꧒. ꦄꦤꦺꦴꦠ꧀ꦠꦥ꧀ꦥꦷꦱꦸꦠ꧀ꦠꦮꦟ꧀ꦟꦤꦴ

꧑꧔꧕. ꦠꦺꦤ ꦫꦲꦶꦠꦺꦴꦠꦶ ꦠꦺꦤ ꦱꦩ꧀ꦩꦴꦮꦴꦪꦴꦩꦺꦤ ꦫꦲꦶꦠꦺꦴ. ꦤꦶꦧ꧀ꦨꦪꦺꦴꦠꦶ ꦨꦪꦫꦲꦶꦠꦺꦴ. ꦏꦸꦱꦭꦴꦤꦸꦥ꧀ꦥꦴꦢꦤꦩ꧀ꦥꦶ ꦲꦶ ꦱꦴꦮꦗ꧀ꦗꦩꦺꦮ ꦄꦚ꧀ꦚꦴꦟꦴꦭꦱꦶꦪꦲꦺꦠꦸꦏꦠ꧀ꦠꦴ. ꦱꦩ꧀ꦧꦸꦗ꧀ꦙꦤꦠ꧀ꦡꦴꦪꦴꦠꦶ ꦄꦫꦶꦪꦩꦒ꧀ꦒꦺꦲꦶ ꦱꦩ꧀ꦧꦸꦗ꧀ꦙꦤꦴꦪ. ꦪꦺꦴꦒꦺꦲꦶ ꦑꦺꦩꦁ ꦠꦺꦲꦶ ꦄꦤꦸꦥꦢ꧀ꦢꦸꦠꦠ꧀ꦠꦴ.

ꦩꦤꦸꦚ꧀ꦚꦮꦠ꧀ꦡꦸꦤ꧀ꦠꦶ ꦩꦤꦺꦴꦫꦩꦁ ꦭꦺꦴꦨꦸꦥ꧀ꦥꦠ꧀ꦠꦶꦏꦴꦫꦟꦁ. ꦪꦡꦴ ꦮꦴ ꦠꦡꦴ ꦮꦴꦠꦶ ꦱꦸꦨꦱꦸꦑꦴꦢꦶꦮꦱꦺꦤ. ꦠꦺꦠꦶ ꦭꦺꦴꦨꦴꦢꦪꦺꦴ. ꦄꦤꦸꦥ꧀ꦥꦤ꧀ꦤꦴꦠꦶ ꦮꦺꦢꦶꦠꦧ꧀ꦧꦴ ꦠꦡꦴꦫꦹꦥꦺ ꦮꦠ꧀ꦡꦴꦫꦩ꧀ꦩꦟꦺ ꦠꦡꦴ ꦄꦤꦸꦥ꧀ꦥꦤ꧀ꦤꦥꦸꦧ꧀ꦧꦠ꧀ꦠꦴ. ꦄꦚ꧀ꦚꦡꦴꦠꦶ ꦮꦸꦠ꧀ꦠꦤꦪꦺꦤꦺꦮ ꦮꦠ꧀ꦡꦴꦫꦩ꧀ꦩꦟꦺꦲꦶ ꦄꦪꦺꦴꦗꦺꦠ꧀ꦮꦴ ꦒꦪ꧀ꦲꦩꦴꦤꦺ. ꦮꦠ꧀ꦡꦸꦩ꧀ꦲꦷꦠꦶ ꦈꦥꦛ꧀ꦜꦴꦏꦴꦢꦶꦕꦷꦮꦫꦴꦢꦶꦮꦠ꧀ꦡꦸꦩ꧀ꦲꦶ. ꦄꦴꦫꦩ꧀ꦩꦟꦺꦠꦶ ꦩꦤꦴꦥꦶꦪꦴꦢꦶꦨꦺꦢꦺ ꦄꦴꦫꦩ꧀ꦩꦟꦺ. ꦠꦴꦢꦶꦱꦺꦤ ꦥꦕ꧀ꦕꦪꦺꦤꦴꦠꦶ ꦄꦪꦺꦴꦤꦶꦱꦺꦴꦩꦤꦱꦶꦏꦴꦫꦱꦠꦶꦮꦺꦴꦱ꧀ꦱꦒ꧀ꦒꦴꦢꦶꦥꦕ꧀ꦕꦪꦺꦤ. ꦆꦩꦺꦠꦶ ꦮꦸꦠ꧀ꦠꦤꦪꦺꦤ ꦥꦕ꧀ꦕꦪꦭꦴꦨꦺꦤ ꦥꦕ꧀ꦖꦴ ꦈꦥ꧀ꦥꦗ꧀ꦗꦩꦴꦤꦴ ꦥꦴꦭ꦳ꦶꦪꦁ ꦠꦡꦴ ꦮꦸꦠ꧀ꦠꦴꦠꦶ ꦢꦛ꧀ꦜꦧ꧀ꦧꦁ. ꦌꦮꦁ ꦈꦥ꧀ꦥꦗ꧀ꦗꦩꦴꦤꦠꦴꦪ ꦤꦥ꧀ꦥꦲꦷꦪꦤ꧀ꦠꦶ ꦤꦴꦩ. ꦄꦤꦸꦥ꧀ꦥꦴꦢꦺꦴ ꦲꦶ ꦥꦫꦩꦠ꧀ꦡꦠꦺꦴ ꦥꦲꦴꦤꦁ ꦏꦡꦶꦠꦁ, ꦠꦱ꧀ꦩꦴ ꦠꦠ꧀ꦡ ꦏꦡꦶꦠꦤꦪꦺꦤꦺꦮ ꦒꦲꦺꦠꦧ꧀ꦧꦤ꧀ꦠꦶ ꦄꦣꦶꦥ꧀ꦥꦴꦪꦺꦴ.

ꦄꦥ꧀ꦥꦛꦶꦭꦢ꧀ꦣꦴꦠꦶ ꦄꦤꦸꦥ꧀ꦥꦠ꧀ꦠꦶꦪꦴ. ꦠꦺꦠꦶ ꦪꦡꦴꦮꦸꦠ꧀ꦠꦱꦷꦭꦴꦢꦶꦄꦤꦮꦗ꧀ꦗꦣꦩ꧀ꦩꦴ. ꦥꦛꦶꦭꦢ꧀ꦣꦴꦠꦶ ꦄꦣꦶꦒꦠꦴ. ‘‘ꦱꦷꦭꦴꦢꦶꦣꦩ꧀ꦩꦴ’’ꦠꦶ ꦌꦠ꧀ꦡ ꦪꦢꦶ ꦩꦒ꧀ꦒꦦꦭꦴꦤꦶꦥꦶ ꦒꦲꦶꦠꦴꦤꦶ, ꦄꦡ ꦏꦱ꧀ꦩꦴ ‘‘ꦥꦫꦶꦲꦴꦤꦶꦮꦱꦺꦤꦴ’’ꦠꦶ ꦮꦸꦠ꧀ꦠꦤ꧀ꦠꦶ ꦄꦴꦲ ‘‘ꦌꦠ꧀ꦡ ꦕꦴ’’ꦠꦶꦄꦴꦢꦶ. ꦆꦩꦱ꧀ꦱ ꦥꦤ ꦱꦩ꧀ꦩꦥ꧀ꦥꦣꦴꦤꦱ꧀ꦱꦴꦠꦶ ꦕꦠꦸꦠ꧀ꦡꦱ꧀ꦱ ꦱꦩ꧀ꦩꦥ꧀ꦥꦣꦴꦤꦱ꧀ꦱ ꦮꦱꦺꦤ. ꦄꦪꦁ ꦢꦺꦱꦤꦴꦠꦶ ‘‘ꦈꦥ꧀ꦥꦤ꧀ꦤꦴ ꦩꦺ ꦏꦸꦱꦭꦴ ꦣꦩ꧀ꦩꦴ ꦤꦶꦫꦸꦗ꧀ꦙꦩꦴꦤꦴ ꦄꦤꦠ꧀ꦡꦴꦪ ꦱꦁꦮꦠ꧀ꦠꦺꦪ꧀ꦪꦸ’’ꦤ꧀ꦠꦶ ꦄꦪꦁ ꦢꦺꦱꦤꦴ ꦏꦠꦴ. ꦢꦸꦠꦶꦪꦩꦒ꧀ꦒꦺꦴ ꦮꦴ…ꦥꦺ… ꦱꦁꦮꦠ꧀ꦠꦺꦪ꧀ꦪꦴꦠꦶ ꦆꦢꦁ ꦄꦴꦪꦠꦶꦁ ꦱꦠ꧀ꦠꦱꦸ ꦄꦠ꧀ꦠꦨꦴꦮꦺꦱꦸ ꦈꦥ꧀ꦥꦗ꧀ꦗꦩꦴꦤꦢꦸꦏ꧀ꦑꦱꦔ꧀ꦑꦴꦠꦄꦤꦠ꧀ꦡꦸꦥ꧀ꦥꦠ꧀ꦠꦶꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ‘‘ꦄꦴꦠꦴꦥꦷ ꦎꦠ꧀ꦠꦥ꧀ꦥꦷ ꦨꦧ꧀ꦧꦺꦴ ꦱꦩ꧀ꦧꦺꦴꦣꦴꦪꦴ’’ꦠꦶꦄꦴꦢꦶꦮꦕꦤꦠꦺꦴ ‘‘ꦆꦩꦺ ꦕꦠ꧀ꦠꦴꦫꦺꦴ ꦱꦩ꧀ꦩꦥ꧀ꦥꦣꦴꦤꦴ ꦥꦸꦧ꧀ꦧꦨꦴꦒꦮꦶꦥꦱ꧀ꦱꦤꦴꦮꦱꦺꦤ ꦏꦡꦶꦠꦴ’’ꦠꦶ ꦮꦸꦠ꧀ꦠꦁ.

ꦄꦤꦺꦴꦠ꧀ꦠꦥ꧀ꦥꦷꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.