꧓. ꦥꦸꦠ꧀ꦠꦩꦁꦱꦹꦥꦩꦱꦸꦠ꧀ꦠꦮꦟ꧀ꦟꦤꦴ

꧖꧓. ꦮꦸꦠ꧀ꦠꦤꦪꦩꦺꦮꦴꦠꦶ ꦲꦺꦛ꧀ꦜꦴ ꦄꦴꦲꦴꦫꦮꦒ꧀ꦒꦱ꧀ꦱ ꦥꦜꦩꦱꦸꦠ꧀ꦠꦺ ꦮꦸꦠ꧀ꦠꦤꦪꦩꦺꦮ. ꦭꦴꦨꦱꦏ꧀ꦏꦴꦫꦺꦤꦴꦠꦶ ꦭꦴꦨꦱꦏ꧀ꦏꦴꦫꦱꦔ꧀ꦑꦴꦠꦴꦪ ꦄꦛ꧀ꦜꦸꦥ꧀ꦥꦠ꧀ꦠꦶꦪꦴꦠꦶ ꦏꦺꦕꦶ. ꦭꦴꦨꦱꦏ꧀ꦏꦴꦫꦺ ꦮꦴ ꦄꦛ꧀ꦜꦸꦥ꧀ꦥꦠ꧀ꦠꦶꦪꦴꦠꦶ ꦄꦥꦫꦺ. ꦪꦺꦴ ꦲꦶ ꦭꦴꦨꦱꦏ꧀ꦏꦴꦫꦤꦶꦩꦶꦠ꧀ꦠꦁ ꦥꦕ꧀ꦕꦪꦺꦱꦸ ꦒꦺꦣꦺꦤ ꦨꦶꦏ꧀ꦑꦹꦤꦁ ꦄꦥꦕ꧀ꦕꦮꦺꦏ꧀ꦑꦶꦠꦥꦫꦶꦨꦺꦴꦒꦺꦴ ꦗꦴꦠꦺꦴ, ꦠꦁ ꦄꦛ꧀ꦜꦸꦥ꧀ꦥꦠ꧀ꦠꦶꦁ ꦏꦠ꧀ꦮꦴ ꦨꦒꦮꦴ ꦆꦩꦁ ꦢꦺꦱꦤꦁ ꦤꦶꦏ꧀ꦑꦶꦥꦶ. ꦪꦩꦏꦩꦲꦴꦩꦺꦓꦺꦴꦠꦶ ꦲꦺꦛ꧀ꦜꦴ ꦎꦭꦩ꧀ꦧꦤꦈꦥꦫꦶꦈꦒ꧀ꦒꦩꦤꦮꦱꦺꦤ ꦱꦠꦥꦛꦭꦱꦲꦱ꧀ꦱꦥꦛꦭꦺꦴ ꦪꦸꦒꦭ꦳ꦩꦲꦴꦩꦺꦓꦺꦴ.

ꦠꦶꦛ꧀ꦜꦤ꧀ꦠꦶ ꦕꦺꦮ ꦨꦒꦮꦠꦶ ꦏꦠ꧀ꦡꦕꦶ ꦤꦶꦧꦢ꧀ꦣꦮꦴꦱꦁ ꦮꦱꦤ꧀ꦠꦺ, ꦕꦴꦫꦶꦏꦩ꧀ꦥꦶ ꦒꦕ꧀ꦖꦤ꧀ꦠꦺ ꦄꦤꦸꦧꦤ꧀ꦣꦤ꧀ꦠꦶ ꦕ. ꦨꦶꦏ꧀ꦑꦹꦤꦩ꧀ꦥꦶ ꦪꦺꦨꦸꦪ꧀ꦪꦺꦤ ꦏꦥ꧀ꦥꦱꦠꦱꦲꦱ꧀ꦱꦁ ꦠꦠꦺꦴ ꦨꦶꦪ꧀ꦪꦺꦴꦥꦶ ꦥꦹꦫꦶꦠꦢꦴꦤꦥꦴꦫꦩꦶꦱꦚ꧀ꦕꦪꦠ꧀ꦠꦴ ꦠꦢꦴ ꦩꦲꦴꦭꦴꦨꦱꦏ꧀ꦏꦴꦫꦺꦴ ꦈꦥ꧀ꦥꦗ꧀ꦗꦠꦷꦠꦶ ꦮꦸꦠ꧀ꦠꦁ ‘‘ꦌꦮꦁ ꦨꦶꦏ꧀ꦑꦸꦱꦔ꧀ꦓꦱ꧀ꦱꦥꦷ’’ꦠꦶ. ꦱꦏ꧀ꦏꦠꦺꦴꦠꦶ ꦱꦏ꧀ꦏꦴꦫꦥ꧀ꦥꦠ꧀ꦠꦺꦴ. ꦒꦫꦸꦏꦠꦺꦴꦠꦶ ꦒꦫꦸꦏꦴꦫꦥ꧀ꦥꦠ꧀ꦠꦺꦴ. ꦩꦴꦤꦶꦠꦺꦴꦠꦶ ꦧꦲꦸꦩꦠꦺꦴ ꦩꦤꦱꦴ ꦥꦶꦪꦴꦪꦶꦠꦺꦴ ꦕ. ꦥꦹꦗꦶꦠꦺꦴꦠꦶ ꦩꦴꦭꦴꦢꦶꦥꦹꦗꦴꦪ ꦕꦺꦮ ꦕꦠꦸꦥꦕ꧀ꦕꦪꦴꦨꦶꦥꦹꦗꦴꦪ ꦕ ꦥꦹꦗꦶꦠꦺꦴ. ꦄꦥꦕꦶꦠꦺꦴꦠꦶ ꦄꦥꦕꦴꦪꦤꦥ꧀ꦥꦠ꧀ꦠꦺꦴ. ꦪꦱ꧀ꦱ ꦲꦶ ꦕꦠ꧀ꦠꦴꦫꦺꦴ ꦥꦕ꧀ꦕꦪꦺ ꦱꦏ꧀ꦏꦠ꧀ꦮꦴ ꦱꦸꦄꦨꦶꦱꦔ꧀ꦑꦠꦺ ꦥꦟꦷꦠꦥꦟꦷꦠꦺ ꦈꦥꦤꦺꦤ꧀ꦠꦶ, ꦱꦺꦴ ꦱꦏ꧀ꦏꦠꦺꦴ. ꦪꦱ꧀ꦩꦶꦁ ꦒꦫꦸꦨꦴꦮꦁ ꦥꦕ꧀ꦕꦸꦥꦛ꧀ꦜꦥꦺꦠ꧀ꦮꦴ ꦢꦺꦤ꧀ꦠꦶ, ꦱꦺꦴ ꦒꦫꦸꦏꦠꦺꦴ. ꦪꦁ ꦩꦤꦱꦴ ꦥꦶꦪꦴꦪꦤ꧀ꦠꦶ ꦧꦲꦸꦩꦚ꧀ꦚꦤ꧀ꦠꦶ, ꦱꦺꦴ ꦧꦲꦸꦩꦠꦺꦴ. ꦪꦱ꧀ꦱ ꦱꦧ꧀ꦧꦩꦺꦠꦁ ꦥꦹꦗꦴꦮꦱꦺꦤ ꦏꦫꦺꦴꦤ꧀ꦠꦶ, ꦱꦺꦴ ꦥꦹꦗꦶꦠꦺꦴ. ꦪꦱ꧀ꦱ ꦄꦨꦶꦮꦴꦢꦤꦥꦕ꧀ꦕꦸꦛ꧀ꦜꦴꦤꦚ꧀ꦗꦭꦶꦏꦩ꧀ꦩꦴꦢꦶꦮꦱꦺꦤ ꦥꦫꦩꦤꦶꦥꦕ꧀ꦕꦏꦴꦫꦁ ꦏꦫꦺꦴꦤ꧀ꦠꦶ, ꦱꦺꦴ ꦄꦥꦕꦶꦠꦺꦴ. ꦨꦒꦮꦠꦶ ꦨꦶꦏ꧀ꦑꦸꦱꦔ꧀ꦓꦺ ꦕ ꦭꦺꦴꦏꦺꦴ ꦌꦮꦁ ꦥꦛꦶꦥꦤ꧀ꦤꦺꦴ. ꦠꦺꦤ ꦮꦸꦠ꧀ꦠꦁ ‘‘ꦠꦺꦤ ꦑꦺꦴ ꦥꦤ ꦱꦩꦪꦺꦤ…ꦥꦺ… ꦥꦫꦶꦏ꧀ꦑꦴꦫꦴꦤ’’ꦤ꧀ꦠꦶ (ꦈꦢꦴ. ꧑꧔; ꦱꦁ. ꦤꦶ. ꧒.꧗꧐). ꦭꦴꦨꦒ꧀ꦒꦪꦱꦒ꧀ꦒꦥ꧀ꦥꦠ꧀ꦠꦤ꧀ꦠꦶ ꦭꦴꦨꦱ꧀ꦱ ꦕ ꦪꦱꦱ꧀ꦱ ꦕ ꦄꦒ꧀ꦒꦁ ꦈꦏ꧀ꦏꦁꦱꦁ ꦥꦠ꧀ꦠꦁ.

ꦥꦜꦩꦴꦲꦴꦫꦮꦟ꧀ꦟꦤꦴ

ꦄꦱ꧀ꦱꦴꦠꦶ ꦨꦒꦮꦠꦺꦴ. ꦣꦩ꧀ꦩꦱꦨꦴꦮꦕꦶꦤ꧀ꦠꦴꦮꦱꦺꦤ ꦥꦮꦠ꧀ꦠꦁ ꦱꦲꦺꦴꦠ꧀ꦠꦥ꧀ꦥꦚꦴꦟꦁ ꦣꦩ꧀ꦩꦱꦁꦮꦺꦒꦺꦴ. ꦣꦸꦮꦥꦛꦶꦱꦺꦮꦤꦛ꧀ꦜꦴꦤꦚ꧀ꦲꦺꦠꦁ ꦱꦠ꧀ꦠꦴꦤꦁ, ꦪꦢꦶꦢꦁ ꦄꦴꦲꦴꦫꦥꦫꦶꦨꦺꦴꦒꦺꦴ, ꦠꦱ꧀ꦩꦴ ꦤ ꦠꦠ꧀ꦡ ꦄꦥꦕ꧀ꦕꦮꦺꦏ꧀ꦑꦟꦩꦠ꧀ꦠꦺꦤ ꦥꦴꦫꦴꦗꦶꦏꦁ ꦥꦚ꧀ꦚꦥꦺꦠꦸꦁ ꦱꦏ꧀ꦏꦴꦠꦶ ꦄꦣꦶꦥ꧀ꦥꦴꦪꦺꦴ. ꦄꦴꦲꦴꦫꦴꦠꦶ ‘‘ꦥꦕ꧀ꦕꦪꦴ’’ꦠꦶꦄꦴꦢꦶꦤꦴ ꦥꦸꦧ꧀ꦧꦺ ꦄꦴꦲꦴꦫꦺꦱꦸ ꦮꦸꦠ꧀ꦠꦮꦶꦣꦶꦁ ꦱꦤ꧀ꦣꦴꦪ ꦄꦴꦲ ‘‘ꦄꦴꦲꦴꦫꦴ’’ꦠꦶꦄꦴꦢꦶ. ꦆꦢꦴꦤꦶ ꦠꦠ꧀ꦡ ꦏꦠ꧀ꦠꦧ꧀ꦧꦁ ꦄꦠ꧀ꦡꦮꦟ꧀ꦟꦤꦁ ꦱꦤ꧀ꦣꦴꦪ ‘‘ꦲꦺꦛ꧀ꦜꦴ ꦮꦸꦠ꧀ꦠꦠ꧀ꦡꦩꦺꦮꦴ’’ꦠꦶ ꦮꦸꦠ꧀ꦠꦁ.

ꦄꦴꦢꦷꦤꦮꦤ꧀ꦠꦶ ꦢꦺꦴꦱꦁ. ꦗꦴꦪꦴꦠꦶ ꦨꦫꦶꦪꦴ. ꦥꦠꦷꦠꦶ ꦨꦠ꧀ꦠꦴ. ꦄꦥꦺꦏ꧀ꦑꦴꦱꦢ꧀ꦢꦴ ꦕꦺꦠꦺ ꦥꦶꦠꦴꦥꦸꦠ꧀ꦠꦱꦢ꧀ꦢꦴ ꦮꦶꦪ, ꦥꦴꦭ꦳ꦶꦪꦁ ꦥꦤ ꦄꦴ-ꦏꦴꦫꦱ꧀ꦱ ꦫꦱ꧀ꦱꦠ꧀ꦠꦁ ꦱꦴꦤꦸꦤꦴꦱꦶꦏꦚ꧀ꦕ ꦏꦠ꧀ꦮꦴ ꦮꦸꦠ꧀ꦠꦁ ‘‘ꦗꦴꦪꦩ꧀ꦥꦠꦶꦏꦴ’’ꦠꦶ. ꦱꦩ꧀ꦩꦴ ꦦꦭꦁ ꦮꦲꦠꦷꦠꦶ ꦱꦩ꧀ꦧꦭꦁ, ꦱꦸꦑꦴꦮꦲꦤ꧀ꦠꦶ ꦄꦠ꧀ꦡꦺꦴ. ꦠꦡꦴ ꦲꦶ ꦠꦁ ‘‘ꦥꦡꦺ ꦲꦶꦠꦤ꧀ꦠꦶ ꦥꦴꦡꦺꦪ꧀ꦪ’’ꦤ꧀ꦠꦶ ꦮꦸꦕ꧀ꦕꦠꦶ. ꦩꦒ꧀ꦒꦱ꧀ꦱ ꦏꦤ꧀ꦠꦴꦫꦥꦫꦶꦪꦴꦥꦤ꧀ꦤꦠ꧀ꦠꦴ ꦮꦸꦠ꧀ꦠꦁ ‘‘ꦏꦤ꧀ꦠꦴꦫꦨꦹꦠꦁ ꦩꦒ꧀ꦒ’’ꦤ꧀ꦠꦶ. ꦢꦸꦭ꧀ꦭꦨꦠꦴꦪ ꦠꦁ ꦈꦢꦏꦁ ꦠꦠ꧀ꦡ ꦠꦴꦫꦺꦠꦷꦠꦶ ꦏꦤ꧀ꦠꦴꦫꦁ, ꦤꦶꦫꦸꦢꦏꦁ ꦩꦲꦴꦮꦤꦁ. ꦫꦸꦭ꦳꧀ꦲꦷꦮꦱꦺꦤ ꦆꦠꦫꦩ꧀ꦥꦶ ꦩꦲꦴꦮꦤꦁ ꦠꦡꦴ ꦮꦸꦕ꧀ꦕꦠꦷꦠꦶ ꦄꦴꦲ ‘‘ꦕꦺꦴꦫꦏꦤ꧀ꦠꦴꦫ’’ꦤ꧀ꦠꦶꦄꦴꦢꦶ. ꦥꦫꦫꦴꦗꦹꦤꦁ ꦮꦺꦫꦶꦄꦴꦢꦷꦤꦚ꧀ꦕ ꦮꦱꦺꦤ ꦱꦥ꧀ꦥꦛꦶꦨꦪꦩ꧀ꦥꦶ ꦄꦫꦚ꧀ꦚꦁ ꦌꦠ꧀ꦡꦺꦮ ꦱꦔ꧀ꦒꦲꦁ ꦒꦕ꧀ꦖꦠꦷꦠꦶ ꦮꦸꦠ꧀ꦠꦁ ‘‘ꦥꦚ꧀ꦕꦮꦶꦣ’’ꦤ꧀ꦠꦶ.

ꦓꦤꦓꦤꦛ꧀ꦜꦴꦤꦠꦺꦴꦠꦶ ꦩꦁꦱꦱ꧀ꦱ ꦧꦲꦭꦧꦲꦭꦁ ꦡꦹꦭꦡꦹꦭꦁ ꦲꦸꦠ꧀ꦮꦴ ꦜꦶꦠꦛ꧀ꦜꦴꦤꦠꦺꦴ. ‘‘ꦠꦴꦢꦶꦱꦚ꧀ꦲꦶ ꦩꦁꦱꦁ ꦒꦲꦺꦠ꧀ꦮꦴ ꦱꦸꦏ꧀ꦑꦴꦥꦶꦠꦁ ꦮꦭ꧀ꦭꦹꦫꦁ. ꦱꦹꦭꦺ ꦄꦴꦮꦸꦤꦶꦠ꧀ꦮꦴ ꦥꦏ꧀ꦏꦩꦁꦱꦁ ꦱꦹꦭꦩꦁꦱꦁ. ꦮꦶꦫꦭ꦳ꦕ꧀ꦖꦴꦪꦴꦪꦁ ꦤꦶꦱꦷꦢꦶꦁꦱꦸ ꦒꦤ꧀ꦠꦸꦁ ꦄꦱꦩꦠ꧀ꦡꦺꦴ ꦲꦸꦠ꧀ꦮꦴ. ꦒꦺꦴꦮꦠꦏꦸꦏ꧀ꦏꦸꦫꦮꦠꦢꦺꦮꦠꦴꦪꦴꦕꦤꦴꦢꦷꦲꦷꦠꦶ ꦒꦺꦴꦮꦠꦏꦸꦏ꧀ꦏꦸꦫꦮꦠꦴꦢꦶꦮꦠꦕꦫꦟꦺꦲꦶ ꦕꦺꦮ ꦢꦺꦮꦠꦴꦪꦴꦕꦤꦴꦢꦷꦲꦶ ꦥꦟꦶꦣꦶꦏꦩ꧀ꦩꦺꦲꦶ ꦕ ꦩꦲꦤ꧀ꦠꦁ ꦢꦸꦏ꧀ꦑꦁ ꦄꦤꦸꦨꦹꦠꦁ.

ꦪꦱ꧀ꦩꦴ ꦥꦤ ꦱꦴꦱꦤꦺ ꦱꦩ꧀ꦩꦴꦥꦛꦶꦥꦗ꧀ꦗꦤ꧀ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦄꦴꦲꦴꦫꦥꦫꦶꦨꦺꦴꦒꦱ꧀ꦱ ꦎꦥꦩ꧀ꦩꦨꦴꦮꦺꦤ ꦠꦺꦱꦁ ꦗꦴꦪꦩ꧀ꦥꦠꦶꦏꦴꦤꦁ ꦥꦸꦠ꧀ꦠꦩꦁꦱꦥꦫꦶꦨꦺꦴꦒꦺꦴ ꦆꦣ ꦨꦒꦮꦠꦴ ꦄꦴꦤꦷꦠꦺꦴ, ꦠꦱ꧀ꦩꦴꦱ꧀ꦱ ꦤꦴꦤꦴꦏꦴꦫꦺꦲꦶ ꦎꦥꦩ꧀ꦩꦠ꧀ꦠꦁ ꦮꦶꦨꦴꦮꦺꦠꦸꦁ ‘‘ꦠꦺꦱꦁ ꦱꦺꦴ ꦥꦸꦠ꧀ꦠꦩꦁꦱꦴꦲꦴꦫꦺꦴ’’ꦠꦶꦄꦴꦢꦶ ꦄꦴꦫꦢ꧀ꦣꦁ. ꦠꦠ꧀ꦡ ꦱꦗꦴꦠꦶꦩꦁꦱꦠꦴꦪꦴꦠꦶ ꦱꦩꦴꦤꦗꦴꦠꦶꦏꦩꦁꦱꦨꦴꦮꦺꦤ, ꦩꦤꦸꦱ꧀ꦱꦩꦁꦱꦨꦴꦮꦺꦤꦴꦠꦶ ꦄꦠ꧀ꦡꦺꦴ. ꦩꦱꦸꦱ꧀ꦱꦩꦁꦱꦚ꧀ꦲꦶ ꦏꦸꦭꦥ꧀ꦥꦱꦸꦠꦩꦤꦸꦱ꧀ꦱꦴꦤꦁ ꦄꦩꦤꦸꦚ꧀ꦚꦁ ꦲꦺꦴꦠꦶ ꦄꦥꦫꦶꦕꦶꦠꦨꦴꦮꦠꦺꦴ ꦒꦴꦫꦪ꧀ꦲꦨꦴꦮꦠꦺꦴ ꦕ, ꦠꦠꦺꦴ ꦌꦮ ꦚꦴꦠꦶꦄꦴꦢꦶꦩꦁꦱꦠꦴꦪꦴꦠꦶꦄꦴꦢꦶ ꦮꦸꦠ꧀ꦠꦁ. ꦠꦫꦸꦟꦩꦁꦱꦠꦴꦪꦴꦠꦶꦄꦴꦢꦶ ꦥꦤ ꦱꦨꦴꦮꦠꦺꦴ ꦄꦤꦨꦶꦱꦔ꧀ꦑꦴꦫꦠꦺꦴ ꦕ ꦄꦩꦤꦸꦚ꧀ꦚꦴꦠꦶ ꦏꦠ꧀ꦮꦴ ꦮꦸꦠ꧀ꦠꦁ. ꦄꦣꦹꦥꦶꦠꦠꦴꦪꦴꦠꦶ ꦄꦣꦹꦥꦶꦠꦨꦴꦮꦠꦺꦴ. ꦩꦗ꧀ꦙꦠ꧀ꦠꦨꦴꦮꦺꦪꦺꦮ ꦜꦶꦠꦴ. ꦠꦠꦺꦴ ꦌꦮ ꦤꦶꦕ꧀ꦖꦤ꧀ꦢꦫꦴꦒꦥꦫꦶꦨꦺꦴꦒꦺ ꦜꦶꦠꦴꦠꦶ ꦮꦸꦠ꧀ꦠꦁ ꦏꦤ꧀ꦠꦴꦫꦠꦺꦴ ꦤꦶꦠ꧀ꦡꦫꦟꦗ꧀ꦙꦴꦱꦪꦠꦴꦪ. ꦆꦢꦴꦤꦶ ꦪꦺ ꦕ ꦠꦺ ꦄꦤꦥꦤꦷꦠꦴꦲꦴꦫꦺꦴ, ꦤ ꦪꦴꦮꦢꦠ꧀ꦡꦥꦫꦶꦨꦺꦴꦒꦺꦴ ꦮꦶꦒꦠꦩꦕ꧀ꦖꦺꦫꦩꦭꦠꦴ ꦱꦩ꧀ꦩꦺꦴꦲꦴꦨꦴꦮꦺꦴ ꦄꦴꦪꦠꦶꦁ ꦠꦠ꧀ꦡ ꦥꦠ꧀ꦡꦤꦴꦨꦴꦮꦺꦴ ꦱꦤ꧀ꦤꦶꦣꦶꦏꦴꦫꦴꦨꦴꦮꦺꦴ ꦄꦥꦫꦶꦕ꧀ꦕꦗꦤꦩꦢꦠ꧀ꦡꦴꦨꦴꦮꦺꦴ ꦄꦲꦷꦭ꦳ꦤꦴ ꦄꦮꦶꦮꦴꦢꦥꦫꦶꦨꦺꦴꦒꦺꦴ ꦕꦴꦠꦶ ꦈꦥꦩꦴꦪꦁ ꦭꦧ꧀ꦨꦩꦴꦤꦴ ꦥꦏꦴꦫꦮꦶꦱꦺꦱꦴ, ꦠꦺ ꦠꦡꦴ ꦤꦷꦲꦫꦶꦠ꧀ꦮꦴ ꦈꦥꦩꦺꦪ꧀ꦪꦺ ꦪꦺꦴꦗꦺꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦤ ꦄꦛ꧀ꦜꦶꦤ꧀ꦲꦴꦫꦸꦕꦩ꧀ꦩꦤꦶꦱ꧀ꦱꦶꦠꦛ꧀ꦜꦴꦤꦴꦤꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦁ ꦏꦴꦫꦟꦤ꧀ꦠꦶ ꦠꦁ ꦠꦺꦱꦁ ꦗꦴꦪꦩ꧀ꦥꦠꦷꦤꦁ ꦪꦴꦮꦢꦺꦮ ꦏꦤ꧀ꦠꦴꦫꦤꦶꦠ꧀ꦡꦫꦟꦠ꧀ꦡꦴꦪ ꦥꦸꦠ꧀ꦠꦩꦁꦱꦥꦫꦶꦨꦺꦴꦒꦱꦔ꧀ꦑꦴꦠꦁ ꦏꦴꦫꦟꦁ.

ꦤꦶꦱ꧀ꦱꦤ꧀ꦢꦥꦴꦛꦶꦏꦸꦭ꧀ꦪꦠꦁ ꦥꦕ꧀ꦕꦮꦺꦏ꧀ꦑꦤ꧀ꦠꦺꦴꦥꦶ ꦏꦧꦭ꦳ꦷꦏꦴꦫꦴꦲꦴꦫꦁ ꦥꦫꦶꦮꦷꦩꦁꦱꦠꦶ. ꦪꦡꦴ ꦠꦺ ꦗꦴꦪꦩ꧀ꦥꦠꦶꦏꦴꦠꦶꦄꦴꦢꦶꦥꦶ ꦎꦥꦩ꧀ꦩꦱꦁꦱꦤ꧀ꦢꦤꦁ. ‘‘ꦥꦫꦶꦨꦸꦚ꧀ꦗꦶꦠꦧ꧀ꦧꦺꦴ ꦄꦴꦲꦴꦫꦺꦴ’’ꦠꦶ ꦥꦢꦁ ꦄꦴꦤꦺꦠ꧀ꦮꦴ ꦱꦩ꧀ꦧꦤ꧀ꦣꦶꦠꦧ꧀ꦧꦁ. ꦌꦱ ꦤꦪꦺꦴ ꦆꦠꦺꦴ ꦥꦫꦺꦱꦸꦥꦶ. ꦄꦥꦛꦶꦏ꧀ꦑꦶꦥꦶꦠ꧀ꦮꦴꦠꦶ ꦄꦤꦥꦤꦺꦠ꧀ꦮꦴ. ꦮꦛ꧀ꦛꦏꦺꦤ ꦮꦶꦪ ꦏꦸꦏ꧀ꦏꦸꦛꦺꦤ ꦮꦶꦪ ꦕꦴꦠꦶ ꦮꦶꦱꦢꦶꦱꦹꦢꦴꦲꦫꦟꦁ. ꦎꦣꦶꦁ ꦄꦢꦱ꧀ꦱꦺꦠ꧀ꦮꦴꦠꦶ ꦩꦲꦤ꧀ꦠꦒ꧀ꦒꦲꦟꦮꦱꦺꦤ ꦎꦣꦶꦁ ꦄꦏꦠ꧀ꦮꦴ. ꦱꦷꦲꦺꦤ ꦮꦶꦪꦴꦠꦶ ꦱꦢꦶꦱꦹꦢꦴꦲꦫꦟꦁ. ꦱꦺꦴ ꦏꦶꦫ ꦱꦥꦢꦴꦤꦩꦺꦮ ꦑꦴꦢꦠꦶ.

ꦄꦒꦣꦶꦠꦄꦩꦸꦕ꧀ꦖꦶꦠꦴꦢꦶꦨꦴꦮꦺꦤ ꦥꦫꦶꦨꦸꦚ꧀ꦗꦶꦠꦧ꧀ꦧꦠꦺꦴ ‘‘ꦄꦩꦕ꧀ꦖꦫꦴꦪꦶꦠ꧀ꦮꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦄꦧ꧀ꦨꦤ꧀ꦠꦫꦺ ꦄꦠ꧀ꦠꦴ ꦤꦴꦩ ꦄꦠ꧀ꦡꦷꦠꦶ ꦢꦶꦛ꧀ꦜꦶ ꦄꦠ꧀ꦠꦹꦥꦭꦢ꧀ꦣꦶ, ꦠꦁꦱꦲꦒꦠꦺꦤ ꦱꦩ꧀ꦩꦺꦴꦲꦺꦤ ꦄꦠ꧀ꦠꦴ ꦄꦴꦲꦴꦫꦁ ꦥꦫꦶꦨꦸꦚ꧀ꦗꦠꦷꦠꦶ. ꦱꦠꦶꦱꦩ꧀ꦥꦗꦚ꧀ꦚꦮꦱꦺꦤꦥꦷꦠꦶ ‘‘ꦄꦱꦶꦠꦺ ꦥꦷꦠꦺ ꦑꦴꦪꦶꦠꦺ ꦱꦴꦪꦶꦠꦺ ꦱꦩ꧀ꦥꦗꦴꦤꦏꦴꦫꦷ ꦲꦺꦴꦠꦷ’’ꦠꦶ ꦌꦠ꧀ꦡ ꦮꦸꦠ꧀ꦠꦱꦠꦶꦱꦩ꧀ꦥꦗꦚ꧀ꦚꦮꦱꦺꦤꦥꦶ.

‘‘ꦄꦲꦺꦴ ꦮꦠ ꦩꦪꦁ…ꦥꦺ… ꦭꦨꦺꦪ꧀ꦪ’’ꦤ꧀ꦠꦶ ꦥꦠ꧀ꦡꦤꦁ ꦮꦴ, ‘‘ꦲꦶꦪ꧀ꦪꦺꦴ ꦮꦶꦪ…ꦥꦺ… ꦤ ꦭꦢ꧀ꦣ’’ꦤ꧀ꦠꦶ ꦄꦤꦸꦱꦺꦴꦕꦤꦁ ꦮꦴ ꦄꦏꦠ꧀ꦮꦴꦠꦶ ꦪꦺꦴꦗꦤꦴ.

‘‘ꦱꦤ꧀ꦤꦶꦣꦶꦁ ꦤ ꦄꦏꦁꦱꦸ, ꦨꦹꦩꦶꦪꦁ ꦮꦴ ꦤꦶꦑꦟꦶꦁꦱꦸ, ꦄꦒ꧀ꦒꦶꦤꦴ ꦮꦴ ꦙꦴꦥꦪꦶꦁꦱꦹ’’ꦠꦶ ꦤ-ꦏꦴꦫꦁ ꦄꦴꦤꦺꦠ꧀ꦮꦴ ꦪꦺꦴꦗꦤꦴ. ꦌꦮꦁ ꦱꦧ꧀ꦧꦠ꧀ꦡ.

ꦥꦶꦟ꧀ꦝꦥꦴꦠꦁ ꦮꦴ ꦄꦲꦷꦭ꦳ꦺꦤ꧀ꦠꦺꦤ ꦢꦴꦪꦏꦁ ꦮꦴ ꦄꦲꦷꦭ꦳ꦺꦤ꧀ꦠꦺꦤ ꦥꦫꦶꦨꦸꦚ꧀ꦗꦶꦠꦧ꧀ꦧꦺꦴꦠꦶ ꦪꦺꦴꦗꦤꦴ. ꦱ ꦥꦠ꧀ꦠꦥꦴꦟꦷꦠꦶ ꦱꦺꦴ ꦥꦠ꧀ꦠꦲꦠ꧀ꦡꦺꦴ. ꦤꦴꦮꦗꦴꦤꦶꦪꦴꦠꦶ ꦤ ꦄꦮꦗꦴꦤꦶꦪꦴ. ꦄꦠꦶꦩꦚ꧀ꦚꦠꦷꦠꦶ ꦄꦠꦶꦏ꧀ꦏꦩꦶꦠ꧀ꦮꦴ ꦩꦚ꧀ꦚꦠꦶ, ꦄꦮꦗꦴꦤꦴꦠꦷꦠꦶ ꦄꦠ꧀ꦡꦺꦴ.

‘‘ꦠꦷꦲꦶ ꦥꦫꦶꦚ꧀ꦚꦴꦲꦶ ꦥꦫꦶꦚ꧀ꦚꦴꦠꦺ’’ꦠꦶ ꦮꦠ꧀ꦮꦴ ꦠꦴꦲꦶ ꦏꦧꦭ꦳ꦷꦏꦴꦫꦴꦲꦴꦫꦱ꧀ꦱ ꦥꦫꦶꦗꦴꦤꦤꦮꦶꦣꦶꦁ ꦢꦱ꧀ꦱꦺꦤ꧀ꦠꦺꦴ ‘‘ꦏꦡ’’ꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦱꦮꦠ꧀ꦡꦸꦏꦮꦱꦺꦤꦴꦠꦶ ꦱꦱꦩ꧀ꦨꦴꦫꦮꦱꦺꦤ, ꦱꦨꦴꦮꦠꦺꦴ ꦥꦤ ꦫꦹꦥꦴꦲꦫꦟꦁ ꦎꦗꦩꦠ꧀ꦠꦁ ꦲꦺꦴꦠꦶ. ꦆꦢꦚ꧀ꦲꦶ ꦏꦧꦭ꦳ꦷꦏꦴꦫꦴꦲꦴꦫꦱ꧀ꦱ ꦭꦏ꧀ꦑꦟꦁ. ꦏꦴꦩꦁ ꦫꦱꦴꦫꦩ꧀ꦩꦟꦁ ꦗꦶꦮ꧀ꦲꦴꦥꦱꦴꦢꦺ ꦥꦛꦶꦲꦚ꧀ꦚꦠꦶ, ꦠꦺꦤ ꦥꦤ ꦄꦮꦶꦤꦴꦨꦴꦮꦠꦺꦴ ꦱꦩ꧀ꦥꦠ꧀ꦠꦮꦶꦱꦪꦒꦴꦲꦶꦠꦴꦪ ꦕ ꦗꦶꦮ꧀ꦲꦴꦥꦱꦴꦢꦱ꧀ꦱ ‘‘ꦎꦗꦛ꧀ꦜꦩꦏꦫꦹꦥꦁ ꦏꦠ꧀ꦡ ꦥꦛꦶꦲꦚ꧀ꦚꦠꦷ’’ꦠꦶ ꦮꦸꦠ꧀ꦠꦁ. ꦠꦱ꧀ꦱꦴꦠꦶ ꦗꦶꦮ꧀ꦲꦴꦥꦱꦴꦢꦱ꧀ꦱ. ꦆꦩꦺ ꦣꦩ꧀ꦩꦴꦠꦶ ꦆꦩꦺ ꦪꦡꦴꦮꦸꦠ꧀ꦠꦨꦹꦠꦸꦥꦴꦢꦴꦪꦣꦩ꧀ꦩꦴ. ꦠꦤ꧀ꦠꦶ ꦫꦹꦥꦑꦤ꧀ꦣꦁ. ꦥꦫꦶꦒ꧀ꦒꦟ꧀ꦲꦠꦺꦴꦠꦶ ꦥꦫꦶꦒ꧀ꦒꦟ꧀ꦲꦤ꧀ꦠꦱ꧀ꦱ. ꦈꦥ꧀ꦥꦤ꧀ꦤꦴ ꦦꦱ꧀ꦱꦥꦚ꧀ꦕꦩꦏꦴ ꦣꦩ꧀ꦩꦴꦠꦶ ꦱꦧ꧀ꦧꦺꦥꦶ ꦪꦺ ꦪꦡꦴꦤꦶꦢ꧀ꦣꦴꦫꦶꦠꦴ, ꦠꦺꦲꦶ ꦱꦲꦥ꧀ꦥꦮꦠ꧀ꦠꦴꦮ ꦱꦧ꧀ꦧꦺꦥꦶ ꦆꦩꦺ. ꦱꦫꦱꦭꦏ꧀ꦑꦟꦠꦺꦴꦠꦶ ꦄꦠ꧀ꦠꦤꦺꦴ ꦏꦶꦕ꧀ꦕꦠꦺꦴ ꦭꦏ꧀ꦑꦟꦠꦺꦴ ꦕ. ꦠꦺꦱꦁ ꦤꦴꦩꦫꦹꦥꦨꦴꦮꦺꦤ ꦮꦮꦠ꧀ꦡꦥꦶꦠꦴꦤꦁ ꦥꦚ꧀ꦕꦤ꧀ꦤꦁ ꦑꦤ꧀ꦣꦴꦤꦁ ꦥꦕ꧀ꦕꦪꦺꦴ ꦮꦶꦚ꧀ꦚꦴꦟꦁ. ‘‘ꦠꦱ꧀ꦱ ꦱꦔ꧀ꦑꦴꦫꦴ ꦠꦺꦱꦁ ꦄꦮꦶꦗ꧀ꦗꦴ’’ꦠꦶ ꦌꦮꦁ ꦈꦢ꧀ꦣꦁ ꦄꦴꦫꦺꦴꦲꦤꦮꦱꦺꦤ ꦥꦕ꧀ꦕꦪꦁ. ꦄꦣꦺꦴꦎꦫꦺꦴꦲꦤꦮꦱꦺꦤ ꦥꦤ ꦱꦭ꦳ꦴꦪꦠꦤꦴꦢꦶꦏꦺ ꦥꦫꦶꦪꦺꦱꦤ꧀ꦠꦺꦴ ꦄꦤꦸꦭꦺꦴꦩꦥꦛꦶꦭꦺꦴꦩꦁ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦁ ꦥꦱ꧀ꦱꦠꦶ. ꦱꦭ꦳ꦴꦪꦠꦤꦴꦢꦪꦺꦴꦥꦶ ꦲꦶ ꦫꦹꦥꦴꦫꦹꦥꦣꦩ꧀ꦩꦴꦤꦁ ꦪꦡꦴꦫꦲꦁ ꦥꦕ꧀ꦕꦪꦨꦴꦮꦺꦤ ꦮꦮꦠ꧀ꦡꦥꦺꦠꦧ꧀ꦧꦴꦠꦶ. ꦪꦴꦡꦴꦮꦠꦺꦴ ꦢꦶꦛ꧀ꦜꦠ꧀ꦠꦴꦠꦶ ‘‘ꦆꦢꦁ ꦫꦹꦥꦁ, ꦌꦠ꧀ꦠꦏꦁ ꦫꦹꦥꦁ, ꦤ ꦆꦠꦺꦴ ꦨꦶꦪ꧀ꦪꦺꦴ, ꦆꦢꦁ ꦤꦴꦩꦁ, ꦌꦠ꧀ꦠꦏꦁ ꦤꦴꦩꦁ, ꦤ ꦆꦠꦺꦴ ꦨꦶꦪ꧀ꦪꦺꦴ’’ꦠꦶ ꦕ ꦪꦡꦴꦨꦹꦠꦁ ꦢꦶꦛ꧀ꦜꦠ꧀ꦠꦴ. ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴ, ꦢꦸꦏ꧀ꦑꦴꦤꦸꦥꦱ꧀ꦱꦤꦴ, ꦄꦤꦠ꧀ꦠꦴꦤꦸꦥꦱ꧀ꦱꦤꦴ, ꦤꦶꦧ꧀ꦧꦶꦢꦴꦤꦸꦥꦱ꧀ꦱꦤꦴ, ꦮꦶꦫꦴꦒꦴꦤꦸꦥꦱ꧀ꦱꦤꦴ, ꦤꦶꦫꦺꦴꦣꦴꦤꦸꦥꦱ꧀ꦱꦤꦴ, ꦥꦛꦶꦤꦶꦱ꧀ꦱꦒ꧀ꦒꦴꦤꦸꦥꦱ꧀ꦱꦤꦴꦠꦶ ꦆꦩꦴꦱꦁ ꦱꦠ꧀ꦠꦤ꧀ꦤꦁ ꦄꦤꦸꦥꦱ꧀ꦱꦤꦴꦤꦁ ꦮꦱꦺꦤ. ꦱꦺꦴꦠꦶ ꦏꦧꦭ꦳ꦷꦏꦴꦫꦴꦲꦴꦫꦺꦴ. ꦠꦶꦭꦏ꧀ꦑꦟ…ꦥꦺ… ꦱꦔ꧀ꦑꦴꦠꦴꦪꦴꦠꦶ ꦄꦤꦶꦕ꧀ꦕꦠꦴꦢꦷꦤꦁ ꦠꦶꦟ꧀ꦟꦁ ꦭꦏ꧀ꦑꦟꦴꦤꦁ ꦥꦛꦶꦮꦶꦗ꧀ꦙꦤꦮꦱꦺꦤ ꦭꦏ꧀ꦑꦟꦮꦤ꧀ꦠꦱꦩ꧀ꦩꦱꦤꦮꦱꦺꦤ ꦕ ꦥꦮꦠ꧀ꦠꦚꦴꦟꦱꦔ꧀ꦑꦴꦠꦴꦪ. ꦥꦫꦶꦚ꧀ꦚꦴꦠꦺꦴ ꦲꦺꦴꦠꦶ ꦄꦤꦮꦱꦺꦱꦠꦺꦴ ꦤꦴꦩꦫꦹꦥꦱ꧀ꦱ ꦚꦴꦠꦠ꧀ꦠꦴ ꦠꦥ꧀ꦥꦫꦶꦪꦴꦥꦤ꧀ꦤꦠ꧀ꦠꦴ ꦕ ꦄꦴꦲꦴꦫꦱ꧀ꦱ. ꦠꦺꦤꦴꦲ ‘‘ꦠꦱ꧀ꦩꦶꦁ ꦪꦺꦮꦴ’’ꦠꦶꦄꦴꦢꦶ. ꦖꦤ꧀ꦢꦫꦴꦒꦴꦮꦏꦝ꧀ꦞꦤꦺꦤꦴꦠꦶ ꦖꦤ꧀ꦢꦫꦴꦒꦱ꧀ꦱ ꦥꦗꦲꦤꦺꦤ.

ꦥꦚ꧀ꦕ ꦏꦴꦩꦒꦸꦟꦴ ꦏꦴꦫꦟꦨꦹꦠꦴ ꦌꦠꦱ꧀ꦱ ꦄꦠ꧀ꦡꦷꦠꦶ ꦥꦚ꧀ꦕꦏꦴꦩꦒꦸꦟꦶꦏꦺꦴ. ꦠꦺꦤꦴꦲ ‘‘ꦥꦚ꧀ꦕꦏꦴꦩꦒꦸꦟꦱꦩ꧀ꦨꦮꦺꦴ’’ꦠꦶ. ꦌꦏꦶꦱ꧀ꦱꦴ ꦠꦟ꧀ꦲꦴꦪ ꦥꦫꦶꦚ꧀ꦚꦴ ꦌꦏꦥꦫꦶꦚ꧀ꦚꦴ. ꦱꦧ꧀ꦧꦱ꧀ꦱ ꦥꦚ꧀ꦕꦏꦴꦩꦒꦸꦟꦶꦏꦱ꧀ꦱ ꦫꦴꦒꦱ꧀ꦱ ꦥꦫꦶꦚ꧀ꦚꦴ, ꦱꦧ꧀ꦧꦥꦫꦶꦚ꧀ꦚꦴ. ꦠꦢꦸꦨꦪꦱ꧀ꦱꦥꦶ ꦩꦹꦭꦨꦹꦠꦱ꧀ꦱ ꦄꦴꦲꦴꦫꦱ꧀ꦱ ꦥꦫꦶꦚ꧀ꦚꦴ ꦩꦹꦭꦥꦫꦶꦚ꧀ꦚꦴ. ꦆꦢꦴꦤꦶ ꦆꦩꦴ ꦠꦶꦱ꧀ꦱꦺꦴꦥꦶ ꦥꦫꦶꦚ꧀ꦚꦴꦪꦺꦴ ꦮꦶꦨꦴꦒꦺꦤ ꦢꦱ꧀ꦱꦺꦠꦸꦁ ‘‘ꦪꦺꦴ ꦨꦶꦏ꧀ꦑꦹ’’ꦠꦶꦄꦴꦢꦶ ꦄꦴꦫꦢ꧀ꦣꦁ. ꦗꦶꦮ꧀ꦲꦴꦢ꧀ꦮꦴꦫꦺ ꦌꦏꦫꦱꦠꦟ꧀ꦲꦁ ꦥꦫꦶꦗꦴꦤꦴꦠꦷꦠꦶ ꦗꦶꦮ꧀ꦲꦴꦪ ꦫꦱꦁ ꦱꦴꦪꦶꦠ꧀ꦮꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ ‘‘ꦪꦺꦴ ꦪꦩꦺꦠ꧀ꦡ ꦫꦱꦺꦴ, ꦱꦺꦴ ꦮꦠ꧀ꦡꦸꦏꦴꦩꦮꦱꦺꦤ ꦎꦗꦛ꧀ꦜꦩꦏꦫꦹꦥꦁ ꦲꦺꦴꦠꦶ ꦗꦶꦮ꧀ꦲꦴꦪꦠꦤꦁ ꦥꦱꦴꦢꦺꦴ. ꦱꦺꦴ ꦏꦶꦁ ꦤꦶꦱ꧀ꦱꦶꦠꦺꦴ? ꦕꦠꦸꦩꦲꦴꦨꦹꦠꦤꦶꦱ꧀ꦱꦶꦠꦺꦴ. ꦠꦁꦱꦲꦗꦴꦠꦺꦴ ꦮꦟ꧀ꦟꦺꦴ ꦒꦤ꧀ꦣꦺꦴ ꦫꦱꦺꦴ ꦎꦗꦴ ꦗꦷꦮꦶꦠꦶꦤ꧀ꦢ꧀ꦫꦶꦪꦤ꧀ꦠꦶ ꦆꦩꦺ ꦣꦩ꧀ꦩꦴ ꦫꦹꦥꦏ꧀ꦑꦤ꧀ꦣꦺꦴ ꦤꦴꦩ. ꦪꦺꦴ ꦠꦱ꧀ꦩꦶꦁ ꦫꦱꦺ ꦄꦱ꧀ꦱꦴꦢꦺꦴ, ꦄꦪꦁ ꦫꦱꦠꦟ꧀ꦲꦴ. ꦠꦁꦱꦲꦒꦠꦴ ꦦꦱ꧀ꦱꦴꦢꦪꦺꦴ ꦣꦩ꧀ꦩꦴ ꦕꦠ꧀ꦠꦴꦫꦺꦴ ꦄꦫꦹꦥꦏ꧀ꦑꦤ꧀ꦣꦴ’’ꦠꦶꦄꦴꦢꦶꦮꦱꦺꦤ. ꦱꦧ꧀ꦧꦁ ꦄꦛ꧀ꦜꦏꦡꦴꦪꦁ ꦄꦴꦒꦠꦮꦱꦺꦤ ꦮꦺꦢꦶꦠꦧ꧀ꦧꦁ. ꦠꦺꦤꦴꦲ ‘‘ꦠꦺꦤ ꦥꦚ꧀ꦕꦏꦴꦩꦒꦸꦟꦶꦏꦺꦴ ꦫꦴꦒꦺꦴ ꦥꦫꦶꦚ꧀ꦚꦴꦠꦺꦴꦮ ꦲꦺꦴꦠꦷ’’ꦠꦶ. ꦠꦠ꧀ꦡ ꦠꦺꦤꦴꦠꦶ ꦪꦺꦴ ꦨꦶꦏ꧀ꦑꦸ ꦗꦶꦮ꧀ꦲꦴꦢ꧀ꦮꦴꦫꦺ ꦫꦱꦠꦟ꧀ꦲꦁ ꦥꦫꦶꦗꦴꦤꦴꦠꦶ, ꦠꦺꦤ. ꦏꦡꦁ ꦥꦤ ꦌꦏꦱ꧀ꦩꦶꦁ ꦢ꧀ꦮꦴꦫꦺ ꦠꦟ꧀ꦲꦁ ꦥꦫꦶꦗꦴꦤꦠꦺꦴ ꦥꦚ꧀ꦕꦱꦸ ꦢ꧀ꦮꦴꦫꦺꦱꦸ ꦫꦴꦒꦺꦴ ꦥꦫꦶꦚ꧀ꦚꦴꦠꦺꦴ ꦲꦺꦴꦠꦷꦠꦶ ꦄꦴꦲ ‘‘ꦏꦱ꧀ꦩꦴ’’ꦠꦶꦄꦴꦢꦶ. ꦠꦱ꧀ꦱꦴꦪꦺꦮꦴꦠꦶ ꦠꦟ꧀ꦲꦴꦪ ꦌꦮ ꦠꦟ꧀ꦲꦴꦱꦴꦩꦚ꧀ꦚꦠꦺꦴ ꦌꦏꦠ꧀ꦠꦤꦪꦮꦱꦺꦤ ꦮꦸꦠ꧀ꦠꦁ. ꦠꦠ꧀ꦡꦴꦠꦶ ꦥꦚ꧀ꦕꦱꦸ ꦢ꧀ꦮꦴꦫꦺꦱꦸ. ꦈꦥ꧀ꦥꦗ꧀ꦗꦤꦠꦺꦴꦠꦶ ꦫꦹꦥꦫꦴꦒꦴꦢꦶꦨꦴꦮꦺꦤ ꦈꦥ꧀ꦥꦗ꧀ꦗꦤꦠꦺꦴ. ꦭꦺꦴꦨꦺꦴ ꦌꦮ ꦲꦶ ꦠꦟ꧀ꦲꦴꦪꦤꦛ꧀ꦜꦺꦤ ‘‘ꦠꦟ꧀ꦲꦴ’’ꦠꦶꦥꦶ, ꦫꦗ꧀ꦗꦤꦛ꧀ꦜꦺꦤ ‘‘ꦫꦴꦒꦺꦴ’’ꦠꦶꦥꦶ ꦮꦸꦕ꧀ꦕꦠꦶ. ꦠꦺꦤꦴꦲ ‘‘ꦱꦴꦪꦺꦮ ꦲꦷ’’ꦠꦶꦄꦴꦢꦶ. ꦆꦢꦴꦤꦶ ꦮꦸꦠ꧀ꦠꦩꦺꦮꦠ꧀ꦡꦁ ‘‘ꦪꦡꦴ’’ꦠꦶꦄꦴꦢꦶꦤꦴ ꦈꦥꦩꦴꦪ ꦱꦩ꧀ꦥꦶꦟ꧀ꦝꦺꦠꦶ. ꦥꦚ꧀ꦕꦩꦒ꧀ꦒꦺ ꦲꦤꦠꦺꦴꦠꦶ ꦥꦚ꧀ꦕꦱꦸ ꦩꦒ꧀ꦒꦺꦱꦸ ꦱꦚ꧀ꦕꦫꦶꦠ꧀ꦠꦁ ꦏꦫꦺꦴꦤ꧀ꦠꦺꦤ ꦩꦒ꧀ꦒꦒꦴꦩꦶꦤꦺꦴ ꦲꦤꦤ꧀ꦠꦺꦴ ‘‘ꦩꦒ꧀ꦒꦺ ꦲꦤꦠꦺꦴ’’ꦠꦶ ꦮꦸꦠ꧀ꦠꦺꦴ.

ꦱꦧ꧀ꦪꦚ꧀ꦗꦤꦺ ꦥꦶꦟ꧀ꦝꦥꦴꦠꦱꦚ꧀ꦚꦶꦠꦺ ꦨꦠ꧀ꦠꦱꦩꦹꦲꦺ ꦩꦤꦸꦚ꧀ꦚꦺ ꦫꦹꦥꦺ ꦫꦹꦥꦱꦢ꧀ꦢꦴꦢꦪꦺꦴ ꦭꦧ꧀ꦨꦤ꧀ꦠꦶ, ꦠꦠ꧀ꦡ ꦥꦚ꧀ꦕꦏꦴꦩꦒꦸꦟꦫꦴꦒꦱ꧀ꦱ ꦱꦩ꧀ꦨꦮꦁ ꦢꦱ꧀ꦱꦺꦠꦸꦁ ‘‘ꦏꦡ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦱꦠꦶꦱꦩ꧀ꦥꦗꦚ꧀ꦚꦺꦤ ꦥꦫꦶꦒ꧀ꦒꦲꦺꦠ꧀ꦮꦴꦠꦶ ꦱꦧ꧀ꦧꦨꦴꦒꦶꦪꦺꦤ ꦏꦩ꧀ꦩꦛ꧀ꦜꦴꦤꦥꦫꦶꦥꦴꦭꦏꦺꦤ ꦥꦫꦶꦒ꧀ꦒꦲꦺꦠ꧀ꦮꦴ. ꦤꦶꦕ꧀ꦖꦤ꧀ꦢꦫꦴꦒꦥꦫꦶꦨꦺꦴꦒꦺꦤꦴꦠꦶ ꦩꦒ꧀ꦒꦴꦣꦶꦒꦩꦱꦶꦢ꧀ꦣꦺꦤ ꦤꦶꦕ꧀ꦖꦤ꧀ꦢꦫꦴꦒꦥꦫꦶꦨꦺꦴꦒꦺꦤ ꦥꦫꦶꦨꦸꦠ꧀ꦠꦺ. ꦱꦺꦴꦠꦶ ꦏꦴꦩꦒꦸꦟꦶꦏꦺꦴ ꦫꦴꦒꦺꦴ.

ꦠꦱ꧀ꦩꦶꦁ ꦱꦠꦷꦠꦶ ꦏꦧꦭ꦳ꦷꦏꦴꦫꦴꦲꦴꦫꦺ ꦱꦠꦶ. ꦠꦱ꧀ꦱꦴꦠꦶ ꦥꦚ꧀ꦕꦏꦴꦩꦒꦸꦟꦶꦏꦫꦴꦒꦱ꧀ꦱ. ꦈꦥ꧀ꦥꦠ꧀ꦠꦶꦠꦺꦴꦠꦶ ꦈꦥ꧀ꦥꦗ꧀ꦗꦤꦠꦺꦴ. ꦤ ꦲꦶ ꦄꦴꦲꦴꦫꦴꦭꦴꦨꦺꦤ ꦗꦶꦓꦕ꧀ꦖꦴꦢꦸꦧ꧀ꦧꦭ꧀ꦪꦥꦫꦺꦠꦱ꧀ꦱ ꦏꦴꦩꦥꦫꦶꦨꦺꦴꦒꦶꦕ꧀ꦖꦴ ꦱꦩ꧀ꦨꦮꦠꦶ. ꦈꦥꦤꦶꦗ꧀ꦙꦴꦤꦕꦶꦠ꧀ꦠꦤ꧀ꦠꦶ ꦫꦴꦒꦮꦱꦺꦤ ꦄꦚ꧀ꦚꦩꦚ꧀ꦚꦁ ꦎꦭꦺꦴꦏꦤꦕꦶꦠ꧀ꦠꦁ.

ꦤꦠ꧀ꦡꦶ ꦠꦁ ꦱꦁꦪꦺꦴꦗꦤꦤ꧀ꦠꦶ ꦥꦚ꧀ꦕꦮꦶꦣꦩ꧀ꦥꦶ ꦈꦢ꧀ꦣꦩ꧀ꦨꦴꦒꦶꦪꦱꦁꦪꦺꦴꦗꦤꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦠꦺꦤꦴꦲ ‘‘ꦠꦺꦤ ꦫꦴꦒꦺꦤ…ꦥꦺ… ꦤꦠ꧀ꦡꦷ’’ꦠꦶ. ꦠꦺꦤꦴꦠꦶ ꦏꦴꦩꦫꦴꦒꦺꦤ. ꦌꦠ꧀ꦠꦏꦺꦤꦴꦠꦶ ꦪꦡꦴꦮꦸꦠ꧀ꦠꦴꦪ ꦢꦺꦱꦤꦴꦪ. ꦏꦡꦺꦠꦸꦁ ꦮꦛ꧀ꦛꦠꦷꦠꦶ ꦆꦩꦁ ꦥꦜꦩꦴꦲꦴꦫꦏꦡꦁ ꦏꦡꦺꦤ꧀ꦠꦺꦤ ꦣꦩ꧀ꦩꦏꦡꦶꦏꦺꦤ.

ꦥꦜꦩꦴꦲꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦢꦸꦠꦶꦪꦴꦲꦴꦫꦮꦟ꧀ꦟꦤꦴ

ꦢꦸꦠꦶꦪꦺꦠꦶ ꦢꦸꦠꦶꦪꦺ ꦄꦴꦲꦴꦫꦺ. ꦈꦢ꧀ꦢꦴꦭꦶꦠꦕꦩ꧀ꦩꦴꦠꦶ ꦈꦥ꧀ꦥꦴꦛꦶꦠꦕꦩ꧀ꦩꦴ, ꦱꦧ꧀ꦧꦱꦺꦴ ꦄꦥꦤꦷꦠꦕꦩ꧀ꦩꦴꦠꦶ ꦄꦠ꧀ꦡꦺꦴ. ꦤ ꦱꦏ꧀ꦏꦺꦴꦠꦶ ꦢꦸꦧ꧀ꦧꦭꦨꦴꦮꦠꦺꦴ, ꦠꦡꦴ ꦲꦶ ꦆꦠ꧀ꦡꦷ ‘‘ꦄꦧꦭꦴ’’ꦠꦶ ꦮꦸꦕ꧀ꦕꦠꦶ. ꦱꦶꦭꦴꦏꦸꦛ꧀ꦛꦴꦢꦷꦤꦤ꧀ꦠꦶ ꦄꦴꦢꦶ-ꦱꦢ꧀ꦢꦺꦤ ꦆꦛ꧀ꦜꦏꦏꦸꦛ꧀ꦛꦩꦠ꧀ꦠꦶꦏꦴꦏꦸꦛ꧀ꦛꦴꦢꦷꦤꦁ ꦱꦔ꧀ꦒꦲꦺꦴ. ꦈꦟ꧀ꦟꦤꦴꦨꦷꦠꦶ ꦩꦏ꧀ꦏꦛꦏꦁ. ꦱꦫꦧꦹꦠꦶ ꦓꦫꦒꦺꦴꦭ꦳ꦶꦏꦴ. ꦈꦕ꧀ꦕꦴꦭꦶꦔ꧀ꦒꦥꦴꦟꦏꦴ ꦤꦴꦩ ꦭꦺꦴꦩꦱꦴ ꦥꦴꦟꦏꦴ. ꦄꦴꦏꦴꦱꦤꦶꦱ꧀ꦱꦶꦠꦴꦠꦶ ꦄꦴꦏꦴꦱꦕꦴꦫꦶꦤꦺꦴ. ꦭꦸꦚ꧀ꦕꦶꦠ꧀ꦮꦴꦠꦶ ꦈꦥ꧀ꦥꦴꦛꦺꦠ꧀ꦮꦴ.

ꦠꦶꦱ꧀ꦱꦺꦴ ꦥꦫꦶꦚ꧀ꦚꦴꦠꦶ ꦲꦺꦛ꧀ꦜꦴ ꦮꦸꦠ꧀ꦠꦴ ꦚꦴꦠꦥꦫꦶꦚ꧀ꦚꦴꦢꦪꦺꦴ ꦠꦶꦱ꧀ꦱꦺꦴ ꦥꦫꦶꦚ꧀ꦚꦴ. ꦠꦩ꧀ꦩꦹꦭꦏꦠ꧀ꦠꦴꦠꦶ ꦦꦱ꧀ꦱꦩꦹꦭꦏꦠ꧀ꦠꦴ. ꦢꦺꦱꦤꦴ ꦪꦴꦮ ꦄꦫꦲꦠ꧀ꦠꦴ ꦏꦡꦶꦠꦴ ꦱꦧ꧀ꦧꦱꦺꦴ ꦮꦺꦢꦤꦴꦱꦸ ꦥꦫꦶꦚ꧀ꦚꦴꦠꦴꦱꦸ ꦏꦶꦭꦺꦱꦴꦤꦁ ꦭꦺꦱꦱ꧀ꦱꦥꦶ ꦄꦨꦴꦮꦠꦺꦴ.

ꦢꦸꦠꦶꦪꦴꦲꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦠꦠꦶꦪꦴꦲꦴꦫꦮꦟ꧀ꦟꦤꦴ

ꦄꦔ꧀ꦒꦴꦫꦏꦴꦱꦸꦤ꧀ꦠꦶ ꦄꦔ꧀ꦒꦴꦫꦫꦴꦱꦶꦁ. ꦦꦸꦟꦤ꧀ꦠꦷꦠꦶ ꦄꦠ꧀ꦠꦤꦺꦴ ꦈꦥꦫꦶ ꦱꦪꦩꦺꦮ ꦄꦴꦏꦶꦫꦤ꧀ꦠꦷꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦤꦫꦴ ꦫꦸꦢꦤ꧀ꦠꦴ ꦥꦫꦶꦢꦝ꧀ꦞꦒꦠ꧀ꦠꦴ’’ꦠꦶ. ꦤꦫꦴꦠꦶ ꦥꦸꦫꦶꦱꦴꦠꦶ ꦄꦠ꧀ꦡꦺꦴ, ꦤ ꦩꦤꦸꦱ꧀ꦱꦴ. ꦨꦪꦚ꧀ꦲꦶ ꦩꦁ ꦮꦶꦤ꧀ꦢꦠꦷꦠꦶ ꦨꦪꦱ꧀ꦱ ꦮꦱꦺꦤ ꦏꦫꦺꦴꦤ꧀ꦠꦺꦴ ꦨꦪꦁ ꦭꦨꦠꦶ ꦤꦴꦩ. ꦱꦤ꧀ꦠꦫꦩꦴꦤꦺꦴꦮꦴꦠꦶ ꦱꦸꦛ꧀ꦜꦸ ꦠꦫꦩꦴꦤꦺꦴ ꦌꦮ ꦲꦸꦠ꧀ꦮꦴ. ꦥꦺꦴꦫꦶꦱꦁ ꦮꦸꦕ꧀ꦕꦠꦶ ꦥꦸꦫꦶꦱꦥ꧀ꦥꦩꦴꦟꦁ, ꦠꦱ꧀ꦩꦴ ꦄꦠꦶꦫꦺꦏꦥꦺꦴꦫꦶꦱꦴ ꦥꦸꦫꦶꦱꦥ꧀ꦥꦩꦴꦟꦠꦺꦴ ꦄꦣꦶꦏꦴ. ꦠꦺꦤꦴꦲ ‘‘ꦥꦚ꧀ꦕꦫꦠꦤꦥ꧀ꦥꦩꦴꦟꦴ’’ꦠꦶ. ꦄꦱ꧀ꦱꦴꦠꦶ ꦏꦴꦱꦸꦪꦴ. ꦠꦢꦨꦴꦮꦺꦠꦶ ꦠꦺꦱꦁ ꦗꦴꦭꦴꦣꦹꦩꦴꦤꦁ ꦄꦨꦴꦮꦺ. ꦄꦴꦫꦏꦴꦮꦱ꧀ꦱꦴꦠꦶ ꦄꦴꦫꦏꦴ ꦌꦮ ꦄꦱ꧀ꦱ.

ꦄꦔ꧀ꦒꦴꦫꦏꦴꦱꦸ ꦮꦶꦪ ꦠꦺꦨꦹꦩꦏꦮꦛ꧀ꦛꦁ ꦌꦏꦴꦢꦱꦤ꧀ꦤꦁ ꦄꦒ꧀ꦒꦷꦤꦁ ꦮꦱꦺꦤ ꦩꦲꦴꦥꦫꦶꦭ꦳ꦴꦲꦠꦺꦴ. ꦗꦶꦮꦶ…ꦥꦺ… ꦥꦸꦡꦸꦗ꧀ꦗꦤꦺꦴ ꦠꦺꦲꦶ ꦄꦒ꧀ꦒꦷꦲꦶ ꦢꦲꦶꦠꦧ꧀ꦧꦠꦺꦴ. ꦢ꧀ꦮꦺ ꦧꦭ…ꦥꦺ… ꦏꦩ꧀ꦩꦁ ꦄꦤꦶꦕ꧀ꦖꦤ꧀ꦠꦱ꧀ꦱꦺꦮ ꦠꦱ꧀ꦱ ꦮꦛ꧀ꦛꦢꦸꦏ꧀ꦑꦺ ꦥꦴꦠꦤꦠꦺꦴ. ꦄꦴꦪꦹꦲꦤꦹꦥꦏꦝ꧀ꦞꦤꦴꦤꦁ ꦏꦴꦭꦨꦺꦢꦺꦴ ꦤ ꦕꦶꦤ꧀ꦠꦺꦠꦧ꧀ꦧꦺꦴ ꦌꦏꦤ꧀ꦠꦨꦴꦮꦶꦤꦺꦴ ꦦꦭꦱ꧀ꦱ ꦤꦶꦥ꧀ꦦꦴꦢꦶꦠꦠ꧀ꦠꦴꦠꦶ ꦄꦴꦲ ‘‘ꦏꦩ꧀ꦩꦁ ꦲꦷ’’ꦠꦶꦄꦴꦢꦶ.

ꦦꦱ꧀ꦱꦺ ꦮꦸꦠ꧀ꦠꦤꦪꦺꦤꦺꦮꦴꦠꦶ ꦠꦠ꧀ꦡ ‘‘ꦦꦱ꧀ꦱꦺꦴ ꦱꦔ꧀ꦑꦴꦫꦏ꧀ꦑꦤ꧀ꦣꦺꦴ’’ꦠꦶ ꦮꦸꦠ꧀ꦠꦁ, ꦆꦣ ‘‘ꦩꦤꦺꦴꦱꦚ꧀ꦕꦺꦠꦤꦴ ꦱꦔ꧀ꦑꦴꦫꦏ꧀ꦑꦤ꧀ꦣꦺꦴ’’ꦠꦶ ꦮꦠ꧀ꦠꦧ꧀ꦧꦁ. ꦱꦺꦱꦁ ꦮꦸꦠ꧀ꦠꦤꦪꦩꦺꦮꦴꦠꦶ. ‘‘ꦠꦟ꧀ꦲꦴꦥꦕ꧀ꦕꦪꦴ ꦈꦥꦴꦢꦴꦤꦁ, ꦈꦥꦴꦢꦴꦤꦥꦕ꧀ꦕꦪꦴ ꦨꦮꦺꦴ’’ꦠꦶ ꦮꦕꦤꦠꦺꦴ ꦩꦤꦺꦴꦱꦚ꧀ꦕꦺꦠꦤꦴꦪ ꦠꦟ꧀ꦲꦴ ꦩꦹꦭꦏꦴꦫꦟꦤ꧀ꦠꦶ ꦄꦴꦲ ‘‘ꦠꦟ꧀ꦲꦴꦩꦹꦭꦏꦠ꧀ꦠꦴ ꦩꦤꦺꦴꦱꦚ꧀ꦕꦺꦠꦤꦴꦪꦴ’’ꦠꦶ. ꦠꦺꦤꦴꦲ ‘‘ꦤ ꦲꦷ’’ꦠꦶꦄꦴꦢꦶ. ꦏꦺꦕꦶ ꦥꦤ ꦪꦱ꧀ꦩꦴ ꦩꦤꦺꦴꦱꦚ꧀ꦕꦺꦠꦤꦴꦪ ꦦꦭꦨꦹꦠꦁ ꦮꦺꦢꦤꦁ ꦥꦛꦶꦕ꧀ꦕ ꦠꦟ꧀ꦲꦴ ꦈꦥ꧀ꦥꦗ꧀ꦗꦠꦶ, ꦠꦱ꧀ꦩꦴ ꦌꦮꦁ ꦮꦸꦠ꧀ꦠꦤ꧀ꦠꦶ ꦮꦢꦤ꧀ꦠꦶ.

ꦠꦠꦶꦪꦴꦲꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦕꦠꦸꦠ꧀ꦡꦴꦲꦴꦫꦮꦟ꧀ꦟꦤꦴ

ꦄꦤꦶꦛ꧀ꦜꦥꦴꦥꦤꦮꦱꦺꦤ ꦠꦁꦱꦩꦔ꧀ꦒꦷꦥꦸꦒ꧀ꦒꦭꦁ ꦄꦴꦒꦕ꧀ꦖꦠꦷꦠꦶ ꦄꦴꦒꦸ, ꦥꦴꦥꦁ, ꦠꦁ ꦕꦫꦠꦶ ꦱꦷꦭꦺꦤꦴꦠꦶ ꦄꦴꦒꦸꦕꦴꦫꦷ. ꦠꦺꦤꦴꦲ ‘‘ꦥꦴꦥꦕꦴꦫꦶ’’ꦤ꧀ꦠꦶ.

ꦫꦴꦗꦴ ꦮꦶꦪ ꦏꦩ꧀ꦩꦁ ꦥꦫꦩꦶꦱ꧀ꦱꦫꦨꦴꦮꦠꦺꦴ. ꦄꦴꦒꦸꦕꦴꦫꦷ ꦥꦸꦫꦶꦱꦺꦴ ꦮꦶꦪ…ꦥꦺ… ꦥꦸꦡꦸꦗ꧀ꦗꦤꦺꦴ ꦢꦸꦏ꧀ꦑꦮꦠ꧀ꦡꦸꦨꦴꦮꦠꦺꦴ. ꦄꦴꦢꦶꦤ꧀ꦤꦥ꧀ꦥꦲꦴꦫꦮꦟꦴꦤꦶ ꦠꦷꦟꦶ ꦱꦠ꧀ꦠꦶꦱꦠꦴꦤꦶ ꦮꦶꦪ ꦥꦸꦡꦸꦗ꧀ꦗꦤꦱ꧀ꦱ ꦄꦴꦠꦸꦫꦩꦴꦤꦩꦲꦴꦢꦸꦏ꧀ꦑꦥꦠꦶꦛ꧀ꦜꦁ ꦥꦛꦶꦱꦤ꧀ꦣꦶꦮꦶꦚ꧀ꦚꦴꦟꦁ. ꦠꦺꦤꦴꦲ ꦱꦠ꧀ꦠꦶ…ꦥꦺ… ꦢꦸꦏ꧀ꦑꦤ꧀ꦠꦶ.

ꦠꦩ꧀ꦩꦹꦭꦏꦠ꧀ꦠꦴꦠꦶ ꦥꦛꦶꦱꦤ꧀ꦣꦶꦮꦶꦚ꧀ꦚꦴꦟꦩꦹꦭꦏꦠ꧀ꦠꦴ ꦆꦠꦺꦴ ꦥꦫꦁ ꦥꦮꦠ꧀ꦠꦤꦴꦩꦫꦹꦥꦱ꧀ꦱ.

ꦕꦠꦸꦠ꧀ꦡꦴꦲꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦥꦸꦠ꧀ꦠꦩꦁꦱꦹꦥꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.