꧔. ꦤꦠꦸꦩ꧀ꦲꦴꦏꦁꦮꦒ꧀ꦒꦺꦴ

꧑. ꦤꦠꦸꦩ꧀ꦲꦴꦏꦁꦱꦸꦠ꧀ꦠꦮꦟ꧀ꦟꦤꦴ

꧓꧓. ꦖꦤ꧀ꦢꦫꦴꦒꦥ꧀ꦥꦲꦴꦤꦺꦤꦴꦠꦶ ꦠꦥ꧀ꦥꦛꦶꦧꦢ꧀ꦣꦱ꧀ꦱ ꦖꦤ꧀ꦢꦫꦴꦒꦱ꧀ꦱ ꦥꦗꦲꦤꦺꦤ. ꦢꦧ꧀ꦧꦴꦢꦶ ꦥꦴꦏꦠꦶꦏꦠꦶꦟꦁ ꦥꦴꦏꦛꦩꦺꦮꦴꦠꦶ ꦄꦥꦴꦏꦛꦁ ꦢꦱ꧀ꦱꦺꦠꦸꦁ ꦠꦴꦭꦤꦴꦭ꦳ꦶꦏꦺꦫꦴꦢꦶ ꦢꦱ꧀ꦱꦶꦠꦁ, ꦠꦶꦟꦏꦛ꧀ꦜꦴꦤꦁ ꦮꦴ ꦨꦺꦢꦢꦱ꧀ꦱꦤꦠ꧀ꦡꦁ. ꦥꦶꦪꦴꦭꦺꦴ ꦦꦴꦫꦸꦱꦏꦁ.

ꦤꦠꦸꦩ꧀ꦲꦴꦏꦁꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧓. ꦄꦚ꧀ꦚꦠꦫꦨꦶꦏ꧀ꦑꦸꦱꦸꦠ꧀ꦠꦮꦟ꧀ꦟꦤꦴ

꧓꧕. ꦪꦢꦶ ꦫꦹꦥꦁ ꦄꦤꦸꦱꦺꦠꦷꦠꦶ ꦫꦹꦥꦣꦩ꧀ꦩꦺ ꦄꦴꦫꦧ꧀ꦨ ꦪꦢꦶ ꦫꦴꦒꦴꦢꦪꦺꦴ ꦄꦤꦸꦱꦪꦤꦮꦱꦺꦤ ꦥꦮꦠ꧀ꦠꦤ꧀ꦠꦶ. ꦠꦺꦤ ꦱꦔ꧀ꦑꦁ ꦒꦕ꧀ꦖꦠꦷꦠꦶ ꦠꦺꦤ ꦫꦴꦒꦴꦢꦶꦤꦴ ꦠꦁꦱꦩꦔ꧀ꦒꦷꦥꦸꦒ꧀ꦒꦭꦺꦴ ꦱꦔ꧀ꦑꦴꦠꦧ꧀ꦧꦠꦁ ‘‘ꦫꦠ꧀ꦠꦺꦴ ꦢꦸꦛ꧀ꦜꦺꦴ’’ꦠꦶꦄꦴꦢꦶꦤꦴ ꦮꦺꦴꦲꦫꦶꦠꦧ꧀ꦧꦠꦁ ꦈꦥꦒꦕ꧀ꦖꦠꦷꦠꦶ. ꦠꦺꦤꦴꦲ ‘‘ꦏꦴꦩꦫꦴꦒꦴꦢꦷꦱꦹ’’ꦠꦶꦄꦴꦢꦶ. ꦄꦨꦹꦠꦺꦤꦴꦠꦶ ꦄꦗꦴꦠꦺꦤ ꦄꦤꦸꦱꦪꦮꦱꦺꦤ ꦄꦥ꧀ꦥꦮꦠ꧀ꦠꦺꦤ. ꦄꦤꦸꦱꦪꦱꦷꦱꦺꦤ ꦲꦺꦠ꧀ꦡ ꦄꦨꦶꦨꦮꦁ ꦮꦢꦠꦶ. ꦪꦠꦺꦴ ‘‘ꦫꦠ꧀ꦠꦺꦴ ꦢꦸꦛ꧀ꦜꦺꦴ ꦩꦹꦭ꦳꧀ꦲꦺꦴꦠꦶ ꦱꦔ꧀ꦑꦁ ꦤ ꦒꦕ꧀ꦖꦠꦷ’’ꦠꦶ ꦮꦸꦠ꧀ꦠꦁ. ꦤꦶꦥ꧀ꦥꦫꦶꦪꦴꦪꦠꦺꦴ ꦲꦶ ꦩꦒ꧀ꦒꦮꦗ꧀ꦙꦏꦶꦭꦺꦱꦴ ꦄꦤꦸꦱꦪꦺꦴ.

ꦄꦚ꧀ꦚꦠꦫꦨꦶꦏ꧀ꦑꦸꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧔. ꦢꦸꦠꦶꦪꦄꦚ꧀ꦚꦠꦫꦨꦶꦏ꧀ꦑꦸꦱꦸꦠ꧀ꦠꦮꦟ꧀ꦟꦤꦴ

꧓꧖. ꦠꦁ ꦄꦤꦸꦱꦪꦶꦠꦁ ꦫꦹꦥꦤ꧀ꦠꦶ ꦠꦁ ꦫꦴꦒꦴꦢꦶꦤꦴ ꦄꦤꦸꦱꦪꦶꦠꦁ ꦫꦹꦥꦁ ꦩꦫꦤ꧀ꦠꦺꦤ ꦄꦤꦸꦱꦪꦺꦤ ꦄꦤꦸꦩꦫꦠꦶ. ꦠꦺꦤ ꦮꦸꦠ꧀ꦠꦁ ‘‘ꦤ ꦲꦷ’’ꦠꦶꦄꦴꦢꦶ. ꦪꦺꦤ ꦄꦤꦸꦱꦪꦺꦤ ꦩꦫꦤ꧀ꦠꦺꦤ ꦠꦁ ꦄꦤꦸꦩꦫꦠꦶ. ꦠꦺꦤ ꦱꦔ꧀ꦑꦁ ꦒꦕ꧀ꦖꦠꦷꦠꦶ ꦠꦡꦴꦨꦹꦠꦠꦺꦴ ꦠꦺꦤ ‘‘ꦫꦠ꧀ꦠꦺꦴ’’ꦠꦶꦄꦴꦢꦶꦮꦺꦴꦲꦴꦫꦁ ꦭꦨꦠꦶ. ꦪꦺꦤ ꦄꦤꦸꦱꦪꦺꦤ ꦏꦴꦫꦟꦨꦹꦠꦺꦤ ꦄꦤꦸꦩꦷꦪꦠꦶ, ꦠꦺꦤ.

ꦢꦸꦠꦶꦪꦄꦚ꧀ꦚꦠꦫꦨꦶꦏ꧀ꦑꦸꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧕-꧖. ꦄꦴꦤꦤ꧀ꦢꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧓꧗-꧓꧘. ꦜꦶꦠꦶꦪꦴ ꦜꦶꦠꦶꦏ꧀ꦑꦟꦺꦤ ꦱꦲꦶꦠꦁ ꦜꦶꦠꦁ. ꦜꦶꦠꦱ꧀ꦱ ꦄꦚ꧀ꦚꦡꦠ꧀ꦠꦤ꧀ꦠꦶ ꦈꦥ꧀ꦥꦴꦢꦏ꧀ꦑꦟꦠꦺꦴ ꦄꦚ꧀ꦚꦡꦴꦨꦴꦮꦺꦴ. ꦥꦚ꧀ꦚꦴꦪꦠꦷꦠꦶ ꦈꦥꦭꦧ꧀ꦨꦠꦶ. ꦥꦕ꧀ꦕꦪꦮꦱꦺꦤ ꦣꦫꦩꦴꦤꦠ꧀ꦠꦴ ꦌꦮ ꦗꦷꦮꦩꦴꦤꦱ꧀ꦱ ꦗꦷꦮꦶꦠꦶꦤ꧀ꦢ꧀ꦫꦶꦪꦮꦱꦺꦤ ꦗꦫꦴ ꦥꦚ꧀ꦚꦴꦪꦠꦶ ꦈꦥ꧀ꦥꦴꦢꦏ꧀ꦑꦟꦠꦺꦴ ꦄꦚ꧀ꦚꦡꦠ꧀ꦠꦥ꧀ꦥꦠ꧀ꦠꦶꦪꦴ. ꦮꦸꦠ꧀ꦠꦩꦺꦮ ꦄꦠ꧀ꦡꦁ ꦥꦴꦏꦛꦠꦫꦁ ꦏꦴꦠꦸꦁ ‘‘ꦜꦶꦠꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦗꦷꦮꦶ…ꦥꦺ… ꦤꦴꦩꦁ. ꦠꦡꦴ ꦲꦶ ꦄꦨꦶꦣꦩ꧀ꦩꦺ (ꦣ. ꦱ. ꧑꧙) ‘‘ꦄꦴꦪꦸ ꦜꦶꦠꦷ’’ꦠꦶ ꦤꦶꦢ꧀ꦢꦶꦛ꧀ꦜꦁ. ꦄꦚ꧀ꦚꦡꦠ꧀ꦠꦤ꧀ꦠꦶ ꦗꦫꦴꦪ ꦤꦴꦩꦤ꧀ꦠꦶ ꦱꦩ꧀ꦧꦤ꧀ꦣꦺꦴ.

ꦠꦷꦟꦶ ꦭꦏ꧀ꦑꦟꦴꦤꦶ ꦲꦺꦴꦤ꧀ꦠꦶ ꦱꦔ꧀ꦑꦠꦱꦨꦴꦮꦭꦏ꧀ꦑꦟꦠꦺꦴ. ꦪꦺꦴ ꦏꦺꦴꦕꦶ ꦫꦹꦥꦣꦩ꧀ꦩꦺꦴ ꦮꦴ ꦄꦫꦹꦥꦣꦩ꧀ꦩꦺꦴ ꦮꦴ ꦭꦺꦴꦏꦶꦪꦺꦴ ꦮꦴ ꦭꦺꦴꦏꦸꦠ꧀ꦠꦫꦺꦴ ꦮꦴ ꦱꦔ꧀ꦑꦴꦫꦺꦴ. ꦱꦔ꧀ꦑꦴꦫꦺꦴ, ꦤ ꦭꦏ꧀ꦑꦟꦁ ꦈꦥ꧀ꦥꦴꦢꦴꦢꦶꦱꦨꦴꦮꦠ꧀ꦠꦴ. ꦭꦏ꧀ꦑꦟꦁ, ꦤ ꦱꦔ꧀ꦑꦴꦫꦺꦴ ꦈꦥ꧀ꦥꦴꦢꦴꦢꦶꦫꦲꦶꦠꦠ꧀ꦠꦴ. ꦤ ꦕ…ꦥꦺ… ꦱꦏ꧀ꦏꦴ ꦱꦔ꧀ꦑꦴꦫꦣꦩ꧀ꦩꦠ꧀ꦠꦴ ꦭꦏ꧀ꦑꦟꦱ꧀ꦱ. ꦤꦴꦥꦶ ꦭꦏ꧀ꦑꦟꦁ ꦮꦶꦤꦴ ꦱꦔ꧀ꦑꦴꦫꦺꦴ ꦥꦚ꧀ꦚꦴꦥꦺꦠꦸꦁ ꦱꦏ꧀ꦏꦴ ꦱꦔ꧀ꦑꦴꦫꦨꦴꦮꦺꦤ. ꦠꦺꦤꦴꦲ ‘‘ꦭꦏ꧀ꦑꦟꦺꦤꦴ’’ꦠꦶꦄꦴꦢꦶ. ꦆꦢꦴꦤꦶ ꦪꦡꦴꦮꦸꦠ꧀ꦠꦩꦠ꧀ꦡꦁ ꦈꦥꦩꦴꦪ ꦮꦶꦨꦴꦮꦺꦠꦸꦁ ‘‘ꦪꦡꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦭꦏ꧀ꦑꦟꦤ꧀ꦠꦶ ꦏꦴꦭ꦳ꦫꦠ꧀ꦠꦱꦧꦭꦴꦢꦶꦨꦴꦮꦭꦏ꧀ꦑꦟꦁ ꦥꦴꦏꦛꦁ ꦲꦺꦴꦠꦶ ‘‘ꦄꦪꦁ ꦄꦱꦸꦏꦱ꧀ꦱ ꦒꦴꦮꦷ’’ꦠꦶ.

ꦌꦮꦁ ꦱꦔ꧀ꦑꦴꦫꦺꦴꦥꦶ ꦥꦚ꧀ꦚꦴꦪꦠꦶ ꦱꦨꦴꦮꦠꦺꦴ ꦈꦥꦣꦴꦫꦺꦤ꧀ꦠꦱ꧀ꦱ ꦈꦥ꧀ꦥꦴꦢꦭꦏ꧀ꦑꦟꦩ꧀ꦥꦶ ꦈꦥ꧀ꦥꦴꦢꦴꦮꦠ꧀ꦡꦴꦠꦶ ꦏꦠ꧀ꦮꦴ. ꦏꦴꦭꦱꦔ꧀ꦑꦴꦠꦺꦴꦠꦶ ꦈꦥ꧀ꦥꦗ꧀ꦗꦩꦴꦤꦏꦴꦭꦱꦔ꧀ꦑꦴꦠꦺꦴ. ꦠꦱ꧀ꦱ ꦱꦔ꧀ꦑꦴꦫꦱ꧀ꦱ. ꦑꦟꦺꦴꦥꦷꦠꦶ ꦈꦥ꧀ꦥꦴꦢꦏ꧀ꦑꦟꦺꦴꦥꦶ ꦥꦚ꧀ꦚꦴꦪꦠꦶ. ꦈꦥ꧀ꦥꦴꦢꦺꦴꦥꦷꦠꦶ ꦈꦥ꧀ꦥꦴꦢꦭꦏ꧀ꦑꦟꦺꦴꦥꦶ. ꦗꦫꦴꦭꦏ꧀ꦑꦟꦤ꧀ꦠꦶ ꦈꦥ꧀ꦥꦤ꧀ꦤꦗꦷꦫꦟꦭꦏ꧀ꦑꦟꦁ, ꦠꦁ ‘‘ꦜꦶꦠꦱ꧀ꦱ ꦄꦚ꧀ꦚꦡꦠ꧀ꦠ’’ꦤ꧀ꦠꦶ ꦮꦸꦠ꧀ꦠꦁ. ‘‘ꦨꦔ꧀ꦒꦏ꧀ꦑꦟꦺ ꦱꦔ꧀ꦑꦴꦫꦺꦴꦥꦶ ꦠꦁꦭꦏ꧀ꦑꦟꦩ꧀ꦥꦶ ꦏꦴꦭꦱꦔ꧀ꦑꦴꦠꦺꦴ ꦠꦱ꧀ꦱ ꦑꦟꦺꦴꦥꦶ ꦥꦚ꧀ꦚꦴꦪꦠꦷ’’ꦠꦶ ꦥꦴꦜꦺꦴ. ꦏꦺꦕꦶ ꦥꦤ ‘‘ꦗꦫꦴꦥꦷ’’ꦠꦶ ꦥꦢꦩ꧀ꦥꦺꦠ꧀ꦡ ꦥꦏ꧀ꦑꦶꦥꦤ꧀ꦠꦶ. ꦌꦮꦚ꧀ꦕ ꦮꦢꦤ꧀ꦠꦶ ‘‘ꦤ ꦲꦶ ꦠꦱ꧀ꦩꦶꦁ ꦑꦟꦺ ꦠꦫꦸꦟꦺꦴ ꦲꦸꦠ꧀ꦮꦴ ꦱꦔ꧀ꦑꦴꦫꦺꦴ ꦨꦶꦗ꧀ꦗꦠꦶ, ꦄꦡ ꦑꦺꦴ ꦗꦶꦪ꧀ꦪꦩꦴꦤꦺꦴ ꦩꦲꦭ꧀ꦭꦏꦺꦴ ꦮꦶꦪ ꦗꦶꦟ꧀ꦟꦺꦴ ꦌꦮ ꦲꦸꦠ꧀ꦮꦴ ꦨꦶꦗ꧀ꦗꦠꦷ’’ꦠꦶ, ꦨꦔ꧀ꦒꦺꦤꦺꦮ ꦥꦤ ꦗꦫꦴ ꦄꦨꦶꦨꦸꦪ꧀ꦪꦠꦶ ꦑꦟꦱ꧀ꦱ ꦄꦠꦶꦆꦠ꧀ꦠꦫꦨꦴꦮꦠꦺꦴ ꦤ ꦱꦏ꧀ꦏꦴ ꦥꦚ꧀ꦚꦴꦥꦺꦠꦸꦁ ꦜꦶꦠꦶꦪꦴꦠꦶ ꦠꦺꦱꦁ ꦄꦣꦶꦥ꧀ꦥꦴꦪꦺꦴ. ꦠꦴꦤꦷꦠꦶ ꦄꦫꦹꦥꦣꦩ꧀ꦩꦴꦤꦁ ꦠꦷꦟꦶ ꦭꦏ꧀ꦑꦟꦴꦤꦶ. ꦄꦠ꧀ꦡꦶꦏ꧀ꦑꦟꦤ꧀ꦠꦶ ꦄꦫꦹꦥꦣꦩ꧀ꦩꦮꦶꦗ꧀ꦗꦩꦴꦤꦏ꧀ꦑꦟꦁ, ꦈꦥ꧀ꦥꦴꦢꦏ꧀ꦑꦟꦤ꧀ꦠꦶ ꦄꦣꦶꦥ꧀ꦥꦴꦪꦺꦴ. ꦱꦧ꧀ꦧꦣꦩ꧀ꦩꦴꦤꦤ꧀ꦠꦶ ꦱꦧ꧀ꦧꦺꦱꦁ ꦫꦹꦥꦴꦫꦹꦥꦣꦩ꧀ꦩꦴꦤꦁ ꦜꦶꦠꦶꦪꦴ ꦤ ꦨꦮꦶꦠꦧ꧀ꦧꦁ. ꦠꦱ꧀ꦱꦺꦮꦴꦠꦶ ꦠꦱ꧀ꦱꦴ ꦌꦮ ꦜꦶꦠꦶꦪꦴ. ꦠꦩꦠ꧀ꦡꦤ꧀ꦠꦶ ꦗꦫꦴꦭꦏ꧀ꦑꦟꦱ꧀ꦱ ꦥꦚ꧀ꦚꦴꦥꦺꦠꦸꦁ ꦄꦱꦏ꧀ꦏꦸꦟꦺꦪ꧀ꦪꦨꦴꦮꦁ. ꦄꦚ꧀ꦚꦺ ꦥꦤ ‘‘ꦱꦤ꧀ꦠꦠꦶꦮꦱꦺꦤ ꦜꦴꦤꦁ ꦜꦶꦠꦷ’’ꦠꦶ ꦮꦢꦤ꧀ꦠꦶ, ꦠꦪꦶꦢꦁ ꦄꦏꦴꦫꦟꦁ ꦄꦛ꧀ꦜꦴꦤꦁ. ꦪꦱ꧀ꦩꦴ ꦱꦸꦠ꧀ꦠꦺ ‘‘ꦜꦶꦠꦱ꧀ꦱ ꦄꦚ꧀ꦚꦡꦠ꧀ꦠꦁ ꦥꦚ꧀ꦚꦴꦪꦠꦷ’’ꦠꦶ ꦈꦥ꧀ꦥꦴꦢꦮꦪꦺꦲꦶ ꦤꦶꦧ꧀ꦧꦶꦱꦺꦱꦺꦤ ꦜꦶꦠꦶꦪꦴ ꦗꦺꦴꦠꦶꦠꦠ꧀ꦠꦴ. ꦪꦁ ꦥꦤꦺꦠ꧀ꦡ ꦮꦠ꧀ꦠꦧ꧀ꦧꦁ, ꦠꦁ ꦲꦺꦛ꧀ꦜꦴ ꦮꦸꦠ꧀ꦠꦩꦺꦮ. ꦄꦥꦶꦕ ꦪꦡꦴ ꦣꦩ꧀ꦩꦱ꧀ꦱ ꦈꦥ꧀ꦥꦴꦢꦴꦮꦠ꧀ꦡꦴꦪ ꦨꦶꦤ꧀ꦤꦴ ꦨꦔ꧀ꦒꦴꦮꦠ꧀ꦡꦴ ꦆꦕ꧀ꦖꦶꦠꦴ, ꦄꦚ꧀ꦚꦡꦴ ꦈꦥ꧀ꦥꦗ꧀ꦗꦩꦴꦤꦩꦺꦮ ꦨꦶꦗ꧀ꦗꦠꦷꦠꦶ ꦄꦴꦥꦗ꧀ꦗꦠꦶ, ꦌꦮꦁ ꦨꦔ꧀ꦒꦴꦮꦠ꧀ꦡꦴꦪꦥꦶ ꦨꦶꦤ꧀ꦤꦴ ꦨꦔ꧀ꦒꦴꦨꦶꦩꦸꦑꦴꦮꦠ꧀ꦡꦴ ꦆꦕ꧀ꦖꦶꦠꦧ꧀ꦧꦴ. ꦤ ꦲꦶ ꦄꦨꦔ꧀ꦒꦴꦨꦶꦩꦸꦑꦺꦴ ꦨꦶꦗ꧀ꦗꦠꦶ. ꦤ ꦕꦺꦠ꧀ꦡ ꦱꦏ꧀ꦏꦴ ꦈꦥ꧀ꦥꦴꦢꦴꦨꦶꦩꦸꦑꦴꦮꦠ꧀ꦡꦁ ꦥꦫꦶꦏꦥ꧀ꦥꦺꦠꦸꦁ ꦠꦢꦴ ꦠꦱ꧀ꦱ ꦄꦭꦢ꧀ꦣꦠ꧀ꦠꦭꦴꦨꦠ꧀ꦠꦴ. ꦄꦪꦁ ꦮꦶꦱꦺꦱꦺꦴꦠꦶ ꦜꦶꦠꦶꦏ꧀ꦑꦟꦺꦴ ꦤꦴꦩ ꦫꦹꦥꦣꦩ꧀ꦩꦴꦤꦁꦪꦺꦮ, ꦤ ꦄꦫꦹꦥꦣꦩ꧀ꦩꦴꦤꦤ꧀ꦠꦶ ꦄꦪꦁ ꦇꦢꦶꦱꦺꦴ ꦮꦶꦱꦺꦱꦺꦴ. ꦄꦴꦕꦫꦶꦪꦩꦠꦶ ꦤꦴꦩ ꦠꦱ꧀ꦱꦺꦮ ꦄꦴꦕꦫꦶꦪꦱ꧀ꦱ ꦩꦠꦶ, ꦱꦴ ꦱꦧ꧀ꦧꦢꦸꦧ꧀ꦧꦭꦴꦠꦶ ꦄꦴꦲ ‘‘ꦠꦱ꧀ꦩꦴ’’ꦠꦶꦄꦴꦢꦶ.

ꦄꦴꦤꦤ꧀ꦢꦱꦸꦠ꧀ꦠꦴꦢꦶꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧗-꧑꧐. ꦄꦤꦸꦣꦩ꧀ꦩꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧓꧙-꧔꧒. ꦄꦥꦴꦪꦢꦸꦏ꧀ꦑꦺ ꦱꦏꦭꦱꦁꦱꦴꦫꦢꦸꦏ꧀ꦑꦺ ꦕ ꦥꦠꦶꦠꦸꦁ ꦄꦢꦠ꧀ꦮꦴ ꦣꦴꦫꦟꦛ꧀ꦜꦺꦤ ꦣꦩ꧀ꦩꦺꦴ, ꦩꦒ꧀ꦒꦦꦭꦤꦶꦧ꧀ꦧꦴꦤꦴꦤꦶ. ꦠꦢꦤꦸꦭꦺꦴꦩꦶꦏꦴ ꦕꦱ꧀ꦱ ꦥꦸꦧ꧀ꦧꦨꦴꦒꦥꦛꦶꦥꦢꦴꦠꦶ ꦄꦴꦲ ‘‘ꦣꦩ꧀ꦩꦴꦤꦸꦣꦩ꧀ꦩꦥꦛꦶꦥꦤ꧀ꦤꦱ꧀ꦱꦴ’’ꦠꦶꦄꦴꦢꦶ. ‘‘ꦤꦶꦧ꧀ꦧꦶꦢꦴꦧꦲꦸꦭꦺꦴ’’ꦠꦶ ꦄꦛ꧀ꦜꦏꦡꦴꦪꦁ ꦥꦢꦸꦢ꧀ꦣꦴꦫꦺꦴ ꦏꦠꦺꦴ, ꦥꦴꦭ꦳ꦶꦪꦁ ꦥꦤ ‘‘ꦤꦶꦧ꧀ꦧꦶꦢꦴꦧꦲꦸꦭꦁ ꦮꦶꦲꦫꦺꦪ꧀ꦪꦴ’’ꦠꦶ ꦄꦴꦒꦠꦁ. ꦈꦏ꧀ꦏꦟ꧀ꦜꦤꦧꦲꦸꦭꦺꦴꦠꦶ ꦱꦧ꧀ꦧꦨꦮꦺꦱꦸ ꦈꦏ꧀ꦏꦟ꧀ꦜꦤꦧꦲꦸꦭꦺꦴ. ꦠꦷꦲꦶ ꦥꦫꦶꦚ꧀ꦚꦴꦲꦷꦠꦶ ꦚꦴꦠꦠꦷꦫꦟꦥ꧀ꦥꦲꦴꦤꦥꦫꦶꦚ꧀ꦚꦴꦲꦶ. ꦥꦫꦶꦗꦴꦤꦴꦠꦷꦠꦶ ꦠꦺꦨꦹꦩꦏꦣꦩ꧀ꦩꦺ ꦥꦫꦶꦕ꧀ꦖꦶꦗ꧀ꦗ ꦗꦴꦤꦴꦠꦶ, ꦮꦶꦥꦱ꧀ꦱꦤꦁ ꦈꦱ꧀ꦱꦸꦏ꧀ꦏꦴꦥꦺꦠꦶ. ꦥꦫꦶꦩꦸꦕ꧀ꦕꦠꦶ ꦱꦧ꧀ꦧꦱꦁꦏꦶꦭꦺꦱꦠꦺꦴ ‘‘ꦩꦒ꧀ꦒꦺꦴ ꦥꦮꦠ꧀ꦠꦶꦠꦺꦴ ꦥꦫꦶꦩꦸꦕ꧀ꦕꦠꦷ’’ꦠꦶ ꦮꦸꦠ꧀ꦠꦠ꧀ꦠꦴ. ꦠꦡꦴꦠꦶ ꦆꦩꦶꦤꦴ ꦆꦠꦺꦴ ꦥꦫꦺꦱꦸ ꦠꦷꦱꦸ ꦩꦒ꧀ꦒꦺꦴ ꦲꦺꦴꦠꦷꦠꦶ ꦢꦱ꧀ꦱꦺꦠꦶ. ꦆꦣꦴꦠꦶ ꦆꦩꦱ꧀ꦩꦶꦁ ꦱꦸꦠ꧀ꦠꦺ. ꦄꦤꦶꦪꦩꦶꦠꦴꦠꦶ ꦄꦒ꧀ꦒꦲꦶꦠꦴ. ꦠꦺꦱꦸ ꦤꦶꦪꦩꦶꦠꦴ ‘‘ꦄꦤꦶꦕ꧀ꦕꦴꦤꦸꦥꦱ꧀ꦱꦷ’’ꦠꦶꦄꦴꦢꦶꦮꦕꦤꦠꦺꦴ. ꦱꦴꦠꦶ ꦄꦤꦸꦥꦱ꧀ꦱꦤꦴ. ꦠꦠ꧀ꦡ ꦤꦶꦪꦩꦶꦠꦮꦱꦺꦤꦺꦮꦴꦠꦶ ꦆꦢꦁ ꦭꦏ꧀ꦑꦟꦮꦕꦤꦁ ꦪꦡꦴ ‘‘ꦪꦢꦶ ꦩꦺ ꦧ꧀ꦪꦴꦣꦪꦺꦴ ꦨꦮꦺꦪ꧀ꦪꦸꦁ, ꦢꦴꦠꦧ꧀ꦧꦩꦶꦢꦩꦺꦴꦱꦣ’’ꦤ꧀ꦠꦶ. ꦤ ꦲꦶ ꦱꦏ꧀ꦏꦴ ꦌꦠꦶꦱ꧀ꦱꦴ ꦌꦮ ꦄꦤꦸꦥꦱ꧀ꦱꦤꦴꦪ ꦮꦱꦺꦤ ꦱꦩ꧀ꦩꦱꦤꦴꦕꦴꦫꦁ ꦩꦠ꧀ꦡꦏꦁ ꦥꦴꦥꦺꦠꦸꦤ꧀ꦠꦶ.

ꦄꦤꦸꦣꦩ꧀ꦩꦱꦸꦠ꧀ꦠꦴꦢꦶꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦤꦠꦸꦩ꧀ꦲꦴꦏꦁꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.