꦴ ꦥꦸꦧ꧀ꦧꦺꦤꦴꦥꦫꦁ ꦮꦶꦱꦺꦱꦴꦮꦲꦴ ꦤ ꦲꦺꦴꦠꦶ, ꦄꦤꦨꦶꦱꦔ꧀ꦑꦠꦺꦴ ꦮꦶꦪ ꦄꦴꦲꦴꦫꦺꦴ ꦥꦸꦫꦶꦱꦱ꧀ꦱ ꦪꦺꦴꦒꦶꦤꦺꦴ ꦕꦶꦠ꧀ꦠꦱ꧀ꦱ ꦄꦨꦶꦫꦸꦕꦶꦁ ꦤ ꦈꦥ꧀ꦥꦴꦢꦺꦠꦶ, ꦠꦺꦤ ꦠꦁ ꦤꦶꦫꦱ꧀ꦱꦴꦢꦁ ꦲꦺꦴꦠꦶ. ꦠꦡꦴ ꦨꦴꦮꦤꦴꦪ ꦱꦩ꧀ꦩꦢꦺꦮ ꦮꦷꦡꦶꦥꦛꦶꦥꦠ꧀ꦠꦶꦪꦴ ꦄꦨꦴꦮꦺꦤ ꦈꦥꦱꦩꦱꦸꦑꦁ ꦤ ꦮꦶꦤ꧀ꦢꦠꦶ, ꦠꦺꦤꦥꦶ ꦕꦶꦠ꧀ꦠꦁ ꦤꦶꦫꦱ꧀ꦱꦴꦢꦁ ꦲꦺꦴꦠꦶ. ꦠꦺꦤ ꦮꦸꦠ꧀ꦠꦁ ‘‘ꦥꦚ꧀ꦚꦴꦥꦪꦺꦴꦒ…ꦥꦺ… ꦤꦶꦫꦱ꧀ꦱꦴꦢꦁ ꦲꦺꦴꦠꦷ’’ꦠꦶ.

ꦠꦱ꧀ꦱ ꦱꦁꦮꦺꦒꦸꦥ꧀ꦥꦴꦢꦤꦚ꧀ꦕ ꦥꦱꦴꦢꦸꦥ꧀ꦥꦴꦢꦤꦚ꧀ꦕ ꦠꦶꦏꦶꦕ꧀ꦖꦤꦤ꧀ꦠꦶ ꦠꦁ ꦢꦱ꧀ꦱꦺꦤ꧀ꦠꦺꦴ ‘‘ꦄꦛ꧀ꦜ ꦱꦁꦮꦺꦒꦮꦠ꧀ꦡꦹꦤꦷ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦗꦴꦠꦶꦗꦫꦴꦧ꧀ꦪꦴꦣꦶꦩꦫꦟꦴꦤꦶ ꦪꦡꦴꦫꦲꦁ ꦱꦸꦒꦠꦶꦪꦁ ꦢꦸꦒ꧀ꦒꦠꦶꦪꦚ꧀ꦕ ꦲꦺꦴꦤ꧀ꦠꦷꦠꦶ ꦠꦢꦚ꧀ꦚꦩꦺꦮ ꦥꦚ꧀ꦕꦮꦶꦣꦧꦤ꧀ꦣꦤꦴꦢꦶꦑꦸꦥ꧀ꦥꦶꦥꦴꦱꦴꦢꦶꦄꦚ꧀ꦚꦩꦚ꧀ꦚꦮꦶꦧꦴꦣꦤꦴꦢꦶꦲꦺꦠꦸꦏꦁ ꦄꦥꦴꦪꦢꦸꦏ꧀ꦑꦁ ꦢꦛ꧀ꦜꦧ꧀ꦧꦁ. ꦠꦪꦶꦢꦁ ꦱꦧ꧀ꦧꦁ ꦠꦺꦱꦁ ꦠꦺꦱꦁ ꦱꦠ꧀ꦠꦴꦤꦁ ꦥꦕ꧀ꦕꦸꦥ꧀ꦥꦤ꧀ꦤꦨꦮꦤꦶꦱ꧀ꦱꦶꦠꦁ ꦒꦲꦶꦠꦤ꧀ꦠꦶ ꦄꦠꦷꦠꦺ ꦄꦤꦴꦒꦠꦺ ꦕ ꦏꦴꦭꦺ ꦮꦛ꧀ꦛꦩꦹꦭꦏꦢꦸꦏ꧀ꦑꦴꦤꦶ ꦮꦶꦱꦸꦁ ꦒꦲꦶꦠꦴꦤꦶꦪꦺꦮ. ꦪꦺ ꦥꦤ ꦱꦠ꧀ꦠꦴ ꦄꦴꦲꦴꦫꦹꦥꦗꦷꦮꦶꦤꦺꦴ ꦠꦠ꧀ꦡ ꦕ ꦈꦛ꧀ꦜꦴꦤꦦꦭꦹꦥꦗꦷꦮꦶꦤꦺꦴ, ꦠꦺꦱꦁ ꦄꦚ꧀ꦚꦺꦲꦶ ꦄꦱꦴꦣꦴꦫꦟꦁ ꦗꦷꦮꦶꦏꦢꦸꦏ꧀ꦑꦁ ꦄꦛ꧀ꦜꦩꦁ ꦱꦁꦮꦺꦒꦮꦠ꧀ꦡꦸ ꦒꦲꦶꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦄꦪꦁ ꦮꦸꦕ꧀ꦕꦠꦶ ꦱꦩꦪꦺ ꦱꦩ꧀ꦥꦲꦁꦱꦤꦴꦠꦶ ꦄꦪꦁ ꦱꦩ꧀ꦥꦲꦁꦱꦶꦠꦧ꧀ꦧꦱꦩꦪꦺ ꦮꦸꦠ꧀ꦠꦤꦪꦺꦤ ꦱꦁꦮꦺꦒꦗꦤꦤꦮꦱꦺꦤ ꦕꦺꦮ ꦥꦱꦴꦢꦸꦥ꧀ꦥꦴꦢꦤꦮꦱꦺꦤ ꦕ ꦱꦩ꧀ꦩꦢꦺꦮ ꦥꦲꦁꦱꦤꦴ, ꦱꦁꦮꦺꦒꦗꦤꦤꦥꦸꦧ꧀ꦧꦏꦥꦱꦴꦢꦸꦥ꧀ꦥꦴꦢꦤꦺꦤ ꦨꦴꦮꦤꦴꦕꦶꦠ꧀ꦠꦱ꧀ꦱ ꦠꦺꦴꦱꦤꦴꦠꦶꦄꦠ꧀ꦡꦺꦴ.

ꦱꦩ꧀ꦩꦴꦥꦛꦶꦥꦠ꧀ꦠꦶꦁ ꦄꦴꦒꦩ꧀ꦩꦴꦠꦶ ꦭꦷꦤꦸꦢ꧀ꦣꦕ꧀ꦕꦮꦶꦫꦲꦺꦤ ꦱꦩꦡꦮꦷꦡꦶꦥꦛꦶꦥꦠ꧀ꦠꦶꦪꦴ ꦕ ꦱꦩ꧀ꦩꦢꦺꦮ ꦨꦴꦮꦤꦴꦥꦛꦶꦥꦠ꧀ꦠꦶꦁ ꦄꦴꦒꦩ꧀ꦩ.

ꦄꦭꦷꦤꦤ꧀ꦠꦶꦄꦴꦢꦷꦱꦸ ꦏꦺꦴꦱꦗ꧀ꦗꦥꦏ꧀ꦑꦶꦏꦴꦤꦁ ꦣꦩ꧀ꦩꦴꦤꦁ ꦄꦤꦣꦶꦩꦠ꧀ꦠꦠꦴꦪ ꦄꦭꦷꦤꦁ, ꦈꦢ꧀ꦣꦕ꧀ꦕꦥꦏ꧀ꦑꦶꦏꦴꦤꦁ ꦄꦤꦣꦶꦩꦠ꧀ꦠꦠꦴꦪ ꦄꦤꦸꦢ꧀ꦣꦠꦁ, ꦥꦚ꧀ꦚꦴꦥꦪꦺꦴꦒꦱꦩ꧀ꦥꦠ꧀ꦠꦶꦪꦴ ꦈꦥꦱꦩꦱꦸꦑꦴꦣꦶꦒꦩꦺꦤ ꦕ ꦄꦤꦶꦫꦱ꧀ꦱꦴꦢꦁ, ꦠꦠꦺꦴ ꦌꦮ ꦄꦴꦫꦩ꧀ꦩꦟꦺ ꦱꦩꦥ꧀ꦥꦮꦠ꧀ꦠꦁ ꦱꦩꦡꦮꦷꦡꦶꦥꦛꦶꦥꦤ꧀ꦤꦚ꧀ꦕ. ꦠꦠ꧀ꦡ ꦄꦭꦷꦤꦠꦴꦪ ꦥꦒ꧀ꦒꦲꦺ, ꦄꦤꦸꦢ꧀ꦣꦠꦴꦪ ꦕ ꦤꦶꦒ꧀ꦒꦲꦺ, ꦄꦤꦶꦫꦱ꧀ꦱꦴꦢꦠꦴꦪ ꦱꦩ꧀ꦥꦲꦁꦱꦤꦺ ꦤ ꦧ꧀ꦪꦴꦥꦴꦫꦁ ꦄꦴꦥꦗ꧀ꦗꦠꦶ. ꦄꦭꦷꦤꦴꦤꦸꦢ꧀ꦣꦕ꧀ꦕꦠꦴꦲꦶ ꦄꦴꦫꦩ꧀ꦩꦟꦺ ꦱꦩꦥ꧀ꦥꦮꦠ꧀ꦠꦁ, ꦄꦤꦶꦫꦱ꧀ꦱꦴꦢꦠꦴꦪ ꦱꦩꦡꦮꦷꦡꦶꦥꦛꦶꦥꦤ꧀ꦤꦁ, ꦱꦩꦥ꧀ꦥꦮꦠ꧀ꦠꦶꦪꦴ ꦮꦴ ꦄꦭꦷꦤꦁ ꦄꦤꦸꦢ꧀ꦣꦠꦁ, ꦱꦩꦡꦮꦷꦡꦶꦥꦛꦶꦥꦠ꧀ꦠꦶꦪꦴ ꦄꦤꦶꦫꦱ꧀ꦱꦴꦢꦤ꧀ꦠꦶ ꦢꦛ꧀ꦜꦧ꧀ꦧꦁ. ꦄꦪꦁ ꦮꦸꦕ꧀ꦕꦠꦶ ꦱꦩꦪꦺ ꦄꦗ꧀ꦙꦸꦥꦺꦏ꧀ꦑꦤꦠꦴꦠꦶ ꦄꦪꦁ ꦄꦗ꧀ꦙꦸꦥꦺꦏ꧀ꦑꦶꦠꦧ꧀ꦧꦱꦩꦪꦺ ꦕꦶꦠ꧀ꦠꦱ꧀ꦱ ꦥꦒ꧀ꦒꦲꦤꦶꦒ꧀ꦒꦲꦱꦩ꧀ꦥꦲꦁꦱꦤꦺꦱꦸ ꦧ꧀ꦪꦴꦮꦛꦠꦴꦱꦔ꧀ꦑꦴꦠꦁ ꦥꦛꦶꦥꦏ꧀ꦑꦁ ꦄꦨꦶꦨꦸꦪ꧀ꦪ ꦈꦥꦺꦏ꧀ꦑꦤꦴ ꦮꦸꦕ꧀ꦕꦠꦶ. ꦌꦱꦴꦠꦶ ꦱꦩꦴꦣꦶꦧꦺꦴꦗ꧀ꦙꦔ꧀ꦒꦺꦴ ꦄꦤꦸꦥ꧀ꦥꦤ꧀ꦤꦺꦴ ꦈꦥ꧀ꦥꦗ꧀ꦗꦠꦶ. ꦄꦫꦲꦠ꧀ꦠꦩꦒ꧀ꦒꦺꦤ ꦨꦴꦮꦤꦴꦥꦴꦫꦶꦥꦹꦫꦷ ꦲꦺꦴꦠꦷꦠꦶ ꦌꦠꦺꦤ ꦤꦶꦥ꧀ꦥꦫꦶꦪꦴꦪꦠꦺꦴ ꦱꦩꦴꦣꦶꦮꦺꦥꦸꦭ꧀ꦭꦥ꧀ꦥꦠ꧀ꦠꦺꦴꦥꦶ ꦄꦫꦲꦴ ꦌꦮꦴꦠꦶ ꦢꦱ꧀ꦱꦺꦠꦶ.

ꦄꦤꦸꦫꦺꦴꦣꦮꦶꦫꦺꦴꦣꦥꦲꦴꦤꦮꦱꦺꦤ ꦩꦗ꧀ꦙꦠ꧀ꦠꦨꦴꦮꦺꦴ ꦈꦥꦺꦏ꧀ꦑꦴꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦏꦴꦫꦟꦁ ꦠꦱ꧀ꦩꦶꦁ ꦱꦠꦶ ꦱꦶꦗ꧀ꦙꦤꦠꦺꦴ, ꦄꦱꦠꦶ ꦕ ꦄꦱꦶꦗ꧀ꦙꦤꦠꦺꦴ, ꦱꦺꦴ ꦕ ꦩꦗ꧀ꦙꦠ꧀ꦠꦨꦴꦮꦺꦴ ꦮꦶꦱꦪꦮꦱꦺꦤ ꦢꦸꦮꦶꦣꦺꦴꦠꦶ ꦄꦴꦲ ‘‘ꦱꦠ꧀ꦠꦩꦗ꧀ꦙꦠ꧀ꦠꦠꦴ ꦱꦔ꧀ꦑꦴꦫꦩꦗ꧀ꦙꦠ꧀ꦠꦠꦴ’’ꦠꦶ. ꦠꦢꦸꦨꦪꦮꦱꦺꦤ ꦕꦱ꧀ꦱ ꦮꦶꦫꦸꦗ꧀ꦙꦤꦁ ꦥꦱ꧀ꦱꦢ꧀ꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ ꦌꦮ ꦢꦹꦫꦷꦏꦠꦤ꧀ꦠꦶ ꦄꦤꦸꦫꦸꦗ꧀ꦙꦤꦱ꧀ꦱꦺꦮ ꦥꦲꦴꦤꦮꦶꦣꦶꦁ ꦢꦱ꧀ꦱꦺꦤ꧀ꦠꦺꦴ ‘‘ꦱꦠ꧀ꦠꦩꦗ꧀ꦙꦠ꧀ꦠꦠꦴ’’ꦠꦶꦄꦴꦢꦶꦩꦴꦲ. ꦠꦡꦴ ꦲꦶꦱ꧀ꦱ ꦱꦠ꧀ꦠꦱꦔ꧀ꦑꦴꦫꦏꦺꦭꦴꦪꦤꦥꦸꦒ꧀ꦒꦭꦥꦫꦶꦮꦗ꧀ꦗꦤꦁ ‘‘ꦈꦥ꧀ꦥꦠ꧀ꦠꦶꦪꦴ ꦏꦴꦫꦟ’’ꦤ꧀ꦠꦶ ꦮꦸꦕ꧀ꦕꦠꦶ. ꦈꦥꦺꦏ꧀ꦑꦴꦪ ꦲꦶ ꦮꦶꦱꦺꦱꦠꦺꦴ ꦫꦴꦒꦺꦴ ꦥꦛꦶꦥꦏ꧀ꦑꦺꦴ, ꦠꦠꦺꦴ ꦫꦴꦒꦧꦲꦸꦭꦱ꧀ꦱ ꦥꦸꦒ꧀ꦒꦭꦱ꧀ꦱ ꦈꦥꦺꦏ꧀ꦑꦴ ‘‘ꦮꦶꦱꦸꦢ꧀ꦣꦶꦩꦒ꧀ꦒꦺꦴ’’ꦠꦶ ꦮꦸꦕ꧀ꦕꦠꦶ. ꦢ꧀ꦮꦷꦲꦴꦏꦴꦫꦺꦲꦷꦠꦶ ꦏꦩ꧀ꦩꦱ꧀ꦱꦏꦠꦴꦥꦕ꧀ꦕꦮꦺꦏ꧀ꦑꦟꦁ ꦄꦠ꧀ꦠꦱꦸꦚ꧀ꦚꦠꦴꦥꦕ꧀ꦕꦮꦺꦏ꧀ꦑꦟꦤ꧀ꦠꦶ ꦆꦩꦺꦲꦶ ꦢ꧀ꦮꦷꦲꦶ ꦏꦴꦫꦟꦺꦲꦶ. ꦢ꧀ꦮꦷꦲꦺꦮꦴꦠꦶ ꦄꦮꦣꦴꦫꦟꦁ ꦱꦔ꧀ꦑꦴꦫꦱꦲꦶꦠꦴꦪ ꦱꦔ꧀ꦑ꧀ꦪꦴꦱꦩꦴꦤꦠꦴꦪ ꦢꦱ꧀ꦱꦤꦠ꧀ꦡꦁ. ꦱꦔ꧀ꦑ꧀ꦪꦴ ꦌꦮ ꦲꦺꦠ꧀ꦡ ꦱꦩꦴꦤꦁ, ꦤ ꦱꦔ꧀ꦑ꧀ꦪꦺꦪ꧀ꦪꦁ ꦱꦧ꧀ꦧꦡꦴ ꦱꦩꦴꦤꦤ꧀ꦠꦶ. ꦄꦱ꧀ꦱꦴꦩꦶꦏꦨꦴꦮꦺꦴ ꦄꦤꦠ꧀ꦠꦤꦶꦪꦠꦴ. ꦱꦠꦶ ꦲꦶ ꦄꦠ꧀ꦠꦤꦶ ꦠꦱ꧀ꦱ ꦏꦶꦚ꧀ꦕꦤꦨꦴꦮꦺꦤ ꦕꦷꦮꦫꦁ ꦄꦚ꧀ꦚꦁ ꦮꦴ ꦏꦶꦚ꧀ꦕꦶ ꦄꦠ꧀ꦠꦤꦶꦪꦁ ꦤꦴꦩ ꦱꦶꦪꦴ, ꦱꦺꦴ ꦥꦤ ꦏꦺꦴꦕꦶ ꦤꦠ꧀ꦡꦺꦮꦴꦠꦶ ꦄꦣꦶꦥ꧀ꦥꦴꦪꦺꦴ. ꦄꦤꦢ꧀ꦣꦤꦶꦪꦤ꧀ꦠꦶ, ꦤ ꦄꦢ꧀ꦣꦴꦤꦏ꧀ꦑꦩꦁ, ꦤ ꦕꦶꦫꦛ꧀ꦜꦴꦪꦶ ꦆꦠ꧀ꦠꦫꦁ ꦄꦤꦶꦕ꧀ꦕꦤ꧀ꦠꦶ ꦄꦠ꧀ꦡꦺꦴ. ꦠꦴꦮꦏꦴꦭꦶꦏꦤ꧀ꦠꦶ ꦠꦱ꧀ꦱꦺꦮ ꦮꦺꦮꦕꦤꦁ.

ꦩꦩꦴꦪꦠꦷꦠꦶ ꦩꦩꦠ꧀ꦠꦁ ꦏꦫꦺꦴꦠꦶ. ꦩꦩꦴꦠꦶ ꦠꦟ꧀ꦲꦴꦪ ꦥꦫꦶꦒ꧀ꦒꦪ꧀ꦲ ꦠꦶꦛ꧀ꦜꦠꦶ. ꦣꦤꦴꦪꦤ꧀ꦠꦴꦠꦶ ꦣꦤꦁ ꦢꦧ꧀ꦧꦁ ꦏꦫꦺꦴꦤ꧀ꦠꦴ. ꦄꦱ꧀ꦱꦴꦠꦶ ꦈꦥꦺꦏ꧀ꦑꦴꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦄꦫꦲꦠ꧀ꦠꦩꦒ꧀ꦒꦺꦤ ꦨꦴꦮꦤꦴꦥꦴꦫꦶꦥꦹꦫꦷ ꦲꦺꦴꦠꦶ. ꦠꦡꦴ ꦲꦶ ꦄꦫꦲꦠꦺꦴ ꦌꦮ ꦖꦭ꦳ꦔ꧀ꦒꦸꦥꦺꦏ꧀ꦑꦴꦤꦶꦥ꧀ꦦꦠ꧀ꦠꦶ.

ꦄꦱꦸꦨꦴꦫꦩ꧀ꦩꦟꦴ ꦣꦩ꧀ꦩꦴꦠꦶ ꦄꦱꦸꦨꦥ꧀ꦥꦏꦴꦫꦴ ꦄꦱꦸꦨꦙꦴꦤꦱ꧀ꦱ ꦄꦴꦫꦩ꧀ꦩꦟꦨꦹꦠꦴ ꦣꦩ꧀ꦩꦴ. ꦏꦴꦩꦁ ꦆꦤ꧀ꦢ꧀ꦫꦶꦪꦧꦢ꧀ꦣꦴꦥꦶ ꦏꦺꦱꦴꦢꦪꦺꦴ ꦄꦱꦸꦨꦥ꧀ꦥꦏꦴꦫꦴ ꦌꦮ, ꦮꦶꦱꦺꦱꦠꦺꦴ ꦥꦤ ꦗꦶꦒꦸꦕ꧀ꦖꦶꦠꦧ꧀ꦧꦺ ꦗꦶꦒꦸꦕ꧀ꦖꦴꦮꦲꦺ ꦒꦟ꧀ꦲꦤ꧀ꦠꦺꦴ ‘‘ꦢꦱꦴ’’ꦠꦶ ꦄꦴꦲ. ꦪꦡꦴ ꦩꦤꦱꦶꦏꦫꦺꦴꦠꦺꦴ ꦱꦨꦴꦮꦱꦫꦱꦠꦺꦴ ꦠꦠ꧀ꦡ ꦄꦱꦸꦨꦱꦚ꧀ꦚꦴ ꦱꦤ꧀ꦠꦶꦛ꧀ꦜꦠꦶ, ꦠꦡꦴ ꦥꦮꦠ꧀ꦠꦺꦴ ꦩꦤꦱꦶꦏꦴꦫꦺꦴ ꦈꦥꦴꦪꦩꦤꦱꦶꦏꦴꦫꦺꦴ. ꦄꦱꦸꦨꦺ ꦄꦱꦸꦨꦥꦛꦶꦏ꧀ꦏꦹꦭꦴꦏꦴꦫꦱ꧀ꦱ ꦈꦒ꧀ꦒꦟ꧀ꦲꦤꦁ, ꦪꦡꦴ ꦮꦴ ꦠꦠ꧀ꦡ ꦈꦒ꧀ꦒꦲꦤꦶꦩꦶꦠ꧀ꦠꦁ ꦈꦥ꧀ꦥꦗ꧀ꦗꦠꦶ, ꦠꦡꦴ ꦩꦤꦱꦶꦏꦴꦫꦺꦴ ꦄꦱꦸꦨꦤꦶꦩꦶꦠ꧀ꦠꦱ꧀ꦱ ꦈꦒ꧀ꦒꦲꦺꦴ. ꦈꦥꦕꦴꦫꦥ꧀ꦥꦤꦴꦮꦲꦴꦪ ꦄꦱꦸꦨꦨꦴꦮꦤꦴꦪ ꦄꦤꦸꦪꦸꦚ꧀ꦗꦤꦴ ꦄꦱꦸꦨꦨꦴꦮꦤꦴꦤꦸꦪꦺꦴꦒꦺꦴ.

ꦩꦤꦕ꧀ꦖꦛ꧀ꦜꦴꦤꦁ ꦆꦤ꧀ꦢ꧀ꦫꦶꦪꦴꦤꦁ ꦱꦸꦛ꧀ꦜꦸ ꦱꦸꦱꦁꦮꦫꦟꦺ ꦱꦠꦶ ꦄꦮꦱꦫꦁ ꦄꦭꦨꦤ꧀ꦠꦺꦴ ꦏꦴꦩꦕ꧀ꦖꦤ꧀ꦢꦺꦴ ꦥꦲꦷꦪꦠꦺꦮ, ꦠꦡꦴ ꦨꦺꦴꦗꦤꦺ ꦩꦠ꧀ꦠꦚ꧀ꦚꦸꦤꦺꦴ ꦩꦶꦠꦴꦲꦴꦫꦱ꧀ꦱ ꦡꦶꦤꦩꦶꦢ꧀ꦣꦴꦨꦶꦨꦮꦴꦨꦴꦮꦴ ꦎꦠꦴꦫꦁ ꦄꦭꦨꦩꦴꦤꦺꦴ ꦏꦴꦩꦕ꧀ꦖꦤ꧀ꦢꦺꦴ ꦥꦲꦷꦪꦠꦶ. ꦪꦺꦴ ꦥꦤ ꦄꦴꦲꦴꦫꦺ ꦥꦛꦶꦏ꧀ꦏꦹꦭꦱꦚ꧀ꦚꦁ ꦠꦧ꧀ꦧꦶꦥꦫꦶꦟꦴꦩꦱ꧀ꦱ ꦠꦢꦴꦣꦴꦫꦱ꧀ꦱ ꦠꦱ꧀ꦱ ꦕ ꦈꦢꦫꦶꦪꦨꦹꦠꦱ꧀ꦱ ꦄꦠꦶꦮꦶꦪ ꦗꦺꦒꦸꦕ꧀ꦖꦠꦁ, ꦏꦴꦪꦱ꧀ꦱ ꦕ ꦄꦴꦲꦴꦫꦠꦶꦛ꧀ꦜꦏꦠꦁ ꦱꦩ꧀ꦩꦢꦺꦮ ꦗꦴꦤꦴꦠꦶ, ꦱꦺꦴ ꦱꦧ꧀ꦧꦱꦺꦴ ꦨꦺꦴꦗꦤꦺ ꦥꦩꦴꦟꦱ꧀ꦱ ꦗꦴꦤꦤꦺꦤ ꦮꦶꦱꦺꦱꦠꦺꦴ ꦨꦺꦴꦗꦤꦺ ꦩꦠ꧀ꦠꦚ꧀ꦚꦹ ꦤꦴꦩ. ꦠꦱ꧀ꦱ ꦏꦴꦩꦕ꧀ꦖꦤ꧀ꦢꦺꦴ ꦥꦲꦷꦪꦠꦺꦮ, ꦄꦛ꧀ꦜꦏꦡꦴꦪꦁ ꦥꦤ ꦄꦥ꧀ꦥꦴꦲꦴꦫꦠꦁꦪꦺꦮ ꦢꦱ꧀ꦱꦺꦠꦸꦁ ‘‘ꦕꦠꦸꦤ꧀ꦤ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦄꦱꦸꦨꦏꦩ꧀ꦩꦶꦏꦠꦶꦱ꧀ꦱꦠ꧀ꦡꦺꦫꦺꦴ ꦢꦤ꧀ꦠꦛ꧀ꦜꦶꦢꦱ꧀ꦱꦴꦮꦷ. ꦥꦲꦷꦤꦱ꧀ꦱꦴꦠꦶ ꦮꦶꦏ꧀ꦑꦩ꧀ꦨꦤꦮꦱꦺꦤ ꦥꦲꦷꦤꦱ꧀ꦱ. ꦄꦨꦶꦣꦩ꧀ꦩꦥꦫꦶꦪꦴꦪꦺꦤ ꦱꦧ꧀ꦧꦺꦴꦥꦶ ꦭꦺꦴꦨꦺꦴ ꦏꦴꦩꦕ꧀ꦖꦤ꧀ꦢꦤꦷꦮꦫꦟꦤ꧀ꦠꦶ ‘‘ꦄꦫꦲꦠ꧀ꦠꦩꦒ꧀ꦒꦺꦤ ꦄꦴꦪꦠꦶꦁ ꦄꦤꦸꦥ꧀ꦥꦴꦢꦺꦴ’’ꦠꦶ ꦮꦸꦠ꧀ꦠꦁ.

ꦩꦺꦗ꧀ꦗꦠꦶ ꦲꦶꦠꦦꦫꦟꦮꦱꦺꦤ ꦱꦶꦤꦶꦪ꧀ꦲꦠꦷꦠꦶ ꦩꦶꦠ꧀ꦠꦺꦴ, ꦲꦶꦠꦺꦱꦷ ꦥꦸꦒ꧀ꦒꦭꦺꦴ, ꦠꦱ꧀ꦩꦶꦁ ꦩꦶꦠ꧀ꦠꦺ ꦨꦮꦴ, ꦩꦶꦠ꧀ꦠꦱ꧀ꦱ ꦮꦴ ꦌꦱꦴꦠꦶ ꦩꦺꦠ꧀ꦠꦴ, ꦲꦶꦠꦺꦱꦶꦠꦴ. ꦱꦴ ꦌꦮ ꦥꦛꦶꦥꦏ꧀ꦑꦠꦺꦴ ꦕꦺꦠꦱꦺꦴ ꦮꦶꦩꦸꦠ꧀ꦠꦷꦠꦶ ꦩꦺꦠ꧀ꦠꦴꦕꦺꦠꦺꦴꦮꦶꦩꦸꦠ꧀ꦠꦶ. ꦠꦠ꧀ꦡ ꦩꦺꦠ꧀ꦠꦴꦪꦤꦱ꧀ꦱ ꦱꦠ꧀ꦠꦺꦱꦸ ꦲꦶꦠꦦꦫꦟꦱ꧀ꦱ ꦈꦥ꧀ꦥꦴꦢꦤꦁ ꦥꦮꦠ꧀ꦠꦤꦁ ꦩꦺꦠ꧀ꦠꦴꦤꦶꦩꦶꦠ꧀ꦠꦱ꧀ꦱ ꦈꦒ꧀ꦒꦲꦺꦴ. ꦠꦺꦤꦴꦲ ‘‘ꦎꦢꦶꦱ꧀ꦱꦏꦴ’’ꦠꦶꦄꦴꦢꦶ.

ꦠꦠ꧀ꦡ ꦄꦠ꧀ꦠꦥꦶꦪꦱꦲꦴꦪꦩꦗ꧀ꦙꦠ꧀ꦠꦮꦺꦫꦶꦮꦱꦺꦤ ꦎꦢꦶꦱ꧀ꦱꦏꦠꦴ. ꦱꦷꦩꦴꦱꦩ꧀ꦨꦺꦢꦺ ꦏꦠꦺ ꦄꦤꦺꦴꦢꦶꦱ꧀ꦱꦏꦠꦴ. ꦌꦏꦴꦢꦶꦢꦶꦱꦴꦦꦫꦟꦮꦱꦺꦤ ꦢꦶꦱꦴꦦꦫꦟꦠꦴ ꦩꦺꦠ꧀ꦠꦴꦪ ꦈꦒ꧀ꦒꦟ꧀ꦲꦤꦺ ꦮꦺꦢꦶꦠꦧ꧀ꦧꦴ. ꦈꦒ꧀ꦒꦲꦺꦴ ꦪꦴꦮ ꦈꦥꦕꦴꦫꦴ ꦢꦛ꧀ꦜꦧ꧀ꦧꦺꦴ. ꦈꦒ꧀ꦒꦲꦶꦠꦴꦪ ꦄꦴꦱꦺꦮꦤꦴ ꦨꦴꦮꦤꦴ, ꦱꦧ꧀ꦧꦴ ꦆꦠ꧀ꦡꦶꦪꦺꦴ ꦥꦸꦫꦶꦱꦴ ꦄꦫꦶꦪꦴ ꦄꦤꦫꦶꦪꦴ ꦢꦺꦮꦴ ꦩꦤꦸꦱ꧀ꦱꦴ ꦮꦶꦤꦶꦥꦴꦠꦶꦏꦴꦠꦶ ꦱꦠ꧀ꦠꦺꦴꦣꦶꦏꦫꦟꦮꦱꦺꦤ ꦥꦮꦠ꧀ꦠꦴ ꦱꦠ꧀ꦠꦮꦶꦣꦴ, ꦄꦛ꧀ꦜꦮꦷꦱꦠꦶꦮꦶꦣꦴ ꦮꦴ, ꦢꦱꦲꦶ ꦢꦶꦱꦴꦲꦶ ꦢꦶꦱꦺꦴꦣꦶꦏꦫꦟꦮꦱꦺꦤ ꦥꦮꦠ꧀ꦠꦴ ꦢꦱꦮꦶꦣꦴ, ꦌꦏꦺꦏꦴꦪ ꦢꦶꦱꦴꦪ ꦱꦠ꧀ꦠꦴꦢꦶꦆꦠ꧀ꦡꦴꦢꦶꦄꦮꦺꦫꦴꦢꦶꦨꦺꦢꦺꦤ ꦄꦱꦷꦠꦴꦣꦶꦏꦕꦠꦸꦱꦠꦥ꧀ꦥꦨꦺꦢꦴ ꦕ ꦎꦣꦶꦱꦺꦴꦦꦫꦟꦩꦺꦠ꧀ꦠꦴ. ꦱꦧ꧀ꦧꦺ ꦱꦠ꧀ꦠꦴ, ꦥꦴꦟꦴ, ꦨꦹꦠꦴ, ꦥꦸꦒ꧀ꦒꦭꦴ, ꦄꦠ꧀ꦠꦨꦴꦮꦥꦫꦶꦪꦴꦥꦤ꧀ꦤꦴꦠꦶ ꦌꦠꦺꦱꦁ ꦮꦱꦺꦤ ꦥꦚ꧀ꦕꦮꦶꦣꦴ. ꦌꦏꦺꦏꦱ꧀ꦩꦶꦁ ꦄꦮꦺꦫꦴ ꦲꦺꦴꦤ꧀ꦠꦸ, ꦄꦧ꧀ꦪꦴꦥꦗ꧀ꦗꦴ, ꦄꦤꦷꦓꦴ, ꦱꦸꦑꦷ ꦄꦠ꧀ꦠꦴꦤꦁ ꦥꦫꦶꦲꦫꦤ꧀ꦠꦹꦠꦶ ꦕꦠꦸꦣꦴ ꦥꦮꦠ꧀ꦠꦶꦪꦴ ꦮꦷꦱꦠꦶꦮꦶꦣꦴ ꦄꦤꦺꦴꦣꦶꦱꦺꦴꦦꦫꦟꦩꦺꦠ꧀ꦠꦴ, ꦠꦁ ꦱꦤ꧀ꦣꦴꦪꦴꦲ – ‘‘ꦎꦣꦶꦱꦺꦴ…ꦥꦺ… ꦨꦴꦮꦺꦤ꧀ꦠꦱ꧀ꦱꦥꦷ’’ꦠꦶ. ꦠ꧀ꦮꦁ ꦌꦠꦱ꧀ꦱꦴꦠꦶꦄꦴꦢꦶꦤꦴ ꦏꦩ꧀ꦩꦱ꧀ꦱꦏꦠꦴꦥꦕ꧀ꦕꦮꦺꦏ꧀ꦑꦟꦁ ꦢꦱ꧀ꦱꦺꦠꦶ. ꦥꦛꦶꦱꦔ꧀ꦑꦴꦤꦺ ꦜꦶꦠꦱ꧀ꦱꦴꦠꦶ ꦏꦺꦴꦣꦺ ꦪꦡꦴꦮꦸꦠ꧀ꦠꦱ꧀ꦱ ꦄꦴꦢꦷꦤꦮꦱ꧀ꦱ ꦠꦥ꧀ꦥꦛꦶꦥꦏ꧀ꦑꦠꦺꦴ ꦄꦏꦺꦴꦣꦺ ꦩꦺꦠ꧀ꦠꦴꦪ ꦄꦴꦤꦶꦱꦁꦱꦱ꧀ꦱ ꦕ ꦥꦛꦶꦱꦔ꧀ꦑꦴꦤꦺ ꦱꦩ꧀ꦩꦢꦺꦮ ꦗꦴꦤꦤꦺ. ꦱꦺꦮꦤ꧀ꦠꦱ꧀ꦱꦴꦠꦶ ꦨꦗꦤ꧀ꦠꦱ꧀ꦱ ꦧ꧀ꦪꦴꦥꦴꦢꦺꦴ ꦥꦲꦷꦪꦠꦶ.

ꦄꦠꦶꦨꦺꦴꦗꦤꦺ ꦤꦶꦩꦶꦠ꧀ꦠꦒ꧀ꦒꦴꦲꦺꦴꦠꦶ ꦄꦴꦲꦴꦫꦱ꧀ꦱ ꦄꦣꦶꦏꦨꦺꦴꦗꦤꦺ ꦡꦶꦤꦩꦶꦢ꧀ꦣꦱ꧀ꦱ ꦤꦶꦩꦶꦠ꧀ꦠꦒ꧀ꦒꦴꦲꦺꦴ, ‘‘ꦌꦠ꧀ꦠꦏꦺ ꦨꦸꦠ꧀ꦠꦺ ꦡꦶꦤꦩꦶꦢ꧀ꦣꦁ ꦈꦥ꧀ꦥꦗ꧀ꦗꦠꦶ, ꦌꦠ꧀ꦠꦏꦺ ꦤꦺꦴ’’ꦠꦶ ꦡꦶꦤꦩꦶꦢ꧀ꦣꦱ꧀ꦱ ꦏꦴꦫꦟꦴꦏꦴꦫꦟꦒ꧀ꦒꦴꦲꦺꦴꦠꦶ ꦄꦠ꧀ꦡꦺꦴ. ꦢꦶꦮꦴ ꦱꦹꦫꦶꦪꦴꦭꦺꦴꦏꦤ꧀ꦠꦶ ꦢꦶꦮꦴ ꦒꦲꦶꦠꦤꦶꦩꦶꦠ꧀ꦠꦁ ꦱꦹꦫꦶꦪꦴꦭꦺꦴꦏꦁ, ꦫꦠ꧀ꦠꦶꦪꦁ ꦩꦤꦱꦶꦏꦫꦺꦴꦤ꧀ꦠꦱ꧀ꦱꦥꦷꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦣꦸꦠꦔ꧀ꦒꦴꦤꦁ ꦮꦷꦫꦶꦪꦤꦶꦱ꧀ꦱꦶꦠꦠ꧀ꦠꦴ ꦮꦸꦠ꧀ꦠꦁ ‘‘ꦣꦸꦠꦔ꧀ꦒꦤꦶꦱ꧀ꦱꦶꦠꦱꦥ꧀ꦥꦴꦪꦏꦡꦴꦪꦥꦷ’’ꦠꦶ.

ꦏꦸꦏ꧀ꦏꦸꦕ꧀ꦕꦩ꧀ꦥꦶ ꦏꦠꦴꦏꦠꦴꦤꦸꦱꦺꦴꦕꦤꦮꦱꦺꦤ ꦥꦮꦠ꧀ꦠꦩꦴꦤꦁ ꦕꦺꦠꦱꦺꦴ ꦄꦮꦹꦥꦱꦩꦴꦮꦲꦠꦴꦪ ꦈꦢ꧀ꦣꦕ꧀ꦕꦺꦤ ꦱꦩꦴꦤꦭꦏ꧀ꦑꦟꦩꦺꦮꦴꦠꦶ ꦠꦢꦸꦨꦪꦱ꧀ꦱ ꦥꦲꦴꦤꦏꦴꦫꦟꦁ ꦢꦱ꧀ꦱꦺꦤ꧀ꦠꦺꦴ ꦨꦒꦮꦴ – ‘‘ꦄꦠ꧀ꦡꦶ, ꦨꦶꦏ꧀ꦑꦮꦺ, ꦕꦺꦠꦱꦺꦴ ꦮꦹꦥꦱꦩꦺꦴ’’ꦠꦶꦄꦴꦢꦶꦩꦴꦲ. ꦠꦱ꧀ꦩꦴ ꦧꦴꦲꦸꦱꦕ꧀ꦕꦴꦢꦶ ꦠꦱ꧀ꦱ ꦥꦲꦴꦤꦏꦴꦫꦟꦤ꧀ꦠꦶ ꦢꦱ꧀ꦱꦺꦠꦸꦁ ‘‘ꦄꦥꦶꦕ ꦖ ꦣꦩ꧀ꦩꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦧꦲꦸꦱ꧀ꦱꦸꦠꦱ꧀ꦱ ꦒꦤ꧀ꦡꦠꦺꦴ, ꦄꦠ꧀ꦡꦠꦺꦴ ꦣꦩ꧀ꦩꦁ ꦮꦶꦕꦴꦫꦺꦤ꧀ꦠꦱ꧀ꦱ ꦄꦠ꧀ꦠꦮꦺꦢꦴꦢꦶꦥꦛꦶꦭꦴꦨꦱꦩ꧀ꦨꦮꦠꦺꦴ ꦮꦶꦏ꧀ꦑꦺꦥꦺꦴ ꦤ ꦲꦺꦴꦠꦶ. ꦪꦡꦴꦮꦶꦲꦶꦠꦥꦛꦶꦥꦠ꧀ꦠꦶꦪꦴ ꦪꦡꦴꦣꦩ꧀ꦩꦥꦛꦶꦏꦴꦫꦥ꧀ꦥꦠ꧀ꦠꦶꦪꦴ ꦕ ꦮꦶꦥ꧀ꦥꦛꦶꦱꦴꦫꦺꦴ ꦄꦤꦮꦱꦫꦺꦴꦮꦴꦠꦶ ‘‘ꦧꦴꦲꦸꦱꦕ꧀ꦕꦺꦤꦥꦶ…ꦥꦺ… ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦁ ꦥꦲꦷꦪꦠꦷ’’ꦠꦶ ꦮꦸꦠ꧀ꦠꦁ. ꦪꦢꦒ꧀ꦒꦺꦤ ꦧꦲꦸꦱ꧀ꦱꦸꦠꦱ꧀ꦱ ꦥꦛꦶꦱꦔ꧀ꦑꦴꦤꦮꦠꦺꦴ ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦁ ꦥꦲꦷꦪꦠꦶ, ꦠꦢꦒ꧀ꦒꦺꦤ ꦥꦫꦶꦥꦸꦕ꧀ꦖꦏꦠꦴꦮꦶꦤꦪꦥꦏꦠꦚ꧀ꦚꦸꦠꦴꦲꦶꦥꦶ ꦠꦁ ꦥꦲꦷꦪꦠꦷꦠꦶ ꦢꦛ꧀ꦜꦧ꧀ꦧꦁ. ꦮꦸꦢ꧀ꦣꦱꦺꦮꦶꦠꦴ ꦕ ꦮꦸꦢ꧀ꦣꦱꦷꦭꦶꦠꦁ ꦄꦴꦮꦲꦠꦷꦠꦶ ꦕꦺꦠꦱꦺꦴ ꦮꦹꦥꦱꦩꦏꦫꦠ꧀ꦠꦴ ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦱ꧀ꦱ ꦥꦲꦴꦤꦏꦴꦫꦷ ꦮꦸꦠ꧀ꦠꦴ, ꦮꦸꦢ꧀ꦣꦨꦴꦮꦁ ꦥꦤ ꦄꦤꦥꦺꦏ꧀ꦑꦶꦠ꧀ꦮꦴ ꦮꦶꦤꦪꦣꦫꦴ ꦏꦸꦏ꧀ꦏꦸꦕ꧀ꦕꦮꦶꦤꦺꦴꦢꦏꦴ ꦏꦭ꧀ꦪꦴꦟꦩꦶꦠ꧀ꦠꦴꦠꦶ ꦢꦛ꧀ꦜꦧ꧀ꦧꦴ. ꦮꦶꦏ꧀ꦑꦺꦥꦺꦴ ꦕ ꦨꦶꦏ꧀ꦑꦹꦤꦁ ꦪꦺꦨꦸꦪ꧀ꦪꦺꦤ ꦏꦸꦏ꧀ꦏꦸꦕ꧀ꦕꦲꦺꦠꦸꦏꦺꦴ ꦲꦺꦴꦠꦷꦠꦶ ‘‘ꦏꦥ꧀ꦥꦶꦪꦴꦏꦥ꧀ꦥꦶꦪꦥꦫꦶꦥꦸꦕ꧀ꦖꦴꦧꦲꦸꦭꦱ꧀ꦱꦴ’’ꦠꦶꦄꦴꦢꦶꦤꦴ ꦮꦶꦤꦪꦤꦪꦺꦤꦺꦮ ꦥꦫꦶꦥꦸꦕ꧀ꦖꦏꦠꦴꦢꦪꦺꦴ ꦤꦶꦢ꧀ꦢꦶꦛ꧀ꦜꦴ. ꦥꦲꦷꦤꦺ ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦺꦠꦶ ꦤꦶꦢ꧀ꦣꦴꦫꦟꦺ ꦨꦸꦩ꧀ꦩꦁ. ꦏꦸꦏ꧀ꦏꦸꦕ꧀ꦕꦱ꧀ꦱ ꦢꦺꦴꦩꦤꦱ꧀ꦱꦱꦲꦒꦠꦠ꧀ꦠꦴ ꦄꦤꦴꦒꦴꦩꦶꦩꦒ꧀ꦒꦺꦤ ꦄꦴꦪꦠꦶꦁ ꦄꦤꦸꦥ꧀ꦥꦴꦢꦺꦴ ꦮꦸꦠ꧀ꦠꦺꦴ.

ꦏꦸꦱꦭꦴꦏꦸꦱꦭꦴ ꦣꦩ꧀ꦩꦴꦠꦶꦄꦴꦢꦷꦱꦸ ꦪꦁ ꦮꦠ꧀ꦠꦧ꧀ꦧꦁ, ꦠꦁ ꦲꦺꦛ꧀ꦜꦴ ꦮꦸꦠ꧀ꦠꦩꦺꦮ. ꦏꦴꦩꦁ ꦧꦴꦲꦸꦱꦕ꧀ꦕꦥꦫꦶꦥꦸꦕ꧀ꦖꦏꦠꦴꦲꦶ ꦄꦛ꧀ꦜꦮꦠ꧀ꦡꦸꦏꦴꦥꦶ ꦮꦶꦕꦶꦏꦶꦕ꧀ꦖꦴ ꦥꦲꦷꦪꦠꦶ, ꦠꦡꦴꦥꦶ ꦫꦠꦤꦠ꧀ꦠꦪꦮꦶꦕꦶꦏꦶꦕ꧀ꦖꦴꦩꦹꦭꦶꦏꦴ ꦱꦺꦱꦮꦶꦕꦶꦏꦶꦕ꧀ꦖꦴꦠꦶ ꦏꦠ꧀ꦮꦴ ꦮꦸꦠ꧀ꦠꦁ ‘‘ꦠꦷꦟꦶ ꦫꦠꦤꦴꦤꦶ ꦄꦴꦫꦧ꧀ꦨꦴ’’ꦠꦶꦄꦴꦢꦶ. ꦮꦶꦤꦪꦺ ꦥꦏꦠꦚ꧀ꦚꦸꦠꦴꦪ ꦕ ꦱꦠꦶ ꦱꦶꦏ꧀ꦑꦴꦪ ꦏꦔ꧀ꦑꦴꦪ ꦄꦱꦩ꧀ꦨꦮꦺꦴ ꦌꦮ, ꦠꦡꦴ ꦫꦠꦤꦠ꧀ꦠꦪꦒꦸꦟꦴꦮꦧꦺꦴꦣꦺ ꦱꦠꦶ ꦥꦸꦧ꧀ꦧꦤ꧀ꦠꦴꦢꦷꦱꦸ ꦱꦁꦱꦪꦱ꧀ꦱꦴꦠꦶ ꦄꦴꦲ – ‘‘ꦮꦶꦤꦪꦺ’’ꦠꦶꦄꦴꦢꦶ. ꦎꦏꦥ꧀ꦥꦤꦷꦪꦱꦢ꧀ꦣꦴ ꦱꦢ꧀ꦣꦺꦪ꧀ꦪꦮꦠ꧀ꦡꦸꦁ ꦄꦤꦸꦥꦮꦶꦱꦶꦠ꧀ꦮꦴ ꦮꦶꦪ ꦄꦣꦶꦩꦸꦕ꧀ꦕꦤꦁ, ꦠꦚ꧀ꦕ ꦠꦡꦴ ꦄꦣꦶꦩꦺꦴꦏ꧀ꦑꦸꦥ꧀ꦥꦴꦢꦤꦩꦺꦮ. ꦱꦢ꧀ꦣꦴꦪ ꦤꦶꦤ꧀ꦤꦥꦺꦴꦟꦥꦧ꧀ꦨꦴꦫꦠꦴ ꦄꦣꦶꦩꦸꦠ꧀ꦠꦶ. ꦄꦫꦲꦠ꧀ꦠꦺꦤ ꦏꦹꦛꦁ ꦒꦟ꧀ꦲꦶ ꦱꦠ꧀ꦠꦥꦶ ꦧꦺꦴꦗ꧀ꦙꦔ꧀ꦒꦺ ꦮꦶꦠ꧀ꦡꦴꦫꦺꦠ꧀ꦮꦴ ꦢꦺꦱꦤꦴꦪ ꦎꦱꦴꦥꦶꦠꦠ꧀ꦠꦴ.

ꦄꦴꦲꦴꦫꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧒. ꦥꦫꦶꦪꦴꦪꦱꦸꦠ꧀ꦠꦮꦟ꧀ꦟꦤꦴ

꧒꧓꧓. ꦱꦩ꧀ꦧꦲꦸꦭꦴꦠꦶ ꦮꦸꦕ꧀ꦕꦤ꧀ꦠꦶ ꦱꦔ꧀ꦓꦱꦩꦚ꧀ꦚꦴꦪ ꦄꦨꦴꦮꦠꦺꦴ. ꦠꦠꦺꦴ ꦥꦫꦤ꧀ꦠꦶ ꦠꦶꦟ꧀ꦟꦁ ꦗꦤꦴꦤꦁ ꦈꦥꦫꦶ ꦱꦔ꧀ꦓꦺꦴ ꦕꦠꦸꦮꦒ꧀ꦒꦏꦫꦟꦷꦪꦴꦢꦶꦱꦔ꧀ꦓꦏꦩ꧀ꦩꦮꦱꦺꦤ ꦏꦩ꧀ꦩꦥ꧀ꦥꦠ꧀ꦠꦠ꧀ꦠꦴ. ꦥꦮꦶꦱꦶꦁꦱꦹꦠꦶ ꦨꦴꦮꦶꦤꦶ ꦥꦮꦶꦱꦤꦺ ꦨꦹꦠꦺ ꦮꦶꦪ ꦏꦠ꧀ꦮꦴ ꦈꦥꦕꦴꦫꦺꦤ ꦮꦸꦠ꧀ꦠꦤ꧀ꦠꦶ ꦄꦴꦲ – ‘‘ꦥꦮꦶꦛ꧀ꦜꦴ’’ꦠꦶ. ꦨꦴꦮꦶꦤꦶ ꦲꦶ ꦨꦹꦠꦺ ꦮꦶꦪ ꦈꦥꦕꦴꦫꦺꦴ. ꦠꦺꦤꦴꦲ – ‘‘ꦠꦺ ꦥꦤꦴ’’ꦠꦶꦄꦴꦢꦶ, ꦠꦺ ꦥꦤ ꦨꦶꦏ꧀ꦑꦹꦠꦶ ꦄꦠ꧀ꦡꦺꦴ. ꦥꦸꦤ ꦠꦺ ꦥꦤꦴꦠꦶ ꦠꦶꦠ꧀ꦡꦶꦪꦴ ꦠꦶꦠ꧀ꦡꦶꦪꦱꦴꦮꦏꦴ ꦕ.

ꦆꦩꦱ꧀ꦩꦶꦁ ꦥꦚ꧀ꦚꦴꦥꦤꦺꦠꦶ ‘‘ꦥꦚ꧀ꦕ ꦤꦷꦮꦫꦟꦺ ꦥꦲꦴꦪꦴ’’ꦠꦶꦄꦴꦢꦶꦤꦪꦥ꧀ꦥꦮꦠ꧀ꦠꦺ ꦆꦩꦱ꧀ꦩꦶꦁ ꦥꦏꦴꦫꦺ ꦄꦠ꧀ꦡꦥꦚ꧀ꦚꦴꦥꦤꦺ. ꦮꦶꦱꦶꦱ꧀ꦱꦠꦶ ꦄꦚ꧀ꦚꦩꦚ꧀ꦚꦠꦺꦴ ꦥꦨꦶꦗ꧀ꦗꦠꦷꦠꦶ ꦮꦶꦱꦺꦱꦺꦴ, ꦨꦺꦢꦺꦴ. ꦱ꧀ꦮꦴꦪꦁ ꦆꦣ ꦄꦤ꧀ꦠꦺꦴꦒꦣꦴꦣꦶꦏꦨꦴꦮꦺꦴ ꦄꦣꦶꦥ꧀ꦥꦺꦠꦺꦴꦠꦶ ꦄꦴꦲ – ‘‘ꦏꦺꦴ ꦮꦶꦱꦺꦱꦺꦴꦠꦶ ꦏꦶꦁ ꦄꦣꦶꦏ’’ꦤ꧀ꦠꦶ. ꦄꦣꦶꦏꦁ ꦥꦪꦱꦤꦁ ꦥꦪꦸꦚ꧀ꦗꦤꦤ꧀ꦠꦶ ꦄꦣꦶꦥ꧀ꦥꦪꦴꦱꦺꦴ, ꦄꦣꦶꦏꦥ꧀ꦥꦪꦺꦴꦒꦺꦴ. ꦤꦴꦤꦴ ꦏꦫꦷꦪꦠꦶ ꦌꦠꦺꦤꦴꦠꦶ ꦤꦴꦤꦴꦏꦫꦟꦁ, ꦨꦺꦢꦺꦴꦠꦶ ꦄꦴꦲ – ‘‘ꦏꦶꦁ ꦤꦴꦤꦠ꧀ꦠ’’ꦤ꧀ꦠꦶ. ꦢꦸꦠꦶꦪꦥꦢꦺꦠꦶ ‘‘ꦄꦤꦸꦱꦴꦱꦤꦶꦪꦴ ꦮꦴ ꦄꦤꦸꦱꦴꦱꦤꦶ’’ꦤ꧀ꦠꦶ ꦌꦠꦱ꧀ꦩꦶꦁ ꦥꦢꦺ. ꦌꦱꦺꦮ ꦤꦪꦺꦴꦠꦶ ꦪꦡꦴ ꦥꦜꦩꦱ꧀ꦩꦶꦁ ꦥꦢꦺ ꦄꦠ꧀ꦡꦪꦺꦴꦗꦤꦴ, ꦌꦮꦁ ꦢꦸꦠꦶꦪꦥꦢꦺꦥꦶ ꦪꦺꦴꦗꦺꦠꦧ꧀ꦧꦴ.

ꦠꦷꦟꦶ ꦜꦴꦤꦴꦤꦷꦠꦶ ꦢꦺꦮꦩꦴꦫꦧ꧀ꦫꦲ꧀ꦩꦛ꧀ꦜꦴꦤꦴꦤꦶ ꦠꦷꦟꦶ ‘‘ꦱꦢꦺꦮꦏꦺ ꦭꦺꦴꦏꦺ’’ꦠꦶꦄꦴꦢꦶꦤꦴ ꦭꦺꦴꦏꦺ ꦥꦏ꧀ꦑꦶꦥꦶꦠ꧀ꦮꦴ. ‘‘ꦱꦱ꧀ꦱꦩꦟꦧ꧀ꦫꦴꦲ꧀ꦩꦟꦶꦪꦴ ꦥꦗꦴꦪ ꦱꦢꦺꦮꦩꦤꦸꦱ꧀ꦱꦴꦪꦴ’’ꦠꦶ ꦢ꧀ꦮꦺ ꦜꦴꦤꦴꦤꦶ. ‘‘ꦥꦗꦴꦪꦴ’’ꦠꦶ ꦌꦠ꧀ꦡ ꦥꦏ꧀ꦑꦶꦥꦶꦠ꧀ꦮꦴ ꦆꦠꦶ ꦥꦚ꧀ꦕꦲꦶ ꦥꦢꦺꦲꦶ. ꦈꦢ꧀ꦢꦺꦱꦤ꧀ꦠꦶ ꦈꦢ꧀ꦢꦶꦱꦶꦠꦧ꧀ꦧꦠꦁ. ꦒꦟꦤꦤ꧀ꦠꦶ ꦌꦏꦺꦴ ꦏꦴꦩꦕ꧀ꦖꦤ꧀ꦢꦺꦴꦠꦶ ꦒꦲꦺꦠꦧ꧀ꦧꦠꦁ ꦒꦕ꧀ꦖꦠꦶ. ꦄꦠ꧀ꦠꦤꦺꦴ ꦲꦠ꧀ꦡꦥꦴꦢꦴꦢꦷꦱꦹꦠꦶ ꦤꦶꦢꦱ꧀ꦱꦤꦩꦠ꧀ꦠꦁ ꦢꦛ꧀ꦜꦧ꧀ꦧꦁ ꦱꦩꦸꦢꦴꦪꦁ ꦄꦴꦫꦧ꧀ꦨ ꦥꦛꦶꦓꦱ꧀ꦱ ꦈꦥ꧀ꦥꦗ꧀ꦗꦤꦠꦺꦴ. ꦄꦠ꧀ꦠꦤꦺꦴ ꦑꦤ꧀ꦣꦺꦱꦸ ꦮꦶꦩꦠꦶ ‘‘ꦄꦲꦁ ꦤꦸ ꦑꦺꦴꦱ꧀ꦩꦷ’’ꦠꦶꦄꦴꦢꦶꦤꦴ.

ꦏꦶꦚ꧀ꦕꦴꦥꦶ ꦱꦧ꧀ꦧꦁ ꦮꦷꦫꦶꦪꦁ ꦕꦺꦠꦱꦶꦏꦩꦺꦮ, ꦪꦁ ꦥꦤ ꦏꦴꦪꦏꦩ꧀ꦩꦴꦣꦶꦛ꧀ꦜꦴꦤꦴꦢꦶꦮꦱꦺꦤ ꦩꦤꦱꦶ ꦏꦴꦪꦶꦏꦥꦪꦺꦴꦒꦱꦩꦸꦛ꧀ꦜꦴꦥꦤꦁ ꦮꦷꦫꦶꦪꦁ ꦏꦴꦪꦶꦏꦤ꧀ꦠꦶ ꦭꦢ꧀ꦣꦥꦫꦶꦪꦴꦪꦤ꧀ꦠꦶ ꦠꦠꦺꦴ ꦮꦶꦱꦺꦱꦺꦠ꧀ꦮꦴ ꦕꦺꦠꦱꦶꦏꦤ꧀ꦠꦶ ꦪꦡꦴꦣꦶꦥ꧀ꦥꦺꦠꦢꦸꦠꦶꦪꦠꦴꦢꦱ꧀ꦱꦤꦠ꧀ꦡꦁ. ꦪꦢꦶꦥꦶ ꦪꦡꦴꦏꦥ꧀ꦥꦶꦠꦆꦫꦶꦪꦴꦥꦡꦱꦤ꧀ꦣꦴꦫꦟꦮꦱꦺꦤ ꦥꦮꦠ꧀ꦠꦩꦴꦤꦁ ꦮꦷꦫꦶꦪꦁ ꦏꦴꦪꦱ꧀ꦱ ꦠꦡꦴꦥꦮꦠ꧀ꦠꦱ꧀ꦱ ꦥꦕ꧀ꦕꦪꦨꦹꦠꦤ꧀ꦠꦶ ꦤ ꦱꦏ꧀ꦏꦴ ꦮꦠ꧀ꦠꦸꦁ, ꦠꦡꦴꦥꦶ ꦤ ꦠꦴꦢꦶꦱꦺꦴ ꦏꦴꦪꦥꦪꦺꦴꦒꦺꦴ, ꦠꦢꦴ ꦥꦮꦠ꧀ꦠꦺꦴ ꦤꦠ꧀ꦡꦷꦠꦶ ꦮꦸꦠ꧀ꦠꦁ ‘‘ꦏꦴꦪꦥꦪꦺꦴꦒꦁ ꦮꦶꦤꦴ ꦈꦥ꧀ꦥꦤ꧀ꦤꦮꦷꦫꦶꦪ’’ꦤ꧀ꦠꦶ. ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦱꦢꦶꦱꦺꦴ ꦮꦴꦠꦶ ꦆꦩꦶꦤꦴ ꦄꦗ꧀ꦙꦠ꧀ꦠꦶꦏꦺ ꦱꦔ꧀ꦑꦴꦫꦺ ꦄꦗ꧀ꦙꦸꦥꦺꦏ꧀ꦑꦤꦮꦱꦺꦤ ꦥꦮꦠ꧀ꦠꦴ ꦄꦗ꧀ꦙꦠ꧀ꦠꦣꦩ꧀ꦩꦺꦱꦸ ꦈꦥꦺꦏ꧀ꦑꦴꦠꦶꦄꦴꦢꦶꦤꦪꦁ ꦄꦠꦶꦢꦶꦱꦠꦶ.

‘‘ꦩꦶꦱ꧀ꦱꦏꦧꦺꦴꦗ꧀ꦙꦔ꧀ꦒꦴ ꦏꦡꦶꦠꦴ’’ꦠꦶ ꦮꦠ꧀ꦮꦴ ꦠꦩꦠ꧀ꦡꦁ ꦮꦶꦨꦴꦮꦺꦠꦸꦁ ‘‘ꦌꦠꦺꦱꦹ’’ꦠꦶꦄꦴꦢꦶ ꦮꦸꦠ꧀ꦠꦁ. ꦕꦔ꧀ꦏꦩꦤ꧀ꦠꦺꦤꦥꦶ ꦄꦫꦶꦪꦩꦒ꧀ꦒꦁ ꦄꦣꦶꦒꦤ꧀ꦠꦸꦁ ꦱꦏ꧀ꦏꦴꦠꦶ ꦏꦠ꧀ꦮꦴ ꦮꦸꦠ꧀ꦠꦁ ‘‘ꦩꦒ꧀ꦒꦁ ꦄꦥꦠ꧀ꦠꦁ ꦏꦴꦪꦶꦏꦮꦷꦫꦶꦪ’’ꦤ꧀ꦠꦶ. ꦧꦺꦴꦗ꧀ꦙꦔ꧀ꦒꦴ ꦤ ꦭꦧ꧀ꦨꦤ꧀ꦠꦷꦠꦶ ꦤꦶꦥ꧀ꦥꦫꦶꦪꦴꦪꦧꦺꦴꦗ꧀ꦙꦔ꧀ꦒꦴ ꦤ ꦭꦧ꧀ꦨꦤ꧀ꦠꦷ. ꦧꦺꦴꦗ꧀ꦙꦔ꧀ꦒꦺ ꦈꦢ꧀ꦣꦫꦤ꧀ꦠꦶ ꦥꦫꦶꦪꦴꦪꦠꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦱꦺꦱꦴꦠꦶ ꦧꦲꦶꦢ꧀ꦣꦴꦣꦩ꧀ꦩꦺꦱꦸ ꦱꦠꦶ-ꦣꦩ꧀ꦩꦮꦶꦕꦪ-ꦈꦥꦺꦏ꧀ꦑꦴ-ꦕꦺꦠꦱꦶꦏ-ꦮꦷꦫꦶꦪ-ꦱꦮꦶꦠꦏ꧀ꦏ-ꦱꦮꦶꦕꦴꦫ-ꦥꦷꦠꦶ-ꦱꦩꦴꦣꦷ ꦢ꧀ꦮꦺ ꦥꦱ꧀ꦱꦢ꧀ꦣꦶꦪꦺꦴ ꦕ. ꦄꦪꦁ ꦥꦤ ꦤꦪꦺꦴ ꦥꦕꦸꦫꦥ꧀ꦥꦮꦠ꧀ꦠꦶꦮꦱꦺꦤ ꦄꦛ꧀ꦜꦏꦡꦴꦤꦪꦺꦤꦺꦮ ꦮꦸꦠ꧀ꦠꦺꦴ. ꦡꦺꦫꦮꦴꦢꦮꦱꦺꦤ ꦥꦤ ꦄꦮꦶꦠꦏ꧀ꦏꦄꦮꦶꦕꦴꦫꦩꦠ꧀ꦠꦴ ꦥꦷꦠꦶꦱꦩꦴꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦴ ꦫꦹꦥꦴꦮꦕꦫꦴꦥꦶ ꦄꦠ꧀ꦡꦷꦠꦶ ꦠꦺꦥꦶ ꦒꦲꦺꦠ꧀ꦮꦴ ꦢꦱ ꦩꦶꦱ꧀ꦱꦏꦴꦮ ꦲꦺꦴꦤ꧀ꦠꦷꦠꦶ ꦮꦠ꧀ꦠꦧ꧀ꦧꦁ ꦱꦶꦪꦴꦠꦶ.

ꦥꦫꦶꦪꦴꦪꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧓. ꦄꦒ꧀ꦒꦶꦱꦸꦠ꧀ꦠꦮꦟ꧀ꦟꦤꦴ

꧒꧓꧔. ꦭꦺꦴꦟꦣꦹꦥꦤꦤ꧀ꦠꦶ ꦭꦺꦴꦟꦚ꧀ꦕ ꦣꦹꦥꦤꦚ꧀ꦕ ꦭꦺꦴꦟꦣꦹꦥꦤꦁ. ꦪꦺꦴꦣꦏꦩ꧀ꦩꦤ꧀ꦠꦶ ꦪꦺꦴꦣꦥꦸꦒ꧀ꦒꦭꦺꦤ ꦏꦠ꧀ꦠꦧ꧀ꦧꦁ ꦏꦩ꧀ꦩꦁ. ꦩꦤ꧀ꦠꦏꦩ꧀ꦩꦤ꧀ꦠꦶ ꦫꦴꦗꦏꦶꦕ꧀ꦕꦩꦤ꧀ꦠꦤꦁ. ꦥꦛꦶꦲꦴꦫꦏꦩ꧀ꦩꦤ꧀ꦠꦶ ꦫꦚ꧀ꦚꦺꦴ ꦱꦤ꧀ꦠꦶꦏꦁ ꦄꦴꦒꦠꦴꦤꦁ ꦮꦕꦤꦁ ꦫꦚ꧀ꦚꦺꦴ ꦤꦶꦮꦺꦢꦺꦠ꧀ꦮꦴ ꦠꦠꦺꦴ ꦤꦺꦱꦁ ꦥꦛꦶꦲꦫꦟꦏꦩ꧀ꦩꦁ. ꦠꦱ꧀ꦩꦴꦠꦶ ꦱꦧ꧀ꦧꦠ꧀ꦡꦶꦏꦠ꧀ꦠꦴ ꦱꦠꦶꦪꦴ. ꦌꦮꦁ ‘‘ꦱꦠꦶꦚ꧀ꦕ ꦑ꧀ꦮꦴꦲ’’ꦤ꧀ꦠꦶꦄꦴꦢꦶꦏꦁ ꦄꦮꦺꦴꦕ. ꦥꦸꦧ꧀ꦧꦨꦴꦒꦮꦶꦥꦱ꧀ꦱꦤꦴ ꦧꦺꦴꦗ꧀ꦙꦔ꧀ꦒꦴꦮ ꦏꦡꦶꦠꦴ ꦥꦒ꧀ꦒꦲꦤꦶꦒ꧀ꦒꦲꦮꦶꦤꦺꦴꦢꦶꦠꦠ꧀ꦠꦴ.

ꦄꦒ꧀ꦒꦶꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧔. ꦩꦺꦠ꧀ꦠꦴꦱꦲꦒꦠꦱꦸꦠ꧀ꦠꦮꦟ꧀ꦟꦤꦴ

꧒꧓꧕. ꦏꦷꦢꦶꦱꦴ ꦒꦠꦶ ꦤꦶꦧ꧀ꦧꦠ꧀ꦠꦶ ꦌꦠꦶꦱ꧀ꦱꦴꦠꦶ ꦏꦶꦁꦒꦠꦶꦏꦴ, ꦏꦶꦁꦤꦶꦛ꧀ꦜꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦏꦷꦢꦶꦱꦷ ꦥꦫꦩꦴ ꦈꦠ꧀ꦠꦩꦴ ꦏꦺꦴꦛꦶ ꦌꦠꦶꦱ꧀ꦱꦴꦠꦶ ꦏꦶꦁꦥꦫꦩꦴ. ꦏꦷꦢꦶꦱꦁ ꦦꦭꦁ ꦄꦴꦤꦶꦱꦁꦱꦁ ꦈꦢꦪꦺꦴ ꦌꦠꦶꦱ꧀ꦱꦴꦠꦶ ꦏꦶꦁꦦꦭꦴ. ꦱꦁꦱꦛ꧀ꦜꦁ ꦱꦩ꧀ꦥꦪꦸꦠ꧀ꦠꦤ꧀ꦠꦶ ꦆꦢꦁ ꦱꦲꦒꦠ-ꦱꦢ꧀ꦢꦱ꧀ꦱ ꦄꦠ꧀ꦡꦢꦱ꧀ꦱꦤꦩꦠ꧀ꦠꦁ, ꦆꦣ ꦥꦤ ꦩꦺꦠ꧀ꦠꦴꦙꦴꦤꦁ ꦥꦴꦢꦏꦁ ꦏꦠ꧀ꦮꦴ ꦮꦶꦥꦱ꧀ꦱꦤꦴꦥꦸꦧ꧀ꦧꦨꦴꦒꦧꦺꦴꦗ꧀ꦙꦔ꧀ꦒꦴ ꦕ ‘‘ꦩꦺꦠ꧀ꦠꦴꦱꦲꦒꦠꦁ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒ’’ꦤ꧀ꦠꦶꦄꦴꦢꦶꦤꦴ ꦮꦸꦠ꧀ꦠꦴꦠꦶ ꦮꦺꦢꦶꦠꦧ꧀ꦧꦁ. ꦱꦧ꧀ꦧꦠ꧀ꦡꦴꦠꦶ ꦱꦧ꧀ꦧꦺꦱꦸ ꦧꦺꦴꦗ꧀ꦙꦔ꧀ꦒꦺꦱꦸ ꦱꦧ꧀ꦧꦺꦱꦸ ꦕ ꦧ꧀ꦫꦲ꧀ꦩꦮꦶꦲꦴꦫꦺꦱꦸ.

ꦥꦛꦶꦏꦹꦭꦺꦠꦶ ꦮꦶꦫꦗ꧀ꦗꦠꦷꦠꦶ ꦥꦛꦶꦏꦹꦭꦁ, ꦄꦤꦶꦛ꧀ꦜꦁ. ꦤ ꦥꦛꦶꦏꦹꦭꦁ ꦄꦥ꧀ꦥꦛꦶꦏꦹꦭꦁ, ꦆꦛ꧀ꦜꦁ. ꦠꦺꦤꦴꦲ ‘‘ꦆꦛ꧀ꦜꦺ ꦮꦠ꧀ꦡꦸꦱ꧀ꦩꦶ’’ꦤ꧀ꦠꦶ. ꦌꦠ꧀ꦡꦴꦠꦶ ꦄꦥ꧀ꦥꦛꦶꦏꦹꦭꦮꦠ꧀ꦡꦸꦱ꧀ꦩꦶꦁ. ꦌꦮꦤ꧀ꦠꦶ ꦥꦛꦶꦏꦹꦭꦱꦚ꧀ꦚꦷ. ꦱꦠ꧀ꦠꦺ ꦄꦥ꧀ꦥꦛꦶꦏꦹꦭꦺ ꦄꦱꦸꦨꦦꦫꦟꦁ, ꦱꦔ꧀ꦑꦴꦫꦺ ꦄꦥ꧀ꦥꦛꦶꦏꦹꦭꦺ ꦄꦤꦶꦕ꧀ꦕꦤ꧀ꦠꦶ ꦩꦤꦱꦶꦏꦴꦫꦁ ꦏꦫꦺꦴꦤ꧀ꦠꦺꦴ. ꦄꦱꦸꦨꦴꦪꦴꦠꦶ ꦄꦱꦸꦨꦱꦚ꧀ꦚꦴꦪ. ꦄꦤꦶꦕ꧀ꦕꦠꦺꦴ ꦮꦴ ꦈꦥꦱꦁꦲꦫꦠꦷꦠꦶ ꦄꦤꦶꦕ꧀ꦕꦤ꧀ꦠꦶ ꦩꦤꦱꦶꦏꦴꦫꦁ ꦥꦮꦠ꧀ꦠꦺꦠꦶ. ‘‘ꦌꦱꦺꦮ ꦤꦪꦺꦴ’’ꦠꦶ ꦱꦔ꧀ꦑꦺꦥꦠꦺꦴ ꦮꦸꦠ꧀ꦠꦩꦠ꧀ꦡꦁ ꦮꦶꦮꦫꦶꦠꦸꦁ ‘‘ꦄꦥ꧀ꦥꦛꦶꦏꦹꦭꦥꦛꦶꦏꦹꦭꦺꦱꦹ’’ꦠꦶꦄꦴꦢꦶ ꦮꦸꦠ꧀ꦠꦁ. ꦖꦭ꦳ꦔ꧀ꦒꦸꦥꦺꦏ꧀ꦑꦤ꧀ꦠꦶ ꦖꦱꦸ ꦄꦴꦫꦩ꧀ꦩꦟꦺꦱꦸ ꦥꦲꦷꦤꦴꦤꦸꦫꦺꦴꦣꦱ꧀ꦱ ꦈꦥ꧀ꦥꦠ꧀ꦠꦶꦪꦴ ꦖꦭ꦳ꦔ꧀ꦒꦮꦤ꧀ꦠꦁ ꦈꦥꦺꦏ꧀ꦑꦁ.