꧑꧑. ꦮꦭꦴꦲꦏꦱꦁꦪꦸꦠ꧀ꦠꦮꦟ꧀ꦟꦤꦴ

꧕꧕꧐-꧖꧐꧖. ꦭꦺꦴꦏꦁ ꦮꦴꦭꦺꦤ꧀ꦠꦴ ꦱꦁꦮꦫꦤ꧀ꦠꦴ ꦖꦴꦢꦺꦤ꧀ꦠꦴ ꦄꦲꦤ꧀ꦠꦶ ꦥꦫꦶꦪꦺꦱꦤ꧀ꦠꦷꦠꦶ ꦮꦭꦴꦲꦴ, ꦢꦺꦮꦥꦸꦠ꧀ꦠꦴ. ꦠꦺꦱꦁ ꦱꦩꦹꦲꦺꦴ ꦮꦭꦴꦲꦏꦢꦺꦮꦏꦴꦪꦺꦴꦠꦶ ꦄꦴꦲ ‘‘ꦮꦭꦴꦲꦏꦏꦴꦪꦶꦏꦴ’’ꦠꦶꦄꦴꦢꦶ. ꦱꦷꦠꦏꦫꦟꦮꦭꦴꦲꦏꦴꦠꦶ ꦱꦷꦠꦲꦫꦟꦮꦭꦴꦲꦏꦴ. ꦱꦺꦱꦥꦢꦺꦱꦹꦠꦶ ꦈꦟ꧀ꦲꦮꦭꦴꦲꦏꦴꦢꦶꦥꦢꦺꦱꦸ. ꦌꦱꦺꦮ ꦤꦪꦺꦴꦠꦶ ‘‘ꦈꦟ꧀ꦲꦏꦫꦟꦮꦭꦴꦲꦏꦴ’’ꦠꦶꦄꦴꦢꦶꦤꦴ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦕꦶꦠ꧀ꦠꦛ꧀ꦜꦥꦤꦤ꧀ꦠꦶ ‘‘ꦱꦷꦠꦁ ꦲꦺꦴꦠꦹ’’ꦠꦶ ꦌꦮꦁ ꦕꦶꦠ꧀ꦠꦱ꧀ꦱ ꦈꦥ꧀ꦥꦴꦢꦤꦁ. ꦮꦱ꧀ꦱꦴꦤꦺꦠꦶ ꦮꦱ꧀ꦱꦏꦴꦭꦺ. ꦈꦠꦸꦱꦩꦸꦛ꧀ꦜꦴꦤꦩꦺꦮꦴꦠꦶ ꦥꦴꦏꦠꦶꦏꦱꦷꦠꦩꦺꦮꦴꦠꦶ ꦄꦠ꧀ꦡꦺꦴ. ꦈꦟ꧀ꦲꦺꦥꦷꦠꦶ ꦈꦟ꧀ꦲꦏꦴꦭꦺ. ꦄꦧ꧀ꦨꦩꦟ꧀ꦝꦥꦺꦴꦠꦶ ꦩꦟ꧀ꦝꦥꦱꦢꦶꦱꦄꦧ꧀ꦨꦥꦛꦭꦮꦶꦠꦴꦤꦩꦴꦲ. ꦄꦧ꧀ꦨꦁ ꦈꦥ꧀ꦥꦗ꧀ꦗꦠꦷꦠꦶ ꦠꦲꦁ ꦠꦲꦁ ꦥꦛꦭꦁ ꦈꦛ꧀ꦜꦲꦠꦶ. ꦄꦧ꧀ꦨꦺꦪꦺꦮꦴꦠꦶ ꦄꦧ꧀ꦨꦏꦴꦭꦺ ꦌꦮ, ꦮꦱ꧀ꦱꦴꦤꦺꦠꦶ ꦄꦠ꧀ꦡꦺꦴ. ꦄꦠꦶꦄꦧ꧀ꦨꦤ꧀ꦠꦶ ꦱꦠꦥꦛꦭꦱꦲꦱ꧀ꦱꦥꦛꦭꦁ ꦲꦸꦠ꧀ꦮꦴ ꦄꦧ꧀ꦨꦸꦛ꧀ꦜꦴꦤꦁ. ꦕꦶꦠ꧀ꦠꦮꦺꦱꦴꦑꦩꦴꦱꦺꦱꦹꦠꦶ ꦮꦱꦤ꧀ꦠꦏꦴꦭꦁ ꦱꦤ꧀ꦣꦴꦪꦴꦲ. ꦠꦢꦴ ꦲꦶ ꦮꦶꦢ꧀ꦣꦺꦴ ꦮꦶꦒꦠꦮꦭꦴꦲꦏꦺꦴ ꦢꦺꦮꦺꦴ ꦨꦮꦶꦠꦸꦁ ꦪꦸꦠ꧀ꦠꦺꦴ. ꦈꦠ꧀ꦠꦫꦢꦏ꧀ꦑꦶꦟꦴꦢꦷꦠꦶ ꦄꦴꦢꦶ-ꦱꦢ꧀ꦢꦺꦤ ꦥꦕ꧀ꦖꦶꦩꦮꦴꦠꦴꦢꦶꦁ ꦱꦔ꧀ꦒꦟ꧀ꦲꦴꦠꦶ. ꦥꦏꦠꦶꦮꦴꦠꦺꦴꦠꦶ ꦥꦏꦠꦶꦪꦴ ꦱꦨꦴꦮꦺꦤ ꦮꦴꦪꦤꦏꦮꦴꦠꦺꦴ. ꦠꦁ ꦈꦠꦸꦱꦩꦸꦛ꧀ꦜꦴꦤꦩꦺꦮꦴꦠꦶ ꦄꦴꦲꦴꦫꦹꦥꦗꦷꦮꦷꦤꦁ ꦱꦠ꧀ꦠꦴꦤꦁ ꦱꦴꦣꦴꦫꦟꦏꦩ꧀ꦩꦹꦥꦤꦶꦱ꧀ꦱꦪꦈꦠꦸꦱꦩꦸꦛ꧀ꦜꦴꦤꦩꦺꦮ. ꦌꦱ ꦤꦪꦺꦴ ꦈꦠꦸꦱꦩꦸꦛ꧀ꦜꦴꦤꦱꦷꦠꦸꦟ꧀ꦲꦮꦴꦠꦺꦱꦸꦥꦶ. ꦠꦩ꧀ꦥꦶ ꦲꦶ ꦄꦴꦲꦴꦫꦹꦥꦗꦷꦮꦷꦤꦁ ꦱꦠ꧀ꦠꦴꦤꦁ ꦱꦴꦣꦴꦫꦟꦏꦩ꧀ꦩꦹꦥꦤꦶꦱ꧀ꦱꦪꦩꦺꦮꦴꦠꦶ.

ꦒꦷꦠꦤ꧀ꦠꦶ ꦩꦺꦓꦒꦷꦠꦁ. ꦱꦕ꧀ꦕꦏꦶꦫꦶꦪꦴꦪꦴꦠꦶ ꦠꦴꦢꦶꦱꦴꦤꦁ ꦥꦸꦫꦶꦱꦮꦶꦱꦺꦱꦴꦤꦁ ꦱꦕ꧀ꦕꦴꦣꦶꦛ꧀ꦜꦴꦤꦺꦤ. ꦆꦢ꧀ꦣꦶꦧꦭꦺꦤꦴꦠꦶ ꦆꦢ꧀ꦣꦶꦩꦤ꧀ꦠꦴꦤꦁ ꦆꦢ꧀ꦣꦶꦄꦴꦤꦸꦨꦴꦮꦺꦤ. ꦮꦶꦤꦴꦱꦩꦺꦓꦺꦤꦴꦠꦶ ꦏꦥ꧀ꦥꦮꦶꦤꦴꦱꦏꦩꦺꦓꦺꦤ. ꦄꦚ꧀ꦚꦺꦤꦥꦶ ꦏꦟ꧀ꦲꦥꦴꦥꦶꦏꦱꦠ꧀ꦠꦴꦤꦁ ꦥꦴꦥꦏꦩ꧀ꦩꦥꦕ꧀ꦕꦪꦴ ꦈꦥ꧀ꦥꦤ꧀ꦤꦮꦶꦤꦴꦱꦩꦺꦓꦺꦤ ꦮꦸꦛ꧀ꦜꦺꦤ ꦱꦺꦴ ꦱꦺꦴ ꦢꦺꦱꦺꦴ ꦮꦶꦤꦱ꧀ꦱꦠꦺꦮ.

ꦮꦭꦴꦲꦏꦱꦁꦪꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.