꧑. ꦱꦠ꧀ꦠꦗꦛꦶꦭꦱꦸꦠ꧀ꦠꦮꦟ꧀ꦟꦤꦴ

꧑꧒꧒. ꦥꦸꦧ꧀ꦧꦴꦫꦴꦩꦱꦔ꧀ꦑꦴꦠꦺꦠꦶ ꦱꦴꦮꦠ꧀ꦡꦶꦤꦒꦫꦱ꧀ꦱ ꦥꦸꦧ꧀ꦧꦢꦶꦱꦴꦪ ꦏꦠꦠ꧀ꦠꦴ ꦥꦸꦧ꧀ꦧꦴꦫꦴꦩꦺꦠꦶ ꦱꦔ꧀ꦑꦁ ꦒꦠꦺ. ꦠꦠ꧀ꦫꦴꦠꦶ ‘‘ꦩꦶꦒꦴꦫꦩꦴꦠꦸꦪꦴ ꦥꦴꦱꦴꦢꦺ’’ꦠꦶ ꦠꦱ꧀ꦩꦶꦁ ꦱꦁꦑꦶꦠ꧀ꦠꦮꦕꦤꦺ. ꦄꦪꦁ ꦆꦢꦴꦤꦶ ꦮꦸꦕ꧀ꦕꦩꦴꦤꦴ ꦄꦤꦸꦥꦸꦧ꧀ꦧꦶꦏꦡꦴ ꦄꦴꦢꦶꦠꦺꦴ ꦥꦛ꧀ꦜꦴꦪ ꦄꦤꦸꦏ꧀ꦏꦩꦏꦡꦴ. ꦥꦠ꧀ꦡꦤꦁ ꦄꦏꦴꦱꦶ ꦠꦱ꧀ꦱ ꦨꦒꦮꦠꦺꦴ ꦄꦒ꧀ꦒꦸꦥꦛ꧀ꦜꦴꦪꦶꦏꦁ ꦌꦏꦁ ꦈꦥꦴꦱꦶꦏꦁ ꦢꦶꦱ꧀ꦮꦴ ꦠꦁ ꦜꦴꦤꦤ꧀ꦠꦫꦁ ꦄꦴꦏꦔ꧀ꦑꦤ꧀ꦠꦷ. ꦩꦺꦟ꧀ꦝꦏꦥꦸꦠ꧀ꦠꦱ꧀ꦱꦴꦠꦶ ꦩꦺꦟ꧀ꦝꦏꦱꦺꦛ꧀ꦜꦶꦥꦸꦠ꧀ꦠꦱ꧀ꦱ. ꦩꦴꦠꦶꦛ꧀ꦜꦴꦤꦺ ꦜꦥꦺꦱꦶ ꦠꦱ꧀ꦱꦴ ꦈꦥꦏꦴꦫꦁ ꦒꦫꦸꦨꦴꦮꦚ꧀ꦕ ꦢꦶꦱ꧀ꦮꦴ. ꦠꦴꦪ ꦏꦴꦫꦶꦠꦺ ꦥꦴꦱꦴꦢꦺꦠꦶ ꦠꦴꦪ ꦩꦲꦴꦈꦥꦴꦱꦶꦏꦴꦪ ꦩꦲꦴꦭꦠꦴꦥꦱꦴꦣꦤꦁ ꦮꦶꦱ꧀ꦱꦗ꧀ꦗꦺꦠ꧀ꦮꦴ ꦤꦮꦲꦶ ꦏꦺꦴꦛꦷꦲꦶ ꦏꦫꦷꦱꦩꦠ꧀ꦠꦺ ꦨꦹꦩꦶꦨꦴꦒꦺ ꦏꦴꦫꦶꦠꦺ ꦱꦲꦱ꧀ꦱꦒꦧ꧀ꦨꦥꦛꦶꦩꦟ꧀ꦝꦶꦠꦺ ꦥꦴꦱꦴꦢꦺ.

ꦥꦫꦹꦭ꦳꧀ꦲꦏꦕ꧀ꦖꦴꦠꦶ ꦥꦫꦹꦭ꦳꧀ꦲꦏꦕ꧀ꦖꦭꦺꦴꦩꦴ. ꦏꦩꦟ꧀ꦝꦭꦸꦓꦛꦶꦏꦴꦢꦶꦁ ꦥꦧ꧀ꦧꦗꦶꦠꦥꦫꦶꦏ꧀ꦑꦴꦫꦁ. ꦤꦒ꧀ꦒꦨꦺꦴꦒ꧀ꦒꦤꦶꦱ꧀ꦱꦶꦫꦶꦏꦴꦤꦤ꧀ꦠꦶ ꦤꦒ꧀ꦒꦴꦤꦚ꧀ꦕꦺꦮ ꦨꦺꦴꦒ꧀ꦒꦴꦤꦚ꧀ꦕ ꦤꦶꦱ꧀ꦱꦶꦫꦶꦏꦴꦤꦚ꧀ꦕ. ꦠꦺ ꦲꦶ ꦄꦤꦶꦮꦠ꧀ꦡꦮꦠ꧀ꦡꦠꦴꦪ ꦤꦒ꧀ꦒꦴ ꦕꦺꦮ, ꦄꦕꦺꦭꦏꦮꦠꦴꦢꦶꦤꦴ ꦨꦺꦴꦒ꧀ꦒꦱꦫꦷꦫꦠꦴꦪ ꦨꦺꦴꦒ꧀ꦒꦴ, ꦱꦺꦴꦨꦴꦫꦲꦶꦠꦠꦴꦪ ꦤꦶꦱ꧀ꦱꦶꦫꦶꦏꦴ ꦕ. ꦄꦠ꧀ꦠꦤꦴ ꦢꦶꦛ꧀ꦜꦱꦸꦠꦁ ꦥꦛꦶꦕ꧀ꦖꦴꦢꦺꦠ꧀ꦮꦴ ꦤ ꦏꦡꦺꦪ꧀ꦪꦸꦤ꧀ꦠꦶ ꦄꦏꦴꦫꦟꦩꦺꦠꦁ ꦠꦺꦱꦁ ꦫꦚ꧀ꦚꦴ ꦥꦪꦸꦠ꧀ꦠꦕꦫꦥꦸꦫꦶꦱꦨꦴꦮꦠꦺꦴ. ꦌꦮꦁ ꦏꦠꦺ ꦥꦤ ꦠꦺ ‘‘ꦄꦚ꧀ꦚꦺꦥꦶ ꦥꦧ꧀ꦧꦗꦶꦠꦴ ꦄꦠ꧀ꦡꦷꦠꦶ ꦄꦪꦁ ꦗꦴꦤꦴꦠꦷ’’ꦠꦶ ꦩꦚ꧀ꦚꦺꦪ꧀ꦪꦸꦤ꧀ꦠꦶ ꦏꦺꦴꦲꦚ꧀ꦚꦕꦶꦠ꧀ꦠꦺꦴ ꦌꦮꦁ ꦄꦏꦴꦱꦷꦠꦶ ꦱꦏ꧀ꦏꦴ ꦮꦶꦚ꧀ꦚꦴꦠꦸꦁ. ꦠꦡꦴ ꦲꦶ ꦠꦺꦤꦠ꧀ꦡꦺꦤ ꦄꦥꦫꦶꦠꦺꦴꦱꦩꦴꦤꦺꦴ ‘‘ꦄꦥꦶꦕꦴ’’ꦠꦶꦄꦴꦢꦶꦩꦴꦲ.

ꦏꦴꦱꦶꦏꦕꦤ꧀ꦢꦤꦤ꧀ꦠꦶ ꦈꦗ꧀ꦗꦭꦕꦤ꧀ꦢꦤꦁ. ꦠꦁ ꦏꦶꦫ ꦮꦟ꧀ꦟꦮꦱꦺꦤ ꦱꦩꦸꦗ꧀ꦗꦭꦁ ꦲꦺꦴꦠꦶ ꦥꦨꦱ꧀ꦱꦫꦁ, ꦠꦢꦠ꧀ꦡꦩꦺꦮ ꦤꦁ ꦱꦟ꧀ꦲꦠꦫꦁ ꦏꦫꦺꦴꦤ꧀ꦠꦶ. ꦠꦺꦤꦴꦲ ‘‘ꦏꦴꦱꦶꦏꦕꦤ꧀ꦢꦤꦤ꧀ꦠꦶ ꦱꦟ꧀ꦲꦕꦤ꧀ꦢꦤ’’ꦤ꧀ꦠꦶ. ꦮꦟ꧀ꦟꦒꦤ꧀ꦣꦠ꧀ꦡꦴꦪꦴꦠꦶ ꦮꦟ꧀ꦟꦱꦺꦴꦨꦠ꧀ꦡꦚ꧀ꦕꦺꦮ ꦱꦸꦒꦤ꧀ꦣꦨꦴꦮꦠ꧀ꦡꦚ꧀ꦕ. ꦮꦟ꧀ꦟꦒꦤ꧀ꦣꦠ꧀ꦡꦴꦪꦴꦠꦶ ꦖꦮꦶꦫꦴꦒꦏꦫꦟꦠ꧀ꦡꦚ꧀ꦕꦺꦮ ꦱꦸꦒꦤ꧀ꦣꦠ꧀ꦡꦴꦪ ꦕ. ‘‘ꦒꦶꦲꦶꦤꦴ’’ꦠꦶꦄꦴꦢꦷꦲꦶ ꦥꦢꦺꦲꦶ ꦌꦮꦁ ꦥꦩꦴꦢꦮꦶꦲꦴꦫꦶꦤꦴ ꦠꦪꦴ ꦄꦫꦲꦤ꧀ꦠꦺꦴ ꦢꦸꦮꦶꦚ꧀ꦚꦺꦪ꧀ꦪꦴꦠꦶ ꦢꦱ꧀ꦱꦺꦠꦶ.

ꦱꦁꦮꦴꦱꦺꦴ ꦤꦴꦩ ꦆꦣ ꦏꦴꦭꦺꦤ ꦈꦥꦱꦔ꧀ꦏꦩꦤꦤ꧀ꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦈꦥꦱꦔ꧀ꦏꦩꦤ꧀ꦠꦺꦤꦴ’’ꦠꦶ ꦄꦴꦲ. ꦏꦴꦪꦮꦴꦕꦴꦲꦶ ꦄꦱꦁꦪꦠꦺꦤꦥꦶ ꦱꦁꦪꦠꦴꦏꦴꦫꦺꦴ, ꦄꦱꦁꦮꦸꦠꦶꦤ꧀ꦢ꧀ꦫꦶꦪꦺꦤꦥꦶ ꦱꦁꦮꦸꦠꦶꦤ꧀ꦢ꧀ꦫꦶꦪꦴꦏꦴꦫꦺꦴ. ꦥꦫꦶꦒ꧀ꦒꦲꦺꦱ꧀ꦱꦴꦩꦷꦠꦶ ꦮꦷꦩꦁꦱꦶꦱ꧀ꦱꦴꦩꦶ ‘‘ꦥꦫꦶꦱꦸꦢ꧀ꦣꦁ ꦤꦸ ꦑꦺꦴ, ꦤꦺꦴ’’ꦠꦶ. ꦱꦥ꧀ꦥꦚ꧀ꦚꦺꦤꦴꦠꦶ ꦱꦷꦭꦥꦫꦶꦒ꧀ꦒꦟ꧀ꦲꦤꦥꦚ꧀ꦚꦴꦪ ꦱꦥ꧀ꦥꦚ꧀ꦚꦺꦤ. ꦗꦴꦤꦶꦠꦸꦁ ꦤ ꦱꦏ꧀ꦏꦺꦴꦠꦶ ꦱꦨꦴꦮꦱ꧀ꦱ ꦱꦠꦺꦴ ꦱꦷꦭꦱ꧀ꦱ ꦄꦤꦸꦥꦣꦴꦫꦟꦠꦺꦴ.

ꦏꦡꦤꦺꦤꦴꦠꦶ ꦄꦥꦫꦴꦥꦫꦁ ꦏꦡꦤꦺꦤ. ꦠꦡꦴ ꦲꦶ ꦮꦏ꧀ꦑꦠꦶ ‘‘ꦌꦏꦕ꧀ꦕꦱ꧀ꦱ ꦲꦷ’’ꦠꦶꦄꦴꦢꦶ. ꦄꦫꦶꦪꦮꦺꦴꦲꦴꦫꦺꦴꦠꦶ ꦢꦶꦛ꧀ꦜꦴꦢꦶꦭꦏ꧀ꦑꦟꦺꦤ ꦮꦺꦴꦲꦫꦶꦠꦺꦴ ‘‘ꦢꦶꦛ꧀ꦜꦁ ꦄꦢꦶꦛ꧀ꦜ’’ꦤ꧀ꦠꦶꦄꦴꦢꦶꦤꦴ ꦥꦮꦸꦠ꧀ꦠꦱꦢ꧀ꦢꦮꦺꦴꦲꦴꦫꦺꦴ. ꦠꦱ꧀ꦱ ꦥꦤ ꦏꦴꦫꦟꦩꦺꦮ ꦒꦟ꧀ꦲꦤ꧀ꦠꦺꦴ ‘‘ꦌꦠ꧀ꦡ ꦕꦺꦠꦤꦴ’’ꦠꦶ ꦄꦴꦲ. ꦌꦱ ꦤꦪꦺꦴ ꦄꦤꦫꦶꦪꦮꦺꦴꦲꦴꦫꦺꦥꦶ. ꦥꦫꦩꦠ꧀ꦡꦠꦺꦴ ꦲꦶ ꦱꦕ꧀ꦕꦮꦴꦕꦴꦢꦪꦺꦴ ꦩꦸꦱꦴꦮꦴꦢꦴꦢꦪꦺꦴ ꦕꦺꦠꦤꦴꦭꦏ꧀ꦑꦟꦴꦠꦶ. ꦥꦚ꧀ꦚꦠ꧀ꦠꦶꦮꦺꦴꦲꦴꦫꦺꦴ ꦠꦡꦴ ꦠꦡꦴ ꦮꦺꦴꦲꦫꦶꦠꦧ꧀ꦧꦠꦺꦴ ꦌꦮꦩꦴꦲ ‘‘ꦱꦁꦮꦺꦴꦲꦴꦫꦺꦤ ꦑꦺꦴ, ꦩꦲꦴꦫꦴꦗ, ꦱꦺꦴꦕꦺꦪ꧀ꦪꦁ ꦮꦺꦢꦶꦠꦧ꧀ꦧ’’ꦤ꧀ꦠꦶ.

ꦚꦴꦟꦡꦴꦩꦺꦴꦠꦶ ꦚꦴꦟꦒꦸꦟꦧꦭꦁ, ꦪꦺꦤ ꦜꦴꦤꦸꦥ꧀ꦥꦠ꧀ꦠꦶꦏꦥꦛꦶꦨꦴꦤꦴꦢꦶꦤꦴ ꦄꦕ꧀ꦕꦴꦪꦶꦏꦏꦶꦕ꧀ꦕꦏꦫꦟꦷꦪꦴꦤꦶ ꦤꦶꦛ꧀ꦜꦴꦥꦺꦠꦶ. ꦱꦁꦏꦡꦴꦪꦴꦠꦶ ꦄꦠ꧀ꦡꦮꦷꦩꦁꦱꦤꦮꦱꦺꦤ ꦥꦮꦠ꧀ꦠꦴꦪ ꦱꦩ꧀ꦩꦴꦏꦡꦴꦪ. ꦈꦥ꧀ꦥꦶꦭꦮꦠꦶ ꦭꦲꦸꦏꦨꦴꦮꦠꦺꦴ. ꦲꦺꦛ꧀ꦜꦴꦕꦫꦏꦴꦠꦶ ꦄꦮꦕꦫꦏꦴ. ꦪꦺ ꦄꦤꦸꦥꦮꦶꦱꦶꦠ꧀ꦮꦴ ꦥꦫꦺꦱꦁ ꦫꦲꦱ꧀ꦱꦮꦷꦩꦁꦱꦤꦮꦱꦺꦤ ꦥꦮꦠ꧀ꦠꦴ, ꦠꦺꦱꦸ ꦎꦕꦫꦏꦮꦺꦴꦲꦴꦫꦺꦴꦠꦶ ꦮꦸꦠ꧀ꦠꦁ ‘‘ꦕꦫꦴ ꦲꦷ’’ꦠꦶꦄꦴꦢꦶ.

ꦮꦟ꧀ꦟꦱꦟ꧀ꦜꦴꦤꦺꦤꦴꦠꦶ ꦮꦟ꧀ꦟꦺꦤ ꦮꦴ ꦱꦟ꧀ꦜꦴꦤꦺꦤ ꦮꦴ ꦮꦟ꧀ꦟꦥꦺꦴꦏ꧀ꦑꦫꦠꦴꦪ ꦮꦴ ꦱꦟ꧀ꦜꦴꦤꦱꦩ꧀ꦥꦠ꧀ꦠꦶꦪꦴ ꦮꦴ. ꦱꦸꦗꦴꦤꦺꦴ ꦥꦺꦱꦭꦺꦴ ꦮꦶꦱ꧀ꦱꦱꦺꦠꦶ ꦪꦺꦴꦗꦤꦴ. ꦭꦲꦸꦏꦢꦱ꧀ꦱꦤꦺꦤꦴꦠꦶ ꦥꦫꦶꦠ꧀ꦠꦢꦱ꧀ꦱꦤꦺꦤ ꦮꦶꦗ꧀ꦗꦸꦏꦺꦤ ꦮꦶꦪ. ꦥꦫꦶꦏ꧀ꦑꦴꦫꦨꦟ꧀ꦝꦏꦺꦤꦴꦠꦶ ꦥꦧ꧀ꦧꦗꦶꦠꦥꦫꦶꦏ꧀ꦑꦴꦫꦨꦹꦠꦺꦤ ꦨꦟ꧀ꦝꦏꦺꦤ. ꦭꦺꦴꦲꦝ꧀ꦞꦩꦴꦱꦺꦴꦠꦶ ꦭꦺꦴꦲꦩꦪꦺꦴ ꦈꦥꦝ꧀ꦞꦒ꧀ꦓꦤꦏꦩꦴꦱꦺꦴ.

ꦱꦠ꧀ꦠꦗꦛꦶꦭꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.