꧓. ꦠꦠꦶꦪꦮꦒ꧀ꦒꦺꦴ

꧑. ꦥꦸꦒ꧀ꦒꦭꦱꦸꦠ꧀ꦠꦮꦟ꧀ꦟꦤꦴ

꧑꧓꧒. ‘‘ꦤꦷꦕꦺ ꦏꦸꦭꦺ ꦥꦕ꧀ꦕꦴꦗꦴꦠꦺꦴ’’ꦠꦶꦄꦴꦢꦶ ꦄꦥ꧀ꦥꦏꦴꦱꦤꦨꦴꦮꦺꦤ ꦠꦩꦠꦷꦠꦶ ꦠꦩꦺꦴ, ꦠꦺꦤ ꦠꦩꦺꦤ ꦪꦸꦠ꧀ꦠꦺꦴꦠꦶ ꦠꦩꦺꦴ ꦥꦸꦒ꧀ꦒꦭꦺꦴ ꦮꦸꦕ꧀ꦕꦠꦶ, ꦠꦁꦪꦺꦴꦒꦠꦺꦴ ꦥꦸꦒ꧀ꦒꦭꦱ꧀ꦱ ꦠꦧ꧀ꦧꦺꦴꦲꦴꦫꦺꦴ ꦪꦡꦴ ‘‘ꦩꦕ꧀ꦖꦺꦫꦪꦺꦴꦒꦠꦺꦴ ꦩꦕ꧀ꦖꦺꦫꦺꦴ’’ꦠꦶ. ꦠꦱ꧀ꦩꦴ ꦠꦩꦺꦴꦠꦶ ꦄꦥ꧀ꦥꦏꦴꦱꦤꦨꦴꦮꦺꦤ ꦠꦩꦺꦴ ꦠꦩꦨꦹꦠꦺꦴ ꦄꦤ꧀ꦣꦏꦴꦫꦺꦴ ꦮꦶꦪ ꦗꦴꦠꦺꦴ, ꦄꦤ꧀ꦣꦏꦴꦫꦠ꧀ꦠꦁ ꦮꦴ ꦥꦠ꧀ꦠꦺꦴꦠꦶ ꦄꦠ꧀ꦡꦺꦴ. ꦮꦸꦠ꧀ꦠꦭꦏ꧀ꦑꦟꦁ ꦠꦩꦩꦺꦮ ꦥꦫꦩ꧀ꦥꦫꦠꦺꦴ ꦄꦪꦤꦁ ꦒꦠꦶ ꦤꦶꦛ꧀ꦜꦴ ꦌꦠꦱ꧀ꦱꦴꦠꦶ ꦠꦩꦥꦫꦴꦪꦟꦺꦴ, ꦠꦩꦥꦫꦴꦪꦟꦠꦁ ꦮꦴ ꦥꦠ꧀ꦠꦺꦴꦠꦶ ꦄꦠ꧀ꦡꦺꦴ. ꦚꦴꦪꦺꦤꦥꦶ ꦠꦩꦒ꧀ꦒꦲꦟꦺꦤ ꦑꦤ꧀ꦣꦠꦩꦺꦴꦮ ꦏꦡꦶꦠꦺꦴ, ꦤ ꦄꦤ꧀ꦣꦏꦴꦫꦠꦩꦺꦴ. ꦑꦤ꧀ꦣꦠꦩꦺꦴꦠꦶ ꦕ ꦱꦩ꧀ꦥꦠ꧀ꦠꦶꦫꦲꦶꦠꦴ ꦑꦤ꧀ꦣꦥꦮꦠ꧀ꦠꦶꦪꦺꦮ ꦢꦛ꧀ꦜꦧ꧀ꦧꦴ. ‘‘ꦈꦕ꧀ꦕꦺ ꦏꦸꦭꦺ ꦥꦕ꧀ꦕꦴꦗꦴꦠꦺꦴ’’ꦠꦶꦄꦴꦢꦶ ꦥꦏꦴꦱꦤꦨꦴꦮꦺꦤ ꦗꦺꦴꦠꦺꦠꦷꦠꦶ ꦗꦺꦴꦠꦶ, ꦠꦺꦤ ꦗꦺꦴꦠꦶꦤꦴ ꦪꦸꦠ꧀ꦠꦺꦴꦠꦶꦄꦴꦢꦶ ꦱꦧ꧀ꦧꦁ ꦠꦩꦺ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦆꦠꦫꦺ ꦢ꧀ꦮꦺꦠꦶ ꦗꦺꦴꦠꦶꦠꦩꦥꦫꦴꦪꦟꦺꦴ ꦗꦺꦴꦠꦶꦗꦺꦴꦠꦶꦥꦫꦴꦪꦟꦺꦴꦠꦶ ꦆꦠꦫꦺ ꦢ꧀ꦮꦺ ꦥꦸꦒ꧀ꦒꦭꦺ.

ꦮꦺꦟꦸꦮꦺꦠ꧀ꦠꦴꦢꦶꦏꦺꦲꦶ ꦥꦺꦭ꦳ꦴꦢꦶꦏꦴꦫꦏꦴ ꦮꦶꦭꦷꦮꦏꦴꦫꦏꦴ. ꦩꦶꦒꦩꦕ꧀ꦖꦴꦢꦷꦤꦁ ꦤꦶꦱꦴꦢꦤꦠꦺꦴ ꦤꦺꦱꦴꦢꦴ, ꦩꦴꦒꦮꦶꦏꦩꦕ꧀ꦖꦧꦤ꧀ꦣꦴꦢꦪꦺꦴ. ꦫꦡꦺꦱꦸ ꦕꦩ꧀ꦩꦺꦤ ꦲꦤꦤꦏꦫꦟꦠꦺꦴ ꦫꦡꦏꦴꦫꦴ ꦕꦩ꧀ꦩꦏꦴꦫꦴ ꦮꦸꦠ꧀ꦠꦴ. ‘‘ꦥꦸ’’ ꦆꦠꦶ ꦏꦫꦷꦱꦱ꧀ꦱ ꦤꦴꦩꦁ, ꦠꦁ ꦏꦸꦱꦺꦤ꧀ꦠꦶ ꦄꦥꦤꦺꦤ꧀ꦠꦷꦠꦶ ꦥꦸꦏ꧀ꦏꦸꦱꦴ, ꦥꦸꦥ꧀ꦦꦖꦝ꧀ꦝꦏꦴ. ꦢꦸꦧ꧀ꦧꦟ꧀ꦟꦺꦴꦠꦶ ꦮꦶꦫꦹꦥꦺꦴ. ꦎꦏꦺꦴꦛꦶꦩꦏꦺꦴꦠꦶ ꦄꦴꦫꦺꦴꦲꦴꦨꦴꦮꦺꦤ ꦲꦺꦛ꧀ꦜꦶꦩꦏꦺꦴꦛꦶꦏꦺꦴ, ꦫꦱ꧀ꦱꦏꦴꦪꦺꦴꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦭꦏꦸꦟ꧀ꦝꦏꦺꦴ’’ꦠꦶ. ꦭꦏꦸ ꦮꦶꦪ ꦓꦛꦶꦏꦴ ꦮꦶꦪ ꦝꦺꦠꦶ ꦥꦮꦠ꧀ꦠꦠꦷꦠꦶ ꦲꦶ ꦭꦏꦸꦟ꧀ꦝꦏꦺꦴ, ꦫꦱ꧀ꦱꦺꦴ. ꦏꦟꦠꦶ ꦤꦶꦩꦷꦭꦠꦷꦠꦶ ꦏꦴꦟꦺꦴ. ꦠꦁ ꦥꦤꦱ꧀ꦱ ꦤꦶꦩꦷꦭꦤꦁ ꦌꦏꦺꦤ ꦄꦏ꧀ꦑꦶꦤꦴ ꦢ꧀ꦮꦷꦲꦶꦥꦶ ꦮꦴꦠꦶ ꦄꦴꦲ ‘‘ꦌꦏꦏ꧀ꦑꦶꦏꦴꦟꦺꦴ ꦮꦴ ꦈꦨꦪꦏ꧀ꦑꦶꦏꦴꦟꦺꦴ ꦮꦴ’’ꦠꦶ. ꦏꦸꦟꦤꦁ ꦏꦸꦟꦺꦴ, ꦲꦠ꧀ꦡꦮꦺꦏꦭ꧀ꦭꦁ, ꦱꦺꦴ ꦌꦠꦱ꧀ꦱ ꦄꦠ꧀ꦡꦷꦠꦶ ꦏꦸꦟꦷ. ꦑꦚ꧀ꦗꦺꦴ ꦮꦸꦕ꧀ꦕꦠꦶ ꦥꦴꦢꦮꦶꦏꦭꦺꦴ. ꦲꦺꦛ꧀ꦜꦶꦩꦏꦴꦪꦱꦔ꧀ꦑꦴꦠꦺꦴ ꦱꦫꦷꦫꦱ꧀ꦱ ꦥꦏ꧀ꦑꦺꦴ ꦥꦢꦺꦱꦺꦴ ꦲꦠꦺꦴ ꦄꦱ꧀ꦱꦴꦠꦶ ꦥꦏ꧀ꦑꦲꦠꦺꦴ. ꦠꦺꦤꦴꦲ ‘‘ꦥꦷꦜꦱꦩ꧀ꦥꦷ’’ꦠꦶ. ꦥꦢꦷꦥꦺ ꦥꦢꦷꦥꦤꦺ ꦌꦠꦧ꧀ꦧꦁ ꦤꦺꦠꦧ꧀ꦧꦤ꧀ꦠꦶ ꦥꦢꦷꦥꦺꦪ꧀ꦪꦁ, ꦠꦺꦭꦏꦥꦭ꧀ꦭꦴꦢꦶꦈꦥꦏꦫꦟꦁ. ꦮꦸꦠ꧀ꦠꦤ꧀ꦠꦶ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦁ.

ꦄꦴꦒꦩꦤꦮꦶꦥꦠ꧀ꦠꦷꦠꦶ ꦄꦴꦒꦩꦤꦛ꧀ꦜꦴꦤꦮꦱꦺꦤ ꦮꦶꦥꦠ꧀ꦠꦶ ꦄꦴꦒꦩꦺꦴ ꦌꦠ꧀ꦡꦴꦠꦶ ꦏꦠ꧀ꦮꦴ. ꦥꦸꦧ꧀ꦧꦸꦥ꧀ꦥꦤ꧀ꦤꦥꦕ꧀ꦕꦪꦮꦶꦥꦠ꧀ꦠꦷꦠꦶ ꦥꦜꦩꦸꦥ꧀ꦥꦤ꧀ꦤꦥꦕ꧀ꦕꦪꦮꦱꦺꦤ ꦮꦶꦥꦠ꧀ꦠꦶ. ꦕꦟ꧀ꦝꦴꦭꦴꦢꦶꦱꦨꦴꦮꦴ ꦲꦶꦱ꧀ꦱ ꦩꦴꦠꦴꦥꦶꦠꦫꦺꦴ ꦥꦜꦩꦸꦥ꧀ꦥꦤ꧀ꦤꦥꦕ꧀ꦕꦪꦴ, ꦥꦜꦩꦸꦥ꧀ꦥꦠ꧀ꦠꦶꦪꦴ ꦮꦴ ꦥꦕ꧀ꦕꦪꦴ, ꦠꦺꦲꦺꦮꦱ꧀ꦱ ꦮꦶꦥꦠ꧀ꦠꦶ ꦌꦮ, ꦤ ꦱꦩ꧀ꦥꦠ꧀ꦠꦶ. ꦥꦮꦠ꧀ꦠꦥꦕ꧀ꦕꦪꦮꦶꦥꦠ꧀ꦠꦷꦠꦶ ꦥꦮꦠ꧀ꦠꦺ ꦱꦸꦑꦥꦕ꧀ꦕꦪꦮꦶꦥꦠ꧀ꦠꦶ. ꦠꦴꦢꦶꦱꦺ ꦤꦶꦲꦷꦤꦏꦸꦭꦺ ꦈꦥ꧀ꦥꦤ꧀ꦤꦺꦴꦥꦶ ꦏꦺꦴꦕꦶ ꦮꦶꦨꦮꦱꦩ꧀ꦥꦤ꧀ꦤꦺꦴ ꦱꦶꦪꦴ, ꦄꦪꦁ ꦥꦤ ꦢꦸꦒ꧀ꦒꦠꦺꦴ ꦢꦸꦫꦹꦥꦺꦴ ꦲꦺꦴꦠꦶ. ꦄꦴꦗꦷꦮꦸꦥꦴꦪꦮꦶꦥꦠ꧀ꦠꦷꦠꦶ ꦄꦴꦗꦷꦮꦤꦸꦥꦴꦪꦮꦱꦺꦤ ꦮꦶꦥꦠ꧀ꦠꦶ. ꦱꦸꦑꦺꦤ ꦲꦶ ꦗꦷꦮꦶꦏꦁ ꦥꦮꦠ꧀ꦠꦺꦠꦸꦁ ꦈꦥꦴꦪꦨꦹꦠꦴ ꦲꦠ꧀ꦡꦶꦱꦶꦥ꧀ꦥꦴꦢꦪꦺꦴ ꦆꦩꦱ꧀ꦱ ꦤꦠ꧀ꦡꦶ, ꦥꦸꦥ꧀ꦦꦖꦝ꧀ꦝꦏꦱꦶꦭꦴꦏꦺꦴꦛ꧀ꦛꦤꦴꦢꦶꦏꦩ꧀ꦩꦁ ꦥꦤ ꦏꦠ꧀ꦮꦴ ꦗꦷꦮꦶꦏꦁ ꦥꦮꦠ꧀ꦠꦺꦠꦶ. ꦠꦺꦤꦴꦲ ‘‘ꦏꦱꦶꦫꦮꦸꦠ꧀ꦠꦶꦏꦺ’’ꦠꦶ. ꦄꦠ꧀ꦠꦨꦴꦮꦮꦶꦥꦠ꧀ꦠꦷꦠꦶ ꦈꦥꦣꦶꦮꦶꦥꦠ꧀ꦠꦶ. ꦢꦸꦏ꧀ꦑꦏꦴꦫꦟꦱꦩꦴꦪꦺꦴꦒꦺꦴꦠꦶ ꦏꦴꦪꦶꦏꦕꦺꦠꦱꦶꦏꦢꦸꦏ꧀ꦑꦸꦥ꧀ꦥꦠ꧀ꦠꦶꦪꦴ ꦥꦕ꧀ꦕꦪꦱꦩꦺꦴꦣꦴꦤꦁ. ꦱꦸꦑꦏꦴꦫꦟꦮꦶꦥꦠ꧀ꦠꦷꦠꦶ ꦱꦸꦑꦥꦕ꧀ꦕꦪꦥꦫꦶꦲꦴꦤꦶ. ꦈꦥꦨꦺꦴꦒꦮꦶꦥꦠ꧀ꦠꦷꦠꦶ ꦈꦥꦨꦺꦴꦒꦱꦸꦑꦱ꧀ꦱ ꦮꦶꦤꦴꦱꦺꦴ ꦄꦤꦸꦥꦭꦢ꧀ꦣꦶ. ꦗꦺꦴꦠꦶ ꦕꦺꦮ ꦗꦺꦴꦠꦶꦥꦫꦴꦪꦟꦨꦴꦮꦺꦴ ꦕ ꦱꦸꦏ꧀ꦏꦥꦏ꧀ꦑꦺꦴ.

ꦢꦱꦲꦶ ꦄꦏ꧀ꦏꦺꦴꦱꦮꦠ꧀ꦡꦹꦲꦷꦠꦶ ꦭꦏ꧀ꦑꦟꦮꦕꦤꦁ ꦌꦠꦁ ꦪꦡꦴ ‘‘ꦪꦢꦶ ꦩꦺ ꦧ꧀ꦪꦴꦣꦶꦠꦴ ꦲꦺꦴꦤ꧀ꦠꦶ, ꦢꦴꦠꦧ꧀ꦧꦩꦶꦢꦩꦺꦴꦱꦣ’’ꦤ꧀ꦠꦶ, ꦠꦱ꧀ꦩꦴ ꦢꦱꦲꦶ ꦄꦏ꧀ꦏꦺꦴꦱꦮꦠ꧀ꦡꦹꦲꦶ, ꦠꦠ꧀ꦡ ꦮꦴ ꦪꦺꦤ ꦏꦺꦤꦕꦶ ꦥꦫꦶꦨꦴꦱꦠꦷꦠꦶ ꦄꦠ꧀ꦡꦺꦴ. ꦌꦏꦒ꧀ꦒꦕꦶꦠ꧀ꦠꦺꦴꦠꦶ ꦢꦴꦤꦁ ꦢꦴꦠꦸꦁ ꦄꦥꦺꦏ꧀ꦑꦶꦠꦠꦴꦪ ꦱꦩꦴꦲꦶꦠꦕꦶꦠ꧀ꦠꦺꦴ.

ꦥꦸꦒ꧀ꦒꦭꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧒. ꦄꦪ꧀ꦪꦶꦏꦴꦱꦸꦠ꧀ꦠꦮꦟ꧀ꦟꦤꦴ

꧑꧓꧓. ꦗꦫꦴꦗꦶꦟ꧀ꦟꦴꦠꦶ ꦗꦫꦴꦪ ꦗꦶꦟ꧀ꦟꦴ. ꦠꦺꦤ ꦥꦴꦏꦛꦗꦫꦴꦪ ꦩꦠ꧀ꦡꦏꦥ꧀ꦥꦠ꧀ꦠꦶꦩꦴꦲ. ꦮꦪꦺꦴꦮꦸꦝ꧀ꦞꦴꦠꦶ ꦮꦪꦱꦴ ꦮꦸꦝ꧀ꦞꦴ. ꦠꦺꦤ ꦥꦕ꧀ꦖꦶꦩꦮꦪꦱ꧀ꦱ ꦎꦱꦏ꧀ꦏꦱꦩ꧀ꦥꦮꦠ꧀ꦠꦶꦁ ꦮꦢꦠꦶ. ꦗꦴꦠꦶꦩꦲꦭ꧀ꦭꦶꦏꦴꦠꦶ ꦗꦴꦠꦶꦩꦲꦠ꧀ꦠꦒꦠꦴ. ꦕꦶꦫꦏꦴꦭꦁ ꦄꦠꦶꦏ꧀ꦏꦤ꧀ꦠꦴꦠꦶ ꦢ꧀ꦮꦺ ꦠꦪꦺꦴ ꦫꦴꦗꦥꦫꦶꦮꦛ꧀ꦛꦺ ꦮꦷꦠꦶꦮꦠ꧀ꦠꦴ. ꦮꦪꦺꦴ-ꦱꦢ꧀ꦢꦺꦴ ꦱꦴꦣꦴꦫꦟꦮꦕꦤꦺꦴꦥꦶ ꦗꦶꦟ꧀ꦟꦱꦢ꧀ꦢꦱꦤ꧀ꦤꦶꦣꦴꦤꦠꦺꦴ ꦎꦱꦴꦤꦮꦪꦁ ꦌꦮ ꦮꦢꦠꦷꦠꦶ ꦄꦴꦲ ‘‘ꦥꦕ꧀ꦖꦶꦩꦮꦪꦁ ꦱꦩ꧀ꦥꦠ꧀ꦠꦴ’’ꦠꦶ. ꦄꦪ꧀ꦪꦶꦏꦴꦠꦶ ꦩꦴꦠꦴꦩꦲꦶꦁ ꦱꦤ꧀ꦣꦴꦪ ꦮꦢꦠꦶ. ꦲꦠ꧀ꦡꦷ ꦌꦮ ꦫꦠꦤꦨꦹꦠꦺꦴ ꦲꦠ꧀ꦡꦶꦫꦠꦤꦤ꧀ꦠꦶ ꦄꦴꦲ ‘‘ꦱꦠꦱꦲꦱ꧀ꦱꦒ꧀ꦓꦤꦏꦺꦤꦴ’’ꦠꦶꦄꦴꦢꦶ. ꦱꦧ꧀ꦧꦴꦤꦶ ꦠꦴꦤꦷꦠꦶ ꦏꦸꦩ꧀ꦨꦏꦴꦫꦨꦴꦗꦤꦴꦤꦶ, ꦠꦺꦲꦶ ꦱꦢ꧀ꦣꦶꦁ ꦱꦠ꧀ꦠꦱꦤ꧀ꦠꦴꦤꦱ꧀ꦱ ꦥꦩꦴꦟꦁ ꦢꦱ꧀ꦱꦺꦤ꧀ꦠꦺꦴ ‘‘ꦠꦺꦱꦸ ꦲꦷ’’ꦠꦶꦄꦴꦢꦶꦩꦴꦲ, ꦠꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.

ꦄꦪ꧀ꦪꦶꦏꦴꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧔. ꦆꦱ꧀ꦱꦠ꧀ꦠꦱꦸꦠ꧀ꦠꦮꦟ꧀ꦟꦤꦴ

꧑꧓꧕. ꦄꦛ꧀ꦜꦸꦥ꧀ꦥꦠ꧀ꦠꦶꦏꦺꦴꦠꦶ ꦌꦠ꧀ꦡ ꦏꦴ ꦄꦱ꧀ꦱ ꦄꦛ꧀ꦜꦸꦥ꧀ꦥꦠ꧀ꦠꦶ? ꦠꦶꦠ꧀ꦡꦶꦪꦴꦤꦁ ꦨꦒꦮꦠꦺꦴ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦕ ꦄꦭꦴꦨꦴꦪ ꦄꦪꦱꦴꦪ ꦥꦫꦶꦱꦏ꧀ꦏꦤꦁ. ꦠꦁ ꦮꦶꦠ꧀ꦡꦴꦫꦠꦺꦴ ꦢꦱ꧀ꦱꦺꦠꦸꦁ ‘‘ꦨꦒꦮꦠꦺꦴ ꦏꦶꦫꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦪꦡꦴ ꦠꦁ ꦱꦧ꧀ꦧꦢꦶꦱꦴꦱꦸ ꦪꦩꦏꦩꦲꦴꦩꦺꦓꦺꦴ ꦈꦛ꧀ꦜꦲꦶꦠ꧀ꦮꦴ ꦩꦲꦴꦎꦓꦁ ꦮꦶꦪ ꦱꦧ꧀ꦧꦴ ꦥꦴꦫꦩꦶꦪꦺꦴ ‘‘ꦆꦩꦱ꧀ꦩꦶꦁꦪꦺꦮ ꦄꦠ꧀ꦠꦨꦴꦮꦺ ꦮꦶꦥꦴꦏꦁ ꦢꦱ꧀ꦱꦴꦩꦴ’’ꦠꦶ ꦱꦩ꧀ꦥꦶꦟ꧀ꦝꦶꦠꦴ ꦮꦶꦪ ꦭꦴꦨꦱꦏ꧀ꦏꦴꦫꦩꦲꦺꦴꦓꦁ ꦤꦶꦧ꧀ꦧꦠ꧀ꦠꦪꦶꦁꦱꦸ. ꦠꦠꦺꦴ ꦠꦠꦺꦴ ꦄꦤ꧀ꦤꦥꦴꦤꦪꦴꦤꦮꦠ꧀ꦡꦩꦴꦭꦴꦒꦤ꧀ꦣꦮꦶꦭꦺꦥꦤꦴꦢꦶꦲꦠ꧀ꦡꦴ ꦑꦠ꧀ꦠꦶꦪꦧ꧀ꦫꦴꦲ꧀ꦩꦟꦴꦢꦪꦺꦴ ꦄꦴꦒꦤ꧀ꦠ꧀ꦮꦴ – ‘‘ꦏꦲꦁ ꦨꦒꦮꦴ, ꦏꦲꦁ ꦢꦺꦮꦢꦺꦮꦺꦴ ꦤꦫꦴꦱꦨꦺꦴ ꦭꦺꦴꦏꦤꦴꦡꦺꦴ’’ꦠꦶ ꦨꦒꦮꦤ꧀ꦠꦁ ꦥꦫꦶꦪꦺꦱꦤ꧀ꦠꦶ, ꦱꦏꦛꦱꦠꦺꦲꦶꦥꦶ ꦥꦕ꧀ꦕꦪꦺ ꦄꦴꦲꦫꦶꦠ꧀ꦮꦴ ꦎꦏꦴꦱꦁ ꦄꦭꦨꦩꦴꦤꦴ ꦱꦩꦤ꧀ꦠꦴ ꦒꦴꦮꦸꦠꦥ꧀ꦥꦩꦴꦟꦩ꧀ꦥꦶ ꦱꦏꦛꦣꦸꦫꦺꦤ ꦱꦏꦛꦣꦸꦫꦁ ꦄꦴꦲꦕ꧀ꦕ ꦠꦶꦛ꧀ꦜꦤ꧀ꦠꦶ ꦕꦺꦮ ꦄꦤꦸꦮꦠ꧀ꦠꦤ꧀ꦠꦶ ꦕ ꦄꦤ꧀ꦣꦏꦮꦶꦤ꧀ꦢꦧ꧀ꦫꦴꦲ꧀ꦩꦟꦴꦢꦪꦺꦴ ꦮꦶꦪ. ꦱꦧ꧀ꦧꦁ ꦑꦤ꧀ꦣꦏꦺ (ꦩꦲꦴꦮ. ꧒꧘꧒) ꦠꦺꦱꦸ ꦠꦺꦱꦸ ꦱꦸꦠ꧀ꦠꦺꦱꦸ ꦕ ꦄꦴꦒꦠꦤꦪꦺꦤ ꦮꦺꦢꦶꦠꦧ꧀ꦧꦁ. ꦪꦡꦴ ꦕ ꦨꦒꦮꦠꦺꦴ, ꦌꦮꦁ ꦨꦶꦏ꧀ꦑꦸꦱꦔ꧀ꦓꦱ꧀ꦱꦥꦶ. ꦮꦸꦠ꧀ꦠꦩ꧀ꦥꦶ – ‘‘ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦒꦮꦴ ꦱꦏ꧀ꦏꦠꦺꦴ ꦲꦺꦴꦠꦶ ꦒꦫꦸꦏꦠꦺꦴ ꦩꦴꦤꦶꦠꦺꦴ ꦥꦹꦗꦶꦠꦺꦴ ꦄꦥꦕꦶꦠꦺꦴ ꦭꦴꦨꦷ ꦕꦷꦮꦫ…ꦥꦺ… ꦥꦫꦶꦏ꧀ꦑꦴꦫꦴꦤꦁ, ꦨꦶꦏ꧀ꦑꦸꦱꦔ꧀ꦓꦺꦴꦥꦶ ꦑꦺꦴ’’ꦠꦶꦄꦴꦢꦶ (ꦈꦢꦴ. ꧓꧘), ꦠꦡꦴ ‘‘ꦪꦴꦮꦠꦴ ꦑꦺꦴ, ꦕꦸꦤ꧀ꦢ, ꦌꦠꦫꦲꦶ ꦱꦔ꧀ꦓꦺꦴ ꦮꦴ ꦒꦟꦺꦴ ꦮꦴ ꦭꦺꦴꦏꦺ ꦈꦥ꧀ꦥꦤ꧀ꦤꦺꦴ, ꦤꦴꦲꦁ, ꦕꦸꦤ꧀ꦢ, ꦄꦚ꧀ꦚꦁ ꦌꦏꦁ ꦱꦔ꧀ꦓꦩ꧀ꦥꦶ ꦌꦏꦁ ꦒꦟꦩ꧀ꦥꦶ ꦱꦩꦤꦸꦥꦱ꧀ꦱꦴꦩꦶ ꦌꦮꦁ ꦭꦴꦨꦒ꧀ꦒꦪꦱꦒ꧀ꦒꦥ꧀ꦥꦠ꧀ꦠꦁ, ꦪꦡꦫꦶꦮꦴꦪꦁ, ꦕꦸꦤ꧀ꦢ, ꦨꦶꦏ꧀ꦑꦸꦱꦔ꧀ꦓꦺꦴ’’ꦠꦶ (ꦢꦷ. ꦤꦶ. ꧓.꧑꧗꧖). ꦌꦮꦤ꧀ꦠꦶ ꦆꦢꦴꦤꦶ ꦮꦸꦕ꧀ꦕꦩꦴꦤꦴꦏꦴꦫꦺꦤ. ꦤꦶꦗ꧀ꦙꦠ꧀ꦠꦶꦤ꧀ꦠꦶ ꦱꦚ꧀ꦚꦠ꧀ꦠꦶꦁ. ꦤꦤ꧀ꦠꦶ ꦏꦡꦁ.

ꦌꦮꦁ ꦥꦸꦕ꧀ꦖꦶꦠꦸꦁ ꦄꦪꦸꦠ꧀ꦠꦁ ꦠꦶꦠ꧀ꦡꦶꦪꦴꦤꦁ ꦏꦡꦴ ꦩꦲꦴꦗꦤꦱꦤ꧀ꦤꦶꦥꦴꦠꦺ ꦤꦶꦪ꧀ꦪꦴꦠꦶꦠꦴ ꦲꦺꦴꦠꦷꦠꦶ. ꦠꦱ꧀ꦩꦶꦁ ꦢꦴꦠꦧ꧀ꦧꦁ, ꦕꦶꦠ꧀ꦠꦥ꧀ꦥꦱꦴꦢꦩꦠ꧀ꦠꦺꦤ ꦢꦺꦤ꧀ꦠꦺꦥꦶ ꦲꦶ ꦥꦸꦚ꧀ꦚꦁ ꦥꦮꦝ꧀ꦞꦠꦶ. ꦄꦴꦫꦺꦴꦕꦶꦠꦁ ꦄꦠ꧀ꦠꦤꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦨꦒꦮꦴꦠꦶ ꦱꦠ꧀ꦡꦸ ꦄꦴꦩꦤ꧀ꦠꦤꦁ. ꦕꦶꦠ꧀ꦠꦁ ꦤꦴꦩ ꦪꦡꦴꦥꦕ꧀ꦕꦪꦁ ꦥꦮꦠ꧀ꦠꦩꦴꦤꦁ ꦤꦶꦒꦟ꧀ꦜꦴ…ꦥꦺ… ꦥꦱꦷꦢꦠꦶ ꦥꦱꦤ꧀ꦤꦱ꧀ꦱꦴꦠꦶ ꦄꦣꦶꦥ꧀ꦥꦴꦪꦺꦴ. ꦥꦸꦧ꧀ꦧꦺ ꦄꦮꦶꦱꦺꦱꦠꦺꦴ ꦢꦺꦪ꧀ꦪꦣꦩ꧀ꦩꦱ꧀ꦱ ꦢꦴꦠꦧ꧀ꦧꦛ꧀ꦜꦴꦤꦁ ꦤꦴꦩ ꦥꦸꦕ꧀ꦖꦶꦠꦁ, ꦆꦢꦴꦤꦶ ꦠꦱ꧀ꦱ ꦩꦲꦥ꧀ꦦꦭꦨꦴꦮꦏꦫꦺꦴ ꦢꦏ꧀ꦑꦶꦟꦺꦪ꧀ꦪꦮꦶꦱꦺꦱꦺꦴꦠꦶ ꦄꦴꦲ ‘‘ꦄꦚ꧀ꦚꦁ ꦠꦪꦴ ꦥꦜꦩꦁ ꦥꦸꦕ꧀ꦖꦶꦠꦁ, ꦄꦚ꧀ꦚꦁ ꦥꦕ꧀ꦖꦴ’’ꦠꦶ. ꦱꦭ꧀ꦭꦏ꧀ꦑꦺꦲꦶ ꦌꦠꦁ. ꦥꦕ꧀ꦖꦶꦩꦁ ꦥꦸꦫꦶꦩꦺꦤ ꦱꦢ꧀ꦣꦶꦁ ꦄꦴꦤꦺꦲꦷꦠꦶ ꦄꦣꦶꦥ꧀ꦥꦴꦪꦺꦴ. ꦥꦸꦕ꧀ꦖꦶꦠꦱ꧀ꦱ ꦤꦴꦩ ꦥꦚ꧀ꦲꦱ꧀ꦱ ꦏꦡꦤꦁ ꦩꦪ꧀ꦲꦩꦺꦮ ꦨꦴꦫꦺꦴ. ꦱꦩꦸꦥꦧ꧀ꦪꦹꦭ꦳꧀ꦲꦺꦴꦠꦶ ꦌꦏꦠꦺꦴ ꦱꦺꦤꦴꦪ ꦫꦴꦱꦶꦮꦱꦺꦤ ꦱꦩ꧀ꦥꦶꦟ꧀ꦝꦶꦠꦺꦴꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦫꦴꦱꦶꦨꦹꦠꦺꦴ’’ꦠꦶ. ꦄꦱꦶꦏ꧀ꦑꦶꦠꦺꦴꦠꦶ ꦱꦠ꧀ꦠꦛ꧀ꦜꦱꦁꦮꦕ꧀ꦖꦫꦴꦤꦶ ꦣꦤꦸꦱꦶꦥ꧀ꦥꦺꦤ ꦱꦶꦏ꧀ꦑꦶꦠꦺꦴ. ꦣꦤꦸꦱꦶꦥ꧀ꦥꦁ ꦱꦶꦏ꧀ꦑꦶꦠ꧀ꦮꦴꦥꦶ ꦏꦺꦴꦕꦶ ꦏꦠꦲꦠ꧀ꦡꦺꦴ ꦤ ꦲꦺꦴꦠꦶ, ꦄꦪꦁ ꦥꦤ ꦄꦱꦶꦏ꧀ꦑꦶꦠꦺꦴ ꦤ ꦏꦠꦲꦠ꧀ꦡꦺꦴ, ꦥꦺꦴꦔ꧀ꦑꦴꦤꦸꦥꦺꦴꦔ꧀ꦑꦨꦴꦮꦺꦴꦪꦺꦮ ꦧ꧀ꦪꦴꦩꦩꦸꦛ꧀ꦜꦶꦧꦤ꧀ꦣꦺꦴ. ꦠꦶꦟꦥꦸꦚ꧀ꦗꦩꦠ꧀ꦠꦶꦏꦴꦥꦸꦚ꧀ꦗꦴꦢꦷꦱꦹꦠꦶ ꦄꦴꦢꦶ-ꦱꦢ꧀ꦢꦺꦤ ꦥꦁꦱꦸꦥꦸꦚ꧀ꦗꦮꦴꦭꦸꦏꦥꦸꦚ꧀ꦗꦱꦴꦫꦦꦭꦏꦄꦪꦺꦴꦓꦤꦴꦢꦶꦏꦺ ꦱꦔ꧀ꦒꦟ꧀ꦲꦴꦠꦶ. ꦄꦏꦠꦥꦫꦶꦕꦪꦺꦴꦠꦶ ꦠꦺꦱꦁ ꦱꦤ꧀ꦠꦶꦏꦴ ꦮꦶꦗ꧀ꦙꦤꦛ꧀ꦜꦺꦤ ꦄꦏꦠꦥꦫꦶꦕꦪꦺꦴ. ꦫꦴꦗꦫꦴꦗꦩꦲꦴꦩꦠ꧀ꦠꦴꦢꦶꦏꦺ ꦈꦥꦺꦕ꧀ꦕ ꦄꦱꦤꦁ ꦈꦥꦴꦱꦤꦁ, ꦤ ꦏꦠꦁ ꦈꦥꦴꦱꦤꦁ ꦌꦠꦺꦤꦴꦠꦶ ꦄꦏꦠꦹꦥꦴꦱꦤꦺꦴ. ꦄꦱꦶꦏ꧀ꦑꦶꦠꦠꦴꦢꦶꦤꦴ ꦨꦷꦫꦸꦨꦴꦮꦺꦤ ꦮꦴ ꦏꦴꦪꦱ꧀ꦱ ꦖꦩ꧀ꦨꦤꦁ ꦱꦔ꧀ꦏꦩ꧀ꦥꦤꦁ ꦈꦠ꧀ꦠꦴꦱꦺꦴ ꦌꦠꦱ꧀ꦱ ꦄꦠ꧀ꦡꦷꦠꦶ ꦖꦩ꧀ꦨꦷꦠꦶ ꦄꦴꦲ ‘‘ꦥꦮꦺꦣꦶꦠꦏꦴꦪꦺꦴ’’ꦠꦶ.

ꦢꦏ꧀ꦑꦶꦟꦺꦪ꧀ꦪꦠꦴꦪ ꦄꦣꦶꦥ꧀ꦥꦺꦠꦠ꧀ꦠꦴ ‘‘ꦄꦫꦲꦠ꧀ꦠꦩꦒ꧀ꦒꦺꦤ ꦏꦴꦩꦕ꧀ꦖꦤ꧀ꦢꦺꦴ ꦥꦲꦷꦤꦺꦴ ꦲꦺꦴꦠꦷ’’ꦠꦶ ꦄꦴꦲ. ꦄꦕ꧀ꦕꦤ꧀ꦠꦥ꧀ꦥꦲꦴꦤꦱ꧀ꦱ ꦆꦕ꧀ꦖꦶꦠꦠ꧀ꦠꦴ ꦠꦠꦶꦪꦺꦤꦺꦮ ꦏꦸꦏ꧀ꦏꦸꦕ꧀ꦕꦁ ꦥꦲꦷꦤꦁ ꦲꦺꦴꦠꦶ ꦥꦛꦶꦓꦱꦩ꧀ꦥꦪꦺꦴꦒꦁ. ꦄꦱꦺꦏ꧀ꦑꦱ꧀ꦱ ꦄꦪꦤ꧀ꦠꦶ ꦄꦱꦺꦏ꧀ꦑꦁ, ꦱꦷꦭꦏ꧀ꦑꦤ꧀ꦣꦺꦴ. ꦠꦪꦶꦢꦁ ꦤ ꦄꦒ꧀ꦒꦦꦭꦁ ꦱꦷꦭꦩꦺꦮ ꦄꦣꦶꦥ꧀ꦥꦺꦠꦁ, ꦄꦡ ꦑꦺꦴ ꦪꦁ ꦏꦶꦚ꧀ꦕꦶ ꦄꦱꦺꦏ꧀ꦑꦱꦤ꧀ꦠꦴꦤꦺ ꦥꦮꦠ꧀ꦠꦁ ꦱꦷꦭꦁ, ꦭꦺꦴꦏꦸꦠ꧀ꦠꦫꦺꦴ ꦌꦮ ꦤ ꦄꦣꦶꦥ꧀ꦥꦺꦠꦺꦴ ꦱꦶꦏ꧀ꦑꦴꦪ ꦗꦴꦠꦠ꧀ꦠꦴ, ꦌꦮꦁ ꦮꦶꦩꦸꦠ꧀ꦠꦶꦏ꧀ꦑꦤ꧀ꦣꦺꦴꦥꦷꦠꦶ. ꦱꦺꦏ꧀ꦑꦱ꧀ꦱ ꦌꦱꦺꦴꦠꦶ ꦮꦴ, ꦄꦥꦫꦶꦪꦺꦴꦱꦶꦠꦱꦶꦏ꧀ꦑꦠ꧀ꦠꦴ ꦱꦪꦩꦺꦮ ꦱꦶꦏ꧀ꦑꦠꦷꦠꦶ ꦮꦴ ꦱꦺꦏ꧀ꦑꦺꦴ, ꦕꦠꦹꦱꦸ ꦩꦒ꧀ꦒꦺꦱꦸ ꦲꦺꦛ꧀ꦜꦶꦩꦺꦱꦸ ꦕ ꦠꦷꦱꦸ ꦦꦭꦺꦱꦸ ꦱꦷꦭꦏ꧀ꦑꦤ꧀ꦣꦺꦴ. ꦈꦥꦫꦶ ꦱꦶꦏ꧀ꦑꦶꦠꦧ꧀ꦧꦴꦨꦴꦮꦠꦺꦴ ꦄꦱꦺꦏ꧀ꦑꦺꦴ. ꦮꦸꦝ꧀ꦞꦶꦥ꧀ꦥꦠ꧀ꦠꦺꦴ ꦱꦺꦏ꧀ꦑꦺꦴꦠꦶ ꦄꦱꦺꦏ꧀ꦑꦺꦴ. ꦄꦒ꧀ꦒꦦꦭꦨꦹꦠꦺꦴ ꦱꦷꦭꦏ꧀ꦑꦤ꧀ꦣꦺꦴ ꦮꦸꦕ꧀ꦕꦺꦪ꧀ꦪ, ꦄꦛ꧀ꦜꦏꦡꦴꦪꦁ ꦥꦤ ꦮꦶꦥꦱ꧀ꦱꦏꦱ꧀ꦱ ꦱꦷꦭꦱ꧀ꦱ ꦄꦣꦶꦥ꧀ꦥꦺꦠꦠ꧀ꦠꦴ ꦠꦡꦴ ꦄꦠ꧀ꦡꦺꦴ ꦮꦸꦠ꧀ꦠꦺꦴ. ꦱꦧ꧀ꦧꦠ꧀ꦡꦴꦠꦶ ‘‘ꦄꦱꦺꦏ꧀ꦑꦺꦤꦴ’’ꦠꦶꦄꦴꦢꦷꦱꦸ. ꦌꦠ꧀ꦡ ꦕ ꦪꦡꦴ ꦱꦷꦭꦱꦩꦴꦣꦶꦥꦚ꧀ꦚꦴꦏ꧀ꦑꦤ꧀ꦣꦴ ꦩꦶꦱ꧀ꦱꦏꦴ ꦄꦣꦶꦥ꧀ꦥꦺꦠꦴ, ꦌꦮꦁ ꦮꦶꦩꦸꦠ꧀ꦠꦶꦏ꧀ꦑꦤ꧀ꦣꦴꦥꦷꦠꦶ ꦠꦢꦔ꧀ꦒꦮꦶꦩꦸꦠ꧀ꦠꦶꦄꦴꦢꦪꦺꦴꦥꦶ ꦮꦺꦢꦶꦠꦧ꧀ꦧꦴ, ꦤ ꦥꦛꦶꦥ꧀ꦥꦱ꧀ꦱꦢ꧀ꦣꦶꦮꦶꦩꦸꦠ꧀ꦠꦶ ꦌꦮ.

ꦪꦺꦤ ꦱꦶꦥ꧀ꦥꦺꦤ ꦆꦱ꧀ꦱꦴꦱꦺꦴ ꦲꦺꦴꦠꦶ, ꦠꦁ ꦆꦱ꧀ꦱꦠ꧀ꦠꦤ꧀ꦠꦶ ꦄꦴꦲ ‘‘ꦈꦱꦸꦱꦶꦥ꧀ꦥ’’ꦤ꧀ꦠꦶ. ꦪꦱ꧀ꦱꦴ ꦮꦴꦪꦺꦴꦣꦴꦠꦸꦪꦴ ꦮꦱꦺꦤ ꦱꦫꦷꦫꦁ ꦱꦚ꧀ꦗꦴꦠꦡꦴꦩꦁ ꦲꦺꦴꦠꦶ, ꦠꦁ ꦧꦭꦥꦕ꧀ꦕꦪꦁ ꦱꦤ꧀ꦣꦴꦪꦴꦲ ‘‘ꦧꦭꦁ ꦤꦴꦩ ꦮꦴꦪꦺꦴꦣꦴꦠꦹ’’ꦠꦶ. ꦱꦩꦥ꧀ꦥꦮꦠ꧀ꦠꦶꦠꦺꦴ ꦲꦶ ꦮꦶꦱꦩꦥ꧀ꦥꦮꦠ꧀ꦠꦶꦤꦶꦮꦴꦫꦏꦣꦴꦠꦸ ꦧꦭꦁ ꦤꦴꦩ, ꦠꦺꦤ ꦠꦠꦺꦴ ꦄꦚ꧀ꦚꦁ ꦧꦭꦫꦹꦥꦁ ꦤꦴꦩ ꦤꦠ꧀ꦡꦶ.

ꦪꦱ꧀ꦩꦴ ꦄꦫꦲꦴ ꦌꦮ ꦌꦏꦤ꧀ꦠꦠꦺꦴ ꦱꦺꦴꦫꦠꦺꦴ, ꦠꦱ꧀ꦱ ꦨꦴꦮꦺꦴ ꦱꦺꦴꦫꦕ꧀ꦕꦤ꧀ꦠꦶ ꦄꦴꦲ ‘‘ꦱꦺꦴꦫꦕ꧀ꦕꦤ꧀ꦠꦶ ꦄꦫꦲꦠ꧀ꦠ’’ꦤ꧀ꦠꦶ. ꦌꦠꦺ ꦢ꧀ꦮꦺꦠꦶ ꦑꦤ꧀ꦠꦶ ꦱꦺꦴꦫꦕ꧀ꦕꦤ꧀ꦠꦶ ꦌꦠꦺ ꦢ꧀ꦮꦺ ꦣꦩ꧀ꦩꦴ. ꦥꦴꦤꦷꦪꦁ ꦥꦶꦮꦤ꧀ꦠꦶ ꦌꦠ꧀ꦡꦴꦠꦶ ꦥꦥꦴ, ꦪꦺꦴ ꦏꦺꦴꦕꦶ ꦗꦭꦴꦱꦪꦺꦴ ꦪꦁ ꦏꦶꦚ꧀ꦕꦶ ꦥꦴꦤꦷꦪꦛ꧀ꦜꦴꦤꦤ꧀ꦠꦶ ꦄꦴꦲ ‘‘ꦕꦠꦸꦫꦱ꧀ꦱꦥꦺꦴꦏ꧀ꦑꦫꦟꦷꦄꦴꦢꦷꦤꦷ’’ꦠꦶ. ꦈꦢꦏꦮꦶꦏꦹꦭꦴꦢꦷꦱꦸ ꦏꦩꦤ꧀ꦠꦶ ꦄꦠꦶꦏ꧀ꦏꦩꦤ꧀ꦠꦶ ꦌꦠꦺꦲꦷꦠꦶ ꦱꦔ꧀ꦏꦩꦤꦴꦤꦶ, ꦱꦺꦠꦸꦄꦴꦢꦷꦤꦶ. ꦱꦺꦠꦸꦏꦫꦟꦪꦸꦠ꧀ꦠꦛ꧀ꦜꦴꦤꦺ ꦱꦺꦠꦸꦁ, ꦕꦔ꧀ꦏꦩꦤꦏꦫꦟꦪꦸꦠ꧀ꦠꦛ꧀ꦜꦴꦤꦺ ꦕꦔ꧀ꦏꦩꦤꦁ, ꦩꦒ꧀ꦒꦏꦫꦟꦪꦸꦠ꧀ꦠꦛ꧀ꦜꦴꦤꦺ ꦩꦒ꧀ꦒꦁ ꦏꦫꦺꦪ꧀ꦪꦴꦠꦶ ꦄꦪꦩꦺꦠ꧀ꦡ ꦄꦣꦶꦥ꧀ꦥꦴꦪꦺꦴ. ꦠꦺꦤꦴꦲ ‘‘ꦥꦟ꧀ꦟꦴꦱꦴ’’ꦠꦶꦄꦴꦢꦶ.

ꦨꦶꦏ꧀ꦑꦴꦕꦴꦫꦮꦠ꧀ꦠꦤ꧀ꦠꦶ ꦄꦫꦶꦪꦴꦤꦁ ꦲꦶꦠꦁ ꦮꦠ꧀ꦠꦥꦛꦶꦥꦠ꧀ꦠꦶꦁ. ꦢꦺꦤ꧀ꦠꦺꦴꦥꦷꦠꦶ ꦥꦶ-ꦱꦢ꧀ꦢꦺꦤ ꦄꦑꦷꦟꦴꦱꦮꦱ꧀ꦱ ꦢꦺꦤ꧀ꦠꦺꦴꦥꦷꦠꦶ ꦆꦩꦩꦠ꧀ꦡꦁ ꦢꦱ꧀ꦱꦺꦠꦶ ꦪꦱ꧀ꦱ ꦏꦱ꧀ꦱꦕꦶꦥꦶ ꦢꦺꦤ꧀ꦠꦺꦤꦥꦶ ꦏꦩ꧀ꦩꦦꦭꦁ ꦱꦢ꧀ꦢꦲꦶꦠ꧀ꦮꦴ ꦮꦶꦥ꧀ꦥꦱꦤ꧀ꦤꦕꦶꦠ꧀ꦠꦺꦤꦺꦮ ꦢꦴꦠꦧ꧀ꦧꦠ꧀ꦠꦴ. ꦡꦤꦪꦤ꧀ꦠꦶ ꦆꦢꦁ ꦠꦱ꧀ꦱ ꦩꦲꦴꦩꦺꦓꦨꦴꦮꦢꦱ꧀ꦱꦤꦁ, ꦪꦺꦴ ꦲꦶ ꦩꦲꦴꦮꦱ꧀ꦱꦁ ꦮꦱ꧀ꦱꦠꦶ, ꦱꦺꦴ ꦒꦗ꧀ꦗꦤ꧀ꦠꦺꦴ ꦮꦶꦗ꧀ꦗꦸꦩ꧀ꦩꦴꦭꦁ ꦮꦶꦱ꧀ꦱꦗ꧀ꦗꦺꦤ꧀ꦠꦺꦴ ꦥꦮꦱ꧀ꦱꦠꦶ. ꦄꦨꦶꦱꦔ꧀ꦑꦫꦶꦠ꧀ꦮꦴ ꦱꦩꦺꦴꦣꦴꦤꦺꦠ꧀ꦮꦴꦠꦶ ꦑꦴꦢꦤꦷꦪꦱ꧀ꦱ ꦮꦶꦮꦶꦣꦗꦴꦠꦶꦪꦴꦤꦶ ꦱꦩ꧀ꦥꦶꦟ꧀ꦝꦺꦠ꧀ꦮꦴ. ꦠꦺꦤꦴꦲ ‘‘ꦫꦴꦱꦶꦁ ꦏꦠ꧀ꦮꦴ’’ꦠꦶ.

ꦥꦏꦶꦫꦟꦁ ꦤꦴꦩ ꦮꦶꦏꦶꦫꦟꦩ꧀ꦥꦶ ꦲꦺꦴꦠꦶ ꦄꦤꦺꦏꦠ꧀ꦡꦠ꧀ꦠꦴ ꦣꦴꦠꦹꦤꦤ꧀ꦠꦶ ꦄꦴꦲ ‘‘ꦮꦶꦏꦶꦫꦠꦷ’’ꦠꦶ. ꦥꦏꦶꦫꦤ꧀ꦠꦺꦴ ꦮꦶꦪ ꦮꦴ ꦢꦴꦤꦁ ꦢꦺꦠꦷꦠꦶ ꦆꦩꦶꦤꦴ ꦒꦸꦟꦑꦺꦠ꧀ꦠꦩꦺꦮ ꦄꦥꦫꦶꦪꦺꦱꦶꦠ꧀ꦮꦴ ꦏꦫꦸꦟꦴꦑꦺꦠ꧀ꦠꦺꦥꦶ ꦩꦲꦴꦢꦴꦤꦁ ꦥꦮꦠ꧀ꦠꦺꦠꦷꦠꦶ ꦢꦱ꧀ꦱꦺꦠꦶ. ꦠꦺꦤ ‘‘ꦥꦏꦶꦫꦺꦠꦷ’’ꦠꦶ ꦮꦢꦤ꧀ꦠꦺꦤ ꦨꦒꦮꦠꦴ ꦄꦛ꧀ꦜꦸꦥ꧀ꦥꦠ꧀ꦠꦶꦪꦁ ꦄꦴꦒꦠꦠꦶꦠ꧀ꦡꦶꦪꦮꦴꦢꦺꦤ ꦄꦥ꧀ꦥꦛꦶꦱꦺꦣꦶꦠꦠꦴꦥꦶ ꦢꦷꦥꦶꦠꦴ ꦲꦺꦴꦠꦶ. ꦥꦸꦚ꧀ꦚꦣꦴꦫꦴꦠꦶ ꦥꦸꦚ꧀ꦚꦩꦪꦣꦴꦫꦴ ꦥꦸꦚ꧀ꦚꦴꦨꦶꦱꦤ꧀ꦢꦴ. ꦱꦶꦤꦺꦲꦪꦤ꧀ꦠꦷꦠꦶ ꦡꦹꦭꦣꦴꦫꦺꦤꦥꦶ ꦱꦶꦤꦺꦲꦺꦤ ꦱꦶꦤꦶꦢ꧀ꦣꦁ ꦏꦫꦺꦴꦤ꧀ꦠꦷ. ꦏꦶꦭꦺꦢꦪꦤ꧀ꦠꦷꦠꦶ ꦄꦭ꧀ꦭꦨꦴꦮꦁ ꦥꦴꦥꦪꦤ꧀ꦠꦷ. ꦪꦡꦴꦪꦁ ꦥꦸꦚ꧀ꦚꦣꦴꦫꦴ ꦢꦴꦠꦴꦫꦁ ꦄꦤ꧀ꦠꦺꦴ ꦱꦶꦤꦺꦲꦺꦠꦶ ꦥꦹꦫꦺꦠꦶ ꦄꦨꦶꦱꦤ꧀ꦢꦺꦠꦶ, ꦌꦮꦁ ꦥꦛꦶꦒ꧀ꦒꦴꦲꦏꦴꦤꦩ꧀ꦥꦶ ꦄꦤ꧀ꦠꦺꦴ ꦱꦶꦤꦺꦲꦺꦠꦶ ꦥꦹꦫꦺꦠꦶ ꦄꦨꦶꦱꦤ꧀ꦢꦺꦠꦶ. ꦠꦺꦤꦺꦮꦴꦲ ‘‘ꦢꦢꦁ ꦥꦶꦪꦺꦴ ꦲꦺꦴꦠꦶ ꦨꦗꦤ꧀ꦠꦶ ꦤꦁ ꦧꦲꦹ’’ꦠꦶꦄꦴꦢꦶ (ꦄ. ꦤꦶ. ꧕.꧓꧔) ꦌꦮꦁ ꦱꦤ꧀ꦠꦺꦥꦶ ‘‘ꦢꦴꦠꦴꦫꦁ ꦄꦨꦶꦮꦱ꧀ꦱꦠꦷ’’ꦠꦶ ꦮꦸꦠ꧀ꦠꦠ꧀ꦠꦴ ꦄꦛ꧀ꦜꦏꦡꦴꦪꦁ ꦢꦴꦪꦏꦮꦱꦺꦤꦺꦮ ‘‘ꦱꦶꦤꦺꦲꦺꦠꦷ’’ꦠꦶ ꦮꦸꦠ꧀ꦠꦁ, ꦪꦱ꧀ꦩꦴ ꦮꦴ ꦥꦛꦶꦒ꧀ꦒꦴꦲꦏꦱ꧀ꦱ ꦱꦶꦤꦺꦲꦸꦥ꧀ꦥꦠ꧀ꦠꦶ ꦄꦴꦩꦶꦱꦤꦶꦱ꧀ꦱꦶꦠꦴꦠꦶ ꦢꦴꦪꦏꦮꦱꦺꦤꦺꦮ ꦮꦸꦠ꧀ꦠꦁ.

ꦆꦱ꧀ꦱꦠ꧀ꦠꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧕. ꦥꦧ꧀ꦧꦠꦹꦥꦩꦱꦸꦠ꧀ꦠꦮꦟ꧀ꦟꦤꦴ

꧑꧓꧖. ꦑꦠ꧀ꦠꦶꦪꦴꦠꦶ ꦄꦨꦶꦱꦺꦏꦥ꧀ꦥꦠ꧀ꦠꦴ. ꦆꦱ꧀ꦱꦫꦶꦪꦩꦢꦺꦴ ꦏꦴꦩꦒꦺꦣꦺꦴ. ꦥꦡꦮꦶꦩꦟ꧀ꦝꦭꦱ꧀ꦱ ꦩꦲꦤ꧀ꦠꦠꦴ ꦠꦁꦤꦶꦮꦴꦱꦶꦤꦁ ꦄꦤꦸꦪꦤ꧀ꦠꦠꦴꦠꦶ ꦱꦧ꧀ꦧꦩꦶꦢꦁ ꦪꦡꦶꦕ꧀ꦖꦶꦠꦱ꧀ꦱ ꦫꦴꦗꦏꦶꦕ꧀ꦕꦱ꧀ꦱ ꦱꦸꦑꦺꦤ ꦱꦩꦶꦗ꧀ꦙꦤꦱ꧀ꦱ ꦏꦴꦫꦟꦏꦶꦠ꧀ꦠꦤꦁ. ꦪꦴꦢꦶꦱꦺ ꦫꦴꦗꦏꦶꦕ꧀ꦕꦺ ꦈꦱ꧀ꦱꦸꦏ꧀ꦏꦁ ꦄꦴꦥꦤ꧀ꦤꦺꦴ, ꦠꦁ ꦮꦶꦠ꧀ꦡꦴꦫꦠꦺꦴ ꦢꦱ꧀ꦱꦺꦠꦸꦁ ‘‘ꦌꦱ ꦏꦶꦫꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦄꦤ꧀ꦠꦫꦒꦩꦤꦴꦤꦷꦠꦶ ꦠꦶꦟ꧀ꦟꦁ ꦤꦶꦫꦤ꧀ꦠꦫꦒꦩꦤꦴꦤꦁ ꦄꦤ꧀ꦠꦫꦤ꧀ꦠꦫꦴ ꦒꦩꦤꦴꦤꦶ. ꦕꦺꦴꦫꦴ ꦕꦶꦤ꧀ꦠꦪꦶꦁꦱꦹꦠꦶ ꦌꦏꦺꦴ ꦄꦤ꧀ꦠꦫꦨꦺꦴꦒꦶꦏꦺꦴ ꦫꦴꦗꦴꦥꦫꦴꦣꦶꦏꦺꦴ ꦥꦚ꧀ꦕꦱꦠꦩꦤꦸꦱ꧀ꦱꦥꦫꦶꦮꦴꦫꦺꦴ ꦕꦺꦴꦫꦶꦪꦁ ꦏꦫꦺꦴꦤ꧀ꦠꦺꦴ ꦮꦶꦕꦫꦠꦶ, ꦠꦺ ꦱꦤ꧀ꦣꦴꦪ ꦮꦸꦠ꧀ꦠꦁ.

‘‘ꦄꦪꦸꦠ꧀ꦠꦁ ꦠꦺ ꦏꦠ’’ꦤ꧀ꦠꦶ ꦱꦕꦴꦲꦁ ꦮꦏ꧀ꦑꦴꦩꦷꦠꦶ ꦪꦺꦴꦗꦤꦴ. ꦣꦸꦫꦮꦶꦲꦴꦫꦺꦠꦶ ꦫꦡꦱ꧀ꦱ ꦣꦸꦫꦁ ꦮꦶꦪ ꦤꦒꦫꦱ꧀ꦱ ꦣꦸꦫꦨꦹꦠꦺ ꦮꦶꦲꦴꦫꦺ. ꦱꦤ꧀ꦡꦩ꧀ꦨꦶꦠꦸꦤ꧀ꦠꦶ ꦮꦶꦱ꧀ꦱꦴꦱꦨꦴꦮꦺꦤ ꦈꦥꦛ꧀ꦜꦴꦠꦸꦁ. ꦱꦢ꧀ꦣꦴꦪꦶꦏꦺꦴꦠꦶ ꦱꦢ꧀ꦣꦴꦪ ꦄꦪꦶꦠꦧ꧀ꦧꦺꦴ, ꦱꦢ꧀ꦣꦺꦪ꧀ꦪꦺꦴꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦱꦢ꧀ꦣꦴꦠꦧ꧀ꦧꦺꦴ’’ꦠꦶ. ꦥꦕ꧀ꦕꦪꦶꦏꦺꦴꦠꦶ ꦥꦠ꧀ꦠꦶꦪꦴꦪꦶꦠꦧ꧀ꦧꦺꦴ. ꦄꦧ꧀ꦨꦱꦩꦁ ꦥꦸꦡꦸꦭꦨꦴꦮꦺꦤ. ꦤꦶꦥ꧀ꦥꦺꦴꦡꦺꦤ꧀ꦠꦺꦴꦠꦶ ꦤꦶꦩ꧀ꦩꦢ꧀ꦢꦺꦤ꧀ꦠꦺꦴ. ꦱꦟ꧀ꦲꦏꦫꦟꦷꦪꦁ ꦄꦠꦶꦱꦟ꧀ꦲꦁ ꦥꦶꦱꦤ꧀ꦠꦺꦴ ꦤꦶꦱꦢꦥꦺꦴꦠꦺꦴ ꦮꦶꦪ ꦥꦶꦱꦤ꧀ꦠꦺꦴ.

ꦣꦩ꧀ꦩꦕꦫꦶꦪꦴꦠꦶꦄꦴꦢꦶꦠ꧀ꦠꦩ꧀ꦥꦶ ꦱꦷꦱꦁ ꦕꦺꦭꦚ꧀ꦕ ꦄꦗ꧀ꦙꦸꦥꦺꦏ꧀ꦑꦶꦠ꧀ꦮꦴ ꦱꦩ꧀ꦩꦴꦥꦛꦶꦥꦠ꧀ꦠꦶ ꦌꦮ ꦏꦴꦠꦧ꧀ꦧꦴ ꦠꦱ꧀ꦱꦴ ꦌꦮ ꦥꦫꦭꦺꦴꦏꦺ ꦥꦠꦶꦛ꧀ꦜꦴꦨꦴꦮꦠꦺꦴ. ꦄꦴꦕꦶꦏ꧀ꦑꦴꦩꦷꦠꦶ ꦏꦡꦺꦩꦶ, ꦏꦡꦺꦤ꧀ꦠꦺꦴ ꦕ ꦪꦡꦴ ꦠꦩꦠ꧀ꦡꦁ ꦱꦩ꧀ꦩꦢꦺꦮ ꦫꦴꦗꦴ ꦗꦴꦤꦴꦠꦶ, ꦌꦮꦁ ꦗꦴꦤꦴꦥꦺꦩꦷꦠꦶ. ꦤꦶꦥ꧀ꦦꦠ꧀ꦠꦶ ꦪꦸꦢ꧀ꦣꦺꦤ ꦏꦴꦠꦧ꧀ꦧꦄꦠ꧀ꦡꦱꦶꦢ꧀ꦣꦶ. ꦮꦶꦱꦶꦤꦺꦴꦠꦶ ꦧꦤ꧀ꦣꦠꦶ ꦪꦡꦴꦣꦶꦥ꧀ꦥꦺꦠꦁ ꦕꦶꦠ꧀ꦠꦁ ꦌꦠꦺꦤꦴꦠꦶ ꦮꦶꦱꦪꦺꦴ, ꦱꦩꦠ꧀ꦡꦨꦴꦮꦺꦴ. ꦩꦤ꧀ꦠꦱꦩ꧀ꦥꦤ꧀ꦤꦴꦠꦶ ꦱꦩ꧀ꦥꦤ꧀ꦤꦫꦴꦗꦩꦤ꧀ꦠꦴ. ꦩꦲꦴꦄꦩꦕ꧀ꦕꦴꦠꦶ ꦩꦲꦺꦴꦱꦣꦴꦢꦶꦱꦢꦶꦱꦴ ꦤꦷꦠꦶꦱꦠ꧀ꦡꦖꦺꦏꦴ ꦄꦩꦕ꧀ꦕꦥꦸꦫꦶꦱꦴ. ꦈꦥꦭꦴꦥꦺꦠꦸꦤ꧀ꦠꦶ ꦥꦫꦺꦱꦁ ꦄꦤ꧀ꦠꦫꦺ ꦮꦶꦫꦺꦴꦣꦠ꧀ꦡꦁ ꦱꦔ꧀ꦒꦟ꧀ꦲꦶꦠꦸꦁ.

ꦢ꧀ꦮꦺꦪꦺꦮ ꦥꦧ꧀ꦧꦠꦴꦠꦶ ꦥꦧ꧀ꦧꦠꦱꦢꦶꦱꦴ ꦢ꧀ꦮꦺꦪꦺꦮ ꦒꦲꦶꦠꦴ. ꦫꦴꦗꦺꦴꦮꦴꦢꦺꦠꦶ ꦫꦴꦗꦺꦴꦮꦴꦢꦱꦸꦠ꧀ꦠꦺ. ꦄꦴꦒꦠꦴꦮ ꦠꦠ꧀ꦠꦤ꧀ꦠꦶꦪꦴ ꦄꦤꦸꦫꦹꦥꦠ꧀ꦡꦁ. ꦮꦶꦭꦸꦩ꧀ꦥꦩꦴꦤꦴꦠꦶ ꦆꦠꦶ-ꦱꦢ꧀ꦢꦺꦴ ꦄꦴꦢꦶꦄꦠ꧀ꦡꦺꦴ. ꦮꦶꦥꦠ꧀ꦠꦷꦠꦶ ꦨꦺꦴꦒꦥꦫꦶꦲꦴꦤꦴꦢꦶꦮꦶꦤꦴꦱꦺꦴ. ꦲꦠ꧀ꦡꦶꦪꦸꦢ꧀ꦣꦴꦢꦷꦲꦶ ꦗꦫꦴꦩꦫꦟꦁ ꦗꦶꦤꦶꦠꦸꦁ ꦤ ꦱꦏ꧀ꦏꦴ ꦱꦠ꧀ꦠꦱ꧀ꦱ ꦄꦮꦶꦱꦪꦨꦴꦮꦠꦺꦴ. ꦪꦺꦤ ꦥꦤ ꦗꦶꦤꦶꦠꦸꦁ ꦱꦏ꧀ꦏꦴ, ꦠꦁ ꦢꦱ꧀ꦱꦺꦤ꧀ꦠꦺꦴ ꦨꦒꦮꦴ ‘‘ꦧꦸꦢ꧀ꦣꦺ…ꦥꦺ… ꦤꦶꦮꦺꦱꦪꦺ’’ꦠꦶ ꦄꦴꦲ. ꦫꦠꦤꦠ꧀ꦠꦪꦺ ꦲꦶ ꦱꦢ꧀ꦣꦴ ꦤꦶꦮꦶꦛ꧀ꦜꦴ ꦩꦹꦭꦗꦴꦠꦴ ꦥꦠꦶꦛ꧀ꦜꦶꦠꦴ ꦌꦏꦤ꧀ꦠꦠꦺꦴ ꦗꦫꦴꦩꦫꦟꦮꦶꦗꦪꦴꦪ ꦲꦺꦴꦠꦶ. ꦠꦺꦤꦴꦲ ‘‘ꦠꦱ꧀ꦩꦴ ꦱꦢ꧀ꦣ’’ꦤ꧀ꦠꦶ.

ꦥꦧ꧀ꦧꦠꦹꦥꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦠꦠꦶꦪꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦱꦴꦫꦠ꧀ꦡꦥ꧀ꦥꦏꦴꦱꦶꦤꦶꦪꦴ ꦱꦁꦪꦸꦠ꧀ꦠꦤꦶꦏꦴꦪ-ꦄꦛ꧀ꦜꦏꦡꦴꦪ

ꦏꦺꦴꦱꦭꦱꦁꦪꦸꦠ꧀ꦠꦮꦟ꧀ꦟꦤꦴꦪ ꦭꦷꦤꦠ꧀ꦡꦥ꧀ꦥꦏꦴꦱꦤꦴ ꦱꦩꦠ꧀ꦠꦴ.