꧑. ꦏꦱꦶꦨꦴꦫꦢ꧀ꦮꦴꦗꦱꦸꦠ꧀ꦠꦮꦟ꧀ꦟꦤꦴ

꧑꧙꧗. ꦢꦏ꧀ꦑꦶꦟꦴꦒꦶꦫꦶꦱ꧀ꦩꦶꦤ꧀ꦠꦶ ꦢꦏ꧀ꦑꦶꦟꦴꦒꦶꦫꦶꦗꦤꦥꦢꦺ, ꦠꦱ꧀ꦩꦶꦁ ꦢꦏ꧀ꦑꦶꦟꦴꦒꦶꦫꦶꦗꦤꦥꦢꦺ ꦢꦏ꧀ꦑꦶꦟꦴꦒꦶꦫꦶꦮꦶꦲꦴꦫꦺ. ꦑꦤ꧀ꦣꦺꦱꦸ ꦜꦥꦺꦠ꧀ꦮꦴ ꦪꦸꦒꦺ ꦪꦺꦴꦠ꧀ꦠꦺꦲꦷꦠꦶ ꦪꦺꦴꦠ꧀ꦠꦫꦗ꧀ꦗꦹꦲꦶ ꦪꦸꦠ꧀ꦠꦴꦤꦶ ꦥꦪꦺꦴꦗꦶꦠꦴꦤꦶ ꦆꦕ꧀ꦕꦺꦮ ꦄꦠ꧀ꦡꦺꦴ.

ꦥꦜꦩꦢꦶꦮꦱꦺꦠꦶ ꦮꦥꦤꦢꦶꦮꦱꦺꦱꦸ ꦥꦜꦩꦢꦶꦮꦱꦺ ꦄꦴꦫꦢ꧀ꦣꦢꦶꦮꦱꦺ. ꦥꦚ꧀ꦕꦔ꧀ꦒꦴꦤꦶꦥꦶ ꦥꦫꦶꦥꦸꦟ꧀ꦟꦴꦤꦶ, ꦥꦒꦺꦮ ꦆꦠꦫꦔ꧀ꦒꦴꦤꦷꦠꦶ ꦢꦱ꧀ꦱꦺꦠꦸꦁ ‘‘ꦥꦫꦶꦥꦸꦟ꧀ꦟꦥꦚ꧀ꦕꦔ꧀ꦒꦴ’’ꦆꦕ꧀ꦕꦺꦮ ꦮꦸꦠ꧀ꦠꦁ. ꦲꦫꦶꦠꦴꦭꦩꦤꦺꦴꦱꦶꦭꦴꦄꦚ꧀ꦗꦤꦺꦲꦶ ꦈꦫꦠ꧀ꦡꦤꦴꦢꦷꦱꦸ ꦜꦥꦶꦠꦠ꧀ꦠꦴ ꦄꦴꦨꦴꦪ ꦈꦗ꧀ꦗꦭꦒꦠ꧀ꦠꦴ. ꦄꦮꦱꦺꦱꦴ ꦧꦭꦷꦧꦢ꧀ꦢꦴ. ꦏꦶꦭꦤ꧀ꦠꦒꦺꦴꦟꦁ ꦩꦺꦴꦕꦺꦠ꧀ꦮꦴ ꦄꦏꦶꦭꦤ꧀ꦠꦱ꧀ꦱ ꦪꦺꦴꦗꦤꦁ ꦏꦶꦭꦤ꧀ꦠꦥꦫꦶꦮꦠ꧀ꦠꦤꦁ.

ꦱꦷꦲꦏꦸꦟ꧀ꦝꦭꦴꦤꦷꦠꦶ ꦱꦷꦲꦩꦸꦑꦏꦸꦟ꧀ꦝꦭꦴꦤꦶ. ꦧ꧀ꦫꦲ꧀ꦩꦮꦺꦜꦤꦤ꧀ꦠꦶ ꦧ꧀ꦫꦲ꧀ꦩꦸꦤꦺꦴ ꦮꦺꦜꦤꦱꦢꦶꦱꦁ, ꦄꦱ꧀ꦱꦤꦑꦮꦺꦜꦤꦱꦢꦶꦱꦤ꧀ꦠꦶ ꦄꦠ꧀ꦡꦺꦴ.

ꦧꦸꦢ꧀ꦣꦴꦤꦁ ꦏꦶꦕ꧀ꦕꦴꦤꦶ ꦏꦴꦭꦮꦱꦺꦤ ꦮꦶꦨꦠ꧀ꦠꦴꦤꦶ ꦥꦚ꧀ꦕ ꦏꦶꦕ꧀ꦕꦴꦤꦶ ꦨꦮꦤ꧀ꦠꦶ. ꦥꦸꦫꦺꦨꦠ꧀ꦠꦏꦶꦕ꧀ꦕꦤ꧀ꦠꦶ ꦨꦠ꧀ꦠꦠꦺꦴ ꦥꦸꦧ꧀ꦧꦺ ꦧꦸꦢ꧀ꦣꦺꦤ ꦏꦴꦠꦧ꧀ꦧꦏꦶꦕ꧀ꦕꦁ. ꦮꦷꦠꦶꦤꦴꦩꦺꦠ꧀ꦮꦴꦠꦶ ꦦꦭꦱꦩꦴꦥꦠ꧀ꦠꦶꦪꦴ ꦏꦴꦭꦁ ꦮꦷꦠꦶꦤꦴꦩꦺꦠ꧀ꦮꦴ. ꦏꦢꦴꦕꦶ ꦌꦏꦺꦴꦠꦶꦄꦴꦢꦶ ꦠꦺꦱꦁ ꦠꦺꦱꦁ ꦮꦶꦤꦺꦪ꧀ꦪꦴꦤꦁ ꦮꦶꦤꦪꦤꦴꦤꦸꦫꦹꦥꦥꦛꦶꦥꦠ꧀ꦠꦶꦢꦱ꧀ꦱꦤꦁ. ꦥꦏꦠꦶꦪꦴꦠꦶ ꦥꦏꦠꦶꦧꦸꦢ꧀ꦣꦮꦺꦱꦺꦤ. ꦧꦸꦢ꧀ꦣꦴꦤꦁ ꦲꦶ ꦫꦹꦥꦏꦴꦪꦱ꧀ꦱ ꦄꦱꦷꦠꦶꦄꦤꦸꦧ꧀ꦪꦚ꧀ꦗꦤꦥꦛꦶꦩꦟ꧀ꦝꦶꦠ-ꦧꦴꦠ꧀ꦠꦶꦁꦱꦩꦲꦴꦥꦸꦫꦶꦱ- ꦭꦏ꧀ꦑꦟ-ꦏꦴꦪꦥ꧀ꦥꦨꦴ-ꦧ꧀ꦪꦴꦩꦥ꧀ꦥꦨꦴ-ꦏꦺꦠꦸꦩꦴꦭꦴꦮꦶꦕꦶꦠ꧀ꦠꦠꦴ ꦧꦸꦢ꧀ꦣꦮꦺꦱꦺꦴ. ꦏꦢꦴꦕꦶ ꦄꦤꦺꦏꦺꦲꦶ ꦥꦴꦛꦶꦲꦴꦫꦶꦪꦺꦲꦶ ꦮꦠ꧀ꦠꦩꦴꦤꦺꦲꦷꦠꦶ ꦆꦩꦶꦤꦴ ꦥꦴꦫꦩꦷꦤꦁ ꦤꦶꦱ꧀ꦱꦤ꧀ꦢꦨꦹꦠꦴꦤꦶ ꦥꦴꦛꦶꦲꦴꦫꦶꦪꦴꦤꦶ ꦫꦸꦕꦶꦮꦱꦺꦤꦺꦮ ꦥꦏꦴꦱꦤꦏꦴꦤꦶ ꦨꦮꦤ꧀ꦠꦶ, ꦤ ꦱꦧ꧀ꦧꦢꦴꦠꦶ ꦢꦱ꧀ꦱꦺꦠꦶ. ꦌꦮꦚ꧀ꦕ ꦏꦠ꧀ꦮꦴ ‘‘ꦆꦤ꧀ꦢꦑꦷꦭꦱ꧀ꦱ ꦄꦤ꧀ꦠꦺꦴ ꦜꦥꦶꦠꦩꦠ꧀ꦠꦺ ꦢꦏ꧀ꦑꦶꦟꦥꦴꦢꦺ’’ꦠꦶꦄꦴꦢꦶꦮꦕꦤꦁ ꦱꦩꦠ꧀ꦡꦶꦠꦁ ꦲꦺꦴꦠꦶ. ꦨꦒꦮꦠꦺꦴ ꦏꦴꦪꦺ ꦥꦷꦠꦫꦱ꧀ꦩꦷꦤꦁ ꦪꦺꦨꦸꦪ꧀ꦪꦠꦴꦪ ‘‘ꦱꦸꦮꦟ꧀ꦟꦫꦱꦱꦶꦚ꧀ꦕꦤꦴꦤꦶ ꦮꦶꦪꦴ’’ꦠꦶ ꦮꦠ꧀ꦮꦴ ꦏꦴꦪꦩ꧀ꦲꦶ ꦤꦷꦭꦴꦢꦶꦫꦱ꧀ꦩꦷꦲꦶ ꦠꦲꦁ ꦠꦲꦁ ꦥꦷꦠꦩꦶꦱ꧀ꦱꦶꦠꦁ ꦱꦤ꧀ꦣꦴꦪ ‘‘ꦮꦶꦕꦶꦠ꧀ꦫꦥꦛꦥꦫꦶꦏ꧀ꦑꦶꦠ꧀ꦠꦴꦤꦶ ꦮꦶꦪ ꦕꦴ’’ꦠꦶ ꦮꦸꦠ꧀ꦠꦁ. ꦩꦣꦸꦫꦺꦤꦴꦏꦴꦫꦺꦤ ꦱꦢ꧀ꦢꦁ ꦏꦫꦺꦴꦤ꧀ꦠꦶ ꦠꦸꦛ꧀ꦜꦫꦮꦫꦮꦤꦠꦺꦴ.

ꦠꦠ꧀ꦡꦴꦠꦶ ꦮꦶꦲꦴꦫꦺ. ꦒꦤ꧀ꦣꦩꦟ꧀ꦝꦭꦩꦴꦭ꦳ꦺꦠꦶ ꦲꦠ꧀ꦡꦺꦤ ꦏꦠꦥꦫꦶꦨꦟ꧀ꦝꦺ ꦱꦩꦺꦴꦱꦫꦶꦠꦒꦤ꧀ꦣꦥꦸꦥ꧀ꦦꦢꦴꦩꦺ ꦩꦟ꧀ꦝꦭꦩꦴꦭ꦳ꦺ.

ꦈꦥꦛ꧀ꦜꦴꦤꦺꦠꦶ ꦥꦩꦸꦑꦺ. ‘‘ꦎꦮꦢꦠꦷ’’ꦠꦶ ꦮꦠ꧀ꦮꦴ ꦠꦠ꧀ꦡꦺꦴꦮꦴꦢꦁ ꦱꦴꦩꦚ꧀ꦚꦠꦺꦴ ꦢꦱ꧀ꦱꦺꦠꦸꦁ, ‘‘ꦨꦶꦏ꧀ꦑꦮꦺ’’ꦠꦶꦄꦴꦢꦶ ꦮꦸꦠ꧀ꦠꦁ. ꦱꦩ꧀ꦥꦠ꧀ꦠꦷꦠꦶ ꦕꦏ꧀ꦑꦴꦢꦶꦆꦤ꧀ꦢ꧀ꦫꦶꦪꦥꦴꦫꦶꦥꦹꦫꦶ ꦕꦺꦮ ꦲꦠ꧀ꦡꦴꦢꦶꦱꦩ꧀ꦥꦢꦴ ꦕ. ꦱꦩꦱ꧀ꦱꦴꦱꦶꦠꦏꦴꦪꦺꦴ ꦏꦶꦭꦩꦡꦮꦶꦤꦺꦴꦢꦤꦺꦤ. ‘‘ꦠꦚ꧀ꦕ ꦑꦺꦴ ꦱꦩꦴꦥꦗ꧀ꦗꦤꦺꦤꦴ’’ꦠꦶ ꦮꦢꦤ꧀ꦠꦶ. ꦢꦸꦠꦶꦪꦨꦴꦒꦺꦠꦶ ꦆꦩꦶꦤꦴ ꦄꦥꦫꦨꦴꦒꦁ ꦠꦪꦺꦴ ꦨꦴꦒꦺ ꦏꦠ꧀ꦮꦴ ꦠꦠ꧀ꦡ ꦥꦸꦫꦶꦩꦨꦴꦒꦁ ꦱꦺꦪ꧀ꦪꦤꦶꦱꦗ꧀ꦗꦴꦮꦱꦺꦤ ꦱꦩꦴꦥꦠ꧀ꦠꦷꦲꦶ ꦮꦷꦠꦶꦤꦴꦩꦺꦠꦷꦠꦶ ꦢꦱ꧀ꦱꦺꦠꦶ. ꦭꦺꦴꦏꦤ꧀ꦠꦶ ꦫꦴꦗꦒꦲꦴꦢꦷꦱꦸ ꦪꦁ ꦠꦢꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦠꦶ, ꦠꦠ꧀ꦡ ꦄꦚ꧀ꦚꦠ꧀ꦡ ꦮꦴ ꦧꦸꦗ꧀ꦙꦤꦏꦁ ꦮꦶꦤꦺꦪ꧀ꦪꦱꦠ꧀ꦠꦭꦺꦴꦏꦁ ꦧꦸꦢ꧀ꦣꦕꦏ꧀ꦑꦸꦤꦴ ꦮꦺꦴꦭꦺꦴꦏꦺꦠꦶ. ꦏꦴꦭꦪꦸꦠ꧀ꦠꦤ꧀ꦠꦶ ꦠꦺꦱꦁ ꦆꦤ꧀ꦢ꧀ꦫꦶꦪꦥꦫꦶꦥꦴꦏꦏꦴꦭꦴꦤꦸꦫꦹꦥꦁ. ꦱꦩꦪꦪꦸꦠ꧀ꦠꦤ꧀ꦠꦶ ꦠꦱ꧀ꦱꦺꦮ ꦮꦺꦮꦕꦤꦁ. ꦱꦩꦪꦪꦸꦠ꧀ꦠꦤ꧀ꦠꦶ ꦮꦴ ꦠꦺꦲꦶ ꦄꦴꦗꦴꦤꦶꦠꦧ꧀ꦧꦮꦶꦱꦺꦱꦥꦛꦶꦭꦴꦨꦴꦤꦸꦫꦹꦥꦁ.

ꦥꦛꦶꦱꦭ꧀ꦭꦷꦤꦺꦴꦠꦶ ꦏꦴꦭꦥꦫꦶꦕ꧀ꦖꦺꦢꦁ ꦏꦠ꧀ꦮꦴ ꦱꦩꦴꦥꦠ꧀ꦠꦶꦁ ꦱꦩꦴꦥꦤ꧀ꦤꦺꦴ. ꦄꦣꦶꦥ꧀ꦥꦴꦪꦁ ꦱꦩ꧀ꦥꦴꦢꦺꦤ꧀ꦠꦺꦴ ꦠꦁ ꦄꦮꦶꦫꦴꦣꦺꦤ꧀ꦠꦺꦴ, ꦄꦗ꧀ꦙꦴꦱꦪꦴꦤꦸꦫꦹꦥꦤ꧀ꦠꦶ ꦄꦠ꧀ꦡꦺꦴ.

ꦱꦏꦭ…ꦥꦺ… ꦢꦺꦮꦠꦴꦪꦺꦴꦠꦶ ꦌꦠ꧀ꦡ ꦭꦺꦴꦏꦣꦴꦠꦸꦱꦴꦏꦭ꧀ꦪꦁ ꦢꦛ꧀ꦜꦧ꧀ꦧꦁ, ꦤ ꦢꦺꦮꦠꦴꦱꦴꦏꦭ꧀ꦪꦁ. ꦤ ꦲꦶ ꦩꦲꦴꦱꦩꦪꦺ ꦮꦶꦪ ꦱꦧ꧀ꦧꦢꦴ ꦩꦗ꧀ꦙꦶꦩꦪꦴꦩꦺ ꦢꦱꦱꦲꦱ꧀ꦱꦕꦏ꧀ꦏꦮꦴꦭ꦳ꦺ ꦱꦧ꧀ꦧꦠ꧀ꦡ ꦱꦧ꧀ꦧꦴ ꦢꦺꦮꦠꦴ ꦱꦠ꧀ꦡꦸ ꦱꦩꦷꦥꦁ ꦈꦥꦒꦕ꧀ꦖꦤ꧀ꦠꦶ. ꦏꦶꦭꦴꦱꦸꦨꦴꦮꦺꦴ ꦏꦶꦭꦩꦡꦺꦴ.

ꦮꦶꦲꦴꦫꦕꦷꦮꦫꦥꦫꦶꦮꦠ꧀ꦠꦤꦮꦱꦺꦤꦴꦠꦶ ꦮꦶꦲꦴꦫꦺ ꦤꦶꦮꦠ꧀ꦡꦤꦶꦮꦴꦱꦤꦥꦫꦶꦮꦠ꧀ꦠꦤꦮꦱꦺꦤ. ꦄꦴꦢꦶꦪꦶꦠ꧀ꦮꦴꦠꦶ ꦥꦴꦫꦸꦥꦤꦮꦱꦺꦤ ꦒꦲꦺꦠ꧀ꦮꦴ. ꦠꦺꦤꦴꦲ ‘‘ꦣꦴꦫꦺꦠ꧀ꦮꦴ’’ꦠꦶ. ꦨꦶꦏ꧀ꦑꦴꦕꦴꦫꦤ꧀ꦠꦶ ꦨꦶꦏ꧀ꦑꦠ꧀ꦡꦁ ꦕꦫꦶꦠꦧ꧀ꦧꦛ꧀ꦜꦴꦤꦁ.

ꦄꦠꦶꦫꦺꦴꦕꦩꦴꦤꦤ꧀ꦠꦶ ꦠꦁ ꦠꦁ ꦄꦠꦶꦏ꧀ꦏꦩꦶꦠ꧀ꦮꦴ ꦱꦩꦤ꧀ꦠꦠꦺꦴ ꦱꦧ꧀ꦧꦢꦶꦱꦴꦱꦸ ꦮꦶꦫꦺꦴꦕꦩꦴꦤꦁ. ꦱꦫꦷꦫꦥ꧀ꦥꦨꦤ꧀ꦠꦶ ꦄꦠ꧀ꦠꦤꦺꦴ ꦱꦫꦷꦫꦥ꧀ꦥꦨꦁ. ꦗꦔ꧀ꦒꦩꦁ ꦮꦶꦪ ꦥꦢꦸꦩꦱꦫꦤ꧀ꦠꦶ ꦫꦠꦤꦩꦪꦏꦶꦚ꧀ꦗꦏ꧀ꦑꦁ ꦫꦗꦠꦩꦪꦏꦟ꧀ꦟꦶꦏꦁ ꦱꦩꦤ꧀ꦠꦠꦺꦴ ꦱꦩ꧀ꦦꦸꦭ꧀ꦭꦶꦠꦏꦚ꧀ꦕꦤꦥꦢꦸꦩꦁ ꦱꦚ꧀ꦕꦴꦫꦶꦩꦱꦫꦁ ꦮꦶꦪ. ꦒꦒꦤꦠꦭꦤ꧀ꦠꦶ ꦄꦧ꧀ꦨꦩꦲꦶꦏꦴꦢꦶꦈꦥꦏ꧀ꦏꦶꦭꦺꦱꦮꦶꦒꦩꦺꦤ ꦱꦸꦮꦶꦱꦸꦢ꧀ꦣꦄꦴꦏꦴꦱꦠꦭꦁ ꦮꦶꦪ. ꦠꦩ꧀ꦥꦶ ꦲꦶ ꦠꦴꦫꦴꦒꦟꦏꦶꦫꦟꦗꦴꦭꦱꦩꦸꦗ꧀ꦗꦭꦠꦴꦪ ꦱꦩꦤ꧀ꦠꦠꦺꦴ ꦮꦶꦫꦺꦴꦕꦠꦶ. ꦏꦤꦏꦱꦶꦑꦫꦤ꧀ꦠꦶ ꦏꦤꦏꦒꦶꦫꦶꦱꦶꦑꦫꦁ. ꦱꦶꦫꦶꦪꦴ ꦗꦭꦩꦴꦤꦤ꧀ꦠꦶ ꦱꦧ꧀ꦧꦱꦺꦴ ꦄꦤꦮꦗ꧀ꦗꦴꦪ ꦱꦧ꧀ꦧꦴꦏꦴꦫꦺꦤ ꦥꦫꦶꦥꦸꦟ꧀ꦟꦏꦴꦪꦠꦴꦪ ꦄꦤꦚ꧀ꦚꦱꦴꦣꦴꦫꦟꦴꦪ ꦫꦹꦥꦏꦴꦪꦱꦶꦫꦶꦪꦴ ꦱꦩꦸꦗ꧀ꦗꦭꦁ, ꦪꦱ꧀ꦱꦴ ꦫꦸꦕꦶꦫꦨꦴꦮꦺꦴ ꦮꦶꦢ꧀ꦣꦺ ꦮꦶꦒꦠꦮꦭꦴꦲꦏꦺ ꦥꦸꦟ꧀ꦟꦩꦴꦱꦶꦪꦁ ꦥꦫꦶꦥꦸꦟ꧀ꦟꦏꦭꦩꦤꦺꦴꦩꦩꦟ꧀ꦝꦭꦁ ꦕꦤ꧀ꦢꦩꦟ꧀ꦝꦭꦁ ꦄꦠꦶꦫꦺꦴꦕꦠꦶ, ꦥꦨꦱ꧀ꦱꦫꦨꦴꦮꦺꦴ ꦱꦲꦱ꧀ꦱꦫꦁꦱꦶꦏꦶꦫꦟꦠꦺꦗꦺꦴꦗꦴꦭꦱꦩꦸꦗ꧀ꦗꦭꦁ ꦱꦹꦫꦶꦪꦩꦟ꧀ꦝꦭꦁ ꦄꦨꦶꦨꦮꦠꦶ, ꦲꦺꦩꦱꦩꦸꦗ꧀ꦗꦭꦨꦴꦮꦺꦴ ꦠꦢꦸꦨꦪꦺ ꦄꦨꦶꦨꦸꦪ꧀ꦪ ꦥꦮꦠ꧀ꦠꦩꦴꦤꦁ ꦌꦏꦏ꧀ꦑꦟꦺ ꦢꦱꦱꦲꦱ꧀ꦱꦶꦭꦺꦴꦏꦣꦴꦠꦸꦮꦶꦗ꧀ꦗꦺꦴꦠꦤꦱꦩꦠ꧀ꦡ-ꦩꦲꦴꦧ꧀ꦫꦲ꧀ꦩꦸꦤꦺꦴ ꦥꦨꦴꦱꦩꦸꦢꦪꦁ ꦄꦨꦶꦮꦶꦲꦕ꧀ꦕ ꦨꦴꦱꦠꦶ ꦠꦥꦠꦶ ꦮꦶꦫꦺꦴꦕꦠꦶ.

ꦱꦩꦤ꧀ꦠꦥꦴꦱꦴꦢꦶꦏꦺꦠꦶ ꦱꦩꦤ꧀ꦠꦠꦺꦴ ꦥꦱꦴꦢꦴꦮꦲꦺ. ꦠꦚ꧀ꦕ ꦑꦺꦴ ꦱꦧ꧀ꦧꦱꦺꦴ ꦱꦫꦶꦠꦧ꧀ꦧꦠꦴꦪꦴꦠꦶ ꦄꦴꦲ ‘‘ꦥꦱꦴꦢꦤꦷꦪꦺ’’ꦠꦶ. ꦈꦠ꧀ꦠꦩꦢꦩꦡꦱꦩꦡꦩꦤꦸꦥ꧀ꦥꦠ꧀ꦠꦺꦠꦶ ꦏꦴꦪꦮꦴꦕꦴꦲꦶ ꦄꦤꦸꦠ꧀ꦠꦫꦁ ꦢꦤ꧀ꦠꦨꦴꦮꦚ꧀ꦕꦺꦮ ꦄꦤꦸꦠ꧀ꦠꦫꦁ ꦕꦶꦠ꧀ꦠꦮꦹꦥꦱꦩꦚ꧀ꦕ ꦱꦩ꧀ꦥꦠ꧀ꦠꦺ. ꦄꦥ꧀ꦥꦱꦴꦢꦺꦤꦴꦠꦶ ꦥꦱꦴꦢꦴꦨꦴꦮꦺꦤ, ꦥꦱꦴꦢꦥꦛꦶꦏ꧀ꦑꦺꦥꦺꦤ ꦮꦴ ꦄꦱ꧀ꦱꦢ꧀ꦣꦶꦪꦺꦤ. ꦈꦨꦪꦡꦴꦥꦶ ꦤꦺꦴꦠꦶ ꦄꦥ꧀ꦥꦱꦴꦢꦺꦴ ꦩꦕ꧀ꦖꦫꦶꦪꦤ꧀ꦠꦶ ꦈꦨꦪꦡꦴꦥꦶ ꦤꦺꦴ ꦌꦮ, ꦄꦡ ꦑꦺꦴ ꦄꦤꦠ꧀ꦠꦩꦤꦠꦴꦪ ꦈꦥꦴꦫꦩ꧀ꦨꦴꦣꦶꦥ꧀ꦥꦴꦪꦺꦤ ꦄꦥꦱꦴꦢꦺꦤ꧀ꦠꦺꦴ, ꦨꦒꦮꦠꦺꦴ ꦩꦸꦑꦠꦺꦴ ꦏꦶꦚ꧀ꦕꦶ ꦢꦺꦱꦺꦠꦸꦏꦴꦩꦺꦴ ꦮꦴ ꦌꦮꦩꦴꦲ. ꦠꦠ꧀ꦡ ꦏꦴꦫꦟꦁ ꦢꦱ꧀ꦱꦺꦤ꧀ꦠꦺꦴ ‘‘ꦨꦒꦮꦠꦺꦴ ꦥꦤꦴ’’ꦠꦶꦄꦴꦢꦶꦩꦴꦲ. ꦄꦠꦶꦠ꧀ꦠꦤ꧀ꦠꦶ ꦠꦶꦠ꧀ꦠꦶꦁ ꦄꦒꦕ꧀ꦖꦤ꧀ꦠꦁ. ꦏꦩ꧀ꦩꦨꦔ꧀ꦒꦤ꧀ꦠꦶ ꦏꦩ꧀ꦩꦲꦴꦤꦶꦁ.

ꦠꦶꦏ꧀ꦑꦥꦚ꧀ꦚꦺꦴ ꦌꦱ ꦧ꧀ꦫꦴꦲ꧀ꦩꦟꦺꦴ, ꦠꦡꦴ ꦲꦶ ꦤ ꦕꦶꦫꦱ꧀ꦱꦺꦮ ꦄꦫꦲꦠ꧀ꦠꦁ ꦱꦕ꧀ꦖꦶꦏꦫꦶꦱ꧀ꦱꦠꦶ. ꦏꦡꦴꦥꦮꦠ꧀ꦠꦤꦠ꧀ꦡꦩ꧀ꦥꦶ ꦌꦮꦩꦴꦲ – ‘‘ꦌꦮꦁ ꦄꦲꦁ ꦆꦩꦱ꧀ꦱ ꦏꦚ꧀ꦕꦶ ꦣꦩ꧀ꦩꦁ ꦱꦺꦴꦠꦸꦁ ꦭꦨꦶꦱ꧀ꦱꦴꦩꦷ’’ꦠꦶ. ꦮꦺꦤꦺꦪ꧀ꦪꦮꦱꦺꦤꦴꦠꦶ ꦄꦠ꧀ꦠꦤꦺꦴ ꦏꦱꦤꦏꦴꦫꦶꦨꦴꦮꦏꦶꦠ꧀ꦠꦤꦩꦸꦑꦺꦤ ꦮꦶꦤꦺꦠꦧ꧀ꦧꦥꦸꦒ꧀ꦒꦭꦮꦱꦺꦤ.

ꦎꦭ꦳ꦴꦫꦶꦏꦴꦤꦷꦠꦶ ꦥꦴꦏꦠꦶꦏꦴꦤꦶ. ‘‘ꦌꦱ ꦈꦠ꧀ꦠꦩꦢꦏ꧀ꦑꦶꦟꦺꦪ꧀ꦪꦺꦴ’’ꦠꦶ ꦱꦚ꧀ꦗꦴꦠꦧꦲꦸꦩꦴꦤꦺꦴ. ꦥꦴꦭ꦳ꦶꦪꦁ ‘‘ꦪꦸꦒꦁ ꦮꦴ ꦤꦔ꧀ꦒꦭꦁ ꦮꦴ’’ꦠꦶ ꦮꦴ-ꦱꦢ꧀ꦢꦺꦴ ꦄꦮꦸꦠ꧀ꦠꦮꦶꦏꦥ꧀ꦥꦠ꧀ꦡꦺꦴ. ꦠꦺꦤ ꦧꦷꦗꦴꦢꦶꦁ ꦱꦔ꧀ꦒꦟ꧀ꦲꦴꦠꦶ, ꦠꦱ꧀ꦩꦴ ꦧꦷꦗꦁ ꦮꦴ ꦇꦱꦁ ꦮꦴ ꦥꦫꦶꦒ꧀ꦒꦲꦪꦺꦴꦠ꧀ꦠꦴꦤꦶ ꦮꦴꦠꦶ ꦄꦪꦩꦠ꧀ꦡꦺꦴ ꦢꦱ꧀ꦱꦶꦠꦺꦴ ꦲꦺꦴꦠꦶ. ꦠꦡꦴ ꦲꦶ ꦨꦒꦮꦴ ꦧ꧀ꦫꦴꦲ꧀ꦩꦟꦱ꧀ꦱ ꦥꦛꦶꦮꦕꦤꦁ ꦢꦺꦤ꧀ꦠꦺꦴ ‘‘ꦱꦢ꧀ꦣꦴ ꦧꦷꦗ’’ꦤ꧀ꦠꦶꦄꦴꦢꦶꦩꦴꦲ. ꦥꦸꦧ꧀ꦧꦣꦩ꧀ꦩꦱꦨꦴꦒꦠꦴꦪꦴꦠꦶ ꦥꦜꦩꦁ ꦒꦲꦶꦠꦣꦩ꧀ꦩꦱꦨꦴꦒꦠꦴꦪ. ꦪꦁ ꦥꦤꦺꦠ꧀ꦡ ꦮꦠ꧀ꦠꦧ꧀ꦧꦁ, ꦠꦁ ꦄꦛ꧀ꦜꦏꦡꦴꦫꦸꦭ꦳꧀ꦲꦩꦺꦮ ꦒꦲꦺꦠꦧ꧀ꦧꦚ꧀ꦕ ꦱꦢ꧀ꦢꦠꦺꦴ ꦄꦠ꧀ꦡꦴꦥꦠ꧀ꦠꦶꦠꦺꦴ ꦮꦴ ꦆꦣ ꦢꦛ꧀ꦜꦧ꧀ꦧꦁ. ꦧꦸꦢ꧀ꦣꦴꦤꦁ ꦄꦴꦤꦸꦨꦴꦮꦺꦴ ꦄꦪꦁ, ꦪꦢꦶꦢꦁ ꦥꦱꦔ꧀ꦒꦴꦒꦠꦣꦩ꧀ꦩꦩꦸꦑꦺꦤ ꦢꦺꦱꦤꦁ ꦄꦴꦫꦨꦶꦠ꧀ꦮꦴ ꦮꦺꦤꦺꦪ꧀ꦪꦮꦶꦤꦪꦤꦁ.

ꦄꦤꦤꦸꦱꦤ꧀ꦣꦶꦏꦴꦠꦶ ꦥꦸꦕ꧀ꦖꦴꦤꦸꦱꦤ꧀ꦣꦶꦮꦱꦺꦤ ꦄꦤꦤꦸꦱꦤ꧀ꦣꦶꦏꦴ. ꦌꦮꦤ꧀ꦠꦶ ꦆꦢꦴꦤꦶ ꦮꦸꦕ꧀ꦕꦩꦴꦤꦴꦏꦴꦫꦺꦤ. ꦌꦠ꧀ꦡꦴꦠꦶ ꦌꦠꦶꦱ꧀ꦱꦴ ꦢꦺꦱꦤꦴꦪ. ꦱꦺꦴꦠꦶ ꦨꦒꦮꦴ. ꦠꦱ꧀ꦱꦴꦠꦶ ꦧ꧀ꦫꦴꦲ꧀ꦩꦟꦱ꧀ꦱ. ꦄꦤꦸꦏꦩ꧀ꦥꦴꦪꦴꦠꦶ ꦄꦱꦧ꧀ꦧꦚ꧀ꦚꦹ ꦲꦶ ꦱꦠꦶꦥꦶ ꦄꦤꦸꦏꦩ꧀ꦥꦴꦪ ꦥꦸꦕ꧀ꦖꦶꦠꦩꦠ꧀ꦠꦺ ꦠꦶꦛ꧀ꦜꦺꦪ꧀ꦪ, ꦠꦡꦴ ꦗꦴꦤꦤ꧀ꦠꦺꦴꦥꦶ ꦄꦤꦤꦸꦏꦩ꧀ꦥꦏꦺꦴ, ꦨꦒꦮꦴ ꦥꦤ ꦈꦨꦪꦣꦩ꧀ꦩꦥꦴꦫꦶꦥꦹꦫꦶꦪꦴ ‘‘ꦆꦢꦁ ꦄꦥꦸꦕ꧀ꦖꦶꦠ’’ꦤ꧀ꦠꦶ ꦄꦥꦫꦶꦲꦴꦥꦺꦠ꧀ꦮꦴ ꦏꦡꦺꦠꦶ. ꦱꦩꦹꦭꦤ꧀ꦠꦶꦄꦴꦢꦶꦤꦴ ꦱꦔ꧀ꦑꦺꦥꦺꦤ ꦮꦸꦠ꧀ꦠꦩꦠ꧀ꦡꦁ ꦮꦶꦮꦫꦤ꧀ꦠꦺꦴ ‘‘ꦠꦠ꧀ꦡꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦧꦷꦗꦱ꧀ꦱ ꦏꦱꦶꦪꦴ ꦩꦹꦭꦨꦴꦮꦺꦴ ꦤꦴꦤꦤ꧀ꦠꦫꦶꦪꦠꦺꦴ ꦠꦥ꧀ꦥꦩꦴꦟꦮꦶꦣꦴꦤꦠꦺꦴ ꦕꦴꦠꦶ ꦄꦴꦲ ‘‘ꦠꦱ꧀ꦩꦶꦁ…ꦥꦺ… ꦏꦠ꧀ꦠꦧ꧀ꦧꦠꦺꦴ’’ꦠꦶ. ꦠꦺꦤ ꦄꦤ꧀ꦮꦪꦠꦺꦴ ꦧ꧀ꦪꦠꦶꦫꦺꦏꦠꦺꦴ ꦕ ꦧꦷꦗꦱ꧀ꦱ ꦏꦱꦶꦪꦴ ꦩꦹꦭꦨꦴꦮꦁ ꦮꦶꦨꦴꦮꦺꦠꦶ. ꦏꦸꦱꦭꦴꦠꦶ ꦆꦩꦶꦤꦴ ꦄꦏꦸꦱꦭꦴ ꦠꦠꦺꦴ ꦄꦚ꧀ꦚꦡꦴꦥꦶ ꦏꦫꦺꦴꦤ꧀ꦠꦶ, ꦠꦁ ꦥꦤ ꦄꦥ꧀ꦥꦩꦴꦟꦤ꧀ꦠꦶ ꦢꦱ꧀ꦱꦺꦠꦶ.

ꦠꦱ꧀ꦱꦴꦠꦶ ꦧ꧀ꦫꦴꦲ꧀ꦩꦟꦱ꧀ꦱ ꦧꦷꦗꦛ꧀ꦜꦴꦤꦶꦪꦱ꧀ꦱ ꦣꦩ꧀ꦩꦱ꧀ꦱ ꦕ ꦈꦥꦏꦴꦫꦨꦴꦮꦠꦺꦴ. ꦣꦩ꧀ꦩꦱꦩ꧀ꦧꦤ꧀ꦣꦱꦩꦠ꧀ꦡꦨꦴꦮꦠꦺꦴꦠꦶ ꦠꦡꦴ ꦮꦸꦠ꧀ꦠꦣꦩ꧀ꦩꦱ꧀ꦱ ꦦꦭꦺꦤ ꦱꦩ꧀ꦧꦤ꧀ꦣꦶꦠꦸꦁ ꦪꦺꦴꦗꦺꦠꦸꦁ ꦱꦩꦠ꧀ꦡꦨꦴꦮꦠꦺꦴ. ꦠꦥꦺꦴ ꦮꦸꦛ꧀ꦜꦷꦠꦶ ꦮꦸꦠ꧀ꦠꦮꦕꦤꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦱꦔ꧀ꦑꦺꦥꦠꦺꦴ ꦮꦸꦠ꧀ꦠꦩꦠ꧀ꦡꦁ ꦥꦴꦏꦛꦁ ꦏꦴꦠꦸꦁ ‘‘ꦄꦪꦁ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦏꦱ꧀ꦱꦏꦱ꧀ꦱ ꦈꦥꦏꦴꦫꦱ꧀ꦱ ꦧꦷꦗꦱ꧀ꦱ ꦄꦤꦤ꧀ꦠꦫꦁ ꦮꦸꦛ꧀ꦜꦶ ꦮꦸꦕ꧀ꦕꦩꦴꦤꦴ ꦄꦛ꧀ꦜꦴꦤꦺ ꦮꦸꦠ꧀ꦠꦴ ꦤꦴꦩ ꦤ ꦲꦺꦴꦠꦶ. ꦏꦱ꧀ꦩꦴ? ꦧꦷꦗꦱ꧀ꦱ ꦮꦥ꧀ꦥꦏꦴꦭꦺ ꦄꦤꦸꦫꦹꦥꦴꦪ ꦮꦸꦛ꧀ꦜꦶꦪꦴ ꦆꦕ꧀ꦖꦶꦠꦧ꧀ꦧꦠꦺꦴ, ꦠꦱ꧀ꦩꦴ ꦄꦮꦱꦴꦤꦺ ꦩꦗ꧀ꦙꦺ ꦮꦴ ꦮꦸꦕ꧀ꦕꦩꦴꦤꦴꦪ ꦣꦩ꧀ꦩꦱꦩ꧀ꦧꦤ꧀ꦣꦱꦩꦠ꧀ꦡꦠꦴ ꦠꦱ꧀ꦱꦴ ꦮꦶꦨꦴꦮꦶꦠꦴ ꦤ ꦱꦶꦪꦴ. ꦄꦠ꧀ꦠꦤꦺꦴ ꦄꦮꦶꦱꦪꦺꦠꦶ ꦙꦴꦤꦴꦢꦶꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦺ. ꦥꦕ꧀ꦖꦴꦥꦷꦠꦶ ꦏꦱꦶꦱꦩ꧀ꦨꦴꦫꦏꦡꦤꦠꦺꦴ ꦥꦕ꧀ꦖꦴꦥꦶ. ꦮꦠ꧀ꦠꦧ꧀ꦧꦺꦴꦠꦶ ꦌꦏꦤ꧀ꦠꦺꦤ ꦮꦠ꧀ꦠꦧ꧀ꦧꦺꦴ. ꦠꦢꦤꦤ꧀ꦠꦫꦁꦪꦺꦮꦴꦠꦶ ꦧꦷꦗꦴꦤꦤ꧀ꦠꦫꦁꦪꦺꦮ. ꦮꦸꦕ꧀ꦕꦩꦴꦤꦴ ꦮꦸꦛ꧀ꦜꦶ ꦱꦩꦠ꧀ꦡꦴ ꦲꦺꦴꦠꦶ, ꦧꦷꦗꦱ꧀ꦱ ꦦꦭꦺꦤ ꦱꦩ꧀ꦧꦤ꧀ꦣꦤꦺ ꦱꦩꦠ꧀ꦡꦴꦠꦶ ꦢꦷꦥꦶꦠꦴ ꦲꦺꦴꦠꦶ ꦄꦤꦤ꧀ꦠꦫꦮꦕꦤꦺꦤꦺꦮ ꦠꦱ꧀ꦱꦴ ꦄꦴꦱꦤ꧀ꦤꦈꦥꦏꦴꦫꦠ꧀ꦠꦢꦷꦥꦤꦠꦺꦴ.

ꦱꦩ꧀ꦥꦱꦴꦢꦭꦏ꧀ꦑꦟꦴꦠꦶ ꦥꦱꦷꦢꦶꦠꦧ꧀ꦧꦺ ꦮꦠ꧀ꦡꦸꦱ꧀ꦩꦶꦁ ꦱꦩ꧀ꦩꦢꦺꦮ ꦥꦱꦷꦢꦤꦭꦏ꧀ꦑꦟꦴ. ꦎꦏꦥ꧀ꦥꦤꦭꦏ꧀ꦑꦟꦴꦠꦶ ꦱꦢ꧀ꦣꦺꦪ꧀ꦪꦮꦠ꧀ꦡꦸꦤꦺꦴ ꦌꦮꦩꦺꦠꦤ꧀ꦠꦶ ꦥꦏ꧀ꦑꦤ꧀ꦢꦤꦭꦏ꧀ꦑꦟꦴ. ꦩꦹꦭꦧꦷꦗꦤ꧀ꦠꦶꦄꦴꦢꦷꦱꦸ ꦩꦹꦭꦩꦺꦮ ꦧꦷꦗꦁ ꦩꦹꦭꦧꦷꦗꦁ. ꦌꦱ ꦤꦪꦺꦴ ꦱꦺꦱꦺꦱꦸꦥꦶ ꦧꦷꦗꦒꦴꦩꦱ꧀ꦱ ꦄꦣꦶꦥ꧀ꦥꦺꦠꦠ꧀ꦠꦴ. ꦨꦹꦠꦒꦴꦩꦺꦴ ꦥꦤ ꦩꦹꦭꦁ ꦧꦷꦗꦁ ꦌꦠꦱ꧀ꦱꦴꦠꦶ ꦩꦹꦭꦧꦷꦗꦤ꧀ꦠꦶꦄꦴꦢꦶꦤꦴ ꦮꦺꦢꦶꦠꦧ꧀ꦧꦺꦴ. ꦧꦷꦗꦧꦷꦗꦤ꧀ꦠꦶ ꦥꦚ꧀ꦕꦩꦁ ꦥꦤ ꦥꦕ꧀ꦕꦪꦤ꧀ꦠꦫꦱꦩꦮꦴꦪꦺ ꦱꦢꦶꦱꦦꦭꦸꦥ꧀ꦥꦠ꧀ꦠꦶꦪꦴ ꦮꦶꦱꦺꦱꦏꦴꦫꦟꦨꦴꦮꦠꦺꦴ ꦮꦶꦫꦹꦲꦤꦱꦩꦠ꧀ꦡꦺ ꦱꦴꦫꦦꦭꦺ ꦤꦶꦫꦸꦭ꦳꧀ꦲꦺꦴ ꦧꦷꦗꦱꦢ꧀ꦢꦺꦴ ꦠꦢꦠ꧀ꦡꦱꦶꦢ꧀ꦣꦶꦪꦴ ꦩꦹꦭꦴꦢꦷꦱꦸꦥꦶ ꦏꦺꦱꦸꦕꦶ ꦥꦮꦠ꧀ꦠꦠꦷꦠꦶ ꦠꦠꦺꦴ ꦤꦶꦮꦠ꧀ꦠꦤꦠ꧀ꦡꦁ ꦌꦏꦺꦤ ꦧꦷꦗ-ꦱꦢ꧀ꦢꦺꦤ ꦮꦶꦱꦺꦱꦺꦠ꧀ꦮꦴ ꦮꦸꦠ꧀ꦠꦁ ‘‘ꦧꦷꦗꦧꦷꦗ’’ꦤ꧀ꦠꦶ ‘‘ꦢꦸꦏ꧀ꦑꦢꦸꦏ꧀ꦑꦁ ꦫꦹꦥꦫꦹꦥ’’ꦤ꧀ꦠꦶ ꦕ ꦪꦡꦴ. ꦌꦮꦩ꧀ꦥꦶ ꦆꦩꦶꦤꦴ ꦄꦠ꧀ꦡꦺꦤ ꦆꦩꦱ꧀ꦱꦥꦶ ꦤꦶꦥ꧀ꦥꦫꦶꦪꦴꦪꦺꦴꦮ ꦧꦷꦗꦨꦴꦮꦺꦴꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦠꦁ ꦱꦧ꧀ꦧꦩ꧀ꦥꦶ…ꦥꦺ… ꦒꦕ꧀ꦖꦠꦷ’’ꦠꦶ.

ꦆꦢꦴꦤꦶ ꦏꦡꦚ꧀ꦕꦶ ꦮꦠ꧀ꦠꦧ꧀ꦧꦺ ꦱꦢ꧀ꦣꦴꦪ ꦎꦥꦩ꧀ꦩꦠ꧀ꦠꦺ ꦧꦷꦗꦺ ꦱꦢ꧀ꦣꦴꦪ ꦧꦷꦗꦨꦴꦮꦁ ꦮꦶꦨꦴꦮꦺꦠꦸꦁ ‘‘ꦠꦠ꧀ꦡ ꦪꦡꦴ’’ꦠꦶꦄꦴꦢꦶ ꦄꦴꦫꦢ꧀ꦣꦁ. ꦏꦴꦩꦁ ꦱꦢ꧀ꦣꦹꦥꦤꦶꦱꦁ ꦱꦷꦭꦁ, ꦠꦡꦴꦥꦶ ꦱꦩꦴꦣꦶꦱ꧀ꦱ ꦮꦶꦪ ꦱꦧ꧀ꦧꦺꦱꦩ꧀ꦥꦶ ꦄꦤꦮꦗ꧀ꦗꦣꦩ꧀ꦩꦴꦤꦁ ꦄꦴꦢꦶꦩꦹꦭꦨꦴꦮꦠꦺꦴ ꦱꦢ꧀ꦣꦴꦪꦥꦶ ꦥꦠꦶꦛ꧀ꦜꦴ ꦲꦺꦴꦠꦷꦠꦶ ꦄꦴꦲ ‘‘ꦲꦺꦛ꧀ꦜꦴ ꦱꦷꦭꦩꦹꦭꦺꦤ ꦥꦠꦶꦛ꧀ꦜꦴꦠꦷ’’ꦠꦶ. ꦪꦱ꧀ꦩꦴ ꦱꦧ꧀ꦧꦱ꧀ꦱꦺꦮ ꦥꦸꦒ꧀ꦒꦭꦱ꧀ꦱ ꦱꦢ꧀ꦣꦴꦮꦱꦺꦤ ꦱꦩꦡꦮꦶꦥꦱ꧀ꦱꦤꦴꦫꦩ꧀ꦨꦺꦴ, ꦠꦱ꧀ꦩꦴ ꦱꦴ ‘‘ꦈꦥꦫꦶ ꦱꦩꦡꦮꦶꦥꦱ꧀ꦱꦤꦔ꧀ꦏꦸꦫꦁ ꦈꦛ꧀ꦜꦴꦥꦺꦠꦷ’’ꦠꦶ ꦮꦸꦠ꧀ꦠꦴ. ꦠꦤ꧀ꦠꦶ ꦣꦚ꧀ꦚꦧꦷꦗꦁ. ꦥꦡꦮꦶꦫꦱꦁ ꦄꦴꦥꦺꦴꦫꦱꦤ꧀ꦠꦶ ꦱꦱꦩ꧀ꦨꦴꦫꦥꦡꦮꦷꦄꦴꦥꦺꦱꦸ ꦭꦧ꧀ꦨꦩꦴꦤꦁ ꦫꦱꦁ. ꦒꦲꦺꦠ꧀ꦮꦴꦠꦶ ꦥꦕ꧀ꦕꦪꦥꦫꦩ꧀ꦥꦫꦴꦪ ꦒꦲꦺꦠ꧀ꦮꦴ. ꦣꦚ꧀ꦚꦥꦫꦶꦥꦴꦏꦒꦲꦟꦠ꧀ꦡꦤ꧀ꦠꦶ ꦣꦚ꧀ꦚꦥꦫꦶꦥꦴꦏꦤꦶꦧ꧀ꦧꦠ꧀ꦠꦶꦄꦠ꧀ꦡꦁ. ꦫꦱꦤ꧀ꦠꦶ ꦱꦢ꧀ꦣꦴꦱꦷꦭꦩꦹꦭꦲꦺꦠꦸꦱꦩꦡꦮꦶꦥꦱ꧀ꦱꦤꦴꦨꦴꦮꦤꦴꦫꦱꦁ ꦄꦴꦢꦶꦪꦶꦠ꧀ꦮꦴ. ꦄꦫꦶꦪꦩꦒ꧀ꦒꦤꦴꦭ꦳ꦺꦤꦴꦠꦶ ꦄꦫꦶꦪꦩꦒ꧀ꦒꦱꦺꦴꦠꦺꦤ ꦄꦫꦶꦪꦦꦭꦣꦚ꧀ꦚꦥꦫꦶꦥꦴꦏꦒꦲꦟꦠ꧀ꦡꦤ꧀ꦠꦶ ꦄꦫꦶꦪꦦꦭꦩꦺꦮ ꦣꦤꦴꦪꦶꦠꦧ꧀ꦧꦠꦺꦴ ꦣꦚ꧀ꦚꦁ ꦠꦱ꧀ꦱ ꦤꦶꦧ꧀ꦧꦠ꧀ꦠꦶꦄꦠ꧀ꦡꦁ. ꦣꦚ꧀ꦚꦤꦴꦭ꦳ꦁ ꦤꦴꦩ ꦏꦟ꧀ꦝꦱ꧀ꦱ ꦤꦶꦱ꧀ꦱꦪꦨꦹꦠꦺꦴ ꦥꦕ꧀ꦖꦶꦩꦢꦺꦱꦺꦴ, ꦏꦟ꧀ꦝꦺꦴ ꦠꦧ꧀ꦨꦤ꧀ꦠꦫꦺꦴ ꦠꦁꦤꦶꦱ꧀ꦱꦪꦺꦴꦪꦺꦮ ꦢꦟ꧀ꦝꦺꦴ. ꦥꦱꦮꦺꦴ ꦤꦴꦩ ꦥꦸꦥ꧀ꦦꦁ. ꦮꦸꦢ꧀ꦣꦶꦤ꧀ꦠꦶ ꦄꦮꦪꦮꦥꦴꦫꦶꦥꦹꦫꦶꦮꦱꦺꦤ ꦮꦸꦢ꧀ꦣꦶꦁ. ꦮꦶꦫꦹꦭ꦳꧀ꦲꦶꦤ꧀ꦠꦶ ꦩꦹꦭꦱꦤ꧀ꦠꦴꦤꦢꦭ꦳꧀ꦲꦠꦴꦪ ꦮꦶꦫꦸꦭ꦳꧀ꦲꦠꦁ. ꦮꦺꦥꦸꦭ꧀ꦭꦤ꧀ꦠꦶ ꦥꦠ꧀ꦠꦤꦴꦭ꦳ꦴꦢꦷꦲꦶ ꦮꦶꦥꦸꦭꦨꦴꦮꦁ. ꦑꦷꦫꦁ ꦗꦤꦺꦠ꧀ꦮꦴꦠꦶ ꦠꦫꦸꦟꦱꦭꦴꦛꦸꦏꦨꦴꦮꦥ꧀ꦥꦠ꧀ꦠꦶꦪꦴ ꦠꦟ꧀ꦝꦸꦭꦱ꧀ꦱ ꦧꦷꦗꦱ꧀ꦱ ꦧꦷꦗꦨꦹꦠꦁ ꦑꦷꦫꦁ ꦈꦥ꧀ꦥꦴꦢꦺꦠ꧀ꦮꦴ. ꦌꦱꦴꦠꦶ ꦱꦢ꧀ꦣꦴ. ꦥꦠꦶꦛ꧀ꦜꦲꦶꦠ꧀ꦮꦴꦠꦶ ꦏꦩ꧀ꦩꦥꦡꦴꦏꦩ꧀ꦩꦥꦡꦱꦩ꧀ꦩꦴꦢꦶꦛ꧀ꦜꦶꦱꦲꦶꦠꦺꦤ ꦄꦴꦢꦶꦠꦺꦴ ꦥꦮꦠ꧀ꦠꦱꦷꦭꦩꦠ꧀ꦠꦺꦤ ꦥꦠꦶꦛ꧀ꦜꦲꦶꦠ꧀ꦮꦴ. ꦮꦸꦢ꧀ꦣꦶꦤ꧀ꦠꦶꦄꦴꦢꦷꦱꦸ ꦱꦸꦥꦫꦶꦱꦸꦢ꧀ꦣꦴꦲꦶ ꦱꦷꦭꦕꦶꦠ꧀ꦠꦮꦶꦱꦸꦢ꧀ꦣꦷꦲꦶ ꦮꦸꦢ꧀ꦣꦶꦁ, ꦢꦶꦛ꧀ꦜꦶꦏꦔ꧀ꦑꦴꦮꦶꦠꦫꦟꦮꦶꦱꦸꦢ꧀ꦣꦷꦲꦶ ꦮꦶꦫꦹꦭ꦳꧀ꦲꦶꦁ. ꦩꦒ꧀ꦒꦴꦩꦒ꧀ꦒꦥꦛꦶꦥꦢꦴꦚꦴꦟꦢꦱ꧀ꦱꦤꦮꦶꦱꦸꦢ꧀ꦣꦷꦲꦶ ꦮꦺꦥꦸꦭ꧀ꦭꦁ ꦥꦠ꧀ꦮꦴ. ꦚꦴꦟꦢꦱ꧀ꦱꦤꦮꦶꦱꦸꦢ꧀ꦣꦶꦑꦷꦫꦤ꧀ꦠꦶ ꦱꦴꦢꦸꦫꦱꦱꦸꦮꦶꦱꦸꦢ꧀ꦣꦶꦨꦴꦮꦠꦺꦴ ꦚꦴꦟꦢꦱ꧀ꦱꦤꦮꦶꦱꦸꦢ꧀ꦣꦶꦱꦔ꧀ꦑꦴꦠꦁ ꦑꦷꦫꦁ ꦗꦤꦺꦠ꧀ꦮꦴ. ꦄꦤꦺꦏ…ꦥꦺ… ꦦꦭꦤ꧀ꦠꦶ ꦄꦤꦺꦏꦥꦛꦶꦱꦩ꧀ꦨꦶꦢꦴ-ꦄꦤꦺꦏꦴꦨꦶꦚ꧀ꦚꦴꦟꦥꦫꦶꦥꦸꦟ꧀ꦟꦁ ꦄꦫꦲꦠ꧀ꦠꦦꦭꦱꦷꦱꦁ ꦤꦶꦥ꧀ꦦꦴꦢꦺꦠꦶ.

ꦧꦷꦗꦏꦶꦕ꧀ꦕꦏꦫꦟꦠꦺꦴꦠꦶ ꦧꦷꦗꦏꦶꦕ꧀ꦕꦱ꧀ꦱ ꦏꦫꦟꦠꦺꦴ. ꦪꦚ꧀ꦲꦶ ꦠꦁꦱꦢꦶꦱꦱ꧀ꦱ ꦮꦶꦱꦢꦶꦱꦱ꧀ꦱ ꦕ ꦄꦠ꧀ꦠꦤꦺꦴ ꦦꦭꦱ꧀ꦱ ꦥꦠꦶꦛ꧀ꦜꦴꦥꦤꦱꦩ꧀ꦧꦤ꧀ꦣꦤꦤꦶꦥ꧀ꦦꦴꦢꦤꦱꦔ꧀ꦑꦴꦠꦁ ꦧꦷꦗꦱ꧀ꦱ ꦏꦶꦕ꧀ꦕꦁ, ꦠꦱ꧀ꦱ ꦏꦫꦟꦠꦺꦴ ꦤꦶꦧ꧀ꦧꦠ꧀ꦠꦤꦠꦺꦴ ‘‘ꦌꦮꦁ ꦱꦢ꧀ꦣꦴ ꦧꦷꦗꦏꦶꦕ꧀ꦕ’’ꦤ꧀ꦠꦶ ꦮꦸꦠ꧀ꦠꦁ. ꦆꦩꦶꦤꦴ ꦄꦤꦚ꧀ꦚꦱꦴꦣꦴꦫꦟꦁ ꦱꦢ꧀ꦣꦴꦪ ꦏꦸꦱꦭꦣꦩ꧀ꦩꦴꦤꦁ ꦧꦷꦗꦨꦴꦮꦁ ꦢꦱ꧀ꦱꦺꦠꦶ. ꦱꦴ ꦕꦴꦠꦶꦄꦴꦢꦶꦤꦴ ꦠꦩꦺꦮꦠ꧀ꦡꦁ ꦱꦩꦠ꧀ꦡꦺꦠꦶ. ꦆꦢꦴꦤꦶ ꦠꦠ꧀ꦡ ꦄꦴꦒꦩꦁ ꦢꦱ꧀ꦱꦺꦤ꧀ꦠꦺꦴ ‘‘ꦱꦢ꧀ꦣꦴꦗꦴꦠꦺꦴ’’ꦠꦶꦄꦴꦢꦶꦩꦴꦲ. ꦠꦺꦤ ꦪꦡꦴ ꦱꦥ꧀ꦥꦸꦫꦶꦱꦹꦥꦤꦶꦱ꧀ꦱꦪꦱ꧀ꦱ ꦱꦢ꧀ꦣꦩ꧀ꦩꦱ꧀ꦱꦮꦤꦱ꧀ꦱ ꦕ, ꦌꦮꦁ ꦄꦤꦮꦱꦺꦱꦴꦪ ꦱꦩ꧀ꦩꦴꦥꦛꦶꦥꦠ꧀ꦠꦶꦪꦴ ꦱꦢ꧀ꦣꦴ ꦩꦹꦭꦏꦴꦫꦟꦤ꧀ꦠꦶ ꦢꦱ꧀ꦱꦺꦠꦶ.

ꦆꦤ꧀ꦢ꧀ꦫꦶꦪꦱꦁꦮꦫꦺꦴ ꦮꦷꦫꦶꦪꦚ꧀ꦕ ꦄꦏꦸꦱꦭꦣꦩ꧀ꦩꦺ, ꦢꦸꦏ꧀ꦏꦫꦏꦴꦫꦶꦏꦴ ꦣꦸꦠꦔ꧀ꦒꦚ꧀ꦕ ꦄꦏꦸꦱꦭꦣꦩ꧀ꦩꦺ ꦕꦺꦮ ꦏꦴꦪꦚ꧀ꦕ ꦠꦥꦠꦶ ꦮꦶꦧꦴꦣꦠꦷꦠꦶ ꦠꦥꦺꦴꦠꦶ ꦮꦸꦕ꧀ꦕꦠꦶ. ꦆꦤ꧀ꦢ꧀ꦫꦶꦪꦱꦁꦮꦫꦺꦴ ꦄꦣꦶꦥ꧀ꦥꦺꦠꦺꦴ ꦮꦷꦫꦶꦪꦱ꧀ꦱ ꦣꦺꦴꦫꦪ꧀ꦲꦨꦴꦮꦺꦤ ꦒꦪ꧀ꦲꦩꦴꦤꦠ꧀ꦠꦴ, ꦆꦠꦫꦺꦱꦁ ꦮꦸꦛ꧀ꦜꦶꦨꦴꦮꦱ꧀ꦱ ꦄꦤꦸꦪꦸꦚ꧀ꦗꦩꦴꦤꦠ꧀ꦠꦴ. ꦄꦴꦢꦶ-ꦱꦢ꧀ꦢꦺꦤ ꦏꦭꦭꦔ꧀ꦒꦴꦫꦮꦸꦛ꧀ꦜꦶꦄꦴꦢꦷꦤꦁ ꦱꦔ꧀ꦒꦲꦺꦴ. ꦱꦩꦤꦸꦒ꧀ꦒꦲꦶꦠꦤ꧀ꦠꦶ ꦈꦥꦒꦠꦁ. ꦮꦶꦫꦸꦲꦤꦴꦩꦶꦭꦴꦪꦤꦤꦶꦥ꧀ꦦꦠ꧀ꦠꦶꦮꦕꦤꦺꦲꦶ ꦣꦚ꧀ꦚꦧꦷꦗꦱꦤ꧀ꦠꦴꦤꦱ꧀ꦱ ꦮꦶꦪ ꦠꦺꦱꦁ ꦮꦸꦢ꧀ꦣꦶꦪꦴ ꦱꦢ꧀ꦣꦴꦧꦷꦗꦱꦤ꧀ꦠꦴꦤꦱ꧀ꦱ ꦠꦥꦺꦴꦮꦸꦛ꧀ꦜꦶꦪꦴ ꦄꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦺꦱꦸ ꦈꦥꦏꦴꦫꦠꦁ ꦢꦱ꧀ꦱꦺꦠꦶ.

ꦥꦸꦫꦶꦩꦥꦢꦺꦱꦸꦥꦷꦠꦶ ꦄꦥꦶ-ꦱꦢ꧀ꦢꦺꦤ ꦥꦫꦥꦢꦺꦱꦸꦥꦷꦠꦶ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ ‘‘ꦲꦶꦫꦷ ꦩꦺ ꦇꦱꦴ, ꦩꦤꦺꦴ ꦩꦺ ꦪꦺꦴꦠ꧀ꦠ’’ꦤ꧀ꦠꦶ ꦆꦕ꧀ꦖꦶꦠꦠ꧀ꦠꦴ, ‘‘ꦱꦠꦶ ꦩꦺ’’ꦠꦶ ꦌꦠ꧀ꦡ ꦩꦺ-ꦱꦢ꧀ꦢꦺꦴ ꦄꦴꦤꦺꦠ꧀ꦮꦴ ꦪꦺꦴꦗꦺꦠꦧ꧀ꦧꦺꦴ. ꦈꦢꦏꦩ꧀ꦥꦶ ꦠꦴꦮ ꦢꦴꦠꦧ꧀ꦧꦁ ꦲꦺꦴꦠꦶ ꦤꦢꦷꦠꦭ꦳ꦴꦏꦴꦢꦶꦠꦺꦴ ꦄꦴꦤꦺꦠ꧀ꦮꦴ. ꦮꦷꦫꦶꦪꦧꦭꦷꦧꦢ꧀ꦢꦺ ꦕꦠꦸꦧ꧀ꦧꦶꦣꦺ ꦪꦺꦴꦗꦺꦠ꧀ꦮꦴ. ꦤꦶꦕ꧀ꦕꦏꦴꦭꦁ ꦄꦠ꧀ꦡꦷꦠꦶ ꦮꦕꦤꦱꦺꦱꦺꦴ.

ꦱꦲ ꦮꦶꦥꦱ꧀ꦱꦤꦴꦪ ꦩꦒ꧀ꦒꦥꦚ꧀ꦚꦴ ꦄꦣꦶꦥ꧀ꦥꦺꦠꦴ ꦄꦩꦠꦥ꧀ꦦꦭꦴꦪ ꦏꦱꦶꦪꦴ ꦄꦣꦶꦥ꧀ꦥꦺꦠꦠ꧀ꦠꦴ. ꦮꦶꦥꦱ꧀ꦱꦤꦴ ꦥꦚ꧀ꦚꦴ ꦕꦴꦠꦶ ꦢꦸꦮꦶꦣꦴꦥꦶ ꦥꦚ꧀ꦚꦴ ꦈꦥꦤꦶꦱ꧀ꦱꦪꦴ ꦲꦺꦴꦠꦶ ꦮꦶꦱꦶꦛ꧀ꦜꦨꦴꦮꦠꦺꦴ. ꦠꦺꦤꦴꦲ ‘‘ꦪꦡꦴ ꦲꦷ’’ꦠꦶꦄꦴꦢꦶ. ꦥꦚ꧀ꦚꦴꦠꦶ ꦥꦏꦴꦫꦺꦲꦶ ꦗꦴꦤꦴꦠꦷꦠꦶ ꦥꦚ꧀ꦚꦴ. ꦥꦚ꧀ꦚꦮꦠꦁ ꦥꦚ꧀ꦚꦴ ꦥꦸꦫꦠꦺꦴ ꦲꦺꦴꦠꦶ ꦪꦺꦴꦤꦶꦱꦺꦴꦩꦤꦱꦶꦏꦴꦫꦱ꧀ꦱ ꦮꦶꦱꦺꦱꦥꦕ꧀ꦕꦪꦨꦴꦮꦠꦺꦴ, ꦱꦲꦗꦴꦠꦴꦣꦶꦥꦠꦷꦱꦸ ꦕ ꦈꦏ꧀ꦏꦛ꧀ꦜꦨꦴꦮꦠꦺꦴ. ꦱꦶꦫꦷꦠꦶ ꦱꦺꦴꦨꦒ꧀ꦒꦁ. ꦱꦠꦁ ꦣꦩ꧀ꦩꦴ ꦱꦢ꧀ꦣꦴꦢꦪꦺꦴ, ꦄꦤ꧀ꦮꦴꦪꦶꦏꦴꦠꦶ ꦄꦤꦸꦒꦴꦩꦶꦤꦺꦴ. ꦇꦱꦴꦧꦢ꧀ꦣꦴ ꦲꦺꦴꦠꦷꦠꦶ ꦲꦶꦫꦶꦱꦔ꧀ꦑꦴꦠꦇꦱꦴꦪ ꦧꦢ꧀ꦣꦴ ꦲꦺꦴꦠꦶ, ꦥꦚ꧀ꦚꦴꦪ ꦏꦢꦴꦕꦶ ꦄꦥ꧀ꦥꦪꦺꦴꦒꦠꦺꦴ ꦩꦤꦺꦴꦱꦷꦱꦺꦤ ꦱꦩꦴꦣꦶ ꦆꦣ ꦮꦸꦠ꧀ꦠꦺꦴꦠꦶ ꦄꦴꦲ ‘‘ꦩꦤꦺꦴꦱꦔ꧀ꦑꦴꦠꦱ꧀ꦱ ꦱꦩꦴꦣꦶꦪꦺꦴꦠ꧀ꦠꦱ꧀ꦱꦴ’’ꦠꦶ. ꦱꦩꦁ ꦈꦥꦤꦺꦠ꧀ꦮꦴ ꦧꦤ꧀ꦣꦶꦠ꧀ꦮꦴ ꦧꦢ꧀ꦣꦫꦗ꧀ꦗꦸꦏꦠ꧀ꦠꦴ ꦱꦩꦴꦣꦶꦪꦺꦴꦠ꧀ꦠꦁ. ꦌꦏꦠꦺꦴ ꦒꦩꦤꦤ꧀ꦠꦶ ꦭꦷꦤꦕ꧀ꦕꦴꦫꦢ꧀ꦣꦱꦔ꧀ꦑꦴꦠꦁ ꦌꦏꦥꦱ꧀ꦱꦠꦺꦴ ꦒꦩꦤꦁ ꦮꦴꦫꦺꦠꦶ. ꦩꦗ꧀ꦙꦶꦩꦴꦪ ꦮꦶꦥꦱ꧀ꦱꦤꦴꦮꦷꦡꦶꦪꦴ ꦥꦛꦶꦥꦴꦢꦤꦠꦺꦴ ꦏꦴꦪꦴꦢꦷꦱꦸ ꦱꦸꦨꦱꦸꦑꦤꦶꦕ꧀ꦕꦠ꧀ꦠꦨꦴꦮꦮꦶꦒꦩꦤꦺ ꦥꦚ꧀ꦚꦴꦪ ꦮꦶꦱꦺꦱꦥꦕ꧀ꦕꦪꦴ ꦱꦠꦷꦠꦶ ꦮꦸꦠ꧀ꦠꦁ – ‘‘ꦱꦠꦶꦪꦸꦠ꧀ꦠꦴ ꦥꦚ꧀ꦚꦴ’’ꦠꦶ ꦠꦱ꧀ꦱꦴ ꦱꦠꦶꦮꦶꦥ꧀ꦥꦪꦺꦴꦒꦴꦱꦧ꧀ꦨꦴꦮꦠꦺꦴ. ꦱꦤ꧀ꦠꦠꦶꦓꦤꦴꦢꦷꦤꦁ ꦄꦪꦁ ꦮꦶꦱꦺꦱꦺꦴ – ꦥꦸꦫꦶꦩꦥꦕ꧀ꦖꦶꦩꦴꦤꦁ ꦣꦩ꧀ꦩꦴꦤꦁ ꦤꦶꦫꦤ꧀ꦠꦫꦠꦴꦪ ꦌꦏꦷꦨꦹꦠꦴꦤꦁ ꦮꦶꦪ ꦥꦮꦠ꧀ꦠꦶ ꦱꦤ꧀ꦠꦠꦶꦓꦤꦠꦴ, ꦌꦏꦱꦩꦹꦲꦮꦱꦺꦤ ꦌꦏꦷꦨꦹꦠꦴꦤꦩꦶꦮ ꦥꦮꦠ꧀ꦠꦶ ꦱꦩꦹꦲꦓꦤꦠꦴ, ꦢꦸꦧ꧀ꦧꦶꦚ꧀ꦚꦺꦪ꧀ꦪꦏꦶꦕ꧀ꦕꦨꦺꦢꦮꦱꦺꦤ ꦌꦏꦷꦨꦹꦠꦴꦤꦩꦶꦮ ꦥꦮꦠ꧀ꦠꦶ. ꦏꦶꦕ꧀ꦕꦓꦤꦠꦴ, ꦌꦏꦴꦫꦩ꧀ꦩꦟꦮꦱꦺꦤ ꦌꦏꦷꦨꦹꦠꦴꦤꦩꦶꦮ ꦥꦮꦠ꧀ꦠꦶ ꦄꦴꦫꦩ꧀ꦩꦟꦓꦤꦠꦴ. ꦱꦧ꧀ꦧꦺꦱꦁ, ꦱꦧ꧀ꦧꦴꦤꦶ ꦮꦴ ꦏꦶꦭꦺꦱꦴꦤꦁ ꦩꦹꦭꦱꦤ꧀ꦠꦴꦤꦏꦴꦤꦶ ꦱꦧ꧀ꦧ…ꦥꦺ… ꦱꦤ꧀ꦠꦴꦤꦏꦴꦤꦶ. ꦄꦤꦸꦥ꧀ꦥꦪꦺꦴꦒꦺꦴ ꦲꦶ ꦄꦠ꧀ꦡꦺꦴ. ꦥꦢꦴꦭꦺꦠꦷꦠꦶ ꦨꦶꦤ꧀ꦢꦠꦶ ꦱꦩꦸꦕ꧀ꦖꦶꦤ꧀ꦢꦠꦶ. ꦱꦴ ꦕ ꦑꦺꦴ ‘‘ꦥꦢꦴꦭꦺꦠꦷ’’ꦠꦶ ꦮꦸꦠ꧀ꦠꦴ ꦭꦺꦴꦏꦸꦠ꧀ꦠꦫꦴꦮ ꦥꦚ꧀ꦚꦴ ꦄꦤꦸꦱꦪꦥ꧀ꦥꦲꦴꦤꦱ꧀ꦱ ꦄꦣꦶꦥ꧀ꦥꦺꦠꦠ꧀ꦠꦴ. ꦱꦤ꧀ꦠꦠꦶꦓꦤꦴꦢꦶꦨꦺꦢꦤꦴ ꦥꦤ ꦭꦺꦴꦏꦶꦪꦴꦥꦶ ꦲꦺꦴꦠꦶ ꦮꦶꦥꦱ꧀ꦱꦤꦴꦮꦱꦺꦤ ꦓꦤꦮꦶꦤꦶꦧ꧀ꦨꦺꦴꦒꦱ꧀ꦱ ꦤꦶꦥ꧀ꦦꦴꦢꦤꦠꦺꦴ. ꦠꦺꦤꦴꦲ ‘‘ꦆꦠꦫꦴ ꦥꦤ ꦭꦺꦴꦏꦶꦏꦴꦥꦶ ꦱꦶꦪꦴ’’ꦠꦶ.

ꦲꦶꦫꦷꦪꦠꦷꦠꦶ ꦭꦗ꧀ꦗꦠꦶ, ꦗꦶꦒꦸꦕ꧀ꦖꦠꦷꦠꦶ ꦄꦠ꧀ꦡꦺꦴ. ꦠꦱ꧀ꦩꦴ ‘‘ꦥꦴꦥꦏꦺꦲꦶ ꦣꦩ꧀ꦩꦺꦲꦷ’’ꦠꦶ ꦤꦶꦱ꧀ꦱꦏ꧀ꦏꦮꦕꦤꦁ ꦢꦛ꧀ꦜꦧ꧀ꦧꦁ, ꦲꦺꦠꦸꦩ꧀ꦲꦶ ꦮꦴ ꦏꦫꦟꦮꦕꦤꦁ. ꦎꦠ꧀ꦠꦥ꧀ꦥꦩ꧀ꦥꦶ ꦒꦲꦶꦠꦩꦺꦮ, ꦤ ꦲꦶ ꦭꦗ꧀ꦗꦤꦁ ꦤꦶꦧ꧀ꦨꦪꦁ ꦥꦴꦥꦨꦪꦁ ꦮꦴ ꦄꦭꦗ꧀ꦗꦤꦁ ꦄꦠ꧀ꦡꦷꦠꦶ. ꦫꦸꦏ꧀ꦑꦭꦛ꧀ꦜꦷꦠꦶ ꦫꦸꦏ꧀ꦑꦢꦟ꧀ꦝꦺꦴ. ꦠꦺꦤ ꦥꦢꦺꦱꦺꦤ ꦏꦱꦤꦠꦺꦴ ꦮꦶꦱꦺꦱꦠꦺꦴ ꦤꦔ꧀ꦒꦭꦤ꧀ꦠꦶ ꦮꦸꦕ꧀ꦕꦠꦷꦠꦶ ꦄꦴꦲ ‘‘ꦇꦱꦴ ꦪꦸꦒꦤꦔ꧀ꦒꦭꦁ ꦣꦴꦫꦺꦠꦷ’’ꦠꦶ. ꦏꦴꦩꦁ ꦥꦚ꧀ꦚꦴꦫꦲꦶꦠꦴ ꦲꦶꦫꦷ ꦄꦠ꧀ꦡꦶ, ꦲꦶꦫꦶꦫꦲꦶꦠꦴ ꦥꦤ ꦥꦚ꧀ꦚꦴ ꦤꦠ꧀ꦡꦺꦮꦴꦠꦶ ꦄꦴꦲ ‘‘ꦲꦶꦫꦶ…ꦥꦺ… ꦄꦨꦴꦮꦠꦺꦴ’’ꦠꦶ. ꦱꦤ꧀ꦣꦶꦛ꧀ꦜꦴꦤꦺ ꦏꦩ꧀ꦥꦤꦴꦨꦴꦮꦠꦺꦴ ꦄꦕꦭꦁ. ꦡꦶꦫꦨꦴꦮꦺꦤ ꦄꦱꦶꦡꦶꦭꦁ. ꦲꦶꦫꦶꦥꦛꦶꦧꦢ꧀ꦣꦥꦚ꧀ꦚꦴ ꦥꦛꦶꦥꦏ꧀ꦑꦮꦱꦺꦤ ꦕ ꦄꦱꦶꦡꦶꦭꦨꦴꦮꦺꦤ ꦕ ꦄꦕꦭꦴ ꦄꦱꦶꦡꦶꦭꦴꦠꦶ ꦄꦴꦲ ‘‘ꦄꦧ꧀ꦧꦺꦴꦏꦶꦟ꧀ꦟꦴ ꦄꦲꦶꦫꦶꦏꦺꦤꦴ’’ꦠꦶ. ꦤꦴꦭ꦳ꦶꦪꦴ ꦩꦶꦤꦩꦴꦤꦥꦸꦫꦶꦱꦺꦴ ꦮꦶꦪ ꦄꦴꦫꦩ꧀ꦩꦟꦁ ꦩꦸꦤꦴꦠꦶ ꦥꦫꦶꦕ꧀ꦖꦺꦢꦠꦺꦴ ꦗꦴꦤꦴꦠꦷꦠꦶ ꦩꦤꦺꦴ. ꦩꦤꦺꦴꦱꦷꦱꦺꦤꦴꦠꦶ ꦩꦤꦱꦺꦴ ꦄꦥꦢꦺꦱꦺꦤ. ꦠꦁꦱꦩ꧀ꦥꦪꦸꦠ꧀ꦠꦺꦴꦠꦶ ꦆꦩꦶꦤꦴ ꦏꦸꦤ꧀ꦠꦱꦲꦕꦫꦟꦠꦺꦴ ꦥꦸꦫꦶꦱꦺꦴ ꦏꦸꦤ꧀ꦠꦺꦴ ꦮꦶꦪ ꦩꦤꦱꦲꦕꦫꦟꦱꦩꦴꦣꦶ ‘‘ꦩꦤꦺꦴ’’ꦠꦶ ꦮꦸꦠ꧀ꦠꦺꦴꦠꦶ ꦢꦱ꧀ꦱꦺꦠꦶ. ꦱꦴꦫꦡꦶꦤꦴꦠꦶ ꦏꦱ꧀ꦱꦏꦺꦤ. ꦱꦺꦴ ꦲꦶ ꦆꦣ ꦧꦭꦷꦧꦢ꧀ꦢꦴꦤꦁ ꦱꦴꦫꦟꦠꦺꦴ ꦥꦴꦕꦤꦠꦺꦴ ‘‘ꦱꦴꦫꦡꦷ’’ꦠꦶ ꦄꦣꦶꦥ꧀ꦥꦺꦠꦺꦴ. ꦌꦏꦴꦧꦤ꧀ꦣꦤꦤ꧀ꦠꦶ ꦌꦏꦴꦧꦢ꧀ꦣꦏꦫꦟꦁ. ꦱꦏꦏꦶꦕ꧀ꦕꦺꦠꦶ ꦱꦏꦏꦶꦕ꧀ꦕꦺꦤ ꦪꦸꦠ꧀ꦠꦺ. ꦠꦺꦤ ꦲꦶ ꦇꦱꦴꦢꦷꦱꦸ ꦪꦡꦴꦫꦲꦁ ꦧꦤ꧀ꦣꦶꦠ꧀ꦮꦴ ꦌꦏꦴꦧꦢ꧀ꦣꦺꦱꦸ ꦏꦠꦺꦱꦸ ꦤꦔ꧀ꦒꦭꦺꦱꦸ ꦏꦶꦕ꧀ꦕꦁ ꦆꦗ꧀ꦙꦠꦶ, ꦤꦺꦴ ꦄꦚ꧀ꦚꦡꦴꦠꦶ ꦠꦁ ‘‘ꦱꦏꦏꦶꦕ꧀ꦕꦺ ꦥꦛꦶꦥꦴꦢꦺꦠꦷ’’ꦠꦶ ꦮꦸꦠ꧀ꦠꦁ. ꦄꦮꦶꦏ꧀ꦑꦺꦥꦱꦨꦴꦮꦺꦤꦴꦠꦶ ꦄꦠ꧀ꦠꦤꦺꦴ ꦄꦮꦶꦏ꧀ꦑꦺꦥꦱꦨꦴꦮꦺꦤ. ꦧꦤ꧀ꦣꦶꦠ꧀ꦮꦴꦠꦶ ꦱꦲꦗꦴꦠꦴꦢꦶꦥꦕ꧀ꦕꦪꦨꦴꦮꦺꦤ ꦄꦠ꧀ꦠꦤꦴ ꦱꦩ꧀ꦧꦤ꧀ꦣꦶꦠ꧀ꦮꦴ. ꦱꦏꦏꦶꦕ꧀ꦕꦺꦠꦶ ꦲꦶꦫꦷꦄꦴꦢꦷꦲꦶ ꦪꦡꦴꦱꦏꦁ ꦏꦠ꧀ꦠꦧ꧀ꦧꦺ ꦏꦶꦕ꧀ꦕꦺ.

ꦕꦶꦫꦏꦠꦴꦢꦶꦩꦠ꧀ꦡꦤ꧀ꦠꦶ ꦕꦶꦫꦨꦴꦱꦶꦠꦩ꧀ꦥꦶ ꦄꦠ꧀ꦡꦁ. ꦱꦫꦠꦶ ꦄꦤꦸꦱ꧀ꦱꦫꦠꦶ ꦏꦴꦪꦴꦢꦶꦁ ꦄꦱꦸꦨꦴꦢꦶꦠꦺꦴ ꦤꦶꦗ꧀ꦙꦴꦪꦠꦶ. ꦦꦴꦭꦺꦠꦷꦠꦶ ꦥꦢꦴꦭꦺꦠꦶ. ꦥꦴꦗꦺꦤ꧀ꦠꦶ ꦒꦩꦺꦤ꧀ꦠꦷꦠꦶ ꦠꦁ ꦥꦴꦗꦤꦁ. ꦆꦣ ꦆꦩꦱ꧀ꦩꦶꦁ ꦱꦸꦠ꧀ꦠꦺ ‘‘ꦥꦴꦕꦤ’’ꦤ꧀ꦠꦶ ꦮꦸꦠ꧀ꦠꦁ ꦗ-ꦏꦴꦫꦱ꧀ꦱ ꦕ-ꦏꦴꦫꦁ ꦏꦠ꧀ꦮꦴ. ꦦꦴꦭꦥꦴꦕꦤꦤ꧀ꦠꦶ ꦆꦩꦩꦠ꧀ꦡꦁ ꦢꦱ꧀ꦱꦺꦠꦸꦁ ‘‘ꦪꦡꦴ ꦲꦶ ꦧ꧀ꦫꦴꦲ꧀ꦩꦟ…ꦥꦺ… ꦱꦠꦷ’’ꦠꦶ ꦮꦸꦠ꧀ꦠꦁ. ꦆꦢꦴꦤꦶ ꦠꦩꦠ꧀ꦡꦁ ꦮꦶꦠ꧀ꦡꦴꦫꦠꦺꦴ ꦢꦱ꧀ꦱꦺꦤ꧀ꦠꦺꦴ ‘‘ꦠꦠ꧀ꦡ ꦪꦡꦴ’’ꦠꦶꦄꦴꦢꦶꦩꦴꦲ. ꦤꦔ꧀ꦒꦭꦁ ꦄꦤꦸꦫꦏ꧀ꦑꦠꦶ ꦨꦶꦗ꧀ꦗꦤꦦꦴꦭꦤꦠꦺꦴ. ꦥꦸꦫꦠꦺꦴ ꦕꦱ꧀ꦱ ꦒꦕ꧀ꦖꦠꦷꦠꦶ ꦄꦱ꧀ꦱ ꦤꦔ꧀ꦒꦭꦱ꧀ꦱ ꦏꦱ꧀ꦱꦤꦺ ꦨꦹꦩꦶꦪꦴ ꦮꦶꦭꦶꦑꦤꦺ ꦥꦸꦫꦠꦺꦴ ꦒꦕ꧀ꦖꦠꦶ ꦥꦸꦧ꧀ꦧꦔ꧀ꦒꦩꦴ ꦲꦺꦴꦠꦶ. ꦒꦠꦶꦪꦺꦴꦠꦶ ꦥꦮꦠ꧀ꦠꦶꦪꦺꦴ. ꦱꦩꦤ꧀ꦮꦺꦱꦩꦴꦤꦴꦠꦶ ꦱꦫꦟꦮꦱꦺꦤ ꦒꦮꦺꦱꦩꦴꦤꦴ. ꦄꦴꦫꦩ꧀ꦩꦟꦺ ꦮꦴ ꦏꦴꦪꦴꦢꦶꦏꦺ ꦈꦥꦛ꧀ꦜꦴꦥꦪꦩꦴꦤꦴ ꦄꦱꦸꦨꦴꦢꦶꦮꦱꦺꦤ ꦥꦚ꧀ꦚꦴꦤꦔ꧀ꦒꦭꦁ ꦫꦏ꧀ꦑꦠꦶ. ꦱꦨꦴꦮꦴꦱꦨꦴꦮꦹꦥꦒꦩꦺ ꦦꦴꦭꦺꦴ ꦮꦶꦪ ꦤꦔ꧀ꦒꦭꦱ꧀ꦱ ‘‘ꦄꦴꦫꦏ꧀ꦑꦴ’’ꦠꦶ ꦮꦸꦠ꧀ꦠꦴ ‘‘ꦱꦧ꧀ꦧꦴꦤꦠ꧀ꦡꦠꦺꦴ ꦱꦠꦶ ꦫꦏ꧀ꦑꦠꦷ’’ꦠꦶ ꦏꦠ꧀ꦮꦴ. ꦠꦡꦴ ꦲꦺꦱꦴ ꦄꦴꦫꦏ꧀ꦑꦥꦕ꧀ꦕꦸꦥꦛ꧀ꦜꦴꦤꦴ. ꦕꦶꦫꦏꦠꦕꦶꦫꦨꦴꦱꦶꦠꦴꦤꦁ ꦄꦱꦩ꧀ꦩꦸꦱ꧀ꦱꦤꦮꦱꦺꦤ ꦱꦠꦶ ꦥꦚ꧀ꦚꦴꦤꦔ꧀ꦒꦭꦱ꧀ꦱ ꦥꦸꦫꦠꦺꦴ ꦲꦺꦴꦠꦷꦠꦶ ꦮꦠ꧀ꦮꦴ ꦠꦱ꧀ꦱ ꦥꦸꦫꦠꦺꦴꦨꦴꦮꦁ ꦢꦱ꧀ꦱꦺꦠꦸꦁ ‘‘ꦱꦠꦶ…ꦥꦺ… ꦤꦺꦴ ꦥꦩꦸꦛ꧀ꦜꦺ’’ꦠꦶ ꦄꦴꦲ. ꦱꦠꦶꦥꦫꦶꦕꦶꦠꦺꦠꦶ ꦱꦠꦶꦪꦴ ꦥꦛ꧀ꦜꦴꦥꦶꦠꦺ. ‘‘ꦈꦥꦛ꧀ꦜꦴꦥꦶꦠꦺ’’ꦠꦶꦥꦶ ꦥꦴꦜꦺꦴ, ꦄꦪꦩꦺꦮꦠ꧀ꦡꦺꦴ. ꦱꦁꦱꦷꦢꦶꦠꦸꦁ ꦤ ꦢꦺꦠꦷꦠꦶ ꦱꦏꦶꦕ꧀ꦕꦏꦶꦫꦶꦪꦴꦪ ꦱꦁꦱꦷꦢꦤꦁ ꦏꦴꦠꦸꦁ ꦤ ꦢꦺꦠꦶ. ꦏꦺꦴꦱꦗ꧀ꦗꦱꦔ꧀ꦑꦴꦠꦁ ꦱꦁꦱꦷꦢꦤꦁ ꦏꦺꦴꦱꦗ꧀ꦗꦱꦁꦱꦷꦢꦤꦁ.

ꦥꦴꦠꦶꦩꦺꦴꦏ꧀ꦑꦱꦁꦮꦫꦱꦷꦭꦁ ꦮꦸꦠ꧀ꦠꦁ ꦏꦴꦪꦶꦏꦮꦴꦕꦱꦶꦏꦱꦁꦪꦩꦱ꧀ꦱ ꦏꦡꦶꦠꦠ꧀ꦠꦴ. ꦄꦴꦲꦴꦫꦺ ꦈꦢꦫꦺ ꦪꦠꦺꦴꦠꦶ ꦥꦫꦶꦨꦸꦚ꧀ꦗꦶꦠꦧ꧀ꦧꦄꦴꦲꦴꦫꦺ ꦱꦁꦪꦠꦨꦴꦮꦢꦱ꧀ꦱꦤꦺꦤ ꦥꦫꦶꦨꦸꦚ꧀ꦗꦶꦠꦧ꧀ꦧꦠꦴꦪ ꦕꦠꦹꦱꦸꦥꦶ ꦥꦕ꧀ꦕꦪꦺꦱꦸ ꦱꦁꦪꦠꦨꦴꦮꦺꦴ ꦢꦷꦥꦶꦠꦺꦴꦠꦶ ꦄꦴꦲ ‘‘ꦄꦴꦲꦴꦫꦩꦸꦑꦺꦤꦴ’’ꦠꦶꦄꦴꦢꦶ. ꦱꦁꦪꦠꦨꦴꦮꦺꦴ ꦕꦺꦠ꧀ꦡ ꦥꦕ꧀ꦕꦪꦲꦺꦠꦸ ꦄꦤꦺꦱꦤꦴꦨꦴꦮꦺꦴꦠꦶ ꦮꦸꦠ꧀ꦠꦁ ‘‘ꦤꦶꦫꦸꦥꦏ꧀ꦏꦶꦭꦺꦱꦺꦴꦠꦶ ꦄꦠ꧀ꦡꦺꦴ’’ꦠꦶ. ꦨꦺꦴꦗꦤꦱꦢ꧀ꦢꦺꦴ ꦄꦴꦲꦴꦫꦥꦫꦶꦨꦺꦴꦒꦺ ꦤꦶꦫꦸꦭ꦳꧀ꦲꦺꦴꦠꦶ ꦏꦠ꧀ꦮꦴ ꦮꦸꦠ꧀ꦠꦁ ‘‘ꦨꦺꦴꦗꦤꦺ ꦩꦠ꧀ꦠꦚ꧀ꦚꦸꦠꦴꦩꦸꦑꦺꦤꦴ’’ꦠꦶ. ꦥꦫꦶꦨꦸꦚ꧀ꦗꦤꦛ꧀ꦜꦺꦤ ꦥꦤ ꦨꦺꦴꦗꦤꦱꦢ꧀ꦢꦩꦸꦑꦺꦤꦴꦠꦶ ꦮꦸꦠ꧀ꦠꦺ ꦄꦣꦶꦥ꧀ꦥꦺꦠꦠ꧀ꦡꦺꦴ ꦭꦧ꧀ꦨꦠꦺꦮ. ꦠꦺꦤꦴꦠꦶ ꦏꦴꦪꦒꦸꦠ꧀ꦠꦴꦠꦶꦄꦴꦢꦶꦮꦕꦤꦺꦤ. ꦤ ꦮꦶꦭꦸꦩ꧀ꦥꦤ꧀ꦠꦷꦠꦶ ‘‘ꦢꦷꦥꦺꦠꦷ’’ꦠꦶ ꦥꦢꦁ ꦄꦴꦤꦺꦠ꧀ꦮꦴ ꦱꦩ꧀ꦧꦤ꧀ꦣꦺꦴ.

ꦢ꧀ꦮꦷꦲꦴꦏꦴꦫꦺꦲꦷꦠꦶ ꦄꦢꦶꦛ꧀ꦜꦴꦢꦷꦤꦁ ꦄꦢꦶꦛ꧀ꦜꦴꦢꦶꦮꦱꦺꦤ ꦢꦶꦛ꧀ꦜꦴꦢꦷꦤꦚ꧀ꦕ ꦢꦶꦛ꧀ꦜꦴꦢꦶꦮꦱꦺꦤꦴꦠꦶ ꦌꦮꦁ ꦢ꧀ꦮꦶꦥ꧀ꦥꦏꦴꦫꦺꦲꦶ. ꦄꦮꦶꦱꦁꦮꦴꦢꦤꦁ ꦄꦮꦶꦠꦡꦏꦡꦤꦁ. ꦖꦺꦢꦤꦁ ꦩꦹꦭꦥ꧀ꦥꦢꦺꦱꦺ ꦤꦶꦏꦤ꧀ꦠꦤꦁ. ꦭꦸꦤꦤꦁ ꦪꦠ꧀ꦡ ꦏꦠ꧀ꦡꦕꦶ ꦖꦺꦢꦤꦁ. ꦈꦥ꧀ꦥꦴꦛꦤꦁ ꦈꦩ꧀ꦩꦹꦭꦤꦁ. ꦄꦱꦶꦠꦺꦤꦴꦠꦶ ꦢꦠ꧀ꦠꦺꦤ, ꦭꦴꦪꦶꦠꦺꦤꦴꦠꦶ ꦄꦠ꧀ꦡꦺꦴ. ꦮꦶꦱꦁꦮꦴꦢꦤꦱꦔ꧀ꦑꦴꦠꦴꦤꦁ ꦠꦶꦟꦴꦤꦁ, ꦄꦛ꧀ꦜꦤ꧀ꦤꦁ ꦄꦤꦫꦶꦪꦮꦺꦴꦲꦴꦫꦴꦤꦤ꧀ꦠꦶ ꦄꦠ꧀ꦡꦺꦴ. ꦪꦡꦴꦨꦹꦠꦚꦴꦟꦤ꧀ꦠꦶ ꦤꦴꦩ ꦫꦹꦥꦥꦫꦶꦕ꧀ꦖꦺꦢꦏꦚꦴꦟꦁ. ꦱꦕ꧀ꦕꦤ꧀ꦠꦶ ꦮꦺꦢꦶꦠꦧ꧀ꦧꦁ ꦄꦮꦶꦥꦫꦷꦠꦮꦸꦠ꧀ꦠꦶꦏꦠ꧀ꦠꦴ ‘‘ꦖꦺꦢꦏꦁ’’ ꦖꦶꦤ꧀ꦢꦤꦏꦁ. ꦤꦶꦢ꧀ꦢꦴꦤꦤ꧀ꦠꦶ ꦤꦶꦢ꧀ꦢꦴꦪꦏꦁ. ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚꦤ꧀ꦠꦶ ꦢꦶꦛ꧀ꦜꦶ ‘‘ꦢꦶꦛ꧀ꦜꦶꦱꦕ꧀ꦕ’’ꦤ꧀ꦠꦶ ꦮꦸꦕ꧀ꦕꦠꦶ. ꦢ꧀ꦮꦷꦱꦸ ꦮꦶꦏꦥ꧀ꦥꦺꦱꦹꦠꦶ ꦨꦴꦮꦏꦠ꧀ꦠꦸꦱꦴꦣꦤꦮꦱꦺꦤ ꦢ꧀ꦮꦷꦱꦸ ꦮꦶꦏꦥ꧀ꦥꦺꦱꦸ. ‘‘ꦤꦶꦢ꧀ꦢꦴꦤ’’ꦤ꧀ꦠꦶ ꦈꦥꦪꦺꦴꦒꦮꦱꦺꦤꦺꦮ ꦄꦠ꧀ꦡꦺꦴ.

ꦱꦷꦭꦩꦺꦮ ‘‘ꦱꦺꦴꦫꦕ꧀ꦕ’’ꦤ꧀ꦠꦶ ꦮꦸꦠ꧀ꦠꦁ ‘‘ꦥꦴꦟꦴꦠꦶꦥꦴꦠꦴꦢꦷꦲꦶ ꦱꦸꦛ꧀ꦜꦸ ꦎꦫꦠꦱ꧀ꦱ ꦏꦩ꧀ꦩ’’ꦤ꧀ꦠꦶ ꦏꦠ꧀ꦮꦴ. ꦱꦔ꧀ꦑꦴꦫꦢꦸꦏ꧀ꦑꦴꦢꦷꦤꦁ ꦄꦨꦴꦮꦠꦺꦴ ꦱꦸꦤ꧀ꦢꦫꦨꦴꦮꦠꦺꦴ ꦱꦸꦤ꧀ꦢꦫꦺ ꦤꦶꦧ꧀ꦧꦴꦤꦺ ꦄꦴꦫꦩ꧀ꦩꦟꦏꦫꦟꦮꦱꦺꦤ ꦫꦠꦠ꧀ꦠꦴ ꦱꦸꦫꦠꦺꦴ, ꦄꦫꦲꦴ. ꦠꦱ꧀ꦱ ꦨꦴꦮꦺꦴ ꦱꦺꦴꦫꦕ꧀ꦕꦁ, ꦄꦫꦲꦠ꧀ꦠꦁ. ꦄꦥ꧀ꦥꦩꦺꦴꦕꦤꦩꦺꦮ ꦄꦕ꧀ꦕꦤ꧀ꦠꦴꦪ ꦥꦩꦺꦴꦕꦤꦁ ꦤ ꦲꦺꦴꦠꦶ.

ꦪꦢꦒ꧀ꦒꦺꦤ ꦮꦶꦥꦱ꧀ꦱꦤꦴꦪ ꦥꦚ꧀ꦚꦴꦪ ꦠꦁꦱꦲꦒꦠꦮꦷꦫꦶꦪꦱ꧀ꦱ ꦕ ꦤꦔ꧀ꦒꦭꦣꦺꦴꦫꦪ꧀ꦲꦠꦴ, ꦠꦡꦴꦥꦮꦠ꧀ꦠꦏꦸꦱꦭꦨꦴꦮꦤꦴꦪ ꦕ ꦏꦱꦶꦨꦴꦮꦺꦴ ꦕ, ꦠꦢꦒ꧀ꦒꦺꦤ ꦠꦠꦺꦴ ꦥꦸꦫꦺꦠꦫꦁ ꦥꦮꦠ꧀ꦠꦥꦚ꧀ꦚꦴꦮꦷꦫꦶꦪꦥꦴꦫꦩꦷꦤꦁ ꦤꦔ꧀ꦒꦭꦣꦺꦴꦫꦪ꧀ꦲꦠꦴ, ꦠꦡꦴꦥꦮꦠ꧀ꦠꦏꦸꦱꦭꦨꦴꦮꦤꦴꦪ ꦕ ꦏꦱꦶꦨꦴꦮꦺꦴ ꦮꦺꦢꦶꦠꦧ꧀ꦧꦺꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦪꦡꦴ ꦲꦷ’’ꦠꦶꦄꦴꦢꦶꦩꦴꦲ. ꦣꦸꦫꦁ ꦮꦲꦠꦷꦠꦶ ꦣꦺꦴꦫꦪ꧀ꦲꦁ. ꦪꦡꦴꦮꦸꦠ꧀ꦠꦁ ꦓꦤꦤ꧀ꦠꦶ ꦄꦱ꧀ꦩꦶꦩꦴꦤꦴꦢꦶꦨꦺꦢꦁ ꦓꦤꦁ. ꦮꦲꦶꦠꦧ꧀ꦧꦴ ꦄꦴꦢꦶꦨꦹꦠꦴ ꦣꦸꦫꦴ ꦌꦠꦺꦱꦁ ꦄꦠ꧀ꦡꦷꦠꦶ ꦣꦸꦫꦴ, ꦥꦸꦫꦶꦩꦣꦸꦫꦮꦴꦲꦏꦴ. ꦠꦁꦩꦹꦭꦏꦴ ꦄꦥꦫꦁ ꦣꦸꦫꦁ ꦮꦲꦤ꧀ꦠꦴ ꦣꦺꦴꦫꦪ꧀ꦲꦴ. ꦣꦸꦫꦴ ꦕ ꦣꦺꦴꦫꦪ꧀ꦲꦴ ꦕ ꦣꦸꦫꦣꦺꦴꦫꦪ꧀ꦲꦁ ꦌꦏꦠ꧀ꦠꦮꦱꦺꦤ. ꦮꦲꦤ꧀ꦠꦤ꧀ꦠꦶ ꦏꦱꦤꦺꦤ ꦥꦮꦠ꧀ꦠꦤ꧀ꦠꦁ.

ꦏꦴꦩꦪꦺꦴꦒꦴꦢꦷꦲꦶ ꦪꦺꦴꦒꦺꦲꦶ ꦑꦺꦩꦠ꧀ꦠꦴ ꦄꦤꦸꦥꦢ꧀ꦢꦮꦠ꧀ꦠꦴ. ꦠꦁ ꦤꦶꦧ꧀ꦧꦴꦤꦁ ꦄꦣꦶꦏꦶꦕ꧀ꦕ ꦈꦢ꧀ꦢꦶꦱ꧀ꦱ. ꦮꦴꦲꦷꦪꦠꦶ ꦮꦶꦥꦱ꧀ꦱꦤꦴꦪ ꦱꦲꦒꦠꦁ. ꦄꦨꦶꦩꦸꦑꦁ ꦮꦴꦲꦷꦪꦠꦶ ꦩꦒ꧀ꦒꦥꦫꦶꦪꦴꦥꦤ꧀ꦤꦁ. ꦑꦺꦠ꧀ꦠꦏꦺꦴꦛꦶꦤ꧀ꦠꦶ ꦑꦺꦠ꧀ꦠꦩꦫꦶꦪꦴꦢꦁ. ꦢꦶꦛ꧀ꦜꦺꦏꦛ꧀ꦜꦺꦠꦶ ꦢꦶꦛ꧀ꦜꦶꦪꦴ ꦱꦲꦗꦴꦠꦺꦏꦛ꧀ꦜꦺ ꦥꦲꦴꦤꦺꦏꦛ꧀ꦜꦺ ꦕ. ꦎꦭ꦳ꦴꦫꦶꦏꦺꦠꦶ ꦈꦥꦫꦶꦩꦒ꧀ꦒꦮꦗ꧀ꦙꦺ ꦈꦥꦴꦢꦴꦪ ꦮꦸꦠ꧀ꦠꦁ, ꦄꦚ꧀ꦚꦡꦴ ꦢꦱ꧀ꦱꦤꦥꦲꦴꦠꦧ꧀ꦧꦴꦥꦶ ꦢꦸꦠꦶꦪꦩꦒ꧀ꦒꦮꦗ꧀ꦙꦺꦲꦶ ꦎꦭ꦳ꦴꦫꦶꦏꦴꦠꦶ. ꦄꦟꦸꦱꦲꦒꦠꦺꦠꦶ ꦄꦟꦸꦨꦹꦠꦺ. ꦆꦢꦁ ꦲꦺꦛ꧀ꦜꦶꦩꦩꦒ꧀ꦒꦮꦗ꧀ꦙꦺ ꦈꦥꦴꦢꦴꦪ ꦮꦸꦠ꧀ꦠꦁ. ꦱꦧ꧀ꦧꦏꦶꦭꦺꦱꦺ ꦄꦮꦱꦶꦛ꧀ꦜꦱꦧ꧀ꦧꦏꦶꦭꦺꦱꦺ ꦥꦗꦲꦤ꧀ꦠꦁ ꦄꦤꦶꦮꦠ꧀ꦠꦤ꧀ꦠꦁ ꦒꦕ꧀ꦖꦠꦶ ꦥꦸꦤ ꦥꦲꦴꦠꦧ꧀ꦧꦠꦴꦪ ꦄꦨꦴꦮꦠꦺꦴ. ꦄꦤꦶꦮꦠ꧀ꦠꦤ꧀ꦠꦤ꧀ꦠꦶ ꦤ ꦤꦶꦮꦠ꧀ꦠꦤ꧀ꦠꦁ, ꦪꦡꦴ ꦤꦶꦮꦠ꧀ꦠꦤꦁ ꦤ ꦲꦺꦴꦠꦶ, ꦌꦮꦁ ꦒꦕ꧀ꦖꦠꦷꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦤꦶꦮꦠ꧀ꦠꦤꦫꦲꦶꦠ’’ꦤ꧀ꦠꦶꦄꦴꦢꦶ. ꦌꦠꦁ ꦥꦤ ꦠꦮ ꦣꦸꦫꦣꦺꦴꦫꦪ꧀ꦲꦁ.

ꦌꦮꦩꦺꦱꦴ ꦏꦱꦷꦠꦶ ꦪꦡꦴꦮꦸꦠ꧀ꦠꦱ꧀ꦱ ꦥꦕ꧀ꦕꦴꦩꦱꦤꦁ. ꦠꦺꦤꦴꦲ ‘‘ꦤꦶꦒꦩꦤꦁ ꦏꦫꦺꦴꦤ꧀ꦠꦺꦴ’’ꦠꦶ. ꦮꦸꦠ꧀ꦠꦱ꧀ꦱꦺꦮ ꦲꦶ ꦄꦠ꧀ꦡꦱ꧀ꦱ ꦥꦸꦤ ꦮꦕꦤꦁ. ꦥꦚ꧀ꦚꦴꦤꦔ꧀ꦒꦭꦺꦤ ꦱꦠꦶꦦꦴꦭꦁ ꦄꦴꦏꦺꦴꦛꦺꦠ꧀ꦮꦴꦠꦶ ꦥꦚ꧀ꦚꦴꦱꦔ꧀ꦑꦴꦠꦺꦤ ꦤꦔ꧀ꦒꦭꦺꦤ ꦱꦢ꧀ꦣꦶꦁ ꦱꦠꦶꦦꦴꦭꦱ꧀ꦱ ꦌꦏꦴꦧꦢ꧀ꦣꦨꦴꦮꦏꦫꦟꦺꦤ ꦄꦴꦏꦺꦴꦛꦺꦠ꧀ꦮꦴ. ꦏꦛ꧀ꦜꦴꦠꦶ ꦌꦠ꧀ꦡ ‘‘ꦏꦱꦷ’’ꦠꦶ ꦥꦢꦁ ꦄꦴꦤꦺꦠ꧀ꦮꦴ ꦱꦩ꧀ꦧꦤ꧀ꦣꦶꦠꦧ꧀ꦧꦁ ‘‘ꦏꦛ꧀ꦜꦴ ꦏꦱꦷ’’ꦠꦶ. ꦏꦩ꧀ꦩꦥꦫꦶꦪꦺꦴꦱꦴꦤꦤ꧀ꦠꦶ ꦪꦡꦴꦮꦸꦠ꧀ꦠꦏꦱꦶꦏꦩ꧀ꦩꦱ꧀ꦱ ꦥꦫꦶꦪꦺꦴꦱꦴꦤꦨꦹꦠꦁ. ꦪꦢꦶꦥꦶ ꦥꦸꦧ꧀ꦧꦺ ‘‘ꦥꦚ꧀ꦚꦴ ꦩꦺ ꦪꦸꦒꦤꦔ꧀ꦒꦭ’’ꦤ꧀ꦠꦶꦄꦴꦢꦶꦤꦴ ꦄꦠ꧀ꦠꦸꦢ꧀ꦢꦺꦱꦶꦏꦮꦱꦺꦤꦴꦪꦁ ꦄꦩꦠꦥ꧀ꦦꦭꦴ ꦏꦱꦶ ꦢꦱ꧀ꦱꦶꦠꦴ, ꦩꦲꦴꦏꦴꦫꦸꦟꦶꦏꦱ꧀ꦱ ꦥꦤ ꦨꦒꦮꦠꦺꦴ ꦢꦺꦱꦤꦴ ꦱꦧ꧀ꦧꦱ꧀ꦱꦥꦶ ꦱꦠ꧀ꦠꦤꦶꦏꦴꦪꦱ꧀ꦱ ꦱꦴꦣꦴꦫꦟꦴ ꦌꦮꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦱꦴ ꦑꦺꦴ ꦥꦤꦺꦱꦴ’’ꦠꦶꦄꦴꦢꦶꦩꦴꦲ.

ꦢꦶꦮꦱꦺꦪꦺꦮꦴꦠꦶ ꦠꦁꦢꦶꦮꦱꦺ ꦌꦮ. ꦄꦴꦢꦶꦩꦴꦲꦴꦠꦶ ꦌꦠ꧀ꦡ ꦄꦴꦢꦶ-ꦱꦢ꧀ꦢꦺꦤ ꦏꦡꦴꦥꦫꦶꦪꦺꦴꦱꦴꦤꦺ ꦥꦴꦜꦥꦢꦺꦱꦺꦴ ꦒꦲꦶꦠꦺꦴꦠꦶ ꦠꦢꦚ꧀ꦚꦁ ‘‘ꦌꦮꦁ ꦮꦸꦠ꧀ꦠꦺ’’ꦠꦶꦄꦴꦢꦶꦥꦴꦜꦁ ꦱꦤ꧀ꦣꦴꦪ ‘‘ꦠꦠꦺꦴ ꦥꦫꦚ꧀ꦕꦴ’’ꦠꦶ ꦄꦴꦲ.

ꦏꦱꦶꦨꦴꦫꦢ꧀ꦮꦴꦗꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.