꧙. ꦕꦩ꧀ꦥꦺꦪ꧀ꦪꦏ꧀ꦑꦤ꧀ꦣꦏꦁ

꧒꧓꧔. ꦏꦱ꧀ꦱꦥꦒꦺꦴꦠ꧀ꦠꦨꦶꦏ꧀ꦑꦸꦮꦠ꧀ꦡꦸꦏꦡꦴ

꧓꧘꧐. ꦕꦩ꧀ꦥꦺꦪ꧀ꦪꦏ꧀ꦑꦤ꧀ꦣꦏꦺ ꦒꦒ꧀ꦒꦫꦴꦪ ꦥꦺꦴꦏ꧀ꦑꦫꦟꦶꦪꦴꦠꦶ ꦌꦠ꧀ꦡ ꦒꦒ꧀ꦒꦫꦱꦢ꧀ꦢꦱ꧀ꦱ ꦤꦴꦩꦱꦢ꧀ꦢꦨꦴꦮꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦒꦒ꧀ꦒꦫꦤꦴꦩꦶꦏꦴꦪ ꦆꦠ꧀ꦡꦶꦪꦴ’’ꦠꦶ. ꦆꦩꦶꦤꦴ ꦒꦒ꧀ꦒꦫꦱꦢ꧀ꦢꦺꦴ ꦒꦒ꧀ꦒꦫꦆꦠꦶ ꦤꦴꦩꦁ ꦥꦮꦠ꧀ꦠꦶꦤꦶꦩꦶꦠ꧀ꦠꦁ ꦏꦠ꧀ꦮꦴ ꦆꦠ꧀ꦡꦶꦢꦧ꧀ꦧꦁ ꦮꦢꦠꦷꦠꦶ ꦢꦱ꧀ꦱꦺꦠꦶ. ꦠꦤ꧀ꦠꦶꦥꦛꦶꦧꦢ꧀ꦣꦺꦴꦠꦶ ꦠꦤ꧀ꦠꦶꦪꦴ ꦥꦛꦶꦧꦢ꧀ꦣꦺꦴ. ‘‘ꦈꦱ꧀ꦱꦸꦏ꧀ꦏꦩ꧀ꦥꦶ ꦄꦏꦴꦱꦶ ꦪꦴꦒꦸꦪꦴ’’ꦠꦶꦄꦴꦢꦷꦱꦸ ꦌꦮꦁ ꦮꦶꦤꦶꦕ꧀ꦖꦪꦺꦴ ꦮꦺꦢꦶꦠꦧ꧀ꦧꦺꦴꦠꦶ ꦪꦺꦴꦗꦤꦴ. ꦠꦱ꧀ꦱ ꦨꦶꦏ꧀ꦑꦸꦤꦺꦴꦠꦶ ꦏꦱ꧀ꦱꦥꦒꦺꦴꦠ꧀ꦠꦤꦴꦩꦏꦱ꧀ꦱ ꦠꦱ꧀ꦱ ꦨꦶꦏ꧀ꦑꦸꦤꦺꦴ. ꦠꦠ꧀ꦡꦺꦮꦴꦠꦶ ꦮꦴꦱꦨꦒꦴꦩꦺꦪꦺꦮ.

꧓꧘꧒. ꦄꦣꦩ꧀ꦩꦺꦤ ꦮꦒ꧀ꦒꦏꦩ꧀ꦩꦁ ꦏꦫꦺꦴꦤ꧀ꦠꦷꦠꦶꦄꦴꦢꦷꦤꦁ ꦤꦴꦤꦴꦏꦫꦟꦤ꧀ꦠꦶ ꦱꦩ꧀ꦧꦤ꧀ꦣꦺꦴ.

꧒꧓꧖. ꦚꦠ꧀ꦠꦶꦮꦶꦥꦤ꧀ꦤꦏꦩ꧀ꦩꦴꦢꦶꦏꦡꦴ

꧓꧘꧕. ꦄꦚ꧀ꦚꦠ꧀ꦫꦴꦥꦶ ꦣꦩ꧀ꦩꦴꦠꦶ ꦌꦠ꧀ꦡ ꦣꦩ꧀ꦩꦴꦠꦶ ꦈꦥꦪꦺꦴꦒꦠ꧀ꦡꦺ ꦤꦶꦱ꧀ꦱꦏ꧀ꦏꦮꦕꦤꦩꦺꦠꦤ꧀ꦠꦶ ꦄꦴꦲ ‘‘ꦄꦚ꧀ꦚꦠ꧀ꦫ ꦣꦩ꧀ꦩ’’ꦤ꧀ꦠꦶ. ‘‘ꦄꦚ꧀ꦚꦠ꧀ꦫꦴ’’ꦠꦶ ꦤꦶꦥꦴꦠꦥꦪꦺꦴꦒꦺ ꦢꦸꦠꦶꦪꦴꦠꦠꦶꦪꦴꦥꦚ꧀ꦕꦩꦷꦱꦸ ꦄꦚ꧀ꦚꦠꦫꦱ꧀ꦱ ꦱꦩ꧀ꦨꦮꦠꦺꦴ ꦈꦥꦪꦺꦴꦒꦮꦕꦤꦩ꧀ꦥꦶ ꦲꦺꦴꦠꦶ. ꦠꦱ꧀ꦩꦴ ꦮꦸꦠ꧀ꦠꦁ ‘‘ꦄꦪꦩꦺꦮ ꦮꦴ ꦥꦴꦜꦺꦴ’’ꦠꦶ. ‘‘ꦨꦹꦠꦺꦤ ꦮꦠ꧀ꦡꦸꦤꦴ’’ꦠꦶ ꦆꦩꦶꦤꦴ ꦣꦩ꧀ꦩꦱꦢ꧀ꦢꦱ꧀ꦱ ꦱꦕ꧀ꦕꦠ꧀ꦡꦁ ꦢꦱ꧀ꦱꦺꦠꦶ. ‘‘ꦌꦱꦺꦮ ꦤꦪꦺꦴ’’ꦠꦶ ꦆꦩꦶꦤꦴ ꦱꦢ꧀ꦢꦱꦨꦴꦮꦩꦺꦮ ꦱꦤ꧀ꦣꦴꦪ ꦄꦠꦶꦢꦶꦱꦠꦶ, ꦤ ꦄꦠ꧀ꦡꦁ. ꦠꦺꦤ ꦮꦸꦠ꧀ꦠꦁ ‘‘ꦌꦠ꧀ꦡ ꦥꦤꦴ’’ꦠꦶꦄꦴꦢꦶ. ꦱꦠ꧀ꦡꦸꦱꦴꦱꦤꦤ꧀ꦠꦶ ꦱꦠ꧀ꦡꦸ ꦄꦴꦟꦴ. ꦱꦠ꧀ꦡꦸꦄꦴꦟꦴ ꦤꦴꦩ ꦚꦠ꧀ꦠꦶꦄꦤꦸꦱꦴꦮꦤꦴꦤꦁ ꦱꦩ꧀ꦥꦢꦴꦠꦶ ꦄꦴꦲ ‘‘ꦚꦠ꧀ꦠꦶꦱꦩ꧀ꦥꦢꦴ ꦄꦤꦸꦱꦴꦮꦤꦱꦩ꧀ꦥꦢꦴ ꦕꦴ’’ꦠꦶ. ‘‘ꦥꦛꦶꦏꦸꦛ꧀ꦜꦚ꧀ꦕꦺꦮ ꦏꦠꦚ꧀ꦕꦴ’’ꦠꦶ ꦆꦩꦶꦤꦴ ꦥꦛꦶꦏꦸꦛ꧀ꦜꦏꦠꦤ꧀ꦠꦶ ꦥꦢꦱ꧀ꦱ ꦢ꧀ꦮꦤ꧀ꦢꦮꦴꦏ꧀ꦪꦁ ꦢꦱ꧀ꦱꦺꦠꦶ. ꦥꦛꦶꦏꦸꦱꦶꦠꦧ꧀ꦧꦤ꧀ꦠꦶ ꦥꦛꦶꦏꦸꦛ꧀ꦜꦁ, ꦏꦠ꧀ꦠꦧ꧀ꦧꦤ꧀ꦠꦶ ꦏꦠꦁ, ꦏꦩ꧀ꦩꦁ. ꦠꦩꦺꦮꦠ꧀ꦡꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦪꦁ ꦄꦚ꧀ꦚꦺꦱꦹ’’ꦠꦶꦄꦴꦢꦶ. ꦠꦠ꧀ꦡ ꦪꦤ꧀ꦠꦶ ꦏꦩ꧀ꦩꦁ.

꧓꧘꧗. ꦥꦴꦭ꦳ꦶꦪꦴꦠꦶ ꦮꦶꦤꦪꦥꦴꦭ꦳ꦶꦪꦴ. ꦪꦤ꧀ꦠꦶ ꦏꦩ꧀ꦩꦁ, ꦤ ꦏꦫꦶꦪꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦌꦠ꧀ꦡꦴꦠꦶ ꦄꦛ꧀ꦜꦏꦡꦴꦪꦁ. ꦱꦺꦴ ꦕ ꦑꦺꦴꦠꦶ ꦱꦺꦴ ꦕ ꦮꦶꦠ꧀ꦡꦴꦫꦺꦴ, ꦄꦴꦒꦠꦺꦴꦠꦶ ꦱꦩ꧀ꦧꦤ꧀ꦣꦺꦴ. ꦏꦱ꧀ꦩꦴ ꦚꦠ꧀ꦠꦶꦢꦸꦠꦶꦪꦚꦠ꧀ꦠꦶꦕꦠꦸꦠ꧀ꦡꦏꦩ꧀ꦩꦴꦤꦩꦺꦮ ꦮꦱꦺꦤ ꦄꦴꦒꦠꦺꦴ, ꦤꦤꦸ ꦚꦠ꧀ꦠꦶꦄꦥꦭꦺꦴꦏꦤꦏꦩ꧀ꦩꦮꦱꦺꦤꦥꦶ ꦄꦴꦒꦠꦺꦤ ꦨꦮꦶꦠꦧ꧀ꦧꦤ꧀ꦠꦶ ꦄꦴꦲ ‘‘ꦪꦱ꧀ꦩꦴ ꦥꦤꦴ’’ꦠꦶꦄꦴꦢꦶ. ꦚꦠ꧀ꦠꦶꦢꦸꦠꦶꦪꦚꦠ꧀ꦠꦶꦕꦠꦸꦠ꧀ꦡꦺꦱꦸ ꦲꦴꦥꦤꦁ ꦮꦴ ꦄꦚ꧀ꦚꦡꦴ ꦏꦫꦟꦁ ꦮꦴ ꦄꦠ꧀ꦡꦶ ꦮꦶꦪ ꦚꦠ꧀ꦠꦶꦏꦩ꧀ꦩꦺ ꦤꦠ꧀ꦡꦷꦠꦶ ꦪꦺꦴꦗꦤꦴ. ꦚꦠ꧀ꦠꦶꦏꦩ꧀ꦩꦺ ꦚꦠ꧀ꦠꦶꦛ꧀ꦜꦥꦤꦠꦺꦴ ꦄꦚ꧀ꦚꦏꦶꦕ꧀ꦕꦱ꧀ꦱ ꦄꦱꦩ꧀ꦨꦮꦠꦺꦴ ꦲꦴꦥꦤꦁ ꦮꦴ ꦄꦚ꧀ꦚꦡꦴ ꦏꦫꦟꦁ ꦮꦴ ꦤꦠ꧀ꦡꦷꦠꦶ ꦄꦣꦶꦥ꧀ꦥꦴꦪꦺꦴ. ꦠꦴꦤꦷꦠꦶ ꦚꦠ꧀ꦠꦶꦏꦩ꧀ꦩꦄꦥꦭꦺꦴꦏꦤꦏꦩ꧀ꦩꦴꦤꦶ. ꦱꦧ꧀ꦧꦺꦱꦩ꧀ꦥꦶ ꦏꦩ꧀ꦩꦴꦤꦤ꧀ꦠꦶ ꦱꦧ꧀ꦧꦺꦱꦩ꧀ꦥꦶ ꦕꦠꦸꦤ꧀ꦤꦁ ꦏꦩ꧀ꦩꦴꦤꦁ. ꦥꦫꦠꦺꦴꦠꦶ ꦥꦫꦱ꧀ꦩꦶꦁ ꦥꦫꦶꦮꦴꦫꦴꦮꦱꦴꦤꦺ (ꦥꦫꦶ. ꦄꦛ꧀ꦜ. ꧔꧘꧒).

꧒꧓꧗. ꦕꦠꦸꦮꦒ꧀ꦒꦏꦫꦟꦴꦢꦶꦏꦡꦴ

꧓꧘꧘. ꦪꦢꦶꦢꦁ ꦏꦩ꧀ꦩꦤ꧀ꦠꦶ ꦪꦺꦴꦗꦤꦴ. ꦠꦺꦱꦤ꧀ꦠꦶ ꦱꦔ꧀ꦓꦴꦤꦁ. ꦏꦩ꧀ꦩꦥ꧀ꦥꦠ꧀ꦠꦺꦴꦠꦶ ꦌꦠ꧀ꦡ ꦏꦩ꧀ꦩꦺꦤ, ꦏꦩ꧀ꦩꦱ꧀ꦱ ꦮꦴ ꦥꦠ꧀ꦠꦺꦴꦠꦶ ꦄꦠ꧀ꦡꦁ ꦥꦛꦶꦏ꧀ꦑꦶꦥꦤ꧀ꦠꦺꦴ ꦄꦴꦲ ‘‘ꦏꦩ꧀ꦩꦁ ꦥꦠ꧀ꦠꦺꦴ’’ꦠꦶ. ‘‘ꦱꦧ꧀ꦧꦏꦩ꧀ꦩꦺꦱꦸ ꦏꦩ꧀ꦩꦥꦠ꧀ꦠꦺꦴ’’ꦠꦶ ꦥꦴꦭ꦳ꦶꦤꦪꦺꦤ ‘‘ꦏꦩ꧀ꦩꦺꦱꦸ ꦥꦠ꧀ꦠꦺꦴ’’ꦠꦶ ꦄꦠ꧀ꦡꦺꦴꦥꦶ ꦪꦸꦗ꧀ꦗꦠꦶ. ꦭꦺꦴꦏꦮꦺꦴꦲꦴꦫꦮꦱꦺꦤ ‘‘ꦏꦩ꧀ꦩꦺꦤ ꦏꦩ꧀ꦩꦱ꧀ꦱ ꦮꦴ ꦥꦠ꧀ꦠꦺꦴ’’ꦠꦶ ꦄꦠ꧀ꦡꦺꦴꦥꦶ ꦪꦸꦗ꧀ꦗꦠꦺꦮ.

꧓꧘꧙. ꦥꦫꦶꦱꦠꦺꦴꦠꦶ ꦥꦫꦶꦱꦏꦴꦫꦟꦴ. ꦠꦠ꧀ꦡꦴꦠꦶ ‘‘ꦕꦠꦸꦮꦒ꧀ꦒꦏꦫꦟꦚ꧀ꦕꦺ ꦨꦶꦏ꧀ꦑꦮꦺ’’ꦠꦶꦄꦴꦢꦶꦥꦴꦜꦺ, ꦕꦠꦸꦮꦷꦱꦠꦶꦥꦸꦒ꧀ꦒꦭꦺꦱꦸ ꦮꦴ. ꦏꦩ꧀ꦩꦤꦴꦤꦴꦱꦁꦮꦴꦱꦏꦺꦴꦠꦶ ꦈꦏ꧀ꦑꦺꦥꦤꦷꦪꦏꦩ꧀ꦩꦏꦠꦺꦴ. ꦭꦢ꧀ꦣꦶꦤꦴꦤꦴꦱꦁꦮꦴꦱꦏꦺꦴꦠꦶ ꦈꦏ꧀ꦑꦶꦠ꧀ꦠꦴꦤꦸꦮꦠ꧀ꦠꦏꦺꦴ. ‘‘ꦲꦸꦠ꧀ꦮꦴ’’ꦠꦶ ꦆꦩꦶꦤꦴ ‘‘ꦨꦶꦏ꧀ꦑꦸꦤꦷꦕꦠꦸꦠ꧀ꦡꦺꦴ’’ꦠꦶꦄꦴꦢꦷꦱꦸ ꦕꦠꦸꦮꦷꦱꦠꦶꦪꦴ ꦜꦴꦤꦺꦱꦸ ꦏꦶꦫꦶꦪꦴꦮꦶꦱꦺꦱꦤꦨꦴꦮꦁ ꦢꦱ꧀ꦱꦺꦠꦶ. ꦨꦶꦏ꧀ꦑꦸꦤꦷ ꦕꦠꦸꦠ꧀ꦡꦷ ꦌꦠꦱ꧀ꦱꦴꦠꦶ ꦨꦶꦏ꧀ꦑꦸꦤꦷꦕꦠꦸꦠ꧀ꦡꦺꦴ, ꦕꦠꦸꦮꦒ꧀ꦒꦺꦴ ꦱꦔ꧀ꦓꦺꦴꦠꦶꦄꦴꦢꦶꦤꦴ ꦮꦕꦤꦠ꧀ꦡꦺꦴ ꦏꦴꦠꦧ꧀ꦧꦺꦴ.

꧓꧙꧓. ꦥꦫꦶꦮꦴꦱꦴꦢꦷꦠꦶꦄꦴꦢꦶꦱꦢ꧀ꦢꦺꦤ ꦩꦹꦭꦴꦪꦏꦱ꧀ꦱꦤꦩꦴꦤꦠ꧀ꦠꦄꦧ꧀ꦨꦴꦤꦴꦤꦶ ꦱꦔ꧀ꦒꦟ꧀ꦲꦴꦠꦶ. ꦠꦺꦱꦤ꧀ꦠꦶ ꦥꦫꦶꦮꦴꦱꦴꦢꦶꦏꦩ꧀ꦩꦴꦤꦁ. ꦥꦫꦠꦺꦴꦠꦶ ꦥꦫꦱ꧀ꦩꦶꦁ ꦕꦹꦭ꦳ꦮꦒ꧀ꦒꦺ (ꦕꦹꦭ꦳ꦮ. ꦄꦛ꧀ꦜ. ꧗꧕ ꦄꦴꦢꦪꦺꦴ).

꧓꧙꧔. ꦥꦛꦶꦏꦸꦛ꧀ꦜꦏꦠꦏꦩ꧀ꦩꦱ꧀ꦱꦴꦠꦶ ꦥꦛꦶꦏꦸꦛ꧀ꦜꦱ꧀ꦱ ꦲꦸꦠ꧀ꦮꦴ ꦏꦠꦱ꧀ꦱ ꦏꦩ꧀ꦩꦱ꧀ꦱ. ꦥꦏꦠꦠ꧀ꦠꦱ꧀ꦱꦴꦠꦶ ꦌꦠ꧀ꦡ ꦥꦏꦠꦶꦱꦷꦭꦱꦔ꧀ꦑꦴꦠꦺꦴ ꦄꦠ꧀ꦠꦴ ꦱꦨꦴꦮꦺꦴ ꦌꦠꦱ꧀ꦱꦴꦠꦶ ꦥꦏꦠꦠ꧀ꦠꦺꦴꦠꦶ ꦄꦠ꧀ꦡꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦄꦮꦶꦥꦤ꧀ꦤꦱꦷꦭꦱ꧀ꦱꦴ’’ꦠꦶ. ꦱꦔ꧀ꦓꦴꦢꦶꦱꦺꦱꦁ ꦄꦤꦴꦥꦗ꧀ꦗꦤ꧀ꦠꦱ꧀ꦱꦴꦥꦶ ꦄꦮꦶꦥꦤ꧀ꦤꦱꦷꦭꦠ꧀ꦠꦴ ꦮꦸꦠ꧀ꦠꦁ ‘‘ꦥꦴꦫꦴꦗꦶꦏꦁ ꦄꦤꦗ꧀ꦙꦴꦥꦤ꧀ꦤꦱ꧀ꦱꦴ’’ꦠꦶ. ꦆꦩꦶꦤꦴ ꦱꦔ꧀ꦓꦴꦢꦶꦱꦺꦱꦁ ꦄꦴꦥꦗ꧀ꦗꦤ꧀ꦠꦺꦴꦥꦶ ꦥꦏꦠꦠ꧀ꦠꦺꦴꦪꦺꦮꦴꦠꦶ ꦢꦱ꧀ꦱꦺꦠꦶ. ꦱꦺꦴꦥꦶ ꦲꦶ ꦆꦣ ꦄꦮꦶꦥꦤ꧀ꦤꦱꦷꦭꦺꦴ ꦤꦴꦩ, ꦄꦚ꧀ꦚꦠ꧀ꦡ ꦥꦤ ꦱꦔ꧀ꦓꦴꦢꦶꦱꦺꦱꦱ꧀ꦱ ꦱꦷꦭꦮꦶꦥꦠ꧀ꦠꦶꦨꦴꦮꦠꦺꦴ ꦠꦁ ꦄꦴꦥꦗ꧀ꦗꦤ꧀ꦠꦺꦴꦥꦶ ꦮꦶꦥꦤ꧀ꦤꦱꦷꦭꦺꦴꦪꦺꦮ ꦤꦴꦩ. ꦄꦴꦤꦤ꧀ꦠꦫꦶꦏꦱ꧀ꦱꦴꦠꦶ ꦌꦠ꧀ꦡ ꦄꦤꦤ꧀ꦠꦫꦱꦢ꧀ꦢꦱ꧀ꦱ ꦱꦩ꧀ꦧꦤ꧀ꦣꦚ꧀ꦕ ꦟꦶꦏꦥꦕ꧀ꦕꦪꦱ꧀ꦱ ꦄꦠ꧀ꦡꦚ꧀ꦕ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦄꦠ꧀ꦠꦤꦺꦴ ꦄꦤꦤ꧀ꦠꦫꦁ ꦤꦶꦱꦶꦤ꧀ꦤꦱ꧀ꦱꦴ’’ꦠꦶ. ꦠꦠ꧀ꦡ ‘‘ꦄꦠ꧀ꦠꦤꦺꦴ’’ꦠꦶ ꦆꦩꦶꦤꦴ ꦄꦤꦤ꧀ꦠꦫꦱꦢ꧀ꦢꦱ꧀ꦱ ꦱꦩ꧀ꦧꦤ꧀ꦣꦁ ꦢꦱ꧀ꦱꦺꦠꦶ. ‘‘ꦤꦶꦱꦶꦤ꧀ꦤꦱ꧀ꦱꦴ’’ꦠꦶ ꦆꦩꦶꦤꦴ ꦟꦶꦏꦥꦕ꧀ꦕꦪꦱ꧀ꦱ ꦄꦠ꧀ꦡꦁ ꦢꦱ꧀ꦱꦺꦠꦶ.

꧒꧓꧙. ꦢ꧀ꦮꦺꦤꦶꦱ꧀ꦱꦴꦫꦟꦴꦢꦶꦏꦡꦴ

꧓꧙꧕. ꦮꦠ꧀ꦡꦸꦠꦺꦴꦠꦶ ꦮꦠ꧀ꦡꦸꦏꦴꦫꦟꦴ. ꦠꦠ꧀ꦡꦴꦠꦶ ‘‘ꦢ꧀ꦮꦺꦩꦴ ꦨꦶꦏ꧀ꦑꦮꦺ’’ꦠꦶꦄꦴꦢꦶꦥꦴꦜꦺ. ‘‘ꦱꦤ꧀ꦣꦴꦪ ꦮꦸꦠ꧀ꦠ’’ꦤ꧀ꦠꦶ ꦆꦩꦶꦤꦴ ‘‘ꦄꦥ꧀ꦥꦠ꧀ꦠꦺꦴ’’ꦠꦶꦄꦴꦢꦶꦱꦸꦠ꧀ꦠꦱ꧀ꦱ ꦤꦺꦪ꧀ꦪꦠ꧀ꦡꦨꦴꦮꦁ ꦢꦱ꧀ꦱꦺꦠꦶ. ꦲꦷꦠꦶ ꦱꦕ꧀ꦕꦁ, ꦪꦱ꧀ꦩꦴ ꦮꦴ. ꦠꦤ꧀ꦠꦶ ꦥꦧ꧀ꦧꦴꦗꦤꦷꦪꦏꦩ꧀ꦩꦁ. ꦥꦸꦤ ꦠꦤ꧀ꦠꦶ ꦥꦧ꧀ꦧꦴꦗꦤꦷꦪꦏꦩ꧀ꦩꦩꦺꦮ. ꦌꦱ ꦨꦶꦏ꧀ꦑꦸ ꦄꦥ꧀ꦥꦠ꧀ꦠꦺꦴꦠꦶ ꦱꦩ꧀ꦧꦤ꧀ꦣꦺꦴ. ꦏꦱ꧀ꦩꦴ ꦄꦥ꧀ꦥꦠ꧀ꦠꦺꦴꦠꦶ ꦄꦴꦲ ‘‘ꦪꦱ꧀ꦩꦴ’’ꦠꦶꦄꦴꦢꦶ. ꦄꦴꦮꦺꦟꦶꦏꦭꦏ꧀ꦑꦟꦺꦤꦴꦠꦶ ꦄꦮꦶꦤꦴ ꦲꦸꦠ꧀ꦮꦴ ꦥꦮꦠ꧀ꦠꦺꦤ ꦭꦏ꧀ꦑꦟꦺꦤ. ꦄꦠ꧀ꦠꦤꦴ ꦄꦮꦶꦤꦴ ꦲꦸꦠ꧀ꦮꦴ ꦄꦠ꧀ꦠꦤꦺꦴ ꦱꦤ꧀ꦠꦏꦺꦤ ꦮꦶꦱꦸꦁ ꦨꦹꦠꦺꦤ ꦭꦏ꧀ꦑꦟꦺꦤꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦪꦢꦶ ꦄꦥ꧀ꦥꦠ꧀ꦠꦺꦴ, ꦏꦱ꧀ꦩꦴ ꦱꦸꦤꦶꦱ꧀ꦱꦴꦫꦶꦠꦺꦴꦠꦶ ꦄꦴꦲ ‘‘ꦪꦱ꧀ꦩꦴ ꦥꦤꦱ꧀ꦱꦴ’’ꦠꦶꦄꦴꦢꦶ. ꦄꦱ꧀ꦱꦴꦠꦶ ꦨꦶꦏ꧀ꦑꦸꦱ꧀ꦱ, ꦏꦫꦺꦪ꧀ꦪꦴꦠꦶ ꦱꦩ꧀ꦧꦤ꧀ꦣꦺꦴ. ꦠꦁ ꦕꦺ ꦱꦔ꧀ꦓꦺꦴ ꦠꦗ꧀ꦗꦤꦷꦪꦏꦩ꧀ꦩꦴꦢꦶꦮꦱꦺꦤ ꦤꦶꦱ꧀ꦱꦴꦫꦺꦠꦶ, ꦱꦸꦤꦶꦱ꧀ꦱꦴꦫꦶꦠꦺꦴꦠꦶ ꦱꦩ꧀ꦧꦤ꧀ꦣꦺꦴ. ꦱꦺꦴꦠꦶ ꦨꦶꦏ꧀ꦑꦸ. ꦪꦱ꧀ꦩꦴ ꦄꦤꦸꦚ꧀ꦚꦴꦠꦴ, ꦠꦱ꧀ꦩꦴ ꦱꦸꦤꦶꦱ꧀ꦱꦴꦫꦶꦠꦺꦴꦠꦶ ꦪꦺꦴꦗꦤꦴ. ꦏꦶꦠ꧀ꦠꦏꦺꦤ ꦄꦔ꧀ꦒꦺꦤ ꦄꦤꦸꦚ꧀ꦚꦴꦠꦴꦠꦶ ꦄꦴꦲ ‘‘ꦌꦏꦺꦤꦥꦶ ꦄꦔ꧀ꦒꦺꦤꦴ’’ꦠꦶ.

꧓꧙꧖. ꦎꦱꦴꦫꦟꦴꦠꦶ ꦌꦠ꧀ꦡ ꦎꦠ꧀ꦪꦹꦥꦱꦒ꧀ꦒꦮꦱꦺꦤ ꦱꦫꦣꦴꦠꦸ ꦥꦮꦺꦱꦤꦠ꧀ꦡꦺꦴꦠꦶ ꦄꦴꦲ ‘‘ꦥꦮꦺꦱꦤꦴ’’ꦠꦶ. ꦠꦠ꧀ꦡꦴꦠꦶ ‘‘ꦎꦱꦴꦫꦟꦴ’’ꦠꦶꦄꦴꦢꦶꦥꦴꦜꦺ. ꦎꦱꦴꦫꦺꦠꦷꦠꦶ ꦌꦠ꧀ꦡ ꦄꦧ꧀ꦨꦴꦤꦴꦢꦶꦮꦱꦺꦤ ꦥꦮꦺꦱꦤꦁ ꦥꦛꦶꦏ꧀ꦑꦶꦥꦤ꧀ꦠꦺꦴ ꦄꦴꦲ ‘‘ꦈꦥꦱꦩ꧀ꦥꦢꦏꦩ꧀ꦩꦮꦱꦺꦤꦴ’’ꦠꦶ. ꦱꦲꦱ꧀ꦱꦏ꧀ꦑꦠ꧀ꦠꦸꦩ꧀ꦥꦷꦠꦶ ꦥꦶꦱꦢ꧀ꦢꦺꦴ ꦒꦫꦲꦠ꧀ꦡꦺꦴ. ꦌꦏꦮꦴꦫꦴꦢꦶꦏꦺ ꦥꦤ ꦏꦴ ꦤꦴꦩ ꦏꦡꦴꦠꦶ ꦢꦱ꧀ꦱꦺꦠꦶ. ꦱꦴꦠꦶꦱꦴꦫꦴꦠꦶ ꦱꦢꦺꦴꦱꦴ. ꦠꦡꦴꦠꦶ ꦪꦡꦴ ꦄꦴꦕꦫꦶꦪꦸꦥꦗ꧀ꦙꦴꦪꦴ ꦱꦴꦠꦶꦱꦴꦫꦴ, ꦠꦡꦴ. ꦱꦺꦱꦺꦴ ꦏꦴꦫꦏꦱꦔ꧀ꦓꦺꦴ ꦱꦴꦠꦶꦱꦴꦫꦺꦴꦠꦶ ꦱꦩ꧀ꦧꦤ꧀ꦣꦺꦴ. ‘‘ꦲꦠ꧀ꦡꦕ꧀ꦖꦶꦤ꧀ꦤꦴꦢꦪꦺꦴ ꦥꦤ ꦢ꧀ꦮꦠ꧀ꦠꦶꦁꦱ ꦱꦸꦎꦱꦴꦫꦶꦠꦴ’’ꦠꦶ ꦮꦸꦠ꧀ꦠꦠ꧀ꦠꦴ ꦄꦤ꧀ꦣꦩꦹꦒꦧꦣꦶꦫꦴꦤꦁ ꦄꦥꦧ꧀ꦧꦗꦶꦠꦴꦤꦩ꧀ꦥꦶ ꦈꦥꦱꦩ꧀ꦥꦢꦴ ꦫꦸꦲꦠꦷꦠꦶ ꦢꦛ꧀ꦜꦧ꧀ꦧꦁ. ꦠꦺꦠꦶ ꦲꦠ꧀ꦡꦕ꧀ꦖꦶꦤ꧀ꦤꦴꦢꦪꦺꦴ ꦢ꧀ꦮꦠ꧀ꦠꦶꦁꦱ.

꧓꧙꧗. ꦄꦨꦹꦠꦮꦠ꧀ꦡꦸꦮꦱꦺꦤꦴꦠꦶ ꦄꦱꦕ꧀ꦕꦮꦠ꧀ꦡꦸꦮꦱꦺꦤ, ꦄꦱꦁꦮꦶꦗ꧀ꦗꦩꦴꦤꦮꦠ꧀ꦡꦸꦮꦱꦺꦤ ꦮꦴ. ꦠꦠ꧀ꦡꦴꦠꦶ ‘‘ꦆꦣ ꦥꦤ ꦨꦶꦏ꧀ꦑꦮꦺ’’ꦠꦶꦄꦴꦢꦶꦥꦴꦜꦺ. ꦥꦛꦶꦤꦶꦱ꧀ꦱꦗ꧀ꦗꦶꦠꦴꦠꦶ ꦌꦠ꧀ꦡ ꦠꦥꦕ꧀ꦕꦪꦱ꧀ꦱ ꦏꦩ꧀ꦩꦠ꧀ꦡꦺ ꦥꦮꦠ꧀ꦠꦨꦴꦮꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦥꦛꦶꦤꦶꦱ꧀ꦱꦗ꧀ꦗꦶꦠꦧ꧀ꦧꦴ’’ꦠꦶ.

꧒꧔꧑. ꦈꦥꦴꦭꦶꦥꦸꦕ꧀ꦖꦴꦏꦡꦴ

꧔꧐꧐. ꦠꦠ꧀ꦡꦴꦠꦶ ꦈꦥꦴꦭꦶꦥꦚ꧀ꦲꦺꦱꦸ. ꦠꦱ꧀ꦱꦥꦴꦥꦶꦪꦱꦶꦏꦴꦢꦷꦲꦶ ꦱꦢ꧀ꦣꦶꦁ ꦌꦏꦴ ꦥꦸꦕ꧀ꦖꦴ ꦏꦠꦴꦠꦶ ꦪꦺꦴꦗꦤꦴ. ꦨꦶꦏ꧀ꦑꦹꦤꦩ꧀ꦥꦶ ꦮꦴꦫꦺꦠꦶ ꦱꦩ꧀ꦧꦤ꧀ꦣꦺꦴ. ꦥꦶꦱꦢ꧀ꦢꦺꦤ ‘‘ꦤ ꦏꦺꦮꦭꦁ ꦈꦥꦴꦭꦶꦥꦚ꧀ꦲꦺꦱꦸꦪꦺꦮ ꦪꦺꦴꦗꦺꦠꦧ꧀ꦧꦴꦤꦶ, ꦄꦡ ꦑꦺꦴ ꦨꦶꦏ꧀ꦑꦹꦤꦁ ꦮꦴꦫꦺꦥꦷ’’ꦠꦶ ꦢꦱ꧀ꦱꦺꦠꦶ.

꧒꧔꧒. ꦠꦗ꧀ꦗꦤꦷꦪꦏꦩ꧀ꦩꦏꦡꦴ

꧔꧐꧗. ‘‘ꦆꦣ ꦥꦤ ꦨꦶꦏ꧀ꦑꦮꦺ ꦨꦶꦏ꧀ꦑꦸ ꦨꦟ꧀ꦝꦤꦏꦴꦫꦏꦺꦴ’’ꦠꦶꦄꦴꦢꦶ ꦮꦸꦠ꧀ꦠꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦠꦠ꧀ꦡꦴꦠꦶ ‘‘ꦆꦣ ꦥꦤ ꦨꦶꦏ꧀ꦑꦮꦺ’’ꦠꦶꦄꦴꦢꦶꦥꦴꦜꦺ. ꦄꦤꦥꦢꦴꦤꦺꦴꦠꦶ ꦌꦠ꧀ꦡ ꦄꦥꦥꦸꦧ꧀ꦧꦺꦴ ꦢꦴꦱꦢ꧀ꦢꦺꦴ ꦄꦮꦑꦟ꧀ꦝꦤꦠ꧀ꦡꦺꦴꦠꦶ ꦄꦴꦲ ‘‘ꦄꦥꦢꦴꦤꦁ ꦮꦸꦕ꧀ꦕꦠꦶ ꦥꦫꦶꦕ꧀ꦖꦺꦢꦺꦴ’’ꦠꦶ. ꦤꦠ꧀ꦡꦶ ꦄꦥꦢꦴꦤꦁ ꦄꦮꦑꦟ꧀ꦝꦤꦁ ꦄꦴꦥꦠ꧀ꦠꦶꦥꦫꦶꦪꦤ꧀ꦠꦺꦴ ꦌꦠꦱ꧀ꦱꦴꦠꦶ ꦄꦤꦥꦢꦴꦤꦺꦴꦠꦶ ꦮꦕꦤꦠ꧀ꦡꦺꦴ ꦏꦴꦠꦧ꧀ꦧꦺꦴ. ꦱꦴꦪꦺꦮ ꦥꦴꦭ꦳ꦶ ꦮꦸꦠ꧀ꦠꦴꦠꦶ ꦱꦩ꧀ꦧꦤ꧀ꦣꦺꦴ. ꦠꦠ꧀ꦡꦴꦠꦶ ꦠꦱ꧀ꦱꦁ ꦥꦴꦭ꦳ꦶꦪꦁ. ꦏꦶꦚ꧀ꦕꦶ ꦄꦠ꧀ꦡꦮꦶꦤꦶꦕ꧀ꦖꦪꦁ ꦥꦴꦭ꦳ꦶꦄꦤꦸꦱꦴꦫꦺꦤ ꦮꦶꦢꦶꦠꦸꦁ ꦤ ꦱꦏ꧀ꦏꦴ ꦤ ꦲꦺꦴꦠꦷꦠꦶ ꦪꦺꦴꦗꦤꦴ.

ꦆꦠꦶ ꦕꦩ꧀ꦥꦺꦪ꧀ꦪꦏ꧀ꦑꦤ꧀ꦣꦏꦮꦟ꧀ꦟꦤꦴꦪ ꦪꦺꦴꦗꦤꦴ ꦱꦩꦠ꧀ꦠꦴ.