꧒. ꦮꦶꦨꦔ꧀ꦒꦱꦸꦠ꧀ꦠꦮꦟ꧀ꦟꦤꦴ

꧒. ꦢꦸꦠꦶꦪꦺꦥꦷꦠꦶ ꦢꦸꦠꦶꦪꦱꦸꦠ꧀ꦠꦺꦥꦶ. ꦥꦶ-ꦱꦢ꧀ꦢꦺꦤ ꦠꦢꦚ꧀ꦚꦺꦱꦸ ꦱꦸꦠ꧀ꦠꦺꦱꦸꦥꦷꦠꦶ ꦄꦠ꧀ꦡꦺꦴ. ‘‘ꦮꦶꦱꦸꦢ꧀ꦣꦶꦩꦒ꧀ꦒꦺ ꦮꦸꦠ꧀ꦠꦴ ꦌꦮꦴ’’ꦠꦶ ꦮꦠ꧀ꦮꦴꦥꦶ ꦠꦢꦺꦏꦢꦺꦱꦁ ꦆꦣ ꦮꦶꦤꦶꦪꦺꦴꦒꦏ꧀ꦑꦩꦁ ꦢꦱ꧀ꦱꦺꦠꦸꦁ ‘‘ꦪꦡꦴ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦤ꧀ꦠꦶ ꦩꦹꦭꦁ. ꦮꦶꦠ꧀ꦡꦴꦫꦢꦺꦱꦤꦤ꧀ꦠꦶ ‘‘ꦮꦶꦨꦗꦶꦱ꧀ꦱꦴꦩꦷ’’ꦠꦶ ꦥꦢꦱ꧀ꦱ ꦄꦠ꧀ꦡꦱ꧀ꦱ ꦢꦱ꧀ꦱꦤꦮꦱꦺꦤ ꦥꦮꦠ꧀ꦠꦁ ꦮꦶꦨꦔ꧀ꦒꦢꦺꦱꦤꦁ. ꦈꦢ꧀ꦢꦺꦱꦢꦺꦱꦤꦴ ꦥꦜꦩꦱꦸꦠ꧀ꦠꦺ ꦄꦤꦸꦭꦺꦴꦩꦢꦺꦱꦤꦴꦱꦢꦶꦱꦴꦮ. ꦥꦸꦤ ꦮꦛ꧀ꦛꦮꦶꦮꦛ꧀ꦛꦁ ꦢꦱ꧀ꦱꦺꦤ꧀ꦠꦺꦴꦠꦶ ‘‘ꦆꦠꦶ ꦑꦺꦴ, ꦨꦶꦏ꧀ꦑꦮꦺ’’ꦠꦶꦄꦴꦢꦶꦤꦴ ꦥꦮꦠ꧀ꦠꦶꦁ ꦤꦶꦮꦠ꧀ꦠꦶꦚ꧀ꦕ ꦢꦱ꧀ꦱꦺꦤ꧀ꦠꦺꦴ. ꦥꦜꦩꦁ ꦈꦢ꧀ꦢꦺꦱꦮꦱꦺꦤ ꦮꦶꦨꦗꦤꦮꦱꦺꦤ ꦮꦶꦮꦛ꧀ꦛꦁ ꦢꦱ꧀ꦱꦶꦠꦁ, ꦠꦠꦺꦴ ꦌꦮ ꦧ꧀ꦪꦠꦶꦫꦺꦏꦤꦪꦺꦤ ꦮꦶꦮꦛ꧀ꦛꦩ꧀ꦥꦶ ꦢꦱ꧀ꦱꦶꦠꦩꦺꦮ ꦲꦺꦴꦠꦷꦠꦶ ꦥꦸꦤꦒ꧀ꦒꦲꦟꦁ.

ꦠꦺꦱꦁ ꦠꦺꦱꦁ ꦱꦠ꧀ꦠꦴꦤꦤ꧀ꦠꦶ ꦆꦢꦁ ꦏꦶꦚ꧀ꦕꦶ ꦥꦏꦴꦫꦠꦺꦴ ꦄꦤꦴꦩꦱꦶꦠ꧀ꦮꦴ ꦱꦧ꧀ꦧꦺꦥꦶ ꦱꦠ꧀ꦠꦺ ꦱꦴꦩꦚ꧀ꦚꦠꦺꦴ ꦧ꧀ꦪꦴꦥꦺꦠ꧀ꦮꦴ ꦒꦲꦟꦤ꧀ꦠꦶ ꦄꦴꦲ ‘‘ꦱꦔ꧀ꦑꦺꦥꦠꦺꦴ…ꦥꦺ… ꦤꦶꦢ꧀ꦢꦺꦱꦺꦴ’’ꦠꦶ. ꦒꦠꦶꦗꦴꦠꦶꦮꦱꦺꦤꦴꦠꦶ ꦥꦚ꧀ꦕꦒꦠꦶꦮꦱꦺꦤ, ꦠꦠ꧀ꦡꦴꦥꦶ ꦌꦏꦺꦏꦴꦪ ꦒꦠꦶꦪꦴ ꦑꦠ꧀ꦠꦶꦪꦴꦢꦶꦨꦸꦩ꧀ꦩꦢꦺꦮꦴꦢꦶꦲꦠ꧀ꦡꦶꦄꦴꦢꦶꦗꦴꦠꦶꦮꦱꦺꦤ ꦕ. ‘‘ꦕꦶꦠ꧀ꦠꦁ ꦩꦤꦺꦴ’’ꦠꦶꦄꦴꦢꦷꦱꦸ ꦮꦶꦪ ꦏꦶꦕ꧀ꦕꦮꦶꦱꦺꦱꦁ, ‘‘ꦩꦴꦤꦱ’’ꦤ꧀ꦠꦶꦄꦴꦢꦷꦱꦸ ꦮꦶꦪ ꦱꦩꦴꦤꦺ ꦄꦠ꧀ꦡꦺ ꦱꦢ꧀ꦢꦮꦶꦱꦺꦱꦁ, ‘‘ꦥꦟ꧀ꦝꦫ’’ꦤ꧀ꦠꦶꦄꦴꦢꦷꦱꦸ ꦮꦶꦪ ꦒꦸꦟꦮꦶꦱꦺꦱꦁ, ‘‘ꦕꦺꦠꦱꦶꦏꦁ ꦲꦢꦪ’’ꦤ꧀ꦠꦶꦄꦴꦢꦷꦱꦸ ꦮꦶꦪ ꦤꦶꦱ꧀ꦱꦪꦮꦶꦱꦺꦱꦁ, ‘‘ꦕꦶꦠ꧀ꦠꦱ꧀ꦱ ꦜꦶꦠꦷ’’ꦠꦶꦄꦴꦢꦷꦱꦸ ꦮꦶꦪ ꦄꦚ꧀ꦚꦱ꧀ꦱ ꦄꦮꦠ꧀ꦡꦴꦨꦴꦮꦮꦶꦱꦺꦱꦁ, ‘‘ꦄꦭꦸꦧ꧀ꦨꦤꦴ’’ꦠꦶꦄꦴꦢꦷꦱꦸ ꦮꦶꦪ ꦄꦚ꧀ꦚꦱ꧀ꦱ ꦏꦶꦫꦶꦪꦴꦨꦴꦮꦮꦶꦱꦺꦱꦁ, ‘‘ꦄꦭꦸꦧ꧀ꦨꦶꦠꦠ꧀ꦠ’’ꦤ꧀ꦠꦶꦄꦴꦢꦷꦱꦸ ꦮꦶꦪ ꦄꦚ꧀ꦚꦱ꧀ꦱ ꦄꦨꦴꦮꦠꦴꦮꦶꦱꦺꦱꦤ꧀ꦠꦶ ꦌꦮꦩꦴꦢꦶꦏꦁ ꦄꦤꦥꦺꦏ꧀ꦑꦶꦠ꧀ꦮꦴ ꦣꦩ꧀ꦩꦩꦠ꧀ꦠꦁ ꦮꦴ ꦢꦷꦥꦤꦴ ꦱꦨꦴꦮꦤꦶꦢ꧀ꦢꦺꦱꦺꦴ. ꦗꦶꦟ꧀ꦟꦱ꧀ꦱ ꦗꦷꦫꦟꦮꦱꦺꦤ ꦥꦮꦠ꧀ꦠꦤꦴꦏꦴꦫꦺꦴ ꦗꦷꦫꦟꦠꦴꦠꦶ ꦄꦴꦲ ‘‘ꦄꦴꦏꦴꦫꦤꦶꦢ꧀ꦢꦺꦱꦺꦴ’’ꦠꦶ.

ꦏꦴꦭꦴꦠꦶꦏ꧀ꦏꦩꦺ ꦏꦶꦕ꧀ꦕꦤꦶꦢ꧀ꦢꦺꦱꦴꦠꦶ ꦏꦭꦭꦏꦴꦭꦠꦺꦴ ꦥꦨꦸꦠꦶ ꦥꦸꦫꦶꦩꦫꦹꦥꦴꦤꦁ ꦗꦫꦴꦥꦠ꧀ꦠꦏ꧀ꦑꦟꦺ ꦈꦥ꧀ꦥꦗ꧀ꦗꦩꦴꦤꦴꦤꦶ ꦥꦕ꧀ꦖꦶꦩꦫꦹꦥꦴꦤꦶ ꦥꦫꦶꦥꦏ꧀ꦏꦫꦹꦥꦴꦤꦸꦫꦹꦥꦴꦤꦶ ꦥꦫꦶꦟꦠꦥꦫꦶꦟꦠꦴꦤꦶ ꦈꦥ꧀ꦥꦗ꧀ꦗꦤ꧀ꦠꦷꦠꦶ ꦄꦤꦸꦏ꧀ꦏꦩꦺꦤ ꦱꦸꦥꦫꦶꦟꦠꦫꦹꦥꦴꦤꦁ ꦥꦫꦶꦥꦴꦏꦏꦴꦭꦺ ꦈꦥ꧀ꦥꦗ꧀ꦗꦩꦴꦤꦴꦤꦶ ꦑꦟ꧀ꦝꦶꦕ꧀ꦕꦴꦢꦶꦱꦨꦴꦮꦴꦤꦶ ꦈꦥ꧀ꦥꦗ꧀ꦗꦤ꧀ꦠꦷꦠꦶ ‘‘ꦑꦟ꧀ꦝꦶꦕ꧀ꦕ’’ꦤ꧀ꦠꦶꦄꦴꦢꦪꦺꦴ ꦏꦴꦭꦴꦠꦶꦏ꧀ꦏꦩꦺ ꦗꦫꦴꦪ ꦏꦶꦕ꧀ꦕꦤꦶꦢ꧀ꦢꦺꦱꦴ. ꦥꦏꦠꦶꦤꦶꦢ꧀ꦢꦺꦱꦴꦠꦶ ꦦꦭꦮꦶꦥꦕ꧀ꦕꦤꦥꦏꦠꦶꦪꦴ ꦤꦶꦢ꧀ꦢꦺꦱꦴ, ꦗꦫꦴꦪ ꦮꦴ ꦥꦴꦥꦸꦟꦶꦠꦧ꧀ꦧꦦꦭꦩꦺꦮ ꦥꦏꦠꦶ, ꦠꦱ꧀ꦱꦴ ꦤꦶꦢ꧀ꦢꦺꦱꦴ, ꦤ ꦕ ꦑꦟ꧀ꦝꦶꦕ꧀ꦕꦴꦢꦷꦤꦺꦮ ꦗꦫꦴꦠꦶ ꦈꦢꦏꦴꦢꦶꦒꦠꦩꦒ꧀ꦒꦺꦱꦸ ꦠꦶꦟꦫꦸꦏ꧀ꦑꦱꦁꦨꦒ꧀ꦒꦠꦴꦢꦪꦺꦴ ꦮꦶꦪ ꦥꦫꦶꦥꦴꦏꦒꦠꦩꦒ꧀ꦒꦱꦔ꧀ꦑꦴꦠꦺꦱꦸ ꦥꦫꦶꦥꦸꦟ꧀ꦟꦫꦹꦥꦺꦱꦸ ꦭꦧ꧀ꦨꦩꦴꦤꦴ ꦑꦟ꧀ꦝꦶꦕ꧀ꦕꦴꦢꦪꦺꦴ ꦗꦫꦴꦪ ꦒꦠꦩꦒ꧀ꦒꦴꦆꦕ꧀ꦕꦺꦮ ꦮꦺꦢꦶꦠꦧ꧀ꦧꦴ, ꦤ ꦗꦫꦴꦠꦶ.

ꦪꦱ꧀ꦩꦴ ꦗꦫꦁ ꦥꦠ꧀ꦠꦱ꧀ꦱ ꦄꦴꦪꦸ ꦲꦴꦪꦠꦶ, ꦆꦤ꧀ꦢ꧀ꦫꦶꦪꦴꦤꦶ ꦗꦗ꧀ꦗꦫꦴꦤꦶ ꦲꦺꦴꦤ꧀ꦠꦷꦠꦶ ꦄꦴꦪꦸꦲꦴꦤꦴꦢꦪꦺꦴ ꦥꦏꦠꦶꦤꦶꦢ꧀ꦢꦺꦱꦴ, ꦠꦱ꧀ꦩꦴ ꦮꦸꦠ꧀ꦠꦁ ‘‘ꦥꦕ꧀ꦖꦶꦩꦴ ꦢ꧀ꦮꦺ ꦥꦏꦠꦶꦤꦶꦢ꧀ꦢꦺꦱꦴ’’ꦠꦶ. ꦠꦺꦤꦴꦲ ‘‘ꦆꦩꦺꦲꦶ ꦥꦤꦴ’’ꦠꦶꦄꦴꦢꦶ.

ꦄꦮꦶꦚ꧀ꦚꦴꦪꦩꦴꦤꦤ꧀ꦠꦫꦠ꧀ꦠꦴ ꦄꦮꦷꦕꦶꦗꦫꦴ ꦩꦟꦶꦄꦴꦢꦷꦱꦸ ꦩꦤ꧀ꦢꦢꦱꦏꦴꦢꦷꦱꦸ ꦌꦏꦺꦏꦢꦱꦏꦺꦱꦸ ꦕ ꦑꦟꦺ ꦑꦟꦺ ꦗꦶꦟ꧀ꦟꦮꦶꦏꦴꦫꦴꦢꦷꦤꦁ ꦢꦸꦮꦶꦚ꧀ꦚꦺꦪ꧀ꦪꦠ꧀ꦠꦴ. ꦠꦠꦺꦴ ꦄꦚ꧀ꦚꦺꦱꦹꦠꦶ ꦩꦟꦶꦄꦴꦢꦶꦠꦺꦴ ꦄꦚ꧀ꦚꦺꦱꦸ ꦄꦲꦶꦕ꧀ꦖꦠ꧀ꦠꦏꦴꦢꦷꦱꦸ, ꦥꦴꦟꦷꦤꦁ ꦌꦏꦨꦮꦥꦫꦶꦪꦴꦥꦤ꧀ꦤꦺ ꦱꦏꦭꦄꦴꦪꦸꦱ꧀ꦩꦶꦁ ꦒꦲꦶꦠꦠꦫꦸꦟꦪꦸꦮꦴꦗꦫꦴꦏꦴꦭꦺꦱꦸ, ꦌꦏꦢ꧀ꦮꦶꦠ꧀ꦠꦶꦢꦶꦮꦱꦴꦠꦶꦏ꧀ꦏꦩꦺꦱꦸ ꦥꦸꦥ꧀ꦦꦴꦢꦷꦱꦸ ꦮꦴꦠꦶ ꦄꦠ꧀ꦡꦺꦴ. ꦠꦠ꧀ꦡ ꦲꦶ ꦗꦫꦴꦮꦶꦱꦺꦱꦱ꧀ꦱ ꦱꦸꦮꦶꦚ꧀ꦚꦺꦪ꧀ꦪꦠ꧀ꦠꦴ ꦱꦮꦷꦕꦶꦗꦫꦴ ꦤꦴꦩ.

ꦕꦮꦤꦏꦮꦱꦺꦤꦴꦠꦶ ꦕꦮꦤꦏꦴꦤꦁ ꦑꦤ꧀ꦣꦴꦤꦁ ꦮꦱꦺꦤ. ꦌꦏꦕꦠꦸꦥꦚ꧀ꦕꦏ꧀ꦑꦤ꧀ꦣꦴꦪ ꦕꦸꦠꦶꦪꦴ ꦕꦮꦤꦩꦺꦮ ꦕꦮꦤꦠꦴꦠꦶ ꦄꦴꦲ ‘‘ꦨꦴꦮꦮꦕꦤꦺꦤ ꦭꦏ꧀ꦑꦟꦤꦶꦢꦱ꧀ꦱꦤ’’ꦤ꧀ꦠꦶ, ꦥꦴꦭ꦳ꦶꦪꦁ ‘‘ꦕꦸꦠꦷ’’ꦠꦶ ꦮꦸꦠ꧀ꦠꦱ꧀ꦱ ꦩꦫꦟꦱ꧀ꦱ ꦱꦨꦴꦮꦢꦱ꧀ꦱꦤꦤ꧀ꦠꦶ ꦄꦠ꧀ꦡꦺꦴ. ꦨꦔ꧀ꦒꦸꦥ꧀ꦥꦠ꧀ꦠꦶ ꦨꦶꦗ꧀ꦗꦩꦴꦤꦠꦴ. ꦠꦺꦤ ‘‘ꦨꦺꦢꦺꦴ’’ꦠꦶ ꦆꦩꦶꦤꦴ ꦑꦤ꧀ꦣꦴꦤꦁ ꦨꦶꦗ꧀ꦗꦩꦴꦤꦠꦴ ꦨꦺꦢꦱꦩꦔ꧀ꦒꦶꦠꦴ ꦮꦸꦠ꧀ꦠꦴꦠꦶ ꦢꦱ꧀ꦱꦺꦠꦶ. ꦜꦴꦤꦴꦨꦴꦮꦥꦫꦶꦢꦷꦥꦤꦤ꧀ꦠꦶ ꦏꦺꦤꦕꦶꦥꦶ ꦄꦴꦏꦴꦫꦺꦤ ꦄꦮꦛ꧀ꦜꦴꦤꦴꦨꦴꦮꦢꦷꦥꦤꦁ. ꦓꦛꦱ꧀ꦱꦺꦮꦴꦠꦶ ꦲꦶ ꦮꦶꦱꦢꦶꦱꦹꦢꦴꦲꦫꦟꦁ. ꦪꦡꦴ ꦓꦛꦺ ꦨꦶꦤ꧀ꦤꦺ ꦏꦥꦴꦭꦴꦢꦶꦄꦮꦪꦮꦱꦺꦱꦺꦴ ꦭꦧ꧀ꦨꦠꦶ, ꦤ ꦌꦮꦁ ꦕꦸꦠꦶꦏ꧀ꦑꦤ꧀ꦣꦺꦱꦸ ꦨꦔ꧀ꦒꦺꦱꦸ, ꦤ ꦏꦺꦴꦕꦶ ꦮꦶꦱꦺꦱꦺꦴ ꦠꦶꦛ꧀ꦜꦠꦷꦠꦶ ꦢꦱ꧀ꦱꦺꦠꦸꦁ ‘‘ꦄꦤ꧀ꦠꦫꦣꦴꦤ’’ꦤ꧀ꦠꦶ ꦮꦸꦠ꧀ꦠꦁ. ꦩꦕ꧀ꦕꦸꦱꦔ꧀ꦑꦴꦠꦁ ꦩꦫꦟꦤ꧀ꦠꦶ ꦩꦕ꧀ꦕꦸꦱꦚ꧀ꦚꦶꦠꦁ ꦩꦫꦟꦁ. ‘‘ꦏꦴꦭꦩꦫꦟ’’ꦤ꧀ꦠꦶ ꦮꦢꦤ꧀ꦠꦶ. ꦱꦤ꧀ꦠꦴꦤꦱ꧀ꦱ ꦄꦕ꧀ꦕꦤ꧀ꦠꦱꦩꦸꦕ꧀ꦖꦺꦢꦨꦹꦠꦁ ꦑꦷꦟꦴꦱꦮꦴꦤꦁ ꦩꦫꦟꦁ ꦱꦩꦸꦕ꧀ꦖꦺꦢꦩꦫꦟꦁ. ꦄꦴꦢꦶ-ꦱꦢ꧀ꦢꦺꦤ ꦑꦟꦶꦏꦩꦫꦟꦁ ꦱꦔ꧀ꦒꦟ꧀ꦲꦴꦠꦶ. ꦠꦱ꧀ꦱ ꦏꦶꦫꦶꦪꦴꦠꦶ ꦄꦤ꧀ꦠꦏꦱ꧀ꦱ ꦏꦶꦫꦶꦪꦴ, ꦪꦴ ꦭꦺꦴꦏꦺ ꦮꦸꦕ꧀ꦕꦠꦶ ‘‘ꦩꦕ꧀ꦕꦹ’’ꦠꦶ, ꦩꦫꦟꦤ꧀ꦠꦶ ꦄꦠ꧀ꦡꦺꦴ. ꦕꦮꦤꦏꦴꦭꦺꦴ ꦌꦮ ꦮꦴ ꦄꦤꦠꦶꦏ꧀ꦏꦩꦤꦷꦪꦠ꧀ꦠꦴ ꦮꦶꦱꦺꦱꦺꦤ ꦏꦴꦭꦺꦴꦠꦶ ꦮꦸꦠ꧀ꦠꦺꦴꦠꦶ ꦠꦱ꧀ꦱ ꦏꦶꦫꦶꦪꦴ ꦄꦠ꧀ꦡꦠꦺꦴ ꦕꦸꦠꦶꦏ꧀ꦑꦤ꧀ꦣꦴꦤꦁ ꦨꦺꦢꦥꦮꦠ꧀ꦠꦶꦪꦺꦮ. ‘‘ꦩꦕ꧀ꦕꦸ ꦩꦫꦟ’’ꦤ꧀ꦠꦶ ꦮꦴ ꦌꦠ꧀ꦡ ꦱꦩꦴꦱꦁ ꦄꦏꦠ꧀ꦮꦴ ꦪꦺꦴ ‘‘ꦩꦕ꧀ꦕꦹ’’ꦠꦶ ꦮꦸꦕ꧀ꦕꦠꦶ ꦨꦺꦢꦺꦴ, ꦠꦩꦺꦮ ꦩꦫꦟꦁ ‘‘ꦥꦴꦟꦕꦴꦒꦺꦴ’’ꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ.

ꦕꦠꦸꦮꦺꦴꦏꦴꦫꦮꦱꦺꦤꦴꦠꦶ ꦕꦠꦸꦮꦺꦴꦏꦴꦫꦨꦮꦮꦱꦺꦤ. ꦠꦠ꧀ꦡ ꦲꦶ ꦫꦹꦥꦏꦴꦪꦱꦚ꧀ꦚꦶꦠꦺꦴ ꦏꦭ꦳ꦺꦮꦫꦺꦴ ꦤꦠ꧀ꦡꦶ, ꦪꦁ ꦤꦶꦏ꧀ꦑꦶꦥꦺꦪ꧀ꦪ. ꦏꦶꦚ꧀ꦕꦴꦥꦶ ꦌꦏꦮꦺꦴꦏꦴꦫꦨꦮꦺꦥꦶ ꦏꦭ꦳ꦺꦮꦫꦤꦶꦏ꧀ꦑꦺꦥꦺꦴ ꦤꦠ꧀ꦡꦶ, ꦫꦹꦥꦏꦴꦪꦱ꧀ꦱ ꦥꦤ ꦠꦠ꧀ꦡ ꦄꦠ꧀ꦡꦶꦠꦴꦩꦠ꧀ꦠꦁ ꦒꦲꦺꦠ꧀ꦮꦴ ‘‘ꦌꦏꦮꦺꦴꦏꦴꦫꦮꦱꦺꦤ ꦏꦭ꦳ꦺꦮꦫꦱ꧀ꦱ ꦤꦶꦏ꧀ꦑꦺꦥꦺꦴ’’ꦠꦶ ꦮꦸꦠ꧀ꦠꦺꦴ. ꦕꦠꦸꦮꦺꦴꦏꦴꦫꦮꦱꦺꦤ ꦕꦴꦠꦶ ꦕ-ꦱꦢ꧀ꦢꦺꦤ ‘‘ꦱꦺꦱꦢ꧀ꦮꦪꦮꦱꦺꦤ ꦑꦤ꧀ꦣꦴꦤꦁ ꦨꦺꦢꦺꦴ’’ꦠꦶ ꦆꦩꦩꦠ꧀ꦡꦁ ꦢꦱ꧀ꦱꦺꦠꦶ ꦱꦧ꧀ꦧꦠ꧀ꦡꦺꦮ ꦑꦤ꧀ꦣꦨꦺꦢꦱꦧ꧀ꦨꦴꦮꦠꦺꦴ. ꦱꦺꦱꦢ꧀ꦮꦪꦮꦱꦺꦤꦴꦠꦶ ꦱꦺꦱꦨꦮꦢ꧀ꦮꦪꦮꦱꦺꦤꦺꦮ ꦏꦭ꦳ꦺꦮꦫꦱ꧀ꦱ ꦤꦶꦏ꧀ꦑꦺꦥꦺꦴ. ꦪꦢꦶꦥꦶ ꦌꦏꦮꦺꦴꦏꦴꦫꦨꦮꦺ ꦫꦹꦥꦏꦴꦪꦺꦴ ꦮꦶꦗ꧀ꦗꦠꦶ, ꦏꦭ꦳ꦺꦮꦫꦤꦶꦏ꧀ꦑꦺꦥꦺꦴ ꦥꦤ ꦤꦠ꧀ꦡꦷꦠꦶ ‘‘ꦏꦭ꦳ꦺꦮꦫꦱ꧀ꦱ ꦱꦧ꧀ꦨꦴꦮꦠꦺꦴ’’ꦆꦕ꧀ꦕꦺꦮ ꦮꦸꦠ꧀ꦠꦁ. ꦪꦱ꧀ꦩꦴ ꦩꦤꦸꦱ꧀ꦱꦴꦢꦷꦱꦸ ꦏꦭ꦳ꦺꦮꦫꦤꦶꦏ꧀ꦑꦺꦥꦺꦴ ꦄꦠ꧀ꦡꦶ, ꦠꦱ꧀ꦩꦴ ꦩꦤꦸꦱ꧀ꦱꦴꦢꦷꦱꦸ ꦏꦭ꦳ꦺꦮꦫꦱ꧀ꦱ ꦤꦶꦏ꧀ꦑꦺꦥꦺꦴꦠꦶ ꦪꦺꦴꦗꦤꦴ. ꦏꦭ꦳ꦺꦮꦫꦁ ꦤꦶꦏ꧀ꦑꦶꦥꦷꦪꦠꦶ ꦌꦠꦺꦤꦴꦠꦶ ꦩꦫꦟꦁ ꦏꦭ꦳ꦺꦮꦫꦱ꧀ꦱ ꦤꦶꦏ꧀ꦑꦺꦥꦺꦴ. ꦌꦏꦠꦺꦴ ꦏꦠ꧀ꦮꦴꦠꦶ ꦌꦏꦗ꧀ꦙꦁ ꦏꦠ꧀ꦮꦴ, ꦌꦏꦗ꧀ꦙꦁ ꦒꦲꦟꦩꦠ꧀ꦠꦺꦤ.

ꦗꦴꦪꦤꦛ꧀ꦜꦺꦤꦴꦠꦶꦄꦴꦢꦶ ꦄꦴꦪꦠꦤꦮꦱꦺꦤ ꦪꦺꦴꦤꦶꦮꦱꦺꦤ ꦕ ꦢ꧀ꦮꦷꦲꦶ ꦥꦢꦺꦲꦶ ꦱꦧ꧀ꦧꦱꦠ꧀ꦠꦺ ꦥꦫꦶꦪꦴꦢꦶꦪꦶꦠ꧀ꦮꦴ ꦥꦫꦶꦪꦴꦢꦶꦪꦶꦠ꧀ꦮꦴ ꦗꦴꦠꦶꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ. ꦏꦺꦕꦶ ꦥꦤ ‘‘ꦏꦠ꧀ꦠꦸꦨꦴꦮꦮꦱꦺꦤ ꦥꦢꦢ꧀ꦮꦪꦁ ꦮꦸꦠ꧀ꦠ’’ꦤ꧀ꦠꦶ ꦮꦢꦤ꧀ꦠꦶ. ‘‘ꦠꦺꦱꦁ ꦠꦺꦱꦁ ꦱꦠ꧀ꦠꦴꦤꦁ ꦗꦴꦠꦶ ꦱꦚ꧀ꦗꦴꦠꦷ’’ꦠꦶ ꦥꦤ ꦏꦠ꧀ꦠꦫꦶ ꦱꦴꦩꦶꦤꦶꦢ꧀ꦢꦺꦱꦱ꧀ꦱ ꦏꦠꦠ꧀ꦠꦴ ꦈꦨꦪꦠ꧀ꦡꦴꦥꦶ ꦨꦴꦮꦤꦶꦢ꧀ꦢꦺꦱꦺꦴ. ꦱꦩ꧀ꦥꦸꦟ꧀ꦟꦴ ꦗꦴꦠꦶ ꦱꦚ꧀ꦗꦴꦠꦶ. ꦥꦴꦏꦛꦴ ꦤꦶꦧ꧀ꦧꦠ꧀ꦠꦶ ꦄꦨꦶꦤꦶꦧ꧀ꦧꦠ꧀ꦠꦶ. ꦠꦺꦱꦁ ꦠꦺꦱꦁ ꦱꦠ꧀ꦠꦴꦤꦁ…ꦥꦺ… ꦄꦨꦶꦤꦶꦧ꧀ꦧꦠ꧀ꦠꦷꦠꦶ ꦱꦠ꧀ꦠꦮꦱꦺꦤ ꦥꦮꦠ꧀ꦠꦠ꧀ꦠꦴ ꦮꦺꦴꦲꦴꦫꦢꦺꦱꦤꦴ.

ꦠꦠ꧀ꦫ ꦠꦠ꧀ꦫꦴꦠꦶ ꦌꦏꦕꦠꦸꦮꦺꦴꦏꦴꦫꦨꦮꦺꦱꦸ ꦢ꧀ꦮꦶꦤ꧀ꦤꦁ ꦱꦺꦱꦫꦹꦥꦣꦴꦠꦸꦪꦁ ꦥꦛꦶꦱꦤ꧀ꦣꦶꦏ꧀ꦑꦟꦺ ꦈꦥ꧀ꦥꦗ꧀ꦗꦩꦴꦤꦴꦤꦁ ꦥꦚ꧀ꦕꦤ꧀ꦤꦁ, ꦏꦴꦩꦣꦴꦠꦸꦪꦁ ꦮꦶꦏꦭꦴꦮꦶꦏꦭꦶꦤ꧀ꦢ꧀ꦫꦶꦪꦴꦤꦁ ꦮꦱꦺꦤ ꦱꦠ꧀ꦠꦤ꧀ꦤꦁ ꦤꦮꦤ꧀ꦤꦁ ꦢꦱꦤ꧀ꦤꦁ ꦥꦸꦤ ꦢꦱꦤ꧀ꦤꦁ ꦌꦏꦴꦢꦱꦤ꧀ꦤꦚ꧀ꦕ ꦄꦴꦪꦠꦤꦴꦤꦁ ꦮꦱꦺꦤ ꦱꦔ꧀ꦒꦲꦺꦴ ꦮꦺꦢꦶꦠꦧ꧀ꦧꦺꦴ. ꦱꦤ꧀ꦠꦠꦶꦪꦤ꧀ꦠꦶ ꦪꦺꦤ ꦏꦩ꧀ꦩꦸꦤꦴ ꦑꦤ꧀ꦣꦴꦤꦁ ꦥꦴꦠꦸꦨꦴꦮꦺꦴ, ꦠꦺꦤ ꦄꦨꦶꦱꦔ꧀ꦑꦠꦱꦤ꧀ꦠꦠꦶꦪꦁ. ꦠꦚ꧀ꦕ ꦑꦺꦴ ꦥꦛꦶꦱꦤ꧀ꦣꦶꦏ꧀ꦑꦟꦮꦱꦺꦤ ꦮꦺꦢꦶꦠꦧ꧀ꦧꦁ.

ꦏꦩ꧀ꦩꦁꦪꦺꦮ ꦏꦩ꧀ꦩꦨꦮꦺꦴ ‘‘ꦨꦮꦠꦶ ꦌꦠꦱ꧀ꦩꦴ ꦈꦥꦥꦠ꧀ꦠꦶꦨꦮꦺꦴ’’ꦠꦶ ꦏꦠ꧀ꦮꦴ. ꦏꦩ꧀ꦩꦺꦤ ꦤꦶꦪ꧀ꦪꦴꦢꦶꦠꦄꦠ꧀ꦠꦨꦴꦮꦸꦥꦥꦠ꧀ꦠꦶꦮꦱꦺꦤ ꦨꦮꦠꦷꦠꦶ ꦨꦮꦺꦴ, ꦠꦡꦴ ꦠꦡꦴ ꦤꦶꦧ꧀ꦧꦠ꧀ꦠꦮꦶꦥꦴꦏꦺꦴ ꦏꦛꦠ꧀ꦠꦴꦫꦹꦥꦚ꧀ꦕ. ꦄꦛ꧀ꦜꦏꦡꦴꦪꦁ ꦥꦤ ‘‘ꦨꦮꦠꦷꦠꦶ ꦏꦠ꧀ꦮꦴ ꦨꦮꦺꦴ’’ꦠꦶ ꦈꦥꦥꦠ꧀ꦠꦶꦨꦮꦱ꧀ꦱ ꦮꦏ꧀ꦑꦩꦴꦤꦠ꧀ꦠꦴ ‘‘ꦏꦩ꧀ꦩꦁ ꦦꦭꦮꦺꦴꦲꦴꦫꦺꦤ ꦨꦮꦺꦴꦠꦶ ꦮꦸꦠ꧀ꦠ’’ꦤ꧀ꦠꦶ ꦏꦡꦶꦠꦁ.

ꦈꦥꦴꦢꦶꦪꦤ꧀ꦠꦶ ꦱꦠ꧀ꦠꦴ ꦢꦭ꦳꧀ꦲꦒ꧀ꦒꦴꦲꦁ ꦒꦟ꧀ꦲꦤ꧀ꦠꦶ ꦌꦠꦺꦤ ꦏꦶꦭꦺꦱꦏꦴꦩꦺꦤ. ꦤ ꦏꦺꦮꦭꦁ ꦆꦣ ꦏꦫꦟꦱꦴꦣꦤꦩꦺꦮ, ꦄꦡ ꦑꦺꦴ ꦏꦠ꧀ꦠꦸꦱꦴꦣꦤꦩ꧀ꦥꦶ ꦭꦧ꧀ꦨꦠꦷꦠꦶ ꦮꦸꦠ꧀ꦠꦁ ‘‘ꦱꦪꦁ ꦮꦴ’’ꦠꦶ. ꦠꦤ꧀ꦠꦶ ꦮꦠ꧀ꦡꦸꦏꦴꦩꦁ. ꦏꦴꦩꦺꦴ ꦕ ꦱꦺꦴ ꦏꦴꦩꦤꦛ꧀ꦜꦺꦤ, ꦈꦥꦴꦢꦴꦤꦚ꧀ꦕ ꦨꦸꦱꦩꦴꦢꦴꦤꦛ꧀ꦜꦺꦤꦴꦠꦶ ꦏꦴꦩꦸꦥꦴꦢꦴꦤꦁ. ꦌꦠꦤ꧀ꦠꦶ ꦏꦴꦩꦸꦥꦴꦢꦴꦤꦥꦢꦁ. ꦥꦸꦤ ꦌꦠꦤ꧀ꦠꦶ ꦏꦴꦩꦸꦥꦴꦢꦴꦤꦱꦔ꧀ꦑꦴꦠꦁ.

ꦱꦱ꧀ꦱꦠꦺꦴ ꦄꦠ꧀ꦠꦴꦠꦶ ꦆꦢꦁ ꦥꦸꦫꦶꦩꦢꦶꦛ꧀ꦜꦶꦁ ꦈꦥꦴꦢꦶꦪꦩꦴꦤꦁ ꦈꦠ꧀ꦠꦫꦢꦶꦛ꧀ꦜꦶꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ. ꦪꦡꦴ ꦌꦱꦴ ꦢꦶꦛ꧀ꦜꦶ ꦢꦭ꦳꧀ꦲꦷꦏꦫꦟꦮꦱꦺꦤ ꦥꦸꦫꦶꦩꦁ ꦈꦠ꧀ꦠꦫꦴ ꦈꦥꦴꦢꦶꦪꦠꦶ, ꦌꦮꦁ ‘‘ꦤꦠ꧀ꦡꦶ ꦢꦶꦤ꧀ꦤ’’ꦤ꧀ꦠꦶꦄꦴꦢꦶꦏꦴꦥꦷꦠꦶ. ꦄꦠ꧀ꦠꦒ꧀ꦒꦲꦟꦁ ꦥꦤ ‘‘ꦄꦠ꧀ꦠꦮꦴꦢꦸꦥꦴꦢꦴꦤ’’ꦤ꧀ꦠꦶ ꦆꦢꦁ ꦤ ꦢꦶꦛ꧀ꦜꦸꦥꦴꦢꦴꦤꦢꦱ꧀ꦱꦤꦤ꧀ꦠꦶ ꦢꦛ꧀ꦜꦧ꧀ꦧꦁ. ꦭꦺꦴꦏꦺꦴ ꦕꦴꦠꦶ ꦄꦠ꧀ꦠꦒ꧀ꦒꦲꦟꦮꦶꦤꦶꦩꦸꦠ꧀ꦠꦒ꧀ꦒꦲꦟꦁ ꦢꦶꦛ꧀ꦜꦸꦥꦴꦢꦴꦤꦨꦹꦠꦁ ꦆꦣ ꦥꦸꦫꦶꦩꦢꦶꦛ꧀ꦜꦶꦈꦠ꧀ꦠꦫꦢꦶꦛ꧀ꦜꦶꦮꦕꦤꦺꦲꦶ ꦮꦸꦠ꧀ꦠꦤ꧀ꦠꦶ ꦢꦛ꧀ꦜꦧ꧀ꦧꦁ.

ꦪꦺꦤ ꦩꦶꦕ꧀ꦖꦴꦨꦶꦤꦶꦮꦺꦱꦺꦤ ꦒꦺꦴꦱꦷꦭꦒꦺꦴꦮꦠꦴꦢꦶꦁ ꦱꦩꦴꦢꦶꦪꦠꦶ ꦕꦺꦮ ꦄꦤꦸꦠꦶꦛ꧀ꦜꦠꦶ ꦕ, ꦱꦺꦴ ꦒꦺꦴꦱꦷꦭꦒꦺꦴꦮꦠꦴꦢꦷꦤꦷꦠꦶ ꦄꦣꦶꦥ꧀ꦥꦺꦠꦴꦤꦶ. ꦠꦺꦤꦴꦲ ‘‘ꦒꦺꦴꦱꦷꦭ…ꦥꦺ… ꦱꦪꦩꦺꦮ ꦈꦥꦴꦢꦴꦤꦴꦤꦷ’’ꦠꦶ. ꦄꦨꦶꦤꦶꦮꦺꦱꦠꦺꦴꦠꦶ ꦄꦨꦶꦤꦶꦮꦺꦱꦤꦠꦺꦴ.

ꦄꦠ꧀ꦠꦮꦴꦢꦸꦥꦴꦢꦴꦤꦤ꧀ꦠꦶ ‘‘ꦄꦠ꧀ꦠꦴ’’ꦠꦶ ꦮꦴꦢꦱ꧀ꦱ ꦥꦚ꧀ꦚꦴꦥꦤꦱ꧀ꦱ ꦒꦲꦟꦱ꧀ꦱ ꦏꦴꦫꦟꦨꦹꦠꦴ ꦢꦶꦛ꧀ꦜꦷꦠꦶ ꦄꦠ꧀ꦡꦺꦴ. ꦄꦠ꧀ꦠꦮꦴꦢꦩꦠ꧀ꦠꦩꦺꦮꦴꦠꦶ ꦄꦠ꧀ꦠꦱ꧀ꦱ ꦄꦨꦴꦮꦴ ‘‘ꦄꦠ꧀ꦠꦴ’’ꦠꦶ ꦆꦢꦁ ꦮꦕꦤꦩꦠ꧀ꦠꦩꦺꦮ. ꦈꦥꦴꦢꦶꦪꦤ꧀ꦠꦶ ꦢꦭ꦳꧀ꦲꦁ ꦒꦟ꧀ꦲꦤ꧀ꦠꦶ.

ꦕꦏ꧀ꦑꦸꦢ꧀ꦮꦴꦫꦴꦢꦷꦱꦸ ꦥꦮꦠ꧀ꦠꦴꦪꦴꦠꦶ ꦆꦢꦁ ꦠꦟ꧀ꦲꦴꦪ ꦫꦹꦥꦠꦟ꧀ꦲꦴꦢꦶꦨꦴꦮꦱ꧀ꦱ ꦏꦴꦫꦟꦮꦕꦤꦁ ꦖꦢ꧀ꦮꦴꦫꦴꦫꦩ꧀ꦩꦟꦶꦏꦣꦩ꧀ꦩꦴꦤꦁ ꦥꦛꦶꦤꦶꦪꦠꦴꦫꦩ꧀ꦩꦟꦠ꧀ꦠꦴ. ꦗꦮꦤꦮꦷꦡꦶꦪꦴ ꦥꦮꦠ꧀ꦠꦴꦪꦴꦠꦶ ꦆꦢꦁ ꦠꦱ꧀ꦱꦴ ꦥꦮꦠ꧀ꦠꦶꦛ꧀ꦜꦴꦤꦢꦱ꧀ꦱꦤꦁ. ꦱꦨꦴꦮꦺꦤꦺꦮ ꦈꦛ꧀ꦜꦴꦠꦸꦁ ꦄꦱꦏ꧀ꦏꦺꦴꦤ꧀ꦠꦱ꧀ꦱ ꦮꦺꦭ꦳ꦸ ꦮꦶꦪ ꦤꦶꦱ꧀ꦱꦪꦺꦴ ꦄꦲꦸꦠ꧀ꦮꦴ ꦎꦭꦸꦩ꧀ꦨꦏꦨꦴꦮꦺꦤ ꦨꦴꦮꦺꦴ ꦈꦥꦴꦢꦴꦤꦱ꧀ꦱ ꦥꦕ꧀ꦕꦪꦨꦴꦮꦠꦺꦴ ꦄꦴꦫꦩ꧀ꦩꦟꦩ꧀ꦥꦶ ꦠꦁꦱꦢꦶꦱꦁ ꦮꦸꦠ꧀ꦠꦁ. ꦫꦹꦥꦺꦠꦶ ꦮꦶꦱꦪꦺ ꦨꦸꦩ꧀ꦩꦁ. ꦱꦴ ꦠꦶꦮꦶꦣꦴ ꦲꦺꦴꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦏꦴꦩꦠꦟ꧀ꦲꦴ ꦏꦴꦩꦱ꧀ꦱꦴꦢꦨꦴꦮꦺꦤ ꦥꦮꦠ꧀ꦠꦶꦪꦴ. ꦌꦮꦁ ꦄꦱ꧀ꦱꦴꦢꦺꦤ꧀ꦠꦷꦠꦶ ꦱꦱ꧀ꦱꦠꦢꦶꦛ꧀ꦜꦶꦪꦴ ꦱꦲꦗꦴꦠꦤꦶꦱ꧀ꦱꦪꦱꦩ꧀ꦥꦪꦸꦠ꧀ꦠꦄꦠ꧀ꦡꦶꦄꦮꦶꦒꦠꦴꦢꦶꦥꦕ꧀ꦕꦪꦨꦹꦠꦴꦪ ꦱꦁꦱꦛ꧀ꦜꦠ꧀ꦠꦴ ꦤꦶꦕ꧀ꦕꦣꦸꦮꦱꦱ꧀ꦱꦠꦴꦨꦶꦤꦶꦮꦺꦱꦩꦸꦑꦺꦤ ꦄꦱ꧀ꦱꦴꦢꦺꦤ꧀ꦠꦷ. ꦨꦮꦱꦲꦒꦠꦴ ꦠꦟ꧀ꦲꦴ ꦨꦮꦠꦟ꧀ꦲꦴ. ꦨꦮꦠꦶ ꦠꦶꦛ꧀ꦜꦠꦶ ꦱꦧ꧀ꦧꦏꦴꦭꦤ꧀ꦠꦶ ꦲꦶ ꦨꦮꦢꦶꦛ꧀ꦜꦶ ꦨꦮꦺꦴ ꦈꦠ꧀ꦠꦫꦥꦢꦭꦺꦴꦥꦺꦤ, ꦨꦮꦱ꧀ꦱꦴꦢꦮꦱꦺꦤ ꦥꦮꦠ꧀ꦠꦶꦪꦴ ꦕ. ꦆꦩꦶꦤꦴ ꦤꦪꦺꦤ ꦮꦶꦨꦮꦠꦟ꧀ꦲꦴꦠꦶ ꦌꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦮꦶꦨꦮꦠꦶ ꦈꦕ꧀ꦖꦶꦗ꧀ꦗꦠꦶ ꦮꦶꦤꦱ꧀ꦱꦠꦷꦠꦶ ꦌꦮꦁ ꦥꦮꦠ꧀ꦠꦴ ꦢꦶꦛ꧀ꦜꦶ ꦮꦶꦨꦮꦺꦴ ꦈꦠ꧀ꦠꦫꦥꦢꦭꦺꦴꦥꦺꦤ. ꦌꦮꦁ ꦠꦴꦤꦶ ꦄꦛ꧀ꦜꦴꦫꦱꦴꦠꦶ ꦪꦴ ꦖ ꦏꦴꦩꦠꦟ꧀ꦲꦴ, ꦖ ꦨꦮꦠꦟ꧀ꦲꦴ, ꦖ ꦮꦶꦨꦮꦠꦟ꧀ꦲꦴ ꦮꦸꦠ꧀ꦠꦴ, ꦌꦠꦴꦤꦶ ꦄꦛ꧀ꦜꦴꦫꦱ ꦠꦟ꧀ꦲꦴꦮꦶꦕꦫꦶꦠꦴꦤꦶ ꦠꦟ꧀ꦲꦴꦥꦕ꧀ꦕꦪꦺꦴ. ꦄꦗ꧀ꦙꦠ꧀ꦠꦤ꧀ꦠꦶ ꦱꦏꦱꦤ꧀ꦠꦠꦶꦪꦁ. ꦧꦲꦶꦢ꧀ꦣꦴꦠꦶ ꦠꦠꦺꦴ ꦧꦲꦶꦢ꧀ꦣꦴ. ꦄꦠꦷꦠꦴꦫꦩ꧀ꦩꦟꦴꦤꦶ ꦮꦴ ꦲꦺꦴꦤ꧀ꦠꦸ ꦆꦠꦫꦴꦫꦩ꧀ꦩꦟꦴꦤꦶ ꦮꦴ, ꦱꦪꦁ ꦥꦤ ꦄꦠꦷꦠꦴꦤꦶ ꦖꦠ꧀ꦠꦶꦁꦱ ꦠꦟ꧀ꦲꦴꦮꦶꦕꦫꦶꦠꦴꦤꦶ. ꦱꦺꦱꦥꦢꦢ꧀ꦮꦪꦺꦥꦶ ꦌꦱꦺꦮ ꦤꦪꦺꦴ. ‘‘ꦄꦛ꧀ꦜꦱꦠꦁ ꦠꦟ꧀ꦲꦴꦮꦶꦕꦫꦶꦠꦴꦤꦷ’’ꦠꦶꦄꦴꦢꦶꦤꦴ ꦱꦩ꧀ꦧꦤ꧀ꦣꦺꦴ. ꦆꦢꦴꦤꦶ ꦄꦥꦫꦺꦤꦥꦶ ꦥꦏꦴꦫꦺꦤ ꦄꦛ꧀ꦜꦱꦠꦁ ꦠꦟ꧀ꦲꦴꦮꦶꦕꦫꦶꦠꦴꦤꦶ ꦢꦱ꧀ꦱꦺꦠꦸꦁ ‘‘ꦄꦗ꧀ꦙꦠ꧀ꦠꦶꦏꦱ꧀ꦱꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦄꦗ꧀ꦙꦠ꧀ꦠꦶꦏꦱ꧀ꦱꦴꦠꦶ ꦄꦗ꧀ꦙꦠ꧀ꦠꦶꦏꦑꦤ꧀ꦣꦥꦚ꧀ꦕꦏꦁ. ꦈꦥꦪꦺꦴꦒꦠ꧀ꦡꦺ ꦲꦶ ꦆꦢꦁ ꦱꦴꦩꦶꦮꦕꦤꦁ. ꦈꦥꦴꦢꦴꦪꦴꦠꦶ ꦒꦲꦺꦠ꧀ꦮꦴ. ꦄꦱ꧀ꦩꦷꦠꦶ ꦲꦺꦴꦠꦷꦠꦶ ꦪꦢꦺꦠꦁ ꦄꦗ꧀ꦙꦠ꧀ꦠꦶꦏꦁ ꦑꦤ꧀ꦣꦥꦚ꧀ꦕꦏꦁ ꦈꦥꦴꦢꦴꦪ ꦠꦟ꧀ꦲꦴꦩꦴꦤꦢꦶꦛ꧀ꦜꦶꦮꦱꦺꦤ ꦱꦩꦸꦢꦴꦪꦒ꧀ꦒꦴꦲꦠꦺꦴ ꦄꦱ꧀ꦩꦷꦠꦶ ꦒꦴꦲꦺꦴ ꦲꦺꦴꦠꦶ, ꦠꦱ꧀ꦩꦶꦁ ꦱꦠꦷꦠꦶ ꦄꦠ꧀ꦡꦺꦴ. ꦆꦣ ꦥꦤ ꦫꦹꦥꦴꦢꦶꦄꦴꦫꦩ꧀ꦩꦟꦮꦱꦺꦤ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦆꦠ꧀ꦡꦩꦱ꧀ꦩꦷꦠꦶ ꦲꦺꦴꦠꦷꦠꦶ ꦑꦠ꧀ꦠꦶꦪꦴꦢꦷꦱꦸ ‘‘ꦆꦢꦁꦥꦏꦴꦫꦺꦴ ꦄꦲ’’ꦤ꧀ꦠꦶ ꦌꦮꦁ ꦠꦟ꧀ꦲꦴꦩꦴꦤꦢꦶꦛ꧀ꦜꦶꦮꦱꦺꦤ ꦲꦺꦴꦠꦷꦠꦶ ꦄꦠ꧀ꦡꦺꦴ. ꦆꦢꦁ ꦠꦴꦮ ꦄꦤꦸꦥꦤꦶꦣꦴꦪ ꦒꦲꦟꦁ.

ꦌꦮꦩꦴꦢꦷꦤꦷꦠꦶ ꦄꦴꦢꦶ-ꦱꦢ꧀ꦢꦺꦤ ‘‘ꦌꦮꦩꦱ꧀ꦩꦶ, ꦄꦚ꧀ꦚꦡꦴꦱ꧀ꦩꦶ, ꦄꦲꦁ ꦨꦮꦶꦱ꧀ꦱꦁ, ꦆꦠ꧀ꦡꦁ ꦨꦮꦶꦱ꧀ꦱꦁ, ꦌꦮꦁ ꦨꦮꦶꦱ꧀ꦱꦁ, ꦄꦚ꧀ꦚꦡꦴ ꦨꦮꦶꦱ꧀ꦱꦁ, ꦄꦱꦱ꧀ꦩꦶ, ꦱꦠꦱ꧀ꦩꦶ, ꦄꦲꦁ ꦱꦶꦪꦁ, ꦆꦠ꧀ꦡꦁ ꦱꦶꦪꦁ, ꦌꦮꦁ ꦱꦶꦪꦁ, ꦄꦚ꧀ꦚꦡꦴ ꦱꦶꦪꦁ, ꦄꦥꦴꦲꦁ ꦱꦶꦪꦁ, ꦄꦥꦴꦲꦁ ꦆꦠ꧀ꦡꦁ ꦱꦶꦪꦁ, ꦄꦥꦴꦲꦁ ꦌꦮꦁ ꦱꦶꦪꦁ, ꦄꦥꦴꦲꦁ ꦄꦚ꧀ꦚꦡꦴ ꦱꦶꦪ’’ꦤ꧀ꦠꦶ ꦌꦠꦺꦱꦁ ꦱꦔ꧀ꦒꦲꦺꦴ. ꦈꦥꦤꦶꦣꦴꦪ ꦒꦲꦟꦩ꧀ꦥꦶ ꦢꦸꦮꦶꦣꦁ ꦱꦩꦠꦺꦴ ꦄꦱꦩꦠꦺꦴ ꦮꦴꦠꦶ ꦠꦁ ꦢꦱ꧀ꦱꦺꦠꦸꦁ ‘‘ꦌꦮꦩꦱ꧀ꦩꦶ, ꦄꦚ꧀ꦚꦡꦴꦱ꧀ꦩꦷ’’ꦠꦶ ꦕ ꦮꦸꦠ꧀ꦠꦁ. ꦠꦠ꧀ꦡ ꦌꦮꦩꦱ꧀ꦩꦷꦠꦶ ꦆꦢꦁ ꦱꦩꦠꦺꦴ ꦈꦥꦤꦶꦣꦴꦪ ꦒꦲꦟꦁ, ꦪꦡꦴ ꦄꦪꦁ ꦑꦠ꧀ꦠꦶꦪꦺꦴ, ꦌꦮꦁ ꦄꦲꦩꦱ꧀ꦩꦷꦠꦶ ꦄꦠ꧀ꦡꦺꦴ. ꦄꦚ꧀ꦚꦡꦴꦱ꧀ꦩꦷꦠꦶ ꦆꦢꦁ ꦥꦤ ꦄꦱꦩꦠꦺꦴ ꦒꦲꦟꦁ, ꦪꦡꦴꦪꦁ ꦑꦠ꧀ꦠꦶꦪꦺꦴ ꦠꦠꦺꦴ ꦄꦚ꧀ꦚꦡꦴ ꦄꦲꦁ ꦲꦷꦤꦺꦴ ꦮꦴ ꦄꦣꦶꦏꦺꦴ ꦮꦴꦠꦶ ꦄꦠ꧀ꦡꦺꦴ. ꦆꦩꦴꦤꦶ ꦠꦴꦮ ꦥꦕ꧀ꦕꦸꦥ꧀ꦥꦤ꧀ꦤꦮꦱꦺꦤ ꦕꦠ꧀ꦠꦴꦫꦶ ꦠꦟ꧀ꦲꦴꦮꦶꦕꦫꦶꦠꦴꦤꦶ. ꦨꦮꦶꦱ꧀ꦱꦤ꧀ꦠꦶꦄꦴꦢꦷꦤꦶ ꦥꦤ ꦕꦠ꧀ꦠꦴꦫꦶ ꦄꦤꦴꦒꦠꦮꦱꦺꦤ ꦮꦸꦠ꧀ꦠꦴꦤꦶ, ꦠꦺꦱꦁ ꦥꦸꦫꦶꦩꦕꦠꦸꦏ꧀ꦏꦺ ꦮꦸꦠ꧀ꦠꦤꦪꦺꦤꦺꦮ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦄꦱꦱ꧀ꦩꦷꦠꦶ ꦱꦱ꧀ꦱꦠꦺꦴ ꦄꦱ꧀ꦩꦶ, ꦤꦶꦕ꧀ꦕꦱ꧀ꦱꦺꦠꦁ ꦄꦣꦶꦮꦕꦤꦁ. ꦱꦠꦱ꧀ꦩꦷꦠꦶ ꦄꦱꦱ꧀ꦱꦠꦺꦴ ꦄꦱ꧀ꦩꦶ, ꦄꦤꦶꦕ꧀ꦕꦱ꧀ꦱꦺꦠꦁ ꦄꦣꦶꦮꦕꦤꦁ. ꦆꦠꦶ ꦆꦩꦴꦤꦶ ꦢ꧀ꦮꦺ ꦱꦱ꧀ꦱꦠꦸꦕ꧀ꦖꦺꦢꦮꦱꦺꦤ ꦮꦸꦠ꧀ꦠꦴꦤꦶ. ꦆꦠꦺꦴ ꦥꦫꦴꦤꦶ ꦱꦶꦪꦤ꧀ꦠꦶꦄꦴꦢꦷꦤꦶ ꦕꦠ꧀ꦠꦴꦫꦶ ꦱꦁꦱꦪꦥꦫꦶꦮꦶꦠꦏ꧀ꦏꦮꦱꦺꦤ ꦮꦸꦠ꧀ꦠꦴꦤꦶ, ꦠꦴꦤꦶ ꦥꦸꦫꦶꦩꦕꦠꦸꦏ꧀ꦏꦺ ꦮꦸꦠ꧀ꦠꦤꦪꦺꦤ ꦄꦠ꧀ꦡꦠꦺꦴ ꦮꦺꦢꦶꦠꦧ꧀ꦧꦴꦤꦶ. ꦄꦥꦴꦲꦁ ꦱꦶꦪꦤ꧀ꦠꦶꦄꦴꦢꦷꦤꦶ ꦥꦤ ꦕꦠ꧀ꦠꦴꦫꦶ ‘‘ꦄꦥꦶ ꦤꦴꦩꦴꦲꦁ ꦨꦮꦺꦪ꧀ꦪ’’ꦤ꧀ꦠꦶ ꦌꦮꦁ ꦥꦠ꧀ꦡꦤꦴꦏꦥ꧀ꦥꦤꦮꦱꦺꦤ ꦮꦸꦠ꧀ꦠꦴꦤꦶ, ꦠꦴꦤꦶꦥꦶ ꦥꦸꦫꦶꦩꦕꦠꦸꦏ꧀ꦏꦺ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦴꦤꦶ. ꦌꦮꦩꦺꦠꦺꦱꦸ –

ꦢ꧀ꦮꦺ ꦢꦶꦛ꧀ꦜꦶꦱꦷꦱꦴ ꦕꦠ꧀ꦠꦴꦫꦺꦴ, ꦱꦸꦢ꧀ꦣꦱꦷꦱꦴ ꦱꦷꦱꦩꦹꦭꦏꦴ;

ꦠꦪꦺꦴ ꦠꦪꦺꦴꦠꦶ ꦌꦠꦴꦤꦶ, ꦄꦛ꧀ꦜꦴꦫꦱ ꦮꦶꦨꦴꦮꦪꦺ.

ꦌꦠꦺ ꦲꦶ ꦱꦱ꧀ꦱꦠꦸꦕ꧀ꦖꦺꦢꦮꦱꦺꦤ ꦮꦸꦠ꧀ꦠꦴ ꦢ꧀ꦮꦺ ꦢꦶꦛ꧀ꦜꦶꦱꦷꦱꦴ ꦤꦴꦩ, ‘‘ꦄꦱ꧀ꦩꦶ, ꦨꦮꦶꦱ꧀ꦱꦁ ꦱꦶꦪꦁ, ꦄꦥꦴꦲꦁ ꦱꦶꦪ’’ꦤ꧀ꦠꦶ ꦌꦠꦺ ꦕꦠ꧀ꦠꦴꦫꦺꦴ ꦱꦸꦢ꧀ꦣꦱꦷꦱꦴ ꦤꦴꦩ, ‘‘ꦆꦠ꧀ꦡꦩꦱ꧀ꦩꦷ’’ꦠꦶꦄꦴꦢꦪꦺꦴ ꦠꦪꦺꦴ ꦠꦪꦺꦴꦠꦶ ꦢ꧀ꦮꦴꦢꦱ ꦱꦷꦱꦩꦹꦭꦏꦴ ꦤꦴꦩꦴꦠꦶ ꦮꦺꦢꦶꦠꦧ꧀ꦧꦁ. ꦆꦣ ꦥꦴꦭ꦳ꦶꦪꦁ ꦫꦹꦥꦴꦫꦩ꧀ꦩꦟꦴꦢꦶꦮꦱꦺꦤ ꦠꦟ꧀ꦲꦴ ꦄꦴꦒꦠꦴꦠꦶ ꦄꦴꦲ ‘‘ꦄꦗ꧀ꦙꦠ꧀ꦠꦶꦏꦫꦹꦥꦴꦢꦶꦤꦶꦱ꧀ꦱꦶꦠꦴꦤꦷ’’ꦠꦶ. ꦄꦛ꧀ꦜꦴꦫꦱ ꦠꦟ꧀ꦲꦴꦮꦶꦕꦫꦶꦠꦴꦤꦷꦠꦶ ꦄꦴꦤꦺꦠ꧀ꦮꦴ ꦱꦩ꧀ꦧꦤ꧀ꦣꦺꦴ. ꦆꦩꦶꦤꦴ ꦄꦱ꧀ꦩꦷꦠꦶ ꦆꦩꦶꦤꦴ ꦄꦨꦶꦱꦺꦏꦱꦺꦤꦴꦥꦕ꧀ꦕꦴꦢꦶꦤꦴ ‘‘ꦑꦠ꧀ꦠꦶꦪꦺꦴ ꦄꦲ’’ꦤ꧀ꦠꦶ ꦩꦹꦭꦨꦴꦮꦠꦺꦴ ‘‘ꦄꦱ꧀ꦩꦷ’’ꦠꦶ ꦲꦺꦴꦠꦶ. ꦱꦺꦱꦁ ꦥꦸꦧ꧀ꦧꦺ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦱꦔ꧀ꦒꦲꦺꦠꦶ ꦠꦟ꧀ꦲꦴꦪ ꦪꦡꦴꦮꦸꦠ꧀ꦠꦮꦶꦨꦴꦒꦱ꧀ꦱ ꦱꦁꦑꦶꦥꦤꦮꦱꦺꦤ ꦱꦔ꧀ꦒꦟ꧀ꦲꦤꦺ ꦏꦫꦶꦪꦩꦴꦤꦺ. ‘‘ꦖꦪꦶꦩꦺ, ꦨꦶꦏ꧀ꦑꦮꦺ, ꦠꦟ꧀ꦲꦴꦏꦴꦪꦴ’’ꦠꦶꦄꦴꦢꦶ ꦤꦶꦢ꧀ꦢꦺꦱꦺꦴ. ‘‘ꦫꦹꦥꦺ ꦠꦟ꧀ꦲꦴ ꦫꦹꦥꦠꦟ꧀ꦲꦴ’’ꦠꦶꦄꦴꦢꦶ ꦤꦶꦢ꧀ꦢꦺꦱꦠ꧀ꦡꦺꦴ. ‘‘ꦏꦴꦩꦫꦴꦒꦨꦴꦮꦺꦤꦴ’’ꦠꦶꦄꦴꦢꦶꦏꦺꦴ, ‘‘ꦄꦗ꧀ꦙꦠ꧀ꦠꦶꦏꦱ꧀ꦱꦸꦥꦴꦢꦴꦪꦴ’’ꦠꦶꦄꦴꦢꦶꦏꦺꦴ ꦕ ꦤꦶꦢ꧀ꦢꦺꦱꦮꦶꦠ꧀ꦡꦴꦫꦺꦴ. ‘‘ꦫꦹꦥꦴꦢꦷꦱꦸ ꦄꦴꦫꦩ꧀ꦩꦟꦺꦱꦸ ꦖꦭ꦳ꦺꦮꦴ’’ꦠꦶꦄꦴꦢꦶꦏꦺꦴ ꦱꦔ꧀ꦒꦲꦺꦴ.

ꦪꦱ꧀ꦩꦴ ꦕꦏ꧀ꦑꦸꦢ꧀ꦮꦴꦫꦴꦢꦷꦱꦸ ꦌꦏꦺꦏꦱ꧀ꦩꦶꦁ ꦢ꧀ꦮꦴꦫꦺ ꦈꦥ꧀ꦥꦗ꧀ꦗꦤꦏꦮꦶꦚ꧀ꦚꦴꦟꦴꦤꦶ ꦮꦶꦪ ꦄꦤꦺꦏꦴ ꦌꦮ ꦮꦺꦢꦤꦴ, ꦠꦱ꧀ꦩꦴ ꦠꦴ ꦫꦴꦱꦶꦮꦱꦺꦤ ꦌꦏꦗ꧀ꦙꦁ ꦒꦲꦺꦠ꧀ꦮꦴ ‘‘ꦖ ꦮꦺꦢꦤꦴꦏꦴꦪꦴ’’ꦠꦶ ꦮꦸꦠ꧀ꦠꦤ꧀ꦠꦶ ꦄꦴꦲ ‘‘ꦮꦺꦢꦤꦴꦱꦩꦹꦲꦴ’’ꦠꦶ. ꦤꦶꦱ꧀ꦱꦪꦨꦴꦮꦺꦤ ꦈꦥ꧀ꦥꦠ꧀ꦠꦶꦢ꧀ꦮꦴꦫꦨꦴꦮꦺꦤ ꦤꦴꦤꦴꦥꦕ꧀ꦕꦪꦴ ꦲꦺꦴꦤ꧀ꦠꦶ ꦕꦏ꧀ꦑꦸꦣꦴꦠꦸꦄꦴꦢꦪꦺꦴ, ꦠꦴ ꦏꦸꦕ꧀ꦖꦶꦤꦴ ꦣꦴꦫꦺꦤ꧀ꦠꦶꦪꦺꦴ ꦮꦶꦪ ꦥꦺꦴꦱꦺꦤ꧀ꦠꦶꦪꦺꦴ ꦮꦶꦪ ꦕ ꦲꦺꦴꦤ꧀ꦠꦷꦠꦶ ꦠꦴꦱꦁ ꦩꦴꦠꦸꦱꦢꦶꦱꦠꦴ ꦮꦸꦠ꧀ꦠꦴ. ꦕꦏ꧀ꦑꦸꦱꦩ꧀ꦦꦱ꧀ꦱꦲꦺꦠꦹꦠꦶ ꦤꦶꦱ꧀ꦱꦪꦴꦢꦶꦕꦏ꧀ꦑꦸꦱꦩ꧀ꦦꦱ꧀ꦱꦥꦕ꧀ꦕꦪꦴ. ꦄꦪꦤ꧀ꦠꦶ ꦄꦪꦁ ꦮꦺꦢꦤꦴ ‘‘ꦕꦏ꧀ꦑꦸꦱꦩ꧀ꦦꦱ꧀ꦱꦗꦴ ꦮꦺꦢꦤꦴ’’ꦠꦶꦄꦴꦢꦶꦤꦴ ꦱꦴꦣꦴꦫꦟꦠꦺꦴ ꦮꦸꦠ꧀ꦠꦴ. ꦌꦠ꧀ꦡꦴꦠꦶ ꦌꦠꦱ꧀ꦩꦶꦁ ꦮꦺꦢꦤꦴꦥꦢꦺ. ꦱꦧ꧀ꦧꦱꦔ꧀ꦒꦴꦲꦶꦏꦴꦠꦶ ꦏꦸꦱꦭꦴꦏꦸꦱꦭꦮꦶꦥꦴꦏꦏꦶꦫꦶꦪꦴꦤꦁ ꦮꦱꦺꦤ ꦱꦧ꧀ꦧꦱꦔ꧀ꦒꦴꦲꦶꦏꦴ. ꦌꦮꦁ ꦮꦶꦨꦔ꧀ꦒꦺ ꦄꦴꦒꦠꦤꦪꦺꦤ ꦱꦴꦣꦴꦫꦟꦠꦺꦴ ꦮꦠ꧀ꦮꦴꦥꦶ ꦆꦣꦴꦣꦶꦥ꧀ꦥꦺꦠꦮꦺꦢꦤꦩꦺꦮ ꦢꦱ꧀ꦱꦺꦠꦸꦁ ‘‘ꦮꦶꦥꦴꦏꦮꦱꦺꦤ ꦥꦤꦴ’’ꦠꦶꦄꦴꦢꦶꦩꦴꦲ. ꦕꦏ꧀ꦑꦸꦩ꧀ꦲꦶ ꦱꦩ꧀ꦦꦱ꧀ꦱꦺꦴꦠꦶ ꦕꦏ꧀ꦑꦸꦩ꧀ꦲꦶ ꦤꦶꦱ꧀ꦱꦪꦨꦹꦠꦺ ꦈꦥ꧀ꦥꦤ꧀ꦤꦦꦱ꧀ꦱꦺꦴ. ꦌꦱ ꦤꦪꦺꦴ ꦱꦺꦱꦺꦱꦸ. ꦪꦱ꧀ꦩꦴ ꦕꦏ꧀ꦑꦴꦢꦷꦤꦶ ꦮꦶꦱꦸꦢ꧀ꦣꦶꦩꦒ꧀ꦒꦺ ꦑꦤ꧀ꦣꦤꦶꦢ꧀ꦢꦺꦱꦺ ꦭꦏ꧀ꦑꦟꦴꦢꦶꦮꦶꦨꦴꦒꦠꦺꦴ, ꦄꦴꦪꦠꦤꦤꦶꦢ꧀ꦢꦺꦱꦺ ꦮꦶꦱꦺꦱꦠꦺꦴ, ꦱꦴꦩꦚ꧀ꦚꦠꦺꦴ ꦕ ꦱꦢ꧀ꦢꦠ꧀ꦡꦢꦱ꧀ꦱꦤꦴꦢꦶꦮꦱꦺꦤ ꦮꦶꦨꦴꦮꦶꦠꦴꦤꦶ, ꦠꦱ꧀ꦩꦴ ‘‘ꦪꦁ ꦮꦠ꧀ꦠꦧ꧀ꦧꦁ…ꦥꦺ… ꦮꦸꦠ꧀ꦠꦩꦺꦮꦴ’’ꦠꦶ ꦄꦴꦲ.

ꦤꦩꦤꦭꦏ꧀ꦑꦟꦤ꧀ꦠꦶ ꦄꦴꦫꦩ꧀ꦩꦟꦴꦨꦶꦩꦸꦑꦁ ꦲꦸꦠ꧀ꦮꦴ ꦤꦩꦤꦱꦨꦴꦮꦁ ꦠꦺꦤ ꦮꦶꦤꦴ ꦄꦥ꧀ꦥꦮꦠ꧀ꦠꦤꦠꦺꦴ. ꦫꦸꦥ꧀ꦥꦤꦭꦏ꧀ꦑꦟꦁ ꦲꦺꦛ꧀ꦜꦴ ꦮꦸꦠ꧀ꦠꦩꦺꦮ. ꦮꦺꦢꦤꦴꦏ꧀ꦑꦤ꧀ꦣꦺꦴ ꦥꦤ ꦌꦏꦴꦮ ꦮꦺꦢꦤꦴ. ꦱꦧ꧀ꦧꦢꦸꦧ꧀ꦧꦭꦕꦶꦠ꧀ꦠꦴꦤꦶ ꦤꦴꦩ ꦥꦚ꧀ꦕꦮꦶꦚ꧀ꦚꦴꦟꦴꦤꦶ. ꦤꦤꦸ ꦠꦠ꧀ꦡ ꦗꦷꦮꦶꦠꦕꦶꦠ꧀ꦠꦛ꧀ꦜꦶꦠꦶꦪꦺꦴ ꦕ ꦱꦤ꧀ꦠꦷꦠꦶ? ꦱꦕ꧀ꦕꦁ, ꦠꦴꦱꦁ ꦥꦤ ꦏꦶꦕ꧀ꦕꦁ ꦤ ꦠꦡꦴ ꦥꦴꦏꦛꦁ, ꦪꦡꦴ ꦕꦺꦠꦤꦴꦢꦷꦤꦤ꧀ꦠꦶ ꦠꦺ ꦌꦮꦺꦠ꧀ꦡ ꦥꦴꦭ꦳ꦶꦪꦁ ꦈꦢ꧀ꦣꦛꦴ. ꦪꦺꦤ ꦩꦲꦤ꧀ꦠꦥꦴꦠꦸꦨꦴꦮꦴꦢꦶꦤꦴ ꦏꦴꦫꦟꦺꦤ. ꦌꦠ꧀ꦡꦴꦠꦶ ꦌꦠꦱ꧀ꦩꦶꦁ ꦩꦲꦴꦨꦹꦠꦤꦶꦢ꧀ꦢꦺꦱꦺ. ꦄꦚ꧀ꦚꦺꦴ ꦮꦶꦤꦶꦕ꧀ꦖꦪꦤꦪꦺꦴꦠꦶ ‘‘ꦮꦕꦤꦠ꧀ꦡꦠꦺꦴ ꦏꦭꦴꦥꦠꦺꦴ’’ꦠꦶꦄꦴꦢꦶꦤꦴ ꦭꦏ꧀ꦑꦟꦴꦢꦶꦤꦶꦕ꧀ꦖꦪꦠꦺꦴ ꦄꦚ꧀ꦚꦺꦴ ꦮꦶꦤꦶꦕ꧀ꦖꦪꦤꦪꦺꦴ. ꦤꦤꦸ ꦱꦺꦴ ꦕꦠꦸꦣꦴꦠꦸꦮꦮꦠ꧀ꦡꦴꦤꦺ ꦮꦸꦠ꧀ꦠꦺꦴ, ꦤ ꦫꦹꦥꦏ꧀ꦑꦤ꧀ꦣꦤꦶꦢ꧀ꦢꦺꦱꦺꦠꦶ? ꦠꦠ꧀ꦡ ꦮꦸꦠ꧀ꦠꦺꦥꦶ ‘‘ꦕꦠꦸꦣꦴꦠꦸꦮꦮꦠ꧀ꦡꦴꦤꦺ ꦮꦸꦠ꧀ꦠꦴꦤꦷ’’ꦠꦶ ꦄꦠꦶꦢꦺꦱꦮꦱꦺꦤ ꦮꦸꦠ꧀ꦠꦠ꧀ꦠꦴ ‘‘ꦫꦹꦥꦏ꧀ꦑꦤ꧀ꦣꦤꦶꦢ꧀ꦢꦺꦱꦺ ꦮꦸꦠ꧀ꦠꦺꦴ’’ꦠꦶ ꦮꦸꦠ꧀ꦠꦁ. ꦈꦥꦴꦢꦴꦪꦴꦠꦶ ꦥꦛꦶꦕ꧀ꦕ. ꦨꦹꦠꦴꦤꦶ ꦲꦶ ꦥꦛꦶꦕ꧀ꦕ ꦈꦥ꧀ꦥꦗ꧀ꦗꦩꦴꦤꦁ ꦈꦥꦴꦢꦴꦫꦹꦥꦁ ‘‘ꦠꦴꦤꦶ ꦒꦲꦺꦠ꧀ꦮꦴ’’ꦠꦶ ꦮꦸꦠ꧀ꦠꦁ ꦄꦮꦶꦱ꧀ꦱꦗ꧀ꦗꦤꦠꦺꦴ. ꦤꦶꦱ꧀ꦱꦴꦪꦴꦠꦶꦥꦶ ꦌꦏꦺ ꦠꦺꦱꦁ ꦤꦶꦱ꧀ꦱꦪꦥꦕ꧀ꦕꦪꦨꦴꦮꦠꦺꦴ. ꦥꦸꦧ꧀ꦧꦏꦴꦭꦏꦶꦫꦶꦪꦴ ꦤꦴꦩ ꦌꦏꦁꦱꦠꦺꦴ ꦄꦥꦫꦏꦴꦭꦏꦶꦫꦶꦪꦴꦥꦺꦏ꧀ꦑꦴꦠꦶ ꦥꦴꦜꦱꦺꦱꦺꦤ ꦄꦠ꧀ꦡꦁ ꦮꦢꦠꦶ. ꦮꦶꦨꦠ꧀ꦠꦶꦮꦶꦥꦭ꧀ꦭꦴꦱꦺꦤ ꦮꦶꦤꦴ ꦌꦮ ꦄꦠ꧀ꦡꦁ ꦢꦱ꧀ꦱꦺꦠꦸꦁ ‘‘ꦱꦩꦹꦲꦠ꧀ꦡꦺ ꦮꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦱꦩꦹꦲꦱꦩ꧀ꦧꦤ꧀ꦣꦺ ꦱꦴꦩꦶꦤꦶꦢ꧀ꦢꦺꦱꦺꦤ ꦱꦩꦹꦲꦠ꧀ꦡꦺꦴ ꦢꦷꦥꦶꦠꦺꦴꦠꦶ ꦠꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦱꦩꦹꦲꦁ ꦈꦥꦴꦢꦴꦪꦴ’’ꦠꦶ. ꦣꦩ꧀ꦩꦱꦔ꧀ꦒꦟꦶꦪꦁ (ꦣ. ꦱ. ꧕꧘꧔) ꦄꦴꦒꦠꦤꦪꦺꦤ ‘‘ꦠꦺꦮꦷꦱꦠꦶꦮꦶꦣ’’ꦤ꧀ꦠꦶ ꦮꦸꦠ꧀ꦠꦁ. ꦠꦠ꧀ꦡ ꦲꦶ ꦲꦢꦪꦮꦠ꧀ꦡꦸ ꦤ ꦤꦶꦢ꧀ꦢꦶꦛ꧀ꦜꦁ, ‘‘ꦪꦁ ꦫꦹꦥꦁ ꦤꦶꦱ꧀ꦱꦴꦪꦴ’’ꦠꦶ ꦮꦴ ꦥꦛ꧀ꦜꦴꦤꦺ (ꦥꦛ꧀ꦜꦴꦤ. ꧑.꧑.꧘) ꦄꦴꦒꦠꦠ꧀ꦠꦴ ꦲꦢꦪꦮꦠ꧀ꦡꦸꦩ꧀ꦥꦶ ꦒꦲꦺꦠ꧀ꦮꦴ ꦗꦴꦠꦶꦫꦹꦥꦨꦴꦮꦺꦤ ꦈꦥꦕꦪꦱꦤ꧀ꦠꦠꦶꦪꦺꦴ ꦌꦏꦠꦺꦴ ꦏꦠ꧀ꦮꦴ ‘‘ꦠꦺꦮꦷꦱꦠꦶꦮꦶꦣ’’ꦤ꧀ꦠꦶ ꦮꦸꦠ꧀ꦠꦁ.

ꦕꦏ꧀ꦑꦸꦱ꧀ꦱ ꦮꦶꦚ꧀ꦚꦴꦟꦤ꧀ꦠꦶ ꦮꦴ ꦕꦏ꧀ꦑꦸꦮꦶꦚ꧀ꦚꦴꦟꦁ. ꦄꦱꦴꦣꦴꦫꦟꦏꦴꦫꦟꦺꦤ ꦕꦴꦪꦁ ꦤꦶꦢ꧀ꦢꦺꦱꦺꦴ. ‘‘ꦱꦔ꧀ꦑꦴꦫꦥꦕ꧀ꦕꦪꦴ ꦮꦶꦚ꧀ꦚꦴꦟ’’ꦤ꧀ꦠꦶ ꦌꦠ꧀ꦡ ꦱꦧ꧀ꦧꦭꦺꦴꦏꦶꦪꦮꦶꦥꦴꦏꦮꦶꦚ꧀ꦚꦴꦟꦱ꧀ꦱ ꦒꦲꦺꦠꦧ꧀ꦧꦠ꧀ꦠꦴ ‘‘ꦠꦺꦨꦹꦩꦏꦮꦶꦥꦴꦏꦕꦶꦠ꧀ꦠꦱ꧀ꦱꦺꦠꦁ ꦄꦣꦶꦮꦕꦤ’’ꦤ꧀ꦠꦶ ꦮꦸꦠ꧀ꦠꦁ.

ꦄꦨꦶꦱꦔ꧀ꦑꦫꦟꦭꦏ꧀ꦑꦟꦺꦴꦠꦶ ꦄꦴꦪꦹꦲꦤꦱꦨꦴꦮꦺꦴ. ꦕꦺꦴꦥꦤꦮꦱꦺꦤꦴꦠꦶ ꦮꦶꦚ꧀ꦚꦠ꧀ꦠꦶꦱꦁꦕꦺꦴꦥꦤꦮꦱꦺꦤ, ꦏꦴꦪꦮꦶꦚ꧀ꦚꦠ꧀ꦠꦶꦪꦴ ꦱꦩꦸꦛ꧀ꦜꦴꦥꦤꦮꦱꦺꦤꦴꦠꦶ ꦄꦠ꧀ꦡꦺꦴ. ꦮꦕꦤꦨꦺꦢꦮꦱꦺꦤꦴꦠꦶ ꦮꦕꦷꦨꦺꦢꦸꦥ꧀ꦥꦴꦢꦮꦱꦺꦤ, ꦮꦕꦷꦮꦶꦚ꧀ꦚꦠ꧀ꦠꦶꦪꦴ ꦱꦩꦸꦛ꧀ꦜꦴꦥꦤꦮꦱꦺꦤꦴꦠꦶ ꦄꦠ꧀ꦡꦺꦴ. ꦌꦮꦁ ꦕꦺꦴꦥꦤꦁ ꦤ ꦨꦮꦺꦪ꧀ꦪꦴꦠꦶ ꦢꦱ꧀ꦱꦺꦠꦸꦁ ‘‘ꦫꦲꦺꦴ ꦤꦶꦱꦷꦢꦶꦠ꧀ꦮꦴ ꦕꦶꦤ꧀ꦠꦺꦤ꧀ꦠꦱ꧀ꦱꦴ’’ꦠꦶ ꦮꦸꦠ꧀ꦠꦁ. ꦌꦏꦹꦤꦠꦶꦁꦱꦴꦠꦶ ꦌꦠ꧀ꦡ ꦄꦨꦶꦚ꧀ꦚꦴꦕꦺꦠꦤꦴꦮꦶꦤꦶꦩꦸꦠ꧀ꦠꦴ ꦌꦮ ꦌꦏꦹꦤꦠꦶꦁꦱ ꦕꦺꦠꦤꦴ ꦮꦺꦢꦶꦠꦧ꧀ꦧꦴ ꦠꦱ꧀ꦱꦴ ꦮꦶꦥꦴꦏꦮꦶꦚ꧀ꦚꦴꦟꦱ꧀ꦱ ꦥꦕ꧀ꦕꦪꦠ꧀ꦠꦴꦨꦴꦮꦠꦺꦴ.

ꦢꦸꦏ꧀ꦑꦺꦠꦶ ꦌꦏꦩ꧀ꦥꦶ ꦆꦢꦁ ꦨꦸꦩ꧀ꦩꦮꦕꦤꦁ ꦱꦁꦱꦶꦭꦺꦱꦤꦤꦶꦱ꧀ꦱꦪꦮꦶꦱꦪꦧ꧀ꦪꦴꦥꦤꦮꦱꦺꦤ ꦄꦠ꧀ꦠꦴꦤꦁ ꦨꦶꦤ꧀ꦢꦶꦠ꧀ꦮꦴ ꦮꦶꦤꦶꦪꦺꦴꦒꦁ ꦒꦕ꧀ꦖꦠꦷꦠꦶ ‘‘ꦕꦠꦹꦲꦶ ꦏꦴꦫꦟꦺꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦌꦏꦺꦴꦥꦶ ꦲꦶ ꦮꦶꦨꦠ꧀ꦠꦶꦤꦶꦢ꧀ꦢꦺꦱꦺꦴ ꦄꦤꦺꦏꦣꦴ ꦮꦶꦤꦶꦪꦺꦴꦒꦁ ꦒꦕ꧀ꦖꦠꦶ ꦪꦡꦴ ꦠꦢ꧀ꦣꦶꦠꦠ꧀ꦡꦺ ꦈꦠ꧀ꦠꦫꦥꦢꦱꦩꦴꦲꦴꦫꦺꦠꦶ. ꦠꦤ꧀ꦠꦶ ꦄꦚ꧀ꦚꦴꦟꦁ. ꦢꦸꦏ꧀ꦑꦱꦕ꧀ꦕꦤ꧀ꦠꦶ ꦲꦢꦪꦮꦠ꧀ꦡꦸꦭꦏ꧀ꦑꦟꦁ ꦢꦸꦏ꧀ꦑꦱꦕ꧀ꦕꦁ. ꦄꦱ꧀ꦱꦴꦠꦶ ꦄꦚ꧀ꦚꦴꦟꦱ꧀ꦱ. ꦤꦶꦱ꧀ꦱꦪꦥꦕ꧀ꦕꦪꦨꦴꦮꦺꦤꦴꦠꦶ ꦥꦸꦫꦺꦗꦴꦠꦤꦶꦱ꧀ꦱꦪꦨꦴꦮꦺꦤ. ꦱꦲꦗꦴꦠꦤꦶꦱ꧀ꦱꦪꦥꦕ꧀ꦕꦪꦨꦴꦮꦺꦤ ꦥꦤ ꦠꦁꦱꦲꦗꦴꦠꦴ ꦦꦱ꧀ꦱꦴꦢꦪꦺꦴ ꦮꦠ꧀ꦠꦧ꧀ꦧꦴ. ꦄꦴꦫꦩ꧀ꦩꦟꦥꦕ꧀ꦕꦪꦨꦴꦮꦺꦤ ꦢꦸꦏ꧀ꦑꦱꦕ꧀ꦕꦁ ꦄꦱ꧀ꦱ ꦄꦴꦫꦩ꧀ꦩꦟꦤ꧀ꦠꦶ ꦪꦺꦴꦗꦤꦴ. ꦢꦸꦏ꧀ꦑꦱꦕ꧀ꦕꦤ꧀ꦠꦶ ꦈꦥꦪꦺꦴꦒꦌꦏꦮꦕꦤꦁ. ꦌꦠꦤ꧀ꦠꦶ ꦄꦚ꧀ꦚꦴꦟꦁ. ꦠꦱ꧀ꦱꦴꦠꦶ ꦢꦸꦏ꧀ꦑꦱꦕ꧀ꦕꦱ꧀ꦱ. ‘‘ꦥꦛꦶꦕ꧀ꦖꦴꦢꦺꦠꦷ’’ꦠꦶ ꦌꦠ꧀ꦡ ꦮꦸꦠ꧀ꦠꦁ ꦥꦛꦶꦕ꧀ꦖꦴꦢꦤꦴꦏꦴꦫꦁ ꦢꦱ꧀ꦱꦺꦠꦸꦁ ‘‘ꦪꦴꦡꦴꦮꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦚꦴꦟꦮꦶꦥ꧀ꦥꦪꦸꦠ꧀ꦠꦕꦶꦠ꧀ꦠꦺꦤꦥꦶ ꦌꦏꦢꦺꦱꦺꦤ ꦪꦴꦡꦴꦮꦠꦺꦴ ꦭꦏ꧀ꦑꦟꦥꦛꦶꦮꦺꦣꦺꦴ ꦲꦺꦴꦠꦶꦪꦺꦮꦴꦠꦶ ‘‘ꦪꦴꦡꦴꦮꦭꦏ꧀ꦑꦟꦥꦛꦶꦮꦺꦣꦤꦶꦮꦴꦫꦟꦺꦤꦴ’’ꦠꦶ ꦮꦠ꧀ꦮꦴ ‘‘ꦚꦴꦟꦥꦮꦠ꧀ꦠꦶꦪꦴ ꦕꦺꦠ꧀ꦡ ꦄꦥ꧀ꦥꦢꦴꦤꦺꦤꦴ’’ꦠꦶ ꦮꦸꦠ꧀ꦠꦤ꧀ꦠꦶ ꦮꦢꦤ꧀ꦠꦶ. ꦥꦸꦫꦶꦩꦁ ꦥꦤ ꦥꦛꦶꦮꦺꦣꦚꦴꦟꦸꦥ꧀ꦥꦠ꧀ꦠꦶꦪꦴ ꦤꦶꦱꦺꦣꦏꦡꦴꦢꦱ꧀ꦱꦤꦁ, ꦥꦕ꧀ꦖꦶꦩꦁ ꦄꦤꦸꦧꦺꦴꦣꦚꦴꦟꦸꦥ꧀ꦥꦠ꧀ꦠꦶꦪꦴ. ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦌꦠ꧀ꦡꦴꦠꦶ ꦢꦸꦏ꧀ꦑꦱꦕ꧀ꦕꦺ.

ꦱꦲꦗꦴꦠꦱ꧀ꦱ ꦄꦚ꧀ꦚꦴꦟꦱ꧀ꦱ ꦱꦩꦸꦢꦪꦱꦕ꧀ꦕꦁ ꦮꦠ꧀ꦡꦸ ꦲꦺꦴꦠꦶ ꦤꦶꦱ꧀ꦱꦪꦥꦕ꧀ꦕꦪꦨꦴꦮꦠꦺꦴꦠꦶ ꦮꦸꦠ꧀ꦠꦁ ‘‘ꦮꦠ꧀ꦡꦸꦠꦺꦴ’’ꦠꦶ. ꦄꦴꦫꦩ꧀ꦩꦟꦠꦺꦴꦠꦶ ꦄꦴꦫꦩ꧀ꦩꦟꦥꦕ꧀ꦕꦪꦨꦴꦮꦺꦤ. ꦪꦱ꧀ꦩꦴ ꦱꦩꦸꦢꦪꦱꦕ꧀ꦕꦁ ꦄꦚ꧀ꦚꦴꦟꦱ꧀ꦱ ꦄꦴꦫꦩ꧀ꦩꦟꦁ ꦲꦺꦴꦠꦶ, ꦠꦱ꧀ꦩꦴ ‘‘ꦢꦸꦏ꧀ꦑꦱꦩꦸꦢꦪꦺ ꦄꦚ꧀ꦚꦴꦟ’’ꦤ꧀ꦠꦶ ꦮꦸꦠ꧀ꦠꦤ꧀ꦠꦶ ꦄꦠ꧀ꦡꦺꦴ. ꦥꦛꦶꦕ꧀ꦖꦴꦢꦤꦁ ꦢꦸꦏ꧀ꦑꦱꦕ꧀ꦕꦺ ꦮꦸꦠ꧀ꦠꦤꦪꦩꦺꦮ ꦌꦏꦺꦤꦺꦮ ꦏꦴꦫꦟꦺꦤ ꦆꦠꦫꦺꦱꦁ ꦠꦶꦟ꧀ꦟꦁ ꦄꦱꦩ꧀ꦨꦮꦠꦺꦴ, ꦏꦶꦁ ꦥꦤ ꦌꦠꦁ ꦌꦏꦁ ꦏꦴꦫꦟꦤ꧀ꦠꦶ ꦄꦴꦲ ‘‘ꦥꦛꦶꦕ꧀ꦖꦴꦢꦤꦠꦺꦴ’’ꦠꦶ. ꦆꦢꦁ ꦮꦶꦠ꧀ꦡꦴꦫꦠꦺꦴ ꦮꦶꦨꦴꦮꦺꦠꦸꦁ ‘‘ꦤꦶꦫꦺꦴꦣꦥꦛꦶꦥꦢꦴꦤꦁ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦢꦴꦫꦧ꧀ꦨꦴꦠꦶ ꦠꦁ ꦄꦴꦫꦧ꧀ꦨ ꦠꦁ ꦄꦴꦫꦩ꧀ꦩꦟꦁ ꦏꦠ꧀ꦮꦴ. ꦥꦕ꧀ꦖꦶꦩꦚ꧀ꦲꦶ ꦱꦕ꧀ꦕꦢ꧀ꦮꦪꦤ꧀ꦠꦶ ꦤꦶꦫꦺꦴꦣꦺꦴ ꦩꦒ꧀ꦒꦺꦴ. ꦠꦚ꧀ꦲꦶ ꦤꦪꦒꦩ꧀ꦨꦷꦫꦠ꧀ꦠꦴ. ꦢꦸꦢ꧀ꦢꦱꦤ꧀ꦠꦶ ꦱꦟ꧀ꦲꦱꦸꦑꦸꦩꦣꦩ꧀ꦩꦠ꧀ꦠꦴ ꦱꦨꦴꦮꦺꦤꦺꦮ ꦒꦩ꧀ꦨꦷꦫꦠꦴꦪ ꦢꦸꦢ꧀ꦢꦱꦁ ꦢꦸꦮꦶꦚ꧀ꦚꦺꦪ꧀ꦪꦁ ꦢꦸꦫꦮꦒ꧀ꦒꦴꦲꦁ. ꦠꦠ꧀ꦡꦴꦠꦶ ꦥꦸꦫꦶꦩꦺ ꦱꦕ꧀ꦕꦢ꧀ꦮꦪꦺ. ꦄꦤ꧀ꦣꦨꦹꦠꦤ꧀ꦠꦶ ꦄꦤ꧀ꦣꦏꦴꦫꦨꦹꦠꦁ. ꦤ ꦥꦮꦠ꧀ꦠꦠꦶ ꦄꦴꦫꦩ꧀ꦩꦟꦁ ꦏꦴꦠꦸꦁ ꦤ ꦮꦶꦱꦲꦠꦶ. ꦮꦕꦤꦷꦪꦠ꧀ꦠꦺꦤꦴꦠꦶ ꦮꦴꦕꦏꦨꦴꦮꦺꦤ ꦠꦡꦴ ꦈꦥꦛ꧀ꦜꦴꦤꦠꦺꦴ. ꦱꦨꦴꦮꦭꦏ꧀ꦑꦟꦱ꧀ꦱ ꦢꦸꦢ꧀ꦢꦱꦠ꧀ꦠꦴꦠꦶ ꦥꦷꦭ꦳ꦤꦴꦢꦶꦄꦴꦪꦹꦲꦤꦴꦢꦶꦮꦱꦺꦤ ‘‘ꦆꦢꦁ ꦢꦸꦏ꧀ꦑꦁ, ꦄꦪꦁ ꦱꦩꦸꦢꦪꦺꦴ’’ꦠꦶ (ꦩ. ꦤꦶ. ꧔꧘꧔; ꧓.꧑꧐꧔) ꦪꦴꦡꦴꦮꦠꦺꦴ ꦱꦨꦴꦮꦭꦏ꧀ꦑꦟꦱ꧀ꦱ ꦢꦸꦢ꧀ꦢꦱꦠ꧀ꦠꦴ ꦢꦸꦮꦶꦚ꧀ꦚꦺꦪ꧀ꦪꦠ꧀ꦠꦴ ꦥꦸꦫꦶꦩꦢ꧀ꦮꦪꦁ ꦒꦩ꧀ꦨꦷꦫꦁ. ꦠꦠ꧀ꦡꦴꦠꦶ ꦥꦸꦫꦶꦩꦱ꧀ꦩꦶꦁ ꦱꦕ꧀ꦕꦢ꧀ꦮꦪꦺ. ꦮꦶꦥꦭ꧀ꦭꦴꦱꦒ꧀ꦒꦴꦲꦮꦱꦺꦤ ꦥꦮꦠ꧀ꦠꦠꦷꦠꦶ ꦱꦸꦨꦴꦢꦶꦮꦶꦥꦫꦷꦠꦒ꧀ꦒꦴꦲꦴꦤꦁ ꦥꦕ꧀ꦕꦪꦨꦴꦮꦮꦱꦺꦤ ꦄꦚ꧀ꦚꦴꦟꦁ ꦥꦮꦠ꧀ꦠꦠꦶ.

ꦆꦢꦴꦤꦶ ‘‘ꦢꦸꦏ꧀ꦑꦺ ꦄꦚ꧀ꦚꦴꦟ’’ꦤ꧀ꦠꦶꦄꦴꦢꦷꦱꦸ ꦥꦏꦴꦫꦤ꧀ꦠꦫꦺꦤꦥꦶ ꦄꦠ꧀ꦡꦁ ꦢꦱ꧀ꦱꦺꦠꦸꦁ ‘‘ꦄꦥꦶꦕꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦢꦸꦏ꧀ꦑꦺꦠꦶ ꦌꦠ꧀ꦠꦴꦮꦠꦴꦠꦶ ‘‘ꦄꦚ꧀ꦚꦴꦟꦤ꧀ꦠꦶ ꦮꦸꦕ꧀ꦕꦩꦴꦤꦴꦪ ꦄꦮꦶꦗ꧀ꦗꦴꦪ ꦢꦸꦏ꧀ꦑꦺ’’ꦠꦶ ꦌꦠ꧀ꦠꦏꦺꦤ. ꦱꦔ꧀ꦒꦲꦠꦺꦴꦠꦶ ꦱꦩꦺꦴꦣꦴꦤꦠꦺꦴ. ꦏꦶꦕ꧀ꦕꦠꦺꦴꦠꦶ ꦄꦱꦩ꧀ꦥꦛꦶꦮꦺꦣꦏꦶꦕ꧀ꦕꦠꦺꦴ. ꦄꦚ꧀ꦚꦴꦟꦩꦶꦮꦴꦠꦶ ꦮꦶꦱꦪꦱꦨꦴꦮꦁ ꦪꦴꦡꦴꦮꦠꦺꦴ ꦥꦛꦶꦮꦶꦗ꧀ꦙꦶꦠꦸꦁ ꦄꦥ꧀ꦥꦢꦴꦤꦏꦶꦕ꧀ꦕꦩꦶꦮ. ‘‘ꦢꦸꦏ꧀ꦑꦺ’’ꦠꦶꦄꦴꦢꦶꦤꦴ ꦠꦠ꧀ꦡ ꦄꦮꦶꦗ꧀ꦗꦴ ꦥꦮꦠ꧀ꦠꦠꦶ, ꦮꦶꦱꦺꦱꦠꦺꦴ ꦤꦶꦢ꧀ꦢꦶꦛ꧀ꦜꦁ ꦲꦺꦴꦠꦷꦠꦶ ꦏꦠ꧀ꦮꦴ ꦱꦧ꧀ꦧꦠ꧀ꦡꦺꦮ ꦠꦡꦴ ꦄꦮꦶꦱꦶꦛ꧀ꦜꦱꦨꦴꦮꦢꦱ꧀ꦱꦤꦁ ꦆꦢꦤ꧀ꦠꦶ ꦢꦱ꧀ꦱꦺꦠꦸꦁ ‘‘ꦄꦮꦶꦱꦺꦱꦠꦺꦴ ꦥꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ.

ꦑꦟꦶꦏꦤꦶꦫꦺꦴꦣꦱ꧀ꦱ ꦆꦣ ꦄꦤꦣꦶꦥ꧀ꦥꦺꦠꦠ꧀ꦠꦴ ꦄꦪꦸꦗ꧀ꦗꦩꦴꦤꦠ꧀ꦠꦴ ꦮꦶꦫꦴꦒꦒ꧀ꦒꦲꦟꦠꦺꦴ ꦕ ꦄꦮꦶꦗ꧀ꦗꦴꦢꦷꦤꦁ ꦥꦛꦶꦥꦏ꧀ꦑꦮꦱꦺꦤ ꦥꦛꦶꦧꦴꦲꦤꦁ ꦆꦣ ‘‘ꦤꦶꦫꦺꦴꦣꦺꦴ’’ꦠꦶ ꦄꦣꦶꦥ꧀ꦥꦺꦠꦺꦴ, ꦱꦺꦴ ꦕ ꦤꦺꦱꦁ ꦱꦧ꧀ꦧꦱꦺꦴ ꦄꦤꦸꦥ꧀ꦥꦗ꧀ꦗꦤꦩꦺꦮꦴꦠꦶ ꦄꦴꦲ ‘‘ꦤꦶꦫꦺꦴꦣꦺꦴ ꦲꦺꦴꦠꦷꦠꦶ ꦄꦤꦸꦥ꧀ꦥꦴꦢꦺꦴ ꦲꦺꦴꦠꦷ’’ꦠꦶ. ‘‘ꦄꦮꦶꦗ꧀ꦗꦴ ꦤꦶꦫꦸꦗ꧀ꦙꦠꦶ ꦌꦠ꧀ꦡꦴꦠꦶ ꦄꦮꦶꦗ꧀ꦗꦴꦤꦶꦫꦺꦴꦣꦺꦴ, ꦱꦔ꧀ꦑꦴꦫꦴ ꦤꦶꦫꦸꦗ꧀ꦙꦤ꧀ꦠꦶ ꦌꦠ꧀ꦡꦴꦠꦶ ꦱꦔ꧀ꦑꦴꦫꦤꦶꦫꦺꦴꦣꦺꦴ’’ꦠꦶ ꦌꦮꦁ ꦱꦧ꧀ꦧꦺꦲꦶ ꦌꦠꦺꦲꦶ ꦤꦶꦫꦺꦴꦣꦥꦢꦺꦲꦶ ꦤꦶꦧ꧀ꦧꦴꦤꦱ꧀ꦱ ꦢꦺꦱꦶꦠꦠ꧀ꦠꦴ ꦢꦛ꧀ꦜꦧ꧀ꦧꦴ. ꦠꦺꦤꦴꦲ ‘‘ꦤꦶꦧ꧀ꦧꦴꦤꦁ ꦲꦷ’’ꦠꦶꦄꦴꦢꦶ. ꦮꦛ꧀ꦛꦮꦶꦮꦛ꧀ꦛꦤ꧀ꦠꦶ ꦮꦛ꧀ꦛꦚ꧀ꦕ ꦮꦶꦮꦛ꧀ꦛꦚ꧀ꦕ. ‘‘ꦢ꧀ꦮꦴꦢꦱꦲꦷ’’ꦠꦶ ꦆꦢꦁ ꦥꦕ꧀ꦕꦺꦏꦁ ꦪꦺꦴꦗꦺꦠꦧ꧀ꦧꦁ ‘‘ꦄꦤꦸꦭꦺꦴꦩꦠꦺꦴ ꦢ꧀ꦮꦴꦢꦱꦲꦶ ꦥꦢꦺꦲꦶ ꦮꦛ꧀ꦛꦁ, ꦥꦛꦶꦭꦺꦴꦩꦠꦺꦴ ꦢ꧀ꦮꦴꦢꦱꦲꦶ ꦮꦶꦮꦛ꧀ꦛꦁ ꦆꦣ ꦢꦱ꧀ꦱꦶꦠ’’ꦤ꧀ꦠꦶ.

ꦮꦶꦨꦔ꧀ꦒꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.