꧑꧙. ꦄꦴꦱꦷꦮꦶꦱꦮꦒ꧀ꦒꦺꦴ

꧑. ꦄꦴꦱꦷꦮꦶꦱꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ

꧒꧓꧘. ꦪꦺ ꦨꦶꦏ꧀ꦑꦹ ꦠꦢꦴ ꦨꦒꦮꦤ꧀ꦠꦁ ꦥꦫꦶꦮꦴꦫꦺꦠ꧀ꦮꦴ ꦤꦶꦱꦶꦤ꧀ꦤꦴ, ꦠꦺꦱꦸ ꦏꦺꦕꦶ ꦌꦏꦮꦶꦲꦴꦫꦶꦤꦺꦴ, ꦏꦺꦕꦶ ꦄꦠ꧀ꦠꦢꦸꦠꦶꦪꦴ, ꦏꦺꦕꦶ ꦄꦠ꧀ꦠꦠꦠꦶꦪꦴ, ꦏꦺꦕꦶ ꦄꦠ꧀ꦠꦕꦠꦸꦠ꧀ꦡꦴ, ꦏꦺꦕꦶ ꦄꦠ꧀ꦠꦥꦚ꧀ꦕꦩꦴ ꦲꦸꦠ꧀ꦮꦴ ꦄꦫꦚ꧀ꦚꦴꦪꦠꦤꦺꦱꦸ ꦮꦶꦲꦫꦤ꧀ꦠꦷꦠꦶ ꦮꦸꦠ꧀ꦠꦁ – ‘‘ꦌꦏꦕꦴꦫꦶꦏ…ꦥꦺ… ꦥꦚ꧀ꦕꦕꦴꦫꦶꦏꦺ’’ꦠꦶ. ꦱꦩꦴꦤꦗ꧀ꦙꦴꦱꦪꦠꦴ ꦱꦨꦴꦒꦮꦸꦠ꧀ꦠꦶꦤꦺꦴ. ꦏꦩ꧀ꦩꦛ꧀ꦜꦴꦤꦴꦤꦸꦪꦸꦚ꧀ꦗꦤꦱ꧀ꦱ ꦏꦴꦫꦏꦺ. ꦠꦠꦺꦴ ꦌꦮ ꦠꦠ꧀ꦡ ꦪꦸꦠ꧀ꦠꦥꦪꦸꦠ꧀ꦠꦺ. ꦥꦸꦒ꧀ꦒꦭꦗ꧀ꦙꦴꦱꦪꦺꦤ ꦏꦴꦫꦟꦨꦹꦠꦺꦤ. ꦥꦕ꧀ꦕꦪꦨꦹꦠꦤ꧀ꦠꦶ ꦄꦥꦱ꧀ꦱꦪꦨꦹꦠꦁ. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ’’ꦠꦶ ꦄꦴꦫꦨꦶꦠ꧀ꦮꦴ ꦪꦴꦮ ‘‘ꦠꦶꦟ꧀ꦟꦺꦴ ꦥꦴꦫꦔ꧀ꦒꦠꦺꦴ ꦡꦭꦺ ꦠꦶꦛ꧀ꦜꦠꦶ ꦧ꧀ꦫꦴꦲ꧀ꦩꦟꦺꦴ’’ꦠꦶ ꦄꦪꦁ ꦩꦴꦠꦶꦏꦴꦤꦶꦏ꧀ꦑꦺꦥꦺꦴ. ꦠꦺꦱꦁ ꦩꦴꦠꦶꦏꦴꦪ ꦮꦶꦠ꧀ꦡꦴꦫꦨꦴꦗꦤꦁ. ꦮꦴꦱꦤꦴ ꦨꦮꦶꦱ꧀ꦱꦠꦷꦠꦶ ꦮꦴꦱꦤꦴꦮꦲꦁ ꦨꦮꦶꦱ꧀ꦱꦠꦶ. ꦱꦶꦤꦺꦫꦸꦁ ꦈꦏ꧀ꦑꦶꦥꦤ꧀ꦠꦺꦴ ꦮꦶꦪꦴꦠꦶꦄꦴꦢꦶ ꦆꦩꦶꦱ꧀ꦱꦴ ꦢꦺꦱꦤꦴꦪ ꦄꦤꦚ꧀ꦚꦱꦴꦣꦴꦫꦟꦠꦴꦪ ꦱꦸꦢꦸꦏ꧀ꦏꦫꦨꦴꦮꦢꦱ꧀ꦱꦤꦁ.

ꦩꦚ꧀ꦕꦛ꧀ꦜꦺꦱꦸ ꦩꦚ꧀ꦕꦱꦩꦚ꧀ꦚꦴ ꦮꦶꦪ ꦩꦸꦑꦛ꧀ꦜꦁ ꦮꦶꦱꦁ ‘‘ꦩꦸꦑ’’ꦤ꧀ꦠꦶ ꦄꦣꦶꦥ꧀ꦥꦺꦠꦁ. ꦱꦸꦏ꧀ꦑꦏꦛ꧀ꦜꦱꦢꦶꦱꦨꦴꦮꦴꦥꦴꦢꦤꦠꦺꦴ ‘‘ꦏꦛ꧀ꦜ’’ꦤ꧀ꦠꦶ ꦮꦸꦕ꧀ꦕꦠꦷꦠꦶ ꦏꦛ꧀ꦜꦁ ꦩꦸꦑꦁ ꦌꦠꦱ꧀ꦱꦴꦠꦶ ꦏꦛ꧀ꦜꦩꦸꦑꦺꦴ, ꦢꦁꦱꦤꦴꦢꦶꦤꦴ ꦏꦛ꧀ꦜꦱꦢꦶꦱꦨꦴꦮꦏꦫꦺꦴ ꦱꦥ꧀ꦥꦺꦴ. ꦄꦡ ꦮꦴ ꦏꦛ꧀ꦜꦱꦢꦶꦱꦨꦴꦮꦴꦥꦴꦢꦤꦠꦺꦴ ꦏꦛ꧀ꦜꦁ ꦮꦶꦱꦁ ꦮꦴ ꦩꦸꦑꦺ ꦌꦠꦱ꧀ꦱꦴꦠꦶ ꦏꦛ꧀ꦜꦩꦸꦑꦺꦴ. ꦆꦩꦶꦤꦴ ꦤꦪꦺꦤ ꦱꦺꦱꦥꦢꦺꦱꦸꦥꦶ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦆꦩꦺ ꦕꦠ꧀ꦠꦴꦫꦺꦴꦠꦶ ꦆꦩꦺ ꦮꦶꦱꦏꦶꦕ꧀ꦕꦨꦺꦢꦺꦤ ꦕꦠ꧀ꦠꦴꦫꦺꦴ. ꦆꦢꦴꦤꦶ ꦠꦁ ꦤꦺꦱꦁ ꦮꦶꦱꦏꦶꦕ꧀ꦕꦨꦺꦢꦁ ꦢꦱ꧀ꦱꦺꦠꦸꦁ ‘‘ꦠꦺꦱꦹ’’ꦠꦶꦄꦴꦢꦶ ꦮꦸꦠ꧀ꦠꦁ. ꦄꦪꦱꦹꦭꦱꦩꦥ꧀ꦥꦶꦠꦁ ꦮꦶꦪꦴꦠꦶ ꦄꦧ꧀ꦨꦤ꧀ꦠꦫꦺ ꦄꦪꦱꦹꦭꦁ ꦄꦤꦸꦥ꧀ꦥꦮꦺꦱꦶꦠꦁ ꦮꦶꦪ. ꦥꦏ꧀ꦏꦥꦹꦠꦶꦥꦤꦱꦁ ꦮꦶꦪꦴꦠꦶ ꦥꦕ꧀ꦕꦶꦠ꧀ꦮꦴ ꦏꦴꦭꦴꦠꦶꦏ꧀ꦏꦩꦺ ꦏꦸꦡꦶꦠꦥꦤꦱꦦꦭꦁ ꦮꦶꦪ. ꦕꦔ꧀ꦒꦮꦴꦫꦺꦠꦶ ꦫꦗꦏꦴꦤꦁ ꦑꦴꦫꦥꦫꦶꦱ꧀ꦱꦴꦮꦤꦺ ꦱꦸꦫꦴꦥꦫꦶꦱ꧀ꦱꦴꦮꦤꦺ ꦮꦴ. ꦄꦤꦮꦱꦺꦱꦁ ꦖꦶꦗ꧀ꦗꦤꦺꦤ ꦄꦱꦤꦶꦥꦴꦠꦛ꧀ꦜꦴꦤꦁ ꦮꦶꦪ. ꦩꦲꦴꦤꦶꦑꦴꦢꦤꦺꦤꦴꦠꦶ ꦩꦲꦤ꧀ꦠꦺꦤ ꦤꦶꦑꦴꦢꦤꦺꦤ.

ꦮꦶꦱꦮꦺꦒꦮꦶꦏꦴꦫꦺꦤꦴꦠꦶ ꦮꦶꦱꦮꦺꦒꦒꦠꦺꦤ ꦮꦶꦏꦴꦫꦺꦤ. ꦮꦴꦠꦺꦤꦴꦠꦶ ꦠꦱ꧀ꦱ ꦱꦥ꧀ꦥꦱ꧀ꦱ ꦱꦫꦷꦫꦁ ꦦꦸꦱꦶꦠ꧀ꦮꦴ ꦈꦒ꧀ꦒꦠꦮꦴꦠꦺꦤ. ꦤꦴꦱꦮꦴꦠꦺ ꦥꦤ ꦮꦠ꧀ꦠꦧ꧀ꦧꦩꦺꦮ ꦤꦠ꧀ꦡꦶ. ꦥꦸꦒ꧀ꦒꦭꦥꦟ꧀ꦟꦠ꧀ꦠꦶꦮꦱꦺꦤꦴꦠꦶ ꦠꦺꦱꦁꦪꦺꦮ ꦱꦺꦴꦭ꦳ꦱꦤ꧀ꦤꦁ ꦱꦥ꧀ꦥꦴꦤꦁ ꦄꦴꦒꦠꦮꦶꦱꦺꦴꦠꦶꦄꦴꦢꦶꦥꦸꦒ꧀ꦒꦭꦤꦴꦩꦱ꧀ꦱ ꦮꦱꦺꦤ ꦕꦠꦸꦱꦛ꧀ꦜꦶ ꦲꦺꦴꦤ꧀ꦠꦶ ꦥꦕ꧀ꦕꦺꦏꦁ ꦕꦠꦸꦧ꧀ꦧꦶꦣꦨꦴꦮꦠꦺꦴ. ꦄꦴꦒꦠꦮꦶꦱꦺꦴꦠꦶ ꦄꦴꦒꦕ꧀ꦖꦮꦶꦱꦺꦴ, ꦱꦷꦓꦠꦫꦁ ꦄꦨꦶꦫꦸꦲꦤꦮꦶꦱꦺꦴꦠꦶ ꦄꦠ꧀ꦡꦺꦴ. ꦓꦺꦴꦫꦮꦶꦱꦺꦴꦠꦶ ꦏꦏ꧀ꦑꦭ꦳ꦮꦶꦱꦺꦴ, ꦢꦸꦠ꧀ꦠꦶꦏꦶꦕ꧀ꦖꦮꦶꦱꦺꦴ. ꦄꦪꦁ ꦱꦷꦠꦈꦢꦏꦁ ꦮꦶꦪ ꦲꦺꦴꦠꦶ ꦒꦴꦭ꦳꧀ꦲꦢꦸꦧ꧀ꦧꦶꦤꦶꦩ꧀ꦩꦺꦴꦕꦪꦨꦴꦮꦺꦤ. ꦈꦢꦏꦱꦥ꧀ꦥꦺꦴ ꦲꦶ ꦓꦺꦴꦫꦮꦶꦱꦺꦴ ꦲꦺꦴꦠꦶ ꦪꦺꦮꦴꦠꦶ ꦮꦸꦠ꧀ꦠꦁ – ‘‘ꦈꦢꦏꦱꦥ꧀ꦥꦴꦢꦷꦤꦁ ꦮꦶꦱꦁ ꦮꦶꦪꦴ’’ꦠꦶ. ꦥꦚ꧀ꦚꦴꦪꦠꦷꦠꦶ ꦒꦟ꧀ꦝꦥꦶꦭ꦳ꦏꦴꦢꦶꦮꦱꦺꦤ ꦥꦚ꧀ꦚꦴꦪꦠꦶ. ꦄꦤꦺꦭ꦳ꦏꦱꦥ꧀ꦥꦺꦴ ꦤꦴꦩ ꦩꦲꦴꦄꦴꦱꦷꦮꦶꦱꦺꦴ. ꦤꦷꦭꦱꦥ꧀ꦥꦺꦴ ꦤꦴꦩ ꦱꦴꦑꦮꦟ꧀ꦟꦺꦴ ꦫꦸꦏ꧀ꦑꦒ꧀ꦒꦴꦢꦷꦱꦸ ꦮꦶꦕꦫꦟꦏꦱꦥ꧀ꦥꦺꦴ. ꦆꦩꦶꦤꦴ ꦈꦥꦴꦪꦺꦤꦴꦠꦶ ꦪꦺꦴꦪꦁ ꦏꦛ꧀ꦜꦩꦸꦑꦺꦱꦸ ꦢꦛ꧀ꦜꦮꦶꦱꦴꦤꦁꦪꦺꦮ ‘‘ꦄꦴꦒꦠꦮꦶꦱꦺꦴ ꦤꦺꦴ ꦓꦺꦴꦫꦮꦶꦱꦺꦴ’’ꦠꦶꦄꦴꦢꦶꦤꦴ ꦕꦠꦸꦧ꧀ꦧꦶꦣꦨꦴꦮꦺꦴ ꦮꦸꦠ꧀ꦠꦺꦴ, ꦆꦩꦶꦤꦴ ꦈꦥꦴꦪꦺꦤ. ꦏꦛ꧀ꦜꦩꦸꦑꦺ ꦢꦛ꧀ꦜꦮꦶꦱꦴꦢꦪꦺꦴꦠꦶ ꦏꦛ꧀ꦜꦩꦸꦑꦺꦱꦸ ꦢꦛ꧀ꦜꦮꦶꦱꦺꦴ, ꦦꦸꦛ꧀ꦜꦮꦶꦱꦺꦴ, ꦮꦴꦠꦮꦶꦨꦺꦴꦠꦶ ꦠꦪꦺꦴ, ꦥꦹꦠꦶꦩꦸꦑꦴꦢꦷꦱꦸ ꦕ ꦢꦛ꧀ꦜꦮꦶꦱꦴꦢꦪꦺꦴ ꦕꦠ꧀ꦠꦴꦫꦺꦴ ꦕꦠ꧀ꦠꦴꦫꦺꦴ ꦮꦺꦢꦶꦠꦧ꧀ꦧꦺꦴ.

ꦌꦏꦺꦏꦤ꧀ꦠꦶ ꦕꦠꦸꦱꦛ꧀ꦜꦶꦪꦺꦴ ꦌꦏꦺꦏꦁ. ꦕꦠꦸꦣꦴꦠꦶ ꦄꦟ꧀ꦝꦗꦴꦢꦶꦮꦶꦨꦴꦒꦺꦤ ꦕꦠꦸꦣꦴ ꦮꦶꦨꦗꦶꦠ꧀ꦮꦴ. ꦖꦥꦟ꧀ꦟꦴꦱꦴꦤꦷꦠꦶ ꦖꦥꦟ꧀ꦟꦴꦱꦴꦣꦶꦏꦴꦤꦶ. ꦒꦠꦩꦒ꧀ꦒꦱ꧀ꦱꦴꦠꦶ ꦪꦡꦴꦮꦸꦠ꧀ꦠꦱꦔ꧀ꦑ꧀ꦪꦴꦒꦠꦩꦒ꧀ꦒꦱ꧀ꦱ ꦥꦛꦶꦭꦺꦴꦩꦠꦺꦴ ꦱꦁꦑꦶꦥ꧀ꦥꦩꦴꦤꦴ ꦄꦤꦸꦏ꧀ꦏꦩꦺꦤ ꦕꦠ꧀ꦠꦴꦫꦺꦴꦮ ꦲꦺꦴꦤ꧀ꦠꦶ. ꦏꦸꦭꦮꦱꦺꦤꦴꦠꦶ ꦏꦛ꧀ꦜꦩꦸꦑꦴꦢꦶꦗꦴꦠꦶꦮꦱꦺꦤ.

ꦱꦏꦭꦏꦴꦪꦺ ꦄꦴꦱꦶꦚ꧀ꦕꦶꦠ꧀ꦮꦴ ꦮꦶꦪ ꦜꦥꦶꦠꦮꦶꦱꦴꦠꦶ ꦲꦶ ꦠꦺꦱꦁ ꦦꦸꦛ꧀ꦜꦮꦶꦱꦠꦴ, ꦮꦴꦠꦮꦶꦱꦠꦴ ꦮꦸꦕ꧀ꦕꦠꦶ. ꦌꦮꦤ꧀ꦠꦶ ‘‘ꦄꦴꦱꦶꦠ꧀ꦠꦮꦶꦱꦴ’’ꦠꦶꦄꦴꦢꦶꦤꦴ. ꦌꦠ꧀ꦡꦴꦠꦶ ꦄꦴꦱꦷꦮꦶꦱꦱꦢ꧀ꦢꦺ ꦮꦕꦤꦠ꧀ꦡꦺꦴ ꦤꦶꦫꦸꦠ꧀ꦠꦶꦤꦪꦺꦤ ꦮꦺꦢꦶꦠꦧ꧀ꦧꦺꦴ. ꦈꦒ꧀ꦒꦠꦠꦺꦗꦴꦠꦶ ꦈꦢꦒ꧀ꦒꦠꦺꦗꦴ, ꦄꦠ꧀ꦠꦤꦺꦴ ꦮꦶꦱꦠꦺꦗꦺꦤ ꦤꦺꦱꦁ ꦏꦸꦫꦹꦫꦢꦧ꧀ꦧꦠꦴ ꦮꦴ. ꦢꦸꦤ꧀ꦤꦶꦩ꧀ꦩꦢ꧀ꦢꦤꦮꦶꦱꦴꦠꦶ ꦩꦤ꧀ꦠꦴꦒꦢꦺꦲꦶ ꦄꦤꦶꦩ꧀ꦩꦢ꧀ꦢꦤꦷꦪꦮꦶꦱꦴ. ꦕꦠ꧀ꦠꦴꦫꦺꦴ ꦄꦴꦱꦷꦮꦶꦱꦴꦠꦶ ꦌꦠ꧀ꦡ ꦆꦠꦶ-ꦱꦢ꧀ꦢꦺꦴ ꦄꦴꦢꦶꦄꦠ꧀ꦡꦺꦴ. ꦠꦺꦤꦺꦠ꧀ꦡ ꦄꦮꦱꦺꦱꦥꦴꦭ꦳ꦶꦁ ꦱꦔ꧀ꦒꦟ꧀ꦲꦴꦠꦶ.

ꦄꦴꦱꦷꦮꦶꦱꦺꦱꦹꦠꦶ ꦆꦩꦺ ꦄꦴꦱꦷꦮꦶꦱꦴ ꦢꦛ꧀ꦜꦮꦶꦱꦴ ꦌꦮꦴꦠꦶ ꦮꦺꦢꦶꦠꦧ꧀ꦧꦴ. ꦱꦫꦷꦫꦛ꧀ꦜꦏꦺꦱꦸꦪꦺꦮꦴꦠꦶ ꦠꦺꦤ ꦥꦸꦫꦶꦱꦺꦤ ꦠꦺꦱꦁ ꦏꦱ꧀ꦱꦕꦶ ꦄꦤꦶꦛ꧀ꦜꦱ꧀ꦱ ꦄꦏꦠꦠ꧀ꦠꦴ ꦄꦴꦪꦸꦱꦺꦱꦱ꧀ꦱ ꦕ ꦮꦶꦗ꧀ꦗꦩꦴꦤꦠ꧀ꦠꦴ ꦤꦁ ꦤ ꦢꦁꦱꦶꦁꦱꦹꦠꦶ ꦢꦛ꧀ꦜꦧ꧀ꦧꦁ. ꦥꦸꦕ꧀ꦖꦶ ꦪꦡꦴꦨꦹꦠꦁ ꦥꦮꦺꦢꦺꦠꦸꦏꦴꦩꦺꦴ. ꦢꦸꦫꦸꦥꦛ꧀ꦜꦴꦲꦴꦠꦶ ꦢꦸꦫꦸꦥꦛ꧀ꦜꦴꦤꦴ. ꦱꦺꦴꦠ꧀ꦡꦶꦩꦒ꧀ꦒꦺꦴꦠꦶ ꦱꦺꦴꦠ꧀ꦡꦶꦨꦴꦮꦱ꧀ꦱ ꦈꦥꦴꦪꦺꦴ.

ꦄꦤ꧀ꦠꦫꦕꦫꦺꦴꦠꦶ ꦄꦤ꧀ꦠꦫꦁ ꦕꦫꦺꦴ ꦱꦸꦑꦱꦠ꧀ꦠꦸ ꦮꦶꦱ꧀ꦱꦴꦱꦓꦴꦠꦷ. ꦠꦺꦤꦴꦲ ‘‘ꦮꦣꦏꦺꦴ’’ꦠꦶ. ꦆꦢꦴꦤꦶ ꦠꦴꦱꦁ ꦥꦺꦱꦤꦺ ꦏꦴꦫꦟꦁ ꦢꦱ꧀ꦱꦺꦠꦸꦁ ‘‘ꦥꦜꦩ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦄꦨꦶꦩꦸꦑꦒꦠꦁ ꦮꦶꦪ ꦄꦨꦶꦩꦸꦑꦒꦠꦁ. ꦇꦢꦶꦱꦷꦥꦶ ꦲꦶ ꦮꦕꦺꦴꦪꦸꦠ꧀ꦠꦶ ꦭꦺꦴꦏꦺ ꦤꦶꦫꦹꦥꦷꦪꦠꦶ ꦱꦤ꧀ꦠꦶꦪꦁ ꦥꦸꦫꦶꦱꦁ ꦜꦥꦺꦠꦷꦠꦶ ꦮꦶꦪ. ꦠꦱ꧀ꦩꦴ ꦄꦨꦶꦩꦸꦑꦒꦠꦤ꧀ꦠꦶ ꦄꦨꦶꦩꦸꦑꦁ ꦠꦺꦤ ꦱꦩ꧀ꦥꦠ꧀ꦠꦤ꧀ꦠꦶ ꦄꦠ꧀ꦡꦺꦴ. ꦮꦔ꧀ꦏꦱꦟ꧀ꦜꦴꦤꦁ ꦦꦭꦏꦁ ꦫꦸꦏ꧀ꦑꦩꦹꦭꦺ ꦄꦴꦒꦠꦴꦒꦠꦴꦤꦁ ꦤꦶꦱꦷꦢꦤꦠ꧀ꦡꦴꦪ ꦄꦠ꧀ꦡꦠꦁ.

ꦄꦫꦶꦠ꧀ꦠꦲꦠ꧀ꦡꦺꦴ ꦥꦸꦫꦶꦱꦺꦴ ꦱꦤ꧀ꦠꦴꦫꦺꦠꦶ ꦌꦠꦴꦪꦴꦠꦶ ꦱꦤ꧀ꦠꦴꦫꦟꦷ. ꦎꦫꦶꦩꦠꦷꦫꦠꦺꦴ ꦈꦠ꧀ꦠꦫꦟꦴꦪ ꦱꦺꦠꦸ ꦈꦠ꧀ꦠꦫꦱꦺꦠꦸ. ꦌꦏꦺꦤ ꦢ꧀ꦮꦷꦲꦶ ꦮꦴ ꦒꦤ꧀ꦠꦧ꧀ꦧꦺꦴ ꦫꦸꦏ꧀ꦑꦩꦪꦺꦴ ꦱꦺꦠꦸ ꦫꦸꦏ꧀ꦑꦱꦺꦠꦸ. ꦗꦔ꧀ꦓꦱꦠ꧀ꦡꦺꦤ ꦒꦩꦤꦪꦺꦴꦒ꧀ꦒꦺꦴ ꦱꦺꦠꦸ ꦗꦔ꧀ꦓꦱꦺꦠꦸ. ꦱꦏꦛꦺꦤ ꦒꦤ꧀ꦠꦸꦁ ꦱꦏ꧀ꦏꦸꦟꦺꦪ꧀ꦪꦺꦴ ꦱꦏꦛꦱꦺꦠꦸ. ꦤ ꦑꦺꦴ ꦌꦱ ꦧ꧀ꦫꦴꦲ꧀ꦩꦟꦺꦴ ꦥꦫꦩꦠ꧀ꦡꦠꦺꦴ. ꦠꦢꦠ꧀ꦡꦺꦴ ꦥꦤ ꦌꦏꦢꦺꦱꦺꦤ ꦱꦩ꧀ꦨꦮꦠꦷꦠꦶ ꦠꦡꦴ ꦮꦸꦠ꧀ꦠꦤ꧀ꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦌꦠ꧀ꦠꦏꦴꦤꦁ ꦥꦕ꧀ꦕꦠ꧀ꦡꦶꦏꦴꦤꦁ ꦧꦴꦲꦶꦠꦠ꧀ꦠꦴ’’ꦠꦶ ꦄꦴꦲ. ꦢꦺꦱꦤꦤ꧀ꦠꦶ ꦈꦢ꧀ꦢꦺꦱꦢꦺꦱꦤꦁ. ꦮꦶꦤꦶꦮꦠ꧀ꦠꦺꦤ꧀ꦠꦺꦴꦠꦶ ꦥꦛꦶꦱꦁꦲꦫꦤ꧀ꦠꦺꦴ. ꦤ ꦭꦢ꧀ꦣꦺꦴ ꦮꦠꦴꦱꦷꦠꦶ ꦤ ꦭꦢ꧀ꦣꦺꦴ ꦮꦠ ꦄꦴꦱꦶ.

ꦫꦴꦗꦴ ꦮꦶꦪ ꦏꦩ꧀ꦩꦁ ꦱꦠ꧀ꦠꦺꦱꦸ ꦆꦱ꧀ꦱꦫꦶꦪꦱ꧀ꦱ ꦮꦠ꧀ꦠꦴꦥꦤꦠꦺꦴ. ꦫꦴꦗꦴ…ꦥꦺ… ꦥꦸꦡꦸꦗ꧀ꦗꦤꦺꦴ ꦮꦛ꧀ꦛꦢꦸꦏ꧀ꦑꦱꦔ꧀ꦑꦴꦠꦴꦥꦫꦴꦣꦠꦴꦪ. ꦚꦴꦟꦥꦭꦴꦪꦤꦺꦤꦴꦠꦶ ꦩꦲꦴꦨꦹꦠꦺꦲꦶ ꦤꦶꦧ꧀ꦧꦶꦤ꧀ꦢꦶꦠ꧀ꦮꦴ ꦮꦶꦫꦗ꧀ꦗꦶꦠ꧀ꦮꦴ ꦮꦶꦩꦸꦕ꧀ꦕꦶꦠꦸꦏꦴꦩꦠꦴꦮꦱꦺꦤ ꦈꦥ꧀ꦥꦤ꧀ꦤꦚꦴꦟꦥꦭꦴꦪꦤꦺ ꦩꦒ꧀ꦒꦴꦣꦶꦒꦩꦱꦶꦢ꧀ꦣꦺꦤꦺꦮ ꦚꦴꦟꦥꦭꦴꦪꦤꦺꦤ. ꦌꦮꦚ꧀ꦲꦺꦠ꧀ꦡ ꦈꦥꦩꦴꦱꦁꦱꦤ꧀ꦢꦤꦁ ꦩꦠ꧀ꦡꦏꦁ ꦥꦴꦥꦶꦠꦩꦺꦮ ꦲꦺꦴꦠꦶ.

ꦪꦡꦺꦮ ꦲꦷꦠꦶꦄꦴꦢꦶꦤꦴ ꦌꦏꦢꦺꦱꦤꦴꦱꦩꦸꦢꦴꦪꦱ꧀ꦱ ꦤꦶꦢꦱ꧀ꦱꦤꦁ ꦄꦴꦫꦢ꧀ꦣꦁ. ꦪꦡꦴꦮꦸꦠ꧀ꦠꦮꦕꦤꦁ ꦄꦛ꧀ꦜꦏꦡꦴꦕꦫꦶꦪꦴꦤꦁ ꦮꦕꦤꦺꦤ ꦱꦩꦠ꧀ꦡꦺꦠꦶ ‘‘ꦥꦠ꧀ꦡꦢ꧀ꦣꦺꦴ ꦨꦮꦠꦷ’’ꦠꦶꦄꦴꦢꦶꦤꦴ. ꦠꦠ꧀ꦡ ꦏꦛ꧀ꦜꦩꦸꦑꦺꦤ ꦮꦴꦠꦶ ꦮꦴ-ꦱꦢ꧀ꦢꦺꦴ ꦈꦥꦩꦠ꧀ꦡꦺꦴ. ꦪꦡꦴ ꦏꦛ꧀ꦜꦩꦸꦑꦺꦤ ꦱꦥ꧀ꦥꦺꦤ ꦢꦛ꧀ꦜꦺꦴ ꦥꦠ꧀ꦡꦢ꧀ꦣꦺꦴ ꦲꦺꦴꦠꦶ, ꦌꦮꦁ ꦥꦡꦮꦷꦣꦴꦠꦸꦥ꧀ꦥꦏꦺꦴꦥꦺꦤ ꦱꦺꦴ ꦏꦴꦪꦺꦴ ꦏꦛ꧀ꦜꦩꦸꦑꦺꦮ ꦲꦺꦴꦠꦶ, ꦏꦛ꧀ꦜꦩꦸꦑꦒꦠꦺꦴ ꦮꦶꦪ ꦥꦠ꧀ꦡꦢ꧀ꦣꦺꦴ ꦲꦺꦴꦠꦷꦠꦶ ꦄꦠ꧀ꦡꦺꦴ. ꦄꦡ ꦮꦴ ꦮꦴ-ꦱꦢ꧀ꦢꦺꦴ ꦄꦮꦣꦴꦫꦟꦠ꧀ꦡꦺꦴ. ꦱꦺꦴ ‘‘ꦥꦡꦮꦷꦣꦴꦠꦸꦥꦏꦺꦴꦥꦺꦤ ꦮꦴ’’ꦠꦶ ꦌꦮꦁ ꦄꦴꦤꦺꦠ꧀ꦮꦴ ꦱꦩ꧀ꦧꦤ꧀ꦣꦶꦠꦧ꧀ꦧꦺꦴ. ꦄꦪꦚ꧀ꦲꦺꦠ꧀ꦡ ꦄꦠ꧀ꦡꦺꦴ – ꦏꦛ꧀ꦜꦩꦸꦑꦺꦤ ꦢꦛ꧀ꦜꦺꦴꦥꦶ ꦏꦴꦪꦺꦴ ꦥꦡꦮꦷꦣꦴꦠꦸꦥ꧀ꦥꦏꦺꦴꦥꦺꦤꦺꦮ ꦥꦠ꧀ꦡꦢ꧀ꦣꦺꦴ ꦲꦺꦴꦠꦶ, ꦠꦱ꧀ꦩꦴ ꦥꦡꦮꦷꦣꦴꦠꦸꦪꦴ ꦄꦮꦶꦪꦸꦠ꧀ꦠꦺꦴ ꦱꦺꦴ ꦏꦴꦪꦺꦴ ꦱꦧ꧀ꦧꦢꦴ ꦏꦛ꧀ꦜꦩꦸꦑꦒꦠꦺꦴ ꦮꦶꦪ ꦲꦺꦴꦠꦷꦠꦶ. ꦮꦴ-ꦱꦢ꧀ꦢꦺꦴ ꦮꦴ ꦄꦤꦶꦪꦩꦠ꧀ꦡꦺꦴ. ꦠꦠ꧀ꦫꦴꦪꦩꦠ꧀ꦡꦺꦴ – ꦏꦛ꧀ꦜꦩꦸꦑꦺꦤ ꦢꦛ꧀ꦜꦺꦴ ꦏꦴꦪꦺꦴ ꦥꦠ꧀ꦡꦢ꧀ꦣꦺꦴ ꦲꦺꦴꦠꦶ ꦮꦴ, ꦤ ꦮꦴ ꦩꦤ꧀ꦠꦴꦒꦢꦮꦱꦺꦤ. ꦥꦡꦮꦷꦣꦴꦠꦸꦥ꧀ꦥꦏꦺꦴꦥꦺꦤ ꦥꦤ ꦩꦤ꧀ꦠꦴꦒꦢꦫꦲꦶꦠꦺꦴ ꦱꦺꦴ ꦏꦴꦪꦺꦴ ꦏꦛ꧀ꦜꦩꦸꦑꦒꦠꦺꦴ ꦮꦶꦪ ꦲꦺꦴꦠꦶ ꦌꦏꦤ꧀ꦠꦥꦠ꧀ꦡꦢ꧀ꦣꦺꦴꦠꦶ. ꦠꦠ꧀ꦡ ꦏꦴꦪꦺꦴꦠꦶ ꦥꦏꦠꦶꦏꦴꦪꦺꦴ. ꦥꦹꦠꦶꦏꦺꦴꦠꦶ ꦏꦸꦡꦶꦠꦺꦴ. ꦱꦤ꧀ꦠꦠ꧀ꦠꦺꦴꦠꦶ ꦱꦧ꧀ꦧꦱꦺꦴ ꦠꦠ꧀ꦠꦺꦴ ꦩꦲꦴꦢꦴꦲꦥ꧀ꦥꦠ꧀ꦠꦺꦴ. ꦱꦚ꧀ꦖꦶꦤ꧀ꦤꦺꦴꦠꦶ ꦱꦧ꧀ꦧꦱꦺꦴ ꦖꦶꦤ꧀ꦤꦺꦴ ꦕꦸꦟ꧀ꦟꦮꦶꦕꦸꦟ꧀ꦟꦨꦹꦠꦺꦴ. ꦪꦢꦴ ꦏꦴꦪꦺꦴ ꦥꦠ꧀ꦡꦢ꧀ꦣꦴꦢꦶꦨꦴꦮꦥ꧀ꦥꦠ꧀ꦠꦺꦴ ꦲꦺꦴꦠꦶ, ꦠꦢꦴ ꦥꦸꦫꦶꦱꦺꦴ ꦏꦛ꧀ꦜꦩꦸꦑꦴꦢꦶꦱꦥ꧀ꦥꦱ꧀ꦱ ꦩꦸꦑꦺ ꦮꦠ꧀ꦠꦩꦴꦤꦺꦴ ꦮꦶꦪ ꦲꦺꦴꦠꦷꦠꦶ ꦄꦠ꧀ꦡꦺꦴ.

ꦮꦶꦱꦺꦱꦠꦺꦴꦠꦶ ꦏꦛ꧀ꦜꦩꦸꦑꦴꦢꦶꦮꦶꦱꦺꦱꦠꦺꦴ ꦕ ꦥꦡꦮꦷꦄꦴꦢꦶꦮꦶꦱꦺꦱꦠꦺꦴ ꦕ. ꦄꦤꦠ꧀ꦡꦒ꧀ꦒꦲꦟꦠꦺꦴꦠꦶꦄꦴꦢꦶ ꦄꦕꦺꦠꦤꦺꦱꦸꦥꦶ ꦨꦹꦠꦺꦱꦸ ꦱꦕꦺꦠꦤꦺꦱꦸ ꦮꦶꦪ ꦄꦤꦠ꧀ꦡꦴꦢꦷꦤꦁ ꦥꦕ꧀ꦕꦏ꧀ꦑꦠꦴꦪ ꦤꦶꦧ꧀ꦧꦺꦢꦗꦤꦤꦠ꧀ꦡꦁ ꦄꦴꦫꦢ꧀ꦣꦁ. ꦠꦠ꧀ꦡ ꦄꦴꦱꦪꦠꦺꦴꦠꦶ ꦥꦮꦠ꧀ꦠꦶꦛ꧀ꦜꦴꦤꦠꦺꦴ. ꦌꦠꦺꦱꦤ꧀ꦠꦶ ꦩꦲꦴꦨꦹꦠꦴꦤꦁ. ꦱꦢꦶꦱꦠꦴꦠꦶ ꦮꦩ꧀ꦩꦶꦏꦴꦱꦪꦱꦸꦱꦶꦫꦒꦲꦤꦱꦔ꧀ꦏꦴꦫꦛ꧀ꦜꦴꦤꦴꦱꦪꦠꦴꦪ ꦕ ꦱꦢꦶꦱꦠꦴ.

ꦥꦕ꧀ꦕꦠ꧀ꦠꦭꦏ꧀ꦑꦟꦮꦱꦺꦤꦴꦠꦶ ꦮꦶꦱꦸꦁ ꦮꦶꦱꦸꦁ ꦭꦏ꧀ꦑꦟꦮꦱꦺꦤ. ꦥꦡꦮꦷꦄꦴꦢꦷꦤꦁ ꦏꦏ꧀ꦑꦭ꦳ꦨꦴꦮꦴꦢꦶ, ꦠꦁꦱꦩꦔ꧀ꦒꦶꦤꦺꦴ ꦥꦸꦒ꧀ꦒꦭꦱ꧀ꦱ ꦏꦏ꧀ꦑꦭ꦳ꦨꦴꦮꦴꦥꦴꦢꦤꦴꦢꦶꦤꦴ ꦮꦶꦏꦴꦫꦸꦥ꧀ꦥꦴꦢꦤꦠꦺꦴ ꦮꦶꦱꦮꦺꦒꦮꦶꦏꦴꦫꦠꦺꦴ ꦱꦢꦶꦱꦠꦴ ꦮꦺꦢꦶꦠꦧ꧀ꦧꦴ.

ꦄꦤꦠ꧀ꦡꦴꦠꦶ ꦧ꧀ꦪꦱꦤꦴ. ꦧ꧀ꦪꦴꦣꦶꦤ꧀ꦠꦶ ꦏꦸꦛ꧀ꦜꦴꦢꦶꦧ꧀ꦪꦴꦣꦶꦁ. ꦨꦮꦺ ꦗꦴꦠꦴꦨꦶꦤꦤ꧀ꦢꦶꦤꦺꦴꦠꦶ ꦨꦮꦺꦱꦸ ꦗꦴꦠꦶꦪꦴ ꦄꦨꦶꦤꦤ꧀ꦢꦤꦱꦷꦭꦴ. ꦥꦚ꧀ꦕꦮꦺꦴꦏꦴꦫꦺ ꦲꦶ ꦗꦴꦠꦶꦪꦴ ꦄꦨꦶꦤꦤ꧀ꦢꦤꦴ ꦤꦴꦩ ꦩꦲꦴꦨꦹꦠꦴꦨꦶꦤꦤ꧀ꦢꦤꦴ ꦌꦮ.

ꦢꦸꦫꦸꦥꦛ꧀ꦜꦴꦤꦠꦫꦴꦤꦷꦠꦶ ꦢꦸꦥ꧀ꦥꦛꦶꦏꦴꦫꦠꦫꦴꦤꦶ. ꦢꦸꦫꦴꦱꦢꦴꦠꦶ ꦢꦸꦫꦸꦥꦱꦔ꧀ꦏꦩꦤꦴ. ‘‘ꦈꦥꦛ꧀ꦜꦴꦩꦷ’’ꦠꦶ ꦈꦥꦱꦔ꧀ꦏꦩꦶꦠꦸꦁ ꦤ ꦱꦏ꧀ꦏꦺꦴꦤ꧀ꦠꦶ. ꦥꦫꦶꦗꦴꦤꦴꦩ ꦏꦩ꧀ꦩꦤꦴꦩꦴꦤꦶ, ꦈꦥꦏꦴꦫꦴ ꦤꦴꦩ ꦤꦠ꧀ꦡꦶ. ꦄꦤꦤ꧀ꦠꦢꦺꦴꦱꦹꦥꦢ꧀ꦢꦮꦠꦺꦴꦠꦶ ꦄꦥꦫꦶꦩꦴꦟꦢꦺꦴꦱꦹꦥꦢ꧀ꦢꦮꦲꦺꦠꦸꦠꦺꦴ. ꦌꦏꦥꦏ꧀ꦑꦭꦤ꧀ꦠꦶ ꦌꦏꦢꦸꦏ꧀ꦑꦁ.

ꦫꦹꦥꦏ꧀ꦑꦤ꧀ꦣꦺꦴ ꦨꦶꦗ꧀ꦗꦩꦴꦤꦺꦴ ꦕꦠ꧀ꦠꦴꦫꦺꦴ ꦄꦫꦹꦥꦏ꧀ꦑꦤ꧀ꦣꦺ ꦒꦲꦺꦠ꧀ꦮꦴꦮ ꦨꦶꦗ꧀ꦗꦠꦶ ꦄꦫꦹꦥꦏ꧀ꦑꦤ꧀ꦣꦴꦤꦁ ꦌꦏꦤꦶꦫꦺꦴꦣꦠ꧀ꦠꦴ. ꦮꦠ꧀ꦡꦸꦫꦹꦥꦩ꧀ꦥꦶ ꦒꦲꦺꦠ꧀ꦮꦴꦮ ꦨꦶꦗ꧀ꦗꦤ꧀ꦠꦶ ꦥꦚ꧀ꦕꦮꦺꦴꦏꦴꦫꦺ ꦄꦫꦹꦥꦏ꧀ꦑꦤ꧀ꦣꦺꦱꦸ ꦨꦶꦤ꧀ꦤꦺꦱꦸ ꦫꦹꦥꦏ꧀ꦑꦤ꧀ꦣꦱ꧀ꦱ ꦄꦮꦛ꧀ꦜꦴꦤꦴꦨꦴꦮꦠꦺꦴ. ꦌꦠ꧀ꦠꦴꦮꦠꦴꦠꦶ ꦭꦺꦴꦨꦸꦥ꧀ꦥꦴꦢꦤꦩꦠ꧀ꦠꦺꦤ. ꦥꦚ꧀ꦚꦴ ꦤꦴꦩ ꦄꦠ꧀ꦠꦨꦴꦮꦺ ꦈꦠ꧀ꦠꦩꦔ꧀ꦒꦁ ꦥꦚ꧀ꦚꦸꦠ꧀ꦠꦫꦠ꧀ꦠꦴ ꦏꦸꦱꦭꦣꦩ꧀ꦩꦴꦤꦁ, ꦱꦠꦶ ꦕ ꦏꦶꦭꦺꦱꦸꦥ꧀ꦥꦠ꧀ꦠꦶꦪꦁ ꦥꦚ꧀ꦚꦴꦪ ꦄꦤꦸꦥ꧀ꦥꦗ꧀ꦗꦤꦠꦺꦴ ꦮꦸꦠ꧀ꦠꦁ – ‘‘ꦌꦠ꧀ꦠꦴꦮꦠꦴ ꦥꦚ꧀ꦚꦴꦱꦷꦱꦁ ꦥꦠꦶꦠꦁ ꦤꦴꦩ ꦲꦺꦴꦠꦷ’’ꦠꦶ. ꦪꦺꦴꦤꦶꦪꦺꦴ ꦈꦥꦤꦺꦠꦶ ꦠꦢꦸꦥꦒꦱ꧀ꦱ ꦏꦩ꧀ꦩꦥꦕ꧀ꦕꦪꦱ꧀ꦱ ꦨꦴꦮꦺ. ‘‘ꦗꦴꦠꦶꦨꦪꦁ, ꦗꦫꦴꦨꦪꦁ, ꦩꦫꦟꦨꦪꦁ, ꦕꦺꦴꦫꦨꦪ’’ꦤ꧀ꦠꦶꦄꦴꦢꦶꦤꦴ ꦄꦴꦒꦠꦴꦤꦶ ꦥꦚ꧀ꦕꦮꦷꦱꦠꦶ ꦩꦲꦴꦨꦪꦴꦤꦶ, ‘‘ꦲꦠ꧀ꦡꦩ꧀ꦥꦶ ꦖꦶꦤ꧀ꦢꦠꦷ’’ꦠꦶꦄꦴꦢꦶꦤꦴ ꦄꦴꦒꦠꦴꦤꦶ ꦢ꧀ꦮꦠ꧀ꦠꦶꦁꦱ ꦏꦩ꧀ꦩꦏꦴꦫꦟꦴꦤꦶ ꦄꦴꦒꦠꦴꦤꦺꦮ ꦲꦺꦴꦤ꧀ꦠꦶ ꦏꦴꦫꦟꦱ꧀ꦱ ꦱꦩꦮꦛ꧀ꦜꦶꦠꦠ꧀ꦠꦴ. ꦤꦤ꧀ꦢꦷꦫꦴꦒꦺꦴ ꦱꦔ꧀ꦑꦴꦫꦏ꧀ꦑꦤ꧀ꦣꦺꦴꦠꦶ ꦱꦔ꧀ꦑꦴꦫꦏ꧀ꦑꦤ꧀ꦣꦥꦫꦶꦪꦴꦥꦤ꧀ꦤꦠ꧀ꦠꦴ ꦮꦸꦠ꧀ꦠꦁ.

ꦥꦴꦭ꦳ꦶꦪꦁꦪꦺꦮ ꦄꦴꦒꦠꦴ ‘‘ꦕꦏ꧀ꦑꦸꦠꦺꦴ ꦕꦺꦥꦶ ꦤꦁ, ꦨꦶꦏ꧀ꦑꦮꦺ’’ꦠꦶꦄꦴꦢꦶꦤꦴ. ꦏꦶꦚ꧀ꦕꦶ ꦄꦭꦨꦶꦠ꧀ꦮꦴꦠꦶ ꦠꦱ꧀ꦩꦶꦁ ꦱꦸꦚ꧀ꦚꦒꦴꦩꦺ ꦕꦺꦴꦫꦴꦤꦁ ꦒꦪ꧀ꦲꦹꦥꦒꦱ꧀ꦱ ꦄꦭꦴꦨꦮꦕꦤꦺꦤꦺꦮ ꦠꦱ꧀ꦱ ꦥꦸꦫꦶꦱꦱ꧀ꦱ ꦄꦠ꧀ꦠꦤꦺꦴ ꦥꦛꦶꦱꦫꦟꦱ꧀ꦱ ꦄꦭꦴꦨꦺꦴ ꦮꦸꦠ꧀ꦠꦺꦴ ꦌꦮ ꦲꦺꦴꦠꦷꦠꦶ ꦤ ꦈꦢ꧀ꦣꦛꦺꦴ, ꦥꦸꦫꦶꦱꦛ꧀ꦜꦴꦤꦶꦪꦺꦴ ꦨꦶꦏ꧀ꦑꦸ, ꦕꦺꦴꦫꦴ ꦥꦤ ꦧꦴꦲꦶꦫꦴꦪꦠꦤꦛ꧀ꦜꦴꦤꦶꦪꦴ. ꦄꦨꦶꦤꦶꦮꦶꦱꦶꦠ꧀ꦮꦴꦠꦶ ꦮꦶꦥꦱ꧀ꦱꦤꦴꦨꦶꦤꦶꦮꦺꦱꦁ ꦏꦠ꧀ꦮꦴ. ꦄꦗ꧀ꦙꦠ꧀ꦠꦶꦏꦴꦪꦠꦤꦮꦱꦺꦤ ꦢꦺꦱꦤꦴꦪ ꦄꦴꦒꦠꦠ꧀ꦠꦴ ꦮꦸꦠ꧀ꦠꦁ ‘‘ꦈꦥꦴꦢꦴꦫꦹꦥꦏꦩ꧀ꦩꦛ꧀ꦜꦴꦤꦮꦱꦺꦤꦴ’’ꦠꦶ.

ꦧꦴꦲꦶꦫꦴꦤꦤ꧀ꦠꦶ ꦧꦴꦲꦶꦫꦴꦪꦠꦤꦴꦤꦁ. ꦥꦚ꧀ꦕ ꦏꦶꦕ꧀ꦕꦴꦤꦷꦠꦶ ꦕꦺꦴꦫꦺꦲꦶ ꦠꦢꦴ ꦏꦴꦠꦧ꧀ꦧꦴꦤꦶ ꦥꦚ꧀ꦕ ꦏꦶꦕ꧀ꦕꦴꦤꦶ. ꦲꦠ꧀ꦡꦱꦴꦫꦤ꧀ꦠꦶ ꦄꦠ꧀ꦠꦤꦺꦴ ꦱꦤ꧀ꦠꦏꦺ ꦲꦠ꧀ꦡꦺꦲꦶ ꦒꦲꦺꦠꦧ꧀ꦧꦱꦴꦫꦨꦟ꧀ꦝꦁ. ꦥꦴꦠꦤꦴꦢꦶꦮꦱꦺꦤ ꦲꦠ꧀ꦡꦥꦫꦴꦩꦴꦱꦁ ꦏꦫꦺꦴꦤ꧀ꦠꦶ. ꦥꦲꦴꦫꦜꦴꦤꦺꦠꦶ ꦥꦲꦛꦛ꧀ꦜꦴꦤꦺ. ꦜꦴꦤꦱꦺꦴ ꦠꦱ꧀ꦩꦶꦁ ꦌꦮ ꦑꦟꦺꦠꦶ ꦮꦢꦤ꧀ꦠꦶ. ꦄꦠ꧀ꦠꦤꦺꦴ ꦱꦸꦑꦴꦮꦲꦁ ꦏꦸꦱꦭꦣꦩ꧀ꦩꦁ ꦥꦲꦴꦪ ꦢꦸꦏ꧀ꦑꦴꦮꦲꦺꦤ ꦄꦏꦸꦱꦭꦺꦤ ꦱꦩꦔ꧀ꦒꦶꦠꦴ ꦱꦸꦑꦴꦮꦲꦁ ꦨꦟ꧀ꦝꦁ ꦥꦲꦴꦪ ꦧꦲꦶ ꦤꦶꦏ꧀ꦑꦩꦤꦁ ꦮꦶꦪꦴꦠꦶ ꦮꦸꦠ꧀ꦠꦁ ꦱꦸꦑꦤꦶꦱ꧀ꦱꦪꦠ꧀ꦠꦴ ꦠꦱ꧀ꦱ. ꦲꦠ꧀ꦡꦥꦫꦴ…ꦥꦺ… ꦄꦴꦥꦗ꧀ꦗꦤꦏꦴꦭꦺꦴ ꦒꦸꦟꦱꦫꦷꦫꦱ꧀ꦱ ꦠꦢꦴ ꦥꦩꦴꦢꦺꦤ ꦧꦴꦣꦶꦠꦠ꧀ꦠꦴ. ꦥꦲꦴꦫ…ꦥꦺ… ꦏꦴꦭꦺꦴ ꦠꦠꦺꦴ ꦢꦭ꦳꧀ꦲꦠꦫꦁ ꦒꦸꦟꦱꦫꦷꦫꦱ꧀ꦱ ꦧꦴꦣꦶꦠꦠ꧀ꦠꦴ. ꦥꦲꦴꦫꦁ…ꦥꦺ… ꦄꦱ꧀ꦱꦩꦟꦏꦴꦭꦺꦴ ꦒꦸꦟꦱꦫꦷꦫꦱ꧀ꦱ ꦩꦫꦟꦥ꧀ꦥꦠ꧀ꦠꦶꦱꦢꦶꦱꦠ꧀ꦠꦴ. ꦄꦮꦱꦺꦱꦗꦤꦱ꧀ꦱ ꦢꦴꦱꦥꦫꦶꦨꦺꦴꦒꦺꦤ ꦥꦫꦶꦨꦸꦚ꧀ꦗꦶꦠꦧ꧀ꦧꦠꦴ ꦄꦚ꧀ꦚꦡꦠ꧀ꦠꦥ꧀ꦥꦠ꧀ꦠꦶꦒꦶꦲꦶꦨꦴꦮꦴꦥꦠ꧀ꦠꦶꦪꦴ ꦤꦶꦢꦱ꧀ꦱꦤꦨꦴꦮꦺꦤ ꦮꦸꦠ꧀ꦠꦴ. ꦪꦁ ‘‘ꦖꦱꦸ ꦢ꧀ꦮꦴꦫꦺꦱꦸ ꦄꦴꦫꦩ꧀ꦩꦟꦺ ꦄꦴꦥꦴꦡꦒꦠꦺ’’ꦠꦶ ꦮꦸꦠ꧀ꦠꦁ, ꦠꦩꦺꦮ ꦄꦴꦫꦩ꧀ꦩꦟꦁ ꦤꦶꦱ꧀ꦱꦴꦪ ꦱꦩ꧀ꦥꦫꦴꦪꦶꦏꦺꦴ ꦢꦸꦏ꧀ꦑꦏ꧀ꦑꦤ꧀ꦣꦺꦴ ꦮꦺꦢꦶꦠꦧ꧀ꦧꦺꦴꦠꦶ ꦪꦺꦴꦗꦤꦴ.

ꦫꦹꦥꦴꦢꦷꦤꦷꦠꦶ ꦫꦹꦥꦱꦢ꧀ꦢꦒꦤ꧀ꦣꦫꦱꦴꦤꦶ. ꦠꦺꦱꦤ꧀ꦠꦶ ꦪꦡꦴꦮꦸꦠ꧀ꦠꦨꦹꦠꦸꦥꦴꦢꦴꦫꦹꦥꦴꦤꦁ. ꦭꦲꦸꦠꦴꦢꦶꦮꦱꦺꦤꦴꦠꦶ ꦠꦺꦱꦁ ꦭꦲꦸꦠꦴꦢꦶꦮꦱꦺꦤ. ꦢꦸꦫꦸꦠ꧀ꦠꦫꦟꦛ꧀ꦜꦺꦴꦠꦶ ꦈꦠ꧀ꦠꦫꦶꦠꦸꦁ ꦄꦱꦏ꧀ꦏꦸꦟꦺꦪ꧀ꦪꦨꦴꦮꦺꦴ ꦎꦓꦛ꧀ꦜꦺꦴ. ꦮꦸꦠ꧀ꦠꦤꦪꦺꦤꦴꦠꦶ ‘‘ꦱꦩ꧀ꦥꦪꦸꦠ꧀ꦠꦴ ꦮꦺꦢꦤꦴ ꦮꦺꦢꦤꦴꦏ꧀ꦑꦤ꧀ꦣꦺꦴ’’ꦠꦶꦄꦴꦢꦶꦤꦴ ꦮꦸꦠ꧀ꦠꦤꦪꦺꦤ. ꦕꦠꦸꦩꦲꦴꦨꦹꦠꦴꦢꦷꦲꦷꦠꦶ ꦄꦴꦢꦶꦱꦢ꧀ꦢꦺꦤ ꦈꦥꦴꦢꦴꦤꦏ꧀ꦑꦤ꧀ꦣꦴꦢꦷꦤꦁ ꦒꦲꦟꦁ. ꦕꦶꦠ꧀ꦠꦏꦶꦫꦶꦪꦢꦱ꧀ꦱꦤꦠ꧀ꦡꦤ꧀ꦠꦶ ꦕꦶꦠ꧀ꦠꦥꦪꦺꦴꦒꦢꦱ꧀ꦱꦤꦠ꧀ꦡꦁ. ꦮꦸꦠ꧀ꦠꦮꦴꦪꦴꦩꦩꦺꦮꦴꦠꦶ ‘‘ꦱꦩ꧀ꦩꦴꦮꦴꦪꦴꦩꦺꦴ’’ꦠꦶ ꦪꦺꦴ ꦄꦫꦶꦪꦩꦒ꧀ꦒꦺ ꦮꦸꦠ꧀ꦠꦺꦴ. ꦨꦢ꧀ꦢꦺꦏꦫꦠ꧀ꦠꦴꦢꦷꦤꦷꦠꦶ ‘‘ꦄꦗ꧀ꦗꦺꦮ ꦏꦶꦕ꧀ꦕꦁ ꦄꦴꦠꦥ꧀ꦥ’’ꦤ꧀ꦠꦶꦄꦴꦢꦶꦤꦴ (ꦩ. ꦤꦶ. ꧓.꧒꧗꧒, ꧒꧗꧕, ꧒꧗꧖) ꦮꦸꦠ꧀ꦠꦴꦤꦶ ꦨꦢ꧀ꦢꦺꦏꦫꦠ꧀ꦠꦱꦸꦠ꧀ꦠꦴꦢꦷꦤꦶ.

ꦏꦸꦟ꧀ꦜꦥꦴꦢꦺꦴꦠꦶ ꦖꦶꦤ꧀ꦤꦥꦴꦢꦺꦴꦮ ꦲꦸꦠ꧀ꦮꦴ ꦒꦠꦶꦮꦶꦏꦭꦺꦴ. ꦩꦴꦤꦱꦁ ꦧꦤ꧀ꦣꦠꦷꦠꦶ ꦠꦱ꧀ꦩꦶꦁ ꦕꦶꦠ꧀ꦠꦺ ꦏꦶꦕ꧀ꦕꦁ ꦤꦶꦧꦤ꧀ꦣꦠꦶ. ‘‘ꦄꦪꦁ ꦄꦫꦶꦪꦩꦒ꧀ꦒꦺꦴ ꦩꦪ꧀ꦲꦁ ꦎꦓꦸꦠ꧀ꦠꦫꦤꦸꦥꦴꦪꦺꦴ’’ꦠꦶ ꦠꦠ꧀ꦡ ꦕꦶꦠ꧀ꦠꦱ꧀ꦱ ꦱꦤ꧀ꦤꦶꦛ꧀ꦜꦴꦤꦁ ꦥꦸꦤ ꦠꦠ꧀ꦡ ꦥꦮꦠ꧀ꦠꦤꦁ ꦮꦷꦫꦶꦪꦴꦫꦩ꧀ꦨꦺꦴ ꦕꦶꦠ꧀ꦠꦧꦤ꧀ꦣꦤꦁ.

ꦠꦱ꧀ꦱ ꦤꦴꦩꦫꦹꦥꦱ꧀ꦱ ꦆꦩꦺ ꦤꦤ꧀ꦢꦷꦫꦴꦒꦴꦢꦪꦺꦴ ꦠꦟ꧀ꦲꦴꦮꦶꦗ꧀ꦗꦴꦢꦪꦺꦴꦠꦶ ꦏꦠ꧀ꦮꦴ ꦥꦕ꧀ꦕꦪꦺꦴ ꦣꦩ꧀ꦩꦴꦪꦠꦤꦺꦏꦢꦺꦱꦺꦴ. ꦄꦫꦶꦪꦩꦒ꧀ꦒꦤꦶꦧ꧀ꦧꦴꦤꦠꦟ꧀ꦲꦴꦮꦗ꧀ꦗꦺꦴ ꦆꦣ ꦣꦩ꧀ꦩꦴꦪꦠꦤꦺꦏꦢꦺꦱꦺꦴꦠꦶ ꦕ. ꦱꦺꦴꦭ꦳ꦱꦲꦴꦏꦴꦫꦺꦲꦷꦠꦶ ꦥꦷꦭ꦳ꦤꦴꦢꦷꦲꦶ ꦱꦺꦴꦭ꦳ꦱꦲꦶ ꦄꦴꦏꦴꦫꦺꦲꦶ. ꦱꦠꦶꦥꦛ꧀ꦜꦴꦤꦮꦶꦨꦔ꧀ꦒꦺ ꦄꦴꦒꦠꦤꦪꦺꦤ ꦱꦛ꧀ꦜꦶꦤꦪꦱꦲꦱ꧀ꦱꦺꦲꦶ. ꦢꦺꦱꦤꦴꦥꦫꦶꦪꦺꦴꦱꦴꦤꦺ…ꦥꦺ… ꦥꦠꦶꦛ꧀ꦜꦲꦶꦁꦱꦹꦠꦶ ꦮꦶꦥꦚ꧀ꦕꦶꦠꦚ꧀ꦚꦹ ꦌꦮꦺꦠ꧀ꦡ ꦒꦲꦟꦮꦱꦺꦤ ꦄꦣꦶꦒꦠꦮꦶꦱꦺꦱꦴ ꦥꦫꦶꦕ꧀ꦖꦶꦤ꧀ꦢꦶꦠꦴ. ꦠꦺ ꦲꦶ ꦠꦢꦴ ꦣꦩ꧀ꦩꦥꦛꦶꦒ꧀ꦒꦴꦲꦏꦨꦴꦮꦺꦤ ꦱꦠ꧀ꦡꦸ ꦱꦤ꧀ꦠꦶꦏꦺ ꦱꦤ꧀ꦤꦶꦱꦶꦤ꧀ꦤꦴ. ꦈꦒ꧀ꦓꦛꦶꦠꦚ꧀ꦚꦹꦤꦁ ꦥꦤ ꦤꦺꦪ꧀ꦪꦴꦤꦚ꧀ꦕ ꦮꦶꦱꦺꦱꦴꦣꦶꦒꦩꦺꦴ ꦄꦛ꧀ꦜꦏꦡꦴꦪꦁ ꦤ ꦫꦸꦭ꦳꧀ꦲꦺꦴꦠꦶ ꦆꦣ ꦤ ꦒꦲꦶꦠꦺꦴꦠꦶ.

ꦄꦴꦱꦷꦮꦶꦱꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧒. ꦫꦡꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ

꧒꧓꧙. ꦱꦸꦱꦁꦮꦸꦠꦶꦤ꧀ꦢ꧀ꦫꦶꦪꦱ꧀ꦱ ꦨꦺꦴꦗꦤꦺ ꦩꦠ꧀ꦠꦚ꧀ꦚꦸꦤꦺꦴ ꦱꦠꦱ꧀ꦱ ꦱꦩ꧀ꦥꦗꦴꦤꦱ꧀ꦱ ꦮꦶꦲꦫꦠꦺꦴ ꦏꦶꦭꦺꦱꦤꦶꦩꦶꦠ꧀ꦠꦁ ꦢꦸꦏ꧀ꦑꦁ ꦄꦤꦮꦱꦫꦤ꧀ꦠꦶ ꦱꦸꦑꦱꦺꦴꦩꦤꦱ꧀ꦱꦧꦲꦸꦭꦠꦴ ꦮꦸꦠ꧀ꦠꦴ. ꦪꦮꦠꦶ ꦠꦺꦤ ꦦꦭꦁ ꦩꦶꦱ꧀ꦱꦶꦠꦁ ꦮꦶꦪ ꦲꦺꦴꦠꦷꦠꦶ ꦪꦺꦴꦤꦶ, ꦌꦏꦤ꧀ꦠꦶꦏꦁ ꦏꦴꦫꦟꦁ. ꦄꦱ꧀ꦱꦴꦠꦶ ꦨꦶꦏ꧀ꦑꦸꦤꦺꦴ. ꦥꦫꦶꦥꦸꦟ꧀ꦟꦤ꧀ꦠꦶ ꦄꦮꦶꦏꦭꦁ. ꦄꦤꦮꦱꦺꦱꦁ ꦄꦴꦱꦮꦺ ꦑꦺꦥꦺꦠꦷꦠꦶ ꦄꦴꦱꦮꦏ꧀ꦑꦪꦺꦴ, ꦄꦒ꧀ꦒꦩꦒ꧀ꦒꦺꦴ. ꦪꦁ ꦪꦤ꧀ꦠꦶ ꦢꦤ꧀ꦣꦁ ꦩꦗ꧀ꦙꦁ ꦗꦮꦺꦴꦠꦶ ꦗꦮꦴꦢꦷꦱꦸ ꦪꦁ ꦪꦁ ꦒꦩꦤꦁ. ꦫꦏ꧀ꦑꦟꦠ꧀ꦡꦴꦪꦴꦠꦶ ꦏꦶꦭꦺꦱꦕꦺꦴꦫꦺꦲꦶ ꦫꦏ꧀ꦑꦟꦠ꧀ꦡꦴꦪ. ꦮꦺꦒꦤꦶꦒ꧀ꦒꦲꦟꦠ꧀ꦡꦴꦪꦴꦠꦶ ꦏꦶꦭꦺꦱꦲꦺꦠꦸꦏꦱ꧀ꦱ ꦆꦤ꧀ꦢ꧀ꦫꦶꦪꦮꦺꦒꦱ꧀ꦱ ꦤꦶꦒ꧀ꦒꦟ꧀ꦲꦤꦠ꧀ꦡꦴꦪ. ꦤꦶꦧ꧀ꦧꦶꦱꦺꦮꦤꦠ꧀ꦡꦴꦪꦴꦠꦶ ꦮꦶꦱꦺꦮꦤꦱ꧀ꦱ ꦮꦶꦥ꧀ꦦꦤ꧀ꦢꦶꦠꦱ꧀ꦱ ꦤꦶꦫꦺꦴꦣꦤꦴꦪ. ꦏꦶꦭꦺꦱꦹꦥꦱꦩꦠ꧀ꦡꦴꦪꦴꦠꦶ ꦏꦶꦭꦺꦱꦴꦤꦁ ꦈꦥꦫꦹꦥꦫꦶ ꦱꦩꦤꦠ꧀ꦡꦴꦪ ꦮꦹꦥꦱꦩꦤꦠ꧀ꦡꦴꦪ.

ꦱꦩꦟꦫꦠꦶ ꦤꦴꦩ ꦱꦩꦡꦮꦶꦥꦱ꧀ꦱꦤꦴꦩꦒ꧀ꦒꦦꦭꦱꦸꦑꦴꦤꦶ. ꦢꦤ꧀ꦠꦴꦤꦩ꧀ꦥꦶ ꦱꦶꦤ꧀ꦣꦮꦴꦤꦁ ꦱꦴꦫꦡꦶꦤꦺꦴ ꦥꦪꦺꦴꦒꦺꦤ ꦱꦶꦪꦴ ꦏꦴꦕꦶ ꦮꦶꦱꦺꦮꦤꦩꦠ꧀ꦠꦴꦠꦶ ꦠꦢꦨꦴꦮꦁ ꦢꦱ꧀ꦱꦺꦤ꧀ꦠꦺꦴ ‘‘ꦤꦶꦧ꧀ꦧꦶꦱꦺꦮꦤꦺ ꦏꦠ꧀ꦮꦴ ꦥꦺꦱꦺꦤ꧀ꦠꦺꦴ’’ꦠꦶ ꦮꦸꦠ꧀ꦠꦁ. ꦚꦴꦟꦁ ꦒꦕ꧀ꦖꦠꦷꦠꦶ ꦄꦱꦔ꧀ꦒꦩꦤꦁ ꦥꦮꦠ꧀ꦠꦠꦶ ꦥꦒꦺꦮ ꦆꦤ꧀ꦢ꧀ꦫꦶꦪꦨꦴꦮꦤꦴꦪ ꦏꦠꦠ꧀ꦠꦴ, ꦏꦶꦭꦺꦱꦤꦶꦒ꧀ꦒꦲꦱ꧀ꦱ ꦱꦸꦑꦺꦤꦺꦮ ꦱꦶꦢ꧀ꦣꦠ꧀ꦠꦴ. ꦢꦴꦪꦏꦱ꧀ꦱ ꦄꦗ꧀ꦙꦴꦱꦪꦺꦴ ꦮꦱꦺꦴ ꦈꦭ꦳ꦴꦫꦺꦴ ꦭꦴꦩꦏꦺꦴ. ꦢꦺꦪ꧀ꦪꦣꦩ꧀ꦩꦱ꧀ꦱ ꦥꦩꦴꦟꦁ ꦮꦱꦺꦴ ꦄꦥ꧀ꦥꦏꦁ ꦧꦲꦸꦏꦚ꧀ꦕ.

ꦩꦲꦴꦩꦟ꧀ꦝꦥꦛ꧀ꦜꦴꦤꦁ ꦤꦴꦩ ꦭꦺꦴꦲꦥꦴꦱꦴꦢꦱ꧀ꦱ ꦥꦸꦫꦠꦺꦴ ꦌꦮ ꦩꦲꦴꦨꦶꦏ꧀ꦑꦸꦱꦔ꧀ꦓꦱ꧀ꦱ ꦱꦤ꧀ꦤꦶꦥꦴꦠꦏꦴꦭꦺ ꦠꦺꦱꦁ ꦥꦲꦺꦴꦤꦏꦮꦱꦺꦤ ꦩꦲꦴꦩꦟ꧀ꦝꦥꦱ꧀ꦱ ꦏꦠ꧀ꦠꦧ꧀ꦧꦛ꧀ꦜꦴꦤꦁ. ꦒꦲꦟꦩꦴꦤꦤ꧀ꦠꦶ ꦥꦫꦶꦮꦶꦱꦒꦲꦟꦨꦴꦗꦤꦁ.

ꦥꦏꦠꦶꦪꦴ ꦨꦠ꧀ꦠꦏꦴꦫꦏꦶꦕ꧀ꦕꦺ ꦄꦣꦶꦒꦠꦺꦴ ꦈꦥꦛ꧀ꦜꦴꦏꦸꦥꦴꦱꦏꦺꦴ. ꦩꦸꦢꦸꦱꦩꦑꦫꦱꦚ꧀ꦚꦶꦠꦺꦲꦶ, ꦢꦲꦤꦥꦕꦤꦨꦗ꧀ꦗꦤꦱꦚ꧀ꦚꦶꦠꦺꦲꦶ ꦮꦴ ꦠꦷꦲꦶ ꦥꦴꦏꦺꦲꦶ.

ꦥꦫꦶꦱꦺꦴꦣꦺꦠ꧀ꦮꦴꦠꦶ ꦫꦚ꧀ꦚꦺꦴ ꦄꦤꦸꦕ꧀ꦖꦮꦶꦏꦨꦴꦮꦁ ꦥꦫꦶꦱꦺꦴꦣꦺꦠ꧀ꦮꦴ. ꦨꦹꦩꦶꦪꦁ ꦖꦝ꧀ꦝꦺꦱꦶ ‘‘ꦨꦶꦏ꧀ꦑꦹꦤꦁ ꦄꦢꦠ꧀ꦮꦴ ꦩꦪꦴ ꦩꦸꦑꦺ ꦥꦏ꧀ꦑꦶꦠ꧀ꦠ’’ꦤ꧀ꦠꦶ. ꦩꦸꦑꦺꦤ ꦒꦟ꧀ꦲꦶ ꦠꦱ꧀ꦱ ꦤꦶꦢ꧀ꦢꦺꦴꦱꦨꦴꦮꦁ ꦢꦱ꧀ꦱꦺꦠꦸꦁ. ꦩꦠ꧀ꦠꦁ ꦗꦴꦤꦴꦥꦺꦠꦸꦁ ꦥꦩꦗ꧀ꦗꦶ. ‘‘ꦠ꧀ꦮꦁ ꦏꦸꦠꦺꦴ ꦄꦴꦒꦠꦺꦴ’’ꦠꦶ ꦥꦸꦕ꧀ꦖꦤꦺ ꦥꦩꦴꦢꦁ ꦄꦴꦥꦗ꧀ꦗꦶ. ꦄꦤꦸꦨꦴꦒꦺꦴꦠꦶ ꦄꦮꦱꦶꦛ꧀ꦜꦨꦴꦒꦺꦴ. ꦆꦢꦩꦠ꧀ꦡꦶꦪꦤ꧀ꦠꦶ ꦆꦢꦁ ꦥꦪꦺꦴꦗꦤꦁ. ꦆꦠꦫꦤ꧀ꦠꦶ ꦥꦴꦭ꦳ꦶꦪꦁ ꦄꦤꦴꦒꦠꦩ꧀ꦥꦶ ꦄꦴꦲꦴꦫꦺ ꦥꦩꦴꦟꦗꦴꦤꦤꦁ.

ꦱꦪꦤꦁ ꦱꦺꦪ꧀ꦪꦴ, ꦏꦴꦩꦨꦺꦴꦒꦷꦤꦁ ꦱꦺꦪ꧀ꦪꦴ ꦏꦴꦩꦨꦺꦴꦒꦶꦱꦺꦪ꧀ꦪꦴ. ꦢꦏ꧀ꦑꦶꦟꦥꦱ꧀ꦱꦺꦤ ꦱꦪꦴꦤꦺꦴ ꦤꦴꦩ ꦤꦠ꧀ꦡꦶ ꦢꦏ꧀ꦑꦶꦟꦲꦠ꧀ꦡꦺꦤ ꦏꦴꦠꦧ꧀ꦧꦏꦶꦕ꧀ꦕꦏꦫꦟꦠꦺꦴ. ꦠꦺꦗꦸꦱ꧀ꦱꦢꦠ꧀ꦠꦴꦠꦶ ꦆꦢꦁ ꦄꦤꦸꦠ꧀ꦫꦴꦱꦱ꧀ꦱꦺꦮ ꦱꦷꦲꦱ꧀ꦱ ꦱꦪꦤꦤ꧀ꦠꦶ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ. ꦢ꧀ꦮꦺ ꦥꦸꦫꦶꦩꦥꦴꦢꦺ ꦌꦏꦱ꧀ꦩꦶꦁ, ꦥꦕ꧀ꦖꦶꦩꦥꦴꦢꦺ ꦌꦏꦱ꧀ꦩꦶꦁ ꦜꦴꦤꦺ ꦜꦥꦺꦠ꧀ꦮꦴꦠꦶ ꦲꦶ ꦆꦢꦁ ꦥꦴꦢꦴꦤꦁ ꦄꦮꦶꦏ꧀ꦑꦶꦠ꧀ꦠꦨꦴꦮꦏꦫꦟꦢꦱ꧀ꦱꦤꦁ.

ꦕꦠꦸꦠ꧀ꦡꦗ꧀ꦙꦴꦤꦱꦺꦪ꧀ꦪꦴꦠꦶ ꦕꦠꦸꦠ꧀ꦡꦗ꧀ꦙꦴꦤꦶꦏꦁ ꦦꦭꦱꦩꦴꦥꦠ꧀ꦠꦶꦁ ꦮꦢꦠꦶ. ꦪꦺꦨꦸꦪ꧀ꦪꦺꦤ ꦲꦶ ꦠꦡꦴꦒꦠꦴ ꦦꦭꦱꦩꦴꦥꦠ꧀ꦠꦶꦁ ꦱꦩꦴꦥꦗ꧀ꦗꦶꦠ꧀ꦮꦴꦮ ꦱꦪꦤ꧀ꦠꦶ. ꦱꦴ ꦕ ꦤꦺꦱꦁ ꦕꦠꦸꦠ꧀ꦡꦗ꧀ꦙꦴꦤꦠꦺꦴ ꦮꦸꦛ꧀ꦜꦴꦪ, ꦏꦶꦭꦺꦱꦥꦫꦶꦤꦶꦧ꧀ꦧꦴꦤꦱ꧀ꦱ ꦕ ꦏꦠꦠ꧀ꦠꦴꦠꦶ ꦮꦢꦤ꧀ꦠꦶ. ꦆꦣ ꦱꦷꦲꦱꦺꦪ꧀ꦪꦴ ꦄꦴꦒꦠꦴ ꦥꦴꦢꦁ ꦄꦕ꧀ꦕꦴꦣꦴꦪ ꦥꦸꦧ꧀ꦧꦺꦤꦴꦥꦫꦁ ꦄꦗꦲꦶꦠꦱꦁꦭꦏ꧀ꦑꦟꦴ ꦱꦺꦪ꧀ꦪꦴꦠꦶ ꦏꦠ꧀ꦮꦴ. ꦠꦺꦤꦴꦲ ‘‘ꦄꦪꦁ ꦲꦷ’’ꦠꦶꦄꦴꦢꦶ. ꦌꦮꦤ꧀ꦠꦶ ‘‘ꦢꦏ꧀ꦑꦶꦟꦺꦤ ꦥꦱ꧀ꦱꦺꦤꦴ’’ꦠꦶꦄꦴꦢꦶꦤꦴ ꦮꦸꦠ꧀ꦠꦴꦏꦴꦫꦺꦤ ꦱꦺꦪ꧀ꦪꦁ ꦏꦥ꧀ꦥꦺꦠꦶ.

ꦏꦡꦁ ꦤꦶꦢ꧀ꦢꦴꦪꦤ꧀ꦠꦺꦴ ꦱꦠꦺꦴ ꦱꦩ꧀ꦥꦗꦴꦤꦺꦴ ꦲꦺꦴꦠꦶ? ꦨꦮꦔ꧀ꦒꦕꦶꦠ꧀ꦠꦺꦤ ꦲꦶ ꦤꦶꦢ꧀ꦢꦹꦥꦒꦩꦤꦤ꧀ꦠꦶ ꦄꦣꦶꦥ꧀ꦥꦴꦪꦺꦴ. ꦄꦥ꧀ꦥꦲꦴꦤꦺꦤꦴꦠꦶ ꦠꦢꦣꦶꦩꦸꦠ꧀ꦠꦠꦴꦪ ꦠꦢꦥ꧀ꦥꦲꦴꦤꦁ ꦢꦛ꧀ꦜꦧ꧀ꦧꦁ. ꦠꦡꦴ ꦠꦺꦱꦸ ꦤꦶꦢ꧀ꦢꦺꦴꦏ꧀ꦏꦩꦤꦱ꧀ꦱ ꦄꦴꦢꦶꦥꦫꦶꦪꦺꦴꦱꦴꦤꦺꦱꦸ ꦄꦗꦲꦶꦠꦱꦠꦶꦱꦩ꧀ꦥꦗꦚ꧀ꦚꦁ ꦲꦺꦴꦠꦶ. ꦠꦺꦤꦴꦲ – ‘‘ꦤꦶꦢ꧀ꦢꦁ ꦎꦏ꧀ꦏꦩꦤ꧀ꦠꦺꦴꦥꦶ ꦱꦠꦺꦴ ꦱꦩ꧀ꦥꦗꦴꦤꦺꦴ ꦲꦺꦴꦠꦷ’’ꦠꦶ. ꦌꦠꦁ ꦥꦤꦴꦠꦶ ‘‘ꦤꦶꦢ꧀ꦢꦁ ꦎꦏ꧀ꦏꦩꦤ꧀ꦠꦺꦴꦥꦶ ꦱꦠꦺꦴ ꦱꦩ꧀ꦥꦗꦴꦤꦺꦴ ꦲꦺꦴꦠꦷ’’ꦠꦶ ꦮꦸꦠ꧀ꦠꦤꦪꦁ ꦮꦢꦠꦶ. ꦚꦴꦟꦣꦴꦠꦸꦏꦤ꧀ꦠꦶ ꦤ ꦫꦺꦴꦕꦪꦶꦁꦱꦹꦠꦶ ꦤꦶꦢ꧀ꦢꦺꦴꦏ꧀ꦏꦩꦤꦺꦥꦶ ꦗꦴꦒꦫꦟꦺ ꦥꦮꦠ꧀ꦠꦚꦴꦟꦱꦨꦴꦮꦩꦺꦮꦴꦠꦶ ꦤ ꦫꦺꦴꦕꦪꦶꦁꦱꦸ ꦥꦺꦴꦫꦴꦟꦴ. ꦤꦶꦫꦤ꧀ꦠꦫꦁ ꦨꦮꦔ꧀ꦒꦕꦶꦠ꧀ꦠꦺꦱꦸ ꦮꦠ꧀ꦠꦩꦴꦤꦺꦱꦸ ꦱꦠꦶꦱꦩ꧀ꦥꦗꦚ꧀ꦚꦴꦱꦩ꧀ꦨꦮꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦥꦸꦫꦶꦩꦱ꧀ꦩꦶꦚ꧀ꦲꦶ ꦤꦪꦺ ꦱꦠꦶꦱꦩ꧀ꦥꦗꦚ꧀ꦚꦱ꧀ꦱ ꦄꦱꦁꦮꦫꦺꦴ, ꦤ ꦨꦮꦔ꧀ꦒꦱ꧀ꦱ. ꦆꦤ꧀ꦢ꧀ꦫꦶꦪꦱꦁꦮꦫꦺꦴ, ꦨꦺꦴꦗꦤꦺ ꦩꦠ꧀ꦠꦚ꧀ꦚꦸꦠꦴ, ꦗꦴꦒꦫꦶꦪꦴꦤꦸꦪꦺꦴꦒꦺꦴꦠꦶ ꦆꦩꦺꦲꦶ ꦠꦶꦮꦔ꧀ꦒꦶꦏꦴ, ꦤꦶꦩꦶꦠ꧀ꦠꦴꦤꦸꦧ꧀ꦪꦚ꧀ꦗꦤꦥꦫꦶꦮꦗ꧀ꦗꦤꦴꦢꦶ ꦱꦧ꧀ꦧꦁ ꦮꦶꦥꦱ꧀ꦱꦤꦴꦥꦏ꧀ꦑꦶꦏꦩꦺꦮꦴꦠꦶ ꦄꦣꦶꦥ꧀ꦥꦴꦪꦺꦴ.

ꦠꦴꦤꦺꦮꦴꦠꦶ ꦮꦶꦥꦱ꧀ꦱꦤꦴꦏ꧀ꦑꦟꦺ ꦥꦮꦠ꧀ꦠꦴꦤꦶ ꦆꦤ꧀ꦢ꧀ꦫꦶꦪꦴꦢꦷꦤꦶ. ꦪꦴꦮ ꦄꦫꦲꦠ꧀ꦠꦴ ꦢꦺꦱꦤꦴ ꦮꦶꦠ꧀ꦡꦴꦫꦠꦺꦴ ꦏꦡꦺꦠꦧ꧀ꦧꦴ. ꦥꦴꦭ꦳ꦶꦪꦁ ꦥꦤ ‘‘ꦪꦺꦴꦤꦶ ꦕꦱ꧀ꦱ ꦄꦴꦫꦢ꧀ꦣꦴ ꦲꦺꦴꦠꦶ ꦄꦴꦱꦮꦴꦤꦁ ꦑꦪꦴꦪꦴ’’ꦠꦶ ꦱꦔ꧀ꦑꦺꦥꦺꦤ ꦏꦡꦶꦠꦴ.

ꦫꦡꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧓. ꦏꦸꦩ꧀ꦩꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ

꧒꧔꧐. ꦄꦛ꧀ꦜꦶꦏꦸꦩ꧀ꦩꦺꦴꦠꦶ ꦥꦶꦛ꧀ꦜꦶꦪꦁ ꦠꦶꦑꦶꦟꦛ꧀ꦜꦶꦏꦺꦴ ꦏꦸꦩ꧀ꦩꦺꦴ. ꦠꦤ꧀ꦠꦶꦧꦤ꧀ꦣꦺꦴꦠꦶ ꦧ꧀ꦪꦴꦮꦛꦺꦴ. ꦱꦩꦸꦒ꧀ꦒꦺ ꦮꦶꦪ ꦄꦠ꧀ꦠꦤꦺꦴ ꦏꦥꦴꦭꦺ ꦥꦏ꧀ꦑꦶꦥꦶꦠ꧀ꦮꦴ. ꦱꦩꦺꦴꦢꦲꦤ꧀ꦠꦺꦴ ꦱꦩ꧀ꦩꦴ ꦎꦢꦲꦤ꧀ꦠꦺꦴ ꦄꦗ꧀ꦙꦠ꧀ꦠꦩꦺꦮ ꦢꦲꦤ꧀ꦠꦺꦴ. ꦄꦴꦫꦩ꧀ꦩꦟꦏꦥꦴꦭꦺꦠꦶ ꦄꦴꦫꦩ꧀ꦩꦟꦏꦛꦴꦲꦺ. ꦱꦩꦺꦴꦢꦲꦤ꧀ꦠꦺꦴꦠꦶ ꦢꦶꦛ꧀ꦜꦩꦠ꧀ꦠꦱ꧀ꦱꦺꦮ ꦕ ꦒꦲꦟꦠꦺꦴ ꦩꦤꦺꦴꦮꦶꦠꦏ꧀ꦏꦺ ꦠꦠ꧀ꦡꦺꦮ ꦱꦩ꧀ꦩꦢꦺꦮ ꦎꦢꦲꦤ꧀ꦠꦺꦴ. ꦠꦚ꧀ꦲꦶ ꦮꦶꦱꦪꦮꦱꦺꦤ ꦥꦮꦠ꧀ꦠꦶꦠꦸꦁ ꦄꦢꦺꦤ꧀ꦠꦺꦴ. ꦥꦚ꧀ꦕ ꦣꦩ꧀ꦩꦺꦠꦶ ‘‘ꦏꦴꦭꦺꦤ ꦮꦏ꧀ꦑꦴꦩꦷ’’ꦠꦶꦄꦴꦢꦶꦤꦴ (ꦥꦫꦶ. ꧓꧖꧒) ꦮꦸꦕ꧀ꦕꦩꦴꦤꦺ.

ꦏꦸꦩ꧀ꦩꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧔. ꦥꦜꦩꦢꦴꦫꦸꦏ꧀ꦑꦤ꧀ꦣꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ

꧒꧔꧑. ꦮꦶꦭꦴꦱꦩꦴꦤꦺꦴ ꦮꦶꦪ ꦱꦴꦒꦫꦁ ꦥꦠ꧀ꦮꦴ. ꦄꦤ꧀ꦠꦺꦴꦱꦴꦑꦺꦴꦠꦶ ꦒꦔ꧀ꦒꦴꦪ ꦠꦷꦫꦱ꧀ꦱ ꦄꦤ꧀ꦠꦺꦴ ꦎꦤꦠꦱꦴꦑꦺꦴ. ꦠꦺꦩꦺꦠꦷꦠꦶ ꦠꦶꦤ꧀ꦠꦺꦴ ꦲꦺꦴꦠꦶ. ꦠꦶꦫꦶꦪꦁ ꦥꦠꦶꦠꦺꦴ ꦢꦟ꧀ꦝꦱꦺꦠꦸ ꦮꦶꦪ ꦜꦶꦠꦠ꧀ꦠꦴ ꦩꦲꦴꦗꦤꦱ꧀ꦱ ꦥꦕ꧀ꦕꦪꦺꦴ ꦗꦴꦠꦺꦴ, ꦠꦡꦴ ꦩꦲꦤ꧀ꦠꦨꦴꦮꦺꦤ ꦒꦔ꧀ꦒꦴꦱꦺꦴꦠꦁ ꦎꦠꦫꦟꦴꦢꦶ ꦤꦠ꧀ꦡꦶ.

ꦄꦪꦁ ꦲꦷꦠꦶ ꦄꦤꦤ꧀ꦠꦫꦁ ꦮꦸꦠ꧀ꦠꦥꦸꦒ꧀ꦒꦭꦺꦴ. ꦄꦫꦶꦪꦩꦒ꧀ꦒꦁ ꦎꦫꦸꦪ꧀ꦲꦴꦠꦶ ꦕꦠꦸꦧ꧀ꦧꦶꦣꦁ ꦄꦫꦶꦪꦩꦒ꧀ꦒꦮꦷꦡꦶꦁ ꦎꦠꦫꦶꦠ꧀ꦮꦴ. ‘‘ꦕꦶꦠ꧀ꦠꦁ ꦤꦴꦩꦺꦠ’’ꦤ꧀ꦠꦶꦄꦴꦢꦶꦤꦴ ꦕꦶꦤ꧀ꦠꦺꦠ꧀ꦮꦴ ꦒꦶꦲꦶꦧꦤ꧀ꦣꦤꦁ ꦤ ꦮꦶꦱ꧀ꦱꦗ꧀ꦗꦺꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦄꦠ꧀ꦠꦤꦺꦴ ꦨꦗꦩꦴꦤꦏꦺꦠꦶ ꦄꦠ꧀ꦠꦤꦺꦴ ꦨꦗꦤ꧀ꦠꦺ. ꦗꦷꦮꦶꦏꦠ꧀ꦡꦴꦪ ꦥꦪꦸꦗ꧀ꦗꦶꦠꦧ꧀ꦧꦠꦺꦴ ꦥꦪꦺꦴꦒꦺꦴ, ꦑꦺꦠ꧀ꦠꦮꦠ꧀ꦡꦴꦢꦶ. ꦠꦠꦺꦴ ꦥꦪꦺꦴꦒꦠꦺꦴ ꦈꦛ꧀ꦜꦶꦠꦁ ꦄꦴꦪꦁ. ꦏꦶꦚ꧀ꦕꦴꦥꦶ ꦨꦶꦏ꧀ꦑꦹꦤꦁ ꦏꦴꦪꦱꦴꦩꦒ꧀ꦒꦶꦁ ꦢꦺꦠꦶ ꦨꦶꦏ꧀ꦑꦠ꧀ꦡꦴꦪ.

ꦩꦸꦟ꧀ꦝꦓꦛꦤ꧀ꦠꦶ ꦨꦶꦤ꧀ꦤꦺꦴꦛ꧀ꦜꦁ ꦓꦛꦁ. ꦑꦤ꧀ꦣꦺꦠꦶ ꦄꦁꦱꦺ. ꦱꦔ꧀ꦓꦨꦺꦴꦒꦤ꧀ꦠꦶ ꦱꦔ꧀ꦓꦱꦤ꧀ꦠꦏꦁ ꦨꦺꦴꦒꦒꦴꦩꦁ ꦒꦤ꧀ꦠ꧀ꦮꦴ. ꦄꦠ꧀ꦡꦠꦺꦴ ꦌꦮꦁ ꦮꦢꦤ꧀ꦠꦷꦠꦶ ꦠꦡꦴ ꦄꦠ꧀ꦡꦱ꧀ꦱ ꦱꦩ꧀ꦨꦮꦠꦺꦴ ꦌꦮꦁ ꦮꦢꦤ꧀ꦠꦴ ꦮꦶꦪ ꦲꦺꦴꦤ꧀ꦠꦶ. ꦪꦴꦒꦸꦩꦠ꧀ꦠꦏꦺ ꦪꦴꦒꦸꦤ꧀ꦠꦶ ꦪꦴꦒꦸꦁ ꦥꦶꦮꦶꦠ꧀ꦮꦴ ꦠꦴꦪ ꦄꦥꦫꦶꦥꦏ꧀ꦏꦴꦪ ꦌꦮ ꦄꦚ꧀ꦚꦁ ꦪꦴꦒꦸꦁ ꦄꦗ꧀ꦙꦺꦴꦲꦫꦶꦠ꧀ꦮꦴꦠꦶ ꦱꦩ꧀ꦧꦤ꧀ꦣꦺꦴ.

ꦏꦶꦭꦺꦱꦴꦤꦸꦫꦚ꧀ꦗꦶꦠꦺꦴꦮꦴꦠꦶ ꦪꦺꦴꦤꦶꦱꦺꦴꦩꦤꦱꦶꦏꦴꦫꦱ꧀ꦱ ꦄꦨꦴꦮꦺꦤ ꦏꦶꦭꦺꦱꦴꦤꦸꦒꦠꦕꦶꦠ꧀ꦠꦺꦴ ꦌꦮ. ꦄꦏ꧀ꦑꦷꦤꦶ ꦤꦷꦲꦫꦶꦠ꧀ꦮꦴꦠꦶ ꦏꦺꦴꦣꦮꦱꦺꦤ ꦄꦏ꧀ꦑꦶꦏꦺ ꦏꦫꦺꦴꦤ꧀ꦠꦺꦴ ꦄꦏ꧀ꦑꦷꦤꦶ ꦤꦷꦲꦫꦶꦠ꧀ꦮꦴ ꦮꦶꦕꦫꦶꦱ꧀ꦱꦠꦶ. ꦈꦢ꧀ꦣꦠꦺꦴ ꦲꦺꦴꦠꦶ ꦄꦮꦹꦥꦱꦤ꧀ꦠꦺꦴ.

ꦢꦶꦛ꧀ꦜꦶꦒꦠꦶꦏꦺꦴꦠꦶ ꦱꦴꦱꦤꦶꦏꦺꦴ ꦌꦮꦁ ꦄꦪꦺꦴꦤꦶꦱꦺꦴ ꦈꦩ꧀ꦩꦸꦗ꧀ꦗꦶꦠ꧀ꦮꦴ ꦱꦴꦱꦤꦁ ꦈꦢ꧀ꦣꦩ꧀ꦩꦁ ꦈꦧ꧀ꦧꦶꦤꦪꦁ ꦏꦠ꧀ꦮꦴ ꦢꦷꦥꦺꦤ꧀ꦠꦺꦴ ꦄꦫꦶꦛ꧀ꦜꦱꦢꦶꦱꦺꦴ. ꦠꦺꦤꦴꦲ ‘‘ꦱꦺꦴ ꦲꦷ’’ꦠꦶꦄꦴꦢꦶ. ꦄꦫꦹꦥꦨꦮꦺ ꦫꦹꦥꦁ ꦄꦠ꧀ꦡꦶ, ꦄꦚ꧀ꦚꦡꦴ ꦠꦠꦺꦴ ꦕꦸꦠꦱ꧀ꦱ ꦏꦸꦠꦺꦴ ꦫꦹꦥꦏ꧀ꦑꦤ꧀ꦣꦱ꧀ꦱ ꦱꦩ꧀ꦨꦮꦺꦴ. ꦄꦱꦚ꧀ꦚꦷꦨꦮꦺ ꦕꦶꦠ꧀ꦠꦁ ꦄꦠ꧀ꦡꦷꦠꦶ ꦌꦠ꧀ꦡꦴꦥꦶ ꦌꦱꦺꦮ ꦤꦪꦺꦴ. ꦧꦲꦸꦕꦶꦠ꧀ꦠꦏ꧀ꦑꦟꦶꦏꦺꦴ ꦭꦺꦴꦏꦸꦠ꧀ꦠꦫꦩꦒ꧀ꦒꦺꦴ ‘‘ꦪꦺꦴ ꦆꦩꦺ ꦕꦠ꧀ꦠꦴꦫꦺꦴ ꦱꦠꦶꦥꦛ꧀ꦜꦴꦤꦺ ꦨꦴꦮꦺꦪ꧀ꦪ ꦱꦠ꧀ꦠꦮꦱ꧀ꦱꦴꦤꦷ’’ꦠꦶꦄꦴꦢꦶꦮꦕꦤꦠꦺꦴ (ꦢꦷ. ꦤꦶ. ꧒.꧔꧐꧔; ꦩ. ꦤꦶ. ꧑.꧑꧓꧗). ꦄꦤꦸꦱꦪꦺꦴ ꦕꦶꦠ꧀ꦠꦮꦶꦥ꧀ꦥꦪꦸꦠ꧀ꦠꦺꦴ, ꦄꦚ꧀ꦚꦡꦴ ꦱꦴꦮꦗ꧀ꦗꦴꦤꦮꦗ꧀ꦗꦣꦩ꧀ꦩꦴꦤꦁ ꦌꦏꦗ꧀ꦙꦁ ꦈꦥ꧀ꦥꦠ꧀ꦠꦶ ꦱꦶꦪꦴ. ꦠꦺ ꦕ ꦱꦠ꧀ꦠꦴ ꦱꦤ꧀ꦣꦴꦮꦤ꧀ꦠꦶ ꦱꦁꦱꦫꦤ꧀ꦠꦶ, ꦄꦚ꧀ꦚꦡꦴ ꦏꦩ꧀ꦩꦦꦭꦴꦤꦁ ꦱꦩ꧀ꦧꦤ꧀ꦣꦺꦴ ꦤ ꦱꦶꦪꦴꦠꦶ. ꦆꦠꦶ ꦮꦢꦤ꧀ꦠꦺꦴ ꦌꦮꦁ ꦩꦶꦕ꧀ꦖꦴꦮꦴꦢꦁ ꦥꦒ꧀ꦒꦪ꧀ꦲ ꦮꦢꦤ꧀ꦠꦺꦴ.

ꦠꦺꦩꦤꦫꦸꦏ꧀ꦑꦺꦴ ꦮꦶꦪ…ꦥꦺ… ꦢꦸꦭ꧀ꦭꦨꦣꦩ꧀ꦩꦱ꧀ꦱꦮꦤꦺꦴ ꦕ ꦥꦸꦒ꧀ꦒꦭꦺꦴ ꦱꦢ꧀ꦣꦴꦱꦶꦤꦺꦲꦺꦤ ꦄꦠꦺꦩꦤꦠꦺꦴ. ꦏꦠꦮꦶꦤꦪꦺꦴ ꦱꦶꦏ꧀ꦑꦶꦠꦮꦶꦤꦪꦺꦴ ꦪꦡꦴ ‘‘ꦏꦠꦮꦶꦗ꧀ꦗꦺꦴ’’ꦠꦶ. ꦣꦩ꧀ꦩꦏꦡꦶꦏꦴꦤꦁ ꦮꦶꦕꦴꦫꦺꦡꦴꦠꦶ ꦆꦢꦁ ꦢꦺꦪ꧀ꦪꦣꦩ꧀ꦩꦁ ꦣꦩ꧀ꦩꦏꦡꦶꦏꦴꦤꦁ ꦄꦪ꧀ꦪꦴꦤꦁ ꦠꦱ꧀ꦱ ꦠꦱ꧀ꦱ ꦪꦸꦠ꧀ꦠꦮꦱꦺꦤ ꦮꦶꦕꦴꦫꦺꦡꦴꦠꦶ ꦤꦶꦪ꧀ꦪꦴꦠꦤꦮꦱꦺꦤ ꦮꦠ꧀ꦮꦴ. ꦢꦶꦮꦴꦏꦡꦶꦏꦺꦴ ꦱꦫꦨꦴꦟꦏꦺꦴ ꦱꦴꦪꦤ꧀ꦲꦺ ꦏꦡꦺꦠꦶ, ꦥꦸꦫꦶꦩꦪꦴꦩꦁ ꦏꦡꦺꦤ꧀ꦠꦺꦴ ꦫꦠ꧀ꦠꦶꦏꦡꦶꦏꦺꦴ ꦨꦴꦟꦏꦥꦸꦒ꧀ꦒꦭꦺꦴ.

ꦤꦤ꧀ꦢꦤꦮꦤꦴꦨꦶꦫꦴꦩꦺꦠꦶ ꦤꦤ꧀ꦢꦤꦮꦤꦁ ꦮꦶꦪ ꦩꦤꦺꦴꦫꦩꦺ. ꦄꦱ꧀ꦱ ꦨꦴꦫꦲꦴꦫꦨꦶꦏ꧀ꦑꦹꦠꦶ ꦄꦱ꧀ꦱ ꦏꦶꦕ꧀ꦕꦮꦴꦲꦏꦨꦶꦏ꧀ꦑꦹ ꦈꦥꦗ꧀ꦙꦴꦪꦴꦢꦪꦺꦴ. ꦱꦸꦑꦤꦶꦱꦶꦤ꧀ꦤꦏꦡꦤ꧀ꦠꦶ ꦥꦛꦶꦱꦤ꧀ꦡꦴꦫꦏꦡꦴꦥꦸꦧ꧀ꦧꦏꦁ ꦈꦥꦤꦶꦱꦶꦤ꧀ꦤꦏꦡꦁ ꦱꦸꦠ꧀ꦮꦴ.

ꦜꦶꦠꦱꦟ꧀ꦜꦴꦤꦺꦤꦺꦮ ꦜꦶꦠꦴꦏꦴꦫꦺꦤꦺꦮ ꦜꦶꦠꦁ, ꦤꦥ꧀ꦥꦪꦸꦠ꧀ꦠꦤ꧀ꦠꦶ ꦄꦠ꧀ꦡꦺꦴ. ꦕꦶꦠ꧀ꦠꦏꦩ꧀ꦩꦩꦹꦭꦴꦢꦷꦤꦶ ꦜꦶꦠꦱꦟ꧀ꦜꦴꦤꦺꦤꦺꦮ ꦜꦶꦠꦴꦠꦶ ꦪꦺꦴꦗꦤꦴ. ꦩꦸꦢꦸꦠꦴꦪꦴꦠꦶ ꦩꦸꦢꦸꦲꦢꦪꦠꦴꦪ ꦱꦴꦥꦺꦏ꧀ꦑꦠꦴꦪ.

ꦥꦛꦶꦥꦢꦤ꧀ꦠꦶ ꦱꦩꦡꦮꦶꦥꦱ꧀ꦱꦤꦴꦥꦛꦶꦥꦠ꧀ꦠꦶꦁ. ꦢꦷꦥꦺꦠ꧀ꦮꦴ ꦥꦏꦴꦱꦺꦠ꧀ꦮꦴ ꦥꦴꦏꦛꦁ ꦏꦠ꧀ꦮꦴ. ꦠꦠ꧀ꦫꦸꦥ꧀ꦥꦴꦢꦺꦴꦠꦶ ꦠꦠ꧀ꦫ ꦈꦥ꧀ꦥꦗ꧀ꦗꦤꦏꦄꦴꦪꦸꦥ꧀ꦥꦴꦢꦺꦴ. ꦑꦺꦠ꧀ꦠꦁ ꦱꦤ꧀ꦣꦴꦪ ꦮꦢꦠꦶ. ꦠꦺꦭ…ꦥꦺ… ꦲꦠ꧀ꦡꦴꦠꦶ ꦠꦺꦭꦓꦛ-ꦩꦣꦸꦓꦛꦦꦴꦟꦶꦠꦓꦛꦴꦢꦶꦲꦠ꧀ꦡꦴ. ꦄꦥꦏ꧀ꦏꦩꦶꦁꦱꦸ ꦢꦸꦧ꧀ꦧꦶꦕꦴꦫꦶꦠꦠ꧀ꦠꦴ. ꦥꦹꦫꦺꦱꦷꦠꦶ ꦲꦺꦛ꧀ꦜꦴ ꦕ ꦠꦠ꧀ꦡ ꦠꦠ꧀ꦡ ꦄꦠꦷꦠꦴꦤꦶ ꦏꦴꦭꦮꦕꦤꦴꦤꦶ ꦥꦺꦴꦫꦴꦟꦛ꧀ꦜꦏꦡꦴꦪ ꦄꦴꦒꦠꦠ꧀ꦠꦴ ꦏꦶꦫ ꦮꦸꦠ꧀ꦠꦴꦤꦶ.

ꦈꦥꦒꦩꦤꦴꦤꦸꦥꦒꦩꦤꦴꦢꦷꦤꦶ ꦎꦫꦶꦩꦱ꧀ꦱ ꦥꦴꦫꦶꦩꦱ꧀ꦱ ꦕ ꦈꦥꦒꦩꦤꦴꦤꦸꦥꦒꦩꦤꦴꦤꦶ ꦕꦺꦮ ꦩꦗ꧀ꦙꦺ ꦱꦁꦱꦷꦢꦤꦴꦤꦶ ꦕ. ꦥꦛꦶꦮꦶꦗ꧀ꦙꦶꦠꦸꦤ꧀ꦠꦶ ꦗꦴꦤꦶꦠꦸꦁ. ꦌꦠꦤ꧀ꦠꦶ ꦪꦡꦴꦮꦸꦠ꧀ꦠꦁ ꦕꦏ꧀ꦑꦸꦱꦨꦴꦮꦁ. ꦢꦺꦴꦩꦤꦱ꧀ꦱꦤ꧀ꦠꦶ ꦠꦱ꧀ꦱꦺꦮ ꦩꦤ꧀ꦢꦨꦴꦮꦥꦕ꧀ꦕꦪꦁ ꦢꦺꦴꦩꦤꦱ꧀ꦱꦁ. ꦄꦴꦥꦗ꧀ꦗꦤ꧀ꦠꦺꦴꦥꦶ ꦈꦥꦒꦕ꧀ꦖꦠꦶ ꦤꦴꦩ ꦠꦤ꧀ꦤꦶꦩꦶꦠ꧀ꦠꦱꦁꦏꦶꦭꦺꦱꦱ꧀ꦱ ꦈꦥ꧀ꦥꦴꦢꦶꦠꦠ꧀ꦠꦴ. ꦠꦶꦟ꧀ꦟꦁ ꦭꦏ꧀ꦑꦟꦴꦤꦤ꧀ꦠꦶ ꦲꦸꦠ꧀ꦮꦴ ꦄꦨꦴꦮꦠꦺꦴ ꦄꦴꦢꦶꦄꦤ꧀ꦠꦮꦤ꧀ꦠꦠꦺꦴ ꦠꦴꦮꦏꦴꦭꦶꦏꦠꦺꦴ ꦤꦶꦕ꧀ꦕꦥꦛꦶꦏ꧀ꦑꦺꦥꦠꦺꦴꦠꦶꦄꦴꦢꦷꦤꦁ ꦠꦶꦟ꧀ꦟꦁ ꦭꦏ꧀ꦑꦟꦴꦤꦁ ꦱꦭ꧀ꦭꦏ꧀ꦑꦟꦮꦱꦺꦤ.

ꦮꦴꦩꦠꦺꦴꦠꦶ ꦩꦶꦕ꧀ꦖꦴ. ꦢꦏ꧀ꦑꦶꦟꦠꦺꦴꦠꦶ ꦱꦩ꧀ꦩꦴ. ꦪꦡꦴ ꦠꦱ꧀ꦱ ꦠꦱ꧀ꦱ ꦱꦠ꧀ꦠꦱ꧀ꦱ ꦎꦫꦨꦴꦮꦠ꧀ꦠꦴ ꦄꦗ꧀ꦙꦠ꧀ꦠꦶꦏꦴꦤꦶ ꦄꦴꦪꦠꦤꦴꦤꦶ ꦎꦫꦶꦩꦁ ꦠꦷꦫꦁ ꦏꦠ꧀ꦮꦴ ꦮꦸꦠ꧀ꦠꦴꦤꦶ, ꦌꦮꦁ ꦤꦺꦱꦁ ꦥꦫꦨꦴꦮꦠ꧀ꦠꦴ ꦧꦴꦲꦶꦫꦴꦤꦶ ꦄꦴꦪꦠꦤꦴꦤꦶ ꦥꦴꦫꦶꦩꦁ ꦮꦸꦠ꧀ꦠꦴꦤꦶ. ꦄꦥꦴꦪꦩꦗ꧀ꦙꦺ ꦱꦁꦱꦫꦟꦲꦺꦠꦸꦠꦴꦪ ꦤꦤ꧀ꦢꦷꦫꦴꦒꦺꦴꦮ ‘‘ꦩꦗ꧀ꦙꦺ ꦱꦁꦱꦴꦢꦺꦴ’’ꦠꦶ ꦮꦸꦠ꧀ꦠꦺꦴ.

ꦈꦤ꧀ꦤꦠꦺꦴꦠꦶ ‘‘ꦱꦺꦪ꧀ꦪꦺꦴꦲꦩꦱ꧀ꦩꦷ’’ꦠꦶꦄꦴꦢꦶꦤꦴ ꦈꦤ꧀ꦤꦠꦶꦁ ꦈꦥꦒꦠꦺꦴ. ꦄꦠ꧀ꦠꦸꦏ꧀ꦏꦁꦱꦤꦺ ꦥꦁꦱꦸꦏꦹꦭꦶꦏꦨꦴꦮꦺꦤ ꦄꦠ꧀ꦠꦴꦤꦁ ꦢꦲꦤꦠꦺꦴ ꦄꦚ꧀ꦚꦴꦏꦴꦫꦠꦴꦒꦲꦺꦠꦧ꧀ꦧꦺꦴ. ꦥꦴꦱꦴꦟꦺꦴ ꦤꦸ ꦑꦺꦴ ꦌꦱ ꦑꦴꦟꦸꦏꦺꦴꦠꦶ ꦒꦲꦺꦠꦧ꧀ꦧꦢꦴꦫꦸꦏ꧀ꦑꦤ꧀ꦣꦱꦢꦶꦱꦺꦴ ꦮꦸꦠ꧀ꦠꦺꦴ.

ꦕꦸꦟ꧀ꦟꦮꦶꦕꦸꦟ꧀ꦟꦁ ꦲꦺꦴꦠꦶ ꦄꦴꦮꦛ꧀ꦛꦮꦺꦒꦱ꧀ꦱ ꦧꦭꦮꦨꦴꦮꦠꦺꦴ. ꦕꦠꦹꦱꦸ ꦄꦥꦴꦪꦺꦱꦹꦠꦶ ꦥꦚ꧀ꦕꦏꦴꦩꦒꦸꦟꦴꦮꦛ꧀ꦛꦺ ꦥꦠꦶꦠꦥꦸꦒ꧀ꦒꦭꦺꦴ ꦩꦤꦸꦱ꧀ꦱꦭꦺꦴꦏꦺꦥꦶ ꦒꦸꦟꦱꦫꦷꦫꦨꦺꦢꦤꦺꦤ ꦢꦷꦓꦫꦠ꧀ꦠꦁ ꦕꦸꦟ꧀ꦟꦮꦶꦕꦸꦟ꧀ꦟꦁ ꦄꦴꦥꦗ꧀ꦗꦠꦶꦪꦺꦮ, ꦠꦱ꧀ꦱ ꦠꦡꦴ ꦄꦴꦥꦤ꧀ꦤꦠ꧀ꦠꦴ. ꦌꦮꦚ꧀ꦲꦶ ꦱꦺꦴ ꦄꦥꦴꦪꦺꦱꦸ ꦠꦴꦢꦶꦱꦺꦱꦸ ꦗꦴꦪꦠꦶ.

ꦱꦷꦭꦱ꧀ꦱ ꦢꦸꦛ꧀ꦜꦁ ꦤꦴꦩ ꦤꦠ꧀ꦡꦶ, ꦠꦱ꧀ꦩꦴ ꦄꦨꦴꦮꦠ꧀ꦡꦺꦴ ꦆꦣ ꦢꦸ-ꦱꦢ꧀ꦢꦺꦴꦠꦶ ꦄꦴꦲ ‘‘ꦤꦶꦱ꧀ꦱꦷꦭꦺꦴ’’ꦠꦶ. ‘‘ꦥꦴꦥꦁ ꦥꦴꦥꦺꦤ ꦱꦸꦏꦫ’’ꦤ꧀ꦠꦶꦄꦴꦢꦷꦱꦸ (ꦈꦢꦴ. ꧔꧘) ꦮꦶꦪ ꦥꦴꦥ-ꦱꦢ꧀ꦢꦺꦴ ꦤꦶꦲꦷꦤꦥꦫꦶꦪꦴꦪꦺꦴꦠꦶ ꦄꦴꦲ ‘‘ꦭꦴꦩꦏꦣꦩ꧀ꦩꦺꦴ’’ꦠꦶ. ꦤ ꦱꦸꦕꦷꦠꦶ ꦏꦴꦪꦮꦴꦕꦴꦕꦶꦠ꧀ꦠꦺꦲꦶ ꦤ ꦱꦸꦕꦶ. ꦱꦔ꧀ꦏꦴꦪ ꦮꦴꦠꦶ ꦄꦠ꧀ꦠꦤꦺꦴ ꦮꦴ ꦱꦔ꧀ꦏꦴꦪ ꦥꦫꦺꦱꦁ ꦱꦩꦴꦕꦴꦫꦏꦶꦫꦶꦪꦁ ꦱꦫꦠꦶ ꦄꦴꦱꦔ꧀ꦏꦠꦶ. ꦠꦺꦤꦴꦲ ‘‘ꦠꦱ꧀ꦱ ꦲꦷ’’ꦠꦶꦄꦴꦢꦶ. ꦠꦴꦤꦶ ꦏꦩ꧀ꦩꦴꦤꦶ ꦥꦮꦶꦱꦠꦷꦠꦶ ꦠꦴꦤꦶ ꦏꦩ꧀ꦩꦴꦤꦶ ꦏꦫꦺꦴꦤ꧀ꦠꦴꦤꦁ ꦄꦤ꧀ꦠꦫꦺ ꦥꦮꦶꦱꦠꦶ. ꦒꦸꦟꦴꦤꦁ ꦥꦹꦠꦶꦨꦴꦮꦺꦤꦴꦠꦶ ꦒꦸꦟꦨꦴꦮꦺꦤ ꦒꦲꦶꦠꦴꦤꦁ ꦱꦷꦭꦣꦩ꧀ꦩꦴꦤꦁ ꦱꦁꦏꦶꦭꦶꦛ꧀ꦜꦨꦴꦮꦥ꧀ꦥꦠ꧀ꦠꦶꦪꦴ. ꦏꦕꦮꦫꦗꦴꦠꦺꦴꦠꦶ ꦄꦧ꧀ꦨꦤ꧀ꦠꦫꦁ ꦱꦚ꧀ꦗꦴꦠꦏꦕꦮꦫꦺꦴ, ꦏꦕꦮꦫꦨꦹꦠꦺꦴ ꦮꦴ.

ꦄꦟꦟꦴ ꦥꦧ꧀ꦧꦗ꧀ꦗꦴꦠꦶ ꦄꦟꦟꦱ꧀ꦱꦺꦮ ꦥꦧ꧀ꦧꦗ꧀ꦗꦴ. ꦎꦫꦶꦩꦠꦷꦫꦴꦢꦷꦤꦁ ꦈꦥꦒꦩꦤꦴꦤꦸꦥꦒꦩꦤꦴꦢꦷꦤꦁ ꦗꦺꦴꦠꦶꦠꦠ꧀ꦠꦴ ꦮꦛ꧀ꦛꦮꦶꦮꦛ꧀ꦛꦁ ꦏꦡꦶꦠꦁ.

ꦥꦜꦩꦢꦴꦫꦸꦏ꧀ꦑꦤ꧀ꦣꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧕. ꦢꦸꦠꦶꦪꦢꦴꦫꦸꦏ꧀ꦑꦤ꧀ꦣꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ

꧒꧔꧒. ꦪꦴ ꦄꦴꦥꦠ꧀ꦠꦶ ꦮꦸꦛ꧀ꦜꦴꦤꦒꦴꦩꦶꦤꦷ ꦢꦺꦱꦤꦴꦒꦴꦩꦶꦤꦷ, ꦠꦁ ꦥꦛꦶꦕ꧀ꦖꦴꦢꦶꦠꦏꦴꦭꦠꦺꦴ ꦥꦛ꧀ꦜꦴꦪ ꦱꦁꦏꦶꦭꦶꦛ꧀ꦜꦴ ꦤꦴꦩ ꦄꦤ꧀ꦠꦫꦴꦪꦶꦏꦨꦴꦮꦠꦺꦴ. ꦄꦴꦮꦷꦏꦠꦴ ꦥꦤ ꦄꦤꦴꦥꦠ꧀ꦠꦶꦛ꧀ꦜꦴꦤꦺ ꦠꦶꦛ꧀ꦜꦠꦷꦠꦶ ꦄꦱꦁꦏꦶꦭꦶꦛ꧀ꦜꦴ ꦤꦴꦩ. ꦠꦺꦤꦴꦲ – ‘‘ꦄꦴꦮꦷꦏꦠꦴ ꦲꦶꦱ꧀ꦱ ꦦꦴꦱꦸ ꦲꦺꦴꦠꦷ’’ꦠꦶ. ꦌꦮꦫꦹꦥꦁ ꦱꦁꦏꦶꦭꦶꦛ꧀ꦜꦤ꧀ꦠꦶ ꦥꦛꦶꦕ꧀ꦖꦴꦢꦶꦠꦠꦴꦪ ꦮꦴ ꦢꦸꦛ꧀ꦜꦸꦭ꧀ꦭꦨꦴꦮꦺꦤ ꦮꦴ ꦱꦁꦏꦶꦭꦶꦛ꧀ꦜꦁ.

ꦢꦸꦠꦶꦪꦢꦴꦫꦸꦏ꧀ꦑꦤ꧀ꦣꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧖. ꦄꦮꦱ꧀ꦱꦸꦠꦥꦫꦶꦪꦴꦪꦱꦸꦠ꧀ꦠꦮꦟ꧀ꦟꦤꦴ

꧒꧔꧓. ꦱꦤ꧀ꦡꦴꦒꦴꦫꦤ꧀ꦠꦶ ꦱꦚ꧀ꦚꦴꦥꦤꦴꦒꦴꦫꦁ. ꦠꦺꦤꦴꦲ ‘‘ꦈꦪ꧀ꦪꦺꦴꦒꦏꦴꦭꦴꦢꦷꦱꦹ’’ꦠꦶꦄꦴꦢꦶ. ꦄꦴꦢꦶ-ꦱꦢ꧀ꦢꦺꦤ ꦩꦔ꧀ꦒꦭꦩꦲꦴꦢꦷꦤꦁ ꦱꦔ꧀ꦒꦲꦺꦴ ꦢꦛ꧀ꦜꦧ꧀ꦧꦺꦴ. ꦱꦤ꧀ꦡꦫꦤ꧀ꦠꦷꦠꦶ ꦮꦶꦱ꧀ꦱꦩꦤ꧀ꦠꦶ, ꦥꦫꦶꦱ꧀ꦱꦩꦁ ꦮꦶꦤꦺꦴꦢꦺꦤ꧀ꦠꦷꦠꦶ ꦄꦠ꧀ꦡꦺꦴ. ꦱꦲꦴꦠꦶ ꦱꦤ꧀ꦤꦶꦥꦴꦠꦮꦱꦺꦤ ꦌꦏꦗ꧀ꦙꦁ. ꦱꦲ ꦄꦠ꧀ꦡꦴꦤꦸꦱꦴꦱꦤꦁ ꦄꦒꦴꦫꦤ꧀ꦠꦶ ꦠꦱ꧀ꦩꦶꦁ ꦄꦠ꧀ꦡꦺ ꦠ꧀ꦡ-ꦏꦴꦫꦱ꧀ꦱ ꦤ꧀ꦡ-ꦏꦴꦫꦁ ꦏꦠ꧀ꦮꦴ ‘‘ꦱꦤ꧀ꦡꦴꦒꦴꦫ’’ꦤ꧀ꦠꦶ ꦮꦸꦕ꧀ꦕꦠꦷꦠꦶ ꦢꦛ꧀ꦜꦧ꧀ꦧꦁ, ꦥꦜꦩꦁ ꦠꦠ꧀ꦡ ꦱꦩ꧀ꦩꦤ꧀ꦠꦤꦮꦱꦺꦤ ꦱꦤ꧀ꦡꦫꦤ꧀ꦠꦶ ꦮꦶꦕꦴꦫꦺꦤ꧀ꦠꦷꦠꦶ ꦄꦠ꧀ꦡꦺꦴ.

ꦠꦺꦥꦶꦛꦏꦁ ꦧꦸꦢ꧀ꦣꦮꦕꦤꦁ ꦄꦴꦒꦠꦩꦺꦮ ꦨꦮꦶꦱ꧀ꦱꦠꦷꦠꦶ ꦧꦸꦢ꧀ꦣꦮꦕꦤꦱ꧀ꦱ ꦄꦴꦒꦩꦤꦱꦷꦱꦺꦤ ꦄꦫꦶꦪꦦꦭꦣꦩ꧀ꦩꦴꦤꦩ꧀ꦥꦶ ꦄꦴꦒꦩꦤꦁ ꦮꦸꦠ꧀ꦠꦩꦺꦮ. ꦠꦶꦪꦴꦩꦫꦠ꧀ꦠꦶꦁ ꦠꦠ꧀ꦡ ꦮꦱꦤ꧀ꦠꦴꦤꦁ ꦦꦭꦱꦩꦴꦥꦠ꧀ꦠꦶꦮꦭ꦳ꦚ꧀ꦗꦤꦁ ꦲꦺꦴꦠꦷꦠꦶ. ꦠꦱ꧀ꦩꦶꦚ꧀ꦕ ꦨꦶꦏ꧀ꦑꦸꦱꦔ꧀ꦓꦺ ꦏꦭ꧀ꦪꦴꦟꦣꦩ꧀ꦩꦴ ꦏꦭ꧀ꦪꦴꦟꦥꦸꦡꦸꦗ꧀ꦗꦤꦴ ꦮꦶꦥꦱ꧀ꦱꦤꦁ ꦈꦱ꧀ꦱꦸꦏ꧀ꦏꦴꦥꦺꦤ꧀ꦠꦴ ꦲꦺꦴꦤ꧀ꦠꦷꦠꦶ ꦄꦫꦶꦪꦩꦒ꧀ꦒꦣꦩ꧀ꦩꦴꦤꦩ꧀ꦥꦶ ꦠꦠ꧀ꦡ ꦄꦴꦒꦩꦤꦁ ꦲꦺꦴꦠꦶꦪꦺꦮ.

ꦄꦭ꧀ꦭꦒꦺꦴꦩꦪꦺꦤꦴꦠꦶ ꦄꦕ꧀ꦖꦺꦤ ꦄꦭ꧀ꦭꦒꦺꦴꦩꦪꦫꦱꦺꦤ. ꦎꦥꦸꦚ꧀ꦗꦴꦥꦺꦠ꧀ꦮꦴꦠꦶ ꦮꦶꦭꦶꦩ꧀ꦥꦺꦠ꧀ꦮꦴ. ꦕꦠꦸꦗ꧀ꦗꦴꦠꦶꦪꦒꦤ꧀ꦣꦺꦲꦷꦠꦶ ꦏꦸꦔ꧀ꦏꦸꦩꦠꦸꦫꦸꦏ꧀ꦑꦪꦮꦤꦥꦸꦥ꧀ꦦꦠꦩꦴꦭꦥꦠ꧀ꦠꦒꦤ꧀ꦣꦺꦲꦶ. ꦤꦴꦤꦴꦮꦟ꧀ꦟꦺꦠꦶ ꦤꦷꦭꦴꦢꦶꦮꦱꦺꦤ ꦤꦴꦤꦴꦮꦟ꧀ꦟꦺ, ꦨꦶꦠ꧀ꦠꦶꦮꦶꦱꦺꦱꦮꦱꦺꦤ ꦤꦴꦤꦴꦱꦟ꧀ꦜꦴꦤꦫꦹꦥꦺ. ‘‘ꦩꦲꦴꦥꦶꦛ꧀ꦜꦶꦏꦏꦺꦴꦗꦮꦺꦠꦶ ꦲꦠ꧀ꦡꦶꦥꦶꦛ꧀ꦜꦶꦄꦴꦢꦷꦱꦸ ꦄꦠ꧀ꦡꦫꦶꦠꦧ꧀ꦧꦠꦴꦪ ‘ꦩꦲꦴꦥꦶꦛ꧀ꦜꦶꦏꦴ’ꦠꦶ ꦭꦢ꧀ꦣꦱꦩꦚ꧀ꦚꦺ ꦏꦺꦴꦗꦮꦺ’’ꦠꦶ ꦮꦢꦤ꧀ꦠꦶ. ꦏꦸꦠ꧀ꦠꦏꦺ ꦥꦤ ꦱꦤ꧀ꦣꦴꦪꦺꦠꦁ ꦮꦸꦠ꧀ꦠꦁ, ‘‘ꦕꦠꦸꦫꦔ꧀ꦒꦸꦭꦴꦣꦶꦏꦥꦸꦥ꧀ꦦꦴ ꦩꦲꦴꦥꦶꦛ꧀ꦜꦶꦏꦏꦺꦴꦗꦮꦴ’’ꦠꦶꦥꦶ ꦮꦢꦤ꧀ꦠꦶ. ꦲꦠ꧀ꦡꦠ꧀ꦡꦫꦄꦱ꧀ꦱꦠ꧀ꦡꦫꦴ ꦲꦠ꧀ꦡꦶꦄꦱ꧀ꦱꦥꦶꦛ꧀ꦜꦷꦱꦸ ꦄꦠ꧀ꦡꦫꦶꦠꦧ꧀ꦧꦴ ꦲꦠ꧀ꦡꦶꦄꦱ꧀ꦱꦫꦹꦥꦮꦶꦕꦶꦠ꧀ꦠꦴ ꦕ ꦄꦠ꧀ꦡꦫꦏꦴ. ꦱꦷꦲꦠ꧀ꦡꦫꦏꦴꦢꦪꦺꦴ ꦥꦤ ꦱꦷꦲꦫꦹꦥꦴꦢꦶꦮꦶꦕꦶꦠ꧀ꦠꦴ ꦌꦮ ꦄꦠ꧀ꦡꦫꦏꦴ. ꦕꦶꦠ꧀ꦠꦠ꧀ꦡꦫꦏꦁ ꦤꦴꦤꦴꦮꦶꦣꦫꦹꦥꦺꦲꦶ ꦕꦺꦮ ꦤꦴꦤꦴꦮꦶꦣꦩꦴꦭꦴꦏꦩ꧀ꦩꦴꦢꦷꦲꦶ ꦕ ꦮꦶꦕꦶꦠ꧀ꦠꦁ ꦄꦠ꧀ꦡꦫꦏꦁ.

ꦈꦥꦣꦴꦤꦤ꧀ꦠꦶ ꦄꦥꦱ꧀ꦱꦪꦤꦁ. ꦈꦥꦢꦲꦶꦠ꧀ꦮꦴꦠꦶ ꦄꦥꦱ꧀ꦱꦪꦪꦺꦴꦒ꧀ꦒꦨꦴꦮꦺꦤ ꦜꦥꦺꦠ꧀ꦮꦴ. ꦒꦤ꧀ꦣꦺꦲꦶ ꦏꦠꦩꦴꦭꦴ ꦒꦤ꧀ꦣꦢꦴꦩꦁ. ꦠꦩꦴꦭꦥꦠ꧀ꦠꦴꦢꦷꦲꦶ ꦏꦠꦩꦴꦭꦴ ꦥꦠ꧀ꦠꦢꦴꦩꦁ. ꦄꦴꦢꦶ-ꦱꦢ꧀ꦢꦺꦤ ꦲꦶꦔ꧀ꦒꦸꦭꦠꦏ꧀ꦏꦺꦴꦭꦗꦴꦠꦶꦦꦭꦗꦴꦠꦶꦥꦸꦥ꧀ꦦꦴꦢꦷꦲꦶ ꦏꦠꦢꦴꦩꦁ ꦱꦔ꧀ꦒꦟ꧀ꦲꦴꦠꦶ. ꦥꦭ꧀ꦭꦔ꧀ꦏꦴꦏꦴꦫꦺꦤ ꦏꦠꦥꦷꦜꦁ ꦥꦭ꧀ꦭꦔ꧀ꦏꦥꦷꦜꦁ. ꦠꦷꦱꦸ ꦥꦱ꧀ꦱꦺꦱꦸ ꦌꦏꦥꦱ꧀ꦱꦺ ꦌꦮ ꦮꦴ ꦱꦈꦥꦱ꧀ꦱꦪꦁ ꦄꦥꦱ꧀ꦱꦪꦥꦷꦜꦁ. ꦄꦤꦥꦱ꧀ꦱꦪꦁ ꦩꦸꦟ꧀ꦝꦥꦷꦜꦁ. ꦪꦺꦴꦗꦤꦴꦮꦛ꧀ꦛꦺꦠꦶ ꦪꦺꦴꦗꦤꦥꦫꦶꦏ꧀ꦑꦺꦥꦺꦴꦏꦴꦱꦺ.

ꦱꦁꦮꦶꦣꦴꦪꦴꦠꦶ ꦄꦤ꧀ꦠꦫꦮꦴꦱꦏꦱ꧀ꦱ ꦏꦺꦴꦟꦥꦢꦺꦱꦁ ꦆꦠꦫꦥꦢꦺꦱꦚ꧀ꦕ ꦱꦩꦁ ꦏꦠ꧀ꦮꦴ ꦮꦶꦣꦴꦪ. ꦠꦺꦤꦴꦲ – ‘‘ꦏꦠ꧀ꦠꦫꦶꦪꦴ ꦥꦢꦸꦩꦁ ꦏꦤ꧀ꦠꦺꦤ꧀ꦠꦺꦴ ꦮꦶꦪꦴ’’ꦠꦶ, ‘‘ꦠꦶꦩꦟ꧀ꦝꦭꦁ ꦥꦛꦶꦕ꧀ꦖꦴꦢꦺꦤ꧀ꦠꦺꦴ’’ꦠꦶ ꦕ. ꦪꦱ꧀ꦩꦴ ꦧꦸꦢ꧀ꦣꦴꦤꦁ ꦫꦹꦥꦱꦩ꧀ꦥꦢꦴ ꦮꦶꦪ ꦄꦴꦏꦥ꧀ꦥꦱꦩ꧀ꦥꦢꦴꦥꦶ ꦥꦫꦩꦸꦏ꧀ꦏꦁꦱꦠꦁ ꦒꦠꦴ, ꦠꦱ꧀ꦩꦴ ꦠꦢꦴ ꦨꦒꦮꦴ ꦌꦮꦁ ꦱꦺꦴꦨꦺꦪ꧀ꦪꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦱꦸꦮꦟ꧀ꦟꦥꦴꦩꦔ꧀ꦒꦺꦤꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ‘‘ꦄꦱꦩꦺꦤ ꦧꦸꦢ꧀ꦣꦮꦺꦱꦺꦤꦴ’’ꦠꦶꦄꦴꦢꦶꦤꦴ ꦠꦢꦴ ꦨꦒꦮꦴ ꦧꦸꦢ꧀ꦣꦴꦤꦸꦨꦴꦮꦱ꧀ꦱ ꦤꦶꦒꦸꦲꦤꦺ ꦏꦴꦫꦟꦴꦨꦴꦮꦠꦺꦴ ꦠꦠ꧀ꦡ ꦱꦤ꧀ꦤꦶꦥꦠꦶꦠꦢꦺꦮꦩꦤꦸꦱ꧀ꦱꦤꦴꦒꦪꦏ꧀ꦑꦒꦤ꧀ꦣꦧ꧀ꦧꦴꦢꦷꦤꦁ ꦥꦱꦴꦢꦗꦤꦤꦠ꧀ꦡꦁ ꦄꦠ꧀ꦠꦤꦺꦴ ꦱꦨꦴꦮꦥꦏꦠꦶꦪꦴꦮ ꦏꦥꦶꦭꦮꦠ꧀ꦡꦸꦁ ꦥꦴꦮꦶꦱꦷꦠꦶ ꦢꦱ꧀ꦱꦺꦠꦶ. ꦧꦸꦢ꧀ꦣꦴꦤꦁ ꦏꦴꦪꦥꦨꦴ ꦤꦴꦩ ꦥꦏꦠꦶꦪꦴ ꦄꦱꦷꦠꦶꦲꦠ꧀ꦡꦩꦠ꧀ꦠꦥꦢꦺꦱꦁ ꦮꦶꦱꦫꦠꦷꦠꦶ ꦄꦴꦲ ‘‘ꦄꦱꦷꦠꦶꦲꦠ꧀ꦡꦛ꧀ꦜꦴꦤꦁ ꦄꦒ꧀ꦒꦲꦺꦱꦷ’’ꦠꦶ. ꦤꦷꦭꦥꦷꦠꦭꦺꦴꦲꦶꦠꦺꦴꦢꦴꦠꦩꦚ꧀ꦗꦶꦛ꧀ꦜꦥꦨꦱ꧀ꦱꦫꦴꦤꦁ ꦮꦱꦺꦤ ꦖꦧ꧀ꦧꦟ꧀ꦟꦴ ꦧꦸꦢ꧀ꦣꦫꦱ꧀ꦩꦶꦪꦺꦴ.

ꦱꦧ꧀ꦧꦥꦴꦭꦶꦦꦸꦭ꧀ꦭꦺꦴꦠꦶ ꦩꦹꦭꦠꦺꦴ ꦥꦛ꧀ꦜꦴꦪ ꦪꦴꦮ ꦱꦴꦑꦒ꧀ꦒꦴ ꦱꦩꦤ꧀ꦠꦠꦺꦴ ꦦꦸꦭ꧀ꦭꦺꦴ ꦮꦶꦏꦱꦶꦠꦺꦴ. ꦥꦛꦶꦥꦴꦛꦶꦪꦴ ꦜꦥꦶꦠꦴꦤꦤ꧀ꦠꦶꦄꦴꦢꦶ ꦥꦫꦶꦏꦥ꧀ꦥꦹꦥꦩꦴ, ꦪꦡꦴ ꦠꦁ…ꦥꦺ… ꦄꦭꦔ꧀ꦏꦠꦁ ꦄꦚ꧀ꦚꦁ ꦮꦶꦫꦺꦴꦕꦠꦶ, ꦌꦮꦁ ꦮꦶꦫꦺꦴꦕꦶꦠ꧀ꦡ, ꦱꦩꦠꦶꦁꦱꦴꦪ ꦥꦴꦫꦩꦶꦠꦴꦲꦶ ꦄꦨꦶꦱꦔ꧀ꦑꦠꦠ꧀ꦠꦴ ꦌꦮꦁ ꦮꦶꦫꦺꦴꦕꦶꦠ꧀ꦡꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ‘‘ꦥꦚ꧀ꦕꦮꦷꦱꦠꦶꦪꦴ ꦒꦔ꧀ꦒꦴꦤꦤ꧀ꦠꦶ ꦱꦠꦩꦸꦑꦴ ꦲꦸꦠ꧀ꦮꦴ ꦱꦩꦸꦢ꧀ꦢꦁ ꦥꦮꦶꦛ꧀ꦜꦴꦪ ꦩꦲꦴꦒꦔ꧀ꦒꦴꦪ ꦩꦲꦤ꧀ꦠꦩꦲꦤ꧀ꦠꦴꦤꦁ ꦒꦔ꧀ꦒꦴꦤꦁ ꦥꦚ꧀ꦕꦮꦷꦱꦠꦷ’’ꦠꦶ ꦮꦢꦤ꧀ꦠꦶ. ꦥꦥꦚ꧀ꦕꦱꦹꦢꦤꦶꦪꦁ (ꦩ. ꦤꦶ. ꦄꦛ꧀ꦜ. ꧒.꧒꧒) ‘‘ꦥꦚ꧀ꦕꦮꦷꦱꦠꦶꦪꦴ ꦤꦢꦷꦤ’’ꦤ꧀ꦠꦶ ꦮꦸꦠ꧀ꦠꦁ, ꦒꦔ꧀ꦒꦴꦢꦷꦤꦁ ꦕꦤ꧀ꦢꦨꦴꦒꦴꦥꦫꦶꦪꦺꦴꦱꦴꦤꦴꦤꦁ ꦥꦚ꧀ꦕꦮꦷꦱꦠꦶꦪꦴ ꦩꦲꦴꦤꦢꦷꦤꦤ꧀ꦠꦶ ꦄꦠ꧀ꦡꦺꦴ. ꦥꦫꦶꦏꦥ꧀ꦥꦮꦕꦤꦚ꧀ꦲꦺꦠꦁ. ꦱꦩ꧀ꦨꦶꦗ꧀ꦗꦴꦠꦶ ꦱꦩ꧀ꦨꦺꦢꦁ ꦩꦶꦱ꧀ꦱꦷꦨꦴꦮꦁ ꦥꦠ꧀ꦮꦴ ꦩꦸꦑꦢ꧀ꦮꦴꦫꦺꦠꦶ ꦱꦩꦸꦢ꧀ꦢꦁ ꦥꦮꦶꦛ꧀ꦜꦛ꧀ꦜꦴꦤꦺ.

ꦤꦴꦒꦱꦸꦥꦟ꧀ꦟꦒꦤ꧀ꦣꦧ꧀ꦧꦪꦏ꧀ꦑꦴꦢꦷꦤꦤ꧀ꦠꦶꦄꦴꦢꦶ ꦥꦫꦶꦏꦥ꧀ꦥꦮꦱꦺꦤ ꦮꦸꦠ꧀ꦠꦁ. ꦱꦲꦱ꧀ꦱꦺꦤꦴꦠꦶ ꦥꦢꦱꦲꦱ꧀ꦱꦺꦤ, ꦨꦴꦟꦮꦴꦫꦥ꧀ꦥꦩꦴꦟꦺꦤ ꦒꦤ꧀ꦡꦺꦤꦴꦠꦶ ꦄꦠ꧀ꦡꦺꦴ.

ꦏꦩ꧀ꦥꦪꦤ꧀ꦠꦺꦴ ꦮꦱꦸꦤ꧀ꦣꦫꦤ꧀ꦠꦶ ꦄꦠ꧀ꦠꦤꦺꦴ ꦒꦸꦟꦮꦶꦱꦺꦱꦺꦲꦶ ꦥꦡꦮꦷꦏꦩ꧀ꦩꦁ ꦈꦤ꧀ꦤꦴꦢꦺꦤ꧀ꦠꦺꦴ, ꦌꦮꦁꦨꦹꦠꦺꦴꦥꦶ ꦄꦲꦺꦜꦪꦤ꧀ꦠꦺꦴ ꦥꦴꦟꦴꦤꦶ. ꦱꦧ꧀ꦧꦥꦢꦏ꧀ꦑꦶꦟꦠ꧀ꦠꦴ ꦧꦸꦢ꧀ꦣꦴꦤꦁ ꦢꦏ꧀ꦑꦶꦟꦁ ꦥꦜꦩꦁ ꦥꦴꦢꦁ ꦈꦢ꧀ꦣꦫꦤ꧀ꦠꦺꦴ. ꦱꦩꦁ ꦱꦩ꧀ꦦꦸꦱꦠꦺ ꦨꦹꦩꦶꦁ ꦱꦸꦥ꧀ꦥꦠꦶꦛ꧀ꦜꦶꦠꦥꦴꦢꦠꦴꦪ. ꦪꦢꦶꦥꦶ ꦨꦹꦩꦶꦁ ꦱꦩꦁ ꦦꦸꦱꦠꦶ, ꦫꦗꦱꦴ ꦤꦸꦥꦭꦶꦥ꧀ꦥꦠꦶ ꦱꦸꦑꦸꦩꦠ꧀ꦠꦴ ꦖꦮꦶꦪꦴ. ꦤꦶꦤ꧀ꦤꦛ꧀ꦜꦴꦤꦁ ꦈꦤ꧀ꦤꦩꦠꦷꦠꦶꦄꦴꦢꦶ ꦧꦸꦢ꧀ꦣꦴꦤꦁ ꦱꦸꦥ꧀ꦥꦠꦶꦛ꧀ꦜꦶꦠꦥꦴꦢꦠꦴꦱꦔ꧀ꦑꦴꦠꦩꦲꦴꦥꦸꦫꦶꦱꦭꦏ꧀ꦑꦟꦥꦛꦶꦭꦴꦨꦱ꧀ꦱ ꦤꦶꦱ꧀ꦱꦤ꧀ꦢꦦꦭꦁ. ꦤꦴꦠꦶꦢꦹꦫꦺ ꦈꦢ꧀ꦣꦫꦠꦷꦠꦶ ꦄꦠꦶꦢꦹꦫꦺ ꦜꦥꦺꦠꦸꦁ ꦤ ꦈꦢ꧀ꦣꦫꦠꦶ. ꦤꦕ꧀ꦕꦴꦱꦤ꧀ꦤꦺ ꦕ ꦤꦶꦏ꧀ꦑꦶꦥꦤ꧀ꦠꦶ ꦄꦕ꧀ꦕꦴꦱꦤ꧀ꦤꦺ ꦕ ꦜꦴꦤꦺ ꦄꦤꦶꦏ꧀ꦑꦶꦥꦤ꧀ꦠꦺꦴ ꦤꦶꦪ꧀ꦪꦴꦠꦶ. ꦲꦴꦱꦪꦤ꧀ꦠꦺꦴ ꦱꦢꦺꦮꦏꦺ ꦭꦺꦴꦏꦺ ꦠꦺꦴꦱꦺꦤ꧀ꦠꦺꦴ. ꦕꦠꦹꦲꦶ ꦥꦴꦢꦺꦲꦶ ꦕꦫꦠꦷꦠꦶ ꦕꦠꦸꦕꦴꦫꦷ.

ꦧꦸꦢ꧀ꦣꦴꦤꦸꦨꦴꦮꦱ꧀ꦱ ꦥꦏꦴꦱꦤꦮꦱꦺꦤ ꦒꦠꦠ꧀ꦠꦴ ꦮꦟ꧀ꦟꦏꦴꦭꦺꦴ ꦤꦴꦩ ꦌꦱ. ꦱꦫꦷꦫꦮꦟ꧀ꦟꦺ ꦮꦴ ꦒꦸꦟꦮꦟ꧀ꦟꦺ ꦮꦴ ꦏꦡꦶꦪꦩꦴꦤꦺ ꦢꦸꦏ꧀ꦏꦡꦶꦠꦤ꧀ꦠꦶ ꦤ ꦮꦠ꧀ꦠꦧ꧀ꦧꦁ. ꦏꦱ꧀ꦩꦴ? ꦄꦥ꧀ꦥꦩꦴꦟꦮꦟ꧀ꦟꦴ ꦲꦶ ꦧꦸꦢ꧀ꦣꦴ ꦨꦒꦮꦤ꧀ꦠꦺꦴ, ꦧꦸꦢ꧀ꦣꦒꦸꦟꦱꦁꦮꦟ꧀ꦟꦤꦴ ꦗꦴꦤꦤ꧀ꦠꦱ꧀ꦱ ꦪꦡꦴꦫꦢ꧀ꦣꦱꦁꦮꦟ꧀ꦟꦤꦁꦪꦺꦮ ꦄꦤꦸꦥꦮꦶꦱꦠꦶ. ꦢꦸꦏꦹꦭꦕꦸꦩ꧀ꦧꦛꦏꦺꦤꦴꦠꦶ ꦒꦤ꧀ꦡꦶꦠ꧀ꦮꦴ ꦒꦲꦶꦠꦢꦸꦏꦹꦭꦮꦠ꧀ꦡꦺꦤ.

ꦤꦴꦒꦮꦶꦏ꧀ꦏꦤ꧀ꦠꦕꦴꦫꦟꦺꦴꦠꦶ ꦲꦠ꧀ꦡꦶꦤꦴꦒꦱꦢꦶꦱꦥꦢꦤꦶꦏ꧀ꦑꦺꦥꦺꦴ. ꦱꦠꦥꦸꦚ꧀ꦚꦭꦏ꧀ꦑꦟꦺꦴꦠꦶ ꦄꦤꦺꦏꦱꦠꦥꦸꦚ꧀ꦚꦴꦨꦶꦤꦶꦧ꧀ꦧꦠ꧀ꦠꦩꦲꦴꦥꦸꦫꦶꦱꦭꦏ꧀ꦑꦟꦺꦴ. ꦩꦟꦶꦮꦺꦫꦺꦴꦕꦤꦺꦴ ꦪꦡꦴꦠꦶ ꦕꦠꦸꦫꦴꦱꦷꦠꦶꦱꦲꦱ꧀ꦱꦩꦟꦶꦥꦫꦶꦮꦴꦫꦶꦠꦺꦴ ꦄꦠꦶꦮꦶꦪ ꦮꦶꦫꦺꦴꦕꦩꦴꦤꦺꦴ ꦮꦶꦗ꧀ꦗꦺꦴꦠꦩꦴꦤꦺꦴ ꦩꦟꦶ ꦮꦶꦪ. ‘‘ꦮꦺꦫꦺꦴꦕꦤꦺꦴ ꦤꦴꦩ ꦌꦏꦺꦴ ꦩꦟꦷ’’ꦠꦶ ꦏꦺꦕꦶ. ꦩꦲꦴꦱꦴꦭꦺꦴꦮꦴꦠꦶ ꦩꦲꦤ꧀ꦠꦺꦴ ꦱꦴꦭꦫꦸꦏ꧀ꦑꦺꦴ ꦮꦶꦪ, ꦱꦸꦢ꧀ꦣꦛ꧀ꦜꦶꦠꦺꦴ ꦏꦺꦴꦮꦶꦭ꦳ꦴꦫꦴꦢꦶ ꦩꦲꦴꦫꦸꦏ꧀ꦑꦺꦴ ꦮꦶꦪ ꦮꦴ. ꦥꦢꦸꦩꦺꦴ ꦏꦺꦴꦏꦤꦢꦺꦴ ꦪꦡꦴꦠꦶ ꦏꦺꦴꦏꦤꦢꦱꦔ꧀ꦑꦴꦠꦁ ꦩꦲꦴꦥꦢꦸꦩꦁ ꦮꦶꦪ, ꦮꦶꦏꦱꦩꦴꦤꦥꦢꦸꦩꦁ ꦮꦶꦪ ꦮꦴ.

ꦄꦴꦏꦴꦱꦒꦔ꧀ꦒꦁ ꦎꦠꦴꦫꦺꦤ꧀ꦠꦺꦴ ꦮꦶꦪꦴꦠꦶꦄꦴꦢꦶ ꦠꦱ꧀ꦱꦴ ꦥꦏꦶꦟ꧀ꦟꦏꦏꦡꦴꦪ ꦄꦚ꧀ꦚꦺꦱꦁ ꦱꦸꦢꦸꦏ꧀ꦏꦫꦨꦴꦮꦢꦱ꧀ꦱꦤꦚ꧀ꦕꦺꦮ ꦱꦸꦟꦤ꧀ꦠꦴꦤꦁ ꦄꦕ꧀ꦕꦤ꧀ꦠꦱꦸꦑꦴꦮꦲꦨꦴꦮꦢꦱ꧀ꦱꦤꦚ꧀ꦕ. ꦥꦡꦮꦺꦴꦗꦁ ꦄꦴꦏꦝ꧀ꦞꦤ꧀ꦠꦺꦴ ꦮꦶꦪꦴꦠꦶ ꦤꦴꦭ꦳ꦶꦪꦤ꧀ꦠꦁ ꦪꦺꦴꦗꦺꦠ꧀ꦮꦴ ꦩꦲꦴꦥꦡꦮꦶꦪꦴ ꦲꦺꦛ꧀ꦜꦶꦩꦠꦭꦺ ꦥꦥ꧀ꦥꦛꦏꦺꦴꦗꦁ ꦈꦢ꧀ꦣꦁ ꦩꦸꦑꦁ ꦏꦠ꧀ꦮꦴ ꦄꦴꦏꦝ꧀ꦞꦤ꧀ꦠꦺꦴ ꦮꦶꦪ. ꦪꦺꦴꦗꦤꦶꦏꦤ꧀ꦠꦶ ꦪꦺꦴꦗꦤꦥꦩꦴꦟꦁ. ꦩꦣꦸꦨꦟ꧀ꦝꦤ꧀ꦠꦶ ꦩꦣꦸꦥꦛꦭꦁ.

ꦩꦲꦤ꧀ꦠꦤ꧀ꦠꦶ ꦮꦶꦥꦸꦭꦁ ꦈꦭ꦳ꦴꦫꦥꦸꦚ꧀ꦚꦁ. ꦱꦧ꧀ꦧꦢꦴꦤꦁ ꦢꦶꦤ꧀ꦤꦩꦺꦮ ꦲꦺꦴꦠꦷꦠꦶ ꦱꦧ꧀ꦧꦩꦺꦮ ꦥꦕ꧀ꦕꦪꦗꦴꦠꦁ ꦄꦴꦮꦴꦱꦢꦴꦪꦏꦺꦤ ꦢꦶꦤ꧀ꦤꦩꦺꦮ ꦲꦺꦴꦠꦶ. ꦠꦡꦴ ꦲꦶ ꦢ꧀ꦮꦺ ꦠꦪꦺꦴ ꦒꦴꦩꦺ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦏꦶꦚ꧀ꦕꦶ ꦄꦭꦢ꧀ꦣꦴ ꦄꦴꦒꦠꦱ꧀ꦱꦥꦶ ꦖꦴꦪꦹꦢꦏꦱꦩ꧀ꦥꦤ꧀ꦤꦁ ꦄꦴꦫꦴꦩꦁ ꦥꦮꦶꦱꦶꦠ꧀ꦮꦴ ꦤ꧀ꦲꦴꦪꦶꦠ꧀ꦮꦴ ꦥꦛꦶꦱ꧀ꦱꦪꦺ ꦩꦸꦲꦸꦠ꧀ꦠꦁ ꦤꦶꦥꦗ꧀ꦗꦶꦠ꧀ꦮꦴ ꦈꦛ꧀ꦜꦴꦪ ꦤꦶꦱꦶꦤ꧀ꦤꦱ꧀ꦱ ꦏꦴꦪꦺ ꦧꦭꦁ ꦄꦴꦲꦫꦶꦠ꧀ꦮꦴ ꦥꦏ꧀ꦑꦶꦠ꧀ꦠꦁ ꦮꦶꦪ ꦲꦺꦴꦠꦶ. ꦧꦲꦶ ꦮꦶꦕꦫꦤ꧀ꦠꦱ꧀ꦱ ꦕ ꦏꦴꦪꦺ ꦮꦟ꧀ꦟꦣꦴꦠꦸ ꦮꦴꦠꦴꦠꦥꦺꦲꦶ ꦏꦶꦭꦩꦠꦶ, ꦥꦛꦶꦱ꧀ꦱꦪꦁ ꦥꦮꦶꦱꦶꦠ꧀ꦮꦴ ꦢ꧀ꦮꦴꦫꦁ ꦥꦶꦣꦴꦪ ꦩꦸꦲꦸꦠ꧀ꦠꦁ ꦤꦶꦱꦶꦤ꧀ꦤꦱ꧀ꦱ ꦮꦶꦱꦨꦴꦒꦱꦤ꧀ꦠꦠꦶ ꦮꦹꦥꦱꦩ꧀ꦩꦠꦶ, ꦱꦨꦴꦒꦱꦤ꧀ꦠꦠꦶ ꦥꦠꦶꦛ꧀ꦜꦴꦠꦶ, ꦮꦟ꧀ꦟꦣꦴꦠꦸ ꦄꦴꦲꦫꦶꦠ꧀ꦮꦴ ꦥꦏ꧀ꦑꦶꦠ꧀ꦠꦴ ꦮꦶꦪ ꦲꦺꦴꦠꦶ, ꦧꦲꦶ ꦮꦶꦕꦫꦤ꧀ꦠꦱ꧀ꦱ ꦕ ꦥꦴꦢꦺ ꦏꦟ꧀ꦛꦏꦴ ꦮꦶꦗ꧀ꦙꦤ꧀ꦠꦶ, ꦑꦴꦟꦸ ꦥꦲꦫꦠꦶ, ꦱꦫꦷꦱꦥꦴꦢꦶꦥꦫꦶꦱ꧀ꦱꦪꦴ ꦕꦺꦮ ꦕꦺꦴꦫꦨꦪꦚ꧀ꦕ ꦈꦥ꧀ꦥꦗ꧀ꦗꦠꦶ, ꦥꦛꦶꦱ꧀ꦱꦪꦁ ꦥꦮꦶꦱꦶꦠ꧀ꦮꦴ ꦢ꧀ꦮꦴꦫꦁ ꦥꦶꦣꦴꦪ ꦤꦶꦱꦶꦤ꧀ꦤꦱ꧀ꦱ ꦥꦤ ꦱꦧ꧀ꦧꦺꦥꦺꦠꦺ ꦥꦫꦶꦱ꧀ꦱꦪꦴ ꦤ ꦲꦺꦴꦤ꧀ꦠꦶ. ꦱꦗ꧀ꦙꦴꦪꦤ꧀ꦠꦱ꧀ꦱ ꦣꦩ꧀ꦩꦥꦷꦠꦶꦱꦸꦑꦁ, ꦏꦩ꧀ꦩꦛ꧀ꦜꦴꦤꦁ ꦩꦤꦱꦶꦏꦫꦺꦴꦤ꧀ꦠꦱ꧀ꦱ ꦈꦥꦱꦩꦱꦸꦑꦁ ꦈꦥ꧀ꦥꦗ꧀ꦗꦠꦶ ꦧꦲꦶꦢ꧀ꦣꦴ ꦮꦶꦏ꧀ꦑꦺꦥꦴꦨꦴꦮꦠꦺꦴ. ꦧꦲꦶ ꦮꦶꦕꦫꦤ꧀ꦠꦱ꧀ꦱ ꦕ ꦏꦴꦪꦺ ꦱꦺꦢꦴ ꦩꦸꦕ꧀ꦕꦤ꧀ꦠꦶ, ꦄꦏ꧀ꦑꦷꦤꦶ ꦦꦤ꧀ꦢꦤ꧀ꦠꦶ, ꦱꦺꦤꦴꦱꦤꦁ ꦥꦮꦶꦱꦤꦏ꧀ꦑꦟꦺ ꦩꦚ꧀ꦕꦥꦷꦜꦴꦢꦷꦤꦶ ꦤ ꦥꦚ꧀ꦚꦴꦪꦤ꧀ꦠꦶ, ꦩꦸꦲꦸꦠ꧀ꦠꦁ ꦤꦶꦱꦶꦤ꧀ꦤꦱ꧀ꦱ ꦥꦤ ꦄꦏ꧀ꦑꦶꦥꦱꦴꦢꦺꦴ ꦄꦴꦲꦫꦶꦠ꧀ꦮꦴ ꦥꦏ꧀ꦑꦶꦠ꧀ꦠꦺꦴ ꦮꦶꦪ ꦲꦺꦴꦠꦶ, ꦢ꧀ꦮꦴꦫꦮꦴꦠꦥꦴꦤꦩꦚ꧀ꦕꦥꦷꦜꦴꦢꦷꦤꦶ ꦥꦚ꧀ꦚꦴꦪꦤ꧀ꦠꦶ. ꦌꦠꦱ꧀ꦩꦶꦚ꧀ꦕ ꦄꦴꦮꦴꦱꦺ ꦮꦱꦤ꧀ꦠꦁ ꦢꦶꦱ꧀ꦮꦴ ꦩꦤꦸꦱ꧀ꦱꦴ ꦕꦠꦹꦲꦶ ꦥꦕ꧀ꦕꦪꦺꦲꦶ ꦱꦏ꧀ꦏꦕ꧀ꦕꦁ ꦈꦥꦛ꧀ꦜꦲꦤ꧀ꦠꦶ. ꦠꦺꦤ ꦮꦸꦠ꧀ꦠꦁ – ‘‘ꦄꦴꦮꦴꦱꦢꦴꦤꦱ꧀ꦩꦶꦚ꧀ꦲꦶ ꦢꦶꦤ꧀ꦤꦺ ꦱꦧ꧀ꦧꦢꦴꦤꦁ ꦢꦶꦤ꧀ꦤꦩꦺꦮ ꦲꦺꦴꦠꦷ’’ꦠꦶ. ꦨꦹꦩꦛ꧀ꦜꦏ…ꦥꦺ… ꦤ ꦱꦏ꧀ꦏꦴꦠꦶ ꦄꦪꦩꦠ꧀ꦡꦺꦴ ꦩꦲꦴꦱꦸꦢꦱ꧀ꦱꦤꦮꦠ꧀ꦡꦸꦤꦴ (ꦢꦷ. ꦤꦶ. ꧒.꧒꧔꧑ ꦄꦴꦢꦪꦺꦴ) ꦢꦷꦥꦺꦠꦧ꧀ꦧꦺꦴ. ꦩꦴꦠꦸꦏꦸꦕ꧀ꦖꦶ ꦄꦱꦩ꧀ꦧꦴꦣꦺꦴꦮ ꦲꦺꦴꦠꦷꦠꦶ ꦄꦪꦩꦠ꧀ꦡꦺꦴ ꦄꦤ꧀ꦠꦶꦩꦨꦮꦶꦏꦴꦤꦁ ꦩꦲꦴꦧꦺꦴꦣꦶꦱꦠ꧀ꦠꦴꦤꦁ ꦥꦛꦶꦱꦤ꧀ꦣꦶꦮꦱꦺꦤ ꦢꦷꦥꦺꦠꦧ꧀ꦧꦺꦴ.

ꦱꦷꦠꦤ꧀ꦠꦶ ꦄꦗ꧀ꦙꦠ꧀ꦠꦁ ꦣꦴꦠꦸꦏ꧀ꦑꦺꦴꦨꦮꦱꦺꦤ ꦮꦴ ꦧꦲꦶꦢ꧀ꦣꦴ ꦈꦠꦸꦮꦶꦥꦫꦶꦟꦴꦩꦮꦱꦺꦤ ꦮꦴ ꦈꦥ꧀ꦥꦗ꧀ꦗꦤꦏꦱꦷꦠꦁ. ꦈꦟ꧀ꦲꦤ꧀ꦠꦶ ꦄꦒ꧀ꦒꦶꦱꦤ꧀ꦠꦴꦥꦁ, ꦠꦱ꧀ꦱ ꦕ ꦢꦮꦢꦴꦲꦴꦢꦷꦱꦸ ꦱꦩ꧀ꦨꦮꦺꦴ ꦢꦛ꧀ꦜꦧ꧀ꦧꦺꦴ. ꦥꦛꦶꦲꦤ꧀ꦠꦷꦠꦶ ꦥꦛꦶꦲꦤꦠꦶ. ꦪꦡꦴ ꦠꦢꦸꦨꦪꦮꦱꦺꦤ ꦏꦴꦪꦕꦶꦠ꧀ꦠꦴꦤꦁ ꦄꦴꦧꦴꦣꦺꦴ ꦤ ꦲꦤꦠꦶ, ꦌꦮꦁ ꦏꦫꦺꦴꦠꦶ. ꦱꦷꦠꦸꦟ꧀ꦲꦧ꧀ꦨꦴꦲꦠꦺ ꦲꦶ ꦱꦫꦷꦫꦺ ꦮꦶꦏ꧀ꦑꦶꦠ꧀ꦠꦕꦶꦠ꧀ꦠꦺꦴ ꦨꦶꦏ꧀ꦑꦸ ꦪꦺꦴꦤꦶꦱꦺꦴ ꦥꦢꦲꦶꦠꦸꦁ ꦤ ꦱꦏ꧀ꦏꦺꦴꦠꦶ. ꦮꦴꦭ꦳ꦩꦶꦒꦴꦤꦷꦠꦶ ꦱꦷꦲꦧ꧀ꦪꦒ꧀ꦓꦴꦢꦶꦮꦴꦭ꦳ꦩꦶꦒꦺ. ꦒꦸꦠ꧀ꦠꦱꦺꦤꦴꦱꦤꦚ꧀ꦲꦶ ꦥꦮꦶꦱꦶꦠ꧀ꦮꦴ ꦢ꧀ꦮꦴꦫꦁ ꦥꦶꦣꦴꦪ ꦤꦶꦱꦶꦤ꧀ꦤꦱ꧀ꦱ ꦠꦺ ꦥꦫꦶꦱ꧀ꦱꦪꦴ ꦤ ꦲꦺꦴꦤ꧀ꦠꦶ. ꦱꦫꦷꦱꦥꦺꦠꦶ ꦪꦺ ꦏꦺꦕꦶ ꦱꦫꦤ꧀ꦠꦴ ꦒꦕ꧀ꦖꦤ꧀ꦠꦺ ꦢꦷꦓꦗꦴꦠꦶꦏꦺ ꦱꦥ꧀ꦥꦴꦢꦶꦏꦺ ꦄꦚ꧀ꦚꦺ ꦕ ꦠꦡꦴꦫꦹꦥꦺ. ꦩꦏꦱꦺꦠꦶ ꦤꦶꦢꦱ꧀ꦱꦤꦩꦠ꧀ꦠꦩꦺꦠꦁ, ꦝꦁꦱꦴꦢꦷꦤꦁ ꦌꦠꦺꦤꦺꦮ ꦱꦔ꧀ꦒꦲꦺꦴ ꦢꦛ꧀ꦜꦧ꧀ꦧꦺꦴ. ꦱꦶꦱꦶꦫꦺꦠꦶ ꦱꦷꦠꦏꦴꦭꦮꦱꦺꦤ ꦱꦠ꧀ꦠꦴꦲꦮꦢ꧀ꦢꦭꦶꦏꦴꦢꦶꦮꦱꦺꦤ ꦕ ꦈꦥ꧀ꦥꦤ꧀ꦤꦺ ꦱꦶꦱꦶꦫꦱꦩ꧀ꦦꦱ꧀ꦱꦺ. ꦮꦸꦛ꧀ꦜꦶꦪꦺꦴꦠꦶ ꦪꦢꦴ ꦠꦢꦴ ꦈꦥ꧀ꦥꦤ꧀ꦤꦴ ꦮꦱ꧀ꦱꦮꦸꦛ꧀ꦜꦶꦪꦺꦴ ꦥꦛꦶꦲꦤꦠꦷꦠꦶ ꦪꦺꦴꦗꦤꦴ.

ꦮꦴꦠꦴꦠꦥꦺꦴ ꦓꦺꦴꦫꦺꦴꦠꦶ ꦫꦸꦏ꧀ꦑꦒꦕ꧀ꦖꦴꦢꦷꦤꦁ ꦈꦧ꧀ꦧꦲꦤꦨꦚ꧀ꦗꦤꦴꦢꦶꦮꦱꦺꦤ ꦥꦮꦠ꧀ꦠꦶꦪꦴ ꦓꦺꦴꦫꦺꦴ ꦱꦫꦗꦄꦫꦗꦴꦢꦶꦨꦺꦢꦺꦴ ꦮꦴꦠꦺꦴ ꦕꦺꦮ ꦒꦶꦩ꧀ꦲꦥꦫꦶꦭ꦳ꦴꦲꦱꦩꦪꦺꦱꦸ ꦈꦥ꧀ꦥꦠ꧀ꦠꦶꦪꦴ ꦓꦺꦴꦫꦺꦴ ꦱꦹꦫꦶꦪꦴꦠꦥꦺꦴ ꦕ. ꦥꦛꦶꦲꦚ꧀ꦚꦠꦷꦠꦶ ꦥꦛꦶꦧꦴꦲꦷꦪꦠꦶ. ꦭꦺꦟꦠ꧀ꦡꦤ꧀ꦠꦶ ꦤꦴꦤꦴꦫꦩ꧀ꦩꦟꦠꦺꦴ ꦕꦶꦠ꧀ꦠꦁ ꦤꦶꦮꦠ꧀ꦠꦶꦠ꧀ꦮꦴ ꦥꦛꦶꦱꦭ꧀ꦭꦴꦟꦴꦫꦴꦩꦠ꧀ꦡꦁ. ꦱꦸꦑꦠ꧀ꦡꦤ꧀ꦠꦶ ꦮꦸꦠ꧀ꦠꦥꦫꦶꦱ꧀ꦱꦪꦴꦨꦴꦮꦺꦤ ꦦꦴꦱꦸꦮꦶꦲꦴꦫꦠ꧀ꦡꦁ. ꦙꦴꦪꦶꦠꦸꦤ꧀ꦠꦶ ꦄꦛ꧀ꦜꦠꦶꦁꦱꦴꦪ ꦄꦴꦫꦩ꧀ꦩꦟꦺꦱꦸ ꦪꦠ꧀ꦡ ꦏꦠ꧀ꦡꦕꦶ ꦕꦶꦠ꧀ꦠꦁ ꦈꦥꦤꦶꦧꦤ꧀ꦣꦶꦠ꧀ꦮꦴ ꦱꦩꦴꦢꦲꦤꦮꦱꦺꦤ ꦙꦴꦪꦶꦠꦸꦁ. ꦮꦶꦥꦱ꧀ꦱꦶꦠꦸꦤ꧀ꦠꦶ ꦄꦤꦶꦕ꧀ꦕꦴꦢꦶꦮꦱꦺꦤ ꦱꦔ꧀ꦑꦴꦫꦺ ꦱꦩ꧀ꦩꦱꦶꦠꦸꦁ.

ꦮꦶꦲꦴꦫꦺꦠꦶ ꦥꦛꦶꦱ꧀ꦱꦪꦺ. ꦏꦴꦫꦪꦺꦠꦶ ꦏꦴꦫꦴꦥꦺꦪ꧀ꦪ. ꦫꦩ꧀ꦩꦺꦠꦶ ꦩꦤꦺꦴꦫꦩꦺ. ꦮꦴꦱꦪꦺꦠ꧀ꦡ ꦧꦲꦸꦱ꧀ꦱꦸꦠꦺꦠꦶ ꦏꦴꦫꦺꦠ꧀ꦮꦴ ꦥꦤ ꦌꦠ꧀ꦡ ꦮꦶꦲꦴꦫꦺꦱꦸ ꦧꦲꦸꦱ꧀ꦱꦸꦠꦺ ꦱꦷꦭꦮꦤ꧀ꦠꦺ ꦏꦭ꧀ꦪꦴꦟꦣꦩ꧀ꦩꦺ ꦤꦶꦮꦴꦱꦺꦪ꧀ꦪ. ꦠꦺ ꦤꦶꦮꦴꦱꦺꦤ꧀ꦠꦺꦴ ꦥꦤ ꦠꦺꦱꦁ ꦧꦲꦸꦱ꧀ꦱꦸꦠꦴꦤꦁ ꦪꦡꦴ ꦥꦕ꧀ꦕꦪꦺꦲꦶ ꦏꦶꦭꦩꦡꦺꦴ ꦤ ꦲꦺꦴꦠꦶ. ꦌꦮꦁ ꦄꦤ꧀ꦤꦚ꧀ꦕ ꦥꦴꦤꦚ꧀ꦕ ꦮꦠ꧀ꦡꦱꦺꦤꦴꦱꦤꦴꦤꦶ ꦕ ꦢꦢꦺꦪ꧀ꦪ ꦈꦗꦸꦨꦹꦠꦺꦱꦸ ꦄꦗ꧀ꦙꦴꦱꦪꦱꦩ꧀ꦥꦤ꧀ꦤꦺꦱꦸ ꦏꦩ꧀ꦩꦦꦭꦴꦤꦁ ꦫꦠꦤꦠ꧀ꦠꦪꦒꦸꦟꦴꦤꦚ꧀ꦕ ꦱꦢ꧀ꦢꦲꦤꦺꦤ ꦮꦶꦥ꧀ꦥꦱꦤ꧀ꦤꦺꦤ ꦕꦺꦠꦱꦴ. ꦆꦢꦴꦤꦶ ꦒꦲꦛ꧀ꦜꦥꦧ꧀ꦧꦗꦶꦠꦴꦤꦁ ꦄꦚ꧀ꦚꦩꦚ꧀ꦚꦹꦥꦏꦴꦫꦠꦁ ꦢꦱ꧀ꦱꦺꦠꦸꦁ ‘‘ꦠꦺ ꦠꦱ꧀ꦱꦴ’’ꦠꦶ ꦒꦴꦡꦩꦴꦲ. ꦠꦠ꧀ꦡ ꦠꦺꦠꦶ ꦧꦲꦸꦱ꧀ꦱꦸꦠꦴ. ꦠꦱ꧀ꦱꦴꦠꦶ ꦈꦥꦴꦱꦏꦱ꧀ꦱ. ꦣꦩ꧀ꦩꦁ ꦢꦺꦱꦺꦤ꧀ꦠꦷꦠꦶ ꦱꦏꦭꦮꦛ꧀ꦛꦢꦸꦏ꧀ꦑꦥꦤꦹꦢꦤꦁ ꦤꦶꦪ꧀ꦪꦴꦤꦶꦏꦁ ꦣꦩ꧀ꦩꦁ ꦏꦡꦺꦤ꧀ꦠꦶ. ꦪꦁ ꦱꦺꦴ ꦣꦩ꧀ꦩꦁ ꦆꦣꦚ꧀ꦚꦴꦪꦴꦠꦶ ꦱꦺꦴ ꦥꦸꦒ꧀ꦒꦭꦺꦴ ꦪꦁ ꦱꦢ꧀ꦣꦩ꧀ꦩꦁ ꦆꦩꦱ꧀ꦩꦶꦁ ꦱꦴꦱꦤꦺ ꦱꦩ꧀ꦩꦴꦥꦛꦶꦥꦗ꧀ꦗꦤꦺꦤ ꦗꦴꦤꦶꦠ꧀ꦮꦴ ꦄꦒ꧀ꦒꦩꦒ꧀ꦒꦴꦣꦶꦒꦩꦺꦤ ꦄꦤꦴꦱꦮꦺꦴ ꦲꦸꦠ꧀ꦮꦴ ꦥꦫꦶꦤꦶꦧ꧀ꦧꦴꦪꦠꦶ.

ꦄꦴꦮꦴꦱꦺꦠꦶ ꦄꦴꦮꦴꦱꦢꦴꦤꦺ. ꦄꦴꦤꦶꦱꦁꦱꦺꦴꦠꦶ ꦈꦢ꧀ꦫꦪꦺꦴ. ꦥꦹꦗꦴꦱꦏ꧀ꦏꦴꦫꦮꦱꦺꦤ ꦥꦜꦩꦪꦴꦩꦺꦴ ꦑꦺꦥꦶꦠꦺꦴ, ꦱꦠ꧀ꦡꦸ ꦣꦩ꧀ꦩꦢꦺꦱꦤꦴꦪ ꦄꦥ꧀ꦥꦴꦮꦱꦺꦱꦺꦴ ꦩꦗ꧀ꦙꦶꦩꦪꦴꦩꦺꦴ ꦒꦠꦺꦴꦠꦶ ꦥꦴꦭ꦳ꦶꦪꦁ ‘‘ꦧꦲꦸꦢꦺꦮ ꦫꦠ꧀ꦠꦶ’’ꦤ꧀ꦠꦶ ꦮꦸꦠ꧀ꦠꦤ꧀ꦠꦶ ꦄꦴꦲ ‘‘ꦄꦠꦶꦫꦺꦏꦠꦫꦁ ꦢꦶꦪꦝ꧀ꦞꦪꦴꦩ’’ꦤ꧀ꦠꦶ. ꦱꦔ꧀ꦒꦲꦁ ꦤꦴꦫꦺꦴꦲꦠꦶ ꦮꦶꦥꦸꦭꦮꦶꦠ꧀ꦡꦴꦫꦨꦴꦮꦠꦺꦴ. ꦧꦸꦢ꧀ꦣꦴꦤꦚ꧀ꦲꦶ ꦨꦠ꧀ꦠꦴꦤꦸꦩꦺꦴꦢꦤꦴꦥꦶ ꦡꦺꦴꦏꦁ ꦮꦝ꧀ꦞꦺꦠ꧀ꦮꦴ ꦮꦸꦕ꧀ꦕꦩꦴꦤꦴ ꦢꦷꦓꦩꦗ꧀ꦙꦶꦩꦥꦩꦴꦟꦴꦥꦶ ꦲꦺꦴꦠꦶ. ꦠꦡꦴ ꦲꦶ ꦱꦸꦦꦸꦱꦶꦠꦁ ꦢꦤ꧀ꦠꦴꦮꦫꦟꦁ, ꦗꦶꦮ꧀ꦲꦴ ꦠꦤꦸꦏꦴ, ꦨꦮꦔ꧀ꦒꦥꦫꦶꦮꦴꦱꦺꦴ ꦥꦫꦶꦠ꧀ꦠꦺꦴ, ꦤꦠ꧀ꦡꦶ ꦮꦺꦒꦴꦪꦶꦠꦁ, ꦤꦠ꧀ꦡꦶ ꦮꦶꦠ꧀ꦡꦴꦪꦶꦠꦁ, ꦤꦠ꧀ꦡꦶ ꦄꦧ꧀ꦪꦴꦮꦛꦩꦤꦺꦴ, ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ ꦱꦩꦸꦥꦧ꧀ꦪꦹꦭ꦳꧀ꦲꦁ, ꦄꦥꦫꦶꦏ꧀ꦑꦪꦴ ꦥꦛꦶꦱꦩ꧀ꦨꦶꦢꦴ.

ꦱꦤ꧀ꦢꦱ꧀ꦱꦺꦠ꧀ꦮꦴꦠꦶꦄꦴꦢꦷꦱꦸ ꦱꦤ꧀ꦢꦱ꧀ꦱꦺꦠ꧀ꦮꦴ ꦄꦴꦮꦴꦱꦢꦴꦤꦥꦛꦶꦱꦁꦪꦸꦠ꧀ꦠꦁ ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ. ꦠꦠꦺꦴ ꦥꦫꦁ, ꦩꦲꦴꦫꦴꦗ, ꦆꦠꦶꦥꦶ ꦱꦷꦭꦁ, ꦆꦠꦶꦥꦶ ꦱꦩꦴꦣꦶ, ꦆꦠꦶꦥꦶ ꦥꦚ꧀ꦚꦴꦠꦶ ꦱꦷꦭꦴꦢꦶꦒꦸꦟꦺ ꦠꦺꦱꦁ ꦱꦩ꧀ꦩꦴ ꦢꦱ꧀ꦱꦺꦠ꧀ꦮꦴ ꦲꦠ꧀ꦡꦺꦤ ꦒꦲꦺꦠ꧀ꦮꦴ ꦮꦶꦪ ꦥꦕ꧀ꦕꦏ꧀ꦑꦠꦺꦴ ꦥꦏꦴꦱꦺꦠ꧀ꦮꦴ. ꦱꦩꦴꦢꦥꦺꦠ꧀ꦮꦴꦠꦶ ꦌꦮꦁ ꦱꦷꦭꦁ ꦱꦩꦴꦢꦴꦠꦧ꧀ꦧꦁ, ꦱꦷꦭꦺ ꦥꦠꦶꦛ꧀ꦜꦶꦠꦺꦤ ꦌꦮꦁ ꦱꦩꦴꦣꦶꦥꦚ꧀ꦚꦴ ꦨꦴꦮꦺꦠꦧ꧀ꦧꦴꦠꦶ ꦪꦡꦴ ꦠꦺ ꦱꦷꦭꦴꦢꦶꦒꦸꦟꦺ ꦱꦩ꧀ꦩꦴ ꦄꦴꦢꦶꦪꦤ꧀ꦠꦶ, ꦠꦡꦴ ꦒꦟ꧀ꦲꦴꦥꦺꦠ꧀ꦮꦴ. ꦱꦩꦸꦠ꧀ꦠꦺꦗꦺꦠ꧀ꦮꦴꦠꦶ ꦪꦡꦴꦱꦩꦴꦢꦶꦤ꧀ꦤꦁ ꦱꦷꦭꦁ ꦱꦸꦮꦶꦱꦸꦢ꧀ꦣꦁ ꦲꦺꦴꦠꦶ, ꦱꦩꦡꦮꦶꦥꦱ꧀ꦱꦤꦴ ꦕ ꦨꦴꦮꦶꦪꦩꦴꦤꦴ ꦪꦡꦴ ꦱꦸꦛ꧀ꦜꦸ ꦮꦶꦱꦺꦴꦣꦶꦠꦴ ꦈꦥꦫꦹꦥꦫꦶ ꦮꦶꦱꦺꦱꦴꦮꦲꦴ ꦲꦺꦴꦤ꧀ꦠꦶ, ꦌꦮꦁ ꦱꦩꦸꦠ꧀ꦠꦺꦗꦺꦠ꧀ꦮꦴ ꦤꦶꦱꦴꦩꦤꦮꦱꦺꦤ ꦮꦺꦴꦢꦴꦥꦺꦠ꧀ꦮꦴ. ꦱꦩ꧀ꦥꦲꦁꦱꦺꦠ꧀ꦮꦴꦠꦶ ꦪꦡꦴꦤꦸꦱꦶꦛ꧀ꦜꦁ ꦜꦶꦠꦱꦷꦭꦴꦢꦶꦒꦸꦟꦺꦲꦶ ꦱꦩ꧀ꦥꦠꦶ ꦥꦛꦶꦭꦢ꧀ꦣꦒꦸꦟꦴꦤꦶꦱꦁꦱꦺꦲꦶ ꦕꦺꦮ ꦈꦥꦫꦶꦭꦢ꧀ꦣꦧ꧀ꦧꦦꦭꦮꦶꦱꦺꦱꦺꦲꦶ ꦕ ꦕꦶꦠ꧀ꦠꦁ ꦱꦩ꧀ꦥꦲꦁꦱꦺꦠ꧀ꦮꦴ ꦭꦢ꧀ꦣꦱ꧀ꦱꦴꦱꦮꦱꦺꦤ ꦱꦸꦛ꧀ꦜꦸ ꦠꦺꦴꦱꦺꦠ꧀ꦮꦴ. ꦌꦮꦩꦺꦠꦺꦱꦁ ꦥꦢꦴꦤꦁ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦱꦏ꧀ꦪꦫꦴꦗꦴꦤꦺꦴ ꦪꦺꦨꦸꦪ꧀ꦪꦺꦤ ꦨꦒꦮꦠꦺꦴ ꦣꦩ꧀ꦩꦢꦺꦱꦤꦴꦪ ꦱꦴꦱꦤꦺ ꦭꦢ꧀ꦣꦱ꧀ꦱꦴꦢꦴ ꦭꦢ꧀ꦣꦥ꧀ꦥꦠꦶꦛ꧀ꦜꦴ ꦕ.

ꦈꦥꦱꦒ꧀ꦒꦱꦢ꧀ꦢꦴꦤꦁ ꦄꦤꦺꦏꦠ꧀ꦡꦠ꧀ꦠꦴ ꦄꦨꦶ-ꦱꦢ꧀ꦢꦺꦴ ꦄꦠꦶ-ꦱꦢ꧀ꦢꦺꦤ ꦱꦩꦴꦤꦠ꧀ꦡꦺꦴꦥꦶ ꦲꦺꦴꦠꦷꦠꦶ ꦮꦸꦠ꧀ꦠꦁ ‘‘ꦄꦨꦶꦏ꧀ꦏꦤ꧀ꦠꦴꦠꦶ ꦄꦠꦶꦏ꧀ꦏꦤ꧀ꦠꦴ’’ꦠꦶ.

ꦠꦠ꧀ꦫ ꦏꦶꦫꦴꦠꦶꦄꦴꦢꦶ ꦏꦺꦕꦶꦮꦴꦢꦺꦴꦠꦶ ꦧꦢ꧀ꦣꦺꦴꦥꦶ ꦤ ꦲꦺꦴꦠꦶ. ꦠꦺꦤꦴꦲ ‘‘ꦄꦏꦴꦫꦟꦩꦺꦠ’’ꦤ꧀ꦠꦶꦄꦴꦢꦶ. ꦏꦴꦪꦕꦶꦠ꧀ꦠꦭꦲꦸꦠꦴꦢꦪꦺꦴ ꦈꦥ꧀ꦥꦗ꧀ꦗꦤ꧀ꦠꦷꦠꦶ ꦆꦢꦁ ꦏꦴꦪꦶꦏꦕꦺꦠꦱꦶꦏꦄꦚ꧀ꦚꦡꦴꦨꦴꦮꦱ꧀ꦱ ꦏꦴꦫꦟꦮꦕꦤꦁ, ꦭꦲꦸꦠꦴꦢꦶꦈꦥ꧀ꦥꦤ꧀ꦤꦺ ꦱꦮꦤꦴꦤꦸꦠ꧀ꦠꦫꦶꦪꦥꦛꦶꦭꦴꦨꦺꦤ ꦭꦢ꧀ꦣꦧ꧀ꦧꦣꦩ꧀ꦩꦠ꧀ꦡꦮꦺꦢꦱꦩꦣꦶꦒꦩꦠꦺꦴ. ꦮꦸꦠ꧀ꦠꦚ꧀ꦲꦺꦠꦁ –

‘‘ꦪꦡꦴ, ꦪꦡꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦱꦠ꧀ꦡꦴ ꦮꦴ ꦣꦩ꧀ꦩꦁ ꦢꦺꦱꦺꦠꦶ ꦄꦚ꧀ꦚꦠꦫꦺꦴ ꦮꦴ ꦒꦫꦸꦛ꧀ꦜꦴꦤꦶꦏꦺꦴ ꦱꦧ꧀ꦫꦲ꧀ꦩꦕꦴꦫꦷ, ꦠꦡꦴ ꦠꦡꦴ ꦱꦺꦴ ꦠꦱ꧀ꦩꦶꦁ ꦣꦩ꧀ꦩꦺ ꦭꦨꦠꦶ ꦄꦠ꧀ꦡꦮꦺꦢꦁ, ꦭꦨꦠꦶ ꦣꦩ꧀ꦩꦮꦺꦢꦁ, ꦭꦨꦠꦶ ꦣꦩ꧀ꦩꦹꦥꦱꦁꦲꦶꦠꦁ ꦥꦴꦩꦺꦴꦗ꧀ꦗ’’ꦤ꧀ꦠꦶꦄꦴꦢꦶ (ꦢꦷ. ꦤꦶ. ꧓.꧓꧒꧒, ꧓꧕꧕; ꦄ. ꦤꦶ. ꧕.꧒꧖).

ꦥꦶꦛ꧀ꦜꦶꦮꦴꦠꦺꦴ ꦈꦥ꧀ꦥꦗ꧀ꦗꦶ ꦈꦥꦴꦢꦶꦤ꧀ꦤꦱꦫꦷꦫꦱ꧀ꦱ ꦠꦡꦴꦫꦹꦥꦠ꧀ꦠꦴ ꦱꦔ꧀ꦑꦴꦫꦴꦤꦚ꧀ꦕ ꦄꦤꦶꦕ꧀ꦕꦠꦴꦪ ꦢꦸꦏ꧀ꦑꦴꦤꦸꦧꦤ꧀ꦣꦠ꧀ꦠꦴ. ꦄꦏꦴꦫꦟꦁ ꦮꦴ ꦌꦠꦤ꧀ꦠꦶ ꦪꦺꦤꦴꦣꦶꦥ꧀ꦥꦴꦪꦺꦤ ꦮꦸꦠ꧀ꦠꦁ, ꦠꦩꦺꦮ ꦄꦣꦶꦥ꧀ꦥꦴꦪꦁ ꦮꦶꦮꦫꦶꦠꦸꦁ ‘‘ꦥꦲꦺꦴꦠꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦌꦏꦥꦭ꧀ꦭꦔ꧀ꦏꦺꦤ ꦤꦶꦱꦷꦢꦶꦠꦸꦁ ꦥꦲꦺꦴꦠꦶ ꦪꦡꦴ ꦠꦁ ꦮꦺꦭꦸꦮꦒꦴꦩꦏꦺ. ꦌꦠ꧀ꦠꦏꦺ ꦜꦴꦤꦺꦠꦶ ꦌꦠ꧀ꦠꦏꦺ ꦜꦴꦤꦺ ꦜꦴꦤꦁ ꦤꦶꦥ꧀ꦦꦤ꧀ꦤꦤ꧀ꦠꦶ ꦪꦺꦴꦗꦤꦴ. ꦠꦚ꧀ꦕ ꦑꦺꦴꦠꦶ ꦮꦸꦛ꧀ꦜꦴꦤꦱꦚ꧀ꦚꦁ ꦕꦶꦠ꧀ꦠꦺ ꦜꦥꦤꦁ. ꦣꦩ꧀ꦩꦏꦡꦁ ꦱꦸꦟꦩꦴꦤꦺꦴ ꦣꦩ꧀ꦩꦒꦴꦫꦮꦺꦤ.

ꦄꦮꦱ꧀ꦱꦸꦠꦱ꧀ꦱꦴꦠꦶ ꦄꦮꦱ꧀ꦱꦸꦠꦨꦴꦮꦱ꧀ꦱ ꦫꦴꦒꦴꦢꦶꦮꦱꦺꦤ. ꦄꦮꦱ꧀ꦱꦸꦠꦱ꧀ꦱ ꦏꦴꦫꦟꦤ꧀ꦠꦶ ꦠꦶꦤ꧀ꦠꦨꦴꦮꦏꦴꦫꦟꦁ. ꦏꦶꦭꦺꦱꦴꦣꦶꦩꦸꦕ꧀ꦕꦤꦺꦤꦴꦠꦶ ꦏꦶꦭꦺꦱꦮꦱꦺꦤ ꦥꦫꦶꦥ꧀ꦦꦤ꧀ꦢꦶꦠꦮꦱꦺꦤ. ꦤꦶꦧ꧀ꦧꦴꦥꦤꦁ ꦮꦶꦪꦴꦠꦶ ꦮꦹꦥꦱꦩꦺꦴ ꦮꦶꦪ. ꦤꦶꦧ꧀ꦧꦶꦱꦺꦮꦤꦴꦤꦤ꧀ꦠꦶ ꦥꦫꦶꦥ꧀ꦦꦤ꧀ꦢꦤꦫꦲꦶꦠꦴꦤꦁ.

ꦄꦮꦱ꧀ꦱꦸꦠꦥꦫꦶꦪꦴꦪꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧗. ꦢꦸꦏ꧀ꦑꦣꦩ꧀ꦩꦱꦸꦠ꧀ꦠꦮꦟ꧀ꦟꦤꦴ

꧒꧔꧔. ꦢꦸꦏ꧀ꦑꦣꦩ꧀ꦩꦴꦤꦤ꧀ꦠꦶ ꦢꦸꦏ꧀ꦑꦏꦴꦫꦟꦴꦤꦁ. ꦠꦺꦤꦴꦲ ‘‘ꦢꦸꦏ꧀ꦑꦱꦩ꧀ꦨꦮꦣꦩ꧀ꦩꦴꦤ’’ꦤ꧀ꦠꦶꦄꦴꦢꦶ. ꦠꦠ꧀ꦡ ꦏꦶꦁ ꦢꦸꦏ꧀ꦑꦁ, ꦏꦴ ꦢꦸꦏ꧀ꦑꦣꦩ꧀ꦩꦴꦠꦶ ꦠꦢꦸꦨꦪꦁ ꦢꦱ꧀ꦱꦺꦠꦸꦁ ‘‘ꦥꦚ꧀ꦕꦱꦸ ꦲꦷ’’ꦠꦶ ꦮꦸꦠ꧀ꦠꦁ. ꦠꦺꦠꦶ ꦥꦚ꧀ꦕꦏ꧀ꦑꦤ꧀ꦣꦴ. ꦢꦸꦏ꧀ꦑꦱꦩ꧀ꦨꦮꦣꦩ꧀ꦩꦠ꧀ꦠꦴꦠꦶ ꦢꦸꦏ꧀ꦑꦸꦥ꧀ꦥꦠ꧀ꦠꦶꦏꦴꦫꦟꦠ꧀ꦠꦴ. ꦄꦱ꧀ꦱꦴꦠꦶ ꦠꦺꦤ. ꦏꦫꦟꦺ ꦲꦺꦠꦁ ꦱꦴꦩꦶꦮꦕꦤꦁ. ꦏꦴꦩꦺꦠꦶ ꦮꦠ꧀ꦡꦸꦏꦴꦩꦺ ꦏꦶꦭꦺꦱꦏꦴꦩꦺ ꦕ. ꦥꦸꦤ ꦄꦱ꧀ꦱꦴꦠꦶ ꦱꦴꦩꦶꦄꦠ꧀ꦡꦺ ꦌꦮ ꦱꦴꦩꦶꦮꦕꦤꦁ. ꦕꦴꦫꦤ꧀ꦠꦶ ꦕꦶꦠ꧀ꦠꦴꦕꦴꦫꦁ. ꦮꦶꦲꦴꦫꦤ꧀ꦠꦶ ꦥꦚ꧀ꦕꦢ꧀ꦮꦴꦫꦥ꧀ꦥꦮꦠ꧀ꦠꦶꦕꦴꦫꦮꦶꦲꦴꦫꦁ. ‘‘ꦌꦏꦛ꧀ꦜꦴ’’ꦠꦶ ꦕ ꦮꦢꦤ꧀ꦠꦶ. ꦠꦺꦤꦺꦮ ꦲꦶ ‘‘ꦄꦤꦸꦧꦤ꧀ꦣꦶꦠ꧀ꦮꦴ ꦕꦫꦤ꧀ꦠꦁ’’ꦆꦕ꧀ꦕꦺꦮ ꦮꦸꦠ꧀ꦠꦁ. ꦄꦤꦸꦧꦤ꧀ꦣꦶꦠ꧀ꦮꦴꦠꦶ ꦕ ꦮꦷꦡꦶꦕꦶꦠ꧀ꦠꦥ꧀ꦥꦮꦠ꧀ꦠꦶꦠꦺꦴ ꦥꦛ꧀ꦜꦴꦪ ꦪꦴꦮ ꦠꦠꦶꦪꦗꦮꦤꦮꦴꦫꦴ ꦄꦤꦸ ꦄꦤꦸ ꦧꦤ꧀ꦣꦶꦠ꧀ꦮꦴ. ꦥꦏ꧀ꦑꦤ꧀ꦢꦤꦴꦢꦷꦠꦶ ꦄꦴꦢꦶ-ꦱꦢ꧀ꦢꦺꦤ ꦏꦱꦶꦒꦺꦴꦫꦏ꧀ꦑꦴꦢꦶꦮꦱꦺꦤꦥꦶ ꦏꦴꦩꦴꦤꦁ ꦥꦫꦶꦪꦺꦱꦤꦢꦸꦏ꧀ꦑꦁ ꦱꦔ꧀ꦒꦟ꧀ꦲꦴꦠꦶ.

ꦢꦴꦪꦠꦷꦠꦶ ꦢꦴꦪꦺꦴ, ꦮꦤꦁ. ꦠꦺꦤꦴꦲ ‘‘ꦄꦛꦮꦶ’’ꦤ꧀ꦠꦶ. ꦏꦟ꧀ꦛꦏꦒꦧ꧀ꦨꦤ꧀ꦠꦶ ꦎꦮꦫꦏꦱꦢꦶꦱꦁ ꦮꦤꦁ. ꦤꦴꦩꦥꦢꦁ ꦤꦴꦩ ꦏꦶꦫꦶꦪꦴꦥꦢꦴꦥꦺꦏ꧀ꦑꦤ꧀ꦠꦶ ‘‘ꦮꦶꦗ꧀ꦙꦷ’’ꦠꦶ ꦮꦕꦤꦱꦺꦱꦺꦤ ꦏꦶꦫꦶꦪꦴꦥꦢꦁ ꦒꦟ꧀ꦲꦴꦠꦶ.

ꦢꦤ꧀ꦣꦴꦪꦶꦠꦠ꧀ꦠꦁ ꦈꦥ꧀ꦥꦤ꧀ꦤꦏꦶꦭꦺꦱꦴꦤꦁ ꦄꦮꦛ꧀ꦜꦴꦤꦁ. ꦠꦺꦤꦴꦲ ‘‘ꦈꦥ꧀ꦥꦤ꧀ꦤꦩꦠ꧀ꦠꦴꦪꦴ’’ꦠꦶꦄꦴꦢꦶ. ꦠꦴꦪꦴꦠꦶ ꦱꦠꦶꦪꦴ. ꦏꦴꦕꦶ ꦏꦶꦭꦺꦱꦴꦠꦶ ꦕꦸꦢ꧀ꦢꦱꦮꦶꦣꦺ ꦕꦶꦠ꧀ꦠꦱ꧀ꦱ ꦏꦶꦕ꧀ꦕꦺ ꦗꦮꦤꦏꦶꦕ꧀ꦕꦺ ꦌꦮ ꦕꦶꦠ꧀ꦠꦏꦶꦭꦺꦱꦴꦤꦁ ꦈꦥ꧀ꦥꦠ꧀ꦠꦶꦁ ꦏꦠ꧀ꦮꦴ ꦠꦡꦴ ꦮꦸꦠ꧀ꦠꦁ. ꦤꦶꦒ꧀ꦒꦲꦶꦠꦴꦮ ꦲꦺꦴꦤ꧀ꦠꦶ ꦥꦮꦠ꧀ꦠꦶꦠꦸꦁ ꦄꦥ꧀ꦥꦢꦴꦤꦮꦱꦺꦤ. ꦠꦺꦤꦴꦲ ‘‘ꦤ ꦱꦟ꧀ꦜꦴꦠꦸꦁ ꦱꦏ꧀ꦏꦺꦴꦤ꧀ꦠꦷ’’ꦠꦶ. ꦕꦏ꧀ꦑꦸꦢ꧀ꦮꦴꦫꦱ꧀ꦩꦶꦤ꧀ꦠꦶ ꦥꦴꦭ꦳ꦶꦪꦁ ꦠꦱ꧀ꦱ ꦥꦜꦩꦁ ꦒꦲꦶꦠꦠꦴꦪ ꦮꦸꦠ꧀ꦠꦁ, ꦠꦺꦤ ꦤꦪꦺꦤ ꦱꦺꦱꦢ꧀ꦮꦴꦫꦴꦤꦶꦥꦶ ꦒꦲꦶꦠꦴꦤꦺꦮ ꦲꦺꦴꦤ꧀ꦠꦶ. ꦫꦴꦒꦴꦢꦷꦱꦸ ꦈꦥ꧀ꦥꦤ꧀ꦤꦺꦱꦸ ꦥꦜꦩꦗꦮꦤꦮꦴꦫꦺ. ꦱꦠꦶꦱꦩ꧀ꦩꦺꦴꦱꦺꦤ ‘‘ꦏꦶꦭꦺꦱꦴ ꦩꦺ ꦈꦥ꧀ꦥꦤ꧀ꦤꦴ’’ꦠꦶ ꦚꦠ꧀ꦮꦴ ꦠꦡꦴ ꦥꦕ꧀ꦕꦴꦩꦴꦱꦱꦠꦶꦪꦴ ꦭꦧ꧀ꦨꦤꦠꦺꦴ. ꦠꦺꦤꦴꦲ – ‘‘ꦄꦤꦕ꧀ꦖꦫꦶꦪꦁ ꦕꦺꦠ’’ꦤ꧀ꦠꦶ. ꦄꦴꦮꦛ꧀ꦛꦺꦠ꧀ꦮꦴꦠꦶ ꦄꦪꦺꦴꦤꦶꦱꦺꦴ ꦄꦴꦮꦛ꧀ꦛꦺꦠ꧀ꦮꦴ. ꦄꦴꦮꦗ꧀ꦗꦤꦴꦢꦷꦱꦹꦠꦶ ꦠꦠꦺꦴ ꦌꦮ ꦄꦪꦺꦴꦤꦶꦱꦺꦴ ꦄꦴꦮꦗ꧀ꦗꦤꦴꦢꦷꦱꦸ ꦈꦥ꧀ꦥꦤ꧀ꦤꦺꦱꦸ ꦆꦛ꧀ꦜꦴꦫꦩ꧀ꦩꦟꦱ꧀ꦱ ꦭꦢ꧀ꦣꦠ꧀ꦠꦴ ꦥꦕ꧀ꦕꦪꦱꦶꦢ꧀ꦣꦶꦪꦴ ꦱꦩ꧀ꦥꦠ꧀ꦠꦁ ꦥꦮꦠ꧀ꦠꦤꦴꦫꦲꦁ. ꦤꦶꦮꦠ꧀ꦠꦺꦠ꧀ꦮꦴꦠꦶ ꦢꦸꦠꦶꦪꦗꦮꦤꦮꦴꦫꦺꦥꦶ ꦏꦶꦭꦺꦱꦸꦥ꧀ꦥꦠ꧀ꦠꦶꦁ ꦤꦶꦮꦠ꧀ꦠꦺꦠ꧀ꦮꦴ. ꦏꦡꦁ ꦥꦤꦱ꧀ꦱ ꦌꦮꦁ ꦭꦢ꧀ꦣꦸꦁ ꦱꦏ꧀ꦏꦴꦠꦶ ꦄꦴꦲ ‘‘ꦄꦴꦫꦢ꧀ꦣꦮꦶꦥꦱ꧀ꦱꦏꦴꦤꦁ ꦲꦷ’’ꦠꦶꦄꦴꦢꦶ. ꦨꦴꦮꦤꦴꦥꦛꦶꦱꦔ꧀ꦑꦴꦤꦺꦠꦶ ꦨꦴꦮꦤꦴꦪꦁ ꦥꦛꦶꦱꦔ꧀ꦑꦴꦤꦺ ꦕ ꦪꦺꦴꦒꦶꦤꦺꦴ ꦥꦠꦶꦛ꧀ꦜꦶꦠꦨꦴꦮꦺꦴ. ꦠꦱ꧀ꦱ ꦄꦪꦩꦴꦤꦶꦱꦁꦱꦺꦴ – ꦪꦁ ꦥꦕ꧀ꦕꦪꦭꦴꦨꦺꦤ ꦈꦥ꧀ꦥꦗ꧀ꦗꦶꦠꦸꦁ ꦭꦢ꧀ꦣꦺꦴꦏꦴꦱꦴꦥꦶ ꦏꦶꦭꦺꦱꦴ ꦥꦸꦧ꧀ꦧꦺ ꦥꦮꦠ꧀ꦠꦨꦴꦮꦤꦴꦤꦸꦨꦴꦮꦺꦤ ꦮꦶꦏ꧀ꦑꦩ꧀ꦨꦶꦠꦴ ꦠꦡꦴ ꦠꦡꦴ ꦤꦶꦒ꧀ꦒꦲꦶꦠꦴ ꦌꦮ ꦲꦸꦠ꧀ꦮꦴ ꦤꦶꦮꦠ꧀ꦠꦤ꧀ꦠꦶ, ꦏꦸꦱꦭꦴ ꦣꦩ꧀ꦩꦴꦮ ꦭꦢ꧀ꦣꦺꦴꦏꦴꦱꦴ ꦈꦥꦫꦹꦥꦫꦶ ꦮꦝ꧀ꦞꦤ꧀ꦠꦶ.

ꦄꦨꦶꦲꦛ꧀ꦜꦸꦤ꧀ꦠꦶ ꦄꦨꦶꦲꦫꦶꦠ꧀ꦮꦴ. ꦄꦤꦸꦢꦲꦤ꧀ꦠꦷꦠꦶ ꦄꦤꦸꦢꦲꦤ꧀ꦠꦴ ꦮꦶꦪ ꦲꦺꦴꦤ꧀ꦠꦶ. ꦄꦤꦸꦱꦺꦤ꧀ꦠꦷꦠꦶ ꦌꦠ꧀ꦡꦴꦥꦶ ꦌꦱꦺꦮ ꦤꦪꦺꦴ. ꦄꦤꦴꦮꦛ꧀ꦛꦤ꧀ꦠꦺꦠꦶ ꦄꦤꦶꦮꦠ꧀ꦠꦤ꧀ꦠꦺ ꦱꦴꦩꦚ꧀ꦚꦠꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦮꦶꦥꦱ꧀ꦱꦤꦴꦧꦭꦩꦺꦮ ꦢꦷꦥꦶꦠꦁ ꦩꦒ꧀ꦒꦦꦭꦴꦣꦶꦒꦩꦱ꧀ꦱ ꦄꦗꦺꦴꦠꦶꦠꦠ꧀ꦠꦴ.

ꦢꦸꦏ꧀ꦑꦣꦩ꧀ꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧘. ꦏꦶꦁꦱꦸꦏꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ

꧒꧔꧕. ꦕꦠꦸꦤ꧀ꦤꦁ ꦄꦫꦶꦪꦱꦕ꧀ꦕꦴꦤꦁ ꦥꦫꦶꦚ꧀ꦚꦴꦨꦶꦱꦩꦪꦴꦢꦶꦮꦱꦺꦤ ꦮꦶꦮꦶꦣꦢꦱ꧀ꦱꦤꦤ꧀ꦠꦶ ꦏꦶꦕ꧀ꦕꦮꦱꦺꦤ ꦤꦴꦤꦴꦢꦱ꧀ꦱꦤꦁ ꦲꦺꦴꦠꦷꦠꦶ ꦮꦸꦠ꧀ꦠꦁ, ‘‘ꦢꦱ꧀ꦱꦤꦤ꧀ꦠꦶ ꦥꦜꦩꦩꦒ꧀ꦒꦱ꧀ꦱꦺꦠꦁ ꦄꦣꦶꦮꦕꦤ’’ꦤ꧀ꦠꦶ. ꦠꦪꦶꦢꦁ ꦈꦥꦫꦶꦩꦒ꧀ꦒꦺꦱꦸ ꦨꦴꦮꦤꦴꦥꦫꦶꦪꦴꦪꦱ꧀ꦱ ꦤꦶꦫꦸꦭ꦳꧀ꦲꦠ꧀ꦠꦴ ꦥꦜꦩꦩꦒ꧀ꦒꦱ꧀ꦱ ꦥꦜꦩꦁ ꦤꦶꦧ꧀ꦧꦴꦤꦢꦱ꧀ꦱꦤꦠꦺꦴ. ꦠꦺꦤꦴꦲ ‘‘ꦥꦜꦩꦩꦒ꧀ꦒꦺꦴ ꦲꦷ’’ꦠꦶꦄꦴꦢꦶ. ꦏꦺꦴꦕꦶ ꦪꦡꦴꦮꦸꦠ꧀ꦠꦁ ꦄꦮꦶꦥꦫꦷꦠꦁ ꦄꦠ꧀ꦡꦁ ꦄꦗꦴꦤꦤ꧀ꦠꦺꦴ ꦚꦴꦟꦢꦱ꧀ꦱꦤꦁ ꦤꦴꦩ ꦄꦴꦫꦩ꧀ꦩꦟꦏꦫꦟꦱ꧀ꦱ ꦮꦱꦺꦤ ꦄꦠꦶꦥ꧀ꦥꦱꦔ꧀ꦒꦁ ꦄꦴꦱꦔ꧀ꦏꦺꦪ꧀ꦪꦴꦠꦶ ꦠꦁ ꦤꦶꦮꦠ꧀ꦠꦺꦠꦸꦁ ‘‘ꦒꦺꦴꦠ꧀ꦫꦨꦹ ꦥꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦤ ꦢꦱ꧀ꦱꦤꦤ꧀ꦠꦶ ꦮꦸꦕ꧀ꦕꦠꦷꦠꦶ ꦌꦠ꧀ꦡ ꦫꦴꦗꦢꦱ꧀ꦱꦤꦁ ꦈꦢꦴꦲꦫꦤ꧀ꦠꦶ. ꦕꦠ꧀ꦠꦴꦫꦺꦴꦥꦶ ꦩꦒ꧀ꦒꦴ ꦢꦱ꧀ꦱꦤꦩꦺꦮ ꦪꦡꦴꦮꦸꦠ꧀ꦠꦺꦤꦠ꧀ꦡꦺꦤ, ꦨꦴꦮꦤꦴꦥꦫꦶꦪꦴꦪꦺꦴ ꦥꦤ ꦈꦥꦫꦶ ꦠꦶꦟ꧀ꦟꦁ ꦩꦒ꧀ꦒꦴꦤꦁ ꦥꦜꦩꦩꦒ꧀ꦒꦈꦥꦴꦪꦱ꧀ꦱ ꦨꦴꦮꦤꦴꦏꦴꦫꦺꦤ ꦥꦮꦠ꧀ꦠꦤꦠꦺꦴ. ꦢꦱ꧀ꦱꦤꦁ ꦮꦶꦱꦸꦢ꧀ꦣꦶ ꦌꦠ꧀ꦡꦴꦠꦶ ꦢꦱ꧀ꦱꦤꦮꦶꦱꦸꦢ꧀ꦣꦶꦏꦁ, ꦤꦶꦧ꧀ꦧꦴꦤꦁ. ꦦꦱ꧀ꦱꦴꦪꦠꦤꦁ ꦏꦩ꧀ꦩꦛ꧀ꦜꦴꦤꦁ ꦄꦱ꧀ꦱ ꦄꦠ꧀ꦡꦷꦠꦶ ꦦꦱ꧀ꦱꦴꦪꦠꦤꦏꦩ꧀ꦩꦛ꧀ꦜꦴꦤꦶꦏꦺꦴ. ꦌꦱ ꦤꦪꦺꦴ ꦱꦺꦱꦺꦱꦸꦥꦶ ꦥꦢꦺꦱꦸ.

ꦥꦢꦺꦱꦱꦔ꧀ꦑꦴꦫꦺꦱꦹꦠꦶ ꦱꦔ꧀ꦑꦴꦫꦺꦏꦢꦺꦱꦺꦱꦸ. ꦲꦺꦛ꧀ꦜꦶꦩꦥꦫꦶꦕ꧀ꦖꦺꦢꦺꦤ ꦥꦡꦮꦶꦄꦴꦢꦶꦏꦺ ꦣꦩ꧀ꦩꦩꦠ꧀ꦠꦺ ꦢꦶꦛ꧀ꦜꦺ ꦫꦹꦥꦥꦫꦶꦒ꧀ꦒꦲꦺꦴ, ꦕꦏ꧀ꦑꦸꦮꦶꦚ꧀ꦚꦴꦟꦴꦢꦶꦏꦺ ꦠꦁꦱꦲꦒꦠꦣꦩ꧀ꦩꦩꦠ꧀ꦠꦺ ꦢꦶꦛ꧀ꦜꦺ ꦄꦫꦹꦥꦥꦫꦶꦒ꧀ꦒꦲꦺꦴ ꦕ ꦱꦶꦗ꧀ꦙꦠꦷꦠꦶ ꦮꦢꦤ꧀ꦠꦶ.

ꦄꦣꦶꦒꦠꦩꦒ꧀ꦒꦩꦺꦮ ꦏꦡꦺꦱꦷꦠꦶ ꦪꦺꦤ ꦩꦸꦑꦺꦤ ꦮꦶꦥꦱ꧀ꦱꦤꦴꦨꦶꦤꦶꦮꦺꦱꦁ ꦄꦏꦴꦱꦶ, ꦠꦩꦺꦮꦱ꧀ꦱ ꦩꦸꦑꦁ ꦏꦡꦺꦱꦶ. ꦄꦪꦁ ꦥꦤꦴꦠꦶ ꦏꦩ꧀ꦩꦛ꧀ꦜꦴꦤꦁ ꦥꦸꦕ꧀ꦖꦤ꧀ꦠꦺꦴ ꦨꦶꦏ꧀ꦑꦸ. ꦆꦩꦺꦱꦤ꧀ꦠꦶ ꦦꦱ꧀ꦱꦴꦪꦠꦤꦏꦩ꧀ꦩꦛ꧀ꦜꦴꦤꦶꦏꦥꦚ꧀ꦕꦏ꧀ꦑꦤ꧀ꦣꦏꦩ꧀ꦩꦛ꧀ꦜꦴꦤꦶꦏꦴꦤꦁ ꦮꦕꦤꦁ. ‘‘ꦄꦚ꧀ꦚꦩꦚ꧀ꦚꦁ ꦤ ꦱꦩꦺꦠꦷ’’ꦠꦶ ꦮꦠ꧀ꦮꦴ ꦠꦩꦺꦮꦠ꧀ꦡꦁ ꦥꦴꦏꦛꦁ ꦏꦫꦺꦴꦠꦶ ‘‘ꦥꦜꦩꦺꦤꦴ’’ꦠꦶꦄꦴꦢꦶꦤꦴ. ꦥꦚ꧀ꦕꦏ꧀ꦑꦤ꧀ꦣꦮꦶꦩꦸꦠ꧀ꦠꦱ꧀ꦱ ꦱꦔ꧀ꦑꦴꦫꦱ꧀ꦱ ꦄꦨꦴꦮꦴ ‘‘ꦤꦶꦥ꧀ꦥꦢꦺꦱꦺꦱꦹ’’ꦠꦶ ꦮꦸꦠ꧀ꦠꦁ. ꦠꦡꦺꦮꦴꦠꦶ ꦪꦡꦺꦮ ꦦꦱ꧀ꦱꦴꦪꦠꦤꦏꦩ꧀ꦩꦛ꧀ꦜꦴꦤꦶꦏꦁ, ꦠꦡꦺꦮ ꦠꦁ ꦥꦚ꧀ꦕꦏ꧀ꦑꦤ꧀ꦣꦏꦩ꧀ꦩꦛ꧀ꦜꦴꦤꦶꦏꦁ ꦥꦸꦕ꧀ꦖꦶꦠ꧀ꦮꦴ.

ꦱꦩꦥ꧀ꦥꦮꦠ꧀ꦠꦴ ꦣꦴꦠꦸꦪꦺꦴꦠꦶ ꦫꦱꦴꦢꦪꦺꦴ ꦱꦫꦷꦫꦣꦴꦠꦸꦪꦺꦴ ꦱꦩꦥ꧀ꦥꦮꦠ꧀ꦠꦴ, ꦤ ꦮꦶꦱꦩꦴꦏꦴꦫꦱꦟ꧀ꦜꦶꦠꦴ ꦄꦲꦺꦱꦸꦁ. ꦠꦺꦤꦴꦲ ‘‘ꦏꦭ꧀ꦭꦱꦫꦷꦫꦁ ꦧꦭꦥ꧀ꦥꦠ꧀ꦠ’’ꦤ꧀ꦠꦶ. ‘‘ꦄꦠꦷꦠꦴ ꦱꦔ꧀ꦑꦴꦫꦴ’’ꦠꦶꦄꦴꦢꦶ ꦮꦶꦥꦱ꧀ꦱꦤꦴꦨꦶꦤꦶꦮꦺꦱꦮꦱꦺꦤ ꦮꦸꦠ꧀ꦠꦁ. ꦱꦩ꧀ꦩꦱꦤꦁ ꦱꦧ꧀ꦧꦠ꧀ꦡꦏꦩꦺꦮ ꦆꦕ꧀ꦖꦶꦠꦧ꧀ꦧꦁ. ꦕꦴꦫꦶꦨꦹꦩꦶꦤ꧀ꦠꦶ ꦒꦺꦴꦕꦫꦛ꧀ꦜꦴꦤꦁ.

ꦏꦴꦫꦏꦨꦴꦮꦤ꧀ꦠꦶ ꦨꦴꦮꦤꦴꦤꦸꦪꦸꦚ꧀ꦗꦤꦨꦴꦮꦁ. ꦥꦟ꧀ꦝꦸꦫꦺꦴꦒꦥꦸꦫꦶꦱꦺꦴꦠꦶ ꦥꦟ꧀ꦝꦸꦫꦺꦴꦒꦷ ꦥꦸꦫꦶꦱꦺꦴ. ꦄꦫꦶꦛ꧀ꦜꦤ꧀ꦠꦶ ꦱꦸꦠ꧀ꦠꦁ. ꦨꦺꦱꦗ꧀ꦗꦁ ꦏꦠ꧀ꦮꦴꦠꦶ ꦨꦺꦱꦗ꧀ꦗꦥꦪꦺꦴꦒꦁ ꦏꦠ꧀ꦮꦴ. ꦏꦫꦶꦱ꧀ꦱꦴꦩꦷꦠꦶ ꦨꦺꦱꦗ꧀ꦗꦁ ꦏꦫꦶꦱ꧀ꦱꦴꦩꦶ. ꦙꦴꦩꦡꦸꦟꦺꦴ ꦮꦶꦪꦴꦠꦶ ꦢꦝ꧀ꦞꦡꦸꦟꦺꦴ ꦮꦶꦪ ꦑꦴꦫꦏꦗꦴꦭꦤꦢ꧀ꦣꦠ꧀ꦠꦴ ꦠꦫꦸꦟꦩꦏꦸꦭꦱꦤ꧀ꦠꦴꦤꦱꦚ꧀ꦖꦤ꧀ꦤꦠ꧀ꦠꦴ.

ꦢꦏ꧀ꦑꦶꦟꦢ꧀ꦮꦴꦫꦒꦴꦩꦺꦠꦶ ꦢꦏ꧀ꦑꦶꦟꦢ꧀ꦮꦴꦫꦱꦩꦷꦥꦺ ꦒꦴꦩꦺ. ꦭꦺꦴꦲꦶꦠꦏꦺꦴꦠꦶ ꦭꦺꦴꦲꦶꦠꦮꦟ꧀ꦟꦺꦴ. ꦎꦕꦶꦫꦏꦗꦴꦠꦺꦴꦠꦶ ꦗꦴꦠꦎꦭꦩ꧀ꦧꦩꦴꦤꦕꦶꦫꦏꦺꦴ ꦮꦶꦪ. ꦄꦴꦢꦶꦤ꧀ꦤꦱꦶꦥꦴꦛꦶꦏꦺꦴꦠꦶ ꦒꦲꦶꦠꦦꦭꦥꦺꦴꦠꦏꦺꦴ. ꦱꦤ꧀ꦢꦕ꧀ꦖꦴꦪꦺꦴꦠꦶ ꦧꦲꦭꦕ꧀ꦖꦴꦪꦺꦴ. ꦪꦱ꧀ꦩꦴ ꦠꦱ꧀ꦱ ꦫꦸꦏ꧀ꦑꦱ꧀ꦱ ꦱꦴꦑꦴ ꦄꦮꦶꦫꦭ꦳ꦴ ꦓꦤꦥ꧀ꦥꦠ꧀ꦠꦴ ꦄꦚ꧀ꦚꦩꦚ꧀ꦚꦁ ꦱꦁꦱꦤ꧀ꦢꦶꦠ꧀ꦮꦴ ꦜꦶꦠꦴ, ꦠꦱ꧀ꦩꦴ ꦖꦴꦪꦴꦥꦶꦱ꧀ꦱ ꦠꦴꦢꦶꦱꦷꦠꦶ ꦮꦸꦠ꧀ꦠꦁ ‘‘ꦱꦤ꧀ꦢꦕ꧀ꦖꦴꦪꦺꦴ ꦤꦴꦩ ꦱꦁꦱꦤ꧀ꦢꦶꦠ꧀ꦮꦴ ꦜꦶꦠꦕ꧀ꦖꦴꦪꦺꦴ’’ꦠꦶ, ꦓꦤꦕ꧀ꦖꦴꦪꦺꦴꦠꦶ ꦄꦠ꧀ꦡꦺꦴ. ꦠꦠ꧀ꦡꦴꦠꦶꦄꦴꦢꦶ ꦈꦥꦩꦴꦱꦁꦱꦤ꧀ꦢꦤꦁ.

ꦪꦺꦤ ꦪꦺꦤꦴꦏꦴꦫꦺꦤ ꦄꦣꦶꦩꦸꦠ꧀ꦠꦴꦤꦤ꧀ꦠꦶ ꦖꦦꦱ꧀ꦱꦴꦪꦠꦤꦴꦢꦶꦩꦸꦑꦺꦤ ꦪꦺꦤ ꦪꦺꦤ ꦮꦶꦥꦱ꧀ꦱꦤꦴꦨꦶꦤꦶꦮꦺꦱꦺꦤ ꦮꦶꦥꦱ꧀ꦱꦤ꧀ꦠꦴꦤꦁ ꦤꦶꦧ꧀ꦧꦴꦤꦚ꧀ꦕ ꦄꦣꦶꦩꦸꦠ꧀ꦠꦴꦤꦁ. ꦱꦸꦛ꧀ꦜꦸ ꦮꦶꦱꦸꦢ꧀ꦣꦁ ꦥꦫꦶꦚ꧀ꦚꦴꦠꦶꦱꦩꦪꦴꦢꦶꦱꦶꦢ꧀ꦣꦶꦪꦴ. ꦠꦺꦤ ꦠꦺꦤꦺꦮꦴꦏꦴꦫꦺꦤꦴꦠꦶ ꦄꦠ꧀ꦠꦤꦴꦣꦶꦩꦸꦠ꧀ꦠꦴꦏꦴꦫꦺꦤ. ꦆꦢꦴꦤꦶ ꦠꦁ ꦠꦁ ꦄꦴꦏꦴꦫꦁ ꦈꦥꦩꦴꦪ ꦱꦢ꧀ꦣꦶꦁ ꦪꦺꦴꦗꦺꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦪꦡꦴ ꦲꦷ’’ꦠꦶꦄꦴꦢꦶ ꦄꦴꦫꦢ꧀ꦣꦁ. ꦠꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.

ꦆꦢꦤ꧀ꦠꦶ ꦤꦒꦫꦺꦴꦥꦩꦁ. ꦠꦁ ꦱꦭ꧀ꦭꦏ꧀ꦑꦶꦠꦤ꧀ꦠꦶ ꦏꦶꦁꦱꦸꦏꦺꦴꦥꦩꦢꦷꦥꦶꦠꦁ ꦄꦠ꧀ꦡꦗꦴꦠꦁ ꦱꦕꦺ ꦱꦭ꧀ꦭꦏ꧀ꦑꦶꦠꦁ. ꦄꦱ꧀ꦱ ꦨꦶꦏ꧀ꦑꦸꦤꦺꦴ. ꦣꦩ꧀ꦩꦢꦺꦱꦤꦠ꧀ꦡꦤ꧀ꦠꦶ ꦪꦡꦴꦱꦭ꧀ꦭꦏ꧀ꦑꦶꦠꦱ꧀ꦱ ꦄꦠ꧀ꦡꦱ꧀ꦱ ꦮꦱꦺꦤ ꦭꦢ꧀ꦣꦮꦶꦱꦺꦱꦱ꧀ꦱ ꦈꦥꦧ꧀ꦫꦹꦲꦤꦴꦪ. ꦠꦱ꧀ꦱꦺꦮꦠ꧀ꦡꦱ꧀ꦱꦴꦠꦶ ꦠꦱ꧀ꦱ ꦢꦱ꧀ꦱꦤꦮꦶꦱꦸꦢ꧀ꦣꦶꦱꦔ꧀ꦑꦴꦠꦱ꧀ꦱ ꦄꦠ꧀ꦡꦱ꧀ꦱ. ꦕꦺꦴꦫꦴꦱꦔ꧀ꦏꦴ ꦤ ꦲꦺꦴꦤ꧀ꦠꦶ ꦩꦗ꧀ꦙꦶꦩꦢꦺꦱꦫꦗ꧀ꦗꦱ꧀ꦱ ꦥꦱꦤ꧀ꦤꦨꦴꦮꦠꦺꦴ. ꦠꦶꦥꦸꦫꦶꦱꦸꦧ꧀ꦧꦺꦣꦴꦤꦷꦠꦶ ꦈꦧ꧀ꦧꦺꦣꦺꦤ ꦠꦶꦥꦸꦫꦶꦱꦥ꧀ꦥꦩꦴꦟꦴꦤꦶ ꦤꦴꦤꦴꦨꦶꦠ꧀ꦠꦶꦮꦶꦕꦶꦠ꧀ꦠꦴꦤꦶ ꦡꦩ꧀ꦨꦴꦤꦁ ꦈꦥꦫꦶ ꦮꦶꦮꦶꦣꦩꦴꦭꦴꦏꦩ꧀ꦩꦴꦢꦶꦮꦶꦕꦶꦠ꧀ꦠꦣꦤꦸꦫꦴꦏꦴꦫꦭꦏ꧀ꦑꦶꦠꦴꦤꦶ ꦩꦤꦺꦴꦫꦩꦴꦤꦶ. ꦠꦺꦤꦴꦲ ‘‘ꦤꦒꦫꦱ꧀ꦱ ꦄꦭꦔ꧀ꦏꦴꦫꦠ꧀ꦡ’’ꦤ꧀ꦠꦶ. ꦤꦒꦫꦢ꧀ꦮꦴꦫꦱ꧀ꦱ ꦡꦶꦫꦨꦴꦮꦴꦥꦴꦢꦤꦮꦱꦺꦤ ꦜꦥꦺꦠꦧ꧀ꦧꦠ꧀ꦠꦴ ꦮꦸꦠ꧀ꦠꦁ ‘‘ꦕꦺꦴꦫꦤꦶꦮꦴꦫꦟꦠ꧀ꦡꦴꦤꦶꦥꦶ ꦲꦺꦴꦤ꧀ꦠꦶꦪꦺꦮꦴ’’ꦠꦶ. ꦥꦶꦛ꧀ꦜꦱꦔ꧀ꦓꦴꦠꦱ꧀ꦱꦴꦠꦶ ꦢ꧀ꦮꦴꦫꦧꦴꦲꦱ꧀ꦱ. ‘‘ꦆꦩꦺ ꦄꦴꦮꦴꦱꦶꦏꦴ, ꦆꦩꦺ ꦄꦴꦒꦤ꧀ꦠꦸꦏꦴ, ꦠꦠ꧀ꦡꦴꦥꦶ ꦕ ꦆꦩꦺꦲꦶ ꦤꦒꦫꦱ꧀ꦱ ꦤꦒꦫꦱꦴꦩꦶꦏꦱ꧀ꦱ ꦕ ꦄꦠ꧀ꦡꦺꦴ. ꦆꦩꦺꦱꦁ ꦮꦱꦺꦤ ꦄꦤꦠ꧀ꦡꦺꦴ ꦱꦶꦪꦴ’’ꦠꦶ ꦗꦴꦤꦤꦚꦴꦟꦱꦔ꧀ꦑꦴꦠꦺꦤ ꦥꦟ꧀ꦝꦶꦕ꧀ꦕꦺꦤ ꦱꦩꦤ꧀ꦤꦴꦒꦠꦺꦴ. ꦄꦚ꧀ꦚꦴꦠꦤꦶꦮꦴꦫꦟꦺ ꦥꦛꦸꦨꦴꦮꦱꦔ꧀ꦑꦴꦠꦺꦤ ꦮꦺꦪ꧀ꦪꦠ꧀ꦠꦶꦪꦺꦤ ꦱꦩꦤ꧀ꦤꦴꦒꦠꦺꦴ. ꦜꦴꦤꦸꦥ꧀ꦥꦠ꧀ꦠꦶꦏꦥꦚ꧀ꦚꦴꦱꦔ꧀ꦑꦴꦠꦴꦪꦴꦠꦶ ꦠꦱ꧀ꦩꦶꦁ ꦠꦱ꧀ꦩꦶꦁ ꦄꦠ꧀ꦡꦏꦶꦕ꧀ꦕꦺ ꦠꦔ꧀ꦑꦟꦸꦥ꧀ꦥꦗ꧀ꦗꦤꦏꦥꦛꦶꦨꦴꦤꦱꦔ꧀ꦑꦴꦠꦴꦪ.

ꦫꦚ꧀ꦚꦴ ꦄꦴꦪꦸꦠ꧀ꦠꦺꦴ ꦤꦶꦪꦺꦴꦗꦶꦠꦺꦴ ꦫꦴꦗꦴꦪꦸꦠ꧀ꦠꦺꦴ, ꦠꦠ꧀ꦡ ꦠꦠ꧀ꦡ ꦫꦚ꧀ꦚꦺꦴ ꦏꦴꦠꦧ꧀ꦧꦏꦶꦕ꧀ꦕꦺ ꦜꦥꦶꦠꦥꦸꦫꦶꦱꦺꦴ. ꦏꦠꦶꦥꦴꦲꦺꦪꦺꦮꦴꦠꦶ ꦏꦠꦶꦥꦪꦢꦶꦮꦱꦺꦪꦺꦮ ꦄꦏꦶꦕ꧀ꦕꦏꦫꦟꦺꦤ ꦠꦱ꧀ꦱ ꦜꦴꦤꦁ ꦮꦶꦧ꧀ꦨꦩꦺꦴ ꦗꦴꦠꦺꦴꦠꦶ ꦏꦠ꧀ꦮꦴ ꦮꦸꦠ꧀ꦠꦁ – ‘‘ꦱꦧ꧀ꦧꦴꦤꦶ ꦮꦶꦤꦶꦕ꧀ꦖꦪꦛ꧀ꦜꦴꦤꦴꦢꦷꦤꦶ ꦲꦴꦫꦺꦠ꧀ꦮꦴ’’ꦠꦶ.

ꦱꦷꦱꦩꦱ꧀ꦱ ꦖꦶꦤ꧀ꦢꦴꦲꦷꦠꦶ ꦱꦷꦱꦨꦹꦠꦁ ꦈꦠ꧀ꦠꦩꦔ꧀ꦒꦛ꧀ꦜꦴꦤꦶꦪꦁ ꦠꦠ꧀ꦡ ꦠꦱ꧀ꦱ ꦫꦴꦗꦏꦶꦕ꧀ꦕꦁ ꦖꦶꦤ꧀ꦢꦴꦠꦶ ꦄꦠ꧀ꦡꦺꦴ. ꦄꦚ꧀ꦚꦡꦴ ꦠꦱ꧀ꦱ ꦥꦴꦏꦠꦶꦏꦺ ꦄꦠ꧀ꦡꦺ ꦒꦪ꧀ꦲꦩꦴꦤꦺ ꦥꦴꦟꦴꦠꦶꦥꦴꦠꦺꦴ ꦄꦴꦟꦠ꧀ꦠꦺꦴ ꦤꦴꦩ ꦱꦶꦪꦴ. ꦤ ꦲꦶ ꦕꦏ꧀ꦏꦮꦠ꧀ꦠꦶꦫꦴꦗꦴ ꦠꦴꦢꦶꦱꦁ ꦄꦴꦟꦴꦥꦺꦠꦶ, ꦄꦚ꧀ꦚꦺꦱꦩ꧀ꦥꦶ ꦠꦠꦺꦴ ꦤꦶꦮꦴꦫꦏꦠ꧀ꦠꦴ. ꦄꦡ ꦮꦴ ꦖꦶꦤ꧀ꦢꦴꦲꦷꦠꦶ ꦩꦩ ꦄꦴꦟꦴꦪ ꦄꦱ꧀ꦱ ꦱꦷꦱꦁ ꦖꦶꦤ꧀ꦢꦤ꧀ꦠꦺꦴ ꦮꦶꦪ ꦄꦠ꧀ꦠꦴꦤꦁ ꦢꦱ꧀ꦱꦺꦲꦶ, ꦌꦮꦁ ꦱꦺꦴ ꦠꦠ꧀ꦡꦺꦴꦮꦴꦢꦥꦛꦶꦏꦫꦠ꧀ꦠꦥꦠ꧀ꦠꦺꦴ ꦎꦢꦩꦺꦪ꧀ꦪꦴꦠꦶ, ꦠꦡꦴ ꦕꦺꦮ ꦈꦥꦫꦶ ꦥꦛꦶꦥꦠ꧀ꦠꦶ ꦄꦴꦒꦠꦴ. ꦠꦠ꧀ꦡꦴꦠꦶ ꦌꦠꦱ꧀ꦩꦶꦁ ꦥꦕ꧀ꦕꦤ꧀ꦠꦶꦩꦤꦒꦫꦺ.

ꦈꦥ꧀ꦥꦤ꧀ꦤꦺꦤꦴꦠꦶ ꦱꦩꦡꦏꦩ꧀ꦩꦛ꧀ꦜꦴꦤꦺ ꦈꦥ꧀ꦥꦤ꧀ꦤꦺꦤ.

ꦠꦱ꧀ꦱꦺꦮꦴꦠꦶ ꦱꦏ꧀ꦏꦴꦪꦱꦔ꧀ꦑꦴꦠꦱ꧀ꦱ ꦤꦒꦫꦱ꧀ꦱ ‘‘ꦢ꧀ꦮꦴꦫꦴꦤꦷ’’ꦠꦶ ꦮꦸꦠ꧀ꦠꦴꦤꦷꦠꦶ ꦄꦴꦤꦺꦠ꧀ꦮꦴ ꦱꦩ꧀ꦧꦤ꧀ꦣꦺꦴ. ‘‘ꦱꦷꦓꦁ ꦢꦹꦠꦪꦸꦒ’’ꦤ꧀ꦠꦶ ꦮꦸꦠ꧀ꦠꦴꦠꦶ ꦪꦺꦴꦗꦤꦴ. ꦲꦢꦪꦮꦠ꧀ꦡꦸꦫꦹꦥꦱ꧀ꦱ ꦩꦗ꧀ꦙꦺ ꦱꦶꦔ꧀ꦓꦴꦛꦏꦨꦴꦮꦺꦤ ꦒꦲꦶꦠꦠ꧀ꦠꦴ ‘‘ꦲꦢꦪꦮꦠ꧀ꦡꦸꦱ꧀ꦱ ꦤꦶꦱ꧀ꦱꦪꦨꦹꦠꦴꦤꦁ ꦩꦲꦴꦨꦹꦠꦴꦤ’’ꦤ꧀ꦠꦶ ꦮꦸꦠ꧀ꦠꦁ. ꦪꦢꦶ ꦌꦮꦁ ꦮꦠ꧀ꦡꦸꦫꦹꦥꦩꦺꦮ ꦒꦲꦺꦠꦧ꧀ꦧꦁ, ꦠꦢꦺꦮꦺꦠ꧀ꦡ ꦄꦒ꧀ꦒꦲꦺꦠ꧀ꦮꦴ ꦏꦱ꧀ꦩꦴ ꦩꦲꦴꦨꦹꦠꦒ꧀ꦒꦲꦟꦤ꧀ꦠꦶ ꦄꦴꦲ ‘‘ꦮꦠ꧀ꦡꦸꦫꦹꦥꦱ꧀ꦱ ꦲꦷ’’ꦠꦶꦄꦴꦢꦶ. ꦪꦴꦢꦶꦱꦺꦴꦠꦶ ꦱꦩ꧀ꦩꦴꦢꦶꦛ꧀ꦜꦶꦄꦴꦢꦷꦤꦁ ꦮꦱꦺꦤ ꦪꦴꦢꦶꦱꦺꦴ ꦌꦮ ꦥꦸꦧ꧀ꦧꦺ ꦄꦴꦒꦠꦮꦶꦥꦱ꧀ꦱꦤꦴꦩꦒ꧀ꦒꦺꦴ. ‘‘ꦄꦪꦩ꧀ꦥꦶ ꦄꦛ꧀ꦜꦔ꧀ꦒꦱꦩꦤ꧀ꦤꦴꦒꦠꦠ꧀ꦠꦴ ꦠꦴꦢꦶꦱꦺꦴ ꦌꦮꦴ’’ꦠꦶ ꦮꦠ꧀ꦮꦴ ꦄꦫꦶꦪꦩꦒ꧀ꦒꦺꦴ ‘‘ꦪꦡꦴꦒꦠꦩꦒ꧀ꦒꦺꦴ’’ꦠꦶ ꦮꦸꦠ꧀ꦠꦺꦴ. ꦆꦢꦁ ꦠꦴꦮꦺꦠ꧀ꦡꦴꦠꦶ ꦌꦠ꧀ꦡ ꦌꦠꦱ꧀ꦩꦶꦁ ꦱꦸꦠ꧀ꦠꦺ ꦣꦩ꧀ꦩꦢꦺꦱꦤꦠ꧀ꦡꦁ ꦄꦴꦨꦠꦴꦪ ꦪꦡꦴꦮꦸꦠ꧀ꦠꦈꦥꦩꦴꦪ ꦆꦢꦁ ꦱꦁꦱꦤ꧀ꦢꦤꦁ.

ꦆꦢꦁ ꦱꦁꦱꦤ꧀ꦢꦤꦤ꧀ꦠꦶ ꦆꦢꦴꦤꦶ ꦮꦏ꧀ꦑꦩꦴꦤꦁ ꦈꦥꦩꦴꦪ ꦱꦁꦱꦤ꧀ꦢꦤꦁ. ꦤꦒꦫꦱꦴꦩꦶꦈꦥꦩꦴ ꦥꦚ꧀ꦕꦏ꧀ꦑꦤ꧀ꦣꦮꦱꦺꦤ ꦢꦱ꧀ꦱꦤꦮꦶꦱꦸꦢ꧀ꦣꦶꦥꦠ꧀ꦠꦁ ꦑꦷꦟꦴꦱꦮꦁ ꦢꦱ꧀ꦱꦺꦠꦸꦁ ꦄꦴꦨꦠꦴ. ꦱꦶꦔ꧀ꦓꦴꦛꦏꦹꦥꦩꦴ ꦕꦠꦸꦩꦲꦴꦨꦹꦠꦮꦱꦺꦤ ꦢꦱ꧀ꦱꦤꦮꦶꦱꦸꦢ꧀ꦣꦶꦥꦠ꧀ꦠꦁ ꦑꦷꦟꦴꦱꦮꦁ ꦢꦱ꧀ꦱꦺꦠꦸꦁ ꦄꦴꦨꦠꦴꦠꦶ ꦪꦺꦴꦗꦤꦴ. ‘‘ꦕꦠꦸꦱꦕ꧀ꦕꦩꦺꦮ ꦏꦡꦶꦠ’’ꦤ꧀ꦠꦶ ꦮꦠ꧀ꦮꦴ ꦠꦴꦤꦶ ꦱꦕ꧀ꦕꦴꦤꦶ ꦤꦶꦢ꧀ꦣꦴꦫꦺꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦱꦏꦭꦺꦤꦥꦶ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦆꦣ ꦤꦒꦫꦱꦩ꧀ꦨꦴꦫꦺꦴ ꦖꦢ꧀ꦮꦴꦫꦴꦢꦪꦺꦴ. ꦠꦺꦤ ꦲꦶ ꦖꦦꦱ꧀ꦱꦴꦪꦠꦤꦴꦢꦪꦺꦴ ꦈꦥꦩꦶꦠꦴ. ꦠꦺ ꦥꦤ ꦢꦸꦏ꧀ꦑꦱꦕ꧀ꦕꦥꦫꦶꦪꦴꦥꦤ꧀ꦤꦴꦠꦶ ꦮꦸꦠ꧀ꦠꦁ ‘‘ꦤꦒꦫꦱꦩ꧀ꦨꦴꦫꦺꦤ ꦢꦸꦏ꧀ꦑꦱꦕ꧀ꦕꦩꦺꦮ ꦏꦡꦶꦠ’’ꦤ꧀ꦠꦶ.

ꦏꦶꦁꦱꦸꦏꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧙. ꦮꦷꦟꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ

꧒꧔꧖. ꦨꦶꦏ꧀ꦑꦸꦱ꧀ꦱ ꦮꦴ ꦨꦶꦏ꧀ꦑꦸꦤꦶꦪꦴ ꦮꦴꦠꦶ ꦏꦴꦩꦁ ꦥꦴꦭ꦳ꦶꦪꦁ ꦥꦫꦶꦱꦴꦢ꧀ꦮꦪꦩꦺꦮ ꦒꦲꦶꦠꦁ, ꦱꦺꦱꦥꦫꦶꦱꦴꦤꦁ ꦥꦤ ꦠꦢꦚ꧀ꦚꦺꦱꦩ꧀ꦥꦶ ꦢꦺꦮꦩꦤꦸꦱ꧀ꦱꦴꦤꦤ꧀ꦠꦶ ꦱꦧ꧀ꦧꦱꦴꦣꦴꦫꦟꦺꦴꦮꦴꦪꦁ ꦣꦩ꧀ꦩꦱꦔ꧀ꦒꦲꦺꦴꦠꦶ ꦆꦩꦩꦠ꧀ꦡꦁ ꦈꦥꦩꦴꦥꦸꦧ꧀ꦧꦏꦁ ꦏꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦪꦡꦴ ꦤꦴꦩꦴ’’ꦠꦶꦄꦴꦢꦶ ꦄꦴꦫꦢ꧀ꦣꦁ. ꦪꦗꦤ꧀ꦠꦺꦴꦠꦶ ꦢꦢꦤ꧀ꦠꦺꦴ. ꦮꦶꦤ꧀ꦢꦶꦠꦧ꧀ꦧꦺꦴꦠꦶ ꦭꦢ꧀ꦣꦧ꧀ꦧꦺꦴ, ꦄꦣꦶꦒꦤ꧀ꦠꦧ꧀ꦧꦺꦴꦠꦶ ꦄꦠ꧀ꦡꦺꦴ.

ꦖꦤ꧀ꦢꦺꦴꦠꦶ ꦠꦟ꧀ꦲꦴꦖꦤ꧀ꦢꦺꦴ. ꦠꦺꦤꦴꦲ – ‘‘ꦢꦸꦧ꧀ꦧꦭꦠꦟ꧀ꦲꦴ ꦱꦺꦴ ꦫꦚ꧀ꦗꦺꦠꦸꦁ ꦤ ꦱꦏ꧀ꦏꦺꦴꦠꦷ’’ꦠꦶ. ꦥꦸꦧ꧀ꦧꦸꦥ꧀ꦥꦠ꧀ꦠꦶꦏꦴ ꦌꦏꦱ꧀ꦩꦶꦁ ꦄꦴꦫꦩ꧀ꦩꦟꦺ ꦥꦜꦩꦁ ꦈꦥ꧀ꦥꦤ꧀ꦤꦴ. ꦱꦴ ꦲꦶ ꦄꦤꦴꦱꦺꦮꦤꦠ꧀ꦠꦴ ꦩꦤ꧀ꦢꦴ. ꦱꦺꦴꦠꦶ ꦖꦤ꧀ꦢꦺꦴ. ꦫꦚ꧀ꦗꦺꦠꦸꦁ ꦤ ꦱꦏ꧀ꦏꦺꦴꦠꦶ ꦭꦢ꧀ꦣꦴꦱꦺꦮꦤꦠ꧀ꦠꦴ. ꦢꦺꦴꦱꦺꦴ ꦤꦴꦩ ꦕꦶꦠ꧀ꦠꦢꦹꦱꦤꦠ꧀ꦠꦴ. ꦠꦴꦤꦷꦠꦶ ꦢꦟ꧀ꦝꦴꦢꦴꦤꦴꦢꦷꦤꦶ. ꦠꦩ꧀ꦩꦹꦭꦏꦴꦠꦶ ꦭꦺꦴꦨꦩꦹꦭꦏꦴ ꦠꦴꦮ ꦩꦴꦪꦴꦱꦴꦜꦺꦪ꧀ꦪꦩꦴꦤꦴꦠꦶꦩꦴꦤꦢꦶꦛ꧀ꦜꦶꦕꦴꦥꦭꦴꦢꦪꦺꦴ, ꦢꦺꦴꦱꦩꦹꦭꦏꦴ ꦈꦥꦤꦴꦲꦩꦏ꧀ꦑꦥꦭꦴꦱꦆꦱ꧀ꦱꦴꦩꦕ꧀ꦖꦫꦶꦪꦡꦩ꧀ꦨꦱꦴꦫꦩ꧀ꦨꦴꦢꦪꦺꦴ, ꦩꦺꦴꦲꦩꦹꦭꦏꦴ ꦄꦲꦶꦫꦶꦏ-ꦄꦤꦺꦴꦠ꧀ꦠꦥ꧀ꦥ-ꦡꦶꦤꦩꦶꦢ꧀ꦣꦮꦶꦕꦶꦏꦶꦕ꧀ꦖꦸꦢ꧀ꦣꦕ꧀ꦕ-ꦮꦶꦥꦫꦷꦠꦩꦤꦱꦶꦏꦴꦫꦴꦢꦪꦺꦴ, ꦱꦁꦏꦶꦭꦺꦱꦣꦩ꧀ꦩꦴ ꦒꦲꦶꦠꦴꦮ ꦲꦺꦴꦤ꧀ꦠꦶ ꦠꦁꦩꦹꦭꦏꦠ꧀ꦠꦴ. ꦪꦱ꧀ꦩꦴ ꦥꦤ ꦱꦧ꧀ꦧꦺꦥꦶ ꦱꦁꦏꦶꦭꦺꦱꦣꦩ꧀ꦩꦴ ꦢ꧀ꦮꦴꦢꦱꦴꦏꦸꦱꦭꦕꦶꦠ꧀ꦠꦸꦥ꧀ꦥꦴꦢꦥꦫꦶꦪꦴꦥꦤ꧀ꦤꦴ ꦌꦮ, ꦠꦱ꧀ꦩꦴ ꦠꦺꦱꦩ꧀ꦥꦺꦠ꧀ꦡ ꦒꦲꦶꦠꦨꦴꦮꦁ ꦢꦱ꧀ꦱꦺꦠꦸꦁ ‘‘ꦖꦤ꧀ꦢꦺꦴ ꦫꦴꦒꦺꦴꦠꦶ ꦮꦴ’’ꦠꦶ ꦮꦸꦠ꧀ꦠꦁ.

ꦨꦴꦪꦶꦠꦧ꧀ꦧꦛ꧀ꦜꦺꦤ ꦱꦨꦪꦺꦴ. ꦨꦺꦫꦮꦛ꧀ꦜꦺꦤ ꦱꦥ꧀ꦥꦛꦶꦨꦪꦺꦴ. ꦏꦸꦱꦭꦥꦏ꧀ꦑꦱ꧀ꦱ ꦮꦶꦏ꧀ꦑꦩ꧀ꦨꦤꦛ꧀ꦜꦺꦤ ꦱꦏꦟ꧀ꦛꦏꦺꦴ. ꦏꦸꦱꦭꦄꦤꦮꦗ꧀ꦗꦣꦩ꧀ꦩꦺꦲꦶ ꦢꦸꦫꦮꦒꦴꦲꦛ꧀ꦜꦺꦤ ꦱꦒꦲꦤꦺꦴ. ꦨꦮꦱꦩ꧀ꦥꦠ꧀ꦠꦶꦨꦮꦤꦶꦧ꧀ꦧꦴꦤꦴꦤꦁ ꦄꦥ꧀ꦥꦢꦴꦤꦨꦴꦮꦠꦺꦴ ꦈꦩ꧀ꦩꦒ꧀ꦒꦺꦴ. ꦢꦸꦒ꧀ꦒꦠꦶꦒꦴꦩꦶꦩꦒ꧀ꦒꦠ꧀ꦠꦴ ꦏꦸꦩ꧀ꦩꦒ꧀ꦒꦺꦴ. ꦆꦫꦶꦪꦤꦴꦠꦶ ꦮꦠ꧀ꦠꦤꦴ ꦥꦛꦶꦥꦗ꧀ꦗꦤꦴ. ꦢꦸꦒ꧀ꦒꦠꦶꦒꦴꦩꦶꦠꦴꦪ ꦏꦶꦭꦺꦱꦺꦴ ꦌꦮ ꦏꦶꦭꦺꦱꦩꦒ꧀ꦒꦺꦴ. ꦤ ꦱꦏ꧀ꦏꦴ ꦱꦩ꧀ꦥꦠ꧀ꦠꦶꦨꦮꦁ ꦒꦤ꧀ꦠꦸꦁ ꦏꦸꦠꦺꦴ ꦤꦶꦧ꧀ꦧꦴꦤꦒꦩꦤꦤ꧀ꦠꦶ ꦄꦣꦶꦥ꧀ꦥꦴꦪꦺꦴ.

ꦄꦱꦸꦨꦴꦮꦗ꧀ꦗꦤꦴꦢꦷꦲꦷꦠꦶ ꦄꦴꦢꦶ-ꦱꦢ꧀ꦢꦺꦤ ꦄꦤꦶꦕ꧀ꦕꦩꦤꦱꦶꦏꦴꦫꦴꦢꦷꦤꦩ꧀ꦥꦶ ꦱꦔ꧀ꦒꦲꦺꦴ ꦢꦛ꧀ꦜꦧ꧀ꦧꦺꦴ. ꦕꦶꦠ꧀ꦠꦁ ꦤꦶꦮꦠ꧀ꦠꦠꦶ ꦱꦫꦴꦒꦕꦶꦠ꧀ꦠꦁ ꦤ ꦈꦥ꧀ꦥꦗ꧀ꦗꦠꦶ ꦥꦛꦶꦥꦏ꧀ꦑꦩꦤꦱꦶꦏꦴꦫꦺꦤ ꦮꦶꦤꦺꦴꦢꦶꦠꦠ꧀ꦠꦴ. ꦩꦗ꧀ꦙꦠ꧀ꦠꦴꦫꦩ꧀ꦩꦟꦺꦠꦶ ꦄꦚ꧀ꦚꦴꦟꦸꦥꦺꦏ꧀ꦑꦛ꧀ꦜꦴꦤꦶꦪꦺ ꦄꦴꦫꦩ꧀ꦩꦟꦺ. ꦈꦢ꧀ꦢꦺꦱ…ꦥꦺ… ꦄꦴꦮꦗ꧀ꦗꦤ꧀ꦠꦱ꧀ꦱꦴꦠꦶ ꦈꦢ꧀ꦢꦶꦱꦴꦥꦤꦮꦱꦺꦤ ꦈꦢ꧀ꦢꦺꦱꦁ, ꦥꦫꦶꦥꦸꦕ꧀ꦖꦴꦥꦤꦮꦱꦺꦤ ꦥꦫꦶꦥꦸꦕ꧀ꦖꦁ, ꦒꦫꦹꦤꦁ ꦱꦤ꧀ꦠꦶꦏꦺ ꦮꦱꦤꦮꦱꦺꦤ ꦒꦫꦸꦮꦴꦱꦁ ꦄꦴꦮꦗ꧀ꦗꦤ꧀ꦠꦱ꧀ꦱ. ꦕꦶꦠ꧀ꦠꦤ꧀ꦠꦶ ꦒꦩ꧀ꦨꦷꦫꦚꦴꦟꦕꦫꦶꦪ-ꦥꦕ꧀ꦕꦮꦺꦏ꧀ꦑꦟ-ꦥꦚ꧀ꦚꦮꦤ꧀ꦠ-ꦥꦸꦒ꧀ꦒꦭꦱꦺꦮꦤꦮꦱꦺꦤ ꦠꦢꦣꦶꦩꦸꦠ꧀ꦠꦶꦱꦶꦢ꧀ꦣꦶꦪꦴ ꦄꦚ꧀ꦚꦴꦟꦕꦶꦠ꧀ꦠꦁ ꦤꦶꦮꦠ꧀ꦠꦠꦶ.

ꦪꦡꦴ ‘‘ꦥꦸꦗ꧀ꦗꦨꦮꦦꦭꦁ ꦥꦸꦚ꧀ꦚ’’ꦤ꧀ꦠꦶ ꦮꦸꦠ꧀ꦠꦁ ‘‘ꦌꦮꦩꦶꦢꦁ ꦥꦸꦚ꧀ꦚꦁ ꦥꦮꦝ꧀ꦞꦠꦷ’’ꦠꦶ (ꦢꦷ. ꦤꦶ. ꧓.꧘꧐), ꦌꦮꦁ ꦏꦶꦛ꧀ꦜꦱꦩ꧀ꦨꦮꦠ꧀ꦠꦴ ‘‘ꦏꦶꦛ꧀ꦜ’’ꦤ꧀ꦠꦶ ꦮꦸꦠ꧀ꦠꦤ꧀ꦠꦶ ꦄꦴꦲ ‘‘ꦏꦶꦛ꧀ꦜꦤ꧀ꦠꦶ ꦏꦶꦛ꧀ꦜꦛ꧀ꦜꦴꦤꦺ ꦈꦥ꧀ꦥꦤ꧀ꦤꦱꦱ꧀ꦱ’’ꦤ꧀ꦠꦶ.

ꦓꦛꦴꦠꦶ ꦱꦶꦔ꧀ꦒꦪꦸꦒꦁ ꦆꦣꦴꦣꦶꦥ꧀ꦥꦺꦠꦤ꧀ꦠꦶ ꦄꦴꦲ ‘‘ꦢ꧀ꦮꦶꦤ꧀ꦤꦁ ꦱꦶꦔ꧀ꦒꦴꦤꦁ ꦄꦤ꧀ꦠꦫꦺ’’ꦠꦶ. ꦓꦛꦴꦠꦶ ꦒꦺꦴꦟꦴꦢꦷꦤꦁ ꦱꦶꦔ꧀ꦒꦤ꧀ꦠꦫꦛ꧀ꦜꦱ꧀ꦱ ꦱꦩꦚ꧀ꦚꦴꦠꦶ ꦮꦢꦤ꧀ꦠꦶ. ꦤꦴꦱꦴꦫꦗ꧀ꦗꦸꦏꦺꦠꦶ ꦤꦴꦱꦴꦫꦗ꧀ꦗꦸꦥꦴꦠꦛ꧀ꦜꦴꦤꦺ.

ꦢꦩꦺꦠꦶ ꦥꦸꦡꦸꦠ꧀ꦠꦴꦫꦩ꧀ꦩꦟꦠꦺꦴ ꦤꦶꦮꦴꦫꦺꦠꦶ. ꦤꦤ꧀ꦠꦶ ꦕꦶꦠ꧀ꦠꦁ. ꦪꦁ ꦱꦸꦠ꧀ꦠꦁ ꦱꦸꦨꦴꦱꦶꦠꦁ ꦩꦪꦴ. ꦠꦢꦱ꧀ꦱꦴꦠꦶ ꦠꦢꦴ ꦄꦱ꧀ꦱ ꦨꦶꦏ꧀ꦑꦸꦤꦺꦴ. ꦄꦴꦫꦩ꧀ꦩꦟꦺꦠꦶ ꦏꦩ꧀ꦩꦛ꧀ꦜꦴꦤꦴꦫꦩ꧀ꦩꦟꦺ.

ꦱꦸꦢꦸꦗꦶꦠꦤ꧀ꦠꦶ ꦤꦶꦧ꧀ꦧꦶꦱꦺꦮꦤꦨꦴꦮꦏꦫꦟꦺꦤ ꦗꦶꦠꦁ. ꦱꦸꦠꦗ꧀ꦗꦶꦠꦤ꧀ꦠꦶ ꦱꦸꦛ꧀ꦜꦸ ꦢꦹꦫꦏꦫꦟꦺꦤ ꦗꦶꦠꦁ, ꦠꦡꦴꦨꦹꦠꦚ꧀ꦕ ꦠꦗ꧀ꦗꦶꦠꦁ ꦤꦴꦩ ꦲꦺꦴꦠꦷꦠꦶ ꦠꦡꦴ ꦮꦸꦠ꧀ꦠꦁ. ꦒꦺꦴꦕꦫꦗ꧀ꦙꦠ꧀ꦠꦤ꧀ꦠꦶ ꦄꦗ꧀ꦙꦠ꧀ꦠꦨꦹꦠꦺꦴ ꦒꦺꦴꦕꦫꦺꦴ. ꦏꦩ꧀ꦩꦛ꧀ꦜꦴꦤꦴꦫꦩ꧀ꦩꦟꦚ꧀ꦲꦶ ꦧꦲꦶꦢ꧀ꦣꦴꦫꦹꦥꦴꦢꦶꦄꦴꦫꦩ꧀ꦩꦟꦮꦶꦣꦸꦫꦠꦴꦪ ꦄꦗ꧀ꦙꦠ꧀ꦠꦤ꧀ꦠꦶ ꦮꦸꦕ꧀ꦕꦠꦶ. ꦱꦩꦡꦺꦴ ꦄꦤꦸꦫꦏ꧀ꦑꦟꦁ ꦌꦠꦱ꧀ꦱꦴꦠꦶ ꦱꦩꦡꦴꦤꦸꦫꦏ꧀ꦑꦟꦁ. ꦪꦡꦴ ꦆꦤ꧀ꦢ꧀ꦫꦶꦪꦱꦁꦮꦫꦱꦷꦭꦁ ꦱꦩꦡꦴꦤꦸꦫꦏ꧀ꦑꦟꦁ ꦲꦺꦴꦠꦶ, ꦠꦡꦴ ꦏꦡꦶꦠꦤ꧀ꦠꦶ ꦄꦠ꧀ꦡꦺꦴ. ꦪꦡꦴ ꦲꦶ ꦆꦤ꧀ꦢ꧀ꦫꦶꦪꦱꦁꦮꦫꦱꦷꦭꦁ ꦱꦩꦡꦱ꧀ꦱ ꦥꦕ꧀ꦕꦪꦺꦴ, ꦌꦮꦁ ꦱꦩꦡꦺꦴꦥꦶ ꦠꦱ꧀ꦱ ꦥꦕ꧀ꦕꦪꦺꦴꦠꦶ.

ꦮꦴꦢꦶꦪꦩꦴꦤꦴꦪ ꦮꦷꦟꦴꦪ. ꦕꦶꦠ꧀ꦠꦁ ꦫꦚ꧀ꦗꦺꦠꦷꦠꦶ ꦫꦗ꧀ꦗꦤꦺꦤ. ꦄꦮꦶꦱ꧀ꦱꦗ꧀ꦗꦤꦷꦪꦠꦴꦪ ꦕꦶꦠ꧀ꦠꦁ ꦧꦤ꧀ꦣꦠꦷꦠꦶ ꦧꦤ꧀ꦣꦤꦷꦪꦺꦴ. ꦮꦺꦛ꧀ꦜꦏꦺꦠꦶ ꦠꦤ꧀ꦠꦷꦤꦁ ꦄꦴꦱꦗ꧀ꦗꦤꦮꦺꦛ꧀ꦜꦏꦺ. ꦏꦺꦴꦟꦤ꧀ꦠꦶ ꦏꦮꦟꦠꦺꦴ ꦮꦷꦟꦴꦪ ꦱꦢ꧀ꦢꦏꦫꦟꦠꦺꦴ ꦏꦺꦴꦟꦤ꧀ꦠꦶ ꦭꦢ꧀ꦣꦤꦴꦩꦁ ꦢꦴꦫꦸꦢꦟ꧀ꦝꦁ ꦱꦶꦔ꧀ꦒꦴꦢꦷꦱꦸ ꦪꦺꦤ ꦏꦺꦤꦕꦶ ꦏꦠꦁ ꦓꦛꦶꦏꦁ. ꦠꦺꦤꦴꦲ ‘‘ꦕꦠꦸꦫꦱ꧀ꦱꦁ ꦱꦴꦫꦢꦟ꧀ꦝꦏ’’ꦤ꧀ꦠꦶ.

ꦪꦱ꧀ꦩꦴ ꦱꦺꦴ ꦫꦴꦗꦴ ꦫꦴꦗꦩꦲꦴꦩꦠ꧀ꦠꦺꦴ ꦮꦴ ꦱꦢ꧀ꦢꦁ ꦪꦡꦴꦱꦨꦴꦮꦠꦺꦴ ꦤ ꦄꦚ꧀ꦚꦴꦱꦶ, ꦠꦱ꧀ꦩꦶꦁ ꦠꦱ꧀ꦱ ꦄꦗꦴꦤꦤꦴꦏꦴꦫꦩꦺꦮ ꦢꦱ꧀ꦱꦺꦠꦸꦁ ‘‘ꦱꦢ꧀ꦢꦁ ꦥꦱ꧀ꦱꦶꦱ꧀ꦱꦴꦩꦷ’’ꦠꦶꦄꦴꦢꦶ ꦮꦸꦠ꧀ꦠꦁ.

ꦄꦱꦠꦷ ꦏꦶꦫꦴꦪꦤ꧀ꦠꦶ ꦥꦴꦭ꦳ꦶꦪꦁ ꦭꦶꦔ꧀ꦒꦮꦶꦥꦭ꧀ꦭꦴꦱꦺꦤ ꦮꦸꦠ꧀ꦠꦤ꧀ꦠꦶ ꦪꦡꦴꦭꦶꦔ꧀ꦒꦩꦺꦮ ꦮꦢꦤ꧀ꦠꦺꦴ ‘‘ꦄꦱꦴ’’ꦠꦶ ꦄꦴꦲ. ‘‘ꦄꦱꦠꦷꦠꦶ ꦭꦴꦩꦏꦴꦣꦶꦮꦕꦤ’’ꦤ꧀ꦠꦶ ꦮꦠ꧀ꦮꦴ ꦠꦠ꧀ꦡ ꦥꦪꦺꦴꦒꦁ ꦢꦱ꧀ꦱꦺꦠꦸꦁ ‘‘ꦄꦱꦴ ꦭꦺꦴꦏꦶꦠ꧀ꦡꦶꦪꦺꦴ ꦤꦴꦩꦴ’’ꦠꦶ ꦮꦸꦠ꧀ꦠꦁ, ꦭꦺꦴꦏꦺ ꦆꦠ꧀ꦡꦶꦪꦺꦴ ꦤꦴꦩ ꦄꦱꦠꦶꦪꦺꦴꦠꦶ ꦄꦠ꧀ꦡꦺꦴ, ꦠꦠ꧀ꦡ ꦏꦴꦫꦟꦩꦴꦲ ‘‘ꦮꦺꦭꦴ ꦠꦴꦱꦁ ꦤ ꦮꦶꦗ꧀ꦗꦠꦷ’’ꦠꦶ. ꦥꦏꦠꦶꦪꦴ ꦭꦺꦴꦏꦺ ꦗꦺꦛ꧀ꦜꦨꦴꦠꦴ ꦏꦤꦶꦛ꧀ꦜꦨꦴꦠꦴ ꦩꦴꦠꦸꦭꦺꦴꦠꦶꦄꦴꦢꦶꦏꦴ ꦮꦺꦭꦴ ꦩꦫꦶꦪꦴꦢꦴ ꦠꦴꦱꦁ ꦤ ꦮꦶꦗ꧀ꦗꦠꦶ. ꦏꦱ꧀ꦩꦴ? ꦱꦴꦫꦠ꧀ꦠꦴ ꦕ ꦥꦒꦧ꧀ꦧꦴ ꦕ ꦱꦧ꧀ꦧꦺꦱꦩ꧀ꦥꦶ ꦱꦩ꧀ꦨꦺꦴꦒꦮꦱꦺꦤ ꦮꦶꦤꦶꦪꦺꦴꦒꦁ ꦒꦕ꧀ꦖꦤ꧀ꦠꦶ. ꦏꦡꦁ? ꦱꦶꦑꦷ ꦱꦧ꧀ꦧꦓꦱꦺꦴ ꦪꦡꦴ. ꦠꦺꦤꦺꦮꦴꦲ –

‘‘ꦱꦧ꧀ꦧꦴ ꦤꦢꦷ ꦮꦔ꧀ꦏꦒꦠꦷ, ꦱꦧ꧀ꦧꦺ ꦏꦛ꧀ꦜꦩꦪꦴ ꦮꦤꦴ;

ꦱꦧ꧀ꦧꦶꦠ꧀ꦡꦶꦪꦺꦴ ꦏꦫꦺ ꦥꦴꦥꦁ, ꦭꦨꦩꦴꦤꦺ ꦤꦶꦮꦴꦠꦏꦺ’’ꦠꦶ. (ꦗꦴ. ꧒.꧒꧑.꧓꧐꧘);

ꦄꦚ꧀ꦚꦩ꧀ꦥꦶ ꦠꦤ꧀ꦠꦶꦧꦢ꧀ꦣꦁ ꦕꦠꦸꦫꦱ꧀ꦱꦄꦩ꧀ꦧꦟꦮꦴꦢꦶꦠꦴꦢꦷꦤꦶ. ꦮꦷꦟꦴ ꦮꦶꦪ ꦥꦚ꧀ꦕꦏ꧀ꦑꦤ꧀ꦣꦴ ꦄꦤꦺꦏꦣꦩ꧀ꦩꦱꦩꦹꦲꦨꦴꦮꦠꦺꦴ. ꦫꦴꦗꦴ ꦮꦶꦪ ꦪꦺꦴꦒꦴꦮꦕꦫꦺꦴ ꦠꦥ꧀ꦥꦛꦶꦧꦢ꧀ꦣꦣꦩ꧀ꦩꦒꦮꦺꦱꦏꦠ꧀ꦠꦴ. ꦄꦱ꧀ꦱꦴꦠꦶ ꦪꦺꦴꦒꦴꦮꦕꦫꦱ꧀ꦱ.

ꦤꦶꦫꦪꦴꦢꦶꦠꦺꦴ ꦄꦚ꧀ꦚꦱ꧀ꦩꦶꦩ꧀ꦥꦶ ꦒꦠꦶ-ꦱꦢ꧀ꦢꦺꦴ ꦮꦠ꧀ꦠꦠꦶ. ꦠꦠꦺꦴ ꦮꦶꦱꦺꦱꦤꦠ꧀ꦡꦁ ‘‘ꦒꦠꦶꦒꦠꦷ’’ꦠꦶ ꦮꦸꦠ꧀ꦠꦁ ‘‘ꦢꦸꦏ꧀ꦑꦢꦸꦏ꧀ꦑꦁ, ꦫꦹꦥꦫꦹꦥ’’ꦤ꧀ꦠꦶ ꦕ ꦪꦡꦴ, ꦒꦠꦶꦱꦚ꧀ꦚꦶꦠꦁ ꦥꦮꦠ꧀ꦠꦶꦛ꧀ꦜꦴꦤꦤ꧀ꦠꦶ ꦄꦠ꧀ꦡꦺꦴ. ꦠꦺꦤꦴꦲ – ‘‘ꦌꦠ꧀ꦡꦤ꧀ꦠꦫꦺ ꦱꦁꦱꦫꦠꦶ ꦮꦠ꧀ꦠꦠꦷ’’ꦠꦶ. ꦱꦚ꧀ꦗꦴꦪꦤꦥꦢꦺꦱꦺꦴ ꦌꦮ ꦒꦠꦷꦠꦶ ꦱꦚ꧀ꦗꦴꦠꦶꦒꦠꦶ.

ꦠꦁ ꦥꦤ ꦒꦠꦶꦁ ꦱꦠ꧀ꦠꦴꦤꦁ ꦱꦁꦮꦺꦒꦮꦠ꧀ꦡꦸꦨꦹꦠꦱ꧀ꦱ ꦥꦕ꧀ꦕꦏ꧀ꦑꦱ꧀ꦱ ꦒꦧ꧀ꦨꦴꦱꦪꦱ꧀ꦱ ꦮꦱꦺꦤ ꦢꦱ꧀ꦱꦺꦠꦸꦁ ‘‘ꦄꦪꦩꦱ꧀ꦱ ꦏꦴꦪꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦫꦹꦥꦣꦩ꧀ꦩꦱ꧀ꦱ ꦱꦭꦏ꧀ꦑꦟꦁ ꦒꦠꦶ ꦤꦶꦛ꧀ꦜꦴ, ꦠꦠꦺꦴ ꦥꦫꦁ ꦄꦚ꧀ꦚꦁ ꦏꦶꦚ꧀ꦕꦶ ꦤꦠ꧀ꦡꦷꦠꦶ ꦱꦭꦏ꧀ꦑꦟꦒꦠꦶ. ꦄꦨꦴꦮꦺꦴ ꦄꦕ꧀ꦕꦤ꧀ꦠꦴꦨꦴꦮꦺꦴ. ꦱꦤ꧀ꦠꦴꦤꦮꦶꦕ꧀ꦖꦺꦢꦺꦴ ꦮꦶꦨꦮꦒꦠꦶ ꦠꦁꦤꦶꦛ꧀ꦜꦴꦤꦨꦴꦮꦴ. ꦨꦺꦢꦺꦴꦠꦶ ꦑꦟꦤꦶꦫꦺꦴꦣꦺꦴ, ꦆꦣꦴꦥꦶ ꦠꦁꦤꦶꦛ꧀ꦜꦴꦤꦠꦴꦪꦺꦮ ꦥꦫꦶꦪꦴꦪꦺꦴ. ꦪꦴꦮ ꦨꦮꦒ꧀ꦒꦴꦠꦶ ꦪꦴꦮ ꦱꦧ꧀ꦧꦨꦮꦒ꧀ꦒꦴ. ꦱꦭꦏ꧀ꦑꦟꦮꦶꦨꦮꦒꦠꦶꦨꦺꦢꦒꦠꦶꦪꦺꦴ ‘‘ꦌꦱꦺꦮ ꦤꦪꦺꦴ’’ꦠꦶ ꦆꦩꦶꦤꦴꦮ ꦥꦏꦴꦱꦶꦠꦴꦠꦶ ꦤ ꦒꦲꦶꦠꦴ. ꦠꦱ꧀ꦱ ꦑꦷꦟꦴꦱꦮꦱ꧀ꦱ ꦤ ꦲꦺꦴꦠꦶ ꦄꦒ꧀ꦒꦩꦒ꧀ꦒꦺꦤ ꦱꦩꦸꦕ꧀ꦖꦶꦤ꧀ꦤꦠ꧀ꦠꦴ.

ꦱꦷꦭꦁ ꦏꦡꦶꦠꦁ ꦫꦹꦥꦴꦢꦷꦱꦸ ꦖꦤ꧀ꦢꦴꦢꦶꦤꦶꦮꦴꦫꦟꦱ꧀ꦱ ꦏꦡꦶꦠꦠ꧀ꦠꦴ. ꦩꦗ꧀ꦙꦺ ꦱꦩꦴꦣꦶꦨꦴꦮꦤꦴ ꦏꦡꦶꦠꦴ ‘‘ꦄꦗ꧀ꦙꦠ꧀ꦠꦩꦺꦮ ꦱꦤ꧀ꦠꦶꦛ꧀ꦜꦠꦶ…ꦥꦺ… ꦱꦩꦴꦣꦶꦪꦠꦷ’’ꦠꦶ ꦗꦺꦴꦠꦶꦠꦠ꧀ꦠꦴ. ꦥꦫꦶꦪꦺꦴꦱꦴꦤꦺ ꦕ ꦤꦶꦧ꧀ꦧꦴꦤꦁ ꦏꦡꦶꦠꦁ ‘‘ꦪꦩ꧀ꦥꦶꦱ꧀ꦱ…ꦥꦺ… ꦤ ꦲꦺꦴꦠꦷ’’ꦠꦶ ꦮꦕꦤꦠꦺꦴ.

ꦮꦷꦟꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧑꧐. ꦖꦥ꧀ꦥꦴꦟꦏꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ

꧒꧔꧗. ꦮꦟꦱꦫꦷꦫꦺꦴꦠꦶ ꦮꦟꦶꦠꦱꦫꦷꦫꦺꦴ. ꦥꦏ꧀ꦏꦠ꧀ꦠꦴꦠꦶ ꦏꦸꦡꦶꦠꦠ꧀ꦠꦴ. ꦱꦫꦢꦟ꧀ꦝꦺꦱꦸ ꦱꦫꦱꦩꦚ꧀ꦚꦴꦠꦶ ꦏꦟ꧀ꦝ-ꦱꦢ꧀ꦢꦺꦴ ꦱꦫꦥꦫꦶꦪꦴꦪꦺꦴꦠꦶ ꦄꦴꦲ – ‘‘ꦱꦫꦮꦤꦤ꧀ꦠꦶ ꦏꦟ꧀ꦝꦮꦤ’’ꦤ꧀ꦠꦶ. ꦄꦫꦸꦒꦠ꧀ꦠꦺꦴ…ꦥꦺ… ꦮꦺꦢꦶꦠꦧ꧀ꦧꦺꦴ ꦒꦸꦟꦱꦫꦷꦫꦱ꧀ꦱ ꦑꦟ꧀ꦝꦖꦶꦢ꧀ꦢꦱꦷꦭꦴꦢꦷꦲꦶ ꦲꦺꦛ꧀ꦜꦴ ꦩꦗ꧀ꦙꦺ ꦈꦥꦫꦶꦨꦴꦒꦺ ꦕ ꦨꦺꦢꦮꦶꦱꦩꦕ꧀ꦖꦶꦤ꧀ꦤꦮꦶꦏꦴꦫꦢꦺꦴꦱꦠ꧀ꦠꦴ. ꦌꦠ꧀ꦡ ꦏꦸꦱꦴ ‘‘ꦏꦟ꧀ꦛꦏꦴ’’ꦠꦶ ꦄꦣꦶꦥ꧀ꦥꦺꦠꦴ ꦏꦟ꧀ꦛꦏꦱꦢꦶꦱꦠ꧀ꦠꦴ, ꦏꦸꦱꦠꦶꦟꦴꦤꦁ ꦌꦮ ꦮꦴ ꦮꦸꦠ꧀ꦠꦴꦏꦴꦫꦥꦢꦺꦱꦺꦴ ‘‘ꦏꦸꦱꦏꦟ꧀ꦛꦏꦺꦴ’’ꦠꦶ ꦮꦸꦠ꧀ꦠꦺꦴ.

ꦒꦴꦩꦮꦴꦱꦷꦤꦁ ꦮꦶꦗ꧀ꦙꦤꦛ꧀ꦜꦺꦤꦴꦠꦶ ꦤꦴꦫꦲꦺꦴꦮ ꦲꦸꦠ꧀ꦮꦴ ꦠꦺꦱꦁ ꦏꦴꦫꦴꦤꦁ ꦥꦛꦶꦒ꧀ꦒꦲꦟꦮꦱꦺꦤ ꦥꦷꦭ꦳ꦤꦛ꧀ꦜꦺꦤ.

ꦥꦏ꧀ꦑꦶꦤ꧀ꦠꦶ ꦲꦠ꧀ꦡꦶꦭꦶꦔ꧀ꦒꦱꦏꦸꦟꦁ. ꦠꦱ꧀ꦱ ꦏꦶꦫ ꦲꦠ꧀ꦡꦶꦱꦺꦴꦟ꧀ꦝꦱꦢꦶꦱꦁ ꦩꦸꦑꦁ, ꦠꦱ꧀ꦩꦴ ‘‘ꦲꦠ꧀ꦡꦶꦱꦺꦴꦟ꧀ꦝꦱꦏꦸꦟ’’ꦤ꧀ꦠꦶ ꦮꦸꦠ꧀ꦠꦁ. ꦮꦶꦱ꧀ꦱꦗ꧀ꦗꦺꦪ꧀ꦪꦴꦠꦶ ꦫꦗ꧀ꦗꦸꦪꦴ ꦪꦡꦴꦧꦢ꧀ꦣꦁ ꦌꦮ ꦮꦶꦱ꧀ꦱꦗ꧀ꦗꦺꦪ꧀ꦪ.

ꦨꦺꦴꦒꦺꦲꦷꦠꦶ ꦄꦠ꧀ꦠꦤꦺꦴ ꦱꦫꦷꦫꦨꦺꦴꦒꦺꦲꦶ. ꦩꦟ꧀ꦝꦭꦁ ꦧꦤ꧀ꦣꦶꦠ꧀ꦮꦴꦠꦶ ꦪꦡꦴ ꦱꦫꦷꦫꦁ ꦩꦟ꧀ꦝꦭꦴꦏꦴꦫꦺꦤ ꦠꦶꦛ꧀ꦜꦠꦶ, ꦌꦮꦁ ꦏꦠ꧀ꦮꦴ. ꦱꦸꦥꦶꦱ꧀ꦱꦴꦩꦷꦠꦶ ꦤꦶꦢ꧀ꦢꦁ ꦎꦏ꧀ꦏꦩꦶꦱ꧀ꦱꦴꦩꦶ. ꦝꦺꦠꦸꦏꦴꦩꦺꦴꦠꦶ ꦈꦥ꧀ꦥꦠꦶꦠꦸꦏꦴꦩꦺꦴ. ꦢꦶꦱꦴ ꦢꦶꦱꦤ꧀ꦠꦶ ꦢꦶꦱꦠꦺꦴ ꦢꦶꦱꦁ.

ꦖ ꦥꦴꦟꦏꦴ ꦮꦶꦪ ꦖ ꦄꦴꦪꦠꦤꦴꦤꦶ ꦤꦴꦤꦗ꧀ꦙꦴꦱꦪꦠ꧀ꦠꦴ, ꦤꦴꦤꦗ꧀ꦙꦴꦱꦪꦠꦴ ꦕ ꦤꦺꦱꦁ ꦤꦴꦤꦴꦮꦶꦱꦪꦤꦶꦤ꧀ꦤꦠꦴꦪ ꦢꦛ꧀ꦜꦧ꧀ꦧꦴ. ꦢꦭ꦳꧀ꦲꦫꦗ꧀ꦗꦸ ꦮꦶꦪ ꦠꦟ꧀ꦲꦴ ꦠꦺꦱꦁ ꦧꦤ꧀ꦣꦤꦠꦺꦴ. ꦩꦗ꧀ꦙꦺ ꦒꦟ꧀ꦜꦶ ꦮꦶꦪ ꦄꦮꦶꦗ꧀ꦗꦴ ꦧꦤ꧀ꦣꦤꦱ꧀ꦱ ꦢꦸꦧ꧀ꦧꦶꦤꦶꦩ꧀ꦩꦺꦴꦕꦤꦲꦺꦠꦸꦠꦺꦴ. ꦄꦴꦫꦩ꧀ꦩꦟꦁ ꦧꦭꦮꦁ ꦲꦺꦴꦠꦶ ꦩꦤꦸꦚ꧀ꦚꦨꦴꦮꦺꦤ ꦕꦺꦮ ꦠꦠ꧀ꦡ ꦠꦟ꧀ꦲꦴꦨꦶꦤꦶꦮꦺꦱꦱ꧀ꦱ ꦢꦭ꦳꧀ꦲꦨꦴꦮꦺꦤ ꦕ.

ꦱꦫꦶꦏ꧀ꦑꦏꦺꦤ ꦮꦴ ꦈꦥꦩꦴꦪ ꦄꦴꦲꦫꦟꦥꦏ꧀ꦑꦺ. ꦄꦥ꧀ꦥꦤꦴꦠꦶ ꦱꦁꦱꦤ꧀ꦢꦤꦴ. ꦥꦴꦭ꦳ꦶꦪꦁꦪꦺꦮ ꦄꦥ꧀ꦥꦶꦠꦴ ꦈꦥꦩꦴ ‘‘ꦌꦮꦩꦺꦮ ꦑꦺꦴ’’ꦠꦶꦄꦴꦢꦶꦤꦴ. ꦫꦹꦥꦕꦶꦠ꧀ꦠꦴꦢꦶꦮꦶꦱꦩꦤꦶꦤ꧀ꦤꦠ꧀ꦠꦴ ꦕꦏ꧀ꦑꦸꦱ꧀ꦱ ꦮꦶꦱꦩꦗ꧀ꦙꦴꦱꦪꦠꦴ. ꦌꦱ ꦤꦪꦺꦴ ꦱꦺꦱꦺꦱꦸꦥꦶ.

ꦏꦟ꧀ꦟꦕ꧀ꦖꦶꦢ꧀ꦢꦏꦹꦥꦏꦺꦠꦶ ꦏꦟ꧀ꦟꦕ꧀ꦖꦶꦢ꧀ꦢꦱꦚ꧀ꦚꦶꦠꦺ ꦄꦴꦮꦴꦛꦺ. ꦠꦱ꧀ꦱꦴꦠꦶ ꦱꦺꦴꦠꦱ꧀ꦱ. ꦥꦕ꧀ꦕꦪꦺꦴ ꦲꦺꦴꦠꦷꦠꦶ ꦈꦥꦤꦶꦱ꧀ꦱꦪꦺꦴ ꦲꦺꦴꦠꦶ ꦠꦺꦤ ꦮꦶꦤꦴ ꦱꦢ꧀ꦢꦒ꧀ꦒꦲꦟꦱ꧀ꦱ ꦄꦨꦴꦮꦠꦺꦴ. ‘‘ꦄꦗꦛꦴꦏꦴꦱꦺꦴꦥꦶ ꦮꦛ꧀ꦛꦠꦶ ꦌꦮꦴ’’ꦠꦶ ꦮꦠ꧀ꦮꦴ ꦠꦱ꧀ꦱ ꦥꦕ꧀ꦕꦪꦨꦴꦮꦁ ꦢꦱ꧀ꦱꦺꦠꦸꦁ ‘‘ꦄꦤ꧀ꦠꦺꦴꦭꦺꦟꦱ꧀ꦩꦶ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦣꦴꦠꦸꦥꦫꦩ꧀ꦥꦫꦴ ꦓꦛ꧀ꦛꦺꦤ꧀ꦠꦺꦴꦠꦶ ꦨꦹꦠꦥꦫꦩ꧀ꦥꦫꦴꦱꦔ꧀ꦓꦛ꧀ꦛꦺꦤ꧀ꦠꦺꦴ.

ꦌꦮꦁ ꦱꦤ꧀ꦠꦺꦠꦶ ꦌꦮꦁ ꦨꦹꦠꦥꦫꦩ꧀ꦥꦫꦴꦮꦱꦺꦤ ꦱꦢ꧀ꦢꦺ ꦱꦺꦴꦠꦥꦡꦩꦴꦒꦕ꧀ꦖꦤ꧀ꦠꦺ. ꦱꦩ꧀ꦥꦠ꧀ꦠꦒꦺꦴꦕꦫꦠꦴ ꦲꦺꦴꦠꦶ ꦱꦺꦴꦠꦱ꧀ꦱ. ꦓꦴꦤꦴꦢꦷꦤꦁ ꦮꦶꦪ ‘‘ꦢꦹꦫꦺ ꦱꦢ꧀ꦢꦺꦴ’’ꦠꦶ ꦗꦴꦤꦤꦁ ꦤ ꦱꦩ꧀ꦨꦮꦺꦪ꧀ꦪ ꦱꦩ꧀ꦥꦠ꧀ꦠꦒꦴꦲꦶꦨꦴꦮꦠꦺꦴ. ꦠꦡꦴ ꦠꦡꦴ ꦗꦴꦤꦤꦴꦏꦴꦫꦺꦴ ꦲꦺꦴꦠꦶ ꦩꦤꦺꦴꦮꦶꦚ꧀ꦚꦴꦟꦱ꧀ꦱ ꦒꦲꦟꦴꦏꦴꦫꦮꦶꦱꦺꦱꦠꦺꦴ. ꦱꦺꦴꦠꦮꦶꦚ꧀ꦚꦴꦟꦥ꧀ꦥꦮꦠ꧀ꦠꦶ ꦥꦤ ꦈꦨꦪꦠ꧀ꦡ ꦱꦩꦴꦤꦴꦮ. ꦢꦹꦫꦺ ꦜꦶꦠꦺꦴꦥꦶ ꦱꦢ꧀ꦢꦺꦴ ꦠꦴꦢꦶꦱꦺ ꦜꦴꦤꦺ ꦥꦛꦶꦓꦺꦴꦱꦴꦢꦷꦤꦁ ꦥꦕ꧀ꦕꦪꦺꦴ ꦲꦺꦴꦠꦶ ꦄꦪꦺꦴꦏꦤ꧀ꦠꦺꦴ ꦮꦶꦪ ꦄꦪꦺꦴꦕꦭꦤꦱ꧀ꦱꦴꦠꦶ ꦢꦛ꧀ꦜꦧ꧀ꦧꦁ. ꦣꦩ꧀ꦩꦠꦴꦠꦶ ꦣꦩ꧀ꦩꦱꦨꦴꦮꦺꦴ, ꦱꦢ꧀ꦢꦱ꧀ꦱ ꦱꦺꦴ ꦱꦨꦴꦮꦺꦴꦠꦶ ꦄꦠ꧀ꦡꦺꦴ. ꦠꦠꦺꦴ ꦠꦠꦺꦴ ꦱꦮꦤꦁ ꦲꦺꦴꦠꦶ ꦄꦴꦏꦴꦱꦱꦚ꧀ꦚꦶꦠꦱ꧀ꦱ ꦈꦥꦤꦶꦱ꧀ꦱꦪꦱ꧀ꦱ ꦭꦧ꧀ꦨꦤꦠꦺꦴ. ꦪꦢꦶ ꦥꦤ ꦱꦺꦴꦠꦁ ꦱꦩ꧀ꦥꦠ꧀ꦠꦒꦴꦲꦷ ꦱꦶꦪꦴ, ꦕꦶꦠ꧀ꦠꦱꦩꦸꦛ꧀ꦜꦴꦤꦱꦢ꧀ꦢꦺꦴ ꦱꦺꦴꦠꦮꦶꦚ꧀ꦚꦴꦟꦱ꧀ꦱ ꦄꦴꦫꦩ꧀ꦩꦟꦥꦕ꧀ꦕꦪꦺꦴ ꦤ ꦱꦶꦪꦴ. ꦥꦛ꧀ꦜꦴꦤꦺ ꦕ ꦄꦮꦶꦱꦺꦱꦺꦤ ‘‘ꦱꦢ꧀ꦢꦴꦪꦠꦤꦁ ꦱꦺꦴꦠꦮꦶꦚ꧀ꦚꦴꦟꦱ꧀ꦱ ꦄꦴꦫꦩ꧀ꦩꦟꦥꦕ꧀ꦕꦪꦺꦤ ꦥꦕ꧀ꦕꦪꦺꦴ’’ꦠꦶ ꦮꦸꦠ꧀ꦠꦺꦴ, ꦧꦲꦶꦢ꧀ꦣꦴ ꦕ ꦕꦶꦠ꧀ꦠꦗꦱ꧀ꦱ ꦱꦢ꧀ꦢꦱ꧀ꦱ ꦱꦩ꧀ꦨꦮꦺꦴ ꦤꦠ꧀ꦡꦶ. ꦄꦡ ꦮꦴ ꦕꦶꦠ꧀ꦠꦗꦺꦴ ꦱꦢ꧀ꦢꦺꦴ ꦣꦴꦠꦸꦥꦫꦩ꧀ꦥꦫꦴꦪ ꦱꦺꦴꦠꦥꦱꦴꦢꦁ ꦓꦛ꧀ꦛꦺꦠꦶ, ꦤ ꦱꦺꦴ ꦕꦶꦠ꧀ꦠꦗꦺꦴ ꦱꦢ꧀ꦢꦺꦴ, ꦪꦺꦴ ꦥꦫꦩ꧀ꦥꦫꦴꦪ ꦥꦮꦠ꧀ꦠꦺꦴ. ꦈꦠꦸꦗꦺꦴ ꦲꦶ ꦱꦺꦴ, ꦠꦱ꧀ꦩꦴ ꦪꦡꦸꦥ꧀ꦥꦤ꧀ꦤꦺꦴ ꦱꦢ꧀ꦢꦺꦴ, ꦠꦠ꧀ꦡ ꦜꦶꦠꦺꦴꦮ ꦱꦺꦴꦠꦥꦱꦴꦢꦱ꧀ꦱ ꦄꦴꦥꦴꦡꦁ ꦄꦴꦒꦕ꧀ꦖꦠꦷꦠꦶ ꦤꦶꦛ꧀ꦜꦩꦺꦠ꧀ꦡ ꦒꦤ꧀ꦠꦧ꧀ꦧꦁ. ꦠꦺꦤ ꦮꦸꦠ꧀ꦠꦁ ‘‘ꦄꦱꦩ꧀ꦥꦠ꧀ꦠꦒꦺꦴꦕꦫꦩꦺꦮꦺꦠ’’ꦤ꧀ꦠꦶ.

ꦠꦢꦴ ꦌꦏꦒ꧀ꦒꦕꦶꦠ꧀ꦠꦠꦁ ꦄꦴꦥꦗ꧀ꦗꦠꦶ ꦥꦫꦶꦱ꧀ꦱꦪꦴꦤꦁ ꦄꦨꦴꦮꦠꦺꦴ. ꦤꦴꦱꦕ꧀ꦖꦶꦢ꧀ꦢꦱꦔ꧀ꦑꦴꦠꦄꦴꦏꦴꦱꦱꦤ꧀ꦤꦶꦱ꧀ꦱꦪꦺ ꦮꦠ꧀ꦠꦤꦠꦺꦴ ꦓꦴꦤꦁ ꦄꦴꦏꦴꦱꦗ꧀ꦙꦴꦱꦪꦁ ꦮꦸꦠ꧀ꦠꦁ. ꦮꦴꦠꦺꦤ ꦮꦶꦤꦴ ꦒꦤ꧀ꦣꦒꦲꦟꦱ꧀ꦱ ꦄꦱꦩ꧀ꦨꦮꦠꦺꦴ ꦮꦴꦠꦹꦥꦤꦶꦱ꧀ꦱꦪꦒꦤ꧀ꦣꦒꦺꦴꦕꦫꦁ. ꦠꦺꦤꦴꦲ ‘‘ꦠꦡꦴ ꦲꦷ’’ꦠꦶꦄꦴꦢꦶ.

ꦒꦴꦩꦠꦺꦴ ꦭꦢ꧀ꦣꦧ꧀ꦧꦁ ꦄꦴꦲꦴꦫꦁ ꦒꦴꦩꦁ, ꦠꦤ꧀ꦤꦶꦤ꧀ꦤꦠꦴꦪ ꦒꦴꦩꦗ꧀ꦙꦴꦱꦪꦠꦴ ꦮꦸꦠ꧀ꦠꦴ. ꦠꦡꦴ ꦲꦶ ꦗꦷꦮꦶꦠꦤꦶꦩꦶꦠ꧀ꦠꦁ ꦫꦱꦺꦴ ꦗꦷꦮꦶꦠꦁ, ꦠꦱ꧀ꦩꦶꦁ ꦤꦶꦤ꧀ꦤꦠꦴꦪ ꦠꦁ ꦄꦮ꧀ꦲꦴꦪꦠꦷꦠꦶ ꦗꦶꦮ꧀ꦲꦴ. ꦤ ꦱꦏ꧀ꦏꦴ ꦑꦺꦭ꦳ꦺꦤ ꦄꦠꦺꦩꦶꦠꦱ꧀ꦱ ꦫꦱꦁ ꦗꦴꦤꦶꦠꦸꦁ, ꦠꦱ꧀ꦩꦴ ꦄꦴꦥꦺꦴꦱꦤ꧀ꦤꦶꦱ꧀ꦱꦶꦠꦫꦱꦴꦫꦩ꧀ꦩꦟꦴ ꦗꦶꦮ꧀ꦲꦴꦠꦶ.

ꦄꦴꦩꦏꦱꦸꦱꦴꦤꦠꦺꦴ ꦧꦲꦶ. ꦈꦥꦴꦢꦶꦟ꧀ꦟꦏꦗ꧀ꦙꦴꦱꦪꦺꦴꦠꦶ ꦈꦥꦴꦢꦶꦟ꧀ꦟꦏꦤꦶꦤ꧀ꦤꦺꦴ. ꦏꦴꦪꦥꦱꦴꦢꦱꦤ꧀ꦤꦶꦱ꧀ꦱꦪꦨꦹꦠꦴꦪ ꦥꦡꦮꦶꦪꦴ ꦦꦺꦴꦛ꧀ꦜꦧ꧀ꦧꦴꦫꦩ꧀ꦩꦟꦺ ꦓꦛꦶꦠꦺ ꦌꦮ ꦠꦠ꧀ꦡ ꦮꦶꦚ꧀ꦚꦴꦟꦸꦥ꧀ꦥꦠ꧀ꦠꦶ, ꦤ ꦄꦚ꧀ꦚꦡꦴꦠꦶ ꦮꦸꦠ꧀ꦠꦁ ‘‘ꦥꦡꦮꦷꦱꦤ꧀ꦤꦶꦱ꧀ꦱꦶꦠꦦꦺꦴꦛ꧀ꦜꦧ꧀ꦧꦴꦫꦩ꧀ꦩꦟꦺꦴ’’ꦠꦶ. ꦠꦡꦴ ꦲꦷꦠꦶꦄꦴꦢꦶ ꦏꦴꦪꦱ꧀ꦱ ꦈꦥꦴꦢꦶꦟ꧀ꦟꦏꦗ꧀ꦙꦴꦱꦪꦠꦴꦪ ꦱꦴꦣꦏꦁ. ꦄꦗ꧀ꦙꦠ꧀ꦠꦶꦏꦧꦴꦲꦶꦫꦴꦠꦶ ꦄꦗ꧀ꦙꦠ꧀ꦠꦶꦏꦴ ꦧꦴꦲꦶꦫꦴ ꦮꦴ. ꦄꦱ꧀ꦱꦴꦠꦶ ꦏꦴꦪꦱ꧀ꦱ. ꦱꦸꦱꦤ꧀ꦡꦠꦱ꧀ꦱꦴꦠꦶꦄꦴꦢꦶ ꦠꦱ꧀ꦱ ꦥꦡꦮꦶꦪꦴ ꦥꦕ꧀ꦕꦪꦨꦴꦮꦢꦱ꧀ꦱꦤꦁ.

ꦤꦴꦤꦗ꧀ꦙꦴꦱꦪꦺꦴꦠꦶ ꦤꦴꦤꦴꦫꦩ꧀ꦩꦟꦤꦶꦤ꧀ꦤꦺꦴ. ꦠꦺꦤ ꦩꦤꦱ꧀ꦱ ꦩꦏ꧀ꦏꦛꦱ꧀ꦱ ꦮꦶꦪ ꦄꦤꦮꦛ꧀ꦜꦶꦠꦠꦁ ꦢꦱ꧀ꦱꦺꦠꦶ. ꦠꦺꦤꦴꦲ ‘‘ꦢꦶꦛ꧀ꦜꦥꦸꦧ꧀ꦧꦺꦥꦷ’’ꦠꦶꦄꦴꦢꦶ. ꦩꦹꦭꦨꦮꦔ꧀ꦒꦒ꧀ꦒꦲꦟꦺꦤ ꦥꦶꦛ꧀ꦜꦶꦨꦮꦔ꧀ꦒꦁ ꦤꦶꦮꦠ꧀ꦠꦺꦠꦶ. ꦄꦱ꧀ꦱꦴꦠꦶ ꦩꦤꦱ꧀ꦱ. ꦌꦮꦁ ꦏꦶꦫꦶꦪꦩꦪꦁ ꦮꦶꦚ꧀ꦚꦴꦟꦁ ꦢꦛ꧀ꦜꦧ꧀ꦧꦁ. ꦤꦴꦤꦠ꧀ꦠꦤ꧀ꦠꦶ ꦨꦺꦢꦺꦴ.

ꦪꦡꦴꦫꦸꦕꦶꦥ꧀ꦥꦮꦠ꧀ꦠꦶꦪꦴ ꦤꦶꦮꦴꦫꦟꦮꦱꦺꦤ ꦧꦢ꧀ꦣꦴꦤꦁ. ꦤꦶꦧ꧀ꦧꦶꦱꦺꦮꦤꦨꦴꦮꦤ꧀ꦠꦶ ꦭꦺꦴꦭꦠꦴꦱꦔ꧀ꦑꦴꦠꦥꦫꦶꦥ꧀ꦦꦤ꧀ꦢꦱ꧀ꦱ ꦄꦨꦴꦮꦁ. ꦤꦴꦏꦝ꧀ꦞꦠꦷꦠꦶ ꦱꦮꦶꦱꦪꦺ ꦫꦹꦥꦴꦫꦩ꧀ꦩꦟꦺ ꦕꦶꦠ꧀ꦠꦱꦤ꧀ꦠꦴꦤꦁ, ꦠꦁꦱꦩꦔ꧀ꦒꦶꦤꦁ ꦮꦴ ꦥꦸꦒ꧀ꦒꦭꦁ ꦤꦴꦏꦝ꧀ꦞꦠꦶ. ꦥꦸꦧ꧀ꦧꦨꦴꦒꦮꦶꦥꦱ꧀ꦱꦤꦴꦮ ꦏꦡꦶꦠꦴ ꦄꦴꦪꦠꦤꦩꦸꦑꦺꦤ ‘‘ꦌꦮꦚ꧀ꦲꦶ ꦮꦺꦴ, ꦨꦶꦏ꧀ꦑꦮꦺ, ꦱꦶꦏ꧀ꦑꦶꦠꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦠ꧀ꦠꦴ.

ꦖꦥ꧀ꦥꦴꦟꦏꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧑꧑. ꦪꦮꦏꦭꦴꦥꦶꦱꦸꦠ꧀ꦠꦮꦟ꧀ꦟꦤꦴ

꧒꧔꧘. ꦪꦮꦥꦸꦚ꧀ꦗꦺꦴ ꦱꦸꦥꦫꦶꦥꦏ꧀ꦏꦪꦮꦱꦩꦸꦢꦴꦪꦺꦴ. ꦏꦴꦗꦲꦠ꧀ꦡꦴꦠꦶ ꦢꦟ꧀ꦝꦲꦠ꧀ꦡꦴ. ꦥꦺꦴꦡꦺꦪ꧀ꦪꦸꦤ꧀ꦠꦶ ꦪꦡꦴ ꦪꦮꦱꦔ꧀ꦑꦴꦠꦁ ꦣꦚ꧀ꦚꦁ ꦮꦟ꧀ꦛꦠꦺꦴ ꦩꦸꦕ꧀ꦕꦠꦶ, ꦌꦮꦁ ꦥꦺꦴꦡꦺꦪ꧀ꦪꦸꦁ. ꦪꦮꦺ ꦱꦴꦮꦺꦠ꧀ꦮꦴꦠꦶ ꦪꦮꦱꦷꦱꦠꦺꦴ ꦪꦮꦺ ꦥꦺꦴꦡꦤꦺꦤ ꦩꦺꦴꦕꦺꦠ꧀ꦮꦴ ꦮꦶꦮꦺꦕꦺꦠ꧀ꦮꦴ.

ꦕꦠꦸꦩꦲꦴꦥꦡꦺꦴ ꦮꦶꦪ ꦖ ꦄꦴꦪꦠꦤꦴꦤꦶ ꦄꦴꦫꦩ꧀ꦩꦟꦢꦟ꧀ꦝꦏꦺꦲꦶ ꦲꦤꦤꦛ꧀ꦜꦴꦤꦠ꧀ꦠꦴ. ꦪꦮꦏꦭꦴꦥꦷ ꦮꦶꦪ ꦱꦠ꧀ꦠꦺꦴ ꦠꦺꦲꦶ ꦲꦚ꧀ꦚꦩꦴꦤꦠ꧀ꦠꦴ. ꦖ ꦧ꧀ꦪꦴꦨꦔ꧀ꦒꦶꦪꦺꦴ ꦮꦶꦪ ꦱꦨꦴꦮꦠꦺꦴ ꦖꦣꦴꦥꦶ ꦥꦕ꧀ꦕꦺꦏꦁ ꦆꦛ꧀ꦜꦴꦤꦶꦛ꧀ꦜꦩꦗ꧀ꦙꦠ꧀ꦠꦮꦱꦺꦤ ꦄꦛ꧀ꦜꦴꦫꦱ ꦄꦴꦫꦩ꧀ꦩꦟꦴꦤꦶ ꦪꦮꦏꦭꦴꦥꦛ꧀ꦜꦴꦤꦶꦪꦱ꧀ꦱ ꦱꦠ꧀ꦠꦱ꧀ꦱ ꦲꦤꦤꦠꦺꦴ. ꦨꦮꦥꦠ꧀ꦡꦤꦴꦪ ꦄꦥꦫꦴꦥꦫꦸꦥ꧀ꦥꦠ꧀ꦠꦶꦁ ꦱꦤ꧀ꦣꦴꦪ ‘‘ꦨꦮꦥꦠ꧀ꦡꦤꦴ ꦏꦶꦭꦺꦱꦴ’’ꦠꦶ ꦧꦲꦸꦮꦕꦤꦤꦶꦢ꧀ꦢꦺꦱꦺꦴ. ꦨꦮꦥꦠ꧀ꦡꦤꦴ ꦕ ꦠꦱ꧀ꦱ ꦥꦕ꧀ꦕꦪꦨꦹꦠꦴ ꦏꦶꦭꦺꦱꦴ ꦕꦴꦠꦶ ꦨꦮꦥꦠ꧀ꦡꦤꦴꦏꦶꦭꦺꦱꦴꦠꦶ ꦌꦮꦁ ꦮꦴ ꦌꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦪꦱ꧀ꦩꦴ ꦱꦠ꧀ꦠꦴꦤꦁ ꦮꦛ꧀ꦛꦢꦸꦏ꧀ꦑꦁ ꦤꦴꦩ ꦱꦧ꧀ꦧꦩ꧀ꦥꦶ ꦠꦁ ꦨꦮꦥꦠ꧀ꦡꦤꦴꦩꦹꦭꦏꦁ, ꦠꦱ꧀ꦩꦴ ꦮꦸꦠ꧀ꦠꦁ ‘‘ꦌꦮꦁ ꦱꦠ꧀ꦠꦴ’’ꦠꦶꦄꦴꦢꦶ. ꦨꦮꦥꦠ꧀ꦡꦤꦏꦶꦭꦺꦱꦴꦠꦶ ꦕ ꦨꦮꦥꦠ꧀ꦡꦤꦴꦩꦹꦭꦏꦁ ꦏꦶꦭꦺꦱꦁ.

ꦨꦸꦩ꧀ꦩꦤ꧀ꦠꦶ ꦱꦩꦷꦥꦠ꧀ꦡꦺ ꦨꦸꦩ꧀ꦩꦁ. ꦠꦺꦤꦴꦲ ‘‘ꦱꦸꦣꦩ꧀ꦩꦴꦪ ꦢ꧀ꦮꦴꦫꦺ’’ꦠꦶ. ꦤ ꦏꦠꦤ꧀ꦠꦶ ꦢꦸꦏ꧀ꦑꦸꦥ꧀ꦥꦴꦢꦤꦁ ꦤ ꦏꦠꦁ. ꦤꦮꦒꦹꦡꦱꦹꦏꦫꦁ ꦮꦶꦪꦴꦠꦶ ꦤꦮꦒꦹꦡꦨꦏ꧀ꦑꦱꦹꦏꦫꦁ ꦮꦶꦪ. ꦕꦶꦠ꧀ꦠꦺꦤꦺꦮꦴꦠꦶ ꦪꦺꦴ ꦧꦗ꧀ꦙꦠꦶ, ꦠꦱ꧀ꦱ ꦕꦶꦠ꧀ꦠꦺꦤꦺꦮ. ꦠꦱ꧀ꦩꦴꦠꦶ ꦪꦱ꧀ꦩꦴ ꦮꦺꦥꦕꦶꦠ꧀ꦠꦶꦧꦤ꧀ꦣꦤꦱ꧀ꦱ ꦧꦤ꧀ꦣꦤꦩꦸꦕ꧀ꦕꦤꦁ ꦮꦶꦪ, ꦠꦱ꧀ꦩꦴ ‘‘ꦮꦺꦥꦕꦶꦠ꧀ꦠꦶꦧꦤ꧀ꦣꦤ’’ꦤ꧀ꦠꦶ ꦮꦸꦠ꧀ꦠꦁ. ꦚꦴꦟꦩꦺꦴꦏ꧀ꦑꦁ ꦧꦤ꧀ꦣꦤꦤ꧀ꦠꦶ ꦚꦴꦟꦺꦤ ꦩꦸꦕ꧀ꦕꦤꦁ ꦧꦤ꧀ꦣꦤꦁ.

ꦩꦚ꧀ꦚꦩꦴꦤꦺꦴꦠꦶ ꦥꦫꦶꦏꦥ꧀ꦥꦶꦠꦠꦟ꧀ꦲꦴꦮꦱꦺꦤ ‘‘ꦌꦠꦁ ꦩꦩꦴ’’ꦠꦶ, ꦢꦶꦛ꧀ꦜꦶꦮꦱꦺꦤ ‘‘ꦌꦱꦺꦴ ꦩꦺ ꦄꦠ꧀ꦠꦴ’’ꦠꦶ, ꦩꦴꦤꦮꦱꦺꦤ ‘‘ꦌꦱꦺꦴꦲꦩꦱ꧀ꦩꦷ’’ꦠꦶ ꦩꦚ꧀ꦚꦤ꧀ꦠꦺꦴ. ꦑꦤ꧀ꦣꦮꦶꦤꦶꦩꦸꦠ꧀ꦠꦱ꧀ꦱ ꦩꦚ꧀ꦚꦩꦴꦤꦮꦠ꧀ꦡꦸꦤꦺꦴ ꦄꦨꦴꦮꦴ ‘‘ꦑꦤ꧀ꦣꦺ ꦩꦚ꧀ꦚꦤ꧀ꦠꦺꦴ’’ꦠꦶ ꦮꦸꦠ꧀ꦠꦁ. ꦌꦠꦤ꧀ꦠꦶ ‘‘ꦩꦴꦫꦱ꧀ꦱꦴ’’ꦠꦶ ꦌꦠꦁ ꦱꦴꦩꦶꦮꦕꦤꦁ. ꦏꦶꦭꦺꦱꦩꦴꦫꦺꦤ ꦧꦢ꧀ꦣꦺꦴꦠꦶ ꦏꦶꦭꦺꦱꦩꦴꦫꦺꦤ ꦠꦺꦤꦺꦮ ꦏꦶꦭꦺꦱꦧꦤ꧀ꦣꦤꦺꦤ ꦧꦢ꧀ꦣꦺꦴ. ꦩꦸꦠ꧀ꦠꦺꦴꦠꦶ ꦌꦠ꧀ꦡꦴꦥꦶ ꦌꦱꦺꦮ ꦤꦪꦺꦴ.

ꦠꦟ꧀ꦲꦴꦩꦚ꧀ꦚꦤꦴꦪ ꦱꦠꦶ ꦢꦶꦛ꧀ꦜꦶꦩꦴꦤꦩꦚ꧀ꦚꦤꦴꦤꦁ ꦥꦱꦔ꧀ꦒꦺꦴ ꦌꦮ ꦤꦠ꧀ꦡꦷꦠꦶ ꦪꦡꦴ ‘‘ꦄꦱ꧀ꦩꦷ’’ꦠꦶ ꦥꦢꦺꦤ ꦢꦶꦛ꧀ꦜꦶꦩꦴꦤꦩꦚ꧀ꦚꦤꦴ ꦮꦸꦠ꧀ꦠꦴ ꦲꦺꦴꦤ꧀ꦠꦶ, ꦌꦮꦁ ꦠꦟ꧀ꦲꦴꦩꦚ꧀ꦚꦶꦠꦴꦥꦷꦠꦶ ꦮꦸꦠ꧀ꦠꦁ ‘‘ꦄꦱ꧀ꦩꦷꦠꦶ ꦥꦢꦺꦤ ꦠꦟ꧀ꦲꦴꦩꦚ꧀ꦚꦶꦠꦁ ꦮꦸꦠ꧀ꦠ’’ꦤ꧀ꦠꦶ. ꦄꦪꦩꦲꦩꦱ꧀ꦩꦷꦠꦶ ꦥꦢꦺꦤ ꦢꦶꦛ꧀ꦜꦶꦩꦚ꧀ꦚꦶꦠꦤ꧀ꦠꦶ ꦌꦠꦫꦲꦶ ꦭꦧ꧀ꦨꦩꦴꦤꦢꦶꦛ꧀ꦜꦶꦮꦠ꧀ꦡꦸꦮꦱꦺꦤꦺꦮ. ꦨꦮꦶꦱ꧀ꦱꦤ꧀ꦠꦶ ꦄꦤꦴꦒꦠꦢꦶꦛ꧀ꦜꦶꦮꦠ꧀ꦡꦸꦥꦫꦶꦏꦥ꧀ꦥꦤꦮꦱꦺꦤꦺꦮ ꦢꦶꦛ꧀ꦜꦶꦩꦚ꧀ꦚꦶꦠꦁ. ꦪꦺꦨꦸꦪ꧀ꦪꦺꦤ ꦲꦶ ꦄꦤꦴꦒꦠꦴꦭꦶꦔ꧀ꦒꦤꦴ ꦱꦱ꧀ꦱꦠꦢꦶꦛ꧀ꦜꦶ. ꦈꦕ꧀ꦖꦺꦢꦮꦱꦺꦤ ꦢꦶꦛ꧀ꦜꦶꦩꦚ꧀ꦚꦶꦠꦩꦺꦮꦴꦠꦶ ꦄꦴꦤꦺꦠ꧀ꦮꦴ ꦱꦩ꧀ꦧꦤ꧀ꦣꦺꦴ. ꦫꦹꦥꦷꦠꦶꦄꦴꦢꦷꦤꦶ ꦥꦢꦴꦤꦶ. ꦱꦱ꧀ꦱꦠꦱ꧀ꦱꦺꦮꦴꦠꦶ ꦱꦱ꧀ꦱꦠꦒꦴꦲꦱ꧀ꦱꦺꦮ ꦥꦨꦺꦢꦢꦷꦥꦤꦴꦤꦶ. ꦪꦱ꧀ꦩꦴ ꦩꦚ꧀ꦚꦶꦠꦁ ꦄꦴꦧꦴꦣꦮꦱꦺꦤ ꦫꦺꦴꦒꦺꦴ, ꦄꦤ꧀ꦠꦺꦴꦢꦺꦴꦱꦮꦱꦺꦤ ꦒꦟ꧀ꦝꦺꦴ, ꦄꦔ꧀ꦒꦤꦶꦏꦤ꧀ꦠꦮꦱꦺꦤ ꦱꦭ꧀ꦭꦁ, ꦠꦱ꧀ꦩꦴ ꦆꦩꦺꦲꦶ ꦠꦟ꧀ꦲꦴꦢꦷꦲꦶ ꦏꦶꦭꦺꦱꦺꦲꦶ ꦥꦴꦏꦛꦕꦭꦤꦮꦱꦺꦤ ꦆꦚ꧀ꦗꦤ꧀ꦠꦶ ꦕꦺꦮ, ꦄꦥꦴꦏꦛꦱꦚ꧀ꦕꦭꦤꦮꦱꦺꦤ ꦦꦤ꧀ꦢꦤ꧀ꦠꦶ ꦕ. ꦥꦥꦚ꧀ꦕꦶꦠꦁ ꦱꦁꦱꦴꦫꦺ ꦕꦶꦫꦴꦪꦤꦁ ꦢꦛ꧀ꦜꦧ꧀ꦧꦁ, ꦑꦤ꧀ꦣꦱꦤ꧀ꦠꦴꦤꦱ꧀ꦱ ꦮꦴ ꦮꦶꦠ꧀ꦡꦴꦫꦟꦁ. ꦥꦩꦠ꧀ꦠꦴꦏꦴꦫꦥ꧀ꦥꦠ꧀ꦠꦴ ꦩꦸꦕ꧀ꦖꦤꦴꦏꦴꦫꦥ꧀ꦥꦠ꧀ꦠꦴ. ꦠꦺꦱꦤ꧀ꦠꦶ ꦠꦟ꧀ꦲꦴꦢꦶꦛ꧀ꦜꦶꦏꦶꦭꦺꦱꦴꦤꦁ. ꦄꦴꦏꦴꦫꦢꦱ꧀ꦱꦤꦠ꧀ꦡꦤ꧀ꦠꦶ ꦥꦮꦠ꧀ꦠꦶꦄꦴꦏꦴꦫꦢꦱ꧀ꦱꦤꦠ꧀ꦡꦁ.

ꦩꦴꦤꦺꦴ ꦤꦴꦩ ‘‘ꦱꦺꦪ꧀ꦪꦺꦴꦲꦩꦱ꧀ꦩꦷ’’ꦠꦶꦄꦴꦢꦶꦤꦴ ꦩꦗ꧀ꦗꦤꦴꦏꦴꦫꦥ꧀ꦥꦮꦠ꧀ꦠꦶ. ꦠꦟ꧀ꦲꦴꦪ ꦱꦩ꧀ꦥꦪꦸꦠ꧀ꦠꦩꦴꦤꦮꦱꦺꦤꦴꦠꦶ ꦏꦱ꧀ꦩꦴ ꦮꦸꦠ꧀ꦠꦁ? ꦤꦤꦸ ꦱꦧ꧀ꦧꦺꦴ ꦩꦴꦤꦺꦴ ꦠꦟ꧀ꦲꦴꦱꦩ꧀ꦥꦪꦸꦠ꧀ꦠꦺꦴ? ꦱꦠꦶ ꦲꦶ ꦧ꧀ꦪꦨꦶꦕꦴꦫꦺ ꦮꦶꦱꦺꦱꦤꦁ ꦆꦕ꧀ꦖꦶꦠꦧ꧀ꦧꦤ꧀ꦠꦶ. ꦱꦕ꧀ꦕꦩꦺꦠꦁ, ꦠꦟ꧀ꦲꦴ ꦥꦤ ꦄꦠ꧀ꦡꦶ ꦩꦴꦤꦱ꧀ꦱ ꦥꦕ꧀ꦕꦪꦨꦹꦠꦴ, ꦄꦠ꧀ꦡꦶ ꦩꦴꦤꦱ꧀ꦱ ꦄꦥ꧀ꦥꦕ꧀ꦕꦪꦨꦹꦠꦴ, ꦪꦠꦺꦴ ꦩꦴꦤꦺꦴ ꦄꦤꦶꦪꦠꦺꦴ ꦮꦸꦕ꧀ꦕꦠꦶ. ꦠꦡꦴ ꦲꦶ ꦥꦛ꧀ꦜꦴꦤꦺ ‘‘ꦱꦁꦪꦺꦴꦗꦤꦁ ꦣꦩ꧀ꦩꦁ ꦥꦛꦶꦕ꧀ꦕ ꦱꦁꦪꦺꦴꦗꦤꦺꦴ ꦣꦩ꧀ꦩꦺꦴ ꦈꦥ꧀ꦥꦗ꧀ꦗꦠꦶ ꦲꦺꦠꦸꦥꦕ꧀ꦕꦪꦴ’’ꦠꦶ ꦌꦠ꧀ꦡ ꦱꦁꦪꦺꦴꦗꦤꦴꦤꦶ ꦱꦁꦪꦺꦴꦗꦤꦺꦲꦶ ꦪꦡꦴꦭꦴꦨꦁ ꦪꦺꦴꦗꦺꦠ꧀ꦮꦴ ꦢꦱ꧀ꦱꦶꦠꦪꦺꦴꦗꦤꦴꦪ ‘‘ꦏꦴꦩꦫꦴꦒꦱꦁꦪꦺꦴꦗꦤꦁ ꦥꦛꦶꦕ꧀ꦕ ꦩꦴꦤꦱꦁꦪꦺꦴꦗꦤꦁ ꦄꦮꦶꦗ꧀ꦗꦴꦱꦁꦪꦺꦴꦗꦤ’’ꦤ꧀ꦠꦶ ꦮꦠ꧀ꦮꦴ ‘‘ꦏꦴꦩꦫꦴꦒꦱꦁꦪꦺꦴꦗꦤꦁ ꦥꦛꦶꦕ꧀ꦕ ꦄꦮꦶꦗ꧀ꦗꦴꦱꦁꦪꦺꦴꦗꦤ’’ꦤ꧀ꦠꦶ, ‘‘ꦩꦴꦤꦱꦁꦪꦺꦴꦗꦤꦁ ꦥꦛꦶꦕ꧀ꦕ ꦨꦮꦫꦴꦒꦱꦁꦪꦺꦴꦗꦤꦁ ꦄꦮꦶꦗ꧀ꦗꦴꦱꦁꦪꦺꦴꦗꦤ’’ꦤ꧀ꦠꦶ ꦕ ꦮꦠ꧀ꦮꦴ ‘‘ꦨꦮꦫꦴꦒꦱꦁꦪꦺꦴꦗꦤꦁ ꦥꦛꦶꦕ꧀ꦕ ꦄꦮꦶꦗ꧀ꦗꦴꦱꦁꦪꦺꦴꦗꦤ’’ꦤ꧀ꦠꦶ ꦮꦸꦠ꧀ꦠꦁ. ꦌꦠ꧀ꦡ ꦕ ꦏꦴꦩꦫꦴꦒꦨꦮꦫꦴꦒꦱꦁꦪꦺꦴꦗꦤꦺꦲꦶ ꦩꦴꦤꦱ꧀ꦱ ꦄꦤꦶꦪꦠꦨꦴꦮꦺꦴ ꦥꦏꦴꦱꦶꦠꦺꦴ. ꦠꦠ꧀ꦡ ꦪꦴ ꦠꦟ꧀ꦲꦴ ꦧꦭꦮꦠꦷ, ꦠꦁ ꦱꦤ꧀ꦣꦴꦪ ꦆꦢꦁ ꦮꦸꦠ꧀ꦠꦁ ‘‘ꦠꦟ꧀ꦲꦴꦪ ꦱꦩ꧀ꦥꦪꦸꦠ꧀ꦠꦩꦴꦤꦮꦱꦺꦤꦴ’’ꦠꦶ. ꦧꦭꦮꦠꦟ꧀ꦲꦴꦱꦩ꧀ꦥꦪꦸꦠ꧀ꦠꦺꦴ ꦲꦶ ꦩꦴꦤꦺꦴ ꦱꦪꦩ꧀ꦥꦶ ꦧꦭꦮꦴ ꦲꦸꦠ꧀ꦮꦴ ꦄꦱ꧀ꦩꦷꦠꦶ ꦱꦮꦶꦱꦺꦱꦁ ꦩꦗ꧀ꦗꦤꦮꦱꦺꦤ ꦥꦮꦠ꧀ꦠꦠꦷꦠꦶ.

ꦢꦶꦛ꧀ꦜꦶꦮꦱꦺꦤꦴꦠꦶ ꦩꦴꦤꦩꦹꦭꦏꦢꦶꦛ꧀ꦜꦶꦮꦱꦺꦤ. ‘‘ꦱꦺꦪ꧀ꦪꦺꦴꦲꦩꦱ꧀ꦩꦷ’’ꦠꦶꦄꦴꦢꦶꦤꦴ ꦲꦶ ꦧꦲꦸꦭꦩꦴꦤꦸꦥꦺꦠꦱ꧀ꦱ ꦥꦸꦒ꧀ꦒꦭꦱ꧀ꦱ ꦫꦹꦥꦴꦢꦷꦱꦸ ꦌꦏꦁ ꦈꦢ꧀ꦢꦶꦱ꧀ꦱ ꦄꦪꦩꦲꦩꦱ꧀ꦩꦷꦠꦶ ꦢꦶꦛ꧀ꦜꦶꦪꦴ ꦈꦥ꧀ꦥꦤ꧀ꦤꦴꦪ ꦩꦴꦤꦱ꧀ꦱ ꦄꦥ꧀ꦥꦲꦷꦤꦠ꧀ꦠꦴ ꦩꦴꦤꦺꦴꦥꦶ ꦠꦠ꧀ꦡ ꦠꦠ꧀ꦡꦺꦮ ꦈꦥ꧀ꦥꦗ꧀ꦗꦠꦶ. ꦆꦠꦶ ꦩꦴꦤꦩꦹꦭꦏꦁ ꦢꦶꦛ꧀ꦜꦶꦁ ꦱꦤ꧀ꦣꦴꦪꦴꦲ ‘‘ꦄꦪꦩꦲꦩꦱ꧀ꦩꦷꦠꦶ ꦢꦶꦛ꧀ꦜꦶꦮꦱꦺꦤ ꦮꦸꦠ꧀ꦠ’’ꦤ꧀ꦠꦶ. ꦕꦺꦴꦢꦏꦺꦴ ꦥꦤ ꦆꦩꦩꦠ꧀ꦡꦁ ꦄꦗꦴꦤꦤ꧀ꦠꦺꦴ ꦄꦤꦸꦥꦭꦧ꧀ꦨꦩꦴꦤꦩꦺꦮ ꦱꦩ꧀ꦥꦪꦺꦴꦒꦠ꧀ꦡꦁ ꦒꦲꦺꦠ꧀ꦮꦴ ‘‘ꦤꦤꦸ ꦕꦴ’’ꦠꦶꦄꦴꦢꦶꦤꦴ ꦕꦺꦴꦢꦺꦠꦶ. ꦆꦠꦫꦺꦴ ‘‘ꦄꦴꦩ ꦤꦠ꧀ꦡꦷ’’ꦠꦶ ꦠꦩꦠ꧀ꦡꦁ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ‘‘ꦩꦴꦤꦱ꧀ꦱ ꦥꦤꦴ’’ꦠꦶꦄꦴꦢꦶꦤꦴ ꦥꦫꦶꦲꦴꦫꦩꦴꦲ. ꦠꦱ꧀ꦱꦠ꧀ꦡꦺꦴ ꦮꦸꦠ꧀ꦠꦺꦴ ꦌꦮ.

ꦪꦮꦏꦭꦴꦥꦶꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦄꦴꦱꦷꦮꦶꦱꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦕꦠꦸꦠ꧀ꦡꦺꦴ ꦥꦟ꧀ꦟꦴꦱꦏꦺꦴ.

ꦱꦭ꦳ꦴꦪꦠꦤꦱꦁꦪꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.