꧕. ꦢꦸꦠꦶꦪꦩꦴꦫꦥꦴꦱꦱꦸꦠ꧀ꦠꦮꦟ꧀ꦟꦤꦴ

꧑꧔꧑. ꦄꦤꦸꦥꦸꦧ꧀ꦧꦒꦩꦤꦕꦴꦫꦶꦏꦤ꧀ꦠꦶ ꦒꦴꦩꦤꦶꦒꦩꦫꦴꦗꦣꦴꦤꦷꦱꦸ ꦄꦤꦸꦏ꧀ꦏꦩꦺꦤ ꦒꦩꦤꦱꦔ꧀ꦑꦴꦠꦁ ꦕꦴꦫꦶꦏꦁ. ꦌꦮꦁ ꦲꦶ ꦒꦠꦺꦱꦹꦠꦶ ꦌꦮꦁ ꦠꦸꦩ꧀ꦲꦺꦱꦸ ꦧꦲꦹꦱꦸ ꦌꦏꦗ꧀ꦙꦁ ꦒꦠꦺꦱꦸ.

ꦄꦴꦢꦶꦩ꧀ꦲꦶ ꦏꦭ꧀ꦪꦴꦟꦁ ꦌꦠꦱ꧀ꦱꦴꦠꦶ ꦄꦴꦢꦶꦏꦭ꧀ꦪꦴꦟꦁ, ꦠꦡꦴ ꦱꦺꦱꦺꦱꦸ. ꦱꦴꦱꦤꦱ꧀ꦱ ꦄꦴꦢꦶ ꦱꦷꦭꦁ ꦩꦹꦭꦏꦠ꧀ꦠꦴ. ꦠꦱ꧀ꦱ ꦱꦩꦡꦴꦢꦪꦺꦴ ꦩꦗ꧀ꦙꦁ ꦱꦴꦱꦤꦱꦩ꧀ꦥꦠ꧀ꦠꦶꦪꦴ ꦮꦺꦩꦗ꧀ꦙꦨꦴꦮꦠꦺꦴ. ꦦꦭꦤꦶꦧ꧀ꦧꦴꦤꦴꦤꦶ ꦥꦫꦶꦪꦺꦴꦱꦴꦤꦁ ꦠꦢꦣꦶꦒꦩꦠꦺꦴ ꦈꦠ꧀ꦠꦫꦶ ꦏꦫꦟꦷꦪꦴꦨꦴꦮꦠꦺꦴ. ꦱꦴꦱꦤꦺ ꦱꦩ꧀ꦩꦴꦥꦛꦶꦥꦠ꧀ꦠꦶ ꦤꦴꦩ ꦥꦚ꧀ꦚꦴꦪ ꦲꦺꦴꦠꦶ, ꦠꦱ꧀ꦱꦴ ꦕ ꦱꦷꦭꦁ ꦱꦩꦴꦣꦶ ꦕ ꦩꦹꦭꦤ꧀ꦠꦶ ꦄꦴꦲ ‘‘ꦱꦷꦭꦱꦩꦴꦣꦪꦺꦴ ꦮꦴ ꦄꦴꦢꦷ’’ꦠꦶ. ꦪꦱ꧀ꦩꦴ ꦥꦚ꧀ꦚꦴ ꦄꦤꦸꦧꦺꦴꦣꦥꦛꦶꦮꦺꦣꦮꦱꦺꦤ ꦢꦸꦮꦶꦣꦴ, ꦠꦱ꧀ꦩꦴ ꦠꦢꦸꦨꦪꦁ ꦒꦟ꧀ꦲꦤ꧀ꦠꦺꦴ ‘‘ꦮꦶꦥꦱ꧀ꦱꦤꦴꦩꦒ꧀ꦒꦴ ꦩꦗ꧀ꦙ’’ꦤ꧀ꦠꦶ ꦄꦴꦲ. ꦥꦚ꧀ꦚꦴꦤꦶꦥ꧀ꦦꦠ꧀ꦠꦶ ꦦꦭꦏꦶꦕ꧀ꦕꦁ, ꦤꦶꦧ꧀ꦧꦴꦤꦱꦕ꧀ꦖꦶꦏꦶꦫꦶꦪꦴ ꦥꦤ ꦱꦩ꧀ꦩꦴꦥꦛꦶꦥꦠ꧀ꦠꦶꦪꦴ ꦥꦫꦶꦪꦺꦴꦱꦴꦤꦁ ꦠꦠꦺꦴ ꦥꦫꦁ ꦏꦠ꧀ꦠꦧ꧀ꦧꦴꦨꦴꦮꦠꦺꦴꦠꦶ ꦄꦴꦲ ‘‘ꦦꦭꦤꦶꦧ꧀ꦧꦴꦤꦴꦤꦶ ꦥꦫꦶꦪꦺꦴꦱꦴꦤ’’ꦤ꧀ꦠꦶ. ꦦꦭꦒ꧀ꦒꦲꦟꦺꦤ ꦲꦶ ꦱꦈꦥꦴꦢꦶꦱꦺꦱꦤꦶꦧ꧀ꦧꦴꦤꦁ ꦒꦪ꧀ꦲꦠꦶ, ꦆꦠꦫꦺꦤ ꦆꦠꦫꦁ, ꦠꦢꦸꦨꦪꦮꦱꦺꦤ ꦥꦛꦶꦥꦠ꧀ꦠꦶꦪꦴ ꦎꦱꦴꦤꦤ꧀ꦠꦶ ꦄꦴꦲ ‘‘ꦦꦭꦤꦶꦧ꧀ꦧꦴꦤꦴꦤꦶ ꦥꦫꦶꦪꦺꦴꦱꦴꦤ’’ꦤ꧀ꦠꦶ. ‘‘ꦠꦱ꧀ꦩꦴꦠꦶꦲ ꦠ꧀ꦮꦁ, ꦨꦶꦏ꧀ꦑꦸ, ꦄꦴꦢꦶꦩꦺꦮ ꦮꦶꦱꦺꦴꦣꦺꦲꦶ ꦏꦸꦱꦭꦺꦱꦸ ꦣꦩ꧀ꦩꦺꦱꦸ. ꦏꦺꦴ ꦕꦴꦢꦶ ꦏꦸꦱꦭꦴꦤꦁ ꦣꦩ꧀ꦩꦴꦤꦁ? ꦱꦷꦭꦚ꧀ꦕ ꦱꦸꦮꦶꦱꦸꦢ꧀ꦣꦁ, ꦢꦶꦛ꧀ꦜꦶ ꦕ ꦈꦗꦸꦏꦴ’’ꦠꦶ (ꦱꦁ. ꦤꦶ. ꧕.꧓꧖꧙) ꦮꦕꦤꦠꦺꦴ ꦱꦷꦭꦢꦶꦛ꧀ꦜꦸꦗꦸꦏꦠꦴꦪ ꦩꦠ꧀ꦡꦏꦨꦹꦠꦴ ꦮꦶꦥꦱ꧀ꦱꦤꦴ, ꦠꦢꦣꦶꦛ꧀ꦜꦴꦤꦴ ꦱꦷꦭꦱꦩꦴꦣꦷꦠꦶ ꦆꦩꦺ ꦠꦱ꧀ꦱ ꦱꦴꦱꦤꦱ꧀ꦱ ꦩꦹꦭꦤ꧀ꦠꦶ ꦄꦴꦲ ‘‘ꦱꦷꦭꦱꦩꦴꦣꦶꦮꦶꦥꦱ꧀ꦱꦤꦴ ꦮꦴ ꦄꦴꦢꦷ’’ꦠꦶ. ꦱꦺꦱꦁ ꦮꦸꦠ꧀ꦠꦤꦪꦩꦺꦮ.

ꦏꦶꦚ꧀ꦕꦴꦥꦶ ꦄꦮꦪꦮꦮꦶꦤꦶꦩꦸꦠ꧀ꦠꦺꦴ ꦱꦩꦸꦢꦴꦪꦺꦴ ꦤꦠ꧀ꦡꦶ, ꦪꦺꦱꦸ ꦥꦤ ꦄꦮꦪꦮꦺꦱꦸ ꦱꦩꦸꦢꦴꦪꦫꦹꦥꦺꦤ ꦄꦥꦺꦏ꧀ꦑꦶꦠꦺꦱꦸ ꦒꦴꦡꦴꦠꦶ ꦱꦩꦚ꧀ꦚꦴ, ꦠꦁ ꦠꦠꦺꦴ ꦨꦶꦤ꧀ꦤꦁ ꦮꦶꦪ ꦏꦠ꧀ꦮꦴ ꦢꦱ꧀ꦱꦺꦤ꧀ꦠꦺꦴ ‘‘ꦕꦠꦸꦥ꧀ꦥꦢꦶꦏꦒꦴꦡꦴꦪ ꦠꦴꦮ ꦥꦜꦩꦥꦴꦢꦺꦴ’’ꦠꦶꦄꦴꦢꦶꦩꦴꦲ. ꦥꦚ꧀ꦕꦥꦢꦖꦥ꧀ꦥꦢꦴꦤꦁ ꦒꦴꦡꦴꦤꦁ ꦄꦴꦢꦶꦥꦫꦶꦪꦺꦴꦱꦴꦤꦒ꧀ꦒꦲꦟꦺꦤ ꦆꦠꦫꦺ ꦢꦸꦠꦶꦪꦴꦢꦪꦺꦴ ꦠꦪꦺꦴ ꦕꦠ꧀ꦠꦴꦫꦺꦴ ꦮꦴ ꦩꦗ꧀ꦙꦤ꧀ꦠꦶ ꦄꦮꦸꦠ꧀ꦠꦱꦶꦢ꧀ꦣꦩꦺꦮꦴꦠꦶ ꦤ ꦮꦸꦠ꧀ꦠꦁ. ꦌꦏꦴꦤꦸꦱꦤ꧀ꦣꦶꦏꦱꦸꦠ꧀ꦠꦱ꧀ꦱꦴꦠꦶ ꦆꦢꦁ ꦧꦲꦸꦮꦶꦨꦴꦒꦁ ꦪꦡꦴꦤꦸꦱꦤ꧀ꦣꦶꦤꦴ ꦌꦏꦴꦤꦸꦱꦤ꧀ꦣꦶꦏꦁ ꦱꦸꦠ꧀ꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ, ꦆꦠꦫꦱ꧀ꦱ ꦥꦤ ꦠꦺꦪꦺꦮ ꦢꦺꦱꦺꦠꦧ꧀ꦧꦣꦩ꧀ꦩꦮꦶꦨꦴꦒꦺꦤ ꦄꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦨꦴꦒꦴ ꦭꦧ꧀ꦨꦤ꧀ꦠꦶ. ꦤꦶꦢꦴꦤꦤ꧀ꦠꦶ ꦏꦴꦭꦢꦺꦱꦏꦥꦫꦶꦱꦴꦢꦶ-ꦄꦥꦢꦶꦱꦤꦭꦏ꧀ꦑꦟꦴꦢꦶꦏꦺꦴ ꦄꦠ꧀ꦡꦺꦴ. ꦆꦢꦩꦮꦺꦴꦕꦴꦠꦶ ꦆꦠꦶ-ꦱꦢ꧀ꦢꦺꦴ ꦄꦴꦢꦶꦄꦠ꧀ꦡꦺꦴ. ꦠꦺꦤ ꦠꦢꦮꦱꦺꦱꦤꦶꦒꦩꦤꦥꦴꦭ꦳ꦶꦁ ꦱꦔ꧀ꦒꦟ꧀ꦲꦴꦠꦶ. ꦄꦤꦺꦏꦴꦤꦸꦱꦤ꧀ꦣꦷꦏꦱ꧀ꦱ ꦱꦲ ꦤꦶꦢꦴꦤꦺꦤ ꦥꦜꦩꦺꦴ ꦄꦤꦸꦱꦤ꧀ꦣꦶ ꦄꦴꦢꦶ. ꦱꦲ ꦤꦶꦒꦩꦤꦺꦤ ꦥꦕ꧀ꦖꦶꦩꦺꦴ ꦥꦫꦶꦪꦺꦴꦱꦴꦤꦁ, ꦆꦠꦫꦺꦤ ꦩꦗ꧀ꦙꦶꦩꦤ꧀ꦠꦶꦄꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦴꦤꦶ ꦮꦺꦢꦶꦠꦧ꧀ꦧꦴꦤꦶ.

ꦱꦴꦠ꧀ꦡꦏꦤ꧀ꦠꦶ ꦄꦠ꧀ꦡꦱꦩ꧀ꦥꦠ꧀ꦠꦶꦪꦴ ꦱꦴꦠ꧀ꦡꦏꦁ ꦏꦠ꧀ꦮꦴ. ꦱꦧ꧀ꦪꦚ꧀ꦗꦤꦤ꧀ꦠꦶ ꦧ꧀ꦪꦚ꧀ꦗꦤꦱꦩ꧀ꦥꦠ꧀ꦠꦶꦪꦴ ꦱꦧ꧀ꦪꦚ꧀ꦗꦤꦁ. ꦱꦩ꧀ꦥꦠ꧀ꦠꦶ ꦕ ꦤꦴꦩ ꦥꦫꦶꦥꦸꦟ꧀ꦟꦧ꧀ꦪꦚ꧀ꦗꦤꦠꦴꦠꦶ ꦄꦴꦲ ‘‘ꦧ꧀ꦪꦚ꧀ꦗꦤꦺꦲꦶ…ꦥꦺ… ꦢꦺꦱꦺꦠꦴ’’ꦠꦶ. ꦱꦏꦭꦥꦫꦶꦥꦸꦟ꧀ꦟꦤ꧀ꦠꦶ ꦱꦧ꧀ꦧꦱꦺꦴ ꦥꦫꦶꦥꦸꦟ꧀ꦟꦁ ꦱꦷꦭꦴꦢꦶꦥꦚ꧀ꦕꦣꦩ꧀ꦩꦏ꧀ꦑꦤ꧀ꦣꦥꦴꦫꦶꦥꦹꦫꦶꦪꦴ. ꦤꦶꦫꦸꦥꦏ꧀ꦏꦶꦭꦺꦱꦁ ꦢꦶꦛ꧀ꦜꦶꦩꦴꦤꦴꦢꦶꦈꦥꦏ꧀ꦏꦶꦭꦺꦱꦴꦨꦴꦮꦠꦺꦴ. ꦄꦮꦶꦱꦺꦱꦠꦺꦴ ꦠꦶꦱ꧀ꦱꦺꦴ ꦱꦶꦏ꧀ꦑꦴ ꦱꦏꦭꦺ ꦱꦴꦱꦤꦺ ꦨꦮꦤ꧀ꦠꦶ. ꦣꦩ꧀ꦩꦺꦴꦠꦶ ꦥꦤ ꦧ꧀ꦫꦲ꧀ꦩꦕꦫꦶꦪꦁ ꦮꦴ ꦱꦤ꧀ꦣꦴꦪ ꦮꦸꦠ꧀ꦠꦁ ‘‘ꦏꦠꦩꦺꦱꦴꦤꦁ ꦑꦺꦴ, ꦨꦤ꧀ꦠꦺ, ꦧꦸꦢ꧀ꦣꦴꦤꦁ ꦨꦒꦮꦤ꧀ꦠꦴꦤꦁ ꦧ꧀ꦫꦲ꧀ꦩꦕꦫꦶꦪꦁ ꦕꦶꦫꦛ꧀ꦜꦶꦠꦶꦏꦁ ꦄꦲꦺꦴꦱꦷ’’ꦠꦶꦄꦴꦢꦷꦱꦸ (ꦥꦴꦫꦴ. ꧑꧘) ꦮꦶꦪ. ꦢꦸꦏꦹꦭꦱꦴꦟꦶꦪꦴ ꦥꦛꦶꦕ꧀ꦖꦤ꧀ꦤꦴ ꦮꦶꦪ, ꦤ ꦠꦸ ꦥꦴꦏꦴꦫꦱꦺꦭꦴꦢꦶꦥꦛꦶꦕ꧀ꦖꦤ꧀ꦤꦴ ꦮꦶꦪ. ꦠꦺꦤ ꦣꦩ꧀ꦩꦤꦶꦫꦸꦠ꧀ꦠꦶꦪꦴ ꦱꦏꦭꦏꦶꦭꦺꦱꦴꦤꦁ ꦥꦲꦴꦤꦴꦤꦸꦨꦴꦮꦁ ꦮꦢꦠꦶ. ꦄꦭꦴꦨꦥꦫꦶꦲꦴꦤꦶꦪꦴ, ꦤ ꦭꦢ꧀ꦣꦥꦫꦶꦲꦴꦤꦶꦪꦴ. ꦄꦝ꧀ꦞꦸꦝ꧀ꦞꦴꦤꦷꦠꦶ ꦥꦚ꧀ꦕꦱꦠꦴꦣꦶꦏꦴꦤꦶ ꦠꦷꦟꦶ ꦥꦴꦛꦶꦲꦴꦫꦶꦪꦱꦲꦱ꧀ꦱꦴꦤꦶ. ꦱꦴꦠꦤ꧀ꦠꦶ ꦱꦸꦑꦁ.

ꦢꦸꦠꦶꦪꦩꦴꦫꦥꦴꦱꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.