꧔. ꦱꦩꦡꦏ꧀ꦑꦤ꧀ꦣꦏꦁ

꧑. ꦱꦩ꧀ꦩꦸꦑꦴꦮꦶꦤꦪꦏꦡꦴ

꧑꧘꧖-꧗. ꦱꦩꦡꦏ꧀ꦑꦤ꧀ꦣꦏꦺ ꦌꦮꦩꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴꦠꦶ ꦪꦺꦴꦗꦤꦴ. ꦖ ꦩꦴꦠꦶꦏꦴꦥꦢꦴꦤꦷꦠꦶ ꦮꦴꦏ꧀ꦪꦩ꧀ꦥꦶ ꦱꦩꦴꦱꦺꦴꦥꦶ ꦪꦸꦠ꧀ꦠꦺꦴꦪꦺꦮ. ꦠꦠ꧀ꦡ ꦱꦩꦴꦱꦺꦴ ꦥꦤ ꦄꦱꦩꦴꦲꦴꦫꦢꦶꦒꦸꦪꦺꦮ. ‘‘ꦤꦶꦏ꧀ꦑꦶꦥꦶꦠ꧀ꦮꦴ’’ꦠꦶ ꦥꦢꦁ ‘‘ꦮꦸꦠ꧀ꦠꦺꦴ’’ꦠꦶ ꦥꦢꦺ ꦥꦸꦧ꧀ꦧꦏꦴꦭꦏꦶꦫꦶꦪꦴꦮꦶꦱꦺꦱꦤꦁ, ꦠꦸꦭ꧀ꦪꦠ꧀ꦡꦺꦴ ꦮꦴ. ꦮꦶꦠ꧀ꦡꦴꦫꦺꦴꦠꦶ ꦮꦶꦨꦔ꧀ꦒꦺꦴ. ꦠꦠ꧀ꦡꦴꦠꦶ ꦮꦶꦨꦔ꧀ꦒꦺ. ꦱꦚ꧀ꦚꦴꦥꦺꦠꦷꦠꦶ ꦌꦠ꧀ꦡ ꦱꦚ꧀ꦚꦁ ꦏꦠ꧀ꦮꦴ ꦗꦴꦤꦴꦥꦺꦠꦷꦠꦶ ꦄꦠ꧀ꦡꦁ ꦥꦛꦶꦏ꧀ꦑꦶꦥꦤ꧀ꦠꦺꦴ ꦄꦴꦲ ‘‘ꦥꦫꦶꦠꦺꦴꦱꦺꦠ꧀ꦮꦴ ꦗꦴꦤꦴꦥꦺꦠꦷ’’ꦠꦶ. ꦆꦩꦶꦤꦴ ꦱꦁꦥꦸꦧ꧀ꦧꦺꦴ ꦚꦴꦣꦴꦠꦸ ꦥꦫꦶꦠꦺꦴꦱꦤꦠ꧀ꦡꦁ ꦄꦤ꧀ꦠꦺꦴꦏꦠ꧀ꦮꦴ ꦄꦮꦧꦺꦴꦣꦤꦠ꧀ꦡꦺꦴ ꦲꦺꦴꦠꦷꦠꦶ ꦢꦱ꧀ꦱꦺꦠꦶ. ꦏꦴꦫꦟꦥꦠꦶꦫꦹꦥꦏꦴꦤꦷꦠꦶ ꦏꦴꦫꦟꦱ꧀ꦱ ꦥꦛꦶꦨꦴꦒꦴꦤꦶ. ꦤꦶꦗ꧀ꦙꦴꦥꦺꦠꦷꦠꦶ ꦌꦠ꧀ꦡ ꦙꦺꦣꦴꦠꦸ ꦎꦭꦺꦴꦏꦤꦠ꧀ꦡꦺꦴꦠꦶ ꦄꦴꦲ ‘‘ꦎꦭꦺꦴꦏꦺꦠꦷ’’ꦠꦶ. ꦪꦡꦴꦠꦶ ꦪꦺꦤꦴꦏꦴꦫꦺꦤ, ꦏꦫꦶꦪꦩꦴꦤꦺꦠꦶ ꦱꦩ꧀ꦧꦤ꧀ꦣꦺꦴ. ꦱꦺꦴꦠꦶ ꦣꦩ꧀ꦩꦮꦴꦢꦷ. ꦥꦫꦠꦺꦴꦥꦶ ꦌꦱꦺꦮ ꦤꦪꦺꦴ. ‘‘ꦥꦸꦤꦥ꧀ꦥꦸꦤ’’ꦤ꧀ꦠꦶ ꦆꦩꦶꦤꦴ ꦄꦤꦸꦥꦺꦏ꧀ꦑꦠꦷꦠꦶ ꦌꦠ꧀ꦡ ꦄꦤꦸꦱꦢ꧀ꦢꦺꦴ ꦤ ꦈꦥꦕ꧀ꦖꦶꦤ꧀ꦤꦠ꧀ꦡꦺꦴꦠꦶ ꦢꦱ꧀ꦱꦺꦠꦶ. ꦥꦺꦏ꧀ꦑꦠꦶ ꦄꦤꦸꦥꦺꦏ꧀ꦑꦠꦷꦠꦶ ꦌꦠ꧀ꦡ ꦆꦏ꧀ꦑꦣꦴꦠꦸ ‘‘ꦢꦱ꧀ꦱꦺꦠꦶ ꦄꦤꦸꦢꦱ꧀ꦱꦺꦠꦷ’’ꦠꦶ ꦌꦠ꧀ꦡ ꦢꦶꦱꦣꦴꦠꦸꦪꦴ ꦱꦢꦶꦱꦠ꧀ꦡꦺꦴꦠꦶ ꦄꦴꦲ ‘‘ꦢꦱ꧀ꦱꦺꦠꦶ…ꦥꦺ… ꦥꦫꦶꦪꦴꦪꦮꦕꦤꦴꦤꦷ’’ꦠꦶ. ꦠꦺꦱꦚ꧀ꦚꦺꦮꦴꦠꦶ ‘‘ꦥꦺꦏ꧀ꦑꦠꦶ ꦄꦤꦸꦥꦺꦏ꧀ꦑꦠꦷ’’ꦠꦶ ꦥꦢꦴꦤꦚ꧀ꦚꦺꦮ. ꦥꦫꦶꦪꦴꦪꦮꦕꦤꦴꦤꦷꦠꦶ ꦮꦺꦮꦕꦤꦱꦢ꧀ꦢꦴ ꦄꦠ꧀ꦡꦺ ꦥꦫꦶꦧ꧀ꦪꦠ꧀ꦠꦶꦁ ꦄꦪꦤ꧀ꦠꦶ ꦒꦕ꧀ꦖꦤ꧀ꦠꦶ ꦆꦩꦺꦲꦷꦠꦶ ꦥꦫꦶꦪꦴꦪꦴꦤꦶ, ꦠꦴꦤꦶꦪꦺꦮ ꦮꦕꦤꦴꦤꦶ ꦥꦫꦶꦪꦴꦪꦮꦕꦤꦴꦤꦶ. ꦱꦺꦴꦠꦶ ꦄꦣꦩ꧀ꦩꦮꦴꦢꦷ. ꦩꦺꦴꦲꦺꦠ꧀ꦮꦴꦠꦶ ꦣꦩ꧀ꦩꦮꦴꦢꦷꦥꦸꦒ꧀ꦒꦭꦴꦢꦶꦁ ꦩꦺꦴꦲꦴꦥꦺꦠ꧀ꦮꦴ.

꧑꧘꧘. ꦣꦩ꧀ꦩꦮꦴꦢꦷ ꦥꦸꦒ꧀ꦒꦭꦺꦴ ꦢꦱ꧀ꦱꦺꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦄꦩꦺꦴꦲꦺꦠ꧀ꦮꦴꦠꦶ ꦄꦣꦩ꧀ꦩꦮꦴꦢꦷꦥꦸꦒ꧀ꦒꦭꦴꦢꦶꦁ ꦄꦩꦺꦴꦲꦴꦥꦺꦠ꧀ꦮꦴ, ꦄꦮꦶꦥꦫꦷꦠꦁ ꦗꦴꦤꦴꦥꦺꦠ꧀ꦮꦴꦠꦶ ꦄꦠ꧀ꦡꦺꦴ.

꧒. ꦱꦠꦶꦮꦶꦤꦪꦏꦡꦴ

꧑꧙꧕. ꦥꦫꦩ꧀ꦩꦸꦑꦁ ꦮꦶꦤꦺꦠꦶ ꦮꦶꦤꦴꦱꦺꦠꦷꦠꦶ ꦮꦶꦤꦪꦺꦴ, ꦥꦫꦩ꧀ꦩꦸꦑꦁ ꦮꦶꦤꦺꦠꦶ ꦮꦶꦤꦴꦱꦺꦠꦶ ꦄꦤꦺꦤꦴꦠꦶ ꦮꦴ ꦮꦶꦤꦪꦺꦴ, ꦮꦶꦤꦪꦏꦩ꧀ꦩꦁ. ꦱꦔ꧀ꦓꦣꦩ꧀ꦩꦮꦶꦤꦪꦥꦸꦒ꧀ꦒꦭꦱꦩ꧀ꦩꦸꦑꦴꦤꦁ ꦢꦴꦠꦧ꧀ꦧꦺꦴ ꦮꦶꦤꦪꦺꦴ ꦱꦩ꧀ꦩꦸꦑꦴꦮꦶꦤꦪꦺꦴ. ꦥꦚ꧀ꦕꦶꦩꦴꦤꦷꦠꦶ ꦌꦠ꧀ꦡ ꦥꦚ꧀ꦕꦤ꧀ꦤꦁ ꦱꦫꦹꦥꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦱꦸꦢ꧀ꦣꦱ꧀ꦱꦴ’’ꦠꦶꦄꦴꦢꦶ. ꦄꦤꦸꦮꦢꦶꦠꦱ꧀ꦱ ꦢꦴꦤꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦌꦠꦴꦤꦷꦠꦶ ꦥꦚ꧀ꦕ ꦄꦔ꧀ꦒꦴꦤꦶ. ‘‘ꦌꦏꦺꦏꦄꦔ꧀ꦒꦮꦱꦺꦤ ꦤ ꦭꦧ꧀ꦨꦤ꧀ꦠꦷ’’ꦠꦶ ꦆꦩꦶꦤꦴ ꦱꦩꦸꦢꦴꦪꦮꦴꦏ꧀ꦪꦤꦶꦧ꧀ꦧꦠ꧀ꦠꦶꦨꦴꦮꦠꦺꦴ ꦥꦚ꧀ꦕꦔ꧀ꦒꦮꦱꦺꦤꦺꦮ ꦭꦧ꧀ꦨꦤ꧀ꦠꦷꦠꦶ ꦢꦱ꧀ꦱꦺꦠꦶ. ꦢꦺꦱꦤꦴꦩꦠ꧀ꦠꦩꦺꦮꦺꦠꦤ꧀ꦠꦶ ‘‘ꦥꦚ꧀ꦕꦶꦩꦴꦤꦷ’’ꦠꦶ ꦌꦠꦁ ꦮꦕꦤꦁ ꦢꦺꦱꦤꦴꦩꦠ꧀ꦠꦩꦺꦮ, ꦤ ꦄꦮꦪꦮꦮꦴꦏ꧀ꦪꦤꦶꦧ꧀ꦧꦠ꧀ꦠꦶꦮꦕꦤꦤ꧀ꦠꦶ ꦄꦣꦶꦥ꧀ꦥꦴꦪꦺꦴ. ꦣꦩ꧀ꦩꦤ꧀ꦠꦶ ꦨꦹꦠꦁ. ꦌꦠ꧀ꦡꦴꦠꦶ ‘‘ꦥꦚ꧀ꦕꦶꦩꦴꦤꦶ ꦨꦶꦏ꧀ꦑꦮꦺ’’ꦠꦶꦄꦴꦢꦶꦮꦕꦤꦺ. ꦠꦠ꧀ꦡ ꦕꦴꦠꦶ ‘‘ꦥꦚ꧀ꦕꦶꦩꦴꦤꦶ ꦨꦶꦏ꧀ꦑꦮꦺ’’ꦠꦶꦄꦴꦢꦶꦮꦕꦤꦺ ꦕ. ꦄꦤꦸꦮꦢꦤ꧀ꦠꦷꦠꦶ ꦌꦠ꧀ꦡ ꦄꦤꦸꦢ꧀ꦣꦁꦱꦤꦺꦤ ꦮꦢꦤ꧀ꦠꦷꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦕꦺꦴꦢꦺꦤ꧀ꦠꦷ’’ꦠꦶ. ꦄꦪꦁ ꦥꦤ ꦱꦠꦶꦮꦶꦤꦪꦺꦴ ꦢꦴꦠꦧ꧀ꦧꦺꦴꦠꦶ ꦱꦩ꧀ꦧꦤ꧀ꦣꦺꦴ. ꦄꦤꦴꦒꦴꦩꦶꦤꦺꦴꦥꦷꦠꦶ ꦥꦶꦱꦢ꧀ꦢꦺꦴ ꦱꦩ꧀ꦨꦴꦮꦤꦺ, ꦱꦏꦢꦴꦒꦴꦩꦶꦄꦴꦢꦶꦏꦺ ꦥꦤ ꦏꦴ ꦤꦴꦩ ꦏꦡꦴꦠꦶ ꦢꦱ꧀ꦱꦺꦠꦶ. ꦱꦺꦴ ꦕ ꦑꦺꦴꦠꦶ ꦱꦠꦶꦮꦶꦤꦪꦺꦴ ꦕ. ꦕꦺꦴꦢꦶꦪꦩꦴꦤꦺꦪꦺꦮꦴꦠꦶ ꦕꦺꦴꦢꦶꦪꦩꦴꦤꦱ꧀ꦱꦺꦮ, ꦄꦪꦩꦺꦮ ꦮꦴ ꦥꦴꦜꦺꦴ. ꦠꦱ꧀ꦩꦶꦤ꧀ꦠꦶ ꦱꦠꦶꦮꦶꦤꦪꦱ꧀ꦩꦶꦁ ꦢꦶꦤ꧀ꦤꦺꦠꦶ ꦱꦩ꧀ꦧꦤ꧀ꦣꦺꦴ. ꦄꦕꦺꦴꦢꦶꦠꦠ꧀ꦠꦴ ꦏꦡꦴ ꦤ ꦫꦹꦲꦠꦷꦠꦶ ꦄꦴꦲ ‘‘ꦕꦺꦴꦢꦺꦤ꧀ꦠꦺꦴꦥꦷ’’ꦠꦶꦄꦴꦢꦶ. ꦄꦴꦥꦗ꧀ꦗꦠꦷꦠꦶ ꦕꦺꦴꦢꦏꦺꦴ ꦄꦴꦥꦗ꧀ꦗꦠꦶ. ꦕꦺꦴꦢꦤꦴꦢꦶꦄꦱꦴꦫꦸꦥ꧀ꦥꦺ ꦮꦶꦤꦺꦠꦶ ꦮꦶꦤꦴꦱꦺꦠꦷꦠꦶ ꦮꦶꦤꦪꦺꦴ, ꦮꦶꦤꦺꦠꦶ ꦮꦶꦤꦴꦱꦺꦠꦶ ꦄꦤꦺꦤꦴꦠꦶ ꦮꦴ ꦮꦶꦤꦪꦺꦴ, ꦮꦶꦤꦪꦏꦩ꧀ꦩꦁ. ꦱꦠꦶꦮꦺꦥꦸꦭ꧀ꦭꦥꦠ꧀ꦠꦱ꧀ꦱ ꦢꦴꦠꦧ꧀ꦧꦺꦴ ꦮꦶꦤꦪꦺꦴ ꦱꦠꦶꦮꦶꦤꦪꦺꦴ.

꧓. ꦄꦩꦹꦭ꦳꧀ꦲꦮꦶꦤꦪꦏꦡꦴ

꧑꧙꧖. ꦨꦴꦱꦶꦠꦥꦫꦶꦏꦤ꧀ꦠꦤ꧀ꦠꦶ ꦌꦠ꧀ꦡ ꦨꦴꦱꦶꦠꦥꦫꦶꦏꦤ꧀ꦠꦱꦢ꧀ꦢꦴꦤꦁ ꦏꦫꦟꦴꦥꦺꦏ꧀ꦑꦠ꧀ꦠꦴ ꦮꦶꦱꦸꦁ ꦏꦫꦟꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦮꦴꦕꦴꦪ ꦨꦴꦱꦶꦠꦁ, ꦏꦴꦪꦺꦤ ꦥꦫꦶꦏꦤ꧀ꦠ’’ꦤ꧀ꦠꦶ. ‘‘ꦥꦫꦶꦏ꧀ꦏꦩꦺꦠ꧀ꦮꦴ ꦏꦠ’’ꦤ꧀ꦠꦶ ꦆꦩꦶꦤꦴ ꦥꦫꦶꦏꦩꦠꦷꦠꦶ ꦥꦫꦶꦏꦤ꧀ꦠꦁ, ꦥꦫꦶꦏꦤ꧀ꦠꦁ ꦲꦸꦠ꧀ꦮꦴ ꦏꦠꦁ ꦥꦫꦶꦏꦤ꧀ꦠꦤ꧀ꦠꦶ ꦮꦕꦤꦠ꧀ꦡꦁ ꦢꦱ꧀ꦱꦺꦠꦶ. ꦥꦫꦶꦏ꧀ꦏꦩꦺꦠ꧀ꦮꦴꦠꦶ ꦄꦠꦶꦏ꧀ꦏꦩꦶꦠ꧀ꦮꦴ. ꦱꦫꦠꦴꦪꦱ꧀ꦩꦴꦠꦶ ꦌꦠ꧀ꦡ ꦈꦏꦴꦫꦭꦺꦴꦥꦱꦤ꧀ꦣꦶꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦱꦫꦠꦸ ꦄꦴꦪꦱ꧀ꦩꦴ’’ꦠꦶ. ‘‘ꦌꦮꦫꦹꦥꦶꦪꦴ ꦄꦴꦥꦠ꧀ꦠꦶꦪꦴ’’ꦠꦶ ꦆꦩꦶꦤꦴ ꦄꦴꦥꦗ꧀ꦗꦶꦠꦴꦠꦶ ꦌꦠ꧀ꦡ ꦠꦸꦥꦕ꧀ꦕꦪꦪꦺꦴꦒꦨꦴꦮꦠꦺꦴ ꦏꦩ꧀ꦩꦠ꧀ꦡꦖꦛ꧀ꦜꦶꦪꦴꦥꦶ ꦱꦩ꧀ꦨꦮꦨꦴꦮꦁ ꦢꦱ꧀ꦱꦺꦠꦶ. ꦠꦸꦥꦕ꧀ꦕꦪꦪꦺꦴꦒꦺ ꦏꦩ꧀ꦩꦠ꧀ꦡꦖꦛ꧀ꦜꦷ ꦄꦤꦶꦕ꧀ꦕꦁ ꦲꦺꦴꦠꦶ, ꦠꦱ꧀ꦩꦴ ꦥꦴꦭ꦳ꦶꦪꦁ ‘‘ꦌꦮꦫꦹꦥꦶꦪꦴ ꦄꦴꦥꦠ꧀ꦠꦶꦪꦴ’’ꦠꦶ ꦏꦩ꧀ꦩꦠ꧀ꦡꦖꦛ꧀ꦜꦷꦨꦴꦮꦺꦤ ꦄꦮꦠ꧀ꦮꦴ ‘‘ꦌꦮꦫꦹꦥꦶꦁ ꦄꦴꦥꦠ꧀ꦠꦶ’’ꦤ꧀ꦠꦶ ꦏꦩ꧀ꦩꦠ꧀ꦡꦢꦸꦠꦶꦪꦴꦨꦴꦮꦺꦤ ꦮꦸꦠ꧀ꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦠꦱ꧀ꦱꦴꦠꦶ ‘‘ꦄꦴꦥꦗ꧀ꦗꦶꦠ꧀ꦮꦴ’’ꦠꦶ ꦥꦴꦜꦱ꧀ꦱ. ‘‘ꦥꦜꦩꦁ ꦥꦕ꧀ꦖꦴ’’ꦠꦶ ꦥꦢꦺꦲꦶ ꦄꦣꦶꦥ꧀ꦥꦴꦪꦠ꧀ꦡꦁ ꦢꦱ꧀ꦱꦺꦠꦶ. ꦕꦺꦴꦢꦏꦱ꧀ꦱ ꦏꦡꦁ ꦮꦶꦤꦺꦠꦶ ꦮꦶꦤꦴꦱꦺꦠꦷꦠꦶ ꦮꦶꦤꦪꦺꦴ, ꦕꦺꦴꦢꦏꦱ꧀ꦱ ꦏꦡꦁ ꦮꦶꦤꦺꦠꦶ ꦮꦶꦤꦴꦱꦺꦠꦶ ꦄꦤꦺꦤꦴꦠꦶ ꦮꦴ ꦮꦶꦤꦪꦺꦴ. ꦥꦜꦩꦁ ꦩꦹꦭ꦳꧀ꦲꦨꦴꦮꦁ ꦈꦥꦒꦤ꧀ꦠ꧀ꦮꦴ ꦥꦕ꧀ꦖꦴ ꦄꦩꦹꦭ꦳꧀ꦲꦱ꧀ꦱ ꦢꦴꦠꦧ꧀ꦧꦺꦴ ꦮꦶꦤꦪꦺꦴ ꦄꦩꦹꦭ꦳꧀ꦲꦮꦶꦤꦪꦺꦴ.

꧔. ꦥꦛꦶꦚ꧀ꦚꦴꦠꦏꦫꦟꦏꦡꦴ

꧒꧐꧐. ꦥꦛꦶꦗꦴꦤꦶꦪꦠꦺ, ꦥꦛꦶꦗꦴꦤꦤꦁ ꦮꦴ ꦥꦛꦶꦚ꧀ꦚꦴ, ꦠꦴꦪ ꦏꦴꦫꦺꦠꦧ꧀ꦧꦁ.

꧕. ꦪꦺꦨꦸꦪ꧀ꦪꦱꦶꦏꦴꦏꦡꦴ

꧒꧐꧒. ꦪꦺꦨꦸꦪ꧀ꦪꦱꦶꦏꦴꦠꦶ ꦌꦠ꧀ꦡ ꦪꦺꦨꦸꦪ꧀ꦪꦺꦤ ꦥꦮꦠ꧀ꦠꦴ ꦪꦺꦨꦸꦪ꧀ꦪꦱꦶꦏꦴ, ꦣꦩ꧀ꦩꦮꦴꦢꦷꦤꦁ ꦪꦺꦨꦸꦪ꧀ꦪꦠꦴꦱꦩ꧀ꦥꦴꦢꦶꦏꦴ ꦏꦶꦫꦶꦪꦴꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦪꦱ꧀ꦱꦴ ꦏꦶꦫꦶꦪꦴꦪꦴ’’ꦠꦶꦄꦴꦢꦶ. ꦠꦠ꧀ꦡ ꦪꦱ꧀ꦱꦴ ꦏꦶꦫꦶꦪꦴꦪꦴꦠꦶ ꦪꦱ꧀ꦱꦴ ꦪꦺꦨꦸꦪ꧀ꦪꦠꦴꦱꦩ꧀ꦥꦴꦢꦶꦏꦴꦪ ꦏꦶꦫꦶꦪꦴꦪ. ꦌꦱꦴꦠꦶ ꦪꦺꦨꦸꦪ꧀ꦪꦠꦴꦱꦩ꧀ꦥꦴꦢꦶꦏꦴ ꦏꦶꦫꦶꦪꦴ.

꧒꧐꧔. ꦎꦫꦩꦠ꧀ꦠꦏꦤ꧀ꦠꦶ ꦌꦠ꧀ꦡ ꦎꦫꦱꦢ꧀ꦢꦺꦴ ꦕ ꦩꦠ꧀ꦠꦱꦢ꧀ꦢꦺꦴ ꦕ ꦱꦩꦹꦲꦁ ꦏꦠ꧀ꦮꦴ ꦥꦫꦶꦠ꧀ꦠꦮꦴꦕꦏꦺꦴ ꦄꦥ꧀ꦥꦩꦠ꧀ꦠꦮꦴꦕꦏꦺꦴꦠꦶ ꦄꦴꦲ ‘‘ꦥꦫꦶꦠ꧀ꦠꦁ ꦄꦥ꧀ꦥꦩꦠ꧀ꦠꦏ’’ꦤ꧀ꦠꦶ. ‘‘ꦨꦟ꧀ꦝꦤꦩꦠ꧀ꦠꦩꦺꦮꦴ’’ꦠꦶ ꦆꦩꦶꦤꦴ ꦤ ꦩꦲꦤ꧀ꦠꦁ ꦮꦶꦮꦴꦢꦴꦣꦶꦏꦫꦟꦁ ꦲꦺꦴꦠꦷꦠꦶ ꦢꦱ꧀ꦱꦺꦠꦶ. ꦤ ꦕ ꦒꦠꦶꦒꦠꦤ꧀ꦠꦶ ꦌꦠ꧀ꦡ ꦕꦶꦫꦏꦴꦭꦨꦴꦮꦁ ꦤ ꦕ ꦒꦠꦤ꧀ꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦢ꧀ꦮꦺ ꦠꦪꦺꦴ…ꦥꦺ… ꦄꦮꦶꦤꦶꦕ꧀ꦖꦶꦠ’’ꦤ꧀ꦠꦶ. ꦠꦠ꧀ꦡ ꦠꦠ꧀ꦡꦺꦮꦴꦠꦶ ꦠꦱ꧀ꦩꦶꦁ ꦠꦱ꧀ꦩꦶꦁ ꦮꦶꦮꦴꦢꦴꦣꦶꦏꦫꦟꦗꦴꦠꦄꦴꦮꦴꦱꦺ ꦌꦮ, ꦤ ꦕ ꦱꦫꦶꦠꦱꦴꦫꦶꦠꦥꦢꦴꦤꦁ ꦱꦸꦢ꧀ꦣꦏꦴꦫꦶꦠꦏꦶꦫꦶꦪꦨꦴꦮꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦱꦪꦁ ꦱꦫꦶꦠꦁ ꦮꦴ ꦄꦚ꧀ꦚꦺꦲꦶ ꦱꦴꦫꦶꦠꦁ ꦮꦴ ꦤ ꦲꦺꦴꦠꦷ’’ꦠꦶ. ꦠꦺꦲꦶ ꦨꦶꦏ꧀ꦑꦹꦲꦷꦠꦶ ꦮꦶꦮꦴꦢꦏꦴꦫꦏꦺꦲꦶ ꦨꦶꦏ꧀ꦑꦹꦲꦶ. ‘‘ꦱꦭꦴꦏꦁ ꦒꦴꦲꦺꦤ꧀ꦠꦺꦴ’’ꦠꦶ ꦆꦩꦶꦤꦴ ‘‘ꦗꦴꦤꦴꦠꦷ’’ꦠꦶ ꦥꦢꦱ꧀ꦱ ꦏꦠ꧀ꦠꦴꦫꦁ ꦢꦱ꧀ꦱꦺꦠꦶ. ꦆꦩꦶꦤꦴ ꦤꦷꦲꦴꦫꦺꦤꦴꦠꦶ ꦆꦩꦶꦤꦴ ꦏꦴꦫꦟꦺꦤ. ꦄꦥꦶ ꦤꦴꦩꦴꦠꦶ ꦆꦩꦶꦤꦴ ꦄꦥ꧀ꦥꦺꦮꦤꦴꦩꦱꦢ꧀ꦢꦺꦴ ꦄꦥꦶꦤꦴꦩꦥꦫꦶꦪꦴꦪꦺꦴꦠꦶ ꦢꦱ꧀ꦱꦺꦠꦶ. ꦄꦱ꧀ꦱꦹꦠꦶ ꦨꦮꦺꦪ꧀ꦪꦸꦁ. ꦆꦩꦶꦤꦴ ‘‘ꦥꦴꦭ꦳ꦶꦪꦁ ꦄꦣꦩ꧀ꦩꦮꦴꦢꦷ ꦧꦲꦸꦠꦫꦴ ꦨꦮꦺꦪ꧀ꦪꦸꦁ, ꦄꦥ꧀ꦥꦺꦮ ꦤꦴꦩ ꦱꦴꦣꦹ’’ꦠꦶ ꦪꦺꦴꦗꦤꦴꦤꦪꦁ ꦢꦱ꧀ꦱꦺꦠꦶ. ‘‘ꦄꦪꦩꦱ꧀ꦱ ꦄꦗ꧀ꦙꦴꦱꦪꦺꦴ ꦲꦺꦴꦠꦷ’’ꦠꦶ ꦆꦩꦶꦤꦴ ꦥꦴꦜꦱꦺꦱꦁ ꦢꦱ꧀ꦱꦺꦠꦶ. ꦄꦱ꧀ꦱꦴꦠꦶ ꦱꦭꦴꦏꦒꦴꦲꦱ꧀ꦱ. ꦢ꧀ꦮꦷꦱꦸꦥꦷꦠꦶ ‘‘ꦗꦴꦤꦴꦠꦶ ꦱꦔ꧀ꦓꦺꦴ ꦨꦶꦗ꧀ꦗꦶꦱ꧀ꦱꦠꦷ’’ꦠꦶ ꦕ ‘‘ꦄꦥ꧀ꦥꦺꦮ ꦤꦴꦩ ꦱꦔ꧀ꦓꦺꦴ ꦨꦶꦗ꧀ꦗꦺꦪ꧀ꦪꦴ’’ꦠꦶ ꦕ ꦢ꧀ꦮꦷꦱꦸꦥꦶ ꦥꦢꦺꦱꦸ.

‘‘ꦄꦣꦩ꧀ꦩꦺꦤ ꦒꦟ꧀ꦲꦤ꧀ꦠꦷ’’ꦠꦶ ꦌꦠ꧀ꦡ ‘‘ꦒꦟ꧀ꦲꦤ꧀ꦠꦷ’’ꦠꦶ ꦏꦶꦫꦶꦪꦴꦥꦢꦱ꧀ꦱ ꦄꦣꦩ꧀ꦩꦮꦴꦢꦶꦤꦺꦴ ꦌꦮ ꦏꦠ꧀ꦠꦴ ꦤꦴꦩꦴꦠꦶ ꦄꦴꦲ ‘‘ꦄꦣꦩ꧀ꦩꦮꦴꦢꦶꦤꦺꦴ’’ꦠꦶ. ‘‘ꦢ꧀ꦮꦺ ꦣꦩ꧀ꦩꦮꦴꦢꦶꦤꦺꦴ’’ꦠꦶ ꦆꦩꦶꦤꦴ ‘‘ꦮꦒ꧀ꦒꦴ ꦒꦟ꧀ꦲꦤ꧀ꦠꦷ’’ꦠꦶ ꦌꦠ꧀ꦡ ‘‘ꦒꦟ꧀ꦲꦤ꧀ꦠꦷ’’ꦠꦶ ꦏꦶꦫꦶꦪꦴꦥꦢꦱ꧀ꦱ ꦣꦩ꧀ꦩꦮꦴꦢꦶꦤꦺꦴ ꦌꦮ ꦏꦠ꧀ꦠꦴ ꦤꦴꦩꦴꦠꦶ ꦢꦱ꧀ꦱꦺꦠꦶ. ꦤ ꦕ ꦪꦡꦴꦢꦶꦛ꧀ꦜꦶꦪꦴ ꦒꦟ꧀ꦲꦤ꧀ꦠꦷꦠꦶ ꦌꦠ꧀ꦡ ꦣꦩ꧀ꦩꦮꦴꦢꦶꦤꦺꦴ ꦲꦸꦠ꧀ꦮꦴ ꦣꦩ꧀ꦩꦮꦴꦢꦶꦱꦭꦴꦏꦁ ꦄꦒ꧀ꦒꦲꦺꦠ꧀ꦮꦴ ꦄꦣꦩ꧀ꦩꦮꦴꦢꦶꦱꦭꦴꦏꦱ꧀ꦱ ꦒꦲꦟꦁ ꦤ ꦕ ꦪꦡꦴꦢꦶꦛ꧀ꦜꦶꦪꦴ ꦒꦟ꧀ꦲꦤ꧀ꦠꦶ ꦤꦴꦩꦴꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦣꦩ꧀ꦩꦮꦴꦢꦶꦤꦺꦴ ꦲꦸꦠ꧀ꦮꦴ’’ꦠꦶꦄꦴꦢꦶ. ꦥꦛꦶꦮꦠ꧀ꦠꦺꦠ꧀ꦮꦴꦠꦶ ꦆꦩꦩꦺꦮꦠ꧀ꦡꦁ ꦥꦛꦶꦱꦺꦣꦺꦠ꧀ꦮꦴ. ‘‘ꦥꦫꦶꦮꦠ꧀ꦠꦺꦠ꧀ꦮꦴ’’ꦠꦶꦥꦶ ꦥꦴꦜꦺꦴ, ꦲꦺꦛ꧀ꦜꦸꦥꦫꦶꦪꦴꦪꦁ ꦏꦠ꧀ꦮꦴꦠꦶ ꦄꦠ꧀ꦡꦺꦴ. ꦠꦺꦠꦶ ꦣꦩ꧀ꦩꦮꦴꦢꦶꦤꦺꦴ. ꦌꦠ꧀ꦡꦴꦠꦶ ꦱꦩꦡꦏ꧀ꦑꦤ꧀ꦣꦏꦺ.

꧖. ꦠꦱ꧀ꦱꦥꦴꦥꦶꦪꦱꦶꦏꦴꦏꦡꦴ

꧒꧐꧗. ꦄꦱꦸꦕꦷꦠꦶ ꦌꦠ꧀ꦡ ꦤꦠ꧀ꦡꦶ ꦱꦸꦕꦷꦤꦶ ꦏꦴꦪꦮꦕꦷꦏꦩ꧀ꦩꦴꦤꦶ ꦌꦠꦱ꧀ꦱꦴꦠꦶ ꦄꦱꦸꦕꦷꦠꦶ ꦮꦕꦤꦠ꧀ꦡꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦄꦱꦸꦕꦷꦲꦶ ꦏꦴꦪꦮꦕꦷꦏꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ’’ꦠꦶ. ꦌꦱꦺꦮ ꦤꦪꦺꦴ ꦄꦭꦗ꧀ꦗꦷꦠꦶ ꦌꦠ꧀ꦡꦴꦥꦶ. ꦱꦴꦤꦸꦮꦴꦢꦺꦴꦠꦶ ꦌꦠ꧀ꦡ ꦄꦤꦸꦮꦴꦢꦈꦥꦮꦴꦢꦱꦢ꧀ꦢꦴꦤꦁ ꦥꦫꦶꦪꦴꦪꦠ꧀ꦠꦴ ꦮꦸꦠ꧀ꦠꦁ ‘‘ꦱꦈꦥꦮꦴꦢꦺꦴ’’ꦠꦶ. ꦆꦠꦶ ꦥꦚ꧀ꦕꦴꦠꦶ ꦆꦩꦴꦤꦶ ꦥꦚ꧀ꦕ ꦄꦔ꧀ꦒꦴꦤꦶ. ꦌꦠ꧀ꦡꦴꦠꦶ ꦠꦱ꧀ꦱꦥꦴꦥꦶꦪꦱꦶꦏꦏꦩ꧀ꦩꦺ. ꦆꦢꦤ꧀ꦠꦶ ꦏꦩ꧀ꦩꦁ ꦮꦸꦕ꧀ꦕꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦲꦷꦠꦶ ꦮꦶꦠ꧀ꦡꦴꦫꦺꦴ. ꦪꦺꦴ ꦥꦸꦒ꧀ꦒꦭꦺꦴ ꦥꦴꦥꦶꦪꦺꦴꦠꦶ ꦪꦺꦴꦗꦤꦴ. ꦥꦴꦥꦸꦱ꧀ꦱꦤ꧀ꦤꦠꦴꦪꦴꦠꦶ ꦭꦴꦩꦏꦸꦱ꧀ꦱꦤ꧀ꦤꦠꦴꦪ. ꦆꦩꦶꦤꦴ ꦄꦪꦚ꧀ꦕ ꦥꦴꦥꦺꦴ ꦄꦪꦚ꧀ꦕ ꦥꦴꦥꦺꦴ, ꦄꦪꦩꦶꦩꦺꦱꦁ ꦮꦶꦱꦺꦱꦺꦤ ꦥꦴꦥꦺꦴꦠꦶ ꦥꦴꦥꦶꦪꦺꦴꦠꦶ ꦕ ꦥꦴꦥꦴꦤꦁ ꦄꦠꦶꦱꦪꦺꦤ ꦥꦴꦥꦺꦴꦠꦶ ꦥꦴꦥꦶꦪꦺꦴꦠꦶ ꦕ ꦮꦕꦤꦠ꧀ꦡꦺꦴ ꦢꦱ꧀ꦱꦶꦠꦺꦴ. ꦠꦱ꧀ꦱꦴꦠꦶ ꦥꦸꦒ꧀ꦒꦭꦱ꧀ꦱ. ꦆꦩꦶꦤꦴ ꦠꦱ꧀ꦱ ꦥꦴꦥꦶꦪꦱ꧀ꦱ ꦏꦠ꧀ꦠꦧ꧀ꦧꦁ ꦠꦱ꧀ꦱꦥꦴꦥꦶꦪꦱꦶꦏꦁ, ꦠꦩꦺꦮ ꦏꦩ꧀ꦩꦁ ꦠꦱ꧀ꦱꦥꦴꦥꦶꦪꦱꦶꦏꦏꦩ꧀ꦩꦤ꧀ꦠꦶ ꦮꦕꦤꦠ꧀ꦡꦁ ꦢꦱ꧀ꦱꦺꦠꦶ. ꦏꦺꦱꦸꦕꦶ ꦥꦺꦴꦠ꧀ꦡꦏꦺꦱꦸ ꦪꦏꦴꦫꦺ ꦢ꧀ꦮꦺꦨꦴꦮꦺꦴ ꦄꦠ꧀ꦡꦶ, ꦱꦺꦴ ꦄꦪꦸꦠ꧀ꦠꦺꦴꦪꦺꦮ. ‘‘ꦪꦺꦨꦸꦪ꧀ꦪꦱꦶꦏꦴ’’ꦠꦶ ꦌꦠ꧀ꦡ ꦪꦏꦴꦫꦺ ꦢ꧀ꦮꦺꦨꦴꦮꦱ꧀ꦱ ꦢꦱ꧀ꦱꦤꦠꦺꦴ ꦌꦠ꧀ꦡꦴꦥꦶ ꦢ꧀ꦮꦺꦨꦴꦮꦺꦴ ꦪꦸꦠ꧀ꦠꦺꦴ ꦨꦮꦺꦪ꧀ꦪꦴꦠꦶ ꦭꦶꦑꦤ꧀ꦠꦷꦠꦶ ꦢꦛ꧀ꦜꦧ꧀ꦧꦁ.

꧗. ꦠꦶꦟꦮꦠ꧀ꦡꦴꦫꦏꦴꦢꦶꦏꦡꦴ

꧒꧑꧒. ꦏꦏ꧀ꦑꦭ꦳ꦠꦴꦪ ꦮꦴꦭ꦳ꦠꦴꦪꦴꦠꦶ ꦌꦠ꧀ꦡ ꦏꦏ꧀ꦑꦭ꦳ꦱ꧀ꦱ ꦨꦴꦮꦺꦴ ꦏꦏ꧀ꦑꦭ꦳ꦠꦴ, ꦮꦴꦭ꦳ꦱ꧀ꦱ ꦨꦴꦮꦺꦴ ꦮꦴꦭ꦳ꦠꦴꦠꦶ ꦮꦕꦤꦠ꧀ꦡꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦏꦏ꧀ꦑꦭ꦳ꦨꦴꦮꦴꦪ ꦕꦺꦮ ꦮꦴꦭ꦳ꦨꦴꦮꦴꦪ ꦕꦴ’’ꦠꦶ. ꦆꦩꦶꦤꦴ ꦠꦴꦥꦕ꧀ꦕꦪꦱ꧀ꦱ ꦱꦩꦹꦲꦠ꧀ꦡꦚ꧀ꦕ ꦱ꧀ꦮꦠ꧀ꦡꦚ꧀ꦕ ꦥꦛꦶꦏ꧀ꦑꦶꦥꦠꦶ. ‘‘ꦏꦏ꧀ꦑꦭ꦳ꦠꦴꦪ ꦮꦴꦭ꦳ꦠꦴꦪꦴ’’ꦠꦶ ꦧ꧀ꦪꦚ꧀ꦗꦤꦠꦺꦴꦪꦺꦮ ꦤꦴꦤꦁ, ꦤ ꦄꦠ꧀ꦡꦠꦺꦴ. ꦨꦺꦢꦴꦪꦴꦠꦶ ꦌꦠ꧀ꦡ ꦄꦚ꧀ꦚꦱ꧀ꦱ ꦨꦺꦢꦁ ꦥꦛꦶꦏ꧀ꦑꦶꦥꦤ꧀ꦠꦺꦴ ꦄꦴꦲ ‘‘ꦱꦔ꧀ꦓꦨꦺꦢꦴꦪꦴ’’ꦠꦶ. ꦒꦶꦭꦴꦤꦺꦥꦷꦠꦶ ꦥꦶꦱꦢ꧀ꦢꦺꦴ ꦄꦚ꧀ꦚꦺ ꦥꦤ ꦏꦴ ꦏꦡꦴꦠꦶ ꦢꦱ꧀ꦱꦺꦠꦶ. ꦠꦠ꧀ꦡꦺꦮꦴꦠꦶ ꦄꦣꦶꦏꦫꦟꦮꦹꦥꦱꦩꦛ꧀ꦜꦴꦤꦺꦪꦺꦮ. ‘‘ꦌꦏꦠꦺꦴ’’ꦠꦶ ꦆꦩꦶꦤꦴ ꦌꦏꦗ꧀ꦙꦤ꧀ꦠꦶ ꦥꦢꦱ꧀ꦱ ‘‘ꦌꦏꦠꦺꦴ’’ꦠꦶ ꦥꦢꦺꦤ ꦱꦩꦴꦤꦠꦁ ꦢꦱ꧀ꦱꦺꦠꦶ, ꦌꦏꦱꦢ꧀ꦢꦠꦺꦴ ꦗ꧀ꦙꦥꦕ꧀ꦕꦪꦺꦴ ꦕ ꦠꦺꦴꦥꦕ꧀ꦕꦪꦺꦴ ꦕ ꦮꦶꦱꦺꦱꦺꦴ, ‘‘ꦠꦶꦟꦮꦠ꧀ꦡꦴꦫꦏꦱꦢꦶꦱꦠ꧀ꦠꦴ’’ꦠꦶ ꦆꦩꦶꦤꦴ ꦱꦢꦶꦱꦹꦥꦕꦴꦫꦁ ꦢꦱ꧀ꦱꦺꦠꦶ. ꦠꦶꦟꦺꦲꦶ ꦄꦮꦠ꧀ꦡꦫꦶꦠꦧ꧀ꦧꦤ꧀ꦠꦶ ꦠꦶꦟꦮꦠ꧀ꦡꦴꦫꦁ, ꦒꦹꦡꦩꦸꦠ꧀ꦠꦁ, ꦠꦶꦟꦮꦠ꧀ꦡꦴꦫꦩꦶꦮ ꦠꦶꦟꦮꦠ꧀ꦡꦴꦫꦏꦁ. ꦌꦠ꧀ꦡ ꦄꦣꦶꦏꦫꦟꦩꦺꦮ ꦩꦸꦑ꧀ꦪꦠꦺꦴ ꦭꦧ꧀ꦨꦠꦶ, ꦱꦩꦡꦺꦴ ꦥꦤ ꦦꦭꦹꦥꦕꦴꦫꦠꦺꦴ, ꦱꦢꦶꦱꦠ꧀ꦡꦺ ꦏꦥꦕ꧀ꦕꦪꦺꦴ. ꦠꦩꦺꦮꦠ꧀ꦡꦁ ꦥꦴꦏꦛꦁ ꦏꦫꦺꦴꦤ꧀ꦠꦺꦴ ꦄꦴꦲ ‘‘ꦪꦡꦴ ꦲꦷ’’ꦠꦶꦄꦴꦢꦶ. ꦓꦛ꧀ꦛꦶꦪꦩꦴꦤꦁ ꦒꦹꦡꦁ ꦮꦴ ꦩꦸꦠ꧀ꦠꦁ ꦮꦴꦠꦶ ꦪꦺꦴꦗꦤꦴ. ‘‘ꦓꦛ꧀ꦛꦶꦪꦩꦴꦤ’’ꦤ꧀ꦠꦶ ꦥꦢꦁ ꦲꦺꦠꦸꦄꦤ꧀ꦠꦺꦴꦒꦣꦮꦶꦱꦺꦱꦤꦁ, ‘‘ꦧꦴꦣꦠꦷ’’ꦠꦶ ꦆꦩꦶꦤꦴ ꦱꦩ꧀ꦧꦤ꧀ꦣꦶꦠꦧ꧀ꦧꦁ. ꦱꦸꦥ꧀ꦥꦛꦶꦕ꧀ꦖꦴꦢꦶꦠꦱ꧀ꦱ ꦥꦤ ꦄꦱ꧀ꦱ ꦒꦹꦡꦩꦸꦠ꧀ꦠꦱ꧀ꦱꦴꦠꦶ ꦪꦺꦴꦗꦤꦴ. ‘‘ꦱꦸꦥ꧀ꦥꦛꦶꦕ꧀ꦖꦴꦢꦶꦠꦱ꧀ꦱꦴ’’ꦠꦶ ꦥꦢꦩ꧀ꦥꦶ ꦲꦺꦠꦸꦄꦤ꧀ꦠꦺꦴꦒꦣꦮꦶꦱꦺꦱꦤꦩꦺꦮ, ‘‘ꦤ ꦧꦴꦣꦠꦷ’’ꦠꦶ ꦆꦩꦶꦤꦴ ꦱꦩ꧀ꦧꦤ꧀ꦣꦶꦠꦧ꧀ꦧꦁ. ꦪꦁ ꦄꦣꦶꦏꦫꦟꦁ ꦱꦁꦮꦠ꧀ꦠꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦩꦹꦭꦴꦤꦸꦩꦹꦭꦤ꧀ꦠꦶ ꦩꦹꦭꦚ꧀ꦕ ꦄꦤꦸꦩꦹꦭꦚ꧀ꦕ ꦩꦹꦭꦴꦤꦸꦩꦹꦭꦁ. ꦠꦤ꧀ꦠꦶ ꦄꦣꦶꦏꦫꦟꦁ. ꦆꦩꦶꦤꦴ ꦏꦩ꧀ꦩꦺꦤꦴꦠꦶ ꦠꦶꦟꦮꦠ꧀ꦡꦴꦫꦏꦏꦩ꧀ꦩꦺꦤ. ꦒꦹꦡꦁ ꦠꦶꦟꦺꦲꦶ ꦥꦛꦶꦕ꧀ꦖꦤ꧀ꦤꦁ ꦱꦸꦮꦹꦥꦱꦤ꧀ꦠꦁ ꦲꦺꦴꦠꦶ ꦮꦶꦪ ꦠꦶꦟꦮꦠ꧀ꦡꦴꦫꦏꦺꦤ ꦥꦛꦶꦕ꧀ꦖꦤ꧀ꦤꦁ ꦱꦸꦮꦹꦥꦱꦤ꧀ꦠꦁ ꦲꦺꦴꦠꦷꦠꦶ ꦪꦺꦴꦗꦤꦴ. ꦆꦠꦷꦠꦶ ꦠꦱ꧀ꦩꦴ.

꧒꧑꧓. ꦡꦸꦭ꧀ꦭꦮꦗ꧀ꦗꦤ꧀ꦠꦶ ꦌꦠ꧀ꦡ ꦡꦸꦭ꧀ꦭꦕ꧀ꦕꦪꦱ꧀ꦱꦴꦥꦶ ꦡꦸꦭ꧀ꦭꦮꦗ꧀ꦗꦠ꧀ꦠꦴ ꦆꦣ ꦥꦴꦫꦴꦗꦶꦏꦱꦔ꧀ꦓꦴꦢꦶꦱꦺꦱꦩꦺꦮꦴꦣꦶꦥ꧀ꦥꦺꦠꦤ꧀ꦠꦶ ꦄꦴꦲ ‘‘ꦥꦴꦫꦴꦗꦶꦏꦚ꧀ꦕꦺꦮ ꦱꦔ꧀ꦓꦴꦢꦶꦱꦺꦱꦚ꧀ꦕꦴ’’ꦠꦶ. ꦒꦶꦲꦶꦥꦛꦶꦱꦁꦪꦸꦠ꧀ꦠꦤ꧀ꦠꦶ ꦌꦠ꧀ꦡ ꦒꦶꦲꦷꦤꦁ ꦥꦛꦶꦱꦁꦪꦸꦠ꧀ꦠꦁ ꦒꦶꦲꦶꦥꦛꦶꦱꦁꦪꦸꦠ꧀ꦠꦤ꧀ꦠꦶ ꦮꦕꦤꦠ꧀ꦡꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦒꦶꦲꦷꦤ’’ꦤ꧀ꦠꦶꦄꦴꦢꦶ. ‘‘ꦲꦷꦤꦺꦤꦴ’’ꦠꦶ ꦥꦢꦁ ‘‘ꦑꦸꦁꦱꦤꦮꦩ꧀ꦨꦤ’’ ꦆꦠꦶ ꦥꦢꦺꦤꦺꦮ ꦱꦩ꧀ꦧꦤ꧀ꦣꦶꦠꦧ꧀ꦧꦁ. ꦣꦩ꧀ꦩꦶꦏꦥꦛꦶꦱ꧀ꦱꦮꦺꦱꦹꦠꦶ ꦤꦶꦩꦶꦠ꧀ꦠꦠ꧀ꦡꦺ ꦨꦸꦩ꧀ꦩꦮꦕꦤꦁ.

꧒꧑꧔. ꦏꦩ꧀ꦩꦮꦴꦕꦴꦥꦫꦶꦪꦺꦴꦱꦴꦤꦺ ꦮꦸꦛ꧀ꦜꦶꦠꦴ ꦲꦺꦴꦤ꧀ꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦠꦠ꧀ꦡꦴꦠꦶ ꦄꦣꦶꦏꦫꦟꦮꦹꦥꦱꦩꦛ꧀ꦜꦴꦤꦺ. ꦄꦚ꧀ꦚꦴꦮꦶꦲꦶꦠꦴꦥꦷꦠꦶ ꦄꦣꦶꦏꦫꦟꦮꦶꦤꦶꦕ꧀ꦖꦪꦠꦺꦴ ꦄꦚ꧀ꦚꦱ꧀ꦩꦶꦁ ꦜꦴꦤꦺ ꦕꦶꦠ꧀ꦠꦁ ꦄꦴꦮꦶꦲꦶꦠꦴꦥꦶ ꦜꦥꦶꦠꦴꦥꦶ. ꦈꦥꦱꦩ꧀ꦥꦢꦩꦟ꧀ꦝꦭꦠꦺꦴꦠꦶ ꦈꦥꦱꦩ꧀ꦥꦢꦱꦷꦩꦧꦶꦩ꧀ꦧꦠꦺꦴ, ꦪꦺ ꦥꦤꦴꦠꦶ ꦨꦶꦏ꧀ꦑꦹ ꦥꦤ, ꦢꦶꦛ꧀ꦜꦴꦮꦶꦏꦩ꧀ꦩꦁ ꦏꦫꦺꦴꦤ꧀ꦠꦷꦠꦶ ꦮꦴ ꦄꦤꦴꦒꦠꦴꦠꦶ ꦮꦴ ꦤꦶꦱꦶꦤ꧀ꦤꦴꦠꦶ ꦮꦴ ꦱꦩ꧀ꦧꦤ꧀ꦣꦺꦴ. ꦠꦺꦲꦶ ꦮꦴꦠꦶ ꦄꦣꦶꦏꦫꦟꦁ ꦮꦶꦤꦶꦕ꧀ꦖꦶꦤꦤ꧀ꦠꦺꦲꦶ ꦨꦶꦏ꧀ꦑꦹꦲꦶ ꦮꦴ. ꦠꦠ꧀ꦡꦴꦠꦶ ꦄꦣꦶꦏꦫꦟꦮꦶꦤꦶꦕ꧀ꦖꦶꦠꦛ꧀ꦜꦴꦤꦁ. ꦖꦤ꧀ꦢꦁ ꦢꦠ꧀ꦮꦴꦠꦶ ꦖꦤ꧀ꦢꦁ ꦱꦔ꧀ꦓꦱ꧀ꦱ ꦢꦠ꧀ꦮꦴ. ꦥꦫꦶꦮꦺꦟꦴꦢꦷꦱꦹꦠꦶꦄꦴꦢꦶꦱꦢ꧀ꦢꦺꦤ ꦄꦴꦮꦴꦱꦴꦢꦪꦺꦴ ꦱꦔ꧀ꦒꦟ꧀ꦲꦴꦠꦶ. ꦠꦺꦠꦶ ꦨꦶꦏ꧀ꦑꦹ.

꧘. ꦄꦣꦶꦏꦫꦟꦏꦡꦴ

꧒꧑꧕. ꦮꦶꦥꦕ꧀ꦕꦠꦴꦪꦴꦠꦶ ꦌꦠ꧀ꦡ ꦮꦶꦏꦴꦫꦨꦴꦮꦺꦤ ꦥꦠꦠꦶ ꦥꦮꦠ꧀ꦠꦠꦷꦠꦶ ꦮꦶꦥꦕ꧀ꦕꦁ, ꦕꦶꦠ꧀ꦠꦢꦸꦏ꧀ꦑꦁ, ꦠꦢꦺꦮ ꦮꦶꦥꦕ꧀ꦕꦠꦴ, ꦠꦢꦠ꧀ꦡꦴꦪꦴꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦕꦶꦠ꧀ꦠꦢꦸꦏ꧀ꦑꦠ꧀ꦡ’’ꦤ꧀ꦠꦶ. ‘‘ꦦꦫꦸꦱꦮꦕꦤ’’ꦤ꧀ꦠꦶ ꦆꦩꦶꦤꦴ ꦮꦺꦴꦲꦴꦫ ꦱꦢ꧀ꦢꦺꦴ ꦮꦕꦤꦥꦫꦶꦪꦴꦪꦺꦴꦠꦶ ꦢꦱ꧀ꦱꦺꦠꦶ. ꦪꦺꦴ ꦠꦠ꧀ꦡꦴꦠꦶ ꦌꦠ꧀ꦡ ꦠꦱꦢ꧀ꦢꦱ꧀ꦱ ꦮꦶꦱꦪꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦠꦺꦱꦸ ꦄꦤꦸꦮꦢꦤ꧀ꦠꦺꦱꦹ’’ꦠꦶ. ꦪꦺꦴ ꦈꦥꦮꦴꦢꦺꦴꦠꦶ ꦪꦺꦴꦗꦤꦴ. ‘‘ꦄꦤꦸꦮꦢꦤꦴ’’ꦠꦶ ꦌꦠꦁ ꦥꦢꦤ꧀ꦠꦶ ꦪꦺꦴꦗꦤꦴ. ꦄꦴꦏꦴꦫꦢꦱ꧀ꦱꦤꦤ꧀ꦠꦶ ꦄꦤꦸꦮꦢꦤꦱ꧀ꦱ ꦄꦴꦏꦴꦫꦢꦱ꧀ꦱꦤꦁ, ꦢꦱ꧀ꦱꦤꦲꦺꦠꦸ ꦮꦴ. ‘‘ꦥꦸꦤꦥ꧀ꦥꦸꦤ’’ꦤ꧀ꦠꦶ ꦆꦩꦶꦤꦴ ꦄꦤꦸꦱꦩ꧀ꦥꦮꦔ꧀ꦏꦠꦴꦠꦶ ꦌꦠ꧀ꦡ ꦄꦤꦸꦱꦢ꧀ꦢꦱ꧀ꦱ ꦤ ꦈꦥꦕ꧀ꦖꦶꦤ꧀ꦤꦠ꧀ꦡꦁ ꦢꦱ꧀ꦱꦺꦠꦶ. ꦠꦠ꧀ꦡꦺꦮꦴꦠꦶ ꦄꦤꦸꦮꦢꦤꦺ ꦌꦮ. ꦱꦩ꧀ꦥꦮꦔ꧀ꦏꦠꦴꦠꦶ ꦱꦩ꧀ꦩꦴ ꦥꦏꦴꦫꦺꦤ ꦤꦶꦤ꧀ꦤꦥꦺꦴꦤꦥꦧ꧀ꦨꦴꦫꦠꦴ. ꦄꦧ꧀ꦨꦸꦱ꧀ꦱꦲꦤꦠꦴꦠꦶ ꦌꦠ꧀ꦡ ꦄꦠꦶꦫꦺꦏꦁ ꦈꦱ꧀ꦱꦴꦲꦤꦠꦴꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦏꦱ꧀ꦩꦴ’’ꦠꦶꦄꦴꦢꦶ. ꦄꦤꦸꦧꦭꦥ꧀ꦥꦢꦴꦤꦤ꧀ꦠꦶ ꦌꦠ꧀ꦡ ꦥꦸꦤꦥ꧀ꦥꦸꦤꦁ ꦧꦭꦱ꧀ꦱ ꦥꦢꦴꦤꦤ꧀ꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦥꦸꦫꦶꦩꦮꦕꦤꦱ꧀ꦱꦴ’’ꦠꦶꦄꦴꦢꦶ.

ꦏꦶꦕ꧀ꦕꦪꦠꦴꦠꦶ ꦌꦠ꧀ꦡ ‘‘ꦩꦴ ꦥꦟ꧀ꦝꦶꦕ꧀ꦕꦪ’’ꦤ꧀ꦠꦶꦄꦴꦢꦷꦱꦸ (ꦗꦴ. ꧒.꧒꧒.꧑) ꦮꦶꦪ ꦧ꧀ꦪꦚ꧀ꦗꦤꦮꦝ꧀ꦞꦤꦮꦱꦺꦤ ꦪꦏꦴꦫꦴꦒꦩꦺꦴꦠꦶ ꦄꦴꦲ ‘‘ꦏꦶꦕ꧀ꦕꦩꦺꦮ ꦏꦶꦕ꧀ꦕꦪ’’ꦤ꧀ꦠꦶ. ‘‘ꦈꦨꦪꦁꦥꦺꦠꦁ ꦱꦔ꧀ꦓꦱ꧀ꦱꦺꦮ ꦄꦣꦶꦮꦕꦤ’’ꦤ꧀ꦠꦶ ꦆꦩꦶꦤꦴ ꦏꦶꦕ꧀ꦕꦏꦫꦟꦷꦪꦱꦢ꧀ꦢꦺꦴ ꦏꦠ꧀ꦠꦸꦮꦴꦕꦏꦺꦴꦠꦶ ꦢꦱ꧀ꦱꦺꦠꦶ, ꦱꦔ꧀ꦓꦺꦴ ꦲꦶ ꦏꦫꦺꦴꦠꦷꦠꦶ ꦮꦕꦤꦠ꧀ꦡꦺꦤ ꦏꦶꦕ꧀ꦕꦺꦴꦠꦶ ꦕ ꦏꦫꦟꦷꦪꦺꦴꦠꦶ ꦕ ꦮꦸꦕ꧀ꦕꦠꦶ. ꦠꦱ꧀ꦱ ꦨꦴꦮꦺꦴ, ꦏꦶꦕ꧀ꦕꦪꦠꦴ ꦏꦫꦟꦷꦪꦠꦴꦠꦶ ꦮꦸꦠ꧀ꦠꦺ ꦱꦔ꧀ꦓꦏꦩ꧀ꦩꦁꦪꦺꦮ ꦭꦧ꧀ꦨꦠꦶ. ꦠꦺꦤ ꦮꦸꦠ꧀ꦠꦁ ‘‘ꦈꦨꦪꦁꦥꦺꦠꦁ ꦱꦔ꧀ꦓꦏꦩ꧀ꦩꦱ꧀ꦱꦺꦮ ꦄꦣꦶꦮꦕꦤ’’ꦤ꧀ꦠꦶ. ꦪꦢꦶ ꦏꦩ꧀ꦩꦮꦴꦕꦏꦺꦴ ꦨꦮꦺꦪ꧀ꦪ, ‘‘ꦏꦠ꧀ꦠꦧ꧀ꦧꦤ꧀ꦠꦶ ꦏꦶꦕ꧀ꦕꦁ, ꦏꦫꦟꦷꦪ’’ꦤ꧀ꦠꦶ ꦮꦸꦠ꧀ꦠꦺꦪꦺꦮ ꦱꦔ꧀ꦓꦏꦩ꧀ꦩꦱ꧀ꦱ ꦭꦨꦤꦠꦺꦴ ꦠꦴꦥꦕ꧀ꦕꦪꦺꦴ ꦱ꧀ꦮꦠ꧀ꦡꦺꦴ ꦨꦮꦺꦪ꧀ꦪ. ꦌꦮꦚ꧀ꦲꦶ ꦱꦠꦶ ꦏꦶꦕ꧀ꦕꦪꦱ꧀ꦱ ꦨꦴꦮꦺꦴ ꦏꦶꦕ꧀ꦕꦪꦠꦴ ꦏꦫꦟꦷꦪꦱ꧀ꦱ ꦨꦴꦮꦺꦴ ꦏꦫꦟꦷꦪꦠꦴꦠꦶ ꦮꦕꦤꦠ꧀ꦡꦺꦴ ꦤ ꦏꦠ꧀ꦠꦧ꧀ꦧꦺꦴ ꦨꦮꦺꦪ꧀ꦪ, ꦏꦠꦺꦴ ꦕ, ꦠꦱ꧀ꦩꦴ ꦤ ꦏꦩ꧀ꦩꦮꦴꦕꦏꦺꦴꦠꦶ ꦢꦛ꧀ꦜꦧ꧀ꦧꦁ. ꦠꦱ꧀ꦱꦺꦮꦴꦠꦶ ꦱꦔ꧀ꦓꦏꦩ꧀ꦩꦱ꧀ꦱꦺꦮ. ꦠꦠ꧀ꦡꦴꦠꦶ ꦄꦥꦭꦺꦴꦏꦤꦴꦢꦷꦱꦸ ꦕꦠꦹꦱꦸ ꦏꦩ꧀ꦩꦺꦱꦸ. ꦱꦷꦩꦛ꧀ꦜꦏꦱꦔ꧀ꦓꦤ꧀ꦠꦶ ‘‘ꦈꦥꦕꦴꦫꦱꦷꦩꦴꦢꦷꦱꦸ ꦜꦶꦠꦁ ꦱꦔ꧀ꦓꦁ. ꦱꦺꦴꦣꦺꦠ꧀ꦮꦴꦠꦶ ꦌꦠ꧀ꦡ ꦱꦺꦴꦣꦤꦁ ꦤꦴꦩ ꦱꦷꦩꦛ꧀ꦜꦏꦱꦔ꧀ꦓꦱ꧀ꦱ ꦲꦠ꧀ꦡꦥꦴꦱꦤꦪꦤꦁ, ꦖꦤ꧀ꦢꦴꦫꦲꦴꦤꦁ ꦖꦤ꧀ꦢꦱ꧀ꦱ ꦄꦴꦲꦫꦟꦁ, ꦱꦷꦩꦠꦺꦴ ꦧꦲꦶꦏꦫꦟꦁ. ꦠꦩꦺꦮꦠ꧀ꦡꦁ ꦌꦏꦢꦺꦱꦠꦺꦴ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ ‘‘ꦖꦤ꧀ꦢꦴꦫꦲꦴꦤꦁ ꦖꦤ꧀ꦢꦁ ꦄꦴꦲꦫꦶꦠ꧀ꦮꦴ’’ꦠꦶ. ꦄꦥꦭꦺꦴꦏꦺꦠꦶ ꦄꦴꦥꦸꦕ꧀ꦖꦠꦶ ꦄꦤꦺꦤꦴꦠꦶ ꦄꦥꦭꦺꦴꦏꦤꦁ, ꦠꦁꦪꦺꦮ ꦏꦩ꧀ꦩꦁ ꦄꦥꦭꦺꦴꦏꦤꦏꦩ꧀ꦩꦁ. ꦮꦸꦠ꧀ꦠꦤꦪꦺꦤꦺꦮꦴꦠꦶ ‘‘ꦱꦷꦩꦛ꧀ꦜꦏꦱꦔ꧀ꦓꦁ ꦱꦺꦴꦣꦺꦠ꧀ꦮꦴ’’ꦠꦶꦄꦴꦢꦶꦤꦴ ꦮꦸꦠ꧀ꦠꦤꦪꦺꦤꦺꦮ. ‘‘ꦱꦸꦟꦴꦠꦸ ꦩꦺ’’ꦠꦶꦄꦴꦢꦶꦤꦴ ꦱꦔ꧀ꦓꦒꦟꦥꦸꦒ꧀ꦒꦭꦺ ꦚꦴꦥꦺꦠꦶ ꦌꦠꦴꦪꦴꦠꦶ ꦚꦠ꧀ꦠꦶ, ꦱꦴꦪꦺꦮ ꦏꦩ꧀ꦩꦁ ꦚꦠ꧀ꦠꦶꦏꦩ꧀ꦩꦁ, ꦚꦠ꧀ꦠꦶꦪꦺꦮ ꦢꦸꦠꦶꦪꦁ ꦚꦠ꧀ꦠꦶꦢꦸꦠꦶꦪꦁ, ꦠꦩꦺꦮ ꦏꦩ꧀ꦩꦁ ꦚꦠ꧀ꦠꦶꦢꦸꦠꦶꦪꦏꦩ꧀ꦩꦁ. ꦌꦠ꧀ꦡ ꦏꦶꦚ꧀ꦕꦴꦥꦶ ꦚꦠ꧀ꦠꦶ ꦥꦜꦩꦁ ꦜꦥꦶꦠꦴ, ꦏꦩ꧀ꦩꦮꦴꦕꦴꦪꦺꦮ ꦢꦸꦠꦶꦪꦴ ꦲꦺꦴꦠꦶ, ‘‘ꦦꦱ꧀ꦱꦥꦚ꧀ꦕꦩꦴ’’ꦠꦶꦄꦴꦢꦷꦱꦸ (ꦣꦴꦠꦸ. ꧓꧑꧖) ꦮꦶꦪ ꦥꦤ ꦥꦛꦶꦭꦺꦴꦩꦮꦱꦺꦤ ꦮꦺꦴꦲꦴꦫꦁ ꦏꦠ꧀ꦮꦴ ‘‘ꦚꦠ꧀ꦠꦶꦢꦸꦠꦶꦪꦴ’’ꦠꦶ ꦮꦸꦠ꧀ꦠꦁ. ꦦꦱ꧀ꦱꦥꦚ꧀ꦕꦩꦴꦠꦶ ꦌꦠ꧀ꦡ ꦏꦶꦚ꧀ꦕꦴꦥꦶ ꦣꦩ꧀ꦩꦱꦔ꧀ꦒꦟꦶꦪꦁ (ꦣ. ꦱ. ꧑ ꦄꦴꦢꦪꦺꦴ) ‘‘ꦦꦱ꧀ꦱꦺꦴ ꦲꦺꦴꦠꦶ, ꦮꦺꦢꦤꦴ ꦲꦺꦴꦠꦶ, ꦱꦚ꧀ꦚꦴ ꦲꦺꦴꦠꦶ, ꦕꦺꦠꦤꦴ ꦲꦺꦴꦠꦶ, ꦕꦶꦠ꧀ꦠꦁ ꦲꦺꦴꦠꦷ’’ꦠꦶ ꦦꦱ꧀ꦱꦁ ꦥꦜꦩꦁ ꦮꦸꦠ꧀ꦠꦁ, ꦥꦛꦶꦭꦺꦴꦩꦮꦱꦺꦤ ꦥꦤ ꦮꦺꦴꦲꦴꦫꦁ ꦏꦠ꧀ꦮꦴ ‘‘ꦦꦱ꧀ꦱꦥꦚ꧀ꦕꦩꦴ’’ꦠꦶ ꦣꦴꦠꦸꦏꦡꦴꦪꦁ ꦮꦸꦠ꧀ꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦌꦱꦺꦮ ꦤꦪꦺꦴ ꦚꦠ꧀ꦠꦶ ꦕꦠꦸꦠ꧀ꦡꦏꦩ꧀ꦩꦺꦥꦶ. ꦌꦏꦴꦪ ꦕ ꦄꦤꦸꦱꦴꦮꦤꦴꦪꦴꦠꦶ ꦚꦠ꧀ꦠꦶꦠꦺꦴ ꦄꦤꦸꦥꦕ꧀ꦖꦴ ꦱꦴꦮꦺꦠꦧ꧀ꦧꦴꦠꦶ ꦄꦤꦸꦱꦴꦮꦤꦴ, ꦠꦴꦪ, ꦠꦷꦲꦶ ꦕ ꦄꦤꦸꦱꦴꦮꦤꦴꦲꦷꦠꦶ ꦚꦠ꧀ꦠꦶꦠꦺꦴꦄꦤꦸ ꦥꦕ꧀ꦖꦴ, ꦥꦸꦤꦥ꧀ꦥꦸꦤꦁ ꦮꦴ ꦠꦶꦏ꧀ꦑꦠ꧀ꦠꦸꦁ ꦱꦴꦮꦺꦠꦧ꧀ꦧꦴꦠꦶ ꦄꦤꦸꦱꦴꦮꦤꦴ, ꦠꦴꦲꦶ. ꦠꦠ꧀ꦡꦴꦠꦶ ꦕꦠꦹꦱꦸ ꦏꦩ꧀ꦩꦺꦱꦸ.

ꦄꦥꦭꦺꦴꦏꦺꦠ꧀ꦮꦴꦮꦴꦠꦶ ꦌꦠ꧀ꦡ ꦌꦮꦦꦭꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦚꦠ꧀ꦠꦶꦏꦩ꧀ꦩꦴꦢꦶꦮꦱꦺꦤ ꦤ ꦏꦴꦠꦧ꧀ꦧ’’ꦤ꧀ꦠꦶ. ꦚꦠ꧀ꦠꦶꦏꦩ꧀ꦩꦩ꧀ꦥꦷꦠꦶ ꦥꦶꦱꦢ꧀ꦢꦺꦤ ꦤ ꦏꦺꦮꦭꦁ ꦄꦥꦭꦺꦴꦏꦤꦏꦩ꧀ꦩꦩꦺꦮ, ꦄꦡ ꦑꦺꦴ ꦚꦠ꧀ꦠꦶꦏꦩ꧀ꦩꦩ꧀ꦥꦷꦠꦶ ꦢꦱ꧀ꦱꦺꦠꦶ. ꦚꦠ꧀ꦠꦶꦢꦸꦠꦶꦪꦏꦩ꧀ꦩꦁ ꦥꦤꦴꦠꦶ ꦌꦠ꧀ꦡ ꦥꦤꦱꦢ꧀ꦢꦺꦴ ꦮꦶꦱꦺꦱꦠ꧀ꦡꦗꦺꦴꦠꦏꦺꦴ, ꦥꦏ꧀ꦑꦤ꧀ꦠꦫꦗꦺꦴꦠꦏꦺꦴ ꦮꦴ. ꦠꦠ꧀ꦡꦴꦠꦶ ꦢ꧀ꦮꦷꦱꦸ ꦏꦩ꧀ꦩꦺꦱꦸ. ꦒꦫꦸꦏꦴꦤꦷꦠꦶ ꦄꦭꦲꦸꦏꦴꦤꦶ. ꦄꦮꦱꦺꦱꦴꦤꦷꦠꦶ ꦖꦲꦶ ꦏꦩ꧀ꦩꦺꦲꦶ ꦄꦮꦱꦺꦱꦴꦤꦶ, ꦌꦮꦫꦹꦥꦴꦤꦶ ꦭꦲꦸꦏꦏꦩ꧀ꦩꦴꦤꦷꦠꦶ ꦱꦩ꧀ꦧꦤ꧀ꦣꦺꦴ. ‘‘ꦄꦮꦱꦺꦱꦴ’’ꦠꦶꦥꦶ ꦥꦴꦜꦺꦴ, ꦱꦩ꧀ꦩꦸꦠꦶꦪꦺꦴꦠꦶ ꦱꦩ꧀ꦧꦤ꧀ꦣꦺꦴ. ꦄꦥꦭꦺꦴꦏꦺꦠ꧀ꦮꦴꦥꦷꦠꦶ ꦥꦶꦱꦢ꧀ꦢꦺꦴ ꦚꦠ꧀ꦠꦶꦢꦸꦠꦶꦪꦏꦩ꧀ꦩꦮꦴꦕꦁ ꦱꦴꦮꦺꦠ꧀ꦮꦴꦥꦷꦠꦶ ꦱꦩ꧀ꦥꦶꦟ꧀ꦝꦺꦠꦶ. ꦄꦚ꧀ꦚꦠ꧀ꦡꦴꦥꦺꦴꦲꦤꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦚꦠ꧀ꦠꦶꦏꦩ꧀ꦩꦚꦠ꧀ꦠꦶꦕꦠꦸꦠ꧀ꦡꦏꦩ꧀ꦩꦮꦱꦺꦤ ꦥꦤ ꦤ ꦏꦴꦠꦧ꧀ꦧꦩꦺꦮꦴ’’ꦠꦶ. ꦚꦠ꧀ꦠꦶꦕꦠꦸꦠ꧀ꦡꦏꦩ꧀ꦩꦁ ꦏꦴꦠꦧ꧀ꦧꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦌꦠ꧀ꦡꦴꦠꦶ ꦱꦩꦡꦏ꧀ꦑꦤ꧀ꦣꦏꦺ.

ꦮꦶꦠ꧀ꦡꦴꦫꦠꦺꦴ ꦥꦤ ꦄꦴꦒꦠꦺꦴꦪꦺꦮꦴꦠꦶ ꦱꦩ꧀ꦧꦤ꧀ꦣꦺꦴ. ꦌꦠꦺꦱꦤ꧀ꦠꦶ ꦕꦠꦸꦤ꧀ꦤꦁ ꦏꦩ꧀ꦩꦴꦤꦁ. ꦪꦁ ꦥꦤ ꦄꦠ꧀ꦡꦗꦴꦠꦁ ꦄꦤꦸꦠ꧀ꦠꦴꦤꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦠꦠ꧀ꦡꦴꦠꦶ ꦕꦠꦹꦱꦸ ꦏꦩ꧀ꦩꦺꦱꦸ. ꦠꦤ꧀ꦠꦶ ꦄꦠ꧀ꦡꦗꦴꦠꦁ. ꦌꦮꦤ꧀ꦠꦶ ꦌꦮꦁ ꦏꦩ꧀ꦩꦮꦒ꧀ꦒꦺꦪꦺꦮ ꦮꦟ꧀ꦟꦪꦩꦴꦤꦺ. ꦲꦷꦠꦶ ꦭꦢ꧀ꦣꦒꦸꦟꦗꦺꦴꦠꦏꦺꦴ. ꦱꦸꦮꦶꦚ꧀ꦚꦺꦪ꧀ꦪꦴꦠꦶ ꦱꦸꦑꦺꦤ ꦮꦶꦚ꧀ꦚꦴꦠꦧ꧀ꦧꦴ.

꧒꧑꧖. ꦥꦴꦭ꦳ꦶꦮꦱꦺꦤꦺꦮꦴꦠꦶ ꦤ ꦄꦛ꧀ꦜꦏꦡꦴꦮꦱꦺꦤꦴꦠꦶ ꦄꦣꦶꦥ꧀ꦥꦴꦪꦺꦴ.

꧒꧒꧐. ꦪꦺꦤꦴꦠꦶ ꦕꦶꦠ꧀ꦠꦸꦥ꧀ꦥꦴꦢꦺꦤ. ꦆꦩꦶꦤꦴ ꦮꦶꦮꦢꦤ꧀ꦠꦶ ꦄꦤꦺꦤꦴꦠꦶ ꦮꦶꦮꦴꦢꦺꦴꦠꦶ ꦮꦕꦤꦠ꧀ꦡꦁ ꦢꦱ꧀ꦱꦺꦠꦶ. ꦱꦩꦡꦺꦲꦶ ꦕꦴꦠꦶ ꦕꦱꦢ꧀ꦢꦺꦴ ꦱꦩ꧀ꦥꦶꦟ꧀ꦝꦤꦠ꧀ꦡꦺꦴ. ꦠꦺꦤ ꦤ ꦏꦺꦮꦭꦁ ꦮꦶꦮꦴꦢꦺꦴꦪꦺꦮ, ꦄꦡ ꦑꦺꦴ ꦄꦣꦶꦏꦫꦟꦚ꧀ꦕꦴꦠꦶ ꦱꦩ꧀ꦥꦶꦟ꧀ꦝꦺꦠꦶ, ꦄꦡ ꦮꦴ ꦱꦩꦡꦺꦲꦶ ꦕꦴꦠꦶ ꦱꦩꦡꦺꦲꦶ ꦌꦮ. ꦆꦩꦶꦤꦴ ꦱꦩꦡꦺꦲꦶ ꦄꦣꦶꦏꦫꦷꦪꦠꦶ ꦮꦹꦥꦱꦩꦷꦪꦠꦷꦠꦶ ꦄꦣꦶꦏꦫꦟꦤ꧀ꦠꦶ ꦮꦕꦤꦠ꧀ꦡꦁ ꦢꦱ꧀ꦱꦺꦠꦶ. ꦮꦶꦮꦴꦢꦺꦴꦪꦺꦮ ꦄꦣꦶꦏꦫꦟꦁ ꦮꦶꦮꦴꦢꦴꦣꦶꦏꦫꦟꦁ. ꦌꦮꦩꦴꦢꦶꦤꦴ ꦤꦪꦺꦤꦴꦠꦶ ꦄꦴꦢꦶꦱꦢ꧀ꦢꦺꦤ ꦄꦤꦸꦢ꧀ꦣꦁꦱꦤꦺꦤ ꦮꦢꦤ꧀ꦠꦶ ꦄꦤꦺꦤ ꦕꦶꦠ꧀ꦠꦸꦥ꧀ꦥꦴꦢꦺꦤꦴꦠꦶ ꦄꦤꦸꦮꦴꦢꦺꦴꦠꦶꦄꦴꦢꦪꦺꦴ ꦮꦕꦤꦠ꧀ꦡꦺ ꦱꦔ꧀ꦒꦟ꧀ꦲꦴꦠꦶ.

꧒꧒꧒. ꦱꦤ꧀ꦣꦴꦪꦨꦴꦱꦶꦠꦮꦱꦺꦤꦴꦠꦶ ꦭꦺꦴꦏꦮꦗ꧀ꦗꦁ ꦱꦤ꧀ꦣꦴꦪ ꦨꦴꦱꦶꦠꦱ꧀ꦱ ꦮꦕꦤꦱ꧀ꦱ ꦮꦱꦺꦤ. ꦱꦤ꧀ꦣꦴꦪꦨꦴꦱꦶꦠꦠ꧀ꦡꦁ ꦮꦶꦠ꧀ꦡꦴꦫꦺꦤ꧀ꦠꦺꦴ ꦄꦴꦲ ‘‘ꦪꦱ꧀ꦩꦶꦁ ꦲꦷ’’ꦠꦶꦄꦴꦢꦶ. ꦠꦠ꧀ꦡ ꦥꦡꦮꦶꦑꦟꦤꦴꦢꦶꦏꦺ ꦪꦱ꧀ꦩꦶꦁ ꦄꦴꦥꦠ꧀ꦠꦴꦣꦶꦏꦫꦟꦺꦠꦶ ꦪꦺꦴꦗꦤꦴ. ꦠꦱ꧀ꦩꦶꦤ꧀ꦠꦶ ꦏꦸꦱꦭꦕꦶꦠ꧀ꦠꦔ꧀ꦒꦺ ꦄꦴꦥꦠ꧀ꦠꦴꦣꦶꦏꦫꦟꦺ. ꦠꦱ꧀ꦩꦴꦠꦶ ꦪꦱ꧀ꦩꦴ ꦤ ꦱꦏ꧀ꦏꦴ ꦮꦠ꧀ꦠꦸꦁ, ꦠꦱ꧀ꦩꦴ. ꦆꦢꦤ꧀ꦠꦶ ‘‘ꦤꦠ꧀ꦡꦶ ꦄꦴꦥꦠ꧀ꦠꦴꦣꦶꦏꦫꦟꦁ ꦏꦸꦱꦭ’’ꦤ꧀ꦠꦶ ꦮꦕꦤꦁ, ꦮꦸꦠ꧀ꦠꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦱꦤ꧀ꦣꦴꦪ ꦄꦮꦸꦠ꧀ꦠꦁ ꦢꦱ꧀ꦱꦺꦠ꧀ꦮꦴ ꦱꦤ꧀ꦣꦴꦪ ꦮꦸꦠ꧀ꦠꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦆꦢꦁ ꦥꦤ ꦱꦤ꧀ꦣꦴꦪ ꦮꦸꦠ꧀ꦠ’’ꦤ꧀ꦠꦶ. ꦠꦠ꧀ꦡ ꦆꦢꦁ ꦥꦤꦴꦠꦶ ꦏꦴꦫꦟꦁ ꦥꦤ ꦱꦤ꧀ꦣꦴꦪꦴꦠꦶ ꦱꦩ꧀ꦧꦤ꧀ꦣꦺꦴ. ꦪꦁ ꦄꦴꦥꦠ꧀ꦠꦴꦣꦶꦏꦫꦟꦤ꧀ꦠꦶ ꦪꦺꦴꦗꦤꦴ. ‘‘ꦭꦺꦴꦏꦮꦗ꧀ꦗ’’ꦤ꧀ꦠꦶ ꦥꦢꦺ ꦠꦸꦭ꧀ꦪꦴꦣꦶꦏꦫꦟꦁ. ꦭꦺꦴꦏꦱ꧀ꦩꦶꦁ, ꦭꦺꦴꦏꦺꦲꦶ ꦮꦴ ꦮꦗ꧀ꦗꦺꦠꦧ꧀ꦧꦤ꧀ꦠꦶ ꦭꦺꦴꦏꦮꦗ꧀ꦗꦁ. ꦠꦤ꧀ꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ. ꦠꦠ꧀ꦡꦴꦠꦶ ꦄꦴꦥꦠ꧀ꦠꦴꦣꦶꦏꦫꦟꦺ. ꦮꦶꦏꦥ꧀ꦥꦺꦴꦠꦶ ꦮꦶꦮꦶꦣꦴ ꦏꦥ꧀ꦥꦤꦁ, ꦮꦶꦮꦶꦣꦠꦏ꧀ꦏꦺꦴ ꦮꦴ. ꦪꦁ ꦥꦤꦴꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ ꦥꦤ. ‘‘ꦥꦟ꧀ꦟꦠ꧀ꦠꦶꦮꦗ꧀ꦗ’’ꦤ꧀ꦠꦶ ꦥꦢꦺ ꦠꦸꦭ꧀ꦪꦴꦣꦶꦏꦫꦟꦁ. ꦨꦒꦮꦠꦺꦴ ꦥꦚ꧀ꦚꦠ꧀ꦠꦶꦪꦴ ꦲꦺꦠꦸꦨꦹꦠꦴꦪ ꦮꦗ꧀ꦗꦺꦠꦧ꧀ꦧꦤ꧀ꦠꦶ ꦥꦟ꧀ꦟꦠ꧀ꦠꦶꦮꦗ꧀ꦗꦁ. ꦠꦤ꧀ꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ, ꦄꦏꦸꦱꦭꦁ ꦲꦺꦴꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦏꦶꦚ꧀ꦕꦷꦠꦶ ꦄꦥ꧀ꦥꦩꦠ꧀ꦠꦏꦁ, ꦄꦴꦥꦠ꧀ꦠꦴꦤꦴꦥꦠ꧀ꦠꦶꦁ ꦄꦗꦴꦤꦤ꧀ꦠꦱ꧀ꦱ ꦄꦴꦥꦗ꧀ꦗꦤꦠꦺꦴꦠꦶ ꦱꦩ꧀ꦧꦤ꧀ꦣꦺꦴ. ꦠꦱ꧀ꦩꦴꦠꦶ ꦪꦱ꧀ꦩꦴ ꦄꦧ꧀ꦪꦴꦏꦠꦁ ꦲꦺꦴꦠꦶ, ꦠꦱ꧀ꦩꦴ. ꦠꦠ꧀ꦡꦴꦠꦶ ꦥꦟ꧀ꦟꦠ꧀ꦠꦶꦮꦗ꧀ꦗꦨꦹꦠꦺ ꦄꦴꦥꦠ꧀ꦠꦴꦣꦶꦏꦫꦟꦺ. ‘‘ꦄꦴꦥꦠ꧀ꦠꦴꦣꦶꦏꦫꦟꦁ…ꦥꦺ… ꦏꦸꦱꦭ’’ꦤ꧀ꦠꦶ ꦆꦢꦁ ꦮꦕꦤꦁ ꦮꦸꦠ꧀ꦠꦤ꧀ꦠꦶ ꦪꦺꦴꦗꦤꦴ.

ꦪꦢꦶ ꦏꦸꦱꦭꦕꦶꦠ꧀ꦠꦺꦴ ꦄꦴꦥꦗ꧀ꦗꦠꦶ, ꦄꦡ ꦤꦤꦸ ꦄꦴꦥꦠ꧀ꦠꦴꦣꦶꦏꦫꦟꦁ ꦏꦸꦭꦭꦤ꧀ꦠꦶ ꦮꦠ꧀ꦠꦧ꧀ꦧꦺꦴ ꦨꦮꦺꦪ꧀ꦪꦴꦠꦶ ꦄꦴꦲ ‘‘ꦱꦕꦺ ꦥꦤꦴ’’ꦠꦶꦄꦴꦢꦶ. ꦪꦤ꧀ꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ. ‘‘ꦆꦢꦁ ꦮꦸꦕ꧀ꦕꦠꦶ…ꦥꦺ… ꦏꦸꦱꦭ’’ꦤ꧀ꦠꦶ ꦮꦢꦺꦪ꧀ꦪ ꦱꦕꦺꦠꦶ ꦪꦺꦴꦗꦤꦴ. ꦌꦭ꦳ꦏꦭꦺꦴꦩꦚ꧀ꦕ ꦥꦢꦱꦺꦴꦣꦩ꧀ꦩꦚ꧀ꦕ ꦌꦭ꦳ꦏꦭꦺꦴꦩꦥꦢꦱꦺꦴꦣꦩ꧀ꦩꦴꦤꦶ, ꦠꦴꦤꦶ ꦄꦴꦢꦷꦤꦶ ꦪꦺꦱꦁ ꦠꦴꦤꦷꦠꦶ ꦌꦭ꦳ꦏꦭꦺꦴꦩꦥꦢꦱꦺꦴꦣꦩ꧀ꦩꦴꦢꦷꦤꦶ, ꦠꦴꦤꦶ ꦱꦩꦸꦛ꧀ꦜꦴꦤꦴꦤꦶ ꦪꦴꦱꦤ꧀ꦠꦶ ꦌꦭ꦳ꦏꦭꦺꦴꦩꦥꦢꦱꦺꦴꦣꦩ꧀ꦩꦴꦢꦶꦱꦩꦸꦛ꧀ꦜꦴꦤꦴ, ꦠꦴꦱꦁ ꦄꦴꦥꦠ꧀ꦠꦷꦤꦩ꧀ꦥꦷꦠꦶ ꦱꦩ꧀ꦧꦤ꧀ꦣꦺꦴ. ꦠꦠ꧀ꦡꦴꦠꦶ ꦌꦭ꦳ꦏꦭꦺꦴꦩꦥꦢꦱꦺꦴꦣꦩ꧀ꦩꦴꦢꦶꦱꦩꦸꦛ꧀ꦜꦴꦤꦴꦱꦸ ꦄꦴꦥꦠ꧀ꦠꦷꦱꦸ. ꦄꦴꦥꦠ꧀ꦠꦶꦪꦴ ꦄꦔ꧀ꦒꦤ꧀ꦠꦶ ꦄꦴꦥꦠ꧀ꦠꦶꦪꦴ ꦏꦴꦫꦟꦁ. ꦌꦮꦁ ꦄꦴꦥꦠ꧀ꦠꦶꦪꦴ ꦄꦤꦔ꧀ꦒꦁ ꦢꦱ꧀ꦱꦺꦠ꧀ꦮꦴ ꦠꦱ꧀ꦱꦴꦪꦺꦮ ꦄꦔ꧀ꦒꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦏꦴꦪꦮꦕꦷꦮꦶꦚ꧀ꦚꦠ꧀ꦠꦶꦮꦱꦺꦤ ꦥꦤꦴ’’ꦠꦶꦄꦴꦢꦶ. ꦠꦠ꧀ꦡ ꦕꦭꦶꦠꦥ꧀ꦥꦮꦠ꧀ꦠꦴꦤꦤ꧀ꦠꦶ ꦕꦭꦶꦠꦺꦤ ꦲꦺꦠꦸꦨꦹꦠꦺꦤ ꦥꦮꦠ꧀ꦠꦴꦤꦁ. ꦄꦡ ꦮꦴ ꦕꦭꦶꦠꦺꦴ ꦕ ꦏꦴꦪꦺꦴ, ꦥꦮꦠ꧀ꦠꦴ ꦕ ꦮꦴꦕꦴꦠꦶ ꦕꦭꦶꦠꦥ꧀ꦥꦮꦠ꧀ꦠꦴ, ꦠꦴꦱꦁ ꦕꦭꦶꦠꦥ꧀ꦥꦮꦠ꧀ꦠꦴꦤꦁ ꦏꦴꦪꦮꦴꦕꦴꦤꦁ. ꦠꦚ꧀ꦕꦴꦠꦶ ꦏꦴꦪꦮꦴꦕꦴꦤꦁ ꦄꦚ꧀ꦚꦠꦫꦚ꧀ꦕ. ꦄꦧ꧀ꦪꦴꦏꦠꦤ꧀ꦠꦶ ꦌꦠ꧀ꦡ ꦆꦠꦶꦱꦢ꧀ꦢꦺꦴ ꦥꦫꦶꦱꦩꦴꦥꦤꦠ꧀ꦡꦺꦴ.

ꦄꦪꦩꦠ꧀ꦡꦺꦴ ꦌꦮꦁ ꦮꦺꦢꦶꦠꦧ꧀ꦧꦺꦴꦠꦶ ꦪꦺꦴꦗꦤꦴ. ꦠꦺꦤꦴꦠꦶ ꦕꦶꦠ꧀ꦠꦺꦤ. ‘‘ꦆꦢꦁ…ꦥꦺ… ꦱꦢ꧀ꦣꦶ’’ꦤ꧀ꦠꦶ ꦆꦩꦶꦤꦴ ꦱꦚ꧀ꦗꦴꦤꦤ꧀ꦠꦺꦴꦠꦶ ꦌꦠ꧀ꦡ ꦱꦁꦱꦢ꧀ꦢꦱ꧀ꦱ ꦱꦸꦤ꧀ꦢꦫꦠ꧀ꦡꦁ ꦱꦲ ꦄꦴꦏꦴꦫꦺꦤ ꦢꦱ꧀ꦱꦺꦠꦶ. ‘‘ꦮꦷꦠꦶꦏ꧀ꦏꦩ…ꦥꦺ… ꦏꦥ꧀ꦥꦺꦠ꧀ꦮꦴ’’ꦠꦶ ꦆꦩꦶꦤꦴ ꦕꦺꦕ꧀ꦕꦴꦠꦶ ꦥꦢꦱ꧀ꦱ ꦄꦠ꧀ꦡꦁ ꦱꦲ ꦮꦶꦱꦺꦱꦤꦺꦤ ꦢꦱ꧀ꦱꦺꦠꦶ. ‘‘ꦈꦥꦏ꧀ꦏꦩꦮꦱꦺꦤ…ꦥꦺ… ꦥꦺꦱꦺꦠ꧀ꦮꦴ’’ꦠꦶ ꦆꦩꦶꦤꦴ ꦄꦨꦶꦮꦶꦠꦫꦶꦠ꧀ꦮꦴꦠꦶ ꦥꦢꦱ꧀ꦱ ꦄꦠ꧀ꦡꦁ ꦢꦱ꧀ꦱꦺꦠꦶ. ꦥꦴꦭ꦳ꦶꦪꦁ ꦪꦁꦱꦢ꧀ꦢꦺꦴꦮꦷꦠꦶꦏ꧀ꦏꦩꦮꦶꦱꦪꦺꦴꦠꦶ ꦄꦴꦲ ‘‘ꦪꦁ ꦄꦴꦥꦠ꧀ꦠꦴꦣꦶꦏꦫꦟꦁ ꦮꦷꦠꦶꦏ꧀ꦏꦩ’’ꦤ꧀ꦠꦶ. ‘‘ꦄꦴꦥꦗ꧀ꦗꦠꦷ’’ꦠꦶ ꦆꦩꦶꦤꦴ ꦥꦴꦜꦱꦺꦱꦁ ꦢꦱ꧀ꦱꦺꦠꦶ. ꦌꦮꦁ ꦮꦷꦠꦶꦏ꧀ꦏꦩꦠꦺꦴ ꦠꦱ꧀ꦱ ꦨꦶꦏ꧀ꦑꦸꦤꦺꦴꦠꦶ ꦪꦺꦴꦗꦤꦴ.

ꦄꦧ꧀ꦪꦴꦏꦠꦮꦴꦫꦺꦥꦷꦠꦶ ꦥꦶꦱꦢ꧀ꦢꦺꦴ ꦄꦏꦸꦱꦭꦮꦴꦫꦁ ꦄꦥꦺꦏ꧀ꦑꦠꦶ. ꦠꦱ꧀ꦱꦴꦠꦶ ꦕꦶꦠ꧀ꦠꦱ꧀ꦱ. ꦄꦗꦴꦤꦤ꧀ꦠꦺꦴꦠꦶꦄꦴꦢꦷꦤꦁ ꦥꦢꦴꦤꦩꦠ꧀ꦡꦺꦴ ꦄꦏꦸꦱꦭꦮꦴꦫꦺ ꦮꦸꦠ꧀ꦠꦥꦛꦶꦥꦏ꧀ꦑꦮꦱꦺꦤ ꦮꦺꦢꦶꦠꦧ꧀ꦧꦺꦴ. ꦪꦁ ꦄꦴꦥꦠ꧀ꦠꦴꦣꦶꦏꦫꦟꦤ꧀ꦠꦶꦄꦴꦢꦷꦤꦁ ꦥꦢꦴꦤꦩꦠ꧀ꦡꦺꦴ ꦄꦏꦸꦱꦭꦮꦴꦫꦺꦤ ꦱꦢꦶꦱꦺꦴꦪꦺꦮ.

꧒꧒꧔. ꦄꦪꦁ ꦮꦶꦮꦴꦢꦺꦴ ꦤꦺꦴ ꦄꦣꦶꦏꦫꦟꦤ꧀ꦠꦶꦄꦴꦢꦷꦱꦸ ꦌꦮꦩꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴꦠꦶ ꦱꦩ꧀ꦧꦤ꧀ꦣꦺꦴ.

꧙. ꦄꦣꦶꦏꦫꦟꦮꦹꦥꦱꦩꦤꦱꦩꦡꦏꦡꦴ

꧒꧒꧘. ꦕꦠꦸꦮꦒ꧀ꦒꦏꦫꦟꦺ ꦏꦩ꧀ꦩꦺꦠꦶ ꦱꦷꦩꦱꦩ꧀ꦩꦸꦠꦶꦄꦴꦢꦶꦏꦩ꧀ꦩꦺ. ꦥꦚ꧀ꦕꦮꦒ꧀ꦒꦏꦫꦟꦺꦠꦶ ꦥꦕ꧀ꦕꦤ꧀ꦠꦶꦩꦺꦱꦸ ꦗꦤꦥꦢꦺꦱꦸ ꦈꦥꦱꦩ꧀ꦥꦢꦴꦢꦶꦏꦩ꧀ꦩꦺ. ꦢꦱꦮꦒ꧀ꦒꦏꦫꦟꦺꦠꦶ ꦩꦗ꧀ꦙꦶꦩꦺꦱꦸ ꦗꦤꦥꦢꦺꦱꦸ ꦈꦥꦱꦩ꧀ꦥꦢꦏꦩ꧀ꦩꦺ. ꦮꦷꦱꦠꦶꦮꦒ꧀ꦒꦏꦫꦟꦺꦠꦶ ꦄꦧ꧀ꦨꦴꦤꦏꦩ꧀ꦩꦺ. ꦏꦩ꧀ꦩꦥ꧀ꦥꦠ꧀ꦠꦴꦠꦶ ꦏꦩ꧀ꦩꦱ꧀ꦱ ꦥꦠ꧀ꦠꦴ ꦪꦸꦠ꧀ꦠꦴ ꦄꦤꦸꦫꦹꦥꦴ.

꧒꧓꧐. ꦱꦩ꧀ꦥꦛꦶꦕ꧀ꦖꦶꦠꦧ꧀ꦧꦤ꧀ꦠꦶ ꦥꦛꦶꦒ꧀ꦒꦟ꧀ꦲꦶꦠꦧ꧀ꦧꦁ. ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦕ ꦥꦤ ꦄꦠꦶꦏ꧀ꦏꦴꦩꦺꦠꦧ꧀ꦧꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦨꦟ꧀ꦝꦏꦤ꧀ꦠꦶ ꦕꦷꦮꦫꦴꦢꦶꦨꦟ꧀ꦝꦏꦁ. ꦩꦴꦤꦤꦶꦒ꧀ꦒꦲꦠ꧀ꦡꦴꦪꦴꦠꦶ ꦨꦟ꧀ꦝꦤꦗꦴꦠꦴꦤꦁ ꦩꦴꦤꦱ꧀ꦱ ꦤꦶꦒ꧀ꦒꦲꦠ꧀ꦡꦴꦪ. ꦏꦠꦶꦥꦴꦲꦤ꧀ꦠꦶ ꦏꦠꦶꦥꦪꦴꦲꦁ, ꦢ꧀ꦮꦷꦲꦠꦷꦲꦤ꧀ꦠꦶ ꦄꦠ꧀ꦡꦺꦴ.

꧒꧓꧑. ꦄꦤꦤ꧀ꦠꦴꦤꦶ ꦕꦺꦮ ꦨꦱ꧀ꦱꦴꦤꦷꦠꦶ ꦌꦠ꧀ꦡ ꦄꦤꦤ꧀ꦠꦱꦢ꧀ꦢꦺꦴ ꦄꦥꦫꦶꦩꦴꦟꦱꦢ꧀ꦢꦺꦤ ꦄꦠ꧀ꦡꦠꦺꦴ ꦌꦏꦺꦴꦠꦶ ꦄꦴꦲ ‘‘ꦄꦥꦫꦶꦩꦴꦟꦴꦤꦷ’’ꦠꦶ. ‘‘ꦮꦕꦤꦴꦤꦷ’’ꦠꦶ ꦆꦩꦶꦤꦴ ꦨꦱ꧀ꦱꦱꦢ꧀ꦢꦺꦴ ꦮꦕꦤꦥꦫꦶꦪꦴꦪꦺꦴꦠꦶ ꦢꦱ꧀ꦱꦺꦠꦶ. ꦈꦧ꧀ꦧꦴꦲꦶꦏꦴꦪ ꦱꦩ꧀ꦩꦤꦶꦠꦧ꧀ꦧꦺꦴꦠꦶ ꦏꦺꦤ ꦱꦩ꧀ꦩꦤꦶꦠꦧ꧀ꦧꦺꦴꦠꦶ ꦄꦴꦲ ‘‘ꦄꦥꦭꦺꦴꦏꦺꦠ꧀ꦮꦴ ꦮꦴ’’ꦠꦶꦄꦴꦢꦶ. ꦆꦩꦶꦤꦴ ꦄꦥꦭꦺꦴꦏꦤꦏꦩ꧀ꦩꦺꦤ ꦮꦴ ꦚꦠ꧀ꦠꦶꦢꦸꦠꦶꦪꦏꦩ꧀ꦩꦺꦤ ꦮꦴ ꦱꦩ꧀ꦩꦤꦶꦠꦧ꧀ꦧꦺꦴꦠꦶ ꦢꦱ꧀ꦱꦺꦠꦶ. ꦄꦤꦤ꧀ꦠꦴꦤꦶ ꦨꦱ꧀ꦱꦴꦤꦶ ꦣꦩ꧀ꦩꦏꦡꦶꦏꦁ ꦈꦢ꧀ꦣꦫꦶꦠ꧀ꦮꦴ ꦧꦴꦲꦠꦶ ꦥꦛꦶꦱꦺꦣꦺꦠꦶ ꦆꦩꦴꦪ ꦱꦩ꧀ꦩꦸꦠꦶꦪꦴꦠꦶ ꦈꦧ꧀ꦧꦴꦲꦶꦏꦴ, ꦠꦴꦪ. ꦌꦮꦁ ꦱꦩ꧀ꦩꦠꦺꦲꦶ ꦥꦤ ꦨꦶꦏ꧀ꦑꦹꦲꦶ ꦮꦶꦤꦶꦕ꧀ꦖꦶꦠꦧ꧀ꦧꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦮꦶꦱꦸꦁ ꦤꦶꦱꦷꦢꦶꦠ꧀ꦮꦴ ꦠꦱ꧀ꦱꦴꦪꦺꦮ ꦥꦫꦶꦱꦴꦪ ꦤꦶꦱꦷꦢꦶꦠ꧀ꦮꦴ ꦮꦴꦠꦶ ꦪꦺꦴꦗꦤꦴ. ꦄꦚ꧀ꦚꦺꦲꦷꦠꦶ ꦱꦩ꧀ꦩꦠꦨꦶꦏ꧀ꦑꦹꦲꦶ ꦄꦚ꧀ꦚꦺꦲꦶ.

꧒꧓꧓. ꦠꦠ꧀ꦫꦱ꧀ꦱꦴꦠꦶ ꦌꦠ꧀ꦡ ꦠꦠ꧀ꦫ ꦄꦱ꧀ꦱꦴꦠꦶ ꦥꦢꦮꦶꦨꦴꦒꦁ ꦏꦠ꧀ꦮꦴ ꦠꦱꦢ꧀ꦢꦺꦴ ꦥꦫꦶꦱꦮꦶꦱꦪꦺꦴ ꦥꦱꦶꦢ꧀ꦣꦮꦶꦱꦪꦺꦴ, ꦄꦱ꧀ꦱꦱꦢ꧀ꦢꦺꦴ ꦄꦴꦑ꧀ꦪꦴꦠꦶꦏꦺꦴꦠꦶ ꦄꦴꦲ ‘‘ꦠꦱ꧀ꦱꦁ ꦥꦫꦶꦱꦠꦶ ꦨꦮꦺꦪ꧀ꦪꦴ’’ꦠꦶ. ‘‘ꦤꦺꦮ ꦱꦸꦠ꧀ꦠꦁ ꦄꦴꦒꦠ’’ꦤ꧀ꦠꦶ ꦱꦴꦩꦚ꧀ꦚꦠꦺꦴ ꦮꦸꦠ꧀ꦠꦺꦥꦶ ‘‘ꦤꦺꦴ ꦱꦸꦠ꧀ꦠꦮꦶꦨꦔ꧀ꦒꦺꦴ’’ꦠꦶ ꦮꦏ꧀ꦑꦩꦴꦤꦠ꧀ꦠꦴ ꦩꦴꦠꦶꦏꦁ ꦱꦤ꧀ꦣꦴꦪ ꦮꦸꦠ꧀ꦠꦤ꧀ꦠꦶ ꦄꦴꦲ ‘‘ꦤ ꦩꦴꦠꦶꦏꦴ ꦄꦴꦒꦠꦴ’’ꦠꦶ. ꦮꦶꦤꦪꦺꦴꦥꦷꦠꦶ ꦑꦤ꧀ꦣꦏꦮꦶꦤꦪꦺꦴꦥꦶ. ꦥꦶꦱꦢ꧀ꦢꦺꦤ ꦱꦸꦠ꧀ꦠꦮꦶꦨꦔ꧀ꦒꦁ ꦄꦥꦺꦏ꧀ꦑꦠꦶ. ꦧ꧀ꦪꦚ꧀ꦗꦤꦕ꧀ꦖꦴꦪꦴꦪꦴꦠꦶ ꦌꦠ꧀ꦡ ꦖꦴꦪꦴꦱꦢ꧀ꦢꦺꦴ ꦥꦛꦶꦧꦶꦩ꧀ꦧꦺ ꦕ ꦥꦨꦴꦪ ꦕ ꦲꦺꦴꦠꦷꦠꦶ ꦄꦴꦲ ‘‘ꦧ꧀ꦪꦚ꧀ꦗꦤꦩꦠ꧀ꦠꦩꦺꦮꦴ’’ꦠꦶ, ꦧ꧀ꦪꦚ꧀ꦗꦤꦥꦛꦶꦧꦶꦩ꧀ꦧꦶꦏꦧ꧀ꦪꦚ꧀ꦗꦤꦥꦨꦴꦮꦤ꧀ꦠꦨꦹꦠꦁ ꦄꦠ꧀ꦡꦁ ꦄꦒ꧀ꦒꦲꦺꦠ꧀ꦮꦴ ꦧ꧀ꦪꦚ꧀ꦗꦤꦥꦛꦶꦧꦶꦩ꧀ꦧꦧ꧀ꦪꦚ꧀ꦗꦤꦥꦨꦴꦩꦠ꧀ꦠꦩꦺꦮ ꦒꦲꦺꦠ꧀ꦮꦴꦠꦶ ꦄꦣꦶꦥ꧀ꦥꦴꦪꦺꦴ. ‘‘ꦥꦛꦶꦱꦺꦣꦺꦠꦷ’’ꦠꦶ ꦆꦩꦶꦤꦴ ꦥꦛꦶꦧꦴꦲꦱꦢ꧀ꦢꦺꦴ ꦥꦛꦶꦱꦺꦣꦠ꧀ꦡꦺꦴꦪꦺꦮ, ꦤ ꦩꦢ꧀ꦢꦤꦠ꧀ꦡꦺꦴꦠꦶ ꦢꦱ꧀ꦱꦺꦠꦶ. ꦥꦛꦶꦧꦴꦲꦤꦴꦏꦴꦫꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦗꦴꦠꦫꦹꦥꦫꦗꦠꦑꦺꦠ꧀ꦠꦮꦠ꧀ꦡꦸꦥꦛꦶꦒ꧀ꦒꦲꦟꦴꦢꦷꦱꦹ’’ꦠꦶꦄꦴꦢꦶ. ꦏꦶꦤ꧀ꦠꦶ ꦏꦺꦤ ꦏꦴꦫꦟꦺꦤ, ꦏꦱ꧀ꦩꦴ ꦏꦴꦫꦟꦴ ꦮꦴ. ꦆꦩꦺꦠꦶ ꦗꦴꦠꦫꦹꦥꦴꦢꦶꦥꦛꦶꦒ꧀ꦒꦴꦲꦏꦺ ꦨꦶꦏ꧀ꦑꦹ. ꦏꦴꦫꦺꦡꦴꦠꦶ ꦠꦸꦩ꧀ꦲꦺ ꦏꦴꦫꦺꦪ꧀ꦪꦴꦡ. ꦌꦪ꧀ꦪꦴꦡꦱ꧀ꦱ ꦲꦶ ꦌꦡꦴꦢꦺꦱꦺꦴ. ꦥꦸꦕ꧀ꦖꦴꦪꦁ ꦱꦠ꧀ꦠꦩꦷꦮꦶꦨꦠ꧀ꦠꦶ ꦲꦺꦴꦠꦶ. ꦱꦸꦠ꧀ꦠꦺꦠꦶ ꦱꦸꦠ꧀ꦠꦤ꧀ꦠꦥꦶꦛꦏꦺ. ꦄꦥꦫꦺꦴ ꦣꦩ꧀ꦩꦏꦡꦶꦏꦺꦴ ꦮꦢꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦆꦩꦺꦱꦤ꧀ꦠꦶ ꦎꦭꦩ꧀ꦧꦺꦠ꧀ꦮꦴ ꦤꦶꦮꦴꦱꦺꦤ꧀ꦠꦴꦤꦁ. ꦌꦠ꧀ꦡꦴꦠꦶ ꦎꦭꦩ꧀ꦧꦺꦠ꧀ꦮꦴ ꦤꦶꦮꦴꦱꦤꦺ.

꧒꧓꧔. ꦧꦲꦸꦠꦫꦴ ꦨꦶꦏ꧀ꦑꦹꦠꦶ ꦌꦠ꧀ꦡ ꦢ꧀ꦮꦶꦒꦸꦟꦠꦶꦒꦸꦟꦴꦢꦶꦤꦴ ꦄꦣꦶꦏꦴ ꦌꦮ ꦧꦲꦸꦠꦫꦴ ꦤꦴꦩꦴꦠꦶ ꦄꦴꦲ ‘‘ꦌꦏꦺꦤꦥꦶ ꦄꦣꦶꦏꦴ ꦧꦲꦸꦠꦫꦴꦮꦴ’’ꦠꦶ. ‘‘ꦏꦺꦴ ꦥꦤ ꦮꦴꦢꦺꦴ’’ꦠꦶꦄꦴꦢꦶꦤꦴ ‘‘ꦌꦏꦺꦤꦥꦷ’’ꦠꦶ ꦌꦠ꧀ꦡ ꦥꦶꦱꦢ꧀ꦢꦱ꧀ꦱ ꦒꦫꦲꦠ꧀ꦡꦁ ꦢꦱ꧀ꦱꦺꦠꦶ.

ꦠꦶꦮꦶꦣꦱꦭꦴꦏꦒ꧀ꦒꦴꦲꦏꦡꦴ

꧒꧓꧕. ꦱꦚ꧀ꦚꦠ꧀ꦠꦶꦪꦴꦠꦶ ꦌꦠ꧀ꦡ ꦱꦚ꧀ꦚꦴꦥꦤꦁ ꦱꦚ꧀ꦚꦠ꧀ꦠꦶ, ꦠꦢꦠ꧀ꦡꦴꦪꦴꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦱꦚ꧀ꦚꦴꦥꦤꦠ꧀ꦡꦴꦪꦴ’’ꦠꦶ. ꦒꦹꦲꦶꦠꦧ꧀ꦧꦺꦴꦠꦶ ꦒꦹꦭ꦳꧀ꦲꦺꦴ, ꦱꦺꦴꦪꦺꦮ ꦒꦹꦭ꦳꧀ꦲꦏꦺꦴ, ꦱꦭꦴꦏꦒ꧀ꦒꦴꦲꦺꦴ ꦏꦴꦠꦧ꧀ꦧꦺꦴꦠꦶ ꦱꦩ꧀ꦧꦤ꧀ꦣꦺꦴ. ꦮꦶꦮꦫꦶꦠꦧ꧀ꦧꦺꦴꦠꦶ ꦮꦶꦮꦛꦺꦴ, ꦱꦺꦴꦪꦺꦮ ꦮꦶꦮꦛꦏꦺꦴ. ꦱꦱ꧀ꦱ ꦄꦠ꧀ꦠꦤꦺꦴ ꦏꦟ꧀ꦟꦱꦩꦷꦥꦺ ꦗꦥ꧀ꦥꦷꦪꦠꦶ ꦏꦡꦷꦪꦠꦷꦠꦶ ꦱꦏꦟ꧀ꦟꦗꦥ꧀ꦥꦺꦴ, ꦱꦺꦴꦪꦺꦮ ꦱꦏꦟ꧀ꦟꦗꦥ꧀ꦥꦏꦺꦴ. ‘‘ꦤꦶꦩꦶꦠ꧀ꦠꦱꦚ꧀ꦚꦁ ꦄꦴꦫꦺꦴꦥꦺꦠ꧀ꦮꦴ’’ꦠꦶ ꦆꦩꦶꦤꦴ ꦮꦟ꧀ꦟꦴꦮꦟ꧀ꦟꦴꦪꦺꦴ ꦏꦠ꧀ꦮꦴꦠꦶ ꦌꦠ꧀ꦡ ꦮꦟ꧀ꦟꦱꦢ꧀ꦢꦺꦴ ꦱꦟ꧀ꦜꦴꦤꦮꦴꦕꦏꦺꦴꦠꦶ ꦢꦱ꧀ꦱꦺꦠꦶ. ꦱꦸꦱꦟ꧀ꦜꦴꦤꦢꦸꦱꦟ꧀ꦜꦴꦤꦴ ꦱꦭꦴꦏꦴꦪꦺꦴ ꦏꦠ꧀ꦮꦴꦠꦶ ꦄꦠ꧀ꦡꦺꦴ. ꦠꦠꦺꦴꦠꦶ ꦮꦶꦱꦨꦴꦒꦏꦫꦟꦠꦺꦴ ꦥꦫꦁ ꦒꦲꦺꦠꦧ꧀ꦧꦺꦴꦠꦶ ꦱꦩ꧀ꦧꦤ꧀ꦣꦺꦴ. ꦱꦧ꧀ꦧꦴꦥꦶ ꦠꦴ ꦱꦭꦴꦏꦴꦪꦺꦴꦠꦶ ꦪꦺꦴꦗꦤꦴ. ꦏꦠ꧀ꦮꦴꦠꦶ ꦥꦏ꧀ꦑꦶꦥꦤꦁ ꦏꦠ꧀ꦮꦴ. ꦮꦸꦠ꧀ꦠꦤꦪꦺꦤꦴꦠꦶ ‘‘ꦄꦭꦗ꧀ꦗꦸꦱ꧀ꦱꦤ꧀ꦤꦴꦪꦴ’’ꦠꦶꦄꦴꦢꦶꦤꦴ ꦮꦸꦠ꧀ꦠꦤꦪꦺꦤ. ‘‘ꦪꦴꦮꦠꦠꦶꦪ’’ꦤ꧀ꦠꦶ ꦆꦩꦶꦤꦴ ꦥꦕ꧀ꦕꦸꦏ꧀ꦏꦝ꧀ꦞꦶꦠꦧ꧀ꦧꦤ꧀ꦠꦶ ꦌꦠ꧀ꦡ ꦥꦸꦤꦥ꧀ꦥꦸꦤꦁ ꦈꦢ꧀ꦣꦁ ꦏꦝ꧀ꦞꦶꦠꦧ꧀ꦧꦤ꧀ꦠꦶ ꦄꦠ꧀ꦡꦁ ꦢꦱ꧀ꦱꦺꦠꦶ. ꦄꦠꦶꦫꦺꦏꦗꦴꦠꦺꦠꦶ ꦄꦣꦩ꧀ꦩꦮꦴꦢꦷꦲꦶ ꦄꦠꦶꦫꦺꦏꦠꦺꦴ ꦗꦴꦠꦺ ꦱꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦪꦴꦮꦠꦠꦶꦪꦩ꧀ꦥꦷꦠꦶ ꦥꦶꦱꦢ꧀ꦢꦺꦴ ꦠꦠꦺꦴ ꦈꦴꦤꦺ ꦌꦏꦢ꧀ꦮꦺꦮꦴꦫꦺ ꦥꦤ ꦏꦴ ꦤꦴꦩ ꦏꦡꦴꦠꦶ ꦢꦱ꧀ꦱꦺꦠꦶ.

ꦱꦏꦟ꧀ꦟꦗꦥ꧀ꦥꦏꦺ ꦥꦤ ꦌꦮꦁ ꦮꦶꦤꦶꦕ꧀ꦖꦪꦺꦴ ꦮꦺꦢꦶꦠꦧ꧀ꦧꦺꦴꦠꦶ ꦪꦺꦴꦗꦤꦴ. ꦱꦕꦺ ꦱꦔ꧀ꦓꦠ꧀ꦡꦺꦫꦺꦴ ꦒꦟ꧀ꦲꦴꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦱꦺꦴꦠꦶ ꦱꦔ꧀ꦓꦠ꧀ꦡꦺꦫꦺꦴ. ꦮꦪꦺꦴꦄꦤꦸꦥ꧀ꦥꦠ꧀ꦠꦴꦠꦶ ꦥꦕ꧀ꦖꦶꦩꦮꦪꦁ ꦄꦤꦸꦥ꧀ꦥꦠ꧀ꦠꦴ. ꦌꦠꦤ꧀ꦠꦶ ꦄꦣꦩ꧀ꦩꦮꦴꦢꦶꦱꦭꦴꦏꦁ. ꦄꦱ꧀ꦱꦴꦠꦶ ꦱꦔ꧀ꦓꦠ꧀ꦡꦺꦫꦱ꧀ꦱ. ꦆꦠꦫꦴ ꦱꦭꦴꦏꦴꦠꦶ ꦄꦣꦩ꧀ꦩꦮꦴꦢꦶꦱꦭꦴꦏꦴꦲꦶ ꦄꦚ꧀ꦚꦴ ꦣꦩ꧀ꦩꦮꦴꦢꦶꦱꦭꦴꦏꦴ. ꦱꦺꦴꦠꦶ ꦱꦔ꧀ꦓꦠ꧀ꦡꦺꦫꦺꦴ. ꦠꦤ꧀ꦠꦶ ꦣꦩ꧀ꦩꦮꦴꦢꦶꦱꦭꦴꦏꦁ. ꦠꦠꦺꦴꦠꦶ ꦤꦺꦮ ꦄꦮꦧꦸꦗ꧀ꦙꦤꦏꦴꦫꦟꦴ. ꦮꦸꦠ꧀ꦠꦤꦪꦩꦺꦮꦴꦠꦶ ꦒꦹꦭ꦳꧀ꦲꦏꦺ ꦮꦸꦠ꧀ꦠꦤꦪꦩꦺꦮ. ꦮꦶꦮꦛꦺꦴ ꦄꦠ꧀ꦡꦺꦴ ꦆꦩꦱ꧀ꦱꦴꦠꦶ ꦮꦶꦮꦛꦠ꧀ꦡꦺꦴ.

ꦠꦱ꧀ꦱꦥꦴꦥꦶꦪꦱꦶꦏꦴꦮꦶꦤꦪꦏꦡꦴ

꧒꧓꧘. ꦥꦴꦫꦴꦗꦶꦏꦱꦴꦩꦤ꧀ꦠꦁ ꦤꦴꦩꦴꦠꦶ ꦥꦴꦫꦴꦗꦶꦏꦱ꧀ꦱ ꦄꦴꦱꦤ꧀ꦤꦁ ꦤꦴꦩ. ꦄꦢꦶꦤ꧀ꦤꦴꦢꦴꦤꦴꦢꦷꦱꦹꦠꦶ ꦄꦴꦢꦶꦱꦢ꧀ꦢꦺꦤ ꦩꦤꦸꦱ꧀ꦱꦮꦶꦒ꧀ꦒꦲ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦥꦴꦫꦴꦗꦶꦏꦺ ꦱꦔ꧀ꦒꦟ꧀ꦲꦴꦠꦶ. ꦤꦶꦧ꧀ꦧꦺꦜꦪꦩꦴꦤꦤ꧀ꦠꦶ ꦮꦺꦜꦤꦫꦲꦶꦠꦁ, ꦠꦩꦺꦤꦁ ꦨꦶꦏ꧀ꦑꦸꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦆꦩꦶꦤꦴ ꦤꦶꦧ꧀ꦧꦺꦜꦺꦤ꧀ꦠꦤ꧀ꦠꦶ ꦌꦠ꧀ꦡ ꦄꦤ꧀ꦠꦱꦢ꧀ꦢꦺꦴ ꦩꦴꦤꦱꦢ꧀ꦢꦥꦫꦶꦪꦴꦪꦺꦴꦠꦶ ꦢꦱ꧀ꦱꦺꦠꦶ. ꦄꦠꦶꦮꦺꦜꦺꦠꦷꦠꦶ ꦌꦠ꧀ꦡ ꦏꦺꦲꦶ ꦄꦠꦶꦮꦺꦜꦺꦠꦷꦠꦶ ꦄꦴꦲ ‘‘ꦆꦔ꧀ꦓꦴꦪꦱ꧀ꦩꦴꦠꦶꦄꦴꦢꦶꦮꦕꦤꦺꦲꦷ’’ꦠꦶ. ꦠꦺꦤꦴꦠꦶ ꦕꦺꦴꦢꦏꦺꦤ. ꦩꦤ꧀ꦠꦶ ꦩꦩꦁ. ꦄꦴꦲꦴꦠꦶ ꦕꦸꦢꦶꦠꦏꦺꦴ ꦄꦴꦲ. ꦌꦠꦱ꧀ꦱꦴꦠꦶ ꦄꦮꦗꦴꦤꦤꦥꦛꦶꦗꦴꦤꦤꦴꦢꦶꦏꦴꦫꦏꦱ꧀ꦱ ꦥꦴꦥꦶꦪꦱ꧀ꦱ ꦥꦸꦒ꧀ꦒꦭꦱ꧀ꦱ. ꦱꦷꦭꦮꦴ ꦨꦮꦶꦱ꧀ꦱꦠꦷꦠꦶ ꦥꦴꦥꦶꦪꦺꦴ ꦥꦸꦒ꧀ꦒꦭꦺꦴ ꦱꦕꦺ ꦱꦷꦭꦮꦴ ꦨꦮꦶꦱ꧀ꦱꦠꦶ. ꦥꦛꦶꦥ꧀ꦥꦱ꧀ꦱꦢ꧀ꦣꦶꦤ꧀ꦠꦶ ꦥꦴꦥꦶꦪꦨꦴꦮꦠꦺꦴ ꦥꦛꦶꦥ꧀ꦥꦱ꧀ꦱꦩ꧀ꦨꦤꦁ. ꦤꦺꦴ ꦕꦺꦠꦶ ꦱꦷꦭꦮꦴ ꦤꦺꦴ ꦨꦮꦶꦱ꧀ꦱꦠꦶ ꦕꦺ. ꦠꦡꦴ ꦤꦴꦱꦶꦠꦺꦴꦠꦶ ꦠꦺꦤ ꦠꦱ꧀ꦱ ꦥꦴꦥꦶꦪꦱꦶꦏꦏꦩ꧀ꦩꦏꦫꦟꦺꦤ ꦤꦴꦱꦁ ꦒꦠꦺꦴ ꦨꦮꦶꦱ꧀ꦱꦠꦶ. ꦱꦧ꧀ꦧꦠ꧀ꦡꦴꦠꦶ ꦱꦧ꧀ꦧꦱ꧀ꦩꦶꦁ ꦱꦩꦡꦏ꧀ꦑꦤ꧀ꦣꦏꦺ.

ꦆꦠꦶ ꦱꦩꦡꦏ꧀ꦑꦤ꧀ꦣꦏꦮꦟ꧀ꦟꦤꦴꦪ ꦪꦺꦴꦗꦤꦴ ꦱꦩꦠ꧀ꦠꦴ.