꧘. ꦥꦶꦟ꧀ꦝꦺꦴꦭ꧀ꦪꦱꦸꦠ꧀ꦠꦮꦟ꧀ꦟꦤꦴ

꧘꧐. ꦄꦥꦏꦫꦷꦪꦠꦶ ꦌꦠꦺꦤꦴꦠꦶ ꦄꦥꦏꦫꦟꦁ, ꦥꦢꦁ. ꦄꦥꦏꦫꦟꦁ ꦥꦏꦫꦟꦁ ꦏꦴꦫꦟꦤ꧀ꦠꦶ ꦄꦠ꧀ꦡꦠꦺꦴ ꦌꦏꦁ. ꦠꦺꦤꦴꦲ ‘‘ꦏꦶꦱ꧀ꦩꦶꦚ꧀ꦕꦶꦢꦺꦮ ꦏꦴꦫꦟꦺ’’ꦠꦶ. ꦤꦷꦲꦫꦶꦠ꧀ꦮꦴꦠꦶ ꦄꦠ꧀ꦠꦤꦺꦴ ꦱꦩꦷꦥꦕꦴꦫꦨꦴꦮꦠꦺꦴ ꦄꦥꦤꦺꦠ꧀ꦮꦴ. ꦠꦡꦴꦏꦫꦟꦚ꧀ꦕ ꦌꦮꦩꦺꦠꦺ ꦌꦠ꧀ꦠꦏꦩ꧀ꦥꦶ ꦄꦥ꧀ꦥꦛꦶꦫꦹꦥꦁ ꦄꦏꦠ꧀ꦮꦴ ꦄꦴꦪꦠꦶꦁ ꦱꦩ꧀ꦩꦴ ꦥꦛꦶꦥꦗ꧀ꦗꦶꦱ꧀ꦱꦤ꧀ꦠꦷꦠꦶ. ꦭꦢ꧀ꦣꦧꦭꦴꦠꦶ ꦭꦢ꧀ꦣꦚꦴꦟꦧꦭꦴ.

ꦌꦏꦢ꧀ꦮꦷꦲꦶꦏꦴꦪꦴꦠꦶ ꦌꦏꦺꦏꦱ꧀ꦱ ꦕꦺꦮ ꦢ꧀ꦮꦶꦤ꧀ꦤꦁ ꦢ꧀ꦮꦶꦤ꧀ꦤꦚ꧀ꦕ ꦇꦲꦶꦏꦴ ꦒꦠꦶ ꦈꦥꦱꦔ꧀ꦏꦩꦤꦴ ꦌꦏꦢ꧀ꦮꦷꦲꦶꦏꦴ. ꦠꦺꦤꦴꦲ ‘‘ꦌꦏꦺꦏꦺꦴ ꦕꦺꦮ ꦢ꧀ꦮꦺ ꦢ꧀ꦮꦺ ꦕ ꦲꦸꦠ꧀ꦮꦴ’’ꦠꦶ. ꦥꦸꦡꦸꦗ꧀ꦗꦤꦴꦤꦁ ꦱꦩꦸꦢꦶꦠꦴꦤꦁ ꦤꦴꦩ ꦏꦶꦫꦶꦪꦴ ꦠꦴꦢꦶꦱꦷꦥꦶ ꦱꦶꦪꦴꦠꦶ ꦮꦸꦠ꧀ꦠꦁ ‘‘ꦏꦺꦭ꦳ꦶꦩ꧀ꦥꦶ ꦏꦫꦺꦪ꧀ꦪꦸ’’ꦤ꧀ꦠꦶ. ꦥꦫꦶꦏꦥ꧀ꦥꦤꦮꦱꦺꦤ ꦱꦩ꧀ꦩꦴꦱꦩ꧀ꦧꦸꦢ꧀ꦣꦁ ꦈꦢ꧀ꦢꦶꦱ꧀ꦱ ꦥꦺꦱꦭꦴ ꦨꦶꦏ꧀ꦑꦹꦥꦶ ꦌꦮꦁ ꦏꦫꦺꦴꦤ꧀ꦠꦷꦠꦶ.

ꦪꦸꦒꦤ꧀ꦣꦫꦥꦧ꧀ꦧꦠꦴꦢꦷꦤꦁ ꦄꦤ꧀ꦠꦫꦺ ꦱꦷꦢꦤ꧀ꦠꦫꦁ ꦱꦩꦸꦢ꧀ꦢꦁ ꦤꦴꦩ. ꦠꦠ꧀ꦡ ꦏꦶꦫ ꦮꦴꦠꦺꦴ ꦤ ꦮꦴꦪꦠꦶ, ꦥꦠꦶꦠꦁ ꦪꦁ ꦏꦶꦚ꧀ꦕꦶꦥꦶ ꦱꦷꦢꦤ꧀ꦠꦫꦤꦢꦶꦪꦁ ꦮꦶꦭꦷꦪꦤ꧀ꦠꦴ ꦱꦷꦢꦤ꧀ꦠꦺꦮ, ꦠꦱ꧀ꦩꦴ ꦠꦁ ꦥꦫꦶꦮꦴꦫꦺꦠ꧀ꦮꦴ ꦜꦶꦠꦴ ꦪꦸꦒꦤ꧀ꦣꦫꦴꦢꦪꦺꦴꦥꦶ ꦱꦷꦢꦥꦧ꧀ꦧꦠꦴ ꦤꦴꦩ. ꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ ‘‘ꦱꦷꦢꦤ꧀ꦠꦫꦺ ꦱꦤ꧀ꦤꦶꦱꦶꦤ꧀ꦤꦁ ꦩꦲꦴꦱꦩꦸꦢ꧀ꦢꦁ ꦮꦶꦪꦴ’’ꦠꦶ. ꦄꦴꦲꦴꦫꦲꦺꦠꦹꦠꦶ ꦄꦴꦩꦶꦱꦲꦺꦠꦸ ꦱꦥ꧀ꦥꦶꦠꦺꦭꦴꦢꦶꦤꦶꦩꦶꦠ꧀ꦠꦁ, ꦠꦺꦱꦁ ꦥꦟꦴꦩꦤꦴ.

ꦥꦕ꧀ꦖꦶꦩꦤ꧀ꦠꦶ ꦤꦶꦲꦷꦤꦁ. ꦠꦺꦤꦴꦲ ‘‘ꦭꦴꦩꦏ’’ꦤ꧀ꦠꦶ, ꦭꦴꦩꦏꦤ꧀ꦠꦺꦴ ꦆꦣꦴꦣꦶꦥ꧀ꦥꦺꦠꦺꦴ –

‘‘ꦩꦶꦒꦴꦤꦁ ꦏꦺꦴꦛ꧀ꦜꦸꦏꦺꦴ ꦄꦤ꧀ꦠꦺꦴ, ꦥꦏ꧀ꦑꦷꦤꦁ ꦥꦤ ꦮꦴꦪꦱꦺꦴ;

ꦌꦫꦟ꧀ꦝꦺꦴ ꦄꦤ꧀ꦠꦺꦴ ꦫꦸꦏ꧀ꦑꦴꦤꦁ, ꦠꦪꦺꦴ ꦄꦤ꧀ꦠꦴ ꦱꦩꦴꦒꦠꦴ’’ꦠꦶ. –

ꦄꦴꦢꦷꦱꦸ (ꦗꦴ. ꧑.꧓.꧑꧓꧕) ꦮꦶꦪ. ꦈꦭꦠꦷꦠꦶ ꦄꦨꦶꦕꦫꦠꦶ. ꦄꦨꦶꦱꦥꦤ꧀ꦠꦶ ꦌꦠꦺꦤꦴꦠꦶ ꦄꦨꦶꦱꦴꦥꦺꦴ. ꦄꦨꦶꦱꦴꦥꦮꦠ꧀ꦡꦸ ꦥꦶꦟ꧀ꦝꦺꦴꦭ꧀ꦪꦁ. ꦄꦠ꧀ꦡꦺꦴ ꦦꦭꦁ ꦮꦱꦺꦴ ꦌꦠꦱ꧀ꦱꦴꦠꦶ ꦄꦠ꧀ꦡꦮꦱꦁ, ꦏꦴꦫꦟꦁ, ꦠꦩ꧀ꦥꦶ ꦠꦺꦱꦸ ꦄꦠ꧀ꦡꦶ, ꦠꦠ꧀ꦡ ꦤꦶꦪꦸꦠ꧀ꦠꦴꦠꦶ ꦄꦠ꧀ꦡꦮꦱꦶꦏꦴ.

ꦄꦤ꧀ꦠꦺꦴ ꦲꦢꦪꦱ꧀ꦱ ꦄꦧ꧀ꦨꦤ꧀ꦠꦫꦺ ꦄꦤꦸꦥꦮꦶꦛ꧀ꦜꦴ ꦱꦺꦴꦏꦮꦠ꧀ꦡꦹꦲꦶ.

ꦄꦨꦶꦗ꧀ꦙꦴꦪꦶꦠꦴꦠꦶ ꦄꦨꦶꦗ꧀ꦙꦴꦪꦤꦱꦷꦭꦺꦴ. ꦄꦨꦶꦟ꧀ꦲꦥ꧀ꦥꦮꦠ꧀ꦠꦶꦪꦴ ꦕꦺꦮ ꦧꦲꦸꦭꦨꦴꦮꦺꦤ ꦕ ꦧꦲꦸꦭꦫꦴꦒꦺꦴ. ꦥꦹꦠꦶꦨꦴꦮꦺꦤꦴꦠꦶ ꦏꦸꦡꦶꦠꦨꦴꦮꦺꦤ. ꦧ꧀ꦪꦴꦥꦴꦢꦺꦴ ꦲꦶ ꦈꦥ꧀ꦥꦗ꧀ꦗꦩꦴꦤꦺꦴ ꦕꦶꦠ꧀ꦠꦁ ꦄꦥꦒꦤ꧀ꦣꦁ ꦏꦫꦺꦴꦠꦶ, ꦤ ꦱꦸꦕꦶꦩꦤꦸꦚ꧀ꦚꦨꦴꦮꦁ. ꦨꦠ꧀ꦠꦤꦶꦏ꧀ꦑꦶꦠ꧀ꦠꦏꦴꦏꦺꦴ ꦮꦶꦪꦴꦠꦶ ꦆꦢꦁ ꦨꦠ꧀ꦠꦛ꧀ꦜꦴꦤꦱ꧀ꦱ ꦄꦱꦫꦟꦺꦤ ꦏꦴꦏꦱ꧀ꦱ ꦤꦛ꧀ꦜꦱꦠꦶꦠꦴ ꦥꦚ꧀ꦚꦴꦪꦠꦷꦠꦶ ꦏꦠ꧀ꦮꦴ ꦮꦸꦠ꧀ꦠꦁ, ꦤ ꦨꦠ꧀ꦠꦤꦶꦏ꧀ꦑꦶꦠ꧀ꦠꦠꦴꦪ. ꦄꦱꦟ꧀ꦜꦶꦠꦺꦴꦠꦶ ꦄꦱꦟ꧀ꦜꦶꦠꦕꦶꦠ꧀ꦠꦺꦴ. ꦏꦛ꧀ꦜꦠ꧀ꦡꦤ꧀ꦠꦶ ꦏꦛ꧀ꦜꦺꦤ ꦏꦠ꧀ꦠꦧ꧀ꦧꦏꦶꦕ꧀ꦕꦁ.

ꦥꦴꦥꦮꦶꦠꦏ꧀ꦏꦺꦲꦶ ꦏꦠꦺꦴ, ꦠꦱ꧀ꦩꦴ ꦠꦺ ꦄꦤꦮꦱꦺꦱꦠꦺꦴ ꦥꦲꦴꦠꦧ꧀ꦧꦴꦠꦶ ꦢꦱ꧀ꦱꦤꦠ꧀ꦡꦁ. ꦢ꧀ꦮꦶꦤ꧀ꦤꦁ ꦮꦸꦠ꧀ꦠꦠ꧀ꦠꦴ ꦌꦏꦺꦴ ꦥꦸꦧ꧀ꦧꦨꦴꦒꦺꦴ, ꦆꦠꦫꦺꦴ ꦩꦶꦱ꧀ꦱꦏꦺꦴꦠꦶ ꦮꦠ꧀ꦠꦸꦁ ꦪꦸꦠ꧀ꦠꦤ꧀ꦠꦶ ꦄꦣꦶꦥ꧀ꦥꦴꦪꦺꦤ ‘‘ꦌꦠ꧀ꦡ ꦕꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦌꦮꦁ ꦠꦁ ꦨꦴꦮꦺꦤ꧀ꦠꦱ꧀ꦱ ꦤꦶꦫꦸꦗ꧀ꦙꦤ꧀ꦠꦶ ꦌꦮꦴꦠꦶ ꦌꦏꦺꦏꦩꦶꦱ꧀ꦱꦏꦠꦴꦮꦱꦺꦤ ꦒꦲꦺꦠꦧ꧀ꦧꦤ꧀ꦠꦶ ꦥꦺꦴꦫꦴꦟꦴ. ꦈꦥꦫꦶ ꦠꦶꦥꦫꦶꦮꦛ꧀ꦛꦢꦺꦱꦤꦴꦪ ꦄꦤꦶꦩꦶꦠ꧀ꦠꦱꦩꦴꦣꦶꦪꦺꦮ ꦢꦷꦥꦶꦠꦺꦴ. ꦠꦺꦤꦴꦲ ‘‘ꦪꦴꦮꦚ꧀ꦕꦶꦢ’’ꦤ꧀ꦠꦶ. ꦤꦶꦢ꧀ꦢꦺꦴꦱꦺꦴꦠꦶ ꦮꦷꦠꦫꦴꦒꦴꦢꦶꦤꦴ ꦤꦶꦢ꧀ꦢꦺꦴꦱꦺꦴ.

ꦥꦶꦟ꧀ꦝꦺꦴꦭ꧀ꦪꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.