꧑꧐. ꦱꦔ꧀ꦓꦮꦤ꧀ꦢꦤꦴꦱꦸꦠ꧀ꦠꦮꦟ꧀ꦟꦤꦴ

꧒꧖꧖. ꦥꦹꦠꦶꦩ꧀ꦲꦶ ꦢꦺꦲꦺ ꦩꦴꦠꦸ ꦱꦫꦷꦫꦺ ꦱꦪꦤꦠꦺꦴ, ꦄꦠ꧀ꦠꦤꦺꦴ ꦌꦮ ꦮꦴ ꦥꦹꦠꦶꦢꦺꦲꦁ ꦱꦫꦷꦫꦁ ꦠꦱ꧀ꦩꦶꦁ ꦜꦶꦠꦠꦴꦪ ꦄꦮꦠ꧀ꦡꦫꦶꦠ꧀ꦮꦴ ꦱꦪꦤꦠꦺꦴ ꦥꦹꦠꦶꦢꦺꦲꦱꦪꦴꦠꦶ ꦪꦺꦴꦗꦤꦴ. ꦏꦸꦟꦥꦩ꧀ꦲꦺꦠꦺꦠꦶ ꦌꦠꦺ ꦩꦤꦸꦱ꧀ꦱꦴ ꦄꦱꦸꦕꦶꦢꦸꦒ꧀ꦒꦤ꧀ꦣꦗꦺꦒꦸꦕ꧀ꦖꦥꦛꦶꦏ꧀ꦏꦹꦭꦺ ꦩꦴꦠꦸꦏꦸꦕ꧀ꦖꦶꦱꦔ꧀ꦑꦴꦠꦺ ꦏꦸꦟꦥꦱ꧀ꦩꦶꦁ ꦢꦱ ꦩꦴꦱꦺ ꦤꦶꦩꦸꦒ꧀ꦒꦴ. ꦠꦺꦱꦁ ꦏꦶꦤ꧀ꦤꦴꦩ ꦠ꧀ꦮꦁ ꦥꦶꦲꦪꦱꦷꦠꦶ ꦪꦺꦴꦗꦤꦴ. ꦌꦠꦺꦱꦁ ꦌꦠꦁ ꦮꦶꦲꦪꦴꦩꦷꦠꦶ ꦌꦠꦺꦱꦁ ꦆꦱꦷꦤꦁ ꦌꦠꦁ ꦱꦩ꧀ꦩꦴꦥꦛꦶꦥꦠ꧀ꦠꦶꦁ ꦮꦶꦲꦪꦴꦩꦶ. ꦆꦢꦴꦤꦶ ꦠꦁ ꦥꦛꦶꦥꦠ꧀ꦠꦶꦁ ꦢꦱ꧀ꦱꦺꦠꦸꦁ ‘‘ꦤ ꦠꦺ ꦱꦁ ꦏꦺꦴꦛ꧀ꦜꦺ ꦎꦥꦺꦤ꧀ꦠꦷ’’ꦠꦶ ꦮꦸꦠ꧀ꦠꦁ. ꦣꦚ꧀ꦚꦁ ꦏꦺꦴꦛ꧀ꦜꦺ ꦤ ꦥꦏ꧀ꦑꦶꦥꦤ꧀ꦠꦶ ꦥꦏ꧀ꦑꦶꦥꦶꦠꦧ꧀ꦧꦱ꧀ꦱ ꦕ ꦄꦨꦴꦮꦠꦺꦴ. ꦠꦺꦤꦴꦲ ‘‘ꦤ ꦲꦶ ꦌꦠꦺꦱꦁ ꦣꦚ꧀ꦚ’’ꦤ꧀ꦠꦶ. ꦥꦫꦺꦱꦁ ꦤꦶꦛ꧀ꦜꦶꦠꦤ꧀ꦠꦶ ꦥꦫꦺꦱꦁ ꦒꦲꦶꦠꦁ ꦱꦤ꧀ꦠꦏꦁ ꦠꦺꦱꦁ ꦥꦴꦏꦴꦪ ꦤꦶꦛ꧀ꦜꦶꦠꦁ. ꦨꦶꦏ꧀ꦑꦴꦕꦴꦫꦮꦠ꧀ꦠꦺꦤꦴꦠꦶ ꦥꦶꦟ꧀ꦝꦴꦕꦫꦶꦪꦴꦪ. ꦌꦱꦩꦴꦤꦴ ꦥꦫꦶꦪꦺꦱꦤ꧀ꦠꦴ. ꦌꦮꦁ ꦥꦫꦶꦪꦶꦛ꧀ꦜꦺꦤ. ꦪꦴꦥꦺꦤ꧀ꦠꦶ, ꦤ ꦌꦱꦤ꧀ꦠꦶ ꦄꦤꦺꦱꦤꦁ. ꦱꦸꦱꦩꦴꦢꦶꦤ꧀ꦤꦱꦸꦤ꧀ꦢꦫꦮꦠꦴꦠꦶ ꦱꦸꦛ꧀ꦜꦸ ꦱꦩꦴꦢꦶꦤ꧀ꦤꦱꦺꦴꦨꦤꦮꦠꦴ.

ꦌꦮꦁ ꦱꦸꦨꦴꦱꦶꦠꦨꦴꦱꦶꦤꦺꦴꦠꦶ ꦒꦤ꧀ꦡꦣꦸꦫꦮꦶꦥꦱ꧀ꦱꦤꦴꦣꦸꦫꦴꦤꦁ ꦮꦱꦺꦤ ꦒꦸꦟꦥꦫꦶꦩꦴꦟꦱꦸꦨꦴꦱꦶꦠꦱ꧀ꦱꦺꦮ ꦨꦴꦱꦤꦱꦷꦭꦴ. ꦄꦫꦶꦪꦺꦤ ꦠꦸꦟ꧀ꦲꦷꦨꦹꦠꦺꦤ ꦠꦸꦟ꧀ꦲꦷꦨꦹꦠꦴ. ꦠꦠꦺꦴ ꦌꦮ ꦩꦤꦱ꧀ꦱ ꦱꦴꦠꦶꦱꦪꦁ ꦱꦩꦚ꧀ꦕꦫꦴ. ꦒꦲꦶꦠꦢꦟ꧀ꦝꦺꦱꦸ ꦥꦫꦴꦩꦴꦱꦴꦢꦶꦥꦪꦸꦠ꧀ꦠꦺꦱꦸ ꦢꦟ꧀ꦝꦴꦢꦴꦤꦴꦢꦶꦲꦺꦠꦸ ꦈꦥ꧀ꦥꦗ꧀ꦗꦤꦏꦏꦶꦭꦺꦱꦥꦫꦶꦭ꦳ꦴꦲꦴꦨꦴꦮꦠꦺꦴ ꦤꦶꦧ꧀ꦧꦸꦠꦴ. ꦠꦺꦤꦴꦲ ‘‘ꦮꦶꦱ꧀ꦱꦛ꧀ꦜꦢꦟ꧀ꦝꦴ’’ꦠꦶ. ꦱꦴꦢꦴꦤꦺꦱꦹꦠꦶ ꦱꦨꦮꦴꦢꦴꦤꦺꦱꦸ. ꦄꦤꦴꦢꦴꦤꦴꦠꦶ ꦠꦧ꧀ꦧꦶꦫꦲꦶꦠꦴ. ꦠꦺꦤꦴꦲ ‘‘ꦨꦮꦪꦺꦴꦤꦷ’’ꦠꦶꦄꦴꦢꦶ.

ꦱꦔ꧀ꦓꦮꦤ꧀ꦢꦤꦴꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦢꦸꦠꦶꦪꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.