꧕. ꦏꦠꦶꦖꦶꦤ꧀ꦢꦱꦸꦠ꧀ꦠꦮꦟ꧀ꦟꦤꦴ

꧕. ꦖꦶꦤ꧀ꦢꦤ꧀ꦠꦺꦴꦠꦶ ꦱꦩꦸꦕ꧀ꦖꦶꦤ꧀ꦢꦤ꧀ꦠꦺꦴ. ꦏꦠꦶ ꦖꦶꦤ꧀ꦢꦺꦪ꧀ꦪꦴꦠꦶ ꦏꦶꦠ꧀ꦠꦏꦺ ꦥꦴꦥꦣꦩ꧀ꦩꦺ ꦱꦩꦸꦕ꧀ꦖꦶꦤ꧀ꦢꦺꦪ꧀ꦪ, ꦄꦤꦸꦥ꧀ꦥꦠ꧀ꦠꦶꦣꦩ꧀ꦩꦠꦁ ꦥꦴꦥꦺꦪ꧀ꦪ. ꦱꦺꦱꦥꦢꦺꦱꦸꦥꦷꦠꦶ ꦱꦺꦱꦺꦱꦸꦥꦶ ꦢ꧀ꦮꦷꦱꦸ ꦥꦢꦺꦱꦸ. ꦗꦲꦤ꧀ꦠꦺꦴ ꦏꦠꦶ ꦗꦲꦺꦪ꧀ꦪ, ꦨꦴꦮꦺꦤ꧀ꦠꦺꦴ ꦏꦠꦶ ꦈꦠ꧀ꦠꦫꦶ ꦨꦴꦮꦺꦪ꧀ꦪꦴꦠꦶ ꦆꦩꦩꦠ꧀ꦡꦁ ‘‘ꦌꦱꦺꦮ ꦤꦪꦺꦴ’’ꦠꦶ ꦆꦩꦶꦤꦴ ꦄꦠꦶꦢꦶꦱꦠꦶ. ꦕꦠꦸꦠ꧀ꦡꦥꦢꦱ꧀ꦱ ꦥꦤ ꦄꦠ꧀ꦡꦺꦴ ꦱꦫꦹꦥꦺꦤꦺꦮ ꦢꦱ꧀ꦱꦶꦠꦺꦴ. ꦄꦠ꧀ꦡꦠꦺꦴ ꦌꦏꦤ꧀ꦠꦶ ꦨꦴꦮꦠ꧀ꦡꦠꦺꦴ ꦌꦏꦁ. ꦪꦢꦶ ꦌꦮꦁ ꦏꦶꦩꦠ꧀ꦡꦁ ꦥꦫꦶꦪꦴꦪꦤ꧀ꦠꦫꦁ ꦒꦲꦶꦠꦤ꧀ꦠꦶ ꦄꦴꦲ ‘‘ꦒꦴꦡꦴꦧꦤ꧀ꦣꦱ꧀ꦱ ꦥꦤꦴ’’ꦠꦶꦄꦴꦢꦶ. ꦄꦠ꧀ꦡꦠꦺꦴ ꦌꦠ꧀ꦡ ꦥꦸꦤꦫꦸꦠ꧀ꦠꦶ ꦄꦠ꧀ꦡꦺꦮꦴꦠꦶ ꦄꦴꦲ ‘‘ꦱꦢ꧀ꦢꦥꦸꦤꦫꦸꦠ꧀ꦠꦶꦁ ꦮꦗ꧀ꦗꦪꦤ꧀ꦠꦷ’’ꦠꦶ. ꦱꦔ꧀ꦒꦁ ꦄꦠꦶꦏ꧀ꦏꦩꦪꦠꦷꦠꦶ ꦱꦔ꧀ꦒꦴꦠꦶꦒꦺꦴꦠꦶ ꦄꦴꦲ ‘‘ꦄꦪꦩꦺꦮꦠ꧀ꦡꦺꦴ’’ꦠꦶ.

ꦎꦫꦁ ꦮꦸꦕ꧀ꦕꦠꦶ ꦏꦴꦩꦣꦴꦠꦸ, ꦥꦛꦶꦱꦤ꧀ꦣꦶꦪꦴ ꦥꦕ꧀ꦕꦪꦨꦴꦮꦺꦤ ꦠꦚ꧀ꦕ ꦨꦗꦤ꧀ꦠꦷꦠꦶ ꦎꦫꦩ꧀ꦨꦴꦒꦶꦪꦴꦤꦶ. ꦠꦠ꧀ꦡ ꦕ ꦏꦩ꧀ꦩꦁ ꦠꦧ꧀ꦧꦶꦥꦴꦏꦁ ꦱꦠ꧀ꦠꦺ ꦢꦸꦏ꧀ꦑꦁ, ꦏꦩ꧀ꦩꦸꦤꦴ ꦮꦶꦥꦴꦏꦁ, ꦱꦠ꧀ꦠꦺꦤ ꦢꦸꦏ꧀ꦑꦁ ꦱꦁꦪꦺꦴꦗꦺꦤ꧀ꦠꦷꦠꦶ ꦱꦁꦪꦺꦴꦗꦤꦴꦤꦶ, ꦱꦏ꧀ꦏꦴꦪꦢꦶꦛ꧀ꦜꦶ-ꦮꦶꦕꦶꦏꦶꦕ꧀ꦖꦴ-ꦱꦷꦭꦧ꧀ꦧꦠꦥꦫꦴꦩꦴꦱ-ꦏꦴꦩꦫꦴꦒ-ꦥꦛꦶꦓꦴ. ꦈꦢ꧀ꦣꦁ ꦮꦸꦕ꧀ꦕꦠꦶ ꦕꦠꦱ꧀ꦱꦺꦴ ꦄꦫꦹꦥꦣꦴꦠꦸꦪꦺꦴ, ꦮꦸꦠ꧀ꦠꦤꦪꦺꦤ ꦠꦁ ꦨꦗꦤ꧀ꦠꦷꦠꦶ ꦈꦢ꧀ꦣꦩ꧀ꦨꦴꦒꦶꦪꦴꦤꦶ, ꦱꦁꦪꦺꦴꦗꦤꦴꦤꦶ ꦫꦹꦥꦴꦫꦹꦥꦫꦴꦒꦩꦴꦤꦸꦢ꧀ꦣꦕ꧀ꦕꦴꦮꦶꦗ꧀ꦗꦴ. ꦄꦴꦫꦺꦴꦥꦶꦠꦮꦕꦤꦴꦤꦸꦫꦹꦥꦺꦤꦺꦮ ꦌꦮꦩꦴꦲꦴꦠꦶ ‘‘ꦥꦚ꧀ꦕ ꦖꦶꦤ꧀ꦢꦺ ꦥꦚ꧀ꦕ ꦗꦲꦺ’’ꦠꦶ ꦌꦮꦁ ꦏꦡꦺꦱꦶ ꦠꦱ꧀ꦱꦴ ꦢꦺꦮꦠꦴꦪ ꦱꦸꦑꦒ꧀ꦒꦲꦟꦠ꧀ꦡꦁ. ꦤ ꦏꦺꦮꦭꦁ ꦠꦴꦪ ꦢꦺꦮꦠꦴꦪ ꦮꦸꦠ꧀ꦠꦮꦕꦤꦴꦤꦸꦫꦹꦥꦠꦺꦴ ꦌꦮ, ꦄꦡ ꦑꦺꦴ ꦠꦺꦱꦸ ꦱꦁꦪꦺꦴꦗꦤꦺꦱꦸ ꦮꦠ꧀ꦠꦧ꧀ꦧꦴꦏꦴꦫꦠꦺꦴꦥꦷꦠꦶ ꦢꦱ꧀ꦱꦺꦠꦸꦁ ‘‘ꦄꦡ ꦮꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦺꦤ ꦎꦫꦩ꧀ꦨꦴꦒꦶꦪꦱꦁꦪꦺꦴꦗꦤꦴꦤꦶ ꦤꦴꦩ ꦒꦫꦹꦤꦶ ꦢꦸꦕ꧀ꦖꦺꦢꦴꦤꦶ ꦒꦴꦭ꦳꧀ꦲꦧꦤ꧀ꦣꦤꦨꦴꦮꦠꦺꦴ, ꦠꦱ꧀ꦩꦴ ꦠꦴꦤꦶ ꦱꦤ꧀ꦣꦴꦪ ‘‘ꦥꦚ꧀ꦕ ꦖꦶꦤ꧀ꦢꦺ’’ꦠꦶ ꦮꦸꦠ꧀ꦠꦁ.

ꦈꦢ꧀ꦣꦩ꧀ꦨꦴꦒꦶꦪꦱꦁꦪꦺꦴꦗꦤꦴꦤꦶ ꦥꦤ ꦭꦲꦹꦤꦶ ꦱꦸꦕ꧀ꦖꦺꦢꦴꦤꦶ ꦲꦺꦛ꧀ꦜꦴ ꦥꦮꦠ꧀ꦠꦶꦠꦴꦤꦸꦏ꧀ꦏꦩꦺꦤ ꦨꦴꦮꦤꦴꦤꦪꦺꦤ ꦥꦲꦴꦠꦧ꧀ꦧꦠꦺꦴ, ꦠꦱ꧀ꦩꦴ ꦠꦴꦤꦶ ꦱꦤ꧀ꦣꦴꦪ ‘‘ꦥꦚ꧀ꦕ ꦗꦲꦺ’’ꦠꦶ ꦮꦸꦠ꧀ꦠꦁ. ꦠꦺꦤꦴꦲ ‘‘ꦥꦴꦢꦺꦱꦸ ꦧꦢ꧀ꦣꦥꦴꦱꦱꦏꦸꦟꦺꦴ ꦮꦶꦪꦴ’’ꦠꦶꦄꦴꦢꦶ. ꦮꦶꦱꦺꦱꦤ꧀ꦠꦶ ꦨꦴꦮꦤꦴꦤꦁ ꦮꦶꦱꦺꦱꦁ ꦮꦶꦥꦱ꧀ꦱꦤꦴꦨꦴꦮꦤꦁ ꦨꦴꦮꦺꦤ꧀ꦠꦺꦴ ꦈꦥ꧀ꦥꦴꦢꦺꦤ꧀ꦠꦺꦴ ꦮꦶꦥꦕ꧀ꦕꦺꦤ꧀ꦠꦺꦴ ꦮꦝ꧀ꦞꦺꦤ꧀ꦠꦺꦴ ꦕ. ꦱꦁꦱꦴꦫꦥꦔ꧀ꦏꦺ ꦱꦚ꧀ꦗꦤꦛ꧀ꦜꦺꦤ ꦫꦴꦒꦺꦴ ꦌꦮ ꦱꦔ꧀ꦒꦺꦴ ‘‘ꦫꦴꦒꦱꦔ꧀ꦒꦺꦴ’’. ꦌꦱ ꦤꦪꦺꦴ ꦱꦺꦱꦺꦱꦸꦥꦶ. ꦪꦱ꧀ꦩꦴ ꦌꦠ꧀ꦡ ꦫꦴꦒ-ꦩꦺꦴꦲ-ꦢꦶꦛ꧀ꦜꦶ-ꦠꦧ꧀ꦨꦴꦒꦶꦪꦱꦏ꧀ꦏꦴꦪꦢꦶꦛ꧀ꦜꦶ-ꦱꦷꦭꦧ꧀ꦧꦠꦥꦫꦴꦩꦴꦱ-ꦏꦴꦩꦫꦴꦒꦴꦮꦶꦗ꧀ꦗꦴ ꦄꦠ꧀ꦡꦠꦺꦴ ꦎꦓꦴ ꦌꦮ, ꦆꦠꦫꦺ ꦠꦢꦺꦏꦛ꧀ꦜꦴ, ꦠꦱ꧀ꦩꦴ ꦨꦒꦮꦴ ꦱꦁꦪꦺꦴꦗꦤꦥ꧀ꦥꦲꦴꦤꦱꦔ꧀ꦒꦴꦠꦶꦏ꧀ꦏꦩꦺꦲꦶ ꦎꦓꦠꦫꦟꦁ ꦏꦡꦺꦱꦶ. ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦴꦤꦶ ꦏꦡꦶꦠꦴꦤꦶ ‘‘ꦨꦴꦮꦪꦺ’’ꦠꦶ ꦥꦸꦧ꧀ꦧꦨꦴꦒꦴꦪ ꦩꦒ꧀ꦒꦨꦴꦮꦤꦴꦪ ꦄꦣꦶꦥ꧀ꦥꦺꦠꦠ꧀ꦠꦴ.

ꦏꦠꦶꦖꦶꦤ꧀ꦢꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.