꧘. ꦱꦩꦸꦒ꧀ꦓꦴꦠꦱꦴꦫꦸꦥ꧀ꦥꦱꦸꦠ꧀ꦠꦮꦟ꧀ꦟꦤꦴ

꧓꧐. ꦩꦚ꧀ꦚꦶꦠꦁ ꦤꦴꦩ ꦠꦟ꧀ꦲꦴꦩꦴꦤꦢꦶꦛ꧀ꦜꦷꦲꦶ ꦒꦲꦺꦠꦧ꧀ꦧꦁ ꦩꦚ꧀ꦚꦶꦠꦁ. ꦱꦧ꧀ꦧꦱ꧀ꦩꦶꦁ ꦩꦚ꧀ꦚꦶꦠꦤ꧀ꦠꦶ ꦱꦧ꧀ꦧꦩꦚ꧀ꦚꦶꦠꦁ, ꦠꦱ꧀ꦱ ꦱꦩꦸꦒ꧀ꦓꦴꦠꦺꦴ ꦱꦺꦠꦸꦓꦴꦠꦺꦴ, ꦠꦢꦴꦮꦲꦁ ꦱꦧ꧀ꦧꦩꦚ꧀ꦚꦶꦠꦱꦩꦸꦒ꧀ꦓꦴꦠꦱꦴꦫꦸꦥ꧀ꦥꦁ. ꦄꦛ꧀ꦜꦏꦡꦴꦪꦁ ꦥꦤ ‘‘ꦩꦚ꧀ꦚꦶꦠꦁ ꦤꦴꦩ ꦕꦏ꧀ꦑꦴꦢꦷꦱꦸ ꦌꦮ ꦈꦥ꧀ꦥꦗ꧀ꦗꦠꦶ, ꦤꦴꦚ꧀ꦚꦱ꧀ꦩꦶ’’ꦤ꧀ꦠꦶ ꦢꦸꦠꦶꦪꦤꦪꦺꦴ ꦮꦸꦠ꧀ꦠꦺꦴ. ꦄꦤꦸꦕ꧀ꦖꦮꦶꦏꦤ꧀ꦠꦶ ꦄꦤꦸꦫꦹꦥꦁ ꦄꦮꦶꦭꦺꦴꦩꦁ. ꦆꦣꦴꦠꦶ ꦆꦣꦺꦮ ꦱꦴꦱꦤꦺ ꦄꦚ꧀ꦚꦠ꧀ꦡ ꦠꦢꦨꦴꦮꦠꦺꦴ. ‘‘ꦠꦟ꧀ꦲꦴ-ꦩꦴꦤꦢꦶꦛ꧀ꦜꦶꦩꦚ꧀ꦚꦶꦠꦴꦤ’’ꦤ꧀ꦠꦶ ꦮꦸꦠ꧀ꦠꦁ ꦩꦚ꧀ꦚꦶꦠꦠ꧀ꦠꦪꦁ ꦱꦥꦫꦱꦤ꧀ꦠꦴꦤꦺꦱꦸ ꦥꦛꦶꦥꦏ꧀ꦑꦮꦱꦺꦤ ꦪꦺꦴꦗꦺꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦕꦏ꧀ꦑꦸꦁ ꦄꦲꦤ꧀ꦠꦶ ꦮꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ‘‘ꦕꦏ꧀ꦑꦸꦁ ꦄꦲ’’ꦤ꧀ꦠꦶ ꦆꦩꦶꦤꦴ ꦄꦗ꧀ꦙꦠ꧀ꦠꦮꦶꦱꦪꦁ ꦢꦶꦛ꧀ꦜꦶꦩꦚ꧀ꦚꦶꦠꦚ꧀ꦕ ꦢꦱ꧀ꦱꦺꦠꦶ ꦄꦠ꧀ꦠꦴꦨꦶꦤꦶꦮꦺꦱꦴꦲꦁꦏꦴꦫꦢꦷꦥꦤꦠꦺꦴ. ‘‘ꦩꦩ’’ꦤ꧀ꦠꦶ ꦆꦩꦶꦤꦴ ꦠꦟ꧀ꦲꦴꦩꦚ꧀ꦚꦶꦠꦁ ꦩꦴꦤꦩꦚ꧀ꦚꦶꦠꦩ꧀ꦥꦶ ꦮꦴ, ꦥꦫꦶꦒ꧀ꦒꦲꦩꦸꦑꦺꦤꦥꦶ ꦱꦺꦪ꧀ꦪꦴꦢꦶꦠꦺꦴ ꦩꦴꦤꦸꦥ꧀ꦥꦗ꧀ꦗꦤꦠꦺꦴ. ꦱꦺꦱꦥꦢꦢ꧀ꦮꦪꦺꦥꦶ ꦆꦩꦶꦤꦴ ꦤꦪꦺꦤ ꦩꦚ꧀ꦚꦶꦠꦮꦶꦨꦴꦒꦺꦴ ꦮꦺꦢꦶꦠꦧ꧀ꦧꦺꦴ. ꦄꦲꦤ꧀ꦠꦶ ꦄꦠ꧀ꦠꦴꦮ, ꦱꦺꦴ ꦕ ꦕꦏ꧀ꦑꦸꦱ꧀ꦩꦶꦁ ꦠꦢꦣꦷꦤꦮꦸꦠ꧀ꦠꦶꦠ꧀ꦠꦴ ‘‘ꦥꦫꦺꦴ’’ꦠꦶ ꦤ ꦩꦚ꧀ꦚꦠꦶ. ꦩꦩ ꦏꦶꦚ꧀ꦕꦤꦥꦭꦶꦧꦺꦴꦣꦺꦴ ꦕꦏ꧀ꦑꦸꦱ꧀ꦩꦶꦁ ꦱꦠꦶ ꦭꦧ꧀ꦨꦤꦠꦺꦴ, ꦄꦱꦠꦶ ꦤ ꦩꦚ꧀ꦚꦠꦶ ꦠꦡꦴꦩꦚ꧀ꦚꦶꦠꦱ꧀ꦱ ꦥꦕ꧀ꦕꦪꦓꦴꦠꦠꦺꦴ. ꦱꦺꦱꦥꦢꦢ꧀ꦮꦪꦺꦥꦶ ꦌꦱꦺꦮ ꦤꦪꦺꦴ.

ꦄꦲꦁ ꦕꦏ꧀ꦑꦸꦠꦺꦴ ꦤꦶꦒ꧀ꦒꦠꦺꦴꦠꦶ ‘‘ꦄꦲ’’ꦤ꧀ꦠꦶ ꦮꦠ꧀ꦠꦧ꧀ꦧꦺꦴ ꦄꦪꦁ ꦱꦠ꧀ꦠꦺꦴ ꦕꦏ꧀ꦑꦸꦠꦺꦴ ꦤꦶꦒ꧀ꦒꦠꦺꦴ ꦠꦠ꧀ꦡ ꦱꦸꦑꦸꦩꦴꦏꦴꦫꦺꦤ ꦈꦥꦭꦧ꧀ꦨꦤꦠꦺꦴ. ꦩꦩ ꦏꦶꦚ꧀ꦕꦤꦥꦭꦶꦧꦺꦴꦣꦺꦴ ꦕꦏ꧀ꦑꦸꦠꦺꦴ ꦤꦶꦒ꧀ꦒꦠꦺꦴ ꦠꦱ꧀ꦩꦶꦁ ꦱꦠꦶ ꦌꦮ ꦈꦥꦭꦧ꧀ꦨꦤꦠꦺꦴ. ꦱꦺꦱꦢ꧀ꦮꦪꦺꦥꦶ ꦌꦱꦺꦮ ꦤꦪꦺꦴ. ꦠꦠ꧀ꦡ ꦥꦫꦺꦴꦠꦶ ꦥꦫꦺꦴ ꦱꦠ꧀ꦠꦺꦴ. ꦩꦩ ꦕꦏ꧀ꦑꦹꦠꦶ ꦤ ꦩꦚ꧀ꦚꦠꦶ ꦪꦱ꧀ꦱ ꦠꦁ ꦕꦏ꧀ꦑꦸ, ꦠꦱ꧀ꦱ ‘‘ꦄꦲ’’ꦤ꧀ꦠꦶ ꦮꦠ꧀ꦠꦧ꧀ꦧꦱ꧀ꦱꦺꦮ ꦄꦨꦴꦮꦠꦺꦴ. ꦩꦩꦠ꧀ꦠꦨꦹꦠꦤ꧀ꦠꦶ ꦩꦩ ꦏꦴꦫꦟꦁ. ꦱꦺꦱꦁ ꦈꦠ꧀ꦠꦴꦤꦩꦺꦮ. ꦌꦮꦩꦺꦠꦱ꧀ꦩꦶꦁ ꦱꦸꦠ꧀ꦠꦺ ꦕꦏ꧀ꦑꦸꦫꦹꦥ-ꦕꦏ꧀ꦑꦸꦮꦶꦚ꧀ꦚꦴꦟ-ꦕꦏ꧀ꦑꦸꦱꦩ꧀ꦦꦱ꧀ꦱ-ꦱꦸꦑꦢꦸꦏ꧀ꦑꦴꦢꦸꦏ꧀ꦑꦩꦱꦸꦑꦮꦱꦺꦤ ꦱꦠ꧀ꦠ ꦮꦴꦫꦴ ꦕꦏ꧀ꦑꦸꦢ꧀ꦮꦴꦫꦺ, ꦠꦡꦴ ꦱꦺꦴꦠꦢ꧀ꦮꦴꦫꦴꦢꦷꦱꦹꦠꦶ ꦖ ꦱꦠ꧀ꦠꦏꦴ ꦢ꧀ꦮꦺꦕꦠ꧀ꦠꦴꦭꦷꦱ. ꦥꦸꦤ ꦱꦏ꧀ꦏꦴꦪꦮꦱꦺꦤ ‘‘ꦱꦧ꧀ꦧꦁ ꦤ ꦩꦚ꧀ꦚꦠꦷ’’ꦠꦶꦄꦴꦢꦶꦤꦴ ꦮꦸꦠ꧀ꦠꦁ, ꦠꦺꦤ ꦠꦺꦕꦠ꧀ꦠꦴꦭꦷꦱ. ꦥꦸꦤ ꦠꦺꦨꦹꦩꦏꦮꦛ꧀ꦛꦁ ‘‘ꦭꦺꦴꦏꦺꦴ’’ꦠꦶ ꦒꦲꦺꦠ꧀ꦮꦴ ‘‘ꦤ ꦏꦶꦚ꧀ꦕꦶ ꦭꦺꦴꦏꦺ ꦈꦥꦴꦢꦶꦪꦠꦷ’’ꦠꦶ ꦮꦸꦠ꧀ꦠꦁ, ꦠꦺꦤ ꦕꦠꦸꦕꦠ꧀ꦠꦴꦭꦷꦱ ꦲꦺꦴꦤ꧀ꦠꦶ. ꦌꦮꦁ ꦱꦧ꧀ꦧꦡꦴꦥꦶ ꦕꦠꦸꦕꦠ꧀ꦠꦴꦭꦷꦱꦴꦪ ꦜꦴꦤꦺꦱꦸ ꦄꦫꦲꦠ꧀ꦠꦁ ꦥꦴꦥꦺꦠ꧀ꦮꦴ ꦮꦶꦥꦱ꧀ꦱꦤꦴ ꦏꦡꦶꦠꦴꦠꦶ ꦮꦺꦢꦶꦠꦧ꧀ꦧꦴ. ‘‘ꦕꦠꦸꦕꦠ꧀ꦠꦴꦭꦷꦱꦴꦣꦶꦏꦱꦠꦺꦱꦹ’’ꦠꦶ ꦏꦺꦱꦸꦕꦶ ꦥꦺꦴꦠ꧀ꦡꦏꦺꦱꦸ ꦭꦶꦑꦤ꧀ꦠꦶ, ꦱꦴ ꦕ ꦥꦩꦴꦢꦭꦺꦑꦴ.

ꦱꦩꦸꦒ꧀ꦓꦴꦠꦱꦴꦫꦸꦥ꧀ꦥꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.