꧑꧐. ꦱꦸꦱꦶꦩꦱꦸꦠ꧀ꦠꦮꦟ꧀ꦟꦤꦴ

꧗꧐. ꦢꦱꦩꦺ ꦒꦫꦸꦏꦠꦺꦴꦠꦶ ꦒꦫꦸꦨꦴꦮꦲꦺꦠꦹꦤꦁ ꦈꦠ꧀ꦠꦩꦒꦸꦟꦴꦤꦁ ꦩꦠ꧀ꦡꦏꦥ꧀ꦥꦠ꧀ꦠꦶꦪꦴ ꦄꦤꦚ꧀ꦚꦱꦴꦣꦴꦫꦟꦺꦤ ꦒꦫꦸꦏꦴꦫꦺꦤ ꦒꦫꦸꦏꦠꦺꦴ. ꦩꦴꦤꦶꦠꦺꦴꦠꦶ ꦱꦩ꧀ꦩꦴꦥꦛꦶꦥꦠ꧀ꦠꦶꦪꦴ ꦩꦴꦤꦶꦠꦺꦴ. ꦠꦴꦪ ꦲꦶ ꦮꦶꦚ꧀ꦚꦹꦤꦁ ꦩꦤꦴꦥꦠꦴꦠꦶ ꦄꦴꦲ ‘‘ꦩꦤꦺꦤ ꦥꦶꦪꦴꦪꦶꦠꦺꦴ’’ꦠꦶ. ꦕꦠꦸꦥꦕ꧀ꦕꦪꦥꦹꦗꦴꦪ ꦕ ꦥꦹꦗꦶꦠꦺꦴꦠꦶ ꦆꦢꦁ ꦄꦠ꧀ꦡꦮꦕꦤꦁ. ꦪꦢꦠ꧀ꦡꦁ ꦱꦁꦒꦷꦠꦶꦏꦴꦫꦺꦲꦶ ‘‘ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦒꦮꦴ ꦱꦏ꧀ꦏꦠꦺꦴ ꦲꦺꦴꦠꦷ’’ꦠꦶꦄꦴꦢꦶꦤꦴ ꦆꦩꦱ꧀ꦱ ꦱꦸꦠ꧀ꦠꦱ꧀ꦱ ꦤꦶꦢꦴꦤꦁ ꦤꦶꦏ꧀ꦑꦶꦠ꧀ꦠꦁ, ꦠꦱ꧀ꦱ ꦄꦠ꧀ꦡꦱ꧀ꦱ ꦈꦭ꧀ꦭꦶꦔ꧀ꦒꦮꦱꦺꦤ ꦮꦸꦠ꧀ꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦌꦱ ꦤꦪꦺꦴ ꦱꦺꦱꦥꦢꦺꦱꦸꦥꦶ. ꦄꦁꦱꦏꦹꦛꦠꦺꦴꦠꦶ ꦈꦠ꧀ꦠꦫꦴꦱꦔ꧀ꦒꦺꦤ ꦈꦨꦺꦴ ꦄꦁꦱꦏꦹꦛꦺ ꦥꦛꦶꦕ꧀ꦖꦴꦢꦺꦠ꧀ꦮꦴ ꦜꦶꦠꦴ ꦢꦏ꧀ꦑꦶꦟꦄꦁꦱꦏꦹꦛꦠꦺꦴ, ꦈꦨꦪꦠꦺꦴ ꦮꦴ ꦄꦥꦤꦺꦤ꧀ꦠꦶ. ꦥꦫꦶꦕꦶꦠꦒꦤ꧀ꦡꦮꦱꦺꦤ ꦥꦟ꧀ꦝꦶꦠꦥꦫꦶꦧ꧀ꦧꦴꦗꦏꦺꦴ, ꦪꦠꦺꦴ ꦥꦕ꧀ꦖꦴ ꦮꦶꦱꦺꦱꦨꦴꦒꦷ ꦗꦴꦠꦺꦴ. ꦮꦶꦕꦶꦠ꧀ꦠꦤꦪꦴꦪ ꦣꦩ꧀ꦩꦏꦡꦴꦪ ꦏꦡꦤꦠꦺꦴ ‘‘ꦏꦮꦶꦱꦺꦛ꧀ꦜꦺꦴ’’ꦠꦶ ꦄꦴꦲꦁꦱꦸ.

ꦠꦺꦗꦸꦱ꧀ꦱꦢꦺꦴꦠꦶ ꦩꦲꦴꦠꦺꦗꦺꦴ. ꦥꦸꦫꦺꦨꦠ꧀ꦠꦏꦶꦕ꧀ꦕꦴꦢꦷꦤꦁ ꦤꦶꦪꦠꦨꦴꦮꦺꦤ ꦤꦶꦪꦩꦩꦤꦸꦪꦸꦠ꧀ꦠꦺꦴ. ꦮꦶꦥꦱ꧀ꦱꦤꦴꦭꦏ꧀ꦑꦟꦩ꧀ꦲꦷꦠꦶ ꦚꦴꦟꦁ ꦠꦠ꧀ꦡ ꦏꦡꦶꦠꦁ. ꦣꦩ꧀ꦩꦤ꧀ꦠꦶ ꦠꦱ꧀ꦱꦁ ꦠꦱ꧀ꦱꦁ ꦥꦫꦶꦱꦴꦪꦁ ꦡꦺꦫꦱ꧀ꦱ ꦄꦱꦩ꧀ꦩꦸꦑꦴ ꦢꦺꦱꦶꦠꦁ ꦣꦩ꧀ꦩꦁ. ꦄꦴꦲꦫꦶꦠ꧀ꦮꦴ ꦏꦡꦺꦠꦶ ꦠꦡꦴ ꦮꦫꦱ꧀ꦱ ꦢꦶꦤ꧀ꦤꦠ꧀ꦠꦴ.

ꦏꦶꦚ꧀ꦕꦴꦥꦶ ꦱꦸꦱꦶꦩꦺꦴ ꦥꦹꦫꦟꦴꦢꦪꦺꦴ ꦮꦶꦪ ꦱꦠ꧀ꦡꦸꦥꦛꦶꦚ꧀ꦚꦺꦴ ꦤ ꦲꦺꦴꦠꦶ, ꦠꦶꦠ꧀ꦡꦶꦪꦺꦲꦶ ꦥꦤ ‘‘ꦄꦪꦁ ꦧ꧀ꦫꦴꦲ꧀ꦩꦟꦥꦧ꧀ꦧꦗꦶꦠꦺꦴ ꦥꦚ꧀ꦚꦮꦴ ꦮꦺꦢꦔ꧀ꦒꦏꦸꦱꦭꦺꦴ’’ꦠꦶ ꦒꦟꦴꦕꦫꦶꦪꦛ꧀ꦜꦴꦤꦺ ꦜꦥꦶꦠꦺꦴ, ꦠꦡꦴ ꦕꦱ꧀ꦱ ꦱꦩ꧀ꦨꦴꦮꦶꦠꦺꦴ. ꦠꦺꦤ ꦮꦸꦠ꧀ꦠꦁ ‘‘ꦄꦲꦁ ꦱꦠ꧀ꦡꦴꦠꦶ ꦥꦛꦶꦗꦴꦤꦤ꧀ꦠꦺꦴ’’ꦠꦶ, ꦤ ꦱꦱ꧀ꦱꦠꦢꦶꦛ꧀ꦜꦶꦏꦠ꧀ꦠꦴ. ꦠꦡꦴ ꦲꦺꦱ ꦨꦒꦮꦠꦺꦴ ꦱꦩ꧀ꦩꦸꦑꦴ ꦈꦥꦒꦤ꧀ꦠꦸꦁ ꦄꦱꦏ꧀ꦑꦶ.

ꦄꦚ꧀ꦚꦴꦠꦶ ꦄꦫꦲꦠ꧀ꦠꦱ꧀ꦱ ꦤꦴꦩꦁ ꦄꦚ꧀ꦚꦶꦤ꧀ꦢ꧀ꦫꦶꦪꦱ꧀ꦱ ꦕꦶꦟ꧀ꦟꦤ꧀ꦠꦺ ꦥꦮꦠ꧀ꦠꦠ꧀ꦠꦴ. ꦠꦁ ꦥꦮꦠ꧀ꦠꦶꦤ꧀ꦠꦶ ꦪꦁ ꦄꦚ꧀ꦚꦧ꧀ꦪꦴꦏꦫꦟꦁ ꦮꦸꦠ꧀ꦠꦁ, ꦠꦁ ꦱꦸꦠ꧀ꦮꦴ. ꦄꦱ꧀ꦱ ꦱꦸꦱꦶꦩꦱ꧀ꦱ, ꦥꦫꦩꦥ꧀ꦥꦩꦴꦟꦤ꧀ꦠꦶ ꦈꦠ꧀ꦠꦩꦏꦺꦴꦛꦶ. ꦄꦴꦕꦫꦶꦪꦩꦸꦛ꧀ꦜꦷꦠꦶ ꦄꦴꦕꦫꦶꦪꦱ꧀ꦱ ꦩꦸꦛ꧀ꦜꦶꦏꦠꦣꦩ꧀ꦩꦺꦴ.

ꦄꦔ꧀ꦒꦱꦤ꧀ꦠꦠꦴꦪꦴꦠꦶ ꦤꦷꦮꦫꦟꦴꦢꦷꦤꦁ ꦥꦕ꧀ꦕꦤꦷꦏꦣꦩ꧀ꦩꦴꦤꦁ ꦮꦶꦢꦹꦫꦨꦴꦮꦺꦤ ꦙꦴꦤꦔ꧀ꦒꦴꦤꦁ ꦮꦹꦥꦱꦤ꧀ꦠꦠꦴꦪ. ꦤꦶꦧ꧀ꦧꦸꦠꦱꦧ꧀ꦧꦢꦫꦡꦥꦫꦶꦭ꦳ꦴꦲꦠꦴꦪ ꦲꦶ ꦠꦺꦱꦁ ꦙꦴꦤꦴꦤꦁ ꦥꦟꦷꦠꦠꦫꦨꦴꦮꦺꦴ. ꦄꦴꦫꦩ꧀ꦩꦟꦱꦤ꧀ꦠꦠꦴꦪꦴꦠꦶ ꦫꦹꦥꦥꦠꦶꦨꦴꦒꦮꦶꦒꦩꦺꦤ ꦱꦟ꧀ꦲꦱꦸꦑꦸꦩꦴꦢꦶꦨꦴꦮꦥ꧀ꦥꦠ꧀ꦠꦱ꧀ꦱ ꦄꦴꦫꦩ꧀ꦩꦟꦱ꧀ꦱ ꦱꦤ꧀ꦠꦨꦴꦮꦺꦤ. ꦪꦢꦒ꧀ꦒꦺꦤ ꦲꦶ ꦠꦺꦱꦁ ꦨꦴꦮꦤꦴꦠꦶꦱꦪꦱꦩ꧀ꦨꦴꦮꦶꦠꦱꦟ꧀ꦲꦱꦸꦑꦸꦩꦥ꧀ꦥꦏꦴꦫꦴꦤꦶ ꦄꦴꦫꦩ꧀ꦩꦟꦴꦤꦶ ꦱꦤ꧀ꦠꦴꦤꦶ, ꦠꦢꦒ꧀ꦒꦺꦤ ꦙꦴꦤꦔ꧀ꦒꦴꦤꦁ ꦱꦤ꧀ꦠꦠꦴ ꦮꦺꦢꦶꦠꦧ꧀ꦧꦴ. ꦄꦴꦫꦩ꧀ꦩꦟꦱꦤ꧀ꦠꦠꦴꦪ ꦮꦴ ꦠꦢꦴꦫꦩ꧀ꦩꦟꦣꦩ꧀ꦩꦴꦤꦁ ꦱꦤ꧀ꦠꦠꦴ ꦭꦺꦴꦏꦸꦠ꧀ꦠꦫꦣꦩ꧀ꦩꦴꦫꦩ꧀ꦩꦟꦴꦲꦶ ꦥꦕ꧀ꦕꦮꦺꦏ꧀ꦑꦟꦴꦲꦶ ꦢꦷꦥꦺꦠꦧ꧀ꦧꦴ. ꦄꦴꦫꦸꦥ꧀ꦥꦮꦶꦩꦺꦴꦏ꧀ꦑꦴꦠꦶ ꦄꦫꦹꦥꦗ꧀ꦙꦴꦤꦱꦚ꧀ꦚꦴꦮꦶꦩꦺꦴꦏ꧀ꦑꦴ. ꦥꦚ꧀ꦚꦴꦩꦠ꧀ꦠꦺꦤꦺꦮ ꦮꦶꦩꦸꦠ꧀ꦠꦴ, ꦤ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦴ. ꦣꦩ꧀ꦩꦴꦤꦁ ꦜꦶꦠꦠꦴ ꦠꦁꦱꦨꦴꦮꦠꦴ ꦣꦩ꧀ꦩꦛ꧀ꦜꦶꦠꦶ, ꦄꦤꦶꦕ꧀ꦕꦢꦸꦏ꧀ꦑꦴꦤꦠ꧀ꦠꦠꦴ, ꦠꦠ꧀ꦡ ꦚꦴꦟꦁ ꦣꦩ꧀ꦩꦛ꧀ꦜꦶꦠꦶꦚꦴꦟꦤ꧀ꦠꦶ ꦄꦴꦲ ‘‘ꦮꦶꦥꦱ꧀ꦱꦤꦴꦚꦴꦟ’’ꦤ꧀ꦠꦶ. ꦌꦮꦩꦴꦲꦴꦠꦶ ‘‘ꦥꦸꦧ꧀ꦧꦺ ꦑꦺꦴ, ꦱꦸꦱꦶꦩ, ꦣꦩ꧀ꦩꦛ꧀ꦜꦶꦠꦶꦚꦴꦟꦁ, ꦥꦕ꧀ꦖꦴ ꦤꦶꦧ꧀ꦧꦴꦤꦺ ꦚꦴꦟ’’ꦤ꧀ꦠꦶ ꦌꦮꦩꦴꦢꦶ.

ꦮꦶꦤꦴꦥꦶ ꦱꦩꦴꦣꦶꦤ꧀ꦠꦶ ꦱꦩꦡꦭꦏ꧀ꦑꦟꦥ꧀ꦥꦠ꧀ꦠꦁ ꦥꦸꦫꦶꦩꦱꦶꦢ꧀ꦣꦁ ꦮꦶꦤꦴꦥꦶ ꦱꦩꦴꦣꦶꦤ꧀ꦠꦶ ꦮꦶꦥꦱ꧀ꦱꦤꦴꦪꦴꦤꦶꦏꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦌꦮꦤ꧀ꦠꦶ ꦮꦸꦠ꧀ꦠꦴꦏꦴꦫꦺꦤ. ꦤ ꦱꦩꦴꦣꦶꦤꦶꦱ꧀ꦱꦤ꧀ꦢꦺꦴ ꦄꦤꦸꦥꦸꦧ꧀ꦧꦮꦶꦲꦴꦫꦴ ꦮꦶꦪ. ꦤ ꦱꦩꦴꦣꦶꦄꦴꦤꦶꦱꦁꦱꦺꦴ ꦭꦺꦴꦏꦶꦪꦴꦨꦶꦚ꧀ꦚꦴ ꦮꦶꦪ. ꦤ ꦱꦩꦴꦣꦶꦱ꧀ꦱ ꦤꦶꦥ꧀ꦦꦠ꧀ꦠꦶ ꦱꦧ꧀ꦧꦨꦮꦒ꧀ꦒꦁ ꦮꦶꦪ. ꦮꦶꦥꦱ꧀ꦱꦤꦴꦪ ꦤꦶꦥ꧀ꦦꦠ꧀ꦠꦶ ꦩꦒ꧀ꦒꦺꦴ ꦮꦴ ꦦꦭꦁ ꦮꦴꦠꦶ ꦪꦺꦴꦗꦤꦴ.

ꦫꦹꦥꦴꦢꦷꦱꦸ ꦕꦺꦠꦺꦱꦸ ꦠꦶꦟ꧀ꦟꦁ ꦭꦏ꧀ꦑꦟꦴꦤꦁ ꦥꦫꦶꦮꦠ꧀ꦠꦤꦮꦱꦺꦤ ꦢꦺꦱꦤꦴ ꦠꦺꦥꦫꦶꦮꦛ꧀ꦛꦢꦺꦱꦤꦴ. ꦄꦤꦸꦪꦺꦴꦒꦁ ꦄꦴꦫꦺꦴꦥꦺꦤ꧀ꦠꦺꦴꦠꦶ ꦤꦤꦸ ꦮꦸꦠ꧀ꦠꦁ, ꦱꦸꦱꦶꦩ, ꦆꦢꦴꦤꦶ ꦄꦫꦲꦠ꧀ꦠꦴꦣꦶꦒꦩꦺꦤ ꦱꦧ꧀ꦧꦱꦺꦴ ꦥꦕ꧀ꦕꦪꦴꦏꦴꦫꦁ ꦥꦛꦶꦮꦶꦗ꧀ꦙꦶꦠ꧀ꦮꦴ ꦠꦠ꧀ꦡ ꦮꦶꦒꦠꦱꦩ꧀ꦩꦺꦴꦲꦺꦴꦠꦶ ꦄꦤꦸꦪꦺꦴꦒꦁ ꦏꦫꦺꦴꦤ꧀ꦠꦺꦴ. ꦥꦴꦏꦛꦏꦫꦟꦠ꧀ꦡꦤ꧀ꦠꦶ ꦪꦡꦴ ꦠ꧀ꦮꦁ, ꦱꦸꦱꦶꦩ, ꦤꦶꦗ꧀ꦙꦴꦤꦏꦺꦴ ꦱꦸꦏ꧀ꦑꦮꦶꦥꦱ꧀ꦱꦏꦺꦴ ꦕ ꦲꦸꦠ꧀ꦮꦴ ꦄꦴꦱꦮꦴꦤꦁ ꦑꦪꦱꦩ꧀ꦩꦱꦤꦺ ꦱꦸꦥ꧀ꦥꦠꦶꦛ꧀ꦜꦶꦠꦺꦴ, ꦌꦮꦩꦺꦠꦺꦥꦶ ꦨꦶꦏ꧀ꦑꦹ, ꦠꦱ꧀ꦩꦴ ‘‘ꦄꦥꦶ ꦥꦤ ꦠꦸꦩ꧀ꦲꦺ ꦄꦴꦪꦱ꧀ꦩꦤ꧀ꦠꦺꦴ’’ꦠꦶꦄꦴꦢꦶꦤꦴ ꦤ ꦠꦺ ꦠꦪꦴ ꦄꦤꦸꦪꦸꦚ꧀ꦗꦶꦠꦧ꧀ꦧꦴꦠꦶ.

ꦱꦸꦱꦶꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦩꦲꦴꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.