꧑꧐. ꦤꦶꦫꦸꦠ꧀ꦠꦶꦥꦡꦱꦸꦠ꧀ꦠꦮꦟ꧀ꦟꦤꦴ

꧖꧒. ꦤꦶꦫꦸꦠ꧀ꦠꦶꦪꦺꦴꦮ ꦤꦶꦫꦸꦠ꧀ꦠꦶꦥꦡꦴꦠꦶ ꦥꦡ-ꦱꦢ꧀ꦢꦺꦤ ꦥꦢꦮꦝ꧀ꦞꦤꦩꦴꦲ ꦪꦡꦴ ‘‘ꦧꦷꦗꦴꦤꦶꦪꦺꦮ ꦧꦷꦗꦗꦴꦠꦴꦤꦷ’’ꦠꦶ. ꦤꦶꦫꦸꦠ꧀ꦠꦶꦮꦱꦺꦤꦴꦠꦶ ꦤꦶꦧ꧀ꦧꦕꦤꦮꦱꦺꦤ. ꦥꦡꦴ ꦕ ꦄꦠ꧀ꦡꦴꦤꦸꦫꦹꦥꦨꦴꦮꦠꦺꦴ. ꦠꦷꦟꦶꦥꦷꦠꦶ ꦤꦶꦫꦸꦠ꧀ꦠꦶꦄꦣꦶꦮꦕꦤꦥꦚ꧀ꦚꦠ꧀ꦠꦶꦥꦡꦥꦢꦴꦤꦶ. ꦠꦡꦴ ꦲꦶ ‘‘ꦦꦸꦱꦠꦷꦠꦶ ꦦꦱ꧀ꦱꦺꦴ’’ꦠꦶꦄꦴꦢꦶꦤꦴ ꦤꦷꦲꦫꦶꦠ꧀ꦮꦴ ꦮꦕꦤꦁ ꦤꦶꦫꦸꦠ꧀ꦠꦶ, ‘‘ꦱꦶꦫꦷꦮꦝ꧀ꦞꦏꦺꦴ ꦣꦤꦮꦝ꧀ꦞꦏꦺꦴ’’ꦠꦶꦄꦴꦢꦶꦤꦴ ꦮꦕꦤꦩꦠ꧀ꦠꦩꦺꦮ ꦄꦣꦶꦏꦴꦫꦁ ꦏꦠ꧀ꦮꦴ ꦥꦮꦠ꧀ꦠꦁ ꦄꦣꦶꦮꦕꦤꦁ, ‘‘ꦠꦏ꧀ꦏꦺꦴ ꦮꦶꦠꦏ꧀ꦏꦺꦴ’’ꦠꦶꦄꦴꦢꦶꦤꦴ ꦠꦁꦠꦁꦥꦏꦴꦫꦺꦤ ꦚꦴꦥꦤꦠꦺꦴ ꦥꦚ꧀ꦚꦠ꧀ꦠꦶ. ꦄꦡ ꦮꦴ ꦠꦁꦠꦁꦄꦠ꧀ꦡꦥ꧀ꦥꦏꦴꦱꦤꦺꦤ ꦤꦶꦕ꧀ꦖꦶꦠꦁ, ꦤꦶꦪꦠꦁ ꦮꦴ ꦮꦕꦤꦁ ꦤꦶꦫꦸꦠ꧀ꦠꦶ. ꦄꦣꦶ-ꦱꦢ꧀ꦢꦺꦴ ꦈꦥꦫꦶꦨꦴꦒꦺ, ꦈꦥꦫꦶ ꦮꦕꦤꦁ ꦄꦣꦶꦮꦕꦤꦁ. ꦏꦱ꧀ꦱ ꦈꦥꦫꦶ? ꦥꦏꦴꦱꦺꦠꦧ꧀ꦧꦱ꧀ꦱ ꦄꦠ꧀ꦡꦱ꧀ꦱꦴꦠꦶ ꦥꦴꦏꦛꦺꦴꦪꦩꦠ꧀ꦡꦺꦴ. ꦄꦣꦷꦤꦁ ꦮꦕꦤꦁ ꦄꦣꦶꦮꦕꦤꦁ. ꦏꦺꦤ ꦄꦣꦷꦤꦁ? ꦄꦠ꧀ꦡꦺꦤ. ꦄꦠ꧀ꦡꦱ꧀ꦱ ꦥꦚ꧀ꦚꦴꦥꦤꦠ꧀ꦡꦺꦤ ꦥꦚ꧀ꦚꦠ꧀ꦠꦷꦠꦶ ꦌꦮꦁ ꦤꦶꦫꦸꦠ꧀ꦠꦶꦄꦴꦢꦶꦥꦢꦴꦤꦁ ꦱꦧ꧀ꦧꦮꦕꦤꦺꦱꦸ ꦥꦮꦠ꧀ꦠꦶ ꦮꦺꦢꦶꦠꦧ꧀ꦧꦴ. ꦄꦚ꧀ꦚꦡꦴ ‘‘ꦦꦸꦱꦠꦷꦠꦶ ꦦꦱ꧀ꦱꦺꦴ’’ꦠꦶꦄꦴꦢꦶꦥ꧀ꦥꦏꦴꦫꦺꦤ ꦤꦶꦢ꧀ꦣꦴꦫꦟꦮꦕꦤꦴꦤꦁꦪꦺꦮ ꦤꦶꦫꦸꦠ꧀ꦠꦶꦠꦴ, ꦱꦶꦫꦶꦮꦝ꧀ꦞꦏꦣꦤꦮꦝ꧀ꦞꦏꦥꦏꦴꦫꦴꦤꦩꦺꦮ ꦄꦨꦶꦭꦴꦥꦤꦁ ꦄꦣꦶꦮꦕꦤꦠꦴ. ‘‘ꦠꦏ꧀ꦏꦺꦴ ꦮꦶꦠꦏ꧀ꦏꦺꦴ’’ꦠꦶ ꦌꦮꦁꦥꦏꦴꦫꦴꦤꦩꦺꦮ ꦌꦏꦩꦺꦮ ꦄꦠ꧀ꦡꦁ ꦠꦺꦤ ꦠꦺꦤ ꦥꦏꦴꦫꦺꦤ ꦚꦴꦥꦺꦤ꧀ꦠꦴꦤꦁ ꦮꦕꦤꦴꦤꦁ ꦥꦚ꧀ꦚꦠ꧀ꦠꦶꦠꦴ ꦕ ꦄꦴꦥꦗ꧀ꦗꦺꦪ꧀ꦪ. ꦄꦱꦁꦏꦶꦟ꧀ꦟꦴꦠꦶ ꦤ ꦱꦁꦏꦶꦟ꧀ꦟꦴ. ꦠꦺꦤꦴꦲ ‘‘ꦄꦮꦶꦗꦲꦶꦠꦴ…ꦥꦺ… ꦄꦖꦝ꧀ꦝꦶꦠꦴ’’ꦠꦶ. ꦤ ꦱꦁꦏꦷꦪꦤ꧀ꦠꦷꦠꦶ ꦤ ꦱꦁꦏꦶꦫꦷꦪꦤ꧀ꦠꦶ, ꦤ ꦱꦁꦏꦷꦪꦶꦱ꧀ꦱꦤ꧀ꦠꦶ ꦤ ꦱꦁꦏꦶꦫꦷꦪꦶꦱ꧀ꦱꦤ꧀ꦠꦷꦠꦶ ꦄꦠ꧀ꦡꦺꦴ. ꦄꦥ꧀ꦥꦛꦶꦏꦸꦛ꧀ꦜꦴꦠꦶ ꦤ ꦥꦛꦶꦏ꧀ꦑꦶꦠ꧀ꦠꦴ. ꦪꦱ꧀ꦩꦴ ꦨꦔ꧀ꦒꦁ ꦄꦠꦶꦏ꧀ꦏꦤ꧀ꦠꦁ ꦈꦥ꧀ꦥꦴꦢꦴꦢꦶ ꦄꦠꦶꦏ꧀ꦏꦤ꧀ꦠꦩꦺꦮ ꦲꦺꦴꦠꦶ, ꦠꦱ꧀ꦩꦴ ꦮꦸꦠ꧀ꦠꦁ ‘‘ꦨꦔ꧀ꦒꦩꦺꦮꦴ’’ꦠꦶ. ꦪꦱ꧀ꦩꦴ ꦢꦺꦱꦤ꧀ꦠꦫꦁ ꦱꦔ꧀ꦏꦤ꧀ꦠꦺꦴꦥꦶ ꦄꦠꦶꦏ꧀ꦏꦤ꧀ꦠꦤ꧀ꦠꦶ ꦮꦸꦕ꧀ꦕꦠꦶ, ꦠꦱ꧀ꦩꦴ ꦠꦢꦴꦨꦴꦮꦁ ꦢꦱ꧀ꦱꦺꦠꦸꦁ ‘‘ꦢꦺꦱꦤ꧀ꦠꦫꦁ ꦄꦱꦔ꧀ꦏꦩꦶꦠ꧀ꦮꦴ’’ꦠꦶ ꦮꦸꦠ꧀ꦠꦁ. ꦪꦠ꧀ꦡ ꦪꦠ꧀ꦡ ꦲꦶ ꦱꦔ꧀ꦑꦴꦫꦴ ꦈꦥ꧀ꦥꦗ꧀ꦗꦤ꧀ꦠꦶ, ꦠꦠ꧀ꦡ ꦠꦠ꧀ꦡꦺꦮ ꦨꦶꦗ꧀ꦗꦤ꧀ꦠꦶ ꦤꦶꦫꦸꦗ꧀ꦙꦤ꧀ꦠꦶ ꦮꦶꦥꦫꦶꦟꦩꦤ꧀ꦠꦶ ꦮꦶꦤꦴꦱꦁ ꦄꦴꦥꦗ꧀ꦗꦤ꧀ꦠꦶ. ꦠꦺꦤꦴꦲ ‘‘ꦮꦶꦥꦫꦶꦟꦠꦤ꧀ꦠꦶ…ꦥꦺ… ꦤꦛ꧀ꦜ’’ꦤ꧀ꦠꦶ. ꦄꦥꦴꦏꦛꦷꦨꦹꦠꦁ ꦄꦗꦴꦠꦠ꧀ꦠꦴ ꦌꦮ.

ꦮꦱꦨꦟꦒꦺꦴꦠ꧀ꦠꦠꦴꦪ ꦮꦱ꧀ꦱꦨꦚ꧀ꦚꦴ. ꦩꦹꦭꦢꦶꦛ꧀ꦜꦶꦒꦠꦶꦏꦴꦠꦶ ꦩꦹꦭꦨꦹꦠꦴ ꦢꦶꦛ꧀ꦜꦶꦒꦠꦶꦏꦴ, ꦆꦩꦱ꧀ꦩꦶꦁ ꦏꦥ꧀ꦥꦺ ꦱꦧ꧀ꦧꦥꦜꦩꦁ ꦠꦴꦢꦶꦱꦢꦶꦛ꧀ꦜꦶꦱꦩꦸꦥ꧀ꦥꦴꦢꦏꦴ. ꦥꦸꦤꦥ꧀ꦥꦸꦤꦁ ꦄꦴꦮꦗ꧀ꦗꦺꦤ꧀ꦠꦱ꧀ꦱꦴꦠꦶ ꦄꦲꦺꦠꦸꦮꦴꦢꦥꦛꦶꦱꦁꦪꦸꦠ꧀ꦠꦒꦤ꧀ꦡꦁ ꦈꦒ꧀ꦒꦲꦺꦠ꧀ꦮꦴ ꦥꦫꦶꦪꦴꦥꦸꦟꦶꦠ꧀ꦮꦴ ꦠꦢꦠ꧀ꦡꦁ ꦮꦷꦩꦁꦱꦤ꧀ꦠꦱ꧀ꦱ ‘‘ꦤꦠ꧀ꦡꦶ ꦲꦺꦠꦸ, ꦤꦠ꧀ꦡꦶ ꦥꦕ꧀ꦕꦪꦺꦴ ꦱꦠ꧀ꦠꦴꦤꦁ ꦱꦁꦏꦶꦭꦺꦱꦴꦪꦴ’’ꦠꦶꦄꦴꦢꦶꦤꦪꦥ꧀ꦥꦮꦠ꧀ꦠꦴꦪ ꦭꦢ꧀ꦣꦶꦪꦴ ꦄꦴꦫꦩ꧀ꦩꦟꦺ ꦩꦶꦕ꧀ꦖꦴꦱꦠꦶ ꦱꦤ꧀ꦠꦶꦛ꧀ꦜꦠꦶ, ‘‘ꦤꦠ꧀ꦡꦶ ꦲꦺꦠꦹ’’ꦠꦶꦄꦴꦢꦶꦮꦱꦺꦤ ꦄꦤꦸꦱ꧀ꦱꦮꦹꦥꦭꦢ꧀ꦣꦺ ꦄꦠ꧀ꦡꦺ ꦠꦢꦴꦏꦴꦫꦥꦫꦶꦮꦶꦠꦏ꧀ꦏꦤꦺꦲꦶ ꦱꦮꦶꦒ꧀ꦒꦲꦺ ꦮꦶꦪ ꦱꦫꦹꦥꦠꦺꦴ ꦕꦶꦠ꧀ꦠꦱ꧀ꦱ ꦥꦕ꧀ꦕꦸꦥꦛ꧀ꦜꦶꦠꦺ ꦕꦶꦫꦏꦴꦭꦥꦫꦶꦕꦪꦺꦤ ‘‘ꦌꦮꦩꦺꦠ’’ꦤ꧀ꦠꦶ ꦤꦶꦗ꧀ꦙꦴꦤꦏ꧀ꦑꦩꦨꦴꦮꦹꦥꦒꦩꦤꦺꦤ ꦤꦶꦗ꧀ꦙꦴꦤꦏ꧀ꦑꦤ꧀ꦠꦶꦪꦴ ꦠꦡꦴꦒꦲꦶꦠꦺ ꦥꦸꦤꦥ꧀ꦥꦸꦤꦁ ꦠꦡꦺꦮ ꦄꦴꦱꦺꦮꦤ꧀ꦠꦱ꧀ꦱ ꦧꦲꦸꦭꦷꦏꦫꦺꦴꦤ꧀ꦠꦱ꧀ꦱ ꦩꦶꦕ꧀ꦖꦴꦮꦶꦠꦏ꧀ꦏꦺꦤ ꦱꦩꦴꦢꦶꦪꦩꦴꦤꦴ ꦩꦶꦕ꧀ꦖꦴꦮꦴꦪꦴꦩꦹꦥꦠ꧀ꦡꦩ꧀ꦨꦶꦠꦴ ꦄꦠꦁꦱꦨꦴꦮꦁ ‘‘ꦠꦁꦱꦨꦴꦮ’’ꦤ꧀ꦠꦶ ꦒꦟ꧀ꦲꦤ꧀ꦠꦷ ꦩꦶꦕ꧀ꦖꦴꦱꦠꦷꦠꦶ ꦭꦢ꧀ꦣꦤꦴꦩꦴ ꦠꦁꦭꦢ꧀ꦣꦶꦱꦲꦒꦠꦴ ꦠꦟ꧀ꦲꦴ ꦱꦤ꧀ꦠꦶꦛ꧀ꦜꦠꦶ. ꦪꦡꦴꦱꦏꦁ ꦮꦶꦠꦏ꧀ꦏꦴꦢꦶꦥꦕ꧀ꦕꦪꦭꦴꦨꦺꦤ ꦠꦱ꧀ꦩꦶꦁ ꦄꦴꦫꦩ꧀ꦩꦟꦺ ꦄꦣꦶꦛ꧀ꦜꦶꦠꦠꦴꦪ ꦄꦤꦺꦏꦒ꧀ꦒꦠꦁ ꦥꦲꦴꦪ ꦕꦶꦠ꧀ꦠꦁ ꦌꦏꦒ꧀ꦒꦠꦁ ꦄꦥ꧀ꦥꦶꦠꦁ ꦮꦶꦪ ꦲꦺꦴꦠꦶ ꦩꦶꦕ꧀ꦖꦴꦱꦩꦴꦣꦶꦤꦴ. ꦱꦺꦴꦥꦶ ꦲꦶ ꦥꦕ꧀ꦕꦪꦮꦶꦱꦺꦱꦺꦲꦶ ꦭꦢ꧀ꦣꦨꦴꦮꦤꦴꦧꦭꦺꦴ ꦇꦢꦶꦱꦺ ꦜꦴꦤꦺ ꦱꦩꦴꦣꦴꦤꦥꦠꦶꦫꦹꦥꦏꦶꦕ꧀ꦕꦏꦫꦺꦴ ꦲꦺꦴꦠꦶꦪꦺꦮ ꦮꦴꦭꦮꦶꦗ꧀ꦙꦤꦴꦢꦷꦱꦸ ꦮꦶꦪꦴꦠꦶ ꦢꦛ꧀ꦜꦧ꧀ꦧꦁ. ꦠꦡꦴ ꦲꦶ ꦄꦤꦺꦏꦏ꧀ꦑꦠ꧀ꦠꦸꦁ ꦠꦺꦤꦴꦏꦴꦫꦺꦤ ꦥꦸꦧ꧀ꦧꦨꦴꦒꦶꦪꦺꦱꦸ ꦗꦮꦤꦮꦴꦫꦺꦱꦸ ꦥꦮꦠ꧀ꦠꦺꦱꦸ ꦱꦧ꧀ꦧꦥꦕ꧀ꦖꦶꦩꦺ ꦗꦮꦤꦮꦴꦫꦺ ꦱꦠ꧀ꦠ ꦗꦮꦤꦴꦤꦶ ꦗꦮꦤ꧀ꦠꦶ. ꦠꦠ꧀ꦡ ꦥꦜꦩꦺ ꦱꦠꦺꦏꦶꦕ꧀ꦖꦺꦴ ꦲꦺꦴꦠꦶ, ꦠꦡꦴ ꦢꦸꦠꦶꦪꦴꦢꦷꦱꦸ. ꦱꦠ꧀ꦠꦩꦺ ꦥꦤ ꦗꦮꦤꦺ ꦱꦩ꧀ꦥꦠ꧀ꦠꦺ ꦄꦠꦺꦏꦶꦕ꧀ꦖꦺꦴ ꦲꦺꦴꦠꦶ. ꦠꦺꦤꦴꦲ ‘‘ꦄꦱ꧀ꦱꦴꦢꦺꦤ꧀ꦠꦱ꧀ꦱꦴ’’ꦠꦶꦄꦴꦢꦶ. ꦆꦩꦺꦱꦸꦥꦷꦠꦶ ꦢ꧀ꦮꦷꦱꦸꦥꦶ ꦜꦴꦤꦺꦱꦸ.

ꦥꦕ꧀ꦕꦸꦥ꧀ꦥꦤ꧀ꦤꦁ ꦮꦴꦠꦶ ꦌꦠ꧀ꦡ ꦆꦠꦶ-ꦱꦢ꧀ꦢꦺꦴ ꦄꦴꦢꦶꦄꦠ꧀ꦡꦺꦴ. ꦠꦺꦤ ‘‘ꦪꦢꦺꦠꦁ ꦄꦤꦴꦒꦠꦁ ꦤꦴꦩ, ꦤꦪꦶꦢꦁ ꦄꦤꦴꦒꦠ’’ꦤ꧀ꦠꦶꦄꦴꦢꦶꦏꦁ ꦱꦔ꧀ꦒꦟ꧀ꦲꦴꦠꦶ. ꦠꦺꦥꦷꦠꦶ ꦠꦺ ꦮꦱ꧀ꦱꦨꦚ꧀ꦚꦴꦥꦶ ꦤ ꦩꦚ꧀ꦚꦶꦁꦱꦸ ꦭꦺꦴꦏꦱꦩꦚ꧀ꦚꦴꦪ ꦄꦤꦠꦶꦏ꧀ꦏꦩꦤꦷꦪꦠꦺꦴ. ꦠꦺꦤꦴꦲ ‘‘ꦄꦠꦷꦠꦁ ꦥꦤꦴ’’ꦠꦶꦄꦴꦢꦶ. ꦑꦤ꧀ꦣꦴꦤꦁ ꦈꦥꦫꦶ ꦤꦶꦫꦸꦭ꦳꧀ꦲꦴ ꦥꦟ꧀ꦟꦠ꧀ꦠꦶ.

ꦤꦶꦫꦸꦠ꧀ꦠꦶꦥꦡꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦈꦥꦪꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.