ꦒꦤ꧀ꦡꦴꦫꦩ꧀ꦨꦏꦡꦴꦮꦟ꧀ꦟꦤꦴ

꧑. ꦱꦁꦮꦟ꧀ꦟꦤꦴꦫꦩ꧀ꦨꦺ ꦫꦠꦤꦠ꧀ꦠꦪꦮꦤ꧀ꦢꦤꦴ ꦱꦁꦮꦟ꧀ꦟꦺꦠꦧ꧀ꦧꦱ꧀ꦱ ꦣꦩ꧀ꦩꦱ꧀ꦱ ꦥꦨꦮꦤꦶꦱ꧀ꦱꦪꦮꦶꦱꦸꦢ꧀ꦣꦶꦥꦛꦶꦮꦺꦢꦤꦠ꧀ꦡꦁ, ꦠꦁ ꦥꦤ ꦣꦩ꧀ꦩꦱꦁꦮꦟ꧀ꦟꦤꦴꦱꦸ ꦮꦶꦚ꧀ꦚꦹꦤꦁ ꦧꦲꦸꦩꦴꦤꦸꦥ꧀ꦥꦴꦢꦤꦠ꧀ꦡꦁ, ꦠꦁ ꦱꦩ꧀ꦩꦢꦺꦮ ꦠꦺꦱꦁ ꦈꦒ꧀ꦒꦲꦟꦣꦴꦫꦟꦴꦢꦶꦏ꧀ꦏꦩꦭꦢ꧀ꦣꦧ꧀ꦧꦴꦪ ꦱꦩ꧀ꦩꦴꦥꦛꦶꦥꦠ꧀ꦠꦶꦪꦴ ꦱꦧ꧀ꦧꦲꦶꦠꦱꦸꦑꦤꦶꦥ꧀ꦦꦴꦢꦤꦠ꧀ꦡꦤ꧀ꦠꦶ. ꦄꦡ ꦮꦴ ꦩꦔ꧀ꦒꦭꦨꦴꦮꦠꦺꦴ, ꦱꦧ꧀ꦧꦏꦶꦫꦶꦪꦴꦱꦸ ꦥꦸꦧ꧀ꦧꦏꦶꦕ꧀ꦕꦨꦴꦮꦠꦺꦴ, ꦥꦟ꧀ꦝꦶꦠꦺꦲꦶ ꦱꦩꦴꦕꦫꦶꦠꦨꦴꦮꦠꦺꦴ, ꦄꦴꦪꦠꦶꦁ ꦥꦫꦺꦱꦁ ꦢꦶꦛ꧀ꦜꦴꦤꦸꦒꦠꦶꦄꦴꦥꦗ꧀ꦗꦤꦠꦺꦴ ꦕ ꦱꦁꦮꦟ꧀ꦟꦤꦴꦪꦁ ꦫꦠꦤꦠ꧀ꦠꦪꦥꦟꦴꦩꦏꦶꦫꦶꦪꦴꦠꦶ. ꦄꦡ ꦮꦴ ꦫꦠꦤꦠ꧀ꦠꦪꦥꦟꦴꦩꦏꦫꦟꦁ ꦥꦹꦗꦤꦷꦪꦥꦹꦗꦴꦥꦸꦚ꧀ꦚꦮꦶꦱꦺꦱꦤꦶꦧ꧀ꦧꦠ꧀ꦠꦤꦠ꧀ꦡꦁ, ꦠꦁ ꦄꦠ꧀ꦠꦤꦺꦴ ꦪꦡꦴꦭꦢ꧀ꦣꦱꦩ꧀ꦥꦠ꧀ꦠꦶꦤꦶꦩꦶꦠ꧀ꦠꦏꦱ꧀ꦱ ꦏꦩ꧀ꦩꦱ꧀ꦱ ꦧꦭꦴꦤꦸꦥ꧀ꦥꦢꦴꦤꦠ꧀ꦡꦁ, ꦄꦤ꧀ꦠꦫꦴ ꦕ ꦠꦱ꧀ꦱ ꦄꦱꦁꦏꦺꦴꦕꦴꦥꦤꦠ꧀ꦡꦁ, ꦠꦢꦸꦨꦪꦁ ꦄꦤꦤ꧀ꦠꦫꦴꦪꦺꦤ ꦄꦛ꧀ꦜꦏꦡꦴꦪ ꦥꦫꦶꦱꦩꦴꦥꦤꦠ꧀ꦡꦤ꧀ꦠꦶ ꦆꦢꦩꦺꦮ ꦕ ꦥꦪꦺꦴꦗꦤꦁ ꦄꦴꦕꦫꦶꦪꦺꦤ ꦆꦣꦴꦣꦶꦥ꧀ꦥꦺꦠꦁ. ꦠꦡꦴ ꦲꦶ ꦮꦏ꧀ꦑꦠꦶ ‘‘ꦆꦠꦶ ꦩꦺ ꦥꦱꦤ꧀ꦤꦩꦠꦶꦤꦺꦴ…ꦥꦺ… ꦠꦱ꧀ꦱꦴꦤꦸꦨꦴꦮꦺꦤꦴ’’ꦠꦶ. ꦮꦠ꧀ꦡꦸꦠ꧀ꦠꦪꦥꦹꦗꦴ ꦲꦶ ꦤꦶꦫꦠꦶꦱꦪꦥꦸꦚ꧀ꦚꦏ꧀ꦑꦺꦠ꧀ꦠꦱꦁꦧꦸꦢ꧀ꦣꦶꦪꦴ ꦄꦥꦫꦶꦩꦺꦪ꧀ꦪꦥꦨꦴꦮꦺꦴ ꦥꦸꦚ꧀ꦚꦴꦠꦶꦱꦪꦺꦴꦠꦶ ꦧꦲꦸꦮꦶꦣꦤ꧀ꦠꦫꦴꦪꦺꦥꦶ ꦭꦺꦴꦏꦱꦤ꧀ꦤꦶꦮꦴꦱꦺ ꦄꦤ꧀ꦠꦫꦴꦪꦤꦶꦧꦤ꧀ꦣꦤꦱꦏꦭꦱꦁꦏꦶꦭꦺꦱꦮꦶꦢ꧀ꦣꦁꦱꦤꦴꦪ ꦥꦲꦺꦴꦠꦶ, ꦨꦪꦴꦢꦶꦈꦥꦢ꧀ꦢꦮꦚ꧀ꦕ ꦤꦶꦮꦴꦫꦺꦠꦶ. ꦪꦡꦴꦲ ‘‘ꦥꦹꦗꦴꦫꦲꦺ ꦥꦹꦗꦪꦠꦺꦴ’’ꦠꦶꦄꦴꦢꦶ (ꦣ. ꦥ. ꧑꧙꧕; ꦄꦥ. ꦡꦺꦫ ꧑.꧑꧐.꧑), ꦠꦡꦴ ‘‘ꦪꦺ, ꦨꦶꦏ꧀ꦑꦮꦺ, ꦧꦸꦢ꧀ꦣꦺ ꦥꦱꦤ꧀ꦤꦴ, ꦄꦒ꧀ꦒꦺ ꦠꦺ ꦥꦱꦤ꧀ꦤꦴ, ꦄꦒ꧀ꦒꦺ ꦑꦺꦴ ꦥꦤ ꦥꦱꦤ꧀ꦤꦴꦤꦁ ꦄꦒ꧀ꦒꦺꦴ ꦮꦶꦥꦴꦏꦺꦴ ꦲꦺꦴꦠꦷ’’ꦠꦶꦄꦴꦢꦶ (ꦆꦠꦶꦮꦸ. ꧙꧐).

‘‘ꦧꦸꦢ꧀ꦣꦺꦴꦠꦶ ꦏꦶꦠ꧀ꦠꦪꦤ꧀ꦠꦱ꧀ꦱ, ꦏꦴꦪꦺ ꦨꦮꦠꦶ ꦪꦴ ꦥꦷꦠꦶ;

ꦮꦫꦩꦺꦮ ꦲꦶ ꦱꦴ ꦥꦷꦠꦶ, ꦏꦱꦶꦟꦺꦤꦥꦶ ꦗꦩ꧀ꦧꦸꦢꦷꦥꦱ꧀ꦱ;

ꦣꦩ꧀ꦩꦺꦴꦠꦶ…ꦥꦺ…, ꦱꦔ꧀ꦓꦺꦴꦠꦶ…ꦥꦺ…, ꦗꦩ꧀ꦧꦸꦢꦷꦥꦱ꧀ꦱꦴ’’ꦠꦶ. (ꦢꦷ. ꦤꦶ. ꦄꦛ꧀ꦜ. ꧑.꧖);

ꦠꦡꦴ ‘‘ꦪꦱ꧀ꦩꦶꦁ, ꦩꦲꦴꦤꦴꦩ, ꦱꦩꦪꦺ ꦄꦫꦶꦪꦱꦴꦮꦏꦺꦴ ꦠꦡꦴꦒꦠꦁ ꦄꦤꦸꦱ꧀ꦱꦫꦠꦶ, ꦤꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦫꦴꦒꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦢꦺꦴꦱ…ꦥꦺ… ꦤ ꦩꦺꦴꦲꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦷ’’ꦠꦶꦄꦴꦢꦶ (ꦄ. ꦤꦶ. ꧖.꧑꧐; ꧑꧑.꧑꧑). ‘‘ꦄꦫꦚ꧀ꦚꦺ ꦫꦸꦏ꧀ꦑꦩꦹꦭꦺ ꦮꦴ…ꦥꦺ… ꦨꦪꦁ ꦮꦴ ꦖꦩ꧀ꦨꦶꦠꦠ꧀ꦠꦁ ꦮꦴ ꦭꦺꦴꦩꦲꦁꦱꦺꦴ ꦤ ꦲꦺꦱ꧀ꦱꦠꦷ’’ꦠꦶ (ꦱꦁ. ꦤꦶ. ꧑.꧒꧔꧙) ꦕ.

ꦠꦠ꧀ꦡ ꦪꦱ꧀ꦱ ꦮꦠ꧀ꦡꦸꦠ꧀ꦠꦪꦱ꧀ꦱ ꦮꦤ꧀ꦢꦤꦁ ꦏꦠ꧀ꦠꦸꦏꦴꦩꦺꦴ, ꦠꦱ꧀ꦱ ꦒꦸꦟꦴꦠꦶꦱꦪꦪꦺꦴꦒꦱꦤ꧀ꦢꦱ꧀ꦱꦤꦠ꧀ꦡꦁ ‘‘ꦏꦫꦸꦟꦴꦱꦷꦠꦭꦲꦢꦪ’’ꦤ꧀ꦠꦶꦄꦴꦢꦶꦤꦴ ꦒꦴꦡꦠ꧀ꦠꦪꦩꦴꦲ. ꦒꦸꦟꦴꦠꦶꦱꦪꦪꦺꦴꦒꦺꦤ ꦲꦶ ꦮꦤ꧀ꦢꦤꦴꦫꦲꦨꦴꦮꦺꦴ, ꦮꦤ꧀ꦢꦤꦴꦫꦲꦺ ꦕ ꦏꦠꦴ ꦮꦤ꧀ꦢꦤꦴ ꦪꦡꦴꦣꦶꦥ꧀ꦥꦺꦠꦁ ꦥꦪꦺꦴꦗꦤꦁ ꦱꦴꦣꦺꦠꦷꦠꦶ. ꦠꦠ꧀ꦡ ꦪꦱ꧀ꦱꦴ ꦢꦺꦱꦤꦴꦪ ꦱꦁꦮꦟ꧀ꦟꦤꦁ ꦏꦠ꧀ꦠꦸꦏꦴꦩꦺꦴ, ꦱꦴ ꦤ ꦮꦶꦤꦪꦢꦺꦱꦤꦴ ꦮꦶꦪ ꦏꦫꦸꦟꦴꦥ꧀ꦥꦣꦴꦤꦴ, ꦤꦴꦥꦶ ꦄꦨꦶꦣꦩ꧀ꦩꦢꦺꦱꦤꦴ ꦮꦶꦪ ꦥꦚ꧀ꦚꦴꦥ꧀ꦥꦣꦴꦤꦴ, ꦄꦡ ꦑꦺꦴ ꦏꦫꦸꦟꦴꦥꦚ꧀ꦚꦴꦥ꧀ꦥꦣꦴꦤꦴꦠꦶ ꦠꦢꦸꦨꦪꦥ꧀ꦥꦣꦴꦤꦩꦺꦮ ꦠꦴꦮ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦡꦺꦴꦩꦤꦁ ꦏꦴꦠꦸꦁ ꦠꦩ꧀ꦩꦹꦭꦏꦠ꧀ꦠꦴ ꦱꦺꦱꦫꦠꦤꦴꦤꦁ ‘‘ꦏꦫꦸꦟꦴꦱꦷꦠꦭꦲꦢꦪ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦏꦶꦫꦠꦷꦠꦶ ꦏꦫꦸꦟꦴ, ꦥꦫꦢꦸꦏ꧀ꦑꦁ ꦮꦶꦏ꧀ꦑꦶꦥꦠꦶ ꦄꦥꦤꦺꦠꦷꦠꦶ ꦄꦠ꧀ꦡꦺꦴ. ꦄꦡ ꦮꦴ ꦏꦶꦟꦴꦠꦷꦠꦶ ꦏꦫꦸꦟꦴ, ꦥꦫꦢꦸꦏ꧀ꦑꦺ ꦱꦠꦶ ꦏꦴꦫꦸꦟꦶꦏꦁ ꦲꦶꦁꦱꦠꦶ ꦮꦶꦧꦴꦣꦠꦷꦠꦶ ꦄꦠ꧀ꦡꦺꦴ. ꦥꦫꦢꦸꦏ꧀ꦑꦺ ꦱꦠꦶ ꦱꦴꦣꦹꦤꦁ ꦏꦩ꧀ꦥꦤꦁ ꦲꦢꦪꦑꦺꦢꦁ ꦏꦫꦺꦴꦠꦷꦠꦶ ꦮꦴ ꦏꦫꦸꦟꦴ. ꦄꦡ ꦮꦴ ꦏꦩꦶꦠꦶ ꦱꦸꦑꦁ, ꦠꦁ ꦫꦸꦤ꧀ꦣꦠꦷꦠꦶ ꦏꦫꦸꦟꦴ. ꦌꦱꦴ ꦲꦶ ꦥꦫꦢꦸꦏ꧀ꦑꦴꦥꦤꦪꦤꦏꦴꦩꦠꦴꦭꦏ꧀ꦑꦟꦴ ꦄꦠ꧀ꦠꦱꦸꦑꦤꦶꦫꦥꦺꦏ꧀ꦑꦠꦴꦪ ꦏꦴꦫꦸꦟꦶꦏꦴꦤꦁ ꦱꦸꦑꦁ ꦫꦸꦤ꧀ꦣꦠꦶ ꦮꦶꦧꦤ꧀ꦣꦠꦷꦠꦶ ꦄꦠ꧀ꦡꦺꦴ. ꦏꦫꦸꦟꦴꦪ ꦱꦷꦠꦭꦁ ꦏꦫꦸꦟꦴꦱꦷꦠꦭꦁ, ꦏꦫꦸꦟꦴꦱꦷꦠꦭꦁ ꦲꦢꦪꦁ ꦄꦱ꧀ꦱꦴꦠꦶ ꦏꦫꦸꦟꦴꦱꦷꦠꦭꦲꦢꦪꦺꦴ, ꦠꦁ ꦏꦫꦸꦟꦴꦱꦷꦠꦭꦲꦢꦪꦁ.

ꦠꦠ꧀ꦡ ꦏꦶꦚ꧀ꦕꦴꦥꦶ ꦥꦫꦺꦱꦁ ꦲꦶꦠꦺꦴꦥꦱꦁꦲꦴꦫꦱꦸꦑꦴꦢꦶꦄꦥꦫꦶꦲꦴꦤꦶꦕ꧀ꦖꦤꦱꦨꦴꦮꦠꦴꦪ, ꦧ꧀ꦪꦴꦥꦴꦢꦴꦫꦠꦷꦤꦁ ꦈꦗꦸꦮꦶꦥꦕ꧀ꦕꦤꦷꦏꦠꦴꦪ ꦕ ꦱꦠ꧀ꦠꦱꦤ꧀ꦠꦴꦤꦒꦠꦱꦤ꧀ꦠꦴꦥꦮꦶꦕ꧀ꦖꦺꦢꦤꦴꦏꦴꦫꦥꦮꦠ꧀ꦠꦶꦪꦴ ꦩꦺꦠ꧀ꦠꦴꦩꦸꦢꦶꦠꦴꦤꦩ꧀ꦥꦶ ꦕꦶꦠ꧀ꦠꦱꦷꦠꦭꦨꦴꦮꦏꦴꦫꦟꦠꦴ ꦈꦥꦭꦧ꧀ꦨꦠꦶ, ꦠꦡꦴꦥꦶ ꦥꦫꦢꦸꦏ꧀ꦑꦴꦥꦤꦪꦤꦴꦏꦴꦫꦥ꧀ꦥꦮꦠ꧀ꦠꦶꦪꦴ ꦥꦫꦹꦥꦠꦴꦥꦴꦱꦲꦤꦫꦱꦴ ꦄꦮꦶꦲꦶꦁꦱꦴꦨꦹꦠꦴ ꦏꦫꦸꦟꦴꦮ ꦮꦶꦱꦺꦱꦺꦤ ꦨꦒꦮꦠꦺꦴ ꦕꦶꦠ꧀ꦠꦱ꧀ꦱ ꦕꦶꦠ꧀ꦠꦥꦱ꧀ꦱꦢ꧀ꦣꦶ ꦮꦶꦪ ꦱꦷꦠꦶꦨꦴꦮꦤꦶꦩꦶꦠ꧀ꦠꦤ꧀ꦠꦶ ꦮꦸꦠ꧀ꦠꦁ ‘‘ꦏꦫꦸꦟꦴꦱꦷꦠꦭꦲꦢꦪ’’ꦤ꧀ꦠꦶ. ꦏꦫꦸꦟꦴꦩꦸꦑꦺꦤ ꦮꦴ ꦩꦺꦠ꧀ꦠꦴꦩꦸꦢꦶꦠꦴꦤꦩ꧀ꦥꦶ ꦲꦢꦪꦱꦷꦠꦭꦨꦴꦮꦏꦴꦫꦟꦠꦴ ꦮꦸꦠ꧀ꦠꦴꦠꦶ ꦢꦛ꧀ꦜꦧ꧀ꦧꦴ.

ꦄꦡ ꦮꦴ ꦖꦄꦱꦴꦣꦴꦫꦟꦚꦴꦟꦮꦶꦱꦺꦱꦤꦶꦧꦤ꧀ꦣꦤꦨꦹꦠꦴ ꦱꦴꦠꦶꦱꦪꦁ ꦤꦶꦫꦮꦱꦺꦱꦚ꧀ꦕ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ ꦮꦶꦪ ꦱꦮꦶꦱꦪꦧ꧀ꦪꦴꦥꦶꦠꦴꦪ ꦩꦲꦴꦏꦫꦸꦟꦴꦨꦴꦮꦩꦸꦥꦒꦠꦴ ꦏꦫꦸꦟꦴꦮ ꦨꦒꦮꦠꦺꦴ ꦄꦨꦶꦱꦪꦺꦤ ꦲꦢꦪꦱꦷꦠꦭꦨꦴꦮꦲꦺꦠꦹꦠꦶ ꦄꦴꦲ ‘‘ꦏꦫꦸꦟꦴꦱꦷꦠꦭꦲꦢꦪ’’ꦤ꧀ꦠꦶ.

ꦄꦡ ꦮꦴ ꦱꦠꦶꦥꦶ ꦩꦺꦠ꧀ꦠꦴꦩꦸꦢꦶꦠꦴꦤꦁ ꦱꦴꦠꦶꦱꦪꦺ ꦲꦢꦪꦱꦷꦠꦶꦨꦴꦮꦤꦶꦧꦤ꧀ꦣꦤꦠ꧀ꦠꦺ ꦱꦏꦭꦧꦸꦢ꧀ꦣꦒꦸꦟꦮꦶꦱꦺꦱꦏꦴꦫꦟꦠꦴꦪ ꦠꦴꦱꦩ꧀ꦥꦶ ꦏꦴꦫꦟꦤ꧀ꦠꦶ ꦏꦫꦸꦟꦴꦮ ꦨꦒꦮꦠꦺꦴ ‘‘ꦲꦢꦪꦱꦷꦠꦭꦨꦴꦮꦏꦴꦫꦟ’’ꦤ꧀ꦠꦶ ꦮꦸꦠ꧀ꦠꦴ. ꦏꦫꦸꦟꦴꦤꦶꦢꦴꦤꦴ ꦲꦶ ꦱꦧ꧀ꦧꦺꦥꦶ ꦧꦸꦢ꧀ꦣꦒꦸꦟꦴ, ꦏꦫꦸꦟꦴꦤꦸꦨꦴꦮꦤꦶꦧ꧀ꦧꦴꦥꦶꦪꦩꦴꦤꦱꦁꦱꦴꦫꦢꦸꦏ꧀ꦑꦱꦤ꧀ꦠꦴꦥꦱ꧀ꦱ ꦲꦶ ꦨꦒꦮꦠꦺꦴ ꦥꦫꦢꦸꦏ꧀ꦑꦴꦥꦤꦪꦤꦏꦴꦩꦠꦴꦪ ꦄꦤꦺꦏꦴꦤꦶꦥꦶ ꦄꦱꦔ꧀ꦑ꧀ꦪꦺꦪ꧀ꦪꦴꦤꦶ ꦏꦥ꧀ꦥꦴꦤꦁ ꦄꦏꦶꦭꦤ꧀ꦠꦫꦹꦥꦱ꧀ꦱꦺꦮ ꦤꦶꦫꦮꦱꦺꦱꦧꦸꦢ꧀ꦣꦏꦫꦣꦩ꧀ꦩꦱꦩ꧀ꦨꦫꦟꦤꦶꦪꦠꦱ꧀ꦱ ꦱꦩꦣꦶꦒꦠꦣꦩ꧀ꦩꦴꦣꦶꦥꦠꦺꦪ꧀ꦪꦱ꧀ꦱ ꦕ ꦱꦤ꧀ꦤꦶꦲꦶꦠꦺꦱꦸꦥꦶ ꦱꦠ꧀ꦠꦱꦔ꧀ꦓꦴꦛꦱꦩꦸꦥꦤꦷꦠꦲꦢꦪꦹꦥꦠꦴꦥꦤꦶꦩꦶꦠ꧀ꦠꦺꦱꦸ ꦤ ꦇꦱꦏꦩ꧀ꦥꦶ ꦕꦶꦠ꧀ꦠꦱꦷꦠꦶꦨꦴꦮꦱ꧀ꦱ ꦄꦚ꧀ꦚꦡꦠ꧀ꦠꦩꦲꦺꦴꦱꦷꦠꦶ. ꦌꦠꦱ꧀ꦩꦶꦚ꧀ꦕ ꦄꦠ꧀ꦡꦮꦶꦏꦥ꧀ꦥꦺ ꦠꦷꦱꦸꦥꦶ ꦄꦮꦠ꧀ꦡꦴꦱꦸ ꦨꦒꦮꦠꦺꦴ ꦏꦫꦸꦟꦴ ꦱꦔ꧀ꦒꦲꦶꦠꦴꦠꦶ ꦢꦛ꧀ꦜꦧ꧀ꦧꦴ.

ꦥꦗꦴꦤꦴꦠꦷꦠꦶ ꦥꦚ꧀ꦚꦴ, ꦪꦡꦴꦱꦨꦴꦮꦁ ꦥꦏꦴꦫꦺꦲꦶ ꦥꦛꦶꦮꦶꦗ꧀ꦙꦠꦷꦠꦶ ꦄꦠ꧀ꦡꦺꦴ. ꦥꦚ꧀ꦚꦴꦮ ꦚꦺꦪ꧀ꦪꦴꦮꦫꦟꦥ꧀ꦥꦲꦴꦤꦠꦺꦴ ꦥꦏꦴꦫꦺꦲꦶ ꦣꦩ꧀ꦩꦱꦨꦴꦮꦗꦺꦴꦠꦤꦛ꧀ꦜꦺꦤ ꦥꦗ꧀ꦗꦺꦴꦠꦺꦴꦠꦶ ꦥꦚ꧀ꦚꦴꦥꦗ꧀ꦗꦺꦴꦠꦺꦴ. ꦱꦮꦴꦱꦤꦥ꧀ꦥꦲꦴꦤꦠꦺꦴ ꦮꦶꦱꦺꦱꦺꦤ ꦲꦠꦁ ꦱꦩꦸꦒ꧀ꦓꦴꦛꦶꦠꦁ ꦮꦶꦲꦠꦁ. ꦥꦚ꧀ꦚꦴꦥꦗ꧀ꦗꦺꦴꦠꦺꦤ ꦮꦶꦲꦠꦁ ꦥꦚ꧀ꦚꦴꦥꦗ꧀ꦗꦺꦴꦠꦮꦶꦲꦠꦁ. ꦩꦸꦪ꧀ꦲꦤ꧀ꦠꦶ ꦠꦺꦤ, ꦱꦪꦁ ꦮꦴ ꦩꦸꦪ꧀ꦲꦠꦶ, ꦩꦺꦴꦲꦤꦩꦠ꧀ꦠꦩꦺꦮ ꦮꦴ ꦠꦤ꧀ꦠꦶ ꦩꦺꦴꦲꦺꦴ, ꦄꦮꦶꦗ꧀ꦗꦴ. ꦱ꧀ꦮꦺꦮ ꦮꦶꦱꦪꦱꦨꦴꦮꦥꦛꦶꦕ꧀ꦖꦴꦢꦤꦏꦫꦟꦠꦺꦴ ꦄꦤ꧀ꦣꦏꦴꦫꦱꦫꦶꦏ꧀ꦑꦠꦴꦪ ꦠꦩꦺꦴ ꦮꦶꦪꦴꦠꦶ ꦠꦩꦺꦴ. ꦥꦚ꧀ꦚꦴꦥꦗ꧀ꦗꦺꦴꦠꦮꦶꦲꦠꦺꦴ ꦩꦺꦴꦲꦠꦩꦺꦴ ꦌꦠꦱ꧀ꦱꦴꦠꦶ ꦥꦚ꧀ꦚꦴꦥꦗ꧀ꦗꦺꦴꦠꦮꦶꦲꦠꦩꦺꦴꦲꦠꦩꦺꦴ, ꦠꦁ ꦥꦚ꧀ꦚꦴꦥꦗ꧀ꦗꦺꦴꦠꦮꦶꦲꦠꦩꦺꦴꦲꦠꦩꦁ. ꦱꦧ꧀ꦧꦺꦱꦩ꧀ꦥꦶ ꦲꦶ ꦑꦷꦟꦴꦱꦮꦴꦤꦁ ꦱꦠꦶꦥꦶ ꦥꦚ꧀ꦚꦴꦥꦗ꧀ꦗꦺꦴꦠꦺꦤ ꦄꦮꦶꦗ꧀ꦗꦤ꧀ꦣꦏꦴꦫꦱ꧀ꦱ ꦮꦶꦲꦠꦨꦴꦮꦺ ꦱꦢ꧀ꦣꦴꦣꦶꦩꦸꦠ꧀ꦠꦺꦲꦶ ꦮꦶꦪ ꦢꦶꦛ꧀ꦜꦶꦥ꧀ꦥꦠ꧀ꦠꦴꦤꦁ ꦱꦴꦮꦏꦺꦲꦶ ꦥꦕ꧀ꦕꦺꦏꦱꦩ꧀ꦧꦸꦢ꧀ꦣꦺꦲꦶ ꦕ ꦱꦮꦴꦱꦤꦥ꧀ꦥꦲꦴꦤꦺꦤ ꦱꦩ꧀ꦩꦴꦱꦩ꧀ꦧꦸꦢ꧀ꦣꦴꦤꦁ ꦏꦶꦭꦺꦱꦥ꧀ꦥꦲꦴꦤꦱ꧀ꦱ ꦮꦶꦱꦺꦱꦺꦴ ꦮꦶꦗ꧀ꦗꦠꦷꦠꦶ ꦱꦴꦠꦶꦱꦪꦺꦤ ꦄꦮꦶꦗ꧀ꦗꦴꦥ꧀ꦥꦲꦴꦤꦺꦤ ꦨꦒꦮꦤ꧀ꦠꦁ ꦡꦺꦴꦩꦺꦤ꧀ꦠꦺꦴ ꦄꦴꦲ ‘‘ꦥꦚ꧀ꦚꦴꦥꦗ꧀ꦗꦺꦴꦠꦮꦶꦲꦠꦩꦺꦴꦲꦠꦩ’’ꦤ꧀ꦠꦶ.

ꦄꦡ ꦮꦴ ꦄꦤ꧀ꦠꦫꦺꦤ ꦥꦫꦺꦴꦥꦢꦺꦱꦁ ꦄꦠ꧀ꦠꦤꦺꦴ ꦱꦤ꧀ꦠꦴꦤꦺ ꦄꦕ꧀ꦕꦤ꧀ꦠꦁ ꦄꦮꦶꦗ꧀ꦗꦤ꧀ꦣꦏꦴꦫꦮꦶꦒꦩꦱ꧀ꦱ ꦤꦶꦧ꧀ꦧꦠ꧀ꦠꦶꦠꦠ꧀ꦠꦴ, ꦠꦡꦴ ꦱꦧ꧀ꦧꦚ꧀ꦚꦸꦠꦴꦪ ꦧꦭꦺꦱꦸ ꦕ ꦮꦱꦷꦨꦴꦮꦱ꧀ꦱ ꦱꦩꦣꦶꦒꦠꦠ꧀ꦠꦴ, ꦥꦫꦱꦤ꧀ꦠꦠꦶꦪꦚ꧀ꦕ ꦣꦩ꧀ꦩꦢꦺꦱꦤꦴꦠꦶꦱꦪꦴꦤꦸꦨꦴꦮꦺꦤ ꦱꦩ꧀ꦩꦢꦺꦮ ꦠꦱ꧀ꦱ ꦥꦮꦠ꧀ꦠꦶꦠꦠ꧀ꦠꦴ ꦨꦒꦮꦴꦮ ꦮꦶꦱꦺꦱꦠꦺꦴ ꦩꦺꦴꦲꦠꦩꦮꦶꦒꦩꦺꦤ ꦡꦺꦴꦩꦺꦠꦧ꧀ꦧꦺꦴꦠꦶ ꦄꦴꦲ ‘‘ꦥꦚ꧀ꦚꦴꦥꦗ꧀ꦗꦺꦴꦠꦮꦶꦲꦠꦩꦺꦴꦲꦠꦩ’’ꦤ꧀ꦠꦶ. ꦆꦩꦱ꧀ꦩꦶꦚ꧀ꦕ ꦄꦠ꧀ꦡꦮꦶꦏꦥ꧀ꦥꦺ ‘‘ꦥꦚ꧀ꦚꦴꦥꦗ꧀ꦗꦺꦴꦠꦺꦴ’’ꦠꦶ ꦥꦢꦺꦤ ꦨꦒꦮꦠꦺꦴ ꦥꦛꦶꦮꦺꦣꦥꦚ꧀ꦚꦴ ꦮꦶꦪ ꦢꦺꦱꦤꦴꦥꦚ꧀ꦚꦴꦥꦶ ꦱꦴꦩꦚ꧀ꦚꦤꦶꦢ꧀ꦢꦺꦱꦺꦤ, ꦌꦏꦱꦺꦱꦤꦪꦺꦤ ꦮꦴ ꦱꦔ꧀ꦒꦲꦶꦠꦴꦠꦶ ꦢꦛ꧀ꦜꦧ꧀ꦧꦴ.

ꦄꦡ ꦮꦴ ꦨꦒꦮꦠꦺꦴ ꦚꦴꦟꦱ꧀ꦱ ꦚꦺꦪ꧀ꦪꦥꦫꦶꦪꦤ꧀ꦠꦶꦏꦠ꧀ꦠꦴ ꦱꦏꦭꦚꦺꦪ꧀ꦪꦣꦩ꧀ꦩꦱꦨꦴꦮꦴꦮꦧꦺꦴꦣꦤꦱꦩꦠ꧀ꦡꦺꦤ ꦄꦤꦴꦮꦫꦟꦚꦴꦟꦱꦔ꧀ꦑꦴꦠꦺꦤ ꦥꦚ꧀ꦚꦴꦥꦗ꧀ꦗꦺꦴꦠꦺꦤ ꦱꦧ꧀ꦧꦚꦺꦪ꧀ꦪꦣꦩ꧀ꦩꦱꦨꦴꦮꦕ꧀ꦖꦴꦢꦏꦱ꧀ꦱ ꦩꦺꦴꦲꦤ꧀ꦣꦏꦴꦫꦱ꧀ꦱ ꦮꦶꦣꦩꦶꦠꦠ꧀ꦠꦴ ꦄꦤꦚ꧀ꦚꦱꦴꦣꦴꦫꦟꦺꦴ ꦨꦒꦮꦠꦺꦴ ꦩꦺꦴꦲꦠꦩꦮꦶꦤꦴꦱꦺꦴꦠꦶ ꦏꦠ꧀ꦮꦴ ꦮꦸꦠ꧀ꦠꦁ ‘‘ꦥꦚ꧀ꦚꦴꦥꦗ꧀ꦗꦺꦴꦠꦮꦶꦲꦠꦩꦺꦴꦲꦠꦩ’’ꦤ꧀ꦠꦶ. ꦌꦠ꧀ꦡ ꦕ ꦩꦺꦴꦲꦠꦩꦮꦶꦣꦩꦤꦤ꧀ꦠꦺ ꦄꦣꦶꦒꦠꦠ꧀ꦠꦴ ꦄꦤꦴꦮꦫꦟꦚꦴꦟꦁ ꦏꦴꦫꦟꦹꦥꦕꦴꦫꦺꦤ ꦱꦱꦤ꧀ꦠꦴꦤꦺ ꦩꦺꦴꦲꦠꦩꦮꦶꦣꦩꦤꦤ꧀ꦠꦶ ꦢꦛ꧀ꦜꦧ꧀ꦧꦁ. ꦄꦨꦶꦤꦷꦲꦴꦫꦱꦩ꧀ꦥꦠ꧀ꦠꦶꦪꦴ ꦱꦮꦴꦱꦤꦥ꧀ꦥꦲꦴꦤꦩꦺꦮ ꦲꦶ ꦏꦶꦭꦺꦱꦴꦤꦁ ꦚꦺꦪ꧀ꦪꦴꦮꦫꦟꦥꦲꦴꦤꦤ꧀ꦠꦶ, ꦥꦫꦱꦤ꧀ꦠꦴꦤꦺ ꦥꦤ ꦩꦺꦴꦲꦠꦩꦮꦶꦣꦩꦤꦱ꧀ꦱ ꦏꦴꦫꦟꦨꦴꦮꦠꦺꦴ ꦦꦭꦹꦥꦕꦴꦫꦺꦤ ꦄꦤꦴꦮꦫꦟꦚꦴꦟꦁ ‘‘ꦩꦺꦴꦲꦠꦩꦮꦶꦣꦩꦤ’’ꦤ꧀ꦠꦶ ꦮꦸꦕ꧀ꦕꦠꦷꦠꦶ.

ꦏꦶꦁ ꦥꦤ ꦏꦴꦫꦟꦁ ꦄꦮꦶꦗ꧀ꦗꦴꦱꦩꦸꦒ꧀ꦓꦴꦠꦺꦴꦪꦺꦮꦺꦏꦺꦴ ꦥꦲꦴꦤꦱꦩ꧀ꦥꦠ꧀ꦠꦶꦮꦱꦺꦤ ꦨꦒꦮꦠꦺꦴ ꦡꦺꦴꦩꦤꦴꦤꦶꦩꦶꦠ꧀ꦠꦁ ꦒꦪ꧀ꦲꦠꦶ, ꦤ ꦥꦤ ꦱꦴꦠꦶꦱꦪꦁ ꦤꦶꦫꦮꦱꦺꦱꦏꦶꦭꦺꦱꦥꦲꦴꦤꦤ꧀ꦠꦶ? ꦠꦥ꧀ꦥꦲꦴꦤꦮꦕꦤꦺꦤꦺꦮ ꦠꦢꦺꦏꦛ꧀ꦜꦠꦴꦪ ꦱꦏꦭꦱꦁꦏꦶꦭꦺꦱꦒꦟꦱꦩꦸꦒ꧀ꦓꦴꦠꦱ꧀ꦱ ꦗꦺꦴꦠꦶꦠꦨꦴꦮꦠꦺꦴ. ꦤ ꦲꦶ ꦱꦺꦴ ꦠꦴꦢꦶꦱꦺꦴ ꦏꦶꦭꦺꦱꦺꦴ ꦄꦠ꧀ꦡꦶ, ꦪꦺꦴ ꦤꦶꦫꦮꦱꦺꦱꦄꦮꦶꦗ꧀ꦗꦴꦥ꧀ꦥꦲꦴꦤꦺꦤ ꦤ ꦥꦲꦷꦪꦠꦷꦠꦶ.

ꦄꦡ ꦮꦴ ꦮꦶꦗ꧀ꦗꦴ ꦮꦶꦪ ꦱꦏꦭꦏꦸꦱꦭꦣꦩ꧀ꦩꦱꦩꦸꦥ꧀ꦥꦠ꧀ꦠꦶꦪꦴ ꦤꦶꦫꦮꦱꦺꦱꦴꦏꦸꦱꦭꦣꦩ꧀ꦩꦤꦶꦧ꧀ꦧꦠ꧀ꦠꦶꦪꦴ ꦱꦁꦱꦴꦫꦥ꧀ꦥꦮꦠ꧀ꦠꦶꦪꦴ ꦕ ꦄꦮꦶꦗ꧀ꦗꦴ ꦥꦣꦴꦤꦏꦴꦫꦟꦤ꧀ꦠꦶ ꦠꦧ꧀ꦧꦶꦓꦴꦠꦮꦕꦤꦺꦤ ꦱꦏꦭꦱꦁꦏꦶꦭꦺꦱꦒꦟꦱꦩꦸꦒ꧀ꦓꦴꦠꦺꦴ ꦮꦸꦠ꧀ꦠꦺꦴ ꦌꦮ ꦲꦺꦴꦠꦷꦠꦶ ꦮꦸꦠ꧀ꦠꦁ ‘‘ꦥꦚ꧀ꦚꦴꦥꦗ꧀ꦗꦺꦴꦠꦮꦶꦲꦠꦩꦺꦴꦲꦠꦩ’’ꦤ꧀ꦠꦶ.

ꦤꦫꦴ ꦕ ꦄꦩꦫꦴ ꦕ ꦤꦫꦴꦩꦫꦴ, ꦱꦲ ꦤꦫꦴꦩꦫꦺꦲꦷꦠꦶ ꦱꦤꦫꦴꦩꦫꦺꦴ, ꦱꦤꦫꦴꦩꦫꦺꦴ ꦕ ꦱꦺꦴ ꦭꦺꦴꦏꦺꦴ ꦕꦴꦠꦶ ꦱꦤꦫꦴꦩꦫꦭꦺꦴꦏꦺꦴ, ꦠꦱ꧀ꦱ ꦒꦫꦹꦠꦶ ꦱꦤꦫꦴꦩꦫꦭꦺꦴꦏꦒꦫꦸ, ꦠꦁ ꦱꦤꦫꦴꦩꦫꦭꦺꦴꦏꦒꦫꦸꦁ. ꦌꦠꦺꦤ ꦢꦺꦮꦩꦤꦸꦱ꧀ꦱꦴꦤꦁ ꦮꦶꦪ ꦠꦢꦮꦱꦶꦛ꧀ꦜꦱꦠ꧀ꦠꦴꦤꦩ꧀ꦥꦶ ꦪꦡꦴꦫꦲꦁ ꦒꦸꦟꦮꦶꦱꦺꦱꦴꦮꦲꦠꦴꦪ ꦨꦒꦮꦠꦺꦴ ꦈꦥꦏꦴꦫꦠꦁ ꦢꦱ꧀ꦱꦺꦠꦶ. ꦤ ꦕꦺꦠ꧀ꦡ ꦥꦣꦴꦤꦴꦥ꧀ꦥꦣꦴꦤꦨꦴꦮꦺꦴ ꦕꦺꦴꦢꦺꦠꦧ꧀ꦧꦺꦴ. ꦄꦚ꧀ꦚꦺꦴ ꦲꦶ ꦱꦢ꧀ꦢꦏ꧀ꦏꦩꦺꦴ, ꦄꦚ꧀ꦚꦺꦴ ꦄꦠ꧀ꦡꦏ꧀ꦏꦩꦺꦴ. ꦌꦢꦶꦱꦺꦱꦸ ꦲꦶ ꦱꦩꦴꦱꦥꦢꦺꦱꦸ ꦥꦣꦴꦤꦩ꧀ꦥꦶ ꦄꦥ꧀ꦥꦣꦴꦤꦁ ꦮꦶꦪ ꦤꦶꦢ꧀ꦢꦶꦱꦷꦪꦠꦶ ꦪꦡꦴ ‘‘ꦱꦫꦴꦗꦶꦏꦴꦪ ꦥꦫꦶꦱꦴꦪꦴ’’ꦠꦶ (ꦄꦥ. ꦄꦛ꧀ꦜ. ꧑.꧑.꧘꧒). ꦏꦴꦩꦚ꧀ꦕꦺꦠ꧀ꦡ ꦱꦠ꧀ꦠꦱꦔ꧀ꦑꦴꦫꦺꦴꦏꦴꦱꦮꦱꦺꦤ ꦠꦶꦮꦶꦣꦺꦴ ꦭꦺꦴꦏꦺꦴ, ꦒꦫꦸꦨꦴꦮꦱ꧀ꦱ ꦥꦤ ꦄꦣꦶꦥ꧀ꦥꦺꦠꦠ꧀ꦠꦴ ꦒꦫꦸꦏꦫꦟꦱꦩꦠ꧀ꦡꦱ꧀ꦱꦺꦮ ꦱꦠ꧀ꦠꦭꦺꦴꦏꦱ꧀ꦱ ꦮꦱꦺꦤ ꦄꦠ꧀ꦡꦺꦴ ꦒꦲꦺꦠꦧ꧀ꦧꦺꦴ. ꦱꦺꦴ ꦲꦶ ꦭꦺꦴꦏꦷꦪꦤ꧀ꦠꦶ ꦌꦠ꧀ꦡ ꦥꦸꦚ꧀ꦚꦥꦴꦥꦴꦤꦶ ꦠꦧ꧀ꦧꦶꦥꦴꦏꦺꦴ ꦕꦴꦠꦶ ‘‘ꦭꦺꦴꦏꦺꦴ’’ꦠꦶ ꦮꦸꦕ꧀ꦕꦠꦶ. ꦄꦩꦫꦒ꧀ꦒꦲꦟꦺꦤ ꦕꦺꦠ꧀ꦡ ꦈꦥꦥꦠ꧀ꦠꦶꦢꦺꦮꦴ ꦄꦣꦶꦥ꧀ꦥꦺꦠꦴ.

ꦄꦡ ꦮꦴ ꦱꦩꦹꦲꦠ꧀ꦡꦺꦴ ꦭꦺꦴꦏ-ꦱꦢ꧀ꦢꦺꦴ ꦱꦩꦸꦢꦴꦪꦮꦱꦺꦤ ꦭꦺꦴꦏꦷꦪꦠꦶ ꦥꦚ꧀ꦚꦴꦥꦷꦪꦠꦷꦠꦶ. ꦱꦲ ꦤꦫꦺꦲꦷꦠꦶ ꦱꦤꦫꦴ, ꦱꦤꦫꦴ ꦕ ꦠꦺ ꦄꦩꦫꦴ ꦕꦴꦠꦶ ꦱꦤꦫꦴꦩꦫꦴ, ꦠꦺꦱꦁ ꦭꦺꦴꦏꦺꦴꦠꦶ ꦱꦤꦫꦴꦩꦫꦭꦺꦴꦏꦺꦴꦠꦶ ꦥꦸꦫꦶꦩꦤꦪꦺꦤꦺꦮ ꦪꦺꦴꦗꦺꦠꦧ꧀ꦧꦁ. ꦄꦩꦫ-ꦱꦢ꧀ꦢꦺꦤ ꦕꦺꦠ꧀ꦡ ꦮꦶꦱꦸꦢ꧀ꦣꦶꦢꦺꦮꦴꦥꦶ ꦱꦔ꧀ꦒꦪ꧀ꦲꦤ꧀ꦠꦶ. ꦠꦺ ꦲꦶ ꦩꦫꦟꦴꦨꦴꦮꦠꦺꦴ ꦥꦫꦩꦠ꧀ꦡꦠꦺꦴ ꦄꦩꦫꦴ, ꦤꦫꦴꦩꦫꦴꦤꦁꦪꦺꦮ ꦒꦲꦟꦁ ꦈꦏ꧀ꦏꦛ꧀ꦜꦤꦶꦢ꧀ꦢꦺꦱꦮꦱꦺꦤ ꦪꦡꦴ ‘‘ꦱꦠ꧀ꦡꦴ ꦢꦺꦮꦩꦤꦸꦱ꧀ꦱꦴꦤ’’ꦤ꧀ꦠꦶ (ꦢꦷ. ꦤꦶ. ꧑.꧑꧕꧗). ꦠꦡꦴ ꦲꦶ ꦱꦧ꧀ꦧꦴꦤꦠ꧀ꦡꦥꦫꦶꦲꦫꦟꦥꦸꦧ꧀ꦧꦔ꧀ꦒꦩꦴꦪ ꦤꦶꦫꦮꦱꦺꦱꦲꦶꦠꦱꦸꦑꦮꦶꦣꦴꦤꦠꦥ꧀ꦥꦫꦴꦪ ꦤꦶꦫꦠꦶꦱꦪꦴꦪ ꦥꦪꦺꦴꦒꦱꦩ꧀ꦥꦠ꧀ꦠꦶꦪꦴ ꦱꦢꦺꦮꦩꦤꦸꦱ꧀ꦱꦴꦪ ꦥꦗꦴꦪ ꦄꦕ꧀ꦕꦤ꧀ꦠꦩꦸꦥꦏꦴꦫꦶꦠꦴꦪ ꦄꦥꦫꦶꦩꦶꦠꦤꦶꦫꦸꦥꦩꦥ꧀ꦥꦨꦴꦮꦒꦸꦟꦮꦶꦱꦺꦱꦱꦩꦔ꧀ꦒꦶꦠꦴꦪ ꦕ ꦱꦧ꧀ꦧꦱꦠ꧀ꦠꦸꦠ꧀ꦠꦩꦺꦴ ꦨꦒꦮꦴ ꦄꦥꦫꦶꦩꦴꦟꦴꦱꦸ ꦭꦺꦴꦏꦣꦴꦠꦹꦱꦸ ꦄꦥꦫꦶꦩꦴꦟꦴꦤꦁ ꦱꦠ꧀ꦠꦴꦤꦁ ꦈꦠ꧀ꦠꦩꦁ ꦒꦴꦫꦮꦛ꧀ꦜꦴꦤꦁ. ꦠꦺꦤ ꦮꦸꦠ꧀ꦠꦁ ‘‘ꦱꦤꦫꦴꦩꦫꦭꦺꦴꦏꦒꦫꦸ’’ꦤ꧀ꦠꦶ.

ꦱꦺꦴꦨꦤꦁ ꦒꦠꦁ ꦒꦩꦤꦁ ꦌꦠꦱ꧀ꦱꦴꦠꦶ ꦱꦸꦒꦠꦺꦴ. ꦨꦒꦮꦠꦺꦴ ꦲꦶ ꦮꦺꦤꦺꦪ꧀ꦪꦗꦤꦸꦥꦱꦔ꧀ꦏꦩꦤꦁ ꦌꦏꦤ꧀ꦠꦺꦤ ꦠꦺꦱꦁ ꦲꦶꦠꦱꦸꦑꦤꦶꦥ꧀ꦦꦴꦢꦤꦠꦺꦴ ꦱꦺꦴꦨꦤꦁ, ꦠꦡꦴ ꦭꦏ꧀ꦑꦟꦴꦤꦸꦧ꧀ꦪꦚ꧀ꦗꦤꦥꦛꦶꦩꦟ꧀ꦝꦶꦠꦫꦹꦥꦏꦴꦪꦠꦴꦪ ꦢꦸꦠꦮꦶꦭꦩ꧀ꦧꦶꦠꦑꦭꦶꦠꦴꦤꦸꦏꦝ꧀ꦞꦤꦤꦶꦥ꧀ꦥꦷꦭ꦳ꦤꦸꦏ꧀ꦏꦸꦛꦶꦏꦏꦸꦛꦶꦭꦴꦏꦸꦭꦠꦴꦢꦶ- ꦢꦺꦴꦱꦫꦲꦶꦠꦩꦮꦲꦱꦶꦠꦫꦴꦗꦲꦁꦱꦮꦱꦨꦮꦴꦫꦟꦩꦶꦒꦫꦴꦗꦒꦩꦤꦁ ꦏꦴꦪꦒꦩꦤꦁ ꦚꦴꦟꦒꦩꦤꦚ꧀ꦕ ꦮꦶꦥꦸꦭꦤꦶꦩ꧀ꦩꦭꦏꦫꦸꦟꦴꦱꦠꦶꦮꦷꦫꦶꦪꦴꦢꦶꦒꦸꦟꦮꦶꦱꦺꦱꦱꦲꦶꦠꦩꦨꦶꦤꦷꦲꦴꦫꦠꦺꦴ ꦪꦴꦮ ꦩꦲꦴꦧꦺꦴꦣꦶ ꦤꦶꦫꦮꦗ꧀ꦗꦠꦴꦪ ꦱꦺꦴꦨꦤꦩꦺꦮꦴꦠꦶ.

ꦄꦡ ꦮꦴ ꦱꦪꦩ꧀ꦨꦹꦚꦴꦟꦺꦤ ꦱꦏꦭꦩꦥꦶ ꦭꦺꦴꦏꦁ ꦥꦫꦶꦚ꧀ꦚꦴꦨꦶꦱꦩꦪꦮꦱꦺꦤ ꦥꦫꦶꦗꦴꦤꦤ꧀ꦠꦺꦴ ꦚꦴꦟꦺꦤ ꦱꦩ꧀ꦩꦴ ꦒꦠꦺꦴ ꦄꦮꦒꦠꦺꦴꦠꦶ ꦱꦸꦒꦠꦺꦴ, ꦠꦡꦴ ꦭꦺꦴꦏꦱꦩꦸꦢꦪꦁ ꦥꦲꦴꦤꦴꦨꦶꦱꦩꦪꦮꦱꦺꦤ ꦥꦗꦲꦤ꧀ꦠꦺꦴ ꦄꦤꦸꦥ꧀ꦥꦠ꧀ꦠꦶꦣꦩ꧀ꦩꦠꦁ ꦄꦴꦥꦴꦢꦺꦤ꧀ꦠꦺꦴ ꦱꦩ꧀ꦩꦴ ꦒꦠꦺꦴ ꦄꦠꦷꦠꦺꦴꦠꦶ ꦱꦸꦒꦠꦺꦴ, ꦭꦺꦴꦏꦤꦶꦫꦺꦴꦣꦁ ꦤꦶꦧ꧀ꦧꦴꦤꦁ ꦱꦕ꧀ꦖꦶꦏꦶꦫꦶꦪꦴꦨꦶꦱꦩꦪꦮꦱꦺꦤ ꦱꦩ꧀ꦩꦴ ꦒꦠꦺꦴ ꦄꦣꦶꦒꦠꦺꦴꦠꦶ ꦱꦸꦒꦠꦺꦴ, ꦭꦺꦴꦏꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦨꦴꦮꦤꦴꦨꦶꦱꦩꦪꦮꦱꦺꦤ ꦱꦩ꧀ꦩꦴ ꦒꦠꦺꦴ ꦥꦛꦶꦥꦤ꧀ꦤꦺꦴꦠꦶ ꦱꦸꦒꦠꦺꦴ. ‘‘ꦱꦺꦴꦠꦴꦥꦠ꧀ꦠꦶꦩꦒ꧀ꦒꦺꦤ ꦪꦺ ꦏꦶꦭꦺꦱꦴ ꦥꦲꦷꦤꦴ, ꦠꦺ ꦏꦶꦭꦺꦱꦺ ꦤ ꦥꦸꦤꦺꦠꦶ ꦤ ꦥꦕ꧀ꦕꦺꦠꦶ ꦤ ꦥꦕ꧀ꦕꦴꦒꦕ꧀ꦖꦠꦷꦠꦶ ꦱꦸꦒꦠꦺꦴ’’ꦠꦶꦄꦴꦢꦶꦤꦴ ꦤꦪꦺꦤ (ꦩꦲꦴꦤꦶ. ꧓꧘) ꦄꦪꦩꦠ꧀ꦡꦺꦴ ꦮꦶꦨꦴꦮꦺꦠꦧ꧀ꦧꦺꦴꦠꦶ.

ꦄꦡ ꦮꦴ ꦱꦸꦤ꧀ꦢꦫꦁ ꦜꦴꦤꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦁ, ꦤꦶꦧ꧀ꦧꦴꦤꦩꦺꦮ ꦮꦴ ꦒꦠꦺꦴ ꦄꦣꦶꦒꦠꦺꦴꦠꦶ ꦱꦸꦒꦠꦺꦴ. ꦪꦱ꧀ꦩꦴ ꦮꦴ ꦨꦹꦠꦁ ꦠꦕ꧀ꦖꦁ ꦄꦠ꧀ꦡꦱꦁꦲꦶꦠꦁ ꦮꦺꦤꦺꦪ꧀ꦪꦴꦤꦁ ꦪꦡꦴꦫꦲꦁ ꦏꦴꦭꦪꦸꦠ꧀ꦠꦩꦺꦮ ꦕ ꦣꦩ꧀ꦩꦁ ꦨꦴꦱꦠꦶ, ꦠꦱ꧀ꦩꦴ ꦱꦩ꧀ꦩꦴ ꦒꦢꦠꦶ ꦮꦢꦠꦷꦠꦶ ꦱꦸꦒꦠꦺꦴ ꦢ-ꦏꦴꦫꦱ꧀ꦱ ꦠ-ꦏꦴꦫꦁ ꦏꦠ꧀ꦮꦴ. ꦆꦠꦶ ꦱꦺꦴꦨꦤꦒꦩꦤꦠꦴꦢꦷꦲꦶ ꦱꦸꦒꦠꦺꦴ, ꦠꦁ ꦱꦸꦒꦠꦁ.

ꦥꦸꦚ꧀ꦚꦥꦴꦥꦏꦺꦲꦶ ꦈꦥꦥꦗ꧀ꦗꦤꦮꦱꦺꦤ ꦒꦤ꧀ꦠꦧ꧀ꦧꦠꦺꦴ ꦒꦠꦶꦪꦺꦴ, ꦈꦥꦥꦠ꧀ꦠꦶꦨꦮꦮꦶꦱꦺꦱꦴ. ꦠꦴ ꦥꦤ ꦤꦶꦫꦪꦴꦢꦶꦮꦱꦺꦤ ꦥꦚ꧀ꦕꦮꦶꦣꦴ. ꦠꦴ ꦲꦶ ꦱꦏꦭꦱ꧀ꦱꦥꦶ ꦨꦮꦒꦴꦩꦶꦏꦩ꧀ꦩꦱ꧀ꦱ ꦄꦫꦶꦪꦩꦒ꧀ꦒꦴꦣꦶꦒꦩꦺꦤ ꦄꦮꦶꦥꦴꦏꦴꦫꦲꦨꦴꦮꦏꦫꦟꦺꦤ ꦤꦶꦮꦠ꧀ꦠꦶꦠꦠ꧀ꦠꦴ ꦨꦒꦮꦴ ꦥꦚ꧀ꦕꦲꦶꦥꦶ ꦒꦠꦷꦲꦶ ꦱꦸꦛ꧀ꦜꦸ ꦩꦸꦠ꧀ꦠꦺꦴ ꦮꦶꦱꦁꦪꦸꦠ꧀ꦠꦺꦴꦠꦶ ꦄꦴꦲ ‘‘ꦒꦠꦶꦮꦶꦩꦸꦠ꧀ꦠ’’ꦤ꧀ꦠꦶ. ꦌꦠꦺꦤ ꦨꦒꦮꦠꦺꦴ ꦏꦠ꧀ꦡꦕꦶꦥꦶ ꦄꦥꦫꦶꦪꦴꦥꦤ꧀ꦤꦠꦁ ꦢꦱ꧀ꦱꦺꦠꦶ, ꦪꦠꦺꦴ ꦨꦒꦮꦴ ‘‘ꦢꦺꦮꦴꦠꦶꦢꦺꦮꦺꦴ’’ꦠꦶ ꦮꦸꦕ꧀ꦕꦠꦶ. ꦠꦺꦤꦴꦲ –

‘‘ꦪꦺꦤ ꦢꦺꦮꦹꦥꦥꦠ꧀ꦪꦱ꧀ꦱ, ꦒꦤ꧀ꦣꦧ꧀ꦧꦺꦴ ꦮꦴ ꦮꦶꦲꦔ꧀ꦒꦩꦺꦴ;

ꦪꦏ꧀ꦑꦠ꧀ꦠꦁ ꦪꦺꦤ ꦒꦕ꧀ꦖꦺꦪ꧀ꦪꦁ, ꦩꦤꦸꦱ꧀ꦱꦠ꧀ꦠꦚ꧀ꦕ ꦄꦧ꧀ꦧꦗꦺ;

ꦠꦺ ꦩꦪ꧀ꦲꦁ ꦄꦴꦱꦮꦴ ꦑꦷꦟꦴ, ꦮꦶꦢ꧀ꦣꦱ꧀ꦠꦴ ꦮꦶꦤꦭ꦳ꦷꦏꦠꦴ’’ꦠꦶ. (ꦄ. ꦤꦶ. ꧔.꧓꧖);

ꦠꦁꦠꦁꦒꦠꦶꦱꦁꦮꦠ꧀ꦠꦤꦏꦴꦤꦚ꧀ꦲꦶ ꦏꦩ꧀ꦩꦏꦶꦭꦺꦱꦴꦤꦁ ꦄꦒ꧀ꦒꦩꦒ꧀ꦒꦺꦤ ꦧꦺꦴꦣꦶꦩꦹꦭꦺꦪꦺꦮ ꦱꦸꦥ꧀ꦥꦲꦷꦤꦠ꧀ꦠꦴ ꦤꦠ꧀ꦡꦶ ꦨꦒꦮꦠꦺꦴ ꦒꦠꦶꦥꦫꦶꦪꦴꦥꦤ꧀ꦤꦠꦴꦠꦶ ꦄꦕ꧀ꦕꦤ꧀ꦠꦩꦺꦮ ꦨꦒꦮꦴ ꦱꦧ꧀ꦧꦨꦮꦪꦺꦴꦤꦶꦒꦠꦶꦮꦶꦚ꧀ꦚꦴꦟꦛ꧀ꦜꦶꦠꦶꦱꦠ꧀ꦠꦴꦮꦴꦱꦱꦠ꧀ꦠꦤꦶꦏꦴꦪꦺꦲꦶ ꦱꦸꦥꦫꦶꦩꦸꦠ꧀ꦠꦺꦴ. ꦠꦁ ꦒꦠꦶꦮꦶꦩꦸꦠ꧀ꦠꦁ. ꦮꦤ꧀ꦢꦺꦠꦶ ꦤꦩꦴꦩꦶ, ꦡꦺꦴꦩꦺꦩꦷꦠꦶ ꦮꦴ ꦄꦠ꧀ꦡꦺꦴ.

ꦄꦡ ꦮꦴ ꦒꦠꦶꦮꦶꦩꦸꦠ꧀ꦠꦤ꧀ꦠꦶ ꦄꦤꦸꦥꦴꦢꦶꦱꦺꦱꦤꦶꦧ꧀ꦧꦴꦤꦣꦴꦠꦸꦥ꧀ꦥꦠ꧀ꦠꦶꦪꦴ ꦨꦒꦮꦤ꧀ꦠꦁ ꦡꦺꦴꦩꦺꦠꦶ. ꦌꦠ꧀ꦡ ꦲꦶ ꦢ꧀ꦮꦷꦲꦶ ꦄꦴꦏꦴꦫꦺꦲꦶ ꦨꦒꦮꦠꦺꦴ ꦡꦺꦴꦩꦤꦴ ꦮꦺꦢꦶꦠꦧ꧀ꦧꦴ ꦄꦠ꧀ꦠꦲꦶꦠꦱꦩ꧀ꦥꦠ꧀ꦠꦶꦠꦺꦴ ꦥꦫꦲꦶꦠꦥꦛꦶꦥꦠ꧀ꦠꦶꦠꦺꦴ ꦕ. ꦠꦺꦱꦸ ꦄꦠ꧀ꦠꦲꦶꦠꦱꦩ꧀ꦥꦠ꧀ꦠꦶ ꦄꦤꦴꦮꦫꦟꦚꦴꦟꦴꦣꦶꦒꦩꦠꦺꦴ, ꦱꦮꦴꦱꦤꦴꦤꦁ ꦱꦧ꧀ꦧꦺꦱꦁ ꦏꦶꦭꦺꦱꦴꦤꦁ ꦄꦕ꧀ꦕꦤ꧀ꦠꦥꦲꦴꦤꦠꦺꦴ, ꦄꦤꦸꦥꦴꦢꦶꦱꦺꦱꦤꦶꦧ꧀ꦧꦴꦤꦥ꧀ꦥꦠ꧀ꦠꦶꦠꦺꦴ ꦕ ꦮꦺꦢꦶꦠꦧ꧀ꦧꦴ. ꦥꦫꦲꦶꦠꦥꦛꦶꦥꦠ꧀ꦠꦶ ꦭꦴꦨꦱꦏ꧀ꦏꦴꦫꦴꦢꦶꦤꦶꦫꦥꦺꦏ꧀ꦑꦕꦶꦠ꧀ꦠꦱ꧀ꦱ ꦱꦧ꧀ꦧꦢꦸꦏ꧀ꦑꦤꦶꦪ꧀ꦪꦴꦤꦶꦏꦣꦩ꧀ꦩꦢꦺꦱꦤꦠꦺꦴ, ꦮꦶꦫꦸꦢ꧀ꦣꦺꦱꦸꦥꦶ ꦤꦶꦕ꧀ꦕꦁ ꦲꦶꦠꦗ꧀ꦙꦴꦱꦪꦮꦱꦺꦤ ꦚꦴꦟꦥꦫꦶꦥꦴꦏꦏꦴꦭꦴꦒꦩꦤꦠꦺꦴ ꦕ. ꦱꦴ ꦥꦤꦺꦠ꧀ꦡ ꦄꦴꦱꦪꦠꦺꦴ ꦥꦪꦺꦴꦒꦠꦺꦴ ꦕ ꦢꦸꦮꦶꦣꦴ ꦥꦫꦲꦶꦠꦥꦛꦶꦥꦠ꧀ꦠꦶ, ꦠꦶꦮꦶꦣꦴ ꦕ ꦄꦠ꧀ꦠꦲꦶꦠꦱꦩ꧀ꦥꦠ꧀ꦠꦶ ꦥꦏꦴꦱꦶꦠꦴ ꦲꦺꦴꦠꦶ, ꦏꦡꦁ? ‘‘ꦏꦫꦸꦟꦴꦱꦷꦠꦭꦲꦢꦪ’’ꦤ꧀ꦠꦶ ꦌꦠꦺꦤ ꦄꦴꦱꦪꦠꦺꦴ ꦥꦫꦲꦶꦠꦥꦛꦶꦥꦠ꧀ꦠꦶ, ꦱꦩ꧀ꦩꦴꦒꦢꦤꦠ꧀ꦡꦺꦤ ꦱꦸꦒꦠ-ꦱꦢ꧀ꦢꦺꦤ ꦥꦪꦺꦴꦒꦠꦺꦴ ꦥꦫꦲꦶꦠꦥꦛꦶꦥꦠ꧀ꦠꦶ, ‘‘ꦥꦚ꧀ꦚꦴꦥꦗ꧀ꦗꦺꦴꦠꦮꦶꦲꦠꦩꦺꦴꦲꦠꦩꦁ ꦒꦠꦶꦮꦶꦩꦸꦠ꧀ꦠ’’ꦤ꧀ꦠꦶ ꦌꦠꦺꦲꦶ ꦕꦠꦸꦱꦕ꧀ꦕꦥꦛꦶꦮꦺꦣꦠ꧀ꦡꦺꦤ ꦕ ꦱꦸꦒꦠ-ꦱꦢ꧀ꦢꦺꦤ ꦠꦶꦮꦶꦣꦴꦥꦶ ꦄꦠ꧀ꦠꦲꦶꦠꦱꦩ꧀ꦥꦠ꧀ꦠꦶ, ꦄꦮꦱꦶꦛ꧀ꦜꦠ꧀ꦡꦺꦤ ꦠꦺꦤ ‘‘ꦥꦚ꧀ꦚꦴꦥꦗ꧀ꦗꦺꦴꦠꦮꦶꦲꦠꦩꦺꦴꦲꦠꦩ’’ꦤ꧀ꦠꦶ ꦌꦠꦺꦤ ꦕ ꦱꦧ꧀ꦧꦴꦥꦶ ꦄꦠ꧀ꦠꦲꦶꦠꦱꦩ꧀ꦥꦠ꧀ꦠꦶ ꦥꦫꦲꦶꦠꦥꦛꦶꦥꦠ꧀ꦠꦶ ꦥꦏꦴꦱꦶꦠꦴ ꦲꦺꦴꦠꦷꦠꦶ.

ꦄꦡ ꦮꦴ ꦠꦷꦲꦶ ꦄꦴꦏꦴꦫꦺꦲꦶ ꦨꦒꦮꦠꦺꦴ ꦡꦺꦴꦩꦤꦴ ꦮꦺꦢꦶꦠꦧ꧀ꦧꦴ – ꦲꦺꦠꦸꦠꦺꦴ ꦦꦭꦠꦺꦴ ꦈꦥꦏꦴꦫꦠꦺꦴ ꦕ. ꦠꦠ꧀ꦡ ꦲꦺꦠꦸ ꦩꦲꦴꦏꦫꦸꦟꦴ, ꦱꦴ ꦥꦜꦩꦥꦢꦺꦤ ꦢꦱ꧀ꦱꦶꦠꦴ. ꦦꦭꦁ ꦕꦠꦸꦧ꧀ꦧꦶꦣꦁ ꦚꦴꦟꦱꦩ꧀ꦥꦢꦴ ꦥꦲꦴꦤꦱꦩ꧀ꦥꦢꦴ ꦄꦴꦤꦸꦨꦴꦮꦱꦩ꧀ꦥꦢꦴ ꦫꦹꦥꦏꦴꦪꦱꦩ꧀ꦥꦢꦴ ꦕꦴꦠꦶ. ꦠꦴꦱꦸ ꦚꦴꦟꦥꦲꦴꦤꦱꦩ꧀ꦥꦢꦴ ꦢꦸꦠꦶꦪꦥꦢꦺꦤ ꦱꦕ꧀ꦕꦥꦛꦶꦮꦺꦣꦠ꧀ꦡꦺꦤ ꦕ ꦱꦸꦒꦠ-ꦱꦢ꧀ꦢꦺꦤ ꦥꦏꦴꦱꦶꦠꦴ ꦲꦺꦴꦤ꧀ꦠꦶ, ꦄꦴꦤꦸꦨꦴꦮꦱꦩ꧀ꦥꦢꦴ ꦥꦤ ꦠꦠꦶꦪꦥꦢꦺꦤ, ꦫꦹꦥꦏꦴꦪꦱꦩ꧀ꦥꦢꦴ ꦪꦡꦴꦮꦸꦠ꧀ꦠꦏꦴꦪꦒꦩꦤꦱꦺꦴꦨꦤꦠ꧀ꦡꦺꦤ ꦱꦸꦒꦠ-ꦱꦢ꧀ꦢꦺꦤ ꦭꦏ꧀ꦑꦟꦴꦤꦸꦧ꧀ꦪꦚ꧀ꦗꦤꦥꦴꦫꦶꦥꦹꦫꦶꦪꦴ ꦮꦶꦤꦴ ꦠꦢꦨꦴꦮꦠꦺꦴ. ꦈꦥꦏꦴꦫꦺꦴ ꦄꦤꦤ꧀ꦠꦫꦁ ꦄꦧꦴꦲꦶꦫꦁ ꦏꦫꦶꦠ꧀ꦮꦴ ꦠꦶꦮꦶꦣꦪꦴꦤꦩꦸꦑꦺꦤ ꦮꦶꦩꦸꦠ꧀ꦠꦶꦣꦩ꧀ꦩꦢꦺꦱꦤꦴ. ꦱꦺꦴ ꦱꦩ꧀ꦩꦴꦒꦢꦤꦠ꧀ꦡꦺꦤ ꦱꦸꦒꦠ-ꦱꦢ꧀ꦢꦺꦤ ꦥꦏꦴꦱꦶꦠꦺꦴ ꦲꦺꦴꦠꦷꦠꦶ ꦮꦺꦢꦶꦠꦧ꧀ꦧꦁ.

ꦠꦠ꧀ꦡ ‘‘ꦏꦫꦸꦟꦴꦱꦷꦠꦭꦲꦢꦪ’’ꦤ꧀ꦠꦶ ꦌꦠꦺꦤ ꦱꦩ꧀ꦩꦴꦱꦩ꧀ꦧꦺꦴꦣꦶꦪꦴ ꦩꦹꦭꦁ ꦢꦱ꧀ꦱꦺꦠꦶ. ꦩꦲꦴꦏꦫꦸꦟꦴꦪ ꦱꦚ꧀ꦕꦺꦴꦢꦶꦠꦩꦴꦤꦱꦺꦴ ꦲꦶ ꦨꦒꦮꦴ ꦱꦁꦱꦴꦫꦥꦔ꧀ꦏꦠꦺꦴ ꦱꦠ꧀ꦠꦴꦤꦁ ꦱꦩꦸꦢ꧀ꦣꦫꦟꦠ꧀ꦡꦁ ꦏꦠꦴꦨꦶꦤꦷꦲꦴꦫꦺꦴ ꦄꦤꦸꦥꦸꦧ꧀ꦧꦺꦤ ꦥꦴꦫꦩꦶꦪꦺꦴ ꦥꦹꦫꦺꦠ꧀ꦮꦴ ꦄꦤꦸꦠ꧀ꦠꦫꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦣꦶꦒꦠꦺꦴꦠꦶ ꦏꦫꦸꦟꦴ ꦱꦩ꧀ꦩꦴꦱꦩ꧀ꦧꦺꦴꦣꦶꦪꦴ ꦩꦹꦭꦁ. ‘‘ꦥꦚ꧀ꦚꦴꦥꦗ꧀ꦗꦺꦴꦠꦮꦶꦲꦠꦩꦺꦴꦲꦠꦩ’’ꦤ꧀ꦠꦶ ꦌꦠꦺꦤ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦢꦱ꧀ꦱꦺꦠꦶ. ꦄꦤꦴꦮꦫꦟꦚꦴꦟꦥꦢꦛ꧀ꦜꦴꦤꦚ꧀ꦲꦶ ꦩꦒ꧀ꦒꦚꦴꦟꦁ, ꦩꦒ꧀ꦒꦚꦴꦟꦥꦢꦛ꧀ꦜꦴꦤꦚ꧀ꦕ ꦄꦤꦴꦮꦫꦟꦚꦴꦟꦁ ꦱꦩ꧀ꦩꦴꦱꦩ꧀ꦧꦺꦴꦣꦷꦠꦶ ꦮꦸꦕ꧀ꦕꦠꦷꦠꦶ. ꦱꦩ꧀ꦩꦴꦒꦩꦤꦠ꧀ꦡꦺꦤ ꦱꦸꦒꦠ-ꦱꦢ꧀ꦢꦺꦤ ꦱꦩ꧀ꦩꦴꦱꦩ꧀ꦧꦺꦴꦣꦶꦪꦴ ꦥꦛꦶꦥꦠ꧀ꦠꦶꦁ ꦢꦱ꧀ꦱꦺꦠꦶ ꦭꦷꦤꦸꦢ꧀ꦣꦕ꧀ꦕꦥꦠꦶꦛ꧀ꦜꦴꦤꦴꦪꦹꦲꦤꦏꦴꦩꦱꦸꦑꦭ꧀ꦭꦶꦏꦠ꧀ꦠꦏꦶꦭꦩꦡꦴꦤꦸꦪꦺꦴꦒ-ꦱꦱ꧀ꦱꦠꦸꦕ꧀ꦖꦺꦢꦴꦨꦶꦤꦶꦮꦺꦱꦴꦢꦶ-ꦄꦤ꧀ꦠꦢ꧀ꦮꦪꦫꦲꦶꦠꦴꦪ ꦏꦫꦸꦟꦴꦥꦚ꧀ꦚꦴꦥꦫꦶꦒ꧀ꦒꦲꦶꦠꦴꦪ ꦩꦗ꧀ꦙꦶꦩꦴꦪ ꦥꦛꦶꦥꦠ꧀ꦠꦶꦪꦴ ꦥꦏꦴꦱꦤꦠꦺꦴ ꦱꦸꦒꦠ-ꦱꦢ꧀ꦢꦱ꧀ꦱ. ꦆꦠꦫꦺꦲꦶ ꦱꦩ꧀ꦩꦴꦱꦩ꧀ꦧꦺꦴꦣꦶꦪꦴ ꦥꦣꦴꦤꦴꦥ꧀ꦥꦣꦴꦤꦨꦺꦢꦁ ꦥꦪꦺꦴꦗꦤꦁ ꦢꦱ꧀ꦱꦺꦠꦶ. ꦱꦁꦱꦴꦫꦩꦲꦺꦴꦓꦠꦺꦴ ꦱꦠ꧀ꦠꦱꦤ꧀ꦠꦴꦫꦟꦚ꧀ꦲꦺꦠ꧀ꦡ ꦥꦣꦴꦤꦁ ꦥꦪꦺꦴꦗꦤꦁ, ꦠꦢꦚ꧀ꦚꦩꦥ꧀ꦥꦣꦴꦤꦁ. ꦠꦺꦱꦸ ꦥꦣꦴꦤꦺꦤ ꦥꦫꦲꦶꦠꦥꦛꦶꦥꦠ꧀ꦠꦶꦁ ꦢꦱ꧀ꦱꦺꦠꦶ, ꦆꦠꦫꦺꦤ ꦄꦠ꧀ꦠꦲꦶꦠꦱꦩ꧀ꦥꦠ꧀ꦠꦶꦁ, ꦠꦢꦸꦨꦪꦺꦤ ꦄꦠ꧀ꦠꦲꦶꦠꦴꦪ ꦥꦛꦶꦥꦤ꧀ꦤꦴꦢꦷꦱꦸ ꦕꦠꦹꦱꦸ ꦥꦸꦒ꧀ꦒꦭꦺꦱꦸ ꦨꦒꦮꦠꦺꦴ ꦕꦠꦸꦠ꧀ꦡꦥꦸꦒ꧀ꦒꦭꦨꦴꦮꦁ ꦢꦱ꧀ꦱꦺꦠꦶ. ꦠꦺꦤ ꦕ ꦄꦤꦸꦠ꧀ꦠꦫꦢꦏ꧀ꦑꦶꦟꦺꦪ꧀ꦪꦨꦴꦮꦁ, ꦈꦠ꧀ꦠꦩꦮꦤ꧀ꦢꦤꦷꦪꦨꦴꦮꦁ, ꦄꦠ꧀ꦠꦤꦺꦴ ꦕ ꦮꦤ꧀ꦢꦤꦏꦶꦫꦶꦪꦴꦪ ꦑꦺꦠ꧀ꦠꦔ꧀ꦒꦠꦨꦴꦮꦁ ꦢꦱ꧀ꦱꦺꦠꦶ.

ꦌꦠ꧀ꦡ ꦕ ꦏꦫꦸꦟꦴꦒꦲꦟꦺꦤ ꦭꦺꦴꦏꦶꦪꦺꦱꦸ ꦩꦲꦒ꧀ꦒꦠꦨꦴꦮꦥ꧀ꦥꦠ꧀ꦠꦴꦱꦴꦣꦴꦫꦟꦒꦸꦟꦢꦷꦥꦤꦠꦺꦴ ꦨꦒꦮꦠꦺꦴ ꦱꦧ꧀ꦧꦭꦺꦴꦏꦶꦪꦒꦸꦟꦱꦩ꧀ꦥꦠ꧀ꦠꦶ ꦢꦱ꧀ꦱꦶꦠꦴ ꦲꦺꦴꦠꦶ, ꦥꦚ꧀ꦚꦴꦒꦲꦟꦺꦤ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦥꦢꦛ꧀ꦜꦴꦤꦩꦒ꧀ꦒꦚꦴꦟꦢꦷꦥꦤꦠꦺꦴ ꦱꦧ꧀ꦧꦭꦺꦴꦏꦸꦠ꧀ꦠꦫꦒꦸꦟꦱꦩ꧀ꦥꦠ꧀ꦠꦶ. ꦠꦢꦸꦨꦪꦒ꧀ꦒꦲꦟꦱꦶꦢ꧀ꦣꦺꦴ ꦲꦶ ꦄꦠ꧀ꦡꦺꦴ ‘‘ꦱꦤꦫꦴꦩꦫꦭꦺꦴꦏꦒꦫꦸ’’ꦤ꧀ꦠꦶꦄꦴꦢꦶꦤꦴ ꦮꦶꦥꦚ꧀ꦕꦷꦪꦠꦷꦠꦶ. ꦏꦫꦸꦟꦴꦒꦲꦟꦺꦤ ꦕ ꦈꦥꦒꦩꦤꦁ ꦤꦶꦫꦸꦥꦏ꧀ꦏꦶꦭꦺꦱꦁ ꦢꦱ꧀ꦱꦺꦠꦶ, ꦥꦚ꧀ꦚꦴꦒꦲꦟꦺꦤ ꦄꦥꦒꦩꦤꦁ. ꦠꦡꦴ ꦏꦫꦸꦟꦴꦒꦲꦟꦺꦤ ꦭꦺꦴꦏꦱꦩꦚ꧀ꦚꦴꦤꦸꦫꦹꦥꦁ ꦨꦒꦮꦠꦺꦴ ꦥꦮꦠ꧀ꦠꦶꦁ ꦢꦱ꧀ꦱꦺꦠꦶ ꦭꦺꦴꦏꦮꦺꦴꦲꦴꦫꦮꦶꦱꦪꦠ꧀ꦠꦴ ꦏꦫꦸꦟꦴꦪ, ꦥꦚ꧀ꦚꦴꦒꦲꦟꦺꦤ ꦱꦩꦚ꧀ꦚꦴꦪ ꦄꦤꦠꦶꦣꦴꦮꦤꦁ. ꦱꦨꦴꦮꦴꦤꦮꦧꦺꦴꦣꦺꦤ ꦲꦶ ꦣꦩ꧀ꦩꦴꦤꦁ ꦱꦩꦚ꧀ꦚꦁ ꦄꦠꦶꦣꦴꦮꦶꦠ꧀ꦮꦴ ꦱꦠ꧀ꦠꦴꦢꦶꦥꦫꦴꦩꦱꦤꦁ ꦲꦺꦴꦠꦷꦠꦶ. ꦠꦡꦴ ꦏꦫꦸꦟꦴꦒꦲꦟꦺꦤ ꦩꦲꦴꦏꦫꦸꦟꦴꦱꦩꦴꦥꦠ꧀ꦠꦶꦮꦶꦲꦴꦫꦁ ꦢꦱ꧀ꦱꦺꦠꦶ, ꦥꦚ꧀ꦚꦴꦒꦲꦟꦺꦤ ꦠꦷꦱꦸ ꦏꦴꦭꦺꦱꦸ ꦄꦥ꧀ꦥꦛꦶꦲꦠꦚꦴꦟꦁ ꦕꦠꦸꦱꦕ꧀ꦕꦚꦴꦟꦁ ꦕꦠꦸꦥꦛꦶꦱꦩ꧀ꦨꦶꦢꦴꦚꦴꦟꦁ ꦕꦠꦸꦮꦺꦱꦴꦫꦗ꧀ꦗꦚꦴꦟꦁ, ꦏꦫꦸꦟꦴꦒꦲꦟꦺꦤ ꦩꦲꦴꦏꦫꦸꦟꦴꦱꦩꦴꦥꦠ꧀ꦠꦶꦚꦴꦟꦱ꧀ꦱ ꦒꦲꦶꦠꦠ꧀ꦠꦴ ꦱꦺꦱꦴꦣꦴꦫꦟꦚꦴꦟꦴꦤꦶ ꦖ ꦄꦨꦶꦚ꧀ꦚꦴ ꦄꦛ꧀ꦜꦱꦸ ꦥꦫꦶꦱꦴꦱꦸ ꦄꦏꦩ꧀ꦥꦤꦚꦴꦟꦴꦤꦶ ꦢꦱ ꦧꦭꦴꦤꦶ ꦕꦸꦢ꧀ꦢꦱ ꦧꦸꦢ꧀ꦣꦚꦴꦟꦴꦤꦶ ꦱꦺꦴꦭ꦳ꦱ ꦚꦴꦟꦕꦫꦶꦪꦴ ꦄꦛ꧀ꦜꦴꦫꦱ ꦧꦸꦢ꧀ꦣꦣꦩ꧀ꦩꦴ ꦕꦠꦸꦕꦠ꧀ꦠꦴꦭꦷꦱ ꦚꦴꦟꦮꦠ꧀ꦡꦹꦤꦶ ꦱꦠ꧀ꦠꦱꦠ꧀ꦠꦠꦶ ꦚꦴꦟꦮꦠ꧀ꦡꦹꦤꦷꦠꦶ ꦌꦮꦩꦴꦢꦷꦤꦁ ꦄꦤꦺꦏꦺꦱꦁ ꦥꦚ꧀ꦚꦴꦥꦨꦺꦢꦴꦤꦁ ꦮꦱꦺꦤ ꦚꦴꦟꦕꦴꦫꦁ ꦢꦱ꧀ꦱꦺꦠꦶ. ꦠꦡꦴ ꦏꦫꦸꦟꦴꦒꦲꦟꦺꦤ ꦕꦫꦟꦱꦩ꧀ꦥꦠ꧀ꦠꦶꦁ, ꦥꦚ꧀ꦚꦴꦒꦲꦟꦺꦤ ꦮꦶꦗ꧀ꦗꦴꦱꦩ꧀ꦥꦠ꧀ꦠꦶꦁ. ꦏꦫꦸꦟꦴꦒꦲꦟꦺꦤ ꦄꦠ꧀ꦠꦴꦣꦶꦥꦠꦶꦠꦴ, ꦥꦚ꧀ꦚꦴꦒꦲꦟꦺꦤ ꦣꦩ꧀ꦩꦴꦣꦶꦥꦠꦶꦠꦴ. ꦏꦫꦸꦟꦴꦒꦲꦟꦺꦤ ꦭꦺꦴꦏꦤꦴꦡꦨꦴꦮꦺꦴ, ꦥꦚ꧀ꦚꦴꦒꦲꦟꦺꦤ ꦄꦠ꧀ꦠꦤꦴꦡꦨꦴꦮꦺꦴ. ꦠꦡꦴ ꦏꦫꦸꦟꦴꦒꦲꦟꦺꦤ ꦥꦸꦧ꧀ꦧꦏꦴꦫꦶꦨꦴꦮꦺꦴ, ꦥꦚ꧀ꦚꦴꦒꦲꦟꦺꦤ ꦏꦠꦚ꧀ꦚꦸꦠꦴ. ꦏꦫꦸꦟꦴꦒꦲꦟꦺꦤ ꦄꦥꦫꦤ꧀ꦠꦥꦠꦴ, ꦥꦚ꧀ꦚꦴꦒꦲꦟꦺꦤ ꦄꦤꦠ꧀ꦠꦤ꧀ꦠꦥꦠꦴ. ꦏꦫꦸꦟꦴꦒꦲꦟꦺꦤ ꦮꦴ ꦧꦸꦢ꧀ꦣꦏꦫꦣꦩ꧀ꦩꦱꦶꦢ꧀ꦣꦶ, ꦥꦚ꧀ꦚꦴꦒꦲꦟꦺꦤ ꦧꦸꦢ꧀ꦣꦨꦴꦮꦱꦶꦢ꧀ꦣꦶ. ꦠꦡꦴ ꦏꦫꦸꦟꦴꦒꦲꦟꦺꦤ ꦥꦫꦺꦱꦁ ꦠꦴꦫꦟꦁ, ꦥꦚ꧀ꦚꦴꦒꦲꦟꦺꦤ ꦱꦪꦁ ꦠꦴꦫꦟꦁ. ꦠꦡꦴ ꦏꦫꦸꦟꦴꦒꦲꦟꦺꦤ ꦱꦧ꧀ꦧꦱꦠ꧀ꦠꦺꦱꦸ ꦄꦤꦸꦒ꧀ꦒꦲꦕꦶꦠ꧀ꦠꦠꦴ, ꦥꦚ꧀ꦚꦴꦒꦲꦟꦺꦤ ꦱꦧ꧀ꦧꦣꦩ꧀ꦩꦺꦱꦸ ꦮꦶꦫꦠ꧀ꦠꦕꦶꦠ꧀ꦠꦠꦴ ꦢꦱ꧀ꦱꦶꦠꦴ ꦲꦺꦴꦠꦶ.

ꦱꦧ꧀ꦧꦺꦱꦚ꧀ꦕ ꦧꦸꦢ꧀ꦣꦒꦸꦟꦴꦤꦁ ꦏꦫꦸꦟꦴ ꦄꦴꦢꦶ ꦠꦤ꧀ꦤꦶꦢꦴꦤꦨꦴꦮꦠꦺꦴ, ꦥꦚ꧀ꦚꦴ ꦥꦫꦶꦪꦺꦴꦱꦴꦤꦁ ꦠꦠꦺꦴ ꦈꦠ꧀ꦠꦫꦶ ꦏꦫꦟꦷꦪꦴꦨꦴꦮꦠꦺꦴ. ꦆꦠꦶ ꦄꦴꦢꦶꦥꦫꦶꦪꦺꦴꦱꦴꦤꦢꦱ꧀ꦱꦤꦺꦤ ꦱꦧ꧀ꦧꦺ ꦧꦸꦢ꧀ꦣꦒꦸꦟꦴ ꦢꦱ꧀ꦱꦶꦠꦴ ꦲꦺꦴꦤ꧀ꦠꦶ. ꦠꦡꦴ ꦏꦫꦸꦟꦴꦒꦲꦟꦺꦤ ꦱꦷꦭꦏ꧀ꦑꦤ꧀ꦣꦥꦸꦧ꧀ꦧꦔ꧀ꦒꦩꦺꦴ ꦱꦩꦴꦣꦶꦏ꧀ꦑꦤ꧀ꦣꦺꦴ ꦢꦱ꧀ꦱꦶꦠꦺꦴ ꦲꦺꦴꦠꦶ. ꦏꦫꦸꦟꦴꦤꦶꦢꦴꦤꦚ꧀ꦲꦶ ꦱꦷꦭꦁ ꦠꦠꦺꦴ ꦥꦴꦟꦴꦠꦶꦥꦴꦠꦴꦢꦶꦮꦶꦫꦠꦶꦥ꧀ꦥꦮꦠ꧀ꦠꦶꦠꦺꦴ, ꦱꦴ ꦕ ꦙꦴꦤꦠ꧀ꦠꦪꦱꦩ꧀ꦥꦪꦺꦴꦒꦶꦤꦷꦠꦶ. ꦥꦚ꧀ꦚꦴꦮꦕꦤꦺꦤ ꦥꦚ꧀ꦚꦴꦏ꧀ꦑꦤ꧀ꦣꦺꦴ. ꦱꦷꦭꦚ꧀ꦕ ꦱꦧ꧀ꦧꦧꦸꦢ꧀ꦣꦒꦸꦟꦴꦤꦁ ꦄꦴꦢꦶ, ꦱꦩꦴꦣꦶ ꦩꦗ꧀ꦙꦺ, ꦥꦚ꧀ꦚꦴ ꦥꦫꦶꦪꦺꦴꦱꦴꦤꦤ꧀ꦠꦶ ꦌꦮꦩ꧀ꦥꦶ ꦄꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦏꦭ꧀ꦪꦴꦟꦢꦱ꧀ꦱꦤꦺꦤ ꦱꦧ꧀ꦧꦺ ꦧꦸꦢ꧀ꦣꦒꦸꦟꦴ ꦢꦱ꧀ꦱꦶꦠꦴ ꦲꦺꦴꦤ꧀ꦠꦶ ꦤꦪꦠꦺꦴ ꦢꦱ꧀ꦱꦶꦠꦠ꧀ꦠꦴ. ꦌꦱꦺꦴ ꦌꦮ ꦲꦶ ꦤꦶꦫꦮꦱꦺꦱꦠꦺꦴ ꦧꦸꦢ꧀ꦣꦒꦸꦟꦴꦤꦁ ꦢꦱ꧀ꦱꦤꦸꦥꦴꦪꦺꦴ, ꦪꦢꦶꦢꦁ ꦤꦪꦒ꧀ꦒꦲꦟꦁ, ꦄꦚ꧀ꦚꦡꦴ ꦏꦺꦴ ꦤꦴꦩ ꦱꦩꦠ꧀ꦡꦺꦴ ꦨꦒꦮꦠꦺꦴ ꦒꦸꦟꦺ ꦄꦤꦸꦥꦢꦁ ꦤꦶꦫꦮꦱꦺꦱꦠꦺꦴ ꦢꦱ꧀ꦱꦺꦠꦸꦁ. ꦠꦺꦤꦺꦮꦴꦲ –

‘‘ꦧꦸꦢ꧀ꦣꦺꦴꦥꦶ ꦧꦸꦢ꧀ꦣꦱ꧀ꦱ ꦨꦟꦺꦪ꧀ꦪ ꦮꦟ꧀ꦟꦁ,

ꦏꦥ꧀ꦥꦩ꧀ꦥꦶ ꦕꦺ ꦄꦚ꧀ꦚꦩꦨꦴꦱꦩꦴꦤꦺꦴ;

ꦑꦷꦪꦺꦡ ꦏꦥ꧀ꦥꦺꦴ ꦕꦶꦫꦢꦷꦓꦩꦤ꧀ꦠꦫꦺ,

ꦮꦟ꧀ꦟꦺꦴ ꦤ ꦑꦷꦪꦺꦡ ꦠꦡꦴꦒꦠꦱ꧀ꦱꦴ’’ꦠꦶ. (ꦢꦷ. ꦤꦶ. ꦄꦛ꧀ꦜ. ꧑.꧓꧐꧔; ꧓.꧑꧔꧑; ꦩ. ꦤꦶ. ꦄꦛ꧀ꦜ. ꧓.꧔꧒꧕; ꦈꦢꦴ. ꧕꧓; ꦧꦸ. ꦮꦁ. ꦄꦛ꧀ꦜ. ꧔.꧕; ꦕꦫꦶꦪꦴ. ꦄꦛ꧀ꦜ. ꦤꦶꦢꦴꦤꦏꦡꦴ, ꦥꦏꦶꦟ꧀ꦟꦏꦏꦡꦴ; ꦄꦥ. ꧒.꧗.꧒꧐) –

ꦠꦺꦤꦺꦮ ꦕ ꦄꦴꦪꦱ꧀ꦩꦠꦴ ꦱꦴꦫꦶꦥꦸꦠ꧀ꦠꦠ꧀ꦡꦺꦫꦺꦤꦥꦶ ꦧꦸꦢ꧀ꦢꦒꦸꦟꦥꦫꦶꦕ꧀ꦖꦺꦢꦤꦁ ꦥꦠꦶ ꦄꦤꦸꦪꦸꦠ꧀ꦠꦺꦤ ‘‘ꦤꦺꦴ ꦲꦺꦠꦁ, ꦨꦤ꧀ꦠꦺ’’ꦠꦶ ꦥꦛꦶꦏ꧀ꦑꦶꦥꦶꦠ꧀ꦮꦴ ‘‘ꦄꦥꦶ ꦕ ꦩꦺ, ꦨꦤ꧀ꦠꦺ, ꦣꦩ꧀ꦩꦤ꧀ꦮꦪꦺꦴ ꦮꦶꦢꦶꦠꦺꦴ’’ꦠꦶ (ꦢꦷ. ꦤꦶ. ꧒.꧑꧔꧖) ꦮꦸꦠ꧀ꦠꦁ.

꧒. ꦌꦮꦁ ꦱꦔ꧀ꦑꦺꦥꦺꦤ ꦱꦏꦭꦱꦧ꧀ꦧꦚ꧀ꦚꦸꦒꦸꦟꦺꦲꦶ ꦨꦒꦮꦤ꧀ꦠꦁ ꦄꦨꦶꦠ꧀ꦡꦮꦶꦠ꧀ꦮꦴ ꦆꦢꦴꦤꦶ ꦱꦢ꧀ꦣꦩ꧀ꦩꦁ ꦡꦺꦴꦩꦺꦠꦸꦁ ‘‘ꦧꦸꦢ꧀ꦣꦺꦴꦥꦷ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦧꦸꦢ꧀ꦣꦺꦴꦠꦶ ꦏꦠ꧀ꦠꦸꦤꦶꦢ꧀ꦢꦺꦱꦺꦴ. ꦧꦸꦢ꧀ꦣꦨꦴꦮꦤ꧀ꦠꦶ ꦏꦩ꧀ꦩꦤꦶꦢ꧀ꦢꦺꦱꦺꦴ. ꦨꦴꦮꦺꦠ꧀ꦮꦴ ꦱꦕ꧀ꦖꦶꦏꦠ꧀ꦮꦴꦠꦶ ꦕ ꦥꦸꦧ꧀ꦧꦏꦴꦭꦏꦶꦫꦶꦪꦴꦤꦶꦢ꧀ꦢꦺꦱꦺꦴ. ꦪꦤ꧀ꦠꦶ ꦄꦤꦶꦪꦩꦠꦺꦴ ꦏꦩ꧀ꦩꦤꦶꦢ꧀ꦢꦺꦱꦺꦴ. ꦈꦥꦒꦠꦺꦴꦠꦶ ꦄꦥꦫꦏꦴꦭꦏꦶꦫꦶꦪꦴꦤꦶꦢ꧀ꦢꦺꦱꦺꦴ. ꦮꦤ꧀ꦢꦺꦠꦶ ꦏꦶꦫꦶꦪꦴꦤꦶꦢ꧀ꦢꦺꦱꦺꦴ. ꦠꦤ꧀ꦠꦶ ꦤꦶꦪꦩꦤꦁ. ꦣꦩ꧀ꦩꦤ꧀ꦠꦶ ꦮꦤ꧀ꦢꦤꦏꦶꦫꦶꦪꦴꦪ ꦏꦩ꧀ꦩꦤꦶꦢ꧀ꦢꦺꦱꦺꦴ. ꦒꦠꦩꦭꦁ ꦄꦤꦸꦠ꧀ꦠꦫꦤ꧀ꦠꦶ ꦕ ꦠꦧ꧀ꦧꦶꦱꦺꦱꦤꦁ.

ꦠꦠ꧀ꦡ ꦧꦸꦢ꧀ꦣꦱꦢ꧀ꦢꦱ꧀ꦱ ꦠꦴꦮ – ‘‘ꦧꦸꦗ꧀ꦙꦶꦠꦴ ꦱꦕ꧀ꦕꦴꦤꦷꦠꦶ ꦧꦸꦢ꧀ꦣꦺꦴ, ꦧꦺꦴꦣꦺꦠꦴ ꦥꦗꦴꦪꦴꦠꦶ ꦧꦸꦢ꧀ꦣꦺꦴ’’ꦠꦶꦄꦴꦢꦶꦤꦴ ꦤꦶꦢ꧀ꦢꦺꦱꦤꦪꦺꦤ (ꦩꦲꦴꦤꦶ. ꧑꧙꧒; ꦕꦹꦭ꦳ꦤꦶ. ꦥꦴꦫꦴꦪꦤꦠ꧀ꦡꦸꦠꦶꦒꦴꦡꦴꦤꦶꦢ꧀ꦢꦺꦱ ꧙꧗) ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦄꦡ ꦮꦴ ꦱꦮꦴꦱꦤꦴꦪ ꦄꦚ꧀ꦚꦴꦟꦤꦶꦢ꧀ꦢꦴꦪ ꦄꦕ꧀ꦕꦤ꧀ꦠꦮꦶꦒꦩꦠꦺꦴ, ꦧꦸꦢ꧀ꦣꦶꦪꦴ ꦮꦴ ꦮꦶꦏꦱꦶꦠꦨꦴꦮꦠꦺꦴ ꦧꦸꦢ꧀ꦣꦮꦴꦠꦶ ꦧꦸꦢ꧀ꦣꦺꦴ ꦗꦴꦒꦫꦟꦮꦶꦏꦱꦤꦠ꧀ꦡꦮꦱꦺꦤ. ꦄꦡ ꦮꦴ ꦏꦱ꧀ꦱꦕꦶꦥꦶ ꦚꦺꦪ꧀ꦪꦣꦩ꧀ꦩꦱ꧀ꦱ ꦄꦤꦮꦧꦸꦢ꧀ꦣꦱ꧀ꦱ ꦄꦨꦴꦮꦺꦤ ꦚꦺꦪ꧀ꦪꦮꦶꦱꦺꦱꦱ꧀ꦱ ꦏꦩ꧀ꦩꦨꦴꦮꦺꦤ ꦄꦒ꧀ꦒꦲꦟꦠꦺꦴ ꦏꦩ꧀ꦩꦮꦕꦤꦶꦕ꧀ꦖꦴꦪ ꦄꦨꦴꦮꦺꦤ ꦄꦮꦒꦩꦤꦠ꧀ꦡꦮꦱꦺꦤꦺꦮ ꦏꦠ꧀ꦠꦸꦤꦶꦢ꧀ꦢꦺꦱꦺꦴ ꦭꦧ꧀ꦨꦠꦷꦠꦶ ꦧꦸꦢ꧀ꦣꦮꦴꦠꦶ ꦧꦸꦢ꧀ꦣꦺꦴ ꦪꦡꦴ ‘‘ꦢꦶꦏ꧀ꦑꦶꦠꦺꦴ ꦤ ꦢꦢꦴꦠꦷ’’ꦠꦶ. ꦄꦠ꧀ꦡꦠꦺꦴ ꦥꦤ ꦥꦴꦫꦩꦶꦠꦴꦥꦫꦶꦨꦴꦮꦶꦠꦺꦴ ꦱꦪꦩ꧀ꦨꦹꦚꦴꦟꦺꦤ ꦱꦲ ꦮꦴꦱꦤꦴꦪ ꦮꦶꦲꦠꦮꦶꦢ꧀ꦣꦱ꧀ꦠꦤꦶꦫꦮꦱꦺꦱꦏꦶꦭꦺꦱꦺꦴ ꦩꦲꦴꦏꦫꦸꦟꦴ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦴꦢꦶꦄꦥꦫꦶꦩꦺꦪ꧀ꦪꦒꦸꦟꦒꦟꦴꦣꦴꦫꦺꦴ ꦑꦤ꧀ꦣꦱꦤ꧀ꦠꦴꦤꦺꦴ ꦧꦸꦢ꧀ꦣꦺꦴ. ꦪꦡꦴꦲ – ‘‘ꦧꦸꦢ꧀ꦣꦺꦴꦠꦶ ꦪꦺꦴ ꦱꦺꦴ ꦨꦒꦮꦴ ꦱꦪꦩ꧀ꦨꦹ ꦄꦤꦴꦕꦫꦶꦪꦏꦺꦴ ꦥꦸꦧ꧀ꦧꦺ ꦄꦤꦤꦸꦱ꧀ꦱꦸꦠꦺꦱꦸ ꦣꦩ꧀ꦩꦺꦱꦸ ꦱꦴꦩꦁ ꦱꦕ꧀ꦕꦴꦤꦶ ꦄꦨꦶꦱꦩ꧀ꦧꦸꦗ꧀ꦙꦶ. ꦠꦠ꧀ꦡ ꦕ ꦱꦧ꧀ꦧꦚ꧀ꦚꦸꦠꦁ ꦥꦠ꧀ꦠꦺꦴ ꦧꦭꦺꦱꦸ ꦕ ꦮꦱꦷꦨꦴꦮ’’ꦤ꧀ꦠꦶ (ꦩꦲꦴꦤꦶ. ꧑꧙꧒). ꦄꦥꦶ-ꦱꦢ꧀ꦢꦺꦴ ꦱꦩ꧀ꦨꦴꦮꦤꦺ. ꦠꦺꦤ ‘‘ꦌꦮꦁ ꦒꦸꦟꦮꦶꦱꦺꦱꦪꦸꦠ꧀ꦠꦺꦴ ꦱꦺꦴꦥꦶ ꦤꦴꦩ ꦨꦒꦮꦴ’’ꦠꦶ ꦮꦏ꧀ꦑꦩꦴꦤꦒꦸꦟꦺ ꦣꦩ꧀ꦩꦺ ꦱꦩ꧀ꦨꦴꦮꦤꦁ ꦢꦷꦥꦺꦠꦶ. ꦧꦸꦢ꧀ꦣꦨꦴꦮꦤ꧀ꦠꦶ ꦱꦩ꧀ꦩꦴꦱꦩ꧀ꦧꦺꦴꦣꦶꦁ. ꦨꦴꦮꦺꦠ꧀ꦮꦴꦠꦶ ꦈꦥ꧀ꦥꦴꦢꦺꦠ꧀ꦮꦴ ꦮꦝ꧀ꦞꦺꦠ꧀ꦮꦴ ꦕ. ꦱꦕ꧀ꦖꦶꦏꦠ꧀ꦮꦴꦠꦶ ꦥꦕ꧀ꦕꦏ꧀ꦑꦁ ꦏꦠ꧀ꦮꦴ. ꦈꦥꦒꦠꦺꦴꦠꦶ ꦥꦠ꧀ꦠꦺꦴ, ꦄꦣꦶꦒꦠꦺꦴꦠꦶ ꦄꦠ꧀ꦡꦺꦴ. ꦌꦠꦱ꧀ꦱ ‘‘ꦧꦸꦢ꧀ꦣꦨꦴꦮ’’ꦤ꧀ꦠꦶ ꦌꦠꦺꦤ ꦱꦩ꧀ꦧꦤ꧀ꦣꦺꦴ. ꦒꦠꦩꦭꦤ꧀ꦠꦶ ꦮꦶꦒꦠꦩꦭꦁ, ꦤꦶꦢ꧀ꦢꦺꦴꦱꦤ꧀ꦠꦶ ꦄꦠ꧀ꦡꦺꦴ. ꦮꦤ꧀ꦢꦺꦠꦶ ꦥꦟꦩꦴꦩꦶ, ꦡꦺꦴꦩꦺꦩꦶ ꦮꦴ. ꦄꦤꦸꦠ꧀ꦠꦫꦤ꧀ꦠꦶ ꦈꦠ꧀ꦠꦫꦫꦲꦶꦠꦁ, ꦭꦺꦴꦏꦸꦠ꧀ꦠꦫꦤ꧀ꦠꦶ ꦄꦠ꧀ꦡꦺꦴ. ꦣꦩ꧀ꦩꦤ꧀ꦠꦶ ꦪꦡꦴꦤꦸꦱꦶꦛ꧀ꦜꦁ ꦥꦛꦶꦥꦗ꧀ꦗꦩꦴꦤꦺ ꦄꦥꦴꦪꦠꦺꦴ ꦱꦁꦱꦴꦫꦠꦺꦴ ꦕ ꦄꦥꦠꦩꦴꦤꦺ ꦣꦴꦫꦺꦠꦷꦠꦶ ꦣꦩ꧀ꦩꦺꦴ.

ꦄꦪꦚ꧀ꦲꦺꦠ꧀ꦡ ꦱꦔ꧀ꦑꦺꦥꦠ꧀ꦡꦺꦴ – ꦌꦮꦁ ꦮꦶꦮꦶꦣꦒꦸꦟꦒꦟꦱꦩꦤ꧀ꦤꦴꦒꦠꦺꦴ ꦧꦸꦢ꧀ꦣꦺꦴꦥꦶ ꦨꦒꦮꦴ ꦪꦁ ꦄꦫꦶꦪꦩꦒ꧀ꦒꦱꦔ꧀ꦑꦴꦠꦁ ꦣꦩ꧀ꦩꦁ ꦨꦴꦮꦺꦠ꧀ꦮꦴ ꦦꦭꦤꦶꦧ꧀ꦧꦴꦤꦱꦔ꧀ꦑꦴꦠꦁ ꦥꦤ ꦣꦩ꧀ꦩꦁ ꦱꦕ꧀ꦖꦶꦏꦠ꧀ꦮꦴ ꦄꦤꦸꦠ꧀ꦠꦫꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦣꦶꦒꦠꦺꦴ, ꦠꦩꦺꦠꦁ ꦧꦸꦢ꧀ꦣꦴꦤꦩ꧀ꦥꦶ ꦧꦸꦢ꧀ꦣꦨꦴꦮꦲꦺꦠꦸꦨꦹꦠꦁ ꦱꦧ꧀ꦧꦢꦺꦴꦱꦩꦭꦫꦲꦶꦠꦁ ꦄꦠ꧀ꦠꦤꦺꦴ ꦈꦠ꧀ꦠꦫꦶꦠꦫꦴꦨꦴꦮꦺꦤ ꦄꦤꦸꦠ꧀ꦠꦫꦁ ꦥꦛꦶꦮꦺꦣꦱꦢ꧀ꦣꦩ꧀ꦩꦁ ꦤꦩꦴꦩꦷꦠꦶ. ꦥꦫꦶꦪꦠ꧀ꦠꦶꦱꦢ꧀ꦣꦩ꧀ꦩꦱ꧀ꦱꦥꦶ ꦠꦥ꧀ꦥꦏꦴꦱꦤꦠ꧀ꦠꦴ ꦆꦣ ꦱꦔ꧀ꦒꦲꦺꦴ ꦢꦛ꧀ꦜꦧ꧀ꦧꦺꦴ. ꦄꦡ ꦮꦴ ‘‘ꦄꦨꦶꦣꦩ꧀ꦩꦤꦪꦱꦩꦸꦢ꧀ꦢꦁ ꦄꦣꦶꦒꦕ꧀ꦖꦶ, ꦠꦷꦟꦶ ꦥꦶꦛꦏꦴꦤꦶ ꦱꦩ꧀ꦩꦱꦷ’’ꦠꦶ ꦕ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦠ꧀ꦠꦴ ꦥꦫꦶꦪꦠ꧀ꦠꦶꦣꦩ꧀ꦩꦱ꧀ꦱꦥꦶ ꦱꦕ꧀ꦖꦶꦏꦶꦫꦶꦪꦱꦩ꧀ꦩꦱꦤꦥꦫꦶꦪꦴꦪꦺꦴ ꦭꦧ꧀ꦨꦠꦷꦠꦶ ꦱꦺꦴꦥꦶ ꦆꦣ ꦮꦸꦠ꧀ꦠꦺꦴ ꦌꦮꦴꦠꦶ ꦢꦛ꧀ꦜꦧ꧀ꦧꦁ.

ꦠꦡꦴ ‘‘ꦪꦁ ꦣꦩ꧀ꦩꦁ ꦨꦴꦮꦺꦠ꧀ꦮꦴ ꦱꦕ꧀ꦖꦶꦏꦠ꧀ꦮꦴ’’ꦠꦶ ꦕ ꦮꦸꦠ꧀ꦠꦠ꧀ꦠꦴ ꦧꦸꦢ꧀ꦣꦏꦫꦣꦩ꧀ꦩꦨꦹꦠꦴꦲꦶ ꦥꦴꦫꦩꦶꦠꦴꦲꦶ ꦱꦲ ꦥꦸꦧ꧀ꦧꦨꦴꦒꦺ ꦄꦣꦶꦱꦷꦭꦱꦶꦏ꧀ꦑꦴꦢꦪꦺꦴꦥꦶ ꦆꦣ ꦣꦩ꧀ꦩ-ꦱꦢ꧀ꦢꦺꦤ ꦱꦔ꧀ꦒꦲꦶꦠꦴꦠꦶ ꦮꦺꦢꦶꦠꦧ꧀ꦧꦁ. ꦠꦴꦥꦶ ꦲꦶ ꦩꦭꦥꦛꦶꦥꦏ꧀ꦑꦠꦴꦪ ꦒꦠꦩꦭꦴ ꦄꦤꦚ꧀ꦚꦱꦴꦣꦴꦫꦟꦠꦴꦪ ꦄꦤꦸꦠ꧀ꦠꦫꦴ ꦕꦴꦠꦶ. ꦠꦡꦴ ꦲꦶ ꦱꦠ꧀ꦠꦴꦤꦁ ꦱꦏꦭꦮꦛ꧀ꦛꦢꦸꦏ꧀ꦑꦤꦶꦱ꧀ꦱꦫꦟꦠ꧀ꦡꦴꦪ ꦏꦠꦩꦲꦴꦨꦶꦤꦷꦲꦴꦫꦺꦴ ꦩꦲꦴꦏꦫꦸꦟꦴꦣꦶꦮꦴꦱꦥꦺꦱꦭꦗ꧀ꦙꦴꦱꦪꦺꦴ ꦥꦚ꧀ꦚꦴꦮꦶꦱꦺꦱꦥꦫꦶꦣꦺꦴꦠꦤꦶꦩ꧀ꦩꦭꦴꦤꦁ ꦢꦴꦤꦢꦩꦱꦚ꧀ꦚꦩꦴꦢꦷꦤꦁ ꦈꦠ꧀ꦠꦩꦣꦩ꧀ꦩꦴꦤꦁ ꦱꦠꦱꦲꦱ꧀ꦱꦴꦣꦶꦏꦴꦤꦶ ꦏꦥ꧀ꦥꦴꦤꦁ ꦕꦠ꧀ꦠꦴꦫꦶ ꦄꦱꦔ꧀ꦑ꧀ꦪꦺꦪ꧀ꦪꦴꦤꦶ ꦱꦏ꧀ꦏꦕ꧀ꦕꦁ ꦤꦶꦫꦤ꧀ꦠꦫꦁ ꦤꦶꦫꦮꦱꦺꦱꦴꦤꦁ ꦨꦴꦮꦤꦴꦥꦕ꧀ꦕꦏ꧀ꦑꦏꦫꦟꦺꦲꦶ ꦏꦩ꧀ꦩꦴꦢꦷꦱꦸ ꦄꦣꦶꦒꦠꦮꦱꦶꦨꦴꦮꦺꦴ ꦄꦕ꧀ꦖꦫꦶꦪꦴꦕꦶꦤ꧀ꦠꦺꦪ꧀ꦪꦩꦲꦴꦤꦸꦨꦴꦮꦺꦴ ꦄꦣꦶꦱꦷꦭꦴꦣꦶꦕꦶꦠ꧀ꦠꦴꦤꦁ ꦥꦫꦩꦸꦏ꧀ꦏꦁꦱꦥꦴꦫꦩꦶꦥ꧀ꦥꦠ꧀ꦠꦺꦴ ꦨꦒꦮꦴ ꦥꦕ꧀ꦕꦪꦴꦏꦴꦫꦺ ꦕꦠꦸꦮꦷꦱꦠꦶꦏꦺꦴꦛꦶꦱꦠꦱꦲꦱ꧀ꦱꦩꦸꦑꦺꦤ ꦩꦲꦴꦮꦗꦶꦫꦚꦴꦟꦁ ꦥꦺꦱꦺꦠ꧀ꦮꦴ ꦄꦤꦸꦠ꧀ꦠꦫꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦨꦶꦱꦩ꧀ꦧꦸꦢ꧀ꦣꦺꦴꦠꦶ.

ꦌꦠ꧀ꦡ ꦕ ‘‘ꦨꦴꦮꦺꦠ꧀ꦮꦴ’’ꦠꦶ ꦌꦠꦺꦤ ꦮꦶꦗ꧀ꦗꦴꦱꦩ꧀ꦥꦢꦴꦪ ꦣꦩ꧀ꦩꦁ ꦡꦺꦴꦩꦺꦠꦶ, ‘‘ꦱꦕ꧀ꦖꦶꦏꦠ꧀ꦮꦴ’’ꦠꦶ ꦌꦠꦺꦤ ꦮꦶꦩꦸꦠ꧀ꦠꦶꦱꦩ꧀ꦥꦢꦴꦪ. ꦠꦡꦴ ꦥꦜꦩꦺꦤ ꦙꦴꦤꦱꦩ꧀ꦥꦢꦴꦪ, ꦢꦸꦠꦶꦪꦺꦤ ꦮꦶꦩꦺꦴꦏ꧀ꦑꦱꦩ꧀ꦥꦢꦴꦪ. ꦥꦜꦩꦺꦤ ꦮꦴ ꦱꦩꦴꦣꦶꦱꦩ꧀ꦥꦢꦴꦪ, ꦢꦸꦠꦶꦪꦺꦤ ꦱꦩꦴꦥꦠ꧀ꦠꦶꦱꦩ꧀ꦥꦢꦴꦪ. ꦄꦡ ꦮꦴ ꦥꦜꦩꦺꦤ ꦑꦪꦺꦚꦴꦟꦨꦴꦮꦺꦤ, ꦢꦸꦠꦶꦪꦺꦤ ꦄꦤꦸꦥ꧀ꦥꦴꦢꦺꦚꦴꦟꦨꦴꦮꦺꦤ. ꦥꦸꦫꦶꦩꦺꦤ ꦮꦴ ꦮꦶꦗ꧀ꦗꦹꦥꦩꦠꦴꦪ, ꦢꦸꦠꦶꦪꦺꦤ ꦮꦗꦶꦫꦸꦥꦩꦠꦴꦪ. ꦥꦸꦫꦶꦩꦺꦤ ꦮꦴ ꦮꦶꦫꦴꦒꦱꦩ꧀ꦥꦠ꧀ꦠꦶꦪꦴ, ꦢꦸꦠꦶꦪꦺꦤ ꦤꦶꦫꦺꦴꦣꦱꦩ꧀ꦥꦠ꧀ꦠꦶꦪꦴ. ꦠꦡꦴ ꦥꦜꦩꦺꦤ ꦤꦶꦪ꧀ꦪꦴꦤꦨꦴꦮꦺꦤ, ꦢꦸꦠꦶꦪꦺꦤ ꦤꦶꦱ꧀ꦱꦫꦟꦨꦴꦮꦺꦤ. ꦥꦜꦩꦺꦤ ꦮꦴ ꦲꦺꦠꦸꦨꦴꦮꦺꦤ, ꦢꦸꦠꦶꦪꦺꦤ ꦄꦱꦔ꧀ꦑꦠꦨꦴꦮꦺꦤ. ꦥꦜꦩꦺꦤ ꦮꦴ ꦢꦱ꧀ꦱꦤꦨꦴꦮꦺꦤ, ꦢꦸꦠꦶꦪꦺꦤ ꦮꦶꦮꦺꦏꦨꦴꦮꦺꦤ. ꦥꦜꦩꦺꦤ ꦮꦴ ꦄꦣꦶꦥꦠꦶꦨꦴꦮꦺꦤ, ꦢꦸꦠꦶꦪꦺꦤ ꦄꦩꦠꦨꦴꦮꦺꦤ ꦣꦩ꧀ꦩꦁ ꦡꦺꦴꦩꦺꦠꦶ. ꦄꦡ ꦮꦴ ‘‘ꦪꦁ ꦣꦩ꧀ꦩꦁ ꦨꦴꦮꦺꦠ꧀ꦮꦴ ꦧꦸꦢ꧀ꦣꦨꦴꦮꦁ ꦈꦥꦒꦠꦺꦴ’’ꦠꦶ ꦌꦠꦺꦤ ꦱ꧀ꦮꦴꦏ꧀ꦑꦴꦠꦠꦴꦪ ꦣꦩ꧀ꦩꦁ ꦡꦺꦴꦩꦺꦠꦶ, ‘‘ꦱꦕ꧀ꦖꦶꦏꦠ꧀ꦮꦴ’’ꦠꦶ ꦌꦠꦺꦤ ꦱꦤ꧀ꦢꦶꦛ꧀ꦜꦶꦏꦠꦴꦪ. ꦠꦡꦴ ꦥꦸꦫꦶꦩꦺꦤ ꦄꦏꦴꦭꦶꦏꦠꦴꦪ, ꦥꦕ꧀ꦖꦶꦩꦺꦤ ꦌꦲꦶꦥꦱ꧀ꦱꦶꦏꦠꦴꦪ. ꦥꦸꦫꦶꦩꦺꦤ ꦮꦴ ꦎꦥꦤꦺꦪ꧀ꦪꦶꦏꦠꦴꦪ, ꦥꦕ꧀ꦖꦶꦩꦺꦤ ꦥꦕ꧀ꦕꦠ꧀ꦠꦁ ꦮꦺꦢꦶꦠꦧ꧀ꦧꦠꦴꦪ ꦣꦩ꧀ꦩꦁ ꦡꦺꦴꦩꦺꦠꦶ. ‘‘ꦒꦠꦩꦭ’’ꦤ꧀ꦠꦶ ꦆꦩꦶꦤꦴ ꦱꦁꦏꦶꦭꦺꦱꦴꦨꦴꦮꦢꦷꦥꦤꦺꦤ ꦣꦩ꧀ꦩꦱ꧀ꦱ ꦥꦫꦶꦱꦸꦢ꧀ꦣꦠꦁ ꦢꦱ꧀ꦱꦺꦠꦶ. ‘‘ꦄꦤꦸꦠ꧀ꦠꦫ’’ꦤ꧀ꦠꦶ ꦌꦠꦺꦤ ꦄꦚ꧀ꦚꦱ꧀ꦱ ꦮꦶꦱꦶꦛ꧀ꦜꦱ꧀ꦱ ꦄꦨꦴꦮꦢꦷꦥꦤꦺꦤ ꦮꦶꦥꦸꦭꦥꦫꦶꦥꦸꦟ꧀ꦟꦠꦁ. ꦥꦜꦩꦺꦤ ꦮꦴ ꦥꦲꦴꦤꦱꦩ꧀ꦥꦢꦁ ꦣꦩ꧀ꦩꦱ꧀ꦱ ꦢꦱ꧀ꦱꦺꦠꦶ, ꦢꦸꦠꦶꦪꦺꦤ ꦱꦨꦴꦮꦱꦩ꧀ꦥꦢꦁ. ꦨꦴꦮꦺꦠꦧ꧀ꦧꦠꦴꦪ ꦮꦴ ꦣꦩ꧀ꦩꦱ꧀ꦱ ꦒꦠꦩꦭꦨꦴꦮꦺꦴ ꦪꦺꦴꦗꦺꦠꦧ꧀ꦧꦺꦴ. ꦨꦴꦮꦤꦴꦧꦭꦺꦤ ꦲꦶ ꦱꦺꦴ ꦢꦺꦴꦱꦴꦤꦁ ꦱꦩꦸꦒ꧀ꦓꦴꦠꦏꦺꦴ ꦲꦺꦴꦠꦷꦠꦶ. ꦱꦕ꧀ꦖꦶꦏꦴꦠꦧ꧀ꦧꦨꦴꦮꦺꦤ ꦄꦤꦸꦠ꧀ꦠꦫꦨꦴꦮꦺꦴ ꦪꦺꦴꦗꦺꦠꦧ꧀ꦧꦺꦴ. ꦱꦕ꧀ꦖꦶꦏꦶꦫꦶꦪꦴꦤꦶꦧ꧀ꦧꦠ꧀ꦠꦶꦠꦺꦴ ꦲꦶ ꦠꦠꦸꦠ꧀ꦠꦫꦶꦏꦫꦟꦷꦪꦴꦨꦴꦮꦠꦺꦴ ꦄꦤꦚ꧀ꦚꦱꦴꦣꦴꦫꦟꦠꦴꦪ ꦄꦤꦸꦠ꧀ꦠꦫꦺꦴꦠꦶ. ꦠꦡꦴ ‘‘ꦨꦴꦮꦺꦠ꧀ꦮꦴ’’ꦠꦶ ꦌꦠꦺꦤ ꦱꦲ ꦥꦸꦧ꧀ꦧꦨꦴꦒꦱꦷꦭꦴꦢꦷꦲꦶ ꦱꦺꦏ꧀ꦑꦴ ꦱꦷꦭꦱꦩꦴꦣꦶꦥꦚ꧀ꦚꦴꦏ꧀ꦑꦤ꧀ꦣꦴ ꦢꦱ꧀ꦱꦶꦠꦴ ꦲꦺꦴꦤ꧀ꦠꦶ. ‘‘ꦱꦕ꧀ꦖꦶꦏꦠ꧀ꦮꦴ’’ꦠꦶ ꦌꦠꦺꦤ ꦱꦲ ꦄꦱꦔ꧀ꦑꦠꦴꦪ ꦣꦴꦠꦸꦪꦴ ꦄꦱꦺꦏ꧀ꦑꦴ ꦱꦷꦭꦱꦩꦴꦣꦶꦥꦚ꧀ꦚꦴꦏ꧀ꦑꦤ꧀ꦣꦴ ꦢꦱ꧀ꦱꦶꦠꦴ ꦲꦺꦴꦤ꧀ꦠꦷꦠꦶ.

꧓. ꦌꦮꦁ ꦱꦔ꧀ꦑꦺꦥꦺꦤꦺꦮ ꦱꦧ꧀ꦧꦣꦩ꧀ꦩꦒꦸꦟꦺꦲꦶ ꦱꦢ꧀ꦣꦩ꧀ꦩꦁ ꦄꦨꦶꦠ꧀ꦡꦮꦶꦠ꧀ꦮꦴ ꦆꦢꦴꦤꦶ ꦄꦫꦶꦪꦱꦔ꧀ꦓꦁ ꦡꦺꦴꦩꦺꦠꦸꦁ ‘‘ꦱꦸꦒꦠꦱ꧀ꦱꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦱꦸꦒꦠꦱ꧀ꦱꦴꦠꦶ ꦱꦩ꧀ꦧꦤ꧀ꦣꦤꦶꦢ꧀ꦢꦺꦱꦺꦴ. ꦠꦱ꧀ꦱ ‘‘ꦥꦸꦠ꧀ꦠꦴꦤ’’ꦤ꧀ꦠꦶ ꦌꦠꦺꦤ ꦱꦩ꧀ꦧꦤ꧀ꦣꦺꦴ. ꦎꦫꦱꦴꦤꦤ꧀ꦠꦶ ꦥꦸꦠ꧀ꦠꦮꦶꦱꦺꦱꦤꦁ. ꦩꦴꦫꦱꦺꦤꦩꦡꦤꦴꦤꦤ꧀ꦠꦶ ꦎꦫꦱꦥꦸꦠ꧀ꦠꦨꦴꦮꦺ ꦏꦴꦫꦟꦤꦶꦢ꧀ꦢꦺꦱꦺꦴ. ꦠꦺꦤ ꦏꦶꦭꦺꦱꦥꦲꦴꦤꦩꦺꦮ ꦨꦒꦮꦠꦺꦴ ꦎꦫꦱꦥꦸꦠ꧀ꦠꦨꦴꦮꦺ ꦏꦴꦫꦟꦁ ꦄꦤꦸꦗꦴꦤꦴꦠꦷꦠꦶ ꦢꦱ꧀ꦱꦺꦠꦶ. ꦄꦛ꧀ꦜꦤ꧀ꦤꦤ꧀ꦠꦶ ꦒꦟꦤꦥꦫꦶꦕ꧀ꦖꦺꦢꦤꦶꦢ꧀ꦢꦺꦱꦺꦴ. ꦠꦺꦤ ꦕ ꦱꦠꦶꦥꦶ ꦠꦺꦱꦁ ꦱꦠ꧀ꦠꦮꦶꦱꦺꦱꦨꦴꦮꦺꦤ ꦄꦤꦺꦏꦱꦲꦱ꧀ꦱꦱꦔ꧀ꦑꦴꦨꦴꦮꦺ ꦆꦩꦁ ꦒꦟꦤꦥꦫꦶꦕ꧀ꦖꦺꦢꦁ ꦤꦴꦠꦶꦮꦠ꧀ꦠꦤ꧀ꦠꦷꦠꦶ ꦢꦱ꧀ꦱꦺꦠꦶ ꦩꦒ꧀ꦒꦛ꧀ꦜꦦꦭꦛ꧀ꦜꦨꦴꦮꦴꦤꦠꦶꦮꦠ꧀ꦠꦤꦠꦺꦴ. ꦱꦩꦹꦲꦤ꧀ꦠꦶ ꦱꦩꦸꦢꦴꦪꦤꦶꦢ꧀ꦢꦺꦱꦺꦴ. ꦄꦫꦶꦪꦱꦔ꧀ꦓꦤ꧀ꦠꦶ ꦒꦸꦟꦮꦶꦱꦶꦛ꧀ꦜꦱꦔ꧀ꦓꦴꦠꦨꦴꦮꦤꦶꦢ꧀ꦢꦺꦱꦺꦴ. ꦠꦺꦤ ꦄꦱꦠꦶꦥꦶ ꦄꦫꦶꦪꦥꦸꦒ꧀ꦒꦭꦴꦤꦁ ꦏꦴꦪꦱꦴꦩꦒ꧀ꦒꦶꦪꦁ ꦄꦫꦶꦪꦱꦔ꧀ꦓꦨꦴꦮꦁ ꦢꦱ꧀ꦱꦺꦠꦶ ꦢꦶꦛ꧀ꦜꦶꦱꦷꦭꦱꦴꦩꦚ꧀ꦚꦺꦤ ꦱꦁꦲꦠꦨꦴꦮꦠꦺꦴ.

ꦠꦠ꧀ꦡ ꦈꦫꦱꦶ ꦨꦮꦴ ꦗꦴꦠꦴ ꦱꦁꦧꦢ꧀ꦣꦴ ꦕ ꦎꦫꦱꦴ. ꦪꦡꦴ ꦲꦶ ꦱꦠ꧀ꦠꦴꦤꦁ ꦎꦫꦱꦥꦸꦠ꧀ꦠꦴ ꦄꦠ꧀ꦠꦗꦴꦠꦠꦴꦪ ꦥꦶꦠꦸ ꦱꦤ꧀ꦠꦏꦱ꧀ꦱ ꦢꦴꦪꦗ꧀ꦗꦱ꧀ꦱ ꦮꦶꦱꦺꦱꦺꦤ ꦨꦴꦒꦶꦤꦺꦴ ꦲꦺꦴꦤ꧀ꦠꦶ, ꦌꦮꦩꦺꦠꦺꦥꦶ ꦄꦫꦶꦪꦥꦸꦒ꧀ꦒꦭꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦣꦩ꧀ꦩꦱ꧀ꦱꦮꦤꦤ꧀ꦠꦺ ꦄꦫꦶꦪꦴꦪ ꦗꦴꦠꦶꦪꦴ ꦗꦴꦠꦠꦴꦪ ꦨꦒꦮꦠꦺꦴ ꦱꦤ꧀ꦠꦏꦱ꧀ꦱ ꦮꦶꦩꦸꦠ꧀ꦠꦶꦱꦸꦑꦱ꧀ꦱ ꦄꦫꦶꦪꦣꦩ꧀ꦩꦫꦠꦤꦱ꧀ꦱ ꦕ ꦌꦏꦤ꧀ꦠꦨꦴꦒꦶꦤꦺꦴꦠꦶ ꦎꦫꦱꦴ ꦮꦶꦪ ꦎꦫꦱꦴ. ꦄꦡ ꦮꦴ ꦨꦒꦮꦠꦺꦴ ꦣꦩ꧀ꦩꦢꦺꦱꦤꦴꦤꦸꦨꦴꦮꦺꦤꦺꦮ ꦄꦫꦶꦪꦨꦹꦩꦶꦁ ꦎꦏ꧀ꦏꦩꦩꦴꦤꦴ ꦎꦏ꧀ꦏꦤ꧀ꦠꦴ ꦕ ꦄꦫꦶꦪꦱꦴꦮꦏꦴ ꦨꦒꦮꦠꦺꦴ ꦈꦫꦺꦤ ꦮꦴꦪꦴꦩꦗꦤꦶꦠꦴꦨꦶꦗꦴꦠꦶꦠꦴꦪ ꦤꦶꦥ꧀ꦥꦫꦶꦪꦴꦪꦺꦤ ꦎꦫꦱꦴ ꦥꦸꦠ꧀ꦠꦴꦠꦶ ꦮꦠ꧀ꦠꦧ꧀ꦧꦠꦁ ꦄꦫꦲꦤ꧀ꦠꦶ. ꦱꦴꦮꦏꦺꦲꦶ ꦥꦮꦠ꧀ꦠꦶꦪꦩꦴꦤꦴꦥꦶ ꦲꦶ ꦣꦩ꧀ꦩꦢꦺꦱꦤꦴ ‘‘ꦨꦒꦮꦠꦺꦴ ꦣꦩ꧀ꦩꦢꦺꦱꦤꦴ’’ꦆꦕ꧀ꦕꦺꦮ ꦮꦸꦕ꧀ꦕꦠꦶ ꦠꦩ꧀ꦩꦹꦭꦶꦏꦠ꧀ꦠꦴ ꦭꦏ꧀ꦑꦟꦴꦢꦶꦮꦶꦱꦺꦱꦴꦨꦴꦮꦠꦺꦴ ꦕ.

ꦪꦢꦶꦥꦶ ꦄꦫꦶꦪꦱꦴꦮꦏꦴꦤꦁ ꦄꦫꦶꦪꦩꦒ꧀ꦒꦴꦣꦶꦒꦩꦱꦩꦪꦺ ꦨꦒꦮꦠꦺꦴ ꦮꦶꦪ ꦠꦢꦤ꧀ꦠꦫꦴꦪꦏꦫꦟꦠ꧀ꦡꦁ ꦢꦺꦮꦥꦸꦠ꧀ꦠꦩꦴꦫꦺꦴ, ꦩꦴꦫꦮꦴꦲꦶꦤꦷ ꦮꦴ ꦤ ꦌꦏꦤ꧀ꦠꦺꦤ ꦄꦥꦱꦴꦢꦺꦠꦶ, ꦠꦺꦲꦶ ꦥꦤ ꦄꦥꦱꦴꦢꦺꦠꦧ꧀ꦧꦠꦴꦪ ꦏꦴꦫꦟꦺ ꦮꦶꦩꦡꦶꦠꦺ ꦠꦺꦥꦶ ꦮꦶꦩꦡꦶꦠꦴ ꦌꦮ ꦤꦴꦩ ꦲꦺꦴꦤ꧀ꦠꦷꦠꦶ ꦄꦴꦲ ‘‘ꦩꦴꦫꦱꦺꦤꦩꦡꦤꦴꦤ’’ꦤ꧀ꦠꦶ. ꦆꦩꦱ꧀ꦩꦶꦁ ꦥꦤꦠ꧀ꦡꦺ ‘‘ꦩꦴꦫꦩꦴꦫꦱꦺꦤꦩꦡꦤꦴꦤ’’ꦤ꧀ꦠꦶ ꦮꦠ꧀ꦠꦧ꧀ꦧꦺ ꦩꦴꦫꦱꦺꦤꦩꦡꦤꦴꦤꦤ꧀ꦠꦶ ꦌꦏꦢꦺꦱꦱꦫꦹꦥꦺꦏꦱꦺꦱꦺꦴ ꦏꦠꦺꦴꦠꦶ ꦢꦛ꧀ꦜꦧ꧀ꦧꦁ. ꦄꦡ ꦮꦴ ꦑꦤ꧀ꦣꦴꦨꦶꦱꦔ꧀ꦑꦴꦫꦩꦴꦫꦴꦤꦁ ꦮꦶꦪ ꦢꦺꦮꦥꦸꦠ꧀ꦠꦩꦴꦫꦱ꧀ꦱꦥꦶ ꦒꦸꦟꦩꦴꦫꦟꦺ ꦱꦲꦴꦪꦨꦴꦮꦹꦥꦒꦩꦤꦠꦺꦴ ꦏꦶꦭꦺꦱꦧꦭꦏꦴꦪꦺꦴ ‘‘ꦱꦺꦤꦴ’’ꦠꦶ ꦮꦸꦕ꧀ꦕꦠꦶ. ꦪꦡꦴꦲ ‘‘ꦏꦴꦩꦴ ꦠꦺ ꦥꦜꦩꦴ ꦱꦺꦤꦴ’’ꦠꦶꦄꦴꦢꦶ (ꦱꦸ. ꦤꦶ. ꧔꧓꧘). ꦱꦴ ꦕ ꦠꦺꦲꦶ ꦢꦶꦪꦝ꧀ꦞꦱꦲꦱ꧀ꦱꦨꦺꦢꦴ, ꦄꦤꦤ꧀ꦠꦨꦺꦢꦴ ꦮꦴ ꦏꦶꦭꦺꦱꦮꦴꦲꦶꦤꦷ ꦱꦠꦶꦣꦩ꧀ꦩꦮꦶꦕꦪꦮꦷꦫꦶꦪꦱꦩꦡꦴꦢꦶꦒꦸꦟꦥꦲꦫꦟꦺꦲꦶ ꦎꦣꦶꦱꦺꦴ ꦮꦶꦩꦡꦶꦠꦴ ꦮꦶꦲꦠꦴ ꦮꦶꦢ꧀ꦣꦱ꧀ꦠꦴ ꦕꦴꦠꦶ ꦩꦴꦫꦱꦺꦤꦩꦡꦤꦴ, ꦄꦫꦶꦪꦱꦴꦮꦏꦴ. ꦌꦠꦺꦤ ꦠꦺꦱꦁ ꦨꦒꦮꦠꦺꦴ ꦄꦤꦸꦗꦴꦠꦥꦸꦠ꧀ꦠꦠꦁ ꦢꦱ꧀ꦱꦺꦠꦶ.

ꦄꦴꦫꦏꦠ꧀ꦠꦴ ꦏꦶꦭꦺꦱꦺꦲꦶ, ꦄꦤꦪꦺ ꦤ ꦆꦫꦶꦪꦤꦠꦺꦴ, ꦄꦪꦺ ꦕ ꦆꦫꦶꦪꦤꦠꦺꦴ ꦄꦫꦶꦪꦴ ꦤꦶꦫꦸꦠ꧀ꦠꦶꦤꦪꦺꦤ. ꦄꦡ ꦮꦴ ꦱꦢꦺꦮꦏꦺꦤ ꦭꦺꦴꦏꦺꦤ ꦱꦫꦟꦤ꧀ꦠꦶ ꦄꦫꦟꦷꦪꦠꦺꦴ ꦈꦥꦒꦤ꧀ꦠꦧ꧀ꦧꦠꦺꦴ, ꦈꦥꦒꦠꦴꦤꦚ꧀ꦕ ꦠꦢꦠ꧀ꦡꦱꦶꦢ꧀ꦣꦶꦠꦺꦴ ꦄꦫꦶꦪꦴ. ꦄꦫꦶꦪꦴꦤꦁ ꦱꦔ꧀ꦓꦺꦴꦠꦶ ꦄꦫꦶꦪꦱꦔ꧀ꦓꦺꦴ. ꦄꦫꦶꦪꦺꦴ ꦕ ꦱꦺꦴ ꦱꦔ꧀ꦓꦺꦴ ꦕꦴꦠꦶ ꦮꦴ ꦄꦫꦶꦪꦱꦔ꧀ꦓꦺꦴ. ꦨꦒꦮꦠꦺꦴ ꦄꦥꦫꦨꦴꦒꦺ ꦧꦸꦢ꧀ꦣꦣꦩ꧀ꦩꦫꦠꦤꦴꦤꦩ꧀ꦥꦶ ꦱꦩꦣꦶꦒꦩꦺꦴ ꦱꦔ꧀ꦓꦫꦠꦤꦴꦣꦷꦤꦺꦴꦠꦶ ꦄꦱ꧀ꦱ ꦄꦫꦶꦪꦱꦔ꧀ꦓꦱ꧀ꦱ ꦧꦲꦹꦥꦏꦴꦫꦠꦁ ꦢꦱ꧀ꦱꦺꦠꦸꦁ ꦆꦣꦺꦮ ‘‘ꦱꦶꦫꦱꦴ ꦮꦤ꧀ꦢꦺ’’ꦠꦶ ꦮꦸꦠ꧀ꦠꦤ꧀ꦠꦶ ꦢꦛ꧀ꦜꦧ꧀ꦧꦁ.

ꦌꦠ꧀ꦡ ꦕ ‘‘ꦱꦸꦒꦠꦱ꧀ꦱ ꦎꦫꦱꦴꦤꦁ ꦥꦸꦠ꧀ꦠꦴꦤ’’ꦤ꧀ꦠꦶ ꦌꦠꦺꦤ ꦄꦫꦶꦪꦱꦔ꧀ꦓꦱ꧀ꦱ ꦥꦨꦮꦱꦩ꧀ꦥꦢꦁ ꦢꦱ꧀ꦱꦺꦠꦶ, ‘‘ꦩꦴꦫꦱꦺꦤꦩꦡꦤꦴꦤ’’ꦤ꧀ꦠꦶ ꦌꦠꦺꦤ ꦥꦲꦴꦤꦱꦩ꧀ꦥꦢꦁ ꦱꦏꦭꦱꦁꦏꦶꦭꦺꦱꦥꦲꦴꦤꦢꦷꦥꦤꦠꦺꦴ, ‘‘ꦄꦛ꧀ꦜꦤ꧀ꦤꦩ꧀ꦥꦶ ꦱꦩꦹꦲ’’ꦤ꧀ꦠꦶ ꦌꦠꦺꦤ ꦚꦴꦟꦱꦩ꧀ꦥꦢꦁ ꦩꦒ꧀ꦒꦛ꧀ꦜꦦꦭꦛ꧀ꦜꦨꦴꦮꦢꦷꦥꦤꦠꦺꦴ. ‘‘ꦄꦫꦶꦪꦱꦔ꧀ꦓ’’ꦤ꧀ꦠꦶ ꦌꦠꦺꦤ ꦥꦨꦮꦱꦩ꧀ꦥꦢꦁ ꦢꦱ꧀ꦱꦺꦠꦶ ꦱꦧ꧀ꦧꦱꦔ꧀ꦓꦴꦤꦁ ꦄꦒ꧀ꦒꦨꦴꦮꦢꦷꦥꦤꦠꦺꦴ. ꦄꦡ ꦮꦴ ꦱꦸꦒꦠꦱ꧀ꦱ ꦎꦫꦱꦴꦤꦁ ꦥꦸꦠ꧀ꦠꦴꦤꦤ꧀ꦠꦶ ꦄꦫꦶꦪꦱꦔ꧀ꦓꦱ꧀ꦱ ꦮꦶꦱꦸꦢ꧀ꦣꦤꦶꦱ꧀ꦱꦪꦨꦴꦮꦢꦷꦥꦤꦁ. ꦩꦴꦫꦱꦺꦤꦩꦡꦤꦴꦤꦤ꧀ꦠꦶ ꦱꦩ꧀ꦩꦴꦈꦗꦸꦚꦴꦪꦱꦴꦩꦷꦕꦶꦥ꧀ꦥꦛꦶꦥꦤ꧀ꦤꦨꦴꦮꦢꦷꦥꦤꦁ. ꦄꦛ꧀ꦜꦤ꧀ꦤꦩ꧀ꦥꦶ ꦱꦩꦹꦲꦤ꧀ꦠꦶ ꦄꦴꦲꦸꦤꦺꦪ꧀ꦪꦴꦢꦶꦨꦴꦮꦢꦷꦥꦤꦁ. ꦄꦫꦶꦪꦱꦔ꧀ꦓꦤ꧀ꦠꦶ ꦄꦤꦸꦠ꧀ꦠꦫꦥꦸꦚ꧀ꦚꦑꦺꦠ꧀ꦠꦨꦴꦮꦢꦷꦥꦤꦁ. ꦠꦡꦴ ‘‘ꦱꦸꦒꦠꦱ꧀ꦱ ꦎꦫꦱꦴꦤꦁ ꦥꦸꦠ꧀ꦠꦴꦤ’’ꦤ꧀ꦠꦶ ꦌꦠꦺꦤ ꦄꦫꦶꦪꦱꦔ꧀ꦓꦱ꧀ꦱ ꦭꦺꦴꦏꦸꦠ꧀ꦠꦫꦱꦫꦟꦒꦩꦤꦱꦨꦴꦮꦁ ꦢꦷꦥꦺꦠꦶ. ꦭꦺꦴꦏꦸꦠ꧀ꦠꦫꦱꦫꦟꦒꦩꦤꦺꦤ ꦲꦶ ꦠꦺ ꦨꦒꦮꦠꦺꦴ ꦎꦫꦱꦥꦸꦠ꧀ꦠꦴ ꦗꦴꦠꦴ. ‘‘ꦩꦴꦫꦱꦺꦤꦩꦡꦤꦴꦤ’’ꦤ꧀ꦠꦶ ꦌꦠꦺꦤ ꦄꦨꦶꦤꦷꦲꦴꦫꦱꦩ꧀ꦥꦢꦴꦪ ꦱꦶꦢ꧀ꦣꦁ ꦥꦸꦧ꧀ꦧꦨꦴꦒꦺ ꦱꦩ꧀ꦩꦴꦥꦛꦶꦥꦠ꧀ꦠꦶꦁ ꦢꦱ꧀ꦱꦺꦠꦶ. ꦏꦠꦴꦨꦶꦤꦷꦲꦴꦫꦴ ꦲꦶ ꦱꦩ꧀ꦩꦴꦥꦛꦶꦥꦤ꧀ꦤꦴ ꦩꦴꦫꦁ ꦩꦴꦫꦥꦫꦶꦱꦁ ꦮꦴ ꦄꦨꦶꦮꦶꦗꦶꦤꦤ꧀ꦠꦶ. ‘‘ꦄꦛ꧀ꦜꦤ꧀ꦤꦩ꧀ꦥꦶ ꦱꦩꦹꦲ’’ꦤ꧀ꦠꦶ ꦌꦠꦺꦤ ꦥꦛꦶꦮꦶꦢ꧀ꦣꦱ꧀ꦠꦮꦶꦥꦏ꧀ꦑꦺ ꦱꦺꦏ꧀ꦑꦴꦱꦺꦏ꧀ꦑꦣꦩ꧀ꦩꦺ ꦢꦱ꧀ꦱꦺꦠꦶ ꦥꦸꦒ꧀ꦒꦭꦴꦣꦶꦛ꧀ꦜꦴꦤꦺꦤ ꦩꦒ꧀ꦒꦦꦭꦣꦩ꧀ꦩꦴꦤꦁ ꦥꦏꦴꦱꦶꦠꦠ꧀ꦠꦴ. ‘‘ꦄꦫꦶꦪꦱꦔ꧀ꦓ’’ꦤ꧀ꦠꦶ ꦄꦒ꧀ꦒꦢꦏ꧀ꦑꦶꦟꦺꦪ꧀ꦪꦨꦴꦮꦁ ꦢꦱ꧀ꦱꦺꦠꦶ. ꦱꦫꦟꦒꦩꦤꦚ꧀ꦕ ꦱꦴꦮꦏꦴꦤꦁ ꦱꦧ꧀ꦧꦒꦸꦟꦴꦤꦁ ꦄꦴꦢꦶ, ꦱꦥꦸꦧ꧀ꦧꦨꦴꦒꦥꦛꦶꦥꦢꦴ ꦱꦺꦏ꧀ꦑꦴ ꦱꦷꦭꦏ꧀ꦑꦤ꧀ꦣꦴꦢꦪꦺꦴ ꦩꦗ꧀ꦙꦺ, ꦄꦱꦺꦏ꧀ꦑꦴ ꦱꦷꦭꦏ꧀ꦑꦤ꧀ꦣꦴꦢꦪꦺꦴ ꦥꦫꦶꦪꦺꦴꦱꦴꦤꦤ꧀ꦠꦶ ꦄꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦏꦭ꧀ꦪꦴꦟꦴ ꦱꦔ꧀ꦑꦺꦥꦠꦺꦴ ꦱꦧ꧀ꦧꦺ ꦄꦫꦶꦪꦱꦔ꧀ꦓꦒꦸꦟꦴ ꦥꦏꦴꦱꦶꦠꦴ ꦲꦺꦴꦤ꧀ꦠꦶ.

꧔. ꦌꦮꦁ ꦒꦴꦡꦴꦠ꧀ꦠꦪꦺꦤ ꦱꦔ꧀ꦑꦺꦥꦠꦺꦴ ꦱꦏꦭꦒꦸꦟꦱꦁꦏꦶꦠ꧀ꦠꦤꦩꦸꦑꦺꦤ ꦫꦠꦤꦠ꧀ꦠꦪꦱ꧀ꦱ ꦥꦟꦴꦩꦁ ꦏꦠ꧀ꦮꦴ ꦆꦢꦴꦤꦶ ꦠꦁ ꦤꦶꦥꦕ꧀ꦕꦏꦴꦫꦁ ꦪꦡꦴꦣꦶꦥ꧀ꦥꦺꦠꦺ ꦥꦪꦺꦴꦗꦤꦺ ꦥꦫꦶꦟꦴꦩꦺꦤ꧀ꦠꦺꦴ ‘‘ꦆꦠꦶ ꦩꦺ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦫꦠꦶꦗꦤꦤꦛ꧀ꦜꦺꦤ ꦫꦠꦤꦁ, ꦧꦸꦢ꧀ꦣꦣꦩ꧀ꦩꦱꦔ꧀ꦓꦴ. ꦠꦺꦱꦚ꧀ꦲꦶ ‘‘ꦆꦠꦶꦥꦶ ꦱꦺꦴ ꦨꦒꦮꦴ’’ꦠꦶꦄꦴꦢꦶꦤꦴ ꦪꦡꦴꦨꦹꦠꦒꦸꦟꦺ ꦄꦴꦮꦗ꧀ꦗꦺꦤ꧀ꦠꦱ꧀ꦱ ꦄꦩꦠꦴꦣꦶꦒꦩꦲꦺꦠꦸꦨꦹꦠꦁ ꦄꦤꦥ꧀ꦥꦏꦁ ꦥꦷꦠꦶꦥꦴꦩꦺꦴꦗ꧀ꦗꦁ ꦈꦥ꧀ꦥꦗ꧀ꦗꦠꦶ. ꦪꦡꦴꦲ –

‘‘ꦪꦱ꧀ꦩꦶꦁ, ꦩꦲꦴꦤꦴꦩ, ꦱꦩꦪꦺ ꦄꦫꦶꦪꦱꦴꦮꦏꦺꦴ ꦠꦡꦴꦒꦠꦁ ꦄꦤꦸꦱ꧀ꦱꦫꦠꦶ, ꦤꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦫꦴꦒꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦢꦺꦴꦱꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦩꦺꦴꦲꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦈꦗꦸꦒꦠꦩꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦁ ꦲꦺꦴꦠꦶ ꦠꦡꦴꦒꦠꦁ ꦄꦴꦫꦧ꧀ꦨ. ꦈꦗꦸꦒꦠꦕꦶꦠ꧀ꦠꦺꦴ ꦑꦺꦴ ꦥꦤ, ꦩꦲꦴꦤꦴꦩ, ꦄꦫꦶꦪꦱꦴꦮꦏꦺꦴ ꦭꦨꦠꦶ ꦄꦠ꧀ꦡꦮꦺꦢꦁ, ꦭꦨꦠꦶ ꦣꦩ꧀ꦩꦮꦺꦢꦁ, ꦭꦨꦠꦶ ꦣꦩ꧀ꦩꦹꦥꦱꦁꦲꦶꦠꦁ ꦥꦴꦩꦺꦴꦗ꧀ꦗꦁ, ꦥꦩꦸꦢꦶꦠꦱ꧀ꦱ ꦥꦷꦠꦶ ꦗꦴꦪꦠꦷ’’ꦠꦶꦄꦴꦢꦶ (ꦄ. ꦤꦶ. ꧖.꧑꧐; ꧑꧑.꧑꧑).

ꦕꦶꦠ꧀ꦠꦷꦏꦠꦴꦢꦶꦨꦴꦮꦺꦴ ꦮꦴ ꦫꦠꦤꦛ꧀ꦜꦺꦴ. ꦮꦸꦠ꧀ꦠꦚ꧀ꦲꦺꦠꦁ –

‘‘ꦕꦶꦠ꧀ꦠꦷꦏꦠꦁ ꦩꦲꦒ꧀ꦓꦚ꧀ꦕ, ꦄꦠꦸꦭꦁ ꦢꦸꦭ꧀ꦭꦨꦢꦱ꧀ꦱꦤꦁ;

ꦄꦤꦺꦴꦩꦱꦠ꧀ꦠꦥꦫꦶꦨꦺꦴꦒꦁ, ꦫꦠꦤꦁ ꦠꦺꦤ ꦮꦸꦕ꧀ꦕꦠꦷ’’ꦠꦶ. (ꦢꦷ. ꦤꦶ. ꦄꦛ꧀ꦜ. ꧒.꧓꧓; ꦑꦸ. ꦥꦴ. ꦄꦛ꧀ꦜ. ꧖.꧓; ꦱꦸ. ꦤꦶ. ꦄꦛ꧀ꦜ. ꧒꧒꧖; ꦩꦲꦴꦤꦶ. ꦄꦛ꧀ꦜ. ꧕꧐) –

ꦕꦶꦠ꧀ꦠꦷꦏꦠꦨꦴꦮꦴꦢꦪꦺꦴ ꦕ ꦄꦤꦚ꧀ꦚꦱꦴꦣꦴꦫꦟꦴ ꦧꦸꦢ꧀ꦣꦴꦢꦷꦱꦸ ꦌꦮ ꦭꦧ꧀ꦨꦤ꧀ꦠꦷꦠꦶ.

ꦮꦤ꧀ꦢꦤꦴꦮ ꦮꦤ꧀ꦢꦤꦴꦩꦪꦁ ꦪꦡꦴ ‘‘ꦢꦴꦤꦩꦪꦁ ꦱꦷꦭꦩꦪ’’ꦤ꧀ꦠꦶ. ꦮꦤ꧀ꦢꦤꦴ ꦕꦺꦠ꧀ꦡ ꦏꦴꦪꦮꦴꦕꦴꦕꦶꦠ꧀ꦠꦺꦲꦶ ꦠꦶꦟ꧀ꦟꦁ ꦫꦠꦤꦴꦤꦁ ꦒꦸꦟꦤꦶꦤ꧀ꦤꦠꦴ, ꦡꦺꦴꦩꦤꦴ ꦮꦴ. ꦥꦸꦗ꧀ꦗꦨꦮꦦꦭꦤꦶꦧ꧀ꦧꦠ꧀ꦠꦤꦠꦺꦴ ꦥꦸꦚ꧀ꦚꦁ, ꦄꦠ꧀ꦠꦤꦺꦴ ꦱꦤ꧀ꦠꦴꦤꦁ ꦥꦸꦤꦴꦠꦷꦠꦶ ꦮꦴ. ꦱꦸꦮꦶꦲꦠꦤ꧀ꦠꦫꦴꦪꦺꦴꦠꦶ. ꦱꦸꦛ꧀ꦜꦸ ꦮꦶꦲꦠꦤ꧀ꦠꦫꦴꦪꦺꦴ. ꦌꦠꦺꦤ ꦄꦠ꧀ꦠꦤꦺꦴ ꦥꦱꦴꦢꦱꦩ꧀ꦥꦠ꧀ꦠꦶꦪꦴ, ꦫꦠꦤꦠ꧀ꦠꦪꦱ꧀ꦱ ꦕ ꦑꦺꦠ꧀ꦠꦨꦴꦮꦱꦩ꧀ꦥꦠ꧀ꦠꦶꦪꦴ ꦠꦁ ꦥꦸꦚ꧀ꦚꦁ ꦄꦠ꧀ꦡꦥ꧀ꦥꦏꦴꦱꦤꦱ꧀ꦱ ꦈꦥꦓꦴꦠꦏꦈꦥꦢ꧀ꦢꦮꦴꦤꦁ ꦮꦶꦲꦤꦤꦺ ꦱꦩꦠ꧀ꦡꦤ꧀ꦠꦶ ꦢꦱ꧀ꦱꦺꦠꦶ. ꦲꦸꦠ꧀ꦮꦴꦠꦶ ꦥꦸꦧ꧀ꦧꦏꦴꦭꦏꦶꦫꦶꦪꦴ. ꦠꦱ꧀ꦱ ‘‘ꦄꦠ꧀ꦡꦁ ꦥꦏꦴꦱꦪꦶꦱ꧀ꦱꦴꦩꦷ’’ꦠꦶ ꦌꦠꦺꦤ ꦱꦩ꧀ꦧꦤ꧀ꦣꦺꦴ. ꦠꦱ꧀ꦱꦴꦠꦶ ꦪꦁ ꦫꦠꦤꦠ꧀ꦠꦪꦮꦤ꧀ꦢꦤꦴꦩꦪꦁ ꦥꦸꦚ꧀ꦚꦁ, ꦠꦱ꧀ꦱ. ꦄꦴꦤꦸꦨꦴꦮꦺꦤꦴꦠꦶ ꦧꦭꦺꦤ.

꧕. ꦌꦮꦁ ꦫꦠꦤꦠ꧀ꦠꦪꦱ꧀ꦱ ꦤꦶꦥꦕ꧀ꦕꦏꦴꦫꦺ ꦥꦪꦺꦴꦗꦤꦁ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦪꦱ꧀ꦱꦴ ꦣꦩ꧀ꦩꦢꦺꦱꦤꦴꦪ ꦄꦠ꧀ꦡꦁ ꦱꦁꦮꦟ꧀ꦟꦺꦠꦸꦏꦴꦩꦺꦴ, ꦠꦱ꧀ꦱꦴ ꦠꦴꦮ ꦒꦸꦟꦴꦨꦶꦠ꧀ꦡꦮꦤꦮꦱꦺꦤ ꦈꦥꦚ꧀ꦚꦴꦥꦤꦠ꧀ꦡꦁ ‘‘ꦱꦁꦪꦸꦠ꧀ꦠꦮꦒ꧀ꦒꦥꦛꦶꦩꦟ꧀ꦝꦶꦠꦱ꧀ꦱꦴ’’ꦠꦶꦄꦴꦢꦶ ꦮꦸꦠ꧀ꦠꦁ, ꦢꦺꦮꦠꦴꦱꦁꦪꦸꦠ꧀ꦠꦴꦢꦶꦱꦁꦪꦸꦠ꧀ꦠꦺꦲꦶ ꦕꦺꦮ ꦤꦭ꦳ꦮꦒ꧀ꦒꦴꦢꦶꦮꦒ꧀ꦒꦺꦲꦶ ꦕ ꦮꦶꦨꦹꦱꦶꦠꦱ꧀ꦱꦴꦠꦶ ꦄꦠ꧀ꦡꦺꦴ. ꦠꦠ꧀ꦡ ‘‘ꦱꦁꦪꦸꦠ꧀ꦠ’’ꦤ꧀ꦠꦶ ‘‘ꦱꦁꦪꦺꦴꦒꦺꦴ’’ꦠꦶ ꦕ ꦄꦠ꧀ꦡꦠꦺꦴ ꦌꦏꦁ. ꦏꦺꦱꦁ ꦱꦁꦪꦸꦠ꧀ꦠꦁ? ꦱꦸꦠ꧀ꦠꦮꦒ꧀ꦒꦴꦤꦁ. ꦪꦡꦴ ꦲꦶ ꦧ꧀ꦪꦚ꧀ꦗꦤꦱꦩꦸꦢꦴꦪꦺꦴ ꦥꦢꦁ, ꦌꦮꦁ ꦄꦠ꧀ꦡꦺꦱꦸ ꦕ ꦏꦠꦴꦮꦣꦶꦏꦺꦴ ꦥꦢꦱꦩꦸꦢꦴꦪꦺꦴ ꦮꦴꦏ꧀ꦪꦁ, ꦮꦴꦏ꧀ꦪꦱꦩꦸꦢꦴꦪꦺꦴ ꦱꦸꦠ꧀ꦠꦁ, ꦱꦸꦠ꧀ꦠꦱꦩꦸꦢꦴꦪꦺ ꦮꦒ꧀ꦒꦺꦴꦠꦶ ꦱꦩꦚ꧀ꦚꦴ, ꦠꦡꦴ ꦱꦸꦠ꧀ꦠꦮꦒ꧀ꦒꦱꦩꦸꦢꦴꦪꦺ ꦱꦁꦪꦸꦠ꧀ꦠꦱꦩꦚ꧀ꦚꦴ. ꦱꦁꦪꦸꦗ꧀ꦗꦤ꧀ꦠꦷꦠꦶ ꦌꦠ꧀ꦡ ꦱꦸꦠ꧀ꦠꦮꦒ꧀ꦒꦴꦠꦶ ꦱꦁꦪꦸꦠ꧀ꦠꦁ. ꦪꦢꦶꦥꦶ ꦄꦮꦪꦮꦮꦶꦤꦶꦩꦸꦠ꧀ꦠꦺꦴ ꦱꦩꦸꦢꦴꦪꦺꦴ ꦤꦴꦩ ꦥꦫꦩꦠ꧀ꦡꦠꦺꦴ ꦤꦠ꧀ꦡꦶ, ꦄꦮꦪꦮꦺ ꦌꦮ ꦠꦁꦠꦁꦱꦤ꧀ꦤꦶꦮꦺꦱꦮꦶꦱꦶꦛ꧀ꦜꦺ ꦈꦥꦴꦢꦴꦪ ꦥꦢꦴꦢꦶꦱꦩꦚ꧀ꦚꦴ ꦮꦶꦪ ꦱꦸꦠ꧀ꦠꦮꦒ꧀ꦒꦱꦩꦚ꧀ꦚꦴ ꦱꦁꦪꦸꦠ꧀ꦠꦱꦩꦚ꧀ꦚꦴ ꦄꦴꦒꦩꦱꦩꦚ꧀ꦚꦴ ꦕ, ꦠꦡꦴꦥꦶ ꦥꦫꦩꦠ꧀ꦡꦠꦺꦴ ꦄꦮꦶꦗ꧀ꦗꦩꦴꦤꦺꦴꦥꦶ ꦱꦩꦸꦢꦴꦪꦺꦴ ꦧꦸꦢ꧀ꦣꦶꦥꦫꦶꦏꦥ꧀ꦥꦶꦠꦫꦹꦥꦺꦤ ꦮꦶꦗ꧀ꦗꦩꦴꦤꦺꦴ ꦮꦶꦪ ꦒꦪ꧀ꦲꦩꦴꦤꦺꦴ ꦄꦮꦪꦮꦴꦤꦁ ꦄꦣꦶꦛ꧀ꦜꦴꦤꦨꦴꦮꦺꦤ ꦮꦺꦴꦲꦫꦷꦪꦠꦶ ꦪꦡꦴ ‘‘ꦫꦸꦏ꧀ꦑꦺ ꦱꦴꦑꦴ’’ꦠꦶ, ꦠꦱ꧀ꦩꦴ ꦮꦸꦠ꧀ꦠꦁ ‘‘ꦱꦁꦪꦸꦠ꧀ꦠꦮꦒ꧀ꦒꦥꦛꦶꦩꦟ꧀ꦝꦶꦠꦱ꧀ꦱꦴ’’ꦠꦶ.

ꦤꦤꦸ ꦱꦁꦪꦸꦠ꧀ꦠꦮꦒ꧀ꦒꦺꦴ ꦌꦮ ꦄꦴꦒꦩꦺꦴ, ꦠꦱ꧀ꦱ ꦥꦤ ꦏꦺꦲꦶ ꦩꦟ꧀ꦝꦤꦤ꧀ꦠꦶ? ꦤ ꦕꦺꦴꦢꦺꦠꦧ꧀ꦧꦩꦺꦠꦁ. ꦨꦮꦠꦶ ꦲꦶ ꦄꦨꦶꦤ꧀ꦤꦺꦥꦶ ꦮꦠ꧀ꦡꦸꦱ꧀ꦩꦶꦁ ꦪꦡꦴꦣꦶꦥ꧀ꦥꦺꦠꦮꦶꦱꦺꦱꦴꦮꦧꦺꦴꦣꦤꦠꦺꦴ ꦨꦺꦢꦏꦱꦩꦸꦢꦴꦕꦴꦫꦺꦴ ꦪꦡꦴ ‘‘ꦱꦶꦭꦴꦥꦸꦠ꧀ꦠꦏꦱ꧀ꦱ ꦱꦫꦷꦫ’’ꦤ꧀ꦠꦶ. ꦄꦴꦒꦩꦶꦱ꧀ꦱꦤ꧀ꦠꦶ ꦌꦠ꧀ꦡ, ꦌꦠꦺꦤ, ꦌꦠꦱ꧀ꦩꦴ ꦮꦴ ꦄꦠ꧀ꦠꦠ꧀ꦡꦥꦫꦠ꧀ꦡꦴꦢꦪꦺꦴꦠꦶ ꦄꦴꦒꦩꦺꦴ, ꦄꦴꦢꦶꦏꦭ꧀ꦪꦴꦟꦴꦢꦶꦒꦸꦟꦱꦩ꧀ꦥꦠ꧀ꦠꦶꦪꦴ ꦈꦠ꧀ꦠꦩꦛ꧀ꦜꦺꦤ ꦠꦁꦠꦁꦄꦨꦶꦥꦠ꧀ꦡꦶꦠꦱꦩꦶꦢ꧀ꦣꦶꦲꦺꦠꦸꦠꦴꦪ ꦥꦟ꧀ꦝꦶꦠꦺꦲꦶ ꦮꦫꦶꦠꦧ꧀ꦧꦠꦺꦴ ꦮꦫꦺꦴ, ꦄꦴꦒꦩꦺꦴ ꦕ ꦱꦺꦴ ꦮꦫꦺꦴ ꦕꦴꦠꦶ ꦄꦴꦒꦩꦮꦫꦺꦴ. ꦄꦴꦒꦩꦱꦩ꧀ꦩꦠꦺꦲꦶ ꦮꦴ ꦮꦫꦺꦴꦠꦶ ꦄꦴꦒꦩꦮꦫꦺꦴ, ꦱꦁꦪꦸꦠ꧀ꦠꦺꦴ ꦕ ꦱꦺꦴ ꦄꦴꦒꦩꦮꦫꦺꦴ ꦕꦴꦠꦶ ꦱꦁꦪꦸꦠ꧀ꦠꦴꦒꦩꦮꦫꦺꦴ, ꦠꦱ꧀ꦱ. ꦧꦸꦢ꧀ꦣꦴꦤꦁ ꦄꦤꦸꦧꦸꦢ꧀ꦣꦴ ꦧꦸꦢ꧀ꦣꦴꦤꦸꦧꦸꦢ꧀ꦣꦴ, ꦧꦸꦢ꧀ꦣꦴꦤꦁ ꦱꦕ꧀ꦕꦥꦛꦶꦮꦺꦣꦁ ꦄꦤꦸꦒꦩ꧀ꦩ ꦥꦛꦶꦮꦶꦢ꧀ꦣꦱꦕ꧀ꦕꦴ ꦄꦒ꧀ꦒꦱꦴꦮꦏꦴꦢꦪꦺꦴ ꦄꦫꦶꦪꦴ. ꦠꦺꦲꦶ ꦄꦠ꧀ꦡꦱꦁꦮꦟ꧀ꦟꦤꦴꦒꦸꦟꦱꦁꦮꦟ꧀ꦟꦤꦴꦤꦁ ꦮꦱꦺꦤ ꦱꦁꦮꦟ꧀ꦟꦶꦠꦱ꧀ꦱ.

ꦄꦡ ꦮꦴ ꦧꦸꦢ꧀ꦣꦴ ꦕ ꦄꦤꦸꦧꦸꦢ꧀ꦣꦴ ꦕ ꦧꦸꦢ꧀ꦣꦴꦤꦸꦧꦸꦢ꧀ꦣꦴꦠꦶ ꦪꦺꦴꦗꦺꦠꦧ꧀ꦧꦁ. ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤꦺꦮ ꦲꦶ ꦮꦶꦤꦪꦱꦸꦠ꧀ꦠꦄꦨꦶꦣꦩ꧀ꦩꦴꦤꦁ ꦥꦏꦶꦟ꧀ꦟꦏꦢꦺꦱꦤꦴꦢꦶꦮꦱꦺꦤ ꦪꦺꦴ ꦥꦜꦩꦁ ꦄꦠ꧀ꦡꦺꦴ ꦮꦶꦨꦠ꧀ꦠꦺꦴ, ꦱꦺꦴ ꦌꦮ ꦥꦕ꧀ꦖꦴ ꦠꦺꦱꦁ ꦄꦠ꧀ꦡꦮꦟ꧀ꦟꦤꦴꦮꦱꦺꦤ ꦱꦔ꧀ꦒꦷꦠꦶꦏꦴꦫꦺꦲꦶ ꦱꦔ꧀ꦒꦲꦁ ꦄꦴꦫꦺꦴꦥꦶꦠꦺꦴꦠꦶ. ꦌꦠ꧀ꦡ ꦕ ꦱꦁꦪꦸꦠ꧀ꦠꦴꦤꦁ ꦮꦒ꧀ꦒꦴ ꦱꦩꦹꦲꦴꦠꦶ ꦱꦁꦪꦸꦠ꧀ꦠꦮꦒ꧀ꦒꦴ, ꦱꦒꦴꦡꦴꦮꦒ꧀ꦒꦴꦢꦪꦺꦴ. ꦠꦥ꧀ꦥꦫꦶꦪꦴꦥꦤ꧀ꦤꦠꦴꦪ ꦱꦁꦪꦸꦠ꧀ꦠꦺꦱꦸ ꦮꦒ꧀ꦒꦴ ꦱꦁꦪꦸꦠ꧀ꦠꦮꦒ꧀ꦒꦴ, ꦤꦭ꦳ꦮꦒ꧀ꦒꦴꦢꦪꦺꦴ. ꦱꦁꦪꦸꦠ꧀ꦠꦴꦮ ꦮꦒ꧀ꦒꦴ ꦱꦁꦪꦸꦠ꧀ꦠꦮꦒ꧀ꦒꦴ. ꦠꦶꦮꦶꦣꦺꦥꦶ ꦠꦺ ꦌꦏꦱꦺꦱꦤꦪꦺꦤ ꦒꦲꦺꦠ꧀ꦮꦴ ꦮꦸꦠ꧀ꦠꦁ ‘‘ꦱꦁꦪꦸꦠ꧀ꦠꦮꦒ꧀ꦒꦥꦛꦶꦩꦟ꧀ꦝꦶꦠꦱ꧀ꦱꦴ’’ꦠꦶ.

ꦠꦠ꧀ꦡ ꦱꦒꦴꦡꦴꦮꦒ꧀ꦒꦺ ꦠꦴꦮ ꦌꦏꦴꦢꦱ ꦱꦁꦪꦸꦠ꧀ꦠꦴꦤꦶ ꦄꦛ꧀ꦜꦠꦶꦁꦱ ꦮꦒ꧀ꦒꦴ. ꦤꦶꦢꦴꦤꦮꦒ꧀ꦒꦺ ꦤꦮ ꦱꦁꦪꦸꦠ꧀ꦠꦴꦤꦶ ꦌꦏꦹꦤꦕꦠ꧀ꦠꦴꦭꦷꦱ ꦮꦒ꧀ꦒꦴ. ꦑꦤ꧀ꦣꦮꦒ꧀ꦒꦺ ꦌꦏꦴꦢꦱ ꦱꦁꦪꦸꦠ꧀ꦠꦴꦤꦶ ꦌꦏꦹꦤꦱꦛ꧀ꦜꦶ ꦮꦒ꧀ꦒꦴ. ꦱꦭ꦳ꦴꦪꦠꦤꦮꦒ꧀ꦒꦺ ꦤꦮ ꦱꦁꦪꦸꦠ꧀ꦠꦴꦤꦶ ꦄꦛ꧀ꦜꦠꦶꦁꦱ ꦮꦒ꧀ꦒꦴ. ꦩꦲꦴꦮꦒ꧀ꦒꦺ ꦢ꧀ꦮꦴꦢꦱ ꦱꦁꦪꦸꦠ꧀ꦠꦴꦤꦶ ꦄꦛ꧀ꦜꦕꦠ꧀ꦠꦴꦭꦷꦱ ꦮꦒ꧀ꦒꦴ. ꦆꦢꦩꦺꦠ꧀ꦡ ꦱꦁꦪꦸꦠ꧀ꦠꦤ꧀ꦠꦫꦮꦒ꧀ꦒꦴꦤꦁ ꦥꦫꦶꦩꦴꦟꦁ.

ꦚꦴꦟꦥ꧀ꦥꦨꦺꦢꦗꦤꦤꦱ꧀ꦱꦴꦠꦶ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦑꦤ꧀ꦣꦴꦪꦠꦤꦴꦢꦶꦏꦡꦴꦧꦲꦸꦭꦠꦴꦪ ꦒꦩ꧀ꦨꦷꦫꦚꦴꦟꦕꦫꦶꦪꦴꦮꦶꦨꦴꦮꦤꦠꦺꦴ ꦥꦚ꧀ꦚꦴꦮꦶꦨꦴꦒꦱꦩꦸꦥ꧀ꦥꦴꦢꦏꦱ꧀ꦱ. ꦆꦣ ꦥꦤ ‘‘ꦥꦚ꧀ꦚꦴꦥ꧀ꦥꦨꦺꦢꦗꦤꦤꦱ꧀ꦱꦴ’’ꦠꦶ ꦱ꧀ꦮꦴꦪꦩꦴꦒꦩꦺꦴ ꦡꦺꦴꦩꦶꦠꦺꦴ, ꦱꦁꦮꦟ꧀ꦟꦤꦴꦱꦸ ꦕꦴꦪꦁ ꦄꦴꦕꦫꦶꦪꦱ꧀ꦱ ꦥꦏꦠꦶ, ꦪꦢꦶꦢꦁ ꦠꦁꦠꦁꦱꦁꦮꦟ꧀ꦟꦤꦴꦤꦁ ꦄꦴꦢꦶꦠꦺꦴ ꦠꦱ꧀ꦱ ꦠꦱ꧀ꦱ ꦱꦁꦮꦟ꧀ꦟꦺꦠꦧ꧀ꦧꦱ꧀ꦱ ꦣꦩ꧀ꦩꦱ꧀ꦱ ꦮꦶꦱꦺꦱꦒꦸꦟꦏꦶꦠ꧀ꦠꦤꦺꦤ ꦡꦺꦴꦩꦤꦴ. ꦠꦡꦴ ꦲꦶ ꦱꦸꦩꦔ꧀ꦒꦭꦮꦶꦭꦴꦱꦶꦤꦷꦥꦥꦚ꧀ꦕꦱꦹꦢꦤꦷꦩꦤꦺꦴꦫꦡꦥꦹꦫꦟꦷꦄꦛ꧀ꦜꦱꦴꦭꦶꦤꦷꦄꦴꦢꦷꦱꦸ ꦕ ꦪꦡꦴꦏ꧀ꦏꦩꦁ ‘‘ꦱꦢ꧀ꦣꦴꦮꦲꦒꦸꦟꦱ꧀ꦱ, ꦥꦫꦮꦴꦢꦩꦡꦤꦱ꧀ꦱ, ꦣꦩ꧀ꦩꦏꦡꦶꦏꦥꦸꦔ꧀ꦒꦮꦴꦤꦁ ꦮꦶꦕꦶꦠ꧀ꦠꦥꦛꦶꦨꦴꦤꦗꦤꦤꦱ꧀ꦱ, ꦠꦱ꧀ꦱ ꦒꦩ꧀ꦨꦷꦫꦚꦴꦟꦺꦲꦶ ꦎꦒꦴꦭ꦳꧀ꦲꦱ꧀ꦱ ꦄꦨꦶꦟ꧀ꦲꦱꦺꦴ ꦤꦴꦤꦴꦤꦪꦮꦶꦕꦶꦠ꧀ꦠꦱ꧀ꦱ ꦄꦨꦶꦣꦩ꧀ꦩꦱ꧀ꦱꦴ’’ꦠꦶꦄꦴꦢꦶꦤꦴ ꦡꦺꦴꦩꦤꦴ ꦏꦠꦴ.

꧖. ꦄꦠ꧀ꦡꦺꦴ ꦏꦡꦷꦪꦠꦶ ꦌꦠꦴꦪꦴꦠꦶ ꦄꦠ꧀ꦡꦏꦡꦴ, ꦄꦠ꧀ꦡꦏꦡꦴꦮ ꦄꦛ꧀ꦜꦏꦡꦴ ꦠ꧀ꦡ-ꦏꦴꦫꦱ꧀ꦱ ꦛ꧀ꦜ-ꦏꦴꦫꦁ ꦏꦠ꧀ꦮꦴ ꦪꦡꦴ ‘‘ꦢꦸꦏ꧀ꦑꦱ꧀ꦱ ꦥꦷꦭ꦳ꦤꦛ꧀ꦜꦺꦴ’’ꦠꦶ. ꦄꦴꦢꦶꦠꦺꦴꦠꦶ ꦄꦴꦢꦶꦩ꧀ꦲꦶ ꦥꦜꦩꦱꦔ꧀ꦒꦷꦠꦶꦪꦁ. ꦖꦭ꦳ꦨꦶꦚ꧀ꦚꦠꦴꦪ ꦥꦫꦩꦺꦤ ꦕꦶꦠ꧀ꦠꦮꦱꦶꦨꦴꦮꦺꦤ ꦱꦩꦤ꧀ꦤꦴꦒꦠꦠ꧀ꦠꦴ ꦙꦴꦤꦴꦢꦷꦱꦸ ꦥꦚ꧀ꦕꦮꦶꦣꦮꦱꦶꦠꦴꦱꦩ꧀ꦨꦴꦮꦠꦺꦴ ꦕ ꦮꦱꦶꦤꦺꦴ, ꦡꦺꦫꦴ ꦩꦲꦴꦏꦱ꧀ꦱꦥꦴꦢꦪꦺꦴ. ꦠꦺꦱꦁ ꦱꦠꦺꦲꦶ ꦥꦚ꧀ꦕꦲꦶ. ꦪꦴꦠꦶ ꦪꦴ ꦄꦛ꧀ꦜꦏꦡꦴ. ꦱꦔ꧀ꦒꦷꦠꦴꦠꦶ ꦄꦠ꧀ꦡꦁ ꦏꦡꦺꦠꦸꦁ ꦪꦸꦠ꧀ꦠꦛ꧀ꦜꦴꦤꦺ ‘‘ꦄꦪꦁ ꦌꦠꦱ꧀ꦱ ꦄꦠ꧀ꦡꦺꦴ, ꦄꦪꦁ ꦌꦠꦱ꧀ꦱ ꦄꦠ꧀ꦡꦺꦴ’’ꦠꦶ ꦱꦔ꧀ꦒꦲꦺꦠ꧀ꦮꦴ ꦮꦸꦠ꧀ꦠꦴ. ꦄꦤꦸꦱꦔ꧀ꦒꦷꦠꦴ ꦕ ꦪꦱꦠ꧀ꦡꦺꦫꦴꦢꦷꦲꦶ ꦥꦕ꧀ꦖꦴꦥꦶ ꦢꦸꦠꦶꦪꦠꦠꦶꦪꦱꦔ꧀ꦒꦷꦠꦷꦱꦸ. ꦆꦩꦶꦤꦴ ꦄꦠ꧀ꦠꦤꦺꦴ ꦱꦁꦮꦟ꧀ꦟꦤꦴꦪ ꦄꦴꦒꦩꦤꦮꦶꦱꦸꦢ꧀ꦣꦶꦁ ꦢꦱ꧀ꦱꦺꦠꦶ.

꧗. ꦱꦷꦲꦱ꧀ꦱ ꦭꦴꦤꦠꦺꦴ ꦒꦲꦟꦠꦺꦴ ꦱꦷꦲꦭ꦳ꦺꦴ, ꦱꦷꦲꦏꦸꦩꦴꦫꦺꦴ, ꦠꦧ꧀ꦧꦁꦱꦗꦴꦠꦠꦴꦪ ꦠꦩ꧀ꦧꦥꦟ꧀ꦟꦶꦢꦷꦥꦺ ꦑꦠ꧀ꦠꦶꦪꦴ, ꦠꦺꦱꦁ ꦤꦶꦮꦴꦱꦠꦴꦪ ꦠꦩ꧀ꦧꦥꦟ꧀ꦟꦶꦢꦷꦥꦱ꧀ꦱ ꦕ ꦱꦷꦲꦭ꦳ꦨꦴꦮꦺꦴ ꦮꦺꦢꦶꦠꦧ꧀ꦧꦺꦴ. ꦄꦴꦨꦠꦴꦠꦶ ꦗꦩ꧀ꦧꦸꦢꦷꦥꦠꦺꦴ ꦄꦴꦤꦷꦠꦴ. ꦄꦡꦴꦠꦶ ꦥꦕ꧀ꦖꦴ. ꦄꦥꦫꦨꦴꦒꦺ ꦲꦶ ꦤꦶꦏꦴꦪꦤ꧀ꦠꦫꦭꦢ꧀ꦣꦷꦲꦶ ꦄꦱꦔ꧀ꦏꦫꦠ꧀ꦡꦁ ꦱꦷꦲꦭ꦳ꦨꦴꦱꦴꦪ ꦄꦛ꧀ꦜꦏꦡꦴ ꦜꦥꦶꦠꦴꦠꦶ. ꦠꦺꦤ ꦩꦹꦭꦛ꧀ꦜꦏꦡꦴ ꦱꦧ꧀ꦧꦱꦴꦣꦴꦫꦟꦴ ꦤ ꦲꦺꦴꦠꦷꦠꦶ ꦆꦢꦁ ꦄꦠ꧀ꦡꦥ꧀ꦥꦏꦴꦱꦤꦁ ꦌꦏꦤ꧀ꦠꦺꦤ ꦏꦫꦟꦷꦪꦤ꧀ꦠꦶ ꦢꦱ꧀ꦱꦺꦠꦶ. ꦠꦺꦤꦺꦮꦴꦲ ‘‘ꦢꦷꦥꦮꦴꦱꦷꦤꦩꦠ꧀ꦡꦴꦪꦴ’’ꦠꦶ. ꦌꦠ꧀ꦡ ꦢꦷꦥꦮꦴꦱꦷꦤꦤ꧀ꦠꦶ ꦗꦩ꧀ꦧꦸꦢꦷꦥꦮꦴꦱꦷꦤꦁ, ꦱꦷꦲꦭ꦳ꦢꦷꦥꦮꦴꦱꦷꦤꦁ ꦮꦴ ꦄꦠ꧀ꦡꦴꦪ ꦱꦷꦲꦭ꦳ꦨꦴꦱꦴꦪ ꦜꦥꦶꦠꦴꦠꦶ ꦪꦺꦴꦗꦤꦴ.

꧘. ꦄꦥꦤꦺꦠ꧀ꦮꦴꦠꦶ ꦏꦚ꧀ꦕꦸꦏꦱꦢꦶꦱꦁ ꦱꦷꦲꦭ꦳ꦨꦴꦱꦁ ꦄꦥꦤꦺꦠ꧀ꦮꦴ. ꦠꦠꦺꦴꦠꦶ ꦄꦛ꧀ꦜꦏꦡꦴꦠꦺꦴ. ꦄꦲꦤ꧀ꦠꦶ ꦄꦠ꧀ꦠꦴꦤꦁ ꦤꦶꦢ꧀ꦢꦶꦱꦠꦶ. ꦩꦤꦺꦴꦫꦩꦁ ꦨꦴꦱꦤ꧀ꦠꦶ ꦩꦴꦒꦣꦨꦴꦱꦁ. ꦱꦴ ꦲꦶ ꦱꦨꦴꦮꦤꦶꦫꦸꦠ꧀ꦠꦶꦨꦹꦠꦴ ꦥꦟ꧀ꦝꦶꦠꦩꦤꦁ ꦫꦩꦪꦠꦶ. ꦠꦺꦤꦺꦮꦴꦲ ‘‘ꦠꦤ꧀ꦠꦶꦤꦪꦴꦤꦸꦕ꧀ꦖꦮꦶꦏ’’ꦤ꧀ꦠꦶ, ꦥꦴꦭ꦳ꦶꦒꦠꦶꦪꦴ ꦄꦤꦸꦭꦺꦴꦩꦶꦏꦁ ꦥꦴꦭ꦳ꦶꦖꦴꦪꦴꦤꦸꦮꦶꦣꦴꦪꦶꦤꦶꦤ꧀ꦠꦶ ꦄꦠ꧀ꦡꦺꦴ. ꦮꦶꦒꦠꦢꦺꦴꦱꦤ꧀ꦠꦶ ꦄꦱꦨꦴꦮꦤꦶꦫꦸꦠ꧀ꦠꦶꦨꦴꦱꦤ꧀ꦠꦫꦫꦲꦶꦠꦁ.

꧙. ꦱꦩꦪꦁ ꦄꦮꦶꦭꦺꦴꦩꦺꦤ꧀ꦠꦺꦴꦠꦶ ꦱꦶꦢ꧀ꦣꦤ꧀ꦠꦁ ꦄꦮꦶꦫꦺꦴꦣꦺꦤ꧀ꦠꦺꦴ. ꦌꦠꦺꦤ ꦄꦠ꧀ꦡꦢꦺꦴꦱꦴꦨꦴꦮꦩꦴꦲ. ꦄꦮꦶꦫꦸꦢ꧀ꦣꦠ꧀ꦠꦴ ꦌꦮ ꦲꦶ ꦡꦺꦫꦮꦴꦢꦴꦥꦶ ꦆꦣ ꦥꦏꦴꦱꦷꦪꦶꦱ꧀ꦱꦤ꧀ꦠꦶ. ꦡꦺꦫꦮꦁꦱꦢꦷꦥꦴꦤꦤ꧀ꦠꦶ ꦡꦶꦫꦺꦲꦶ ꦱꦷꦭꦏ꧀ꦑꦤ꧀ꦣꦴꦢꦷꦲꦶ ꦱꦩꦤ꧀ꦤꦴꦒꦠꦠ꧀ꦠꦴ ꦡꦺꦫꦴ, ꦩꦲꦴꦏꦱ꧀ꦱꦥꦴꦢꦪꦺꦴ. ꦠꦺꦲꦶ ꦄꦴꦒꦠꦴ ꦄꦴꦕꦫꦶꦪꦥꦫꦩ꧀ꦥꦫꦴ ꦡꦺꦫꦮꦁꦱꦺꦴ, ꦠꦥ꧀ꦥꦫꦶꦪꦴꦥꦤ꧀ꦤꦴ ꦲꦸꦠ꧀ꦮꦴ ꦄꦴꦒꦩꦴꦣꦶꦒꦩꦱꦩ꧀ꦥꦤ꧀ꦤꦠ꧀ꦠꦴ ꦥꦚ꧀ꦚꦴꦥꦗ꧀ꦗꦺꦴꦠꦺꦤ ꦠꦱ꧀ꦱ ꦱꦩꦸꦗ꧀ꦗꦭꦤꦠꦺꦴ ꦡꦺꦫꦮꦁꦱꦢꦷꦥꦴ, ꦩꦲꦴꦮꦶꦲꦴꦫꦮꦴꦱꦶꦤꦺꦴ, ꦠꦺꦱꦁ. ꦮꦶꦮꦶꦣꦺꦲꦶ ꦄꦴꦏꦴꦫꦺꦲꦶ ꦤꦶꦕ꧀ꦖꦷꦪꦠꦷꦠꦶ ꦮꦶꦤꦶꦕ꧀ꦖꦪꦺꦴ, ꦒꦟ꧀ꦜꦶꦛ꧀ꦜꦴꦤꦺꦱꦸ ꦑꦶꦭꦩꦢ꧀ꦢꦤꦴꦏꦴꦫꦺꦤ ꦥꦮꦠ꧀ꦠꦴ ꦮꦶꦩꦠꦶꦕ꧀ꦖꦺꦢꦤꦷ ꦏꦡꦴ. ꦱꦸꦛ꧀ꦜꦸꦤꦶꦥꦸꦟꦺꦴ ꦱꦟ꧀ꦲꦺꦴ ꦮꦶꦤꦶꦕ꧀ꦖꦪꦺꦴ ꦌꦠꦺꦱꦤ꧀ꦠꦶ ꦱꦸꦤꦶꦥꦸꦟꦮꦶꦤꦶꦕ꧀ꦖꦪꦴ. ꦄꦡ ꦮꦴ ꦮꦶꦤꦶꦕ꧀ꦖꦶꦤꦺꦴꦠꦷꦠꦶ ꦮꦶꦤꦶꦕ꧀ꦖꦪꦺꦴ ꦮꦸꦠ꧀ꦠꦥ꧀ꦥꦏꦴꦫꦮꦶꦱꦪꦁ ꦚꦴꦟꦁ. ꦱꦸꦛ꧀ꦜꦸ ꦤꦶꦥꦸꦟꦺꦴ ꦖꦺꦏꦺꦴ ꦮꦶꦤꦶꦕ꧀ꦖꦪꦺꦴ ꦌꦠꦺꦱꦤ꧀ꦠꦶ ꦪꦺꦴꦗꦺꦠꦧ꧀ꦧꦁ. ꦌꦠꦺꦤ ꦩꦲꦴꦏꦱ꧀ꦱꦥꦴꦢꦶꦡꦺꦫꦥꦫꦩ꧀ꦥꦫꦴꦒꦠꦺꦴ, ꦠꦠꦺꦴ ꦌꦮ ꦕ ꦄꦮꦶꦥꦫꦷꦠꦺꦴ ꦱꦟ꧀ꦲꦺꦴ ꦱꦸꦑꦸꦩꦺꦴ ꦩꦲꦴꦮꦶꦲꦴꦫꦮꦴꦱꦷꦤꦁ ꦮꦶꦤꦶꦕ꧀ꦖꦪꦺꦴ, ꦠꦱ꧀ꦱ ꦥꦩꦴꦟꦨꦹꦠꦠꦁ ꦢꦱ꧀ꦱꦺꦠꦶ.

꧑꧐. ꦱꦸꦗꦤꦱ꧀ꦱ ꦕꦴꦠꦶ ꦕ-ꦱꦢ꧀ꦢꦺꦴ ꦱꦩ꧀ꦥꦶꦟ꧀ꦝꦤꦠ꧀ꦡꦺꦴ. ꦠꦺꦤ ‘‘ꦤ ꦏꦺꦮꦭꦁ ꦗꦩ꧀ꦧꦸꦢꦷꦥꦮꦴꦱꦷꦤꦩꦺꦮ ꦄꦠ꧀ꦡꦴꦪ, ꦄꦡ ꦑꦺꦴ ꦱꦴꦣꦸꦗꦤꦠꦺꦴꦱꦤꦠ꧀ꦡꦚ꧀ꦕꦴ’’ꦠꦶ ꦢꦱ꧀ꦱꦺꦠꦶ. ꦠꦺꦤ ꦕ ‘‘ꦠꦩ꧀ꦧꦥꦟ꧀ꦟꦶꦢꦷꦥꦮꦴꦱꦷꦤꦩ꧀ꦥꦶ ꦄꦠ꧀ꦡꦴꦪꦴ’’ꦠꦶ ꦄꦪꦩꦠ꧀ꦡꦺꦴ ꦱꦶꦢ꧀ꦣꦺꦴ ꦲꦺꦴꦠꦶ ꦈꦒ꧀ꦒꦲꦟꦴꦢꦶꦱꦸꦏꦫꦠꦴꦪ ꦠꦺꦱꦩ꧀ꦥꦶ ꦧꦲꦸꦏꦴꦫꦠ꧀ꦠꦴ. ꦕꦶꦫꦛ꧀ꦜꦶꦠꦠ꧀ꦡꦤ꧀ꦠꦶ ꦕꦶꦫꦛ꧀ꦜꦶꦠꦶꦄꦠ꧀ꦡꦁ, ꦕꦶꦫꦏꦴꦭꦥ꧀ꦥꦮꦠ꧀ꦠꦤꦴꦪꦴꦠꦶ ꦄꦠ꧀ꦡꦺꦴ. ꦆꦢꦚ꧀ꦲꦶ ꦄꦠ꧀ꦡꦥ꧀ꦥꦏꦴꦱꦤꦁ ꦄꦮꦶꦥꦫꦷꦠꦥꦢꦧ꧀ꦪꦚ꧀ꦗꦤꦱꦸꦤꦶꦏ꧀ꦑꦺꦥꦱ꧀ꦱ ꦄꦠ꧀ꦡꦱꦸꦤꦪꦱ꧀ꦱ ꦕ ꦈꦥꦴꦪꦨꦴꦮꦠꦺꦴ ꦱꦢ꧀ꦣꦩ꧀ꦩꦱ꧀ꦱ ꦕꦶꦫꦛ꧀ꦜꦶꦠꦶꦪꦴ ꦥꦮꦠ꧀ꦠꦠꦶ. ꦮꦸꦠ꧀ꦠꦚ꧀ꦲꦺꦠꦁ ꦨꦒꦮꦠꦴ ‘‘ꦢ꧀ꦮꦺꦩꦺ, ꦨꦶꦏ꧀ꦑꦮꦺ, ꦣꦩ꧀ꦩꦴ ꦱꦢ꧀ꦣꦩ꧀ꦩꦱ꧀ꦱ ꦜꦶꦠꦶꦪꦴ ꦄꦱꦩ꧀ꦩꦺꦴꦱꦴꦪ ꦄꦤꦤ꧀ꦠꦫꦣꦴꦤꦴꦪ ꦱꦁꦮꦠ꧀ꦠꦤ꧀ꦠꦶ. ꦏꦠꦩꦺ ꦢ꧀ꦮꦺ? ꦱꦸꦤꦶꦏ꧀ꦑꦶꦠ꧀ꦠꦚ꧀ꦕ ꦥꦢꦧ꧀ꦪꦚ꧀ꦗꦤꦁ ꦄꦠ꧀ꦡꦺꦴ ꦕ ꦱꦸꦤꦷꦠꦺꦴ’’ꦠꦶ (ꦄ. ꦤꦶ. ꧒.꧒꧐).

꧑꧑-꧑꧒. ꦪꦁ ꦄꦠ꧀ꦡꦮꦟ꧀ꦟꦤꦁ ꦏꦠ꧀ꦠꦸꦏꦴꦩꦺꦴ, ꦠꦱ꧀ꦱꦴ ꦩꦲꦠ꧀ꦠꦁ ꦥꦫꦶꦲꦫꦶꦠꦸꦁ ‘‘ꦱꦴꦮꦠ꧀ꦡꦶꦥꦨꦹꦠꦷꦤ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦠꦺꦤꦺꦮꦴꦲ – ‘‘ꦤ ꦆꦣ ꦨꦶꦪ꧀ꦪꦺꦴ ꦮꦶꦠ꧀ꦡꦴꦫꦏꦡꦁ ꦏꦫꦶꦱ꧀ꦱꦴꦩꦶ, ꦤ ꦠꦁ ꦆꦣ ꦮꦶꦕꦴꦫꦪꦶꦱ꧀ꦱꦴꦩꦷ’’ꦠꦶ ꦕ. ꦱꦔ꧀ꦒꦷꦠꦷꦤꦁ ꦢ꧀ꦮꦶꦤ꧀ꦤꦤ꧀ꦠꦶ ꦢꦷꦓꦩꦗ꧀ꦙꦶꦩꦤꦶꦏꦴꦪꦴꦤꦁ.

꧑꧓. ‘‘ꦤ ꦆꦣ ꦨꦶꦪ꧀ꦪꦺꦴ ꦮꦶꦠ꧀ꦡꦴꦫꦏꦡꦁ ꦏꦫꦶꦱ꧀ꦱꦴꦩꦷ’’ꦠꦶ ꦱꦴꦩꦚ꧀ꦚꦠꦺꦴ ꦮꦸꦠ꧀ꦠꦱ꧀ꦱ ꦄꦠ꧀ꦡꦱ꧀ꦱ ꦄꦮꦱ꧀ꦱꦪꦁ ꦢꦱ꧀ꦱꦺꦠꦸꦁ ‘‘ꦱꦸꦠ꧀ꦠꦴꦤꦁ ꦥꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ.

꧑꧔. ꦪꦁ ꦄꦛ꧀ꦜꦏꦡꦁ ꦏꦠ꧀ꦠꦸꦏꦴꦩꦺꦴ, ꦠꦢꦺꦏꦢꦺꦱꦨꦴꦮꦺꦤ ꦮꦶꦱꦸꦢ꧀ꦣꦶꦩꦒ꧀ꦒꦺꦴ ꦒꦲꦺꦠꦧ꧀ꦧꦺꦴꦠꦶ ꦏꦡꦶꦏꦴꦤꦁ ꦈꦥꦢꦺꦱꦁ ꦏꦫꦺꦴꦤ꧀ꦠꦺꦴ ꦠꦠ꧀ꦠ ꦮꦶꦕꦴꦫꦶꦠꦣꦩ꧀ꦩꦺ ꦈꦢ꧀ꦢꦺꦱꦮꦱꦺꦤ ꦢꦱ꧀ꦱꦺꦠꦶ ‘‘ꦱꦷꦭꦏꦡꦴ’’ꦠꦶꦄꦴꦢꦶꦤꦴ. ꦠꦠ꧀ꦡ ꦱꦷꦭꦏꦡꦴꦠꦶ ꦕꦴꦫꦶꦠ꧀ꦠꦮꦴꦫꦶꦠ꧀ꦠꦴꦢꦶꦮꦱꦺꦤ ꦱꦷꦭꦱ꧀ꦱ ꦮꦶꦠ꧀ꦡꦴꦫꦏꦡꦴ. ꦣꦸꦠꦣꦩ꧀ꦩꦴꦠꦶ ꦥꦶꦟ꧀ꦝꦥꦴꦠꦶꦏꦔ꧀ꦒꦴꦢꦪꦺꦴ ꦠꦺꦫꦱ ꦏꦶꦭꦺꦱꦣꦸꦤꦤꦏꦣꦩ꧀ꦩꦴ. ꦏꦩ꧀ꦩꦛ꧀ꦜꦴꦤꦴꦤꦶ ꦱꦧ꧀ꦧꦴꦤꦷꦠꦶ ꦥꦴꦭ꦳ꦶꦪꦁ ꦄꦴꦒꦠꦴꦤꦶ ꦄꦛ꧀ꦜꦠ꧀ꦠꦶꦁꦱ, ꦄꦛ꧀ꦜꦏꦡꦴꦪꦁ ꦢ꧀ꦮꦺꦠꦶ ꦤꦶꦫꦮꦱꦺꦱꦴꦤꦶ ꦪꦺꦴꦒꦏꦩ꧀ꦩꦱ꧀ꦱ ꦨꦴꦮꦤꦴꦪ ꦥꦮꦠ꧀ꦠꦶꦛ꧀ꦜꦴꦤꦴꦤꦶ. ꦕꦫꦶꦪꦴꦮꦶꦣꦴꦤꦱꦲꦶꦠꦺꦴꦠꦶ ꦫꦴꦒꦕꦫꦶꦪꦴꦢꦷꦤꦁ ꦱꦨꦴꦒꦴꦢꦶꦮꦶꦣꦴꦤꦺꦤ ꦱꦲꦶꦠꦺꦴ. ꦙꦴꦤꦴꦤꦶ ꦕꦠ꧀ꦠꦴꦫꦶ ꦫꦹꦥꦴꦮꦕꦫꦗ꧀ꦙꦴꦤꦴꦤꦶ, ꦱꦩꦴꦥꦠ꧀ꦠꦶꦪꦺꦴ ꦕꦠꦱ꧀ꦱꦺꦴ ꦄꦫꦹꦥꦱꦩꦴꦥꦠ꧀ꦠꦶꦪꦺꦴ. ꦄꦛ꧀ꦜꦥꦶ ꦮꦴ ꦥꦛꦶꦭꦢ꧀ꦣꦩꦠ꧀ꦠꦴꦤꦶ ꦙꦴꦤꦴꦤꦶ, ꦱꦩꦴꦥꦗ꧀ꦗꦤꦮꦱꦶꦨꦴꦮꦥ꧀ꦥꦠ꧀ꦠꦶꦪꦴ ꦱꦩꦴꦥꦠ꧀ꦠꦶꦪꦺꦴ. ꦙꦴꦤꦴꦤꦶ ꦮꦴ ꦫꦹꦥꦴꦫꦹꦥꦴꦮꦕꦫꦗ꧀ꦙꦴꦤꦴꦤꦶ, ꦱꦩꦴꦥꦠ꧀ꦠꦶꦪꦺꦴ ꦦꦭꦱꦩꦴꦥꦠ꧀ꦠꦶꦤꦶꦫꦺꦴꦣꦱꦩꦴꦥꦠ꧀ꦠꦶꦪꦺꦴ.

꧑꧕. ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦨꦺꦢꦴ ꦖ ꦄꦨꦶꦚ꧀ꦚꦴꦪꦺꦴ ꦱꦧ꧀ꦧꦴ ꦄꦨꦶꦚ꧀ꦚꦴꦪꦺꦴ. ꦚꦴꦟꦮꦶꦨꦔ꧀ꦒꦴꦢꦷꦱꦸ ꦄꦴꦒꦠꦤꦪꦺꦤ ꦌꦏꦮꦶꦣꦴꦢꦶꦤꦴ ꦥꦚ꧀ꦚꦴꦪ ꦱꦔ꧀ꦏꦭꦺꦠ꧀ꦮꦴ ꦱꦩ꧀ꦥꦶꦟ꧀ꦝꦺꦠ꧀ꦮꦴ ꦤꦶꦕ꧀ꦖꦪꦺꦴ ꦥꦚ꧀ꦚꦴꦱꦔ꧀ꦏꦭꦤꦤꦶꦕ꧀ꦖꦪꦺꦴ.

꧑꧖. ꦥꦕ꧀ꦕꦪꦣꦩ꧀ꦩꦴꦤꦁ ꦲꦺꦠꦸꦄꦴꦢꦷꦤꦁ ꦥꦕ꧀ꦕꦪꦸꦥ꧀ꦥꦤ꧀ꦤꦣꦩ꧀ꦩꦴꦤꦁ ꦲꦺꦠꦸꦥꦕ꧀ꦕꦪꦴꦢꦶꦨꦴꦮꦺꦴ ꦥꦕ꧀ꦕꦪꦴꦏꦴꦫꦺꦴ, ꦠꦱ꧀ꦱ ꦢꦺꦱꦤꦴ ꦥꦕ꧀ꦕꦪꦴꦏꦴꦫꦢꦺꦱꦤꦴ, ꦥꦛꦶꦕ꧀ꦕꦱꦩꦸꦥ꧀ꦥꦴꦢꦏꦡꦴꦠꦶ ꦄꦠ꧀ꦡꦺꦴ. ꦱꦴ ꦥꦤ ꦤꦶꦏꦴꦪꦤ꧀ꦠꦫꦭꦢ꧀ꦣꦶꦱꦔ꧀ꦏꦫꦫꦲꦶꦠꦠꦴꦪ ꦱꦸꦛ꧀ꦜꦸꦥꦫꦶꦱꦸꦢ꧀ꦣꦴ, ꦓꦤꦮꦶꦤꦶꦧ꧀ꦨꦺꦴꦒꦱ꧀ꦱ ꦕ ꦱꦸꦢꦸꦏ꧀ꦏꦫꦠꦴꦪ ꦤꦶꦥꦸꦟꦴ ꦱꦟ꧀ꦲꦱꦸꦑꦸꦩꦴ, ꦌꦏꦠ꧀ꦠꦤꦪꦴꦢꦶꦱꦲꦶꦠꦴ ꦕ ꦠꦠ꧀ꦡ ꦮꦶꦕꦴꦫꦶꦠꦴꦠꦶ ꦄꦴꦲ ‘‘ꦱꦸꦥꦫꦶꦱꦸꦢ꧀ꦣꦤꦶꦥꦸꦟꦤꦪꦴ’’ꦠꦶ. ꦥꦛꦶꦱꦩ꧀ꦨꦶꦢꦴꦢꦷꦱꦸ ꦄꦴꦒꦠꦤꦪꦁ ꦄꦮꦶꦱꦗ꧀ꦗꦺꦠ꧀ꦮꦴꦮ ꦮꦶꦕꦴꦫꦶꦠꦠ꧀ꦠꦴ ꦄꦮꦶꦩꦸꦠ꧀ꦠꦠꦤ꧀ꦠꦶꦩꦒ꧀ꦒꦴ.

꧑꧗. ꦆꦠꦶ ꦥꦤ ꦱꦧ꧀ꦧꦤ꧀ꦠꦶ ꦆꦠꦶ-ꦱꦢ꧀ꦢꦺꦴ ꦥꦫꦶꦱꦩꦴꦥꦤꦺ, ꦥꦤ-ꦱꦢ꧀ꦢꦺꦴ ꦮꦕꦤꦴꦭꦔ꧀ꦏꦴꦫꦺ, ꦌꦠꦁ ꦱꦧ꧀ꦧꦤ꧀ꦠꦶ ꦄꦠ꧀ꦡꦺꦴ. ꦆꦣꦴꦠꦶ ꦆꦩꦶꦱ꧀ꦱꦴ ꦄꦛ꧀ꦜꦏꦡꦴꦪ. ꦤ ꦠꦁ ꦮꦶꦕꦴꦫꦪꦶꦱ꧀ꦱꦴꦩꦶ ꦥꦸꦤꦫꦸꦠ꧀ꦠꦶꦨꦴꦮꦠꦺꦴꦠꦶ ꦄꦣꦶꦥ꧀ꦥꦴꦪꦺꦴ.

꧑꧘. ꦆꦢꦴꦤꦶ ꦠꦱ꧀ꦱꦺꦮ ꦄꦮꦶꦕꦴꦫꦟꦱ꧀ꦱ ꦌꦏꦤ꧀ꦠꦏꦴꦫꦟꦁ ꦤꦶꦢ꧀ꦣꦴꦫꦺꦤ꧀ꦠꦺꦴ ‘‘ꦩꦗ꧀ꦙꦺ ꦮꦶꦱꦸꦢ꧀ꦣꦶꦩꦒ꧀ꦒꦺꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ‘‘ꦩꦗ꧀ꦙꦺ ꦜꦠ꧀ꦮꦴ’’ꦠꦶ ꦌꦠꦺꦤ ꦩꦗ꧀ꦙꦛ꧀ꦜꦨꦴꦮꦢꦷꦥꦤꦺꦤ ꦮꦶꦱꦺꦱꦠꦺꦴ ꦕꦠꦸꦤ꧀ꦤꦁ ꦄꦴꦒꦩꦴꦤꦁ ꦱꦴꦣꦴꦫꦟꦛ꧀ꦜꦏꦡꦴ ꦮꦶꦱꦸꦢ꧀ꦣꦶꦩꦒ꧀ꦒꦺꦴ, ꦤ ꦱꦸꦩꦔ꧀ꦒꦭꦮꦶꦭꦴꦱꦶꦤꦶꦄꦴꦢꦪꦺꦴ ꦮꦶꦪ ꦄꦱꦴꦣꦴꦫꦟꦛ꧀ꦜꦏꦡꦴꦠꦶ ꦢꦱ꧀ꦱꦺꦠꦶ. ‘‘ꦮꦶꦱꦺꦱꦠꦺꦴ’’ꦠꦶ ꦕ ꦆꦢꦁ ꦮꦶꦤꦪꦴꦨꦶꦣꦩ꧀ꦩꦴꦤꦩ꧀ꦥꦶ ꦮꦶꦱꦸꦢ꧀ꦣꦶꦩꦒ꧀ꦒꦺꦴ ꦪꦡꦴꦫꦲꦁ ꦄꦠ꧀ꦡꦮꦟ꧀ꦟꦤꦴ ꦲꦺꦴꦠꦶ ꦌꦮꦴꦠꦶ ꦏꦠ꧀ꦮꦴ ꦮꦸꦠ꧀ꦠꦁ.

꧑꧙. ꦆꦕ꧀ꦕꦺꦮꦴꦠꦶ ꦆꦠꦶ ꦌꦮ. ꦠꦩ꧀ꦥꦷꦠꦶ ꦮꦶꦱꦸꦢ꧀ꦣꦶꦩꦒ꧀ꦒꦩ꧀ꦥꦶ. ꦌꦠꦴꦪꦴꦠꦶ ꦱꦴꦫꦠ꧀ꦡꦥ꧀ꦥꦏꦴꦱꦶꦤꦶꦪꦴ.

ꦌꦠ꧀ꦡ ꦕ ‘‘ꦱꦷꦲꦭ꦳ꦢꦷꦥꦁ ꦄꦴꦨꦠꦴ’’ꦠꦶꦄꦴꦢꦶꦤꦴ ꦄꦛ꧀ꦜꦏꦡꦴꦏꦫꦟꦱ꧀ꦱ ꦤꦶꦩꦶꦠ꧀ꦠꦁ ꦢꦱ꧀ꦱꦺꦠꦶ, ‘‘ꦢꦷꦥꦮꦴꦱꦷꦤꦩꦠ꧀ꦡꦴꦪ ꦱꦸꦗꦤꦱ꧀ꦱ ꦕ ꦠꦸꦛ꧀ꦜꦠ꧀ꦡꦁ ꦕꦶꦫꦛ꧀ꦜꦶꦠꦠ꧀ꦡꦚ꧀ꦕ ꦣꦩ꧀ꦩꦱ꧀ꦱꦴ’’ꦠꦶ ꦌꦠꦺꦲꦶ ꦥꦪꦺꦴꦗꦤꦁ, ‘‘ꦱꦁꦪꦸꦠ꧀ꦠꦴꦒꦩꦮꦫꦱ꧀ꦱ ꦄꦠ꧀ꦡꦁ ꦥꦏꦴꦱꦪꦶꦱ꧀ꦱꦴꦩꦷ’’ꦠꦶ ꦌꦠꦺꦤ ꦥꦶꦟ꧀ꦝꦠ꧀ꦡꦁ, ‘‘ꦄꦥꦤꦺꦠ꧀ꦮꦴꦤ ꦠꦠꦺꦴꦲꦁ ꦱꦷꦲꦭ꦳ꦨꦴꦱ’’ꦤ꧀ꦠꦶꦄꦴꦢꦶꦤꦴ ‘‘ꦱꦴꦮꦠ꧀ꦡꦶꦥꦨꦹꦠꦷꦤ’’ꦤ꧀ꦠꦶꦄꦴꦢꦶꦤꦴ ‘‘ꦱꦷꦭꦏꦡꦴ’’ꦠꦶꦄꦴꦢꦶꦤꦴ ꦕ ꦏꦫꦟꦥ꧀ꦥꦏꦴꦫꦁ. ꦲꦺꦛ꧀ꦜꦶꦩꦤꦶꦏꦴꦪꦺꦱꦸ ꦮꦶꦱꦸꦢ꧀ꦣꦶꦩꦒ꧀ꦒꦺ ꦕ ꦮꦶꦕꦴꦫꦶꦠꦴꦤꦁ ꦄꦠ꧀ꦡꦴꦤꦁ ꦄꦮꦶꦕꦴꦫꦟꦩ꧀ꦥꦶ ꦲꦶ ꦆꦣ ꦏꦫꦟꦥ꧀ꦥꦏꦴꦫꦺꦴ ꦌꦮꦴꦠꦶ.

ꦒꦤ꧀ꦡꦴꦫꦩ꧀ꦨꦏꦡꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.