꧑꧐. ꦥꦸꦟ꧀ꦟꦩꦱꦸꦠ꧀ꦠꦮꦟ꧀ꦟꦤꦴ

꧘꧒. ꦢꦶꦱ꧀ꦱꦠꦶ ꦄꦥꦢꦶꦱ꧀ꦱꦠꦷꦠꦶ ꦢꦺꦱꦺꦴ, ꦏꦴꦫꦟꦁ, ꦠꦚ꧀ꦕ ꦑꦺꦴ ꦚꦴꦥꦏꦁ ꦢꦛ꧀ꦜꦧ꧀ꦧꦁ. ꦪꦚ꧀ꦲꦶ ꦱꦺꦴ ꦗꦴꦤꦶꦠꦸꦏꦴꦩꦺꦴ ꦫꦸꦥ꧀ꦥꦤꦴꦢꦶꦱꦨꦴꦮꦁ, ꦥꦜꦩꦁ ꦥꦤ ꦱꦫꦹꦥꦁ ꦥꦸꦕ꧀ꦖꦶꦠ꧀ꦮꦴ ꦥꦸꦤ ꦠꦱ꧀ꦱ ꦮꦶꦱꦺꦱꦺꦴ ꦥꦸꦕ꧀ꦖꦶꦠꦧ꧀ꦧꦺꦴꦠꦶ ꦥꦜꦩꦁ ‘‘ꦆꦩꦺ ꦤꦸ ꦑꦺꦴ’’ꦠꦶꦄꦴꦢꦶꦤꦴ ꦥꦸꦕ꧀ꦖꦁ ꦏꦫꦺꦴꦠꦶ, ꦆꦣꦴꦥꦶ ꦕ ꦱꦺꦴ ꦮꦶꦱꦺꦱꦺꦴ ꦌꦮ ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦄꦤ꧀ꦠꦤ꧀ꦠꦶ ꦢꦱ꧀ꦱꦺꦠꦶ. ꦄꦗꦴꦤꦤ꧀ꦠꦺꦴ ꦮꦶꦪ ꦥꦸꦕ꧀ꦖꦠꦶ ꦠꦺꦱꦁ ꦲꦺꦠꦸꦤ꧀ꦠꦶ ꦄꦣꦶꦥ꧀ꦥꦴꦪꦺꦴ.

ꦠꦟ꧀ꦲꦴꦖꦤ꧀ꦢꦩꦹꦭꦏꦴ ꦥꦨꦮꦠ꧀ꦠꦴ. ꦥꦚ꧀ꦕꦸꦥꦴꦢꦴꦤꦏ꧀ꦑꦤ꧀ꦣꦴꦠꦶ ꦌꦠ꧀ꦡ ꦮꦶꦱꦺꦱꦠꦺꦴ ꦠꦟ꧀ꦲꦸꦥꦴꦢꦴꦤꦱ꧀ꦱ ꦒꦲꦟꦁ ꦆꦠꦫꦱ꧀ꦱ ꦠꦒ꧀ꦒꦲꦟꦺꦤꦺꦮ ꦒꦲꦶꦠꦁ ꦠꦢꦮꦶꦤꦴꦨꦴꦮꦠꦺꦴꦠꦶ ꦖꦤ꧀ꦢꦫꦴꦒꦺꦴ ꦌꦮ ꦈꦢ꧀ꦣꦛꦺꦴ. ꦆꦢꦤ꧀ꦠꦶ ꦠꦥ꧀ꦥꦚ꧀ꦲꦥꦛꦶꦏ꧀ꦑꦶꦥꦤꦁ. ꦪꦢꦶꦥꦶ ꦑꦤ꧀ꦣꦴ ꦈꦥꦴꦢꦴꦤꦺꦲꦶ ꦄꦱꦲꦗꦴꦠꦴꦥꦶ ꦲꦺꦴꦤ꧀ꦠꦶ ꦈꦥꦴꦢꦴꦤꦱ꧀ꦱ ꦄꦤꦴꦫꦩ꧀ꦩꦟꦨꦹꦠꦴꦥꦶ, ꦈꦥꦴꦢꦴꦤꦁ ꦥꦤ ꦠꦺꦲꦶ ꦱꦲꦗꦴꦠꦩꦺꦮ, ꦠꦢꦴꦫꦩ꧀ꦩꦟꦚ꧀ꦕ ꦲꦺꦴꦠꦶꦪꦺꦮꦴꦠꦶ ꦢꦱ꧀ꦱꦺꦠꦶ. ꦤ ꦲꦶ ꦄꦱꦲꦗꦴꦠꦁ ꦄꦤꦴꦫꦩ꧀ꦩꦟꦚ꧀ꦕ ꦈꦥꦴꦢꦴꦤꦁ ꦄꦠ꧀ꦡꦷꦠꦶ. ꦆꦢꦴꦤꦶ ꦠꦩꦠ꧀ꦡꦁ ꦮꦶꦮꦫꦶꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦠꦟ꧀ꦲꦴꦱꦩ꧀ꦥꦪꦸꦠ꧀ꦠꦱ꧀ꦩꦶ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ, ꦠꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ. ꦄꦴꦫꦩ꧀ꦩꦟꦠꦺꦴꦠꦶ ꦄꦴꦫꦩ꧀ꦩꦟꦏꦫꦟꦠꦺꦴ. ‘‘ꦌꦮꦁꦫꦹꦥꦺꦴ ꦱꦶꦪ’’ꦤ꧀ꦠꦶ ꦌꦮꦁꦥꦮꦠ꧀ꦠꦱ꧀ꦱ ꦖꦤ꧀ꦢꦫꦴꦒꦱ꧀ꦱ ‘‘ꦌꦮꦁꦮꦺꦢꦤꦺꦴ ꦱꦶꦪ’’ꦤ꧀ꦠꦶ ꦌꦮꦁꦥꦮꦠ꧀ꦠꦶꦪꦴ ꦄꦨꦴꦮꦠꦺꦴ ꦠꦠ꧀ꦡ ꦠꦠ꧀ꦡꦺꦮ ꦤꦠꦱꦔ꧀ꦑꦴꦫꦴ ꦨꦶꦗ꧀ꦗꦤ꧀ꦠꦶ, ꦠꦱ꧀ꦩꦴ ꦫꦹꦥꦮꦺꦢꦤꦴꦫꦩ꧀ꦩꦟꦴꦤꦁ ꦖꦤ꧀ꦢꦫꦴꦒꦴꦢꦷꦤꦁ ꦄꦨꦴꦮꦠꦺꦴ ꦄꦠ꧀ꦡꦺꦮ ꦖꦤ꧀ꦢꦫꦴꦒꦮꦺꦩꦠ꧀ꦠꦠꦴ. ꦖꦤ꧀ꦢꦫꦴꦒꦱ꧀ꦱ ꦥꦲꦴꦤꦴꦢꦶꦮꦱꦺꦤ ꦖꦤ꧀ꦢꦫꦴꦒꦥꦛꦶꦱꦁꦪꦸꦠ꧀ꦠꦱ꧀ꦱ ꦄꦥꦸꦕ꧀ꦖꦶꦠꦠ꧀ꦠꦴ, ‘‘ꦄꦤꦸꦱꦤ꧀ꦣꦶ ꦤ ꦓꦛꦶꦪꦠꦷ’’ꦠꦶ ꦮꦸꦠ꧀ꦠꦁ. ꦏꦶꦚ꧀ꦕꦴꦥꦶ ꦤ ꦓꦛꦶꦪꦠꦷꦠꦶ ꦄꦚ꧀ꦚꦱ꧀ꦱꦺꦮ ꦥꦸꦕ꧀ꦖꦶꦠꦠ꧀ꦠꦴ, ꦠꦡꦴꦥꦶ ꦱꦴꦤꦸꦱꦤ꧀ꦣꦶꦏꦴꦮ ꦥꦸꦕ꧀ꦖꦴ, ꦠꦠꦺꦴ ꦌꦮ ꦱꦴꦤꦸꦱꦤ꧀ꦣꦶꦏꦁ ꦮꦶꦱ꧀ꦱꦗ꧀ꦗꦤꦁ. ꦠꦠ꧀ꦡ ꦏꦴꦫꦟꦩꦴꦲ ‘‘ꦠꦺꦱꦁ ꦠꦺꦱ’’ꦤ꧀ꦠꦶꦄꦴꦢꦶꦤꦴ. ꦠꦺꦤ ꦄꦗ꧀ꦙꦴꦱꦪꦴꦤꦸꦱꦤ꧀ꦣꦶꦮꦱꦺꦤ ꦱꦴꦤꦸꦱꦤ꧀ꦣꦶꦏꦴꦤꦺꦮ ꦥꦸꦕ꧀ꦖꦴꦮꦶꦱ꧀ꦱꦗ꧀ꦗꦤꦴꦤꦷꦠꦶ ꦢꦱ꧀ꦱꦺꦠꦶ.

ꦥꦸꦟ꧀ꦟꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦑꦗ꧀ꦗꦤꦷꦪꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.