꧘. ꦖꦺꦠ꧀ꦮꦴꦮꦒ꧀ꦒꦺꦴ

꧑. ꦖꦺꦠ꧀ꦮꦴꦱꦸꦠ꧀ꦠꦮꦟ꧀ꦟꦤꦴ

꧗꧑. ꦮꦣꦶꦠ꧀ꦮꦴꦠꦶ ꦲꦤ꧀ꦠ꧀ꦮꦴ ꦮꦶꦤꦴꦱꦺꦠ꧀ꦮꦴ. ꦄꦥꦫꦶꦢꦪ꧀ꦲꦩꦴꦤꦠ꧀ꦠꦴꦠꦶ ꦄꦥꦷꦭ꦳ꦶꦪꦩꦴꦤꦠ꧀ꦠꦴ. ꦮꦶꦤꦛ꧀ꦜꦢꦺꦴꦩꦤꦱ꧀ꦱꦠ꧀ꦠꦴ ꦤ ꦱꦺꦴꦕꦠꦶ ꦕꦺꦠꦺꦴꦢꦸꦏ꧀ꦑꦢꦸꦏ꧀ꦑꦴꦨꦴꦮꦠꦺꦴ. ꦮꦶꦱꦁ ꦤꦴꦩ ꦢꦸꦏ꧀ꦑꦁ ꦄꦤꦶꦛ꧀ꦜꦨꦴꦮꦠꦺꦴ, ꦠꦱ꧀ꦱ ꦩꦹꦭꦏꦴꦫꦟꦁ ꦏꦺꦴꦣꦺꦴ ꦄꦤꦶꦛ꧀ꦜꦦꦭꦠ꧀ꦠꦴꦠꦶ ꦄꦴꦲ ‘‘ꦮꦶꦱꦩꦹꦭꦱ꧀ꦱꦴꦠꦶ ꦢꦸꦏ꧀ꦑꦮꦶꦥꦴꦏꦱ꧀ꦱꦴ’’ꦠꦶ. ꦄꦏ꧀ꦏꦸꦛ꧀ꦜꦱ꧀ꦱꦴꦠꦶ ꦄꦏ꧀ꦏꦺꦴꦱꦴꦥꦫꦴꦣꦱ꧀ꦱ. ꦄꦏ꧀ꦏꦺꦴꦱꦥꦲꦴꦫꦠ꧀ꦡꦱꦩ꧀ꦧꦤ꧀ꦣꦺꦤ ꦲꦶ ‘‘ꦏꦸꦢ꧀ꦣꦱ꧀ꦱꦴ’’ꦠꦶ ꦈꦥꦪꦺꦴꦒꦠ꧀ꦡꦺ ꦱꦩ꧀ꦥꦢꦴꦤꦮꦕꦤꦁ. ꦱꦸꦑꦁ ꦈꦥ꧀ꦥꦗ꧀ꦗꦠꦶ ꦏꦺꦴꦣꦁ ꦤꦱ꧀ꦱꦠꦶ. ꦱꦸꦑꦸꦥ꧀ꦥꦠ꧀ꦠꦶꦁ ꦱꦤ꧀ꦣꦴꦪ ꦌꦱ ꦏꦺꦴꦣꦺꦴ ‘‘ꦩꦣꦸꦫꦒ꧀ꦒꦺꦴ’’ꦠꦶ ꦮꦸꦠ꧀ꦠꦺꦴ, ꦱꦸꦑꦴꦮꦱꦴꦤꦺꦴꦠꦶ ꦄꦠ꧀ꦡꦺꦴ.

ꦖꦺꦠ꧀ꦮꦴꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧒. ꦫꦡꦱꦸꦠ꧀ꦠꦮꦟ꧀ꦟꦤꦴ

꧗꧒. ꦥꦚ꧀ꦚꦴꦟꦤ꧀ꦠꦶ ꦭꦏ꧀ꦑꦟꦁ ꦱꦭ꧀ꦭꦏ꧀ꦑꦟꦹꦥꦴꦪꦺꦴ. ꦢꦶꦱ꧀ꦮꦴꦠꦶ ꦢꦱ꧀ꦱꦤꦲꦺꦠꦸ. ‘‘ꦕꦺꦴꦭ꦳ꦫꦚ꧀ꦚꦺꦴ ꦫꦛ꧀ꦜꦁ ꦕꦺꦴꦭ꦳ꦫꦛ꧀ꦜ’’ꦤ꧀ꦠꦶ ꦌꦮꦁ ꦫꦛ꧀ꦜꦁ ꦫꦚ꧀ꦚꦴ ꦥꦚ꧀ꦚꦴꦪꦠꦶ.

ꦫꦡꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧓. ꦮꦶꦠ꧀ꦠꦱꦸꦠ꧀ꦠꦮꦟ꧀ꦟꦤꦴ

꧗꧓. ꦱꦢ꧀ꦣꦴꦪꦴꦠꦶ ꦱꦢ꧀ꦣꦴꦲꦺꦠꦸ. ꦏꦸꦭꦱꦩ꧀ꦥꦢꦴꦠꦶ ꦑꦠ꧀ꦠꦶꦪꦴꦢꦶꦱꦩ꧀ꦥꦠ꧀ꦠꦶꦪꦺꦴ. ꦱꦧ꧀ꦧꦭꦺꦴꦏꦶꦪꦭꦺꦴꦏꦸꦠ꧀ꦠꦫꦮꦶꦠ꧀ꦠꦥꦛꦶꦭꦴꦨꦲꦺꦠꦸꦠꦺꦴ ꦱꦢ꧀ꦣꦴꦮꦶꦠ꧀ꦠꦩꦺꦮ. ꦲꦺꦛ꧀ꦜꦴ ꦠꦶꦟ꧀ꦟꦁ ꦢ꧀ꦮꦴꦫꦴꦤꦁ ꦮꦱꦺꦤ ꦈꦥ꧀ꦥꦤ꧀ꦤꦏꦱ꧀ꦱ ꦱꦧ꧀ꦧꦱ꧀ꦱꦥꦶ ꦄꦤꦮꦗ꧀ꦗꦣꦩ꧀ꦩꦱ꧀ꦱ ꦱꦔ꧀ꦒꦟ꧀ꦲꦤꦠꦺꦴ ‘‘ꦣꦩ꧀ꦩꦺꦴꦠꦶ ꦢꦱꦏꦸꦱꦭꦏꦩ꧀ꦩꦥꦡꦺꦴ’’ꦠꦶ ꦮꦸꦠ꧀ꦠꦁ. ꦄꦱꦁꦏꦶꦭꦶꦛ꧀ꦜꦱꦸꦑꦤ꧀ꦠꦶ. ꦤꦶꦫꦴꦩꦶꦱꦁ ꦱꦸꦑꦁ. ꦠꦩꦺꦮ ꦱꦴꦩꦶꦱꦁ ꦈꦥꦤꦶꦣꦴꦪ ꦱꦩ꧀ꦨꦴꦮꦺꦤ꧀ꦠꦺꦴ ꦄꦴꦲ ‘‘ꦄꦱꦁꦏꦶꦭꦶꦛ꧀ꦜ’’ꦤ꧀ꦠꦶ. ꦄꦱꦺꦕꦤꦏꦨꦴꦮꦺꦤ ꦄꦨꦶꦫꦸꦕꦶꦗꦤꦤꦠꦺꦴ ꦥꦶꦪꦴꦏꦶꦕ꧀ꦖꦏꦫꦟꦠꦺꦴ ꦧꦲꦸꦁ ꦱꦸꦕꦶꦫꦩ꧀ꦥꦶ ꦏꦴꦭꦁ ꦄꦴꦱꦺꦮꦤ꧀ꦠꦱ꧀ꦱ ꦄꦢꦺꦴꦱꦴꦮꦲꦠꦺꦴ ꦱꦕ꧀ꦕꦩꦺꦮ ꦩꦣꦸꦫꦠꦫꦁ. ꦤ ꦲꦶ ꦠꦁ ꦥꦶꦮꦶꦠꦧ꧀ꦧꦠꦺꦴ ꦱꦴꦢꦶꦠꦧ꧀ꦧꦠꦺꦴ ꦄꦤꦸꦨꦮꦶꦠꦧ꧀ꦧꦠꦺꦴ ꦫꦱꦺꦴꦠꦶ ꦮꦠ꧀ꦠꦧ꧀ꦧꦠꦁ ꦄꦫꦲꦠꦶ. ꦆꦢꦴꦤꦶ ꦠꦱ꧀ꦱ ꦏꦶꦕ꧀ꦕꦱꦩ꧀ꦥꦠ꧀ꦠꦶꦄꦠ꧀ꦡꦺꦲꦶꦥꦶ ꦩꦲꦴꦫꦲꦠꦁ ꦢꦱ꧀ꦱꦺꦠꦸꦁ ‘‘ꦱꦕ꧀ꦕꦱ꧀ꦩꦶꦁ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦤꦢꦷꦤꦶꦮꦠ꧀ꦠꦤꦁ ꦩꦲꦴꦏꦥ꧀ꦥꦶꦤꦮꦠ꧀ꦡꦸꦄꦴꦢꦷꦲꦶ (ꦣ. ꦥ. ꦄꦛ꧀ꦜ. ꧑.ꦩꦲꦴꦏꦥ꧀ꦥꦶꦤꦠ꧀ꦡꦺꦫꦮꦠ꧀ꦡꦸ; ꦄ. ꦤꦶ. ꦄꦛ꧀ꦜ. ꧑.꧑.꧒꧓꧑; ꦡꦺꦫꦒꦴ. ꦄꦛ꧀ꦜ. ꧒.ꦩꦲꦴꦏꦥ꧀ꦥꦶꦤꦠ꧀ꦡꦺꦫꦒꦴꦡꦴꦮꦟ꧀ꦟꦤꦴ) ꦢꦷꦥꦺꦠꦧ꧀ꦧꦁ, ꦆꦠꦫꦴꦤꦶ ꦏꦟ꧀ꦲꦢꦷꦥꦴꦪꦤꦗꦴꦠꦏ- (ꦗꦴ. ꧑.꧑꧐.꧖꧒ ꦄꦴꦢꦪꦺꦴ) ꦱꦸꦠꦱꦺꦴꦩ- (ꦗꦴ. ꧒.꧒꧑.꧓꧗꧑ ꦄꦴꦢꦪꦺꦴ) ꦩꦕ꧀ꦖꦗꦴꦠꦏꦺꦲꦶ (ꦗꦴ. ꧑.꧑.꧓꧔, ꧗꧕; ꧑.꧒.꧑꧓꧑ ꦄꦴꦢꦪꦺꦴ) ꦢꦷꦥꦺꦠꦧ꧀ꦧꦴꦤꦶ. ꦤꦶꦩ꧀ꦩꦢ꧀ꦢꦺꦤ꧀ꦠꦶ ꦄꦨꦶꦨꦮꦤ꧀ꦠꦶ. ꦩꦣꦸꦫꦠꦫꦤ꧀ꦠꦶ ꦱꦸꦤ꧀ꦢꦫꦠꦫꦁ ꦱꦺꦛ꧀ꦜꦺꦱꦹꦠꦶ ꦄꦠ꧀ꦡꦺꦴ. ꦥꦚ꧀ꦚꦴꦗꦷꦮꦷꦠꦶ ꦥꦚ꧀ꦚꦴꦪ ꦗꦷꦮꦤꦱꦷꦭꦺꦴꦠꦶ ꦥꦚ꧀ꦚꦴꦗꦷꦮꦷ, ꦥꦚ꧀ꦚꦴꦥꦸꦧ꧀ꦧꦔ꧀ꦒꦩꦕꦫꦶꦪꦺꦴꦠꦶ ꦄꦠ꧀ꦡꦺꦴ. ꦥꦚ꧀ꦚꦴꦗꦷꦮꦷꦠꦶ ꦕ ꦥꦚ꧀ꦚꦴꦮꦱꦺꦤ ꦆꦫꦶꦪꦠꦶ ꦮꦠ꧀ꦠꦠꦶ ꦗꦷꦮꦶꦠꦁ ꦥꦮꦠ꧀ꦠꦺꦠꦷꦠꦶ ꦄꦠ꧀ꦡꦺꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦪꦺꦴ ꦥꦚ꧀ꦚꦴꦗꦷꦮꦷ’’ꦠꦶꦄꦴꦢꦶꦩꦴꦲ. ‘‘ꦗꦷꦮꦠ’’ꦤ꧀ꦠꦶ ꦏꦺꦕꦶ ꦥꦜꦤ꧀ꦠꦶ, ꦗꦷꦮꦤ꧀ꦠꦴꦤꦁ ꦥꦚ꧀ꦚꦴꦗꦷꦮꦶꦁ ꦱꦺꦛ꧀ꦜꦩꦴꦲꦹꦠꦶ ꦄꦠ꧀ꦡꦺꦴ.

ꦮꦶꦠ꧀ꦠꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧔. ꦮꦸꦛ꧀ꦜꦶꦱꦸꦠ꧀ꦠꦮꦟ꧀ꦟꦤꦴ

꧗꧔. ꦈꦥ꧀ꦥꦠꦤ꧀ꦠꦴꦤꦤ꧀ꦠꦶ ꦥꦡꦮꦶꦁ ꦨꦶꦤ꧀ꦢꦶꦠ꧀ꦮꦴ ꦈꦛ꧀ꦜꦲꦤ꧀ꦠꦴꦤꦁ. ‘‘ꦱꦺꦛ꧀ꦜ’’ꦤ꧀ꦠꦶ ꦮꦸꦕ꧀ꦕꦩꦴꦤꦠ꧀ꦠꦴ ‘‘ꦱꦠ꧀ꦠꦮꦶꦣ’’ꦤ꧀ꦠꦶ ꦮꦸꦠ꧀ꦠꦁ, ꦆꦠꦫꦺꦱꦁ ꦮꦴ ꦠꦢꦤꦸꦭꦺꦴꦩꦠꦺꦴ. ꦑꦺꦩꦺꦴ ꦲꦺꦴꦠꦶ ꦢꦸꦧ꧀ꦨꦶꦏ꧀ꦑꦸꦥꦢ꧀ꦢꦮꦴꦨꦴꦮꦠꦺꦴ. ꦠꦺꦤꦴꦲ ‘‘ꦱꦸꦨꦶꦏ꧀ꦑꦺꦴ’’ꦠꦶ. ꦤꦶꦥꦠꦤ꧀ꦠꦴꦤꦤ꧀ꦠꦶ ꦄꦣꦺꦴꦩꦸꦑꦁ ꦥꦮꦠ꧀ꦠꦤ꧀ꦠꦴꦤꦁ. ꦥꦮꦗꦩꦴꦤꦴꦤꦤ꧀ꦠꦶ ꦮꦗꦤꦱꦷꦭꦴꦤꦁ. ꦠꦺ ꦥꦤ ꦪꦱ꧀ꦩꦴ ꦗꦔ꧀ꦒꦩꦴ ꦤꦴꦩ ꦲꦺꦴꦤ꧀ꦠꦶ, ꦤ ꦫꦸꦏ꧀ꦑꦴꦢꦪꦺꦴ ꦮꦶꦪ ꦡꦴꦮꦫꦴ, ꦠꦱ꧀ꦩꦴ ꦄꦴꦲ ‘‘ꦗꦔ꧀ꦒꦩꦴꦤ’’ꦤ꧀ꦠꦶ. ꦒꦴꦮꦺꦴꦠꦶ ꦣꦺꦤꦸꦪꦺꦴ. ꦠꦺꦤ ꦩꦲꦶꦁꦱꦴꦢꦶꦏꦴꦤꦩ꧀ꦥꦶ ꦱꦔ꧀ꦒꦲꦺꦴ ꦢꦛ꧀ꦜꦧ꧀ꦧꦺꦴ. ꦮꦢꦤ꧀ꦠꦴꦤꦤ꧀ꦠꦶ ꦈꦥ꧀ꦥꦤ꧀ꦤꦁ ꦄꦠ꧀ꦡꦁ ꦮꦢꦤ꧀ꦠꦴꦤꦁ.

ꦄꦠ꧀ꦠꦤꦺꦴ ꦑꦤ꧀ꦠꦶꦪꦴꦠꦶ ꦄꦠ꧀ꦠꦤꦺꦴ ꦑꦤ꧀ꦠꦶꦪꦴ ꦫꦸꦕꦶꦪꦴ ꦒꦲꦶꦠꦨꦴꦮꦺꦤ. ꦆꦠꦫꦴ ꦢꦺꦮꦠꦴ ꦠꦱ꧀ꦱꦴ ꦮꦶꦱ꧀ꦱꦗ꧀ꦗꦤꦺ ꦄꦥꦫꦶꦠꦸꦱ꧀ꦱꦩꦴꦤꦴ ꦄꦴꦲ. ꦪꦴꦮ ꦥꦣꦁꦱꦷꦠꦶ ꦒꦸꦟꦣꦁꦱꦷ ꦱꦠ꧀ꦡꦸꦢꦺꦱꦤꦴꦪ ꦭꦢ꧀ꦣꦧ꧀ꦧꦒꦸꦟꦤꦴꦱꦤꦠꦺꦴ. ꦥꦒꦧ꧀ꦧꦴꦠꦶ ꦥꦴꦒꦧ꧀ꦧꦶꦪꦺꦤ ꦱꦩꦤ꧀ꦤꦴꦒꦠꦴ, ꦪꦡꦴ ꦮꦕꦷꦥꦴꦒꦧ꧀ꦧꦶꦪꦺꦤ ꦄꦑꦫꦴ, ꦠꦡꦴ ꦮꦴꦕꦴꦪ ꦨꦮꦶꦠꦧ꧀ꦧꦁ. ꦩꦸꦑꦫꦴꦠꦶ ꦩꦸꦑꦑꦫꦴ. ꦢꦱꦧꦭꦁ ꦥꦸꦕ꧀ꦖꦶ ꦱꦟ꧀ꦲꦁ ꦱꦸꦑꦸꦩꦁ ꦫꦠꦤꦠ꧀ꦠꦪꦱꦁꦲꦶꦠꦁ ꦄꦠ꧀ꦡꦁ ꦱꦺꦴꦠꦸꦏꦴꦩꦴ. ꦄꦱ꧀ꦱꦴ ꦢꦺꦮꦠꦴꦪ ꦮꦶꦱ꧀ꦱꦗ꧀ꦗꦺꦤ꧀ꦠꦺꦴ ꦄꦗ꧀ꦙꦴꦱꦪꦴꦤꦸꦫꦹꦥꦁ. ꦈꦥ꧀ꦥꦠꦩꦴꦤꦴꦠꦶ ꦈꦥ꧀ꦥꦠꦤ꧀ꦠꦷ ꦱꦩꦸꦒ꧀ꦓꦴꦛꦺꦠꦶ ꦎꦣꦶꦱꦺꦴ. ꦮꦛ꧀ꦛꦩꦹꦭꦏꦩꦲꦴꦄꦮꦶꦗ꧀ꦗꦴꦠꦶ ꦠꦱ꧀ꦱꦴ ꦄꦴꦢꦷꦤꦮꦢꦱ꧀ꦱꦤꦠ꧀ꦡꦁ ꦨꦹꦠꦏꦡꦤꦮꦶꦱꦺꦱꦤꦁ. ꦎꦱꦷꦢꦤ꧀ꦠꦴꦤꦤ꧀ꦠꦶ ꦥꦛꦶꦥꦏ꧀ꦑꦮꦱꦺꦤ ꦄꦣꦺꦴ ꦱꦷꦢꦤ꧀ꦠꦴꦤꦁ, ꦈꦱ꧀ꦱꦴꦢꦪꦩꦴꦤꦴꦤꦤ꧀ꦠꦶ ꦄꦠ꧀ꦡꦺꦴ. ꦥꦸꦚ꧀ꦚꦏ꧀ꦑꦺꦠ꧀ꦠꦨꦹꦠꦺꦴꦠꦶ ꦆꦢꦁ ‘‘ꦥꦢꦱꦴ ꦕꦫꦩꦴꦤꦴꦤ’’ꦤ꧀ꦠꦶ ꦥꦢꦱ꧀ꦱ ꦄꦠ꧀ꦡꦮꦶꦮꦫꦟꦮꦱꦺꦤ ꦨꦹꦠꦏꦡꦤꦮꦶꦱꦺꦱꦤꦁ. ꦪꦴꦢꦶꦱꦺꦴ ꦥꦸꦠ꧀ꦠꦺꦴ ꦮꦴ ꦲꦺꦴꦠꦹꦠꦶ ꦆꦢꦁ ꦥꦸꦫꦶꦩꦥꦢꦺ ꦢꦺꦮꦠꦴꦪ ꦥꦸꦠ꧀ꦠꦒꦲꦟꦱ꧀ꦱ ꦏꦠꦠ꧀ꦠꦴ ꦮꦸꦠ꧀ꦠꦁ.

ꦮꦸꦛ꧀ꦜꦶꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧕. ꦨꦷꦠꦴꦱꦸꦠ꧀ꦠꦮꦟ꧀ꦟꦤꦴ

꧗꧕. ꦏꦶꦁ ꦱꦹꦣ ꦨꦷꦠꦴꦠꦶ ꦌꦠ꧀ꦡ ꦱꦸ-ꦆꦣꦴꦠꦶ ꦤꦶꦥꦴꦠꦩꦠ꧀ꦠꦤ꧀ꦠꦶ ꦄꦴꦲ ‘‘ꦏꦶꦁ ꦨꦷꦠꦴ’’ꦠꦶ? ꦩꦒ꧀ꦒꦺꦴ ꦕ ꦤꦺꦏꦴꦪꦠꦤꦥ꧀ꦥꦮꦸꦠ꧀ꦠꦺꦴꦠꦶ ꦄꦤꦺꦏꦏꦴꦫꦟꦁ ꦤꦴꦤꦴꦮꦶꦣꦴꦣꦶꦒꦩꦺꦴꦏꦴꦱꦁ ꦏꦠ꧀ꦮꦴ ꦥꦮꦸꦠ꧀ꦠꦺꦴ ꦏꦡꦶꦠꦺꦴ. ꦠꦺꦤꦴꦲ ‘‘ꦄꦛ꧀ꦜꦠꦶꦁꦱꦴꦫꦩ꧀ꦩꦟꦮꦱꦺꦤꦴ’’ꦠꦶꦄꦴꦢꦶ. ꦌꦮꦁ ꦱꦤ꧀ꦠꦺꦠꦶ ꦌꦮꦁ ꦱꦧ꧀ꦧꦱꦴꦣꦴꦫꦟꦴꦤꦺꦏꦴꦪꦠꦤꦺꦲꦶ ꦤꦶꦧ꧀ꦧꦴꦤꦒꦴꦩꦶꦩꦒ꧀ꦒꦱ꧀ꦱ ꦠꦸꦩ꧀ꦲꦺꦲꦶ ꦥꦮꦺꦢꦶꦠꦠ꧀ꦠꦴ ꦭꦧ꧀ꦨꦩꦴꦤꦺ ꦑꦺꦩꦺ ꦩꦒ꧀ꦒꦺ ꦏꦶꦁ ꦨꦷꦠꦴꦪꦁ ꦗꦤꦠꦴ ꦈꦥ꧀ꦥꦡꦨꦹꦠꦴ ꦮꦶꦥꦫꦷꦠꦢꦶꦛ꧀ꦜꦶꦠꦺꦴ ꦒꦟ꧀ꦲꦷꦠꦶ ꦄꦠ꧀ꦡꦺꦴ? ꦌꦮꦁ ꦢꦺꦮꦠꦴ ꦪꦡꦶꦕ꧀ꦖꦴꦪ ꦥꦸꦫꦶꦩꦢ꧀ꦣꦺꦤ ꦄꦠ꧀ꦠꦤꦴ ꦪꦡꦴꦕꦶꦤ꧀ꦠꦶꦠꦩꦠ꧀ꦡꦁ ꦱꦠ꧀ꦡꦸ ꦥꦮꦺꦢꦶꦠꦴ, ꦥꦕ꧀ꦖꦶꦩꦢ꧀ꦣꦺꦤ ꦄꦠ꧀ꦠꦤꦺꦴ ꦱꦁꦱꦪꦁ ꦥꦸꦕ꧀ꦖꦠꦶ. ꦧꦲꦸꦥꦚ꧀ꦚꦴꦠꦶ ꦥꦸꦡꦸꦥꦚ꧀ꦚ. ꦈꦱ꧀ꦱꦤ꧀ꦤꦥꦚ꧀ꦚꦴꦠꦶ ꦄꦣꦶꦏꦥꦚ꧀ꦚꦴ. ꦜꦥꦺꦠ꧀ꦮꦴꦠꦶ ꦱꦁꦪꦩꦺꦠ꧀ꦮꦴ. ꦱꦁꦮꦶꦨꦴꦒꦷꦠꦶ ꦄꦴꦲꦴꦫꦥꦫꦶꦨꦺꦴꦒꦺ ꦱꦩ꧀ꦩꦢꦺꦮ ꦮꦶꦨꦗꦤꦱꦷꦭꦺꦴ. ꦠꦺꦤꦴꦲ ‘‘ꦄꦕ꧀ꦖꦫꦴꦪꦴ’’ꦠꦶꦄꦴꦢꦶ. ꦮꦸꦠ꧀ꦠꦠ꧀ꦡꦩꦺꦮ ꦲꦺꦛ꧀ꦜꦴ.

ꦩꦤꦺꦤꦴꦠꦶ ꦩꦤꦺꦴꦒꦲꦟꦺꦤ. ꦥꦸꦧ꧀ꦧꦱꦸꦢ꧀ꦣꦶꦄꦔ꧀ꦒꦤ꧀ꦠꦶ ꦥꦸꦧ꧀ꦧꦨꦴꦒꦱꦸꦢ꧀ꦣꦶꦨꦹꦠꦁ ꦄꦔ꧀ꦒꦁ. ꦕꦠꦹꦱꦹꦠꦶ ꦮꦸꦠ꧀ꦠꦄꦔ꧀ꦒꦥꦫꦶꦪꦴꦥꦤ꧀ꦤꦁ. ꦪꦚ꧀ꦚꦈꦥꦏ꧀ꦑꦫꦺꦴꦠꦶ ꦢꦴꦤꦱ꧀ꦱ ꦱꦴꦣꦤꦁ. ꦌꦠꦺꦱꦸ ꦣꦩ꧀ꦩꦺꦱꦹꦠꦶ ꦌꦠꦺꦱꦸ ꦱꦢ꧀ꦣꦴꦢꦶꦒꦸꦟꦺꦱꦸ. ꦪꦡꦴ ꦲꦶ ꦱꦢ꧀ꦣꦺꦴ ꦥꦕ꧀ꦕꦪꦁ ꦥꦕ꧀ꦕꦸꦥꦛ꧀ꦜꦥꦺꦠ꧀ꦮꦴ ꦮꦠ꧀ꦡꦸꦥꦫꦶꦕ꧀ꦕꦴꦒꦱ꧀ꦱ ꦮꦶꦱꦺꦱꦥꦕ꧀ꦕꦪꦺꦴ ꦏꦩ꧀ꦩꦦꦭꦱ꧀ꦱ ꦥꦫꦭꦺꦴꦏꦱ꧀ꦱ ꦕ ꦥꦕ꧀ꦕꦏ꧀ꦑꦠꦺꦴ ꦮꦶꦪ ꦥꦠ꧀ꦠꦶꦪꦴꦪꦤꦠꦺꦴ, ꦌꦮꦁ ꦩꦸꦢꦸꦲꦢꦪꦺꦴ. ꦩꦸꦢꦸꦲꦢꦪꦺꦴ ꦲꦶ ꦄꦤꦸꦢꦪꦁ ꦥꦠ꧀ꦮꦴ ꦪꦁ ꦏꦶꦚ꧀ꦕꦶ ꦄꦠ꧀ꦠꦤꦺꦴ ꦱꦤ꧀ꦠꦏꦁ ꦥꦫꦺꦱꦁ ꦢꦺꦠꦶ. ꦪꦺꦴ ꦕ ꦱꦁꦮꦶꦨꦴꦒꦱꦷꦭꦺꦴ, ꦱꦺꦴ ꦄꦥ꧀ꦥꦏꦱ꧀ꦩꦶꦩ꧀ꦥꦶ ꦄꦠ꧀ꦠꦤꦺꦴ ꦱꦤ꧀ꦠꦏꦺ ꦥꦫꦺꦲꦶ ꦱꦴꦣꦴꦫꦟꦨꦺꦴꦒꦷ ꦲꦺꦴꦠꦶ. ꦮꦢꦚ꧀ꦚꦹ ꦮꦢꦴꦤꦶꦪꦠꦴꦪ ꦪꦴꦒꦶꦤꦺꦴꦮ ꦪꦸꦠ꧀ꦠꦁ ꦪꦸꦠ꧀ꦠꦏꦴꦭꦁ ꦚꦠ꧀ꦮꦴ ꦄꦠ꧀ꦡꦶꦏꦴꦤꦁ ꦩꦤꦺꦴꦫꦡꦁ ꦥꦹꦫꦺꦠꦷꦠꦶ ꦮꦸꦠ꧀ꦠꦁ ‘‘ꦆꦠꦶ…ꦥꦺ… ꦕꦠꦹꦱꦹꦠꦶ ꦄꦴꦲꦴ’’ꦠꦶ.

ꦮꦴꦕꦤ꧀ꦠꦶꦄꦴꦢꦷꦤꦶ ꦠꦷꦟꦶ ꦄꦔ꧀ꦒꦴꦤꦶ ꦠꦶꦮꦶꦣꦱꦷꦭꦱꦩ꧀ꦥꦠ꧀ꦠꦶꦢꦷꦥꦤꦠꦺꦴ. ꦱꦩ꧀ꦥꦤ꧀ꦤꦱꦷꦭꦺꦴ ꦲꦶ ꦥꦫꦭꦺꦴꦏꦁ ꦤ ꦨꦴꦱꦺꦪ꧀ꦪ. ꦱꦢ꧀ꦣꦺꦴ ꦌꦏꦁ ꦄꦔ꧀ꦒꦁ ꦥꦪꦺꦴꦒꦴꦱꦪꦱꦸꦢ꧀ꦣꦶꦢꦷꦥꦤꦠꦺꦴ. ꦱꦸꦢ꧀ꦣꦴꦱꦪꦱ꧀ꦱ ꦱꦩ꧀ꦩꦴꦥꦪꦺꦴꦒꦺ ꦜꦶꦠꦱ꧀ꦱ ꦏꦡꦁ ꦥꦫꦭꦺꦴꦏꦠꦺꦴ ꦨꦪꦤ꧀ꦠꦶ. ꦢꦸꦏꦮꦱꦺꦤ ꦕꦠꦸꦫꦔ꧀ꦒꦪꦺꦴꦗꦤꦴ ꦢꦸꦏꦤꦪꦺꦴ. ꦌꦠꦺꦱꦸ ꦕꦠꦹꦱꦸ ꦣꦩ꧀ꦩꦺꦱꦸ ꦜꦶꦠꦺꦴꦠꦶ ꦌꦠꦺꦱꦸ ꦪꦡꦴꦮꦸꦠ꧀ꦠꦢꦸꦏꦱꦔ꧀ꦒꦲꦺꦱꦸ ꦕꦠꦹꦱꦸ ꦒꦸꦟꦺꦱꦸ ꦥꦠꦶꦛ꧀ꦜꦶꦠꦺꦴ.

ꦨꦷꦠꦴꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧖. ꦤꦗꦷꦫꦠꦶꦱꦸꦠ꧀ꦠꦮꦟ꧀ꦟꦤꦴ

꧗꧖. ꦤꦴꦩꦒꦺꦴꦠ꧀ꦠꦤ꧀ꦠꦶ ꦠꦶꦱ꧀ꦱꦺꦴ ꦏꦱ꧀ꦱꦥꦺꦴ ꦒꦺꦴꦠꦩꦺꦴꦠꦶ ꦌꦮꦫꦹꦥꦁ ꦤꦴꦩꦚ꧀ꦕ ꦒꦺꦴꦠ꧀ꦠꦚ꧀ꦕ. ꦤꦶꦢꦱ꧀ꦱꦤꦩꦠ꧀ꦠꦩꦺꦠꦁ, ꦠꦱ꧀ꦩꦴ ꦱꦧ꧀ꦧꦱ꧀ꦱ ꦥꦚ꧀ꦚꦠ꧀ꦠꦶꦪꦴ ꦭꦏ꧀ꦑꦟꦮꦕꦤꦤ꧀ꦠꦶ ꦢꦛ꧀ꦜꦧ꧀ꦧꦁ. ꦤ ꦗꦷꦫꦠꦷꦠꦶ ꦄꦱꦨꦴꦮꦣꦩ꧀ꦩꦠ꧀ꦠꦴ ꦈꦥ꧀ꦥꦴꦢꦮꦪꦴꦨꦴꦮꦠꦺꦴ ꦗꦫꦁ ꦤ ꦥꦴꦥꦸꦟꦴꦠꦶ. ꦠꦺꦤꦴꦲ ‘‘ꦗꦷꦫꦟꦱꦨꦴꦮꦺꦴ ꦤ ꦲꦺꦴꦠꦷ’’ꦠꦶ. ꦪꦱ꧀ꦩꦴ ꦱꦩꦚ꧀ꦚꦴꦨꦴꦮꦠꦺꦴ ꦏꦴꦭꦤ꧀ꦠꦫꦺꦥꦶ ꦠꦁ ꦱꦩꦚ꧀ꦚꦴꦪꦠꦺꦮ, ꦠꦱ꧀ꦩꦴ ‘‘ꦄꦠꦷꦠꦧꦸꦢ꧀ꦣꦴꦤꦁ…ꦥꦺ… ꦤ ꦗꦷꦫꦠꦷꦠꦶ ꦮꦸꦕ꧀ꦕꦠꦷ’’ꦠꦶ ꦄꦴꦲ.

ꦄꦴꦭꦱꦶꦪꦤ꧀ꦠꦶ ꦄꦭꦱꦨꦴꦮꦺꦴ ꦢꦭ꦳꧀ꦲꦏꦺꦴꦱꦗ꧀ꦗꦁ. ꦠꦺꦤꦴꦲ ‘‘ꦪꦺꦤꦴ’’ꦠꦶꦄꦴꦢꦶ. ꦜꦶꦠꦶꦤ꧀ꦠꦶ ꦧ꧀ꦪꦴꦥꦴꦫꦁ. ꦤꦶꦢ꧀ꦢꦴꦮꦱꦺꦤ ꦥꦩꦗ꧀ꦗꦤꦁ ꦏꦠ꧀ꦠꦧ꧀ꦧꦱ꧀ꦱ ꦄꦏꦫꦟꦁ. ꦏꦶꦭꦺꦱꦮꦱꦺꦤ ꦥꦩꦗ꧀ꦗꦤꦁ ꦄꦏꦠ꧀ꦠꦧ꧀ꦧꦱ꧀ꦱ ꦏꦫꦟꦩ꧀ꦥꦶ. ꦏꦩ꧀ꦩꦱꦩꦪꦺꦠꦶ ꦏꦩ꧀ꦩꦁ ꦏꦴꦠꦸꦁ ꦪꦸꦠ꧀ꦠꦏꦴꦭꦺ. ꦏꦩ꧀ꦩꦏꦫꦟꦮꦷꦫꦶꦪꦴꦨꦴꦮꦺꦴꦠꦶ ꦠꦁꦏꦩ꧀ꦩꦏꦶꦫꦶꦪꦱꦩꦸꦛ꧀ꦜꦴꦥꦏꦮꦷꦫꦶꦪꦴꦨꦴꦮꦺꦴ. ꦱꦺꦴ ꦥꦤ ꦄꦠ꧀ꦡꦠꦺꦴ ꦮꦷꦫꦶꦪꦥꦛꦶꦥꦏ꧀ꦑꦺꦴ ꦄꦏꦸꦱꦭꦕꦶꦠ꧀ꦠꦸꦥ꧀ꦥꦴꦢꦺꦴ, ꦤ ꦮꦷꦫꦶꦪꦱ꧀ꦱ ꦄꦨꦴꦮꦩꦠ꧀ꦠꦁ. ꦱꦷꦭꦱꦚ꧀ꦚꦩꦴꦨꦴꦮꦺꦴ ꦢꦸꦱ꧀ꦱꦷꦭ꧀ꦪꦁ. ꦮꦶꦱ꧀ꦱꦛ꧀ꦜꦴꦕꦴꦫꦠꦴ ꦤꦴꦩ ꦄꦤꦴꦕꦴꦫꦺꦴ. ꦱꦺꦴꦥ꧀ꦥꦧꦲꦸꦭꦠꦴꦠꦶ ꦤꦶꦢ꧀ꦢꦴꦭꦸꦠꦴ. ꦪꦠꦺꦴ ꦒꦲꦟꦲꦠ꧀ꦡꦺꦴꦥꦶ ꦤ ꦏꦶꦭꦴꦱꦸꦥꦶ ꦥꦸꦫꦶꦱꦺꦴ ꦤꦶꦢ꧀ꦢꦴꦪ ꦄꦨꦶꦨꦸꦪ꧀ꦪꦠꦶ. ꦠꦺꦤꦴꦲ ‘‘ꦠꦴꦪꦴ’’ꦠꦶꦄꦴꦢꦶ. ꦄꦠꦶꦕ꧀ꦖꦴꦠꦴꦢꦷꦤꦷꦠꦶ ꦄꦴꦢꦶ-ꦱꦢ꧀ꦢꦺꦤ ꦄꦨꦶꦨꦸꦪ꧀ꦪꦠꦴꦢꦶꦁ ꦱꦔ꧀ꦒꦟ꧀ꦲꦴꦠꦶ. ꦄꦴꦒꦤ꧀ꦠꦸꦏꦴꦭꦱꦶꦪꦁ ꦤ ꦥꦸꦧ꧀ꦧꦺ ꦮꦸꦠ꧀ꦠꦄꦴꦭꦱ꧀ꦪꦁ ꦮꦶꦪ ꦥꦏꦠꦶꦱꦶꦢ꧀ꦣꦁ. ‘‘ꦠꦺ ꦖꦶꦢ꧀ꦢꦺ’’ꦠꦶ ꦥꦴꦭ꦳ꦶꦪꦁ ꦭꦶꦔ꧀ꦒꦮꦶꦥꦭ꧀ꦭꦴꦱꦺꦤ ꦮꦸꦠ꧀ꦠꦤ꧀ꦠꦶ ꦄꦴꦲ ‘‘ꦠꦴꦤꦶ ꦖ ꦖꦶꦢ꧀ꦢꦴꦤꦷ’’ꦠꦶ. ꦏꦸꦱꦭꦕꦶꦠ꧀ꦠꦥ꧀ꦥꦮꦠ꧀ꦠꦶꦪꦴ ꦄꦤꦺꦴꦏꦴꦱꦨꦴꦮꦠꦺꦴ ꦖꦶꦢ꧀ꦢꦴꦤꦶ. ꦠꦺꦤꦴꦲ ꦨꦒꦮꦴ – ‘‘ꦪꦠ꧀ꦡ ꦮꦶꦠ꧀ꦠꦁ ꦤ ꦠꦶꦛ꧀ꦜꦠꦷ’’ꦠꦶ. ꦱꦧ꧀ꦧꦴꦏꦴꦫꦺꦤ ꦭꦺꦱꦩꦠ꧀ꦠꦁ ꦄꦱꦺꦱꦺꦠ꧀ꦮꦴꦠꦶ ꦄꦣꦶꦥ꧀ꦥꦴꦪꦺꦴ.

ꦤꦗꦷꦫꦠꦶꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧗. ꦆꦱ꧀ꦱꦫꦶꦪꦱꦸꦠ꧀ꦠꦮꦟ꧀ꦟꦤꦴ

꧗꧗. ꦱꦠ꧀ꦡꦱ꧀ꦱ ꦩꦭꦤ꧀ꦠꦶ ꦱꦠ꧀ꦡꦩꦭꦁ, ꦪꦺꦤ ꦱꦠ꧀ꦡꦁ ꦩꦭꦷꦤꦁ ꦲꦺꦴꦠꦶ, ꦱꦠ꧀ꦡꦩꦭꦒ꧀ꦒꦲꦟꦺꦤ ꦕꦺꦠ꧀ꦡ ꦩꦭꦷꦤꦁ ꦱꦠ꧀ꦡꦩꦺꦮ ꦒꦲꦶꦠꦤ꧀ꦠꦶ ꦄꦴꦲ ‘‘ꦩꦭꦒ꧀ꦒꦲꦶꦠꦱꦠ꧀ꦡ’’ꦤ꧀ꦠꦶ. ꦄꦴꦟꦴꦥꦮꦠ꧀ꦠꦤꦤ꧀ꦠꦶ ꦄꦥ꧀ꦥꦏꦺ ꦮꦴ ꦩꦲꦤ꧀ꦠꦺ ꦮꦴ ꦪꦠ꧀ꦡ ꦏꦠ꧀ꦡꦕꦶ ꦄꦠ꧀ꦠꦤꦺꦴ ꦄꦴꦟꦴꦪ ꦥꦮꦠ꧀ꦠꦤꦮꦱꦺꦤ ꦮꦱꦤꦁ ꦆꦱ꧀ꦱꦫꦶꦪꦠ꧀ꦠꦩꦶꦕ꧀ꦖꦤ꧀ꦠꦶ. ꦩꦟꦶꦫꦠꦤꦩ꧀ꦥꦶ ꦮꦶꦱ꧀ꦱꦗ꧀ꦗꦤꦷꦪꦥꦏ꧀ꦑꦶꦏꦠ꧀ꦠꦴ ꦈꦠ꧀ꦠꦩꦁ ꦨꦟ꧀ꦝꦁ ꦤꦴꦩ ꦤ ꦲꦺꦴꦠꦶ, ꦆꦠ꧀ꦡꦷ ꦥꦤ ꦥꦫꦶꦕ꧀ꦕꦠ꧀ꦠꦏꦸꦭꦴꦕꦴꦫꦶꦠ꧀ꦡꦶꦏꦴꦪꦥꦶ ꦄꦤꦶꦱ꧀ꦱꦗ꧀ꦗꦤꦷꦪꦠꦴꦪ ꦈꦠ꧀ꦠꦩꦨꦟ꧀ꦝꦁ ꦤꦴꦩ. ꦠꦺꦤꦴꦲ ‘‘ꦆꦠ꧀ꦡꦷ ꦨꦟ꧀ꦝꦴꦤꦩꦸꦠ꧀ꦠꦩ’’ꦤ꧀ꦠꦶ. ꦠꦺꦱꦁ ꦠꦺꦱꦚ꧀ꦲꦶ ꦥꦸꦫꦶꦱꦴꦗꦴꦤꦷꦪꦴꦤꦁ ꦈꦥ꧀ꦥꦠ꧀ꦠꦶꦛ꧀ꦜꦴꦤꦠꦴꦪ ꦈꦠ꧀ꦠꦩꦫꦠꦤꦴꦏꦫꦠ꧀ꦠꦴ ꦆꦠ꧀ꦡꦷ ꦨꦟ꧀ꦝꦴꦤꦩꦸꦠ꧀ꦠꦩꦁ. ꦩꦭꦒ꧀ꦒꦲꦶꦠꦱꦠ꧀ꦡꦱꦢꦶꦱꦺꦴ ꦄꦮꦧꦺꦴꦣꦏꦶꦕ꧀ꦕꦮꦶꦧꦤ꧀ꦣꦤꦠꦺꦴ. ꦱꦠ꧀ꦡꦩꦭꦁ ꦮꦶꦪ ꦱꦠ꧀ꦡꦱ꧀ꦱ ꦥꦚ꧀ꦚꦴꦱꦠ꧀ꦡꦱ꧀ꦱ ꦒꦸꦟꦴꦨꦴꦮꦏꦫꦟꦠꦺꦴ ꦥꦚ꧀ꦚꦴꦱꦠ꧀ꦡꦩꦭꦁ. ꦄꦧ꧀ꦧꦸ ꦮꦸꦕ꧀ꦕꦠꦶ ꦈꦥꦢ꧀ꦢꦮꦁ, ꦠꦁ ꦢꦺꦠꦷꦠꦶ ꦄꦧ꧀ꦧꦸꦢꦁ, ꦮꦶꦤꦴꦱꦏꦴꦫꦟꦁ. ꦤꦤꦸ ꦲꦫꦟꦁ ꦱꦩꦟꦱ꧀ꦱ ꦄꦪꦸꦠ꧀ꦠꦤ꧀ꦠꦶ? ꦪꦸꦠ꧀ꦠꦁ. ꦠꦱ꧀ꦱ ꦄꦤ꧀ꦮꦪꦠꦺꦴ ꦧ꧀ꦪꦠꦶꦫꦺꦏꦠꦺꦴ ꦕ ꦪꦸꦠ꧀ꦠꦠꦁ ꦢꦱ꧀ꦱꦺꦤ꧀ꦠꦺꦴ ‘‘ꦱꦭꦴꦏꦨꦠ꧀ꦠꦴꦢꦷꦤꦷ’’ꦠꦶꦄꦴꦢꦶꦩꦴꦲ.

ꦆꦱ꧀ꦱꦫꦶꦪꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧘. ꦏꦴꦩꦱꦸꦠ꧀ꦠꦮꦟ꧀ꦟꦤꦴ

꧗꧘. ‘‘ꦄꦠ꧀ꦠꦏꦴꦩꦺꦴ’’ꦠꦶ ꦥꦴꦭ꦳ꦶꦪꦁ ꦮꦸꦠ꧀ꦠꦠ꧀ꦠꦴ ꦄꦴꦲ ‘‘ꦜꦥꦺꦠ꧀ꦮꦴ ꦱꦧ꧀ꦧꦧꦺꦴꦣꦶꦱꦠ꧀ꦠꦺ’’ꦠꦶ. ꦠꦺ ꦲꦶ ꦱꦧ꧀ꦧꦱꦺꦴ ꦥꦫꦠ꧀ꦡꦴꦪ ꦌꦮ ꦥꦛꦶꦥꦗ꧀ꦗꦩꦴꦤꦴ ꦩꦲꦴꦏꦴꦫꦸꦟꦶꦏꦴ ꦥꦫꦠ꧀ꦡꦏꦴꦩꦴ, ꦄꦠ꧀ꦡꦏꦴꦩꦴ ꦤꦴꦩ ꦤ ꦲꦺꦴꦤ꧀ꦠꦶ, ꦪꦴ ꦕ ꦠꦺꦱꦁ ꦄꦠ꧀ꦠꦠ꧀ꦡꦴꦮꦲꦴ ꦥꦛꦶꦥꦠ꧀ꦠꦶ, ꦱꦴꦥꦶ ꦪꦴꦮꦢꦺꦮ ꦥꦫꦠ꧀ꦡꦴ ꦌꦮꦴꦠꦶ. ꦮꦸꦠ꧀ꦠꦁ ꦥꦺꦴꦫꦴꦟꦛ꧀ꦜꦏꦡꦴꦪꦁ. ꦪꦱ꧀ꦩꦴ ꦧꦺꦴꦣꦶꦱꦠ꧀ꦠꦴ ꦥꦫꦲꦶꦠꦥꦛꦶꦥꦠ꧀ꦠꦶꦪꦴ ꦥꦴꦫꦩꦶꦪꦺꦴ ꦥꦹꦫꦺꦤ꧀ꦠꦴ ꦠꦡꦴꦫꦹꦥꦁ ꦏꦴꦫꦟꦁ ꦥꦠ꧀ꦮꦴ ꦄꦠ꧀ꦠꦴꦤꦁ ꦥꦫꦺꦱꦁ ꦥꦫꦶꦕ꧀ꦕꦗꦤ꧀ꦠꦶ ꦥꦚ꧀ꦚꦴꦥꦴꦫꦩꦶꦪꦴ ꦥꦫꦶꦥꦹꦫꦟꦠꦺꦴ, ꦠꦱ꧀ꦩꦴ ꦆꦣꦴꦥꦶ ‘‘ꦱꦧ꧀ꦧꦧꦺꦴꦣꦶꦱꦠ꧀ꦠꦺ ꦜꦥꦺꦠ꧀ꦮꦴꦪꦺꦮꦴꦠꦶ ꦮꦸꦠ꧀ꦠ’’ꦤ꧀ꦠꦶ ꦄꦴꦲ. ꦏꦭ꧀ꦪꦴꦟꦤ꧀ꦠꦶ ꦨꦢ꧀ꦢꦏꦁ. ꦮꦴꦕꦴꦪ ꦄꦣꦶꦥ꧀ꦥꦺꦠꦠ꧀ꦠꦴ ꦄꦴꦲ ‘‘ꦱꦟ꧀ꦲꦁ ꦩꦸꦢꦸꦏ’’ꦤ꧀ꦠꦶ. ꦥꦴꦥꦶꦏꦤ꧀ꦠꦶ ꦭꦴꦩꦏꦁ ꦤꦶꦲꦷꦤꦁ. ꦠꦁ ꦥꦤ ꦦꦫꦸꦱꦁ ꦮꦴꦕꦤ꧀ꦠꦶ ꦱꦫꦹꦥꦠꦺꦴ ꦢꦱ꧀ꦱꦺꦠꦶ.

ꦏꦴꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧙. ꦥꦴꦡꦺꦪ꧀ꦪꦱꦸꦠ꧀ꦠꦮꦟ꧀ꦟꦤꦴ

꧗꧙. ꦱꦢ꧀ꦣꦴ ꦧꦤ꧀ꦣꦠꦶ ꦥꦴꦡꦺꦪ꧀ꦪꦤ꧀ꦠꦶ ꦱꦢ꧀ꦣꦴ ꦤꦴꦩ ꦱꦠ꧀ꦠꦱ꧀ꦱ ꦩꦫꦟꦮꦱꦺꦤ ꦩꦲꦴꦥꦡꦁ ꦱꦁꦮꦗꦠꦺꦴ ꦩꦲꦴꦏꦤ꧀ꦠꦴꦫꦁ ꦥꦛꦶꦥꦗ꧀ꦗꦠꦺꦴ ꦩꦲꦴꦮꦶꦢꦸꦒ꧀ꦒꦁ ꦥꦏ꧀ꦑꦤ꧀ꦢꦠꦺꦴ ꦥꦴꦡꦺꦪ꧀ꦪꦥꦸꦛꦁ ꦧꦤ꧀ꦣꦠꦶ ꦱꦩ꧀ꦧꦭꦁ ꦱꦗ꧀ꦗꦺꦠꦶ. ꦏꦡꦤ꧀ꦠꦶ ꦄꦴꦲ ‘‘ꦱꦢ꧀ꦣꦁ ꦈꦥ꧀ꦥꦴꦢꦺꦠ꧀ꦮꦴ’’ꦠꦶꦄꦴꦢꦶ. ꦌꦠꦁ ꦮꦸꦠ꧀ꦠꦤ꧀ꦠꦶ ‘‘ꦱꦢ꧀ꦣꦴ ꦧꦤ꧀ꦣꦠꦶ ꦥꦴꦡꦺꦪ꧀ꦪ’’ꦤ꧀ꦠꦶ ꦌꦠꦁ ꦒꦴꦡꦴꦥꦢꦁ ꦮꦸꦠ꧀ꦠꦁ ꦨꦒꦮꦠꦴ. ꦱꦶꦫꦷꦠꦶ ꦏꦠꦥꦸꦚ꧀ꦚꦺꦲꦶ ꦱꦺꦮꦷꦪꦠꦶ ꦠꦺꦲꦶ ꦥꦛꦶꦭꦨꦷꦪꦠꦷꦠꦶ ꦱꦶꦫꦷ. ꦆꦱ꧀ꦱꦫꦶꦪꦁ ꦮꦶꦨꦮꦺꦴ. ꦄꦴꦱꦪꦶꦠꦧ꧀ꦧꦠꦺꦴ ꦄꦴꦱꦪꦺꦴ, ꦮꦱꦤꦛ꧀ꦜꦴꦤꦁ ꦤꦶꦏꦺꦠꦤ꧀ꦠꦶ ꦄꦠ꧀ꦡꦺꦴ. ꦥꦫꦶꦏꦝ꧀ꦞꦠꦷꦠꦶ ꦆꦕ꧀ꦖꦴꦮꦱꦶꦏꦁ ꦥꦸꦒ꧀ꦒꦭꦁ ꦠꦠ꧀ꦡ ꦠꦠ꧀ꦡ ꦈꦥꦏꦝ꧀ꦞꦠꦶ.

ꦥꦴꦡꦺꦪ꧀ꦪꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧑꧐. ꦥꦗ꧀ꦗꦺꦴꦠꦱꦸꦠ꧀ꦠꦮꦟ꧀ꦟꦤꦴ

꧘꧐. ꦠꦁ ꦠꦁ ꦱꦩꦮꦶꦱꦩꦁ ꦥꦗ꧀ꦗꦺꦴꦠꦠꦷꦠꦶ ꦥꦗ꧀ꦗꦺꦴꦠꦺꦴ. ꦥꦢꦷꦥꦺꦴ ꦄꦤ꧀ꦣꦏꦴꦫꦁ ꦮꦶꦣꦩꦶꦠ꧀ꦮꦴ ꦥꦕ꧀ꦕꦏ꧀ꦑꦠꦺꦴ ꦫꦹꦥꦒꦠꦁ ꦢꦱ꧀ꦱꦺꦠꦶ, ꦌꦮꦁ ꦥꦚ꧀ꦚꦴꦥꦗ꧀ꦗꦺꦴꦠꦺꦴ ꦄꦮꦶꦗ꧀ꦗꦤ꧀ꦣꦏꦴꦫꦁ ꦮꦶꦣꦩꦶꦠ꧀ꦮꦴ ꦣꦩ꧀ꦩꦴꦤꦁ ꦥꦫꦩꦠ꧀ꦡꦨꦹꦠꦁ ꦫꦹꦥꦁ ꦢꦱ꧀ꦱꦺꦠꦶ. ꦗꦴꦒꦫꦧ꧀ꦫꦴꦲ꧀ꦩꦟꦺꦴ ꦮꦶꦪꦴꦠꦶ ꦗꦴꦒꦫꦑꦷꦟꦴꦱꦮꦧ꧀ꦫꦴꦲ꧀ꦩꦟꦺꦴ ꦮꦶꦪ. ꦱꦺꦴ ꦲꦶ ꦱꦠꦶꦥꦚ꧀ꦚꦴꦮꦺꦥꦸꦭ꧀ꦭꦥ꧀ꦥꦠ꧀ꦠꦶꦪꦴ ꦱꦧ꧀ꦧꦢꦴꦥꦶ ꦗꦴꦒꦫꦺꦴ ꦲꦺꦴꦠꦶ. ꦒꦴꦮꦺꦴꦠꦶ ꦒꦺꦴꦗꦴꦠꦶꦪꦺꦴ. ꦆꦢꦁ ꦒꦸꦤ꧀ꦤꦁ ꦒꦺꦴꦟꦴꦤꦚ꧀ꦕ ꦱꦴꦩꦚ꧀ꦚꦠꦺꦴ ꦒꦲꦟꦁ. ꦏꦩ꧀ꦩꦺꦠꦶ ꦏꦫꦟꦠ꧀ꦡꦺ ꦨꦸꦩ꧀ꦩꦮꦕꦤꦁ. ꦗꦷꦮꦤꦁ ꦗꦷꦮꦺꦴ, ꦱꦲ ꦗꦷꦮꦺꦤꦴꦠꦶ ꦱꦗꦷꦮꦶꦤꦺꦴ. ꦠꦺꦤꦴꦲ ‘‘ꦏꦩ꧀ꦩꦺꦤ ꦱꦲ ꦗꦷꦮꦤ꧀ꦠꦴꦤ’’ꦤ꧀ꦠꦶ, ꦏꦱꦶꦮꦴꦟꦶꦗ꧀ꦗꦴꦢꦶꦏꦩ꧀ꦩꦁ ꦏꦠ꧀ꦮꦴ ꦗꦷꦮꦤ꧀ꦠꦴꦤꦤ꧀ꦠꦶ ꦄꦠ꧀ꦡꦺꦴ. ꦒꦺꦴꦩꦟ꧀ꦝꦭꦺꦲꦶ ꦱꦢ꧀ꦣꦶꦤ꧀ꦠꦶ ꦒꦺꦴꦒꦟꦺꦤ ꦱꦲ. ꦤ ꦠꦺꦤ ꦮꦶꦤꦴ ꦏꦱꦶꦏꦩ꧀ꦩꦴꦢꦷꦤꦶ ꦈꦥ꧀ꦥꦗ꧀ꦗꦤ꧀ꦠꦶ, ꦒꦺꦴꦫꦱꦱꦶꦢ꧀ꦣꦶꦪꦴ ꦕꦺꦮ ꦏꦱꦤꦨꦴꦫꦮꦲꦤꦱꦶꦢ꧀ꦣꦶꦪꦴ ꦕ ꦏꦱꦶꦏꦩ꧀ꦩꦌꦏꦕ꧀ꦕꦮꦴꦟꦶꦗ꧀ꦗꦏꦩ꧀ꦩꦴꦢꦷꦤꦶ ꦆꦗ꧀ꦙꦤ꧀ꦠꦶ. ꦱꦠ꧀ꦠꦏꦴꦪꦱ꧀ꦱꦴꦠꦶ ꦄꦴꦲꦴꦫꦸꦥꦗꦷꦮꦶꦤꦺꦴ ꦱꦠ꧀ꦠꦏꦴꦪꦱ꧀ꦱ ꦏꦱꦶꦠꦺꦴ ꦄꦚ꧀ꦚꦡꦴ ꦗꦷꦮꦶꦏꦁ ꦏꦥ꧀ꦥꦺꦤ꧀ꦠꦱ꧀ꦱꦥꦶ ꦏꦱꦶꦗꦷꦮꦶꦠꦮꦸꦠ꧀ꦠꦶꦪꦴ ꦩꦹꦭꦏꦴꦫꦟꦁ ꦦꦭꦤꦶꦥ꧀ꦦꦠ꧀ꦠꦶꦤꦶꦩꦶꦠ꧀ꦠꦠ꧀ꦠꦴ ꦠꦱ꧀ꦱ. ꦆꦫꦶꦪꦴꦥꦡꦺꦴ ꦕ ꦆꦫꦶꦪꦤꦏꦶꦫꦶꦪꦴꦤꦁ ꦥꦮꦠ꧀ꦠꦤꦸꦥꦴꦪꦺꦴ. ‘‘ꦱꦷꦠꦤ꧀ꦠꦶ ꦤꦔ꧀ꦒꦭꦱꦷꦠꦏꦩ꧀ꦩ’’ꦤ꧀ꦠꦶ ꦮꦢꦤ꧀ꦠꦶ.

ꦥꦗ꧀ꦗꦺꦴꦠꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧑꧑. ꦄꦫꦟꦱꦸꦠ꧀ꦠꦮꦟ꧀ꦟꦤꦴ

꧘꧑. ꦫꦟꦤ꧀ꦠꦶ ꦏꦤ꧀ꦢꦤ꧀ꦠꦶ ꦌꦠꦺꦲꦷꦠꦶ ꦫꦟꦴ, ꦫꦴꦒꦴꦢꦪꦺꦴ. ꦠꦺꦲꦶ ꦄꦨꦶꦨꦹꦠꦠꦴꦪ ꦲꦶ ꦱꦠ꧀ꦠꦴ ꦤꦴꦤꦥ꧀ꦥꦏꦴꦫꦁ ꦏꦤ꧀ꦢꦤ꧀ꦠꦶ ꦥꦫꦶꦢꦺꦮꦤ꧀ꦠꦶ. ꦠꦺ ꦥꦤ ꦱꦧ꧀ꦧꦱꦺꦴ ꦤꦠ꧀ꦡꦶ ꦌꦠꦺꦱꦁ ꦫꦟꦴꦠꦶ ꦄꦫꦟꦴ. ꦤꦶꦏ꧀ꦏꦶꦭꦺꦱꦴ ꦑꦷꦟꦴꦱꦮꦴ. ꦮꦸꦱꦶꦠꦮꦴꦱꦺꦴꦠꦶ ꦮꦸꦱꦶꦠꦧ꧀ꦫꦲ꧀ꦩꦕꦫꦶꦪꦮꦴꦱꦺꦴ. ꦨꦺꦴꦗꦶꦱ꧀ꦱꦶꦪꦤ꧀ꦠꦶ ꦨꦸꦗꦶꦱ꧀ꦱꦨꦴꦮꦺꦴ. ꦠꦺꦤꦴꦲ ‘‘ꦄꦢꦴꦱꦨꦴꦮꦺꦴ’’ꦠꦶ. ꦱꦩꦟꦴꦠꦶ ꦱꦩꦶꦠꦥꦴꦥꦱꦩꦟꦴꦠꦶ ꦄꦴꦲ ‘‘ꦑꦷꦟꦴꦱꦮꦱꦩꦟꦴ’’ꦠꦶ. ꦥꦸꦡꦸꦗ꧀ꦗꦤꦏꦭ꧀ꦪꦴꦟꦏꦴꦭꦺ ꦭꦺꦴꦏꦶꦪꦥꦫꦶꦚ꧀ꦚꦴꦪ, ꦱꦺꦏ꧀ꦑꦴ ꦥꦸꦧ꧀ꦧꦨꦴꦒꦺ ꦭꦺꦴꦏꦶꦪꦥꦫꦶꦚ꧀ꦚꦴꦪ, ꦥꦕ꧀ꦕꦮꦺꦏ꧀ꦑꦟꦺ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦴꦪ ꦥꦫꦶꦚ꧀ꦚꦴꦪ ꦥꦫꦶꦚ꧀ꦚꦺꦪ꧀ꦪꦁ ꦠꦺꦨꦹꦩꦏꦁ ꦑꦤ꧀ꦣꦥꦚ꧀ꦕꦏꦁ ꦥꦫꦶꦗꦴꦤꦤ꧀ꦠꦶ ꦥꦫꦶꦕ꧀ꦖꦶꦗ꧀ꦗꦤ꧀ꦠꦶ. ꦑꦷꦟꦴꦱꦮꦴ ꦥꦤ ꦥꦫꦶꦚ꧀ꦚꦴꦠꦥꦫꦶꦚ꧀ꦚꦺꦪ꧀ꦪꦴ ꦲꦺꦴꦤ꧀ꦠꦶ. ꦠꦡꦴ ꦲꦶ ꦠꦺ ꦱꦴꦩꦷ ꦲꦸꦠ꧀ꦮꦴ ꦥꦫꦶꦨꦸꦚ꧀ꦗꦤ꧀ꦠꦶ. ꦮꦤ꧀ꦢꦤ꧀ꦠꦶ ꦤꦁ ꦥꦠꦶꦛ꧀ꦜꦶꦠꦤ꧀ꦠꦶ ꦮꦸꦠ꧀ꦠꦁ, ꦮꦤ꧀ꦢꦤꦷꦪꦨꦴꦮꦺꦴ ꦕ ꦱꦷꦭꦱꦩ꧀ꦥꦤ꧀ꦤꦠꦴꦪꦴꦠꦶ ꦄꦴꦲ ‘‘ꦥꦠꦶꦛ꧀ꦜꦶꦠꦤ꧀ꦠꦶ ꦱꦷꦭꦺ ꦥꦠꦶꦛ꧀ꦜꦶꦠ’’ꦤ꧀ꦠꦶ. ꦆꦣꦴꦠꦶ ꦆꦩꦱ꧀ꦩꦶꦁ ꦭꦺꦴꦏꦺ. ꦑꦠ꧀ꦠꦶꦪꦴꦠꦶ ꦭꦏ꧀ꦑꦟꦮꦕꦤꦤ꧀ꦠꦶ ꦄꦴꦲ ‘‘ꦤ ꦏꦺꦮꦭꦁ ꦑꦠ꧀ꦠꦶꦪꦴꦮꦴ’’ꦠꦶꦄꦴꦢꦶ.

ꦄꦫꦟꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦖꦺꦠ꧀ꦮꦴꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦱꦴꦫꦠ꧀ꦡꦥ꧀ꦥꦏꦴꦱꦶꦤꦶꦪꦴ ꦱꦁꦪꦸꦠ꧀ꦠꦤꦶꦏꦴꦪ-ꦄꦛ꧀ꦜꦏꦡꦴꦪ

ꦢꦺꦮꦠꦴꦱꦁꦪꦸꦠ꧀ꦠꦮꦟ꧀ꦟꦤꦴꦪ ꦭꦷꦤꦠ꧀ꦡꦥ꧀ꦥꦏꦴꦱꦤꦴ ꦱꦩꦠ꧀ꦠꦴ.