꧑. ꦥꦜꦩꦮꦒ꧀ꦒꦺꦴ

꧑. ꦄꦛ꧀ꦜꦶꦱꦸꦠ꧀ꦠꦮꦟ꧀ꦟꦤꦴ

꧒꧐꧒. ꦄꦴꦪꦱ꧀ꦩꦴ ꦕ ꦭꦏ꧀ꦑꦟꦺꦴꦠꦶꦄꦴꦢꦷꦱꦸ ‘‘ꦏꦺꦴ ꦤꦴꦩꦴꦪꦱ꧀ꦩꦴ ꦭꦏ꧀ꦑꦟꦺꦴ, ꦏꦱ꧀ꦩꦴ ꦕ ‘ꦭꦏ꧀ꦑꦟꦺꦴ’ꦠꦶ ꦤꦴꦩꦁ ꦄꦲꦺꦴꦱꦶ, ꦏꦺꦴ ꦕꦴꦪꦱ꧀ꦩꦴ ꦩꦺꦴꦒ꧀ꦒꦭ꧀ꦭꦴꦤꦺꦴ, ꦏꦱ꧀ꦩꦴ ꦕ ꦱꦶꦠꦁ ꦥꦴꦠ꧀ꦮꦴꦏꦴꦱꦷ’’ꦠꦶ ꦠꦁ ꦱꦧ꧀ꦧꦁ ꦥꦏꦴꦱꦺꦠꦸꦁ ‘‘ꦪ꧀ꦮꦴꦪ’’ꦤ꧀ꦠꦶꦄꦴꦢꦶ ꦄꦴꦫꦢ꧀ꦣꦁ. ꦭꦏ꧀ꦑꦟꦱꦩ꧀ꦥꦤ꧀ꦤꦺꦤꦴꦠꦶ ꦥꦸꦫꦶꦱꦭꦏ꧀ꦑꦟꦱꦩ꧀ꦥꦤ꧀ꦤꦺꦤ.

ꦇꦱꦁ ꦲꦱꦶꦠꦁ ‘‘ꦱꦶꦠ’’ꦤ꧀ꦠꦶ ꦮꦸꦕ꧀ꦕꦠꦷꦠꦶ ꦄꦴꦲ ‘‘ꦩꦤ꧀ꦢꦲꦱꦶꦠ’’ꦤ꧀ꦠꦶ. ꦄꦛ꧀ꦜꦶꦱꦔ꧀ꦑꦭꦶꦏꦤ꧀ꦠꦶ ꦤꦪꦶꦢꦁ ꦄꦮꦶꦚ꧀ꦚꦴꦟꦏꦁ ꦄꦛ꧀ꦜꦶꦱꦔ꧀ꦑꦭꦶꦏꦩꦠ꧀ꦠꦁ, ꦄꦡ ꦑꦺꦴ ꦌꦏꦺꦴ ꦥꦺꦠꦺꦴꦠꦶ ꦄꦴꦲ ‘‘ꦥꦺꦠꦭꦺꦴꦏꦺ ꦤꦶꦧ꧀ꦧꦠ꧀ꦠ’’ꦤ꧀ꦠꦶ. ꦌꦠꦺ ꦄꦠ꧀ꦠꦨꦴꦮꦴꦠꦶ ꦥꦺꦠꦠ꧀ꦠꦨꦴꦮꦴ. ꦤ ꦄꦴꦥꦴꦡꦁ ꦄꦴꦒꦕ꧀ꦖꦤ꧀ꦠꦷꦠꦶ ꦢꦺꦮꦠ꧀ꦠꦨꦴꦮꦴ ꦮꦶꦪ ꦤ ꦄꦴꦥꦴꦡꦁ ꦄꦴꦒꦕ꧀ꦖꦤ꧀ꦠꦶ ꦥꦏꦠꦶꦪꦴ. ꦠꦺꦱꦁ ꦥꦤ ꦫꦸꦕꦶꦪꦴ ꦄꦴꦥꦴꦡꦁ ꦄꦴꦒꦕ꧀ꦖꦺꦪ꧀ꦪꦸꦁ ꦩꦤꦸꦱ꧀ꦱꦴꦤꦁ. ꦢꦸꦏ꧀ꦑꦴꦨꦶꦨꦹꦠꦴꦤꦁ ꦄꦤꦴꦡꦨꦴꦮꦢꦱ꧀ꦱꦤꦥꦢꦛ꧀ꦜꦴꦤꦴ ꦏꦫꦸꦟꦴꦠꦶ ꦄꦴꦲ ‘‘ꦏꦴꦫꦸꦚ꧀ꦚꦺ ꦏꦠ꧀ꦠꦧ꧀ꦧꦺ’’ꦠꦶ. ꦄꦠ꧀ꦠꦤꦺꦴ ꦕ ꦱꦩ꧀ꦥꦠ꧀ꦠꦶꦁ ꦧꦸꦢ꧀ꦣꦚꦴꦟꦱ꧀ꦱ ꦕ ꦱꦩ꧀ꦥꦠ꧀ꦠꦶꦤ꧀ꦠꦶ ꦥꦕ꧀ꦕꦺꦏꦁ ꦱꦩ꧀ꦥꦠ꧀ꦠꦶꦱꦢ꧀ꦢꦺꦴ ꦪꦺꦴꦗꦺꦠꦧ꧀ꦧꦺꦴ. ꦠꦢꦸꦨꦪꦁ ꦮꦶꦨꦴꦮꦺꦠꦸꦁ ‘‘ꦠꦁ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦄꦠ꧀ꦠꦤꦺꦴ ꦱꦩ꧀ꦥꦠ꧀ꦠꦶꦁ ꦄꦤꦸꦱ꧀ꦱꦫꦶꦠ꧀ꦮꦴ ꦱꦶꦠꦁ ꦥꦴꦠ꧀ꦮꦴꦏꦴꦱꦷꦠꦶ ꦥꦢꦁ ꦄꦴꦤꦺꦠ꧀ꦮꦴ ꦱꦩ꧀ꦧꦤ꧀ꦣꦶꦠꦧ꧀ꦧꦁ. ꦣꦩ꧀ꦩꦣꦴꦠꦹꦠꦶ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ ꦱꦤ꧀ꦣꦴꦪ ꦮꦢꦠꦶ. ꦣꦩ꧀ꦩꦣꦴꦠꦹꦠꦶ ꦮꦴ ꦣꦩ꧀ꦩꦴꦤꦁ ꦱꦨꦴꦮꦺꦴ.

ꦆꦠꦫꦺꦴꦠꦶ ꦭꦏ꧀ꦑꦟꦠ꧀ꦡꦺꦫꦺꦴ. ꦈꦥꦥꦠ꧀ꦠꦷꦠꦶ ꦗꦴꦠꦶ. ꦈꦥꦥꦠ꧀ꦠꦶꦱꦷꦱꦺꦤ ꦲꦶ ꦠꦡꦴꦫꦹꦥꦁ ꦄꦠ꧀ꦠꦨꦴꦮꦁ ꦮꦢꦠꦶ. ꦭꦺꦴꦲꦠꦸꦟ꧀ꦝꦏꦺꦲꦷꦠꦶ ꦭꦺꦴꦲꦩꦪꦺꦲꦺꦮ ꦠꦸꦟ꧀ꦝꦏꦺꦲꦶ. ꦕꦫꦤ꧀ꦠꦷꦠꦶ ꦄꦴꦏꦴꦱꦺꦤ ꦒꦕ꧀ꦖꦤ꧀ꦠꦶ. ꦄꦕ꧀ꦖꦫꦶꦪꦁ ꦮꦠꦴꦠꦶ ꦒꦫꦲꦕ꧀ꦖꦫꦶꦪꦁ ꦤꦴꦩꦺꦠꦁ. ꦕꦏ꧀ꦑꦸꦨꦹꦠꦴꦠꦶ ꦱꦩ꧀ꦥꦠ꧀ꦠꦢꦶꦧ꧀ꦧꦕꦏ꧀ꦑꦸꦏꦴ, ꦭꦺꦴꦏꦱ꧀ꦱ ꦕꦏ꧀ꦑꦸꦨꦹꦠꦴꦠꦶ ꦌꦮꦁ ꦮꦴ ꦌꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ.

ꦪꦠ꧀ꦫꦴꦠꦶ ꦲꦺꦠꦸꦄꦠ꧀ꦡꦺ ꦤꦶꦥꦴꦠꦺꦴꦠꦶ ꦄꦴꦲ ‘‘ꦪꦠ꧀ꦫꦴꦠꦶ ꦏꦴꦫꦟꦮꦕꦤ’’ꦤ꧀ꦠꦶ. ꦄꦚ꧀ꦚꦠ꧀ꦫ ꦲꦶ ‘‘ꦪꦠ꧀ꦫ ꦲꦶ ꦤꦴꦩꦴ’’ꦠꦶ ꦄꦠ꧀ꦡꦺꦴ ꦮꦸꦕ꧀ꦕꦠꦶ. ꦄꦥ꧀ꦥꦩꦴꦟꦺ ꦱꦠ꧀ꦠꦤꦶꦏꦴꦪꦺ ꦠꦺ ꦕ ꦑꦺꦴ ꦮꦶꦨꦴꦒꦺꦤ ꦏꦴꦩꦨꦮꦴꦢꦶꦨꦺꦢꦺ ꦨꦮꦺ, ꦤꦶꦫꦪꦴꦢꦶꦨꦺꦢꦴ ꦒꦠꦶꦪꦺꦴ, ꦤꦴꦤꦠ꧀ꦠꦏꦴꦪꦤꦴꦤꦠ꧀ꦠꦱꦚ꧀ꦚꦶꦄꦴꦢꦶꦮꦶꦚ꧀ꦚꦴꦟꦛ꧀ꦜꦶꦠꦶꦪꦺꦴ, ꦠꦡꦴꦫꦹꦥꦺ ꦱꦠ꧀ꦠꦴꦮꦴꦱꦺ ꦕ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦚ꧀ꦕ ꦩꦺ ꦈꦥꦤꦺꦠꦸꦁ ꦥꦕ꧀ꦕꦏ꧀ꦑꦁ ꦏꦫꦺꦴꦤ꧀ꦠꦺꦤ.

ꦒꦺꦴꦓꦴꦠꦏꦺꦴꦠꦶ ꦒꦸꦤ꧀ꦤꦁ ꦄꦨꦶꦟ꧀ꦲꦁ ꦲꦤꦤꦏꦺꦴ. ꦠꦺꦤꦴꦲ ‘‘ꦮꦣꦶꦠ꧀ꦮꦴ ꦮꦣꦶꦠ꧀ꦮꦴ’’ꦠꦶ. ꦠꦱ꧀ꦱꦴꦠꦶ ꦒꦸꦤ꧀ꦤꦁ ꦮꦣꦏꦏꦩ꧀ꦩꦱ꧀ꦱ. ꦄꦥꦫꦴꦥꦫꦶꦪꦏꦩ꧀ꦩꦱ꧀ꦱꦴꦠꦶ ꦄꦥꦫꦴꦥꦫꦶꦪꦮꦺꦢꦤꦷꦪꦏꦩ꧀ꦩꦱ꧀ꦱ. ꦧꦭꦮꦠꦴ ꦒꦺꦴꦓꦴꦠꦏꦏꦩ꧀ꦩꦺꦤ ꦮꦶꦥꦴꦏꦺ ꦢꦷꦪꦩꦴꦤꦺ ꦄꦭꦢ꧀ꦣꦺꦴꦏꦴꦱꦁ ꦄꦥꦫꦴꦥꦫꦶꦪꦮꦺꦢꦤꦷꦪꦁ ꦠꦱ꧀ꦩꦶꦁ ꦮꦶꦥꦏ꧀ꦏꦮꦶꦥꦴꦏꦺ ꦆꦢꦴꦤꦶ ꦭꦢ꧀ꦣꦺꦴꦏꦴꦱꦁ ‘‘ꦄꦮꦱꦺꦱꦏꦩ꧀ꦩ’’ꦤ꧀ꦠꦶ ꦮꦸꦠ꧀ꦠꦁ. ꦥꦛꦶꦱꦤ꧀ꦣꦷꦠꦶ ꦥꦴꦥꦏꦩ꧀ꦩꦗꦤꦶꦠꦴ ꦥꦛꦶꦱꦤ꧀ꦣꦶ. ꦏꦩ꧀ꦩꦱꦨꦴꦒꦠꦴꦪꦴꦠꦶ ꦏꦩ꧀ꦩꦱꦢꦶꦱꦨꦴꦮꦺꦤ. ꦄꦴꦫꦩ꧀ꦩꦟꦱꦨꦴꦒꦠꦴꦪꦴꦠꦶ ꦄꦴꦫꦩ꧀ꦩꦟꦱ꧀ꦱ ꦱꦨꦴꦒꦨꦴꦮꦺꦤ ꦱꦢꦶꦱꦨꦴꦮꦺꦤ. ꦪꦴꦢꦶꦱꦺ ꦲꦶ ꦄꦴꦫꦩ꧀ꦩꦟꦺ ꦥꦸꦧ꧀ꦧꦺ ꦠꦁ ꦏꦩ꧀ꦩꦁ ꦠꦱ꧀ꦱ ꦕ ꦮꦶꦥꦴꦏꦺꦴ ꦥꦮꦠ꧀ꦠꦺꦴ, ꦠꦴꦢꦶꦱꦺꦪꦺꦮ ꦄꦴꦫꦩ꧀ꦩꦟꦺ ꦆꦢꦁ ꦏꦩ꧀ꦩꦁ ꦆꦩꦱ꧀ꦱ ꦮꦶꦥꦴꦏꦺꦴ ꦕ ꦥꦮꦠ꧀ꦠꦺꦴꦠꦶ ꦏꦠ꧀ꦮꦴ ꦮꦸꦠ꧀ꦠꦁ ‘‘ꦠꦱ꧀ꦱꦺꦮ ꦏꦩ꧀ꦩꦱ꧀ꦱ ꦮꦶꦥꦴꦏꦴꦮꦱꦺꦱꦺꦤꦴ’’ꦠꦶ. ꦨꦮꦠꦶ ꦲꦶ ꦠꦁꦱꦢꦶꦱꦺꦥꦶ ꦠꦧ꧀ꦧꦺꦴꦲꦴꦫꦺꦴ ꦪꦡꦴ ‘‘ꦱꦺꦴ ꦌꦮ ꦠꦶꦠ꧀ꦠꦶꦫꦺꦴ, ꦠꦴꦤꦶꦪꦺꦮ ꦎꦱꦣꦴꦤꦷ’’ꦠꦶ. ꦤꦶꦩꦶꦠ꧀ꦠꦁ ꦄꦲꦺꦴꦱꦷꦠꦶ ꦥꦸꦧ꧀ꦧꦺ ꦏꦠꦹꦥꦕꦶꦠꦱ꧀ꦱ ꦥꦺꦠꦹꦥꦥꦠ꧀ꦠꦶꦤꦶꦧ꧀ꦧꦠ꧀ꦠꦤꦮꦱꦺꦤ ꦏꦠꦺꦴꦏꦴꦱꦱ꧀ꦱ ꦠꦱ꧀ꦱ ꦏꦩ꧀ꦩꦱ꧀ꦱ ꦤꦶꦩꦶꦠ꧀ꦠꦨꦹꦠꦁ ꦆꦢꦴꦤꦶ ꦠꦡꦴ ꦈꦥꦛ꧀ꦜꦲꦤ꧀ꦠꦁ ꦠꦱ꧀ꦱ ꦮꦶꦥꦴꦏꦱ꧀ꦱ ꦤꦶꦩꦶꦠ꧀ꦠꦁ ꦄꦴꦫꦩ꧀ꦩꦟꦁ ꦄꦲꦺꦴꦱꦶ. ꦱꦺꦴꦠꦶ ꦒꦺꦴꦓꦴꦠꦏꦺꦴ. ꦄꦛ꧀ꦜꦶꦱꦔ꧀ꦑꦭꦶꦏꦥꦺꦠꦺꦴ ꦗꦴꦠꦺꦴ ꦏꦩ꧀ꦩꦱꦫꦶꦏ꧀ꦑꦏꦮꦶꦥꦴꦏꦠꦴꦮꦱꦺꦤ.

ꦄꦛ꧀ꦜꦶꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧒. ꦥꦺꦱꦶꦱꦸꦠ꧀ꦠꦮꦟ꧀ꦟꦤꦴ

꧒꧐꧓. ꦒꦺꦴꦩꦁꦱꦥꦺꦱꦶꦪꦺꦴ ꦏꦠ꧀ꦮꦴꦠꦶ ꦒꦴꦮꦶꦁ ꦮꦣꦶꦠ꧀ꦮꦴ ꦮꦣꦶꦠ꧀ꦮꦴ ꦒꦺꦴꦩꦁꦱꦁ ꦦꦴꦭꦺꦠ꧀ꦮꦴ ꦥꦺꦱꦶꦪꦺꦴ ꦏꦠ꧀ꦮꦴ. ꦱꦸꦏ꧀ꦑꦴꦥꦺꦠ꧀ꦮꦴꦠꦶ ꦏꦴꦭꦤ꧀ꦠꦫꦁ ꦜꦥꦤꦠ꧀ꦡꦁ ꦱꦸꦏ꧀ꦑꦴꦥꦺꦠ꧀ꦮꦴ. ꦱꦸꦏ꧀ꦑꦴꦥꦶꦪꦩꦴꦤꦴꦤꦁ ꦩꦁꦱꦥꦺꦱꦷꦤꦚ꧀ꦲꦶ ꦮꦭ꧀ꦭꦹꦫꦱꦩꦚ꧀ꦚꦴ.

ꦥꦺꦱꦶꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧓. ꦥꦶꦟ꧀ꦝꦱꦸꦠ꧀ꦠꦮꦟ꧀ꦟꦤꦴ

꧒꧐꧔. ꦤꦶꦥ꧀ꦥꦏ꧀ꦑꦕꦩ꧀ꦩꦺꦠꦶ ꦮꦶꦒꦠꦥꦏ꧀ꦑꦕꦩ꧀ꦩꦺ.

꧔. ꦤꦶꦕ꧀ꦖꦮꦶꦱꦸꦠ꧀ꦠꦮꦟ꧀ꦟꦤꦴ

꧒꧐꧕. ꦈꦫꦧ꧀ꦨꦺ ꦲꦤꦠꦷꦠꦶ ꦎꦫꦧ꧀ꦨꦶꦏꦺꦴ. ꦌꦭ꦳ꦏꦺꦠꦶ ꦄꦗꦺ.

꧕. ꦄꦱꦶꦭꦺꦴꦩꦱꦸꦠ꧀ꦠꦮꦟ꧀ꦟꦤꦴ

꧒꧐꧖. ꦤꦶꦮꦴꦥꦥꦸꦛ꧀ꦜꦺꦠꦶ ꦄꦠ꧀ꦠꦤꦴ ꦢꦶꦤ꧀ꦤꦤꦶꦮꦴꦥꦺꦤ ꦥꦺꦴꦱꦶꦠꦺ. ꦄꦱꦶꦤꦴ ꦮꦣꦶꦠ꧀ꦮꦴ ꦮꦣꦶꦠ꧀ꦮꦴ ꦮꦶꦏ꧀ꦏꦶꦟꦤ꧀ꦠꦺꦴ.

꧖. ꦱꦠ꧀ꦠꦶꦱꦸꦠ꧀ꦠꦮꦟ꧀ꦟꦤꦴ

꧒꧐꧗. ꦌꦏꦁ ꦩꦶꦒꦤ꧀ꦠꦶ ꦌꦏꦁ ꦢꦷꦥꦏꦩꦶꦒꦁ.

꧗. ꦈꦱꦸꦭꦺꦴꦩꦱꦸꦠ꧀ꦠꦮꦟ꧀ꦟꦤꦴ

꧒꧐꧘. ꦏꦴꦫꦟꦴꦲꦷꦠꦶ ꦪꦴꦠꦤꦴꦲꦶ. ꦚꦠ꧀ꦮꦴꦠꦶ ꦏꦩ꧀ꦩꦛ꧀ꦜꦴꦤꦁ ꦚꦠ꧀ꦮꦴ.

꧘. ꦱꦹꦕꦶꦭꦺꦴꦩꦱꦸꦠ꧀ꦠꦮꦟ꧀ꦟꦤꦴ

꧒꧐꧙. ꦱꦸꦟꦺꦴꦠꦶ ꦥꦹꦫꦺꦠꦷꦠꦶ ꦱꦹꦠꦺꦴ, ꦄꦱ꧀ꦱꦢꦩꦏꦴꦢꦶꦏꦺꦴ.

꧙. ꦢꦸꦠꦶꦪꦱꦹꦕꦶꦭꦺꦴꦩꦱꦸꦠ꧀ꦠꦮꦟ꧀ꦟꦤꦴ

꧒꧑꧐. ꦥꦺꦱꦸꦚ꧀ꦚꦹꦥꦱꦁꦲꦴꦫꦮꦱꦺꦤ ꦆꦠꦺꦴ ꦱꦸꦠꦁ ꦄꦩꦸꦠ꧀ꦫ, ꦄꦩꦸꦠ꧀ꦫ ꦮꦴ ꦱꦸꦠꦁ ꦆꦣ ꦱꦹꦕꦺꦠꦷꦠꦶ ꦱꦹꦕꦏꦺꦴ. ꦄꦤꦪꦧ꧀ꦪꦱꦤꦁ ꦥꦴꦥꦺꦱꦶ ꦩꦤꦸꦱ꧀ꦱꦺꦠꦶ ꦱꦩ꧀ꦧꦤ꧀ꦣꦺꦴ.

꧑꧐. ꦏꦸꦩ꧀ꦨꦟ꧀ꦝꦱꦸꦠ꧀ꦠꦮꦟ꧀ꦟꦤꦴ

꧒꧑꧑. ꦮꦶꦤꦶꦕ꧀ꦖꦪꦴꦩꦕ꧀ꦕꦺꦴꦠꦶ ꦫꦚ꧀ꦚꦴ ꦄꦝ꧀ꦝꦏꦫꦟꦺ ꦜꦥꦶꦠꦺꦴ ꦮꦶꦤꦶꦕ꧀ꦖꦪꦩꦲꦴꦩꦠ꧀ꦠꦺꦴ. ꦱꦺꦴ ꦲꦶ ꦒꦴꦩꦗꦤꦏꦴꦪꦁ ꦏꦹꦛꦺꦠꦶ ꦮꦚ꧀ꦕꦺꦠꦷꦠꦶ ꦒꦴꦩꦏꦹꦛꦏꦺꦴꦠꦶ ꦮꦸꦕ꧀ꦕꦠꦶ. ꦏꦺꦕꦶ ‘‘ꦠꦴꦢꦶꦱꦺꦴ ꦌꦮ ꦒꦴꦩꦗꦺꦛ꧀ꦜꦏꦺꦴ ꦒꦴꦩꦏꦹꦛꦏꦺꦴ’’ꦠꦶ ꦮꦢꦤ꧀ꦠꦶ. ꦱꦩꦺꦤ ꦨꦮꦶꦠꦧ꧀ꦧꦁ, ‘‘ꦣꦩ꧀ꦩꦛ꧀ꦜꦺꦴ’’ꦠꦶ ꦮꦠ꧀ꦠꦧ꧀ꦧꦠꦺꦴ. ꦫꦲꦱ꧀ꦱꦔ꧀ꦒꦺ ꦤꦶꦱꦷꦢꦤꦮꦱꦺꦤ ꦮꦶꦱꦩꦴ ꦤꦶꦱꦗ꧀ꦗꦴꦮ ꦄꦲꦺꦴꦱꦶ.

ꦏꦸꦩ꧀ꦨꦟ꧀ꦝꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦥꦜꦩꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.